లలితాపఞ్చకమ్ Lyrics in Telugu:
ప్రాతః స్మరామి లలితావదనారవిన్దం బిమ్బాధరం పృథులమౌక్తికశోభినాసమ్ ।
ఆకర్ణదీర్ఘనయనం మణికుణ్డలాఢ్యం మన్దస్మితం మృగమదోజ్జ్వలభాలదేశమ్ ॥ ౧॥
ప్రాతర్భజామి లలితాభుజకల్పవల్లీం రత్నాఙ్గుళీయలసదఙ్గులిపల్లవాఢ్యామ్ ।
మాణిక్యహేమవలయాఙ్గదశోభమానాం పుణ్డ్రేక్షుచాపకుసుమేషుసృణీఃదధానామ్ ॥ ౨॥
ప్రాతర్నమామి లలితాచరణారవిన్దం భక్తేష్టదాననిరతం భవసిన్ధుపోతమ్ ।
పద్మాసనాదిసురనాయకపూజనీయం పద్మాఙ్కుశధ్వజసుదర్శనలాఞ్ఛనాఢ్యమ్ ॥ ౩॥
ప్రాతః స్తువే పరశివాం లలితాం భవానీం త్రయ్యన్తవేద్యవిభవాం కరుణానవద్యామ్ ।
విశ్వస్య సృష్టవిలయస్థితిహేతుభూతాం విశ్వేశ్వరీం నిగమవాఙ్గమనసాతిదూరామ్ ॥ ౪॥
ప్రాతర్వదామి లలితే తవ పుణ్యనామ కామేశ్వరీతి కమలేతి మహేశ్వరీతి ।
శ్రీశామ్భవీతి జగతాం జననీ పరేతి వాగ్దేవతేతి వచసా త్రిపురేశ్వరీతి ॥ ౫॥
యః శ్లోకపఞ్చకమిదం లలితామ్బికాయాః సౌభాగ్యదం సులలితం పఠతి ప్రభాతే ।
తస్మై దదాతి లలితా ఝటితి ప్రసన్నా విద్యాం శ్రియం విమలసౌఖ్యమనన్తకీర్తిమ్ ॥ ౬॥
॥ ఇతి శ్రీమచ్ఛఙ్కరభగవతః కృతౌ లలితా పఞ్చకమ్ సమ్పూర్ణమ్ ॥
