Sri Sharada Shatashlokistavah in Kannada:
ಶ್ರೀಶಾರದಾಶತಶ್ಲೋಕೀಸ್ತವಃ
ಕರೋತು ಪದವಿನ್ಯಾಸಾನ್ಕಮಲಾಸನಕಾಮಿನೀ ।
ಜಿಹ್ವಾಗ್ರೇ ಮಮ ಕಾರುಣ್ಯಾಜ್ಜಿತಚನ್ದ್ರಾಯುತಪ್ರಭಾ ॥ 1 ॥
ಪಾಪೇಽಪಿ ಶಾರದಾಮ್ಬ ತ್ವಂ ಕೃತ್ವಾ ಬಹುಕೃಪಾಂ ಮಯಿ ।
ಗರೀಯಸೀಂ ಚಾಪಿ ವಾಂಛಾಂ ಪೂರಯಾಶು ಕೃಪಾನಿಧೇ ॥ 2 ॥
ಬಹುಭಿಸ್ತ್ವದ್ವದನಾಮ್ಬುಜಮುಲ್ಲೇಖೈಃ ಸ್ತೋತುಮಾರ್ಯಜನಹೃದ್ಯೈಃ ।
ಪ್ರತಿಭಾಂ ಪ್ರಯಚ್ಛ ಮಹ್ಯಂ ಕರುಣಾಜಲಧೇ ಪಯೋಜಭವಜಾಯೇ ॥ 3 ॥
ಚಮ್ಪಕಸುಮಕೋರಕಯುಕ್ಚಕಿತಮೃಗೀಪ್ರೇಕ್ಷಣೇನ ಸಂಯುಕ್ತಮ್ ।
ಶುಕಕೇಕಿನಿನದಜುಷ್ಟಂ ವನಮಿವ ತವ ಭಾತಿ ವದನಾಬ್ಜಮ್ ॥ 4 ॥
ನಾಸಿಕಾಖ್ಯವರಶಾಖಯಾ ಯುತಂ ಖಂಜರೀಟಖಗಯುಗ್ಮಭೂಷಿತಮ್ ।
ಪಕ್ವಬಿಮ್ಬಫಲಸಂಯುತಂ ಶಿವೇ ಭಾತಿ ಭೂರುಹ ಇವಾನನಂ ತವ ॥ 5 ॥
ಭಕ್ತಕೇಕಿಕುಲತೋಷಣವ್ರತಂ ಪದ್ಮಸಮ್ಭವಹೃದಮ್ಬರಾಶ್ರಿತಮ್ ।
ಗದ್ಯಪದ್ಯಮಯವಾರಿಸನ್ದದನ್ಮೇಘವತ್ತವ ಮುಖಂ ವಿಭಾತಿ ಮೇ ॥ 6 ॥
ನೇತ್ರೋತ್ಪಲಾಲಂಕೃತಮಧ್ಯಭಾಗಂ ಭ್ರೂವಲ್ಲಿಕಾಬಮ್ಭರಪಂಕ್ತಿರಮ್ಯಮ್ ।
ಪಕ್ಷ್ಮಾಲಿಶೈವಾಲಯುತಂ ವಿಭಾತಿ ತವಾಸ್ಯಮೇತತ್ಸರಸೀವ ವಾಣಿ ॥ 7 ॥
ಸುಚಿಲ್ಲಿಕಾತೋರಣಶೋಭಮಾನಂ ವಿಶಾಲಫಾಲಾಂಗಣರಮ್ಯರಮ್ಯಮ್ ।
ಉತ್ತುಂಗಮಾಣಿಕ್ಯಕಿರೀಟಹರ್ಮ್ಯಂ ವಿಭಾತಿ ವೇಶ್ಮೇವ ತವಾಮ್ಬ ವಕ್ತ್ರಮ್ ॥ 8 ॥
ನಯನಝಷಯುತೋಽಯಂ ದನ್ತಮುಕ್ತಾಫಲಾಢ್ಯೋ
ದಶನವಸನನಾಮಶ್ರೀಪ್ರವಾಲಪ್ರಭಾಯುಕ್ ।
ಪ್ರತಿಪದಮಭಿವೃದ್ಧೈಃ ಕಾನ್ತಿಪೂರೈಃ ಸಮೇತಃ
ಶರಧಿರಿವ ವಿಭಾತಿ ತ್ವನ್ಮುಖಂ ವಾಕ್ಸವಿತ್ರಿ ॥ 9 ॥
ಕಲಯ ಕಲಿವಿಮೋಕಂ ಕಾಲಕಾಲಾನುಜಾತೇ
ಕಲಯ ಶುಭಸಮೃದ್ಧಿಂ ಭೂಮಿಮಧ್ಯೇಽಖಿಲೇಽಸ್ಮಿನ್ ।
ಕಲಯ ರುಚಿಸಮೃದ್ಧಿಂ ಸ್ವಸ್ವಧರ್ಮೇ ಜನಾನಾಂ
ಕಲಯ ಸುಖಸಮೃದ್ಧಿಂ ಸ್ವಸ್ವಧರ್ಮೇ ರತಾನಾಮ್ ॥ 10 ॥
ಸ್ಫುರ ಹ್ರುದಯಸರೋಜೇ ಶಾರದೇ ಶುಭ್ರವರ್ಣೇ
ಕಲಶಮಮೃತಪೂರ್ಣಂ ಮಾಲಿಕಾಂ ಬೋಧಮುದ್ರಾಮ್ ।
ಸರಸಿಜನಿಭಹಸ್ತೈರ್ಬಿಭ್ರತೀ ಪುಸ್ತಕಂ ಚ
ಪ್ರಣತಹೃದಯಮಚ್ಛಂ ಕುರ್ವತೀ ತೂರ್ಣಮೇವ ॥ 11 ॥
ಪಾಲಯ ಮಾಂ ಕರುಣಾಬ್ಧೇ ಪರಿವಾರಯುತಂ ತ್ವಿಹಾಪಿ ಶೃಂಗಾದ್ರೌ ।
ಶಾರದಶಶಿನಿಭವದನೇ ವರದೇ ಲಘು ಶಾರದೇ ಸದಯೇ ॥ 12 ॥
ಐನ್ದ್ರೀಮಾಶಾಮೈನ್ದವೀಂ ವಾ ಕಲಾಮಿ-
ತ್ಯಾದೌ ಬೀಜಂ ಜಾತು ಮಾತಸ್ತ್ವದೀಯಮ್ ।
ವ್ಯಾಜಾದ್ವಾ ಯೋ ವ್ಯಾಹರೇತ್ತಸ್ಯ ವಕ್ತ್ರಾ-
ದ್ದಿವ್ಯಾ ವಾಚೋ ನಿಃಸರನ್ತ್ಯಪ್ರಯತ್ನಾತ್ ॥ 13 ॥
ಶಾರದೇ ತವ ಪದಾಮ್ಬುಜಯುಗ್ಮಂ ಬೋಧಪುಷ್ಪರಸಪೂರ್ಣಮಜಸ್ರಮ್ ।
ಮಾಮಕಂ ಹೃದಯಸಂಜ್ಞಕಮೀಶೇ ನೈವ ಮುಂಚತು ಸರಃ ಕರುಣಾಬ್ಧೇ ॥ 14 ॥
ಕಥಿತಾನಿ ಮದೀಪ್ಸಿತಾನಿ ಮಾತರ್ಮುಹುರಗ್ರೇ ತವ ಶಾರದಾಮ್ಬಿಕೇ ತ್ವಮ್ ।
ನ ಹಿ ಪೂರಯಸೇ ಚಿರಾಯಸೇ ಕಿಂ ಮದಘೌಘಾತ್ಕಿಮು ಶಕ್ತ್ಯಭಾವತೋ ವಾ ॥ 15 ॥
ಅದ್ಯೈವ ಮತ್ಪ್ರಾರ್ಥಿತಮಮ್ಬ ದದ್ಯಾ ಯದಿ ತ್ವಪಾರಾಂ ಕರುಣಾಂ ವಿಧಾಯ ।
ವೇಲಾವಿಹೀನಂ ಸುಖಮಾಪ್ನುಯಾಂ ಹಿ ನೈವಾತ್ರ ಸನ್ದೇಹಲವೋಽಪಿ ಕಶ್ಚಿತ್ ॥ 16 ॥
ಕಮನೀಯಕವಿತ್ವದಾಂ ಜವಾದ್ರಮಣೀಯಾಮ್ಬುಜತುಲ್ಯಪದ್ಯುತಾಮ್ ।
ಶಮನೀಯಭಯಾಪಹಾರಿಣೀಂ ರಮಣೀಂ ಪದ್ಮಭವಸ್ಯ ಭಾವಯೇ ॥ 17 ॥
ಕಾಂಕ್ಷೇ ಕಮಲಜಕಾಮಿನಿ ಕಮನೀಯೈಃ ಪದ್ಯನಿಕುರುಮ್ಬೈಃ ।
ಸ್ತೋತುಂ ವಾಚಾಂ ನಿಕರಂ ಸ್ವಾಯತ್ತಂ ಕಲಯ ಜಗದಮ್ಬ ॥ 18 ॥
ಕಾಮಂ ಮಮ ಫಾಲತಲೇ ಲಿಖತು ಲಿಪಿಂ ದುಃಖದಾಂ ವಿಧಿಃ ಸತತಮ್ ।
ನಾಹಂ ಬಿಭೇಮಿ ಮಾತರ್ಲುಮ್ಪಾಮಿ ತ್ವತ್ಪದಾಬ್ಜರಜಸಾ ತಾಮ್ ॥ 19 ॥
ಕಿಂ ಕಲ್ಪವೃಕ್ಷಮುಖ್ಯೈಃ ಕಿಂ ಕರಧೃತಮೇರುಣಾ ಶಿವೇನಾಪಿ ।
ಕಿಂ ಕಮಲಯಾ ಚ ಹೃದಿ ಚೇತ್ಕಿಂಕರಸರ್ವೇಷ್ಟದಾ ವಾಣೀ ॥ 20 ॥
ತುಂಗಾತಟನಿಕಟಚರಂ ಭೃಂಗಾವಲಿಗರ್ವಹರಣಚಣಚಿಕುರಮ್ ।
ಶ್ರೀಶಾರದಾಭಿಧಾನಂ ಭಾಗ್ಯಂ ಮಮ ಜಯತಿ ಶೃಂಗಶೈಲಾಗ್ರೇ ॥ 21 ॥
ನಿರಣಾಯಿ ಮಯಾ ಸಮಸ್ತಶಾಸ್ತ್ರಾ-
ಣ್ಯಪಿ ವೀಕ್ಷ್ಯ ಪ್ರಣತಾರ್ತಿಹಾರಿ ಲೋಕೇ ।
ಪ್ರವಿಹಾಯ ತವಾಂಘ್ರಿಪಂಕಜಾತಂ
ನ ಪರಂ ವಸ್ತ್ವಿತಿ ವಾಣಿ ನಿಶ್ಚಿತಂ ತತ್ ॥ 22 ॥
ಪದ್ಮಾಸನಾಸಿ ಖಲು ಭಾರತಿ ವಾಗಧೀಶೇ
ಪದ್ಮಾಸನಪ್ರಿಯತಮೇ ಕರಲಗ್ನಪದ್ಮೇ ।
ಮತ್ಕಂ ಮನೋಽಮ್ಬುಜಮಹೋ ಸ್ವಯಮೇವ ಮಾತಃ
ಶ್ರೀಶಾರದಾಮ್ಬ ವಿಜಹಾಸಿ ಕಿಮತ್ರ ವಾಚ್ಯಮ್ ॥ 23 ॥
ಆನೀಯ ದಿವ್ಯಕುಸುಮಾನಿ ಕಿರನ್ತಿ ಲೋಕಾ
ಯೇ ತ್ವತ್ಪದಾಬ್ಜಯುಗಲಂ ವಚಸಾಂ ಸವಿತ್ರಿ ।
ತಾನ್ಪ್ರಾಪ್ತರಾಜಪದವೀಂಸ್ತರಸಾ ಕಿರನ್ತಿ
ಪೌರಾಂಗನಾಃ ಕುಸುಮಲಾಜಚಯೇನ ನೂನಮ್ ॥ 24 ॥
ಆಜ್ಞಾಸೀದ್ಗೌರವೀ ಮೇ ತವ ಖಲು ಕರುಣಾವಾರಿಧಿಃ ಶಾರದಾಮ್ಬಾ
ಸಾಷ್ಟಾಂಗಂ ಯೋಗಮಾರಾದುಪದಿಶತಿ ಭವಾನೌರಸಃ ಸೂನುರಸ್ಯಾಃ ।
ಇತ್ಯಪ್ಯದ್ಯಾಪಿ ಮಾತರ್ನ ಹಿ ಖಲು ಕರುಣಾ ಜಾಯತೇ ಮಯ್ಯನಾಥೇ
ಕಿಂ ವಾ ಕುರ್ಯಾಂ ವದಾಮ್ಬ ಪ್ರಣತಭಯಹರೇ ಶಾರದೇ ಚಾಪಲೋಽಹಮ್ ॥ 25 ॥
ನಾಹಂ ನಿಗೃಹ್ಯ ಕರಣಾನಿ ಸರೋಜಜಾತ-
ಜಾಯೇ ತ್ವದೀಯಪದಪಂಕಜಯೋರ್ಹಿ ಸೇವಾಮ್ ।
ಶಕ್ನೋಮಿ ಕರ್ತುಮಲಸಾಜ್ಞಶಿಖಾಮಣಿರ್ಯ-
ತ್ತಸ್ಮಾನ್ನಿಸರ್ಗಕರುಣಾಂ ಕುರು ಮಯ್ಯನಾಥೇ ॥ 26 ॥
ವಾಣಿ ಸರಸ್ವತಿ ಭಾರತಿ ವಾಗ್ವಾದಿನಿ ವಾರಿಜಾತಜನಿಜಾಯೇ ।
ಕಾಶ್ಮೀರಪುರನಿವಾಸಿನಿ ಕಾಮಿತಫಲವೃನ್ದದಾಯಿನಿ ನಮಸ್ತೇ ॥ 27 ॥
ಶರಣಂ ತ್ವಚ್ಚರಣಂ ಮೇ ನಾನ್ಯದ್ವಾಗ್ದೇವಿ ನಿಶ್ಚಿತಂ ತ್ವೇತತ್ ।
ತಸ್ಮಾತ್ಕುರು ಕರುಣಾಂ ಮಯ್ಯನನ್ಯಶರಣೇ ದ್ರುತಂ ಮಾತಃ ॥ 28 ॥
ಶರದಭ್ರಸದಭ್ರವಸ್ತ್ರವೀತಾ ಕರದೂರೀಕೃತಪಂಕಜಾಭಿಮಾನಾ ।
ಚರಣಾಮ್ಬುಜಲಗ್ನನಾಕಿಮೌಲಿರ್ವರದಾ ಸ್ಯಾನ್ಮಮ ಶಾರದಾ ದಯಾರ್ದ್ರಾ ॥ 29 ॥
ಸ್ಥಾಪಯ ನರಕೇಷು ಸದಾಪ್ಯಥ ಸುಖಕಾಷ್ಠಾಸು ದಿವ್ಯಲೋಕೇಷು ।
ನ ಹಿ ತತ್ರ ಮೇ ವಿಚಾರಃ ಪರಂ ತು ಚಿತ್ತಂ ತವಾಂಘ್ರಿಗತಮಸ್ತು ॥ 30 ॥
ಶೃಂಗಾದ್ರಿವಾಸಲೋಲೇ ಭೃಂಗಾಹಂಕಾರಹಾರಿಕಚಭಾರೇ ।
ತುಂಗಾತೀರವಿಹಾರೇ ಗಂಗಾಧರಸೋದರಿ ಪ್ರಸೀದ ಮಮ ॥ 31 ॥
ಋಷ್ಯಶೃಂಗಜನಿಭೂಮಿವಿಭೂಷೇ ಕಶ್ಯಪಾದಿಮುನಿವನ್ದಿತಪಾದೇ ।
ಪಶ್ಯದಂಘ್ರಿಮುಖಪಾಲನಲೋಲೇ ವಶ್ಯಪಂಕಜಭವೇಽವ ಸದಾ ಮಾಮ್ ॥ 32 ॥
ಕಮ್ಬುಡಮ್ಬರನಿವರ್ತಕಕಂಠಾಮಮ್ಬುಧಿಂ ನಿರವಧಿ ಕರುಣಯಾಃ ।
ಅಮ್ಬುದಪ್ರತಿಮಕೇಶಸಮೂಹಾಮಮ್ಬುಜೋದ್ಭವಸಖೀಂ ಕಲಯೇಽಹಮ್ ॥ 33 ॥
ಭರ್ಮಗರ್ವಹರಸಂಹನನಾಭಾಂ ಶರ್ಮದಾಂ ಪದಸರೋಜನತೇಭ್ಯಃ ।
ಕರ್ಮಭಕ್ತಿಮುಖಪದ್ಧತಿಗಮ್ಯಾಂ ಕುರ್ಮಹೇ ಮನಸಿ ಪದ್ಮಜಜಾಯಾಮ್ ॥ 34 ॥
ಶಮ್ಭುಸೋದರಿ ಶಶಾಂಕನಿಭಾಸ್ಯೇ ಮನ್ದಬುದ್ಧಿವಿತತೇರಪಿ ಶೀಘ್ರಮ್ ।
ವಾಕ್ಪ್ರದಾಯಿನಿ ಕೃಪಾಮೃತರಾಶೇ ಶೃಂಗಶೈಲವರವಾಸವಿಲೋಲೇ ॥ 35 ॥
ತುಷ್ಟಿಮೇಹಿ ವಚಸಾಂ ಜನನಿ ತ್ವಂ ಮತ್ಕೃತೇನ ವಿಧಿನಾಽವಿಧಿನಾ ವಾ ।
ಐಂಜಪೇನ ಪರಿಪೂರಯ ವಾಂಛಾಂ ಮಾಮಕೀಂ ಚ ಮಹತೀಮಪಿ ಶೀಘ್ರಮ್ ॥ 36 ॥
ತವೌರಸಂ ಸೂನುಮಹೋ ತ್ವದೀಯಭಕ್ತಾಗ್ರಗಣ್ಯಾ ಮಮ ದೇಶಿಕೇನ್ದ್ರಾಃ ।
ಪ್ರಾಹುರ್ಯತೋಽತೋ ಮಯಿ ಶಾರದಾಮ್ಬ ಪಾಪ್ಯಗ್ರಗಣ್ಯೇಽಪಿ ದಯಾ ವಿಧೇಯಾ ॥ 37 ॥
ತವೌರಸಂ ಮಾಂ ಸುತಮಾಹುರಾರ್ಯಾಸ್ತ್ವತ್ಪಾದಭಕ್ತಾಗ್ರಸರಾ ಯತೋಽತಃ ।
ಸೋಢ್ವಾ ಮದೀಯಾನ್ಸಕಲಾಪರಾಧಾನ್ಪುರೋ ಭವಾಮ್ಬಾಶು ಗಿರಾಂ ಸವಿತ್ರಿ ॥ 38 ॥
ಭಕ್ತೇಷ್ಟಪಾಥೋನಿಧಿಪೂರ್ಣಚನ್ದ್ರಃ ಕವಿತ್ವಮಾಕನ್ದವಸನ್ತಕಾಲಃ ।
ಜಾಡ್ಯಾನ್ಧಕಾರವ್ರಜಪದ್ಮಬನ್ಧುರಮ್ಬ ಪ್ರಣಾಮಸ್ತವ ಪಾದಪದ್ಮೇ ॥ 39 ॥
ಮುಖಾಮ್ಬುಜಂ ಭಾತು ಜಗಜ್ಜನನ್ಯಾ ಹೃದಮ್ಬುಜೇ ಮೇ ಜಿತಚನ್ದ್ರಬಿಮ್ಬಮ್ ।
ರದಾಮ್ಬರಾಧಃಕೃತಪಕ್ವಬಿಮ್ಬಂ ಮಹಾಘವಿಧ್ವಂಸನಚಂಚ್ವಜಸ್ರಮ್ ॥ 40 ॥
ಯಾನೇನ ಹಂಸಂ ವದನೇನ ಚನ್ದ್ರಂ ಶ್ರೋಣೀಭರಾಚ್ಛೈಲಪತಿಂ ಚ ಕಾಮಮ್ ।
ಕಾಂಚಿದ್ಧಸನ್ತೀಂ ಕಲಯೇ ಹೃದಬ್ಜೇ ಚನ್ದ್ರಾರ್ಧರಾಜದ್ವರಕೇಶಪಾಶಾಮ್ ॥ 41 ॥
ವಿಸ್ಮೃತ್ಯ ದೇಹಾದಿಕಮಮ್ಬ ಸಮ್ಯಕ್ಸಮುಚ್ಚರಂಸ್ತಾವಕಮನ್ತ್ರರಾಜಮ್ ।
ತುಂಗಾನದೀಪುಣ್ಯತಟೇ ಕದಾಹಂ ಸುಸೈಕತೇ ಸ್ವೈರಗತಿರ್ಭವಾಮಿ ॥ 42 ॥
ಶ್ರೀಶಾದಿಸಂಸೇವಿತಪಾದಪದ್ಮೇ ಶ್ರೀಬೋಧದಾನವ್ರತಬದ್ಧದೀಕ್ಷೇ ।
ಶ್ರೀಕಂಠಸೋದರ್ಯಮಿತಾನುಕಮ್ಪೇ ಶ್ರೀಶಾರದಾಮ್ಬಾಶು ಕೃಪಾಂ ಕುರುಷ್ವ ॥ 43 ॥
ಹೃದ್ಯಾನಿ ಪದ್ಯಾನಿ ವಿನಿಃಸರನ್ತಿ ತ್ವದಂಘ್ರಿಸಮ್ಪೂಜಕವಕ್ತ್ರಪದ್ಮಾತ್ ।
ವಿನಾ ಪ್ರಯತ್ನಂ ತರಸಾ ನ ಚಿತ್ರಂ ತ್ವಮಮ್ಬ ಯಸ್ಮಾದ್ವಚಸಾಂ ಸವಿತ್ರೀ ॥ 44 ॥
ಗಮಾಗಮವಿವರ್ಜಿತೈರಸುಭಿರನ್ತರಂಗೇಽನಿಶಂ
ಗಜಾಸ್ಯಗುಹನನ್ದಿಭಿಃ ಸುರವರೈರ್ಮುದಾ ಚಿನ್ತಿತೇ ।
ಗಜಾಜಿನಧರಾನುಜೇ ಗಲಿತತೃಷ್ಣಲೋಕೇಕ್ಷಿತೇ
ಗತಿಂ ಮಮ ಶುಭಾಂ ಮತಿಂ ಸಪದಿ ದೇಹಿ ವಾಗೀಶ್ವರಿ ॥ 45 ॥
ಜಲೋದ್ಭವಜಭಾಮಿನಿ ಪ್ರಣತಸೌಖ್ಯಭೂಮಪ್ರದೇ
ಜಡತ್ವವಿನಿವಾರಣವ್ರತನಿಷಕ್ತಚೇತೋಽಮ್ಬುಜೇ ।
ಜಗತ್ತ್ರಯನಿವಾಸಿಭಿಃ ಸತತಸೇವ್ಯಪಾದಾಮ್ಬುಜೇ
ಜಗಜ್ಜನನಿ ಶಾರದೇ ಜನಯ ಸೌಖ್ಯಮತ್ಯದ್ಭುತಮ್ ॥ 46 ॥
ಮದೇಭಗಮನೇಽವನೇ ನತತತೇರನೇಕೈಃ ಸುಖೈ-
ರನಾರತಮಜಾಮಿತಂ ಪ್ರವಣಹೃತ್ಸರೋಜೇಽಮ್ಬಿಕೇ ।
ಕುತೋ ಮಯಿ ಕೃಪಾ ನ ತೇ ಪ್ರಸರತಿ ಪ್ರಸನ್ನೇ ವದ
ಪ್ರಪಂಚಜನನಪ್ರಭುಪ್ರಣಯಿನಿ ಪ್ರಪದ್ಯೇಽದ್ಯ ಕಮ್ ॥ 47 ॥
ಕದಾ ವಾ ಶ್ರುಂಗಾದ್ರೌ ವಿಮಲತರತುಂಗಾಪರಿಸರೇ
ವಸನ್ಮಾತರ್ವಾಚಾಂ ಶಿರಸಿ ನಿದಧಾನೋಽಂಜಲಿಪುಟಮ್ ।
ಗಿರಾಂ ದೇವಿ ಬ್ರಾಹ್ಮಿ ಪ್ರಣತವರದೇ ಭಾರತಿ ಜವಾ-
ತ್ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ 48 ॥
ಜಗನ್ನಾಥಂ ಗಂಗಾ ವಿವಿಧವೃಜಿನೋಘೈಃ ಪರಿವೃತಂ
ಯಥಾಽರಕ್ಷತ್ಪೂರ್ವಂ ಸಕಲಮಪಿ ಹತ್ವಾಽಽಶು ದುರಿತಮ್ ।
ಪುನಶ್ಚಾನ್ತೇ ದತ್ತ್ವಾ ಕರಸರಸಿಜಂ ಪೂರ್ಣಕೃಪಯಾ
ಜನೈಃ ಸದ್ಭಿಃ ಪ್ರಾಪ್ಯಾಂ ಪರಮಪದವೀಂ ಪ್ರಾಪಿತವತೀ ॥ 49 ॥
ತಥಾ ಶಾನ್ತಂ ಪಾಪಂ ಸಕಲಮಪಿ ಕೃತ್ವಾ ಮಮ ಜವಾ-
ದ್ಧೃದಮ್ಭೋಜೇ ಲಗ್ನಂ ಕುರು ತವ ಪದಾಮ್ಭೋರುಹಯುಗಮ್ ।
ಕರಾಮ್ಭೋಜೇ ಪಶ್ಚಾತ್ಪರಮಕೃಪಯಾ ದೇವಿ ವಚಸಾಂ
ಪ್ರದತ್ತ್ವಾಽಽಲಮ್ಬಂ ಮಾಂ ಗಮಯ ಪದವೀಂ ನಿರ್ಮಲತರಾಮ್ ॥ 50 ॥
ದವೀಯಾಂಸಂ ತ್ವೇನಂ ಪರಮಕೃಪಯಾ ದೇಶಿಕಮುಖಾ-
ತ್ಸಮಾನೀಯಾಮ್ಬ ತ್ವಂ ತವ ಪದಪಯೋಜಾತನಿಕಟಮ್ ।
ಅವಿತ್ವಾಽಽಪೀಯನ್ತಂ ಸಮಯಮಧುನಾ ದೇವಿ ಭಜಸೇ
ಯದೌದಾಸ್ಯಂ ತರ್ಹಿ ತ್ರಿಜಗತಿ ಮಮಾನ್ಯಾಂ ವದ ಗತಿಮ್ ॥ 51 ॥
ಕಾಮಂ ಸನ್ತು ಸುರಾ ನಿರನ್ತರನಿಜಧ್ಯಾನಾರ್ಚನಾಕಾರಿಣೋ
ಲೋಕಾನ್ಸ್ವೇಪ್ಸಿತಸರ್ವಸೌಖ್ಯಸಹಿತಾನ್ಕರ್ತುಂ ಜಗತ್ಯಾಂ ಕಿಲ ।
ಪೂಜಾಧ್ಯಾನಜಪಾದಿಗನ್ಧರಹಿತಾಂಸ್ತ್ರಾತುಂ ಪುನಸ್ತ್ವಾಂ ವಿನಾ
ನಾನ್ಯದ್ದೈವತಮಸ್ತಿಪದ್ಮಜಮನಃಪದ್ಮಾರ್ಭಕಾರ್ಕಪ್ರಭೇ ॥ 52 ॥
ಕಾರುಣ್ಯಂ ಮಯಿ ಧೇಹಿ ಮಾತರನಿಶಂ ಪದ್ಮೋದ್ಭವಪ್ರೇಯಸಿ
ಪ್ರಾರಬ್ಧಂ ಮಮ ದುಷ್ಟಮಾಶು ಶಮಯ ಪ್ರಜ್ಞಾಂ ಶುಭಾಂ ಯಚ್ಛ ಮೇ ।
ಕರ್ತುಂ ಕಾವ್ಯಚಯಂ ರಸೌಘಭರಿತಂ ಶಕ್ತಿಂ ದೃಢಾಂ ಭಕ್ತಿಮ-
ಪ್ಯಂಹಃಸಂಚಯವಾರಿಣೀಂ ತವ ಪದಾಮ್ಭೋಜೇ ಕೃಪಾಮ್ಭೋನಿಧೇ ॥ 53 ॥
ಕುರ್ಯಾಮದ್ಯ ಕಿಮಮ್ಬ ಭಕ್ತಿರಹಿತಃ ಪೂಜಾಂ ಜಪಂ ತರ್ಪಣಂ
ಕಿಂ ವೈರಾಗ್ಯವಿವೇಕಗನ್ಧರಹಿತಃ ಕುರ್ಯಾಂ ವಿಚಾರಂ ಶ್ರುತೇಃ ।
ಕಿಂ ಯೋಗಂ ಪ್ರಕರೋಮಿ ಚಂಚಲಮನಾಃ ಶೃಂಗಾದ್ರಿವಾಸಪ್ರಿಯೇ
ತ್ವತ್ಪಾದಪ್ರಣತಿಂ ವಿಹಾಯ ನ ಗತಿರ್ಮೇಽನ್ಯಾ ಗಿರಾಂ ದೇವತೇ ॥ 54 ॥
ಜಹ್ಯಾನ್ನೈವ ಕದಾಪಿ ತಾವಕಪದಂ ಮಾತರ್ಮನೋ ಮಾಮಕಂ
ಮಾನ್ದ್ಯಧ್ವಾನ್ತನಿವಾರಣೋದ್ಯತದಿನೇಶಾಖರ್ವಗರ್ವಾವಲಿ ।
ಗೌರೀನಾಥರಮಾಧವಾಬ್ಜಭವನೈಃ ಸಮ್ಭಾವ್ಯಮಾನಂ ಮುದಾ
ವಾಕ್ಚಾತುರ್ಯವಿಧಾನಲಬ್ಧಸುಯಶಃಸಮ್ಪೂರಿತಾಶಾಮುಖಮ್ ॥ 55 ॥
ತುಂಗಾತೀರವಿಹಾರಸಕ್ತಹೃದಯೇ ಶೃಂಗಾರಜನ್ಮಾವನೇ
ಗಂಗಾಧಾರಿಮುಖಾಮರೇನ್ದ್ರವಿನುತೇಽನಂಗಾಹಿತಾಪದ್ಧರೇ ।
ಸಂಗಾತೀತಮನೋವಿಹಾರರಸಿಕೇ ಗಂಗಾತರಂಗಾಯಿತಾ
ಭೃಂಗಾಹಂಕೃತಿಭೇದದಕ್ಷಚಿಕುರೇ ತುಂಗಾಗಿರೋ ದೇಹಿ ಮೇ ॥ 56 ॥
ತ್ವತ್ಪಾದಾಮ್ಬುಜಪೂಜನಾಪ್ತಹೃದಯಾಮ್ಭೋಜಾತಶುದ್ಧಿರ್ಜನಃ
ಸ್ವರ್ಗಂ ರೌರವಮೇವ ವೇತ್ತಿ ಕಮಲಾನಾಥಾಸ್ಪದಂ ದುಃಖದಮ್ ।
ಕಾರಾಗಾರಮವೈತಿ ಚನ್ದ್ರನಗರಂ ವಾಗ್ದೇವಿ ಕಿಂ ವರ್ಣನೈ-
ರ್ದೃಶ್ಯಂ ಸರ್ವಮುದೀಕ್ಷತೇ ಸ ಹಿ ಪುನಾ ರಜ್ಜೂರಗಾದ್ಯೈಃ ಸಮಮ್ ॥ 57 ॥
ತ್ವತ್ಪಾದಾಮ್ಬುರುಹಂ ವಿಹಾಯ ಶರಣಂ ನಾಸ್ತ್ಯೇವ ಮೇಽನ್ಯದ್ಧ್ರುವಂ
ವಾಚಾಂ ದೇವಿ ಕೃಪಾಪಯೋಜಲನಿಧೇ ಕುತ್ರಾಪಿ ವಾ ಸ್ಥಾಪಯ ।
ಅಪ್ಯೂರ್ಧ್ವಂ ಧ್ರುವಮಂಡಲಾದಥ ಫಣೀನ್ದ್ರಾದಪ್ಯಧಸ್ತತ್ರ ಮೇ
ತ್ವನ್ನ್ಯಸ್ತೈಹಿಕಪಾರಲೌಕಿಕಭರಸ್ತ್ವಾಸೇ ನ ಕಾಪಿ ವ್ಯಥಾ ॥ 58 ॥
ತ್ವತ್ಪಾದಾಮ್ಬುರುಹಂ ಹೃದಾಖ್ಯಸರಸಿಸ್ಯಾದ್ರೂಢಮೂಲಂ ಯದಾ
ವಕ್ತ್ರಾಬ್ಜೇ ತ್ವಮಿವಾಮ್ಬ ಪದ್ಮನಿಲಯಾ ತಿಷ್ಠೇದ್ಗೃಹೇ ನಿಶ್ಚಲಾ ।
ಕೀರ್ತಿರ್ಯಾಸ್ಯತಿ ದಿಕ್ತಟಾನಪಿ ನೃಪೈಃ ಸಮ್ಪೂಜ್ಯತಾ ಸ್ಯಾತ್ತದಾ
ವಾದೇ ಸರ್ವನಯೇಷ್ವಪಿ ಪ್ರತಿಭಟಾನ್ದೂರೀಕರೋತ್ಯೇವ ಹಿ ॥ 59 ॥
ಮಾತಸ್ತ್ವತ್ಪದವೈಭವಂ ನಿಗದಿತುಂ ಪ್ರಾರಭ್ಯ ನಾಗೇಶ್ವರಾ-
ಸ್ವಪ್ನಾಚಾರ್ಯಕವೀನ್ದುಶೇಖರದಿನೇಶಾದ್ಯಾಃ ಪ್ರಭಗ್ನಾ ಮುಹುಃ ।
ಕ್ವಾಹಂ ತತ್ಕಥನೇ ಜಡೇಷ್ವಚರಮಃ ಕಾರುಣ್ಯಪಾಥೋನಿಧೇ
ವಾಚಾಂ ದೇವಿ ಸುತಸ್ಯ ಸಾಹಸಮಿದಂ ಕ್ಷನ್ತವ್ಯಮೇವಾಮ್ಬಯಾ ॥ 60 ॥
ಮಾತಃ ಶೃಂಗಪುರೀನಿವಾಸರಸಿಕೇ ಮಾತಂಗಕುಮ್ಭಸ್ತನಿ
ಪ್ರಾಣಾಯಾಮಮುಖೈರ್ವಿನಾಪಿ ಮನಸಃ ಸ್ಥೈರ್ಯಂ ದ್ರುತಂ ದೇಹಿ ಮೇ ।
ಯೇನಾಹಂ ಸುಖಮನ್ಯದುರ್ಲಭಮಹೋರಾತ್ರಂ ಭಜಾಮ್ಯನ್ವಹಂ
ಪ್ರಾಪ್ಸ್ಯಾಮ್ಯಾತ್ಮಪರೈಕಬೋಧಮಚಲಂ ನಿಃಸಂಶಯಂ ಶಾರದೇ ॥ 61 ॥
ವೇದಾಭ್ಯಾಸಜಡೋಽಪಿ ಯತ್ಕರಸರೋಜಾತಗ್ರಹಾತ್ಪದ್ಮಭೂ-
ಶ್ಚಿತ್ರಂ ವಿಶ್ವಮಿದಂ ತನೋತಿ ವಿವಿಧಂ ವೀತಕ್ರಿಯಂ ಸಕ್ರಿಯಮ್ ।
ತಾಂ ತುಂಗಾತಟವಾಸಸಕ್ತಹೃದಯಾಂ ಶ್ರೀಚಕ್ರರಾಜಾಲಯಾಂ
ಶ್ರೀಮಚ್ಛಂಕರದೇಶಿಕೇನ್ದ್ರವಿನುತಾಂ ಶ್ರೀಶಾರದಾಮ್ಬಾಂ ಭಜೇ ॥ 62 ॥
ವೈರಾಗ್ಯಂ ದೃಢಮಮ್ಬ ದೇಹಿ ವಿಷಯೇಷ್ವಾದ್ಯನ್ತದುಃಖಪ್ರದೇ-
ಷ್ವಾಮ್ನಾಯಾನ್ತವಿಚಾರಣೇ ಸ್ತಿರತರಾಂ ಚಾಸ್ಥಾಂ ಕೃಪಾವಾರಿಧೇ ।
ಪ್ರತ್ಯಗ್ಬ್ರಹ್ಮಣಿ ಚಿತ್ತಸಂಸ್ಥಿತಿವಿಧಿಂ ಸಮ್ಬೋಧಯಾಶ್ವೇವ ಮಾಂ
ತ್ವಂ ಬ್ರೂಷೇ ಸಕಲಂ ಮಮೇತಿ ಗುರವಃ ಪ್ರಾಹುರ್ಯತಃ ಶಾರದೇ ॥ 63 ॥
ಕಮಲಾಸನವರಕಾಮಿನಿ ಕರಧೃತಚಿನ್ಮುದ್ರಿಕೇ ಕೃಪಾಮ್ಭೋಧೇ ।
ಕರಕಲಿತಾಮಲಕಾಭಂ ತತ್ತ್ವಂ ಮಾಂ ಬೋಧಯತು ಜಗದಮ್ಬ ॥ 64 ॥
ಕರವಿಧೃತಕೀರಡಿಮ್ಭಾಂ ಶರದಭ್ರಸಧರ್ಮವಸ್ತ್ರಸಂವೀತಾಮ್ ।
ವರದಾನನಿರತಪಾಣಿಂ ಸುರದಾಂ ಪ್ರಣಮಾಮಿ ಶಾರದಾಂ ಸದಯಾಮ್ ॥ 65 ॥
ಕಾಮಾಕ್ಷೀವಿಪುಲಾಕ್ಷೀಮೀನಾಕ್ಷೀತ್ಯಾದಿನಾಮಭಿರ್ಮಾತಃ ।
ಕಾಂಚೀಕಾಶೀಮಧುರಾಪುರೇಷು ಭಾಸಿ ತ್ವಮೇವ ವಾಗ್ಜನನಿ ॥ 66 ॥
ಚನ್ದ್ರಾರ್ಧಶೇಖರಾಪರರೂಪಶ್ರೀಶಂಕರಾರ್ಯಕರಪೂಜ್ಯೇ ।
ಚನ್ದ್ರಾರ್ಧಕೃತವತಂಸೇ ಚನ್ದನದಿಗ್ಧೇ ನಮಾಮಿ ವಾಣಿ ಪದೇ ॥ 67 ॥
ಜಯ ಜಯ ಚಿನ್ಮುದ್ರಕರೇ ಜಯ ಜಯ ಶೃಂಗಾದ್ರಿವಿಹರಣವ್ಯಗ್ರೇ ।
ಜಯ ಜಯ ಪದ್ಮಜಜಾಯೇ ಜಯ ಜಯ ಜಗದಮ್ಬ ಶಾರದೇ ಸದಯೇ ॥ 68 ॥
ದುರ್ವಸನದತ್ತಶಾಪಪ್ರತಿಪಾಲನಲಕ್ಷ್ಯತಃ ಸಮಸ್ತಾನಾಮ್ ।
ರಕ್ಷಾರ್ಥಮವನಿಮಧ್ಯೇ ಕೃತಚಿರವಾಸಾಂ ನಮಾಮಿ ವಾಗ್ದೇವೀಮ್ ॥ 69 ॥
ನವನವಕವನಸಮರ್ಥಂ ಪಟುತರವಾಗ್ಧೂತವಾಸವಾಚಾರ್ಯಮ್ ।
ವನಜಾಸನವರಮಾನಿನಿ ವರದೇ ಕುರು ಶೀಘ್ರಮಂಘ್ರಿನತಮ್ ॥ 70 ॥
ಭಗವತ್ಪದಮಂಡನಯೋರ್ವಾದಮಹೇ ಸಕಲಲೋಕಚಿತ್ರಕರೇ ।
ಅಂಗೀಕೃತಮಾಧ್ಯಸ್ಥ್ಯಾಂ ಜಗದಮ್ಬಾಂ ನೌಮಿ ಶಾರದಾಂ ಸದಯಾಮ್ ॥ 71 ॥
ಸೇವಾಪೂಜಾನಮನವಿಧಯಃ ಸನ್ತು ದೂರೇ ನಿತಾನ್ತಂ
ಕಾದಾಚಿತ್ಕಾ ಸ್ಮೃತಿರಪಿ ಪದಾಮ್ಭೋಜಯುಗ್ಮಸ್ಯ ತೇಽಮ್ಬ ।
ಮೂಕಂ ರಂಕಂ ಕಲಯತಿ ಸುರಾಚಾರ್ಯಮಿನ್ದ್ರಂ ಚ ವಾಚಾ
ಲಕ್ಷ್ಮ್ಯಾ ಲೋಕೋ ನ ಚ ಕಲಯತೇ ತಾಂ ಕಲೇಃ ಕಿಂ ಹಿ ದೌಃಸ್ಥ್ಯಮ್ ॥ 72 ॥
ಆಶಾವಸ್ತ್ರಃ ಸದಾತ್ಮನ್ಯವಿರತಹೃದಯಸ್ತ್ಯಕ್ತಸರ್ವಾನುರಾಗಃ
ಕಾಯೇ ಚಕ್ಷುರ್ಮುಖೇಷ್ವಪ್ಯನುದಿತಮಮತಃ ಕ್ವಾಪಿ ಕಸ್ಮಿಂಶ್ಚ ಕಾಲೇ ।
ಶೈಲಾಗ್ರೇಽರಣ್ಯಕೋಣೇ ಕ್ವಚಿದಪಿ ಪುಲಿನೇ ಕ್ವಾಪಿ ರೇವಾತಟೇ ವಾ
ಗಂಗಾತೀರೇಽಥ ತುಂಗಾತಟಭುವಿ ಚ ಕದಾ ಸ್ವೈರಚಾರೀ ಭವೇಯಮ್ ॥ 73 ॥
ಕಲ್ಪನ್ತಾಂ ಕಾಮ್ಯಸಿದ್‍ಧ್ಯೈ ಕಲಿಮಲಹತಯೇ ಚಾಕ್ಷಯೈಶ್ವರ್ಯಸಿದ್ಧ್ಯೈ
ಕಾರುಣ್ಯಾಪಾರಪೂರಾಃ ಕಮಲಭವಮನೋಮೋದದಾನವ್ರತಾಢ್ಯಾಃ
ಕಾತ್ಯಾಯನ್ಯಬ್ಧಿಕನ್ಯಾಮುಖಸುರರಮಣೀಕಾಂಕ್ಷ್ಯಮಾಣಾಃ ಕವಿತ್ವ-
ಪ್ರಾಗ್ಭಾರಾಮ್ಭೋಧಿರಾಕಾಹಿಮಕರಕಿರಣಾಃ ಶಾರದಾಮ್ಬಾಕಟಾಕ್ಷಾಃ ॥ 74 ॥
ಕಲ್ಪಾದೌ ತನ್ಮಹಿಮ್ನಾ ಕತಿಪಯದಿವಸೇಷ್ವೇವ ಲುಪ್ತೇಷು ಮಾರ್ಗೇ-
ಷ್ವಾಮ್ನಾಯಪ್ರೋದಿತೇಷು ಪ್ರವರಸುರಗಣೈಃ ಪ್ರಾರ್ಥಿತಃ ಪಾರ್ವತೀಶಃ ।
ಆಮ್ನಾಯಾಧ್ವಪ್ರವೃದ್‍ಧ್ಯೈ ಯತಿವರವಪುಷಾಗತ್ಯ ಯಾಂ ಶೃಂಗಶೈಲೇ
ಸಂಸ್ಥಾಪ್ಯಾರ್ಚಾಂ ಪ್ರಚಕ್ರೇ ನಿವಸತು ವದನೇ ಶಾರದಾ ಸಾದರಂ ಸಾ ॥ 75 ॥
ತಿಷ್ಠಾಮ್ಯತ್ರೈವ ಮಾತಸ್ತವ ಪದಯುಗಲಂ ವೀಕ್ಷಮಾಣಃ ಪ್ರಮೋದಾ-
ನ್ನಾಹಂ ತ್ಯಕ್ತ್ವಾ ತವಾಂಘ್ರಿಂ ಸಕಲಸುಖಕರಂ ಕ್ವಾಪಿ ಗಚ್ಛಾಮಿ ನೂನಮ್ ।
ಛಾಯಾಂ ಮತ್ಕಾಂ ವಿಧತ್ಸ್ವ ಪ್ರವಚನನಮನಧ್ಯಾನಪೂಜಾಸು ಶಕ್ತಾಂ
ಶುದ್ಧಾಮೇಕಾಂ ತ್ರಿಲೋಕೀಜನನಪಟುವಿಧಿಪ್ರಾಣಕಾನ್ತೇ ನಮಸ್ತೇ ॥ 76 ॥
ತ್ವದ್ಬೀಜೇ ವರ್ತಮಾನೇ ವದನಸರಸಿಜೇ ದುರ್ಲಭಂ ಕಿಂ ನರಾಣಾಂ
ಧರ್ಮೋ ವಾಽರ್ಥಶ್ಚ ಕಾಮೋಽಪ್ಯಥ ಚ ಸಕಲಸನ್ತ್ಯಾಗಸಾಧ್ಯಶ್ಚ ಮೋಕ್ಷಃ ।
ಕಾಮ್ಯಂ ವಾ ಸಾರ್ವಭೌಮ್ಯಂ ಕಮಲಜದಯಿತೇಽಹೇತುಕಾರುಣ್ಯಪೂರ್ಣೇ
ಶೃಂಗಾದ್ರ್ಯಾವಾಸಲೋಲೇ ಭವತಿ ಸುರವರಾರಾಧ್ಯಪಾದಾರವಿನ್ದೇ ॥ 77 ॥
ದೃಷ್ಟ್ವಾ ತ್ವತ್ಪಾದಪಂಕೇರುಹನಮನವಿಧಾವುದ್ಯತಾನ್ಭಕ್ತಲೋಕಾ-
ನ್ದೂರಂ ಗಚ್ಛನ್ತಿ ರೋಗಾ ಹರಿಮಿವ ಹರಿಣಾ ವೀಕ್ಷ್ಯ ಯದ್ವತ್ಸುದೂರಮ್ ।
ಕಾಲಃ ಕುತ್ರಾಪಿ ಲೀನೋ ಭವತಿ ದಿನಕರೇ ಪ್ರೋದ್ಯಮಾನೇ ತಮೋವ-
ತ್ಸೌಖ್ಯಂ ಚಾಯುರ್ಯಥಾಬ್ಜಂ ವಿಕಸತಿ ವಚಸಾಂ ದೇವಿ ಶೃಂಗಾದ್ರಿವಾಸೇ ॥ 78 ॥
ನಾಹಂ ತ್ವತ್ಪಾದಪೂಜಾಮಿಹ ಗುರುಚರಣಾರಾಧನಂ ಚಾಪ್ಯಕಾರ್ಷಂ
ನಾಶ್ರೌಷಂ ತತ್ತ್ವಶಾಸ್ತ್ರಂ ನ ಚ ಖಲು ಮನಸಃ ಸ್ಥೈರ್ಯಲೇಶೋಽಪಿ ಕಶ್ಚಿತ್ ।
ನೋ ವೈರಾಗ್ಯಂ ವಿವೇಕೋ ನ ಚ ಮಮ ಸುದೃಢಾ ಮೋಕ್ಷಕಾಂಕ್ಷಾಽಪಿ ನೂನಂ
ಮಾತಃ ಕಾವಾ ಗತಿರ್ಮೇ ಸರಸಿಜಭವನಪ್ರಾಣಕಾನ್ತೇ ನ ಜಾನೇ ॥ 79 ॥
ನೌಮಿ ತ್ವಾಂ ಶೈವವರ್ಯಾಃ ಶಿವ ಇತಿ ಗಣನಾಥಾರ್ಚಕಾ ವಿಘ್ನಹರ್ತೇ-
ತ್ಯಾರ್ಯೇತ್ಯಮ್ಬಾಂಘ್ರಿಸಕ್ತಾ ಹರಿಭಜನರತಾ ವಿಷ್ಣುರಿತ್ಯಾಮನನ್ತಿ ।
ಯಾಂ ತಾಂ ಸರ್ವಸ್ವರೂಪಾಂ ಸಕಲಮುನಿಮನಃಪದ್ಮಸಂಚಾರಶೀಲಾಂ
ಶೃಂಗಾದ್ರ್ಯಾವಾಸಲೋಲಾಂ ಕಮಲಜಮಹಿಷೀಂ ಶಾರದಾಂ ಪಾರದಾಭಾಮ್ ॥ 80 ॥
ಯಃ ಕಶ್ಚಿದ್ಬುದ್ಧಿಹೀನೋಽಪ್ಯವಿದಿತನಮನಧ್ಯಾನಪೂಜಾವಿಧಾನಃ
ಕುರ್ಯಾದ್ಯದ್ಯಮ್ಬ ಸೇವಾಂ ತವ ಪದಸರಸೀಜಾತಸೇವಾರತಸ್ಯ ।
ಚಿತ್ರಂ ತಸ್ಯಾಸ್ಯಮಧ್ಯಾತ್ಪ್ರಸರತಿ ಕವಿತಾ ವಾಹಿನೀವಾಮರಾಣಾಂ
ಸಾಲಂಕಾರಾ ಸುವರ್ಣಾ ಸರಸಪದಯುತಾ ಯತ್ನಲೇಶಂ ವಿನೈವ ॥ 81 ॥
ಯಾಚನ್ತೇ ನಮ್ರಲೋಕಾ ವಿವಿಧಗುರುರುಜಾಕ್ರಾನ್ತದೇಹಾಃ ಪಿಶಾಚೈ-
ರಾವಿಷ್ಟಾಂಗಾಶ್ಚ ತತ್ತಜ್ಜನಿತಬಹುತರಕ್ಲೇಶನಾಶಾಯ ಶೀಘ್ರಮ್ ।
ಕಿಂ ಕುರ್ಯಾಂ ಮನ್ತ್ರಯನ್ತ್ರಪ್ರಮುಖವಿಧಿಪರಿಜ್ಞಾನಶೂನ್ಯಶ್ಚಿಕಿತ್ಸಾಂ
ಕರ್ತುಂ ನ ತ್ವತ್ಪದಾಬ್ಜಸ್ಮರಣಲವಮೃತೇ ವಾಣಿ ಜಾನೇಽತ್ರ ಕಿಂಚಿತ್ ॥ 82 ॥
ರಾಗದ್ವೇಷಾದಿದೋಷೈಃ ಸತತವಿರಹಿತೈಃ ಶಾನ್ತಿದಾನ್ತ್ಯಾದಿಯುಕ್ತೈ-
ರಾಚಾರ್ಯಾಂಘ್ರ್ಯಬ್ಜಸೇವಾಕರಣಪಟುತರೈರ್ಲಭ್ಯಪಾದಾರವಿನ್ದಾ ।
ಮುದ್ರಾಸ್ರಕ್ಕುಮ್ಭವಿದ್ಯಾಃ ಕರಸಲಿಲರುಹೈಃ ಸನ್ದಧಾನಾ ಪುರಸ್ತಾ-
ದಾಸ್ತಾಂ ವಾಗ್ದೇವತಾ ನಃ ಕಲಿಕೃತವಿವಿಧಾಪತ್ತಿವಿಧ್ವಂಸನಾಯ ॥ 83 ॥
ವಾರಯ ಪಾಪಕದಮ್ಬಂ ತಾರಯ ಸಂಸಾರಸಾಗರಂ ತರಸಾ ।
ಶೋಧಯ ಚಿತ್ತಸರೋಜಂ ಬೋಧಯ ಪರತತ್ತ್ವಮಾಶು ಮಾಮಮ್ಬ ॥ 84 ॥
ಸಚ್ಚಿದ್ರೂಪಾತ್ಮನಿಷ್ಠಃ ಪ್ರಗಲಿತಸಕಲಾಕ್ಷಾದಿವೃತ್ತಿಃ ಶಯಾನೋ
ಭುಂಜಾನಃ ಸತ್ಯಸೌಖ್ಯಂ ತದಿತರಸುಖತಃ ಪ್ರಾಪ್ತನೀರಾಗಭಾವಃ ।
ಪಾಷಾಣೇ ವಾಥ ತಲ್ಪೇ ವನಭುವಿ ಸದನೇ ಪಾರ್ಥಿವಸ್ಯಾಽಶ್ಮಹೇಮ್ನೋ-
ರ್ನಾರ್ಯಾಂ ಮೃತ್ಯೌ ಚ ತುಲ್ಯಃ ಸತತಸುಖಿಮನಾಃ ಸ್ಯಾಂ ಕದಾ ಶಾರದಾಮ್ಬ ॥ 85 ॥
ಕಿಂ ಪಾಠಯೇಯಂ ಲಘುಚನ್ದ್ರಿಕಾಂ ವಾ ಕಿಂ ವಾ ತ್ಯಜೇಯಂ ಸಕಲಪ್ರಪಂಚಮ್ ।
ಸ್ವಪ್ನೇಽದ್ಯ ಮೇ ಬ್ರೂಹಿ ಕಿಮತ್ರ ಕಾರ್ಯಂ ಡೋಲಾಯಿತಂ ಮಾಮಕಮಮ್ಬ ಚೇತಃ ॥ 86 ॥
ತ್ಯಾಗೇ ವಾಽಧ್ಯಾಪನೇ ವಾ ಮಮ ಖಲು ನ ಗಿರಾಂ ದೇವಿ ಕಾಪ್ಯಸ್ತಿ ಶಕ್ತಿ-
ಸ್ತ್ವಂ ವೈ ಸರ್ವತ್ರ ಹೇತುರ್ಯದಸಿ ನಿರವಧಿರ್ವಾರಿರಾಶಿಃ ಕೃಪಾಯಾಃ ।
ತಸ್ಮಾತ್ಸ್ವಪ್ನೇಽದ್ಯ ಕಾರ್ಯಂ ಮಮ ಖಲು ನಿಖಿಲಂ ಬೋಧಯೈವಂ ಕುರುಷ್ವೇ-
ತ್ಯಜ್ಞಾನಾಂ ಬೋಧನಾರ್ಥಂ ತ್ವಮಿಹ ಬಹುವಿಧಾ ಅಮ್ಬ ಮೂರ್ತೀರ್ಬಿಭರ್ಷಿ ॥ 87 ॥
ವಿತರ ವಿಧಿಪ್ರೇಯಸಿ ಮೇ ವಿಮಲಧಿಯಂ ವಾಂಛಿತಂ ಚ ತರಸೈವ ।
ವಿಷ್ಣುಮುಖಾಮರವನ್ದ್ಯೇ ವಿಧುಬಿಮ್ಬಸಮಾನವದನಕಂಜಾತೇ ॥ 88 ॥
ಶಾರದನೀರದಸನ್ನಿಭವಸನೇ ವನಜಾಸನಾನ್ತರಂಗಚರೇ ।
ವರಟಾವಲ್ಲಭಯಾನೇ ವರದೇ ವಾಗ್ದೇವಿ ಶಾರದೇ ಪಾಹಿ ॥ 89 ॥
ಸಪ್ತದಶಘಸ್ರಮವಿರತಮೀಶೇನ ಸಮಸ್ತವಿದ್ಯಾನಾಮ್ ।
ವಿರಚಿತವಾದಾಂ ಕುತುಕಾತ್ಸಾಮೋದಂ ನೌಮಿ ವಾಗ್ಜನನೀಮ್ ॥ 90 ॥
ಸುರವರನಿಷೇವ್ಯಪಾದೇ ಸುಖಲವಾಧೂತಕೇಕಿಕುಲನಿನದೇ
ಸುರವನವಿಹಾರಬಲದೇ ಸುರವರದೇ ಪಾಹಿ ಶಾರದೇ ಸುರದೇ ॥ 91 ॥
ಕುನ್ದರದನೇಽಮ್ಬ ವಾಣಿ ಮುಕುನ್ದರವೀನ್ದ್ವಾದಿದೇವವರ್ಯೇಡ್ಯೇ ।
ಕುನ್ದರಕೃಪಾವಶಾನ್ಮುಕುನ್ದವರಾದ್ಯಾಂಶ್ಚ ಮೇ ನಿಧೀನ್ದೇಹಿ ॥ 92 ॥
ಸ್ಫುರಶರದಿನ್ದುಪ್ರತಿಭಟವದನೇ ವಾಗ್ದೇವಿ ಮಾಮಕೇ ಮನಸಿ ।
ವರದಾನನಿರತಪಾಣೇ ಸರಸಿಜನಯನೇ ಸರೋಜಜಾತಸಖಿ ॥ 93 ॥
ಅಸ್ಥಿರಭಕ್ತೇರ್ಮಮ ದೇವಿ ಗಿರಾಂ ಶೀಘ್ರಂ ದತ್ತ್ವಾ ಕಾಂಚಿತ್ಸಿದ್ಧಿಮ್ ।
ಕುರು ಸುದೃಢಾಂ ಮಮ ತವ ಪಾದಾಬ್ಜೇ ಭಕ್ತಿಂ ಶೃಂಗಗಿರೀನ್ದ್ರನಿವಾಸೇ ॥ 94 ॥
ಸಹಮಾನಸೋದರಿ ಸಹ ಪ್ರಣ್ತಕೃತಾ ಮಾನಹೀನಮನ್ತುತತೀಃ ।
ಸಹಮಾನಸೋದರೀತ್ವಂ ತ್ಯಜ ವಾ ಯುಕ್ತಂ ಯದತ್ರ ಕುರು ವಾಣಿ ॥ 95 ॥
ವಲಭಿನ್ಮುಖನಿರ್ಜರವರಸೇವ್ಯೇ ಕಲವಚನನ್ಯಕ್ಕೃತಪಿಕರಾವೇ ।
ಜಲಜಪ್ರತಿಭಟಪದಯುಗರಮ್ಯೇ ಕಲಯ ಪ್ರವರಂ ಕೃತಿನಾಮೇನಮ್ ॥ 96 ॥
ಕರವಿಲಸದ್ವರಪುಸ್ತಕಮಾಲೇ ಶರದಬ್ಜಾಹಂಕೃತಿಹರಚೇಲೇ ।
ಅರಣೀಸುಮನಿಭಕುಂಕುಮಫಾಲೇ ಶರಣಂ ಮಮ ಭವ ಧೃತಶುಕಬಾಲೇ ॥ 97 ॥ var ಅರಣೀಸುತನಿಭ
ಕಲಯಾಸಕ್ತಿಂ ಕಮಲಜದಯಿತೇ ತುಲನಾಶೂನ್ಯಾಮೀಮ್ಮನುವರ್ಯೇ ।
ವಲಯಾಂಚಿತಕರಸರಸೀಜಾತೇ ಲಲನಾಭಿಃ ಸುರವಿತತೇಃ ಪೂಜ್ಯೇ ॥ 98 ॥
ಶೃಂಗಕ್ಷ್ಮಾಭೃತ್ಕೂಟವಿಹಾರೇ ತುಂಗಾತಟಭೂಕೃತಸಂಚಾರೇ ।
ವಾಚಾಂ ದೇವಿ ಪ್ರಾರ್ಥಿತಮರ್ಥಂ ಶೀಘ್ರಂ ದೇಹಿ ಪ್ರಣತಾಯಾಸ್ಮೈ ॥ 99 ॥
ನಾಹಂ ಸೋಢುಂ ಕಾಲವಿಲಮ್ಬಂ ಶಕ್ನೋಮ್ಯಮ್ಬ ಪ್ರಣತಪ್ರವಣೇ ।
ಈಪ್ಸಿತಮರ್ಥಂ ದೇಹಿ ತದಾಶು ದ್ರುಹಿಣಸ್ವಾನ್ತಾಮ್ಬುಜಬಾಲಘೃಣೇ ॥ 100 ॥
ಇತಿ ಶೃಂಗೇರಿ ಶ್ರೀಜಗದ್ಗುರು ಶ್ರೀಸಚ್ಚಿದಾನನ್ದಶಿವಾಭಿನವನೃಸಿಂಹ-
ಭಾರತೀಸ್ವಾಮಿಭಿಃ ವಿರಚಿತಃ ಶ್ರೀಶಾರದಾಶತಶ್ಲೋಕೀಸ್ತವಃ ಸಮ್ಪೂರ್ಣಃ ।
