Sri Lalitha Trisati Stotram Uttarapeetika in English:
॥ śrī lalitā triśatī stōtram phalaśr̥ti (uttara pīṭhika) ॥
hayagrīva uvāca-
itīdaṁ tē mayākhyātaṁ divyanāmnāṁ śatatrayam |
rahasyātirahasyatvā-dgōpanīyaṁ mahāmunē || 60 ||
śivavarṇāni nāmāni śrīdēvīkathitāni vai |
śaktyakṣarāṇi nāmāni kāmēśakathitāni hi || 61 ||
ubhayākṣaranāmāni hyubhābhyāṁ kathitāni vai |
tadanyairgrathitaṁ stōtramētasya sadr̥śaṁ kimu || 62 ||
nānēna sadr̥śaṁ stōtraṁ śrīdēvīprītidāyakam |
lōkatrayēpi kalyāṇaṁ sambhavēnnātra samśayaḥ || 63 ||
sūta uvāca-
iti hayamukhagītaṁ stōtrarājaṁ niśamya
pragalitakaluṣōbhūcchittaparyāpti mētya |
nijagurumatha natvā kumbhajanmā taduktēḥ
punaradhikarahasyaṁ jñātumēvaṁ jagāda || 64 ||
agastya uvāca-
aśvānana mahābhāga rahasyamapi mē vada |
śivavarṇāni kānyatra śaktivarṇāni kāni hi || 65 ||
ubhayōrapi varṇāni kāni mē vada dēśika |
iti pr̥ṣṭaḥ kumbhajēna hayagrīvō:’vadatpunaḥ || 66 ||
śrī hayagrīva uvāca-
tava gōpyaṁ kimastīha sākṣādambākaṭākṣataḥ |
idantvatirahasyaṁ tē vakṣyāmi śr̥ṇu kumbhaja || 67 ||
ētadvijñānamātrēṇa śrīvidyā siddhidā bhavēt |
katrayaṁ hadvayaṁ caiva śaivō bhāgaḥ prakīrtitaḥ || 68 ||
śaktyākṣarāṇi śēṣāṇi hrīṅkāra ubhayātmakaḥ |
ēvaṁ vibhāgamajñātvā śrīvidyājapaśīlinaḥ || 69 ||
na tēṣāṁ siddhidā vidyā kalpakōṭiśatairapi |
caturbhiśśivacakraiśca śakticakraiśca pañcabhiḥ || 70 ||
navacakraistu saṁsiddhaṁ śrīcakraṁ śivayōrvapuḥ |
trikōṇamaṣṭakōṇaṁ ca daśakōṇadvayaṁ tathā || 71 ||
caturdaśāraṁ caitāni śakticakrāṇi pañca vai |
bindu ścāṣṭadalaṁ padmaṁ padmaṁ ṣōḍaśapatrakam || 72 ||
caturaśraṁ ca catvāri śivacakrāṇyanukramāt |
trikōṇē baindavaṁ śliṣṭamaṣṭārēṣṭadalāmbujam || 73 ||
daśārayōṣṣōḍaśāraṁ bhūpuraṁ bhuvanāśrakē |
śaivānāmapi śāktānāṁ cakrāṇāṁ ca parasparam || 74 ||
avinābhāvasambandhaṁ yō jānāti sa cakravit |
trikōṇarūpiṇī śaktirbindurūpaśśivassmr̥taḥ || 75 ||
avinābhāvasambandhastasmādbindutrikōṇayōḥ |
ēvaṁ vibhāgamajñātvā śrīcakraṁ yassamarcayēt || 76 ||
na tatphalamavāpnōti lalitāmbā na tuṣyati |
yē ca jānanti lōkēsmin śrīvidyāṁ cakravēdinaḥ || 77 ||
sāmānyavēdinastē vai viśēṣajñō:’tidurlabhaḥ |
svayaṁ vidyāviśēṣajñō viśēṣajñaṁ samarcayēt || 78 ||
tastmai dēyaṁ tatō grāhyaṁ śrīvidyācakravēdinā |
andhaṁ tamaḥ praviśanti yē hyavidyāmupāsatē || 79 ||
iti śrutirapyāhaitā navidyōpāsakān punaḥ |
vidyānupāsakānēva nindatyāruṇikī śrutiḥ || 80 ||
aśrutāsaśśrutāsaśca yajvānō yēpyayajvanaḥ |
svaryantōnāpyapēkṣanta indramagniṁ ca yē viduḥ || 81 ||
sikatā iva samyanti raśmibhissamudīritāḥ |
asmāllōkādamuṣmāccētyapyāhāruṇikī śrutiḥ || 82 ||
yaḥ prāptaḥ pr̥śnibhāvaṁ vā yadi vā śaṅkarassvayam |
tēnaiva labhyatē vidyā śrīmatpañcadaśākṣarī || 83 ||
iti tantrēṣu bahudhā vidyāyā mahimōcyatē |
mōkṣaikahētuvidyā tu śrīvidyaiva na samśayaḥ || 84 ||
na śilpādijñānayuktē vidvacchabdaḥ prayujyatē |
mōkṣaikahētuvidyā sā śrīvidyaiva na samśayaḥ || 85 ||
tasmādvidyāvidē dadyāt khyāpayēttadguṇānsudhīḥ |
svayaṁ vidyāviśēṣajñō vidyāmāhātmyavēdyapi || 86 ||
vidyāvidaṁ nārcayēccētkōvā taṁ pūjayējjanaḥ |
prasaṅgādētaduktaṁ tē prakr̥taṁ śr̥ṇu kumbhaja || 87 ||
yaḥ kīrtayētsakr̥dbhaktyā divyaṁ nāmnāṁ śatatrayam |
tasya puṇyaphalaṁ vakṣyē vistarēṇa ghaṭōdbhava || 88 ||
rahasyanāmasāhasrapāṭhē yatphala mīritam |
tatkōṭikōṭiguṇītamēkanāmajapādbhavēt || 89 ||
kāmēśvarābhyāṁ tadidaṁ kr̥taṁ nāmaśatatrayam |
nānyēna tulayēdētatstōtrēṇānyakr̥tēna tu || 90 ||
śriyaḥparamparā yasya bhāvinī tūttarōttaram |
tēnaiva labhyatē nāmnāṁ triśatī sarvakāmadā || 91 ||
asyā nāmnāṁ triśatyāstu mahimā kēna varṇyatē |
yā svayaṁ śivayōrvaktrapadmābhyāṁ parinissr̥tā || 92 ||
nityāṣōḍaśikārūpānviprānādau tu bhōjayēt |
abhyaktā gandhatailēna snātānuṣṇēna vāriṇā || 93 ||
abhyarcya vastragandhādyaiḥ kāmēśvaryādināmabhiḥ |
apūpaiśśarkarādyaiśca phalaiḥ puṣpaissugandhibhiḥ || 94 ||
vidyāvidō viśēṣēṇa bhōjayētṣōḍaśa dvijāḥ |
ēvaṁ nityabaliṁ kuryādādau brāhmaṇabhōjanē || 95 ||
paścāttriśatyā nāmnāṁ tu brāhmaṇān kramaśō:’rcayēt |
tailābhyaṅgādikaṁ dadyādvibhavē sati bhaktitaḥ || 96 ||
śukla pratipadārabhya paurṇamāsyavadhi kramāt |
divasē divasē viprā bhōjyā vimśatisaṅkhyayā || 97 ||
daśabhiḥ pañcabhirvāpi tribhirēkēna vā dinaiḥ |
trimśatṣaṣṭhiśataṁ viprān bhōjayēttriśataṁ kramāt || 98 ||
ēvaṁ yaḥ kurutē bhaktyā janmamadhyē sakr̥nnaraḥ |
tasyaiva saphalaṁ janma muktistasya karē sthitā || 99 ||
rahasyanāmasāhasrairarcanēpyēvamēva hi |
ādau nityabaliṁ kuryātpaścādbrāhmaṇabhōjanam || 100 ||
rahasyanāmasāhasramahimā yō mayōditaḥ |
saśīkarāṇuratraikanāmnō mahimavāridhēḥ || 101 ||
vāgdēvīracitē nāmasāhasrē yadyadīritam |
tattatphalamavāpnōti nāmnōpyēkasya kīrtanāt || 102 ||
ētadanyairjapaiḥ stōtrairarcanairyatphalaṁ bhavēt |
tatphalaṁ kōṭiguṇitaṁ bhavēnnāmaśatatrayāt || 103 ||
rahasyanāmasāhasrakōṭyāvr̥ttyāstu yatphalam |
tadbhavētkōṭiguṇitaṁ nāmatriśatakīrtanāt || 104 ||
vāgdēvīracitē stōtrē tādr̥śō mahimā yadi |
sākṣātkāmēśakāmēśīkr̥tē:’smin gr̥hyatāmiti || 105 ||
sakr̥tsaṅkīrtanādēva nāmnāmasmin śatatrayē |
bhavēccittasya paryāptirnūnamanyānapēkṣiṇī || 106 ||
na jñātavyamitastvanyajjagatsarvaṁ ca kumbhaja |
yadyatsādhyatamaṁ kāryaṁ tattadarthamidaṁ japēt || 107 ||
tattatsiddhimavāpnōti paścātkāryaṁ parīkṣayēt |
yē yē prasaṅgāstantrēṣu taistairyatsādhyatē dhruvam || 108 ||
tatsarvaṁ siddhyati kṣipraṁ nāmatriśatakīrtanāt |
āyuṣkaraṁ puṣṭikaraṁ putradaṁ vaśyakārakam || 109 ||
vidyāpradaṁ kīrtikaraṁ sukavitvapradāyakam |
sarvasampatpradaṁ sarvabhōgadaṁ sarvasaukhyadam || 110 ||
sarvābhīṣṭapradaṁ caiva dēvīnāmaśatatrayam |
ētajjapaparō bhūyānnānyadicchētkadācana || 111 ||
ētatkīrtanasantuṣṭā śrīdēvī lalitāmbikā |
bhaktasya yadyadiṣṭaṁ syāttattatpūrayatē dhruvam || 112 ||
tasmātkumbhōdbhavamunē kīrtayatvamidaṁ sadā |
aparaṁ kiñcidapi tē bōddhavyaṁ nā:’vaśiṣyatē || 113 ||
iti tē kathitaṁ stōtraṁ lalitāprītidāyakam |
nā:’vidyāvēdinē brūyānnā:’bhaktāya kadācana || 114 ||
na śaṭhāya na duṣṭāya nā:’viśvāsāya karhicit |
yō brūyāttriśatīṁ nāmnāṁ tasyānarthō mahānbhavēt || 115 ||
ityājñā śāṅkarī prōktā tasmādgōpyamidaṁ tvayā |
lalitāprēritēnaiva mayōktaṁ stōtramuttamam || 116 ||
rahasyanāmasāhasrādatigōpyamidaṁ munē |
ēvamuktvā hayagrīvaḥ kumbhajaṁ tāpasōttamam || 117 ||
stōtrēṇānēna lalitāṁ stutvā tripurasundarīm |
ānandalaharīmagnamānasassamavartata || 118 ||
iti brahmāṇḍapurāṇē – uttarakhaṇḍē – hayagrīvāgastyasaṁvādē –
lalitōpākhyānē – stōtrakhaṇḍē – lalitāmbātrisatīstōtraratnaṁ samāptam ||
Also Read:
Sri Lalitha Trisati Stotram Uttarapeetika Lyrics in English | Hindi | Kannada | Telugu | Tamil