Pancabrahma Upanishad in Bengali:
॥ পঞ্চব্রহ্মোপনিষৎ ॥
ব্রহ্মাদিপঞ্চব্রহ্মাণো যত্র বিশ্রান্তিমাপ্নুয়ুঃ ।
তদখণ্ডসুখাকারং রামচন্দ্রপদং ভজে ॥
ওঁ সহ নাববতু ॥ সহ নৌ ভুনক্তু ॥ সহ বীর্যং করবাবহৈ ॥
তেজস্বিনাবধীতমস্তু মা বিদ্বিষাবহৈ ॥
ওঁ শান্তিঃ শান্তিঃ শান্তিঃ ॥
হরিঃ ওঁ ॥
অথ পৈপ্পলাদো ভগবান্ভো কিমাদৌ কিং জাতমিতি । সদ্যো জাতমিতি ।
কিং ভগব ইতি । অঘোর ইতি । কিং ভগব ইতি । বামদেব ইতি ।
কিং বা পুনরিমে ভগব ইতি । তৎপুরুষ ইতি । কিং বা পুনরিমে ভগব ইতি ।
সর্বেষাং দিব্যানাং প্রেরয়িতা ঈশান ইতি । ঈশানো ভূতভব্যস্য
সর্বেষাং দেবয়োগিনাম্ । কতি বর্ণাঃ । কতি ভেদাঃ । কতি শক্তয়ঃ ।
যৎসর্বং তদ্গুহ্যম্ । তস্মৈ নমো মহাদেবায় মহারুদ্রায় প্রোবাচ
তস্মৈ ভগবান্মহেশঃ ।
গোপ্যাদ্গোপ্যতরং লোকে যদ্যস্তি শ্রুণু শাকল ।
সদ্যো জাতং মহী পূষা রমা ব্রহ্মঃ ত্রিবৃৎস্বরঃ ॥ ১ ॥
ঋগ্বেদো গার্হপত্যং চ মন্ত্রাঃ সপ্তস্বরাস্তথা ।
বর্ণং পীতং ক্রিয়া শক্তিঃ সর্বাভীষ্টফলপ্রদম্ ॥ ২ ॥
অঘোরং সলিলং চন্দ্রং গৌরী বেদ দ্বিতীয়কম্ ।
নীর্দাভং স্বরং সান্দ্রং দক্ষিণাগ্নিরুদাহৃতম্ ॥ ৩ ॥
পঞ্চাশদ্বর্ণসংয়ুক্তং স্থিতিরিচ্ছক্রিয়ান্বিতম্ ।
শক্তিরক্ষণসংয়ুক্তং সর্বাঘৌঘবিনাশনম্ ॥ ৪ ॥
সর্বদুষ্টপ্রশমনং সর্বৈশ্বর্যফলপ্রদম্ ।
বামদেব মহাবোধদায়কং পাবনাত্মকম্ ॥ ৫ ॥
বিদ্যালোকসমায়ুক্তং ভানুকোটিসমপ্রভম্ ।
প্রসন্নং সামবেদাখ্যং নানাষ্টকসমন্বিতম্ ॥ ৬ ॥
ধীরস্বরমধীনং চাবহনীয়মনুত্তমম্ ।
জ্ঞানসংহারসংয়ুক্তং শক্তিদ্বয়সমন্বিতম্ ॥ ৭ ॥
বর্ণং শুক্লং তমোমিশ্রং পূর্ণবোধকরং স্বয়ম্ ।
ধামত্রয়নিয়ন্তারং ধামত্রয়সমন্বিতম্ ॥ ৮ ॥
সর্বসৌভাগ্যদং নৄণাং সর্বকর্মফলপ্রদম্ ।
অষ্টাক্ষরসমায়ুক্তমষ্টপত্রান্তরস্থিতম্ ॥ ৯ ॥
যত্তৎপুরুষং প্রোক্তং বায়ুমণ্ডলসংবৃতম্ ।
পঞ্চাগ্নিনা সমায়ুক্তং মন্ত্রশক্তিনিয়ামকম্ ॥ ১০ ॥
পঞ্চাশৎস্বরবর্ণাখ্যমথর্ববেদস্বরূপকম্ ।
কোটিকোটিগণাধ্যক্ষং ব্রহ্মাণ্ডাখণ্ডবিগ্রহম্ ॥ ১১ ॥
বর্ণং রক্তং কামদং চ সর্বাধিব্যাধিভেষজম্ ।
সৃষ্টিস্থিতিলয়াদীনাং কারণং সর্বশক্তিধৃক্ ॥ ১২ ॥
অবস্থাত্রিতয়াতীতং তুরীয়ং ব্রহ্মসংজ্ঞিতম্ ।
ব্রহ্মবিষ্ণ্বাদিভিঃ সেব্যং সর্বেষাং জনকং পরম্ ॥ ১৩ ॥
ঈশানং পরমং বিদ্যাৎপ্রেরকং বুদ্ধিসাক্ষিণম্ ।
আকাশাত্মকমব্যক্তমোঙ্কারস্বরভূষিতম্ ॥ ১৪ ॥
সর্বদেবময়ং শান্তং শান্ত্যতীতং স্বরাদ্বহিঃ ।
অকারাদিস্বরাধ্যক্ষমাকাশময়বিগ্রহম্ ॥ ১৫ ॥
পঞ্চকৃত্যনিয়ন্তারং পঞ্চব্রহ্মাত্মকং বৃহৎ ।
পঞ্চব্রহ্মোপসংহারং কৃৎবা স্বাত্মনি সংস্থিতঃ ॥ ১৬ ॥
স্বমায়াবৈভবান্সর্বান্সংহৃত্য স্বাত্মনি স্থিতঃ ।
পঞ্চব্রহ্মাত্মকাতীতো ভাসতে স্বস্বতেজসা ॥ ১৭ ॥
আদাবন্তে চ মধ্যে চ ভাসসে নান্যহেতুনা ।
মায়যা মোহিতাঃ শম্ভোর্মহাদেবং জগদ্গুরুম্ ॥ ১৮ ॥
ন জানন্তি সুরাঃ সর্বে সর্বকারণকারণম্ ।
ন সন্দৃশে তিষ্ঠতি রূপমস্য পরাৎপরং পুরুষং বিশ্বধাম ॥ ১৯ ॥
যেন প্রকাশতে বিশ্বং যত্রৈব প্রবিলীয়তে ।
তদ্ব্রহ্ম পরমং শান্তং তদ্ব্রহ্মাস্মি পরমং পদম্ ॥ ২০ ॥
পঞ্চব্রহ্ম পরং বিদ্যাৎসদ্যোজাতাদিপূর্বকম্ ।
দৃশ্যতে শ্রূয়তে যচ্চ পঞ্চব্রহ্মাত্মকং স্বয়ম্ ॥ ২১ ॥
পঞ্চধা বর্তমানং তং ব্রহ্মকার্যমিতি স্মৃতম্ ।
ব্রহ্মকার্যমিতি জ্ঞাৎবা ঈশানং প্রতিপদ্যতে ॥ ২২ ॥
পঞ্চব্রহ্মাত্মকং সর্বং স্বাত্মনি প্রবিলাপ্য চ ।
সোঽহমস্মীতি জানীয়াদ্বিদ্বান্ব্রহ্মাঽমৃতো ভবেৎ ॥ ২৩ ॥
ইত্যেতদ্ব্রহ্ম জানীয়াদ্যঃ স মুক্তো ন সংশয়ঃ ।
পঞ্চাক্ষরময়ং শম্ভুং পরব্রহ্মস্বরূপিণম্ ॥ ২৪ ॥
নকারাদিয়কারান্তং জ্ঞাৎবা পঞ্চাক্ষরং জপেৎ ।
সর্বং পঞ্চাত্মকং বিদ্যাৎপঞ্চব্রহ্মাত্মতত্ত্বতঃ ॥ ২৫ ॥
পঞ্চব্রহ্মাত্মিকীং বিদ্যাং যোঽধীতে ভক্তিভাবিতঃ ।
স পঞ্চাত্মকতামেত্য ভাসতে পঞ্চধা স্বয়ম্ ॥ ২৬ ॥
এবমুক্ত্বা মহাদেবো গালবস্য মহাত্মনঃ ।
কৃপাং চকার তত্রৈব স্বান্তর্ধিমগমৎস্বয়ম্ ॥ ২৭ ॥
যস্য শ্রবণমাত্রেণাশ্রুতমেব শ্রুতং ভবেৎ ।
অমতং চ মতং জ্ঞাতমবিজ্ঞাতং চ শাকল ॥ ২৮ ॥
একেনৈব তু পিণ্ডেন মৃত্তিকায়াশ্চ গৌতম ।
বিজ্ঞাতং মৃণ্ময়ং সর্বং মৃদভিন্নং হি কায়কম্ ॥ ২৯ ॥
একেন লোহমণিনা সর্বং লোহময়ং যথা ।
বিজ্ঞাতং স্যাদথৈকেন নখানাং কৃন্তনেন চ ॥ ৩০ ॥
সর্বং কার্ষ্ণায়সং জ্ঞাতং তদভিন্নং স্বভাবতঃ ।
কারণাভিন্নরূপেণ কার্যং কারণমেব হি ॥ ৩১ ॥
তদ্রূপেণ সদা সত্যং ভেদেনোক্তির্মৃষা খলু ।
তচ্চ কারণমেকং হি ন ভিন্নং নোভয়াত্মকম্ ॥ ৩২ ॥
ভেদঃ সর্বত্র মিথ্যৈব ধর্মাদেরনিরূপণাৎ ।
অতশ্চ কারণং নিত্যমেকমেবাদ্বয়ং খলু ॥ ৩৩ ॥
অত্র কারণমদ্বৈতং শুদ্ধচৈতন্যমেব হি ।
অস্মিন্ব্রহ্মপুরে বেশ্ম দহরং যদিদং মুনে ॥ ৩৪ ॥
পুণ্ডরীকং তু তন্মধ্যে আকাশো দহরোঽস্তি তৎ ।
স শিবঃ সচ্চিদানন্দঃ সোঽন্বেষ্টব্যো মুমুক্ষিভিঃ ॥ ৩৫ ॥
অয়ং হৃদি স্থিতঃ সাক্ষী সর্বেষামবিশেষতঃ ।
তেনায়ং হৃদয়ং প্রোক্তঃ শিবঃ সংসারমোচকঃ ॥ ৩৬ ॥
ইত্যুপনিষৎ ॥
ওঁ সহ নাববতু ॥ সহ নৌ ভুনক্তু ॥ সহ বীর্যং করবাবহৈ ॥
তেজস্বিনাবধীতমস্তু মা বিদ্বিষাবহৈ ॥
ওঁ শান্তিঃ শান্তিঃ শান্তিঃ ॥
ইতি পঞ্চব্রহ্মোপনিষৎসমাপ্তা ॥
Also Read:
Pancha Brahma Upanishad Lyrics in Sanskrit | English | Bengali | Gujarati | Kannada | Malayalam | Oriya | Telugu | Tamil