Gita - Geetaa

Bhagavadgita Mahatmayam and Dhyanamantra Lyrics in Oriya

Bhagavadgeetaa Mahatmayam and Dhyanamantra in Oriya:

॥ ଭଗବଦ୍ଗୀତା ମାହାତ୍ମ୍ୟଂ ଅଥବା ଧ୍ୟାନମଂତ୍ର ॥
॥ ଶ୍ରୀ ପରମାତ୍ମନେ ନମଃ ॥

॥ ଅଥ ଶ୍ରୀଗୀତାମାହାତ୍ମ୍ୟପ୍ରାରମ୍ଭଃ ॥

ଶ୍ରୀ ଗଣେଶାୟ ନମଃ ॥ ଶ୍ରୀରାଧାରମଣାୟ ନମଃ ॥

ଧରୋବାଚ ।
ଭଗବନ୍ପରେମେଶାନ ଭକ୍ତିରବ୍ୟଭିଚାରିଣୀ ।
ପ୍ରାରବ୍ଧଂ ଭୁଜ୍ୟମାନସ୍ୟ କଥଂ ଭବତି ହେ ପ୍ରଭୋ ॥ ୧ ॥

ଶ୍ରୀ ବିଷ୍ଣୁରୁବାଚ ।
ପ୍ରାରବ୍ଧଂ ଭୁଜ୍ୟମାନୋ ହି ଗୀତାଭ୍ୟାସରତଃ ସଦା ।
ସ ମୁକ୍ତଃ ସ ସୁଖୀ ଲୋକେ କର୍ମଣା ନୋପଲିପ୍ୟତେ ॥ ୨ ॥

ମହାପାପାଦିପାପାନି ଗୀତାଧ୍ୟାନଂ କରୋତି ଚେତ୍ ।
କ୍ୱଚିତ୍ସ୍ପର୍ଶଂ ନ କୁର୍ୱନ୍ତି ନଲିନୀଦଲମମ୍ବୁବତ୍ ॥ ୩ ॥

ଗୀତାୟାଃ ପୁସ୍ତକଂ ଯତ୍ର ଯତ୍ର ପାଠଃ ପ୍ରବର୍ତତେ ।
ତତ୍ର ସର୍ୱାଣି ତୀର୍ଥାଣି ପ୍ରୟାଗାଦୀନି ତତ୍ର ବୈ ॥ ୪ ॥

ସର୍ୱେ ଦେବାଶ୍ଚ ଋଷୟୋ ଯୋଗିନଃ ପନ୍ନଗାଶ୍ଚ ଯେ ।
ଗୋପାଲା ଗୋପିକା ବାପି ନାରଦୋଦ୍ଧବପାର୍ଷଦୈଃ ॥

ସହାୟୋ ଜାୟତେ ଶୀଘ୍ରଂ ଯତ୍ର ଗୀତା ପ୍ରବର୍ତତେ ୫ ॥

ଯତ୍ର ଗୀତାବିଚାରଶ୍ଚ ପଠନଂ ପାଠନଂ ଶୃତମ୍ ।
ତତ୍ରାହଂ ନିଶ୍ଚିତଂ ପୃଥ୍ୱି ନିବସାମି ସଦୈବ ହି ॥ ୬ ॥

ଗୀତାଶ୍ରୟେଽହଂ ତିଷ୍ଠାମି ଗୀତା ମେ ଚୋତ୍ତମଂ ଗୃହମ୍ ।
ଗୀତାଜ୍ଞାନମୁପାଶ୍ରିତ୍ୟ ତ୍ରୀଂଲୋକାନ୍ପାଲୟାମ୍ୟହମ୍ ॥ ୭ ॥

ଗୀତା ମେ ପରମା ବିଦ୍ୟା ବ୍ରହ୍ମରୂପା ନ ସଂଶୟଃ ।
ଅର୍ଧମାତ୍ରାକ୍ଷରା ନିତ୍ୟା ସ୍ୱାନିର୍ୱାଚ୍ୟପଦାତ୍ମିକା ॥ ୮ ॥

ଚିଦାନନ୍ଦେନ କୃଷ୍ଣେନ ପ୍ରୋକ୍ତା ସ୍ୱମୁଖତୋଽର୍ଜୁନମ୍ ।
ବେଦତ୍ରୟୀ ପରାନନ୍ଦା ତତ୍ତ୍ୱାର୍ଥଜ୍ଞାନସଂୟୁତା ॥ ୯ ॥

ଯୋଽଷ୍ଟାଦଶଜପୋ ନିତ୍ୟଂ ନରୋ ନିଶ୍ଚଲମାନସଃ ।
ଜ୍ଞାନସିଦ୍ଧିଂ ସ ଲଭତେ ତତୋ ଯାତି ପରଂ ପଦମ୍ ॥ ୧୦ ॥

ପାଠେଽସମର୍ଥଃ ସମ୍ପୂର୍ଣେ ତତୋଽର୍ଧଂ ପାଠମାଚରେତ୍ ।
ତଦା ଗୋଦାନଜଂ ପୁଣ୍ୟଂ ଲଭତେ ନାତ୍ର ସଂଶୟଃ ॥ ୧୧ ॥

ତ୍ରିଭାଗଂ ପଠମାନସ୍ତୁ ଗଙ୍ଗାସ୍ନାନଫଲଂ ଲଭେତ୍ ।
ଷଡଂଶଂ ଜପମାନସ୍ତୁ ସୋମୟାଗଫଲଂ ଲଭେତ୍ ॥ ୧୨ ॥

ଏକାଧ୍ୟାୟଂ ତୁ ଯୋ ନିତ୍ୟଂ ପଠତେ ଭକ୍ତିସଂୟୁତଃ ।
ରୁଦ୍ରଲୋକମବାପ୍ନୋତି ଗଣୋ ଭୂତ୍ୱା ବସେଚ୍ଚିରମ୍ ॥ ୧୩ ॥

ଅଧ୍ୟାୟଂ ଶ୍ଲୋକପାଦଂ ବା ନିତ୍ୟଂ ଯଃ ପଠତେ ନରଃ ।
ସ ଯାତି ନରତାଂ ଯାବନ୍ମନ୍ୱନ୍ତରଂ ବସୁନ୍ଧରେ ॥ ୧୪ ॥

ଗୀତାୟାଃ ଶ୍ଲୋକଦଶକଂ ସପ୍ତ ପଞ୍ଚ ଚତୁଷ୍ଟୟମ୍ ।
ଦ୍ୱୌ ତ୍ରୀନେକଂ ତଦର୍ଧଂ ବା ଶ୍ଲୋକାନାଂ ଯଃ ପଠେନ୍ନରଃ ॥ ୧୫ ॥

ଚନ୍ଦ୍ରଲୋକମବାପ୍ନୋତି ବର୍ଷାଣାମୟୁତଂ ଧ୍ରୁବମ୍ ।
ଗୀତାପାଠସମାୟୁକ୍ତୋ ମୃତୋ ମାନୁଷତାଂ ବ୍ରଜେତ୍ ॥ ୧୬ ॥

ଗୀତାଭ୍ୟାସଂ ପୁନଃ କୃତ୍ୱା ଲଭତେ ମୁକ୍ତିମୁତ୍ତମାମ୍ ।
ଗୀତେତ୍ୟୁଚ୍ଚାରସଂୟୁକ୍ତୋ ମ୍ରିୟମାଣୋ ଗତିଂ ଲଭେତ୍ ॥ ୧୭ ॥

ଗୀତାର୍ଥଶ୍ରବଣାସକ୍ତୋ ମହାପାପୟୁତୋଽପି ବା ।
ବୈକୁଣ୍ଠଂ ସମବାପ୍ନୋତି ବିଷ୍ଣୁନା ସହ ମୋଦତେ ॥ ୧୮ ॥

ଗୀତାର୍ଥଂ ଧ୍ୟାୟତେ ନିତ୍ୟଂ କୃତ୍ୱା କର୍ମାଣି ଭୂରିଶଃ ।
ଜୀବନ୍ମୁକ୍ତଃ ସ ବିଜ୍ଞେୟୋ ଦେହାନ୍ତେ ପରମଂ ପଦମ୍ ॥ ୧୯ ॥

ଗୀତାମାଶ୍ରିତ୍ୟ ବହବୋ ଭୂଭୁଜୋ ଜନକାଦୟଃ ।
ନିର୍ଧୂତକଲ୍ମଷା ଲୋକେ ଗୀତାୟାତାଃ ପରଂ ପଦମ୍ ॥ ୨୦ ॥

ଗୀତାୟାଃ ପଠନଂ କୃତ୍ୱା ମାହାତ୍ମ୍ୟଂ ନୈବ ଯଃ ପଠେତ୍ ।
ବୃଥା ପାଠୋ ଭବେତ୍ତସ୍ୟ ଶ୍ରମ ଏବ ହ୍ୟୁଦାହୃତଃ ॥ ୨୧ ॥

ଏତନ୍ମାହାତ୍ମ୍ୟସଂୟୁକ୍ତଂ ଗୀତାଭ୍ୟାସଂ କରୋତି ଯଃ ।
ସ ତତ୍ଫଲମବାପ୍ନୋତି ଦୁର୍ଲଭାଂ ଗତିମାପ୍ନୁୟାତ୍ ॥ ୨୨ ॥

ସୂତ ଉବାଚ ।
ମାହାତ୍ମ୍ୟମେତଦ୍ଗୀତାୟା ମୟା ପ୍ରୋକ୍ତ ସତାତନମ୍ ।
ଗୀତାନ୍ତେ ଚ ପଠେଦ୍ୟସ୍ତୁ ଯଦୁକ୍ତଂ ତତ୍ଫଲଂ ଲଭେତ୍ ॥ ୨୩ ॥

॥ ଇତି ଶ୍ରୀବାରାହପୁରାଣେ ଶ୍ରୀଗୀତାମାହାତ୍ମ୍ୟଂ ସମ୍ପୂର୍ଣମ୍ ॥

॥ ଅଥ ଶ୍ରୀମଦ୍ଭଗବଦ୍ଗୀତାଧ୍ୟାନାଦି ॥

ଶ୍ରୀ ଗଣେଶାୟ ନମଃ ॥ ଶ୍ରୀଗୋପାଲକୃଷ୍ଣାୟ ନମଃ ॥

ଅଥ ଧ୍ୟାନମ୍ ।
ଅଥ କରନ୍ୟାସଃ।
ଓଁ ଅସ୍ୟ ଶ୍ରୀମଦ୍ଭଗବଦ୍ଗୀତାମାଲାମନ୍ତ୍ରସ୍ୟ
ଭଗବାନ୍ୱେଦବ୍ୟାସ ଋଷିଃ ॥ ଅନୁଷ୍ଟୁପ୍ ଛନ୍ଦଃ ॥

ଶ୍ରୀକୃଷ୍ଣ ପରମାତ୍ମା ଦେବତା ॥

ଅଶୋଚ୍ୟାନନ୍ୱଶୋଚସ୍ତ୍ୱଂ ପ୍ରଜ୍ଞାବାଦାଂଶ୍ଚ ଭାଷସେ ଇତି ବୀଜମ୍ ॥

ସର୍ୱଧର୍ମାନ୍ ପରିତ୍ୟଜ୍ୟ ମାମେକଂ ଶରଣଂ ବ୍ରଜ ଇତି ଶକ୍ତିଃ ॥

ଅହଂ ତ୍ୱା ସର୍ୱପାପେଭ୍ୟୋ ମୋକ୍ଷୟିଷ୍ୟାମି ମା ଶୁଚ ଇତି କୀଲକମ୍ ॥

ନୈନଂ ଛିନ୍ଦନ୍ତି ଶସ୍ତ୍ରାଣି ନୈନଂ ଦହତି
ପାବକ ଇତ୍ୟଙ୍ଗୁଷ୍ଠାଭ୍ୟାଂ ନମଃ ॥

ନ ଚୈନଂ କ୍ଲେଦୟନ୍ତ୍ୟାପୋ ନ ଶୋଷୟତି ମାରୁତ ଇତି ତର୍ଜନୀଭ୍ୟାଂ ନମଃ ॥

ଅଚ୍ଛେଦ୍ୟୋଽୟମଦାହ୍ୟୋଽୟମକ୍ଲେଦ୍ୟୋଽଶୋଷ୍ୟ
ଏବ ଚ ଇତି ମଧ୍ୟମାଭ୍ୟାଂ ନମଃ ॥

ନିତ୍ୟଃ ସର୍ୱଗତଃ ସ୍ଥାଣୁରଚଲୋଽୟଂ ସନାତନ ଇତ୍ୟନାମିକାଭ୍ୟାଂ ନମଃ ॥

ପଶ୍ୟ ମେ ପାର୍ଥ୍ ରୂପାଣି ଶତଶୋଽଥ
ସହସ୍ରଶ ଇତି କନିଷ୍ଠିକାଭ୍ୟାଂ ନମଃ ॥

ନାନାବିଧାନି ଦିବ୍ୟାନି ନାନାବର୍ଣାକୃତୀନି
ଚ ଇତି କରତଲକରପୃଷ୍ଠାଭ୍ୟାଂ ନମଃ ॥

ଇତି କରନ୍ୟାସଃ ॥

ଅଥ ହୃଦୟାଦିନ୍ୟାସଃ ॥

ନୈନଂ ଛିନ୍ଦନ୍ତି ଶସ୍ତ୍ରାଣି ନୈନଂ ଦହତି
ପାବକ ଇତି ହୃଦୟାୟ ନମଃ ॥

ନ ଚୈନଂ କ୍ଲେଦୟନ୍ତ୍ୟାପୋ ନ ଶୋଷୟତି ମାରୁତ ଇତି ଶିରସେ ସ୍ୱାହା ॥

ଅଚ୍ଛେଦ୍ୟୋଽୟମଦାହ୍ୟୋଽୟମକ୍ଲେଦ୍ୟୋଽଶୋଷ୍ୟ
ଏବ ଚେତି ଶିଖାୟୈ ବଷଟ୍ ॥

ନିତ୍ୟଃ ସର୍ୱଗତଃ ସ୍ଥାଣୁରଚଲୋଽୟଂ ସନାତନ ଇତି କବଚାୟ ହୁମ୍ ॥

ପଶ୍ୟ ମେ ପାର୍ଥ୍ ରୂପାଣି ଶତଶୋଽଥ
ସହସ୍ରଶ ଇତି ନେତ୍ରତ୍ରୟାୟ ବୌଷଟ୍ ॥

ନାନାବିଧାନି ଦିବ୍ୟାନି ନାନାବର୍ଣାକୃତୀନି
ଚେତି ଅସ୍ତ୍ରାୟ ଫଟ୍ ॥

ଶ୍ରୀକୃଷ୍ଣପ୍ରୀତ୍ୟର୍ଥେ ପାଠେ ବିନିୟୋଗଃ ॥

ଓଁ ପାର୍ଥାୟ ପ୍ରତିବୋଧିତାଂ ଭଗବତା ନାରାୟଣେନ ସ୍ୱୟଂ
ବ୍ୟାସେନ ଗ୍ରଥିତାଂ ପୁରାଣମୁନିନା ମଧ୍ୟେ ମହାଭାରତମ୍ ।
ଅଦ୍ୱୈତାମୃତବର୍ଷିଣୀଂ ଭଗବତୀମଷ୍ଟାଦଶାଧ୍ୟାୟିନୀଂ
ଅମ୍ବ ତ୍ୱାମନୁସନ୍ଦଧାମି ଭଗବଦ୍ଗୀତେ ଭବେଦ୍ୱେଷିଣୀମ୍ ॥ ୧ ॥

ନମୋଽସ୍ତୁ ତେ ବ୍ୟାସ ବିଶାଲବୁଦ୍ଧେ ଫୁଲ୍ଲାରବିନ୍ଦାୟତପତ୍ରନେତ୍ର ।
ଯେନ ତ୍ୱୟା ଭାରତତୈଲପୂର୍ଣଃ ପ୍ରଜ୍ୱାଲିତୋ ଜ୍ଞାନମୟଃ ପ୍ରଦୀପଃ ॥ ୨ ॥

ପ୍ରପନ୍ନପାରିଜାତାୟତୋତ୍ରବେତ୍ରୈକପାଣୟେ ।
ଜ୍ଞାନମୁଦ୍ରାୟ କୃଷ୍ଣାୟ ଗୀତାମୃତଦୁହେ ନମଃ ॥ ୩ ॥

ବସୁଦେବସୁତଂ ଦେବଂ କଂସଚାଣୂରମର୍ଦନମ୍ ।
ଦେବକୀପରମାନନ୍ଦଂ କୃଷ୍ଣଂ ବନ୍ଦେ ଜଗଦ୍ଗୁରୁମ୍ ॥ ୪ ॥

ଭୀଷ୍ମଦ୍ରୋଣତଟା ଜୟଦ୍ରଥଜଲା ଗାନ୍ଧାରନୀଲୋତ୍ପଲା
ଶଲ୍ୟଗ୍ରାହବତୀ କୃପେଣ ବହନୀ କର୍ଣେନ ବେଲାକୁଲା ।
ଅଶ୍ୱତ୍ଥାମବିକର୍ଣଘୋରମକରା ଦୁର୍ୟୋଧନାବର୍ତିନୀ
ସୋତ୍ତୀର୍ଣା ଖଲୁ ପାଣ୍ଡବୈ ରଣନଦୀ କୈବର୍ତକଃ କେଶବଃ ॥ ୫ ॥

ପାରାଶର୍ୟବଚଃ ସରୋଜମମଲଂ ଗୀତାର୍ଥଗନ୍ଧୋତ୍କଟଂ
ନାନାଖ୍ୟାନକକେସରଂ ହରିକଥାସମ୍ବୋଧନାବୋଧିତମ୍ ।
ଲୋକେ ସଜ୍ଜନଷଟ୍ପଦୈରହରହଃ ପେପୀୟମାନଂ ମୁଦା
ଭୂୟାଦ୍ଭାରତପଙ୍କଜଂ କଲିମଲପ୍ରଧ୍ୱଂସି ନଃ ଶ୍ରେୟସେ ॥ ୬ ॥

ମୂକଂ କରୋତି ବାଚାଲଂ ପଙ୍ଗୁଂ ଲଙ୍ଘୟତେ ଗିରିମ୍ ।
ଯତ୍କୃପା ତମହଂ ବନ୍ଦେ ପରମାନନ୍ଦମାଧବମ୍ ॥ ୭ ॥

ଅଥ ଗୀତାମାହାତ୍ମ୍ୟମ୍ ।
ଗୀତାଶାସ୍ତ୍ରମିଦଂ ପୁଣ୍ୟଂ ଯଃ ପଠେତ୍ପ୍ରୟତଃ ପୁମାନ୍ ।
ବିଷ୍ଣୋଃ ପଦମବାପ୍ନୋତି ଭୟଶୋକାଦିବର୍ଜିତଃ ॥ ୧ ॥

ଗୀତାଧ୍ୟଯନଶୀଲସ୍ୟ ପ୍ରାଣାୟାମପରସ୍ୟ ଚ ।
ନୈବ ସନ୍ତି ହି ପାପାନି ପୂର୍ୱଜନ୍ମକୃତାନି ଚ ॥ ୨ ॥

ମଲନିର୍ମୋଚନଂ ପୁଂସାଂ ଜଲସ୍ନାନଂ ଦିନେ ଦିନେ ।
ସକୃଦ୍ଗୀତାମ୍ଭସି ସ୍ନାନଂ ସଂସାରମଲନାଶନମ୍ ॥ ୩ ॥

ଗୀତା ସୁଗୀତା କର୍ତବ୍ୟା କିମନ୍ୟୈଃ ଶାସ୍ତ୍ରବିସ୍ତରୈଃ ।
ଯା ସ୍ୱୟଂ ପଦ୍ମନାଭସ୍ୟ ମୁଖପଦ୍ମାଦ୍ୱିନିଃସୃତା ॥ ୪ ॥

ଭାରତାମୃତସର୍ୱସ୍ୱଂ ବିଷ୍ଣୋର୍ୱକ୍ତ୍ରାଦ୍ୱିନିଃସୃତମ୍ ।
ଗୀତାଗଙ୍ଗୋଦକଂ ପୀତ୍ୱା ପୁନର୍ଜନ୍ମ ନ ବିଦ୍ୟତେ ॥ ୫ ॥

ସର୍ୱୋପନିଷଦୋ ଗାବୋ ଦୋଗ୍ଧା ଗୋପାଲ ନନ୍ଦନଃ ।
ପାର୍ଥୋ ବତ୍ସଃ ସୁଧୀର୍ଭୋକ୍ତା ଦୁଗ୍ଧଂ ଗୀତାମୃତଂ ମହତ୍ ॥ ୬ ॥

ଏକଂ ଶାସ୍ତ୍ରଂ ଦେବକୀପୁତ୍ରଗୀତମେକୋ
ଦେବୋ ଦେବକୀପୁତ୍ର ଏବ ।
ଏକୋ ମନ୍ତ୍ରସ୍ତସ୍ୟ ନାମାନି ଯାନି
କର୍ମାପ୍ୟେକଂ ତସ୍ୟ ଦେବସ୍ୟ ସେବା ॥ ୭ ॥

ଶାନ୍ତାକାରଂ ଭୁଜଗଶୟନଂ ପଦ୍ମନାଭଂ ସୁରେଶଂ
ବିଶ୍ୱାଧାରଂ ଗଗନସଦୃଶଂ ମେଘବର୍ଣଂ ଶୁଭାଙ୍ଗମ୍ ।
ଲକ୍ଷ୍ମୀକାନ୍ତଂ କମଲନୟନଂ ଯୋଗିଭିର୍ଧ୍ୟାନଗମ୍ୟଂ
ବନ୍ଦେ ବିଷ୍ଣୁଂ ଭବଭୟହରଂ ସର୍ୱଲୋକୈକନାଥମ୍ ॥

ଯଂ ବ୍ରହ୍ମା ବରୁଣେନ୍ଦ୍ରରୁଦ୍ରମରୁତଃ ସ୍ତୁନ୍ୱନ୍ତି ଦିବ୍ୟୈଃ ସ୍ତବୈଃ
ବେଦୈଃ ସାଙ୍ଗପଦକ୍ରମୋପନିଷଦୈର୍ଗାୟନ୍ତି ଯଂ ସାମଗାଃ ।
ଧ୍ୟାନାବସ୍ଥିତତଦ୍ଗତେନ ମନସା ପଶ୍ୟନ୍ତି ଯଂ ଯୋଗିନୋ
ଯସ୍ୟାନ୍ତଂ ନ ବିଦୁଃ ସୁରାସୁରଗଣା ଦେବାୟ ତସ୍ମୈ ନମଃ ॥ ୮ ॥

॥ ଇତି ଧ୍ୟାନମ୍ ॥

Also Read:

Bhagavad Gita Mahatmayam and Dhyanamantra Lyrics in Hindi | English | Bengali | Gujarati | Kannada | Malayalam | Oriya | Telugu | Tamil