ଶ୍ରୀଗଣେଶାୟ ନମଃ ।
ଵିନୋଦମୋଦମୋଦିତା ଦୟୋଦୟୋଜ୍ଜ୍ଵଲାନ୍ତରା
ନିଶୁମ୍ଭଶୁମ୍ଭଦମ୍ଭଦାରଣେ ସୁଦାରୁଣାଽରୁଣା ।
ଅଖଣ୍ଡଗଣ୍ଡଦଣ୍ଡମୁଣ୍ଡମଣ୍ଡଲୀଵିମଣ୍ଡିତା
ପ୍ରଚଣ୍ଡଚଣ୍ଡରଶ୍ମିରଶ୍ମିରାଶିଶୋଭିତା ଶିଵା ॥ ୧॥
ଅମନ୍ଦନନ୍ଦିନନ୍ଦିନୀ ଧରାଧରେନ୍ଦ୍ରନନ୍ଦିନୀ
ପ୍ରତୀର୍ଣଶୀର୍ଣତାରିଣୀ ସଦାର୍ୟକାର୍ୟକାରିଣୀ ।
ତଦନ୍ଧକାନ୍ତକାନ୍ତକପ୍ରିୟେଶକାନ୍ତକାନ୍ତକା
ମୁରାରିକାମଚାରିକାମମାରିଧାରିଣୀ ଶିଵା ॥ ୨॥
ଅଶେଷଵେଷଶୂନ୍ୟଦେଶଭର୍ତୃକେଶଶୋଭିତା
ଗଣେଶଦେଵତେଶଶେଷନିର୍ନିମେଷଵୀକ୍ଷିତା ।
ଜିତସ୍ଵଶିଞ୍ଜିତାଽଲିକୁଞ୍ଜପୁଞ୍ଜମଞ୍ଜୁଗୁଞ୍ଜିତା
ସମସ୍ତମସ୍ତକସ୍ଥିତା ନିରସ୍ତକାମକସ୍ତଵା ॥ ୩॥
ସସମ୍ଭ୍ରମଂ ଭ୍ରମଂ ଭ୍ରମଂ ଭ୍ରମନ୍ତି ମୂଢମାନଵା
ମୁଧାଽବୁଧାଃ ସୁଧାଂ ଵିହାୟ ଧାଵମାନମାନସାଃ ।
ଅଧୀନଦୀନହୀନଵାରିହୀନମୀନଜୀଵନା
ଦଦାତୁ ଶଂପ୍ରଦାଽନିଶଂ ଵଶଂଵଦାର୍ଥମାଶିଷମ୍ ॥ ୪॥
ଵିଲୋଲଲୋଚନାଞ୍ଚିତୋଚିତୈଶ୍ଚିତା ସଦା ଗୁଣୈର୍-
ଅପାସ୍ୟଦାସ୍ୟମେଵମାସ୍ୟହାସ୍ୟଲାସ୍ୟକାରିଣୀ ॥
ନିରାଶ୍ରୟାଽଽଶ୍ରୟାଶ୍ରୟେଶ୍ଵରୀ ସଦା ଵରୀୟସୀ
କରୋତୁ ଶଂ ଶିଵାଽନିଶଂ ହି ଶଂକରାଂକଶୋଭିନୀ ॥ ୫॥
ଇତି ପାର୍ଵତୀପଞ୍ଚକଂ ସମାପ୍ତମ୍ ॥
