Templesinindiainfo

Best Spiritual Website

Shiva Upanishad Lyrics in Bengali

Shiva Upanishads in Bengali:

॥ শ্রীশিবোপনিষৎ ॥

কৈলাসশিখরাসীনমশেষামরপূজিতম্ ।
কালঘ্নং শ্রীমহাকালমীশ্বরং জ্ঞানপারগম্ ॥ ১-১ ॥

সম্পূজ্য বিধিবদ্ভক্ত্যা ঋষ্যাত্রেয়ঃ সুসংয়তঃ ।
সর্বভূতহিতার্থায় পপ্রচ্ছেদং মহামুনিঃ ॥ ১-২ ॥

জ্ঞানয়োগং ন বিন্দন্তি যে নরা মন্দবুদ্ধয়ঃ ।
তে মুচ্যন্তে কথং ঘোরাদ্ভগবন্ভবসাগরাৎ ॥ ১-৩ ॥

এবং পৃষ্টঃ প্রসন্নাত্মা ঋষ্যাত্রেয়েণ ধীমতা ।
মন্দবুদ্ধিবিমুক্ত্যর্থং মহাকালঃ প্রভাষতে ॥ ১-৪ ॥

মহাদেব উবাচ
পুরা রুদ্রেণ গদিতাঃ শিবধর্মাঃ সনাতনাঃ ।
দেব্যাঃ সর্বগণানাং চ সংক্ষেপাদ্গ্রন্থকোটিভিঃ ॥ ১-৫ ॥

আয়ুঃ প্রজ্ঞাং তথা শক্তিং প্রসমীক্ষ্য নৄণামিহ ।
তাপত্রয়প্রপীডাং চ ভোগতৃষ্ণাবিমোহিনীম্ ॥ ১-৬ ॥

তে ধর্মাঃ স্কন্দনন্দিভ্যামন্যৈশ্চ মুনিসত্তমৈঃ ।
সারমাদায় নির্দিষ্টাঃ সম্যক্প্রকরণান্তরৈঃ ॥ ১-৭ ॥

সারাদপি মহাসারং শিবোপনিষদং পরম্ ।
অল্পগ্রন্থং মহার্থং চ প্রবক্ষ্যামি জগদ্ধিতম্ ॥ ১-৮ ॥

শিবঃ শিব ইমে শান্ত- নাম চাদ্যং মুহুর্মুহুঃ ।
উচ্চারয়ন্তি তদ্ভক্ত্যা তে শিবা নাত্র সংশয়ঃ ॥ ১-৯ ॥

অশিবাঃ পাশসংয়ুক্তাঃ পশবঃ সর্বচেতনাঃ ।
যস্মাদ্বিলক্ষণাস্তেভ্যস্তস্মাদীশঃ শিবঃ স্মৃতঃ ॥ ১-১০ ॥

গুণো বুদ্ধিরহংকারস্তন্মাত্রাণীন্দ্রিয়ানি চ ।
ভূতানি চ চতুর্বিংশদিতি পাশাঃ প্রকীর্তিতাঃ ॥ ১-১১ ॥

পঞ্চবিংশকমজ্ঞানং সহজং সর্বদেহিনাম্ ।
পাশাজালস্য তন্মূলং প্রকৃতিঃ কারণায় নঃ ॥ ১-১২ ॥

সত্যজ্ঞানে নিবধ্যন্তে পুরুষাঃ পাশবন্ধনৈঃ ।
মদ্ভাবাচ্চ বিমুচ্যন্তে জ্ঞানিনঃ পাশপঞ্জরাৎ ॥ ১-১৩ ॥

ষড্বিংশকশ্চ পুরুষঃ পশুরজ্ঞঃ শিবাগমে ।
সপ্তবিংশ ইতি প্রোক্তঃ শিবঃ সর্বজগৎপতিঃ ॥ ১-১৪ ॥

যস্মাচ্ছিবঃ সুসম্পূর্ণঃ সর্বজ্ঞঃ সর্বগঃ প্রভুঃ ।
তস্মাৎস পাশহরিতঃ স বিশুদ্ধঃ স্বভাবতঃ ॥ ১-১৫ ॥

পশুপাশপরঃ শান্তঃ পরমজ্ঞানদেশিকঃ ।
শিবঃ শিবায় ভূতানাং তং বিজ্ঞায় বিমুচ্যতে ॥ ১-১৬ ॥

এতদেব পরং জ্ঞানং শিব ইত্যক্ষরদ্বয়ম্ ।
বিচারাদ্যাতি বিস্তারং তৈলবিন্দুরিবাম্ভসি ॥ ১-১৭ ॥

সকৃদুচ্চারিতং যেন শিব ইত্যক্ষরদ্বয়ম্ ।
বদ্ধঃ পরিকরস্তেন মোক্ষোপগমনং প্রতি ॥ ১-১৮ ॥

দ্ব্যক্ষরঃ শিবমন্ত্রো ঽয়ং শিবোপনিষদি স্মৃতঃ ।
একাক্ষরঃ পুনশ্চায়মোমিত্যেবং ব্যবস্থিতঃ ॥ ১-১৯ ॥

নামসংকীর্তণাদেব শিবস্যাশেষপাতকৈঃ ।
যতঃ প্রমুচ্যতে ক্ষিপ্রং মন্ত্রো ঽয়ং দ্ব্যক্ষরঃ পরঃ ॥ ১-২০ ॥

যঃ শিবং শিবমিত্যেবং দ্ব্যক্ষরং মন্ত্রমভ্যসেৎ ।
একাক্ষরং বা সততং স যাতি পরমং পদম্ ॥ ১-২১ ॥

মিত্রস্বজনবন্ধূনাং কুর্যান্নাম শিবাত্মকম্ ।
অপি তৎকীর্তনাদ্যাতি পাপমুক্তঃ শিবং পুরম্ ॥ ১-২২ ॥

বিজ্ঞেয়ঃ স শিবঃ শান্তো নরস্তদ্ভাবভাবিতঃ ।
আস্তে সদা নিরুদ্বিগ্নঃ স দেহান্তে বিমুচ্যতে ॥ ১-২৩ ॥

হৃদ্যন্তঃকরণং জ্ঞেয়ং শিবস্য আয়তনং পরম্ ।
হৃৎপদ্মং বেদিকা তত্র লিঙ্গমোংকারমিষ্যতে ॥ ১-২৪ ॥

পুরুষঃ স্থাপকো জ্ঞেয়ঃ সত্যং সংমার্জনং স্মৃতম্ ।
অহিংসা গোময়ং প্রোক্তং শান্তিশ্চ সলিলং পরম্ ॥ ১-২৫ ॥

কুর্যাৎসংমার্জনং প্রাজ্ঞো বৈরাগ্যং চন্দনং স্মৃতম্ ।
পূজয়েদ্ধ্যানয়োগেন সংতোষৈঃ কুসুমৈঃ সিতৈঃ ॥ ১-২৬ ॥

ধূপশ্চ গুগ্গুলুর্দেয়ঃ প্রাণায়ামসমুদ্ভবঃ ।
প্রত্যাহারশ্চ নৈবেদ্যমস্তেয়ং চ প্রদক্ষিণম্ ॥ ১-২৭ ॥

ইতি দিব্যোপচারৈশ্চ সম্পূজ্য পরমং শিবম্ ।
জপেদ্ধ্যায়েচ্চ মুক্ত্যর্থং সর্বসঙ্গবিবর্জিতঃ ॥ ১-২৮ ॥

জ্ঞানয়োগবিনির্মুক্তঃ কর্ময়োগসমাবৃত্তঃ ।
মৃতঃ শিবপুরং গচ্ছেৎস তেন শিবকর্মণা ॥ ১-২৯ ॥

তত্র ভুক্ত্বা মহাভোগান্প্রলয়ে সর্বদেহিনাম্ ।
শিবধর্মাচ্ছিবজ্ঞানং প্রাপ্য মুক্তিমবাপ্নুয়াৎ ॥ ১-৩০ ॥

জ্ঞানয়োগেন মুচ্যন্তে দেহপাতাদনন্তরম্ ।
ভোগান্ভুক্ত্বা চ মুচ্যন্তে প্রলয়ে কর্ময়োগিনঃ ॥ ১-৩১ ॥

তস্মাজ্জ্ঞানবিদো যোগাত্তথাজ্ঞাঃ কর্ময়োগিনঃ ।
সর্ব এব বিমুচ্যন্তে যে নরাঃ শিবমাশ্রিতাঃ ॥ ১-৩২ ॥

স ভোগঃ শিববিদ্যার্থং যেষাং কর্মাস্তি নির্মলম্ ।
তে ভোগান্প্রাপ্য মুচ্যন্তে প্রলয়ে শিববিদ্যযা ॥ ১-৩৩ ॥

বিদ্যা সংকীর্তনীয়া হি যেষাং কর্ম ন বিদ্যতে ।
তে চাবর্ত্য বিমুচ্যন্তে যাবৎকর্ম ন তদ্ভবেৎ ॥ ১-৩৪ ॥

শিবজ্ঞানবিদং তস্মাৎপূজয়েদ্বিভবৈর্গুরুম্ ।
বিদ্যাদানং চ কুর্বীত ভোগমোক্ষজিগীষয়া ॥ ১-৩৫ ॥

শিবয়োগী শিবজ্ঞানী শিবজাপী তপোঽধিকঃ ।
ক্রমশঃ কর্ময়োগী চ পঞ্চৈতে মুক্তিভাজনাঃ ॥ ১-৩৬ ॥

কর্ময়োগস্য যন্মূলং তদ্বক্ষ্যামি সমাসতঃ ।
লিঙ্গমায়তনং চেতি তত্র কর্ম প্রবর্ততে ॥ ১-৩৭ ॥

॥ ইতি শিবোপনিষদি মুক্তিনির্দেশাধ্যায়ঃ প্রথমঃ ॥

অথ পূর্বস্থিতো লিঙ্গে গর্ভঃ স ত্রিগুণো ভবেৎ ।
গর্ভাদ্বাপি বিভাগেন স্থাপ্য লিঙ্গং শিবালয়ে ॥ ২-১ ॥

যাবল্লিঙ্গস্য দৈর্ঘ্যং স্যাত্তাবদ্বেদ্যাশ্চ বিস্তরঃ ।
লিঙ্গতৃতীয়ভাগেন ভবেদ্বেদ্যাঃ সমুচ্ছ্রয়ঃ ॥ ২-২ ॥

ভাগমেকং ন্যসেদ্ভূমৌ দ্বিতীয়ং বেদিমধ্যতঃ ।
তৃতীয়ভাগে পূজা স্বাদিতি লিঙ্গং ত্রিধা স্থিতম্ ॥ ২-৩ ॥

ভূমিস্থং চতুরশ্রং স্বাদষ্টাশ্রং বেদিমধ্যতঃ ।
পূজার্থং বর্তুলং কার্যং দৈর্ঘ্যাত্ত্রিগুণবিস্তরম্ ॥ ২-৪ ॥

অধোভাগে স্থিতঃ স্কন্দঃ স্থিতা দেবী চ মধ্যতঃ ।
ঊর্ধ্বং রুদ্রঃ ক্রমাদ্বাপি ব্রহ্মবিষ্ণুমহেশ্বরাঃ ॥ ২-৫ ॥

এত এব ত্রয়ো লোকা এত এব ত্রয়ো গুণাঃ ।
এত এব ত্রয়ো বেদা এতচ্চান্যৎস্থিতং ত্রিধা ॥ ২-৬ ॥

নবহস্তঃ স্মৃতো জ্যেষ্ঠঃ ষড্ঢস্তশ্চাপি মধ্যমঃ ।
বিদ্যাৎকনীয়স্ত্রৈহস্তং লিঙ্গমানমিদং স্মৃতম্ ॥ ২-৭ ॥

গর্ভস্যানতঃ প্রবিস্তারস্তদূনশ্চ ন শস্যতে ।
গর্ভস্যানতঃ প্রবিস্তারাদ্তদুপর্যপি সংস্থিতম্ ॥ ২-৮ ॥

প্রাসাদং কল্পয়েচ্ছ্রীমান্বিভজেত ত্রিধা পুনঃ ।
ভাগ একো ভবেজ্জঙ্ঘা দ্বৌ ভাগৌ মঞ্জরী স্মৃতা ॥ ২-৯ ॥

মঞ্জর্যা অর্ধভাগস্থং শুকনাসং প্রকল্পয়েৎ ।
গর্ভাদর্ধেন বিস্তারমায়ামং চ সুশোভনম্ ॥ ২-১০ ॥

গর্ভাদ্বাপি ত্রিভাগেন শুকনাসং প্রকল্পয়েৎ ।
গর্ভাদর্ধেন বিস্তীর্ণা গর্ভাচ্চ দ্বিগুণায়তা ॥ ২-১১ ॥

জঙ্ঘাভিশ্চ ভবেৎকার্যা মঞ্জর্যঙ্গুলরাশিনা ।
প্রাসাদার্ধেন বিজ্ঞেয়ো মণ্ডপস্তস্য বামতঃ ॥ ২-১২ ॥

মণ্ডপাৎপাদবিস্তীর্ণা জগতী তাবদুচ্ছ্রিতা ।
প্রাসাদস্য প্রমাণেন জগত্যা সার্ধমঙ্গণম্ ॥ ২-১৩ ॥

প্রাকারং তৎসমন্তাচ্চ গুপুরাদালভূষিতম্ ।
প্রাকারান্তঃ স্থিতং কার্যং বৃষস্থানং সমুচ্ছ্রিতম্ ॥ ২-১৪ ॥

নন্দীশ্বরমহাকালৌ দ্বারশাখাব্যবস্থিতৌ ।
প্রাকারাদ্দক্ষিণে কার্যং সর্বোপকরণান্বিতম্ ॥ ২-১৫ ॥

পঞ্চভৌমং ত্রিভৌমং বা যোগীন্দ্রাবসথং মহৎ ।
প্রাকারগুপ্তং তৎকার্যং মৈত্রস্থানসমন্বিতম্ ॥ ২-১৬ ॥

স্থানাদ্দশসমায়ুক্তং ভব্যবৃক্ষজলান্বিতম্ ।
তন্মহানসমাগ্নেয়্যাং পূর্বতঃ সত্ত্রমণ্ডপম্ ॥ ২-১৭ ॥

স্থানং চণ্ডেশমৈশান্যাং পুষ্পারামং তথোত্তরম্ ।
কোষ্ঠাগারং চ বায়ব্যাং বারুণ্যাং বরুণালয়ম্ ॥ ২-১৮ ॥

শমীন্ধনকুশস্থানমায়ুধানাং চ নৈরৃতম্ ।
সর্বলোকোপকারায় নগরস্থং প্রকল্পয়েৎ ॥ ২-১৯ ॥

শ্রীমদায়তনং শম্ভোর্যোগিনাং বিজনে বনে ।
শিবস্যায়তনে যাবৎসমেতাঃ পরমাণবঃ ॥ ২-২০ ॥

মন্বন্তরাণি তাবন্তি কর্তুর্ভোগাঃ শিবে পুরে ।
মহাপ্রতিমলিঙ্গানি মহান্ত্যায়তনানি চ ॥ ২-২১ ॥

কৃৎবাপ্নোতি মহাভোগানন্তে মুক্তিং চ শাশ্বতীম্ ।
লিঙ্গপ্রতিষ্ঠাং কুর্বীত যদা তল্লক্ষণং কৃতী ॥ ২-২২ ॥

পঞ্চগব্যেন সংশোধ্য পূজয়িৎবাধিবাসয়েৎ ।
পালাশোদুম্বরাশ্বত্থ- পৃষদাজ্যতিলৈর্যবৈঃ ॥ ২-২৩ ॥

অগ্নিকার্যং প্রকুর্বীত দদ্যাৎপূর্ণাহুতিত্রয়ম্ ।
শিবস্যাষ্টশতং হুৎবা লিঙ্গমূলং স্পৃশেদ্বুধঃ ॥ ২-২৪ ॥

এবং মধ্যে ঽবসানে তন্মূর্তিমন্ত্রৈশ্চ মূর্তিষু ।
অষ্টৌ মূর্তীশ্বরাঃ কার্যাঃ নবমঃ স্থাপকঃ স্মৃতঃ ॥ ২-২৫ ॥

প্রাতঃ সংস্থাপয়েল্লিঙ্গং মন্ত্রৈস্তু নবভিঃ ক্রমাৎ ।
মহাস্নাপনপূজাং চ স্থাপ্য লিঙ্গং প্রপূজয়েৎ ॥ ২-২৬ ॥

গুরোর্মূর্তিধরাণাং চ দদ্যাদুত্তমদক্ষিণাম্ ।
যতীনাং চ সমস্তানাং দদ্যান্মধ্যমদক্ষিণাম্ ॥ ২-২৭ ॥

দীনান্ধকৃপণেভ্যশ্চ সর্বাসামুপকল্পয়েৎ ।
সর্বভক্ষ্যান্নপানাদ্যৈরনিষিদ্ধং চ ভোজনম্ ॥ ২-২৮ ॥

কল্পয়েদাগতানাং চ ভূতেভ্যশ্চ বলিং হরেৎ ।
রাত্রৌ মাতৃগণানাং চ বলিং দদ্যাদ্বিশেষতঃ ॥ ২-২৯ ॥

এবং যঃ স্থাপয়েল্লিঙ্গং তস্য পুণ্যফলং শৃণু ।
কুলত্রিংশকমুদ্ধৃত্য ভৃত্যৈশ্চ পরিবারিতঃ ॥ ২-৩০ ॥

কলত্রপুত্রমিত্রাদ্যৈঃ সহিতঃ সর্ববান্ধবৈঃ ।
বিমুচ্য পাপকলিলং শিবলোকং ব্রজেন্নরঃ ।
তত্র ভুক্ত্বা মহাভোগান্প্রলয়ে মুক্তিমাপ্নুয়াৎ ॥ ২-৩১ ॥

॥ ইতি শিবোপনিষদি লিঙ্গায়তনাধ্যায়ো দ্বিতীয়ঃ ॥

অথান্যৈরল্পবিত্তৈশ্চ নৃপৈশ্চ শিবভাবিতৈঃ ।
শক্তিতঃ স্বাশ্রমে কার্যং শিবশান্তিগৃহদ্বয়ম্ ॥ ৩-১ ॥

গৃহস্যেশানদিগ্ভাগে কার্যমুত্তরতো ঽপি বা ।
খাৎবা ভূমিং সমুদ্ধৃত্য শল্যানাকোট্য যত্নতঃ ॥ ৩-২ ॥

শিবদেবগৃহং কার্যমষ্টহস্তপ্রমাণতঃ ।
দক্ষিণোত্তরদিগ্ভাগে কিংচিচ্দীর্ঘং প্রকল্পয়েৎ ॥ ৩-৩ ॥

হস্তমাত্রপ্রমাণং চ দৃঢপট্টচতুষ্টয়ম্ ।
চতুষ্কোণেষু সংয়োজ্যমর্ঘ্যপাত্রাদিসংশ্রয়ম্ ॥ ৩-৪ ॥

গর্ভমধ্যে প্রকুর্বীত শিববেদিং সুশোভনাম্ ।
উদগর্বাক্চ্ছ্রিতাং(?) কিংচিচ্চতুঃশীর্ষকসংয়ুতাম্ ॥ ৩-৫ ॥

ত্রিহস্তায়ামবিস্তারাম্ষোডশাঙ্গুলমুচ্ছ্রিতাম্ ।
তচ্ছীর্ষাণীব হস্তার্ধমায়ামাদ্বিস্তরেণ চ ॥ ৩-৬ ॥

শিবস্থণ্ডিলমিত্যেতচ্চতুর্হস্তং সমং শিরঃ ।
মূর্তিনৈবেদ্যদীপানাং বিন্যাসার্থং প্রকল্পয়েৎ ॥ ৩-৭ ॥

শৈবলিঙ্গেন কার্যং স্যাৎকার্যং মণিজপার্থিবৈঃ ।
স্থণ্ডিলার্ধে চ কুর্বন্তি বেদিমন্যাং সবর্তুলাম্ ॥ ৩-৮ ॥

ষোডশাঙ্গুলমুৎসেধাং বিস্তীর্ণাং দ্বিগুণেন চ ।
গৃহে ন স্থাপয়েচ্ছৈলং লিঙ্গং মণিজমর্চয়েৎ ॥ ৩-৯ ॥

ত্রিসংধ্যং পার্থিবং বাপি কুর্যাদন্যদ্দিনেদিনে ।
সর্বেষামেব বর্ণানাং স্ফাটিকং সর্বকামদম্ ॥ ৩-১০ ॥

সর্বদোষবিনির্মুক্তমন্যথা দোষমাবহেৎ ।
আয়ুষ্মান্বলবাঞ্শ্রীমান্পুত্রবান্ধনবান্সুখী ॥ ৩-১১ ॥

বরমিষ্টং চ লভতে লিঙ্গং পার্থিবমর্চয়ন্ ।
তস্মাদ্ধি পার্থিবং লিঙ্গং জ্ঞেয়ং সর্বার্থসাধকম্ ॥ ৩-১২ ॥

নির্দোষং সুলভং চৈব পূজয়েৎসততং বুধঃ ।
যথা যথা মহালিঙ্গং পূজা শ্রদ্ধা যথা যথা ॥ ৩-১৩ ॥

তথা তথা মহৎপুণ্যং বিজ্ঞেয়মনুরূপতঃ ।
প্রতিমালিঙ্গবেদীষু যাবন্তঃ পরমাণবঃ ।
তাবৎকল্পান্মহাভোগস্তৎকর্তাস্তে শিবে পুরে ॥ ৩-১৪ ॥

॥ ইতি শিবোপনিষদি শিবগৃহাধ্যায়স্তৃতীয়ঃ ॥

অথৈকভিন্নাবিচ্ছিন্নং পুরতঃ শান্তিমণ্ডপম্ ।
পূর্বাপরাষ্টহস্তং স্যাদ্দ্বাদশোত্তরদক্ষিণে ॥ ৪-১ ॥

তদ্দ্বারভিত্তিসংবদ্ধং কপিচ্ছুকসমাবৃতম্ ।
পটদ্বয়ং ভবেৎস্থাপ্য স্রুবাদ্যাবারহেতুনা ॥ ৪-২ ॥

দ্বারং ত্রিশাখং বিজ্ঞেয়ং নবত্যঙ্গুলমুচ্ছ্রিতম্ ।
তদর্ধেন চ বিস্তীর্ণং সৎকবাটং শিবালয়ে ॥ ৪-৩ ॥

দীর্ঘং পঞ্চনবত্যা চ পঞ্চশাখাসুশোভিতম্ ।
সৎকবাটদ্বয়োপেতং শ্রীমদ্বাহনমণ্টপম্ ॥ ৪-৪ ॥

দ্বারং পশ্চান্মুখং জ্ঞেয়মশেষার্থপ্রসাধকম্ ।
অভাবে প্রাঙ্মুখং কার্যমুদগ্দক্ষিণতো ন চ ॥ ৪-৫ ॥

গবাক্ষকদ্বয়ং কার্যমপিধানং সুশোভনম্ ।
ধূমনির্গমনার্থায় দক্ষিণোত্তরকুড্যযোঃ ॥ ৪-৬ ॥

আগ্নেয়ভাগাৎপরিতঃ কার্যা জালগবাক্ষকাঃ ।
ঊর্ধ্বস্তূপিকয়া যুক্তা ঈষচ্ছিদ্রপিধানয়া ॥ ৪-৭ ॥

শিবাগ্নিহোত্রকুণ্ডং চ বৃত্তং হস্তপ্রমাণতঃ ।
চতুরশ্রবেদি(kA) শ্রীমন্মেখলাত্রয়ভূষিতম্ ॥ ৪-৮ ॥

কুড্যং দ্বিহস্তবিস্তীঋণং পঞ্চহস্তসমুচ্ছ্রিতম্ ।
শিবাগ্নিহোত্রশরণং কর্তব্যমতিশোভনম্ ॥ ৪-৯ ॥

জগতীস্তম্ভপট্টাদ্যং সপ্তসংখ্যং চ কল্পয়েৎ ।
বন্ধয়োগবিনির্মুক্তং তুল্যস্থানপদান্তরম্ ॥ ৪-১০ ॥

ঐষ্টকং কল্পয়েদ্যত্নাচ্ছিবাগ্ন্যায়তনং মহৎ ।
চতুঃপ্রেগীবকোপেতম্(?) একপ্রেগীবকেন বা(?) ॥ ৪-১১ ॥

সুধাপ্রলিপ্তং কর্তব্যং পঞ্চাণ্ডকবিভূষিতম্ ।
শিবাগ্নিহোত্রশরণং চতুরণ্ডকসংয়ুতম্ ॥ ৪-১২ ॥

বহিস্তদেব জগতী ত্রিহস্তা বা সুকুট্টিমা ।
তাবদেব চ বিস্তীর্ণা মেখলাদিবিভূষিতা ॥ ৪-১৩ ॥

কর্তব্যা চাত্র জগতী তস্যাশ্চাধঃ সমন্ততঃ ।
দ্বিহস্তমাত্রবিস্তীর্ণা তদর্ধার্ধসমুচ্ছ্রিতা ॥ ৪-১৪ ॥

অন্যা বৃত্তা প্রকর্তব্যা রুদ্রবেদী সুশোভনা ।
দশহস্তপ্রমাণা চ চতুরঙ্গুলমুচ্ছ্রিতা ॥ ৪-১৫ ॥

রুদ্রমাতৃগণানাং চ দিক্পতীনাং চ সর্বদা ।
সর্বাগ্রপাকসংয়ুক্তং তাসু নিত্যবলিং হরেৎ ॥ ৪-১৬ ॥

বেদ্যন্যা সর্বভূতানাং বহিঃ কার্যা দ্বিহস্তিকা ।
বৃষস্থানং চ কর্তব্যং শিবালোকনসংমুখম্ ॥ ৪-১৭ ॥

অগ্রার্ষসবিতুর্ব্যোম বৃষঃ কার্যশ্চ পশ্চিমে ।
ব্যোম্নশ্চাধস্ত্রিগর্ভং স্যাৎপিতৃতর্পণবেদিকা ॥ ৪-১৮ ॥

প্রাকারান্তর্বহিঃ কার্যং শ্রীমদ্গোপুরভূষিতম্ ।
পুষ্পারামজলোপেতং প্রাকারান্তং চ কারয়েৎ ॥ ৪-১৯ ॥

মৃদ্দারুজং তৃণচ্ছন্নং প্রকুর্বীত শিবালয়ম্ ।
ভূমিকাদ্বয়বিন্যাসাদুৎক্ষিপ্তং কল্পয়েদ্বুধঃ ॥ ৪-২০ ॥

শিবদক্ষিণতঃ কার্যং তভুক্তের্যোগ্যমালয়ম্ ।
শয়্যাসনসমায়ুক্তং বাস্তুবিদ্যাবিনির্মিতম্ ॥ ৪-২১ ॥

ধ্বজসিংহৌ বৃষগজৌ চৎবারঃ শোভনাঃ স্মৃতাঃ ।
ধূমশ্বগর্দভধ্বাঙ্ক্ষাশ্চৎবারশ্চার্থনাশকাঃ ॥ ৪-২২ ॥

গৃহস্যায়ামবিস্তারং কৃৎবা ত্রিগুণমাদিতঃ ।
অষ্টভিঃ শোধয়েদাপৈঃ শেষশ্চ গৃহমাদিশেৎ ॥ ৪-২৩ ॥

ইতি শান্তিগৃহং কৃৎবা রুদ্রাগ্নিং যঃ প্রবর্তয়েৎ ।
অপ্যেকং দিবসং ভক্ত্যা তস্য পুণ্যফলং শৃণু ॥ ৪-২৪ ॥

কলত্রপুত্রমিত্রাদ্যৈঃ স ভৃত্যৈঃ পরিবারিতঃ ।
কুলৈকবিংশদুত্তার্য দেবলোকমবাপ্নুয়াৎ ॥ ৪-২৫ ॥

নীলোৎপলদলশ্যামাঃ পীনবৃত্তপয়োধরাঃ ।
হেমবর্ণাঃ স্ত্রিয়শ্চান্যাঃ সুন্দর্যঃ প্রিয়দর্শনাঃ ॥ ৪-২৬ ॥

তাভিঃ সার্ধং মহাভোগৈর্বিমানৈঃ সার্বকামিকৈঃ ।
ইচ্ছয়া ক্রীডতে তাবদ্যাবদাভূতসম্প্লবম্ ॥ ৪-২৭ ॥

ততঃ কল্পাগ্নিনা সার্ধং দহ্যমানং সুবিহ্বলম্ ।
দৃষ্ট্বা বিরজ্যতে ভূয়ো ভবভোগমহার্ণবাৎ ॥ ৪-২৮ ॥

ততঃ সম্পৃচ্ছতে রুদ্রাংস্তত্রস্থান্জ্ঞানপারগান্ ।
তেভ্যঃ প্রাপ্য শিবজ্ঞানং শান্তং নির্বাণমাপ্নুয়াৎ ॥ ৪-২৯ ॥

অবিরক্তশ্চ ভোগেভ্যঃ সপ্ত জন্মানি জায়তে ।
পৃথিব্যধিপতিঃ শ্রীমানিচ্ছয়া বা দ্বিজোত্তমঃ ॥ ৪-৩০ ॥

সপ্তমাজ্জন্মনশ্চান্তে শিবজ্ঞানমনাপ্নুয়াৎ ।
জ্ঞানাদ্বিরক্তঃ সংসারাচ্ছুদ্ধঃ খান্যধিতিষ্ঠতি ॥ ৪-৩১ ॥

ইত্যেতদখিলং কার্যং ফলমুক্তং সমাসতঃ ।
উৎসবে চ পুনর্ব্রূমঃ প্রত্যেকং দ্রব্যজং ফলম্ ॥ ৪-৩২ ॥

সদ্গন্ধগুটিকামেকাং লাক্ষাং প্রাণ্যঙ্গবর্জিতাম্ ।
কর্পাসাস্থিপ্রমাণং চ হুৎবাগ্নৌ শৃণুয়াৎফলম্ ॥ ৪-৩৩ ॥

যাবৎসৎগন্ধগুটিকা শিবাগ্নৌ সংখ্যযা হুতা ।
তাবৎকোট্যস্তু বর্ষাণি ভোগান্ভুঙ্ক্তে শিবে পুরে ॥ ৪-৩৪ ॥

একাঙ্গুলপ্রমাণেন হুৎবাগ্নৌ চন্দনাহুতিম্ ।
বর্ষকোটিদ্বয়ং ভোগৈর্দিব্যৈঃ শিবপুরে বসেৎ ॥ ৪-৩৫ ॥

যাবৎকেসরসংখ্যানং কুসুমস্যানলে হুতম্ ।
তাবদ্যুগসহস্রাণি শিবলোকে মহীয়তে ॥ ৪-৩৬ ॥

নাগকেসরপুষ্পং তু কুঙ্কুমার্ধেন কীর্তিতম্ ।
যৎফলং চন্দনস্যোক্তমুশীরস্য তদর্ধকম্ ॥ ৪-৩৭ ॥

যৎপুষ্পধূপভষ্যান্ন- দধিক্ষীরঘৃতাদিভিঃ ।
পুণ্যলিঙ্গার্চনে প্রোক্তং তদ্ধোমস্য দশাধিকম্ ॥ ৪-৩৮ ॥

হুৎবাগ্নৌ সমিধস্তিস্রৌ শিবোমাস্কন্দনামভিঃ ।
পশ্চাদ্দদ্যাত্তিলান্নানি হোময়ীত যথাক্রমম্ ॥ ৪-৩৯ ॥

পলাশাঙ্কুরজারিষ্ট- পালাল্যঃ(?) সমিধঃ শুভাঃ ।
পৃষদাজ্যপ্লুতা হুৎবা শৃণু যৎফলমাপ্নুয়াৎ ॥ ৪-৪০ ॥

পলাশাঙ্কুরসংখ্যানাং যাবদগ্নৌ হুতং ভবেৎ ।
তাবৎকল্পান্মহাভোগৈঃ শিবলোকে মহীয়তে ॥ ৪-৪১ ॥

তল্লক্ষ্যমধ্যসংভূতং হুৎবাগ্নৌ সমিধঃ শুভাঃ ।
কল্পার্ধসংমিতং কালং ভোগান্ভুঙ্ক্তে শিবে পুরে ॥ ৪-৪২ ॥

শমীসমিৎফলং দেয়মব্দানপি চ লক্ষকম্ ।
শম্যর্ধফলবচ্ছেষাঃ সমিধঃ ক্ষীরবৃক্ষজাঃ ॥ ৪-৪৩ ॥

তিলসংখ্যাংস্তিলান্হুৎবা হ্যাজ্যাক্তা(?) যাবতী ভবেৎ ।
তাবৎস বর্ষলক্ষাংস্তু ভোগান্ভুঙ্ক্তে শিবে পুরে ॥ ৪-৪৪ ॥

যাবৎসুরৌষধীরজ্ঞস্(?) তিলতুল্যফলং স্মৃতম্ ।
ইতরেভ্যস্তিলেভ্যশ্চ কৃষ্ণানাং দ্বিগুণং ফলম্ ॥ ৪-৪৫ ॥

লাজাক্ষতাঃ সগোধূমাঃ বর্ষলক্ষফলপ্রদাঃ ।
দশসাহস্রিকা জ্ঞেয়াঃ শেষাঃ স্যুর্বীজজাতয়ঃ ॥ ৪-৪৬ ॥

পলাশেন্ধনজে বহ্নৌ হোমস্য দ্বিগুণং ফলম্ ।
ক্ষীরবৃক্ষসমৃদ্ধে ঽগ্নৌ ফলং সার্ধার্ধিকং ভবেৎ ॥ ৪-৪৭ ॥

অসমিদ্ধে সধূমে চ হোমকর্ম নিরর্থকম্ ।
অন্ধশ্চ জায়মানঃ স্যাদ্দারিদ্র্যোপহতস্তথা ॥ ৪-৪৮ ॥

ন চ কণ্টকিভির্বৃক্ষৈরগ্নিং প্রজ্বাল্য হোময়েৎ ।
শুষ্কৈর্নবৈঃ প্রশস্তৈশ্চ কাষ্ঠৈরগ্নিং সমিন্ধয়েৎ ॥ ৪-৪৯ ॥

এবমাজ্যাহুতিং হুৎবা শিবলোকমবাপ্নুয়াৎ ।
তত্র কল্পশতং ভোগান্ভুঙ্ক্তে দিব্যান্যথেপ্সিতান্ ॥ ৪-৫০ ॥

স্রুচৈকাহিতমাত্রেণ ব্রতস্যাপূরিতেন চ ।
যাহুতির্দীয়তে বহ্নৌ সা পূর্ণাহুতিরুচ্যতে ॥ ৪-৫১ ॥

একাং পূর্ণাহুতিং হুৎবা শিবেন শিবভাবিতঃ ।
সর্বকামমবাপ্নোতি শিবলোকে ব্যবস্থিতঃ ॥ ৪-৫২ ॥

অশেষকুলজৈর্সার্ধং স ভৃত্যৈঃ পরিবারিতঃ ।
আভূতসম্প্লবং যাবদ্ভোগান্ভুঙ্ক্তে যথেপ্সিতান্ ॥ ৪-৫৩ ॥

ততশ্চ প্রলয়ে প্রাপ্তে সম্প্রাপ্য জ্ঞানমুত্তমম্ ।
প্রসাদাদীশ্বরস্যৈব মুচ্যতে ভবসাগরাৎ ॥ ৪-৫৪ ॥

শিবপূর্ণাহুতিং বহ্নৌ পতন্তীং যঃ প্রপশ্যতি ।
সো ঽপি পাপরি নরঃ সর্বৈর্মুক্তঃ শিবপুরং ব্রজেৎ ॥ ৪-৫৫ ॥

শিবাগ্নিধূমসংস্পৃষ্টা জীবাঃ সর্বে চরাচরাঃ ।
তে ঽপি পাপবিনির্মুক্তাঃ স্বর্গং যান্তি ন সংশয়ঃ ॥ ৪-৫৬ ॥

শিবয়জ্ঞমহাবেদ্যা জায়তে যে ন সন্তি বা ।
তে ঽপি যান্তি শিবস্থানং জীবাঃ স্থাবরজঙ্গমাঃ ॥ ৪-৫৭ ॥

পূর্ণাহুতিং ঘৃতাভাবে ক্ষীরতৈলেন কল্পয়েৎ ।
হোময়েদতসীতৈলং তিলতৈলং বিনা নরঃ ॥ ৪-৫৮ ॥

সর্ষপেঙ্গুডিকাশাম্র- করঞ্জমধুকাক্ষজম্ ।
প্রিয়ঙ্গুবিল্বপৈপ্পল্য- নালিকেরসমুদ্ভবম্(?) ॥ ৪-৫৯ ॥

ইত্যেবমাদিকং তৈলমাজ্যাভাবে প্রকল্পয়েৎ ।
দূর্বয়া বিল্বপত্ত্রৈর্বা সমিধঃ সম্প্রকীর্তিতাঃ ॥ ৪-৬০ ॥

অন্নার্থং হোময়েৎক্ষীরং দধি মূলফলানি বা ।
তিলার্থং তণ্ডুলৈঃ কুর্যাদ্দর্ভার্থং হরিতৈস্তৃণৈঃ ॥ ৪-৬১ ॥

পরিধীনামভাবেন শরৈর্বংশৈশ্চ কল্পয়েৎ ।
ইন্ধনানামভাবেন দীপয়েত্তৃণগোময়ৈঃ ॥ ৪-৬২ ॥

গোময়ানামভাবেন মহত্যম্ভসি হোময়েৎ ।
অপামসংভবে হোমং ভূমিভাগে মনোহরে ॥ ৪-৬৩ ॥

বিপ্রস্য দক্ষিণে পাণাবশ্বত্থে তদভাবতঃ ।
ছাগস্য দক্ষিণে কর্ণে কুশমূলে চ হোময়েৎ ॥ ৪-৬৪ ॥

স্বাত্মাগ্নৌ হোময়েৎপ্রাজ্ঞঃ সর্বাগ্নীনামসংভবে ।
অভাবে ন ত্যজেৎকর্ম কর্ময়োগবিধৌ স্থিতঃ ॥ ৪-৬৫ ॥

আপৎকালে ঽপি যঃ কুর্যাচ্ছিবাগ্নের্মনসার্চনম্ ।
স মোহকঞ্চুকং ত্যক্ত্বা পরাং শান্তিমবাপ্নুয়াৎ ॥ ৪-৬৬ ॥

প্রাণাগ্নিহোত্রং কুর্বন্তি পরমং শিবয়োগিনঃ ।
বাহ্যকর্মবিনির্মুক্তা জ্ঞানধ্যানসমাকুলাঃ ॥ ৪-৬৭ ॥

॥ ইতি শিবোপনিষদি শান্তিগৃহাগ্নিকার্যাধ্যায়শ্চতুর্থঃ ॥

অথাগ্নেয়ং মহাস্নানমলক্ষ্মীমলনাশনম্ ।
সর্বপাপহরং দিব্যং তপঃ শ্রীকীর্তিবর্ধনম্ ॥ ৫-১ ॥

অগ্নিরূপেণ রুদ্রেণ স্বতেজঃ পরমং বলম্ ।
ভূতিরূপং সমুদ্গীর্ণং বিশুদ্ধং দুরিতাপহম্ ॥ ৫-২ ॥

যক্ষরক্ষঃপিশাচানাং ধ্বংসনং মন্ত্রসৎকৃতম্ ।
রক্ষার্থং বালরূপাণাং সূতিকানাং গৃহেষু চ ॥ ৫-৩ ॥

যশ্চ ভুঙ্ক্তে দ্বিজঃ কৃৎবা অন্নস্য বা পরিধিত্রয়ম্(?) ।
অপি শূদ্রস্য পঙ্ক্তিস্থঃ পঙ্ক্তিদোষৈর্ন লিপ্যতে ॥ ৫-৪ ॥

আহারমর্ধভুক্তং চ কীটকেশাদিদূষিতম্ ।
তাবন্মাত্রং সমুদ্ধৃত্য ভূতিস্পৃষ্টং বিশুদ্ধ্যতি ॥ ৫-৫ ॥

আরণ্যং গোময়কৃতং করীষং বা প্রশস্যতে ।
শর্করাপাংসুনির্মুক্তমভাবে কাষ্ঠভস্মনা ॥ ৫-৬ ॥

স্বগৃহাশ্রমবল্লিভ্যঃ কুলালালয়ভস্মনা ।
গোময়েষু চ দগ্ধেষু হীষ্টকানি চ যেষু চ ॥ ৫-৭ ॥

সর্বত্র বিদ্যতে ভস্ম দুঃখাপার্জনরক্ষণম্(duHkhopAr) ।
শঙ্খকুন্দেন্দুবর্ণাভমাদদ্যাজ্জন্তুবর্জিতম্ ॥ ৫-৮ ॥

ভস্মানীয় প্রয়ত্নেন তদ্রক্ষেদ্যত্নবাংস্তথা ।
মার্জারমূষিকাদ্যৈশ্চ নোপহন্যেত তদ্যথা ॥ ৫-৯ ॥

পঞ্চদোষবিনির্মুক্তং গুণপঞ্চকসংয়ুতম্ ।
শিবৈকাদশিকাজপ্তং শিবভস্ম প্রকীর্তিতম্ ॥ ৫-১০ ॥

জাতিকারুকবাক্কায়- স্থানদুষ্টং চ পঞ্চমম্ ।
পাপঘ্নং শাংকরং রক্ষা- পবিত্রং যোগদং গুণাঃ(?) ॥ ৫-১১ ॥

শিবব্রতস্য শান্তস্য ভাসকৎবাচ্ছুভস্য চ ।
ভক্ষণাৎসর্বপাপানাং ভস্মেতি পরিকীর্তিতম্ ॥ ৫-১২ ॥

ভস্মস্নানং শিবস্নানং বারুণাদধিকং স্মৃতম্ ।
জন্তুশৈবালনির্মুক্তমাগ্নেয়ং পঙ্কবর্জিতম্ ॥ ৫-১৩ ॥

অপবিত্রং ভবেত্তোয়ং নিশি পূর্বমনাহৃতম্ ।
নদীতডাগবাপিষু গিরিপ্রস্রবণেষু চ ॥ ৫-১৪ ॥

স্নানং সাধারণং প্রোক্তং বারুণং সর্বদেহিনাম্ ।
অসাধারণমেবোক্তং ভস্মস্নানং দ্বিজন্মনাম্ ॥ ৫-১৫ ॥

ত্রিকালং বারুণস্নানাদনারোগ্যং প্রজায়তে ।
আগ্নেয়ং রোগশমনমেতস্মাদ্সার্বকামিকম্ ॥ ৫-১৬ ॥

সংধ্যাত্রয়ে ঽর্ধরাত্রে চ ভুক্ত্বা চান্নবিরেচনে ।
শিবয়োগ্যাচরেৎস্নানমুচ্চারাদিক্রিয়াসু চ ॥ ৫-১৭ ॥

ভস্মাস্তৃতে মহীভাগে সমে জন্তুবিবর্জিতে ।
ধ্যায়মানঃ শিবং যোগী রজন্যন্তং শয়ীত চ ॥ ৫-১৮ ॥

একরাত্রোষিতস্যাপি যা গতির্ভস্মশায়িনঃ ।
ন সা শক্যা গৃহস্থেন প্রাপ্তুং যজ্ঞশতৈরপি ॥ ৫-১৯ ॥

গৃহস্থস্ত্র্যায়ুষোংকারৈঃ স্নানং কুর্যাত্ত্রিপুণ্ড্রকৈঃ ।
যতিঃ সার্বাঙ্গিকং স্নানমাপাদতলমস্তকাৎ ॥ ৫-২০ ॥

শিবভক্তস্ত্রিধা বেদ্যাং ভস্মস্নানফলং লভেৎ ।
হৃদি মূর্ধ্নি ললাটে চ শূদ্রঃ শিবগৃহাশ্রমী ॥ ৫-২১ ॥

গণাঃ প্রব্রজিতাঃ শান্তাঃ ভূতিমালভ্য পঞ্চধা ।
শিরোললাটে হৃদ্বাহ্বোর্ভস্মস্নানফলং লভেৎ ॥ ৫-২২ ॥

সংবৎসরং তদর্ধং বা চতুর্দশ্যষ্টমীষু চ ।
যঃ কুর্যাদ্ভস্মনা স্নানং তস্য পুণ্যফলং শৃনু ॥ ৫-২৩ ॥

শিবভস্মনি যাবন্তঃ সমেতাঃ পরমাণবঃ ।
তাবদ্বর্ষসহস্রাণি শিবলোকে মহীয়তে ॥ ৫-২৪ ॥

একবিংশকুলোপেতঃ পত্নীপুত্রাদিসংয়ুতঃ ।
মিত্রস্বজনভৃত্যৈশ্চ সমস্তৈঃ পরিবারিতঃ ॥ ৫-২৫ ॥

তত্র ভুক্ত্বা মহাভোগানিচ্ছয়া সার্বকামিকান্ ।
জ্ঞানয়োগং সমাসাদ্য প্রলয়ে মুক্তিমাপ্নুয়াৎ ॥ ৫-২৬ ॥

ভস্ম ভস্মান্তিকং যেন গৃহীতং নৈষ্ঠিকব্রতম্(?) ।
অনেন বৈ স দেহেন রুদ্রশ্চঙ্ক্রমতে ক্ষিতৌ ॥ ৫-২৭ ॥

ভস্মস্নানরতং শান্তং যে নমন্তি দিনে দিনে ।
তে সর্বপাপনির্মুক্তা নরা যান্তি শিবং পুরম্ ॥ ৫-২৮ ॥

ইত্যেতৎপরমং স্নানমাগ্নেয়ং শিবনির্মিতম্ ।
ত্রিসংধ্যমাচরেন্নিত্যং জাপী যোগমবাপ্নুয়াৎ ॥ ৫-২৯ ॥

ভস্মানীয় প্রদদ্যাদ্যঃ স্নানার্থং শিবয়োগিনে ।
কল্পং শিবপুরে ভোগান্ভুক্ত্বান্তে স্যাদ্দ্বিজোত্তমঃ ॥ ৫-৩০ ॥

আগ্নেয়ং বারুণং মান্ত্রং বায়ব্যং ৎবৈন্দ্রপঞ্চমম্ ।
মানসং শান্তিতোয়ং চ জ্ঞানস্নানং তথাষ্টমম্ ॥ ৫-৩১ ॥

আগ্নেয়ং রুদ্রমন্ত্রেণ ভস্মস্নানমনুত্তমম্ ।
অম্ভসা বারুণং স্নানম্কার্যং বারুণমূর্তিনা ॥ ৫-৩২ ॥

মূর্ধানং পাণিনালভ্য শিবৈকাদশিকাং জপেৎ ।
ধ্যায়মানঃ শিবং শান্তম্মন্ত্রস্নানং পরং স্মৃতম্ ॥ ৫-৩৩ ॥

গবাং খুরপুটোৎখাত- পবনোদ্ধূতরেণুনা ।
কার্যং বায়ব্যকং স্নানম্মন্ত্রেণ মরুদাত্মনা ॥ ৫-৩৪ ॥

ব্যভ্রে ঽর্কে বর্ষতি স্নানং কুর্যাদৈন্দ্রীং দিশং স্থিতঃ ।
আকাশমূর্তিমন্ত্রেণ তদৈন্দ্রমিতি কীর্তিতম্ ॥ ৫-৩৫ ॥

উদকং পাণিনা গৃহ্য সর্বতীর্থানি সংস্মরেৎ ।
অভ্যুক্ষয়েচ্ছিরস্তেন স্নানং মানসমুচ্যতে ॥ ৫-৩৬ ॥

পৃথিব্যাং যানি তীর্থানি সরাংস্যায়তনানি চ ।
তেষু স্নাতস্য যৎপুণ্যং তৎপুণ্যং ক্ষান্তিবারিণা ॥ ৫-৩৭ ॥

ন তথা শুধ্যতে তীর্থৈস্তপোভির্বা মহাধ্বরৈঃ ।
পুরুষঃ সর্বদানৈশ্চ যথা ক্ষান্ত্যা বিশুদ্ধ্যতি ॥ ৫-৩৮ ॥

আক্রুষ্টস্তাডিতস্তস্মাদধিক্ষিপ্তস্তিরস্কৃত ।
ক্ষমেদক্ষমমানানাং স্বর্গমোক্ষজিগীষয়া ॥ ৫-৩৯ ॥

যৈব ব্রহ্মবিদাং প্রাপ্তির্যৈব প্রাপ্তিস্তপস্বিনাম্ ।
যৈব যোগাভিয়ুক্তানাং গতিঃ সৈব ক্ষমাবতাম্ ॥ ৫-৪০ ॥

জ্ঞানামলাম্ভসা স্নাতঃ সর্বদৈব মুনিঃ শুচিঃ ।
নির্মলঃ সুবিশুদ্ধশ্চ বিজ্ঞেয়ঃ সূর্যরশ্মিবৎ ॥ ৫-৪১ ॥

মেধ্যামেধ্যরসং যদ্বদপি বৎস বিনা করৈঃ ।
নৈব লিপ্যতি তদ্দোষৈস্তদ্বজ্জ্ঞানী সুনির্মলঃ ॥ ৫-৪২ ॥

এষামেকতমে স্নাতঃ শুদ্ধভাবঃ শিবং ব্রজেৎ ।
অশুদ্ধভাবঃ স্নাতো ঽপি পূজয়ন্নাপ্নুয়াৎফলম্ ॥ ৫-৪৩ ॥

জলং মন্ত্রং দয়া দানং সত্যমিন্দ্রিয়সংয়মঃ ।
জ্ঞানং ভাবাত্মশুদ্ধিশ্চ শৌচমষ্টবিধং শ্রুতম্ ॥ ৫-৪৪ ॥

অঙ্গুষ্ঠতলমূলে চ ব্রাহ্মং তীর্থমবস্থিতম্ ।
তেনাচম্য ভবেচ্ছুদ্ধঃ শিবমন্ত্রেণ ভাবিতঃ ॥ ৫-৪৫ ॥

যদধঃ কন্যকায়াশ্চ তত্তীর্থং দৈবমুচ্যতে ।
তীর্থং প্রদেশিনীমূলে পিত্র্যং পিতৃবিধোদয়ম্(?) ॥ ৫-৪৬ ॥

মধ্যমাঙ্গুলিমধ্যেন তীর্থমারিষমুচ্যতে ।
করপুষ্করমধ্যে তু শিবতীর্থং প্রতিষ্ঠিতম্ ॥ ৫-৪৭ ॥

বামপাণিতলে তীর্থমৌমম্নাম প্রকীর্তিতম্ ।
শিবোমাতীর্থসংয়োগাৎকুর্যাৎস্নানাভিষেচনম্ ॥ ৫-৪৮ ॥

দেবান্দৈবেন তীর্থেন তর্পয়েদকৃতাম্ভসা ।
উদ্ধৃত্য দক্ষিণং পাণিমুপবীতী সদা বুধঃ ॥ ৫-৪৯ ॥

প্রাচীনাবীতিনা কার্যং পিতৄণাং তিলবারিণা ।
তর্পণং সর্বভূতানামারিষেণ নিবীতিনা ॥ ৫-৫০ ॥

সব্যস্কন্ধে যদা সূত্রমুপবীত্যুচ্যতে তদা ।
প্রাচীনাবীত্যসব্যেন নিবীতী কণ্ঠসংস্থিতে ॥ ৫-৫১ ॥

পিতৄণাং তর্পণং কৃৎবা সূর্যায়ার্ঘ্যং প্রকল্পয়েৎ ।
উপস্থায় ততঃ সূর্যং যজেচ্ছিবমনন্তরম্ ॥ ৫-৫২ ॥

॥ ইতি শিবোপনিষদি শিবভস্মস্নানাধ্যায়ঃ পঞ্চমঃ ॥

অথ ভক্ত্যা শিবং পূজ্য নৈবেদ্যমুপকল্পয়েৎ ।
যদন্নমাত্মনাশ্নীয়াত্তস্যাগ্রে বিনিবেদয়েৎ ॥ ৬-১ ॥

যঃ কৃৎবা ভক্ষ্যভোজ্যানি যত্নেন বিনিবেদয়েৎ ।
শিবায় স শিবে লোকে কল্পকোটিং প্রমোদতে ॥ ৬-২ ॥

যঃ পক্বং শ্রীফলং দদ্যাচ্ছিবায় বিনিবেদয়েৎ ।
গুরোর্বা হোময়েদ্বাপি তস্য পুণ্যফলং শৃণু ॥ ৬-৩ ॥

শ্রীমদ্ভিঃ স মহায়ানৈর্ভোগান্ভুঙ্ক্তে শিবে পুরে ।
বর্ষাণাময়ুতং সাগ্রং তদন্তে শ্রীপতির্ভবেৎ ॥ ৬-৪ ॥

কপিত্থমেকং যঃ পক্বমীশ্বরায় নিবেদয়েৎ ।
বর্ষলক্ষং মহাভোগৈঃ শিবলোকে মহীয়তে ॥ ৬-৫ ॥

একমাম্রফলং পক্বং যঃ শম্ভোর্বিনিবেদয়েৎ ।
বর্ষাণাম্যুতং ভোগৈঃ ক্রীডতে স শিবে পুরে ॥ ৬-৬ ॥

একং বটফলং পক্বং যঃ শিবায় নিবেদয়েৎ ।
বর্ষলক্ষং মহাভোগৈঃ শিবলোকে মহীয়তে ॥ ৬-৭ ॥

যঃ পক্বং দাডিমং চৈকং দদ্যাদ্বিকসিতং নবম্ ।
শিবায় গুরবে বাপি তস্য পুণ্যফলং শৃণু ॥ ৬-৮ ॥

যাবত্তদ্বীজসংখ্যানং শোভনং পরিকীর্তিতম্ ।
তাবদষ্টায়ুতান্যুচ্চৈঃ শিবলোকে মহীয়তে ॥ ৬-৯ ॥

দ্রাক্ষাফলানি পক্বানি যঃ শিবায় নিবেদয়েৎ ।
ভক্ত্যা বা শিবয়োগিভ্যস্তস্য পুণ্যফলং শৃণু ॥ ৬-১০ ॥

যাবত্তৎফলসংখ্যানমুভয়োর্বিনিবেদিতম্ ।
তাবদ্যুগসহস্রাণি রুদ্রলোকে মহীয়তে ॥ ৬-১১ ॥

দ্রাক্ষাফলেষু যৎপুণ্যং তৎখর্জূরফলেষু চ ।
তদেব রাজবৃক্ষেষু পারাবতফলেষু চ ॥ ৬-১২ ॥

যো নারঙ্গফলং পক্বং বিনিবেদ্য মহেশ্বরে ।
অষ্টলক্ষং মহাভোগৈঃ কৃডতে স শিবে পুরে ॥ ৬-১৩ ॥

বীজপূরেষু তস্যার্ধং তদর্ধং লিকুচেষু চ ।
জম্বূফলেষু যৎপুণ্যং তৎপুণ্যং তিন্দুকেষু চ ॥ ৬-১৪ ॥

পনসং নারিকেলং বা শিবায় বিনিবেদয়েৎ ।
বর্ষলক্ষং মহাভোগৈঃ শিবলোকে মহীয়তে ॥ ৬-১৫ ॥

পুরুষং চ প্রিয়ালং চ মধূককুসুমানি চ ।
জম্বূফলানি পক্বানি বৈকঙ্কতফলানি চ ॥ ৬-১৬ ॥

নিবেদ্য ভক্ত্যা শর্বায় প্রত্যেকং তু ফলে ফলে ।
দশবর্ষসহস্রাণি রুদ্রলোকে মহীয়তে ॥ ৬-১৭ ॥

ক্ষীরিকায়াঃ ফলং পক্বং যঃ শিবায় নিবেদয়েৎ ।
বর্ষলক্ষং মহাভোগৈর্মোদতে স শিবে পুরে ॥ ৬-১৮ ॥

বালুকাত্রপুসাদীনি যঃ ফলানি নিবেদয়েৎ ।
শিবায় গুরবে বাপি পক্বং চ করমর্দকম্ ॥ ৬-১৯ ॥

দশবর্ষসহস্রাণি রুদ্রলোকে মহীয়তে ।
বদরাণি সুপক্বানি তিন্তিডীকফলানি চ ॥ ৬-২০ ॥

দর্শনীয়ানি পক্বানি হ্যামলক্যাঃ ফলানি চ ।
এবমাদীনি চান্যানি শাকমূলফলানি চ ॥ ৬-২১ ॥

নিবেদয়তি শর্বায় শৃণু যৎফলমাপ্নুয়াৎ ।
একৈকস্মিন্ফলে ভোগান্প্রাপ্নুয়াদনুপূর্বশঃ ॥ ৬-২২ ॥

পঞ্চবর্ষসহস্রাণি রুদ্রলোকে মহীয়তে ।
গোধূমচন্দকাদ্যানি সুকৃতং সক্তুভর্জিতম্ ॥ ৬-২৩ ॥

নিবেদয়ীত শর্বায় তস্য পুণ্যফলং শৃণু ।
যাবত্তদ্বীজসংখ্যানং শুভং ভ্রষ্টং নিবেদয়েৎ ॥ ৬-২৪ ॥

তাবদ্বর্ষসহস্রাণি রুদ্রলোকে মহীয়তে ।
যঃ পক্বানীক্ষুদণ্ডানি শিবায় বিনিবেদয়েৎ ॥ ৬-২৫ ॥

গুরবে বাপি তদ্ভক্ত্যা তস্য পুণ্যফলং শৃণু ।
ইক্ষুপর্ণানি চৈকৈকং বর্ষলোকং প্রমোদতে ॥ ৬-২৬ ॥

সাকং শিবপুরে ভোগৈঃ পৌণ্ড্রং পঞ্চগুণং ফলম্ ।
নিবেদ্য পরমেশায় শুক্তিমাত্ররসস্য তু ॥ ৬-২৭ ॥

বর্ষকোটিং মহাভোগৈঃ শিবলোকে মহীয়তে ।
নিবেদ্য ফাণিতং শুদ্ধং শিবায় গুরবে ঽপি বা ॥ ৬-২৮ ॥

রসাৎসহস্রগুণিতং ফলং প্রাপ্নোতি মানবঃ ।
গুডস্য ফলমেকং যঃ শিবায় বিনিবেদয়েৎ ॥ ৬-২৯ ॥

অম্বকোটিং শিবে লোকে মহাভোগৈঃ প্রমোদতে ।
খণ্ডস্য পলনৈবেদ্যং গুডাচ্ছতগুণং ফলম্ ॥ ৬-৩০ ॥

খণ্ডাৎসহস্রগুণিতং শর্করায়া নিবেদনে ।
মৎসণ্ডিকাং মহাশুদ্ধাং শংকরায় নিবেদয়েৎ ॥ ৬-৩১ ॥

কল্পকোটিং নরঃ সাগ্রং শিবলোকে মহীয়তে ।
পরিশুদ্ধং ভৃষ্টমাজ্যং সিদ্ধং চৈব সুসংস্কৃতম্ ॥ ৬-৩২ ॥

মাসং নিবেদ্য শর্বায় শৃণু যৎফলমাপ্নুয়াৎ ।
অশেষফলদানেন যৎপুণ্যং পরিকীর্তিতম্ ॥ ৬-৩৩ ॥

তৎপুণ্যং প্রাপ্নুয়াৎসর্বং মহাদাননিবেদনে ।
পনসানি চ দিব্যানি স্বাদূনি সুরভীণি চ ॥ ৬-৩৪ ॥

নিবেদয়েত্তু শর্বায় তস্য পুণ্যফলং শৃণু ।
কল্পকোটিং নরঃ সাগ্রং শিবলোকে ব্যবস্থিতঃ ॥ ৬-৩৫ ॥

পিবন্শিবামৃতং দিব্যং মহাভোগৈঃ প্রমোদতে ।
দিনে দিনে চ যস্ত্বাপং বস্ত্রপূতং সমাচরেৎ ॥ ৬-৩৬ ॥

সুখায় শিবভক্তেভ্যস্তস্য পুণ্যফলং শৃণু ।
মহাসরাংসি যঃ কুর্যাদ্ভবেৎপুণ্যং শিবাগ্রতঃ ॥ ৬-৩৭ ॥

তৎপুণ্যং সকলং প্রাপ্য শিবলোকে মহীয়তে ।
যদিষ্টমাত্মনঃ কিংচিদন্নপানফলাদিকম্ ॥ ৬-৩৮ ॥

তত্তচ্ছিবায় দেয়ং স্যাদুত্তমং ভোগমিচ্ছতা ।
ন শিবঃ পরিপূর্ণৎবাৎকিংচিদশ্নাতি কস্যচিৎ ॥ ৬-৩৯ ॥

কিন্ত্বীশ্বরনিভং কৃৎবা সর্বমাত্মনি দীয়তে ।
ন রোহতি যথা বীজং স্বস্থমাশ্রয়বর্জিতম্ ॥ ৬-৪০ ॥

পুণ্যবীজং তথা সূক্ষ্মং নিষ্ফলং স্যান্নিরাশ্রয়ম্ ।
সুক্ষেত্রেষু যথা বীজমুপ্তং ভবতি সৎফলম্ ॥ ৬-৪১ ॥

অল্পমপ্যক্ষয়ং তদ্বৎপুণ্যং শিবসমাশ্রয়াৎ ।
তস্মাদীশ্বরমুদ্দিশ্য যদ্যদাত্মনি রোচতে ॥ ৬-৪২ ॥

তত্তদীশ্বরভক্তেভ্যঃ প্রদাতব্যং ফলার্থিনা ।
যঃ শিবায় গুরোর্বাপি রচয়েন্মণিভূমিকম্ ॥ ৬-৪৩ ॥

নৈবেদ্য ভোজনার্থং যঃ পত্ত্রৈঃ পুষ্পৈশ্চ শোভনম্ ।
যাবত্তৎপত্ত্রপুষ্পাণাং পরিসংখ্যা বিধীয়তে ॥ ৬-৪৪ ॥

তাবদ্বর্ষসহস্রাণি সুরলোকে মহীয়তে ।
পলাশকদলীপদ্ম- পত্ত্রাণি চ বিশেষতঃ ॥ ৬-৪৫ ॥

দত্ত্বা শিবায় গুরবে শৃণু যৎফলমাপ্নুয়াৎ ।
যাবত্তৎপত্ত্রসংখ্যানমীশ্বরায় নিবেদিতম্ ॥ ৬-৪৬ ॥

তাবদব্দায়ুতানাং স লোকে ভোগানবাপ্নুয়াৎ ।
যাবত্তাম্বুলপত্ত্রাণি পূগাংশ্চ বিনিবেদয়েৎ ॥ ৬-৪৭ ॥

তাবন্তি বর্ষলক্ষাণি শিবলোকে মহীয়তে ।
যচ্ছুদ্ধং শঙ্খচূর্ণং বা গুরবে বিনিবেদয়েৎ ॥ ৬-৪৮ ॥

তাম্বূলয়োগসিদ্ধ্যর্থং তস্য পুণ্যফলং শৃণু ।
যাবত্তাম্বূলপত্ত্রাণি চূর্ণমানেন ভক্ষয়েৎ ॥ ৬-৪৯ ॥

তাবদ্বর্ষসহস্রাণি রুদ্রলোকে মহীয়তে ।
জাতীফলং সকঙ্কোলং লতাকস্তূরিকোৎপলম্ ॥ ৬-৫০ ॥

ইত্যেতানি সুগন্ধীনি ফলানি বিনিবেদয়েৎ ।
ফলে ফলে মহাভোগৈর্বর্ষলক্ষং তু যত্নতঃ ॥ ৬-৫১ ॥

কামিকেন বিমানেন ক্রীডতে স শিবে পুরে ।
ত্রুটিমাত্রপ্রমাণেন কর্পূরস্য শিবে গুরৌ ॥ ৬-৫২ ॥

বর্ষকোটিং মহাভোগৈঃ শিবলোকে মহীয়তে ।
পূগতাম্বূলপত্ত্রাণামাধারং যো নিবেদয়েৎ ॥ ৬-৫৩ ॥

বর্ষকোট্যষ্টকং ভোগৈঃ শিবলোকে মহীয়তে ।
যশ্চূএণাধারসৎপাত্রং কস্যাপি বিনিবেদয়েৎ ॥ ৬-৫৪ ॥

মোদতে স শিবে লোকে বর্ষকোটীশ্চতুর্দশ ।
মৃৎকাষ্ঠবংশখণ্ডানি যঃ প্রদদ্যাচ্ছিবাশ্রমে ॥ ৬-৫৫ ॥

প্রাপ্নুয়াদ্বিপুলান্ভোগান্দিব্যাঞ্ছিবপুরে নরঃ ।
মাণিক্যং কলশং পাত্রীং স্থাল্যাদীন্ভাণ্ডসম্পুটান্ ॥ ৬-৫৬ ॥

দত্ত্বা শিবাগ্রজস্তেভ্যঃ শিবলোকে মহীয়তে ।
তোয়াধারপিধানানি মৃদ্বস্ত্রতরুজানি বা ॥ ৬-৫৭ ॥

বংশালাবুসমুত্থানি দত্ত্বাপ্নোতি শিবং পুরম্ ।
পঞ্চসংমার্জনীতোয়ং গোময়াঞ্জনকর্পটান্ ॥ ৬-৫৮ ॥

মৃৎকুম্ভপীটিকাং দদ্যাদ্ভোগাঞ্ছিবপুরে লভেৎ ।
যঃ পুষ্পধূপগন্ধানাং দধিক্ষীরঘৃতাম্ভসাম্ ॥ ৬-৫৯ ॥

দদ্যাদাধারপাত্রাণি শিবলোকে স গচ্ছতি ।
বংশতালাদিসংভূতং পুষ্পাধারকরণ্ডকম্ ॥ ৬-৬০ ॥

ইত্যেবমাদ্যান্যো দদ্যাচ্ছিবলোকমবাপ্নুয়াৎ ।
যঃ স্রুক্স্রুবাদিপাত্রাণি হোমার্থং বিনিবেদয়েৎ ॥ ৬-৬১ ॥

বর্ষকোটিং মহাভাগৈঃ শিবলোকে মহীয়তে ।
যঃ সর্বধাতুসংয়ুক্তং দদ্যাল্লবণপর্বতম্ ॥ ৬-৬২ ॥

শিবায় গুরবে বাপি তস্য পুণ্যফলং শৃণু ।
কল্পকোটিসহস্রাণি কল্পকোটিশতানি চ ॥ ৬-৬৩ ॥

স গোত্রভৃত্যসংয়ুক্তো বসেচ্ছিবপুরে নরঃ ।
বিমানয়ানৈঃ শ্রীমদ্ভিঃ সর্বকামসমন্বিতৈঃ ॥ ৬-৬৪ ॥

ভোগান্ভুক্ত্বা তু বিপুলাংস্তদন্তে স মহীপতিঃ ।
মনঃশিলাং হরীতালং রাজপট্টং চ হিঙ্গুলম্ ॥ ৬-৬৫ ॥

গৈরিকং মণিদন্তং চ হেমতোয়ং তথাষ্টমম্ ।
যশ্চ তং পর্বতবরং শালিতণ্ডুলকল্পিতম্ ॥ ৬-৬৬ ॥

শিবায়গুরবে বাপি তস্য পুণ্যফলং শৃণু ।
কল্পকোটিশতং সাগ্রং ভোগান্ভুঙ্ক্তে শিবে পুরে ॥ ৬-৬৭ ॥

যঃ সর্বধান্যশিখরৈরুপেতং যবপর্বতম্ ।
ঘৃততৈলনদীয়ুক্তং তস্য পুণ্যফলং শৃণু ॥ ৬-৬৮ ॥

কল্পকোটিশতং সাগ্রং ভোগান্ভুঙ্ক্তে শিবে পুরে ।
সমস্তকুলজৈঃ সার্ধং তস্যান্তে স মহীপতিঃ ॥ ৬-৬৯ ॥

তিলধেনুং প্রদদ্যাদ্যঃ কৃৎবা কৃষ্ণাজিনে নরঃ ।
কপিলায়াঃ প্রদানস্য যৎফলং তদবাপ্নুয়াৎ ॥ ৬-৭০ ॥

ঘৃতধেনুং নরঃ কৃৎবা কাংস্যপাত্রে সকাঞ্চনান্ ।
নিবেদ্য গোপ্রদানস্য সমগ্রং ফলমাপ্নুয়াৎ ॥ ৬-৭১ ॥

দ্বীপিচর্মণি যঃ স্থাপ্য প্রদদ্যাল্লবণাঢকম্ ।
অশেষরসদানস্য যৎপুণ্যং তদবাপ্নুয়াৎ ॥ ৬-৭২ ॥

মরিচাঢেন কুর্বীত(?) মারীচং নাম পর্বতম্ ।
দদ্যাদ্যজ্জীরকং পূর্বমাগ্নেয়ং হিঙ্গুমুত্তমম্ ॥ ৬-৭৩ ॥

দক্ষিণে গুডশুণ্ঠীং চ নৈরৃতে নাগকেসরম্ ।
পিপ্পলীং পশ্চিমে দদ্যাদ্বায়ব্যে কৃষ্ণজীরকম্ ॥ ৬-৭৪ ॥

কৌবের্যামজমোদং চ ৎবগেলাশ্চেশদৈবতে ।
কুস্তুম্বর্যাঃ প্রদেয়াঃ স্যুর্বহিঃ প্রাকারতঃ স্থিতাঃ ॥ ৬-৭৫ ॥

ককুভামন্তরালেষু সমন্তাৎসৈন্ধবং ন্যসেৎ ।
সপুষ্পাক্ষততোয়েন শিবায় বিনিবেদয়েৎ ॥ ৬-৭৬ ॥

যাবত্তদ্দীপসংখ্যানং সর্বমেকত্র পর্বতে ।
তাবদ্বর্ষশতাদূর্ধ্বং ভোগান্ভুঙ্ক্তে শিবে পুরে ॥ ৬-৭৭ ॥

কূশ্মাণ্ডং মধ্যতঃ স্থাপ্য কালিঙ্গং পূর্বতো ন্যসেৎ ।
দক্ষিণে ক্ষীরতুম্বীং তু বৃন্তাকং পশ্চিমে ন্যসেৎ ॥ ৬-৭৮ ॥

পটীসান্যুত্তরে স্থাপ্য কর্কটীমীশদৈবতে ।
ন্যসেদ্গজপটোলাংশ্চ মধুরান্বহ্নিদৈবতে ॥ ৬-৭৯ ॥

কারবেল্লাংশ্চ নৈরৃত্যাং বায়ব্যাং নিম্বকং ফলম্ ।
উচ্চাবচানি চান্যানি ফলানি স্থাপয়েদ্বহিঃ ॥ ৬-৮০ ॥

অভ্যর্চ্য পুষ্পধূপৈশ্চ সমন্তাৎফলপর্বতম্ ।
শিবায় গুরবে বাপি প্রণিপত্য নিবেদয়েৎ ॥ ৬-৮১ ॥

যাবত্তৎফলসংখ্যানং তদ্দীপানাং চ মধ্যতঃ ।
তাবদ্বর্ষসহস্রাণি রুদ্রলোকে মহীয়তে ॥ ৬-৮২ ॥

মূলকং মধ্যতঃ স্থাপ্য তৎপূর্বে বালমূলকম্ ।
আগ্নেয়্যাং বাস্তুকং স্থাপ্য যাম্যায়াং ক্ষারবাস্তুকম্ ॥ ৬-৮৩ ॥

পালক্যং নৈরৃতে স্থাপ্য সুমুখং পশ্চিমে ন্যসেৎ ।
কুহদ্রকং চ বায়ব্যামুত্তরে বাপি তালিকীম্ ॥ ৬-৮৪ ॥

কুসুম্ভশাকমৈশান্যাং সর্বশাকানি তদ্বহিঃ ।
পূর্বক্রমেণ বিন্যস্য শিবায় বিনিবেদয়েৎ ॥ ৬-৮৫ ॥

যাবত্তন্মূলনালানাং পত্ত্রসংখ্যা চ কীর্তিতা ।
তাবদ্বর্ষসহস্রাণি রুদ্রলোকে মহীয়তে ॥ ৬-৮৬ ॥

দত্ত্বা লভেন্মহাভোগান্গুগ্গুল্বদ্রেঃ পলদ্বয়ম্ ।
বর্ষকোটিদ্বয়ং স্বর্গে দ্বিগুণং গুডমিশ্রিতৈঃ ॥ ৬-৮৭ ॥

গুডার্দ্রকং সলবণমাম্রমঞ্জরিসংয়ুতম্ ।
নিবেদ্য গুরবে ভক্ত্যা সৌভাগ্যং পরমং লভেৎ ॥ ৬-৮৮ ॥

হস্তারোপ্যেণ বা কৃৎবা মহারত্নান্বিতাং মহীম্ ।
নিবেদয়িৎবা শর্বায় শিবতুল্যঃ প্রজায়তে ॥ ৬-৮৯ ॥

বজ্রেন্দ্রনীলবৈডূর্য- পদ্মরাগং সমৌক্তিকম্ ।
কীটপক্ষং সুবর্ণং চ মহারত্নানি সপ্ত বৈ ॥ ৬-৯০ ॥

যশ্চ সিংহাসনং দদ্যান্মহারত্নান্বিতং নৃপঃ ।
ক্ষুদ্ররত্নৈশ্চ বিবিধৈস্তস্য পুণ্যফলং শৃণু ॥ ৬-৯১ ॥

কুলত্রিংশকসংয়ুক্তঃ সান্তঃপুরপরিচ্ছদঃ ।
সমস্তভৃত্যসংয়ুক্তঃ শিবলোকে মহীয়তে ॥ ৬-৯২ ॥

তত্র ভুক্ত্বা মহাভোগান্শিবতুল্যপরাক্রমঃ ।
আমহাপ্রলয়ং যাবত্তদন্তে মুক্তিমাপ্নুয়াৎ ॥ ৬-৯৩ ॥

যদি চেদ্রাজ্যমাকঙ্ক্ষেত্ততঃ সর্বসমাহিতঃ ।
সপ্তদ্বীপসমুদ্রায়াঃ ক্ষিতেরধিপতির্ভবেৎ ॥ ৬-৯৪ ॥

জন্মকোটিসহস্রাণি জন্মকোটিশতানি চ ।
রাজ্যং কৃৎবা ততশ্চান্তে পুনঃ শিবপুরং ব্রজেৎ ॥ ৬-৯৫ ॥

এতদেব ফলং জ্ঞেয়ং মকুটাভরণাদিষু ।
রত্নাসনপ্রদানেন পাদুকে বিনিবেদয়েৎ ॥ ৬-৯৬ ॥

দদ্যাদ্যঃ কেবলং বজ্রং শুদ্ধং গোধূমমাত্রকম্ ।
শিবায় স শিবে লোকে তিষ্ঠেদাপ্রলয়ং সুখী ॥ ৬-৯৭ ॥

ইন্দ্রনীলপ্রদানেন স বৈডূর্যপ্রদানতঃ ।
মোদতে বিবিধৈর্ভোগৈঃ কল্পকোটিং শিবে পুরে ॥ ৬-৯৮ ॥

মসূরমাত্রমপি যঃ পদ্মরাগং সুশোভনম্ ।
নিবেদয়িৎবা শর্বায় মোদতে কালমক্ষয়ম্ ॥ ৬-৯৯ ॥

নিবেদ্য মৌক্তিকং স্বচ্ছমেকভাগৈকমাত্রকম্ ।
ভোগৈঃ শিবপুরে দিব্যৈঃ কল্পকোটিং প্রমোদতে ॥ ৬-১০০ ॥

কীটপক্ষং মহাশুদ্ধং নিবেদ্য যবমাত্রকম্ ।
শিবায়াদ্যঃ শিবে লোকে মোদতে কালমক্ষয়ম্ ॥ ৬-১০১ ॥

হেম্না কৃৎবা চ যঃ পুষ্পমপি মাষকমাত্রকম্ ।
নিবেদয়িৎবা শর্বায় বর্ষকোটিং বসেদ্দিবি ॥ ৬-১০২ ॥

ক্ষুদ্ররত্নানি যো দদ্যাদ্ধেম্নি বদ্ধানি শম্ভবে ।
মোদতে স শিবে লোকে কল্পকোট্যযুতং নরঃ ॥ ৬-১০৩ ॥

যথা যথা মহারত্নং শোভনং চ যথা যথা ।
তথা তথা মহৎপুণ্যং জ্ঞেয়ং তচ্ছিবদানতঃ ॥ ৬-১০৪ ॥

ভূমিভাগে স(?)বিস্তীঋণে জম্বূদ্বীপং প্রকল্পয়েৎ ।
অষ্টাবরণসংয়ুক্তং নগেন্দ্রাষ্টকভূষিতম্ ॥ ৬-১০৫ ॥

তন্মধ্যে কারয়েদ্দিব্যং মেরুপ্রাসাদমুত্তমম্ ।
অনেকশিখরাকীর্ণমশেষামরসংয়ুতম্ ॥ ৬-১০৬ ॥

বহিঃ সুবর্ণনিচিতং সর্বরত্নোপশোভিতম্ ।
চতুঃপ্রগ্রীবকোপেতং চক্ষুর্লিঙ্গসমায়ুতম্ ॥ ৬-১০৭ ॥

চতুর্দিক্ষু বনোপেতং চতুর্ভিঃ সংয়ুতৈঃ শরৈঃ ।
চতুর্ণাং পুরয়ুক্তেন প্রাকারেণ চ সংয়ুতম্ ॥ ৬-১০৮ ॥

মেরুপ্রাসাদমিত্যেবং হেমরত্নবিভূষিতম্ ।
যঃ কারয়েদ্বনোপেতং সো ঽনন্তফলমাপ্নুয়াৎ ॥ ৬-১০৯ ॥

ভূম্যম্ভঃপরমাণূনাং যথা সংখ্যা ন বিদ্যতে ।
শিবায়তনপুণ্যস্য তথা সংখ্যা ন বিদ্যতে ॥ ৬-১১০ ॥

কুলত্রিংশকসংয়ুক্তঃ সর্বভৃত্যসমন্বিতঃ ।
কলত্রপুত্রমিত্রৈশ্চ সর্বস্বজনসংয়ুতঃ ॥ ৬-১১১ ॥

আশ্র্তিতোপাশ্রিতৈঃ সর্বৈরশেষগণসংয়ুতঃ ।
যথা শিবস্তথৈবায়ং শর্বলোকে স পূজ্যতে ॥ ৬-১১২ ॥

ন চ মানুষ্যকং লোকমাগচ্ছেৎকৃপণং পুনঃ ।
সর্বজ্ঞঃ পরিপূর্ণশ্চ মুক্তঃ স্বাত্মনি তিষ্ঠতি ॥ ৬-১১৩ ॥

যঃ শিবায় বনং কৃৎবা মুদাব্দসলিলোত্থিতম্(?) ।
তদ্দণ্ডকোপশোভং চ হস্তে কুর্বীত সর্বদা ॥ ৬-১১৪ ॥

শোভয়েদ্ভূতনাথং বা চন্দ্রশালাং ক্বচিৎক্বচিৎ ।
বেদীং বাথাভ্যপদ্যন্ত প্রোন্নতাঃ স্তম্ভপঙ্ক্তয়ঃ ॥ ৬-১১৫ ॥

শাতকুম্ভময়ীং বাপি সর্বলক্ষণসংয়ুতাম্ ।
ঈশ্বরপ্রতিমাং সৌম্যাং কারয়েৎপুরুষোচ্ছ্রিতাম্ ॥ ৬-১১৬ ॥

ত্রিশূলসব্যহস্তাং চ বরদাভয়দায়িকাং ।
সব্যহস্তাক্ষমালাং চ জটাকুসুমভূষিতাম্ ॥ ৬-১১৭ ॥

পদ্মসিংহাসনাসীনাং বৃষস্থাং বা সমুচ্ছ্রিতাম্ ।
বিমানস্থাং রথস্থাং বা বেদিস্থাং বা প্রভান্বিতাম্ ॥ ৬-১১৮ ॥

সৌম্যবক্ত্রাং করালাং বা মহাভৈরবরূপিণীম্ ।
অত্যুচ্ছ্রিতাং সুবিস্তীর্ণাং নৃত্যস্থাং যোগসংস্থিতাম্ ॥ ৬-১১৯ ॥

কুর্যাদসংভবে হেম্নস্তারেণ বিমলেন চ ।
আরকূটময়ীং বাপি তাম্রমৃচ্ছৈলদারুজাম্ ॥ ৬-১২০ ॥

অশেষকৈঃ সরূপৈশ্চ বর্ণকৈর্বা পটে লিখেৎ ।
কুড্যে বা ফলকে বাপি ভক্ত্যা বিত্তানুসারতঃ ॥ ৬-১২১ ॥

একাং সপরিবারাং বা পার্বতীং গণসংয়ুতাম্ ।
প্রতীহারসমোপেতাং(?) কুর্যাদেবাবিকল্পতঃ ॥ ৬-১২২ ॥

পীঠং বা কারয়েদ্রৌপ্যং তাম্রং পিত্তলসংভবম্ ।
চতুর্মুখৈকবক্ত্রং বা বহিঃ কাঞ্চনসংস্কৃতম্ ॥ ৬-১২৩ ॥

পৃথক্পৃথগনেকানি কারয়িৎবা মুখানি তু ।
সৌম্যভৈরবরূপাণি শিবস্য বহুরূপিণঃ ॥ ৬-১২৪ ॥

নানাভরণয়ুক্তানি হেমরৌপ্যকৃতানি চ ।
শিবস্য রথয়াত্রায়াং তানি লোকস্য দর্শয়েৎ ॥ ৬-১২৫ ॥

উক্তানি যানি পুণ্যানি সংক্ষেপেণ পৃথক্পৃথক্ ।
কৃৎবৈকেন মমৈতেষামক্ষয়ং ফলমাপ্নুয়াৎ ॥ ৬-১২৬ ॥

মাতুঃ পিতুঃ সহোপায়ৈর্(?) দশভির্দশভিঃ কুলৈঃ ।
কলত্রপুত্রমিত্রাদ্যৈর্ভৃত্যৈর্যুক্তঃ স বান্ধবৈঃ ॥ ৬-১২৭ ॥

অয়ুতেন বিমানানাং সর্বকাময়ুতেন চ ।
ভুঙ্ক্তে স্বয়ং মহাভোগানন্তে মুক্তিমবাপ্নুয়াৎ ॥ ৬-১২৮ ॥

মণ্ডপস্তম্ভপর্যন্তে কীলয়েদ্দর্পণান্বিতম্ ।
অভিষিচ্য জনা যস্মিন্পুজাং কুবন্তি বিল্বকৈঃ ॥ ৬-১২৯ ॥

কালকালকৃতিং কৃৎবা কীলয়েদ্যঃ শিবাশ্রমে ।
সর্বলোকোপকারায় পূজয়েচ্চ দিনে দিনে ॥ ৬-১৩০ ॥

ধূপবেলাপ্রমাণার্থং কল্পয়েদ্যঃ শিবাশ্রমে ।
ক্ষরন্তীং পূর্যমাণাং বা সদায়ামে ঘটীং নৃপঃ ॥ ৬-১৩১ ॥

এষামেকতমং পুণ্যং কৃৎবা পাপবিবর্জিতঃ ।
শিবলোকে নরঃ প্রাপ্য সর্বজ্ঞঃ স সুখী ভবেৎ ॥ ৬-১৩২ ॥

রথয়াত্রাং প্রবক্ষ্যামি শিবস্য পরমাত্মনঃ ।
সর্বলোকহিতার্থায় মহাশিল্পিবিনির্মিতাম্ ॥ ৬-১৩৩ ॥

রথমধ্যে সমাবেশ্য যথা যষ্টিং তু কীলয়েৎ ।
যষ্টের্মধ্যে স্থিতং কার্যং বিমানমতিশোভিতম্ ॥ ৬-১৩৪ ॥

পঞ্চভৌমং ত্রিভৌমং বা দৃঢবংশপ্রকল্পিতম্ ।
কর্মণা সুনিবদ্ধং চ রজ্জুভিশ্চ সুসংয়ুতম্ ॥ ৬-১৩৫ ॥

পঞ্চশালাণ্ডিকৈর্যুক্তং নানাভক্তিসমন্বিতম্ ।
চিত্রবর্ণপরিচ্ছন্নং পটৈর্বা বর্ণকান্বিতৈঃ ॥ ৬-১৩৬ ॥

লম্বকৈঃ সূত্রদাম্না চ ঘণ্টাচামরভূষিতম্ ।
বুদ্বুদৈরর্ধচন্দ্রৈশ্চ দর্পণৈশ্চ সমুজ্জ্বলম্ ॥ ৬-১৩৭ ॥

কদল্যর্ধধ্বজৈর্যুক্তং মহাচ্ছত্ত্রং মহাধ্বজম্ ।
পুষ্পমালাপরিক্ষিপ্তং সর্বশোভাসমন্বিতম্ ॥ ৬-১৩৮ ॥

মহারথবিমানে ঽস্মিন্স্থাপয়েদ্গণসংয়ুতম্ ।
ঈশ্বরপ্রতিমাং হেম্নি প্রথমে পুরমণ্ডপে ॥ ৬-১৩৯ ॥

মুখত্রয়ং চ বধ্নীয়াদ্বহিঃ কুর্যাত্তথাশ্রিতম্ ।
পুরে পুরে বহির্দিক্ষু গৃহকেষু সমাশ্রিতম্ ॥ ৬-১৪০ ॥

চতুষ্কং শিববক্ত্রাণাং সংস্থাপ্য প্রতিপূজয়েৎ ।
দিনত্রয়ং প্রকুর্বীত স্নানমর্চনভোজনম্ ॥ ৬-১৪১ ॥

নৃত্যক্রীডাপ্রয়োগেণ গেয়মঙ্গলপাঠকৈঃ ।
মহাবাদিত্রনির্ঘোষৈঃ পৌষপূর্ণিমপর্বণি ॥ ৬-১৪২ ॥

ভ্রাময়েদ্রাজমার্গেণ চতুর্থে ঽহনি তদ্রথম্ ।
ততঃ স্বস্থানমানীয় তচ্ছেষমপি বর্ধয়েৎ ॥ ৬-১৪৩ ॥

অবধার্য জগদ্ধাত্রী প্রতিমামবতারয়েৎ ।
মহাবিমানয়াত্রৈষা কর্তব্যা পট্টকে ঽপি বা ॥ ৬-১৪৪ ॥

বংশৈর্নবৈঃ সুপক্বৈশ্চ কটং কুর্যাদ্ভরক্ষমম্(?) ।
বৃত্তং দ্বিগুণদীর্ঘং চ চতুরশ্রমধঃ সমম্ ॥ ৬-১৪৫ ॥

সর্বত্র চর্মণা বদ্ধং মহায়ষ্টিসমাশ্রিতম্ ।
মুখং বদ্ধং চ কুর্বীত বংশমণ্ডলিনা দৃঢম্ ॥ ৬-১৪৬ ॥

কটে ঽস্মিংস্তানি বস্ত্রাণি স্থাপ্য বধ্নীত যত্নতঃ ।
উপর্যুপরি সর্বাণি তন্মধ্যে প্রতিমাং ন্যসেৎ ॥ ৬-১৪৭ ॥

বর্ণকৈঃ কুঙ্কুমাদ্যৈশ্চ চিত্রপুষ্পৈশ্চ পূজয়েৎ ।
নানাভরণপূজাভির্মুক্তাহারপ্রলম্বিভিঃ ॥ ৬-১৪৮ ॥

রথস্য মহতো মধ্যে স্থাপ্য পট্টদ্বয়ং দৃঢম্ ।
অধরোত্তরভাগেন মধ্যে ছিদ্রসমন্বিতম্ ॥ ৬-১৪৯ ॥

কটিয়ষ্টেরধোভাগং স্থাপ্য ছিদ্রময়ং শুভৈঃ ।
আবদ্ধ্য কীলয়েদ্যত্নাদ্যষ্ট্যর্ধং চ ধ্বজাষ্টকম্ ॥ ৬-১৫০ ॥

কটস্য পৃষ্টং সর্বত্র কারয়েৎপটসংবৃতম্ ।
তৎপটে চ লিখেৎসোমং সগণং সবৃষং শিবম্ ॥ ৬-১৫১ ॥

বিচিত্রপুষ্পস্রগ্দাম্না সমন্তাদ্ভূষয়েৎকটম্ ।
রবকৈঃ কিঙ্কিণীজালৈর্ঘণ্টাচামরভূষিতৈঃ ॥ ৬-১৫২ ॥

মহাপূজাবিশেষৈশ্চ কৌতূহলসমন্বিতম্ ।
বাদ্যারম্ভোপচারেণ মার্গশোভাং প্রকল্পয়েৎ ॥ ৬-১৫৩ ॥

তদ্রথং ভ্রাময়েদ্যত্নাদ্রাজমার্গেণ সর্বতঃ ।
ততঃ স্বাশ্রমমানীয় স্থাপয়েত্তৎসমীপতঃ ॥ ৬-১৫৪ ॥

মহাশব্দং ততঃ কুর্যাত্তালত্রয়সমন্বিতম্ ।
ততস্তুষ্ণীং স্থিতে লোকে তচ্ছান্তিমিহ ধারয়েৎ ॥ ৬-১৫৫ ॥

শিবং তু সর্বজগতঃ শিবং গোব্রাহ্মণস্য চ ।
শিবমস্তু নৃপাণাং চ তদ্ভক্তানাং জনস্য চ ॥ ৬-১৫৬ ॥

রাজা বিজয়মাপ্নোতি পুত্রপৌত্রৈশ্চ বর্ধতাম্ ।
ধর্মনিষ্ঠশ্চ ভবতু প্রজানাং চ হিতে রতঃ ॥ ৬-১৫৭ ॥

কালবর্ষী তু পর্জন্যঃ সস্যসম্পত্তিরুত্তমা ।
সুভিক্ষাৎক্ষেমমাপ্নোতি কার্যসিদ্ধিশ্চ জায়তাম্ ॥ ৬-১৫৮ ॥

দোষাঃ প্রয়ান্তু নাশং চ গুণাঃ স্থৈর্যং ভজন্তু বঃ ।
বহুক্ষীরয়ুতা গাবো হৃষ্টপুষ্টা ভবন্তু বঃ ॥ ৬-১৫৯ ॥

এবং শিবমহাশান্তিমুচ্চার্য জগতঃ ক্রমাৎ ।
অভিবর্ধ্য ততঃ শেষমৈশ্বরীং সার্বকামিকীম্ ॥ ৬-১৬০ ॥

শিবমালাং সমাদায় সদাসীপরিচারিকঃ ।
ফলৈর্ভক্ষৈশ্চ সংয়ুক্তাং গৃহ্য পাত্রীং নিবেশয়েৎ ॥ ৬-১৬১ ॥

পাত্রীং চ ধারয়েন্মূর্ধ্না সোষ্ণীষাং দেবপুত্রকঃ ।
অলংকৃতঃ শুক্লবাসা ধার্মিকঃ সততং শুচিঃ ॥ ৬-১৬২ ॥

ততশ্চ তাং সমুৎক্ষিপ্য পাণিনা ধারয়েদ্বুধঃ ।
প্রব্রূয়াদপরশ্চাত্র শিবধর্মস্য ভাজকঃ ॥ ৬-১৬৩ ॥

তোয়ং যথা ঘটীসংস্থমজস্রং ক্ষরতে তথা ।
ক্ষরতে সর্বলোকানাং তদ্বদায়ুরহর্নিশম্ ॥ ৬-১৬৪ ॥

যদা সর্বং পরিত্যজ্য গন্তব্যমবশৈর্ধ্রুবম্ ।
তদা ন দীয়তে কস্মাৎপাথেয়ার্থমিদং ধনম্ ॥ ৬-১৬৫ ॥

কলত্রপুত্রমিত্রাণি পিতা মাতা চ বান্ধবাঃ ।
তিষ্ঠন্তি ন মৃতস্যার্থে পরলোকে ধনানি চ ॥ ৬-১৬৬ ॥

নাস্তি ধর্মসমং মিত্রং নাস্তি ধর্মসমঃ সখা ।
যতঃ সর্বৈঃ পরিত্যক্তং নরং ধর্মো ঽনুগচ্ছতি ॥ ৬-১৬৭ ॥

তস্মাদ্ধর্মং সমুদ্দিশ্য যঃ শেষামভিবর্ধয়েৎ ।
সমস্তপাপনির্মুক্তঃ শিবলোকং স গচ্ছতি ॥ ৬-১৬৮ ॥

উপর্যুপরি বিত্তেন যঃ শেষামভিবর্ধয়েৎ ।
তস্যেয়মুত্তমা দেয়া যতশ্চান্যা ন বর্ধতে ॥ ৬-১৬৯ ॥

ইত্যেবং মধ্যমাং শেষাং বর্ধয়েদ্বা কনীয়সীম্ ।
ততস্তেষাং প্রদাতব্যা সর্বশোকস্য শান্তয়ে ॥ ৬-১৭০ ॥

যেনোত্তমা গৃহীতা স্যাচ্শিবশেষা মহীয়সী ।
প্রাপণীয়া গৃহং তস্য তথৈব শিরসা বৃতা ॥ ৬-১৭১ ॥

ধ্বজচ্ছত্ত্রবিমানাদ্যৈর্মহাবাদিত্রনিঃস্বনৈঃ ।
গৃহদ্বারং ততঃ প্রাপ্তমর্চয়িৎবা নিবেশয়েৎ ॥ ৬-১৭২ ॥

দদ্যাদ্গোত্রকলত্রাণাং ভৃত্যানাং স্বজনস্য চ ।
তর্পয়েচ্চানতান্(?) ভক্ত্যা বাদিত্রধ্বজবাহকান্ ॥ ৬-১৭৩ ॥

এবমাদীয়তে ভক্ত্যা যঃ শিবস্যোত্তমা গৃহে ।
শোভয়া রাজমার্গেণ তস্য ধর্মফলং শৃণু ॥ ৬-১৭৪ ॥

সমস্তপাপনির্মুক্তঃ সমস্তকুলসংয়ুতঃ ।
শিবলোকমবাপ্নোতি সভৃত্যপরিচারকঃ ॥ ৬-১৭৫ ॥

তত্র দিব্যৈর্মহাভোগৈর্বিমানৈঃ সার্বকামিকৈঃ ।
কল্পানাং ক্রীডতে কোটিমন্তে নির্বাণমাপ্নুয়াৎ ॥ ৬-১৭৬ ॥

রথস্য যাত্রাং যঃ কুর্যাদিত্যেবমুপশোভয়া ।
ভক্ষভোজ্যপ্রদানৈশ্চ তৎফলং শৃনু যত্নতঃ ॥ ৬-১৭৭ ॥

অশেষপাপনির্মুক্তঃ সর্বভৃত্যসমন্বিতঃ ।
কুলত্রিংশকমুদ্ধৃত্য সুহৃদ্ভিঃ স্বজনৈঃ সহ ॥ ৬-১৭৮ ॥

সর্বকাময়ুতৈর্দিব্যৈঃ স্বচ্ছন্দগমনালয়ৈঃ ।
মহাবিমানৈঃ শ্রীমদ্ভির্দিব্যস্ত্রীপরিবারিতঃ ॥ ৬-১৭৯ ॥

ইচ্ছয়া ক্রীডতে ভোগৈঃ কল্পকোটিং শিবে পুরে ।
জ্ঞানয়োগং ততঃ প্রাপ্য সংসারাদবমুচ্যতে ॥ ৬-১৮০ ॥

শিবস্য রথয়াত্রায়ামুপবাসপরঃ ক্ষমী ।
পুরতঃ পৃষ্ঠতো বাপি গচ্ছংস্তস্য ফলং শৃণু ॥ ৬-১৮১ ॥

অশেষপাপনির্মুক্তঃ শুদ্ধঃ শিবপুরং গতঃ ।
মহারথোপমৈর্যানৈঃ কল্পাশীতিং প্রমোদতে᳚ ॥ ৬-১৮২ ॥

ধ্বজচ্ছত্ত্রপতাকাভির্দীপদর্পণচামরৈঃ ।
ধূপৈর্বিতানকলশৈরুপশোভা সহস্রশঃ ॥ ৬-১৮৩ ॥

গৃহীৎবা যাতি পুরতঃ স্বেচ্ছয়া বা পরেচ্ছয়া ।
সম্পর্কাৎকৌতুকাল্লাভাচ্ছিবলোকে ব্রজন্তে তে ॥ ৬-১৮৪ ॥

শিবস্য রথয়াত্রাং তু যঃ প্রপশ্যতি ভক্তিতঃ ।
প্রসঙ্গাৎকৌতুকাদ্বাপি তে ঽপি যান্তি শিবং পুরম্ ॥ ৬-১৮৫ ॥

নানায়ত্নাদিশেষান্তে নানাপ্রেক্ষণকানি চ ।
কুর্বীত রথয়াত্রায়াং রমতে চ বিভূষিতা ॥ ৬-১৮৬ ॥

তে ভোগৈর্বিবিধৈর্দিব্যৈঃ শিবাসন্না গণেশ্বরাঃ ।
ক্রীডন্তি রুদ্রভবনে কল্পানাং বিংশতীর্নরাঃ ॥ ৬-১৮৭ ॥

মহতা জ্ঞানসঙ্ঘেন তস্মাচ্ছিবরথেন চ ।
পৃথক্জীবা মৃতা যান্তি শিবলোকং ন সংশয়ঃ ॥ ৬-১৮৮ ॥

শ্রীপর্বতে মহাকালে বারাণস্যাং মহালয়ে ।
জল্পেশ্বরে কুরুক্ষেত্রে কেদারে মণ্ডলেশ্বরে ॥ ৬-১৮৯ ॥

গোকর্ণে ভদ্রকর্ণে চ শঙ্কুকর্ণে স্থলেশ্বরে ।
ভীমেশ্বরে সুবর্ণাক্ষে কালঞ্জরবনে তথা ॥ ৬-১৯০ ॥

এবমাদিষু চান্যেষু শিবক্ষেত্রেষু যে মৃতাঃ ।
জীবাশ্চরাচরাঃ সর্বে শিবলোকং ব্রজন্তি তে ॥ ৬-১৯১ ॥

প্রয়াগং কামিকং তীর্থমবিমুক্তং তু নৈষ্ঠিকম্ ।
শ্রীপর্বতং চ বিজ্ঞেয়মিহামুত্র চ সিদ্ধিদম্ ॥ ৬-১৯২ ॥

প্রসঙ্গেনাপি যঃ পশ্যেদন্যত্র প্রস্থিতঃ ক্বচিৎ ।
শ্রীপর্বতং মহাপুণ্যং সো ঽপি যাতি শিবং পুরম্ ॥ ৬-১৯৩ ॥

ব্রজেদ্যঃ শিবতীর্থানি সর্বপাপৈঃ প্রমুচ্যতে ।
পাপয়ুক্তঃ শিবজ্ঞানং প্রাপ্য নির্বাণমাপ্নুয়াৎ ॥ ৬-১৯৪ ॥

তীর্থস্থানেষু যঃ শ্রাদ্ধং শিবরাত্রে প্রয়ত্নতঃ ।
কল্পয়িৎবানুসারেণ কালস্য বিষুবস্য চ ॥ ৬-১৯৫ ॥

তীর্থয়াত্রাগতং শান্তং হাহাভূতমচেতনম্ ।
ক্ষুৎপিপাসাতুরং লোকে পাংসুপাদং ৎবরান্বিতম্ ॥ ৬-১৯৬ ॥

সংতর্পয়িৎবা যত্নেন ম্লানলক্ষ্মীমিবাম্বুভিঃ ।
পাদ্যাসনপ্রদানেন কস্তেন পুরুষঃ সমঃ ॥ ৬-১৯৭ ॥

অশ্নন্তি যাবত্তৎপিণ্ডং তীর্থনির্ধূতকল্মষাঃ ।
তাবদ্বর্ষসহস্রাণি তদ্দাতাস্তে শিবে পুরে ॥ ৬-১৯৮ ॥

দদ্যাদ্যঃ শিবসত্ত্রার্থং মহিষীং সুপয়স্বিনীম্ ।
মোদতে স শিবে লোকে যুগকোটিশতং নরঃ ॥ ৬-১৯৯ ॥

আর্তায় শিবভক্তায় দদ্যাদ্যঃ সুপয়স্বিনীম্ ।
অজামেকাং সুপুষ্টাঙ্গীং তস্য পুণ্যফলং শৃণু ॥ ৬-২০০ ॥

যাবত্তদ্রোমসংখ্যানং তৎপ্রসূতিকুলেষু চ ।
তাবদ্বর্ষসহস্রাণি রুদ্রলোকে মহীয়তে ॥ ৬-২০১ ॥

মৃদুরোমাঞ্চিতাং কৃষ্ণাং নিবেদ্য গুরবে নরঃ ।
রোম্ণি রোম্ণি সুবর্ণস্য দত্তস্য ফলমাপ্নুয়াৎ ॥ ৬-২০২ ॥

গজাশ্বরথসংয়ুক্তৈর্বিমানৈঃ সার্বকামিকৈঃ ।
সানুগঃ ক্রীডতে ভোগৈঃ কল্পকোটিং শিবে পুরে ॥ ৬-২০৩ ॥

নিবেদ্যাশ্বতরং পুষ্টমদুষ্টং গুরবে নরঃ ।
সংগতিং সোপকরণং ভোগান্ভুঙ্ক্তে শিবে পুরে ॥ ৬-২০৪ ॥

দিব্যাশ্বয়ুক্তৈঃ শ্রীমদ্ভির্বিমানৈঃ সার্বকামিকৈঃ ।
কোটিং কোটিং চ কল্পানাং তদন্তে স্যান্মহীপতিঃ ॥ ৬-২০৫ ॥

অপি যোজনমাত্রায় শিবিকাং পরিকল্পয়েৎ ।
গুরোঃ শান্তস্য দান্তস্য তস্য পুণ্যফলং শৃণু ॥ ৬-২০৬ ॥

বিমানানাং সহস্রেণ সর্বকাময়ুতেন চ ।
কল্পকোট্যযুতং সাগ্রং ভোগান্ভুঙ্ক্তে শিবে পুরে ॥ ৬-২০৭ ॥

ছাগং মেষং ময়ূরং চ কুক্কুটং শারিকাং শুকম্ ।
বালক্রীডনকানেতানিত্যাদ্যানপরানপি ॥ ৬-২০৮ ॥

নিবেদয়িৎবা স্কন্দায় তৎসায়ুজ্যমবাপ্নুয়াৎ ।
ভুক্ত্বা তু বিপুলান্ভোগাংস্তদন্তে স্যাদ্দ্বিজোত্তমঃ ॥ ৬-২০৯ ॥

মুসলোলূখলাদ্যানি গৃহোপকরণানি চ ।
দদ্যাচ্ছিবগৃহস্থেভ্যস্তস্য পূণ্যফলং শৃণু ॥ ৬-২১০ ॥

প্রত্যেকং কল্পমেকৈকং গৃহোপকরণৈর্নরঃ ।
অন্তে দিবি বসেদ্ভোগৈস্তদন্তে চ গৃহী ভবেৎ ॥ ৬-২১১ ॥

খর্জূরতালপত্ত্রৈর্বা চর্মণা বা সুকল্পিতম্ ।
দত্ত্বা কোট্যাসনং বৃত্তং শিবলোকমবাপ্নুয়াৎ ॥ ৬-২১২ ॥

প্রাতর্নীহারবেলায়াং হেমন্তে শিবয়োগিনাম্ ।
কৃৎবা প্রতাপনায়াগ্নিং শিবলোকে মহীয়তে ॥ ৬-২১৩ ॥

সূর্যায়ুতপ্রভাদীপ্তৈর্বিমানৈঃ সার্বকামিকৈঃ ।
কল্পকোটিশতং ভোগান্ভুক্ত্বা স তু মহীপতিঃ ॥ ৬-২১৪ ॥

যঃ প্রান্তরং বিদেশং বা গচ্ছন্তং শিবয়োগিনম্ ।
ভোজয়ীত যথাশক্ত্যা শিবলোকে মহীয়তে ॥ ৬-২১৫ ॥

যশ্ছত্ত্রং ধারয়েদ্গ্রীষ্মে গচ্ছতে শিবয়োগিনে ।
স মৃতঃ পৃথিবীং কৃৎস্নামেকচ্ছত্ত্রামবাপ্নুয়াৎ ॥ ৬-২১৬ ॥

যঃ সমুদ্ধরতে মার্গে মাত্রোপকরণাসনম্ ।
শিবয়োগপ্রবৃত্তস্য তস্য পুণ্যফলং শৃণু ॥ ৬-২১৭ ॥

কল্পায়ুতং নরঃ সাগ্রং ভুক্ত্বা ভোগাঞ্ছিবে পুরে ।
তদন্তে প্রাপ্নুয়াদ্রাজ্যং সর্বৈশ্বর্যসমন্বিতম্ ॥ ৬-২১৮ ॥

অভ্যঙ্গোদ্বর্তনং স্নানমার্তস্য শিবয়োগিনঃ ।
কৃৎবাপ্নোতি মহাভোগান্কল্পাঞ্ছিবপুরে নরঃ ॥ ৬-২১৯ ॥

অপনীয় সমুচ্ছিষ্টং ভক্তিতঃ শিবয়োগিনাম্ ।
দশধেনুপ্রদানস্য ফলমাপ্নোতি মানবঃ ॥ ৬-২২০ ॥

পঞ্চগব্যসমং জ্ঞেয়মুচ্ছিষ্টং শিবয়োগিনাম্ ।
তদ্ভুক্ত্বা লভতে শুদ্ধিং মহতঃ পাতকাদপি ॥ ৬-২২১ ॥

নারী চ ভুক্ত্বা সৎপুত্রং কুলাধারং গুণান্বিতম্ ।
রাজ্যযোগ্যং ধনাঢ্যং চ প্রাপ্নুয়াদ্ধর্মতৎপরম্ ॥ ৬-২২২ ॥

যশ্চ যাং শিবয়জ্ঞায় গৃহস্থঃ পরিকল্পয়েৎ ।
শিবভক্তো ঽস্য মহতঃ পরমং ফলমাপ্নুয়াৎ ॥ ৬-২২৩ ॥

শিবোমাং চ প্রয়ত্নেন ভক্ত্যাব্দং যো ঽনুপালয়েৎ ।
গবাং লক্ষপ্রদানস্য সম্পূর্ণং ফলমাপ্নুয়াৎ ॥ ৬-২২৪ ॥

প্রাতঃ প্রদদ্যাৎসঘৃতং সুকৃতং বালপিণ্ডকম্ ।
দূর্বাং চ বালবৎসানাং(?) তস্য পুণ্যফলং শৃণু ॥ ৬-২২৫ ॥

যাবত্তদ্বালবৎসানাং পানাহারং প্রকল্পয়েৎ ।
তাবদষ্টায়ুতান্পূর্বৈর্ভোগান্ভুঙ্ক্তে শিবে পুরে ॥ ৬-২২৬ ॥

বিধবানাথবৃদ্ধানাং প্রদদ্যাদ্যঃ প্রজীবনম্ ।
আভূতস্সম্প্লবং যাবচ্ছিবলোকে মহীয়তে ॥ ৬-২২৭ ॥

দদ্যাদ্যঃ সর্বজন্তূনামাহারমনুয়ত্নতঃ ।
ত্রিঃ পৃথ্বীং রত্নসম্পূর্ণাং যদ্দত্ত্বা তৎফলং লভেৎ ॥ ৬-২২৮ ॥

বিনয়ব্রতদানানি যানি সিদ্ধানি লোকতঃ ।
তানি তেনৈব বিধিনা শিবমন্ত্রেণ কল্পয়েৎ ॥ ৬-২২৯ ॥

নিবেদয়ীত রুদ্রায় রুদ্রাণ্যাঃ ষণ্মুখস্য চ ।
প্রাপ্নুয়াদ্বিপুলান্ভোগান্দিব্যাঞ্ছিবপুরে নরঃ ॥ ৬-২৩০ ॥

পুনর্যঃ কর্তরীং দদ্যাৎকেশক্লেশাপনুত্তয়ে ।
সর্বক্লেশবিনির্মুক্তঃ শিবলোকে সুখী ভবেৎ ॥ ৬-২৩১ ॥

নাসিকাশোধনং দদ্যাৎসংদংশং শিবয়োগিনে ।
বর্ষকোটিং মহাভোগৈঃ শিবলোকে মহীয়তে ॥ ৬-২৩২ ॥

নখচ্ছেদনকং দত্ত্বা শিবলোকে মহীয়তে ।
বর্ষলক্ষং মহাভোগৈঃ শিবলোকে মহীয়তে ॥ ৬-২৩৩ ॥

দত্ত্বাঞ্জনশলাকাং বা লোহাদ্যাং শিবয়োগিনে ।
ভোগাঞ্ছিবপুরে প্রাপ্য জ্ঞানচক্ষুরবাপ্নুয়াৎ ॥ ৬-২৩৪ ॥

কর্ণশোধনকং দত্ত্বা লোহাদ্যং শিবয়োগিনে ।
বর্ষকোটিং মহাভোগৈঃ শিবলোকে মহীয়তে ॥ ৬-২৩৫ ॥

দদ্যাদ্যঃ শিবভক্তায় সূচীং কৌপীনশোধনীম্ ।
বর্ষলক্ষং স লক্ষার্ধং শিবলোকে মহীয়তে ॥ ৬-২৩৬ ॥

নিবেদ্য শিবয়োগিভ্যঃ সূচিকং সূত্রসংয়ুতম্ ।
বর্ষলক্ষং মহাভোগৈঃ ক্রীডতে স শিবে পুরে ॥ ৬-২৩৭ ॥

দদ্যাদ্যঃ শিবয়োগিভ্যঃ সুকৃতাং পত্রবেধনীম্ ।
বর্ষলক্ষং মহাভোগৈঃ শিবলোকে মহীয়তে ॥ ৬-২৩৮ ॥

দদ্যাদ্যঃ পুস্তকাদীনাং সর্বকার্যার্থকর্তৃকাম্ ।
পঞ্চলক্ষং মহাভোগৈর্মোদতে স শিবে পুরে ॥ ৬-২৩৯ ॥

শমীন্ধনতৃণাদীনাং দদ্যাত্তচ্ছেদনং চ যঃ ।
ক্রীডতে স শিবে লোকে বর্ষলক্ষচতুষ্টয়ম্ ॥ ৬-২৪০ ॥

শিবাশ্রমোপভোগায় লোহোপকরণং মহৎ ।
যঃ প্রদদ্যাগ্কুঠারাদ্যং তস্য পুণ্যফলং শৃণু ॥ ৬-২৪১ ॥

যাবত্তৎফলসংখ্যানং লোহোপকরণে ভবেৎ ।
তাবন্তি বর্ষলক্ষাণি শিবলোকে মহীয়তে ॥ ৬-২৪২ ॥

শিবায়তনবিত্তানাং রক্ষার্থং যঃ প্রয়চ্ছতি ।
ধনুঃখড্গায়ুধাদীনি তস্য পুণ্যফলং শৃণু ॥ ৬-২৪৩ ॥

একৈকস্মিন্পরিজ্ঞেয়মায়ুধে চাপি বৈ ফলম্ ।
বর্ষকোট্যষ্টকং ভোগৈঃ শিবলোকে মহীয়তে ॥ ৬-২৪৪ ॥

যঃ স্বাত্মভোগভৃত্যর্থং কুসুমানি নিবেদয়েৎ ।
শিবায় গুরবে বাপি তস্য পুণ্যফলং শৃণু ॥ ৬-২৪৫ ॥

যাবদন্যোঽন্যসংবন্ধাস্তস্যাংশাঃ পরিকীর্তিতাঃ ।
বর্ষলক্ষং স তাবচ্চ শিবলোকে প্রমোদতে ॥ ৬-২৪৬ ॥

নষ্টাপহৃতমন্বিষ্য পুনর্বিত্তং নিবেদয়েৎ ।
শিবাত্মকং শিবায়ৈব তস্য পুণ্যফলং শৃণু ॥ ৬-২৪৭ ॥

যাবচ্ছিবায় তদ্বিত্তং প্রাঙ্নিবেদ্য ফলং স্মৃতম্ ।
নষ্টমানীয় তদ্ভূয়ঃ পুণ্যং শতগুণং লভেৎ ॥ ৬-২৪৮ ॥

দেবদ্রব্যং হৃতং নষ্টমন্বেষ্যমপি যত্নতঃ ।
ন প্রাপ্নোতি তদা তস্য প্রাপ্নুয়াদ্দ্বিগুণং ফলম্ ॥ ৬-২৪৯ ॥

তাম্রকুম্ভকটাহাদ্যং যঃ শিবায় নিবেদয়েৎ ।
শিবাত্মকং শিবায়ৈব তস্য পুণ্যফলং শৃণু ॥ ৬-২৫০ ॥

যাবচ্ছিবায় তদ্বিত্তং প্রাঙ্নিবেদ্য ফলং স্মৃতম্ ।
নষ্টমানীয় তদ্ভূয়ঃ পুণ্যং শতগুণং লভেৎ ॥ ৬-২৫১ ॥

স্নানসত্ত্রোপভোগায় তস্য পুণ্যফলং শৃণু ।
যাবত্তৎফলসংখ্যানং তাম্রোপকরণে স্থিতম্ ॥ ৬-২৫২ ॥

পলে পলে বর্ষকোটিং মোদতে স শিবে পুরে ।
যঃ পত্ত্রপুষ্পবস্তূনাং দদ্যাদাধারভাজনম্ ॥ ৬-২৫৩ ॥

তদ্বস্তুদাতুর্যৎপুণ্যং তৎপুণ্যং সকলং ভবেৎ ।
দত্ত্বোপকরণং কিংচিদপি যো বিত্তমর্থিনাম্ ॥ ৬-২৫৪ ॥

যদ্বস্তু কুরুতে তেন তৎপ্রদানফলং লভেৎ ।
যঃ শৌচপীতবস্ত্রাণি ক্ষারাদ্যৈঃ শিবয়োগিনাম্ ॥ ৬-২৫৫ ॥

স পাপমলনির্মুক্তঃ শিবলোকমবাপ্নুয়াৎ ।
যঃ পুষ্পপট্টসংয়ুক্তং পটগর্ভং চ কম্বলম্ ॥ ৬-২৫৬ ॥

প্রদদ্যাচ্ছিবয়োগিভ্যস্তস্য পুণ্যফলং শৃণু ।
তেষাং চ বস্ত্রতন্তূনাং যাবৎসংখ্যা বিধীয়তে ॥ ৬-২৫৭ ॥

তাবদ্বর্ষসহস্রাণি ভোগান্ভুঙ্ক্তে শিবে পুরে ।
শ্লক্ষ্ণবস্ত্রাণি শুক্লানি দদ্যাদ্যঃ শিবয়োগিনে ॥ ৬-২৫৮ ॥

চিত্রবস্ত্রাণি তদ্ভক্ত্যা তস্য পুণ্যফলং শৃণু ।
যাবত্তৎসূক্ষ্মবস্ত্রাণাং তন্তুসংখ্যা বিধীয়তে ॥ ৬-২৫৯ ॥

তাবদ্যুগানি সংভোগৈঃ শিবলোকে মহীয়তে ।
শঙ্খপাত্রং তু বিস্তীর্ণং ভাণ্ডং বাপি সুশোভনম্ ॥ ৬-২৬০ ॥

প্রদদ্যাচ্ছিবয়োগিভ্যস্তস্য পুণ্যফলং শৃণু ।
দিব্যং বিমানমারূঢঃ সর্বকামসমন্বিতম্ ॥ ৬-২৬১ ॥

কল্পকোট্যযুতং সাগ্রং শিবলোকে মহীয়তে ।
শুক্ত্যাদীনি চ পাত্রাণি শোভনান্যমলানি চ ॥ ৬-২৬২ ॥

নিবেদ্য শিবয়োগিভ্যঃ শঙ্খার্ধেন ফলং লভেৎ ।
স্ফাটিকানাং চ পাত্রাণাং শঙ্খতুল্যফলং স্মৃতম্ ॥ ৬-২৬৩ ॥

শৈলজানাং তদর্ধেন পাত্রাণাং চ তদর্ধকম্ ।
তালখর্জূরপাত্রাণাং বংশজানাং নিবেদনে ॥ ৬-২৬৪ ॥

অন্যেষামেবমাদীনাং পুণ্যং বার্ক্ষ্যার্ধসংমিতম্ ।
বংশজার্ধসমং পুণ্যং ফলপাত্রনিবেদনে ॥ ৬-২৬৫ ॥

নানাপর্ণপুটাণাং চ সারাণাং বা ফলার্ধকম্ ।
যস্তাম্রকাংস্যপাত্রাণি শোব্হনান্যমলানি চ ॥ ৬-২৬৬ ॥

স্নানভোজনপানার্থং দদ্যাদ্যঃ শিবয়োগিনে ।
তাম্রাং কাংসীং ত্রিলোহীং বা যঃ প্রদদ্যাত্ত্রিপাদিকাম্ ॥ ৬-২৬৭ ॥

ভোজনে ভোজনাধারং গুরবে তৎফলং শৃণু ।
যাবত্তৎপলসংখ্যানং ত্রিপাদ্যা ভোজনেষু চ ॥ ৬-২৬৮ ॥

তাবদ্যুগসহস্রাণি ভোগান্ভুঙ্ক্তে শিবে পুরে ।
লোহং ত্রিপাদিকং দত্ত্বা সৎকৃৎবা শিবয়োগিনে ॥ ৬-২৬৯ ॥

দশকল্পান্মহাভোগৈর্নরঃ শিবপুরে বসেৎ ।
যঃ প্রদদ্যাত্ত্রিবিষ্টম্ভং ভিক্ষাপাত্রসমাশ্রয়ম্ ॥ ৬-২৭০ ॥

বংশজং দারুজং বাপি তস্য পুণ্যফলং শৃণু ।
দিব্যস্ত্রীভোগসম্পন্নো বিমানে মহতি স্থিতঃ ॥ ৬-২৭১ ॥

চতুর্যুগসহস্রং তু ভোগান্ভুঙ্ক্তে শিবে পুরে ।
ভিক্ষাপাত্রমুখাচ্ছাদম্বস্ত্রপর্ণাদিকল্পিতম্ ॥ ৬-২৭২ ॥

দত্ত্বা শিবপুরে ভোগান্কল্পমেকং বসেন্নরঃ ।
সংশ্রয়ং যঃ প্রদদ্যাচ্চ ভিক্ষাপাত্রে কমণ্ডলৌ ॥ ৬-২৭৩ ॥

কল্পিতং বস্ত্রসূত্রাদ্যৈস্তস্য পুণ্যফলং শৃণু ।
তদ্বস্ত্রপূততন্তূনাং সংখ্যা যাবদ্বিধীয়তে ॥ ৬-২৭৪ ॥

তাবদ্বর্ষসহস্রাণি রুদ্রলোকে মহীয়তে ।
সূত্রবল্কলবালৈর্বা শিক্যভাণ্ডসমাশ্রয়ম্ ॥ ৬-২৭৫ ॥

যঃ কৃৎবা দামনীয়োক্ত্রং প্রগ্রহং রজ্জুমেব বা ।
এবমাদীনি চান্যানি বস্তূনি বিনিবেদয়েৎ ॥ ৬-২৭৬ ॥

শিবগোষ্ঠোপয়োগার্থং তস্য পুণ্যফলং শৃণু ।
যাবত্তদ্রজ্জুসংখ্যানং প্রদদ্যাচ্ছিবগোকুলে ॥ ৬-২৭৭ ॥

তাবচ্চতুর্যুগং দেহী শিবলোকে মহীয়তে ।
যথা যথা প্রিয়ং বস্ত্রং শোভনং চ যথা যথা ॥ ৬-২৭৮ ॥

তথা তথা মহাপুণ্যং তদ্দানাদুত্তরোত্তরম্ ।
যঃ পন্থানং দিশেৎপৃষ্টং প্রণষ্টং চ গবাদিকং ॥ ৬-২৭৯ ॥

স গোদানসমং পুণ্যং প্রজ্ঞাসৌখ্যং চ বিন্দতি ।
কৃৎবোপকারমার্তানাং স্বর্গং যাতি ন সংশয়ঃ ॥ ৬-২৮০ ॥

অপি কণ্টকমুদ্ধৃত্য কিমুতান্যং মহাগুণম্(?) ।
অন্নপানৌষধীনাং চ যঃ প্রদাতারমুদ্দিশেৎ ॥ ৬-২৮১ ॥

আর্তানাং তস্য বিজ্ঞেয়ং দাতুস্তৎসদৃশং ফলম্ ।
শিবায় তস্য সংরুদ্ধং কর্ম তিষ্ঠতি যদ্বিনা ॥ ৬-২৮২ ॥

তদল্পমপি যজ্ঞাঙ্গং দত্ত্বা যজ্ঞফলং লভেৎ ।
অপি কাশকুশং সূত্রং গোময়ং সমিদিন্ধনম্ ॥ ৬-২৮৩ ॥

শিবয়জ্ঞোপয়োগার্থং প্রবক্ষ্যামি সমাসতঃ ।
সর্বেষাং শিবভক্তানাং দদ্যাদ্যৎকিংচিদাদরাৎ ।
দত্ত্বা যজ্ঞফলং বিদ্যাৎকিমু তদ্বস্তুদানতঃ ॥ ৬-২৮৪ ॥

॥ ইতি শিবোপনিষদি ফলোপকরণপ্রদানাধ্যায়ঃ ষষ্ঠঃ ॥

অথ স্বর্গাপবর্গার্থে প্রবক্ষ্যামি সমাসতঃ ।
সর্বেষাং শিবভক্তানাং শিবাচারমনুত্তমম্ ॥ ৭-১ ॥

শিবঃ শিবায় ভূতানাং যস্মাদ্দানং প্রয়চ্ছতি ।
গুরুমূর্তিঃ স্থিতস্তস্মাৎপূজয়েৎসততং গুরুম্ ॥ ৭-২ ॥

নালক্ষণে যথা লিঙ্গে সাংনিধ্যং কল্পয়েচ্ছিবঃ ।
অল্পাগমে গুরৌ তদ্বৎসাংনিধ্যং ন প্রকল্পয়েৎ ॥ ৭-৩ ॥

শিবজ্ঞানার্থতত্ত্বজ্ঞঃ প্রসন্নমনসং গুরুম্ ।
শিবঃ শিবং সমাস্থায় জ্ঞানং বক্তি ন হীতরঃ ॥ ৭-৪ ॥

গুরুং চ শিববদ্ভক্ত্যা নমস্কারেণ পূজয়েৎ ।
কৃতাঞ্জলিস্ত্রিসংধ্যং চ ভূমিবিন্যস্তমস্তকঃ ॥ ৭-৫ ॥

ন বিবিক্তমনাচান্তম্(?) চঙ্ক্রমন্তং তথাকুলম্ ।
সমাধিস্থং ব্রজন্তং চ নমস্কুর্যাদ্গুরুং বুধঃ ॥ ৭-৬ ॥

ব্যাখ্যানে তৎসমাপ্তৌ চ সম্প্রশ্নে স্নানভোজনে ।
ভুক্ত্বা চ শয়নে স্বপ্নে নমস্কুর্যাৎসদা গুরুম্ ॥ ৭-৭ ॥

গ্রামান্তরমভিপ্রেপ্সুর্গুরোঃ কুর্যাৎপ্রদক্ষিণম্ ।
সার্বাঙ্গিকপ্রণামং চ পুনঃ কুর্যাত্তদাগতঃ ॥ ৭-৮ ॥

পর্বোৎসবেষু সর্বেষু দদ্যাদ্গন্ধপবিত্রকম্ ।
শিবজ্ঞানস্য চারম্ভে প্রবাসগমনাগতৌ ॥ ৭-৯ ॥

শিবধর্মব্রতারম্ভে তৎসমাপ্তৌ চ কল্পয়েৎ ।
প্রসাদনায় কুপিতো বিজিত্য চ রিপুং তথা ॥ ৭-১০ ॥

পুণ্যাহে গ্রহশান্তৌ চ দীক্ষায়াং চ সদক্ষিণম্ ।
আবার্য পদসম্প্রাপ্তৌ পবিত্রে চোপবিগ্রহে ॥ ৭-১১ ॥

উপানচ্ছত্ত্রশয়নং বস্ত্রমাসনভূষণম্ ।
পাত্রদণ্ডাক্ষসূত্রং বা গুরুসক্তং ন ধারয়েৎ ॥ ৭-১২ ॥

হাস্যনিষ্ঠীবনাস্ফোটমুচ্চভাষ্যবিজৃম্ভণম্ ।
পাদপ্রসারণং গতিং ন কুর্যাদ্গুরুসংনিধৌ ॥ ৭-১৩ ॥

হীনান্নপানবস্ত্রঃ স্যান্নীচশয়্যাসনো গুরোঃ ।
ন যথেষ্টশ্চ সংতিষ্ঠেৎকলহং চ বিবর্জয়েৎ ॥ ৭-১৪ ॥

প্রতিবাতে ঽনুবাতে বা ন তিষ্ঠেদ্গুরুণা সহ ।
অসংশ্রয়ে চ সততং ন কিংচিৎকীর্তয়েদ্গুরোঃ ॥ ৭-১৫ ॥

অন্যাসক্তো ন ভুঞ্জানো ন তিষ্ঠন্নপরাঙ্মুখঃ ।
ন শয়নো ন চাসীনঃ সংভাস্যেদ্গুরুণা সহ ॥ ৭-১৬ ॥

দৃষ্ট্বৈব গুরুমায়ান্তমুত্তিষ্ঠেদ্দূরতস্ত্বরম্ ।
অনুজ্ঞাতশ্চ গুরুণা সংবিশেচ্চানুপৃষ্ঠতঃ ॥ ৭-১৭ ॥

ন কণ্ঠং প্রাবৃতং কুর্যান্ন চ তত্রাবসক্তিকাম্ ।
ন পাদধাবনস্নানং যত্র পশ্যেদ্গুরুঃ স্থিতঃ ॥ ৭-১৮ ॥

ন দন্তধাবনাভ্যঙ্গমায়ামোদ্বর্তনক্রিয়াঃ ।
উৎসর্গপরিধানং চ গুরোঃ কুর্বীত পশ্যতঃ ॥ ৭-১৯ ॥

গুরুর্যদর্পয়েৎকিংচিদ্গৃহাসন্নং তদঞ্জলৌ ।
পাত্রে বা পুরতঃ শিষ্যস্তদ্বক্ত্রমভিবীক্ষয়ন্ ॥ ৭-২০ ॥

যদর্পয়েদ্গুরুঃ কিংচি তন্নম্রঃ পুরতঃ স্থিতঃ ।
পাণিদ্বয়েন গৃহ্ণীয়ৎস্থাপয়েত্তচ্চ সুস্থিতম্ ॥ ৭-২১ ॥

ন গুরোঃ কীর্তয়েন্নাম পরোঽক্ষমপি কেবলম্ ।
সমানসংজ্ঞমন্যং বা নাহ্বয়ীত তদাখ্যযা ॥ ৭-২২ ॥

স্বগুরুস্তদ্গুরুশ্চৈব যদি স্যাতাং সমং ক্বচিৎ ।
গুরোর্গুরুস্তয়োঃ পূজ্যঃ স্বগুরুশ্চ তদাজ্ঞয়া ॥ ৭-২৩ ॥

অনিবেদ্য ন ভুঞ্জীত ভুক্ত্বা চাস্য নিবেদয়েৎ ।
নাবিজ্ঞাপ্য গুরুং গচ্ছেদ্বহিঃ কার্যেণ কেনচিৎ ॥ ৭-২৪ ॥

গুর্বাজ্ঞয়া কর্ম কৃৎবা তৎসমাপ্তৌ নিবেদয়েৎ ।
কৃৎবা চ নৈত্যকং সর্বমধীয়ীতাজ্ঞয়া গুরোঃ ॥ ৭-২৫ ॥

মৃদ্ভস্মগোময়জলং পত্ত্রপুষ্পেন্ধনং সমিৎ ।
পর্যাপ্তমষ্টকং হ্যেতদ্গুর্বর্থং তু সমাহরেৎ ॥ ৭-২৬ ॥

ভৈষজ্যাহারপাত্রাণি বস্ত্রশয়্যাসনং গুরোঃ ।
আনয়েৎসর্বয়ত্নেন প্রার্থয়িৎবা ধনেশ্বরান্ ॥ ৭-২৭ ॥

গুরোর্ন খণ্ডয়েদাজ্ঞামপি প্রাণান্পরিত্যজেৎ ।
কৃৎবাজ্ঞাং প্রাপ্নুয়ান্মুক্তিং লঙ্ঘয়ন্নরকং ব্রজেৎ ॥ ৭-২৮ ॥

পর্যটেৎপৃথিবীং কৃৎস্নাং সশৈলবনকাননাম্ ।
গুরুভৈষজ্যসিদ্ধ্যর্থমপি গচ্ছেদ্রসাতলম্ ॥ ৭-২৯ ॥

যদাদিশেদ্গুরুঃ কিংচিত্তৎকুর্যাদবিচারতঃ ।
অমীমাংস্যা হি গুরবঃ সর্বকার্যেষু সর্বথা ॥ ৭-৩০ ॥

নোত্থাপয়েৎসুখাসীনং শয়ানং ন প্রবোধয়েৎ ।
আসীনো গুরুমাসীনমভিগচ্ছেৎপ্রতিষ্ঠিতম্ ॥ ৭-৩১ ॥

পথি প্রয়ান্তং যান্তং চ যত্নাদ্বিশ্রময়েদ্গুরুম্ ।
ক্ষিৎপিপাসাতুরং স্নাতং জ্ঞাৎবা শক্তং চ ভোজয়েৎ ॥ ৭-৩২ ॥

অভ্যঙ্গোদ্বর্তনং স্নানং ভোজনষ্ঠীবমার্জনম্ ।
গাত্রসংবাহনং রাত্রৌ পাদাভ্যঙ্গং চ যত্নতঃ ॥ ৭-৩৩ ॥

প্রাতঃ প্রসাধনং দত্ত্বা কার্যং সংমার্জনাঞ্জনম্ ।
নানাপুষ্পপ্রকরণং শ্রীমদ্ব্যাখ্যানমণ্ডপে ॥ ৭-৩৪ ॥

স্থাপ্যাসনং গুরোঃ পূজ্যং শিবজ্ঞানস্য পুস্তকম্ ।
তত্র তিষ্ঠেৎপ্রতীক্ষংস্তদ্গুরোরাগমনং ক্রমাৎ ॥ ৭-৩৫ ॥

গুরোর্নিন্দাপবাদং চ শ্রুৎবা কর্ণৌ পিধাপয়েৎ ।
অন্যত্র চৈব সর্পেত্তু নিগৃহ্ণীয়াদুপায়তঃ ॥ ৭-৩৬ ॥

ন গুরোরপ্রিয়ং কুর্যাৎপীডিতস্তারিতো ঽপি বা ।
নোচ্চারয়েচ্চ তদ্বাক্যমুচ্চার্য নরকং ব্রজেৎ ॥ ৭-৩৭ ॥

গুরুরেব পিতা মাতা গুরুরেব পরঃ শিবঃ ।
যস্যৈব নিশ্চিতো ভাবস্তস্য মুক্তির্ন দূরতঃ ॥ ৭-৩৮ ॥

আহারাচারধর্মাণাং যৎকুর্যাদ্গুরুরীশ্বরঃ ।
তথৈব চানুকুর্বীত নানুয়ুঞ্জীত কারণম্ ॥ ৭-৩৯ ॥

যজ্ঞস্তপাংসি নিয়মাত্তানি বৈ বিবিধানি চ ।
গুরুবাক্যে তু সর্বাণি সম্পদ্যন্তে ন সংশয়ঃ ॥ ৭-৪০ ॥

অজ্ঞানপঙ্কনির্মগ্নং যঃ সমুদ্ধরতে জনম্ ।
শিবজ্ঞানাত্মহস্তেন কস্তং ন প্রতিপূজয়েৎ ॥ ৭-৪১ ॥

ইতি যঃ পূজয়েন্নিত্যং গুরুমূর্তিস্থমীশ্বরম্ ।
সর্বপাপবিনির্মুক্তঃ প্রাপ্নোতি পরমং পদম্ ॥ ৭-৪২ ॥

স্নাৎবাম্ভসা ভস্মনা বা শুক্লবস্ত্রোপবীতবান্ ।
দূর্বাগর্ভস্থিতং পুষ্পং গুরুঃ শিরসি ধারয়েৎ ॥ ৭-৪৩ ॥

রোচনালভনং কুর্যাদ্ধূয়যেদাত্মনস্তনুম্ ।
অঙ্গুলীয়াক্ষসূত্রং চ কর্ণমাত্রে চ ধারয়েৎ ॥ ৭-৪৪ ॥

গুরুরেবংবিধঃ শ্রীমান্নিত্যং তিষ্ঠেৎসমাহিতঃ ।
যস্মাজ্জ্ঞানোপদেশার্থং গুরুরাস্তে সদাশিবঃ ॥ ৭-৪৫ ॥

ধারয়েৎপাদুকে নিত্যং মৃদুবর্মপ্রকল্পিতে ।
প্রগৃহ্য দণ্ডং ছত্ত্রং বা পর্যটেদাশ্রমাদ্বহিঃ ॥ ৭-৪৬ ॥

ন ভূমৌ বিন্যসেৎপাদমন্তর্ধানং বিনা গুরুঃ ।
কুশপাদকমাক্রম্য তর্পণার্থং প্রকল্পয়েৎ ॥ ৭-৪৭ ॥

পাদস্থানানি পত্ত্রাদ্যৈঃ কৃৎবা দেবগৃহং বিশেৎ ।
পাত্রাস্তরিতপাদশ্চ(?) নিত্যং ভুঞ্জীত বাগ্যতঃ ॥ ৭-৪৮ ॥

ন পাদৌ ধাবয়েৎকাংস্যে লোহে বা পরিকল্পিতে ।
শৌচয়েত্তৃণগর্ভায়াং দ্বিতীয়ায়াং তথাচমেৎ ॥ ৭-৪৯ ॥

ন রক্তমুল্বণং বস্ত্রং ধারয়েৎকুসুমানি চ ।
ন বহির্গন্ধমাল্যানি বাসাংসি মলিনানি চ ॥ ৭-৫০ ॥

কেশাস্থীনি কপালানি কার্পাসাস্থিতুষাণি চ ।
অমেধ্যাঙ্গারভস্মানি নাধিতিষ্ঠেদ্রজাংসি চ ॥ ৭-৫১ ॥

ন চ লোষ্টং বিমৃদ্নীয়ান্ন চ ছিন্দ্যান্নখৈস্তৃণম্ ।
ন পত্ত্রপুষ্পমূল্যানি বংশমঙ্গলকাষ্ঠিতাম্ ॥ ৭-৫২ ॥

এবমাদীনি চান্যানি পাণিভ্যাং ন চ মর্দয়েৎ ।
ন দন্তখাদনং কুর্যাদ্রোমাণ্যুৎপাটয়েন্ন চ ॥ ৭-৫৩ ॥

ন পদ্ভ্যামুল্লিখেদ্ভূমিং লোষ্টকাষ্ঠৈঃ করেণ বা ।
ন নখাংশ্চ নখৈর্বিদ্যান্ন কণ্ডূয়েন্নখৈস্তনুম্ ॥ ৭-৫৪ ॥

মুহুর্মুহুঃ শিরঃ শ্মশ্রু ন স্পৃশেৎকরজৈর্বুধঃ ।
ন লিক্ষাকর্ষণং কুর্যাদাত্মনো বা পরস্য বা ॥ ৭-৫৫ ॥

সৌবর্ণ্যরৌপ্যতাম্রৈশ্চ শৃঙ্গদন্তশলাকয়া ।
দেহকণ্ডূয়নং কার্যং বংশকাষ্ঠীকবীরণৈঃ(?) ॥ ৭-৫৬ ॥

ন বিচিত্তং প্রকুর্বীত দিশশ্চৈবাবলোকয়ন্ ।
ন শোকার্তশ্চ সংতিষ্ঠেদ্ধূৎবা পাণৌ কপোলকম্ ॥ ৭-৫৭ ॥

ন পাণিপাদবাক্চক্ষুঃ- শ্রোত্রশিশ্নগুদোদরৈঃ ।
চাপলানি ন কুর্বীত স সর্বার্থমবাপ্নুয়াৎ ॥ ৭-৫৮ ॥

ন কুর্যাৎকেনচিদ্বৈরমধ্রুবে জীবিতে সতি ।
লোককৌতূহলং পাপং সংধ্যাং চ পরিবর্জয়েৎ ॥ ৭-৫৯ ॥

ন কুদ্বারেণ বেশ্মানি নগরং গ্রামমাবিশেৎ ।
ন দিবা প্রাবৃতশিরা রাত্রৌ প্রাবৃত্য পর্যটেৎ ॥ ৭-৬০ ॥

নাতিভ্রমণশীলঃ স্যান্ন বিশেচ্চ গৃহাদ্গৃহম্ ।
ন চাজ্ঞানমধীয়ীত শিবজ্ঞানং সমভ্যসেৎ ॥ ৭-৬১ ॥

শিবজ্ঞানং পরং ব্রহ্ম তদারভ্য ন সংত্যজেৎ ।
ব্রহ্মাসাধ্য চ যো গচ্ছেদ্ব্রহ্মহা স প্রকীর্তিতঃ ॥ ৭-৬২ ॥

কৃতাঞ্জলিঃ স্থিতঃ শিষ্যো লঘুবস্ত্রমুদঙ্মুখঃ ।
শিবমন্ত্রং সমুচ্চার্য প্রাঙ্মুখো ঽধ্যাপয়েদ্গুরুঃ ॥ ৭-৬৩ ॥

নাগদন্তাদিসংভূতং চতুরশ্রং সুশোভনম্ ।
হেমরত্নচিতং বাপি গুরোরাসনমুত্তমম্ ॥ ৭-৬৪ ॥

ন শুশ্রূষার্থকামাশ্চ ন চ ধর্মঃ প্রদৃশ্যতে ।
ন ভক্তির্ন যশঃ ক্রৌর্যং ন তমধ্যাপয়েদ্গুরুঃ ॥ ৭-৬৫ ॥

দেবাগ্নিগুরুগোষ্ঠীষু ব্যাখ্যাধ্যযনসংসদি ।
প্রশ্নে বাদে ঽনৃতে ঽশৌচে দক্ষিণং বাহুমুদ্ধরেৎ ॥ ৭-৬৬ ॥

বশে সততনম্রঃ স্যাৎসংহৃত্যাঙ্গানি কূর্মবৎ ।
তৎসংমুখং চ নির্গচ্ছেন্নমস্কারপুরস্সরঃ ॥ ৭-৬৭ ॥

দেবাগ্নিগুরুবিপ্রাণাং ন ব্রজেদন্তরেণ তু ।
নার্পয়েন্ন চ গৃহ্ণীয়াৎকিংচিদ্বস্তু তদন্তরা ॥ ৭-৬৮ ॥

ন মুখেন ধমেদগ্নিং নাধঃকুর্যান্ন লঙ্ঘয়েৎ ।
ন ক্ষিপেদশুচিং বহ্নৌ ন চ পাদৌ প্রতাপয়েৎ ॥ ৭-৬৯ ॥

তৃণকাষ্ঠাদিগহনে জন্তুভিশ্চ সমাকুলে ।
স্থানে ন দীপয়েদগ্নিং দীপ্তং চাপি ততঃ ক্ষিপেৎ ॥ ৭-৭০ ॥

অগ্নিং যুগপদানীয় ধারয়েত প্রয়ত্নতঃ ।
জ্বলন্তং ন প্রদীপং চ স্বয়ং নির্বাপয়েদ্বুধঃ ॥ ৭-৭১ ॥

শিবব্রতধরং দৃষ্ট্বা সমুত্থায় সদা দ্রুতম্ ।
শিবো ঽয়মিতি সংকল্প্য হর্ষিতঃ প্রণমেত্ততঃ ॥ ৭-৭২ ॥

ভোগান্দদাতি বিপুলান্লিঙ্গে সম্পূজিতঃ শিবঃ ।
অগ্নৌ চ বিবিধাং সিদ্ধিং গুরৌ মুক্তিং প্রয়চ্ছতি ॥ ৭-৭৩ ॥

মোক্ষার্থং পূজয়েত্তস্মাদ্গুরুমূর্তিস্থমীশ্বরম্ ।
গুরুভক্ত্যা লভেজ্জ্ঞানং জ্ঞানান্মুক্তিমবাপ্নুয়াৎ ॥ ৭-৭৪ ॥

সর্বপর্বসু যত্নেন হ্যেষু সম্পূজয়েচ্ছিবম্ ।
কুর্যাদায়তনে শোভাং গুরুস্থানেষু সর্বতঃ ॥ ৭-৭৫ ॥

নরদ্বয়োচ্ছ্রিতে পীঠে সর্বশোভাসমন্বিতে ।
সংস্থাপ্য মণিজং লিঙ্গং স্থানে কুর্যাজ্জগদ্ধিতম্ ॥ ৭-৭৬ ॥

অন্নপানবিশেষৈশ্চ নৈবেদ্যমুপকল্পয়েৎ ।
ভোজয়েদ্ব্রতিনশ্চাত্র স্বগুরুং চ বিশেষতঃ ॥ ৭-৭৭ ॥

পূজয়েচ্চ শিবজ্ঞানং বাচয়ীত চ পর্বসু ।
দর্শয়েচ্ছিবভক্তেভ্যঃ সৎপূজাং পরিকল্পিতাম্ ॥ ৭-৭৮ ॥

প্রিয়ং ব্রূয়াৎসদা তেভ্যঃ প্রদেয়ং চাপি শক্তিতঃ ।
এবং কৃতে বিশেষেণ প্রসীদতি মহেশ্বরঃ ॥ ৭-৭৯ ॥

ছিন্নং ভিন্নং মৃতং নষ্টং বর্ধতে নাস্তি কেবলম্ ।
ইত্যাদ্যান্ন বদেচ্ছব্দান্সাক্ষাদ্ব্রূয়াত্তু মঙ্গলম্ ॥ ৭-৮০ ॥

অধেনুং ধেনুমিত্যেব ব্রূয়াদ্ভদ্রমভদ্রকম্ ।
কপালং চ ভগালং স্যাৎপরমং মঙ্গলং বদেৎ ॥ ৭-৮১ ॥

ঐন্দ্রং ধনুর্মণিধনুর্দাহকাষ্ঠাদি চন্দনম্ ।
স্বর্যাতং চ মৃতং ব্রূয়াচ্ছিবীভূতং চ যোগিনম্ ॥ ৭-৮২ ॥

দ্বিধাভূতং বদেচ্ছিন্নং ভিন্নং চ বহুধা স্থিতম্ ।
নষ্টমন্বেষণীয়ং চ রিক্তং পূর্ণাভিবর্ধিতম্ ॥ ৭-৮৩ ॥

নাস্তীতি শোভনং সর্বমাদ্যমঙ্গাভিবর্ধনম্ ।
সিদ্ধিমদ্ব্রূহি গচ্ছন্তং সুপ্তং ব্রূয়াৎপ্রবর্ধিতম্ ॥ ৭-৮৪ ॥

ন ম্লেচ্ছমূর্খপতিতৈঃ ক্রূরৈঃ সংতাপবেদিভিঃ ।
দুর্জনৈরবলিপ্তৈশ্চ ক্ষুদ্রৈঃ সহ ন সংবদেৎ ॥ ৭-৮৫ ॥

নাধার্মিকনৃপাক্রান্তে ন দংশমশকাবৃতে ।
নাতিশীতজলাকীর্ণে দেশে রোগপ্রদে বসেৎ ॥ ৭-৮৬ ॥

নাসনং শয়নং পানং নমস্কারাভিবাদনম্ ।
সোপানৎকঃ প্রকুর্বীত শিবপুস্তকবাচনম্ ॥ ৭-৮৭ ॥

আচার্যং দৈবতং তীর্থমুদ্ধূতোদং মৃদং দধি ।
বটমশ্বত্থকপিলাং দীক্ষিতোদধিসংগমম্ ॥ ৭-৮৮ ॥

যানি চৈষাং প্রকারাণি মঙ্গলানীহ কানিচিৎ ।
শিবায়েতি নমস্কৃৎবা প্রোক্তমেতৎপ্রদক্ষিণম্ ॥ ৭-৮৯ ॥

উপানচ্ছত্ত্রবস্ত্রাণি পবিত্রং করকং স্রজম্ ।
আসনং শয়নং পানং ধৃতমন্যৈর্ন ধারয়েৎ ॥ ৭-৯০ ॥

পালাশমাসনং শয়্যাং পাদুকে দন্তধাবনম্ ।
বর্জয়েচ্চাপি নির্যাসং রক্তং ন তু সমুদ্ভবম্ ॥ ৭-৯১ ॥

সংধ্যামুপাস্য কুর্বীত নিত্যং দেহপ্রসাধনম্ ।
স্পৃশেদ্বন্দেচ্চ কপিলাং প্রদদ্যাচ্চ গবাং হিতম্ ॥ ৭-৯২ ॥

যঃ প্রদদ্যাদ্গবাং সম্যক্ফলানি চ বিশেষতঃ ।
ক্ষেত্রমুদ্দাময়েচ্চাপি তস্য পুণ্যফলং শৃণু ॥ ৭-৯৩ ॥

যাবত্তৎপত্ত্রকুসুম- কন্দমূলফলানি চ ।
তাবদ্বর্ষসহস্রাণি শিবলোকে মহীয়তে ॥ ৭-৯৪ ॥

কৃশরোগার্তবৃদ্ধানাং ত্যক্তানাং নির্জনে বনে ।
ক্ষুৎপিপাসাতুরাণাং চ গবাং বিহ্বলচেতসাম্ ॥ ৭-৯৫ ॥

নীৎবা যস্তৃণতোয়ানি বনে যত্নাৎপ্রয়চ্ছতি ।
করোতি চ পরিত্রাণং তস্য পুণ্যফলং শৃণু ॥ ৭-৯৬ ॥

কুলৈকবিংশকোপেতঃ পত্নীপুত্রাদিসংয়ুতঃ ।
মিত্রভৃত্যৈরুপেতশ্চ শ্রীমচ্ছিবপুরং ব্রজেৎ ॥ ৭-৯৭ ॥

তত্র ভুক্ত্বা মহাভোগান্বিমানৈঃ সার্বকামিকৈঃ ।
স মহাপ্রলয়ং যাবত্তদন্তে মুক্তিমাপ্নুয়াৎ ॥ ৭-৯৮ ॥

গোব্রাহ্মণপরিত্রাণং সকৃৎকৃৎবা প্রয়ত্নতঃ ।
মুচ্যতে পঞ্চভির্ঘোরৈর্মহদ্ভিঃ পাতকৈর্দ্রুতম্ ॥ ৭-৯৯ ॥

অহিংসা সত্যমস্তেয়ং ব্রহ্মচর্যমকল্কতা ।
অক্রোধো গুরুশুশ্রূষা শৌচং সংতোষমার্জবম্ ॥ ৭-১০০ ॥

অহিংসাদ্যা যমাঃ পঞ্চ যতীনাং পরিকীর্তিতাঃ ।
অক্রোধাদ্যাশ্চ নিয়মাঃ সিদ্ধিবৃদ্ধিকরাঃ স্মৃতাঃ ॥ ৭-১০১ ॥

দশলাক্ষণিকো ধর্মঃ শিবাচারঃ প্রকীর্তিতঃ ।
যোগীন্দ্রাণাং বিশেষেণ শিবয়োগপ্রসিদ্ধয়ে ॥ ৭-১০২ ॥

ন বিন্দতি নরো যোগং পুত্রদারাদিসংগতঃ ।
নিবদ্ধঃ স্নেহপাশেন মোহস্তম্ভবলীয়সা ॥ ৭-১০৩ ॥

মোহাৎকুটুম্বসংসক্তস্তৃষ্ণয়া শৃঙ্খলীকৃতঃ ।
বালৈর্বদ্ধস্তু লোকো ঽয়ং মুসলেনাভিহন্যতে ॥ ৭-১০৪ ॥

ইমে বালাঃ কথং ত্যাজ্যা জীবিষ্যন্তি ময়া বিনা ।
মোহাদ্ধি চিন্তয়ত্যেবং পরমার্থৌ ন পশ্যতি ॥ ৭-১০৫ ॥

সম্পর্কাদুদরে ন্যস্তঃ শুক্রবিন্দুরচেতনঃ ।
স পিত্রা কেন যত্নেন গর্ভস্থঃ পরিপালিতঃ ॥ ৭-১০৬ ॥

কর্কশাঃ কঠিনা ভক্ষা জীর্যন্তে যত্র ভক্ষিতাঃ ।
তস্মিন্নেবোদরে শুক্রং কিং ন জীর্যতি ভক্ষ্যবৎ ॥ ৭-১০৭ ॥

যেনৈতদ্যোজিতং গর্ভে যেন চৈব বিবর্ধিতম্ ।
তেনৈব নির্গৎং ভূয়ঃ কর্মণা স্বেন পাল্যতে ॥ ৭-১০৮ ॥

ন কশ্চিৎকস্যচিৎপুত্রঃ পিতা মাতা ন কস্যচিৎ ।
যৎস্বয়ং প্রাক্তনং কর্ম পিতা মাতেতি তৎস্মৃতম্ ॥ ৭-১০৯ ॥

যেন যত্র কৃতং কর্ম স তত্রৈব প্রজায়তে ।
পিতরৌ চাস্য দাসৎবং কুরুতস্তৎপ্রচোদিতৌ ॥ ৭-১১০ ॥

ন কশ্চিৎকস্যচিচ্ছক্তঃ কর্তুং দুঃখং সুখানি চ ।
করোতি প্রাক্তনং কর্ম মোহাল্লোকস্য কেবলম্ ॥ ৭-১১১ ॥

কর্মদায়াদসংবন্ধাদুপকারঃ পরস্পরম্ ।
দৃশ্যতে নাপকারশ্চ মোহেনাত্মনি মন্যতে ॥ ৭-১১২ ॥

ঈশ্বরাধিষ্ঠিতং কর্ম ফলতীহ শুভাশুভম্ ।
গ্রামস্বামিপ্রসাদেন সুকৃতং কর্ষণং যথা ॥ ৭-১১৩ ॥

দ্বয়ং দেবৎবমোক্ষায় মমেতি ন মমেতি চ ।
মমেতি বধ্যতে জন্তুর্ন মমেতি বিমুচ্যতে ॥ ৭-১১৪ ॥

দ্ব্যক্ষরং চ ভবেন্মৃত্যুস্ত্র্যক্ষরং ব্রহ্ম শাশ্বতম্ ।
মমেতি দ্ব্যক্ষরং মৃত্যুস্ত্র্যক্ষরং ন মমেতি চ ॥ ৭-১১৫ ॥

তস্মাদাত্মন্যহংকারমুৎসৃজ্য প্রবিচারতঃ ।
বিধূয়াশেষসঙ্গাংশ্চ মোক্ষোপায়ং বিচিন্তয়েৎ ॥ ৭-১১৬ ॥

জ্ঞানাদ্যোগপরিক্লেশং কুপ্রাবরণভোজনম্ ।
কুচর্যাং কুনিবাসং চ মোক্ষার্থী ন বিচিন্তয়েৎ ॥ ৭-১১৭ ॥

ন দুঃখেন বিনা সৌখ্যং দৃশ্যতে সর্বদেহিনাম্ ।
দুঃখং তন্মাত্রকং জ্ঞেয়ং সুখমানন্ত্যমুত্তমম্ ॥ ৭-১১৮ ॥

সেবায়াং পাশুপাল্যে চ বানিজ্যে কৃষিকর্মণি ।
তুল্যে সতি পরিক্লেশে বরং ক্লেশো বিমুক্তয়ে ॥ ৭-১১৯ ॥

স্বর্গাপবর্গয়োরেকং যঃ শীঘ্রং ন প্রসাধয়েৎ ।
যাতি তেনৈব দেহেন স মৃতস্তপ্যতে চিরম্ ॥ ৭-১২০ ॥

যদবশ্যং পরাধীনৈস্ত্যজনীয়ং শরীরকম্ ।
কস্মাত্তেন বিমূঢাত্মা ন সাধয়তি শাশ্বতম্ ॥ ৭-১২১ ॥

যৌবনস্থা গৃহস্থাশ্চ প্রাসাদস্থাশ্চ যে নৃপাঃ ।
সর্ব এব বিশীর্যন্তে শুষ্কস্নিগ্ধান্নভোজনাঃ ॥ ৭-১২২ ॥

অনেকদোষদুষ্টস্য দেহস্যৈকো মহান্গুণহ্ ।
যাং যামবস্থামাপ্নোতি তাং তামেবানুবর্ততে ॥ ৭-১২৩ ॥

মন্দং পরিহরন্কর্ম স্বদেহমনুপালয়েৎ ।
বর্ষাসু জীর্ণকটবত্তিষ্ঠন্নপ্যবসীদতি ॥ ৭-১২৪ ॥

ন তে ঽত্র দেহিনঃ সন্তি যে তিষ্ঠন্তি সুনিশ্চলাঃ ।
সর্বে কুর্বন্তি কর্মাণি বিকৃশাঃ পূর্বকর্মভিঃ ॥ ৭-১২৫ ॥

তুল্যে সত্যপি কর্তব্যে বরং কর্ম কৃতং পরম্ ।
যঃ কৃৎবা ন পুনঃ কুর্যান্নানাকর্ম শুভাশুভম্ ॥ ৭-১২৬ ॥

তস্মাদন্তর্বহিশ্চিন্তামনেকাকারসংস্থিতাম্ ।
সংত্যজ্যাত্মহিতার্থায় স্বাধ্যায়ধ্যানমভ্যসেৎ ॥ ৭-১২৭ ॥

বিবিক্তে বিজনে রম্যে পুষ্পাশ্রমবিভূষিতে ।
স্থানং কৃৎবা শিবস্থানে ধ্যায়েচ্ছান্তং পরং শিবম্ ॥ ৭-১২৮ ॥

যে ঽতিরম্যাণ্যরণ্যানি সুজলানি শিবানি তু ।
বিহায়াভিরতা গ্রামে প্রায়স্তে দৈবমোহিতাঃ ॥ ৭-১২৯ ॥

বিবেকিনঃ প্রশান্তস্য যৎসুখং ধ্যায়তঃ শিবম্ ।
ন তৎসুখং মহেন্দ্রস্য ব্রহ্মণঃ কেশবস্য বা ॥ ৭-১৩০ ॥

ইতি নামামৃতং দিব্যং মহাকালাদবাপ্তবান্ ।
বিস্তরেণানুপূর্বাচ্চ ঋষ্যাত্রেয়ঃ(?) সুনিশ্চিতম্ ॥ ৭-১৩১ ॥

প্রজ্ঞামথা বিনির্মথ্য(?) শিবজ্ঞানমহোদধিম্ ।
ঋষ্যাত্রেয়ঃ সমুদ্ধৃত্য প্রাহেদমণুমাত্রকম্ ॥ ৭-১৩২ ॥

শিবধর্মে মহাশাস্ত্রে শিবধর্মস্য চোত্তরে ।
যদনুক্তং ভবেৎকিংচিত্তদত্র পরিকীর্তিতম্ ॥ ৭-১৩৩ ॥

ত্রিদৈবত্যমিদং শাস্ত্রং মুনীন্দ্রাত্রেয়ভাষিতম্ ।
তির্যঙ্মনুজদেবানাং সর্বেষাং চ বিমুক্তিদম্ ॥ ৭-১৩৪ ॥

নন্দিস্কন্দমহাকালাস্ত্রয়ো দেবাঃ প্রকীর্তিতাঃ ।
চন্দ্রাত্রেয়স্তথাত্রিশ্চ ঋষ্যাত্রেয়ো মুনিত্রয়ম্ ॥ ৭-১৩৫ ॥

এতৈর্মহাত্মবিঃ প্রোক্তাঃ শিবধর্মাঃ সমাসতঃ ।
সর্বলোকোপকারার্থং নমস্তেভ্যঃ সদা নমঃ ॥ ৭-১৩৬ ॥

তেষাং শিষ্যপ্রশিষ্যৈশ্চ শিবধর্মপ্রবক্তৃভিঃ ।
ব্যাপ্তং জ্ঞানসরঃ শার্বং বিকচৈরিব পঙ্কজৈঃ ॥ ৭-১৩৭ ॥

যে শ্রাবয়ন্তি সততং শিবধর্মং শিবার্থিনাম্ ।
তে রুদ্রাস্তে মুনীন্দ্রাশ্চ তে নমস্যাঃ স্বভক্তিতঃ ॥ ৭-১৩৮ ॥

যে সমুত্থায় শৃণ্বন্তি শিবধর্মং দিনে দিনে ।
তে রুদ্রা রুদ্রলোকেশা ন তে প্রকৃতিমানুষাঃ ॥ ৭-১৩৯ ॥

শিবোপনিষদং হ্যেতদধ্যায়ৈঃ সপ্তভিঃ স্মৃতম্ ।
ঋষ্যাত্রেয়সগোত্রেণ মুনিনা হিতকাম্যযা ॥ ৭-১৪০ ॥

॥ ইতি শিবোপনিষদি শিবাচারাধ্যায়ঃ সপ্তমঃ ॥

॥ ইতি শিবোপনিষৎসমাপ্তা ॥

Also Read:

Shiva Upanishad Lyrics in Sanskrit | English | Marathi | Bengali | Gujarati | Kannada | Malayalam | Oriya | Telugu | Tamil

Shiva Upanishad Lyrics in Bengali

Leave a Reply

Your email address will not be published. Required fields are marked *

Scroll to top