Shivapadadi Keshanta Varnana Stotram in Kannada:
॥ ಶಿವಪಾದಾದಿ ಕೇಶಾನ್ತ ವರ್ಣನ ಸ್ತೋತ್ರಮ್ ॥
ಕಲ್ಯಾಣಂ ನೋ ವಿಧತ್ತಾಂ ಕಟಕತಟಲಸತ್ಕಲ್ಪವಾಹೀನಿಕುಞ್ಜ-
ಕ್ರೀಡಾಸಂಸಕ್ತವಿದ್ಯಾಧರನಿವಹವಧೂಗೀತರುದ್ರಾಪದಾನಃ|
ತಾರೈರ್ಹೇರಮ್ಬನಾದೈಸ್ತರಲಿತನಿನದತ್ತಾರಕಾರಾತಿಕೇಕೀ
ಕೈಲಾಸಃ ಶರ್ವನಿರ್ವೃತ್ಯಭಿಜನಕಪದಃ ಸರ್ವದಾ ಪರ್ವತೇನ್ದ್ರಃ || ೧ ||
ಯಸ್ಯ ಪ್ರಾಹುಃ ಸ್ವರೂಪಂ ಸಕಲದಿವಿಷದಾಂ ಸಾರಸರ್ವಸ್ವಯೋಗಂ
ಯತ್ಯೇಷುಃ ಶಾರ್ಙ್ಗಧನ್ವಾ ಸಮಜನಿ ಜಗತಾಂ ರಕ್ಷಣೇ ಜಾಗರೂಕಃ |
ಮೌರ್ವೀ ದರ್ವೀಕರಾಣಾಮಪಿ ಚ ಪರಿವೃಢಃ ಪೂಸ್ರಯೀ ಸಾ ಚ ಲಕ್ಷ್ಯಂ
ಸೋಽವ್ಯಾದವ್ಯಾಜಮಸ್ಮಾನಶಿವಭಿದನಿಶಂ ನಾಕಿನಾಂ ಶ್ರೀಪಿನಾಕಃ || ೨ ||
ಆತಙ್ಕಾವೇಗಹಾರೀ ಸಕಲದಿವಿಷದಾಮಙ್ಘ್ರಿಪದ್ಮಾಶ್ರಯಾಣಾಂ
ಮಾತಙ್ಗಾದ್ಯುಗ್ರದೈತ್ಯಪ್ರಕರತನುಗಲದ್ರಕ್ತಧಾರಾಕ್ತಧಾರಃ |
ಕ್ರೂರಃ ಸೂರಾಯುತಾನಾಮಪಿ ಚ ಪರಿಭವಂ ಸ್ವೀಯಭಾಸಾ ವಿತನ್ವನ್
ಘೋರಾಕಾರಃ ಕುಠಾರೋ ದೃಢತರದುರಿತಾಖ್ಯಾಟವೀಂ ಪಾಟಯೇನ್ನಃ |೩ ||
ಕಾಲಾರಾತೇಃ ಕರಾಗ್ರೇ ಕೃತವಸತಿರುರಃಶಾಣ ತಾತೋ ರಿಪೂಣಾಂ
ಕಾಲೇ ಕಾಲೇ ಕುಲಾದ್ರಿಪ್ರವರತನಯಯಾ ಕಲ್ಪಿತಸ್ನಹಲೇಪಃ |
ಪಾಯಾನ್ನಃ ಪಾವಕಾರ್ಚಿಃಪ್ರಸರಸಖಮುಖಃ ಪಾಪಹನ್ತಾ ನಿತಾನ್ತಂ
ಶೂಲಃ ಶ್ರೀಪಾದಸೇವಾಭಜನರಸಜುಷಾಂ ಪಾಲನೈಕಾನ್ತಶೀಲಃ || ೪ ||
ದೇವಸ್ಯಾಙ್ಕಾಶ್ರಯಾಯಾಃ ಕುಲಗಿರಿದುಹಿತುರ್ನೇತ್ರಕೋಣಪ್ರಚಾರ-
ಪ್ರಸ್ತಾರಾನತ್ಯುದಾರಾನ್ಪಿಪಟಿಷುರಿವ ಯೋ ನಿತ್ಯಮತ್ಯಾದರೇಣ |
ಆಧತ್ತೇ ಭಙ್ಗಿತುಙ್ಗೈರನಿಶಮವಯವೈರನ್ತರಙ್ಗಂ ಸಮೋದಂ
ಸೋಮಾಪೀಡಸ್ಯ ಸೋಽಯಂ ಪ್ರದಿಶತು ಕುಶಲಂ ಪಾಣಿರಙ್ಗಃ ಕುರಙ್ಗಃ || ೫ ||
ಕಣ್ಠಪ್ರಾನ್ತಾವಸಜ್ಜತ್ಕನಕಮಯಮಹಾಘಣ್ಟಿಕಾಘೋರಘೋಷೈಃ
ಕಣ್ಠಾರಾವೈರಕುಣ್ಠೈರಪಿ ಭರಿತಜಗಚ್ಚಕ್ರವಾಲಾನ್ತರಾಲಃ |
ಚಣ್ರ‍್ಡಃ ಪ್ರೋದ್ದಣ್ಡಶೃಙ್ಗಃ ಕಕುದಕವಲಿತೋತ್ತುಙ್ಗಕೈಲಾಸಶ್ರೃಙ್ಗಃ
ಕಣ್ಠೇ ಕಾಲಸ್ಯ ವಾಹಃ ಶಮಯತು ಶಮಲಂ ಶಾಶ್ವ್ತಃ ಶಾಕ್ಕರೇನ್ದ್ರಃ || ೬ ||
ನಿರ್ಯದ್ದಾನಾಮ್ಬುಧಾರಾಪರಿಮಳತರಳೀಭೂತಲೋಲಮ್ಬಪಾಲೀಝಙ್ಕಾರೈಃ
ಶಙ್ಕರಾದ್ರೇಃ ಶಿಖರಶತದರೀಃ ಪೂರಯನ್ಭೂರೀಘೋಷೈಃ |
ಶಾರ್ಘಃ ಸೌವರ್ಣಶೈಲಪ್ರತಿಮಪೃಥುವಪುಃ ಸರ್ವವಿಘ್ನಾಪಹರ್ತಾ
ಶರ್ವಾಣ್ಯಾಃ ಪೂರ್ವಸೂನುಃ ಸ ಭವತು ಭವತಾಂ ಸ್ವಸ್ತಿದೋ ಹಸ್ತಿವಕ್ತ್ರಃ || ೭ ||
ಯಃ ಪುಣ್ಯೈರ್ದೇವತಾನಾಂ ಸಮಜನಿ ಶಿವಯೋಃ ಶ್ಲಾಘ್ಯವೀರ್ಯೈಕಮತ್ಯಾ
ಯನ್ನಾಮ್ನಿ ಶ್ರೂಯಮಾಣೇ ದಿತಿಜಭಟಘಟಾ ಭೀತಿಭಾರಂ ಭಜನ್ತೇ |
ಭೂಯಾತ್ಸೋಽಯಂ ವಿಭೂತ್ಯೈ ನಿಶಿತಶರಶಿಖಾಪಾಟಿತಕ್ರೌಞ್ಚಶೈಲಃ
ಸಂಸಾರಾಗಾಧಕೂಪೋದರಪತಿತಸಮುತ್ತಾರಕಸ್ತಾರಕಾರಿಃ || ೮ ||
ಆರೂಢಃ ಪ್ರೌಢವೇಗಪ್ರವಿಜಿತಪವನಂ ತುಙ್ಗತುಙ್ಗಂ ತುರಙ್ಗಂ
ಚೈಲಂ ನೀಲಂ ವಸಾನಃ ಕರತಲವಿಲಸತ್ಕಾಣ್ಡಕೋದಣ್ಡದಣ್ಡಃ |
ರಾಗದ್ವೇಷಾದಿನಾನಾವಿಧಮೃಗಪಟಲೀಭೀತಿಕೃದ್ಭೂತಭರ್ತಾ
ಕುರ್ವನ್ನಾಖೇಟಲೀಲಾಂ ಪರಿಲಸತು ಮನಃ ಕಾನನೇ ಮಾಮಕೀನೇ || ೯ ||
ಅಮ್ಭೋಜಾಭ್ಯಾಂ ಚ ರಮ್ಭಾರಥಚರಣಲತಾದ್ವನ್ದ್ವಕುಮ್ಭೀನ್ದ್ರಕುಮ್ಭೈ-
ರ್ಬಿಮ್ಬೇನೇನ್ದೋಶ್ಚ ಕಮ್ಬೋರುಪರಿ ವಿಲಸತಾ ವಿದ್ರುಮೇಣೋತ್ಪಲಾಭ್ಯಾಮ್ |
ಅಮ್ಭೋದೇನಾಪಿ ಸಂಭಾವಿತಮುಪಜನಿತಾಡಮ್ಬರಂ ಶಮ್ಬರಾರೇಃ
ಶಮ್ಭೋಃ ಸಂಭೋಗಯೋಗ್ಯಂ ಕಿಮಪಿ ಧನಮಿದಂ ಸಂಭವೇತ್ಸಂಪದೇ ನಃ || ೧೦ ||
ವೇಣೀಸೌಭಾಗ್ಯವಿಸ್ಮಾಪಿತತಪನಸುತಾಚಾರುವೇಣೀವಿಲಾಸಾನ್
ವಾಣೀನಿರ್ಧೂತವಾಣೀಕರತಲವಿಧೃತೋದಾರವೀಣಾವಿರಾವಾನ್ |
ಏಣೀನೇತ್ರಾನ್ತಭಙ್ಗೀನಿರಸನನಿಪುಣಾಪಾಙ್ಗಕೋಣಾನುಪಾಸೇ
ಶೋಣಾನ್ಪ್ರಾಣಾನುದೂಢಪ್ರತಿನವಸುಷಮಾಕನ್ದಲಾನಿನ್ದುಮೌಲೇಃ || ೧೧ ||
ನೃತ್ತಾರಮ್ಭೇಷು ಹಸ್ತಾಹತಮುರಜಧಿಮೀಧಿಕ್ಕೃತೈರತ್ಯುದಾರೈ-
ಶ್ಚಿತ್ತಾನನ್ದಂ ವಿಧತ್ತೇ ಸದಸಿ ಭಗವತಃ ಸನ್ತತಂ ಯಃ ಸ ನನ್ದೀ |
ಚಣ್ಡೀಶಾದ್ಯಾಸ್ತಥಾಽನ್ಯೇ ಚತುರಗುಣಗಣಪ್ರೀಣಿತಸ್ವಾಮಿಸತ್ಕಾ-
ರೋತ್ಕರ್ಷೋದ್ಯತ್ಪ್ರಸಾದಾಃ ಪ್ರಮಥಪರಿವೃಢಾಃ ಸನ್ತು ಸನ್ತೋಷಿಣೋ ನಃ || ೧೨ ||
ಮುಕ್ತಾಮಾಣಿಕ್ಯಜಾಲೈಃ ಪರಿಕಲಿತಮಹಾಸಾಲಮಾಲೋಕನೀಯಂ
ಪ್ರತ್ಯುಪ್ತಾನರ್ಧರತ್ನೈರ್ದಿಶಿ ದಿಶಿ ಭವನೈಃ ಕಲ್ಪಿತೈರ್ದಿಕ್ಪತೀನಾಮ್ |
ಉದ್ಯಾನೈರದ್ರಿಕನ್ಯಾಪರಿಜನವನಿತಾಮಾನನೀಯೈಃ ಪರಿತಂ
ಹೃದ್ಯಂ ಹೄದ್ಯಸ್ತು ನಿತ್ಯಂ ಮಮ ಭುವನಪತೇರ್ಧಾಮ ಸೋಮಾರ್ಧಮೌಲೇಃ || ೧೩ ||
ಸ್ತಮ್ಭೈರ್ಜಮ್ಭಾರಿರತ್ನಪ್ರವರವಿರಚಿತೈಃ ಸಂಭೃತೋಪಾನ್ತಭಾಗಂ
ಶುಮ್ಭತ್ಸೋಪಾನಮಾರ್ಗಂ ಶುಚಿಮಣಿನಿಚಯೈರ್ಗುಮ್ಫಿತಾನಲ್ಪಶಿಲ್ಪಮ್ |
ಕುಮ್ಭೈಃ ಸಂಪೂರ್ಣಶೋಭಂ ಶಿರಸಿ ಸುಘಟಿತೈಃ ಶಾತಕುಮ್ಭೈರಪಙ್ಕೈಃ
ಶಮ್ಭೋಃ ಸಂಭಾವನೀಯಂ ಸಕಲಮುನಿಜನೈಃ ಸ್ವಸ್ತಿದಂ ಸ್ಯಾತ್ಸದಾ ನಃ || ೧೪ ||
ನ್ಯಸ್ತೋ ಮಧ್ಯೇ ಸಭಾಯಾಃ ಪರಿಸರವಿಲಸತ್ಪಾದಪೀಠಾಭಿರಾಮೋ
ಹೃದ್ಯಃ ಪಾದೈಶ್ಚತುರ್ಭಿಃ ಕನಕಮಣಿಮಯೈರುಚ್ಚಕೈರುಜ್ಜ್ವಲಾತ್ಮಾ |
ವಾಸೋರತ್ನೇನ ಕೇನಾಪ್ಯಧಿಕಮೃದುತರೇಣಾಸ್ತೃತೋ ವಿಸ್ತೃತಶ್ರೀಪೀಠಃ
ಪೀಡಾಭರಂ ನಃ ಶಮಯತು ಶಿವಯೋಃ ಸ್ವೈರಸಂವಾಸಯೋಗ್ಯಃ || ೧೫ ||
ಆಸೀನಸ್ಯಾಧಿಪೀಠಂ ತ್ರಿಜಗದಧಿಪತೇರಙ್ಘ್ರಿಪೀಠಾನುಷಕ್ತೌ
ಪಾಥೋಜಾಭೋಗಭಾಜೌ ಪರಿಮೃದುಲತಲೋಲ್ಲಾಸಿಪದ್ಮಾಭಿಲೇಖೌ |
ಪಾತಾಂ ಪಾದಾವುಭೌ ತೌ ನಮದಮರಕಿರೀಟೋಲ್ಲಸಚ್ಚಾರುಹೀರ-
ಶ್ರೇಣೀಶೋಣಾಯಮಾನೋನ್ನತ ನಖದಶಕೋದ್ಭಾಸಮಾನೌ ಸಮಾನೌ || ೧೬ ||
ಯನ್ನಾದೋ ವೇದವಾಚಾಂ ನಿಗದತಿ ನಿಖಿಲಂ ಲಕ್ಷಣಂ ಪಕ್ಷಿಕೇತುರ್-
ಲಕ್ಷ್ಮೀಸಂಭೋಗಸೌಖ್ಯಂ ವಿರಚಯತಿ ಯಯೋಶ್ಚಾಪರೇ ರೂಪಭೇದೇ |
ಶಂಭೋಃ ಸಂಭಾವನೀಯೇ ಪದಕಮಲಸಮಾಸಙ್ಗತಸ್ತುಙ್ಗಶೋಭೇ
ಮಾಙ್ಗಲ್ಯಂ ನಃ ಸಮಗ್ರಂ ಸಕಲಸುಖಕರೇ ನೂಪುರೇ ಪೂರಯೇತಾಮ್ || ೧೭ ||
ಅಙ್ಗೇ ಶೃಙ್ಗಾರಯೋನೇಃ ಸಪದಿ ಶಲಭತಾಂ ನೇತ್ರವಹ್ನೌ ಪ್ರಯಾತೇ
ಶತ್ರೋರುದ್ಧೃತ್ಯ ತಸ್ಮಾದಿಷುಧಿಯುಗಮಧೋ ನ್ಯಸ್ತಮಗ್ರೇ ಕಿಮೇತತ್ |
ಶಙ್ಕಾಮಿತ್ಥಂ ನತಾನಾಮಮರಪರಿಷದಾಮನ್ತರಙ್ಕೂರಯತ್ತತ್-
ಸಂಘಾತಂ ಚಾರು ಜಙ್ಘಾಯುಗಮಖಿಲಪತೇರಂಹಸಾ ಸಂಹರೇನ್ನಃ || ೧೮ ||
ಜಾನುದ್ವನ್ದ್ವೇನ ಮೀನಧ್ವಜನೃವರಸಮುದ್ಗೋಪಮಾನೇನ ಸಾಕಂ
ರಾಜನ್ತೌ ರಾಜರಮ್ಭಾಕರಿಕರಕನಕಸ್ತಮ್ಭಸಂಭಾವನೀಯೌ |
ಊರೂ ಗೌರೀಕರಾಮ್ಭೋರುಹಸರಸಸಮಾಮರ್ದನಾನನ್ದಭಾಜೌ
ಚಾರೂ ದೂರೀಕ್ರಿಯೇತಾಂ ದುರಿತಮುಪಚಿತಂ ಜನ್ಮಜನ್ಮಾನ್ತರೇ ನಃ || ೧೯ ||
ಆಮುಕ್ತಾನರ್ಘರತ್ನಪ್ರಕರಕರಪರಿಷ್ವಕ್ತಕಲ್ಯಾಣಕಾಞ್ಚೀ-
ದಾಮ್ನಾ ಬದ್ಧೇನ ದುಗ್ಧದ್ಯುತಿನಿಚಯಮುಷಾ ಚೀನಪಟ್ಟಾಮ್ಬರೇಣ |
ಸಂವೀತೇ ಶೈಲಕನ್ಯಾಸುಚರಿತಪರಿಪಾಕಾಯಮಾನೇ ನಿತಮ್ಬೇ
ನಿತ್ಯಂ ನರ್ನರ್ತು ಚಿತ್ತಂ ಮಮ ನಿಖಿಲಜಗತ್ಸ್ವಾಮಿನಃ ಸೋಮಮೌಲೇಃ || ೨೦ ||
ಸನ್ಧ್ಯಾಕಾಲಾನುರಜ್ಯದ್ದಿನಕರಸರುಚಾ ಕಾಲಧೌತೇನ ಗಾಢಂ
ವ್ಯಾನದ್ಧಃ ಸ್ನಿಗ್ಧಮುಗ್ಧಃ ಸರಸಮುದರಬನ್ಧೇನ ವೀತೋಪಮೇನ |
ಉದ್ದೀಪ್ರೈಃ ಸ್ವಪ್ರಕಾಶೈರುಪಚಿತಮಹಿಮಾ ಮನ್ಮಥಾರೇರುದಾರೋ
ಮಧ್ಯೋ ಮಿಥ್ಯಾರ್ಥಸಘ್ರ್ಯಙ್ ಮಮ ದಿಶತು ಸದಾ ಸಙ್ಗತಿಂ ಮಙ್ಗಳಾನಾಮ್ || ೨೧ ||
ನಾಭೀಚಕ್ರಾಲವಾಲಾನ್ನವನವಸುಷಮಾದೋಹದಶ್ರೀಪರೀತಾ-
ದುದ್ಗಚ್ಛನ್ತೀ ಪುರಸ್ತಾದುದರಪಥಮತಿಕ್ರಮ್ಯ ವಕ್ಷಃ ಪ್ರಯಾನ್ತೀ |
ಶ್ಯಾಮಾ ಕಾಮಾಗಮಾರ್ಥಪ್ರಕಥನಲಿಪಿವದ್ಭಾಸತೇ ಯಾ ನಿಕಾಮಂ
ಸಾ ಮಾಂ ಸೋಮಾರ್ಧಮೌಲೇಃ ಸುಖಯತು ಸತತಂ ರೋಮವಲ್ಲೀಮತಲ್ಲೀ || ೨೨ ||
ಆಶ್ಲೇಷೇಷ್ವದ್ರಿಜಾಯಾಃ ಕಠಿನಕುಚತಟೀಲಿಪ್ತಕಾಶ್ಮೀರಪಙ್ಕ-
ವ್ಯಾಸಙ್ಗಾದ್ಯದುದ್ಯದರ್ಕದ್ಯುತಿಭಿರುಪಚಿತಸ್ಪರ್ಧಮುದ್ದಾಮಹೃದ್ಯಮ್ |
ದಕ್ಷಾರಾತೇರುದೂಢಪ್ರತಿನವಮಣಿಮಾಲಾವಲೀಭಾಸಮಾನಂ
ವಕ್ಷೋ ವಿಕ್ಷೋಭಿತಾಘಂ ಸತತನತಿಜುಷಾಂ ರಕ್ಷತಾದಕ್ಷತಂ ನಃ || ೨೩ ||
ವಾಮಾಙ್ಕೇ ವಿಸ್ಫುರನ್ತ್ಯಾಃ ಕರತಲವಿಲಸಚ್ಚಾರುರಕ್ತೋತ್ಪಲಾಯಾಃ
ಕಾನ್ತಾಯಾ ವಾಮವಕ್ಷೋರುಹಭರಶಿಖರೋನ್ಮರ್ದನವ್ಯಗ್ರಮೇಕಂ |
ಅನ್ಯಾಂಸ್ತ್ರೀನಪ್ಯುದಾರಾನ್ವರಪರಶುಮೃಗಾಲಙ್ಕೃತಾನಿನ್ದುಮೌಲೇರ್-
ಬಾಹೂನಾಬದ್ಧಹೇಮಾಙ್ಗದಮಣಿಕಟಕಾನನ್ತರಾಲೋಕಯಾಮಃ || ೨೪ ||
ಸಮ್ಮ್ರಾನ್ತಾಯಾಃ ಶಿವಾಯಾಃ ಪತಿವಿಲಯಭಿಯಾ ಸರ್ವಲೋಕೋಪತಾಪಾತ್-
ಸಂವಿಗ್ನಸ್ಯಾಪಿ ವಿಷ್ಣೋಃ ಸರಭಸಮುಭಯೋರ್ವಾರಣಪ್ರೇರಣಾಭ್ಯಾಮ್ |
ಮಧ್ಯೇ ತ್ರೈಶಙ್ಕವೀಯಾಮನುಭವತಿ ದಶಾಂ ಯತ್ರ ಹಾಲಾಹಲೋಷ್ಮಾ
ಸೋಽಯಂ ಸರ್ವಾಪದಾಂ ನಃ ಶಮಯತು ನಿಚಯಂ ನೀಲಕಣ್ಠಸ್ಯ ಕಣ್ಠಃ || ೨೫ ||
ಹೃದ್ಯೈರದ್ರೀನ್ದ್ರಕನ್ಯಾಮೃದುದಶನಪದೈರ್ಮುದ್ರಿತೋ ವಿದ್ರುಮಶ್ರೀ-
ರುದ್ದ್ಯೋತನ್ತ್ಯಾ ನಿತಾನ್ತಂ ಧವಳಧವಳಯಾ ಮಿಶ್ರಿತೋ ದನ್ತಕಾನ್ತ್ಯಾ |
ಮುಕ್ತಾಮಾಣಿಕ್ಯಜಾಲವ್ಯತಿಕರಸದೃಶಾ ತೇಜಸಾ ಭಾಸಮಾನಃ
ಸದ್ಯೋಜಾತಸ್ಯ ದದ್ಯಾದಧರಮಣಿರಸೌ ಸಂಪದಾಂ ಸಞ್ಚಯಂ ನಃ || ೨೬ ||
ಕರ್ಣಾಲಙ್ಕಾರನಾನಾಮಣಿನಿಕರರುಚಾಂ ಸಞ್ಚಯೈರಞ್ಚಿತಾಯಾಂ
ವರ್ಣ್ಯಾಯಾಂ ಸ್ವರ್ಣಪದ್ಮೋದರಪರಿವಿಲಸತ್ಕರ್ಣಿಕಾಸನ್ನಿಭಾಯಾಮ್ |
ಪದ್ಧತ್ಯಾಂ ಪ್ರಾಣವಾಯೋಃ ಪ್ರಣತಜನಹೃದಮ್ಭೋಜವಾಸಸ್ಯ
ಶಂಭೋರ್ನಿತ್ಯಂ ನಶ್ಚಿತ್ತಮೇತದ್ವಿರಚಯತು ಸುಖೇ ನಾಸಿಕಾಂ ನಾಸಿಕಾಯಾಮ್ || ೨೭ ||
ಅತ್ಯನ್ತಂ ಭಾಸಮಾನೇ ರುಚಿರತರರುಚಾಂ ಸಙ್ಗಮಾತ್ಸನ್ಮಣೀನಾ-
ಮುದ್ಯಚ್ಚಣ್ಡಾಂಶುಧಾಮಪ್ರಸರನಿರಸನಸ್ಪಷ್ಟ್ರ‍ದೃಷ್ರ‍್ಟಾಪದಾನೇ |
ಭೂಯಾಸ್ತಾಂ ಭೂತಯೇ ನಃ ಕರಿವರಜಯಿನಃ ಕರ್ಣಪಾಶಾವಲಮ್ಬೇ
ಭಕ್ತಾಲೀಭಾಲಸಜ್ಜಜ್ಜನಿಮರಣಲಿಪೇಃ ಕುಣ್ಡಲೇ ಕುಣ್ಡಲೇ ತೇ || ೨೮ ||
ಯಾಭ್ಯಾಂ ಕಾಲವ್ಯವಸ್ಥಾ ಭವತಿ ತನುಮತಾಂ ಯೋ ಮುಖಂ ದೇವತಾನಾಂ
ಯೇಷಾಮಾಹುಃ ಸ್ವರೂಪಂ ಜಗತಿ ಮುನಿವರಾ ದೇವತಾನಾಂ ತ್ರಯೀಂ ತಾಮ್ |
ರುದ್ರಾಣೀವಕ್ತ್ರಪಙ್ಕೇರುಹಸತತವಿಹಾರೋತ್ಸುಕೇನ್ದೀವರೇಭ್ಯ-
ಸ್ತೇಭ್ಯಸ್ತ್ರಿಭ್ಯಃ ಪ್ರಣಾಮಾಞ್ಜಲಿಮುಪರಚಯೇ ತ್ರೀಕ್ಷಣಸ್ಯೇಕ್ಷಣೇಭ್ಯಃ || ೨೯ ||
ವಾಮಂ ವಾಮಾಙ್ಕಗಾಯಾ ವದನಸರಸಿಜೇ ವ್ಯಾವಲದ್ವಲ್ಲಭಾಯಾ
ವ್ಯಾನಮ್ರೇಷ್ವನ್ಯದನ್ಯತ್ಪುನರಲಿಕಭವಂ ವೀತನಿಃಶೇಷರೌಕ್ಷ್ಯಮ್ |
ಭೂಯೋ ಭೂಯೋಽಪಿ ಮೋದಾನ್ನಿಪತದತಿದಯಾಶೀತಲಂ ಚೂತಬಾಣೇ
ದಕ್ಷಾರೇರೀಕ್ಷಣಾನಾಂ ತ್ರಯಮಪಹರತಾದಾಶು ತಾಪತ್ರಯಂ ನಃ || ೩೦ ||
ಯಸ್ಮಿನ್ನರ್ಧೇನ್ದುಮುಗ್ಧದ್ಯುತಿನಿಚಯತಿರಸ್ಕಾರನಿಸ್ತನ್ದ್ರಕಾನ್ತೌ
ಕಾಶ್ಮೀರಕ್ಷೋದಸಙ್ಕಲ್ಪಿತಮಿವ ರುಚಿರಂ ಚಿತ್ರಕಂ ಭಾತಿ ನೇತ್ರಮ್ |
ತಸ್ಮಿನ್ನುಲ್ಲೀಲಚಿಲ್ಲೀನಟವರತರುಣೀಲಾಸ್ಯರಙ್ಗಾಯಮಾಣೇ
ಕಾಲಾರೇಃ ಫಾಲದೇಶೇ ವಿಹರತು ಹೃದಯಂ ವೀತಚಿನ್ತಾನ್ತರಂ ನಃ || ೩೧ ||
ಸ್ವಾಮಿನ್ ಗಙ್ಗಾಮಿವಾಙ್ಗೀಕುರು ತವ ಶಿರಸಾ ಮಾಮಪೀತ್ಯರ್ಥಯನ್ತೀಂ
ಧನ್ಯಾಂ ಕನ್ಯಾಂ ಖರಾಂಶೋಃ ಶಿರಸಿ ವಹತಿ ಕಿಂನ್ವೇಷ ಕಾರುಣ್ಯಶಾಲೀ |
ಇತ್ಥಂ ಶಙ್ಕಾಂ ಜನಾನಾಂ ಜನಯದತಿಘನಂ ಕೈಶಿಕಂ ಕಾಲಮೇಘ-
ಚ್ಛಾಯಂ ಭೂಯಾದುದಾರಂ ತ್ರಿಪುರವಿಜಯಿನಃ ಶ್ರೇಯಸೇ ಭೂಯಸೇ ನಃ || ೩೨ ||
ಶ್ರೃಙ್ಗಾರಾಕಲ್ಪಯೋಗ್ಯೈಃ ಶಿಖರಿವರಸುತಾಸತ್ಸಖೀಹಸ್ತಲೂನೈಃ
ಸೂನೈರಾಬದ್ಧಮಾಲಾವಲಿಪರಿವಿಲಸತ್ಸೌರಭಾಕೃಷ್ಟಭೃಙ್ಗಮ್ |
ತುಙ್ಗಂ ಮಾಣಿಕ್ಯಕಾನ್ತ್ಯಾ ಪರಿಹಸಿತಸುರಾವಾಸಶೈಲೇನ್ದ್ರಶ್ರೃಙ್ಗಂ
ಸಙ್ಘಂ ನಃ ಸಙ್ಕಟಾನಾಂ ವಿಘಟಯತು ಸದಾ ಕಾಙ್ಕಟೀಕಂ ಕಿರೀಟಮ್ || ೩೩ ||
ವಕ್ರಾಕಾರಃ ಕಲಙ್ಕೀ ಜಡತನುರಹಮಪ್ಯಙ್ಘ್ರಿಸೇವಾನುಭಾವಾ-
ದುತ್ತಂಸತ್ವಂ ಪ್ರಯಾತಃ ಸುಲಭತರಘೃಣಾಸ್ಯನ್ದಿನಶ್ಚನ್ದ್ರಮೌಲೇಃ |
ತತ್ಸೇವನ್ತಾಂ ಜನೌಘಾಃ ಶಿವಮಿತಿ ನಿಜಯಾಽವಸ್ಥಯೈವ ಬ್ರುವಾಣಂ
ವನ್ದೇ ದೇವಸ್ಯ ಶಂಭೋರ್ಮುಕುಟಸುಘಟಿತಂ ಮುಗ್ಧಪೀಯೂಷಭಾನುಮ್ || ೩೪ ||
ಕಾನ್ತ್ಯಾ ಸಂಫುಲ್ಲಮಲ್ಲೀಕುಸುಮಧವಳಯಾ ವ್ಯಾಪ್ಯ ವಿಶ್ವಂ ವಿರಾಜನ್
ವೃತ್ತಾಕಾರೋ ವಿತನ್ವನ್ ಮುಹುರಪಿ ಚ ಪರಾಂ ನಿರ್ವೃತಿಂ ಪಾದಭಾಜಾಮ್ |
ಸಾನನ್ದಂ ನನ್ದಿದೋಷ್ಣಾ ಮಣಿಕಟಕವತಾ ವಾಹ್ಮಮಾನಃ ಪುರಾರೇಃ
ಶ್ವೇತಚ್ಛತ್ರಾಖ್ಯಶೀತದ್ಯುತಿರಪಹರತಾದಸ್ತಾಪದಾ ನಃ || ೩೫ ||
ದಿವ್ಯಾಕಲ್ಪೋಜ್ಜ್ವಲಾನಾಂ ಶಿವಗಿರಿಸುತಯೋಃ ಪಾರ್ಶ್ವಯೋರಾಶ್ರಿತಾನಾಂ
ರುದ್ರಾಣೀಸತ್ಸಖೀನಾಮತಿತರಲಕಟಾಕ್ಷಾಞ್ಚಲೈರಞ್ಚಿತಾನಾಮ್ |
ಉದ್ವೇಲ್ಲದ್ವಾಹುವಲ್ಲೀವಿಲಸನಸಮಯೇ ಚಾಮರಾನ್ದೋಲನೀನಾಮುದ್ಭೂತಃ
ಕಙ್ಕಣಾಲೀವಲಯಕಲಕಲೋ ವಾರಯೇದಾಪದೋ ನಃ || ೩೬ ||
ಸ್ವರ್ಗೌಕಃಸುನ್ದರೀಣಾಂ ಸುಲಲಿತವಪುಷಾಂ ಸ್ವಾಮಿಸೇವಾಪರಾಣಾಂ
ವಲ್ಗದ್ಭೂಷಾಣಿ ವಕ್ತ್ರಾಮ್ಬುಜಪರಿವಿಗಲನ್ಮುಗ್ಧಗೀತಾಮೃತಾನಿ |
ನಿತ್ಯಂ ನೃತ್ತಾನ್ಯುಪಾಸೇ ಭುಜವಿಧುತಿಪದನ್ಯಾಸಭಾವಾವಲೋಕ-
ಪ್ರತ್ಯುದ್ಯತ್ಪ್ರೀತಿಮಾದ್ಯತ್ಪ್ರಮಥನಟನಟೀದತ್ತಸಮ್ಭಾವನಾನಿ || ೩೭ ||
ಸ್ಥಾನಪ್ರಾಪ್ತ್ಯಾ ಸ್ವರಾಣಾಂ ಕಿಮಪಿ ವಿಶದತಾಂ ವ್ಯಞ್ಜಯನ್ಮಞ್ಜುವೀಣಾ-
ಸ್ವಾನಾವಚ್ಛಿನ್ನತಾಲಕ್ರಮಮಮೃತಮಿವಾಸ್ವಾದ್ಯಮಾನಂ ಶಿವಾಭ್ಯಾಮ್ |
ನಾನಾರಾಗಾತಿಹೃದ್ಯಂ ನವರಸಮಧುರಸ್ತೋತ್ರಜಾತಾನು ವಿದ್ಧಂ
ಗಾನಂ ವೀಣಾಮಹರ್ಷೇಃ ಕಲಮತಿಲಲಿತಂ ಕರ್ಣಪೂರಾಯತಾಂ ನಃ || ೩೮ ||
ಚೇತೋ ಜಾತಪ್ರಮೋದಂ ಸಪದಿ ವಿದಧತೀ ಪ್ರಾಣಿನಾಂ ವಾಣಿನೀನಾಂ
ಪಾಣಿದ್ವನ್ದ್ವಾಗ್ರಜಾಗ್ರತ್ಸುಲಲಿತರಣಿತಸ್ವರ್ಣತಾಲಾನುಕೂಲಾ |
ಸ್ವೀಯಾರಾವೇಣ ಪಾಥೋಧರರವಪಟುನಾ ನಾದಯನ್ತೀ ಮಯೂರೀ
ಮಾಯೂರೀಂ ಮನ್ದಭಾವಂ ಮಣಿಮುರಜಭವಾ ಮಾರ್ಜನಾ ಮಾರ್ಜಯೇನ್ನಃ || ೩೯ ||
ದೇವೇಭ್ಯೋ ದಾನವೇಭ್ಯಃ ಪಿತೃಮುನಿಪರಿಷತ್ಸಿದ್ಧವಿದ್ಯಾಧರೇಭ್ಯಃ
ಸಾಧ್ಯೇಭ್ಯಶ್ಚಾರಣೇಭ್ಯೋ ಮನುಜಪಶುಪತಜ್ಜಾತಿಕೀಟಾದಿಕೇಭ್ಯಃ |
ಶ್ರೀಕೈಲಾಸಪ್ರರೂಢಾಸ್ತೃಣವಿಟಪಿಮುಖಾಶ್ಚಾಪಿ ಯೇ ಸನ್ತಿ ತೇಭ್ಯಃ
ಸವಭ್ಯೋ ನಿರ್ವಿಚಾರಂ ನತಿಮುಪರಚಯೇ ಶರ್ವಪಾದಾಶ್ರಯೇಭ್ಯಃ || ೪೦ ||
ಧ್ಯಾಯನ್ನಿತ್ಯಂ ಪ್ರಭಾತೇ ಪ್ರತಿದಿವಸಮಿದಂ ಸ್ತೋತ್ರರತ್ನಂ ಪಠೇದ್ಯಃ
ಕಿಂವಾ ಬ್ರೂಮಸ್ತದೀಯಂ ಸುಚರಿತಮಥವಾ ಕೀರ್ತಯಾಮಃ ಸಮಾಸಾತ್ |
ಸಮ್ಪಜ್ಜಾತಂ ಸಮಗ್ರಂ ಸದಸಿ ಬಹುಮತಿಂ ಸರ್ವಲೋಕಪ್ರಿಯತ್ವಂ
ಸಮ್ಪ್ರಾಪ್ಯಾಯುಃಶತಾನ್ತೇ ಪದಮಯತಿ ಪರಬ್ರಹ್ಮಣೋ ಮನ್ಮಥಾರೇಃ || ೪೧ ||
ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ
ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ
ಶ್ರೀಮಚ್ಛಙ್ಕರಾಚಾರ್ಯಸ್ಯ ಕೃತಮ್
ಶಿವಪಾದಾದಿಕೇಶಾನ್ತವರ್ಣನಸ್ತೋತ್ರಂ ಸಂಪೂರ್ಣಮ್ ||
Also Read:
Shivapadadi Keshanta Varnana Stotram Lyrics in English | Marathi | Gujarati | Bengali | Kannada | Malayalam | Telugu