ശ്രീഹനൂമത് പഞ്ച ചാമരം Lyrics in Malayalam:
നമോഽസ്തു തേ ഹനൂമതേ ദയാവതേ മനോഗതേ
സുവര്‍ണപര്‍വതാകൃതേ നഭസ്സ്വതഃ സുതായ തേ ।
ന ചാഞ്ജനേയ തേ സമോ ജഗത്ത്രയേ മഹാമതേ
പരാക്രമേ വചഃകമേ സമസ്തസിദ്ധിസങ്ക്രമേ ॥ 1॥
രവിം ഗ്രസിഷ്ണുരുത്പതന്‍ ഫലേച്ഛയാ ശിശുര്‍ഭവാന്‍
രവേര്‍ഗൃഹീതവാനഹോ സമസ്തവേദശാസ്ത്ര്‍കം ।
ഭവന്‍മനോജ്ഞഭാഷണം ബഭൂവ കര്‍ണഭൂഷണം
രഘൂത്തമസ്യ മാനസാംബുജസ്യ പൂര്‍ണതോഷണം ॥ 2॥
ധരാത്മജാപതിം ഭവാന്‍ വിഭാവയന്‍ ജഗത്പതിം
ജഗാമ രാമദാസതാം സമസ്തലോകവിശ്രുതാം ।
വിലങ്ഘ്യ വാരിധിം ജവാത് വിലോക്യ ദീനജാനകീം
ദശാനനസ്യ മാനസം ദദാഹ ലങ്കയാ സമം ॥ 3॥
വിലോക്യ മാതരം കൃശാം ദശാനനസ്യ തദ്വനേ
ഭവാനഭാഷത പ്രിയം മനോഹരം ച സംസ്കൃതം ।
സമസ്തദുഷ്ടരക്ഷസാം വിനാശകാലസൂചനം
ചകാര രാവണാഗ്രതഃ നയേന വാ ഭയേന വാ ॥ 4॥
മഹാബലോ മഹാചലം സമുഹ്യ ചൌഷധിപ്രഭം
ഭവാന്‍ രരക്ഷ ലക്ഷ്മണം ഭയാവഹേ മഹാവഹേ ।
മഹോപകാരിണം തദാ ഭവന്തമാത്മബാന്ധവം
സമസ്തലോകബാന്ധവോഽപ്യമന്യത സ്വയം വിഭുഃ ॥ 5॥
ഭവാംശ്ച യത്ര യത്ര തത് ശൃണോതി രാമകീര്‍തനം
കരോതി തത്ര തത്ര ഭോഃ സഭാഷ്പമസ്തകാഞ്ജലിം ।
പ്രദേഹി മേഽഞ്ജനാസുത ത്വദീയഭക്തിവൈഭവം
വിദേഹി മേ നിരഞ്ജനം ച രാമദാസദാസതാം ॥ 6॥
അഗണ്യപുണ്യവാന്‍ ഭവാന്‍ അനന്യധന്യജീവനഃ
വിമുച്യ മൌക്തികസ്രജം ദദൌ ധരാത്മജാ മുദാ ।
ഭവന്തമാലിലിങ്ഗ യദ് രഘൂത്തമഃ സ്വയം വദന്‍
ഇദം ഹി മേ ഹനൂമതഃ പ്രദേയസര്‍വമിത്യഹോ ॥ 7॥
വിദേഹരാജനന്ദിനീമനോഹരേ വരേ പരേ
വിദേഹമുക്തിദായകേ വിധേഹി മേ മനോ ഹരേ ।
ക്ഷണം ക്ഷണം നിരീക്ഷണം ഭവേദ് യഥാ മയി പ്രഭോഃ
തഥാ നിവേദയസ്വ മദ്ദശാം ദശാനനാന്തകേ ॥ 8॥
ഇദം ച പഞ്ചചാമരം ഗൃഹാണ ദാസകല്‍പിതം
സമീരണാത്മസംഭവ പ്രമോദമാനചേതസാ ।
രിപൂന്‍ ഷഡാന്തരാന്‍ വിനാശയാശു ദുര്‍ദമാന്‍
പുനര്‍ഭവാഖ്യകര്‍ദമാത് വിമുച്യ പാഹി പാഹി മാം ॥ 9॥