Shiva Upanishads in Kannada:
॥ ಶ್ರೀಶಿವೋಪನಿಷತ್ ॥
ಕೈಲಾಸಶಿಖರಾಸೀನಮಶೇಷಾಮರಪೂಜಿತಂ ।
ಕಾಲಘ್ನಂ ಶ್ರೀಮಹಾಕಾಲಮೀಶ್ವರಂ ಜ್ಞಾನಪಾರಗಂ ॥ 1-1 ॥
ಸಂಪೂಜ್ಯ ವಿಧಿವದ್ಭಕ್ತ್ಯಾ ಋಷ್ಯಾತ್ರೇಯಃ ಸುಸಂಯತಃ ।
ಸರ್ವಭೂತಹಿತಾರ್ಥಾಯ ಪಪ್ರಚ್ಛೇದಂ ಮಹಾಮುನಿಃ ॥ 1-2 ॥
ಜ್ಞಾನಯೋಗಂ ನ ವಿಂದಂತಿ ಯೇ ನರಾ ಮಂದಬುದ್ಧಯಃ ।
ತೇ ಮುಚ್ಯಂತೇ ಕಥಂ ಘೋರಾದ್ಭಗವನ್ಭವಸಾಗರಾತ್ ॥ 1-3 ॥
ಏವಂ ಪೃಷ್ಟಃ ಪ್ರಸನ್ನಾತ್ಮಾ ಋಷ್ಯಾತ್ರೇಯೇಣ ಧೀಮತಾ ।
ಮಂದಬುದ್ಧಿವಿಮುಕ್ತ್ಯರ್ಥಂ ಮಹಾಕಾಲಃ ಪ್ರಭಾಷತೇ ॥ 1-4 ॥
ಮಹಾದೇವ ಉವಾಚ
ಪುರಾ ರುದ್ರೇಣ ಗದಿತಾಃ ಶಿವಧರ್ಮಾಃ ಸನಾತನಾಃ ।
ದೇವ್ಯಾಃ ಸರ್ವಗಣಾನಾಂ ಚ ಸಂಕ್ಷೇಪಾದ್ಗ್ರಂಥಕೋಟಿಭಿಃ ॥ 1-5 ॥
ಆಯುಃ ಪ್ರಜ್ಞಾಂ ತಥಾ ಶಕ್ತಿಂ ಪ್ರಸಮೀಕ್ಷ್ಯ ನೄಣಾಮಿಹ ।
ತಾಪತ್ರಯಪ್ರಪೀಡಾಂ ಚ ಭೋಗತೃಷ್ಣಾವಿಮೋಹಿನೀಂ ॥ 1-6 ॥
ತೇ ಧರ್ಮಾಃ ಸ್ಕಂದನಂದಿಭ್ಯಾಮನ್ಯೈಶ್ಚ ಮುನಿಸತ್ತಮೈಃ ।
ಸಾರಮಾದಾಯ ನಿರ್ದಿಷ್ಟಾಃ ಸಮ್ಯಕ್ಪ್ರಕರಣಾಂತರೈಃ ॥ 1-7 ॥
ಸಾರಾದಪಿ ಮಹಾಸಾರಂ ಶಿವೋಪನಿಷದಂ ಪರಂ ।
ಅಲ್ಪಗ್ರಂಥಂ ಮಹಾರ್ಥಂ ಚ ಪ್ರವಕ್ಷ್ಯಾಮಿ ಜಗದ್ಧಿತಂ ॥ 1-8 ॥
ಶಿವಃ ಶಿವ ಇಮೇ ಶಾಂತ- ನಾಮ ಚಾದ್ಯಂ ಮುಹುರ್ಮುಹುಃ ।
ಉಚ್ಚಾರಯಂತಿ ತದ್ಭಕ್ತ್ಯಾ ತೇ ಶಿವಾ ನಾತ್ರ ಸಂಶಯಃ ॥ 1-9 ॥
ಅಶಿವಾಃ ಪಾಶಸಂಯುಕ್ತಾಃ ಪಶವಃ ಸರ್ವಚೇತನಾಃ ।
ಯಸ್ಮಾದ್ವಿಲಕ್ಷಣಾಸ್ತೇಭ್ಯಸ್ತಸ್ಮಾದೀಶಃ ಶಿವಃ ಸ್ಮೃತಃ ॥ 1-10 ॥
ಗುಣೋ ಬುದ್ಧಿರಹಂಕಾರಸ್ತನ್ಮಾತ್ರಾಣೀಂದ್ರಿಯಾನಿ ಚ ।
ಭೂತಾನಿ ಚ ಚತುರ್ವಿಂಶದಿತಿ ಪಾಶಾಃ ಪ್ರಕೀರ್ತಿತಾಃ ॥ 1-11 ॥
ಪಂಚವಿಂಶಕಮಜ್ಞಾನಂ ಸಹಜಂ ಸರ್ವದೇಹಿನಾಂ ।
ಪಾಶಾಜಾಲಸ್ಯ ತನ್ಮೂಲಂ ಪ್ರಕೃತಿಃ ಕಾರಣಾಯ ನಃ ॥ 1-12 ॥
ಸತ್ಯಜ್ಞಾನೇ ನಿಬಧ್ಯಂತೇ ಪುರುಷಾಃ ಪಾಶಬಂಧನೈಃ ।
ಮದ್ಭಾವಾಚ್ಚ ವಿಮುಚ್ಯಂತೇ ಜ್ಞಾನಿನಃ ಪಾಶಪಂಜರಾತ್ ॥ 1-13 ॥
ಷಡ್ವಿಂಶಕಶ್ಚ ಪುರುಷಃ ಪಶುರಜ್ಞಃ ಶಿವಾಗಮೇ ।
ಸಪ್ತವಿಂಶ ಇತಿ ಪ್ರೋಕ್ತಃ ಶಿವಃ ಸರ್ವಜಗತ್ಪತಿಃ ॥ 1-14 ॥
ಯಸ್ಮಾಚ್ಛಿವಃ ಸುಸಂಪೂರ್ಣಃ ಸರ್ವಜ್ಞಃ ಸರ್ವಗಃ ಪ್ರಭುಃ ।
ತಸ್ಮಾತ್ಸ ಪಾಶಹರಿತಃ ಸ ವಿಶುದ್ಧಃ ಸ್ವಭಾವತಃ ॥ 1-15 ॥
ಪಶುಪಾಶಪರಃ ಶಾಂತಃ ಪರಮಜ್ಞಾನದೇಶಿಕಃ ।
ಶಿವಃ ಶಿವಾಯ ಭೂತಾನಾಂ ತಂ ವಿಜ್ಞಾಯ ವಿಮುಚ್ಯತೇ ॥ 1-16 ॥
ಏತದೇವ ಪರಂ ಜ್ಞಾನಂ ಶಿವ ಇತ್ಯಕ್ಷರದ್ವಯಂ ।
ವಿಚಾರಾದ್ಯಾತಿ ವಿಸ್ತಾರಂ ತೈಲಬಿಂದುರಿವಾಂಭಸಿ ॥ 1-17 ॥
ಸಕೃದುಚ್ಚಾರಿತಂ ಯೇನ ಶಿವ ಇತ್ಯಕ್ಷರದ್ವಯಂ ।
ಬದ್ಧಃ ಪರಿಕರಸ್ತೇನ ಮೋಕ್ಷೋಪಗಮನಂ ಪ್ರತಿ ॥ 1-18 ॥
ದ್ವ್ಯಕ್ಷರಃ ಶಿವಮಂತ್ರೋ ಽಯಂ ಶಿವೋಪನಿಷದಿ ಸ್ಮೃತಃ ।
ಏಕಾಕ್ಷರಃ ಪುನಶ್ಚಾಯಮೋಮಿತ್ಯೇವಂ ವ್ಯವಸ್ಥಿತಃ ॥ 1-19 ॥
ನಾಮಸಂಕೀರ್ತಣಾದೇವ ಶಿವಸ್ಯಾಶೇಷಪಾತಕೈಃ ।
ಯತಃ ಪ್ರಮುಚ್ಯತೇ ಕ್ಷಿಪ್ರಂ ಮಂತ್ರೋ ಽಯಂ ದ್ವ್ಯಕ್ಷರಃ ಪರಃ ॥ 1-20 ॥
ಯಃ ಶಿವಂ ಶಿವಮಿತ್ಯೇವಂ ದ್ವ್ಯಕ್ಷರಂ ಮಂತ್ರಮಭ್ಯಸೇತ್ ।
ಏಕಾಕ್ಷರಂ ವಾ ಸತತಂ ಸ ಯಾತಿ ಪರಮಂ ಪದಂ ॥ 1-21 ॥
ಮಿತ್ರಸ್ವಜನಬಂಧೂನಾಂ ಕುರ್ಯಾನ್ನಾಮ ಶಿವಾತ್ಮಕಂ ।
ಅಪಿ ತತ್ಕೀರ್ತನಾದ್ಯಾತಿ ಪಾಪಮುಕ್ತಃ ಶಿವಂ ಪುರಂ ॥ 1-22 ॥
ವಿಜ್ಞೇಯಃ ಸ ಶಿವಃ ಶಾಂತೋ ನರಸ್ತದ್ಭಾವಭಾವಿತಃ ।
ಆಸ್ತೇ ಸದಾ ನಿರುದ್ವಿಗ್ನಃ ಸ ದೇಹಾಂತೇ ವಿಮುಚ್ಯತೇ ॥ 1-23 ॥
ಹೃದ್ಯಂತಃಕರಣಂ ಜ್ಞೇಯಂ ಶಿವಸ್ಯ ಆಯತನಂ ಪರಂ ।
ಹೃತ್ಪದ್ಮಂ ವೇದಿಕಾ ತತ್ರ ಲಿಂಗಮೋಂಕಾರಮಿಷ್ಯತೇ ॥ 1-24 ॥
ಪುರುಷಃ ಸ್ಥಾಪಕೋ ಜ್ಞೇಯಃ ಸತ್ಯಂ ಸಂಮಾರ್ಜನಂ ಸ್ಮೃತಂ ।
ಅಹಿಂಸಾ ಗೋಮಯಂ ಪ್ರೋಕ್ತಂ ಶಾಂತಿಶ್ಚ ಸಲಿಲಂ ಪರಂ ॥ 1-25 ॥
ಕುರ್ಯಾತ್ಸಂಮಾರ್ಜನಂ ಪ್ರಾಜ್ಞೋ ವೈರಾಗ್ಯಂ ಚಂದನಂ ಸ್ಮೃತಂ ।
ಪೂಜಯೇದ್ಧ್ಯಾನಯೋಗೇನ ಸಂತೋಷೈಃ ಕುಸುಮೈಃ ಸಿತೈಃ ॥ 1-26 ॥
ಧೂಪಶ್ಚ ಗುಗ್ಗುಲುರ್ದೇಯಃ ಪ್ರಾಣಾಯಾಮಸಮುದ್ಭವಃ ।
ಪ್ರತ್ಯಾಹಾರಶ್ಚ ನೈವೇದ್ಯಮಸ್ತೇಯಂ ಚ ಪ್ರದಕ್ಷಿಣಂ ॥ 1-27 ॥
ಇತಿ ದಿವ್ಯೋಪಚಾರೈಶ್ಚ ಸಂಪೂಜ್ಯ ಪರಮಂ ಶಿವಂ ।
ಜಪೇದ್ಧ್ಯಾಯೇಚ್ಚ ಮುಕ್ತ್ಯರ್ಥಂ ಸರ್ವಸಂಗವಿವರ್ಜಿತಃ ॥ 1-28 ॥
ಜ್ಞಾನಯೋಗವಿನಿರ್ಮುಕ್ತಃ ಕರ್ಮಯೋಗಸಮಾವೃತ್ತಃ ।
ಮೃತಃ ಶಿವಪುರಂ ಗಚ್ಛೇತ್ಸ ತೇನ ಶಿವಕರ್ಮಣಾ ॥ 1-29 ॥
ತತ್ರ ಭುಕ್ತ್ವಾ ಮಹಾಭೋಗಾನ್ಪ್ರಲಯೇ ಸರ್ವದೇಹಿನಾಂ ।
ಶಿವಧರ್ಮಾಚ್ಛಿವಜ್ಞಾನಂ ಪ್ರಾಪ್ಯ ಮುಕ್ತಿಮವಾಪ್ನುಯಾತ್ ॥ 1-30 ॥
ಜ್ಞಾನಯೋಗೇನ ಮುಚ್ಯಂತೇ ದೇಹಪಾತಾದನಂತರಂ ।
ಭೋಗಾನ್ಭುಕ್ತ್ವಾ ಚ ಮುಚ್ಯಂತೇ ಪ್ರಲಯೇ ಕರ್ಮಯೋಗಿನಃ ॥ 1-31 ॥
ತಸ್ಮಾಜ್ಜ್ಞಾನವಿದೋ ಯೋಗಾತ್ತಥಾಜ್ಞಾಃ ಕರ್ಮಯೋಗಿನಃ ।
ಸರ್ವ ಏವ ವಿಮುಚ್ಯಂತೇ ಯೇ ನರಾಃ ಶಿವಮಾಶ್ರಿತಾಃ ॥ 1-32 ॥
ಸ ಭೋಗಃ ಶಿವವಿದ್ಯಾರ್ಥಂ ಯೇಷಾಂ ಕರ್ಮಾಸ್ತಿ ನಿರ್ಮಲಂ ।
ತೇ ಭೋಗಾನ್ಪ್ರಾಪ್ಯ ಮುಚ್ಯಂತೇ ಪ್ರಲಯೇ ಶಿವವಿದ್ಯಯಾ ॥ 1-33 ॥
ವಿದ್ಯಾ ಸಂಕೀರ್ತನೀಯಾ ಹಿ ಯೇಷಾಂ ಕರ್ಮ ನ ವಿದ್ಯತೇ ।
ತೇ ಚಾವರ್ತ್ಯ ವಿಮುಚ್ಯಂತೇ ಯಾವತ್ಕರ್ಮ ನ ತದ್ಭವೇತ್ ॥ 1-34 ॥
ಶಿವಜ್ಞಾನವಿದಂ ತಸ್ಮಾತ್ಪೂಜಯೇದ್ವಿಭವೈರ್ಗುರುಂ ।
ವಿದ್ಯಾದಾನಂ ಚ ಕುರ್ವೀತ ಭೋಗಮೋಕ್ಷಜಿಗೀಷಯಾ ॥ 1-35 ॥
ಶಿವಯೋಗೀ ಶಿವಜ್ಞಾನೀ ಶಿವಜಾಪೀ ತಪೋಽಧಿಕಃ ।
ಕ್ರಮಶಃ ಕರ್ಮಯೋಗೀ ಚ ಪಂಚೈತೇ ಮುಕ್ತಿಭಾಜನಾಃ ॥ 1-36 ॥
ಕರ್ಮಯೋಗಸ್ಯ ಯನ್ಮೂಲಂ ತದ್ವಕ್ಷ್ಯಾಮಿ ಸಮಾಸತಃ ।
ಲಿಂಗಮಾಯತನಂ ಚೇತಿ ತತ್ರ ಕರ್ಮ ಪ್ರವರ್ತತೇ ॥ 1-37 ॥
॥ ಇತಿ ಶಿವೋಪನಿಷದಿ ಮುಕ್ತಿನಿರ್ದೇಶಾಧ್ಯಾಯಃ ಪ್ರಥಮಃ ॥
ಅಥ ಪೂರ್ವಸ್ಥಿತೋ ಲಿಂಗೇ ಗರ್ಭಃ ಸ ತ್ರಿಗುಣೋ ಭವೇತ್ ।
ಗರ್ಭಾದ್ವಾಪಿ ವಿಭಾಗೇನ ಸ್ಥಾಪ್ಯ ಲಿಂಗಂ ಶಿವಾಲಯೇ ॥ 2-1 ॥
ಯಾವಲ್ಲಿಂಗಸ್ಯ ದೈರ್ಘ್ಯಂ ಸ್ಯಾತ್ತಾವದ್ವೇದ್ಯಾಶ್ಚ ವಿಸ್ತರಃ ।
ಲಿಂಗತೃತೀಯಭಾಗೇನ ಭವೇದ್ವೇದ್ಯಾಃ ಸಮುಚ್ಛ್ರಯಃ ॥ 2-2 ॥
ಭಾಗಮೇಕಂ ನ್ಯಸೇದ್ಭೂಮೌ ದ್ವಿತೀಯಂ ವೇದಿಮಧ್ಯತಃ ।
ತೃತೀಯಭಾಗೇ ಪೂಜಾ ಸ್ವಾದಿತಿ ಲಿಂಗಂ ತ್ರಿಧಾ ಸ್ಥಿತಂ ॥ 2-3 ॥
ಭೂಮಿಸ್ಥಂ ಚತುರಶ್ರಂ ಸ್ವಾದಷ್ಟಾಶ್ರಂ ವೇದಿಮಧ್ಯತಃ ।
ಪೂಜಾರ್ಥಂ ವರ್ತುಲಂ ಕಾರ್ಯಂ ದೈರ್ಘ್ಯಾತ್ತ್ರಿಗುಣವಿಸ್ತರಂ ॥ 2-4 ॥
ಅಧೋಭಾಗೇ ಸ್ಥಿತಃ ಸ್ಕಂದಃ ಸ್ಥಿತಾ ದೇವೀ ಚ ಮಧ್ಯತಃ ।
ಊರ್ಧ್ವಂ ರುದ್ರಃ ಕ್ರಮಾದ್ವಾಪಿ ಬ್ರಹ್ಮವಿಷ್ಣುಮಹೇಶ್ವರಾಃ ॥ 2-5 ॥
ಏತ ಏವ ತ್ರಯೋ ಲೋಕಾ ಏತ ಏವ ತ್ರಯೋ ಗುಣಾಃ ।
ಏತ ಏವ ತ್ರಯೋ ವೇದಾ ಏತಚ್ಚಾನ್ಯತ್ಸ್ಥಿತಂ ತ್ರಿಧಾ ॥ 2-6 ॥
ನವಹಸ್ತಃ ಸ್ಮೃತೋ ಜ್ಯೇಷ್ಠಃ ಷಡ್ಢಸ್ತಶ್ಚಾಪಿ ಮಧ್ಯಮಃ ।
ವಿದ್ಯಾತ್ಕನೀಯಸ್ತ್ರೈಹಸ್ತಂ ಲಿಂಗಮಾನಮಿದಂ ಸ್ಮೃತಂ ॥ 2-7 ॥
ಗರ್ಭಸ್ಯಾನತಃ ಪ್ರವಿಸ್ತಾರಸ್ತದೂನಶ್ಚ ನ ಶಸ್ಯತೇ ।
ಗರ್ಭಸ್ಯಾನತಃ ಪ್ರವಿಸ್ತಾರಾದ್ತದುಪರ್ಯಪಿ ಸಂಸ್ಥಿತಂ ॥ 2-8 ॥
ಪ್ರಾಸಾದಂ ಕಲ್ಪಯೇಚ್ಛ್ರೀಮಾನ್ವಿಭಜೇತ ತ್ರಿಧಾ ಪುನಃ ।
ಭಾಗ ಏಕೋ ಭವೇಜ್ಜಂಘಾ ದ್ವೌ ಭಾಗೌ ಮಂಜರೀ ಸ್ಮೃತಾ ॥ 2-9 ॥
ಮಂಜರ್ಯಾ ಅರ್ಧಭಾಗಸ್ಥಂ ಶುಕನಾಸಂ ಪ್ರಕಲ್ಪಯೇತ್ ।
ಗರ್ಭಾದರ್ಧೇನ ವಿಸ್ತಾರಮಾಯಾಮಂ ಚ ಸುಶೋಭನಂ ॥ 2-10 ॥
ಗರ್ಭಾದ್ವಾಪಿ ತ್ರಿಭಾಗೇನ ಶುಕನಾಸಂ ಪ್ರಕಲ್ಪಯೇತ್ ।
ಗರ್ಭಾದರ್ಧೇನ ವಿಸ್ತೀರ್ಣಾ ಗರ್ಭಾಚ್ಚ ದ್ವಿಗುಣಾಯತಾ ॥ 2-11 ॥
ಜಂಘಾಭಿಶ್ಚ ಭವೇತ್ಕಾರ್ಯಾ ಮಂಜರ್ಯಂಗುಲರಾಶಿನಾ ।
ಪ್ರಾಸಾದಾರ್ಧೇನ ವಿಜ್ಞೇಯೋ ಮಂಡಪಸ್ತಸ್ಯ ವಾಮತಃ ॥ 2-12 ॥
ಮಂಡಪಾತ್ಪಾದವಿಸ್ತೀರ್ಣಾ ಜಗತೀ ತಾವದುಚ್ಛ್ರಿತಾ ।
ಪ್ರಾಸಾದಸ್ಯ ಪ್ರಮಾಣೇನ ಜಗತ್ಯಾ ಸಾರ್ಧಮಂಗಣಂ ॥ 2-13 ॥
ಪ್ರಾಕಾರಂ ತತ್ಸಮಂತಾಚ್ಚ ಗುಪುರಾದಾಲಭೂಷಿತಂ ।
ಪ್ರಾಕಾರಾಂತಃ ಸ್ಥಿತಂ ಕಾರ್ಯಂ ವೃಷಸ್ಥಾನಂ ಸಮುಚ್ಛ್ರಿತಂ ॥ 2-14 ॥
ನಂದೀಶ್ವರಮಹಾಕಾಲೌ ದ್ವಾರಶಾಖಾವ್ಯವಸ್ಥಿತೌ ।
ಪ್ರಾಕಾರಾದ್ದಕ್ಷಿಣೇ ಕಾರ್ಯಂ ಸರ್ವೋಪಕರಣಾನ್ವಿತಂ ॥ 2-15 ॥
ಪಂಚಭೌಮಂ ತ್ರಿಭೌಮಂ ವಾ ಯೋಗೀಂದ್ರಾವಸಥಂ ಮಹತ್ ।
ಪ್ರಾಕಾರಗುಪ್ತಂ ತತ್ಕಾರ್ಯಂ ಮೈತ್ರಸ್ಥಾನಸಮನ್ವಿತಂ ॥ 2-16 ॥
ಸ್ಥಾನಾದ್ದಶಸಮಾಯುಕ್ತಂ ಭವ್ಯವೃಕ್ಷಜಲಾನ್ವಿತಂ ।
ತನ್ಮಹಾನಸಮಾಗ್ನೇಯ್ಯಾಂ ಪೂರ್ವತಃ ಸತ್ತ್ರಮಂಡಪಂ ॥ 2-17 ॥
ಸ್ಥಾನಂ ಚಂಡೇಶಮೈಶಾನ್ಯಾಂ ಪುಷ್ಪಾರಾಮಂ ತಥೋತ್ತರಂ ।
ಕೋಷ್ಠಾಗಾರಂ ಚ ವಾಯವ್ಯಾಂ ವಾರುಣ್ಯಾಂ ವರುಣಾಲಯಂ ॥ 2-18 ॥
ಶಮೀಂಧನಕುಶಸ್ಥಾನಮಾಯುಧಾನಾಂ ಚ ನೈರೃತಂ ।
ಸರ್ವಲೋಕೋಪಕಾರಾಯ ನಗರಸ್ಥಂ ಪ್ರಕಲ್ಪಯೇತ್ ॥ 2-19 ॥
ಶ್ರೀಮದಾಯತನಂ ಶಂಭೋರ್ಯೋಗಿನಾಂ ವಿಜನೇ ವನೇ ।
ಶಿವಸ್ಯಾಯತನೇ ಯಾವತ್ಸಮೇತಾಃ ಪರಮಾಣವಃ ॥ 2-20 ॥
ಮನ್ವಂತರಾಣಿ ತಾವಂತಿ ಕರ್ತುರ್ಭೋಗಾಃ ಶಿವೇ ಪುರೇ ।
ಮಹಾಪ್ರತಿಮಲಿಂಗಾನಿ ಮಹಾಂತ್ಯಾಯತನಾನಿ ಚ ॥ 2-21 ॥
ಕೃತ್ವಾಪ್ನೋತಿ ಮಹಾಭೋಗಾನಂತೇ ಮುಕ್ತಿಂ ಚ ಶಾಶ್ವತೀಂ ।
ಲಿಂಗಪ್ರತಿಷ್ಠಾಂ ಕುರ್ವೀತ ಯದಾ ತಲ್ಲಕ್ಷಣಂ ಕೃತೀ ॥ 2-22 ॥
ಪಂಚಗವ್ಯೇನ ಸಂಶೋಧ್ಯ ಪೂಜಯಿತ್ವಾಧಿವಾಸಯೇತ್ ।
ಪಾಲಾಶೋದುಂಬರಾಶ್ವತ್ಥ- ಪೃಷದಾಜ್ಯತಿಲೈರ್ಯವೈಃ ॥ 2-23 ॥
ಅಗ್ನಿಕಾರ್ಯಂ ಪ್ರಕುರ್ವೀತ ದದ್ಯಾತ್ಪೂರ್ಣಾಹುತಿತ್ರಯಂ ।
ಶಿವಸ್ಯಾಷ್ಟಶತಂ ಹುತ್ವಾ ಲಿಂಗಮೂಲಂ ಸ್ಪೃಶೇದ್ಬುಧಃ ॥ 2-24 ॥
ಏವಂ ಮಧ್ಯೇ ಽವಸಾನೇ ತನ್ಮೂರ್ತಿಮಂತ್ರೈಶ್ಚ ಮೂರ್ತಿಷು ।
ಅಷ್ಟೌ ಮೂರ್ತೀಶ್ವರಾಃ ಕಾರ್ಯಾಃ ನವಮಃ ಸ್ಥಾಪಕಃ ಸ್ಮೃತಃ ॥ 2-25 ॥
ಪ್ರಾತಃ ಸಂಸ್ಥಾಪಯೇಲ್ಲಿಂಗಂ ಮಂತ್ರೈಸ್ತು ನವಭಿಃ ಕ್ರಮಾತ್ ।
ಮಹಾಸ್ನಾಪನಪೂಜಾಂ ಚ ಸ್ಥಾಪ್ಯ ಲಿಂಗಂ ಪ್ರಪೂಜಯೇತ್ ॥ 2-26 ॥
ಗುರೋರ್ಮೂರ್ತಿಧರಾಣಾಂ ಚ ದದ್ಯಾದುತ್ತಮದಕ್ಷಿಣಾಂ ।
ಯತೀನಾಂ ಚ ಸಮಸ್ತಾನಾಂ ದದ್ಯಾನ್ಮಧ್ಯಮದಕ್ಷಿಣಾಂ ॥ 2-27 ॥
ದೀನಾಂಧಕೃಪಣೇಭ್ಯಶ್ಚ ಸರ್ವಾಸಾಮುಪಕಲ್ಪಯೇತ್ ।
ಸರ್ವಭಕ್ಷ್ಯಾನ್ನಪಾನಾದ್ಯೈರನಿಷಿದ್ಧಂ ಚ ಭೋಜನಂ ॥ 2-28 ॥
ಕಲ್ಪಯೇದಾಗತಾನಾಂ ಚ ಭೂತೇಭ್ಯಶ್ಚ ಬಲಿಂ ಹರೇತ್ ।
ರಾತ್ರೌ ಮಾತೃಗಣಾನಾಂ ಚ ಬಲಿಂ ದದ್ಯಾದ್ವಿಶೇಷತಃ ॥ 2-29 ॥
ಏವಂ ಯಃ ಸ್ಥಾಪಯೇಲ್ಲಿಂಗಂ ತಸ್ಯ ಪುಣ್ಯಫಲಂ ಶೃಣು ।
ಕುಲತ್ರಿಂಶಕಮುದ್ಧೃತ್ಯ ಭೃತ್ಯೈಶ್ಚ ಪರಿವಾರಿತಃ ॥ 2-30 ॥
ಕಲತ್ರಪುತ್ರಮಿತ್ರಾದ್ಯೈಃ ಸಹಿತಃ ಸರ್ವಬಾಂಧವೈಃ ।
ವಿಮುಚ್ಯ ಪಾಪಕಲಿಲಂ ಶಿವಲೋಕಂ ವ್ರಜೇನ್ನರಃ ।
ತತ್ರ ಭುಕ್ತ್ವಾ ಮಹಾಭೋಗಾನ್ಪ್ರಲಯೇ ಮುಕ್ತಿಮಾಪ್ನುಯಾತ್ ॥ 2-31 ॥
॥ ಇತಿ ಶಿವೋಪನಿಷದಿ ಲಿಂಗಾಯತನಾಧ್ಯಾಯೋ ದ್ವಿತೀಯಃ ॥
ಅಥಾನ್ಯೈರಲ್ಪವಿತ್ತೈಶ್ಚ ನೃಪೈಶ್ಚ ಶಿವಭಾವಿತೈಃ ।
ಶಕ್ತಿತಃ ಸ್ವಾಶ್ರಮೇ ಕಾರ್ಯಂ ಶಿವಶಾಂತಿಗೃಹದ್ವಯಂ ॥ 3-1 ॥
ಗೃಹಸ್ಯೇಶಾನದಿಗ್ಭಾಗೇ ಕಾರ್ಯಮುತ್ತರತೋ ಽಪಿ ವಾ ।
ಖಾತ್ವಾ ಭೂಮಿಂ ಸಮುದ್ಧೃತ್ಯ ಶಲ್ಯಾನಾಕೋಟ್ಯ ಯತ್ನತಃ ॥ 3-2 ॥
ಶಿವದೇವಗೃಹಂ ಕಾರ್ಯಮಷ್ಟಹಸ್ತಪ್ರಮಾಣತಃ ।
ದಕ್ಷಿಣೋತ್ತರದಿಗ್ಭಾಗೇ ಕಿಂಚಿಚ್ದೀರ್ಘಂ ಪ್ರಕಲ್ಪಯೇತ್ ॥ 3-3 ॥
ಹಸ್ತಮಾತ್ರಪ್ರಮಾಣಂ ಚ ದೃಢಪಟ್ಟಚತುಷ್ಟಯಂ ।
ಚತುಷ್ಕೋಣೇಷು ಸಂಯೋಜ್ಯಮರ್ಘ್ಯಪಾತ್ರಾದಿಸಂಶ್ರಯಂ ॥ 3-4 ॥
ಗರ್ಭಮಧ್ಯೇ ಪ್ರಕುರ್ವೀತ ಶಿವವೇದಿಂ ಸುಶೋಭನಾಂ ।
ಉದಗರ್ವಾಕ್ಚ್ಛ್ರಿತಾಂ(?) ಕಿಂಚಿಚ್ಚತುಃಶೀರ್ಷಕಸಂಯುತಾಂ ॥ 3-5 ॥
ತ್ರಿಹಸ್ತಾಯಾಮವಿಸ್ತಾರಾಮ್ಷೋಡಶಾಂಗುಲಮುಚ್ಛ್ರಿತಾಂ ।
ತಚ್ಛೀರ್ಷಾಣೀವ ಹಸ್ತಾರ್ಧಮಾಯಾಮಾದ್ವಿಸ್ತರೇಣ ಚ ॥ 3-6 ॥
ಶಿವಸ್ಥಂಡಿಲಮಿತ್ಯೇತಚ್ಚತುರ್ಹಸ್ತಂ ಸಮಂ ಶಿರಃ ।
ಮೂರ್ತಿನೈವೇದ್ಯದೀಪಾನಾಂ ವಿನ್ಯಾಸಾರ್ಥಂ ಪ್ರಕಲ್ಪಯೇತ್ ॥ 3-7 ॥
ಶೈವಲಿಂಗೇನ ಕಾರ್ಯಂ ಸ್ಯಾತ್ಕಾರ್ಯಂ ಮಣಿಜಪಾರ್ಥಿವೈಃ ।
ಸ್ಥಂಡಿಲಾರ್ಧೇ ಚ ಕುರ್ವಂತಿ ವೇದಿಮನ್ಯಾಂ ಸವರ್ತುಲಾಂ ॥ 3-8 ॥
ಷೋಡಶಾಂಗುಲಮುತ್ಸೇಧಾಂ ವಿಸ್ತೀರ್ಣಾಂ ದ್ವಿಗುಣೇನ ಚ ।
ಗೃಹೇ ನ ಸ್ಥಾಪಯೇಚ್ಛೈಲಂ ಲಿಂಗಂ ಮಣಿಜಮರ್ಚಯೇತ್ ॥ 3-9 ॥
ತ್ರಿಸಂಧ್ಯಂ ಪಾರ್ಥಿವಂ ವಾಪಿ ಕುರ್ಯಾದನ್ಯದ್ದಿನೇದಿನೇ ।
ಸರ್ವೇಷಾಮೇವ ವರ್ಣಾನಾಂ ಸ್ಫಾಟಿಕಂ ಸರ್ವಕಾಮದಂ ॥ 3-10 ॥
ಸರ್ವದೋಷವಿನಿರ್ಮುಕ್ತಮನ್ಯಥಾ ದೋಷಮಾವಹೇತ್ ।
ಆಯುಷ್ಮಾನ್ಬಲವಾಞ್ಶ್ರೀಮಾನ್ಪುತ್ರವಾಂಧನವಾನ್ಸುಖೀ ॥ 3-11 ॥
ವರಮಿಷ್ಟಂ ಚ ಲಭತೇ ಲಿಂಗಂ ಪಾರ್ಥಿವಮರ್ಚಯನ್ ।
ತಸ್ಮಾದ್ಧಿ ಪಾರ್ಥಿವಂ ಲಿಂಗಂ ಜ್ಞೇಯಂ ಸರ್ವಾರ್ಥಸಾಧಕಂ ॥ 3-12 ॥
ನಿರ್ದೋಷಂ ಸುಲಭಂ ಚೈವ ಪೂಜಯೇತ್ಸತತಂ ಬುಧಃ ।
ಯಥಾ ಯಥಾ ಮಹಾಲಿಂಗಂ ಪೂಜಾ ಶ್ರದ್ಧಾ ಯಥಾ ಯಥಾ ॥ 3-13 ॥
ತಥಾ ತಥಾ ಮಹತ್ಪುಣ್ಯಂ ವಿಜ್ಞೇಯಮನುರೂಪತಃ ।
ಪ್ರತಿಮಾಲಿಂಗವೇದೀಷು ಯಾವಂತಃ ಪರಮಾಣವಃ ।
ತಾವತ್ಕಲ್ಪಾನ್ಮಹಾಭೋಗಸ್ತತ್ಕರ್ತಾಸ್ತೇ ಶಿವೇ ಪುರೇ ॥ 3-14 ॥
॥ ಇತಿ ಶಿವೋಪನಿಷದಿ ಶಿವಗೃಹಾಧ್ಯಾಯಸ್ತೃತೀಯಃ ॥
ಅಥೈಕಭಿನ್ನಾವಿಚ್ಛಿನ್ನಂ ಪುರತಃ ಶಾಂತಿಮಂಡಪಂ ।
ಪೂರ್ವಾಪರಾಷ್ಟಹಸ್ತಂ ಸ್ಯಾದ್ದ್ವಾದಶೋತ್ತರದಕ್ಷಿಣೇ ॥ 4-1 ॥
ತದ್ದ್ವಾರಭಿತ್ತಿಸಂಬದ್ಧಂ ಕಪಿಚ್ಛುಕಸಮಾವೃತಂ ।
ಪಟದ್ವಯಂ ಭವೇತ್ಸ್ಥಾಪ್ಯ ಸ್ರುವಾದ್ಯಾವಾರಹೇತುನಾ ॥ 4-2 ॥
ದ್ವಾರಂ ತ್ರಿಶಾಖಂ ವಿಜ್ಞೇಯಂ ನವತ್ಯಂಗುಲಮುಚ್ಛ್ರಿತಂ ।
ತದರ್ಧೇನ ಚ ವಿಸ್ತೀರ್ಣಂ ಸತ್ಕವಾಟಂ ಶಿವಾಲಯೇ ॥ 4-3 ॥
ದೀರ್ಘಂ ಪಂಚನವತ್ಯಾ ಚ ಪಂಚಶಾಖಾಸುಶೋಭಿತಂ ।
ಸತ್ಕವಾಟದ್ವಯೋಪೇತಂ ಶ್ರೀಮದ್ವಾಹನಮಂಟಪಂ ॥ 4-4 ॥
ದ್ವಾರಂ ಪಶ್ಚಾನ್ಮುಖಂ ಜ್ಞೇಯಮಶೇಷಾರ್ಥಪ್ರಸಾಧಕಂ ।
ಅಭಾವೇ ಪ್ರಾಙ್ಮುಖಂ ಕಾರ್ಯಮುದಗ್ದಕ್ಷಿಣತೋ ನ ಚ ॥ 4-5 ॥
ಗವಾಕ್ಷಕದ್ವಯಂ ಕಾರ್ಯಮಪಿಧಾನಂ ಸುಶೋಭನಂ ।
ಧೂಮನಿರ್ಗಮನಾರ್ಥಾಯ ದಕ್ಷಿಣೋತ್ತರಕುಡ್ಯಯೋಃ ॥ 4-6 ॥
ಆಗ್ನೇಯಭಾಗಾತ್ಪರಿತಃ ಕಾರ್ಯಾ ಜಾಲಗವಾಕ್ಷಕಾಃ ।
ಊರ್ಧ್ವಸ್ತೂಪಿಕಯಾ ಯುಕ್ತಾ ಈಷಚ್ಛಿದ್ರಪಿಧಾನಯಾ ॥ 4-7 ॥
ಶಿವಾಗ್ನಿಹೋತ್ರಕುಂಡಂ ಚ ವೃತ್ತಂ ಹಸ್ತಪ್ರಮಾಣತಃ ।
ಚತುರಶ್ರವೇದಿ(kA) ಶ್ರೀಮನ್ಮೇಖಲಾತ್ರಯಭೂಷಿತಂ ॥ 4-8 ॥
ಕುಡ್ಯಂ ದ್ವಿಹಸ್ತವಿಸ್ತೀಋಣಂ ಪಂಚಹಸ್ತಸಮುಚ್ಛ್ರಿತಂ ।
ಶಿವಾಗ್ನಿಹೋತ್ರಶರಣಂ ಕರ್ತವ್ಯಮತಿಶೋಭನಂ ॥ 4-9 ॥
ಜಗತೀಸ್ತಂಭಪಟ್ಟಾದ್ಯಂ ಸಪ್ತಸಂಖ್ಯಂ ಚ ಕಲ್ಪಯೇತ್ ।
ಬಂಧಯೋಗವಿನಿರ್ಮುಕ್ತಂ ತುಲ್ಯಸ್ಥಾನಪದಾಂತರಂ ॥ 4-10 ॥
ಐಷ್ಟಕಂ ಕಲ್ಪಯೇದ್ಯತ್ನಾಚ್ಛಿವಾಗ್ನ್ಯಾಯತನಂ ಮಹತ್ ।
ಚತುಃಪ್ರೇಗೀವಕೋಪೇತಂ(?) ಏಕಪ್ರೇಗೀವಕೇನ ವಾ(?) ॥ 4-11 ॥
ಸುಧಾಪ್ರಲಿಪ್ತಂ ಕರ್ತವ್ಯಂ ಪಂಚಾಂಡಕಬಿಭೂಷಿತಂ ।
ಶಿವಾಗ್ನಿಹೋತ್ರಶರಣಂ ಚತುರಂಡಕಸಂಯುತಂ ॥ 4-12 ॥
ಬಹಿಸ್ತದೇವ ಜಗತೀ ತ್ರಿಹಸ್ತಾ ವಾ ಸುಕುಟ್ಟಿಮಾ ।
ತಾವದೇವ ಚ ವಿಸ್ತೀರ್ಣಾ ಮೇಖಲಾದಿವಿಭೂಷಿತಾ ॥ 4-13 ॥
ಕರ್ತವ್ಯಾ ಚಾತ್ರ ಜಗತೀ ತಸ್ಯಾಶ್ಚಾಧಃ ಸಮಂತತಃ ।
ದ್ವಿಹಸ್ತಮಾತ್ರವಿಸ್ತೀರ್ಣಾ ತದರ್ಧಾರ್ಧಸಮುಚ್ಛ್ರಿತಾ ॥ 4-14 ॥
ಅನ್ಯಾ ವೃತ್ತಾ ಪ್ರಕರ್ತವ್ಯಾ ರುದ್ರವೇದೀ ಸುಶೋಭನಾ ।
ದಶಹಸ್ತಪ್ರಮಾಣಾ ಚ ಚತುರಂಗುಲಮುಚ್ಛ್ರಿತಾ ॥ 4-15 ॥
ರುದ್ರಮಾತೃಗಣಾನಾಂ ಚ ದಿಕ್ಪತೀನಾಂ ಚ ಸರ್ವದಾ ।
ಸರ್ವಾಗ್ರಪಾಕಸಂಯುಕ್ತಂ ತಾಸು ನಿತ್ಯಬಲಿಂ ಹರೇತ್ ॥ 4-16 ॥
ವೇದ್ಯನ್ಯಾ ಸರ್ವಭೂತಾನಾಂ ಬಹಿಃ ಕಾರ್ಯಾ ದ್ವಿಹಸ್ತಿಕಾ ।
ವೃಷಸ್ಥಾನಂ ಚ ಕರ್ತವ್ಯಂ ಶಿವಾಲೋಕನಸಂಮುಖಂ ॥ 4-17 ॥
ಅಗ್ರಾರ್ಷಸವಿತುರ್ವ್ಯೋಮ ವೃಷಃ ಕಾರ್ಯಶ್ಚ ಪಶ್ಚಿಮೇ ।
ವ್ಯೋಮ್ನಶ್ಚಾಧಸ್ತ್ರಿಗರ್ಭಂ ಸ್ಯಾತ್ಪಿತೃತರ್ಪಣವೇದಿಕಾ ॥ 4-18 ॥
ಪ್ರಾಕಾರಾಂತರ್ಬಹಿಃ ಕಾರ್ಯಂ ಶ್ರೀಮದ್ಗೋಪುರಭೂಷಿತಂ ।
ಪುಷ್ಪಾರಾಮಜಲೋಪೇತಂ ಪ್ರಾಕಾರಾಂತಂ ಚ ಕಾರಯೇತ್ ॥ 4-19 ॥
ಮೃದ್ದಾರುಜಂ ತೃಣಚ್ಛನ್ನಂ ಪ್ರಕುರ್ವೀತ ಶಿವಾಲಯಂ ।
ಭೂಮಿಕಾದ್ವಯವಿನ್ಯಾಸಾದುತ್ಕ್ಷಿಪ್ತಂ ಕಲ್ಪಯೇದ್ಬುಧಃ ॥ 4-20 ॥
ಶಿವದಕ್ಷಿಣತಃ ಕಾರ್ಯಂ ತಭುಕ್ತೇರ್ಯೋಗ್ಯಮಾಲಯಂ ।
ಶಯ್ಯಾಸನಸಮಾಯುಕ್ತಂ ವಾಸ್ತುವಿದ್ಯಾವಿನಿರ್ಮಿತಂ ॥ 4-21 ॥
ಧ್ವಜಸಿಂಹೌ ವೃಷಗಜೌ ಚತ್ವಾರಃ ಶೋಭನಾಃ ಸ್ಮೃತಾಃ ।
ಧೂಮಶ್ವಗರ್ದಭಧ್ವಾಂಕ್ಷಾಶ್ಚತ್ವಾರಶ್ಚಾರ್ಥನಾಶಕಾಃ ॥ 4-22 ॥
ಗೃಹಸ್ಯಾಯಾಮವಿಸ್ತಾರಂ ಕೃತ್ವಾ ತ್ರಿಗುಣಮಾದಿತಃ ।
ಅಷ್ಟಭಿಃ ಶೋಧಯೇದಾಪೈಃ ಶೇಷಶ್ಚ ಗೃಹಮಾದಿಶೇತ್ ॥ 4-23 ॥
ಇತಿ ಶಾಂತಿಗೃಹಂ ಕೃತ್ವಾ ರುದ್ರಾಗ್ನಿಂ ಯಃ ಪ್ರವರ್ತಯೇತ್ ।
ಅಪ್ಯೇಕಂ ದಿವಸಂ ಭಕ್ತ್ಯಾ ತಸ್ಯ ಪುಣ್ಯಫಲಂ ಶೃಣು ॥ 4-24 ॥
ಕಲತ್ರಪುತ್ರಮಿತ್ರಾದ್ಯೈಃ ಸ ಭೃತ್ಯೈಃ ಪರಿವಾರಿತಃ ।
ಕುಲೈಕವಿಂಶದುತ್ತಾರ್ಯ ದೇವಲೋಕಮವಾಪ್ನುಯಾತ್ ॥ 4-25 ॥
ನೀಲೋತ್ಪಲದಲಶ್ಯಾಮಾಃ ಪೀನವೃತ್ತಪಯೋಧರಾಃ ।
ಹೇಮವರ್ಣಾಃ ಸ್ತ್ರಿಯಶ್ಚಾನ್ಯಾಃ ಸುಂದರ್ಯಃ ಪ್ರಿಯದರ್ಶನಾಃ ॥ 4-26 ॥
ತಾಭಿಃ ಸಾರ್ಧಂ ಮಹಾಭೋಗೈರ್ವಿಮಾನೈಃ ಸಾರ್ವಕಾಮಿಕೈಃ ।
ಇಚ್ಛಯಾ ಕ್ರೀಡತೇ ತಾವದ್ಯಾವದಾಭೂತಸಂಪ್ಲವಂ ॥ 4-27 ॥
ತತಃ ಕಲ್ಪಾಗ್ನಿನಾ ಸಾರ್ಧಂ ದಹ್ಯಮಾನಂ ಸುವಿಹ್ವಲಂ ।
ದೃಷ್ಟ್ವಾ ವಿರಜ್ಯತೇ ಭೂಯೋ ಭವಭೋಗಮಹಾರ್ಣವಾತ್ ॥ 4-28 ॥
ತತಃ ಸಂಪೃಚ್ಛತೇ ರುದ್ರಾಂಸ್ತತ್ರಸ್ಥಾನ್ಜ್ಞಾನಪಾರಗಾನ್ ।
ತೇಭ್ಯಃ ಪ್ರಾಪ್ಯ ಶಿವಜ್ಞಾನಂ ಶಾಂತಂ ನಿರ್ವಾಣಮಾಪ್ನುಯಾತ್ ॥ 4-29 ॥
ಅವಿರಕ್ತಶ್ಚ ಭೋಗೇಭ್ಯಃ ಸಪ್ತ ಜನ್ಮಾನಿ ಜಾಯತೇ ।
ಪೃಥಿವ್ಯಧಿಪತಿಃ ಶ್ರೀಮಾನಿಚ್ಛಯಾ ವಾ ದ್ವಿಜೋತ್ತಮಃ ॥ 4-30 ॥
ಸಪ್ತಮಾಜ್ಜನ್ಮನಶ್ಚಾಂತೇ ಶಿವಜ್ಞಾನಮನಾಪ್ನುಯಾತ್ ।
ಜ್ಞಾನಾದ್ವಿರಕ್ತಃ ಸಂಸಾರಾಚ್ಛುದ್ಧಃ ಖಾನ್ಯಧಿತಿಷ್ಠತಿ ॥ 4-31 ॥
ಇತ್ಯೇತದಖಿಲಂ ಕಾರ್ಯಂ ಫಲಮುಕ್ತಂ ಸಮಾಸತಃ ।
ಉತ್ಸವೇ ಚ ಪುನರ್ಬ್ರೂಮಃ ಪ್ರತ್ಯೇಕಂ ದ್ರವ್ಯಜಂ ಫಲಂ ॥ 4-32 ॥
ಸದ್ಗಂಧಗುಟಿಕಾಮೇಕಾಂ ಲಾಕ್ಷಾಂ ಪ್ರಾಣ್ಯಂಗವರ್ಜಿತಾಂ ।
ಕರ್ಪಾಸಾಸ್ಥಿಪ್ರಮಾಣಂ ಚ ಹುತ್ವಾಗ್ನೌ ಶೃಣುಯಾತ್ಫಲಂ ॥ 4-33 ॥
ಯಾವತ್ಸತ್ಗಂಧಗುಟಿಕಾ ಶಿವಾಗ್ನೌ ಸಂಖ್ಯಯಾ ಹುತಾ ।
ತಾವತ್ಕೋಟ್ಯಸ್ತು ವರ್ಷಾಣಿ ಭೋಗಾನ್ಭುಂಕ್ತೇ ಶಿವೇ ಪುರೇ ॥ 4-34 ॥
ಏಕಾಂಗುಲಪ್ರಮಾಣೇನ ಹುತ್ವಾಗ್ನೌ ಚಂದನಾಹುತಿಂ ।
ವರ್ಷಕೋಟಿದ್ವಯಂ ಭೋಗೈರ್ದಿವ್ಯೈಃ ಶಿವಪುರೇ ವಸೇತ್ ॥ 4-35 ॥
ಯಾವತ್ಕೇಸರಸಂಖ್ಯಾನಂ ಕುಸುಮಸ್ಯಾನಲೇ ಹುತಂ ।
ತಾವದ್ಯುಗಸಹಸ್ರಾಣಿ ಶಿವಲೋಕೇ ಮಹೀಯತೇ ॥ 4-36 ॥
ನಾಗಕೇಸರಪುಷ್ಪಂ ತು ಕುಂಕುಮಾರ್ಧೇನ ಕೀರ್ತಿತಂ ।
ಯತ್ಫಲಂ ಚಂದನಸ್ಯೋಕ್ತಮುಶೀರಸ್ಯ ತದರ್ಧಕಂ ॥ 4-37 ॥
ಯತ್ಪುಷ್ಪಧೂಪಭಷ್ಯಾನ್ನ- ದಧಿಕ್ಷೀರಘೃತಾದಿಭಿಃ ।
ಪುಣ್ಯಲಿಂಗಾರ್ಚನೇ ಪ್ರೋಕ್ತಂ ತದ್ಧೋಮಸ್ಯ ದಶಾಧಿಕಂ ॥ 4-38 ॥
ಹುತ್ವಾಗ್ನೌ ಸಮಿಧಸ್ತಿಸ್ರೌ ಶಿವೋಮಾಸ್ಕಂದನಾಮಭಿಃ ।
ಪಶ್ಚಾದ್ದದ್ಯಾತ್ತಿಲಾನ್ನಾನಿ ಹೋಮಯೀತ ಯಥಾಕ್ರಮಂ ॥ 4-39 ॥
ಪಲಾಶಾಂಕುರಜಾರಿಷ್ಟ- ಪಾಲಾಲ್ಯಃ(?) ಸಮಿಧಃ ಶುಭಾಃ ।
ಪೃಷದಾಜ್ಯಪ್ಲುತಾ ಹುತ್ವಾ ಶೃಣು ಯತ್ಫಲಮಾಪ್ನುಯಾತ್ ॥ 4-40 ॥
ಪಲಾಶಾಂಕುರಸಂಖ್ಯಾನಾಂ ಯಾವದಗ್ನೌ ಹುತಂ ಭವೇತ್ ।
ತಾವತ್ಕಲ್ಪಾನ್ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 4-41 ॥
ತಲ್ಲಕ್ಷ್ಯಮಧ್ಯಸಂಭೂತಂ ಹುತ್ವಾಗ್ನೌ ಸಮಿಧಃ ಶುಭಾಃ ।
ಕಲ್ಪಾರ್ಧಸಂಮಿತಂ ಕಾಲಂ ಭೋಗಾನ್ಭುಂಕ್ತೇ ಶಿವೇ ಪುರೇ ॥ 4-42 ॥
ಶಮೀಸಮಿತ್ಫಲಂ ದೇಯಮಬ್ದಾನಪಿ ಚ ಲಕ್ಷಕಂ ।
ಶಮ್ಯರ್ಧಫಲವಚ್ಛೇಷಾಃ ಸಮಿಧಃ ಕ್ಷೀರವೃಕ್ಷಜಾಃ ॥ 4-43 ॥
ತಿಲಸಂಖ್ಯಾಂಸ್ತಿಲಾನ್ಹುತ್ವಾ ಹ್ಯಾಜ್ಯಾಕ್ತಾ(?) ಯಾವತೀ ಭವೇತ್ ।
ತಾವತ್ಸ ವರ್ಷಲಕ್ಷಾಂಸ್ತು ಭೋಗಾನ್ಭುಂಕ್ತೇ ಶಿವೇ ಪುರೇ ॥ 4-44 ॥
ಯಾವತ್ಸುರೌಷಧೀರಜ್ಞಸ್(?) ತಿಲತುಲ್ಯಫಲಂ ಸ್ಮೃತಂ ।
ಇತರೇಭ್ಯಸ್ತಿಲೇಭ್ಯಶ್ಚ ಕೃಷ್ಣಾನಾಂ ದ್ವಿಗುಣಂ ಫಲಂ ॥ 4-45 ॥
ಲಾಜಾಕ್ಷತಾಃ ಸಗೋಧೂಮಾಃ ವರ್ಷಲಕ್ಷಫಲಪ್ರದಾಃ ।
ದಶಸಾಹಸ್ರಿಕಾ ಜ್ಞೇಯಾಃ ಶೇಷಾಃ ಸ್ಯುರ್ಬೀಜಜಾತಯಃ ॥ 4-46 ॥
ಪಲಾಶೇಂಧನಜೇ ವಹ್ನೌ ಹೋಮಸ್ಯ ದ್ವಿಗುಣಂ ಫಲಂ ।
ಕ್ಷೀರವೃಕ್ಷಸಮೃದ್ಧೇ ಽಗ್ನೌ ಫಲಂ ಸಾರ್ಧಾರ್ಧಿಕಂ ಭವೇತ್ ॥ 4-47 ॥
ಅಸಮಿದ್ಧೇ ಸಧೂಮೇ ಚ ಹೋಮಕರ್ಮ ನಿರರ್ಥಕಂ ।
ಅಂಧಶ್ಚ ಜಾಯಮಾನಃ ಸ್ಯಾದ್ದಾರಿದ್ರ್ಯೋಪಹತಸ್ತಥಾ ॥ 4-48 ॥
ನ ಚ ಕಂಟಕಿಭಿರ್ವೃಕ್ಷೈರಗ್ನಿಂ ಪ್ರಜ್ವಾಲ್ಯ ಹೋಮಯೇತ್ ।
ಶುಷ್ಕೈರ್ನವೈಃ ಪ್ರಶಸ್ತೈಶ್ಚ ಕಾಷ್ಠೈರಗ್ನಿಂ ಸಮಿಂಧಯೇತ್ ॥ 4-49 ॥
ಏವಮಾಜ್ಯಾಹುತಿಂ ಹುತ್ವಾ ಶಿವಲೋಕಮವಾಪ್ನುಯಾತ್ ।
ತತ್ರ ಕಲ್ಪಶತಂ ಭೋಗಾನ್ಭುಂಕ್ತೇ ದಿವ್ಯಾನ್ಯಥೇಪ್ಸಿತಾನ್ ॥ 4-50 ॥
ಸ್ರುಚೈಕಾಹಿತಮಾತ್ರೇಣ ವ್ರತಸ್ಯಾಪೂರಿತೇನ ಚ ।
ಯಾಹುತಿರ್ದೀಯತೇ ವಹ್ನೌ ಸಾ ಪೂರ್ಣಾಹುತಿರುಚ್ಯತೇ ॥ 4-51 ॥
ಏಕಾಂ ಪೂರ್ಣಾಹುತಿಂ ಹುತ್ವಾ ಶಿವೇನ ಶಿವಭಾವಿತಃ ।
ಸರ್ವಕಾಮಮವಾಪ್ನೋತಿ ಶಿವಲೋಕೇ ವ್ಯವಸ್ಥಿತಃ ॥ 4-52 ॥
ಅಶೇಷಕುಲಜೈರ್ಸಾರ್ಧಂ ಸ ಭೃತ್ಯೈಃ ಪರಿವಾರಿತಃ ।
ಆಭೂತಸಂಪ್ಲವಂ ಯಾವದ್ಭೋಗಾನ್ಭುಂಕ್ತೇ ಯಥೇಪ್ಸಿತಾನ್ ॥ 4-53 ॥
ತತಶ್ಚ ಪ್ರಲಯೇ ಪ್ರಾಪ್ತೇ ಸಂಪ್ರಾಪ್ಯ ಜ್ಞಾನಮುತ್ತಮಂ ।
ಪ್ರಸಾದಾದೀಶ್ವರಸ್ಯೈವ ಮುಚ್ಯತೇ ಭವಸಾಗರಾತ್ ॥ 4-54 ॥
ಶಿವಪೂರ್ಣಾಹುತಿಂ ವಹ್ನೌ ಪತಂತೀಂ ಯಃ ಪ್ರಪಶ್ಯತಿ ।
ಸೋ ಽಪಿ ಪಾಪರಿ ನರಃ ಸರ್ವೈರ್ಮುಕ್ತಃ ಶಿವಪುರಂ ವ್ರಜೇತ್ ॥ 4-55 ॥
ಶಿವಾಗ್ನಿಧೂಮಸಂಸ್ಪೃಷ್ಟಾ ಜೀವಾಃ ಸರ್ವೇ ಚರಾಚರಾಃ ।
ತೇ ಽಪಿ ಪಾಪವಿನಿರ್ಮುಕ್ತಾಃ ಸ್ವರ್ಗಂ ಯಾಂತಿ ನ ಸಂಶಯಃ ॥ 4-56 ॥
ಶಿವಯಜ್ಞಮಹಾವೇದ್ಯಾ ಜಾಯತೇ ಯೇ ನ ಸಂತಿ ವಾ ।
ತೇ ಽಪಿ ಯಾಂತಿ ಶಿವಸ್ಥಾನಂ ಜೀವಾಃ ಸ್ಥಾವರಜಂಗಮಾಃ ॥ 4-57 ॥
ಪೂರ್ಣಾಹುತಿಂ ಘೃತಾಭಾವೇ ಕ್ಷೀರತೈಲೇನ ಕಲ್ಪಯೇತ್ ।
ಹೋಮಯೇದತಸೀತೈಲಂ ತಿಲತೈಲಂ ವಿನಾ ನರಃ ॥ 4-58 ॥
ಸರ್ಷಪೇಂಗುಡಿಕಾಶಾಮ್ರ- ಕರಂಜಮಧುಕಾಕ್ಷಜಂ ।
ಪ್ರಿಯಂಗುಬಿಲ್ವಪೈಪ್ಪಲ್ಯ- ನಾಲಿಕೇರಸಮುದ್ಭವಂ(?) ॥ 4-59 ॥
ಇತ್ಯೇವಮಾದಿಕಂ ತೈಲಮಾಜ್ಯಾಭಾವೇ ಪ್ರಕಲ್ಪಯೇತ್ ।
ದೂರ್ವಯಾ ಬಿಲ್ವಪತ್ತ್ರೈರ್ವಾ ಸಮಿಧಃ ಸಂಪ್ರಕೀರ್ತಿತಾಃ ॥ 4-60 ॥
ಅನ್ನಾರ್ಥಂ ಹೋಮಯೇತ್ಕ್ಷೀರಂ ದಧಿ ಮೂಲಫಲಾನಿ ವಾ ।
ತಿಲಾರ್ಥಂ ತಂಡುಲೈಃ ಕುರ್ಯಾದ್ದರ್ಭಾರ್ಥಂ ಹರಿತೈಸ್ತೃಣೈಃ ॥ 4-61 ॥
ಪರಿಧೀನಾಮಭಾವೇನ ಶರೈರ್ವಂಶೈಶ್ಚ ಕಲ್ಪಯೇತ್ ।
ಇಂಧನಾನಾಮಭಾವೇನ ದೀಪಯೇತ್ತೃಣಗೋಮಯೈಃ ॥ 4-62 ॥
ಗೋಮಯಾನಾಮಭಾವೇನ ಮಹತ್ಯಂಭಸಿ ಹೋಮಯೇತ್ ।
ಅಪಾಮಸಂಭವೇ ಹೋಮಂ ಭೂಮಿಭಾಗೇ ಮನೋಹರೇ ॥ 4-63 ॥
ವಿಪ್ರಸ್ಯ ದಕ್ಷಿಣೇ ಪಾಣಾವಶ್ವತ್ಥೇ ತದಭಾವತಃ ।
ಛಾಗಸ್ಯ ದಕ್ಷಿಣೇ ಕರ್ಣೇ ಕುಶಮೂಲೇ ಚ ಹೋಮಯೇತ್ ॥ 4-64 ॥
ಸ್ವಾತ್ಮಾಗ್ನೌ ಹೋಮಯೇತ್ಪ್ರಾಜ್ಞಃ ಸರ್ವಾಗ್ನೀನಾಮಸಂಭವೇ ।
ಅಭಾವೇ ನ ತ್ಯಜೇತ್ಕರ್ಮ ಕರ್ಮಯೋಗವಿಧೌ ಸ್ಥಿತಃ ॥ 4-65 ॥
ಆಪತ್ಕಾಲೇ ಽಪಿ ಯಃ ಕುರ್ಯಾಚ್ಛಿವಾಗ್ನೇರ್ಮನಸಾರ್ಚನಂ ।
ಸ ಮೋಹಕಂಚುಕಂ ತ್ಯಕ್ತ್ವಾ ಪರಾಂ ಶಾಂತಿಮವಾಪ್ನುಯಾತ್ ॥ 4-66 ॥
ಪ್ರಾಣಾಗ್ನಿಹೋತ್ರಂ ಕುರ್ವಂತಿ ಪರಮಂ ಶಿವಯೋಗಿನಃ ।
ಬಾಹ್ಯಕರ್ಮವಿನಿರ್ಮುಕ್ತಾ ಜ್ಞಾನಧ್ಯಾನಸಮಾಕುಲಾಃ ॥ 4-67 ॥
॥ ಇತಿ ಶಿವೋಪನಿಷದಿ ಶಾಂತಿಗೃಹಾಗ್ನಿಕಾರ್ಯಾಧ್ಯಾಯಶ್ಚತುರ್ಥಃ ॥
ಅಥಾಗ್ನೇಯಂ ಮಹಾಸ್ನಾನಮಲಕ್ಷ್ಮೀಮಲನಾಶನಂ ।
ಸರ್ವಪಾಪಹರಂ ದಿವ್ಯಂ ತಪಃ ಶ್ರೀಕೀರ್ತಿವರ್ಧನಂ ॥ 5-1 ॥
ಅಗ್ನಿರೂಪೇಣ ರುದ್ರೇಣ ಸ್ವತೇಜಃ ಪರಮಂ ಬಲಂ ।
ಭೂತಿರೂಪಂ ಸಮುದ್ಗೀರ್ಣಂ ವಿಶುದ್ಧಂ ದುರಿತಾಪಹಂ ॥ 5-2 ॥
ಯಕ್ಷರಕ್ಷಃಪಿಶಾಚಾನಾಂ ಧ್ವಂಸನಂ ಮಂತ್ರಸತ್ಕೃತಂ ।
ರಕ್ಷಾರ್ಥಂ ಬಾಲರೂಪಾಣಾಂ ಸೂತಿಕಾನಾಂ ಗೃಹೇಷು ಚ ॥ 5-3 ॥
ಯಶ್ಚ ಭುಂಕ್ತೇ ದ್ವಿಜಃ ಕೃತ್ವಾ ಅನ್ನಸ್ಯ ವಾ ಪರಿಧಿತ್ರಯಂ(?) ।
ಅಪಿ ಶೂದ್ರಸ್ಯ ಪಂಕ್ತಿಸ್ಥಃ ಪಂಕ್ತಿದೋಷೈರ್ನ ಲಿಪ್ಯತೇ ॥ 5-4 ॥
ಆಹಾರಮರ್ಧಭುಕ್ತಂ ಚ ಕೀಟಕೇಶಾದಿದೂಷಿತಂ ।
ತಾವನ್ಮಾತ್ರಂ ಸಮುದ್ಧೃತ್ಯ ಭೂತಿಸ್ಪೃಷ್ಟಂ ವಿಶುದ್ಧ್ಯತಿ ॥ 5-5 ॥
ಆರಣ್ಯಂ ಗೋಮಯಕೃತಂ ಕರೀಷಂ ವಾ ಪ್ರಶಸ್ಯತೇ ।
ಶರ್ಕರಾಪಾಂಸುನಿರ್ಮುಕ್ತಮಭಾವೇ ಕಾಷ್ಠಭಸ್ಮನಾ ॥ 5-6 ॥
ಸ್ವಗೃಹಾಶ್ರಮವಲ್ಲಿಭ್ಯಃ ಕುಲಾಲಾಲಯಭಸ್ಮನಾ ।
ಗೋಮಯೇಷು ಚ ದಗ್ಧೇಷು ಹೀಷ್ಟಕಾನಿ ಚ ಯೇಷು ಚ ॥ 5-7 ॥
ಸರ್ವತ್ರ ವಿದ್ಯತೇ ಭಸ್ಮ ದುಃಖಾಪಾರ್ಜನರಕ್ಷಣಂ(duHkhopAr) ।
ಶಂಖಕುಂದೇಂದುವರ್ಣಾಭಮಾದದ್ಯಾಜ್ಜಂತುವರ್ಜಿತಂ ॥ 5-8 ॥
ಭಸ್ಮಾನೀಯ ಪ್ರಯತ್ನೇನ ತದ್ರಕ್ಷೇದ್ಯತ್ನವಾಂಸ್ತಥಾ ।
ಮಾರ್ಜಾರಮೂಷಿಕಾದ್ಯೈಶ್ಚ ನೋಪಹನ್ಯೇತ ತದ್ಯಥಾ ॥ 5-9 ॥
ಪಂಚದೋಷವಿನಿರ್ಮುಕ್ತಂ ಗುಣಪಂಚಕಸಂಯುತಂ ।
ಶಿವೈಕಾದಶಿಕಾಜಪ್ತಂ ಶಿವಭಸ್ಮ ಪ್ರಕೀರ್ತಿತಂ ॥ 5-10 ॥
ಜಾತಿಕಾರುಕವಾಕ್ಕಾಯ- ಸ್ಥಾನದುಷ್ಟಂ ಚ ಪಂಚಮಂ ।
ಪಾಪಘ್ನಂ ಶಾಂಕರಂ ರಕ್ಷಾ- ಪವಿತ್ರಂ ಯೋಗದಂ ಗುಣಾಃ(?) ॥ 5-11 ॥
ಶಿವವ್ರತಸ್ಯ ಶಾಂತಸ್ಯ ಭಾಸಕತ್ವಾಚ್ಛುಭಸ್ಯ ಚ ।
ಭಕ್ಷಣಾತ್ಸರ್ವಪಾಪಾನಾಂ ಭಸ್ಮೇತಿ ಪರಿಕೀರ್ತಿತಂ ॥ 5-12 ॥
ಭಸ್ಮಸ್ನಾನಂ ಶಿವಸ್ನಾನಂ ವಾರುಣಾದಧಿಕಂ ಸ್ಮೃತಂ ।
ಜಂತುಶೈವಾಲನಿರ್ಮುಕ್ತಮಾಗ್ನೇಯಂ ಪಂಕವರ್ಜಿತಂ ॥ 5-13 ॥
ಅಪವಿತ್ರಂ ಭವೇತ್ತೋಯಂ ನಿಶಿ ಪೂರ್ವಮನಾಹೃತಂ ।
ನದೀತಡಾಗವಾಪಿಷು ಗಿರಿಪ್ರಸ್ರವಣೇಷು ಚ ॥ 5-14 ॥
ಸ್ನಾನಂ ಸಾಧಾರಣಂ ಪ್ರೋಕ್ತಂ ವಾರುಣಂ ಸರ್ವದೇಹಿನಾಂ ।
ಅಸಾಧಾರಣಮೇವೋಕ್ತಂ ಭಸ್ಮಸ್ನಾನಂ ದ್ವಿಜನ್ಮನಾಂ ॥ 5-15 ॥
ತ್ರಿಕಾಲಂ ವಾರುಣಸ್ನಾನಾದನಾರೋಗ್ಯಂ ಪ್ರಜಾಯತೇ ।
ಆಗ್ನೇಯಂ ರೋಗಶಮನಮೇತಸ್ಮಾದ್ಸಾರ್ವಕಾಮಿಕಂ ॥ 5-16 ॥
ಸಂಧ್ಯಾತ್ರಯೇ ಽರ್ಧರಾತ್ರೇ ಚ ಭುಕ್ತ್ವಾ ಚಾನ್ನವಿರೇಚನೇ ।
ಶಿವಯೋಗ್ಯಾಚರೇತ್ಸ್ನಾನಮುಚ್ಚಾರಾದಿಕ್ರಿಯಾಸು ಚ ॥ 5-17 ॥
ಭಸ್ಮಾಸ್ತೃತೇ ಮಹೀಭಾಗೇ ಸಮೇ ಜಂತುವಿವರ್ಜಿತೇ ।
ಧ್ಯಾಯಮಾನಃ ಶಿವಂ ಯೋಗೀ ರಜನ್ಯಂತಂ ಶಯೀತ ಚ ॥ 5-18 ॥
ಏಕರಾತ್ರೋಷಿತಸ್ಯಾಪಿ ಯಾ ಗತಿರ್ಭಸ್ಮಶಾಯಿನಃ ।
ನ ಸಾ ಶಕ್ಯಾ ಗೃಹಸ್ಥೇನ ಪ್ರಾಪ್ತುಂ ಯಜ್ಞಶತೈರಪಿ ॥ 5-19 ॥
ಗೃಹಸ್ಥಸ್ತ್ರ್ಯಾಯುಷೋಂಕಾರೈಃ ಸ್ನಾನಂ ಕುರ್ಯಾತ್ತ್ರಿಪುಂಡ್ರಕೈಃ ।
ಯತಿಃ ಸಾರ್ವಾಂಗಿಕಂ ಸ್ನಾನಮಾಪಾದತಲಮಸ್ತಕಾತ್ ॥ 5-20 ॥
ಶಿವಭಕ್ತಸ್ತ್ರಿಧಾ ವೇದ್ಯಾಂ ಭಸ್ಮಸ್ನಾನಫಲಂ ಲಭೇತ್ ।
ಹೃದಿ ಮೂರ್ಧ್ನಿ ಲಲಾಟೇ ಚ ಶೂದ್ರಃ ಶಿವಗೃಹಾಶ್ರಮೀ ॥ 5-21 ॥
ಗಣಾಃ ಪ್ರವ್ರಜಿತಾಃ ಶಾಂತಾಃ ಭೂತಿಮಾಲಭ್ಯ ಪಂಚಧಾ ।
ಶಿರೋಲಲಾಟೇ ಹೃದ್ಬಾಹ್ವೋರ್ಭಸ್ಮಸ್ನಾನಫಲಂ ಲಭೇತ್ ॥ 5-22 ॥
ಸಂವತ್ಸರಂ ತದರ್ಧಂ ವಾ ಚತುರ್ದಶ್ಯಷ್ಟಮೀಷು ಚ ।
ಯಃ ಕುರ್ಯಾದ್ಭಸ್ಮನಾ ಸ್ನಾನಂ ತಸ್ಯ ಪುಣ್ಯಫಲಂ ಶೃನು ॥ 5-23 ॥
ಶಿವಭಸ್ಮನಿ ಯಾವಂತಃ ಸಮೇತಾಃ ಪರಮಾಣವಃ ।
ತಾವದ್ವರ್ಷಸಹಸ್ರಾಣಿ ಶಿವಲೋಕೇ ಮಹೀಯತೇ ॥ 5-24 ॥
ಏಕವಿಂಶಕುಲೋಪೇತಃ ಪತ್ನೀಪುತ್ರಾದಿಸಂಯುತಃ ।
ಮಿತ್ರಸ್ವಜನಭೃತ್ಯೈಶ್ಚ ಸಮಸ್ತೈಃ ಪರಿವಾರಿತಃ ॥ 5-25 ॥
ತತ್ರ ಭುಕ್ತ್ವಾ ಮಹಾಭೋಗಾನಿಚ್ಛಯಾ ಸಾರ್ವಕಾಮಿಕಾನ್ ।
ಜ್ಞಾನಯೋಗಂ ಸಮಾಸಾದ್ಯ ಪ್ರಲಯೇ ಮುಕ್ತಿಮಾಪ್ನುಯಾತ್ ॥ 5-26 ॥
ಭಸ್ಮ ಭಸ್ಮಾಂತಿಕಂ ಯೇನ ಗೃಹೀತಂ ನೈಷ್ಠಿಕವ್ರತಂ(?) ।
ಅನೇನ ವೈ ಸ ದೇಹೇನ ರುದ್ರಶ್ಚಂಕ್ರಮತೇ ಕ್ಷಿತೌ ॥ 5-27 ॥
ಭಸ್ಮಸ್ನಾನರತಂ ಶಾಂತಂ ಯೇ ನಮಂತಿ ದಿನೇ ದಿನೇ ।
ತೇ ಸರ್ವಪಾಪನಿರ್ಮುಕ್ತಾ ನರಾ ಯಾಂತಿ ಶಿವಂ ಪುರಂ ॥ 5-28 ॥
ಇತ್ಯೇತತ್ಪರಮಂ ಸ್ನಾನಮಾಗ್ನೇಯಂ ಶಿವನಿರ್ಮಿತಂ ।
ತ್ರಿಸಂಧ್ಯಮಾಚರೇನ್ನಿತ್ಯಂ ಜಾಪೀ ಯೋಗಮವಾಪ್ನುಯಾತ್ ॥ 5-29 ॥
ಭಸ್ಮಾನೀಯ ಪ್ರದದ್ಯಾದ್ಯಃ ಸ್ನಾನಾರ್ಥಂ ಶಿವಯೋಗಿನೇ ।
ಕಲ್ಪಂ ಶಿವಪುರೇ ಭೋಗಾನ್ಭುಕ್ತ್ವಾಂತೇ ಸ್ಯಾದ್ದ್ವಿಜೋತ್ತಮಃ ॥ 5-30 ॥
ಆಗ್ನೇಯಂ ವಾರುಣಂ ಮಾಂತ್ರಂ ವಾಯವ್ಯಂ ತ್ವೈಂದ್ರಪಂಚಮಂ ।
ಮಾನಸಂ ಶಾಂತಿತೋಯಂ ಚ ಜ್ಞಾನಸ್ನಾನಂ ತಥಾಷ್ಟಮಂ ॥ 5-31 ॥
ಆಗ್ನೇಯಂ ರುದ್ರಮಂತ್ರೇಣ ಭಸ್ಮಸ್ನಾನಮನುತ್ತಮಂ ।
ಅಂಭಸಾ ವಾರುಣಂ ಸ್ನಾನಮ್ಕಾರ್ಯಂ ವಾರುಣಮೂರ್ತಿನಾ ॥ 5-32 ॥
ಮೂರ್ಧಾನಂ ಪಾಣಿನಾಲಭ್ಯ ಶಿವೈಕಾದಶಿಕಾಂ ಜಪೇತ್ ।
ಧ್ಯಾಯಮಾನಃ ಶಿವಂ ಶಾಂತಮ್ಮಂತ್ರಸ್ನಾನಂ ಪರಂ ಸ್ಮೃತಂ ॥ 5-33 ॥
ಗವಾಂ ಖುರಪುಟೋತ್ಖಾತ- ಪವನೋದ್ಧೂತರೇಣುನಾ ।
ಕಾರ್ಯಂ ವಾಯವ್ಯಕಂ ಸ್ನಾನಮ್ಮಂತ್ರೇಣ ಮರುದಾತ್ಮನಾ ॥ 5-34 ॥
ವ್ಯಭ್ರೇ ಽರ್ಕೇ ವರ್ಷತಿ ಸ್ನಾನಂ ಕುರ್ಯಾದೈಂದ್ರೀಂ ದಿಶಂ ಸ್ಥಿತಃ ।
ಆಕಾಶಮೂರ್ತಿಮಂತ್ರೇಣ ತದೈಂದ್ರಮಿತಿ ಕೀರ್ತಿತಂ ॥ 5-35 ॥
ಉದಕಂ ಪಾಣಿನಾ ಗೃಹ್ಯ ಸರ್ವತೀರ್ಥಾನಿ ಸಂಸ್ಮರೇತ್ ।
ಅಭ್ಯುಕ್ಷಯೇಚ್ಛಿರಸ್ತೇನ ಸ್ನಾನಂ ಮಾನಸಮುಚ್ಯತೇ ॥ 5-36 ॥
ಪೃಥಿವ್ಯಾಂ ಯಾನಿ ತೀರ್ಥಾನಿ ಸರಾಂಸ್ಯಾಯತನಾನಿ ಚ ।
ತೇಷು ಸ್ನಾತಸ್ಯ ಯತ್ಪುಣ್ಯಂ ತತ್ಪುಣ್ಯಂ ಕ್ಷಾಂತಿವಾರಿಣಾ ॥ 5-37 ॥
ನ ತಥಾ ಶುಧ್ಯತೇ ತೀರ್ಥೈಸ್ತಪೋಭಿರ್ವಾ ಮಹಾಧ್ವರೈಃ ।
ಪುರುಷಃ ಸರ್ವದಾನೈಶ್ಚ ಯಥಾ ಕ್ಷಾಂತ್ಯಾ ವಿಶುದ್ಧ್ಯತಿ ॥ 5-38 ॥
ಆಕ್ರುಷ್ಟಸ್ತಾಡಿತಸ್ತಸ್ಮಾದಧಿಕ್ಷಿಪ್ತಸ್ತಿರಸ್ಕೃತ ।
ಕ್ಷಮೇದಕ್ಷಮಮಾನಾನಾಂ ಸ್ವರ್ಗಮೋಕ್ಷಜಿಗೀಷಯಾ ॥ 5-39 ॥
ಯೈವ ಬ್ರಹ್ಮವಿದಾಂ ಪ್ರಾಪ್ತಿರ್ಯೈವ ಪ್ರಾಪ್ತಿಸ್ತಪಸ್ವಿನಾಂ ।
ಯೈವ ಯೋಗಾಭಿಯುಕ್ತಾನಾಂ ಗತಿಃ ಸೈವ ಕ್ಷಮಾವತಾಂ ॥ 5-40 ॥
ಜ್ಞಾನಾಮಲಾಂಭಸಾ ಸ್ನಾತಃ ಸರ್ವದೈವ ಮುನಿಃ ಶುಚಿಃ ।
ನಿರ್ಮಲಃ ಸುವಿಶುದ್ಧಶ್ಚ ವಿಜ್ಞೇಯಃ ಸೂರ್ಯರಶ್ಮಿವತ್ ॥ 5-41 ॥
ಮೇಧ್ಯಾಮೇಧ್ಯರಸಂ ಯದ್ವದಪಿ ವತ್ಸ ವಿನಾ ಕರೈಃ ।
ನೈವ ಲಿಪ್ಯತಿ ತದ್ದೋಷೈಸ್ತದ್ವಜ್ಜ್ಞಾನೀ ಸುನಿರ್ಮಲಃ ॥ 5-42 ॥
ಏಷಾಮೇಕತಮೇ ಸ್ನಾತಃ ಶುದ್ಧಭಾವಃ ಶಿವಂ ವ್ರಜೇತ್ ।
ಅಶುದ್ಧಭಾವಃ ಸ್ನಾತೋ ಽಪಿ ಪೂಜಯನ್ನಾಪ್ನುಯಾತ್ಫಲಂ ॥ 5-43 ॥
ಜಲಂ ಮಂತ್ರಂ ದಯಾ ದಾನಂ ಸತ್ಯಮಿಂದ್ರಿಯಸಂಯಮಃ ।
ಜ್ಞಾನಂ ಭಾವಾತ್ಮಶುದ್ಧಿಶ್ಚ ಶೌಚಮಷ್ಟವಿಧಂ ಶ್ರುತಂ ॥ 5-44 ॥
ಅಂಗುಷ್ಠತಲಮೂಲೇ ಚ ಬ್ರಾಹ್ಮಂ ತೀರ್ಥಮವಸ್ಥಿತಂ ।
ತೇನಾಚಮ್ಯ ಭವೇಚ್ಛುದ್ಧಃ ಶಿವಮಂತ್ರೇಣ ಭಾವಿತಃ ॥ 5-45 ॥
ಯದಧಃ ಕನ್ಯಕಾಯಾಶ್ಚ ತತ್ತೀರ್ಥಂ ದೈವಮುಚ್ಯತೇ ।
ತೀರ್ಥಂ ಪ್ರದೇಶಿನೀಮೂಲೇ ಪಿತ್ರ್ಯಂ ಪಿತೃವಿಧೋದಯಂ(?) ॥ 5-46 ॥
ಮಧ್ಯಮಾಂಗುಲಿಮಧ್ಯೇನ ತೀರ್ಥಮಾರಿಷಮುಚ್ಯತೇ ।
ಕರಪುಷ್ಕರಮಧ್ಯೇ ತು ಶಿವತೀರ್ಥಂ ಪ್ರತಿಷ್ಠಿತಂ ॥ 5-47 ॥
ವಾಮಪಾಣಿತಲೇ ತೀರ್ಥಮೌಮಮ್ನಾಮ ಪ್ರಕೀರ್ತಿತಂ ।
ಶಿವೋಮಾತೀರ್ಥಸಂಯೋಗಾತ್ಕುರ್ಯಾತ್ಸ್ನಾನಾಭಿಷೇಚನಂ ॥ 5-48 ॥
ದೇವಾಂದೈವೇನ ತೀರ್ಥೇನ ತರ್ಪಯೇದಕೃತಾಂಭಸಾ ।
ಉದ್ಧೃತ್ಯ ದಕ್ಷಿಣಂ ಪಾಣಿಮುಪವೀತೀ ಸದಾ ಬುಧಃ ॥ 5-49 ॥
ಪ್ರಾಚೀನಾವೀತಿನಾ ಕಾರ್ಯಂ ಪಿತೄಣಾಂ ತಿಲವಾರಿಣಾ ।
ತರ್ಪಣಂ ಸರ್ವಭೂತಾನಾಮಾರಿಷೇಣ ನಿವೀತಿನಾ ॥ 5-50 ॥
ಸವ್ಯಸ್ಕಂಧೇ ಯದಾ ಸೂತ್ರಮುಪವೀತ್ಯುಚ್ಯತೇ ತದಾ ।
ಪ್ರಾಚೀನಾವೀತ್ಯಸವ್ಯೇನ ನಿವೀತೀ ಕಂಠಸಂಸ್ಥಿತೇ ॥ 5-51 ॥
ಪಿತೄಣಾಂ ತರ್ಪಣಂ ಕೃತ್ವಾ ಸೂರ್ಯಾಯಾರ್ಘ್ಯಂ ಪ್ರಕಲ್ಪಯೇತ್ ।
ಉಪಸ್ಥಾಯ ತತಃ ಸೂರ್ಯಂ ಯಜೇಚ್ಛಿವಮನಂತರಂ ॥ 5-52 ॥
॥ ಇತಿ ಶಿವೋಪನಿಷದಿ ಶಿವಭಸ್ಮಸ್ನಾನಾಧ್ಯಾಯಃ ಪಂಚಮಃ ॥
ಅಥ ಭಕ್ತ್ಯಾ ಶಿವಂ ಪೂಜ್ಯ ನೈವೇದ್ಯಮುಪಕಲ್ಪಯೇತ್ ।
ಯದನ್ನಮಾತ್ಮನಾಶ್ನೀಯಾತ್ತಸ್ಯಾಗ್ರೇ ವಿನಿವೇದಯೇತ್ ॥ 6-1 ॥
ಯಃ ಕೃತ್ವಾ ಭಕ್ಷ್ಯಭೋಜ್ಯಾನಿ ಯತ್ನೇನ ವಿನಿವೇದಯೇತ್ ।
ಶಿವಾಯ ಸ ಶಿವೇ ಲೋಕೇ ಕಲ್ಪಕೋಟಿಂ ಪ್ರಮೋದತೇ ॥ 6-2 ॥
ಯಃ ಪಕ್ವಂ ಶ್ರೀಫಲಂ ದದ್ಯಾಚ್ಛಿವಾಯ ವಿನಿವೇದಯೇತ್ ।
ಗುರೋರ್ವಾ ಹೋಮಯೇದ್ವಾಪಿ ತಸ್ಯ ಪುಣ್ಯಫಲಂ ಶೃಣು ॥ 6-3 ॥
ಶ್ರೀಮದ್ಭಿಃ ಸ ಮಹಾಯಾನೈರ್ಭೋಗಾನ್ಭುಂಕ್ತೇ ಶಿವೇ ಪುರೇ ।
ವರ್ಷಾಣಾಮಯುತಂ ಸಾಗ್ರಂ ತದಂತೇ ಶ್ರೀಪತಿರ್ಭವೇತ್ ॥ 6-4 ॥
ಕಪಿತ್ಥಮೇಕಂ ಯಃ ಪಕ್ವಮೀಶ್ವರಾಯ ನಿವೇದಯೇತ್ ।
ವರ್ಷಲಕ್ಷಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 6-5 ॥
ಏಕಮಾಮ್ರಫಲಂ ಪಕ್ವಂ ಯಃ ಶಂಭೋರ್ವಿನಿವೇದಯೇತ್ ।
ವರ್ಷಾಣಾಮ್ಯುತಂ ಭೋಗೈಃ ಕ್ರೀಡತೇ ಸ ಶಿವೇ ಪುರೇ ॥ 6-6 ॥
ಏಕಂ ವಟಫಲಂ ಪಕ್ವಂ ಯಃ ಶಿವಾಯ ನಿವೇದಯೇತ್ ।
ವರ್ಷಲಕ್ಷಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 6-7 ॥
ಯಃ ಪಕ್ವಂ ದಾಡಿಮಂ ಚೈಕಂ ದದ್ಯಾದ್ವಿಕಸಿತಂ ನವಂ ।
ಶಿವಾಯ ಗುರವೇ ವಾಪಿ ತಸ್ಯ ಪುಣ್ಯಫಲಂ ಶೃಣು ॥ 6-8 ॥
ಯಾವತ್ತದ್ಬೀಜಸಂಖ್ಯಾನಂ ಶೋಭನಂ ಪರಿಕೀರ್ತಿತಂ ।
ತಾವದಷ್ಟಾಯುತಾನ್ಯುಚ್ಚೈಃ ಶಿವಲೋಕೇ ಮಹೀಯತೇ ॥ 6-9 ॥
ದ್ರಾಕ್ಷಾಫಲಾನಿ ಪಕ್ವಾನಿ ಯಃ ಶಿವಾಯ ನಿವೇದಯೇತ್ ।
ಭಕ್ತ್ಯಾ ವಾ ಶಿವಯೋಗಿಭ್ಯಸ್ತಸ್ಯ ಪುಣ್ಯಫಲಂ ಶೃಣು ॥ 6-10 ॥
ಯಾವತ್ತತ್ಫಲಸಂಖ್ಯಾನಮುಭಯೋರ್ವಿನಿವೇದಿತಂ ।
ತಾವದ್ಯುಗಸಹಸ್ರಾಣಿ ರುದ್ರಲೋಕೇ ಮಹೀಯತೇ ॥ 6-11 ॥
ದ್ರಾಕ್ಷಾಫಲೇಷು ಯತ್ಪುಣ್ಯಂ ತತ್ಖರ್ಜೂರಫಲೇಷು ಚ ।
ತದೇವ ರಾಜವೃಕ್ಷೇಷು ಪಾರಾವತಫಲೇಷು ಚ ॥ 6-12 ॥
ಯೋ ನಾರಂಗಫಲಂ ಪಕ್ವಂ ವಿನಿವೇದ್ಯ ಮಹೇಶ್ವರೇ ।
ಅಷ್ಟಲಕ್ಷಂ ಮಹಾಭೋಗೈಃ ಕೃಡತೇ ಸ ಶಿವೇ ಪುರೇ ॥ 6-13 ॥
ಬೀಜಪೂರೇಷು ತಸ್ಯಾರ್ಧಂ ತದರ್ಧಂ ಲಿಕುಚೇಷು ಚ ।
ಜಂಬೂಫಲೇಷು ಯತ್ಪುಣ್ಯಂ ತತ್ಪುಣ್ಯಂ ತಿಂದುಕೇಷು ಚ ॥ 6-14 ॥
ಪನಸಂ ನಾರಿಕೇಲಂ ವಾ ಶಿವಾಯ ವಿನಿವೇದಯೇತ್ ।
ವರ್ಷಲಕ್ಷಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 6-15 ॥
ಪುರುಷಂ ಚ ಪ್ರಿಯಾಲಂ ಚ ಮಧೂಕಕುಸುಮಾನಿ ಚ ।
ಜಂಬೂಫಲಾನಿ ಪಕ್ವಾನಿ ವೈಕಂಕತಫಲಾನಿ ಚ ॥ 6-16 ॥
ನಿವೇದ್ಯ ಭಕ್ತ್ಯಾ ಶರ್ವಾಯ ಪ್ರತ್ಯೇಕಂ ತು ಫಲೇ ಫಲೇ ।
ದಶವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ॥ 6-17 ॥
ಕ್ಷೀರಿಕಾಯಾಃ ಫಲಂ ಪಕ್ವಂ ಯಃ ಶಿವಾಯ ನಿವೇದಯೇತ್ ।
ವರ್ಷಲಕ್ಷಂ ಮಹಾಭೋಗೈರ್ಮೋದತೇ ಸ ಶಿವೇ ಪುರೇ ॥ 6-18 ॥
ವಾಲುಕಾತ್ರಪುಸಾದೀನಿ ಯಃ ಫಲಾನಿ ನಿವೇದಯೇತ್ ।
ಶಿವಾಯ ಗುರವೇ ವಾಪಿ ಪಕ್ವಂ ಚ ಕರಮರ್ದಕಂ ॥ 6-19 ॥
ದಶವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ।
ಬದರಾಣಿ ಸುಪಕ್ವಾನಿ ತಿಂತಿಡೀಕಫಲಾನಿ ಚ ॥ 6-20 ॥
ದರ್ಶನೀಯಾನಿ ಪಕ್ವಾನಿ ಹ್ಯಾಮಲಕ್ಯಾಃ ಫಲಾನಿ ಚ ।
ಏವಮಾದೀನಿ ಚಾನ್ಯಾನಿ ಶಾಕಮೂಲಫಲಾನಿ ಚ ॥ 6-21 ॥
ನಿವೇದಯತಿ ಶರ್ವಾಯ ಶೃಣು ಯತ್ಫಲಮಾಪ್ನುಯಾತ್ ।
ಏಕೈಕಸ್ಮಿನ್ಫಲೇ ಭೋಗಾನ್ಪ್ರಾಪ್ನುಯಾದನುಪೂರ್ವಶಃ ॥ 6-22 ॥
ಪಂಚವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ।
ಗೋಧೂಮಚಂದಕಾದ್ಯಾನಿ ಸುಕೃತಂ ಸಕ್ತುಭರ್ಜಿತಂ ॥ 6-23 ॥
ನಿವೇದಯೀತ ಶರ್ವಾಯ ತಸ್ಯ ಪುಣ್ಯಫಲಂ ಶೃಣು ।
ಯಾವತ್ತದ್ಬೀಜಸಂಖ್ಯಾನಂ ಶುಭಂ ಭ್ರಷ್ಟಂ ನಿವೇದಯೇತ್ ॥ 6-24 ॥
ತಾವದ್ವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ।
ಯಃ ಪಕ್ವಾನೀಕ್ಷುದಂಡಾನಿ ಶಿವಾಯ ವಿನಿವೇದಯೇತ್ ॥ 6-25 ॥
ಗುರವೇ ವಾಪಿ ತದ್ಭಕ್ತ್ಯಾ ತಸ್ಯ ಪುಣ್ಯಫಲಂ ಶೃಣು ।
ಇಕ್ಷುಪರ್ಣಾನಿ ಚೈಕೈಕಂ ವರ್ಷಲೋಕಂ ಪ್ರಮೋದತೇ ॥ 6-26 ॥
ಸಾಕಂ ಶಿವಪುರೇ ಭೋಗೈಃ ಪೌಂಡ್ರಂ ಪಂಚಗುಣಂ ಫಲಂ ।
ನಿವೇದ್ಯ ಪರಮೇಶಾಯ ಶುಕ್ತಿಮಾತ್ರರಸಸ್ಯ ತು ॥ 6-27 ॥
ವರ್ಷಕೋಟಿಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ।
ನಿವೇದ್ಯ ಫಾಣಿತಂ ಶುದ್ಧಂ ಶಿವಾಯ ಗುರವೇ ಽಪಿ ವಾ ॥ 6-28 ॥
ರಸಾತ್ಸಹಸ್ರಗುಣಿತಂ ಫಲಂ ಪ್ರಾಪ್ನೋತಿ ಮಾನವಃ ।
ಗುಡಸ್ಯ ಫಲಮೇಕಂ ಯಃ ಶಿವಾಯ ವಿನಿವೇದಯೇತ್ ॥ 6-29 ॥
ಅಂಬಕೋಟಿಂ ಶಿವೇ ಲೋಕೇ ಮಹಾಭೋಗೈಃ ಪ್ರಮೋದತೇ ।
ಖಂಡಸ್ಯ ಪಲನೈವೇದ್ಯಂ ಗುಡಾಚ್ಛತಗುಣಂ ಫಲಂ ॥ 6-30 ॥
ಖಂಡಾತ್ಸಹಸ್ರಗುಣಿತಂ ಶರ್ಕರಾಯಾ ನಿವೇದನೇ ।
ಮತ್ಸಂಡಿಕಾಂ ಮಹಾಶುದ್ಧಾಂ ಶಂಕರಾಯ ನಿವೇದಯೇತ್ ॥ 6-31 ॥
ಕಲ್ಪಕೋಟಿಂ ನರಃ ಸಾಗ್ರಂ ಶಿವಲೋಕೇ ಮಹೀಯತೇ ।
ಪರಿಶುದ್ಧಂ ಭೃಷ್ಟಮಾಜ್ಯಂ ಸಿದ್ಧಂ ಚೈವ ಸುಸಂಸ್ಕೃತಂ ॥ 6-32 ॥
ಮಾಸಂ ನಿವೇದ್ಯ ಶರ್ವಾಯ ಶೃಣು ಯತ್ಫಲಮಾಪ್ನುಯಾತ್ ।
ಅಶೇಷಫಲದಾನೇನ ಯತ್ಪುಣ್ಯಂ ಪರಿಕೀರ್ತಿತಂ ॥ 6-33 ॥
ತತ್ಪುಣ್ಯಂ ಪ್ರಾಪ್ನುಯಾತ್ಸರ್ವಂ ಮಹಾದಾನನಿವೇದನೇ ।
ಪನಸಾನಿ ಚ ದಿವ್ಯಾನಿ ಸ್ವಾದೂನಿ ಸುರಭೀಣಿ ಚ ॥ 6-34 ॥
ನಿವೇದಯೇತ್ತು ಶರ್ವಾಯ ತಸ್ಯ ಪುಣ್ಯಫಲಂ ಶೃಣು ।
ಕಲ್ಪಕೋಟಿಂ ನರಃ ಸಾಗ್ರಂ ಶಿವಲೋಕೇ ವ್ಯವಸ್ಥಿತಃ ॥ 6-35 ॥
ಪಿಬನ್ಶಿವಾಮೃತಂ ದಿವ್ಯಂ ಮಹಾಭೋಗೈಃ ಪ್ರಮೋದತೇ ।
ದಿನೇ ದಿನೇ ಚ ಯಸ್ತ್ವಾಪಂ ವಸ್ತ್ರಪೂತಂ ಸಮಾಚರೇತ್ ॥ 6-36 ॥
ಸುಖಾಯ ಶಿವಭಕ್ತೇಭ್ಯಸ್ತಸ್ಯ ಪುಣ್ಯಫಲಂ ಶೃಣು ।
ಮಹಾಸರಾಂಸಿ ಯಃ ಕುರ್ಯಾದ್ಭವೇತ್ಪುಣ್ಯಂ ಶಿವಾಗ್ರತಃ ॥ 6-37 ॥
ತತ್ಪುಣ್ಯಂ ಸಕಲಂ ಪ್ರಾಪ್ಯ ಶಿವಲೋಕೇ ಮಹೀಯತೇ ।
ಯದಿಷ್ಟಮಾತ್ಮನಃ ಕಿಂಚಿದನ್ನಪಾನಫಲಾದಿಕಂ ॥ 6-38 ॥
ತತ್ತಚ್ಛಿವಾಯ ದೇಯಂ ಸ್ಯಾದುತ್ತಮಂ ಭೋಗಮಿಚ್ಛತಾ ।
ನ ಶಿವಃ ಪರಿಪೂರ್ಣತ್ವಾತ್ಕಿಂಚಿದಶ್ನಾತಿ ಕಸ್ಯಚಿತ್ ॥ 6-39 ॥
ಕಿಂತ್ವೀಶ್ವರನಿಭಂ ಕೃತ್ವಾ ಸರ್ವಮಾತ್ಮನಿ ದೀಯತೇ ।
ನ ರೋಹತಿ ಯಥಾ ಬೀಜಂ ಸ್ವಸ್ಥಮಾಶ್ರಯವರ್ಜಿತಂ ॥ 6-40 ॥
ಪುಣ್ಯಬೀಜಂ ತಥಾ ಸೂಕ್ಷ್ಮಂ ನಿಷ್ಫಲಂ ಸ್ಯಾನ್ನಿರಾಶ್ರಯಂ ।
ಸುಕ್ಷೇತ್ರೇಷು ಯಥಾ ಬೀಜಮುಪ್ತಂ ಭವತಿ ಸತ್ಫಲಂ ॥ 6-41 ॥
ಅಲ್ಪಮಪ್ಯಕ್ಷಯಂ ತದ್ವತ್ಪುಣ್ಯಂ ಶಿವಸಮಾಶ್ರಯಾತ್ ।
ತಸ್ಮಾದೀಶ್ವರಮುದ್ದಿಶ್ಯ ಯದ್ಯದಾತ್ಮನಿ ರೋಚತೇ ॥ 6-42 ॥
ತತ್ತದೀಶ್ವರಭಕ್ತೇಭ್ಯಃ ಪ್ರದಾತವ್ಯಂ ಫಲಾರ್ಥಿನಾ ।
ಯಃ ಶಿವಾಯ ಗುರೋರ್ವಾಪಿ ರಚಯೇನ್ಮಣಿಭೂಮಿಕಂ ॥ 6-43 ॥
ನೈವೇದ್ಯ ಭೋಜನಾರ್ಥಂ ಯಃ ಪತ್ತ್ರೈಃ ಪುಷ್ಪೈಶ್ಚ ಶೋಭನಂ ।
ಯಾವತ್ತತ್ಪತ್ತ್ರಪುಷ್ಪಾಣಾಂ ಪರಿಸಂಖ್ಯಾ ವಿಧೀಯತೇ ॥ 6-44 ॥
ತಾವದ್ವರ್ಷಸಹಸ್ರಾಣಿ ಸುರಲೋಕೇ ಮಹೀಯತೇ ।
ಪಲಾಶಕದಲೀಪದ್ಮ- ಪತ್ತ್ರಾಣಿ ಚ ವಿಶೇಷತಃ ॥ 6-45 ॥
ದತ್ತ್ವಾ ಶಿವಾಯ ಗುರವೇ ಶೃಣು ಯತ್ಫಲಮಾಪ್ನುಯಾತ್ ।
ಯಾವತ್ತತ್ಪತ್ತ್ರಸಂಖ್ಯಾನಮೀಶ್ವರಾಯ ನಿವೇದಿತಂ ॥ 6-46 ॥
ತಾವದಬ್ದಾಯುತಾನಾಂ ಸ ಲೋಕೇ ಭೋಗಾನವಾಪ್ನುಯಾತ್ ।
ಯಾವತ್ತಾಂಬುಲಪತ್ತ್ರಾಣಿ ಪೂಗಾಂಶ್ಚ ವಿನಿವೇದಯೇತ್ ॥ 6-47 ॥
ತಾವಂತಿ ವರ್ಷಲಕ್ಷಾಣಿ ಶಿವಲೋಕೇ ಮಹೀಯತೇ ।
ಯಚ್ಛುದ್ಧಂ ಶಂಖಚೂರ್ಣಂ ವಾ ಗುರವೇ ವಿನಿವೇದಯೇತ್ ॥ 6-48 ॥
ತಾಂಬೂಲಯೋಗಸಿದ್ಧ್ಯರ್ಥಂ ತಸ್ಯ ಪುಣ್ಯಫಲಂ ಶೃಣು ।
ಯಾವತ್ತಾಂಬೂಲಪತ್ತ್ರಾಣಿ ಚೂರ್ಣಮಾನೇನ ಭಕ್ಷಯೇತ್ ॥ 6-49 ॥
ತಾವದ್ವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ।
ಜಾತೀಫಲಂ ಸಕಂಕೋಲಂ ಲತಾಕಸ್ತೂರಿಕೋತ್ಪಲಂ ॥ 6-50 ॥
ಇತ್ಯೇತಾನಿ ಸುಗಂಧೀನಿ ಫಲಾನಿ ವಿನಿವೇದಯೇತ್ ।
ಫಲೇ ಫಲೇ ಮಹಾಭೋಗೈರ್ವರ್ಷಲಕ್ಷಂ ತು ಯತ್ನತಃ ॥ 6-51 ॥
ಕಾಮಿಕೇನ ವಿಮಾನೇನ ಕ್ರೀಡತೇ ಸ ಶಿವೇ ಪುರೇ ।
ತ್ರುಟಿಮಾತ್ರಪ್ರಮಾಣೇನ ಕರ್ಪೂರಸ್ಯ ಶಿವೇ ಗುರೌ ॥ 6-52 ॥
ವರ್ಷಕೋಟಿಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ।
ಪೂಗತಾಂಬೂಲಪತ್ತ್ರಾಣಾಮಾಧಾರಂ ಯೋ ನಿವೇದಯೇತ್ ॥ 6-53 ॥
ವರ್ಷಕೋಟ್ಯಷ್ಟಕಂ ಭೋಗೈಃ ಶಿವಲೋಕೇ ಮಹೀಯತೇ ।
ಯಶ್ಚೂಏಣಾಧಾರಸತ್ಪಾತ್ರಂ ಕಸ್ಯಾಪಿ ವಿನಿವೇದಯೇತ್ ॥ 6-54 ॥
ಮೋದತೇ ಸ ಶಿವೇ ಲೋಕೇ ವರ್ಷಕೋಟೀಶ್ಚತುರ್ದಶ ।
ಮೃತ್ಕಾಷ್ಠವಂಶಖಂಡಾನಿ ಯಃ ಪ್ರದದ್ಯಾಚ್ಛಿವಾಶ್ರಮೇ ॥ 6-55 ॥
ಪ್ರಾಪ್ನುಯಾದ್ವಿಪುಲಾನ್ಭೋಗಾಂದಿವ್ಯಾಂಛಿವಪುರೇ ನರಃ ।
ಮಾಣಿಕ್ಯಂ ಕಲಶಂ ಪಾತ್ರೀಂ ಸ್ಥಾಲ್ಯಾದೀನ್ಭಾಂಡಸಂಪುಟಾನ್ ॥ 6-56 ॥
ದತ್ತ್ವಾ ಶಿವಾಗ್ರಜಸ್ತೇಭ್ಯಃ ಶಿವಲೋಕೇ ಮಹೀಯತೇ ।
ತೋಯಾಧಾರಪಿಧಾನಾನಿ ಮೃದ್ವಸ್ತ್ರತರುಜಾನಿ ವಾ ॥ 6-57 ॥
ವಂಶಾಲಾಬುಸಮುತ್ಥಾನಿ ದತ್ತ್ವಾಪ್ನೋತಿ ಶಿವಂ ಪುರಂ ।
ಪಂಚಸಂಮಾರ್ಜನೀತೋಯಂ ಗೋಮಯಾಂಜನಕರ್ಪಟಾನ್ ॥ 6-58 ॥
ಮೃತ್ಕುಂಭಪೀಟಿಕಾಂ ದದ್ಯಾದ್ಭೋಗಾಂಛಿವಪುರೇ ಲಭೇತ್ ।
ಯಃ ಪುಷ್ಪಧೂಪಗಂಧಾನಾಂ ದಧಿಕ್ಷೀರಘೃತಾಂಭಸಾಂ ॥ 6-59 ॥
ದದ್ಯಾದಾಧಾರಪಾತ್ರಾಣಿ ಶಿವಲೋಕೇ ಸ ಗಚ್ಛತಿ ।
ವಂಶತಾಲಾದಿಸಂಭೂತಂ ಪುಷ್ಪಾಧಾರಕರಂಡಕಂ ॥ 6-60 ॥
ಇತ್ಯೇವಮಾದ್ಯಾನ್ಯೋ ದದ್ಯಾಚ್ಛಿವಲೋಕಮವಾಪ್ನುಯಾತ್ ।
ಯಃ ಸ್ರುಕ್ಸ್ರುವಾದಿಪಾತ್ರಾಣಿ ಹೋಮಾರ್ಥಂ ವಿನಿವೇದಯೇತ್ ॥ 6-61 ॥
ವರ್ಷಕೋಟಿಂ ಮಹಾಭಾಗೈಃ ಶಿವಲೋಕೇ ಮಹೀಯತೇ ।
ಯಃ ಸರ್ವಧಾತುಸಂಯುಕ್ತಂ ದದ್ಯಾಲ್ಲವಣಪರ್ವತಂ ॥ 6-62 ॥
ಶಿವಾಯ ಗುರವೇ ವಾಪಿ ತಸ್ಯ ಪುಣ್ಯಫಲಂ ಶೃಣು ।
ಕಲ್ಪಕೋಟಿಸಹಸ್ರಾಣಿ ಕಲ್ಪಕೋಟಿಶತಾನಿ ಚ ॥ 6-63 ॥
ಸ ಗೋತ್ರಭೃತ್ಯಸಂಯುಕ್ತೋ ವಸೇಚ್ಛಿವಪುರೇ ನರಃ ।
ವಿಮಾನಯಾನೈಃ ಶ್ರೀಮದ್ಭಿಃ ಸರ್ವಕಾಮಸಮನ್ವಿತೈಃ ॥ 6-64 ॥
ಭೋಗಾನ್ಭುಕ್ತ್ವಾ ತು ವಿಪುಲಾಂಸ್ತದಂತೇ ಸ ಮಹೀಪತಿಃ ।
ಮನಃಶಿಲಾಂ ಹರೀತಾಲಂ ರಾಜಪಟ್ಟಂ ಚ ಹಿಂಗುಲಂ ॥ 6-65 ॥
ಗೈರಿಕಂ ಮಣಿದಂತಂ ಚ ಹೇಮತೋಯಂ ತಥಾಷ್ಟಮಂ ।
ಯಶ್ಚ ತಂ ಪರ್ವತವರಂ ಶಾಲಿತಂಡುಲಕಲ್ಪಿತಂ ॥ 6-66 ॥
ಶಿವಾಯಗುರವೇ ವಾಪಿ ತಸ್ಯ ಪುಣ್ಯಫಲಂ ಶೃಣು ।
ಕಲ್ಪಕೋಟಿಶತಂ ಸಾಗ್ರಂ ಭೋಗಾನ್ಭುಂಕ್ತೇ ಶಿವೇ ಪುರೇ ॥ 6-67 ॥
ಯಃ ಸರ್ವಧಾನ್ಯಶಿಖರೈರುಪೇತಂ ಯವಪರ್ವತಂ ।
ಘೃತತೈಲನದೀಯುಕ್ತಂ ತಸ್ಯ ಪುಣ್ಯಫಲಂ ಶೃಣು ॥ 6-68 ॥
ಕಲ್ಪಕೋಟಿಶತಂ ಸಾಗ್ರಂ ಭೋಗಾನ್ಭುಂಕ್ತೇ ಶಿವೇ ಪುರೇ ।
ಸಮಸ್ತಕುಲಜೈಃ ಸಾರ್ಧಂ ತಸ್ಯಾಂತೇ ಸ ಮಹೀಪತಿಃ ॥ 6-69 ॥
ತಿಲಧೇನುಂ ಪ್ರದದ್ಯಾದ್ಯಃ ಕೃತ್ವಾ ಕೃಷ್ಣಾಜಿನೇ ನರಃ ।
ಕಪಿಲಾಯಾಃ ಪ್ರದಾನಸ್ಯ ಯತ್ಫಲಂ ತದವಾಪ್ನುಯಾತ್ ॥ 6-70 ॥
ಘೃತಧೇನುಂ ನರಃ ಕೃತ್ವಾ ಕಾಂಸ್ಯಪಾತ್ರೇ ಸಕಾಂಚನಾನ್ ।
ನಿವೇದ್ಯ ಗೋಪ್ರದಾನಸ್ಯ ಸಮಗ್ರಂ ಫಲಮಾಪ್ನುಯಾತ್ ॥ 6-71 ॥
ದ್ವೀಪಿಚರ್ಮಣಿ ಯಃ ಸ್ಥಾಪ್ಯ ಪ್ರದದ್ಯಾಲ್ಲವಣಾಢಕಂ ।
ಅಶೇಷರಸದಾನಸ್ಯ ಯತ್ಪುಣ್ಯಂ ತದವಾಪ್ನುಯಾತ್ ॥ 6-72 ॥
ಮರಿಚಾಢೇನ ಕುರ್ವೀತ(?) ಮಾರೀಚಂ ನಾಮ ಪರ್ವತಂ ।
ದದ್ಯಾದ್ಯಜ್ಜೀರಕಂ ಪೂರ್ವಮಾಗ್ನೇಯಂ ಹಿಂಗುಮುತ್ತಮಂ ॥ 6-73 ॥
ದಕ್ಷಿಣೇ ಗುಡಶುಂಠೀಂ ಚ ನೈರೃತೇ ನಾಗಕೇಸರಂ ।
ಪಿಪ್ಪಲೀಂ ಪಶ್ಚಿಮೇ ದದ್ಯಾದ್ವಾಯವ್ಯೇ ಕೃಷ್ಣಜೀರಕಂ ॥ 6-74 ॥
ಕೌಬೇರ್ಯಾಮಜಮೋದಂ ಚ ತ್ವಗೇಲಾಶ್ಚೇಶದೈವತೇ ।
ಕುಸ್ತುಂಬರ್ಯಾಃ ಪ್ರದೇಯಾಃ ಸ್ಯುರ್ಬಹಿಃ ಪ್ರಾಕಾರತಃ ಸ್ಥಿತಾಃ ॥ 6-75 ॥
ಕಕುಭಾಮಂತರಾಲೇಷು ಸಮಂತಾತ್ಸೈಂಧವಂ ನ್ಯಸೇತ್ ।
ಸಪುಷ್ಪಾಕ್ಷತತೋಯೇನ ಶಿವಾಯ ವಿನಿವೇದಯೇತ್ ॥ 6-76 ॥
ಯಾವತ್ತದ್ದೀಪಸಂಖ್ಯಾನಂ ಸರ್ವಮೇಕತ್ರ ಪರ್ವತೇ ।
ತಾವದ್ವರ್ಷಶತಾದೂರ್ಧ್ವಂ ಭೋಗಾನ್ಭುಂಕ್ತೇ ಶಿವೇ ಪುರೇ ॥ 6-77 ॥
ಕೂಶ್ಮಾಂಡಂ ಮಧ್ಯತಃ ಸ್ಥಾಪ್ಯ ಕಾಲಿಂಗಂ ಪೂರ್ವತೋ ನ್ಯಸೇತ್ ।
ದಕ್ಷಿಣೇ ಕ್ಷೀರತುಂಬೀಂ ತು ವೃಂತಾಕಂ ಪಶ್ಚಿಮೇ ನ್ಯಸೇತ್ ॥ 6-78 ॥
ಪಟೀಸಾನ್ಯುತ್ತರೇ ಸ್ಥಾಪ್ಯ ಕರ್ಕಟೀಮೀಶದೈವತೇ ।
ನ್ಯಸೇದ್ಗಜಪಟೋಲಾಂಶ್ಚ ಮಧುರಾನ್ವಹ್ನಿದೈವತೇ ॥ 6-79 ॥
ಕಾರವೇಲ್ಲಾಂಶ್ಚ ನೈರೃತ್ಯಾಂ ವಾಯವ್ಯಾಂ ನಿಂಬಕಂ ಫಲಂ ।
ಉಚ್ಚಾವಚಾನಿ ಚಾನ್ಯಾನಿ ಫಲಾನಿ ಸ್ಥಾಪಯೇದ್ಬಹಿಃ ॥ 6-80 ॥
ಅಭ್ಯರ್ಚ್ಯ ಪುಷ್ಪಧೂಪೈಶ್ಚ ಸಮಂತಾತ್ಫಲಪರ್ವತಂ ।
ಶಿವಾಯ ಗುರವೇ ವಾಪಿ ಪ್ರಣಿಪತ್ಯ ನಿವೇದಯೇತ್ ॥ 6-81 ॥
ಯಾವತ್ತತ್ಫಲಸಂಖ್ಯಾನಂ ತದ್ದೀಪಾನಾಂ ಚ ಮಧ್ಯತಃ ।
ತಾವದ್ವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ॥ 6-82 ॥
ಮೂಲಕಂ ಮಧ್ಯತಃ ಸ್ಥಾಪ್ಯ ತತ್ಪೂರ್ವೇ ವಾಲಮೂಲಕಂ ।
ಆಗ್ನೇಯ್ಯಾಂ ವಾಸ್ತುಕಂ ಸ್ಥಾಪ್ಯ ಯಾಮ್ಯಾಯಾಂ ಕ್ಷಾರವಾಸ್ತುಕಂ ॥ 6-83 ॥
ಪಾಲಕ್ಯಂ ನೈರೃತೇ ಸ್ಥಾಪ್ಯ ಸುಮುಖಂ ಪಶ್ಚಿಮೇ ನ್ಯಸೇತ್ ।
ಕುಹದ್ರಕಂ ಚ ವಾಯವ್ಯಾಮುತ್ತರೇ ವಾಪಿ ತಾಲಿಕೀಂ ॥ 6-84 ॥
ಕುಸುಂಭಶಾಕಮೈಶಾನ್ಯಾಂ ಸರ್ವಶಾಕಾನಿ ತದ್ಬಹಿಃ ।
ಪೂರ್ವಕ್ರಮೇಣ ವಿನ್ಯಸ್ಯ ಶಿವಾಯ ವಿನಿವೇದಯೇತ್ ॥ 6-85 ॥
ಯಾವತ್ತನ್ಮೂಲನಾಲಾನಾಂ ಪತ್ತ್ರಸಂಖ್ಯಾ ಚ ಕೀರ್ತಿತಾ ।
ತಾವದ್ವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ॥ 6-86 ॥
ದತ್ತ್ವಾ ಲಭೇನ್ಮಹಾಭೋಗಾನ್ಗುಗ್ಗುಲ್ವದ್ರೇಃ ಪಲದ್ವಯಂ ।
ವರ್ಷಕೋಟಿದ್ವಯಂ ಸ್ವರ್ಗೇ ದ್ವಿಗುಣಂ ಗುಡಮಿಶ್ರಿತೈಃ ॥ 6-87 ॥
ಗುಡಾರ್ದ್ರಕಂ ಸಲವಣಮಾಮ್ರಮಂಜರಿಸಂಯುತಂ ।
ನಿವೇದ್ಯ ಗುರವೇ ಭಕ್ತ್ಯಾ ಸೌಭಾಗ್ಯಂ ಪರಮಂ ಲಭೇತ್ ॥ 6-88 ॥
ಹಸ್ತಾರೋಪ್ಯೇಣ ವಾ ಕೃತ್ವಾ ಮಹಾರತ್ನಾನ್ವಿತಾಂ ಮಹೀಂ ।
ನಿವೇದಯಿತ್ವಾ ಶರ್ವಾಯ ಶಿವತುಲ್ಯಃ ಪ್ರಜಾಯತೇ ॥ 6-89 ॥
ವಜ್ರೇಂದ್ರನೀಲವೈಡೂರ್ಯ- ಪದ್ಮರಾಗಂ ಸಮೌಕ್ತಿಕಂ ।
ಕೀಟಪಕ್ಷಂ ಸುವರ್ಣಂ ಚ ಮಹಾರತ್ನಾನಿ ಸಪ್ತ ವೈ ॥ 6-90 ॥
ಯಶ್ಚ ಸಿಂಹಾಸನಂ ದದ್ಯಾನ್ಮಹಾರತ್ನಾನ್ವಿತಂ ನೃಪಃ ।
ಕ್ಷುದ್ರರತ್ನೈಶ್ಚ ವಿವಿಧೈಸ್ತಸ್ಯ ಪುಣ್ಯಫಲಂ ಶೃಣು ॥ 6-91 ॥
ಕುಲತ್ರಿಂಶಕಸಂಯುಕ್ತಃ ಸಾಂತಃಪುರಪರಿಚ್ಛದಃ ।
ಸಮಸ್ತಭೃತ್ಯಸಂಯುಕ್ತಃ ಶಿವಲೋಕೇ ಮಹೀಯತೇ ॥ 6-92 ॥
ತತ್ರ ಭುಕ್ತ್ವಾ ಮಹಾಭೋಗಾನ್ಶಿವತುಲ್ಯಪರಾಕ್ರಮಃ ।
ಆಮಹಾಪ್ರಲಯಂ ಯಾವತ್ತದಂತೇ ಮುಕ್ತಿಮಾಪ್ನುಯಾತ್ ॥ 6-93 ॥
ಯದಿ ಚೇದ್ರಾಜ್ಯಮಾಕಂಕ್ಷೇತ್ತತಃ ಸರ್ವಸಮಾಹಿತಃ ।
ಸಪ್ತದ್ವೀಪಸಮುದ್ರಾಯಾಃ ಕ್ಷಿತೇರಧಿಪತಿರ್ಭವೇತ್ ॥ 6-94 ॥
ಜನ್ಮಕೋಟಿಸಹಸ್ರಾಣಿ ಜನ್ಮಕೋಟಿಶತಾನಿ ಚ ।
ರಾಜ್ಯಂ ಕೃತ್ವಾ ತತಶ್ಚಾಂತೇ ಪುನಃ ಶಿವಪುರಂ ವ್ರಜೇತ್ ॥ 6-95 ॥
ಏತದೇವ ಫಲಂ ಜ್ಞೇಯಂ ಮಕುಟಾಭರಣಾದಿಷು ।
ರತ್ನಾಸನಪ್ರದಾನೇನ ಪಾದುಕೇ ವಿನಿವೇದಯೇತ್ ॥ 6-96 ॥
ದದ್ಯಾದ್ಯಃ ಕೇವಲಂ ವಜ್ರಂ ಶುದ್ಧಂ ಗೋಧೂಮಮಾತ್ರಕಂ ।
ಶಿವಾಯ ಸ ಶಿವೇ ಲೋಕೇ ತಿಷ್ಠೇದಾಪ್ರಲಯಂ ಸುಖೀ ॥ 6-97 ॥
ಇಂದ್ರನೀಲಪ್ರದಾನೇನ ಸ ವೈಡೂರ್ಯಪ್ರದಾನತಃ ।
ಮೋದತೇ ವಿವಿಧೈರ್ಭೋಗೈಃ ಕಲ್ಪಕೋಟಿಂ ಶಿವೇ ಪುರೇ ॥ 6-98 ॥
ಮಸೂರಮಾತ್ರಮಪಿ ಯಃ ಪದ್ಮರಾಗಂ ಸುಶೋಭನಂ ।
ನಿವೇದಯಿತ್ವಾ ಶರ್ವಾಯ ಮೋದತೇ ಕಾಲಮಕ್ಷಯಂ ॥ 6-99 ॥
ನಿವೇದ್ಯ ಮೌಕ್ತಿಕಂ ಸ್ವಚ್ಛಮೇಕಭಾಗೈಕಮಾತ್ರಕಂ ।
ಭೋಗೈಃ ಶಿವಪುರೇ ದಿವ್ಯೈಃ ಕಲ್ಪಕೋಟಿಂ ಪ್ರಮೋದತೇ ॥ 6-100 ॥
ಕೀಟಪಕ್ಷಂ ಮಹಾಶುದ್ಧಂ ನಿವೇದ್ಯ ಯವಮಾತ್ರಕಂ ।
ಶಿವಾಯಾದ್ಯಃ ಶಿವೇ ಲೋಕೇ ಮೋದತೇ ಕಾಲಮಕ್ಷಯಂ ॥ 6-101 ॥
ಹೇಮ್ನಾ ಕೃತ್ವಾ ಚ ಯಃ ಪುಷ್ಪಮಪಿ ಮಾಷಕಮಾತ್ರಕಂ ।
ನಿವೇದಯಿತ್ವಾ ಶರ್ವಾಯ ವರ್ಷಕೋಟಿಂ ವಸೇದ್ದಿವಿ ॥ 6-102 ॥
ಕ್ಷುದ್ರರತ್ನಾನಿ ಯೋ ದದ್ಯಾದ್ಧೇಮ್ನಿ ಬದ್ಧಾನಿ ಶಂಭವೇ ।
ಮೋದತೇ ಸ ಶಿವೇ ಲೋಕೇ ಕಲ್ಪಕೋಟ್ಯಯುತಂ ನರಃ ॥ 6-103 ॥
ಯಥಾ ಯಥಾ ಮಹಾರತ್ನಂ ಶೋಭನಂ ಚ ಯಥಾ ಯಥಾ ।
ತಥಾ ತಥಾ ಮಹತ್ಪುಣ್ಯಂ ಜ್ಞೇಯಂ ತಚ್ಛಿವದಾನತಃ ॥ 6-104 ॥
ಭೂಮಿಭಾಗೇ ಸ(?)ವಿಸ್ತೀಋಣೇ ಜಂಬೂದ್ವೀಪಂ ಪ್ರಕಲ್ಪಯೇತ್ ।
ಅಷ್ಟಾವರಣಸಂಯುಕ್ತಂ ನಗೇಂದ್ರಾಷ್ಟಕಭೂಷಿತಂ ॥ 6-105 ॥
ತನ್ಮಧ್ಯೇ ಕಾರಯೇದ್ದಿವ್ಯಂ ಮೇರುಪ್ರಾಸಾದಮುತ್ತಮಂ ।
ಅನೇಕಶಿಖರಾಕೀರ್ಣಮಶೇಷಾಮರಸಂಯುತಂ ॥ 6-106 ॥
ಬಹಿಃ ಸುವರ್ಣನಿಚಿತಂ ಸರ್ವರತ್ನೋಪಶೋಭಿತಂ ।
ಚತುಃಪ್ರಗ್ರೀವಕೋಪೇತಂ ಚಕ್ಷುರ್ಲಿಂಗಸಮಾಯುತಂ ॥ 6-107 ॥
ಚತುರ್ದಿಕ್ಷು ವನೋಪೇತಂ ಚತುರ್ಭಿಃ ಸಂಯುತೈಃ ಶರೈಃ ।
ಚತುರ್ಣಾಂ ಪುರಯುಕ್ತೇನ ಪ್ರಾಕಾರೇಣ ಚ ಸಂಯುತಂ ॥ 6-108 ॥
ಮೇರುಪ್ರಾಸಾದಮಿತ್ಯೇವಂ ಹೇಮರತ್ನವಿಭೂಷಿತಂ ।
ಯಃ ಕಾರಯೇದ್ವನೋಪೇತಂ ಸೋ ಽನಂತಫಲಮಾಪ್ನುಯಾತ್ ॥ 6-109 ॥
ಭೂಮ್ಯಂಭಃಪರಮಾಣೂನಾಂ ಯಥಾ ಸಂಖ್ಯಾ ನ ವಿದ್ಯತೇ ।
ಶಿವಾಯತನಪುಣ್ಯಸ್ಯ ತಥಾ ಸಂಖ್ಯಾ ನ ವಿದ್ಯತೇ ॥ 6-110 ॥
ಕುಲತ್ರಿಂಶಕಸಂಯುಕ್ತಃ ಸರ್ವಭೃತ್ಯಸಮನ್ವಿತಃ ।
ಕಲತ್ರಪುತ್ರಮಿತ್ರೈಶ್ಚ ಸರ್ವಸ್ವಜನಸಂಯುತಃ ॥ 6-111 ॥
ಆಶ್ರ್ತಿತೋಪಾಶ್ರಿತೈಃ ಸರ್ವೈರಶೇಷಗಣಸಂಯುತಃ ।
ಯಥಾ ಶಿವಸ್ತಥೈವಾಯಂ ಶರ್ವಲೋಕೇ ಸ ಪೂಜ್ಯತೇ ॥ 6-112 ॥
ನ ಚ ಮಾನುಷ್ಯಕಂ ಲೋಕಮಾಗಚ್ಛೇತ್ಕೃಪಣಂ ಪುನಃ ।
ಸರ್ವಜ್ಞಃ ಪರಿಪೂರ್ಣಶ್ಚ ಮುಕ್ತಃ ಸ್ವಾತ್ಮನಿ ತಿಷ್ಠತಿ ॥ 6-113 ॥
ಯಃ ಶಿವಾಯ ವನಂ ಕೃತ್ವಾ ಮುದಾಬ್ದಸಲಿಲೋತ್ಥಿತಂ(?) ।
ತದ್ದಂಡಕೋಪಶೋಭಂ ಚ ಹಸ್ತೇ ಕುರ್ವೀತ ಸರ್ವದಾ ॥ 6-114 ॥
ಶೋಭಯೇದ್ಭೂತನಾಥಂ ವಾ ಚಂದ್ರಶಾಲಾಂ ಕ್ವಚಿತ್ಕ್ವಚಿತ್ ।
ವೇದೀಂ ವಾಥಾಭ್ಯಪದ್ಯಂತ ಪ್ರೋನ್ನತಾಃ ಸ್ತಂಭಪಂಕ್ತಯಃ ॥ 6-115 ॥
ಶಾತಕುಂಭಮಯೀಂ ವಾಪಿ ಸರ್ವಲಕ್ಷಣಸಂಯುತಾಂ ।
ಈಶ್ವರಪ್ರತಿಮಾಂ ಸೌಮ್ಯಾಂ ಕಾರಯೇತ್ಪುರುಷೋಚ್ಛ್ರಿತಾಂ ॥ 6-116 ॥
ತ್ರಿಶೂಲಸವ್ಯಹಸ್ತಾಂ ಚ ವರದಾಭಯದಾಯಿಕಾಂ ।
ಸವ್ಯಹಸ್ತಾಕ್ಷಮಾಲಾಂ ಚ ಜಟಾಕುಸುಮಭೂಷಿತಾಂ ॥ 6-117 ॥
ಪದ್ಮಸಿಂಹಾಸನಾಸೀನಾಂ ವೃಷಸ್ಥಾಂ ವಾ ಸಮುಚ್ಛ್ರಿತಾಂ ।
ವಿಮಾನಸ್ಥಾಂ ರಥಸ್ಥಾಂ ವಾ ವೇದಿಸ್ಥಾಂ ವಾ ಪ್ರಭಾನ್ವಿತಾಂ ॥ 6-118 ॥
ಸೌಮ್ಯವಕ್ತ್ರಾಂ ಕರಾಲಾಂ ವಾ ಮಹಾಭೈರವರೂಪಿಣೀಂ ।
ಅತ್ಯುಚ್ಛ್ರಿತಾಂ ಸುವಿಸ್ತೀರ್ಣಾಂ ನೃತ್ಯಸ್ಥಾಂ ಯೋಗಸಂಸ್ಥಿತಾಂ ॥ 6-119 ॥
ಕುರ್ಯಾದಸಂಭವೇ ಹೇಮ್ನಸ್ತಾರೇಣ ವಿಮಲೇನ ಚ ।
ಆರಕೂಟಮಯೀಂ ವಾಪಿ ತಾಮ್ರಮೃಚ್ಛೈಲದಾರುಜಾಂ ॥ 6-120 ॥
ಅಶೇಷಕೈಃ ಸರೂಪೈಶ್ಚ ವರ್ಣಕೈರ್ವಾ ಪಟೇ ಲಿಖೇತ್ ।
ಕುಡ್ಯೇ ವಾ ಫಲಕೇ ವಾಪಿ ಭಕ್ತ್ಯಾ ವಿತ್ತಾನುಸಾರತಃ ॥ 6-121 ॥
ಏಕಾಂ ಸಪರಿವಾರಾಂ ವಾ ಪಾರ್ವತೀಂ ಗಣಸಂಯುತಾಂ ।
ಪ್ರತೀಹಾರಸಮೋಪೇತಾಂ(?) ಕುರ್ಯಾದೇವಾವಿಕಲ್ಪತಃ ॥ 6-122 ॥
ಪೀಠಂ ವಾ ಕಾರಯೇದ್ರೌಪ್ಯಂ ತಾಮ್ರಂ ಪಿತ್ತಲಸಂಭವಂ ।
ಚತುರ್ಮುಖೈಕವಕ್ತ್ರಂ ವಾ ಬಹಿಃ ಕಾಂಚನಸಂಸ್ಕೃತಂ ॥ 6-123 ॥
ಪೃಥಕ್ಪೃಥಗನೇಕಾನಿ ಕಾರಯಿತ್ವಾ ಮುಖಾನಿ ತು ।
ಸೌಮ್ಯಭೈರವರೂಪಾಣಿ ಶಿವಸ್ಯ ಬಹುರೂಪಿಣಃ ॥ 6-124 ॥
ನಾನಾಭರಣಯುಕ್ತಾನಿ ಹೇಮರೌಪ್ಯಕೃತಾನಿ ಚ ।
ಶಿವಸ್ಯ ರಥಯಾತ್ರಾಯಾಂ ತಾನಿ ಲೋಕಸ್ಯ ದರ್ಶಯೇತ್ ॥ 6-125 ॥
ಉಕ್ತಾನಿ ಯಾನಿ ಪುಣ್ಯಾನಿ ಸಂಕ್ಷೇಪೇಣ ಪೃಥಕ್ಪೃಥಕ್ ।
ಕೃತ್ವೈಕೇನ ಮಮೈತೇಷಾಮಕ್ಷಯಂ ಫಲಮಾಪ್ನುಯಾತ್ ॥ 6-126 ॥
ಮಾತುಃ ಪಿತುಃ ಸಹೋಪಾಯೈರ್(?) ದಶಭಿರ್ದಶಭಿಃ ಕುಲೈಃ ।
ಕಲತ್ರಪುತ್ರಮಿತ್ರಾದ್ಯೈರ್ಭೃತ್ಯೈರ್ಯುಕ್ತಃ ಸ ಬಾಂಧವೈಃ ॥ 6-127 ॥
ಅಯುತೇನ ವಿಮಾನಾನಾಂ ಸರ್ವಕಾಮಯುತೇನ ಚ ।
ಭುಂಕ್ತೇ ಸ್ವಯಂ ಮಹಾಭೋಗಾನಂತೇ ಮುಕ್ತಿಮವಾಪ್ನುಯಾತ್ ॥ 6-128 ॥
ಮಂಡಪಸ್ತಂಭಪರ್ಯಂತೇ ಕೀಲಯೇದ್ದರ್ಪಣಾನ್ವಿತಂ ।
ಅಭಿಷಿಚ್ಯ ಜನಾ ಯಸ್ಮಿನ್ಪುಜಾಂ ಕುವಂತಿ ಬಿಲ್ವಕೈಃ ॥ 6-129 ॥
ಕಾಲಕಾಲಕೃತಿಂ ಕೃತ್ವಾ ಕೀಲಯೇದ್ಯಃ ಶಿವಾಶ್ರಮೇ ।
ಸರ್ವಲೋಕೋಪಕಾರಾಯ ಪೂಜಯೇಚ್ಚ ದಿನೇ ದಿನೇ ॥ 6-130 ॥
ಧೂಪವೇಲಾಪ್ರಮಾಣಾರ್ಥಂ ಕಲ್ಪಯೇದ್ಯಃ ಶಿವಾಶ್ರಮೇ ।
ಕ್ಷರಂತೀಂ ಪೂರ್ಯಮಾಣಾಂ ವಾ ಸದಾಯಾಮೇ ಘಟೀಂ ನೃಪಃ ॥ 6-131 ॥
ಏಷಾಮೇಕತಮಂ ಪುಣ್ಯಂ ಕೃತ್ವಾ ಪಾಪವಿವರ್ಜಿತಃ ।
ಶಿವಲೋಕೇ ನರಃ ಪ್ರಾಪ್ಯ ಸರ್ವಜ್ಞಃ ಸ ಸುಖೀ ಭವೇತ್ ॥ 6-132 ॥
ರಥಯಾತ್ರಾಂ ಪ್ರವಕ್ಷ್ಯಾಮಿ ಶಿವಸ್ಯ ಪರಮಾತ್ಮನಃ ।
ಸರ್ವಲೋಕಹಿತಾರ್ಥಾಯ ಮಹಾಶಿಲ್ಪಿವಿನಿರ್ಮಿತಾಂ ॥ 6-133 ॥
ರಥಮಧ್ಯೇ ಸಮಾವೇಶ್ಯ ಯಥಾ ಯಷ್ಟಿಂ ತು ಕೀಲಯೇತ್ ।
ಯಷ್ಟೇರ್ಮಧ್ಯೇ ಸ್ಥಿತಂ ಕಾರ್ಯಂ ವಿಮಾನಮತಿಶೋಭಿತಂ ॥ 6-134 ॥
ಪಂಚಭೌಮಂ ತ್ರಿಭೌಮಂ ವಾ ದೃಢವಂಶಪ್ರಕಲ್ಪಿತಂ ।
ಕರ್ಮಣಾ ಸುನಿಬದ್ಧಂ ಚ ರಜ್ಜುಭಿಶ್ಚ ಸುಸಂಯುತಂ ॥ 6-135 ॥
ಪಂಚಶಾಲಾಂಡಿಕೈರ್ಯುಕ್ತಂ ನಾನಾಭಕ್ತಿಸಮನ್ವಿತಂ ।
ಚಿತ್ರವರ್ಣಪರಿಚ್ಛನ್ನಂ ಪಟೈರ್ವಾ ವರ್ಣಕಾನ್ವಿತೈಃ ॥ 6-136 ॥
ಲಂಬಕೈಃ ಸೂತ್ರದಾಮ್ನಾ ಚ ಘಂಟಾಚಾಮರಭೂಷಿತಂ ।
ಬುದ್ಬುದೈರರ್ಧಚಂದ್ರೈಶ್ಚ ದರ್ಪಣೈಶ್ಚ ಸಮುಜ್ಜ್ವಲಂ ॥ 6-137 ॥
ಕದಲ್ಯರ್ಧಧ್ವಜೈರ್ಯುಕ್ತಂ ಮಹಾಚ್ಛತ್ತ್ರಂ ಮಹಾಧ್ವಜಂ ।
ಪುಷ್ಪಮಾಲಾಪರಿಕ್ಷಿಪ್ತಂ ಸರ್ವಶೋಭಾಸಮನ್ವಿತಂ ॥ 6-138 ॥
ಮಹಾರಥವಿಮಾನೇ ಽಸ್ಮಿನ್ಸ್ಥಾಪಯೇದ್ಗಣಸಂಯುತಂ ।
ಈಶ್ವರಪ್ರತಿಮಾಂ ಹೇಮ್ನಿ ಪ್ರಥಮೇ ಪುರಮಂಡಪೇ ॥ 6-139 ॥
ಮುಖತ್ರಯಂ ಚ ಬಧ್ನೀಯಾದ್ಬಹಿಃ ಕುರ್ಯಾತ್ತಥಾಶ್ರಿತಂ ।
ಪುರೇ ಪುರೇ ಬಹಿರ್ದಿಕ್ಷು ಗೃಹಕೇಷು ಸಮಾಶ್ರಿತಂ ॥ 6-140 ॥
ಚತುಷ್ಕಂ ಶಿವವಕ್ತ್ರಾಣಾಂ ಸಂಸ್ಥಾಪ್ಯ ಪ್ರತಿಪೂಜಯೇತ್ ।
ದಿನತ್ರಯಂ ಪ್ರಕುರ್ವೀತ ಸ್ನಾನಮರ್ಚನಭೋಜನಂ ॥ 6-141 ॥
ನೃತ್ಯಕ್ರೀಡಾಪ್ರಯೋಗೇಣ ಗೇಯಮಂಗಲಪಾಠಕೈಃ ।
ಮಹಾವಾದಿತ್ರನಿರ್ಘೋಷೈಃ ಪೌಷಪೂರ್ಣಿಮಪರ್ವಣಿ ॥ 6-142 ॥
ಭ್ರಾಮಯೇದ್ರಾಜಮಾರ್ಗೇಣ ಚತುರ್ಥೇ ಽಹನಿ ತದ್ರಥಂ ।
ತತಃ ಸ್ವಸ್ಥಾನಮಾನೀಯ ತಚ್ಛೇಷಮಪಿ ವರ್ಧಯೇತ್ ॥ 6-143 ॥
ಅವಧಾರ್ಯ ಜಗದ್ಧಾತ್ರೀ ಪ್ರತಿಮಾಮವತಾರಯೇತ್ ।
ಮಹಾವಿಮಾನಯಾತ್ರೈಷಾ ಕರ್ತವ್ಯಾ ಪಟ್ಟಕೇ ಽಪಿ ವಾ ॥ 6-144 ॥
ವಂಶೈರ್ನವೈಃ ಸುಪಕ್ವೈಶ್ಚ ಕಟಂ ಕುರ್ಯಾದ್ಭರಕ್ಷಮಂ(?) ।
ವೃತ್ತಂ ದ್ವಿಗುಣದೀರ್ಘಂ ಚ ಚತುರಶ್ರಮಧಃ ಸಮಂ ॥ 6-145 ॥
ಸರ್ವತ್ರ ಚರ್ಮಣಾ ಬದ್ಧಂ ಮಹಾಯಷ್ಟಿಸಮಾಶ್ರಿತಂ ।
ಮುಖಂ ಬದ್ಧಂ ಚ ಕುರ್ವೀತ ವಂಶಮಂಡಲಿನಾ ದೃಢಂ ॥ 6-146 ॥
ಕಟೇ ಽಸ್ಮಿಂಸ್ತಾನಿ ವಸ್ತ್ರಾಣಿ ಸ್ಥಾಪ್ಯ ಬಧ್ನೀತ ಯತ್ನತಃ ।
ಉಪರ್ಯುಪರಿ ಸರ್ವಾಣಿ ತನ್ಮಧ್ಯೇ ಪ್ರತಿಮಾಂ ನ್ಯಸೇತ್ ॥ 6-147 ॥
ವರ್ಣಕೈಃ ಕುಂಕುಮಾದ್ಯೈಶ್ಚ ಚಿತ್ರಪುಷ್ಪೈಶ್ಚ ಪೂಜಯೇತ್ ।
ನಾನಾಭರಣಪೂಜಾಭಿರ್ಮುಕ್ತಾಹಾರಪ್ರಲಂಬಿಭಿಃ ॥ 6-148 ॥
ರಥಸ್ಯ ಮಹತೋ ಮಧ್ಯೇ ಸ್ಥಾಪ್ಯ ಪಟ್ಟದ್ವಯಂ ದೃಢಂ ।
ಅಧರೋತ್ತರಭಾಗೇನ ಮಧ್ಯೇ ಛಿದ್ರಸಮನ್ವಿತಂ ॥ 6-149 ॥
ಕಟಿಯಷ್ಟೇರಧೋಭಾಗಂ ಸ್ಥಾಪ್ಯ ಛಿದ್ರಮಯಂ ಶುಭೈಃ ।
ಆಬದ್ಧ್ಯ ಕೀಲಯೇದ್ಯತ್ನಾದ್ಯಷ್ಟ್ಯರ್ಧಂ ಚ ಧ್ವಜಾಷ್ಟಕಂ ॥ 6-150 ॥
ಕಟಸ್ಯ ಪೃಷ್ಟಂ ಸರ್ವತ್ರ ಕಾರಯೇತ್ಪಟಸಂವೃತಂ ।
ತತ್ಪಟೇ ಚ ಲಿಖೇತ್ಸೋಮಂ ಸಗಣಂ ಸವೃಷಂ ಶಿವಂ ॥ 6-151 ॥
ವಿಚಿತ್ರಪುಷ್ಪಸ್ರಗ್ದಾಮ್ನಾ ಸಮಂತಾದ್ಭೂಷಯೇತ್ಕಟಂ ।
ರವಕೈಃ ಕಿಂಕಿಣೀಜಾಲೈರ್ಘಂಟಾಚಾಮರಭೂಷಿತೈಃ ॥ 6-152 ॥
ಮಹಾಪೂಜಾವಿಶೇಷೈಶ್ಚ ಕೌತೂಹಲಸಮನ್ವಿತಂ ।
ವಾದ್ಯಾರಂಭೋಪಚಾರೇಣ ಮಾರ್ಗಶೋಭಾಂ ಪ್ರಕಲ್ಪಯೇತ್ ॥ 6-153 ॥
ತದ್ರಥಂ ಭ್ರಾಮಯೇದ್ಯತ್ನಾದ್ರಾಜಮಾರ್ಗೇಣ ಸರ್ವತಃ ।
ತತಃ ಸ್ವಾಶ್ರಮಮಾನೀಯ ಸ್ಥಾಪಯೇತ್ತತ್ಸಮೀಪತಃ ॥ 6-154 ॥
ಮಹಾಶಬ್ದಂ ತತಃ ಕುರ್ಯಾತ್ತಾಲತ್ರಯಸಮನ್ವಿತಂ ।
ತತಸ್ತುಷ್ಣೀಂ ಸ್ಥಿತೇ ಲೋಕೇ ತಚ್ಛಾಂತಿಮಿಹ ಧಾರಯೇತ್ ॥ 6-155 ॥
ಶಿವಂ ತು ಸರ್ವಜಗತಃ ಶಿವಂ ಗೋಬ್ರಾಹ್ಮಣಸ್ಯ ಚ ।
ಶಿವಮಸ್ತು ನೃಪಾಣಾಂ ಚ ತದ್ಭಕ್ತಾನಾಂ ಜನಸ್ಯ ಚ ॥ 6-156 ॥
ರಾಜಾ ವಿಜಯಮಾಪ್ನೋತಿ ಪುತ್ರಪೌತ್ರೈಶ್ಚ ವರ್ಧತಾಂ ।
ಧರ್ಮನಿಷ್ಠಶ್ಚ ಭವತು ಪ್ರಜಾನಾಂ ಚ ಹಿತೇ ರತಃ ॥ 6-157 ॥
ಕಾಲವರ್ಷೀ ತು ಪರ್ಜನ್ಯಃ ಸಸ್ಯಸಂಪತ್ತಿರುತ್ತಮಾ ।
ಸುಭಿಕ್ಷಾತ್ಕ್ಷೇಮಮಾಪ್ನೋತಿ ಕಾರ್ಯಸಿದ್ಧಿಶ್ಚ ಜಾಯತಾಂ ॥ 6-158 ॥
ದೋಷಾಃ ಪ್ರಯಾಂತು ನಾಶಂ ಚ ಗುಣಾಃ ಸ್ಥೈರ್ಯಂ ಭಜಂತು ವಃ ।
ಬಹುಕ್ಷೀರಯುತಾ ಗಾವೋ ಹೃಷ್ಟಪುಷ್ಟಾ ಭವಂತು ವಃ ॥ 6-159 ॥
ಏವಂ ಶಿವಮಹಾಶಾಂತಿಮುಚ್ಚಾರ್ಯ ಜಗತಃ ಕ್ರಮಾತ್ ।
ಅಭಿವರ್ಧ್ಯ ತತಃ ಶೇಷಮೈಶ್ವರೀಂ ಸಾರ್ವಕಾಮಿಕೀಂ ॥ 6-160 ॥
ಶಿವಮಾಲಾಂ ಸಮಾದಾಯ ಸದಾಸೀಪರಿಚಾರಿಕಃ ।
ಫಲೈರ್ಭಕ್ಷೈಶ್ಚ ಸಂಯುಕ್ತಾಂ ಗೃಹ್ಯ ಪಾತ್ರೀಂ ನಿವೇಶಯೇತ್ ॥ 6-161 ॥
ಪಾತ್ರೀಂ ಚ ಧಾರಯೇನ್ಮೂರ್ಧ್ನಾ ಸೋಷ್ಣೀಷಾಂ ದೇವಪುತ್ರಕಃ ।
ಅಲಂಕೃತಃ ಶುಕ್ಲವಾಸಾ ಧಾರ್ಮಿಕಃ ಸತತಂ ಶುಚಿಃ ॥ 6-162 ॥
ತತಶ್ಚ ತಾಂ ಸಮುತ್ಕ್ಷಿಪ್ಯ ಪಾಣಿನಾ ಧಾರಯೇದ್ಬುಧಃ ।
ಪ್ರಬ್ರೂಯಾದಪರಶ್ಚಾತ್ರ ಶಿವಧರ್ಮಸ್ಯ ಭಾಜಕಃ ॥ 6-163 ॥
ತೋಯಂ ಯಥಾ ಘಟೀಸಂಸ್ಥಮಜಸ್ರಂ ಕ್ಷರತೇ ತಥಾ ।
ಕ್ಷರತೇ ಸರ್ವಲೋಕಾನಾಂ ತದ್ವದಾಯುರಹರ್ನಿಶಂ ॥ 6-164 ॥
ಯದಾ ಸರ್ವಂ ಪರಿತ್ಯಜ್ಯ ಗಂತವ್ಯಮವಶೈರ್ಧ್ರುವಂ ।
ತದಾ ನ ದೀಯತೇ ಕಸ್ಮಾತ್ಪಾಥೇಯಾರ್ಥಮಿದಂ ಧನಂ ॥ 6-165 ॥
ಕಲತ್ರಪುತ್ರಮಿತ್ರಾಣಿ ಪಿತಾ ಮಾತಾ ಚ ಬಾಂಧವಾಃ ।
ತಿಷ್ಠಂತಿ ನ ಮೃತಸ್ಯಾರ್ಥೇ ಪರಲೋಕೇ ಧನಾನಿ ಚ ॥ 6-166 ॥
ನಾಸ್ತಿ ಧರ್ಮಸಮಂ ಮಿತ್ರಂ ನಾಸ್ತಿ ಧರ್ಮಸಮಃ ಸಖಾ ।
ಯತಃ ಸರ್ವೈಃ ಪರಿತ್ಯಕ್ತಂ ನರಂ ಧರ್ಮೋ ಽನುಗಚ್ಛತಿ ॥ 6-167 ॥
ತಸ್ಮಾದ್ಧರ್ಮಂ ಸಮುದ್ದಿಶ್ಯ ಯಃ ಶೇಷಾಮಭಿವರ್ಧಯೇತ್ ।
ಸಮಸ್ತಪಾಪನಿರ್ಮುಕ್ತಃ ಶಿವಲೋಕಂ ಸ ಗಚ್ಛತಿ ॥ 6-168 ॥
ಉಪರ್ಯುಪರಿ ವಿತ್ತೇನ ಯಃ ಶೇಷಾಮಭಿವರ್ಧಯೇತ್ ।
ತಸ್ಯೇಯಮುತ್ತಮಾ ದೇಯಾ ಯತಶ್ಚಾನ್ಯಾ ನ ವರ್ಧತೇ ॥ 6-169 ॥
ಇತ್ಯೇವಂ ಮಧ್ಯಮಾಂ ಶೇಷಾಂ ವರ್ಧಯೇದ್ವಾ ಕನೀಯಸೀಂ ।
ತತಸ್ತೇಷಾಂ ಪ್ರದಾತವ್ಯಾ ಸರ್ವಶೋಕಸ್ಯ ಶಾಂತಯೇ ॥ 6-170 ॥
ಯೇನೋತ್ತಮಾ ಗೃಹೀತಾ ಸ್ಯಾಚ್ಶಿವಶೇಷಾ ಮಹೀಯಸೀ ।
ಪ್ರಾಪಣೀಯಾ ಗೃಹಂ ತಸ್ಯ ತಥೈವ ಶಿರಸಾ ವೃತಾ ॥ 6-171 ॥
ಧ್ವಜಚ್ಛತ್ತ್ರವಿಮಾನಾದ್ಯೈರ್ಮಹಾವಾದಿತ್ರನಿಃಸ್ವನೈಃ ।
ಗೃಹದ್ವಾರಂ ತತಃ ಪ್ರಾಪ್ತಮರ್ಚಯಿತ್ವಾ ನಿವೇಶಯೇತ್ ॥ 6-172 ॥
ದದ್ಯಾದ್ಗೋತ್ರಕಲತ್ರಾಣಾಂ ಭೃತ್ಯಾನಾಂ ಸ್ವಜನಸ್ಯ ಚ ।
ತರ್ಪಯೇಚ್ಚಾನತಾನ್(?) ಭಕ್ತ್ಯಾ ವಾದಿತ್ರಧ್ವಜವಾಹಕಾನ್ ॥ 6-173 ॥
ಏವಮಾದೀಯತೇ ಭಕ್ತ್ಯಾ ಯಃ ಶಿವಸ್ಯೋತ್ತಮಾ ಗೃಹೇ ।
ಶೋಭಯಾ ರಾಜಮಾರ್ಗೇಣ ತಸ್ಯ ಧರ್ಮಫಲಂ ಶೃಣು ॥ 6-174 ॥
ಸಮಸ್ತಪಾಪನಿರ್ಮುಕ್ತಃ ಸಮಸ್ತಕುಲಸಂಯುತಃ ।
ಶಿವಲೋಕಮವಾಪ್ನೋತಿ ಸಭೃತ್ಯಪರಿಚಾರಕಃ ॥ 6-175 ॥
ತತ್ರ ದಿವ್ಯೈರ್ಮಹಾಭೋಗೈರ್ವಿಮಾನೈಃ ಸಾರ್ವಕಾಮಿಕೈಃ ।
ಕಲ್ಪಾನಾಂ ಕ್ರೀಡತೇ ಕೋಟಿಮಂತೇ ನಿರ್ವಾಣಮಾಪ್ನುಯಾತ್ ॥ 6-176 ॥
ರಥಸ್ಯ ಯಾತ್ರಾಂ ಯಃ ಕುರ್ಯಾದಿತ್ಯೇವಮುಪಶೋಭಯಾ ।
ಭಕ್ಷಭೋಜ್ಯಪ್ರದಾನೈಶ್ಚ ತತ್ಫಲಂ ಶೃನು ಯತ್ನತಃ ॥ 6-177 ॥
ಅಶೇಷಪಾಪನಿರ್ಮುಕ್ತಃ ಸರ್ವಭೃತ್ಯಸಮನ್ವಿತಃ ।
ಕುಲತ್ರಿಂಶಕಮುದ್ಧೃತ್ಯ ಸುಹೃದ್ಭಿಃ ಸ್ವಜನೈಃ ಸಹ ॥ 6-178 ॥
ಸರ್ವಕಾಮಯುತೈರ್ದಿವ್ಯೈಃ ಸ್ವಚ್ಛಂದಗಮನಾಲಯೈಃ ।
ಮಹಾವಿಮಾನೈಃ ಶ್ರೀಮದ್ಭಿರ್ದಿವ್ಯಸ್ತ್ರೀಪರಿವಾರಿತಃ ॥ 6-179 ॥
ಇಚ್ಛಯಾ ಕ್ರೀಡತೇ ಭೋಗೈಃ ಕಲ್ಪಕೋಟಿಂ ಶಿವೇ ಪುರೇ ।
ಜ್ಞಾನಯೋಗಂ ತತಃ ಪ್ರಾಪ್ಯ ಸಂಸಾರಾದವಮುಚ್ಯತೇ ॥ 6-180 ॥
ಶಿವಸ್ಯ ರಥಯಾತ್ರಾಯಾಮುಪವಾಸಪರಃ ಕ್ಷಮೀ ।
ಪುರತಃ ಪೃಷ್ಠತೋ ವಾಪಿ ಗಚ್ಛಂಸ್ತಸ್ಯ ಫಲಂ ಶೃಣು ॥ 6-181 ॥
ಅಶೇಷಪಾಪನಿರ್ಮುಕ್ತಃ ಶುದ್ಧಃ ಶಿವಪುರಂ ಗತಃ ।
ಮಹಾರಥೋಪಮೈರ್ಯಾನೈಃ ಕಲ್ಪಾಶೀತಿಂ ಪ್ರಮೋದತೇ᳚ ॥ 6-182 ॥
ಧ್ವಜಚ್ಛತ್ತ್ರಪತಾಕಾಭಿರ್ದೀಪದರ್ಪಣಚಾಮರೈಃ ।
ಧೂಪೈರ್ವಿತಾನಕಲಶೈರುಪಶೋಭಾ ಸಹಸ್ರಶಃ ॥ 6-183 ॥
ಗೃಹೀತ್ವಾ ಯಾತಿ ಪುರತಃ ಸ್ವೇಚ್ಛಯಾ ವಾ ಪರೇಚ್ಛಯಾ ।
ಸಂಪರ್ಕಾತ್ಕೌತುಕಾಲ್ಲಾಭಾಚ್ಛಿವಲೋಕೇ ವ್ರಜಂತೇ ತೇ ॥ 6-184 ॥
ಶಿವಸ್ಯ ರಥಯಾತ್ರಾಂ ತು ಯಃ ಪ್ರಪಶ್ಯತಿ ಭಕ್ತಿತಃ ।
ಪ್ರಸಂಗಾತ್ಕೌತುಕಾದ್ವಾಪಿ ತೇ ಽಪಿ ಯಾಂತಿ ಶಿವಂ ಪುರಂ ॥ 6-185 ॥
ನಾನಾಯತ್ನಾದಿಶೇಷಾಂತೇ ನಾನಾಪ್ರೇಕ್ಷಣಕಾನಿ ಚ ।
ಕುರ್ವೀತ ರಥಯಾತ್ರಾಯಾಂ ರಮತೇ ಚ ವಿಭೂಷಿತಾ ॥ 6-186 ॥
ತೇ ಭೋಗೈರ್ವಿವಿಧೈರ್ದಿವ್ಯೈಃ ಶಿವಾಸನ್ನಾ ಗಣೇಶ್ವರಾಃ ।
ಕ್ರೀಡಂತಿ ರುದ್ರಭವನೇ ಕಲ್ಪಾನಾಂ ವಿಂಶತೀರ್ನರಾಃ ॥ 6-187 ॥
ಮಹತಾ ಜ್ಞಾನಸಂಘೇನ ತಸ್ಮಾಚ್ಛಿವರಥೇನ ಚ ।
ಪೃಥಕ್ಜೀವಾ ಮೃತಾ ಯಾಂತಿ ಶಿವಲೋಕಂ ನ ಸಂಶಯಃ ॥ 6-188 ॥
ಶ್ರೀಪರ್ವತೇ ಮಹಾಕಾಲೇ ವಾರಾಣಸ್ಯಾಂ ಮಹಾಲಯೇ ।
ಜಲ್ಪೇಶ್ವರೇ ಕುರುಕ್ಷೇತ್ರೇ ಕೇದಾರೇ ಮಂಡಲೇಶ್ವರೇ ॥ 6-189 ॥
ಗೋಕರ್ಣೇ ಭದ್ರಕರ್ಣೇ ಚ ಶಂಕುಕರ್ಣೇ ಸ್ಥಲೇಶ್ವರೇ ।
ಭೀಮೇಶ್ವರೇ ಸುವರ್ಣಾಕ್ಷೇ ಕಾಲಂಜರವನೇ ತಥಾ ॥ 6-190 ॥
ಏವಮಾದಿಷು ಚಾನ್ಯೇಷು ಶಿವಕ್ಷೇತ್ರೇಷು ಯೇ ಮೃತಾಃ ।
ಜೀವಾಶ್ಚರಾಚರಾಃ ಸರ್ವೇ ಶಿವಲೋಕಂ ವ್ರಜಂತಿ ತೇ ॥ 6-191 ॥
ಪ್ರಯಾಗಂ ಕಾಮಿಕಂ ತೀರ್ಥಮವಿಮುಕ್ತಂ ತು ನೈಷ್ಠಿಕಂ ।
ಶ್ರೀಪರ್ವತಂ ಚ ವಿಜ್ಞೇಯಮಿಹಾಮುತ್ರ ಚ ಸಿದ್ಧಿದಂ ॥ 6-192 ॥
ಪ್ರಸಂಗೇನಾಪಿ ಯಃ ಪಶ್ಯೇದನ್ಯತ್ರ ಪ್ರಸ್ಥಿತಃ ಕ್ವಚಿತ್ ।
ಶ್ರೀಪರ್ವತಂ ಮಹಾಪುಣ್ಯಂ ಸೋ ಽಪಿ ಯಾತಿ ಶಿವಂ ಪುರಂ ॥ 6-193 ॥
ವ್ರಜೇದ್ಯಃ ಶಿವತೀರ್ಥಾನಿ ಸರ್ವಪಾಪೈಃ ಪ್ರಮುಚ್ಯತೇ ।
ಪಾಪಯುಕ್ತಃ ಶಿವಜ್ಞಾನಂ ಪ್ರಾಪ್ಯ ನಿರ್ವಾಣಮಾಪ್ನುಯಾತ್ ॥ 6-194 ॥
ತೀರ್ಥಸ್ಥಾನೇಷು ಯಃ ಶ್ರಾದ್ಧಂ ಶಿವರಾತ್ರೇ ಪ್ರಯತ್ನತಃ ।
ಕಲ್ಪಯಿತ್ವಾನುಸಾರೇಣ ಕಾಲಸ್ಯ ವಿಷುವಸ್ಯ ಚ ॥ 6-195 ॥
ತೀರ್ಥಯಾತ್ರಾಗತಂ ಶಾಂತಂ ಹಾಹಾಭೂತಮಚೇತನಂ ।
ಕ್ಷುತ್ಪಿಪಾಸಾತುರಂ ಲೋಕೇ ಪಾಂಸುಪಾದಂ ತ್ವರಾನ್ವಿತಂ ॥ 6-196 ॥
ಸಂತರ್ಪಯಿತ್ವಾ ಯತ್ನೇನ ಮ್ಲಾನಲಕ್ಷ್ಮೀಮಿವಾಂಬುಭಿಃ ।
ಪಾದ್ಯಾಸನಪ್ರದಾನೇನ ಕಸ್ತೇನ ಪುರುಷಃ ಸಮಃ ॥ 6-197 ॥
ಅಶ್ನಂತಿ ಯಾವತ್ತತ್ಪಿಂಡಂ ತೀರ್ಥನಿರ್ಧೂತಕಲ್ಮಷಾಃ ।
ತಾವದ್ವರ್ಷಸಹಸ್ರಾಣಿ ತದ್ದಾತಾಸ್ತೇ ಶಿವೇ ಪುರೇ ॥ 6-198 ॥
ದದ್ಯಾದ್ಯಃ ಶಿವಸತ್ತ್ರಾರ್ಥಂ ಮಹಿಷೀಂ ಸುಪಯಸ್ವಿನೀಂ ।
ಮೋದತೇ ಸ ಶಿವೇ ಲೋಕೇ ಯುಗಕೋಟಿಶತಂ ನರಃ ॥ 6-199 ॥
ಆರ್ತಾಯ ಶಿವಭಕ್ತಾಯ ದದ್ಯಾದ್ಯಃ ಸುಪಯಸ್ವಿನೀಂ ।
ಅಜಾಮೇಕಾಂ ಸುಪುಷ್ಟಾಂಗೀಂ ತಸ್ಯ ಪುಣ್ಯಫಲಂ ಶೃಣು ॥ 6-200 ॥
ಯಾವತ್ತದ್ರೋಮಸಂಖ್ಯಾನಂ ತತ್ಪ್ರಸೂತಿಕುಲೇಷು ಚ ।
ತಾವದ್ವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ॥ 6-201 ॥
ಮೃದುರೋಮಾಂಚಿತಾಂ ಕೃಷ್ಣಾಂ ನಿವೇದ್ಯ ಗುರವೇ ನರಃ ।
ರೋಮ್ಣಿ ರೋಮ್ಣಿ ಸುವರ್ಣಸ್ಯ ದತ್ತಸ್ಯ ಫಲಮಾಪ್ನುಯಾತ್ ॥ 6-202 ॥
ಗಜಾಶ್ವರಥಸಂಯುಕ್ತೈರ್ವಿಮಾನೈಃ ಸಾರ್ವಕಾಮಿಕೈಃ ।
ಸಾನುಗಃ ಕ್ರೀಡತೇ ಭೋಗೈಃ ಕಲ್ಪಕೋಟಿಂ ಶಿವೇ ಪುರೇ ॥ 6-203 ॥
ನಿವೇದ್ಯಾಶ್ವತರಂ ಪುಷ್ಟಮದುಷ್ಟಂ ಗುರವೇ ನರಃ ।
ಸಂಗತಿಂ ಸೋಪಕರಣಂ ಭೋಗಾನ್ಭುಂಕ್ತೇ ಶಿವೇ ಪುರೇ ॥ 6-204 ॥
ದಿವ್ಯಾಶ್ವಯುಕ್ತೈಃ ಶ್ರೀಮದ್ಭಿರ್ವಿಮಾನೈಃ ಸಾರ್ವಕಾಮಿಕೈಃ ।
ಕೋಟಿಂ ಕೋಟಿಂ ಚ ಕಲ್ಪಾನಾಂ ತದಂತೇ ಸ್ಯಾನ್ಮಹೀಪತಿಃ ॥ 6-205 ॥
ಅಪಿ ಯೋಜನಮಾತ್ರಾಯ ಶಿಬಿಕಾಂ ಪರಿಕಲ್ಪಯೇತ್ ।
ಗುರೋಃ ಶಾಂತಸ್ಯ ದಾಂತಸ್ಯ ತಸ್ಯ ಪುಣ್ಯಫಲಂ ಶೃಣು ॥ 6-206 ॥
ವಿಮಾನಾನಾಂ ಸಹಸ್ರೇಣ ಸರ್ವಕಾಮಯುತೇನ ಚ ।
ಕಲ್ಪಕೋಟ್ಯಯುತಂ ಸಾಗ್ರಂ ಭೋಗಾನ್ಭುಂಕ್ತೇ ಶಿವೇ ಪುರೇ ॥ 6-207 ॥
ಛಾಗಂ ಮೇಷಂ ಮಯೂರಂ ಚ ಕುಕ್ಕುಟಂ ಶಾರಿಕಾಂ ಶುಕಂ ।
ಬಾಲಕ್ರೀಡನಕಾನೇತಾನಿತ್ಯಾದ್ಯಾನಪರಾನಪಿ ॥ 6-208 ॥
ನಿವೇದಯಿತ್ವಾ ಸ್ಕಂದಾಯ ತತ್ಸಾಯುಜ್ಯಮವಾಪ್ನುಯಾತ್ ।
ಭುಕ್ತ್ವಾ ತು ವಿಪುಲಾನ್ಭೋಗಾಂಸ್ತದಂತೇ ಸ್ಯಾದ್ದ್ವಿಜೋತ್ತಮಃ ॥ 6-209 ॥
ಮುಸಲೋಲೂಖಲಾದ್ಯಾನಿ ಗೃಹೋಪಕರಣಾನಿ ಚ ।
ದದ್ಯಾಚ್ಛಿವಗೃಹಸ್ಥೇಭ್ಯಸ್ತಸ್ಯ ಪೂಣ್ಯಫಲಂ ಶೃಣು ॥ 6-210 ॥
ಪ್ರತ್ಯೇಕಂ ಕಲ್ಪಮೇಕೈಕಂ ಗೃಹೋಪಕರಣೈರ್ನರಃ ।
ಅಂತೇ ದಿವಿ ವಸೇದ್ಭೋಗೈಸ್ತದಂತೇ ಚ ಗೃಹೀ ಭವೇತ್ ॥ 6-211 ॥
ಖರ್ಜೂರತಾಲಪತ್ತ್ರೈರ್ವಾ ಚರ್ಮಣಾ ವಾ ಸುಕಲ್ಪಿತಂ ।
ದತ್ತ್ವಾ ಕೋಟ್ಯಾಸನಂ ವೃತ್ತಂ ಶಿವಲೋಕಮವಾಪ್ನುಯಾತ್ ॥ 6-212 ॥
ಪ್ರಾತರ್ನೀಹಾರವೇಲಾಯಾಂ ಹೇಮಂತೇ ಶಿವಯೋಗಿನಾಂ ।
ಕೃತ್ವಾ ಪ್ರತಾಪನಾಯಾಗ್ನಿಂ ಶಿವಲೋಕೇ ಮಹೀಯತೇ ॥ 6-213 ॥
ಸೂರ್ಯಾಯುತಪ್ರಭಾದೀಪ್ತೈರ್ವಿಮಾನೈಃ ಸಾರ್ವಕಾಮಿಕೈಃ ।
ಕಲ್ಪಕೋಟಿಶತಂ ಭೋಗಾನ್ಭುಕ್ತ್ವಾ ಸ ತು ಮಹೀಪತಿಃ ॥ 6-214 ॥
ಯಃ ಪ್ರಾಂತರಂ ವಿದೇಶಂ ವಾ ಗಚ್ಛಂತಂ ಶಿವಯೋಗಿನಂ ।
ಭೋಜಯೀತ ಯಥಾಶಕ್ತ್ಯಾ ಶಿವಲೋಕೇ ಮಹೀಯತೇ ॥ 6-215 ॥
ಯಶ್ಛತ್ತ್ರಂ ಧಾರಯೇದ್ಗ್ರೀಷ್ಮೇ ಗಚ್ಛತೇ ಶಿವಯೋಗಿನೇ ।
ಸ ಮೃತಃ ಪೃಥಿವೀಂ ಕೃತ್ಸ್ನಾಮೇಕಚ್ಛತ್ತ್ರಾಮವಾಪ್ನುಯಾತ್ ॥ 6-216 ॥
ಯಃ ಸಮುದ್ಧರತೇ ಮಾರ್ಗೇ ಮಾತ್ರೋಪಕರಣಾಸನಂ ।
ಶಿವಯೋಗಪ್ರವೃತ್ತಸ್ಯ ತಸ್ಯ ಪುಣ್ಯಫಲಂ ಶೃಣು ॥ 6-217 ॥
ಕಲ್ಪಾಯುತಂ ನರಃ ಸಾಗ್ರಂ ಭುಕ್ತ್ವಾ ಭೋಗಾಂಛಿವೇ ಪುರೇ ।
ತದಂತೇ ಪ್ರಾಪ್ನುಯಾದ್ರಾಜ್ಯಂ ಸರ್ವೈಶ್ವರ್ಯಸಮನ್ವಿತಂ ॥ 6-218 ॥
ಅಭ್ಯಂಗೋದ್ವರ್ತನಂ ಸ್ನಾನಮಾರ್ತಸ್ಯ ಶಿವಯೋಗಿನಃ ।
ಕೃತ್ವಾಪ್ನೋತಿ ಮಹಾಭೋಗಾನ್ಕಲ್ಪಾಂಛಿವಪುರೇ ನರಃ ॥ 6-219 ॥
ಅಪನೀಯ ಸಮುಚ್ಛಿಷ್ಟಂ ಭಕ್ತಿತಃ ಶಿವಯೋಗಿನಾಂ ।
ದಶಧೇನುಪ್ರದಾನಸ್ಯ ಫಲಮಾಪ್ನೋತಿ ಮಾನವಃ ॥ 6-220 ॥
ಪಂಚಗವ್ಯಸಮಂ ಜ್ಞೇಯಮುಚ್ಛಿಷ್ಟಂ ಶಿವಯೋಗಿನಾಂ ।
ತದ್ಭುಕ್ತ್ವಾ ಲಭತೇ ಶುದ್ಧಿಂ ಮಹತಃ ಪಾತಕಾದಪಿ ॥ 6-221 ॥
ನಾರೀ ಚ ಭುಕ್ತ್ವಾ ಸತ್ಪುತ್ರಂ ಕುಲಾಧಾರಂ ಗುಣಾನ್ವಿತಂ ।
ರಾಜ್ಯಯೋಗ್ಯಂ ಧನಾಢ್ಯಂ ಚ ಪ್ರಾಪ್ನುಯಾದ್ಧರ್ಮತತ್ಪರಂ ॥ 6-222 ॥
ಯಶ್ಚ ಯಾಂ ಶಿವಯಜ್ಞಾಯ ಗೃಹಸ್ಥಃ ಪರಿಕಲ್ಪಯೇತ್ ।
ಶಿವಭಕ್ತೋ ಽಸ್ಯ ಮಹತಃ ಪರಮಂ ಫಲಮಾಪ್ನುಯಾತ್ ॥ 6-223 ॥
ಶಿವೋಮಾಂ ಚ ಪ್ರಯತ್ನೇನ ಭಕ್ತ್ಯಾಬ್ದಂ ಯೋ ಽನುಪಾಲಯೇತ್ ।
ಗವಾಂ ಲಕ್ಷಪ್ರದಾನಸ್ಯ ಸಂಪೂರ್ಣಂ ಫಲಮಾಪ್ನುಯಾತ್ ॥ 6-224 ॥
ಪ್ರಾತಃ ಪ್ರದದ್ಯಾತ್ಸಘೃತಂ ಸುಕೃತಂ ಬಾಲಪಿಂಡಕಂ ।
ದೂರ್ವಾಂ ಚ ಬಾಲವತ್ಸಾನಾಂ(?) ತಸ್ಯ ಪುಣ್ಯಫಲಂ ಶೃಣು ॥ 6-225 ॥
ಯಾವತ್ತದ್ಬಾಲವತ್ಸಾನಾಂ ಪಾನಾಹಾರಂ ಪ್ರಕಲ್ಪಯೇತ್ ।
ತಾವದಷ್ಟಾಯುತಾನ್ಪೂರ್ವೈರ್ಭೋಗಾನ್ಭುಂಕ್ತೇ ಶಿವೇ ಪುರೇ ॥ 6-226 ॥
ವಿಧವಾನಾಥವೃದ್ಧಾನಾಂ ಪ್ರದದ್ಯಾದ್ಯಃ ಪ್ರಜೀವನಂ ।
ಆಭೂತಸ್ಸಂಪ್ಲವಂ ಯಾವಚ್ಛಿವಲೋಕೇ ಮಹೀಯತೇ ॥ 6-227 ॥
ದದ್ಯಾದ್ಯಃ ಸರ್ವಜಂತೂನಾಮಾಹಾರಮನುಯತ್ನತಃ ।
ತ್ರಿಃ ಪೃಥ್ವೀಂ ರತ್ನಸಂಪೂರ್ಣಾಂ ಯದ್ದತ್ತ್ವಾ ತತ್ಫಲಂ ಲಭೇತ್ ॥ 6-228 ॥
ವಿನಯವ್ರತದಾನಾನಿ ಯಾನಿ ಸಿದ್ಧಾನಿ ಲೋಕತಃ ।
ತಾನಿ ತೇನೈವ ವಿಧಿನಾ ಶಿವಮಂತ್ರೇಣ ಕಲ್ಪಯೇತ್ ॥ 6-229 ॥
ನಿವೇದಯೀತ ರುದ್ರಾಯ ರುದ್ರಾಣ್ಯಾಃ ಷಣ್ಮುಖಸ್ಯ ಚ ।
ಪ್ರಾಪ್ನುಯಾದ್ವಿಪುಲಾನ್ಭೋಗಾಂದಿವ್ಯಾಂಛಿವಪುರೇ ನರಃ ॥ 6-230 ॥
ಪುನರ್ಯಃ ಕರ್ತರೀಂ ದದ್ಯಾತ್ಕೇಶಕ್ಲೇಶಾಪನುತ್ತಯೇ ।
ಸರ್ವಕ್ಲೇಶವಿನಿರ್ಮುಕ್ತಃ ಶಿವಲೋಕೇ ಸುಖೀ ಭವೇತ್ ॥ 6-231 ॥
ನಾಸಿಕಾಶೋಧನಂ ದದ್ಯಾತ್ಸಂದಂಶಂ ಶಿವಯೋಗಿನೇ ।
ವರ್ಷಕೋಟಿಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 6-232 ॥
ನಖಚ್ಛೇದನಕಂ ದತ್ತ್ವಾ ಶಿವಲೋಕೇ ಮಹೀಯತೇ ।
ವರ್ಷಲಕ್ಷಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 6-233 ॥
ದತ್ತ್ವಾಂಜನಶಲಾಕಾಂ ವಾ ಲೋಹಾದ್ಯಾಂ ಶಿವಯೋಗಿನೇ ।
ಭೋಗಾಂಛಿವಪುರೇ ಪ್ರಾಪ್ಯ ಜ್ಞಾನಚಕ್ಷುರವಾಪ್ನುಯಾತ್ ॥ 6-234 ॥
ಕರ್ಣಶೋಧನಕಂ ದತ್ತ್ವಾ ಲೋಹಾದ್ಯಂ ಶಿವಯೋಗಿನೇ ।
ವರ್ಷಕೋಟಿಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 6-235 ॥
ದದ್ಯಾದ್ಯಃ ಶಿವಭಕ್ತಾಯ ಸೂಚೀಂ ಕೌಪೀನಶೋಧನೀಂ ।
ವರ್ಷಲಕ್ಷಂ ಸ ಲಕ್ಷಾರ್ಧಂ ಶಿವಲೋಕೇ ಮಹೀಯತೇ ॥ 6-236 ॥
ನಿವೇದ್ಯ ಶಿವಯೋಗಿಭ್ಯಃ ಸೂಚಿಕಂ ಸೂತ್ರಸಂಯುತಂ ।
ವರ್ಷಲಕ್ಷಂ ಮಹಾಭೋಗೈಃ ಕ್ರೀಡತೇ ಸ ಶಿವೇ ಪುರೇ ॥ 6-237 ॥
ದದ್ಯಾದ್ಯಃ ಶಿವಯೋಗಿಭ್ಯಃ ಸುಕೃತಾಂ ಪತ್ರವೇಧನೀಂ ।
ವರ್ಷಲಕ್ಷಂ ಮಹಾಭೋಗೈಃ ಶಿವಲೋಕೇ ಮಹೀಯತೇ ॥ 6-238 ॥
ದದ್ಯಾದ್ಯಃ ಪುಸ್ತಕಾದೀನಾಂ ಸರ್ವಕಾರ್ಯಾರ್ಥಕರ್ತೃಕಾಂ ।
ಪಂಚಲಕ್ಷಂ ಮಹಾಭೋಗೈರ್ಮೋದತೇ ಸ ಶಿವೇ ಪುರೇ ॥ 6-239 ॥
ಶಮೀಂಧನತೃಣಾದೀನಾಂ ದದ್ಯಾತ್ತಚ್ಛೇದನಂ ಚ ಯಃ ।
ಕ್ರೀಡತೇ ಸ ಶಿವೇ ಲೋಕೇ ವರ್ಷಲಕ್ಷಚತುಷ್ಟಯಂ ॥ 6-240 ॥
ಶಿವಾಶ್ರಮೋಪಭೋಗಾಯ ಲೋಹೋಪಕರಣಂ ಮಹತ್ ।
ಯಃ ಪ್ರದದ್ಯಾಗ್ಕುಠಾರಾದ್ಯಂ ತಸ್ಯ ಪುಣ್ಯಫಲಂ ಶೃಣು ॥ 6-241 ॥
ಯಾವತ್ತತ್ಫಲಸಂಖ್ಯಾನಂ ಲೋಹೋಪಕರಣೇ ಭವೇತ್ ।
ತಾವಂತಿ ವರ್ಷಲಕ್ಷಾಣಿ ಶಿವಲೋಕೇ ಮಹೀಯತೇ ॥ 6-242 ॥
ಶಿವಾಯತನವಿತ್ತಾನಾಂ ರಕ್ಷಾರ್ಥಂ ಯಃ ಪ್ರಯಚ್ಛತಿ ।
ಧನುಃಖಡ್ಗಾಯುಧಾದೀನಿ ತಸ್ಯ ಪುಣ್ಯಫಲಂ ಶೃಣು ॥ 6-243 ॥
ಏಕೈಕಸ್ಮಿನ್ಪರಿಜ್ಞೇಯಮಾಯುಧೇ ಚಾಪಿ ವೈ ಫಲಂ ।
ವರ್ಷಕೋಟ್ಯಷ್ಟಕಂ ಭೋಗೈಃ ಶಿವಲೋಕೇ ಮಹೀಯತೇ ॥ 6-244 ॥
ಯಃ ಸ್ವಾತ್ಮಭೋಗಭೃತ್ಯರ್ಥಂ ಕುಸುಮಾನಿ ನಿವೇದಯೇತ್ ।
ಶಿವಾಯ ಗುರವೇ ವಾಪಿ ತಸ್ಯ ಪುಣ್ಯಫಲಂ ಶೃಣು ॥ 6-245 ॥
ಯಾವದನ್ಯೋಽನ್ಯಸಂಬಂಧಾಸ್ತಸ್ಯಾಂಶಾಃ ಪರಿಕೀರ್ತಿತಾಃ ।
ವರ್ಷಲಕ್ಷಂ ಸ ತಾವಚ್ಚ ಶಿವಲೋಕೇ ಪ್ರಮೋದತೇ ॥ 6-246 ॥
ನಷ್ಟಾಪಹೃತಮನ್ವಿಷ್ಯ ಪುನರ್ವಿತ್ತಂ ನಿವೇದಯೇತ್ ।
ಶಿವಾತ್ಮಕಂ ಶಿವಾಯೈವ ತಸ್ಯ ಪುಣ್ಯಫಲಂ ಶೃಣು ॥ 6-247 ॥
ಯಾವಚ್ಛಿವಾಯ ತದ್ವಿತ್ತಂ ಪ್ರಾಙ್ನಿವೇದ್ಯ ಫಲಂ ಸ್ಮೃತಂ ।
ನಷ್ಟಮಾನೀಯ ತದ್ಭೂಯಃ ಪುಣ್ಯಂ ಶತಗುಣಂ ಲಭೇತ್ ॥ 6-248 ॥
ದೇವದ್ರವ್ಯಂ ಹೃತಂ ನಷ್ಟಮನ್ವೇಷ್ಯಮಪಿ ಯತ್ನತಃ ।
ನ ಪ್ರಾಪ್ನೋತಿ ತದಾ ತಸ್ಯ ಪ್ರಾಪ್ನುಯಾದ್ದ್ವಿಗುಣಂ ಫಲಂ ॥ 6-249 ॥
ತಾಮ್ರಕುಂಭಕಟಾಹಾದ್ಯಂ ಯಃ ಶಿವಾಯ ನಿವೇದಯೇತ್ ।
ಶಿವಾತ್ಮಕಂ ಶಿವಾಯೈವ ತಸ್ಯ ಪುಣ್ಯಫಲಂ ಶೃಣು ॥ 6-250 ॥
ಯಾವಚ್ಛಿವಾಯ ತದ್ವಿತ್ತಂ ಪ್ರಾಙ್ನಿವೇದ್ಯ ಫಲಂ ಸ್ಮೃತಂ ।
ನಷ್ಟಮಾನೀಯ ತದ್ಭೂಯಃ ಪುಣ್ಯಂ ಶತಗುಣಂ ಲಭೇತ್ ॥ 6-251 ॥
ಸ್ನಾನಸತ್ತ್ರೋಪಭೋಗಾಯ ತಸ್ಯ ಪುಣ್ಯಫಲಂ ಶೃಣು ।
ಯಾವತ್ತತ್ಫಲಸಂಖ್ಯಾನಂ ತಾಮ್ರೋಪಕರಣೇ ಸ್ಥಿತಂ ॥ 6-252 ॥
ಪಲೇ ಪಲೇ ವರ್ಷಕೋಟಿಂ ಮೋದತೇ ಸ ಶಿವೇ ಪುರೇ ।
ಯಃ ಪತ್ತ್ರಪುಷ್ಪವಸ್ತೂನಾಂ ದದ್ಯಾದಾಧಾರಭಾಜನಂ ॥ 6-253 ॥
ತದ್ವಸ್ತುದಾತುರ್ಯತ್ಪುಣ್ಯಂ ತತ್ಪುಣ್ಯಂ ಸಕಲಂ ಭವೇತ್ ।
ದತ್ತ್ವೋಪಕರಣಂ ಕಿಂಚಿದಪಿ ಯೋ ವಿತ್ತಮರ್ಥಿನಾಂ ॥ 6-254 ॥
ಯದ್ವಸ್ತು ಕುರುತೇ ತೇನ ತತ್ಪ್ರದಾನಫಲಂ ಲಭೇತ್ ।
ಯಃ ಶೌಚಪೀತವಸ್ತ್ರಾಣಿ ಕ್ಷಾರಾದ್ಯೈಃ ಶಿವಯೋಗಿನಾಂ ॥ 6-255 ॥
ಸ ಪಾಪಮಲನಿರ್ಮುಕ್ತಃ ಶಿವಲೋಕಮವಾಪ್ನುಯಾತ್ ।
ಯಃ ಪುಷ್ಪಪಟ್ಟಸಂಯುಕ್ತಂ ಪಟಗರ್ಭಂ ಚ ಕಂಬಲಂ ॥ 6-256 ॥
ಪ್ರದದ್ಯಾಚ್ಛಿವಯೋಗಿಭ್ಯಸ್ತಸ್ಯ ಪುಣ್ಯಫಲಂ ಶೃಣು ।
ತೇಷಾಂ ಚ ವಸ್ತ್ರತಂತೂನಾಂ ಯಾವತ್ಸಂಖ್ಯಾ ವಿಧೀಯತೇ ॥ 6-257 ॥
ತಾವದ್ವರ್ಷಸಹಸ್ರಾಣಿ ಭೋಗಾನ್ಭುಂಕ್ತೇ ಶಿವೇ ಪುರೇ ।
ಶ್ಲಕ್ಷ್ಣವಸ್ತ್ರಾಣಿ ಶುಕ್ಲಾನಿ ದದ್ಯಾದ್ಯಃ ಶಿವಯೋಗಿನೇ ॥ 6-258 ॥
ಚಿತ್ರವಸ್ತ್ರಾಣಿ ತದ್ಭಕ್ತ್ಯಾ ತಸ್ಯ ಪುಣ್ಯಫಲಂ ಶೃಣು ।
ಯಾವತ್ತತ್ಸೂಕ್ಷ್ಮವಸ್ತ್ರಾಣಾಂ ತಂತುಸಂಖ್ಯಾ ವಿಧೀಯತೇ ॥ 6-259 ॥
ತಾವದ್ಯುಗಾನಿ ಸಂಭೋಗೈಃ ಶಿವಲೋಕೇ ಮಹೀಯತೇ ।
ಶಂಖಪಾತ್ರಂ ತು ವಿಸ್ತೀರ್ಣಂ ಭಾಂಡಂ ವಾಪಿ ಸುಶೋಭನಂ ॥ 6-260 ॥
ಪ್ರದದ್ಯಾಚ್ಛಿವಯೋಗಿಭ್ಯಸ್ತಸ್ಯ ಪುಣ್ಯಫಲಂ ಶೃಣು ।
ದಿವ್ಯಂ ವಿಮಾನಮಾರೂಢಃ ಸರ್ವಕಾಮಸಮನ್ವಿತಂ ॥ 6-261 ॥
ಕಲ್ಪಕೋಟ್ಯಯುತಂ ಸಾಗ್ರಂ ಶಿವಲೋಕೇ ಮಹೀಯತೇ ।
ಶುಕ್ತ್ಯಾದೀನಿ ಚ ಪಾತ್ರಾಣಿ ಶೋಭನಾನ್ಯಮಲಾನಿ ಚ ॥ 6-262 ॥
ನಿವೇದ್ಯ ಶಿವಯೋಗಿಭ್ಯಃ ಶಂಖಾರ್ಧೇನ ಫಲಂ ಲಭೇತ್ ।
ಸ್ಫಾಟಿಕಾನಾಂ ಚ ಪಾತ್ರಾಣಾಂ ಶಂಖತುಲ್ಯಫಲಂ ಸ್ಮೃತಂ ॥ 6-263 ॥
ಶೈಲಜಾನಾಂ ತದರ್ಧೇನ ಪಾತ್ರಾಣಾಂ ಚ ತದರ್ಧಕಂ ।
ತಾಲಖರ್ಜೂರಪಾತ್ರಾಣಾಂ ವಂಶಜಾನಾಂ ನಿವೇದನೇ ॥ 6-264 ॥
ಅನ್ಯೇಷಾಮೇವಮಾದೀನಾಂ ಪುಣ್ಯಂ ವಾರ್ಕ್ಷ್ಯಾರ್ಧಸಂಮಿತಂ ।
ವಂಶಜಾರ್ಧಸಮಂ ಪುಣ್ಯಂ ಫಲಪಾತ್ರನಿವೇದನೇ ॥ 6-265 ॥
ನಾನಾಪರ್ಣಪುಟಾಣಾಂ ಚ ಸಾರಾಣಾಂ ವಾ ಫಲಾರ್ಧಕಂ ।
ಯಸ್ತಾಮ್ರಕಾಂಸ್ಯಪಾತ್ರಾಣಿ ಶೋವ್ಹನಾನ್ಯಮಲಾನಿ ಚ ॥ 6-266 ॥
ಸ್ನಾನಭೋಜನಪಾನಾರ್ಥಂ ದದ್ಯಾದ್ಯಃ ಶಿವಯೋಗಿನೇ ।
ತಾಮ್ರಾಂ ಕಾಂಸೀಂ ತ್ರಿಲೋಹೀಂ ವಾ ಯಃ ಪ್ರದದ್ಯಾತ್ತ್ರಿಪಾದಿಕಾಂ ॥ 6-267 ॥
ಭೋಜನೇ ಭೋಜನಾಧಾರಂ ಗುರವೇ ತತ್ಫಲಂ ಶೃಣು ।
ಯಾವತ್ತತ್ಪಲಸಂಖ್ಯಾನಂ ತ್ರಿಪಾದ್ಯಾ ಭೋಜನೇಷು ಚ ॥ 6-268 ॥
ತಾವದ್ಯುಗಸಹಸ್ರಾಣಿ ಭೋಗಾನ್ಭುಂಕ್ತೇ ಶಿವೇ ಪುರೇ ।
ಲೋಹಂ ತ್ರಿಪಾದಿಕಂ ದತ್ತ್ವಾ ಸತ್ಕೃತ್ವಾ ಶಿವಯೋಗಿನೇ ॥ 6-269 ॥
ದಶಕಲ್ಪಾನ್ಮಹಾಭೋಗೈರ್ನರಃ ಶಿವಪುರೇ ವಸೇತ್ ।
ಯಃ ಪ್ರದದ್ಯಾತ್ತ್ರಿವಿಷ್ಟಂಭಂ ಭಿಕ್ಷಾಪಾತ್ರಸಮಾಶ್ರಯಂ ॥ 6-270 ॥
ವಂಶಜಂ ದಾರುಜಂ ವಾಪಿ ತಸ್ಯ ಪುಣ್ಯಫಲಂ ಶೃಣು ।
ದಿವ್ಯಸ್ತ್ರೀಭೋಗಸಂಪನ್ನೋ ವಿಮಾನೇ ಮಹತಿ ಸ್ಥಿತಃ ॥ 6-271 ॥
ಚತುರ್ಯುಗಸಹಸ್ರಂ ತು ಭೋಗಾನ್ಭುಂಕ್ತೇ ಶಿವೇ ಪುರೇ ।
ಭಿಕ್ಷಾಪಾತ್ರಮುಖಾಚ್ಛಾದಮ್ವಸ್ತ್ರಪರ್ಣಾದಿಕಲ್ಪಿತಂ ॥ 6-272 ॥
ದತ್ತ್ವಾ ಶಿವಪುರೇ ಭೋಗಾನ್ಕಲ್ಪಮೇಕಂ ವಸೇನ್ನರಃ ।
ಸಂಶ್ರಯಂ ಯಃ ಪ್ರದದ್ಯಾಚ್ಚ ಭಿಕ್ಷಾಪಾತ್ರೇ ಕಮಂಡಲೌ ॥ 6-273 ॥
ಕಲ್ಪಿತಂ ವಸ್ತ್ರಸೂತ್ರಾದ್ಯೈಸ್ತಸ್ಯ ಪುಣ್ಯಫಲಂ ಶೃಣು ।
ತದ್ವಸ್ತ್ರಪೂತತಂತೂನಾಂ ಸಂಖ್ಯಾ ಯಾವದ್ವಿಧೀಯತೇ ॥ 6-274 ॥
ತಾವದ್ವರ್ಷಸಹಸ್ರಾಣಿ ರುದ್ರಲೋಕೇ ಮಹೀಯತೇ ।
ಸೂತ್ರವಲ್ಕಲವಾಲೈರ್ವಾ ಶಿಕ್ಯಭಾಂಡಸಮಾಶ್ರಯಂ ॥ 6-275 ॥
ಯಃ ಕೃತ್ವಾ ದಾಮನೀಯೋಕ್ತ್ರಂ ಪ್ರಗ್ರಹಂ ರಜ್ಜುಮೇವ ವಾ ।
ಏವಮಾದೀನಿ ಚಾನ್ಯಾನಿ ವಸ್ತೂನಿ ವಿನಿವೇದಯೇತ್ ॥ 6-276 ॥
ಶಿವಗೋಷ್ಠೋಪಯೋಗಾರ್ಥಂ ತಸ್ಯ ಪುಣ್ಯಫಲಂ ಶೃಣು ।
ಯಾವತ್ತದ್ರಜ್ಜುಸಂಖ್ಯಾನಂ ಪ್ರದದ್ಯಾಚ್ಛಿವಗೋಕುಲೇ ॥ 6-277 ॥
ತಾವಚ್ಚತುರ್ಯುಗಂ ದೇಹೀ ಶಿವಲೋಕೇ ಮಹೀಯತೇ ।
ಯಥಾ ಯಥಾ ಪ್ರಿಯಂ ವಸ್ತ್ರಂ ಶೋಭನಂ ಚ ಯಥಾ ಯಥಾ ॥ 6-278 ॥
ತಥಾ ತಥಾ ಮಹಾಪುಣ್ಯಂ ತದ್ದಾನಾದುತ್ತರೋತ್ತರಂ ।
ಯಃ ಪಂಥಾನಂ ದಿಶೇತ್ಪೃಷ್ಟಂ ಪ್ರಣಷ್ಟಂ ಚ ಗವಾದಿಕಂ ॥ 6-279 ॥
ಸ ಗೋದಾನಸಮಂ ಪುಣ್ಯಂ ಪ್ರಜ್ಞಾಸೌಖ್ಯಂ ಚ ವಿಂದತಿ ।
ಕೃತ್ವೋಪಕಾರಮಾರ್ತಾನಾಂ ಸ್ವರ್ಗಂ ಯಾತಿ ನ ಸಂಶಯಃ ॥ 6-280 ॥
ಅಪಿ ಕಂಟಕಮುದ್ಧೃತ್ಯ ಕಿಮುತಾನ್ಯಂ ಮಹಾಗುಣಂ(?) ।
ಅನ್ನಪಾನೌಷಧೀನಾಂ ಚ ಯಃ ಪ್ರದಾತಾರಮುದ್ದಿಶೇತ್ ॥ 6-281 ॥
ಆರ್ತಾನಾಂ ತಸ್ಯ ವಿಜ್ಞೇಯಂ ದಾತುಸ್ತತ್ಸದೃಶಂ ಫಲಂ ।
ಶಿವಾಯ ತಸ್ಯ ಸಂರುದ್ಧಂ ಕರ್ಮ ತಿಷ್ಠತಿ ಯದ್ವಿನಾ ॥ 6-282 ॥
ತದಲ್ಪಮಪಿ ಯಜ್ಞಾಂಗಂ ದತ್ತ್ವಾ ಯಜ್ಞಫಲಂ ಲಭೇತ್ ।
ಅಪಿ ಕಾಶಕುಶಂ ಸೂತ್ರಂ ಗೋಮಯಂ ಸಮಿದಿಂಧನಂ ॥ 6-283 ॥
ಶಿವಯಜ್ಞೋಪಯೋಗಾರ್ಥಂ ಪ್ರವಕ್ಷ್ಯಾಮಿ ಸಮಾಸತಃ ।
ಸರ್ವೇಷಾಂ ಶಿವಭಕ್ತಾನಾಂ ದದ್ಯಾದ್ಯತ್ಕಿಂಚಿದಾದರಾತ್ ।
ದತ್ತ್ವಾ ಯಜ್ಞಫಲಂ ವಿದ್ಯಾತ್ಕಿಮು ತದ್ವಸ್ತುದಾನತಃ ॥ 6-284 ॥
॥ ಇತಿ ಶಿವೋಪನಿಷದಿ ಫಲೋಪಕರಣಪ್ರದಾನಾಧ್ಯಾಯಃ ಷಷ್ಠಃ ॥
ಅಥ ಸ್ವರ್ಗಾಪವರ್ಗಾರ್ಥೇ ಪ್ರವಕ್ಷ್ಯಾಮಿ ಸಮಾಸತಃ ।
ಸರ್ವೇಷಾಂ ಶಿವಭಕ್ತಾನಾಂ ಶಿವಾಚಾರಮನುತ್ತಮಂ ॥ 7-1 ॥
ಶಿವಃ ಶಿವಾಯ ಭೂತಾನಾಂ ಯಸ್ಮಾದ್ದಾನಂ ಪ್ರಯಚ್ಛತಿ ।
ಗುರುಮೂರ್ತಿಃ ಸ್ಥಿತಸ್ತಸ್ಮಾತ್ಪೂಜಯೇತ್ಸತತಂ ಗುರುಂ ॥ 7-2 ॥
ನಾಲಕ್ಷಣೇ ಯಥಾ ಲಿಂಗೇ ಸಾಂನಿಧ್ಯಂ ಕಲ್ಪಯೇಚ್ಛಿವಃ ।
ಅಲ್ಪಾಗಮೇ ಗುರೌ ತದ್ವತ್ಸಾಂನಿಧ್ಯಂ ನ ಪ್ರಕಲ್ಪಯೇತ್ ॥ 7-3 ॥
ಶಿವಜ್ಞಾನಾರ್ಥತತ್ತ್ವಜ್ಞಃ ಪ್ರಸನ್ನಮನಸಂ ಗುರುಂ ।
ಶಿವಃ ಶಿವಂ ಸಮಾಸ್ಥಾಯ ಜ್ಞಾನಂ ವಕ್ತಿ ನ ಹೀತರಃ ॥ 7-4 ॥
ಗುರುಂ ಚ ಶಿವವದ್ಭಕ್ತ್ಯಾ ನಮಸ್ಕಾರೇಣ ಪೂಜಯೇತ್ ।
ಕೃತಾಂಜಲಿಸ್ತ್ರಿಸಂಧ್ಯಂ ಚ ಭೂಮಿವಿನ್ಯಸ್ತಮಸ್ತಕಃ ॥ 7-5 ॥
ನ ವಿವಿಕ್ತಮನಾಚಾಂತಂ(?) ಚಂಕ್ರಮಂತಂ ತಥಾಕುಲಂ ।
ಸಮಾಧಿಸ್ಥಂ ವ್ರಜಂತಂ ಚ ನಮಸ್ಕುರ್ಯಾದ್ಗುರುಂ ಬುಧಃ ॥ 7-6 ॥
ವ್ಯಾಖ್ಯಾನೇ ತತ್ಸಮಾಪ್ತೌ ಚ ಸಂಪ್ರಶ್ನೇ ಸ್ನಾನಭೋಜನೇ ।
ಭುಕ್ತ್ವಾ ಚ ಶಯನೇ ಸ್ವಪ್ನೇ ನಮಸ್ಕುರ್ಯಾತ್ಸದಾ ಗುರುಂ ॥ 7-7 ॥
ಗ್ರಾಮಾಂತರಮಭಿಪ್ರೇಪ್ಸುರ್ಗುರೋಃ ಕುರ್ಯಾತ್ಪ್ರದಕ್ಷಿಣಂ ।
ಸಾರ್ವಾಂಗಿಕಪ್ರಣಾಮಂ ಚ ಪುನಃ ಕುರ್ಯಾತ್ತದಾಗತಃ ॥ 7-8 ॥
ಪರ್ವೋತ್ಸವೇಷು ಸರ್ವೇಷು ದದ್ಯಾದ್ಗಂಧಪವಿತ್ರಕಂ ।
ಶಿವಜ್ಞಾನಸ್ಯ ಚಾರಂಭೇ ಪ್ರವಾಸಗಮನಾಗತೌ ॥ 7-9 ॥
ಶಿವಧರ್ಮವ್ರತಾರಂಭೇ ತತ್ಸಮಾಪ್ತೌ ಚ ಕಲ್ಪಯೇತ್ ।
ಪ್ರಸಾದನಾಯ ಕುಪಿತೋ ವಿಜಿತ್ಯ ಚ ರಿಪುಂ ತಥಾ ॥ 7-10 ॥
ಪುಣ್ಯಾಹೇ ಗ್ರಹಶಾಂತೌ ಚ ದೀಕ್ಷಾಯಾಂ ಚ ಸದಕ್ಷಿಣಂ ।
ಆವಾರ್ಯ ಪದಸಂಪ್ರಾಪ್ತೌ ಪವಿತ್ರೇ ಚೋಪವಿಗ್ರಹೇ ॥ 7-11 ॥
ಉಪಾನಚ್ಛತ್ತ್ರಶಯನಂ ವಸ್ತ್ರಮಾಸನಭೂಷಣಂ ।
ಪಾತ್ರದಂಡಾಕ್ಷಸೂತ್ರಂ ವಾ ಗುರುಸಕ್ತಂ ನ ಧಾರಯೇತ್ ॥ 7-12 ॥
ಹಾಸ್ಯನಿಷ್ಠೀವನಾಸ್ಫೋಟಮುಚ್ಚಭಾಷ್ಯವಿಜೃಂಭಣಂ ।
ಪಾದಪ್ರಸಾರಣಂ ಗತಿಂ ನ ಕುರ್ಯಾದ್ಗುರುಸಂನಿಧೌ ॥ 7-13 ॥
ಹೀನಾನ್ನಪಾನವಸ್ತ್ರಃ ಸ್ಯಾನ್ನೀಚಶಯ್ಯಾಸನೋ ಗುರೋಃ ।
ನ ಯಥೇಷ್ಟಶ್ಚ ಸಂತಿಷ್ಠೇತ್ಕಲಹಂ ಚ ವಿವರ್ಜಯೇತ್ ॥ 7-14 ॥
ಪ್ರತಿವಾತೇ ಽನುವಾತೇ ವಾ ನ ತಿಷ್ಠೇದ್ಗುರುಣಾ ಸಹ ।
ಅಸಂಶ್ರಯೇ ಚ ಸತತಂ ನ ಕಿಂಚಿತ್ಕೀರ್ತಯೇದ್ಗುರೋಃ ॥ 7-15 ॥
ಅನ್ಯಾಸಕ್ತೋ ನ ಭುಂಜಾನೋ ನ ತಿಷ್ಠನ್ನಪರಾಙ್ಮುಖಃ ।
ನ ಶಯನೋ ನ ಚಾಸೀನಃ ಸಂಭಾಸ್ಯೇದ್ಗುರುಣಾ ಸಹ ॥ 7-16 ॥
ದೃಷ್ಟ್ವೈವ ಗುರುಮಾಯಾಂತಮುತ್ತಿಷ್ಠೇದ್ದೂರತಸ್ತ್ವರಂ ।
ಅನುಜ್ಞಾತಶ್ಚ ಗುರುಣಾ ಸಂವಿಶೇಚ್ಚಾನುಪೃಷ್ಠತಃ ॥ 7-17 ॥
ನ ಕಂಠಂ ಪ್ರಾವೃತಂ ಕುರ್ಯಾನ್ನ ಚ ತತ್ರಾವಸಕ್ತಿಕಾಂ ।
ನ ಪಾದಧಾವನಸ್ನಾನಂ ಯತ್ರ ಪಶ್ಯೇದ್ಗುರುಃ ಸ್ಥಿತಃ ॥ 7-18 ॥
ನ ದಂತಧಾವನಾಭ್ಯಂಗಮಾಯಾಮೋದ್ವರ್ತನಕ್ರಿಯಾಃ ।
ಉತ್ಸರ್ಗಪರಿಧಾನಂ ಚ ಗುರೋಃ ಕುರ್ವೀತ ಪಶ್ಯತಃ ॥ 7-19 ॥
ಗುರುರ್ಯದರ್ಪಯೇತ್ಕಿಂಚಿದ್ಗೃಹಾಸನ್ನಂ ತದಂಜಲೌ ।
ಪಾತ್ರೇ ವಾ ಪುರತಃ ಶಿಷ್ಯಸ್ತದ್ವಕ್ತ್ರಮಭಿವೀಕ್ಷಯನ್ ॥ 7-20 ॥
ಯದರ್ಪಯೇದ್ಗುರುಃ ಕಿಂಚಿ ತನ್ನಮ್ರಃ ಪುರತಃ ಸ್ಥಿತಃ ।
ಪಾಣಿದ್ವಯೇನ ಗೃಹ್ಣೀಯತ್ಸ್ಥಾಪಯೇತ್ತಚ್ಚ ಸುಸ್ಥಿತಂ ॥ 7-21 ॥
ನ ಗುರೋಃ ಕೀರ್ತಯೇನ್ನಾಮ ಪರೋಽಕ್ಷಮಪಿ ಕೇವಲಂ ।
ಸಮಾನಸಂಜ್ಞಮನ್ಯಂ ವಾ ನಾಹ್ವಯೀತ ತದಾಖ್ಯಯಾ ॥ 7-22 ॥
ಸ್ವಗುರುಸ್ತದ್ಗುರುಶ್ಚೈವ ಯದಿ ಸ್ಯಾತಾಂ ಸಮಂ ಕ್ವಚಿತ್ ।
ಗುರೋರ್ಗುರುಸ್ತಯೋಃ ಪೂಜ್ಯಃ ಸ್ವಗುರುಶ್ಚ ತದಾಜ್ಞಯಾ ॥ 7-23 ॥
ಅನಿವೇದ್ಯ ನ ಭುಂಜೀತ ಭುಕ್ತ್ವಾ ಚಾಸ್ಯ ನಿವೇದಯೇತ್ ।
ನಾವಿಜ್ಞಾಪ್ಯ ಗುರುಂ ಗಚ್ಛೇದ್ಬಹಿಃ ಕಾರ್ಯೇಣ ಕೇನಚಿತ್ ॥ 7-24 ॥
ಗುರ್ವಾಜ್ಞಯಾ ಕರ್ಮ ಕೃತ್ವಾ ತತ್ಸಮಾಪ್ತೌ ನಿವೇದಯೇತ್ ।
ಕೃತ್ವಾ ಚ ನೈತ್ಯಕಂ ಸರ್ವಮಧೀಯೀತಾಜ್ಞಯಾ ಗುರೋಃ ॥ 7-25 ॥
ಮೃದ್ಭಸ್ಮಗೋಮಯಜಲಂ ಪತ್ತ್ರಪುಷ್ಪೇಂಧನಂ ಸಮಿತ್ ।
ಪರ್ಯಾಪ್ತಮಷ್ಟಕಂ ಹ್ಯೇತದ್ಗುರ್ವರ್ಥಂ ತು ಸಮಾಹರೇತ್ ॥ 7-26 ॥
ಭೈಷಜ್ಯಾಹಾರಪಾತ್ರಾಣಿ ವಸ್ತ್ರಶಯ್ಯಾಸನಂ ಗುರೋಃ ।
ಆನಯೇತ್ಸರ್ವಯತ್ನೇನ ಪ್ರಾರ್ಥಯಿತ್ವಾ ಧನೇಶ್ವರಾನ್ ॥ 7-27 ॥
ಗುರೋರ್ನ ಖಂಡಯೇದಾಜ್ಞಾಮಪಿ ಪ್ರಾಣಾನ್ಪರಿತ್ಯಜೇತ್ ।
ಕೃತ್ವಾಜ್ಞಾಂ ಪ್ರಾಪ್ನುಯಾನ್ಮುಕ್ತಿಂ ಲಂಘಯನ್ನರಕಂ ವ್ರಜೇತ್ ॥ 7-28 ॥
ಪರ್ಯಟೇತ್ಪೃಥಿವೀಂ ಕೃತ್ಸ್ನಾಂ ಸಶೈಲವನಕಾನನಾಂ ।
ಗುರುಭೈಷಜ್ಯಸಿದ್ಧ್ಯರ್ಥಮಪಿ ಗಚ್ಛೇದ್ರಸಾತಲಂ ॥ 7-29 ॥
ಯದಾದಿಶೇದ್ಗುರುಃ ಕಿಂಚಿತ್ತತ್ಕುರ್ಯಾದವಿಚಾರತಃ ।
ಅಮೀಮಾಂಸ್ಯಾ ಹಿ ಗುರವಃ ಸರ್ವಕಾರ್ಯೇಷು ಸರ್ವಥಾ ॥ 7-30 ॥
ನೋತ್ಥಾಪಯೇತ್ಸುಖಾಸೀನಂ ಶಯಾನಂ ನ ಪ್ರಬೋಧಯೇತ್ ।
ಆಸೀನೋ ಗುರುಮಾಸೀನಮಭಿಗಚ್ಛೇತ್ಪ್ರತಿಷ್ಠಿತಂ ॥ 7-31 ॥
ಪಥಿ ಪ್ರಯಾಂತಂ ಯಾಂತಂ ಚ ಯತ್ನಾದ್ವಿಶ್ರಮಯೇದ್ಗುರುಂ ।
ಕ್ಷಿತ್ಪಿಪಾಸಾತುರಂ ಸ್ನಾತಂ ಜ್ಞಾತ್ವಾ ಶಕ್ತಂ ಚ ಭೋಜಯೇತ್ ॥ 7-32 ॥
ಅಭ್ಯಂಗೋದ್ವರ್ತನಂ ಸ್ನಾನಂ ಭೋಜನಷ್ಠೀವಮಾರ್ಜನಂ ।
ಗಾತ್ರಸಂವಾಹನಂ ರಾತ್ರೌ ಪಾದಾಭ್ಯಂಗಂ ಚ ಯತ್ನತಃ ॥ 7-33 ॥
ಪ್ರಾತಃ ಪ್ರಸಾಧನಂ ದತ್ತ್ವಾ ಕಾರ್ಯಂ ಸಂಮಾರ್ಜನಾಂಜನಂ ।
ನಾನಾಪುಷ್ಪಪ್ರಕರಣಂ ಶ್ರೀಮದ್ವ್ಯಾಖ್ಯಾನಮಂಡಪೇ ॥ 7-34 ॥
ಸ್ಥಾಪ್ಯಾಸನಂ ಗುರೋಃ ಪೂಜ್ಯಂ ಶಿವಜ್ಞಾನಸ್ಯ ಪುಸ್ತಕಂ ।
ತತ್ರ ತಿಷ್ಠೇತ್ಪ್ರತೀಕ್ಷಂಸ್ತದ್ಗುರೋರಾಗಮನಂ ಕ್ರಮಾತ್ ॥ 7-35 ॥
ಗುರೋರ್ನಿಂದಾಪವಾದಂ ಚ ಶ್ರುತ್ವಾ ಕರ್ಣೌ ಪಿಧಾಪಯೇತ್ ।
ಅನ್ಯತ್ರ ಚೈವ ಸರ್ಪೇತ್ತು ನಿಗೃಹ್ಣೀಯಾದುಪಾಯತಃ ॥ 7-36 ॥
ನ ಗುರೋರಪ್ರಿಯಂ ಕುರ್ಯಾತ್ಪೀಡಿತಸ್ತಾರಿತೋ ಽಪಿ ವಾ ।
ನೋಚ್ಚಾರಯೇಚ್ಚ ತದ್ವಾಕ್ಯಮುಚ್ಚಾರ್ಯ ನರಕಂ ವ್ರಜೇತ್ ॥ 7-37 ॥
ಗುರುರೇವ ಪಿತಾ ಮಾತಾ ಗುರುರೇವ ಪರಃ ಶಿವಃ ।
ಯಸ್ಯೈವ ನಿಶ್ಚಿತೋ ಭಾವಸ್ತಸ್ಯ ಮುಕ್ತಿರ್ನ ದೂರತಃ ॥ 7-38 ॥
ಆಹಾರಾಚಾರಧರ್ಮಾಣಾಂ ಯತ್ಕುರ್ಯಾದ್ಗುರುರೀಶ್ವರಃ ।
ತಥೈವ ಚಾನುಕುರ್ವೀತ ನಾನುಯುಂಜೀತ ಕಾರಣಂ ॥ 7-39 ॥
ಯಜ್ಞಸ್ತಪಾಂಸಿ ನಿಯಮಾತ್ತಾನಿ ವೈ ವಿವಿಧಾನಿ ಚ ।
ಗುರುವಾಕ್ಯೇ ತು ಸರ್ವಾಣಿ ಸಂಪದ್ಯಂತೇ ನ ಸಂಶಯಃ ॥ 7-40 ॥
ಅಜ್ಞಾನಪಂಕನಿರ್ಮಗ್ನಂ ಯಃ ಸಮುದ್ಧರತೇ ಜನಂ ।
ಶಿವಜ್ಞಾನಾತ್ಮಹಸ್ತೇನ ಕಸ್ತಂ ನ ಪ್ರತಿಪೂಜಯೇತ್ ॥ 7-41 ॥
ಇತಿ ಯಃ ಪೂಜಯೇನ್ನಿತ್ಯಂ ಗುರುಮೂರ್ತಿಸ್ಥಮೀಶ್ವರಂ ।
ಸರ್ವಪಾಪವಿನಿರ್ಮುಕ್ತಃ ಪ್ರಾಪ್ನೋತಿ ಪರಮಂ ಪದಂ ॥ 7-42 ॥
ಸ್ನಾತ್ವಾಂಭಸಾ ಭಸ್ಮನಾ ವಾ ಶುಕ್ಲವಸ್ತ್ರೋಪವೀತವಾನ್ ।
ದೂರ್ವಾಗರ್ಭಸ್ಥಿತಂ ಪುಷ್ಪಂ ಗುರುಃ ಶಿರಸಿ ಧಾರಯೇತ್ ॥ 7-43 ॥
ರೋಚನಾಲಭನಂ ಕುರ್ಯಾದ್ಧೂಯಯೇದಾತ್ಮನಸ್ತನುಂ ।
ಅಂಗುಲೀಯಾಕ್ಷಸೂತ್ರಂ ಚ ಕರ್ಣಮಾತ್ರೇ ಚ ಧಾರಯೇತ್ ॥ 7-44 ॥
ಗುರುರೇವಂವಿಧಃ ಶ್ರೀಮಾನ್ನಿತ್ಯಂ ತಿಷ್ಠೇತ್ಸಮಾಹಿತಃ ।
ಯಸ್ಮಾಜ್ಜ್ಞಾನೋಪದೇಶಾರ್ಥಂ ಗುರುರಾಸ್ತೇ ಸದಾಶಿವಃ ॥ 7-45 ॥
ಧಾರಯೇತ್ಪಾದುಕೇ ನಿತ್ಯಂ ಮೃದುವರ್ಮಪ್ರಕಲ್ಪಿತೇ ।
ಪ್ರಗೃಹ್ಯ ದಂಡಂ ಛತ್ತ್ರಂ ವಾ ಪರ್ಯಟೇದಾಶ್ರಮಾದ್ಬಹಿಃ ॥ 7-46 ॥
ನ ಭೂಮೌ ವಿನ್ಯಸೇತ್ಪಾದಮಂತರ್ಧಾನಂ ವಿನಾ ಗುರುಃ ।
ಕುಶಪಾದಕಮಾಕ್ರಮ್ಯ ತರ್ಪಣಾರ್ಥಂ ಪ್ರಕಲ್ಪಯೇತ್ ॥ 7-47 ॥
ಪಾದಸ್ಥಾನಾನಿ ಪತ್ತ್ರಾದ್ಯೈಃ ಕೃತ್ವಾ ದೇವಗೃಹಂ ವಿಶೇತ್ ।
ಪಾತ್ರಾಸ್ತರಿತಪಾದಶ್ಚ(?) ನಿತ್ಯಂ ಭುಂಜೀತ ವಾಗ್ಯತಃ ॥ 7-48 ॥
ನ ಪಾದೌ ಧಾವಯೇತ್ಕಾಂಸ್ಯೇ ಲೋಹೇ ವಾ ಪರಿಕಲ್ಪಿತೇ ।
ಶೌಚಯೇತ್ತೃಣಗರ್ಭಾಯಾಂ ದ್ವಿತೀಯಾಯಾಂ ತಥಾಚಮೇತ್ ॥ 7-49 ॥
ನ ರಕ್ತಮುಲ್ಬಣಂ ವಸ್ತ್ರಂ ಧಾರಯೇತ್ಕುಸುಮಾನಿ ಚ ।
ನ ಬಹಿರ್ಗಂಧಮಾಲ್ಯಾನಿ ವಾಸಾಂಸಿ ಮಲಿನಾನಿ ಚ ॥ 7-50 ॥
ಕೇಶಾಸ್ಥೀನಿ ಕಪಾಲಾನಿ ಕಾರ್ಪಾಸಾಸ್ಥಿತುಷಾಣಿ ಚ ।
ಅಮೇಧ್ಯಾಂಗಾರಭಸ್ಮಾನಿ ನಾಧಿತಿಷ್ಠೇದ್ರಜಾಂಸಿ ಚ ॥ 7-51 ॥
ನ ಚ ಲೋಷ್ಟಂ ವಿಮೃದ್ನೀಯಾನ್ನ ಚ ಛಿಂದ್ಯಾನ್ನಖೈಸ್ತೃಣಂ ।
ನ ಪತ್ತ್ರಪುಷ್ಪಮೂಲ್ಯಾನಿ ವಂಶಮಂಗಲಕಾಷ್ಠಿತಾಂ ॥ 7-52 ॥
ಏವಮಾದೀನಿ ಚಾನ್ಯಾನಿ ಪಾಣಿಭ್ಯಾಂ ನ ಚ ಮರ್ದಯೇತ್ ।
ನ ದಂತಖಾದನಂ ಕುರ್ಯಾದ್ರೋಮಾಣ್ಯುತ್ಪಾಟಯೇನ್ನ ಚ ॥ 7-53 ॥
ನ ಪದ್ಭ್ಯಾಮುಲ್ಲಿಖೇದ್ಭೂಮಿಂ ಲೋಷ್ಟಕಾಷ್ಠೈಃ ಕರೇಣ ವಾ ।
ನ ನಖಾಂಶ್ಚ ನಖೈರ್ವಿದ್ಯಾನ್ನ ಕಂಡೂಯೇನ್ನಖೈಸ್ತನುಂ ॥ 7-54 ॥
ಮುಹುರ್ಮುಹುಃ ಶಿರಃ ಶ್ಮಶ್ರು ನ ಸ್ಪೃಶೇತ್ಕರಜೈರ್ಬುಧಃ ।
ನ ಲಿಕ್ಷಾಕರ್ಷಣಂ ಕುರ್ಯಾದಾತ್ಮನೋ ವಾ ಪರಸ್ಯ ವಾ ॥ 7-55 ॥
ಸೌವರ್ಣ್ಯರೌಪ್ಯತಾಮ್ರೈಶ್ಚ ಶೃಂಗದಂತಶಲಾಕಯಾ ।
ದೇಹಕಂಡೂಯನಂ ಕಾರ್ಯಂ ವಂಶಕಾಷ್ಠೀಕವೀರಣೈಃ(?) ॥ 7-56 ॥
ನ ವಿಚಿತ್ತಂ ಪ್ರಕುರ್ವೀತ ದಿಶಶ್ಚೈವಾವಲೋಕಯನ್ ।
ನ ಶೋಕಾರ್ತಶ್ಚ ಸಂತಿಷ್ಠೇದ್ಧೂತ್ವಾ ಪಾಣೌ ಕಪೋಲಕಂ ॥ 7-57 ॥
ನ ಪಾಣಿಪಾದವಾಕ್ಚಕ್ಷುಃ- ಶ್ರೋತ್ರಶಿಶ್ನಗುದೋದರೈಃ ।
ಚಾಪಲಾನಿ ನ ಕುರ್ವೀತ ಸ ಸರ್ವಾರ್ಥಮವಾಪ್ನುಯಾತ್ ॥ 7-58 ॥
ನ ಕುರ್ಯಾತ್ಕೇನಚಿದ್ವೈರಮಧ್ರುವೇ ಜೀವಿತೇ ಸತಿ ।
ಲೋಕಕೌತೂಹಲಂ ಪಾಪಂ ಸಂಧ್ಯಾಂ ಚ ಪರಿವರ್ಜಯೇತ್ ॥ 7-59 ॥
ನ ಕುದ್ವಾರೇಣ ವೇಶ್ಮಾನಿ ನಗರಂ ಗ್ರಾಮಮಾವಿಶೇತ್ ।
ನ ದಿವಾ ಪ್ರಾವೃತಶಿರಾ ರಾತ್ರೌ ಪ್ರಾವೃತ್ಯ ಪರ್ಯಟೇತ್ ॥ 7-60 ॥
ನಾತಿಭ್ರಮಣಶೀಲಃ ಸ್ಯಾನ್ನ ವಿಶೇಚ್ಚ ಗೃಹಾದ್ಗೃಹಂ ।
ನ ಚಾಜ್ಞಾನಮಧೀಯೀತ ಶಿವಜ್ಞಾನಂ ಸಮಭ್ಯಸೇತ್ ॥ 7-61 ॥
ಶಿವಜ್ಞಾನಂ ಪರಂ ಬ್ರಹ್ಮ ತದಾರಭ್ಯ ನ ಸಂತ್ಯಜೇತ್ ।
ಬ್ರಹ್ಮಾಸಾಧ್ಯ ಚ ಯೋ ಗಚ್ಛೇದ್ಬ್ರಹ್ಮಹಾ ಸ ಪ್ರಕೀರ್ತಿತಃ ॥ 7-62 ॥
ಕೃತಾಂಜಲಿಃ ಸ್ಥಿತಃ ಶಿಷ್ಯೋ ಲಘುವಸ್ತ್ರಮುದಙ್ಮುಖಃ ।
ಶಿವಮಂತ್ರಂ ಸಮುಚ್ಚಾರ್ಯ ಪ್ರಾಙ್ಮುಖೋ ಽಧ್ಯಾಪಯೇದ್ಗುರುಃ ॥ 7-63 ॥
ನಾಗದಂತಾದಿಸಂಭೂತಂ ಚತುರಶ್ರಂ ಸುಶೋಭನಂ ।
ಹೇಮರತ್ನಚಿತಂ ವಾಪಿ ಗುರೋರಾಸನಮುತ್ತಮಂ ॥ 7-64 ॥
ನ ಶುಶ್ರೂಷಾರ್ಥಕಾಮಾಶ್ಚ ನ ಚ ಧರ್ಮಃ ಪ್ರದೃಶ್ಯತೇ ।
ನ ಭಕ್ತಿರ್ನ ಯಶಃ ಕ್ರೌರ್ಯಂ ನ ತಮಧ್ಯಾಪಯೇದ್ಗುರುಃ ॥ 7-65 ॥
ದೇವಾಗ್ನಿಗುರುಗೋಷ್ಠೀಷು ವ್ಯಾಖ್ಯಾಧ್ಯಯನಸಂಸದಿ ।
ಪ್ರಶ್ನೇ ವಾದೇ ಽನೃತೇ ಽಶೌಚೇ ದಕ್ಷಿಣಂ ಬಾಹುಮುದ್ಧರೇತ್ ॥ 7-66 ॥
ವಶೇ ಸತತನಮ್ರಃ ಸ್ಯಾತ್ಸಂಹೃತ್ಯಾಂಗಾನಿ ಕೂರ್ಮವತ್ ।
ತತ್ಸಂಮುಖಂ ಚ ನಿರ್ಗಚ್ಛೇನ್ನಮಸ್ಕಾರಪುರಸ್ಸರಃ ॥ 7-67 ॥
ದೇವಾಗ್ನಿಗುರುವಿಪ್ರಾಣಾಂ ನ ವ್ರಜೇದಂತರೇಣ ತು ।
ನಾರ್ಪಯೇನ್ನ ಚ ಗೃಹ್ಣೀಯಾತ್ಕಿಂಚಿದ್ವಸ್ತು ತದಂತರಾ ॥ 7-68 ॥
ನ ಮುಖೇನ ಧಮೇದಗ್ನಿಂ ನಾಧಃಕುರ್ಯಾನ್ನ ಲಂಘಯೇತ್ ।
ನ ಕ್ಷಿಪೇದಶುಚಿಂ ವಹ್ನೌ ನ ಚ ಪಾದೌ ಪ್ರತಾಪಯೇತ್ ॥ 7-69 ॥
ತೃಣಕಾಷ್ಠಾದಿಗಹನೇ ಜಂತುಭಿಶ್ಚ ಸಮಾಕುಲೇ ।
ಸ್ಥಾನೇ ನ ದೀಪಯೇದಗ್ನಿಂ ದೀಪ್ತಂ ಚಾಪಿ ತತಃ ಕ್ಷಿಪೇತ್ ॥ 7-70 ॥
ಅಗ್ನಿಂ ಯುಗಪದಾನೀಯ ಧಾರಯೇತ ಪ್ರಯತ್ನತಃ ।
ಜ್ವಲಂತಂ ನ ಪ್ರದೀಪಂ ಚ ಸ್ವಯಂ ನಿರ್ವಾಪಯೇದ್ಬುಧಃ ॥ 7-71 ॥
ಶಿವವ್ರತಧರಂ ದೃಷ್ಟ್ವಾ ಸಮುತ್ಥಾಯ ಸದಾ ದ್ರುತಂ ।
ಶಿವೋ ಽಯಮಿತಿ ಸಂಕಲ್ಪ್ಯ ಹರ್ಷಿತಃ ಪ್ರಣಮೇತ್ತತಃ ॥ 7-72 ॥
ಭೋಗಾಂದದಾತಿ ವಿಪುಲಾನ್ಲಿಂಗೇ ಸಂಪೂಜಿತಃ ಶಿವಃ ।
ಅಗ್ನೌ ಚ ವಿವಿಧಾಂ ಸಿದ್ಧಿಂ ಗುರೌ ಮುಕ್ತಿಂ ಪ್ರಯಚ್ಛತಿ ॥ 7-73 ॥
ಮೋಕ್ಷಾರ್ಥಂ ಪೂಜಯೇತ್ತಸ್ಮಾದ್ಗುರುಮೂರ್ತಿಸ್ಥಮೀಶ್ವರಂ ।
ಗುರುಭಕ್ತ್ಯಾ ಲಭೇಜ್ಜ್ಞಾನಂ ಜ್ಞಾನಾನ್ಮುಕ್ತಿಮವಾಪ್ನುಯಾತ್ ॥ 7-74 ॥
ಸರ್ವಪರ್ವಸು ಯತ್ನೇನ ಹ್ಯೇಷು ಸಂಪೂಜಯೇಚ್ಛಿವಂ ।
ಕುರ್ಯಾದಾಯತನೇ ಶೋಭಾಂ ಗುರುಸ್ಥಾನೇಷು ಸರ್ವತಃ ॥ 7-75 ॥
ನರದ್ವಯೋಚ್ಛ್ರಿತೇ ಪೀಠೇ ಸರ್ವಶೋಭಾಸಮನ್ವಿತೇ ।
ಸಂಸ್ಥಾಪ್ಯ ಮಣಿಜಂ ಲಿಂಗಂ ಸ್ಥಾನೇ ಕುರ್ಯಾಜ್ಜಗದ್ಧಿತಂ ॥ 7-76 ॥
ಅನ್ನಪಾನವಿಶೇಷೈಶ್ಚ ನೈವೇದ್ಯಮುಪಕಲ್ಪಯೇತ್ ।
ಭೋಜಯೇದ್ವ್ರತಿನಶ್ಚಾತ್ರ ಸ್ವಗುರುಂ ಚ ವಿಶೇಷತಃ ॥ 7-77 ॥
ಪೂಜಯೇಚ್ಚ ಶಿವಜ್ಞಾನಂ ವಾಚಯೀತ ಚ ಪರ್ವಸು ।
ದರ್ಶಯೇಚ್ಛಿವಭಕ್ತೇಭ್ಯಃ ಸತ್ಪೂಜಾಂ ಪರಿಕಲ್ಪಿತಾಂ ॥ 7-78 ॥
ಪ್ರಿಯಂ ಬ್ರೂಯಾತ್ಸದಾ ತೇಭ್ಯಃ ಪ್ರದೇಯಂ ಚಾಪಿ ಶಕ್ತಿತಃ ।
ಏವಂ ಕೃತೇ ವಿಶೇಷೇಣ ಪ್ರಸೀದತಿ ಮಹೇಶ್ವರಃ ॥ 7-79 ॥
ಛಿನ್ನಂ ಭಿನ್ನಂ ಮೃತಂ ನಷ್ಟಂ ವರ್ಧತೇ ನಾಸ್ತಿ ಕೇವಲಂ ।
ಇತ್ಯಾದ್ಯಾನ್ನ ವದೇಚ್ಛಬ್ದಾನ್ಸಾಕ್ಷಾದ್ಬ್ರೂಯಾತ್ತು ಮಂಗಲಂ ॥ 7-80 ॥
ಅಧೇನುಂ ಧೇನುಮಿತ್ಯೇವ ಬ್ರೂಯಾದ್ಭದ್ರಮಭದ್ರಕಂ ।
ಕಪಾಲಂ ಚ ಭಗಾಲಂ ಸ್ಯಾತ್ಪರಮಂ ಮಂಗಲಂ ವದೇತ್ ॥ 7-81 ॥
ಐಂದ್ರಂ ಧನುರ್ಮಣಿಧನುರ್ದಾಹಕಾಷ್ಠಾದಿ ಚಂದನಂ ।
ಸ್ವರ್ಯಾತಂ ಚ ಮೃತಂ ಬ್ರೂಯಾಚ್ಛಿವೀಭೂತಂ ಚ ಯೋಗಿನಂ ॥ 7-82 ॥
ದ್ವಿಧಾಭೂತಂ ವದೇಚ್ಛಿನ್ನಂ ಭಿನ್ನಂ ಚ ಬಹುಧಾ ಸ್ಥಿತಂ ।
ನಷ್ಟಮನ್ವೇಷಣೀಯಂ ಚ ರಿಕ್ತಂ ಪೂರ್ಣಾಭಿವರ್ಧಿತಂ ॥ 7-83 ॥
ನಾಸ್ತೀತಿ ಶೋಭನಂ ಸರ್ವಮಾದ್ಯಮಂಗಾಭಿವರ್ಧನಂ ।
ಸಿದ್ಧಿಮದ್ಬ್ರೂಹಿ ಗಚ್ಛಂತಂ ಸುಪ್ತಂ ಬ್ರೂಯಾತ್ಪ್ರವರ್ಧಿತಂ ॥ 7-84 ॥
ನ ಮ್ಲೇಚ್ಛಮೂರ್ಖಪತಿತೈಃ ಕ್ರೂರೈಃ ಸಂತಾಪವೇದಿಭಿಃ ।
ದುರ್ಜನೈರವಲಿಪ್ತೈಶ್ಚ ಕ್ಷುದ್ರೈಃ ಸಹ ನ ಸಂವದೇತ್ ॥ 7-85 ॥
ನಾಧಾರ್ಮಿಕನೃಪಾಕ್ರಾಂತೇ ನ ದಂಶಮಶಕಾವೃತೇ ।
ನಾತಿಶೀತಜಲಾಕೀರ್ಣೇ ದೇಶೇ ರೋಗಪ್ರದೇ ವಸೇತ್ ॥ 7-86 ॥
ನಾಸನಂ ಶಯನಂ ಪಾನಂ ನಮಸ್ಕಾರಾಭಿವಾದನಂ ।
ಸೋಪಾನತ್ಕಃ ಪ್ರಕುರ್ವೀತ ಶಿವಪುಸ್ತಕವಾಚನಂ ॥ 7-87 ॥
ಆಚಾರ್ಯಂ ದೈವತಂ ತೀರ್ಥಮುದ್ಧೂತೋದಂ ಮೃದಂ ದಧಿ ।
ವಟಮಶ್ವತ್ಥಕಪಿಲಾಂ ದೀಕ್ಷಿತೋದಧಿಸಂಗಮಂ ॥ 7-88 ॥
ಯಾನಿ ಚೈಷಾಂ ಪ್ರಕಾರಾಣಿ ಮಂಗಲಾನೀಹ ಕಾನಿಚಿತ್ ।
ಶಿವಾಯೇತಿ ನಮಸ್ಕೃತ್ವಾ ಪ್ರೋಕ್ತಮೇತತ್ಪ್ರದಕ್ಷಿಣಂ ॥ 7-89 ॥
ಉಪಾನಚ್ಛತ್ತ್ರವಸ್ತ್ರಾಣಿ ಪವಿತ್ರಂ ಕರಕಂ ಸ್ರಜಂ ।
ಆಸನಂ ಶಯನಂ ಪಾನಂ ಧೃತಮನ್ಯೈರ್ನ ಧಾರಯೇತ್ ॥ 7-90 ॥
ಪಾಲಾಶಮಾಸನಂ ಶಯ್ಯಾಂ ಪಾದುಕೇ ದಂತಧಾವನಂ ।
ವರ್ಜಯೇಚ್ಚಾಪಿ ನಿರ್ಯಾಸಂ ರಕ್ತಂ ನ ತು ಸಮುದ್ಭವಂ ॥ 7-91 ॥
ಸಂಧ್ಯಾಮುಪಾಸ್ಯ ಕುರ್ವೀತ ನಿತ್ಯಂ ದೇಹಪ್ರಸಾಧನಂ ।
ಸ್ಪೃಶೇದ್ವಂದೇಚ್ಚ ಕಪಿಲಾಂ ಪ್ರದದ್ಯಾಚ್ಚ ಗವಾಂ ಹಿತಂ ॥ 7-92 ॥
ಯಃ ಪ್ರದದ್ಯಾದ್ಗವಾಂ ಸಮ್ಯಕ್ಫಲಾನಿ ಚ ವಿಶೇಷತಃ ।
ಕ್ಷೇತ್ರಮುದ್ದಾಮಯೇಚ್ಚಾಪಿ ತಸ್ಯ ಪುಣ್ಯಫಲಂ ಶೃಣು ॥ 7-93 ॥
ಯಾವತ್ತತ್ಪತ್ತ್ರಕುಸುಮ- ಕಂದಮೂಲಫಲಾನಿ ಚ ।
ತಾವದ್ವರ್ಷಸಹಸ್ರಾಣಿ ಶಿವಲೋಕೇ ಮಹೀಯತೇ ॥ 7-94 ॥
ಕೃಶರೋಗಾರ್ತವೃದ್ಧಾನಾಂ ತ್ಯಕ್ತಾನಾಂ ನಿರ್ಜನೇ ವನೇ ।
ಕ್ಷುತ್ಪಿಪಾಸಾತುರಾಣಾಂ ಚ ಗವಾಂ ವಿಹ್ವಲಚೇತಸಾಂ ॥ 7-95 ॥
ನೀತ್ವಾ ಯಸ್ತೃಣತೋಯಾನಿ ವನೇ ಯತ್ನಾತ್ಪ್ರಯಚ್ಛತಿ ।
ಕರೋತಿ ಚ ಪರಿತ್ರಾಣಂ ತಸ್ಯ ಪುಣ್ಯಫಲಂ ಶೃಣು ॥ 7-96 ॥
ಕುಲೈಕವಿಂಶಕೋಪೇತಃ ಪತ್ನೀಪುತ್ರಾದಿಸಂಯುತಃ ।
ಮಿತ್ರಭೃತ್ಯೈರುಪೇತಶ್ಚ ಶ್ರೀಮಚ್ಛಿವಪುರಂ ವ್ರಜೇತ್ ॥ 7-97 ॥
ತತ್ರ ಭುಕ್ತ್ವಾ ಮಹಾಭೋಗಾನ್ವಿಮಾನೈಃ ಸಾರ್ವಕಾಮಿಕೈಃ ।
ಸ ಮಹಾಪ್ರಲಯಂ ಯಾವತ್ತದಂತೇ ಮುಕ್ತಿಮಾಪ್ನುಯಾತ್ ॥ 7-98 ॥
ಗೋಬ್ರಾಹ್ಮಣಪರಿತ್ರಾಣಂ ಸಕೃತ್ಕೃತ್ವಾ ಪ್ರಯತ್ನತಃ ।
ಮುಚ್ಯತೇ ಪಂಚಭಿರ್ಘೋರೈರ್ಮಹದ್ಭಿಃ ಪಾತಕೈರ್ದ್ರುತಂ ॥ 7-99 ॥
ಅಹಿಂಸಾ ಸತ್ಯಮಸ್ತೇಯಂ ಬ್ರಹ್ಮಚರ್ಯಮಕಲ್ಕತಾ ।
ಅಕ್ರೋಧೋ ಗುರುಶುಶ್ರೂಷಾ ಶೌಚಂ ಸಂತೋಷಮಾರ್ಜವಂ ॥ 7-100 ॥
ಅಹಿಂಸಾದ್ಯಾ ಯಮಾಃ ಪಂಚ ಯತೀನಾಂ ಪರಿಕೀರ್ತಿತಾಃ ।
ಅಕ್ರೋಧಾದ್ಯಾಶ್ಚ ನಿಯಮಾಃ ಸಿದ್ಧಿವೃದ್ಧಿಕರಾಃ ಸ್ಮೃತಾಃ ॥ 7-101 ॥
ದಶಲಾಕ್ಷಣಿಕೋ ಧರ್ಮಃ ಶಿವಾಚಾರಃ ಪ್ರಕೀರ್ತಿತಃ ।
ಯೋಗೀಂದ್ರಾಣಾಂ ವಿಶೇಷೇಣ ಶಿವಯೋಗಪ್ರಸಿದ್ಧಯೇ ॥ 7-102 ॥
ನ ವಿಂದತಿ ನರೋ ಯೋಗಂ ಪುತ್ರದಾರಾದಿಸಂಗತಃ ।
ನಿಬದ್ಧಃ ಸ್ನೇಹಪಾಶೇನ ಮೋಹಸ್ತಂಭಬಲೀಯಸಾ ॥ 7-103 ॥
ಮೋಹಾತ್ಕುಟುಂಬಸಂಸಕ್ತಸ್ತೃಷ್ಣಯಾ ಶೃಂಖಲೀಕೃತಃ ।
ಬಾಲೈರ್ಬದ್ಧಸ್ತು ಲೋಕೋ ಽಯಂ ಮುಸಲೇನಾಭಿಹನ್ಯತೇ ॥ 7-104 ॥
ಇಮೇ ಬಾಲಾಃ ಕಥಂ ತ್ಯಾಜ್ಯಾ ಜೀವಿಷ್ಯಂತಿ ಮಯಾ ವಿನಾ ।
ಮೋಹಾದ್ಧಿ ಚಿಂತಯತ್ಯೇವಂ ಪರಮಾರ್ಥೌ ನ ಪಶ್ಯತಿ ॥ 7-105 ॥
ಸಂಪರ್ಕಾದುದರೇ ನ್ಯಸ್ತಃ ಶುಕ್ರಬಿಂದುರಚೇತನಃ ।
ಸ ಪಿತ್ರಾ ಕೇನ ಯತ್ನೇನ ಗರ್ಭಸ್ಥಃ ಪರಿಪಾಲಿತಃ ॥ 7-106 ॥
ಕರ್ಕಶಾಃ ಕಠಿನಾ ಭಕ್ಷಾ ಜೀರ್ಯಂತೇ ಯತ್ರ ಭಕ್ಷಿತಾಃ ।
ತಸ್ಮಿನ್ನೇವೋದರೇ ಶುಕ್ರಂ ಕಿಂ ನ ಜೀರ್ಯತಿ ಭಕ್ಷ್ಯವತ್ ॥ 7-107 ॥
ಯೇನೈತದ್ಯೋಜಿತಂ ಗರ್ಭೇ ಯೇನ ಚೈವ ವಿವರ್ಧಿತಂ ।
ತೇನೈವ ನಿರ್ಗತ್ಂ ಭೂಯಃ ಕರ್ಮಣಾ ಸ್ವೇನ ಪಾಲ್ಯತೇ ॥ 7-108 ॥
ನ ಕಶ್ಚಿತ್ಕಸ್ಯಚಿತ್ಪುತ್ರಃ ಪಿತಾ ಮಾತಾ ನ ಕಸ್ಯಚಿತ್ ।
ಯತ್ಸ್ವಯಂ ಪ್ರಾಕ್ತನಂ ಕರ್ಮ ಪಿತಾ ಮಾತೇತಿ ತತ್ಸ್ಮೃತಂ ॥ 7-109 ॥
ಯೇನ ಯತ್ರ ಕೃತಂ ಕರ್ಮ ಸ ತತ್ರೈವ ಪ್ರಜಾಯತೇ ।
ಪಿತರೌ ಚಾಸ್ಯ ದಾಸತ್ವಂ ಕುರುತಸ್ತತ್ಪ್ರಚೋದಿತೌ ॥ 7-110 ॥
ನ ಕಶ್ಚಿತ್ಕಸ್ಯಚಿಚ್ಛಕ್ತಃ ಕರ್ತುಂ ದುಃಖಂ ಸುಖಾನಿ ಚ ।
ಕರೋತಿ ಪ್ರಾಕ್ತನಂ ಕರ್ಮ ಮೋಹಾಲ್ಲೋಕಸ್ಯ ಕೇವಲಂ ॥ 7-111 ॥
ಕರ್ಮದಾಯಾದಸಂಬಂಧಾದುಪಕಾರಃ ಪರಸ್ಪರಂ ।
ದೃಶ್ಯತೇ ನಾಪಕಾರಶ್ಚ ಮೋಹೇನಾತ್ಮನಿ ಮನ್ಯತೇ ॥ 7-112 ॥
ಈಶ್ವರಾಧಿಷ್ಠಿತಂ ಕರ್ಮ ಫಲತೀಹ ಶುಭಾಶುಭಂ ।
ಗ್ರಾಮಸ್ವಾಮಿಪ್ರಸಾದೇನ ಸುಕೃತಂ ಕರ್ಷಣಂ ಯಥಾ ॥ 7-113 ॥
ದ್ವಯಂ ದೇವತ್ವಮೋಕ್ಷಾಯ ಮಮೇತಿ ನ ಮಮೇತಿ ಚ ।
ಮಮೇತಿ ಬಧ್ಯತೇ ಜಂತುರ್ನ ಮಮೇತಿ ವಿಮುಚ್ಯತೇ ॥ 7-114 ॥
ದ್ವ್ಯಕ್ಷರಂ ಚ ಭವೇನ್ಮೃತ್ಯುಸ್ತ್ರ್ಯಕ್ಷರಂ ಬ್ರಹ್ಮ ಶಾಶ್ವತಂ ।
ಮಮೇತಿ ದ್ವ್ಯಕ್ಷರಂ ಮೃತ್ಯುಸ್ತ್ರ್ಯಕ್ಷರಂ ನ ಮಮೇತಿ ಚ ॥ 7-115 ॥
ತಸ್ಮಾದಾತ್ಮನ್ಯಹಂಕಾರಮುತ್ಸೃಜ್ಯ ಪ್ರವಿಚಾರತಃ ।
ವಿಧೂಯಾಶೇಷಸಂಗಾಂಶ್ಚ ಮೋಕ್ಷೋಪಾಯಂ ವಿಚಿಂತಯೇತ್ ॥ 7-116 ॥
ಜ್ಞಾನಾದ್ಯೋಗಪರಿಕ್ಲೇಶಂ ಕುಪ್ರಾವರಣಭೋಜನಂ ।
ಕುಚರ್ಯಾಂ ಕುನಿವಾಸಂ ಚ ಮೋಕ್ಷಾರ್ಥೀ ನ ವಿಚಿಂತಯೇತ್ ॥ 7-117 ॥
ನ ದುಃಖೇನ ವಿನಾ ಸೌಖ್ಯಂ ದೃಶ್ಯತೇ ಸರ್ವದೇಹಿನಾಂ ।
ದುಃಖಂ ತನ್ಮಾತ್ರಕಂ ಜ್ಞೇಯಂ ಸುಖಮಾನಂತ್ಯಮುತ್ತಮಂ ॥ 7-118 ॥
ಸೇವಾಯಾಂ ಪಾಶುಪಾಲ್ಯೇ ಚ ವಾನಿಜ್ಯೇ ಕೃಷಿಕರ್ಮಣಿ ।
ತುಲ್ಯೇ ಸತಿ ಪರಿಕ್ಲೇಶೇ ವರಂ ಕ್ಲೇಶೋ ವಿಮುಕ್ತಯೇ ॥ 7-119 ॥
ಸ್ವರ್ಗಾಪವರ್ಗಯೋರೇಕಂ ಯಃ ಶೀಘ್ರಂ ನ ಪ್ರಸಾಧಯೇತ್ ।
ಯಾತಿ ತೇನೈವ ದೇಹೇನ ಸ ಮೃತಸ್ತಪ್ಯತೇ ಚಿರಂ ॥ 7-120 ॥
ಯದವಶ್ಯಂ ಪರಾಧೀನೈಸ್ತ್ಯಜನೀಯಂ ಶರೀರಕಂ ।
ಕಸ್ಮಾತ್ತೇನ ವಿಮೂಢಾತ್ಮಾ ನ ಸಾಧಯತಿ ಶಾಶ್ವತಂ ॥ 7-121 ॥
ಯೌವನಸ್ಥಾ ಗೃಹಸ್ಥಾಶ್ಚ ಪ್ರಾಸಾದಸ್ಥಾಶ್ಚ ಯೇ ನೃಪಾಃ ।
ಸರ್ವ ಏವ ವಿಶೀರ್ಯಂತೇ ಶುಷ್ಕಸ್ನಿಗ್ಧಾನ್ನಭೋಜನಾಃ ॥ 7-122 ॥
ಅನೇಕದೋಷದುಷ್ಟಸ್ಯ ದೇಹಸ್ಯೈಕೋ ಮಹಾನ್ಗುಣಹ್ ।
ಯಾಂ ಯಾಮವಸ್ಥಾಮಾಪ್ನೋತಿ ತಾಂ ತಾಮೇವಾನುವರ್ತತೇ ॥ 7-123 ॥
ಮಂದಂ ಪರಿಹರನ್ಕರ್ಮ ಸ್ವದೇಹಮನುಪಾಲಯೇತ್ ।
ವರ್ಷಾಸು ಜೀರ್ಣಕಟವತ್ತಿಷ್ಠನ್ನಪ್ಯವಸೀದತಿ ॥ 7-124 ॥
ನ ತೇ ಽತ್ರ ದೇಹಿನಃ ಸಂತಿ ಯೇ ತಿಷ್ಠಂತಿ ಸುನಿಶ್ಚಲಾಃ ।
ಸರ್ವೇ ಕುರ್ವಂತಿ ಕರ್ಮಾಣಿ ವಿಕೃಶಾಃ ಪೂರ್ವಕರ್ಮಭಿಃ ॥ 7-125 ॥
ತುಲ್ಯೇ ಸತ್ಯಪಿ ಕರ್ತವ್ಯೇ ವರಂ ಕರ್ಮ ಕೃತಂ ಪರಂ ।
ಯಃ ಕೃತ್ವಾ ನ ಪುನಃ ಕುರ್ಯಾನ್ನಾನಾಕರ್ಮ ಶುಭಾಶುಭಂ ॥ 7-126 ॥
ತಸ್ಮಾದಂತರ್ಬಹಿಶ್ಚಿಂತಾಮನೇಕಾಕಾರಸಂಸ್ಥಿತಾಂ ।
ಸಂತ್ಯಜ್ಯಾತ್ಮಹಿತಾರ್ಥಾಯ ಸ್ವಾಧ್ಯಾಯಧ್ಯಾನಮಭ್ಯಸೇತ್ ॥ 7-127 ॥
ವಿವಿಕ್ತೇ ವಿಜನೇ ರಮ್ಯೇ ಪುಷ್ಪಾಶ್ರಮವಿಭೂಷಿತೇ ।
ಸ್ಥಾನಂ ಕೃತ್ವಾ ಶಿವಸ್ಥಾನೇ ಧ್ಯಾಯೇಚ್ಛಾಂತಂ ಪರಂ ಶಿವಂ ॥ 7-128 ॥
ಯೇ ಽತಿರಮ್ಯಾಣ್ಯರಣ್ಯಾನಿ ಸುಜಲಾನಿ ಶಿವಾನಿ ತು ।
ವಿಹಾಯಾಭಿರತಾ ಗ್ರಾಮೇ ಪ್ರಾಯಸ್ತೇ ದೈವಮೋಹಿತಾಃ ॥ 7-129 ॥
ವಿವೇಕಿನಃ ಪ್ರಶಾಂತಸ್ಯ ಯತ್ಸುಖಂ ಧ್ಯಾಯತಃ ಶಿವಂ ।
ನ ತತ್ಸುಖಂ ಮಹೇಂದ್ರಸ್ಯ ಬ್ರಹ್ಮಣಃ ಕೇಶವಸ್ಯ ವಾ ॥ 7-130 ॥
ಇತಿ ನಾಮಾಮೃತಂ ದಿವ್ಯಂ ಮಹಾಕಾಲಾದವಾಪ್ತವಾನ್ ।
ವಿಸ್ತರೇಣಾನುಪೂರ್ವಾಚ್ಚ ಋಷ್ಯಾತ್ರೇಯಃ(?) ಸುನಿಶ್ಚಿತಂ ॥ 7-131 ॥
ಪ್ರಜ್ಞಾಮಥಾ ವಿನಿರ್ಮಥ್ಯ(?) ಶಿವಜ್ಞಾನಮಹೋದಧಿಂ ।
ಋಷ್ಯಾತ್ರೇಯಃ ಸಮುದ್ಧೃತ್ಯ ಪ್ರಾಹೇದಮಣುಮಾತ್ರಕಂ ॥ 7-132 ॥
ಶಿವಧರ್ಮೇ ಮಹಾಶಾಸ್ತ್ರೇ ಶಿವಧರ್ಮಸ್ಯ ಚೋತ್ತರೇ ।
ಯದನುಕ್ತಂ ಭವೇತ್ಕಿಂಚಿತ್ತದತ್ರ ಪರಿಕೀರ್ತಿತಂ ॥ 7-133 ॥
ತ್ರಿದೈವತ್ಯಮಿದಂ ಶಾಸ್ತ್ರಂ ಮುನೀಂದ್ರಾತ್ರೇಯಭಾಷಿತಂ ।
ತಿರ್ಯಙ್ಮನುಜದೇವಾನಾಂ ಸರ್ವೇಷಾಂ ಚ ವಿಮುಕ್ತಿದಂ ॥ 7-134 ॥
ನಂದಿಸ್ಕಂದಮಹಾಕಾಲಾಸ್ತ್ರಯೋ ದೇವಾಃ ಪ್ರಕೀರ್ತಿತಾಃ ।
ಚಂದ್ರಾತ್ರೇಯಸ್ತಥಾತ್ರಿಶ್ಚ ಋಷ್ಯಾತ್ರೇಯೋ ಮುನಿತ್ರಯಂ ॥ 7-135 ॥
ಏತೈರ್ಮಹಾತ್ಮಬಿಃ ಪ್ರೋಕ್ತಾಃ ಶಿವಧರ್ಮಾಃ ಸಮಾಸತಃ ।
ಸರ್ವಲೋಕೋಪಕಾರಾರ್ಥಂ ನಮಸ್ತೇಭ್ಯಃ ಸದಾ ನಮಃ ॥ 7-136 ॥
ತೇಷಾಂ ಶಿಷ್ಯಪ್ರಶಿಷ್ಯೈಶ್ಚ ಶಿವಧರ್ಮಪ್ರವಕ್ತೃಭಿಃ ।
ವ್ಯಾಪ್ತಂ ಜ್ಞಾನಸರಃ ಶಾರ್ವಂ ವಿಕಚೈರಿವ ಪಂಕಜೈಃ ॥ 7-137 ॥
ಯೇ ಶ್ರಾವಯಂತಿ ಸತತಂ ಶಿವಧರ್ಮಂ ಶಿವಾರ್ಥಿನಾಂ ।
ತೇ ರುದ್ರಾಸ್ತೇ ಮುನೀಂದ್ರಾಶ್ಚ ತೇ ನಮಸ್ಯಾಃ ಸ್ವಭಕ್ತಿತಃ ॥ 7-138 ॥
ಯೇ ಸಮುತ್ಥಾಯ ಶೃಣ್ವಂತಿ ಶಿವಧರ್ಮಂ ದಿನೇ ದಿನೇ ।
ತೇ ರುದ್ರಾ ರುದ್ರಲೋಕೇಶಾ ನ ತೇ ಪ್ರಕೃತಿಮಾನುಷಾಃ ॥ 7-139 ॥
ಶಿವೋಪನಿಷದಂ ಹ್ಯೇತದಧ್ಯಾಯೈಃ ಸಪ್ತಭಿಃ ಸ್ಮೃತಂ ।
ಋಷ್ಯಾತ್ರೇಯಸಗೋತ್ರೇಣ ಮುನಿನಾ ಹಿತಕಾಮ್ಯಯಾ ॥ 7-140 ॥
॥ ಇತಿ ಶಿವೋಪನಿಷದಿ ಶಿವಾಚಾರಾಧ್ಯಾಯಃ ಸಪ್ತಮಃ ॥
॥ ಇತಿ ಶಿವೋಪನಿಷತ್ಸಮಾಪ್ತಾ ॥
Also Read:
Shiva Upanishad Lyrics in Sanskrit | English | Marathi | Bengali | Gujarati | Kannada | Malayalam | Oriya | Telugu | Tamil
