শ্রীরামপ্রাতঃস্মরণম্ শ্রীরামপঞ্চকম্ Lyrics in Bengali:
প্রাতঃ স্মরামি রঘুনাথমুখারবিন্দং
মন্দস্মিতং মধুরভাষি বিশালভালম্ ।
কর্ণাবলম্বিচলকুণ্ডলশোভিগণ্ডং
কর্ণান্তদীর্ঘনয়নং নয়নাভিরামম্ ॥ ১॥
প্রাতর্ভজামি রঘুনাথকরারবিন্দং
রক্ষোগণায় ভয়দং বরদং নিজেভ্যঃ ।
য়দ্রাজসংসদি বিভজ্য মহেশচাপং
সীতাকরগ্রহণমঙ্গলমাপ সদ্যঃ ॥ ২॥
প্রাতর্নমামি রঘুনাথপদারবিন্দং
বজ্রাঙ্কুশাদিশুভরেখি সুখাবহং মে ।
য়োগীন্দ্রমানসমধুব্রতসেব্যমানং
শাপাপহং সপদি গৌতমধর্মপত্ন্যাঃ ॥ ৩॥
প্রাতর্বদামি বচসা রঘুনাথ নাম
বাগ্দোষহারি সকলং শমলং নিহন্তি ।
য়ত্পার্বতী স্বপতিনা সহ ভোক্তুকামা
প্রীত্যা সহস্রহরিনামসমং জজাপ ॥ ৪॥
প্রাতঃ শ্রয়ে শ্রুতিনুতাং রঘুনাথমূর্তিং
নীলাম্বুজোত্পলসিতেতররত্ননীলাম্ ।
আমুক্তমৌক্তিকবিশেষবিভূষণাঢ্যাং
ধ্যেয়াং সমস্তমুনিভির্জনমুক্তিহেতুম্ ॥ ৫॥
য়ঃ শ্লোকপঞ্চকমিদং প্রয়তঃ পঠেদ্ধি
নিত্যং প্রভাতসময়ে পুরুষঃ প্রবুদ্ধঃ ।
শ্রীরামকিঙ্করজনেষু স এব মুখ্যো
ভূত্বা প্রয়াতি হরিলোকমনন্যলভ্যম্ ॥
॥ ইতি শ্রীরামকর্ণামৃতান্তর্গতম্ শ্রীরামপ্রাতঃস্মরণম্ ॥
