কামাসিকাষ্টকম্ Lyrics in Bengali:
শ্রীবেদান্তদেশিকৃতম্ ।
(কাঞ্চ্যাং)
শ্রুতীনামুত্তরং ভাগং বেগবত্যাশ্চ দক্ষিণম্ ।
কামাদধিবসন্ জীয়াত্কশ্চিদদ্ভুতকেসরী ॥ ১॥
তপনেন্দ্বগ্নিনয়নঃ তাপানপচিনোতু নঃ ।
তাপনীয়রহস্যানাং সারঃ কামাসিকাহরিঃ ॥ ২॥
আকণ্ঠমাদিপুরুষং কণ্ঠীরবমুপরি কুণ্ঠিতারাতিম্ ।
বেগোপকণ্ঠসঙ্গাদ্বিমুক্তবৈকুণ্ঠবহুমতিমুপাসে ॥ ৩॥
বন্ধুমখিলস্য জন্তোর্বন্ধুরপর্যঙ্কবন্ধরমণীয়ম্ ।
বিষমবিলোচনমীডে বেগবতীপুলিনকেলিনরসিংহম্ ॥ ৪॥
স্বস্থানেষু মরুদ্গণান্ নিয়ময়ন্ স্বাধীনসর্বেন্দ্রিয়ঃ
পর্যঙ্কস্থিরধারণাপ্রকটিতপ্রত্যঙ্মুখাবস্থিতিঃ ।
প্রায়েণ প্রণিপেদুষঃ প্রভুরসৌ য়োগং নিজং শিক্ষয়ন্
কামানাতনুতাদশেষ জগতাং কামাসিকা কেসরী ॥ ৫॥
বিকস্বরনখস্বরুক্ষতহিরণ্যবক্ষঃস্থলী
নিরর্গলবিনির্গলদ্রুধিরসিন্ধুসন্ধ্যায়িতাঃ ।
অবন্তু মদনাসিকা মনুজপঞ্চবক্ত্রস্য মাং
অহম্প্রথমিকা মিথঃ প্রকটিতাহবা বাহবঃ ॥ ৬॥
সটাপটলভীষণে সরভসাট্টহাসোদ্ভটে
স্ফুরত্ক্রুধিপরিস্ফুটভ্রুকুটিকেঽপি বক্ত্রে কৃতে ।
কৃপাকপটকেসরিন্ দনুজডিম্ভদত্তস্তনা
সরোজসদৃশা দৃশা ব্যতিবিষজ্য তে ব্যজ্যতে ॥ ৭॥
ত্বয়ি রক্ষতি রক্ষকৈঃ কিমন্যৈস্ত্বয়ি চারক্ষতি রক্ষকৈঃ কিমন্যৈঃ ।
ইতি নিশ্চিতধীঃ শ্রয়ামি নিত্যং নৃহরে বেগবতীতটাশ্রয়ং ত্বাম্ ॥ ৮॥
ইত্থং স্তুতঃ সকৃদিহাষ্টভিরেষ পদ্যৈঃ
শ্রীবেঙ্কটেশরচিতৈস্ত্রিদশেন্দ্রবন্দ্যঃ ।
দুর্দান্তঘোরদুরিতদ্বিরদেন্দ্রভেদী
কামাসিকানরহরির্বিতনোতু কামান্ ॥ ৯॥
ইতি শ্রীবেদান্তদেশিকৃতং কামাসিকাষ্টকং সম্পূর্ণম্ ।
