Sri Vallabhabhava Ashtakam Lyrics in Oriya:
ଵଲ୍ଲଭଭାଵାଷ୍ଟକମ୍
ପତିଃ ଶ୍ରୀଵଲ୍ଲଭୋଽସ୍ମାକଂ ଗତିଃ ଶ୍ରୀଵଲ୍ଲଭଃ ସଦା ।
ମତିଃ ଶ୍ରୀଵଲ୍ଲଭେ ହ୍ୟସ୍ତାଂ ରତିଃ ଶ୍ରୀଵଲ୍ଲଭେଽସ୍ତୁ ମେ ॥ ୧॥
ଵୃତ୍ତିଃ ଶ୍ରୀଵସ୍ତ୍ଵଭୀୟୈଵ କୃତିଃ ଶ୍ରୀଵଲ୍ଲଭାର୍ଥିନୀ ।
ଦର୍ଶନଂ ଶ୍ରୀଵଲ୍ଲଭସ୍ୟ ସ୍ମରଣଂ ଵଲ୍ଲଭପ୍ରଭୋଃ ॥ ୨॥
ତ୍ଵତ୍ପ୍ରସାଦସୁଧାଘ୍ରାଣଂ ତ୍ଵଦୁଚ୍ଛିଷ୍ଟରସାଗ୍ରହଃ ।
ଶ୍ରଵଣଂ ତ୍ଵଦ୍ଗୁଣାନାଂ ହି ସ୍ମରଣଂ ତ୍ଵତ୍ପଦାବ୍ଜୟୋଃ ॥ ୩॥
ଗୃଣନଂ ତନ୍ମହିତ୍ଵସ୍ୟ ସେଵନଂ କରୟୋର୍ଭଵେତ୍ ।
ତ୍ଵତ୍ସ୍ଵରୂପାନ୍ତରୋ ଭୋଗୋ ଗମନଂ ତଵ ସନ୍ନିଧୌ ॥ ୪॥
ତ୍ଵଦଗ୍ରେ ସର୍ଵଦା ସ୍ଥାନଂ ସଙ୍ଗସ୍ତ୍ଵତ୍ସେଵକୈଃ ସଦା ।
ତ୍ଵଦ୍ଵାର୍ତାଽତିରୁଚିର୍ନିଷ୍ଠା ଭୂୟାତ୍ତ୍ଵଦ୍ଵାକ୍ୟମାତ୍ରଗା ॥ ୫॥
ଶ୍ରଦ୍ଧା ତ୍ଵଦେକସମ୍ବଧେ ଵିଶ୍ଵାସସ୍ତ୍ଵତ୍ପଦାବ୍ଜୟୋଃ ।
ଦାସ୍ୟଂ ତ୍ଵଦୀୟମେଵାସ୍ତୁ ଭୂୟାତ୍ତ୍ଵଚ୍ଚରଣାଶ୍ରୟଃ ॥ ୬॥
ମସ୍ତକେ ଶ୍ରୀଵଲ୍ଲଭୋସ୍ତୁ ହୃଦି ତିଷ୍ଠତୁ ଵଲ୍ଲଭଃ ।
ଅଭିତଃ ଶ୍ରୀଵଲ୍ଲଭୋଽସ୍ତୁ ସର୍ଵଂ ଶ୍ରୀଵଲ୍ଲଭୋ ମମ ॥ ୭॥
ନମଃ ଶ୍ରୀଵଲ୍ଲଭାୟୈଵ ଦୈନ୍ୟଂ ଶ୍ରୀଵଲ୍ଲଭେ ସଦା ।
ପ୍ରାର୍ଥନା ଶ୍ରୀଵଲ୍ଲଭେଽସ୍ତୁ ତତ୍ପଦାଧୀନତା ମମ ॥ ୮॥
ଏତଦଷ୍ଟକପାଠେନ ଶ୍ରୀଵଲ୍ଲଭପଦାମ୍ବୁଜେ ।
ଭଵେଦ୍ଭାଵୋ ଵିନାଽଽୟାସଂ ଭକ୍ତିମାର୍ଗଵତାତ୍ମନାମ୍ ॥ ୯॥
ଇତି ଶ୍ରୀହରିଦାସୋକ୍ତଂ ଶ୍ରୀଵଲ୍ଲଭଭାଵାଷ୍ଟକମ୍ ସମ୍ପୂର୍ଣମ୍ ।
