Shri Lakshmi Sahasranamastotram Lyrics in Kannada:
॥ ಶ್ರೀಲಕ್ಷ್ಮೀಸಹಸ್ರನಾಮಸ್ತೋತ್ರಮ್ 2 ॥
(ನಾರದೀಯೋಪಪುರಾಣತಃ)
ಮಿತ್ರಸಹ ಉವಾಚ-
ಭಗವನ್ ಸರ್ವಧರ್ಮಜ್ಞ ಸರ್ವಶಾಸ್ತ್ರವಿಶಾರದ ।
ಪಾವನಾನಾಂ ಹಿ ಮಹಸಾಂ ನಿದಾನಂ ತ್ವಂ ಮಹಾಮುನೇ ॥ 1 ॥
ಅತರ್ಕಿತೇನಾಗಮೇನ ತವ ತುಷ್ಟೋಽಸ್ಮಿ ಸರ್ವದಾ ।
ಹೃದಯಂ ನಿರ್ವೃತಂ ಮೇಽದ್ಯ ಮಹಾದುಃಖೌಘಪೀಡಿತಮ್ ॥ 2 ॥
ದೇವಾ ಗೃಹೇಷು ಸನ್ತುಷ್ಟಾಃ ತಾರಿತಾಃ ಪಿತರಶ್ಚ ಯೇ ।
ಚಿರಾಯ ಮೇ ಮನಸ್ಯಸ್ತಿ ಸಂಶಯೋ ಬಲವತ್ತರಃ ॥ 3 ॥
ಪೃಚ್ಛಾಮಿ ತ್ವಾಮಹಂ ತಂ ವೈ ಉತ್ತರಂ ದಾತುಮರ್ಹಸಿ ।
ಇಷ್ಟಂ ಮಯಾ ಚ ಬಹುಭಿಃ ಯಜ್ಞೈಸ್ಸಮ್ಪೂರ್ಣದಕ್ಷಿಣೈಃ ॥ 4 ॥
ದಾನಾನಿ ಚ ಮಹಾರ್ಹಾಣಿ ಪಾತ್ರೇಷು ಸ್ಪರ್ಶಿತಾನಿ ಚ ।
ಅನೃತಂ ನೋಕ್ತಪೂರ್ವಂ ಮೇ ಪ್ರಜಾ ಧರ್ಮೇಣ ಪಾಲಿತಾಃ ॥ 5 ॥
ಪತಿವ್ರತಾ ಮಹಾಭಾಗಾ ನಿತ್ಯಂ ಸುಸ್ನಿಗ್ಧಭಾಷಿಣೀ ।
ಪೂಜ್ಯಾನ್ ಗೃಹಾಗತಾನ್ ಸರ್ವಾನಾರಾಧಯತಿ ನಿತ್ಯದಾ ॥ 6 ॥
ತಥಾ ಹಿ ಸೇವತೇ ದೇವಾನ್ ಯಥಾಽಹಮಪಿ ನಾಶಕಮ್ ।
ಭಾರ್ಯಾಽನುಕೂಲಾ ಮೇ ದೇವೀ ಮದಯನ್ತೀ ಮನಸ್ವಿನೀ ॥ 7 ॥
ತಥಾಪಿ ದುಃಖಂ ಸಮ್ಪ್ರಾಪ್ತಂ ಮಯಾ ದ್ವಾದಶವಾರ್ಷಿಕಮ್ ।
ರಾಕ್ಷಸತ್ವಂ ಮಹಾಘೋರಂ ಸಮ್ಪೂರ್ಣನರಕೋಪಮಮ್ ॥ 8 ॥
ತತ್ರ ವೃತ್ತಾನಿ ಕಾರ್ಯಾಣಿ ಸ್ಮೃತ್ವಾ ಮೇ ವೇಪತೇ ಮನಃ ।
ಭಕ್ಷಿತಾಃ ಕತಿ ವಾ ತತ್ರ ದ್ವಿಪದಾಶ್ಚ ಚತುಷ್ಪದಾಃ ॥ 9 ॥
ತತ್ಸರ್ವಮಸ್ತು ತನ್ನೈವ ಚಿನ್ತ್ಯತೇ ಶಾಪಹೇತುಕಮ್ ।
ಗುರುಪುತ್ರೇ ಗುರುಸಮಃ ಶಕ್ತಿಃ ಸಮ್ಭಕ್ಷಿತೋ ಮಯಾ ॥ 10 ॥
ಬ್ರಹ್ಮಹತ್ಯಾಕೃತಂ ಪಾಪಂ ಕಥಂ ಮೇ ನ ಭವಿಷ್ಯತಿ ।
ಶಾಪಾದ್ರಾಕ್ಷಸತಾ ಕಾಲೇ ಪ್ರಾಪ್ತಾ ಯದ್ಯಪಿ ತನ್ಮಯಾ ॥ 11 ॥
ರಾತ್ರಿನ್ದಿವಂ ಮೇ ದಹತಿ ಹೃದಯಂ ಹಿ ಸಬನ್ಧನಮ್ ।
ನ ರೋಚತೇ ಮೇ ಭುಕ್ತಿರ್ವಾ ಸುಪ್ತಿರ್ವಾಪಿ ಗತಿರ್ಬಹಿಃ ॥ 12 ॥
ಮಹಾಬನ್ಧನಮೇತನ್ಮೇ ರಾಜ್ಯಂ ಹಿ ಮನುತೇ ಮನಃ ।
ಕಿನ್ನು ತತ್ಕಾರಣಂ ಯೇನ ಪ್ರಾಪ್ತೋಽಹಂ ತಾದೃಶೀಂ ಶುಚಮ್ ॥ 13 ॥
ವಕ್ತುಮರ್ಹಸಿ ಸರ್ವಜ್ಞ ತತ್ಪ್ರಾಯಶ್ಚಿತ್ತವಿಸ್ತರಮ್ ।
ಉಪಾದಿಶ ಮಹಾಮನ್ತ್ರತನ್ತ್ರಜ್ಞ ಪ್ರಣತಾಯ ಮೇ ॥ 14 ॥
ಶ್ರೀನಾರದ ಉವಾಚ-
ಶೃಣು ರಾಜನ್ಪ್ರವಕ್ಷ್ಯಾಮಿ ಪ್ರಾಗ್ಜನ್ಮಚರಿತಂ ತವ ।
ಯೇನೇದೃಶಂ ತ್ವಯಾ ಪ್ರಾಪ್ತಂ ದುಃಖಮತ್ಯನ್ತದುಸ್ಸಹಮ್ ॥ 15 ॥
ಪುರಾಭೂದ್ಬಾಹ್ಮಣಃ ಕಶ್ಚಿತ್ತಾಮ್ರಪರ್ಣಿನದೀತಟೇ ।
ದರಿದ್ರೋಽತ್ಯನ್ತದುರ್ಭಾಗ್ಯಃ ಬಹುಪುತ್ರಕುಟುಮ್ಬವಾನ್ ॥ 16 ॥
ಕೃಷ್ಣಶರ್ಮೇತಿ ವಿಖ್ಯಾತಃ ವೇದವೇದಾಂಗತತ್ವವಿತ್ ।
ತವ ಭಾರ್ಯಾಽಭವತ್ಪುಣ್ಯಾ ಸದಾ ಚಂಡೀ ಕುರೂಪಿಣೀ ॥ 17 ॥
ಕಿನ್ತು ಶಕ್ತಿವ್ರತಾಚಾರೇಽಪ್ರತಿಮಾ ಶುದ್ಧಮಾನಸಾ ।
ಕಟುವಾಙ್ಮಾನಿನೀ ನಾಮ್ನಾ ಕ್ಷುತ್ಪಿಪಾಸಾರ್ದಿತಾ ಸದಾ ॥ 18 ॥
ದಾರಿದ್ರ್ಯಶಮನಾರ್ಥಂ ತ್ವಂ ಸರ್ವಲಕ್ಷಣಲಕ್ಷಿತಮ್ ।
ಕಲ್ಪಯಿತ್ವ ಶ್ರಿಯೋ ಮೂರ್ತಿಂ ಭಕ್ತ್ಯಾ ಪೂಜಿತವಾನ್ಗೃಹೇ ॥ 19 ॥
ಮಾನಿನ್ಯಪ್ಯನ್ವಹಂ ಭಕ್ತ್ಯಾ ಗೋಮಯಾಲೇಪನಾದಿಭಿಃ ।
ರಂಗವಲ್ಯಾಪ್ಯಲಂಕೃತ್ಯ ಪೂಜಾಸ್ಥಾನಂ ಗೃಹೇ ತವ ॥ 20 ॥
ಪಾಯಸಾಪೂಪನೈವೇದ್ಯೈಃ ಸಾ ತ್ವಾಂ ಪರ್ಯಚರನ್ಮುದಾ ।
ಏಕದಾ ಭೃಗುವಾರೇ ತ್ವಾಂ ಸಹಸ್ರಕಮಲಾರ್ಚನಮ್ ॥ 21 ॥
ವಿಧಾತುಂ ವಿಷ್ಣುಪತ್ನ್ಯಾಸ್ತು ಪದ್ಮಾನ್ಯಾನಯಿತುಂ ಗತಃ ।
ಗತೇಽರ್ಧದಿವಸೇ ಗೇಹಂ ಪ್ರಾಪ್ಯ ಖಿನ್ನೋಽನಯೋದಿತಃ ॥ 22 ॥
ಹನ್ತಾರ್ಧದಿವಸೋಽತೀತಃ ಕದಾ ದೇವಾನಸಂಖ್ಯಕಾನ್ ।
ಅಭ್ಯರ್ಚ್ಯಾಥ ಶ್ರಿಯೋ ದೇವ್ಯಾಃ ಸಹಸ್ರಕಮಲಾರ್ಚನಮ್ ॥ 23 ॥
ಕೃತ್ವಾ ಭುಕ್ತ್ವಾ ಕದಾಽನ್ನಂ ನೋ ದರ್ಶಯಿಷ್ಯಸಿ ತಾಮ್ಯತಾಮ್ ।
ಬಾಲಾ ರುದನ್ತಿ ಕ್ಷುಧಿತಾಃ ಪಕ್ವಂ ಭವತಿ ಶೀತಲಮ್ ॥ 24 ॥
ಇತಿ ತಸ್ಯಾಂ ಭರ್ತ್ಸಯನ್ತ್ಯಾಂ ತೂಷ್ಣೀಂ ಪೂಜಾಮಧಾದ್ಭವಾನ್ ।
ಸಹಸ್ರಪದ್ಮಪೂಜಾಯಾಂ ಚಲನ್ತ್ಯಾಂ ಮಧ್ಯತಸ್ತು ಸಾ ॥ 25 ॥
ಅಸಮರ್ಥಾ ಕ್ಷುಧಂ ಸೋಢುಂ ಬಾಲೈಸ್ಸಹ ಬುಭೋಜ ಹ ।
ತದಾ ತ್ವಂ ಕುಪಿತೋಽಪ್ಯೇನಾಂ ನ ಚ ಕಿಂಚಿದಪಿ ಬ್ರುವನ್ ॥ 26 ॥
ಗೃಹಾನ್ನಿರ್ಗತ್ಯ ಶಾನ್ತಾತ್ಮಾ ಕಿಂ ಕೃತ್ಯಮಿತಿ ಚಿನ್ತಯನ್ ।
ನಿರ್ಯಾನ್ತಂ ತ್ವಾಂ ತು ಸಾ ಪ್ರಾಹ ಕ್ವ ಗಚ್ಛಸಿ ಸುದುರ್ಮತೇ ॥ 27 ॥
ಅನಿರ್ವರ್ತ್ಯ ಶ್ರಿಯಃ ಪೂಜಾಂ ಪ್ರಾರಬ್ಧಾಂ ಸುಮಹಾದರಮ್ ।
ಪೃಥಙ್ನೈವೇದ್ಯಮಸ್ತೀಹ ನಾಸ್ಮಾಭಿರ್ಭಕ್ಷಿತಂ ಹಿ ತತ್ ॥ 28 ॥
ಕಾಲಾತ್ಯಯಾತ್ಕ್ಷುಧಾರ್ತಾನಾಂ ಭುಕ್ತಿಂ ದೇವೀ ಸಹಿಷ್ಯತೇ ।
ತದ್ವಿಧೇಹಿ ಶ್ರಿಯಃ ಪೂಜಾಂ ಮಾ ಸ್ಮ ನಿಷ್ಕಾರಣಂ ಕ್ರುಧಃ ॥ 29 ॥
ನರಕೇ ಮಾ ಪತೋ ಬುದ್ಧ್ಯಾ ಮಾಂ ಚ ಪಾತಯ ಮಾ ವೃಥಾ ।
ಇತಿ ತಸ್ಯಾಂ ಬ್ರುವಾಣಾಯಾಂ ತ್ವಂ ಗೃಹಾನ್ನಿರಗಾಃ ಕ್ರುಧಾ ॥ 30 ॥
ಸದ್ಯಃ ಸನ್ಯಸ್ಯ ವಿಪಿನೇಽವಾತ್ಸೀಸ್ತ್ವಂ ವಿಧಿನಾ ಕಿಲ ।
ಯತಿತ್ವೇಽಪಿ ಸದಾ ಬುದ್ಧ್ಯಾ ಪೂರ್ವಾಶ್ರಮಕಥಾಂ ಸ್ಮರನ್ ॥ 31 ॥
ದಾರಿದ್ರ್ಯಂ ಸರ್ವಧರ್ಮಾಣಾಂ ಪ್ರತ್ಯೂಹಾಯ ಪ್ರವರ್ತತೇ ।
ಸತ್ಯಪ್ಯಸ್ಮಿನ್ಧರ್ಮಪತ್ನೀ ಅನುಕೂಲಾ ಭವೇದ್ಯದಿ ॥ 32 ॥
ನರಸ್ಯ ಜನ್ಮ ಸುಖಿತಂ ನಾನ್ಯಥಾಽರ್ಥಶತೈರಪಿ ।
ವನ್ಧ್ಯಾಜಾನಿಸ್ಸ ಭವತು ಅನುಕೂಲಕಲತ್ರವಾನ್ ॥ 33 ॥
ಲಭತೇ ಜನ್ಮಸಾಫಲ್ಯಮೇತದ್ದೇವ್ಯಾಃ ಪ್ರಸಾದಜಮ್ ।
ಇತ್ಯೇವಂ ಚಿನ್ತಯನ್ನೇವ ತ್ಯಕ್ತ್ವಾ ದೇಹಂ ತರೋಸ್ತಲೇ ॥ 34 ॥
ಇಕ್ಷ್ವಾಕುವಂಶೇ ಜಾತಸ್ತ್ವಂ ರಾಜಾ ಮಿತ್ರಸಹಾಭಿಧಃ ।
ರುಷಾ ಪರವಶೋ ಯಸ್ಮಾದಸಮಾಪ್ಯ ಶ್ರಿಯೋಽರ್ಚನಮ್ ॥ 35 ॥
ನಿರ್ಗತೋಽಸಿ ಗೃಹಾತ್ತಸ್ಮಾದ್ದುಃಖಮೇತದುಪಸ್ಥಿತಮ್ ।
ಸಾಪಿ ತ್ವಯಿ ವಿನಿರ್ಯಾತೇ ಪಶ್ಚಾತ್ತಾಪವತೀ ಭೃಶಮ್ ॥ 36 ॥
ಪ್ರಕ್ಷಾಲಿತಾಂಘ್ರಿಹಸ್ತಾಽಥ ಪ್ರಯತಾಽಽಚಮ್ಯ ಸತ್ವರಮ್ ।
ನೈವೇದ್ಯಂ ಸ್ವಯಮೀಶ್ವರ್ಯೈ ಪ್ರಣಮ್ಯ ಚ ನಿವೇದ್ಯ ಚ ॥ 37 ॥
ಅಮ್ಬ ಸರ್ವಸ್ಯ ಲೋಕಸ್ಯ ಜನನ್ಯಸಿ ಸಹಸ್ವ ತತ್ ।
ಆಗಾಂಸಿ ಮಮ ನಾಗಾರಿಕೇತನೋರಃಸ್ಥಲಾಲಯೇ ॥ 38 ॥
ಯಸ್ಯಾಂ ಜಾತೌ ತು ಮೇ ಭರ್ತಾ ತತ್ಪೂಜಾಪುಣ್ಯತೋ ಭವೇತ್ ।
ಭವೇಯಮಹಮಪ್ಯತ್ರ ಜಾತೌ ತಂ ಚಾಪ್ನುಯಾಂ ಯಥಾ ॥ 39 ॥
ಕಾಮಕ್ರೋಧಾದಿಹೀನಾ ಸ್ಯಾಂ ತಥಾಮ್ಬಾನುಗ್ರಹಂ ಕುರು ।
ಇತಿ ದೇವೀಂ ಪ್ರಾರ್ಥಯನ್ತೀ ಜೀವನ್ತೀ ಕೃಚ್ಛ್ರತೋ ಭುವಿ ॥ 40 ॥
ತ್ಯಕ್ತ್ವಾ ದೇಹಂ ಪುನರ್ಜಾತಾ ರಾಜವಂಶೇ ಸುಪಾವನೇ ।
ಮದಯನ್ತೀತಿ ನಾಮ್ನಾ ವೈ ತವ ಭಾರ್ಯಾಽಭವತ್ಪುನಃ ॥ 41 ॥
ಅಭುಕ್ತೇ ತ್ವಯಿ ಭುತ್ಕ್ಯಾ ಸಾ ವನ್ಧ್ಯಾ ಜಾತಾ ವಧೂಮಣಿಃ ।
ಉಭಯೋರ್ಭವತೋರ್ಲಕ್ಷ್ಮೀಪೂಜಾಯಾಮಪರಾಧತಃ ॥ 42 ॥
ಉಭಾವಪಿ ಮಹಾದುಃಖಂ ಪ್ರಾಪ್ತೌ ದ್ವಾದಶವರ್ಷಿಕಮ್ ।
ತ್ಯಕ್ತ್ವಾ ರಾಜ್ಯಂ ಚ ಕೋಶಂಚ ದರಿದ್ರಾವತಿದುಃಖಿತೌ ॥ 43 ॥
ಮಾ ಬ್ರಹ್ಮಹತ್ಯಾದೋಷಾತ್ತ್ವಂ ಭೈಷೀ ರಾಜನ್ ಕಥಂಚನ ।
ಯಾಂ ಜಾತಿಮನುವಿಷ್ಟೋ ಹಿ ತಾದೃಶೀಂ ತ್ವಂ ಕ್ರಿಯಾಮಧಾಃ ॥ 44 ॥
ಕಿನ್ತು ಭೂಯಶ್ಚ್ಯುತೇ ರಾಜ್ಯಾದ್ಭೇತವ್ಯಂ ಶ್ರೀಪ್ರಕೋಪತಃ ।
ನಾಮ್ನಾಂ ತದದ್ಯ ಶ್ರೀದೇವ್ಯಾಃ ಸಹಸ್ರೇಣ ಶತೇನ ಚ ॥ 45 ॥
ಅಷ್ಟೋತ್ತರೇಣ ಪದ್ಮಾನಾಂ ಪುಂಜತಸ್ತಾಂ ಪ್ರಪೂಜಯ ।
ಭವೇತ್ತವ ಸ್ಥಿರಂ ರಾಜ್ಯಂ ದುಃಖಂ ನಾಣ್ವಪಿ ತೇ ಭವೇತ್ ॥ 46 ॥
ಭಾರ್ಯಾ ತೇ ಸಾಪಿ ಶುಶ್ರೂಷಾಂ ಸ್ವಯಮೇವ ಕರೋತು ತೇ ।
ವರ್ಷಮಾತ್ರಂ ಪೂಜಿತಾ ಸಾ ಲಕ್ಷ್ಮೀರ್ನಾರಾಯಣಪ್ರಿಯಾ ॥ 47 ॥
ಯುವಯೋಸ್ಸರ್ವಕಾಮಾನಾಂ ದಾತ್ರೀ ಸ್ಯಾನ್ನಾತ್ರ ಸಂಶಯಃ ।
ಸ್ತ್ರೀಸಂಗಪ್ರತಿಹನ್ತಾಽಸ್ತಿ ಶಾಪೋ ಯದ್ಯಪಿ ತೇ ಪ್ರಭೋ ॥ 48 ॥
ಪ್ರಸೋಷ್ಯತೇ ಚ ತನಯಂ ತವ ಭಾರ್ಯಾ ಕಥಂಚನ ।
ಪುತ್ರಪೌತ್ರಾಭಿವೃದ್ಧ್ಯಾ ತ್ವಂ ಮೋದಿಷ್ಯಸಿ ಮಹೇನ್ದ್ರವತ್ ॥ 49 ॥
ಯಥಾ ಪೃಷ್ಟಂ ಮಹಾಭಾಗ ದುಃಖಹೇತುಸ್ತವೋದಿತಃ ।
ಉಕ್ತಸ್ತತ್ಪರಿಹಾರೋಽಪಿ ಕಿಮಿಚ್ಛಸಿ ಪುನರ್ವದ ॥ 50 ॥
ರಾಜೋವಾಚ-
ಧನ್ಯೋಽಸ್ಮ್ಯನುಗೃಹೀತೋಽಸ್ಮಿ ಮಹರ್ಷೇ ಕೃಪಯಾ ತವ ।
ಮತ್ತೋ ನ ವಿದ್ಯತೇ ಕಶ್ಚಿಲ್ಲೋಕೇಽಸ್ಮಿನ್ ಭಾಗ್ಯವತ್ತರಃ ॥ 51 ॥
ತವ ಪಾದಾಬ್ಜಯುಗಲೇ ಪ್ರಣಾಮಾನಾಂ ಶತಂ ಶತಮ್ ।
ಕರೋಮಿ ಪಾಹಿ ಮಾಂ ವಿಪ್ರ ಕುಲೋತ್ತಂಸ ದಯಾನಘ ॥ 52 ॥
ನಾಮ್ನಾಂ ಸಹಸ್ರಂ ಶ್ರೀದೇವ್ಯಾ ಅಷ್ಟೋತ್ತರಶತಾಧಿಕಮ್ ।
ಪ್ರಬ್ರೂಹಿ ಮೇ ಮುನಿಶ್ರೇಷ್ಠ ಪೂಜಾಯಾ ವಿಧಿಮಪ್ಯಥ ॥ 53 ॥
ಜಪಸ್ಯ ಚ ವಿಧಿಂ ತೇಷಾಂ ನಾಮ್ನಾಂ ಶುಶ್ರೂಷವೇ ವದ ।
ಸೂತ ಉವಾಚ-
ಇತಿ ರಾಜ್ಞಾ ಮುನಿಶ್ರೇಷ್ಠಃ ಪೃಷ್ಟಸ್ಸವಿನಯಂ ತತಃ ॥ 54 ॥
ನಮಸ್ಕೃತ್ಯ ಶ್ರಿಯೈ ಪಶ್ಚಾದ್ಧ್ಯಾತ್ವೋವಾಚ ಮಹೀಪತಿಮ್ ।
ಶ್ರೀನಾರದ ಉವಾಚ-
ಸಮ್ಯಕ್ ಪೃಷ್ಟಂ ಮಹಾರಾಜ ಸರ್ವಲೋಕಹಿತಂ ತ್ವಯಾ ॥ 55 ॥
ವಕ್ಷ್ಯಾಮಿ ತಾನಿ ನಾಮಾನಿ ಪೂಜಾಂಚಾಪಿ ಯಥಾಕ್ರಮಮ್ ।
ಪಲಮಾನಸುವರ್ಣೇನ ರಜತೇನಾಥ ತಾಮ್ರತಃ ॥ 56 ॥
ಚತುರ್ಭುಜಾಂ ಪದ್ಮಧರಾಂ ವರಾಭಯವಿಶೋಭಿನೀಮ್ ।
ನಿಷಣ್ಣಾಂ ಫುಲ್ಲಕಮಲೇ ಚತುರ್ದನ್ತೈಃ ಸಿತೈರ್ಗಜೈಃ ॥ 57 ॥
ಸುವರ್ಣಘಂಟಾಮುಖರೈಃ ಕೃತಕ್ಷೀರಾಭಿಷೇಚನಾಮ್ ।
ಕಟಕಾಂಗದಮಂಜೀರರಶನಾದಿ ವಿಭೂಷಣೈಃ ॥ 58 ॥
ವಿಭೂಷಿತಾಂ ಕ್ಷೌಮವಸ್ತ್ರಾಂ ಸಿನ್ದೂರತಿಲಕಾಂಚಿತಾಮ್ ।
ಪ್ರಸನ್ನವದನಾಮ್ಭೋಜಾಂ ಪ್ರಪನ್ನಾರ್ತಿವಿನಾಶಿನೀಮ್ ॥ 59 ॥
ಛತ್ರಚಾಮರಹಸ್ತಾಢ್ಯೈಃ ಸೇವಿತಾಮಪ್ಸರೋಗಣೈಃ ।
ಕೃತ್ವೈವಂ ಪ್ರತಿಮಾಂ ತಾಂ ಚ ಪ್ರತಿಷ್ಠಾಪ್ಯ ಯಥಾವಿಧಿ ॥ 60 ॥
ಶ್ರೀಂ ಲಕ್ಷ್ಮ್ಯೈ ನಮ ಇತ್ಯೇವ ಧ್ಯಾನಾವಾಹನಪೂರ್ವಕಾನ್ ।
ಉವಚಾರಾಂಶ್ಚತುಷ್ಷಷ್ಟಿಂ ಕಲ್ಪಯೇತ ಗೃಹೇ ಸುಧೀಃ ॥ 61 ॥
ಪ್ರತಿಮಾಯಾ ಅಲಾಭೇ ತು ಲಕ್ಷ್ಮ್ಯಾಸ್ಸಮ್ಪ್ರಾಪ್ಯ ಚಾಲಯಮ್ ।
ಕಾರಯೇದುಪಚಾರಾಂಸ್ತು ಯಥಾವಿಧ್ಯರ್ಚಕೈರ್ಮುದಾ ॥ 62 ॥
ತಸ್ಯಾಪ್ಯಭಾವೇ ತ್ವಾಲೇಖ್ಯೇ ಲಿಖಿತಾಂ ವರ್ಣಕೈಸ್ತಥಾ ।
ಪೂಜಯೇತ್ತಸ್ಯ ಚಾಭಾವೇ ಕೃತಾಂ ಚನ್ದನದಾರುಣಾ ॥ 63 ॥
ತದಭಾವೇ ಚನ್ದನೇನ ರಚಿತಾಂ ಪೂಜಯೇದ್ರಮಾಮ್ ।
ಏಷಾಮಭಾವೇ ವಿಕಚೇ ಕಮಲೇ ಕರ್ಣಿಕಾಗತಾಮ್ ॥ 64 ॥
ಧ್ಯಾತ್ವಾ ತಥಾವಿಧಾಂ ದೇವೀಮಾದರೇಣ ಪ್ರಪೂಜಯೇತ್ ।
ಕಮಲಾನಾಂ ಸಹಸ್ರೇಣಾಪ್ಯಷ್ಟೋತ್ತರಶತೇನ ಚ ॥ 65 ॥
ಅರ್ಚಯೇದಿನ್ದಿರಾಪಾದೌ ಧ್ಯಾತ್ವಾಭೀಷ್ಟಾನಿ ಚೇತಸಿ ।
ಶ್ರೀದೇವ್ಯಾ ನಾಮಸಾಹಸ್ರಂ ಅಷ್ಟೋತ್ತರಶತಾಧಿಕಮ್ ॥ 66 ॥
ಅಥಾತಸ್ಸಮ್ಪ್ರವಕ್ಷ್ಯಾಮಿ ಶೃಣು ನಾನ್ಯಮನಾ ನೃಪ ।
ಪಾರಾಯಣಪ್ರಕಾರಃ ॥
ಓಂ ಅಸ್ಯ ಶ್ರೀಮಹಾಲಕ್ಷ್ಮೀಸಹಸ್ರನಾಮಸ್ತೋತ್ರಮಹಾಮನ್ತ್ರಸ್ಯ ನಾರದ ಋಷಿಃ ।
ಅನುಷ್ಟುಪಛನ್ದಃ । ಶ್ರೀಮಹಾಲಕ್ಷ್ಮೀರ್ದೇವತಾ ।
ಹ್ರಾಂ ಬೀಜಮ್ । ಹ್ರಿಂ ಶಕ್ತಿಃ । ಹ್ರೂಂ ಕೀಲಕಮ್ ।
ಶ್ರೀಮಹಾಲಕ್ಷ್ಮೀಪ್ರಸಾದಸಿದ್ಧ್ಯರ್ಥೇ
ಶ್ರೀಮಹಾಲಕ್ಷ್ಮೀಸಹಸ್ರನಾಮಮನ್ತ್ರಜಪೇ ವಿನಿಯೋಗಃ ॥
ಓಂ ಹ್ಲಾಂ ಹಿರಣ್ಯವರ್ಣಾಂ ಹರಿಣೀಂ ಸುವರ್ಣರಜತಸ್ರಜಾಮ್ । ಅಂಗುಷ್ಠಾಭ್ಯಾಣ್ ನಮಃ ।
ಮಂ ಹ್ಲೀಂ ಚನ್ದ್ರಾಂ ಹಿರಣ್ಮಯೀಂ ಲಕ್ಷ್ಮೀಂ ಜಾತವೇದೋ ನ ಆವಹ । ತರ್ಜನೀಭ್ಯಾಂ ನಮಃ ।
ಹಾಂ ಹ್ಲೂಂ ತಾಂ ಮ ಆವಹ ಜಾತವೇದೋ ಲಕ್ಷ್ಮೀಮನಪಗಾಮಿನೀಮ್ । ಮಧ್ಯಮಾಭ್ಯಾಂ ನಮಃ ।
ಲಂ ಹ್ಲೈಂ ಯಸ್ಯಾಂ ಹಿರಣ್ಯಂ ವಿನ್ದೇಯಂ ಗಾಮಶ್ವಮ್ಪುರುಷಾನಹಮ್ । ಅನಾಮಿಕಾಭ್ಯಾಂ ನಮಃ ।
ಕ್ಷ್ಮ್ಯೈಂ ಹ್ಲೌಂ ಶ್ರಿಯಂ ದೇವೀಮುಪಹ್ವಯೇ ಶ್ರೀರ್ಮಾ ದೇವೀ ಜುಷತಮ್ ।
ಕರತಲಕರಪೃಷ್ಠಾಭ್ಯಾಂ ನಮಃ ॥
ಓಂ ಹ್ಲಾಂ ಕಾಂಸೋಸ್ಮಿತಾಂ ಹಿರಣ್ಯಪ್ರಾಕಾರಾಮಾರ್ದ್ರಾಂ ಜ್ವಲನ್ತೀಂ ತೃಪ್ತಾಂ ತರ್ಪಯನ್ತೀಮ್ ।
ಹೃದಯಾಯ ನಮಃ ।
ಮಂ ಹ್ಲೀಂ ಪದ್ಮೇ ಸ್ಥಿತಾಂ ಪದ್ಮವರ್ಣಾಂ ತಾಮಿಹೋಪಹ್ವಯೇ ಶ್ರಿಯಮ್ ।
ಶಿರಸೇ ಸ್ವಾಹಾ ।
ಹಾಂ ಹ್ಲೂಂ ಚನ್ದ್ರಾಂ ಪ್ರಭಾಸಾಂ ಯಶಸಾ ಜ್ವಲನ್ತೀಂ ಶ್ರಿಯಂ ಲೋಕೇ ದೇವಜುಷ್ಟಾಮುದಾರಾಮ್ ।
ಶಿಖಾಯೈ ವಷಟ್ ।
ಲಂ ಹ್ಲೈಂ ತಾಂ ಪದ್ಮಿನೀಮೀಂ ಶರಣಮಹಂ ಪ್ರಪದ್ಯೇಽಲಕ್ಷ್ಮೀರ್ಮೇ
ನಶ್ಯತಾಂ ತ್ವಾಂ ವೃಣೇ ।
ಕವಚಾಯ ಹುಮ್ ।
ಕ್ಷ್ಮ್ಯೈಂ ಹ್ರೌಂ ಆದಿತ್ಯವರ್ಣೇ ತಪಸೋಽಧಿಜಾತೋ ವನಸ್ಪತಿಸ್ತವ
ವೃಕ್ಷೋಽಥ ಬಿಲ್ವಃ । ನೇತ್ರತ್ರಯಾಯ ವೌಷಟ್ ।
ನಮಃ ಹ್ಲಃ ತಸ್ಯ ಫಲಾನಿ ತಪಸಾ ನುದಾನ್ತು ಮಾಯಾನ್ತರಾಯಾಶ್ಚ ಬಾಹ್ಯಾ ಅಲಕ್ಷ್ಮೀಃ ।
ಅಸ್ತ್ರಾಯ ಫಟ್ । ಭೂರ್ಭುವಸ್ಸುವರೋಮಿತಿ ದಿಗ್ಬನ್ಧಃ ॥
ಧ್ಯಾನಮ್-
ಲಕ್ಷ್ಮೀದೇವೀಂ ದ್ವಿಪದ್ಮಾಭಯವರದಕರಾಂ ತಪ್ತಕಾರ್ತಸ್ವರಾಭಾಂ
ಶುಭ್ರಾಭ್ರಾಭೇಭಯುಗ್ಮದ್ವಯಕರಧೃತಕುಮ್ಭಾದ್ಭಿರಾಸಿಚ್ಯಮಾನಾಮ್ ।
ರತ್ನೌಘಾಬದ್ಧಮೌಲಿಂ ವಿಮಲತರದುಕೂಲಾರ್ತವಾಲೇಪನಾಢ್ಯಾಂ
ಪದ್ಮಾಕ್ಷೀಂ ಪದ್ಮನಾಭೋರಸಿ ಕೃತವಸತಿಂ ಪದ್ಮಗಾಂ ಚಿನ್ತಯಾಮಿ ॥
ಲಂ ಪೃಥಿವ್ಯಾತ್ಮಿಕಾಯೈ ಗನ್ಧಂ ಸಮರ್ಪಯಾಮಿ ।
ಹಂ ಆಕಾಶಾತ್ಮಿಕಾಯೈ ಪುಷ್ಪಾಣಿ ಸಮರ್ಪಯಾಮಿ ।
ಯಂ ವಾಯ್ವಾತ್ಮಿಕಾಯೈ ಧೂಪಮಾಘ್ರಾಪಯಾಮಿ ।
ರಂ ವಹ್ನ್ಯಾತ್ಮಿಕಾಯೈ । ದೀಪಂ ದರ್ಶಯಾಮಿ ।
ವಂ ಅಮೃತಾತ್ಮಿಕಾಯೈ । ಅಮೃತಂ ನಿವೇದಯಾಮಿ ।
ಸಂ ಸರ್ವಾತ್ಮಿಕಾಯೈ ಸರ್ವೋಪಚಾರಾನ್ ಸಮರ್ಪಯಾಮಿ ।
ಪಾರಾಯಣಾನ್ತೇ ಓಂ ಹ್ಲಾಂ ಉಪೈತು ಮಾಂ ದೇವಸಖಃ ಕೀರ್ತಿಶ್ಚ ಮಣಿನಾ ಸಹ ।
ಹೃದಯಾಯ ನಮಃ ।
ಮಂ ಹ್ಲೀಂ ಪ್ರಾದುರ್ಭೂತೋಽಸ್ಮಿ ರಾಷ್ಟ್ರೇಽಸ್ಮಿನ್ಕೀರ್ತಿಮೃದ್ಧಿಂ ದದಾತು ಮೇ ।
ಶಿರಸೇ ಸ್ವಾಹಾ ।
ಹಾಂ ಹ್ಲೂಂ ಕ್ಷುತ್ಪಿಪಾಸಾಮಲಾಂ ಜ್ಯೇಷ್ಠಾಂ ಅಲಕ್ಷ್ಮೀಂ ನಾಶಯಾಮ್ಯಹಮ್ ।
ಶಿಖಾಯೈ ವಷಟ್ ।
ಲಂ ಹ್ಲೈಂ ಅಭೂತಿಮಸಮೃದ್ಧಿಂಚ ಸರ್ವಾಂ ನಿರ್ಣುದ ಮೇ ಗೃಹಾತ್ ।
ಕವಚಾಯ ಹುಮ್ ।
ಕ್ಷ್ಮ್ಯೈಂ ಹ್ಲೌಂ ಗನ್ಧದ್ವಾರಾಂ ದುರಾಧರ್ಷಾಂ ನಿತ್ಯಪುಷ್ಟಾಂ ಕರೀಷಿಣೀಮ್ ।
ನೈತ್ರತ್ರಯಾಯ ವೌಷಟ್ ।
ನಮಃ ಹ್ಲಃ ಈಶ್ವರೀಂ ಸರ್ವಭೂತಾನಾಂ ತಾಮಿಹೋಪಹ್ನಯೇ ಶ್ರಿಯಮ್ ।
ಅಸ್ತ್ರಾಯ ಹಟ್ ॥
ಭೂರ್ಭುವಸ್ಸುವರೋಮಿತಿ ದಿಗ್ವಿಮೋಕಃ ।
ಧ್ಯಾನಮ್ ।
ಲಮಿತ್ಯಾದಿ ಪಂಚಪೂಜಾ ।
ಅಥ ಶ್ರೀಲಕ್ಷ್ಮೀಸಹಸ್ರನಾಮಸ್ತೋತ್ರಮ್ ॥
ಶ್ರೀನಾರದ ಉವಾಚ –
ಮಹಾಲಕ್ಷ್ಮೀರ್ಮಹೇಶಾನಾ ಮಹಾಮಾಯಾ ಮಲಾಪಹಾ ।
ವಿಷ್ಣುಪತ್ನೀ ವಿಧೀಶಾರ್ಚ್ಯಾ ವಿಶ್ವಯೋನಿರ್ವರಪ್ರದಾ ॥ 1 ॥
ಧಾತ್ರೀ ವಿಧಾತ್ರೀ ಧರ್ಮಿಷ್ಠಾ ಧಮ್ಮಿಲ್ಲೋದ್ಭಾಸಿಮಲ್ಲಿಕಾ ।
ಭಾರ್ಗವೀ ಭಕ್ತಿಜನನೀ ಭವನಾಥಾ ಭವಾರ್ಚಿತಾ ॥ 2 ॥
ಭದ್ರಾ ಭದ್ರಪ್ರದಾ ಭವ್ಯಾ ಭಕ್ತಾಭೀಷ್ಟಫಲಪ್ರದಾ ।
ಪ್ರಳಯಸ್ಥಾ ಪ್ರಸಿದ್ಧಾ ಮಾ ಪ್ರಕೃಷ್ಟೈಶ್ವರ್ಯದಾಯಿನೀ ॥ 3 ॥
ವಿಷ್ಣುಶಕ್ತಿರ್ವಿಷ್ಣುಮಾಯಾ ವಿಷ್ಣುವಕ್ಷಃಸ್ಥಲಸ್ಥಿತಾ ।
ವಾಗ್ರೂಪಾ ವಾಗ್ವಿಭೂತಿಜ್ಞಾ ವಾಕ್ಪ್ರದಾ ವರದಾ ವರಾ ॥ 4 ॥
ಸಮ್ಪತ್ಪ್ರದಾ ಸರ್ವಶಕ್ತಿಃ ಸಂವಿದ್ರೂಪಾ ಸಮಾಽಸಮಾ ।
ಹರಿದ್ರಾಭಾ ಹರಿನ್ನಾಥಪೂಜಿತಾ ಹರಿಮೋಹಿನೀ ॥ 5 ॥
ಹತಪಾಪಾ ಹತಖಲಾ ಹಿತಾಹಿತವಿವರ್ಜಿತಾ ।
ಹಿತಾಹಿತಪರಾಽಹೇಯಾ ಹರ್ಷದಾ ಹರ್ಷರೂಪಿಣೀ ॥ 6 ॥
ವೇದಶಾಸ್ತ್ರಾಲಿಸಂಸೇವ್ಯಾ ವೇದರೂಪಾ ವಿಧಿಸ್ತುತಾ ।
ಶ್ರುತಿಃ ಸ್ಮೃತಿರ್ಮತಿಃ ಸಾಧ್ವೀ ಶ್ರುತಾಽಶ್ರುತಧರಾ ಧರಾ ॥ 7 ॥
ಶ್ರೀಃ ಶ್ರಿತಾಘಧ್ವಾನ್ತಭಾನುಃ ಶ್ರೇಯಸೀ ಶ್ರೇಷ್ಠರೂಪಿಣೀ ।
ಇನ್ದಿರಾ ಮನ್ದಿರಾನ್ತಸ್ಥಾ ಮನ್ದುರಾವಾಸಿನೀ ಮಹೀ ॥ 8 ॥
ಧನಲಕ್ಷ್ಮೀರ್ಧನಕರೀ ಧನಿಪ್ರೀತಾ ಧನಪ್ರದಾ ।
ಧಾನಾಸಮೃದ್ಧಿದಾ ಧುರ್ಯಾ ಧುತಾಘಾ ಧೌತಮಾನಸಾ ॥ 9 ॥
ಧಾನ್ಯಲಕ್ಷ್ಮೀರ್ದಾರಿತಾಘಾ ದಾರಿದ್ರ್ಯವಿನಿವಾರಿಣೀ ।
ವೀರಲಕ್ಷ್ಮೀರ್ವೀರವನ್ದ್ಯಾ ವೀರಖಡ್ಗಾಗ್ರವಾಸಿನೀ ॥ 10 ॥
ಅಕ್ರೋಧನಾಽಲೋಭಪರಾ ಲಲಿತಾ ಲೋಭಿನಾಶಿನೀ ।
ಲೋಕವನ್ದ್ಯಾ ಲೋಕಮಾತಾ ಲೋಚನಾಧಃಕೃತೋತ್ಪಲಾ ॥ 11 ॥
ಹಸ್ತಿಹಸ್ತೋಪಮಾನೋರುಃ ಹಸ್ತದ್ವಯಧೃತಾಮ್ಬುಜಾ ।
ಹಸ್ತಿಕುಮ್ಭೋಪಮಕುಚಾ ಹಸ್ತಿಕುಮ್ಭಸ್ಥಲಸ್ಥಿತಾ ॥ 12 ॥
ರಾಜಲಕ್ಷ್ಮೀ ರಾಜರಾಜಸೇವಿತಾ ರಾಜ್ಯದಾಯಿನೀ ।
ರಾಕೇನ್ದುಸುನ್ದರೀ ರಸ್ಯಾ ರಸಾಲರಸಭಾಷಣಾ ॥ 13 ॥
ಕೋಶವೃದ್ಧಿಃ ಕೋಟಿದಾತ್ರೀ ಕೋಟಿಕೋಟಿರವಿಪ್ರಭಾ ।
ಕರ್ಮಾರಾಢ್ಯಾ ಕರ್ಮಗಮ್ಯಾ ಕರ್ಮಣಾಂ ಫಲದಾಯಿನೀ ॥ 14 ॥
ಧೈರ್ಯಪ್ರದಾ ಧೈರ್ಯರೂಪಾ ಧೀರಾ ಧೀರಸಮರ್ಚಿತಾ ।
ಪತಿವ್ರತಾ ಪರತರಪುರುಷಾರ್ಥಪ್ರದಾಽಪರಾ ॥ 15 ॥
ಪದ್ಮಾಲಯಾ ಪದ್ಮಕರಾ ಪದ್ಮಾಕ್ಷೀ ಪದ್ಮಧಾರಿಣೀ ।
ಪದ್ಮಿನೀ ಪದ್ಮದಾ ಪದ್ಮಾ ಪದ್ಮಶಂಖಾದಿಸೇವಿತಾ ॥ 16 ॥
ದಿವ್ಯಾ ದಿವ್ಯಾಂಗರಾಗಾಢ್ಯಾ ದಿವ್ಯಾದಿವ್ಯಸ್ವರೂಪಧೃತ್ ।
ದಯಾನಿಧಿರ್ದಾನಪರಾ ದಾನವಾರಾತಿಭಾಮಿನೀ ॥ 17 ॥
ದೇವಕಾರ್ಯಪರಾ ದೇವೀ ದೈತ್ಯೇನ್ದ್ರಪರಿಪೂಜಿತಾ ।
ನಾರಾಯಣೀ ನಾದಗತಾ ನಾಕರಾಜಸಮರ್ಚಿತಾ ॥ 18 ॥
ನಕ್ಷತ್ರನಾಥವದನಾ ನರಸಿಂಹಪ್ರಿಯಾಽನಲಾ ।
ಜಗದ್ರೂಪಾ ಜಗನ್ನಾಥಾ ಜಂಗಮಾಜಂಗಮಾಕೃತಿಃ ॥ 19 ॥
ಕವಿತಾ ಕಂಜನಿಲಯಾ ಕಮ್ರಾ ಕಲಿನಿಷೇಧಿನೀ ।
ಕಾರುಣ್ಯಸಿನ್ಧುಃ ಕಮಲಾ ಕಮಲಾಕ್ಷೀ ಕುಚೋನ್ನತಾ ॥ 20 ॥
ಬಲಿಪ್ರಿಯಾ ಬಲಿಹರೀ ಬಲಿನೀ ಬಲಿಸಂಸ್ತುತಾ ।
ಹೀರಭೂಷಾ ಹೀನದೋಷಾ ಹಾನಿಹರ್ತ್ರೀ ಹತಾಸುರಾ ॥ 21 ॥
ಹವ್ಯಕವ್ಯಾರ್ಚಿತಾ ಹತ್ಯಾದಿಕಪಾತಕನಾಶಿಣೀ ।
ವಿಶುದ್ಧಸತ್ತ್ವಾ ವಿವಶಾ ವಿಶ್ವಬಾಧಾಹರೀ ವಧೂಃ ॥ 22 ॥
ಬ್ರಹ್ಮಾಣೀ ಬ್ರಹ್ಮಜನನೀ ಬ್ರಹ್ಮರೂಪಾ ಬೃಹದ್ವಪುಃ ।
ಬನ್ದೀಕೃತಾಮರವಧೂಮೋಚಿನೀ ಬನ್ಧುರಾಲಕಾ ॥ 23 ॥
ಬಿಲೇಶಯಾಂಗನಾವನ್ದ್ಯಾ ಬೀಭತ್ಸರಹಿತಾಽಬಲಾ ।
ಭೋಗಿನೀ ಭುವನಾಧೀಶಾ ಭೋಗಿಭೋಗಶಯಾಽಭಯಾ ॥ 24 ॥
ದಾಮೋದರಪ್ರಿಯಾ ದಾನ್ತಾ ದಾಶೇಶಪರಿಸೇವಿತಾ ।
ಜಾಮದಗ್ನ್ಯಪ್ರಿಯಾ ಜಹ್ನುತನಯಾ ಪಾವನಾಂಘಿರಕಾ ॥ 25 ॥
ಕ್ಷೀರೋದಮಥನೋದ್ಭೂತಾ ಕ್ಷೀರಾಕ್ತಾ ಕ್ಷಿತಿರೂಪಿಣೀ ।
ಕ್ಷೇಮಂಕರೀ ಕ್ಷಯಕರೀ ಕ್ಷೇತ್ರಜ್ಞಾ ಕ್ಷೇತ್ರದಾಯಿನೀ ॥ 26 ॥
ಸ್ವಯಂವೃತಾಚ್ಯುತಾ ಸ್ವೀಯರಕ್ಷಿಣೀ ಸ್ವತ್ವದಾಯಿನೀ ।
ತಾರಕೇಶಮುಖೀ ತಾರ್ಕ್ಷ್ಯಸ್ವಾಮಿನೀ ತಾರಿತಾಶ್ರಿತಾ ॥ 27 ॥
ಗುಣಾತೀತಾ ಗುಣವತೀ ಗುಣ್ಯಾ ಗರುಡಸಂಸ್ಥಿತಾ ।
ಗೇಯಾ ಗಯಾಕ್ಷೇತ್ರಗತಾ ಗಾನತುಷ್ಟಾ ಗತಿಪ್ರದಾ ॥ 28 ॥
ಶೇಷರೂಪಾ ಶೇಷಶಾಯಿಭಾಮಿನೀ ಶಿಷ್ಟಸಮ್ಮತಾ ।
ಶೇವಧಿಃ ಶೋಷಿತಾಶೇಷಭುವನಾ ಶೋಭನಾಕೃತಿಃ ॥ 29 ॥
ಪಾಂಚರಾತ್ರಾರ್ಚಿತಾ ಪಾಂಚಜನ್ಯಧಾರ್ಯಂಕವಾಸಿನೀ ।
ಪಾಷಂಡದ್ವೇಷಿಣೀ ಪಾಶಮೋಚನೀ ಪಾಮರಪ್ರಿಯಾ ॥ 30 ॥
ಭಯಂಕರೀ ಭಯಹರೀ ಭರ್ತೃಭಕ್ತಾ ಭವಾಪಹಾ ।
ಹ್ರೀರ್ಹ್ರೀಮತೀ ಹೃತತಮಾಃ ಹತಮಾಯಾ ಹತಾಶುಭಾ ॥ 31 ॥
ರಘುವಂಶಸ್ನುಷಾ ರಾಮಾ ರಮ್ಯಾ ರಾಮಪ್ರಿಯಾ ರಮಾ ।
ಸೀರಧ್ವಜಸುತಾ ಸೀತಾ ಸೀಮಾತೀತಗುಣೋಜ್ಜ್ವಲಾ ॥ 32 ॥
ಜಾನಕೀ ಜಗದಾನನ್ದದಾಯಿನೀ ಜಗತೀಭವಾ ।
ಭೂಗರ್ಭಸಮ್ಭವಾ ಭೂತಿಃ ಭೂಷಿತಾಂಗೀ ಭೃತಾನತಾ ॥ 33 ॥
ವೇದಸ್ತವಾ ವೇದವತೀ ವೈದೇಹೀ ವೇದವಿತ್ಪ್ರಿಯಾ ।
ವೇದಾನ್ತವೇದ್ಯಾ ವೀರ್ಯಾಢ್ಯಾ ವೀರಪತ್ನೀ ವಿಶಿಷ್ಟಧೀಃ ॥ 34 ॥
ಶಿವಚಾಪಾರೋಪಪಣಾ ಶಿವಾ ಶಿವಪರಾರ್ಚಿತಾ ।
ಸಾಕೇತವಾಸಿನೀ ಸಾಧುಸ್ವಾನ್ತಗಾ ಸ್ವಾದುಭಕ್ಷಿಣೀ ॥ 35 ॥
ಗುಹಾಗತಾ ಗುಹನತಾ ಗುಹಾಗತಮುನಿಸ್ತುತಾ ।
ದರಸ್ಮಿತಾ ದನುಜಸಂಹರ್ತ್ರೀ ದಶರಥಸ್ನುಷಾ ॥ 36 ॥
ದಾಯಪ್ರದಾ ದಾನಫಲಾ ದಕ್ಷಾ ದಾಶರಥಿಪ್ರಿಯಾ ।
ಕಾನ್ತಾ ಕಾನ್ತಾರಗಾ ಕಾಮ್ಯಾ ಕಾರಣಾತೀತವಿಗ್ರಹಾ ॥ 37 ॥
ವೀರಾ ವಿರಾಧಸಂಹರ್ತ್ರೀ ವಿಶ್ವಮಾಯಾವಿಧಾಯಿನೀ ।
ವೇದ್ಯಾ ವೈದ್ಯಪ್ರಿಯಾ ವೈದ್ಯಾ ವೇಧೋವಿಷ್ಣುಶಿವಾಕೃತಿಃ ॥ 38 ॥
ಖರದೂಷಣಕಾಲಾಗ್ನಿಃ ಖರಭಾನುಕುಲಸ್ನುಷಾ ।
ಶೂರಾ ಶೂರ್ಪಣಖಾಭಂಗಕಾರಿಣೀ ಶ್ರುತವಲ್ಲಭಾ ॥ 39 ॥
ಸುವರ್ಣಮೃಗತೃಷ್ಣಾಢ್ಯಾ ಸುವರ್ಣಸದೃಶಾಂಗಕಾ ।
ಸುಮಿತ್ರಾಸುಖದಾ ಸೂತಸಂಸ್ತುತಾ ಸುತದಾರದಾ ॥ 40 ॥
ಸುಮಿತ್ರಾನುಗ್ರಹಪರಾ ಸುಮನ್ತ್ರಾ ಸುಪ್ರತಿಷ್ಠಿತಾ ।
ಶ್ಯಾಮಾ ಶ್ಯಾಮಲನೇತ್ರಾನ್ತಾ ಶ್ಯಾಮನ್ಯಗ್ರೋಧಸೇವಿನೀ ॥ 41 ॥
ತುಂಗಸ್ಥಾನಪ್ರದಾ ತುಂಗಾ ಗಂಗಾಪ್ರಾರ್ಥನತತ್ಪರಾ ।
ಗತಿಪ್ರಿಯಾ ಗರ್ಭರೂಪಾ ಗತಿರ್ಗತಿಮತೀ ಚ ಗೌಃ ॥ 42 ॥
ಗರ್ವದೂರಾ ಗರ್ವಹರೀ ಗತಿನಿರ್ಜಿತಹಂಸಿಕಾ ।
ದಶಾನನವಧೋದ್ಯುಕ್ತಾ ದಯಾಸಿನ್ಧುರ್ದಶಾತಿಗಾ ॥ 43 ॥
ಸೇತುಹೇತುರ್ಹೇತುಹೀನಾ ಹೇತುಹೇತುಮದಾತ್ಮಿಕಾ ।
ಹನೂಮತ್ಸ್ವಾಮಿನೀ ಹೃಷ್ಟಾ ಹೃಷ್ಟಪುಷ್ಟಜನಸ್ತುತಾ ॥ 44 ॥
ವಾಮಕೇಶೀ ವಾಮನೇತ್ರೀ ವಾದ್ಯಾ ವಾದಿಜಯಪ್ರದಾ ।
ಧನಧಾನ್ಯಕರೀ ಧರ್ಮ್ಯಾ ಧರ್ಮಾಧರ್ಮಫಲಪ್ರದಾ ॥ 45 ॥
ಸಮುದ್ರತನಯಾ ಸ್ತುತ್ಯಾ ಸಮುದ್ರಾ ಸದ್ರಸಪ್ರದಾ ।
ಸಾಮಪ್ರಿಯಾ ಸಾಮನುತಾ ಸಾನ್ತ್ವೋಕ್ತಿಃ ಸಾಯುಧಾ ಸತೀ ॥ 46 ॥
ಶೀತೀಕೃತಾಗ್ನಿಃ ಶೀತಾಂಶುಮುಖೀ ಶೀಲವತೀ ಶಿಶುಃ ।
ಭಸ್ಮೀಕೃತಾಸುರಪುರಾ ಭರತಾಗ್ರಜಭಾಮಿನೀ ॥ 47 ॥
ರಾಕ್ಷಸೀದುಃಖದಾ ರಾಜ್ಞೀ ರಾಕ್ಷಸೀಗಣರಕ್ಷಿಣೀ ।
ಸರಸ್ವತೀ ಸರಿದ್ರೂಪಾ ಸನ್ನುತಾ ಸದ್ಗತಿಪ್ರದಾ ॥ 48 ॥
ಕ್ಷಮಾವತೀ ಕ್ಷಮಾಶೀಲಾ ಕ್ಷಮಾಪುತ್ರೀ ಕ್ಷಮಾಪ್ರದಾ ।
ಭರ್ತೃಭಕ್ತಿಪರಾ ಭರ್ತೃದೈವತಾ ಭರತಸ್ತುತಾ ॥ 49 ॥
ದೂಷಣಾರಾತಿದಯಿತಾ ದಯಿತಾಲಿಂಗನೋತ್ಸುಕಾ ।
ಅಲ್ಪಮಧ್ಯಾಽಲ್ಪಧೀದೂರಾ ಕಲ್ಪವಲ್ಲೀ ಕಲಾಧರಾ ॥ 50 ॥
ಸುಗ್ರೀವವನ್ದ್ಯಾ ಸುಗ್ರೀವಾ ವ್ಯಗ್ರೀಭಾವಾವಿತಾನತಾ ।
ನೀಲಾಶ್ಮಭೂಷಾ ನೀಲಾದಿಸ್ತುತಾ ನೀಲೋತ್ಪಲೇಕ್ಷಣಾ ॥ 51 ॥
ನ್ಯಾಯ್ಯಾ ನ್ಯಾಯಪರಾಽಽರಾಧ್ಯಾ ನ್ಯಾಯಾನ್ಯಾಯಫಲಪ್ರದಾ ।
ಪುಣ್ಯದಾ ಪುಣ್ಯಲಭ್ಯಾ ಚ ಪುರುಷೋತ್ತಮಭಾಮಿನೀ ॥ 52 ॥
ಪುರುಷಾರ್ಥಪ್ರದಾ ಪುಣ್ಯಾ ಪಣ್ಯಾ ಫಣಿಪತಿಸ್ತುತಾ ।
ಅಶೋಕವನಿಕಾಸ್ಥಾನಾಽಶೋಕಾ ಶೋಕವಿನಾಶಿನೀ ॥ 53 ॥
ಶೋಭಾರೂಪಾ ಶುಭಾ ಶುಭ್ರಾ ಶುಭ್ರದನ್ತಾ ಶುಚಿಸ್ಮಿತಾ ।
ಪುರುಹೂತಸ್ತುತಾ ಪೂರ್ಣಾ ಪೂರ್ಣರೂಪಾ ಪರೇಶಯಾ ॥ 54 ॥
ದರ್ಭಾಗ್ರಧೀರ್ದಹರಗಾ ದರ್ಭಬ್ರಹ್ಮಾಸ್ತ್ರಭಾಮಿನೀ ।
ತ್ರೈಲೋಕ್ಯಮಾತಾ ತ್ರೈಲೋಕ್ಯಮೋಹಿನೀ ತ್ರಾತವಾಯಸಾ ॥ 55 ॥
ತ್ರಾಣೈಕಕಾರ್ಯಾ ತ್ರಿದಶಾ ತ್ರಿದಶಾಧೀಶಸೇವಿತಾ ।
ಲಕ್ಷ್ಮಣಾ ಲಕ್ಷ್ಮಣಾರಾಧ್ಯಾ ಲಕ್ಷ್ಮಣಾಗ್ರಜನಾಯಿಕಾ ॥ 56 ॥
ಲಂಕಾವಿನಾಶಿನೀ ಲಕ್ಷ್ಯಾ ಲಲನಾ ಲಲಿತಾಶಯಾ ।
ತಾರಕಾಖ್ಯಪ್ರಿಯಾ ತಾರಾ ತಾರಿಕಾ ತಾರ್ಕ್ಷ್ಯಗಾ ತರಿಃ ॥ 57 ॥
ತಾಟಕಾರಾತಿಮಹಿಷೀ ತಾಪತ್ರಯಕುಠಾರಿಕಾ ।
ತಾಮ್ರಾಧರಾ ತಾರ್ಕ್ಷ್ಯನುತಾ ತಾಮ್ರಾಕ್ಷೀ ತಾರಿತಾನತಾ ॥ 58 ॥
ರಘುವಂಶಪತಾಕಾ ಶ್ರೀರಘುನಾಥಸಧರ್ಮಿಣೀ ।
ವನಪ್ರಿಯಾ ವನಪರಾ ವನಜಾಕ್ಷೀ ವಿನೀತಿದಾ ॥ 59 ॥
ವಿದ್ಯಾಪ್ರಿಯಾ ವಿದ್ವದೀಡ್ಯಾ ವಿದ್ಯಾಽವಿದ್ಯಾವಿನಾಶಿನೀ ।
ಸರ್ವಾಧಾರಾ ಶಮಪರಾ ಶರಭಂಗಮುನಿಸ್ತುತಾ ॥ 60 ॥
ಬಿಲ್ವಪ್ರಿಯಾ ಬಲಿಮತೀ ಬಲಿಸಂಸ್ತುತವೈಭವಾ ।
ಬಲಿರಾಕ್ಷಸಸಂಹರ್ತ್ರೀ ಬಹುಕಾ ಬಹುವಿಗ್ರಹಾ ॥ 61 ॥
ಕ್ಷತ್ರಿಯಾನ್ತಕರಾರಾತಿಭಾರ್ಯಾ ಕ್ಷತ್ರಿಯವಂಶಜಾ ।
ಶರಣಾಗತಸಂರಕ್ಷಾ ಶರಚಾಪಾಸಿಪೂಜಿತಾ ॥ 62 ॥
ಶರೀರಭಾಜಿತರತಿಃ ಶರೀರಜಹರಸ್ತುತಾ ।
ಕಲ್ಯಾಣೀ ಕರುಣಾಮೂರ್ತಿಃ ಕಲುಷಘ್ನೀ ಕವಿಪ್ರಿಯಾ ॥ 63 ॥
ಅಚಕ್ಷುರಶ್ರುತಿರಪಾದಾಪ್ರಾಣಾ ಚಾಮನಾ ಅಧೀಃ ।
ಅಪಾಣಿಪಾದಾಽಪ್ಯವ್ಯಕ್ತಾ ವ್ಯಕ್ತಾ ವ್ಯಂಜಿತವಿಷ್ಟಪಾ ॥ 64 ॥
ಶಮೀಪ್ರಿಯಾ ಸಕಲದಾ ಶರ್ಮದಾ ಶರ್ಮರೂಪಿಣೀ ।
ಸುತೀಕ್ಷ್ಣವನ್ದನೀಯಾಂಘ್ರಿಃ ಸುತವದ್ವತ್ಸಲಾ ಸುಧೀಃ ॥ 65 ॥
ಸುತೀಕ್ಷ್ಣದಂಡಾ ಸುವ್ಯಕ್ತಾ ಸುತೀಭೂತಜಗತ್ತ್ರಯಾ ।
ಮಧುರಾ ಮಧುರಾಲಾಪಾ ಮಧುಸೂದನಭಾಮಿನೀ ॥ 66 ॥
ಮಾಧ್ವೀ ಚ ಮಾಧವಸತೀ ಮಾಧವೀಕುಸುಮಪ್ರಿಯಾ ।
ಪರಾ ಪರಭೃತಾಲಾಪಾ ಪರಾಪರಗತಿಪ್ರದಾ ॥ 67 ॥
ವಾಲ್ಮೀಕಿವದನಾಮ್ಭೋಧಿಸುಧಾ ಬಲಿರಿಪುಸ್ತುತಾ ।
ನೀಲಾಂಗದಾದಿವಿನುತಾ ನೀಲಾಂಗದವಿಭೂಷಿತಾ ॥ 68 ॥
ವಿದ್ಯಾಪ್ರದಾ ವಿಯನ್ಮಧ್ಯಾ ವಿದ್ಯಾಧರಕೃತಸ್ತವಾ ।
ಕುಲ್ಯಾ ಕುಶಲದಾ ಕಲ್ಯಾ ಕಲಾ ಕುಶಲವಪ್ರಸೂಃ ॥ 69 ॥
ವಶಿನೀ ವಿಶದಾ ವಶ್ಯಾ ವನ್ದ್ಯಾ ವನ್ದಾರುವತ್ಸಲಾ ।
ಮಾಹೇನ್ದ್ರೀ ಮಹದಾ ಮಹ್ಯಾ ಮೀನಾಕ್ಷೀ ಮೀನಕೇತನಾ ॥ 70 ॥
ಕಮನೀಯಾ ಕಲಾಮೂರ್ತಿಃ ಕುಪಿತಾಽಕುಪಿತಾ ಕೃಪಾ ।
ಅನಸೂಯಾಂಗರಾಗಾಂಕಾಽನಸೂಯಾ ಸೂರಿವನ್ದಿತಾ ॥ 71 ॥
ಅಮ್ಬಾ ಬಿಮ್ಬಾಧರಾ ಕಮ್ಬುಕನ್ಧರಾ ಮನ್ಥರಾ ಉಮಾ ।
ರಾಮಾನುಗಾಽಽರಾಮಚರೀ ರಾತ್ರಿಂಚರಭಯಂಕರೀ ॥ 72 ॥
ಏಕವೇಣೀಧರಾ ಭೂಮಿಶಯನಾ ಮಲಿನಾಮ್ಬರಾ ।
ರಕ್ಷೋಹರೀ ಗಿರಿಲಸದ್ವಕ್ಷೋಜಾ ಜ್ಞಾನವಿಗ್ರಹಾ ॥ 73 ॥
ಮೇಧಾ ಮೇಧಾವಿನೀ ಮೇಧ್ಯಾ ಮೈಥಿಲೀ ಮಾತೃವರ್ಜಿತಾ ।
ಅಯೋನಿಜಾ ವಯೋನಿತ್ಯಾ ಪಯೋನಿಧಿಸುತಾ ಪೃಥುಃ ॥ 74 ॥
ವಾನರರ್ಕ್ಷಪರೀವಾರಾ ವಾರಿಜಾಸ್ಯಾ ವರಾನ್ವಿತಾ ।
ದಯಾರ್ದ್ರಾಽಭಯದಾ ಭದ್ರಾ ನಿದ್ರಾಮುದ್ರಾ ಮುದಾಯತಿಃ ॥ 75 ॥
ಗೃಧ್ರಮೋಕ್ಷಪ್ರದಾ ಗೃಧ್ನುಃ ಗೃಹೀತವರಮಾಲಿಕಾ ।
ಶ್ವಶ್ರೇಯಸಪ್ರದಾ ಶಶ್ವದ್ಭವಾ ಶತಧೃತಿಪ್ರಸೂಃ ॥ 76 ॥
ಶರತ್ಪದ್ಮಪದಾ ಶಾನ್ತಾ ಶ್ವಶುರಾರ್ಪಿತಭೂಷಣಾ ।
ಲೋಕಾಧಾರಾ ನಿರಾನನ್ದಾ ನೀರಾಗಾ ನೀರಜಪ್ರಿಯಾ ॥ 77 ॥
ನೀರಜಾ ನಿಸ್ತಮಾ ನಿಃಸ್ವಾ ನೀರೀತಿರ್ನೀತಿನೈಪುಣಾ ।
ನಾರೀಮಣಿರ್ನರಾಕಾರಾ ನಿರಾಕಾರಾಽನಿರಾಕೃತಾ ॥ 78 ॥
ಕೌಮಾರೀ ಕೌಶಲನಿಧಿಃ ಕೌಶಿಕೀ ಕೌಸ್ತುಭಸ್ವಸಾ ।
ಸುಧಾಕರಾನುಜಾ ಸುಭ್ರೂಃ ಸುಜಾತಾ ಸೋಮಭೂಷಣಾ ॥ 79 ॥
ಕಾಲೀ ಕಲಾಪಿನೀ ಕಾನ್ತಿಃ ಕೌಶೇಯಾಮ್ಬರಮಂಡಿತಾ ।
ಶಶಕ್ಷತಜಸಂರಕ್ತಚನ್ದನಾಲಿಪ್ತಗಾತ್ರಕಾ ॥ 80 ॥
ಮಂಜೀರಮಂಡಿತಪದಾ ಮಂಜುವಾಕ್ಯಾ ಮನೋರಮಾ ।
ಗಾಯತ್ರ್ಯರ್ಥಸ್ವರೂಪಾ ಚ ಗಾಯತ್ರೀ ಗೋಗತಿಪ್ರದಾ ॥ 81 ॥
ಧನ್ಯಾಽಕ್ಷರಾತ್ಮಿಕಾ ಧೇನುಃ ಧಾರ್ಮಿಕಾ ಧರ್ಮವರ್ಧಿನೀ ।
ಏಲಾಲಕಾಽಪ್ಯೇಧಮಾನಕೃಪಾ ಕೃಸರತರ್ಪಿತಾ ॥ 82 ॥
ಕೃಷ್ಣಾ ಕೃಷ್ಣಾಲಕಾ ಕೃಷ್ಟಾ ಕಷ್ಟಘ್ನೀ ಖಂಡಿತಾಶರಾ ।
ಕಲಾಲಾಪಾ ಕಲಹಕೃದ್ದೂರಾ ಕಾವ್ಯಾಬ್ಧಿಕೌಮುದೀ ॥ 83 ॥
ಅಕಾರಣಾ ಕಾರಣಾತ್ಮಾ ಕಾರಣಾವಿನಿವರ್ತಿನೀ ।
ಕವಿಪ್ರಿಯಾ ಕವನದಾ ಕೃತಾರ್ಥಾ ಕೃಷ್ಣಭಾಮಿನೀ ॥ 84 ॥
ರುಕ್ಮಿಣೀ ರುಕ್ಮಿಭಗಿನೀ ರುಚಿರಾ ರುಚಿದಾ ರುಚಿಃ ।
ರುಕ್ಮಪ್ರಿಯಾ ರುಕ್ಮಭೂಷಾ ರೂಪಿಣೀ ರೂಪವರ್ಜಿತಾ ॥ 85 ॥ಪೃ
ಅಭೀಷ್ಮಾ ಭೀಷ್ಮತನಯಾ ಭೀತಿಹೃದ್ಭೂತಿದಾಯಿನೀ ।
ಸತ್ಯಾ ಸತ್ಯವ್ರತಾ ಸಹ್ಯಾ ಸತ್ಯಭಾಮಾ ಶುಚಿವ್ರತಾ ॥ 86 ॥
ಸಮ್ಪನ್ನಾ ಸಂಹಿತಾ ಸಮ್ಪತ್ ಸವಿತ್ರೀ ಸವಿತೃಸ್ತುತಾ ।
ದ್ವಾರಕಾನಿಲಯಾ ದ್ವಾರಭೂತಾ ದ್ವಿಪದಗಾ ದ್ವಿಪಾತ್ ॥ 87 ॥
ಏಕೈಕಾತ್ಮೈಕರೂಪೈಕಪತ್ನೀ ಚೈಕೇಶ್ವರೀ ಪ್ರಸೂಃ ।
ಅಜ್ಞಾನಧ್ವಾನ್ತಸೂರ್ಯಾರ್ಚಿಃ ದಾರಿದ್ರ್ಯಾಗ್ನಿಘನಾವಲೀ ॥ 88 ॥
ಪ್ರದ್ಯುಮ್ನಜನನೀ ಪ್ರಾಪ್ಯಾ ಪ್ರಕೃಷ್ಟಾ ಪ್ರಣತಿಪ್ರಿಯಾ ।
ವಾಸುದೇವಪ್ರಿಯಾ ವಾಸ್ತುದೋಷಘ್ನೀ ವಾರ್ಧಿಸಂಶ್ರಿತಾ ॥ 89 ॥
ವತ್ಸಲಾ ಕೃತ್ಸ್ನಲಾವಣ್ಯಾ ವರ್ಣ್ಯಾ ಗಣ್ಯಾ ಸ್ವತನ್ತಿರಕಾ ।
ಭಕ್ತಾ ಭಕ್ತಪರಾಧೀನಾ ಭವಾನೀ ಭವಸೇವಿತಾ ॥ 90 ॥
ರಾಧಾಪರಾಧಸಹನೀ ರಾಧಿತಾಶೇಷಸಜ್ಜನಾ ।
ಕೋಮಲಾ ಕೋಮಲಮತಿಃ ಕುಸುಮಾಹಿತಶೇಖರಾ ॥ 91 ॥
ಕುರುವಿನ್ದಮಣಿಶ್ರೇಣೀಭೂಷಣಾ ಕೌಮುದೀರುಚಿಃ ।
ಅಮ್ಲಾನಮಾಲ್ಯಾ ಸಮ್ಮಾನಕಾರಿಣೀ ಸರಯೂರುಚಿಃ ॥ 92 ॥
ಕಟಾಕ್ಷನೃತ್ಯತ್ಕರುಣಾ ಕನಕೋಜ್ಜ್ವಲಭೂಷಣಾ ।
ನಿಷ್ಟಪ್ತಕನಕಾಭಾಂಗೀ ನೀಲಕುಂಚಿತಮೂರ್ಧಜಾ ॥ 93 ॥
ವಿಶೃಂಖಲಾ ವಿಯೋನಿಸ್ಥಾ ವಿದ್ಯಮಾನಾ ವಿದಾಂವರಾ ।
ಶೃಂಗಾರಿಣೀ ಶಿರೀಷಾಂಗೀ ಶಿಶಿರಾ ಶಿರಸಿ ಸ್ಥಿತಾ ॥ 94 ॥
ಸೂರ್ಯಾತ್ಮಿಕಾ ಸೂರಿನಮ್ಯಾ ಸೂರ್ಯಮಂಡಲವಾಸಿನೀ ।
ವಹ್ನಿಶೈತ್ಯಕರೀ ವಹ್ನಿಪ್ರವಿಷ್ಟಾ ವಹ್ನಿಶೋಭಿತಾ ॥ 95 ॥
ನಿರ್ಹೇತುರಕ್ಷಿಣೀ ನಿಷ್ಕಾಭರಣಾ ನಿಷ್ಕದಾಯಿನೀ ।
ನಿರ್ಮಮಾ ನಿರ್ಮಿತಜಗನ್ನಿಸ್ತಮಸ್ಕಾ ನಿರಾಶ್ರಯಾ ॥ 96 ॥
ನಿರಯಾರ್ತಿಹರೀ ನಿಘ್ನಾ ನಿಹಿತಾ ನಿಹತಾಸುರಾ ।
ರಾಜ್ಯಾಭಿಷಿಕ್ತಾ ರಾಜ್ಯೇಶೀ ರಾಜ್ಯದಾ ರಾಜಿತಾಶ್ರಿತಾ ॥ 97 ॥
ರಾಕೇನ್ದುವದನಾ ರಾತ್ರಿಚರಘ್ನೀ ರಾಷ್ಟ್ರವಲ್ಲಭಾ ।
ಶ್ರಿತಾಚ್ಯುತಪ್ರಿಯಾ ಶ್ರೋತ್ರೀ ಶ್ರೀದಾಮಸಖವಲ್ಲಭಾ ॥ 98 ॥
ರಮಣೀ ರಮಣೀಯಾಂಗೀ ರಮಣೀಯಗುಣಾಶ್ರಯಾ ।
ರತಿಪ್ರಿಯಾ ರತಿಕರೀ ರಕ್ಷೋಘ್ನೀ ರಕ್ಷಿತಾಂಡಕಾ ॥ 99 ॥
ರಸರೂಪಾ ರಸಾತ್ಮೈಕರಸಾ ರಸಪರಾಶ್ರಿತಾ ।
ರಸಾತಲಸ್ಥಿತಾ ರಾಸತತ್ಪರಾ ರಥಗಾಮಿನೀ ॥ 100 ॥
ಅಶ್ವಾರೂಢಾ ಗಜಾರೂಢಾ ಶಿಬಿಕಾತಲಶಾಯಿನೀ ।
ಚಲತ್ಪಾದಾ ಚಲದ್ವೇಣೀ ಚತುರಂಗಬಲಾನುಗಾ ॥ 101 ॥
ಚಂಚಚ್ಚನ್ದ್ರಕರಾಕಾರಾ ಚತುರ್ಥೀ ಚತುರಾಕೃತಿಃ ।
ಚೂರ್ಣೀಕೃತಾಶರಾ ಚೂರ್ಣಾಲಕಾ ಚೂತಫಲಪ್ರಿಯಾ ॥ 102 ॥
ಶಿಖಾಶೀಘ್ರಾ ಶಿಖಾಕಾರಾ ಶಿಖಾವಿಧೃತಮಲ್ಲಿಕಾ ।
ಶಿಕ್ಷಾಶಿಕ್ಷಿತಮೂರ್ಖಾಲಿಃ ಶೀತಾಽಶೀತಾ ಶತಾಕೃತಿಃ ॥ 103 ॥
ವೈಷ್ಣವೀ ವಿಷ್ಣುಸದೃಶೀ ವಿಷ್ಣುಲೋಕಪ್ರದಾ ವೃಷಾ ।
ವೀಣಾಗಾನಪ್ರಿಯಾ ವೀಣಾ ವೀಣಾಧರಮುನಿಸ್ತುತಾ ॥ 104 ॥
ವೈದಿಕೀ ವೈದಿಕಾಚಾರಪ್ರೀತಾ ವೈದೂರ್ಯಭೂಷಣಾ ।
ಸುನ್ದರಾಂಗೀ ಸುಹೃತ್ಸ್ಫೀತಾ ಸಾಕ್ಷಿಣೀ ಸಾಕ್ಷಮಾಲಿಕಾ ॥ 105 ॥
ಕ್ರಿಯಾ ಕ್ರಿಯಾಪರಾ ಕ್ರೂರಾ ಕ್ರೂರರಾಕ್ಷಸಹಾರಿಣೀ ।
ತಲ್ಪಸ್ಥಾ ತರಣಿಸ್ಥಾನಾ ತಾಪತ್ರಯನಿವಾರಿಣೀ ॥ 106 ॥
ತೀರ್ಣಪ್ರತಿಜ್ಞಾ ತೀರ್ಥೇಶೀ ತೀರ್ಥಪಾದಾ ತಿಥಿಪ್ರಿಯಾ ।
ಚರ್ಯಾ ಚರಣದಾ ಚೀರ್ಣಾ ಚೀರಾಂಕಾ ಚತ್ವರಸ್ಥಿತಾ ॥ 107 ॥
ಲತಾ ಲತಾಂಗೀ ಲಾವಣ್ಯಾ ಲಘ್ವೀ ಲಕ್ಷ್ಯಾಶರಾಲಯಾ ।
ಲೀಲಾ ಲೀಲಾಹತಖಲಾ ಲೀನಾ ಲೀಢಾ ಶುಭಾವಲಿಃ ॥ 108 ॥
ಲೂತೋಪಮಾನಾ ಲೂನಾಘಾ ಲೋಲಾಽಲೋಲವಿಭೂತಿದಾ ।
ಅಮರ್ತ್ಯಾ ಮರ್ತ್ಯಸುಲಭಾ ಮಾನುಷೀ ಮಾನವೀ ಮನುಃ ॥ 109 ॥
ಸುಗನ್ಧಾ ಸುಹಿತಾ ಸೂಕ್ಷ್ಮಾ ಸೂಕ್ಷ್ಮಮಧ್ಯಾ ಸುತೋಜ್ಜ್ವಲಾ ।
ಮಣಿರ್ಮಣಿಮತೀ ಮಂಜುಗಮನಾ ಮಹಿತಾ ಮುನಿಃ ॥ 110 ॥
ಮಿತಾಽಮಿತಸುಖಾಕಾರಾ ಮೀಲಿತಾ ಮೀನಲೋಚನಾ ।
ಗೋಮತೀ ಗೋಕುಲಸ್ಥಾನಾ ಗೋದಾ ಗೋಕುಲವಾಸಿನೀ ॥ 111 ॥
ಗಜೇನ್ದ್ರಗಾಮಿನೀ ಗಮ್ಯಾ ಮಾದ್ರೀ ಮಾಯಾವಿನೀ ಮಧುಃ ।
ತ್ರಿಲೋಚನನುತಾ ತ್ರಿಷ್ಟುಬನಷ್ಟುಪ್ಪಂಕ್ತಿರೂಪಿಣೀ ॥ 112 ॥
ದ್ವಿಪಾತ್ತ್ರಿಪಾದಷ್ಟಪದೀ ನವಪಾಚ್ಚ ಚತುಷ್ಪದೀ ।
ಪಂಕ್ತ್ಯಾನನೋಪದೇಷ್ಟ್ರೀ ಚ ಶಾರದಾ ಪಂಕ್ತಿಪಾವನೀ ॥ 113 ॥
ಶೇಖರೀಭೂತಶೀತಾಂಶುಃ ಶೇಷತಲ್ಪಾಧಿಶಾಯಿನೀ ।
ಶೇಮುಷೀ ಮುಷಿತಾಶೇಷಪಾತಕಾ ಮಾತೃಕಾಮಯೀ ॥ 114 ॥
ಶಿವವನ್ದ್ಯಾ ಶಿಖರಿಣೀ ಹರಿಣೀ ಕರಿಣೀ ಸೃಣಿಃ ।
ಜಗಚ್ಚಕ್ಷುರ್ಜಗನ್ಮಾತಾ ಜಂಗಮಾಜಂಗಮಪ್ರಸೂಃ ॥ 115 ॥
ಸರ್ವಶಬ್ದಾ ಸರ್ವಮುಕ್ತಿಃ ಸರ್ವಭಕ್ತಿಸ್ಸಮಾಹಿತಾ ।
ಕ್ಷೀರಪ್ರಿಯಾ ಕ್ಷಾಲಿತಾಘಾ ಕ್ಷೀರಾಮ್ಬುಧಿಸುತಾಽಕ್ಷಯಾ ॥ 116 ॥
ಮಾಯಿನೀ ಮಥನೋದ್ಭೂತಾ ಮುಗ್ಧಾ ದುಗ್ಧೋಪಮಸ್ಥಿತಾ ।
ವಶಗಾ ವಾಮನಯನಾ ಹಂಸಿನೀ ಹಂಸಸೇವಿತಾ ॥ 117 ॥
ಅನಂಗಾಽನಂಗಜನನೀ ಸುತುಂಗಪದದಾಯಿನೀ ।
ವಿಶ್ವಾ ವಿಶ್ವೇಡಿತಾ ವಿಶ್ವಧಾತ್ರೀ ವಿಶ್ವಾಧಿಕಾರ್ಥದಾ ॥ 118 ॥
ಗದ್ಯಪದ್ಯಸ್ತುತಾ ಗನ್ತ್ರೀ ಗಚ್ಛನ್ತೀ ಗರುಡಾಸನಾ ।
ಪಶ್ಯನ್ತೀ ಶೃಣ್ವತೀ ಸ್ಪರ್ಶಕರ್ತ್ರೀ ರಸನಿರೂಪಿಣೀ ॥ 119 ॥
ಭೃತ್ಯಪ್ರಿಯಾ ಭೃತಿಕರೀ ಭರಣೀಯಾ ಭಯಾಪಹಾ ।
ಪ್ರಕರ್ಷದಾ ಪ್ರಸಿದ್ಧೇಶಾ ಪ್ರಮಾಣಂ ಪ್ರಮಿತಿಃ ಪ್ರಮಾ ॥ 120 ॥
ಆಕಾಶರೂಪಿಣ್ಯಧ್ಯಸ್ತಾ ಮಧ್ಯಸ್ಥಾ ಮಧ್ಯಮಾ ಮಿತಿಃ ।
ತಲೋದರೀ ತಲಕರೀ ತಟಿದ್ರೂಪಾ ತರಂಗಿಣೀ ॥ 121 ॥
ಅಕಮ್ಪಾ ಕಮ್ಪಿತರಿಪುಃ ಜಮ್ಭಾರಿಸುಖದಾಯಿನೀ ।
ದಯಾವಿಷ್ಟಾ ಶಿಷ್ಟಸುಹೃತ್ ವಿಷ್ಟರಶ್ರವಸಃಪ್ರಿಯಾ ॥ 122 ॥
ಹೃಷೀಕಸುಖದಾ ಹೃದ್ಯಾಽಭೀತಾ ಭೀತಾರ್ತಿಹಾರಿಣೀ ।
ಮಾತಾ ಮನುಮುಖಾರಾಧ್ಯಾ ಮಾತಂಗೀ ಮಾನಿತಾಖಿಲಾ ॥ 123 ॥
ಭೃಗುಪ್ರಿಯಾ ಭ್ರುಗುಸುತಾ ಭಾರ್ಗವೇಡ್ಯಾ ಮಹಾಬಲಾ ।
ಅನುಕೂಲಾಽಮಲತನುಃ ಲೋಪಹೀನಾ ಲಿಪಿಸ್ತುತಾ ॥ 124 ॥
ಅನ್ನದಾಽನ್ನಸ್ವರೂಪಽನ್ನಪೂರ್ಣಾಽಪರ್ಣಾ ಋಣಾಪಹಾ ।
ವೃನ್ದಾ ವೃನ್ದಾವನರತಿಃ ಬನ್ದೀಭೂತಾಮರೀಸ್ತುತಾ ॥ 125 ॥
ತೇಜಸ್ವಿನೀ ತುರ್ಯಪೂಜ್ಯಾ ತೇಜಸ್ತ್ರಿತಯರೂಪಿಣೀ ।
ಷಡಾಸ್ಯಜಯದಾ ಷಷ್ಠೀ ಷಡೂರ್ಮಿಪರಿವರ್ಜಿತಾ ॥ 126 ॥
ಷಡ್ಜಪ್ರಿಯಾ ಸತ್ತ್ವರೂಪಾ ಸವ್ಯಮಾರ್ಗಪ್ರಪೂಜಿತಾ ।
ಸನಾತನತನುಸ್ಸನ್ನಾ ಸಮ್ಪನ್ಮೂರ್ತಿಃ ಸರೀಸೃಪಾ ॥ 127 ॥
ಜಿತಾಶಾ ಜನ್ಮಕರ್ಮಾದಿನಾಶಿನೀ ಜ್ಯೇಷ್ಠರೂಪಿಣೀ ।
ಜನಾರ್ದನಹೃದಾವಾಸಾ ಜನಾನನ್ದಾ ಜಯಾಽಜನಿಃ ॥ 128 ॥
ವಾಸನಾ ವಾಸನಾಹನ್ತ್ರೀ ವಾಮಾ ವಾಮವಿಲೋಚನಾ ।
ಪಯಸ್ವಿನೀ ಪೂತತನುಃ ಪಾತ್ರೀ ಪರಿಷದರ್ಚಿತಾ ॥ 129 ॥
ಮಹಾಮೋಹಪ್ರಮಥಿನೀ ಮಹಾಹರ್ಷಾ ಮಹಾಧೃತಿಃ ।
ಮಹಾವೀರ್ಯಾ ಮಹಾಚರ್ಯಾ ಮಹಾಪ್ರೀತಾ ಮಹಾಗುಣಾ ॥ 130 ॥
ಮಹಾಶಕ್ತಿರ್ಮಹಾಸಕ್ತಿಃ ಮಹಾಜ್ಞಾನಾ ಮಹಾರತಿಃ ।
ಮಹಾಪೂಜ್ಯಾ ಮಹೇಜ್ಯಾ ಚ ಮಹಾಲಾಭಪ್ರದಾ ಮಹೀ ॥ 131 ॥
ಮಹಾಸಮ್ಪನ್ಮಹಾಕಮ್ಪಾ ಮಹಾಲಕ್ಷ್ಯಾ ಮಹಾಶಯಾ ।
ಮಹಾರೂಪಾ ಮಹಾಧೂಪಾ ಮಹಾಮತಿರ್ಮಹಾಮಹಾ ॥ 132 ॥
ಮಹಾರೋಗಹರೀ ಮುಕ್ತಾ ಮಹಾಲೋಭಹರೀ ಮೃಡಾ ।
ಮೇದಸ್ವಿನೀ ಮಾತೃಪೂಜ್ಯಾ ಮೇಯಾ ಮಾ ಮಾತೃರೂಪಿಣೀ ॥ 133 ॥
ನಿತ್ಯಮುಕ್ತಾ ನಿತ್ಯಬುದ್ಧಾ ನಿತ್ಯತೃಪ್ತಾ ನಿಧಿಪ್ರದಾ ।
ನೀತಿಜ್ಞಾ ನೀತಿಮದ್ವನ್ದ್ಯಾ ನೀತಾ ಪ್ರೀತಾಚ್ಯುತಪ್ರಿಯಾ ॥ 134 ॥
ಮಿತ್ರಪ್ರಿಯಾ ಮಿತ್ರವಿನ್ದಾ ಮಿತ್ರಮಂಡಲಶೋಭಿನೀ ।
ನಿರಂಕುಶಾ ನಿರಾಧಾರಾ ನಿರಾಸ್ಥಾನಾ ನಿರಾಮಯಾ ॥ 135 ॥
ನಿರ್ಲೇಪಾ ನಿಃಸ್ಪೃಹಾ ನೀಲಕಬರೀ ನೀರಜಾಸನಾ ।
ನಿರಾಬಾಧಾ ನಿರಾಕರ್ತ್ರೀ ನಿಸ್ತುಲಾ ನಿಷ್ಕಭೂಷಿತಾ ॥ 136 ॥
ನಿರಂಜನಾ ನಿರ್ಮಥನಾ ನಿಷ್ಕ್ರೋಧಾ ನಿಷ್ಪರಿಗ್ರಹಾ ।
ನಿರ್ಲೋಭಾ ನಿರ್ಮಲಾ ನಿತ್ಯತೇಜಾ ನಿತ್ಯಕೃಪಾನ್ವಿತಾ ॥ 137 ॥
ಧನಾಢ್ಯಾ ಧರ್ಮನಿಲಯಾ ಧನದಾ ಧನದಾರ್ಚಿತಾ ।
ಧರ್ಮಕರ್ತ್ರೀ ಧರ್ಮಗೋಪ್ತ್ರೀ ಧರ್ಮಿಣೀ ಧರ್ಮದೇವತಾ ॥ 138 ॥
ಧಾರಾ ಧರಿತ್ರೀ ಧರಣಿಃ ಧುತಪಾಪಾ ಧುತಾಶರಾ ।
ಸ್ತ್ರೀದೇವತಾಽಕ್ರೋಧನಾಥಾಽಮೋಹಾಽಲೋಭಾಽಮಿತಾರ್ಥದಾ ॥ 139 ॥
ಕಾಲರೂಪಾಽಕಾಲವಶಾ ಕಾಲಜ್ಞಾ ಕಾಲಪಾಲಿನೀ ।
ಜ್ಞಾನಿಧ್ಯೇಯಾ ಜ್ಞಾನಿಗಮ್ಯಾ ಜ್ಞಾನದಾನಪರಾಯಣಾ ॥ 140 ॥
ಇತಿ ಶ್ರೀನಾರದೀಯೋಪಪುರಾಣಾನ್ತರ್ಗತಂ ಶ್ರೀಲಕ್ಷ್ಮೀಸಹಸ್ರನಾಮಸ್ತೋತ್ರಂ 2 ಸಮ್ಪೂರ್ಣಮ್ ॥
Also Read 1000 Names of Shri Laxmi:
1000 Names of of Sri Lakshmi | Sahasranama Stotram 2 Lyrics in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil
