కుఞ్జవిహార్యష్టకమ్ ౨ Lyrics in Telugu:
ద్వితీయం శ్రీకుఞ్జవిహార్యష్టకం
నమః కుఞ్జవిహారిణే ।
అవిరతరతిబన్ధుస్మేరతాబన్ధురశ్రీః
కబలిత ఇవ రాధాపాఙ్గభఙ్గీతరఙ్గైః ।
ముదితవదనచన్ద్రశ్చన్ద్రికాపీతధారీ
ముదిరమధురకాన్తిర్భాతి కుఞ్జే విహారీ ॥ ౧॥
తతసుషిరఘనానాం నాదమానద్ధభాజాం
జనయతి తరుణీనాం మణ్డలే మణ్డితానామ్ ।
తటభువి నటరాజక్రీడయా భానుపుత్ర్యాః
విదధదతులచారిర్భాతి కుఞ్జే విహారీ ॥ ౨॥
శిఖినిగలితషడ్జేకోకిలే పఞ్చమాఢ్యే
స్వయమపి నవవంశ్యోద్దామయన్ గ్రామముఖ్యమ్ ।
ధృతమృగమదగన్ధః సుష్ఠుగాన్ధారసంజ్ఞం
త్రిభువనధృతిహారిర్భాతి కుఞ్జే విహారీ ॥ ౩॥
అనుపమకరశాఖోపాత్తరాధాఙ్గులీకో
లఘు లఘు కుసుమానాం పర్యటన్ వాటికాయామ్ ।
సరభసమనుగీతశ్చిత్రకణ్ఠీభిరుచ్చైః
వ్రజనవయువతీభిర్భాతి కుఞ్జే విహారీ ॥ ౪॥
అహిరిపుకృతలాస్యే కీచకారబ్ధవాద్యే
వ్రజగిరితటరఙ్గే భృఙ్గసఙ్గీతభాజి ।
విరచితపరిచర్యశ్చిత్రతౌర్యత్రికోణ-
స్తిమితకరణవృత్తిర్భాతి కుఞ్జే విహారీ ॥ ౫॥
దిశి దిశి శుకశారీమణ్డలైర్గూఢలీలాః
ప్రకటమనుపఠద్భిర్నిర్మితాశ్చర్యపూరః ।
తదతిరహసి వృత్తం ప్రేయసీకర్ణమూలే
స్మితముఖమభిజల్పన్ భాతి కుఞ్జే విహారీ ॥ ౬॥
తవ చికురకదమ్బం స్తమ్భతే ప్రేక్ష్య కేకీ
నయనకమలలక్ష్మీర్వన్దతే కృష్ణసారః ।
అలిరలమలకాన్తం నౌతి పశ్యేతి రాధాం
సుమధురమభిశంసన్ భాతి కుఞ్జే విహారీ ॥ ౭॥
మదనతరలబాలా చక్రవాలేన విష్వగ్-
వివిధవరకలానాం శిక్షయా సేవ్యమానః ।
స్ఖలితచికురవేశే స్కన్ధదేశే ప్రియాయాః
ప్రథితపృథులబాహుర్భాతి కుఞ్జే విహారీ ॥ ౮॥
ఇదమనుపమలీలాహారి కుఞ్జవిహారీ
స్మరణపదమధీతే తుష్టధీరష్టకం యః ।
నిజగుణవృతయా శ్రీరాధయారాధిఽఽరాధితస్తం
నయతి నిజపదాబ్జం కుఞ్జసద్మాధిరాజః ॥ ౯॥
ఇతి శ్రీరూపగోస్వామివిరచితస్తవమాలాయాం శ్రీకుఞ్జవిహార్యష్టకం
ద్వితీయం సమ్పూర్ణమ్ ॥
