ലലിതാപഞ്ചകം Lyrics in Malayalam:
പ്രാതഃ സ്മരാമി ലലിതാവദനാരവിന്ദം ബിംബാധരം പൃഥുലമൌക്തികശോഭിനാസം ।
ആകര്‍ണദീര്‍ഘനയനം മണികുണ്ഡലാഢ്യം മന്ദസ്മിതം മൃഗമദോജ്ജ്വലഭാലദേശം ॥ 1॥
പ്രാതര്‍ഭജാമി ലലിതാഭുജകല്‍പവല്ലീം രത്നാങ്ഗുളീയലസദങ്ഗുലിപല്ലവാഢ്യാം ।
മാണിക്യഹേമവലയാങ്ഗദശോഭമാനാം പുണ്ഡ്രേക്ഷുചാപകുസുമേഷുസൃണീഃദധാനാം ॥ 2॥
പ്രാതര്‍നമാമി ലലിതാചരണാരവിന്ദം ഭക്തേഷ്ടദാനനിരതം ഭവസിന്ധുപോതം ।
പദ്മാസനാദിസുരനായകപൂജനീയം പദ്മാങ്കുശധ്വജസുദര്‍ശനലാഞ്ഛനാഢ്യം ॥ 3॥
പ്രാതഃ സ്തുവേ പരശിവാം ലലിതാം ഭവാനീം ത്രയ്യന്തവേദ്യവിഭവാം കരുണാനവദ്യാം ।
വിശ്വസ്യ സൃഷ്ടവിലയസ്ഥിതിഹേതുഭൂതാം വിശ്വേശ്വരീം നിഗമവാങ്ഗമനസാതിദൂരാം ॥ 4॥
പ്രാതര്‍വദാമി ലലിതേ തവ പുണ്യനാമ കാമേശ്വരീതി കമലേതി മഹേശ്വരീതി ।
ശ്രീശാംഭവീതി ജഗതാം ജനനീ പരേതി വാഗ്ദേവതേതി വചസാ ത്രിപുരേശ്വരീതി ॥ 5॥
യഃ ശ്ലോകപഞ്ചകമിദം ലലിതാംബികായാഃ സൌഭാഗ്യദം സുലലിതം പഠതി പ്രഭാതേ ।
തസ്മൈ ദദാതി ലലിതാ ഝടിതി പ്രസന്നാ വിദ്യാം ശ്രിയം വിമലസൌഖ്യമനന്തകീര്‍തിം ॥ 6॥
॥ ഇതി ശ്രീമച്ഛങ്കരഭഗവതഃ കൃതൌ ലലിതാ പഞ്ചകം സമ്പൂര്‍ണം ॥