Goraksha Ashatakam 2 Lyrics in Oriya:
॥ ଗୋରକ୍ଷଶତକମ୍ ୨ ॥
ଶ୍ରୀଗୁରୁଂ ପରମାନନ୍ଦଂ ଵନ୍ଦେ ସ୍ଵାନନ୍ଦଵିଗ୍ରହମ୍ ।
ୟସ୍ୟ ସନ୍ନିଧ୍ୟମାତ୍ରେଣ ଚିଦାନନ୍ଦାୟତେ ତନୁଃ ॥ ୧ ॥
ଅନ୍ତର୍ନିଶ୍ଚଲିତାତ୍ମଦୀପକଲିକାସ୍ଵାଧାରବନ୍ଧାଦିଭିଃ
ୟୋ ୟୋଗୀ ୟୁଗକଲ୍ପକାଲକଲନାତ୍ ତ୍ଵଂ ଜଜେଗୀୟତେ ।
ଜ୍ଞାନାମୋଦମହୋଦଧିଃ ସମଭଵଦ୍ୟତ୍ରାଦିନାଥଃ ସ୍ଵୟଂ
ଵ୍ୟକ୍ତାଵ୍ୟକ୍ତଗୁଣାଧିକଂ ତମନିଶଂ ଶ୍ରୀମୀନନାଥଂ ଭଜେ ॥ ୨ ॥
ନମସ୍କୃତ୍ୟ ଗୁରୁଂ ଭକ୍ତ୍ୟା ଗୋରକ୍ଷୋ ଜ୍ଞାନମୁତ୍ତମମ୍ ।
ଅଭୀଷ୍ଟଂ ୟୋଗିନାଂ ବ୍ରୂତେ ପରମାନନ୍ଦକାରକମ୍ ॥ ୩ ॥
ଗୋରକ୍ଷଃ ଶତକଂ ଵକ୍ତି ୟୋଗିନାଂ ହିତକାମ୍ୟୟା ।
ଧ୍ରୁଵଂ ୟସ୍ୟାଵବୋଧେନ ଜାୟତେ ପରମଂ ପଦମ୍ ॥ ୪ ॥
ଏତଦ୍ଵିମୁକ୍ତିସୋପାନମେତତ୍ କାଲସ୍ୟ ଵଞ୍ଚନମ୍ ।
ୟଦ୍ଵ୍ୟାଵୃତ୍ତଂ ମନୋ ମୋହାଦ୍ ଆସକ୍ତଂ ପରମାତ୍ମନି ॥ ୫ ॥
ଦ୍ଵିଜସେଵିତଶାଖସ୍ୟ ଶ୍ରୁତିକଲ୍ପତରୋଃ ଫଲମ୍ ।
ଶମନଂ ଭଵତାପସ୍ୟ ୟୋଗଂ ଭଜତି ସଜ୍ଜନଃ ॥ ୬ ॥
ଆସନଂ ପ୍ରାଣସଂୟାମଃ ପ୍ରତ୍ୟାହାରୋଽଥ ଧାରଣା ।
ଧ୍ୟାନଂ ସମାଧିରେତାନି ୟୋଗାଙ୍ଗାନି ଭଵନ୍ତି ଷଟ୍ ॥ ୭ ॥
ଆସନାନି ତୁ ତାଵନ୍ତି ୟାଵତ୍ୟୋ ଜୀଵଜାତୟଃ ।
ଏତେଷାମଖିଲାନ୍ଭେଦାନ୍ଵିଜାନାତି ମହେଶ୍ଵରଃ ॥ ୮ ॥
ଚତୁରାଶୀତିଲକ୍ଷାଣାଂ ଏକମେକମୁଦାହୃତମ୍ ।
ତତଃ ଶିଵେନ ପୀଠାନାଂ ଷୋଡେଶାନଂ ଶତଂ କୃତମ୍ ॥ ୯ ॥
ଆସନେଭ୍ୟଃ ସମସ୍ତେଭ୍ୟୋ ଦ୍ଵୟମେଵ ଵିଶିଷ୍ୟତେ ।
ଏକଂ ସିଦ୍ଧାସନଂ ପ୍ରୋକ୍ତଂ ଦ୍ଵିତୀୟଂ କମଲାସନମ୍ ॥ ୧୦ ॥
ୟୋନିସ୍ଥାନକମଙ୍ଘ୍ରିମୂଲଘଟିତଂ କୃତ୍ଵା ଦୃଢଂ ଵିନ୍ୟସେ
ନ୍ମେଢ୍ରେ ପାଦମଥୈକମେଵ ନିୟତଂ କୃତ୍ଵା ସମଂ ଵିଗ୍ରହମ୍ ।
ସ୍ଥାଣୁଃ ସଂୟମିତେନ୍ଦ୍ରିୟୋଽଚଲଦୃଶା ପଶ୍ୟନ୍ ଭ୍ରୁଵୋରନ୍ତରମ୍
ଏତନ୍ ମୋକ୍ଷକଵାଟଭେଦଜନକଂ ସିଦ୍ଧାସନଂ ପ୍ରୋଚ୍ୟତେ ॥ ୧୧ ॥
ଵାମୋରୂପରି ଦକ୍ଷିଣଂ ହି ଚରଣଂ ସଂସ୍ଥାପ୍ୟ ଵାମଂ ତଥା
ଦକ୍ଷୋରୂପରି ପଶ୍ଚିମେନ ଵିଧିନା ଧୃତ୍ଵା କରାଭ୍ୟାଂ ଦୃଢମ୍ ।
ଅଙ୍ଗୁଷ୍ଠୌ ହୃଦୟେ ନିଧାୟ ଚିବୁକଂ ନାସାଗ୍ରମାଲୋକୟେ
ଦେତଦ୍ଵ୍ୟାଧିଵିକାରହାରି ୟମିନାଂ ପଦ୍ମାସନଂ ପ୍ରୋଚ୍ୟତେ ॥ ୧୨ ॥
ଷଟ୍ଚକ୍ରଂ ଷୋଡଶାଧାରଂ ତ୍ରିଲକ୍ଷଂ ଵ୍ୟୋମପଞ୍ଚକମ୍ ।
ସ୍ଵଦେହେ ୟେ ନ ଜାନନ୍ତି କଥଂ ସିଧ୍ୟନ୍ତି ୟୋଗିନଃ ॥ ୧୩ ॥
ଏକସ୍ତମ୍ଭଂ ନଵଦ୍ଵାରଂ ଗୃହଂ ପଞ୍ଚାଧିଦୈଵତମ୍ ।
ସ୍ଵଦେହଂ ୟେ ନ ଜାନନ୍ତି କଥଂ ସିଧ୍ୟନ୍ତି ୟୋଗିନଃ ॥ ୧୪ ॥
ଚତୁର୍ଦଲଂ ସ୍ୟାଦାଧାରଃ ସ୍ଵାଧିଷ୍ଠାନଂ ଚ ଷଟ୍ଦଲମ୍ ।
ନାଭୌ ଦଶଦଲଂ ପଦ୍ମଂ ସୂର୍ୟସଙ୍ଖ୍ୟଦଲଂ ହୃଦି ॥ ୧୫ ॥
କଣ୍ଠେ ସ୍ୟାତ୍ ଷୋଡଶଦଲଂ ଭ୍ରୂମଧ୍ୟେ ଦ୍ଵିଦଲଂ ତଥା ।
ସହସ୍ରଦଲମାଖ୍ୟାତଂ ବ୍ରହ୍ମରନ୍ଧ୍ରେ ମହାପଥେ ॥ ୧୬ ॥
ଆଧାରଃ ପ୍ରଥମଂ ଚକ୍ରଂ ସ୍ଵାଧିଷ୍ଠାନଂ ଦ୍ଵିତୀୟକମ୍ ।
ୟୋନିସ୍ଥାନଂ ଦ୍ଵୟୋର୍ମଧ୍ୟେ କାମରୂପଂ ନିଗଦ୍ୟତେ ॥ ୧୭ ॥
ଆଧାରାଖ୍ୟଂ ଗୁଦସ୍ଥାନଂ ପଙ୍କଜଂ ଚ ଚତୁର୍ଦଲମ୍ ।
ତନ୍ମଧ୍ୟେ ପ୍ରୋଚ୍ୟତେ ୟୋନିଃ କାମାକ୍ଷା ସିଦ୍ଧଵନ୍ଦିତା ॥ ୧୮ ॥
ୟୋନିମଧ୍ୟେ ମହାଲିଙ୍ଗଂ ପଶ୍ଚିମାଭିମୁଖଂ ସ୍ଥିତମ୍ ।
ମସ୍ତକେ ମଣିଵଦ୍ବିମ୍ବଂ ୟୋ ଜାନାତି ସ ୟୋଗଵିତ୍ ॥ ୧୯ ॥
ତପ୍ତଚାମୀକରାଭାସଂ ତଡିଲ୍ଲେଖେଵ ଵିସ୍ଫୁରତ୍ ।
ତ୍ରିକୋଣଂ ତତ୍ପୁରଂ ଵହ୍ନେରଧୋମେଢ୍ରାତ୍ ପ୍ରତିଷ୍ଠିତମ୍ ॥ ୨୦ ॥
ୟତ୍ସମାଧୌ ପରଂ ଜ୍ୟୋତିରନନ୍ତଂ ଵିଶ୍ଵତୋମୁଖମ୍ ।
ତସ୍ମିନ୍ ଦୃଷ୍ଟେ ମହାୟୋଗେ ୟାତାୟାତଂ ନ ଵିଦ୍ୟତେ ॥ ୨୧ ॥
ସ୍ଵଶବ୍ଦେନ ଭଵେତ୍ ପ୍ରାଣଃ ସ୍ଵାଧିଷ୍ଠାନଂ ତଦାଶ୍ରୟଃ ।
ସ୍ଵାଧିଷ୍ଠାନାତ୍ ପଦାଦସ୍ମାନ୍ମେଢ୍ରମେଵାଭିଧୀୟତେ ॥ ୨୨ ॥
ତନ୍ତୁନା ମଣିଵତ୍ ପ୍ରୋତୋ ୟତ୍ର କନ୍ଦଃ ସୁଷୁମ୍ଣୟା ।
ତନ୍ନାଭିମଣ୍ଡଲଂ ଚକ୍ରଂ ପ୍ରୋଚ୍ୟତେ ମଣିପୂରକମ୍ ॥ ୨୩ ॥
ଦ୍ଵାଦଶାରେ ମହାଚକ୍ରେ ପୁଣ୍ୟପାପଵିଵର୍ଜିତେ ।
ତାଵଜ୍ ଜୀଵୋ ଭ୍ରମତ୍ୟେଵ ୟାଵତ୍ ତତ୍ତ୍ଵଂ ନ ଵିନ୍ଦତି ॥ ୨୪ ॥
ଊର୍ଧ୍ଵଂ ମେଢ୍ରାଦ୍ ଅଧୋ ନାଭେଃ କନ୍ଦୟୋନିଃ ଖଗାଣ୍ଡଵତ୍ ।
ତତ୍ର ନାଡ୍ୟଃ ସମୁତ୍ପନ୍ନାଃ ସହସ୍ରାଣାଂ ଦ୍ଵିସପ୍ତତିଃ ॥ ୨୫ ॥
ତେଷୁ ନାଡିସହସ୍ରେଷୁ ଦ୍ଵିସପ୍ତତିରୁଦାହୃତାଃ ।
ପ୍ରଧାନଂ ପ୍ରାଣଵାହିନ୍ୟୋ ଭୂୟସ୍ତତ୍ର ଦଶ ସ୍ମୃତାଃ ॥ ୨୬ ॥
ଇଡା ଚ ପିଙ୍ଗଲା ଚୈଵ ସୁଷୁମ୍ଣା ଚ ତୃତୀୟକା ।
ଗାନ୍ଧାରୀ ହସ୍ତିଜିହ୍ଵା ଚ ପୂଷା ଚୈଵ ୟଶସ୍ଵିନୀ ॥ ୨୭ ॥
ଅଲମ୍ବୁଷା କୁହୂଶ୍ ଚୈଵ ଶଙ୍ଖିନୀ ଦଶମୀ ସ୍ମୃତା ।
ଏତନ୍ ନାଡିମୟଂ ଚକ୍ରଂ ଜ୍ଞାତଵ୍ୟଂ ୟୋଗିଭିଃ ସଦା ॥ ୨୮ ॥
ଇଡା ଵାମେ ସ୍ଥିତା ଭାଗେ ପିଙ୍ଗଲା ଦକ୍ଷିଣେ ତଥା ।
ସୁଷୁମ୍ଣା ମଧ୍ୟଦେଶେ ତୁ ଗାନ୍ଧାରୀ ଵାମଚକ୍ଷୁଷି ॥ ୨୯ ॥
ଦକ୍ଷିଣେ ହସ୍ତିଜିହ୍ଵା ଚ ପୂଷା କର୍ଣେ ଚ ଦକ୍ଷିଣେ ।
ୟଶସ୍ଵିନୀ ଵାମକର୍ଣେ ଚାସନେ ଵାପ୍ୟଲମ୍ବୁଷା ॥ ୩୦ ॥
କୁହୂଶ୍ଚ ଲିଙ୍ଗଦେଶେ ତୁ ମୂଲସ୍ଥାନେ ଚ ଶଙ୍ଖିନୀ ।
ଏଵଂ ଦ୍ଵାରମୁପାଶ୍ରିତ୍ୟ ତିଷ୍ଠନ୍ତି ଦଶନାଡିକାଃ ॥ ୩୧ ॥
ଇଡାପିଙ୍ଗଲାସୁଷୁମ୍ଣା ଚ ତିସ୍ରୋ ନାଡ୍ୟୁଦାହୃତାଃ ।
ସତତଂ ପ୍ରାଣଵାହିନ୍ୟଃ ସୋମସୂର୍ୟାଗ୍ନିଦେଵତାଃ ॥ ୩୨ ॥
ପ୍ରାଣୋଽପାନଃ ସମାନଶ୍ ଚୋଦାନୋ ଵ୍ୟାନୌ ଚ ଵାୟଵଃ ।
ନାଗଃ କୂର୍ମୋଽଥ କୃକରୋ ଦେଵଦତ୍ତୋ ଧନଞ୍ଜୟଃ ॥ ୩୩ ॥
ହୃଦି ପ୍ରାଣୋ ଵସେନ୍ ନିତ୍ୟଂ ଅପାନୋ ଗୁଦମଣ୍ଡଲେ ।
ସମାନୋ ନାଭିଦେଶେ ସ୍ୟାଦୁଦାନଃ କଣ୍ଠମଧ୍ୟଗଃ ॥ ୩୪ ॥
ଉଦ୍ଗାରେ ନାଗାଖ୍ୟାତଃ କୂର୍ମ ଉନ୍ମୀଲନେ ସ୍ମୃତଃ ।
କୃକରଃ କ୍ଷୁତକୃଜ୍ଜ୍ଞେୟୋ ଦେଵଦତ୍ତୋ ଵିଜୃମ୍ଭଣେ ॥ ୩୫ ॥
ନ ଜହାତି ମୃତଂ ଚାପି ସର୍ଵଵ୍ୟାପି ଧନଞ୍ଜୟଃ ।
ଏତେ ସର୍ଵାସୁ ନାଡୀଷୁ ଭ୍ରମନ୍ତେ ଜୀଵରୂପିଣଃ ॥ ୩୬ ॥
ଆକ୍ଷିପ୍ତୋ ଭୁଜଦଣ୍ଡେନ ୟଥୋଚ୍ଚଲତି କନ୍ଦୁକଃ ।
ପ୍ରାଣାପାନସମାକ୍ଷିପ୍ତସ୍ତଥା ଜୀଵୋ ନ ତିଷ୍ଠତି ॥ ୩୮ ॥
ପ୍ରାଣାପାନଵଶୋ ଜୀଵୋ ହ୍ୟଧଶ୍ ଚୋର୍ଧ୍ଵଂ ଚ ଧାଵତି ।
ଵାମଦକ୍ଷିଣମାର୍ଗେଣ ଚଞ୍ଚଲତ୍ଵାନ୍ ନ ଦୃଶ୍ୟତେ ॥ ୩୯ ॥
ରଜ୍ଜୁବଦ୍ଧୋ ୟଥା ଶ୍ୟେନୋ ଗତୋଽପ୍ୟାକୃଷ୍ୟତେ ।
ଗୁଣବଦ୍ଧସ୍ତଥା ଜୀଵଃ ପ୍ରାଣାପାନେନ କୃଷ୍ୟତେ ॥ ୪୦ ॥
ଅପାନଃ କର୍ଷତି ପ୍ରାଣଃ ପ୍ରାଣୋଽପାନଂ ଚ କର୍ଷତି ।
ଊର୍ଧ୍ଵାଧଃ ସଂସ୍ଥିତାଵେତୌ ସଂୟୋଜୟତି ୟୋଗଵିତ୍ ॥ ୪୧ ॥
ହକାରେଣ ବହିର୍ୟାତି ସକାରେଣ ଵିଶେତ୍ପୁନଃ ।
ହଂସହଂସେତ୍ୟମୁମ ମନ୍ତ୍ରଂ ଜୀଵୋ ଜପତି ସର୍ଵଦା ॥ ୪୨ ॥
ଷଟ୍ଶତାନିତ୍ଵହୋରାତ୍ରେ ସହସ୍ରାଣ୍ୟେକଵିଂଶତିଃ ।
ଏତତ୍ସଙ୍ଖ୍ୟାନ୍ଵିତଂ ମନ୍ତ୍ର ଜୀଵୋ ଜପତି ସର୍ଵଦା ॥ ୪୩ ॥
ଅଜପା ନାମ ଗାୟତ୍ରୀ ୟୋଗିନାଂ ମୋକ୍ଷଦାୟିନୀ ।
ଅସ୍ୟାଃ ସଙ୍କଲ୍ପମାତ୍ରେଣ ସର୍ଵପାପୈଃ ପ୍ରମୁଚ୍ୟତେ ॥ ୪୪ ॥
ଅନୟା ସଦୃଶୀ ଵିଦ୍ୟା ଅନୟା ସଦୃଶୋ ଜପଃ ।
ଅନୟା ସଦୃଶଂ ଜ୍ଞାନଂ ନ ଭୂତଂ ନ ଭଵିଷ୍ୟତି ॥ ୪୫ ॥
କୁନ୍ଦଲିନ୍ୟାଃ ସମୁଦ୍ଭୂତା ଗାୟତ୍ରୀ ପ୍ରାଣଧାରିଣୀ ।
ପ୍ରାଣଵିଦ୍ୟା ମହାଵିଦ୍ୟା ୟସ୍ତାଂ ଵେତ୍ତି ସ ୟୋଗଵିତ୍ ॥ ୪୬ ॥
କନ୍ଦୋର୍ଧ୍ଵଂ କୁଣ୍ଡଲୀ ଶକ୍ତିରଷ୍ଟଧା କୁଣ୍ଡଲାକୃତି ।
ବ୍ରହ୍ମଦ୍ଵାରମୁଖଂ ନିତ୍ୟଂ ମୁଖେନାଚ୍ଛାଦ୍ୟ ତିଷ୍ଠତି ॥ ୪୭ ॥
ୟେନ ଦ୍ଵାରେଣ ଗନ୍ତଵ୍ୟଂ ବ୍ରହ୍ମସ୍ଥାନମନାମୟମ୍ ।
ମୁଖେନାଚ୍ଛାଦ୍ୟ ତଦ୍ଦ୍ଵାରଂ ପ୍ରସୁପ୍ତା ପରମେଶ୍ଵରୀ ॥ ୪୮ ॥
ପ୍ରବୁଦ୍ଧା ଵହ୍ନିୟୋଗେନ ମନସା ମାରୁତା ହତା ।
ସୂଚୀଵଦ୍ ଗୁଣମାଦାୟ ଵ୍ରଜତ୍ୟୂର୍ଧ୍ଵଂ ସୁଷୁମ୍ଣୟା ॥ ୪୯ ॥
ପ୍ରସ୍ଫୁରଦ୍ଭୁଜଗାକାରା ପଦ୍ମତନ୍ତୁନିଭା ଶୁଭା ।
ପ୍ରବୁଦ୍ଧା ଵହ୍ନିୟୋଗେନ ଵ୍ରଜତି ଊର୍ଧ୍ଵଂ ସୁଷୁମ୍ଣୟା ॥ ୫୦ ॥
ଉଦ୍ଘଟୟେତ୍କପାତଂ ତୁ ୟଥା କୁଞ୍ଚିକୟା ହଠାତ୍ ।
କୁଣ୍ଡଲିନ୍ୟା ତଥା ୟୋଗୀ ମୋକ୍ଷଦ୍ଵାରଂ ପ୍ରଭେଦୟେତ୍ ॥ ୫୧ ॥
କୃତ୍ଵା ସମ୍ପୁଟିତୌ କରୌ ଦୃଢତରଂ ବଦ୍ଧଵାତୁ ପଦ୍ମାସନଂ
ଗାଢଂ ଵକ୍ଷସି ସନ୍ନିଧାୟ ଚିବୁକଂ ଧ୍ୟାତ୍ଵା ତତ୍ପ୍ରେକ୍ଷିତମ୍ ।
ଵାରଂ ଵାରମପାନମୂର୍ଧ୍ଵମନିଲଂ ପ୍ରୋଚ୍ଚାରୟେତ୍ପୂରିତଂ
ମୁଞ୍ଚନ୍ପ୍ରାଣମୁପୈତି ବୋଧମତୁଲଂ ଶକ୍ତିପ୍ରବୋଧାନ୍ନରଃ ॥ ୫୨ ॥
ଅଙ୍ଗାନାଂ ମର୍ଦନଂ କୁର୍ୟାଚ୍ଛ୍ରମଜାତେନ ଵାରିଣା ।
କଟ୍ଵାମ୍ଲଲଵଣତ୍ୟାଗୀ କ୍ଷୀରଭୋଜନମାଚରେତ୍ ॥ ୫୩ ॥
ବ୍ରହ୍ମଚାରୀ ମିତାହାରୀ ତ୍ୟାଗୀ ୟୋଗପରାୟଣଃ ।
ଅବ୍ଦାଦୁର୍ଧ୍ଵଂ ଭଵେତ୍ସିଦ୍ଧୋ ନାତ୍ର କାର୍ୟା ଵିଚାରଣା ॥ ୫୪ ॥
ସୁସ୍ନିଗ୍ଧଂ ମଧୁରାହାରଂ ଚତୁର୍ଥାଂଶଵିଵର୍ଜିତମ୍ ।
ଭୁଜ୍ୟତେ ସୁରସମ୍ପ୍ରୀତ୍ୟୈ ମିତାହାରଃ ସ ଉଚ୍ୟତେ ॥ ୫୫ ॥
କନ୍ଦୋର୍ଧ୍ଵଂ କୁଣ୍ଡଲୀ ଶକ୍ତିରଷ୍ଟଧା କୁଣ୍ଡଲାକୃତିଃ ।
ବନ୍ଧନାୟ ଚ ମୂଢାନାଂ ୟୋଗିନାଂ ମୋକ୍ଷଦା ସ୍ମୃତା ॥ ୫୬ ॥
ମହାମୁଦ୍ରାଂ ନମୋମୁଦ୍ରାମୁଡ୍ଡିୟାନଂ ଜଲନ୍ଧରମ୍ ।
ମୂଲବନ୍ଧଂ ଚ ୟୋ ଵେତ୍ତି ସ ୟୋଗୀ ସିଦ୍ଧିଭାଜନମ୍ ॥ ୫୭ ॥
ଶୋଧନଂ ନାଡିଜାଲସ୍ୟ ଚାଲନଂ ଚନ୍ଦ୍ରସୂର୍ୟୟୋଃ ।
ରସାନାଂ ଶୋଷଣଂ ଚୈଵ ମହାମୁଦ୍ରାଭିଧୀୟତେ ॥ ୫୮ ॥
ଵକ୍ଷୋନ୍ୟସ୍ତହନୁର୍ନିପୀଡ୍ୟ ସୁଚିରଂ ୟୋନିଂ ଚ ଵାମାଙ୍ଘ୍ରିଣା
ହସ୍ତାଭ୍ୟାମଵଧାରିତଂ ପ୍ରସରିତଂ ପାଦଂ ତଥା ଦକ୍ଷିଣମ୍ ।
ଆପୂର୍ୟ ଶ୍ଵସନେନ କୁକ୍ଷିୟୁଗଲଂ ବଦ୍ଧ୍ଵା ଶନୈ ରେଚୟେଦ୍
ଏଷା ପାତକନାଶିନୀ ସୁମହତୀ ମୁଦ୍ରା ନୄଣାଂ ପ୍ରୋଚ୍ୟତେ ॥ ୫୯ ॥
ଚନ୍ଦ୍ରାଙ୍ଗେନ ସମଭ୍ୟସ୍ୟ ସୂର୍ୟାଙ୍ଗେନାଭ୍ୟସେତ୍ ପୁନଃ ।
ୟାଵତ୍ ତୁଲ୍ୟା ଭଵେତ୍ସଙ୍ଖ୍ୟା ତତୋ ମୁଦ୍ରାଂ ଵିସର୍ଜୟେତ୍ ॥ ୬୦ ॥
ନ ହି ପଥ୍ୟମପଥ୍ୟଂ ଵା ରସାଃ ସର୍ଵେଽପି ନୀରସାଃ ।
ଅପି ମୁକ୍ତଂ ଵିଷଂ ଘୋରଂ ପୀୟୂଷମପି ଜୀର୍ୟତେ ॥ ୬୧ ॥
କ୍ଷୟକୁଷ୍ଠଗୁଦାଵର୍ତଗୁଲ୍ମାଜୀର୍ଣପୁରୋଗମାଃ ।
ରୋଗାସ୍ତସ୍ୟ କ୍ଷୟଂ ୟାନ୍ତି ମହାମୁଦ୍ରାଂ ତୁ ୟୋଽଭ୍ୟସେତ୍ ॥ ୬୨ ॥
କଥିତେୟଂ ମହାମୁଦ୍ରା ମହାସିଦ୍ଧିକରା ନୄଣାମ୍ ।
ଗୋପନୀୟା ପ୍ରୟତ୍ନେନ ନ ଦେୟା ୟସ୍ୟ କସ୍ୟଚିତ୍ ॥ ୬୩ ॥
କପାଲକୁହରେ ଜିହ୍ଵା ପ୍ରଵିଷ୍ଟା ଵିପରୀତଗା ।
ଭ୍ରୁଵୋରନ୍ତର୍ଗତା ଦୃଷ୍ଟିର୍ମୁଦ୍ରା ଭଵତି ଖେଚରୀ ॥ ୬୪ ॥
ନ ରୋଗୋ ମରଣଂ ତନ୍ଦ୍ରା ନ ନିଦ୍ରା ନ କ୍ଷୁଧା ତୃଷା ।
ନ ଚ ମୂର୍ଚ୍ଛା ଭଵେତ୍ତସ୍ୟ ୟୋ ମୁଦ୍ରାଂ ଵେତ୍ତି ଖେଚରୀମ୍ ॥ ୬୫ ॥
ପୀଡ୍ୟତେ ନ ସ ରୋଗେଣ ଲିପ୍ୟତେ ନ ଚ କର୍ମଣା ।
ବାଧ୍ୟତେ ନ ସ କାଲେନ ୟୋ ମୁଦ୍ରାଂ ଵେତ୍ତି ଖେଚରୀମ୍ ॥ ୬୬ ॥
ଚିତ୍ତଂ ଚରତି ଖେ ୟସ୍ମାଜ୍ଜିହ୍ଵା ଚରତି ଖେ ଗତା ।
ତେନୈଷା ଖେଚରୀ ନାମ ମୁଦ୍ରା ସିଦ୍ଧୈର୍ନିରୂପିତା ॥ ୬୭ ॥
ବିନ୍ଦୁମୂଲଂ ଶରୀରଂ ତୁ ଶିରାସ୍ତତ୍ର ପ୍ରତିଷ୍ଠିତାଃ ।
ଭାଵୟନ୍ତି ଶରୀରଂ ୟା ଆପାଦତଲମସ୍ତକମ୍ ॥ ୬୮ ॥
ଖେଚର୍ୟା ମୁଦ୍ରିତଂ ୟେନ ଵିଵରଂ ଲମ୍ବିକୋର୍ଧ୍ଵତଃ ।
ନ ତସ୍ୟ କ୍ଷରତେ ବିନ୍ଦୁଃ କାମିନ୍ୟାଲିଙ୍ଗିତସ୍ୟ ଚ ॥ ୬୯ ॥
ୟାଵଦ୍ବିନ୍ଦୁଃ ସ୍ଥିତୋ ଦେହେ ତାଵତ୍କାଲଭୟଂ କୁତଃ ।
ୟାଵଦ୍ବଦ୍ଧା ନଭୋମୁଦ୍ରା ତାଵଦ୍ବିନ୍ଦୁର୍ନ ଗଚ୍ଛତି ॥ ୭୦ ॥
ଚଲିତୋଽପି ୟଦା ବିନ୍ଦୁଃ ସମ୍ପ୍ରାପ୍ତଶ୍ଚ ହୁତାଶନମ୍ ।
ଵ୍ରଜତ୍ୟୂର୍ଧ୍ଵଂ ହୃତଃ ଶକ୍ତ୍ୟା ନିରୁଦ୍ଧୋ ୟୋନିମୁଦ୍ରୟା ॥ ୭୧ ॥
ସ ପୁନର୍ଦ୍ଵିଵିଧୋ ବିନ୍ଦୁଃ ପଣ୍ଡୁରୋ ଲୋହିତସ୍ତଥା ।
ପାଣ୍ଡୁରଂ ଶୁକ୍ରମିତ୍ୟାହୁର୍ଲୋହିତଂ ତୁ ମହାରାଜଃ ॥ ୭୨ ॥
ସିନ୍ଦୂରଦ୍ରଵସଙ୍କାଶଂ ରଵିସ୍ଥାନେ ସ୍ଥିତଂ ରଜଃ ।
ଶଶିସ୍ଥାନେ ସ୍ଥିତୋ ବିନ୍ଦୁସ୍ତୟୋରୈକ୍ୟଂ ସୁଦୁର୍ଲଭମ୍ ॥ ୭୩ ॥
ବିନ୍ଦୁଃ ଶିଵୋ ରଜଃ ଶକ୍ତିର୍ବିନ୍ଦୁମିନ୍ଦୂ ରଜୋ ରଵିଃ ।
ଉଭୟୋଃ ସଙ୍ଗମାଦେଵ ପ୍ରାପ୍ୟତେ ପରମଂ ପଦମ୍ ॥ ୭୪ ॥
ଵାୟୁନା ଶକ୍ତିଚାରେଣ ପ୍ରେରିତଂ ତୁ ମହାରଜଃ ।
ବିନ୍ଦୁନୈତି ସହୈକତ୍ଵଂ ଭଵେଦ୍ଦିଵ୍ୟଂ ଵପୁସ୍ତଦା ॥ ୭୫ ॥
ଶୁକ୍ରଂ ଚନ୍ଦ୍ରେଣ ସଂୟୁକ୍ତଂ ରଜଃ ସୂର୍ୟେଣ ସଂୟୁତମ୍ ।
ତୟୋଃ ସମରସୈକତ୍ଵଂ ୟୋଜାନାତି ସ ୟୋଗଵିତ୍ ॥ ୭୬ ॥
ଉଡ୍ଡୀନଂ କୁରୁତେ ୟସ୍ମାଦଵିଶ୍ରାନ୍ତଂ ମହାଖଗଃ ।
ଉଡ୍ଡୀୟାନଂ ତଦେଵ ସ୍ୟାତ୍ତଵ ବନ୍ଧୋଽଭିଧୀୟତେ ॥ ୭୭ ॥
ଉଦରାତ୍ପଶ୍ଚିମେ ଭାଗେ ହ୍ୟଧୋ ନାଭେର୍ନିଗଦ୍ୟତେ ।
ଉଡ୍ଡୀୟାନସ୍ୟ ବନ୍ଧୋଽୟଂ ତତ୍ର ବନ୍ଧୋ ଵିଧୀୟତେ ॥ ୭୮ ॥
ବଧ୍ନାତି ହି ସିରାଜାଲମଧୋଗାମି ଶିରୋଜଲମ୍ ।
ତତୋ ଜାଲନ୍ଧରୋ ବନ୍ଧଃ କଣ୍ଠଦୁଃଖୌଘନାଶନଃ ॥ ୭୯ ॥
ଜାଲନ୍ଧରେ କୃତେ ବନ୍ଧେ କଣ୍ଠସଂକୋଚଲକ୍ଷଣେ ।
ପୀୟୂଷଂ ନ ପତତ୍ୟଗ୍ନୌ ନ ଚ ଵାୟୁଃ ପ୍ରକୁପ୍ୟତି ॥ ୮୦ ॥
ପାର୍ଷ୍ଣିଭାଗେନ ସମ୍ପୀଡ୍ୟ ୟୋନିମାକୁଞ୍ଚୟେଦ୍ଗୁଦମ୍ ।
ଅପାନମୂର୍ଧ୍ଵମାକୃଷ୍ୟ ମୂଲବନ୍ଧୋଽଭିଧୀୟତେ ॥ ୮୧ ॥
ଅପାନପ୍ରାଣୟୋରୈକ୍ୟାତ୍ କ୍ଷୟାନ୍ମୂତ୍ରପୁରୀଷୟୋଃ ।
ୟୁଵା ଭଵତି ଵୃଦ୍ଧୋଽପି ସତତଂ ମୂଲବନ୍ଧନାତ୍ ॥ ୮୨ ॥
ପଦ୍ମାସନଂ ସମାରୁହ୍ୟ ସମକାୟଶିରୋଧରଃ ।
ନାସାଗ୍ରଦୃଷ୍ଟିରେକାନ୍ତେ ଜପେଦୋଙ୍କାରମଵ୍ୟୟମ୍ ॥ ୮୩ ॥
ଭୂର୍ଭୁଵଃ ସ୍ଵରିମେ ଲୋକାଃ ସୋମସୂର୍ୟାଗ୍ନିଦେଵତାଃ ।
ୟସ୍ୟା ମାତ୍ରାସୁ ତିଷ୍ଠନ୍ତି ତତ୍ପରଂ ଜ୍ୟୋତିରୋମିତି ॥ ୮୪ ॥
ତ୍ରୟଃକାଲାସ୍ତ୍ରୟୋ ଵେଦାସ୍ତ୍ରୟୋ ଲୋକାସ୍ତ୍ରୟଃ ସ୍ଵେରାଃ ।
ତ୍ରୟୋଦେଵାଃ ସ୍ଥିତା ୟତ୍ର ତତ୍ପରଂ ଜ୍ୟୋତିରୋମିତି ॥ ୮୫ ॥
କ୍ରିୟା ଚେଚ୍ଛା ତଥା ଜ୍ଞାନାବ୍ରାହ୍ମୀରୌଦ୍ରୀଶ୍ଚ ଵୈଷ୍ଣଵୀ ।
ତ୍ରିଧାଶକ୍ତିଃ ସ୍ଥିତା ୟତ୍ର ତତ୍ପରଂ ଜ୍ୟୋତିରୋମିତି ॥ ୮୬ ॥
ଆକାରାଶ୍ଚ ତଥୋକାରୋମକାରୋ ବିନ୍ଦୁସଂଜ୍ଞକଃ ।
ତିସ୍ରୋମାତ୍ରାଃ ସ୍ଥିତା ୟତ୍ର ତତ୍ପରଂ ଜ୍ୟୋତିରୋମିତି ॥ ୮୭ ॥
ଵଚସା ତଜ୍ଜୟେଦ୍ବୀଜଂ ଵପୁଷା ତତ୍ସମଭ୍ୟସେତ୍ ।
ମନସା ତତ୍ସ୍ମରେନ୍ନିତ୍ୟଂ ତତ୍ପରଂ ଜ୍ୟୋତିରୋମିତି ॥ ୮୮ ॥
ଶୁଚିର୍ଵାପ୍ୟଶୁଚିର୍ଵାପି ୟୋ ଜପେତ୍ପ୍ରଣଵଂ ସଦା ।
ଲିପ୍ୟତେ ନ ସ ପାପେନ ପଦ୍ମପତ୍ରମିଵାମ୍ଭସା ॥ ୮୯ ॥
ଚଲେ ଵାତେ ଚଲୋ ବିନ୍ଦୁର୍ନିଶ୍ଚଲେ ନିଶ୍ଚଲୋ ଭଵେତ୍ ।
ୟୋଗୀ ସ୍ଥାଣୁତ୍ଵମାପ୍ନୋତି ତତୋ ଵାୟୁଂ ନିରୋଧୟେତ୍ ॥ ୯୦ ॥
ୟାଵଦ୍ଵାୟୁଃ ସ୍ଥିତୋ ଦେହେ ତାଵଜ୍ଜୀଵନମୁଚ୍ୟତେ ।
ମରଣଂ ତସ୍ୟ ନିଷ୍କ୍ରାନ୍ତିସ୍ତତୋ ଵାୟୁଂ ନିରୋଧୟେତ୍ ॥ ୯୧ ॥
ୟାଵଦ୍ବଦ୍ଧୋ ମରୁଦ୍ଦେହେ ୟାଵଚ୍ଚିତ୍ତଂ ନିରାକୁଲମ୍ ।
ୟାଵଦ୍ଦୃଷ୍ଟିର୍ଭ୍ରୁଵୋର୍ମଧ୍ୟେ ତାଵତ୍କାଲଭୟଂ କୁତଃ ॥ ୯୨ ॥
ଅତଃ କାଲଭୟାଦ୍ ବ୍ରହ୍ମା ପ୍ରାଣାୟାମପରାୟଣଃ ।
ୟୋଗିନୋ ମୁନୟଶ୍ଚୈଵ ତତୋ ଵାୟୁଂ ନିରୋଧୟେତ୍ ॥ ୯୩ ॥
ଷଟ୍ତ୍ରିଂଶଦଙ୍ଗୁଲୋହଂସଃ ପ୍ରୟାଣଂ କୁରୁତେ ବହିଃ ।
ଵାମଦକ୍ଷିଣମାର୍ଗେଣ ତତଃ ପ୍ରାଣୋଽଭିଧୀୟତେ ॥ ୯୪ ॥
ଶୁଦ୍ଧିମେତି ୟଦା ସର୍ଵଂ ନାଡୀଚକ୍ରଂ ମଲାକୁଲମ୍ ।
ତଦୈଵ ଜାୟତେ ୟୋଗୀ ପ୍ରାଣସଂଗ୍ରହଣେ କ୍ଷମଃ ॥ ୯୫ ॥
ବଦ୍ଧପଦ୍ମାସନୋ ୟୋଗୀ ପ୍ରାଣଂ ଚନ୍ଦ୍ରେଣ ପୂରୟେତ୍ ।
ଧାରୟିତ୍ଵା ୟଥାଶକ୍ତି ଭୂୟଃ ସୂର୍ୟେଣ ରେଚୟେତ୍ ॥ ୯୬ ॥
ଅମୃତଂ ଦଧିସଙ୍କାଶଂ ଗୋକ୍ଷୀରରଜତୋପମମ୍ ।
ଧ୍ୟାତ୍ଵା ଚନ୍ଦ୍ରମସୋ ବିମ୍ବଂ ପ୍ରାଣାୟାମୀ ସୁଖୀ ଭଵେତ୍ ॥ ୯୭ ॥
ଦକ୍ଷିଣୋ ଶ୍ଵାସମାକୃଷ୍ୟ ପୂରୟେଦୁଦରଂ ଶନୈଃ ।
କୁମ୍ଭୟିତ୍ଵା ଵିଧାନେନ ପୁରଶ୍ଚନ୍ଦ୍ରେଣ ରେଚୟେତ୍ ॥ ୯୮ ॥
ପ୍ରଜ୍ଵଲଜ୍ଜ୍ଵଲନଜ୍ଵାଲାପୁଞ୍ଜମାଦିତ୍ୟମଣ୍ଡଲମ୍ ।
ଧ୍ୟାତ୍ଵା ନାଭିସ୍ଥିତଂ ୟୋଗୀ ପ୍ରାଣାୟାମେ ସୁଖୀ ଭଵେତ୍ ॥ ୯୯ ॥
ପ୍ରାଣଂ ଚୋଦିଡୟା ପିବେନ୍ପରିମିତଂ ଭୂୟୋଽନ୍ୟୟା ରେଚୟେତ୍
ପୀତ୍ଵା ପିଙ୍ଗଲୟା ସମୀରଣମଥୋ ବଦ୍ଧ୍ଵା ତ୍ୟଜେଦ୍ଵାମୟା ।
ସୂର୍ୟଚନ୍ଦ୍ରମସୋରନେନ ଵିଧିନା ବିମ୍ବଦ୍ଵୟଂ ଧ୍ୟାୟତଃ
ଶୁଦ୍ଧା ନାଡିଗଣା ଭଵନ୍ତି ୟମିନୋ ମାସତ୍ରୟାଦୂର୍ଧ୍ଵତଃ ॥ ୧୦୦ ॥
ୟଥେଷ୍ଠଂ ଧାରଣଂ ଵାୟୋରନଲସ୍ୟ ପ୍ରଦୀପନମ୍ ।
ନାଦାଭିଵ୍ୟକ୍ତିରାରୋଗ୍ୟଂ ଜାୟତେ ନାଡିଶୋଧନାତ୍ ॥ ୧୦୧ ॥
॥ ଇତି ଶ୍ରୀ ଗୋରକ୍ଷନାଥପ୍ରଣୀତଃ ଗୋରକ୍ଷଶତକଂ ସମ୍ପୂର୍ଣମ୍ ॥
