Goraksha Ashatakam 1 Lyrics in Malayalam:
॥ ഗോരക്ഷശതകം 1 ॥
ഓം പരമഗുരവേ ഗോരക്ഷനാഥായ നമഃ ।
ഓം ഗോരക്ഷശതകം വക്ഷ്യേ ഭവപാശവിമുക്തയേ ।
ആത്മബോധകരം പുംസാം വിവേകദ്വാരകുഞ്ചികാം ॥ 1 ॥
ഏതദ്വിമുക്തിസോപാനമേതത്കാലസ്യ വഞ്ചനം ।
യദ്വ്യാവൃത്തം മനോ മോഹാദാസക്തം പരമാത്മനി ॥ 2 ॥
ദ്വിജസേവിതശാഖസ്യ ശ്രുതികല്‍പതരോഃ ഫലം ।
ശമനം ഭവതാപസ്യ യോഗം ഭജതി സജ്ജനഃ ॥ 3 ॥
ആസനം പ്രാണസംയാമഃ പ്രത്യാഹാരോഽഥ ധാരണാ ।
ധ്യാനം സമാധിരേതാനി യോഗാങ്ഗാനി ഭവന്തി ഷട് ॥ 4 ॥
ആസനാനി തു താവന്തി യാവത്യോ ജീവജാതയഃ ।
ഏതേഷാമഖിലാന്‍ഭേദാന്വിജാനാതി മഹേശ്വരഃ ॥ 5 ॥
ചതുരാശീതിലക്ഷാണാം ഏകമേകമുദാഹൃതം ।
തതഃ ശിവേന പീഠാനാം ഷോഡേശാനം ശതം കൃതം ॥ 6 ॥
ആസനേഭ്യഃ സമസ്തേഭ്യോ ദ്വയമേവ വിശിഷ്യതേ ।
ഏകം സിദ്ധാസനം പ്രോക്തം ദ്വിതീയം കമലാസനം ॥ 7 ॥
യോനിസ്ഥാനകമംഘ്രിമൂലഘടിതം കൃത്വാ ദൃഢം വിന്യസേ-
ന്‍മേഢ്രേ പാദമഥൈകമേവ നിയതം കൃത്വാ സമം വിഗ്രഹം ।
സ്ഥാണുഃ സംയമിതേന്ദ്രിയോഽചലദൃശാ പശ്യന്‍ഭ്രുവോരന്തരം
ഏതന്‍മോക്ഷകവാടഭേദജനകം സിദ്ധാസനം പ്രോച്യതേ ॥ 8 ॥
വാമോരൂപരി ദക്ഷിണം ഹി ചരണം സംസ്ഥാപ്യ വാമം തഥാ
ദക്ഷോരൂപരി പശ്ചിമേന വിധിനാ ധൃത്വാ കരാഭ്യാം ദൃഢം ।
അങ്ഗുഷ്ഠൌ ഹൃദയേ നിധായ ചിബുകം നാസാഗ്രമാലോകയേ-
ദേതദ്വ്യാധിവികാരഹാരി യമിനാം പദ്മാസനം പ്രോച്യതേ ॥ 9 ॥
ആധാരം പ്രഥമം ചക്രം സ്വാധിഷ്ഠാനം ദ്വിതീയകം ।
യോനിസ്ഥാനം ദ്വയോര്‍മധ്യേ കാമരൂപം നിഗദ്യതേ ॥ 10 ॥
ആധാരാഖ്യേ ഗുദസ്ഥാനേ പങ്കജം യച്ചതുര്‍ദലം ।
തന്‍മധ്യേ പ്രോച്യതേ യോനിഃ കാമാഖ്യാ സിദ്ധവന്ദിതാ ॥ 11 ॥
യോനിമധ്യേ മഹാലിങ്ഗം പശ്ചിമാഭിമുഖം സ്ഥിതം ।
മസ്തകേ മണിവദ്ഭിന്നം യോ ജാനാതി സ യോഗവിത് ॥ 12 ॥
തപ്തചാമീകരാഭാസം തഡില്ലേഖേവ വിസ്ഫുരത് ।
ചതുരസ്രം പുരം വഹ്നേരധോമേഢ്രാത്പ്രിതിഷ്ഠിതം ॥ 13 ॥
സ്വശബ്ദേന ഭവേത്പ്രാണഃ സ്വാധിഷ്ഠാനം തദാശ്രയഃ ।
സ്വാധിഷ്ഠാനാഖ്യയാ തസ്മാന്‍മേഢ്രവാഭിധീയതേ ॥ 14 ॥
തന്തുനാ മണിവത്പ്രോതോ യത്ര കന്ദഃ സുഷുംണയാ ।
തന്നാഭിമണ്ഡലം ചക്രം പ്രോച്യതേ മണിപൂരകം ॥ 15 ॥
ഊര്‍ധ്വം മേഢ്രാദധോ നാഭേഃ കന്ദയോനിഃ സ്വഗാണ്ഡവത് ।
തത്ര നാഡ്യഃ സമുത്പന്നാഃ സഹസ്രാണി ദ്വിസപ്തതിഃ ॥ 16 ॥
തേഷു നാഡിസഹസ്രേഷു ദ്വിസപ്തതിരുദാഹൃതാഃ ।
പ്രാധാന്യാത്പ്രാണവാഹിന്യോ ഭൂയസ്തത്ര ദശ സ്മൃതാഃ ॥ 17 ॥
ഇഡാ ച പിങ്ഗലാ ചൈവ സുഷുംണാ ച തൃതീയകാ ।
ഗാന്ധാരീ ഹസ്തിജിഹ്വാ ച പൂഷാ ചൈവ യശസ്വിനീ ॥ 18 ॥
അലംബുഷാ കുഹൂശ്ചൈവ ശങ്ഖിനീ ദശമീ സ്മൃതാ ।
ഏതന്നാഡിമയം ചക്രം ജ്ഞാതവ്യം യോഗിഭിഃ സദാ ॥ 19 ॥
ഇഡാ വാമേ സ്ഥിതാ ഭാഗേ പിങ്ഗലാ ദക്ഷിണേ തഥാ ।
സുഷുംണാ മധ്യദേശേ തു ഗാന്ധാരീ വാമചക്ഷുഷി ॥ 20 ॥
ദക്ഷിണേ ഹസ്തിജിഹ്വാ ച പൂഷാ കര്‍ണേ ച ദക്ഷിണേ ।
യശസ്വിനീ വാമകര്‍ണേ ചാസനേ വാപ്യലംബുഷാ ॥ 21 ॥
കൂഹുശ്ച ലിങ്ഗദേശേ തു മൂലസ്ഥാനേ ച ശങ്ഖിനീ ।
ഏവം ദ്വാരമുപാശ്രിത്യ തിഷ്ഠന്തി ദശ നാഡികാഃ ॥ 22 ॥
സതതം പ്രാണവാഹിന്യഃ സോമസൂര്യാഗ്നിദേവതാഃ ।
ഇഡാപിങ്ഗലാസുഷുംണാ ച തിസ്രോ നാഡ്യ ഉദാഹൃതാഃ ॥ 23 ॥
പ്രാണാപാനൌ സമാനശ്ച ഹ്യുദാനോ വ്യാന ഏവ ച ।
നാഗഃ കൂര്‍മശ്ച കൃകരോ ദേവദത്തോ ധനഞ്ജയഃ ॥ 24 ॥
നാഗാദ്യാഃ പഞ്ച വിഖ്യാതാഃ പ്രാണാദ്യാഃ പഞ്ച വായവഃ ।
ഏതേ നാഡിസഹസ്രേഷു വര്‍തന്തേ ജീവരൂപിണഃ ॥ 25 ॥
പ്രാണാപാനവശോ ജീവോ ഹ്യധശ്ചോര്‍ധ്വം ച ധാവതി ।
വാമദക്ഷിണമാര്‍ഗേണ ചഞ്ചലത്വാന്ന ദൃശ്യതേ ॥ 26 ॥
ആക്ഷിപ്തോ ഭുവി ദണ്ഡേന യഥോച്ചലതി കന്ദുകഃ ।
പ്രാണാപാനസമാക്ഷിപ്തസ്തഥാ ജീവോഽനുകൃഷ്യതേ ॥ 27 ॥
രജ്ജുബദ്ധോ യഥാ ശ്യേനോ ഗതോഽപ്യാകൃഷ്യതേ ।
ഗുണബദ്ധസ്തഥാ ജീവഃ പ്രാണാപാനേന കൃഷ്യതേ ॥ 28 ॥
അപാനഃ കര്‍ഷതി പ്രാണഃ പ്രാണോഽപാനം ച കര്‍ഷതി ।
ഊര്‍ധ്വാധഃ സംസ്ഥിതാവേതൌ യോ ജാനാതി സ യോഗവിത് ॥ 29 ॥
കന്ദോര്‍ധ്വേ കുണ്ഡലീശക്തിരഷ്ടധാ കുണ്ഡലീകൃതാ ।
ബ്രഹ്മദ്വാരമുഖം നിത്യം മുഖേനാവൃത്യ തിഷ്ഠതി ॥ 30 ॥
പ്രബുദ്ധാ വഹ്നിയോഗേന മനസാ മാരുതാ ഹതാ ।
പ്രജീവഗുണമാദായ വ്രജത്യൂര്‍ധ്വം സുഷുംണയാ ॥ 31 ॥
മഹാമുദ്രാം നമോമുദ്രാമുഡ്ഡിയാനം ജലന്ധരം ।
മൂലബന്ധം ച യോ വേത്തി സ യോഗീ സിദ്ധിഭാജനം ॥ 32 ॥
വക്ഷോന്യസ്തഹനുര്‍നിപീഡ്യ സുചിരം യോനിം ച വാമാംഘ്രിണാ
ഹസ്താഭ്യാമവധാരിതം പ്രസരിതം പാദം തഥാ ദക്ഷിണം ।
ആപൂര്യ ശ്വസനേന കുക്ഷിയുഗലം ബദ്ധ്വാ ശനൈ രേചയേദ്
ഏഷാ പാതകനാശിനീ സുമഹതീ മുദ്രാ നൄണാം പ്രോച്യതേ ॥ 33 ॥
കപാലകുഹരേ ജിഹ്വാ പ്രവിഷ്ടാ വിപരീതഗാ ।
ഭ്രുവോരന്തര്‍ഗതാ ദൃഷ്ടിര്‍മുദ്രാ ഭവതി ഖേചരീ ॥ 34 ॥
ഊര്‍ധ്വം മേഢ്രാദധോ നാഭേരുഡ്ഡിയാനം പ്രചക്ഷതേ ।
ഉഡ്ഡിയാനജയോ ബന്ധോ മൃത്യുമാതങ്ഗകേസരീ ॥ 35 ॥
ജാലന്ധരേ കൃതേ ബന്ധേ കണ്ഠസങ്കോചലക്ഷണേ ।
ന പീയൂഷം പതത്യഗ്നൌ ന ച വായുഃ പ്രകുപ്യതി ॥ 36 ॥
പാര്‍ഷ്ണിഭാഗേന സമ്പീഡ്യ യോനിമാകുഞ്ചയേദ്ഗുദം ।
അപാനമൂര്‍ധ്വമാകൃഷ്യ മൂലബന്ധോ നിഗദ്യതേ ॥ 37 ॥
യതഃ കാലഭയാത് ബ്രഹ്മാ പ്രാണായാമപരായണഃ ।
യോഗിനോ മുനയശ്ചൈവ തതഃ പ്രാണം നിബന്ധയേത് ॥ 38 ॥
ചലേ വാതേ ചലം സര്‍വം നിശ്ചലേ നിശ്ചലം ഭവേത് ।
യോഗീ സ്ഥാണുത്വമാപ്നോതി തതോ വായും നിബന്ധയേത് ॥ 39 ॥
ഷട്ത്രിംശദങ്ഗുലം ഹംസഃ പ്രയാണം കുരുതേ ബഹിഃ ।
വാമദക്ഷിണമാര്‍ഗേണ തതഃ പ്രാണോഽഭിധീയതേ ॥ 40 ॥
ബദ്ധപദ്മാസനോ യോഗീ നമസ്കൃത്യ ഗുരും ശിവം ।
നാസാഗ്രദൃഷ്ടിരേകാകീ പ്രാണായാമം സമഭ്യസേത് ॥ 41 ॥
പ്രാണോ ദേഹസ്ഥിതോ വായുരായാമസ്തന്നിബന്ധനം ।
ഏകശ്വാസമയീ മാത്രാ തദ്യോഗോ ഗഗനായതേ ॥ 42 ॥
ബദ്ധപദ്മാസനോ യോഗീ പ്രാണം ചന്ദ്രേണ പൂരയേത് ।
ധാരയിത്വാ യഥാശക്തി ഭൂയഃ സൂര്യേണ രേചയേത് ॥ 43 ॥
അമൃതോദധിസങ്കാശം ക്ഷീരോദധവലപ്രഭം ।
ധ്യാത്വാ ചന്ദ്രമയം ബിംബം പ്രാണായാമേ സുഖീ ഭവേത് ॥ 44 ॥
പ്രാണം സൂര്യേണ ചാകൃഷ്യ പൂരയേദുദരം ശനൈഃ ।
കുംഭയിത്വാ വിധാനേന ഭൂയശ്ചന്ദ്രേണ രേചയേത് ॥ 45 ॥
പ്രജ്വലജ്ജ്വലന ജ്വാലാ പുഞ്ജമാദിത്യമണ്ഡലം ।
ധ്യാത്വാ നാഭിസ്ഥിതം യോഗീ പ്രാണായാമേ സുഖീ ഭവേത് ॥ 46 ॥
രേചകഃ പൂരകശ്ചൈവ കുംഭകഃ പ്രണവാത്മകഃ ।
പ്രാണായാമോ ഭവേത്ത്രേധാ മാത്രാ ദ്വാദശസംയുതഃ ॥ 47 ॥
ദ്വാദശാധമകേ മാത്രാ മധ്യമേ ദ്വിഗുണാസ്തതഃ ।
ഉത്തമേ ത്രിഗുണാ മാത്രാഃ പ്രാണായാമസ്യ നിര്‍ണയഃ ॥ 48 ॥
അധമേ ച ഘനോ ഘര്‍മഃ കമ്പോ ഭവതി മധ്യമേ ।
ഉത്തിഷ്ഠത്യുത്തമേ യോഗീ ബദ്ധപദ്മാസനോ മുഹുഃ ॥ 49 ॥
അങ്ഗാനാം മര്‍ദനം ശസ്തം ശ്രമസംജാതവാരിണാ ।
കട്വംലലവണത്യാഗീ ക്ഷീരഭോജനമാചരേത് ॥ 50 ॥
മന്ദം മന്ദം പിബേദ്വായും മന്ദം മന്ദം വിയോജയേത് ।
നാധികം സ്തംഭയേദ്വായും ന ച ശീഘ്രം വിമോചയേത് ॥ 51 ॥
ഊര്‍ധ്വമാകൃഷ്യ ചാപാനം വാതം പ്രാണേ നിയോജയേത് ।
മൂര്‍ധാനം നീയതേ ശക്ത്യാ സര്‍വപാപൈഃ പ്രമുച്യതേ ॥ 52 ॥
പ്രാണായാമോ ഭവത്യേവം പാതകേന്ധനപാതകഃ ।
ഏനോംബുധിമഹാസേതുഃ പ്രോച്യതേ യോഗിഭിഃ സദാ ॥ 53 ॥
ആസനേന രുജോ ഹന്തി പ്രാണായാമേന പാതകം ।
വികാരം മാനസം യോഗീ പ്രത്യാഹാരേണ സര്‍വദാ ॥ 54 ॥
ചന്ദ്രാമൃതമയീം ധാരാം പ്രത്യാഹാരതി ഭാസ്കരഃ ।
തത്പ്രത്യാഹരണം തസ്യ പ്രത്യാഹാരഃ സ ഉച്യതേ ॥ 55 ॥
ഏകാ സ്ത്രീ ഭുജ്യതേ ദ്വാഭ്യാമാഗതാ സോമമണ്ഡലാത് ।
തൃതീയോ യോ ഭവേത്താഭ്യാം സ ഭവത്യജരാമരഃ ॥ 56 ॥
നാഭിദേശേ ഭവത്യേകോ ഭാസ്കരോ ദഹനാത്മകഃ ।
അമൃതാത്മാ സ്ഥിതോ നിത്യം താലുമൂലേ ച ചന്ദ്രമാഃ ॥ 57 ॥
വര്‍ഷത്യധോമുഖശ്ചന്ദ്രോ ഗ്രസത്യൂര്‍ധ്വമുഖോ രവിഃ ।
ജ്ഞാതവ്യം കരണം തത്ര യേന പീയൂഷമാപ്യതേ ॥ 58 ॥
ഊര്‍ധ്വനാഭിരധസ്താലു ഊര്‍ധ്വഭാനുരധഃ ശശീ ।
കരണം വിപരീതാഖ്യം ഗുരുവക്ത്രേണ ലഭ്യതേ ॥ 59 ॥
ത്രിധാ ബദ്ധോ വൃഷോ യത്ര രൌരവീതി മഹാസ്വനം ।
അനാഹതം ച തച് ചക്രം ഹൃദയേ യോഗിനോ വിദുഃ ॥ 60 ॥
അനാഹതമതിക്രംയ ചാക്രംയ മണിപൂരകം ।
പ്രാപ്തേ പ്രാണം മഹാപദ്മം യോഗിത്വമമൃതായതേ ॥ 61 ॥
വിശബ്ദഃ സംസ്മൃതോ ഹംസോ നിര്‍മലഃ ശുദ്ധ ഉച്യതേ ।
അതഃ കണ്ഠേ വിശുദ്ധാഖ്യേ ചക്രം ചക്രവിദോ വിദുഃ ॥ 62 ॥
വിശുദ്ധേ പരമേ ചക്രേ ധൃത്വാ സോമകലാജലം ।
മാസേന ന ക്ഷയം യാതി വഞ്ചയിത്വാ മുഖം രവേഃ ॥ 63 ॥
സമ്പീഡ്യ രസനാഗ്രേണ രാജദന്തബിലം മഹത് ।
ധ്യാത്വാമൃതമയീം ദേവീം ഷണ്‍മാസേന കവിര്‍ഭവേത് ॥ 64 ॥
അമൃതാപൂര്‍ണദേഹസ്യ യോഗിനോ ദ്വിത്രിവത്സരാത് ।
ഊര്‍ധ്വം പ്രവര്‍തതേ രേതോഽപ്യണിമാദിഗുണോദയഃ ॥ 65 ॥
ഇന്ധനാനി യഥാ വഹ്നിസ്തൈലവര്‍തി ച ദീപകഃ ।
തഥാ സോമകലാപൂര്‍ണം ദേഹീ ദേഹം ന മുഞ്ചതി ॥ 66 ॥
ആസനേന സമായുക്തഃ പ്രാണായാമേന സംയുതഃ ।
പ്രത്യാഹാരേണ സംയുക്തോ ധാരണാം ച സമഭ്യസേത് ॥ 67 ॥
ഹൃദയേ പഞ്ചഭൂതാനാം ധാരണാശ്ച പൃഥക് പൃഥക് ।
മനസോ നിശ്ചലത്വേന ധാരണാ ച വിധീയതേ ॥ 68 ॥
യാ പൃഥ്വീ ഹരിതാലദേശരുചിരാ പീതാ ലകാരാന്വിതാ
സംയുക്താ കമലാസനേന ഹി ചതുഷ്കോണാ ഹൃദി സ്ഥായിനീ ।
പ്രാണം തത്ര വിനീയ പഞ്ചഘടികാശ്ചിത്താന്വിതം ധാരയേദ്
ഏഷാ സ്തംഭകരീ സദാ ക്ഷിതിജയം കുര്യാദ്ഭുവോ ധാരണാ ॥ 69 ॥
അര്‍ധേന്ദുപ്രതിമം ച കുന്ദധവലം കണ്ഠേഽംബുതത്തവം സ്ഥിതം
യത്പീയൂഷവകാരബീജസഹിതം യുക്തം സദാ വിഷ്ണുനാ ।
പ്രാണം തത്ര വിനീയ പഞ്ചഘടികാശ്ചിത്താന്വിതം ധാരയേദ്
ഏഷാ ദുര്‍വഹകാലകൂടജരണാ സ്യാദ്വാരിണീ ധാരണാ ॥ 70 ॥
യത്താലസ്ഥിതമിന്ദ്രഗോപസദൃശം തത്ത്വം ത്രികോണോജ്ജ്വലം
തേജോരേഫമയം പ്രവാലരുചിരം രുദ്രേണ യത്സങ്ഗതം ।
പ്രാണം തത്ര വിനീയ പഞ്ചഘടികാശ്ചിത്താന്വിതം ധാരയേ
ഏഷാ വഹ്നിജയം സദാ വിദധതേ വൈശ്വാനരീ ധാരണാ ॥ 71 ॥
യദ്ഭിന്നാഞ്ജനപുഞ്ജസാന്നിഭമിദം തത്ത്വം ഭ്രുവോരന്തരേ
വൃത്തം വായുമയം യകാരസഹിതം യത്രേശ്വരോ ദേവതാ ।
പ്രാണം തത്ര വിനീയ പഞ്ചഘടികാശ്ചിത്താന്വിതം ധാരയേദ്
ഏഷാ ഖേ ഗമനം കരോതി യമിനാം സ്യാദ്വായവീ ധാരണാ ॥ 72 ॥
ആകാശം സുവിശുദ്ധവാരിസദൃശം യദ്ബ്രഹ്മരന്ധ്രേ സ്ഥിതം
തത്രാദ്യേന സദാശിവേന സഹിതം ശാന്തം ഹകാരാക്ഷരം ।
പ്രാണം തത്ര വിനീയ പഞ്ചഘടികാശ്ചിത്താന്വിതം ധാരയേദ്
ഏഷാ മോക്ഷകവാടപാടനപടുഃ പ്രോക്താ നഭോധാരണാ ॥ 73 ॥
സ്തംഭനീ ദ്രാവണീ ചൈവ ദഹനീ ഭ്രാമണീ തഥാ ।
ശോഷണീ ച ഭവന്ത്യേവം ഭൂതാനാം പഞ്ചധാരണാഃ ॥ 74 ॥
കര്‍മണാ മനസാ വാചാ ധാരണാഃ പഞ്ച ദുര്ലഭാഃ ।
വിധായ സതതം യോഗീ സര്‍വപാപൈഃ പ്രമുച്യതേ ॥ 75 ॥
സര്‍വം ചിന്താസമാവര്‍തി യോഗിനോ ഹൃദി വര്‍തതേ ।
യത്തത്ത്വേ നിശ്ചിതം ചേതസ്തത്തു ധ്യാനം പ്രചക്ഷതേ ॥ 76 ॥
ദ്വിധാ ഭവതി തദ്ധ്യാനം സഗുണം നിര്‍ഗുണം തഥാ ।
സഗുണം വര്‍ണഭേദേന നിര്‍ഗുണം കേവലം വിദുഃ ॥ 77 ॥
ആധാരം പ്രഥമം ചക്രം തപ്തകാഞ്ചനസന്നിഭം ।
നാസാഗ്രേ ദൃഷ്ടിമാദായ ധ്യാത്വാ മുഞ്ചതി കില്‍ബിഷം ॥ 78 ॥
സ്വാധിഷ്ഠാനം ദ്വിതീയം തു സന്‍മാണിക്യസുശോഭനം ।
നാസാഗ്രേ ദൃഷ്ടിമാദായ ധ്യാത്വാ മുഞ്ചതി പാതകം ॥ 79 ॥
തരുണാദിത്യസംകാശം ചക്രം ച മണിപൂരകം ।
നാസാഗ്രേ ദൃഷ്ടിമാദായ ധ്യാത്വാ സംക്ഷോഭയേജ്ജഗത് ॥ 80 ॥
[verse missing]
വിദ്യുത്പ്രഭാവം ഹൃത്പദ്മേ പ്രാണായാമവിഭേദനൈഃ ।
നാസാഗ്രേ ദൃഷ്ടിമാദായ ധ്യാത്വാ ബ്രഹ്മമയോ ഭവേത് ॥ 82 ॥
സന്തതം ഘണ്ടികാമധ്യേ വിശുദ്ധം ചാമൃതോദ്ഭവം ।
നാസാഗ്രേ ദൃഷ്ടിമാദായ ധ്യാത്വാ ബ്രഹ്മമയോ ഭവേത് ॥ 83 ॥
ഭ്രുവോര്‍മധ്യേ സ്ഥിതം ദേവം സ്നിഗ്ധമൌക്തികസന്നിഭം ।
നാസാഗ്രേ ദൃഷ്ടിമാദായ ധ്യാത്വാഽനന്ദമയോ ഭവേത് ॥ 84 ॥
നിര്‍ഗുണം ച ശിവം ശാന്തം ഗഗനേ വിശ്വതോമുഖം ।
നാസാഗ്രേ ദൃഷ്ടിമാദായ ധ്യാത്വാ ദുഃഖാദ്വിമുച്യതേ ॥ 85 ॥
ഗുദം മേഢ്രം ച നാഭിം ച ഹൃത്പദ്മേ ച തദൂര്‍ധ്വതഃ ।
ഘണ്ടികാം ലമ്പികാസ്ഥാനം ഭ്രൂമധ്യേ പരമേശ്വരം ॥ 86 ॥
നിര്‍മലം ഗഗനാകാരം മരീചിജലസന്നിഭം ।
ആത്മാനം സര്‍വഗം ധ്യാത്വാ യോഗീ യോഗമവാപ്നുയാത് ॥ 87 ॥
കഥിതാനി യഥൈതാനി ധ്യാനസ്ഥാനാനി യോഗിനാം ।
ഉപാധിതത്ത്വയുക്താനി കുര്‍വന്ത്യഷ്ടഗുണോദയം ॥ 88 ॥
ഉപാധിശ്ച തഥാ തത്ത്വം ദ്വയമേവമുദാഹൃതം ।
ഉപാധിഃ പ്രോച്യതേ വര്‍ണസ്തത്ത്വമാത്മാഭിധീയതേ ॥ 89 ॥
ഉപാധിരന്യഥാജ്ഞാനം തത്ത്വം സംസ്ഥിതമന്യഥാ ।
സമസ്തോപാധിവിധ്വംസി സദാഭ്യാസേന യോഗിനാം ॥ 90 ॥
ആത്മവര്‍ണേന ഭേദേന ദൃശ്യതേ സ്ഫാടികോ മണിഃ ।
മുക്തോ യഃ ശക്തിഭേദേന സോഽയമാത്മാ പ്രശസ്യതേ ॥ 91 ॥
നിരാതങ്കം നിരാലംബം നിഷ്പ്രപഞ്ചം നിരാശ്രയം ।
നിരാമയം നിരാകാരം തത്ത്വം തത്ത്വവിദോ വിദുഃ ॥ 92 ॥
ശബ്ദാദ്യാഃ പഞ്ച യാ മാത്രാ യാവത് കര്‍ണാദിഷു സ്മൃതാഃ ।
താവദേവ സ്മൃതം ധ്യാനം തത്സമാധിരതഃ പരം ॥ 93 ॥
യദാ സംക്ഷീയതേ പ്രാണോ മാനസം ച വിലീയതേ ।
തദാ സമരസൈകത്വം സമാധിരഭിധീയതേ ॥ 94 ॥
[verse missing]
ധാരണാഃ പഞ്ചനാഡ്യസ്തു ധ്യാനം ച ഷഷ്ഠിനാഡികാഃ ।
ദിനദ്വാദശകേനൈവ സമാധിഃ പ്രാണസംയമഃ ॥ 96 ॥
ന ഗന്ധം ന രസം രൂപം ന സ്പര്‍ശം ന ച നിഃസ്വനം ।
ആത്മാനം ന പരം വേത്തി യോഗീ യുക്തഃ സമാധിനാ ॥ 97 ॥
ഖാദ്യതേ ന ച കാലേന ബാധ്യതേ ന ച കര്‍മണാ ।
സാധ്യതേ ന ച കേനാപി യോഗീ യുക്തഃ സമാധിനാ ॥ 98 ॥
നിര്‍മലം നിശ്ചലം നിത്യം നിഷ്ക്രിയം നിര്‍ഗുണം മഹത് ।
വ്യോമവിജ്ഞാനമാനന്ദം ബ്രഹ്മ ബ്രഹ്മവിദോ വിദുഃ ॥ 99 ॥
ദുഗ്ധേ ക്ഷീരം ധൃതേ സര്‍പിരഗ്നൌ വഹ്നിരിവാര്‍പിതഃ ।
അദ്വയത്വം വ്രജേന്നിത്യം യോഗവിത്പരമേ പദേ ॥ 100 ॥
ഭവഭയവനേ വഹ്നിര്‍മുക്തിസോപാനമാര്‍ഗതഃ ।
അദ്വയത്വം വ്രജേന്നിത്യം യോഗവിത്പരമേ പദേ ॥ 101 ॥
॥ ഇതി ശ്രീ ഗോരക്ഷനാഥപ്രണീതഃ ഗോരക്ഷശതകം സമാപ്തം ॥