Shri Devi or Parvathisahasranamastotram Lyrics in Bengali:
॥ শ্রীদেবী অথবা পার্বতিসহস্রনামস্তোত্রম্ কূর্মপুরাণান্তর্গতম্ ॥
অথ দেবীমাহাত্ম্যম্ ।
সূত উবাচ
ইত্যাকর্ণ্যাথ মুনয়ঃ কূর্মরূপেণ ভাষিতম্ ।
বিষ্ণুনা পুনরেবৈনং প্রণতা হরিম্ ॥ ১২।১ ॥
ঋষয়ঃ ঊচুঃ
কৈষা ভগবতী দেবী শংকরার্দ্ধশরীরিণী ।
শিবা সতী হৈমবতী য়থাবদ্ব্রূহি পৃচ্ছতাম্ ॥ ১২।২ ॥
তেষাং তদ্বচনং শ্রুত্বা মুনীনাং পুরুষোত্তমঃ ।
প্রত্যুবাচ মহায়োগী ধ্যাত্বা স্বং পরমং পদম্ ॥ ১২।৩ ॥
শ্রীকূর্ম উবাচ
পুরা পিতামহেনোক্তং মেরুপৃষ্ঠে সুশোভনে ।
রহস্যমেতদ্ বিজ্ঞানং গোপনীয়ং বিশেষতঃ ॥ ১২।৪ ॥
সাংখ্যানাং পরমং সাংখ্যং ব্রহ্মবিজ্ঞানমুত্তমম্ ।
সংসারার্ণবমগ্নানাং জন্তূনামেকমোচনম্ ॥ ১২।৫ ॥
য়া সা মাহেশ্বরী শক্তির্জ্ঞানরূপাঽতিলালসা ।
ব্যোমসংজ্ঞা পরা কাষ্ঠা সেয়ং হৈমবতী মতা ॥ ১২।৬ ॥
শিবা সর্বগতাঽনান্তা গুণাতীতাতিনিষ্কলা ।
একানেকবিভাগস্থা জ্ঞানরূপাঽতিলালসা ॥ ১২।৭ ॥
অনন্যা নিষ্কলে তত্ত্বে সংস্থিতা তস্য তেজসা ।
স্বাভাবিকী চ তন্মূলা প্রভা ভানোরিবামলা ॥ ১২।৮ ॥
একা মাহেশ্বরী শক্তিরনেকোপাধিয়োগতঃ ।
পরাবরেণ রূপেণ ক্রীডতে তস্য সন্নিধৌ ॥ ১২।৯ ॥
সেয়ং করোতি সকলং তস্যাঃ কার্যমিদং জগত্ ।
ন কার্যং নাপি করণমীশ্বরস্যেতি সূরয়ঃ ॥ ১২।১০ ॥
চতস্রঃ শক্তয়ো দেব্যাঃ স্বরূপত্বেন সংস্থিতাঃ ।
অধিষ্ঠানবশাত্তস্যাঃ শৃণুধ্বং মুনিপুংগবাঃ ॥ ১২।১১ ॥
শান্তির্বিদ্যা প্রতিষ্ঠা চ নিবৃত্তিশ্চেতি তাঃ স্মৃতাঃ ।
চতুর্ব্যূহস্ততো দেবঃ প্রোচ্যতে পরমেশ্বরঃ ॥ ১২।১২ ॥
অনয়া পরয়া দেবঃ স্বাত্মানন্দং সমশ্নুতে ।
চতুর্ষ্বপি চ বেদেষু চতুর্মূর্তির্মহেশ্বরঃ ॥ ১২।১৩ ॥
অস্যাস্ত্বনাদিসংসিদ্ধমৈশ্বর্যমতুলং মহত্ ।
তত্সম্বন্ধাদনন্তায়া রুদ্রেণ পরমাত্মনা ॥ ১২।১৪ ॥
সৈষা সর্বেশ্বরী দেবী সর্বভূতপ্রবর্তিকা ।
প্রোচ্যতে ভগবান্ কালো হরিঃ প্রাণো মহেশ্বরঃ ॥ ১২।১৫ ॥
তত্র সর্বমিদং প্রোতমোতংচৈবাখিলং জগত্ ।
স কালোঽগ্নির্হরো রুদ্রো গীয়তে বেদবাদিভিঃ ॥ ১২।১৬ ॥
কালঃ সৃজতি ভূতানি কালঃ সংহরতে প্রজাঃ ।
সর্বে কালস্য বশগা ন কালঃ কস্যচিদ্ বশে ॥ ১২।১৭ ॥
প্রধানং পুরুষস্তত্ত্বং মহানাত্মা ত্বহংকৃতিঃ ।
কালেনান্যানি তত্ত্বানি সমাবিষ্টানি য়োগিনা ॥ ১২।১৮ ॥
তস্য সর্বজগন্মূর্তিঃ শক্তির্মায়েতি বিশ্রুতা ।
তদেয়ং ভ্রাময়েদীশো মায়াবী পুরুষোত্তমঃ ॥ ১২।১৯ ॥
সৈষা মায়াত্মিকা শক্তিঃ সর্বাকারা সনাতনী ।
বৈশ্বরূপং মহেশস্য সর্বদা সম্প্রকাশয়েত্ ॥ ১২।২০ ॥
অন্যাশ্চ শক্তয়ো মুখ্যাস্তস্য দেবস্য নির্মিতাঃ ।
জ্ঞানশক্তিঃ ক্রিয়াশক্তিঃ প্রাণশক্তিরিতি ত্রয়ম্ ॥ ১২।২১ ॥
সর্বাসামেব শক্তীনাং শক্তিমন্তো বিনির্মিতাঃ ।
মায়য়ৈবাথ বিপ্রেন্দ্রাঃ সা চানাদিরনশ্বরাঃ ॥ ১২।২২ ॥
সর্বশক্ত্যাত্মিকা মায়া দুর্নিবারা দুরত্যয়া ।
মায়াবী সর্বশক্তীশঃ কালঃ কালকারঃ প্রভুঃ ॥ ১২।২৩ ॥
করোতি কালঃ সকলং সংহরেত্ কাল এব হি ।
কালঃ স্থাপয়তে বিশ্বং কালাধীনমিদং জগত্ ॥ ১২।২৪ ॥
লব্ধ্বা দেবাধিদেবস্য সন্নিধিং পরমেষ্ঠিনঃ ।
অনন্তস্যাখিলেশস্য শংভোঃ কালাত্মনঃ প্রভোঃ ॥ ১২।২৫ ॥
প্রধানং পুরুষো মায়া মায়া চৈবং প্রপদ্যতে ।
একা সর্বগতানন্তা কেবলা নিষ্কলা শিবা ॥ ১২।২৬ ॥
একা শক্তিঃ শিবৈকোঽপি শক্তিমানুচ্যতে শিবঃ ।
শক্তয়ঃ শক্তিমন্তোঽন্যে সর্বশক্তিসমুদ্ভবাঃ ॥ ১২।২৭ ॥
শক্তিশক্তিমতোর্ভেদং বদন্তি পরমার্থতঃ ।
অভেদংচানুপশ্যন্তি য়োগিনস্তত্ত্বচিন্তকাঃ ॥ ১২।২৮ ॥
শক্তয়ো গিরজা দেবী শক্তিমানথ শংকরঃ ।
বিশেষঃ কথ্যতে চায়ং পুরাণে ব্রহ্মবাদিভিঃ ॥ ১২।২৯ ॥
ভোগ্যা বিশ্বেশ্বরী দেবী মহেশ্বরপতিব্রতা ।
প্রোচ্যতে ভগবান্ ভোক্তা কপর্দী নীললোহিতঃ ॥ ১২।৩০ ॥
মন্তা বিশ্বেশ্বরো দেবঃ শংকরো মন্মথান্তকঃ ।
প্রোচ্যতে মতিরীশানী মন্তব্যা চ বিচারতঃ ॥ ১২।৩১ ॥
ইত্যেতদখিলং বিপ্রাঃ শক্তিশক্তিমদুদ্ভবম্ ।
প্রোচ্যতে সর্ববেদেষু মুনিভিস্তত্ত্বদর্শিভিঃ ॥ ১২।৩২ ॥
এতত্প্রদর্শিতং দিব্যং দেব্যা মাহাত্ম্যমুত্তমম্ ।
সর্ববেদান্তবীদেষু নিশ্চিতং ব্রহ্মবাদিভিঃ ॥ ১২।৩৩ ॥
একং সর্বগতং সূক্ষ্মং কূটস্থমচলং ধ্রুবম্ ।
য়োগিনস্তত্প্রপশ্যন্তি মহাদেব্যাঃ পরং পদম্ ॥ ১২।৩৪ ॥
আনন্দমক্ষরং ব্রহ্ম কেবলং নিষ্কলং পরম্ ।
য়োগিনস্তত্প্রপশ্যন্তি মহাদেব্যাঃ পরং পদম্ ॥ ১২।৩৫ ॥
পরাত্পরতরং তত্ত্বং শাশ্বতং শিবমচ্যুতম্ ।
অনন্তপ্রকৃতৌ লীনং দেব্যাস্তত্পরমং পদম্ ॥ ১২।৩৬ ॥
শুভং নিরঞ্জনং শুদ্ধং নির্গুণং দ্বৈতবর্জিতম্ ।
আত্মোপলব্ধিবিষয়ং দেব্যাস্ততপরমং পদম্ ॥ ১২।৩৭ ॥
সৈষা ধাত্রী বিধাত্রী চ পরমানন্দমিচ্ছতাম্ ।
সংসারতাপানখিলান্নিহন্তীশ্বরসংশ্রয়া ॥ ১২।৩৮ ॥
তস্মাদ্বিমুক্তিমন্বিচ্ছন্ পার্বতীং পরমেশ্বরীম্ ।
আশ্রয়েত্সর্বভূতানামাত্মভূতাং শিবাত্মিকাম্ ॥ ১২।৩৯ ॥
লব্ধ্বা চ পুত্রীং শর্বাণীং তপস্তপ্ত্বা সুদুশ্চরন্ ।
সভার্যঃ শরণং য়াতঃ পার্বতীং পরমেশ্বরীম্ ॥ ১২।৪০ ॥
তাং দৃষ্ট্বা জায়মানাং চ স্বেচ্ছয়ৈব বরাননাম্ ।
মেনা হিমবতঃ পত্নী প্রাহেদং পর্বতেশ্বরম্ ॥ ১২।৪১ ॥
মেনোবাচ
পশ্য বালামিমাং রাজন্রাজীবসদৃশাননাম্ ।
হিতায় সর্বভূতানাং জাতা চ তপসাবয়োঃ ॥ ১২।৪২ ॥
সোঽপি দৃষ্ট্বা ততঃ দেবীং তরুণাদিত্যসন্নিভাম্ ।
কপর্দিনীং চতুর্বক্রাং ত্রিনেত্রামতিলালসাম্ ॥ ১২।৪৩ ॥
অষ্টহস্তাং বিশালাক্ষীং চন্দ্রাবয়বভূষণাম্ ।
নির্গুণাং সগুণাং সাক্ষাত্সদসদ্ব্যক্তিবর্জিতাম্ ॥ ১২।৪৪ ॥
প্রণম্য শিরসা ভূমৌ তেজসা চাতিবিহ্বলঃ ।
ভীতঃ কৃতাঞ্জলিস্তস্যাঃ প্রোবাচ পরমেশ্বরীম্ ॥ ১২।৪৫ ॥
হিমবানুবাচ
কা ত্বং দেবি বিশালাক্ষি শশাঙ্কাবয়বাঙ্কিতে ।
ন জানে ত্বামহং বত্সে য়থাবদ্ব্রূহি পৃচ্ছতে ॥ ১২।৪৬ ॥
গিরীন্দ্রবচনং শ্রুত্বা ততঃ সা পরমেশ্বরী ।
ব্যাজহার মহাশৈলং য়োগিনামভয়প্রদা ॥ ১২।৪৭ ॥
দেব্যুবাচ
মাং বিদ্ধি পরমাং শক্তিং পরমেশ্বরসমাশ্রয়াম্ ॥ ১২।৪৮ ॥
অনন্যামব্যয়ামেকাং য়াং পশ্যন্তি মুমুক্ষবঃ ।
অহং বৈ সর্বভাবানাত্মা সর্বান্তরা শিবা ॥ ১২।৪৯ ॥
শাশ্বতৈশ্বর্যবিজ্ঞানমূর্তিঃ সর্বপ্রবর্তিকা ।
অনন্তাঽনন্তমহিমা সংসারার্ণবতারিণী ॥ ১২।৫০ ॥
দিব্যং দদামি তে চক্ষুঃ পশ্য মে রূপমৈশ্বরম্ ।
এতাবদুক্ত্বা বিজ্ঞানং দত্ত্বা হিমবতে স্বয়ম্ ॥ ১২।৫১ ॥
স্বং রূপং দর্শয়ামাস দিব্যং তত্ পারমেশ্বরম্ ।
কোটিসূর্যপ্রিতীকাশং তেজোবিম্বং নিরাকুলম্ ॥ ১২।৫২ ॥
জ্বালামালাসহস্রাঢ্যং কালানলশতোপমম্ ।
দংষ্ট্রাকরালং দুর্দ্ধর্ষং জটামণডলমণ্ডিতম্ ॥ ১২।৫৩ ॥
কিরীটিনং গদাহস্তং শঙ্কচক্রধরং তথা ।
ত্রিশূলবরহস্তং চ ঘোররূপং ভয়ানকম্ ॥ ১২।৫৪ ॥
প্রশান্তং সোম্যবদনমনন্তাশ্চর্যসংয়ুতম্ ।
চন্দ্রাবয়বলক্ষ্মাণং চন্দ্রকোটিসমপ্রভম্ ॥ ১২।৫৫ ॥
কিরীটিনং গদাহস্তং নূপুরৈরুপশোভিতম্ ।
দিব্যমাল্যাম্বরধরং দিব্যগন্ধানুলেপনম্ ॥ ১২।৫৬ ॥
শঙ্খচক্রধরং কাম্যং ত্রিনেত্রং কৃত্তিবাসসম্ ।
অণ্ডস্থং চাণ্ডবাহ্যস্থং বাহ্যমাভ্যন্তরং পরম্ ॥ ১২।৫৭ ॥
সর্বশক্তিময়ং শুভ্রং সর্বাকারং সনাতনম্ ।
ব্রহ্মোন্দ্রোপেন্দ্রয়োগীন্দ্রৈর্বন্দ্যমানপদাম্বুজম্ ॥ ১২।৫৮ ॥
সর্বতঃ পাণিপাদান্তং সর্বতোঽক্ষিশিরোমুখম্ ।
সর্বমাবৃত্য তিষ্ঠন্তং দদর্শ পরমেশ্বরম্ ॥ ১২।৫৯ ॥
দৃষ্ট্বা তদীদৃশং রূপং দেব্যা মাহেশ্বরং পরম্ ।
ভয়েন চ সমাবিষ্টঃ স রাজা হৃষ্টমানসঃ ॥ ১২।৬০ ॥
আত্মন্যাধায় চাত্মানমোঙ্কারং সমনুস্মরন্ ।
নাম্নামষ্টসহস্রেণ তুষ্টাব পরমেশ্বরীম্ ॥ ১২।৬১ ॥
হিমবানুবাচ
শিবোমা পরমা শক্তিরনন্তা নিষ্কলামলা ।
শান্তা মাহেশ্বরী নিত্যা শাশ্বতী পরমাক্ষরা ॥ ১২।৬২ ॥
অচিন্ত্যা কেবলাঽনন্ত্যা শিবাত্মা পরমাত্মিকা ।
অনাদিরব্যয়া শুদ্ধা দেবাত্মা সর্বগাঽচলা ॥ ১২।৬৩ ॥
একানেকবিভাগস্থা মায়াতীতা সুনির্মলা ।
মহামাহেশ্বরী সত্যা মহাদেবী নিরঞ্জনা ॥ ১২।৬৪ ॥
কাষ্ঠা সর্বান্তরস্থা চ চিচ্ছক্তিরতিলালসা ।
নন্দা সর্বাত্মিকা বিদ্যা জ্যোতীরূপাঽমৃতাক্ষরা ॥ ১২।৬৫ ॥
শান্তিঃ প্রতিষ্ঠা সর্বেষাং নিবৃত্তিরমৃতপ্রদা ।
ব্যোমমূর্তির্ব্যোমলয়া ব্যোমাধারাঽচ্যুতাঽমরা ॥ ১২।৬৬ ॥
অনাদিনিধনাঽমোঘা কারণাত্মাকুলাকুলা ।
স্বতঃ প্রথমজানাভিরমৃতস্যাত্মসংশ্রয়া ॥ ১২।৬৭ ॥
প্রাণেশ্বরপ্রিয়া মাতা মহামহিষঘাতিনী ।
প্রাণেশ্বরী প্রাণরূপা প্রধানপুরুষেশ্বরী ॥ ১২।৬৮ ॥
মহামায়া সুদুষ্পূরা মূলপ্রকৃতিরীশ্বরী
সর্বশক্তিকলাকারা জ্যোত্স্না দ্যোর্মহিমাস্পদা ॥ ১২।৬৯ ॥
সর্বকার্যনিয়ন্ত্রী চ সর্বভূতেশ্বরেশ্বরী ।
সংসারয়োনিঃ সকলা সর্বশক্তিসমুদ্ভবা ॥ ১২।৭০ ॥
সংসারপোতা দুর্বারা দুর্নিরীক্ষ্য দুরাসদা ।
প্রাণশক্তিঃ প্রাণবিদ্যা য়োগনীপরমা কলা ॥ ১২।৭১ ॥
মহবিভূতিদুর্দর্ষা মূলপ্রকৃতিসম্ভবা ।
অনাদ্যনন্তবিভবা পরমাদ্যাপকর্ষিণী ॥ ১২।৭২ ॥
সর্গস্থিত্যন্তকরণী সুদুর্বাচ্যাদুরত্যয়া ।
শব্দয়োনিঃ শব্দময়ী নাদাখ্যা নাদবিগ্রহা ॥ ১২।৭৩ ॥
অনাদিরব্যক্তগুণা মহানন্দা সনাতনী ।
আকাশয়োনির্যোগস্থা মহায়োগেশ্বরেশ্বরী ॥ ১২।৭৪ ॥
মহামায়া সুদুষ্পারা মূলপ্রকৃতিরীশ্বরী
প্রধানপুরুষাতীতা প্রধানপুরুষাত্মিকা ॥ ১২।৭৫ ॥
পুরাণী চিন্ময়ী পুংসামাদিঃ পুরুষরূপিণী ।
ভূতান্তরাত্মা কূটস্থা মহাপুরুষসংজ্ঞিতা ॥ ১২।৭৬ ॥
জন্মমৃত্যুজরাতীতা সর্বশক্তিসমন্বিতা ।
ব্যাপিনী চানবচ্ছিন্না প্রধানানুপ্রবেশিনী ॥ ১২।৭৭ ॥
ক্ষেত্রজ্ঞশক্তিরব্যক্তলক্ষণা মলবর্জিতা ।
অনাদিমায়াসংভিন্না ত্রিতত্ত্বা প্রকৃতিগ্রহা ॥ ১২।৭৮ ॥
মহামায়াসমুত্পন্না তামসী পৌরুষী ধ্রুবা ।
ব্যক্তাব্যক্তাত্মিকা কৃষ্ণা রক্তা শুক্লা প্রসূতিকা ॥ ১২।৭৯ ॥
অকার্যা কার্যজননী নিত্যং প্রসবধর্মিণী ।
সর্গপ্রলয়নির্মুক্তা সৃষ্টিস্থিত্যন্তধর্মিণী ॥ ১২।৮০ ॥
ব্রহ্মগর্ভা চতুর্বিশা পদ্মনাভাঽচ্যুতাত্মিকা ।
বৈদ্যুতী শাশ্বতী য়োনির্জগন্মাতেশ্বরপ্রিয়া ॥ ১২।৮১ ॥
সর্বাধারা মহারূপা সর্বৈশ্বর্যসমন্বিতা ।
বিশ্বরূপা মহাগর্ভা বিশ্বেশেচ্ছানুবর্তিনী ॥ ১২।৮২ ॥
মহীয়সী ব্রহ্ময়োনিঃ মহালক্ষ্মীসমুদ্ভবা
মহাবিমানমধ্যস্থা মহানিদ্রাত্মহেতুকা ॥ ১২।৮৩ ॥
সর্বসাধারণী সূক্ষ্মা হ্যবিদ্যা পারমার্থিকা ।
অনন্তরূপাঽনন্তস্থা দেবী পুরুষমোহিনী ॥ ১২।৮৪ ॥
অনেকাকারসংস্থানা কালত্রয়বিবর্জিতা ।
ব্রহ্মজন্মা হরের্মূর্তির্ব্রহ্মবিষ্ণুশিবাত্মিকা ॥ ১২।৮৫ ॥
ব্রহ্মেশবিষ্ণুজননী ব্রহ্মাখ্যা ব্রহ্মসংশ্রয়া ।
ব্যক্তা প্রথমজা ব্রাহ্মী মহতী জ্ঞানরূপিণী ॥ ১২।৮৬ ॥
বৈরাগ্যৈশ্বর্যধর্মাত্মা ব্রহ্মমূর্তির্হৃদিস্থিতা ।
অপাংয়োনিঃ স্বয়ংভূতির্মানসী তত্ত্বসংভবা ॥ ১২।৮৭ ॥
ঈশ্বরাণী চ শর্বাণী শংকরার্দ্ধশরীরিণী ।
ভবানী চৈব রুদ্রাণী মহালক্ষ্মীরথাম্বিকা ॥ ১২।৮৮ ॥
মহেশ্বরসমুত্পন্না ভুক্তিমুক্তিফলপ্রদা ।
সর্বেশ্বরী সর্ববন্দ্যা নিত্যং মুদিতমানসা ॥ ১২।৮৯ ॥
ব্রহ্মেন্দ্রোপেন্দ্রনমিতা শংকরেচ্ছানুবর্তিনী ।
ঈশ্বরার্দ্ধাসনগতা মহেশ্বরপতিব্রতা ॥ ১২।৯০ ॥
সকৃদ্বিভাতা সর্বার্তি সমুদ্রপরিশোষিণী ।
পার্বতী হিমবত্পুত্রী পরমানন্দদায়িনী ॥ ১২।৯১ ॥
গুণাঢ্যা য়োগজা য়োগ্যা জ্ঞানমূর্তির্বিকাসিনী ।
সাবিত্রীকমলা লক্ষ্মীঃ শ্রীরনন্তোরসি স্থিতা ॥ ১২।৯২ ॥
সরোজনিলয়া মুদ্রা য়োগনিদ্রা সুরার্দিনী ।
সরস্বতী সর্ববিদ্যা জগজ্জ্যেষ্ঠা সুমঙ্গলা ॥ ১২।৯৩ ॥
বাগ্দেবী বরদা বাচ্যা কীর্তিঃ সর্বার্থসাধিকা ।
য়োগীশ্বরী ব্রহ্মবিদ্যা মহাবিদ্যা সুশোভনা ॥ ১২।৯৪ ॥
গুহ্যবিদ্যাত্মবিদ্যা চ ধর্মবিদ্যাত্মভাবিতা ।
স্বাহা বিশ্বংভরা সিদ্ধিঃ স্বধা মেধা ধৃতিঃ শ্রুতিঃ ॥ ১২।৯৫ ॥
নীতিঃ সুনীতিঃ সুকৃতির্মাধবী নরবাহিনী ।
পূজ্যা বিভাবরী সৌম্যা ভোগিনী ভোগশায়িনী ॥ ১২।৯৬ ॥
শোভা বংশকরী লোলা মালিনী পরমেষ্ঠিনী ।
ত্রৈলোক্যসুন্দরী রম্যা সুন্দরী কামচারিণী ॥ ১২।৯৭ ॥
মহানুভাবা সত্ত্বস্থা মহামহিষমর্দিনী ।
পদ্মমালা পাপহরা বিচিত্রা মুকুটাননা ॥ ১২।৯৮ ॥
কান্তা চিত্রাম্বরধরা দিব্যাবরণভূষিতা ।
হংসাখ্যা ব্যোমনিলয়া জগত্সৃষ্টিবিবর্দ্ধিনী ॥ ১২।৯৯ ॥
নির্যন্ত্রা য়ন্ত্রবাহস্থা নন্দিনী ভদ্রকালিকা ।
আদিত্যবর্ণা কৌমারী ময়ূরবরবাহনা ॥ ১২।১০০ ॥
বৃষাসনগতা গৌরী মহাকালী সুরার্চিতা ।
অদিতির্নিয়তা রৌদ্রা পদ্মগর্ভা বিবাহনা ॥ ১২।১০১ ॥
বিরূপাক্ষী লেলিহানা মহাপুরনিবাসিনী ।
মহাফলাঽনবদ্যাঙ্গী কামরুপা বিভাবরী ॥ ১২।১০২ ॥
বিচিত্ররত্নমুকুটা প্রণতার্তিপ্রভঞ্জনী ।
কৌশিকী কর্ষণী রাত্রিস্ত্রিদশার্তিবিনাশিনী ॥ ১২।১০৩ ॥
বহুরূপা স্বরূপা চ বিরূপা রূপবর্জিতা ।
ভক্তার্তিশমনী ভব্যা ভবভারবিনাশনী ॥ ১২।১০৪ ॥
নির্গুণা নিত্যবিভবা নিঃসারা নিরপত্রপা ।
য়শস্বিনী সামগীতির্ভবাঙ্গনিলয়ালয়া ॥ ১২।১০৫ ॥
দীক্ষা বিদ্যাধরী দীপ্তা মহেন্দ্রবিনিপাতিনী ।
সর্বাতিশায়িনী বিশ্বা সর্বসিদ্ধিপ্রদায়িনী ॥ ১২।১০৬ ॥
সর্বেশ্বরপ্রিয়া ভার্যা সমুদ্রান্তরবাসিনী ।
অকলঙ্কা নিরাধারা নিত্যসিদ্ধা নিরাময়া ॥ ১২।১০৭ ॥
কামধেনুর্বৃহদ্গর্ভা ধীমতী মোহনাশিনী ।
নিঃসঙ্কল্পা নিরাতঙ্কা বিনয়া বিনয়প্রিয়া ॥ ১২।১০৮ ॥
জ্বালামালাসহস্রাঢ্যা দেবদেবী মনোময়ী ।
মহাভগবতী ভর্গা বাসুদেবসমুদ্ভবা ॥ ১২।১০৯ ॥
মহেন্দ্রোপেন্দ্রভগিনী ভক্তিগম্যা পরাবরা ।
জ্ঞানজ্ঞেয়া জরাতীতা বেদান্তবিষয়া গতিঃ ॥ ১২।১১০ ॥
দক্ষিণা দহনা মায়া সর্বভূতনমস্কৃতা ।
য়োগমায়া বিভাগজ্ঞা মহামোহা মহীয়সী ॥ ১২।১১১ ॥
সংধ্যা সর্বসমুদ্ভূতির্ব্রহ্মবৃক্ষাশ্রয়ানতিঃ ।
বীজাঙ্কুরসমুদ্ভূতির্মহাশক্তির্মহামতিঃ ॥ ১২।১১২ ॥
খ্যাতিঃ প্রজ্ঞা চিতিঃ সংচ্চিন্মহাভোগীন্দ্রশায়িনী ।
বিকৃতিঃ শাংসরী শাস্তির্গণগন্ধর্বসেবিতা ॥ ১২।১১৩ ॥
বৈশ্বানরী মহাশালা দেবসেনা গুহপ্রিয়া ।
মহারাত্রিঃ শিবামন্দা শচী দুঃস্বপ্ননাশিনী ॥ ১২।১১৪ ॥
ইজ্যা পূজ্যা জগদ্ধাত্রী দুর্বিজ্ঞেয়া সুরূপিণী ।
তপস্বিনী সমাধিস্থা ত্রিনেত্রা দিবি সংস্থিতা ॥ ১২।১১৫ ॥
গুহাম্বিকা গুণোত্পত্তির্মহাপীঠা মরুত্সুতা ।
হব্যবাহান্তরাগাদিঃ হব্যবাহসমুদ্ভবা ॥ ১২।১১৬ ॥
জগদ্যোনির্জগন্মাতা জন্মমৃত্যুজরাতিগা ।
বুদ্ধিমাতা বুদ্ধিমতী পুরুষান্তরবাসিনী ॥ ১২।১১৭ ॥
তরস্বিনী সমাধিস্থা ত্রিনেত্রা দিবিসংস্থিতা ।
সর্বেন্দ্রিয়মনোমাতা সর্বভূতহৃদি স্থিতা ॥ ১২।১১৮ ॥
সংসারতারিণী বিদ্যা ব্রহ্মবাদিমনোলয়া ।
ব্রহ্মাণী বৃহতী ব্রাহ্মী ব্রহ্মভূতা ভবারণী ॥ ১২।১১৯ ॥
হিরণ্ময়ী মহারাত্রিঃ সংসারপরিবর্ত্তিকা ।
সুমালিনী সুরূপা চ ভাবিনী তারিণী প্রভা ॥ ১২।১২০ ॥
উন্মীলনী সর্বসহা সর্বপ্রত্যয়সাক্ষিণী ।
সুসৌম্যা চন্দ্রবদনা তাণ্ডবাসক্তমানসা ॥ ১২।১২১ ॥
সত্ত্বশুদ্ধিকরী শুদ্ধির্মলত্রয়বিনাশিনী ।
জগত্প্রিয়া জগন্মূর্তিস্ত্রিমূর্তিরমৃতাশ্ ॥ ১২।১২২ ॥
নিরাশ্রয়া নিরাহারা নিরঙ্কুরবনোদ্ভবা ।
চন্দ্রহস্তা বিচিত্রাঙ্গী স্রগ্বিণী পদ্মধারিণী ॥ ১২।১২৩ ॥
পরাবরবিধানজ্ঞা মহাপুরুষপূর্বজা ।
বিদ্যেশ্বরপ্রিয়া বিদ্যা বিদ্যুজ্জিহ্বা জিতশ্রমা ॥ ১২।১২৪ ॥
বিদ্যাময়ী সহস্রাক্ষী সহস্রবদনাত্মজা ।
সহস্ররশ্মিঃ সত্ত্বস্থা মহেশ্বরপদাশ্রয়া ॥ ১২।১২৫ ॥
ক্ষালিনী সন্ময়ী ব্যাপ্তা তৈজসী পদ্মবোধিকা ।
মহামায়াশ্রয়া মান্যা মহাদেবমনোরমা ॥ ১২।১২৬ ॥
ব্যোমলক্ষ্মীঃ সিহরথা চেকিতানামিতপ্রভা ।
বীরেশ্বরী বিমানস্থা বিশোকাশোকনাশিনী ॥ ১২।১২৭ ॥
অনাহতা কুণ্ডলিনী নলিনী পদ্মবাসিনী ।
সদানন্দা সদাকীর্তিঃ সর্বভূতাশ্রয়স্থিতা ॥ ১২।১২৮ ॥
বাগ্দেবতা ব্রহ্মকলা কলাতীতা কলারণী ।
ব্রহ্মশ্রীর্ব্রহ্মহৃদয়া ব্রহ্মবিষ্ণুশিবপ্রিয়া ॥ ১২।১২৯ ॥
ব্যোমশক্তিঃ ক্রিয়াশক্তির্জ্ঞানশক্তিঃ পরাগতিঃ ।
ক্ষোভিকা বন্ধিকা ভেদ্যা ভেদাভেদবিবর্জিতা ॥ ১২।১৩০ ॥
অভিন্নাভিন্নসংস্থানা বংশিনী বংশহারিণী ।
গুহ্যশক্তির্গুণাতীতা সর্বদা সর্বতোমুখী ॥ ১২।১৩১ ॥
ভগিনী ভগবত্পত্নী সকলা কালকারিণী ।
সর্ববিত্ সর্বতোভদ্রা গুহ্যাতীতা গুহাবলিঃ ॥ ১২।১৩২ ॥
প্রক্রিয়া য়োগমাতা চ গঙ্গা বিশ্বেশ্বরেশ্বরী ।
কপিলা কাপিলা কান্তাকনকাভাকলান্তরা ॥ ১২।১৩৩ ॥
পুণ্যা পুষ্করিণী ভোক্ত্রী পুরংদরপুরস্সরা ।
পোষণী পরমৈশ্বর্যভূতিদা ভূতিভূষণা ॥ ১২।১৩৪ ॥
পঞ্চব্রহ্মসমুত্পত্তিঃ পরমার্থার্থবিগ্রহা ।
ধর্মোদয়া ভানুমতী য়োগিজ্ঞেয় মনোজবা ॥ ১২।১৩৫ ॥
মনোহরা মনোরস্থা তাপসী বেদরূপিণী ।
বেদশক্তির্বেদমাতা বেদবিদ্যাপ্রকাশিনী ॥ ১২।১৩৬ ॥
য়োগেশ্বরেশ্বরী মাতা মহাশক্তির্মনোময়ী ।
বিশ্বাবস্থা বিয়ন্মূর্ত্তির্বিদ্যুন্মালা বিহায়সী ॥ ১২।১৩৭ ॥
কিংনরী সুরভির্বন্দ্যা নন্দিনী নন্দিবল্লভা ।
ভারতী পরমানন্দা পরাপরবিভেদিকা ॥ ১২।১৩৮ ॥
সর্বপ্রহরণোপেতা কাম্যা কামেশ্বরেশ্বরী ।
অচিন্ত্যাঽচিন্ত্যবিভবা হৃল্লেখা কনকপ্রভা ১২।১৩৯ ॥
কূষ্মাণ্ডী ধনরত্নাঢ্যা সুগন্ধা গন্ধায়িনী ।
ত্রিবিক্রমপদোদ্ভূতা ধনুষ্পাণিঃ শিবোদয়া ॥ ১২।১৪০ ॥
সুদুর্লভা ধনাদ্যক্ষা ধন্যা পিঙ্গললোচনা ।
শান্তিঃ প্রভাবতী দীপ্তিঃ পঙ্কজায়তলোচনা ॥ ১২।১৪১ ॥
আদ্যা হৃত্কমলোদ্ভূতা গবাং মতা রণপ্রিয়া ।
সত্ক্রিয়া গিরিজা শুদির্নিত্যপুষ্টা নিরন্তরা ॥ ১২।১৪২ ॥
দুর্গাকাত্যায়নীচণ্ডী চর্চিকা শান্তবিগ্রহা ।
হিরণ্যবর্ণা রজনী জগদ্যন্ত্রপ্রবর্তিকা ॥ ১২।১৪৩ ॥
মন্দরাদ্রিনিবাসা চ শারদা স্বর্ণমালিনী ।
রত্নমালা রত্নগর্ভা পৃথ্বী বিশ্বপ্রমাথিনী ॥ ১২।১৪৪ ॥
পদ্মাননা পদ্মনিভা নিত্যতুষ্টাঽমৃতোদ্ভবা ।
ধুন্বতী দুঃপ্রকম্পা চ সূর্যমাতা দৃষদ্বতী ॥ ১২।১৪৫ ॥
মহেন্দ্রভগিনী মান্যা বরেণ্যা বরদয়িকা ।
কল্যাণী কমলাবাসা পঞ্চচূডা বরপ্রদা ॥ ১২।১৪৬ ॥
বাচ্যা বরেশ্বরী বন্দ্যা দুর্জয়া দুরতিক্রমা ।
কালরাত্রির্মহাবেগা বীরভদ্রপ্রিয়া হিতা ॥ ১২।১৪৭ ॥
ভদ্রকালী জগন্মাতা ভক্তানাং ভদ্রদায়িনী ।
করালা পিঙ্গলাকারা কামভেদাঽমহামদা ॥ ১২।১৪৮ ॥
য়শস্বিনী য়শোদা চ ষডধ্বপরিবর্ত্তিকা ।
শঙ্খিনী পদ্মিনী সাংখ্যা সাংখ্যয়োগপ্রবর্তিকা ॥ ১২।১৪৯ ॥
চৈত্রা সংবত্সরারূঢা জগত্সম্পূরণীধ্বজা ।
শুম্ভারিঃ খেচরীস্বস্থা কম্বুগ্রীবাকলিপ্রিয়া ॥ ১২।১৫০ ॥
খগধ্বজা খগারূঢা পরার্যা পরমালিনী ।
ঐশ্বর্যপদ্মনিলয়া বিরক্তা গরুডাসনা ॥ ১২।১৫১ ॥
জয়ন্তী হৃদ্গুহা গম্যা গহ্বরেষ্ঠা গণাগ্রণীঃ ।
সংকল্পসিদ্ধা সাম্যস্থা সর্ববিজ্ঞানদায়িনী ॥ ১২।১৫২ ॥
কলিকল্পবিহন্ত্রী চ গুহ্যোপনিষদুত্তমা ।
নিষ্ঠা দৃষ্টিঃ স্মৃতির্ব্যাপ্তিঃ পুষ্টিস্তুষ্টিঃ ক্রিয়াবতী ॥ ১২।১৫৩ ॥
বিশ্বামরেশ্বরেশানা ভুক্তির্মুক্তিঃ শিবাঽমৃতা ।
লোহিতা সর্পমালা চ ভীষণী বনমালিনী ॥ ১২।১৫৪ ॥
অনন্তশয়নাঽনন্তা নরনারায়ণোদ্ভবা ।
নৃসিংহী দৈত্যমথনী শঙ্খচক্রগদাধরা ॥ ১২।১৫৫ ॥
সংকর্ষণসমুত্পত্তিরম্বিকাপাদসংশ্রয়া ।
মহাজ্বালা মহামূর্ত্তিঃ সুমূর্ত্তিঃ সর্বকামধুক্ ॥ ১২।১৫৬ ॥
সুপ্রভা সুস্তনা সৌরী ধর্মকামার্থমোক্ষদা ।
ভ্রূমধ্যনিলয়া পূর্বা পুরাণপুরুষারণিঃ ॥ ১২।১৫৭ ॥
মহাবিভূতিদা মধ্যা সরোজনয়না সমা ।
অষ্টাদশভুজানাদ্যা নীলোত্পলদলপ্রভ১২।১৫৮ ॥
সর্বশক্ত্যাসনারূঢা সর্বধর্মার্থবর্জিতা ।
বৈরাগ্যজ্ঞাননিরতা নিরালোকা নিরিন্দ্রিয়া ॥ ১২।১৫৯ ॥
বিচিত্রগহনাধারা শাশ্বতস্থানবাসিনী ।
স্থানেশ্বরী নিরানন্দা ত্রিশূলবরধারিণী ॥ ১২।১৬০ ॥
অশেষদেবতামূর্ত্তির্দেবতা বরদেবতা ।
গণাম্বিকা গিরেঃ পুত্রী নিশুম্ভবিনিপাতিনী ॥ ১২।১৬১ ॥
অবর্ণা বর্ণরহিতা ত্রিবর্ণা জীবসংভবা ।
অনন্তবর্ণাঽনন্যস্থা শংকরী শান্তমানসা ॥ ১২।১৬২ ॥
অগোত্রা গোমতী গোপ্ত্রী গুহ্যরূপা গুণোত্তরা ।
গৌর্গীর্গব্যপ্রিয়া গৌণী গণেশ্বরনমস্কৃতা ॥ ১২।১৬৩ ॥
সত্যমাতা সত্যসংধা ত্রিসংধ্যা সংধিবর্জিতা ।
সর্ববাদাশ্রয়া সাংখ্যা সাংখ্যয়োগসমুদ্ভবা ॥ ১২।১৬৪ ॥
অসংখ্যেয়াঽপ্রমেয়াখ্যা শূন্যা শুদ্ধকুলোদ্ভবা ।
বিন্দুনাদসমুত্পত্তিঃ শংভুবামা শশিপ্রভা ॥ ১২।১৬৫ ॥
পিষঙ্গা ভেদরহিতা মনোজ্ঞা মধুসূদনী ।
মহাশ্রীঃ শ্রীসমুত্পত্তিস্তমঃপারে প্রতিষ্ঠিতা ॥ ১২।১৬৬ ॥
ত্রিতত্ত্বমাতা ত্রিবিধা সুসূক্ষ্মপদসংশ্রয়া ।
শন্তা ভীতা মলাতীতা নির্বিকারা নিরাশ্রয়া ॥ ১২।১৬৭ ॥
শিবাখ্যা চিত্তনিলয়া শিবজ্ঞানস্বরূপিণী ।
দৈত্যদানবনির্মাত্রী কাশ্যপী কালকর্ণিকা ॥ ১২।১৬৮ ॥
শাস্ত্রয়োনিঃ ক্রিয়ামূর্তিশ্চতুর্বর্গপ্রদর্শিকা ।
নারায়ণী নরোদ্ভূতিঃ কৌমুদী লিঙ্গধারিণী ॥ ১২।১৬৯ ॥
কামুকী ললিতাভাবা পরাপরবিভূতিদা ।
পরান্তজাতমহিমা বডবা বামলোচনা ॥ ১২।১৭০ ॥
সুভদ্রা দেবকী সীতা বেদবেদাঙ্গপারগা ।
মনস্বিনী মন্যুমাতা মহামন্যুসমুদ্ভবা ॥ ১২।১৭১ ॥
অমৃত্যুরমৃতাস্বাদা পুরুহূতা পুরুষ্টুতা ।
অশোচ্যা ভিন্নবিষয়া হিরণ্যরজতপ্রিয়া ॥ ১২।১৭২ ॥
হিরণ্যা রাজতী হৈমা হেমাভরণভূষিতা ।
বিভ্রাজমানা দুর্জ্ঞেয়া জ্যোতিষ্টোমফলপ্রদা ॥ ১২।১৭৩ ॥
মহানিদ্রাসমুদ্ভূতিরনিদ্রা সত্যদেবতা ।
দীর্ঘাককুদ্মিনী হৃদ্যা শান্তিদা শান্তিবর্দ্ধিনী ॥ ১২।১৭৪ ॥
লক্ষ্ম্যাদিশক্তিজননী শক্তিচক্রপ্রবর্তিকা ।
ত্রিশক্তিজননী জন্যা ষডূর্মিপরিবর্জিতা ॥ ১২।১৭৫ ॥
সুধামা কর্মকরণী য়ুগান্তদহনাত্মিকা ।
সংকর্ষণী জগদ্ধাত্রী কাময়োনিঃ কিরীটিনী ॥ ১২।১৭৬ ॥
ঐন্দ্রী ত্রৈলোক্যনমিতা বৈষ্ণবী পরমেশ্বরী ।
প্রদ্যুম্নদয়িতা দাত্রী য়ুগ্মদৃষ্টিস্ত্রিলোচনা ॥ ১২।১৭৭ ॥
মদোত্কটা হংসগতিঃ প্রচণ্ডা চণ্ডবিক্রমা ।
বৃষাবেশা বিয়ন্মাতা বিন্ধ্যপর্বতবাসিনী ॥ ১২।১৭৮ ॥
হিমবন্মেরুনিলয়া কৈলাসগিরিবাসিনী ।
চাণূরহন্তৃতনয়া নীতিজ্ঞা কামরূপিণী ॥ ১২।১৭৯ ॥
বেদবিদ্যাব্রতস্নাতা ধর্মশীলাঽনিলাশনা ।
বীরভদ্রপ্রিয়া বীরা মহাকামসমুদ্ভবা ॥ ১২।১৮০ ॥
বিদ্যাধরপ্রিয়া সিদ্ধা বিদ্যাধরনিরাকৃতিঃ ।
আপ্যায়নী হরন্তী চ পাবনী পোষণী কলা ॥ ১২।১৮১ ॥
মাতৃকা মন্মথোদ্ভূতা বারিজা বাহনপ্রিয়া ।
করীষিণী সুধাবাণী বীণাবাদনতত্পরা ॥ ১২।১৮২ ॥
সেবিতা সেবিকা সেব্যা সিনীবালী গরুত্মতী ।
অরুন্ধতী হিরণ্যাক্ষী মৃগাংকা মানদায়িনী ॥ ১২।১৮৩ ॥
বসুপ্রদা বসুমতী বসোর্দ্ধারা বসুংধরা ।
ধারাধরা বরারোহা বরাবরসহস্রদা ॥ ১২।১৮৪ ॥
শ্রীফলা শ্রীমতী শ্রীশা শ্রীনিবাসা শিবপ্রিয়া ।
শ্রীধরা শ্রীকরী কল্যা শ্রীধরার্দ্ধশরীরিণী ॥ ১২।১৮৫ ॥
অনন্তদৃষ্টিরক্ষুদ্রা ধাত্রীশা ধনদপ্রিয়া ।
নিহন্ত্রী দৈত্যসঙ্ঘানাং সিহিকা সিহবাহনা ॥ ১২।১৮৬ ॥
সুষেণা চন্দ্রনিলয়া সুকীর্তিশ্ছিন্নসংশয়া ।
রসজ্ঞা রসদা রামা লেলিহানামৃতস্রবা ॥ ১২।১৮৭ ॥
নিত্যোদিতা স্বয়ংজ্যোতিরুত্সুকা মৃতজীবনা ।
বজ্রদণ্ডা বজ্রজিহ্বা বৈদেহী বজ্রবিগ্রহা ॥ ১২।১৮৮ ॥
মঙ্গল্যা মঙ্গলা মালা মলিনা মলহারিণী ।
গান্ধর্বী গারুডী চান্দ্রী কম্বলাশ্বতরপ্রিয়া ॥ ১২।১৮৯ ॥
সৌদামিনী জনানন্দা ভ্রুকুটীকুটিলাননা ।
কর্ণিকারকরা কক্ষ্যা কংসপ্রাণাপহারিণী ॥ ১২।১৯০ ॥
য়ুগংধরা য়ুগাবর্ত্তা ত্রিসংধ্যা হর্ষবর্দ্ধনী ।
প্রত্যক্ষদেবতা দিব্যা দিব্যগন্ধা দিবা পরা ॥ ১২।১৯১ ॥
শক্রাসনগতা শাক্রী সান্ধ্যা চারুশরাসনা ।
ইষ্টা বিশিষ্টা শিষ্টেষ্টা শিষ্টাশিষ্টপ্রপূজিতা ॥ ১২।১৯২ ॥
শতরূপা শতাবর্ত্তা বিনতা সুরভিঃ সুরা ।
সুরেন্দ্রমাতা সুদ্যুম্না সুষুম্না সূর্যসংস্থিতা ॥ ১২।১৯৩ ॥
সমীক্ষ্যা সত্প্রতিষ্ঠা চ নিবৃত্তির্জ্ঞানপারগা ।
ধর্মশাস্ত্রার্থকুশলা ধর্মজ্ঞা ধর্মবাহনা ॥ ১২।১৯৪ ॥
ধর্মাধর্মবিনির্মাত্রী ধার্মিকাণাং শিবপ্রদা ।
ধর্মশক্তির্ধর্মময়ী বিধর্মা বিশ্বধর্মিণী ॥ ১২।১৯৫ ॥
ধর্মান্তরা ধর্মময়ী ধর্মপূর্বা ধনাবহা ।
ধর্মোপদেষ্ট্রী ধর্মত্মা ধর্মগম্যা ধরাধরা ॥ ১২।১৯৬ ॥
কাপালী শকলা মূর্ত্তিঃ কলা কলিতবিগ্রহা ।
সর্বশক্তিবিনির্মুক্তা সর্বশক্ত্যাশ্রয়াশ্রয়া ॥ ১২।১৯৭ ॥
সর্বা সর্বেশ্বরী সূক্ষ্মা সূক্ষ্মাজ্ঞানস্বরূপিণী ।
প্রধানপুরুষেশেষা মহাদেবৈকসাক্ষিণী ॥ ১২।১৯৮ ॥
সদাশিবা বিয়ন্মূর্ত্তির্বিশ্বমূর্ত্তিরমূর্ত্তিকা ।
এবং নাম্নাং সহস্রেণ স্তুত্বাঽসৌ হিমবান্ গিরিঃ ॥ ১২।১৯৯ ॥
ভূয়ঃ প্রণম্য ভীতাত্মা প্রোবাচেদং কৃতাঞ্জলিঃ ।
য়দেতদৈশ্বরং রূপং ঘোরং তে পরমেশ্বরি ॥ ১২।২০০ ॥
ভীতোঽস্মি সাম্প্রতং দৃষ্ট্বা রূপমন্যত্ প্রদর্শয় ।
এবমুক্তাঽথ সা দেবী তেন শৈলেন পার্বতী ॥ ১২।২০১ ॥
সংহৃত্য দর্শয়ামাস স্বরূপমপরং পুনঃ ।
নীলোত্পলদলপ্রখ্যং নীলোত্পলসুগন্ধিকম্ ॥ ১২।২০২ ॥
দ্বিনেত্রং দ্বিভুজং সৌম্যং নীলালকবিভূষিতম্ ।
রক্তপাদাম্বুজতলং সুরক্তকরপল্লবম্ ॥ ১২।২০৩ ॥
শ্রীমদ্বিশালসংবৃত্তংললাটতিলকোজ্জ্বলম্ ।
ভূষিতং চারুসর্বাঙ্গং ভূষণৈরতিকোমলম্ ॥ ১২।২০৪ ॥
দধানমুরসা মালাং বিশালাং হেমনির্মিতাম্ ।
ঈষত্স্মিতং সুবিম্বোষ্ঠং নূপুরারাবসংয়ুতম্ ॥ ১২।২০৫ ॥
প্রসন্নবদনং দিব্যমনন্তমহিমাস্পদম্ ।
তদীদৃশং সমালোক্য স্বরূপং শৈলসত্তমঃ ॥ ১২।২০৬ ॥
ভীতিং সংত্যজ্য হৃষ্টাত্মা বভাষে পরমেশ্বরীম্ ।
হিমবানুবাচ
অদ্য মে সফলং জন্ম অদ্য মে সফলং তপঃ ॥ ১২।২০৭ ॥
য়ন্মে সাক্ষাত্ত্বমব্যক্তা প্রসন্না দৃষ্টিগোচরা ।
ত্বয়া সৃষ্টং জগত্ সর্বং প্রধানাদ্যং ত্বয়ি স্থিতম্ ॥ ১২।২০৮ ॥
ত্বয়্যেব লীয়তে দেবি ত্বমেব চ পরা গতিঃ ।
বদন্তি কেচিত্ ত্বামেব প্রকৃতিং প্রকৃতেঃ পরাম্ ॥ ১২।২০৯ ॥
অপরে পরমার্থজ্ঞাঃ শিবেতি শিবসংশ্রয়াত্ ।
ত্বয়ি প্রধানং পুরুষো মহান্ ব্রহ্মা তথেশ্বরঃ ॥ ১২।২১০ ॥
অবিদ্যা নিয়তির্মায়া কলাদ্যাঃ শতশোঽভবন্ ।
ত্বং হি সা পরমা শক্তিরনন্তা পরমেষ্ঠিনী ॥ ১২।২১১ ॥
সর্বভেদবিনির্মুক্তা সর্বেভেদাশ্রয়াশ্রয়া ।
ত্বামধিষ্ঠায় য়োগেশি মহাদেবো মহেশ্বরঃ ॥ ১২।২১২ ॥
প্রধানাদ্যং জগত্ কৃত্স্নং করোতি বিকরোতি চ ।
ত্বয়ৈব সংগতো দেবঃ স্বমানন্দং সমশ্নুতে ॥ ১২।২১৩ ॥
ত্বমেব পরমানন্দস্ত্বমেবানন্দদায়িনী ।
ত্বমক্ষরং পরং ব্যোম মহজ্জ্যোতির্নিরঞ্জনম্ ॥ ১২।২১৪ ॥
শিবং সর্বগতং সূক্ষ্মং পরং ব্রহ্ম সনাতনম্ ।
ত্বং শক্রঃ সর্বদেবানাং ব্রহ্মা ব্রহ্মবিদামসি ॥ ১২।২১৫ ॥
বায়ুর্বলবতাং দেবি য়োগিনাং ত্বং কুমারকঃ ।
ঋষীণাং চ বসিষ্ঠস্ত্বং ব্যাসো বেদবিদামসি ॥ ১২।২১৬ ॥
সাংখ্যানাং কপিলো দেবো রুদ্রাণামসি শংকরঃ ।
আদিত্যানামুপেন্দ্রস্ত্বং বসূনাং চৈব পাবকঃ ॥ ১২।২১৭ ॥
বেদানাং সামবেদস্ত্বং গায়ত্রী ছন্দসামসি ।
অধ্যাত্মবিদ্যা বিদ্যানাং গতীনাং পরমা গতিঃ ॥ ১২।২১৮ ॥
মায়া ত্বং সর্বশক্তীনাং কালঃ কলয়তামসি ।
ওঙ্কারঃ সর্বগুহ্যানাং বর্ণানাং চ দ্বিজাত্তমঃ ॥ ১২।২১৯ ॥
আশ্রমাণাং চ গার্হস্থ্যমীশ্বরাণাং মহেশ্বরঃ ।
পুংসাং ত্বমেকঃ পুরুষঃ সর্বভূতহৃদি স্থিতঃ ॥ ১২।২২০ ॥
সর্বোপনিষদাং দেবি গুহ্যোপনিষদুচ্যতে ।
ঈশানশ্চাসি কল্পানাং য়ুগানাং কৃতমেব চ ॥ ১২।২২১ ॥
আদিত্যঃ সর্বমার্গাণাং বাচাং দেবি সরস্বতী ।
ত্বং লক্ষ্মীশ্চারুরূপাণাং বিষ্ণুর্মায়াবিনামসি ॥ ১২।২২২ ॥
অরুন্ধতী সতীনাং ত্বং সুপর্ণঃ পততামসি ।
সূক্তানাং পৌরুষং সূক্তং সাম জ্যেষ্টং চ সামসু ॥ ১২।২২৩ ॥
সাবিত্রী চাসি জাপ্যানাং য়জুষাং শতরুদ্রিয়ম্ ।
পর্বতানাং মহামেরুরনন্তো ভোগিনামসি ॥ ১২।২২৪ ॥
সর্বেষাং ত্বং পরং ব্রহ্ম ত্বন্ময়ং সর্বমেব হি ॥ ১২।২২৫ ॥
রূপং তবাশেষকলাবিহীন-
মগোচরং নির্মলমেকরূপম্ ।
অনাদিমধ্যান্তমনন্তামাদ্যং
নমামি সত্যং তমসঃ পরস্তাত্ ॥ ১২।২২৬ ॥
য়দেব পশ্যন্তি জগত্প্রসূতিং
বেদান্তবিজ্ঞানবিনিশ্চিতার্থাঃ ।
আনন্দমাত্রং প্রণবাভিধানং
তদেব রূপং শরণং প্রপদ্যে ॥ ১২।২২৭ ॥
অশেষভূতান্তরসন্নিবিষ্টং
প্রধানপুংয়োগবিয়োগহেতুম্ ।
তেজোময়ং জন্মবিনাশহীনং
প্রাণাভিধানং প্রণতোঽস্মি রূপম্ ॥ ১২।২২৮ ॥
আদ্যন্তহীনং জগদাত্মভূতং
বিভিন্নসংস্থং প্রকৃতেঃ পরস্তাত্ ।
কূটস্থমব্যক্তবপুস্তথৈব
নমামি রূপং পুরুষাভিধানম্ ॥ ১২।২২৯ ॥
সর্বাশ্রয়ং সর্বজগদ্বিধানং
সর্বত্রগং জন্মবিনাশহীনম্ ।
সূক্ষ্মং বিচিত্রং ত্রিগুণং প্রধানং
নতোঽস্মি তে রূপমরূপভেদম্ ॥ ১২।২৩০ ॥
আদ্যং মহান্তং পুরুষাত্মরূপং
প্রকৃত্যবস্থং ত্রিগুণাত্মবীজম্ ।
ঐশ্বর্যবিজ্ঞানবিরাগধর্মৈঃ
সমন্বিতং দেবি নতোঽস্মি রূপম্ ॥ ১২।২৩১ ॥
দ্বিসপ্তলোকাত্মকমম্বুসংস্থং
বিচিত্রভেদং পুরুষৈকনাথম্ ।
অনন্তভূতৈরধিবাসিতং তে
নতোঽস্মি রূপং জগদণ্ডসংজ্ঞম্ ॥ ১২।২৩১ ॥
অশেষবেদাত্মকমেকমাদ্যং
স্বতেজসা পূরিতলোকভেদম্ ।
ত্রিকালহেতুং পরমেষ্ঠিসংজ্ঞং
নমামি রূপং রবিমণ্ডলস্থম্ ॥ ১২।২৩২ ॥
সহস্রমূর্ধানমনন্তশক্তিং
সহস্রবাহুং পুরুষং পুরাণম্ ।
শয়ানমন্তঃ সলিলে তথৈব
নারায়ণাখ্যং প্রণতোঽস্মি রূপম্ ॥ ১২।২৩৩ ॥
দংষ্ট্রাকরালং ত্রিদশাভিবন্দ্যং
য়ুগান্তকালানলকল্পরূপম্ ।
অশেষভূতাণ্ডবিনাশহেতুং
নমামি রূপং তব কালসংজ্ঞম্ ॥ ১২।২৩৪ ॥
ফণাসহস্রেণ বিরাজমানং
ভোগীন্দ্রমুখ্যৈরভিপূজ্যমানম্ ।
জনার্দনারূঢতনুং প্রসুপ্তং
নতোঽস্মি রূপং তব শেষসংজ্ঞম্ ॥ ১২।২৩৫ ॥
অব্যাহতৈশ্বর্যময়ুগ্মনেত্রং
ব্রহ্মামৃতানন্দরসজ্ঞমেকম্ ।
য়ুগান্তশেষং দিবি নৃত্যমানং
নতোঽস্মি রূপং তব রুদ্রসংজ্ঞম্ ॥ ১২।২৩৬ ॥
প্রহীণশোকং বিমলং পবিত্রং
সুরাসুরৈরর্চিতাপাদপদ্মম্ ।
সুকোমলং দেবি বিভাসি শুভ্রং
নমামি তে রূপমিদং ভবানি ॥ ১২।২৩৭ ॥
ওঁ নমস্তেঽস্তু মহাদেবি নমস্তে পরমেশ্বরি ।
নমো ভগবতীশানি শিবায়ৈ তে নমো নমঃ ॥ ১২।২৩৮ ॥
ত্বন্ময়োঽহং ত্বদাধারস্ত্বমেব চ গতির্মম ।
ত্বামেব শরণং য়াস্যে প্রসীদ পরমেশ্বরি ॥ ১২।২৩৯ ॥
ময়া নাস্তি সমো লোকে দেবো বা দানবোঽপি বা ।
জগন্মাতৈব মত্পুত্রী সংভূতা তপসা য়তঃ ॥ ১২।২৪০ ॥
এষা তবাম্বিকা দেবি কিলাভূত্পিতৃকন্যকা ।
মেনাঽশেষজগন্মাতুরহো পুণ্যস্য গৌরবম্ ॥ ১২।২৪১ ॥
পাহি মামমরেশানি মেনয়া সহ সর্বদা ।
নমামি তব পাদাব্জং ব্রজামি শরণং শিবাম্ ॥ ১২।২৪২ ॥
অহো মে সুমহদ্ ভাগ্যং মহাদেবীসমাগমাত্ ।
আজ্ঞাপয় মহাদেবি কিং করিষ্যামি শংকরি ॥ ১২।২৪৩ ॥
এতাবদুক্ত্বা বচনং তদা হিমগিরীশ্বরঃ ।
সম্প্রেক্ষণমাণো গিরিজাং প্রাঞ্জলিঃ পার্শ্বতোঽভবত্ ॥ ১২।২৪৪ ॥
অথ সা তস্য বচনং নিশম্য জগতোঽরণিঃ ।
সস্মিতং প্রাহ পিতরং স্মৃত্বা পশুপতিং পতিম্ ॥ ১২।২৪৬ ॥
দেব্যুবাচ
শৃণুষ্ব চৈতত্ প্রথমং গুহ্যমীশ্বরগোচরম্ ।
উপদেশং গিরিশ্রেষ্ঠ সেবিতং ব্রহ্মবাদিভিঃ ॥ ১২।২৪৭ ॥
য়ন্মে সাক্ষাত্ পরং রূপমৈশ্বরং দৃষ্টমদ্ভুতম্ ।
সর্বশক্তিসমায়ুক্তমনন্তং প্রেরকং পরম্ ॥ ১২।২৪৮ ॥
শান্তঃ সমাহিতমনা দম্ভাহংকারবর্জিতঃ ।
তন্নিষ্ঠস্তত্পরো ভূত্বা তদেব শরণং ব্রজ ॥ ১২।২৪৯ ॥
ভক্ত্যা ত্বনন্যয়া তাত পদ্ভাবং পরমাশ্রিতঃ ।
সর্বয়জ্ঞতপোদানৈস্তদেবার্চ্চয় সর্বদা ॥ ১২।২৫০ ॥
তদেব মনসা পশ্য তদ্ ধ্যায়স্ব য়জস্ব চ ।
মমোপদেশাত্সংসারং নাশয়ামি তবানঘ ॥ ১২।২৫১ ॥
অহং বৈ মত্পরান্ ভক্তানৈশ্বরং য়োগমাস্থিতান্ ।
সংসারসাগরাদস্মাদুদ্ধরাম্যচিরেণ তু ॥ ১২।২৫২ ॥
ধ্যানেন কর্ময়োগেন ভক্ত্যা জ্ঞানেন চৈব হি ।
প্রাপ্যাঽহং তে গিরিশ্রেষ্ঠ নান্যথা কর্মকোটিভিঃ ॥ ১২।২৫৩ ॥
শ্রুতিস্মৃত্যুদিতং সম্যক্ কর্ম বর্ণাশ্রমাত্মকম্ ।
অধ্যাত্মজ্ঞানসহিতং মুক্তয়ে সততং কুরু ॥ ১২।২৫৪ ॥
ধর্মাত্সংজায়তে ভক্তির্ভক্ত্যা সম্প্রাপ্যতে পরম্ ।
শ্রুতিস্মৃতিভ্যামুদিতো ধর্মো য়জ্ঞাদিকো মতঃ ॥ ১২।২৫৫ ॥
নান্যতো জায়তে ধর্মো বেদাদ্ ধর্মো হি নির্বভৌ ।
তস্মান্মুমুক্ষুর্ধর্মার্থী মদ্রূপং বেদমাশ্রয়েত্ ॥ ১২।২৫৬ ॥
মমৈবৈষা পরা শক্তির্বেদসংজ্ঞা পুরাতনী ।
ঋগ্যজুঃ সামরূপেণ সর্গাদৌ সম্প্রবর্ত্ততে ॥ ১২।২৫৭ ॥
তেষামেব চ গুপ্ত্যর্থং বেদানাং ভগবানজঃ ।
ব্রাহ্মণাদীন্ সসর্জাথ স্বে স্বে কর্মণ্যয়োজয়ত্ ॥ ১২।২৫৮ ॥
য়ে ন কুর্বন্তি তদ্ ধর্মং তদর্থং ব্রহ্মনির্মিতাঃ ।
তেষামধস্তাদ্ নরকাংস্তামিস্ত্রাদীনকল্পয়ত্ ॥ ১২।২৫৯ ॥
ন চ বেদাদৃতে কিঞ্চিচ্ছাস্ত্রং ধর্মাভিধায়কম্ ।
য়োঽন্যত্ররমতেসোঽসৌ ন সংভাষ্যো দ্বিজাতিভিঃ ॥ ১২।২৬০ ॥
য়ানি শাস্ত্রাণি দৃশ্যন্তে লোকেঽস্মিন্ বিবিধানিতু ।
শ্রুতিস্মৃতিবিরুদ্ধানি নিষ্ঠা তেষাং হি তামসী ॥ ১২।২৬১ ॥
কাপালং পঞ্চরাত্রং চ য়ামলং বামমার্হতম্ ।
এবংবিধানি চান্যানি মোহনার্থানি তানি তু ॥ ১২।২৬২ ॥
য়ে কুশাস্ত্রাভিয়োগেন মোহয়ন্তীহ মানবান্ ।
ময়া সৃষ্টানি শাস্ত্রাণি মোহায়ৈষাং ভবান্তরে ॥ ১২।২৬৩ ॥
বেদার্থবিত্তমৈঃ কার্যং য়ত্ স্মৃতং কর্ম বৈদিকম্ ।
তত্প্রয়ত্নেন কুর্বন্তি মত্প্রিয়াস্তে হি য়ে নরাঃ ॥ ১২।২৬৪ ॥
বর্ণানামনুকম্পার্থং মন্নিয়োগাদ্বিরাট্ স্বয়ম্ ।
স্বায়ংভুবো মনুর্ধার্মান্ মুনীনাং পূর্বমুক্তবান্ ॥ ১২।২৬৫ ॥
শ্রুত্বা চান্যেঽপি মুনয়স্তন্মুখাদ্ ধর্মমুত্তমম্ ।
চক্রুর্ধর্মপ্রতিষ্ঠার্থং ধর্মশাস্ত্রাণি চৈব হি ॥ ১২।২৬৬ ॥
তেষু চান্তর্হিতেষ্বেবং য়ুগান্তেষু মহর্ষয়ঃ ।
ব্রহ্মণো বচনাত্তানি করিষ্যন্তি য়ুগে য়ুগে ॥ ১২।২৬৭ ॥
অষ্টাদশ পুরাণানি ব্যাসেন কথিতানি তু ।
নিয়োগাদ্ ব্রহ্মণো রাজংস্তেষু ধর্মঃ প্রতিষ্ঠিতঃ ॥ ১২।২৬৮ ॥
অন্যান্যুপপুরাণানি তচ্ছিষ্যৈঃ কথিতানি তু ।
য়ুগে য়ুগেঽত্র সর্বেষাং কর্তা বৈ ধর্মশাস্ত্রবিত্ ॥ ১২।২৬৯ ॥
শিক্ষা কল্পো ব্যাকরণং নিরুক্তং ছন্দ এব চ ।
জ্যোতিঃ শাস্ত্রং ন্যায়বিদ্যা মীমাংসা চোপবৃংহণম্ ॥ ১২।২৭০ ॥
এবং চতুর্দশৈতানি বিদ্যাস্থানানি সত্তম ।
চতুর্বেদৈঃ সহোক্তানি ধর্মো নান্যত্র বিদ্যতে ॥ ১২।২৭১ ॥
এবং পৈতামহং ধর্মং মনুব্যাসাদয়ঃ পরম্ ।
স্থাপয়ন্তি মমাদেশাদ্ য়াবদাভূতসম্প্লবম্ ॥ ১২।২৭২ ॥
ব্রহ্মণা সহ তে সর্বে সম্প্রাপ্তে প্রতিসংচরে ।
পরস্যান্তে কৃতাত্মানঃ প্রবিশন্তি পরং পদম্ ॥ ১২।২৭৩ ॥
তস্মাত্ সর্বপ্রয়ত্নেন ধর্মার্থং বেদমাশ্রয়েত্ ।
ধর্মেণ সহিতং জ্ঞানং পরং ব্রহ্ম প্রকাশয়েত্ ॥ ১২।২৭৪ ॥
য়ে তু সঙ্গান্ পরিত্যজ্য মামেব শরণং গতাঃ ।
উপাসতে সদা ভক্ত্যা য়োগমৈশ্বরমাস্থিতাঃ ॥ ১২।২৭৫ ॥
সর্বভূতদয়াবন্তঃ শান্তা দান্তা বিমত্সরাঃ ।
অমানিনো বুদ্ধিমন্তস্তাপসাঃ শংসিতব্রতাঃ ॥ ১২।২৭৬ ॥
মচ্চিত্তা মদ্গতপ্রাণা মজ্জ্ঞানকথনে রতাঃ ।
সংন্যাসিনো গৃহস্থাশ্চ বনস্থা ব্রহ্মচারিণঃ ॥ ১২।২৭৭ ॥
তেষাং নিত্যাভিয়ুক্তানাং মায়াতত্ত্বং সমুত্থিতম্ ।
নাশয়ামি তমঃ কৃত্স্নং জ্ঞানদীপেন মা চিরাত্ ॥ ১২।২৭৮ ॥
তে সুনির্ধূততমসো জ্ঞানেনৈকেন মন্ময়াঃ ।
সদানন্দাস্তু সংসারে ন জায়ন্তে পুনঃ পুনঃ ॥ ১২।২৭৯ ॥
তস্মাত্ সর্বপ্রকারেণ মদ্ভক্তো মত্পরায়ণঃ ।
মামেবার্চয় সর্বত্র মনসা শরণং গতঃ ॥ ১২।২৮০ ॥
অশক্তো য়দি মে ধ্যাতুমৈশ্বরং রূপমব্যয়ম্ ।
ততো মে সকলং রূপং কালাদ্যং শরণং ব্রজ ॥ ১২।২৮১ ॥
য়দ্যত্ স্বরূপং মে তাত মনসো গোচরং তব ।
তন্নিষ্ঠস্তত্পরো ভূত্বা তদর্চনপরো ভব ॥ ১২।২৮২ ॥
য়ত্তু মে নিষ্কলং রূপং চিন্মাত্রং কেবলং শিবম্ ।
সর্বোপাধিবিনির্মুক্তমনন্তমমৃতং পরম্ ॥ ১২।২৮৩ ॥
জ্ঞানেনৈকেন তল্লভ্যং ক্লেশেন পরমং পদম্ ।
জ্ঞানমেব প্রপশ্যন্তো মামেব প্রবিশন্তি তে ॥ ১২।২৮৪ ॥
তদ্বুদ্ধয়স্তদাত্মানস্তন্নিষ্ঠাস্তত্পরায়ণাঃ ।
গচ্ছন্ত্যপুনরাবৃত্তিং জ্ঞাননির্ধূতকল্মষাঃ ॥ ১২।২৮৫ ॥
মামনাশ্রিত্য পরমং নির্বাণমমলং পদম্ ।
প্রাপ্যতে ন হি রাজেন্দ্র ততো মাং শরণং ব্রজ ॥ ১২।২৮৬ ॥
একত্বেন পৃথক্ত্বেন তথা চোভয়থাপি বা ।
মামুপাস্য মহারাজ ততো য়াস্যাসি তত্পদম্ ॥ ১২।২৮৭ ॥
মামনাশ্রিত্য তত্তত্ত্বং স্বভাববিমলং শিবম্ ।
জ্ঞায়তে ন হি রাজেন্দ্র ততো মাং শরণং ব্রজ ॥ ১২।২৮৮ ॥
তস্মাত্ ত্বমক্ষরং রূপং নিত্যং চারূপমৈশ্বরম্ ।
আরাধয় প্রয়ত্নেন ততো বন্ধং প্রহাস্যসি ॥ ১২।২৮৯ ॥
কর্মণা মনসা বাচা শিবং সর্বত্র সর্বদা ।
সমারাধয় ভাবেন ততো য়াস্যসি তত্পদম্ ॥ ১২।২৯০ ॥
ন বৈ পশ্যন্তি তত্তত্ত্বং মোহিতা মম মায়য়া ।
অনাদ্যনন্তং পরমং মহেশ্বরমজং শিবম্ ॥ ১২।২৯১ ॥
সর্বভূতাত্মভূতস্থং সর্বাধারং নিরঞ্জনম্ ।
নিত্যানন্দং নিরাভাসং নির্গুণং তমসঃ পরম্ ॥ ১২।২৯২ ॥
অদ্বৈতমচলং ব্রহ্ম নিষ্কলং নিষ্প্রপঞ্চকম্ ।
স্বসংবেদ্যমবেদ্যং তত্ পরে ব্যোম্নি ব্যবস্থিতম্ ॥ ১২।২৯৩ ॥
সূক্ষ্মেণ তমসা নিত্যং বেষ্টিতা মম মায়য়া ।
সংসারসাগরে ঘোরে জায়ন্তে চ পুনঃ পুনঃ ॥ ১২।২৯৪ ॥
ভক্ত্যা ত্বনন্যয়া রাজন্ সম্যগ্ জ্ঞানেন চৈব হি ।
অন্বেষ্টব্যং হি তদ্ ব্রহ্ম জন্মবন্ধনিবৃত্তয়ে ॥ ১২।২৯৫ ॥
অহংকারং চ মাত্সর্যং কামং ক্রোধপরিগ্রহম্ ।
অধর্মাভিনিবেশং চ ত্যক্ত্বা বৈরাগ্যমাস্থিতঃ ॥ ১২।২৯৬ ॥
সর্বভূতেষু চাত্মানং সর্বভূতানি চাত্মনি ।
অন্বীক্ষ্য চাত্মনাত্মানং ব্রহ্মভূয়ায় কল্পতে ॥ ১২।২৯৭ ॥
ব্রহ্মভূতঃ প্রসন্নাত্মা সর্বভূতাভয়প্রদঃ ।
ঐশ্বরীং পরমাং ভক্তিং বিন্দেতানন্যগামিনীম্ ॥ ১২।২৯৮ ॥
বীক্ষতে তত্পরং তত্ত্বমৈশ্বরং ব্রহ্মনিষ্কলম্ ।
সর্বসংসারনির্মুক্তো ব্রহ্মণেয়বাবতিষ্ঠতে ॥ ১২।২৯৯ ॥
ব্রহ্মণো হি প্রতিষ্ঠাঽয়ং পরস্য পরমঃ শিবঃ ।
অনন্যশ্চাব্যয়স্চৈকশ্চাত্মাধারো মহেশ্বরঃ ॥ ১২।৩০০ ॥
জ্ঞানেন কর্ময়োগেন ভক্তিয়োগেন বা নৃপ ।
সর্বসংসারমুক্ত্যর্থমীশ্বরং শরণং ব্রজ ॥ ১২।৩০১ ॥
এষ গুহ্যোপদেশস্তে ময়া দত্তো গিরীশ্বর ।
অন্বীক্ষ্য চৈতদখিলং য়থেষ্টং কর্ত্তুমর্হসি ॥ ১২।৩০২ ॥
অহং বৈ য়াচিতা দেবৈঃ সংজাতা পরমেশ্বরাত্ ।
বিনিন্দ্য দক্ষং পিতরং মহেশ্বরবিনিন্দকম্ ॥ ১২।৩০৩ ॥
ধর্মসংস্থাপনার্থায় তবারাধনকারণাত্ ।
মেনাদেহসমুত্পন্না ত্বামেব পিতরং শ্রিতা ॥ ১২।৩০৪ ॥
স ত্বং নিয়োগাদ্দেবস্য ব্রহ্মণঃ পরমাত্মনঃ ।
প্রিদাস্যসে মাং রুদ্রায় স্বয়ংবরসমাগমে ॥ ১২।৩০৫ ॥
তত্সংবন্ধাচ্চ তে রাজন্ সর্বে দেবাঃ সবাসবাঃ ।
ত্বাং নমস্যন্তি বৈ তাত প্রসীদতি চ শংকরঃ ॥ ১২।৩০৬ ॥
তস্মাত্সর্বপ্রয়ত্নেন মাং বিদ্ধীশ্বরগোচরাম্ ।
সম্পূজ্য দেবমীশানং শরণ্যং শরণং ব্রজ ॥ ১২।৩০৭ ॥
স এবমুক্তো ভগবান্ দেবদেব্যা গিরীশ্বরঃ ।
প্রণম্য শিরসা দেবীং প্রাঞ্জলিঃ পুনরব্রবীত্ ॥ ১২।৩০৮ ॥
বিস্তরেণ মহেশানি য়োগং মাহেশ্বরং পরম্ ।
জ্ঞানং বৈ চাত্মনো য়োগং সাধনানি প্রচক্ষ্ব মে ॥ ১২।৩০৯ ॥
তস্যৈতত্ পরমং জ্ঞানমাত্ময়োগমুত্তমম্ ।
য়থাবদ্ ব্যাজহারেশাসাধনানিচ বিস্তরাত্ ॥ ১২।৩১০ ॥
নিশম্য বদনাম্ভোজাদ্ গিরীন্দ্রো লোকপূজিতঃ ।
লোকমাতুঃ পরং জ্ঞানং য়োগাসক্তোঽভবত্পুনঃ ॥ ১২।৩১১ ॥
প্রদদৌ চ মহেশায় পার্বতীং ভাগ্যগৌরবাত্ ।
নিয়োগাদ্ব্রহ্মণঃ সাধ্বীং দেবানাং চৈব সংনিধৌ ॥ ১২।৩১২ ॥
য় ইমং পঠতেঽধ্যায়ং দেব্যা মাহাত্ম্যকীর্তনম্ ।
শিবস্য সংনিধৌ ভক্ত্যা সুচিস্তদ্ভাবভাবিতঃ ॥ ১২।৩১৩ ॥
সর্বপাপবিনির্মুক্তো দিব্যয়োগসমন্বিতঃ ।
উল্লঙ্ঘ্য ব্রহ্মণো লোকং দেব্যাঃ স্থানমবাপ্নুয়াত্ ॥ ১২।৩১৪ ॥
য়শ্চৈতত্ পঠতি স্তোত্রং ব্রাহ্মণানাং সমীপতঃ ।
সমাহিতমনাঃ সোঽপি সর্বপাপৈঃ প্রমুচ্যতে ॥ ১২।৩১৫ ॥
নাম্নামষ্টসহস্রং তু দেব্যা য়ত্ সমুদীরিতম্ ।
জ্ঞাত্বাঽর্কমণ্ডলগতাং সংভাব্য পরমেশ্বরীম্ ॥ ১২।৩১৬ ॥
অভ্যর্চ্য গন্ধপুষ্পাদ্যৈর্ভক্তিয়োগসমন্বিতঃ ।
সংস্মরন্পরমং ভাবং দেব্যা মাহেশ্বরং পরম্ ॥ ১২।৩১৭ ॥
অনন্যমানসো নিত্যং জপেদামরণাদ্ দ্বিজঃ ।
সোঽন্তকালে স্মৃতিং লব্ধ্বা পরং ব্রহ্মাধিগচ্ছতি ॥ ১২।৩১৮ ॥
অথবা জায়তে বিপ্রো ব্রাহ্মণানাং কুলে শুচৌ ।
পূর্বসংস্কারমাহাত্ম্যাদ্ ব্রহ্মবিদ্যামবাপ্নুয়াত্ ॥ ১২।৩১৯ ॥
সম্প্রাপ্য য়োগং পরমং দিব্যং তত্ পারমেশ্বরম্ ।
শান্তঃ সর্বগাতো ভূত্বা শিবসায়ুজ্যমাপ্নুয়াত্ ॥ ১২।৩২০ ॥
প্রত্যেকং চাথ নামানি জুহুয়াত্ সবনত্রয়ম্ ।
পূতনাদিকৃতৈর্দোষৈর্গ্রহদোষৈশ্চ মুচ্যতে ॥ ১২।৩২১ ॥
জপেদ্ বাঽহরহর্নিত্যং সংবত্সরমতন্দ্রিতঃ ।
শ্রীকামঃ পার্বতীং দেবীং পূজয়িত্বা বিধানতঃ ॥ ১২।৩২২ ॥
সম্পূজ্য পার্শ্বতঃ শংভুং ত্রিনেত্রং ভক্তিসংয়ুতঃ ।
লভতে মহতীং লক্ষ্মীং মহাদেবপ্রসাদতঃ ॥ ১২।৩২৩ ॥
তস্মাত্ সর্বপ্রয়ত্নেন জপ্তব্যং হি দ্বিজাতিভিঃ ।
সর্বপাপাপনোদার্থং দেব্যা নাম সহস্রকম্ ॥ ১২।৩২৪ ॥
প্রসঙ্গাত্ কথিতং বিপ্রা দেব্যা মাহাত্ম্যমুত্তমম্ ।
অতঃ পরং প্রজাসর্গং ভৃগ্বাদীনাং নিবোধত ॥ ১২।৩২৫ ॥
ইতি শ্রীকূর্মপুরাণে ষট্সাহস্ত্র্যাং সংহিতায়াং পূর্ববিভাগে
দ্বাদশোঽধ্যায়ঃ ॥ ১২ ॥
Also Read 1000 Names of Sri Devi or Paravti:
1000 Names of Sri Devi or Parvati | Sahasranama Stotram in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil
