Shiva Upanishads in Oriya:
॥ ଶ୍ରୀଶିବୋପନିଷତ୍ ॥
କୈଲାସଶିଖରାସୀନମଶେଷାମରପୂଜିତମ୍ ।
କାଲଘ୍ନଂ ଶ୍ରୀମହାକାଲମୀଶ୍ୱରଂ ଜ୍ଞାନପାରଗମ୍ ॥ ୧-୧ ॥
ସମ୍ପୂଜ୍ୟ ବିଧିବଦ୍ଭକ୍ତ୍ୟା ଋଷ୍ୟାତ୍ରେୟଃ ସୁସଂୟତଃ ।
ସର୍ୱଭୂତହିତାର୍ଥାୟ ପପ୍ରଚ୍ଛେଦଂ ମହାମୁନିଃ ॥ ୧-୨ ॥
ଜ୍ଞାନୟୋଗଂ ନ ବିନ୍ଦନ୍ତି ଯେ ନରା ମନ୍ଦବୁଦ୍ଧୟଃ ।
ତେ ମୁଚ୍ୟନ୍ତେ କଥଂ ଘୋରାଦ୍ଭଗବନ୍ଭବସାଗରାତ୍ ॥ ୧-୩ ॥
ଏବଂ ପୃଷ୍ଟଃ ପ୍ରସନ୍ନାତ୍ମା ଋଷ୍ୟାତ୍ରେୟେଣ ଧୀମତା ।
ମନ୍ଦବୁଦ୍ଧିବିମୁକ୍ତ୍ୟର୍ଥଂ ମହାକାଲଃ ପ୍ରଭାଷତେ ॥ ୧-୪ ॥
ମହାଦେବ ଉବାଚ
ପୁରା ରୁଦ୍ରେଣ ଗଦିତାଃ ଶିବଧର୍ମାଃ ସନାତନାଃ ।
ଦେବ୍ୟାଃ ସର୍ୱଗଣାନାଂ ଚ ସଂକ୍ଷେପାଦ୍ଗ୍ରନ୍ଥକୋଟିଭିଃ ॥ ୧-୫ ॥
ଆୟୁଃ ପ୍ରଜ୍ଞାଂ ତଥା ଶକ୍ତିଂ ପ୍ରସମୀକ୍ଷ୍ୟ ନୄଣାମିହ ।
ତାପତ୍ରୟପ୍ରପୀଡାଂ ଚ ଭୋଗତୃଷ୍ଣାବିମୋହିନୀମ୍ ॥ ୧-୬ ॥
ତେ ଧର୍ମାଃ ସ୍କନ୍ଦନନ୍ଦିଭ୍ୟାମନ୍ୟୈଶ୍ଚ ମୁନିସତ୍ତମୈଃ ।
ସାରମାଦାୟ ନିର୍ଦିଷ୍ଟାଃ ସମ୍ୟକ୍ପ୍ରକରଣାନ୍ତରୈଃ ॥ ୧-୭ ॥
ସାରାଦପି ମହାସାରଂ ଶିବୋପନିଷଦଂ ପରମ୍ ।
ଅଲ୍ପଗ୍ରନ୍ଥଂ ମହାର୍ଥଂ ଚ ପ୍ରବକ୍ଷ୍ୟାମି ଜଗଦ୍ଧିତମ୍ ॥ ୧-୮ ॥
ଶିବଃ ଶିବ ଇମେ ଶାନ୍ତ- ନାମ ଚାଦ୍ୟଂ ମୁହୁର୍ମୁହୁଃ ।
ଉଚ୍ଚାରୟନ୍ତି ତଦ୍ଭକ୍ତ୍ୟା ତେ ଶିବା ନାତ୍ର ସଂଶୟଃ ॥ ୧-୯ ॥
ଅଶିବାଃ ପାଶସଂୟୁକ୍ତାଃ ପଶବଃ ସର୍ୱଚେତନାଃ ।
ଯସ୍ମାଦ୍ୱିଲକ୍ଷଣାସ୍ତେଭ୍ୟସ୍ତସ୍ମାଦୀଶଃ ଶିବଃ ସ୍ମୃତଃ ॥ ୧-୧୦ ॥
ଗୁଣୋ ବୁଦ୍ଧିରହଂକାରସ୍ତନ୍ମାତ୍ରାଣୀନ୍ଦ୍ରିୟାନି ଚ ।
ଭୂତାନି ଚ ଚତୁର୍ୱିଂଶଦିତି ପାଶାଃ ପ୍ରକୀର୍ତିତାଃ ॥ ୧-୧୧ ॥
ପଞ୍ଚବିଂଶକମଜ୍ଞାନଂ ସହଜଂ ସର୍ୱଦେହିନାମ୍ ।
ପାଶାଜାଲସ୍ୟ ତନ୍ମୂଲଂ ପ୍ରକୃତିଃ କାରଣାୟ ନଃ ॥ ୧-୧୨ ॥
ସତ୍ୟଜ୍ଞାନେ ନିବଧ୍ୟନ୍ତେ ପୁରୁଷାଃ ପାଶବନ୍ଧନୈଃ ।
ମଦ୍ଭାବାଚ୍ଚ ବିମୁଚ୍ୟନ୍ତେ ଜ୍ଞାନିନଃ ପାଶପଞ୍ଜରାତ୍ ॥ ୧-୧୩ ॥
ଷଡ୍ୱିଂଶକଶ୍ଚ ପୁରୁଷଃ ପଶୁରଜ୍ଞଃ ଶିବାଗମେ ।
ସପ୍ତବିଂଶ ଇତି ପ୍ରୋକ୍ତଃ ଶିବଃ ସର୍ୱଜଗତ୍ପତିଃ ॥ ୧-୧୪ ॥
ଯସ୍ମାଚ୍ଛିବଃ ସୁସମ୍ପୂର୍ଣଃ ସର୍ୱଜ୍ଞଃ ସର୍ୱଗଃ ପ୍ରଭୁଃ ।
ତସ୍ମାତ୍ସ ପାଶହରିତଃ ସ ବିଶୁଦ୍ଧଃ ସ୍ୱଭାବତଃ ॥ ୧-୧୫ ॥
ପଶୁପାଶପରଃ ଶାନ୍ତଃ ପରମଜ୍ଞାନଦେଶିକଃ ।
ଶିବଃ ଶିବାୟ ଭୂତାନାଂ ତଂ ବିଜ୍ଞାୟ ବିମୁଚ୍ୟତେ ॥ ୧-୧୬ ॥
ଏତଦେବ ପରଂ ଜ୍ଞାନଂ ଶିବ ଇତ୍ୟକ୍ଷରଦ୍ୱୟମ୍ ।
ବିଚାରାଦ୍ୟାତି ବିସ୍ତାରଂ ତୈଲବିନ୍ଦୁରିବାମ୍ଭସି ॥ ୧-୧୭ ॥
ସକୃଦୁଚ୍ଚାରିତଂ ଯେନ ଶିବ ଇତ୍ୟକ୍ଷରଦ୍ୱୟମ୍ ।
ବଦ୍ଧଃ ପରିକରସ୍ତେନ ମୋକ୍ଷୋପଗମନଂ ପ୍ରତି ॥ ୧-୧୮ ॥
ଦ୍ୱ୍ୟକ୍ଷରଃ ଶିବମନ୍ତ୍ରୋ ଽୟଂ ଶିବୋପନିଷଦି ସ୍ମୃତଃ ।
ଏକାକ୍ଷରଃ ପୁନଶ୍ଚାୟମୋମିତ୍ୟେବଂ ବ୍ୟବସ୍ଥିତଃ ॥ ୧-୧୯ ॥
ନାମସଂକୀର୍ତଣାଦେବ ଶିବସ୍ୟାଶେଷପାତକୈଃ ।
ଯତଃ ପ୍ରମୁଚ୍ୟତେ କ୍ଷିପ୍ରଂ ମନ୍ତ୍ରୋ ଽୟଂ ଦ୍ୱ୍ୟକ୍ଷରଃ ପରଃ ॥ ୧-୨୦ ॥
ଯଃ ଶିବଂ ଶିବମିତ୍ୟେବଂ ଦ୍ୱ୍ୟକ୍ଷରଂ ମନ୍ତ୍ରମଭ୍ୟସେତ୍ ।
ଏକାକ୍ଷରଂ ବା ସତତଂ ସ ଯାତି ପରମଂ ପଦମ୍ ॥ ୧-୨୧ ॥
ମିତ୍ରସ୍ୱଜନବନ୍ଧୂନାଂ କୁର୍ୟାନ୍ନାମ ଶିବାତ୍ମକମ୍ ।
ଅପି ତତ୍କୀର୍ତନାଦ୍ୟାତି ପାପମୁକ୍ତଃ ଶିବଂ ପୁରମ୍ ॥ ୧-୨୨ ॥
ବିଜ୍ଞେୟଃ ସ ଶିବଃ ଶାନ୍ତୋ ନରସ୍ତଦ୍ଭାବଭାବିତଃ ।
ଆସ୍ତେ ସଦା ନିରୁଦ୍ୱିଗ୍ନଃ ସ ଦେହାନ୍ତେ ବିମୁଚ୍ୟତେ ॥ ୧-୨୩ ॥
ହୃଦ୍ୟନ୍ତଃକରଣଂ ଜ୍ଞେୟଂ ଶିବସ୍ୟ ଆୟତନଂ ପରମ୍ ।
ହୃତ୍ପଦ୍ମଂ ବେଦିକା ତତ୍ର ଲିଙ୍ଗମୋଂକାରମିଷ୍ୟତେ ॥ ୧-୨୪ ॥
ପୁରୁଷଃ ସ୍ଥାପକୋ ଜ୍ଞେୟଃ ସତ୍ୟଂ ସଂମାର୍ଜନଂ ସ୍ମୃତମ୍ ।
ଅହିଂସା ଗୋମୟଂ ପ୍ରୋକ୍ତଂ ଶାନ୍ତିଶ୍ଚ ସଲିଲଂ ପରମ୍ ॥ ୧-୨୫ ॥
କୁର୍ୟାତ୍ସଂମାର୍ଜନଂ ପ୍ରାଜ୍ଞୋ ବୈରାଗ୍ୟଂ ଚନ୍ଦନଂ ସ୍ମୃତମ୍ ।
ପୂଜୟେଦ୍ଧ୍ୟାନୟୋଗେନ ସଂତୋଷୈଃ କୁସୁମୈଃ ସିତୈଃ ॥ ୧-୨୬ ॥
ଧୂପଶ୍ଚ ଗୁଗ୍ଗୁଲୁର୍ଦେୟଃ ପ୍ରାଣାୟାମସମୁଦ୍ଭବଃ ।
ପ୍ରତ୍ୟାହାରଶ୍ଚ ନୈବେଦ୍ୟମସ୍ତେୟଂ ଚ ପ୍ରଦକ୍ଷିଣମ୍ ॥ ୧-୨୭ ॥
ଇତି ଦିବ୍ୟୋପଚାରୈଶ୍ଚ ସମ୍ପୂଜ୍ୟ ପରମଂ ଶିବମ୍ ।
ଜପେଦ୍ଧ୍ୟାୟେଚ୍ଚ ମୁକ୍ତ୍ୟର୍ଥଂ ସର୍ୱସଙ୍ଗବିବର୍ଜିତଃ ॥ ୧-୨୮ ॥
ଜ୍ଞାନୟୋଗବିନିର୍ମୁକ୍ତଃ କର୍ମୟୋଗସମାବୃତ୍ତଃ ।
ମୃତଃ ଶିବପୁରଂ ଗଚ୍ଛେତ୍ସ ତେନ ଶିବକର୍ମଣା ॥ ୧-୨୯ ॥
ତତ୍ର ଭୁକ୍ତ୍ୱା ମହାଭୋଗାନ୍ପ୍ରଲୟେ ସର୍ୱଦେହିନାମ୍ ।
ଶିବଧର୍ମାଚ୍ଛିବଜ୍ଞାନଂ ପ୍ରାପ୍ୟ ମୁକ୍ତିମବାପ୍ନୁୟାତ୍ ॥ ୧-୩୦ ॥
ଜ୍ଞାନୟୋଗେନ ମୁଚ୍ୟନ୍ତେ ଦେହପାତାଦନନ୍ତରମ୍ ।
ଭୋଗାନ୍ଭୁକ୍ତ୍ୱା ଚ ମୁଚ୍ୟନ୍ତେ ପ୍ରଲୟେ କର୍ମୟୋଗିନଃ ॥ ୧-୩୧ ॥
ତସ୍ମାଜ୍ଜ୍ଞାନବିଦୋ ଯୋଗାତ୍ତଥାଜ୍ଞାଃ କର୍ମୟୋଗିନଃ ।
ସର୍ୱ ଏବ ବିମୁଚ୍ୟନ୍ତେ ଯେ ନରାଃ ଶିବମାଶ୍ରିତାଃ ॥ ୧-୩୨ ॥
ସ ଭୋଗଃ ଶିବବିଦ୍ୟାର୍ଥଂ ଯେଷାଂ କର୍ମାସ୍ତି ନିର୍ମଲମ୍ ।
ତେ ଭୋଗାନ୍ପ୍ରାପ୍ୟ ମୁଚ୍ୟନ୍ତେ ପ୍ରଲୟେ ଶିବବିଦ୍ୟଯା ॥ ୧-୩୩ ॥
ବିଦ୍ୟା ସଂକୀର୍ତନୀୟା ହି ଯେଷାଂ କର୍ମ ନ ବିଦ୍ୟତେ ।
ତେ ଚାବର୍ତ୍ୟ ବିମୁଚ୍ୟନ୍ତେ ଯାବତ୍କର୍ମ ନ ତଦ୍ଭବେତ୍ ॥ ୧-୩୪ ॥
ଶିବଜ୍ଞାନବିଦଂ ତସ୍ମାତ୍ପୂଜୟେଦ୍ୱିଭବୈର୍ଗୁରୁମ୍ ।
ବିଦ୍ୟାଦାନଂ ଚ କୁର୍ୱୀତ ଭୋଗମୋକ୍ଷଜିଗୀଷୟା ॥ ୧-୩୫ ॥
ଶିବୟୋଗୀ ଶିବଜ୍ଞାନୀ ଶିବଜାପୀ ତପୋଽଧିକଃ ।
କ୍ରମଶଃ କର୍ମୟୋଗୀ ଚ ପଞ୍ଚୈତେ ମୁକ୍ତିଭାଜନାଃ ॥ ୧-୩୬ ॥
କର୍ମୟୋଗସ୍ୟ ଯନ୍ମୂଲଂ ତଦ୍ୱକ୍ଷ୍ୟାମି ସମାସତଃ ।
ଲିଙ୍ଗମାୟତନଂ ଚେତି ତତ୍ର କର୍ମ ପ୍ରବର୍ତତେ ॥ ୧-୩୭ ॥
॥ ଇତି ଶିବୋପନିଷଦି ମୁକ୍ତିନିର୍ଦେଶାଧ୍ୟାୟଃ ପ୍ରଥମଃ ॥
ଅଥ ପୂର୍ୱସ୍ଥିତୋ ଲିଙ୍ଗେ ଗର୍ଭଃ ସ ତ୍ରିଗୁଣୋ ଭବେତ୍ ।
ଗର୍ଭାଦ୍ୱାପି ବିଭାଗେନ ସ୍ଥାପ୍ୟ ଲିଙ୍ଗଂ ଶିବାଲୟେ ॥ ୨-୧ ॥
ଯାବଲ୍ଲିଙ୍ଗସ୍ୟ ଦୈର୍ଘ୍ୟଂ ସ୍ୟାତ୍ତାବଦ୍ୱେଦ୍ୟାଶ୍ଚ ବିସ୍ତରଃ ।
ଲିଙ୍ଗତୃତୀୟଭାଗେନ ଭବେଦ୍ୱେଦ୍ୟାଃ ସମୁଚ୍ଛ୍ରୟଃ ॥ ୨-୨ ॥
ଭାଗମେକଂ ନ୍ୟସେଦ୍ଭୂମୌ ଦ୍ୱିତୀୟଂ ବେଦିମଧ୍ୟତଃ ।
ତୃତୀୟଭାଗେ ପୂଜା ସ୍ୱାଦିତି ଲିଙ୍ଗଂ ତ୍ରିଧା ସ୍ଥିତମ୍ ॥ ୨-୩ ॥
ଭୂମିସ୍ଥଂ ଚତୁରଶ୍ରଂ ସ୍ୱାଦଷ୍ଟାଶ୍ରଂ ବେଦିମଧ୍ୟତଃ ।
ପୂଜାର୍ଥଂ ବର୍ତୁଲଂ କାର୍ୟଂ ଦୈର୍ଘ୍ୟାତ୍ତ୍ରିଗୁଣବିସ୍ତରମ୍ ॥ ୨-୪ ॥
ଅଧୋଭାଗେ ସ୍ଥିତଃ ସ୍କନ୍ଦଃ ସ୍ଥିତା ଦେବୀ ଚ ମଧ୍ୟତଃ ।
ଊର୍ଧ୍ୱଂ ରୁଦ୍ରଃ କ୍ରମାଦ୍ୱାପି ବ୍ରହ୍ମବିଷ୍ଣୁମହେଶ୍ୱରାଃ ॥ ୨-୫ ॥
ଏତ ଏବ ତ୍ରୟୋ ଲୋକା ଏତ ଏବ ତ୍ରୟୋ ଗୁଣାଃ ।
ଏତ ଏବ ତ୍ରୟୋ ବେଦା ଏତଚ୍ଚାନ୍ୟତ୍ସ୍ଥିତଂ ତ୍ରିଧା ॥ ୨-୬ ॥
ନବହସ୍ତଃ ସ୍ମୃତୋ ଜ୍ୟେଷ୍ଠଃ ଷଡ୍ଢସ୍ତଶ୍ଚାପି ମଧ୍ୟମଃ ।
ବିଦ୍ୟାତ୍କନୀୟସ୍ତ୍ରୈହସ୍ତଂ ଲିଙ୍ଗମାନମିଦଂ ସ୍ମୃତମ୍ ॥ ୨-୭ ॥
ଗର୍ଭସ୍ୟାନତଃ ପ୍ରବିସ୍ତାରସ୍ତଦୂନଶ୍ଚ ନ ଶସ୍ୟତେ ।
ଗର୍ଭସ୍ୟାନତଃ ପ୍ରବିସ୍ତାରାଦ୍ତଦୁପର୍ୟପି ସଂସ୍ଥିତମ୍ ॥ ୨-୮ ॥
ପ୍ରାସାଦଂ କଲ୍ପୟେଚ୍ଛ୍ରୀମାନ୍ୱିଭଜେତ ତ୍ରିଧା ପୁନଃ ।
ଭାଗ ଏକୋ ଭବେଜ୍ଜଙ୍ଘା ଦ୍ୱୌ ଭାଗୌ ମଞ୍ଜରୀ ସ୍ମୃତା ॥ ୨-୯ ॥
ମଞ୍ଜର୍ୟା ଅର୍ଧଭାଗସ୍ଥଂ ଶୁକନାସଂ ପ୍ରକଲ୍ପୟେତ୍ ।
ଗର୍ଭାଦର୍ଧେନ ବିସ୍ତାରମାୟାମଂ ଚ ସୁଶୋଭନମ୍ ॥ ୨-୧୦ ॥
ଗର୍ଭାଦ୍ୱାପି ତ୍ରିଭାଗେନ ଶୁକନାସଂ ପ୍ରକଲ୍ପୟେତ୍ ।
ଗର୍ଭାଦର୍ଧେନ ବିସ୍ତୀର୍ଣା ଗର୍ଭାଚ୍ଚ ଦ୍ୱିଗୁଣାୟତା ॥ ୨-୧୧ ॥
ଜଙ୍ଘାଭିଶ୍ଚ ଭବେତ୍କାର୍ୟା ମଞ୍ଜର୍ୟଙ୍ଗୁଲରାଶିନା ।
ପ୍ରାସାଦାର୍ଧେନ ବିଜ୍ଞେୟୋ ମଣ୍ଡପସ୍ତସ୍ୟ ବାମତଃ ॥ ୨-୧୨ ॥
ମଣ୍ଡପାତ୍ପାଦବିସ୍ତୀର୍ଣା ଜଗତୀ ତାବଦୁଚ୍ଛ୍ରିତା ।
ପ୍ରାସାଦସ୍ୟ ପ୍ରମାଣେନ ଜଗତ୍ୟା ସାର୍ଧମଙ୍ଗଣମ୍ ॥ ୨-୧୩ ॥
ପ୍ରାକାରଂ ତତ୍ସମନ୍ତାଚ୍ଚ ଗୁପୁରାଦାଲଭୂଷିତମ୍ ।
ପ୍ରାକାରାନ୍ତଃ ସ୍ଥିତଂ କାର୍ୟଂ ବୃଷସ୍ଥାନଂ ସମୁଚ୍ଛ୍ରିତମ୍ ॥ ୨-୧୪ ॥
ନନ୍ଦୀଶ୍ୱରମହାକାଲୌ ଦ୍ୱାରଶାଖାବ୍ୟବସ୍ଥିତୌ ।
ପ୍ରାକାରାଦ୍ଦକ୍ଷିଣେ କାର୍ୟଂ ସର୍ୱୋପକରଣାନ୍ୱିତମ୍ ॥ ୨-୧୫ ॥
ପଞ୍ଚଭୌମଂ ତ୍ରିଭୌମଂ ବା ଯୋଗୀନ୍ଦ୍ରାବସଥଂ ମହତ୍ ।
ପ୍ରାକାରଗୁପ୍ତଂ ତତ୍କାର୍ୟଂ ମୈତ୍ରସ୍ଥାନସମନ୍ୱିତମ୍ ॥ ୨-୧୬ ॥
ସ୍ଥାନାଦ୍ଦଶସମାୟୁକ୍ତଂ ଭବ୍ୟବୃକ୍ଷଜଲାନ୍ୱିତମ୍ ।
ତନ୍ମହାନସମାଗ୍ନେୟ୍ୟାଂ ପୂର୍ୱତଃ ସତ୍ତ୍ରମଣ୍ଡପମ୍ ॥ ୨-୧୭ ॥
ସ୍ଥାନଂ ଚଣ୍ଡେଶମୈଶାନ୍ୟାଂ ପୁଷ୍ପାରାମଂ ତଥୋତ୍ତରମ୍ ।
କୋଷ୍ଠାଗାରଂ ଚ ବାୟବ୍ୟାଂ ବାରୁଣ୍ୟାଂ ବରୁଣାଲୟମ୍ ॥ ୨-୧୮ ॥
ଶମୀନ୍ଧନକୁଶସ୍ଥାନମାୟୁଧାନାଂ ଚ ନୈରୃତମ୍ ।
ସର୍ୱଲୋକୋପକାରାୟ ନଗରସ୍ଥଂ ପ୍ରକଲ୍ପୟେତ୍ ॥ ୨-୧୯ ॥
ଶ୍ରୀମଦାୟତନଂ ଶମ୍ଭୋର୍ୟୋଗିନାଂ ବିଜନେ ବନେ ।
ଶିବସ୍ୟାୟତନେ ଯାବତ୍ସମେତାଃ ପରମାଣବଃ ॥ ୨-୨୦ ॥
ମନ୍ୱନ୍ତରାଣି ତାବନ୍ତି କର୍ତୁର୍ଭୋଗାଃ ଶିବେ ପୁରେ ।
ମହାପ୍ରତିମଲିଙ୍ଗାନି ମହାନ୍ତ୍ୟାୟତନାନି ଚ ॥ ୨-୨୧ ॥
କୃତ୍ୱାପ୍ନୋତି ମହାଭୋଗାନନ୍ତେ ମୁକ୍ତିଂ ଚ ଶାଶ୍ୱତୀମ୍ ।
ଲିଙ୍ଗପ୍ରତିଷ୍ଠାଂ କୁର୍ୱୀତ ଯଦା ତଲ୍ଲକ୍ଷଣଂ କୃତୀ ॥ ୨-୨୨ ॥
ପଞ୍ଚଗବ୍ୟେନ ସଂଶୋଧ୍ୟ ପୂଜୟିତ୍ୱାଧିବାସୟେତ୍ ।
ପାଲାଶୋଦୁମ୍ବରାଶ୍ୱତ୍ଥ- ପୃଷଦାଜ୍ୟତିଲୈର୍ୟବୈଃ ॥ ୨-୨୩ ॥
ଅଗ୍ନିକାର୍ୟଂ ପ୍ରକୁର୍ୱୀତ ଦଦ୍ୟାତ୍ପୂର୍ଣାହୁତିତ୍ରୟମ୍ ।
ଶିବସ୍ୟାଷ୍ଟଶତଂ ହୁତ୍ୱା ଲିଙ୍ଗମୂଲଂ ସ୍ପୃଶେଦ୍ବୁଧଃ ॥ ୨-୨୪ ॥
ଏବଂ ମଧ୍ୟେ ଽବସାନେ ତନ୍ମୂର୍ତିମନ୍ତ୍ରୈଶ୍ଚ ମୂର୍ତିଷୁ ।
ଅଷ୍ଟୌ ମୂର୍ତୀଶ୍ୱରାଃ କାର୍ୟାଃ ନବମଃ ସ୍ଥାପକଃ ସ୍ମୃତଃ ॥ ୨-୨୫ ॥
ପ୍ରାତଃ ସଂସ୍ଥାପୟେଲ୍ଲିଙ୍ଗଂ ମନ୍ତ୍ରୈସ୍ତୁ ନବଭିଃ କ୍ରମାତ୍ ।
ମହାସ୍ନାପନପୂଜାଂ ଚ ସ୍ଥାପ୍ୟ ଲିଙ୍ଗଂ ପ୍ରପୂଜୟେତ୍ ॥ ୨-୨୬ ॥
ଗୁରୋର୍ମୂର୍ତିଧରାଣାଂ ଚ ଦଦ୍ୟାଦୁତ୍ତମଦକ୍ଷିଣାମ୍ ।
ଯତୀନାଂ ଚ ସମସ୍ତାନାଂ ଦଦ୍ୟାନ୍ମଧ୍ୟମଦକ୍ଷିଣାମ୍ ॥ ୨-୨୭ ॥
ଦୀନାନ୍ଧକୃପଣେଭ୍ୟଶ୍ଚ ସର୍ୱାସାମୁପକଲ୍ପୟେତ୍ ।
ସର୍ୱଭକ୍ଷ୍ୟାନ୍ନପାନାଦ୍ୟୈରନିଷିଦ୍ଧଂ ଚ ଭୋଜନମ୍ ॥ ୨-୨୮ ॥
କଲ୍ପୟେଦାଗତାନାଂ ଚ ଭୂତେଭ୍ୟଶ୍ଚ ବଲିଂ ହରେତ୍ ।
ରାତ୍ରୌ ମାତୃଗଣାନାଂ ଚ ବଲିଂ ଦଦ୍ୟାଦ୍ୱିଶେଷତଃ ॥ ୨-୨୯ ॥
ଏବଂ ଯଃ ସ୍ଥାପୟେଲ୍ଲିଙ୍ଗଂ ତସ୍ୟ ପୁଣ୍ୟଫଲଂ ଶୃଣୁ ।
କୁଲତ୍ରିଂଶକମୁଦ୍ଧୃତ୍ୟ ଭୃତ୍ୟୈଶ୍ଚ ପରିବାରିତଃ ॥ ୨-୩୦ ॥
କଲତ୍ରପୁତ୍ରମିତ୍ରାଦ୍ୟୈଃ ସହିତଃ ସର୍ୱବାନ୍ଧବୈଃ ।
ବିମୁଚ୍ୟ ପାପକଲିଲଂ ଶିବଲୋକଂ ବ୍ରଜେନ୍ନରଃ ।
ତତ୍ର ଭୁକ୍ତ୍ୱା ମହାଭୋଗାନ୍ପ୍ରଲୟେ ମୁକ୍ତିମାପ୍ନୁୟାତ୍ ॥ ୨-୩୧ ॥
॥ ଇତି ଶିବୋପନିଷଦି ଲିଙ୍ଗାୟତନାଧ୍ୟାୟୋ ଦ୍ୱିତୀୟଃ ॥
ଅଥାନ୍ୟୈରଲ୍ପବିତ୍ତୈଶ୍ଚ ନୃପୈଶ୍ଚ ଶିବଭାବିତୈଃ ।
ଶକ୍ତିତଃ ସ୍ୱାଶ୍ରମେ କାର୍ୟଂ ଶିବଶାନ୍ତିଗୃହଦ୍ୱୟମ୍ ॥ ୩-୧ ॥
ଗୃହସ୍ୟେଶାନଦିଗ୍ଭାଗେ କାର୍ୟମୁତ୍ତରତୋ ଽପି ବା ।
ଖାତ୍ୱା ଭୂମିଂ ସମୁଦ୍ଧୃତ୍ୟ ଶଲ୍ୟାନାକୋଟ୍ୟ ଯତ୍ନତଃ ॥ ୩-୨ ॥
ଶିବଦେବଗୃହଂ କାର୍ୟମଷ୍ଟହସ୍ତପ୍ରମାଣତଃ ।
ଦକ୍ଷିଣୋତ୍ତରଦିଗ୍ଭାଗେ କିଂଚିଚ୍ଦୀର୍ଘଂ ପ୍ରକଲ୍ପୟେତ୍ ॥ ୩-୩ ॥
ହସ୍ତମାତ୍ରପ୍ରମାଣଂ ଚ ଦୃଢପଟ୍ଟଚତୁଷ୍ଟୟମ୍ ।
ଚତୁଷ୍କୋଣେଷୁ ସଂୟୋଜ୍ୟମର୍ଘ୍ୟପାତ୍ରାଦିସଂଶ୍ରୟମ୍ ॥ ୩-୪ ॥
ଗର୍ଭମଧ୍ୟେ ପ୍ରକୁର୍ୱୀତ ଶିବବେଦିଂ ସୁଶୋଭନାମ୍ ।
ଉଦଗର୍ୱାକ୍ଚ୍ଛ୍ରିତାଂ(?) କିଂଚିଚ୍ଚତୁଃଶୀର୍ଷକସଂୟୁତାମ୍ ॥ ୩-୫ ॥
ତ୍ରିହସ୍ତାୟାମବିସ୍ତାରାମ୍ଷୋଡଶାଙ୍ଗୁଲମୁଚ୍ଛ୍ରିତାମ୍ ।
ତଚ୍ଛୀର୍ଷାଣୀବ ହସ୍ତାର୍ଧମାୟାମାଦ୍ୱିସ୍ତରେଣ ଚ ॥ ୩-୬ ॥
ଶିବସ୍ଥଣ୍ଡିଲମିତ୍ୟେତଚ୍ଚତୁର୍ହସ୍ତଂ ସମଂ ଶିରଃ ।
ମୂର୍ତିନୈବେଦ୍ୟଦୀପାନାଂ ବିନ୍ୟାସାର୍ଥଂ ପ୍ରକଲ୍ପୟେତ୍ ॥ ୩-୭ ॥
ଶୈବଲିଙ୍ଗେନ କାର୍ୟଂ ସ୍ୟାତ୍କାର୍ୟଂ ମଣିଜପାର୍ଥିବୈଃ ।
ସ୍ଥଣ୍ଡିଲାର୍ଧେ ଚ କୁର୍ୱନ୍ତି ବେଦିମନ୍ୟାଂ ସବର୍ତୁଲାମ୍ ॥ ୩-୮ ॥
ଷୋଡଶାଙ୍ଗୁଲମୁତ୍ସେଧାଂ ବିସ୍ତୀର୍ଣାଂ ଦ୍ୱିଗୁଣେନ ଚ ।
ଗୃହେ ନ ସ୍ଥାପୟେଚ୍ଛୈଲଂ ଲିଙ୍ଗଂ ମଣିଜମର୍ଚୟେତ୍ ॥ ୩-୯ ॥
ତ୍ରିସଂଧ୍ୟଂ ପାର୍ଥିବଂ ବାପି କୁର୍ୟାଦନ୍ୟଦ୍ଦିନେଦିନେ ।
ସର୍ୱେଷାମେବ ବର୍ଣାନାଂ ସ୍ଫାଟିକଂ ସର୍ୱକାମଦମ୍ ॥ ୩-୧୦ ॥
ସର୍ୱଦୋଷବିନିର୍ମୁକ୍ତମନ୍ୟଥା ଦୋଷମାବହେତ୍ ।
ଆୟୁଷ୍ମାନ୍ବଲବାଞ୍ଶ୍ରୀମାନ୍ପୁତ୍ରବାନ୍ଧନବାନ୍ସୁଖୀ ॥ ୩-୧୧ ॥
ବରମିଷ୍ଟଂ ଚ ଲଭତେ ଲିଙ୍ଗଂ ପାର୍ଥିବମର୍ଚୟନ୍ ।
ତସ୍ମାଦ୍ଧି ପାର୍ଥିବଂ ଲିଙ୍ଗଂ ଜ୍ଞେୟଂ ସର୍ୱାର୍ଥସାଧକମ୍ ॥ ୩-୧୨ ॥
ନିର୍ଦୋଷଂ ସୁଲଭଂ ଚୈବ ପୂଜୟେତ୍ସତତଂ ବୁଧଃ ।
ଯଥା ଯଥା ମହାଲିଙ୍ଗଂ ପୂଜା ଶ୍ରଦ୍ଧା ଯଥା ଯଥା ॥ ୩-୧୩ ॥
ତଥା ତଥା ମହତ୍ପୁଣ୍ୟଂ ବିଜ୍ଞେୟମନୁରୂପତଃ ।
ପ୍ରତିମାଲିଙ୍ଗବେଦୀଷୁ ଯାବନ୍ତଃ ପରମାଣବଃ ।
ତାବତ୍କଲ୍ପାନ୍ମହାଭୋଗସ୍ତତ୍କର୍ତାସ୍ତେ ଶିବେ ପୁରେ ॥ ୩-୧୪ ॥
॥ ଇତି ଶିବୋପନିଷଦି ଶିବଗୃହାଧ୍ୟାୟସ୍ତୃତୀୟଃ ॥
ଅଥୈକଭିନ୍ନାବିଚ୍ଛିନ୍ନଂ ପୁରତଃ ଶାନ୍ତିମଣ୍ଡପମ୍ ।
ପୂର୍ୱାପରାଷ୍ଟହସ୍ତଂ ସ୍ୟାଦ୍ଦ୍ୱାଦଶୋତ୍ତରଦକ୍ଷିଣେ ॥ ୪-୧ ॥
ତଦ୍ଦ୍ୱାରଭିତ୍ତିସଂବଦ୍ଧଂ କପିଚ୍ଛୁକସମାବୃତମ୍ ।
ପଟଦ୍ୱୟଂ ଭବେତ୍ସ୍ଥାପ୍ୟ ସ୍ରୁବାଦ୍ୟାବାରହେତୁନା ॥ ୪-୨ ॥
ଦ୍ୱାରଂ ତ୍ରିଶାଖଂ ବିଜ୍ଞେୟଂ ନବତ୍ୟଙ୍ଗୁଲମୁଚ୍ଛ୍ରିତମ୍ ।
ତଦର୍ଧେନ ଚ ବିସ୍ତୀର୍ଣଂ ସତ୍କବାଟଂ ଶିବାଲୟେ ॥ ୪-୩ ॥
ଦୀର୍ଘଂ ପଞ୍ଚନବତ୍ୟା ଚ ପଞ୍ଚଶାଖାସୁଶୋଭିତମ୍ ।
ସତ୍କବାଟଦ୍ୱୟୋପେତଂ ଶ୍ରୀମଦ୍ୱାହନମଣ୍ଟପମ୍ ॥ ୪-୪ ॥
ଦ୍ୱାରଂ ପଶ୍ଚାନ୍ମୁଖଂ ଜ୍ଞେୟମଶେଷାର୍ଥପ୍ରସାଧକମ୍ ।
ଅଭାବେ ପ୍ରାଙ୍ମୁଖଂ କାର୍ୟମୁଦଗ୍ଦକ୍ଷିଣତୋ ନ ଚ ॥ ୪-୫ ॥
ଗବାକ୍ଷକଦ୍ୱୟଂ କାର୍ୟମପିଧାନଂ ସୁଶୋଭନମ୍ ।
ଧୂମନିର୍ଗମନାର୍ଥାୟ ଦକ୍ଷିଣୋତ୍ତରକୁଡ୍ୟଯୋଃ ॥ ୪-୬ ॥
ଆଗ୍ନେୟଭାଗାତ୍ପରିତଃ କାର୍ୟା ଜାଲଗବାକ୍ଷକାଃ ।
ଊର୍ଧ୍ୱସ୍ତୂପିକୟା ଯୁକ୍ତା ଈଷଚ୍ଛିଦ୍ରପିଧାନୟା ॥ ୪-୭ ॥
ଶିବାଗ୍ନିହୋତ୍ରକୁଣ୍ଡଂ ଚ ବୃତ୍ତଂ ହସ୍ତପ୍ରମାଣତଃ ।
ଚତୁରଶ୍ରବେଦି(kA) ଶ୍ରୀମନ୍ମେଖଲାତ୍ରୟଭୂଷିତମ୍ ॥ ୪-୮ ॥
କୁଡ୍ୟଂ ଦ୍ୱିହସ୍ତବିସ୍ତୀଋଣଂ ପଞ୍ଚହସ୍ତସମୁଚ୍ଛ୍ରିତମ୍ ।
ଶିବାଗ୍ନିହୋତ୍ରଶରଣଂ କର୍ତବ୍ୟମତିଶୋଭନମ୍ ॥ ୪-୯ ॥
ଜଗତୀସ୍ତମ୍ଭପଟ୍ଟାଦ୍ୟଂ ସପ୍ତସଂଖ୍ୟଂ ଚ କଲ୍ପୟେତ୍ ।
ବନ୍ଧୟୋଗବିନିର୍ମୁକ୍ତଂ ତୁଲ୍ୟସ୍ଥାନପଦାନ୍ତରମ୍ ॥ ୪-୧୦ ॥
ଐଷ୍ଟକଂ କଲ୍ପୟେଦ୍ୟତ୍ନାଚ୍ଛିବାଗ୍ନ୍ୟାୟତନଂ ମହତ୍ ।
ଚତୁଃପ୍ରେଗୀବକୋପେତମ୍(?) ଏକପ୍ରେଗୀବକେନ ବା(?) ॥ ୪-୧୧ ॥
ସୁଧାପ୍ରଲିପ୍ତଂ କର୍ତବ୍ୟଂ ପଞ୍ଚାଣ୍ଡକବିଭୂଷିତମ୍ ।
ଶିବାଗ୍ନିହୋତ୍ରଶରଣଂ ଚତୁରଣ୍ଡକସଂୟୁତମ୍ ॥ ୪-୧୨ ॥
ବହିସ୍ତଦେବ ଜଗତୀ ତ୍ରିହସ୍ତା ବା ସୁକୁଟ୍ଟିମା ।
ତାବଦେବ ଚ ବିସ୍ତୀର୍ଣା ମେଖଲାଦିବିଭୂଷିତା ॥ ୪-୧୩ ॥
କର୍ତବ୍ୟା ଚାତ୍ର ଜଗତୀ ତସ୍ୟାଶ୍ଚାଧଃ ସମନ୍ତତଃ ।
ଦ୍ୱିହସ୍ତମାତ୍ରବିସ୍ତୀର୍ଣା ତଦର୍ଧାର୍ଧସମୁଚ୍ଛ୍ରିତା ॥ ୪-୧୪ ॥
ଅନ୍ୟା ବୃତ୍ତା ପ୍ରକର୍ତବ୍ୟା ରୁଦ୍ରବେଦୀ ସୁଶୋଭନା ।
ଦଶହସ୍ତପ୍ରମାଣା ଚ ଚତୁରଙ୍ଗୁଲମୁଚ୍ଛ୍ରିତା ॥ ୪-୧୫ ॥
ରୁଦ୍ରମାତୃଗଣାନାଂ ଚ ଦିକ୍ପତୀନାଂ ଚ ସର୍ୱଦା ।
ସର୍ୱାଗ୍ରପାକସଂୟୁକ୍ତଂ ତାସୁ ନିତ୍ୟବଲିଂ ହରେତ୍ ॥ ୪-୧୬ ॥
ବେଦ୍ୟନ୍ୟା ସର୍ୱଭୂତାନାଂ ବହିଃ କାର୍ୟା ଦ୍ୱିହସ୍ତିକା ।
ବୃଷସ୍ଥାନଂ ଚ କର୍ତବ୍ୟଂ ଶିବାଲୋକନସଂମୁଖମ୍ ॥ ୪-୧୭ ॥
ଅଗ୍ରାର୍ଷସବିତୁର୍ୱ୍ୟୋମ ବୃଷଃ କାର୍ୟଶ୍ଚ ପଶ୍ଚିମେ ।
ବ୍ୟୋମ୍ନଶ୍ଚାଧସ୍ତ୍ରିଗର୍ଭଂ ସ୍ୟାତ୍ପିତୃତର୍ପଣବେଦିକା ॥ ୪-୧୮ ॥
ପ୍ରାକାରାନ୍ତର୍ବହିଃ କାର୍ୟଂ ଶ୍ରୀମଦ୍ଗୋପୁରଭୂଷିତମ୍ ।
ପୁଷ୍ପାରାମଜଲୋପେତଂ ପ୍ରାକାରାନ୍ତଂ ଚ କାରୟେତ୍ ॥ ୪-୧୯ ॥
ମୃଦ୍ଦାରୁଜଂ ତୃଣଚ୍ଛନ୍ନଂ ପ୍ରକୁର୍ୱୀତ ଶିବାଲୟମ୍ ।
ଭୂମିକାଦ୍ୱୟବିନ୍ୟାସାଦୁତ୍କ୍ଷିପ୍ତଂ କଲ୍ପୟେଦ୍ବୁଧଃ ॥ ୪-୨୦ ॥
ଶିବଦକ୍ଷିଣତଃ କାର୍ୟଂ ତଭୁକ୍ତେର୍ୟୋଗ୍ୟମାଲୟମ୍ ।
ଶୟ୍ୟାସନସମାୟୁକ୍ତଂ ବାସ୍ତୁବିଦ୍ୟାବିନିର୍ମିତମ୍ ॥ ୪-୨୧ ॥
ଧ୍ୱଜସିଂହୌ ବୃଷଗଜୌ ଚତ୍ୱାରଃ ଶୋଭନାଃ ସ୍ମୃତାଃ ।
ଧୂମଶ୍ୱଗର୍ଦଭଧ୍ୱାଙ୍କ୍ଷାଶ୍ଚତ୍ୱାରଶ୍ଚାର୍ଥନାଶକାଃ ॥ ୪-୨୨ ॥
ଗୃହସ୍ୟାୟାମବିସ୍ତାରଂ କୃତ୍ୱା ତ୍ରିଗୁଣମାଦିତଃ ।
ଅଷ୍ଟଭିଃ ଶୋଧୟେଦାପୈଃ ଶେଷଶ୍ଚ ଗୃହମାଦିଶେତ୍ ॥ ୪-୨୩ ॥
ଇତି ଶାନ୍ତିଗୃହଂ କୃତ୍ୱା ରୁଦ୍ରାଗ୍ନିଂ ଯଃ ପ୍ରବର୍ତୟେତ୍ ।
ଅପ୍ୟେକଂ ଦିବସଂ ଭକ୍ତ୍ୟା ତସ୍ୟ ପୁଣ୍ୟଫଲଂ ଶୃଣୁ ॥ ୪-୨୪ ॥
କଲତ୍ରପୁତ୍ରମିତ୍ରାଦ୍ୟୈଃ ସ ଭୃତ୍ୟୈଃ ପରିବାରିତଃ ।
କୁଲୈକବିଂଶଦୁତ୍ତାର୍ୟ ଦେବଲୋକମବାପ୍ନୁୟାତ୍ ॥ ୪-୨୫ ॥
ନୀଲୋତ୍ପଲଦଲଶ୍ୟାମାଃ ପୀନବୃତ୍ତପୟୋଧରାଃ ।
ହେମବର୍ଣାଃ ସ୍ତ୍ରିୟଶ୍ଚାନ୍ୟାଃ ସୁନ୍ଦର୍ୟଃ ପ୍ରିୟଦର୍ଶନାଃ ॥ ୪-୨୬ ॥
ତାଭିଃ ସାର୍ଧଂ ମହାଭୋଗୈର୍ୱିମାନୈଃ ସାର୍ୱକାମିକୈଃ ।
ଇଚ୍ଛୟା କ୍ରୀଡତେ ତାବଦ୍ୟାବଦାଭୂତସମ୍ପ୍ଲବମ୍ ॥ ୪-୨୭ ॥
ତତଃ କଲ୍ପାଗ୍ନିନା ସାର୍ଧଂ ଦହ୍ୟମାନଂ ସୁବିହ୍ୱଲମ୍ ।
ଦୃଷ୍ଟ୍ୱା ବିରଜ୍ୟତେ ଭୂୟୋ ଭବଭୋଗମହାର୍ଣବାତ୍ ॥ ୪-୨୮ ॥
ତତଃ ସମ୍ପୃଚ୍ଛତେ ରୁଦ୍ରାଂସ୍ତତ୍ରସ୍ଥାନ୍ଜ୍ଞାନପାରଗାନ୍ ।
ତେଭ୍ୟଃ ପ୍ରାପ୍ୟ ଶିବଜ୍ଞାନଂ ଶାନ୍ତଂ ନିର୍ୱାଣମାପ୍ନୁୟାତ୍ ॥ ୪-୨୯ ॥
ଅବିରକ୍ତଶ୍ଚ ଭୋଗେଭ୍ୟଃ ସପ୍ତ ଜନ୍ମାନି ଜାୟତେ ।
ପୃଥିବ୍ୟଧିପତିଃ ଶ୍ରୀମାନିଚ୍ଛୟା ବା ଦ୍ୱିଜୋତ୍ତମଃ ॥ ୪-୩୦ ॥
ସପ୍ତମାଜ୍ଜନ୍ମନଶ୍ଚାନ୍ତେ ଶିବଜ୍ଞାନମନାପ୍ନୁୟାତ୍ ।
ଜ୍ଞାନାଦ୍ୱିରକ୍ତଃ ସଂସାରାଚ୍ଛୁଦ୍ଧଃ ଖାନ୍ୟଧିତିଷ୍ଠତି ॥ ୪-୩୧ ॥
ଇତ୍ୟେତଦଖିଲଂ କାର୍ୟଂ ଫଲମୁକ୍ତଂ ସମାସତଃ ।
ଉତ୍ସବେ ଚ ପୁନର୍ବ୍ରୂମଃ ପ୍ରତ୍ୟେକଂ ଦ୍ରବ୍ୟଜଂ ଫଲମ୍ ॥ ୪-୩୨ ॥
ସଦ୍ଗନ୍ଧଗୁଟିକାମେକାଂ ଲାକ୍ଷାଂ ପ୍ରାଣ୍ୟଙ୍ଗବର୍ଜିତାମ୍ ।
କର୍ପାସାସ୍ଥିପ୍ରମାଣଂ ଚ ହୁତ୍ୱାଗ୍ନୌ ଶୃଣୁୟାତ୍ଫଲମ୍ ॥ ୪-୩୩ ॥
ଯାବତ୍ସତ୍ଗନ୍ଧଗୁଟିକା ଶିବାଗ୍ନୌ ସଂଖ୍ୟଯା ହୁତା ।
ତାବତ୍କୋଟ୍ୟସ୍ତୁ ବର୍ଷାଣି ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୪-୩୪ ॥
ଏକାଙ୍ଗୁଲପ୍ରମାଣେନ ହୁତ୍ୱାଗ୍ନୌ ଚନ୍ଦନାହୁତିମ୍ ।
ବର୍ଷକୋଟିଦ୍ୱୟଂ ଭୋଗୈର୍ଦିବ୍ୟୈଃ ଶିବପୁରେ ବସେତ୍ ॥ ୪-୩୫ ॥
ଯାବତ୍କେସରସଂଖ୍ୟାନଂ କୁସୁମସ୍ୟାନଲେ ହୁତମ୍ ।
ତାବଦ୍ୟୁଗସହସ୍ରାଣି ଶିବଲୋକେ ମହୀୟତେ ॥ ୪-୩୬ ॥
ନାଗକେସରପୁଷ୍ପଂ ତୁ କୁଙ୍କୁମାର୍ଧେନ କୀର୍ତିତମ୍ ।
ଯତ୍ଫଲଂ ଚନ୍ଦନସ୍ୟୋକ୍ତମୁଶୀରସ୍ୟ ତଦର୍ଧକମ୍ ॥ ୪-୩୭ ॥
ଯତ୍ପୁଷ୍ପଧୂପଭଷ୍ୟାନ୍ନ- ଦଧିକ୍ଷୀରଘୃତାଦିଭିଃ ।
ପୁଣ୍ୟଲିଙ୍ଗାର୍ଚନେ ପ୍ରୋକ୍ତଂ ତଦ୍ଧୋମସ୍ୟ ଦଶାଧିକମ୍ ॥ ୪-୩୮ ॥
ହୁତ୍ୱାଗ୍ନୌ ସମିଧସ୍ତିସ୍ରୌ ଶିବୋମାସ୍କନ୍ଦନାମଭିଃ ।
ପଶ୍ଚାଦ୍ଦଦ୍ୟାତ୍ତିଲାନ୍ନାନି ହୋମୟୀତ ଯଥାକ୍ରମମ୍ ॥ ୪-୩୯ ॥
ପଲାଶାଙ୍କୁରଜାରିଷ୍ଟ- ପାଲାଲ୍ୟଃ(?) ସମିଧଃ ଶୁଭାଃ ।
ପୃଷଦାଜ୍ୟପ୍ଲୁତା ହୁତ୍ୱା ଶୃଣୁ ଯତ୍ଫଲମାପ୍ନୁୟାତ୍ ॥ ୪-୪୦ ॥
ପଲାଶାଙ୍କୁରସଂଖ୍ୟାନାଂ ଯାବଦଗ୍ନୌ ହୁତଂ ଭବେତ୍ ।
ତାବତ୍କଲ୍ପାନ୍ମହାଭୋଗୈଃ ଶିବଲୋକେ ମହୀୟତେ ॥ ୪-୪୧ ॥
ତଲ୍ଲକ୍ଷ୍ୟମଧ୍ୟସଂଭୂତଂ ହୁତ୍ୱାଗ୍ନୌ ସମିଧଃ ଶୁଭାଃ ।
କଲ୍ପାର୍ଧସଂମିତଂ କାଲଂ ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୪-୪୨ ॥
ଶମୀସମିତ୍ଫଲଂ ଦେୟମବ୍ଦାନପି ଚ ଲକ୍ଷକମ୍ ।
ଶମ୍ୟର୍ଧଫଲବଚ୍ଛେଷାଃ ସମିଧଃ କ୍ଷୀରବୃକ୍ଷଜାଃ ॥ ୪-୪୩ ॥
ତିଲସଂଖ୍ୟାଂସ୍ତିଲାନ୍ହୁତ୍ୱା ହ୍ୟାଜ୍ୟାକ୍ତା(?) ଯାବତୀ ଭବେତ୍ ।
ତାବତ୍ସ ବର୍ଷଲକ୍ଷାଂସ୍ତୁ ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୪-୪୪ ॥
ଯାବତ୍ସୁରୌଷଧୀରଜ୍ଞସ୍(?) ତିଲତୁଲ୍ୟଫଲଂ ସ୍ମୃତମ୍ ।
ଇତରେଭ୍ୟସ୍ତିଲେଭ୍ୟଶ୍ଚ କୃଷ୍ଣାନାଂ ଦ୍ୱିଗୁଣଂ ଫଲମ୍ ॥ ୪-୪୫ ॥
ଲାଜାକ୍ଷତାଃ ସଗୋଧୂମାଃ ବର୍ଷଲକ୍ଷଫଲପ୍ରଦାଃ ।
ଦଶସାହସ୍ରିକା ଜ୍ଞେୟାଃ ଶେଷାଃ ସ୍ୟୁର୍ବୀଜଜାତୟଃ ॥ ୪-୪୬ ॥
ପଲାଶେନ୍ଧନଜେ ବହ୍ନୌ ହୋମସ୍ୟ ଦ୍ୱିଗୁଣଂ ଫଲମ୍ ।
କ୍ଷୀରବୃକ୍ଷସମୃଦ୍ଧେ ଽଗ୍ନୌ ଫଲଂ ସାର୍ଧାର୍ଧିକଂ ଭବେତ୍ ॥ ୪-୪୭ ॥
ଅସମିଦ୍ଧେ ସଧୂମେ ଚ ହୋମକର୍ମ ନିରର୍ଥକମ୍ ।
ଅନ୍ଧଶ୍ଚ ଜାୟମାନଃ ସ୍ୟାଦ୍ଦାରିଦ୍ର୍ୟୋପହତସ୍ତଥା ॥ ୪-୪୮ ॥
ନ ଚ କଣ୍ଟକିଭିର୍ୱୃକ୍ଷୈରଗ୍ନିଂ ପ୍ରଜ୍ୱାଲ୍ୟ ହୋମୟେତ୍ ।
ଶୁଷ୍କୈର୍ନବୈଃ ପ୍ରଶସ୍ତୈଶ୍ଚ କାଷ୍ଠୈରଗ୍ନିଂ ସମିନ୍ଧୟେତ୍ ॥ ୪-୪୯ ॥
ଏବମାଜ୍ୟାହୁତିଂ ହୁତ୍ୱା ଶିବଲୋକମବାପ୍ନୁୟାତ୍ ।
ତତ୍ର କଲ୍ପଶତଂ ଭୋଗାନ୍ଭୁଙ୍କ୍ତେ ଦିବ୍ୟାନ୍ୟଥେପ୍ସିତାନ୍ ॥ ୪-୫୦ ॥
ସ୍ରୁଚୈକାହିତମାତ୍ରେଣ ବ୍ରତସ୍ୟାପୂରିତେନ ଚ ।
ଯାହୁତିର୍ଦୀୟତେ ବହ୍ନୌ ସା ପୂର୍ଣାହୁତିରୁଚ୍ୟତେ ॥ ୪-୫୧ ॥
ଏକାଂ ପୂର୍ଣାହୁତିଂ ହୁତ୍ୱା ଶିବେନ ଶିବଭାବିତଃ ।
ସର୍ୱକାମମବାପ୍ନୋତି ଶିବଲୋକେ ବ୍ୟବସ୍ଥିତଃ ॥ ୪-୫୨ ॥
ଅଶେଷକୁଲଜୈର୍ସାର୍ଧଂ ସ ଭୃତ୍ୟୈଃ ପରିବାରିତଃ ।
ଆଭୂତସମ୍ପ୍ଲବଂ ଯାବଦ୍ଭୋଗାନ୍ଭୁଙ୍କ୍ତେ ଯଥେପ୍ସିତାନ୍ ॥ ୪-୫୩ ॥
ତତଶ୍ଚ ପ୍ରଲୟେ ପ୍ରାପ୍ତେ ସମ୍ପ୍ରାପ୍ୟ ଜ୍ଞାନମୁତ୍ତମମ୍ ।
ପ୍ରସାଦାଦୀଶ୍ୱରସ୍ୟୈବ ମୁଚ୍ୟତେ ଭବସାଗରାତ୍ ॥ ୪-୫୪ ॥
ଶିବପୂର୍ଣାହୁତିଂ ବହ୍ନୌ ପତନ୍ତୀଂ ଯଃ ପ୍ରପଶ୍ୟତି ।
ସୋ ଽପି ପାପରି ନରଃ ସର୍ୱୈର୍ମୁକ୍ତଃ ଶିବପୁରଂ ବ୍ରଜେତ୍ ॥ ୪-୫୫ ॥
ଶିବାଗ୍ନିଧୂମସଂସ୍ପୃଷ୍ଟା ଜୀବାଃ ସର୍ୱେ ଚରାଚରାଃ ।
ତେ ଽପି ପାପବିନିର୍ମୁକ୍ତାଃ ସ୍ୱର୍ଗଂ ଯାନ୍ତି ନ ସଂଶୟଃ ॥ ୪-୫୬ ॥
ଶିବୟଜ୍ଞମହାବେଦ୍ୟା ଜାୟତେ ଯେ ନ ସନ୍ତି ବା ।
ତେ ଽପି ଯାନ୍ତି ଶିବସ୍ଥାନଂ ଜୀବାଃ ସ୍ଥାବରଜଙ୍ଗମାଃ ॥ ୪-୫୭ ॥
ପୂର୍ଣାହୁତିଂ ଘୃତାଭାବେ କ୍ଷୀରତୈଲେନ କଲ୍ପୟେତ୍ ।
ହୋମୟେଦତସୀତୈଲଂ ତିଲତୈଲଂ ବିନା ନରଃ ॥ ୪-୫୮ ॥
ସର୍ଷପେଙ୍ଗୁଡିକାଶାମ୍ର- କରଞ୍ଜମଧୁକାକ୍ଷଜମ୍ ।
ପ୍ରିୟଙ୍ଗୁବିଲ୍ୱପୈପ୍ପଲ୍ୟ- ନାଲିକେରସମୁଦ୍ଭବମ୍(?) ॥ ୪-୫୯ ॥
ଇତ୍ୟେବମାଦିକଂ ତୈଲମାଜ୍ୟାଭାବେ ପ୍ରକଲ୍ପୟେତ୍ ।
ଦୂର୍ୱୟା ବିଲ୍ୱପତ୍ତ୍ରୈର୍ୱା ସମିଧଃ ସମ୍ପ୍ରକୀର୍ତିତାଃ ॥ ୪-୬୦ ॥
ଅନ୍ନାର୍ଥଂ ହୋମୟେତ୍କ୍ଷୀରଂ ଦଧି ମୂଲଫଲାନି ବା ।
ତିଲାର୍ଥଂ ତଣ୍ଡୁଲୈଃ କୁର୍ୟାଦ୍ଦର୍ଭାର୍ଥଂ ହରିତୈସ୍ତୃଣୈଃ ॥ ୪-୬୧ ॥
ପରିଧୀନାମଭାବେନ ଶରୈର୍ୱଂଶୈଶ୍ଚ କଲ୍ପୟେତ୍ ।
ଇନ୍ଧନାନାମଭାବେନ ଦୀପୟେତ୍ତୃଣଗୋମୟୈଃ ॥ ୪-୬୨ ॥
ଗୋମୟାନାମଭାବେନ ମହତ୍ୟମ୍ଭସି ହୋମୟେତ୍ ।
ଅପାମସଂଭବେ ହୋମଂ ଭୂମିଭାଗେ ମନୋହରେ ॥ ୪-୬୩ ॥
ବିପ୍ରସ୍ୟ ଦକ୍ଷିଣେ ପାଣାବଶ୍ୱତ୍ଥେ ତଦଭାବତଃ ।
ଛାଗସ୍ୟ ଦକ୍ଷିଣେ କର୍ଣେ କୁଶମୂଲେ ଚ ହୋମୟେତ୍ ॥ ୪-୬୪ ॥
ସ୍ୱାତ୍ମାଗ୍ନୌ ହୋମୟେତ୍ପ୍ରାଜ୍ଞଃ ସର୍ୱାଗ୍ନୀନାମସଂଭବେ ।
ଅଭାବେ ନ ତ୍ୟଜେତ୍କର୍ମ କର୍ମୟୋଗବିଧୌ ସ୍ଥିତଃ ॥ ୪-୬୫ ॥
ଆପତ୍କାଲେ ଽପି ଯଃ କୁର୍ୟାଚ୍ଛିବାଗ୍ନେର୍ମନସାର୍ଚନମ୍ ।
ସ ମୋହକଞ୍ଚୁକଂ ତ୍ୟକ୍ତ୍ୱା ପରାଂ ଶାନ୍ତିମବାପ୍ନୁୟାତ୍ ॥ ୪-୬୬ ॥
ପ୍ରାଣାଗ୍ନିହୋତ୍ରଂ କୁର୍ୱନ୍ତି ପରମଂ ଶିବୟୋଗିନଃ ।
ବାହ୍ୟକର୍ମବିନିର୍ମୁକ୍ତା ଜ୍ଞାନଧ୍ୟାନସମାକୁଲାଃ ॥ ୪-୬୭ ॥
॥ ଇତି ଶିବୋପନିଷଦି ଶାନ୍ତିଗୃହାଗ୍ନିକାର୍ୟାଧ୍ୟାୟଶ୍ଚତୁର୍ଥଃ ॥
ଅଥାଗ୍ନେୟଂ ମହାସ୍ନାନମଲକ୍ଷ୍ମୀମଲନାଶନମ୍ ।
ସର୍ୱପାପହରଂ ଦିବ୍ୟଂ ତପଃ ଶ୍ରୀକୀର୍ତିବର୍ଧନମ୍ ॥ ୫-୧ ॥
ଅଗ୍ନିରୂପେଣ ରୁଦ୍ରେଣ ସ୍ୱତେଜଃ ପରମଂ ବଲମ୍ ।
ଭୂତିରୂପଂ ସମୁଦ୍ଗୀର୍ଣଂ ବିଶୁଦ୍ଧଂ ଦୁରିତାପହମ୍ ॥ ୫-୨ ॥
ଯକ୍ଷରକ୍ଷଃପିଶାଚାନାଂ ଧ୍ୱଂସନଂ ମନ୍ତ୍ରସତ୍କୃତମ୍ ।
ରକ୍ଷାର୍ଥଂ ବାଲରୂପାଣାଂ ସୂତିକାନାଂ ଗୃହେଷୁ ଚ ॥ ୫-୩ ॥
ଯଶ୍ଚ ଭୁଙ୍କ୍ତେ ଦ୍ୱିଜଃ କୃତ୍ୱା ଅନ୍ନସ୍ୟ ବା ପରିଧିତ୍ରୟମ୍(?) ।
ଅପି ଶୂଦ୍ରସ୍ୟ ପଙ୍କ୍ତିସ୍ଥଃ ପଙ୍କ୍ତିଦୋଷୈର୍ନ ଲିପ୍ୟତେ ॥ ୫-୪ ॥
ଆହାରମର୍ଧଭୁକ୍ତଂ ଚ କୀଟକେଶାଦିଦୂଷିତମ୍ ।
ତାବନ୍ମାତ୍ରଂ ସମୁଦ୍ଧୃତ୍ୟ ଭୂତିସ୍ପୃଷ୍ଟଂ ବିଶୁଦ୍ଧ୍ୟତି ॥ ୫-୫ ॥
ଆରଣ୍ୟଂ ଗୋମୟକୃତଂ କରୀଷଂ ବା ପ୍ରଶସ୍ୟତେ ।
ଶର୍କରାପାଂସୁନିର୍ମୁକ୍ତମଭାବେ କାଷ୍ଠଭସ୍ମନା ॥ ୫-୬ ॥
ସ୍ୱଗୃହାଶ୍ରମବଲ୍ଲିଭ୍ୟଃ କୁଲାଲାଲୟଭସ୍ମନା ।
ଗୋମୟେଷୁ ଚ ଦଗ୍ଧେଷୁ ହୀଷ୍ଟକାନି ଚ ଯେଷୁ ଚ ॥ ୫-୭ ॥
ସର୍ୱତ୍ର ବିଦ୍ୟତେ ଭସ୍ମ ଦୁଃଖାପାର୍ଜନରକ୍ଷଣମ୍(duHkhopAr) ।
ଶଙ୍ଖକୁନ୍ଦେନ୍ଦୁବର୍ଣାଭମାଦଦ୍ୟାଜ୍ଜନ୍ତୁବର୍ଜିତମ୍ ॥ ୫-୮ ॥
ଭସ୍ମାନୀୟ ପ୍ରୟତ୍ନେନ ତଦ୍ରକ୍ଷେଦ୍ୟତ୍ନବାଂସ୍ତଥା ।
ମାର୍ଜାରମୂଷିକାଦ୍ୟୈଶ୍ଚ ନୋପହନ୍ୟେତ ତଦ୍ୟଥା ॥ ୫-୯ ॥
ପଞ୍ଚଦୋଷବିନିର୍ମୁକ୍ତଂ ଗୁଣପଞ୍ଚକସଂୟୁତମ୍ ।
ଶିବୈକାଦଶିକାଜପ୍ତଂ ଶିବଭସ୍ମ ପ୍ରକୀର୍ତିତମ୍ ॥ ୫-୧୦ ॥
ଜାତିକାରୁକବାକ୍କାୟ- ସ୍ଥାନଦୁଷ୍ଟଂ ଚ ପଞ୍ଚମମ୍ ।
ପାପଘ୍ନଂ ଶାଂକରଂ ରକ୍ଷା- ପବିତ୍ରଂ ଯୋଗଦଂ ଗୁଣାଃ(?) ॥ ୫-୧୧ ॥
ଶିବବ୍ରତସ୍ୟ ଶାନ୍ତସ୍ୟ ଭାସକତ୍ୱାଚ୍ଛୁଭସ୍ୟ ଚ ।
ଭକ୍ଷଣାତ୍ସର୍ୱପାପାନାଂ ଭସ୍ମେତି ପରିକୀର୍ତିତମ୍ ॥ ୫-୧୨ ॥
ଭସ୍ମସ୍ନାନଂ ଶିବସ୍ନାନଂ ବାରୁଣାଦଧିକଂ ସ୍ମୃତମ୍ ।
ଜନ୍ତୁଶୈବାଲନିର୍ମୁକ୍ତମାଗ୍ନେୟଂ ପଙ୍କବର୍ଜିତମ୍ ॥ ୫-୧୩ ॥
ଅପବିତ୍ରଂ ଭବେତ୍ତୋୟଂ ନିଶି ପୂର୍ୱମନାହୃତମ୍ ।
ନଦୀତଡାଗବାପିଷୁ ଗିରିପ୍ରସ୍ରବଣେଷୁ ଚ ॥ ୫-୧୪ ॥
ସ୍ନାନଂ ସାଧାରଣଂ ପ୍ରୋକ୍ତଂ ବାରୁଣଂ ସର୍ୱଦେହିନାମ୍ ।
ଅସାଧାରଣମେବୋକ୍ତଂ ଭସ୍ମସ୍ନାନଂ ଦ୍ୱିଜନ୍ମନାମ୍ ॥ ୫-୧୫ ॥
ତ୍ରିକାଲଂ ବାରୁଣସ୍ନାନାଦନାରୋଗ୍ୟଂ ପ୍ରଜାୟତେ ।
ଆଗ୍ନେୟଂ ରୋଗଶମନମେତସ୍ମାଦ୍ସାର୍ୱକାମିକମ୍ ॥ ୫-୧୬ ॥
ସଂଧ୍ୟାତ୍ରୟେ ଽର୍ଧରାତ୍ରେ ଚ ଭୁକ୍ତ୍ୱା ଚାନ୍ନବିରେଚନେ ।
ଶିବୟୋଗ୍ୟାଚରେତ୍ସ୍ନାନମୁଚ୍ଚାରାଦିକ୍ରିୟାସୁ ଚ ॥ ୫-୧୭ ॥
ଭସ୍ମାସ୍ତୃତେ ମହୀଭାଗେ ସମେ ଜନ୍ତୁବିବର୍ଜିତେ ।
ଧ୍ୟାୟମାନଃ ଶିବଂ ଯୋଗୀ ରଜନ୍ୟନ୍ତଂ ଶୟୀତ ଚ ॥ ୫-୧୮ ॥
ଏକରାତ୍ରୋଷିତସ୍ୟାପି ଯା ଗତିର୍ଭସ୍ମଶାୟିନଃ ।
ନ ସା ଶକ୍ୟା ଗୃହସ୍ଥେନ ପ୍ରାପ୍ତୁଂ ଯଜ୍ଞଶତୈରପି ॥ ୫-୧୯ ॥
ଗୃହସ୍ଥସ୍ତ୍ର୍ୟାୟୁଷୋଂକାରୈଃ ସ୍ନାନଂ କୁର୍ୟାତ୍ତ୍ରିପୁଣ୍ଡ୍ରକୈଃ ।
ଯତିଃ ସାର୍ୱାଙ୍ଗିକଂ ସ୍ନାନମାପାଦତଲମସ୍ତକାତ୍ ॥ ୫-୨୦ ॥
ଶିବଭକ୍ତସ୍ତ୍ରିଧା ବେଦ୍ୟାଂ ଭସ୍ମସ୍ନାନଫଲଂ ଲଭେତ୍ ।
ହୃଦି ମୂର୍ଧ୍ନି ଲଲାଟେ ଚ ଶୂଦ୍ରଃ ଶିବଗୃହାଶ୍ରମୀ ॥ ୫-୨୧ ॥
ଗଣାଃ ପ୍ରବ୍ରଜିତାଃ ଶାନ୍ତାଃ ଭୂତିମାଲଭ୍ୟ ପଞ୍ଚଧା ।
ଶିରୋଲଲାଟେ ହୃଦ୍ବାହ୍ୱୋର୍ଭସ୍ମସ୍ନାନଫଲଂ ଲଭେତ୍ ॥ ୫-୨୨ ॥
ସଂବତ୍ସରଂ ତଦର୍ଧଂ ବା ଚତୁର୍ଦଶ୍ୟଷ୍ଟମୀଷୁ ଚ ।
ଯଃ କୁର୍ୟାଦ୍ଭସ୍ମନା ସ୍ନାନଂ ତସ୍ୟ ପୁଣ୍ୟଫଲଂ ଶୃନୁ ॥ ୫-୨୩ ॥
ଶିବଭସ୍ମନି ଯାବନ୍ତଃ ସମେତାଃ ପରମାଣବଃ ।
ତାବଦ୍ୱର୍ଷସହସ୍ରାଣି ଶିବଲୋକେ ମହୀୟତେ ॥ ୫-୨୪ ॥
ଏକବିଂଶକୁଲୋପେତଃ ପତ୍ନୀପୁତ୍ରାଦିସଂୟୁତଃ ।
ମିତ୍ରସ୍ୱଜନଭୃତ୍ୟୈଶ୍ଚ ସମସ୍ତୈଃ ପରିବାରିତଃ ॥ ୫-୨୫ ॥
ତତ୍ର ଭୁକ୍ତ୍ୱା ମହାଭୋଗାନିଚ୍ଛୟା ସାର୍ୱକାମିକାନ୍ ।
ଜ୍ଞାନୟୋଗଂ ସମାସାଦ୍ୟ ପ୍ରଲୟେ ମୁକ୍ତିମାପ୍ନୁୟାତ୍ ॥ ୫-୨୬ ॥
ଭସ୍ମ ଭସ୍ମାନ୍ତିକଂ ଯେନ ଗୃହୀତଂ ନୈଷ୍ଠିକବ୍ରତମ୍(?) ।
ଅନେନ ବୈ ସ ଦେହେନ ରୁଦ୍ରଶ୍ଚଙ୍କ୍ରମତେ କ୍ଷିତୌ ॥ ୫-୨୭ ॥
ଭସ୍ମସ୍ନାନରତଂ ଶାନ୍ତଂ ଯେ ନମନ୍ତି ଦିନେ ଦିନେ ।
ତେ ସର୍ୱପାପନିର୍ମୁକ୍ତା ନରା ଯାନ୍ତି ଶିବଂ ପୁରମ୍ ॥ ୫-୨୮ ॥
ଇତ୍ୟେତତ୍ପରମଂ ସ୍ନାନମାଗ୍ନେୟଂ ଶିବନିର୍ମିତମ୍ ।
ତ୍ରିସଂଧ୍ୟମାଚରେନ୍ନିତ୍ୟଂ ଜାପୀ ଯୋଗମବାପ୍ନୁୟାତ୍ ॥ ୫-୨୯ ॥
ଭସ୍ମାନୀୟ ପ୍ରଦଦ୍ୟାଦ୍ୟଃ ସ୍ନାନାର୍ଥଂ ଶିବୟୋଗିନେ ।
କଲ୍ପଂ ଶିବପୁରେ ଭୋଗାନ୍ଭୁକ୍ତ୍ୱାନ୍ତେ ସ୍ୟାଦ୍ଦ୍ୱିଜୋତ୍ତମଃ ॥ ୫-୩୦ ॥
ଆଗ୍ନେୟଂ ବାରୁଣଂ ମାନ୍ତ୍ରଂ ବାୟବ୍ୟଂ ତ୍ୱୈନ୍ଦ୍ରପଞ୍ଚମମ୍ ।
ମାନସଂ ଶାନ୍ତିତୋୟଂ ଚ ଜ୍ଞାନସ୍ନାନଂ ତଥାଷ୍ଟମମ୍ ॥ ୫-୩୧ ॥
ଆଗ୍ନେୟଂ ରୁଦ୍ରମନ୍ତ୍ରେଣ ଭସ୍ମସ୍ନାନମନୁତ୍ତମମ୍ ।
ଅମ୍ଭସା ବାରୁଣଂ ସ୍ନାନମ୍କାର୍ୟଂ ବାରୁଣମୂର୍ତିନା ॥ ୫-୩୨ ॥
ମୂର୍ଧାନଂ ପାଣିନାଲଭ୍ୟ ଶିବୈକାଦଶିକାଂ ଜପେତ୍ ।
ଧ୍ୟାୟମାନଃ ଶିବଂ ଶାନ୍ତମ୍ମନ୍ତ୍ରସ୍ନାନଂ ପରଂ ସ୍ମୃତମ୍ ॥ ୫-୩୩ ॥
ଗବାଂ ଖୁରପୁଟୋତ୍ଖାତ- ପବନୋଦ୍ଧୂତରେଣୁନା ।
କାର୍ୟଂ ବାୟବ୍ୟକଂ ସ୍ନାନମ୍ମନ୍ତ୍ରେଣ ମରୁଦାତ୍ମନା ॥ ୫-୩୪ ॥
ବ୍ୟଭ୍ରେ ଽର୍କେ ବର୍ଷତି ସ୍ନାନଂ କୁର୍ୟାଦୈନ୍ଦ୍ରୀଂ ଦିଶଂ ସ୍ଥିତଃ ।
ଆକାଶମୂର୍ତିମନ୍ତ୍ରେଣ ତଦୈନ୍ଦ୍ରମିତି କୀର୍ତିତମ୍ ॥ ୫-୩୫ ॥
ଉଦକଂ ପାଣିନା ଗୃହ୍ୟ ସର୍ୱତୀର୍ଥାନି ସଂସ୍ମରେତ୍ ।
ଅଭ୍ୟୁକ୍ଷୟେଚ୍ଛିରସ୍ତେନ ସ୍ନାନଂ ମାନସମୁଚ୍ୟତେ ॥ ୫-୩୬ ॥
ପୃଥିବ୍ୟାଂ ଯାନି ତୀର୍ଥାନି ସରାଂସ୍ୟାୟତନାନି ଚ ।
ତେଷୁ ସ୍ନାତସ୍ୟ ଯତ୍ପୁଣ୍ୟଂ ତତ୍ପୁଣ୍ୟଂ କ୍ଷାନ୍ତିବାରିଣା ॥ ୫-୩୭ ॥
ନ ତଥା ଶୁଧ୍ୟତେ ତୀର୍ଥୈସ୍ତପୋଭିର୍ୱା ମହାଧ୍ୱରୈଃ ।
ପୁରୁଷଃ ସର୍ୱଦାନୈଶ୍ଚ ଯଥା କ୍ଷାନ୍ତ୍ୟା ବିଶୁଦ୍ଧ୍ୟତି ॥ ୫-୩୮ ॥
ଆକ୍ରୁଷ୍ଟସ୍ତାଡିତସ୍ତସ୍ମାଦଧିକ୍ଷିପ୍ତସ୍ତିରସ୍କୃତ ।
କ୍ଷମେଦକ୍ଷମମାନାନାଂ ସ୍ୱର୍ଗମୋକ୍ଷଜିଗୀଷୟା ॥ ୫-୩୯ ॥
ଯୈବ ବ୍ରହ୍ମବିଦାଂ ପ୍ରାପ୍ତିର୍ୟୈବ ପ୍ରାପ୍ତିସ୍ତପସ୍ୱିନାମ୍ ।
ଯୈବ ଯୋଗାଭିୟୁକ୍ତାନାଂ ଗତିଃ ସୈବ କ୍ଷମାବତାମ୍ ॥ ୫-୪୦ ॥
ଜ୍ଞାନାମଲାମ୍ଭସା ସ୍ନାତଃ ସର୍ୱଦୈବ ମୁନିଃ ଶୁଚିଃ ।
ନିର୍ମଲଃ ସୁବିଶୁଦ୍ଧଶ୍ଚ ବିଜ୍ଞେୟଃ ସୂର୍ୟରଶ୍ମିବତ୍ ॥ ୫-୪୧ ॥
ମେଧ୍ୟାମେଧ୍ୟରସଂ ଯଦ୍ୱଦପି ବତ୍ସ ବିନା କରୈଃ ।
ନୈବ ଲିପ୍ୟତି ତଦ୍ଦୋଷୈସ୍ତଦ୍ୱଜ୍ଜ୍ଞାନୀ ସୁନିର୍ମଲଃ ॥ ୫-୪୨ ॥
ଏଷାମେକତମେ ସ୍ନାତଃ ଶୁଦ୍ଧଭାବଃ ଶିବଂ ବ୍ରଜେତ୍ ।
ଅଶୁଦ୍ଧଭାବଃ ସ୍ନାତୋ ଽପି ପୂଜୟନ୍ନାପ୍ନୁୟାତ୍ଫଲମ୍ ॥ ୫-୪୩ ॥
ଜଲଂ ମନ୍ତ୍ରଂ ଦୟା ଦାନଂ ସତ୍ୟମିନ୍ଦ୍ରିୟସଂୟମଃ ।
ଜ୍ଞାନଂ ଭାବାତ୍ମଶୁଦ୍ଧିଶ୍ଚ ଶୌଚମଷ୍ଟବିଧଂ ଶ୍ରୁତମ୍ ॥ ୫-୪୪ ॥
ଅଙ୍ଗୁଷ୍ଠତଲମୂଲେ ଚ ବ୍ରାହ୍ମଂ ତୀର୍ଥମବସ୍ଥିତମ୍ ।
ତେନାଚମ୍ୟ ଭବେଚ୍ଛୁଦ୍ଧଃ ଶିବମନ୍ତ୍ରେଣ ଭାବିତଃ ॥ ୫-୪୫ ॥
ଯଦଧଃ କନ୍ୟକାୟାଶ୍ଚ ତତ୍ତୀର୍ଥଂ ଦୈବମୁଚ୍ୟତେ ।
ତୀର୍ଥଂ ପ୍ରଦେଶିନୀମୂଲେ ପିତ୍ର୍ୟଂ ପିତୃବିଧୋଦୟମ୍(?) ॥ ୫-୪୬ ॥
ମଧ୍ୟମାଙ୍ଗୁଲିମଧ୍ୟେନ ତୀର୍ଥମାରିଷମୁଚ୍ୟତେ ।
କରପୁଷ୍କରମଧ୍ୟେ ତୁ ଶିବତୀର୍ଥଂ ପ୍ରତିଷ୍ଠିତମ୍ ॥ ୫-୪୭ ॥
ବାମପାଣିତଲେ ତୀର୍ଥମୌମମ୍ନାମ ପ୍ରକୀର୍ତିତମ୍ ।
ଶିବୋମାତୀର୍ଥସଂୟୋଗାତ୍କୁର୍ୟାତ୍ସ୍ନାନାଭିଷେଚନମ୍ ॥ ୫-୪୮ ॥
ଦେବାନ୍ଦୈବେନ ତୀର୍ଥେନ ତର୍ପୟେଦକୃତାମ୍ଭସା ।
ଉଦ୍ଧୃତ୍ୟ ଦକ୍ଷିଣଂ ପାଣିମୁପବୀତୀ ସଦା ବୁଧଃ ॥ ୫-୪୯ ॥
ପ୍ରାଚୀନାବୀତିନା କାର୍ୟଂ ପିତୄଣାଂ ତିଲବାରିଣା ।
ତର୍ପଣଂ ସର୍ୱଭୂତାନାମାରିଷେଣ ନିବୀତିନା ॥ ୫-୫୦ ॥
ସବ୍ୟସ୍କନ୍ଧେ ଯଦା ସୂତ୍ରମୁପବୀତ୍ୟୁଚ୍ୟତେ ତଦା ।
ପ୍ରାଚୀନାବୀତ୍ୟସବ୍ୟେନ ନିବୀତୀ କଣ୍ଠସଂସ୍ଥିତେ ॥ ୫-୫୧ ॥
ପିତୄଣାଂ ତର୍ପଣଂ କୃତ୍ୱା ସୂର୍ୟାୟାର୍ଘ୍ୟଂ ପ୍ରକଲ୍ପୟେତ୍ ।
ଉପସ୍ଥାୟ ତତଃ ସୂର୍ୟଂ ଯଜେଚ୍ଛିବମନନ୍ତରମ୍ ॥ ୫-୫୨ ॥
॥ ଇତି ଶିବୋପନିଷଦି ଶିବଭସ୍ମସ୍ନାନାଧ୍ୟାୟଃ ପଞ୍ଚମଃ ॥
ଅଥ ଭକ୍ତ୍ୟା ଶିବଂ ପୂଜ୍ୟ ନୈବେଦ୍ୟମୁପକଲ୍ପୟେତ୍ ।
ଯଦନ୍ନମାତ୍ମନାଶ୍ନୀୟାତ୍ତସ୍ୟାଗ୍ରେ ବିନିବେଦୟେତ୍ ॥ ୬-୧ ॥
ଯଃ କୃତ୍ୱା ଭକ୍ଷ୍ୟଭୋଜ୍ୟାନି ଯତ୍ନେନ ବିନିବେଦୟେତ୍ ।
ଶିବାୟ ସ ଶିବେ ଲୋକେ କଲ୍ପକୋଟିଂ ପ୍ରମୋଦତେ ॥ ୬-୨ ॥
ଯଃ ପକ୍ୱଂ ଶ୍ରୀଫଲଂ ଦଦ୍ୟାଚ୍ଛିବାୟ ବିନିବେଦୟେତ୍ ।
ଗୁରୋର୍ୱା ହୋମୟେଦ୍ୱାପି ତସ୍ୟ ପୁଣ୍ୟଫଲଂ ଶୃଣୁ ॥ ୬-୩ ॥
ଶ୍ରୀମଦ୍ଭିଃ ସ ମହାୟାନୈର୍ଭୋଗାନ୍ଭୁଙ୍କ୍ତେ ଶିବେ ପୁରେ ।
ବର୍ଷାଣାମୟୁତଂ ସାଗ୍ରଂ ତଦନ୍ତେ ଶ୍ରୀପତିର୍ଭବେତ୍ ॥ ୬-୪ ॥
କପିତ୍ଥମେକଂ ଯଃ ପକ୍ୱମୀଶ୍ୱରାୟ ନିବେଦୟେତ୍ ।
ବର୍ଷଲକ୍ଷଂ ମହାଭୋଗୈଃ ଶିବଲୋକେ ମହୀୟତେ ॥ ୬-୫ ॥
ଏକମାମ୍ରଫଲଂ ପକ୍ୱଂ ଯଃ ଶମ୍ଭୋର୍ୱିନିବେଦୟେତ୍ ।
ବର୍ଷାଣାମ୍ୟୁତଂ ଭୋଗୈଃ କ୍ରୀଡତେ ସ ଶିବେ ପୁରେ ॥ ୬-୬ ॥
ଏକଂ ବଟଫଲଂ ପକ୍ୱଂ ଯଃ ଶିବାୟ ନିବେଦୟେତ୍ ।
ବର୍ଷଲକ୍ଷଂ ମହାଭୋଗୈଃ ଶିବଲୋକେ ମହୀୟତେ ॥ ୬-୭ ॥
ଯଃ ପକ୍ୱଂ ଦାଡିମଂ ଚୈକଂ ଦଦ୍ୟାଦ୍ୱିକସିତଂ ନବମ୍ ।
ଶିବାୟ ଗୁରବେ ବାପି ତସ୍ୟ ପୁଣ୍ୟଫଲଂ ଶୃଣୁ ॥ ୬-୮ ॥
ଯାବତ୍ତଦ୍ବୀଜସଂଖ୍ୟାନଂ ଶୋଭନଂ ପରିକୀର୍ତିତମ୍ ।
ତାବଦଷ୍ଟାୟୁତାନ୍ୟୁଚ୍ଚୈଃ ଶିବଲୋକେ ମହୀୟତେ ॥ ୬-୯ ॥
ଦ୍ରାକ୍ଷାଫଲାନି ପକ୍ୱାନି ଯଃ ଶିବାୟ ନିବେଦୟେତ୍ ।
ଭକ୍ତ୍ୟା ବା ଶିବୟୋଗିଭ୍ୟସ୍ତସ୍ୟ ପୁଣ୍ୟଫଲଂ ଶୃଣୁ ॥ ୬-୧୦ ॥
ଯାବତ୍ତତ୍ଫଲସଂଖ୍ୟାନମୁଭୟୋର୍ୱିନିବେଦିତମ୍ ।
ତାବଦ୍ୟୁଗସହସ୍ରାଣି ରୁଦ୍ରଲୋକେ ମହୀୟତେ ॥ ୬-୧୧ ॥
ଦ୍ରାକ୍ଷାଫଲେଷୁ ଯତ୍ପୁଣ୍ୟଂ ତତ୍ଖର୍ଜୂରଫଲେଷୁ ଚ ।
ତଦେବ ରାଜବୃକ୍ଷେଷୁ ପାରାବତଫଲେଷୁ ଚ ॥ ୬-୧୨ ॥
ଯୋ ନାରଙ୍ଗଫଲଂ ପକ୍ୱଂ ବିନିବେଦ୍ୟ ମହେଶ୍ୱରେ ।
ଅଷ୍ଟଲକ୍ଷଂ ମହାଭୋଗୈଃ କୃଡତେ ସ ଶିବେ ପୁରେ ॥ ୬-୧୩ ॥
ବୀଜପୂରେଷୁ ତସ୍ୟାର୍ଧଂ ତଦର୍ଧଂ ଲିକୁଚେଷୁ ଚ ।
ଜମ୍ବୂଫଲେଷୁ ଯତ୍ପୁଣ୍ୟଂ ତତ୍ପୁଣ୍ୟଂ ତିନ୍ଦୁକେଷୁ ଚ ॥ ୬-୧୪ ॥
ପନସଂ ନାରିକେଲଂ ବା ଶିବାୟ ବିନିବେଦୟେତ୍ ।
ବର୍ଷଲକ୍ଷଂ ମହାଭୋଗୈଃ ଶିବଲୋକେ ମହୀୟତେ ॥ ୬-୧୫ ॥
ପୁରୁଷଂ ଚ ପ୍ରିୟାଲଂ ଚ ମଧୂକକୁସୁମାନି ଚ ।
ଜମ୍ବୂଫଲାନି ପକ୍ୱାନି ବୈକଙ୍କତଫଲାନି ଚ ॥ ୬-୧୬ ॥
ନିବେଦ୍ୟ ଭକ୍ତ୍ୟା ଶର୍ୱାୟ ପ୍ରତ୍ୟେକଂ ତୁ ଫଲେ ଫଲେ ।
ଦଶବର୍ଷସହସ୍ରାଣି ରୁଦ୍ରଲୋକେ ମହୀୟତେ ॥ ୬-୧୭ ॥
କ୍ଷୀରିକାୟାଃ ଫଲଂ ପକ୍ୱଂ ଯଃ ଶିବାୟ ନିବେଦୟେତ୍ ।
ବର୍ଷଲକ୍ଷଂ ମହାଭୋଗୈର୍ମୋଦତେ ସ ଶିବେ ପୁରେ ॥ ୬-୧୮ ॥
ବାଲୁକାତ୍ରପୁସାଦୀନି ଯଃ ଫଲାନି ନିବେଦୟେତ୍ ।
ଶିବାୟ ଗୁରବେ ବାପି ପକ୍ୱଂ ଚ କରମର୍ଦକମ୍ ॥ ୬-୧୯ ॥
ଦଶବର୍ଷସହସ୍ରାଣି ରୁଦ୍ରଲୋକେ ମହୀୟତେ ।
ବଦରାଣି ସୁପକ୍ୱାନି ତିନ୍ତିଡୀକଫଲାନି ଚ ॥ ୬-୨୦ ॥
ଦର୍ଶନୀୟାନି ପକ୍ୱାନି ହ୍ୟାମଲକ୍ୟାଃ ଫଲାନି ଚ ।
ଏବମାଦୀନି ଚାନ୍ୟାନି ଶାକମୂଲଫଲାନି ଚ ॥ ୬-୨୧ ॥
ନିବେଦୟତି ଶର୍ୱାୟ ଶୃଣୁ ଯତ୍ଫଲମାପ୍ନୁୟାତ୍ ।
ଏକୈକସ୍ମିନ୍ଫଲେ ଭୋଗାନ୍ପ୍ରାପ୍ନୁୟାଦନୁପୂର୍ୱଶଃ ॥ ୬-୨୨ ॥
ପଞ୍ଚବର୍ଷସହସ୍ରାଣି ରୁଦ୍ରଲୋକେ ମହୀୟତେ ।
ଗୋଧୂମଚନ୍ଦକାଦ୍ୟାନି ସୁକୃତଂ ସକ୍ତୁଭର୍ଜିତମ୍ ॥ ୬-୨୩ ॥
ନିବେଦୟୀତ ଶର୍ୱାୟ ତସ୍ୟ ପୁଣ୍ୟଫଲଂ ଶୃଣୁ ।
ଯାବତ୍ତଦ୍ବୀଜସଂଖ୍ୟାନଂ ଶୁଭଂ ଭ୍ରଷ୍ଟଂ ନିବେଦୟେତ୍ ॥ ୬-୨୪ ॥
ତାବଦ୍ୱର୍ଷସହସ୍ରାଣି ରୁଦ୍ରଲୋକେ ମହୀୟତେ ।
ଯଃ ପକ୍ୱାନୀକ୍ଷୁଦଣ୍ଡାନି ଶିବାୟ ବିନିବେଦୟେତ୍ ॥ ୬-୨୫ ॥
ଗୁରବେ ବାପି ତଦ୍ଭକ୍ତ୍ୟା ତସ୍ୟ ପୁଣ୍ୟଫଲଂ ଶୃଣୁ ।
ଇକ୍ଷୁପର୍ଣାନି ଚୈକୈକଂ ବର୍ଷଲୋକଂ ପ୍ରମୋଦତେ ॥ ୬-୨୬ ॥
ସାକଂ ଶିବପୁରେ ଭୋଗୈଃ ପୌଣ୍ଡ୍ରଂ ପଞ୍ଚଗୁଣଂ ଫଲମ୍ ।
ନିବେଦ୍ୟ ପରମେଶାୟ ଶୁକ୍ତିମାତ୍ରରସସ୍ୟ ତୁ ॥ ୬-୨୭ ॥
ବର୍ଷକୋଟିଂ ମହାଭୋଗୈଃ ଶିବଲୋକେ ମହୀୟତେ ।
ନିବେଦ୍ୟ ଫାଣିତଂ ଶୁଦ୍ଧଂ ଶିବାୟ ଗୁରବେ ଽପି ବା ॥ ୬-୨୮ ॥
ରସାତ୍ସହସ୍ରଗୁଣିତଂ ଫଲଂ ପ୍ରାପ୍ନୋତି ମାନବଃ ।
ଗୁଡସ୍ୟ ଫଲମେକଂ ଯଃ ଶିବାୟ ବିନିବେଦୟେତ୍ ॥ ୬-୨୯ ॥
ଅମ୍ବକୋଟିଂ ଶିବେ ଲୋକେ ମହାଭୋଗୈଃ ପ୍ରମୋଦତେ ।
ଖଣ୍ଡସ୍ୟ ପଲନୈବେଦ୍ୟଂ ଗୁଡାଚ୍ଛତଗୁଣଂ ଫଲମ୍ ॥ ୬-୩୦ ॥
ଖଣ୍ଡାତ୍ସହସ୍ରଗୁଣିତଂ ଶର୍କରାୟା ନିବେଦନେ ।
ମତ୍ସଣ୍ଡିକାଂ ମହାଶୁଦ୍ଧାଂ ଶଂକରାୟ ନିବେଦୟେତ୍ ॥ ୬-୩୧ ॥
କଲ୍ପକୋଟିଂ ନରଃ ସାଗ୍ରଂ ଶିବଲୋକେ ମହୀୟତେ ।
ପରିଶୁଦ୍ଧଂ ଭୃଷ୍ଟମାଜ୍ୟଂ ସିଦ୍ଧଂ ଚୈବ ସୁସଂସ୍କୃତମ୍ ॥ ୬-୩୨ ॥
ମାସଂ ନିବେଦ୍ୟ ଶର୍ୱାୟ ଶୃଣୁ ଯତ୍ଫଲମାପ୍ନୁୟାତ୍ ।
ଅଶେଷଫଲଦାନେନ ଯତ୍ପୁଣ୍ୟଂ ପରିକୀର୍ତିତମ୍ ॥ ୬-୩୩ ॥
ତତ୍ପୁଣ୍ୟଂ ପ୍ରାପ୍ନୁୟାତ୍ସର୍ୱଂ ମହାଦାନନିବେଦନେ ।
ପନସାନି ଚ ଦିବ୍ୟାନି ସ୍ୱାଦୂନି ସୁରଭୀଣି ଚ ॥ ୬-୩୪ ॥
ନିବେଦୟେତ୍ତୁ ଶର୍ୱାୟ ତସ୍ୟ ପୁଣ୍ୟଫଲଂ ଶୃଣୁ ।
କଲ୍ପକୋଟିଂ ନରଃ ସାଗ୍ରଂ ଶିବଲୋକେ ବ୍ୟବସ୍ଥିତଃ ॥ ୬-୩୫ ॥
ପିବନ୍ଶିବାମୃତଂ ଦିବ୍ୟଂ ମହାଭୋଗୈଃ ପ୍ରମୋଦତେ ।
ଦିନେ ଦିନେ ଚ ଯସ୍ତ୍ୱାପଂ ବସ୍ତ୍ରପୂତଂ ସମାଚରେତ୍ ॥ ୬-୩୬ ॥
ସୁଖାୟ ଶିବଭକ୍ତେଭ୍ୟସ୍ତସ୍ୟ ପୁଣ୍ୟଫଲଂ ଶୃଣୁ ।
ମହାସରାଂସି ଯଃ କୁର୍ୟାଦ୍ଭବେତ୍ପୁଣ୍ୟଂ ଶିବାଗ୍ରତଃ ॥ ୬-୩୭ ॥
ତତ୍ପୁଣ୍ୟଂ ସକଲଂ ପ୍ରାପ୍ୟ ଶିବଲୋକେ ମହୀୟତେ ।
ଯଦିଷ୍ଟମାତ୍ମନଃ କିଂଚିଦନ୍ନପାନଫଲାଦିକମ୍ ॥ ୬-୩୮ ॥
ତତ୍ତଚ୍ଛିବାୟ ଦେୟଂ ସ୍ୟାଦୁତ୍ତମଂ ଭୋଗମିଚ୍ଛତା ।
ନ ଶିବଃ ପରିପୂର୍ଣତ୍ୱାତ୍କିଂଚିଦଶ୍ନାତି କସ୍ୟଚିତ୍ ॥ ୬-୩୯ ॥
କିନ୍ତ୍ୱୀଶ୍ୱରନିଭଂ କୃତ୍ୱା ସର୍ୱମାତ୍ମନି ଦୀୟତେ ।
ନ ରୋହତି ଯଥା ବୀଜଂ ସ୍ୱସ୍ଥମାଶ୍ରୟବର୍ଜିତମ୍ ॥ ୬-୪୦ ॥
ପୁଣ୍ୟବୀଜଂ ତଥା ସୂକ୍ଷ୍ମଂ ନିଷ୍ଫଲଂ ସ୍ୟାନ୍ନିରାଶ୍ରୟମ୍ ।
ସୁକ୍ଷେତ୍ରେଷୁ ଯଥା ବୀଜମୁପ୍ତଂ ଭବତି ସତ୍ଫଲମ୍ ॥ ୬-୪୧ ॥
ଅଲ୍ପମପ୍ୟକ୍ଷୟଂ ତଦ୍ୱତ୍ପୁଣ୍ୟଂ ଶିବସମାଶ୍ରୟାତ୍ ।
ତସ୍ମାଦୀଶ୍ୱରମୁଦ୍ଦିଶ୍ୟ ଯଦ୍ୟଦାତ୍ମନି ରୋଚତେ ॥ ୬-୪୨ ॥
ତତ୍ତଦୀଶ୍ୱରଭକ୍ତେଭ୍ୟଃ ପ୍ରଦାତବ୍ୟଂ ଫଲାର୍ଥିନା ।
ଯଃ ଶିବାୟ ଗୁରୋର୍ୱାପି ରଚୟେନ୍ମଣିଭୂମିକମ୍ ॥ ୬-୪୩ ॥
ନୈବେଦ୍ୟ ଭୋଜନାର୍ଥଂ ଯଃ ପତ୍ତ୍ରୈଃ ପୁଷ୍ପୈଶ୍ଚ ଶୋଭନମ୍ ।
ଯାବତ୍ତତ୍ପତ୍ତ୍ରପୁଷ୍ପାଣାଂ ପରିସଂଖ୍ୟା ବିଧୀୟତେ ॥ ୬-୪୪ ॥
ତାବଦ୍ୱର୍ଷସହସ୍ରାଣି ସୁରଲୋକେ ମହୀୟତେ ।
ପଲାଶକଦଲୀପଦ୍ମ- ପତ୍ତ୍ରାଣି ଚ ବିଶେଷତଃ ॥ ୬-୪୫ ॥
ଦତ୍ତ୍ୱା ଶିବାୟ ଗୁରବେ ଶୃଣୁ ଯତ୍ଫଲମାପ୍ନୁୟାତ୍ ।
ଯାବତ୍ତତ୍ପତ୍ତ୍ରସଂଖ୍ୟାନମୀଶ୍ୱରାୟ ନିବେଦିତମ୍ ॥ ୬-୪୬ ॥
ତାବଦବ୍ଦାୟୁତାନାଂ ସ ଲୋକେ ଭୋଗାନବାପ୍ନୁୟାତ୍ ।
ଯାବତ୍ତାମ୍ବୁଲପତ୍ତ୍ରାଣି ପୂଗାଂଶ୍ଚ ବିନିବେଦୟେତ୍ ॥ ୬-୪୭ ॥
ତାବନ୍ତି ବର୍ଷଲକ୍ଷାଣି ଶିବଲୋକେ ମହୀୟତେ ।
ଯଚ୍ଛୁଦ୍ଧଂ ଶଙ୍ଖଚୂର୍ଣଂ ବା ଗୁରବେ ବିନିବେଦୟେତ୍ ॥ ୬-୪୮ ॥
ତାମ୍ବୂଲୟୋଗସିଦ୍ଧ୍ୟର୍ଥଂ ତସ୍ୟ ପୁଣ୍ୟଫଲଂ ଶୃଣୁ ।
ଯାବତ୍ତାମ୍ବୂଲପତ୍ତ୍ରାଣି ଚୂର୍ଣମାନେନ ଭକ୍ଷୟେତ୍ ॥ ୬-୪୯ ॥
ତାବଦ୍ୱର୍ଷସହସ୍ରାଣି ରୁଦ୍ରଲୋକେ ମହୀୟତେ ।
ଜାତୀଫଲଂ ସକଙ୍କୋଲଂ ଲତାକସ୍ତୂରିକୋତ୍ପଲମ୍ ॥ ୬-୫୦ ॥
ଇତ୍ୟେତାନି ସୁଗନ୍ଧୀନି ଫଲାନି ବିନିବେଦୟେତ୍ ।
ଫଲେ ଫଲେ ମହାଭୋଗୈର୍ୱର୍ଷଲକ୍ଷଂ ତୁ ଯତ୍ନତଃ ॥ ୬-୫୧ ॥
କାମିକେନ ବିମାନେନ କ୍ରୀଡତେ ସ ଶିବେ ପୁରେ ।
ତ୍ରୁଟିମାତ୍ରପ୍ରମାଣେନ କର୍ପୂରସ୍ୟ ଶିବେ ଗୁରୌ ॥ ୬-୫୨ ॥
ବର୍ଷକୋଟିଂ ମହାଭୋଗୈଃ ଶିବଲୋକେ ମହୀୟତେ ।
ପୂଗତାମ୍ବୂଲପତ୍ତ୍ରାଣାମାଧାରଂ ଯୋ ନିବେଦୟେତ୍ ॥ ୬-୫୩ ॥
ବର୍ଷକୋଟ୍ୟଷ୍ଟକଂ ଭୋଗୈଃ ଶିବଲୋକେ ମହୀୟତେ ।
ଯଶ୍ଚୂଏଣାଧାରସତ୍ପାତ୍ରଂ କସ୍ୟାପି ବିନିବେଦୟେତ୍ ॥ ୬-୫୪ ॥
ମୋଦତେ ସ ଶିବେ ଲୋକେ ବର୍ଷକୋଟୀଶ୍ଚତୁର୍ଦଶ ।
ମୃତ୍କାଷ୍ଠବଂଶଖଣ୍ଡାନି ଯଃ ପ୍ରଦଦ୍ୟାଚ୍ଛିବାଶ୍ରମେ ॥ ୬-୫୫ ॥
ପ୍ରାପ୍ନୁୟାଦ୍ୱିପୁଲାନ୍ଭୋଗାନ୍ଦିବ୍ୟାଞ୍ଛିବପୁରେ ନରଃ ।
ମାଣିକ୍ୟଂ କଲଶଂ ପାତ୍ରୀଂ ସ୍ଥାଲ୍ୟାଦୀନ୍ଭାଣ୍ଡସମ୍ପୁଟାନ୍ ॥ ୬-୫୬ ॥
ଦତ୍ତ୍ୱା ଶିବାଗ୍ରଜସ୍ତେଭ୍ୟଃ ଶିବଲୋକେ ମହୀୟତେ ।
ତୋୟାଧାରପିଧାନାନି ମୃଦ୍ୱସ୍ତ୍ରତରୁଜାନି ବା ॥ ୬-୫୭ ॥
ବଂଶାଲାବୁସମୁତ୍ଥାନି ଦତ୍ତ୍ୱାପ୍ନୋତି ଶିବଂ ପୁରମ୍ ।
ପଞ୍ଚସଂମାର୍ଜନୀତୋୟଂ ଗୋମୟାଞ୍ଜନକର୍ପଟାନ୍ ॥ ୬-୫୮ ॥
ମୃତ୍କୁମ୍ଭପୀଟିକାଂ ଦଦ୍ୟାଦ୍ଭୋଗାଞ୍ଛିବପୁରେ ଲଭେତ୍ ।
ଯଃ ପୁଷ୍ପଧୂପଗନ୍ଧାନାଂ ଦଧିକ୍ଷୀରଘୃତାମ୍ଭସାମ୍ ॥ ୬-୫୯ ॥
ଦଦ୍ୟାଦାଧାରପାତ୍ରାଣି ଶିବଲୋକେ ସ ଗଚ୍ଛତି ।
ବଂଶତାଲାଦିସଂଭୂତଂ ପୁଷ୍ପାଧାରକରଣ୍ଡକମ୍ ॥ ୬-୬୦ ॥
ଇତ୍ୟେବମାଦ୍ୟାନ୍ୟୋ ଦଦ୍ୟାଚ୍ଛିବଲୋକମବାପ୍ନୁୟାତ୍ ।
ଯଃ ସ୍ରୁକ୍ସ୍ରୁବାଦିପାତ୍ରାଣି ହୋମାର୍ଥଂ ବିନିବେଦୟେତ୍ ॥ ୬-୬୧ ॥
ବର୍ଷକୋଟିଂ ମହାଭାଗୈଃ ଶିବଲୋକେ ମହୀୟତେ ।
ଯଃ ସର୍ୱଧାତୁସଂୟୁକ୍ତଂ ଦଦ୍ୟାଲ୍ଲବଣପର୍ୱତମ୍ ॥ ୬-୬୨ ॥
ଶିବାୟ ଗୁରବେ ବାପି ତସ୍ୟ ପୁଣ୍ୟଫଲଂ ଶୃଣୁ ।
କଲ୍ପକୋଟିସହସ୍ରାଣି କଲ୍ପକୋଟିଶତାନି ଚ ॥ ୬-୬୩ ॥
ସ ଗୋତ୍ରଭୃତ୍ୟସଂୟୁକ୍ତୋ ବସେଚ୍ଛିବପୁରେ ନରଃ ।
ବିମାନୟାନୈଃ ଶ୍ରୀମଦ୍ଭିଃ ସର୍ୱକାମସମନ୍ୱିତୈଃ ॥ ୬-୬୪ ॥
ଭୋଗାନ୍ଭୁକ୍ତ୍ୱା ତୁ ବିପୁଲାଂସ୍ତଦନ୍ତେ ସ ମହୀପତିଃ ।
ମନଃଶିଲାଂ ହରୀତାଲଂ ରାଜପଟ୍ଟଂ ଚ ହିଙ୍ଗୁଲମ୍ ॥ ୬-୬୫ ॥
ଗୈରିକଂ ମଣିଦନ୍ତଂ ଚ ହେମତୋୟଂ ତଥାଷ୍ଟମମ୍ ।
ଯଶ୍ଚ ତଂ ପର୍ୱତବରଂ ଶାଲିତଣ୍ଡୁଲକଲ୍ପିତମ୍ ॥ ୬-୬୬ ॥
ଶିବାୟଗୁରବେ ବାପି ତସ୍ୟ ପୁଣ୍ୟଫଲଂ ଶୃଣୁ ।
କଲ୍ପକୋଟିଶତଂ ସାଗ୍ରଂ ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୬-୬୭ ॥
ଯଃ ସର୍ୱଧାନ୍ୟଶିଖରୈରୁପେତଂ ଯବପର୍ୱତମ୍ ।
ଘୃତତୈଲନଦୀୟୁକ୍ତଂ ତସ୍ୟ ପୁଣ୍ୟଫଲଂ ଶୃଣୁ ॥ ୬-୬୮ ॥
କଲ୍ପକୋଟିଶତଂ ସାଗ୍ରଂ ଭୋଗାନ୍ଭୁଙ୍କ୍ତେ ଶିବେ ପୁରେ ।
ସମସ୍ତକୁଲଜୈଃ ସାର୍ଧଂ ତସ୍ୟାନ୍ତେ ସ ମହୀପତିଃ ॥ ୬-୬୯ ॥
ତିଲଧେନୁଂ ପ୍ରଦଦ୍ୟାଦ୍ୟଃ କୃତ୍ୱା କୃଷ୍ଣାଜିନେ ନରଃ ।
କପିଲାୟାଃ ପ୍ରଦାନସ୍ୟ ଯତ୍ଫଲଂ ତଦବାପ୍ନୁୟାତ୍ ॥ ୬-୭୦ ॥
ଘୃତଧେନୁଂ ନରଃ କୃତ୍ୱା କାଂସ୍ୟପାତ୍ରେ ସକାଞ୍ଚନାନ୍ ।
ନିବେଦ୍ୟ ଗୋପ୍ରଦାନସ୍ୟ ସମଗ୍ରଂ ଫଲମାପ୍ନୁୟାତ୍ ॥ ୬-୭୧ ॥
ଦ୍ୱୀପିଚର୍ମଣି ଯଃ ସ୍ଥାପ୍ୟ ପ୍ରଦଦ୍ୟାଲ୍ଲବଣାଢକମ୍ ।
ଅଶେଷରସଦାନସ୍ୟ ଯତ୍ପୁଣ୍ୟଂ ତଦବାପ୍ନୁୟାତ୍ ॥ ୬-୭୨ ॥
ମରିଚାଢେନ କୁର୍ୱୀତ(?) ମାରୀଚଂ ନାମ ପର୍ୱତମ୍ ।
ଦଦ୍ୟାଦ୍ୟଜ୍ଜୀରକଂ ପୂର୍ୱମାଗ୍ନେୟଂ ହିଙ୍ଗୁମୁତ୍ତମମ୍ ॥ ୬-୭୩ ॥
ଦକ୍ଷିଣେ ଗୁଡଶୁଣ୍ଠୀଂ ଚ ନୈରୃତେ ନାଗକେସରମ୍ ।
ପିପ୍ପଲୀଂ ପଶ୍ଚିମେ ଦଦ୍ୟାଦ୍ୱାୟବ୍ୟେ କୃଷ୍ଣଜୀରକମ୍ ॥ ୬-୭୪ ॥
କୌବେର୍ୟାମଜମୋଦଂ ଚ ତ୍ୱଗେଲାଶ୍ଚେଶଦୈବତେ ।
କୁସ୍ତୁମ୍ବର୍ୟାଃ ପ୍ରଦେୟାଃ ସ୍ୟୁର୍ବହିଃ ପ୍ରାକାରତଃ ସ୍ଥିତାଃ ॥ ୬-୭୫ ॥
କକୁଭାମନ୍ତରାଲେଷୁ ସମନ୍ତାତ୍ସୈନ୍ଧବଂ ନ୍ୟସେତ୍ ।
ସପୁଷ୍ପାକ୍ଷତତୋୟେନ ଶିବାୟ ବିନିବେଦୟେତ୍ ॥ ୬-୭୬ ॥
ଯାବତ୍ତଦ୍ଦୀପସଂଖ୍ୟାନଂ ସର୍ୱମେକତ୍ର ପର୍ୱତେ ।
ତାବଦ୍ୱର୍ଷଶତାଦୂର୍ଧ୍ୱଂ ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୬-୭୭ ॥
କୂଶ୍ମାଣ୍ଡଂ ମଧ୍ୟତଃ ସ୍ଥାପ୍ୟ କାଲିଙ୍ଗଂ ପୂର୍ୱତୋ ନ୍ୟସେତ୍ ।
ଦକ୍ଷିଣେ କ୍ଷୀରତୁମ୍ବୀଂ ତୁ ବୃନ୍ତାକଂ ପଶ୍ଚିମେ ନ୍ୟସେତ୍ ॥ ୬-୭୮ ॥
ପଟୀସାନ୍ୟୁତ୍ତରେ ସ୍ଥାପ୍ୟ କର୍କଟୀମୀଶଦୈବତେ ।
ନ୍ୟସେଦ୍ଗଜପଟୋଲାଂଶ୍ଚ ମଧୁରାନ୍ୱହ୍ନିଦୈବତେ ॥ ୬-୭୯ ॥
କାରବେଲ୍ଲାଂଶ୍ଚ ନୈରୃତ୍ୟାଂ ବାୟବ୍ୟାଂ ନିମ୍ବକଂ ଫଲମ୍ ।
ଉଚ୍ଚାବଚାନି ଚାନ୍ୟାନି ଫଲାନି ସ୍ଥାପୟେଦ୍ବହିଃ ॥ ୬-୮୦ ॥
ଅଭ୍ୟର୍ଚ୍ୟ ପୁଷ୍ପଧୂପୈଶ୍ଚ ସମନ୍ତାତ୍ଫଲପର୍ୱତମ୍ ।
ଶିବାୟ ଗୁରବେ ବାପି ପ୍ରଣିପତ୍ୟ ନିବେଦୟେତ୍ ॥ ୬-୮୧ ॥
ଯାବତ୍ତତ୍ଫଲସଂଖ୍ୟାନଂ ତଦ୍ଦୀପାନାଂ ଚ ମଧ୍ୟତଃ ।
ତାବଦ୍ୱର୍ଷସହସ୍ରାଣି ରୁଦ୍ରଲୋକେ ମହୀୟତେ ॥ ୬-୮୨ ॥
ମୂଲକଂ ମଧ୍ୟତଃ ସ୍ଥାପ୍ୟ ତତ୍ପୂର୍ୱେ ବାଲମୂଲକମ୍ ।
ଆଗ୍ନେୟ୍ୟାଂ ବାସ୍ତୁକଂ ସ୍ଥାପ୍ୟ ଯାମ୍ୟାୟାଂ କ୍ଷାରବାସ୍ତୁକମ୍ ॥ ୬-୮୩ ॥
ପାଲକ୍ୟଂ ନୈରୃତେ ସ୍ଥାପ୍ୟ ସୁମୁଖଂ ପଶ୍ଚିମେ ନ୍ୟସେତ୍ ।
କୁହଦ୍ରକଂ ଚ ବାୟବ୍ୟାମୁତ୍ତରେ ବାପି ତାଲିକୀମ୍ ॥ ୬-୮୪ ॥
କୁସୁମ୍ଭଶାକମୈଶାନ୍ୟାଂ ସର୍ୱଶାକାନି ତଦ୍ବହିଃ ।
ପୂର୍ୱକ୍ରମେଣ ବିନ୍ୟସ୍ୟ ଶିବାୟ ବିନିବେଦୟେତ୍ ॥ ୬-୮୫ ॥
ଯାବତ୍ତନ୍ମୂଲନାଲାନାଂ ପତ୍ତ୍ରସଂଖ୍ୟା ଚ କୀର୍ତିତା ।
ତାବଦ୍ୱର୍ଷସହସ୍ରାଣି ରୁଦ୍ରଲୋକେ ମହୀୟତେ ॥ ୬-୮୬ ॥
ଦତ୍ତ୍ୱା ଲଭେନ୍ମହାଭୋଗାନ୍ଗୁଗ୍ଗୁଲ୍ୱଦ୍ରେଃ ପଲଦ୍ୱୟମ୍ ।
ବର୍ଷକୋଟିଦ୍ୱୟଂ ସ୍ୱର୍ଗେ ଦ୍ୱିଗୁଣଂ ଗୁଡମିଶ୍ରିତୈଃ ॥ ୬-୮୭ ॥
ଗୁଡାର୍ଦ୍ରକଂ ସଲବଣମାମ୍ରମଞ୍ଜରିସଂୟୁତମ୍ ।
ନିବେଦ୍ୟ ଗୁରବେ ଭକ୍ତ୍ୟା ସୌଭାଗ୍ୟଂ ପରମଂ ଲଭେତ୍ ॥ ୬-୮୮ ॥
ହସ୍ତାରୋପ୍ୟେଣ ବା କୃତ୍ୱା ମହାରତ୍ନାନ୍ୱିତାଂ ମହୀମ୍ ।
ନିବେଦୟିତ୍ୱା ଶର୍ୱାୟ ଶିବତୁଲ୍ୟଃ ପ୍ରଜାୟତେ ॥ ୬-୮୯ ॥
ବଜ୍ରେନ୍ଦ୍ରନୀଲବୈଡୂର୍ୟ- ପଦ୍ମରାଗଂ ସମୌକ୍ତିକମ୍ ।
କୀଟପକ୍ଷଂ ସୁବର୍ଣଂ ଚ ମହାରତ୍ନାନି ସପ୍ତ ବୈ ॥ ୬-୯୦ ॥
ଯଶ୍ଚ ସିଂହାସନଂ ଦଦ୍ୟାନ୍ମହାରତ୍ନାନ୍ୱିତଂ ନୃପଃ ।
କ୍ଷୁଦ୍ରରତ୍ନୈଶ୍ଚ ବିବିଧୈସ୍ତସ୍ୟ ପୁଣ୍ୟଫଲଂ ଶୃଣୁ ॥ ୬-୯୧ ॥
କୁଲତ୍ରିଂଶକସଂୟୁକ୍ତଃ ସାନ୍ତଃପୁରପରିଚ୍ଛଦଃ ।
ସମସ୍ତଭୃତ୍ୟସଂୟୁକ୍ତଃ ଶିବଲୋକେ ମହୀୟତେ ॥ ୬-୯୨ ॥
ତତ୍ର ଭୁକ୍ତ୍ୱା ମହାଭୋଗାନ୍ଶିବତୁଲ୍ୟପରାକ୍ରମଃ ।
ଆମହାପ୍ରଲୟଂ ଯାବତ୍ତଦନ୍ତେ ମୁକ୍ତିମାପ୍ନୁୟାତ୍ ॥ ୬-୯୩ ॥
ଯଦି ଚେଦ୍ରାଜ୍ୟମାକଙ୍କ୍ଷେତ୍ତତଃ ସର୍ୱସମାହିତଃ ।
ସପ୍ତଦ୍ୱୀପସମୁଦ୍ରାୟାଃ କ୍ଷିତେରଧିପତିର୍ଭବେତ୍ ॥ ୬-୯୪ ॥
ଜନ୍ମକୋଟିସହସ୍ରାଣି ଜନ୍ମକୋଟିଶତାନି ଚ ।
ରାଜ୍ୟଂ କୃତ୍ୱା ତତଶ୍ଚାନ୍ତେ ପୁନଃ ଶିବପୁରଂ ବ୍ରଜେତ୍ ॥ ୬-୯୫ ॥
ଏତଦେବ ଫଲଂ ଜ୍ଞେୟଂ ମକୁଟାଭରଣାଦିଷୁ ।
ରତ୍ନାସନପ୍ରଦାନେନ ପାଦୁକେ ବିନିବେଦୟେତ୍ ॥ ୬-୯୬ ॥
ଦଦ୍ୟାଦ୍ୟଃ କେବଲଂ ବଜ୍ରଂ ଶୁଦ୍ଧଂ ଗୋଧୂମମାତ୍ରକମ୍ ।
ଶିବାୟ ସ ଶିବେ ଲୋକେ ତିଷ୍ଠେଦାପ୍ରଲୟଂ ସୁଖୀ ॥ ୬-୯୭ ॥
ଇନ୍ଦ୍ରନୀଲପ୍ରଦାନେନ ସ ବୈଡୂର୍ୟପ୍ରଦାନତଃ ।
ମୋଦତେ ବିବିଧୈର୍ଭୋଗୈଃ କଲ୍ପକୋଟିଂ ଶିବେ ପୁରେ ॥ ୬-୯୮ ॥
ମସୂରମାତ୍ରମପି ଯଃ ପଦ୍ମରାଗଂ ସୁଶୋଭନମ୍ ।
ନିବେଦୟିତ୍ୱା ଶର୍ୱାୟ ମୋଦତେ କାଲମକ୍ଷୟମ୍ ॥ ୬-୯୯ ॥
ନିବେଦ୍ୟ ମୌକ୍ତିକଂ ସ୍ୱଚ୍ଛମେକଭାଗୈକମାତ୍ରକମ୍ ।
ଭୋଗୈଃ ଶିବପୁରେ ଦିବ୍ୟୈଃ କଲ୍ପକୋଟିଂ ପ୍ରମୋଦତେ ॥ ୬-୧୦୦ ॥
କୀଟପକ୍ଷଂ ମହାଶୁଦ୍ଧଂ ନିବେଦ୍ୟ ଯବମାତ୍ରକମ୍ ।
ଶିବାୟାଦ୍ୟଃ ଶିବେ ଲୋକେ ମୋଦତେ କାଲମକ୍ଷୟମ୍ ॥ ୬-୧୦୧ ॥
ହେମ୍ନା କୃତ୍ୱା ଚ ଯଃ ପୁଷ୍ପମପି ମାଷକମାତ୍ରକମ୍ ।
ନିବେଦୟିତ୍ୱା ଶର୍ୱାୟ ବର୍ଷକୋଟିଂ ବସେଦ୍ଦିବି ॥ ୬-୧୦୨ ॥
କ୍ଷୁଦ୍ରରତ୍ନାନି ଯୋ ଦଦ୍ୟାଦ୍ଧେମ୍ନି ବଦ୍ଧାନି ଶମ୍ଭବେ ।
ମୋଦତେ ସ ଶିବେ ଲୋକେ କଲ୍ପକୋଟ୍ୟଯୁତଂ ନରଃ ॥ ୬-୧୦୩ ॥
ଯଥା ଯଥା ମହାରତ୍ନଂ ଶୋଭନଂ ଚ ଯଥା ଯଥା ।
ତଥା ତଥା ମହତ୍ପୁଣ୍ୟଂ ଜ୍ଞେୟଂ ତଚ୍ଛିବଦାନତଃ ॥ ୬-୧୦୪ ॥
ଭୂମିଭାଗେ ସ(?)ବିସ୍ତୀଋଣେ ଜମ୍ବୂଦ୍ୱୀପଂ ପ୍ରକଲ୍ପୟେତ୍ ।
ଅଷ୍ଟାବରଣସଂୟୁକ୍ତଂ ନଗେନ୍ଦ୍ରାଷ୍ଟକଭୂଷିତମ୍ ॥ ୬-୧୦୫ ॥
ତନ୍ମଧ୍ୟେ କାରୟେଦ୍ଦିବ୍ୟଂ ମେରୁପ୍ରାସାଦମୁତ୍ତମମ୍ ।
ଅନେକଶିଖରାକୀର୍ଣମଶେଷାମରସଂୟୁତମ୍ ॥ ୬-୧୦୬ ॥
ବହିଃ ସୁବର୍ଣନିଚିତଂ ସର୍ୱରତ୍ନୋପଶୋଭିତମ୍ ।
ଚତୁଃପ୍ରଗ୍ରୀବକୋପେତଂ ଚକ୍ଷୁର୍ଲିଙ୍ଗସମାୟୁତମ୍ ॥ ୬-୧୦୭ ॥
ଚତୁର୍ଦିକ୍ଷୁ ବନୋପେତଂ ଚତୁର୍ଭିଃ ସଂୟୁତୈଃ ଶରୈଃ ।
ଚତୁର୍ଣାଂ ପୁରୟୁକ୍ତେନ ପ୍ରାକାରେଣ ଚ ସଂୟୁତମ୍ ॥ ୬-୧୦୮ ॥
ମେରୁପ୍ରାସାଦମିତ୍ୟେବଂ ହେମରତ୍ନବିଭୂଷିତମ୍ ।
ଯଃ କାରୟେଦ୍ୱନୋପେତଂ ସୋ ଽନନ୍ତଫଲମାପ୍ନୁୟାତ୍ ॥ ୬-୧୦୯ ॥
ଭୂମ୍ୟମ୍ଭଃପରମାଣୂନାଂ ଯଥା ସଂଖ୍ୟା ନ ବିଦ୍ୟତେ ।
ଶିବାୟତନପୁଣ୍ୟସ୍ୟ ତଥା ସଂଖ୍ୟା ନ ବିଦ୍ୟତେ ॥ ୬-୧୧୦ ॥
କୁଲତ୍ରିଂଶକସଂୟୁକ୍ତଃ ସର୍ୱଭୃତ୍ୟସମନ୍ୱିତଃ ।
କଲତ୍ରପୁତ୍ରମିତ୍ରୈଶ୍ଚ ସର୍ୱସ୍ୱଜନସଂୟୁତଃ ॥ ୬-୧୧୧ ॥
ଆଶ୍ର୍ତିତୋପାଶ୍ରିତୈଃ ସର୍ୱୈରଶେଷଗଣସଂୟୁତଃ ।
ଯଥା ଶିବସ୍ତଥୈବାୟଂ ଶର୍ୱଲୋକେ ସ ପୂଜ୍ୟତେ ॥ ୬-୧୧୨ ॥
ନ ଚ ମାନୁଷ୍ୟକଂ ଲୋକମାଗଚ୍ଛେତ୍କୃପଣଂ ପୁନଃ ।
ସର୍ୱଜ୍ଞଃ ପରିପୂର୍ଣଶ୍ଚ ମୁକ୍ତଃ ସ୍ୱାତ୍ମନି ତିଷ୍ଠତି ॥ ୬-୧୧୩ ॥
ଯଃ ଶିବାୟ ବନଂ କୃତ୍ୱା ମୁଦାବ୍ଦସଲିଲୋତ୍ଥିତମ୍(?) ।
ତଦ୍ଦଣ୍ଡକୋପଶୋଭଂ ଚ ହସ୍ତେ କୁର୍ୱୀତ ସର୍ୱଦା ॥ ୬-୧୧୪ ॥
ଶୋଭୟେଦ୍ଭୂତନାଥଂ ବା ଚନ୍ଦ୍ରଶାଲାଂ କ୍ୱଚିତ୍କ୍ୱଚିତ୍ ।
ବେଦୀଂ ବାଥାଭ୍ୟପଦ୍ୟନ୍ତ ପ୍ରୋନ୍ନତାଃ ସ୍ତମ୍ଭପଙ୍କ୍ତୟଃ ॥ ୬-୧୧୫ ॥
ଶାତକୁମ୍ଭମୟୀଂ ବାପି ସର୍ୱଲକ୍ଷଣସଂୟୁତାମ୍ ।
ଈଶ୍ୱରପ୍ରତିମାଂ ସୌମ୍ୟାଂ କାରୟେତ୍ପୁରୁଷୋଚ୍ଛ୍ରିତାମ୍ ॥ ୬-୧୧୬ ॥
ତ୍ରିଶୂଲସବ୍ୟହସ୍ତାଂ ଚ ବରଦାଭୟଦାୟିକାଂ ।
ସବ୍ୟହସ୍ତାକ୍ଷମାଲାଂ ଚ ଜଟାକୁସୁମଭୂଷିତାମ୍ ॥ ୬-୧୧୭ ॥
ପଦ୍ମସିଂହାସନାସୀନାଂ ବୃଷସ୍ଥାଂ ବା ସମୁଚ୍ଛ୍ରିତାମ୍ ।
ବିମାନସ୍ଥାଂ ରଥସ୍ଥାଂ ବା ବେଦିସ୍ଥାଂ ବା ପ୍ରଭାନ୍ୱିତାମ୍ ॥ ୬-୧୧୮ ॥
ସୌମ୍ୟବକ୍ତ୍ରାଂ କରାଲାଂ ବା ମହାଭୈରବରୂପିଣୀମ୍ ।
ଅତ୍ୟୁଚ୍ଛ୍ରିତାଂ ସୁବିସ୍ତୀର୍ଣାଂ ନୃତ୍ୟସ୍ଥାଂ ଯୋଗସଂସ୍ଥିତାମ୍ ॥ ୬-୧୧୯ ॥
କୁର୍ୟାଦସଂଭବେ ହେମ୍ନସ୍ତାରେଣ ବିମଲେନ ଚ ।
ଆରକୂଟମୟୀଂ ବାପି ତାମ୍ରମୃଚ୍ଛୈଲଦାରୁଜାମ୍ ॥ ୬-୧୨୦ ॥
ଅଶେଷକୈଃ ସରୂପୈଶ୍ଚ ବର୍ଣକୈର୍ୱା ପଟେ ଲିଖେତ୍ ।
କୁଡ୍ୟେ ବା ଫଲକେ ବାପି ଭକ୍ତ୍ୟା ବିତ୍ତାନୁସାରତଃ ॥ ୬-୧୨୧ ॥
ଏକାଂ ସପରିବାରାଂ ବା ପାର୍ୱତୀଂ ଗଣସଂୟୁତାମ୍ ।
ପ୍ରତୀହାରସମୋପେତାଂ(?) କୁର୍ୟାଦେବାବିକଲ୍ପତଃ ॥ ୬-୧୨୨ ॥
ପୀଠଂ ବା କାରୟେଦ୍ରୌପ୍ୟଂ ତାମ୍ରଂ ପିତ୍ତଲସଂଭବମ୍ ।
ଚତୁର୍ମୁଖୈକବକ୍ତ୍ରଂ ବା ବହିଃ କାଞ୍ଚନସଂସ୍କୃତମ୍ ॥ ୬-୧୨୩ ॥
ପୃଥକ୍ପୃଥଗନେକାନି କାରୟିତ୍ୱା ମୁଖାନି ତୁ ।
ସୌମ୍ୟଭୈରବରୂପାଣି ଶିବସ୍ୟ ବହୁରୂପିଣଃ ॥ ୬-୧୨୪ ॥
ନାନାଭରଣୟୁକ୍ତାନି ହେମରୌପ୍ୟକୃତାନି ଚ ।
ଶିବସ୍ୟ ରଥୟାତ୍ରାୟାଂ ତାନି ଲୋକସ୍ୟ ଦର୍ଶୟେତ୍ ॥ ୬-୧୨୫ ॥
ଉକ୍ତାନି ଯାନି ପୁଣ୍ୟାନି ସଂକ୍ଷେପେଣ ପୃଥକ୍ପୃଥକ୍ ।
କୃତ୍ୱୈକେନ ମମୈତେଷାମକ୍ଷୟଂ ଫଲମାପ୍ନୁୟାତ୍ ॥ ୬-୧୨୬ ॥
ମାତୁଃ ପିତୁଃ ସହୋପାୟୈର୍(?) ଦଶଭିର୍ଦଶଭିଃ କୁଲୈଃ ।
କଲତ୍ରପୁତ୍ରମିତ୍ରାଦ୍ୟୈର୍ଭୃତ୍ୟୈର୍ୟୁକ୍ତଃ ସ ବାନ୍ଧବୈଃ ॥ ୬-୧୨୭ ॥
ଅୟୁତେନ ବିମାନାନାଂ ସର୍ୱକାମୟୁତେନ ଚ ।
ଭୁଙ୍କ୍ତେ ସ୍ୱୟଂ ମହାଭୋଗାନନ୍ତେ ମୁକ୍ତିମବାପ୍ନୁୟାତ୍ ॥ ୬-୧୨୮ ॥
ମଣ୍ଡପସ୍ତମ୍ଭପର୍ୟନ୍ତେ କୀଲୟେଦ୍ଦର୍ପଣାନ୍ୱିତମ୍ ।
ଅଭିଷିଚ୍ୟ ଜନା ଯସ୍ମିନ୍ପୁଜାଂ କୁବନ୍ତି ବିଲ୍ୱକୈଃ ॥ ୬-୧୨୯ ॥
କାଲକାଲକୃତିଂ କୃତ୍ୱା କୀଲୟେଦ୍ୟଃ ଶିବାଶ୍ରମେ ।
ସର୍ୱଲୋକୋପକାରାୟ ପୂଜୟେଚ୍ଚ ଦିନେ ଦିନେ ॥ ୬-୧୩୦ ॥
ଧୂପବେଲାପ୍ରମାଣାର୍ଥଂ କଲ୍ପୟେଦ୍ୟଃ ଶିବାଶ୍ରମେ ।
କ୍ଷରନ୍ତୀଂ ପୂର୍ୟମାଣାଂ ବା ସଦାୟାମେ ଘଟୀଂ ନୃପଃ ॥ ୬-୧୩୧ ॥
ଏଷାମେକତମଂ ପୁଣ୍ୟଂ କୃତ୍ୱା ପାପବିବର୍ଜିତଃ ।
ଶିବଲୋକେ ନରଃ ପ୍ରାପ୍ୟ ସର୍ୱଜ୍ଞଃ ସ ସୁଖୀ ଭବେତ୍ ॥ ୬-୧୩୨ ॥
ରଥୟାତ୍ରାଂ ପ୍ରବକ୍ଷ୍ୟାମି ଶିବସ୍ୟ ପରମାତ୍ମନଃ ।
ସର୍ୱଲୋକହିତାର୍ଥାୟ ମହାଶିଲ୍ପିବିନିର୍ମିତାମ୍ ॥ ୬-୧୩୩ ॥
ରଥମଧ୍ୟେ ସମାବେଶ୍ୟ ଯଥା ଯଷ୍ଟିଂ ତୁ କୀଲୟେତ୍ ।
ଯଷ୍ଟେର୍ମଧ୍ୟେ ସ୍ଥିତଂ କାର୍ୟଂ ବିମାନମତିଶୋଭିତମ୍ ॥ ୬-୧୩୪ ॥
ପଞ୍ଚଭୌମଂ ତ୍ରିଭୌମଂ ବା ଦୃଢବଂଶପ୍ରକଲ୍ପିତମ୍ ।
କର୍ମଣା ସୁନିବଦ୍ଧଂ ଚ ରଜ୍ଜୁଭିଶ୍ଚ ସୁସଂୟୁତମ୍ ॥ ୬-୧୩୫ ॥
ପଞ୍ଚଶାଲାଣ୍ଡିକୈର୍ୟୁକ୍ତଂ ନାନାଭକ୍ତିସମନ୍ୱିତମ୍ ।
ଚିତ୍ରବର୍ଣପରିଚ୍ଛନ୍ନଂ ପଟୈର୍ୱା ବର୍ଣକାନ୍ୱିତୈଃ ॥ ୬-୧୩୬ ॥
ଲମ୍ବକୈଃ ସୂତ୍ରଦାମ୍ନା ଚ ଘଣ୍ଟାଚାମରଭୂଷିତମ୍ ।
ବୁଦ୍ବୁଦୈରର୍ଧଚନ୍ଦ୍ରୈଶ୍ଚ ଦର୍ପଣୈଶ୍ଚ ସମୁଜ୍ଜ୍ୱଲମ୍ ॥ ୬-୧୩୭ ॥
କଦଲ୍ୟର୍ଧଧ୍ୱଜୈର୍ୟୁକ୍ତଂ ମହାଚ୍ଛତ୍ତ୍ରଂ ମହାଧ୍ୱଜମ୍ ।
ପୁଷ୍ପମାଲାପରିକ୍ଷିପ୍ତଂ ସର୍ୱଶୋଭାସମନ୍ୱିତମ୍ ॥ ୬-୧୩୮ ॥
ମହାରଥବିମାନେ ଽସ୍ମିନ୍ସ୍ଥାପୟେଦ୍ଗଣସଂୟୁତମ୍ ।
ଈଶ୍ୱରପ୍ରତିମାଂ ହେମ୍ନି ପ୍ରଥମେ ପୁରମଣ୍ଡପେ ॥ ୬-୧୩୯ ॥
ମୁଖତ୍ରୟଂ ଚ ବଧ୍ନୀୟାଦ୍ବହିଃ କୁର୍ୟାତ୍ତଥାଶ୍ରିତମ୍ ।
ପୁରେ ପୁରେ ବହିର୍ଦିକ୍ଷୁ ଗୃହକେଷୁ ସମାଶ୍ରିତମ୍ ॥ ୬-୧୪୦ ॥
ଚତୁଷ୍କଂ ଶିବବକ୍ତ୍ରାଣାଂ ସଂସ୍ଥାପ୍ୟ ପ୍ରତିପୂଜୟେତ୍ ।
ଦିନତ୍ରୟଂ ପ୍ରକୁର୍ୱୀତ ସ୍ନାନମର୍ଚନଭୋଜନମ୍ ॥ ୬-୧୪୧ ॥
ନୃତ୍ୟକ୍ରୀଡାପ୍ରୟୋଗେଣ ଗେୟମଙ୍ଗଲପାଠକୈଃ ।
ମହାବାଦିତ୍ରନିର୍ଘୋଷୈଃ ପୌଷପୂର୍ଣିମପର୍ୱଣି ॥ ୬-୧୪୨ ॥
ଭ୍ରାମୟେଦ୍ରାଜମାର୍ଗେଣ ଚତୁର୍ଥେ ଽହନି ତଦ୍ରଥମ୍ ।
ତତଃ ସ୍ୱସ୍ଥାନମାନୀୟ ତଚ୍ଛେଷମପି ବର୍ଧୟେତ୍ ॥ ୬-୧୪୩ ॥
ଅବଧାର୍ୟ ଜଗଦ୍ଧାତ୍ରୀ ପ୍ରତିମାମବତାରୟେତ୍ ।
ମହାବିମାନୟାତ୍ରୈଷା କର୍ତବ୍ୟା ପଟ୍ଟକେ ଽପି ବା ॥ ୬-୧୪୪ ॥
ବଂଶୈର୍ନବୈଃ ସୁପକ୍ୱୈଶ୍ଚ କଟଂ କୁର୍ୟାଦ୍ଭରକ୍ଷମମ୍(?) ।
ବୃତ୍ତଂ ଦ୍ୱିଗୁଣଦୀର୍ଘଂ ଚ ଚତୁରଶ୍ରମଧଃ ସମମ୍ ॥ ୬-୧୪୫ ॥
ସର୍ୱତ୍ର ଚର୍ମଣା ବଦ୍ଧଂ ମହାୟଷ୍ଟିସମାଶ୍ରିତମ୍ ।
ମୁଖଂ ବଦ୍ଧଂ ଚ କୁର୍ୱୀତ ବଂଶମଣ୍ଡଲିନା ଦୃଢମ୍ ॥ ୬-୧୪୬ ॥
କଟେ ଽସ୍ମିଂସ୍ତାନି ବସ୍ତ୍ରାଣି ସ୍ଥାପ୍ୟ ବଧ୍ନୀତ ଯତ୍ନତଃ ।
ଉପର୍ୟୁପରି ସର୍ୱାଣି ତନ୍ମଧ୍ୟେ ପ୍ରତିମାଂ ନ୍ୟସେତ୍ ॥ ୬-୧୪୭ ॥
ବର୍ଣକୈଃ କୁଙ୍କୁମାଦ୍ୟୈଶ୍ଚ ଚିତ୍ରପୁଷ୍ପୈଶ୍ଚ ପୂଜୟେତ୍ ।
ନାନାଭରଣପୂଜାଭିର୍ମୁକ୍ତାହାରପ୍ରଲମ୍ବିଭିଃ ॥ ୬-୧୪୮ ॥
ରଥସ୍ୟ ମହତୋ ମଧ୍ୟେ ସ୍ଥାପ୍ୟ ପଟ୍ଟଦ୍ୱୟଂ ଦୃଢମ୍ ।
ଅଧରୋତ୍ତରଭାଗେନ ମଧ୍ୟେ ଛିଦ୍ରସମନ୍ୱିତମ୍ ॥ ୬-୧୪୯ ॥
କଟିୟଷ୍ଟେରଧୋଭାଗଂ ସ୍ଥାପ୍ୟ ଛିଦ୍ରମୟଂ ଶୁଭୈଃ ।
ଆବଦ୍ଧ୍ୟ କୀଲୟେଦ୍ୟତ୍ନାଦ୍ୟଷ୍ଟ୍ୟର୍ଧଂ ଚ ଧ୍ୱଜାଷ୍ଟକମ୍ ॥ ୬-୧୫୦ ॥
କଟସ୍ୟ ପୃଷ୍ଟଂ ସର୍ୱତ୍ର କାରୟେତ୍ପଟସଂବୃତମ୍ ।
ତତ୍ପଟେ ଚ ଲିଖେତ୍ସୋମଂ ସଗଣଂ ସବୃଷଂ ଶିବମ୍ ॥ ୬-୧୫୧ ॥
ବିଚିତ୍ରପୁଷ୍ପସ୍ରଗ୍ଦାମ୍ନା ସମନ୍ତାଦ୍ଭୂଷୟେତ୍କଟମ୍ ।
ରବକୈଃ କିଙ୍କିଣୀଜାଲୈର୍ଘଣ୍ଟାଚାମରଭୂଷିତୈଃ ॥ ୬-୧୫୨ ॥
ମହାପୂଜାବିଶେଷୈଶ୍ଚ କୌତୂହଲସମନ୍ୱିତମ୍ ।
ବାଦ୍ୟାରମ୍ଭୋପଚାରେଣ ମାର୍ଗଶୋଭାଂ ପ୍ରକଲ୍ପୟେତ୍ ॥ ୬-୧୫୩ ॥
ତଦ୍ରଥଂ ଭ୍ରାମୟେଦ୍ୟତ୍ନାଦ୍ରାଜମାର୍ଗେଣ ସର୍ୱତଃ ।
ତତଃ ସ୍ୱାଶ୍ରମମାନୀୟ ସ୍ଥାପୟେତ୍ତତ୍ସମୀପତଃ ॥ ୬-୧୫୪ ॥
ମହାଶବ୍ଦଂ ତତଃ କୁର୍ୟାତ୍ତାଲତ୍ରୟସମନ୍ୱିତମ୍ ।
ତତସ୍ତୁଷ୍ଣୀଂ ସ୍ଥିତେ ଲୋକେ ତଚ୍ଛାନ୍ତିମିହ ଧାରୟେତ୍ ॥ ୬-୧୫୫ ॥
ଶିବଂ ତୁ ସର୍ୱଜଗତଃ ଶିବଂ ଗୋବ୍ରାହ୍ମଣସ୍ୟ ଚ ।
ଶିବମସ୍ତୁ ନୃପାଣାଂ ଚ ତଦ୍ଭକ୍ତାନାଂ ଜନସ୍ୟ ଚ ॥ ୬-୧୫୬ ॥
ରାଜା ବିଜୟମାପ୍ନୋତି ପୁତ୍ରପୌତ୍ରୈଶ୍ଚ ବର୍ଧତାମ୍ ।
ଧର୍ମନିଷ୍ଠଶ୍ଚ ଭବତୁ ପ୍ରଜାନାଂ ଚ ହିତେ ରତଃ ॥ ୬-୧୫୭ ॥
କାଲବର୍ଷୀ ତୁ ପର୍ଜନ୍ୟଃ ସସ୍ୟସମ୍ପତ୍ତିରୁତ୍ତମା ।
ସୁଭିକ୍ଷାତ୍କ୍ଷେମମାପ୍ନୋତି କାର୍ୟସିଦ୍ଧିଶ୍ଚ ଜାୟତାମ୍ ॥ ୬-୧୫୮ ॥
ଦୋଷାଃ ପ୍ରୟାନ୍ତୁ ନାଶଂ ଚ ଗୁଣାଃ ସ୍ଥୈର୍ୟଂ ଭଜନ୍ତୁ ବଃ ।
ବହୁକ୍ଷୀରୟୁତା ଗାବୋ ହୃଷ୍ଟପୁଷ୍ଟା ଭବନ୍ତୁ ବଃ ॥ ୬-୧୫୯ ॥
ଏବଂ ଶିବମହାଶାନ୍ତିମୁଚ୍ଚାର୍ୟ ଜଗତଃ କ୍ରମାତ୍ ।
ଅଭିବର୍ଧ୍ୟ ତତଃ ଶେଷମୈଶ୍ୱରୀଂ ସାର୍ୱକାମିକୀମ୍ ॥ ୬-୧୬୦ ॥
ଶିବମାଲାଂ ସମାଦାୟ ସଦାସୀପରିଚାରିକଃ ।
ଫଲୈର୍ଭକ୍ଷୈଶ୍ଚ ସଂୟୁକ୍ତାଂ ଗୃହ୍ୟ ପାତ୍ରୀଂ ନିବେଶୟେତ୍ ॥ ୬-୧୬୧ ॥
ପାତ୍ରୀଂ ଚ ଧାରୟେନ୍ମୂର୍ଧ୍ନା ସୋଷ୍ଣୀଷାଂ ଦେବପୁତ୍ରକଃ ।
ଅଲଂକୃତଃ ଶୁକ୍ଲବାସା ଧାର୍ମିକଃ ସତତଂ ଶୁଚିଃ ॥ ୬-୧୬୨ ॥
ତତଶ୍ଚ ତାଂ ସମୁତ୍କ୍ଷିପ୍ୟ ପାଣିନା ଧାରୟେଦ୍ବୁଧଃ ।
ପ୍ରବ୍ରୂୟାଦପରଶ୍ଚାତ୍ର ଶିବଧର୍ମସ୍ୟ ଭାଜକଃ ॥ ୬-୧୬୩ ॥
ତୋୟଂ ଯଥା ଘଟୀସଂସ୍ଥମଜସ୍ରଂ କ୍ଷରତେ ତଥା ।
କ୍ଷରତେ ସର୍ୱଲୋକାନାଂ ତଦ୍ୱଦାୟୁରହର୍ନିଶମ୍ ॥ ୬-୧୬୪ ॥
ଯଦା ସର୍ୱଂ ପରିତ୍ୟଜ୍ୟ ଗନ୍ତବ୍ୟମବଶୈର୍ଧ୍ରୁବମ୍ ।
ତଦା ନ ଦୀୟତେ କସ୍ମାତ୍ପାଥେୟାର୍ଥମିଦଂ ଧନମ୍ ॥ ୬-୧୬୫ ॥
କଲତ୍ରପୁତ୍ରମିତ୍ରାଣି ପିତା ମାତା ଚ ବାନ୍ଧବାଃ ।
ତିଷ୍ଠନ୍ତି ନ ମୃତସ୍ୟାର୍ଥେ ପରଲୋକେ ଧନାନି ଚ ॥ ୬-୧୬୬ ॥
ନାସ୍ତି ଧର୍ମସମଂ ମିତ୍ରଂ ନାସ୍ତି ଧର୍ମସମଃ ସଖା ।
ଯତଃ ସର୍ୱୈଃ ପରିତ୍ୟକ୍ତଂ ନରଂ ଧର୍ମୋ ଽନୁଗଚ୍ଛତି ॥ ୬-୧୬୭ ॥
ତସ୍ମାଦ୍ଧର୍ମଂ ସମୁଦ୍ଦିଶ୍ୟ ଯଃ ଶେଷାମଭିବର୍ଧୟେତ୍ ।
ସମସ୍ତପାପନିର୍ମୁକ୍ତଃ ଶିବଲୋକଂ ସ ଗଚ୍ଛତି ॥ ୬-୧୬୮ ॥
ଉପର୍ୟୁପରି ବିତ୍ତେନ ଯଃ ଶେଷାମଭିବର୍ଧୟେତ୍ ।
ତସ୍ୟେୟମୁତ୍ତମା ଦେୟା ଯତଶ୍ଚାନ୍ୟା ନ ବର୍ଧତେ ॥ ୬-୧୬୯ ॥
ଇତ୍ୟେବଂ ମଧ୍ୟମାଂ ଶେଷାଂ ବର୍ଧୟେଦ୍ୱା କନୀୟସୀମ୍ ।
ତତସ୍ତେଷାଂ ପ୍ରଦାତବ୍ୟା ସର୍ୱଶୋକସ୍ୟ ଶାନ୍ତୟେ ॥ ୬-୧୭୦ ॥
ଯେନୋତ୍ତମା ଗୃହୀତା ସ୍ୟାଚ୍ଶିବଶେଷା ମହୀୟସୀ ।
ପ୍ରାପଣୀୟା ଗୃହଂ ତସ୍ୟ ତଥୈବ ଶିରସା ବୃତା ॥ ୬-୧୭୧ ॥
ଧ୍ୱଜଚ୍ଛତ୍ତ୍ରବିମାନାଦ୍ୟୈର୍ମହାବାଦିତ୍ରନିଃସ୍ୱନୈଃ ।
ଗୃହଦ୍ୱାରଂ ତତଃ ପ୍ରାପ୍ତମର୍ଚୟିତ୍ୱା ନିବେଶୟେତ୍ ॥ ୬-୧୭୨ ॥
ଦଦ୍ୟାଦ୍ଗୋତ୍ରକଲତ୍ରାଣାଂ ଭୃତ୍ୟାନାଂ ସ୍ୱଜନସ୍ୟ ଚ ।
ତର୍ପୟେଚ୍ଚାନତାନ୍(?) ଭକ୍ତ୍ୟା ବାଦିତ୍ରଧ୍ୱଜବାହକାନ୍ ॥ ୬-୧୭୩ ॥
ଏବମାଦୀୟତେ ଭକ୍ତ୍ୟା ଯଃ ଶିବସ୍ୟୋତ୍ତମା ଗୃହେ ।
ଶୋଭୟା ରାଜମାର୍ଗେଣ ତସ୍ୟ ଧର୍ମଫଲଂ ଶୃଣୁ ॥ ୬-୧୭୪ ॥
ସମସ୍ତପାପନିର୍ମୁକ୍ତଃ ସମସ୍ତକୁଲସଂୟୁତଃ ।
ଶିବଲୋକମବାପ୍ନୋତି ସଭୃତ୍ୟପରିଚାରକଃ ॥ ୬-୧୭୫ ॥
ତତ୍ର ଦିବ୍ୟୈର୍ମହାଭୋଗୈର୍ୱିମାନୈଃ ସାର୍ୱକାମିକୈଃ ।
କଲ୍ପାନାଂ କ୍ରୀଡତେ କୋଟିମନ୍ତେ ନିର୍ୱାଣମାପ୍ନୁୟାତ୍ ॥ ୬-୧୭୬ ॥
ରଥସ୍ୟ ଯାତ୍ରାଂ ଯଃ କୁର୍ୟାଦିତ୍ୟେବମୁପଶୋଭୟା ।
ଭକ୍ଷଭୋଜ୍ୟପ୍ରଦାନୈଶ୍ଚ ତତ୍ଫଲଂ ଶୃନୁ ଯତ୍ନତଃ ॥ ୬-୧୭୭ ॥
ଅଶେଷପାପନିର୍ମୁକ୍ତଃ ସର୍ୱଭୃତ୍ୟସମନ୍ୱିତଃ ।
କୁଲତ୍ରିଂଶକମୁଦ୍ଧୃତ୍ୟ ସୁହୃଦ୍ଭିଃ ସ୍ୱଜନୈଃ ସହ ॥ ୬-୧୭୮ ॥
ସର୍ୱକାମୟୁତୈର୍ଦିବ୍ୟୈଃ ସ୍ୱଚ୍ଛନ୍ଦଗମନାଲୟୈଃ ।
ମହାବିମାନୈଃ ଶ୍ରୀମଦ୍ଭିର୍ଦିବ୍ୟସ୍ତ୍ରୀପରିବାରିତଃ ॥ ୬-୧୭୯ ॥
ଇଚ୍ଛୟା କ୍ରୀଡତେ ଭୋଗୈଃ କଲ୍ପକୋଟିଂ ଶିବେ ପୁରେ ।
ଜ୍ଞାନୟୋଗଂ ତତଃ ପ୍ରାପ୍ୟ ସଂସାରାଦବମୁଚ୍ୟତେ ॥ ୬-୧୮୦ ॥
ଶିବସ୍ୟ ରଥୟାତ୍ରାୟାମୁପବାସପରଃ କ୍ଷମୀ ।
ପୁରତଃ ପୃଷ୍ଠତୋ ବାପି ଗଚ୍ଛଂସ୍ତସ୍ୟ ଫଲଂ ଶୃଣୁ ॥ ୬-୧୮୧ ॥
ଅଶେଷପାପନିର୍ମୁକ୍ତଃ ଶୁଦ୍ଧଃ ଶିବପୁରଂ ଗତଃ ।
ମହାରଥୋପମୈର୍ୟାନୈଃ କଲ୍ପାଶୀତିଂ ପ୍ରମୋଦତେ᳚ ॥ ୬-୧୮୨ ॥
ଧ୍ୱଜଚ୍ଛତ୍ତ୍ରପତାକାଭିର୍ଦୀପଦର୍ପଣଚାମରୈଃ ।
ଧୂପୈର୍ୱିତାନକଲଶୈରୁପଶୋଭା ସହସ୍ରଶଃ ॥ ୬-୧୮୩ ॥
ଗୃହୀତ୍ୱା ଯାତି ପୁରତଃ ସ୍ୱେଚ୍ଛୟା ବା ପରେଚ୍ଛୟା ।
ସମ୍ପର୍କାତ୍କୌତୁକାଲ୍ଲାଭାଚ୍ଛିବଲୋକେ ବ୍ରଜନ୍ତେ ତେ ॥ ୬-୧୮୪ ॥
ଶିବସ୍ୟ ରଥୟାତ୍ରାଂ ତୁ ଯଃ ପ୍ରପଶ୍ୟତି ଭକ୍ତିତଃ ।
ପ୍ରସଙ୍ଗାତ୍କୌତୁକାଦ୍ୱାପି ତେ ଽପି ଯାନ୍ତି ଶିବଂ ପୁରମ୍ ॥ ୬-୧୮୫ ॥
ନାନାୟତ୍ନାଦିଶେଷାନ୍ତେ ନାନାପ୍ରେକ୍ଷଣକାନି ଚ ।
କୁର୍ୱୀତ ରଥୟାତ୍ରାୟାଂ ରମତେ ଚ ବିଭୂଷିତା ॥ ୬-୧୮୬ ॥
ତେ ଭୋଗୈର୍ୱିବିଧୈର୍ଦିବ୍ୟୈଃ ଶିବାସନ୍ନା ଗଣେଶ୍ୱରାଃ ।
କ୍ରୀଡନ୍ତି ରୁଦ୍ରଭବନେ କଲ୍ପାନାଂ ବିଂଶତୀର୍ନରାଃ ॥ ୬-୧୮୭ ॥
ମହତା ଜ୍ଞାନସଙ୍ଘେନ ତସ୍ମାଚ୍ଛିବରଥେନ ଚ ।
ପୃଥକ୍ଜୀବା ମୃତା ଯାନ୍ତି ଶିବଲୋକଂ ନ ସଂଶୟଃ ॥ ୬-୧୮୮ ॥
ଶ୍ରୀପର୍ୱତେ ମହାକାଲେ ବାରାଣସ୍ୟାଂ ମହାଲୟେ ।
ଜଲ୍ପେଶ୍ୱରେ କୁରୁକ୍ଷେତ୍ରେ କେଦାରେ ମଣ୍ଡଲେଶ୍ୱରେ ॥ ୬-୧୮୯ ॥
ଗୋକର୍ଣେ ଭଦ୍ରକର୍ଣେ ଚ ଶଙ୍କୁକର୍ଣେ ସ୍ଥଲେଶ୍ୱରେ ।
ଭୀମେଶ୍ୱରେ ସୁବର୍ଣାକ୍ଷେ କାଲଞ୍ଜରବନେ ତଥା ॥ ୬-୧୯୦ ॥
ଏବମାଦିଷୁ ଚାନ୍ୟେଷୁ ଶିବକ୍ଷେତ୍ରେଷୁ ଯେ ମୃତାଃ ।
ଜୀବାଶ୍ଚରାଚରାଃ ସର୍ୱେ ଶିବଲୋକଂ ବ୍ରଜନ୍ତି ତେ ॥ ୬-୧୯୧ ॥
ପ୍ରୟାଗଂ କାମିକଂ ତୀର୍ଥମବିମୁକ୍ତଂ ତୁ ନୈଷ୍ଠିକମ୍ ।
ଶ୍ରୀପର୍ୱତଂ ଚ ବିଜ୍ଞେୟମିହାମୁତ୍ର ଚ ସିଦ୍ଧିଦମ୍ ॥ ୬-୧୯୨ ॥
ପ୍ରସଙ୍ଗେନାପି ଯଃ ପଶ୍ୟେଦନ୍ୟତ୍ର ପ୍ରସ୍ଥିତଃ କ୍ୱଚିତ୍ ।
ଶ୍ରୀପର୍ୱତଂ ମହାପୁଣ୍ୟଂ ସୋ ଽପି ଯାତି ଶିବଂ ପୁରମ୍ ॥ ୬-୧୯୩ ॥
ବ୍ରଜେଦ୍ୟଃ ଶିବତୀର୍ଥାନି ସର୍ୱପାପୈଃ ପ୍ରମୁଚ୍ୟତେ ।
ପାପୟୁକ୍ତଃ ଶିବଜ୍ଞାନଂ ପ୍ରାପ୍ୟ ନିର୍ୱାଣମାପ୍ନୁୟାତ୍ ॥ ୬-୧୯୪ ॥
ତୀର୍ଥସ୍ଥାନେଷୁ ଯଃ ଶ୍ରାଦ୍ଧଂ ଶିବରାତ୍ରେ ପ୍ରୟତ୍ନତଃ ।
କଲ୍ପୟିତ୍ୱାନୁସାରେଣ କାଲସ୍ୟ ବିଷୁବସ୍ୟ ଚ ॥ ୬-୧୯୫ ॥
ତୀର୍ଥୟାତ୍ରାଗତଂ ଶାନ୍ତଂ ହାହାଭୂତମଚେତନମ୍ ।
କ୍ଷୁତ୍ପିପାସାତୁରଂ ଲୋକେ ପାଂସୁପାଦଂ ତ୍ୱରାନ୍ୱିତମ୍ ॥ ୬-୧୯୬ ॥
ସଂତର୍ପୟିତ୍ୱା ଯତ୍ନେନ ମ୍ଲାନଲକ୍ଷ୍ମୀମିବାମ୍ବୁଭିଃ ।
ପାଦ୍ୟାସନପ୍ରଦାନେନ କସ୍ତେନ ପୁରୁଷଃ ସମଃ ॥ ୬-୧୯୭ ॥
ଅଶ୍ନନ୍ତି ଯାବତ୍ତତ୍ପିଣ୍ଡଂ ତୀର୍ଥନିର୍ଧୂତକଲ୍ମଷାଃ ।
ତାବଦ୍ୱର୍ଷସହସ୍ରାଣି ତଦ୍ଦାତାସ୍ତେ ଶିବେ ପୁରେ ॥ ୬-୧୯୮ ॥
ଦଦ୍ୟାଦ୍ୟଃ ଶିବସତ୍ତ୍ରାର୍ଥଂ ମହିଷୀଂ ସୁପୟସ୍ୱିନୀମ୍ ।
ମୋଦତେ ସ ଶିବେ ଲୋକେ ଯୁଗକୋଟିଶତଂ ନରଃ ॥ ୬-୧୯୯ ॥
ଆର୍ତାୟ ଶିବଭକ୍ତାୟ ଦଦ୍ୟାଦ୍ୟଃ ସୁପୟସ୍ୱିନୀମ୍ ।
ଅଜାମେକାଂ ସୁପୁଷ୍ଟାଙ୍ଗୀଂ ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୦୦ ॥
ଯାବତ୍ତଦ୍ରୋମସଂଖ୍ୟାନଂ ତତ୍ପ୍ରସୂତିକୁଲେଷୁ ଚ ।
ତାବଦ୍ୱର୍ଷସହସ୍ରାଣି ରୁଦ୍ରଲୋକେ ମହୀୟତେ ॥ ୬-୨୦୧ ॥
ମୃଦୁରୋମାଞ୍ଚିତାଂ କୃଷ୍ଣାଂ ନିବେଦ୍ୟ ଗୁରବେ ନରଃ ।
ରୋମ୍ଣି ରୋମ୍ଣି ସୁବର୍ଣସ୍ୟ ଦତ୍ତସ୍ୟ ଫଲମାପ୍ନୁୟାତ୍ ॥ ୬-୨୦୨ ॥
ଗଜାଶ୍ୱରଥସଂୟୁକ୍ତୈର୍ୱିମାନୈଃ ସାର୍ୱକାମିକୈଃ ।
ସାନୁଗଃ କ୍ରୀଡତେ ଭୋଗୈଃ କଲ୍ପକୋଟିଂ ଶିବେ ପୁରେ ॥ ୬-୨୦୩ ॥
ନିବେଦ୍ୟାଶ୍ୱତରଂ ପୁଷ୍ଟମଦୁଷ୍ଟଂ ଗୁରବେ ନରଃ ।
ସଂଗତିଂ ସୋପକରଣଂ ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୬-୨୦୪ ॥
ଦିବ୍ୟାଶ୍ୱୟୁକ୍ତୈଃ ଶ୍ରୀମଦ୍ଭିର୍ୱିମାନୈଃ ସାର୍ୱକାମିକୈଃ ।
କୋଟିଂ କୋଟିଂ ଚ କଲ୍ପାନାଂ ତଦନ୍ତେ ସ୍ୟାନ୍ମହୀପତିଃ ॥ ୬-୨୦୫ ॥
ଅପି ଯୋଜନମାତ୍ରାୟ ଶିବିକାଂ ପରିକଲ୍ପୟେତ୍ ।
ଗୁରୋଃ ଶାନ୍ତସ୍ୟ ଦାନ୍ତସ୍ୟ ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୦୬ ॥
ବିମାନାନାଂ ସହସ୍ରେଣ ସର୍ୱକାମୟୁତେନ ଚ ।
କଲ୍ପକୋଟ୍ୟଯୁତଂ ସାଗ୍ରଂ ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୬-୨୦୭ ॥
ଛାଗଂ ମେଷଂ ମୟୂରଂ ଚ କୁକ୍କୁଟଂ ଶାରିକାଂ ଶୁକମ୍ ।
ବାଲକ୍ରୀଡନକାନେତାନିତ୍ୟାଦ୍ୟାନପରାନପି ॥ ୬-୨୦୮ ॥
ନିବେଦୟିତ୍ୱା ସ୍କନ୍ଦାୟ ତତ୍ସାୟୁଜ୍ୟମବାପ୍ନୁୟାତ୍ ।
ଭୁକ୍ତ୍ୱା ତୁ ବିପୁଲାନ୍ଭୋଗାଂସ୍ତଦନ୍ତେ ସ୍ୟାଦ୍ଦ୍ୱିଜୋତ୍ତମଃ ॥ ୬-୨୦୯ ॥
ମୁସଲୋଲୂଖଲାଦ୍ୟାନି ଗୃହୋପକରଣାନି ଚ ।
ଦଦ୍ୟାଚ୍ଛିବଗୃହସ୍ଥେଭ୍ୟସ୍ତସ୍ୟ ପୂଣ୍ୟଫଲଂ ଶୃଣୁ ॥ ୬-୨୧୦ ॥
ପ୍ରତ୍ୟେକଂ କଲ୍ପମେକୈକଂ ଗୃହୋପକରଣୈର୍ନରଃ ।
ଅନ୍ତେ ଦିବି ବସେଦ୍ଭୋଗୈସ୍ତଦନ୍ତେ ଚ ଗୃହୀ ଭବେତ୍ ॥ ୬-୨୧୧ ॥
ଖର୍ଜୂରତାଲପତ୍ତ୍ରୈର୍ୱା ଚର୍ମଣା ବା ସୁକଲ୍ପିତମ୍ ।
ଦତ୍ତ୍ୱା କୋଟ୍ୟାସନଂ ବୃତ୍ତଂ ଶିବଲୋକମବାପ୍ନୁୟାତ୍ ॥ ୬-୨୧୨ ॥
ପ୍ରାତର୍ନୀହାରବେଲାୟାଂ ହେମନ୍ତେ ଶିବୟୋଗିନାମ୍ ।
କୃତ୍ୱା ପ୍ରତାପନାୟାଗ୍ନିଂ ଶିବଲୋକେ ମହୀୟତେ ॥ ୬-୨୧୩ ॥
ସୂର୍ୟାୟୁତପ୍ରଭାଦୀପ୍ତୈର୍ୱିମାନୈଃ ସାର୍ୱକାମିକୈଃ ।
କଲ୍ପକୋଟିଶତଂ ଭୋଗାନ୍ଭୁକ୍ତ୍ୱା ସ ତୁ ମହୀପତିଃ ॥ ୬-୨୧୪ ॥
ଯଃ ପ୍ରାନ୍ତରଂ ବିଦେଶଂ ବା ଗଚ୍ଛନ୍ତଂ ଶିବୟୋଗିନମ୍ ।
ଭୋଜୟୀତ ଯଥାଶକ୍ତ୍ୟା ଶିବଲୋକେ ମହୀୟତେ ॥ ୬-୨୧୫ ॥
ଯଶ୍ଛତ୍ତ୍ରଂ ଧାରୟେଦ୍ଗ୍ରୀଷ୍ମେ ଗଚ୍ଛତେ ଶିବୟୋଗିନେ ।
ସ ମୃତଃ ପୃଥିବୀଂ କୃତ୍ସ୍ନାମେକଚ୍ଛତ୍ତ୍ରାମବାପ୍ନୁୟାତ୍ ॥ ୬-୨୧୬ ॥
ଯଃ ସମୁଦ୍ଧରତେ ମାର୍ଗେ ମାତ୍ରୋପକରଣାସନମ୍ ।
ଶିବୟୋଗପ୍ରବୃତ୍ତସ୍ୟ ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୧୭ ॥
କଲ୍ପାୟୁତଂ ନରଃ ସାଗ୍ରଂ ଭୁକ୍ତ୍ୱା ଭୋଗାଞ୍ଛିବେ ପୁରେ ।
ତଦନ୍ତେ ପ୍ରାପ୍ନୁୟାଦ୍ରାଜ୍ୟଂ ସର୍ୱୈଶ୍ୱର୍ୟସମନ୍ୱିତମ୍ ॥ ୬-୨୧୮ ॥
ଅଭ୍ୟଙ୍ଗୋଦ୍ୱର୍ତନଂ ସ୍ନାନମାର୍ତସ୍ୟ ଶିବୟୋଗିନଃ ।
କୃତ୍ୱାପ୍ନୋତି ମହାଭୋଗାନ୍କଲ୍ପାଞ୍ଛିବପୁରେ ନରଃ ॥ ୬-୨୧୯ ॥
ଅପନୀୟ ସମୁଚ୍ଛିଷ୍ଟଂ ଭକ୍ତିତଃ ଶିବୟୋଗିନାମ୍ ।
ଦଶଧେନୁପ୍ରଦାନସ୍ୟ ଫଲମାପ୍ନୋତି ମାନବଃ ॥ ୬-୨୨୦ ॥
ପଞ୍ଚଗବ୍ୟସମଂ ଜ୍ଞେୟମୁଚ୍ଛିଷ୍ଟଂ ଶିବୟୋଗିନାମ୍ ।
ତଦ୍ଭୁକ୍ତ୍ୱା ଲଭତେ ଶୁଦ୍ଧିଂ ମହତଃ ପାତକାଦପି ॥ ୬-୨୨୧ ॥
ନାରୀ ଚ ଭୁକ୍ତ୍ୱା ସତ୍ପୁତ୍ରଂ କୁଲାଧାରଂ ଗୁଣାନ୍ୱିତମ୍ ।
ରାଜ୍ୟଯୋଗ୍ୟଂ ଧନାଢ୍ୟଂ ଚ ପ୍ରାପ୍ନୁୟାଦ୍ଧର୍ମତତ୍ପରମ୍ ॥ ୬-୨୨୨ ॥
ଯଶ୍ଚ ଯାଂ ଶିବୟଜ୍ଞାୟ ଗୃହସ୍ଥଃ ପରିକଲ୍ପୟେତ୍ ।
ଶିବଭକ୍ତୋ ଽସ୍ୟ ମହତଃ ପରମଂ ଫଲମାପ୍ନୁୟାତ୍ ॥ ୬-୨୨୩ ॥
ଶିବୋମାଂ ଚ ପ୍ରୟତ୍ନେନ ଭକ୍ତ୍ୟାବ୍ଦଂ ଯୋ ଽନୁପାଲୟେତ୍ ।
ଗବାଂ ଲକ୍ଷପ୍ରଦାନସ୍ୟ ସମ୍ପୂର୍ଣଂ ଫଲମାପ୍ନୁୟାତ୍ ॥ ୬-୨୨୪ ॥
ପ୍ରାତଃ ପ୍ରଦଦ୍ୟାତ୍ସଘୃତଂ ସୁକୃତଂ ବାଲପିଣ୍ଡକମ୍ ।
ଦୂର୍ୱାଂ ଚ ବାଲବତ୍ସାନାଂ(?) ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୨୫ ॥
ଯାବତ୍ତଦ୍ବାଲବତ୍ସାନାଂ ପାନାହାରଂ ପ୍ରକଲ୍ପୟେତ୍ ।
ତାବଦଷ୍ଟାୟୁତାନ୍ପୂର୍ୱୈର୍ଭୋଗାନ୍ଭୁଙ୍କ୍ତେ ଶିବେ ପୁରେ ॥ ୬-୨୨୬ ॥
ବିଧବାନାଥବୃଦ୍ଧାନାଂ ପ୍ରଦଦ୍ୟାଦ୍ୟଃ ପ୍ରଜୀବନମ୍ ।
ଆଭୂତସ୍ସମ୍ପ୍ଲବଂ ଯାବଚ୍ଛିବଲୋକେ ମହୀୟତେ ॥ ୬-୨୨୭ ॥
ଦଦ୍ୟାଦ୍ୟଃ ସର୍ୱଜନ୍ତୂନାମାହାରମନୁୟତ୍ନତଃ ।
ତ୍ରିଃ ପୃଥ୍ୱୀଂ ରତ୍ନସମ୍ପୂର୍ଣାଂ ଯଦ୍ଦତ୍ତ୍ୱା ତତ୍ଫଲଂ ଲଭେତ୍ ॥ ୬-୨୨୮ ॥
ବିନୟବ୍ରତଦାନାନି ଯାନି ସିଦ୍ଧାନି ଲୋକତଃ ।
ତାନି ତେନୈବ ବିଧିନା ଶିବମନ୍ତ୍ରେଣ କଲ୍ପୟେତ୍ ॥ ୬-୨୨୯ ॥
ନିବେଦୟୀତ ରୁଦ୍ରାୟ ରୁଦ୍ରାଣ୍ୟାଃ ଷଣ୍ମୁଖସ୍ୟ ଚ ।
ପ୍ରାପ୍ନୁୟାଦ୍ୱିପୁଲାନ୍ଭୋଗାନ୍ଦିବ୍ୟାଞ୍ଛିବପୁରେ ନରଃ ॥ ୬-୨୩୦ ॥
ପୁନର୍ୟଃ କର୍ତରୀଂ ଦଦ୍ୟାତ୍କେଶକ୍ଲେଶାପନୁତ୍ତୟେ ।
ସର୍ୱକ୍ଲେଶବିନିର୍ମୁକ୍ତଃ ଶିବଲୋକେ ସୁଖୀ ଭବେତ୍ ॥ ୬-୨୩୧ ॥
ନାସିକାଶୋଧନଂ ଦଦ୍ୟାତ୍ସଂଦଂଶଂ ଶିବୟୋଗିନେ ।
ବର୍ଷକୋଟିଂ ମହାଭୋଗୈଃ ଶିବଲୋକେ ମହୀୟତେ ॥ ୬-୨୩୨ ॥
ନଖଚ୍ଛେଦନକଂ ଦତ୍ତ୍ୱା ଶିବଲୋକେ ମହୀୟତେ ।
ବର୍ଷଲକ୍ଷଂ ମହାଭୋଗୈଃ ଶିବଲୋକେ ମହୀୟତେ ॥ ୬-୨୩୩ ॥
ଦତ୍ତ୍ୱାଞ୍ଜନଶଲାକାଂ ବା ଲୋହାଦ୍ୟାଂ ଶିବୟୋଗିନେ ।
ଭୋଗାଞ୍ଛିବପୁରେ ପ୍ରାପ୍ୟ ଜ୍ଞାନଚକ୍ଷୁରବାପ୍ନୁୟାତ୍ ॥ ୬-୨୩୪ ॥
କର୍ଣଶୋଧନକଂ ଦତ୍ତ୍ୱା ଲୋହାଦ୍ୟଂ ଶିବୟୋଗିନେ ।
ବର୍ଷକୋଟିଂ ମହାଭୋଗୈଃ ଶିବଲୋକେ ମହୀୟତେ ॥ ୬-୨୩୫ ॥
ଦଦ୍ୟାଦ୍ୟଃ ଶିବଭକ୍ତାୟ ସୂଚୀଂ କୌପୀନଶୋଧନୀମ୍ ।
ବର୍ଷଲକ୍ଷଂ ସ ଲକ୍ଷାର୍ଧଂ ଶିବଲୋକେ ମହୀୟତେ ॥ ୬-୨୩୬ ॥
ନିବେଦ୍ୟ ଶିବୟୋଗିଭ୍ୟଃ ସୂଚିକଂ ସୂତ୍ରସଂୟୁତମ୍ ।
ବର୍ଷଲକ୍ଷଂ ମହାଭୋଗୈଃ କ୍ରୀଡତେ ସ ଶିବେ ପୁରେ ॥ ୬-୨୩୭ ॥
ଦଦ୍ୟାଦ୍ୟଃ ଶିବୟୋଗିଭ୍ୟଃ ସୁକୃତାଂ ପତ୍ରବେଧନୀମ୍ ।
ବର୍ଷଲକ୍ଷଂ ମହାଭୋଗୈଃ ଶିବଲୋକେ ମହୀୟତେ ॥ ୬-୨୩୮ ॥
ଦଦ୍ୟାଦ୍ୟଃ ପୁସ୍ତକାଦୀନାଂ ସର୍ୱକାର୍ୟାର୍ଥକର୍ତୃକାମ୍ ।
ପଞ୍ଚଲକ୍ଷଂ ମହାଭୋଗୈର୍ମୋଦତେ ସ ଶିବେ ପୁରେ ॥ ୬-୨୩୯ ॥
ଶମୀନ୍ଧନତୃଣାଦୀନାଂ ଦଦ୍ୟାତ୍ତଚ୍ଛେଦନଂ ଚ ଯଃ ।
କ୍ରୀଡତେ ସ ଶିବେ ଲୋକେ ବର୍ଷଲକ୍ଷଚତୁଷ୍ଟୟମ୍ ॥ ୬-୨୪୦ ॥
ଶିବାଶ୍ରମୋପଭୋଗାୟ ଲୋହୋପକରଣଂ ମହତ୍ ।
ଯଃ ପ୍ରଦଦ୍ୟାଗ୍କୁଠାରାଦ୍ୟଂ ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୪୧ ॥
ଯାବତ୍ତତ୍ଫଲସଂଖ୍ୟାନଂ ଲୋହୋପକରଣେ ଭବେତ୍ ।
ତାବନ୍ତି ବର୍ଷଲକ୍ଷାଣି ଶିବଲୋକେ ମହୀୟତେ ॥ ୬-୨୪୨ ॥
ଶିବାୟତନବିତ୍ତାନାଂ ରକ୍ଷାର୍ଥଂ ଯଃ ପ୍ରୟଚ୍ଛତି ।
ଧନୁଃଖଡ୍ଗାୟୁଧାଦୀନି ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୪୩ ॥
ଏକୈକସ୍ମିନ୍ପରିଜ୍ଞେୟମାୟୁଧେ ଚାପି ବୈ ଫଲମ୍ ।
ବର୍ଷକୋଟ୍ୟଷ୍ଟକଂ ଭୋଗୈଃ ଶିବଲୋକେ ମହୀୟତେ ॥ ୬-୨୪୪ ॥
ଯଃ ସ୍ୱାତ୍ମଭୋଗଭୃତ୍ୟର୍ଥଂ କୁସୁମାନି ନିବେଦୟେତ୍ ।
ଶିବାୟ ଗୁରବେ ବାପି ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୪୫ ॥
ଯାବଦନ୍ୟୋଽନ୍ୟସଂବନ୍ଧାସ୍ତସ୍ୟାଂଶାଃ ପରିକୀର୍ତିତାଃ ।
ବର୍ଷଲକ୍ଷଂ ସ ତାବଚ୍ଚ ଶିବଲୋକେ ପ୍ରମୋଦତେ ॥ ୬-୨୪୬ ॥
ନଷ୍ଟାପହୃତମନ୍ୱିଷ୍ୟ ପୁନର୍ୱିତ୍ତଂ ନିବେଦୟେତ୍ ।
ଶିବାତ୍ମକଂ ଶିବାୟୈବ ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୪୭ ॥
ଯାବଚ୍ଛିବାୟ ତଦ୍ୱିତ୍ତଂ ପ୍ରାଙ୍ନିବେଦ୍ୟ ଫଲଂ ସ୍ମୃତମ୍ ।
ନଷ୍ଟମାନୀୟ ତଦ୍ଭୂୟଃ ପୁଣ୍ୟଂ ଶତଗୁଣଂ ଲଭେତ୍ ॥ ୬-୨୪୮ ॥
ଦେବଦ୍ରବ୍ୟଂ ହୃତଂ ନଷ୍ଟମନ୍ୱେଷ୍ୟମପି ଯତ୍ନତଃ ।
ନ ପ୍ରାପ୍ନୋତି ତଦା ତସ୍ୟ ପ୍ରାପ୍ନୁୟାଦ୍ଦ୍ୱିଗୁଣଂ ଫଲମ୍ ॥ ୬-୨୪୯ ॥
ତାମ୍ରକୁମ୍ଭକଟାହାଦ୍ୟଂ ଯଃ ଶିବାୟ ନିବେଦୟେତ୍ ।
ଶିବାତ୍ମକଂ ଶିବାୟୈବ ତସ୍ୟ ପୁଣ୍ୟଫଲଂ ଶୃଣୁ ॥ ୬-୨୫୦ ॥
ଯାବଚ୍ଛିବାୟ ତଦ୍ୱିତ୍ତଂ ପ୍ରାଙ୍ନିବେଦ୍ୟ ଫଲଂ ସ୍ମୃତମ୍ ।
ନଷ୍ଟମାନୀୟ ତଦ୍ଭୂୟଃ ପୁଣ୍ୟଂ ଶତଗୁଣଂ ଲଭେତ୍ ॥ ୬-୨୫୧ ॥
ସ୍ନାନସତ୍ତ୍ରୋପଭୋଗାୟ ତସ୍ୟ ପୁଣ୍ୟଫଲଂ ଶୃଣୁ ।
ଯାବତ୍ତତ୍ଫଲସଂଖ୍ୟାନଂ ତାମ୍ରୋପକରଣେ ସ୍ଥିତମ୍ ॥ ୬-୨୫୨ ॥
ପଲେ ପଲେ ବର୍ଷକୋଟିଂ ମୋଦତେ ସ ଶିବେ ପୁରେ ।
ଯଃ ପତ୍ତ୍ରପୁଷ୍ପବସ୍ତୂନାଂ ଦଦ୍ୟାଦାଧାରଭାଜନମ୍ ॥ ୬-୨୫୩ ॥
ତଦ୍ୱସ୍ତୁଦାତୁର୍ୟତ୍ପୁଣ୍ୟଂ ତତ୍ପୁଣ୍ୟଂ ସକଲଂ ଭବେତ୍ ।
ଦତ୍ତ୍ୱୋପକରଣଂ କିଂଚିଦପି ଯୋ ବିତ୍ତମର୍ଥିନାମ୍ ॥ ୬-୨୫୪ ॥
ଯଦ୍ୱସ୍ତୁ କୁରୁତେ ତେନ ତତ୍ପ୍ରଦାନଫଲଂ ଲଭେତ୍ ।
ଯଃ ଶୌଚପୀତବସ୍ତ୍ରାଣି କ୍ଷାରାଦ୍ୟୈଃ ଶିବୟୋଗିନାମ୍ ॥ ୬-୨୫୫ ॥
ସ ପାପମଲନିର୍ମୁକ୍ତଃ ଶିବଲୋକମବାପ୍ନୁୟାତ୍ ।
ଯଃ ପୁଷ୍ପପଟ୍ଟସଂୟୁକ୍ତଂ ପଟଗର୍ଭଂ ଚ କମ୍ବଲମ୍ ॥ ୬-୨୫୬ ॥
ପ୍ରଦଦ୍ୟାଚ୍ଛିବୟୋଗିଭ୍ୟସ୍ତସ୍ୟ ପୁଣ୍ୟଫଲଂ ଶୃଣୁ ।
ତେଷାଂ ଚ ବସ୍ତ୍ରତନ୍ତୂନାଂ ଯାବତ୍ସଂଖ୍ୟା ବିଧୀୟତେ ॥ ୬-୨୫୭ ॥
ତାବଦ୍ୱର୍ଷସହସ୍ରାଣି ଭୋଗାନ୍ଭୁଙ୍କ୍ତେ ଶିବେ ପୁରେ ।
ଶ୍ଲକ୍ଷ୍ଣବସ୍ତ୍ରାଣି ଶୁକ୍ଲାନି ଦଦ୍ୟାଦ୍ୟଃ ଶିବୟୋଗିନେ ॥ ୬-୨୫୮ ॥
ଚିତ୍ରବସ୍ତ୍ରାଣି ତଦ୍ଭକ୍ତ୍ୟା ତସ୍ୟ ପୁଣ୍ୟଫଲଂ ଶୃଣୁ ।
ଯାବତ୍ତତ୍ସୂକ୍ଷ୍ମବସ୍ତ୍ରାଣାଂ ତନ୍ତୁସଂଖ୍ୟା ବିଧୀୟତେ ॥ ୬-୨୫୯ ॥
ତାବଦ୍ୟୁଗାନି ସଂଭୋଗୈଃ ଶିବଲୋକେ ମହୀୟତେ ।
ଶଙ୍ଖପାତ୍ରଂ ତୁ ବିସ୍ତୀର୍ଣଂ ଭାଣ୍ଡଂ ବାପି ସୁଶୋଭନମ୍ ॥ ୬-୨୬୦ ॥
ପ୍ରଦଦ୍ୟାଚ୍ଛିବୟୋଗିଭ୍ୟସ୍ତସ୍ୟ ପୁଣ୍ୟଫଲଂ ଶୃଣୁ ।
ଦିବ୍ୟଂ ବିମାନମାରୂଢଃ ସର୍ୱକାମସମନ୍ୱିତମ୍ ॥ ୬-୨୬୧ ॥
କଲ୍ପକୋଟ୍ୟଯୁତଂ ସାଗ୍ରଂ ଶିବଲୋକେ ମହୀୟତେ ।
ଶୁକ୍ତ୍ୟାଦୀନି ଚ ପାତ୍ରାଣି ଶୋଭନାନ୍ୟମଲାନି ଚ ॥ ୬-୨୬୨ ॥
ନିବେଦ୍ୟ ଶିବୟୋଗିଭ୍ୟଃ ଶଙ୍ଖାର୍ଧେନ ଫଲଂ ଲଭେତ୍ ।
ସ୍ଫାଟିକାନାଂ ଚ ପାତ୍ରାଣାଂ ଶଙ୍ଖତୁଲ୍ୟଫଲଂ ସ୍ମୃତମ୍ ॥ ୬-୨୬୩ ॥
ଶୈଲଜାନାଂ ତଦର୍ଧେନ ପାତ୍ରାଣାଂ ଚ ତଦର୍ଧକମ୍ ।
ତାଲଖର୍ଜୂରପାତ୍ରାଣାଂ ବଂଶଜାନାଂ ନିବେଦନେ ॥ ୬-୨୬୪ ॥
ଅନ୍ୟେଷାମେବମାଦୀନାଂ ପୁଣ୍ୟଂ ବାର୍କ୍ଷ୍ୟାର୍ଧସଂମିତମ୍ ।
ବଂଶଜାର୍ଧସମଂ ପୁଣ୍ୟଂ ଫଲପାତ୍ରନିବେଦନେ ॥ ୬-୨୬୫ ॥
ନାନାପର୍ଣପୁଟାଣାଂ ଚ ସାରାଣାଂ ବା ଫଲାର୍ଧକମ୍ ।
ଯସ୍ତାମ୍ରକାଂସ୍ୟପାତ୍ରାଣି ଶୋବ୍ହନାନ୍ୟମଲାନି ଚ ॥ ୬-୨୬୬ ॥
ସ୍ନାନଭୋଜନପାନାର୍ଥଂ ଦଦ୍ୟାଦ୍ୟଃ ଶିବୟୋଗିନେ ।
ତାମ୍ରାଂ କାଂସୀଂ ତ୍ରିଲୋହୀଂ ବା ଯଃ ପ୍ରଦଦ୍ୟାତ୍ତ୍ରିପାଦିକାମ୍ ॥ ୬-୨୬୭ ॥
ଭୋଜନେ ଭୋଜନାଧାରଂ ଗୁରବେ ତତ୍ଫଲଂ ଶୃଣୁ ।
ଯାବତ୍ତତ୍ପଲସଂଖ୍ୟାନଂ ତ୍ରିପାଦ୍ୟା ଭୋଜନେଷୁ ଚ ॥ ୬-୨୬୮ ॥
ତାବଦ୍ୟୁଗସହସ୍ରାଣି ଭୋଗାନ୍ଭୁଙ୍କ୍ତେ ଶିବେ ପୁରେ ।
ଲୋହଂ ତ୍ରିପାଦିକଂ ଦତ୍ତ୍ୱା ସତ୍କୃତ୍ୱା ଶିବୟୋଗିନେ ॥ ୬-୨୬୯ ॥
ଦଶକଲ୍ପାନ୍ମହାଭୋଗୈର୍ନରଃ ଶିବପୁରେ ବସେତ୍ ।
ଯଃ ପ୍ରଦଦ୍ୟାତ୍ତ୍ରିବିଷ୍ଟମ୍ଭଂ ଭିକ୍ଷାପାତ୍ରସମାଶ୍ରୟମ୍ ॥ ୬-୨୭୦ ॥
ବଂଶଜଂ ଦାରୁଜଂ ବାପି ତସ୍ୟ ପୁଣ୍ୟଫଲଂ ଶୃଣୁ ।
ଦିବ୍ୟସ୍ତ୍ରୀଭୋଗସମ୍ପନ୍ନୋ ବିମାନେ ମହତି ସ୍ଥିତଃ ॥ ୬-୨୭୧ ॥
ଚତୁର୍ୟୁଗସହସ୍ରଂ ତୁ ଭୋଗାନ୍ଭୁଙ୍କ୍ତେ ଶିବେ ପୁରେ ।
ଭିକ୍ଷାପାତ୍ରମୁଖାଚ୍ଛାଦମ୍ୱସ୍ତ୍ରପର୍ଣାଦିକଲ୍ପିତମ୍ ॥ ୬-୨୭୨ ॥
ଦତ୍ତ୍ୱା ଶିବପୁରେ ଭୋଗାନ୍କଲ୍ପମେକଂ ବସେନ୍ନରଃ ।
ସଂଶ୍ରୟଂ ଯଃ ପ୍ରଦଦ୍ୟାଚ୍ଚ ଭିକ୍ଷାପାତ୍ରେ କମଣ୍ଡଲୌ ॥ ୬-୨୭୩ ॥
କଲ୍ପିତଂ ବସ୍ତ୍ରସୂତ୍ରାଦ୍ୟୈସ୍ତସ୍ୟ ପୁଣ୍ୟଫଲଂ ଶୃଣୁ ।
ତଦ୍ୱସ୍ତ୍ରପୂତତନ୍ତୂନାଂ ସଂଖ୍ୟା ଯାବଦ୍ୱିଧୀୟତେ ॥ ୬-୨୭୪ ॥
ତାବଦ୍ୱର୍ଷସହସ୍ରାଣି ରୁଦ୍ରଲୋକେ ମହୀୟତେ ।
ସୂତ୍ରବଲ୍କଲବାଲୈର୍ୱା ଶିକ୍ୟଭାଣ୍ଡସମାଶ୍ରୟମ୍ ॥ ୬-୨୭୫ ॥
ଯଃ କୃତ୍ୱା ଦାମନୀୟୋକ୍ତ୍ରଂ ପ୍ରଗ୍ରହଂ ରଜ୍ଜୁମେବ ବା ।
ଏବମାଦୀନି ଚାନ୍ୟାନି ବସ୍ତୂନି ବିନିବେଦୟେତ୍ ॥ ୬-୨୭୬ ॥
ଶିବଗୋଷ୍ଠୋପୟୋଗାର୍ଥଂ ତସ୍ୟ ପୁଣ୍ୟଫଲଂ ଶୃଣୁ ।
ଯାବତ୍ତଦ୍ରଜ୍ଜୁସଂଖ୍ୟାନଂ ପ୍ରଦଦ୍ୟାଚ୍ଛିବଗୋକୁଲେ ॥ ୬-୨୭୭ ॥
ତାବଚ୍ଚତୁର୍ୟୁଗଂ ଦେହୀ ଶିବଲୋକେ ମହୀୟତେ ।
ଯଥା ଯଥା ପ୍ରିୟଂ ବସ୍ତ୍ରଂ ଶୋଭନଂ ଚ ଯଥା ଯଥା ॥ ୬-୨୭୮ ॥
ତଥା ତଥା ମହାପୁଣ୍ୟଂ ତଦ୍ଦାନାଦୁତ୍ତରୋତ୍ତରମ୍ ।
ଯଃ ପନ୍ଥାନଂ ଦିଶେତ୍ପୃଷ୍ଟଂ ପ୍ରଣଷ୍ଟଂ ଚ ଗବାଦିକଂ ॥ ୬-୨୭୯ ॥
ସ ଗୋଦାନସମଂ ପୁଣ୍ୟଂ ପ୍ରଜ୍ଞାସୌଖ୍ୟଂ ଚ ବିନ୍ଦତି ।
କୃତ୍ୱୋପକାରମାର୍ତାନାଂ ସ୍ୱର୍ଗଂ ଯାତି ନ ସଂଶୟଃ ॥ ୬-୨୮୦ ॥
ଅପି କଣ୍ଟକମୁଦ୍ଧୃତ୍ୟ କିମୁତାନ୍ୟଂ ମହାଗୁଣମ୍(?) ।
ଅନ୍ନପାନୌଷଧୀନାଂ ଚ ଯଃ ପ୍ରଦାତାରମୁଦ୍ଦିଶେତ୍ ॥ ୬-୨୮୧ ॥
ଆର୍ତାନାଂ ତସ୍ୟ ବିଜ୍ଞେୟଂ ଦାତୁସ୍ତତ୍ସଦୃଶଂ ଫଲମ୍ ।
ଶିବାୟ ତସ୍ୟ ସଂରୁଦ୍ଧଂ କର୍ମ ତିଷ୍ଠତି ଯଦ୍ୱିନା ॥ ୬-୨୮୨ ॥
ତଦଲ୍ପମପି ଯଜ୍ଞାଙ୍ଗଂ ଦତ୍ତ୍ୱା ଯଜ୍ଞଫଲଂ ଲଭେତ୍ ।
ଅପି କାଶକୁଶଂ ସୂତ୍ରଂ ଗୋମୟଂ ସମିଦିନ୍ଧନମ୍ ॥ ୬-୨୮୩ ॥
ଶିବୟଜ୍ଞୋପୟୋଗାର୍ଥଂ ପ୍ରବକ୍ଷ୍ୟାମି ସମାସତଃ ।
ସର୍ୱେଷାଂ ଶିବଭକ୍ତାନାଂ ଦଦ୍ୟାଦ୍ୟତ୍କିଂଚିଦାଦରାତ୍ ।
ଦତ୍ତ୍ୱା ଯଜ୍ଞଫଲଂ ବିଦ୍ୟାତ୍କିମୁ ତଦ୍ୱସ୍ତୁଦାନତଃ ॥ ୬-୨୮୪ ॥
॥ ଇତି ଶିବୋପନିଷଦି ଫଲୋପକରଣପ୍ରଦାନାଧ୍ୟାୟଃ ଷଷ୍ଠଃ ॥
ଅଥ ସ୍ୱର୍ଗାପବର୍ଗାର୍ଥେ ପ୍ରବକ୍ଷ୍ୟାମି ସମାସତଃ ।
ସର୍ୱେଷାଂ ଶିବଭକ୍ତାନାଂ ଶିବାଚାରମନୁତ୍ତମମ୍ ॥ ୭-୧ ॥
ଶିବଃ ଶିବାୟ ଭୂତାନାଂ ଯସ୍ମାଦ୍ଦାନଂ ପ୍ରୟଚ୍ଛତି ।
ଗୁରୁମୂର୍ତିଃ ସ୍ଥିତସ୍ତସ୍ମାତ୍ପୂଜୟେତ୍ସତତଂ ଗୁରୁମ୍ ॥ ୭-୨ ॥
ନାଲକ୍ଷଣେ ଯଥା ଲିଙ୍ଗେ ସାଂନିଧ୍ୟଂ କଲ୍ପୟେଚ୍ଛିବଃ ।
ଅଲ୍ପାଗମେ ଗୁରୌ ତଦ୍ୱତ୍ସାଂନିଧ୍ୟଂ ନ ପ୍ରକଲ୍ପୟେତ୍ ॥ ୭-୩ ॥
ଶିବଜ୍ଞାନାର୍ଥତତ୍ତ୍ୱଜ୍ଞଃ ପ୍ରସନ୍ନମନସଂ ଗୁରୁମ୍ ।
ଶିବଃ ଶିବଂ ସମାସ୍ଥାୟ ଜ୍ଞାନଂ ବକ୍ତି ନ ହୀତରଃ ॥ ୭-୪ ॥
ଗୁରୁଂ ଚ ଶିବବଦ୍ଭକ୍ତ୍ୟା ନମସ୍କାରେଣ ପୂଜୟେତ୍ ।
କୃତାଞ୍ଜଲିସ୍ତ୍ରିସଂଧ୍ୟଂ ଚ ଭୂମିବିନ୍ୟସ୍ତମସ୍ତକଃ ॥ ୭-୫ ॥
ନ ବିବିକ୍ତମନାଚାନ୍ତମ୍(?) ଚଙ୍କ୍ରମନ୍ତଂ ତଥାକୁଲମ୍ ।
ସମାଧିସ୍ଥଂ ବ୍ରଜନ୍ତଂ ଚ ନମସ୍କୁର୍ୟାଦ୍ଗୁରୁଂ ବୁଧଃ ॥ ୭-୬ ॥
ବ୍ୟାଖ୍ୟାନେ ତତ୍ସମାପ୍ତୌ ଚ ସମ୍ପ୍ରଶ୍ନେ ସ୍ନାନଭୋଜନେ ।
ଭୁକ୍ତ୍ୱା ଚ ଶୟନେ ସ୍ୱପ୍ନେ ନମସ୍କୁର୍ୟାତ୍ସଦା ଗୁରୁମ୍ ॥ ୭-୭ ॥
ଗ୍ରାମାନ୍ତରମଭିପ୍ରେପ୍ସୁର୍ଗୁରୋଃ କୁର୍ୟାତ୍ପ୍ରଦକ୍ଷିଣମ୍ ।
ସାର୍ୱାଙ୍ଗିକପ୍ରଣାମଂ ଚ ପୁନଃ କୁର୍ୟାତ୍ତଦାଗତଃ ॥ ୭-୮ ॥
ପର୍ୱୋତ୍ସବେଷୁ ସର୍ୱେଷୁ ଦଦ୍ୟାଦ୍ଗନ୍ଧପବିତ୍ରକମ୍ ।
ଶିବଜ୍ଞାନସ୍ୟ ଚାରମ୍ଭେ ପ୍ରବାସଗମନାଗତୌ ॥ ୭-୯ ॥
ଶିବଧର୍ମବ୍ରତାରମ୍ଭେ ତତ୍ସମାପ୍ତୌ ଚ କଲ୍ପୟେତ୍ ।
ପ୍ରସାଦନାୟ କୁପିତୋ ବିଜିତ୍ୟ ଚ ରିପୁଂ ତଥା ॥ ୭-୧୦ ॥
ପୁଣ୍ୟାହେ ଗ୍ରହଶାନ୍ତୌ ଚ ଦୀକ୍ଷାୟାଂ ଚ ସଦକ୍ଷିଣମ୍ ।
ଆବାର୍ୟ ପଦସମ୍ପ୍ରାପ୍ତୌ ପବିତ୍ରେ ଚୋପବିଗ୍ରହେ ॥ ୭-୧୧ ॥
ଉପାନଚ୍ଛତ୍ତ୍ରଶୟନଂ ବସ୍ତ୍ରମାସନଭୂଷଣମ୍ ।
ପାତ୍ରଦଣ୍ଡାକ୍ଷସୂତ୍ରଂ ବା ଗୁରୁସକ୍ତଂ ନ ଧାରୟେତ୍ ॥ ୭-୧୨ ॥
ହାସ୍ୟନିଷ୍ଠୀବନାସ୍ଫୋଟମୁଚ୍ଚଭାଷ୍ୟବିଜୃମ୍ଭଣମ୍ ।
ପାଦପ୍ରସାରଣଂ ଗତିଂ ନ କୁର୍ୟାଦ୍ଗୁରୁସଂନିଧୌ ॥ ୭-୧୩ ॥
ହୀନାନ୍ନପାନବସ୍ତ୍ରଃ ସ୍ୟାନ୍ନୀଚଶୟ୍ୟାସନୋ ଗୁରୋଃ ।
ନ ଯଥେଷ୍ଟଶ୍ଚ ସଂତିଷ୍ଠେତ୍କଲହଂ ଚ ବିବର୍ଜୟେତ୍ ॥ ୭-୧୪ ॥
ପ୍ରତିବାତେ ଽନୁବାତେ ବା ନ ତିଷ୍ଠେଦ୍ଗୁରୁଣା ସହ ।
ଅସଂଶ୍ରୟେ ଚ ସତତଂ ନ କିଂଚିତ୍କୀର୍ତୟେଦ୍ଗୁରୋଃ ॥ ୭-୧୫ ॥
ଅନ୍ୟାସକ୍ତୋ ନ ଭୁଞ୍ଜାନୋ ନ ତିଷ୍ଠନ୍ନପରାଙ୍ମୁଖଃ ।
ନ ଶୟନୋ ନ ଚାସୀନଃ ସଂଭାସ୍ୟେଦ୍ଗୁରୁଣା ସହ ॥ ୭-୧୬ ॥
ଦୃଷ୍ଟ୍ୱୈବ ଗୁରୁମାୟାନ୍ତମୁତ୍ତିଷ୍ଠେଦ୍ଦୂରତସ୍ତ୍ୱରମ୍ ।
ଅନୁଜ୍ଞାତଶ୍ଚ ଗୁରୁଣା ସଂବିଶେଚ୍ଚାନୁପୃଷ୍ଠତଃ ॥ ୭-୧୭ ॥
ନ କଣ୍ଠଂ ପ୍ରାବୃତଂ କୁର୍ୟାନ୍ନ ଚ ତତ୍ରାବସକ୍ତିକାମ୍ ।
ନ ପାଦଧାବନସ୍ନାନଂ ଯତ୍ର ପଶ୍ୟେଦ୍ଗୁରୁଃ ସ୍ଥିତଃ ॥ ୭-୧୮ ॥
ନ ଦନ୍ତଧାବନାଭ୍ୟଙ୍ଗମାୟାମୋଦ୍ୱର୍ତନକ୍ରିୟାଃ ।
ଉତ୍ସର୍ଗପରିଧାନଂ ଚ ଗୁରୋଃ କୁର୍ୱୀତ ପଶ୍ୟତଃ ॥ ୭-୧୯ ॥
ଗୁରୁର୍ୟଦର୍ପୟେତ୍କିଂଚିଦ୍ଗୃହାସନ୍ନଂ ତଦଞ୍ଜଲୌ ।
ପାତ୍ରେ ବା ପୁରତଃ ଶିଷ୍ୟସ୍ତଦ୍ୱକ୍ତ୍ରମଭିବୀକ୍ଷୟନ୍ ॥ ୭-୨୦ ॥
ଯଦର୍ପୟେଦ୍ଗୁରୁଃ କିଂଚି ତନ୍ନମ୍ରଃ ପୁରତଃ ସ୍ଥିତଃ ।
ପାଣିଦ୍ୱୟେନ ଗୃହ୍ଣୀୟତ୍ସ୍ଥାପୟେତ୍ତଚ୍ଚ ସୁସ୍ଥିତମ୍ ॥ ୭-୨୧ ॥
ନ ଗୁରୋଃ କୀର୍ତୟେନ୍ନାମ ପରୋଽକ୍ଷମପି କେବଲମ୍ ।
ସମାନସଂଜ୍ଞମନ୍ୟଂ ବା ନାହ୍ୱୟୀତ ତଦାଖ୍ୟଯା ॥ ୭-୨୨ ॥
ସ୍ୱଗୁରୁସ୍ତଦ୍ଗୁରୁଶ୍ଚୈବ ଯଦି ସ୍ୟାତାଂ ସମଂ କ୍ୱଚିତ୍ ।
ଗୁରୋର୍ଗୁରୁସ୍ତୟୋଃ ପୂଜ୍ୟଃ ସ୍ୱଗୁରୁଶ୍ଚ ତଦାଜ୍ଞୟା ॥ ୭-୨୩ ॥
ଅନିବେଦ୍ୟ ନ ଭୁଞ୍ଜୀତ ଭୁକ୍ତ୍ୱା ଚାସ୍ୟ ନିବେଦୟେତ୍ ।
ନାବିଜ୍ଞାପ୍ୟ ଗୁରୁଂ ଗଚ୍ଛେଦ୍ବହିଃ କାର୍ୟେଣ କେନଚିତ୍ ॥ ୭-୨୪ ॥
ଗୁର୍ୱାଜ୍ଞୟା କର୍ମ କୃତ୍ୱା ତତ୍ସମାପ୍ତୌ ନିବେଦୟେତ୍ ।
କୃତ୍ୱା ଚ ନୈତ୍ୟକଂ ସର୍ୱମଧୀୟୀତାଜ୍ଞୟା ଗୁରୋଃ ॥ ୭-୨୫ ॥
ମୃଦ୍ଭସ୍ମଗୋମୟଜଲଂ ପତ୍ତ୍ରପୁଷ୍ପେନ୍ଧନଂ ସମିତ୍ ।
ପର୍ୟାପ୍ତମଷ୍ଟକଂ ହ୍ୟେତଦ୍ଗୁର୍ୱର୍ଥଂ ତୁ ସମାହରେତ୍ ॥ ୭-୨୬ ॥
ଭୈଷଜ୍ୟାହାରପାତ୍ରାଣି ବସ୍ତ୍ରଶୟ୍ୟାସନଂ ଗୁରୋଃ ।
ଆନୟେତ୍ସର୍ୱୟତ୍ନେନ ପ୍ରାର୍ଥୟିତ୍ୱା ଧନେଶ୍ୱରାନ୍ ॥ ୭-୨୭ ॥
ଗୁରୋର୍ନ ଖଣ୍ଡୟେଦାଜ୍ଞାମପି ପ୍ରାଣାନ୍ପରିତ୍ୟଜେତ୍ ।
କୃତ୍ୱାଜ୍ଞାଂ ପ୍ରାପ୍ନୁୟାନ୍ମୁକ୍ତିଂ ଲଙ୍ଘୟନ୍ନରକଂ ବ୍ରଜେତ୍ ॥ ୭-୨୮ ॥
ପର୍ୟଟେତ୍ପୃଥିବୀଂ କୃତ୍ସ୍ନାଂ ସଶୈଲବନକାନନାମ୍ ।
ଗୁରୁଭୈଷଜ୍ୟସିଦ୍ଧ୍ୟର୍ଥମପି ଗଚ୍ଛେଦ୍ରସାତଲମ୍ ॥ ୭-୨୯ ॥
ଯଦାଦିଶେଦ୍ଗୁରୁଃ କିଂଚିତ୍ତତ୍କୁର୍ୟାଦବିଚାରତଃ ।
ଅମୀମାଂସ୍ୟା ହି ଗୁରବଃ ସର୍ୱକାର୍ୟେଷୁ ସର୍ୱଥା ॥ ୭-୩୦ ॥
ନୋତ୍ଥାପୟେତ୍ସୁଖାସୀନଂ ଶୟାନଂ ନ ପ୍ରବୋଧୟେତ୍ ।
ଆସୀନୋ ଗୁରୁମାସୀନମଭିଗଚ୍ଛେତ୍ପ୍ରତିଷ୍ଠିତମ୍ ॥ ୭-୩୧ ॥
ପଥି ପ୍ରୟାନ୍ତଂ ଯାନ୍ତଂ ଚ ଯତ୍ନାଦ୍ୱିଶ୍ରମୟେଦ୍ଗୁରୁମ୍ ।
କ୍ଷିତ୍ପିପାସାତୁରଂ ସ୍ନାତଂ ଜ୍ଞାତ୍ୱା ଶକ୍ତଂ ଚ ଭୋଜୟେତ୍ ॥ ୭-୩୨ ॥
ଅଭ୍ୟଙ୍ଗୋଦ୍ୱର୍ତନଂ ସ୍ନାନଂ ଭୋଜନଷ୍ଠୀବମାର୍ଜନମ୍ ।
ଗାତ୍ରସଂବାହନଂ ରାତ୍ରୌ ପାଦାଭ୍ୟଙ୍ଗଂ ଚ ଯତ୍ନତଃ ॥ ୭-୩୩ ॥
ପ୍ରାତଃ ପ୍ରସାଧନଂ ଦତ୍ତ୍ୱା କାର୍ୟଂ ସଂମାର୍ଜନାଞ୍ଜନମ୍ ।
ନାନାପୁଷ୍ପପ୍ରକରଣଂ ଶ୍ରୀମଦ୍ୱ୍ୟାଖ୍ୟାନମଣ୍ଡପେ ॥ ୭-୩୪ ॥
ସ୍ଥାପ୍ୟାସନଂ ଗୁରୋଃ ପୂଜ୍ୟଂ ଶିବଜ୍ଞାନସ୍ୟ ପୁସ୍ତକମ୍ ।
ତତ୍ର ତିଷ୍ଠେତ୍ପ୍ରତୀକ୍ଷଂସ୍ତଦ୍ଗୁରୋରାଗମନଂ କ୍ରମାତ୍ ॥ ୭-୩୫ ॥
ଗୁରୋର୍ନିନ୍ଦାପବାଦଂ ଚ ଶ୍ରୁତ୍ୱା କର୍ଣୌ ପିଧାପୟେତ୍ ।
ଅନ୍ୟତ୍ର ଚୈବ ସର୍ପେତ୍ତୁ ନିଗୃହ୍ଣୀୟାଦୁପାୟତଃ ॥ ୭-୩୬ ॥
ନ ଗୁରୋରପ୍ରିୟଂ କୁର୍ୟାତ୍ପୀଡିତସ୍ତାରିତୋ ଽପି ବା ।
ନୋଚ୍ଚାରୟେଚ୍ଚ ତଦ୍ୱାକ୍ୟମୁଚ୍ଚାର୍ୟ ନରକଂ ବ୍ରଜେତ୍ ॥ ୭-୩୭ ॥
ଗୁରୁରେବ ପିତା ମାତା ଗୁରୁରେବ ପରଃ ଶିବଃ ।
ଯସ୍ୟୈବ ନିଶ୍ଚିତୋ ଭାବସ୍ତସ୍ୟ ମୁକ୍ତିର୍ନ ଦୂରତଃ ॥ ୭-୩୮ ॥
ଆହାରାଚାରଧର୍ମାଣାଂ ଯତ୍କୁର୍ୟାଦ୍ଗୁରୁରୀଶ୍ୱରଃ ।
ତଥୈବ ଚାନୁକୁର୍ୱୀତ ନାନୁୟୁଞ୍ଜୀତ କାରଣମ୍ ॥ ୭-୩୯ ॥
ଯଜ୍ଞସ୍ତପାଂସି ନିୟମାତ୍ତାନି ବୈ ବିବିଧାନି ଚ ।
ଗୁରୁବାକ୍ୟେ ତୁ ସର୍ୱାଣି ସମ୍ପଦ୍ୟନ୍ତେ ନ ସଂଶୟଃ ॥ ୭-୪୦ ॥
ଅଜ୍ଞାନପଙ୍କନିର୍ମଗ୍ନଂ ଯଃ ସମୁଦ୍ଧରତେ ଜନମ୍ ।
ଶିବଜ୍ଞାନାତ୍ମହସ୍ତେନ କସ୍ତଂ ନ ପ୍ରତିପୂଜୟେତ୍ ॥ ୭-୪୧ ॥
ଇତି ଯଃ ପୂଜୟେନ୍ନିତ୍ୟଂ ଗୁରୁମୂର୍ତିସ୍ଥମୀଶ୍ୱରମ୍ ।
ସର୍ୱପାପବିନିର୍ମୁକ୍ତଃ ପ୍ରାପ୍ନୋତି ପରମଂ ପଦମ୍ ॥ ୭-୪୨ ॥
ସ୍ନାତ୍ୱାମ୍ଭସା ଭସ୍ମନା ବା ଶୁକ୍ଲବସ୍ତ୍ରୋପବୀତବାନ୍ ।
ଦୂର୍ୱାଗର୍ଭସ୍ଥିତଂ ପୁଷ୍ପଂ ଗୁରୁଃ ଶିରସି ଧାରୟେତ୍ ॥ ୭-୪୩ ॥
ରୋଚନାଲଭନଂ କୁର୍ୟାଦ୍ଧୂୟଯେଦାତ୍ମନସ୍ତନୁମ୍ ।
ଅଙ୍ଗୁଲୀୟାକ୍ଷସୂତ୍ରଂ ଚ କର୍ଣମାତ୍ରେ ଚ ଧାରୟେତ୍ ॥ ୭-୪୪ ॥
ଗୁରୁରେବଂବିଧଃ ଶ୍ରୀମାନ୍ନିତ୍ୟଂ ତିଷ୍ଠେତ୍ସମାହିତଃ ।
ଯସ୍ମାଜ୍ଜ୍ଞାନୋପଦେଶାର୍ଥଂ ଗୁରୁରାସ୍ତେ ସଦାଶିବଃ ॥ ୭-୪୫ ॥
ଧାରୟେତ୍ପାଦୁକେ ନିତ୍ୟଂ ମୃଦୁବର୍ମପ୍ରକଲ୍ପିତେ ।
ପ୍ରଗୃହ୍ୟ ଦଣ୍ଡଂ ଛତ୍ତ୍ରଂ ବା ପର୍ୟଟେଦାଶ୍ରମାଦ୍ବହିଃ ॥ ୭-୪୬ ॥
ନ ଭୂମୌ ବିନ୍ୟସେତ୍ପାଦମନ୍ତର୍ଧାନଂ ବିନା ଗୁରୁଃ ।
କୁଶପାଦକମାକ୍ରମ୍ୟ ତର୍ପଣାର୍ଥଂ ପ୍ରକଲ୍ପୟେତ୍ ॥ ୭-୪୭ ॥
ପାଦସ୍ଥାନାନି ପତ୍ତ୍ରାଦ୍ୟୈଃ କୃତ୍ୱା ଦେବଗୃହଂ ବିଶେତ୍ ।
ପାତ୍ରାସ୍ତରିତପାଦଶ୍ଚ(?) ନିତ୍ୟଂ ଭୁଞ୍ଜୀତ ବାଗ୍ୟତଃ ॥ ୭-୪୮ ॥
ନ ପାଦୌ ଧାବୟେତ୍କାଂସ୍ୟେ ଲୋହେ ବା ପରିକଲ୍ପିତେ ।
ଶୌଚୟେତ୍ତୃଣଗର୍ଭାୟାଂ ଦ୍ୱିତୀୟାୟାଂ ତଥାଚମେତ୍ ॥ ୭-୪୯ ॥
ନ ରକ୍ତମୁଲ୍ବଣଂ ବସ୍ତ୍ରଂ ଧାରୟେତ୍କୁସୁମାନି ଚ ।
ନ ବହିର୍ଗନ୍ଧମାଲ୍ୟାନି ବାସାଂସି ମଲିନାନି ଚ ॥ ୭-୫୦ ॥
କେଶାସ୍ଥୀନି କପାଲାନି କାର୍ପାସାସ୍ଥିତୁଷାଣି ଚ ।
ଅମେଧ୍ୟାଙ୍ଗାରଭସ୍ମାନି ନାଧିତିଷ୍ଠେଦ୍ରଜାଂସି ଚ ॥ ୭-୫୧ ॥
ନ ଚ ଲୋଷ୍ଟଂ ବିମୃଦ୍ନୀୟାନ୍ନ ଚ ଛିନ୍ଦ୍ୟାନ୍ନଖୈସ୍ତୃଣମ୍ ।
ନ ପତ୍ତ୍ରପୁଷ୍ପମୂଲ୍ୟାନି ବଂଶମଙ୍ଗଲକାଷ୍ଠିତାମ୍ ॥ ୭-୫୨ ॥
ଏବମାଦୀନି ଚାନ୍ୟାନି ପାଣିଭ୍ୟାଂ ନ ଚ ମର୍ଦୟେତ୍ ।
ନ ଦନ୍ତଖାଦନଂ କୁର୍ୟାଦ୍ରୋମାଣ୍ୟୁତ୍ପାଟୟେନ୍ନ ଚ ॥ ୭-୫୩ ॥
ନ ପଦ୍ଭ୍ୟାମୁଲ୍ଲିଖେଦ୍ଭୂମିଂ ଲୋଷ୍ଟକାଷ୍ଠୈଃ କରେଣ ବା ।
ନ ନଖାଂଶ୍ଚ ନଖୈର୍ୱିଦ୍ୟାନ୍ନ କଣ୍ଡୂୟେନ୍ନଖୈସ୍ତନୁମ୍ ॥ ୭-୫୪ ॥
ମୁହୁର୍ମୁହୁଃ ଶିରଃ ଶ୍ମଶ୍ରୁ ନ ସ୍ପୃଶେତ୍କରଜୈର୍ବୁଧଃ ।
ନ ଲିକ୍ଷାକର୍ଷଣଂ କୁର୍ୟାଦାତ୍ମନୋ ବା ପରସ୍ୟ ବା ॥ ୭-୫୫ ॥
ସୌବର୍ଣ୍ୟରୌପ୍ୟତାମ୍ରୈଶ୍ଚ ଶୃଙ୍ଗଦନ୍ତଶଲାକୟା ।
ଦେହକଣ୍ଡୂୟନଂ କାର୍ୟଂ ବଂଶକାଷ୍ଠୀକବୀରଣୈଃ(?) ॥ ୭-୫୬ ॥
ନ ବିଚିତ୍ତଂ ପ୍ରକୁର୍ୱୀତ ଦିଶଶ୍ଚୈବାବଲୋକୟନ୍ ।
ନ ଶୋକାର୍ତଶ୍ଚ ସଂତିଷ୍ଠେଦ୍ଧୂତ୍ୱା ପାଣୌ କପୋଲକମ୍ ॥ ୭-୫୭ ॥
ନ ପାଣିପାଦବାକ୍ଚକ୍ଷୁଃ- ଶ୍ରୋତ୍ରଶିଶ୍ନଗୁଦୋଦରୈଃ ।
ଚାପଲାନି ନ କୁର୍ୱୀତ ସ ସର୍ୱାର୍ଥମବାପ୍ନୁୟାତ୍ ॥ ୭-୫୮ ॥
ନ କୁର୍ୟାତ୍କେନଚିଦ୍ୱୈରମଧ୍ରୁବେ ଜୀବିତେ ସତି ।
ଲୋକକୌତୂହଲଂ ପାପଂ ସଂଧ୍ୟାଂ ଚ ପରିବର୍ଜୟେତ୍ ॥ ୭-୫୯ ॥
ନ କୁଦ୍ୱାରେଣ ବେଶ୍ମାନି ନଗରଂ ଗ୍ରାମମାବିଶେତ୍ ।
ନ ଦିବା ପ୍ରାବୃତଶିରା ରାତ୍ରୌ ପ୍ରାବୃତ୍ୟ ପର୍ୟଟେତ୍ ॥ ୭-୬୦ ॥
ନାତିଭ୍ରମଣଶୀଲଃ ସ୍ୟାନ୍ନ ବିଶେଚ୍ଚ ଗୃହାଦ୍ଗୃହମ୍ ।
ନ ଚାଜ୍ଞାନମଧୀୟୀତ ଶିବଜ୍ଞାନଂ ସମଭ୍ୟସେତ୍ ॥ ୭-୬୧ ॥
ଶିବଜ୍ଞାନଂ ପରଂ ବ୍ରହ୍ମ ତଦାରଭ୍ୟ ନ ସଂତ୍ୟଜେତ୍ ।
ବ୍ରହ୍ମାସାଧ୍ୟ ଚ ଯୋ ଗଚ୍ଛେଦ୍ବ୍ରହ୍ମହା ସ ପ୍ରକୀର୍ତିତଃ ॥ ୭-୬୨ ॥
କୃତାଞ୍ଜଲିଃ ସ୍ଥିତଃ ଶିଷ୍ୟୋ ଲଘୁବସ୍ତ୍ରମୁଦଙ୍ମୁଖଃ ।
ଶିବମନ୍ତ୍ରଂ ସମୁଚ୍ଚାର୍ୟ ପ୍ରାଙ୍ମୁଖୋ ଽଧ୍ୟାପୟେଦ୍ଗୁରୁଃ ॥ ୭-୬୩ ॥
ନାଗଦନ୍ତାଦିସଂଭୂତଂ ଚତୁରଶ୍ରଂ ସୁଶୋଭନମ୍ ।
ହେମରତ୍ନଚିତଂ ବାପି ଗୁରୋରାସନମୁତ୍ତମମ୍ ॥ ୭-୬୪ ॥
ନ ଶୁଶ୍ରୂଷାର୍ଥକାମାଶ୍ଚ ନ ଚ ଧର୍ମଃ ପ୍ରଦୃଶ୍ୟତେ ।
ନ ଭକ୍ତିର୍ନ ଯଶଃ କ୍ରୌର୍ୟଂ ନ ତମଧ୍ୟାପୟେଦ୍ଗୁରୁଃ ॥ ୭-୬୫ ॥
ଦେବାଗ୍ନିଗୁରୁଗୋଷ୍ଠୀଷୁ ବ୍ୟାଖ୍ୟାଧ୍ୟଯନସଂସଦି ।
ପ୍ରଶ୍ନେ ବାଦେ ଽନୃତେ ଽଶୌଚେ ଦକ୍ଷିଣଂ ବାହୁମୁଦ୍ଧରେତ୍ ॥ ୭-୬୬ ॥
ବଶେ ସତତନମ୍ରଃ ସ୍ୟାତ୍ସଂହୃତ୍ୟାଙ୍ଗାନି କୂର୍ମବତ୍ ।
ତତ୍ସଂମୁଖଂ ଚ ନିର୍ଗଚ୍ଛେନ୍ନମସ୍କାରପୁରସ୍ସରଃ ॥ ୭-୬୭ ॥
ଦେବାଗ୍ନିଗୁରୁବିପ୍ରାଣାଂ ନ ବ୍ରଜେଦନ୍ତରେଣ ତୁ ।
ନାର୍ପୟେନ୍ନ ଚ ଗୃହ୍ଣୀୟାତ୍କିଂଚିଦ୍ୱସ୍ତୁ ତଦନ୍ତରା ॥ ୭-୬୮ ॥
ନ ମୁଖେନ ଧମେଦଗ୍ନିଂ ନାଧଃକୁର୍ୟାନ୍ନ ଲଙ୍ଘୟେତ୍ ।
ନ କ୍ଷିପେଦଶୁଚିଂ ବହ୍ନୌ ନ ଚ ପାଦୌ ପ୍ରତାପୟେତ୍ ॥ ୭-୬୯ ॥
ତୃଣକାଷ୍ଠାଦିଗହନେ ଜନ୍ତୁଭିଶ୍ଚ ସମାକୁଲେ ।
ସ୍ଥାନେ ନ ଦୀପୟେଦଗ୍ନିଂ ଦୀପ୍ତଂ ଚାପି ତତଃ କ୍ଷିପେତ୍ ॥ ୭-୭୦ ॥
ଅଗ୍ନିଂ ଯୁଗପଦାନୀୟ ଧାରୟେତ ପ୍ରୟତ୍ନତଃ ।
ଜ୍ୱଲନ୍ତଂ ନ ପ୍ରଦୀପଂ ଚ ସ୍ୱୟଂ ନିର୍ୱାପୟେଦ୍ବୁଧଃ ॥ ୭-୭୧ ॥
ଶିବବ୍ରତଧରଂ ଦୃଷ୍ଟ୍ୱା ସମୁତ୍ଥାୟ ସଦା ଦ୍ରୁତମ୍ ।
ଶିବୋ ଽୟମିତି ସଂକଲ୍ପ୍ୟ ହର୍ଷିତଃ ପ୍ରଣମେତ୍ତତଃ ॥ ୭-୭୨ ॥
ଭୋଗାନ୍ଦଦାତି ବିପୁଲାନ୍ଲିଙ୍ଗେ ସମ୍ପୂଜିତଃ ଶିବଃ ।
ଅଗ୍ନୌ ଚ ବିବିଧାଂ ସିଦ୍ଧିଂ ଗୁରୌ ମୁକ୍ତିଂ ପ୍ରୟଚ୍ଛତି ॥ ୭-୭୩ ॥
ମୋକ୍ଷାର୍ଥଂ ପୂଜୟେତ୍ତସ୍ମାଦ୍ଗୁରୁମୂର୍ତିସ୍ଥମୀଶ୍ୱରମ୍ ।
ଗୁରୁଭକ୍ତ୍ୟା ଲଭେଜ୍ଜ୍ଞାନଂ ଜ୍ଞାନାନ୍ମୁକ୍ତିମବାପ୍ନୁୟାତ୍ ॥ ୭-୭୪ ॥
ସର୍ୱପର୍ୱସୁ ଯତ୍ନେନ ହ୍ୟେଷୁ ସମ୍ପୂଜୟେଚ୍ଛିବମ୍ ।
କୁର୍ୟାଦାୟତନେ ଶୋଭାଂ ଗୁରୁସ୍ଥାନେଷୁ ସର୍ୱତଃ ॥ ୭-୭୫ ॥
ନରଦ୍ୱୟୋଚ୍ଛ୍ରିତେ ପୀଠେ ସର୍ୱଶୋଭାସମନ୍ୱିତେ ।
ସଂସ୍ଥାପ୍ୟ ମଣିଜଂ ଲିଙ୍ଗଂ ସ୍ଥାନେ କୁର୍ୟାଜ୍ଜଗଦ୍ଧିତମ୍ ॥ ୭-୭୬ ॥
ଅନ୍ନପାନବିଶେଷୈଶ୍ଚ ନୈବେଦ୍ୟମୁପକଲ୍ପୟେତ୍ ।
ଭୋଜୟେଦ୍ୱ୍ରତିନଶ୍ଚାତ୍ର ସ୍ୱଗୁରୁଂ ଚ ବିଶେଷତଃ ॥ ୭-୭୭ ॥
ପୂଜୟେଚ୍ଚ ଶିବଜ୍ଞାନଂ ବାଚୟୀତ ଚ ପର୍ୱସୁ ।
ଦର୍ଶୟେଚ୍ଛିବଭକ୍ତେଭ୍ୟଃ ସତ୍ପୂଜାଂ ପରିକଲ୍ପିତାମ୍ ॥ ୭-୭୮ ॥
ପ୍ରିୟଂ ବ୍ରୂୟାତ୍ସଦା ତେଭ୍ୟଃ ପ୍ରଦେୟଂ ଚାପି ଶକ୍ତିତଃ ।
ଏବଂ କୃତେ ବିଶେଷେଣ ପ୍ରସୀଦତି ମହେଶ୍ୱରଃ ॥ ୭-୭୯ ॥
ଛିନ୍ନଂ ଭିନ୍ନଂ ମୃତଂ ନଷ୍ଟଂ ବର୍ଧତେ ନାସ୍ତି କେବଲମ୍ ।
ଇତ୍ୟାଦ୍ୟାନ୍ନ ବଦେଚ୍ଛବ୍ଦାନ୍ସାକ୍ଷାଦ୍ବ୍ରୂୟାତ୍ତୁ ମଙ୍ଗଲମ୍ ॥ ୭-୮୦ ॥
ଅଧେନୁଂ ଧେନୁମିତ୍ୟେବ ବ୍ରୂୟାଦ୍ଭଦ୍ରମଭଦ୍ରକମ୍ ।
କପାଲଂ ଚ ଭଗାଲଂ ସ୍ୟାତ୍ପରମଂ ମଙ୍ଗଲଂ ବଦେତ୍ ॥ ୭-୮୧ ॥
ଐନ୍ଦ୍ରଂ ଧନୁର୍ମଣିଧନୁର୍ଦାହକାଷ୍ଠାଦି ଚନ୍ଦନମ୍ ।
ସ୍ୱର୍ୟାତଂ ଚ ମୃତଂ ବ୍ରୂୟାଚ୍ଛିବୀଭୂତଂ ଚ ଯୋଗିନମ୍ ॥ ୭-୮୨ ॥
ଦ୍ୱିଧାଭୂତଂ ବଦେଚ୍ଛିନ୍ନଂ ଭିନ୍ନଂ ଚ ବହୁଧା ସ୍ଥିତମ୍ ।
ନଷ୍ଟମନ୍ୱେଷଣୀୟଂ ଚ ରିକ୍ତଂ ପୂର୍ଣାଭିବର୍ଧିତମ୍ ॥ ୭-୮୩ ॥
ନାସ୍ତୀତି ଶୋଭନଂ ସର୍ୱମାଦ୍ୟମଙ୍ଗାଭିବର୍ଧନମ୍ ।
ସିଦ୍ଧିମଦ୍ବ୍ରୂହି ଗଚ୍ଛନ୍ତଂ ସୁପ୍ତଂ ବ୍ରୂୟାତ୍ପ୍ରବର୍ଧିତମ୍ ॥ ୭-୮୪ ॥
ନ ମ୍ଲେଚ୍ଛମୂର୍ଖପତିତୈଃ କ୍ରୂରୈଃ ସଂତାପବେଦିଭିଃ ।
ଦୁର୍ଜନୈରବଲିପ୍ତୈଶ୍ଚ କ୍ଷୁଦ୍ରୈଃ ସହ ନ ସଂବଦେତ୍ ॥ ୭-୮୫ ॥
ନାଧାର୍ମିକନୃପାକ୍ରାନ୍ତେ ନ ଦଂଶମଶକାବୃତେ ।
ନାତିଶୀତଜଲାକୀର୍ଣେ ଦେଶେ ରୋଗପ୍ରଦେ ବସେତ୍ ॥ ୭-୮୬ ॥
ନାସନଂ ଶୟନଂ ପାନଂ ନମସ୍କାରାଭିବାଦନମ୍ ।
ସୋପାନତ୍କଃ ପ୍ରକୁର୍ୱୀତ ଶିବପୁସ୍ତକବାଚନମ୍ ॥ ୭-୮୭ ॥
ଆଚାର୍ୟଂ ଦୈବତଂ ତୀର୍ଥମୁଦ୍ଧୂତୋଦଂ ମୃଦଂ ଦଧି ।
ବଟମଶ୍ୱତ୍ଥକପିଲାଂ ଦୀକ୍ଷିତୋଦଧିସଂଗମମ୍ ॥ ୭-୮୮ ॥
ଯାନି ଚୈଷାଂ ପ୍ରକାରାଣି ମଙ୍ଗଲାନୀହ କାନିଚିତ୍ ।
ଶିବାୟେତି ନମସ୍କୃତ୍ୱା ପ୍ରୋକ୍ତମେତତ୍ପ୍ରଦକ୍ଷିଣମ୍ ॥ ୭-୮୯ ॥
ଉପାନଚ୍ଛତ୍ତ୍ରବସ୍ତ୍ରାଣି ପବିତ୍ରଂ କରକଂ ସ୍ରଜମ୍ ।
ଆସନଂ ଶୟନଂ ପାନଂ ଧୃତମନ୍ୟୈର୍ନ ଧାରୟେତ୍ ॥ ୭-୯୦ ॥
ପାଲାଶମାସନଂ ଶୟ୍ୟାଂ ପାଦୁକେ ଦନ୍ତଧାବନମ୍ ।
ବର୍ଜୟେଚ୍ଚାପି ନିର୍ୟାସଂ ରକ୍ତଂ ନ ତୁ ସମୁଦ୍ଭବମ୍ ॥ ୭-୯୧ ॥
ସଂଧ୍ୟାମୁପାସ୍ୟ କୁର୍ୱୀତ ନିତ୍ୟଂ ଦେହପ୍ରସାଧନମ୍ ।
ସ୍ପୃଶେଦ୍ୱନ୍ଦେଚ୍ଚ କପିଲାଂ ପ୍ରଦଦ୍ୟାଚ୍ଚ ଗବାଂ ହିତମ୍ ॥ ୭-୯୨ ॥
ଯଃ ପ୍ରଦଦ୍ୟାଦ୍ଗବାଂ ସମ୍ୟକ୍ଫଲାନି ଚ ବିଶେଷତଃ ।
କ୍ଷେତ୍ରମୁଦ୍ଦାମୟେଚ୍ଚାପି ତସ୍ୟ ପୁଣ୍ୟଫଲଂ ଶୃଣୁ ॥ ୭-୯୩ ॥
ଯାବତ୍ତତ୍ପତ୍ତ୍ରକୁସୁମ- କନ୍ଦମୂଲଫଲାନି ଚ ।
ତାବଦ୍ୱର୍ଷସହସ୍ରାଣି ଶିବଲୋକେ ମହୀୟତେ ॥ ୭-୯୪ ॥
କୃଶରୋଗାର୍ତବୃଦ୍ଧାନାଂ ତ୍ୟକ୍ତାନାଂ ନିର୍ଜନେ ବନେ ।
କ୍ଷୁତ୍ପିପାସାତୁରାଣାଂ ଚ ଗବାଂ ବିହ୍ୱଲଚେତସାମ୍ ॥ ୭-୯୫ ॥
ନୀତ୍ୱା ଯସ୍ତୃଣତୋୟାନି ବନେ ଯତ୍ନାତ୍ପ୍ରୟଚ୍ଛତି ।
କରୋତି ଚ ପରିତ୍ରାଣଂ ତସ୍ୟ ପୁଣ୍ୟଫଲଂ ଶୃଣୁ ॥ ୭-୯୬ ॥
କୁଲୈକବିଂଶକୋପେତଃ ପତ୍ନୀପୁତ୍ରାଦିସଂୟୁତଃ ।
ମିତ୍ରଭୃତ୍ୟୈରୁପେତଶ୍ଚ ଶ୍ରୀମଚ୍ଛିବପୁରଂ ବ୍ରଜେତ୍ ॥ ୭-୯୭ ॥
ତତ୍ର ଭୁକ୍ତ୍ୱା ମହାଭୋଗାନ୍ୱିମାନୈଃ ସାର୍ୱକାମିକୈଃ ।
ସ ମହାପ୍ରଲୟଂ ଯାବତ୍ତଦନ୍ତେ ମୁକ୍ତିମାପ୍ନୁୟାତ୍ ॥ ୭-୯୮ ॥
ଗୋବ୍ରାହ୍ମଣପରିତ୍ରାଣଂ ସକୃତ୍କୃତ୍ୱା ପ୍ରୟତ୍ନତଃ ।
ମୁଚ୍ୟତେ ପଞ୍ଚଭିର୍ଘୋରୈର୍ମହଦ୍ଭିଃ ପାତକୈର୍ଦ୍ରୁତମ୍ ॥ ୭-୯୯ ॥
ଅହିଂସା ସତ୍ୟମସ୍ତେୟଂ ବ୍ରହ୍ମଚର୍ୟମକଲ୍କତା ।
ଅକ୍ରୋଧୋ ଗୁରୁଶୁଶ୍ରୂଷା ଶୌଚଂ ସଂତୋଷମାର୍ଜବମ୍ ॥ ୭-୧୦୦ ॥
ଅହିଂସାଦ୍ୟା ଯମାଃ ପଞ୍ଚ ଯତୀନାଂ ପରିକୀର୍ତିତାଃ ।
ଅକ୍ରୋଧାଦ୍ୟାଶ୍ଚ ନିୟମାଃ ସିଦ୍ଧିବୃଦ୍ଧିକରାଃ ସ୍ମୃତାଃ ॥ ୭-୧୦୧ ॥
ଦଶଲାକ୍ଷଣିକୋ ଧର୍ମଃ ଶିବାଚାରଃ ପ୍ରକୀର୍ତିତଃ ।
ଯୋଗୀନ୍ଦ୍ରାଣାଂ ବିଶେଷେଣ ଶିବୟୋଗପ୍ରସିଦ୍ଧୟେ ॥ ୭-୧୦୨ ॥
ନ ବିନ୍ଦତି ନରୋ ଯୋଗଂ ପୁତ୍ରଦାରାଦିସଂଗତଃ ।
ନିବଦ୍ଧଃ ସ୍ନେହପାଶେନ ମୋହସ୍ତମ୍ଭବଲୀୟସା ॥ ୭-୧୦୩ ॥
ମୋହାତ୍କୁଟୁମ୍ବସଂସକ୍ତସ୍ତୃଷ୍ଣୟା ଶୃଙ୍ଖଲୀକୃତଃ ।
ବାଲୈର୍ବଦ୍ଧସ୍ତୁ ଲୋକୋ ଽୟଂ ମୁସଲେନାଭିହନ୍ୟତେ ॥ ୭-୧୦୪ ॥
ଇମେ ବାଲାଃ କଥଂ ତ୍ୟାଜ୍ୟା ଜୀବିଷ୍ୟନ୍ତି ମୟା ବିନା ।
ମୋହାଦ୍ଧି ଚିନ୍ତୟତ୍ୟେବଂ ପରମାର୍ଥୌ ନ ପଶ୍ୟତି ॥ ୭-୧୦୫ ॥
ସମ୍ପର୍କାଦୁଦରେ ନ୍ୟସ୍ତଃ ଶୁକ୍ରବିନ୍ଦୁରଚେତନଃ ।
ସ ପିତ୍ରା କେନ ଯତ୍ନେନ ଗର୍ଭସ୍ଥଃ ପରିପାଲିତଃ ॥ ୭-୧୦୬ ॥
କର୍କଶାଃ କଠିନା ଭକ୍ଷା ଜୀର୍ୟନ୍ତେ ଯତ୍ର ଭକ୍ଷିତାଃ ।
ତସ୍ମିନ୍ନେବୋଦରେ ଶୁକ୍ରଂ କିଂ ନ ଜୀର୍ୟତି ଭକ୍ଷ୍ୟବତ୍ ॥ ୭-୧୦୭ ॥
ଯେନୈତଦ୍ୟୋଜିତଂ ଗର୍ଭେ ଯେନ ଚୈବ ବିବର୍ଧିତମ୍ ।
ତେନୈବ ନିର୍ଗତ୍ଂ ଭୂୟଃ କର୍ମଣା ସ୍ୱେନ ପାଲ୍ୟତେ ॥ ୭-୧୦୮ ॥
ନ କଶ୍ଚିତ୍କସ୍ୟଚିତ୍ପୁତ୍ରଃ ପିତା ମାତା ନ କସ୍ୟଚିତ୍ ।
ଯତ୍ସ୍ୱୟଂ ପ୍ରାକ୍ତନଂ କର୍ମ ପିତା ମାତେତି ତତ୍ସ୍ମୃତମ୍ ॥ ୭-୧୦୯ ॥
ଯେନ ଯତ୍ର କୃତଂ କର୍ମ ସ ତତ୍ରୈବ ପ୍ରଜାୟତେ ।
ପିତରୌ ଚାସ୍ୟ ଦାସତ୍ୱଂ କୁରୁତସ୍ତତ୍ପ୍ରଚୋଦିତୌ ॥ ୭-୧୧୦ ॥
ନ କଶ୍ଚିତ୍କସ୍ୟଚିଚ୍ଛକ୍ତଃ କର୍ତୁଂ ଦୁଃଖଂ ସୁଖାନି ଚ ।
କରୋତି ପ୍ରାକ୍ତନଂ କର୍ମ ମୋହାଲ୍ଲୋକସ୍ୟ କେବଲମ୍ ॥ ୭-୧୧୧ ॥
କର୍ମଦାୟାଦସଂବନ୍ଧାଦୁପକାରଃ ପରସ୍ପରମ୍ ।
ଦୃଶ୍ୟତେ ନାପକାରଶ୍ଚ ମୋହେନାତ୍ମନି ମନ୍ୟତେ ॥ ୭-୧୧୨ ॥
ଈଶ୍ୱରାଧିଷ୍ଠିତଂ କର୍ମ ଫଲତୀହ ଶୁଭାଶୁଭମ୍ ।
ଗ୍ରାମସ୍ୱାମିପ୍ରସାଦେନ ସୁକୃତଂ କର୍ଷଣଂ ଯଥା ॥ ୭-୧୧୩ ॥
ଦ୍ୱୟଂ ଦେବତ୍ୱମୋକ୍ଷାୟ ମମେତି ନ ମମେତି ଚ ।
ମମେତି ବଧ୍ୟତେ ଜନ୍ତୁର୍ନ ମମେତି ବିମୁଚ୍ୟତେ ॥ ୭-୧୧୪ ॥
ଦ୍ୱ୍ୟକ୍ଷରଂ ଚ ଭବେନ୍ମୃତ୍ୟୁସ୍ତ୍ର୍ୟକ୍ଷରଂ ବ୍ରହ୍ମ ଶାଶ୍ୱତମ୍ ।
ମମେତି ଦ୍ୱ୍ୟକ୍ଷରଂ ମୃତ୍ୟୁସ୍ତ୍ର୍ୟକ୍ଷରଂ ନ ମମେତି ଚ ॥ ୭-୧୧୫ ॥
ତସ୍ମାଦାତ୍ମନ୍ୟହଂକାରମୁତ୍ସୃଜ୍ୟ ପ୍ରବିଚାରତଃ ।
ବିଧୂୟାଶେଷସଙ୍ଗାଂଶ୍ଚ ମୋକ୍ଷୋପାୟଂ ବିଚିନ୍ତୟେତ୍ ॥ ୭-୧୧୬ ॥
ଜ୍ଞାନାଦ୍ୟୋଗପରିକ୍ଲେଶଂ କୁପ୍ରାବରଣଭୋଜନମ୍ ।
କୁଚର୍ୟାଂ କୁନିବାସଂ ଚ ମୋକ୍ଷାର୍ଥୀ ନ ବିଚିନ୍ତୟେତ୍ ॥ ୭-୧୧୭ ॥
ନ ଦୁଃଖେନ ବିନା ସୌଖ୍ୟଂ ଦୃଶ୍ୟତେ ସର୍ୱଦେହିନାମ୍ ।
ଦୁଃଖଂ ତନ୍ମାତ୍ରକଂ ଜ୍ଞେୟଂ ସୁଖମାନନ୍ତ୍ୟମୁତ୍ତମମ୍ ॥ ୭-୧୧୮ ॥
ସେବାୟାଂ ପାଶୁପାଲ୍ୟେ ଚ ବାନିଜ୍ୟେ କୃଷିକର୍ମଣି ।
ତୁଲ୍ୟେ ସତି ପରିକ୍ଲେଶେ ବରଂ କ୍ଲେଶୋ ବିମୁକ୍ତୟେ ॥ ୭-୧୧୯ ॥
ସ୍ୱର୍ଗାପବର୍ଗୟୋରେକଂ ଯଃ ଶୀଘ୍ରଂ ନ ପ୍ରସାଧୟେତ୍ ।
ଯାତି ତେନୈବ ଦେହେନ ସ ମୃତସ୍ତପ୍ୟତେ ଚିରମ୍ ॥ ୭-୧୨୦ ॥
ଯଦବଶ୍ୟଂ ପରାଧୀନୈସ୍ତ୍ୟଜନୀୟଂ ଶରୀରକମ୍ ।
କସ୍ମାତ୍ତେନ ବିମୂଢାତ୍ମା ନ ସାଧୟତି ଶାଶ୍ୱତମ୍ ॥ ୭-୧୨୧ ॥
ଯୌବନସ୍ଥା ଗୃହସ୍ଥାଶ୍ଚ ପ୍ରାସାଦସ୍ଥାଶ୍ଚ ଯେ ନୃପାଃ ।
ସର୍ୱ ଏବ ବିଶୀର୍ୟନ୍ତେ ଶୁଷ୍କସ୍ନିଗ୍ଧାନ୍ନଭୋଜନାଃ ॥ ୭-୧୨୨ ॥
ଅନେକଦୋଷଦୁଷ୍ଟସ୍ୟ ଦେହସ୍ୟୈକୋ ମହାନ୍ଗୁଣହ୍ ।
ଯାଂ ଯାମବସ୍ଥାମାପ୍ନୋତି ତାଂ ତାମେବାନୁବର୍ତତେ ॥ ୭-୧୨୩ ॥
ମନ୍ଦଂ ପରିହରନ୍କର୍ମ ସ୍ୱଦେହମନୁପାଲୟେତ୍ ।
ବର୍ଷାସୁ ଜୀର୍ଣକଟବତ୍ତିଷ୍ଠନ୍ନପ୍ୟବସୀଦତି ॥ ୭-୧୨୪ ॥
ନ ତେ ଽତ୍ର ଦେହିନଃ ସନ୍ତି ଯେ ତିଷ୍ଠନ୍ତି ସୁନିଶ୍ଚଲାଃ ।
ସର୍ୱେ କୁର୍ୱନ୍ତି କର୍ମାଣି ବିକୃଶାଃ ପୂର୍ୱକର୍ମଭିଃ ॥ ୭-୧୨୫ ॥
ତୁଲ୍ୟେ ସତ୍ୟପି କର୍ତବ୍ୟେ ବରଂ କର୍ମ କୃତଂ ପରମ୍ ।
ଯଃ କୃତ୍ୱା ନ ପୁନଃ କୁର୍ୟାନ୍ନାନାକର୍ମ ଶୁଭାଶୁଭମ୍ ॥ ୭-୧୨୬ ॥
ତସ୍ମାଦନ୍ତର୍ବହିଶ୍ଚିନ୍ତାମନେକାକାରସଂସ୍ଥିତାମ୍ ।
ସଂତ୍ୟଜ୍ୟାତ୍ମହିତାର୍ଥାୟ ସ୍ୱାଧ୍ୟାୟଧ୍ୟାନମଭ୍ୟସେତ୍ ॥ ୭-୧୨୭ ॥
ବିବିକ୍ତେ ବିଜନେ ରମ୍ୟେ ପୁଷ୍ପାଶ୍ରମବିଭୂଷିତେ ।
ସ୍ଥାନଂ କୃତ୍ୱା ଶିବସ୍ଥାନେ ଧ୍ୟାୟେଚ୍ଛାନ୍ତଂ ପରଂ ଶିବମ୍ ॥ ୭-୧୨୮ ॥
ଯେ ଽତିରମ୍ୟାଣ୍ୟରଣ୍ୟାନି ସୁଜଲାନି ଶିବାନି ତୁ ।
ବିହାୟାଭିରତା ଗ୍ରାମେ ପ୍ରାୟସ୍ତେ ଦୈବମୋହିତାଃ ॥ ୭-୧୨୯ ॥
ବିବେକିନଃ ପ୍ରଶାନ୍ତସ୍ୟ ଯତ୍ସୁଖଂ ଧ୍ୟାୟତଃ ଶିବମ୍ ।
ନ ତତ୍ସୁଖଂ ମହେନ୍ଦ୍ରସ୍ୟ ବ୍ରହ୍ମଣଃ କେଶବସ୍ୟ ବା ॥ ୭-୧୩୦ ॥
ଇତି ନାମାମୃତଂ ଦିବ୍ୟଂ ମହାକାଲାଦବାପ୍ତବାନ୍ ।
ବିସ୍ତରେଣାନୁପୂର୍ୱାଚ୍ଚ ଋଷ୍ୟାତ୍ରେୟଃ(?) ସୁନିଶ୍ଚିତମ୍ ॥ ୭-୧୩୧ ॥
ପ୍ରଜ୍ଞାମଥା ବିନିର୍ମଥ୍ୟ(?) ଶିବଜ୍ଞାନମହୋଦଧିମ୍ ।
ଋଷ୍ୟାତ୍ରେୟଃ ସମୁଦ୍ଧୃତ୍ୟ ପ୍ରାହେଦମଣୁମାତ୍ରକମ୍ ॥ ୭-୧୩୨ ॥
ଶିବଧର୍ମେ ମହାଶାସ୍ତ୍ରେ ଶିବଧର୍ମସ୍ୟ ଚୋତ୍ତରେ ।
ଯଦନୁକ୍ତଂ ଭବେତ୍କିଂଚିତ୍ତଦତ୍ର ପରିକୀର୍ତିତମ୍ ॥ ୭-୧୩୩ ॥
ତ୍ରିଦୈବତ୍ୟମିଦଂ ଶାସ୍ତ୍ରଂ ମୁନୀନ୍ଦ୍ରାତ୍ରେୟଭାଷିତମ୍ ।
ତିର୍ୟଙ୍ମନୁଜଦେବାନାଂ ସର୍ୱେଷାଂ ଚ ବିମୁକ୍ତିଦମ୍ ॥ ୭-୧୩୪ ॥
ନନ୍ଦିସ୍କନ୍ଦମହାକାଲାସ୍ତ୍ରୟୋ ଦେବାଃ ପ୍ରକୀର୍ତିତାଃ ।
ଚନ୍ଦ୍ରାତ୍ରେୟସ୍ତଥାତ୍ରିଶ୍ଚ ଋଷ୍ୟାତ୍ରେୟୋ ମୁନିତ୍ରୟମ୍ ॥ ୭-୧୩୫ ॥
ଏତୈର୍ମହାତ୍ମବିଃ ପ୍ରୋକ୍ତାଃ ଶିବଧର୍ମାଃ ସମାସତଃ ।
ସର୍ୱଲୋକୋପକାରାର୍ଥଂ ନମସ୍ତେଭ୍ୟଃ ସଦା ନମଃ ॥ ୭-୧୩୬ ॥
ତେଷାଂ ଶିଷ୍ୟପ୍ରଶିଷ୍ୟୈଶ୍ଚ ଶିବଧର୍ମପ୍ରବକ୍ତୃଭିଃ ।
ବ୍ୟାପ୍ତଂ ଜ୍ଞାନସରଃ ଶାର୍ୱଂ ବିକଚୈରିବ ପଙ୍କଜୈଃ ॥ ୭-୧୩୭ ॥
ଯେ ଶ୍ରାବୟନ୍ତି ସତତଂ ଶିବଧର୍ମଂ ଶିବାର୍ଥିନାମ୍ ।
ତେ ରୁଦ୍ରାସ୍ତେ ମୁନୀନ୍ଦ୍ରାଶ୍ଚ ତେ ନମସ୍ୟାଃ ସ୍ୱଭକ୍ତିତଃ ॥ ୭-୧୩୮ ॥
ଯେ ସମୁତ୍ଥାୟ ଶୃଣ୍ୱନ୍ତି ଶିବଧର୍ମଂ ଦିନେ ଦିନେ ।
ତେ ରୁଦ୍ରା ରୁଦ୍ରଲୋକେଶା ନ ତେ ପ୍ରକୃତିମାନୁଷାଃ ॥ ୭-୧୩୯ ॥
ଶିବୋପନିଷଦଂ ହ୍ୟେତଦଧ୍ୟାୟୈଃ ସପ୍ତଭିଃ ସ୍ମୃତମ୍ ।
ଋଷ୍ୟାତ୍ରେୟସଗୋତ୍ରେଣ ମୁନିନା ହିତକାମ୍ୟଯା ॥ ୭-୧୪୦ ॥
॥ ଇତି ଶିବୋପନିଷଦି ଶିବାଚାରାଧ୍ୟାୟଃ ସପ୍ତମଃ ॥
॥ ଇତି ଶିବୋପନିଷତ୍ସମାପ୍ତା ॥
Also Read:
Shiva Upanishad Lyrics in Sanskrit | English | Marathi | Bengali | Gujarati | Kannada | Malayalam | Oriya | Telugu | Tamil