Shataka

Shri Rangarajastavam Lyrics in Kannada | Hindu Shataka

About Sri Parasara Battar’s Sri Rangaraja Stavam:

One of the dear most disciples of Sri Kurathazhwan was Pillaipillaiazhwan. He was living in Srirangam when the temple was administered by Sri Parasara Battar (more affectionately called Battar). The king who was ruling the province at that time was Veerasundaran. He was in the process of repairing the ramports of the Srirangam temple. At that stage, he noticed that the house of Pillai Pillai Azhwan was obstructing the reparing of the ramport. Hence he ordered to evict Pillai Pillai Azhwan. On hearing this, Battar intervened in vain. After this incident, friction developed between Battar and the king. The king gave constant troubles to Battar. One day Battar left Srirangam without informing anyone. He moved to Thirukoshtiyuur.

When Battar was residing at Thirukoshtiyuur, suffering due to the separation of Periyaperumal, Pillai pillai azhwan came to him. He carried a very happy message for Battar – king eerasundavan passed away. Battar immediately left Thirukoshtiyuur and came to Srirangam. When he returned, he describes the temple city starting from Cauvery, each of the streets, and finally falls at the lotus-feet of Sri Ranganatha. Thus the sloka beautifully describes Srirangam.

This sloka has two parts – poorva (first)and the uttara (concluding ) part. The poorva part has 147 slokas while the uttara part has 105 slokas. This sloka is said to explain the meaning of the dwaya mantra. The poorva part explains the first line of the dwayam while the uttara part explains the second line of the dwayam.

Sri Rangaraja Stavam in Kannada:

ಶ್ರೀರಂಗರಾಜಸ್ತವಮ್

ಶ್ರೀರಂಗರಾಜಸ್ತವಮ್ ॥

ಶ್ರೀಮತೇ ರಾಮಾನುಜಾಯ ನಮಃ ।
ಶ್ರೀಪರಾಶರಭಟ್ಟಾರ್ಯಃ ಶ್ರೀರಂಗೇಶಪುರೋಹಿತಃ ।
ಶ್ರೀವತ್ಸಾಂಕಸುತಃ ಶ್ರೀಮಾನ್ಶ್ರೇಯಸೇ ಮೇಽಸ್ತು ಭೂಯಸೇ ।

ಅಥ ಶ್ರೀರಂಗರಾಜಸ್ತವೇ ಪೂರ್ವಶತಕಮ್ ।

ಶ್ರೀವತ್ಸಚಿಹ್ನಮಿಶ್ರೇಭ್ಯೋ ನಮ ಉಕ್ತಿಮಧೀಮಹೇ ।
ಯದುಕ್ತಯಸ್ತ್ರಯೀಕಂಠೇ ಯಾನ್ತಿ ಮಂಗಲಸೂತ್ರತಾಮ್ ॥ 1 ॥

ರಾಮಾನುಜಪದಚ್ಛಾಯಾ ಗೋವಿನ್ದಾಹ್ವಾಽನಪಾಯಿನೀ ।
ತದಾಯತ್ತಸ್ವರೂಪಾ ಸಾ ಜೀಯಾನ್ಮದ್ವಿಶ್ರಮಸ್ಥಲೀ ॥ 2 ॥

ರಾಮಾನುಜಮುನಿರ್ಜೀಯಾದ್ಯೋ ಹರೇರ್ಭಕ್ತಿಯನ್ತ್ರತಃ ।
ಕಲಿಕೋಲಾಹಲಕ್ರೀಡಾಮುಧಾಗ್ರಹಮಪಾಹರತ್ ॥ 3 ॥

ವಿಧಾಯ ವೈದಿಕಮ್ಮಾರ್ಗಮಕೌತಸ್ಕುತಕಂಟಕಮ್ ।
ನೇತಾರಂ ಭಗವದ್ಭಕ್ತೇರ್ಯಾಮುನಂ ಮನವಾಮಹೈ ॥ 4 ॥

ನೌಮಿ ನಾಥಮುನಿಂ ನಾಮ ಜೀಮೂತಂ ಭಕ್ತ್ಯವಗ್ರಹೇ ।
ವೈರಾಗ್ಯಭಗವತ್ತತ್ತ್ವಜ್ಞಾನಭಕ್ತ್ಯಭಿವರ್ಷುಕಮ್ ॥ 5 ॥

ಋಷಿಂ ಜುಷಾಮಹೇ ಕೃಷ್ಣತೃಷ್ಣಾತತ್ತ್ವಮಿವೋದಿತಂ
ಸಹಸ್ರಶಾಖಾಂ ಯೋಽದ್ರಾಕ್ಷೀದ್ದ್ರಾವಿಡೀಂ ಬ್ರಹ್ಮಸಂಹಿತಾಮ್ ॥ 6 ॥

ನಮಃ ಶ್ರೀರಂಗನಾಯಕ್ಯೈ ಯದ್ಭ್ರೂವಿಭ್ರಮಭೇದತಃ ।
ಈಶೇಶಿತವ್ಯವೈಷಮ್ಯನಿಮ್ನೋನ್ನತಮಿದಂ ಜಗತ್ ॥ 7 ॥

ಶ್ರೀಸ್ತನಾಭರಣಂ ತೇಜಃ ಶ್ರೀರಂಗೇಶಯಮಾಶ್ರಯೇ ।
ಚಿನ್ತಾಮಣಿಮಿವೋದ್ವಾನ್ತಮುತ್ಸಂಗೇಽನನ್ತಭೋಗಿನಃ ॥ 8 ॥

ಅಸ್ತಿ ವಸ್ತ್ವಿದಮಿತ್ಥಂ ತ್ವಪ್ರಸಂಖ್ಯಾನಪರಾಙ್ಮುಖಮ್ ।
ಶ್ರೀಮತ್ಯಾಯತನೇ ಲಕ್ಷ್ಮೀಪದಲಾಕ್ಷೈಕಲಕ್ಷಣಮ್ ॥ 9 ॥

ಲಕ್ಷ್ಮೀಕಲ್ಪಲತೋತ್ತುಂಗಸ್ತನಸ್ತಬಕಚಂಚಲಃ ।
ಶ್ರೀರಂಗರಾಜಭೃಂಗೋ ಮೇ ರಮತಾಂ ಮಾನಸಾಮ್ಬುಜೇ ॥ 10 ॥

ಸ್ವಸ್ತಿ ಶ್ರೀಸ್ತನಕಸ್ತೂರೀಮಕರೀಮುದ್ರಿತೋರಸಃ ।
ಶ್ರೀರಂಗರಾಜಾಚ್ಛರದಶ್ಶತಮಾಶಾಸ್ಮಹೇತಮಾಮ್ ॥ 11 ॥

ಪಾತು ಪ್ರಣತರಕ್ಷಾಯಾಂ ವಿಲಮ್ಬಮಸಹನ್ನಿವ ॥

ಸದಾ ಪಂಚಾಯುಧೀಂ ಬಿಭ್ರತ್ಸ ನಃ ಶ್ರೀರಂಗನಾಯಕಃ ॥ 12 ॥

ಅಮತಂ ಮತಂ ಮತಮಥಾಮತಂ ಸ್ತುತಂ
ಪರಿನಿನ್ದಿತಂ ಭವತಿ ನಿನ್ದಿತಂ ಸ್ತುತಮ್ ।
ಇತಿ ರಂಗರಾಜಮುದಜೂಘುಷತ್ತ್ರಯೀ
ಸ್ತುಮಹೇ ವಯಮ್ಕಿಮಿತಿ ತನ್ನ ಶಕ್ನುಮಃ ॥ 13 ॥

ಯದಿ ಮೇ ಸಹಸ್ರವದನಾದಿವೈಭವಂ
ನಿಜಮರ್ಪಯೇತ್ಸ ಕಿಲ ರಂಗಚನ್ದ್ರಮಾಃ ।
ಅಥ ಶೇಷವನ್ಮಮ ಚ ತದ್ವದೇವ ವಾ
ಸ್ತುತಿಶಕ್ತ್ಯಭಾವವಿಭವೇಽಪಿ ಭಾಗಿತಾ ॥ 14 ॥

ಸೋ ಅಂಗ ವೇದ ಯದಿ ವಾ ನ ಕಿಲೇತಿ ವೇದಃ
ಸನ್ದೇಗ್ಧ್ಯನರ್ಘವಿದಮಾತ್ಮನಿ ರಂಗನಾಥಮ್ ।
ಸ್ಥಾನೇ ತದೇಷ ಖಲು ದೋಷಮಲೀಮಸಾಭಿಃ
ಮದ್ವಾಗ್ಭಿರೈಶಮತಿಶಾಯನಮಾವೃಣೋತಿ ॥ 15 ॥

ಸ್ವಂ ಸಂಸ್ಕೃತದ್ರಾವಿಡವೇದಸೂಕ್ತೈಃ
ಭಾನ್ತಂ ಮದುಕ್ತೈರ್ಮಲಿನೀಕರೋತಿ ।
ಶ್ರೀರಂಗಕಮ್ರಃ ಕಲಭಂ ಕ ಏವ
ಸ್ನಾತ್ವಾಽಪಿ ಧೂಲೀರಸಿಕಂ ನಿಷೇದ್ಧಾ ॥ 16 ॥

ಕಿನ್ತು ಪ್ರಪತ್ತಿಬಲತಾರಿತವಿಷ್ಣುಮಾಯ-
ಮದ್ವಂಶ್ಯರಾಜಕುಲದುರ್ಲಲಿತಂ ಕಿಲೈವಮ್ ।
ಶ್ರೀರಂಗರಾಜಕಮಲಾಪದಲಾಲಿತತ್ವಂ
ಯದ್ವಾಽಪರಾಧ್ಯತಿ ಮಮ ಸ್ತುತಿಸಾಹಸೇಽಸ್ಮಿನ್ ॥ 17 ॥

ನಾಥಸ್ಯ ಚ ಸ್ವಮಹಿಮಾರ್ಣವಪಾರದೃಶ್ವ-
ವಿಜ್ಞಾನವಾಗ್ವಿಲಸಿತಂ ಸಹತೇ ನ ವೇದಃ ।
ಆಪೇಕ್ಷಿಕಂ ಯದಿ ತದಸ್ತಿ ಮಮಾಪಿ ತೇನ
ಶ್ರೀರಂಗಿಣಃ ಸ್ತುತಿವಿಧಾವಹಮಧ್ಯಕಾರ್ಷಮ್ ॥ 18 ॥

ಅನ್ಯತ್ರಾತದ್ಗುಣೋಕ್ತಿರ್ಭಗವತಿ ನ ತದುತ್ಕರ್ಷಚೌರ್ಯೈಃ ಪರೇಷಾಂ
ಸ್ತುತ್ಯತ್ವಾದ್ಯಾವದರ್ಥಾ ಫಣಿತಿರಪಿ ತಥಾ ತಸ್ಯ ನಿಸ್ಸೀಮಕತ್ವಾತ್ ।
ಆಮ್ನಾಯಾನಾಮಸೀಮ್ನಾಮಪಿ ಹರಿವಿಭವೇ ವರ್ಷಬಿನ್ದೋರಿವಾಽಬ್ಧೌ
ಸಂ ಬನ್ಧಾತ್ಸ್ವಾತ್ಮಲಾಭೋ ನ ತು ಕಬಲನತಃ ಸ್ತೋತುರೇವಂ ನ ಕಿಂ ಮೇ ॥ 19 ॥

ಕಾವೇರೀಮವಗಾಹಿಷೀಯ ಭಗವದ್ಭೋಗಾನ್ತರಾಯೀ ಭವತ್
ಕರ್ಮಕ್ಲೇಶಫಲಾಶಯಪ್ರಶಮನೋದ್ವೇಲಾಮಲಸ್ರೋತಸಮ್ ।
ಜನ್ತೋಸ್ಸಮ್ಸರತೋಽರ್ಚಿರಾದಿಸರಣಿವ್ಯಾಸಂಗಭಂಗಾಯ ಯಾ
ಲೋಕೇಽಸ್ಮಿಣ್ ವಿರಜೇವ ವೇಲ್ಲಿತಜಲಾ ಶ್ರೀರಂಗಮಾಲಿಂಗತಿ ॥ 20 ॥

ದುಗ್ಧಾಬ್ಧಿರ್ಜನಕೋ ಜನನ್ಯಹಮಿಯಂ ಶ್ರೀರೇವ ಪುತ್ರೀ ವರಃ
ಶ್ರೀರಂಗೇಶ್ವರ ಏತದರ್ಹಮಿಹ ಕಿಂ ಕುರ್ಯಾಮಿತೀವಾಕುಲಾ ।
ಚಂಚಚ್ಚಾಮರಚನ್ದ್ರಚನ್ದನಮಹಾಮಾಣಿಕ್ಯಮುಕ್ತೋತ್ಕರಾನ್
ಕಾವೇರೀ ಲಹರೀಕರೈರ್ವಿದಧತೀ ಪರ್ಯೇತಿ ಸಾ ಸೇವ್ಯತಾಮ್ ॥ 21 ॥

ತೀರ್ಥಂ ಶುನ್ಧತಿ ಪಾತಿ ನನ್ದನತರೂನ್ ರಥ್ಯಾಂಗಣಾನ್ಯುಕ್ಷತಿ
ಸ್ನಾನೀಯಾರ್ಹಣಪಾನವಾರಿ ವಹತಿ ಸ್ನಾತಃ ಪುನೀತೇ ಜನಾನ್ ।
ಶ್ಯಾಮಂ ವೇದರಹೋ ವ್ಯನಕ್ತಿ ಪುಲಿನೇ ಫೇನೈರ್ಹಸನ್ತೀವ ತತ್
ಗಂಗಾಂ ವಿಷ್ಣುಪದೀತ್ವಮಾತ್ರಮುಖರಾಂ ಹೇಮಾಪಗಾ ಹನ್ತ್ವಘಮ್ ॥ 22 ॥

ಅಗಣಿತಗುಣಾವದ್ಯಂ ಸರ್ವಂ ಸ್ಥಿರತ್ರಸಮಪ್ರತಿ-
ಕ್ರಿಯಮಪಿ ಪಯಃ ಪೂರೈರಾಪ್ಯಾಯಯನ್ತ್ಯನುಜಾಗ್ರತೀ ।
ಪ್ರವಹತಿ ಜಗದ್ಧಾತ್ರೀ ಭೂತ್ವೇವ ರಂಗಪತೇರ್ದಯಾ
ಶಿಶಿರಮಧುರಾಽಗಾಧಾ ಸಾ ನಃ ಪುನಾತು ಮರುದ್ವೃಧಾ ॥ 23 ॥

ತರಳತನುತರಂಗೈರ್ಮನ್ದಮಾನ್ದೋಲ್ಯಮಾನ-
ಸ್ವತಟವಿಟಪಿರಾಜೀಮಂಜರೀಸುಪ್ತಭೃಂಗಾ ।
ಕ್ಷಿಪತು ಕನಕನಾಮ್ನೀ ನಿಮ್ನಗಾ ನಾರಿಕೇಲ-
ಕ್ರಮುಕಜಮಕರನ್ದೈರ್ಮಾಂಸಲಾಪಾ ಮದಂಹಃ ॥ 24 ॥

ಕದಲವಕುಲಜಮ್ಬೂಪೂಗಮಾಕನ್ದಕಂಠ-
ದ್ವಯಸಸರಸನೀರಾಮನ್ತರಾ ಸಹ್ಯಕನ್ಯಾಮ್ ।
ಪ್ರಬಲಜಲಪಿಪಾಸಾಲಮ್ಬಮಾನಾಮ್ಬುದೌಘ-
ಭ್ರಮಕರತರುವೃನ್ದಂ ವನ್ದ್ಯತಾಮನ್ತರೀಪಮ್ ॥ 25 ॥

ಯದ್ವಿಷ್ಣೋಃ ಪದಮತಮಃ ಪರೋರಜೋಽಗ್ರ್ಯಂ
ಮುಕ್ತಾನಾಮನುವಿರಜಂ ವಿದೀಪ್ರಮಾಹುಃ ।
ತತ್ಪುಣ್ಯಂ ಪುಲಿನಮಿದನ್ತಯಾಽದ್ಯ ಮಧ್ಯೇ
ಕಾವೇರಿ ಸ್ಫುರತಿ ತದೀಕ್ಷಿಷೀಯ ನಿತ್ಯಮ್ ॥ 26 ॥

ತ್ರಯ್ಯನ್ತಪ್ರಹತಿಮತೀಷು ವೈಷ್ಣವಾನಾಂ
ಪ್ರಾಪ್ಯಾಸು ಪ್ರಚುರಭವಶ್ರಮಾಪಹಾಸು ।
ಕಾವೇರೀಪರಿಚರಿತಾಸು ಪಾವನೀಷು
ಶ್ರೀರಂಗೋಪವನತಟೀಷು ವರ್ತಿಷೀಯ ॥ 27 ॥

ಸ್ಫುರಿತಶಫರದೀರ್ಯನ್ನಾಲಿಕೇರೀಗುಲುಚ್ಛ-
ಪ್ರಸೃಮರಮಧುಕುಲ್ಯಾವರ್ಧಿತಾನೋಕಹಾನಿ ।
ರತಿಮವಿರತಿ ರಂಗಾರಾಮರಮ್ಯಸ್ಥಲಾನಿ
ಕ್ರಮುಕಪದಸಮೋಚಾಮೇಚಕಾನಿ ಕ್ರಿಯಾಸುಃ ॥ 28 ॥

ಅಧಿಪರಮಪದಂ ಪುರೀಮಯೋಧ್ಯಾಂ
ಅಮೃತವೃತಾಮಪರಾಜಿತಾಮುಶನ್ತಿ ।
ಪುಲಿನಮುಪರಿ ರಂಗರಾಜಧಾನೀ
ಪಿಶಿತದೃಶಾಮಪಿ ಸಾ ಪುರಶ್ಚಕಾಸ್ತಿ ॥ 29 ॥

ಭವಪದಮಪಿ ದಿವ್ಯಧಾಮ ಕರ್ತುಂ
ತದುಭಯತನ್ತ್ರಿತಹರ್ಮ್ಯಮಾಲಿಕೇವ ।
ಭವನಮಣಿತಲೈರ್ವಿಜೃಮ್ಭಮಾಣಾ
ಜಯತಿತರಾಮಿಹ ರಂಗರಾಜಧಾನೀ ॥ 30 ॥

ಮಣಿಮಕರರುಚೀರ್ವಿತತ್ಯ ಪಾಶಾನ್
ವಿಸೃಮರಕೇತುಕರೈರ್ಮೃಗಂ ಹಿಮಾಂಶೋಃ ।
ಶ್ರಿಯ ಇವ ನವಕೇಲಯೇ ಜಿಘೃಕ್ಷುಃ
ಸುಖಯತು ರಂಗಪುರೀ ಚಕಾಸತೀ ನಃ ॥ 31 ॥

ಜನಪದಸರಿದನ್ತರೀಪಪುಷ್ಯತ್
ಪುರಪರಿಪಾಲನನಿತ್ಯಜಾಗರೂಕಾನ್ ।
ಪ್ರಹರಣಪರಿವಾರವಾಹನಾಢ್ಯಾನ್
ಕುಮುದಮುಖಾಣ್ ಗಣನಾಯಕಾನ್ ನಮಾಮಿ ॥ 32 ॥

ಅಹೃತಸಹಜದಾಸ್ಯಾಃ ಸೂರಯಸ್ಸ್ರಸ್ತಬನ್ಧಾ
ವಿಮಲಚರಮದೇಹಾ ಇತ್ಯಮೀ ರಂಗಧಾಮ ।
ಮಹಿತಮನುಜಯತಿರ್ಯಕ್ಸ್ಥಾವರತ್ವಾಃ ಶ್ರಯನ್ತೇ
ಸುನಿಯತಮಿತಿ ಹ ಸ್ಮ ಪ್ರಾಹುರೇಭ್ಯೋ ನಮಃ ಸ್ತಾತ್ ॥ 33 ॥

ಶ್ರೀರಂಗದಿವ್ಯಭವನಮ್ಭುವಿ ಗೋಪುರಾಣಾಂ
ಪ್ರಾಕಾರಿತೇನ ನಿಕರೇಣ ಗುರುತ್ಮತೇವ ।
ಪಾರ್ಶ್ವಪ್ರಸಾರಿತಪತತ್ತ್ರಪುಟೇನ ಭಕ್ತ್ಯಾ
ನಾನಾತನೂಭಿರೂಪಗೂಢಮುಪಘ್ನಯಾಮಃ ॥ 34 ॥

ಪ್ರಾಕಾರಮಧ್ಯಾಜಿರಮಂಡಪೋಕ್ತ್ಯಾ
ಸದ್ವೀಪರತ್ನಾಕರರತ್ನಶೈಲಾ ।
ಸರ್ವಂಸಹಾ ರಂಗವಿಮಾನಸೇವಾಂ
ಪ್ರಾಪ್ತೇವ ತನ್ಮನ್ದಿರಮಾವಿರಸ್ತಿ ॥ 35 ॥

ಜಿತಬಾಹ್ಯಜಿನಾದಿಮಣಿಪ್ರತಿಮಾ
ಅಪಿ ವೈದಿಕಯನ್ನಿವ ರಂಗಪುರೇ ।
ಮಣಿಮಂಡಪವಪಗಣನ್ ವಿದಧೇ
ಪರಕಾಲಕವಿಃ ಪ್ರನಮೇಮಹಿ ತಾನ್ ॥ 36 ॥

ಸ್ಮೇರಾನನಾಕ್ಷಿಕಮಲೈರ್ನಮತಃ ಪುನಾನಾನ್
ದಂಷ್ಟ್ರಾಗದಾಭ್ರುಕುಟಿಭಿರ್ದ್ವಿಷತೋ ಧುನಾನಾನ್ ।
ಚನ್ದ್ರಪ್ರಚಂಡಮುಖತಃ ಪ್ರಣಮಾಮಿ ರಂಗ-
ದ್ವಾರಾವಲೀಷು ಚತಸೃಷ್ವಧಿಕಾರಭಾಜಃ ॥ 37 ॥

ಸರ್ವಾತ್ಮಸಾಧಾರಣನಾಥಗೋಷ್ಠೀ-
ಪೂರೇಽಪಿ ದುಷ್ಪೂರಮಹಾವಕಾಶಮ್ ।
ಆಸ್ಥಾನಮಾನನ್ದಮಯಂ ಸಹಸ್ರ-
ಸ್ಥೂಣಾದಿನಾಽಽಮ್ನಾತಮವಾಪ್ನವಾನಿ ॥ 38 ॥

ವಿಹರತಿ ಹರೌ ಲಕ್ಷ್ಮ್ಯಾ ಲೀಲಾತಪತ್ರಪರಿಷ್ಕ್ರಿಯಾ-
ವಿನಿಮಯವಿಧಾಸೂನಾಸೂನಿಕ್ರಿಯಾಸಫಲೋತ್ಪಲಾಮ್ ।
ಅಥ ಮುನಿಮನಃ ಪದ್ಮೇಷ್ವಬ್ಜಾಸಹಾಯವಿಹಾರಜ-
ಶ್ರಮಹರತಟೀಂ ಯಾಮಸ್ತಾಮೈನ್ದವೀಮರವಿನ್ದಿನೀಮ್ ॥ 39 ॥

ತಾಪತ್ರಯೀಮೈನ್ದವಪುಷ್ಕರಿಣ್ಯಾಂ
ನಿಮಜ್ಜ್ಯ ನಿರ್ವಾಪಯಿತಾಽಸ್ಮಿ ಯಸ್ಯಾಃ ।
ಅಭ್ಯಾಸತೋಽಪಾಮಘಮರ್ಷಣೀನಾಂ
ಚನ್ದ್ರಃ ಸುಧಾದೀಧಿತಿತಾಮವಾಪ ॥ 40 ॥

ಪೂರ್ವೇಣ ತಾಂ ತದ್ವದುದಾರನಿಮ್ನ-
ಪ್ರಸನ್ನಶೀತಾಶಯಮಗ್ನನಾಥಾಃ ।
ಪರಾಂಕುಶಾದ್ಯಾಃ ಪ್ರಥಮೇ ಪುಮಾಂಸೋ
ನಿಷೇದಿವಾಂಸೋ ದಶ ಮಾಂ ದಯೇರನ್ ॥ 41 ॥

ಆಧಾರಶಕ್ತಿಮುಪರಿ ಪ್ರಕೃತಿಂ ಪರೇಣ
ತಾಂ ಕೂರ್ಮಮತ್ರ ಫಣಿನಂ ಪೃಥಿವೀಂ ಫಣಾಸು ।
ಪೃಥ್ವ್ಯಾಂ ಪಯೋಧಿಮಧಿ ತನ್ನಲಿನಂ ನಿಧಾಯ
ಶ್ರೀರಂಗಧಾಮ ಸುನಿವಿಷ್ಟಮಭಿಷ್ಟವಾನಿ ॥ 42 ॥

ಪರೇಣ ನಾಕಂ ಪುರಿ ಹೇಮಮಯ್ಯಾಂ
ಯೋ ಬ್ರಹ್ಮಕೋಶೋಽಸ್ತ್ಯಪರಾಜಿತಾಖ್ಯಃ ।
ಶ್ರೀರಂಗನಾಮ್ನಾ ತಮಪೌರುಷೇಯಂ
ವಿಮಾನರಾಜಂ ಭುವಿ ಭಾವಯಾನಿ ॥ 43 ॥

ಅನಾದ್ಯಾಮ್ನಾತತ್ವಾತ್ಪುರುಷರಚನಾದೋಷರಹಿತಂ
ಜನೇ ತಾಂಸ್ತಾನ್ ಕಾಮಾಣ್ ವಿದಧದಪಿ ಸಾಯುಜ್ಯಹೃದಯಮ್ ।
ಅಸನ್ದೇಹಾಧ್ಯಾಸಂ ಭಗವದುಪಲಮ್ಭಸ್ಥಲಮಮೀ
ಪ್ರತೀಮಃ ಶ್ರೀರಂಗಂ ಶ್ರುತಿಶತಸಮಾನರ್ದ್ಧಿ ಶರಣಮ್ ॥ 44 ॥

ಅಪಿ ಫಣಿಪತಿಭಾವಾಚ್ಛುಭ್ರಮನ್ತಃ ಶಯಾಲೋಃ
ಮರಕತಸುಕುಮಾರೈಃ ರಂಗಭರ್ತುರ್ಮಯೂಖೈಃ ।
ಸಕಲಜಲಧಿಪಾನಶ್ಯಾಮಜೀಮೂತಜೈತ್ರಂ
ಪುಲಕಯತಿ ವಿಮಾನಂ ಪಾವನಂ ಲೋಚನೇ ನಃ ॥ 45 ॥

ವ್ಯಾಪಿ ರೂಪಮಪಿ ಗೋಷ್ಪದಯಿತ್ವಾ
ಭಕ್ತವತ್ಸಲತಯೋಜ್ಝಿತವೇಲಮ್ ।
ತದ್ವಿಷನ್ತಪನೃಕೇಸರಿರೂಪಂ
ಗೋಪುರೋಪರಿ ವಿಜೃಮ್ಭಿತಮೀಡೇ ॥ 46 ॥

ಅಹಮಲಮವಲಮ್ಬಃ ಸೀದತಾಮಿತ್ಯಜಸ್ರಂ
ನಿವಸದುಪರಿಭಾಗೇ ಗೋಪುರಂ ರಂಗಧಾಮ್ನಃ ।
ಕ್ವಚನ ನೃಪರಿಪಾಟೀವಾಸಿತಂ ಕ್ವಾಪಿ ಸಿಮ್ಹ-
ಕ್ರಮಸುರಭಿತಮೇಕಂ ಜ್ಯೋತಿರಗ್ರೇ ಚಕಾಸ್ತಿ ॥ 47 ॥

ಸಂಶೋಧ್ಯ ಪಾವನಮನೋಹರದೃಷ್ಟಿಪಾತೈಃ
ದೇವಾಯ ಮಾಮಪಿ ನಿವೇದಯತಾಂ ಗುರೂಣಾಮ್ ।
ಸವ್ಯೋತ್ತರೇ ಭಗವತೋಽಸ್ಯ ಕಟಾಕ್ಷವೀಕ್ಷಾ-
ಪಂಕ್ತಿಂ ಪ್ರಪದ್ಯ ಪರಿತಃ ಪರಿತೋ ಭವೇಯಮ್ ॥ 48 ॥

ಶ್ರೀರಂಗರಾಜಕರನಮ್ರಿತಶಾಖಿಕಾಭ್ಯೋ
ಲಕ್ಷ್ಮ್ಯಾ ಸ್ವಹಸ್ತಕಲಿತಶ್ರವಣವತಂಸಮ್ ।
ಪುನ್ನಾಗತಲ್ಲಜಮಜಸ್ರಸಹಸ್ರಗೀತಿ-
ಸೇಕೋತ್ಥದಿವ್ಯನಿಜಸೌರಭಮಾಮನಾಮಃ ॥ 49 ॥

ಶ್ರೀರಂಗಚನ್ದ್ರಮಸಮಿನ್ದಿರಯಾ ವಿಹರ್ತುಂ
ವಿನ್ಯಸ್ಯ ವಿಶ್ವಚಿದಚಿನ್ನಯನಾಧಿಕಾರಮ್ ।
ಯೋ ನಿರ್ವಹತ್ಯನಿಶಮಂಗುಲಿಮುದ್ರಯೈವ
ಸೇನಾನ್ಯಮನ್ಯವಿಮುಖಾಸ್ತಮಶಿಶ್ರಿಯಾಮ ॥ 50 ॥

ಸೈನ್ಯಧುರೀಣಪ್ರಾಣಸಹಾಯಾಂ ಸೂತ್ರವತೀಮಾಶಿಶ್ರಿಯಮಮ್ಬಾಮ್ ।
ಶ್ರೀಪದಲಾಕ್ಷಾಲಾಂಛಿತಸೇವಾಪ್ರೋತಲಸದ್ದೋರ್ವಲ್ಲಿವಿಲಾಸಾಮ್ ॥ 51 ॥

ವಿದಧತು ಸುಖಂ ವಿಷ್ವಕ್ಸೇನಸ್ಯ ತೇ ಪ್ರಥಮೇ ಭಟಾಃ
ಕರಿಮುಖಜಯತ್ಸೇನೌ ಕಾಲಾಹ್ವಸಿಂಹಮುಖೌ ಚ ನಃ ।
ಜಗತಿ ಭಜತಾಂ ತತ್ತತ್ಪ್ರತ್ಯೂಹತೂಲದವಾನಲಾಃ
ದಿಶಿ ದಿಶಿ ದಿವಾರಾತ್ರಂ ಶ್ರೀರಂಗಪಾಲನಕರ್ಮಠಾಃ ॥ 52 ॥

ಶ್ರುತಿಮಯಮತಿಹರ್ಷಪ್ರಶ್ರಯಸ್ಮೇರವಕ್ತ್ರಂ
ಮಣಿಮುಕುರಮಿವಾಗ್ರೇ ಮಂಗಲಂ ರಂಗಧಾಮ್ನಃ ।
ಶರಣಮಭಿಗತಾಃ ಸ್ಮೋ ಯತ್ರ ರೂಪಸ್ವರೂಪ-
ಸ್ವಗುಣಮಹಿಮದರ್ಶೀ ಮೋದತೇ ರಂಗಶಾಯೀ ॥ 53 ॥

ತಾರ್ಕ್ಷ್ಯಪಕ್ಷತಿವದಸ್ಯ ವಲ್ಲಭಾಂ
ರುದ್ರಯಾ ಸಹ ಸುಕೀರ್ತಿಮರ್ಚಯೇ ।
ಹರ್ಷಬಾಷ್ಪಮಪಿ ಕೀರ್ತಿಮರ್ಥಿನಾಂ
ಯನ್ಮುಖೇನ ಕಮಲಾ ಕಟಾಕ್ಷಯೇತ್ ॥ 54 ॥

ಸ್ವಾಸ್ತ್ರರೂಪಸ್ಫುರನ್ಮೌಲಿ ಮಾ ಶಬ್ದ ಇತಿ
ಉದ್ಧುನಾನಾಂ ಸುರಾಸ್ತರ್ಜನೀಮುದ್ರಯಾ ।
ನಾಥನಿದ್ರೋಚಿತೋನ್ನಿದ್ರತಾಮ್ರೇಕ್ಷಣಾಂ
ಸಂಚರನ್ತೀಂ ಸ್ತುಮಸ್ತಾಂ ಚ ಪಂಚಾಯುಧೀಮ್ ॥ 55 ॥

ಅಸ್ತ್ರಗ್ರಾಮಾಗ್ರೇಸರಂ ನಾಥವೀಕ್ಷಾ-
ಶೀಧುಕ್ಷೀಬೋದ್ವೇಲನೃತ್ತಾಭಿರಾಮಮ್ ।
ಚಕ್ರಂ ದೈತ್ಯಚ್ಛೇದಕಲ್ಮಾಷಿತಾಂಗಂ
ಭ್ರಾಮ್ಯಜ್ಜ್ವಾಲಾಮಾಲಭಾರಿ ಪ್ರಪದ್ಯೇ ॥ 56 ॥

ಹನುಭೂಷವಿಭೀಷಣಯೋಃ ಸ್ಯಾಂ ಯತಮಾವಿಹ ಮೋಕ್ಷಮುಪೇಕ್ಷ್ಯ ।
ರಘುನಾಯಕನಿಷ್ಕ್ರಯಭೂತಂ ಭುವಿ ರಂಗಧನಂ ರಮಯೇತೇ ॥ 57 ॥

ಇತೋ ಬಹಿಃ ಪಂಚ ಪರಾಂಚಿ ಖಾನಿ ಪ್ರತ್ಯಂಚಿ ತಾನಿ ಸ್ಯುರಿತೋಽನ್ತರಿತ್ಥಮ್ ।
ಔಪಾಧಿಕೇಭ್ಯೋ ನಿರುಪಾಧಿಭೋಗ್ಯೇ ಪ್ರತ್ಯಾಹರದ್ವೇತ್ರಧರಂ ನಮಾಮಿ ॥ 58 ॥

ಶೇಷಶಯಲೋಚನಾಮೃತನದೀರಯಾಕುಲಿತಲೋಲಮಾನಾನಾಮ್ ।
ಆಲಮ್ಬಮಿವಾಮೋದಸ್ತಮ್ಭದ್ವಯಮನ್ತರಂಗಮಭಿಯಾಮಃ ॥ 59 ॥

ಶ್ರೀರಂಗಾನ್ತರ್ಮನ್ದಿರಂ ದೀಪ್ರಶೇಷಂ ಶ್ರೀಭೂಮೀತದ್ರಮ್ಯಜಾಮಾತೃಗರ್ಭಮ್ ।
ಪಶ್ಯೇಮ ಶ್ರೀದಿವ್ಯಮಾಣಿಕ್ಯಭೂಷಾಮಂಜೂಷಾಯಾಸ್ತುಲ್ಯಮುನ್ಮೀಲಿತಾಯಾಃ ॥ 60 ॥

ಲೀಲಾಲತಾಕೃಪಾಣೀಭೃಂಗಾರಪತದ್ಗ್ರಹಾರ್ಪಿತಕರಾಗ್ರಾಃ ।
ಪ್ರೋತಾವತಂಸಿತಕುಚಾಃ ಪದಾಬ್ಜಸಮ್ವಾಹಿನೀರ್ವಯಂ ಸ್ತುಮಹೇ ॥ 61 ॥

ಮುಕುಲಿತನಲಿನಾಃ ಸಕೌಮುದೀಕಾ
ಇವ ಸುನಿಶಾ ವಿಮಲಾದಿಕಾ ನವಾಪಿ ।
ಶಿರಸಿ ಕೃತನಮಸ್ಯದೇಕಹಸ್ತಾ
ಇತರಕರೋಚ್ಚಲಚಾಮರಾಃ ಶ್ರಯೇಯಮ್ ॥ 62 ॥

ಉತ್ಫುಲ್ಲಪಂಕಜತಟಾಕಮಿವಾಭಿಯಾನಿ
ಶ್ರೀರಂಗರಾಜಮಿಹ ದಕ್ಷಿಣಸವ್ಯಸೀಮ್ನೋಃ ।
ಲಕ್ಷ್ಮೀಂ ವಿಹಾರರಸಿಕಾಮಿವ ರಾಜಹಮ್ಸೀಂ
ಛಾಯಾಮಿವಾಭ್ಯುದಯಿನೀಮವನೀಂ ಚ ತಸ್ಯಾಃ ॥ 63 ॥

ಪಿಬ ನಯನ ಪುರಸ್ತೇ ರಂಗಧುರ್ಯಾಭಿಧಾನಂ
ಸ್ಥಿತಮಿವ ಪರಿಫುಲ್ಲತ್ಪುಂಡರೀಕಂ ತಟಾಕಮ್ ।
ಶ್ರಿಯಮಪಿ ವಿಹರನ್ತೀಂ ರಾಜಹಮ್ಸೀಮಿವಾಸ್ಮಿನ್
ಪ್ರತಿಫಲನಮಿವಾಸ್ಯಾಃ ಪಶ್ಯ ವಿಶ್ವಮ್ಭರಾಂ ಚ ॥ 64 ॥

ಸೌಶೀಲ್ಯಶೀತಲಮವೇಲಕೃಪಾತರಂಗ-
ಸಮ್ಪ್ಲಾವಿತಾಖಿಲಮಕೃತ್ರಿಮಭೂಮ ನಿಮ್ನಮ್ ।
ಲಕ್ಷ್ಮ್ಯಾ ಚ ವಾಸಿತಮಭೂಮ ವಿಗಾಹಮಾನಾಃ
ಶ್ರೀರಂಗರಾಜಮಿಷಪದ್ಮಸರಃ ಪ್ರಸನ್ನಮ್ ॥ 65 ॥

ಸಿಂಹಾಸನೇ ಕಮಲಯಾ ಕ್ಷಮಯಾ ಚ ವಿಶ್ವಂ
ಏಕಾತಪತ್ರಯಿತುಮಸ್ಮದಸೂನ್ನಿಷಣ್ಣಮ್ ।
ಲಕ್ಷ್ಮೀಸ್ವಯಮ್ವರಸನಾಥಿತಯೌವನಶ್ರೀ-
ಸೌನ್ದರ್ಯ ಸಮ್ಪದವಲಿಪ್ತಮಿವಾಲಿಹೀಯ ॥ 66 ॥

ಆಪಾದಮೂಲಮಣಿಮೌಲಿಸಮುಲ್ಲಸನ್ತ್ಯಾ
ಸ್ವಾತನ್ತ್ರ್ಯಸೌಹೃದತರಂಗಿತಯಾಽಂಗಭಂಗ್ಯಾ ।
ಸಖ್ಯಂ ಸಮಸ್ತಜನಚೇತಸಿ ಸನ್ದಧಾನಂ
ಶ್ರೀರಂಗರಾಜಮನಿಮೇಷಮನುಸ್ರಿಯಾಸ್ಮ ॥ 67 ॥

ಕ್ಷಿತಿಕಮಲನಿವಾಸಾಕಲ್ಪವಲ್ಲೀಸಲೀಲೋ-
ಲ್ಲುಠನದಶದಿಶೋದ್ಯದ್ಯೌವನಾರಮ್ಭಜೃಮ್ಭಃ ।
ಶ್ರಮಮಪಹರತಾಂ ಮೇ ರಂಗಧಾಮೇತಿ ತತ್ತದ್-
ವರಮಯಫಲನಮ್ರಃ ಪತ್ರಲಃ ಪಾರಿಜಾತಃ ॥ 68 ॥

ಸಮ್ಭಾಷಮಾಣಮಿವ ಸರ್ವವಶಂವದೇನ
ಮನ್ದಸ್ಮಿತೇನ ಮಧುರೇಣ ಚ ವೀಕ್ಷಣೇನ ।
ದಿವ್ಯಾಸ್ತ್ರಪುಷ್ಪಿತಚತುರ್ಭುಜಮತ್ಯುದಾರಂ
ರಂಗಾಸ್ಪದಂ ಮಮ ಶುಭಾಶ್ರಯಮಾಶ್ರಯಾಣಿ ॥ 69 ॥

ಏತೇ ಶಂಖಗದಾಸುದರ್ಶನಭೃತಃ ಕ್ಷೇಮಾಂಕರಾ ಬಾಹವಃ
ಪಾದದ್ವನ್ದ್ವಮಿದಂ ಶರಣ್ಯಮಭಯಂ ಭದ್ರಂ ಚ ವೋ ಹೇ ಜನಾಃ ।
ಇತ್ಯೂಚಿಷ್ಯಭಯಂಕರೇ ಕರತಲೇ ಸ್ಮೇರೇಣ ವಕ್ತ್ರೇಣ ತದ್-
ವ್ಯಾಕುರ್ವನ್ನಿವ ನಿರ್ವಹೇನ್ಮಮ ಧುರಂ ಶ್ರೀರಂಗಸರ್ವಂಸಹಃ ॥ 70 ॥

ಅಂಗೈರಹಮ್ಪ್ರಥಮಿಕಾಚರಿತಾತ್ಮದಾನೈಃ
ಆಮೋದಮಾನನವಯೌವನಸಾವಲೇಪೈಃ ।
ಹೈ ಪಾರಿಜಾತಮಿವ ನೂತನತಾಯಮಾನ-
ಶಾಖಾಶತಂ ಹೃದಿ ದಧೀಮಹಿ ರಂಗಧುರ್ಯಮ್ ॥ 71 ॥ ವರ್। ಕಥಮಧೀಮಹಿ
ಆಲೋಕಾ ಹೃದಯಾಲವೋ ರಸವಶಾದೀಶಾನಮೀಷತ್ಸ್ಮಿತಂ
ಪ್ರಚ್ಛಾಯಾನಿ ವಚಾಂಸಿ ಪದ್ಮನಿಲಯಾ ಚೇತಃ ಶರವ್ಯಂ ವಪುಃ ।
ಚಕ್ಷುಷ್ಮನ್ತಿ ಗತಾಗತಾನಿ ತ ಇಮೇ ಶ್ರೀರಂಗಶೃಂಗಾರ ತೇ
ಭಾವಾ ಯೌವನಗನ್ಧಿನಃ ಕಿಮಪರಂ ಸಿಂಚನ್ತಿ ಚೇತಾಂಸಿ ನಃ ॥ 72 ॥

ಆಯತ್ಕಿರೀಟಮಲಿಕೋಲ್ಲಸದೂರ್ಧ್ವಪುಂಡ್ರಂ
ಆಕರ್ಣಲೋಚನಮನಂಕುಶಕರ್ಣಪಾಶಮ್ ।
ಉತ್ಫುಲ್ಲವಕ್ಷಸಮುದಾಯುಧಬಾಹುಮರ್ಹ-
ನ್ನೀವಿಂ ಚ ರಂಗಪದಮಬ್ಜಪದಂ ಭಜಾಮಃ ॥ 73 ॥ ವರ್। ಪತಿ
ಅಬ್ಜನ್ಯಸ್ತಪದಾಬ್ಜಮಂಚಿತಕಟೀಸಂವಾದಿಕೌಶೇಯಕಂ
ಕಿಂಚಿತ್ತಾಂಡವಗನ್ಧಿಸಂಹನನಕಂ ನಿರ್ವ್ಯಾಜಮನ್ದಸ್ಮಿತಮ್ ।
ಚೂಡಾಚುಮ್ಬಿಮುಖಾಮ್ಬುಜಂ ನಿಜಭುಜಾವಿಶ್ರಾನ್ತದಿವ್ಯಾಯುಧಂ
ಶ್ರೀರಂಗೇ ಶರದಃ ಶತಂ ತತ ಇತಃ ಪಶ್ಯೇಮ ಲಕ್ಷ್ಮೀಸಖಮ್ ॥ 74 ॥

ಅಗ್ರೇ ತಾರ್ಕ್ಷ್ಯೇಣ ಪಶ್ಚಾದಹಿಪತಿಶಯನೇನಾತ್ಮನಾ ಪಾರ್ಶ್ವಯೋಶ್ಚ
ಶ್ರೀಭೂಮಿಭ್ಯಾಮತೃಪ್ತ್ಯಾ ನಯನಚುಲಕನೈಃ ಸೇವ್ಯಮಾನಾಮೃತೌಘಮ್ ।
ವಕ್ತ್ರೇಣಾವಿಃಸ್ಮಿತೇನ ಸ್ಫುರದಭಯಗದಾಶಂಖಚಕ್ರೈರ್ಭುಜಾಗ್ರೈಃ
ವಿಶ್ವಸ್ಮೈ ತಿಷ್ಠಮಾನಂ ಶರಣಮಶರಣಾ ರಂಗರಾಜಂ ಭಜಾಮಃ ॥ 75 ॥

ಆರ್ತಾಪಾಶ್ರಯಮಾರ್ಥಿಕಲ್ಪಕಮಸಹ್ಯಾಗಸ್ಕರಕ್ಷ್ಮಾತಲಂ
ಸದ್ಯಃ ಸಮ್ಶ್ರಿತಕಾಮಧೇನುಮಭಿಯತ್ಸರ್ವಸ್ವಮಸ್ಮದ್ಧನಮ್ ।
ಶ್ರೀರಂಗೇಶ್ವರಮಾಶ್ರಯೇಮ ಕಮಲಾಚಕ್ಷುರ್ಮಹೀಜೀವಿತಂ
ಶ್ರೀರಂಗೇ ಸ ಸುಖಾಕರೋತು ಸುಚಿರಂ ದಾಸ್ಯಂ ಚ ಧತ್ತಾಂ ಮಯಿ ॥ 76 ॥

ಸ್ವಫಣವಿತಾನದೀಪ್ರಮಣಿಮಾಲಿಸುದಾಮರುಚಿ-
ಮ್ರದಿಮಸುಗನ್ಧಿಭೋಗಸುಖಶಾಯಿತರಂಗಧನಮ್ ।
ಮದಭರಮನ್ಥರೋಚ್ಛ್ವಸಿತನಿಃಶ್ವಸಿತೋತ್ತರಲಂ
ಫಣಿಪತಿಡೋಲಿಕಾತಲಿಮಮಾಶ್ವಸಿಮಃ ಪ್ರಣತಾಃ ॥ 77 ॥

ವಟದಲದೇವಕೀಜಠರವೇದಶಿರಃ ಕಮಲಾ-
ಸ್ತನಶಠಕೋಪವಾಗ್ವಪುಷಿ ರಂಗಗೃಹೇ ಶಯಿತಮ್ ।
ವರದಮುದಾರದೀರ್ಘಭುಜಲೋಚನಸಂಹನನಂ
ಪುರುಷಮುಪಾಸಿಷೀಯ ಪರಮಂ ಪ್ರಣತಾರ್ತಿಹರಮ್ ॥ 78 ॥

ಉದಧಿಪರಮವ್ಯೋಮ್ನೋರ್ವಿಸ್ಮೃತ್ಯ ಪದ್ಮವನಾಲಯಾ-
ವಿನಿಮಯಮಯೀಂ ನಿದ್ರಾಂ ಶ್ರೀರಂಗನಾಮನಿ ಧಾಮನಿ ।
ಫಣಿಪರಿವೃಢಸ್ಫಾರಪ್ರಶ್ವಾಸನಿಃಶ್ವಸಿತಕ್ರಮ-
ಸ್ಖಲಿತನಯನಂ ತನ್ವನ್ಮನ್ವೀತ ನಃ ಪರಮಃ ಪುಮಾನ್ ॥ 79 ॥

ಜಲಧಿಮಿವ ನಿಪೀತಂ ನೀರದೇನಾದ್ರಿಮಬ್ಧೌ
ನಿಹಿತಮಿವ ಶಯಾನಂ ಕುಂಜರಂ ವಾದ್ರಿಕುಂಜೇ ।
ಕಮಲಪದಕರಾಕ್ಷಂ ಮೇಚಕಂ ಧಾಮ್ನಿ ನೀಲೇ
ಫಣಿನಮಧಿಶಯಾನಂ ಪೂರುಷಂ ವನ್ದಿಷೀಯ ॥ 80 ॥

ಶ್ರೀರಂಗೇಶಯ ಇಹ ಶರ್ಮ ನಿರ್ಮಿಮೀತಾಮಾತಾಮ್ರಾಧರಪದಪಾಣಿವಿದ್ರುಮೋ ನಃ ।
ಕಾವೇರೀಲಹರಿಕರೋಪಲಾಲ್ಯಮಾನೋ ಗಮ್ಭೀರಾದ್ಭುತ ಇವ ತರ್ಣಕೋಽರ್ಣವಸ್ಯ ॥ 81 ॥

ಸಿಂಚೇದಿಮಂ ಚ ಜನಮಿನ್ದಿರಯಾ ತಟಿತ್ವಾನ್
ಭೂಷಾಮಣಿದ್ಯುತಿಭಿರಿನ್ದ್ರಧನುರ್ದಧಾನಃ ।
ಶ್ರೀರಂಗಧಾಮನಿ ದಯಾರಸನಿರ್ಭರತ್ವಾ-
ದಾದ್ರೌ ಶಯಾಲುರಿವ ಶೀತಲಕಾಲಮೇಘಃ ॥ 82 ॥

ಆಮೌಲಿರತ್ನಮಕರಾತ್ಪುನರಾ ಚ ಪದ್ಭ್ಯಾಂ
ಧಾಮಕ್ರಮೋನ್ನಮದುದಾರಮನೋಹರಾಂಗಮ್ ।
ಶ್ರೀರಂಗಶೇಷಶಯನಂ ನಯನೈಃ ಪಿಬಾಮಃ
ಪಶ್ಯನ್ಮನಃಪ್ರವಣಮೋಘಮಿವಾಮೃತಸ್ಯ ॥ 83 ॥

ಅರವಿನ್ದಿತಮಂಘ್ರಿಪಾಣಿಪದ್ಮೈ-
ರಪಿ ತಾಪಿಂಛಿತಮಂಚಿತಾಂಗಕಾನ್ತ್ಯಾ ।
ಅಧರೇಣ ಸ ಬನ್ಧುಜೀವಿತಂ ಶ್ರೀಃ
ನಿಯತಂ ನನ್ದನಯೇತ ರಂಗಚನ್ದ್ರಮ್ ॥ 84 ॥

ಅನ್ಯೋನ್ಯರಂಜಕರುಚೋಽನುಪಮಾನಶೋಭಾಃ
ದಿವ್ಯಸ್ರಗಮ್ಬರಪರಿಷ್ಕರಣಾಂಗರಾಗಾಃ ।
ಸಂಸ್ಪರ್ಶತಃ ಪುಲಕಿತಾ ಇವ ಚಿನ್ಮಯತ್ವಾತ್
ರಂಗೇನ್ದುಕಾನ್ತಿಮಧಿಕಾಮುಪಬೃಮ್ಹಯನ್ತಿ ॥ 85 ॥

ದ್ರುತಕನಕಜಗಿರಿಪರಿಮಿಲದುದಧಿ-
ಪ್ರಚಲಿತಲಹರಿವದಹಮಹಮಿಕಯಾ ।
ಸ್ನಪಯತಿ ಜನಮಿಮಮಪಹರತಿ ತಮಃ
ಫಣಿಶಯಮರಕತಮಣಿಕಿರಣಗಣಃ ॥ 86 ॥

ಭೋಗೀನ್ದ್ರನಿಃಶ್ವಸಿತ ಸೌರಭವರ್ಧಿತಂ ಶ್ರೀ
ನಿತ್ಯಾನುಷಕ್ತಪರಮೇಶ್ವರಭಾವಗನ್ಧಿ ।
ಸೌರಭ್ಯಮಾಪ್ಲುತದಿಶಾವಧಿ ರಂಗನೇತುಃ
ಆನನ್ದಸಮ್ಪದಿ ನಿಮಜ್ಜಯತೇ ಮನಾಂಸಿ ॥ 87 ॥

ರಂಗಭರ್ತುರಪಿ ಲೋಚನಚರ್ಚಾಂ ಸಾಹಸಾವಲಿಷು ಲೇಖಯಮಾನಮ್ ।
ಪುಷ್ಪಹಾಸ ಇತಿ ನಾಮ ದುಹಾನಂ ಸೌಕುಮಾರ್ಯಮತಿವಾಙ್ಮನಸಂ ನಃ ॥ 88 ॥

ಏಕೈಕಸ್ಮಿನ್ಪರಮವಯವೇಽನನ್ತಸೌನ್ದರ್ಯಮಗ್ನಂ
ಸರ್ವಂ ದ್ರಕ್ಷ್ಯೇ ಕಥಮಿತಿ ಮುಧಾ ಮಾಮಥಾ ಮನ್ದಚಕ್ಷುಃ ।
ತ್ವಾಂ ಸೌಭ್ರಾತ್ರವ್ಯತಿಕರಕರಂ ರಂಗರಾಜಾಂಗಕಾನಾಂ
ತಲ್ಲಾವಣ್ಯಂ ಪರಿಣಮಯಿತಾ ವಿಶ್ವಪಾರೀಣವೃತ್ತಿ ॥ 89 ॥

ವಪುರ್ಮನ್ದಾರಸ್ಯ ಪ್ರಥಮಕುಸುಮೋಲ್ಲಾಸಸಮಯಃ
ಕ್ಷಮಾಲಕ್ಷ್ಮೀಭೃಂಗೀಸಕಲಕರಣೋನ್ಮಾದನಮಧು ।
ವಿಕಾಸಃ ಸೌನ್ದರ್ಯಸ್ರಜಿ ರಸಿಕತಾಶೀಧುಚುಲಕೋ
ಯುವತ್ವಂ ರಂಗೇನ್ದೋಃ ಸುರಭಯತಿ ನಿತ್ಯಂ ಸುಭಗತಾಮ್ ॥ 90 ॥

ಕಿರೀಟಚೂಡರತ್ನರಾಜಿರಾಧಿರಾಜ್ಯಜಲ್ಪಿಕಾ ।
ಮುಖೇನ್ದುಕಾನ್ತಿರುನ್ಮುಖಂ ತರಂಗಿತೇವ ರಂಗಿಣಃ ॥ 91 ॥

ಶಿಖಾರತ್ನೋದ್ದೀಪ್ರಂ ದಿಶಿ ದಿಶಿ ಚ ಮಾಣಿಕ್ಯಮಕರೀ-
ಲಸಚ್ಛೃಂಗಂ ರಂಗಪ್ರಭುಮಣಿಕಿರೀಟಂ ಮನುಮಹೇ ।
ಸಮುತ್ತುಂಗಸ್ಫೀತಂ ಚಿದಚಿದಧಿರಾಜಶ್ರಿಯ ಇವ
ಪ್ರಿಯಾಕ್ರೀಡಂ ಚೂಡಾಮಣಿಮಪಿ ನಿತಮ್ಬಂ ತಮಭಿತಃ ॥ 92 ॥

ವಿಹರತು ಮಯಿ ರಂಗಿನಶ್ಚೂಲಿಕಾಭ್ರಮರಕತಿಲಕೋರ್ಧ್ವಪುಂಡ್ರೋಜ್ಜ್ವಲಮ್ ।
ಮುಖಮಮೃತತಟಾಕಚನ್ದ್ರಾಮ್ಬುಜಸ್ಮಯಹರಶುಚಿಮುಗ್ಧಮನ್ದಸ್ಮಿತಮ್ ॥ 93 ॥

ಮುಖಪುಂಡರೀಕಮುಪರಿ ತ್ರಿಕಂಟಕಂ ತಿಲಕಾಶ್ಚ ಕೇಸರಸಮಾಃ ಸಮೌಕ್ತಿಕಾಃ ।
ಇಹ ರಂಗಭರ್ತುರಭಿಯನ್ಮಧುವ್ರತಪ್ರಕರಶ್ರಿಯಂ ಭ್ರಮರಕಾಣಿ ಬಿಭ್ರತಿ ॥ 94 ॥

ಹೃದಯಂ ಪ್ರಸಾದಯತಿ ರಂಗಪತೇರ್ಮಧುರೋರ್ಧ್ವಪುಂಡ್ರತಿಲಕಂ ಲಲಿತಮ್ ।
ಅಲಿಕಾರ್ಧಚನ್ದ್ರದಲಸಂವಲಿತಾಮಮೃತಸ್ರುತಿಂ ಯದಭಿಶಂಕಯತೇ ॥ 95 ॥

ಸರಸೀರುಹೇ ಸಮವನಾಮ್ಯ ಮದಾದುಪರಿ ಪ್ರನೃತ್ಯದಲಿಪಂಕ್ತಿನಿಭೇ ।
ಸ್ಫುರತೋ ಭ್ರುವಾವುಪರಿ ಲೋಚನಯೋಃ ಸವಿಲಾಸಲಾಸ್ಯಗತಿ ರಂಗಭೃತಃ ॥ 96 ॥

ಸ್ಮರಶರನಲಿನಭ್ರಮಾನ್ನೇತ್ರಯೋಃ ಪರಿಸರನಮದಿಕ್ಷುಚಾಪಚ್ಛವಿ ।
ಯುಗಮುದಯತಿ ರಂಗಭರ್ತುರ್ಭ್ರುವೋಃ ಗುರುಕುಲಮಿವ ಶಾರ್ಂಗನೃತ್ತಶ್ರಿಯಃ ॥ 97 ॥

ಕೃಪಯಾ ಪರಯಾ ಕರಿಷ್ಯಮಾಣೇ ಸಕಲಾಂಗಂ ಕಿಲ ಸರ್ವತೋಽಕ್ಷಿ ನೇತ್ರೇ ।
ಪ್ರಥಮಂ ಶ್ರವಸೀ ಸಮಾಸ್ತೃಣಾತೇ ಇತಿ ದೈರ್ಘ್ಯೇಣ ವಿದನ್ತಿ ರಂಗನೇತುಃ ॥ 98 ॥

ಶ್ರವೋನಾಸಾರೋಧಾತ್ತದವಧಿಕಡೋಲಾಯಿತಗತೇ
ವಿಶಾಲಸ್ಫೀತಾಯದ್ರುಚಿರಶಿಶಿರಾತಾಮ್ರಧವಲೇ ।
ಮಿಥೋ ಬದ್ಧಸ್ಪರ್ಧಸ್ಫುರಿತಶಫರದ್ವನ್ದ್ವಲಲಿತೇ
ಕ್ರಿಯಾಸ್ತಾಂ ಶ್ರೀರಂಗಪ್ರಣಯಿನಯನಾಬ್ಜೇ ಮಯಿ ದಯಾಮ್ ॥ 99 ॥

ಕರುಣಾಮೃತಕೂಲಮುದ್ವಹೈಷ ಪ್ರಣಮತ್ಸ್ವಾಗತಿಕೀ ಪ್ರಸನ್ನಶೀತಾ ।
ಮಯಿ ರಂಗಧನೋಪಕರ್ಣಿಕಾಽಕ್ಷ್ಣೋಃ ಸರಿತೋರ್ವೀಕ್ಷಣವೀಚಿಸನ್ತತಿಃ ಸ್ತಾತ್ ॥ 100 ॥

ವಿಲಸತಿ ನಾಸಾ ಕಲ್ಪಕವಲ್ಲೀ ಮುಗ್ಧೇವ ರಂಗನಿಲಯಸ್ಯ ।
ಸ್ಮಿತಮಪಿ ತನ್ನವಕುಸುಮಂ ಚುಬುಕಕಪೋಲಂ ಚ ಪಲ್ಲವೋಲ್ಲಸಿತಮ್ ॥ 101 ॥

ನಯನಶಫರಿವಿದ್ಧೌ ಕರ್ಣಪಾಶಾವರುದ್ಧೌ
ರುಷ ಇವ ಲುಠತೋಽರ್ಚಿರ್ಮಂಜರೀರುದ್ಗಿರನ್ತೌ ।
ಪರಿಮಿಲದಲಕಾಲೀಶೈವಲಾಮಂಸವೇಲಾಂ
ಅನುಮಣಿಮಕರೋದ್ಧೌ ರಂಗಧುರ್ಯಾಮೃತಾಬ್ಧೇಃ ॥ 102 ॥

ಅಧರಮಧುರಾಮ್ಭೋಜಂ ತತ್ಕರ್ಣಪಾಶಮೃಣಾಲಿಕಾ-
ವಲಯಮಭಿ ಮಾಮಾಸ್ತಾಂ ರಂಗೇನ್ದುವಕ್ತ್ರಸರಶ್ಚಿರಮ್ ।
ನಯನಶಫರಂ ನಾಸಾಶೈವಾಲವಲ್ಲರಿ ಕರ್ಣಿಕಾ-
ಮಕರಮಲಕಶ್ರೇಣೀಪರ್ಯನ್ತನೀಲವನಾವಲಿ ॥ 103 ॥

ರಮಯತು ಸ ಮಾಂ ಕಂಠಃ ಶ್ರೀರಂಗನೇತುರುದಂಚಿತ-
ಕ್ರಮುಕತರುಣಗ್ರೀವಾಕಮ್ಬುಪ್ರಲಮ್ಬಮಲಿಮ್ಲುಚಃ ।
ಪ್ರಣಯವಿಲಗಲ್ಲಕ್ಷ್ಮೀವಿಶ್ವಮ್ಭರಾಕರಕನ್ದಲೀ-
ಕನಕವಲಯಕ್ರೀಡಾಸಂಕ್ರಾನ್ತರೇಖ ಇವೋಲ್ಲಸನ್ ॥ 104 ॥

ಅಧಿಷ್ಠಾನಸ್ತಮ್ಭೌ ಭುವನಪೃಥುಯನ್ತ್ರಸ್ಯ ಕಮಲಾ-
ಕರೇಣೋರಾಲಾನೇ ಅರಿಕರಿಘಟೋನ್ಮಾಥಮುಸಲೌ ।
ಫಣೀನ್ದ್ರಸ್ಫೀತಸ್ರಗ್ವ್ಯತಿಕರಿತಸನ್ದಿಗ್ಧವಿಭವೌ
ಭುಜೌ ಮೇ ಭೂಯಾಸ್ತಾಮಭಯಮಭಿ ರಂಗಪ್ರಣಯಿನಃ ॥ 105 ॥

ಪ್ರತಿಜಲಧಿತೋ ವೇಲಾಶಯ್ಯಾಂ ವಿಭೀಷಣಕೌತುಕಾತ್
ಪುನರಿವ ಪುರಸ್ಕರ್ತುಂ ಶ್ರೀರಂಗಿಣಃ ಫಣಿಪುಂಗವೇ ।
ಸಮುಪದಧತಃ ಕಂಚಿತ್ಕಂಚಿತ್ಪ್ರಸಾರಯತೋ ಭುಜ-
ದ್ವಯಮಪಿ ಸದಾ ದಾನಶ್ರದ್ಧಾಲು ದೀರ್ಘಮುಪಾಸ್ಮಹೇ ॥ 106 ॥

ಕುಸುಮಭರಾಲಸೌ ಸ್ಫಟಿಕವೇದಿಶಯೌ ವಿಟಪಾ-
ವಮರತರೋಃ ಪರಂ ಪರಿಹಸತ್ಪೃಥು ರಂಗಭುಜಃ ।
ಬಹುಮಣಿಮುದ್ರಿಕಾಕನಕಕಂಕಣದೋರ್ವಲಯೈಃ
ಕಿಸಲಯಿ ದೋರ್ದ್ವಯಂ ಫಣಿನಿ ನಿರ್ಭರಸುಪ್ತಮಿಮಃ ॥ 107 ॥

ಮದ್ರಕ್ಷಾವ್ರತಕೌತುಕೇ ಸುಕಟಕೇ ವಿಕ್ರಾನ್ತಿಕರ್ಣೇಜಪೇ
ಶಾರ್ಂಗಜ್ಯಾಕಿಣಕರ್ಕಶಿಮ್ನಿ ಸುಮನಸ್ಸ್ರಙ್ಮೋಹನೇ ಮಾರ್ದವೇ ।
ದೋರ್ದ್ವನ್ದ್ವಂ ಬಹುಶಃ ಪ್ರಲೋಭ್ಯ ಕಮಲಾಲೀಲೋಪಧಾನಂ ಭವತ್
ತಚ್ಚಿತ್ರಾಲಕಮುದ್ರಿತಂ ವಿಜಯತೇ ಶ್ರೀರಂಗಸಂಸಂಗಿನಃ ॥ 108 ॥

ಭವಾರ್ತಾನಾಂ ವಕ್ತ್ರಾಮೃತಸರಸಿ ಮಾರ್ಗಂ ದಿಶದಿವ
ಸ್ವಯಂ ವಕ್ತ್ರೇಣೇದಂ ವರದಮಿತಿ ಸನ್ದರ್ಶಿತಮಿವ ।
ಕರಾಮ್ಭೋಜಂ ಪಂಕೇರುಹವನರುಷಾ ಪಾಟಲಮಿವ
ಶ್ರಯಾಮಿ ಶ್ರೀರಂಗೇಶಯಿತುರುಪಧಾನೀಕೃತಮಹಮ್ ॥ 109 ॥

ಕಿರೀಟಂ ಶ್ರೀರಂಗೇಶಯಿತುರುಪಧಾನೀಕೃತಭುಜಃ
ವಿಧೀಶಾಧೀಶತ್ವಾದ್ಧಟತ ಇತಿ ಸಂಸ್ಪೃಶ್ಯ ವದತಿ ।
ನಿಹೀನಾನಾಂ ಮುಖ್ಯಂ ಶರಣಮಿತಿ ಬಾಹುಸ್ತದಿತರಃ
ಸ್ಫುಟಂ ಬ್ರೂತೇ ಪಾದಾಮ್ಬುಜಯುಗಲಮಾಜಾನುನಿಹಿತಃ ॥ 110 ॥

ಮಲಯಜಶಶಿಲಿಪ್ತಂ ಮಾಲತೀದಾಮತಲ್ಪಂ
ಸುಮಣಿಸರವಿತಾನಂ ಕೌಸ್ತುಭಸ್ವಸ್ತಿದೀಪಮ್ ।
ದನುಜವೃಷವಿಷಾಣೋಲ್ಲೇಖಚಿತ್ರಂ ಚ ಲಕ್ಷ್ಮೀ-
ಲಲಿತಗೃಹಮುಪಾಸೇ ರಂಗಸರ್ವಂಸಹೋರಃ ॥ 111 ॥

ಹಾರಸ್ಫಾರಿತಫೇನಮಂಶುಲಹರೀಮಾಲರ್ದ್ಧಿ ಮುಕ್ತಾಫಲ-
ಶ್ರೇಣೀಶೀಕರದುರ್ದಿನಂ ತತ ಇತೋ ವ್ಯಾಕೀರ್ಣರತ್ನೋತ್ಕರಮ್ ।
ಆವಿಃಕೌಸ್ತುಭಲಕ್ಷ್ಮಿ ರಂಗವಸತೇರ್ನಿಸ್ಸೀಮಭೂಮಾದ್ಭುತಂ
ವಕ್ಷೋ ಮನ್ದರಮಥ್ಯಮಾನಜಲಧಿಶ್ಲಾಘಂ ವಿಲೋಕೇಮಹಿ ॥ 112 ॥

ವಕ್ಷಃಸ್ಥಲ್ಯಾಂ ತುಲಸಿಕಮಲಾಕೌಸ್ತುಭೈರ್ವೈಜಯನ್ತೀ
ಸರ್ವೇಶತ್ವಂ ಕಥಯತಿತರಾಂ ರಂಗಧಾಮ್ನಸ್ತದಾಸ್ತಾಮ್ ।
ಕೂರ್ಮವ್ಯಾಘ್ರೀನಖಪರಿಮಿಲತ್ಪಂಚಹೇತೀ ಯಶೋದಾ-
ನದ್ಧಾ ಮೌಗ್ಧ್ಯಾಭರಣಮಧಿಕಂ ನಃ ಸಮಾಧಿಂ ಧಿನೋತಿ ॥ 113 ॥

ಕಿಯಾನ್ಭರೋ ಮಮ ಜಗದಂಡಮಂಡಲೀ-
ತ್ಯತೃಪ್ತಿತಃ ಕೃಶಿತಮಿವೋದರಂ ವಿಭೋಃ ।
ರಿರಕ್ಷಿಷೋಚಿತಜಗತೀಪರಮ್ಪರಾಂ
ಪರಾಮಿವ ಪ್ರಥಯತಿ ನಾಭಿಪಂಕಜಮ್ ॥ 114 ॥

ತ್ರಿವಿಧಚಿದಚಿದ್ವೃನ್ದಂ ತುನ್ದಾವಲಮ್ಬಿವಲಿತ್ರಯಂ
ವಿಗಣಯದಿವೈಶ್ವರ್ಯಂ ವ್ಯಾಖ್ಯಾತಿ ರಂಗಮಹೇಶಿತುಃ ।
ಪ್ರಣತವಶತಾಂ ಬ್ರೂತೇ ದಾಮೋದರತ್ವಕರಃ ಕಿಣಃ
ತದುಭಯಗುಣಾಕೃಷ್ಟಂ ಪಟ್ಟಂ ಕಿಲೋದರಬನ್ಧನಮ್ ॥ 115 ॥

ತ್ರಯೋ ದೇವಾಸ್ತುಲ್ಯಾಸ್ತ್ರಿತಯಮಿದಮದ್ವೈತಮಧಿಕಂ
ತ್ರಿಕಾದಸ್ಮಾತ್ತತ್ತ್ವಂ ಪರಮಿತಿ ವಿತರ್ಕಾನ್ ವಿಘಟಯನ್ ।
ವಿಭೋರ್ನಾಭೀಪದ್ಮೋ ವಿಧಿಶಿವನಿದಾನಂ ಭಗವತಃ
ತದನ್ಯದ್ಭ್ರೂಭಂಗೀಪರವದಿತಿ ಸಿದ್ಧಾನ್ತಯತಿ ನಃ ॥ 116 ॥

ಗರ್ಭೇ ಕೃತ್ವಾ ಗೋಪ್ತುಮನನ್ತಂ ಜಗದನ್ತ-
ರ್ಮಜ್ಜದ್ಭ್ರಮ್ಯಾ ವಾಂಛತಿ ಸಾಮ್ಯಂ ನನು ನಾಭಿಃ ।
ಉತ್ಕ್ಷಿಪ್ಯೈತತ್ಪ್ರೇಕ್ಷಿತುಮುದ್ಯದ್ಭ್ರಮಿಭೂಯಂ
ನಾಭೀಪದ್ಮೋ ರಂಹತಿ ರಂಗಾಯತನಾಬ್ಧೇಃ ॥ 117 ॥

ಮದಮಿವ ಮಧುಕೈಟಭಸ್ಯ ರಮ್ಭಾಕರಭಕರೀನ್ದ್ರಕರಾಭಿರೂಪ್ಯದರ್ಪಮ್ ।
ಸ್ಫುಟಮಿವ ಪರಿಭೂಯ ಗರ್ವಗುರ್ವೋಃ ಕಿಮುಪಮಿಮೀಮಹಿ ರಂಗಕುಂಜರೋರ್ವೋಃ ॥ 118 ॥

ಕಟೀಕಾನ್ತಿಸಂವಾದಿಚಾತುರ್ಯನೀವೀಲಸದ್ರತ್ನಕಾಂಚೀಕಲಾಪಾನುಲೇಪಮ್ ।
ಮಹಾಭ್ರಂ ಲಿಹನ್ಮೇರುಮಾಣಿಕ್ಯಸಾನೂರಿವಾಭಾತಿ ಪೀತಾಮ್ಬರಂ ರಂಗಬನ್ಧೋಃ ॥ 119 ॥

ಭರ್ಮಸ್ಥಲಾಂಶುಪರಿವೇಷ ಇವಾಮ್ಬುರಾಶೇಃ
ಸನ್ಧ್ಯಾಮ್ಬುವಾಹನಿಕುರುಮ್ಬಮಿವಾಮ್ಬರಸ್ಯ ।
ಶಮ್ಪಾಕದಮ್ಬಕಮಿವಾಮ್ಬುಮುಚೋ ಮನಾ ನಃ
ಪೀತಾಮ್ಬರಂ ಪಿಬತಿ ರಂಗಧುರನ್ಧರಸ್ಯ ॥ 120 ॥

ವೈಭೂಷಣ್ಯಾಂ ಕಾನ್ತಿರಾಂಗೀ ನಿಮಗ್ನಾ ವಿಷ್ವದ್ರೀಚೀ ಕ್ವಾಪಿ ಸೋನ್ಮಾದವೃತ್ತಿಃ ।
ಜಾನೇ ಜಾನುದ್ವನ್ದ್ವವಾರ್ತಾವಿವರ್ತೋ ಜಾತಃ ಶ್ರೀಮದ್ರಂಗತುಂಗಾಲಯಸ್ಯ ॥ 121 ॥

ಶ್ರೀರಂಗೇಶಯಜಂಘೇ ಶ್ರೀಭೂಮ್ಯಾಮರ್ಶಹರ್ಷಕಂಟಕಿತೇ ।
ತತ್ಕೇಲಿನಲಿನಮಾಂಸಲನಾಲದ್ವಯಲಲಿತಮಾಚರತಃ ॥ 122 ॥

ವನ್ದಾರುವೃನ್ದಾರಕಮೌಲಿಮಾಲಾಯುಂಜಾನಚೇತಃ ಕಮಲಾಕರೇಭ್ಯಃ ।
ಸಂಕ್ರನ್ತರಾಗಾವಿವ ಪಾದಪದ್ಮೌ ಶ್ರೀರಂಗಭರ್ತುರ್ಮನವೈ ನವೈ ಚ ॥ 123 ॥

ಯದ್ವೃನ್ದಾವನಪಂಡಿತಂ ದಧಿರವೈರ್ಯತ್ತಾಂಡವಂ ಶಿಕ್ಷಿತಂ
ಯಲ್ಲಕ್ಷ್ಮೀಕರಸೌಖ್ಯಸಾಕ್ಷಿ ಜಲಜಪ್ರಸ್ಪರ್ಧಮಾನರ್ದ್ಧಿ ಯತ್ ।
ಯದ್ಭಕ್ತೇಷ್ವಜಲಸ್ಥಲಜ್ಞಮಪಿ ಯದ್ದೂತ್ಯಪ್ರಸಂಗೋತ್ಸುಕಂ
ತದ್ವಿಷ್ಣೋಃ ಪರಮಂ ಪದಂ ವಹತು ನಃ ಶ್ರೀರಂಗಿಣೋ ಮಂಗಲಮ್ ॥ 124 ॥

ಶಿಂಜಾನಶ್ರುತಿಶಿಂಜಿನೀಮಣಿರವೈರ್ವಜ್ರಾರವಿನ್ದಧ್ವಜ-
ಚ್ಛತ್ರೀಕಲ್ಪಕಶಂಖಚಕ್ರಮುಕುರೈಸ್ಸ್ತೈಸ್ತೈಶ್ಚ ರೇಖಾಮಯೈಃ ।
ಐಶ್ವರ್ಯೇಣ ಜಯಂ ತ್ರಿವಿಕ್ರಮಮುಖಂ ಘುಷ್ಯದ್ಭಿರಾಮ್ರೇಡಿತಂ
ಶ್ರೀರಂಗೇಶಯಪಾದಪಂಕಜಯುಗಂ ವನ್ದಾಮಹೇ ಸುನ್ದರಮ್ ॥ 125 ॥

ಪುನಾನಿ ಭುವನಾನ್ಯಹಂ ಬಹುಮುಖೀತಿ ಸರ್ವಾಂಗುಲೀ
ಝಲಜ್ಝಲಿತಜಾಹ್ನವೀಲಹರಿವೃನ್ದಸನ್ದೇಹದಾಃ ।
ದಿವಾ ನಿಶಿ ಚ ರಂಗಿಣಶ್ಚರಣಚಾರುಕಲ್ಪದ್ರುಮ-
ಪ್ರವಾಲನವಮಂಜರೀಃ ನಖರುಚೀರ್ವಿಗಾಹೇಮಹಿ ॥ 126 ॥

ಶ್ರೀರಂಗೇನ್ದೋಃ ಪದಕಿಸಲಯೇ ನೀಲಮಂಜೀರಮೈತ್ರ್ಯಾ
ವನ್ದೇ ವೃನ್ತಪ್ರಣಯಿಮಧುಪವ್ರಾತರಾಜೀವಜೈತ್ರೇ ।
ನಿತ್ಯಾಭ್ಯರ್ಚಾನತವಿಧಿಮುಖಸ್ತೋಮಸಂಶಯ್ಯಮಾನೈಃ
ಹೇಮಾಮ್ಭೋಜೈರ್ನಿಬಿಡನಿಕಟೇ ರಾಮಸೀತೋಪನೀತೈಃ ॥ 127 ॥

ಇತಿ ಶ್ರೀರಂಗರಾಜಸ್ತವೇ ಪೂರ್ವಶತಕಂ ಸಮಾಪ್ತಮ್ ।

ಅಥ ಶ್ರೀರಂಗರಾಜಸ್ತವೇ ಉತ್ತರಶತಕಮ್ ।

ಶ್ರೀಪರಾಶರಭಟ್ಟಾರ್ಯಃ ಶ್ರೀರಂಗೇಶಪುರೋಹಿತಃ ।
ಶ್ರೀವತ್ಸಾಂಕಸುತಃ ಶ್ರೀಮಾನ್ ಶ್ರೇಯಸೇ ಮೇಽಸ್ತು ಭೂಯಸೇ ॥

ಹರ್ತುಂ ತಮಸ್ಸದಸತೀ ಚ ವಿವೇಕ್ತುಮೀಶೋ
ಮಾನಂ ಪ್ರದೀಪಮಿವ ಕಾರುಣಿಕೋ ದದಾತಿ ।
ತೇನಾವಲೋಕ್ಯ ಕೃತಿನಃ ಪರಿಭುಂಜತೇ ತಂ
ತತ್ರೈವ ಕೇಽಪಿ ಚಪಲಾಶ್ಶಲಭೀಭವನ್ತಿ ॥ 1 ॥

ಯಾ ವೇದಬಾಹ್ಯಾಃ ಸ್ಮೃತಯೋಽರ್ಹದಾದೇರ್ವೇದೇಷು ಯಾಃ ಕಾಶ್ಚ ಕುದೃಷ್ಟಯಃ ।
var ಕುದೃಷ್ಟಯಸ್ತಾಃ?
ಆಗಸ್ಕೃತಾಂ ರಂಗನಿಧೇ ತ್ವದಧ್ವನ್ಯನ್ಧಂಕರಣ್ಯಃ
ಸ್ಮೃತವಾನ್ ಮನುಸ್ತತ್ ॥ 2 ॥

ಪ್ರತ್ಯಕ್ಷಪ್ರಮಥನಪಶ್ಯತೋಹರತ್ವಾ-
ನ್ನಿರ್ದೋಷಶ್ರುತಿವಿಮತೇಶ್ಚ ಬಾಹ್ಯವರ್ತ್ಮ ।
ದುಸ್ತರ್ಕಪ್ರಭವತಯಾ ಚ ವಕ್ತೃದೋಷ-
ಸ್ಪೃಷ್ಟ್ಯಾ ಚ ಪ್ರಜಹತಿ ರಂಗವಿನ್ದ ವೃದ್ಧಾಃ ॥ 3 ॥

ಅವಯವಿತಯೇದಂಕುರ್ವಾಣೈರ್ಬಹಿಷ್ಕರಣೈರ್ವಪು-
ರ್ನಿರವಯವಕೋಽಹಂಕಾರಾರ್ಹಃ ಪುಮಾನ್ ಕರಣಾತಿಗಃ ।
ಸ್ಫುರತಿ ಹಿ ಜನಾಃ ಪ್ರತ್ಯಾಸತ್ತೇರಿಮೌ ನ ವಿವಿಂಚತೇ
ತದಧಿಕುರುತಾಂ ಶಾಸ್ತ್ರಂ ರಂಗೇಶ ತೇ ಪರಲೋಕಿನಿ ॥ 4 ॥

ಪ್ರತ್ಯಕ್ಷಾ ಶ್ರುತಿರರ್ಥಧೀಶ್ಚ ನ ತಥಾ ದೋಷಸ್ತದರ್ಥಃ
ಪುನರ್ಧರ್ಮಾಧರ್ಮಪರಾವರೇಶ್ವರಮುಖಃ ಪ್ರತ್ಯಕ್ಷಬಾಧ್ಯೋ ನ ಚ ।
ತಚ್ಚಾರ್ವಾಕಮತೇಽಪಿ ರಂಗರಮಣ ಪ್ರತ್ಯಕ್ಷವತ್ ಸಾ ಪ್ರಮಾ
ಯೋಗೋನ್ಮೀಲಿತಧೀಸ್ತದರ್ಥಮಥವಾ ಪ್ರತ್ಯಕ್ಷಮೀಕ್ಷೇತ ಸಃ ॥ 5 ॥

ನ ಸದಸದುಭಯಂ ವಾ ನೋಭಯಸ್ಮಾದ್ಬಹಿರ್ವಾ ಜಗದಿತಿ
ನ ಕಿಲೈಕಾಂ ಕೋಟಿಮಾಟೀಕತೇ ತತ್ ।
ಇತಿ ನಿರುಪಧಿ ಸರ್ವಂ ಸರ್ವಿಕಾತೋ ನಿಷೇಧನ್
ವರದ ಸುಗತಪಾಶಶ್ಚೋರಲಾವಂ ವಿಲಾವ್ಯಃ ॥ 6 ॥

ಪ್ರತೀತಿಶ್ಚೇದಿಷ್ಟಾ ನ ನಿಖಿಲನಿಷೇಧೋ ಯದಿ ನ ಕೋ
ನಿಷೇದ್ಧಾಽತೋ ನೇಷ್ಟೋ ನಿರುಪಧಿನಿಷೇಧಸ್ಸದುಪಧೌ ।
ನಿಷೇಧೇಽನ್ಯತ್ಸಿಧ್ಯೇದ್ವರದ ಘಟಭಂಗೇ ಶಕಲವತ್
ಪ್ರಮಾಶೂನ್ಯೇ ಪಕ್ಷೇ ಶ್ರುತಿರಪಿ ಮತೇಽಸ್ಮಿನ್ವಿಜಯತಾಮ್ ॥ 7 ॥

ಯೋಗಾಚಾರೋ ಜಗದಪಲಪತ್ಯತ್ರ ಸೌತ್ರಾನ್ತಿಕಸ್ತ-
ದ್ಧೀವೈಚಿತ್ರ್ಯಾದನುಮಿತಿಪದಂ ವಕ್ತಿ ವೈಭಾಷಿಕಸ್ತು ।
ಪ್ರತ್ಯಕ್ಷಂ ತತ್ಕ್ಷಣಿಕಯತಿ ತೇ ರಂಗನಾಥ ತ್ರಯೋಽಪಿ
ಜ್ಞಾನಾತ್ಮತ್ವಕ್ಷಣಭಿದುರತೇ ಚಕ್ಷತೇ ತಾನ್ ಕ್ಷಿಪಾಮಃ ॥ 8 ॥

ಜಗದ್ಭಂಕುರಂ ಭಂಗುರಾ ಬುದ್ಧಿರಾತ್ಮೇತ್ಯಸದ್ವೇತ್ತ್ರಭಾವೇ
ತಥಾ ವೇದ್ಯವಿತ್ತ್ಯೋಃ ।
ಕ್ಷಣಧ್ವಂಸತಶ್ಚ ಸ್ಮೃತಿಪ್ರತ್ಯಭಿಜ್ಞಾದರಿದ್ರಂ
ಜಗತ್ಸ್ಯಾದಿದಂ ರಂಗಚನ್ದ್ರ ॥ 9 ॥

ಅಹಮಿದಮಭಿವೇದ್ಮೀತ್ಯಾತ್ಮವಿತ್ತ್ಯೋರ್ವಿಭೇದೇ
ಸ್ಫುರತಿ ಯದಿ ತದೈಕ್ಯಂ ಬಾಹ್ಯಮಪ್ಯೇಕಮಸ್ತು ।
ಪ್ರಮಿತಿರಪಿ ಮೃಷಾ ಸ್ಯಾನ್ಮೇಯಮಿಥ್ಯಾತ್ವವಾದೇ
ಯದಿ ತದಪಿ ಸಹೇರನ್ ದೀರ್ಘಮಸ್ಮನ್ಮತಾಯುಃ ॥ 10 ॥

ಏತದ್ರಾಮಾಸ್ತ್ರಂ ದಲಯತು ಕಲಿರ್ಬ್ರಹ್ಮಮೀಮಾಂಸಕಾಂಶ್ಚ
ಜ್ಞಪ್ತಿರ್ಬ್ರಹ್ಮೈತಜ್ಜ್ವಲದಪಿ ನಿಜಾವಿದ್ಯಯಾ ಬಮ್ಭ್ರಮೀತಿ ।
ತಸ್ಯ ಭ್ರಾನ್ತಿಂ ತಾಂ ಶ್ಲಥಯತಿ ಜಿತಾದ್ವೈತವಿದ್ಯಸ್ತು ಜೀವೋ
ಯದ್ಯದ್ದೃಶ್ಯಂ ತದ್ವಿತಥಮಿತಿ ಯೇ ಜ್ಞಾಪಯಾಂಚಕ್ರುರಜ್ಞಾಃ ॥ 11 ॥

ಅಂಗೀಕೃತ್ಯ ತು ಸಪ್ತಭಂಗಿಕುಸೃತಿಂ ಸ್ಯಾದಸ್ತಿನಾಸ್ತ್ಯಾತ್ಮಿಕಾಂ
ವಿಶ್ವಂ ತ್ವದ್ವಿಭವಂ ಜಗಜ್ಜಿನಮತೇ ನೈಕಾನ್ತಮಾಚಕ್ಷತೇ ।
ಭಿನ್ನಾಭಿನ್ನಮಿದಂ ತಥಾ ಜಗದುಷೇ ವನ್ಧ್ಯಾ ಮಮಾಮ್ಬೇತಿವ-
ನ್ನೂತ್ನಬ್ರಹ್ಮವಿದೇ ರಹಃ ಪರಮಿದಂ ರಂಗೇನ್ದ್ರ ತೇ ಚಕ್ಷತಾಮ್ ॥ 12 ॥

ಕಣಚರಚರಣಾಕ್ಷೌ ಭಿಕ್ಷಮಾಣೌ ಕುತರ್ಕೈಃ
ಶ್ರುತಿಶಿರಸಿ ಸುಭಿಕ್ಷಂ ತ್ವಜ್ಜಗತ್ಕಾರಣತ್ವಮ್ ।
ಅಣುಷು ವಿಪರಿಣಾಮ್ಯ ವ್ಯೋಮಪೂರ್ವಂ ಚ ಕಾರ್ಯಂ
ತವ ಭವದನಪೇಕ್ಷಂ ರಂಗಭರ್ತರ್ಬ್ರುವಾತೇ ॥ 13 ॥

ವೇದೇ ಕರ್ತ್ರಾದ್ಯಭಾವಾದ್ಬಲವತಿ ಹಿ ನಯೈಸ್ತ್ವನ್ಮುಖೇ ನೀಯಮಾನೇ
ತನ್ಮೂಲತ್ವೇನ ಮಾನಂ ತದಿತರದಖಿಲಂ ಜಾಯತೇ ರಂಗಧಾಮನ್
ತಸ್ಮಾತ್ಸಾಂಖ್ಯಂ ಸಯೋಗಂ ಸಪಶುಪತಿಮತಂ ಕುತ್ರಚಿತ್ಪಂಚರಾತ್ರಂ
ಸರ್ವತ್ರೈವ ಪ್ರಮಾಣಂ ತದಿದಮವಗತಂ ಪಂಚಮಾದೇವ ವೇದಾತ್ ॥ 14 ॥

ಸಂಚಷ್ಟೇ ನೇಶ್ವರಂ ತ್ವಾಂ ಪುರುಷಪರಿಷದಿ ನ್ಯಸ್ಯ ಯದ್ವಾಽಽನ್ಯಪರ್ಯಾತ್
ಸಾಂಖ್ಯೋ ಯೋಗೀ ಚ ಕಾಕ್ವಾ ಪ್ರತಿಫಲನಮಿವೈಶ್ವರ್ಯಮೂಚೇ ಕಯಾಚಿತ್ ।
ಭಿಕ್ಷೌ ಶೈವಸ್ಸುರಾಜಮ್ಭವಮಭಿಮನುತೇ ರಂಗರಾಜಾತಿರಾಗಾತ್
ತ್ವಾಂ ತ್ವಾಮೇವಾಭ್ಯಧಾಸ್ತ್ವಂ ನನು ಪರವಿಭವವ್ಯೂಹನಾಢ್ಯಮ್ಭವಿಷ್ಣುಮ್ ॥ 15 ॥

ಇತಿ ಮೋಹನವರ್ತ್ಮನಾ/ವರ್ಷ್ಮಣಾ ತ್ವಯಾಽಪಿ ಗ್ರಥಿತಂ ಬಾಹ್ಯಮತಂ ತೃಣಾಯ ಮನ್ಯೇ ।
ಅಥ ವೈದಿಕವರ್ಮವರ್ಮಿತಾನಾಂ ಮನಿತಾಹೇ ಕುದೃಶಾಂ ಕಿಮೀಶ ವರ್ತ್ಮ ॥ 16 ॥

ಸಂಸ್ಕಾರಂ ಪ್ರತಿಸಂಚರೇಷು ನಿದಧತ್ಸರ್ಗೇಸು ತತ್ಸ್ಮಾರಿತಂ
ರೂಪಂ ನಾಮ ಚ ತತ್ತದರ್ಹನಿವಹೇ ವ್ಯಾಕೃತ್ಯ ರಂಗಾಸ್ಪದ ।
ಸುಪ್ತೋದ್ಬುದ್ಧವಿರಿಂಚಪೂರ್ವಜನತಾಮಧ್ಯಾಪ್ಯ ತತ್ತದ್ಧಿತಂ
ಶಾಸನ್ನಸ್ಮೃತಕರ್ತೃಕಾನ್ ವಹಸಿ ಯದ್ವೇದಾಃ ಪ್ರಮಾಣಂ ತತಃ ॥ 17 ॥

ಶೀಕ್ಷಾಯಾಂ ವರ್ಣಶಿಕ್ಷಾ ಪದಸಮಧಿಗಮೋ ವ್ಯಾಕ್ರಿಯಾನಿರ್ವಚೋಭ್ಯಾಂ
ಛನ್ದಶ್ಛನ್ದಶ್ಚಿತೌ ಸ್ಯಾದ್ಗಮಯತಿ ಸಮಯಂ ಜ್ಯೌತಿಷಂ ರಂಗನಾಥ ।
ಕಲ್ಪೇಽನುಷ್ಠಾನಮುಕ್ತಂ ಹ್ಯುಚಿತಗಮಿತಯೋರ್ನ್ಯಾಯಮೀಮಾಂಸಯೋಸ್ಸ್ಯಾತ್
ಅರ್ಥವ್ಯಕ್ತಿಃ ಪುರಾಣಸ್ಮೃತಿಷು ತದನುಗಾಸ್ತ್ವಾಂ ವಿಚಿನ್ವನ್ತಿ ವೇದಾಃ ॥ 18 ॥

ಆದೌ ವೇದಾಃ ಪ್ರಮಾಣಂ ಸ್ಮೃತಿರುಪಕುರುತೇ ಸೇತಿಹಾಸೈಃ ಪುರಾಣೈಃ
ನ್ಯಾಯೈಸ್ಸಾರ್ಧಂ ತ್ವದರ್ಚಾವಿಧಿಮುಪರಿ ಪರಕ್ಷೀಯತೇ ಪೂರ್ವಭಾಗಃ ।
ಊರ್ಧ್ವೋ ಭಾಗತ್ಸ್ವದೀಹಾಗುಣವಿಭವಪರಿಜ್ಞಾಪನೈಸ್ತ್ವತ್ಪದಾಪ್ತೌ
ವೇದ್ಯೋ ವೇದೈಶ್ಚ ಸರ್ವೈರಹಮಿತಿ ಭಗವನ್ ಸ್ವೇನ ಚ ವ್ಯಾಚಕರ್ಥ ॥ 19 ॥

ಕ್ರಿಯಾ ತಚ್ಛಕ್ತಿರ್ವಾ ಕಿಮಪಿ ತದಪೂರ್ವಂ ಪಿತೃಸುರ-
ಪ್ರಸಾದೋ ವಾ ಕರ್ತುಃ ಫಲದ ಇತಿ ರಂಗೇಶ ಕುದೃಶಃ ।
ತ್ವದರ್ಚೇಷ್ಟಾಪೂರ್ತೇ ಫಲಮಪಿ ಭವತ್ಪ್ರೀತಿಜಮಿತಿ
ತ್ರಯೀವೃದ್ಧಾಸ್ತತ್ತದ್ವಿಧಿರಪಿ ಭವತ್ಪ್ರೇರಣಮಿತಿ ॥ 20 ॥

ಆಜ್ಞಾ ತೇ ಸನಿಮಿತ್ತನಿತ್ಯವಿಧಯಃ ಸ್ವರ್ಗಾದಿಕಾಮ್ಯದ್ವಿಧಿಃ
ಸೋಽನುಜ್ಞಾ ಶಠಚಿತ್ತಶಾಸ್ತ್ರವಶತೋಪಾಯೋಽಭಿಚಾರಶ್ರುತಿಃ ।
ಸರ್ವೀಯಸ್ಯ ಸಮಸ್ತಶಾಸಿತುರಹೋ ಶ್ರೀರಂಗಸರ್ವಸ್ವ ತೇ
ರಕ್ಷಾಕೂತನಿವೇದಿನೀ ಶ್ರುತಿರಸೌ ತ್ವನ್ನಿತ್ಯಶಾಸ್ತಿಸ್ತತಃ ॥ 21 ॥

ಅತ್ರಾಸ್ತೇ ನಿಧಿರಿತಿವತ್ಪುಮರ್ಥಭೂತೇ ಸಿದ್ಧಾರ್ಥಾ ಅಪಿ ಗುಣರೂಪವೃತ್ತವಾದಾಃ ।
ರಂಗೇಶ ತ್ವಯಿ ಸಕಲಾಸ್ಸಮನ್ವಯನ್ತೇ ನೋಪಾಸಾಫಲವಿಧಿಭಿರ್ವಿಶೇಷ ಏಷಾಮ್ ॥ 22 ॥

ದೇಹೋ ದೇಹಿನಿ ಕಾರಣೇ ವಿಕೃತಯೋ ಜಾತಿರ್ಗುಣಾಃ ಕರ್ಮ ಚ
ದ್ರವ್ಯೇ ನಿಷ್ಠಿತರೂಪಬುದ್ಧಿವಚನಾಸ್ತಾತ್ಸ್ಥ್ಯಾತ್ ತಥೇದಂ ಜಗತ್ ।
ವಿಶ್ವಂ ತ್ವಯ್ಯಭಿಮನ್ಯಸೇ ಜಗದಿಷೇ ತೇನಾದ್ವಿತೀಯಸ್ತತಃ
ಮಾಯೋಪಾಧಿವಿಕಾರಸಂಕರಕಥಾ ಕಾ ನಾಮ ರಂಗೇಶ್ವರ ॥ 23 ॥

ಸ್ಥಿತ್ಯುತ್ಪತ್ತಿಪ್ರವೃತ್ತಿಗ್ರಸನನಿಯಮನವ್ಯಾಪನೈರಾತ್ಮನಸ್ತೇ
ಶೇಷೋಽಶೇಷಃ ಪ್ರಪಂಚೋ ವಪುರಿತಿ ಭವತಸ್ತಸ್ಯ ಚಾಭೇದವಾದಾಃ ।
ಸರ್ವಂ ಖಲ್ವೈತದಾತ್ಮ್ಯಂ ಸಕಲಮಿದಮಹಂ ತತ್ತ್ವಮಸ್ಯೇವಮಾದ್ಯಾಃ
ವ್ಯಾಖ್ಯಾತಾ ರಂಗಧಾಮಪ್ರವಣ ವಿಜಯಿಭಿರ್ವೈದಿಕೈಸ್ಸಾರ್ವಭೌಮೈಃ ॥ 24 ॥

ಸರಾಜಕಮರಾಜಕಂ ಪುನರನೇಕರಾಜಂ ತಥಾ
ಯಥಾಭಿಮತರಾಜಕಂ ಜಗದಿದಂ ಜಜಲ್ಪುರ್ಜಡಾಃ ।
ಜಗಾವವಶಚಿತ್ರತಾತರತಮತ್ವತರ್ಕಾಂಗಿಕಾ
ಶ್ರುತಿಶ್ಚಿದಚಿತೀ ತ್ವಯಾ ವರದ ನಿತ್ಯರಾಜನ್ವತೀ ॥ 25 ॥

ಬ್ರಹ್ಮಾದ್ಯಾಸ್ಸೃಜ್ಯವರ್ಗೇ ಭ್ರುಕುಟಿಭಟತಯೋದ್ಘಾಟಿತಾ ನಾವತಾರ-
ಪ್ರಸ್ತಾವೇ ತೇನ ನ ತ್ವಂ ನ ಚ ತವ ಸದೃಶಾ ವಿಶ್ವಮೇಕಾತಪತ್ರಮ್ ।
ಲಕ್ಷ್ಮೀನೇತ್ರಾ ತ್ವಯೇತಿ ಶ್ರುತಿಮುನಿವಚನೈಸ್ತ್ವತ್ಪರೈರರ್ಪಯಾಮಃ
ಶ್ರೀರಂಗಾಮ್ಭೋಧಿಚನ್ದ್ರೋದಯ ಜಲಮುಚಿತಂ ವಾದಿಕೌತಸ್ಕುತೇಭ್ಯಃ ॥ 26 ॥

ದೋಷೋಪಧಾವಧಿಸಮಾತಿಶಯಾನಸಂಖ್ಯಾ
ನಿರ್ಲೇಪಮಂಗಲಗುಣೌಘದುಘಾಷ್ಷಡೇತಾಃ ।
ಜ್ಞಾನೈಶ್ವರೀಶಕನವೀರ್ಯಬಲಾರ್ಚಿಷಸ್ತ್ವಾಂ
ರಂಗೇಶ ಭಾಸ ಇವ ರತ್ನಮನರ್ಘಯನ್ತಿ ॥ 27 ॥

ಯುಗಪದನಿಶಮಕ್ಷೈಃ ಸ್ವೈಃ ಸ್ವತೋ ವಾಽಽಕ್ಷಕಾರ್ಯೇ
ನಿಯಮಮನಿಯಮಂ ವಾ ಪ್ರಾಪ್ಯ ರಂಗಾಧಿರಾಜ ।
ಕರತಲವದಶೇಷಂ ಪಶ್ಯಸಿ ಸ್ವಪ್ರಕಾಶಂ
ತದವರಣಮಮೋಘಂ ಜ್ಞಾನಮಾಮ್ನಾಸಿಷುಸ್ತೇ ॥ 28 ॥

ನಯನಶ್ರವಣೋ ದೃಶಾ ಶೃಣೋಷಿ ಅಥ ತೇ ರಂಗಪತೇ ಮಹೇಶಿತುಃ ।
ಕರಣೈರಪಿ ಕಾಮಕಾರಿಣಃ ಘಟತೇ ಸರ್ವಪಥೀನಮೀಕ್ಷಣಮ್ ॥ 29 ॥

ಸಾರ್ವಜ್ಞ್ಯೇನಾಜ್ಞಮೂಲಂ ಜಗದಭಿದಧತೋ ವಾರಿತಾಸ್ಸಾಕ್ಷಿಮಾತ್ರಾತ್
ಸಾಂಖ್ಯೋಕ್ತಾತ್ಕಾರಣಂ ತ್ವಾಂ ಪರಯತಿ ಭಗವನ್ನೈಶ್ವರೀ ರಂಗಶಾಯಿನ್
ಅಪ್ರೇರ್ಯೋಽನ್ಯೈಃ ಸ್ವತನ್ತ್ರೋಽಪ್ರತಿಹತಿ ಸದಸತ್ಕರ್ಮಚೈತ್ರ್ಯಾ ವಿಚಿತ್ರಂ
ಯತ್ರೇಚ್ಛಾಲೇಶತಸ್ತ್ವಂ ಯುಗಪದಗಣಯನ್ ವಿಶ್ವಮಾವಿಶ್ಚಕರ್ಥ ॥ 30 ॥

ಕಾರ್ಯೇಽನನ್ತೇ ಸ್ವತನುಮುಖತಸ್ತ್ವಾಮುಪಾದಾನಮಾಹುಃ
ಸಾ ತೇ ಶಕ್ತಿಸ್ಸುಕರಮಿತರಚ್ಚೇತಿ ವೇಲಾಂ ವಿಲಂಘ್ಯ ।
ಇಚ್ಛಾ ಯಾವದ್ವಿಹರತಿ ಸದಾ ರಂಗರಾಜಾನಪೇಕ್ಷಾ
ಸೈವೈಶಾನಾದತಿಶಯಕರಿ ಸೋರ್ಣನಾಭೌ ವಿಭಾವ್ಯಾ ॥ 31 ॥

ಸ್ವಮಹಿಮಸ್ಥಿತಿರೀಶ ಭೃಶಕ್ರಿಯೋಽಪ್ಯಕಲಿತಶ್ರಮ ಏವ ಬಿಭರ್ಷಿ ಯತ್ ।
ವಪುರಿವ ಸ್ವಮಶೇಷಮಿದಂ ಬಲಂ ತವ ಪರಾಶ್ರಿತಕಾರಣವಾರಣಮ್ ॥ 32 ॥

ಮೃಗನಾಭಿಗನ್ಧ ಇವ ಯತ್ಸಕಲಾರ್ಥಾನ್ ನಿಜಸನ್ನಿಧೇರವಿಕೃತೋ ವಿಕೃಣೋಷಿ ।
ಪ್ರಿಯರಂಗ ವೀರ್ಯಮಿತಿ ತತ್ತು ವದನ್ತೇ ಸವಿಕಾರಕಾರಣಮಿತೋ ವಿನಿವಾರ್ಯಮ್ ॥ 33 ॥

ಸಹಕಾರ್ಯಪೇಕ್ಷಮಪಿ ಹಾತುಮಿಹ ತದನಪೇಕ್ಷಕರ್ತೃತಾ ।
ರಂಗಧನ ಜಯತಿ ತೇಜ ಇತಿ ಪ್ರಣತಾರ್ತಿಜಿತ್ ಪ್ರತಿಭಟಾಭಿಭಾವುಕಮ್ ॥ 34 ॥

ಮರ್ತ್ಯೌತ್ಥಾಯಂ ವಿರಿಂಚಾವಧಿಕಮುಪರಿ ಚೋತ್ಪ್ರೇಕ್ಷ್ಯ ಮೀಮಾಂಸಮಾನಾ
ರಂಗೇನ್ದ್ರಾನನ್ದವಲ್ಲೀ ತವ ಗುಣನಿವಹಂ ಯೌವನಾನನ್ದಪೂರ್ವಮ್ ।
ನ ಸ್ವಾರ್ಥಂ ಸ್ಪ್ರಷ್ಟುಮೀಷ್ಟೇ ಸ್ಖಲತಿ ಪಥಿ ಪರಂ ಮೂಕಲಾಯಂ ನಿಲಿಲ್ಯೇ
ಹನ್ತೈವಂ ತ್ವದ್ಗುಣಾನಾಮವಧಿಗಣನಯೋಃ ಕಾ ಕಥಾ ಚಿತ್ತವಾಚೋಃ ॥ 35 ॥

ನ್ಯಧಾಯಿಷತ ಯೇ ಗುಣಾ ನಿಧಿನಿಧಾಯಮಾರಣ್ಯಕೇಷ್ವಮೀ
ಮ್ರದಿಮಚಾತುರೀಪ್ರಣತಚಾಪಲಕ್ಷಾನ್ತಯಃ ।
ದಯಾವಿಜಯಸೌನ್ದರೀಪ್ರಭೃತಯೋಽಪಿ ರತ್ನೌಘವತ್
ಜಗದ್ವ್ಯವಹೃತಿಕ್ಷಮಾ ವರದ ರಂಗರತ್ನಾಪಣೇ ॥ 36 ॥

ಯಮಾಶ್ರಿತ್ಯೈವಾತ್ಮಮ್ಭರಯ ಇವ ತೇ ಸದ್ಗುಣಗಣಾಃ
ಪ್ರಥನ್ತೇ ಸೋಽನನ್ತಸ್ವವಶಘನಶಾನ್ತೋದಿತದಶಃ ।
ತ್ವಮೇವ ತ್ವಾಂ ವೇತ್ಥ ಸ್ತಿಮಿತವಿತರಂಗಂ ವರದ ಭೋಃ
ಸ್ವಸಂವೇದ್ಯಸ್ವಾತ್ಮದ್ವಯಸಬಹುಲಾನನ್ದಭರಿತಮ್ ॥ 37 ॥

ಆಘ್ರಾಯೇಶ್ವರಗನ್ಧಮೀಶಸದೃಶಂ ಮನ್ಯಾಸ್ತವೇನ್ದ್ರಾದಯೋ
ಮುಹ್ಯನ್ತಿ ತ್ವಮನಾವಿಲೋ ನಿರವಧೇರ್ಭೂಮ್ನಃ ಕಣೇಹತ್ಯ ಯತ್ ।
ಚಿತ್ರೀಯೇಮಹಿ ನಾತ್ರ ರಂಗರಸಿಕ ತ್ವಂ ತ್ವನ್ಮಹಿಮ್ನಃ ಪರಃ
ವೈಪುಲ್ಯಾನ್ಮಹಿತಃ ಸ್ವಭಾವ ಇತಿ ವಾ ಕಿನ್ನಾಮ ಸಾತ್ಮ್ಯಂ ನ ತೇ ॥ 38 ॥

ಷಾಡ್ಗುಣ್ಯಾದ್ವಾಸುದೇವಃ ಪರ ಇತಿ ಸ ಭವಾನ್ ಮುಕ್ತಭೋಗ್ಯೋ ಬಲಾಢ್ಯಾತ್
ಬೋಧಾತ್ ಸಂಕರ್ಷಣಸ್ತ್ವಂ ಹರತಿ ವಿತನುಷೇ ಶಾಸ್ತ್ರಮೈಶ್ವರ್ಯವೀರ್ಯಾತ್ ।
ಪ್ರದ್ಯುಮ್ನಸ್ಸರ್ಗಧರ್ಮೌ ನಯಸಿ ಚ ಭಗವಂಚ್ಛಕ್ತಿತೇಜೋಽನಿರುದ್ಧಃ
ಬಿಭ್ರಾಣಃ ಪಾಸಿ ತತ್ತ್ವಂ ಗಮಯಸಿ ಚ ತಥಾ ವ್ಯೂಹ್ಯ ರಂಗಾಧಿರಾಜ ॥ 39 ॥

ಜಾಗ್ರತ್ಸ್ವಪ್ನಾತ್ಯಲಸತುರೀಯಪ್ರಾಯಧ್ಯಾತೃಕ್ರಮವದುಪಾಸ್ಯಃ ।
ಸ್ವಾಮಿಂಸ್ತತ್ತತ್ಸಹಪರಿಬರ್ಹಃ ಚಾತುರ್ವ್ಯೂಹಂ ವಹಸಿ ಚತುರ್ಧಾ ॥ 40 ॥

ಅಚಿದವಿಶೇಷಿತಾನ್ ಪ್ರಲಯಸೀಮನಿ ಸಂಸರತಃ
ಕರಣಕಳೇಬರೈರ್ಘಟಯಿತುಂ ದಯಮಾನಮನಾಃ ।
ವರದ ನಿಜೇಚ್ಛಯೈವ ಪರವಾನಕರೋಃ ಪ್ರಕೃತಿಂ
ಮಹದಭಿಮಾನಭೂತಕರಣಾವಲಿಕೋರಕಿಣೀಮ್ ॥ 41 ॥

ನಿಮ್ನೋನ್ನತಂ ಚ ಕರುಣಂ ಚ ಜಗದ್ವಿಚಿತ್ರಂ
ಕರ್ಮ ವ್ಯಪೇಕ್ಷ್ಯ ಸ್ರ್ಜತಸ್ತವ ರಂಗಶೇಷಿನ್ ।
ವೈಷಮ್ಯನಿರ್ಘೃಣತಯೋರ್ನ ಖಲು ಪ್ರಸಕ್ತಿಃ
ತದ್ಬ್ರಹ್ಮಸೂತ್ರಸಚಿವಾಃ ಶ್ರುತಯೋ ಗೃಣನ್ತಿ ॥ 42 ॥

ಸ್ವಾಧೀನೇ ಸಹಕಾರಿಕಾರಣಗಣೇ ಕರ್ತುಶ್ಶರೀರೇಽಥವಾ
ಭೋಕ್ತುಃ ಸ್ವಾನುವಿಧಾಪರಾಧವಿಧಯೋಃ ರಾಜ್ಞೋ ಯಥಾ ಶಾಸಿತುಃ ।
ದಾತುರ್ವಾಽರ್ಥಿಜನೇ ಕಟಾಕ್ಷಾಣಮಿವ ಶ್ರೀರಂಗಸರ್ವಸ್ವ ತೇ
ಸ್ರಷ್ಟುಸ್ಸೃಜ್ಯದಶಾವ್ಯಪೇಕ್ಷಣಮಪಿ ಸ್ವಾತನ್ತ್ರ್ಯಮೇವಾವಹೇತ್ ॥ 43 ॥

ಪ್ರಲಯಸಮಯಸುಪ್ತಂ ಸ್ವಂ ಶರೀರೈಕದೇಶಂ
ವರದ ಚಿದಚಿದಾಖ್ಯಂ ಸ್ವೇಚ್ಛಯಾ ವಿಸ್ತೃಣಾನಃ ।
ಖಚಿತಮಿವ ಕಲಾಪಂ ಚಿತ್ರಮಾತತ್ಯ ಧೂನ್ವನ್
ಅನುಶಿಖಿನಿ ಶಿಖೀವ ಕ್ರೀಡಸಿ ಶ್ರೀಸಮಕ್ಷಮ್ ॥ 44 ॥

ಭೂಯೋ ಭೂಯಸ್ತ್ವಯಿ ಹಿತಪರೇಽಪ್ಯುತ್ಪಥಾನಾತ್ಮನೀನ-
ಸ್ರೋತೋಮಗ್ನಾನಪಿ ಪಥಿ ನಯಂಸ್ತ್ವಂ ದುರಾಶಾವಶೇನ ।
ರುಗ್ಣೇ ತೋಕೇ ಸ್ವ ಇವ ಜನನಿ ತತ್ಕಷಾಯಂ ಪಿಬನ್ತೀ
ತತ್ತದ್ವರ್ಣಶ್ರಮವಿಧಿವಶಃ ಕ್ಲಿಶ್ಯಸೇ ರಂಗರಾಜ ॥ 45 ॥

ಸಾರ್ವ ತ್ವತ್ಕಂ ಸಕಲಚರಿತಂ ರಂಗಧಾಮನ್ ದುರಾಶಾ-
ಪಾಶೇಭ್ಯಸ್ಸ್ಯಾನ್ನ ಯಥಿ ಜಗತಾಂ ಜಾತು ಮೂರ್ಖೋತ್ತರಾಣಾಮ್ ।
ನಿಸ್ತನ್ದ್ರಾಲೋಸ್ತವ ನಿಯಮತೋ ನರ್ತುಲಿಂಗಪ್ರವಾಹಾ
ಸರ್ಗಸ್ಥೇಮಪ್ರಭೃತಿಷು ಸದಾಜಾಗರಾ ಜಾಘಟೀತಿ ॥ 46 ॥

ಸುಹೃದಿವ ನಿಗಲಾದ್ಯೈರುನ್ಮದಿಷ್ಣುಂ ನೃಶಂಸಂ
ತ್ವಮಪಿ ನಿರಯಪೂರ್ವೈರ್ದಣ್ದಯನ್ ರಂಗನೇತಃ ।
ತದಿತರಮಪಿ ಬಾಧಾತ್ತ್ರಾಯಸೇ ಭೋಗಮೋಕ್ಷ-
ಪ್ರದಿರಪಿ ತವ ದಂಡಾಪೂಪಿಕಾತಸ್ಸುಹೃತ್ತ್ವಮ್ ॥ 47 ॥

ಧೃತಿನಿಯಮನರಕ್ಷಾವೀಕ್ಷಣೈಶ್ಶಾಸ್ತ್ರದಾನ-
ಪ್ರಮೃತಿಭಿರಚಿಕಿತ್ಸ್ಯಾನ್ ಪ್ರಾಣಿನಃ ಪ್ರೇಕ್ಷ್ಯ ಭೂಯಃ ।
ಸುರಮನುಜತಿರಶ್ಚಾಂ ಸರ್ವಥಾ ತುಲ್ಯಧರ್ಮಾ
ತ್ವಮವತರಸಿ ದೇವೋಽಜೋಽಪಿ ಸನ್ನವ್ಯಯಾತ್ಮಾ ॥ 48 ॥

ಅನುಜನುರನುರೂಪರೂಪಚೇಷ್ಟಾ ನ ಯದಿ ಸಮಾಗಮಮಿನ್ದಿರಾಽಕರಿಷ್ಯತ್ ।
ಅಸರಸಮಥವಾಽಪ್ರಿಯಮ್ಭವಿಷ್ಣು ಧ್ರುವಮಕರಿಷ್ಯತ ರಂಗರಾಜನರ್ಮ ॥ 49 ॥

ಗರೀಯಸ್ತ್ವಂ ಪರಿಜಾನನ್ತಿ ಧೀರಾಃ ಪರಂ ಭಾವಂ ಮನುಜತ್ವಾದಿಭೂಷ್ಣುಮ್ ।
ಅಜಾನನ್ತಸ್ತ್ವವಜಾನನ್ತಿ ಮೂಢಾಃ ಜನಿಘ್ನಂ ತೇ ಭಗವಂಜನ್ಮ ಕರ್ಮ ॥ 50 ॥

ಮಧ್ಯೇವಿರಿಂಚಗಿರಿಶಂ ಪ್ರಥಮಾವತಾರಃ
ತತ್ಸಾಮ್ಯತಃ ಸ್ಥಗಯಿತುಂ ತವ ಚೇತ್ಸ್ವರೂಪಮ್ ।
ಕಿಂ ತೇ ಪರತ್ವಪಿಶುನೈರಿಹ ರಂಗಧಾಮನ್
ಸತ್ತ್ವಪ್ರವರ್ತನಕೃಪಾಪರಿಪಾಲನಾದ್ಯೈಃ ॥ 51 ॥

ಮಧುಃ ಕೈಟಭಶ್ಚೇತಿ ರೋಧಂ ವಿಧೂಯ ತ್ರಯೀದಿವ್ಯಚಕ್ಷುರ್ವಿಧಾತುರ್ವಿಧಾಯ ।
ಸ್ಮರಸ್ಯಂಗ ರಂಗಿಸ್ತುರಂಗಾವತಾರಃ ಸಮಸ್ತಂ ಜಗಜ್ಜೀವಯಿಷ್ಯಸ್ಯಕಸ್ಮಾತ್ ॥ 52 ॥

ರಂಗಧೇ ತಿಮಿರಘಸ್ಮರಶೀತಸ್ವಚ್ಛಹಂಸತನುರಿನ್ದುರಿವೋದ್ಯನ್ ।
ವೇದಭಾಭಿರನುಜಗ್ರಹಿಥಾಽಽರ್ತಾನ್ ಜ್ಞಾನಯಜ್ಞಸುಧಯೈವ ಸಮೃದ್ಧ್ಯನ್ ॥ 53 ॥

ವಟದಲಮಧಿಶಯ್ಯ ರಂಗಧಾಮನ್ ಶಯಿತ ಇವಾರ್ಣವತರ್ಣಕಃ ಪದಾಬ್ಜಮ್ ।
ಅಧಿಮುಖಮುದರೇ ಜಗನ್ತಿ ಮಾತುಂ ನಿದಧಿಥ ವೈಷ್ಣವಭೋಗ್ಯಲಿಪ್ಸಯಾ ವಾ ॥ 54 ॥

ಉನ್ಮೂಲ್ಯಾಹರ ಮನ್ದರಾದ್ರಿಮಹಿನಾ ತಂ ಸಮ್ಬಧಾನಾಮುನಾ
ದೋರ್ಭಿಶ್ಚಂಚಲಮಾಲಿಕೈಶ್ಚ ದಧಿನಿರ್ಮಾಥಂ ಮಥಾನಾಮ್ಬುಧಿಮ್ ।
ಶ್ರೀರಂಗೇಶ್ವರ ಚನ್ದ್ರಕೌಸ್ತುಭಸುಧಾಪೂರ್ವಂ ಗೃಹಾಣೇತಿ ತೇ
ಕುರ್ವಾಣಸ್ಯ ಫಲೇಗ್ರಹಿರ್ಹಿ ಕಮಲಾಲಾಭೇನ ಸರ್ವಃ ಶ್ರಮಃ ॥ 55 ॥

ದೇವೀಹಸ್ತಾಮ್ಬುಜೇಭ್ಯಶ್ಚರಣಕಿಸಲಯೇ ಸಂವಹದ್ಭ್ಯೋಽಪಹೃತ್ಯ
ಪ್ರತ್ಯಸ್ಯಾನನ್ತಭೋಗಂ ಝತಿತಿ ಚಲಪುಟೇ ಚಕ್ಷುಷಿ ವಿಸ್ತೃಣಾನಃ ।
ಆಕ್ಷಿಪ್ಯೋರಶ್ಚ ಲಕ್ಷ್ಮ್ಯಾಃ ಸ್ತನಕಲಶಕನತ್ಕುಂಕುಮಸ್ತೋಮಪಂಕಾ-
ದ್ದೇವಃ ಶ್ರೀರಂಗಧಾಮಾ ಗಜಪತಿಘುಷಿತೇ ವ್ಯಾಕುಲಃ ಸ್ತಾತ್ ಪುರೋ ನಃ ॥ 56 ॥

ಅತನ್ತ್ರಿತಚಮೂಪತಿಪ್ರಹಿತಹಸ್ತಮಸ್ವೀಕೃತ
ಪ್ರಣೀತಮಣಿಪಾದುಕಂ ಕಿಮಿತಿ ಚಾಕುಲಾನ್ತಃ ಪುರಮ್ ।
ಅವಾಹನಪರಿಷ್ಕ್ರಿಯಂ ಪತಗರಾಜಮಾರೋಹತಃ
ಕರಿಪ್ರವರಬೃಮ್ಹಿತೇ ಭಗವತಸ್ತ್ವರಾಯೈ ನಮಃ ॥ 57 ॥

ಯಂ ಪಶ್ಯನ್ವಿಶ್ವಧುರ್ಯಾಂ ಧಿಯಮಸಕೃದಥೋ ಮನ್ಥರಾಂ ಮನ್ಯಮಾನಃ
ಹುಂಕಾರಾಸ್ಫಾಲನಾಂಘ್ರಿಪ್ರಹತಿಭಿರಪಿ ತಂ ತಾರ್ಕ್ಷ್ಯಮಧ್ಯಕ್ಷಿಪಸ್ತ್ವಮ್ ।
ಕಿಂಚೋದಂಚನ್ನುದಸ್ಥಾಸ್ತಮಥ ಗಜಪತೇರ್ಬೃಮ್ಹಿತೇ ಜೃಮ್ಭಮಾಣೇ
ದೇವ ಶ್ರೀರಂಗಬನ್ಧೋ ಪ್ರಣಮತಿ ಹಿ ಜನೇ ಕಾನ್ದಿಶೀಕೀ ದಶಾ ತೇ ॥ 58 ॥

ಶ್ರೀರಂಗೇಶಯ ಶರಣಂ ಮಮಾಸಿ ವಾತ್ಯಾವ್ಯಾಲೋಲತ್ಕಮಲತಟಾಕತಾಂಡವೇನ ।
ಸ್ರಗ್ಭೂಷಾಮ್ಬರಮಯಥಾಯಥಂ ದಧಾನಃ ಧಿಙ್ಮಾಮಿತ್ಯನುಗಜಗರ್ಜಮಾಜಗನ್ಥ ॥ 59 ॥

ಮೀನತನುಸ್ತ್ವಂ ನಾವಿ ನಿಧಾಯ ಸ್ಥಿರಚರಪರಿಕರಮನುಮನು ಭಗವನ್
ವೇದಸನಾಭಿಸ್ವೋಕ್ತಿವಿನೌದೈರಕಲಿತಲಯಭಯಲವಮಮುಮವಹಃ ॥ 60 ॥

ಶ್ರೀನಯನಾಭೋದ್ಭಾಸುರದೀರ್ಘಪ್ರವಿಪುಲಸುರುಚಿರಶುಚಿಶಿಶಿರವಪುಃ ।
ಪಕ್ಷನಿಗೀರ್ಣೋದ್ಗೀರ್ಣಮಹಾಬ್ಧಿಸ್ಥಲಜಲವಿಹರಣರತಗತಿರಚರಃ ॥ 61 ॥

ಚಕರ್ಥ ಶ್ರೀರಂಗಿನ್ನಿಖಿಲಜಗದಾಧಾರಕಮಠೋ
ಭವನ್ ಧರ್ಮಾನ್ ಕೂರ್ಮಃ ಪುನರಮೃತಮನ್ಥಾಚಲಧರಃ ।
ಜಗನ್ಥ ಶ್ರೇಯಸ್ತ್ವಂ ಮರಕತಶಿಲಾಪೀಠಲಲಿತಂ
ಜಲಾದುದ್ಯಲ್ಲಕ್ಷ್ಮೀಪದಕಿಸಲಯನ್ಯಾಸಸುಲಭಮ್ ॥ 62 ॥

ಹೃದಿ ಸುರರಿಪೋರ್ದಂಷ್ಟ್ರೋತ್ಖಾತೇ ಕ್ಷಿಪನ್ ಪ್ರಲಯಾರ್ಣವಂ
ಕ್ಷಿತಿಕುಚತಟೀಮರ್ಚನ್ ದೈತ್ಯಾಸ್ರಕುಂಕುಮಚರ್ಚಯಾ ।
ಸ್ಫುಟಧುತಸಟಾಭ್ರಾಮ್ಯದ್ಬ್ರಹ್ಮಸ್ತವೋನ್ಮುಖಬೃಮ್ಹಿತಃ
ಶರಣಮಸಿ ಮೇ ರಂಗಿಸ್ತ್ವಂ ಮೂಲಕೋಲತನುರ್ಭವನ್ ॥ 63 ॥

ನೃಹರಿದಶಯೋಃ ಪಶ್ಯನ್ನೌತ್ಪತ್ತಿಕಂ ಘಟನಾದ್ಭುತಂ
ನರಮುತ ಹರಿಂ ದೃಷ್ಟ್ವೈಕೈಕಂ ಸಮುದ್ವಿಜತೇ ಜನಃ ।
ಇತಿ ಕಿಲ ಸಿತಾಕ್ಷೀರನ್ಯಾಯೇನ ಸಂಗಮಿತಾಂಗಕಂ
ಸ್ಫುಟಸಟಮಹಾದಮ್ಷ್ಟ್ರಂ ರಂಗೇನ್ದ್ರಸಿಮ್ಹಮುಪಾಸ್ಮಹೇ ॥ 64 ॥

ದ್ವಿಷಾಣದ್ವೇಷೋದ್ಯನ್ನಯನವನವಹ್ನಿಪ್ರಶಮನ
ಭ್ರಮಲ್ಲಕ್ಷ್ಮೀವಕ್ತ್ರಪ್ರಹಿತಮಧುಗಂಡೂಷಸುಷಮೈಃ
ನಖಕ್ಷುಣ್ಣಾರಾತಿಕ್ಷತಜಪಟಲೈರಾಪ್ಲುತಸಟಾ-
ಚ್ಛಟಾಸ್ಕನ್ಧೋ ರುನ್ಧೇ ದುರಿತಮಿಹ ಪುಂಸ್ಪಂಚವದನಃ ॥ 65 ॥

ನಖಾಗ್ರಗ್ರಸ್ತೇಽಪಿ ದ್ವಿಷತಿ ನಿಜಭಕ್ತದ್ರುಹಿ ರೂಷಃ
ಪ್ರಕರ್ಷಾದ್ವಿಷ್ಣುತ್ವದ್ವಿಗುಣಪರಿಣಾಹೋತ್ಕಟತನುಃ ।
ವಿರುದ್ಧೇ ವೈಯಗ್ರೀಸುಘಟಿತಸಮಾನಾಧಿಕರಣೇ
ನೃಸಿಂಹತ್ವೇ ಬಿಭ್ರದ್ವರದ ಬಿಭರಾಮಾಸಿಥ ಜಗತ್ ॥ 66 ॥

ದೈತ್ಯೌದಾರ್ಯೇನ್ದ್ರಯಾಚ್ಞಾವಿಹತಿಮಪನಯನ್ ವಾಮನೋಽರ್ಥೀ ತ್ವಮಾಸೀಃ
ವಿಕ್ರಾನ್ತೇ ಪಾದಪದ್ಮೇ ತ್ರಿಜಗದಣುಸಮಂ ಪಾಂಸುಲೀಕೃತ್ಯ ಲಿಲ್ಯೇ ।
ನಾಭೀಪದ್ಮಶ್ಚ ಮಾನಕ್ಷಮಮಿವ ಭುವನಗ್ರಾಮಮನ್ಯಂ ಸಿಸೃಕ್ಷುಃ
ತಸ್ಥೌ ರಂಗೇನ್ದ್ರ ವೃತ್ತೇ ತವ ಜಯಮುಖರೋ ದಿಂಡಿಮಸ್ತತ್ರ ವೇದಃ ॥ 67 ॥

ಭವಾನ್ ರಾಮೋ ಭೂತ್ವಾ ಪರಶುಪರಿಕರ್ಮಾ ಭೃಗುಕುಲಾ-
ದಲಾವೀದ್ಭೂಪಾಲಾನ್ ಪಿತೃಗಣಮತಾರ್ಪ್ಸೀತ್ತದಸೃಜಾ ।
ಭುವೋ ಭಾರಾಕ್ರಾನ್ತಂ ಲಘು ತಲಮುಪಾಚೀಕ್ಲೃಪದಿತಿ
ದ್ವಿಷಾಮುಗ್ರಮ್ಪಶ್ಯೋಽಪ್ಯನಘ ಮಮ ಮಾ ಜೀಗಣದಘಮ್ ॥ 68 ॥

ಮನುಜಸಮಯಂ ಕೃತ್ವಾ ನಾಥಾವತೇರಿಥ ಪದ್ಮಯಾ
ಕ್ವಚನ ವಿಪಿನೇ ಸಾ ಚೇದನ್ತರ್ಧಿನರ್ಮ ವಿನಿರ್ಮಮೇ ।
ಕಿಮಥ ಜಲಧಿಂ ಬಧ್ವಾ ರಕ್ಷೋ ವಿಧೀಶವರೋದ್ಧತಂ
ಬಲಿಮುಖಕುಲೋಚ್ಛಿಷ್ಟಂ ಕುರ್ವನ್ ರಿಪುಂ ನಿರಪತ್ರಯಃ ॥ 69 ॥ ॥ ॥।ತ್ರಪಃ?
ಯದ್ಯೂತೇ ವಿಜಯಾಪದಾನಗಣನಾ ಕಾಲಿಂಗದನ್ತಾಂಕುರೈಃ
ಯದ್ವಿಶ್ಲೇಷಲವೋಽಪಿ ಕಾಲಿಯಭುವೇ ಕೋಲಾಹಲಾಯಾಭವತ್ ।
ದೂತ್ಯೇನಾಪಿ ಚ ಯಸ್ಯ ಗೋಪವನಿತಾಃ ಕೃಷ್ಣಾಗಸಾಂ ವ್ಯಸ್ಮರನ್
ತಂ ತ್ವಾಂ ಕ್ಷೇಮಕೃಷೀಬಲಂ ಹಲಧರಂ ರಂಗೇಶ ಭಕ್ತಾಸ್ಮಹೇ ॥ 70 ॥

ಆಕಂಠವಾರಿಭರಮನ್ಥರಮೇಘದೇಶ್ಯಂ
ಪೀತಾಮ್ಬರಂ ಕಮಲಲೋಚನಪಂಚಹೇತಿ ।
ಬ್ರಹ್ಮ ಸ್ತನನ್ಧಯಮಯಾಚತ ದೇವಕೀ ತ್ವಾಂ
ಶ್ರೀರಂಗಕಾನ್ತ ಸುತಕಾಮ್ಯತಿ ಕಾಽಪರೈವಮ್ ॥ 71 ॥

ಶೈಲೋಽಗ್ನಿಶ್ಚ ಜಲಾಮ್ಬಭೂವ ಮುನಯೋ ಮೂಢಾಮ್ಬಭೂವುರ್ಜಡಾಃ
ಪ್ರಾಜ್ಞಾಮಾಸುರಗಾಸ್ಸಗೋಪಮಮೃತಾಮಾಸುರ್ಮಹಾಶೀವಿಷಾಃ ।
ಗೋವ್ಯಾಘ್ರಾಸ್ಸಹಜಾಮ್ಬಭೂವುರಪರೇ ತ್ವನ್ಯಾಮ್ಬಭೂವುಃ ಪ್ರಭೋ
ತ್ವಂ ತೇಷ್ವನ್ಯತಮಾಮ್ಬಭೂವಿಥ ಭವದ್ವೇಣುಕ್ವಣೋನ್ಮಾಥನೇ ॥ 72 ॥

ಕಲ್ಕಿತನುರ್ಧರಣೀಂ ಲಘಯಿಷ್ಯನ್ ಕಲಿಕಲುಷಾನ್ ವಿಲುನಾಸಿ ಪುರಾ ತ್ವಮ್ ।
ರಂಗನಿಕೇತ ಲುನೀಹಿ ಲುನೀಹೀತ್ಯಖಿಲಮರುನ್ತುದಮದ್ಯ ಲುನೀಹಿ ॥ 73 ॥

ಆಸ್ತಾಂ ತೇ ಗುಣರಾಶಿವದ್ಗುಣಪರೀವಾಹಾತ್ಮನಾಂ ಜನ್ಮನಾಂ
ಸಂಖ್ಯಾ ಭೌಮನಿಕೇತನೇಷ್ವಪಿ ಕುಟೀಕುಂಜೇಶೂ ರಂಗೇಶ್ವರ ।
ಅರ್ಚ್ಯಸ್ಸರ್ವಸಹಿಷ್ಣುರರ್ಚಕಪರಾಧೀನಾಖಿಲಾತ್ಮಸ್ಥಿತಿಃ
ಪ್ರೀಣೀಷೇ ಹೃದಯಾಲುಭಿಸ್ತವ ತತಶ್ಶೀಲಾಜ್ಜಡೀಭೂಯತೇ ॥ 74 ॥

ಶ್ರೀಮದ್ವ್ಯೋಮ ನಸೀಮ ವಾಙ್ಮನಸಯೋಸ್ಸರ್ವೇಽವತಾರಾಃ ಕ್ವಚಿತ್
ಕಾಲೇ ವಿಶ್ವಜನೀನಮೇತದಿತಿಧೀಃ ಶ್ರೀರಂಗಧಾಮನ್ಯಥ ।
ಆರ್ತಸ್ವಾಗತಿಕೈಃ ಕೃಪಾಕಲುಷಿತೈರಾಲೋಕಿತೈರಾರ್ದ್ರಯನ್
ವಿಶ್ವತ್ರಾಣವಿಮರ್ಶನಸ್ಖಲಿತಯಾ ನಿದ್ರಾಸಿ ಜಾಗರ್ಯಯಾ ॥ 75 ॥

ಸರ್ಗಾಭ್ಯಾಸವಿಶಾಲಯಾ ನಿಜಧಿಯಾ ಜಾನನ್ನನನ್ತೇಶಯಂ
ಭಾರತ್ಯಾ ಸಹಧರ್ಮಚಾರರತಯಾ ಸ್ವಾಧೀನಸಂಕೀರ್ತನಃ ।
ಕಲ್ಪಾನೇವ ಬಹೂನ್ ಕಮಂಡಲುಗಲದ್ಗಂಗಾಪ್ಲುತೋಽಪೂಜಯ-
ದ್ಬ್ರಹ್ಮಾ ತ್ವಾಂ ಮುಖಲೋಚನಾಂಜಲಿಪುಟೈಃ ಪದ್ಮೈರಿವಾಽವರ್ಜಿತೈಃ ॥ 76 ॥

ಮನುಕುಲಮಹೀಪಾಲವ್ಯಾನಮ್ರಮೌಲಿಪರಮ್ಪರಾ-
ಮಣಿಮಕರಿಕಾರೋಚಿರ್ನೀರಾಜಿತಾಂಘ್ರಿಸರೋರುಹಃ ।
ಸ್ವಯಮಥ ವಿಭೋ ಸ್ವೇನ ಶ್ರೀರಂಗಧಾಮನಿ ಮೈಥಿಲೀ-
ರಮಣವಪುಷಾ ಸ್ವಾರ್ಹಾಣ್ಯಾರಾಧನಾನ್ಯಸಿ ಲಮ್ಭಿತಃ ॥ 77 ॥

ಮನ್ವನ್ವವಾಯೇ ದ್ರುಹಿಣೇ ಚ ಧನ್ಯೇ ವಿಭೀಷಣೇನೈವ ಪುರಸ್ಕೃತೇನ ।
ಗುಣೈರ್ದರಿದ್ರಾಣಮಿಮಂ ಜನಂ ತ್ವಂ ಮಧ್ಯೇಸರಿನ್ನಾಥ ಸುಖಾಕರೋಷಿ ॥ 78 ॥

ತೇಜಃ ಪರಂ ತತ್ಸವಿತುರ್ವರೇಣ್ಯಂ ಧಾಮ್ನಾ ಪರೇಣಾಪ್ರಣಖಾತ್ಸುವರ್ಣಾಮ್ ।
ತ್ವಾಂ ಪುಂಡರೀಕೇಕ್ಷಣಮಾಮನನ್ತಿ ಶ್ರೀರಂಗನಾಥಂ ತಮುಪಾಸಿಷೀಯ ॥ 79 ॥

ಆತ್ಮಾಽಸ್ಯ ಗನ್ತುಃ ಪರಿತಸ್ಥುಷಶ್ಚ ಮಿತ್ರಸ್ಯ ಚಕ್ಷುರ್ವರುಣಸ್ಯ ಚಾಗ್ನೇಃ ।
ಲಕ್ಷ್ಮ್ಯಾ ಸಹೌತ್ಪತ್ತಿಕಗಾಢಬನ್ಧಂ ಪಶ್ಯೇಮ ರಂಗೇ ಶರದಶ್ಶತಂ ತ್ವಾಮ್ ॥ 80 ॥

ಯಸ್ಯಾಸ್ಮಿ ಪತ್ಯುರ್ನ ತಮನ್ತರೇಮಿ ಶ್ರೀರಂಗತುಂಗಾಯತನೇ ಶಯಾನಮ್ ।
ಸ್ವಭಾವದಾಸ್ಯೇನ ಚ ಯೋಽಹಮಸ್ಮಿ ಸ ಸನ್ ಯಜೇ ಜ್ಞಾನಮಯೈರ್ಮಖೈಸ್ತಮ್ ॥ 81 ॥

ಆಯುಃ ಪ್ರಜಾನಾಮಮೃತಂ ಸುರಾಣಾಂ ರಂಗೇಶ್ವರಂ ತ್ವಾಂ ಶರಣಂ ಪ್ರಪದ್ಯೇ ।
ಮಾಂ ಬ್ರಹ್ಮಣೇಽಸ್ಮೈ ಮಹಸೇ ತದರ್ಥಂ ಪ್ರತ್ಯಂಚಮೇನಂ ಯುನಜೈ ಪರಸ್ಮೈ ॥ 82 ॥

ಆರ್ತಿಂ ತಿತೀರ್ಷುರಥ ರಂಗಪತೇ ಧನಾಯನ್ ಆತ್ಮಮ್ಭರಿರ್ವಿವಿದಿಷುರ್ನಿಜದಾಸ್ಯಕಾಮ್ಯನ್ ।
ಜ್ಞಾನೀತ್ಯಮೂನ್ ಸಮಮಥಾಸ್ಸಮಮತ್ಯುದಾರಾನ್ ಗೀತಾಸು ದೇವ ಭವದಾಶ್ರಯಣೋಪಕಾರಾನ್ ॥ 83 ॥

ನಿತ್ಯಂ ಕಾಮ್ಯಂ ಪರಮಪಿ ಕತಿಚಿತ್ತ್ವಯ್ಯಧ್ಯಾತ್ಮಸ್ವಮತಿಭಿರಮಮಾಃ ।
ನ್ಯಸ್ಯಾಸಂಗಾ ವಿದಧತಿ ವಿಹಿತಂ ಶ್ರೀರಂಗೇನ್ದೋ ವಿದಧತಿ ನ ಚ ತೇ ॥ 84 ॥

ಪ್ರತ್ಯಂಚಂ ಸ್ವಂ ಪಂಚವಿಂಶಂ ಪರಾಚಸ್ಸಂಚಕ್ಷಾಣಾಸ್ತತ್ತ್ವರಾಶೇರ್ವಿವಿಚ್ಯ ।
ಯುಂಜಾನಾಶ್ಚರ್ತಮ್ಭರಾಯಾಂ ಸ್ವಬುದ್ಧೌ ಸ್ವಂ ವಾ ತ್ವಾಂ ವಾ ರಂಗನಾಥಾಽಪ್ನುವನ್ತಿ ॥ 85 ॥

ಅಥ ಮೃದಿತಕಷಾಯಾಃ ಕೇಚಿದಾಜಾನದಾಸ್ಯ-
ತ್ವರಿತಶಿಥಿಲಚಿತ್ತಾಃ ಕೀರ್ತಿಚಿನ್ತಾನಮಸ್ಯಾಃ ।
ವಿದಧತಿ ನನು ಪಾರಂ ಭಕ್ತಿನಿಘ್ನಾ ಲಭನ್ತೇ
ತ್ವಯಿ ಕಿಲ ತತಮೇ ತ್ವಂ ತೇಷು ರಂಗೇನ್ದ್ರ ಕಿಂ ತತ್ ॥ 86 ॥

ಉಪಾದತ್ತೇ ಸತ್ತಾಸ್ಥಿತಿನಿಯಮನಾದ್ಯೈಶ್ಚಿದಚಿತೌ
ಸ್ವಮುದ್ದಿಶ್ಯ ಶ್ರೀಮಾನಿತಿ ವದತಿ ವಾಗೌಪನಿಷದೀ ।
ಉಪಾಯೋಪೇಯತ್ವೇ ತದಿಹ ತವ ತತ್ತ್ವಂ ನ ತು ಗುಣಾ-
ವತಸ್ತ್ವಾಂ ಶ್ರೀರಂಗೇಶಯ ಶರಣಮವ್ಯಾಜಮಭಜಮ್ ॥ 87 ॥

ಪಟುನೈಕವರಾಟಿಕೇವ ಕ್ಲೃಪ್ತಾ ಸ್ಥಲಯೋಃ ಕಾಕಣಿಕಾಸುವರ್ಣಕೋಟ್ಯೋಃ ।
ಭವಮೋಕ್ಷಣಯೋಸ್ತ್ವಯೈವ ಜನ್ತುಃ ಕ್ರಿಯತೇ ರಂಗನಿಧೇ ತ್ವಮೇವ ಪಾಹಿ ॥ 88 ॥

ಜ್ಞಾನಕ್ರಿಯಾಭಜನಸಮ್ಪದಕಿಂಚನೋಽಹ-
ಮಿಚ್ಛಾಧಿಕಾರಶಕನಾನುಶಯಾನಭಿಜ್ಞಃ ।
ರಂಗೇಶ ಪೂರ್ಣವೃನಶ್ಶರಣಂ ಭವೇತಿ
ಮೌಖ್ಯಾದ್ಬ್ರವೀಮಿ ಮನಸಾ ವಿಷಯಾಕುಲೇನ ॥ 89 ॥

ತ್ವಯಿ ಸತಿ ಪುರುಸಾಹರ್ಥೇ ಮತ್ಪರೇ ಚಾಹಮಾತ್ಮ-
ಕ್ಷಯಕರಕುಹನಾರ್ಥಾಂಛ್ರದ್ದಧದ್ರಂಗಚನ್ದ್ರ ।
ಜನಮಖಿಲಮಹಮ್ಯುರ್ವಂಚಯಾಮಿ ತ್ವದಾತ್ಮ-
ಪ್ರತಿಮಭವದನನ್ಯಜ್ಞಾನಿವದ್ದೇಶಿಕಸ್ಸನ್ ॥ 90 ॥

ಅತಿಕ್ರಾಮನ್ನಾಜ್ಞಾಂ ತವ ವಿಧಿನಿಷೇಧೇಷು ಭವತೇಽಪಿ
ಅಭಿದ್ರುಹ್ಯನ್ವಾಗ್ಧೀಕೃತಿಭಿರಪಿ ಭಕ್ತಾಯ ಸತತಮ್ ।
ಅಜಾನನ್ ಜಾನನ್ ವಾ ಭವದಸಹನೀಯಾಗಸಿ ರತ-
ಸ್ಸಹಿಷ್ಣುತ್ವಾದ್ರಂಗಪ್ರವಣ ತವ ಮಾಭೂವಮಭರಃ ॥ 91 ॥

ಪ್ರಕುಪಿತಭುಜಗಫಣಾನಾಮಿವ ವಿಷಯಾಣಮಹಂ ಛಾಯಾಮ್ ।
ಸತಿ ತವ ಭುಜಸುರವಿಟಪಿಪ್ರಚ್ಛಾಯೇ ರಂಗಜೀವಿತ ಭಜಾಮಿ ॥ 92 ॥

ತ್ವತ್ಸರ್ವಶಕ್ತೇರಧಿಕಾಽಸ್ಮದಾದೇಃ ಕೀಟಸ್ಯ ಶಕ್ತಿರ್ಬತ ರಂಗಬನ್ಧೋ ।
ಯತ್ತ್ವತ್ಕೃಪಾಮಪ್ಯತಿಕೋಶಕಾರನ್ಯಾಯಾದಸೌ ನಶ್ಯತಿ ಜೀವನಾಶಮ್ ॥ 93 ॥

ಶ್ರೀರಂಗೇಶ ತ್ವದ್ಗುಣಾನಾಮಿವಾಸ್ಮದ್ದೋಷಾಣಾಂ ಕಃ ಪಾರದೃಶ್ವಾ ಯತೋಽಹಮ್ ।
ಓಘೇ ಮೋಘೋದನ್ಯವತ್ತ್ವದ್ಗುಣಾನಾಂ ತೃಷ್ಣಾಪೂರಂ ವರ್ಷತಾಂ ನಾಸ್ಮಿ ಪಾತ್ರಮ್ ॥ 94 ॥

ತ್ವಂ ಚೇನ್ಮನುಷ್ಯಾದಿಷು ಜಾಯಮಾನಸ್ತತ್ಕರ್ಮಪಾಕಂ ಕೃಪಯೋಪಭುಂಕ್ಷೇ ।
ಶ್ರೀರಂಗಶಾಯಿನ್ ಕುಶಲೇತರಾಭ್ಯಾಂ ಭೂಯೋಽಭಿಭೂಯೇಮಹಿ ಕಸ್ಯ ಹೇತೋಃ ॥ 95 ॥

ಕ್ಷಮಾ ಸಾಪರಧೇಽನುತಾಪಿನ್ಯುಪೇಯಾ ಕಥಂ ಸಾಪರಾಧೇಽಪಿ ದೃಪ್ತೇ ಮಯಿ ಸ್ಯಾತ್ ।
ತಥಾಪ್ಯತ್ರ ರಂಗಾಧಿನಾಥಾನುತಾಪವ್ಯಪಾಯಂ ಕ್ಷಮೇತಾತಿವೇಲಾ ಕ್ಷಮಾ ತೇ ॥ 96 ॥

ಬಲಿಭುಜಿ ಶಿಶುಪಾಲೇ ತಾದೃಗಾಗಸ್ಕರೇ ವಾ
ಗುನಲವಸಹವಾಸಾತ್ತ್ವತ್ಕ್ಷಮಾ ಸಂಕುಚನ್ತೀ ।
ಮಯಿ ಗುಣಪರಮಾಣೂದನ್ತಚಿನ್ತಾನಭಿಜ್ಞೇ
ವಿಹರತು ವರದಾಸೌ ಸರ್ವದಾ ಸಾರ್ವಭೌಮೀ ॥ 97 ॥

ದಯಾ ಪರವ್ಯಸನಹರಾ ಭವವ್ಯಥಾ ಸುಖಾಯತೇ ಮಮ ತದಹಂ ದಯಾತಿಗಃ ।
ತಥಾಽಪ್ಯಸೌ ಸುಖಯತಿ ದುಃಖಮಿತ್ಯತಃ ದಯಸ್ವ ಮಾಂ ಗುಣಮಯ ರಂಗಮನ್ದಿರ ॥ 98 ॥

ಗರ್ಭಜನ್ಮಜರಾಮೃತಿಕ್ಲೇಶಕರ್ಮಷಡೂರ್ಮಿಗಃ ।
ಶ್ವೇವ ದೇವವಷಟ್ಕೃತಂ ತ್ವಾಂ ಶ್ರಿಯೋಽರ್ಹಮಕಾಮಯೇ ॥ 99 ॥

ಅನುಕೃತ್ಯ ಪೂರ್ವಪುಮ್ಸಃ ರಂಗನಿಧೇ ವಿನಯಡಮ್ಭತೋಽಮುಷ್ಮಾತ್ ।
ಶುನ ಇವ ಮಮ ವರಮೃದ್ಧೇಃ ಉಪಭೋಗಸ್ತ್ವದ್ವಿತೀರ್ಣಾಯಾಃ ॥ 100 ॥

ಸಕೃತ್ಪ್ರಪನ್ನಾಯ ತವಾಹಮಸ್ಮೀತ್ಯಾಯಾಚತೇ ಚಾಭಯದೀಕ್ಷಮಾಣಮ್ ।
ತ್ವಾಮಪ್ಯಪಾಸ್ಯಾಹಮಹಮ್ಭವಾಮಿ ರಂಗೇಶ ವಿಸ್ರಮ್ಭವಿವೇಕರೇಕಾತ್ ॥ 101 ॥

ತವ ಭರೋಽಹಮಕಾರಿಷಿ ಧಾರ್ಮಿಕೈಶ್ಶರಣಮಿತ್ಯಪಿ ವಾಚಮುದೈರಿರಮ್ ।
ಇತಿ ಸಸಾಕ್ಷಿಕಯನ್ನಿದಮದ್ಯ ಮಾಂ ಕುರು ಭರಂ ತವ ರಂಗಧುರನ್ಧರ ॥ 102 ॥

ದಯಾಽನ್ಯೇಷಾಂ ದುಃಖಾಪ್ರಸಹನಮನನ್ಯೋಽಸಿ ಸಕಲೈಃ
ದಯಾಲುಸ್ತ್ವಂ ನಾತಃ ಪ್ರಣಮದಪರಾಧಾನವಿದುಷಃ ।
ಕ್ಷಮಾ ತೇ ರಂಗೇನ್ದೋ ಭವತಿ ನ ತರಾಂ ನಾಥ ನ ತಮಾಂ
ತವೌದಾರ್ಯಂ ಯಸ್ಮಾತ್ತವ ವಿಭವಮರ್ಥಿಸ್ವಮಮಥಾಃ ॥ 103 ॥

ಗುಣತುಂಗತಯಾ ತವ ರಂಗಪತೇ ಭೃಶನಿಮ್ನಮಿಮಂ ಜನಮುನ್ನಮಯ ।
ಯದಪೇಕ್ಷ್ಯಮಪೇಕ್ಷಿತುರಸ್ಯ ಹಿ ತತ್ಪರಿಪೂರಣಮೀಶಿತುರೀಶ್ವರತಾ ॥ 104 ॥

ತ್ವಂ ಮೀನಪಾನೀಯನಯೇನ ಕರ್ಮಧೀಭಕ್ತಿವೈರಾಗ್ಯಜುಷೋ ವಿಭರ್ಷಿ ।
ರಂಗೇಶ ಮಾಂ ಪಾಸಿ ಮಿತಮ್ಪಚಂ ಯತ್ಪಾನೀಯಶಾಲಂ ಮರುಭೂಷು ತತ್ಸ್ಯಾತ್ ॥ 105 ॥

ಇತಿ ಶ್ರೀ ರಂಗರಾಜಸ್ತವೇ ಉತ್ತರಶತಕಂ ಸಮಾಪ್ತಮ್ ।

ಇತಿ ಶ್ರೀಪರಾಶರಭಟ್ಟವಿರಚಿತಂ ಶ್ರೀರಂಗರಾಜಸ್ತವಂ ಸಮ್ಪೂರ್ಣಮ್ ।

Add Comment

Click here to post a comment