Anu Geetaa in Bengali:
॥ অনুগীতা ॥(Adhyaya 16-19 Ashvamedhika, Mahabharata)
অধ্যায়ঃ ১৬
জনমেজয় উবাচ
সভায়াং বসতোস্তস্যাং নিহত্যারীন্মহাত্মনোঃ ।
কেশবার্জুনয়োঃ কা নু কথা সমভবদ্দ্বিজ ॥ ১ ॥
বৈশম্পায়ন উবাচ
কৃষ্ণেন সহিতঃ পার্থঃ স্বরাজ্যং প্রাপ্য কেবলম্ ।
তস্যাং সভায়াং রম্যায়াং বিজহার মুদা যুতঃ ॥ ২ ॥
ততঃ কং চিৎসভোদ্দেশং স্বর্গোদ্দেশ সমং নৃপ ।
যদৃচ্ছয়া তৌ মুদিতৌ জগ্মতুঃ স্বজনাবৃতৌ ॥ ৩ ॥
ততঃ প্রতীতঃ কৃষ্ণেন সহিতঃ পাণ্ডবোঽর্জুনঃ ।
নিরীক্ষ্য তাং সভাং রম্যামিদং বচনমব্রবীৎ ॥ ৪ ॥
বিদিতং তে মহাবাহো সঙ্গ্রামে সমুপস্থিতে ।
মাহাত্ম্যং দেবকী মাতস্তচ্চ তে রূপমৈশ্বরম্ ॥ ৫ ॥
যত্তু তদ্ভবতা প্রোক্তং তদা কেশব সৌহৃদাৎ ।
তৎসর্বং পুরুষব্যাঘ্র নষ্টং মে নষ্টচেতসঃ ॥ ৬ ॥
মম কৌতূহলং ৎবস্তি তেষ্বর্থেষু পুনঃ প্রভো ।
ভবাংশ্চ দ্বারকাং গন্তা নচিরাদিব মাধব ॥ ৭ ॥
বৈশন্পায়ন উবাচ
এবমুক্তস্ততঃ কৃষ্ণঃ ফল্গুনং প্রত্যভাষত ।
পরিষ্বজ্য মহাতেজা বচনং বদতাং বরঃ ॥ ৮ ॥
বাসুদেব উবাচ
শ্রাবিতস্ত্বং ময়া গুহ্যং জ্ঞাপিতশ্চ সনাতনম্ ।
ধর্মং স্বরূপিণং পার্থ সর্বলোকাংশ্চ শাশ্বতান্ ॥ ৯ ॥
অবুদ্ধ্বা যন্ন গৃহ্ণীথাস্তন্মে সুমহদপ্রিয়ম্ ।
নূনমশ্রদ্দধানোঽসি দুর্মেধাশ্চাসি পাণ্ডব ॥ ১০ ॥
স হি ধর্মঃ সুপর্যাপ্তো ব্রহ্মণঃ পদবেদনে ।
ন শক্যং তন্ময়া ভূয়স্তথা বক্তুমশেষতঃ ॥ ১১ ॥
পরং হি ব্রহ্ম কথিতং যোগয়ুক্তেন তন্ময়া ।
ইতিহাসং তু বক্ষ্যামি তস্মিন্নর্থে পুরাতনম্ ॥ ১২ ॥
যথা তাং বুদ্ধিমাস্থায় গতিমগ্র্যাং গমিষ্যসি ।
শৃণু ধর্মভৃতাং শ্রেষ্ঠ গদতঃ সর্বমেব মে ॥ ১৩ ॥
আগচ্ছদ্ব্রাহ্মণঃ কশ্চিৎস্বর্গলোকাদরিন্দম ।
ব্রহ্মলোকাচ্চ দুর্ধর্ষঃ সোঽস্মাভিঃ পূজিতোঽভবৎ ॥ ১৪ ॥
অস্মাভিঃ পরিপৃষ্টশ্চ যদাহ ভরতর্ষভ ।
দিব্যেন বিধিনা পার্থ তচ্ছৃণুষ্বাবিচারয়ন্ ॥ ১৫ ॥
ব্রাহ্মণ উবাচ
মোক্ষধর্মং সমাশ্রিত্য কৃষ্ণ যন্মানুপৃচ্ছসি ।
ভূতানামনুকম্পার্থং যন্মোহচ্ছেদনং প্রভো ॥ ১৬ ॥
তত্তেঽহং সম্প্রবক্ষ্যামি যথাবন্মধুসূদন ।
শৃণুষ্বাবহিতো ভূৎবা গদতো মম মাধব ॥ ১৭ ॥
কশ্চিদ্বিপ্রস্তপো যুক্তঃ কাশ্যপো ধর্মবিত্তমঃ ।
আসসাদ দ্বিজং কং চিদ্ধর্মাণামাগতাগমম্ ॥ ১৮ ॥
গতাগতে সুবহুশো জ্ঞানবিজ্ঞানপারগম্ ।
লোকতত্ত্বার্থ কুশলং জ্ঞাতারং সুখদুঃখয়োঃ ॥ ১৯ ॥
জাতী মরণতত্ত্বজ্ঞং কোবিদং পুণ্যপাপয়োঃ ।
দ্রষ্টারমুচ্চনীচানাং কর্মভির্দেহিনাং গতিম্ ॥ ২০ ॥
চরন্তং মুক্তবৎসিদ্ধং প্রশান্তং সংয়তেন্দ্রিয়ম্ ।
দীপ্যমানং শ্রিয়া ব্রাহ্ম্যা ক্রমমাণং চ সর্বশঃ ॥ ২১ ॥
অন্তর্ধানগতিজ্ঞং চ শ্রুৎবা তত্ত্বেন কাশ্যপঃ ।
তথৈবান্তর্হিতৈঃ সিদ্ধৈর্যান্তং চক্রধরৈঃ সহ ॥ ২২ ॥
সম্ভাষমাণমেকান্তে সমাসীনং চ তৈঃ সহ ।
যদৃচ্ছয়া চ গচ্ছন্তমসক্তং পবনং যথা ॥ ২৩ ॥
তং সমাসাদ্য মেধাবী স তদা দ্বিজসত্তমঃ ।
চরণৌ ধর্মকামো বৈ তপস্বী সুসমাহিতঃ ।
প্রতিপেদে যথান্যায়ং ভক্ত্যা পরময়া যুতঃ ॥ ২৪ ॥
বিস্মিতশ্চাদ্ভুতং দৃষ্ট্বা কাশ্যপস্তং দ্বিজোত্তমম্ ।
পরিচারেণ মহতা গুরুং বৈদ্যমতোষয়ৎ ॥ ২৫ ॥
প্রীতাত্মা চোপপন্নশ্চ শ্রুতচারিত্য সংয়ুতঃ ।
ভাবেন তোষয়চ্চৈনং গুরুবৃত্ত্যা পরন্তপঃ ॥ ২৬ ॥
তস্মৈ তুষ্টঃ স শিষ্যায় প্রসন্নোঽথাব্রবীদ্গুরুঃ ।
সিদ্ধিং পরামভিপ্রেক্ষ্য শৃণু তন্মে জনার্দন ॥ ২৭ ॥
সিদ্ধ উবাচ
বিবিধৈঃ কর্মভিস্তাত পুণ্যযোগৈশ্চ কেবলৈঃ ।
গচ্ছন্তীহ গতিং মর্ত্যা দেবলোকেঽপি চ স্থিতিম্ ॥ ২৮ ॥
ন ক্ব চিৎসুখমত্যন্তং ন ক্ব চিচ্ছাশ্বতী স্থিতিঃ ।
স্থানাচ্চ মহতো ভ্রংশো দুঃখলব্ধাৎপুনঃ পুনঃ ॥ ২৯ ॥
অশুভা গতয়ঃ প্রাপ্তাঃ কষ্টা মে পাপসেবনাৎ ।
কামমন্যুপরীতেন তৃষ্ণয়া মোহিতেন চ ॥ ৩০ ॥
পুনঃ পুনশ্চ মরণং জন্ম চৈব পুনঃ পুনঃ ।
আহারা বিবিধা ভুক্তাঃ পীতা নানাবিধাঃ স্তনাঃ ॥ ৩১ ॥
মাতরো বিবিধা দৃষ্টাঃ পিতরশ্চ পৃথগ্বিধাঃ ।
সুখানি চ বিচিত্রাণি দুঃখানি চ ময়ানঘ ॥ ৩২ ॥
প্রিয়ৈর্বিবাসো বহুশঃ সংবাসশ্চাপ্রিয়ৈঃ সহ ।
ধননাশশ্চ সম্প্রাপ্তো লব্ধ্বা দুঃখেন তদ্ধনম্ ॥ ৩৩ ॥
অবমানাঃ সুকষ্টাশ্চ পরতঃ স্বজনাত্তথা ।
শারীরা মানসাশ্চাপি বেদনা ভৃশদারুণাঃ ॥ ৩৪ ॥
প্রাপ্তা বিমাননাশ্চোগ্রা বধবন্ধাশ্চ দারুণাঃ ।
পতনং নিরয়ে চৈব যাতনাশ্চ যমক্ষয়ে ॥ ৩৫ ॥
জরা রোগাশ্চ সততং বাসনানি চ ভূরিশঃ ।
লোকেঽস্মিন্ননুভূতানি দ্বন্দ্বজানি ভৃশং ময়া ॥ ৩৬ ॥
ততঃ কদা চিন্নির্বেদান্নিকারান্নিকৃতেন চ ।
লোকতন্ত্রং পরিত্যক্তং দুঃখার্তেন ভৃশং ময়া ।
ততঃ সিদ্ধিরিয়ং প্রাপ্তা প্রসাদাদাত্মনো ময়া ॥ ৩৭ ॥
নাহং পুনরিহাগন্তা লোকানালোকয়াম্যহম্ ।
আ সিদ্ধেরা প্রজা সর্গাদাত্মনো মে গতিঃ শুভা ॥ ৩৮ ॥
উপলব্ধা দ্বিজশ্রেষ্ঠ তথেয়ং সিদ্ধিরুত্তমা ।
ইতঃ পরং গমিষ্যামি ততঃ পরতরং পুনঃ ।
ব্রহ্মণঃ পদমব্যগ্রং মা তেঽভূদত্র সংশয়ঃ ॥ ৩৯ ॥
নাহং পুনরিহাগন্তা মর্ত্যলোকে পরন্তপ ।
প্রীতোঽস্মি তে মহাপ্রাজ্ঞ ব্রূহি কিং করবাণি তে ॥ ৪০ ॥
যদীপ্সুরুপপন্নস্ত্বং তস্য কালোঽয়মাগতঃ ।
অভিজানে চ তদহং যদর্থং মা ৎবমাগতঃ ।
অচিরাত্তু গমিষ্যামি যেনাহং ৎবামচূচুদম্ ॥ ৪১ ॥
ভৃশং প্রীতোঽস্মি ভবতশ্চারিত্রেণ বিচক্ষণ ।
পরিপৃচ্ছ যাবদ্ভবতে ভাষেয়ং যত্তবেপ্সিতম্ ॥ ৪২ ॥
বহু মন্যে চ তে বুদ্ধিং ভৃশং সম্পূজয়ামি চ ।
যেনাহং ভবতা বুদ্ধো মেধাবী হ্যসি কাশ্যপ ॥ ৪৩ ॥
ইতি শ্রীমহাভারতে আশ্বমেধিকে পর্বণি অনুগীতাপর্বণি সপ্তদশোঽধ্যায়ঃ ॥
অধ্যায়ঃ ১৭
বাসুদেব উবাচ
ততস্তস্যোপসঙ্গৃহ্য পাদৌ প্রশ্নান্সুদুর্বচান্ ।
পপ্রচ্ছ তাংশ্চ সর্বান্স প্রাহ ধর্মভৃতাং বরঃ ॥ ১ ॥
কাশ্যপ উবাচ
কথং শরীরং চ্যবতে কথং চৈবোপপদ্যতে ।
কথং কষ্টাচ্চ সংসারাৎসংসরন্পরিমুচ্যতে ॥ ২ ॥
আত্মানং বা কথং যুক্ত্বা তচ্ছরীরং বিমুঞ্চতি ।
শরীরতশ্চ নির্মুক্তঃ কথমন্যৎপ্রপদ্যতে ॥ ৩ ॥
কথং শুভাশুভে চায়ং কর্মণী স্বকৃতে নরঃ ।
উপভুঙ্ক্তে ক্ব বা কর্ম বিদেহস্যোপতিষ্ঠতি ॥ ৪ ॥
ব্রাহ্মণ উবাচ
এবং সঞ্চোদিতঃ সিদ্ধঃ প্রশ্নাংস্তান্প্রত্যভাষত ।
আনুপূর্ব্যেণ বার্ষ্ণেয় যথা তন্মে বচঃ শৃণু ॥ ৫ ॥
সিদ্ধ উবাচ
আয়ুঃ কীর্তিকরাণীহ যানি কর্মাণি সেবতে ।
শরীরগ্রহণেঽন্যস্মিংস্তেষু ক্ষীণেষু সর্বশঃ ॥ ৬ ॥
আয়ুঃ ক্ষয়পরীতাত্মা বিপরীতানি সেবতে ।
বুদ্ধির্ব্যাবর্ততে চাস্য বিনাশে প্রত্যুপস্থিতে ॥ ৭ ॥
সত্ত্বং বলং চ কালং চাপ্যবিদিৎবাত্মনস্তথা ।
অতিবেলমুপাশ্নাতি তৈর্বিরুদ্ধান্যনাত্মবান্ ॥ ৮ ॥
যদায়মতিকষ্টানি সর্বাণ্যুপনিষেবতে ।
অত্যর্থমপি বা ভুঙ্ক্তে ন বা ভুঙ্ক্তে কদা চন ॥ ৯ ॥
দুষ্টান্নং বিষমান্নং চ সোঽন্যোন্যেন বিরোধি চ ।
গুরু বাপি সমং ভুঙ্ক্তে নাতিজীর্ণেঽপি বা পুনঃ ॥ ১০ ॥
ব্যায়ামমতিমাত্রং বা ব্যবায়ং চোপসেবতে ।
সততং কর্ম লোভাদ্বা প্রাপ্তং বেগবিধারণম্ ॥ ১১ ॥
রসাতিয়ুক্তমন্নং বা দিবা স্বপ্নং নিষেবতে ।
অপক্বানাগতে কালে স্বয়ং দোষান্প্রকোপয়ন্ ॥ ১২ ॥
স্বদোষকোপনাদ্রোগং লভতে মরণান্তিকম্ ।
অথ চোদ্বন্ধনাদীনি পরীতানি ব্যবস্যতি ॥ ১৩ ॥
তস্য তৈঃ কারণৈর্জন্তোঃ শরীরাচ্চ্যবতে যথা ।
জীবিতং প্রোচ্যমানং তদ্যথাবদুপধারয় ॥ ১৪ ॥
ঊষ্মা প্রকুপিতঃ কায়ে তীব্রবায়ুসমীরিতঃ ।
শরীরমনুপর্যেতি সর্বান্প্রাণান্রুণদ্ধি বৈ ॥ ১৫ ॥
অত্যর্থং বলবানূষ্মা শরীরে পরিকোপিতঃ ।
ভিনত্তি জীব স্থানানি তানি মর্মাণি বিদ্ধি চ ॥ ১৬ ॥
ততঃ স বেদনঃ সদ্যো জীবঃ প্রচ্যবতে ক্ষরন্ ।
শরীরং ত্যজতে জন্তুশ্ছিদ্যমানেষু মর্মসু ।
বেদনাভিঃ পরীতাত্মা তদ্বিদ্ধি দ্বিজসত্তম ॥ ১৭ ॥
জাতীমরণসংবিগ্নাঃ সততং সর্বজন্তবঃ ।
দৃশ্যন্তে সন্ত্যজন্তশ্চ শরীরাণি দ্বিজর্ষভ ॥ ১৮ ॥
গর্ভসঙ্ক্রমণে চাপি মর্মণামতিসর্পণে ।
তাদৃশীমেব লভতে বেদনাং মানবঃ পুনঃ ॥ ১৯ ॥
ভিন্নসন্ধিরথ ক্লেদমদ্ভিঃ স লভতে নরঃ ।
যথা পঞ্চসু ভূতেষু সংশ্রিতৎবং নিগচ্ছতি ।
শৈত্যাৎপ্রকুপিতঃ কায়ে তীব্রবায়ুসমীরিতঃ ॥ ২০ ॥
যঃ স পঞ্চসু ভূতেষু প্রাণাপানে ব্যবস্থিতঃ ।
স গচ্ছত্যূর্ধ্বগো বায়ুঃ কৃচ্ছ্রান্মুক্ত্বা শরীরিণম্ ॥ ২১ ॥
শরীরং চ জহাত্যেব নিরুচ্ছ্বাসশ্চ দৃশ্যতে ।
নিরূষ্মা স নিরুচ্ছ্বাসো নিঃশ্রীকো গতচেতনঃ ॥ ২২ ॥
ব্রহ্মণা সম্পরিত্যক্তো মৃত ইত্যুচ্যতে নরঃ ।
স্রোতোভির্যৈর্বিজানাতি ইন্দ্রিয়ার্থাঞ্শরীরভৃৎ ।
তৈরেব ন বিজানাতি প্রাণমাহারসম্ভবম্ ॥ ২৩ ॥
তত্রৈব কুরুতে কায়ে যঃ স জীবঃ সনাতনঃ ।
তেষাং যদ্যদ্ভবেদ্যুক্তং সংনিপাতে ক্ব চিৎক্ব চিৎ ।
তত্তন্মর্ম বিজানীহি শাস্ত্রদৃষ্টং হি তত্তথা ॥ ২৪ ॥
তেষু মর্মসু ভিন্নেষু ততঃ স সমুদীরয়ন্ ।
আবিশ্য হৃদয়ং জন্তোঃ সত্ত্বং চাশু রুণদ্ধি বৈ ।
ততঃ স চেতনো জন্তুর্নাভিজানাতি কিং চন ॥ ২৫ ॥
তমসা সংবৃতজ্ঞানঃ সংবৃতেষ্বথ মর্মসু ।
স জীবো নিরধিষ্ঠানশ্চাব্যতে মাতরিশ্বনা ॥ ২৬ ॥
ততঃ স তং মহোচ্ছ্বাসং ভৃশমুচ্ছ্বস্য দারুণম্ ।
নিষ্ক্রামন্কম্পয়ত্যাশু তচ্ছরীরমচেতনম্ ॥ ২৭ ॥
স জীবঃ প্রচ্যুতঃ কায়াৎকর্মভিঃ স্বৈঃ সমাবৃতঃ ।
অঙ্কিতঃ স্বৈঃ শুভৈঃ পুণ্যৈঃ পাপৈর্বাপ্যুপপদ্যতে ॥ ২৮ ॥
ব্রাহ্মণা জ্ঞানসম্পন্না যথাবচ্ছ্রুত নিশ্চয়াঃ ।
ইতরং কৃতপুণ্যং বা তং বিজানন্তি লক্ষণৈঃ ॥ ২৯ ॥
যথান্ধ কারে খদ্যোতং লীয়মানং ততস্ততঃ ।
চক্ষুষ্মন্তঃ প্রপশ্যন্তি তথা তং জ্ঞানচক্ষুষঃ ॥ ৩০ ॥
পশ্যন্ত্যেবংবিধাঃ সিদ্ধা জীবং দিব্যেন চক্ষুষা ।
চ্যবন্তং জায়মানং চ যোনিং চানুপ্রবেশিতম্ ॥ ৩১ ॥
তস্য স্থানানি দৃষ্টানি ত্রিবিধানীহ শাস্ত্রতঃ ।
কর্মভূমিরিয়ং ভূমির্যত্র তিষ্ঠন্তি জন্তবঃ ॥ ৩২ ॥
ততঃ শুভাশুভং কৃৎবা লভন্তে সর্বদেহিনঃ ।
ইহৈবোচ্চাবচান্ভোগান্প্রাপ্নুবন্তি স্বকর্মভিঃ ॥ ৩৩ ॥
ইহৈবাশুভ কর্মা তু কর্মভির্নিরয়ং গতঃ ।
অবাক্স নিরয়ে পাপো মানবঃ পচ্যতে ভৃশম্ ।
তস্মাৎসুদুর্লভো মোক্ষ আত্মা রক্ষ্যো ভৃশং ততঃ ॥ ৩৪ ॥
ঊর্ধ্বং তু জন্তবো গৎবা যেষু স্থানেষ্ববস্থিতাঃ ।
কীর্ত্যমানানি তানীহ তত্ত্বতঃ সংনিবোধ মে ।
তচ্ছ্রুৎবা নৈষ্ঠিকীং বুদ্ধিং বুধ্যেথাঃ কর্ম নিশ্চয়াৎ ॥ ৩৫ ॥
তারা রূপাণি সর্বাণি যচ্চৈতচ্চন্দ্রমণ্ডলম্ ।
যচ্চ বিভ্রাজতে লোকে স্বভাসা সূর্যমণ্ডলম্ ।
স্থানান্যেতানি জানীহি নরাণাং পুণ্যকর্মণাম্ ॥ ৩৬ ॥
কর্ম ক্ষয়াচ্চ তে সর্বে চ্যবন্তে বৈ পুনঃ পুনঃ ।
তত্রাপি চ বিশেষোঽস্তি দিবি নীচোচ্চমধ্যমঃ ॥ ৩৭ ॥
ন তত্রাপ্যস্তি সন্তোষো দৃষ্ট্বা দীপ্ততরাং শ্রিয়ম্ ।
ইত্যেতা গতয়ঃ সর্বাঃ পৃথক্ত্বে সমুদীরিতাঃ ॥ ৩৮ ॥
উপপত্তিং তু গর্ভস্য বক্ষ্যাম্যহমতঃ পরম্ ।
যথাবত্তাং নিগদতঃ শৃণুষ্বাবহিতো দ্বিজ ॥ ৩৯ ॥
ইতি শ্রীমহাভারতে আশ্বমেধিকে পর্বণি অনুগীতাপর্বণি অষ্টাদশোঽধ্যায়ঃ ॥
অধ্যায়ঃ ১৮
ব্রাহ্মণ উবাচ
শুভানামশুভানাং চ নেহ নাশোঽস্তি কর্মণাম্ ।
প্রাপ্য প্রাপ্য তু পচ্যন্তে ক্ষেত্রং ক্ষেত্রং তথা তথা ॥ ১ ॥
যথা প্রসূয়মানস্তু ফলী দদ্যাৎফলং বহু ।
তথা স্যাদ্বিপুলং পুণ্যং শুদ্ধেন মনসা কৃতম্ ॥ ২ ॥
পাপং চাপি তথৈব স্যাৎপাপেন মনসা কৃতম্ ।
পুরোধায় মনো হীহ কর্মণ্যাত্মা প্রবর্ততে ॥ ৩ ॥
যথা কত্ম সমাদিষ্টং কামমন্যুসমাবৃতঃ ।
নরো গর্ভং প্রবিশতি তচ্চাপি শৃণু চোত্তরম্ ॥ ৪ ॥
শুক্রং শোণিতসংসৃষ্টং স্ত্রিয়া গর্ভাশয়ং গতম্ ।
ক্ষেত্রং কর্মজমাপ্নোতি শুভং বা যদি বাশুভম্ ॥ ৫ ॥
সৌক্ষ্ম্যাদব্যক্তভাবাচ্চ ন স ক্ব চন সজ্জতে ।
সম্প্রাপ্য ব্রহ্মণঃ কায়ং তস্মাত্তদ্ব্রহ্ম শাশ্বতম্ ।
তদ্বীজং সর্বভূতানাং তেন জীবন্তি জন্তবঃ ॥ ৬ ॥
স জীবঃ সর্বগাত্রাণি গর্ভস্যাবিশ্য ভাগশঃ ।
দধাতি চেতসা সদ্যঃ প্রাণস্থানেষ্ববস্থিতঃ ।
ততঃ স্পন্দয়তেঽঙ্গানি স গর্ভশ্চেতনান্বিতঃ ॥ ৭ ॥
যথা হি লোহনিষ্যন্দো নিষিক্তো বিম্ববিগ্রহম্ ।
উপৈতি তদ্বজ্জানীহি গর্ভে জীব প্রবেশনম্ ॥ ৮ ॥
লোহপিণ্ডং যথা বহ্নিঃ প্রবিশত্যভিতাপয়ন্ ।
তথা ৎবমপি জানীহি গর্ভে জীবোপপাদনম্ ॥ ৯ ॥
যথা চ দীপঃ শরণং দীপ্যমানঃ প্রকাশয়েৎ ।
এবমেব শরীরাণি প্রকাশয়তি চেতনা ॥ ১০ ॥
যদ্যচ্চ কুরুতে কর্ম শুভং বা যদি বাশুভম্ ।
পূর্বদেহকৃতং সর্বমবশ্যমুপভুজ্যতে ॥ ১১ ॥
ততস্তৎক্ষীয়তে চৈব পুনশ্চান্যৎপ্রচীয়তে ।
যাবত্তন্মোক্ষয়োগস্থং ধর্মং নৈবাববুধ্যতে ॥ ১২ ॥
তত্র ধর্মং প্রবক্ষ্যামি সুখী ভবতি যেন বৈ ।
আবর্তমানো জাতীষু তথান্যোন্যাসু সত্তম ॥ ১৩ ॥
দানং ব্রতং ব্রহ্মচর্যং যথোক্তব্রতধারণম্ ।
দমঃ প্রশান্ততা চৈব ভূতানাং চানুকম্পনম্ ॥ ১৪ ॥
সংয়মশ্চানৃশংস্যং চ পরস্বাদান বর্জনম্ ।
ব্যলীকানামকরণং ভূতানাং যত্র সা ভুবি ॥ ১৫ ॥
মাতাপিত্রোশ্চ শুশ্রূষা দেবতাতিথিপূজনম্ ।
গুরু পূজা ঘৃণা শৌচং নিত্যমিন্দ্রিয়সংয়মঃ ॥ ১৬ ॥
প্রবর্তনং শুভানাং চ তৎসতাং বৃত্তমুচ্যতে ।
ততো ধর্মঃ প্রভবতি যঃ প্রজাঃ পাতি শাশ্বতীঃ ॥ ১৭ ॥
এবং সৎসু সদা পশ্যেত্তত্র হ্যেষা ধ্রুবা স্থিতিঃ ।
আচারো ধর্মমাচষ্টে যস্মিন্সন্তো ব্যবস্থিতাঃ ॥ ১৮ ॥
তেষু তদ্ধর্মনিক্ষিপ্তং যঃ স ধর্মঃ সনাতনঃ ।
যস্তং সমভিপদ্যেত ন স দুর্গতিমাপ্নুয়াৎ ॥ ১৯ ॥
অতো নিয়ম্যতে লোকঃ প্রমুহ্য ধর্মবর্ত্মসু ।
যস্তু যোগী চ মুক্তশ্চ স এতেভ্যো বিশিষ্যতে ॥ ২০ ॥
বর্তমানস্য ধর্মেণ পুরুষস্য যথাতথা ।
সংসারতারণং হ্যস্য কালেন মহতা ভবেৎ ॥ ২১ ॥
এবং পূর্বকৃতং কর্ম সর্বো জন্তুর্নিষেবতে ।
সর্বং তৎকারণং যেন নিকৃতোঽয়মিহাগতঃ ॥ ২২ ॥
শরীরগ্রহণং চাস্য কেন পূর্বং প্রকল্পিতম্ ।
ইত্যেবং সংশয়ো লোকে তচ্চ বক্ষ্যাম্যতঃ পরম্ ॥ ২৩ ॥
শরীরমাত্মনঃ কৃৎবা সর্বভূতপিতামহঃ ।
ত্রৈলোক্যমসৃজদ্ব্রহ্মা কৃৎস্নং স্থাবরজঙ্গমম্ ॥ ২৪ ॥
ততঃ প্রধানমসৃজচ্চেতনা সা শরীরিণাম্ ।
যয়া সর্বমিদং ব্যাপ্তং যাং লোকে পরমাং বিদুঃ ॥ ২৫ ॥
ইহ তৎক্ষরমিত্যুক্তং পরং ৎবমৃতমক্ষরম্ ।
ত্রয়াণাং মিথুনং সর্বমেকৈকস্য পৃথক্পৃথক্ ॥ ২৬ ॥
অসৃজৎসর্বভূতানি পূর্বসৃষ্টঃ প্রজাপতিঃ ।
স্থাবরাণি চ ভূতানি ইত্যেষা পৌর্বিকী শ্রুতিঃ ॥ ২৭ ॥
তস্য কালপরীমাণমকরোৎস পিতামহঃ ।
ভূতেষু পরিবৃত্তিং চ পুনরাবৃত্তিমেব চ ॥ ২৮ ॥
যথাত্র কশ্চিন্মেধাবী দৃষ্টাত্মা পূর্বজন্মনি ।
যৎপ্রবক্ষ্যামি তৎসর্বং যথাবদুপপদ্যতে ॥ ২৯ ॥
সুখদুঃখে সদা সম্যগনিত্যে যঃ প্রপশ্যতি ।
কায়ং চামেধ্য সঙ্ঘাতং বিনাশং কর্ম সংহিতম্ ॥ ৩০ ॥
যচ্চ কিং চিৎসুখং তচ্চ সর্বং দুঃখমিতি স্মরন্ ।
সংসারসাগরং ঘোরং তরিষ্যতি সুদুস্তরম্ ॥ ৩১ ॥
জাতী মরণরোগৈশ্চ সমাবিষ্টঃ প্রধানবিৎ ।
চেতনাবৎসু চৈতন্যং সমং ভূতেষু পশ্যতি ॥ ৩২ ॥
নির্বিদ্যতে ততঃ কৃৎস্নং মার্গমাণঃ পরং পদম্ ।
তস্যোপদেশং বক্ষ্যামি যাথাতথ্যেন সত্তম ॥ ৩৩ ॥
শাশ্বতস্যাব্যযস্যাথ পদস্য জ্ঞানমুত্তমম্ ।
প্রোচ্যমানং ময়া বিপ্র নিবোধেদমশেষতঃ ॥ ৩৪ ॥
ইতি শ্রীমহাভারতে আশ্বমেধিকে পর্বণি অনুগীতাপর্বণি ষোডষোঽশ্দ্যায়ঃ ॥
অধ্যায়ঃ ১৯
ব্রাহ্মণ উবাচ
যঃ স্যাদেকায়নে লীনস্তূষ্ণীং কিং চিদচিন্তয়ন্ ।
পূর্বং পূর্বং পরিত্যজ্য স নিরারম্ভকো ভবেৎ ॥ ১ ॥
সর্বমিত্রঃ সর্বসহঃ সমরক্তো জিতেন্দ্রিয়ঃ ।
ব্যপেতভয়মন্যুশ্চ কামহা মুচ্যতে নরঃ ॥ ২ ॥
আত্মবৎসর্বভূতেষু যশ্চরেন্নিয়তঃ শুচিঃ ।
অমানী নিরভীমানঃ সর্বতো মুক্ত এব সঃ ॥ ৩ ॥
জীবিতং মরণং চোভে সুখদুঃখে তথৈব চ ।
লাভালাভে প্রিয় দ্বেষ্যে যঃ সমঃ স চ মুচ্যতে ॥ ৪ ॥
ন কস্য চিৎস্পৃহয়তে নাবজানাতি কিং চন ।
নির্দ্বন্দ্বো বীতরাগাত্মা সর্বতো মুক্ত এব সঃ ॥ ৫ ॥
অনমিত্রোঽথ নির্বন্ধুরনপত্যশ্চ যঃ ক্ব চিৎ ।
ত্যক্তধর্মার্থকামশ্চ নিরাকাঙ্ক্ষী স মুচ্যতে ॥ ৬ ॥
নৈব ধর্মী ন চাধর্মী পূর্বোপচিতহা চ যঃ ।
ধাতুক্ষয়প্রশান্তাত্মা নির্দ্বন্দ্বঃ স বিমুচ্যতে ॥ ৭ ॥
অকর্মা চাবিকাঙ্ক্ষশ্চ পশ্যঞ্জগদশাশ্বতম্ ।
অস্বস্থমবশং নিত্যং জন্ম সংসারমোহিতম্ ॥ ৮ ॥
বৈরাগ্য বুদ্ধিঃ সততং তাপদোষব্যপেক্ষকঃ ।
আত্মবন্ধবিনির্মোক্ষং স করোত্যচিরাদিব ॥ ৯ ॥
অগন্ধ রসমস্পর্শমশব্দমপরিগ্রহম্ ।
অরূপমনভিজ্ঞেয়ং দৃষ্ট্বাত্মানং বিমুচ্যতে ॥ ১০ ॥
পঞ্চ ভূতগুণৈর্হীনমমূর্তি মদলেপকম্ ।
অগুণং গুণভোক্তারং যঃ পশ্যতি স মুচ্যতে ॥ ১১ ॥
বিহায় সর্বসঙ্কল্পান্বুদ্ধ্যা শারীর মানসান্ ।
শনৈর্নির্বাণমাপ্নোতি নিরিন্ধন ইবানলঃ ॥ ১২ ॥
বিমুক্তঃ সর্বসংস্কারৈস্ততো ব্রহ্ম সনাতনম্ ।
পরমাপ্নোতি সংশান্তমচলং দিব্যমক্ষরম্ ॥ ১৩ ॥
অতঃ পরং প্রবক্ষ্যামি যোগশাস্ত্রমনুত্তমম্ ।
যজ্জ্ঞাৎবা সিদ্ধমাত্মানং লোকে পশ্যন্তি যোগিনঃ ॥ ১৪ ॥
তস্যোপদেশং পশ্যামি যথাবত্তন্নিবোধ মে ।
যৈর্দ্বারৈশ্চারয়ন্নিত্যং পশ্যত্যাত্মানমাত্মনি ॥ ১৫ ॥
ইন্দ্রিয়াণি তু সংহৃত্য মন আত্মনি ধারয়েৎ ।
তীব্রং তপ্ত্বা তপঃ পূর্বং ততো যোক্তুমুপক্রমেৎ ॥ ১৬ ॥
তপস্বী ত্যক্তসঙ্কল্পো দম্ভাহঙ্কারবর্জিতঃ ।
মনীষী মনসা বিপ্রঃ পশ্যত্যাত্মানমাত্মনি ॥ ১৭ ॥
স চেচ্ছক্নোত্যযং সাধুর্যোক্তুমাত্মানমাত্মনি ।
তত একান্তশীলঃ স পশ্যত্যাত্মানমাত্মনি ॥ ১৮ ॥
সংয়তঃ সততং যুক্ত আত্মবান্বিজিতেন্দ্রিয়ঃ ।
তথায়মাত্মনাত্মানং সাধু যুক্তঃ প্রপশ্যতি ॥ ১৯ ॥
যথা হি পুরুষঃ স্বপ্নে দৃষ্ট্বা পশ্যত্যসাবিতি ।
তথারূপমিবাত্মানং সাধু যুক্তঃ প্রপশ্যতি ॥ ২০ ॥
ইষীকাং বা যথা মুঞ্জাৎকশ্চিন্নির্হৃত্য দর্শয়েৎ ।
যোগী নিষ্কৃষ্টমাত্মানং যথা সম্পশ্যতে তনৌ ॥ ২১ ॥
মুঞ্জং শরীরং তস্যাহুরিষীকামাত্মনি শ্রিতাম্ ।
এতন্নিদর্শনং প্রোক্তং যোগবিদ্ভিরনুত্তমম্ ॥ ২২ ॥
যদা হি যুক্তমাত্মানং সম্যক্পশ্যতি দেহভৃৎ ।
তদাস্য নেশতে কশ্চিত্ত্রৈলোক্যস্যাপি যঃ প্রভুঃ ॥ ২৩ ॥
অন্যোন্যাশ্চৈব তনবো যথেষ্টং প্রতিপদ্যতে ।
বিনিবৃত্য জরামৃত্যূ ন হৃষ্যতি ন শোচতি ॥ ২৪ ॥
দেবানামপি দেবৎবং যুক্তঃ কারয়তে বশী ।
ব্রহ্ম চাব্যযমাপ্নোতি হিৎবা দেহমশাশ্বতম্ ॥ ২৫ ॥
বিনশ্যৎষ্বপি লোকেষু ন ভয়ং তস্য জায়তে ।
ক্লিশ্যমানেষু ভূতেষু ন স ক্লিশ্যতি কেন চিৎ ॥ ২৬ ॥
দুঃখশোকময়ৈর্ঘোরৈঃ সঙ্গস্নেহ সমুদ্ভবৈঃ ।
ন বিচাল্যেত যুক্তাত্মা নিস্পৃহঃ শান্তমানসঃ ॥ ২৭ ॥
নৈনং শস্ত্রাণি বিধ্যন্তে ন মৃত্যুশ্চাস্য বিদ্যতে ।
নাতঃ সুখতরং কিং চিল্লোকে ক্ব চন বিদ্যতে ॥ ২৮ ॥
সম্যগ্যুক্ত্বা যদাত্মানমাত্ময়েব প্রপশ্যতি ।
তদৈব ন স্পৃহয়তে সাক্ষাদপি শতক্রতোঃ ॥ ২৯ ॥
নির্বেদস্তু ন গন্তব্যো যুঞ্জানেন কথং চন ।
যোগমেকান্তশীলস্তু যথা যুঞ্জীত তচ্ছৃণু ॥ ৩০ ॥
দৃষ্টপূর্বা দিশং চিন্ত্য যস্মিন্সংনিবসেৎপুরে ।
পুরস্যাভ্যন্তরে তস্য মনশ্চায়ং ন বাহ্যতঃ ॥ ৩১ ॥
পুরস্যাভ্যন্তরে তিষ্ঠন্যস্মিন্নাবসথে বসেৎ ।
তস্মিন্নাবসথে ধার্যং স বাহ্যাভ্যন্তরং মনঃ ॥ ৩২ ॥
প্রচিন্ত্যাবসথং কৃৎস্নং যস্মিন্কায়েঽবতিষ্ঠতে ।
তস্মিন্কায়ে মনশ্চার্যং ন কথং চন বাহ্যতঃ ॥ ৩৩ ॥
সংনিয়ম্যেন্দ্রিয়গ্রামং নির্ঘোষে নির্জনে বনে ।
কায়মভ্যন্তরং কৃৎস্নমেকাগ্রঃ পরিচিন্তয়েৎ ॥ ৩৪ ॥
দন্তাংস্তালু চ জিহ্বাং চ গলং গ্রীবাং তথৈব চ ।
হৃদয়ং চিন্তয়েচ্চাপি তথা হৃদয়বন্ধনম্ ॥ ৩৫ ॥
ইত্যুক্তঃ স ময়া শিষ্যো মেধাবী মধুসূদন ।
পপ্রচ্ছ পুনরেবেমং মোক্ষধর্মং সুদুর্বচম্ ॥ ৩৬ ॥
ভুক্তং ভুক্তং কথমিদমন্নং কোষ্ঠে বিপচ্যতে ।
কথং রসৎবং ব্রজতি শোণিতং জায়তে কথম্ ।
তথা মাংসং চ মেদশ্চ স্নায়্বস্থীনি চ পোষতি ॥ ৩৭ ॥
কথমেতানি সর্বাণি শরীরাণি শরীরিণাম্ ।
বর্ধন্তে বর্ধমানস্য বর্ধতে চ কথং বলম্ ।
নিরোজসাং নিষ্ক্রমণং মলানাং চ পৃথক্পৃথক্ ॥ ৩৮ ॥
কুতো বায়ং প্রশ্বসিতি উচ্ছ্বসিত্যপি বা পুনঃ ।
কং চ দেশমধিষ্ঠায় তিষ্ঠত্যাত্মায়মাত্মনি ॥ ৩৯ ॥
জীবঃ কায়ং বহতি চেচ্চেষ্টয়ানঃ কলেবরম্ ।
কিং বর্ণং কীদৃশং চৈব নিবেশয়তি বৈ মনঃ ।
যাথাতথ্যেন ভগবন্বক্তুমর্হসি মেঽনঘ ॥ ৪০ ॥
ইতি সম্পরিপৃষ্টোঽহং তেন বিপ্রেণ মাধব ।
প্রত্যব্রুবং মহাবাহো যথা শ্রুতমরিন্দম ॥ ৪১ ॥
যথা স্বকোষ্ঠে প্রক্ষিপ্য কোষ্ঠং ভাণ্ড মনা ভবেৎ ।
তথা স্বকায়ে প্রক্ষিপ্য মনো দ্বারৈরনিশ্চলৈঃ ।
আত্মানং তত্র মার্গেত প্রমাদং পরিবর্জয়েৎ ॥ ৪২ ॥
এবং সততমুদ্যুক্তঃ প্রীতাত্মা নচিরাদিব ।
আসাদয়তি তদ্ব্রহ্ম যদ্দৃষ্ট্বা স্যাৎপ্রধানবিৎ ॥ ৪৩ ॥
ন ৎবসৌ চক্ষুষা গ্রাহ্যো ন চ সর্বৈরপীন্দ্রিয়ৈঃ ।
মনসৈব প্রদীপেন মহানাত্মনি দৃশ্যতে ॥ ৪৪ ॥
সর্বতঃ পাণিপাদং তং সর্বতোঽক্ষিশিরোমুখম্ ।
জীবো নিষ্ক্রান্তমাত্মানং শরীরাৎসম্প্রপশ্যতি ॥ ৪৫ ॥
স তদুৎসৃজ্য দেহং স্বং ধারয়ন্ব্রহ্ম কেবলম্ ।
আত্মানমালোকয়তি মনসা প্রহসন্নিব ॥ ৪৬ ॥
ইদং সর্বরহস্যং তে ময়োক্তং দ্বিজসত্তম ।
আপৃচ্ছে সাধয়িষ্যামি গচ্ছ শিষ্যযথাসুখম্ ॥ ৪৭ ॥
ইত্যুক্তঃ স তদা কৃষ্ণ ময়া শিষ্যো মহাতপাঃ ।
অগচ্ছত যথাকামং ব্রাহ্মণশ্ছিন্নসংশয়ঃ ॥ ৪৮ ॥
বাসুদেব উবাচ
ইত্যুক্ত্বা স তদা বাক্যং মাং পার্থ দ্বিজপুঙ্গবঃ ।
মোক্ষধর্মাশ্রিতঃ সম্যক্তত্রৈবান্তরধীয়ত ॥ ৪৯ ॥
কচ্চিদেতত্ত্বয়া পার্থ শ্রুতমেকাগ্রচেতসা ।
তদাপি হি রথস্থস্ত্বং শ্রুতবানেতদেব হি ॥ ৫০ ॥
নৈতৎপার্থ সুবিজ্ঞেয়ং ব্যামিশ্রেণেতি মে মতিঃ ।
নরেণাকৃত সঞ্জ্ঞেন বিদগ্ধেনাকৃতাত্মনা ॥ ৫১ ॥
সুরহস্যমিদং প্রোক্তং দেবানাং ভরতর্ষভ ।
কচ্চিন্নেদং শ্রুতং পার্থ মর্ত্যেনান্যেন কেন চিৎ ॥ ৫২ ॥
ন হ্যেতচ্ছ্রোতুমর্হোঽন্যো মনুষ্যস্ত্বামৃতেঽনঘ ।
নৈতদদ্য সুবিজ্ঞেয়ং ব্যামিশ্রেণান্তরাত্মনা ॥ ৫৩ ॥
ক্রিয়াবদ্ভির্হি কৌন্তেয় দেবলোকঃ সমাবৃতঃ ।
ন চৈতদিষ্টং দেবানাং মর্ত্যৈ রূপনিবর্তনম্ ॥ ৫৪ ॥
পরা হি সা গতিঃ পার্থ যত্তদ্ব্রহ্ম সনাতনম্ ।
যত্রামৃতৎবং প্রাপ্নোতি ত্যক্ত্বা দুঃখং সদা সুখী ॥ ৫৫ ॥
এবং হি ধর্মমাস্থায় যোঽপি স্যুঃ পাপয়োনয়ঃ ।
স্ত্রিয়ো বৈশ্যাস্তথা শূদ্রাস্তেঽপি যান্তি পরাং গতিম্ ॥ ৫৬ ॥
কিং পুনর্ব্রাহ্মণাঃ পার্থ ক্ষত্রিয়া বা বহুশ্রুতাঃ ।
স্বধর্মরতয়ো নিত্যং ব্রহ্মলোকপরায়ণাঃ ॥ ৫৭ ॥
হেতুমচ্চৈতদুদ্দিষ্টমুপায়াশ্চাস্য সাধনে ।
সিদ্ধেঃ ফলং চ মোক্ষশ্চ দুঃখস্য চ বিনির্ণয়ঃ ।
অতঃ পরং সুখং ৎবন্যৎকিং নু স্যাদ্ভরতর্ষভ ॥ ৫৮ ॥
শ্রুতবাঞ্শ্রদ্দধানশ্চ পরাক্রান্তশ্চ পাণ্ডব ।
যঃ পরিত্যজতে মর্ত্যো লোকতন্ত্রমসারবৎ ।
এতৈরুপায়ৈঃ স ক্ষিপ্রং পরাং গতিমবাপ্নুয়াৎ ॥ ৫৯ ॥
এতাবদেব বক্তব্যং নাতো ভূয়োঽস্তি কিং চন ।
ষণ্মাসান্নিত্যযুক্তস্য যোগঃ পার্থ প্রবর্ততে ॥ ৬০ ॥
ইতি শ্রীমহাভারতে আশ্বমেধিকে পর্বণি অনুগীতাপর্বণি একোনবিংষোঽধ্যায়ঃ ॥
॥ ইতি অনুগীতা সমাপ্তা ॥
Also Read:
Anu Gita Lyrics in Hindi | English | Bengali | Gujarati | Kannada | Malayalam | Oriya | Telugu | Tamil
