కిరాతాష్టకం Lyrics in Telugu:
శ్రీః ॥
శ్రీగణేశాయ నమః । కిరాతశాస్త్రే నమః ॥
అథ కిరాతాష్టకమ్ ॥
ప్రత్యర్థి-వ్రాత-వక్షఃస్థల-రుధిరసురాపానమత్తా పృషత్కం
చాపే సన్ధాయ తిష్ఠన్ హృదయసరసిజే మామకే తాపహం తమ్ ।
పిమ్భోత్తంసః శరణ్యః పశుపతితనయో నీరదాభః ప్రసన్నో
దేవః పాయాదపాయాత్ శబరవపురసౌ సావధానః సదా నః ॥ ౧॥
ఆఖేటాయ వనేచరస్య గిరిజాసక్తస్య శమ్భోః సుతః
త్రాతుం యో భువనం పురా సమజని ఖ్యాతః కిరాతాకృతిః ।
కోదణ్డక్షురికాధరో ఘనరవః పిఞ్ఛావతంసోజ్జ్వలః
స త్వం మామవ సర్వదా రిపుగణత్రస్తం దయావారిధే ॥ ౨॥
యో మాం పీడయతి ప్రసహ్య సతతం దేహీత్యనన్యాశ్రయం
భిత్వా తస్య రిపోరురః క్షురికయా శాతాగ్రయా దుర్మతేః ।
దేవ త్వత్కరపఙ్కజోల్లసితయా శ్రీమత్కిరాతాకృతేః
తత్ప్రాణాన్ వితరాన్తకాయ భగవన్ కాలారిపుత్రాఞ్జసా ॥ ౩॥
విద్ధో మర్మసు దుర్వచోభిరసతాం సన్తప్తశల్యోపమైః
దృప్తానాం ద్విషతామశాన్తమనసాం ఖిన్నోఽస్మి యావద్భృశమ్ ।
తావత్త్వం క్షురికాశరాసనధరశ్చిత్తే మమావిర్భవన్
స్వామిన్ దేవ కిరాతరూప శమయ ప్రత్యర్థిగర్వం క్షణాత్ ॥ ౪॥
హర్తుం విత్తమధర్మతో మమ రతాశ్చోరాశ్చ యే దుర్జనాః
తేషాం మర్మసు తాడయాశు విశిఖైస్త్వత్కార్ముకాన్నిఃసృతైః ॥
శాస్తారం ద్విషతాం కిరాతవపుషం సర్వార్థదం త్వామృతే
పశ్యామ్యత్ర పురారిపుత్ర శరణం నాన్యం ప్రపన్నోఽమ్యహమ్ ॥ ౫॥
యక్షప్రేతపిశాచభూతనివహా దుఃఖప్రదా భీషణాః
బాధన్తే నరశోణితోత్సుకధియో యే మాం రిపుప్రేరితాః ।
చాప-జ్యా-నినదైస్త్వమీశ సకలాన్ సంహృత్య దుష్టగ్రహాన్
గౌరీశాత్మజ దైవతేశ్వర కిరాతాకార సంరక్ష మామ్ ॥ ౬॥
ద్రోగ్ధుం యే నిరతాః త్వమద్య పదపద్మైకాన్తభక్తాయ మే
మాయాఛన్నకళేబరాశ్రువిషదానాద్యైః సదా కర్మభిః ।
వశ్యస్తమ్భనమారణాదికుశలప్రారమ్భదక్షానరీన్
దుష్టాన్ సంహర దేవదేవ శబరాకార త్రిలోకేశ్వర ॥ ౭॥
తన్వా వా మనసా గిరాపి సతతం దోషం చికీర్షత్యలం
త్వత్పాదప్రణతస్య నిరపరాధస్యాపి యే మానవాః ।
సర్వాన్ సంహర తాన్ గిరీశసుత మే తాపత్రయౌఘానపి
త్వామేకం శబరాకృతే భయహరం నాథం ప్రపన్నోఽస్మ్యహమ్ ॥ ౮॥
క్లిష్టో రాజభటైస్తదాపి పరిభూతోఽహం ఖలైర్వ్యరిభిః
చాన్యైర్ఘోరతరైర్విపజ్జలనిధౌ మగ్నోఽస్మి దుఃఖాతురమ్ ।
హా హా కిఙ్కరవై విభో శబరవేషం త్వామభీష్టార్థదం
వన్దేఽహం పరదైవతం కురు కృపానాథార్తబన్ధో మయి ॥ ౯॥
స్తోత్రం యః ప్రజపేత్ ప్రశాన్తకరణైర్నిత్యం కిరాతాష్టకం
స క్షిప్రం వశగాన్ కరోతి నృపతీనాబద్ధవైరానపి ।
సంహృత్యాత్మవిరోధినః ఖలజనాన్ దుష్టగ్రహానప్యసౌ
యాత్యన్తే యమదూతభీతిరహితో దివ్యాం గతిం శాశ్వతీమ్ ॥ ౧౦।
ఇతి కిరాతాష్టకం సమ్పూర్ణమ్ ॥
