Templesinindiainfo

Best Spiritual Website

1000 Names of Gorak | Sahasranama Stotram Lyrics in Telugu

Goraksahasranama Stotram Lyrics in Telugu:

॥ శ్రీగోరక్షసహస్రనామస్తోత్రమ్ ॥

శ్రీగోరక్ష విధి విధాన

ఓం శ్రీ గణేశాయ నమః ॥ ఓం గోరక్షనాథాయ నమః ॥

యోగీన్ద్రం యోగగమ్యం యతిపతిమమలం సచ్చిదానన్దరూపం
శూన్యాధారం నిరీహం జగదుదయలయస్థైర్యంహేతుం మునీన్ద్రమ్ ।
స్వాత్మారామాభిరామం భవభయ హరణం భుక్తిముక్త్యోర్నిదానం
పుణ్యం వన్దారువన్ద్యం సువిదితయశసం నౌమి గోరక్షనాథమ్ ॥

శ్రీకృష్ణ ఉవాచ –
గోరక్షనాథః కో దేవః కో మన్త్రస్తస్య పూజనే ।
సేవ్యతే కేన విధినా తన్మే బ్రూహి మహామునే ॥ ౧ ॥

గర్గ ఉవాచ –
దేవాశ్చ మునయః సర్వే ప్రపచ్ఛుర్ధర్మవాదినః ।
దేవదేవం మహాదేవం గోరక్షస్య చ కీర్తనమ్ ॥ ౨ ॥

దేవాః ఉవాచ –
కాఽసౌ గోరక్షనాథో వై తపస్వీ జటిలాభిధః ।
కథం జాతో మహాబుద్ధిరేతద్ బ్రూహి సవిస్తరమ్ ॥ ౩ ॥

శ్రీమహాదేవ ఉవాచ –
స్వయం జ్యోతిస్వరూపోఽయం శూన్యాధారో నిరఞ్జనః ।
సముద్భూతో దక్షిణాస్యాం దిశి గోరక్షసంజ్ఞకః ॥ ౪ ॥

మాతా శూన్యమయీ తస్య వ్యవహారమయః పితా ।
నిరఞ్జనో మహాయోగీ గోరక్షో జగతో గురుః ॥ ౫ ॥

అహమేవాస్మి గోరక్షో మద్రూపం తన్నిబోధత ।
యోగమార్గప్రచారాయ మయా రూపమిదం ధృతమ్ ॥ ౬ ॥

గోరక్షనాథమన్త్రే తు గృహితే విధిపూర్వకమ్ ।
తస్యాఽనుష్ఠానమాత్రేణ భవేత్ సిద్ధిర్ధ్రువం నృణామ్ ॥ ౭ ॥

దేవాః ఉవాచ –
దేవదేవ మహాదేవ గోరక్షస్య చ పూజనే ।
కో మన్త్రః కో విధిశ్చాస్య తత్సర్వం కథయస్వ నః ॥ ౮ ॥

మహాదేవ ఉవాచ్చ –
దేవాః ! శృణుత వై సర్వే గోరక్షస్య విధిక్రియాః ।
గోరక్షా మనసి ధ్యాత్వా యోగీన్ద్రో భవితా నరః ॥ ౯ ॥

వినా గోరక్షమన్త్రేణ యోగసిద్ధిర్న జాయతే ।
గోరక్షస్య ప్రసాదేన సర్వసిద్ధిర్న సంశయః ॥ ౧౦ ॥

శ్రీకృష్ణ ఉవాచ –
ధన్యోఽసి మునిశార్దూల గోరక్షస్య విధిక్రియాః ।
యాఃప్రోక్తా భవతా శ్రోతుం పరం కౌతూహలం హి మే ॥ ౧౧ ॥

గర్గ ఉవాచ –
శృణు త్వం రాధికానాథ విధిపూర్వకజాం క్రియామ్ ।
గుహ్యాతిగృహ్యమన్త్రస్య వేదస్యాగమనం విధిః ॥ ౧౨ ॥

గుహ్యాతిగుహ్యాః పరమాః గోరక్షస్య విధిక్రియాః ।
వదామి భవతామగ్రే శృణ్వన్తు ఖలు తత్త్వతః ॥ ౧౩ ॥

అఙ్గన్యాసం కరన్యాసం దిఙ్న్యాసం మన్త్రమేవ చ ।
ధ్యానం నామ్నాం సహస్రం చ సర్వం వ్యాఖ్యాయతే మయా ॥ ౧౪ ॥

సఙ్కల్పం ప్రథమం కుర్యాత్ తత్తో న్యాసం సమాచరేత్ ।
ఆదౌ న్యాసవిధిం కృత్వా పశ్చాత్ పూజాం సమాచరేత్ ॥ ౧౫ ॥

ప్రథమం తు అఙ్గన్యాసం కరన్యాసం మథాపరమ్ ।
తృతీయం తు దిశాన్యాసం తతో ధ్యానముదీరయేత్ ॥ ౧౬ ॥

అథ సఙ్కల్పః ।
ఓం అస్య శ్రీగోరక్ష సహస్రనామస్తోత్రమన్త్రస్య బృహదారణ్యక ఋషిః ।
అనుష్టుప్ ఛన్దః । శ్రీగోరక్షనాథో దేవతా । గోమ్ బీజమ్ । విమలేతి శక్తిః ।
హఁసేతి నిరఞ్జనాత్మకమ్ కీలకమ్ । అభీష్టసిద్ధ్యర్థే జపే వినియోగః ॥

ఏవం సఙ్కల్పం విధాయాసనశుద్ధిం కుర్యాత్ ।
తదనన్తరశ్చ అఙ్గన్యాసం కుర్యాత్ ।

అథ అఙ్గన్యాసః ।
ఓం హ్రీం శ్రీం గోం గోరక్షనాథ హృదయాయ నమః ।
ఓం హ్రీం శ్రీం గోం గోరక్షనాథ శిరసే స్వాహా ।
ఓం హ్రీం శ్రీం గోం గోరక్షనాథ శిఖాయై వషట్ ।
ఓం హ్రీం శ్రీం గోం గోరక్షనాథ కవచాయ హుఁ ।
ఓం హ్రీం శ్రీం గోం గోరక్షనాథ నేత్రత్రయాయ వౌషట్ ।
ఓం హ్రీం శ్రీం గోం గోరక్షనాథ అస్త్రాయ ఫట్ ।
ఓం హ్రీం శ్రీం గోం గోరక్షనాథసర్వవిద్యాపతయే తుభ్యం నమః ॥

అథ కరన్యాసః ।
ఓం హ్రీం శ్రీం గోం గోరక్షనాథ అనుష్ఠాభ్యాం నమః ।
ఓం హ్రీం శ్రీం గోం గోరక్షనాథ తర్జనీభ్యాం నమః ।
ఓం హ్రీం శ్రీం గోం గోరక్షనాథ మధ్యమాభ్యాం నమః ।
ఓం హ్రీం శ్రీం గోం గోరక్షనాథ అనామికాభ్యాం నమః ।
ఓం హ్రీం శ్రీం గోం గోరక్షనాథ కనిష్ఠికాభ్యాం నమః ।
ఓం హ్రీం శ్రీం గోం గోరక్షనాథ పఞ్చాఙ్గులినఖాభ్యాం నమః ।
ఓం హ్రీం శ్రీం గోం గోరక్షనాథ మూలాభ్యాం నమః ।
ఓం హ్రీం శ్రీం గోం గోరక్షనాథ మణిబన్ధకన్ధరాభ్యాం నమః
ఓం హ్రీం శ్రీం గోం గోరక్షనాథ చిబుకజానుభ్యాం నమః ।
ఓం హ్రీం శ్రీం గోం గోరక్షనాథ బాహుకవచాభ్యాం నమః ।
ఓం హ్రీం శ్రీ గోం గోరక్షనాథ కరతలకరపృష్ఠాభ్యాం నమః ఇతి కరన్యాసః ॥

అథ దిగ్బన్ధ –
ఓం హ్రీం శ్రీం గో గోరక్షనాథ పుర్వదిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ ఆగ్నేయ దిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ దక్షిణదిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ నైఋత్యదిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ పశ్చిమదిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ వాయవ్యదిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ ఉత్తరదిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ ఈశానదిక్పాలమారభ్య హుఁ ఫట్ స్వాహా ।
ఓం హ్రీం శ్రీ గోం గోరక్షనాథ అధోదిక్పాలమారభ్య హుఁ ఫట్ స్వాహా ।
ఓం హ్రీం శ్రీం గోం గోరక్షనాథ ఊర్ధ్వదిక్పాలమారభ్య హుఁ ఫట్ స్వాహా ॥

అథ ధ్యానమ్ ।
జటిలం నిర్గుణం శాన్తం బ్రహ్మవిష్ణుశివాత్మకం
కమణ్డలుధరం దేవం కుణ్డలాలఙ్కృతం గురుమ్ ।
శూన్యాత్మకం నిరాకారం యోగిధ్యేయం నిరఞ్జనం
విశ్వారాధ్యమహం వన్దే నాథం గోరక్షనామకమ్ ॥

వన్దే గోరక్షనాథం సకలగురువర యోగిభిర్ధ్యానగమ్యం
విశ్వాధారం నిరీహం నిఖిలగుణగణాలఙ్కృతం విశ్వరూపమ్ ।
యోగాభ్యాసే విలగ్నం మునివరభయం చిన్మయం శూన్యరూపం
ఆనన్దైకాబ్ధిమగనం సమధిగతశివం ధ్యానగమ్యం శుభాఙ్గమ్ ॥

గోరక్షం గుణసాగరం యతిపతిం యోగీశ్వరం గోపతిం
శూన్యాభారమనన్తమవ్యయమజం దేవదేవాధిదేవం గురుమ్ ।
బ్రహ్మారుద్రమహేన్ద్ర వన్దితపదం భక్తార్తివిద్రావణం
యోగాభ్యాసరతం మృగాజినధరం వన్దే వదాన్యం వరమ్ ॥

హే గోరక్షగురో ! దయార్ణవ విభో ! యోగీశ దివ్యామ్బరమ్ !
భక్తానామభయప్రద ! ప్రభువర ! హే నిర్వికారాత్మజ ! ।
వన్దే త్వాం భగవన్ ! కృపాం కురుమయి త్వత్పాదపాథోరుహా
మన్దానన్దరసైకతత్పర మతౌ భృఙ్గే భవత్ప్రేయసి ॥

ఇతి ధ్యానమ్ ।

ఏవం ధ్యాత్వా జపేత్ సిద్ధిర్గోరక్షస్య ప్రసాదతః ।
నియమేన మనుష్యాణాం భవిష్యతి న సంశయ ॥ ౧౭ ॥

అథ మన్త్ర ।
అత్ర మన్త్ర ప్రవక్ష్యామి శృణు తవం యదునన్దన ।
శ్రీ కల్పద్రుమతన్త్రే తు యే మన్త్రాః కథితాః పురా ॥ ౧౮ ॥

జపన్తి సాధకా ధీరాస్తాన్ మన్త్రాన్ శ్రద్ధయాన్వితాః ।
శీఘ్రం భవతి సంసిద్ధిః సాధకానాం శివాజ్ఞయా ॥ ౧౯ ॥

గోరక్షనాథమన్త్రాణాం ప్రభావో వర్ణితః పురా ।
కల్పద్రుమాదితన్త్రేషు బహుభిర్మునిభిః కలౌః ॥ ౨౦ ॥

గోరక్ష గాయత్రీ ।
ఓం హ్రీం శ్రీం గోం గోరక్షనాథాయ విద్మహే, శూన్యపుత్రాయ ధీమహి ।
తన్నో గోరక్షనిరఞ్జనః ప్రచోదయాత ।

గోరక్ష మన్త్ర ।
ఓం హ్రీం శ్రీం గోం హుఁ ఫట్ స్వాహా ।
ఓం హ్రీం శ్రీం గోం గోరక్ష హుఁ ఫట్ స్వాహా ।
ఓం హ్రీం శ్రీం గోం గోరక్షనిరఞ్జనాత్మనే హుఁ ఫట్ స్వాహా ।

శతలక్షమితం జప్త్వా సాధకః శుద్ధ మానసః ।
సాధయేత్ సర్వకార్యాణి నాత్ర కార్యా విచారణా ॥ ౨౧ ॥

యో ధారయేన్నరో నిత్యం మన్త్రరాజం విశేషతః ।
స యోగసిద్ధిమాప్నోతి గోరక్షస్య ప్రసాదతః ॥ ౨౨ ॥

అథ నామ్నాం సహస్రఞ్చ గోరక్షస్య వదామ్యహమ్ ।
స్నేహాద్ గుహ్యతమం కృష్ణ ! మహాపాతకనాశనమ్ ॥ ౨౩ ॥

॥ సత్యం శివం సున్దరమ్ ॥

అథ గోరక్షసహస్రనామప్రారమ్భః ।

గోసేవీ గోరక్షనాథో గాయత్రీధరసమ్భవః ।
యోగీన్ద్రః సిద్ధిదో గోప్తా యోగినాథో యుగేశ్వరః ॥ ౧ ॥

యతిశ్చ ధార్మికో ధీరో లఙ్కానాథో దిగమ్బరః ।
యోగానన్దో యోగచరో యోగవేత్తా యతిప్రియః ॥ ౨ ॥

యోగరాశిర్యోగగమ్యో యోగిరాట్ యోగవిత్తమః ।
యోగమార్గయుతో యాతా బ్రహ్మచారీ బృహత్తపాః ॥ ౩ ॥

శఙ్కరైకస్వరూపశ్చ శఙ్కరధ్యానతత్పరః ॥ ౪ ॥

యోగానన్దో యోగధారీ యోగమాయాప్రసేవకః ।
యోగయుక్తో యోగధీరో యోగజ్ఞానసమన్వితః ॥ ౫ ॥

యోగచారో యోగవిద్యో యుక్తాహారసమన్వితః ।
నాగహారీ నాగరూపో నాగమాలో నగేశ్వరః ॥ ౬ ॥

నాగధారీ నాగరూపీ నానావర్ణవిభూషితః ।
నానావేషో నరాకారో నానారూపో నిరఞ్జనః ॥ ౭ ॥

ఆదినాథో సోమనాథో సిద్ధినాథో మహేశ్వరః ।
నాథనాథో మహానాథో సర్వనాథో నరేశ్వరః ॥ ౮ ॥

క్షేత్రనాథోఽజపానాథో బాలనాథో గిరామ్పతిః ।
గఙ్గాధరః పాత్రధరో భస్మభూషితవిగ్రహ ॥ ౯ ॥

మృగాజినధరో మృగయో మృగాక్షో మృగవేషధృక్ ।
మేఘనాదో మేఘవర్ణో మహాసత్త్వో మహామనాః ॥ ౧౦ ॥

దిగీశ్వరో దయాకారీ దివ్యాభరణభూషితః ।
దిగమ్బరో దూరదర్శీ దివ్యో దివ్యతమో దమః ॥ ౧౧ ॥

జలనాథో జగన్నాథో గఙ్గానాథో జనాధిపః ।
భూతనాథో విపన్నాథో కునాథో భువనేశ్వరః ॥ ౧౨ ॥

జ్ఞపతిర్గోపికాకాన్తో గోపీ గోపారిమర్దనః ।
గుప్తో గురుర్గిరాం నాథో ప్రాణాయామపరాయణః ॥ ౧౩ ॥

యజ్ఞనాథో యజ్ఞరూపో నిత్యానన్దో మహాయతిః ।
నియతాత్మా మహావీర్యోద్యుతిమాన్ ధృతిమాన్ వశీ ॥ ౧౪ ॥

సిద్ధనాథో వృద్ధనాథో వృద్ధో వృద్ధగతిప్రియః ।
ఖేచరః ఖేచరాధ్యక్షో విద్యానన్దో గణాధిపః ॥ ౧౫ ॥

విద్యాపతిర్మన్త్రనాథో ధ్యాననాథో ధనాధిపః ।
సర్వారాధ్యః పూర్ణనాథో ద్యుతినాథో ద్యుతిప్రియః ॥ ౧౬ ॥

సృష్టికర్తా సృష్టిధర్తా జగత్ప్రలయకారకః ।
భైరవో భైరవాకారో భయహర్తా భవాపహా ॥ ౧౭ ॥

సృష్టినాథః స్థితేర్నాథో విశ్వారాధ్యో మహామతిః ।
దివ్యనాదో దిశానాథో దివ్యభోగసమన్వితః ॥ ౧౮ ॥

అవ్యక్తో వాసుదేవశ్చ శతమూర్తిః సనాతనః ।
పూర్ణనాథః కాన్తినాథో సర్వేశం హృదయస్థితః ॥ ౧౯ ॥

అఙ్గనాథో రఙ్గనాథో మఙ్గలో మఙ్గలేశ్వరః ।
అమ్బాసేవీ ధైర్యనాథో వపుర్గోప్తా గుహాశయః ॥ ౨౦ ॥

అకారోఽనిధనోఽమర్త్యో సాధురాత్మపరాయణః ।
ఇకారస్త్విన్ద్రనాథశ్చ యతిర్ధన్యో ధనేశ్వరః ॥ ౨౧ ॥

ఉకార ఊకారో నిత్యో మాయానాథో మహాతపాః ।
ఏకారస్త్వేక ఐకార ఏకమూర్తిస్త్రిలోచనః ॥ ౨౨ ॥

ఋకారో లాకృతిర్లోకనాథో ౠసుతమర్దనః ।
ఌకారో ౡసుతో లాభో లలోప్తా లకరో లలః ॥ ౨౩ ॥

ఖవర్ణంః ఖర్వహస్తశ్చ ఖఖనాథః ఖగేశ్వరః ।
గౌరీనాథో గిరాంనాథో గర్గపూజ్యో గణేశ్వరః ॥ ౨౪ ॥

గంనాథో గణనాథశ్చ గఙ్గాసేవీ గురుప్రియః ।
చకారశ్చపతిశ్చన్ద్రశ్చం చం శబ్దశ్చకృచ్చరః ॥ ౨౫ ॥

చోరనాథో దణ్డనాథో దేవనాథః శివాకృతిః ।
చమ్పానాథః సోమనాథో వృద్ధినాథో విభావసుః ॥ ౨౬ ॥

చిరనాథః చారురూపః కవీశః కవితాపతిః ।
ఋద్ధినాథో విభానాథో విశ్వవ్యాపీ చరాచరః ॥ ౨౭ ॥

చారుశృఙ్గశ్చారునాథశ్చిత్రనాథశ్చిరన్తపాః ।
శక్తినాథో బుద్ధినాథశ్ఛేత్తా సర్వగుణాశ్రయః ॥ ౨౮ ॥

జయాధీశో జయాధారో జయాదాతా సదాజయః ।
జపాధీశో జపాధారో జపదాతా సదాజపః ॥ ౨౯ ॥

శఙ్ఖనాథః శఙ్ఖనాదః శఙ్ఖరూపో జనేశ్వరః ।
సోఽహం రూపశ్చ సంసారీ సుస్వరూపః సదాసుఖీ ॥ ౩౦ ॥

ఓఙ్కార ఇన్ద్రనాథశ్చ ఇన్ద్రరూపః శుభః సుధీః ।
జకారో జఞ్జపకశ్చ ఝాకారో మృత్యుజిన్మునిః ॥ ౩౧ ॥

టఙ్కారః టణ్టనాథశ్చ టోకారో టోపతిష్టరః ।
ఠకారో ఠణ్ఠనాథశ్చ ఠన్నాథః ఠమయశ్చ ఠ ॥ ౩౨ ॥

డమయో ఢమయో నిత్యో డవాద్యో డమరుప్రియః ।
వదప్రదాఽభయో భోగో భవో భీమో భయానకః ॥ ౩౩ ॥

దణ్డధారీ దణ్డరూపో దణ్డసిద్ధో గుణాశ్రయః ।
దణ్డో దణ్డమయో దమ్యో దరూపో దమనో దమః ॥ ౩౪ ॥

ణకారో నన్దనాథశ్చ బుధనాథో నిరాపదః ।
నన్దీభక్తో నమస్కారో సర్వలోకప్రియో నరః ౩౫ ॥

థకారో థకారః స్తుత్యో జుతా జిష్ణుర్జితో గతిః ।
థసేవీ థన్థశబ్దశ్చ థవాసీ జిత్వరో జయః ॥ ౩౬ ॥

దానదో దానసిద్ధో దః దయోః దీనప్రియోఽదమః ।
అదీనో దివ్యరూపశ్చ దివ్యో దివ్యాసనో ద్యూతిః ॥ ౩౭ ॥

దయాలుర్దయితో దాన్తోఽదూరో దూరేక్షణో దినమ్ ।
దివ్యమాల్యో దివ్యభోగో దివ్యవస్త్రో దివాపతిః ॥ ౩౮ ॥

ధకారో ధనదాతా చ ధనదో ధర్మదోఽధనః ।
ధనీ ధర్మధరో ధీరో ధరాధీశో ధరాధరః ॥ ౩౯ ॥

ధీమాన్ శ్రీమాన్ ధరధరో ధ్వాన్తనాథోఽధమోద్ధరః ।
ధర్మిష్ఠో ధార్మికో ధుర్యోధీరో ధీరోగనాశనః ॥ ౪౦ ॥

సిద్ధాన్తకృతచ్ఛుద్ధమతిః శుద్ధ శుద్ధైకరః కృతీ ।
అన్ధకారహరో హర్షో హర్షవాన్ హర్షితప్రజః ॥ ౪౧ ॥

పాణ్డునాథః పీతవర్ణః పాణ్డుహా పన్నగాసనః ।
ప్రసన్నాస్య ప్రపన్నార్తిహరః పరమపావనః ॥ ౪౨ ॥

ఫఙ్కారః ఫూకారః పాతా ఫణీన్ద్రః ఫలసంస్థితః ।
ఫణీరాజః ఫలాధ్యక్షో ఫలదాతా ఫలీ ఫలః ॥ ౪౩ ॥

బం బం ప్రియో బకారశ్చ బామనో బారుణో వరః ।
వరదస్తు వరాధిశో బాలో బాలప్రియో బలః ॥ ౪౪ ॥

వరాహో వారుణీనాథో విద్వాన్ విద్వత్ప్రియో బలీ ।
భవానీపూజకో భౌమో భద్రాకారో భవాన్తకః ॥ ౪౫ ॥

భద్రప్రియోఽర్భకానన్దో భవానీపతిసేవకః ।
భవప్రియో భవాధీశో భవో భవ్యో భయాపహా ॥ ౪౬ ॥

మహాదేవప్రియో మాన్యో మననీయో మహాశయః ।
మహాయోగీ మహాధీరో మహాసిద్ధో మహాశ్రయః ॥ ౪౭ ॥

మనోగమ్యో మనస్వీ చ మహామోదమయో మహః ।
మార్గప్రియో మార్గసేవీ మహాత్మా ముదితోఽమలః ॥ ౪౮ ॥

మధ్యనాథో మహాకారో మకారో మఖపూజితః ।
మఖో మఖకరో మోహో మోహనాశో మరుత్ప్రియః ॥ ౪౯ ॥

యకారో యజ్ఞకర్తా చ యమో యాగో యమప్రియః ।
యశోధరో యశస్వీ చ యశోదాతా యశఃప్రియః ॥ ౫౦ ॥

నమస్కారప్రియోనాథో నరనాథో నిరామయః ।
నిత్యయోగరతో నిత్యో నన్దినాథో నరోత్తమః ॥ ౫౧ ॥

రమణో రామనాథశ్చ రామభద్రో రమాపతిః ।
రాంరాంరవో రామరామో రామరాధనతత్పరః ॥ ౫౨ ॥

రాజీవలోచనో రమ్యో రాగవేత్తా రతీశ్వరః ।
రాజధర్మప్రియో రాజనీతితత్త్వవిశారదః ॥ ౫౩ ॥

రఞ్జకో రణమూర్తిశ్చ రాజ్యభోగప్రదః ప్రభుః ।
రమాప్రియో రమాదాతా రమాభాగ్యవివర్ధనః ॥ ౫౪ ॥

రక్తచన్దనలిప్తాఙ్గో రక్తగన్ఘానులేపనః ।
రక్తవస్త్రవిలాసీ చ రక్తభక్తఫలప్రదః ॥ ౫౫ ॥

అతీన్ద్రియో విశ్వయోనిరమేయాత్మా పునర్వసుః ।
సత్యధర్మో బృహద్రూపో నైకరూపో మహీధరః ॥ ౫౬ ॥

అదృశ్యోఽవ్యక్తరూపశ్చ విశ్వబాహుః ప్రతిష్ఠితః ।
అతులో వరదస్తార పరర్ద్ధిస్తు శుభేక్షణః ॥ ౫౭ ॥

హిరణ్యగర్భః ప్రణయో ధర్మో ధర్మవిదుత్తమః ।
వత్సలో వీరహా సింహః స్వవశో భూరిదక్షిణః ॥ ౫౮ ॥

గఙ్గాధర గురుర్గేయో గతరాగో గతస్మయః ।
సిద్ధగీతః సిద్ధకథో గుణపాత్రో గుణాకరః ॥ ౫౯ ॥

దృష్టః శ్రుతో భవద్భూతః సమబుద్ధిః సమప్రభః ।
మహావాయుర్మహావీరో మహాభూతస్తనుస్థితః ॥ ౬౦ ॥

నక్షత్రేశః సుధానాథో ధవః కల్పాన్త భైరవః ।
సుధన్వా సర్వదృగ్ ద్రష్టా వాచస్పతిరయోనిజః ॥ ౬౧ ॥

శుభాఙ్గ శ్రీకరః శ్రేయః సత్కీర్తిః శాశ్వతః స్థిరః ।
విశోకః శోకహా శాన్తః కామపాలః కలానిధిః ॥ ౬౨ ॥

విశుద్ధాత్మా మహాయజ్ఞా బ్రహ్మజ్ఞో బ్రాహ్మణప్రియః ।
పూర్ణః పూర్ణకరః స్తోతా స్తుతిః స్తవ్యో మనోజవః ॥ ౬౩ ॥

బ్రహ్మణ్యో బ్రాహ్మణో బ్రహ్మ సద్భూతిః సత్పరాక్రమః ।
ప్రకృతిః పురుషో భోక్తా సుఖదః శిశిరః శమః ॥ ౬౪ ॥

సత్త్వం రజస్తమః సోమో సోమపాః సౌమ్యదర్శనః ।
త్రిగుణస్త్రిగుణాతీతో త్రయీరూపస్త్రిలోకపః ॥ ౬౫ ॥

దక్షిణః పేశలః స్వాస్యో దుర్గో దుఃస్వప్ననాశనః ।
జితమన్యుర్గమ్భీరాత్మా ప్రాణభృత్ వ్యాదిశో దిశః ॥ ౬౬ ॥

ముకుటీ కుణ్డలీ దణ్డీ కటకీ కనకాఙ్గదీ ।
అహః సంవత్సరః కాలః జ్ఞాపకో వ్యాపకః కవిః ॥ ౬౭ ॥

భూర్భువః స్వః స్వరూపశ్చ ఆశ్రమః శ్రమణః క్షమో ।
క్షమాయుక్తో క్షయః క్షాన్తః కృశః స్థూలో నిరన్తరః ॥ ౬౮ ॥

సర్వగః సర్వవిత్ సర్వః సురేశశ్చ సురోత్తమః ।
సమాత్మా సంమితః సత్యః సుపర్వా శుచిరచ్యుతః ॥ ౬౯ ॥

సర్వాదిః శర్మకృచ్ఛాన్తో శరణ్యః యశరణార్తిహా ।
శుభలక్షణయుక్తాఙ్గః శుభాఙ్గః శుభదర్శనః ॥ ౭౦ ॥

పావకః పావనో పూతో మహాకాలో మహాపహా ।
లిఙ్గమూర్తిరలిఙ్గాత్మా లిఙ్గాలిఙ్గాత్మవిగ్రహః ॥ ౭౧ ॥

కపాలమాలాభరణః కపాలీ విష్ణువల్లభః ।
కాలాధీశః కాలకర్తా దుష్టావగ్రహకారకః ॥ ౭౨ ॥

నాట్యకర్తా నటవరో నాట్యశాస్త్రవిశారదః ।
అతిరాగో రాగహేతుర్వీతరాగో విరాగవిత్ ॥ ౭౩ ॥

వసన్తకృద్ వసన్తాత్మా వసన్తేశో వసన్తదః ।
జీవాధ్యక్షో జీవరూపో జీవో జీవప్రదః సదా ॥ ౭౪ ॥

జీవబన్ధహరో జీవజీవనమ్ జీవ సంశ్రయః ।
వజ్రాత్మావజ్రహస్తశ్చ సుపర్ణః సుప్రతాపవాన్ ॥ ౭౫ ॥

రుద్రాక్షమాలాభరణో భుజఙ్గాభరణప్రియః ।
రుద్రాక్షవక్షా రుద్రాక్షశిరః రుద్రాక్షభక్షకః ॥ ౭౬ ॥

భుజఙ్గేన్ద్రలసత్కణ్ఠో భుజఙ్గవలయావృతః ।
భుజఙ్గేన్ద్రలసత్కర్ణో భుజఙ్గకృతభూషణః ॥ ౭౭ ॥

ఉగ్రోఽనుగ్రో భీమకర్మా భోగీ భీమపరాక్రమః ।
మేధ్మోఽవధ్యోఽమోధశక్తిర్నిర్ద్వన్దోఽమోధవిక్రమః ॥ ౭౮ ॥

కల్ప్యోఽకల్ప్యో నిరాకల్పో వికల్పః కల్పనాశనః ।
కల్పాకృతిః కల్పకర్తా కల్పాన్తః కల్పరక్షకః ॥ ౭౯ ॥

సులభోఽసులభో లభ్యోఽలభ్యో లాభప్రవర్ధకః ।
లాభాత్మా లాభదో లాభో లోకబన్ధుస్త్రయీతనుః ॥ ౮౦ ॥

భూశయోఽన్నమయో భూకృన్కమనీయో మహీతనుః ।
విజ్ఞానమయ ఆనన్దమయః ప్రాణమయోఽన్నదః ॥ ౮౧ ॥

దయాసుధార్ద్రనయనో నిరాశీరపరిగ్రహః ।
పదార్థవృత్తి రాశాస్యో మాయావీ మూకనాశనః ॥ ౮౨ ॥

హితైషీ హితకృత్ యుగ్యో పరార్థైకప్రయోజనః ।
కర్పూరగౌర పరదో జటా మణ్డలమణ్డితః ॥ ౮౩ ॥

నిష్ప్రపఞ్చీ నిరాధారో సత్వేశో సత్త్వవిత్ సదః ।
సమస్తజగదాధారో స్మస్తానన్దకారణః ॥ ౮౪ ॥

మునివన్ద్యో వీరభద్రో మునివృన్దనిశేవితః ।
మునిహృత్పుణ్డరీకస్థో మునిసఙ్ఘైకజీవనః ॥ ౮౫ ॥

ఉచ్చైర్ఘోషో ఘోషరూపః పత్తీశః పాపమోచనః ।
ఓషధీశో గిరిశయః కృత్స్నవీతః శుచిస్మితః ॥ ౮౬ ॥

అరణ్యేశో పరిచరో మన్త్రాత్మా మన్త్రవిత్తమః ।
ప్రలయానలకృత్ పుష్టః సోమసూర్యాగ్నిలోచనః ॥ ౮౭ ॥

అక్షోభ్యః క్షోభరహితో భస్మోద్ధూలితవిగ్రహః ।
శార్దూలచర్మవసనః సామగః సామగప్రియః ॥ ౮౮ ॥

కైలాశశిఖరావాసో స్వర్ణకేశ సువర్ణదృక ।
స్వతన్త్ర సర్వతన్త్రాత్మా ప్రణతార్తిపభఞ్జనః ॥ ౮౯ ॥

నికటస్థోఽతిదూరస్థో మహోత్సాహో మహోదయః ।
బ్రహ్మచారీ దృఢాచారీ సదాచారీ సనాతనః ॥ ౯౦ ॥

అపధృష్యః పిఙ్గలాక్ష్యః సర్వధర్మఫలప్రదః ।
అవిద్యా రహితో విద్యాసంశ్రయః క్షేత్రపాలకః ॥ ౯౧ ॥

గజారిః కరుణాసిన్ధుః శత్రుఘ్నః శత్రుపాతనః ।
కమఠో భార్గవః కల్కి ఋర్షభః కపిలో భవః ॥ ౯౨ ॥

శూన్య శూన్యమయః శూన్యజన్మా శూన్యలయోఽలయః ।
శూన్యాకారః శూన్యదేవో ప్రకాశాత్మా నిరీశ్వరః ॥ ౯౩ ॥

గోరాజో గోగణోపేతో గోదేవో గోపతిప్రియః ।
గవీశ్వరో గవా దాతా గోరక్షకారకో గిరిః ॥ ౯౪ ॥

చేతనశ్చేతనాధ్యక్షో మహాకాశో నిరాపదః ।
జడో జడగతో జాడ్యనాశనో జడతాపహా ॥ ౯౫ ॥

రామప్రియో లక్ష్మణాఢ్యో వితస్తానన్దదాయకః ।
కాశీవాసప్రియో రఙ్గో లోకరఞ్జనకారకః ॥ ౯౬ ॥

నిర్వేదకారీ నిర్విణ్ణో మహనీయో మహాధనః ।
యోగినీవల్లభో భర్తా భక్తకల్పతరూర్గ్రహీః ॥ ౯౭ ॥

ఋషభో గౌతమః స్త్రగ్వీ బుద్ధో బుద్ధిమత్తాం గురుః ।
నీరూపో నిర్మమోఽక్రూరో నిరాగ్రహః ॥ ౯౮ ॥

నిర్దమ్భో నీరసో నీలో నాయకో నాయకోత్తమః ।
నిర్వాణనాయకో నిత్యస్థితో నిర్ణయకారకః ॥ ౯౯ ॥

భావికో భావుకో భావో భవాత్మా భవమోచనః ।
భవ్యదాతా భవత్రాతా భగవాన్ భూతిమాన భవః ॥ ౧౦౦ ॥

ప్రేమీ ప్రియః ప్రేమకరః ప్రేమాత్మాః ప్రేమవిత్తమః ।
ఫుల్లారవిన్దనయనో నయాత్మా నీతిమాన్ నయీ ॥ ౧౦౧ ॥

పరంతేజః పరంధామ పరమేష్ఠీ పురాతనః ।
పుష్కరః పుష్కరాధ్యక్షః పుష్కరక్షేత్రసంస్థితః ॥ ౧౦౨ ॥

ప్రత్యగాత్మాఽప్రతర్క్యస్తు రాజమాన్యో జగత్పతిః ।
పుణ్యాత్మా పుణ్యకృత పుణ్యప్రియః పుణ్యవదాశ్రితః ॥ ౧౦౩ ॥

వాయుదో వాయుసేవీ చ వాతాహారో విమత్సరః ।
బిల్వప్రియో బిల్వధారీ బిల్వమాల్యో లయాశ్రయః ॥ ౧౦౪ ॥

బిల్వభక్తో బిల్వనాథో బిల్వభక్తిప్రియో వశీ ।
శమ్భుమన్త్రధరః శమ్భుయోగః శమ్భుప్రియో హరః ॥ ౧౦౫ ॥

స్కన్దప్రియో నిరాస్కన్దో సుఖయోగః సుఖాసనః ।
క్షమాప్రియః క్షమాదాతా క్షమాశీలో నిరక్షమః ॥ ౧౦౬ ॥

జ్ఞానజ్ఞో జ్ఞానదో జ్ఞానో జ్ఞానగమ్యః క్షమాపతిః ।
క్షమాచారస్తత్త్వదర్శీ తన్త్రజ్ఞస్తన్త్రకారకః ॥ ౧౦౭ ॥

తన్త్రసాధన తత్త్వజ్ఞస్తన్త్రమార్గప్రవర్తకః ।
తన్త్రాత్మా బాలతన్త్రజ్ఞో యన్త్రమన్త్రఫలప్రదః ॥ ౧౦౮ ॥

గోరసో గోరసాధీశో గోసిద్ధా గోమతీప్రియః ।
గోరక్షకారకో గోమీ గోరాఙ్గోపపిర్గురుః ॥ ౧౦౯ ॥

సమ్పూర్ణకామః సర్వేష్ఠ దాతా సర్వాత్మకః శమీ ।
శుద్ధోఽరుద్ధోఽవిరుద్ధశ్చ ప్రబుద్ధః సిద్ధసేవితః ॥ ౧౧౦ ॥

ధర్మో ధర్మవిదాం శ్రేష్ఠో ధర్మజ్ఞో ధర్మధారకః ।
ధర్మసేతుర్ధర్మరాజో ధర్మమార్గప్రవర్తకః ॥ ౧౧౧ ॥

ధర్మాచార్యో ధర్మకర్తా ధర్మ్యో ధర్మవిదగ్రణీః ।
ధర్మాత్మా ధర్మమర్మజ్ఞో ధర్మశాస్త్రవిశారదః ॥ ౧౧౨ ॥

కర్తా ధర్తా జగద్భర్తాఽపహర్తాసుర రక్షసామ్ ।
వేత్తా ఛేత్తా భవాపత్తేర్భేంతా పాపస్య పుణ్యకృత్ ॥ ౧౧౩ ॥

గుణవాన్ గుణస్మపన్నో గుణ్యో గణ్యో గుణప్రియః ।
గుణజ్ఞో గుణసమ్పూజ్యో గుణానన్దితమానసః ॥ ౧౧౪ ॥

గుణాధారో గుణాధీశో గుణిగీతో గుణిప్రియః ।
గుణాకారో గుణశ్రేష్ఠో గుణదాతా గుణోజ్వలః ॥ ౧౧౫ ॥

గర్గప్రియో గర్గదేవో గర్గదేవనమస్కృతః ।
గర్గనన్దకరో గర్గ గీతో గర్గవరప్రదః ॥ ౧౧౬ ॥

వేదవేద్యో వేదవిదో వేదవన్ద్యో విదామ్పతిః ।
వేదాన్తవేద్యో వేదాన్తకర్తా వేదాన్తపారగః ॥ ౧౧౭ ॥

హిరణ్యరేతా హుతభుక్ హిమవర్ణో హిమాలయః । హృతభుక్
హయగ్రీవో హిరణ్యస్త్రక్ హయనాథో హిరణ్యమయః ॥ ౧౧౮ ॥

శక్తిమాన్ శక్తిదాతా చ శక్తినాథః సుశక్తికః ।
శక్తిఽశక్తః శక్తిసాధ్య శక్తిహృత్ శక్తికారణమ్ ॥ ౧౧౯ ॥

సర్వాశాస్యగుణోపేతః సర్వ సౌభాగ్యదాయకః ।
త్రిపుణ్డ్రధారీ సంన్యాసీ గజచర్మపరివృతః ॥ ౧౨౦ ॥

గజాసురవిమర్దీ చ భూతవైతాలశోభితః ।
శ్మశానారణ్యసంవాసీ కర్పరాలఙ్కృతః శివః ॥ ౧౨౧ ॥

కర్మసాక్షీ కర్మకర్తా కర్మా కర్మఫలప్రదః ।
కర్మణ్యః కర్మదః కర్మీ కర్మహా కర్మకృద్ గురుః ॥ ౧౨౨ ॥

గోసఙ్కష్టసన్త్రాతా గోసన్తాపనివర్తకః ।
గోవర్ధనో గవాందాతా గోసౌభాగ్యవివర్ధనః ॥ ౧౨౩ ॥

గర్గ ఉవాచ –
ఇదం గోరక్షనాథస్య స్తోత్రముక్తమ్ మయా ప్రభో ।
నామ్నాం సహస్రమేతద్ధి గుహ్యాద్గుహ్యతమం పరమ్ ॥ ౧౨౪ ॥

ఏతస్య పఠనం నిత్యం సర్వాభీష్టప్రదం నృణామ్ ।
విద్యార్థీ లభతే విద్యాం ధనార్థీ లభతే ధనమ్ ॥ ౧౨౫ ॥

పుత్రార్థీ లభతే పుత్రాన్ మోక్షార్థీ ముక్తిమాప్నుయాత్ ।
యం యం చిన్తయతే కామం తం తం ప్రాప్నోతి నిశ్చితమ్ ॥ ౧౨౬ ॥

రాజ్యార్థీ లభతే రాజ్యం యోగార్థీ యోగవాన్ భవేత్ ।
భోగార్థీ లభతే భోగాన్ గోరక్షస్య ప్రసాదతః ॥ ౧౨౭ ॥

అరణ్యే విషమే ఘేరే శత్రుభిః పరివేష్టితః ।
సహస్రనామ పఠనాన్నరో ముచ్యేత్ తత్క్షణమ్ ॥ ౧౨౮ ॥

రాజద్వారే మహామారీ రోగే చ భయదే నృణామ్ ।
సర్వేష్వపి చ రోగేషు గోరక్ష స్మరణం హితమ్ ॥ ౧౨౯ ॥

నామ్నాం సహస్రం యత్రస్యాద్ గృహే గృహవతాం శుభమ్ ।
ధనధాన్యాదికం తత్ర పుత్రపౌత్రాదికం తథా ॥ ౧౩౦ ॥।

ఆరోగ్యం పశువృద్ధిశ్చ శుభకర్మాణి భూరిశః ।
న భయం తత్ర రోగాణాం సత్యం సత్యం వదామ్యహమ్ ॥ ౧౩౧ ॥

సహస్రనామ శ్రవణాత్ పఠనాచ్చ భవేద్ ధ్రువమ్ ।
కన్యాదాన సహస్రస్య వాజపేయ శతస్య చ ॥ ౧౩౨ ॥

గవాం కోటి ప్రదానస్య జ్యోతిష్టోమస్య యత్ ఫలమ్ ।
దశాశ్వమేధ యజ్ఞస్య ఫలం ప్రాప్నోతి మానవః ॥ ౧౩౩ ॥

సహస్రనామస్తోత్రస్య పుస్తకాని దదాతి తః ।
బ్రాహ్మణేభ్యస్తు సమ్పూజ్య తస్య లక్ష్మీ స్థిరో భవేత్ ॥ ౧౩౪ ॥

లభతే రాజసమ్మానం వ్యాపారస్య ఫలం లభేత్ । రాజసన్మానం
ప్రాప్నుయాచ్చ గతాం లక్ష్మీ సర్వజ్ఞవిజయీ భవేత్ ॥ ౧౩౫ ॥

చతుర్దశ్యాం ప్రదోషే చ శివం గోరక్ష సంజ్ఞితమ్ ।
పూజయేద్వివిధాచారైర్గన్ధపూష్పాదిభిర్నరః ॥ ౧౩౬ ॥

సంస్థాప్య పార్థివం లిఙ్గం గోరక్ష జగద్గురోః ।
భక్తయా సమర్చయేన్ నిత్యం సాధకః శుద్ధ మానసః ॥ ౧౩౭ ॥

స్తోత్రపాఠం ప్రకుర్వీత కారయేద్ బ్రాహ్మణైస్తథా ।
సర్వసిద్ధిమవాప్నోతి నాత్ర కార్యా విచారణా ॥ ౧౩౮ ॥

ధ్యాయేదన్తే మహేశానం పూజయిత్వా యథావిధి ।
బ్రాహ్మణాన్ పూజయేత్తత్ర ధనవస్త్రాదిభిః శుభైః ॥ ౧౩౯ ॥

ధ్యానమ్ –
యస్మాదుద్భవతీ దమద్భ త తమం యేనైవ తత్పాల్యతే
యస్మిన్ విశ్వమిదం చరాచరమయం సంలోయతే సర్వథా ।
బ్రహ్మావిష్ణుశివాదయోఽపి న పర పారం గతా యస్య తే
గోరక్షప్రభవం పరాత్పరతరం శూన్యం పరం ధీమహి ॥ ౧౪౦ ॥

॥ ఇతి శ్రీకల్పద్రుమతన్త్రే మహాసిద్ధిసారే మహర్షి గర్గప్రోక్తం
నిరఞ్జనాత్మకం శ్రీగోరక్షసహస్రనామస్తోత్రం సమ్పూర్ణమ్ ॥

Also Read 1000 Names of Gorak:

1000 Names of Gorak | Sahasranama Stotram in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil

1000 Names of Gorak | Sahasranama Stotram Lyrics in Telugu

Leave a Reply

Your email address will not be published. Required fields are marked *

Scroll to top