ଗୋଵିନ୍ଦାଷ୍ଟକଂ ସ୍ଵାମିବ୍ରହ୍ମାନନ୍ଦକୃତମ୍ Lyrics in Oriya:
ଶ୍ରୀ ଗଣେଶାୟ ନମଃ ॥
ଚିଦାନନ୍ଦାକାରଂ ଶ୍ରୁତିସରସସାରଂ ସମରସଂ
ନିରାଧାରାଧାରଂ ଭଵଜଲଧିପାରଂ ପରଗୁଣମ୍ ।
ରମାଗ୍ରୀଵାହାରଂ ଵ୍ରଜଵନଵିହାରଂ ହରନୁତଂ
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୧॥
ମହାମ୍ଭୋଦିସ୍ଥାନଂ ସ୍ଥିରଚରନିଦାନଂ ଦିଵିଜପଂ
ସୁଧାଧାରାପାନଂ ଵିହଗପତିୟାନଂ ୟମରତମ୍ ।
ମନୋଜ୍ଞଂ ସୁଜ୍ଞାନଂ ମୁନିଜନନିଧାନଂ ଧ୍ରୁଵପଦମ୍
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୨॥
ଧିୟା ଧୀରୈର୍ଧ୍ୟେୟଂ ଶ୍ରଵଣପୁଟପେୟଂ ୟତିଵରୈଃ
ମହାଵାକ୍ୟୈଜ୍ଞେୟଂ ତ୍ରିଭୁଵନଵିଧେୟଂ ଵିଧିପରମ୍ ।
ମନୋମାନାମେୟଂ ସପଦି ହୃଦି ନେୟଂ ନଵତନୁଂ
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୩॥
ମହାମାୟାଜାଲଂ ଵିମଲଵନମାଲଂ ମଲହରଂ
ସୁବାଲଂ ଗୋପାଲଂ ନିହତଶିଶୁପାଲଂ ଶଶିମୁଖମ୍ ।
କଲାତୀତଂ କାଲଂ ଗତିହତମରାଲଂ ମୁରରିପୁଂ
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୪॥
ନଭୋବିମ୍ବସ୍ଫୀତଂ ନିଗମଗଣଗୀତଂ ସମଗତିଂ
ସୁରୌଘେ ସମ୍ପ୍ରୀତଂ ଦିତିଜଵିପରୀତଂ ପୁରିଶୟମ୍ ।
ଗିରାଂ ପନ୍ଥାତୀତଂ ସ୍ଵଦିତନଵନୀତଂ ନୟକରଂ
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୫॥
ପରେଶଂ ପଦ୍ମେଶଂ ଶିଵକମଲଜେଶମ୍ ଶିଵକରଂ
ଦ୍ଵିଜେଶଂ ଦେଵେଶଂ ତନୁକୁଟିଲକେଶଂ କଲିହରମ୍ ।
ଖଗେଶଂ ନାଗେଶଂ ନିଖିଲଭୁଵନେଶଂ ନଗଧରଂ
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୬॥
ରମାକାନ୍ତଂ କାନ୍ତଂ ଭଵଭୟଲୟାନ୍ତଂ ଭଵସୁଖଂ
ଦୁରାଶାନ୍ତଂ ଶାନ୍ତଂ ନିଖିଲହୃଦି ଭାନ୍ତଂ ଭୁଵନପମ୍ ।
ଵିଵାଦାନ୍ତଂ ଦାନ୍ତଂ ଦନୁଜନିଚୟାନ୍ତଂ ସୁଚରିତଂ
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୭॥
ଜଗଜ୍ଜ୍ୟେଷ୍ଠଂ ଶ୍ରେଷ୍ଠଂ ସୁରପତିକନିଷ୍ଠଂ କ୍ରତୁପତିଂ
ବଲିଷ୍ଠଂ ଭୂୟିଷ୍ଠଂ ତ୍ରିଭୁଵନଵରିଷ୍ଠଂ ଵରଵହମ୍ ।
ସ୍ଵନିଷ୍ଠଂ ଧାର୍ମିଷ୍ଠଂ ଗୁରୁଗୁଣଗରିଷ୍ଠଂ ଗୁରୁଵରଂ
ସଦା ତଂ ଗୋଵିନ୍ଦଂ ପରମସୁଖକନ୍ଦଂ ଭଜତ ରେ ॥ ୮॥
ଗଦାପାଣେରେତଦ୍ଦୁରିତଦଲନଂ ଦୁଃଖଶମନଂ
ଵିଶୁଦ୍ଧାତ୍ମା ସ୍ତୋତ୍ରଂ ପଠତି ମନୁଜୋ ୟସ୍ତୁ ସତତମ୍ ।
ସ ଭୁକ୍ତ୍ଵା ଭୋଗୌଘଂ ଚିରମିହ ତତୋଽପାସ୍ତଵୃଜିନୋ
ଵରଂ ଵିଷ୍ଣୋଃ ସ୍ଥାନଂ ଵ୍ରଜତି ଖଲୁ ଵୈକୁଣ୍ଠଭୁଵନମ୍ ॥
॥ ଇତି ଶ୍ରୀ ପରମହଂସ ସ୍ଵାମି ବ୍ରହ୍ମାନନ୍ଦ ଵିରଚିତଂ
ଶ୍ରୀ ଗୋଵିନ୍ଦାଷ୍ଟକଂ ସମ୍ପୂର୍ଣମ୍ ॥
