Shrimad Bhagwat Geeta Sa ~Nkarabhashyam in Bengali:
॥ শ্রীমদ্ভগবদ্গীতাশাঙ্করভাষ্যম্ ॥
॥ উপোদ্ঘাতঃ ॥
নারায়ণঃ পরোঽব্যক্তাৎ অণ্ডমব্যক্তসম্ভবম্ ।
অণ্ডস্যান্তস্ত্বিমে লোকাঃ সপ্তদ্বীপা চ মেদিনী ॥
সঃ ভগবান্ সৃষ্ট্বা-ইদং জগৎ, তস্য চ স্থিতিং চিকীর্ষুঃ,
মরীচি-আদীন্-অগ্রে সৃষ্ট্বা প্রজাপতীন্, প্রবৃত্তি-লক্ষণং ধর্মং
গ্রাহয়ামাস বেদ-উক্তম্ । ততঃ অন্যাণ্ চ সনক-সনন্দন-আদীন্ উৎপাদ্য,
নিবৃত্তি-লক্ষণং ধর্মং জ্ঞান-বৈরাগ্য-লক্ষণং গ্রাহয়ামাস ।
দ্বিবিধঃ হি বেদোক্তঃ ধর্মঃ, প্রবৃত্তি-লক্ষণঃ
নিবৃত্তি-লক্ষণঃ চ । জগতঃ স্থিতি-কারণং ,
প্রাণিনাং সাক্ষাৎ-অভ্যুদয়-নিঃশ্রেয়স-হেতুঃ
যঃ সঃ ধর্মঃ ব্রাহ্মণাদ্যৈঃ বর্ণিভিঃ আশ্রমিভিঃ চ শ্রেয়োর্থিভিঃ
অনুষ্ঠীয়মানঃ ।
দীর্ঘেণ কালেন অনুষ্ঠাতৃঈণাং কাম-উদ্ভবাৎ
হীয়মান-বিবেক-বিজ্ঞান-হেতুকেন অধর্মেণ অভিভূয়মানে ধর্মে,
প্রবর্ধমানে চ অধর্মে, জগতঃ স্থিতিং পরিপিপালয়িষুঃ সঃ
আদিকর্তা নারায়ণ-আখ্যঃ বিষ্ণুঃ ভৌমস্য ব্রহ্মণঃ ব্রাহ্মণৎবস্য
রক্ষণার্থং দেবক্যাং বসুদেবাৎ-অংশেন কৃষ্ণঃ কিল সম্বভূব ।
ব্রাহ্মণৎবস্য হি রক্ষণে রক্ষিতঃ স্যাৎ বৈদিকঃ ধর্মঃ, তৎ-অধীনৎবাৎ
বর্ণ-আশ্রম-ভেদানাম্ ॥
সঃ চ ভগবান্ জ্ঞান-ঐশ্বর্য-শক্তি-বল-বীর্য-তেজোভিঃ সদা
সম্পন্নঃ ত্রিগুণ-আত্মিকাং স্বাং মায়াং মূল-প্রকৃতিং বশীকৃত্য, অজঃ
অব্যযঃ ভূতানাম্-ঈশ্বরঃ নিত্য-শুদ্ধ-বুদ্ধ-মুক্ত-স্বভাবঃ অপি সন্,
স্ব-মায়যা দেহবান্ ইব জাতঃ ইব চ লোক-অনুগ্রহং কুর্বন্ লক্ষ্যতে ।
স্বপ্রয়োজন-অভাবেঽপি ভূত-অনুজিঘৃক্ষয়া বৈদিকং ধর্ম-দ্বয়ম্
অর্জুনায় শোক-মোহ-মহা-উদধৌ নিমগ্নায় উপদিদেশ, গুণ-অধিকৈঃ
হি গৃহীতঃ অনুষ্ঠীয়মানঃ চ ধর্মঃ প্রচয়ং গমিষ্যতীতি । তং
ধর্মং ভগবতা যথা-উপদিষ্টং বেদব্যাসঃ সর্বজ্ঞঃ ভগবান্
গীতা-আখ্যৈঃ সপ্তভিঃ শ্লোক-শতৈঃ উপনিববন্ধ ॥ তৎ ইদং
গীতা-শাস্ত্রং সমস্ত-বেদার্থ-সার-সঙ্গ্রহ-ভূতং
দুর্বিজ্ঞেয়-অর্থম্, তৎ-অর্থ-আবিষ্করণায়
অনেকৈঃ বিবৃত-পদ-পদার্থ-বাক্যার্থ-ন্যায়ম্-অপি
অত্যন্ত-বিরুদ্ধ-অনেক-অর্থবৎবেন লৌকিকৈঃ গৃহ্যমাণম্-উপলভ্য
অহং বিবেকতঃ অর্থ-নির্ধারণার্থং সঙ্ক্ষেপতঃ বিবরণং করিষ্যামি ॥
তস্য অস্য গীতা-শাস্ত্রস্য সঙ্ক্ষেপতঃ প্রয়োজনং পরং
নিঃশ্রেয়সং সহেতুকস্য সংসারস্য অত্যন্ত-উপরম-লক্ষণম্ । তৎ
চ সর্ব-কর্ম-সন্ন্যাস-পূর্বকাৎ-আত্মজ্ঞান-নিষ্ঠা-রূপাৎ ধর্মাৎ
ভবতি । তথা ইমং এব গীতার্থং ধর্মং উদ্দিশ্য ভগবতা এব উক্তং —
”সঃ হি ধর্মঃ সুপর্যাপ্তঃ ব্রহ্মণঃ পদ-বেদনে” (অশ্ব. ১৬-১২)
ইতি অনুগীতাসু । তত্র এব চ উক্তং — ”ন এব ধর্মী ন চ
অধর্মী ন চ এব হি শুভ-অশুভী ।” (অশ্ব. ১৯-৭) ”যঃ
স্যাৎ-একাসনে লীনঃ তূষ্ণীং কিঞ্চিৎ-অচিন্তয়ন্” (অশ্ব. ১৯-১)
ইতি ॥ ”জ্ঞানং সন্ন্যাস-লক্ষণম্” (অশ্ব. ৪৩-২৬) ইতি চ ।
ইহ অপি চ অন্তে উক্তং অর্জুনায় — “সর্ব-ধর্মান্ পরিত্যজ্য মাম্
একং শরণং ব্রজ” (ভ. গী. ১৮-৬৬) ইতি । অভ্যুদয়-অর্থঃ অপি
যঃ প্রবৃত্তি-লক্ষণঃ ধর্মঃ বর্ণান-আশ্রমাণ্ চ উদ্দিশ্য বিহিতঃ,
সঃ দেব-আদি-স্থান-প্রাপ্তি-হেতুঃ অপি সন্, ঈশ্বর-অর্পণ-বুদ্ধ্যা
অনুষ্ঠীয়মানঃ সত্ত্ব-শুদ্ধয়ে ভবতি ফল-অভিসন্ধি-বর্জিতঃ
শুদ্ধ-সত্ত্বস্য চ জ্ঞান-নিষ্ঠা-যোগ্যতা-প্রাপ্তি-দ্বারেণ
জ্ঞান-উৎপত্তি-হেতুৎবেন চ নিঃশ্রেয়স-হেতুৎবং অপি প্রতিপদ্যতে ।
তথা চ ইমম্-অর্থম্-অভিসন্ধায় বক্ষ্যতি — “ব্রহ্মণি-আধায়
কর্মাণি” (ভ. গী. ৫-১০)“যোগিনঃ কর্ম কুর্বন্তি সঙ্গং
ত্যক্ত্বা-আত্মস্-হুদ্ধয়ে” (ভ. গী. ৫-১১) ইতি ॥
ইমং দ্বিপ্রকারং ধর্মং নিঃশ্রেয়স-প্রয়োজনম্, পরমার্থ-তত্ত্বং চ
বাসুদেব-আখ্যং পরং ব্রহ্ম-অভিধেয়ভূতং বিশেষতঃ অভিব্যঞ্জয়ৎ
বিশিষ্ট-প্রয়োজন-সম্বন্ধ-অভিধেয়বয়্ গীতা-শাস্ত্রম্ । যতঃ
তৎ-অর্থ-বিজ্ঞানে সমস্ত-পুরুষার্থ-সিদ্ধিঃ, অতঃ তৎ-বিবরণে যত্নঃ
ক্রিয়তে ময়া ॥
॥ শ্রীমদ্-ভগবদ্গীতা-শাঙ্কর-ভাষ্যম্ ॥ ॥ প্রথমোঽধ্যায়ঃ ॥
ধৃতরাষ্ট্র উবাচ —
ধর্মক্ষেত্রে কুরুক্ষেত্রে সমবেতা যুয়ুৎসবঃ ।
মামকাঃ পাণ্ডবাশ্চৈব কিমকুর্বত সঞ্জয় ॥ ১-১॥
সঞ্জয় উবাচ —
দৃষ্ট্বা তু পাণ্ডবানীকং ব্যূঢং দুর্যোধনস্তদা ।
আচার্যমুপসঙ্গম্য রাজা বচনমব্রবীৎ ॥ ১-২॥
পশ্যৈতাং পাণ্ডুপুত্রাণাং আচার্য মহতীং চমূম্ ।
ব্যূঢাং দ্রুপদপুত্রেণ তব শিষ্যেণ ধীমতা ॥ ১-৩॥
অত্র শূরা মহেষ্বাসাঃ ভীমার্জুনসমা যুধি ।
যুয়ুধানো বিরাটশ্চ দ্রুপদশ্চ মহারথঃ ॥ ১-৪॥
ধৃষ্টকেতুশ্চেকিতানঃ কাশীরাজশ্চ বীর্যবান্ ।
পুরুজিৎকুন্তিভোজশ্চ শৈব্যশ্চ নরপুঙ্গবঃ ॥ ১-৫॥
যুধামন্যুশ্চ বিক্রান্ত উত্তমৌজাশ্চ বীর্যবান্ ।
সৌভদ্রো দ্রৌপদেয়াশ্চ সর্ব এব মহারথাঃ ॥ ১-৬॥
অস্মাকং তু বিশিষ্টা যে তান্নিবোধ দ্বিজোত্তম ।
নায়কা মম সৈন্যস্য সংজ্ঞার্থং তান্ব্রবীমি তে ॥ ১-৭॥
ভবান্ভীষ্মশ্চ কর্ণশ্চ কৃপশ্চ সমিতিঞ্জয়ঃ ।
অশ্বত্থামা বিকর্ণশ্চ সৌমদত্তির্জয়দ্রথঃ ॥ ১-৮॥
অন্যে চ বহবঃ শূরাঃ মদর্থে ত্যক্তজীবিতাঃ ।
নানাশস্ত্রপ্রহরণাঃ সর্বে যুদ্ধবিশারদাঃ ॥ ১-৯॥
অপর্যাপ্তং তদস্মাকং বলং ভীষ্মাভিরক্ষিতম্ ।
পর্যাপ্তং ৎবিদমেতেষাং বলং ভীমাভিরক্ষিতম্ ॥ ১-১০॥
অয়নেষু চ সর্বেষু যথাভাগমবস্থিতাঃ ।
ভীষ্মমেবাভিরক্ষন্তু ভবন্তঃ সর্ব এব হি ॥ ১-১১॥
তস্য সঞ্জনয়ন্হর্ষং কুরুবৃদ্ধঃ পিতামহঃ ।
সিংহনাদং বিনদ্যোচ্চৈঃ শঙ্খং দধ্মৌ প্রতাপবান্ ॥ ১-১২॥
ততঃ শঙ্খাশ্চ ভের্যশ্চ পণবানকগোমুখাঃ ।
সহসৈবাভ্যহন্যন্ত স শব্দস্তুমুলোঽভবৎ ॥ ১-১৩॥
ততঃ শ্বেতৈর্হয়ৈর্যুক্তে মহতি স্যন্দনে স্থিতৌ ।
মাধবঃ পাণ্ডবশ্চৈব দিব্যৌ শঙ্খৌ প্রদধ্মতুঃ ॥ ১-১৪॥
পাঞ্চজন্যং হৃষীকেশঃ দেবদত্তং ধনঞ্জয়ঃ ।
পৌণ্ড্রং দধ্মৌ মহাশঙ্খং ভীমকর্মা বৃকোদরঃ ॥ ১-১৫॥
অনন্তবিজয়ং রাজা কুন্তীপুত্রো যুধিষ্ঠিরঃ ।
নকুলঃ সহদেবশ্চ সুঘোষমণিপুষ্পকৌ ॥ ১-১৬॥
কাশ্যশ্চ পরমেষ্বাসঃ শিখণ্ডী চ মহারথঃ ।
ধৃষ্টদ্যুম্নো বিরাটশ্চ সাত্যকিশ্চাপরাজিতঃ ॥ ১-১৭॥
দ্রুপদো দ্রৌপদেয়াশ্চ সর্বশঃ পৃথিবীপতে ।
সৌভদ্রশ্চ মহাবাহুঃ শঙ্খান্দধ্মুঃ পৃথক্পৃথক্ ॥ ১-১৮॥
স ঘোষো ধার্তরাষ্ট্রাণাং হৃদয়ানি ব্যদারয়ৎ ।
নভশ্চ পৃথিবীং চৈব তুমুলো ব্যনুনাদয়ন্ ॥ ১-১৯॥
অথ ব্যবস্থিতান্দৃষ্ট্বা ধার্তরাষ্ট্রান্কপিধ্বজঃ ।
প্রবৃত্তে শস্ত্রসম্পাতে ধনুরুদ্যম্য পাণ্ডবঃ ॥ ১-২০॥
হৃষীকেশং তদা বাক্যং ইদমাহ মহীপতে ।
অর্জুন উবাচ —
সেনয়োরুভয়োর্মধ্যে রথং স্থাপয় মেঽচ্যুত ॥ ১-২১॥
যাবদেতান্নিরীক্ষেঽহং যোদ্ধুকামানবস্থিতান্ ।
কৈর্ময়া সহ যোদ্ধব্যং অস্মিন্রণসমুদ্যমে ॥ ১-২২॥
যোৎস্যমানানবেক্ষেঽহং য এতেঽত্র সমাগতাঃ ।
ধার্তরাষ্ট্রস্য দুর্বুদ্ধেঃ যুদ্ধে প্রিয়চিকীর্ষবঃ ॥ ১-২৩॥
সঞ্জয় উবাচ —
এবমুক্তো হৃষীকেশঃ গুডাকেশেন ভারত ।
সেনয়োরুভয়োর্মধ্যে স্থাপয়িৎবা রথোত্তমম্ ॥ ১-২৪॥
ভীষ্মদ্রোণপ্রমুখতঃ সর্বেষাং চ মহীক্ষিতাম্ ।
উবাচ পার্থ পশ্যৈতান্ সমবেতান্কুরূনিতি ॥ ১-২৫॥
তত্রাপশ্যৎস্থিতান্পার্থঃ পিতৄনথ পিতামহান্ ।
আচার্যান্মাতুলান্ভ্রাতৄন্ পুত্রান্পৌত্রান্সখীংস্তথা ॥ ১-২৬॥
শ্বশুরান্সুহৃদশ্চৈব সেনয়োরুভয়োরপি ।
তান্সমীক্ষ্য স কৌন্তেয়ঃ সর্বান্বন্ধূনবস্থিতান্ ॥ ১-২৭॥
কৃপয়া পরয়াবিষ্টঃ বিষীদন্নিদমব্রবীৎ ।
অর্জুন উবাচ —
দৃষ্ট্বেমান্স্বজনান্কৃষ্ণ যুয়ুৎসূন্সমুপস্থিতান্ ॥ ১-২৮॥
সীদন্তি মম গাত্রাণি মুখং চ পরিশুষ্যতি ।
বেপথুশ্চ শরীরে মে রোমহর্ষশ্চ জায়তে ॥ ১-২৯॥
গাণ্ডীবং স্রংসতে হস্তাৎ ৎবক্চৈব পরিদহ্যতে ।
ন চ শক্নোম্যবস্থাতুং ভ্রমতীব চ মে মনঃ ॥ ১-৩০॥
নিমিত্তানি চ পশ্যামি বিপরীতানি কেশব ।
ন চ শ্রেয়োঽনুপশ্যামি হৎবা স্বজনমাহবে ॥ ১-৩১॥
ন কাঙ্ক্ষে বিজয়ং কৃষ্ণ ন চ রাজ্যং সুখানি চ ।
কিং নো রাজ্যেন গোবিন্দ কিং ভোগৈর্জীবিতেন বা ॥ ১-৩২॥
যেষামর্থে কাঙ্ক্ষিতং নঃ রাজ্যং ভোগাঃ সুখানি চ ।
ত ইমেঽবস্থিতা যুদ্ধে প্রাণাংস্ত্যক্ত্বা ধনানি চ ॥ ১-৩৩॥
আচার্যাঃ পিতরঃ পুত্রাঃ তথৈব চ পিতামহাঃ ।
মাতুলাঃ শ্বশুরাঃ পৌত্রাঃ স্যালাঃ সম্বন্ধিনস্তথা ॥ ১-৩৪॥
এতান্ন হন্তুমিচ্ছামি ঘ্নতোঽপি মধুসূদন ।
অপি ত্রৈলোক্যরাজ্যস্য হেতোঃ কিং নু মহীকৃতে ॥ ১-৩৫॥
নিহত্য ধার্তরাষ্ট্রান্নঃ কা প্রীতিঃ স্যাজ্জনার্দন ।
পাপমেবাশ্রয়েদস্মাৎ হৎবৈতানাততায়িনঃ ॥ ১-৩৬॥
তস্মান্নার্হা বয়ং হন্তুং ধার্তরাষ্ট্রান্সবান্ধবান্ ।
স্বজনং হি কথং হৎবা সুখিনঃ স্যাম মাধব ॥ ১-৩৭॥
যদ্যপ্যেতে ন পশ্যন্তি লোভোপহতচেতসঃ ।
কুলক্ষয়কৃতং দোষং মিত্রদ্রোহে চ পাতকম্ ॥ ১-৩৮॥
কথং ন জ্ঞেয়মস্মাভিঃ পাপাদস্মান্নিবর্তিতুম্ ।
কুলক্ষয়কৃতং দোষং প্রপশ্যদ্ভির্জনার্দন ॥ ১-৩৯॥
কুলক্ষয়ে প্রণশ্যন্তি কুলধর্মাঃ সনাতনাঃ ।
ধর্মে নষ্টে কুলং কৃৎস্নং অধর্মোঽভিভবত্যুত ॥ ১-৪০॥
অধর্মাভিভবাৎকৃষ্ণ প্রদুষ্যন্তি কুলস্ত্রিয়ঃ ।
স্ত্রীষু দুষ্টাসু বার্ষ্ণেয় জায়তে বর্ণসঙ্করঃ ॥ ১-৪১॥
সঙ্করো নরকায়ৈব কুলঘ্নানাং কুলস্য চ ।
পতন্তি পিতরো হ্যেষাং লুপ্তপিণ্ডোদকক্রিয়াঃ ॥ ১-৪২॥
দোষৈরেতৈঃ কুলঘ্নানাং বর্ণসঙ্করকারকৈঃ ।
উৎসাদ্যন্তে জাতিধর্মাঃ কুলধর্মাশ্চ শাশ্বতাঃ ॥ ১-৪৩॥
উৎসন্নকুলধর্মাণাং মনুষ্যাণাং জনার্দন ।
নরকে নিয়তং বাসঃ ভবতীত্যনুশুশ্রুম ॥ ১-৪৪॥
অহো বত মহৎপাপং কর্তুং ব্যবসিতা বয়ম্ ।
যদ্রাজ্যসুখলোভেন হন্তুং স্বজনমুদ্যতাঃ ॥ ১-৪৫॥
যদি মামপ্রতীকারং অশস্ত্রং শস্ত্রপাণয়ঃ ।
ধার্তরাষ্ট্রা রণে হন্যুঃ তন্মে ক্ষেমতরং ভবেৎ ॥ ১-৪৬॥
সঞ্জয় উবাচ —
এবমুক্ত্বার্জুনঃ সঙ্খ্যে রথোপস্থ উপাবিশৎ ।
বিসৃজ্য সশরং চাপং শোকসংবিগ্নমানসঃ ॥ ১-৪৭॥
ওঁ তৎসদিতি শ্রীমদ্-ভগবদ্গীতাসু উপনিষৎসু ব্রহ্ম-বিদ্যায়াং যোগ-শাস্ত্রে
শ্রীকৃষ্ন-অর্জুন-সংবাদেঽর্জুন-বিষাদ-যোগঃ নাম প্রথমোঽধ্যায়ঃ ॥১॥
॥ শ্রীমদ্-ভগবদ্গীতা-শাঙ্কর-ভাষ্যম্ ॥ ॥ দ্বিতীয়োঽধ্যায়ঃ ॥
সঞ্জয় উবাচ —
তং তথা কৃপয়াবিষ্টং অশ্রুপূর্ণাকুলেক্ষণম্ ।
বিষীদন্তমিদং বাক্যং উবাচ মধুসূদনঃ ॥ ২-১॥
শ্রীভগবানুবাচ —
কুতস্ত্বা কশ্মলমিদং বিষমে সমুপস্থিতম্ ।
অনার্যজুষ্টমস্বর্গ্যং অকীর্তিকরমর্জুন ॥ ২-২॥
ক্লৈব্যং মা স্ম গমঃ পার্থ নৈতত্ত্বয়্যুপপদ্যতে ।
ক্ষুদ্রং হৃদয়দৌর্বল্যং ত্যক্ত্বোত্তিষ্ঠ পরন্তপ ॥ ২-৩॥
অর্জুন উবাচ —
কথং ভীষ্মমহং সঙ্খ্যে দ্রোণং চ মধুসূদন ।
ইষুভিঃ প্রতিয়োৎস্যামি পূজার্হাবরিসূদন ॥ ২-৪॥
গুরূনহৎবা হি মহানুভাবান্ শ্রেয়ো ভোক্তুং ভৈক্ষমপীহ লোকে ।
হৎবার্থকামাংস্তু গুরূনিহৈব ভুঞ্জীয় ভোগান্রুধিরপ্রদিগ্ধান্ ॥ ২-৫॥
ন চৈতদ্বিদ্মঃ কতরন্নো গরীয়ঃ যদ্বা জয়েম যদি বা নো জয়েয়ুঃ ।
যানেব হৎবা ন জিজীবিষামঃ তেঽবস্থিতাঃ প্রমুখে ধার্তরাষ্ট্রাঃ ॥ ২-৬॥
কার্পণ্যদোষোপহতস্বভাবঃ পৃচ্ছামি ৎবাং ধর্মসম্মূঢচেতাঃ ।
যচ্ছ্রেয়ঃ স্যান্নিশ্চিতং ব্রূহি তন্মে শিষ্যস্তেঽহং শাধি মাং ৎবাং প্রপন্নম্ ॥ ২-৭॥
ন হি প্রপশ্যামি মমাপনুদ্যাৎ-যচ্ছোকমুচ্ছোষণমিন্দ্রিয়াণাম্ ।
অবাপ্য ভূমাবসপত্নমৃদ্ধং রাজ্যং সুরাণামপি চাধিপত্যম্ ॥ ২-৮॥
সঞ্জয় উবাচ —
এবমুক্ত্বা হৃষীকেশং গুডাকেশঃ পরন্তপঃ ।
ন যোৎস্য ইতি গোবিন্দং উক্ত্বা তূষ্ণীং বভূব হ ॥ ২-৯॥
তমুবাচ হৃষীকেশঃ প্রহসন্নিব ভারত ।
সেনয়োরুভয়োর্মধ্যে বিষীদন্তমিদং বচঃ ॥ ২-১০॥
অত্র “দৃষ্ট্বা তু পাণ্ডব-অনীকম্” (ভ. গী. ১-২)
ইতি আরভ্য যাবৎ “ন যোৎস্যে ইতি গোবিন্দং উক্ত্বা
তূষ্ণীং বভূব হ” (ভ. গী. ২-৯) ইতি এতৎ-অন্তঃ প্রাণিনাং
শোক-মোহ-আদি-সংসার-বীজভূত-দোষ-উদ্ভব-কারণ-
প্রদর্শনার্থৎবেন ব্যাখ্যেয়ঃ গ্রন্থঃ ।
তথা হি — অর্জুনেন
রাজ্য-গুরু-পুত্র-মিত্র-সুহৃৎ-স্বজন-সম্বন্ধিবান্ধবেষু
“অহং এতেষাম্” “মম এতে” ইতি এবং
প্রত্যয-নিমিত্ত-স্নেহ-বিচ্ছেদ-আদি-নিমিত্তৌ আত্মনঃ শোক-মোহৌ
প্রদর্শিতৌ “কথং ভীষ্মং অহং সঙ্খ্যে” (ভ. গী. ২-৪)
ইত্যাদিনা । শোক-মোহাভ্যাং হি অভিভূত-বিবেক-বিজ্ঞানঃ স্বতঃ এব
ক্ষত্র-ধর্মে যুদ্ধে প্রবৃত্তঃ অপি তস্মাৎ-যুদ্ধাৎ-উপররাম ;
পর-ধর্মং চ ভিক্ষা-জীবন-আদিকং কর্তুং প্রববৃতে । তথা চ
সর্ব-প্রাণিনাং শোক-মোহ-আদি-দোষ-আবিষ্ট-চেতসাং স্বভাবতঃ এব
স্বধর্ম-পরিত্যাগঃ প্রতিষিদ্ধ-সেবা চ স্যাৎ । স্বধর্মে প্রবৃত্তানাম্
অপি তেষাং বাঽগ্-মনঃ-কায়-আদীনাং প্রবৃত্তিঃ ফল-অভিসন্ধি-পূর্বিকা
এব সাহঙ্কারা চ ভবতি ।
তত্র এবং সতি ধর্ম-অধর্ম-উপচয়াৎ
ইষ্ট-অনিষ্ট-জন্ম-সুখ-দুঃক-আদি-প্রাপ্তি-লক্ষণঃ সংসারঃ
অনুপরতঃ ভবতি । ইতি অতঃ সংসার-বীজ-ভূতৌ শোক-মোহৌ তয়োঃ চ
সর্ব-কর্ম-সন্ন্যাস্-অপূর্বকাৎ-আত্মজ্ঞানাৎ ন অন্যতঃ নিবৃত্তিঃ ইতি
তৎ-উপদিদিক্ষুঃ সর্ব-লোক-অনুগ্রহার্থং অর্জুনং নিমিত্তীকৃত্য আহ
ভগবান্ বাসুদেবঃ — “অশোচ্যান্” (ভ. গী. ২-১১) ইত্যাদি ॥
অত্র কেচিৎ আহুঃ — সর্ব-কর্ম-সন্ন্যাস-পূর্বকাৎ
আত্ম-জ্ঞান-নিষ্ঠা-মাত্রাৎ এব কেবলাৎ কৈবল্যং ন প্রাপ্যতে এব ।
কিং তর্হি ? অগ্নিহোত্র-আদি-শ্রৌত-স্মার্ত-কর্ম-সহিতাৎ জ্ঞানাৎ
কৈবল্য-প্রাপ্তিঃ ইতি সর্বাসু গীতাসু নিশ্চিতঃ অর্থঃ ইতি । জ্ঞাপকং চ
আহুঃ অস্য-অর্থস্য — “অথ চেৎ ৎবং ইমং ধর্ম্যং সঙ্গ্রামং ন
করিষ্যসি” (ভ. গী. ২-৩৩) “কর্মণি এব অধিকারঃ তে”
(ভ. গী. ২-৪৭)“কুরু কর্ম এব তস্মাৎ ৎবম্” (ভ. গী. ৪-১৫)
ইত্যাদি । হিংসা-আদি-যুক্তৎবাৎ বৈদিকং কর্ম অধর্মায় ইতি ইয়ং অপি আশঙ্কা
ন কার্যা ।
কথম্ ?
ক্ষাত্রং কর্ম যুদ্ধ-লক্ষণং
গুরু-ভ্রাতৃ-পুত্র-আদি-হিংসা-লক্ষণম্-অত্যন্তং ক্রূরং অপি স্বধর্ম
ইতি কৃৎবা ন অধর্মায় ; তৎ-অকরণে চ “ততঃ স্বধর্মং
কীর্তিং চ হিৎবা পাপং অবাপ্স্যসি” (ভ. গী. ২-৩৩) ইতি ব্রুবতা
যাবৎ-জীবাদি-শ্রুতি-চোদিতানাং পশি-আদি-হিংসা-লক্ষণানাং চ কর্মণাং
প্রাগ্-এব ন অধর্মৎবং ইতি সুনিশ্চিতং উক্তং ভবতি — ইতি ॥
তৎ অসৎ ; জ্ঞান-কর্ম-নিষ্ঠয়োঃ বিভাগ-বচনাৎ
বুদ্ধি-দ্বয়-আশ্রয়যোঃ । “অশোচ্যান্” (ভ. গী. ২-১১) ইত্যাদিনা
ভগবতা যাবৎ “স্বধর্মং অপি চ অবেক্ষ্য” (ভ. গী. ২-৩১) ইতি
এতৎ অন্তেন গ্রন্থেন যৎ-পরমার্থ-আত্ম=তত্ত্ব-নিরূপণং কৃতম্, তৎ
সাঙ্খ্যম্ । তৎ-বিষয়া বুদ্ধিঃ আত্মনঃ জন্মাদি-ষড্বিক্রিয়া-অভাবাদ্-অকর্তা
আত্মা ইতি প্রকরণার্থ-নিরূপণাৎ যা জায়তে, সা সাঙ্খ্যা-বুদ্ধিঃ । সা
যেষাং জ্ঞানিনাম্-উচিতা ভবতি, তে সাঙ্খ্যাঃ । এতস্যা বুদ্ধেঃ জন্মনঃ
প্রাক্ আত্মনঃ দেহাদি-ব্যতিরিক্তৎব-কর্তৃৎব-ভোক্তৃৎব-আদি-অপেক্ষঃ
ধর্ম-অধর্ম-বিবেক-পূর্বকঃ মোক্ষ-সাধন-অনুষ্ঠান-লক্ষণঃ যোগঃ
তৎ-বিষয়া বুদ্ধিঃ যোগ-বুদ্ধিঃ । সা যেষাং কর্মিণাম্-উচিতা ভবতি
তে যোগিনঃ । তথা চ ভগবতা বিভক্তে দ্বে বুদ্ধী নির্দিষ্টে “এষা
তেঽভিহিতা সাঙ্খ্যে বুদ্ধিঃ যোগে তু ইমাং শৃণু” (ভ. গী. ২-৩৯) ইতি
তয়োঃ চ সাঙ্খ্য-বুদ্ধি-আশ্রয়াং জ্ঞান-যোগেন নিষ্ঠাং সাঙ্খ্যানাং
বিভক্তাং বক্ষ্যতি “পুরা বেদ-আত্মনা ময়া প্রোক্তা” (ভ. গী. ৩-৩)
ইতি । তথা চ যোগ-বুদ্ধি-আশ্রয়াং কর্ম-যোগেন নিষ্ঠাং বিভক্তাং
বক্ষ্যতি — “কর্ম-যোগেন যোগিনাম্” ইতি । এবং সাঙ্খ্য-বুদ্ধিং
যোগ-বুদ্ধিং চ আশ্রিত্য দ্বে নিষ্ঠে বিভক্তে ভগবতা এব উক্তে
জ্ঞান-কর্মণোঃ কর্তৃৎব-অকর্তৃৎব-একৎব-অনেকৎব-বুদ্ধি-আশ্রয়যোঃ
যুগপৎ-এক-পুরুষ-আশ্রয়ৎব-অসম্ভবং পশ্যতা । যথা এতৎ
বিভাগ-বচনম্, তথা এব দর্শিতং শাতপথীয়ে ব্রাহ্মণে —
“এতং এব প্রব্রাজিনঃ লোকম্-ইচ্ছন্তঃ ব্রাহ্মণাঃ প্রব্রজন্তি” ইতি
সর্ব-কর্ম-সন্ন্যাসং বিধায় তৎ শেষেণ “কিং প্রজয়া করিষ্যামঃ
যেষাং নঃ অয়ং আত্মা অয়ং লোকঃ” (বৃ. উ. ৪-৪-২২) ইতি । তত্র চ প্রাক্
দার-পরিগ্রহাৎ পুরুষঃ আত্মা প্রাকৃতঃ ধর্ম-জিজ্ঞাসা-উত্তর-কালং
লোক-ত্রয়-সাধনং — পুত্রম্, দ্বিপ্রকারং চ বিত্তং মানুষং
দৈবং চ ; তত্র মানুষং কর্ম-রূপং পিতৃ-লোক-প্রাপ্তি-সাধনং
বিদ্যাং চ দৈবং বিত্তং দেব-লোক-প্রাপ্তি-সাধনং — “সঃ
অকাময়ত” (বৃ. উ. ১-৪-১৭) ইতি অবিদ্যা-কামবতঃ এব সর্বাণি কর্মাণি
শ্রৌত-আদীনি দর্শিতানি । তেভ্যঃ “ব্যুত্থায়, প্রব্রজন্তি”
ইতি ব্যুত্থানম্-আত্মানং এব লোকম্-ইচ্ছতঃ অকামস্য বিহিতম্ ।
তৎ-এতৎ-বিভাগ-বচনম্-অনুপপন্নং স্যাৎ যদি শ্রৌত-কর্ম-জ্ঞানয়োঃ
সমুচ্ছয়ঃ অভিপ্রেতঃ স্যাৎ ভগবতঃ ॥
ন চ অর্জুনস্য প্রশ্নঃ উপপন্নঃ ভবতি “জ্যায়সী চেৎ কর্মণ্ঃ
স্তে” (ভ. গী. ৩-১) ইত্যাদিঃ । এক-পুরুষ-অনুষ্ঠেয়ৎব-অসম্ভবং
বুদ্ধি-কর্মণোঃ ভগবতা পূর্বম্-অনুক্তং কথং অর্জুনঃ অশ্রুতং
বুদ্ধেঃ চ কর্মণঃ জ্যায়স্ত্বং ভগবতি-অধ্যারোপয়েৎ মৃষা এব
“জ্যায়সী চেৎ কর্মণঃ তে মতা বুদ্ধিঃ” (ভ. গী. ৩-১) ইতি ॥
কিঞ্চ — যদি বুদ্ধি-কর্মণোঃ সর্বেষাং সমুচ্ছয়ঃ উক্তঃ স্যাৎ
অর্জুনস্য অপি সঃ উক্তঃ এব ইতি, “যৎ শ্রেয়ঃ এতয়োঃ একং তৎ মে
ব্রূহি সুনিশ্চিতম্” (ভ. গী. ৫-১) ইতি কথং উভয়োঃ উপদেশে সতি
অন্যতরৈবিষয়ঃ এব প্রশ্নঃ স্যাৎ ? ন হি পিত্ত-প্রশমন-অর্থিনঃ
বৈদ্যেন মধুরং শীতলং চ ভোক্তব্যং ইতি উপদিষ্টে তয়োঃ
অন্যতরৎ-পিত্ত-প্রশমন-কারণং ব্রূহি ইতি প্রশ্নঃ সম্ভবতি ॥ অথ
অর্জুনস্য ভগবৎ-উক্ত-বচন-অর্থ-বিবেক-অনবধারণ-নিমিত্তঃ
প্রশ্নঃ কল্প্যেত, তথা অপি ভগবতা প্রশ্ন অনুরূপং প্রতিবচনং দেয়ম্
— ময়া বুদ্ধি-কর্মণোঃ সমুচ্ছয়ঃ উক্তঃ, কিমর্থং ইত্থং ৎবং ভ্রান্তঃ
অসি — ইতি । ন তু পুনঃ প্রতিবচনম্-অননুরূপং পৃষ্টাৎ-অন্যৎ
এব “দ্বে নিষ্ঠে ময়া পুরা প্রোক্তে” (ভ. গী. ৩-৩) ইতি বক্তুং
যুক্তম্ ॥ ন অপি স্মার্তেন এব কর্মণা বুদ্ধেঃ সমুচ্চয়ে অভিপ্রেতে
বিভাগ-বচনাদি সর্বম্-উপপন্নম্ । কিঞ্চ — ক্ষত্রিয়স্য
যুদ্ধং স্মার্তং কর্ম স্বধর্মঃ ইতি জানতঃ “তৎ কিং কর্মণি
ঘোরে মাং নিয়োজয়সি” (ভ. গী. ৩-১) ইতি উপালম্ভঃ অনুপপন্নঃ ॥
তস্মাৎ গীতা-শাস্ত্রে ঈষৎ-মাত্রেণ-অপি শ্রৌতেন স্মার্তেন বা কর্মণা
আত্ম-জ্ঞানস্য সমুচ্চয়ঃ ন কেনচিৎ দর্শয়িতুং শক্যঃ । যস্য তু
অজ্ঞানাৎ রাগ-আদি-দোষতঃ বা কর্মণি প্রবৃত্তস্য যজ্ঞেন দানেন তপসা
বা বিশুদ্ধ-সত্ত্বস্য জ্ঞানম্-উৎপন্নং-পরমার্থ-তত্ত্ব-বিষয়ম্
“একং এব ইদং সর্বং ব্রহ্ম অকর্তৃ চ” ইতি, তস্য কর্মণি
কর্ম-প্রয়োজনে চ নিবৃত্তে অপি লোক-সঙ্গ্রহার্থং যত্ন-পূর্বং যথা
প্রবৃত্তিঃ, তথা ইব প্রবৃত্তস্য যৎ-প্রবৃত্তি-রূপং দৃশ্যতে ন
তৎ-কর্ম যেন বুদ্ধেঃ সমুচ্চয়ঃ স্যাৎ ; যথা ভগবতঃ বাসুদেবস্য
ক্ষত্র-ধর্ম-চেষ্টিতং ন জ্ঞানেন সমুচ্চীয়তে পুরুষার্থ-সিদ্ধয়ে,
তদ্বৎ তৎ-ফল-অভিসন্ধি-অহঙ্কার-অভাবস্য তুল্যৎবাৎ বিদুষঃ ।
তত্ত্ববিৎ ন অহং করোমি ইতি মন্যতে,
ন চ তৎ-ফলম্-অভিসন্ধত্তে । যথা
চ স্বর্গাদি-কামার্থিনঃ অগ্নিহোত্র-আদি-কর্ম-লক্ষণ-ধর্ম-অনুষ্ঠানায়
আহিত-অগ্নেঃ কাম্যে এব অগ্নিহোত্র-আদৌ প্রবৃত্তস্য সামিকৃতে বিনষ্টেঽপি
কামে তৎ এব অগ্নিহোত্র-আদি-অনুতিষ্ঠতঃ অপি ন তৎ-কাম্যম্-অগ্নিহোত্রাদি
ভবতি । তথা চ দর্শয়তি ভগবান্ — “কুর্বন্ অপি ন লিপ্যতে”
(ভ. গী. ৫-৭) “ন করোতি ন লিপ্যতে” (ভ. গী. ১৩-৩১) ইতি তত্র
তত্র ॥ যৎ চ “পূর্বৈঃ পূর্বতরং কৃতম্” (ভ. গী. ৪-১৫)
“কর্মণা এব হি সংসিদ্ধিম্-আস্থিতাঃ জনক-আদয়ঃ”
(ভ. গী. ৩-২০) ইতি, তৎ তু প্রবিভজ্য বিজ্ঞেয়ম্ । তৎ কথম্ ? যদি
তাবৎ পূর্বে জনক-আদয়ঃ তত্ত্ব-বিদঃ অপি প্রবৃত্ত-কর্মাণঃ স্যুঃ,
তে লোক-সঙ্গ্রহার্থং “গুণা গুণেষু বর্তন্তে” (ভ. গী. ৩-২৮)
ইতি জ্ঞানেন এব সংসিদ্ধিম্-আস্থিতাঃ, কর্ম-সন্ন্যাসে প্রাপ্তেঽপি কর্মণা
সহ এব সংসিদ্ধিম্-আস্থিতাঃ, ন কর্ম-সন্ন্যাসং কৃতবন্তঃ ইতি অর্থঃ ।
অথ ন তে তত্ত্ব-বিদঃ ; ঈশ্বর-সমর্পিতেন কর্মণা সাধন-ভূতেন
সংসিদ্ধিং সত্ত্ব-শুদ্ধিম্, জ্ঞান-উৎপত্তি-লক্ষণাং বা সংসিদ্ধিম্,
আস্থিতাঃ জনক-আদয়ঃ ইতি ব্যাখ্যেয়ম্ । এবং এব আর্থং বক্ষ্যতি
ভগবান্ “সত্ত্ব-শুদ্ধয়ে কর্ম কুর্বন্তি” (ভ. গী. ৫-১১)
ইতি । “স্বকর্মণা তং অভ্যর্চ্য সিদ্ধিং বিন্দতি মানবঃ”
(ভ. গী. ১৮-৪৬) ইতি উক্ত্বা সিদ্ধিং প্রাপ্তস্য পুনঃ জ্ঞান-নিষ্ঠাং
বক্ষ্যতি — “সিদ্ধিং প্রাপ্তঃ যথা ব্রহ্ম” (ভ. গী. ১৮-৫০)
ইত্যাদিনা ॥ তস্মাৎ গীতা-শাস্ত্রে কেবলাৎ এব তত্ত্ব-জ্ঞানাৎ মোক্ষ-প্রাপ্তিঃ
ন কর্ম-সমুচ্চিতাৎ, ইতি নিশ্চিতঃ অর্থঃ । যথা চ অয়ং অর্থঃ,
তথা প্রকরণশঃ বিভজ্য তত্র তত্র দর্শয়িষ্যামঃ ॥ তত্র এবং
ধর্ম-সম্মূঢ-চেতসঃ মিথ্যা-জ্ঞানবতঃ মহতি শোক-সাগরে নিমগ্নস্য
অর্জুনস্য অন্যত্র-আত্ম-জ্ঞানাৎ উদ্ধরণং অপশ্যন্ ভগবান্ বাসুদেবঃ
ততঃ কৃপয়া অর্জুনং উদ্দিধারয়িষুঃ আত্ম-জ্ঞানায়-অবতারয়ন্ আহ —
শ্রীভগবানুবাচ —
অশোচ্যানন্বশোচস্ত্বং প্রজ্ঞাবাদাংশ্চ ভাষসে ।
গতাসূনগতাসূংশ্চ নানুশোচন্তি পণ্ডিতাঃ ॥ ২-১১॥
অশোচ্যান্ ইত্যাদি । ন শোচ্যা অশোচ্যাঃ ভীষ্মদ্রোণাদয়ঃ, সদ্বৃত্তৎবাৎ
পরমার্থস্বরূপেণ চ নিত্যৎবাৎ, তান্ অশোচ্যান্ অন্বশোচঃ
অনুশোচিতবানসি “তে ম্রিয়ন্তে মন্নিমিত্তম্, অহং তৈর্বিনাভূতঃ
কিং করিষ্যামি রাজ্যসুখাদিনা” ইতি । ৎবং প্রজ্ঞাবাদান্ প্রজ্ঞাবতাং
বুদ্ধিমতাং বাদাংশ্চ বচনানি চ ভাষসে তদেতৎ মৌঢ্যং পাণ্ডিত্যং
চ বিরুদ্ধং আত্মনি দর্শয়সি উন্মত্ত ইব ইত্যভিপ্রায়ঃ । যস্মাৎ গতাসূন্
গতপ্রাণান্ মৃতান্, অগতাসূন্ অগতপ্রাণান্ জীবতশ্চ ন অনুশোচন্তি পণ্ডিতাঃ
আত্মজ্ঞাঃ । পণ্ডা আত্মবিষয়া বুদ্ধিঃ যেষাং তে হি পণ্ডিতাঃ, “পাণ্ডিত্যং
নির্বিদ্য” (বৃ. উ. ৩-৫-১) ইতি শ্রুতেঃ । পরমার্থতস্তু তান্ নিত্যান্
অশোচ্যান্ অনুশোচসি, অতো মূঢোঽসি ইত্যভিপ্রায়ঃ ॥ কুতস্তে অশোচ্যাঃ,
যতো নিত্যাঃ । কথম্ ? —
ন ৎবেবাহং জাতু নাসং ন ৎবং নেমে জনাধিপাঃ ।
ন চৈব ন ভবিষ্যামঃ সর্বে বয়মতঃ পরম্ ॥ ২-১২॥
ন তু এব জাতু কদাচিৎ অহং নাসম্, কিং তু আসমেব । অতীতেষু
দেহোৎপত্তিবিনাশেষু ঘটাদিষু বিয়দিব নিত্য এব অহমাসমিত্যভিপ্রায়ঃ ।
তথা ন ৎবং ন আসীঃ, কিং তু আসীরেব । ততা ন ইমে জনাধিপাঃ ন আসন্,
কিং তু আসন্নেব । তথা ন চ এব ন ভবিষ্যামঃ, কিং তু ভবিষ্যাম
এব, সর্বে বয়ং অতঃ অস্মাৎ দেহবিনাশাৎ পরং উত্তরকালে অপি । ত্রিষ্বপি
কালেষু নিত্যা আত্মস্বরূপেণ ইত্যর্থঃ । দেহভেদানুবৃত্ত্যা বহুবচনম্,
নাত্মভেদাভিপ্রায়েণ ॥ তত্র কথমিব নিত্য আত্মেতি দৃষ্টান্তমাহ —
দেহিনোঽস্মিন্যথা দেহে কৌমারং যৌবনং জরা ।
তথা দেহান্তরপ্রাপ্তির্ধীরস্তত্র ন মুহ্যতি ॥ ২-১৩॥
দেহঃ অস্য অস্তীতি দেহী, তস্য দেহিনো দেহবতঃ আত্মনঃ অস্মিন্ বর্তমানে
দেহে যথা যেন প্রকারেণ কৌমারং কুমারভাবো বাল্যাবস্থা, যৌবনং যূনো
ভাবো মধ্যমাবস্থা, জরা বয়োহানিঃ জীর্ণাবস্থা, ইত্যেতাঃ তিস্রঃ অবস্থাঃ
অন্যোন্যবিলক্ষণাঃ । তাসাং প্রথমাবস্থানাশে ন নাশঃ, দ্বিতীয়াবস্থোপাজনে
ন উপজন আত্মনঃ । কিং তর্হি ? অবিক্রিয়স্যৈব দ্বিতীয়তৃতীয়াবস্থাপ্রাপ্তিঃ
আত্মনো দৃষ্টা । তথা তদ্বদেব দেহাৎ অন্যো দেহো দেহান্তরম্, তস্য প্রাপ্তিঃ
দেহান্তরপ্রাপ্তিঃ অবিক্রিয়স্যৈব আত্মনঃ ইত্যর্থঃ । ধীরো ধীমান্, তত্র
এবং সতি ন মুহ্যতি ন মোহমাপদ্যতে ॥ যদ্যপি আত্মবিনাশনিমিত্তো মোহো ন
সম্ভবতি নিত্য আত্মা ইতি বিজানতঃ, ততাপি শীতোষ্ণসুখদুঃখপ্রাপ্তিনিমিত্তো
মোহো লৌকিকো দৃশ্যতে, সুখবিয়োগনিমিত্তো মোহঃ দুঃখসংয়োগনিমিত্তশ্চ
শোকঃ । ইত্যেতদর্জুনস্য বচনমাশঙ্ক্য ভগবানাহ —
মাত্রাস্পর্শাস্তু কৌন্তেয় শীতোষ্ণসুখদুঃখদাঃ ।
আগমাপায়িনোঽনিত্যাস্তাংস্তিতিক্ষস্ব ভারত ॥ ২-১৪॥
মাত্রাঃ আভিঃ মীয়ন্তে শব্দাদয় ইতি শ্রোত্রাদীনি ইন্দ্রিয়াণি । মাত্রাণাং স্পর্শাঃ
শব্দাদিভিঃ সংয়োগাঃ । তে শীতোষ্ণসুখদুঃখদাঃ শীতং উষ্ণং সুখং
দুঃখং চ প্রয়চ্ছন্তীতি । অথবা স্পৃশ্যন্ত ইতি স্পর্শাঃ বিষয়াঃ
শব্দাদয়ঃ । মাত্রাশ্চ স্পর্শাশ্চ শীতোষ্ণসুখদুঃখদাঃ । শীতং কদাচিৎ
সুখং কদাচিৎ দুঃখম্ । তথা উষ্ণমপি অনিয়তস্বরূপম্ । সুখদুঃখে পুনঃ
নিয়তরূপে যতো ন ব্যভিচরতঃ । অতঃ তাভ্যাং পৃথক্ শীতোষ্ণয়োঃ গ্রহণম্
যস্মাৎ তে মাত্রাস্পর্শাদয়ঃ আগমাপায়িনঃ আগমাপায়শীলাঃ তস্মাৎ অনিত্যাঃ ।
অতঃ তান্ শীতোষ্ণাদীন্ তিতিক্ষস্ব প্রসহস্ব । তেষু হর্ষং বিষাদং বা মা
কার্ষীঃ ইত্যর্থঃ ॥ শীতোষ্ণাদীন্ সহতঃ কিং স্যাদিতি শৃণু —
যং হি ন ব্যথয়ন্ত্যেতে পুরুষং পুরুষর্ষভ ।
সমদুঃখসুখং ধীরং সোঽমৃতৎবায় কল্পতে ॥ ২-১৫॥
যং হি পুরুষং সমে দুঃখসুখে যস্য তং সমদুঃখসুখং
সুখদুঃখপ্রাপ্তৌ হর্ষবিষাদরহিতং ধীরং ধীমন্তং ন ব্যথয়ন্তি
ন চালয়ন্তি নিত্যাত্মদর্শনাৎ এতে যথোক্তাঃ শীতোষ্ণাদয়ঃ, সঃ
নিত্যাত্মস্বরূপদর্শননিষ্ঠো দ্বন্দ্বসহিষ্ণুঃ অমৃতৎবায় অমৃতভাবায়
মোক্ষায়েত্যর্থঃ, কল্পতে সমর্থো ভবতি ॥ ইতশ্চ শোকমোহৌ অকৃৎবা
সীতোষ্ণাদিসহনং যুক্তম্, যস্মাৎ —
নাসতো বিদ্যতে ভাবো নাভাবো বিদ্যতে সতঃ ।
উভয়োরপি দৃষ্টোঽন্তস্ত্বনয়োস্তত্ত্বদর্শিভিঃ ॥ ২-১৬॥
ন অসতঃ অবিদ্যমানস্য শীতোষ্ণাদেঃ সকারণস্য ন বিদ্যতে নাস্তি ভাবো
ভবনং অস্তিতা ॥ ন হি শীতোষ্ণাদি সকারণং প্রমাণৈর্নিরূপ্যমাণং
বস্তুসদ্ভবতি । বিকারো হি সঃ, বিকারশ্চ ব্যভিচরতি । যথা
ঘটাদিসংস্থানং চক্ষুষা নিরূপ্যমাণং মৃদ্ব্যতিরেকেণানুপলব্ধেরসৎ,
তথা সর্বো বিকারঃ কারণব্যতিরেকেণানুপলব্ধেরসন্ । জন্মপ্রধ্বংসাভ্যাং
প্রাগূর্ধ্বং চ অনুপলব্ধেঃ কার্যস্য ঘটাদেঃ মৃদাদিকারণস্য চ
তৎকারণব্যতিরেকেণানুপলব্ধেরসত্ত্বম্ ॥ তদসত্ত্বে সর্বাভাবপ্রসঙ্গ ইতি
চেৎ, ন ; সর্বত্র বুদ্ধিদ্বয়োপলব্ধেঃ,
সদ্বুদ্ধিরসদ্বুদ্ধিরিতি । যদ্বিষয়া
বুদ্ধির্ন ব্যভিচরতি, তৎ সৎ ; যদ্বিষয়া ব্যভিচরতি, তদসৎ ; ইতি
সদসদ্বিভাগে বুদ্ধিতন্ত্রে স্থিতে, সর্বত্র দ্বে বুদ্ধী সর্বৈরুপলভ্যেতে
সমানাধিকরণে ন নীলোৎপলবৎ, সন্ ঘটঃ, সন্ পটঃ, সন্ হস্তী ইতি । এবং
সর্বত্র তয়োর্বুদ্ধ্যোঃ ঘটাদিবুদ্ধিঃ ব্যভিচরতি । তথা চ দর্শিতম্ ।
ন তু সদ্বুদ্ধিঃ । তস্মাৎ ঘটাদিবুদ্ধিবিষয়ঃ অসন্, ব্যভিচারাৎ ; ন তু
সদ্বুদ্ধিবিষয়ঃ, অব্যভিচারাৎ ॥
ঘটে বিনষ্টে ঘটবুদ্দৌ ব্যভিচরন্ত্যাং
সদ্বুদ্ধিরপি ব্যভিচরতীতি চেৎ, ন ; পটাদাবপি সদ্বুদ্ধিদর্শনাৎ ।
বিশেষণবিষয়ৈব সা সদ্বুদ্ধিঃ ॥ সদ্বুদ্ধিবৎ ঘটবুদ্ধিরপি ঘটান্তরে
দৃশ্যত ইতি চেৎ, ন ; পটাদৌ অদর্শনাৎ ॥ সদ্বুদ্ধিরপি নষ্টে ঘটে
ন দৃশ্যত ইতি চেৎ, ন ; বিশেষ্যাভাবাৎ সদ্বুদ্ধিঃ বিশেষণবিষয়া
সতী বিশেষ্যাভাবে বিশেষণানুপপত্তৌ কিংবিষয়া স্যাৎ ? ন তু পুনঃ
সদ্বুদ্ধেঃ বিষয়াভাবাৎ ॥ একাধিকরণৎবং ঘটাদিবিশেষ্যাভাবে ন
যুক্তমিতি চেৎ, ন ; “ইদমুদকম্” ইতি মরীচ্যাদৌ অন্যতরাভাবেঽপি
সামানাধিকরণ্যদর্শনাৎ ॥ তস্মাদ্দেহাদেঃ দ্বন্দ্বস্য চ সকারণস্য অসতো ন
বিদ্যতে ভাব ইতি । তথা সতশ্চ আত্মনঃ অভাবঃ অবিদ্যমানতা ন বিদ্যতে,
সর্বত্র অব্যভিচারাৎ ইতি অবোচাম ॥ এবং আত্মানাত্মনোঃ সদসতোঃ উভয়োরপি
দৃষ্টঃ উপলব্ধঃ অন্তো নির্ণয়ঃ সৎ সদেব অসৎ অসদেবেতি, তু অনয়োঃ
যথোক্তয়োঃ তত্ত্বদর্শিভিঃ । তদিতি সর্বনাম, সর্বং চ ব্রহ্ম, তস্য
নাম তদিতি, তদ্ভাবঃ তত্ত্বম্, ব্রহ্মণো যাথাত্ম্যম্ । তৎ দ্রষ্টুং শীলং
যেষাং তে তত্ত্বদর্শিনঃ, তৈঃ তত্ত্বদর্শিভিঃ । ৎবমপি তত্ত্বদর্শিনাং
দৃষ্টিমাশ্রিত্য শোকং মোহং চ হিৎবা শীতোষ্ণাদীনি নিয়তানিয়তরূপাণি
দ্বন্দ্বানি “বিকারোঽয়মসন্নেব মরীচিজলবন্মিথ্যাবভাসতে”
ইতি মনসি নিশ্চিত্য তিতিক্ষস্ব ইত্যভিপ্রায়ঃ ॥ কিং পুনস্তৎ, যৎ সদেব
সর্বদা ইতি ; উচ্যতে —
অবিনাশি তু তদ্বিদ্ধি যেন সর্বমিদং ততম্ ।
বিনাশমব্যযস্যাস্য ন কশ্চিৎকর্তুমর্হতি ॥ ২-১৭॥
অবিনাশি ন বিনষ্টুং শীলং যস্যেতি । তুশব্দঃ অসতো বিশেষণার্থঃ ।
তৎ বিদ্ধি বিজানীহি । কিম্ ? যেন সর্বং ইদং জগৎ ততং ব্যাপ্তং সদাখ্যেন
ব্রহ্মণা সাকাশম্, আকাশেনেব ঘটাদয়ঃ । বিনাশং অদর্শনং অভাবম্ ।
অব্যযস্য ন ব্যেতি উপচয়াপচয়ৌ ন যাতি ইতি অব্যযং তস্য অব্যযস্য ।
নৈতৎ সদাখ্যং ব্রহ্ম স্বেন রূপেণ ব্যেতি ব্যভিচরতি, নিরবয়বৎবাৎ,
দেহাদিবৎ । নাপ্যাত্মীয়েন, আত্মীয়াভাবাৎ । যথা দেবদত্তো ধনহান্যা ব্যেতি,
ন তু এবং ব্রহ্ম ব্যেতি । অতঃ অব্যযস্য অস্য ব্রহ্মণঃ বিনাশং ন কশ্চিৎ
কর্তুমর্হতি, ন কশ্চিৎ আত্মানং বিনাশয়িতুং শক্নোতি ঈশ্বরোঽপি । আত্মা
হি ব্রহ্ম, স্বাত্মনি চ ক্রিয়াবিরোধাৎ ॥ কিং পুনস্তদসৎ, যৎস্বাত্মসত্তাং
ব্যভিচরতীতি, উচ্যতে —
অন্তবন্ত ইমে দেহা নিত্যস্যোক্তাঃ শরীরিণঃ ।
অনাশিনোঽপ্রমেয়স্য তস্মাদ্যুধ্যস্ব ভারত ॥ ২-১৮॥
অন্তঃ বিনাশঃ বিদ্যতে যেষাং তে অন্তবন্তঃ । যথা মৃগতৃষ্ণিকাদৌ
সদ্বুদ্ধিঃ অনুবৃত্তা প্রমাণনিরূপণান্তে বিচ্ছিদ্যতে, স তস্য
অন্তঃ ; তথা ইমে দেহাঃ স্বপ্নমায়াদেহাদিবচ্চ অন্তবন্তঃ নিত্যস্য
শরীরিণঃ শরীরবতঃ অনাশিনঃ অপ্রমেয়স্য আত্মনঃ অন্তবন্ত ইতি উক্তাঃ
বিবেকিভিরিত্যর্থঃ । “নিত্যস্য” “অনাশিনঃ” ইতি ন
পুনরুক্তম্ ; নিত্যৎবস্য দ্বিবিধৎবাৎ লোকে, নাশস্য চ । যথা দেহো
ভস্মীভূতঃ অদর্শনং গতো নষ্ট উচ্যতে । বিদ্যমানোঽপি যথা অন্যথা
পরিণতো ব্যাধ্যাদিয়ুক্তো জাতো নষ্ট উচ্যতে । তত্র “নিত্যস্য”
“অনাশিনঃ” ইতি দ্বিবিধেনাপি নাশেন অসম্বন্ধঃ অস্যেত্যর্থঃ
অন্যথা পৃথিব্যাদিবদপি নিত্যৎবং স্যাৎ আত্মনঃ ; তৎ মা ভূদিতি
“নিত্যস্য” “অনাশিনঃ” ইত্যাহ । অপ্রমেয়স্য ন প্রমেয়স্য
প্রত্যক্ষাদিপ্রমাণৈঃ অপরিচ্ছেদ্যস্যেত্যর্থঃ ॥ ননু আগমেন আত্মা
পরিচ্ছিদ্যতে, প্রত্যক্ষাদিনা চ পূর্বম্ । ন ; আত্মনঃ স্বতঃসিদ্ধৎবাৎ ।
সিদ্ধে হি আত্মনি প্রমাতরি প্রমিৎসোঃ প্রমাণান্বেষণা ভবতি । ন হি পূর্বম্
“ইত্থমহম্” ইতি আত্মানমপ্রমায় পশ্চাৎ প্রমেয়পরিচ্ছেদায়
প্রবর্ততে । ন হি আত্মা নাম কস্যচিৎ অপ্রসিদ্ধো ভবতি । শাস্ত্রং তু
অন্ত্যং প্রমাণং অতদ্ধর্মাধ্যারোপণমাত্রনিবর্তকৎবেন প্রমাণৎবং আত্মনঃ
প্রতিপদ্যতে, ন তু অজ্ঞাতার্থ- জ্ঞাপকৎবেন । তথা চ শ্রুতিঃ —
“যৎসাক্ষাদপরোক্ষাদ্ব্রহ্ম য আত্মা সর্বান্তরঃ” (বৃ. উ. ৩-৫-১)
ইতি ॥ যস্মাদেবং নিত্যঃ অবিক্রিয়শ্চ আত্মা তস্মাৎ যুধ্যস্ব, যুদ্ধাৎ
উপরমং মা কার্ষীঃ ইত্যর্থঃ ॥ ন হি অত্র যুদ্ধকর্তব্যতা বিধীয়তে,
যুদ্ধে প্রবৃত্ত এব হি অসৌ শোকমোহপ্রতিবদ্ধঃ তূষ্ণীমাস্তে । অতঃ তস্য
প্রতিবন্ধাপনয়নমাত্রং ভগবতা ক্রিয়তে । তস্মাৎ “যুধ্যস্ব”
ইতি অনুবাদমাত্রম্, ন বিধিঃ ॥ শোকমোহাদিসংসারকারণনিবৃত্ত্যর্থঃ
গীতাশাস্ত্রম্, ন প্রবর্তকং ইত্যেতস্যার্থস্য সাক্ষিভূতে ঋচৌ আনীনায়
ভগবান্ । যত্তু মন্যসে “যুদ্ধে ভীষ্মাদয়ো ময়া হন্যন্তে”
“অহমেব তেষাং হন্তা” ইতি, এষা বুদ্ধিঃ মৃষৈব তে ।
কথম্ ? —
য এনং বেত্তি হন্তারং যশ্চৈনং মন্যতে হতম্ ।
উভৌ তৌ ন বিজানীতো নায়ং হন্তি ন হন্যতে ॥ ২-১৯॥
য এনং প্রকৃতং দেহিনং বেত্তি বিজানাতি হন্তারং হননক্রিয়ায়াঃ কর্তারং
যশ্চ এনং অন্যো মন্যতে হতং দেহহননেন “হতঃ অহম্” ইতি
হননক্রিয়ায়াঃ কর্মভূতম্, তৌ উভৌ ন বিজানীতঃ ন জ্ঞাতবন্তৌ অবিবেকেন
আত্মানম্ । “হন্তা অহম্” “হতঃ অস্তি অহম্” ইতি দেহহননেন
আত্মানমহং প্রত্যযবিষয়ং যৌ বিজানীতঃ তৌ আত্মস্বরূপানভিজ্ঞৌ ইত্যর্থঃ
যস্মাৎ ন অয়ং আত্মা হন্তি ন হননক্রিয়ায়াঃ কর্তা ভবতি, ন চ হন্যতে
ন চ কর্ম ভবতীত্যর্থঃ, অবিক্রিয়ৎবাৎ ॥ কথমবিক্রয় আত্মেতি দ্বিতীয়ো
মন্ত্রঃ —
ন জায়তে ম্রিয়তে বা কদাচিন্নায়ং ভূৎবাভবিতা বা ন ভূয়ঃ ।
অজো নিত্যঃ শাশ্বতোঽয়ং পুরাণো ন হন্যতে হন্যমানে শরীরে ॥ ২-২০॥
ন জায়তে ন উৎপদ্যতে, জনিলক্ষণা বস্তুবিক্রিয়া ন আত্মনো বিদ্যতে
ইত্যর্থঃ । তথা ন ম্রিয়তে বা । বাশব্দঃ চার্থে । ন ম্রিয়তে চ
ইতি অন্ত্যা বিনাশলক্ষণা বিক্রিয়া প্রতিষিধ্যতে । কদাচিচ্ছব্দঃ
সর্ববিক্রিয়াপ্রতিষেধৈঃ সম্বধ্যতে — ন কদাচিৎ জায়তে, ন
কদাচিৎ ম্রিয়তে, ইত্যেবম্ । যস্মাৎ অয়ং আত্মা ভূৎবা ভবনক্রিয়ামনুভূয়
পশ্চাৎ অভবিতা অভাবং গন্তা ন ভূয়ঃ পুনঃ, তস্মাৎ ন ম্রিয়তে । যোহি
ভূৎবা ন ভবিতা স ম্রিয়ত ইত্যুচ্যতে লোকে । বাশব্দাৎ নশব্দাচ্চ
অয়মাত্মা অভূৎবা বা ভবিতা দেহবৎ ন ভূয়ঃ । তস্মাৎ ন জায়তে । যো
হি অভূৎবা ভবিতা স জায়ত ইত্যুচ্যতে । নৈবমাত্মা । অতো ন জায়তে ।
যস্মাদেবং তস্মাৎ অজঃ, যস্মাৎ ন ম্রিয়তে তস্মাৎ নিত্যশ্চ । যদ্যপি
আদ্যন্তয়োর্বিক্রিয়যোঃ প্রতিষেধে সর্বা বিক্রিয়াঃ প্রতিষিদ্ধা ভবন্তি,
তথাপি মধ্যভাবিনীনাং বিক্রিয়াণাং স্বশব্দৈরেব প্রতিষেধঃ কর্তব্যঃ
অনুক্তানামপি যৌবনাদিসমস্তবিক্রিয়াণাং প্রতিষেধো যথা স্যাৎ ইত্যাহ —
শাশ্বত ইত্যাদিনা । শাশ্বত ইতি অপক্ষয়লক্ষণা বিক্রিয়া প্রতিষিধ্যতে ।
শশ্বদ্ভবঃ শাশ্বতঃ । ন অপক্ষীয়তে স্বরূপেণ, নিরবয়বৎবাৎ । নাপি
গুণক্ষয়েণ অপক্ষয়ঃ, নির্গুণৎবাৎ । অপক্ষয়বিপরীতাপি বৃদ্ধিলক্ষণা
বিক্রিয়া প্রতিষিধ্যতে — পুরাণ ইতি । যো হি অবয়বাগমেন উপচীয়তে স
বর্ধতে অভিনব ইতি চ উচ্যতে । অয়ং তু আত্মা নিরবয়বৎবাৎ পুরাপি নব
এবেতি পুরাণঃ ; ন বর্ধতে ইত্যর্থঃ । তথা ন হন্যতে । হন্তি ; অত্র
বিপরিণামার্থে দ্রষ্টব্যঃ অপুনরুক্ততায়ৈ । ন বিপরিণম্যতে ইত্যর্থঃ
হন্যমানে বিপরিণম্যমানেঽপি শরীরে । অস্মিন্ মন্ত্রে ষড্ ভাববিকারা
লৌকিকবস্তুবিক্রিয়া আত্মনি প্রতিষিধ্যন্তে । সর্বপ্রকারবিক্রিয়ারহিত
আত্মা ইতি বাক্যার্থঃ । যস্মাদেবং তস্মাৎ “উভৌ তৌ ন বিজানীতঃ”
ইতি পূর্বেণ মন্ত্রেণ অস্য সম্বন্ধঃ ॥ “য এনং বেত্তি হন্তারম্”
(ভ. গী. ২-১৯) ইত্যনেন মন্ত্রেণ হননক্রিয়ায়াঃ কর্তা কর্ম চ ন ভবতি
ইতি প্রতিজ্ঞায়, “ন জায়তে” ইত্যনেন অবিক্রিয়ৎবং হেতুমুক্ত্বা
প্রতিজ্ঞাতার্থমুপসংহরতি —
বেদাবিনাশিনং নিত্যং য এনমজমব্যযম্ ।
কথং স পুরুষঃ পার্থ কং ঘাতয়তি হন্তি কম্ ॥ ২-২১॥
বেদ বিজানাতি অবিনাশিনং অন্ত্যভাববিকাররহিতং নিত্যং বিপরিণামরহিতং যো
বেদ ইতি সম্বন্ধঃ । এনং পূর্বেণ মন্ত্রেণোক্তলক্ষণং অজং জন্মরহিতম্
অব্যযং অপক্ষয়রহিতং কথং কেন প্রকারেণ সঃ বিদ্বান্ পুরুষঃ
অধিকৃতঃ হন্তি হননক্রিয়াং করোতি, কথং বা ঘাতয়তি হন্তারং
প্রয়োজয়তি । ন কথঞ্চিৎ কঞ্চিৎ হন্তি, ন কথঞ্চিৎ কঞ্চিৎ ঘাতয়তি
ইতি উভয়ত্র আক্ষেপ এবার্থঃ, প্রশ্নার্থাসম্ভবাৎ । হেৎবর্থস্য চ
অবিক্রিয়ৎবস্য তুল্যৎবাৎ বিদুষঃ সর্বকর্মপ্রতিষেধ এব প্রকারণার্থঃ
অভিপ্রেতো ভগবতা । হন্তেস্তু আক্ষেপঃ উদাহরণার্থৎবেন কথিতঃ ॥
বিদুষঃ কং কর্মাসম্ভবহেতুবিশেষং পশ্যন্ কর্মাণ্যাক্ষিপতি
ভগবান্ “কথং স পুরুষঃ” ইতি । ননু উক্ত এবাত্মনঃ
অবিক্রিয়ৎবং সর্বকর্মাসম্ভবকারণবিশেষঃ । সত্যমুক্তঃ । ন তু
সঃ কারণবিশেষঃ, অন্যৎবাৎ বিদুষঃ অবিক্রিয়াদাত্মনঃ । ন হি অবিক্রিয়ং
স্থাণুং বিদিতবতঃ কর্ম ন সম্ভবতি ইতি চেৎ, ন ; বিদুষ– আত্মৎবাৎ ।
ন দেহাদিসঙ্ঘাতস্য বিদ্বত্তা । অতঃ পারিশেষ্যাৎ অশংহতঃ আত্মা বিদ্বান্
অবিক্রিয়ঃ ইতি তস্য বিদুষঃ কর্মাসম্ভবাৎ আক্ষেপো যুক্তঃ “কথং
স পুরুষঃ” ইতি । যথা বুদ্ধ্যাদ্যাহৃতস্য শব্দাদ্যর্থস্য
অবিক্রিয় এব সন্ বুদ্ধিবৃত্ত্যবিবেকবিজ্ঞানেন অবিদ্যযা উপলব্ধা
আত্মা কল্প্যতে, এবমেব আত্মানাত্মবিবেকজ্ঞানেন বুদ্ধিবৃত্ত্যা বিদ্যযা
অসত্যরূপয়ৈব পরমার্থতঃ অবিক্রিয় এব আত্মা বিদ্বানুচ্যতে । বিদুষ–
কর্মাসম্ভববচনাৎ যানি কর্মাণি শাস্ত্রেণ বিধীয়ন্তে তানি অবিদুষো
বিহিতানি ইতি ভগবতো নিশ্চয়োঽবগম্যতে ॥ ননু বিদ্যাপি অবিদুষ
এব বিধীয়তে, বিদিতবিদ্যস্য পিষ্টপেষণবৎ বিদ্যাবিদানানর্থক্যাৎ
তত্র অবিদুষঃ কর্মাণি বিধীয়ন্তে ন বিদুষঃ ইতি বিশেষো
নোপপদ্যতে ইতি চেৎ, ন ; অনুষ্ঠেয়স্য ভাবাভাববিশেষোপপত্তেঃ ।
অগ্নিহোত্রাদিবিধ্যর্থজ্ঞানোত্তরকালং অগ্নিহোত্রাদিকর্ম
অনেকসাধনোপসংহারপূর্বকমনুষ্ঠেয়ম্
“কর্তা অহম্, মম কর্তব্যম্”
ইত্যেবম্প্রকারবিজ্ঞানবতঃ অবিদুষঃ যথা অনুষ্ঠেয়ং ভবতি, ন তু
তথা “ন জায়তে” ইত্যাদ্যাত্মস্বরূপবিধ্যর্থজ্ঞানোত্তরকালভাবি
কিঞ্চিদনুষ্ঠেয়ং ভবতি ; কিং তু “নাহং কর্তা, নাহং ভোক্তা”
ইত্যাদ্যাত্মৈকৎবাকর্তৃৎবাদিবিষয়জ্ঞানাৎ নান্যদুৎপদ্যতে ইতি এষ বিশেষ
উপপদ্যতে । যঃ পুনঃ “কর্তা অহম্” ইতি বেত্তি আত্মানম্, তস্য
“মম ইদং কর্তব্যম্” ইতি অবশ্যম্ভাবিনী বুদ্ধিঃ স্যাৎ ; তদপেক্ষয়া
সঃ অদিক্রিয়তে ইতি তং প্রতি কর্মাণি সম্ভবন্তি । স চ অবিদ্বান্, “উভৌ
তৌ ন বিজানীতঃ” (ভ. গী. ২-১৯) ইতি বচনাৎ, বিশেষিতস্য চ
বিদুষঃ কর্মাক্ষেপবচনাচ্চ “কথং স পুরুষঃ” ইতি । তস্মাৎ
বিশেষিতস্য অবিক্রিয়াত্মদর্শিনঃ বিদুষঃ মুমুক্ষোশ্চ সর্বকর্মসন্ন্যাসে
এব অধিকারঃ । অত এব ভগবান্ নারায়ণঃ সাঙ্খ্যান্ বিদুষঃ অবিদুষশ্চ
কর্মিণঃ প্রবিভজ্য দ্বে নিষ্ঠে গ্রাহয়তি — “জ্ঞানয়োগেন সাঙ্খ্যানাং
কর্ময়োগেন যোগিনাম্” (ভ. গী. ৩-৩) ইতি । তথা চ পুত্রায় আহ ভগবান্
ব্যাসঃ — ”দ্বাবিমাবথ পন্থানৌ” (শাং. ২৪১-৬) ইত্যাদি । তথা
চ ক্রিয়াপথশ্চৈব পুরস্তাৎ পস্চাৎসন্ন্যাসশ্চেতি । এতমেব বিভাগং
পুনঃ পুনর্দর্শয়িষ্যতি ভগবান্ — অতত্ত্ববিৎ “অহঙ্কারবিমূঢাত্মা
কর্তাহমিতি মন্যতে” (ভ. গী. ৩-২৭), তত্ত্ববিত্তু নাহং করোমি ইতি ।
তথা চ “সর্বকর্মাণি মনসা সন্ন্যস্যাস্তে”
(ভ. গী. ৫-১৩) ইত্যাদি ॥
তত্র কেচিৎপণ্ডিতম্মন্যা বদন্তি — “জন্মাদিষড্ভাববিক্রিয়ারহিতঃ
অবিক্রিয়ঃ অকর্তা একঃ অহমাত্মা” ইতি ন কস্যচিৎ জ্ঞানং উৎপদ্যতে,
যস্মিন্ সতি সর্বকর্মসন্ন্যাসঃ উপদিশ্যতে ইতি । তন্ন ; “ন
জায়তে” (ভ. গী. ২-২০)ইত্যাদিশাস্ত্রোপদেশানর্থক্যপ্রসঙ্গাৎ ।
যথা চ শাস্ত্রোপদেশসামর্থ্যাৎ ধর্মাধর্মাস্তিৎব-বিজ্ঞানং কর্তুশ্চ
দেহান্তরসম্বন্ধবিজ্ঞানমুৎপদ্যতে, তথা শাস্ত্রাৎ তস্যৈব আত্মনঃ
অবিক্রিয়ৎবাকর্তৃৎবৈকৎবাদিবিজ্ঞানং কস্মাৎ নোৎপদ্যতে ইতি প্রষ্টব্যাঃ
তে । করণাগোচরৎবাৎ ইতি চেৎ, ন ; “মনসৈবানুদ্রষ্টব্যম্”
(বৃ. উ. ৪-৪-১৯) ইতি শ্রুতেঃ । শাস্ত্রাচার্যোপদেশশমদমাদিসংস্কৃতং
মনঃ আত্মদর্শনে করণম্ । তথা চ তদধিগমায় অনুমানে আগমে চ
সতি জ্ঞানং নোৎপদ্যত ইতি সাহসমাত্রমেতৎ । জ্ঞানং চ উৎপদ্যমানং
তদ্বিপরীতমজ্ঞানং অবশ্যং বাধতে ইত্যভ্যুপগন্তব্যম্ । তচ্চ
অজ্ঞানং দর্শিতং “হন্তা অহম্, হতঃ অস্মি” ইতি উভৌ তৌ ন
বিজানীতঃ” ইতি । অত্র চ আত্মনঃ হননক্রিয়ায়াঃ কর্তৃৎবং কর্মৎবং
হেতুকর্তৃৎবং চ অজ্ঞানকৃতং দর্শিতম্ । তচ্চ সর্বক্রিয়াস্বপি
সমানং কর্তৃৎবাদেঃ অবিদ্যাকৃতৎবম্, অবিক্রিয়ৎবাৎ আত্মনঃ । বিক্রিয়াবান্
হি কর্তা আত্মনঃ কর্মভূতমন্যং প্রয়োজয়তি “কুরু” ইতি ।
তদেতৎ অবিশেষেণ বিদুষঃ সর্বক্রিয়াসু কর্তৃৎবং হেতুকর্তৃৎবং চ
প্রতিষেধতি ভগবান্বাসুদেবঃ বিদুষঃ কর্মাধিকারাভাবপ্রদর্শনার্থম্
“বেদাবিনাশিনং . . . কথং স পুরুষঃ” ইত্যাদিনা । ক্ব
পুনঃ বিদুষঃ অধিকার ইতি এতদুক্তং পূর্বমেব “জ্ঞানয়োগেন
সাঙ্খ্যানাম্” (ভ. গী. ৩-৩) ইতি । তথা চ সর্বকর্মসন্ন্যাসং
বক্ষ্যতি “সর্বকর্মাণি মনসা” (ভ. গী. ৫-১৩) ইত্যাদিনা ॥ ননু
মনসা ইতি বচনাৎ ন বাচিকানাং কায়িকানাং চ সন্ন্যাসঃ ইতি চেৎ, ন ;
সর্বকর্মাণি ইতি বিশেষিতৎবাৎ । মানসানামেব সর্বকর্মণামিতি চেৎ, ন ;
মনোব্যাপারপূর্বকৎবাদ্বাক্কায়ব্যাপারাণাং মনোব্যাপারাভাবে তদনুপপত্তেঃ ।
শাস্ত্রীয়াণাং বাক্কায়কর্মণাং কারণানি মানসানি কর্মাণি বর্জয়িৎবা অন্যানি
সর্বকর্মাণি মনসা সন্ন্যস্যেদিতি চেৎ, ন ;“নৈব কুর্বন্ন কারয়ন্”
(ভ. গী. ৫-১৩) ইতি বিশেষণাৎ । সর্বকর্মসন্ন্যাসঃ অয়ং ভগবতা উক্তঃ
মরিষ্যতঃ ন জীবতঃ ইতি চেৎ, ন ; “নবদ্বারে পুরে দেহী আস্তে”
(ভ. গী. ৫-১৩) ইতি বিশেষণানুপপত্তেঃ । ন হি সর্বকর্মসন্ন্যাসেন
মৃতস্য তদ্দেহে আসনং সম্ভবতি । অকুর্বতঃ অকারয়তশ্চ
দেহে সন্ন্যস্য ইতি সম্বন্ধঃ ন দেহে আস্তে ইতি চেৎ, ন ; সর্বত্র
আত্মনঃ অবিক্রিয়ৎবাবধারণাৎ, আসনক্রিয়ায়াশ্চ অধিকরণাপেক্ষৎবাৎ,
তদনপেক্ষৎবাচ্চ সন্ন্যাসস্য । সম্পূর্বস্তু ন্যাসশব্দঃ অত্র ত্যাগার্থঃ,
ন নিক্ষেপার্থঃ । তস্মাৎ গীতাশাস্ত্রে আত্মজ্ঞানবতঃ সন্ন্যাসে এব অধিকারঃ,
ন কর্মণি ইতি তত্র তত্র উপরিষ্টাৎ আত্মজ্ঞানপ্রকরণে দর্শয়িষ্যামঃ ॥
প্রকৃতং তু বক্ষ্যামঃ । তত্র আত্মনঃ অবিনাশিৎবং প্রতিজ্ঞাতম্ ।
তৎকিমিবেতি, উচ্যতে —
বাসাংসি জীর্ণানি যথা বিহায় নবানি গৃহ্ণাতি নরোঽপরাণি ।
তথা শরীরাণি বিহায় জীর্ণান্যন্যানি সংয়াতি নবানি দেহী ॥ ২-২২॥
বাসাংসি বস্ত্রাণি জীর্ণানি দুর্বলতাং গতানি যথা লোকে বিহায় পরিত্যজ্য
নবানি অভিনবানি গৃহ্ণাতি উপাদত্তে নরঃ পুরুষঃ অপরাণি অন্যানি, তথা
তদ্বদেব শরীরাণি বিহায় জীর্ণানি অন্যানি সংয়াতি সঙ্গচ্ছতি নবানি দেহী
আত্মা পুরুষবৎ অবিক্রিয় এবেত্যর্থঃ ॥ কস্মাৎ অবিক্রিয় এবেতি, আহ —
নৈনং ছিন্দন্তি শস্ত্রাণি নৈনং দহতি পাবকঃ ।
ন চৈনং ক্লেদয়ন্ত্যাপো ন শোষয়তি মারুতঃ ॥ ২-২৩॥
এবং প্রকৃতং দেহিনং ন চ্ছিন্দন্তি শস্ত্রাণি, নিরবয়বৎবাৎ ন
অবয়ববিভাগং কুর্বন্তি । শস্ত্রাণি অস্যাদীনি । তথা ন এনং দহতি
পাবকঃ, অগ্নিরপি ন ভস্মীকরোতি । তথা ন চ এনং ক্লেদয়ন্তি আপঃ ।
অপাং হি সাবয়বস্য বস্তুনঃ আর্দ্রীভাবকরণেন অবয়ববিশ্লেষাপাদনে
সামর্থ্যম্ । তৎ ন নিরবয়বে আত্মনি সম্ভবতি । তথা স্নেহবৎ দ্রব্যং
স্নেহশোষণেন নাশয়তি বায়ুঃ । এনং তু আত্মানং ন শোষয়তি মারুতোঽপি ॥
যতঃ এবং তস্মাৎ —
অচ্ছেদ্যোঽয়মদাহ্যোঽয়মক্লেদ্যোঽশোষ্য এব চ ।
নিত্যঃ সর্বগতঃ স্থাণুরচলোঽয়ং সনাতনঃ ॥ ২-২৪॥
যস্মাৎ অন্যোন্যনাশহেতুভূতানি এনমাত্মানং নাশয়িতুং নোৎসহন্তে অস্যাদীনি
তস্মাৎ নিত্যঃ । নিত্যৎবাৎ সর্বগতঃ । সর্বগতৎবাৎ স্থাণুঃ ইব, স্থির
ইত্যেতৎ । স্থিরৎবাৎ অচলঃ অয়ং আত্মা । অতঃ সনাতনঃ চিরন্তনঃ, ন
কারণাৎকুতশ্চিৎ নিষ্পন্নঃ, অভিনব ইত্যর্থঃ ॥ নৈতেষাং শ্লোকানাং
পৌনরুক্ত্যং চোদনীয়ম্, যতঃ একেনৈব শ্লোকেন আত্মনঃ নিত্যৎবমবিক্রিয়ৎবং
চোক্তং “ন জায়তে ম্রিয়তে বা” (ভ. গী. ২-২০) ইত্যাদিনা । তত্র
যদেব আত্মবিষয়ং কিঞ্চিদুচ্যতে, তৎ এতস্মাৎ শ্লোকার্থাৎ ন অতিরিচ্যতে ;
কিঞ্চিচ্ছব্দতঃ পুনরুক্তম্, কিঞ্চিদর্থতঃ ইতি ।
দুর্বোধৎবাৎ আত্মবস্তুনঃ পুনঃ পুনঃ প্রসঙ্গমাপাদ্য
শব্দান্তরেণ তদেব বস্তু নিরূপয়তি ভগবান্
বাসুদেবঃ কথং নু নাম সংসারিণামসংসারিৎববুদ্ধিগোচরতামাপন্নং সৎ
অব্যক্তং তত্ত্বং সংসারনিবৃত্তয়ে স্যাৎ ইতি ॥ কিং চ —
অব্যক্তোঽয়মচিন্ত্যোঽয়মবিকার্যোঽয়মুচ্যতে ।
তস্মাদেবং বিদিৎবৈনং নানুশোচিতুমর্হসি ॥ ২-২৫॥
সর্বকরণাবিষয়ৎবাৎ ন ব্যজ্যত ইতি অব্যক্তঃ অয়ং আত্মা । অত এব
অচিন্ত্যঃ অয়ম্ । যদ্ধি ইন্দ্রিয়গোচরঃ তৎ চিন্তাবিষয়ৎবমাপদ্যতে ।
অয়ং ৎবাত্মা অনিন্দ্রিয়গোচরৎবাৎ অচিন্ত্যঃ । অত এব অবিকার্যঃ, যথা ক্ষীরং
দধ্যাতঞ্চনাদিনা বিকারি ন তথা অয়মাত্মা । নিরবয়বৎবাচ্চ অবিক্রিয়ঃ ।
ন হি নিরবয়বং কিঞ্চিৎ বিক্রিয়াত্মকং দৃষ্টম্ । অবিক্রিয়ৎবাৎ অবিকার্যঃ
অয়ং আত্মা উচ্যতে ।তস্মাৎ এবং যথোক্তপ্রকারেণ এনং আত্মানং বিদিৎবা
ৎবং ন অনুশোচিতুমর্হসি হন্তাহমেষাম্, ময়ৈতে হন্যন্ত ইতি ॥ আত্মনঃ
অনিত্যৎবমভ্যুপগম্য ইদমুচ্যতে —
অথ চৈনং নিত্যজাতং নিত্যং বা মন্যসে মৃতম্ ।
তথাপি ৎবং মহাবাহো নৈবং শোচিতুমর্হসি ॥ ২-২৬॥
অথ চ ইতি অভ্যুপগমার্থঃ । এনং প্রকৃতমাত্মানং নিত্যজাতং
লোকপ্রসিদ্ধ্যা প্রত্যনেকশরীরোৎপত্তি জাতো জাত ইতি মন্যসে
প্রতিতত্তদ্বিনাশং নিত্যং বা মন্যসে মৃতং মৃতো মৃত ইতি ; তথাপি
তথাভাবেঽপি আত্মনি ৎবং মহাবাহো, ন এবং শোচিতুমর্হসি, জন্মবতো
জন্ম নাশবতো নাশশ্চেত্যেতাববশ্যম্ভাবিনাবিতি ॥ তথা চ সতি —
জাতস্য হি ধ্রুবো মৃত্যুর্ধ্রুবং জন্ম মৃতস্য চ ।
তস্মাদপরিহার্যেঽর্থে ন ৎবং শোচিতুমর্হসি ॥ ২-২৭॥
জাতস্য হি লব্ধজন্মনঃ ধ্রুবঃ অব্যভিচারী মৃত্যুঃ
মরণং ধ্রুবং জন্ম মৃতস্য চ । তস্মাদপরিহার্যোঽয়ং
জন্মমরণলক্ষণোঽর্থঃ । তস্মিন্নপরিহার্যেঽর্থে ন ৎবং শোচিতুমর্হসি ॥
কার্যকরণসঙ্ঘাতাত্মকান্যপি ভূতান্যুদ্দিশ্য শোকো ন যুক্তঃ কর্তুম্,
যতঃ —
অব্যক্তাদীনি ভূতানি ব্যক্তমধ্যানি ভারত ।
অব্যক্তনিধনান্যেব তত্র কা পরিদেবনা ॥ ২-২৮॥
অব্যক্তাদীনি অব্যক্তং অদর্শনং অনুপলব্ধিঃ আদিঃ যেষাং ভূতানাং
পুত্রমিত্রাদিকার্যকরণসঙ্ঘাতাত্মকানাং
তানি অব্যক্তাদীনি ভূতানি প্রাগুৎপত্তেঃ,
উৎপন্নানি চ প্রাঙ্মরণাৎ ব্যক্তমধ্যানি । অব্যক্তনিধনান্যেব পুনঃ
অবয়্কৎং অদর্শনং নিধনং মরণং যেষাং তানি অব্যক্তনিধনানি ।
মরণাদূর্ধ্বমপ্যব্যক্ততামেব প্রতিপদ্যন্তে ইত্যর্থঃ । তথা চোক্তম্
–”অদর্শনাদাপতিতঃ পুনশ্চাদর্শনং গতঃ । নাসৌ তব ন তস্য
ৎবং বৃথা কা পরিদেবনা” (মো. ধ. ১৭৪-১৭) ইতি । তত্র কা পরিদেবনা
কো বা প্রলাপঃ অদৃষ্টদৃষ্টপ্রনষ্টভ্রান্তিভূতেষু ভূতেষ্বিত্যর্থঃ ॥
দুর্বিজ্ঞেয়োঽয়ং প্রকৃত আত্মা ; কিং ৎবামেবৈকমুপালভে সাধারণে
ভ্রান্তিনিমিত্তে । কথং দুর্বিজ্ঞেয়োঽয়মাত্মা ইত্যত আহ —
আশ্চর্যবৎপশ্যতি কশ্চিদেনমাশ্চর্যবদ্বদতি তথৈব চান্যঃ ।
আশ্চর্যবচ্চৈনমন্যঃ শৃণোতি শ্রুৎবাপ্যেনং বেদ ন চৈব কশ্চিৎ ॥ ২-২৯॥
আশ্চর্যবৎ আশ্চর্যং অদৃষ্টপূর্বং অদ্ভুতং অকস্মাদ্দৃশ্যমানং
তেন তুল্যং আশ্চর্যবৎ আশ্চর্যমিতি এনং আত্মানং পশ্যতি কশ্চিৎ ।
আশ্চর্যবৎ এনং বদতি তথৈব চ অন্যঃ । আশ্চর্যবচ্চ এনমন্যঃ
শৃণোতি । শ্রুৎবা দৃষ্ট্বা উক্ত্বাপি এনমাত্মানং বেদ ন চৈব কশ্চিৎ ।
অথবা যোঽয়মাত্মানং পশ্যতি স আশ্চর্যতুল্যঃ, যো বদতি যশ্চ শৃণোতি
সঃ অনেকসহস্রেষু কশ্চিদেব ভবতি । অতো দুর্বোধ আত্মা ইত্যভিপ্রায়ঃ ॥
অথেদানীং প্রকরণার্থমুপসংহরন্ব্রূতে —
দেহী নিত্যমবধ্যোঽয়ং দেহে সর্বস্য ভারত ।
তস্মাৎসর্বাণি ভূতানি ন ৎবং শোচিতুমর্হসি ॥ ২-৩০॥
দেহী শরীরী নিত্যং সর্বদা সর্বাবস্থাসু অবধ্যঃ নিরবয়বৎবান্নিত্যৎবাচ্চ
তত্র অবধ্যোঽয়ং দেহে শরীরে সর্বস্য সর্বগতৎবাৎস্থাবরাদিষু স্থিতোঽপি
সর্বস্য প্রাণিজাতস্য দেহে বধ্যমানেঽপি অয়ং দেহী ন বধ্যঃ যস্মাৎ,
তস্মাৎ ভীষ্মাদীনি সর্বাণি ভূতানি উদ্দিশ্য ন ৎবং শোচিতুমর্হসি ॥ ইহ
পরমার্থতত্ত্বাপেক্ষায়াং শোকো মোহো বা ন সম্ভবতীত্যুক্তম্ । ন কেবলং
পরমার্থতত্ত্বাপেক্ষায়ামেব । কিং তু —
স্বধর্মমপি চাবেক্ষ্য ন বিকম্পিতুমর্হসি ।
ধর্ম্যাদ্ধি যুদ্ধাচ্ছ্রেয়োঽন্যৎক্ষত্ত্রিয়স্য ন বিদ্যতে ॥ ২-৩১॥
স্বধর্মমপি স্বো ধর্মঃ ক্ষত্রিয়স্য যুদ্ধং তমপি অবেক্ষ্য ৎবং
ন বিকম্পিতুং প্রচলিতুং নার্হসি ক্ষত্রিয়স্য স্বাভাবিকাদ্ধর্মাৎ
আত্মস্বাভাব্যাদিত্যভিপ্রায়ঃ । তচ্চ যুদ্ধং পৃথিবীজয়দ্বারেণ ধর্মার্থং
প্রজারক্ষণার্থং চেতি ধর্মাদনপেতং পরং ধর্ম্যম্ । তস্মাৎ ধর্ম্যাৎ
যুদ্ধাৎ শ্রেয়ঃ অন্যৎ ক্ষত্রিয়স্য ন বিদ্যতে হি যস্মাৎ ॥
কুতশ্চ তৎ যুদ্ধং কর্তব্যমিতি, উচ্যতে —
যদৃচ্ছয়া চোপপন্নং স্বর্গদ্বারমপাবৃতম্ ।
সুখিনঃ ক্ষত্রিয়াঃ পার্থ লভন্তে যুদ্ধমীদৃশম্ ॥ ২-৩২॥
যদৃচ্ছয়া চ অপ্রার্থিততয়া উপপন্নং আগতং স্বর্গদ্বারং অপাবৃতম্
উদ্ধাটিতং যে এতৎ ঈদৃশং যুদ্ধং লভন্তে ক্ষত্রিয়াঃ হে পার্থ, কিং ন
সুখিনঃ তে ? এবং কর্তব্যতাপ্রাপ্তমপি —
অথ চেত্ত্বমিমং ধর্ম্যং সঙ্গ্রামং ন করিষ্যসি ।
ততঃ স্বধর্মং কীর্তিং চ হিৎবা পাপমবাপ্স্যসি ॥ ২-৩৩॥
অথ চেৎ ৎবং ইমং ধর্ম্যং ধর্মাদনপেতং বিহিতং সঙ্গ্রামং
যুদ্ধং ন করিষ্যসি চেৎ, ততঃ তদকরণাৎ স্বধর্মং কীর্তিং চ
মহাদেবাদিসমাগমনিমিত্তাং হিৎবা কেবলং পাপং অবাপ্স্যসি ॥ ন কেবলং
স্বধর্মকীর্তিপরিত্যাগঃ —
অকীর্তিং চাপি ভূতানি কথয়িষ্যন্তি তেঽব্যযাম্ ।
সম্ভাবিতস্য চাকীর্তির্মরণাদতিরিচ্যতে ॥ ২-৩৪॥
অকীর্তিং চাপি যুদ্ধে ভূতানি কথয়িষ্যন্তি তে তব অব্যযাং দীর্ঘকালাম্ ।
ধর্মাত্মা শূর ইত্যেবমাদিভিঃ গুণৈঃ সম্ভাবিতস্য চ অকীর্তিঃ মরণাৎ
অতিরিচ্যতে, সম্ভাবিতস্য চ অকীর্তেঃ বরং মরণমিত্যর্থঃ ॥ কিঞ্চ —
ভয়াদ্রণাদুপরতং মংস্যন্তে ৎবাং মহারথাঃ ।
যেষাং চ ৎবং বহুমতো ভূৎবা যাস্যসি লাঘবম্ ॥ ২-৩৫॥
ভয়াৎ কর্ণাদিভ্যঃ রণাৎ যুদ্ধাৎ উপরতং নিবৃত্তং মংস্যন্তে চিন্তয়িষ্যন্তি
ন কৃপয়েতি ৎবাং মহারথাঃ দুর্যোধনপ্রভৃতয়ঃ । যেষাং চ ৎবং
দুর্যোধনাদীনাং বহুমতো বহুভিঃ গুণৈঃ যুক্তঃ ইত্যেবং মতঃ বহুমতঃ
ভূৎবা পুনঃ যাস্যসি লাঘবং লঘুভাবম্ ॥ কিঞ্চ–
অবাচ্যবাদাংশ্চ বহূন্বদিষ্যন্তি তবাহিতাঃ ।
নিন্দন্তস্তব সামর্থ্যং ততো দুঃখতরং নু কিম্ ॥ ২-৩৬॥
অবাচ্যবাদান্ অবক্তব্যবাদাংশ্চ বহূন্ অনেকপ্রকারান্ বদিষ্যন্তি
তব অহিতাঃ শত্রবঃ নিন্দন্তঃ কুৎসয়ন্তঃ তব ৎবদীয়ং সামর্থ্যং
নিবাতকবচাদিয়ুদ্ধনিমিত্তম্ । ততঃ তস্মাৎ নিন্দাপ্রাপ্তের্দুঃখাৎ দুঃখতরং
নু কিম্, ততঃ কষ্টতরং দুঃখং নাস্তীত্যর্থঃ ॥ যুদ্ধে পুনঃ ক্রিয়মাণে
কর্ণাদিভিঃ —
হতো বা প্রাপ্স্যসি স্বর্গং জিৎবা বা ভোক্ষ্যসে মহীম্ ।
তস্মাদুত্তিষ্ঠ কৌন্তেয় যুদ্ধায় কৃতনিশ্চয়ঃ ॥ ২-৩৭॥
হতো বা প্রাপ্স্যসি স্বর্গম্, হতঃ সন্ স্বর্গং প্রাপ্স্যসি । জিৎবা বা কর্ণাদীন্
শূরান্ ভোক্ষ্যসে মহীম্ । উভয়থাপি তব লাভ এবেত্যভিপ্রায়ঃ । যত এবং
তস্মাৎ উত্তিষ্ঠ কৌন্তেয় যুদ্ধায় কৃতনিশ্চয়ঃ “জেষ্যামি শত্রূন্,
মরিষ্যামি বা” ইতি নিশ্চয়ং কৃৎবেত্যর্থঃ ॥ তত্র যুদ্ধং স্বধর্মং
ইত্যেবং যুধ্যমানস্যোপদেশমিমং শৃণু —
সুখদুঃখে সমে কৃৎবা লাভালাভৌ জয়াজয়ৌ ।
ততো যুদ্ধায় যুজ্যস্ব নৈবং পাপমবাপ্স্যসি ॥ ২-৩৮॥
সুখদুঃখে সমে তুল্যে কৃৎবা, রাগদ্বেষাবপ্যকৃৎবেত্যেতৎ ।
তথা লাভালাভৌ জয়াজয়ৌ চ সমৌ কৃৎবা ততো যুদ্ধায় যুজ্যস্ব
ঘটস্ব । ন এবং যুদ্ধং কুর্বন্ পাপং অবাপ্স্যসি । ইত্যেষ উপদেশঃ
প্রাসঙ্গিকঃ ॥ শোকমোহাপনয়নায় লৌকিকো ন্যায়ঃ “স্বধর্মমপি
চাবেক্ষ্য” (ভ. গী. ২-৩১) ইত্যাদ্যৈঃ শ্লোকৈরুক্তঃ, ন তু তাৎপর্যেণ ।
পরমার্থদর্শনমিহ প্রকৃতম্ । তচ্চোক্তমুপসংহ্রিয়তে –“এষা
তেঽভিহিতা” (ভ. গী. ২-৩৯) ইতি শাস্ত্রবিষয়বিভাগপ্রদর্শনায় ।
ইহ হি প্রদর্শিতে পুনঃ শাস্ত্রবিষয়বিভাগে উপরিষ্টাৎ “জ্ঞানয়োগেন
সাঙ্খ্যানাং কর্ময়োগেন যোগিনাম্” (ভ. গী. ৩-৩) ইতি নিষ্ঠাদ্বয়বিষয়ং
শাস্ত্রং সুখং প্রবর্তিষ্যতে, শ্রোতারশ্চ বিষয়বিভাগেন সুখং
গ্রহীষ্যন্তি ইত্যত আহ —
এষা তেঽভিহিতা সাঙ্খ্যে বুদ্ধির্যোগে ৎবিমাং শৃণু ।
বুদ্ধ্যা যুক্তো যয়া পার্থ কর্মবন্ধং প্রহাস্যসি ॥ ২-৩৯॥
এষা তে তুভ্যং অভিহিতা উক্তা সাঙ্খ্যে পরমার্থবস্তুবিবেকবিষয়ে বুদ্ধিঃ
জ্ঞানং সাক্ষাৎ শোকমোহাদিসংসার-হেতুদোষনিবৃত্তিকারণম্ । যোগে তু
তৎপ্রাপ্ত্যুপায়ে নিঃসঙ্গতয়া দ্বন্দ্বপ্রহাণপূর্বকং ঈশ্বরারাধনার্থে
কর্ময়োগে কর্মানুষ্ঠানে সমাধিয়োগে চ ইমাং অনন্তরমেবোচ্যমানাং
বুদ্ধিং শৃণু । তাং চ বুদ্ধিং স্তৌতি প্ররোচনার্থং — বুদ্ধ্যা যয়া
যোগবিষয়যা যুক্তঃ হে পার্থ, কর্মবন্ধং কর্মৈব ধর্মাধর্মাখ্যো
বন্ধঃ কর্মবন্ধঃ তং প্রহাস্যসি ঈশ্বরপ্রসাদনিমিত্তজ্ঞানপ্রাপ্ত্যৈব
ইত্যভিপ্রায়ঃ ॥ কিঞ্চ অন্যৎ —
নেহাভিক্রমনাশোঽস্তি প্রত্যবায়ো ন বিদ্যতে ।
স্বল্পমপ্যস্য ধর্মস্য ত্রায়তে মহতো ভয়াৎ ॥ ২-৪০॥
ন ইহ মোক্ষমার্গে কর্ময়োগে অভিক্রমনাশঃ অভিক্রমণমভিক্রমঃ
প্রারম্ভঃ তস্য নাশঃ নাস্তি যথা কৃষ্যাদেঃ । যোগবিষয়ে প্রারম্ভস্য
ন অনৈকান্তিকফলৎবমিত্যর্থঃ । কিঞ্চ — নাপি চিকিৎসাবৎ প্রত্যবায়ঃ
বিদ্যতে ভবতি । কিং তু স্বল্পমপি অস্য ধর্মস্য যোগধর্মস্য অনুষ্ঠিতং
ত্রায়তে রক্ষতি মহতঃ ভয়াৎ সংসারভয়াৎ জন্মমরণাদিলক্ষণাৎ ॥
যেয়ং সাঙ্খ্যে বুদ্ধিরুক্তা যোগে চ, বক্ষ্যমাণলক্ষণা সা —
ব্যবসায়াত্মিকা বুদ্ধিরেকেহ কুরুনন্দন ।
বহুশাখা হ্যনন্তাশ্চ বুদ্ধয়োঽব্যবসায়িনাম্ ॥ ২-৪১॥
ব্যবসায়াত্মিকা নিশ্চয়স্বভাবা একা এব বুদ্ধিঃ
ইতরবিপরীতবুদ্ধিশাখাভেদস্য বাধিকা, সম্যক্প্রমাণজনিতৎবাৎ,
ইহ শ্রেয়োমার্গে হে কুরুনন্দন । যাঃ পুনঃ ইতরা বিপরীতবুদ্ধয়ঃ,
যাসাং শাখাভেদপ্রচারবশাৎ অনন্তঃ অপারঃ অনুপরতঃ সংসারো
নিত্যপ্রততো বিস্তীর্ণো ভবতি, প্রমাণজনিতবিবেকবুদ্ধিনিমিত্তবশাচ্চ
উপরতাস্বনন্তভেদবুদ্ধিষু সংসারোঽপ্যুপরমতে তা বুদ্ধয়ঃ
বহুশাখাঃ বহ্বয়ঃ শাখাঃ যাসাং তাঃ বহুশাখাঃ, বহুভেদা ইত্যেতৎ ।
প্রতিশাখাভেদেন হি অনন্তাশ্চ বুদ্ধয়ঃ । কেষাম্ ? অব্যবসায়িনাং
প্রমাণজনিতবিবেকবুদ্ধিরহিতানামিত্যর্থঃ ॥
যেষাং ব্ববসায়াত্মিকা বুদ্ধির্নাস্তি তে —
যামিমাং পুষ্পিতাং বাচং প্রবদন্ত্যবিপশ্চিতঃ ।
বেদবাদরতাঃ পার্থ নান্যদস্তীতি বাদিনঃ ॥ ২-৪২॥
যাং ইমাং বক্ষ্যমাণাং পুষ্পিতাং পুষ্পিত ইব বৃক্ষঃ
শোভমানাং শ্রূয়মাণরমণীয়াং বাচং বাক্যলক্ষণাং প্রবদন্তি
কে ? অবিপশ্চিতঃ অমেধসঃ অবিবেকিন ইত্যর্থঃ । বেদবাদরতাঃ
বহ্বর্থবাদফলসাধনপ্রকাশকেষু বেদবাক্যেষু রতাঃ হে পার্থ, ন অন্যৎ
স্বর্গপশ্বাদিফলসাধনেভ্যঃ কর্মভ্যঃ অস্তি
ইতি এবং বাদিনঃ বদনশীলাঃ ॥ তে চ —
কামাত্মানঃ স্বর্গপরা জন্মকর্মফলপ্রদাম্ ।
ক্রিয়াবিশেষবহুলাং ভোগৈশ্বর্যগতিং প্রতি ॥ ২-৪৩॥
কামাত্মানঃ কামস্বভাবাঃ, কামপরা ইত্যর্থঃ । স্বর্গপরাঃ স্বর্গঃ পরঃ
পুরুষার্থঃ যেষাং তে স্বর্গপরাঃ স্বর্গপ্রধানাঃ । জন্মকর্মফলপ্রদাং
কর্মণঃ ফলং কর্মফলং জন্মৈব কর্মফলং জন্মকর্মফলং তৎ
প্রদদাতীতি জন্মকর্মফলপ্রদা, তাং বাচম্ । প্রবদন্তি ইত্যনুষজ্যতে ।
ক্রিয়াবিশেষবহুলাং ক্রিয়াণাং বিশেষাঃ ক্রিয়াবিশেষাঃ তে বহুলা যস্যাং
বাচি তাং স্বর্গপশুপুত্রাদ্যর্থাঃ যয়া বাচা বাহুল্যেন প্রকাশ্যন্তে ।
ভোগৈশ্বর্যগতিং প্রতি ভোগশ্চ ঐশ্বর্যং চ ভোগৈশ্বর্যে, তয়োর্গতিঃ
প্রাপ্তিঃ ভোগৈশ্বর্যগতিঃ, তাং প্রতি সাধনভূতাঃ যে ক্রিয়াবিশেষাঃ
তদ্বহুলাং তাং বাচং প্রবদন্তঃ মূঢাঃ সংসারে পরিবর্তন্তে ইত্যভিপ্রায়ঃ ॥
তেষাং চ —
ভোগৈশ্বর্যপ্রসক্তানাং তয়াপহৃতচেতসাম্ ।
ব্যবসায়াত্মিকা বুদ্ধিঃ সমাধৌ ন বিধীয়তে ॥ ২-৪৪॥
ভোগৈশ্বর্যপ্রসক্তানাং ভোগঃ কর্তব্যঃ ঐশ্বর্যং চ ইতি
ভোগৈশ্বর্যযোরেব প্রণয়বতাং তদাত্মভূতানাম্ । তয়া ক্রিয়াবিশেষবহুলয়া
বাচা অপহৃতচেতসাং আচ্ছাদিতবিবেকপ্রজ্ঞানাং ব্যবসায়াত্মিকা সাঙ্খ্যে
যোগে বা বুদ্ধিঃ সমাধৌ সমাধীয়তে অস্মিন্ পুরুষোপভোগায় সর্বমিতি সমাধিঃ
অন্তঃকরণং বুদ্ধিঃ তস্মিন্ সমাধৌ, ন বিধীয়তে ন ভবতি ইত্যর্থঃ ॥
যে এবং বিবেকবুদ্ধিরহিতাঃ তেষাং কামাত্মনাং যৎ ফলং তদাহ —
ত্রৈগুণ্যবিষয়া বেদা নিস্ত্রৈগুণ্যো ভবার্জুন ।
নির্দ্বন্দ্বো নিত্যসত্ত্বস্থো নির্যোগক্ষেম আত্মবান্ ॥ ২-৪৫॥
ত্রৈগুণ্যবিষয়াঃ ত্রৈগুণ্যং সংসারো বিষয়ঃ প্রকাশয়িতব্যঃ যেষাং তে বেদাঃ
ত্রৈগুণ্যবিষয়াঃ । ৎবং তু নিস্ত্রৈগুণ্যো ভব অর্জুন,
নিষ্কামো ভব ইত্যর্থঃ । নির্দ্বন্দ্বঃ সুখদুঃখহেতূ
সপ্রতিপক্ষৌ পদার্থৌ দ্বন্দ্বশব্দবাচ্যৌ,
ততঃ নির্গতঃ নির্দ্বন্দ্বো ভব । নিত্যসত্ত্বস্থঃ সদা সত্ত্বগুণাশ্রিতো ভব ।
তথা নির্যোগক্ষেমঃ অনুপাত্তস্য উপাদানং যোগঃ, উপাত্তস্য রক্ষণং ক্ষেমঃ,
যোগক্ষেমপ্রধানস্য শ্রেয়সি প্রবৃত্তির্দুষ্করা ইত্যতঃ নির্যোগক্ষেমো ভব ।
আত্মবান্ অপ্রমত্তশ্চ ভব । এষ তব উপদেশঃ স্বধর্মমনুতিষ্ঠতঃ ॥
সর্বেষু বেদোক্তেষু কর্মসু যান্যুক্তান্যনন্তানি ফলানি তানি নাপেক্ষ্যন্তে
চেৎ, কিমর্থং তানি ঈস্বরায়েত্যনুষ্ঠীয়ন্তে ইত্যুচ্যতে ; শৃণু —
যাবানর্থ উদপানে সর্বতঃসম্প্লুতোদকে ।
তাবান্ সর্বেষু বেদেষু ব্রাহ্মণস্য বিজানতঃ ॥ ২-৪৬॥
যথা লোকে কূপতডাগাদ্যনেকস্মিন্ উদপানে পরিচ্ছিন্নোদকে যাবান্
যাবৎপরিমাণঃ স্নানপানাদিঃ অর্থঃ ফলং প্রয়োজনং স সর্বঃ অর্থঃ সর্বতঃ
সম্প্লুতোদকেঽপি যঃ অর্থঃ তাবানেব সম্পদ্যতে, তত্র অন্তর্ভবতীত্যর্থঃ ।
এবং তাবান্ তাবৎপরিমাণ এব সম্পদ্যতে সর্বেষু বেদেষু বেদোক্তেষু কর্মসু
যঃ অর্থঃ যৎকর্মফলং সঃ অর্থঃ ব্রাহ্মণস্য সন্ন্যাসিনঃ পরমার্থতত্ত্বং
বিজানতঃ যঃ অর্থঃ যৎ বিজ্ঞানফলং সর্বতঃসম্প্লুতোদকস্থানীয়ং তস্মিন্
তাবানেব সম্পদ্যতে তত্রৈবান্তর্ভবতীত্যর্থঃ । “যথা কৃতায়
বিজিতায়াধরেয়াঃ সংয়ন্ত্যেবমেনং সর্বং তদভিসমেতি যৎ কিঞ্চিৎ প্রজাঃ
সাধু কুর্বন্তি যস্তদ্বেদ যৎস বেদ” (ছা. উ. ৪-১-৪)ইতি শ্রুতেঃ ।
“সর্বং কর্মাখিলম্” (ভ. গী. ৪-৩৩) ইতি চ বক্ষ্যতি । তস্মাৎ প্রাক্
জ্ঞাননিষ্ঠাধিকারপ্রাপ্তেঃ কর্মণ্যধিকৃতেন কূপতডাগাদ্যর্থস্থানীয়মপি
কর্ম কর্তব্যম্ ॥ তব চ —
কর্মণ্যেবাধিকারস্তে মা ফলেষু কদাচন ।
মা কর্মফলহেতুর্ভূর্মা তে সঙ্গোঽস্ত্বকর্মণি ॥ ২-৪৭॥
কর্মণ্যেব অধিকারঃ ন জ্ঞাননিষ্ঠায়াং তে তব । তত্র চ কর্ম
কুর্বতঃ মা ফলেষু অধিকারঃ অস্তু, কর্মফলতৃষ্ণা মা ভূৎ কদাচন
কস্যাঞ্চিদপ্যবস্থায়ামিত্যর্থঃ । যদা কর্মফলে তৃষ্ণা তে স্যাৎ
তদা কর্মফলপ্রাপ্তেঃ হেতুঃ স্যাঃ, এবং মা কর্মফলহেতুঃ ভূঃ । যদা হি
কর্মফলতৃষ্ণাপ্রয়ুক্তঃ কর্মণি প্রবর্ততে তদা কর্মফলস্যৈব জন্মনো
হেতুর্ভবেৎ । যদি কর্মফলং নেষ্যতে, কিং কর্মণা দুঃখরূপেণ ? ইতি মা তে
তব সঙ্গঃ অস্তু অকর্মণি অকরণে প্রীতির্মা ভূৎ ॥ যদি কর্মফলপ্রয়ুক্তেন
ন কর্তব্যং কর্ম, কথং তর্হি কর্তব্যমিতি ; উচ্যতে —
যোগস্থঃ কুরু কর্মাণি সঙ্গং ত্যক্ত্বা ধনঞ্জয় ।
সিদ্ধ্যসিদ্ধ্যোঃ সমো ভূৎবা সমৎবং যোগ উচ্যতে ॥ ২-৪৮॥
যোগস্থঃ সন্ কুরু কর্মাণি কেবলমীশ্বরার্থম্ ; তত্রাপি “ঈশ্বরো
মে তুষ্যতু” ইতি সঙ্গং ত্যক্ত্বা ধনঞ্জয় । ফলতৃষ্ণাশূন্যেন
ক্রিয়মাণে কর্মণি সত্ত্বশুদ্ধিজা জ্ঞানপ্রাপ্তিলক্ষণাসিদ্ধিঃ, তদ্বিপর্যযজা
অসিদ্ধিঃ, তয়োঃ সিদ্ধ্যসিদ্ধ্যোঃ অপি সমঃ তুল্যঃ ভূৎবা কুরু কর্মাণি । কোঽসৌ
যোগঃ যত্রস্থঃ কুরু ইতি উক্তম্ ? ইদমেব তৎ — সিদ্ধ্যসিদ্ধ্যোঃ সমৎবং
যোগঃ উচ্যতে ॥ যৎপুনঃ সমৎববুদ্ধিয়ুক্তমীশ্বরারাধনার্থং কর্মোক্তম্,
এতস্মাৎকর্মণঃ —
দূরেণ হ্যবরং কর্ম বুদ্ধিয়োগাদ্ধনঞ্জয় ।
বুদ্ধৌ শরণমন্বিচ্ছ কৃপণাঃ ফলহেতবঃ ॥ ২-৪৯॥
দূরেণ অতিবিপ্রকর্ষেণ অত্যন্তমেব হি অবরং অধমং নিকৃষ্টং
কর্ম ফলার্থিনা ক্রিয়মাণং বুদ্ধিয়োগাৎ সমৎববুদ্ধিয়ুক্তাৎ কর্মণঃ,
জন্মমরণাদিহেতুৎবাৎ । হে ধনঞ্জয়, যত এবং ততঃ যোগবিষয়ায়াং বুদ্ধৌ
তৎপরিপাকজায়াং বা সাঙ্খ্যবুদ্ধৌ শরণং আশ্রয়মভয়প্রাপ্তিকারণম্
অন্বিচ্ছ প্রার্থয়স্ব, পরমার্থজ্ঞানশরণো ভবেত্যর্থঃ । যতঃ
অবরং কর্ম কুর্বাণাঃ কৃপণাঃ দীনাঃ ফলহেতবঃ ফলতৃষ্ণাপ্রয়ুক্তাঃ
সন্তঃ, “যো বা এতদক্ষরং গার্গ্যবিদিৎবাস্মাল্লোকাৎপ্রৈতি স
কৃপণঃ” (বৃ. উ. ৩-৮-১০) ইতি শ্রুতেঃ ॥ সমৎববুদ্ধিয়ুক্তঃ সন্
স্বধর্মমনুতিষ্ঠন্ যৎফলং প্রাপ্নোতি তচ্ছৃণু —
বুদ্ধিয়ুক্তো জহাতীহ উভে সুকৃতদুষ্কৃতে ।
তস্মাদ্যোগায় যুজ্যস্ব যোগঃ কর্মসু কৌশলম্ ॥ ২-৫০॥
বুদ্ধিয়ুক্তঃ কর্মসমৎববিষয়যা বুদ্ধ্যা যুক্তঃ বুদ্ধিয়ুক্তঃ সঃ
জহাতি পরিত্যজতি ইহ অস্মিন্ লোকে উভে সুকৃতদুষ্কৃতে পুণ্যপাপে
সত্ত্বশুদ্ধিজ্ঞানপ্রাপ্তিদ্বারেণ যতঃ, তস্মাৎ সমৎববুদ্ধিয়োগায়
যুজ্যস্ব ঘটস্ব । যোগো হি কর্মসু কৌশলম্, স্বধর্মাখ্যেষু কর্মসু
বর্তমানস্য যা সিদ্ধ্যাসিদ্ধ্যোঃ সমৎববুদ্ধিঃ ঈশ্বরার্পিতচেতস্তয়া তৎ
কৌশলং কুশলভাবঃ । তদ্ধি কৌশলং যৎ বন্ধনস্বভাবান্যপি কর্মাণি
সমৎববুদ্ধ্যা স্বভাবাৎ নিবর্তন্তে । তস্মাৎসমৎববুদ্ধিয়ুক্তো ভব ৎবম্ ॥
যস্মাৎ —
কর্মজং বুদ্ধিয়ুক্তং হি ফলং ত্যক্ত্বা মনীষিণঃ ।
জন্মবন্ধবিনির্মুক্তাঃ পদং গচ্ছন্ত্যনাময়ম্ ॥ ২-৫১॥
কর্মজং ফলং ত্যক্ত্বা ইতি ব্যবহিতেন সম্বন্ধঃ ।
ইষ্টানিষ্টদেহপ্রাপ্তিঃ কর্মজং ফলং কর্মভ্যো জাতং বুদ্ধিয়ুক্তাঃ
সমৎববুদ্ধিয়ুক্তাঃ সন্তঃ হি যস্মাৎ ফলং ত্যক্ত্বা পরিত্যজ্য
মনীষিণঃ জ্ঞানিনো ভূৎবা, জন্মবন্ধবিনির্মুক্তাঃ জন্মৈব বন্ধঃ
জন্মবন্ধঃ তেন বিনির্মুক্তাঃ জীবন্ত এব জন্মবন্ধাৎ বিনির্মুক্তাঃ
সন্তঃ, পদং পরমং বিষ্ণোঃ মোক্ষাখ্যং গচ্ছন্তি অনাময়ং
সর্বোপদ্রবরহিতমিত্যর্থঃ । অথবা “বুদ্ধিয়োগাদ্ধনঞ্জয়”
(ভ. গী. ২-৪৯) ইত্যারভ্য পরমার্থদর্শনলক্ষণৈব
সর্বতঃসম্প্লুতোদকস্থানীয়া কর্ময়োগজসত্ত্বশুদ্ধিজনিতা
বুদ্ধির্দর্শিতা, সাক্ষাৎসুকৃতদুষ্কৃতপ্রহাণাদিহেতুৎবশ্রবণাৎ ॥
যোগানুষ্ঠানজনিতসত্ত্বশুদ্ধিজা বুদ্ধিঃ কদা প্রাপ্স্যতে ইত্যুচ্যতে —
যদা তে মোহকলিলং বুদ্ধির্ব্যতিতরিষ্যতি ।
তদা গন্তাসি নির্বেদং শ্রোতব্যস্য শ্রুতস্য চ ॥ ২-৫২॥
যদা যস্মিন্কালে তে তব মোহকলিলং মোহাত্মকমবিবেকরূপং কালুষ্যং যেন
আত্মানাত্মবিবেকবোধং কলুষীকৃত্য বিষয়ং প্রত্যন্তঃকরণং প্রবর্ততে,
তৎ তব বুদ্ধিঃ ব্যতিতরিষ্যতি ব্যতিক্রমিষ্যতি, অতিশুদ্ধভাবমাপৎস্যতে
ইত্যর্থঃ । তদা তস্মিন্ কালে গন্তাসি প্রাপ্স্যসি নির্বেদং বৈরাগ্যং শ্রোতব্যস্য
শ্রুতস্য চ, তদা শ্রোতব্যং শ্রুতং চ তে নিষ্ফলং
প্রতিভাতীত্যভিপ্রায়ঃ ॥ মোহকলিলাত্যযদ্বারেণ
লব্ধাত্মবিবেকজপ্রজ্ঞঃ কদা কর্ময়োগজং ফলং
পরমার্থয়োগমবাপ্স্যামীতি চেৎ, তৎ শৃণু —
শ্রুতিবিপ্রতিপন্না তে যদা স্থাস্যতি নিশ্চলা ।
সমাধাবচলা বুদ্ধিস্তদা যোগমবাপ্স্যসি ॥ ২-৫৩॥
শ্রুতিবিপ্রতিপন্না অনেকসাধ্যসাধনসম্বন্ধপ্রকাশনশ্রুতিভিঃ শ্রবণৈঃ
প্রবৃত্তিনিবৃত্তিলক্ষণৈঃ বিপ্রতিপন্না নানাপ্রতিপন্না বিক্ষিপ্তা সতী তে
তব বুদ্ধিঃ যদি যস্মিন্ কালে স্থাস্যতি স্থিরীভূতা ভবিষ্যতি নিশ্চলা
বিক্ষেপচলনবর্জিতা সতী সমাধৌ, সমাধীয়তে চিত্তমস্মিন্নিতি সমাধিঃ
আত্মা, তস্মিন্ আত্মনি ইত্যেতৎ । অচলা তত্রাপি বিকল্পবর্জিতা ইত্যেতৎ । বুদ্ধিঃ
অন্তঃকরণম্ । তদা তস্মিন্কালে যোগং অবাপ্স্যসি বিবেকপ্রজ্ঞাং সমাধিং
প্রাপ্স্যসি ॥ প্রশ্নবীজং প্রতিলভ্য অর্জুন উবাচ লব্ধসমাধিপ্রজ্ঞস্য
লক্ষণবুভুৎসয়া —
অর্জুন উবাচ —
স্থিতপ্রজ্ঞস্য কা ভাষা সমাধিস্থস্য কেশব ।
স্থিতধীঃ কিং পৃভাষেত কিমাসীত ব্রজেত কিম্ ॥ ২-৫৪॥
স্থিতা প্রতিষ্ঠিতা “অহমস্মি পরং ব্রহ্ম” ইতি প্রজ্ঞা যস্য
সঃ স্থিতপ্রজ্ঞঃ তস্য স্থিতপ্রজ্ঞস্য কা ভাষা কিং ভাষণং বচনং
কথমসৌ পরৈর্ভাষ্যতে সমাধিস্থস্য সমাধৌ স্থিতস্য হে কেশব ।
স্থিতধীঃ স্থিতপ্রজ্ঞঃ স্বয়ং বা কিং প্রভাষেত । কিং আসীৎ ব্রজেত কিম্
আসনং ব্রজনং বা তস্য কথমিত্যর্থঃ । স্থিতপ্রজ্ঞস্য লক্ষণমনেন
শ্লোকেন পৃচ্ছ্যতে ॥ যো হ্যাদিত এব সন্ন্যস্য কর্মাণি জ্ঞানয়োগনিষ্ঠায়াং
প্রবৃত্তঃ, যশ্চ কর্ময়োগেন, তয়োঃ “প্রজহাতি” ইত্যারভ্য
আ অধ্যায়পরিসমাপ্তেঃ স্থিতপ্রজ্ঞলক্ষণং সাধনং চোপদিশ্যতে ।
সর্বত্রৈব হি অধ্যাত্মশাস্ত্রে কৃতার্থলক্ষণানি যানি তান্যেব সাধনানি
উপদিশ্যন্তে, যত্নসাধ্যৎবাৎ । যানি যত্নসাধ্যানি সাধনানি লক্ষণানি চ
ভবন্তি তানি শ্রীভগবানুবাচ —
শ্রীভগবানুবাচ —
প্রজহাতি যদা কামান্সর্বান্পার্থ মনোগতান্ ।
আত্মন্যেবাত্মনা তুষ্টঃ স্থিতপ্রজ্ঞস্তদোচ্যতে ॥ ২-৫৫॥
প্রজহাতি প্রকর্ষেণ জহাতি পরিত্যজ্যতি যদা যস্মিন্কালে সর্বান্ সমস্তান্
কামান্ ইচ্ছাভেদান্ হে পার্থ, মনোগতান্ মনসি প্রবিষ্টান্ হৃদি প্রবিষ্টান্ ।
সর্বকামপরিত্যাগে তুষ্টিকারণাভাবাৎ শরীরধারণনিমিত্তশেষে চ সতি
উন্মত্তপ্রমত্তস্যেব প্রবৃত্তিঃ প্রাপ্তা, ইত্যত উচ্যতে — আত্মন্যেব
প্রত্যগাত্মস্বরূপে এব আত্মনা স্বেনৈব বাহ্যলাভনিরপেক্ষঃ তুষ্টঃ
পরমার্থদর্শনামৃতরসলাভেন অন্যস্মাদলম্প্রত্যযবান্ স্থিতপ্রজ্ঞঃ
স্থিতা প্রতিষ্ঠিতা আত্মানাত্মবিবেকজা প্রজ্ঞা যস্য সঃ স্থিতপ্রজ্ঞঃ বিদ্বান্
তদা উচ্যতে । ত্যক্তপুত্রবিত্তলোকৈষণঃ সন্ন্যাসী আত্মারাম আত্মক্রীডঃ
স্থিতপ্রজ্ঞ ইত্যর্থঃ ॥ কিঞ্চ —
দুঃখেষ্বনুদ্বিগ্নমনাঃ সুখেষু বিগতস্পৃহঃ ।
বীতরাগভয়ক্রোধঃ স্থিতধীর্মুনিরুচ্যতে ॥ ২-৫৬॥
দুঃখেষু আধ্যাত্মিকাদিষু প্রাপ্তেষু ন উদ্বিগ্নং ন প্রক্ষুভিতং দুঃখপ্রাপ্তৌ
মনো যস্য সোঽয়ং অনুদ্বিগ্ন- মনাঃ । তথা সুখেষু প্রাপ্তেষু বিগতা
স্পৃহা তৃষ্ণা যস্য, ন অগ্নিরিব ইন্ধনাদ্যাধানে সুখান্যনু বিবর্ধতে
স বিগতস্পৃহঃ । বীতরাগভয়ক্রোধঃ রাগশ্চ ভয়ং চ ক্রোধশ্চ
বীতা বিগতা যস্মাৎ স বীতরাগভয়ক্রোধঃ । স্থিতধীঃ স্থিতপ্রজ্ঞো মুনিঃ
সন্ন্যাসী তদা উচ্যতে ॥ কিঞ্চ —
যঃ সর্বত্রানভিস্নেহস্তত্তৎপ্রাপ্য শুভাশুভম্ ।
নাভিনন্দতি ন দ্বেষ্টি তস্য প্রজ্ঞা প্রতিষ্ঠিতা ॥ ২-৫৭॥
যঃ মুনিঃ সর্বত্র দেহজীবিতাদিষ্বপি অনভিস্নেহঃ অভিস্নেহবর্জিতঃ তত্তৎ
প্রাপ্য শুভাশুভং তত্তৎ শুভং অশুভং বা লব্ধ্বা ন অভিনন্দতি ন
দ্বেষ্টি শুভং প্রাপ্য ন তুষ্যতি ন হৃষ্যতি, অশুভং চ প্রাপ্য ন
দ্বেষ্টি ইত্যর্থঃ । তস্য এবং হর্ষবিষাদবর্জিতস্য বিবেকজা প্রজ্ঞা
প্রতিষ্ঠিতা ভবতি ॥ কিঞ্চ–
যদা সংহরতে চায়ং কূর্মোঽঙ্গানীব সর্বশঃ ।
ইন্দ্রিয়াণীন্দ্রিয়ার্থেভ্যস্তস্য প্রজ্ঞা প্রতিষ্ঠিতা ॥ ২-৫৮॥
যদা সংহরতে সম্যগুপসংহরতে চ অয়ং জ্ঞাননিষ্ঠায়াং প্রবৃত্তো যদি
কূর্মঃ অঙ্গানি ইব যথা কূর্মঃ ভয়াৎ স্বান্যঙ্গানি উপসংহরতি সর্বশঃ
সর্বতঃ, এবং জ্ঞাননিষ্ঠঃ ইন্দ্রিয়াণি ইন্দ্রিয়ার্থেভ্যঃ সর্ববিষয়েভ্যঃ
উপসংহরতে । তস্য প্রজ্ঞা প্রতিষ্ঠিতা ইত্যুক্তার্থং বাক্যম্ ॥ তত্র
বিষয়াননাহরতঃ আতুরস্যাপি ইন্দ্রিয়াণি কূর্মাঙ্গানীব সংহ্রিয়ন্তে ন তু
তদ্বিষয়ো রাগঃ স কথং সংহ্রিয়তে ইতি উচ্যতে —
বিষয়া বিনিবর্তন্তে নিরাহারস্য দেহিনঃ ।
রসবর্জং রসোঽপ্যস্য পরং দৃষ্ট্বা নিবর্ততে ॥ ২-৫৯॥
যদ্যপি বিষয়াঃ বিষয়োপলক্ষিতানি বিষয়শব্দবাচ্যানি ইন্দ্রিয়াণি
নিরাহারস্য অনাহ্রিয়মাণবিষয়স্য কষ্টে তপসি স্থিতস্য মূর্খস্যাপি
বিনিবর্তন্তে দেহিনো দেহবতঃ রসবর্জং রসো রাগো বিষয়েষু যঃ তং
বর্জয়িৎবা । রসশব্দো রাগে প্রসিদ্ধঃ, স্বরসেন প্রবৃত্তঃ রসিকঃ
রসজ্ঞঃ, ইত্যাদিদর্শনাৎ । সোঽপি রসো রঞ্জনারূপঃ সূক্ষ্মঃ অস্য
যতেঃ পরং পরমার্থতত্ত্বং ব্রহ্ম দৃষ্ট্বা উপলভ্য “অহমেব
তৎ” ইতি বর্তমানস্য নিবর্ততে নির্বীজং বিষয়বিজ্ঞানং
সম্পদ্যতে ইত্যর্থঃ । ন অসতি সম্যগ্দর্শনে রসস্য উচ্ছেদঃ । তস্মাৎ
সম্যগ্দর্শনাত্মিকায়াঃ প্রজ্ঞায়াঃ স্থৈর্যং কর্তব্যমিত্যভিপ্রায়ঃ ॥
সম্যগ্দর্শনলক্ষণপ্রজ্ঞাস্থৈর্যং চিকীর্ষতা আদৌ ইন্দ্রিয়াণি স্ববশে
স্থাপয়িতব্যানি, যস্মাত্তদনবস্থাপনে দোষমাহ —
যততো হ্যপি কৌন্তেয় পুরুষস্য বিপশ্চিতঃ ।
ইন্দ্রিয়াণি প্রমাথীনি হরন্তি প্রসভং মনঃ ॥ ২-৬০॥
যততঃ প্রয়ত্নং কুর্বতঃ হি যস্মাৎ কৌন্তেয় পুরুষস্য বিপশ্চিতঃ
মেধাবিনঃ অপি ইতি ব্যবহিতেন সম্বন্ধঃ । ইন্দ্রিয়াণি প্রমাথীনি
প্রমথনশীলানি বিষয়াভিমুখং হি পুরুষং বিক্ষোভয়ন্তি আকুলীকুর্বন্তি,
আকুলীকৃত্য চ হরন্তি প্রসভং প্রসহ্য প্রকাশমেব পশ্যতো
বিবেকবিজ্ঞানয়ুক্তং মনঃ ॥ যতঃ তস্মাৎ —
তানি সর্বাণি সংয়ম্য যুক্ত আসীত মৎপরঃ ।
বশে হি যস্যেন্দ্রিয়াণি তস্য প্রজ্ঞা প্রতিষ্ঠিতা ॥ ২-৬১॥
তানি সর্বাণি সংয়ম্য সংয়মনং বশীকরণং কৃৎবা যুক্তঃ সমাহিতঃ সন্
আসীত মৎপরঃ অহং বাসুদেবঃ সর্বপ্রত্যগাত্মা পরো যস্য সঃ মৎপরঃ,
“ন অন্যোঽহং তস্মাৎ” ইতি আসীত ইত্যর্থঃ । এবমাসীনস্য যতেঃ
বশে হি যস্য ইন্দ্রিয়াণি বর্তন্তে অভ্যাসবলাৎ তস্য প্রজ্ঞা প্রতিষ্ঠিতা ॥
অথেদানীং পরাভবিষ্যতঃসর্বানর্থমূলমিদমুচ্যতে —
ধ্যায়তো বিষয়ান্পুংসঃ সঙ্গস্তেষূপজায়তে ।
সঙ্গাৎসঞ্জায়তে কামঃ কামাৎক্রোধোঽভিজায়তে ॥ ২-৬২॥
ধ্যায়তঃ চিন্তয়তঃ বিষয়ান্ শব্দাদীন্ বিষয়বিশেষান্ আলোচয়তঃ পুংসঃ
পুরুষস্য সঙ্গঃ আসক্তিঃ প্রীতিঃ তেষু বিষয়েষু উপজায়তে উৎপদ্যতে ।
সঙ্গাৎ প্রীতেঃ সঞ্জায়তে সমুৎপদ্যতে কামঃ তৃষ্ণা । কামাৎ কুতশ্চিৎ
প্রতিহতাৎ ক্রোধঃ অভিজায়তে ॥
ক্রোধাদ্ভবতি সম্মোহঃ সম্মোহাৎস্মৃতিবিভ্রমঃ ।
স্মৃতিভ্রংশাদ্বুদ্ধিনাশো বুদ্ধিনাশাৎপ্রণশ্যতি ॥ ২-৬৩॥
ক্রোধাৎ ভবতি সম্মোহঃ অবিবেকঃ কার্যাকার্যবিষয়ঃ । ক্রুদ্ধো
হি সম্মূঢঃ সন্ গুরুমপ্যাক্রোশতি । সম্মোহাৎ স্মৃতিবিভ্রমঃ
শাস্ত্রাচার্যোপদেশাহিতসংস্কারজনিতায়াঃ স্মৃতেঃ স্যাৎ বিভ্রমো ভ্রংশঃ
স্মৃত্যুৎপত্তিনিমিত্ত-প্রাপ্তৌ অনুৎপত্তিঃ । ততঃ স্মৃতিভ্রংশাৎ বুদ্ধিনাশঃ
বুদ্ধের্নাশঃ । কার্যাকার্যবিষয়বিবেকায়োগ্যতা অন্তঃকরণস্য বুদ্ধের্নাশ
উচ্যতে । বুদ্ধিনাশাৎ প্রণশ্যতি । তাবদেব হি পুরুষঃ যাবদন্তঃকরণং
তদীয়ং কার্যাকার্যবিষয়বিবেকয়োগ্যম্ । তদয়োগ্যৎবে নষ্ট এব পুরুষো
ভবতি । অতঃ তস্যান্তঃকর্ণস্য বুদ্ধের্নাশাৎ প্রণস্যতি পুরুষার্থায়োগ্যো
ভবতীত্যর্থঃ ॥ সর্বানর্থস্য মূলমুক্তং বিষয়াভিধ্যানম্ । অথ ইদানীং
মোক্ষকারণমিদমুচ্যতে —
রাগদ্বেষবিয়ুক্তৈস্তু বিষয়ানিন্দ্রিয়ৈশ্চরন্ ।
আত্মবশ্যৈর্বিধেয়াত্মা প্রসাদমধিগচ্ছতি ॥ ২-৬৪॥
রাগদ্বেষবিয়ুক্তৈঃ রাগশ্চ দ্বেষশ্চ রাগদ্বেষৌ, তৎপুরঃসরা হি
ইন্দ্রিয়াণাং প্রবৃত্তিঃ স্বাভাবিকী, তত্র যো মুমুক্ষুঃ ভবতি সঃ তাভ্যাং
বিয়ুক্তৈঃ শ্রোত্রাদিভিঃ ইন্দ্রিয়ৈঃ বিষয়ান্ অবর্জনীয়ান্ চরন্ উপলভমানঃ
আত্মবশ্যৈঃ আত্মনঃ বশ্যানি বশীভূতানি ইন্দ্রিয়াণি তৈঃ আত্মবশ্যৈঃ
বিধেয়াত্মা ইচ্ছাতঃ বিধেয়ঃ আত্মা অন্তঃকরণং যস্য সঃ অয়ং প্রসাদম্
অধিগচ্ছতি । প্রসাদঃ প্রসন্নতা স্বাস্থ্যম্ ॥ প্রসাদে সতি কিং স্যাৎ
ইত্যুচ্যতে —
প্রসাদে সর্বদুঃখানাং হানিরস্যোপজায়তে ।
প্রসন্নচেতসো হ্যাশু বুদ্ধিঃ পর্যবতিষ্ঠতে ॥ ২-৬৫॥
প্রসাদে সর্বদুঃখানাং আধ্যাত্মিকাদীনাং হানিঃ বিনাশঃ অস্য যতেঃ
উপজায়তে । কিঞ্চ — প্রসন্নচেতসঃ স্বস্থান্তঃকরণস্য
হি যস্মাৎ আশু শীঘ্রং বুদ্ধিঃ পর্যবতিষ্ঠতে আকাশমিব পরি
সমন্তাৎ অবতিষ্ঠতে, আত্মস্বরূপেণৈব নিশ্চলীভবতীত্যর্থঃ ॥
এবং প্রসন্নচেতসঃ অবস্থিতবুদ্ধেঃ কৃতকৃত্যতা যতঃ, তস্মাৎ
রাগদ্বেষবিয়ুক্তৈঃ ইন্দ্রিয়ৈঃ শাস্ত্রাবিরুদ্ধেষু অবর্জনীয়েষু যুক্তঃ
সমাচরেৎ ইতি বাক্যার্থঃ ॥ সেয়ং প্রসন্নতা স্তূয়তে —
নাস্তি বুদ্ধিরয়ুক্তস্য ন চায়ুক্তস্য ভাবনা ।
ন চাভাবয়তঃ শান্তিরশান্তস্য কুতঃ সুখম্ ॥ ২-৬৬॥
নাস্তি ন বিদ্যতে ন ভবতীত্যর্থঃ, বুদ্ধিঃ আত্মস্বরূপবিষয়া অয়ুক্তস্য
অসমাহিতান্তঃকরণস্য । ন চ অস্তি অয়ুক্তস্য ভাবনা আত্মজ্ঞানাভিনিবেশঃ
তথা — ন চ অস্তি অভাবয়তঃ আত্মজ্ঞানাভিনিবেশমকুর্বতঃ শান্তিঃ
উপশমঃ । অশান্তস্য কুতঃ সুখম্ ? ইন্দ্রিয়াণাং হি বিষয়সেবাতৃষ্ণাতঃ
নিবৃত্তির্যা তৎসুখম্, ন বিষয়বিষয়া তৃষ্ণা । দুঃখমেব হি সা ।
ন তৃষ্ণায়াং সত্যাং সুখস্য গন্ধমাত্রমপ্যুপপদ্যতে ইত্যর্থঃ ॥
অয়ুক্তস্য কস্মাদ্বুদ্ধির্নাস্তি ইত্যুচ্যতে —
ইন্দ্রিয়াণাং হি চরতাং যন্মনোঽনুবিধীয়তে ।
তদস্য হরতি প্রজ্ঞাং বায়ুর্নাবমিবাম্ভসি ॥ ২-৬৭॥
ইন্দ্রিয়াণাং হি যস্মাৎ চরতাং স্বস্ববিষয়েষু প্রবর্তমানানাং যৎ মনঃ
অনুবিধীয়তে অনুপ্রবর্ততে তৎ ইন্দ্রিয়বিষয়বিকল্পনেন প্রবৃত্তং মনঃ
অস্য যতেঃ হরতি প্রজ্ঞাং আত্মানাত্মবিবেকজাং নাশয়তি । কথম্ ? বায়ুঃ
নাবমিব অম্ভসি উদকে জিগমিষতাং মার্গাদুদ্ধৃত্য উন্মার্গে যথা বায়ুঃ
নাবং প্রবর্তয়তি, এবমাত্মবিষয়াং প্রজ্ঞাং হৃৎবা মনো বিষয়বিষয়াং
করোতি ॥ “যততো হি” (ভ. গী. ২-৬০) ইত্যুপন্যস্তস্যার্থস্য
অনেকধা উপপত্তিমুক্ত্বা তং চার্থমুপপাদ্য উপসংহরতি —
তস্মাদ্যস্য মহাবাহো নিগৃহীতানি সর্বশঃ ।
ইন্দ্রিয়াণীন্দ্রিয়ার্থেভ্যস্তস্য প্রজ্ঞা প্রতিষ্ঠিতা ॥ ২-৬৮॥
ইন্দ্রিয়াণাং প্রবৃত্তৌ দোষ উপপাদিতো যস্মাৎ, তস্মাৎ যস্য যতেঃ হে
মহাবাহো, নিগৃহীতানি সর্বশঃ সর্বপ্রকারৈঃ মানসাদিভেদৈঃ ইন্দ্রিয়াণি
ইন্দ্রিয়ার্থেভ্যঃ শব্দাদিভ্যঃ তস্য প্রজ্ঞা প্রতিষ্ঠিতা ॥ যোঽয়ং
লৌকিকো বৈদিকশ্চ ব্যবহারঃ স উৎপন্নবিবেকজ্ঞানস্য স্থিতপ্রজ্ঞস্য
অবিদ্যাকার্যৎবাৎ অবিদ্যানিবৃত্তৌ নিবর্ততে, অবিদ্যায়াশ্চ বিদ্যাবিরোধাৎ
নিবৃত্তিঃ, ইত্যেতমর্থং স্ফুটীকুর্বন্ আহ —
যা নিশা সর্বভূতানাং তস্যাং জাগর্তি সংয়মী ।
যস্যাং জাগ্রতি ভূতানি সা নিশা পশ্যতো মুনেঃ ॥ ২-৬৯॥
যা নিশা রাত্রিঃ সর্বপদার্থানামবিবেককরী তমঃস্বভাবৎবাৎ সর্বভূতানাং
সর্বেষাং ভূতানাম্ । কিং তৎ পরমার্থতত্ত্বং স্থিতপ্রজ্ঞস্য
বিষয়ঃ । যথা নক্তঞ্চরাণাং অহরেব সদন্যেষাং নিশা ভবতি, তদ্বৎ
নক্তঞ্চরস্থানীয়ানামজ্ঞানাং সর্বভূতানাং নিশেব নিশা পরমার্থতত্ত্বম্,
অগোচরৎবাদতদ্বুদ্ধীনাম্ । তস্যাং পরমার্থতত্ত্বলক্ষণায়ামজ্ঞাননিদ্রায়াঃ
প্রবুদ্ধো জাগর্তি সংয়মী সংয়মবান্, জিতেন্দ্রিয়ো যোগীত্যর্থঃ । যস্যাং
গ্রাহ্যগ্রাহকভেদলক্ষণায়ামবিদ্যানশায়াং প্রসুপ্তান্যেব ভূতানি জাগ্রতি ইতি
উচ্যন্তে, যস্যাং নিশায়াং প্রসুপ্তা ইব স্বপ্নদৃশঃ, সা নিশা অবিদ্যারূপৎবাৎ
পরমার্থতত্ত্বং পশ্যতো মুনেঃ ॥ অতঃ কর্মাণি অবিদ্যাবস্থায়ামেব
চোদ্যন্তে, ন বিদ্যাবস্থায়াম্ । বিদ্যায়াং হি সত্যাং উদিতে সবিতরি
শার্বরমিব তমঃ প্রণাশমুপগচ্ছতি অবিদ্যা । প্রাক্ বিদ্যোৎপত্তেঃ অবিদ্যা
প্রমাণবুদ্ধ্যা গৃহ্যমাণা ক্রিয়াকারকফলভেদরূপা সতী সর্বকর্মহেতুৎবং
প্রতিপদ্যতে । ন অপ্রমাণবুদ্ধ্যা গৃহ্যমাণায়াঃ কর্মহেতুৎবোপপত্তিঃ,
“প্রমাণভূতেন বেদেন মম চোদিতং কর্তব্যং কর্ম” ইতি হি কর্মণি
কর্তা প্রবর্ততে, ন “অবিদ্যামাত্রমিদং সর্বং নিশেব” ইতি । যস্য
পুনঃ “নিশেব অবিদ্যামাত্রমিদং সর্বং ভেদজাতম্” ইতি জ্ঞানং
তস্য আত্মজ্ঞস্য সর্বকর্মসন্ন্যাসে এব অধিকারো ন প্রবৃত্তৌ । তথা
চ দর্শয়িষ্যতি –“তদ্বুদ্ধয়স্তদাত্মানঃ” (ভ. গী. ৫-১৭)
ইত্যাদিনা জ্ঞাননিষ্ঠায়ামেব তস্য অধিকারম্ ॥ তত্রাপি প্রবর্তকপ্রমাণাভাবে
প্রবৃত্ত্যনুপপত্তিঃ ইতি চেৎ, ন ; স্বাত্মবিষয়ৎবাদাত্মবিজ্ঞানস্য । ন হি
আত্মনঃ স্বাত্মনি প্রবর্তকপ্রমাণাপেক্ষতা, আত্মৎবাদেব । তদন্তৎবাচ্চ
সর্বপ্রমাণানাং প্রমাণৎবস্য । ন হি আত্মস্বরূপাধিগমে সতি পুনঃ
প্রমাণপ্রমেয়ব্যবহারঃ সম্ভবতি । প্রমাতৃৎবং হি আত্মনঃ নিবর্তয়তি
অন্ত্যং প্রমাণম্ ; নিবর্তয়দেব চ অপ্রমাণীভবতি, স্বপ্নকালপ্রমাণমিব
প্রবোধে । লোকে চ বস্ত্বধিগমে প্রবৃত্তিহেতুত্ত্বাদর্শনাৎ প্রমাণস্য ।
তস্মাৎ ন আত্মবিদঃ কর্মণ্যধিকার ইতি সিদ্ধম্ ॥ বিদুষঃ ত্যক্তৈষণস্য
স্থিতপ্রজ্ঞস্য যতেরেব মোক্ষপ্রাপ্তিঃ, ন তু অসন্ন্যাসিনঃ কামকামিনঃ
ইত্যেতমর্থং দৃষ্টান্তেন প্রতিপাদয়িষ্যন্ আহ —
আপূর্যমাণমচলপ্রতিষ্ঠং সমুদ্রমাপঃ প্রবিশন্তি যদ্বৎ ।
তদ্বৎকামা যং প্রবিশন্তি সর্বে স শান্তিমাপ্নোতি ন কামকামী ॥ ২-৭০॥
আপূর্যমাণং অদ্ভিঃ অচলপ্রতিষ্ঠং অচলতয়া প্রতিষ্ঠা অবস্থিতিঃ
যস্য তং অচলপ্রতিষ্ঠং সমুদ্রং আপঃ সর্বতো গতাঃ প্রবিশন্তি
স্বাত্মস্থমবিক্রিয়মেব সন্তং যদ্বৎ, তদ্বৎ কামাঃ বিষয়সন্নিধাবপি
সর্বতঃ ইচ্ছাবিশেষাঃ যং পুরুষং — সমুদ্রমিব আপঃ — অবিকুর্বন্তঃ
প্রবিশন্তি সর্বে আত্মন্যেব প্রলীয়ন্তে ন স্বাত্মবশং কুর্বন্তি, সঃ শান্তিং
মোক্ষং আপ্নোতি, ন ইতরঃ কামকামী, কাম্যন্ত ইতি কামাঃ বিষয়াঃ তান্ কাময়িতুং
শীলং যস্য সঃ কামকামী, নৈব প্রাপ্নোতি ইত্যর্থঃ ॥ যস্মাদেবং তস্মাৎ–
বিহায় কামান্যঃ সর্বান্পুমাংশ্চরতি নিঃস্পৃহঃ ।
নির্মমো নিরহঙ্কারঃ স শান্তিমধিগচ্ছতি ॥ ২-৭১॥
বিহায় পরিত্যজ্য কামান্ যঃ সন্ন্যাসী পুমান্ সর্বান্ অশেষতঃ কার্ত্স্ন্যেন
চরতি, জীবনমাত্রচেষ্টাশেষঃ পর্যটতীত্যর্থঃ । নিঃস্পৃহঃ
শরীরজীবনমাত্রেঽপি নির্গতা স্পৃহা যস্য সঃ নিঃস্পৃহঃ সন্, নির্মমঃ
শরীরজীবনমাত্রাক্ষিপ্তপরিগ্রহেঽপি মমেদং ইত্যপভিনিবেশবর্জিতঃ,
নিরহঙ্কারঃ বিদ্যাবত্ত্বাদিনিমিত্তাত্মসম্ভাবনারহিতঃ ইত্যেতৎ । সঃ এবম্ভূতঃ
স্থিতপ্রজ্ঞঃ ব্রহ্মবিৎ শান্তিং সর্বসংসারদুঃখোপরমলক্ষণাং নির্বাণাখ্যাম্
অধিগচ্ছতি প্রাপ্নোতি ব্রহ্মভূতো ভবতি ইত্যর্থঃ ॥ সৈষা জ্ঞাননিষ্ঠা
স্তূয়তে —
এষা ব্রাহ্মী স্থিতিঃ পার্থ নৈনাং প্রাপ্য বিমুহ্যতি ।
স্থিৎবাস্যামন্তকালেঽপি ব্রহ্মনির্বাণমৃচ্ছতি ॥ ২-৭২॥
এষা যথোক্তা ব্রাহ্মী ব্রহ্মণি ভবা ইয়ং স্থিতিঃ সর্বং কর্ম সন্ন্যস্য
ব্রহ্মরূপেণৈব অবস্থানং ইত্যেতৎ । হে পার্থ, ন এনাং স্থিতিং প্রাপ্য
লব্ধ্বা ন বিমুহ্যতি ন মোহং প্রাপ্নোতি । স্থিৎবা অস্যাং স্থিতৌ ব্রাহ্ম্যাং
যথোক্তায়াং অন্তকালেঽপি অন্ত্যে বয়স্যপি ব্রহ্মনির্বাণং ব্রহ্মনির্বৃতিং
মোক্ষং ঋচ্ছতি গচ্ছতি । কিমু বক্তব্যং ব্রহ্মচর্যাদেব সন্ন্যস্য
যাবজ্জীবং যো ব্রহ্মণ্যেব অবতিষ্ঠতে স ব্রহ্মনির্বাণমৃচ্ছতি ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে সাঙ্খ্যযোগো নাম দ্বিতীয়োঽধ্যায়ঃ ॥২॥
ইতি শ্রীমদ্-শঙ্কর-ভগবতঃ কৃতৌ গীতা-ভাষ্যে দ্বিতীয়োঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ তৃতীয়োঽধ্যায়ঃ ॥
শাস্ত্রস্য প্রবৃত্তিনিবৃত্তিবিষয়ভূতে দ্বে বুদ্ধী ভগবতা নির্দিষ্টে,
সাঙ্খ্যে বুদ্ধিঃ যোগে বুদ্ধিঃ ইতি চ । তত্র “প্রজহাতি যদা কামান্”
(ভ. গী. ২-৫৫) ইত্যারভ্য আ অধ্যায়পরিসমাপ্তেঃ সাঙ্খ্যবুদ্ধ্যাশ্রিতানাং
সন্ন্যাসং কর্তব্যমুক্ত্বা তেষাং তন্নিষ্ঠতয়ৈব চ কৃতার্থতা উক্তা
— “এষা ব্রাহ্মী স্থিতিঃ” (ভ. গী. ২-৭২) ইতি । অর্জুনায়
চ“কর্মণ্যেবাধিকারস্তে . . . মা তে সঙ্গোঽস্ত্বকর্মণি”
(ভ. গী. ২-৪৭) ইতি কর্মৈব কর্তব্যমুক্তবান্ যোগবুদ্ধিমাশ্রিত্য, ন তত
এব শ্রেয়ঃপ্রাপ্তিং উক্তবান্ । তদেতদালক্ষ্য পর্যাকুলীকৃতবুদ্ধিঃ অর্জুনঃ
উবাচ । কথং ভক্তায় শ্রেয়োর্থিনে যৎ সাক্ষাৎ শ্রেয়ঃপ্রাপ্তিসাধনং
সাঙ্খ্যবুদ্ধিনিষ্ঠাং শ্রাবয়িৎবা মাং কর্মণি দৃষ্টানেকানর্থয়ুক্তে
পারম্পর্যেণাপি অনৈকান্তিকশ্রেয়ঃপ্রাপ্তিফলে নিয়ুঞ্জ্যাৎ ইতি যুক্তঃ
পর্যাকুলীভাবঃ অর্জুনস্য, তদনুরূপশ্চ প্রশ্নঃ “জ্যায়সী
চেৎ” (ভ. গী. ৩-১) ইত্যাদিঃ, প্রশ্নাপাকরণবাক্যং চ ভগবতঃ
যুক্তং যথোক্তবিভাগবিষয়ে শাস্ত্রে ॥ কেচিত্তু — অর্জুনস্য
প্রশ্নার্থমন্যথা কল্পয়িৎবা তৎপ্রতিকূলং ভগবতঃ প্রতিবচনং
বর্ণয়ন্তি, যথা চ আত্মনা সম্বন্ধগ্রন্থে গীতার্থো নিরূপিতঃ
তৎপ্রতিকূলং চ ইহ পুনঃ প্রশ্নপ্রতিবচনয়োঃ অর্থং নিরূপয়ন্তি ।
কথম্ ? তত্র সম্বন্ধগ্রন্থে তাবৎ — সর্বেষামাশ্রমিণাং জ্ঞানকর্মণোঃ
সমুচ্চয়ঃ গীতাশাস্ত্রে নিরূপিতঃ অর্থঃ ইত্যুক্তম্ ; পুনঃ বিশেষিতং চ
যাবজ্জীবশ্রুতিচোদিতানি কর্মাণি পরিত্যজ্য কেবলাদেব জ্ঞানাৎ মোক্ষঃ
প্রাপ্যতে ইত্যেতৎ একান্তেনৈব প্রতিষিদ্ধমিতি । ইহ তু আশ্রমবিকল্পং
দর্শয়তা যাবজ্জীবশ্রুতিচোদিতানামেব কর্মণাং পরিত্যাগ উক্তঃ । তৎ
কথং ঈদৃশং বিরুদ্ধমর্থং অর্জুনায় ব্রূয়াৎ ভগবান্, শ্রোতা বা
কথং বিরুদ্ধমর্থমবধারয়েৎ ॥ তত্রৈতৎ স্যাৎ — গৃহস্থানামেব
শ্রৌতকর্মপরিত্যাগেন কেবলাদেব জ্ঞানাৎ মোক্ষঃ প্রতিষিধ্যতে, ন তু
আশ্রমান্তরাণামিতি । এতদপি পূর্বোত্তরবিরুদ্ধমেব । কথম্ ? সর্বাশ্রমিণাং
জ্ঞানকর্মণোঃ সমুচ্চয়ো গীতাশাস্ত্রে নিশ্চিতঃ অর্থঃ ইতি প্রতিজ্ঞায়
ইহ কথং তদ্বিরুদ্ধং কেবলাদেব জ্ঞানাৎ মোক্ষং ব্রূয়াৎ আশ্রমান্তরাণাম্ ॥
অথ মতং শ্রৌতকর্মাপেক্ষয়া এতদ্বচনং “কেবলাদেব জ্ঞানাৎ
শ্রৌতকর্মরহিতাৎ গৃহস্থানাং মোক্ষঃ প্রতিষিধ্যতে” ইতি ;
তত্র গৃহস্থানাং বিদ্যমানমপি স্মার্তং কর্ম অবিদ্যমানবৎ উপেক্ষ্য
“জ্ঞানাদেব কেবলাৎ” ইত্যুচ্যতে ইতি । এতদপি বিরুদ্ধম্ । কথম্?
গৃহস্থস্যৈব স্মার্তকর্মণা সমুচ্চিতাৎ জ্ঞানাৎ মোক্ষঃ প্রতিষিধ্যতে
ন তু আশ্রমান্তরাণামিতি কথং বিবেকিভিঃ শক্যমবধারয়িতুম্ । কিঞ্চ
— যদি মোক্ষসাধনৎবেন স্মার্তানি কর্মাণি ঊর্ধ্বরেতসাং সমুচ্চীয়ন্তে
তথা গৃহস্থস্যাপি ইষ্যতাং স্মার্তৈরেব সমুচ্চয়ো ন শ্রৌতৈঃ ॥
অথ শ্রৌতৈঃ স্মার্তৈশ্চ গৃহস্থস্যৈব সমুচ্চয়ঃ মোক্ষায়,
ঊর্ধ্বরেতসাং তু স্মার্তকর্মমাত্রসমুচ্চিতাৎ জ্ঞানাৎ মোক্ষ ইতি । তত্রৈবং
সতি গৃহস্থস্য আয়াসবাহুল্যাৎ, শ্রৌতং স্মার্তং চ বহুদুঃখরূপং
কর্ম শিরসি আরোপিতং স্যাৎ ॥ অথ গৃহস্থস্যৈব আয়াসবাহুল্যকারণাৎ
মোক্ষঃ স্যাৎ, ন আশ্রমান্তরাণাং শ্রৌতনিত্যকর্মরহিতৎবাৎ ইতি ।
তদপ্যসৎ, সর্বোপনিষৎসু ইতিহাসপুরাণয়োগশাস্ত্রেষু চ জ্ঞানাঙ্গৎবেন
মুমুক্ষোঃ সর্বকর্মসন্ন্যাসবিধানাৎ, আশ্রমবিকল্পসমুচ্চয়বিধানাচ্চ
শ্রুতিস্মৃত্যোঃ ॥ সিদ্ধস্তর্হি সর্বাশ্রমিণাং জ্ঞানকর্মণোঃ সমুচ্চয়ঃ
— ন, মুমুক্ষোঃ সর্বকর্মসন্ন্যাসবিধানাৎ । “পুত্রৈষণায়া
বিত্তৈষণায়াশ্চ লোকৈষণায়াশ্চ ব্যুত্থায়াথ ভিক্ষাচর্যং চরন্তি”
(বৃ. উ. ৩-৫-১) ”তস্মাৎ ন্যাসমেষাং তপসামতিরিক্তমাহুঃ”
(তৈ. না. ৭৯) ”ন্যাস এবাত্যরেচয়ৎ” (তৈ. না. ৭৮) ইতি,
”ন কর্মণা ন প্রজয়া ধনেন ত্যাগেনৈকে অমৃতৎবমানশুঃ”
(তৈ. না. ১২) ইতি চ । “ব্রহ্মচর্যাদেব প্রব্রজেৎ”
(জা. উ. ৪) ইত্যাদ্যাঃ শ্রুতয়ঃ । ”ত্যজ ধর্মমধর্মং চ উভে
সত্যানৃতে ত্যজ । উভে সত্যানৃতে ত্যক্ত্বা যেন ত্যজসি তত্ত্যজ ।”
(মো. ধ. ৩২৯-৪০) ”সংসারমেব নিঃসারং দৃষ্ট্বা সারদিদৃক্ষয়া ।
প্রব্রজন্ত্যকৃতোদ্বাহাঃ পরং বৈরাগ্যমাশ্রিতাঃ” ইতি বৃহস্পতিঃ ।
”কর্মণা বধ্যতে জন্তুর্বিদ্যযা চ বিমুচ্যতে । তস্মাৎকর্ম ন
কুর্বন্তি যতয়ঃ পারদর্শিনঃ” (মো. ধ. ২৪১-৭) ইতি শুকানুশাসনম্
ইহাপি চ “সর্বকর্মাণি মনসা সন্ন্যস্য” (ভ. গী. ৫-১৩)
ইত্যাদি ॥ মোক্ষস্য চ অকার্যৎবাৎ মুমুক্ষোঃ কর্মানর্থক্যম্ । নিত্যানি
প্রত্যবায়পরিহারার্থানি ইতি চেৎ, ন ; অসন্ন্যাসিবিষয়ৎবাৎ প্রত্যবায়প্রাপ্তেঃ
ন হি অগ্নিকার্যাদ্যকরণাৎ সন্ন্যাসিনঃ প্রত্যবায়ঃ কল্পয়িতুং শক্যঃ, যথা
ব্রহ্মচারিণামসন্ন্যাসিনামপি কর্মিণাম্ । ন তাবৎ নিত্যানাং কর্মণামভাবাদেব
ভাবরূপস্য প্রত্যবায়স্য উৎপত্তিঃ কল্পয়িতুং শক্যা, “কথমসতঃ
সজ্জায়েত” (ছা. উ. ৬-২-২) ইতি অসতঃ সজ্জন্মাসম্ভবশ্রুতেঃ । যদি
বিহিতাকরণাৎ অসম্ভাব্যমপি প্রত্যবায়ং ব্রূয়াৎ বেদঃ, তদা অনর্থকরঃ বেদঃ
অপ্রমাণমিত্যুক্তং স্যাৎ ; বিহিতস্য করণাকরণয়োঃ দুঃখমাত্রফলৎবাৎ ।
তথা চ কারকং শাস্ত্রং ন জ্ঞাপকং ইত্যনুপপন্নার্থং কল্পিতং স্যাৎ
ন চৈতদিষ্টম্ । তস্মাৎ ন সন্ন্যাসিনাং কর্মাণি । অতো জ্ঞানকর্মণোঃ
সমুচ্চয়ানুপপত্তিঃ ; “জ্যায়সী চেৎ কর্মণস্তে মতা বুদ্ধিঃ”
(ভ. গী. ৩-১) ইতি অর্জুনস্য প্রশ্নানুপপত্তেশ্চ ॥ যদি হি ভগবতা
দ্বিতীয়েঽধ্যায়ে জ্ঞানং কর্ম চ সমুচ্চিত্য ৎবয়া অনুষ্ঠেয়ং ইত্যুক্তং
স্যাৎ, ততঃ অর্জুনস্য প্রশ্নঃ অনুপপন্নঃ “জ্যায়সী চেৎকর্মণস্তে
মতা বুদ্ধিঃ” (ভ. গী. ৩-১) ইতি । অর্জুনায় চেৎ বুদ্ধিকর্মণী
ৎবয়া অনুষ্ঠেয় ইত্যুক্তে, যা কর্মণো জ্যায়সী বুদ্ধিঃ সাপি উক্তৈব ইতি
“তৎ কিং কর্মণি ঘোরে মাং নিয়োজয়সি কেশব” (ভ. গী. ৩-১) ইতি
উপালম্ভঃ প্রশ্নো বা ন কথঞ্চন উপপদ্যতে । ন চ অর্জুনস্যৈব জ্যায়সী
বুদ্ধিঃ ন অনুষ্ঠেয়া ইতি ভগবতা উক্তং পূর্বং ইতি কল্পয়িতুং যুক্তম্,
যেন “জ্যায়সী চেৎ” ইতি বিবেকতঃ প্রশ্নঃ স্যাৎ ॥ যদি পুনঃ
একস্য পুরুষস্য জ্ঞানকর্মণোর্বিরোধাৎ যুগপদনুষ্ঠানং ন সম্ভবতীতি
ভিন্নপুরুষানুষ্ঠেয়ৎবং ভগবতা পূর্বমুক্তং স্যাৎ, ততোঽয়ং প্রশ্ন
উপপন্নঃ “জ্যায়সী চেৎ” ইত্যাদিঃ । অবিবেকতঃ প্রশ্নকল্পনায়ামপি
ভিন্নপুরুষানুষ্ঠেয়ৎবেন জ্ঞানকর্মনিষ্ঠয়োঃ ভগবতঃ প্রতিবচনং
নোপপদ্যতে । ন চ অজ্ঞাননিমিত্তং ভগবৎপ্রতিবচনং কল্পনীয়ম্ ।
অস্মাচ্চ ভিন্নপুরুষানুষ্ঠেয়ৎবেন জ্ঞানকর্মনিষ্ঠয়োঃ ভগবতঃ
প্রতিবচনদর্শনাৎ জ্ঞানকর্মণোঃ সমুচ্চয়ানুপপত্তিঃ । তস্মাৎ
কেবলাদেব জ্ঞানাৎ মোক্ষ ইত্যেষোঽর্থো নিশ্চিতো গীতাসু সর্বোপনিষৎসু চ ॥
জ্ঞানকর্মণোঃ “একং বদ নিশ্চিত্য” (ভ. গী. ৩-২) ইতি চ
একবিষয়ৈব প্রার্থনা অনুপপন্না, উভয়োঃ সমুচ্চয়সম্ভবে । “কুরু
কর্মৈব তস্মাত্ত্বম্” (ভ. গী. ৪-১৫) ইতি চ জ্ঞাননিষ্ঠাসম্ভবম্
অর্জুনস্য অবধারণেন দর্শয়িষ্যতি ॥
অর্জুন উবাচ —
জ্যায়সী চেৎকর্মণস্তে মতা বুদ্ধির্জনার্দন ।
তৎকিং কর্মণি ঘোরে মাং নিয়োজয়সি কেশব ॥ ৩-১॥
জ্যায়সী শ্রেয়সী চেৎ যদি কর্মণঃ সকাশাৎ তে তব মতা অভিপ্রেতা বুদ্ধিঃ হে
জনার্দন । যদি বুদ্ধিকর্মণী সমুচ্চিতে ইষ্টে তদা একং শ্রেয়ঃসাধনমিতি
কর্মণো জ্যায়সী বুদ্ধিঃ ইতি কর্মণঃ অতিরিক্তকরণং বুদ্ধেরনুপপন্নম্
অর্জুনেন কৃতং স্যাৎ ; ন হি তদেব তস্মাৎ ফলতোঽতিরিক্তং স্যাৎ । তথা চ,
কর্মণঃ শ্রেয়স্করী ভগবতোক্তা বুদ্ধিঃ, অশ্রেয়স্করং চ কর্ম কুর্বিতি
মাং প্রতিপাদয়তি, তৎ কিং নু কারণমিতি ভগবত উপালম্ভমিব কুর্বন্ তৎ
কিং কস্মাৎ কর্মণি ঘোরে ক্রূরে হিংসালক্ষণে মাং নিয়োজয়সি কেশব ইতি চ
যদাহ, তচ্চ নোপপদ্যতে । অথ স্মার্তেনৈব কর্মণা সমুচ্চয়ঃ সর্বেষাং
ভগবতা উক্তঃ অর্জুনেন চ অবধারিতশ্চেৎ, “তৎকিং কর্মণি ঘোরে মাং
নিয়োজয়সি” (ভ. গী. ৩-১) ইত্যাদি কথং যুক্তং বচনম্ ॥ কিঞ্চ–
ব্যামিশ্রেণেব বাক্যেন বুদ্ধিং মোহয়সীব মে ।
তদেকং বদ নিশ্চিত্য যেন শ্রেয়োঽহমাপ্নুয়াম্ ॥ ৩-২॥
ব্যামিশ্রেণেব, যদ্যপি বিবিক্তাভিধায়ী ভগবান্, তথাপি মম মন্দবুদ্ধেঃ
ব্যামিশ্রমিব ভগবদ্বাক্যং প্রতিভাতি । তেন মম বুদ্ধিং মোহয়সি ইব, মম
বুদ্ধিব্যামোহাপনয়ায় হি প্রবৃত্তঃ ৎবং তু কথং মোহয়সি ? অতঃ ব্রবীমি
বুদ্ধিং মোহয়সি ইব মে মম ইতি । ৎবং তু ভিন্নকর্তৃকয়োঃ জ্ঞানকর্মণোঃ
একপুরুষানুষ্ঠানাসম্ভবং যদি মন্যসে, তত্রৈবং সতি তৎ তয়োঃ একং
বুদ্ধিং কর্ম বা ইদমেব অর্জুনস্য যোগ্যং বুদ্ধিশক্ত্যবস্থানুরূপমিতি
নিশ্চিত্য বদ ব্রূহি, যেন জ্ঞানেন কর্মণা বা অন্যতরেণ শ্রেয়ঃ অহম্
আপ্নুয়াং প্রাপ্নুয়াম্ ; ইতি যদুক্তং তদপি নোপপদ্যতে ॥ যদি হি কর্মিষ্ঠায়াং
গুণভূতমপি জ্ঞানং ভগবতা উক্তং স্যাৎ, তৎ কথং তয়োঃ “একং
বদ” ইতি একবিষয়ৈব অর্জুনস্য শুশ্রূষা স্যাৎ । ন হি ভগবতা
পূর্বমুক্তং “অন্যতরদেব জ্ঞানকর্মণোঃ বক্ষ্যামি,নৈব দ্বয়ম্”
ইতি, যেন উভয়প্রাপ্ত্যসম্ভবং আত্মনো মন্যমানঃ একমেব প্রার্থয়েৎ ॥
প্রশ্নানুরূপমেব প্রতিবচনং শ্রীভগবানুবাচ —
শ্রীভগবানুবাচ —
লোকেঽস্মিন্দ্বিবিধা নিষ্ঠা পুরা প্রোক্তা ময়ানঘ ।
জ্ঞানয়োগেন সাঙ্খ্যানাং কর্ময়োগেন যোগিনাম্ ॥ ৩-৩॥
লোকে অস্মিন্ শাস্ত্রার্থানুষ্ঠানাদিকৃতানাং ত্রৈবর্ণিকানাং দ্বিবিধা দ্বিপ্রকারা
নিষ্ঠা স্থিতিঃ অনুষ্ঠেয়তাৎপর্যং পুরা পূর্বং সর্গাদৌ প্রজাঃ সৃষ্ট্বা
তাসাং অভ্যুদয়নিঃশ্রেয়সমপ্রাপ্তিসাধনং বেদার্থসম্প্রদায়মাবিষ্কুর্বতা
প্রোক্তা ময়া সর্বজ্ঞেন ঈশ্বরেণ হে অনঘ অপাপ । তত্র কা সা দ্বিবিধা
নিষ্ঠা ইত্যাহ — তত্র জ্ঞানয়োগেন জ্ঞানমেব যোগঃ তেন সাঙ্খ্যানাম্
আত্মানাত্মবিষয়বিবেকবিজ্ঞানবতাং ব্রহ্মচর্যাশ্রমাদেব কৃতসন্ন্যাসানাং
বেদান্তবিজ্ঞানসুনিশ্চিতার্থানাং পরমহংসপরিব্রাজকানাং ব্রহ্মণ্যেব
অবস্থিতানাং নিষ্ঠা প্রোক্তা । কর্ময়োগেন কর্মৈব যোগঃ কর্ময়োগঃ
তেন কর্ময়োগেন যোগিনাং কর্মিণাং নিষ্ঠা প্রোক্তা ইত্যর্থঃ । যদি চ
একেন পুরুষেণ একস্মৈ পুরুষার্থায় জ্ঞানং কর্ম চ সমুচ্চিত্য
অনুষ্ঠেয়ং ভগবতা ইষ্টং উক্তং বক্ষ্যমাণং বা গীতাসু বেদেষু চোক্তম্,
কথমিহ অর্জুনায় উপসন্নায় প্রিয়ায় বিশিষ্টভিন্নপুরুষকর্তৃকে এব
জ্ঞানকর্মনিষ্ঠে ব্রূয়াৎ ? যদি পুনঃ “অর্জুনঃ জ্ঞানং কর্ম চ
দ্বয়ং শ্রুৎবা স্বয়মেবানুষ্ঠাস্যতি অন্যেষাং তু ভিন্নপুরুষানুষ্ঠেয়তাং
বক্ষ্যামি ইতি” মতং ভগবতঃ কল্প্যেত, তদা রাগদ্বেষবান্
অপ্রমাণভূতো ভগবান্ কল্পিতঃ স্যাৎ । তচ্চায়ুক্তম্ । তস্মাৎ কয়াপি যুক্ত্যা
ন সমুচ্চয়ো জ্ঞানকর্মণোঃ ॥ যৎ অর্জুনেন উক্তং কর্মণো জ্যায়স্ত্বং
বুদ্ধেঃ, তচ্চ স্থিতম্, অনিরাকরণাৎ । তস্যাশ্চ জ্ঞাননিষ্ঠায়াঃ
সন্ন্যাসিনামেবানুষ্ঠেয়ৎবম্, ভিন্নপুরুষানুষ্ঠেয়ৎববচনাৎ । ভগবতঃ
এবমেব অনুমতমিতি গম্যতে ॥ “মাং চ বন্ধকারণে কর্মণ্যেব
নিয়োজয়সি” ইতি বিষণ্ণমনসমর্জুনং “কর্ম নারভে”
ইত্যেবং মন্বানমালক্ষ্য আহ ভগবান্ — ন কর্মণামনারম্ভাৎ ইতি ।
অথবা — জ্ঞানকর্মনিষ্ঠয়োঃ পরস্পরবিরোধাৎ একেন পুরুষেণ যুগপৎ
অনুষ্ঠাতুমশক্ত্যৎবে সতি ইতরেতরানপেক্ষয়োরেব পুরুষার্থহেতুৎবে
প্রাপ্তে কর্মনিষ্ঠায়া জ্ঞাননিষ্ঠাপ্রাপ্তিহেতুৎবেন পুরুষার্থহেতুৎবম্, ন
স্বাতন্ত্র্যেণ ; জ্ঞাননিষ্ঠা তু কর্মনিষ্ঠোপায়লব্ধাত্মিকা সতী স্বাতন্ত্র্যেণ
পুরুষার্থহেতুঃ অন্যানপেক্ষা, ইত্যেতমর্থং প্রদর্শয়িষ্যন্ আহ ভগবান্ —
ন কর্মণামনারম্ভান্নৈষ্কর্ম্যং পুরুষোঽশ্নুতে ।
ন চ সন্ন্যসনাদেব সিদ্ধিং সমধিগচ্ছতি ॥ ৩-৪॥
ন কর্মণাং ক্রিয়াণাং যজ্ঞাদীনাং ইহ জন্মনি জন্মান্তরে বা অনুষ্ঠিতানাম্
উপাত্তদুরিতক্ষয়হেতুৎবেন সত্ত্বশুদ্ধিকারণানাং তৎকারণৎবেন চ
জ্ঞানোৎপত্তিদ্বারেণ জ্ঞাননিষ্ঠাহেতূনাম্, “জ্ঞানমুৎপদ্যতে পুংসাং
ক্ষয়াৎপাপস্য কর্মণঃ । যথাদর্শতলপ্রখ্যে পশ্যত্যাত্মানমাত্মনি”
(মো. ধ. ২০৪-৮) ইত্যাদিস্মরণাৎ, অনারম্ভাৎ অননুষ্ঠানাৎ নৈষ্কর্ম্যং
নিষ্কর্মভাবং কর্মশূন্যতাং জ্ঞানয়োগেন নিষ্ঠাং নিষ্ক্রিয়াত্মস্বরূপেণৈব
অবস্থানমিতি যাবৎ । পুরুষঃ ন অশ্নুতে ন প্রাপ্নোতীত্যর্থঃ ॥
কর্মণামনারম্ভান্নৈষ্কর্ম্যং নাশ্নুতে ইতি বচনাৎ তদ্বিপর্যযাৎ
তেষামারম্ভাৎ নৈষ্কর্ম্যমশ্নুতে ইতি গম্যতে । কস্মাৎ পুনঃ কারণাৎ
কর্মণামনারম্ভান্নৈষ্কর্ম্যং নাশ্নুতে ইতি ? উচ্যতে, কর্মারম্ভস্যৈব
নৈষ্কর্ম্যোপায়ৎবাৎ । ন হ্যুপায়মন্তরেণ উপেয়প্রাপ্তিরস্তি । কর্ময়োগোপায়ৎবং
চ নৈষ্কর্ম্যলক্ষণস্য জ্ঞানয়োগস্য, শ্রুতৌ ইহ চ, প্রতিপাদনাৎ ।
শ্রুতৌ তাবৎ প্রকৃতস্য আত্মলোকস্য বেদ্যস্য বেদনোপায়ৎবেন “তমেতং
বেদানুবচনেন ব্রাহ্মণা বিবিদিষন্তি যজ্ঞেন” (বৃ. উ. ৪-৪-২২)
ইত্যাদিনা কর্ময়োগস্য জ্ঞানয়োগোপায়ৎবং প্রতিপাদিতম্ । ইহাপি চ —
“সন্ন্যাসস্তু মহাবাহো দুঃখমাপ্তুময়োগতঃ” (ভ. গী. ৫-৬)
“যোগিনঃ কর্ম কুর্বন্তি সঙ্গং ত্যক্ত্বাত্মশুদ্ধয়ে” (ভ. গী. ৫-১১)
“যজ্ঞো দানং তপশ্চৈব পাবনানি মনীষিণাম্” (ভ. গী. ১৮-৫)
ইত্যাদি প্রতিপাদয়িষ্যতি ॥ ননু চ ”অভয়ং সর্বভূতেভ্যো দত্ত্বা
নৈষ্কর্ম্যমাচরেৎ” (অশ্ব. ৪৬-১৮) ইত্যাদৌ কর্তব্যকর্মসন্ন্যাসাদপি
নৈষ্কর্ম্যপ্রাপ্তিং দর্শয়তি । লোকে চ কর্মণামনারম্ভান্নৈষ্কর্ম্যমিতি
প্রসিদ্ধতরম্ । অতশ্চ নৈষ্কর্ম্যার্থিনঃ কিং কর্মারম্ভেণ ? ইতি
প্রাপ্তম্ । অত আহ — ন চ সন্ন্যসনাদেবেতি । নাপি সন্ন্যসনাদেব
কেবলাৎ কর্মপরিত্যাগমাত্রাদেব জ্ঞানরহিতাৎ সিদ্ধিং নৈষ্কর্ম্যলক্ষণাং
জ্ঞানয়োগেন নিষ্ঠাং সমধিগচ্ছতি ন প্রাপ্নোতি ॥ কস্মাৎ পুনঃ কারণাৎ
কর্মসন্ন্যাসমাত্রাদেব কেবলাৎ জ্ঞানরহিতাৎ সিদ্ধিং নৈষ্কর্ম্যলক্ষণাং
পুরুষো নাধিগচ্ছতি ইতি হেৎবাকাঙ্ক্ষায়ামাহ —
ন হি কশ্চিৎক্ষণমপি জাতু তিষ্ঠত্যকর্মকৃৎ ।
কার্যতে হ্যবশঃ কর্ম সর্বঃ প্রকৃতিজৈর্গুণৈঃ ॥ ৩-৫॥
ন হি যস্মাৎ ক্ষণমপি কালং জাতু কদাচিৎ কশ্চিৎ তিষ্ঠতি অকর্মকৃৎ
সন্ । কস্মাৎ ? কার্যতে প্রবর্ত্যতে হি যস্মাৎ অবশ এব অস্বতন্ত্র এব কর্ম
সর্বঃ প্রাণী প্রকৃতিজৈঃ প্রকৃতিতো জাতৈঃ সত্ত্তবরজস্তমোভিঃ গুণৈঃ
অজ্ঞ ইতি বাক্যশেষঃ, যতো বক্ষ্যতি “গুণৈর্যো ন বিচাল্যতে”
(ভ. গী. ১৪-২৩) ইতি । সাঙ্খ্যানাং পৃথক্করণাৎ অজ্ঞানামেব হি কর্ময়োগঃ,
ন জ্ঞানিনাম্ । জ্ঞানিনাং তু গুণৈরচাল্যমানানাং স্বতশ্চলনাভাবাৎ কর্ময়োগো
নোপপদ্যতে । তথা চ ব্যাখ্যাতম্“বেদাবিনাশিনম্” (ভ. গী. ২-২১)
ইত্যত্র ॥ যত্ত্বনাত্মজ্ঞঃ চোদিতং কর্ম নারভতে ইতি তদসদেবেত্যাহ —
কর্মেন্দ্রিয়াণি সংয়ম্য য আস্তে মনসা স্মরন্ ।
ইন্দ্রিয়ার্থান্বিমূঢাত্মা মিথ্যাচারঃ স উচ্যতে ॥ ৩-৬॥
কর্মেন্দ্রিয়াণি হস্তাদীনি সংয়ম্য সংহৃত্য যঃ আস্তে তিষ্ঠতি মনসা স্মরন্
চিন্তয়ন্ ইন্দ্রিয়ার্থান্ বিষয়ান্ বিমূঢাত্মা বিমূঢান্তঃকরণঃ মিথ্যাচারো
মৃষাচারঃ পাপাচারঃ সঃ উচ্যতে ॥
যস্ত্বিন্দ্রিয়াণি মনসা নিয়ম্যারভতেঽর্জুন ।
কর্মেন্দ্রিয়ৈঃ কর্ময়োগমসক্তঃ স বিশিষ্যতে ॥ ৩-৭॥
যস্তু পুনঃ কর্মণ্যধিকৃতঃ অজ্ঞঃ বুদ্ধীন্দ্রিয়াণি মনসা নিয়ম্য আরভতে
অর্জুন কর্মেন্দ্রিয়ৈঃ বাক্পাণ্যাদিভিঃ । কিমারভতে ইত্যাহ — কর্ময়োগম্
অসক্তঃ সন্ ফলাভিসন্ধিবর্জিতঃ সঃ বিশিষ্যতে ইতরস্মাৎ মিথ্যাচারাৎ ॥
যতঃ এবং অতঃ —
নিয়তং কুরু কর্ম ৎবং কর্ম জ্যায়ো হ্যকর্মণঃ ।
শরীরয়াত্রাপি চ তে ন প্রসিধ্যেদকর্মণঃ ॥ ৩-৮॥
নিয়তং নিত্যং শাস্ত্রোপদিষ্টম্, যো যস্মিন্ কর্মণি অধিকৃতঃ ফলায় চ
অশ্রুতং তৎ নিয়তং কর্ম, তৎ কুরু ৎবং হে অর্জুন, যতঃ কর্ম জ্যায়ঃ
অদিকতরং ফলতঃ, হি যস্মাৎ অকর্মণঃ অকরণাৎ অনারম্ভাৎ । কথম্ ?
শরীরয়াত্রা শরীরস্থিতিঃ অপি চ তে তব ন প্রসিধ্যেৎ প্রসিদ্ধিং ন
গচ্ছেৎ অকর্মণঃ অকরণাৎ । অতঃ দৃষ্টঃ কর্মাকর্মণোর্বিশেষো লোকে ॥
যচ্চ মন্যসে বন্ধার্থৎবাৎ কর্ম ন কর্তব্যমিতি তদপ্যসৎ । কথং —
যজ্ঞার্থাৎকর্মণোঽন্যত্র লোকোঽয়ং কর্মবন্ধনঃ ।
তদর্থং কর্ম কৌন্তেয় মুক্তসঙ্গঃ সমাচর ॥ ৩-৯॥
“যজ্ঞো বৈ বিষ্ণুঃ” (তৈ. স. ১-৭-৪) ইতি শ্রুতেঃ যজ্ঞঃ
ঈশ্বরঃ, তদর্থং যৎ ক্রিয়তে তৎ যজ্ঞার্থং কর্ম । তস্মাৎ
কর্মণঃ অন্যত্র অন্যেন কর্মণা লোকঃ অয়ং অধিকৃতঃ কর্মকৃৎ
কর্মবন্ধনঃ কর্ম বন্ধনং যস্য সোঽয়ং কর্মবন্ধনঃ লোকঃ, ন
তু যজ্ঞার্থাৎ । অতঃ তদর্থং যজ্ঞার্থং কর্ম কৌন্তেয়,
মুক্তসঙ্গঃ কর্মফলসঙ্গবর্জিতঃ সন্ সমাচর নির্বর্তয় ॥
ইতশ্চ অধিকৃতেন কর্ম কর্তব্যং —
সহয়জ্ঞাঃ প্রজাঃ সৃষ্ট্বা পুরোবাচ প্রজাপতিঃ ।
অনেন প্রসবিষ্যধ্বমেষ বোঽস্ত্বিষ্টকামধুক্ ॥ ৩-১০॥
সহয়জ্ঞাঃ যজ্ঞসহিতাঃ প্রজাঃ ত্রয়ো বর্ণাঃ তাঃ সৃষ্ট্বা উৎপাদ্য পুরা
পূর্বং সর্গাদৌ উবাচ উক্তবান্ প্রজাপতিঃ প্রজানাং স্রষ্টা অনেন যজ্ঞেন
প্রসবিষ্যধ্বং প্রসবঃ বৃদ্ধিঃ উৎপত্তিঃ তং কুরুধ্বম্ । এষ যজ্ঞঃ বঃ
যুষ্মাকং অস্তু ভবতু ইষ্টকামধুক্ ইষ্টান্ অভিপ্রেতান্ কামান্ ফলবিশেষান্
দোগ্ধীতি ইষ্টকামধুক্ ॥ কথং —
দেবান্ভাবয়তানেন তে দেবা ভাবয়ন্তু বঃ ।
পরস্পরং ভাবয়ন্তঃ শ্রেয়ঃ পরমবাপ্স্যথ ॥ ৩-১১॥
দেবান্ ইন্দ্রাদীন্ ভাবয়ত বর্ধয়ত অনেন যজ্ঞেন । তে দেবা ভাবয়ন্তু
আপ্যায় যন্তু বৃষ্ট্যাদিনা বঃ যুষ্মান্ । এবং পরস্পরং অন্যোন্যং ভাবয়ন্তঃ
শ্রেয়ঃ পরং মোক্ষলক্ষণং জ্ঞানপ্রাপ্তিক্রমেণ অবাপ্স্যথ । স্বর্গং বা
পরং শ্রেয়ঃ অবাপ্স্যথ ॥ কিঞ্চ–
ইষ্টান্ভোগান্হি বো দেবা দাস্যন্তে যজ্ঞভাবিতাঃ ।
তৈর্দত্তানপ্রদায়ৈভ্যো যো ভুঙ্ক্তে স্তেন এব সঃ ॥ ৩-১২॥
ইষ্টান্ অভিপ্রেতান্ ভোগান্ হি বঃ যুষ্মভ্যং দেবাঃ দাস্যন্তে বিতরিষ্যন্তি
স্ত্রীপশুপুত্রাদীন্ যজ্ঞভাবিতাঃ যজ্ঞৈঃ বর্ধিতাঃ তোষিতাঃ ইত্যর্থঃ ।
তৈঃ দেবৈঃ দত্তান্ ভোগান্ অপ্রদায় অদত্ত্বা, আনৃণ্যমকৃৎবা ইত্যর্থঃ,
এভ্যঃ দেবেভ্যঃ, যঃ ভুঙ্ক্তে স্বদেহেন্দ্রিয়াণ্যেব তর্পয়তি স্তেন এব তস্কর
এব সঃ দেবাদিস্বাপহারী ॥ যে পুনঃ —
যজ্ঞশিষ্টাশিনঃ সন্তো মুচ্যন্তে সর্বকিল্বিষৈঃ ।
ভুঞ্জতে তে ৎবঘং পাপা যে পচন্ত্যাত্মকারণাৎ ॥ ৩-১৩॥
দেবয়জ্ঞাদীন্ নির্বর্ত্য তচ্ছিষ্টং অশনং অমৃতাখ্যং অশিতুং শীলং
যেষাং তে যজ্ঞশিষ্টাশিনঃ সন্তঃ মুচ্যন্তে সর্বকিল্বিষৈঃ সর্বপাপৈঃ
চুল্ল্যাদিপঞ্চসূনাকৃতৈঃ প্রমাদকৃতহিংসাদিজনিতৈশ্চ অন্যৈঃ । যে তু
আত্মম্ভরয়ঃ, ভুঞ্জতে তে তু অঘং পাপং স্বয়মপি পাপাঃ — যে পচন্তি
পাকং নির্বর্তয়ন্তি আত্মকারণাৎ আত্মহেতোঃ ॥
ইতশ্চ অধিকৃতেন কর্ম কর্তব্যং জগচ্চক্রপ্রবৃত্তিহেতুর্হি কর্ম ।
কথমিতি উচ্যতে —
অন্নাদ্ভবন্তি ভূতানি পর্জন্যাদন্নসম্ভবঃ ।
যজ্ঞাদ্ভবতি পর্জন্যো যজ্ঞঃ কর্মসমুদ্ভবঃ ॥ ৩-১৪॥
অন্নাৎ ভুক্তাৎ লোহিতরেতঃপরিণতাৎ প্রত্যক্ষং ভবন্তি জায়ন্তে ভূতানি
পর্জন্যাৎ বৃষ্টেঃ অন্নস্য সম্ভবঃ অন্নসম্ভবঃ । যজ্ঞাৎ ভবতি
পর্জন্যঃ, ”অগ্নৌ প্রাস্তাহুতিঃ সম্যগাদিত্যমুপতিষ্ঠতে । আদিত্যাজ্জায়তে
বৃষ্টির্বৃষ্টেরন্নং ততঃ প্রজাঃ” (মনু. ৩-৭৬) ইতি স্মৃতেঃ ।
যজ্ঞঃ অপূর্বম্ । স চ যজ্ঞঃ কর্মসমুদ্ভবঃ ঋৎবিগ্যজমানয়োশ্চ
ব্যাপারঃ কর্ম, তৎ সমুদ্ভবঃ যস্য যজ্ঞস্য অপূর্বস্য স যজ্ঞঃ
কর্মসমুদ্ভবঃ ॥ তচ্চৈবংবিধং কর্ম কুতো জাতমিত্যাহ —
কর্ম ব্রহ্মোদ্ভবং বিদ্ধি ব্রহ্মাক্ষরসমুদ্ভবম্ ।
তস্মাৎসর্বগতং ব্রহ্ম নিত্যং যজ্ঞে প্রতিষ্ঠিতম্ ॥ ৩-১৫॥
কর্ম ব্রহ্মোদ্ভবং ব্রহ্ম বেদঃ সঃ উদ্ভবঃ কারণং প্রকাশকো যস্য তৎ
কর্ম ব্রহ্মোদ্ভবং বিদ্ধি বিজানীহি । ব্রহ্ম পুনঃ বেদাখ্যং অক্ষরসমুদ্ভবম্
অক্ষরং ব্রহ্ম পরমাত্মা সমুদ্ভবো যস্য তৎ অক্ষরসমুদ্ভবম্ । ব্রহ্ম
বেদ ইত্যর্থঃ । যস্মাৎ সাক্ষাৎ পরমাত্মাখ্যাৎ অক্ষরাৎ পুরুষনিঃশ্বাসবৎ
সমুদ্ভূতং ব্রহ্ম তস্মাৎ সর্বার্থপ্রকাশকৎবাৎ সর্বগতম্ ; সর্বগতমপি
সৎ নিত্যং সদা যজ্ঞবিধিপ্রধানৎবাৎ যজ্ঞে প্রতিষ্ঠিতম্ ॥
এবং প্রবর্তিতং চক্রং নানুবর্তয়তীহ যঃ ।
অঘায়ুরিন্দ্রিয়ারামো মোঘং পার্থ স জীবতি ॥ ৩-১৬॥
এবং ইত্থং ঈশ্বরেণ বেদয়জ্ঞপূর্বকং জগচ্চক্রং প্রবর্তিতং ন
অনুবর্তয়তি ইহ লোকে যঃ কর্মণি অধিকৃতঃ সন্ অঘায়ুঃ অঘং পাপম্
আয়ুঃ জীবনং যস্য সঃ অঘায়ুঃ, পাপজীবনঃ ইতি যাবৎ । ইন্দ্রিয়ারামঃ
ইন্দ্রিয়ৈঃ আরামঃ আরমণং আক্রীডা বিষয়েষু যস্য সঃ ইন্দ্রিয়ারামঃ মোঘং
বৃথা হে পার্থ, স জীবতি ॥ তস্মাৎ অজ্ঞেন অধিকৃতেন কর্তব্যমেব
কর্মেতি প্রকরণার্থঃ । প্রাক্ আত্মজ্ঞাননিষ্ঠায়োগ্যতাপ্রাপ্তেঃ তাদর্থ্যেন
কর্ময়োগানুষ্ঠানং অধিকৃতেন অনাত্মজ্ঞেন কর্তব্যমেবেত্যেতৎ “ন
কর্মণামনারম্ভাৎ” (ভ. গী. ৩-৪) ইত্যত আরভ্য“শরীরয়াত্রাপি
চ তে ন প্রসিধ্যেদকর্মণঃ” (ভ. গী. ৩-৮) ইত্যেবমন্তেন প্রতিপাদ্য,
“যজ্ঞার্থাৎ কর্মণোঽন্যত্র” (ভ. গী. ৩-৯)ইত্যাদিনা “মোঘং
পার্থ স জীবতি” (ভ. গী. ৩-১৬) ইত্যেবমন্তেনাপি গ্রন্থেন প্রাসঙ্গিকম্
অধিকৃতস্য অনাত্মবিদঃ কর্মানুষ্ঠানে বহু কারণমুক্তম্ । তদকরণে
চ দোষসঙ্কীর্তনং কৃতম্ ॥ এবং স্থিতে কিমেবং প্রবর্তিতং চক্রং
সর্বেণানুবর্তনীয়ম্, আহোস্বিৎ পূর্বোক্তকর্ময়োগানুষ্ঠানোপায়প্রাপ্যাং অনাত্মবিদঃ
জ্ঞানয়োগেনৈব নিষ্ঠাং আত্মবিদ্ভিঃ সাঙ্খ্যৈঃ অনুষ্ঠেয়ামপ্রাপ্তেনৈব,
ইত্যেবমর্থং অর্জুনস্য প্রশ্নমাশঙ্ক্য স্বয়মেব বা শাস্ত্রার্থস্য
বিবেকপ্রতিপত্ত্যর্থং “এতং বৈ তমাত্মানং বিদিৎবা নিবৃত্তমিথ্যাজ্ঞানাঃ
সন্তঃ ব্রাহ্মণাঃ মিথ্যাজ্ঞানবদ্ভিঃ অবশ্যং কর্তব্যেভ্যঃ পুত্রৈষণাদিভ্যো
ব্যুত্থায়াথ ভিক্ষাচর্যং শরীরস্থিতিমাত্রপ্রয়ুক্তং চরন্তি ন
তেষামাত্মজ্ঞাননিষ্ঠাব্যতিরেকেণ অন্যৎ কার্যমস্তি” (বৃ. উ. ৩-৫-১)
ইত্যেবং শ্রুত্যর্থমিহ গীতাশাস্ত্রে প্রতিপিপাদয়িষিতমাবিষ্কুর্বন্ আহ
ভগবান্ —
যস্ত্বাত্মরতিরেব স্যাদাত্মতৃপ্তশ্চ মানবঃ ।
আত্মন্যেব চ সন্তুষ্টস্তস্য কার্যং ন বিদ্যতে ॥ ৩-১৭॥
যস্তু সাঙ্খ্যঃ আত্মজ্ঞাননিষ্ঠঃ আত্মরতিঃ আত্মন্যেব রতিঃ ন বিষয়েষু
যস্য সঃ আত্মরতিরেব স্যাৎ ভবেৎ আত্মতৃপ্তশ্চ আত্মনৈব তৃপ্তঃ
ন অন্নরসাদিনা সঃ মানবঃ মনুষ্যঃ সন্ন্যাসী আত্মন্যেব চ সন্তুষ্টঃ ।
সন্তোষো হি বাহ্যার্থলাভে সর্বস্য ভবতি, তমনপেক্ষ্য আত্মন্যেব চ
সন্তুষ্টঃ সর্বতো ব বীততৃষ্ণ ইত্যেতৎ । যঃ ঈদৃশঃ আত্মবিৎ তস্য
কার্যং করণীয়ং ন বিদ্যতে নাস্তি ইত্যর্থঃ ॥ কিঞ্চ —
নৈব তস্য কৃতেনার্থো নাকৃতেনেহ কশ্চন ।
ন চাস্য সর্বভূতেষু কশ্চিদর্থব্যপাশ্রয়ঃ ॥ ৩-১৮॥
নৈব তস্য পরমাত্মরতেঃ কৃতেন কর্মণা অর্থঃ প্রয়োজনমস্তি । অস্তু তর্হি
অকৃতেন অকরণেন প্রত্যবায়াখ্যঃ অনর্থঃ, ন অকৃতেন ইহ লোকে কশ্চন
কশ্চিদপি প্রত্যবায়প্রাপ্তিরূপঃ আত্মহানিলক্ষণো বা নৈব অস্তি । ন চ
অস্য সর্বভূতেষু ব্রহ্মাদিস্থাবরান্তেষু ভূতেষু কশ্চিৎ অর্থব্যপাশ্রয়ঃ
প্রয়োজননিমিত্তক্রিয়াসাধ্যঃ ব্যপাশ্রয়ঃ ব্যপাশ্রয়ণং আলম্বনং কঞ্চিৎ
ভূতবিশেষমাশ্রিত্য ন সাধ্যঃ কশ্চিদর্থঃ অস্তি, যেন তদর্থা ক্রিয়া
অনুষ্ঠেয়া স্যাৎ । ন ৎবং এতস্মিন্ সর্বতঃসম্প্লুতোদকস্থানীয়ে সম্যগ্দর্শনে
বর্তসে ॥
যতঃ এবং —
তস্মাদসক্তঃ সততং কার্যং কর্ম সমাচর ।
অসক্তো হ্যাচরন্কর্ম পরমাপ্নোতি পূরুষঃ ॥ ৩-১৯॥
তস্মাৎ অসক্তঃ সঙ্গবর্জিতঃ সততং সর্বদা কার্যং কর্তব্যং নিত্যং কর্ম
সমাচর নির্বর্তয় । অসক্তো হি যস্মাৎ সমাচরন্ ঈশ্বরার্থং কর্ম কুর্বন্
পরং মোক্ষং আপ্নোতি পূরুষঃ সত্ত্বশুদ্ধিদ্বারেণ ইত্যর্থঃ ॥ যস্মাচ্চ —
কর্মণৈব হি সংসিদ্ধিমাস্থিতা জনকাদয়ঃ ।
লোকসঙ্গ্রহমেবাপি সম্পশ্যন্কর্তুমর্হসি ॥ ৩-২০॥
কর্মণৈব হি যস্মাৎ পূর্বে ক্ষত্রিয়াঃ বিদ্বাংসঃ সংসিদ্ধিং মোক্ষং গন্তুম্
আস্থিতাঃ প্রবৃত্তাঃ । কে ? জনকাদয়ঃ জনকাশ্বপতিপ্রভৃতয়ঃ ।
যদি তে প্রাপ্তসম্যগ্দর্শনাঃ, ততঃ লোকসঙ্গ্রহার্থং প্রারব্ধকর্মৎবাৎ
কর্মণা সহৈব অসন্ন্যস্যৈব কর্ম সংসিদ্ধিমাস্থিতা ইত্যর্থঃ । অথ
অপ্রাপ্তসম্যগ্দর্শনাঃ জনকাদয়ঃ, তদা কর্মণা সত্ত্বশুদ্ধিসাধনভূতেন
ক্রমেণ সংসিদ্ধিমাস্থিতা ইতি ব্যাখ্যেয়ঃ শ্লোকঃ । অথ মন্যসে পূর্বৈরপি
জনকাদিভিঃ অজানদ্ভিরেব কর্তব্যং কর্ম কৃতম্ ; তাবতা নাবশ্যমন্যেন
কর্তব্যং সম্যগ্দর্শনবতা কৃতার্থেনেতি ; তথাপি প্রারব্ধকর্মায়ত্তঃ
ৎবং লোকসঙ্গ্রহং এব অপি লোকস্য উন্মার্গপ্রবৃত্তিনিবারণং লোকসঙ্গ্রহঃ
তমেবাপি প্রয়োজনং সম্পশ্যন্ কর্তুং অর্হসি ॥ লোকসঙ্গ্রহঃ কিমর্থং
কর্তব্য ইত্যুচ্যতে —
যদ্যদাচরতি শ্রেষ্ঠস্তত্তদেবেতরো জনঃ ।
স যৎপ্রমাণং কুরুতে লোকস্তদনুবর্ততে ॥ ৩-২১॥
যদ্যৎ কর্ম আচরতি করোতি শ্রেষ্ঠঃ প্রধানঃ তত্তদেব কর্ম আচরতি
ইতরঃ অন্যঃ জনঃ তদনুগতঃ । কিঞ্চ সঃ শ্রেষ্ঠঃ যৎ প্রমাণং কুরুতে
লৌকিকং বৈদিকং বা লোকঃ তৎ অনুবর্ততে তদেব প্রমাণীকরোতি ইত্যর্থঃ ॥
যদি অত্র তে লোকসঙ্গ্রহকর্তব্যতায়াং বিপ্রতিপত্তিঃ তর্হি মাং কিং ন
পশ্যসি ? —
ন মে পার্থাস্তি কর্তব্যং ত্রিষু লোকেষু কিঞ্চন ।
নানবাপ্তমবাপ্তব্যং বর্ত এব চ কর্মণি ॥ ৩-২২॥
ন মে মম পার্থ ন অস্তি ন বিদ্যতে কর্তব্যং ত্রিষু অপি লোকেষু কিঞ্চন
কিঞ্চিদপি । কস্মাৎ ? ন অনবাপ্তং অপ্রাপ্তং অবাপ্তব্যং প্রাপণীয়ম্, তথাপি
বর্তে এব চ কর্মণি অহম্ ॥
যদি হ্যহং ন বর্তেয় জাতু কর্মণ্যতন্দ্রিতঃ ।
মম বর্ত্মানুবর্তন্তে মনুষ্যাঃ পার্থ সর্বশঃ ॥ ৩-২৩॥
যদি হি পুনঃ অহং ন বর্তেয় জাতু কদাচিৎ কর্মণি অতন্দ্রিতঃ অনলসঃ
সন্ মম শ্রেষ্ঠস্য সতঃ বর্ত্ম মার্গং অনুবর্তন্তে মনুষ্যাঃ হে পার্থ,
সর্বশঃ সর্বপ্রকারৈঃ ॥
উৎসীদেয়ুরিমে লোকা ন কুর্যাং কর্ম চেদহম্ ।
সঙ্করস্য চ কর্তা স্যামুপহন্যামিমাঃ প্রজাঃ ॥ ৩-২৪॥
উৎসীদেয়ুঃ বিনশ্যেয়ুঃ ইমে সর্বে লোকাঃ লোকস্থিতিনিমিত্তস্য কর্মণঃ অভাবাৎ ন
কুর্যাং কর্ম চেৎ অহম্ । কিঞ্চ, সঙ্করস্য চ কর্তা স্যাম্ । তেন কারণেন
উপহন্যাং ইমাঃ প্রজাঃ । প্রজানামনুগ্রহায় প্রবৃত্তঃ উপহতিং উপহননং
কুর্যাৎ ইত্যর্থঃ । মম ঈশ্বরস্য অননুরূপমাপদ্যেত ॥ যদি পুনঃ অহমিব
ৎবং কৃতার্থবুদ্ধিঃ, আত্মবিৎ অন্যো বা, তস্যাপি আত্মনঃ কর্তব্যাভাবেঽপি
পরানুগ্রহ এব কর্তব্য ইত্যাহ —
সক্তাঃ কর্মণ্যবিদ্বাংসো যথা কুর্বন্তি ভারত ।
কুর্যাদ্বিদ্বাংস্তথাসক্তশ্চিকীর্ষুর্লোকসঙ্গ্রহম্ ॥ ৩-২৫॥
সক্তাঃ কর্মণি “অস্য কর্মণঃ ফলং মম ভবিষ্যতি” ইতি কেচিৎ
অবিদ্বাংসঃ যথা কুর্বন্তি ভারত, কুর্যাৎ বিদ্বান্ আত্মবিৎ তথা অসক্তঃ সন্
তদ্বৎ কিমর্থং করোতি ? তৎ শৃণু — চিকীর্ষুঃ কর্তুমিচ্ছুঃ
লোকসঙ্গ্রহম্ ॥ এবং লোকসঙ্গ্রহং চিকীর্ষোঃ ন মম আত্মবিদঃ
কর্তব্যমস্তি অন্যস্য বা লোকসঙ্গ্রহং মুক্ত্বা । ততঃ তস্য আত্মবিদঃ
ইদমুপদিশ্যতে —
ন বুদ্ধিভেদং জনয়েদজ্ঞানাং কর্মসঙ্গিনাম্ ।
জোষয়েৎসর্বকর্মাণি বিদ্বান্যুক্তঃ সমাচরন্ ॥ ৩-২৬॥
বুদ্ধের্ভেদঃ বুদ্ধিভেদঃ “ময়া ইদং কর্তব্যং ভোক্তব্যং চাস্য কর্মণঃ
ফলম্” ইতি নিশ্চয়রূপায়া বুদ্ধেঃ ভেদনং চালনং বুদ্ধিভেদঃ তং
ন জনয়েৎ ন উৎপাদয়েৎ অজ্ঞানাং অবিবেকিনাং কর্মসঙ্গিনাং কর্মণি আসক্তানাং
আসঙ্গবতাম্ । কিং নু কুর্যাৎ ? জোষয়েৎ কারয়েৎ সর্বকর্মাণি বিদ্বান্ স্বয়ং
তদেব অবিদুষাং কর্ম যুক্তঃ অভিয়ুক্তঃ সমাচরন্ ॥ অবিদ্বানজ্ঞঃ কথং
কর্মসু সজ্জতে ইত্যাহ —
প্রকৃতেঃ ক্রিয়মাণানি গুণৈঃ কর্মাণি সর্বশঃ ।
অহঙ্কারবিমূঢাত্মা কর্তাহমিতি মন্যতে ॥ ৩-২৭॥
প্রকৃতেঃ প্রকৃতিঃ প্রধানং সত্ত্বরজস্তমসাং গুণানাং সাম্যাবস্থা
তস্যাঃ প্রকৃতেঃ গুণৈঃ বিকারৈঃ কার্যকরণরূপৈঃ ক্রিয়মাণানি কর্মাণি
লৌকিকানি শাস্ত্রীয়াণি চ সর্বশঃ সর্বপ্রকারৈঃ অহঙ্কারবিমূঢাত্মা
কার্যকরণসঙ্ঘাতাত্মপ্রত্যযঃ অহঙ্কারঃ তেন বিবিধং নানাবিধং মূঢঃ
আত্মা অন্তঃকরণং যস্য সঃ অয়ং কার্যকরণধর্মা কার্যকরণাভিমানী
অবিদ্যযা কর্মাণি আত্মনি মন্যমানঃ তত্তৎকর্মণাং অহং কর্তা ইতি মন্যতে ॥
যঃ পুনর্বিদ্বান্ —
তত্ত্ববিত্তু মহাবাহো গুণকর্মবিভাগয়োঃ ।
গুণা গুণেষু বর্তন্ত ইতি মৎবা ন সজ্জতে ॥ ৩-২৮॥
তত্ত্ববিৎ তু মহাবাহো । কস্য তত্ত্ববিৎ ? গুণকর্মবিভাগয়োঃ গুণবিভাগস্য
কর্মবিভাগস্য চ তত্ত্ববিৎ ইত্যর্থঃ । গুণাঃ করণাত্মকাঃ গুণেষু
বিষয়াত্মকেষু বর্তন্তে ন আত্মা ইতি মৎবা ন সজ্জতে সক্তিং ন করোতি ॥
যে পুনঃ —
প্রকৃতের্গুণসম্মূঢাঃ সজ্জন্তে গুণকর্মসু ।
তানকৃৎস্নবিদো মন্দান্কৃৎস্নবিন্ন বিচালয়েৎ ॥ ৩-২৯॥
প্রকৃতেঃ গুণৈঃ সম্যক্ মূঢাঃ সম্মোহিতাঃ সন্তঃ সজ্জন্তে গুণানাং কর্মসু
গুণকর্মসু “বয়ং কর্ম কুর্মঃ ফলায়” ইতি তান্ কর্মসঙ্গিনঃ
অকৃৎস্নবিদঃ কর্মফলমাত্রদর্শিনঃ মন্দান্ মন্দপ্রজ্ঞান্ কৃৎস্নবিৎ
আত্মবিৎ স্বয়ং ন বিচালয়েৎ বুদ্ধিভেদকরণমেব চালনং তৎ ন কুর্যাৎ
ইত্যর্থঃ ॥ কথং পুনঃ কর্মণ্যধিকৃতেন অজ্ঞেন মুমুক্ষুণা কর্ম
কর্তব্যমিতি, উচ্যতে —
ময়ি সর্বাণি কর্মাণি সন্ন্যস্যাধ্যাত্মচেতসা ।
নিরাশীর্নির্মমো ভূৎবা যুধ্যস্ব বিগতজ্বরঃ ॥ ৩-৩০॥
ময়ি বাসুদেবে পরমেশ্বরে সর্বজ্ঞে সর্বাত্মনি সর্বাণি কর্মাণি সন্ন্যস্য
নিক্ষিপ্য অধ্যাত্মচেতসা বিবেকবুদ্ধ্যা “অহং কর্তা ঈশ্বরায়
ভৃত্যবৎ করোমি” ইত্যনয়া বুদ্ধ্যা । কিঞ্চ, নিরাশীঃ ত্যক্তাশীঃ
নির্মমঃ মমভাবশ্চ নির্গতঃ যস্য তব স ৎবং নির্মমো ভূৎবা যুধ্যস্ব
বিগতজ্বরঃ বিগতসন্তাপঃ বিগতশোকঃ সন্নিত্যর্থঃ ॥ যদেতন্মম মতং
কর্ম কর্তব্যং ইতি সপ্রমাণমুক্তং তৎ তথা —
যে মে মতমিদং নিত্যমনুতিষ্ঠন্তি মানবাঃ ।
শ্রদ্ধাবন্তোঽনসূয়ন্তো মুচ্যন্তে তেঽপি কর্মভিঃ ॥ ৩-৩১॥
যে মে মদীয়ং ইদং মতং নিত্যং অনুতিষ্ঠন্তি অনুবর্তন্তে মানবাঃ মনুষ্যাঃ
শ্রদ্ধাবন্তঃ শ্রদ্দধানাঃ অনসূয়ন্তঃ অসূয়াং চ ময়ি পরমগুরৌ বাসুদেবে
অকুর্বন্তঃ, মুচ্যন্তে তেঽপি এবং ভূতাঃ কর্মভিঃ ধর্মাধর্মাখ্যৈঃ ॥
যে ৎবেতদভ্যসূয়ন্তো নানুতিষ্ঠন্তি মে মতম্ ।
সর্বজ্ঞানবিমূঢাংস্তান্বিদ্ধি নষ্টানচেতসঃ ॥ ৩-৩২॥
যে তু তদ্বিপরীতাঃ এতৎ মম মতং অভ্যসূয়ন্তঃ নিন্দন্তঃ ন
অনুতিষ্ঠন্তি নানুবর্তন্তে মে মতম্, সর্বেষু জ্ঞানেষু বিবিধং মূঢাঃ
তে । সর্বজ্ঞানবিমূঢান্ তান্ বিদ্ধি জানীহি নষ্টান্ নাশং গতান্ অচেতসঃ
অবিবেকিনঃ ॥ কস্মাৎ পুনঃ কারণাৎ ৎবদীয়ং মতং নানুতিষ্ঠন্তি, পরধর্মান্
অনুতিষ্ঠন্তি, স্বধর্মং চ নানুবর্তন্তে, ৎবৎপ্রতিকূলাঃ কথং ন বিভ্যতি
ৎবচ্ছাসনাতিক্রমদোষাৎ ? তত্রাহ —
সদৃশং চেষ্টতে স্বস্যাঃ প্রকৃতের্জ্ঞানবানপি ।
প্রকৃতিং যান্তি ভূতানি নিগ্রহঃ কিং করিষ্যতি ॥ ৩-৩৩॥
সদৃশং অনুরূপং চেষ্টতে চেষ্টাং করোতি কস্য ? স্বস্যাঃ
স্বকীয়ায়াঃ প্রকৃতেঃ । প্রকৃতির্নাম পূর্বকৃতধর্মাধর্মাদিসংস্কারঃ
বর্তমানজন্মাদৌ অভিব্যক্তঃ ; সা প্রকৃতিঃ । তস্যাঃ সদৃশমেব সর্বো
জন্তুঃ জ্ঞানবানপি চেষ্টতে, কিং পুনর্মূর্খঃ । তস্মাৎ প্রকৃতিং যান্তি
অনুগচ্ছন্তি ভূতানি প্রাণিনঃ । নিগ্রহঃ নিষেধরূপঃ কিং করিষ্যতি মম
বা অন্যস্য বা ॥ যদি সর্বো জন্তুঃ আত্মনঃ প্রকৃতিসদৃশমেব চেষ্টতে,
ন চ প্রকৃতিশূন্যঃ কশ্চিৎ অস্তি, ততঃ পুরুষকারস্য বিষয়ানুপপত্তেঃ
শাস্ত্রানর্থক্যপ্রাপ্তৌ ইদমুচ্যতে —
ইন্দ্রিয়স্যেন্দ্রিয়স্যার্থে রাগদ্বেষৌ ব্যবস্থিতৌ ।
তয়োর্ন বশমাগচ্ছেত্তৌ হ্যস্য পরিপন্থিনৌ ॥ ৩-৩৪॥
ইন্দ্রিয়স্যেন্দ্রিয়স্য অর্থে সর্বেন্দ্রিয়াণামর্থে শব্দাদিবিষয়ে ইষ্টে রাগঃ
অনিষ্টে দ্বেষঃ ইত্যেবং প্রতীন্দ্রিয়ার্থং রাগদ্বেষৌ অবশ্যম্ভাবিনৌ
তত্র অয়ং পুরুষকারস্য শাস্ত্রার্থস্য চ বিষয় উচ্যতে । শাস্ত্রার্থে
প্রবৃত্তঃ পূর্বমেব রাগদ্বেষয়োর্বশং নাগচ্ছেৎ । যা হি পুরুষস্য
প্রকৃতিঃ সা রাগদ্বেষপুরঃসরৈব স্বকার্যে পুরুষং প্রবর্তয়তি । তদা
স্বধর্মপরিত্যাগঃ পরধর্মানুষ্ঠানং চ ভবতি । যদা পুনঃ রাগদ্বেষৌ
তৎপ্রতিপক্ষেণ নিয়ময়তি তদা শাস্ত্রদৃষ্টিরেব পুরুষঃ ভবতি, ন
প্রকৃতিবশঃ । তস্মাৎ তয়োঃ রাগদ্বেষয়োঃ বশং ন আগচ্ছেৎ, যতঃ তৌ
হি অস্য পুরুষস্য পরিপন্থিনৌ শ্রেয়োমার্গস্য বিঘ্নকর্তারৌ তস্করৌ ইব
পথীত্যর্থঃ ॥ তত্র রাগদ্বেষপ্রয়ুক্তো মন্যতে শাস্ত্রার্থমপ্যন্যথা
“পরধর্মোঽপি ধর্মৎবাৎ অনুষ্ঠেয় এব” ইতি, তদসৎ —
শ্রেয়ান্স্বধর্মো বিগুণঃ পরধর্মাৎস্বনুষ্ঠিতাৎ ।
স্বধর্মে নিধনং শ্রেয়ঃ পরধর্মো ভয়াবহঃ ॥ ৩-৩৫॥
শ্রেয়ান্ প্রশস্যতরঃ স্বো ধর্মঃ স্বধর্মঃ বিগুণঃ অপি বিগতগুণোঽপি
অনুষ্ঠীয়মানঃ পরধর্মাৎ স্বনুষ্ঠিতাৎ সাদ্গুণ্যেন সম্পাদিতাদপি ।
স্বধর্মে স্থিতস্য নিধনং মরণমপি শ্রেয়ঃ পরধর্মে স্থিতস্য জীবিতাৎ
কস্মাৎ ? পরধর্মঃ ভয়াবহঃ নরকাদিলক্ষণং ভয়মাবহতি যতঃ ॥
যদ্যপি অনর্থমূলং “ধ্যায়তো বিষয়ান্পুংসঃ” (ভ. গী. ২-৬২)
ইতি “রাগদ্বেষৌ হ্যস্য পরিপন্থিনৌ” (ভ. গী. ৩-৩৪)ইতি চ
উক্তম্, বিক্ষিপ্তং অনবধারিতং চ তদুক্তম্ । তৎ সঙ্ক্ষিপ্তং নিশ্চিতং চ
ইদমেবেতি জ্ঞাতুমিচ্ছন্ অর্জুনঃ উবাচ “জ্ঞাতে হি তস্মিন্ তদুচ্ছেদায়
যত্নং কুর্যাম্” ইতি ॥
অর্জুন উবাচ —
অথ কেন প্রয়ুক্তোঽয়ং পাপং চরতি পূরুষঃ ।
অনিচ্ছন্নপি বার্ষ্ণেয় বলাদিব নিয়োজিতঃ ॥ ৩-৩৬॥
অথ কেন হেতুভূতেন প্রয়ুক্তঃ সন্ রাজ্ঞেব ভৃত্যঃ অয়ং পাপং কর্ম
চরতি আচরতি পূরুষঃ পুরুষঃ স্বয়ং অনিচ্ছন্ অপি হে বার্ষ্ণেয়
বৃষ্ণিকুলপ্রসূত, বলাৎ ইব নিয়োজিতঃ রাজ্ঞেব ইত্যুক্তো দৃষ্টান্তঃ ॥
শৃণু ৎবং তং বৈরিণং সর্বানর্থকরং যং ৎবং পৃচ্ছসি ইতি ভগবান্
উবাচ —
শ্রীভগবানুবাচ —
কাম এষ ক্রোধ এষ রজোগুণসমুদ্ভবঃ ।
মহাশনো মহাপাপ্মা বিদ্ধ্যেনমিহ বৈরিণম্ ॥ ৩-৩৭॥
“ঐশ্বর্যস্য সমগ্রস্য ধর্মস্য যশসঃ শ্রিয়ঃ । বৈরাগ্যস্যাথ
মোক্ষস্য ষণ্ণাং ভগ ইতীঙ্গনা” (বি. পু. ৬-৫-৭৪)ঐশ্বর্যাদিষট্কং
যস্মিন্ বাসুদেবে নিত্যমপ্রতিবদ্ধৎবেন সামস্ত্যেন চ বর্ততে, ”উৎপত্তিং
প্রলয়ং চৈব ভূতানামাগতিং গতিম্ । বেত্তি বিদ্যামবিদ্যাং চ স বাচ্যো
ভগবানিতি” (বি. পু. ৬-৫- ৭৮) উৎপত্ত্যাদিবিষয়ং চ বিজ্ঞানং যস্য
স বাসুদেবঃ বাচ্যঃ ভগবান্ ইতি ॥ কাম এষঃ সর্বলোকশত্রুঃ যন্নিমিত্তা
সর্বানর্থপ্রাপ্তিঃ প্রাণিনাম্ । স এষ কামঃ প্রতিহতঃ কেনচিৎ ক্রোধৎবেন
পরিণমতে । অতঃ ক্রোধঃ অপি এষ এব রজোগুণসমুদ্ভবঃ রজশ্চ তৎ
গুণশ্চ রজোগুণঃ সঃ সমুদ্ভবঃ যস্য সঃ কামঃ রজোগুণসমুদ্ভবঃ,
রজোগুণস্য বা সমুদ্ভবঃ । কামো হি উদ্ভূতঃ রজঃ প্রবর্তয়ন্ পুরুষং
প্রবর্তয়তি ; “তৃষ্ণয়া হি অহং কারিতঃ” ইতি দুঃখিনাং রজঃকার্যে
সেবাদৌ প্রবৃত্তানাং প্রলাপঃ শ্রূয়তে । মহাশনঃ মহৎ অশনং অস্যেতি
মহাশনঃ ; অত এব মহাপাপ্মা ; কামেন হি প্রেরিতঃ জন্তুঃ পাপং করোতি ।
অতঃ বিদ্ধি এনং কামং ইহ সংসারে বৈরিণম্ ॥
কথং বৈরী ইতি দৃষ্টান্তৈঃ প্রত্যায়যতি —
ধূমেনাব্রিয়তে বহ্নির্যথাদর্শো মলেন চ ।
যথোল্বেনাবৃতো গর্ভস্তথা তেনেদমাবৃতম্ ॥ ৩-৩৮॥
ধূমেন সহজেন আব্রিয়তে বহ্নিঃ প্রকাশাত্মকঃ অপ্রকাশাত্মকেন, যথা
বা আদর্শো মলেন চ, যথা উল্বেন চ জরায়ুণা গর্ভবেষ্টনেন আবৃতঃ
আচ্ছাদিতঃ গর্ভঃ তথা তেন ইদং আবৃতম্ ॥ কিং পুনস্তৎ ইদংশব্দবাচ্যং
যৎ কামেনাবৃতমিত্যুচ্যতে —
আবৃতং জ্ঞানমেতেন জ্ঞানিনো নিত্যবৈরিণা ।
কামরূপেণ কৌন্তেয় দুষ্পূরেণানলেন চ ॥ ৩-৩৯॥
আবৃতং এতেন জ্ঞানং জ্ঞানিনঃ নিত্যবৈরিণা, জ্ঞানী হি জানাতি “অনেন
অহমনর্থে প্রয়ুক্তঃ” ইতি পূর্বমেব । দুঃখী চ ভবতী নিত্যমেব ।
অতঃ অসৌ জ্ঞানিনো নিত্যবৈরী, ন তু মূর্খস্য । স হি কামং তৃষ্ণাকালে
মিত্রমিব পশ্যন্ তৎকার্যে দুঃখে প্রাপ্তে জানাতি “তৃষ্ণয়া অহং
দুঃখিৎবমাপাদিতঃ” ইতি, ন পূর্বমেব । অতঃ জ্ঞানিন এব নিত্যবৈরী ।
কিংরূপেণ ? কামরূপেণ কামঃ ইচ্ছৈব রূপমস্য ইতি কামরূপঃ তেন দুষ্পূরেণ
দুঃখেন পূরণমস্য ইতি দুষ্পূরঃ তেন অনলেন ন অস্য অলং পর্যাপ্তিঃ বিদ্যতে
ইত্যনলঃ তেন চ ॥ কিমধিষ্ঠানঃ পুনঃ কামঃ জ্ঞানস্য আবরণৎবেন
বৈরী সর্বস্য লোকস্য ? ইত্যপেক্ষায়ামাহ, জ্ঞাতে হি শত্রোরধিষ্ঠানে
সুখেন নিবর্হণং কর্তুং শক্যত ইতি —
ইন্দ্রিয়াণি মনো বুদ্ধিরস্যাধিষ্ঠানমুচ্যতে ।
এতৈর্বিমোহয়ত্যেষ জ্ঞানমাবৃত্য দেহিনম্ ॥ ৩-৪০॥
ইন্দ্রিয়াণি মনঃ বুদ্ধিশ্চ অস্য কামস্য অধিষ্ঠানং আশ্রয়ঃ উচ্যতে ।
এতৈঃ ইন্দ্রিয়াদিভিঃ আশ্রয়ৈঃ বিমোহয়তি বিবিধং মোহয়তি এষ কামঃ জ্ঞানম্
আবৃত্য আচ্ছাদ্য দেহিনং শরীরিণম্ ॥ যতঃ এবং —
তস্মাত্ত্বমিন্দ্রিয়াণ্যাদৌ নিয়ম্য ভরতর্ষভ ।
পাপ্মানং প্রজহিহ্যেনং জ্ঞানবিজ্ঞাননাশনম্ ॥ ৩-৪১॥
তস্মাৎ ৎবং ইন্দ্রিয়াণি আদৌ পূর্বমেব নিয়ম্য বশীকৃত্য ভরতর্ষভ
পাপ্মানং পাপাচারং কামং প্রজহিহি পরিত্যজ এবং প্রকৃতং
বৈরিণং জ্ঞানবিজ্ঞাননাশনং জ্ঞানং শাস্ত্রতঃ আচার্যতশ্চ
আত্মাদীনাং অববোধঃ, বিজ্ঞানং বিশেষতঃ তদনুভবঃ, তয়োঃ
জ্ঞানবিজ্ঞানয়োঃ শ্রেয়ঃপ্রাপ্তিহেৎবোঃ নাশনং নাশকরং প্রজহিহি
আত্মনঃ পরিত্যজেত্যর্থঃ ॥ ইন্দ্রিয়াণ্যাদৌ নিয়ম্য কামং শত্রুং জহিহি
ইত্যুক্তম্ ; তত্র কিমাশ্রয়ঃ কামং জহ্যাৎ ইত্যুচ্যতে —
ইন্দ্রিয়াণি পরাণ্যাহুরিন্দ্রিয়েভ্যঃ পরং মনঃ ।
মনসস্তু পরা বুদ্ধির্যো বুদ্ধেঃ পরতস্তু সঃ ॥ ৩-৪২॥
ইন্দ্রিয়াণি শ্রোত্রাদীনি পঞ্চ দেহং স্থূলং বাহ্যং পরিচ্ছিন্নং চ অপেক্ষ্য
সৌক্ষ্ম্যান্তরৎবব্যাপিৎবাদ্যপেক্ষয়া পরাণি প্রকৃষ্টানি আহুঃ পণ্ডিতাঃ । তথা
ইন্দ্রিয়েভ্যঃ পরং মনঃ সঙ্কল্পবিকল্পাত্মকম্ । তথা মনসঃ তু পরা বুদ্ধিঃ
নিশ্চয়াত্মিকা । তথা যঃ সর্বদৃশ্যেভ্যঃ বুদ্ধ্যন্তেভ্যঃ আভ্যন্তরঃ,
যং দেহিনং ইন্দ্রিয়াদিভিঃ আশ্রয়ৈঃ যুক্তঃ কামঃ জ্ঞানাবরণদ্বারেণ মোহয়তি
ইত্যুক্তম্ । বুদ্ধেঃ পরতস্তু সঃ, সঃ বুদ্ধেঃ দ্রষ্টা পর আত্মা ॥ ততঃ
কিং —
এবং বুদ্ধেঃ পরং বুদ্ধ্বা সংস্তভ্যাত্মানমাত্মনা ।
জহি শত্রুং মহাবাহো কামরূপং দুরাসদম্ ॥ ৩-৪৩॥
এবং বুদ্ধেঃ পরং আত্মানং বুদ্ধ্বা জ্ঞাৎবা সংস্তভ্য সম্যক্ স্তম্ভনং
কৃৎবা আত্মানং স্বেনৈব আত্মনা সংস্কৃতেন মনসা সম্যক্ সমাধায়েত্যর্থঃ ।
জহি এনং শত্রুং হে মহাবাহো কামরূপং দুরাসদং দুঃখেন আসদঃ আসাদনং
প্রাপ্তিঃ যস্য তং দুরাসদং দুর্বিজ্ঞেয়ানেকবিশেষমিতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে কর্ময়োগো নাম ত্র়্^তীয়োঽধ্যায়ঃ ॥৩॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে কর্ম-প্রশংসা-যোগঃ নাম তৃতীয়ঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ চতুর্থোঽধ্যায়ঃ ॥
যোঽয়ং যোগঃ অধ্যায়দ্বয়েনোক্তঃ জ্ঞাননিষ্ঠালক্ষণঃ, সসন্ন্যাসঃ
কর্ময়োগোপায়ঃ, যস্মিন্ বেদার্থঃ পরিসমাপ্তঃ, প্রবৃত্তিলক্ষণঃ
নিবৃত্তিলক্ষণশ্চ, গীতাসু চ সর্বাসু অয়মেব যোগো বিবক্ষিতো
ভগবতা । অতঃ পরিসমাপ্তং বেদার্থং মন্বানঃ তং বংশকথনেন
স্তৌতি শ্রীভগবান্ —
শ্রীভগবানুবাচ —
ইমং বিবস্বতে যোগং প্রোক্তবানহমব্যযম্ ।
বিবস্বান্মনবে প্রাহ মনুরিক্ষ্বাকবেঽব্রবীৎ ॥ ৪-১॥
ইমং অধ্যায়দ্বয়েনোক্তং যোগং বিবস্বতে আদিত্যায় সর্গাদৌ প্রোক্তবান্
অহং জগৎপরিপালয়িতৄণাং ক্ষত্রিয়াণাং বলাধানায় তেন যোগবলেন
যুক্তাঃ সমর্থা ভবন্তি ব্রহ্ম পরিরক্ষিতুম্ । ব্রহ্মক্ষত্রে পরিপালিতে
জগৎ পরিপালয়িতুমলম্ । অব্যযং অব্যযফলৎবাৎ । ন হ্যস্য যোগস্য
সম্যগ্দর্শননিষ্ঠালক্ষণস্য মোক্ষাখ্যং ফলং ব্যেতি । স চ বিবস্বান্
মনবে প্রাহ । মনুঃ ইক্ষ্বাকবে স্বপুত্রায় আদিরাজায় অব্রবীৎ ॥
এবং পরম্পরাপ্রাপ্তমিমং রাজর্ষয়ো বিদুঃ ।
স কালেনেহ মহতা যোগো নষ্টঃ পরন্তপ ॥ ৪-২॥
এবং ক্ষত্রিয়পরম্পরাপ্রাপ্তং ইমং রাজর্ষয়ঃ রাজানশ্চ তে ঋষয়শ্চ
রাজর্ষয়ঃ বিদুঃ ইমং যোগম্ । স যোগঃ কালেন ইহ মহতা দীর্ঘণ নষ্টঃ
বিচ্ছিন্নসম্প্রদায়ঃ সংবৃত্তঃ । হে পরন্তপ, আত্মনঃ বিপক্ষভূতাঃ
পরা ইতি উচ্যন্তে, তান্ শৌর্যতেজোগভস্তিভিঃ ভানুরিব তাপয়তীতি
পরন্তপঃ শত্রুতাপন ইত্যর্থঃ ॥ দুর্বলানজিতেন্দ্রিয়ান্ প্রাপ্য নষ্টং
যোগমিমমুপলভ্য লোকং চ অপুরুষার্থসম্বন্ধিনং —
স এবায়ং ময়া তেঽদ্য যোগঃ প্রোক্তঃ পুরাতনঃ ।
ভক্তোঽসি মে সখা চেতি রহস্যং হ্যেতদুত্তমম্ ॥ ৪-৩॥
স এব অয়ং ময়া তে তুভ্যং অদ্য ইদানীং যোগঃ প্রোক্তঃ পুরাতনঃ ভক্তঃ অসি মে
সখা চ অসি ইতি । রহস্যং হি যস্মাৎ এতৎ উত্তমং যোগঃ জ্ঞানং ইত্যর্থঃ ॥
ভগবতা বিপ্রতিষিদ্ধমুক্তমিতি মা ভূৎ কস্যচিৎ বুদ্ধিঃ ইতি পরিহারার্থং
চোদ্যমিব কুর্বন্ অর্জুন উবাচ —
অর্জুন উবাচ —
অপরং ভবতো জন্ম পরং জন্ম বিবস্বতঃ ।
কথমেতদ্বিজানীয়াং ৎবমাদৌ প্রোক্তবানিতি ॥ ৪-৪॥
অপরং অর্বাক্ বসুদেবগৃহে ভবতো জন্ম । পরং পূর্বং সর্গাদৌ জন্ম
উৎপত্তিঃ বিবস্বতঃ আদিত্যস্য । তৎ কথং এতৎ বিজানীয়াং অবিরুদ্ধার্থতয়া,
যঃ ৎবমেব আদৌ প্রোক্তবান্ ইমং যোগং স এব ইদানীং মহ্যং প্রোক্তবানসি
ইতি ॥ যা বাসুদেবে অনীশ্বরাসর্বজ্ঞাশঙ্কা মূর্খাণাম্, তাং পরিহরন্
শ্রীভগবানুবাচ, যদর্থো হ্যর্জুনস্য প্রশ্নঃ —
শ্রীভগবানুবাচ —
বহূনি মে ব্যতীতানি জন্মানি তব চার্জুন ।
তান্যহং বেদ সর্বাণি ন ৎবং বেত্থ পরন্তপ ॥ ৪-৫॥
বহূনি মে মম ব্যতীতানি অতিক্রান্তানি জন্মানি তব চ
হে অর্জুন । তানি অহং বেদ জানে সর্বাণি ন ৎবং বেত্থ ন
জানীষে, ধর্মাধর্মাদিপ্রতিবদ্ধজ্ঞানশক্তিৎবাৎ । অহং পুনঃ
নিত্যশুদ্ধবুদ্ধমুক্তস্বভাবৎবাৎ অনাবরণজ্ঞানশক্তিরিতি বেদ অহং হে
পরন্তপ ॥ কথং তর্হি তব নিত্যেশ্বরস্য ধর্মাধর্মাভাবেঽপি জন্ম ইতি,
উচ্যতে —
অজোঽপি সন্নব্যযাত্মা ভূতানামীশ্বরোঽপি সন্ ।
প্রকৃতিং স্বামধিষ্ঠায় সম্ভবাম্যাত্মমায়যা ॥ ৪-৬॥
অজোঽপি জন্মরহিতোঽপি সন্, তথা অব্যযাত্মা অক্ষীণজ্ঞানশক্তিস্বভাবোঽপি
সন্, তথা ভূতানাং ব্রহ্মাদিস্তম্বপর্যন্তানাং ঈশ্বরঃ ঈশনশীলোঽপি সন্,
প্রকৃতিং স্বাং মম বৈষ্ণবীং মায়াং ত্রিগুণাত্মিকাম্, যস্যা বশে সর্বং জগৎ
বর্ততে, যয়া মোহিতং সৎ স্বমাত্মানং বাসুদেবং ন জানাতি, তাং প্রকৃতিং স্বাম্
অধিষ্ঠায় বশীকৃত্য সম্ভবামি দেহবানিব ভবামি জাত ইব আত্মমায়যা
আত্মনঃ মায়যা, ন পরমার্থতো লোকবৎ ॥
তচ্চ জন্ম কদা কিমর্থং চ ইত্যুচ্যতে —
যদা যদা হি ধর্মস্য গ্লানির্ভবতি ভারত ।
অভ্যুত্থানমধর্মস্য তদাত্মানং সৃজাম্যহম্ ॥ ৪-৭॥
যদা যদা হি ধর্মস্য গ্লানিঃ হানিঃ বর্ণাশ্রমাদিলক্ষণস্য
প্রাণিনামভ্যুদয়নিঃশ্রেয়সসাধনস্য ভবতি ভারত, অভ্যুত্থানং উদ্ভবঃ
অধর্মস্য, তদা তদা আত্মানং সৃজামি অহং মায়যা ॥ কিমর্থম্ ? —
পরিত্রাণায় সাধূনাং বিনাশায় চ দুষ্কৃতাম্ ।
ধর্মসংস্থাপনার্থায় সম্ভবামি যুগে যুগে ॥ ৪-৮॥
পরিত্রাণায় পরিরক্ষণায় সাধূনাং সন্মার্গস্থানাম্, বিনাশায় চ দুষ্কৃতাং
পাপকারিণাম্, কিঞ্চ ধর্মসংস্থাপনার্থায় ধর্মস্য সম্যক্ স্থাপনং
তদর্থং সম্ভবামি যুগে যুগে প্রতিয়ুগম্ ॥ তৎ —
জন্ম কর্ম চ মে দিব্যমেবং যো বেত্তি তত্ত্বতঃ ।
ত্যক্ত্বা দেহং পুনর্জন্ম নৈতি মামেতি সোঽর্জুন ॥ ৪-৯॥
জন্ম মায়ারূপং কর্ম চ সাধূনাং পরিত্রাণাদি মে মম দিব্যং অপ্রাকৃতম্
ঐশ্বরং এবং যথোক্তং যঃ বেত্তি তত্ত্বতঃ তত্ত্বেন যথাবৎ ত্যক্ত্বা দেহম্
ইমং পুনর্জন্ম পুনরুৎপত্তিং ন এতি ন প্রাপ্নোতি । মাং এতি আগচ্ছতি সঃ
মুচ্যতে হে অর্জুন ॥ নৈষ মোক্ষমার্গ ইদানীং প্রবৃত্তঃ ; কিং তর্হি ?
পূর্বমপি —
বীতরাগভয়ক্রোধা মন্ময়া মামুপাশ্রিতাঃ ।
বহবো জ্ঞানতপসা পূতা মদ্ভাবমাগতাঃ ॥ ৪-১০॥
বীতরাগভয়ক্রোধাঃ রাগশ্চ ভয়ং চ ক্রোধশ্চ বীতাঃ বিগতাঃ যেভ্যঃ
তে বীতরাগভয়ক্রোধাঃ মন্ময়াঃ ব্রহ্মবিদঃ ঈশ্বরাভেদদর্শিনঃ মামেব
চ পরমেশ্বরং উপাশ্রিতাঃ কেবলজ্ঞাননিষ্ঠা ইত্যর্থঃ । বহবঃ অনেকে
জ্ঞানতপসা জ্ঞানমেব চ পরমাত্মবিষয়ং তপঃ তেন জ্ঞানতপসা
পূতাঃ পরাং শুদ্ধিং গতাঃ সন্তঃ মদ্ভাবং ঈশ্বরভাবং মোক্ষম্
আগতাঃ সমনুপ্রাপ্তাঃ । ইতরতপোনিরপেক্ষজ্ঞাননিষ্ঠা ইত্যস্য লিঙ্গম্
“জ্ঞানতপসা” ইতি বিশেষণম্ ॥ তব তর্হি রাগদ্বেষৌ স্তঃ,
যেন কেভ্যশ্চিদেব আত্মভাবং প্রয়চ্ছসি ন সর্বেভ্যঃ ইত্যুচ্যতে —
যে যথা মাং প্রপদ্যন্তে তাংস্তথৈব ভজাম্যহম্ ।
মম বর্ত্মানুবর্তন্তে মনুষ্যাঃ পার্থ সর্বশঃ ॥ ৪-১১॥
যে যথা যেন প্রকারেণ যেন প্রয়োজনেন যৎফলার্থিতয়া মাং প্রপদ্যন্তে তান্
তথৈব তৎফলদানেন ভজামি অনুগৃহ্ণামি অহং ইত্যেতৎ । তেষাং মোক্ষং
প্রতি অনর্থিৎবাৎ । ন হি একস্য মুমুক্ষুৎবং ফলার্থিৎবং চ যুগপৎ
সম্ভবতি । অতঃ যে ফলার্থিনঃ তান্ ফলপ্রদানেন, যে যথোক্তকারিণস্তু
অফলার্থিনঃ মুমুক্ষবশ্চ তান্ জ্ঞানপ্রদানেন, যে জ্ঞানিনঃ সন্ন্যাসিনঃ
মুমুক্ষবশ্চ তান্ মোক্ষপ্রদানেন, তথা আর্তান্ আর্তিহরণেন ইত্যেবং যথা
প্রপদ্যন্তে যে তান্ তথৈব ভজামি ইত্যর্থঃ । ন পুনঃ রাগদ্বেষনিমিত্তং
মোহনিমিত্তং বা কঞ্চিৎ ভজামি । সর্বথাপি সর্বাবস্থস্য মম ঈশ্বরস্য
বর্ত্ম মার্গং অনুবর্তন্তে মনুষ্যাঃ — যৎফলার্থিতয়া যস্মিন্ কর্মণি
অধিকৃতাঃ যে প্রয়তন্তে তে মনুষ্যা অত্র উচ্যন্তে — হে পার্থ সর্বশঃ
সর্বপ্রকারৈঃ ॥ যদি তব ঈশ্বরস্য রাগাদিদোষাভাবাৎ সর্বপ্রাণিষু
অনুজিঘৃক্ষায়াং তুল্যায়াং সর্বফলপ্রদানসমর্থে চ ৎবয়ি সতি
“বাসুদেবঃ সর্বম্” ইতি জ্ঞানেনৈব মুমুক্ষবঃ সন্তঃ কস্মাৎ
ৎবামেব সর্বে ন প্রতিপদ্যন্তে ইতি ? শৃণু তত্র কারণং —
কাঙ্ক্ষন্তঃ কর্মণাং সিদ্ধিং যজন্ত ইহ দেবতাঃ ।
ক্ষিপ্রং হি মানুষে লোকে সিদ্ধির্ভবতি কর্মজা ॥ ৪-১২॥
কাঙ্ক্ষন্তঃ অভীপ্সন্তঃ কর্মণাং সিদ্ধিং ফলনিষ্পত্তিং প্রার্থয়ন্তঃ
যজন্তে ইহ অস্মিন্ লোকে দেবতাঃ ইন্দ্রাগ্ন্যাদ্যাঃ ; “অথ যোঽন্যাং
দেবতামুপাস্তে অন্যোঽসাবন্যোঽহমস্মীতি ন স বেদ যথা পশুরেবং স
দেবানাম্” (বৃ. উ. ১-৪-১০) ইতি শ্রুতেঃ । তেষাং হি ভিন্নদেবতায়াজিনাং
ফলাকাঙ্ক্ষিণাং ক্ষিপ্রং শীঘ্রং হি যস্মাৎ মানুষে লোকে, মনুষ্যলোকে হি
শাস্ত্রাধিকারঃ । “ক্ষিপ্রং হি মানুষে লোকে” ইতি বিশেষণাৎ
অন্যেষ্বপি কর্মফলসিদ্ধিং দর্শয়তি ভগবান্ । মানুষে লোকে
বর্ণাশ্রমাদিকর্মাণি ইতি বিশেষঃ, তেষাং চ বর্ণাশ্রমাদ্যধিকারিকর্মণাং
ফলসিদ্ধিঃ ক্ষিপ্রং ভবতি । কর্মজা কর্মণো জাতা ॥ মানুষে এব লোকে
বর্ণাশ্রমাদিকর্মাধিকারঃ, ন অন্যেষু লোকেষু ইতি নিয়মঃ কিন্নিমিত্ত ইতি ?
অথবা বর্ণাশ্রমাদিপ্রবিভাগোপেতাঃ মনুষ্যাঃ মম বর্ত্ম অনুবর্তন্তে
সর্বশঃ ইত্যুক্তম্ । কস্মাৎপুনঃ কারণাৎ নিয়মেন তবৈব বর্ত্ম অনুবর্তন্তে
ন অন্যস্য ইতি ? উচ্যতে —
চাতুর্বর্ণ্যং ময়া সৃষ্টং গুণকর্মবিভাগশঃ ।
তস্য কর্তারমপি মাং বিদ্ধ্যকর্তারমব্যযম্ ॥ ৪-১৩॥
চৎবার এব বর্ণাঃ চাতুর্বর্ণ্যং ময়া ঈশ্বরেণ সৃষ্টং উৎপাদিতম্,
”ব্রাহ্মণোঽস্য মুখমাসীৎ” (ঋ. ১০-৮-৯১)ইত্যাদিশ্রুতেঃ ।
গুণকর্মবিভাগশঃ গুণবিভাগশঃ কর্মবিভাগশশ্চ । গুণাঃ
সত্ত্বরজস্তমাংসি । তত্র সাত্ত্বিকস্য সত্ত্বপ্রধানস্য ব্রাহ্মণস্য
“শমো দমস্তপঃ” (ভ. গী. ১৮-৪২) ইত্যাদীনি কর্মাণি,
সত্ত্বোপসর্জনরজঃপ্রধানস্য ক্ষত্রিয়স্য শৌর্যতেজঃপ্রভৃতীনি
কর্মাণি, তমউপসর্জনরজঃপ্রধানস্য বৈশ্যস্য কৃষ্যাদীনি কর্মাণি,
রজউপসর্জনতমঃপ্রধানস্য শূদ্রস্য শুশ্রূষৈব কর্ম ইত্যেবং
গুণকর্মবিভাগশঃ চাতুর্বর্ণ্যং ময়া সৃষ্টং ইত্যর্থঃ । তচ্চ ইদং
চাতুর্বর্ণ্যং ন অন্যেষু লোকেষু, অতঃ মানুষে লোকে ইতি বিশেষণম্ । হন্ত
তর্হি চাতুর্বর্ণ্যস্য সর্গাদেঃ কর্মণঃ কর্তৃৎবাৎ তৎফলেন যুজ্যসে, অতঃ ন
ৎবং নিত্যমুক্তঃ নিত্যেশ্বরশ্চ ইতি ? উচ্যতে — যদ্যপি মায়াসংব্যবহারেণ
তস্য কর্মণঃ কর্তারমপি সন্তং মাং পরমার্থতঃ বিদ্ধি অকর্তারম্ । অত
এব অব্যযং অসংসারিণং চ মাং বিদ্ধি ॥ যেষাং তু কর্মণাং কর্তারং মাং
মন্যসে পরমার্থতঃ তেষাং অকর্তা এবাহম্, যতঃ —
ন মাং কর্মাণি লিম্পন্তি ন মে কর্মফলে স্পৃহা ।
ইতি মাং যোঽভিজানাতি কর্মভির্ন স বধ্যতে ॥ ৪-১৪॥
ন মাং তানি কর্মাণি লিম্পন্তি দেহাদ্যারম্ভকৎবেন, অহঙ্কারাভাবাৎ । ন চ
তেষাং কর্মণাং ফলেষু মে মম স্পৃহা তৃষ্ণা । যেষাং তু সংসারিণাম্
“অহং কর্তা” ইত্যভিমানঃ কর্মসু, স্পৃহা তৎফলেষু চ, তান্
কর্মাণি লিম্পন্তি ইতি যুক্তম্, তদভাবাৎ ন মাং কর্মাণি লিম্পন্তি । ইতি এবং
যঃ অন্যোঽপি মাং আত্মৎবেন অভিজানাতি “নাহং কর্তা ন মে কর্মফলে
স্পৃহা” ইতি সঃ কর্মভিঃ ন বধ্যতে, তস্যাপি ন দেহাদ্যারম্ভকাণি
কর্মাণি ভবন্তি ইত্যর্থঃ ॥ “নাহং কর্তা ন মে কর্মফলে স্পৃহা”
ইতি —
এবং জ্ঞাৎবা কৃতং কর্ম পূর্বৈরপি মুমুক্ষুভিঃ ।
কুরু কর্মৈব তস্মাত্ত্বং পূর্বৈঃ পূর্বতরং কৃতম্ ॥ ৪-১৫॥
এবং জ্ঞাৎবা কৃতং কর্ম পূর্বৈঃ অপি অতিক্রান্তৈঃ মুমুক্ষুভিঃ । কুরু
তেন কর্মৈব ৎবম্, ন তূষ্ণীমাসনং নাপি সন্ন্যাসঃ কর্তব্যঃ, তস্মাৎ ৎবং
পূর্বৈরপি অনুষ্ঠিতৎবাৎ, যদি অনাত্মজ্ঞঃ ৎবং তদা আত্মশুদ্ধ্যর্থম্,
তত্ত্ববিচ্চেৎ লোকসঙ্গ্রহার্থং পূর্বৈঃ জনকাদিভিঃ পূর্বতরং কৃতং ন
অধুনাতনং কৃতং নির্বর্তিতম্ ॥ তত্র কর্ম চেৎ কর্তব্যং ৎবদ্বচনাদেব
করোম্যহম্, কিং বিশেষিতেন “পূর্বৈঃ পূর্বতরং কৃতম্” ইত্যুচ্যতে
; যস্মাৎ মহৎ বৈষম্যং কর্মণি । কথম্ ? —
কিং কর্ম কিমকর্মেতি কবয়োঽপ্যত্র মোহিতাঃ ।
তত্তে কর্ম প্রবক্ষ্যামি যজ্জ্ঞাৎবা মোক্ষ্যসেঽশুভাৎ ॥ ৪-১৬॥
কিং কর্ম কিং চ অকর্ম ইতি কবয়ঃ মেধাবিনঃ অপি অত্র অস্মিন্ কর্মাদিবিষয়ে
মোহিতাঃ মোহং গতাঃ । তৎ অতঃ তে তুভ্যং অহং কর্ম অকর্ম চ প্রবক্ষ্যামি,
যৎ জ্ঞাৎবা বিদিৎবা কর্মাদি মোক্ষ্যসে অশুভাৎ সংসারাৎ ॥ ন চৈতত্ত্বয়া
মন্তব্যং — কর্ম নাম দেহাদিচেষ্টা লোকপ্রসিদ্ধম্, অকর্ম নাম তদক্রিয়া
তূষ্ণীমাসনম্ ; কিং তত্র বোদ্ধব্যম্ ? ইতি । কস্মাৎ, উচ্যতে —
কর্মণো হ্যপি বোদ্ধব্যং বোদ্ধব্যং চ বিকর্মণঃ ।
অকর্মণশ্চ বোদ্ধব্যং গহনা কর্মণো গতিঃ ॥ ৪-১৭॥
কর্মণঃ শাস্ত্রবিহিতস্য হি যস্মাৎ অপি অস্তি বোদ্ধব্যম্, বোদ্ধব্যং চ অস্ত্যেব
বিকর্মণঃ প্রতিষিদ্ধস্য, তথা অকর্মণশ্চ তূষ্ণীম্ভাবস্য বোদ্ধব্যম্
অস্তি ইতি ত্রিষ্বপ্যধ্যাহারঃ কর্তব্যঃ । যস্মাৎ গহনা বিষমা দুর্জ্ঞেয়া —
কর্মণঃ ইতি উপলক্ষণার্থং কর্মাদীনাং — কর্মাকর্মবিকর্মণাং গতিঃ
যাথাত্ম্যং তত্ত্বং ইত্যর্থঃ ॥ কিং পুনস্তত্ত্বং কর্মাদেঃ যৎ বোদ্ধব্যং
বক্ষ্যমামি ইতি প্রতিজ্ঞাতম্ ? উচ্যতে —
কর্মণ্যকর্ম যঃ পশ্যেদকর্মণি চ কর্ম যঃ ।
স বুদ্ধিমান্মনুষ্যেষু স যুক্তঃ কৃৎস্নকর্মকৃৎ ॥ ৪-১৮॥
কর্মণি, ক্রিয়তে ইতি কর্ম ব্যাপারমাত্রম্, তস্মিন্ কর্মণি অকর্ম কর্মাভাবং
যঃ পশ্যেৎ, অকর্মণি চ কর্মাভাবে কর্তৃতন্ত্রৎবাৎ প্রবৃত্তিনিবৃত্ত্যোঃ
— বস্তু অপ্রাপ্যৈব হি সর্ব এব ক্রিয়াকারকাদিব্যবহারঃ অবিদ্যাভূমৌ
এব — কর্ম যঃ পশ্যেৎ পশ্যতি, সঃ বুদ্ধিমান্ মনুষ্যেষু, সঃ
যুক্তঃ যোগী চ, কৃৎস্নকর্মকৃৎ সমস্তকর্মকৃচ্চ সঃ, ইতি স্তূয়তে
কর্মাকর্মণোরিতরেতরদর্শী ॥ ননু কিমিদং বিরুদ্ধমুচ্যতে “কর্মণি
অকর্ম যঃ পশ্যেৎ” ইতি “অকর্মণি চ কর্ম” ইতি ; ন হি কর্ম
অকর্ম স্যাৎ, অকর্ম বা কর্ম । তত্র বিরুদ্ধং কথং পশ্যেৎ দ্রষ্টা ? —
ন, অকর্ম এব পরমার্থতঃ সৎ কর্মবৎ অবভাসতে মূঢদৃষ্টেঃ লোকস্য,
তথা কর্মৈব অকর্মবৎ । তত্র যথাভূতদর্শনার্থমাহ ভগবান্
— “কর্মণ্যকর্ম যঃ পশ্যেৎ” ইত্যাদি । অতো ন বিরুদ্ধম্ ।
বুদ্ধিমত্ত্বাদ্যুপপত্তেশ্চ । “বোদ্ধব্যম্” (ভ. গী. ৪-১৭) ইতি
চ যথাভূতদর্শনমুচ্যতে । ন চ বিপরীতজ্ঞানাৎ অশুভাৎ মোক্ষণং
স্যাৎ ; “যৎ জ্ঞাৎবা মোক্ষ্যসেঽশুভাৎ” (ভ. গী. ৪-১৬)
ইতি চ উক্তম্ । তস্মাৎ কর্মাকর্মণী বিপর্যযেণ গৃহীতে প্রাণিভিঃ
তদ্বিপর্যযগ্রহণনিবৃত্ত্যর্থং ভগবতো বচনং “কর্মণ্যকর্ম
যঃ” ইত্যাদি । ন চ অত্র কর্মাধিকরণমকর্ম অস্তি, কুণ্ডে বদরাণীব ।
নাপি অকর্মাধিকরণং কর্মাস্তি, কর্মাভাবৎবাদকর্মণঃ । অতঃ বিপরীতগৃহীতে
এব কর্মাকর্মণী লৌকিকৈঃ, যথা মৃগতৃষ্ণিকায়ামুদকং শুক্তিকায়াং
বা রজতম্ । ননু কর্ম কর্মৈব সর্বেষাং ন ক্বচিৎ ব্যভিচরতি
— তৎ ন, নৌস্থস্য নাবি গচ্ছন্ত্যাং তটস্থেষু অগতিষু নগেষু
প্রতিকূলগতিদর্শনাৎ, দূরেষু চক্ষুষা অসন্নিকৃষ্টেষু গচ্ছৎসু
গত্যভাবদর্শনাৎ, এবং ইহাপি অকর্মণি কর্মদর্শনং কর্মণি
চ অকর্মদর্শনং বিপরীতদর্শনং যেন তন্নিরাকরণার্থমুচ্যতে
“কর্মণ্যকর্ম যঃ পশ্যেৎ” ইত্যাদি ॥ তদেতৎ উক্তপ্রতিবচনমপি
অসকৃৎ অত্যন্তবিপরীতদর্শনভাবিততয়া মোমুহ্যমানো লোকঃ শ্রুতমপি
অসকৃৎ তত্ত্বং বিস্মৃত্য বিস্মৃত্য মিথ্যাপ্রসঙ্গং অবতার্যাবতার্য
চোদয়তি ইতি পুনঃ পুনঃ উত্তরমাহ ভগবান্, দুর্বিজ্ঞেয়ৎবং চ
আলক্শ্য বস্তুনঃ । “অব্যক্তোঽয়মচিন্ত্যোঽয়ম্” (ভ. গী. ২-২৫)
“ন জায়তে ম্রিয়তে” (ভ. গী. ২-২০) ইত্যাদিনা আত্মনি কর্মাভাবঃ
শ্রুতিস্মৃতিন্যায়প্রসিদ্ধঃ উক্তঃ বক্ষ্যমাণশ্চ । তস্মিন্ আত্মনি
কর্মাভাবে অকর্মণি কর্মবিপরীতদর্শনং অত্যন্তনিরূঢম্ ; যতঃ,
“কিং কর্ম কিমকর্মেতি কবয়োঽপ্যত্র মোহিতাঃ” (ভ. গী. ৪-১৬) ।
দেহাদ্যাশ্রয়ং কর্ম আত্মন্যধ্যারোপ্য “অহং কর্তা, মম এতৎ কর্ম,
ময়া অস্য কর্মণঃ ফলং ভোক্তব্যম্” ইতি চ, তথা “অহং তূষ্ণীং
ভবামি, যেন অহং নিরায়াসঃ অকর্মা সুখী স্যাম্” ইতি কার্যকরণাশ্রয়ং
ব্যাপারোপরমং তৎকৃতং চ সুখিৎবং আত্মনি অধ্যারোপ্য “ন করোমি
কিঞ্চিৎ, তূষ্ণীং সুখমাসে” ইতি অভিমন্যতে লোকঃ । তত্রেদং লোকস্য
বিপররীতদর্শনাপনয়ায় আহ ভগবান্ — “কর্মণ্যকর্ম যঃ
পশ্যেৎ” ইত্যাদি ॥ অত্র চ কর্ম কর্মৈব সৎ কার্যকরণাশ্রয়ং
কর্মরহিতে অবিক্রিয়ে আত্মনি সর্বৈঃ অধ্যস্তম্, যতঃ পণ্ডিতোঽপি “অহং
করোমি” ইতি মন্যতে । অতঃ আত্মসমবেততয়া সর্বলোকপ্রসিদ্ধে কর্মণি
নদীকূলস্থেষ্বিব বৃক্ষেষু গতিপ্রাতিলোম্যেন অকর্ম কর্মাভাবং যথাভূতং
গত্যভাবমিব বৃক্ষেষু যঃ পশ্যেৎ, অকর্মণি চ কার্যকরণব্যাপারোপরমে
কর্মবৎ আত্মনি অধ্যারোপিতে, “তূষ্ণীং অকুর্বন্ সুখং আসে”
ইত্যহঙ্কারাভিসন্ধি-হেতুৎবাৎ, তস্মিন্ অকর্মণি চ কর্ম যঃ পশ্যেৎ,
যঃ এবং কর্মাকর্মবিভাগজ্ঞঃ সঃ বুদ্ধিমান্ পণ্ডিতঃ মনুষ্যেষু, সঃ
যুক্তঃ যোগী কৃৎস্নকর্মকৃচ্চ সঃ অশুভাৎ মোক্ষিতঃ কৃতকৃত্যো
ভবতি ইত্যর্থঃ ॥ অয়ং শ্লোকঃ অন্যথা ব্যাখ্যাতঃ কৈশ্চিৎ । কথম্ ?
নিত্যানাং কিল কর্মণাং ঈশ্বরার্থে অনুষ্ঠীয়মানানাং তৎফলাভাবাৎ
অকর্মাণি তানি উচ্যন্তে গৌণ্যা বৃত্ত্যা । তেষাং চ অকরণং অকর্ম ;
তচ্চ প্রত্যবায়ফলৎবাৎ কর্ম উচ্যতে গৌণ্যৈব বৃত্ত্যা । তত্র
নিত্যে কর্মণি অকর্ম যঃ পশ্যেৎ ফলাভাবাৎ ; তথা ধেনুরপি গৌঃ
অগৌঃ ইত্যুচ্যতে ক্ষীরাখ্যং ফলং ন প্রয়চ্ছতি ইতি, তদ্বৎ । তথা
নিত্যাকরণে তু অকর্মণি চ কর্ম যঃ পশ্যেৎ নরকাদিপ্রত্যবায়ফলং
প্রয়চ্ছতি ইতি ॥ নৈতৎ যুক্তং ব্যাখ্যানম্ । এবং জ্ঞানাৎ অশুভাৎ
মোক্ষানুপপত্তেঃ “যজ্জ্ঞাৎবা মোক্ষ্যসেঽশুভাৎ” (ভ. গী. ৪-১৬)
ইতি ভগবতা উক্তং বচনং বাধ্যেত । কথম্ ? নিত্যানামনুষ্ঠানাৎ
অশুভাৎ স্যাৎ নাম মোক্ষণম্, ন তু তেষাং ফলাভাবজ্ঞানাৎ । ন হি নিত্যানাং
ফলাভাবজ্ঞানং অশুভমুক্তিফলৎবেন চোদিতম্, নিত্যকর্মজ্ঞানং বা ।
ন চ ভগবতৈবেহোক্তম্ । এতে অকর্মণি কর্মদর্শনং প্রত্যুক্তম্ ।
ন হি অকর্মণি “কর্ম” ইতি দর্শনং কর্তব্যতয়া ইহ চোদ্যতে,
নিত্যস্য তু কর্তব্যতামাত্রম্ । ন চ “অকরণাৎ নিত্যস্য প্রত্যবায়ো
ভবতি” ইতি বিজ্ঞানাৎ কিঞ্চিৎ ফলং স্যাৎ । নাপি নিত্যাকরণং
জ্ঞেয়ৎবেন চোদিতম্ । নাপি “কর্ম অকর্ম” ইতি মিথ্যাদর্শনাৎ
অশুভাৎ মোক্ষণং বুদ্দিমত্ত্বং যুক্ততা কৃৎস্নকর্মকৃত্ত্বাদি চ ফলম্
উপপদ্যতে, স্তুতির্বা । মিথ্যাজ্ঞানমেব হি সাক্ষাৎ অশুভরূপম্ । কুতঃ
অন্যস্মাদশুভাৎ মোক্ষণম্ ? ন হি তমঃ তমসো নিবর্তকং ভবতি ॥ ননু
কর্মণি যৎ অকর্মদর্শনং অকর্মণি বা কর্মদর্শনং ন তৎ মিথ্যাজ্ঞানম্ ;
কিং তর্হি ? গৌণং ফলভাবাভাবনিমিত্তং — ন, কর্মাকর্মবিজ্ঞানাদপি
গৌণাৎ ফলস্য অশ্রবণাৎ । নাপি শ্রুতহান্যশ্রুতপরিকল্পনায়াং কশ্চিৎ
বিশেষ উপলভ্যতে । স্বশব্দেনাপি শক্যং বক্তুং “নিত্যকর্মণাং
ফলং নাস্তি, অকরণাচ্চ তেষাং নরকপাতঃ স্যাৎ” ইতি ; তত্র
ব্যাজেন পরব্যামোহরূপেণ “কর্মণ্যকর্ম যঃ পস্যেৎ” ইত্যাদিনা
কিম্ ? তত্র এবং ব্যাচক্ষাণেন ভগবতোক্তং বাক্যং লোকব্যামোহার্থমিতি
ব্যক্তং কল্পিতং স্যাৎ । ন চ এতৎ ছদ্মরূপেণ বাক্যেন রক্ষণীয়ং বস্তু
; নাপি শব্দান্তরেণ পুনঃ পুনঃ উচ্যমানং সুবোধং স্যাৎ ইত্যেবং বক্তুং
যুক্তম্ । “কর্মণ্যেবাধিকারস্তে” (ভ. গী. ২-৪৭) ইত্যত্র হি
স্ফুটতর উক্তঃ অর্থঃ, ন পুনর্বক্তব্যো ভবতি । সর্বত্র চ প্রশস্তং
বোদ্ধব্যং চ কর্তব্যমেব । ন নিষ্প্রয়োজনং বোদ্ধব্যমিত্যুচ্যতে ॥ ন
চ মিথ্যাজ্ঞানং বোদ্ধব্যং ভবতি, তৎপ্রত্যুপস্থাপিতং বা বস্ত্বাভাসম্ ।
নাপি নিত্যানাং অকরণাৎ অভাবাৎ প্রত্যবায়ভাবোৎপত্তিঃ, “নাসতো বিদ্যতে
ভাবঃ” (ভ. গী. ২-১৬) ইতি বচনাৎ “কথং অসতঃ সজ্জায়েত”
(ছা. উ. ৬-২-২)ইতি চ দর্শিতং অসতঃ সজ্জন্মপ্রতিষেধাৎ । অসতঃ
সদুৎপত্তিং ব্রুবতা অসদেব সদ্ভবেৎ, সচ্চাপি অসৎ ভবেৎ ইত্যুক্তং স্যাৎ ।
তচ্চ অয়ুক্তম্, সর্বপ্রমাণবিরোধাৎ । ন চ নিষ্ফলং বিদধ্যাৎ কর্ম
শাস্ত্রম্, দুঃখস্বরূপৎবাৎ, দুঃখস্য চ
বুদ্ধিপূর্বকতয়া কার্যৎবানুপপত্তেঃ ।
তদকরণে চ নরকপাতাভ্যুপগমাৎ অনর্থায়ৈব উভয়থাপি করণে চ
অকরণে চ শাস্ত্রং নিষ্ফলং কল্পিতং স্যাৎ । স্বাভ্যুপগমবিরোধশ্চ
“নিত্যং নিষ্ফলং কর্ম” ইতি অভ্যুপগম্য “মোক্ষফলায়”
ইতি ব্রুবতঃ । তস্মাৎ যথাশ্রুত এবার্থঃ “কর্মণ্যকর্ম যঃ”
ইত্যাদেঃ । তথা চ ব্যাখ্যাতঃ অস্মাভিঃ শ্লোকঃ ॥ তদেতৎ কর্মণি
অকর্মদর্শনং স্তূয়তে —
যস্য সর্বে সমারম্ভাঃ কামসঙ্কল্পবর্জিতাঃ ।
জ্ঞানাগ্নিদগ্ধকর্মাণং তমাহুঃ পণ্ডিতং বুধাঃ ॥ ৪-১৯॥
যস্য যথোক্তদর্শিনঃ সর্বে যাবন্তঃ সমারম্ভাঃ সর্বাণি কর্মাণি,
সমারভ্যন্তে ইতি সমারম্ভাঃ, কামসঙ্কল্পবর্জিতাঃ কামৈঃ তৎকারণৈশ্চ
সঙ্কল্পৈঃ বর্জিতাঃ মুধৈব চেষ্টামাত্রা অনুষ্ঠীয়ন্তে ; প্রবৃত্তেন
চেৎ লোকসঙ্গ্রহার্থম্, নিবৃত্তেন চেৎ জীবনমাত্রার্থম্ । তং
জ্ঞানাগ্নিদগ্ধকর্মাণং কর্মাদৌ অকর্মাদিদর্শনং জ্ঞানং তদেব অগ্নিঃ
তেন জ্ঞানাগ্নিনা দগ্ধানি শুভাশুভলক্ষণানি কর্মাণি যস্য তং আহুঃ
পরমার্থতঃ পণ্ডিতং বুধাঃ ব্রহ্মবিদঃ ॥ যস্তু অকর্মাদিদর্শী, সঃ
অকর্মাদিদর্শনাদেব নিষ্কর্মা সন্ন্যাসী জীবনমাত্রার্থচেষ্টঃ সন্ কর্মণি
ন প্রবর্ততে, যদ্যপি প্রাক্ বিবেকতঃ প্রবৃত্তঃ । যস্য প্রারব্ধকর্মা
সন্ উত্তরকালমুৎপন্নাত্মসম্যগ্দর্শনঃ স্যাৎ, সঃ সর্বকর্মণি
প্রয়োজনমপশ্যন্ সসাধনং কর্ম পরিত্যজত্যেব । সঃ কুতশ্চিৎ
নিমিত্তাৎ কর্মপরিত্যাগাসম্ভবে সতি কর্মণি তৎফলে চ সঙ্গরহিততয়া
স্বপ্রয়োজনাভাবাৎ লোকসঙ্গ্রহার্থং পূর্ববৎ কর্মণি প্রবৃত্তোঽপি নৈব
কিঞ্চিৎ করোতি, জ্ঞানাগ্নিদগ্ধকর্মৎবাৎ তদীয়ং কর্ম অকর্মৈব সম্পদ্যতে
ইত্যেতমর্থং দর্শয়িষ্যন্ আহ —
ত্যক্ত্বা কর্মফলাসঙ্গং নিত্যতৃপ্তো নিরাশ্রয়ঃ ।
কর্মণ্যভিপ্রবৃত্তোঽপি নৈব কিঞ্চিৎকরোতি সঃ ॥ ৪-২০॥
ত্যক্ত্বা কর্মসু অভিমানং ফলাসঙ্গং চ যথোক্তেন জ্ঞানেন
নিত্যতৃপ্তঃ নিরাকাঙ্ক্ষো বিষয়েষু ইত্যর্থঃ । নিরাশ্রয়ঃ
আশ্রয়রহিতঃ, আশ্রয়ো নাম যৎ আশ্রিত্য পুরুষার্থং সিসাধয়িষতি,
দৃষ্টাদৃষ্টেষ্টফল-সাধনাশ্রয়রহিত ইত্যর্থঃ । বিদুষা ক্রিয়মাণং
কর্ম পরমার্থতোঽকর্মৈব, তস্য নিষ্ক্রিয়াত্মদর্শন-সম্পন্নৎবাৎ । তেন
এবম্ভূতেন স্বপ্রয়োজনাভাবাৎ সসাধনং কর্ম পরিত্যক্তব্যমেব ইতি প্রাপ্তে,
ততঃ নির্গমাসম্ভবাৎ লোকসঙ্গ্রহচিকীর্ষয়া শিষ্টবিগর্হণাপরিজিহীর্ষয়া
বা পূর্ববৎ কর্মণি অভিপ্রবৃত্তোঽপি নিষ্ক্রিয়াত্মদর্শনসম্পন্নৎবাৎ নৈব
কিঞ্চিৎ করোতি সঃ ॥ যঃ পুনঃ পূর্বোক্তবিপরীতঃ প্রাগেব কর্মারম্ভাৎ
ব্রহ্মণি সর্বান্তরে প্রত্যগাত্মনি নিষ্ক্রিয়ে সঞ্জাতাত্মদর্শনঃ স
দৃষ্টাদৃষ্টেষ্টবিষয়াশীর্বিবর্জিততয়া দৃষ্টাদৃষ্টার্থে কর্মণি
প্রয়োজনমপশ্যন্ সসাধনং কর্ম সন্ন্যস্য শরীরয়াত্রামাত্রচেষ্টঃ
যতিঃ জ্ঞাননিষ্ঠো মুচ্যতে ইত্যেতমর্থং দর্শয়িতুমাহ —
নিরাশীর্যতচিত্তাত্মা ত্যক্তসর্বপরিগ্রহঃ ।
শারীরং কেবলং কর্ম কুর্বন্নাপ্নোতি কিল্বিষম্ ॥ ৪-২১॥
নিরাশীঃ নির্গতাঃ আশিষঃ যস্মাৎ সঃ নিরাশীঃ, যতচিত্তাত্মা চিত্তম্
অন্তঃকরণং আত্মা বাহ্যঃ কার্যকরণসঙ্ঘাতঃ তৌ উভাবপি যতৌ সংয়তৌ যেন
সঃ যতচিত্তাত্মা, ত্যক্তসর্বপরিগ্রহঃ ত্যক্তঃ সর্বঃ পরিগ্রহঃ যেন সঃ
ত্যক্তসর্বপরিগ্রহঃ, শারীরং শরীরস্থিতিমাত্রপ্রয়োজনম্, কেবলং তত্রাপি
অভিমানবর্জিতম্, কর্ম কুর্বন্ ন আপ্নোতি ন প্রাপ্নোতি কিল্বিষং অনিষ্টরূপং
পাপং ধর্মং চ । ধর্মোঽপি মুমুক্ষোঃ কিল্বিষমেব বন্ধাপাদকৎবাৎ । তস্মাৎ
তাভ্যাং মুক্তঃ ভবতি, সংসারাৎ মুক্তো ভবতি ইত্যর্থঃ ॥ “শারীরং
কেবলং কর্ম” ইত্যত্র কিং শরীরনির্বর্ত্যং শারীরং কর্ম অভিপ্রেতম্,
আহোস্বিৎ শরীরস্থিতিমাত্রপ্রয়োজনং শারীরং কর্ম ইতি ? কিং চ অতঃ যদি
শরীরনির্বর্ত্যং শারীরং কর্ম যদি বা শরীরস্থিতিমাত্রপ্রয়োজনং শারীরম্
ইতি ? উচ্যতে — যদা শরীরনির্বর্ত্যং কর্ম শারীরং অভিপ্রেতং স্যাৎ,
তদা দৃষ্টাদৃষ্টপ্রয়োজনং কর্ম প্রতিষিদ্ধমপি শরীরেণ কুর্বন্
নাপ্নোতি কিল্বিষং ইতি ব্রুবতো বিরুদ্ধাভিধানং প্রসজ্যেত । শাস্ত্রীয়ং
চ কর্ম দৃষ্টাদৃষ্টপ্রয়োজনং শরীরেণ কুর্বন্ নাপ্নোতি কিল্বিষম্
ইত্যপি ব্রুবতঃ অপ্রাপ্তপ্রতিষেধপ্রসঙ্গঃ । “শারীরং কর্ম
কুর্বন্” ইতি বিশেষণাৎ কেবলশব্দপ্রয়োগাচ্চ বাঙ্মনসনির্বর্ত্যং
কর্ম বিধিপ্রতিষেধবিষয়ং ধর্মাধর্মশব্দবাচ্যং কুর্বন্ প্রাপ্নোতি
কিল্বিষং ইত্যুক্তং স্যাৎ । তত্রাপি বাঙ্মনসাভ্যাং বিহিতানুষ্ঠানপক্ষে
কিল্বিষপ্রাপ্তিবচনং বিরুদ্ধং আপদ্যেত । প্রতিষিদ্ধসেবাপক্ষেঽপি
ভূতার্থানুবাদমাত্রং অনর্থকং স্যাৎ । যদা তু শরীরস্থিতিমাত্রপ্রয়োজনং
শারীরং কর্ম অভিপ্রেতং ভবেৎ, তদা দৃষ্টাদৃষ্টপ্রয়োজনং কর্ম
বিধিপ্রতিষেধগম্যং শরীরবাঙ্মনসনির্বর্ত্যং অন্যৎ অকুর্বন্ তৈরেব
শরীরাদিভিঃ শরীরস্থিতিমাত্রপ্রয়োজনং কেবলশব্দপ্রয়োগাৎ “অহং
করোমি” ইত্যভিমানবর্জিতঃ শরীরাদিচেষ্টামাত্রং লোকদৃষ্ট্যা কুর্বন্
নাপ্নোতি কিল্বিষম্ । এবম্ভূতস্য পাপশব্দবাচ্যকিল্বিষপ্রাপ্ত্যসম্ভবাৎ
কিল্বিষং সংসারং ন আপ্নোতি ; জ্ঞানাগ্নিদগ্ধসর্বকর্মৎবাৎ অপ্রতিবন্ধেন
মুচ্যত এব ইতি পূর্বোক্তসম্যগ্দর্শনফলানুবাদ এব এষঃ । এবম্
“শারীরং কেবলং কর্ম” ইত্যস্য অর্থস্য পরিগ্রহে নিরবদ্যং
ভবতি ॥ ত্যক্তসর্বপরিগ্রহস্য যতেঃ অন্নাদেঃ শরীরস্থিতিহেতোঃ
পরিগ্রহস্য অভাবাৎ যাচনাদিনা শরীরস্থিতৌ কর্তব্যতায়াং প্রাপ্তায়াম্
”অয়াচিতমসঙ্ক্লৃপ্তমুপপন্নং যদৃচ্ছয়া” (অশ্ব. ৪৬-১৯)
ইত্যাদিনা বচনেন অনুজ্ঞাতং যতেঃ শরীরস্থিতিহেতোঃ অন্নাদেঃ প্রাপ্তিদ্বারম্
আবিষ্কুর্বন্ আহ —
যদৃচ্ছালাভসন্তুষ্টো দ্বন্দ্বাতীতো বিমৎসরঃ ।
সমঃ সিদ্ধাবসিদ্ধৌচ কৃৎবাপি ন নিবধ্যতে ॥ ৪-২২॥
যদৃচ্ছালাভসন্তুষ্টঃ অপ্রার্থিতোপনতো লাভো যদৃচ্ছালাভঃ তেন
সন্তুষ্টঃ সঞ্জাতালম্প্রত্যযঃ । দ্বন্দ্বাতীতঃ দ্বন্দ্বৈঃ শীতোষ্ণাদিভিঃ
হন্যমানোঽপি অবিষণ্ণচিত্তঃ দ্বন্দ্বাতীতঃ উচ্যতে । বিমৎসরঃ বিগতমৎসরঃ
নির্বৈরবুদ্দিঃ সমঃ তুল্যঃ যদৃচ্ছালাভস্য সিদ্ধৌ অসিদ্ধৌ চ ।
যঃ এবম্ভূতো যতিঃ অন্নাদেঃ শরীরস্থিতিহেতোঃ লাভালাভয়োঃ সমঃ
হর্ষবিষাদবর্জিতঃ কর্মাদৌ অকর্মাদিদর্শী যথাভূতাত্মদর্শননিষ্ঠঃ
সন্ শরীরস্থিতিমাত্রপ্রয়োজনে ভিক্ষাটনাদিকর্মণি শরীরাদিনির্বর্ত্যে
“নৈব কিঞ্চিৎ করোম্যহম্” (ভ. গী. ৫-৮) , “গুণা গুণেষু
বর্তন্তে” (ভ. গী. ৩-২৮) ইত্যেবং সদা সম্পরিচক্ষাণঃ আত্মনঃ
কর্তৃৎবাভাবং পশ্যন্নৈব কিঞ্চিৎ ভিক্ষাটনাদিকং কর্ম করোতি,
লোকব্যবহারসামান্যদর্শনেন তু লৌকিকৈঃ আরোপিতকর্তৃৎবে ভিক্ষাটনাদৌ
কর্মণি কর্তা ভবতি । স্বানুভবেন তু শাস্ত্রপ্রমাণাদিজনিতেন অকর্তৈব ।
স এবং পরাধ্যারোপিতকর্তৃৎবঃ শরীরস্থিতিমাত্রপ্রয়োজনং
ভিক্ষাটনাদিকং কর্ম কৃৎবাপি ন নিবধ্যতে বন্ধহেতোঃ কর্মণঃ
সহেতুকস্য জ্ঞানাগ্নিনা দগ্ধৎবাৎ ইতি উক্তানুবাদ এব এষঃ ॥ “ত্যক্ত্বা
কর্মফলাসঙ্গম্” (ভ. গী. ৪-২০) ইত্যনেন শ্লোকেন যঃ প্রারব্ধকর্মা
সন্ যদা নিষ্ক্রিয়ব্রহ্মাত্মদর্শনসম্পন্নঃ স্যাৎ তদা তস্য আত্মনঃ
কর্তৃকর্মপ্রয়োজনাভাবদর্শিনঃ কর্মপরিত্যাগে প্রাপ্তে কুতশ্চিন্নিমিত্তাৎ
তদসম্ভবে সতি পূর্ববৎ তস্মিন্ কর্মণি অভিপ্রবৃত্তস্য অপি “নৈব
কিঞ্চিৎ করোতি সঃ” (ভ. গী. ৪-২০) ইতি কর্মাভাবঃ প্রদর্শিতঃ ।
যস্য এবং কর্মাভাবো দর্শিতঃ তস্যৈব —
গতসঙ্গস্য মুক্তস্য জ্ঞানাবস্থিতচেতসঃ ।
যজ্ঞায়াচরতঃ কর্ম সমগ্রং প্রবিলীয়তে ॥ ৪-২৩॥
গতসঙ্গস্য সর্বতোনিবৃত্তাসক্তেঃ, মুক্তস্য
নিবৃত্তধর্মাধর্মাদিবন্ধনস্য, জ্ঞানাবস্থিতচেতসঃ জ্ঞানে এব
অবস্থিতং চেতঃ যস্য সোঽয়ং জ্ঞানাবস্থিতচেতাঃ তস্য, যজ্ঞায়
যজ্ঞনির্বৃত্ত্যর্থং আচরতঃ নির্বর্তয়তঃ কর্ম সমগ্রং সহ অগ্রেণ
ফলেন বর্ততে ইতি সমগ্রং কর্ম তৎ সমগ্রং প্রবিলীয়তে বিনশ্যতি
ইত্যর্থঃ ॥ কস্মাৎ পুনঃ কারণাৎ ক্রিয়মাণং কর্ম স্বকার্যারম্ভং অকুর্বৎ
সমগ্রং প্রবিলীয়তে ইত্যুচ্যতে যতঃ —
ব্রহ্মার্পণং ব্রহ্ম হবির্ব্রহ্মাগ্নৌ ব্রহ্মণা হুতম্ ।
ব্রহ্মৈব তেন গন্তব্যং ব্রহ্মকর্মসমাধিনা ॥ ৪-২৪॥
ব্রহ্ম অর্পণং যেন করণেন ব্রহ্মবিৎ হবিঃ অগ্নৌ অর্পয়তি তৎ ব্রহ্মৈব
ইতি পশ্যতি, তস্য আত্মব্যতিরেকেণ অভাবং পশ্যতি, যথা শুক্তিকায়াং
রজতাভাবং পশ্যতি ; তদুচ্যতে ব্রহ্মৈব অর্পণমিতি, যথা যদ্রজতং
তৎ শুক্তিকৈবেতি । “ব্রহ্ম অর্পণম্” ইতি অসমস্তে পদে । যৎ
অর্পণবুদ্ধ্যা গৃহ্যতে লোকে তৎ অস্য ব্রহ্মবিদঃ ব্রহ্মৈব ইত্যর্থঃ ।
ব্রহ্ম হবিঃ তথা যৎ হবির্বুদ্ধ্যা গৃহ্যমাণং তৎ ব্রহ্মৈব অস্য ।
তথা “ব্রহ্মাগ্নৌ” ইতি সমস্তং পদম্ । অগ্নিরপি ব্রহ্মৈব
যত্র হূয়তে ব্রহ্মণা কর্ত্রা, ব্রহ্মৈব কর্তেত্যর্থঃ । যৎ তেন হুতং
হবনক্রিয়া তৎ ব্রহ্মৈব । যৎ তেন গন্তব্যং ফলং তদপি ব্রহ্মৈব
ব্রহ্মকর্মসমাধিনা ব্রহ্মৈব কর্ম ব্রহ্মকর্ম তস্মিন্ সমাধিঃ যস্য
সঃ ব্রহ্মকর্মসমাধিঃ তেন ব্রহ্মকর্মসমাধিনা ব্রহ্মৈব গন্তব্যম্ ॥
এবং লোকসঙ্গ্রহং চিকীর্ষুণাপি ক্রিয়মাণং কর্ম পরমার্থতঃ
অকর্ম, ব্রহ্মবুদ্ধ্যুপমৃদিতৎবাৎ । এবং সতি নিবৃত্তকর্মণোঽপি
সর্বকর্মসন্ন্যাসিনঃ সম্যগ্দর্শনস্তুত্যর্থং যজ্ঞৎবসম্পাদনং জ্ঞানস্য
সুতরামুপপদ্যতে ; যৎ অর্পণাদি অধিয়জ্ঞে প্রসিদ্ধং তৎ অস্য অধ্যাত্মং
ব্রহ্মৈব পরমার্থদর্শিন ইতি । অন্যথা সর্বস্য ব্রহ্মৎবে অর্পণাদীনামেব
বিশেষতো ব্রহ্মৎবাভিধানং অনর্থকং স্যাৎ । তস্মাৎ ব্রহ্মৈব ইদং
সর্বমিতি অভিজানতঃ বিদুষঃ কর্মাভাবঃ । কারকবুদ্ধ্যভাবাচ্চ । ন হি
কারকবুদ্ধিরহিতং যজ্ঞাখ্যং কর্ম দৃষ্টম্ । সর্বমেব অগ্নিহোত্রাদিকং
কর্ম শব্দসমর্পিতদেবতাবিশেষসম্প্রদানাদিকারকবুদ্ধিমৎ
কর্ত্রভিমানফলাভিসন্ধিমচ্চ দৃষ্টম্ ;
ন উপমৃদিতক্রিয়াকারকফলভেদবুদ্ধিমৎ
কর্তৃৎবাভিমানফলাভিসন্ধিরহিতং বা । ইদং তু
ব্রহ্মবুদ্ধ্যুপমৃদিতার্পণাদিকারকক্রিয়াফলভেদবুদ্ধি কর্ম । অতঃ
অকর্মৈব তৎ । তথা চ দর্শিতং “কর্মণ্যকর্ম যঃ পশ্যেৎ”
(ভ. গী. ৪-১৮) “কর্মণ্যভিপ্রবৃত্তোঽপি নৈব কিঞ্চিৎকরোতি সঃ”
(ভ. গী. ৪-২০) “গুণা গুণেষু বর্তন্তে” (ভ. গী. ৩-২৮)“নৈব
কিঞ্চিৎকরোমীতি যুক্তো মন্যেত তত্ত্ববিৎ” (ভ. গী. ৫-৮) ইত্যাদিভিঃ ।
তথা চ দর্শয়ন্ তত্র তত্র ক্রিয়াকারকফলভেদবুদ্ধ্যুপমর্দং করোতি ।
দৃষ্টা চ কাম্যাগ্নিহোত্রাদৌ কামোপমর্দেন কাম্যাগ্নিহোত্রাদিহানিঃ । তথা
মতিপূর্বকামতিপূর্বকাদীনাং কর্মণাং কার্যবিশেষস্য আরম্ভকৎবং দৃষ্টম্ ।
তথা ইহাপি ব্রহ্মবুদ্ধ্যুপমৃদিতার্পণাদিকারকক্রিয়াফলভেদবুদ্ধেঃ
বাহ্যচেষ্টামাত্রেণ কর্মাপি বিদুষঃ অকর্ম সম্পদ্যতে । অতঃ উক্তম্
“সমগ্রং প্রবিলীয়তে” (ভ. গী. ৪-২০) ইতি ॥ অত্র কেচিদাহুঃ
— যৎ ব্রহ্মতৎ অর্পণাদীনি ; ব্রহ্মৈব কিল অর্পণাদিনা পঞ্চবিধেন
কারকাত্মনা ব্যবস্থিতং সৎ তদেব কর্ম করোতি । তত্র ন অর্পণাদিবুদ্ধিঃ
নিবর্ত্যতে, কিং তু অর্পণাদিষু ব্রহ্মবুদ্ধিঃ আধীয়তে ; যথা প্রতিমাদৌ
বিষ্ণ্বাদিবুদ্ধিঃ, যথা বা নামাদৌ ব্রহ্মবুদ্ধিরিতি ॥ সত্যম্, এবমপি স্যাৎ
যদি জ্ঞানয়জ্ঞস্তুত্যর্থং প্রকরণং ন স্যাৎ । অত্র তু সম্যগ্দর্শনং
জ্ঞানয়জ্ঞশব্দিতং অনেকান্ যজ্ঞশব্দিতান্ ক্রিয়াবিশেষান্ উপন্যস্য
“শ্রেয়ান্ দ্রব্যময়াদ্যজ্ঞাৎ জ্ঞানয়জ্ঞঃ” (ভ. গী. ৪-৩৩) ইতি
জ্ঞানং স্তৌতি । অত্র চ সমর্থমিদং বচনং “ব্রহ্মার্পণম্”
ইত্যাদি জ্ঞানস্য যজ্ঞৎবসম্পাদনে ; অন্যথা সর্বস্য ব্রহ্মৎবে অর্পণাদীনামেব
বিশেষতো ব্রহ্মৎবাভিধানমনর্থকং স্যাৎ । যে তু অর্পণাদিষু প্রতিমায়াং
বিষ্ণুদৃষ্টিবৎ ব্রহ্মদৃষ্টিঃ ক্ষিপ্যতে নামাদিষ্বিব চেতি ব্রুবতে ন
তেষাং ব্রহ্মবিদ্যা উক্তা ইহ বিবক্ষিতা স্যাৎ, অর্পণাদিবিষয়ৎবাৎ জ্ঞানস্য ।
ন চ দৃষ্টিসম্পাদনজ্ঞানেন মোক্ষফলং প্রাপ্যতে । “ব্রহ্মৈব
তেন গন্তব্যম্” ইতি চোচ্যতে । বিরুদ্ধং চ সম্যগ্দর্শনং অন্তরেণ
মোক্ষফলং প্রাপ্যতে ইতি । প্রকৃতবিরোধশ্চ ; সম্যগ্দর্শনং চ
প্রকৃতং “কর্মণ্যকর্ম যঃ পশ্যেৎ” (ভ. গী. ৪-১৮) ইত্যত্র, অন্তে
চ সম্যগ্দর্শনম্, তস্যৈব উপসংহারাৎ ।“শ্রেয়ান্ দ্রব্যময়াদ্যজ্ঞাৎ
জ্ঞানয়জ্ঞঃ” (ভ. গী. ৪-৩৩), “জ্ঞানং লব্ধ্বা পরাং শান্তিম্”
(ভ. গী. ৪-৩৯) ইত্যাদিনা সম্যগ্দর্শনস্তুতিমেব কুর্বন্ উপক্ষীণঃ
অধ্যায়ঃ । তত্র অকস্মাৎ অর্পণাদৌ ব্রহ্মদৃষ্টিঃ অপ্রকরণে প্রতিমায়ামিব
বিষ্ণুদৃষ্টিঃ উচ্যতে ইতি অনুপপন্নং তস্মাৎ যথাব্যাখ্যাতার্থ এব অয়ং
শ্লোকঃ ॥ তত্র অধুনা সম্যগ্দর্শনস্য যজ্ঞৎবং সম্পাদ্য তৎস্তুত্যর্থম্
অন্যেঽপি যজ্ঞা উপক্ষিপ্যন্তে —
দৈবমেবাপরে যজ্ঞং যোগিনঃ পর্যুপাসতে ।
ব্রহ্মাগ্নাবপরে যজ্ঞং যজ্ঞেনৈবোপজুহ্বতি ॥ ৪-২৫॥
দৈবমেব দেবা ইজ্যন্তে যেন যজ্ঞেন অসৌ দৈবো যজ্ঞঃ তমেব
অপরে যজ্ঞং যোগিনঃ কর্মিণঃ পর্যুপাসতে কুর্বন্তীত্যর্থঃ ।
ব্রহ্মাগ্নৌ “সত্যং জ্ঞানমনন্তং ব্রহ্ম” (তৈ. উ. ২-১-১)
”বিজ্ঞানমানন্দং ব্রহ্ম” “যৎ সাক্ষাদপরোক্ষাৎ
ব্রহ্ম য আত্মা সর্বান্তরঃ” (বৃ. উ. ৩-৪-১) ইত্যাদিবচনোক্তম্
অশনায়াদিসর্বসংসারধর্মবর্জিতং “নেতি নেতি” (বৃ. উ. ৪-৪-২২)
ইতি নিরস্তাশেষবিশেষং ব্রহ্মশব্দেন উচ্যতে । ব্রহ্ম চ তৎ
অগ্নিশ্চ সঃ হোমাধিকরণৎববিবক্ষয়া ব্রহ্মাগ্নিঃ । তস্মিন্ ব্রহ্মাগ্নৌ
অপরে অন্যে ব্রহ্মবিদঃ যজ্ঞং — যজ্ঞশব্দবাচ্য আত্মা, আত্মনামসু
যজ্ঞশব্দস্য পাঠাৎ — তং আত্মানং যজ্ঞং পরমার্থতঃ পরমেব
ব্রহ্ম সন্তং বুদ্ধ্যাদ্যুপাধিসংয়ুক্তং অধ্যস্তসর্বোপাধিধর্মকম্
আহুতিরূপং যজ্ঞেনৈব আত্মনৈব উক্তলক্ষণেন উপজুহ্বতি প্রক্ষিপন্তি,
সোপাধিকস্য আত্মনঃ নিরুপাধিকেন পরব্রহ্মস্বরূপেণৈব যদ্দর্শনং
স তস্মিন্ হোমঃ তং কুর্বন্তি ব্রহ্মাত্মৈকৎবদর্শননিষ্ঠাঃ সন্ন্যাসিনঃ
ইত্যর্থঃ ॥ সোঽয়ং সম্যগ্দর্শনলক্ষণঃ যজ্ঞঃ দৈবয়জ্ঞাদিষু যজ্ঞেষু
উপক্ষিপ্যতে “ব্রহ্মার্পণম্” ইত্যাদিশ্লোকৈঃ প্রস্তুতঃ “শ্রেয়ান্
দ্রব্যময়াদ্যজ্ঞাৎ জ্ঞানয়জ্ঞঃ পরন্তপ” (ভ. গী. ৪-৩৩)ইত্যাদিনা
স্তুত্যর্থং —
শ্রোত্রাদীনীন্দ্রিয়াণ্যন্যে সংয়মাগ্নিষু জুহ্বতি ।
শব্দাদীন্বিষয়ানন্য ইন্দ্রিয়াগ্নিষু জুহ্বতি ॥ ৪-২৬॥
শ্রোত্রাদীনি ইন্দ্রিয়াণি অন্যে যোগিনঃ সংয়মাগ্নিষু । প্রতীন্দ্রিয়ং
সংয়মো ভিদ্যতে ইতি বহুবচনম্ । সংয়মা এবং অগ্নয়ঃ তেষু
জুহ্বতি ইদ্রিয়সংয়মমেব কুর্বন্তি ইত্যর্থঃ । শব্দাদীন্ বিষয়ান্
অন্যে ইন্দ্রিয়াগ্নিষু ইন্দ্রিয়াণ্যেব অগ্নয়ঃ তেষু ইন্দ্রিয়াগ্নিষু জুহ্বতি
শ্রোত্রাদিভিরবিরুদ্ধবিষয়গ্রহণং হোমং মন্যন্তে ॥ কিঞ্চ —
সর্বাণীন্দ্রিয়কর্মাণি প্রাণকর্মাণি চাপরে ।
আত্মসংয়ময়োগাগ্নৌ জুহ্বতি জ্ঞানদীপিতে ॥ ৪-২৭॥
সর্বাণি ইন্দ্রিয়কর্মাণি ইন্দ্রিয়াণাং কর্মাণি ইন্দ্রিয়কর্মাণি, তথা প্রাণকর্মাণি
প্রাণো বায়ুঃ আধ্যাত্মিকঃ তৎকর্মাণি আকুঞ্চনপ্রসারণাদীনি তানি চ অপরে
আত্মসংয়ময়োগাগ্নৌ আত্মনি সংয়মঃ আত্মসংয়মঃ স এব যোগাগ্নিঃ তস্মিন্
আত্মসংয়ময়োগাগ্নৌ জুহ্বতি প্রক্ষিপন্তি জ্ঞানদীপিতে স্নেহেনেব প্রদীপে
বিবেকবিজ্ঞানেন উজ্জ্বলভাবং আপাদিতে জুহ্বতি প্রবিলাপয়ন্তি ইত্যর্থঃ ॥
দ্রব্যযজ্ঞাস্তপোয়জ্ঞা যোগয়জ্ঞাস্তথাপরে ।
স্বাধ্যায়জ্ঞানয়জ্ঞাশ্চ যতয়ঃ সংশিতব্রতাঃ ॥ ৪-২৮॥
দ্রব্যযজ্ঞাঃ তীর্থেষু দ্রব্যবিনিয়োগং যজ্ঞবুদ্ধ্যা কুর্বন্তি যে তে
দ্রব্যযজ্ঞাঃ । তপোয়জ্ঞাঃ তপঃ যজ্ঞঃ যেষাং তপস্বিনাং তে তপোয়জ্ঞাঃ ।
যোগয়জ্ঞাঃ প্রাণায়ামপ্রত্যাহারাদিলক্ষণো যোগো যজ্ঞো যেষাং তে
যোগয়জ্ঞাঃ । তথা অপরে স্বাধ্যায়জ্ঞানয়জ্ঞাশ্চ স্বাধ্যায়ঃ যথাবিধি
ঋগাদ্যভ্যাসঃ যজ্ঞঃ যেষাং তে স্বাধ্যায়যজ্ঞাঃ । জ্ঞানয়জ্ঞাঃ জ্ঞানং
শাস্ত্রার্থপরিজ্ঞানং যজ্ঞঃ যেষাং তে জ্ঞানয়জ্ঞাশ্চ যতয়ঃ যতনশীলাঃ
সংশিতব্রতাঃ সম্যক্ শিতানি তনূকৃতানি তীক্ষ্ণীকৃতানি ব্রতানি যেষাং
তে সংশিতব্রতাঃ ॥ কিঞ্চ —
অপানে জুহ্বতি প্রাণং প্রাণেঽপানং তথাপরে ।
প্রাণাপানগতী রুদ্ধ্বা প্রাণায়ামপরায়ণাঃ ॥ ৪-২৯॥
অপানে অপানবৃত্তৌ জুহ্বতি প্রক্ষিপন্তি প্রাণং প্রাণবৃত্তিম্, পূরকাখ্যং
প্রাণায়ামং কুর্বন্তীত্যর্থঃ । প্রাণে অপানং তথা অপরে জুহ্বতি, রেচকাখ্যং
চ প্রাণায়ামং কুর্বন্তীত্যেতৎ । প্রাণাপানগতী মুখনাসিকাভ্যাং বায়োঃ
নির্গমনং প্রাণস্য গতিঃ, তদ্বিপর্যযেণ অধোগমনং অপানস্য গতিঃ, তে
প্রাণাপানগতী এতে রুদ্ধ্বা নিরুধ্য প্রাণায়ামপরায়ণাঃ প্রাণায়ামতৎপরাঃ ;
কুম্ভকাখ্যং প্রাণায়ামং কুর্বন্তীত্যর্থঃ ॥ কিঞ্চ —
অপরে নিয়তাহারাঃ প্রাণান্প্রাণেষু জুহ্বতি ।
সর্বেঽপ্যেতে যজ্ঞবিদো যজ্ঞক্ষপিতকল্মষাঃ ॥ ৪-৩০॥
অপরে নিয়তাহারাঃ নিয়তঃ পরিমিতঃ আহারঃ যেষাং তে নিয়তাহারাঃ সন্তঃ
প্রাণান্ বায়ুভেদান্ প্রাণেষু এব জুহ্বতি যস্য যস্য বায়োঃ জয়ঃ ক্রিয়তে
ইতরান্ বায়ুভেদান্ তস্মিন্ তস্মিন্ জুহ্বতি, তে তত্র প্রবিষ্টা ইব ভবন্তি ।
সর্বেঽপি এতে যজ্ঞবিদঃ যজ্ঞক্ষপিতকল্মষাঃ যজ্ঞৈঃ যথোক্তৈঃ ক্ষপিতঃ
নাশিতঃ কল্মষো যেষাং তে যজ্ঞক্ষপিতকল্মষাঃ ॥ এবং যথোক্তান্ যজ্ঞান্
নির্বর্ত্য —
যজ্ঞশিষ্টামৃতভুজো যান্তি ব্রহ্ম সনাতনম্ ।
নায়ং লোকোঽস্ত্যযজ্ঞস্য কুতোঽন্যঃ কুরুসত্তম ॥ ৪-৩১॥
যজ্ঞশিষ্টামৃতভুজঃ যজ্ঞানাং শিষ্টং যজ্ঞশিষ্টং
যজ্ঞশিষ্টং চ তৎ অমৃতং চ যজ্ঞশিষ্টামৃতং তৎ
ভুঞ্জতে ইতি যজ্ঞশিষ্টামৃতভুজঃ । যথোক্তান্ যজ্ঞান্ কৃৎবা
তচ্ছিষ্টেন কালেন যথাবিধিচোদিতং অন্নং অমৃতাখ্যং ভুঞ্জতে ইতি
যজ্ঞশিষ্টামৃতভুজঃ যান্তি গচ্ছন্তি ব্রহ্ম সনাতনং চিরন্তনং
মুমুক্ষবশ্চেৎ ; কালাতিক্রমাপেক্ষয়া ইতি সামর্থ্যাৎ গম্যতে । ন অয়ং লোকঃ
সর্বপ্রাণিসাধারণোঽপি অস্তি যথোক্তানাং যজ্ঞানাং একোঽপি যজ্ঞঃ যস্য
নাস্তি সঃ অয়জ্ঞঃ তস্য । কুতঃ অন্যো বিশিষ্টসাধনসাধ্যঃ কুরুসত্তম ॥
এবং বহুবিধা যজ্ঞা বিততা ব্রহ্মণো মুখে ।
কর্মজান্বিদ্ধি তান্সর্বানেবং জ্ঞাৎবা বিমোক্ষ্যসে ॥ ৪-৩২॥
এবং যথোক্তা বহুবিধা বহুপ্রকারা যজ্ঞাঃ বিততাঃ বিস্তীর্ণাঃ ব্রহ্মণো
বেদস্য মুখে দ্বারে বেদদ্বারেণ অবগম্যমানাঃ ব্রহ্মণো মুখে বিততা উচ্যন্তে ;
তদ্যথা ”বাচি হি প্রাণং জুহুমঃ” (ঐ. আ. ৩-২-৬) ইত্যাদয়ঃ ।
কর্মজান্ কায়িকবাচিকমানসকর্মোদ্ভাবান্ বিদ্ধি তান্ সর্বান্ অনাত্মজান্,
নির্ব্যাপারো হি আত্মা । অত এবং জ্ঞাৎবা বিমোক্ষ্যসে অশুভাৎ । ন মদ্ব্যাপারা
ইমে, নির্ব্যাপারোঽহং উদাসীন ইত্যেবং জ্ঞাৎবা অস্মাৎ সম্যগ্দর্শনাৎ মোক্ষ্যসে
সংসারবন্ধনাৎ ইত্যর্থঃ ॥ “ব্রহ্মার্পণম্” (ভ. গী. ৪-২৪)
ইত্যাদিশ্লোকেন সম্যগ্দর্শনস্য যজ্ঞৎবং সম্পাদিতম্ । যজ্ঞাশ্চ অনেকে
উপদিষ্টাঃ । তৈঃ সিদ্ধপুরুষার্থপ্রয়োজনৈঃ জ্ঞানং স্তূয়তে । কথম্ ? —
শ্রেয়ান্দ্রব্যময়াদ্যজ্ঞাজ্জ্ঞানয়জ্ঞঃ পরন্তপ ।
সর্বং কর্মাখিলং পার্থ জ্ঞানে পরিসমাপ্যতে ॥ ৪-৩৩॥
শ্রেয়ান্ দ্রব্যময়াৎ দ্রব্যসাধনসাধ্যাৎ যজ্ঞাৎ জ্ঞানয়জ্ঞঃ হে পরন্তপ ।
দ্রব্যময়ো হি যজ্ঞঃ ফলস্যারম্ভকঃ, জ্ঞানয়জ্ঞঃ ন ফলারম্ভকঃ,
অতঃ শ্রেয়ান্ প্রশস্যতরঃ । কথম্ ? যতঃ সর্বং কর্ম সমস্তং অখিলম্
অপ্রতিবদ্ধং পার্থ জ্ঞানে মোক্ষসাধনে সর্বতঃসম্প্লুতোদকস্থানীয়ে
পরিসমাপ্যতে অন্তর্ভবতীত্যর্থঃ “যথা কৃতায় বিজিতায়াধরেয়াঃ
সংয়ন্ত্যেবমেবং সর্বং তদভিসমেতি যৎ কিঞ্চিৎপ্রজাঃ সাধু কুর্বন্তি
যস্তদ্বেদ যৎস বেদ” (ছা. উ. ৪-১-৪) ইতি শ্রুতেঃ ॥ তদেতৎ বিশিষ্টং
জ্ঞানং তর্হি কেন প্রাপ্যতে ইত্যুচ্যতে —
তদ্বিদ্ধি প্রণিপাতেন পরিপ্রশ্নেন সেবয়া ।
উপদেক্ষ্যন্তি তে জ্ঞানং জ্ঞানিনস্তত্ত্বদর্শিনঃ ॥ ৪-৩৪॥
তৎ বিদ্ধি বিজানীহি যেন বিধিনা প্রাপ্যতে ইতি । আচার্যান্ অভিগম্য,
প্রণিপাতেন প্রকর্ষেণ নীচৈঃ পতনং প্রণিপাতঃ দীর্ঘনমস্কারঃ তেন,
“কথং বন্ধঃ ? কথং মোক্ষঃ ? কা বিদ্যা ? কা চাবিদ্যা ?” ইতি
পরিপ্রশ্নেন, সেবয়া গুরুশুশ্রূষয়া এবমাদিনা । প্রশ্রয়েণ আবর্জিতা
আচার্যা উপদেক্ষ্যন্তি কথয়িষ্যন্তি তে জ্ঞানং যথোক্তবিশেষণং
জ্ঞানিনঃ । জ্ঞানবন্তোঽপি কেচিৎ যথাবৎ তত্ত্বদর্শনশীলাঃ, অপরে ন
; অতো বিশিনষ্টি তত্ত্বদর্শিনঃ ইতি । যে সম্যগ্দর্শিনঃ তৈঃ উপদিষ্টং
জ্ঞানং কার্যক্ষমং ভবতি নেতরৎ ইতি ভগবতো মতম্ ॥ তথা চ সতি
ইদমপি সমর্থং বচনং —
যজ্জ্ঞাৎবা ন পুনর্মোহমেবং যাস্যসি পাণ্ডব ।
যেন ভূতান্যশেষেণ দ্রক্ষ্যস্যাত্মন্যথো ময়ি ॥ ৪-৩৫॥
যৎ জ্ঞাৎবা যৎ জ্ঞানং তৈঃ উপদিষ্টং অধিগম্য প্রাপ্য পুনঃ ভূয়ঃ মোহম্
এবং যথা ইদানীং মোহং গতোঽসি পুনঃ এবং ন যাস্যসি হে পাণ্ডব । কিঞ্চ
— যেন জ্ঞানেন ভূতানি অশেষেণ ব্রহ্মাদীনি স্তম্বপর্যন্তানি দ্রক্ষ্যতি
সাক্ষাৎ আত্মনি প্রত্যগাত্মনি “মৎসংস্থানি ইমানি ভূতানি”
ইতি অথো অপি ময়ি বাসুদেবে “পরমেশ্বরে চ ইমানি” ইতি ;
ক্ষেত্রজ্ঞেশ্বরৈকৎবং সর্বোপনিষৎপ্রসিদ্ধং দ্রক্ষ্যসি ইত্যর্থঃ ॥
কিঞ্চ এতস্য জ্ঞানস্য মাহাত্ম্যং —
অপি চেদসি পাপেভ্যঃ সর্বেভ্যঃ পাপকৃত্তমঃ ।
সর্বং জ্ঞানপ্লবেনৈব বৃজিনং সন্তরিষ্যসি ॥ ৪-৩৬॥
অপি চেৎ অসি পাপেভ্যঃ পাপকৃদ্ভ্যঃ সর্বেভ্যঃ অতিশয়েন পাপকৃৎ
পাপকৃত্তমঃ সর্বং জ্ঞানপ্লবেনৈব জ্ঞানমেব প্লবং কৃৎবা বৃজিনং
বৃজিনার্ণবং পাপসমুদ্রং সন্তরিষ্যসি । ধর্মোঽপি ইহ মুমুক্ষোঃ পাপম্
উচ্যতে ॥ জ্ঞানং কথং নাশয়তি পাপমিতি দৃষ্টান্ত উচ্যতে —
যথৈধাংসি সমিদ্ধোঽগ্নির্ভস্মসাৎকুরুতেঽর্জুন ।
জ্ঞানাগ্নিঃ সর্বকর্মাণি ভস্মসাৎকুরুতে তথা ॥ ৪-৩৭॥
যথা এধাংসি কাষ্ঠানি সমিদ্ধঃ সম্যক্ ইদ্ধঃ দীপ্তঃ অগ্নিঃ ভস্ম্মসাৎ
ভস্মীভাবং কুরুতে হে অর্জুন, জ্ঞানমেব অগ্নিঃ জ্ঞানাগ্নিঃ সর্বকর্মাণি
ভস্মসাৎ কুরুতে তথা নির্বীজীকরোতীত্যর্থঃ । ন হি সাক্ষাদেব জ্ঞানাগ্নিঃ
কর্মাণি ইন্ধনবৎ ভস্মীকর্তুং শক্নোতি । তস্মাৎ সম্যগ্দর্শনং সর্বকর্মণাং
নির্বীজৎবে কারণং ইত্যভিপ্রায়ঃ । সামর্থ্যাৎ যেন কর্মণা শরীরং আরব্ধং
তৎ প্রবৃত্তফলৎবাৎ উপভোগেনৈব ক্ষীয়তে । “তস্য তাবদেব
চিরং যাবন্ন বিমোক্ষ্যেঽথ সম্পৎস্যে” অতো যানি অপ্রবৃত্তফলানি
জ্ঞানোৎপত্তেঃ প্রাক্ কৃতানি জ্ঞানসহভাবীনি চ অতীতানেকজন্মকৃতানি
চ তান্যেব সর্বাণি ভস্মসাৎ কুরুতে ॥ যতঃ এবং অতঃ —
ন হি জ্ঞানেন সদৃশং পবিত্রমিহ বিদ্যতে ।
তৎস্বয়ং যোগসংসিদ্ধঃ কালেনাত্মনি বিন্দতি ॥ ৪-৩৮॥
ন হি জ্ঞানেন সদৃশং তুল্যং পবিত্রং পাবনং শুদ্ধিকরং ইহ বিদ্যতে ।
তৎ জ্ঞানং স্বয়মেব যোগসংসিদ্ধঃ যোগেন কর্ময়োগেন সমাধিয়োগেন চ
সংসিদ্ধঃ সংস্কৃতঃ যোগ্যতাং আপন্নঃ সন্ মুমুক্ষুঃ কালেন মহতা আত্মনি
বিন্দতি লভতে ইত্যর্থঃ ॥ যেন একান্তেন জ্ঞানপ্রাপ্তিঃ ভবতি স উপায়ঃ
উপদিশ্যতে —
শ্রদ্ধাবাংল্লভতে জ্ঞানং তৎপরঃ সংয়তেন্দ্রিয়ঃ ।
জ্ঞানং লব্ধ্বা পরাং শান্তিমচিরেণাধিগচ্ছতি ॥ ৪-৩৯॥
শ্রদ্ধাবান্ শ্রদ্ধালুঃ লভতে জ্ঞানম্ । শ্রদ্ধালুৎবেঽপি ভবতি
কশ্চিৎ মন্দপ্রস্থানঃ, অত আহ — তৎপরঃ, গুরূপসদনাদৌ অভিয়ুক্তঃ
জ্ঞানলব্ধ্যুপায়ে শ্রদ্ধাবান্ । তৎপরঃ অপি অজিতেন্দ্রিয়ঃ স্যাৎ ইত্যতঃ আহ
— সংয়তেন্দ্রিয়ঃ, সংয়তানি বিষয়েভ্যো নিবর্তিতানি যস্য ইন্দ্রিয়াণি স
সংয়তেন্দ্রিয়ঃ । য এবম্ভূতঃ শ্রদ্ধাবান্ তৎপরঃ সংয়তেন্দ্রিয়শ্চ
সঃ অবশ্যং জ্ঞানং লভতে । প্রণিপাতাদিস্তু বাহ্যোঽনৈকান্তিকোঽপি
ভবতি, মায়াবিৎবাদিসম্ভবাৎ ; ন তু তৎ শ্রদ্ধাবত্ত্বাদৌ ইত্যেকান্ততঃ
জ্ঞানলব্ধ্যুপায়ঃ । কিং পুনঃ জ্ঞানলাভাৎ স্যাৎ ইত্যুচ্যতে — জ্ঞানং
লব্ধ্বা পরাং মোক্ষাখ্যাং শান্তিং উপরতিং অচিরেণ ক্ষিপ্রমেব অধিগচ্ছতি ।
সম্যগ্দর্শনাৎ ক্ষিপ্রমেব মোক্ষো ভবতীতি সর্বশাস্ত্রন্যায়প্রসিদ্ধঃ
সুনিশ্চিতঃ অর্থঃ ॥ অত্র সংশয়ঃ ন কর্তব্যঃ, পাপিষ্ঠো হি সংশয়ঃ ;
কথং ইতি উচ্যতে —
অজ্ঞশ্চাশ্রদ্দধানশ্চ সংশয়াত্মা বিনশ্যতি ।
নায়ং লোকোঽস্তি ন পরো ন সুখং সংশয়াত্মনঃ ॥ ৪-৪০॥
অজ্ঞশ্চ অনাত্মজ্ঞশ্চ অশ্রদ্দধানশ্চ গুরুবাক্যশাস্ত্রেষু
অবিশ্বাসবাংশ্চ সংশয়াত্মা চ সংশয়চিত্তশ্চ বিনশ্যতি ।
অজ্ঞাশ্রদ্দধানৌ যদ্যপি বিনশ্যতঃ, ন তথা যথা সংশয়াত্মা ।
সংশয়াত্মা তু পাপিষ্ঠঃ সর্বেষাম্ । কথম্ ? নায়ং সাধারণোঽপি লোকোঽস্তি ।
তথা ন পরঃ লোকঃ । ন সুখম্, তত্রাপি সংশয়োৎপত্তেঃ সংশয়াত্মনঃ
সংশয়চিত্তস্য । তস্মাৎ সংশয়ো ন কর্তব্যঃ ॥ কস্মাৎ ? —
যোগসন্ন্যস্তকর্মাণং জ্ঞানসঞ্ছিন্নসংশয়ম্ ।
আত্মবন্তং ন কর্মাণি নিবধ্নন্তি ধনঞ্জয় ॥ ৪-৪১॥
যোগসন্ন্যস্তকর্মাণং পরমার্থদর্শনলক্ষণেন যোগেন সন্ন্যস্তানি কর্মাণি
যেন পরমার্থদর্শিনা ধর্মাধর্মাখ্যানি তং যোগসন্ন্যস্তকর্মাণম্ ।
কথং যোগসন্ন্যস্তকর্মেত্যাহ — জ্ঞানসঞ্ছিন্নসংশয়ং
জ্ঞানেন আত্মেশ্বরৈকৎবদর্শনলক্ষণেন সঞ্ছিন্নঃ সংশয়ো
যস্য সঃ জ্ঞানসঞ্ছিন্নসংশয়ঃ । য এবং যোগসন্ন্যস্তকর্মা তম্
আত্মবন্তং অপ্রমত্তং গুণচেষ্টারূপেণ দৃষ্টানি কর্মাণি ন নিবধ্নন্তি
অনিষ্টাদিরূপং ফলং নারভন্তে হে ধনঞ্জয় ॥ যস্মাৎ কর্ময়োগানুষ্ঠানাৎ
অশুদ্ধিক্ষয়হেতুকজ্ঞানসঞ্ছিন্নসংশয়ঃ ন নিবধ্যতে কর্মভিঃ
জ্ঞানাগ্নিদগ্ধকর্মৎবাদেব, যস্মাচ্চ জ্ঞানকর্মানুষ্ঠানবিষয়ে সংশয়বান্
বিনশ্যতি —
তস্মাদজ্ঞানসম্ভূতং হৃৎস্থং জ্ঞানাসিনাত্মনঃ ।
ছিত্ত্বৈনং সংশয়ং যোগমাতিষ্ঠোত্তিষ্ঠ ভারত ॥ ৪-৪২॥
তস্মাৎ পাপিষ্ঠং অজ্ঞানসম্ভূতং অজ্ঞানাৎ অবিবেকাৎ জাতং হৃৎস্থং
হৃদি বুদ্ধৌ স্থিতং জ্ঞানাসিনা শোকমোহাদিদোষহরং সম্যগ্দর্শনং
জ্ঞানং তদেব অসিঃ খঙ্গঃ তেন জ্ঞানাসিনা আত্মনঃ স্বস্য, আত্মবিষয়ৎবাৎ
সংশয়স্য । ন হি পরস্য সংশয়ঃ পরেণ চ্ছেত্তব্যতাং প্রাপ্তঃ, যেন
স্বস্যেতি বিশেষ্যেত । অতঃ আত্মবিষয়োঽপি স্বস্যৈব ভবতি । ছিত্ত্বা এনং
সংশয়ং স্ববিনাশহেতুভূতম্, যোগং সম্যগ্দর্শনোপায়ং কর্মানুষ্ঠানম্
আতিষ্ঠ কুর্বিত্যর্থঃ । উত্তিষ্ঠ চ ইদানীং যুদ্ধায় ভারত ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে জ্ঽআনকর্মসন্ন্যাসয়োগো নাম চতুর্থোঽধ্যায়ঃ ॥৪॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে ব্রহ্ময়জ্ঞ-প্রশংসা নাম চতুর্থঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ পঞ্চমোঽধ্যায়ঃ ॥
“কর্মণ্যকর্ম যঃ পশ্যেৎ” (ভ. গী. ৪-১৮)
ইত্যারভ্য “স যুক্তঃ কৃৎস্নকর্মকৃৎ” (ভ. গী. ৪-১৮)
“জ্ঞানাগ্নিদগ্ধকর্মাণম্” (ভ. গী. ৪-১৯) “শারীরং কেবলং
কর্ম কুর্বন্” (ভ. গী. ৪-২১) “যদৃচ্ছালাভসন্তুষ্টঃ”
(ভ. গী. ৪-২২) “ব্রহ্মার্পণং ব্রহ্ম হবিঃ” (ভ. গী. ৪-২৪)
“কর্মজান্ বিদ্ধি তান্ সর্বান্” (ভ. গী. ৪-৩২) “সর্বং
কর্মাখিলং পার্থ” (ভ. গী. ৪-৩৩) “জ্ঞানাগ্নিঃ সর্বকর্মাণি”
(ভ. গী. ৪-৩৭) “যোগসন্ন্যস্তকর্মাণম্” (ভ. গী. ৪-৪১)
ইত্যেতৈঃ বচনৈঃ সর্বকর্মসন্ন্যাসং অবোচৎ ভগবান্ । “ছিত্ত্বৈনং
সংশয়ং যোগমাতিষ্ঠ” (ভ. গী. ৪-৪২) ইত্যনেন বচনেন যোগং
চ কর্মানুষ্ঠানলক্ষণং অনুতিষ্ঠ ইত্যুক্তবান্ । তয়োরুভয়োশ্চ
কর্মানুষ্ঠানকর্মসন্ন্যাসয়োঃ স্থিতিগতিবৎ পরস্পরবিরোধাৎ একেন
সহ কর্তুমশক্যৎবাৎ, কালভেদেন চ অনুষ্ঠানবিধানাভাবাৎ,
অর্থাৎ এতয়োঃ অন্যতরকর্তব্যতাপ্রাপ্তৌ সত্যাং যৎ প্রশস্যতরম্
এতয়োঃ কর্মানুষ্ঠানকর্মসন্ন্যাসয়োঃ তৎ কর্তব্যং ন ইতরৎ ইত্যেবং
মন্যমানঃ প্রশস্যতরবুভুৎসয়া অর্জুন উবাচ — “সন্ন্যাসং
কর্মণাং কৃষ্ণ” (ভ. গী. ৫-১) ইত্যাদিনা ॥ ননু চ আত্মবিদঃ
জ্ঞানয়োগেন নিষ্ঠাং প্রতিপিপাদয়িষন্ পূর্বোদাহৃতৈঃ বচনৈঃ
ভগবান্ সর্বকর্মসন্ন্যাসং অবোচৎ, ন তু অনাত্মজ্ঞস্য । অতশ্চ
কর্মানুষ্ঠানকর্মসন্ন্যাসয়োঃ ভিন্নপুরুষবিষয়ৎবাৎ অন্যতরস্য
প্রশস্যতরৎববুভুৎসয়া অয়ং প্রশ্নঃ অনুপপন্নঃ । সত্যমেব
ৎবদভিপ্রায়েণ প্রশ্নো ন উপপদ্যতে ; প্রষ্টুঃ স্বাভিপ্রায়েণ পুনঃ
প্রশ্নঃ যুজ্যত এবেতি বদামঃ । কথম্ ? পূর্বোদাহৃতৈঃ বচনৈঃ ভগবতা
কর্মসন্ন্যাসস্য কর্তব্যতয়া বিবক্ষিতৎবাৎ, প্রাধান্যমন্তরেণ চ কর্তারং
তস্য কর্তব্যৎবাসম্ভবাৎ অনাত্মবিদপি কর্তা পক্ষে প্রাপ্তঃ অনূদ্যত এব ;
ন পুনঃ আত্মবিৎকর্তৃকৎবমেব সন্ন্যাসস্য বিবক্ষিতম্, ইত্যেবং মন্বানস্য
অর্জুনস্য কর্মানুষ্ঠানকর্মসন্ন্যাসয়োঃ অবিদ্বৎপুরুষকর্তৃকৎবমপি অস্তীতি
পূর্বোক্তেন প্রকারেণ তয়োঃ পরস্পরবিরোধাৎ অন্যতরস্য কর্তব্যৎবে প্রাপ্তে
প্রশস্যতরং চ কর্তব্যং ন ইতরৎ ইতি প্রশস্যতরবিবিদিষয়া প্রশ্নঃ ন
অনুপপন্নঃ ॥ প্রতিবচনবাক্যার্থনিরূপণেনাপি প্রষ্টুঃ অভিপ্রায়ঃ এবমেবেতি
গম্যতে । কথম্ ? “সন্ন্যাসকর্ময়োগৌ নিঃশ্রেয়সকরৌ তয়োস্তু কর্ময়োগো
বিশিষ্যতে” (ভ. গী. ৫-২) ইতি প্রতিবচনম্ । এতৎ নিরূপ্যং — কিং
অনেন আত্মবিৎকর্তৃকয়োঃ সন্ন্যাসকর্ময়োগয়োঃ নিঃশ্রেয়সকরৎবং প্রয়োজনম্
উক্ত্বা তয়োরেব কুতশ্চিৎ বিশেষাৎ কর্মসন্ন্যাসাৎ কর্ময়োগস্য বিশিষ্টৎবম্
উচ্যতে ? আহোস্বিৎ অনাত্মবিৎকর্তৃকয়োঃ সন্ন্যাসকর্ময়োগয়োঃ তদুভয়ং উচ্যতে ?
ইতি । কিঞ্চাতঃ — যদি আত্মবিৎকর্তৃকয়োঃ কর্মসন্ন্যাসকর্ময়োগয়োঃ
নিঃশ্রেয়সকরৎবম্, তয়োস্তু কর্মসন্ন্যাসাৎ কর্ময়োগস্য বিশিষ্টৎবম্
উচ্যতে ; যদি বা অনাত্মবিৎকর্তৃকয়োঃ সন্ন্যাসকর্ময়োগয়োঃ তদুভয়ম্
উচ্যতে ইতি । অত্র উচ্যতে — আত্মবিৎকর্তৃকয়োঃ সন্ন্যাসকর্ময়োগয়োঃ
অসম্ভবাৎ তয়োঃ নিঃশ্রেয়সকরৎববচনং তদীয়াচ্চ কর্মসন্ন্যাসাৎ
কর্ময়োগস্য বিশিষ্টৎবাভিধানং ইত্যেতৎ উভয়ং অনুপপন্নম্ । যদি
অনাত্মবিদঃ কর্মসন্ন্যাসঃ তৎপ্রতিকূলশ্চ কর্মানুষ্ঠানলক্ষণঃ
কর্ময়োগঃ সম্ভবেতাম্, তদা তয়োঃ নিঃশ্রেয়সকরৎবোক্তিঃ কর্ময়োগস্য
চ কর্মসন্ন্যাসাৎ বিশিষ্টৎবাভিধানং ইত্যেতৎ উভয়ং উপপদ্যেত ।
আত্মবিদস্তু সন্ন্যাসকর্ময়োগয়োঃ অসম্ভবাৎ তয়োঃ নিঃশ্রেয়সকরৎবাভিধানং
কর্মসন্ন্যাসাচ্চ কর্ময়োগঃ বিশিষ্যতে ইতি চ অনুপপন্নম্ ॥ অত্র আহ —
কিং আত্মবিদঃ সন্ন্যাসকর্ময়োগয়োঃ উভয়োরপি অসম্ভবঃ ? আহোস্বিৎ অন্যতরস্য
অসম্ভবঃ ? যদা চ অন্যতরস্য অসম্ভবঃ, তদা কিং কর্মসন্ন্যাসস্য, উত
কর্ময়োগস্য ? ইতি ; অসম্ভবে কারণং চ বক্তব্যং ইতি । অত্র উচ্যতে —
আত্মবিদঃ নিবৃত্তমিথ্যাজ্ঞানৎবাৎ বিপর্যযজ্ঞানমূলস্য কর্ময়োগস্য
অসম্ভবঃ স্যাৎ । জন্মাদিসর্ববিক্রিয়ারহিতৎবেন নিষ্ক্রিয়ং আত্মানম্
আত্মৎবেন যো বেত্তি তস্য আত্মবিদঃ সম্যগ্দর্শনেন অপাস্তমিথ্যাজ্ঞানস্য
নিষ্ক্রিয়াত্মস্বরূপাবস্থানলক্ষণং সর্বকর্মসন্ন্যাসং উক্ত্বা তদ্বিপরীতস্য
মিথ্যাজ্ঞানমূলকর্তৃৎবাভিমানপুরঃসরস্য সক্রিয়াত্মস্বরূপাবস্থানরূপস্য
কর্ময়োগস্য ইহ গীতাশাস্ত্রে তত্র তত্র আত্মস্বরূপনিরূপণপ্রদেশেষু
সম্যগ্জ্ঞানমিথ্যাজ্ঞানতৎকার্যবিরোধাৎ অভাবঃ প্রতিপাদ্যতে যস্মাৎ,
তস্মাৎ আত্মবিদঃ নিবৃত্তমিথ্যাজ্ঞানস্য বিপর্যযজ্ঞানমূলঃ
কর্ময়োগো ন সম্ভবতীতি যুক্তং উক্তং স্যাৎ ॥ কেষু কেষু পুনঃ
আত্মস্বরূপনিরূপণপ্রদেশেষু আত্মবিদঃ কর্মাভাবঃ প্রতিপাদ্যতে ইতি অত্র
উচ্যতে — “অবিনাশি তু তৎ” (ভ. গী. ২-১৭) ইতি প্রকৃত্য
“য এনং বেত্তি হন্তারম্” (ভ. গী. ২-১৯) “বেদাবিনাশিনং
নিত্যম্” (ভ. গী. ২-২১) ইত্যাদৌ তত্র তত্র আত্মবিদঃ কর্মাভাবঃ
উচ্যতে ॥ ননু চ কর্ময়োগোঽপি আত্মস্বরূপনিরূপণপ্রদেশেষু
তত্র তত্র প্রতিপাদ্যতে এব ; তদ্যথা — “তস্মাদ্যুধ্যস্ব
ভারত” (ভ. গী. ২-১৮) “স্বধর্মমপি চাবেক্ষ্য”
(ভ. গী. ২-৩১)“কর্মণ্যেবাধিকারস্তে” (ভ. গী. ২-৪৭)
ইত্যাদৌ । অতশ্চ কথং আত্মবিদঃ কর্ময়োগস্য অসম্ভবঃ স্যাদিতি ? অত্র
উচ্যতে — সম্যগ্জ্ঞানমিথ্যাজ্ঞানতৎকার্যবিরোধাৎ, “জ্ঞানয়োগেন
সাঙ্খ্যানাম্” (ভ. গী. ৩-৩)ইত্যনেন সাঙ্খ্যানাং আত্মতত্ত্ববিদাম্
অনাত্মবিৎকর্তৃককর্ময়োগনিষ্ঠাতঃ নিষ্ক্রিয়াত্মস্বরূপাবস্থানলক্ষণায়াঃ
জ্ঞানয়োগনিষ্ঠায়াঃ পৃথক্করণাৎ, কৃতকৃত্যৎবেন আত্মবিদঃ
প্রয়োজনান্তরাভাবাৎ, “তস্য কার্যং ন বিদ্যতে” (ভ. গী. ৩-১৭)
ইতি কর্তব্যান্তরাভাববচনাচ্চ, “ন কর্মণামনারম্ভাৎ”
(ভ. গী. ৩-৪) “সন্ন্যাসস্তু মহাবাহো দুঃখমাপ্তুময়োগতঃ”
(ভ. গী. ৫-৬) ইত্যাদিনা চ আত্মজ্ঞানাঙ্গৎবেন কর্ময়োগস্য
বিধানাৎ, “যোগারূঢস্য তস্যৈব শমঃ কারণমুচ্যতে”
(ভ. গী. ৬-৩)ইত্যনেন চ উৎপন্নসম্যগ্দর্শনস্য কর্ময়োগাভাববচনাৎ,
“শারীরং কেবলং কর্ম কুর্বন্নাপ্নোতি কিল্বিষম্” (ভ. গী. ৪-২১)
ইতি চ শরীরস্থিতিকারণাতিরিক্তস্য কর্মণো নিবারণাৎ, “নৈব
কিঞ্চিৎকরোমীতি যুক্তো মন্যেত তত্ত্ববিৎ” (ভ. গী. ৫-৮)ইত্যনেন চ
শরীরস্থিতিমাত্রপ্রয়ুক্তেষ্বপি দর্শনশ্রবণাদিকর্মসু আত্ময়াথাত্ম্যবিদঃ
“করোমি” ইতি প্রত্যযস্য সমাহিতচেতস্তয়া সদা অকর্তব্যৎবোপদেশাৎ
আত্মতত্ত্ববিদঃ সম্যগ্দর্শনবিরুদ্ধো মিথ্যাজ্ঞানহেতুকঃ কর্ময়োগঃ
স্বপ্নেঽপি ন সম্ভাবয়িতুং শক্যতে যস্মাৎ, তস্মাৎ অনাত্মবিৎকর্তৃকয়োরেব
সন্ন্যাসকর্ময়োগয়োঃ নিঃশ্রেয়সকরৎববচনম্, তদীয়াচ্চ
কর্মসন্ন্যাসাৎ পূর্বোক্তাত্মবিৎকর্তৃকসর্বকর্মসন্ন্যাসবিলক্ষণাৎ
সত্যেব কর্তৃৎববিজ্ঞানে কর্মৈকদেশবিষয়াৎ যমনিয়মাদিসহিতৎবেন
চ দুরনুষ্ঠেয়াৎ সুকরৎবেন চ কর্ময়োগস্য বিশিষ্টৎবাভিধানম্
ইত্যেবং প্রতিবচনবাক্যার্থনিরূপণেনাপি পূর্বোক্তঃ প্রষ্টুরভিপ্রায়ঃ
নিশ্চীয়তে ইতি স্থিতম্ ॥ “জ্যায়সী চেৎকর্মণস্তে” (ভ. গী. ৩-১)
ইত্যত্র জ্ঞানকর্মণোঃ সহ অসম্ভবে “যচ্ছ্রেয় এতয়োঃ তদ্ব্রূহি”
(ভ. গী. ৩-২) ইত্যেবং পৃষ্টোঽর্জুনেন ভগবান্ সাঙ্খ্যানাং সন্ন্যাসিনাং
জ্ঞানয়োগেন নিষ্ঠা পুনঃ কর্ময়োগেন যোগিনাং নিষ্ঠা প্রোক্তেতি নির্ণয়ং
চকার । “ন চ সন্ন্যসনাদেব কেবলাৎ সিদ্ধিং সমধিগচ্ছতি”
(ভ. গী. ৩-৪) ইতি বচনাৎ জ্ঞানসহিতস্য সিদ্ধিসাধনৎবং ইষ্টম্”
কর্ময়োগস্য চ, বিধানাৎ । জ্ঞানরহিতস্য সন্ন্যাসঃ শ্রেয়ান্, কিং বা
কর্ময়োগঃ শ্রেয়ান্ ?” ইতি এতয়োঃ বিশেষবুভুৎসয়া —
অর্জুন উবাচ —
সন্ন্যাসং কর্মণাং কৃষ্ণ পুনর্যোগং চ শংসসি ।
যচ্ছ্রেয় এতয়োরেকং তন্মে ব্রূহি সুনিশ্চিতম্ ॥ ৫-১॥
সন্ন্যাসং পরিত্যাগং কর্মণাং শাস্ত্রীয়াণাং অনুষ্ঠেয়বিশেষাণাং শংসসি
প্রশংসসি কথয়সি ইত্যেতৎ । পুনঃ যোগং চ তেষামেব অনুষ্ঠানম্
অবশ্যকর্তব্যং শংসসি । অতঃ মে কতরৎ শ্রেয়ঃ ইতি সংশয়ঃ — কিং
কর্মানুষ্ঠানং শ্রেয়ঃ, কিং বা তদ্ধানং ইতি । প্রশস্যতরং চ অনুষ্ঠেয়ম্ ।
অতশ্চ যৎ শ্রেয়ঃ প্রশস্যতরং এতয়োঃ কর্মসন্ন্যাসকর্ময়োগয়োঃ
যদনুষ্ঠানাৎ শ্রেয়োবাপ্তিঃ মম স্যাদিতি মন্যসে, তৎ একং অন্যতরং সহ
একপুরুষানুষ্ঠেয়ৎবাসম্ভবাৎ মে ব্রূহি সুনিশ্চিতং অভিপ্রেতং তবেতি ॥
স্বাভিপ্রায়ং আচক্ষাণো নির্ণয়ায় শ্রীভগবানুবাচ —
শ্রীভগবানুবাচ —
সন্ন্যাসঃ কর্ময়োগশ্চ নিঃশ্রেয়সকরাবুভৌ ।
তয়োস্তু কর্মসন্ন্যাসাৎকর্ময়োগো বিশিষ্যতে ॥ ৫-২॥
সন্ন্যাসঃ কর্মণাং পরিত্যাগঃ কর্ময়োগশ্চ তেষামনুষ্ঠানং তৌ উভৌ
অপি নিঃশ্রেয়সকরৌ মোক্ষং কুর্বাতে জ্ঞানোৎপত্তিহেতুৎবেন । উভৌ যদ্যপি
নিঃশ্রেয়সকরৌ, তথাপি তয়োস্তু নিঃশ্রেয়সহেৎবোঃ কর্মসন্ন্যাসাৎ কেবলাৎ
কর্ময়োগো বিশিষ্যতে ইতি কর্ময়োগং স্তৌতি ॥ কস্মাৎ ইতি আহ —
জ্ঞেয়ঃ স নিত্যসন্ন্যাসী যো ন দ্বেষ্টি ন কাঙ্ক্ষতি ।
নির্দ্বন্দ্বো হি মহাবাহো সুখং বন্ধাৎপ্রমুচ্যতে ॥ ৫-৩॥
জ্ঞেয়ঃ জ্ঞাতব্যঃ স কর্ময়োগী নিত্যসন্ন্যাসী ইতি যো ন দ্বেষ্টি কিঞ্চিৎ ন
কাঙ্ক্ষতি দুঃখসুখে তৎসাধনে চ । এবংবিধো যঃ, কর্মণি বর্তমানোঽপি
স নিত্যসন্ন্যাসী ইতি জ্ঞাতব্যঃ ইত্যর্থঃ । নির্দ্বন্দ্বঃ দ্বন্দ্ববর্জিতঃ হি
যস্মাৎ মহাবাহো সুখং বন্ধাৎ অনায়াসেন প্রমুচ্যতে ॥ সন্ন্যাসকর্ময়োগয়োঃ
ভিন্নপুরুষানুষ্ঠেয়যোঃ বিরুদ্ধয়োঃ ফলেঽপি বিরোধো যুক্তঃ, ন তু উভয়োঃ
নিঃশ্রেয়সকরৎবমেব ইতি প্রাপ্তে ইদং উচ্যতে —
সাঙ্খ্যযোগৌ পৃথগ্বালাঃ প্রবদন্তি ন পণ্ডিতাঃ ।
একমপ্যাস্থিতঃ সম্যগুভয়োর্বিন্দতে ফলম্ ॥ ৫-৪॥
সাঙ্খ্যযোগৌ পৃথক্ বিরুদ্ধভিন্নফলৌ বালাঃ প্রবদন্তি ন পণ্ডিতাঃ ।
পণ্ডিতাস্তু জ্ঞানিন একং ফলং অবিরুদ্ধং ইচ্ছন্তি । কথম্ ? একমপি
সাঙ্খ্যযোগয়োঃ সম্যক্ আস্থিতঃ সম্যগনুষ্ঠিতবান্ ইত্যর্থঃ, উভয়োঃ বিন্দতে
ফলম্ । উভয়োঃ তদেব হি নিঃশ্রেয়সং ফলম্ ; অতঃ ন ফলে বিরোধঃ অস্তি ॥
ননু সন্ন্যাসকর্ময়োগশব্দেন প্রস্তুত্য সাঙ্খ্যযোগয়োঃ ফলৈকৎবং
কথং ইহ অপ্রকৃতং ব্রবীতি ? নৈষ দোষঃ — যদ্যপি অর্জুনেন
সন্ন্যাসং কর্ময়োগং চ কেবলং অভিপ্রেত্য প্রশ্নঃ কৃতঃ, ভগবাংস্তু
তদপরিত্যাগেনৈব স্বাভিপ্রেতং চ বিশেষং সংয়োজ্য শব্দান্তরবাচ্যতয়া
প্রতিবচনং দদৌ “সাঙ্খ্যযোগৌ” ইতি । তৌ এব সন্ন্যাসকর্ময়োগৌ
জ্ঞানতদুপায়সমবুদ্ধিৎবাদিসংয়ুক্তৌ সাঙ্খ্যযোগশব্দবাচ্যৌ ইতি ভগবতো
মতম্ । অতঃ ন অপ্রকৃতপ্রক্রিয়েতি ॥ একস্যাপি সম্যগনুষ্ঠানাৎ কথম্
উভয়োঃ ফলং বিন্দতে ইতি উচ্যতে —
যৎসাঙ্খ্যৈঃ প্রাপ্যতে স্থানং তদ্যোগৈরপি গম্যতে ।
একং সাঙ্খ্যং চ যোগং চ যঃ পশ্যতি স পশ্যতি ॥ ৫-৫॥
যৎ সাঙ্খ্যৈঃ জ্ঞাননিষ্ঠৈঃ সন্ন্যাসিভিঃ প্রাপ্যতে স্থানং মোক্ষাখ্যম্,
তৎ যোগৈরপি জ্ঞানপ্রাপ্ত্যুপায়ৎবেন ঈশ্বরে সমর্প্য কর্মাণি আত্মনঃ
ফলং অনভিসন্ধায় অনুতিষ্ঠন্তি যে তে যোগাঃ যোগিনঃ তৈরপি
পরমার্থজ্ঞানসন্ন্যাসপ্রাপ্তিদ্বারেণ গম্যতে ইত্যভিপ্রায়ঃ । অতঃ একং
সাঙ্খ্যং চ যোগং চ যঃ পশ্যতি ফলৈকৎবাৎ স পশ্যতি সম্যক্
পশ্যতীত্যর্থঃ ॥ এবং তর্হি যোগাৎ সন্ন্যাস এব বিশিষ্যতে ; কথং
তর্হি ইদমুক্তং “তয়োস্তু কর্মসন্ন্যাসাৎ কর্ময়োগো বিশিষ্যতে”
(ভ. গী. ৫-২) ইতি ? শৃণু তত্র কারণং — ৎবয়া পৃষ্টং কেবলং
কর্মসন্ন্যাসং কর্ময়োগং চ অভিপ্রেত্য তয়োঃ অন্যতরঃ কঃ শ্রেয়ান্ ইতি ।
তদনুরূপং প্রতিবচনং ময়া উক্তং কর্মসন্ন্যাসাৎ কর্ময়োগঃ বিশিষ্যতে ইতি
জ্ঞানং অনপেক্ষ্য । জ্ঞানাপেক্ষস্তু সন্ন্যাসঃ সাঙ্খ্যমিতি ময়া অভিপ্রেতঃ ।
পরমার্থয়োগশ্চ স এব । যস্তু কর্ময়োগঃবৈদিকঃ স চ তাদর্থ্যাৎ
যোগঃ সন্ন্যাস ইতি চ উপচর্যতে । কথং তাদর্থ্যং ইতি উচ্যতে —
সন্ন্যাসস্তু মহাবাহো দুঃখমাপ্তুময়োগতঃ ।
যোগয়ুক্তো মুনির্ব্রহ্ম নচিরেণাধিগচ্ছতি ॥ ৫-৬॥
সন্ন্যাসস্তু পারমার্থিকঃ হে মহাবাহো দুঃখং আপ্তুং প্রাপ্তুং অয়োগতঃ
যোগেন বিনা । যোগয়ুক্তঃ বৈদিকেন কর্ময়োগেন ঈশ্বরসমর্পিতরূপেণ
ফলনিরপেক্ষেণ যুক্তঃ, মুনিঃ মননাৎ ঈশ্বরস্বরূপস্য মুনিঃ, ব্রহ্ম
— পরমাত্মজ্ঞাননিষ্ঠালক্ষণৎবাৎ প্রকৃতঃ সন্ন্যাসঃ ব্রহ্ম
উচ্যতে, ”ন্যাস ইতি ব্রহ্মা ব্রহ্মা হি পরঃ” (তৈ. না. ৭৮) ইতি
শ্রুতেঃ — ব্রহ্ম পরমার্থসন্ন্যাসং পরমার্থজ্ঞাননিষ্ঠালক্ষণং
নচিরেণ ক্ষিপ্রমেব অধিগচ্ছতি প্রাপ্নোতি । অতঃ ময়া উক্তম্
“কর্ময়োগো বিশিষ্যতে” (ভ. গী. ৫-২) ইতি ॥ যদা পুনঃ অয়ং
সম্যগ্জ্ঞানপ্রাপ্ত্যুপায়ৎবেন —
যোগয়ুক্তো বিশুদ্ধাত্মা বিজিতাত্মা জিতেন্দ্রিয়ঃ ।
সর্বভূতাত্মভূতাত্মা কুর্বন্নপি ন লিপ্যতে ॥ ৫-৭॥
যোগেন যুক্তঃ যোগয়ুক্তঃ, বিশুদ্ধাত্মা বিশুদ্ধসত্ত্বঃ, বিজিতাত্মা বিজিতদেহঃ,
জিতেন্দ্রিয়শ্চ, সর্বভূতাত্মভূতাত্মা সর্বেষাং ব্রহ্মাদীনাং স্তম্বপর্যন্তানাং
ভূতানাং আত্মভূতঃ আত্মা প্রত্যক্চেতনো যস্য সঃ সর্বভূতাত্মভূতাত্মা
সম্যগ্দর্শীত্যর্থঃ, স তত্রৈবং বর্তমানঃ লোকসঙ্গ্রহায় কর্ম কুর্বন্নপি
ন লিপ্যতে ন কর্মভিঃ বধ্যতে ইত্যর্থঃ ॥ ন চ অসৌ পরমার্থতঃ
করোতীত্যতঃ —
নৈব কিঞ্চিৎকরোমীতি যুক্তো মন্যেত তত্ত্ববিৎ ।
পশ্যঞ্শৃণ্বন্স্পৃশঞ্জিঘ্রন্নশ্নন্গচ্ছন্স্বপঞ্শ্বসন্ ॥ ৫-৮॥
প্রলপন্ বিসৃজন্গৃহ্ণন্নুন্মিষন্নিমিষন্নপি ।
ইন্দ্রিয়াণীন্দ্রিয়ার্থেষু বর্তন্ত ইতি ধারয়ন্ ॥ ৫-৯॥
নৈব কিঞ্চিৎ করোমীতি যুক্তঃ সমাহিতঃ সন্ মন্যেত চিন্তয়েৎ, তত্ত্ববিৎ
আত্মনো যাথাত্ম্যং তত্ত্বং বেত্তীতি তত্ত্ববিৎ পরমার্থদর্শীত্যর্থঃ ॥ কদা
কথং বা তত্ত্বমবধারয়ন্ মন্যেত ইতি, উচ্যতে — পশ্যন্নিতি । মন্যেত
ইতি পূর্বেণ সম্বন্ধঃ । যস্য এবং তত্ত্ববিদঃ সর্বকার্যকরণচেষ্টাসু
কর্মসু অকর্মৈব, পশ্যতঃ সম্যগ্দর্শিনঃ তস্য সর্বকর্মসন্ন্যাসে এব
অধিকারঃ, কর্মণঃ অভাবদর্শনাৎ । ন হি মৃগতৃষ্ণিকায়াং উদকবুদ্ধ্যা
পানায় প্রবৃত্তঃ উদকাভাবজ্ঞানেঽপি তত্রৈব পানপ্রয়োজনায় প্রবর্ততে ॥
যস্তু পুনঃ অতত্ত্ববিৎ প্রবৃত্তশ্চ কর্ময়োগে —
ব্রহ্মণ্যাধায় কর্মাণি সঙ্গং ত্যক্ত্বা করোতি যঃ ।
লিপ্যতে ন স পাপেন পদ্মপত্রমিবাম্ভসা ॥ ৫-১০॥
ব্রহ্মণি ঈশ্বরে আধায় নিক্ষিপ্য “তদর্থং কর্ম করোমি” ইতি
ভৃত্য ইব স্বাম্যর্থং সর্বাণি কর্মাণি মোক্ষেঽপি ফলে সঙ্গং ত্যক্ত্বা
করোতি যঃ সর্বকর্মাণি, লিপ্যতে ন স পাপেন ন সম্বধ্যতে পদ্মপত্রমিব
অম্ভসা উদকেন । কেবলং সত্ত্বশুদ্ধিমাত্রমেব ফলং তস্য কর্মণঃ
স্যাৎ ॥
যস্মাৎ —
কায়েন মনসা বুদ্ধ্যা কেবলৈরিন্দ্রিয়ৈরপি ।
যোগিনঃ কর্ম কুর্বন্তি সঙ্গং ত্যক্ত্বাত্মশুদ্ধয়ে ॥ ৫-১১॥
কায়েন দেহেন মনসা বুদ্ধ্যা চ কেবলৈঃ মমৎববর্জিতৈঃ “ঈশ্বরায়ৈব
কর্ম করোমি, ন মম ফলায়” ইতি মমৎববুদ্ধিশূন্যৈঃ ইন্দ্রিয়ৈরপি
— কেবলশব্দঃ কায়াদিভিরপি প্রত্যেকং সম্বধ্যতে — সর্বব্যাপারেষু
মমতাবর্জনায় । যোগিনঃ কর্মিণঃ কর্ম কুর্বন্তি সঙ্গং ত্যক্ত্বা ফলবিষয়ম্
আত্মশুদ্ধয়ে সত্ত্বশুদ্ধয়ে ইত্যর্থঃ । তস্মাৎ তত্রৈব তব অধিকারঃ
ইতি কুরু কর্মৈব ॥ যস্মাচ্চ —
যুক্তঃ কর্মফলং ত্যক্ত্বা শান্তিমাপ্নোতি নৈষ্ঠিকীম্ ।
অয়ুক্তঃ কামকারেণ ফলে সক্তো নিবধ্যতে ॥ ৫-১২॥
যুক্তঃ “ঈশ্বরায় কর্মাণি করোমি ন মম ফলায়”
ইত্যেবং সমাহিতঃ সন্ কর্মফলং ত্যক্ত্বা পরিত্যজ্য
শান্তিং মোক্ষাখ্যাং আপ্নোতি নৈষ্ঠিকীং নিষ্ঠায়াং ভবাং
সত্ত্বশুদ্ধিজ্ঞানপ্রাপ্তিসর্বকর্মসন্ন্যাসজ্ঞাননিষ্ঠাক্রমেণেতি বাক্যশেষঃ ।
যস্তু পুনঃ অয়ুক্তঃ অসমাহিতঃ কামকারেণ করণং কারঃ কামস্য কারঃ
কামকারঃ তেন কামকারেণ, কামপ্রেরিততয়েত্যর্থঃ, “মম ফলায় ইদং
করোমি কর্ম” ইত্যেবং ফলে সক্তঃ নিবধ্যতে । অতঃ ৎবং যুক্তো ভব
ইত্যর্থঃ ॥ যস্তু পরমার্থদর্শী সঃ —
সর্বকর্মাণি মনসা সন্ন্যস্যাস্তে সুখং বশী ।
নবদ্বারে পুরে দেহী নৈব কুর্বন্ন কারয়ন্ ॥ ৫-১৩॥
সর্বাণি কর্মাণি সর্বকর্মাণি সন্ন্যস্য পরিত্যজ্য নিত্যং নৈমিত্তিকং
কাম্যং প্রতিষিদ্ধং চ তানি সর্বাণি কর্মাণি মনসা বিবেকবুদ্ধ্যা,
কর্মাদৌ অকর্মসন্দর্শনেন সন্ত্যজ্যেত্যর্থঃ, আস্তে তিষ্ঠতি সুখম্ ।
ত্যক্তবাঙ্মনঃকায়চেষ্টঃ নিরায়াসঃ প্রসন্নচিত্তঃ আত্মনঃ অন্যত্র
নিবৃত্তসর্ববাহ্যপ্রয়োজনঃ ইতি “সুখং আস্তে” ইত্যুচ্যতে । বশী
জিতেন্দ্রিয় ইত্যর্থঃ । ক্ব কথং আস্তে ইতি, আহ — নবদ্বারে পুরে । সপ্ত
শীর্ষণ্যানি আত্মন উপলব্ধিদ্বারাণি, অর্বাক্ দ্বে মূত্রপুরীষবিসর্গার্থে, তৈঃ
দ্বারৈঃ নবদ্বারং পুরং উচ্যতে শরীরম্, পুরমিব পুরম্, আত্মৈকস্বামিকম্,
তদর্থপ্রয়োজনৈশ্চ ইন্দ্রিয়মনোবুদ্ধিবিষয়ৈঃ অনেকফলবিজ্ঞানস্য
উৎপাদকৈঃ পৌরৈরিব অধিষ্ঠিতম্ । তস্মিন্ নবদ্বারে পুরে দেহী সর্বং
কর্ম সন্ন্যস্য আস্তে ; কিং বিশেষণেন ? সর্বো হি দেহী সন্ন্যাসী অসন্ন্যাসী
বা দেহে এব আস্তে ; তত্র অনর্থকং বিশেষণমিতি । উচ্যতে — যস্তু
অজ্ঞঃ দেহী দেহেন্দ্রিয়সঙ্ঘাতমাত্রাত্মদর্শী স সর্বোঽপি “গেহে ভূমৌ
আসনে বা আসে” ইতি মন্যতে । ন হি দেহমাত্রাত্মদর্শিনঃ গেহে ইব দেহে
আসে ইতি প্রত্যযঃ সম্ভবতি । দেহাদিসঙ্ঘাতব্যতিরিক্তাত্মদর্শিনস্তু
“দেহে আসে” ইতি প্রত্যযঃ উপপদ্যতে । পরকর্মণাং চ পরস্মিন্
আত্মনি অবিদ্যযা অধ্যারোপিতানাং বিদ্যযা বিবেকজ্ঞানেন মনসা সন্ন্যাস
উপপদ্যতে । উৎপন্নবিবেকজ্ঞানস্য সর্বকর্মসন্ন্যাসিনোঽপি গেহে ইব দেহে
এব নবদ্বারে পুরে আসনং প্রারব্ধফলকর্মসংস্কারশেষানুবৃত্ত্যা দেহ
এব বিশেষবিজ্ঞানোৎপত্তেঃ । দেহে এব আস্তে ইতি অস্ত্যেব বিশেষণফলম্,
বিদ্বদবিদ্বৎপ্রত্যযভেদাপেক্ষৎবাৎ ॥ যদ্যপি কার্যকরণকর্মাণি অবিদ্যযা
আত্মনি অধ্যারোপিতানি “সন্ন্যস্যাস্তে” ইত্যুক্তম্, তথাপি আত্মসমবায়ি
তু কর্তৃৎবং কারয়িতৃৎবং চ স্যাৎ ইতি আশঙ্ক্য আহ — নৈব কুর্বন্
স্বয়ম্, ন চ কার্যকরণানি কারয়ন্ ক্রিয়াসু প্রবর্তয়ন্ । কিং যৎ তৎ
কর্তৃৎবং কারয়িতৃৎবং চ দেহিনঃ স্বাত্মসমবায়ি সৎ সন্ন্যাসাৎ ন
সম্ভবতি, যথা গচ্ছতো গতিঃ গমনব্যাপারপরিত্যাগে ন স্যাৎ তদ্বৎ ? কিং
বা স্বত এব আত্মনঃ ন অস্তি ইতি ? অত্র উচ্যতে — ন অস্তি আত্মনঃ স্বতঃ
কর্তৃৎবং কারয়িতৃৎবং চ । উক্তং হি “অবিকার্যোঽয়মুচ্যতে”
(ভ. গী. ২-২৫) “শরীরস্থোঽপি ন করোতি ন লিপ্যতে”
(ভ. গী. ১৩-৩১) ইতি । “ধ্যায়তীব লেলায়তীব”
(বৃ. উ. ৪-৩-৭) ইতি শ্রুতেঃ ॥ কিঞ্চ–
ন কর্তৃৎবং ন কর্মাণি লোকস্য সৃজতি প্রভুঃ ।
ন কর্মফলসংয়োগং স্বভাবস্তু প্রবর্ততে ॥ ৫-১৪॥
ন কর্তৃৎবং স্বতঃ কুরু ইতি নাপি কর্মাণি রথঘটপ্রাসাদাদীনি ঈপ্সিততমানি
লোকস্য সৃজতি উৎপাদয়তি প্রভুঃ আত্মা । নাপি রথাদি কৃতবতঃ
তৎফলেন সংয়োগং ন কর্মফলসংয়োগম্ । যদি কিঞ্চিদপি স্বতঃ ন
করোতি ন কারয়তি চ দেহী, কঃ তর্হি কুর্বন্ কারয়ংশ্চ প্রবর্ততে ইতি,
উচ্যতে — স্বভাবস্তু স্বো ভাবঃ স্বভাবঃ অবিদ্যালক্ষণা প্রকৃতিঃ মায়া
প্রবর্ততে “দৈবী হি” (ভ. গী. ৭-১৪) ইত্যাদিনা বক্ষ্যমাণা ॥
পরমার্থতস্তু —
নাদত্তে কস্যচিৎপাপং ন চৈব সুকৃতং বিভুঃ ।
অজ্ঞানেনাবৃতং জ্ঞানং তেন মুহ্যন্তি জন্তবঃ ॥ ৫-১৫॥
ন আদত্তে ন চ গৃহ্ণাতি ভক্তস্যাপি কস্যচিৎ পাপম্ । ন চৈব আদত্তে
সুকৃতং ভক্তৈঃ প্রয়ুক্তং বিভুঃ । কিমর্থং তর্হি ভক্তৈঃ পূজাদিলক্ষণং
যাগদানহোমাদিকং চ সুকৃতং প্রয়ুজ্যতে ইত্যাহ — অজ্ঞানেন আবৃতং
জ্ঞানং বিবেকবিজ্ঞানম্, তেন মুহ্যন্তি “করোমি কারয়ামি ভোক্ষ্যে
ভোজয়ামি” ইত্যেবং মোহং গচ্ছন্তি অবিবেকিনঃ সংসারিণো জন্তবঃ ॥
জ্ঞানেন তু তদজ্ঞানং যেষাং নাশিতমাত্মনঃ ।
তেষামাদিত্যবজ্জ্ঞানং প্রকাশয়তি তৎপরম্ ॥ ৫-১৬॥
জ্ঞানেন তু যেন অজ্ঞানেন আবৃতাঃ মুহ্যন্তি জন্তবঃ তৎ অজ্ঞানং যেষাং
জন্তূনাং বিবেকজ্ঞানেন আত্মবিষয়েণ নাশিতং আত্মনঃ ভবতি, তেষাং
জন্তূনাং আদিত্যবৎ যথা আদিত্যঃ সমস্তং রূপজাতং অবভাসয়তি তদ্বৎ
জ্ঞানং জ্ঞেয়ং বস্তু সর্বং প্রকাশয়তি তৎ পরং পরমার্থতত্ত্বম্ ॥
যৎ পরং জ্ঞানং প্রকাশিতং —
তদ্বুদ্ধ্যস্তদাত্মানস্তন্নিষ্ঠাস্তৎপরায়ণাঃ ।
গচ্ছন্ত্যপুনরাবৃত্তিং জ্ঞাননির্ধূতকল্মষাঃ ॥ ৫-১৭॥
তস্মিন্ ব্রহ্মণি গতা বুদ্ধিঃ যেষাং তে তদ্বুদ্ধয়ঃ, তদাত্মানঃ তদেব
পরং ব্রহ্ম আত্মা যেষাং তে তদাত্মানঃ, তন্নিষ্ঠাঃ নিষ্ঠা অভিনিবেশঃ
তাৎপর্যং সর্বাণি কর্মাণি সন্ন্যস্য তস্মিন্ ব্রহ্মণ্যেব অবস্থানং যেষাং তে
তন্নিষ্ঠাঃ, তৎপরায়ণাশ্চ তদেব পরং অয়নং পরা গতিঃ যেষাং ভবতি তে
তৎপরায়ণাঃ কেবলাত্মরতয় ইত্যর্থঃ । যেষাং জ্ঞানেন নাশিতং আত্মনঃ
অজ্ঞানং তে গচ্ছন্তি এবংবিধাঃ অপুনরাবৃত্তিং অপুনর্দেহসম্বন্ধং
জ্ঞাননির্ধূতকল্মষাঃ যথোক্তেন জ্ঞানেন নির্ধূতঃ নাশিতঃ কল্মষঃ
পাপাদিসংসারকারণদোষঃ যেষাং তে জ্ঞাননির্ধূতকল্মষাঃ যতয়ঃ ইত্যর্থঃ ॥
যেষাং জ্ঞানেন নাশিতং আত্মনঃ অজ্ঞানং তে পণ্ডিতাঃ কথং তত্ত্বং
পশ্যন্তি ইত্যুচ্যতে —
বিদ্যাবিনয়সম্পন্নে ব্রাহ্মণে গবি হস্তিনি ।
শুনি চৈব শ্বপাকে চ পণ্ডিতাঃ সমদর্শিনঃ ॥ ৫-১৮॥
বিদ্যাবিনয়সম্পন্নে বিদ্যা চ বিনয়শ্চ বিদ্যাবিনয়ৌ, বিনয়ঃ উপশমঃ,
তাভ্যাং বিদ্যাবিনয়াভ্যাং সম্পন্নঃ বিদ্যাবিনয়সম্পন্নঃ বিদ্বান্ বিনীতশ্চ
যো ব্রাহ্মণঃ তস্মিন্ ব্রাহ্মণে গবি হস্তিনি শুনি চৈব শ্বপাকে চ পণ্ডিতাঃ
সমদর্শিনঃ । বিদ্যাবিনয়সম্পন্নে উত্তমসংস্কারবতি ব্রাহ্মণে সাত্ত্বিকে,
মধ্যমায়াং চ রাজস্যাং গবি, সংস্কারহীনায়াং অত্যন্তমেব কেবলতামসে
হস্ত্যাদৌ চ, সত্ত্বাদিগুণৈঃ তজ্জৈশ্চ সংস্কারৈঃ তথা রাজসৈঃ তথা
তামসৈশ্চ সংস্কারৈঃ অত্যন্তমেব অস্পৃষ্টং সমং একং অবিক্রিয়ং তৎ
ব্রহ্ম দ্রষ্টুং শীলং যেষাং তে পণ্ডিতাঃ সমদর্শিনঃ ॥ ননু অভোজ্যান্নাঃ তে
দোষবন্তঃ, ”সমাসমাভ্যাং বিষমসমে পূজাতঃ” (গৌ. ধ. ২-৮-২০
; ১৭-১৮) ইতি স্মৃতেঃ । ন তে দোষবন্তঃ । কথম্ ? —
ইহৈব তৈর্জিতঃ সর্গো যেষাং সাম্যে স্থিতং মনঃ ।
নির্দোষং হি সমং ব্রহ্ম তস্মাদ্ব্রহ্মণি তে স্থিতাঃ ॥ ৫-১৯॥
ইহ এব জীবদ্ভিরেব তৈঃ সমদর্শিভিঃ পণ্ডিতৈঃ জিতঃ বশীকৃতঃ সর্গঃ
জন্ম, যেষাং সাম্যে সর্বভূতেষু ব্রহ্মণি সমভাবে স্থিতং নিশ্চলীভূতং
মনঃ অন্তঃকরণম্ । নির্দোষং যদ্যপি দোষবৎসু শ্বপাকাদিষু মূঢৈঃ
তদ্দোষৈঃ দোষবৎ ইব বিভাব্যতে, তথাপি তদ্দোষৈঃ অস্পৃষ্টং ইতি
নির্দোষং দোষবর্জিতং হি যস্মাৎ ; নাপি স্বগুণভেদভিন্নম্, নির্গুণৎবাৎ
চৈতন্যস্য । বক্ষ্যতি চ ভগবান্ ইচ্ছাদীনাং ক্ষেত্রধর্মৎবম্,
“অনাদিৎবান্নির্গুণৎবাৎ” (ভ. গী. ১৩-৩১) ইতি চ । নাপি অন্ত্যা
বিশেষাঃ আত্মনো ভেদকাঃ সন্তি, প্রতিশরীরং তেষাং সত্ত্বে প্রমাণানুপপত্তেঃ ।
অতঃ সমং ব্রহ্ম একং চ । তস্মাৎ ব্রহ্মণি এব তে স্থিতাঃ । তস্মাৎ ন
দোষগন্ধমাত্রমপি তান্ স্পৃশতি, দেহাদিসঙ্ঘাতাত্মদর্শনাভিমানাভাবাৎ
তেষাম্ । দেহাদিসঙ্ঘাতাত্মদর্শনাভিমানবদ্বিষয়ং তু তৎ সূত্রম্
”সমাসমাভ্যাং বিষমসমে পূজাতঃ” (গৌ. ধ. ২-৮-২০) ইতি,
পূজাবিষয়ৎবেন বিশেষণাৎ । দৃশ্যতে হি ব্রহ্মবিৎ ষডঙ্গবিৎ
চতুর্বেদবিৎ ইতি পূজাদানাদৌ গুণবিশেষসম্বন্ধঃ কারণম্ । ব্রহ্ম তু
সর্বগুণদোষসম্বন্ধবর্জিতমিত্যতঃ “ব্রহ্মণি তে স্থিতাঃ” ইতি
যুক্তম্ । কর্মবিষয়ং চ ”সমাসমাভ্যাম্” (গৌ. ধ. ২-৮-২০)
ইত্যাদি । ইদং তু সর্বকর্মসন্ন্যাসবিষয়ং প্রস্তুতম্, “সর্বকর্মাণি
মনসা” (ভ. গী. ৫-১৩) ইত্যারভ্য অধ্যায়পরিসমাপ্তেঃ ॥ যস্মাৎ
নির্দোষং সমং ব্রহ্ম আত্মা, তস্মাৎ —
ন প্রহৃষ্যেৎপ্রিয়ং প্রাপ্য নোদ্বিজেৎপ্রাপ্য চাপ্রিয়ম্ ।
স্থিরবুদ্ধিরসম্মূঢো ব্রহ্মবিদ্ব্রহ্মণি স্থিতঃ ॥ ৫-২০॥
ন প্রহৃষ্যেৎ প্রহর্ষং ন কুর্যাৎ প্রিয়ং ইষ্টং প্রাপ্য লব্ধ্বা ।
ন উদ্বিজেৎ প্রাপ্য চ অপ্রিয়ং অনিষ্টং লব্ধ্বা । দেহমাত্রাত্মদর্শিনাং
হি প্রিয়াপ্রিয়প্রাপ্তী হর্ষবিষাদৌ কুর্বাতে, ন কেবলাত্মদর্শিনঃ, তস্য
প্রিয়াপ্রিয়প্রাপ্ত্যসম্ভবাৎ । কিঞ্চ — “সর্বভূতেষু একঃ সমঃ
নির্দোষঃ আত্মা” ইতি স্থিরা নির্বিচিকিৎসা বুদ্ধিঃ যস্য সঃ স্থিরবুদ্ধিঃ
অসম্মূঢঃ সম্মোহবর্জিতশ্চ স্যাৎ যথোক্তব্রহ্মবিৎ ব্রহ্মণি স্থিতঃ,
অকর্মকৃৎ সর্বকর্মসন্ন্যাসী ইত্যর্থঃ ॥ কিঞ্চ, ব্রহ্মণি স্থিতঃ —
বাহ্যস্পর্শেষ্বসক্তাত্মা বিন্দত্যাত্মনি যৎসুখম্ ।
স ব্রহ্ময়োগয়ুক্তাত্মা সুখমক্ষয়মশ্নুতে ॥ ৫-২১॥
বাহ্যস্পর্শেষু বাহ্যাশ্চ তে স্পর্শাশ্চ বাহ্যস্পর্শাঃ স্পৃশ্যন্তে ইতি
স্পর্শাঃ শব্দাদয়ো বিষয়াঃ তেষু বাহ্যস্পর্শেষু, অসক্তঃ আত্মা অন্তঃকরণং
যস্য সঃ অয়ং অসক্তাত্মা বিষয়েষু প্রীতিবর্জিতঃ সন্ বিন্দতি লভতে
আত্মনি যৎ সুখং তৎ বিন্দতি ইত্যেতৎ । স ব্রহ্ময়োগয়ুক্তাত্মা ব্রহ্মণি যোগঃ
সমাধিঃ ব্রহ্ময়োগঃ তেন ব্রহ্ময়োগেন যুক্তঃ সমাহিতঃ তস্মিন্ ব্যাপৃতঃ
আত্মা অন্তঃকরণং যস্য সঃ ব্রহ্ময়োগয়ুক্তাত্মা, সুখং অক্ষয়ং অশ্নুতে
ব্যাপ্নোতি । তস্মাৎ বাহ্যবিষয়প্রীতেঃ ক্ষণিকায়াঃ ইন্দ্রিয়াণি নিবর্তয়েৎ আত্মনি
অক্ষয়সুখার্থী ইত্যর্থঃ ॥ ইতশ্চ নিবর্তয়েৎ —
যে হি সংস্পর্শজা ভোগা দুঃখয়োনয় এব তে ।
আদ্যন্তবন্তঃ কৌন্তেয় ন তেষু রমতে বুধঃ ॥ ৫-২২॥
যে হি যস্মাৎ সংস্পর্শজাঃ বিষয়েন্দ্রিয়সংস্পর্শেভ্যো জাতাঃ ভোগা ভুক্তয়ঃ
দুঃখয়োনয় এব তে, অবিদ্যাকৃতৎবাৎ । দৃশ্যন্তে হি আধ্যাত্মিকাদীনি দুঃখানি
তন্নিমিত্তান্যেব । যথা ইহলোকে তথা পরলোকেঽপি ইতি গম্যতে এবশব্দাৎ ।
ন সংসারে সুখস্য গন্ধমাত্রমপি অস্তি ইতি বুদ্ধ্বা বিষয়মৃগতৃষ্ণিকায়া
ইন্দ্রিয়াণি নিবর্তয়েৎ । ন কেবলং দুঃখয়োনয় এব, আদ্যন্তবন্তশ্চ, আদিঃ
বিষয়েন্দ্রিয়সংয়োগো ভোগানাং অন্তশ্চ তদ্বিয়োগ এব ; অতঃ আদ্যন্তবন্তঃ
অনিত্যাঃ, মধ্যক্ষণভাবিৎবাৎ ইত্যর্থঃ । কৌন্তেয়, ন তেষু ভোগেষু রমতে
বুধঃ বিবেকী অবগতপরমার্থতত্ত্বঃ ; অত্যন্তমূঢানামেব হি বিষয়েষু
রতিঃ দৃশ্যতে, যথা পশুপ্রভৃতীনাম্ ॥ অয়ং চ শ্রেয়োমার্গপ্রতিপক্ষী
কষ্টতমো দোষঃ সর্বানর্থপ্রাপ্তিহেতুঃ দুর্নিবারশ্চ ইতি তৎপরিহারে
যত্নাধিক্যং কর্তব্যং ইত্যাহ ভগবান্ —
শক্নোতীহৈব যঃ সোঢুং প্রাক্ছরীরবিমোক্ষণাৎ ।
কামক্রোধোদ্ভবং বেগং স যুক্তঃ স সুখী নরঃ ॥ ৫-২৩॥
শক্নোতি উৎসহতে ইহৈব জীবন্নেব যঃ সোঢুং প্রসহিতুং প্রাক্
পূর্বং শরীরবিমোক্ষণাৎ আ মরণাৎ ইত্যর্থঃ । মরণসীমাকরণং
জীবতোঽবশ্যম্ভাবি হি কামক্রোধোদ্ভবো বেগঃ, অনন্তনিমিত্তবান্ হি সঃ ইতি
যাবৎ মরণং তাবৎ ন বিস্রম্ভণীয় ইত্যর্থঃ । কামঃ ইন্দ্রিয়গোচরপ্রাপ্তে
ইষ্টে বিষয়ে শ্রূয়মাণে স্মর্যমাণে বা অনুভূতে সুখহেতৌ যা গর্ধিঃ
তৃষ্ণা স কামঃ ; ক্রোধশ্চ আত্মনঃ প্রতিকূলেষু দুঃখহেতুষু
দৃশ্যমানেষু শ্রূয়মাণেষু স্মর্যমাণেষু বা যো দ্বেষঃ সঃ ক্রোধঃ
; তৌ কামক্রোধৌ উদ্ভবো যস্য বেগস্য সঃ কামক্রোধোদ্ভবঃ বেগঃ ।
রোমাঞ্চনপ্রহৃষ্টনেত্রবদনাদিলিঙ্গঃ অন্তঃকরণপ্রক্ষোভরূপঃ
কামোদ্ভবো বেগঃ, গাত্রপ্রকম্পপ্রস্বেদসন্দষ্টোষ্ঠপুটরক্তনেত্রাদিলিঙ্গঃ
ক্রোধোদ্ভবো বেগঃ, তং কামক্রোধোদ্ভবং বেগং যঃ উৎসহতে প্রসহতে সোঢুং
প্রসহিতুম্, সঃ যুক্তঃ যোগী সুখী চ ইহ লোকে নরঃ ॥ কথম্ভূতশ্চ
ব্রহ্মণি স্থিতঃ ব্রহ্ম প্রাপ্নোতি ইতি আহ ভগবান্ —
যোঽন্তঃসুখোঽন্তরারামস্তথান্তর্জ্যোতিরেব যঃ ।
স যোগী ব্রহ্মনির্বাণং ব্রহ্মভূতোঽধিগচ্ছতি ॥ ৫-২৪॥
যঃ অন্তঃসুখঃ অন্তঃ আত্মনি সুখং যস্য সঃ অন্তঃসুখঃ, তথা অন্তরেব
আত্মনি আরামঃ আরমণং ক্রীডা যস্য সঃ অন্তরারামঃ, তথা এব অন্তঃ এব
আত্মন্যেব জ্যোতিঃ প্রকাশো যস্য সঃ অন্তর্জ্যোতিরেব, যঃ ঈদৃশঃ সঃ যোগী
ব্রহ্মনির্বাণং ব্রহ্মণি নির্বৃতিং মোক্ষং ইহ জীবন্নেব ব্রহ্মভূতঃ সন্
অধিগচ্ছতি প্রাপ্নোতি ॥ কিঞ্চ —
লভন্তে ব্রহ্মনির্বাণমৃষয়ঃ ক্ষীণকল্মষাঃ ।
ছিন্নদ্বৈধা যতাত্মানঃ সর্বভূতহিতে রতাঃ ॥ ৫-২৫॥
লভন্তে ব্রহ্মনির্বাণং মোক্ষং ঋষয়ঃ সম্যগ্দর্শিনঃ সন্ন্যাসিনঃ
ক্ষীণকল্মষাঃ ক্ষীণপাপাঃ নির্দোষাঃ ছিন্নদ্বৈধাঃ ছিন্নসংশয়াঃ যতাত্মানঃ
সংয়তেন্দ্রিয়াঃ সর্বভূতহিতে রতাঃ সর্বেষাং ভূতানাং হিতে আনুকূল্যে রতাঃ
অহিংসকা ইত্যর্থঃ ॥ কিঞ্চ —
কামক্রোধবিয়ুক্তানাং যতীনাং যতচেতসাম্ ।
অভিতো ব্রহ্মনির্বাণং বর্ততে বিদিতাত্মনাম্ ॥ ৫-২৬॥
কামক্রোধবিয়ুক্তানাং কামশ্চ ক্রোধশ্চ কামক্রোধৌ তাভ্যাং বিয়ুক্তানাং
যতীনাং সন্ন্যাসিনাং যতচেতসাং সংয়তান্তঃকরণানাং অভিতঃ উভয়তঃ
জীবতাং মৃতানাং চ ব্রহ্মনির্বাণং মোক্ষো বর্ততে বিদিতাত্মনাং
বিদিতঃ জ্ঞাতঃ আত্মা যেষাং তে বিদিতাত্মানঃ তেষাং বিদিতাত্মনাং
সম্যগ্দর্শিনামিত্যর্থঃ ॥ সম্যগ্দর্শননিষ্ঠানাং সন্ন্যাসিনাং সদ্যঃ
মুক্তিঃ উক্তা । কর্ময়োগশ্চ ঈশ্বরার্পিতসর্বভাবেন ঈশ্বরে ব্রহ্মণি
আধায় ক্রিয়মাণঃ সত্ত্বসুদ্ধিজ্ঞানপ্রাপ্তিসর্বকর্মসন্ন্যাসক্রমেণ মোক্ষায়
ইতি ভগবান্ পদে পদে অব্রবীৎ, বক্ষ্যতি চ । অথ ইদানীং ধ্যানয়োগং
সম্যগ্দর্শনস্য অন্তরঙ্গং বিস্তরেণ বক্ষ্যামি ইতি তস্য সূত্রস্থানীয়ান্
শ্লোকান্ উপদিশতি স্ম —
স্পর্শান্কৃৎবা বহির্বাহ্যাংশ্চক্ষুশ্চৈবান্তরে ভ্রুবোঃ ।
প্রাণাপানৌ সমৌ কৃৎবা নাসাভ্যন্তরচারিণৌ ॥ ৫-২৭॥
যতেন্দ্রিয়মনোবুদ্ধির্মুনির্মোক্ষপরায়ণঃ ।
বিগতেচ্ছাভয়ক্রোধো যঃ সদা মুক্ত এব সঃ ॥ ৫-২৮॥
স্পর্শান্ শব্দাদীন্ কৃৎবা বহিঃ বাহ্যান্ — শ্রোত্রাদিদ্বারেণ অন্তঃ বুদ্ধৌ
প্রবেশিতাঃ শব্দাদয়ঃ বিষয়াঃ তান্ অচিন্তয়তঃ শব্দাদয়ো ব্রাহ্যা বহিরেব
কৃতাঃ ভবন্তি — তান্ এবং বহিঃ কৃৎবা চক্ষুশ্চৈব অন্তরে ভ্রুবোঃ
“কৃৎবা” ইতি অনুষজ্যতে । তথা প্রাণাপানৌ নাসাভ্যন্তরচারিণৌ
সমৌ কৃৎবা, যতেন্দ্রিয়মনোবুদ্ধিঃ যতানি সংয়তানি ইন্দ্রিয়াণি মনঃ
বুদ্ধিশ্চ যস্য সঃ যতেন্দ্রিয়মনোবুদ্ধিঃ, মননাৎ মুনিঃ সন্ন্যাসী,
মোক্ষপরায়ণঃ এবং দেহসংস্থানাৎ মোক্ষপরায়ণঃ মোক্ষ এব পরং অয়নং
পরা গতিঃ যস্য সঃ অয়ং মোক্ষপরায়ণো মুনিঃ ভবেৎ । বিগতেচ্ছাভয়ক্রোধঃ
ইচ্ছা চ ভয়ং চ ক্রোধশ্চ ইচ্ছাভয়ক্রোধাঃ তে বিগতাঃ যস্মাৎ সঃ
বিগতেচ্ছাভয়ক্রোধঃ, যঃ এবং বর্ততে সদা সন্ন্যাসী, মুক্ত এব সঃ ন
তস্য মোক্ষায়ান্যঃ কর্তব্যোঽস্তি ॥ এবং সমাহিতচিত্তেন কিং বিজ্ঞেয়ং ইতি,
উচ্যতে —
ভোক্তারং যজ্ঞতপসাং সর্বলোকমহেশ্বরম্ ।
সুহৃদং সর্বভূতানাং জ্ঞাৎবা মাং শান্তিমৃচ্ছতি ॥ ৫-২৯॥
ভোক্তারং যজ্ঞতপসাং যজ্ঞানাং তপসাং চ কর্তৃরূপেণ দেবতারূপেণ
চ, সর্বলোকমহেশ্বরং সর্বেষাং লোকানাং মহান্তং ঈশ্বরং সুহৃদং
সর্বভূতানাং সর্বপ্রাণিনাং প্রত্যুপকারনিরপেক্ষতয়া উপকারিণং সর্বভূতানাং
হৃদয়েশয়ং সর্বকর্মফলাধ্যক্ষং সর্বপ্রত্যযসাক্ষিণং মাং নারায়ণং
জ্ঞাৎবা শান্তিং সর্বসংসারোপরতিং ঋচ্ছতি প্রাপ্নোতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে কর্মসন্ন্যাসয়োগো নাম পঽচমোঽধ্যায়ঃ ॥৫॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে প্রকৃতি-গর্ভঃ নাম পঞ্চমঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ ষষ্ঠোঽধ্যায়ঃ ॥
অতীতানন্তরাধ্যায়ান্তে ধ্যানয়োগস্য সম্যগ্দর্শনং প্রতি অন্তরঙ্গস্য
সূত্রভূতাঃ শ্লোকাঃ“স্পর্শান্ কৃৎবা বহিঃ” (ভ. গী. ৫-২৭)
ইত্যাদয়ঃ উপদিষ্টাঃ । তেষাং বৃত্তিস্থানীয়ঃ অয়ং ষষ্ঠোঽধ্যায়ঃ আরভ্যতে ।
তত্র ধ্যানয়োগস্য বহিরঙ্গং কর্ম ইতি, যাবৎ ধ্যানয়োগারোহণসমর্থঃ
তাবৎ গৃহস্থেন অধিকৃতেন কর্তব্যং কর্ম ইত্যতঃ তৎ স্তৌতি —
অনাশ্রিত ইতি ॥ ননু কিমর্থং ধ্যানয়োগারোহণসীমাকরণম্, যাবতা
অনুষ্ঠেয়মেব বিহিতং কর্ম যাবজ্জীবম্ । ন, “আরুরুক্ষোর্মুনের্যোগং
কর্ম কারণমুচ্যতে” (ভ. গী. ৬-৩) ইতি বিশেষণাৎ, আরূঢস্য চ
শমেনৈব সম্বন্ধকরণাৎ । আরুরুক্ষোঃ আরূঢস্য চ শমঃ কর্ম চ উভয়ং
কর্তব্যৎবেন অভিপ্রেতং চেৎস্যাৎ, তদা “আরুরুক্ষোঃ” “আরূঢস্য
চ” ইতি শমকর্মবিষয়ভেদেন বিশেষণং বিভাগকরণং চ
অনর্থকং স্যাৎ ॥ তত্র আশ্রমিণাং কশ্চিৎ যোগমারুরুক্ষুঃ ভবতি,
আরূঢশ্চ কশ্চিৎ, অন্যে ন আরুরুক্ষবঃ ন চ আরূঢাঃ ; তানপেক্ষ্য
“আরুরুক্ষোঃ” “আরূঢস্য চ” ইতি বিশেষণং
বিভাগকরণং চ উপপদ্যত এবেতি চেৎ, ন ; “তস্যৈব” ইতি
বচনাৎ, পুনঃ যোগগ্রহণাচ্চ “যোগারূঢস্য” ইতি ; য আসীৎ পূর্বং
যোগমারুরুক্ষুঃ, তস্যৈব আরূঢস্য শম এব কর্তব্যঃ কারণং যোগফলং
প্রতি উচ্যতে ইতি । অতো ন যাবজ্জীবং কর্তব্যৎবপ্রাপ্তিঃ কস্যচিদপি কর্মণঃ ।
যোগবিভ্রষ্টবচনাচ্চ — গৃহস্থস্য চেৎ কর্মিণো যোগো বিহিতঃ
ষষ্ঠে অধ্যায়ে, সঃ যোগবিভ্রষ্টোঽপি কর্মগতিং কর্মফলং প্রাপ্নোতি
ইতি তস্য নাশাশঙ্কা অনুপপন্না স্যাৎ । অবশ্যং হি কৃতং কর্ম কাম্যং
নিত্যং বা — মোক্ষস্য নিত্যৎবাৎ অনারভ্যৎবে — স্বং ফলং আরভত
এব । নিত্যস্য চ কর্মণঃ বেদপ্রমাণাববুদ্ধৎবাৎ ফলেন ভবিতব্যম্
ইতি অবোচাম, অন্যথা বেদস্য আনর্থক্যপ্রসঙ্গাৎ ইতি । ন চ কর্মণি সতি
উভয়বিভ্রষ্টবচনম্, অর্থবৎ কর্মণো বিভ্রংশকারণানুপপত্তেঃ ॥ কর্ম
কৃতং ঈশ্বরে সন্ন্যস্য ইত্যতঃ কর্তুঃ কর্ম ফলং নারভত ইতি চেৎ, ন ;
ঈশ্বরে সন্ন্যাসস্য অধিকতরফলহেতুৎবোপপত্তেঃ ॥ মোক্ষায়ৈব ইতি চেৎ,
স্বকর্মণাং কৃতানাং ঈশ্বরে সন্ন্যাসো মোক্ষায়ৈব, ন ফলান্তরায় যোগসহিতঃ
; যোগাচ্চ বিভ্রষ্টঃ ; ইত্যতঃ তং প্রতি নাশাশঙ্কা যুক্তৈব ইতি চেৎ,
ন ;“একাকী যতচিত্তাত্মা নিরাশীরপরিগ্রহঃ” (ভ. গী. ৬-১০)
“ব্রহ্মচারিব্রতে স্থিতঃ” (ভ. গী. ৬-১৪) ইতি কর্মসন্ন্যাসবিধানাৎ ।
ন চ অত্র ধ্যানকালে স্ত্রীসহায়ৎবাশঙ্কা, যেন একাকিৎবং বিধীয়তে ।
ন চ গৃহস্থস্য “নিরাশীরপরিগ্রহঃ” ইত্যাদিবচনং অনুকূলম্ ।
উভয়বিভ্রষ্টপ্রশ্নানুপপত্তেশ্চ ॥ অনাশ্রিত ইত্যনেন কর্মিণ এব
সন্ন্যাসিৎবং যোগিৎবং চ উক্তম্, প্রতিষিদ্ধং চ নিরগ্নেঃ অক্রিয়স্য চ
সন্ন্যাসিৎবং যোগিৎবং চেতি চেৎ, ন ; ধ্যানয়োগং প্রতি বহিরঙ্গস্য যতঃ
কর্মণঃ ফলাকাঙ্ক্ষাসন্ন্যাসস্তুতিপরৎবাৎ । ন কেবলং নিরগ্নিঃ অক্রিয়ঃ
এব সন্ন্যাসী যোগী চ । কিং তর্হি ? কর্ম্যপি, কর্মফলাসঙ্গং সন্ন্যস্য
কর্ময়োগং অনুতিষ্ঠন্ সত্ত্বশুদ্ধ্যর্থম্, “স সন্ন্যাসী চ যোগী চ
ভবতি” ইতি স্তূয়তে । ন চ একেন বাক্যেন কর্মফলাসঙ্গসন্ন্যাসস্তুতিঃ
চতুর্থাশ্রমপ্রতিষেধশ্চ উপপদ্যতে । ন চ প্রসিদ্ধং নিরগ্নেঃ
অক্রিয়স্য পরমার্থসন্ন্যাসিনঃ শ্রুতিস্মৃতিপুরাণেতিহাসয়োগশাস্ত্রেষু বিহিতং
সন্ন্যাসিৎবং যোগিৎবং চ প্রতিষেধতি ভগবান্ । স্ববচনবিরোধাচ্চ
— “সর্বকর্মাণি মনসা সন্ন্ন্যস্য . . . নৈব কুর্বন্ন কারয়ন্
আস্তে” (ভ. গী. ৫-১৩) “মৌনী সন্তুষ্টো যেন কেনচিৎ অনিকেতঃ
স্থিরমতিঃ” (ভ. গী. ১২-১৯) “বিহায় কামান্যঃ সর্বান্ পুমাংশ্চরতি
নিঃস্পৃহঃ” (ভ. গী. ২-৭১) “সর্বারম্ভপরিত্যাগী”
(ভ. গী. ১২-১৬) ইতি চ তত্র তত্র ভগবতা স্ববচনানি দর্শিতানি ;
তৈঃ বিরুধ্যেত চতুর্থাশ্রমপ্রতিষেধঃ । তস্মাৎ মুনেঃ যোগং আরুরুক্ষোঃ
প্রতিপন্নগার্হস্থ্যস্য অগ্নিহোত্রাদিকর্ম ফলনিরপেক্ষং অনুষ্ঠীয়মানং
ধ্যানয়োগারোহণসাধনৎবং সত্ত্বশুদ্ধিদ্বারেণ প্রতিপদ্যতে ইতি “স
সন্ন্যাসী চ যোগী চ” ইতি স্তূয়তে ॥
শ্রীভগবানুবাচ —
অনাশ্রিতঃ কর্মফলং কার্যং কর্ম করোতি যঃ ।
স সন্ন্যাসী চ যোগী চ ন নিরগ্নির্ন চাক্রিয়ঃ ॥ ৬-১॥
অনাশ্রিতঃ ন আশ্রিতঃ অনাশ্রিতঃ । কিম্ ? কর্মফলং কর্মণাং ফলং
কর্মফলং যৎ তদনাশ্রিতঃ, কর্মফলতৃষ্ণারহিত ইত্যর্থঃ । যো হি
কর্মফলে তৃষ্ণাবান্ সঃ কর্মফলমাশ্রিতো ভবতি, অয়ং তু তদ্বিপরীতঃ,
অতঃ অনাশ্রিতঃ কর্মফলম্ । এবম্ভূতঃ সন্ কার্যং কর্তব্যং নিত্যং
কাম্যবিপরীতং অগ্নিহোত্রাদিকং কর্ম করোতি নির্বর্তয়তি যঃ কশ্চিৎ ঈদৃশঃ
কর্মী স কর্ম্যন্তরেভ্যো বিশিষ্যতে ইত্যেবমর্থমাহ — “স সন্ন্যাসী
চ যোগী চ” ইতি । সন্ন্যাসঃ পরিত্যাগঃ স যস্যাস্তি স সন্ন্যাসী চ,
যোগী চ যোগঃ চিত্তসমাধানং স যস্যাস্তি স যোগী চ ইতি এবঙ্গুণসম্পন্নঃ
অয়ং মন্তব্যঃ” ন কেবলং নিরগ্নিঃ অক্রিয় এব সন্ন্যাসী যোগী চ ইতি
মন্তব্যঃ । নির্গতাঃ অগ্নয়ঃ কর্মাঙ্গভূতাঃ যস্মাৎ স নিরগ্নিঃ, অক্রিয়শ্চ
অনগ্নিসাধনা অপি অবিদ্যমানাঃ ক্রিয়াঃ তপোদানাদিকাঃ যস্য অসৌ অক্রিয়ঃ ॥
ননু চ নিরগ্নেঃ অক্রিয়স্যৈব শ্রুতিস্মৃতিয়োগশাস্ত্রেষু সন্ন্যাসিৎবং
যোগিৎবং চ প্রসিদ্ধম্ । কথং ইহ সাগ্নেঃ সক্রিয়স্য চ সন্ন্যাসিৎবং
যোগিৎবং চ অপ্রসিদ্ধমুচ্যতে ইতি । নৈষ দোষঃ, কয়াচিৎ গুণবৃত্ত্যা
উভয়স্য সম্পিপাদয়িষিতৎবাৎ । তৎ কথম্ ? কর্মফলসঙ্কল্পসন্ন্যাসাৎ
সন্ন্যাসিৎবম্, যোগাঙ্গৎবেন চ কর্মানুষ্ঠানাৎ কর্মফলসঙ্কল্পস্য চ
চিত্তবিক্ষেপহেতোঃ পরিত্যাগাৎ যোগিৎবং চ ইতি গৌণমুভয়ম্ ; ন পুনঃ
মুখ্যং সন্ন্যাসিৎবং যোগিৎবং চ অভিপ্রেতমিত্যেতমর্থং দর্শয়িতুমাহ —
যং সন্ন্যাসমিতি প্রাহুর্যোগং তং বিদ্ধি পাণ্ডব ।
ন হ্যসন্ন্যস্তসঙ্কল্পো যোগী ভবতি কশ্চন ॥ ৬-২॥
যং সর্বকর্মতৎফলপরিত্যাগলক্ষণং পরমার্থসন্ন্যাসং সন্ন্যাসম্
ইতি প্রাহুঃ শ্রুতিস্মৃতিবিদঃ, যোগং কর্মানুষ্ঠানলক্ষণং
তং পরমার্থসন্ন্যাসং বিদ্ধি জানীহি হে পাণ্ডব । কর্ময়োগস্য
প্রবৃত্তিলক্ষণস্য তদ্বিপরীতেন নিবৃত্তিলক্ষণেন পরমার্থসন্ন্যাসেন
কীদৃশং সামান্যমঙ্গীকৃত্য তদ্ভাব উচ্যতে ইত্যপেক্ষায়াং ইদমুচ্যতে —
অস্তি হি পরমার্থসন্ন্যাসেন সাদৃশ্যং কর্তৃদ্বারকং কর্ময়োগস্য । যো হি
পরমার্থসন্ন্যাসী স ত্যক্তসর্বকর্মসাধনতয়া সর্বকর্মতৎফলবিষয়ং
সঙ্কল্পং প্রবৃত্তিহেতুকামকারণং সন্ন্যস্যতি । অয়মপি কর্ময়োগী
কর্ম কুর্বাণ এব ফলবিষয়ং সঙ্কল্পং সন্ন্যস্যতি ইত্যেতমর্থং
দর্শয়িষ্যন্ আহ — ন হি যস্মাৎ অসন্ন্যস্তসঙ্কল্পঃ অসন্ন্যস্তঃ
অপরিত্যক্তঃ ফলবিষয়ঃ সঙ্কল্পঃ অভিসন্ধিঃ যেন সঃ অসন্ন্যস্তসঙ্কল্পঃ
কশ্চন কশ্চিদপি কর্মী যোগী সমাধানবান্ ভবতি ন সম্ভবতীত্যর্থঃ,
ফলসঙ্কল্পস্য চিত্তবিক্ষেপহেতুৎবাৎ । তস্মাৎ যঃ কশ্চন কর্মী
সন্ন্যস্তফলসঙ্কল্পো ভবেৎ স যোগী সমাধানবান্ অবিক্ষিপ্তচিত্তো ভবেৎ,
চিত্তবিক্ষেপহেতোঃ ফলসঙ্কল্পস্য সন্ন্যস্তৎবাদিত্যভিপ্রায়ঃ ॥ এবং
পরমার্থসন্ন্যাসকর্ময়োগয়োঃ কর্তৃদ্বারকং সন্ন্যাসসামান্যমপেক্ষ্য
“যং সন্ন্যাসমিতি প্রাহুর্যোগং তং বিদ্ধি পাণ্ডব” ইতি কর্ময়োগস্য
স্তুত্যর্থং সন্ন্যাসৎবং উক্তম্ । ধ্যানয়োগস্য ফলনিরপেক্ষঃ কর্ময়োগো
বহিরঙ্গং সাধনমিতি তং সন্ন্যাসৎবেন স্তুৎবা অধুনা কর্ময়োগস্য
ধ্যানয়োগসাধনৎবং দর্শয়তি —
আরুরুক্ষোর্মুনের্যোগং কর্ম কারণমুচ্যতে ।
যোগারূঢস্য তস্যৈব শমঃ কারণমুচ্যতে ॥ ৬-৩॥
আরুরুক্ষোঃ আরোঢুমিচ্ছতঃ, অনারূঢস্য, ধ্যানয়োগে
অবস্থাতুমশক্তস্যৈবেত্যর্থঃ । কস্য তস্য আরুরুক্ষোঃ ? মুনেঃ,
কর্মফলসন্ন্যাসিন ইত্যর্থঃ । কিমারুরুক্ষোঃ ? যোগম্ । কর্ম
কারণং সাধনং উচ্যতে । যোগারূঢস্য পুনঃ তস্যৈব শমঃ উপশমঃ
সর্বকর্মভ্যো নিবৃত্তিঃ কারণং যোগারূঢস্য সাধনং উচ্যতে ইত্যর্থঃ ।
যাবদ্যাবৎ কর্মভ্যঃ উপরমতে, তাবত্তাবৎ নিরায়াসস্য জিতেন্দ্রিয়স্য চিত্তং
সমাধীয়তে । তথা সতি স ঝটিতি যোগারূঢো ভবতি । তথা চোক্তং ব্যাসেন
–”নৈতাদৃশং ব্রাহ্মণস্যাস্তি বিত্তং যথৈকতা সমতা সত্যতা চ ।
শীলং স্থিতির্দণ্ডনিধানমার্জবং ততস্ততশ্চোপরমঃ ক্রিয়াভ্যঃ”
(মো. ধ. ১৭৫-৩৭) ইতি ॥ অথেদানীং কদা যোগারূঢো ভবতি ইত্যুচ্যতে —
যদা হি নেন্দ্রিয়ার্থেষু ন কর্মস্বনুষজ্জতে ।
সর্বসঙ্কল্পসন্ন্যাসী যোগারূঢস্তদোচ্যতে ॥ ৬-৪॥
যদা সমাধীয়মানচিত্তো যোগী হি ইন্দ্রিয়ার্থেষু ইন্দ্রিয়াণামর্থাঃ শব্দাদয়ঃ
তেষু ইন্দ্রিয়ার্থেষু কর্মসু চ নিত্যনৈমিত্তিককাম্যপ্রতিষিদ্ধেষু
প্রয়োজনাভাববুদ্ধ্যা ন অনুষজ্জতে অনুষঙ্গং কর্তব্যতাবুদ্ধিং ন
করোতীত্যর্থঃ । সর্বসঙ্কল্পসন্ন্যাসী সর্বান্ সঙ্কল্পান্ ইহামুত্রার্থকামহেতূন্
সন্ন্যসিতুং শীলং অস্য ইতি সর্বসঙ্কল্পসন্ন্যাসী, যোগারূঢঃ প্রাপ্তয়োগ
ইত্যেতৎ, তদা তস্মিন্ কালে উচ্যতে । “সর্বসঙ্কল্পসন্ন্যাসী”
ইতি বচনাৎ সর্বাংশ্চ কামান্ সর্বাণি চ কর্মাণি সন্ন্যস্যেদিত্যর্থঃ ।
সঙ্কল্পমূলা হি সর্বে কামাঃ — ”সঙ্কল্পমূলঃ কামো বৈ
যজ্ঞাঃ সঙ্কল্পসম্ভবাঃ ।” (মনু. ২-৩) ”কাম জানামি তে
মূলং সঙ্কল্পাৎকিল জায়সে । ন ৎবাং সঙ্কল্পয়িষ্যামি তেন মে ন
ভবিষ্যসি” (মো. ধ. ১৭৭-২৫)ইত্যাদিস্মৃতেঃ । সর্বকামপরিত্যাগে
চ সর্বকর্মসন্ন্যাসঃ সিদ্ধো ভবতি, “স যথাকামো ভবতি
তৎক্রতুর্ভবতি যৎক্রতুর্ভবতি তৎকর্ম কুরুতে” (বৃ. উ. ৪-৪-৫)
ইত্যাদিশ্রুতিভ্যঃ ; ”যদ্যদ্ধি কুরুতে জন্তুঃ তত্তৎ কামস্য
চেষ্টিতম্” (মনু. ২-৪)ইত্যাদিস্মৃতিভ্যশ্চ ; ন্যায়াচ্চ —
ন হি সর্বসঙ্কল্পসন্ন্যাসে কশ্চিৎ স্পন্দিতুমপি শক্তঃ । তস্মাৎ
“সর্বসঙ্কল্পসন্ন্যাসী” ইতি বচনাৎ সর্বান্ কামান্ সর্বাণি কর্মাণি
চ ত্যাজয়তি ভগবান্ ॥ যদা এবং যোগারূঢঃ, তদা তেন আত্মা উদ্ধৃতো
ভবতি সংসারাদনর্থজাতাৎ । অতঃ —
উদ্ধরেদাত্মনাত্মানং নাত্মানমবসাদয়েৎ ।
আত্মৈব হ্যাত্মনো বন্ধুরাত্মৈব রিপুরাত্মনঃ ॥ ৬-৫॥
উদ্ধরেৎ সংসারসাগরে নিমগ্নং আত্মনা আত্মানং ততঃ উৎ ঊর্ধ্বং হরেৎ
উদ্ধরেৎ, যোগারূঢতামাপাদয়েদিত্যর্থঃ । ন আত্মানং অবসাধয়েৎ ন অধঃ
নয়েৎ, ন অধঃ গময়েৎ । আত্মৈব হি যস্মাৎ আত্মনঃ বন্ধুঃ । ন হি অন্যঃ
কশ্চিৎ বন্ধুঃ, যঃ সংসারমুক্তয়ে ভবতি । বন্ধুরপি তাবৎ মোক্ষং
প্রতি প্রতিকূল এব, স্নেহাদিবন্ধনায়তনৎবাৎ । তস্মাৎ যুক্তমবধারণম্
“আত্মৈব হ্যাত্মনো বন্ধুঃ” ইতি । আত্মৈব রিপুঃ শত্রুঃ । যঃ
অন্যঃ অপকারী বাহ্যঃ শত্রুঃ সোঽপি আত্মপ্রয়ুক্ত এবেতি যুক্তমেব অবধারণম্
“আত্মৈব রিপুরাত্মনঃ” ইতি ॥ আত্মৈব বন্ধুঃ আত্মৈব রিপুঃ আত্মনঃ
ইত্যুক্তম্ । তত্র কিংলক্ষণ আত্মা আত্মনো বন্ধুঃ, কিংলক্ষণো বা আত্মা আত্মনো
রিপুঃ ইত্যুচ্যতে —
বন্ধুরাত্মাত্মনস্তস্য যেনাত্মৈবাত্মনা জিতঃ ।
অনাত্মনস্তু শত্রুৎবে বর্তেতাত্মৈব শত্রুবৎ ॥ ৬-৬॥
বন্ধুঃ আত্মা আত্মনঃ তস্য, তস্য আত্মনঃ স আত্মা বন্ধুঃ যেন আত্মনা আত্মৈব
জিতঃ, আত্মা কার্যকরণসঙ্ঘাতো যেন বশীকৃতঃ, জিতেন্দ্রিয় ইত্যর্থ– ।
অনাত্মনস্তু অজিতাত্মনস্তু শত্রুৎবে শত্রুভাবে বর্তেত আত্মৈব শত্রুবৎ,
যথা অনাত্মা শত্রুঃ আত্মনঃ অপকারী, তথা আত্মা আত্মন অপকারে বর্তেত
ইত্যর্থঃ ॥
জিতাত্মনঃ প্রশান্তস্য পরমাত্মা সমাহিতঃ ।
শীতোষ্ণসুখদুঃখেষু তথা মানাপমানয়োঃ ॥ ৬-৭॥
জিতাত্মনঃ কার্যকরণসঙ্ঘাত আত্মা জিতো যেন সঃ জিতাত্মা তস্যজিতাত্মনঃ,
প্রশান্তস্য প্রসন্নান্তঃকরণস্য সতঃ সন্ন্যাসিনঃ পরমাত্মা সমাহিতঃ
সাক্ষাদাত্মভাবেন বর্ততে ইত্যর্থঃ । কিঞ্চ শীতোষ্ণসুখদুঃখেষু তথা
মানে অপমানে চ মানাপমানয়োঃ পূজাপরিভবয়োঃ সমঃ স্যাৎ ॥
জ্ঞানবিজ্ঞানতৃপ্তাত্মা কূটস্থো বিজিতেন্দ্রিয়ঃ ।
যুক্ত ইত্যুচ্যতে যোগী সমলোষ্টাশ্মকাঞ্চনঃ ॥ ৬-৮॥
জ্ঞানবিজ্ঞানতৃপ্তাত্মা জ্ঞানং শাস্ত্রোক্তপদার্থানাং পরিজ্ঞানম্,
বিজ্ঞানং তু শাস্ত্রতো জ্ঞাতানাং তথৈব স্বানুভবকরণম্, তাভ্যাং
জ্ঞানবিজ্ঞানাভ্যাং তৃপ্তঃ সঞ্জাতালম্প্রত্যযঃ আত্মা অন্তঃকরণং যস্য
সঃ জ্ঞানবিজ্ঞানতৃপ্তাত্মা, কূটস্থঃ অপ্রকম্প্যঃ, ভবতি ইত্যর্থঃ ;
বিজিতেন্দ্রিয়শ্চ । য ঈদৃশঃ, যুক্তঃ সমাহিতঃ ইতি স উচ্যতে কথ্যতে ।
স যোগী সমলোষ্টাশ্মকাঞ্চনঃ লোষ্টাশ্মকাঞ্চনানি সমানি যস্য সঃ
সমলোষ্টাশ্মকাঞ্চনঃ ॥ কিঞ্চ —
সুহৃন্মিত্রার্যুদাসীনমধ্যস্থদ্বেষ্যবন্ধুষু ।
সাধুষ্বপি চ পাপেষু সমবুদ্ধির্বিশিষ্যতে ॥ ৬-৯॥
“সুহৃৎ” ইত্যাদিশ্লোকার্ধং একং পদম্ । সুহৃৎ ইতি
প্রত্যুপকারমনপেক্ষ্য উপকর্তা, মিত্রং স্নেহবান্, অরিঃ শত্রুঃ,
উদাসীনঃ ন কস্যচিৎ পক্ষং ভজতে, মধ্যস্থঃ যো বিরুদ্ধয়োঃ উভয়োঃ
হিতৈষী, দ্বেষ্যঃ আত্মনঃ অপ্রিয়ঃ, বন্ধুঃ সম্বন্ধী ইত্যেতেষু সাধুষু
শাস্ত্রানুবর্তিষু অপি চ পাপেষু প্রতিষিদ্ধকারিষু সর্বেষু এতেষু
সমবুদ্ধিঃ “কঃ কিঙ্কর্মা” ইত্যব্যাপৃতবুদ্ধিরিত্যর্থঃ ।
বিশিষ্যতে, “বিমুচ্যতে” ইতি বা পাঠান্তরম্ । যোগারূঢানাং
সর্বেষাং অয়ং উত্তম ইত্যর্থঃ ॥ অত এবমুত্তমফলপ্রাপ্তয়ে —
যোগী যুঞ্জীত সততমাত্মানং রহসি স্থিতঃ ।
একাকী যতচিত্তাত্মা নিরাশীরপরিগ্রহঃ ॥ ৬-১০॥
যোগী ধ্যায়ী যুঞ্জীত সমাদধ্যাৎ সততং সর্বদা আত্মানং অন্তঃকরণং রহসি
একান্তে গিরিগুহাদৌ স্থিতঃ সন্ একাকী অসহায়ঃ । “রহসি স্থিতঃ একাকী
চ” ইতি বিশেষণাৎ সন্ন্যাসং কৃৎবা ইত্যর্থঃ । যতচিত্তাত্মা চিত্তম্
অন্তঃকরণং আত্মা দেহশ্চ সংয়তৌ যস্য সঃ যতচিত্তাত্মা, নিরাশীঃ
বীততৃষ্ণঃ অপরিগ্রহঃ পরিগ্রহরহিতশ্চেত্যর্থঃ । সন্ন্যাসিৎবেঽপি
ত্যক্তসর্বপরিগ্রহঃ সন্ যুঞ্জীত ইত্যর্থঃ ॥ অথেদানীং যোগং যুঞ্জতঃ
আসনাহারবিহারাদীনাং যোগসাধনৎবেন নিয়মো বক্তব্যঃ, প্রাপ্তয়োগস্য লক্ষণং
তৎফলাদি চ, ইত্যত আরভ্যতে । তত্র আসনমেব তাবৎ প্রথমমুচ্যতে —
শুচৌ দেশে প্রতিষ্ঠাপ্য স্থিরমাসনমাত্মনঃ ।
নাত্যুচ্ছ্রিতং নাতিনীচং চৈলাজিনকুশোত্তরম্ ॥ ৬-১১॥
শুচৌ শুদ্ধে বিবিক্তে স্বভাবতঃ সংস্কারতো বা, দেশে স্থানে প্রতিষ্ঠাপ্য
স্থিরং অচলং আত্মনঃ আসনং নাত্যুচ্ছ্রিতং নাতীব উচ্ছ্রিতং ন অপি
অতিনীচম্, তচ্চ চৈলাজিনকুশোত্তরং চৈলং অজিনং কুশাশ্চ উত্তরে
যস্মিন্ আসনে তৎ আসনং চৈলাজিনকুশোত্তরম্ । পাঠক্রমাদ্বিপরীতঃ অত্র
ক্রমঃ চৈলাদীনাম্ ॥ প্রতিষ্ঠাপ্য, কিম্ ? —
তত্রৈকাগ্রং মনঃ কৃৎবা যতচিত্তেন্দ্রিয়ক্রিয়ঃ ।
উপবিশ্যাসনে যুঞ্জ্যাদ্যোগমাত্মবিশুদ্ধয়ে ॥ ৬-১২॥
তত্র তস্মিন্ আসনে উপবিশ্য যোগং যুঞ্জ্যাৎ । কথম্ ? সর্ববিষয়েভ্যঃ
উপসংহৃত্য একাগ্রং মনঃ কৃৎবা যতচিত্তেন্দ্রিয়ক্রিয়ঃ চিত্তং
চ ইন্দ্রিয়াণি চ চিত্তেন্দ্রিয়াণি তেষাং ক্রিয়াঃ সংয়তা যস্য সঃ
যতচিত্তেন্দ্রিয়ক্রিয়ঃ । স কিমর্থং যোগং যুঞ্জ্যাৎ ইত্যাহ —
আত্মবিশুদ্ধয়ে অন্তঃকরণস্য বিশুদ্ধ্যর্থমিত্যেতৎ ॥ বাহ্যমাসনমুক্তম্ ;
অধুনা শরীরধারণং কথং ইত্যুচ্যতে —
সমং কায়শিরোগ্রীবং ধারয়ন্নচলং স্থিরঃ ।
সম্প্রেক্ষ্য নাসিকাগ্রং স্বং দিশশ্চানবলোকয়ন্ ॥ ৬-১৩॥
সমং কায়শিরোগ্রীবং কায়শ্চ শিরশ্চ গ্রীবা চ কায়শিরোগ্রীবং তৎ সমং
ধারয়ন্ অচলং চ । সমং ধারয়তঃ চলনং সম্ভবতি ; অতঃ বিশিনষ্টি
— অচলমিতি । স্থিরঃ স্থিরো ভূৎবা ইত্যর্থঃ । স্বং নাসিকাগ্রং সম্প্রেক্ষ্য
সম্যক্ প্রেক্ষণং দর্শনং কৃৎবেব ইতি । ইবশব্দো লুপ্তো দ্রষ্টব্যঃ ।
ন হি স্বনাসিকাগ্রসম্প্রেক্ষণমিহ বিধিৎসিতম্ । কিং তর্হি ? চক্ষুষো
দৃষ্টিসন্নিপাতঃ । স চ অন্তঃকরণসমাধানাপেক্ষো বিবক্ষিতঃ ।
স্বনাসিকাগ্রসম্প্রেক্ষণমেব চেৎ বিবক্ষিতম্, মনঃ তত্রৈব সমাধীয়েত,
নাত্মনি । আত্মনি হি মনসঃ সমাধানং বক্ষ্যতি “আত্মসংস্থং মনঃ
কৃৎবা” (ভ. গী. ৬-২৫) ইতি । তস্মাৎ ইবশব্দলোপেন অক্ষ্ণোঃ
দৃষ্টিসন্নিপাত এব “সম্প্রেক্ষ্য” ইত্যুচ্যতে । দিশশ্চ
অনবলোকয়ন্ দিশাং চ অবলোকনমন্তরাকুর্বন্ ইত্যেতৎ ॥ কিঞ্চ —
প্রশান্তাত্মা বিগতভীর্ব্রহ্মচারিব্রতে স্থিতঃ ।
মনঃ সংয়ম্য মচ্চিত্তো যুক্ত আসীত মৎপরঃ ॥ ৬-১৪॥
প্রশান্তাত্মা প্রকর্ষেণ শান্তঃ আত্মা অন্তঃকরণং যস্য সোঽয়ং প্রশান্তাত্মা,
বিগতভীঃ বিগতভয়ঃ, ব্রহ্মচারিব্রতে স্থিতঃ ব্রহ্মচারিণো ব্রতং
ব্রহ্মচর্যং গুরুশুশ্রূষাভিক্ষান্নভুক্ত্যাদি তস্মিন্ স্থিতঃ, তদনুষ্ঠাতা
ভবেদিত্যর্থঃ । কিঞ্চ, মনঃ সংয়ম্য মনসঃ বৃত্তীঃ উপসংহৃত্য
ইত্যেতৎ, মচ্চিত্তঃ ময়ি পরমেশ্বরে চিত্তং যস্য সোঽয়ং মচ্চিত্তঃ,
যুক্তঃ সমাহিতঃ সন্ আসীত উপবিশেৎ । মৎপরঃ অহং পরো যস্য সোঽয়ং মৎপরো
ভবতি । কশ্চিৎ রাগী স্ত্রীচিত্তঃ, ন তু স্ত্রিয়মেব পরৎবেন গৃহ্ণাতি
; কিং তর্হি ? রাজানং মহাদেবং বা । অয়ং তু মচ্চিত্তো মৎপরশ্চ ॥
অথেদানীং যোগফলমুচ্যতে —
যুঞ্জন্নেবং সদাত্মানং যোগী নিয়তমানসঃ ।
শান্তিং নির্বাণপরমাং মৎসংস্থামধিগচ্ছতি ॥ ৬-১৫॥
যুঞ্জন্ সমাধানং কুর্বন্ এবং যতোক্তেন বিধানেন সদা আত্মানং সর্বদা যোগী
নিয়তমানসঃ নিয়তং সংয়তং মানসং মনো যস্য সোঽয়ং নিয়তমানসঃ,
শান্তিং উপরতিং নির্বাণপরমাং নির্বাণং মোক্ষঃ তৎ পরমা নিষ্টা যস্যাঃ
শান্তেঃ সা নির্বাণপরমা তাং নির্বাণপরমাম্, মৎসংস্থাং মদধীনাম্
অধিগচ্ছতি প্রাপ্নোতি ॥ ইদানীং যোগিনঃ আহারাদিনিয়ম উচ্যতে —
নাত্যশ্নতস্তু যোগোঽস্তি ন চৈকান্তমনশ্নতঃ ।
ন চাতিস্বপ্নশীলস্য জাগ্রতো নৈব চার্জুন ॥ ৬-১৬॥
ন অত্যশ্নতঃ আত্মসম্মিতমন্নপরিমাণমতীত্যাশ্নতঃ অত্যশ্নতঃ ন যোগঃ অস্তি ।
ন চ একান্তং অনশ্নতঃ যোগঃ অস্তি । ”যদু হ বা আত্মসম্মিতমন্নং
তদবতি তন্ন হিনস্তি যদ্ভূয়ো হিনস্তি তদ্যৎ কনীয়োঽন্নং ন তদবতি”
(শ. ব্রা।) ইতি শ্রুতেঃ । তস্মাৎ যোগী ন আত্মসম্মিতাৎ অন্নাৎ অধিকং ন্যূনং
বা অশ্নীয়াৎ । অথবা, যোগিনঃ যোগশাস্ত্রে পরিপঠীতাৎ অন্নপরিমাণাৎ
অতিমাত্রমশ্নতঃ যোগো নাস্তি । উক্তং হি — ”অর্ধং সব্যঞ্জনান্নস্য
তৃতীয়মুদকস্য চ । বায়োঃ সঞ্চরণার্থং তু চতুর্থমবশেষয়েৎ”
ইত্যাদিপরিমাণম্ । তথা — ন চ অতিস্বপ্নশীলস্য যোগো ভবতি নৈব
চ অতিমাত্রং জাগ্রতো ভবতি চ অর্জুন ॥ কথং পুনঃ যোগো ভবতি
ইত্যুচ্যতে —
যুক্তাহারবিহারস্য যুক্তচেষ্টস্য কর্মসু ।
যুক্তস্বপ্নাববোধস্য যোগো ভবতি দুঃখহা ॥ ৬-১৭॥
যুক্তাহারবিহারস্য আহ্রিয়তে ইতি আহারঃ অন্নম্, বিহরণং বিহারঃ পাদক্রমঃ, তৌ
যুক্তৌ নিয়তপরিমাণৌ যস্য সঃ যুক্তাহারবিহারঃ তস্য, তথা যুক্তচেষ্টস্য
যুক্তা নিয়তা চেষ্টা যস্য কর্মসু তস্য, তথা যুক্তস্বপ্নাববোধস্য যুক্তৌ
স্বপ্নশ্চ অববোধশ্চ তৌ নিয়তকালৌ যস্য তস্য, যুক্তাহারবিহারস্য
যুক্তচেষ্টস্য কর্মসু যুক্তস্বপ্নাববোধস্য যোগিনো যোগো ভবতি দুঃখহা
দুঃখানি সর্বাণি হন্তীতি দুঃখহা, সর্বসংসারদুঃখক্ষয়কৃৎ যোগঃ
ভবতীত্যর্থঃ ॥ অথ অধুনা কদা যুক্তো ভবতি ইত্যুচ্যতে —
যদা বিনিয়তং চিত্তমাত্মন্যেবাবতিষ্ঠতে ।
নিঃস্পৃহঃ সর্বকামেভ্যো যুক্ত ইত্যুচ্যতে তদা ॥ ৬-১৮॥
যদা বিনিয়তং বিশেষেণ নিয়তং সংয়তং একাগ্রতামাপন্নং চিত্তং হিৎবা
বাহ্যার্থচিন্তাং আত্মন্যেব কেবলে অবতিষ্ঠতে, স্বাত্মনি স্থিতিং লভতে
ইত্যর্থঃ । নিঃস্পৃহঃ সর্বকামেভ্যঃ নির্গতা দৃষ্টাদৃষ্টবিষয়েভ্যঃ
স্পৃহা তৃষ্ণা যস্য যোগিনঃ সঃ যুক্তঃ সমাহিতঃ ইত্যুচ্যতে তদা তস্মিন্কালে ॥
তস্য যোগিনঃ সমাহিতং যৎ চিত্তং তস্যোপমা উচ্যতে —
যদা দীপো নিবাতস্থো নেঙ্গতে সোপমা স্মৃতা ।
যোগিনো যতচিত্তস্য যুঞ্জতো যোগমাত্মনঃ ॥ ৬-১৯॥
যথা দীপঃ প্রদীপঃ নিবাতস্থঃ নিবাতে বাতবর্জিতে দেশে স্থিতঃ ন ইঙ্গতে ন
চলতি, সা উপমা উপমীয়তে অনয়া ইত্যুপমা যোগজ্ঞৈঃ চিত্তপ্রচারদর্শিভিঃ
স্মৃতা চিন্তিতা যোগিনো যতচিত্তস্য সংয়তান্তঃকরণস্য যুঞ্চতো
যোগং অনুতিষ্ঠতঃ আত্মনঃ সমাধিমনুতিষ্ঠত ইত্যর্থঃ ॥ এবং
যোগাভ্যাসবলাদেকাগ্রীভূতং নিবাতপ্রদীপকল্পং সৎ —
যত্রোপরমতে চিত্তং নিরুদ্ধং যোগসেবয়া ।
যত্র চৈবাত্মনাত্মানং পশ্যন্নাত্মনি তুষ্যতি ॥ ৬-২০॥
যত্র যস্মিন্ কালে উপরমতে চিত্তং উপরতিং গচ্ছতি নিরুদ্ধং সর্বতো
নিবারিতপ্রচারং যোগসেবয়া যোগানুষ্ঠানেন, যত্র চৈব যস্মিংশ্চ
কালে আত্মনা সমাধিপরিশুদ্ধেন অন্তঃকরণেন আত্মানং পরং চৈতন্যং
জ্যোতিঃস্বরূপং পশ্যন্ উপলভমানঃ স্বে এব আত্মনি তুষ্যতি তুষ্টিং ভজতে ॥
কিঞ্চ —
সুখমাত্যন্তিকং যত্তদ্বুদ্ধিগ্রাহ্যমতীন্দ্রিয়ম্ ।
বেত্তি যত্র ন চৈবায়ং স্থিতশ্চলতি তত্ত্বতঃ ॥ ৬-২১॥
সুখং আত্যন্তিকং অত্যন্তমেব ভবতি ইত্যাত্যন্তিকং অনন্তমিত্যর্থঃ, যৎ
তৎ বুদ্ধিগ্রাহ্যং বুদ্ধ্যৈব ইন্দ্রিয়নিরপেক্ষয়া গৃহ্যতে ইতি বুদ্ধিগ্রাহ্যম্
অতীন্দ্রিয়ং ইন্দ্রিয়গোচরাতীতং অবিষয়জনিতমিত্যর্থঃ, বেত্তি তৎ ঈদৃশং
সুখমনুভবতি যত্র যস্মিন্ কালে, ন চ এব অয়ং বিদ্বান্ আত্মস্বরূপে স্থিতঃ
তস্মাৎ নৈব চলতি তত্ত্বতঃ তত্ত্বস্বরূপাৎ ন প্রচ্যবতে ইত্যর্থঃ ॥
কিঞ্চ —
যং লব্ধ্বা চাপরং লাভং মন্যতে নাধিকং ততঃ ।
যস্মিন্স্থিতো ন দুঃখেন গুরুণাপি বিচাল্যতে ॥ ৬-২২॥
যং লব্ধ্বা যং আত্মলাভং লব্ধ্বা প্রাপ্য চ অপরং অন্যৎ লাভং লাভান্তরং
ততঃ অধিকং অস্তীতি ন মন্যতে ন চিন্তয়তি । কিঞ্চ, যস্মিন্ আত্মতত্ত্বে
স্থিতঃ দুঃখেন শস্ত্রনিপাতাদিলক্ষণেন গুরুণা মহতা অপি ন বিচাল্যতে ॥
“যত্রোপরমতে” (ভ. গী. ৬-২০) ইত্যাদ্যারভ্য যাবদ্ভিঃ বিশেষণৈঃ
বিশিষ্ট আত্মাবস্থাবিশেষঃ যোগঃ উক্তঃ —
তং বিদ্যাদ্দুঃখসংয়োগবিয়োগং যোগসংজ্ঞিতম্ ।
স নিশ্চয়েন যোক্তব্যো যোগোঽনির্বিণ্ণচেতসা ॥ ৬-২৩॥
তং বিদ্যাৎ বিজানীয়াৎ দুঃখসংয়োগবিয়োগং দুঃখৈঃ সংয়োগঃ দুঃখসংয়োগঃ,
তেন বিয়োগঃ দুঃখসংয়োগবিয়োগঃ, তং দুঃখসংয়োগবিয়োগং যোগ
ইত্যেব সংজ্ঞিতং বিপরীতলক্ষণেন বিদ্যাৎ বিজানীয়াদিত্যর্থঃ ।
যোগফলমুপসংহৃত্য পুনরন্বারম্ভেণ যোগস্য কর্তব্যতা উচ্যতে
নিশ্চয়ানির্বেদয়োঃ যোগসাধনৎববিধানার্থম্ । স যথোক্তফলো যোগঃ
নিশ্চয়েন অধ্যবসায়েন যোক্তব্যঃ অনির্বিণ্ণচেতসা ন নির্বিণ্ণং অনির্বিণ্ণম্ ।
কিং তৎ ? চেতঃ তেন নির্বেদরহিতেন চেতসা চিত্তেনেত্যর্থঃ ॥ কিঞ্চ —
সঙ্কল্পপ্রভবান্কামাংস্ত্যক্ত্বা সর্বানশেষতঃ ।
মনসৈবেন্দ্রিয়গ্রামং বিনিয়ম্য সমন্ততঃ ॥ ৬-২৪॥
সঙ্কল্পপ্রভবান্ সঙ্কল্পঃ প্রভবঃ যেষাং কামানাং তে সঙ্কল্পপ্রভবাঃ
কামাঃ তান্ ত্যক্ত্বা পরিত্যজ্য সর্বান্ অশেষতঃ নির্লেপেন । কিঞ্চ, মনসৈব
বিবেকয়ুক্তেন ইন্দ্রিয়গ্রামং ইন্দ্রিয়সমুদায়ং বিনিয়ম্য নিয়মনং কৃৎবা
সমন্ততঃ সমন্তাৎ ॥
শনৈঃ শনৈরুপরমেদ্বুদ্ধ্যা ধৃতিগৃহীতয়া ।
আত্মসংস্থং মনঃ কৃৎবা ন কিঞ্চিদপি চিন্তয়েৎ ॥ ৬-২৫॥
শনৈঃ শনৈঃ ন সহসা উপরমেৎ উপরতিং কুর্যাৎ । কয়া ? বুদ্ধ্যা ।
কিংবিশিষ্টয়া ? ধৃতিগৃহীতয়া ধৃত্যা ধৈর্যেণ গৃহীতয়া
ধৃতিগৃহীতয়া ধৈর্যেণ যুক্তয়া ইত্যর্থঃ । আত্মসংস্থং আত্মনি সংস্থিতম্
“আত্মৈব সর্বং ন ততোঽন্যৎ কিঞ্চিদস্তি” ইত্যেবমাত্মসংস্থং
মনঃ কৃৎবা ন কিঞ্চিদপি চিন্তয়েৎ । এষ যোগস্য পরমো বিধিঃ ॥
তত্র এবমাত্মসংস্থং মনঃ কর্তুং প্রবৃত্তো যোগী —
যতো যতো নিশ্চরতি মনশ্চঞ্চলমস্থিরম্ ।
ততস্ততো নিয়ম্যৈতদাত্মন্যেব বশং নয়েৎ ॥ ৬-২৬॥
যতো যতঃ যস্মাদ্যস্মাৎ নিমিত্তাৎ শব্দাদেঃ নিশ্চরতি নির্গচ্ছতি
স্বভাবদোষাৎ মনঃ চঞ্চলং অত্যর্থং চলম্, অত এব অস্থিরম্, ততস্ততঃ
তস্মাত্তস্মাৎ শব্দাদেঃ নিমিত্তাৎ নিয়ম্য তত্তন্নিমিত্তং যাথাত্ম্যনিরূপণেন
আভাসীকৃত্য বৈরাগ্যভাবনয়া চ এতৎ মনঃ আত্মন্যেব বশং নয়েৎ
আত্মবশ্যতামাপাদয়েৎ । এবং যোগাভ্যাসবলাৎ যোগিনঃ আত্মন্যেব প্রশাম্যতি
মনঃ ॥
প্রশান্তমনসং হ্যেনং যোগিনং সুখমুত্তমম্ ।
উপৈতি শান্তরজসং ব্রহ্মভূতমকল্মষম্ ॥ ৬-২৭॥
প্রশান্তমনসং প্রকর্ষেণ শান্তং মনঃ যস্য সঃ প্রশান্তমনাঃ
তং প্রশান্তমনসং হি এনং যোগিনং সুখং উত্তমং নিরতিশয়ং উপৈতি
উপগচ্ছতি শান্তরজসং প্রক্ষীণমোহাদিক্লেশরজসমিত্যর্থঃ, ব্রহ্মভূতং
জীবন্মুক্তম্, “ব্রহ্মৈব সর্বম্” ইত্যেবং নিশ্চয়বন্তং ব্রহ্মভূতম্
অকল্মষং ধর্মাধর্মাদিবর্জিতম্ ॥
যুঞ্জন্নেবং সদাত্মানং যোগী বিগতকল্মষঃ ।
সুখেন ব্রহ্মসংস্পর্শমত্যন্তং সুখমশ্নুতে ॥ ৬-২৮॥
যুঞ্জন্ এবং যথোক্তেন ক্রমেণ যোগী যোগান্তরায়বর্জিতঃ সদা সর্বদা আত্মানং
বিগতকল্মষঃ বিগতপাপঃ, সুখেন অনায়াসেন ব্রহ্মসংস্পর্শং ব্রহ্মণা
পরেণ সংস্পর্শো যস্য তৎ ব্রহ্মসংস্পর্শং সুখং অত্যন্তং অন্তমতীত্য
বর্তত ইত্যত্যন্তং উৎকৃষ্টং নিরতিশয়ং অশ্নুতে ব্যাপ্নোতি ॥ ইদানীং
যোগস্য যৎ ফলং ব্রহ্মৈকৎবদর্শনং সর্বসংসারবিচ্ছেদকারণং তৎ
প্রদর্শ্যতে —
সর্বভূতস্থমাত্মানং সর্বভূতানি চাত্মনি ।
ঈক্ষতে যোগয়ুক্তাত্মা সর্বত্র সমদর্শনঃ ॥ ৬-২৯॥
সর্বভূতস্থং সর্বেষু ভূতেষু স্থিতং স্বং আত্মানং সর্বভূতানি চ
আত্মনি ব্রহ্মাদীনি স্তম্বপর্যন্তানি চ সর্বভূতানি আত্মনি একতাং গতানি
ঈক্ষতে পশ্যতি যোগয়ুক্তাত্মা সমাহিতান্তঃকরণঃ সর্বত্র সমদর্শনঃ
সর্বেষু ব্রহ্মাদিস্থাবরান্তেষু বিষমেষু সর্বভূতেষু সমং নির্বিশেষং
ব্রহ্মাত্মৈকৎববিষয়ং দর্শনং জ্ঞানং যস্য স সর্বত্র সমদর্শনঃ ॥
এতস্য আত্মৈকৎবদর্শনস্য ফলং উচ্যতে —
যো মাং পশ্যতি সর্বত্র সর্বং চ ময়ি পশ্যতি ।
তস্যাহং ন প্রণশ্যামি স চ মে ন প্রণশ্যতি ॥ ৬-৩০॥
যো মাং পশ্যতি বাসুদেবং সর্বস্য আত্মানং সর্বত্র সর্বেষু ভূতেষু
সর্বং চ ব্রহ্মাদিভূতজাতং ময়ি সর্বাত্মনি পশ্যতি, তস্য এবং
আত্মৈকৎবদর্শিনঃ অহং ঈশ্বরো ন প্রণশ্যামি ন পরোক্ষতাং গমিষ্যামি ।
স চ মে ন প্রণশ্যতি স চ বিদ্বান্ মম বাসুদেবস্য ন প্রণশ্যতি ন
পরোক্ষো ভবতি, তস্য চ মম চ একাত্মকৎবাৎ ; স্বাত্মা হি নাম আত্মনঃ
প্রিয় এব ভবতি, যস্মাচ্চ অহমেব সর্বাত্মৈকৎবদর্শী ॥ ইত্যেতৎ
পূর্বশ্লোকার্থং সম্যগ্দর্শনমনূদ্য তৎফলং মোক্ষঃ অভিধীয়তে —
সর্বভূতস্থিতং যো মাং ভজত্যেকৎবমাস্থিতঃ ।
সর্বথা বর্তমানোঽপি স যোগী ময়ি বর্ততে ॥ ৬-৩১॥
সর্বথা সর্বপ্রকারৈঃ বর্তমানোঽপি সম্যগ্দর্শী যোগী ময়ি বৈষ্ণবে পরমে
পদে বর্ততে, নিত্যমুক্ত এব সঃ, ন মোক্ষং প্রতি কেনচিৎ প্রতিবধ্যতে
ইত্যর্থঃ ॥ কিঞ্চ অন্যৎ —
আত্মৌপম্যেন সর্বত্র সমং পশ্যতি যোঽর্জুন ।
শুখং বা যদি বা দুঃখং স যোগী পরমো মতঃ ॥ ৬-৩২॥
আত্মৌপম্যেন আত্মা স্বয়মেব উপমীয়তে অনয়া ইত্যুপমা তস্যা উপমায়া ভাবঃ
ঔপম্যং তেন আত্মৌপম্যেন, সর্বত্র সর্বভূতেষু সমং তুল্যং পশ্যতি যঃ
অর্জুন, স চ কিং সমং পশ্যতি ইত্যুচ্যতে — যথা মম সুখং ইষ্টং
তথা সর্বপ্রাণিনাং সুখং অনুকূলম্ । বাশব্দঃ চার্থে । যদি বা যচ্চ
দুঃখং মম প্রতিকূলং অনিষ্টং যথা তথা সর্বপ্রাণিনাং দুঃখং অনিষ্টং
প্রতিকূলং ইত্যেবং আত্মৌপম্যেন সুখদুঃখে অনুকূলপ্রতিকূলে তুল্যতয়া
সর্বভূতেষু সমং পশ্যতি, ন কস্যচিৎ প্রতিকূলমাচরতি, অহিংসক
ইত্যর্থঃ । যঃ এবমহিংসকঃ সম্যগ্দর্শননিষ্ঠঃ স যোগী পরমঃ
উৎকৃষ্টঃ মতঃ অভিপ্রেতঃ সর্বয়োগিনাং মধ্যে ॥ এতস্য যথোক্তস্য
সম্যগ্দর্শনলক্ষণস্য যোগস্য দুঃখসম্পাদ্যতামালক্ষ্য শুশ্রূষুঃ
ধ্রুবং তৎপ্রাপ্ত্যুপায়মর্জুন উবাচ —
অর্জুন উবাচ —
যোঽয়ং যোগস্ত্বয়া প্রোক্তঃ সাম্যেন মধুসূদন ।
এতস্যাহং ন পশ্যামি চঞ্চলৎবাৎস্থিতিং স্থিরাম্ ॥ ৬-৩৩॥
যঃ অয়ং যোগঃ ৎবয়া প্রোক্তঃ সাম্যেন সমৎবেন হে মধুসূদন এতস্য যোগস্য
অহং ন পশ্যামি নোপলভে, চঞ্চলৎবাৎ মনসঃ । কিম্ ? স্থিরাং অচলাং
স্থিতিম্ ॥ প্রসিদ্ধমেতৎ —
চঞ্চলং হি মনঃ কৃষ্ণ প্রমাথি বলবদ্দৃঢম্ ।
তস্যাহং নিগ্রহং মন্যে বায়োরিব সুদুষ্করম্ ॥ ৬-৩৪॥
চঞ্চলং হি মনঃ । কৃষ্ণ ইতি কৃষতেঃ বিলেখনার্থস্য রূপম্ ।
ভক্তজনপাপাদিদোষাকর্ষণাৎ কৃষ্ণঃ, তস্য সম্বুদ্ধিঃ হে কৃষ্ণ ।
হি যস্মাৎ মনঃ চঞ্চলং ন কেবলমত্যর্থং চঞ্চলম্, প্রমাথি
চ প্রমথনশীলম্, প্রমথ্নাতি শরীরং ইন্দ্রিয়াণি চ বিক্ষিপৎ সৎ
পরবশীকরোতি । কিঞ্চ — বলবৎ প্রবলম্, ন কেনচিৎ নিয়ন্তুং
শক্যম্, দুর্নিবারৎবাৎ । কিঞ্চ — দৃঢং তন্তুনাগবৎ অচ্ছেদ্যম্ ।
তস্য এবম্ভূতস্য মনসঃ অহং নিগ্রহং নিরোধং মন্যে বায়োরিব যথা বায়োঃ
দুষ্করো নিগ্রহঃ ততোঽপি দুষ্করং মন্যে ইত্যভিপ্রায়ঃ ॥ শ্রীভগবানুবাচ,
এবং এতৎ যথা ব্রবীষি —
শ্রীভগবানুবাচ —
অসংশয়ং মহাবাহো মনো দুর্নিগ্রহং চলম্ ।
অভ্যাসেন তু কৌন্তেয় বৈরাগ্যেণ চ গৃহ্যতে ॥ ৬-৩৫॥
অসংশয়ং নাস্তি সংশয়ঃ “মনো দুর্নিগ্রহং চলম্”
ইত্যত্র হে মহাবাহো । কিন্তু অভ্যাসেন তু অভ্যাসো নাম চিত্তভূমৌ
কস্যাঞ্চিৎ সমানপ্রত্যযাবৃত্তিঃ চিত্তস্য । বৈরাগ্যেণ বৈরাগ্যং নাম
দৃষ্টাদৃষ্টেষ্টভোগেষু দোষদর্শনাভ্যাসাৎ বৈতৃষ্ণ্যম্ । তেন চ
বৈরাগ্যেণ গৃহ্যতে বিক্ষেপরূপঃ প্রচারঃ চিত্তস্য । এবং তৎ মনঃ
গৃহ্যতে নিগৃহ্যতে নিরুধ্যতে ইত্যর্থঃ ॥ যঃ পুনঃ অসংয়তাত্মা, তেন —
অসংয়তাত্মনা যোগো দুষ্প্রাপ ইতি মে মতিঃ ।
বশ্যাত্মনা তু যততা শক্যোঽবাপ্তুমুপায়তঃ ॥ ৬-৩৬॥
অসংয়তাত্মনা অভ্যাসবৈরাগ্যাভ্যামসংয়তঃ আত্মা অন্তঃকরণং যস্য সোঽয়ম্
অসংয়তাত্মা তেন অসংয়তাত্মনা যোগো দুষ্প্রাপঃ দুঃখেন প্রাপ্যত ইতি মে মতিঃ ।
যস্তু পুনঃ বশ্যাত্মা অভ্যাসবৈরাগ্যাভ্যাং বশ্যৎবমাপাদিতঃ আত্মা মনঃ
যস্য সোঽয়ং বশ্যাত্মা তেন বশ্যাত্মনা তু যততা ভূয়োঽপি প্রয়ত্নং কুর্বতা
শক্যঃ অবাপ্তুং যোগঃ উপায়তঃ যথোক্তাদুপায়াৎ ॥ তত্র যোগাভ্যাসাঙ্গীকরণেন
ইহলোকপরলোকপ্রাপ্তিনিমিত্তানি কর্মাণি সন্ন্যস্তানি, যোগসিদ্ধিফলং চ
মোক্ষসাধনং সম্যগ্দর্শনং ন প্রাপ্তমিতি, যোগী যোগমার্গাৎ মরণকালে
চলিতচিত্তঃ ইতি তস্য নাশমশঙ্ক্য অর্জুন উবাচ —
অর্জুন উবাচ —
অয়তিঃ শ্রদ্ধয়োপেতো যোগাচ্চলিতমানসঃ ।
অপ্রাপ্য যোগসংসিদ্ধিং কাং গতিং কৃষ্ণ গচ্ছতি ॥ ৬-৩৭॥
অয়তিঃ অপ্রয়ত্নবান্ যোগমার্গে শ্রদ্ধয়া আস্তিক্যবুদ্ধ্যা চ উপেতঃ যোগাৎ
অন্তকালে চ চলিতং মানসং মনো যস্য সঃ চলিতমানসঃ ভ্রষ্টস্মৃতিঃ
সঃ অপ্রাপ্য যোগসংসিদ্ধিং যোগফলং সম্যগ্দর্শনং কাং গতিং হে কৃষ্ণ
গচ্ছতি ॥
কচ্চিন্নোভয়বিভ্রষ্টশ্ছিন্নাভ্রমিব নশ্যতি ।
অপ্রতিষ্ঠো মহাবাহো বিমূঢো ব্রহ্মণঃ পথি ॥ ৬-৩৮॥
কচ্চিৎ কিং ন উভয়বিভ্রষ্টঃ কর্মমার্গাৎ যোগমার্গাচ্চ বিভ্রষ্টঃ
সন্ ছিন্নাভ্রমিব নশ্যতি, কিং বা ন নশ্যতি অপ্রতিষ্ঠো নিরাশ্রয়ঃ হে
মহাবাহো বিমূঢঃ সন্ ব্রহ্মণঃ পথি ব্রহ্মপ্রাপ্তিমার্গে ॥
এতন্মে সংশয়ং কৃষ্ণ চ্ছেত্তুমর্হস্যশেষতঃ ।
ৎবদন্যঃ সংশয়স্যাস্য চ্ছেত্তা ন হ্যুপপদ্যতে ॥ ৬-৩৯॥
এতৎ মে মম সংশয়ং কৃষ্ণ চ্ছেত্তুং অপনেতুং অর্হসি অশেষতঃ ।
ৎবদন্যঃ ৎবত্তঃ অন্যঃ ঋষিঃ দেবো বা চ্ছেত্তা নাশয়িতা সংশয়স্য অস্য ন
হি যস্মাৎ উপপদ্যতে ন সম্ভবতি । অতঃ ৎবমেব চ্ছেত্তুমর্হসি ইত্যর্থঃ ॥
শ্রীভগবানুবাচ —
পার্থ নৈবেহ নামুত্র বিনাশস্তস্য বিদ্যতে ।
ন হি কল্যাণকৃৎকশ্চিদ্দুর্গতিং তাত গচ্ছতি ॥ ৬-৪০॥
হে পার্থ নৈব ইহ লোকে নামুত্র পরস্মিন্ বা লোকে বিনাশঃ তস্য বিদ্যতে
নাস্তি । নাশো নাম পূর্বস্মাৎ হীনজন্মপ্রাপ্তিঃ স যোগভ্রষ্টস্য নাস্তি ।
ন হি যস্মাৎ কল্যাণকৃৎ শুভকৃৎ কশ্চিৎ দুর্গতিং কুৎসিতাং গতিং হে
তাত, তনোতি আত্মানং পুত্ররূপেণেতি পিতা তাত উচ্যতে । পিতৈব পুত্র ইতি
পুত্রোঽপি তাত উচ্যতে । শিষ্যোঽপি পুত্র উচ্যতে । যতো ন গচ্ছতি ॥
কিং তু অস্য ভবতি ?–
প্রাপ্য পুণ্যকৃতাং লোকানুষিৎবা শাশ্বতীঃ সমাঃ ।
শুচীনাং শ্রীমতাং গেহে যোগভ্রষ্টোঽভিজায়তে ॥ ৬-৪১॥
যোগমার্গে প্রবৃত্তঃ সন্ন্যাসী সামর্থ্যাৎ প্রাপ্য গৎবা পুণ্যকৃতাম্
অশ্বমেধাদিয়াজিনাং লোকান্, তত্র চ উষিৎবা বাসমনুভূয় শাশ্বতীঃ
নিত্যাঃ সমাঃ সংবৎসরান্, তদ্ভোগক্ষয়ে শুচীনাং যতোক্তকারিণাং শ্রীমতাং
বিভূতিমতাং গেহে গৃহে যোগভ্রষ্টঃ অভিজায়তে ॥
অথবা যোগিনামেব কুলে ভবতি ধীমতাম্ ।
এতদ্ধি দুর্লভতরং লোকে জন্ম যদীদৃশম্ ॥ ৬-৪২॥
অথবা শ্রীমতাং কুলাৎ অন্যস্মিন্ যোগিনামেব দরিদ্রাণাং কুলে ভবতি
জায়তে ধীমতাং বুদ্ধিমতাম্ । এতৎ হি জন্ম, যৎ দরিদ্রাণাং যোগিনাং কুলে,
দুর্লভতরং দুঃখলভ্যতরং পূর্বমপেক্ষ্য লোকে জন্ম যৎ ঈদৃশং
যথোক্তবিশেষণে কুলে ॥ যস্মাৎ —
তত্র তং বুদ্ধিসংয়োগং লভতে পৌর্বদেহিকম্ ।
যততে চ ততো ভূয়ঃ সংসিদ্ধৌ কুরুনন্দন ॥ ৬-৪৩॥
তত্র যোগিনাং কুলে তং বুদ্ধিসংয়োগং বুদ্ধ্যা সংয়োগং বুদ্ধিসংয়োগং
লভতে পৌর্বদেহিকং পূর্বস্মিন্ দেহে ভবং পৌর্ব- দেহিকম্ । যততে
চ প্রয়ত্নং চ করোতি ততঃ তস্মাৎ পূর্বকৃতাৎ সংস্কারাৎ ভূয়ঃ বহুতরং
সংসিদ্ধৌ সংসিদ্ধিনিমিত্তং হে কুরুনন্দন ॥ কথং পূর্বদেহবুদ্ধিসংয়োগ
ইতি তদুচ্যতে —
পূর্বাভ্যাসেন তেনৈব হ্রিয়তে হ্যবশোঽপি সঃ ।
জিজ্ঞাসুরপি যোগস্য শব্দব্রহ্মাতিবর্ততে ॥ ৬-৪৪॥
যঃ পূর্বজন্মনি কৃতঃ অভ্যাসঃ সঃ পূর্বাভ্যাসঃ, তেনৈব বলবতা
হ্রিয়তে সংসিদ্ধৌ হি যস্মাৎ অবশোঽপি সঃ যোগভ্রষ্টঃ ; ন কৃতং
চেৎ যোগাভ্যাসজাৎ সংস্কারাৎ বলবত্তরমধর্মাদিলক্ষণং কর্ম,
তদা যোগাভ্যাসজনিতেন সংস্কারেণ হ্রিয়তে ; অধর্মশ্চেৎ বলবত্তরঃ
কৃতঃ, তেন যোগজোঽপি সংস্কারঃ অভিভূয়ত এব, তৎক্ষয়ে তু যোগজঃ
সংস্কারঃ স্বয়মেব কার্যমারভতে, ন দীর্ঘকালস্থস্যাপি বিনাশঃ তস্য
অস্তি ইত্যর্থঃ । অতঃ জিজ্ঞাসুরপি যোগস্য স্বরূপং জ্ঞাতুমিচ্ছন্ অপি
যোগমার্গে প্রবৃত্তঃ সন্ন্যাসী যোগভ্রষ্টঃ, সামর্থ্যাৎ সোঽপি শব্দব্রহ্ম
বেদোক্তকর্মানুষ্ঠানফলং অতিবর্ততে অতিক্রামতি অপাকরিষ্যতি ; কিমুত
বুদ্ধ্বা যঃ যোগং তন্নিষ্ঠঃ অভ্যাসং কুর্যাৎ ॥ কুতশ্চ যোগিৎবং শ্রেয়ঃ
ইতি —
প্রয়ত্নাদ্যতমানস্তু যোগী সংশুদ্ধকিল্বিষঃ ।
অনেকজন্মসংসিদ্ধস্ততো যাতি পরাং গতিম্ ॥ ৬-৪৫॥
প্রয়ত্নাৎ যতমানঃ, অধিকং যতমান ইত্যর্থঃ । তত্র যোগী বিদ্বান্
সংশুদ্ধকিল্বিষঃ বিশুদ্ধকিল্বিষঃ সংশুদ্ধপাপঃ অনেকজন্মসংসিদ্ধঃ
অনেকেষু জন্মসু কিঞ্চিৎকিঞ্চিৎ সংস্কারজাতং উপচিত্য তেন উপচিতেন
অনেকজন্মকৃতেন সংসিদ্ধঃ অনেকজন্মসংসিদ্ধঃ ততঃ লব্ধসম্যগ্দর্শনঃ
সন্ যাতি পরাং প্রকৃষ্টাং গতিম্ ॥ যস্মাদেবং তস্মাৎ —
তপস্বিভ্যোঽধিকো যোগী জ্ঞানিভ্যোঽপি মতোঽধিকঃ ।
কর্মিভ্যশ্চাধিকো যোগী তস্মাদ্যোগী ভবার্জুন ॥ ৬-৪৬॥
তপস্বিভ্যঃ অধিকঃ যোগী, জ্ঞানিভ্যোঽপি জ্ঞানমত্র শাস্ত্রার্থপাণ্ডিত্যম্,
তদ্বদ্ভ্যোঽপি মতঃ জ্ঞাতঃ অধিকঃ শ্রেষ্ঠঃ ইতি । কর্মিভ্যঃ, অগ্নিহোত্রাদি
কর্ম, তদ্বদ্ভ্যঃ অধিকঃ যোগী বিশিষ্টঃ যস্মাৎ তস্মাৎ যোগী ভব অর্জুন ॥
যোগিনামপি সর্বেষাং মদ্গতেনান্তরাত্মনা ।
শ্রদ্ধাবান্ভজতে যো মাং স মে যুক্ততমো মতঃ ॥ ৬-৪৭॥
যোগিনামপি সর্বেষাং রুদ্রাদিত্যাদিধ্যানপরাণাং মধ্যে মদ্গতেন ময়ি বাসুদেবে
সমাহিতেন অন্তরাত্মনা অন্তঃকরণেন শ্রদ্ধাবান্ শ্রদ্দধানঃ সন্ ভজতে
সেবতে যো মাম্, স মে মম যুক্ততমঃ অতিশয়েন যুক্তঃ মতঃ অভিপ্রেতঃ ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে ধ্যানয়োগো নাম ষষ্ঠোঽধ্যায়ঃ ॥৬॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে অঘ্যাস-যোগঃ নাম ষষ্ঠঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ সপ্তমোঽধ্যায়ঃ ॥
“যোগিনামপি সর্বেষাং মদ্গতেনান্তরাত্মনা । শ্রদ্ধাবান্ভজতে যো মাং
স মে যুক্ততমো মতঃ” (ভ. গী. ৬-৪৭) ইতি প্রশ্নবীজং উপন্যস্য,
স্বয়মেব “ঈদৃশং মদীয়ং তত্ত্বম্, এবং মদ্গতান্তরাত্মা স্যাৎ”
ইত্যেতৎ বিবক্ষুঃ শ্রীভগবানুবাচ —
শ্রীভগবানুবাচ —
ময়্যাসক্তমনাঃ পার্থ যোগং যুঞ্জন্মদাশ্রয়ঃ ।
অসংশয়ং সমগ্রং মাং যথা জ্ঞাস্যসি তচ্ছৃণু ॥ ৭-১॥
ময়ি বক্ষ্যমাণবিশেষণে পরমেশ্বরে আসক্তং মনঃ যস্য সঃ
ময়্যাসক্তমনাঃ, হে পার্থ যোগং যুঞ্জন্ মনঃসমাধানং কুর্বন্,
মদাশ্রয়ঃ অহমেব পরমেশ্বরঃ আশ্রয়ো যস্য সঃ মদাশ্রয়ঃ ।
যো হি কশ্চিৎ পুরুষার্থেন কেনচিৎ অর্থী ভবতি স তৎসাধনং
কর্ম অগ্নিহোত্রাদি তপঃ দানং বা কিঞ্চিৎ আশ্রয়ং প্রতিপদ্যতে, অয়ং
তু যোগী মামেব আশ্রয়ং প্রতিপদ্যতে, হিৎবা অন্যৎ সাধনান্তরং ময়্যেব
আসক্তমনাঃ ভবতি । যঃ ৎবং এবম্ভূতঃ সন্ অসংশয়ং সমগ্রং সমস্তং
বিভূতিবলশক্ত্যৈশ্বর্যাদিগুণসম্পন্নং মাং যথা যেন প্রকারেণ জ্ঞাস্যসি
সংশয়মন্তরেণ “এবমেব ভগবান্” ইতি, তৎ শৃণু উচ্যমানং
ময়া ॥ তচ্চ মদ্বিষয়ং —
জ্ঞানং তেঽহং সবিজ্ঞানমিদং বক্ষ্যাম্যশেষতঃ ।
যজ্জ্ঞাৎবা নেহ ভূয়োঽন্যজ্জ্ঞাতব্যমবশিষ্যতে ॥ ৭-২॥
জ্ঞানং তে তুভ্যং অহং সবিজ্ঞানং বিজ্ঞানসহিতং স্বানুভবয়ুক্তং ইদং
বক্ষ্যামি কথয়িষ্যামি অশেষতঃ কার্ত্স্ন্যেন । তৎ জ্ঞানং বিবক্ষিতং স্তৌতি
শ্রোতুঃ অভিমুখীকরণায় — যৎ জ্ঞাৎবা যৎ জ্ঞানং জ্ঞাৎবা ন ইহ ভূয়ঃ
পুনঃ অন্যৎ জ্ঞাতব্যং পুরুষার্থসাধনং অবশিষ্যতে নাবশিষ্টং ভবতি ।
ইতি মত্তত্ত্বজ্ঞো যঃ, সঃ সর্বজ্ঞো ভবতীত্যর্থঃ । অতো বিশিষ্টফলৎবাৎ
দুর্লভং জ্ঞানম্ ॥ কথমিত্যুচ্যতে —
মনুষ্যাণাং সহস্রেষু কশ্চিদ্যততি সিদ্ধয়ে ।
যততামপি সিদ্ধানাং কশ্চিন্মাং বেত্তি তত্ত্বতঃ ॥ ৭-৩॥
মনুষ্যাণাং মধ্যে সহস্রেষু অনেকেষু কশ্চিৎ যততি প্রয়ত্নং করোতি
সিদ্ধয়ে সিদ্ধ্যর্থম্ । তেষাং যততামপি সিদ্ধানাম্, সিদ্ধা এব হি তে যে
মোক্ষায় যতন্তে, তেষাং কশ্চিৎ এব হি মাং বেত্তি তত্ত্বতঃ যথাবৎ ॥
শ্রোতারং প্ররোচনেন অভিমুখীকৃত্যাহ —
ভূমিরাপোঽনলো বায়ুঃ খং মনো বুদ্ধিরেব চ ।
অহঙ্কার ইতীয়ং মে ভিন্না প্রকৃতিরষ্টধা ॥ ৭-৪॥
ভূমিঃ ইতি পৃথিবীতন্মাত্রমুচ্যতে, ন স্থূলা, “ভিন্না
প্রকৃতিরষ্টধা” ইতি বচনাৎ । তথা অবাদয়োঽপি তন্মাত্রাণ্যেব
উচ্যন্তে — আপঃ অনলঃ বায়ুঃ খম্ । মনঃ ইতি মনসঃ কারণমহঙ্কারো
গৃহ্যতে । বুদ্ধিঃ ইতি অহঙ্কারকারণং মহত্তত্ত্বম্ । অহঙ্কারঃ ইতি
অবিদ্যাসংয়ুক্তমব্যক্তম্ । যথা বিষসংয়ুক্তমন্নং বিষমিত্যুচ্যতে,
এবমহঙ্কারবাসনাবৎ অব্যক্তং মূলকারণমহঙ্কার ইত্যুচ্যতে, প্রবর্তকৎবাৎ
অহঙ্কারস্য । অহঙ্কার এব হি সর্বস্য প্রবৃত্তিবীজং দৃষ্টং লোকে ।
ইতীয়ং যথোক্তা প্রকৃতিঃ মে মম ঐশ্বরী মায়াশক্তিঃ অষ্টধা ভিন্না
ভেদমাগতা ॥
অপরেয়মিতস্ত্বন্যাং প্রকৃতিং বিদ্ধি মে পরাম্ ।
জীবভূতাং মহাবাহো যয়েদং ধার্যতে জগৎ ॥ ৭-৫॥
অপরা ন পরা নিকৃষ্টা অশুদ্ধা অনর্থকরী সংসারবন্ধনাত্মিকা ইয়ম্ ।
ইতঃ অস্যাঃ যথোক্তায়াঃ তু অন্যাং বিশুদ্ধাং প্রকৃতিং মম আত্মভূতাং বিদ্ধি
মে পরাং প্রকৃষ্টাং জীবভূতাং ক্ষেত্রজ্ঞলক্ষণাং প্রাণধারণনিমিত্তভূতাং
হে মহাবাহো, যয়া প্রকৃত্যা ইদং ধার্যতে জগৎ অন্তঃ প্রবিষ্টয়া ॥
এতদ্যোনীনি ভূতানি সর্বাণীত্যুপধারয় ।
অহং কৃৎস্নস্য জগতঃ প্রভবঃ প্রলয়স্তথা ॥ ৭-৬॥
এতদ্যোনীনি এতে পরাপরে ক্ষেত্রক্ষেত্রজ্ঞলক্ষণে প্রকৃতী যোনিঃ যেষাং
ভূতানাং তানি এতদ্যোনীনি, ভূতানি সর্বাণি ইতি এবং উপধারয় জানীহি । যস্মাৎ
মম প্রকৃতী যোনিঃ কারণং সর্বভূতানাম্, অতঃ অহং কৃৎস্নস্য সমস্তস্য
জগতঃ প্রভবঃ উৎপত্তিঃ প্রলয়ঃ বিনাশঃ তথা । প্রকৃতিদ্বয়দ্বারেণ
অহং সর্বজ্ঞঃ ঈশ্বরঃ জগতঃ কারণমিত্যর্থঃ ॥ যতঃ তস্মাৎ —
মত্তঃ পরতরং নান্যৎকিঞ্চিদস্তি ধনঞ্জয় ।
ময়ি সর্বমিদং প্রোতং সূত্রে মণিগণা ইব ॥ ৭-৭॥
মত্তঃ পরমেশ্বরাৎ পরতরং অন্যৎ কারণান্তরং কিঞ্চিৎ নাস্তি ন বিদ্যতে,
অহমেব জগৎকারণমিত্যর্থঃ, হে ধনঞ্জয় । যস্মাদেবং তস্মাৎ ময়ি
পরমেশ্বরে সর্বাণি ভূতানি সর্বমিদং জগৎ প্রোতং অনুস্যূতং অনুগতম্
অনুবিদ্ধং গ্রথিতমিত্যর্থ, দীর্ঘতন্তুষু পটবৎ, সূত্রে চ মণিগণা
ইব ॥ কেন কেন ধর্মেণ বিশিষ্টে ৎবয়ি সর্বমিদং প্রোতমিত্যুচ্যতে —
রসোঽহমপ্সু কৌন্তেয় প্রভাস্মি শশিসূর্যযোঃ ।
প্রণবঃ সর্ববেদেষু শব্দঃ খে পৌরুষং নৃষু ॥ ৭-৮॥
রসঃ অহম্, অপাং যঃ সারঃ স রসঃ, তস্মিন্ রসভূতে ময়ি আপঃ প্রোতা ইত্যর্থঃ ।
এবং সর্বত্র । যথা অহং অপ্সু রসঃ, এবং প্রভা অস্মি শশিসূর্যযোঃ ।
প্রণবঃ ওঙ্কারঃ সর্ববেদেষু, তস্মিন্ প্রণবভূতে ময়ি সর্বে বেদাঃ প্রোতাঃ ।
তথা খে আকাশে শব্দঃ সারভূতঃ, তস্মিন্ ময়ি খং প্রোতম্ । তথা পৌরুষং
পুরুষস্য ভাবঃ পৌরুষং যতঃ পুম্বুদ্ধিঃ নৃষু, তস্মিন্ ময়ি পুরুষাঃ
প্রোতাঃ ॥
পুণ্যো গন্ধঃ পৃথিব্যাং চ তেজশ্চাস্মি বিভাবসৌ ।
জীবনং সর্বভূতেষু তপশ্চাস্মি তপস্বিষু ॥ ৭-৯॥
পুণ্যঃ সুরভিঃ গন্ধঃ পৃথিব্যাং চ অহম্, তস্মিন্ ময়ি গন্ধভূতে
পৃথিবী প্রোতা । পুণ্যৎবং গন্ধস্য স্বভাবত এব পৃথিব্যাং দর্শিতম্
অবাদিষু রসাদেঃ পুণ্যৎবোপলক্ষণার্থম্ । অপুণ্যৎবং তু গন্ধাদীনাম্
অবিদ্যাধর্মাদ্যপেক্ষং সংসারিণাং ভূতবিশেষসংসর্গনিমিত্তং ভবতি ।
তেজশ্চ দীপ্তিশ্চ অস্মি বিভাবসৌ অগ্নৌ । তথা জীবনং সর্বভূতেষু,
যেন জীবন্তি সর্বাণি ভূতানি তৎ জীবনম্ । তপশ্চ অস্মি তপস্বিষু, তস্মিন্
তপসি ময়ি তপস্বিনঃ প্রোতাঃ ॥
বীজং মাং সর্বভূতানাং বিদ্ধি পার্থ সনাতনম্ ।
বুদ্ধির্বুদ্ধিমতামস্মি তেজস্তেজস্বিনামহম্ ॥ ৭-১০॥
বীজং প্ররোহকারণং মাং বিদ্ধি সর্বভূতানাং হে পার্থ সনাতনং চিরন্তনম্ ।
কিঞ্চ, বুদ্ধিঃ বিবেকশক্তিঃ অন্তঃকরণস্য বুদ্ধিমতাং বিবেকশক্তিমতাম্
অস্মি, তেজঃ প্রাগল্ভ্যং তদ্বতাং তেজস্বিনাং অহম্ ॥
বলং বলবতাং চাহং কামরাগবিবর্জিতম্ ।
ধর্মাবিরুদ্ধো ভূতেষু কামোঽস্মি ভরতর্ষভ ॥ ৭-১১॥
বলং সামর্থ্যং ওজো বলবতাং অহম্, তচ্চ বলং কামরাগবিবর্জিতম্,
কামশ্চ রাগশ্চ কামরাগৌ — কামঃ তৃষ্ণা অসন্নিকৃষ্টেষু
বিষয়েষু, রাগো রঞ্জনা প্রাপ্তেষু বিষয়েষু — তাভ্যাং কামরাগাভ্যাং
বিবর্জিতং দেহাদিধারণমাত্রার্থং বলং সত্ত্বমহমস্মি ; ন তু যৎসংসারিণাং
তৃষ্ণারাগকারণম্ । কিঞ্চ — ধর্মাবিরুদ্ধঃ ধর্মেণ শাস্ত্রার্থেন
অবিরুদ্ধো যঃ প্রাণিষু ভূতেষু কামঃ, যথা দেহধারণমাত্রাদ্যর্থঃ
অশনপানাদিবিষয়ঃ, স কামঃ অস্মি হে ভরতর্ষভ ॥ কিঞ্চ —
যে চৈব সাত্ত্বিকা ভাবা রাজসাস্তমসাশ্চ যে ।
মত্ত এবেতি তান্বিদ্ধি ন ৎবহং তেষু তে ময়ি ॥ ৭-১২॥
যে চৈব সাত্ত্বিকাঃ সত্ত্বনির্বৃত্তাঃ ভাবাঃ পদার্থাঃ, রাজসাঃ
রজোনির্বৃত্তাঃ, তামসাঃ তমোনির্বৃত্তাশ্চ, যে কেচিৎ প্রাণিনাং স্বকর্মবশাৎ
জায়ন্তে ভাবাঃ, তান্ মত্ত এব জায়মানান্ ইতি এবং বিদ্ধি সর্বান্ সমস্তানেব ।
যদ্যপি তে মত্তঃ জায়ন্তে, তথাপি ন তু অহং তেষু তদধীনঃ তদ্বশঃ,
যথা সংসারিণঃ । তে পুনঃ ময়ি মদ্বশাঃ মদধীনাঃ ॥ এবম্ভূতমপি
পরমেশ্বরং নিত্যশুদ্ধবুদ্ধমুক্তস্বভাবং সর্বভূতাত্মানং নির্গুণং
সংসারদোষবীজপ্রদাহকারণং মাং নাভিজানাতি জগৎ ইতি অনুক্রোশং দর্শয়তি
ভগবান্ । তচ্চ কিন্নিমিত্তং জগতঃ অজ্ঞানমিত্যুচ্যতে —
ত্রিভির্গুণময়ৈর্ভাবৈরেভিঃ সর্বমিদং জগৎ ।
মোহিতং নাভিজানাতি মামেভ্যঃ পরমব্যযম্ ॥ ৭-১৩॥
ত্রিভিঃ গুণময়ৈঃ গুণবিকারৈঃ রাগদ্বেষমোহাদিপ্রকারৈঃ ভাবৈঃ পদার্থৈঃ
এভিঃ যথোক্তৈঃ সর্বং ইদং প্রাণিজাতং জগৎ মোহিতং অবিবেকিতামাপাদিতং সৎ ন
অভিজানাতি মাম্, এভ্যঃ যথোক্তেভ্যঃ গুণেভ্যঃ পরং ব্যতিরিক্তং বিলক্ষণং
চ অব্যযং ব্যযরহিতং জন্মাদিসর্বভাববিকারবর্জিতং ইত্যর্থঃ ॥ কথং
পুনঃ দৈবীং এতাং ত্রিগুণাত্মিকাং বৈষ্ণবীং মায়ামতিক্রামতি ইত্যুচ্যতে —
দৈবী হ্যেষা গুণময়ী মম মায়া দুরত্যযা ।
মামেব যে প্রপদ্যন্তে মায়ামেতাং তরন্তি তে ॥ ৭-১৪॥
দৈবী দেবস্য মম ঈশ্বরস্য বিষ্ণোঃ স্বভাবভূতা হি যস্মাৎ এষা যথোক্তা
গুণময়ী মম মায়া দুরত্যযা দুঃখেন অত্যযঃ অতিক্রমণং যস্যাঃ সা দুরত্যযা ।
তত্র এবং সতি সর্বধর্মান্ পরিত্যজ্য মামেব মায়াবিনং স্বাত্মভূতং
সর্বাত্মনা যে প্রপদ্যন্তে তে মায়াং এতাং সর্বভূতমোহিনীং তরন্তি অতিক্রামন্তি
; তে সংসারবন্ধনাৎ মুচ্যন্তে ইত্যর্থঃ ॥ যদি ৎবাং প্রপন্নাঃ মায়ামেতাং
তরন্তি, কস্মাৎ ৎবামেব সর্বে ন প্রপদ্যন্তে ইত্যুচ্যতে —
ন মাং দুষ্কৃতিনো মূঢাঃ প্রপদ্যন্তে নরাধমাঃ ।
মায়যাপহৃতজ্ঞানা আসুরং ভাবমাশ্রিতাঃ ॥ ৭-১৫॥
ন মাং পরমেশ্বরং নারায়ণং দুষ্কৃতিনঃ পাপকারিণঃ মূঢাঃ
প্রপদ্যন্তে নরাধমাঃ নরাণাং মধ্যে অধমাঃ নিকৃষ্টাঃ । তে চ মায়যা
অপহৃতজ্ঞানাঃ সম্মুষিতজ্ঞানাঃ আসুরং ভাবং হিংসানৃতাদিলক্ষণম্
আশ্রিতাঃ ॥ যে পুনর্নরোত্তমাঃ পুণ্যকর্মাণঃ —
চতুর্বিধা ভজন্তে মাং জনাঃ সুকৃতিনোঽর্জুন ।
আর্তো জিজ্ঞাসুরর্থার্থী জ্ঞানী চ ভরতর্ষভ ॥ ৭-১৬॥
চতুর্বিধাঃ চতুঃপ্রকারাঃ ভজন্তে সেবন্তে মাং জনাঃ সুকৃতিনঃ
পুণ্যকর্মাণঃ হে অর্জুন । আর্তঃ আর্তিপরিগৃহীতঃ তস্করব্যাঘ্ররোগাদিনা
অভিভূতঃ আপন্নঃ, জিজ্ঞাসুঃ ভগবত্তত্ত্বং জ্ঞাতুমিচ্ছতি যঃ, অর্থার্থী
ধনকামঃ, জ্ঞানী বিষ্ণোঃ তত্ত্ববিচ্চ হে ভরতর্ষভ ॥
তেষাং জ্ঞানী নিত্যযুক্ত একভক্তির্বিশিষ্যতে ।
প্রিয়ো হি জ্ঞানিনোঽত্যর্থমহং স চ মম প্রিয়ঃ ॥ ৭-১৭॥
তেষাং চতুর্ণাং মধ্যে জ্ঞানী তত্ত্ববিৎ তৎববিত্ত্বাৎ নিত্যযুক্তঃ ভবতি
একভক্তিশ্চ, অন্যস্য ভজনীয়স্য অদর্শনাৎ ; অতঃ স একভক্তিঃ
বিশিষ্যতে বিশেষং আধিক্যং আপদ্যতে, অতিরিচ্যতে ইত্যর্থঃ । প্রিয়ো হি
যস্মাৎ অহং আত্মা জ্ঞানিনঃ, অতঃ তস্য অহং অত্যর্থং প্রিয়ঃ ; প্রসিদ্ধং হি
লোকে “আত্মা প্রিয়ো ভবতি” ইতি । তস্মাৎ জ্ঞানিনঃ আত্মৎবাৎ বাসুদেবঃ
প্রিয়ো ভবতীত্যর্থঃ । স চ জ্ঞানী মম বাসুদেবস্য আত্মৈবেতি মম অত্যর্থং
প্রিয়ঃ ॥ ন তর্হি আর্তাদয়ঃ ত্রয়ঃ বাসুদেবস্য প্রিয়াঃ ? ন ; কিং তর্হি ?–
উদারাঃ সর্ব এবৈতে জ্ঞানী ৎবাত্মৈব মে মতম্ ।
আস্থিতঃ স হি যুক্তাত্মা মামেবানুত্তমাং গতিম্ ॥ ৭-১৮॥
উদারাঃ উৎকৃষ্টাঃ সর্ব এব এতে, ত্রয়োঽপি মম প্রিয়া এবেত্যর্থঃ । ন হি
কশ্চিৎ মদ্ভক্তঃ মম বাসুদেবস্য অপ্রিয়ঃ ভবতি । জ্ঞানী তু অত্যর্থং
প্রিয়ো ভবতীতি বিশেষঃ । তৎ কস্মাৎ ইত্যত আহ — জ্ঞানী তু আত্মৈব
ন অন্যো মত্তঃ ইতি মে মম মতং নিশ্চয়ঃ । আস্থিতঃ আরোঢুং প্রবৃত্তঃ
সঃ জ্ঞানী হি যস্মাৎ “অহমেব ভগবান্ বাসুদেবঃ ন অন্যোঽস্মি”
ইত্যেবং যুক্তাত্মা সমাহিতচিত্তঃ সন্ মামেব পরং ব্রহ্ম গন্তব্যং অনুত্তমাং
গন্তুং প্রবৃত্ত ইত্যর্থঃ ॥ জ্ঞানী পুনরপি স্তূয়তে —
বহূনাং জন্মনামন্তে জ্ঞানবান্মাং প্রপদ্যতে ।
বাসুদেবঃ সর্বমিতি স মহাত্মা সুদুর্লভঃ ॥ ৭-১৯॥
বহূনাং জন্মনাং জ্ঞানার্থসংস্কারাশ্রয়াণাং অন্তে সমাপ্তৌ জ্ঞানবান্
প্রাপ্তপরিপাকজ্ঞানঃ মাং বাসুদেবং প্রত্যগাত্মানং প্রত্যক্ষতঃ
প্রপদ্যতে । কথম্ ? বাসুদেবঃ সর্বং ইতি । যঃ এবং সর্বাত্মানং মাং
নারায়ণং প্রতিপদ্যতে, সঃ মহাত্মা ; ন তৎসমঃ অন্যঃ অস্তি, অধিকো বা ।
অতঃ সুদুর্লভঃ, “মনুষ্যাণাং সহস্রেষু” (ভ. গী. ৭-৩) ইতি হি
উক্তম্ ॥ আত্মৈব সর্বো বাসুদেব ইত্যেবমপ্রতিপত্তৌ কারণমুচ্যতে —
কামৈস্তৈস্তৈর্হৃতজ্ঞানাঃ প্রপদ্যন্তেঽন্যদেবতাঃ ।
তং তং নিয়মমাস্থায় প্রকৃত্যা নিয়তাঃ স্বয়া ॥ ৭-২০॥
কামৈঃ তৈস্তৈঃ পুত্রপশুস্বর্গাদিবিষয়ৈঃ হৃতজ্ঞানাঃ
অপহৃতবিবেকবিজ্ঞানাঃ প্রপদ্যন্তে অন্যদেবতাঃ প্রাপ্নুবন্তি বাসুদেবাৎ আত্মনঃ
অন্যাঃ দেবতাঃ ; তং তং নিয়মং দেবতারাধনে প্রসিদ্ধো যো যো নিয়মঃ তং
তং আস্থায় আশ্রিত্য প্রকৃত্যা স্বভাবেন জন্মান্তরার্জিতসংস্কারবিশেষেণ
নিয়তাঃ নিয়মিতাঃ স্বয়া আত্মীয়যা ॥ তেষাং চ কামীনাং —
যো যো যাং যাং তনুং ভক্তঃ শ্রদ্ধয়ার্চিতুমিচ্ছতি ।
তস্য তস্যাচলাং শ্রদ্ধাং তামেব বিদধাম্যহম্ ॥ ৭-২১॥
যঃ যঃ কামী যাং যাং দেবতাতনুং শ্রদ্ধয়া সংয়ুক্তঃ ভক্তশ্চ সন্
অর্চিতুং পূজয়িতুং ইচ্ছতি, তস্য তস্য কামিনঃ অচলাং স্থিরাং শ্রদ্ধাং
তামেব বিদধামি স্থিরীকরোমি ॥ যথৈব পূর্বং প্রবৃত্তঃ স্বভাবতো যঃ
যাং দেবতাতনুং শ্রদ্ধয়া অর্চিতুং ইচ্ছতি —
স তয়া শ্রদ্ধয়া যুক্তস্তস্যা রাধনমীহতে ।
লভতে চ ততঃ কামান্ময়ৈব বিহিতান্হি তান্ ॥ ৭-২২॥
স তয়া মদ্বিহিতয়া শ্রদ্ধয়া যুক্তঃ সন্ তস্যাঃ দেবতাতন্বাঃ রাধনম্
আরাধনং ঈহতে চেষ্টতে । লভতে চ ততঃ তস্যাঃ আরাধিতায়াঃ দেবতাতন্বাঃ
কামান্ ঈপ্সিতান্ ময়ৈব পরমেশ্বরেণ সর্বজ্ঞেন কর্মফলবিভাগজ্ঞতয়া
বিহিতান্ নির্মিতান্ তান্, হি যস্মাৎ তে ভগবতা বিহিতাঃ কামাঃ তস্মাৎ তান্
অবশ্যং লভতে ইত্যর্থঃ । “হিতান্” ইতি পদচ্ছেদে হিতৎবং
কামানামুপচরিতং কল্প্যম্ ; ন হি কামা হিতাঃ কস্যচিৎ ॥ যস্মাৎ
অন্তবৎসাধনব্যাপারা অবিবেকিনঃ কামিনশ্চ তে, অতঃ —
অন্তবত্তু ফলং তেষাং তদ্ভবত্যল্পমেধসাম্ ।
দেবান্দেবয়জো যান্তি মদ্ভক্তা যান্তি মামপি ॥ ৭-২৩॥
অন্তবৎ বিনাশি তু ফলং তেষাং তৎ ভবতি অল্পমেধসাং অল্পপ্রজ্ঞানাম্ ।
দেবান্দেবয়জো যান্তি দেবান্ যজন্ত ইতি দেবয়জঃ, তে দেবান্ যান্তি, মদ্ভক্তা
যান্তি মামপি । এবং সমানে অপি আয়াসে মামেব ন প্রপদ্যন্তে অনন্তফলায়,
অহো খলু কষ্টং বর্তন্তে, ইত্যনুক্রোশং দর্শয়তি ভগবান্ ॥ কিন্নিমিত্তং
মামেব ন প্রপদ্যন্তে ইত্যুচ্যতে —
অব্যক্তং ব্যক্তিমাপন্নং মন্যন্তে মামবুদ্ধয়ঃ ।
পরং ভাবমজানন্তো মমাব্যযমনুত্তমম্ ॥ ৭-২৪॥
অব্যক্তং অপ্রকাশং ব্যক্তিং আপন্নং প্রকাশং গতং ইদানীং মন্যন্তে
মাং নিত্যপ্রসিদ্ধমীশ্বরমপি সন্তং অবুদ্ধয়ঃ অবিবেকিনঃ পরং ভাবং
পরমাত্মস্বরূপং অজানন্তঃ অবিবেকিনঃ মম অব্যযং ব্যযরহিতং অনুত্তমং
নিরতিশয়ং মদীয়ং ভাবমজানন্তঃ মন্যন্তে ইত্যর্থঃ ॥ তদজ্ঞানং
কিন্নিমিত্তমিত্যুচ্যতে —
নাহং প্রকাশঃ সর্বস্য যোগমায়াসমাবৃতঃ ।
মূঢোঽয়ং নাভিজানাতি লোকো মামজমব্যযম্ ॥ ৭-২৫॥
ন অহং প্রকাশঃ সর্বস্য লোকস্য, কেষাঞ্চিদেব মদ্ভক্তানাং প্রকাশঃ
অহমিত্যভিপ্রায়ঃ । যোগমায়াসমাবৃতঃ যোগঃ গুণানাং যুক্তিঃ ঘটনং
সৈব মায়া যোগমায়া, তয়া যোগমায়যা সমাবৃতঃ, সঞ্ছন্নঃ ইত্যর্থঃ ।
অত এব মূঢো লোকঃ অয়ং ন অভিজানাতি মাং অজং অব্যযম্ ॥ যয়া যোগমায়যা
সমাবৃতং মাং লোকঃ নাভিজানাতি, নাসৌ যোগমায়া মদীয়া সতী মম ঈশ্বরস্য
মায়াবিনো জ্ঞানং প্রতিবধ্নাতি, যথা অন্যস্যাপি মায়াবিনঃ
মায়াজ্ঞানং তদ্বৎ ॥ যতঃ এবম্, অতঃ —
বেদাহং সমতীতানি বর্তমানানি চার্জুন ।
ভবিষ্যাণি চ ভূতানি মাং তু বেদ ন কশ্চন ॥ ৭-২৬॥
অহং তু বেদ জানে সমতীতানি সমতিক্রান্তানি ভূতানি, বর্তমানানি চ অর্জুন,
ভবিষ্যাণি চ ভূতানি বেদ অহম্ । মাং তু বেদ ন কশ্চন মদ্ভক্তং
মচ্ছরণং একং মুক্ত্বা ; মত্তত্ত্ববেদনাভাবাদেব ন মাং ভজতে ॥ কেন
পুনঃ মত্তত্ত্ববেদনপ্রতিবন্ধেন প্রতিবদ্ধানি সন্তি জায়মানানি সর্বভূতানি
মাং ন বিদন্তি ইত্যপেক্ষায়ামিদমাহ —
ইচ্ছাদ্বেষসমুত্থেন দ্বন্দ্বমোহেন ভারত ।
সর্বভূতানি সম্মোহং সর্গে যান্তি পরন্তপ ॥ ৭-২৭॥
ইচ্ছাদ্বেষসমুত্থেন ইচ্ছা চ দ্বেষশ্চ ইচ্ছাদ্বেষৌ তাভ্যাং
সমুত্তিষ্ঠতীতি ইচ্ছাদ্বেষসমুত্থঃ তেন ইচ্ছাদ্বেষসমুত্থেন ।
কেনেতি বিশেষাপেক্ষায়ামিদমাহ — দ্বন্দ্বমোহেন দ্বন্দ্বনিমিত্তঃ
মোহঃ দ্বন্দ্বমোহঃ তেন । তাবেব ইচ্ছাদ্বেষৌ শীতোষ্ণবৎ
পরস্পরবিরুদ্ধৌ সুখদুঃখতদ্ধেতুবিষয়ৌ যথাকালং
সর্বভূতৈঃ সম্বধ্যমানৌ দ্বন্দ্বশব্দেন অভিধীয়েতে । যত্র
যদা ইচ্ছাদ্বেষৌ সুখদুঃখতদ্ধেতুসম্প্রাপ্ত্যা লব্ধাত্মকৌ
ভবতঃ, তদা তৌ সর্বভূতানাং প্রজ্ঞায়াঃ স্ববশাপাদনদ্বারেণ
পরমার্থাত্মতত্ত্ববিষয়জ্ঞানোৎপত্তি-প্রতিবন্ধকারণং মোহং জনয়তঃ । ন
হি ইচ্ছাদ্বেষদোষবশীকৃতচিত্তস্য যথাভূতার্থবিষয়জ্ঞানমুৎপদ্যতে
বহিরপি ; কিমু বক্তব্যং তাভ্যামাবিষ্টবুদ্ধেঃ সম্মূঢস্য প্রত্যগাত্মনি
বহুপ্রতিবন্ধে জ্ঞানং নোৎপদ্যত ইতি । অতঃ তেন ইচ্ছাদ্বেষসমুত্থেন
দ্বন্দ্বমোহেন, ভারত ভরতান্বয়জ, সর্বভূতানি সম্মোহিতানি সন্তি সম্মোহং
সম্মূঢতাং সর্গে জন্মনি, উৎপত্তিকালে ইত্যেতৎ, যান্তি গচ্ছন্তি হে পরন্তপ ।
মোহবশান্যেব সর্বভূতানি জায়মানানি জায়ন্তে ইত্যভিপ্রায়ঃ । যতঃ এবম্,
অতঃ তেন দ্বন্দ্বমোহেন প্রতিবদ্ধপ্রজ্ঞানানি সর্বভূতানি সম্মোহিতানি
মামাত্মভূতং ন জানন্তি ; অত এব আত্মভাবে মাং ন ভজন্তে ॥ কে পুনঃ
অনেন দ্বন্দ্বমোহেন নির্মুক্তাঃ সন্তঃ ৎবাং বিদিৎবা যথাশাস্ত্রমাত্মভাবেন
ভজন্তে ইত্যপেক্ষিতমর্থং দর্শিতুং উচ্যতে —
যেষাং ৎবন্তগতং পাপং জনানাং পুণ্যকর্মণাম্ ।
তে দ্বন্দ্বমোহনির্মুক্তা ভজন্তে মাং দৃঢব্রতাঃ ॥ ৭-২৮॥
যেষাং তু পুনঃ অন্তগতং সমাপ্তপ্রায়ং ক্ষীণং পাপং জনানাং পুণ্যকর্মণাং
পুণ্যং কর্ম যেষাং সত্ত্বশুদ্ধিকারণং বিদ্যতে তে পুণ্যকর্মাণঃ তেষাং
পুণ্যকর্মণাম্, তে দ্বন্দ্বমোহনির্মুক্তাঃ যথোক্তেন দ্বন্দ্বমোহেন নির্মুক্তাঃ
ভজন্তে মাং পরমাত্মানং দৃঢব্রতাঃ । “এবমেব পরমার্থতত্ত্বং
নান্যথা” ইত্যেবং সর্বপরিত্যাগব্রতেন নিশ্চিতবিজ্ঞানাঃ দৃঢব্রতাঃ
উচ্যন্তে ॥ তে কিমর্থং ভজন্তে ইত্যুচ্যতে —
জরামরণমোক্ষায় মামাশ্রিত্য যতন্তি যে ।
তে ব্রহ্ম তদ্বিদুঃ কৃৎস্নমধ্যাত্মং কর্ম চাখিলম্ ॥ ৭-২৯॥
জরামরণমোক্ষায় জরামরণয়োঃ মোক্ষার্থং মাং পরমেশ্বরং আশ্রিত্য
মৎসমাহিতচিত্তাঃ সন্তঃ যতন্তি প্রয়তন্তে যে, তে যৎ ব্রহ্ম পরং তৎ
বিদুঃ কৃৎস্নং সমস্তং অধ্যাত্মং প্রত্যগাত্মবিষয়ং বস্তু তৎ বিদুঃ,
কর্ম চ অখিলং সমস্তং বিদুঃ ॥
সাধিভূতাধিদৈবং মাং সাধিয়জ্ঞং চ যে বিদুঃ ।
প্রয়াণকালেঽপি চ মাং তে বিদুর্যুক্তচেতসঃ ॥ ৭-৩০॥
সাধিভূতাধিদৈবং অধিভূতং চ অধিদৈবং চ অধিভূতাধিদৈবম্,
সহ অধিভূতাধিদৈবেন বর্ততে ইতি সাধিভূতাধিদৈবং চ মাং যে বিদুঃ,
সাধিয়জ্ঞং চ সহ অধিয়জ্ঞেন সাধিয়জ্ঞং যে বিদুঃ, প্রয়াণকালে
মরণকালে অপি চ মাং তে বিদুঃ যুক্তচেতসঃ সমাহিতচিত্তা ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে জ্ঞানবিজ্ঞানয়োগো নাম সপ্তমোঽধ্যায়ঃ ॥৭॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে জ্ঞান-বিজ্ঞান-যোগঃ নাম সপ্তমঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ অষ্টমোঽধ্যায়ঃ ॥
“তে ব্রহ্ম তদ্বিদুঃ কৃৎস্নম্” (ভ. গী. ৭-২৯) ইত্যাদিনা ভগবতা
অর্জুনস্য প্রশ্নবীজানি উপদিষ্টানি । অতঃ তৎপ্রশ্নার্থং অর্জুনঃ উবাচ —
অর্জুন উবাচ —
কিং তদ্ব্রহ্ম কিমধ্যাত্মং কি কর্ম পুরুষোত্তম ।
অধিভূতং চ কিং প্রোক্তমধিদৈবং কিমুচ্যতে ॥ ৮-১॥
অধিয়জ্ঞঃ কথং কোঽত্র দেহেঽস্মিন্মধুসূদন ।
প্রয়াণকালে চ কথং জ্ঞেয়োঽসি নিয়তাত্মভিঃ ॥ ৮-২॥
এষাং প্রশ্নানাং যথাক্রমং নির্ণয়ায় শ্রীভগবানুবাচ —
শ্রীভগবানুবাচ —
অক্ষরং ব্রহ্ম পরমং স্বভাবোঽধ্যাত্মমুচ্যতে ।
ভূতভাবোদ্ভবকরো বিসর্গঃ কর্মসংজ্ঞিতঃ ॥ ৮-৩॥
অক্ষরং ন ক্ষরতীতি অক্ষরং পরমাত্মা, “এতস্য বা অক্ষরস্য
প্রশাসনে গার্গি” (বৃ. উ. ৩-৮-৯) ইতি শ্রুতেঃ । ওঙ্কারস্য চ
“ওমিত্যেকাক্ষরং ব্রহ্ম” (ভ. গী. ৮-১৩) ইতি পরেণ বিশেষণাৎ
অগ্রহণম্ । পরমং ইতি চ নিরতিশয়ে ব্রহ্মণি অক্ষরে উপপন্নতরম্
বিশেষণম্ । তস্যৈব পরস্য ব্রহ্মণঃ প্রতিদেহং প্রত্যগাত্মভাবঃ
স্বভাবঃ, স্বো ভাবঃ স্বভাবঃ অধ্যাত্মং উচ্যতে । আত্মানং দেহং অধিকৃত্য
প্রত্যগাত্মতয়া প্রবৃত্তং পরমার্থব্রহ্মাবসানং বস্তু স্বভাবঃ
অধ্যাত্মং উচ্যতে অধ্যাত্মশব্দেন অভিধীয়তে । ভূতভাবোদ্ভবকরঃ
ভূতানাং ভাবঃ ভূতভাবঃ তস্য উদ্ভবঃ ভূতভাবোদ্ভবঃ তং করোতীতি
ভূতভাবোদ্ভবকরঃ, ভূতবস্তূৎপত্তিকর ইত্যর্থঃ । বিসর্গঃ বিসর্জনং
দেবতোদ্দেশেন চরুপুরোডাশাদেঃ দ্রব্যস্য পরিত্যাগঃ ; স এষ বিসর্গলক্ষণো
যজ্ঞঃ কর্মসংজ্ঞিতঃ কর্মশব্দিত ইত্যেতৎ । এতস্মাৎ হি বীজভূতাৎ
বৃষ্ট্যাদিক্রমেণ স্থাবরজঙ্গমানি ভূতানি উদ্ভবন্তি ॥
অধিভূতং ক্ষরো ভাবঃ পুরুষশ্চাধিদৈবতম্ ।
অধিয়জ্ঞোঽহমেবাত্র দেহে দেহভৃতাং বর ॥ ৮-৪॥
অধিভূতং প্রাণিজাতং অধিকৃত্য ভবতীতি । কোঽসৌ ? ক্ষরঃ ক্ষরতীতি
ক্ষরঃ বিনাশী, ভাবঃ যৎকিঞ্চিৎ জনিমৎ বস্তু ইত্যর্থঃ । পুরুষঃ পূর্ণম্
অনেন সর্বমিতি, পুরি শয়নাৎ বা, পুরুষঃ আদিত্যান্তর্গতো হিরণ্যগর্ভঃ,
সর্বপ্রাণিকরণানাং অনুগ্রাহকঃ, সঃ অধিদৈবতম্ । অধিয়জ্ঞঃ
সর্বয়জ্ঞাভিমানিনী বিষ্ণ্বাখ্যা দেবতা, ”যজ্ঞো বৈ বিষ্ণুঃ”
(তৈ. সং. ১-৭-৪) ইতি শ্রুতেঃ । স হি বিষ্ণুঃ অহমেব ; অত্র অস্মিন্ দেহে যো
যজ্ঞঃ তস্য অহং অধিয়জ্ঞঃ ; যজ্ঞো হি দেহনির্বর্ত্যৎবেন দেহসমবায়ী
ইতি দেহাধিকরণো ভবতি, দেহভৃতাং বর ॥
অন্তকালে চ মামেব স্মরন্মুক্ত্বা কলেবরম্ ।
যঃ প্রয়াতি স মদ্ভাবং যাতি নাস্ত্যত্র সংশয়ঃ ॥ ৮-৫॥
অন্তকালে মরণকালে চ মামেব পরমেশ্বরং বিষ্ণুং স্মরন্ মুক্ত্বা পরিত্যজ্য
কলেবরং শরীরং যঃ প্রয়াতি গচ্ছতি, সঃ মদ্ভাবং বৈষ্ণবং তত্ত্বং
যাতি । নাস্তি ন বিদ্যতে অত্র অস্মিন্ অর্থে সংশয়ঃ — যাতি বা ন বা ইতি ॥
ন মদ্বিষয় এব অয়ং নিয়মঃ । কিং তর্হি ? —
যং যং বাপি স্মরন্ভাবং ত্যজত্যন্তে কলেবরম্ ।
তং তমেবৈতি কৌন্তেয় সদা তদ্ভাবভাবিতঃ ॥ ৮-৬॥
যং যং বাপি যং যং ভাবং দেবতাবিশেষং স্মরন্ চিন্তয়ন্ ত্যজতি
পরিত্যজতি অন্তে অন্তকালে প্রাণবিয়োগকালে কলেবরং শরীরং তং তমেব
স্মৃতং ভাবমেব এতি নান্যং কৌন্তেয়, সদা সর্বদা তদ্ভাবভাবিতঃ তস্মিন্
ভাবঃ তদ্ভাবঃ স ভাবিতঃ স্মর্যমাণতয়া অভ্যস্তঃ যেন সঃ তদ্ভাবভাবিতঃ
সন্ ॥ যস্মাৎ এবং অন্ত্যা ভাবনা দেহান্তরপ্রাপ্তৌ কারণং —
তস্মাৎসর্বেষু কালেষু মামনুস্মর যুধ্য চ ।
ময়্যর্পিতমনোবুদ্ধির্মামেবৈষ্যস্যসংশয়ঃ ॥ ৮-৭॥
তস্মাৎ সর্বেষু কালেষু মাং অনুস্মর যথাশাস্ত্রম্ । যুধ্য চ যুদ্ধং
চ স্বধর্মং কুরু । ময়ি বাসুদেবে অর্পিতে মনোবুদ্ধী যস্য তব স ৎবং
ময়ি অর্পিতমনোবুদ্ধিঃ সন্ মামেব যথাস্মৃতং এষ্যসি আগমিষ্যসি ;
অসংশয়ঃ ন সংশয়ঃ অত্র বিদ্যতে ॥ কিঞ্চ–
অভ্যাসয়োগয়ুক্তেন চেতসা নান্যগামিনা ।
পরমং পুরুষং দিব্যং যাতি পার্থানুচিন্তয়ন্ ॥ ৮-৮॥
অভ্যাসয়োগয়ুক্তেন ময়ি চিত্তসমর্পণবিষয়ভূতে একস্মিন্
তুল্যপ্রত্যযাবৃত্তিলক্ষণঃ বিলক্ষণপ্রত্যযানন্তরিতঃ অভ্যাসঃ
স চাভ্যাসো যোগঃ তেন যুক্তং তত্রৈব ব্যাপৃতং যোগিনঃ চেতঃ তেন,
চেতসা নান্যগামিনা ন অন্যত্র বিষয়ান্তরে গন্তুং শীলং অস্যেতি নান্যগামি
তেন নান্যগামিনা, পরমং নিরতিশয়ং পুরুষং দিব্যং দিবি সূর্যমণ্ডলে
ভবং যাতি গচ্ছতি হে পার্থ অনুচিন্তয়ন্ শাস্ত্রাচার্যোপদেশং অনুধ্যায়ন্
ইত্যেতৎ ॥ কিংবিশিষ্টং চ পুরুষং যাতি ইতি উচ্যতে —
কবিং পুরাণমনুশাসিতারমণোরণীয়াংসমনুস্মরেদ্যঃ ।
সর্বস্য ধাতারমচিন্ত্যরূপমাদিত্যবর্ণং তমসঃ পরস্তাৎ ॥ ৮-৯॥
কবিং ক্রান্তদর্শিনং সর্বজ্ঞং পুরাণং চিরন্তনং অনুশাসিতারং
সর্বস্য জগতঃ প্রশাসিতারং অণোঃ সূক্ষ্মাদপি অণীয়াংসং সূক্ষ্মতরম্
অনুস্মরেৎ অনুচিন্তয়েৎ যঃ কশ্চিৎ, সর্বস্য কর্মফলজাতস্য ধাতারং
বিধাতারং বিচিত্রতয়া প্রাণিভ্যো বিভক্তারম্, অচিন্ত্যরূপং ন অস্য রূপং
নিয়তং বিদ্যমানমপি কেনচিৎ চিন্তয়িতুং শক্যতে ইতি অচিন্ত্যরূপঃ তম্,
আদিত্যবর্ণং আদিত্যস্যেব নিত্যচৈতন্যপ্রকাশো বর্ণো যস্য তং আদিত্যবর্ণম্,
তমসঃ পরস্তাৎ অজ্ঞানলক্ষণাৎ মোহান্ধকারাৎ পরং তং অনুচিন্তয়ন্ যাতি
ইতি পূর্বেণ সম্বন্ধঃ ॥ কিঞ্চ —
প্রয়াণকালে মনসাচলেন ভক্ত্যা যুক্তো যোগবলেন চৈব ।
ভ্রুবোর্মধ্যে প্রাণমাবেশ্য সম্য ক্স তং পরং পুরুষমুপৈতি দিব্যম্ ॥ ৮-১০॥
প্রয়াণকালে মরণকালে মনসা অচলেন চলনবর্জিতেন
ভক্ত্যা যুক্তঃ ভজনং ভক্তিঃ তয়া যুক্তঃ যোগবলেন চৈব যোগস্য
বলং যোগবলং সমাধিজসংস্কারপ্রচয়জনিতচিত্তস্থৈর্যলক্ষণং
যোগবলং তেন চ যুক্তঃ ইত্যর্থঃ, পূর্বং হৃদয়পুণ্ডরীকে বশীকৃত্য
চিত্তং ততঃ ঊর্ধ্বগামিন্যা নাড্যা ভূমিজয়ক্রমেণ ভ্রুবোঃ মধ্যে প্রাণম্
আবেশ্য স্থাপয়িৎবা সম্যক্ অপ্রমত্তঃ সন্, সঃ এবং বিদ্বান্ যোগী “কবিং
পুরাণম্” (ভ. গী. ৮-৯) ইত্যাদিলক্ষণং তং পরং পরতরং পুরুষম্
উপৈতি প্রতিপদ্যতে দিব্যং দ্যোতনাত্মকম্ ॥ পুনরপি বক্ষ্যমাণেন উপায়েন
প্রতিপিৎসিতস্য ব্রহ্মণো বেদবিদ্বদনাদিবিশেষণবিশেষ্যস্য অভিধানং
করোতি ভগবান্ —
যদক্ষরং বেদবিদো বদন্তি বিশন্তি যদ্যতয়ো বীতরাগাঃ ।
যদিচ্ছন্তো ব্রহ্মচর্যং চরন্তি তত্তে পদং সঙ্গ্রহেণ প্রবক্ষ্যে ॥ ৮-১১॥
যৎ অক্ষরং ন ক্ষরতীতি অক্ষরং অবিনাশি বেদবিদঃ বেদার্থজ্ঞাঃ
বদন্তি, “তদ্বা এতদক্ষরং গার্গি ব্রাহ্মণা অভিবদন্তি”
(বৃ. উ. ৩-৮-৮) ইতি শ্রুতেঃ, সর্ববিশেষনিবর্তকৎবেন অভিবদন্তি
“অস্থূলমনণু” ইত্যাদি । কিঞ্চ — বিশন্তি প্রবিশন্তি
সম্যগ্দর্শনপ্রাপ্তৌ সত্যাং যৎ যতয়ঃ যতনশীলাঃ সন্ন্যাসিনঃ বীতরাগাঃ
বীতঃ বিগতঃ রাগঃ যেভ্যঃ তে বীতরাগাঃ । যচ্চ অক্ষরমিচ্ছন্তঃ —
জ্ঞাতুং ইতি বাক্যশেষঃ — ব্রহ্মচর্যং গুরৌ চরন্তি আচরন্তি, তৎ
তে পদং তৎ অক্ষরাখ্যং পদং পদনীয়ং তে তব সঙ্গ্রহেণ সঙ্গ্রহঃ
সঙ্ক্ষেপঃ তেন সঙ্ক্ষেপেণ প্রবক্ষ্যে কথয়িষ্যামি ॥ “স যো হ বৈ
তদ্ভগবন্মনুষ্যেষু প্রায়ণান্তমোঙ্কারমভিধ্যায়ীত কতমং বাব স তেন
লোকং জয়তীতি ।” (প্র. উ. ৫-১) “তস্মৈ স হোবাচ এতদ্বৈ
সত্যকাম পরং চাপরং চ ব্রহ্ম যদোঙ্কারঃ” (প্র. উ. ৫-২)
ইত্যুপক্রম্য “যঃ পুনরেতং ত্রিমাত্রেণোমিত্যেতেনৈবাক্ষরেণ
পরং পুরুষমভিধ্যায়ীত — স সামভিরুন্নীয়তে ব্রহ্মলোকম্”
(প্র. উ. ৫-৫) ইত্যাদিনা বচনেন, “অন্যত্র ধর্মাদন্যত্রাধর্মাৎ”
(ক. উ. ১-২-১৪) ইতি চ উপক্রম্য “সর্বে বেদা যৎপদমামনন্তি ।
তপাংসি সর্বাণি চ যদ্বদন্তি । যদিচ্ছন্তো ব্রহ্মচর্যং চরন্তি তত্তে
পদং সঙ্গ্রহেণ ব্রবীম্যোমিত্যেতৎ” (ক. উ. ১-২-১৫) ইত্যাদিভিশ্চ
বচনৈঃ পরস্য ব্রহ্মণো বাচকরূপেণ, প্রতিমাবৎ প্রতীকরূপেণ বা,
পরব্রহ্মপ্রতিপত্তিসাধনৎবেন মন্দমধ্যমবুদ্ধীনাং বিবক্ষিতস্য
ওঙ্কারস্য উপাসনং কালান্তরে মুক্তিফলং উক্তং যৎ, তদেব ইহাপি “কবিং
পুরাণমনুশাসিতারম্” (ভ. গী. ৮-৯) “যদক্ষরং বেদবিদো
বদন্তি” (ভ. গী. ৮-১১) ইতি চ উপন্যস্তস্য পরস্য ব্রহ্মণঃ
পূর্বোক্তরূপেণ প্রতিপত্ত্যুপায়ভূতস্য ওঙ্কারস্য কালান্তরমুক্তিফলম্
উপাসনং যোগধারণাসহিতং বক্তব্যম্, প্রসক্তানুপ্রসক্তং চ যৎকিঞ্চিৎ,
ইত্যেবমর্থঃ উত্তরো গ্রন্থ আরভ্যতে —
সর্বদ্বারাণি সংয়ম্য মনো হৃদি নিরুধ্য চ ।
মূর্ধ্ন্যাধায়াত্মনঃ প্রাণমাস্থিতো যোগধারণাম্ ॥ ৮-১২॥
সর্বদ্বারাণি সর্বাণি চ তানি দ্বারাণি চ সর্বদ্বারাণি উপলব্ধৌ,
তানি সর্বাণি সংয়ম্য সংয়মনং কৃৎবা মনঃ হৃদি হৃদয়পুণ্ডরীকে
নিরুধ্য নিরোধং কৃৎবা নিষ্প্রচারমাপাদ্য, তত্র বশীকৃতেন মনসা
হৃদয়াৎ ঊর্ধ্বগামিন্যা নাড্যা ঊর্ধ্বমারুহ্য মূর্ধ্নিং আধায় আত্মনঃ প্রাণং
আস্থিতঃ প্রবৃত্তঃ যোগধারণাং ধারয়িতুম্ ॥ তত্রৈব চ ধারয়ন্ —
ওমিত্যেকাক্ষরং ব্রহ্ম ব্যাহরন্মামনুস্মরন্ ।
যঃ প্রয়াতি ত্যজন্দেহং স যাতি পরমাং গতিম্ ॥ ৮-১৩॥
ওমিতি একাক্ষরং ব্রহ্ম ব্রহ্মণঃ অভিধানভূতং ওঙ্কারং ব্যাহরন্
উচ্চারয়ন্, তদর্থভূতং মাং ঈশ্বরং অনুস্মরন্ অনুচিন্তয়ন্ যঃ
প্রয়াতি ম্রিয়তে, সঃ ত্যজন্ পরিত্যজন্ দেহং শরীরং — “ত্যজন্
দেহম্” ইতি প্রয়াণবিশেষণার্থম্ দেহত্যাগেন প্রয়াণং আত্মনঃ, ন
স্বরূপনাশেনেত্যর্থঃ — সঃ এবং যাতি গচ্ছতি পরমাং প্রকৃষ্টাং
গতিম্ ॥ কিঞ্চ —
অনন্যচেতাঃ সততং যো মাং স্মরতি নিত্যশঃ ।
তস্যাহং সুলভঃ পার্থ নিত্যযুক্তস্য যোগিনঃ ॥ ৮-১৪॥
অনন্যচেতাঃ ন অন্যবিষয়ে চেতঃ যস্য সোঽয়ং অনন্যচেতাঃ, যোগী
সততং সর্বদা যঃ মাং পরমেশ্বরং স্মরতি নিত্যশঃ । সততং
ইতি নৈরন্তর্যং উচ্যতে, নিত্যশঃ ইতি দীর্ঘকালৎবং উচ্যতে । ন
ষণ্মাসং সংবৎসরং বা ; কিং তর্হি ? যাবজ্জীবং নৈরন্তর্যেণ যঃ
মাং স্মরতীত্যর্থঃ । তস্য যোগিনঃ অহং সুলভঃ সুখেন লভ্যঃ হে
পার্থ, নিত্যযুক্তস্য সদা সমাহিতচিত্তস্য যোগিনঃ । যতঃ এবম্,
অতঃ অনন্যচেতাঃ সন্ ময়ি সদা সমাহিতঃ ভবেৎ ॥ তব সৌলভ্যেন
কিং স্যাৎ ইত্যুচ্যতে ; শৃণু তৎ মম সৌলভ্যেন যৎ ভবতি —
মামুপেত্য পুনর্জন্ম দুঃখালয়মশাশ্বতম্ ।
নাপ্নুবন্তি মহাত্মানঃ সংসিদ্ধিং পরমাং গতাঃ ॥ ৮-১৫॥
মাং উপেত্য মাং ঈশ্বরং উপেত্য মদ্ভাবমাপদ্য পুনর্জন্ম পুনরুৎপত্তিং
নাপ্নুবন্তি ন প্রাপ্নুবন্তি । কিংবিশিষ্টং পুনর্জন্ম ন প্রাপ্নুবন্তি ইতি,
তদ্বিশেষণমাহ — দুঃখালয়ং দুঃখানাং আধ্যাত্মিকাদীনাং আলয়ং
আশ্রয়ং আলীয়ন্তে যস্মিন্ দুঃখানি ইতি দুঃখালয়ং জন্ম । ন কেবলং
দুঃখালয়ম্, অশাশ্বতম্ অনবস্থিতস্বরূপং চ । নাপ্নুবন্তি ঈদৃশং
পুনর্জন্ম মহাত্মানঃ যতয়ঃ সংসিদ্ধিং মোক্ষাখ্যাং পরমাং প্রকৃষ্টাং
গতাঃ প্রাপ্তাঃ । যে পুনঃ মাং ন প্রাপ্নুবন্তি তে পুনঃ আবর্তন্তে ॥ কিং
পুনঃ ৎবত্তঃ অন্যৎ প্রাপ্তাঃ পুনরাবর্তন্তে ইতি, উচ্যতে —
আ ব্রহ্মভুবনাল্লোকাঃ পুনরাবর্তিনোঽর্জুন ।
মামুপেত্য তু কৌন্তেয় পুনর্জন্ম ন বিদ্যতে ॥ ৮-১৬॥
আ ব্রহ্মভুবনাৎ ভবন্তি অস্মিন্ ভূতানি ইতি ভুবনম্, ব্রহ্মণো
ভুবনং ব্রহ্মভুবনম্, ব্রহ্মলোক ইত্যর্থঃ, আ ব্রহ্মভুবনাৎ সহ
ব্রহ্মভুবনেন লোকাঃ সর্বে পুনরাবর্তিনঃ পুনরাবর্তনস্বভাবাঃ হে
অর্জুন । মাং একং উপেত্য তু কৌন্তেয় পুনর্জন্ম পুনরুৎপত্তিঃ ন বিদ্যতে ॥
ব্রহ্মলোকসহিতাঃ লোকাঃ কস্মাৎ পুনরাবর্তিনঃ ? কালপরিচ্ছিন্নৎবাৎ ।
কথম্ ? —
সহস্রয়ুগপর্যন্তমহর্যদ্ব্রহ্মণো বিদুঃ ।
রাত্রিং যুগসহস্রান্তাং তেঽহোরাত্রবিদো জনাঃ ॥ ৮-১৭॥
সহস্রয়ুগপর্যন্তং সহস্রাণি যুগানি পর্যন্তঃ পর্যবসানং যস্য অহ্নঃ
তৎ অহঃ সহস্রয়ুগপর্যন্তম্, ব্রহ্মণঃ প্রজাপতেঃ বিরাজঃ বিদুঃ, রাত্রিম্
অপি যুগসহস্রান্তাং অহঃপরিমাণামেব । কে বিদুরিত্যাহ — তে অহোরাত্রবিদঃ
কালসঙ্খ্যাবিদো জনাঃ ইত্যর্থঃ । যতঃ এবং কালপরিচ্ছিন্নাঃ তে, অতঃ
পুনরাবর্তিনো লোকাঃ ॥ প্রজাপতেঃ অহনি যৎ ভবতি রাত্রৌ চ, তৎ উচ্যতে
—
অব্যক্তাদ্ব্যক্তয়ঃ সর্বাঃ প্রভবন্ত্যহরাগমে ।
রাত্র্যাগমে প্রলীয়ন্তে তত্রৈবাব্যক্তসংজ্ঞকে ॥ ৮-১৮॥
অব্যক্তাৎ অব্যক্তং প্রজাপতেঃ স্বাপাবস্থা তস্মাৎ অব্যক্তাৎ ব্যক্তয়ঃ
ব্যজ্যন্ত ইতি ব্যক্তয়ঃ স্থাবরজঙ্গমলক্ষণাঃ সর্বাঃ প্রজাঃ
প্রভবন্তি অভিব্যজ্যন্তে, অহ্নঃ আগমঃ অহরাগমঃ তস্মিন্ অহরাগমে
কালে ব্রহ্মঃ প্রবোধকালে । তথা রাত্র্যাগমে ব্রহ্মণঃ স্বাপকালে
প্রলীয়ন্তে সর্বাঃ ব্যক্তয়ঃ তত্রৈব পূর্বোক্তে অব্যক্তসংজ্ঞকে ॥
অকৃতাভ্যাগমকৃতবিপ্রণাশদোষপরিহারার্থম্,
বন্ধমোক্ষশাস্ত্রপ্রবৃত্তিসাফল্যপ্রদর্শনার্থম্
অবিদ্যাদিক্লেশমূলকর্মাশয়বশাচ্চ অবশঃ ভূতগ্রামঃ ভূৎবা ভূৎবা
প্রলীয়তে ইত্যতঃ সংসারে বৈরাগ্যপ্রদর্শনার্থং চ ইদমাহ —
ভূতগ্রামঃ স এবায়ং ভূৎবা ভূৎবা প্রলীয়তে ।
রাত্র্যাগমেঽবশঃ পার্থ প্রভবত্যহরাগমে ॥ ৮-১৯॥
ভূতগ্রামঃ ভূতসমুদায়ঃ স্থাবরজঙ্গমলক্ষণঃ যঃ পূর্বস্মিন্ কল্পে
আসীৎ স এব অয়ং নান্যঃ । ভূৎবা ভূৎবা অহরাগমে, প্রলীয়তে পুনঃ পুনঃ
রাত্র্যাগমে অহ্নঃ ক্ষয়ে অবশঃ অস্বতন্ত্র এব, হে পার্থ, প্রভবতি জায়তে
অবশ এব অহরাগমে ॥ যৎ উপন্যস্তং অক্ষরম্, তস্য প্রাপ্ত্যুপায়ো নির্দিষ্টঃ
“ওমিত্যেকাক্ষরং ব্রহ্ম” (ভ. গী. ৮-১৩) ইত্যাদিনা । অথ ইদানীম্
অক্ষরস্যৈব স্বরূপনির্দিদিক্ষয়া ইদং উচ্যতে, অনেন যোগমার্গেণ ইদং
গন্তব্যমিতি —
পরস্তস্মাত্তু ভাবোঽন্যোঽব্যক্তোঽব্যক্তাৎসনাতনঃ ।
যঃ স সর্বেষু ভূতেষু নশ্যৎসু ন বিনশ্যতি ॥ ৮-২০॥
পরঃ ব্যতিরিক্তঃ ভিন্নঃ ; কুতঃ ? তস্মাৎ পূর্বোক্তাৎ । তু–শব্দঃ
অক্ষরস্য বিবক্ষিতস্য অব্যক্তাৎ বৈলক্ষণ্যবিশেষণার্থঃ ।
ভাবঃ অক্ষরাখ্যং পরং ব্রহ্ম । ব্যতিরিক্তৎবে সত্যপি
সালক্ষণ্যপ্রসঙ্গোঽস্তীতি তদ্বিনিবৃত্ত্যর্থম্ আহ — অন্যঃ
ইতি । অন্যঃ বিলক্ষণঃ । স চ অব্যক্তঃ অনিন্দ্রিয়গোচরঃ ।
“পরস্তস্মাৎ” ইত্যুক্তম্ ; কস্মাৎ পুনঃ পরঃ ? পূর্বোক্তাৎ
ভূতগ্রামবীজভূতাৎ অবিদ্যালক্ষণাৎ অব্যক্তাৎ । অন্যঃ বিলক্ষণঃ ভাবঃ
ইত্যভিপ্রায়ঃ । সনাতনঃ চিরন্তনঃ যঃ সঃ ভাবঃ সর্বেষু ভূতেষু
ব্রহ্মাদিষু নশ্যৎসু ন বিনশ্যতি ॥
অব্যক্তোঽক্ষর ইত্যুক্তস্তমাহুঃ পরমাং গতিম্ ।
যং প্রাপ্য ন নিবর্তন্তে তদ্ধাম পরমং মম ॥ ৮-২১॥
সোঽসৌ অব্যক্তঃ অক্ষরঃ ইত্যুক্তঃ, তমেব অক্ষরসংজ্ঞকং অব্যক্তং
ভাবং আহুঃ পরমাং প্রকৃষ্টাং গতিম্ । যং পরং ভাবং প্রাপ্য গৎবা
ন নিবর্তন্তে সংসারায়, তৎ ধাম স্থানং পরমং প্রকৃষ্টং মম,
বিষ্ণোঃ পরমং পদমিত্যর্থঃ ॥ তল্লব্ধেঃ উপায়ঃ উচ্যতে —
পুরুষঃ স পরঃ পার্থ ভক্ত্যা লভ্যস্ত্বনন্যযা ।
যস্যান্তঃস্থানি ভূতানি যেন সর্বমিদং ততম্ ॥ ৮-২২॥
পুরুষঃ পুরি শয়নাৎ পূর্ণৎবাদ্বা, স পরঃ পার্থ, পরঃ
নিরতিশয়ঃ, যস্মাৎ পুরুষাৎ ন পরং কিঞ্চিৎ । সঃ ভক্ত্যা লভ্যস্তু
জ্ঞানলক্ষণয়া অনন্যযা আত্মবিষয়যা । যস্য পুরুষস্য অন্তঃস্থানি
মধ্যস্থানি ভূতানি কার্যভূতানি ; কার্যং হি কারণস্য অন্তর্বর্তি ভবতি ।
যেন পুরুষেণ সর্বং ইদং জগৎ ততং ব্যাপ্তম্ আকাশেনেব ঘটাদি ॥
প্রকৃতানাং যোগিনাং প্রণবাবেশিতব্রহ্মবুদ্ধীনাং কালান্তরমুক্তিভাজাং
ব্রহ্মপ্রতিপত্তয়ে উত্তরো মার্গো বক্তব্য ইতি “যত্র কালে”
ইত্যাদি বিবক্ষিতার্থসমর্পণার্থং উচ্যতে, আবৃত্তিমার্গোপন্যাসঃ
ইতরমার্গস্তুত্যর্থঃ —
যত্র কালে ৎবনাবৃত্তিমাবৃত্তিং চৈব যোগিনঃ ।
প্রয়াতা যান্তি তং কালং বক্ষ্যামি ভরতর্ষভ ॥ ৮-২৩॥
যত্র কালে প্রয়াতাঃ ইতি ব্যবহিতেন সম্বন্ধঃ । যত্র যস্মিন্ কালে তু
অনাবৃত্তিং অপুনর্জন্ম আবৃত্তিং তদ্বিপরীতাং চৈব । যোগিনঃ ইতি যোগিনঃ
কর্মিণশ্চ উচ্যন্তে, কর্মিণস্তু গুণতঃ — “কর্ময়োগেন যোগিনাম্”
(ভ. গী. ৩-৩) ইতি বিশেষণাৎ — যোগিনঃ । যত্র কালে প্রয়াতাঃ মৃতাঃ
যোগিনঃ অনাবৃত্তিং যান্তি, যত্র কালে চ প্রয়াতাঃ আবৃত্তিং যান্তি, তং
কালং বক্ষ্যামি ভরতর্ষভ ॥ তং কালমাহ —
অগ্নির্জ্যোতিরহঃ শুক্লঃ ষণ্মাসা উত্তরায়ণম্ ।
তত্র প্রয়াতা গচ্ছন্তি ব্রহ্ম ব্রহ্মবিদো জনাঃ ॥ ৮-২৪॥
অগ্নিঃ কালাভিমানিনী দেবতা । তথা জ্যোতিরপি দেবতৈব কালাভিমানিনী ।
অথবা, অগ্নিজ্যোতিষী যথাশ্রুতে এব দেবতে । ভূয়সা তু নির্দেশো
“যত্র কালে” “তং কালম্” ইতি আম্রবণবৎ । তথা
অহঃ দেবতা অহরভিমানিনী ; শুক্লঃ শুক্লপক্ষদেবতা ; ষণ্মাসা
উত্তরায়ণম্, তত্রাপি দেবতৈব মার্গভূতা ইতি স্থিতঃ অন্যত্র
অয়ং ন্যায়ঃ । তত্র তস্মিন্ মার্গে প্রয়াতাঃ মৃতাঃ গচ্ছন্তি ব্রহ্ম
ব্রহ্মবিদো ব্রহ্মোপাসকাঃ ব্রহ্মোপাসনপরা জনাঃ । “ক্রমেণ”
ইতি বাক্যশেষঃ । ন হি সদ্যোমুক্তিভাজাং সম্যগ্দর্শননিষ্ঠানাং
গতিঃ আগতির্বা ক্বচিৎ অস্তি, “ন তস্য প্রাণা উৎক্রামন্তি”
(বৃ. উ. ৪-৪-৬) ইতি শ্রুতেঃ । ব্রহ্মসংলীনপ্রাণা এব তে ব্রহ্মময়া
ব্রহ্মভূতা এব তে ॥
ধূমো রাত্রিস্তথা কৃষ্ণঃ ষণ্মাসা দক্ষিণায়নম্ ।
তত্র চান্দ্রমসং জ্যোতির্যোগী প্রাপ্য নিবর্ততে ॥ ৮-২৫॥
ধূমো রাত্রিঃ ধূমাভিমানিনী রাত্র্যভিমানিনী চ দেবতা । তথা কৃষ্ণঃ
কৃষ্ণপক্ষদেবতা । ষণ্মাসা দক্ষিণায়নং ইতি চ পূর্ববৎ দেবতৈব ।
তত্র চন্দ্রমসি ভবং চান্দ্রমসং জ্যোতিঃ ফলং ইষ্টাদিকারী যোগী
কর্মী প্রাপ্য ভুক্ত্বা তৎক্ষয়াৎ ইহ পুনঃ নিবর্ততে ॥
শুক্লকৃষ্ণে গতী হ্যেতে জগতঃ শাশ্বতে মতে ।
একয়া যাত্যনাবৃত্তিমন্যযাবর্ততে পুনঃ ॥ ৮-২৬॥
শুক্লকৃষ্ণে শুক্লা চ কৃষ্ণা চ শুক্লকৃষ্ণে, জ্ঞানপ্রকাশকৎবাৎ
শুক্লা, তদভাবাৎ কৃষ্ণা ; এতে শুক্লকৃষ্ণে হি গতী জগতঃ ইতি
অধিকৃতানাং জ্ঞানকর্মণোঃ, ন জগতঃ সর্বস্যৈব এতে গতী সম্ভবতঃ ;
শাশ্বতে নিত্যে, সংসারস্য নিত্যৎবাৎ, মতে অভিপ্রেতে । তত্র একয়া শুক্লয়া
যাতি অনাবৃত্তিম্, অন্যযা ইতরয়া আবর্ততে পুনঃ ভূয়ঃ ॥
নৈতে সৃতী পার্থ জানন্যোগী মুহ্যতি কশ্চন ।
তস্মাৎসর্বেষু কালেষু যোগয়ুক্তো ভবার্জুন ॥ ৮-২৭॥
ন এতে যথোক্তে সৃতী মার্গৌ পার্থ জানন্ সংসারায় একা, অন্যা মোক্ষায়
ইতি, যোগী ন মুহ্যতি কশ্চন কশ্চিদপি । তস্মাৎ সর্বেষু কালেষু
যোগয়ুক্তঃ সমাহিতো ভব অর্জুন ॥ শৃণু তস্য যোগস্য মাহাত্ম্যং —
বেদেষু যজ্ঞেষু তপঃসু চৈব দানেষু যৎপুণ্যফলং প্রদিষ্টম্ ।
অত্যেতি তৎসর্বমিদং বিদিৎবা যোগী পরং স্থানমুপৈতি চাদ্যম্ ॥ ৮-২৮॥
বেদেষু সম্যগধীতেষু যজ্ঞেষু চ সাদ্গুণ্যেন অনুষ্ঠিতেন তপঃসু চ
সুতপ্তেষু দানেষু চ সম্যগ্দত্তেষু, এতেষু যৎ পুণ্যফলং প্রদিষ্টং
শাস্ত্রেণ, অত্যেতি অতীত্য গচ্ছতি তৎ সর্বং ফলজাতম্ ; ইদং বিদিৎবা
সপ্তপ্রশ্ননির্ণয়দ্বারেণ উক্তং অর্থং সম্যক্ অবধার্য অনুষ্ঠায় যোগী,
পরং উৎকৃষ্টং ঐশ্বরং স্থানং উপৈতি চ প্রতিপদ্যতে আদ্যং আদৌ ভবম্,
কারণং ব্রহ্ম ইত্যর্থঃ ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে অক্ষরব্রহ্ময়োগো নাম অষ্টমোঽধ্যায়ঃ ॥৮॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে তারক-ব্রহ্ম-যোগঃ নাম অষ্টমঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ নবমোঽধ্যায়ঃ ॥
অষ্টমে নাডীদ্বারেণ ধারণায়োগঃ সগুণঃ উক্তঃ । তস্য চ ফলম্
অগ্ন্যর্চিরাদিক্রমেণ কালান্তরে ব্রহ্মপ্রাপ্তিলক্ষণমেব অনাবৃত্তিরূপং
নির্দিষ্টম্ । তত্র “অনেনৈব প্রকারেণ মোক্ষপ্রাপ্তিফলং অধিগম্যতে,
ন অন্যথা” ইতি তদাশঙ্কাব্যাবিবর্তয়িষয়া শ্রীভগবান্ উবাচ —
শ্রীভগবানুবাচ —
ইদং তু তে গুহ্যতমং প্রবক্ষ্যাম্যনসূয়বে ।
জ্ঞানং বিজ্ঞানসহিতং যজ্জ্ঞাৎবা মোক্ষ্যসেঽশুভাৎ ॥ ৯-১॥
ইদং ব্রহ্মজ্ঞানং বক্ষ্যমাণং উক্তং চ পূর্বেষু অধ্যায়েষু, তৎ বুদ্ধৌ
সন্নিধীকৃত্য ইদং ইত্যাহ । তু–শব্দো বিশেষনির্ধারণার্থঃ । ইদমেব তু
সম্যগ্জ্ঞানং সাক্ষাৎ মোক্ষপ্রাপ্তিসাধনং “বাসুদেবঃ সর্বমিতি”
(ভ. গী. ৭-১৯) “আত্মৈবেদং সর্বম্” (ছা. উ. ৭-২৫-২)
“একমেবাদ্বিতীয়ম্” (ছা. উ. ৬-২-১) ইত্যাদিশ্রুতিস্মৃতিভ্যঃ
; নান্যৎ, “অথ তে যেঽন্যথাতো বিদুঃ অন্যরাজানঃ তে ক্ষয়্যলোকা
ভবন্তি” (ছা. উ. ৭-২৫-২) ইত্যাদিশ্রুতিভ্যশ্চ । তে তুভ্যং
গুহ্যতমং গোপ্যতমং প্রবক্ষ্যামি কথয়িষ্যামি অনসূয়বে অসূয়ারহিতায় ।
কিং তৎ ? জ্ঞানম্ । কিংবিশিষ্টম্ ? বিজ্ঞানসহিতং অনুভবয়ুক্তম্, যৎ
জ্ঞাৎবা প্রাপ্য মোক্ষ্যসে অশুভাৎ সংসারবন্ধনাৎ ॥ তচ্চ —
রাজবিদ্যা রাজগুহ্যং পবিত্রমিদমুত্তমম্ ।
প্রত্যক্ষাবগমং ধর্ম্যং সুসুখং কর্তুমব্যযম্ ॥ ৯-২॥
রাজবিদ্যা বিদ্যানাং রাজা, দীপ্ত্যতিশয়বত্ত্বাৎ ; দীপ্যতে হি ইয়ং
অতিশয়েন ব্রহ্মবিদ্যা সর্ববিদ্যানাম্ । তথা রাজগুহ্যং গুহ্যানাং রাজা ।
পবিত্রং পাবনং ইদং উত্তমং সর্বেষাং পাবনানাং শুদ্ধিকারণং
ব্রহ্মজ্ঞানম্ উৎকৃষ্টতমম্ । অনেকজন্মসহস্রসঞ্চিতমপি
ধর্মাধর্মাদি সমূলং কর্ম ক্ষণমাত্রাদেব ভস্মীকরোতি ইত্যতঃ কিং
তস্য পাবনৎবং বক্তব্যম্ । কিঞ্চ — প্রত্যক্ষাবগমং প্রত্যক্ষেণ
সুখাদেরিব অবগমো যস্য তৎ প্রত্যক্ষাবগমম্ । অনেকগুণবতোঽপি
ধর্মবিরুদ্ধৎবং দৃষ্টম্, ন তথা আত্মজ্ঞানং ধর্মবিরোধি, কিন্তু
ধর্ম্যং ধর্মাদনপেতম্ । এবমপি, স্যাদ্দুঃখসম্পাদ্যমিত্যত আহ —
সুসুখং কর্তুম্, যথা রত্নবিবেকবিজ্ঞানম্ । তত্র অল্পায়াসানামন্যেষাং
কর্মণাং সুখসম্পাদ্যানাং অল্পফলৎবং দুষ্করাণাং চ মহাফলৎবং
দৃষ্টমিতি, ইদং তু সুখসম্পাদ্যৎবাৎ ফলক্ষয়াৎ ব্যেতি ইতি প্রাপ্তে,
আহ — অব্যযং ইতি । ন অস্য ফলতঃ কর্মবৎ ব্যযঃ অস্তীতি অব্যযম্ ।
অতঃ শ্রদ্ধেয়ং আত্মজ্ঞানম্ ॥ যে পুনঃ —
অশ্রদ্দধানাঃ পুরুষা ধর্মস্যাস্য পরন্তপ ।
অপ্রাপ্য মাং নিবর্তন্তে মৃত্যুসংসারবর্ত্মনি ॥ ৯-৩॥
অশ্রদ্দধানাঃ শ্রদ্ধাবিরহিতাঃ আত্মজ্ঞানস্য ধর্মস্য অস্য
স্বরূপে তৎফলে চ নাস্তিকাঃ পাপকারিণঃ, অসুরাণাং উপনিষদং
দেহমাত্রাত্মদর্শনমেব প্রতিপন্নাঃ অসুতৃপঃ পাপাঃ পুরুষাঃ
অশ্রদ্দধানাঃ, পরন্তপ, অপ্রাপ্য মাং পরমেশ্বরম্,
মৎপ্রাপ্তৌ নৈব আশঙ্কা ইতি মৎপ্রাপ্তিমার্গভেদভক্তিমাত্রমপি
অপ্রাপ্য ইত্যর্থঃ । নিবর্তন্তে নিশ্চয়েন বর্তন্তে ; ক্ব ? —
মৃত্যুসংসারবর্ত্মনি মৃত্যুয়ুক্তঃ সংসারঃ মৃত্যুসংসারঃ তস্য
বর্ত্ম নরকতির্যগাদিপ্রাপ্তিমার্গঃ, তস্মিন্নেব বর্তন্তে ইত্যর্থঃ ॥
স্তুত্যা অর্জুনমভিমুখীকৃত্য আহ —
ময়া ততমিদং সর্বং জগতদব্যক্তমূর্তিনা ।
মৎস্থানি সর্বভূতানি ন চাহং তেষ্ববস্থিতঃ ॥ ৯-৪॥
ময়া মম যঃ পরো ভাবঃ তেন ততং ব্যাপ্তং সর্বং ইদং জগৎ
অব্যক্তমূর্তিনা ন ব্যক্তা মূর্তিঃ স্বরূপং যস্য মম সোঽহমব্যক্তমূর্তিঃ
তেন ময়া অব্যক্তমূর্তিনা, করণাগোচরস্বরূপেণ ইত্যর্থঃ ।
তস্মিন্ ময়ি অব্যক্তমূর্তৌ স্থিতানি মৎস্থানি, সর্বভূতানি ব্রহ্মাদীনি
স্তম্বপর্যন্তানি । ন হি নিরাত্মকং কিঞ্চিৎ ভূতং ব্যবহারায় অবকল্পতে ।
অতঃ মৎস্থানি ময়া আত্মনা আত্মবত্ত্বেন স্থিতানি, অতঃ ময়ি স্থিতানি
ইতি উচ্যন্তে । তেষাং ভূতানাং অহমেব আত্মা ইত্যতঃ তেষু স্থিতঃ ইতি
মূঢবুদ্ধীনাং অবভাসতে ; অতঃ ব্রবীমি — ন চ অহং তেষু ভূতেষু
অবস্থিতঃ, মূর্তবৎ সংশ্লেষাভাবেন আকাশস্যাপি অন্তরতমো হি অহম্ ।
ন হি অসংসর্গি বস্তু ক্বচিৎ আধেয়ভাবেন অবস্থিতং ভবতি ॥ অত
এব অসংসর্গিৎবাৎ মম —
ন চ মৎস্থানি ভূতানি পশ্য মে যোগমৈশ্বরম্ ।
ভূতভৃন্ন চ ভূতস্থো মমাত্মা ভূতভাবনঃ ॥ ৯-৫॥
ন চ মৎস্থানি ভূতানি ব্রহ্মাদীনি । পশ্য মে যোগং যুক্তিং ঘটনং মে
মম ঐশ্বরং ঈশ্বরস্য ইমং ঐশ্বরম্, যোগং আত্মনো যাথাত্ম্যমিত্যর্থঃ ।
তথা চ শ্রুতিঃ অসংসর্গিৎবাৎ অসঙ্গতাং দর্শয়তি — “ অসঙ্গো
ন হি সজ্জতে” (বৃ. উ. ৩-৯-২৬) ইতি । ইদং চ আশ্চর্যং অন্যৎ
পশ্য — ভূতভৃৎ অসঙ্গোঽপি সন্ ভূতানি বিভর্তি ; ন চ ভূতস্থঃ,
যথোক্তেন ন্যায়েন দর্শিতৎবাৎ ভূতস্থৎবানুপপত্তেঃ । কথং পুনরুচ্যতে
“অসৌ মম আত্মা” ইতি ? বিভজ্য দেহাদিসঙ্ঘাতং তস্মিন্ অহঙ্কারম্
অধ্যারোপ্য লোকবুদ্ধিং অনুসরন্ ব্যপদিশতি “মম আত্মা” ইতি,
ন পুনঃ আত্মনঃ আত্মা অন্যঃ ইতি লোকবৎ অজানন্ । তথা ভূতভাবনঃ ভূতানি
ভাবয়তি উৎপাদয়তি বর্ধয়তীতি বা ভূতভাবনঃ ॥ যথোক্তেন শ্লোকদ্বয়েন
উক্তং অর্থং দৃষ্টান্তেন উপপাদয়ন্ আহ —
যথাকাশস্থিতো নিত্যং বায়ুঃ সর্বত্রগো মহান্ ।
তথা সর্বাণি ভূতানি মৎস্থানীত্যুপধারয় ॥ ৯-৬॥
যথা লোকে আকাশস্থিতঃ আকাশে স্থিতঃ নিত্যং সদা বায়ুঃ সর্বত্র
গচ্ছতীতি সর্বত্রগঃ মহান্ পরিমাণতঃ, তথা আকাশবৎ সর্বগতে
ময়ি অসংশ্লেষেণৈব স্থিতানি ইত্যেবং উপধারয় বিজানীহি ॥ এবং বায়ুঃ
আকাশে ইব ময়ি স্থিতানি সর্বভূতানি স্থিতিকালে ; তানি —
সর্বভূতানি কৌন্তেয় প্রকৃতিং যান্তি মামিকাম্ ।
কল্পক্ষয়ে পুনস্তানি কল্পাদৌ বিসৃজাম্যহম্ ॥ ৯-৭॥
সর্বভূতানি কৌন্তেয় প্রকৃতিং ত্রিগুণাত্মিকাং অপরাং নিকৃষ্টাং
যান্তি মামিকাং মদীয়াং কল্পক্ষয়ে প্রলয়কালে । পুনঃ ভূয়ঃ তানি
ভূতানি উৎপত্তিকালে কল্পাদৌ বিসৃজামি উৎপাদয়ামি অহং পূর্ববৎ ॥
এবং অবিদ্যালক্ষণাং —
প্রকৃতিং স্বামবষ্টভ্য বিসৃজামি পুনঃ পুনঃ ।
ভূতগ্রামমিমং কৃৎস্নমবশং প্রকৃতের্বশাৎ ॥ ৯-৮॥
প্রকৃতিং স্বাং স্বীয়াং অবষ্টভ্য বশীকৃত্য বিসৃজামি পুনঃ পুনঃ
প্রকৃতিতো জাতং ভূতগ্রামং ভূতসমুদায়ং ইমং বর্তমানং কৃৎস্নং
সমগ্রং অবশম্ অস্বতন্ত্রম্, অবিদ্যাদিদোষৈঃ পরবশীকৃতম্,
প্রকৃতেঃ বশাৎ স্বভাববশাৎ ॥ তর্হি তস্য তে পরমেশ্বরস্য,
ভূতগ্রামং ইমং বিষমং বিদধতঃ, তন্নিমিত্তাভ্যাং ধর্মাধর্মাভ্যাং
সম্বন্ধঃ স্যাদিতি, ইদং আহ ভগবান্ —
ন চ মাং তানি কর্মাণি নিবধ্নন্তি ধনঞ্জয় ।
উদাসীনবদাসীনমসক্তং তেষু কর্মসু ॥ ৯-৯॥
ন চ মাং ঈশ্বরং তানি ভূতগ্রামস্য বিষমসর্গনিমিত্তানি কর্মাণি
নিবধ্নন্তি ধনঞ্জয় । তত্র কর্মণাং অসম্বন্ধিৎবে কারণমাহ —
উদাসীনবৎ আসীনং যথা উদাসীনঃ উপেক্ষকঃ কশ্চিৎ তদ্বৎ আসীনম্,
আত্মনঃ অবিক্রিয়ৎবাৎ, অসক্তং ফলাসঙ্গরহিতম্, অভিমানবর্জিতং
“অহং করোমি” ইতি তেষু কর্মসু । অতঃ অন্যস্যাপি
কর্তৃৎবাভিমানাভাবঃ ফলাসঙ্গাভাবশ্চ অসম্বন্ধকারণম্,
অন্যথা কর্মভিঃ বধ্যতে মূঢঃ কোশকারবৎ ইত্যভিপ্রায়ঃ ॥
তত্র “ভূতগ্রামমিমং বিসৃজামি” (ভ. গী. ৯-৮)
“উদাসীনবদাসীনম্” (ভ. গী. ৯-৯)ইতি চ বিরুদ্ধং উচ্যতে,
ইতি তৎপরিহারার্থং আহ —
ময়াধ্যক্ষেণ প্রকৃতিঃ সূয়তে সচরাচরম্ ।
হেতুনানেন কৌন্তেয় জগদ্বিপরিবর্ততে ॥ ৯-১০॥
ময়া অধ্যক্ষেণ সর্বতো দৃশিমাত্রস্বরূপেণ অবিক্রিয়াত্মনা
অধ্যক্ষেণ ময়া, মম মায়া ত্রিগুণাত্মিকা অবিদ্যালক্ষণা প্রকৃতিঃ
সূয়তে উৎপাদয়তি সচরাচরং জগৎ । তথা চ মন্ত্রবর্ণঃ —
“একো দেবঃ সর্বভূতেষু গূঢঃ সর্বব্যাপী সর্বভূতান্তরাত্মা ।
কর্মাধ্যক্ষঃ সর্বভূতাধিবাসঃ সাক্ষী চেতা কেবলো নির্গুণশ্চ”
(শ্বে. উ. ৬-১১) ইতি । হেতুনা নিমিত্তেন অনেন অধ্যক্ষৎবেন কৌন্তেয়
জগৎ সচরাচরং ব্যক্তাব্যক্তাত্মকং বিপরিবর্ততে সর্বাবস্থাসু ।
দৃশিকর্মৎবাপত্তিনিমিত্তা হি জগতঃ সর্বা প্রবৃত্তিঃ — অহং
ইদং ভোক্ষ্যে, পশ্যামি ইদম্, শৃণোমি ইদম্, সুখমনুভবামি,
দুঃখমনুভবামি, তদর্থমিদং করিষ্যে, ইদং জ্ঞাস্যামি,
ইত্যাদ্যা অবগতিনিষ্ঠা অবগত্যবসানৈব । ”যো অস্যাধ্যক্ষঃ
পরমে ব্যোমন্” (ঋ. ১০-১২৯-৭),(তৈ. ব্রা. ২-৮-৯)
ইত্যাদয়শ্চ মন্ত্রাঃ এতমর্থং দর্শয়ন্তি । ততশ্চ একস্য
দেবস্য সর্বাধ্যক্ষভূতচৈতন্যমাত্রস্য পরমার্থতঃ
সর্বভোগানভিসম্বন্ধিনঃ অন্যস্য চেতনান্তরস্য অভাবে
ভোক্তুঃ অন্যস্য অভাবাৎ । কিন্নিমিত্তা ইয়ং সৃষ্টিঃ ইত্যত্র
প্রশ্নপ্রতিবচনে অনুপপন্নে, ”কো অদ্ধা বেদ ক ইহ প্রবোচৎ ।
কুত আজাতা কুত ইয়ং বিসৃষ্টিঃ” (ঋ. ১০-১২৯-৬),
(তৈ. ব্রা. ২-৮-৯) ইত্যাদিমন্ত্রবর্ণেভ্যঃ । দর্শিতং চ ভগবতা
— “অজ্ঞানেনাবৃতং জ্ঞানং তেন মুহ্যন্তি জন্তবঃ”
(ভ. গী. ৫-১৫)ইতি ॥ এবং মাং নিত্যশুদ্ধবুদ্ধমুক্তস্বভাবং
সর্বজ্ঞং সর্বজন্তূনাং আত্মানমপি সন্তং —
অবজানন্তি মাং মূঢা মানুষীং তনুমাশ্রিতম্ ।
পরং ভাবমজানন্তো মম ভূতমহেশ্বরম্ ॥ ৯-১১॥
অবজানন্তি অবজ্ঞাং পরিভবং কুর্বন্তি মাং মূঢাঃ অবিবেকিনঃ
মানুষীং মনুষ্যসম্বন্ধিনীং তনুং দেহং আশ্রিতম্, মনুষ্যদেহেন
ব্যবহরন্তমিত্যেতৎ, পরং প্রকৃষ্টং ভাবং পরমাত্মতত্ত্বং
আকাশকল্পং আকাশাদপি অন্তরতমং অজানন্তো মম ভূতমহেশ্বরং
সর্বভূতানাং মহান্তং ঈশ্বরং স্বাত্মানম্ । ততশ্চ তস্য মম
অবজ্ঞানভাবনেন আহতাঃ তে বরাকাঃ ॥ কথম্ ? —
মোঘাশা মোঘকর্মাণো মোঘজ্ঞানা বিচেতসঃ ।
রাক্ষসীমাসুরীং চৈব প্রকৃতিং মোহিনীং শ্রিতাঃ ॥ ৯-১২॥
মোঘাশাঃ বৃথা আশাঃ আশিষঃ যেষাং তে মোঘাশাঃ, তথা মোঘকর্মাণঃ
যানি চ অগ্নিহোত্রাদীনি তৈঃ অনুষ্ঠীয়মানানি কর্মাণি তানি চ, তেষাং
ভগবৎপরিভবাৎ, স্বাত্মভূতস্য অবজ্ঞানাৎ, মোঘান্যেব নিষ্ফলানি
কর্মাণি ভবন্তীতি মোঘকর্মাণঃ । তথা মোঘজ্ঞানাঃ মোঘং নিষ্ফলং
জ্ঞানং যেষাং তে মোঘজ্ঞানাঃ, জ্ঞানমপি তেষাং নিষ্ফলমেব স্যাৎ ।
বিচেতসঃ বিগতবিবেকাশ্চ তে ভবন্তি ইত্যভিপ্রায়ঃ । কিঞ্চ —
তে ভবন্তি রাক্ষসীং রক্ষসাং প্রকৃতিং স্বভাবং আসুরীং অসুরাণাং চ
প্রকৃতিং মোহিনীং মোহকরীং দেহাত্মবাদিনীং শ্রিতাঃ আশ্রিতাঃ, ছিন্দ্ধি,
ভিন্দ্ধি, পিব, খাদ, পরস্বমপহর, ইত্যেবং বদনশীলাঃ ক্রূরকর্মাণো
ভবন্তি ইত্যর্থঃ, “অসুর্যা নাম তে লোকাঃ” (ঈ. উ. ৩) ইতি শ্রুতেঃ ॥
যে পুনঃ শ্রদ্দধানাঃ ভগবদ্ভক্তিলক্ষণে মোক্ষমার্গে প্রবৃত্তাঃ —
মহাত্মনস্তু মাং পার্থ দৈবীং প্রকৃতিমাশ্রিতাঃ ।
ভজন্ত্যনন্যমনসো জ্ঞাৎবা ভূতাদিমব্যযম্ ॥ ৯-১৩॥
মহাত্মানস্তু অক্ষুদ্রচিত্তাঃ মাং ঈশ্বরং পার্থ দৈবীং দেবানাং প্রকৃতিং
শমদমদয়াশ্রদ্ধাদিলক্ষণাং আশ্রিতাঃ সন্তঃ ভজন্তি সেবন্তে অনন্যমনসঃ
অনন্যচিত্তাঃ জ্ঞাৎবা ভূতাদিং ভূতানাং বিয়দাদীনাং প্রাণিনাং চ আদিং কারণম্
অব্যযম্ ॥ কথম্ ? —
সততং কীর্তয়ন্তো মাং যতন্তশ্চ দৃঢব্রতাঃ ।
নমস্যন্তশ্চ মাং ভক্ত্যা নিত্যযুক্তা উপাসতে ॥ ৯-১৪॥
সততং সর্বদা ভগবন্তং ব্রহ্মস্বরূপং মাং কীর্তয়ন্তঃ, যতন্তশ্চ
ইন্দ্রিয়োপসংহারশমদমদয়াহিংসাদিলক্ষণৈঃ ধর্মৈঃ প্রয়তন্তশ্চ,
দৃঢব্রতাঃ দৃঢং স্থিরং অচাল্যং ব্রতং যেষাং তে দৃঢব্রতাঃ
নমস্যন্তশ্চ মাং হৃদয়েশয়ং আত্মানং ভক্ত্যা নিত্যযুক্তাঃ সন্তঃ
উপাসতে সেবন্তে ॥ তে কেন কেন প্রকারেণ উপাসতে ইত্যুচ্যতে —
জ্ঞানয়জ্ঞেন চাপ্যন্যে যজন্তো মামুপাসতে ।
একৎবেন পৃথক্ত্বেন বহুধা বিশ্বতোমুখম্ ॥ ৯-১৫॥
জ্ঞানয়জ্ঞেন জ্ঞানমেব ভগবদ্বিষয়ং যজ্ঞঃ তেন জ্ঞানয়জ্ঞেন,
যজন্তঃ পূজয়ন্তঃ মাং ঈশ্বরং চ অপি অন্যে অন্যাং উপাসনাং পরিত্যজ্য
উপাসতে । তচ্চ জ্ঞানম্ — একৎবেন “একমেব পরং ব্রহ্ম”
ইতি পরমার্থদর্শনেন যজন্তঃ উপাসতে । কেচিচ্চ পৃথক্ত্বেন
“আদিত্যচন্দ্রাদিভেদেন স এব ভগবান্ বিষ্ণুঃ অবস্থিতঃ” ইতি
উপাসতে । কেচিৎ “বহুধা অবস্থিতঃ স এব ভগবান্ সর্বতোমুখঃ
বিশ্বরূপঃ” ইতি তং বিশ্বরূপং সর্বতোমুখং বহুধা বহুপ্রকারেণ
উপাসতে ॥ যদি বহুভিঃ প্রকারৈঃ উপাসতে, কথং ৎবামেব উপাসতে ইতি,
অত আহ —
অহং ক্রতুরহং যজ্ঞঃ স্বধাহমহমৌষধম্ ।
মন্ত্রোঽহমহমেবাজ্যমহমগ্নিরহং হুতম্ ॥ ৯-১৬॥
অহং ক্রতুঃ শ্রৌতকর্মভেদঃ অহমেব । অহং যজ্ঞঃ স্মার্তঃ । কিঞ্চ
স্বধা অন্নম্ অহম্, পিতৃভ্যো যৎ দীয়তে । অহং ঔষধং সর্বপ্রাণিভিঃ
যৎ অদ্যতে তৎ ঔষধশব্দশব্দিতং ব্রীহিয়বাদিসাধারণম্ ।
অথবা স্বধা ইতি সর্বপ্রাণিসাধারণং অন্নম্, ঔষধং ইতি
ব্যাধ্যুপশমনার্থং ভেষজম্ । মন্ত্রঃ অহম্, যেন পিতৃভ্যো
দেবতাভ্যশ্চ হবিঃ দীয়তে । অহমেব আজ্যং হবিশ্চ । অহং অগ্নিঃ,
যস্মিন্ হূয়তে হবিঃ সঃ অগ্নিঃ অহম্ । অহং হুতং হবনকর্ম চ ॥
কিঞ্চ —
পিতাহমস্য জগতো মাতা ধাতা পিতামহঃ ।
বেদ্যং পবিত্রমোঙ্কার ঋক্সাম যজুরেব চ ॥ ৯-১৭॥
পিতা জনয়িতা অহং অস্য জগতঃ, মাতা জনয়িত্রী, ধাতা কর্মফলস্য
প্রাণিভ্যো বিধাতা, পিতামহঃ পিতুঃ পিতা, বেদ্যং বেদিতব্যম্, পবিত্রং
পাবনং ওঙ্কারঃ, ঋক্ সাম যজুঃ এব চ ॥ কিঞ্চ–
গতির্ভর্তা প্রভুঃ সাক্ষী নিবাসঃ শরণং সুহৃৎ ।
প্রভবঃ প্রলয়ঃ স্থানং নিধানং বীজমব্যযম্ ॥ ৯-১৮॥
গতিঃ কর্মফলম্, ভর্তা পোষ্টা, প্রভুঃ স্বামী, সাক্ষী প্রাণিনাং
কৃতাকৃতস্য, নিবাসঃ যস্মিন্ প্রাণিনো নিবসন্তি, শরণং আর্তানাম্,
প্রপন্নানামার্তিহরঃ । সুহৃৎ প্রত্যুপকারানপেক্ষঃ সন্ উপকারী,
প্রভবঃ উৎপত্তিঃ জগতঃ, প্রলয়ঃ প্রলীয়তে অস্মিন্ ইতি, তথা স্থানং
তিষ্ঠতি অস্মিন্ ইতি, নিধানং নিক্ষেপঃ কালান্তরোপভোগ্যং প্রাণিনাম্,
বীজং প্ররোহকারণং প্ররোহধর্মিণাম্, অব্যযং যাবৎসংসারভাবিৎবাৎ
অব্যযম্, ন হি অবীজং কিঞ্চিৎ প্ররোহতি ; নিত্যং চ প্ররোহদর্শনাৎ
বীজসন্ততিঃ ন ব্যেতি ইতি গম্যতে ॥ কিঞ্চ —
তপাম্যহমহং বর্ষং নিগৃহ্ণাম্যুৎসৃজামি চ ।
অমৃতং চৈব মৃত্যুশ্চ সদসচ্চাহমর্জুন ॥ ৯-১৯॥
তপামি অহম্ আদিত্যো ভূৎবা কৈশ্চিৎ রশ্মিভিঃ উল্বণৈঃ । অহং
বর্ষং কৈশ্চিৎ রশ্মিভিঃ উৎসৃজামি । উৎসৃজ্য পুনঃ নিগৃহ্ণামি
কৈশ্চিৎ রশ্মিভিঃ অষ্টভিঃ মাসৈঃ পুনঃ উৎসৃজামি প্রাবৃষি ।
অমৃতং চৈব দেবানাম্, মৃত্যুশ্চ মর্ত্যানাম্ । সৎ যস্য যৎ
সম্বন্ধিতয়া বিদ্যমানং তৎ, তদ্বিপরীতং অসচ্চ এব অহম্ অর্জুন ।
ন পুনঃ অত্যন্তমেব অসৎ ভগবান্, স্বয়ং কার্যকারণে বা সদসতী ॥
যে পূর্বোক্তৈঃ নিবৃত্তিপ্রকারৈঃ একৎবপৃথক্ত্বাদিবিজ্ঞানৈঃ যজ্ঞৈঃ
মাং পূজয়ন্তঃ উপাসতে জ্ঞানবিদঃ, তে যথাবিজ্ঞানং মামেব প্রাপ্নুবন্তি ।
যে পুনঃ অজ্ঞাঃ কামকামাঃ —
ত্রৈবিদ্যা মাং সোমপাঃ পূতপাপা যজ্ঞৈরিষ্ট্বা স্বর্গতিং প্রার্থয়ন্তে ।
তে পুণ্যমাসাদ্য সুরেন্দ্রলোকমশ্নন্তি দিব্যান্দিবি দেবভোগান্ ॥ ৯-২০॥
ত্রৈবিদ্যাঃ ঋগ্যজুঃসামবিদঃ মাং বস্বাদিদেবরূপিণং সোমপাঃ সোমং
পিবন্তীতি সোমপাঃ, তেনৈব সোমপানেন পূতপাপাঃ শুদ্ধকিল্বিষাঃ, যজ্ঞৈঃ
অগ্নিষ্টোমাদিভিঃ ইষ্ট্বা পূজয়িৎবা স্বর্গতিং স্বর্গগমনং স্বরেব গতিঃ
স্বর্গতিঃ তাম্, প্রার্থয়ন্তে । তে চ পুণ্যং পুণ্যফলং আসাদ্য সম্প্রাপ্য
সুরেন্দ্রলোকং শতক্রতোঃ স্থানং অশ্নন্তি ভুঞ্জতে দিব্যান্ দিবি ভবান্
অপ্রাকৃতান্ দেবভোগান্ দেবানাং ভোগান্ ॥
তে তং ভুক্ত্বা স্বর্গলোকং বিশালং ক্ষীণে পুণ্যে মর্ত্যলোকং বিশন্তি ।
এবং ত্রয়ীধর্মমনুপ্রপন্না গতাগতং কামকামা লভন্তে ॥ ৯-২১॥
তে তং ভুক্ত্বা স্বর্গলোকং বিশালং বিস্তীর্ণং ক্ষীণে পুণ্যে মর্ত্যলোকং
বিশন্তি আবিশন্তি । এবং যথোক্তেন প্রকারেণ ত্রয়ীধর্মং কেবলং
বৈদিকং কর্ম অনুপ্রপন্নাঃ গতাগতং গতং চ আগতং চ গতাগতং
গমনাগমনং কামকামাঃ কামান্ কাময়ন্তে ইতি কামকামাঃ লভন্তে
গতাগতমেব, ন তু স্বাতন্ত্র্যং ক্বচিৎ লভন্তে ইত্যর্থঃ ॥ যে পুনঃ
নিষ্কামাঃ সম্যগ্দর্শিনঃ —
অনন্যাশ্চিন্তয়ন্তো মাং যে জনাঃ পর্যুপাসতে ।
তেষাং নিত্যাভিয়ুক্তানাং যোগক্ষেমং বহাম্যহম্ ॥ ৯-২২॥
অনন্যাঃ অপৃথগ্ভূতাঃ পরং দেবং নারায়ণং আত্মৎবেন গতাঃ
সন্তঃ চিন্তয়ন্তঃ মাং যে জনাঃ সন্ন্যাসিনঃ পর্যুপাসতে, তেষাং
পরমার্থদর্শিনাং নিত্যাভিয়ুক্তানাং সততাভিয়োগিনাং যোগক্ষেমং যোগঃ
অপ্রাপ্তস্য প্রাপণং ক্ষেমঃ তদ্রক্ষণং তদুভয়ং বহামি প্রাপয়ামি অহম্
; “জ্ঞানী ৎবাত্মৈব মে মতম্” (ভ. গী. ৭-১৮) “স চ
মম প্রিয়ঃ” (ভ. গী. ৭-১৭) যস্মাৎ, তস্মাৎ তে মম আত্মভূতাঃ
প্রিয়াশ্চ ইতি ॥ ননু অন্যেষামপি ভক্তানাং যোগক্ষেমং বহত্যেব
ভগবান্ । সত্যং বহত্যেব ; কিন্তু অয়ং বিশেষঃ — অন্যে যে ভক্তাঃ
তে আত্মার্থং স্বয়মপি যোগক্ষেমং ঈহন্তে ; অনন্যদর্শিনস্তু ন আত্মার্থং
যোগক্ষেমং ঈহন্তে ; ন হি তে জীবিতে মরণে বা আত্মনঃ গৃদ্ধিং কুর্বন্তি
; কেবলমেব ভগবচ্ছরণাঃ তে ; অতঃ ভগবানেব তেষাং যোগক্ষেমং
বহতীতি ॥ ননু অন্যা অপি দেবতাঃ ৎবমেব চেৎ, তদ্ভক্তাশ্চ ৎবামেব
যজন্তে । সত্যমেবং —
যেঽপ্যন্যদেবতাভক্তা যজন্তে শ্রদ্ধয়ান্বিতাঃ ।
তেঽপি মামেব কৌন্তেয় যজন্ত্যবিধিপূর্বকম্ ॥ ৯-২৩॥
যেঽপি অন্যদেবতাভক্তাঃ অন্যাসু দেবতাসু ভক্তাঃ অন্যদেবতাভক্তাঃ সন্তঃ
যজন্তে পূজয়ন্তি শ্রদ্ধয়া আস্তিক্যবুদ্ধ্যা অন্বিতাঃ অনুগতাঃ, তেঽপি
মামেব কৌন্তেয় যজন্তি অবিধিপূর্বকং অবিধিঃ অজ্ঞানং তৎপূর্বকং
যজন্তে ইত্যর্থঃ ॥ কস্মাৎ তে অবিধিপূর্বকং যজন্তে ইত্যুচ্যতে ;
যস্মাৎ —
অহং হি সর্বয়জ্ঞানাং ভোক্তা চ প্রভুরেব চ ।
ন তু মামভিজানন্তি তত্ত্বেনাতশ্চ্যবন্তি তে ॥ ৯-২৪॥
অহং হি সর্বয়জ্ঞানাং শ্রৌতানাং স্মার্তানাং চ সর্বেষাং যজ্ঞানাং
দেবতাত্মৎবেন ভোক্তা চ প্রভুঃ এব চ । মৎস্বামিকো হি যজ্ঞঃ,
“অধিয়জ্ঞোঽহমেবাত্র” (ভ. গী. ৮-৪) ইতি হি উক্তম্ । তথা
ন তু মাং অভিজানন্তি তত্ত্বেন যথাবৎ । অতশ্চ অবিধিপূর্বকং ইষ্ট্বা
যাগফলাৎ চ্যবন্তি প্রচ্যবন্তে তে ॥ যেঽপি অন্যদেবতাভক্তিমত্ত্বেন
অবিধিপূর্বকং যজন্তে, তেষামপি যাগফলং অবশ্যম্ভাবি । কথম্
? —
যান্তি দেবব্রতা দেবান্পিতৄন্যান্তি পিতৃব্রতাঃ ।
ভূতানি যান্তি ভূতেজ্যা যান্তি মদ্যাজিনোঽপি মাম্ ॥ ৯-২৫॥
যান্তি গচ্ছন্তি দেবব্রতাঃ দেবেষু ব্রতং নিয়মো ভক্তিশ্চ
যেষাং তে দেবব্রতাঃ দেবান্ যান্তি । পিতৄন্ অগ্নিষ্বাত্তাদীন্
যান্তি পিতৃব্রতাঃ শ্রাদ্ধাদিক্রিয়াপরাঃ পিতৃভক্তাঃ । ভূতানি
বিনায়কমাতৃগণচতুর্ভগিন্যাদীনি যান্তি ভূতেজ্যাঃ ভূতানাং পূজকাঃ ।
যান্তি মদ্যাজিনঃ মদ্যজনশীলাঃ বৈষ্ণবাঃ মামেব যান্তি । সমানে অপি
আয়াসে মামেব ন ভজন্তে অজ্ঞানাৎ, তেন তে অল্পফলভাজঃ ভবন্তি
ইত্যর্থঃ ॥ ন কেবলং মদ্ভক্তানাং অনাবৃত্তিলক্ষণং অনন্তফলম্,
সুখারাধনশ্চ অহম্ । কথম্ ? —
পত্রং পুষ্পং ফলং তোয়ং যো মে ভক্ত্যা প্রয়চ্ছতি ।
তদহং ভক্ত্যুপহৃতমশ্নামি প্রয়তাত্মনঃ ॥ ৯-২৬॥
পত্রং পুষ্পং ফলং তোয়ং উদকং যঃ মে মহ্যং ভক্ত্যা প্রয়চ্ছতি,
তৎ অহং পত্রাদি ভক্ত্যা উপহৃতং ভক্তিপূর্বকং প্রাপিতং
ভক্ত্যুপহৃতং অশ্নামি গৃহ্ণামি প্রয়তাত্মনঃ শুদ্ধবুদ্ধেঃ ॥
যতঃ এবম্, অতঃ —
যৎকরোষি যদশ্নাসি যজ্জুহোষি দদাসি যৎ ।
যত্তপস্যসি কৌন্তেয় তৎকুরুষ্ব মদর্পণম্ ॥ ৯-২৭॥
যৎ করোষি স্বতঃ প্রাপ্তম্, যৎ অশ্নাসি, যচ্চ জুহোষি হবনং
নির্বর্তয়সি শ্রৌতং স্মার্তং বা, যৎ দদাসি প্রয়চ্ছসি ব্রাহ্মণাদিভ্যঃ
হিরণ্যান্নাজ্যাদি, যৎ তপস্যসি তপঃ চরসি কৌন্তেয়, তৎ কুরুষ্ব
মদর্পণং মৎসমর্পণম্ ॥ এবং কুর্বতঃ তব যৎ ভবতি, তৎ
শৃণু —
শুভাশুভফলৈরেবং মোক্ষ্যসে কর্মবন্ধনৈঃ ।
সন্ন্যাসয়োগয়ুক্তাত্মা বিমুক্তো মামুপৈষ্যসি ॥ ৯-২৮॥
শুভাশুভফলৈঃ শুভাশুভে ইষ্টানিষ্টে ফলে যেষাং তানি
শুভাশুভফলানি কর্মাণি তৈঃ শুভাশুভফলৈঃ কর্মবন্ধনৈঃ
কর্মাণ্যেব বন্ধনানি কর্মবন্ধনানি তৈঃ কর্মবন্ধনৈঃ এবং
মদর্পণং কুর্বন্ মোক্ষ্যসে । সোঽয়ং সন্ন্যাসয়োগো নাম, সন্ন্যাসশ্চ
অসৌ মৎসমর্পণতয়া কর্মৎবাৎ যোগশ্চ অসৌ ইতি, তেন সন্ন্যাসয়োগেন
যুক্তঃ আত্মা অন্তঃকরণং যস্য তব সঃ ৎবং সন্ন্যাসয়োগয়ুক্তাত্মা সন্
বিমুক্তঃ কর্মবন্ধনৈঃ জীবন্নেব পতিতে চাস্মিন্ শরীরে মাং উপৈষ্যসি
আগমিষ্যসি ॥ রাগদ্বেষবান্ তর্হি ভগবান্, যতো ভক্তান্ অনুগৃহ্ণাতি,
ন ইতরান্ ইতি । তৎ ন —
সমোঽহং সর্বভূতেষু ন মে দ্বেষ্যোঽস্তি ন প্রিয়ঃ ।
যে ভজন্তি তু মাং ভক্ত্যা ময়ি তে তেষু চাপ্যহম্ ॥ ৯-২৯॥
সমঃ তুল্যঃ অহং সর্বভূতেষু । ন মে দ্বেষ্যঃ অস্তি ন প্রিয়ঃ ।
অগ্নিবৎ অহং — দূরস্থানাং যথা অগ্নিঃ শীতং ন অপনয়তি, সমীপং
উপসর্পতাং অপনয়তি ; তথা অহং ভক্তান্ অনুগৃহ্ণামি, ন ইতরান্ । যে
ভজন্তি তু মাং ঈশ্বরং ভক্ত্যা ময়ি তে — স্বভাবত এব, ন মম
রাগনিমিত্তং — বর্তন্তে । তেষু চ অপি অহং স্বভাবত এব বর্তে,
ন ইতরেষু । ন এতাবতা তেষু দ্বেষো মম ॥ শৃণু মদ্ভক্তের্মাহাত্ম্যং
—
অপি চেৎসুদুরাচারো ভজতে মামনন্যভাক্ ।
সাধুরেব স মন্তব্যঃ সম্যগ্ব্যবসিতো হি সঃ ॥ ৯-৩০॥
অপি চেৎ যদ্যপি সুদুরাচারঃ সুষ্ঠু দুরাচারঃ অতীব কুৎসিতাচারোঽপি
ভজতে মাং অনন্যভাক্ অনন্যভক্তিঃ সন্, সাধুরেব সম্যগ্বৃত্ত
এব সঃ মন্তব্যঃ জ্ঞাতব্যঃ ; সম্যক্ যথাবৎ ব্যবসিতো হি সঃ,
যস্মাৎ সাধুনিশ্চয়ঃ সঃ ॥ উৎসৃজ্য চ বাহ্যাং দুরাচারতাং অন্তঃ
সম্যগ্ব্যবসায়সামর্থ্যাৎ —
ক্ষিপ্রং ভবতি ধর্মাত্মা শশ্বচ্ছান্তিং নিগচ্ছতি ।
কৌন্তেয় প্রতিজানীহি ন মে ভক্তঃ প্রণশ্যতি ॥ ৯-৩১॥
ক্ষিপ্রং শীঘ্রং ভবতি ধর্মাত্মা ধর্মচিত্তঃ এব । শশ্বৎ নিত্যং
শান্তিং চ উপশমং নিগচ্ছতি প্রাপ্নোতি । শৃণু পরমার্থম্,
কৌন্তেয় প্রতিজানীহি নিশ্চিতাং প্রতিজ্ঞাং কুরু, ন মে মম ভক্তঃ
ময়ি সমর্পিতান্তরাত্মা মদ্ভক্তঃ ন প্রণশ্যতি ইতি ॥ কিঞ্চ —
মাং হি পার্থ ব্যপাশ্রিত্য যেঽপি স্যুঃ পাপয়োনয়ঃ ।
স্ত্রিয়ো বৈশ্যাস্তথা শূদ্রাস্তেঽপি যান্তি পরাং গতিম্ ॥ ৯-৩২॥
মাং হি যস্মাৎ পার্থ ব্যপাশ্রিত্য মাং আশ্রয়ৎবেন গৃহীৎবা যেঽপি স্যুঃ
ভবেয়ুঃ পাপয়োনয়ঃ পাপা যোনিঃ যেষাং তে পাপয়োনয়ঃ পাপজন্মানঃ । কে
তে ইতি, আহ — স্ত্রিয়ঃ বৈশ্যাঃ তথা শূদ্রাঃ তেঽপি যান্তি গচ্ছন্তি
পরাং প্রকৃষ্টাং গতিম্ ॥
কিং পুনর্ব্রাহ্মণাঃ পুণ্যা ভক্তা রাজর্ষয়স্তথা ।
অনিত্যমসুখং লোকমিমং প্রাপ্য ভজস্ব মাম্ ॥ ৯-৩৩॥
কিং পুনঃ ব্রাহ্মণাঃ পুণ্যাঃ পুণ্যযোনয়ঃ ভক্তাঃ রাজর্ষয়ঃ তথা ।
রাজানশ্চ তে ঋষয়শ্চ রাজর্ষয়ঃ । যতঃ এবম্, অতঃ অনিত্যং
ক্ষণভঙ্গুরম্ অসুখং চ সুখবর্জিতং ইমং লোকং মনুষ্যলোকং প্রাপ্য
পুরুষার্থসাধনং দুর্লভং মনুষ্যৎবং লব্ধ্বা ভজস্ব সেবস্ব মাম্ ॥
কথং —
মন্মনা ভব মদ্ভক্তো মদ্যাজী মাং নমস্কুরু ।
মামেবৈষ্যসি যুক্ত্বৈবমাত্মানং মৎপরায়ণঃ ॥ ৯-৩৪॥
ময়ি বাসুদেবে মনঃ যস্য তব স ৎবং মন্মনাঃ ভব । তথা মদ্ভক্তঃ
ভব মদ্যাজী মদ্যজনশীলঃ ভব । মাং এব চ নমস্কুরু । মাং এব
ঈশ্বরং এষ্যসি আগমিষ্যসি যুক্ত্বা সমাধায় চিত্তম্ । এবং আত্মানম্,
অহং হি সর্বেষাং ভূতানাং আত্মা, পরা চ গতিঃ, পরং অয়নম্,
তং মাং এবম্ভূতম্, এষ্যসি ইতি অতীতেন সম্বন্ধঃ, মৎপরায়ণঃ সন্
ইত্যর্থঃ ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে রাজবিদ্যারায়গুহ্যযোগো নাম নবমোঽধ্যায়ঃ ॥৯॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে রাজবিদ্যা-রায়গুহ্য-যোগঃ নাম
নবমোঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ দশমোঽধ্যায়ঃ ॥
সপ্তমে অধ্যায়ে ভগবতঃ তত্ত্বং বিভূতয়ঃ চ প্রকাশিতাঃ, নবমে চ ।
অথ ইদানীং যেষু যেষু ভাবেষু চিন্ত্যঃ ভগবান্, তে তে ভাবাঃ বক্তব্যাঃ,
তত্ত্বং চ ভগবতঃ বক্তব্যং উক্তং অপি, দুর্বিজ্ঞেয়ৎবাৎ, ইতি অতঃ
শ্রী-ভগবান্ উবাচ —
শ্রীভগবানুবাচ —
ভূয় এব মহাবাহো শৃণু মে পরমং বচঃ ।
যত্তেঽহং প্রীয়মাণায় বক্ষ্যামি হিতকাম্যযা ॥ ১০-১॥
ভূয়ঃ এব ভূয়ঃ পুনঃ হে মহাবাহো শৃণু মে মদীয়ং পরমং
প্রকৃষ্টং নিরতিশয়-বস্তুনঃ প্রকাশকং বচঃ বাক্যং যৎ পরমং
তে তুভ্যং প্রীয়মাণায় — মৎ-বচনাৎ প্রীয়সে ৎবং অতীব অমৃতং
ইব পিবন্, ততঃ — বক্ষ্যামি হিত-কাম্যযা হিত-ইচ্ছয়া ॥ কিং
অর্থং অহং বক্ষ্যামি ইতি অতঃ আহ —
ন মে বিদুঃ সুরগণাঃ প্রভবং ন মহর্ষয়ঃ ।
অহমাদির্হি দেবানাং মহর্ষীণাং চ সর্বশঃ ॥ ১০-২॥
ন মে বিদুঃ ন জানন্তি সুর-গণাঃ ব্রহ্মা-আদয়ঃ । কিং তে ন
বিদুঃ? মম প্রভবং প্রভাবং প্রভু-শক্তি-অতিশয়ম্, অথবা
প্রভবং প্রভবনং উৎপত্তিম্ । ন অপি মহর্ষয়ঃ ভৃগু-আদয়ঃ
বিদুঃ । কস্মাৎ তে ন বিদুঃ ইতি উচ্যতে — অহম্ আদিঃ কারণং হি যস্মাৎ
দেবানাং মহর্ষীণাং চ সর্বশঃ সর্ব-প্রকারৈঃ ॥ কিং চ —
যো মামজমনাদিং চ বেত্তি লোকমহেশ্বরম্ ।
অসম্মূঢঃ স মর্ত্যেষু সর্বপাপৈঃ প্রমুচ্যতে ॥ ১০-৩॥
যঃ মাং অজম্ অনাদিং চ, যস্মাৎ অহং আদিঃ দেবানাং মহর্ষীণাং চ,
ন মম অন্যঃ আদিঃ বিদ্যতে; অতঃ অহং অজঃ অনাদিঃ চ; অনাদিৎবং অজৎবে
হেতুঃ, তং মাং অজং অনাদিং চ যঃ বেত্তি বিজানাতি লোক-মহেশ্বরং
লোকানাং মহান্তং ঈশ্বরং তুরীয়ম্ অজ্ঞান-তৎ-কার্য-বর্জিতং অসম্মূঢঃ
সম্মোহ-বর্জিতঃ সঃ মর্ত্যেষু মনুষ্যেষু, সর্ব-পাপৈঃ সর্বৈঃ
পাপৈঃ মতিপূর্ব-অমতিপূর্ব-কৃতৈঃ প্রমুচ্যতে প্রমোক্ষ্যতে ॥
ইতঃ চ অহং মহেশ্বরঃ লোকানাং —
বুদ্ধির্জ্ঞানমসম্মোহঃ ক্ষমা সত্যং দমঃ শমঃ ।
সুখং দুঃখং ভবোঽভাবঃ ভয়ং চাভয়মেব চ ॥ ১০-৪॥
বুদ্ধিঃ অন্তঃকরণস্য সূক্ষ্ম-আদি-অর্থ-অববোধন-সামর্থ্যম্,
তদ্বন্তং বুদ্ধিমান্ ইতি হি বদন্তি । জ্ঞানং
আত্মা-আদি-পদ-অর্থানাম্-অববোধঃ । অসম্মোহঃ প্রতি-উৎপন্নেষু
বোদ্ধব্যেষু বিবেক-পূর্বিকা প্রবৃত্তিঃ । ক্ষমা আক্রুষ্টস্য তাডিতস্য
বা অবিকৃত-চিত্ততা । সত্যং যথা-দৃষ্টস্য যথা-শ্রুতস্য চ
আত্ম-অনুভবস্য পর-বুদ্ধি-সঙ্ক্রান্তয়ে তথা এব উচ্চার্যমাণা বাক্
সত্যং উচ্যতে । দমঃ বাহ্য-ইন্দ্রিয়-উপশমঃ । শমঃ অন্তঃকরণস্য
উপশমঃ । সুখং আহ্লাদঃ । দুঃখং সন্তাপঃ । ভবঃ উদ্ভবঃ । অভাবঃ
তৎ-বিপর্যযঃ । ভয়ং চ ত্রাসঃ, অভয়ং এব চ তৎ-বিপরীতম্ ॥
অহিংসা সমতা তুষ্টিঃ তপো দানং যশোঽয়শঃ ।
ভবন্তি ভাবা ভূতানাং মত্ত এব পৃথগ্বিধাঃ ॥ ১০-৫॥
অহিংসা অপীডা প্রাণিনাম্ । সমতা সম-চিত্ততা । তুষ্টিঃ সন্তোষঃ
পর্যাপ্ত-বুদ্ধিঃ-লাভেষু । তপঃ ইন্দ্রিয়-সংয়ম-পূর্বকং শরীর-পীডনম্ ।
দানং যথা-শক্তি সংবিভাগঃ । যশঃ ধর্ম-নিমিত্তা কীর্তিঃ । অয়শঃ
তু অধর্ম-নিমিত্তা অকীর্তিঃ । ভবন্তি ভাবাঃ যথোক্তাঃ বুদ্ধি-আদয়ঃ
ভূতানাং প্রাণিনাং মত্তঃ এব ঈশ্বরাৎ পৃথগ্-বিধাঃ নানা-বিধাঃ
স্ব-কর্ম-অনুরূপেণ ॥ কিং চ —
মহর্ষয়ঃ সপ্ত পূর্বে চৎবারো মনবস্তথা ।
মদ্ভাবা মানসা জাতাঃ যেষাং লোক ইমাঃ প্রজাঃ ॥ ১০-৬॥
মহর্ষয়ঃ সপ্ত ভৃগি-আদয়ঃ পূর্বে অতীত-কাল-সম্বন্ধিনঃ,
চৎবারঃ মনবঃ তথা সাবর্ণাঃ ইতি প্রসিদ্ধাঃ, তে চ মৎ-ভাবাঃ
মৎ-গত-ভাবনাঃ বৈষ্ণবেন সামর্থ্যেন উপেতাঃ, মানসাঃ মনস এব
উৎপাদিতাঃ ময়া জাতাঃ উৎপন্নাঃ, যেষাং মনূনাং মহর্ষীণাং চ সৃষ্টিঃ
লোকে ইমাঃ স্থাবর-জঙ্গম-লক্ষণাঃ প্রজাঃ ॥
এতাং বিভূতিং যোগং চ মম যো বেত্তি তত্ত্বতঃ ।
সোঽবিকম্পেন যোগেন যুজ্যতে নাত্র সংশয়ঃ ॥ ১০-৭॥
এতাং যথোক্তাং বিভূতিং বিস্তারং যোগং চ যুক্তিং চ আত্মনঃ ঘটনম্,
অথবা যোগ-ঐশ্বর্য-সামর্থ্যং সর্বজ্ঞৎবং যোগজং যোগঃ উচ্যতে,
মম মদীয়ং যোগং যঃ বেত্তি তত্ত্বতঃ তত্ত্বেন যথাবৎ ইতি এতৎ, সঃ
অবিকম্পেন অপ্রচলিতেন যোগেন সম্যগ্-দর্শন-স্থৈর্য-লক্ষণেন
যুজ্যতে সম্বধ্যতে । ন অত্র সংশয়ঃ ন অস্মিন্ অর্থে সংশয়ঃ অস্তি ॥
কীদৃশেন অবিকম্পেন যোগেন যুজ্যতে ইতি উচ্যতে —
অহং সর্বস্য প্রভবঃ মত্তঃ সর্বং প্রবর্ততে ।
ইতি মৎবা ভজন্তে মাং বুধা ভাবসমন্বিতাঃ ॥ ১০-৮॥
অহং পরং ব্রহ্ম বাসুদেব-আখ্যং সর্বস্য জগতঃ প্রভবঃ
উৎপত্তিঃ । মত্তঃ এব স্থিতি-নাশ-ক্রিয়া-ফল-উপভোগ-লক্ষণং
বিক্রিয়া-রূপং সর্বং জগৎ প্রবর্ততে । ইতি এবং মৎবা ভজন্তে সেবন্তে
মাং বুধাঃ অবগত-পরমার্থ-তত্ত্বাঃ, ভাব-সমন্বিতাঃ ভাবঃ ভাবনা
পরমার্থ-তত্ত্ব-অভিনিবেশঃ তেন সমন্বিতাঃ সংয়ুক্তাঃ ইতি অর্থঃ ॥
কিং চ —
মচ্চিত্তা মদ্গতপ্রাণাঃ বোধয়ন্তঃ পরস্পরম্ ।
কথয়ন্তশ্চ মাং নিত্যং তুষ্যন্তি চ রমন্তি চ ॥ ১০-৯॥
মৎ-চিত্তাঃ, ময়ি চিত্তং যেষাং তে মৎ-চিত্তাঃ, মৎ-গত-প্রাণাঃ মাং
গতাঃ প্রাপ্তাঃ চক্ষুঃ-আদয়ঃ প্রাণাঃ যেষাং তে মৎ-গত-প্রাণাঃ, ময়ি
উপসংহৃত-করণাঃ ইতি অর্থঃ । অথবা, মৎ-গত-প্রাণাঃ মৎ-গত-জীবনাঃ
ইতি এতৎ । বোধয়ন্তঃ অবগময়ন্তঃ পরস্পরং অন্যোন্যম্, কথয়ন্তঃ চ
জ্ঞান-বল-বীর্য-আদি-ধর্মৈঃ বিশিষ্টং মাম্, তুষ্যন্তি চ পরিতোষম্
উপয়ান্তি চ রমন্তি চ রতিং চ প্রাপ্নুবন্তি প্রিয়-সঙ্গতি এব ॥ যে
যথোক্তৈঃ প্রকারৈঃ ভজন্তে মাং ভক্তাঃ সন্তঃ —
তেষাং সততয়ুক্তানাং ভজতাং প্রীতিপূর্বকম্ ।
দদামি বুদ্ধিয়োগং তং যেন মামুপয়ান্তি তে ॥ ১০-১০॥
তেষাং সতত-যুক্তানাং নিত্য-অভিয়ুক্তানাং
নিবৃত্ত-সর্ব-বাহ্য-এষণানাং ভজতাং সেবমানানাম্ । কিং
অর্থিৎব-আদিনা কারণেন? ন ইতি আহ — প্রীতি-পূর্বকং প্রীতিঃ স্নেহঃ
তৎ-পূর্বকং মাং ভজতাং ইতি অর্থঃ । দদামি প্রয়চ্ছামি বুদ্ধি-যোগং
বুদ্ধিঃ সম্যগ্-দর্শনং মৎ-তত্ত্ব-বিষয়ং তেন যোগঃ বুদ্ধি-যোগঃ
তং বুদ্ধি-যোগম্, যেন বুদ্ধি-যোগেন সম্যগ্-দর্শন-লক্ষণেন
মাং পরমেশ্বরং আত্ম-ভূতম্ আত্মৎবেন উপয়ান্তি প্রতিপদ্যন্তে ।
কে? তে যে মৎ-চিত্তৎব-আদি-প্রকারৈঃ মাং ভজন্তে ॥ কিং অর্থম্,
কস্য বা, ৎবৎ-প্রাপ্তি-প্রতিবন্ধ-হেতোঃ নাশকং বুদ্ধি-যোগং তেষাং
ৎবৎ-ভক্তানাং দদাসি ইতি অপেক্ষায়াং আহ —
তেষামেবানুকম্পার্থং অহমজ্ঞানজং তমঃ ।
নাশয়াম্যাত্মভাবস্থঃ জ্ঞানদীপেন ভাস্বতা ॥ ১০-১১॥
তেষাম্ এব কথং নু নাম শ্রেয়ঃ স্যাৎ ইতি অনুকম্প-অর্থং দয়া-হেতোঃ
অহম্ অজ্ঞান-জং অবিবেকতঃ জাতং মিথ্যা-প্রত্যয-লক্ষণং
মোহ-অন্ধকারং তমঃ নাশয়ামি, আত্ম-ভাবস্থঃ আত্মনঃ
ভাবঃ অন্তঃকরণ-আশয়ঃ তস্মিন্ এব স্থিতঃ সন্ জ্ঞান-দীপেন
বিবেক-প্রত্যয-রূপেণ ভক্তি-প্রসাদ-স্নেহ-ভিষিক্তেন
মৎ-ভাবনা-অভিনিবেশ-বাত-ঈরিতেন
ব্রহ্মচর্য-আদি-সাধন-সংস্কারবৎ-প্রজ্ঞা-আবর্তিনা
বিরক্ত-অন্তঃকরণ-আধারেণ
বিষয়-ব্যাবৃত্ত-চিত্ত-রাগ-দ্বেষ-অকলুষিত-
নিবাত-অপবরক-স্থেন
নিত্য-প্রবৃত্ত-একাগ্র্য-ধ্যান-জনিত-সম্যগ্-দর্শন-ভাস্বতা
জ্ঞান-দীপেন ইতি অর্থঃ ॥ যথোক্তাং ভগবতঃ বিভূতিং যোগং চ
শ্রুৎবা অর্জুনঃ উবাচ —
অর্জুন উবাচ —
পরং ব্রহ্ম পরং ধাম পবিত্রং পরমং ভবান্ ।
পুরুষং শাশ্বতং দিব্যং আদিদেবমজং বিভুম্ ॥ ১০-১২॥
পরং ব্রহ্ম পরমাত্মা পরং ধাম পরং তেজঃ পবিত্রং পাবনং
পরমং প্রকৃ-ষ্টং ভবান্ । পুরষং শাশ্বতং নিত্যং দিব্যং দিবি
ভবং আদি-দেবং সর্ব-দেবানাং আদৌ ভবং আদি-দেবং অজং বিভুং
বিভবন-শীলম্ ॥ ঈদৃশং —
আহুস্ত্বামৃষয়ঃ সর্বে দেবর্ষির্নারদস্তথা ।
অসিতো দেবলো ব্যাসঃ স্বয়ং চৈব ব্রবীষি মে ॥ ১০-১৩॥
আহুঃ কথয়ন্তি ৎবাং ঋষয়ঃ বসিষ্ঠ-আদয়ঃ সর্বে দেব-ঋষিঃ
নারদঃ তথা । অসিতঃ দেবলঃ অপি এবং এব আহ, ব্যাসঃ চ, স্বয়ং
চ এব ৎবং চ ব্রবীষি মে ॥
সর্বমেতদৃতং মন্যে যন্মাং বদসি কেশব । ন হি তে ভগবন্ব্যক্তিং
বিদুর্দেবা ন দানবাঃ ॥ ১০-১৪॥
সর্বং এতৎ যথোক্তং ঋষিভিঃ ৎবয়া চ এতৎ ঋতং সত্যং এব মন্যে,
যৎ মাং প্রতি বদসি ভাষসে হে কেশব । ন হি তে তব ভগবন্ ব্যক্তিং
প্রভবং বিদুঃ ন দেবাঃ, ন দানবাঃ ॥ যতঃ ৎবং দেব-আদীনাং আদিঃ,
অতঃ —
স্বয়মেবাত্মনাত্মানং বেত্থ ৎবং পুরুষোত্তম । ভূতভাবন ভূতেশ
দেবদেব জগৎপতে ॥ ১০-১৫॥
স্বয়ং এব আত্মনা আত্মানং বেত্থ জানাসি ৎবং
নিরতিশয়-জ্ঞান-ঐশ্বর্য-বল-আদি-শক্তি-মন্তং ঈশ্বরং
পুরুষোত্তম । ভূতানি ভাবয়তি তি ভূত-ভাবনঃ, হে ভূতভাবন ।
ভূতেশ ভূতানাম্ ঈশিতঃ । হে দেব-দেব জগৎ-পতে ॥
বক্তুমর্হস্যশেষেণ দিব্যা হ্যাত্মবিভূতয়ঃ । যাভির্বিভূতিভির্লোকান্
ইমাংস্ত্বং ব্যাপ্য তিষ্ঠসি ॥ ১০-১৬॥
অক্তুং কথয়িতুং অর্হসি অশেষেণ । দিব্যাঃ হি আত্ম-বিভূতয়ঃ ।
আত্মনঃ বিভূতয়ঃ যাঃ তাঃ বক্তুং অর্হসি । যাভিঃ বিভূতিভিঃ আত্মনঃ
মাহাত্ম্য-বিস্তরৈঃ ইমান্ লোকান্ ৎবং ব্যাপ্য তিষ্ঠসি ॥
কথং বিদ্যামহং যোগিন্ ৎবাং সদা পরিচিন্তয়ন্ । কেষু কেষু চ ভাবেষু
চিন্ত্যোঽসি ভগবন্ময়া ॥ ১০-১৭॥
কথং বিদ্যাং বিজানীয়াং অহং হে যোগিন্ ৎবাং সদা পরি-চিন্তয়ন্ । কেষু
কেষু চ ভাবেষু বস্তুষু চিন্ত্যঃ অসি ধ্যেয়ঃ অসি ভগবন্ ময়া ॥
বিস্তরেণাত্মনো যোগং বিভূতিং চ জনার্দন ।
ভূয়ঃ কথয় তৃপ্তির্হি শৃণ্বতো নাস্তি মেঽমৃতম্ ॥ ১০-১৮॥
বিস্তরেণ আত্মনঃ যোগং যোগ-ঐশ্বর্য-শক্তি-বিশেষং বিভূতিং চ
বিস্তরং ধ্যেয়-পদার্থানাং হে জনার্দন, অর্দতেঃ গতি-কর্মণঃ রূপম্,
অসুরাণাং দেব-প্রতিপক্ষ-ভূতানাং জনানাং নরক-আদি-গময়িতৃৎবাৎ
জনার্দনঃ অভ্যুদয়-নিঃশ্রেয়স-পুরুষার্থ-প্রয়োজনং সর্বৈঃ জনৈঃ
যাচ্যতে ইতি বা । ভূয়ঃ পূর্বং উক্তং অপি কথয়; তৃপ্তিঃ পরিতোষঃ হি
যস্মাৎ ন অস্তি মে মম শৃণ্বতঃ ৎবৎ-মুখ-নিঃসৃত-বাক্য-অমৃতম্
শ্রীভগবানুবাচ —
হন্ত তে কথয়িষ্যামি দিব্যা হ্যাত্মবিভূতয়ঃ ।
প্রাধান্যতঃ কুরুশ্রেষ্ঠ নাস্ত্যন্তো বিস্তরস্য মে ॥ ১০-১৯॥
হন্ত ইদানীং তে তব দিব্যাঃ দিবি ভবাঃ আত্ম-বিভূতয়ঃ আত্মনঃ মম
বিভূতয়ঃ যাঃ তাঃ কথয়িষ্যামি ইতি এতৎ । প্রাধান্যতঃ যত্র যত্র
প্রধানা যা যা বিভূতিঃ তাং তাং প্রধানাং প্রাধান্যতঃ কথয়িষ্যামি অহং
কুরু-শ্রেষ্ঠ । অশেষতঃ তু বর্ষ-শতেন-অপি ন শক্যা বক্তুম্,
যতঃ ন অস্তি অন্তঃ বিস্তরস্য মে মম বিভূতীনাং ইতি অর্থঃ ॥ তত্র
প্রথমং এব তাবৎ শৃণু —
অহমাত্মা গুডাকেশ সর্বভূতাশয়স্থিতঃ ।
অহমাদিশ্চ মধ্যং চ ভূতানামন্ত এব চ ॥ ১০-২০॥
অহং আত্মা প্রত্যগ্-আত্মা গুডাকেশ, গুডাকা নিদ্রা তস্যাঃ ঈশঃ
গুডাকেশঃ, জিত-নিদ্রঃ ইতি অর্থঃ; ঘন-কেশঃ ইতি বা ।
সর্ব-ভূত-আশয়-স্থিতঃ সর্বেষাং ভূতানাং আশয়ে অন্তর্-হৃদি
স্থিতঃ অহং আত্মা প্রত্যগ্-আত্মা নিত্যং ধ্যেয়ঃ । তৎ-অশক্তেন চ
উত্তরেষু ভাবেষু চিন্ত্যঃ অহম্; যস্মাৎ অহং এব আদিঃ ভূতানাং কারণং
তথা মধ্যং চ স্থিতিঃ অন্তঃ প্রলয়ঃ চ ॥ এবং চ ধ্যেয়ঃ অহং —
আদিত্যানামহং বিষ্ণুঃ জ্যোতিষাং রবিরংশুমান্ ।
মরীচির্মরুতামস্মি নক্ষত্রাণামহং শশী ॥ ১০-২১॥
আদিত্যানাং দ্বাদশানাং বিষ্ণুঃ নাম আদিত্যঃ অহম্ । জ্যোতিষাং রবিঃ
প্রকাশয়িতৄণাম্ অংশুমান্ রশ্মিমান্ । মরীচিঃ নাম মরুতাং
মরুৎ-দেবতা-ভেদানাং অস্মি । নক্ষত্রাণাং অহং শশী চন্দ্রমাঃ ॥
বেদানাং সামবেদোঽস্মি দেবানামস্মি বাসবঃ ।
ইন্দ্রিয়াণাং মনশ্চাস্মি ভূতানামস্মি চেতনা ॥ ১০-২২॥
বেদানাং মধ্যে সাম-বেদঃ অস্মি । দেবানাং রুদ্র-আদিত্য-আদীনাং বাসবঃ
ইন্দ্রঃ অস্মি । ইন্দ্রিয়াণাং একাদশানাং চক্ষুঃ-আদীনাং মনঃ চ অস্মি
সঙ্কল্প-বিকল্প-আত্মকং মনঃ চ অস্মি । ভূতানাং অস্মি চেতনা
কার্য-করণ-সঙ্ঘাতে নিত্যা-আভিব্যক্তা বুদ্ধি-বৃত্তিঃ চেতনা ॥
রুদ্রাণাং শঙ্করশ্চাস্মি বিত্তেশো যক্ষরক্ষসাম্ ।
বসূনাং পাবকশ্চাস্মি মেরুঃ শিখরিণামহম্ ॥ ১০-২৩॥
রুদ্রাণাম্ একাদশানাং শঙ্করহ্ চ অস্মি । বিত্তেশঃ কুবেরঃ
যক্ষ-রক্ষসাং যক্ষাণাং রক্ষসাং চ । বসূনাং অষ্টানাং পাবকহ্
চ অস্মি অগ্নিঃ । মেরুঃ শিখরিণাং শিখর-বতাং অহম্ ॥
পুরোধসাং চ মুখ্যং মাং বিদ্ধি পার্থ বৃহস্পতিম্ ।
সেনানীনামহং স্কন্দঃ সরসামস্মি সাগরঃ ॥ ১০-২৪॥
পুরোধসাং চ রাজ-পুরোহিতানাং চ মুখ্যং প্রধানং মাং বিদ্ধি
হে পার্থ বৃহস্পতিম্ । সহ্ হি ইন্দ্রস্য ইতি মুখ্যঃ স্যাৎ পুরোধাঃ ।
সেনানীনাং সেনা-পতীনাং অহং স্কন্দঃ দেব-সেনা-পতিঃ । সরসাং যানি
দেবখাতানি সরাংসি তেষাং সরসাং সাগরঃ অস্মি ভবামি ॥
মহর্ষীণাং ভৃগুরহং গিরামস্ম্যেকমক্ষরম্ ।
যজ্ঞানাং জপয়জ্ঞোঽস্মি স্থাবরাণাং হিমালয়ঃ ॥ ১০-২৫॥
মহর্ষীণাং ভৃগুঃ অহম্ । গিরাং বাচাং পদ-লক্ষণানাং একং অক্ষরং
ওঙ্কারঃ অস্মি । যজ্ঞানাং জপ-যজ্ঞঃ অস্মি, স্থাবরাণাং স্থিতি-মতাং
হিমালয়ঃ ॥
অশ্বত্থঃ সর্ববৃক্ষাণাং দেবর্ষীণাং চ নারদঃ ।
গন্ধর্বাণাং চিত্ররথঃ সিদ্ধানাং কপিলো মুনিঃ ॥ ১০-২৬॥
অশ্বত্থঃ সর্ব-বৃক্ষাণাম্, দেব-ঋষীণাং চ নারদঃ দেবাঃ
এব সন্তঃ ঋষিৎবং প্রাপ্তাঃ মন্ত্র-দর্শিৎবাৎ তে দেব-ঋষয়ঃ,
তেষাং নারদঃ অস্মি । গন্ধর্বাণাং চিত্ররথঃ নাম গন্ধর্বঃ অস্মি ।
সিদ্ধানাং জন্মন এব ধর্ম-জ্ঞান-বৈরাগ্য-ঐশ্বর্য-অতিশয়ং
প্রাপ্তানাং কপিলঃ মুনিঃ ॥
উচ্চৈঃশ্রবসমশ্বানাং বিদ্ধি মামমৃতোদ্ভবম্ ।
ঐরাবতং গজেন্দ্রাণাং নরাণাং চ নরাধিপম্ ॥ ১০-২৭॥
উচ্চৈঃশ্রবসম্ অশ্বানাং উচ্চৈঃশ্রবাঃ নাম অশ্ব-রাজঃ তং মাং
বিদ্ধি বিজানীহি অমৃত-উদ্ভবং অমৃত-নিমিত্ত-মথন-উদ্ভবম্ ।
ঐরাবতং ইরাবত্যাঃ অপত্যং গজেন্দ্রাণাং হস্তি-ঈশ্বরাণাম্, তং মাং
বিদ্ধি ইতি অনুবর্ততে । নরাণাং চ মনুষ্যাণাং নর-অধিপং রাজানং
মাং বিদ্ধি জানীহি ॥
আয়ুধানামহং বজ্রং ধেনূনামস্মি কামধুক্ ।
প্রজনশ্চাস্মি কন্দর্পঃ সর্পাণামস্মি বাসুকিঃ ॥ ১০-২৮॥
আয়ুধানাং অহং বজ্রং দধীচি-অস্থি-সম্ভবম্ । ধেনূনাং দোগ্ধ্রীণাং
অস্মি কাম-ধুক্ বসিষ্ঠস্য সর্ব-কামানাং দোগ্ধ্রী, সামান্যা বা
কাম-ধুক্ । প্রজনঃ প্রজনয়িতা অস্মি কন্দর্পঃ কামঃ সর্পাণাং
সর্প-ভেদানাং অস্মি বাসুকিঃ সর্প-রাজঃ ॥
অনন্তশ্চাস্মি নাগানাং বরুণো যাদসামহম্ ।
পিতৄণামর্যমা চাস্মি যমঃ সংয়মতামহম্ ॥ ১০-২৯॥
অনন্তঃ চ অস্মি নাগানাং নাগ-বিশেষাণাং নাগ-রাজঃ চ অস্মি ।
বরুণঃ যাদসাং অহম্ অব্-দেবতানাং রাজা অহম্ । পিতৄণাং অর্যমা নাম
পিতৃ-রাজঃ চ অস্মি । যমঃ সংয়মতাং সংয়মনং কুর্বতাং অহম্ ॥
প্রহ্লাদশ্চাস্মি দৈত্যানাং কালঃ কলয়তামহম্ ।
মৃগাণাং চ মৃগেন্দ্রোঽহং বৈনতেয়শ্চ পক্ষিণাম্ ॥ ১০-৩০॥
প্রহ্লাদঃ নাম চ অস্মি দৈত্যানাং দিতি-বংশ্যানাম্ । কালঃ কলয়তাং
কলনং গণনং কুর্বতাং অহম্ । মৃগাণাং চ মৃগ-ইন্দ্রঃ সিংহঃ
ব্যাঘ্রঃ বা অহম্ । বৈনতেয়ঃ চ গরুত্মান্ বিনতা-সুতঃ পক্ষিণাং
পতত্রিণাম্ ॥
পবনঃ পবতামস্মি রামঃ শস্ত্রভৃতামহম্ ।
ঝষাণাং মকরশ্চাস্মি স্রোতসামস্মি জাহ্নবী ॥ ১০-৩১॥
পবনঃ বায়ুঃ পবতাং পাবয়িতৄণাং অস্মি । রামঃ শস্ত্র-ভৃতাং
অহং শস্ত্রাণাং ধারয়িতৄণাং দাশরথিঃ রামঃ অহম্ । ঝষাণাং
মৎস্য-আদীনাং মকরঃ নাম জাতি-বিশেষঃ অহম্ । স্রোতসাং স্রবন্তীনাং
অস্মি জাহ্নবী গঙ্গা ॥
সর্গাণামাদিরন্তশ্চ মধ্যং চৈবাহমর্জুন ।
অধ্যাত্মবিদ্যা বিদ্যানাং বাদঃ প্রবদতামহম্ ॥ ১০-৩২॥
সর্গাণাং সৃষ্টীনাম্ আদিঃ অন্তঃ চ মধ্যং চৈব অহং
উৎপত্তি-স্থিতি-লয়াঃ অহং অর্জুন । ভূতানাং জীব-অধিষ্ঠিতানাং এব
আদিঃ অন্তঃ চ ইত্যাদি উক্তং উপক্রমে, ইহ তু সর্বস্য এব সর্গ-মাত্রস্য
ইতি বিশেষঃ । অধ্যাত্ম-বিদ্যা বিদ্যানাং মোক্ষ-অর্থৎবাৎ প্রধানং অস্মি ।
বাদঃ অর্থ-নির্ণয়-হেতুৎবাৎ প্রবদতাং প্রধানম্, অতঃ সঃ অহং
অস্মি । প্রবক্তৄ-দ্বারেণ বদন-ভেদানাং এব বাদ-জল্প-বিতণ্ডানাং
ইহ গ্রহণং প্রবদতাং ইতি ॥
অক্ষরাণামকারোঽস্মি দ্বন্দ্বঃ সামাসিকস্য চ ।
অহমেবাক্ষয়ঃ কালঃ ধাতাহং বিশ্বতোমুখঃ ॥ ১০-৩৩॥
অক্ষরাণাং বর্ণানাং অকারঃ বর্ণঃ অস্মি ।
দ্বন্দ্বঃ সমাসঃ অস্মি সামাসিকস্য চ সমাস-সমূহস্য ।
কিং চ অহং এব অক্ষয়ঃ অক্ষীণঃ কালঃ প্রসিদ্ধঃ ক্ষণ-আদি-আখ্যঃ,
অথবা পরমেশ্বরঃ কালস্য অপি কালঃ অস্মি । ধাতা অহং কর্ম-ফলস্য
বিধাতা সর্ব-জগতঃ বিশ্বতো-মুখঃ সর্বতো-মুখঃ ॥
মৃত্যুঃ সর্বহরশ্চাহং উদ্ভবশ্চ ভবিষ্যতাম্ ।
কীর্তিঃ শ্রীর্বাক্চ নারীণাং স্মৃতির্মেধা ধৃতিঃ ক্ষমা ॥ ১০-৩৪॥
মৃত্যুঃ দ্বিবিধঃ ধন-আদি-হরঃ প্রাণ-হরঃ চ; তত্র যঃ
প্রাণ-হরঃ, সঃ সর্ব-হরঃ উচ্যতে; সঃ অহং ইতি অর্থঃ । অথবা,
পরঃ ঈশ্বরঃ প্রলয়ে সর্ব-হরণাৎ সর্ব-হরঃ, সঃ অহম্ । উদ্ভবঃ
উৎকর্ষঃ অভ্যুদয়ঃ তৎ-প্রাপ্তি-হেতুঃ চ অহম্ । কেষাম্? ভবিষ্যতাং
ভাবি-কল্যাণানাম্, উৎকর্ষ-প্রাপ্তি-যোগ্যানাং ইতি অর্থঃ । কীর্তিঃ শ্রীঃ বাক্
চ নারীণাং স্মৃতিঃ মেধা ধৃতিঃ ক্ষমা ইতি এতাঃ উত্তমাঃ স্ত্রীণাং অহং অস্মি,
যাসাং আভাস-মাত্র-সম্বন্ধেন অপি লোকঃ কৃতার্থম্-আত্মানং মন্যতে ॥
বৃহৎসাম তথা সাম্নাং গায়ত্রী চ্ছন্দসামহম্ ।
মাসানাং মার্গশীর্ষোঽহং ঋতূনাং কুসুমাকরঃ ॥ ১০-৩৫॥
বৃহৎ-সাম তথা সাম্নাং প্রধানং অস্মি । গায়ত্রী চ্ছন্দসাং অহং
গায়ত্রি-আদি-চ্ছন্দো-বিশিষ্টানাং ঋচাং গায়ত্রী ঋক্ অহং অস্মি ইতি
অর্থঃ । মাসানাং মার্গশীর্ষঃ অহম্, ঋতূনাং কুসুমাকরঃ বসন্তঃ ॥
দ্যূতং ছলয়তামস্মি তেজস্তেজস্বিনামহম্ ।
জয়োঽস্মি ব্যবসায়োঽস্মি সত্ত্বং সত্ত্ববতামহম্ ॥ ১০-৩৬॥
দ্যূতম্ অক্ষদেবন-আদি-লক্ষণং ছলয়তাং ছলস্য কর্তৄণাং
অস্মি । তেজস্বিনাং তেজঃ অহম্ । জয়ঃ অস্মি জেতৄণাম্, ব্যবসায়ঃ অস্মি
ব্যবসায়িনাম্, সত্ত্বং সত্ত্ব-বতাং সাত্ত্বিকানাং অহম্ ॥
বৃষ্ণীনাং বাসুদেবোঽস্মি পাণ্ডবানাং ধনঞ্জয়ঃ ।
মুনীনামপ্যহং ব্যাসঃ কবীনামুশনা কবিঃ ॥ ১০-৩৭॥
বৃষ্ণীনাং যাদবানাং বাসুদেবঃ অস্মি অয়ং এব অহং ৎবৎ-সখঃ ।
পাণ্ডবানাং ধনঞ্জয়ঃ ৎবং এব । মুনীনাং মনন-শীলানাং
সর্ব-পদ-অর্থ-জ্ঞানিনাং অপি অহং ব্যাসঃ, কবীনাং ক্রান্ত-দর্শিনাং
উশনা কবিঃ অস্মি ॥
দণ্ডো দময়তামস্মি নীতিরস্মি জিগীষতাম্ ।
মৌনং চৈবাস্মি গুহ্যানাং জ্ঞানং জ্ঞানবতামহম্ ॥ ১০-৩৮॥
দণ্ডঃ দময়তাং দময়িতৄণাং অস্মি অদান্তানাং দমন-কারণম্ । নীতিঃ
অস্মি জিগীষতাং জেতুম্-ইচ্ছতাম্ । মৌনং চ এব অস্মি গুহ্যানাং গোপ্যানাম্ ।
জ্ঞানং জ্ঞানবতাম্ অহম্ ॥
যচ্চাপি সর্বভূতানাং বীজং তদহমর্জুন ।
ন তদস্তি বিনা যৎস্যাৎ ময়া ভূতং চরাচরম্ ॥ ১০-৩৯॥
যচ্ত্ চ আপি সর্ব-ভূতানাং বীজং প্ররোহ-কারণম্, তৎ অহং অর্জুন ।
প্রকরণ-উপসংহার-অর্থং বিভূতি-সঙ্ক্ষেপম্-আহ — ন তৎ অস্তি
ভূতং চর-অচরং চরং অচরং বা, ময়া বিনা যৎ স্যাৎ ভবেৎ ।
ময়া অপকৃষ্টং পরিত্যক্তং নিরাত্মকং শূন্যং হি তৎ স্যাৎ । অতঃ
মৎ-আত্মকং সর্বং ইতি অর্থঃ ॥
নান্তোঽস্তি মম দিব্যানাং বিভূতীনাং পরন্তপ ।
এষ তূদ্দেশতঃ প্রোক্তঃ বিভূতের্বিস্তরো ময়া ॥ ১০-৪০॥
ন অন্তঃ অস্তি মম দিব্যানাং বিভূতীনাং বিস্তরাণাং পরন্তপ । ন
হি ঈশ্বরস্য সর্ব-আত্মনঃ দিব্যানাং বিভূতীনাং ইয়ত্তা শক্যা বক্তুং
জ্ঞাতুং বা কেনচিৎ । এষঃ তু উদ্দেশতঃ এক-দেশেন প্রোক্তঃ বিভূতেঃ
বিস্তরঃ ময়া ॥
যদ্যদ্বিভূতিমৎসত্ত্বং শ্রীমদূর্জিতমেব বা ।
তত্তদেবাবগচ্ছ ৎবং মম তেজোংশসম্ভবম্ ॥ ১০-৪১॥
যৎ যৎ লোকে বিভূতি-মৎ বিভূতি-যুক্তং সত্ত্বং বস্তু শ্রী-মৎ
ঊর্জিতং এব বা শ্রীঃ লক্ষ্মীঃ তয়াঃ সহিতং উৎসাহ-উপেতং বা, তৎ-তৎ
এব অবগচ্ছ ৎবং জানীহি মম ঈশ্বরস্য তেজো-অংশ-সম্ভবং তেজসঃ
অংশঃ এক-দেশঃ সম্ভবঃ যস্য তৎ তেজোংশ-সম্ভবং ইতি অবগচ্ছ
ৎবম্ ॥
অথবা বহুনৈতেন কিং জ্ঞাতেন তবার্জুন ।
বিষ্টভ্যাহমিদং কৃৎস্নং একাংশেন স্থিতো জগৎ ॥ ১০-৪২॥
অথবা বহুনা এতেন এবম্-আদিনা কিং জ্ঞাতেন তব অর্জুন স্যাৎ
স-অবশেষেণ । অশেষতঃ ৎবং উচ্যমানং অর্থং শৃণু —
বিষ্টভ্য বিশেষতঃ স্তম্ভনং দৃঢং কৃৎবা ইদং কৃৎস্নং জগৎ
এক-অংশেন এক-অবয়বেন এক-পাদেন, সর্ব-ভূত-স্বরূপেণ ইতি
এতৎ; তথা চ মন্ত্র-বর্ণঃ — ॒`পাদঃ অস্য বিশ্বা ভূতানি”
(ঋ. ১০-৮-৯০-৩) ইতি; স্থিতঃ অহং ইতি ॥
ওঁ তৎসদিতি শ্রীমদ্-ভগবদ্গীতাসু উপনিষৎসু ব্রহ্ম-বিদ্যায়াং
যোগ-শাস্ত্রে শ্রী-কৃষ্ণ-অর্জুন-সংবাদে বিভূতি-যোগঃ নাম দশমঃ
অধ্যায়ঃ ॥১০॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে বিভূতি-যোগঃ নাম দশমোঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ একাদশোঽধ্যায়ঃ ॥
ভগবতো বিভূতয় উক্তাঃ । তত্র চ “বিষ্টভ্যাহমিদং
কৃৎস্নমেকাংশেন স্থিতো জগৎ” (ভ. গী. ১০-৪২) ইতি ভগবতা অভিহিতং
শ্রুৎবা, যৎ জগদাত্মরূপং আদ্যমৈশ্বরং তৎ সাক্ষাৎকর্তুমিচ্ছন্, অর্জুন
উবাচ — অর্জুন উবাচ —
মদনুগ্রহায় পরমং গুহ্যমধ্যাত্মসংজ্ঞিতম্ ।
যত্ত্বয়োক্তং বচস্তেন মোহোঽয়ং বিগতো মম ॥ ১১-১॥
মদনুগ্রহায় মমানুগ্রহার্থং পরমং নিরতিশয়ং গুহ্যং গোপ্যং
অধ্যাত্মসংজ্ঞিতম্ আত্মানাত্মবিবেকবিষয়ং যৎ ৎবয়া উক্তং বচঃ বাক্যং
তেন তে বচসা মোহঃ অয়ং বিগতঃ মম, অবিবেকবুদ্ধিঃ অপগতা ইত্যর্থঃ ॥
কিঞ্চ —
ভবাপ্যযৌ হি ভূতানাং শ্রুতৌ বিস্তরশো ময়া ।
ৎবত্তঃ কমলপত্রাক্ষ মাহাত্ম্যমপি চাব্যযম্ ॥ ১১-২॥
ভবঃ উৎপত্তিঃ অপ্যযঃ প্রলয়ঃ তৌ ভবাপ্যযৌ হি ভূতানাং
শ্রুতৌ বিস্তরশঃ ময়া, ন সঙ্ক্ষেপতঃ, ৎবত্তঃ ৎবৎসকাশাৎ,
কমলপত্রাক্ষ কমলস্য পত্রং কমলপত্রং তদ্বৎ অক্ষিণী যস্য তব
স ৎবং কমলপত্রাক্ষঃ হে কমলপত্রাক্ষ, মহাত্মনঃ ভাবঃ
মাহাত্ম্যমপি চ অব্যযং অক্ষয়ম্ “শ্রুতম্” ইতি অনুবর্ততে ॥
এবমেতদ্যথাত্থ ৎবমাত্মানং পরমেশ্বর ।
দ্রষ্টুমিচ্ছামি তে রূপমৈশ্বরং পুরুষোত্তম ॥ ১১-৩॥
এবমেতৎ নান্যথা যথা যেন প্রকারেণ আত্থ কথয়সি
ৎবং আত্মানং পরমেশ্বর । তথাপি দ্রষ্টুমিচ্ছামি তে তব
জ্ঞানৈশ্বর্যশক্তিবলবীর্যতেজোভিঃ সম্পন্নং ঐশ্বরং বৈষ্ণবং
রূপং পুরুষোত্তম ॥
মন্যসে যদি তচ্ছক্যং ময়া দ্রষ্টুমিতি প্রভো ।
যোগেশ্বর ততো মে ৎবং দর্শয়াত্মানমব্যযম্ ॥ ১১-৪॥
মন্যসে চিন্তয়সি যদি ময়া অর্জুনেন তৎ শক্যং দ্রষ্টুং ইতি প্রভো,
স্বামিন্, যোগেশ্বর যোগিনো যোগাঃ, তেষাং ঈশ্বরঃ যোগেশ্বরঃ, হে
যোগেশ্বর । যস্মাৎ অহং অতীব অর্থী দ্রষ্টুম্, ততঃ তস্মাৎ মে মদর্থং
দর্শয় ৎবং আত্মানম্ অব্যযম্ ॥ এবং চোদিতঃ অর্জুনেন ভগবান্ উবাচ —
শ্রীভগবানুবাচ —
পশ্য মে পার্থ রূপাণি শতশোঽথ সহস্রশঃ ।
নানাবিধানি দিব্যানি নানাবর্ণাকৃতীনি চ ॥ ১১-৫॥
পশ্য মে পার্থ, রূপাণি শতশঃ অথ সহস্রশঃ, অনেকশঃ
ইত্যর্থঃ । তানি চ নানাবিধানি অনেকপ্রকারাণি দিবি ভবানি দিব্যানি
অপ্রাকৃতানি নানাবর্ণাকৃতীনি চ নানা বিলক্ষণাঃ নীলপীতাদিপ্রকারাঃ
বর্ণাঃ তথা আকৃতয়শ্চ অবয়বসংস্থানবিশেষাঃ যেষাং রূপাণাং
তানি নানাবর্ণাকৃতীনি চ ॥
পশ্যাদিত্যান্বসূন্রুদ্রানশ্বিনৌ মরুতস্তথা ।
বহূন্যদৃষ্টপূর্বাণি পশ্যাশ্চর্যাণি ভারত ॥ ১১-৬॥
পশ্য আদিত্যান্ দ্বাদশ, বসূন্ অষ্টৌ, রুদ্রান্ একাদশ, অশ্বিনৌ
দ্বৌ, মরুতঃ সপ্ত সপ্ত গণাঃ যে তান্ । তথা চ বহূনি অন্যান্যপি
অদৃষ্টপূর্বাণি মনুষ্যলোকে ৎবয়া, ৎবত্তঃ অন্যেন বা কেনচিৎ,
পশ্য আশ্চর্যাণি অদ্ভুতানি ভারত ॥ ন কেবলং এতাবদেব —
ইহৈকস্থং জগৎকৃৎস্নং পশ্যাদ্য সচরাচরম্ ।
মম দেহে গুডাকেশ যচ্চান্যদ্দ্রষ্টুমিচ্ছসি ॥ ১১-৭॥
ইহ একস্থম্ একস্মিন্নেব স্থিতং জগৎ কৃৎস্নং সমস্তং পশ্য অদ্য
ইদানীং সচরাচরং সহ চরেণ অচরেণ চ বর্ততে মম দেহে গুডাকেশ ।
যচ্চ অন্যৎ জয়পরাজয়াদি, যৎ শঙ্কসে, “যদ্বা জয়েম যদি
বা নো জয়েয়ুঃ” (ভ. গী. ২-৬) ইতি যৎ অবোচঃ, তদপি দ্রষ্টুং
যদি ইচ্ছসি ॥ কিং তু —
ন তু মাং শক্যসে দ্রষ্টুমনেনৈব স্বচক্ষুষা । দিব্যং দদামি তে
চক্ষুঃ পশ্য মে যোগমৈশ্বরম্ ॥ ১১-৮॥
ন তু মাং বিশ্বরূপধরং শক্যসে দ্রষ্টুং অনেনৈব প্রাকৃতেন
স্বচক্ষুষা স্বকীয়েন চক্ষুষা । যেন তু শক্যসে দ্রষ্টুং দিব্যেন,
তৎ দিব্যং দদামি তে তুভ্যং চক্ষুঃ । তেন পশ্য মে যোগং ঐশ্বরং
ঈশ্বরস্য মম ঐশ্বরং
যোগং যোগশক্ত্যতিশয়ং ইত্যর্থঃ ॥
সঞ্জয় উবাচ —
এবমুক্ত্বা ততো রাজন্মহায়োগেশ্বরো হরিঃ ।
দর্শয়ামাস পার্থায় পরমং রূপমৈশ্বরম্ ॥ ১১-৯॥
এবং যথোক্তপ্রকারেণ উক্ত্বা ততঃ অনন্তরং রাজন্ ধৃতরাষ্ট্র,
মহায়োগেশ্বরঃ মহাংশ্চ অসৌ যোগেশ্বরশ্চ হরিঃ নারায়ণঃ
দর্শয়ামাস দর্শিতবান্ পার্থায় পৃথাসুতায় পরমং রূপং বিশ্বরূপং
ঐশ্বরম্ ॥
অনেকবক্ত্রনয়নমনেকাদ্ভুতদর্শনম্ ।
অনেকদিব্যাভরণং দিব্যানেকোদ্যতায়ুধম্ ॥ ১১-১০॥
অনেকবক্ত্রনয়নম্ অনেকানি বক্ত্রাণি নয়নানি চ যস্মিন্ রূপে
তৎ অনেকবক্ত্রনয়নম্, অনেকাদ্ভুতদর্শনং অনেকানি অদ্ভুতানি
বিস্মাপকানি দর্শনানি যস্মিন্ রূপে তৎ অনেকাদ্ভুতদর্শনং রূপম্,
তথা অনেকদিব্যাভরণং অনেকানি দিব্যানি আভরণানি যস্মিন্ তৎ
অনেকদিব্যাভরণম্, তথা দিব্যানেকোদ্যতায়ুধং দিব্যানি অনেকানি
অস্যাদীনি উদ্যতানি আয়ুধানি যস্মিন্ তৎ দিব্যানেকোদ্যতায়ুধম্,
“দর্শয়ামাস” ইতি পূর্বেণ সম্বন্ধঃ ॥ কিঞ্চ —
দিব্যমাল্যাম্বরধরং দিব্যগন্ধানুলেপনম্ ।
সর্বাশ্চর্যময়ং দেবমনন্তং বিশ্বতোমুখম্ ॥ ১১-১১॥
দিব্যমাল্যাম্বরধরং দিব্যানি মাল্যানি পুষ্পাণি অম্বরাণি বস্ত্রাণি চ
ধ্রিয়ন্তে যেন ঈশ্বরেণ তং দিব্যমাল্যাম্বরধরম্, দিব্যগন্ধানুলেপনং
দিব্যং গন্ধানুলেপনং যস্য তং দিব্যগন্ধানুলেপনম্, সর্বাশ্চর্যময়ং
সর্বাশ্চর্যপ্রায়ং দেবং অনন্তং ন অস্য অন্তঃ অস্তি ইতি অনন্তঃ তম্,
বিশ্বতোমুখং সর্বতোমুখং সর্বভূতাত্মভূতৎবাৎ, তং দর্শয়ামাস ।
“অর্জুনঃ দদর্শ” ইতি বা অধ্যাহ্রিয়তে ॥ যা পুনর্ভগবতঃ
বিশ্বরূপস্য ভাঃ, তস্যা উপমা উচ্যতে —
দিবি সূর্যসহস্রস্য ভবেদ্যুগপদুত্থিতা ।
যদি ভাঃ সদৃশী সা স্যাদ্ভাসস্তস্য মহাত্মনঃ ॥ ১১-১২॥
দিবি অন্তরিক্ষে তৃতীয়স্যাং বা দিবি সূর্যাণাং সহস্রং সূর্যসহস্রং
তস্য যুগপদুত্থিতস্য সূর্যসহস্রস্য যা যুগপদুত্থিতা ভাঃ, সা যদি,
সদৃশী স্যাৎ তস্য মহাত্মনঃ বিশ্বরূপস্যৈব ভাসঃ । যদি বা ন স্যাৎ,
ততঃ বিশ্বরূপস্যৈব ভাঃ অতিরিচ্যতে ইত্যভিপ্রায়ঃ ॥ কিঞ্চ —
তত্রৈকস্থং জগৎকৃৎস্নং প্রবিভক্তমনেকধা ।
অপশ্যদ্দেবদেবস্য শরীরে পাণ্ডবস্তদা ॥ ১১-১৩॥
তত্র তস্মিন্ বিশ্বরূপে একস্মিন্ স্থিতং একস্থং জগৎ কৃৎস্নং
প্রবিভক্তং অনেকধা দেবপিতৃমনুষ্যাদিভেদৈঃ অপশ্যৎ দৃষ্টবান্
দেবদেবস্য হরেঃ শরীরে পাণ্ডবঃ অর্জুনঃ তদা ॥
ততঃ স বিস্ময়াবিষ্টো হৃষ্টরোমা ধনঞ্জয়ঃ ।
প্রণম্য শিরসা দেবং কৃতাঞ্জলিরভাষত ॥ ১১-১৪॥
ততঃ তং দৃষ্ট্বা সঃ বিস্ময়েন আবিষ্টঃ বিস্ময়াবিষ্টঃ হৃষ্টানি
রোমাণি যস্য সঃ অয়ং হৃষ্টরোমা চ অভবৎ ধনঞ্জয়ঃ ।
প্রণম্য প্রকর্ষেণ নমনং কৃৎবা প্রহ্বীভূতঃ সন্ শিরসা দেবং
বিশ্বরূপধরং কৃতাঞ্জলিঃ নমস্কারার্থং সম্পুটীকৃতহস্তঃ সন্
অভাষত উক্তবান্ ॥ কথম্? যৎ ৎবয়া দর্শিতং বিশ্বরূপম্, তৎ অহং
পশ্যামীতি স্বানুভবমাবিষ্কুর্বন্ অর্জুন উবাচ —
অর্জুন উবাচ —
পশ্যামি দেবাংস্তব দেব দেহে সর্বাংস্তথা ভূতবিশেষসঙ্ঘান্ ।
ব্রহ্মাণমীশং কমলাসনস্থমৃষীংশ্চ সর্বানুরগাংশ্চ দিব্যান্ ॥ ১১-১৫॥
পশ্যামি উপলভে হে দেব, তব দেহে দেবান্ সর্বান্,
তথা ভূতবিশেষসঙ্ঘান্ ভূতবিশেষাণাং স্থাবরজঙ্গমানাং
নানাসংস্থানবিশেষাণাং সঙ্ঘাঃ ভূতবিশেষসঙ্ঘাঃ তান্, কিঞ্চ
— ব্রহ্মাণং চতুর্মুখং ঈশং ঈশিতারং প্রজানাং কমলাসনস্থং
পৃথিবীপদ্মমধ্যে মেরুকর্ণিকাসনস্থমিত্যর্থঃ, ঋষীংশ্চ বসিষ্ঠাদীন্
সর্বান্, উরগাংশ্চ বাসুকিপ্রভৃতীন্ দিব্যান্ দিবি ভবান্ ॥
অনেকবাহূদরবক্ত্রনেত্রং পশ্যামি ৎবা সর্বতোঽনন্তরূপম্ ।
নান্তং ন মধ্যং ন পুনস্তবাদিং পশ্যামি বিশ্বেশ্বর বিশ্বরূপ ॥ ১১-১৬॥
অনেকবাহূদরবক্ত্রনেত্রং অনেকে বাহবঃ উদরাণি বক্ত্রাণি নেত্রাণি চ
যস্য তব সঃ ৎবং অনেকবাহূদরবক্ত্রনেত্রঃ তং অনেকবাহূদরবক্ত্রনেত্রম্ ।
পশ্যামি ৎবা ৎবাং সর্বতঃ সর্বত্র অনন্তরূপং অনন্তানি রূপাণি অস্য ইতি
অনন্তরূপঃ তং অনন্তরূপম্ । ন অন্তম্, অন্তঃ অবসানম্, ন মধ্যম্, মধ্যং
নাম দ্বয়োঃ কোট্যোঃ অন্তরম্, ন পুনঃ তব আদিং — ন দেবস্য অন্তং পশ্যামি,
ন মধ্যং পশ্যামি, ন পুনঃ আদিং পশ্যামি, হে বিশ্বেশ্বর বিশ্বরূপ ॥
কিঞ্চ —
কিরীটিনং গদিনং চক্রিণং চ তেজোরাশিং সর্বতোদীপ্তিমন্তম্ ।
পশ্যামি ৎবাং দুর্নিরীক্ষ্যং সমন্তাদ্দীপ্তানলার্কদ্যুতিমপ্রমেয়ম্ ॥ ১১-১৭॥
কিরীটিনং কিরীটং নাম শিরোভূষণবিশেষঃ তৎ যস্য অস্তি সঃ
কিরীটী তং কিরীটিনম্, তথা গদিনং গদা অস্য বিদ্যতে ইতি গদী তং
গদিনম্, তথা চক্রিণং চক্রং অস্য অস্তীতি চক্রী তং চক্রিণং চ,
তেজোরাশিং তেজঃপুঞ্জং সর্বতোদীপ্তিমন্তং সর্বতোদীপ্তিঃ অস্য অস্তীতি
সর্বতোদীপ্তিমান্, তং সর্বতোদীপ্তিমন্তং পশ্যামি ৎবাং দুর্নিরীক্ষ্যং
দুঃখেন নিরীক্ষ্যঃ দুর্নিরীক্ষ্যঃ তং দুর্নিরীক্ষ্যং সমন্তাৎ সমন্ততঃ
সর্বত্র দীপ্তানলার্কদ্যুতিং অনলশ্চ অর্কশ্চ অনলার্কৌ দীপ্তৌ
অনলার্কৌ দীপ্তানলার্কৌ তয়োঃ দীপ্তানলার্কয়োঃ দ্যুতিরিব দ্যুতিঃ তেজঃ যস্য
তব স ৎবং দীপ্তানলার্কদ্যুতিঃ তং ৎবাং দীপ্তানলার্কদ্যুতিম্, অপ্রমেয়ং
ন প্রমেয়ম্ অশক্যপরিচ্ছেদং ইত্যেতৎ ॥ ইত এব তে যোগশক্তিদর্শনাৎ
অনুমিনোমি —
ৎবমক্ষরং পরমং বেদিতব্যং ৎবমস্য বিশ্বস্য পরং নিধানম্ ।
ৎবমব্যযঃ শাশ্বতধর্মগোপ্তা সনাতনস্ত্বং পুরুষো মতো মে ॥ ১১-১৮॥
ৎবং অক্ষরং ন ক্ষরতীতি, পরমং ব্রহ্ম বেদিতব্যং জ্ঞাতব্যং
মুমুক্ষুভিঃ । ৎবং অস্য বিশ্বস্য সমস্তস্য জগতঃ পরং প্রকৃষ্টং
নিধানং নিধীয়তে অস্মিন্নিতি নিধানং পরঃ আশ্রয়ঃ ইত্যর্থঃ । কিঞ্চ,
ৎবং অব্যযঃ ন তব ব্যযো বিদ্যতে ইতি অব্যযঃ, শাশ্বতধর্মগোপ্তা
শশ্বদ্ভবঃ শাশ্বতঃ নিত্যঃ ধর্মঃ তস্য গোপ্তা শাশ্বতধর্মগোপ্তা ।
সনাতনঃ চিরন্তনঃ ৎবং পুরুষঃ পরমঃ মতঃ অভিপ্রেতঃ মে মম ॥
কিঞ্চ —
অনাদিমধ্যান্তমনন্তবীর্যমনন্তবাহুং শশিসূর্যনেত্রম্ ।
পশ্যামি ৎবাং দীপ্তহুতাশবক্ত্রং স্বতেজসা বিশ্বমিদং তপন্তম্ ॥ ১১-১৯॥
অনাদিমধ্যান্তং আদিশ্চ মধ্যং চ অন্তশ্চ ন বিদ্যতে যস্য সঃ
অয়ং অনাদিমধ্যান্তঃ তং ৎবাং অনাদিমধ্যান্তম্, অনন্তবীর্যং ন তব
বীর্যস্য অন্তঃ অস্তি ইতি অনন্তবীর্যঃ তং ৎবাং অনন্তবীর্যম্, তথা
অনন্তবাহুম্ অনন্তাঃ বাহবঃ যস্য তব সঃ ৎবম্, অনন্তবাহুঃ তং ৎবাং
অনন্তবাহুম্, শশিসূর্যনেত্রং শশিশূর্যৌ নেত্রে যস্য তব সঃ
ৎবং শশিসূর্যনেত্রঃ তং ৎবাং শশিসূর্যনেত্রং চন্দ্রাদিত্যনয়নম্,
পশ্যামি ৎবাং দীপ্তহুতাশবক্ত্রং দীপ্তশ্চ অসৌ হুতাশশ্চ বক্ত্রং
যস্য তব সঃ ৎবং দীপ্তহুতাশবক্ত্রঃ তং ৎবাং দীপ্তহুতাশবক্ত্রম্,
স্বতেজসা বিশ্বং ইদং সমস্তং তপন্তম্ ॥
দ্যাবাপৃথিব্যোরিদমন্তরং হি ব্যাপ্তং ৎবয়ৈকেন দিশশ্চ সর্বাঃ ।
দৃষ্ট্বাদ্ভুতং রূপমিদং তবোগ্রং লোকত্রয়ং প্রব্যথিতং মহাত্মন্ ॥ ১১-২০॥
দ্যাবাপৃথিব্যোঃ ইদং অন্তরং হি অন্তরিক্ষং ব্যাপ্তং ৎবয়া
একেন বিশ্বরূপধরেণ দিশশ্চ সর্বাঃ ব্যাপ্তাঃ । দৃষ্ট্বা উপলভ্য
অদ্ভুতং বিস্মাপকং রূপং ইদং তব উগ্রং ক্রূরং লোকানাং ত্রয়ং লোকত্রয়ং
প্রব্যথিতং ভীতং প্রচলিতং বা হে মহাত্মন্ অক্ষুদ্রস্বভাব ॥ অথ
অধুনা পুরা “যদ্বা জয়েম যদি বা নো জয়েয়ুঃ” (ভ. গী. ২-৬)
ইতি অর্জুনস্য যঃ সংশয়ঃ আসীৎ, তন্নির্ণয়ায় পাণ্ডবজয়ং ঐকান্তিকং
দর্শয়ামি ইতি প্রবৃত্তো ভগবান্ । তং পশ্যন্ আহ — কিঞ্চ —
অমী হি ৎবা সুরসঙ্ঘা বিশন্তি কেচিদ্ভীতাঃ প্রাঞ্জলয়ো গৃণন্তি ।
স্বস্তীত্যুক্ত্বা মহর্ষিসিদ্ধসঙ্ঘাঃ স্তুবন্তি ৎবাং স্তুতিভিঃ পুষ্কলাভিঃ ॥ ১১-২১॥
অমী হি যুধ্যমানা যোদ্ধারঃ ৎবা ৎবাং সুরসঙ্ঘাঃ যে অত্র
ভূভারাবতারায় অবতীর্ণাঃ বস্বাদিদেবসঙ্ঘাঃ মনুষ্যসংস্থানাঃ ৎবাং
বিশন্তি প্রবিশন্তঃ দৃশ্যন্তে । তত্র কেচিৎ ভীতাঃ প্রাঞ্জলয়ঃ
সন্তো গৃণন্তি স্তুবন্তি ৎবাং অন্যে পলায়নেঽপি অশক্তাঃ সন্তঃ । যুদ্ধে
প্রত্যুপস্থিতে উৎপাতাদিনিমিত্তানি উপলক্ষ্য স্বস্তি অস্তু জগতঃ ইতি উক্ত্বা
মহর্ষিসিদ্ধসঙ্ঘাঃ মহর্ষীণাং সিদ্ধানাং চ সঙ্ঘাঃ স্তুবন্তি ৎবাং
স্তুতিভিঃ পুষ্কলাভিঃ সম্পূর্ণাভিঃ ॥ কিঞ্চান্যৎ —
রুদ্রাদিত্যা বসবো যে চ সাধ্যা বিশ্বেঽশ্বিনৌ মরুতশ্চোষ্মপাশ্চ ।
গন্ধর্বয়ক্ষাসুরসিদ্ধসঙ্ঘা বীক্ষন্তে ৎবাং বিস্মিতাশ্চৈব সর্বে ॥ ১১-২২॥
রুদ্রাদিত্যাঃ বসবো যে চ সাধ্যাঃ রুদ্রাদয়ঃ গণাঃ
বিশ্বেদেবাঃ অশ্বিনৌ চ দেবৌ মরুতশ্চ ঊষ্মপাশ্চ পিতরঃ,
গন্ধর্বয়ক্ষাসুরসিদ্ধসঙ্ঘাঃ গন্ধর্বাঃ হাহাহূহূপ্রভৃতয়ঃ যক্ষাঃ
কুবেরপ্রভৃতয়ঃ অসুরাঃ বিরোচনপ্রভৃতয়ঃ সিদ্ধাঃ কপিলাদয়ঃ
তেষাং সঙ্ঘাঃ গন্ধর্বয়ক্ষাসুরসিদ্ধসঙ্ঘাঃ, তে বীক্ষন্তে পশ্যন্তি
ৎবাং বিস্মিতাঃ বিস্ময়মাপন্নাঃ সন্তঃ তে এব সর্বে ॥ যস্মাৎ —
রূপং মহত্তে বহুবক্ত্রনেত্রং মহাবাহো বহুবাহূরুপাদম্ ।
বহূদরং বহুদংষ্ট্রাকরালং দৃষ্ট্বা লোকাঃ প্রব্যথিতাস্তথাহম্ ॥ ১১-২৩॥
রূপং মহৎ অতিপ্রমাণং তে তব বহুবক্ত্রনেত্রং বহূনি বক্ত্রাণি
মুখানি নেত্রাণি চক্ষূংষি চ যস্মিন্ তৎ রূপং বহুবক্ত্রনেত্রম্,
হে মহাবাহো, বহুবাহূরুপাদং বহবো বাহবঃ ঊরবঃ পাদাশ্চ যস্মিন্
রূপে তৎ বহুবাহূরুপাদম্, কিঞ্চ, বহূদরং বহূনি উদরাণি যস্মিন্নিতি
বহূদরম্, বহুদংষ্ট্রাকরালং বহ্বীভিঃ দংষ্ট্রাভিঃ করালং বিকৃতং
তৎ বহুদংষ্ট্রাকরালম্, দৃষ্ট্বা রূপং ঈদৃশং লোকাঃ লৌকিকাঃ
প্রাণিনঃ প্রব্যথিতাঃ প্রচলিতাঃ ভয়েন; তথা অহমপি ॥ তত্রেদং
কারণং —
নভঃস্পৃশং দীপ্তমনেকবর্ণং ব্যাত্তাননং দীপ্তবিশালনেত্রম্ ।
দৃষ্ট্বা হি ৎবাং প্রব্যথিতান্তরাত্মা ধৃতিং ন বিন্দামি শমং চ
বিষ্ণো ॥ ১১-২৪॥
নভঃস্পৃশং দ্যুস্পর্শং ইত্যর্থঃ, দীপ্তং প্রজ্বলিতম্,
অনেকবর্ণং অনেকে বর্ণাঃ ভয়ঙ্করাঃ নানাসংস্থানাঃ যস্মিন্ ৎবয়ি তং ৎবাম্
অনেকবর্ণম্, ব্যাত্তাননং ব্যাত্তানি বিবৃতানি আননানি মুখানি যস্মিন্ ৎবয়ি
তং ৎবাং ব্যাত্তাননম্, দীপ্তবিশালনেত্রং দীপ্তানি প্রজ্বলিতানি বিশালানি
বিস্তীর্ণানি নেত্রাণি যস্মিন্ ৎবয়ি তং ৎবাং দীপ্তবিশালনেত্রং দৃষ্ট্বা হি
ৎবাং প্রব্যথিতান্তরাত্মা প্রব্যথিতঃ প্রভীতঃ অন্তরাত্মা মনঃ যস্য
মম সঃ অহং প্রব্যথিতান্তরাত্মা সন্ ধৃতিং ধৈর্যং ন বিন্দামি ন
লভে শমং চ উপশমনং মনস্তুষ্টিং হে বিষ্ণো ॥ কস্মাৎ —
দংষ্ট্রাকরালানি চ তে মুখানি দৃষ্ট্বৈব কালানলসন্নিভানি ।
দিশো ন জানে ন লভে চ শর্ম প্রসীদ দেবেশ জগন্নিবাস ॥ ১১-২৫॥
দংষ্ট্রাকরালানি দংষ্ট্রাভিঃ করালানি বিকৃতানি তে তব মুখানি
দৃষ্ট্বৈব উপলভ্য কালানলসন্নিভানি প্রলয়কালে লোকানাং দাহকঃ
অগ্নিঃ কালানলঃ তৎসদৃশানি কালানলসন্নিভানি মুখানি দৃষ্ট্বেত্যেতৎ ।
দিশঃ পূর্বাপরবিবেকেন ন জানে দিঙ্মূঢো জাতঃ অস্মি । অতঃ ন লভে চ
ন উপলভে চ শর্ম সুখম্ । অতঃ প্রসীদ প্রসন্নো ভব হে দেবেশ,
জগন্নিবাস ॥ যেভ্যো মম পরাজয়াশঙ্কা যা আসীৎ সা চ অপগতা । যতঃ —
অমী চ ৎবাং ধৃতরাষ্ট্রস্য পুত্রাঃ সর্বে সহৈবাবনিপালসঙ্ঘৈঃ ।
ভীষ্মো দ্রোণঃ সূতপুত্রস্তথাসৌ সহাস্মদীয়ৈরপি যোধমুখ্যৈঃ ॥ ১১-২৬॥
অমী চ ৎবাং ধৃতরাষ্ট্রস্য পুত্রাঃ দুর্যোধনপ্রভৃতয়ঃ
— “ৎবরমাণাঃ বিশন্তি” ইতি ব্যবহিতেন সম্বন্ধঃ — সর্বে
সহৈব সহিতাঃ অবনিপালসঙ্ঘৈঃ অবনিং পৃথ্বীং পালয়ন্তীতি অবনিপালাঃ
তেষাং সঙ্ঘৈঃ, কিঞ্চ ভীষ্মো দ্রোণঃ সূতপুত্রঃ কর্ণঃ তথা অসৌ সহ
অস্মদীয়ৈরপি ধৃষ্টদ্যুম্নপ্রভৃতিভিঃ যোধমুখ্যৈঃ যোধানাং মুখ্যৈঃ
প্রধানৈঃ সহ ॥ কিঞ্চ —
বক্ত্রাণি তে ৎবরমাণা বিশন্তি দংষ্ট্রাকরালানি ভয়ানকানি ।
কেচিদ্বিলগ্না দশনান্তরেষু সন্দৃশ্যন্তে চূর্ণিতৈরুত্তমাঙ্গৈঃ ॥ ১১-২৭॥
বক্ত্রাণি মুখানি তে তব ৎবরমাণাঃ ৎবরায়ুক্তাঃ সন্তঃ বিশন্তি,
কিংবিশিষ্টানি মুখানি? দংষ্ট্রাকরালানি ভয়ানকানি ভয়ঙ্করাণি । কিঞ্চ,
কেচিৎ মুখানি প্রবিষ্টানাং মধ্যে বিলগ্নাঃ দশনান্তরেষু মাংসমিব
ভক্ষিতং সন্দৃশ্যন্তে উপলভ্যন্তে চূর্ণিতৈঃ চূর্ণীকৃতৈঃ উত্তমাঙ্গৈঃ
শিরোভিঃ ॥ কথং প্রবিশন্তি মুখানি ইত্যাহ —
যথা নদীনাং বহবোঽম্বুবেগাঃ সমুদ্রমেবাভিমুখা দ্রবন্তি ।
তথা তবামী নরলোকবীরা বিশন্তি বক্ত্রাণ্যভিবিজ্বলন্তি ॥ ১১-২৮॥
যথা নদীনাং স্রবন্তীনাং বহবঃ অনেকে অম্বূনাং বেগাঃ অম্বুবেগাঃ ৎবরাবিশেষাঃ
সমুদ্রমেব অভিমুখাঃ প্রতিমুখাঃ দ্রবন্তি প্রবিশন্তি, তথা তদ্বৎ তব অমী
ভীষ্মাদয়ঃ নরলোকবীরাঃ মনুষ্যলোকে শূরাঃ বিশন্তি বক্ত্রাণি অভিবিজ্বলন্তি
প্রকাশমানানি ॥ তে কিমর্থং প্রবিশন্তি কথং চ ইত্যাহ —
যথা প্রদীপ্তং জ্বলনং পতঙ্গা বিশন্তি নাশায় সমৃদ্ধবেগাঃ ।
তথৈব নাশায় বিশন্তি লোকাস্তবাপি বক্ত্রাণি সমৃদ্ধবেগাঃ ॥ ১১-২৯॥
যথা প্রদীপ্তং জ্বলনং অগ্নিং পতঙ্গাঃ পক্ষিণঃ বিশন্তি নাশায় বিনাশায়
সমৃদ্ধবেগাঃ সমৃদ্ধঃ উদ্ভূতঃ বেগঃ গতিঃ যেষাং তে সমৃদ্ধবেগাঃ,
তথৈব নাশায় বিশন্তি লোকাঃ প্রাণিনঃ তবাপি বক্ত্রাণি সমৃদ্ধবেগাঃ ॥
ৎবং পুনঃ —
লেলিহ্যসে গ্রসমানঃ সমন্তাল্লোকান্সমগ্রান্বদনৈর্জ্বলদ্ভিঃ ।
তেজোভিরাপূর্য জগৎসমগ্রং ভাসস্তবোগ্রাঃ প্রতপন্তি বিষ্ণো ॥ ১১-৩০॥
লেলিহ্যসে আস্বাদয়সি গ্রসমানঃ অন্তঃ প্রবেশয়ন্ সমন্তাৎ সমন্ততঃ
লোকান্ সমগ্রান্ সমস্তান্ বদনৈঃ বক্ত্রৈঃ জ্বলদ্ভিঃ দীপ্যমানৈঃ তেজোভিঃ
আপূর্য সংব্যাপ্য জগৎ সমগ্রং সহ অগ্রেণ সমস্তং ইত্যেতৎ । কিঞ্চ,
ভাসঃ দীপ্তয়ঃ তব উগ্রাঃ ক্রূরাঃ প্রতপন্তি প্রতাপং কুর্বন্তি হে বিষ্ণো
ব্যাপনশীল ॥ যতঃ এবমুগ্রস্বভাবঃ, অতঃ —
আখ্যাহি মে কো ভবানুগ্ররূপো নমোঽস্তু তে দেববর প্রসীদ ।
বিজ্ঞাতুমিচ্ছামি ভবন্তমাদ্যং ন হি প্রজানামি তব প্রবৃত্তিম্ ॥ ১১-৩১॥
আখ্যাহি কথয় মে মহ্যং কঃ ভবান্ উগ্ররূপঃ ক্রূরাকারঃ, নমঃ অস্তু
তে তুভ্যং হে দেববর দেবানাং প্রধান, প্রসীদ প্রসাদং কুরু । বিজ্ঞাতুং
বিশেষেণ জ্ঞাতুং ইচ্ছামি ভবন্তং আদ্যং আদৌ ভবং আদ্যম্, ন হি যস্মাৎ
প্রজানামি তব ৎবদীয়াং প্রবৃত্তিং চেষ্টাম্ ॥
শ্রীভগবানুবাচ —
কালোঽস্মি লোকক্ষয়কৃৎপ্রবৃদ্ধো লোকান্সমাহর্তুমিহ প্রবৃত্তঃ ।
ঋতেঽপি ৎবা ন ভবিষ্যন্তি সর্বে যেঽবস্থিতাঃ প্রত্যনীকেষু যোধাঃ ॥ ১১-৩২॥
কালঃ অস্মি লোকক্ষয়কৃৎ লোকানাং ক্ষয়ং করোতীতি লোকক্ষয়কৃৎ
প্রবৃদ্ধঃ বৃদ্ধিং গতঃ । যদর্থং প্রবৃদ্ধঃ তৎ শৃণু —
লোকান্ সমাহর্তুং সংহর্তুং ইহ অস্মিন্ কালে প্রবৃত্তঃ । ঋতেঽপি বিনাপি
ৎবা ৎবাং ন ভবিষ্যন্তি ভীষ্মদ্রোণকর্ণপ্রভৃতয়ঃ সর্বে, যেভ্যঃ
তব আশঙ্কা, যে অবস্থিতাঃ প্রত্যনীকেষু অনীকমনীকং প্রতি প্রত্যনীকেষু
প্রতিপক্ষভূতেষু অনীকেষু যোধাঃ যোদ্ধারঃ ॥ যস্মাৎ এবং —
তস্মাত্ত্বমুত্তিষ্ঠ যশো লভস্ব জিৎবা শত্রূন্ভুঙ্ক্ষ্ব রাজ্যং সমৃদ্ধম্ ।
ময়ৈবৈতে নিহতাঃ পূর্বমেব নিমিত্তমাত্রং ভব সব্যসাচিন্ ॥ ১১-৩৩॥
তস্মাৎ ৎবং উত্তিষ্ঠ “ভীষ্মপ্রভৃতয়ঃ অতিরথাঃ অজেয়াঃ দেবৈরপি,
অর্জুনেন জিতাঃ” ইতি যশঃ লভস্ব; কেবলং পুণ্যৈঃ হি তৎ প্রাপ্যতে ।
জিৎবা শত্রূন্ দুর্যোধনপ্রভৃতীন্ ভুঙ্ক্ষ্ব রাজ্যং সমৃদ্ধং অসপত্নম্
অকণ্টকম্ । ময়া এব এতে নিহতাঃ নিশ্চয়েন হতাঃ প্রাণৈঃ বিয়োজিতাঃ পূর্বমেব ।
নিমিত্তমাত্রং ভব ৎবং হে সব্যসাচিন্, সব্যেন বামেনাপি হস্তেন শরাণাং
ক্ষেপ্তা সব্যসাচী ইতি উচ্যতে অর্জুনঃ ॥
দ্রোণং চ ভীষ্মং চ জয়দ্রথং চ কর্ণং তথান্যানপি যোধবীরান্ ।
ময়া হতাংস্ত্বং জহি মা ব্যথিষ্ঠা যুধ্যস্ব জেতাসি রণে সপত্নান্ ॥ ১১-৩৪॥
দ্রোণং চ, যেষু যেষু যোধেষু অর্জুনস্য আশঙ্কা তাংস্তান্
ব্যপদিশতি ভগবান্, ময়া হতানিতি । তত্র দ্রোণভীষ্ময়োঃ
তাবৎ প্রসিদ্ধং আশঙ্কাকারণম্ । দ্রোণস্তু ধনুর্বেদাচার্যঃ
দিব্যাস্ত্রসম্পন্নঃ, আত্মনশ্চ বিশেষতঃ গুরুঃ গরিষ্ঠঃ ।
ভীষ্মশ্চ স্বচ্ছন্দমৃত্যুঃ দিব্যাস্ত্রসম্পন্নশ্চ পরশুরামেণ
দ্বন্দ্বয়ুদ্ধং অগমৎ, ন চ পরাজিতঃ । তথা জয়দ্রথঃ, যস্য
পিতা তপঃ চরতি “মম পুত্রস্য শিরঃ ভূমৌ নিপাতয়িষ্যতি
যঃ, তস্যাপি শিরঃ পতিষ্যতি” ইতি । কর্ণোঽপি বাসবদত্তয়া
শক্ত্যা ৎবমোঘয়া সম্পন্নঃ সূর্যপুত্রঃ কানীনঃ যতঃ, অতঃ তন্নাম্নৈব
নির্দেশঃ । ময়া হতান্ ৎবং জহি নিমিত্তমাত্রেণ । মা ব্যথিষ্ঠাঃ তেভ্যঃ
ভয়ং মা কার্ষীঃ । যুধ্যস্ব জেতাসি দুর্যোধনপ্রভৃতীন্ রণে যুদ্ধে
সপত্নান্ শত্রূন্ ॥ সঞ্জয় উবাচ —
এতচ্ছ্রুৎবা বচনং কেশবস্য কৃতাঞ্জলির্বেপমানঃ কিরীটী ।
নমস্কৃৎবা ভূয় এবাহ কৃষ্ণং সগদ্গদং ভীতভীতঃ প্রণম্য ॥ ১১-৩৫॥
এতৎ শ্রুৎবা বচনং কেশবস্য পূর্বোক্তং কৃতাঞ্জলিঃ সন্
বেপমানঃ কম্পমানঃ কিরীটী নমস্কৃৎবা, ভূয়ঃ পুনঃ এব আহ উক্তবান্
কৃষ্ণং সগদ্গদং ভয়াবিষ্টস্য দুঃখাভিঘাতাৎ স্নেহাবিষ্টস্য চ
হর্ষোদ্ভবাৎ, অশ্রুপূর্ণনেত্রৎবে সতি শ্লেষ্মণা কণ্ঠাবরোধঃ;
ততশ্চ বাচঃ অপাটবং মন্দশব্দৎবং যৎ স গদ্গদঃ তেন সহ
বর্তত ইতি সগদ্গদং বচনং আহ ইতি বচনক্রিয়াবিশেষণং এতৎ ।
ভীতভীতঃ পুনঃ পুনঃ ভয়াবিষ্টচেতাঃ সন্ প্রণম্য প্রহ্বঃ
ভূৎবা, “আহ” ইতি ব্যবহিতেন সম্বন্ধঃ ॥ অত্র অবসরে
সঞ্জয়বচনং সাভিপ্রায়ম্ । কথম্? দ্রোণাদিষু অর্জুনেন নিহতেষু
অজেয়েষু চতুর্ষু, নিরাশ্রয়ঃ দুর্যোধনঃ নিহতঃ এব ইতি মৎবা
ধৃতরাষ্ট্রঃ জয়ং প্রতি নিরাশঃ সন্ সন্ধিং করিষ্যতি, ততঃ
শান্তিঃ উভয়েষাং ভবিষ্যতি ইতি । তদপি ন অশ্রৌষীৎ ধৃতরাষ্ট্রঃ
ভবিতব্যবশাৎ ॥
অর্জুন উবাচ —
স্থানে হৃষীকেশ তব প্রকীর্ত্যা জগৎপ্রহৃষ্যত্যনুরজ্যতে চ ।
রক্ষাংসি ভীতানি দিশো দ্রবন্তি সর্বে নমস্যন্তি চ সিদ্ধসঙ্ঘাঃ ॥ ১১-৩৬॥
স্থানে যুক্তম্ । কিং তৎ? তব প্রকীর্ত্যা ৎবন্মাহাত্ম্যকীর্তনেন শ্রুতেন,
হে হৃষীকেশ, যৎ জগৎ প্রহৃষ্যতি প্রহর্ষং উপৈতি, তৎ স্থানে
যুক্তম্, ইত্যর্থঃ । অথবা বিষয়বিশেষণং স্থানে ইতি । যুক্তঃ
হর্ষাদিবিষয়ঃ ভগবান্, যতঃ ঈশ্বরঃ সর্বাত্মা সর্বভূতসুহৃচ্চ
ইতি । তথা অনুরজ্যতে অনুরাগং চ উপৈতি; তচ্চ বিষয়ে ইতি
ব্যাখ্যেয়ম্ । কিঞ্চ, রক্ষাংসি ভীতানি ভয়াবিষ্টানি দিশঃ দ্রবন্তি
গচ্ছন্তি; তচ্চ স্থানে বিষয়ে । সর্বে নমস্যন্তি নমস্কুর্বন্তি
চ সিদ্ধসঙ্ঘাঃ সিদ্ধানাং সমুদায়াঃ কপিলাদীনাম্, তচ্চ স্থানে ॥
ভগবতো হর্ষাদিবিষয়ৎবে হেতুং দর্শয়তি —
কস্মাচ্চ তে ন নমেরন্মহাত্মন্গরীয়সে ব্রহ্মণোঽপ্যাদিকর্ত্রে ।
অনন্ত দেবেশ জগন্নিবাস ৎবমক্ষরং সদসত্তৎপরং যৎ ॥ ১১-৩৭॥
কস্মাচ্চ হেতোঃ তে তুভ্যং ন নমেরন্ নমস্কুর্যুঃ হে মহাত্মন্, গরীয়সে
গুরুতরায়; যতঃ ব্রহ্মণঃ হিরণ্যগর্ভস্য অপি আদিকর্তা কারণং
অতঃ তস্মাৎ আদিকর্ত্রে । কথং এতে ন নমস্কুর্যুঃ? অতঃ হর্ষাদীনাং
নমস্কারস্য চ স্থানং ৎবং অর্হঃ বিষয়ঃ ইত্যর্থঃ । হে অনন্ত দেবেশ
হে জগন্নিবাস ৎবং অক্ষরং তৎ পরম্, যৎ বেদান্তেষু শ্রূয়তে । কিং
তৎ? সদসৎ ইতি । সৎ বিদ্যমানম্, অসৎ চ যত্র নাস্তি ইতি বুদ্ধিঃ;
তে উপধানভূতে সদসতী যস্য অক্ষরস্য, যদ্বারেণ সদসতী ইতি
উপচর্যতে । পরমার্থতস্তু সদসতোঃ পরং তৎ অক্ষরং যৎ অক্ষরং
বেদবিদঃ বদন্তি । তৎ ৎবমেব, ন অন্যৎ ইতি অভিপ্রায়ঃ ॥ পুনরপি
স্তৌতি —
ৎবমাদিদেবঃ পুরুষঃ পুরাণস্ত্বমস্য বিশ্বস্য পরং নিধানম্ ।
বেত্তাসি বেদ্যং চ পরং চ ধাম ৎবয়া ততং বিশ্বমনন্তরূপ ॥ ১১-৩৮॥
ৎবং আদিদেবঃ, জগতঃ স্রষ্টৃৎবাৎ । পুরুষঃ, পুরি শয়নাৎ পুরাণঃ
চিরন্তনঃ ৎবং এব অস্য বিশ্বস্য পরং প্রকৃষ্টং নিধানং নিধীয়তে
অস্মিন্ জগৎ সর্বং মহাপ্রলয়াদৌ ইতি । কিঞ্চ, বেত্তা অসি, বেদিতা
অসি সর্বস্যৈব বেদ্যজাতস্য । যৎ চ বেদ্যং বেদনার্হং তচ্চ অসি
পরং চ ধাম পরমং পদং বৈষ্ণবম্ । ৎবয়া ততং ব্যাপ্তং বিশ্বং
সমস্তম্, হে অনন্তরূপ অন্তো ন বিদ্যতে তব রূপাণাম্ ॥ কিঞ্চ —
বায়ুর্যমোঽগ্নির্বরুণঃ শশাঙ্কঃ প্রজাপতিস্ত্বং প্রপিতামহশ্চ ।
নমো নমস্তেঽস্তু সহস্রকৃৎবঃ পুনশ্চ ভূয়োঽপি নমো নমস্তে ॥ ১১-৩৯॥
বায়ুঃ ৎবং যমশ্চ অগ্নিঃ বরুণঃ অপাং পতিঃ শশাঙ্কঃ চন্দ্রমাঃ
প্রজাপতিঃ ৎবং কশ্যপাদিঃ প্রপিতামহশ্চ পিতামহস্যাপি পিতা প্রপিতামহঃ,
ব্রহ্মণোঽপি পিতা ইত্যর্থঃ । নমো নমঃ তে তুভ্যং অস্তু সহস্রকৃৎবঃ ।
পুনশ্চ ভূয়োঽপি নমো নমঃ তে । বহুশো নমস্কারক্রিয়াভ্যাসাবৃত্তিগণনং
কৃৎবসুচা উচ্যতে । “পুনশ্চ” “ভূয়োঽপি” ইতি
শ্রদ্ধাভক্ত্যতিশয়াৎ অপরিতোষং আত্মনঃ দর্শয়তি ॥ তথা —
নমঃ পুরস্তাদথ পৃষ্ঠতস্তে নমোঽস্তু তে সর্বত এব সর্ব ।
অনন্তবীর্যামিতবিক্রমস্ত্বং সর্বং সমাপ্নোষি ততোঽসি সর্বঃ ॥ ১১-৪০॥
নমঃ পুরস্তাৎ পূর্বস্যাং দিশি তুভ্যম্, অথ পৃষ্ঠতঃ তে পৃষ্ঠতঃ অপি
চ তে নমোঽস্তু, তে সর্বত এব সর্বাসু দিক্ষু সর্বত্র স্থিতায় হে সর্ব ।
অনন্তবীর্যামিতবিক্রমঃ অনন্তং বীর্যং অস্য, অমিতঃ বিক্রমঃ অস্য । বীর্যং
সামর্থ্যং বিক্রমঃ পরাক্রমঃ । বীর্যবানপি কশ্চিৎ শত্রুবধাদিবিষয়ে ন
পরাক্রমতে, মন্দপরাক্রমো বা । ৎবং তু অনন্তবীর্যঃ অমিতবিক্রমশ্চ ইতি
অনন্তবীর্যামিতবিক্রমঃ । সর্বং সমস্তং জগৎ সমাপ্তোষি সম্যক্ একেন আত্মনা
ব্যাপ্নোষি যতঃ, ততঃ তস্মাৎ অসি ভবসি সর্বঃ ৎবম্, ৎবয়া বিনাভূতং ন
কিঞ্চিৎ অস্তি ইতি অভিপ্রায়ঃ ॥ যতঃ অহং ৎবন্মাহাত্ম্যাপরিজ্ঞানাৎ অপরাদ্ধঃ,
অতঃ —
সখেতি মৎবা প্রসভং যদুক্তং হে কৃষ্ণ হে যাদব হে সখেতি ।
অজানতা মহিমানং তবেদং ময়া প্রমাদাৎপ্রণয়েন বাপি ॥ ১১-৪১॥
সখা সমানবয়াঃ ইতি মৎবা জ্ঞাৎবা বিপরীতবুদ্ধ্যা প্রসভং অভিভূয়
প্রসহ্য যৎ উক্তং হে কৃষ্ণ হে যাদব হে সখেতি চ অজানতা
অজ্ঞানিনা মূঢেন; কিম্ অজানতা ইতি আহ — মহিমানং মহাত্ম্যং তব
ইদং ঈশ্বরস্য বিশ্বরূপম্ । “তব ইদং মহিমানং অজানতা”
ইতি বৈয়ধিকরণ্যেন সম্বন্ধঃ । “তবেমম্” ইতি পাঠঃ যদি
অস্তি, তদা সামানাধিকরণ্যমেব । ময়া প্রমাদাৎ বিক্ষিপ্তচিত্ততয়া,
প্রণয়েন বাপি, প্রণয়ো নাম স্নেহনিমিত্তঃ বিস্রম্ভঃ তেনাপি কারণেন
যৎ উক্তবান্ অস্মি ॥
যচ্চাবহাসার্থমসৎকৃতোঽসি বিহারশয়্যাসনভোজনেষু ।
একোঽথবাপ্যচ্যুত তৎসমক্ষং তৎক্ষাময়ে ৎবামহমপ্রমেয়ম্ ॥ ১১-৪২॥
যচ্চ অবহাসার্থং পরিহাসপ্রয়োজনায় অসৎকৃতঃ
পরিভূতঃ অসি ভবসি; ক্ব? বিহারশয়্যাসনভোজনেষু, বিহরণং বিহারঃ
পাদব্যায়ামঃ, শয়নং শয়্যা, আসনং আস্থায়িকা, ভোজনং অদনম্, ইতি এতেষু
বিহারশয়্যাসনভোজনেষু, একঃ পরোক্ষঃ সন্ অসৎকৃতঃ অসি পরিভূতঃ
অসি; অথবাপি হে অচ্যুত, তৎ সমক্ষম্, তচ্ছব্দঃ ক্রিয়াবিশেষণার্থঃ,
প্রত্যক্ষং বা অসৎকৃতঃ অসি তৎ সর্বং অপরাধজাতং ক্ষাময়ে ক্ষমাং
কারয়ে ৎবাং অহং অপ্রমেয়ং প্রমাণাতীতম্ ॥ যতঃ ৎবং —
পিতাসি লোকস্য চরাচরস্য ৎবমস্য পূজ্যশ্চ গুরুর্গরীয়ান্ ।
ন ৎবৎসমোঽস্ত্যভ্যধিকঃ কুতোঽন্যো লোকত্রয়েঽপ্যপ্রতিমপ্রভাব ॥ ১১-৪৩॥
পিতা অসি জনয়িতা অসি লোকস্য প্রাণিজাতস্য চরাচরস্য
স্থাবরজঙ্গমস্য । ন কেবলং ৎবং অস্য জগতঃ পিতা, পূজ্যশ্চ পূজার্হঃ,
যতঃ গুরুঃ গরীয়ান্ গুরুতরঃ । কস্মাৎ গুরুতরঃ ৎবং ইতি আহ — ন
ৎবৎসমঃ ৎবত্তুল্যঃ অস্তি । ন হি ঈশ্বরদ্বয়ং সম্ভবতি, অনেকেশ্বরৎবে
ব্যবহারানুপপত্তেঃ । ৎবৎসম এব তাবৎ অন্যঃ ন সম্ভবতি; কুতঃ এব অন্যঃ
অভ্যধিকঃ স্যাৎ লোকত্রয়েঽপি সর্বস্মিন্? অপ্রতিমপ্রভাব প্রতিমীয়তে যয়া সা
প্রতিমা, ন বিদ্যতে প্রতিমা যস্য তব প্রভাবস্য সঃ ৎবং অপ্রতিমপ্রভাবঃ,
হে অপ্রতিমপ্রভাব নিরতিশয়প্রভাব ইত্যর্থঃ ॥ যতঃ এবং —
তস্মাৎপ্রণম্য প্রণিধায় কায়ং প্রসাদয়ে ৎবামহমীশমীড্যম্ ।
পিতেব পুত্রস্য সখেব সখ্যুঃ প্রিয়ঃ প্রিয়ায়ার্হসি দেব সোঢুম্ ॥ ১১-৪৪॥
তস্মাৎ প্রণম্য নমস্কৃত্য, প্রণিধায় প্রকর্ষেণ নীচৈঃ ধৃৎবা
কায়ং শরীরম্, প্রসাদয়ে প্রসাদং কারয়ে ৎবাং অহং ঈশং ঈশিতারম্, ঈড্যং
স্তুত্যম্ । ৎবং পুনঃ পুত্রস্য অপরাধং পিতা যথা ক্ষমতে, সর্বং সখা
ইব সখ্যুঃ অপরাধম্, যথা বা প্রিয়ঃ প্রিয়ায়াঃ অপরাধং ক্ষমতে, এবম্
অর্হসি হে দেব সোঢুং প্রসহিতুং ক্ষন্তুং ইত্যর্থঃ ॥
অদৃষ্টপূর্বং হৃষিতোঽস্মি দৃষ্ট্বা ভয়েন চ প্রব্যথিতং মনো মে ।
তদেব মে দর্শয় দেব রূপং প্রসীদ দেবেশ জগন্নিবাস ॥ ১১-৪৫॥
অদৃষ্টপূর্বং ন কদাচিদপি দৃষ্টপূর্বং ইদং বিশ্বরূপং তব ময়া
অন্যৈর্বা, তৎ অহং দৃষ্ট্বা হৃষিতঃ অস্মি । ভয়েন চ প্রব্যথিতং
মনঃ মে । অতঃ তদেব মে মম দর্শয় হে দেব রূপং যৎ মৎসখম্ ।
প্রসীদ দেবেশ, জগন্নিবাস জগতো নিবাসো জগন্নিবাসঃ, হে জগন্নিবাস ॥
কিরীটিনং গদিনং চক্রহস্তমিচ্ছামি ৎবাং দ্রষ্টুমহং তথৈব ।
তেনৈব রূপেণ চতুর্ভুজেন সহস্রবাহো ভব বিশ্বমূর্তে ॥ ১১-৪৬॥
কিরীটিনং কিরীটবন্তং তথা গদিনং গদাবন্তং চক্রহস্তং ইচ্ছামি ৎবাং
প্রার্থয়ে ৎবাং দ্রষ্টুং অহং তথৈব, পূর্ববৎ ইত্যর্থঃ । যতঃ এবম্, তস্মাৎ
তেনৈব রূপেণ বসুদেবপুত্ররূপেণ চতুর্ভুজেন, সহস্রবাহো বার্তমানিকেন
বিশ্বরূপেণ, ভব বিশ্বমূর্তে; উপসংহৃত্য বিশ্বরূপম্, তেনৈব রূপেণ
ভব ইত্যর্থঃ ॥ অর্জুনং ভীতং উপলভ্য, উপসংহৃত্য বিশ্বরূপম্,
প্রিয়বচনেন আশ্বাসয়ন্ শ্রীভগবান্ উবাচ —
শ্রীভগবানুবাচ —
ময়া প্রসন্নেন তবার্জুনেদং রূপং পরং দর্শিতমাত্ময়োগাৎ ।
তেজোময়ং বিশ্বমনন্তমাদ্যং যন্মে ৎবদন্যেন ন দৃষ্টপূর্বম্ ॥ ১১-৪৭॥
ময়া প্রসন্নেন, প্রসাদো নাম ৎবয়ি অনুগ্রহবুদ্ধিঃ, তদ্বতা প্রসন্নেন ময়া
তব হে অর্জুন, ইদং পরং রূপং বিশ্বরূপং দর্শিতং আত্ময়োগাৎ আত্মনঃ
ঐশ্বর্যস্য সামর্থ্যাৎ । তেজোময়ং তেজঃপ্রায়ং বিশ্বং সমস্তং অনন্তম্
অন্তরহিতং আদৌ ভবং আদ্যং যৎ রূপং মে মম ৎবদন্যেন ৎবত্তঃ অন্যেন
কেনচিৎ ন দৃষ্টপূর্বম্ ॥ আত্মনঃ মম রূপদর্শনেন কৃতার্থ এব
ৎবং সংবৃত্তঃ ইতি তৎ স্তৌতি —
ন বেদয়জ্ঞাধ্যযনৈর্ন দানৈর্ন চ ক্রিয়াভির্ন তপোভিরুগ্রৈঃ ।
এবংরূপঃ শক্য অহং নৃলোকে দ্রষ্টুং ৎবদন্যেন কুরুপ্রবীর ॥ ১১-৪৮॥
ন বেদয়জ্ঞাধ্যযনৈঃ চতুর্ণামপি বেদানাং অধ্যযনৈঃ যথাবৎ
যজ্ঞাধ্যযনৈশ্চ — বেদাধ্যযনৈরেব যজ্ঞাধ্যযনস্য সিদ্ধৎবাৎ
পৃথক্ যজ্ঞাধ্যযনগ্রহণং যজ্ঞবিজ্ঞানোপলক্ষণার্থং — তথা ন
দানৈঃ তুলাপুরুষাদিভিঃ, ন চ ক্রিয়াভিঃ অগ্নিহোত্রাদিভিঃ শ্রৌতাদিভিঃ, ন
অপি তপোভিঃ উগ্রৈঃ চান্দ্রায়ণাদিভিঃ উগ্রৈঃ ঘোরৈঃ, এবংরূপঃ যথাদর্শিতং
বিশ্বরূপং যস্য সোঽহং এবংরূপঃ ন শক্যঃ অহং নৃলোকে মনুষ্যলোকে
দ্রষ্টুং ৎবদন্যেন ৎবত্তঃ অন্যেন কুরুপ্রবীর ॥
মা তে ব্যথা মা চ বিমূঢভাবো দৃষ্ট্বা রূপং ঘোরমীদৃঙ্মমেদম্ ।
ব্যপেতভীঃ প্রীতমনাঃ পুনস্ত্বং তদেব মে রূপমিদং প্রপশ্য ॥ ১১-৪৯॥
মা তে ব্যথা মা ভূৎ তে ভয়ম্, মা চ বিমূঢভাবঃ বিমূঢচিত্ততা,
দৃষ্ট্বা উপলভ্য রূপং ঘোরং ঈদৃক্ যথাদর্শিতং মম ইদম্ । ব্যপেতভীঃ
বিগতভয়ঃ, প্রীতমনাশ্চ সন্ পুনঃ ভূয়ঃ ৎবং তদেব চতুর্ভুজং
রূপং শঙ্খচক্রগদাধরং তব ইষ্টং রূপং ইদং প্রপশ্য ॥ সঞ্জয়
উবাচ —
ইত্যর্জুনং বাসুদেবস্তথোক্ত্বা স্বকং রূপং দর্শয়ামাস ভূয়ঃ ।
আশ্বাসয়ামাস চ ভীতমেনং ভূৎবা পুনঃসৌম্যবপুর্মহাত্মা ॥ ১১-৫০॥
ইতি এবং অর্জুনং বাসুদেবঃ তথাভূতং বচনং উক্ত্বা, স্বকং বসুদেবস্য
গৃহে জাতং রূপং দর্শয়ামাস দর্শিতবান্ ভূয়ঃ পুনঃ । আশ্বাসয়ামাস
চ আশ্বাসিতবান্ ভীতং এনম্, ভূৎবা পুনঃ সৌম্যবপুঃ প্রসন্নদেহঃ
মহাত্মা ॥
অর্জুন উবাচ —
দৃষ্ট্বেদং মানুষং রূপং তব সৌম্যং জনার্দন ।
ইদানীমস্মি সংবৃত্তঃ সচেতাঃ প্রকৃতিং গতঃ ॥ ১১-৫১॥
দৃষ্ট্বা ইদং মানুষং রূপং মৎসখং প্রসন্নং
তব সৌম্যং জনার্দন, ইদানীং অধুনা
অস্মি সংবৃত্তঃ সঞ্জাতঃ । কিম্? সচেতাঃ প্রসন্নচিত্তঃ প্রকৃতিং স্বভাবং
গতশ্চ অস্মি ॥
শ্রীভগবানুবাচ —
সুদুর্দর্শমিদং রূপং দৃষ্টবানসি যন্মম ।
দেবা অপ্যস্য রূপস্য নিত্যং দর্শনকাঙ্ক্ষিণঃ ॥ ১১-৫২॥
সুদুর্দর্শং সুষ্ঠু দুঃখেন দর্শনং অস্য ইতি
সুদুর্দর্শম্, ইদং রূপং দৃষ্টবান্ অসি
যৎ মম, দেবাঃ অপি অস্য মম রূপস্য নিত্যং সর্বদা দর্শনকাঙ্ক্ষিণঃ;
দর্শনেপ্সবোঽপি ন ৎবমিব দৃষ্টবন্তঃ,
ন দ্রক্ষ্যন্তি চ ইতি অভিপ্রায়ঃ ॥ কস্মাৎ? —
নাহং বেদৈর্ন তপসা ন দানেন ন চেজ্যযা ।
শক্য এবংবিধো দ্রষ্টুং দৃষ্টবানসি মাং যথা ॥ ১১-৫৩॥
ন অহং বেদৈঃ ঋগ্যজুঃসামাথর্ববেদৈঃ চতুর্ভিরপি, ন তপসা
উগ্রেণ চান্দ্রায়ণাদিনা, ন দানেন গোভূহিরণ্যাদিনা, ন চ ইজ্যযা
যজ্ঞেন পূজয়া বা শক্যঃ এবংবিধঃ যথাদর্শিতপ্রকারঃ দ্রষ্টুং
দৃষ্টাবান্ অসি মাং যথা ৎবম্ ॥ কথং পুনঃ শক্যঃ ইতি উচ্যতে —
ভক্ত্যা ৎবনন্যযা শক্য অহমেবংবিধোঽর্জুন ।
জ্ঞাতুং দ্রষ্টুং চ তত্ত্বেন প্রবেষ্টুং চ পরন্তপ ॥ ১১-৫৪॥
ভক্ত্যা তু কিংবিশিষ্টয়া ইতি আহ — অনন্যযা অপৃথগ্ভূতয়া, ভগবতঃ
অন্যত্র পৃথক্ ন কদাচিদপি যা ভবতি সা ৎবনন্যা ভক্তিঃ । সর্বৈরপি
করণৈঃ বাসুদেবাদন্যৎ ন উপলভ্যতে যয়া, সা অনন্যা ভক্তিঃ, তয়া ভক্ত্যা
শক্যঃ অহং এবংবিধঃ বিশ্বরূপপ্রকারঃ হে অর্জুন, জ্ঞাতুং শাস্ত্রতঃ ।
ন কেবলং জ্ঞাতুং শাস্ত্রতঃ, দ্রষ্টুং চ সাক্ষাৎকর্তুং তত্ত্বেন তত্ত্বতঃ,
প্রবেষ্টুং চ মোক্ষং চ গন্তুং পরন্তপ ॥ অধুনা সর্বস্য গীতাশাস্ত্রস্য
সারভূতঃ অর্থঃ নিঃশ্রেয়সার্থঃ অনুষ্ঠেয়ৎবেন সমুচ্চিত্য উচ্যতে —
মৎকর্মকৃন্মৎপরমো মদ্ভক্তঃ সঙ্গবর্জিতঃ ।
নির্বৈরঃ সর্বভূতেষু যঃ স মামেতি পাণ্ডব ॥ ১১-৫৫॥
মৎকর্মকৃৎ মদর্থং কর্ম মৎকর্ম, তৎ করোতীতি মৎকর্মকৃৎ ।
মৎপরমঃ — করোতি ভৃত্যঃ স্বামিকর্ম, ন তু আত্মনঃ পরমা প্রেত্য
গন্তব্যা গতিরিতি স্বামিনং প্রতিপদ্যতে; অয়ং তু মৎকর্মকৃৎ মামেব
পরমাং গতিং প্রতিপদ্যতে ইতি মৎপরমঃ, অহং পরমঃ পরা গতিঃ
যস্য সোঽয়ং মৎপরমঃ । তথা মদ্ভক্তঃ মামেব সর্বপ্রকারৈঃ
সর্বাত্মনা সর্বোৎসাহেন ভজতে ইতি মদ্ভক্তঃ । সঙ্গবর্জিতঃ
ধনপুত্রমিত্রকলত্রবন্ধুবর্গেষু সঙ্গবর্জিতঃ সঙ্গঃ প্রীতিঃ স্নেহঃ
তদ্বর্জিতঃ । নির্বৈরঃ নির্গতবৈরঃ সর্বভূতেষু শত্রুভাবরহিতঃ
আত্মনঃ অত্যন্তাপকারপ্রবৃত্তেষ্বপি । যঃ ঈদৃশঃ মদ্ভক্তঃ সঃ
মাং এতি, অহমেব তস্য পরা গতিঃ, ন অন্যা গতিঃ কাচিৎ ভবতি ।
অয়ং তব উপদেশঃ ইষ্টঃ ময়া উপদিষ্টঃ হে পাণ্ডব ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে বিশ্বরূপদর্শনং নাম একাদশোঽধ্যায়ঃ ॥১১॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে বিশ্বরূপ-দর্শনং নাম একাদশঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ দ্বাদশোঽধ্যায়ঃ ॥
দ্বিতীয়-অধ্যায়-প্রভৃতিষু বিভূতি-অন্তেষু অধ্যায়েষু পরমাত্মনঃ
ব্রহ্মণঃ অক্ষরস্য বিধ্বস্ত-সর্ব-উপাধি-বিশেষস্য উপাসনম্
উক্তম্; সর্ব-যোগ-ঐশ্বর্য-সর্বজ্ঞান-শক্তিমৎ-সত্ত্ব-উপাধেঃ
ঈশ্বরস্য তব চ উপাসনং তত্র তত্র উক্তম্ । বিশ্ব-রূপ-অধ্যায়ে
তু ঐশ্বরং আদ্যং সমস্ত-জগৎ-আত্ম-রূপং বিশ্ব-রূপং ৎবদীয়ং
দর্শিতং উপাসনা-অর্থং এব ৎবয়া । তৎ চ দর্শয়িৎবা উক্তবান্ অসি
“মৎ-কর্ম-কৃৎ” (ভ. গী. ১১-৫৫) ইত্যাদি । অতঃ অহং অনয়োঃ
উভয়োঃ পক্ষয়োঃ বিশিষ্টতর-বুভুৎসয়া ৎবাং পৃচ্ছামি ইতি অর্জুনঃ
উবাচ —
অর্জুন উবাচ —
এবং সততয়ুক্তা যে ভক্তাস্ত্বাং পর্যুপাসতে ।
যে চাপ্যক্ষরমব্যক্তং তেষাং কে যোগবিত্তমাঃ ॥ ১২-১॥
এবং ইতি অতীত-অনন্তর-শ্লোকেন উক্তং অর্থং পরামৃশতি
“মৎ-কর্ম-কৃৎ” (ভ. গী. ১১-৫৫) ইত্যাদিনা । এবং
সতত-যুক্তাঃ, নৈরন্তর্যেণ ভগবৎ-কর্ম-আদৌ যথোক্তে অর্থে সমাহিতাঃ
সন্তঃ প্রবৃত্তাঃ ইতি অর্থঃ । যে ভক্তাঃ অনন্য-শরণাঃ সন্তঃ ৎবাং
যথা-দর্শিতং বিশ্ব-রূপং পর্যুপাসতে ধ্যায়ন্তি; যে চ অন্যেঽপি
ত্যক্ত-সর্ব-এষণাঃ সন্ন্যস্ত-সর্ব-কর্মাণঃ যথা-বিশেষিতং ব্রহ্ম
অক্ষরং নিরস্ত-সর্ব-উপাধিৎবাৎ অব্যক্তং অকরণ-গোচরম্ । যৎ হি
করণ-গোচরং তৎ ব্যক্তং উচ্যতে, অঞ্জেঃ ধাতোঃ তৎ-কর্মকৎবাৎ; ইদং তু
অক্ষরং তৎ-বিপরীতম্, শিষ্টৈঃ চ উচ্যমানৈঃ বিশেষণৈঃ বিশিষ্টম্,
তৎ যে চ অপি পর্যুপাসতে, তেষাং উভয়েষাং মধ্যে কে যোগ-বিৎ-তমাঃ? কে
অতিশয়েন যোগ-বিদঃ ইতি অর্থঃ ॥
শ্রী-ভগবান্ উবাচ — যে তু অক্ষর-উপাসকাঃ সম্যগ্-দর্শিনঃ
নিবৃত্ত-এষণাঃ, তে তাবৎ তিষ্ঠন্তু; তান্ প্রতি যৎ বক্তব্যম্, তৎ
উপরিষ্টাৎ বক্ষ্যামঃ । যে তু ইতরে —
শ্রীভগবানুবাচ —
ময়্যাবেশ্য মনো যে মাং নিত্যযুক্তা উপাসতে ।
শ্রদ্ধয়া পরয়োপেতাঃ তে মে যুক্ততমা মতাঃ ॥ ১২-২॥
ময়ি বিশ্ব-রূপে পরমেশ্বরে আবেশ্য সমাধায় মনঃ, যে
ভক্তাঃ সন্তঃ, মাং সর্ব-যোগেশ্বরাণাং অধীশ্বরং সর্বজ্ঞং
বিমুক্ত-রাগ-আদি-ক্লেশ-তিমির-দৃষ্টিম্, নিত্য-যুক্তাঃ
অতীত-অনন্তর-অধ্যায়-অন্ত-উক্ত-শ্লোক-অর্থ-ন্যায়েন সতত-যুক্তাঃ
সন্তঃ উপাসতে শ্রদ্ধয়া পরয়া প্রকৃষ্টয়া উপেতাঃ, তে মে মম মতাঃ
অভিপ্রেতাঃ যুক্ত-তমাঃ ইতি । নৈরন্তর্যেণ হি তে মৎ-চিত্ততয়া অহো-রাত্রম্
অতিবাহয়ন্তি । অতঃ যুক্তং তান্ প্রতি যুক্ত-তমাঃ ইতি বক্তুম্ ॥
কিং ইতরে যুক্ত-তমাঃ ন ভবন্তি? ন; কিং তু তান্ প্রতি যৎ বক্তব্যম্,
তৎ শৃণু —
যে ৎবক্ষরমনির্দেশ্যং অব্যক্তং পর্যুপাসতে ।
সর্বত্রগমচিন্ত্যং চ কূটস্থমচলং ধ্রুবম্ ॥ ১২-৩॥
যে তু অক্ষরং অনির্দেশ্যম্, অব্যক্তৎবাৎ অশব্দ-গোচরঃ ইতি ন
নির্দেষ্টুং শক্যতে, অতঃ অনির্দেশ্যম্, অব্যক্তং ন কেন অপি প্রমাণেন
ব্যজ্যতে ইতি অব্যক্তং পরি-উপাসতে পরি সমন্তাৎ উপাসতে । উপাসনং নাম
যথা-শাস্ত্রং উপাস্যস্য অর্থস্য বিষয়ী-করণেন সামীপ্যং উপগম্য
তৈল-ধারাবৎ সমান-প্রত্যয-প্রবাহেণ দীর্ঘ-কালং যৎ আসনম্,
তৎ উপাসনং আচক্ষতে । অক্ষরস্য বিশেষণং আহ উপাস্যস্য —
সর্বত্র-গং ব্যোমবৎ ব্যাপি অচিন্ত্যং চ অব্যক্তৎবাৎ অচিন্ত্যম্ । যৎ হি
করণ-গোচরম্, তৎ মনসা অপি চিন্ত্যম্, তৎ-বিপরীতৎবাৎ অচিন্ত্যম্
অক্ষরম্, কূটস্থং দৃশ্যমান-গুণং অন্তর্-দোষং বস্তু কূটম্ ।
“কূট-রূপম্” কূট-সাক্ষ্যম্” ইতি-আদৌ কূট-শব্দঃ
প্রসিদ্ধঃ লোকে । তথা চ অবিদ্যা-আদি-অনেক-সংসার-বীজং অন্তর্-দোষবৎ
মায়া-অব্যাকৃত-আদি-শব্দ-বাচ্যতয়া “মায়াং তু প্রকৃতিং বিদ্যাৎ
মায়িনং তু মহেশ্বরম্” (শ্বে. উ. ৪-১০) “মম মায়া দুরত্যযা”
(ভ. গী. ৭-১৪) ইতি-আদৌ প্রসিদ্ধং যৎ তৎ কূটম্, তস্মিন্ কূটে স্থিতং
কূট-স্থং তৎ-অধ্যক্ষতয়া । অথবা, রাশিঃ ইব স্থিতং কূট-স্থম্ ।
অতঃ এব অচলম্ । যস্মাৎ অচলম্, তস্মাৎ ধ্রুবম্, নিত্যং ইতি অর্থঃ ॥
সন্নিয়ম্যেন্দ্রিয়গ্রামং সর্বত্র সমবুদ্ধয়ঃ ।
তে প্রাপ্নুবন্তি মামেব সর্বভূতহিতে রতাঃ ॥ ১২-৪॥
সন্নিয়ম্য সম্যক্ নিয়ম্য উপসংহৃত্য ইন্দ্রিয়-গ্রামং ইন্দ্রিয়-সমুদায়ং
সর্বত্র সর্বস্মিন্ কালে সম-বুদ্ধয়ঃ সমা তুল্যা বুদ্ধিঃ যেষাম্
ইষ্ট-অনিষ্ট-প্রাপ্তৌ তে সম-বুদ্ধয়ঃ । তে যে এবং-বিধাঃ তে
প্রাপ্নুবন্তি মাং এব সর্ব-ভূত-হিতে রতাঃ । ন তু তেষাং বক্তব্যং
কিঞ্চিৎ “মাং তে প্রাপ্নুবন্তি” ইতি; “জ্ঞানী তু আত্মা এব মে
মতম্” (ভ. গী. ৭-১৮) ইতি হি উক্তম্ । ন হি ভগবৎ-স্বরূপাণাং সতাং
যুক্ত-তমৎবম্-অয়ুক্ত-তমৎবং বা বাচ্যম্ ॥ কিং তু —
ক্লেশোঽধিকতরস্তেষাং অব্যক্তাসক্তচেতসাম্ ।
অব্যক্তা হি গতির্দুঃখং দেহবদ্ভিরবাপ্যতে ॥ ১২-৫॥
ক্লেশঃ অধিকতরঃ, যদ্যপি মৎ-কর্ম-আদি-পরাণাং ক্লেশঃ অধিকঃ
এব ক্লেশঃ অধিকতরঃ তু অক্ষর-আত্মনাং পরমাত্ম-দর্শিনাং
দেহ-অভিমান-পরিত্যাগ-নিমিত্তঃ । অব্যক্ত-আসক্ত-চেতসাং অব্যক্তে আসক্তং
চেতঃ যেষাং তে অব্যক্ত-আসক্ত-চেতসঃ তেষাং অব্যক্ত-আসক্ত-চেতসাম্ ।
অব্যক্তা হি যস্মাৎ যা গতিঃ অক্ষর-আত্মিকা দুঃখং সা দেহবদ্ভিঃ
দেহ-অভিমানবদ্ভিঃ অবাপ্যতে, অতঃ ক্লেশঃ অধিকতরঃ ॥ অক্ষর-উপাসকানাং
যৎ বর্তনম্, তৎ উপরিষ্টাৎ বক্ষ্যামঃ —
যে তু সর্বাণি কর্মাণি ময়ি সন্ন্যস্য মৎপরাঃ ।
অনন্যেনৈব যোগেন মাং ধ্যায়ন্ত উপাসতে ॥ ১২-৬॥
যে তু সর্বাণি কর্মাণি ময়ি ঈশ্বরে সন্ন্যস্য মৎ-পরাঃ অহং পরঃ যেষাং
তে মৎ-পরাঃ সন্তঃ অনন্যেন এব অবিদ্যমানং অন্যৎ আলম্বনং বিশ্ব-রূপং
দেবং আত্মানং মুক্ত্বা যস্য সঃ অনন্যঃ তেন অনন্যেন এব; কেন? যোগেন
সমাধিনা মাং ধ্যায়ন্তঃ চিন্তয়ন্তঃ উপাসতে ॥ তেষাং কিম্? —
তেষামহং সমুদ্ধর্তা মৃত্যুসংসারসাগরাৎ ।
ভবামি ন চিরাৎপার্থ ময়্যাবেশিতচেতসাম্ ॥ ১২-৭॥
তেষাং মৎ-উপাসন-এক-পরাণাং অহং ঈশ্বরঃ সমুদ্ধর্তা । কুতঃ ইতি আহ
— মৃত্যু-সংসার-সাগরাৎ মৃত্যু-যুক্তঃ সংসারঃ মৃত্যু-সংসারঃ,
সঃ এব সাগরঃ ইব সাগরঃ, দুস্তরৎবাৎ, তস্মাৎ মৃত্যু-সংসার-সাগরাৎ
অহং তেষাং সমুদ্ধর্তা ভবামি ন চিরাৎ । কিং তর্হি? ক্ষিপ্রং এব হে পার্থ,
ময়ি আবেশিত-চেতসাং ময়ি বিশ্ব-রূপে আবেশিতং সমাহিতং চেতঃ যেষাং
তে ময়ি-আবেশিত-চেতসঃ তেষাম্ ॥ যতঃ এবম্, তস্মাৎ —
ময়্যেব মন আধৎস্ব ময়ি বুদ্ধিং নিবেশয় ।
নিবসিষ্যসি ময়্যেব অত ঊর্ধ্বং ন সংশয়ঃ ॥ ১২-৮॥
ময়ি এব বিশ্ব-রূপে ঈশ্বরে মনঃ সঙ্কল্প-বিকল্প-আত্মকং আধৎস্ব
স্থাপয় । ময়ি এব অধ্যবসায়ং কুর্বতীং বুদ্ধিং আধৎস্ব নিবেশয় ।
ততঃ তে কিং স্যাৎ ইতি শৃণু — নিবসিষ্যসি নিবৎস্যসি নিশ্চয়েন
মৎ-আত্মনা ময়ি নিবাসং করিষ্যসি এব অতঃ শরীর-পাতাৎ ঊর্ধ্বম্ । ন
সংশয়ঃ সংশয়ঃ অত্র ন কর্তব্যঃ ॥
অথ চিত্তং সমাধাতুং ন শক্নোষি ময়ি স্থিরম্ ।
অভ্যাসয়োগেন ততঃ মামিচ্ছাপ্তুং ধনঞ্জয় ॥ ১২-৯॥
অথ এবং যথা অবোচং তথা ময়ি চিত্তং সমাধাতুং স্থাপয়িতুং স্থিরম্
অচলং ন শক্নোষি চেৎ, ততঃ পশ্চাৎ অভ্যাস-যোগেন, চিত্তস্য একস্মিন্
আলম্বনে সর্বতঃ সমাহৃত্য পুনঃ পুনঃ স্থাপনং অভ্যাসঃ, তৎ-পূর্বকঃ
যোগঃ সমাধান-লক্ষণঃ তেন অভ্যাস-যোগেন মাং বিশ্ব-রূপং ইচ্ছ
প্রার্থয়স্ব আপ্তুং প্রাপ্তুং হে ধনঞ্জয় ॥
অভ্যাসেঽপ্যসমর্থোঽসি মৎকর্মপরমো ভব ।
মদর্থমপি কর্মাণি কুর্বন্সিদ্ধিমবাপ্স্যসি ॥ ১২-১০॥
অভ্যাসে অপি অসমর্থঃ অসি অশক্তঃ অসি, তর্হি মৎ-কর্ম-পরমঃ
ভব মৎ-অর্থং কর্ম মৎ-কর্ম তৎ-পরমঃ মৎ-কর্ম-পরমঃ,
মৎ-কর্ম-প্রধানঃ ইতি অর্থঃ । অভ্যাসেন বিনা মৎ-অর্থং অপি কর্মাণি
কেবলং কুর্বন্ সিদ্ধিং সত্ত্ব-শুদ্ধি-যোগ-জ্ঞান-প্রাপ্তি-দ্বারেণ
অবাপ্স্যসি ॥
অথৈতদপ্যশক্তোঽসি কর্তুং মদ্যোগমাশ্রিতঃ ।
সর্বকর্মফলত্যাগং ততঃ কুরু যতাত্মবান্ ॥ ১২-১১॥
অথ পুনঃ এতৎ অপি যৎ উক্তং মৎ-কর্ম-পরমৎবম্, তৎ কর্তুং অশক্তঃ অসি,
মৎ-যোগং আশ্রিতঃ ময়ি ক্রিয়মাণানি কর্মাণি সন্ন্যস্য যৎ করণং তেষাম্
অনুষ্ঠানং সঃ মৎ-যোগঃ, তং আশ্রিতঃ সন্, সর্ব-কর্ম-ফল-ত্যাগং
সর্বেষাং কর্মণাং ফল-সন্ন্যাসং সর্ব-কর্ম-ফল-ত্যাগং ততঃ
অনন্তরং কুরু যত-আত্মবান্ সংয়ত-চিত্তঃ সন্ ইতি অর্থঃ ॥ ইদানীং
সর্ব-কর্ম-ফল-ত্যাগং স্তৌতি —
শ্রেয়ো হি জ্ঞানমভ্যাসাৎ জ্ঞানাদ্ধ্যানং বিশিষ্যতে ।
ধ্যানাৎকর্মফলত্যাগঃ ত্যাগাচ্ছান্তিরনন্তরম্ ॥ ১২-১২॥
শ্রেয়ঃ হি প্রশস্য-তরং জ্ঞানম্ । কস্মাৎ? অবিবেক-পূর্বকাৎ অভ্যাসাৎ ।
তস্মাৎ অপি জ্ঞানাৎ জ্ঞান-পূর্বকং ধ্যানং বিশিষ্যতে । জ্ঞানবতঃ ধ্যানাৎ
অপি কর্ম-ফল-ত্যাগঃ, “বিশিষ্যতে” ইতি অনুষজ্যতে । এবং
কর্ম-ফল-ত্যাগাৎ পূর্ব-বিশেষণ-বতঃ শান্তিঃ উপশমঃ সহেতুকস্য
সংসারস্য অনন্তরং এব স্যাৎ, ন তু কালান্তরং অপেক্ষতে ॥ অজ্ঞস্য
কর্মণি প্রবৃত্তস্য পূর্ব-উপদিষ্ট-উপায়-অনুষ্ঠান-অশক্তৌ
সর্ব-কর্মণাং ফল-ত্যাগঃ শ্রেয়ঃ-সাধনং উপদিষ্টম্, ন
প্রথমং এব । অতঃ চ “শ্রেয়ঃ হি জ্ঞানম্-অভ্যাসাৎ” ইতি
উত্তর-উত্তর-বিশিষ্টৎব-উপদেশেন সর্ব-কর্ম-ফল-ত্যাগঃ
স্তূয়তে, সম্পন্ন-সাধন-অনুষ্ঠান-অশক্তৌ অনুষ্ঠেয়ৎবেন শ্রুতৎবাৎ ।
কেন সাধর্ম্যেণ স্তুতিৎবম্ ? “যদা সর্বে প্রমুচ্যন্তে”
(ক. উ. ২-৩-১৪) ইতি সর্ব-কাম-প্রহাণাৎ অমৃতৎবং উক্তম্; তৎ
প্রসিদ্ধম্ । কামাঃ চ সর্বে শ্রৌত-স্মার্ত-কর্মণাং ফলানি ।
তৎ-ত্যাগে চ বিদুষঃ ধ্যান-নিষ্ঠস্য অনন্তরা এব শান্তিঃ ইতি
সর্ব-কাম-ত্যাগ-সামান্যং অজ্ঞ-কর্ম-ফল-ত্যাগস্য অস্তি ইতি
তৎ-সামান্যাৎ সর্ব-কর্ম-ফল-ত্যাগ-স্তুতিঃ ইয়ং প্ররোচন-অর্থা ।
যথা অগস্ত্যেন ব্রাহ্মণেন সমুদ্রঃ পীতঃ ইতি ইদানীন্তনাঃ অপি ব্রাহ্মণাঃ
ব্রাহ্মণৎব-সামান্যাৎ স্তূয়ন্তে, এবং কর্ম-ফল-ত্যাগাৎ কর্ম-যোগস্য
শ্রেয়ঃ-সাধনৎবং অভিহিতম্ ॥ অত্র চ আত্ম-ঈশ্বর-ভেদম্-আশ্রিত্য
বিশ্ব-রূপে ঈশ্বরে চেতঃ-সমাধান-লক্ষণঃ যোগঃ উক্তঃ, ঈশ্বর-অর্থং
কর্ম-অনুষ্ঠান-আদি চ । “অথ এতৎ অপি অশক্তঃ অসি”
(ভ. গী. ১২-১১) ইতি অজ্ঞান-কার্য-সূচনাৎ ন অভেদ-দর্শিনঃ
অক্ষর-উপাসকস্য কর্ম-যোগঃ উপপদ্যতে ইতি দর্শয়তি; তথা
কর্ম-যোগিনঃ অক্ষর-উপাসনা-অনুপপত্তিম্ । “তে প্রাপ্নুবন্তি মাম্
এব” (ভ. গী. ১২-৪) ইতি অক্ষর-উপাসকানাং কৈবল্য-প্রাপ্তৌ
স্বাতন্ত্র্যং উক্ত্বা, ইতরেষাং পারতন্ত্র্যাৎ ঈশ্বর-অধীনতাং দর্শিতবান্
“তেষাং অহং সমুদ্ধর্তা” (ভ. গী. ১২-৭) ইতি । যদি হি
ঈশ্বরস্য আত্ম-ভূতাঃ তে মতাঃ অভেদ-দর্শিৎবাৎ, অক্ষর-স্বরূপাঃ এব
তে ইতি সমুদ্ধরণ-কর্ম-বচনং তান্ প্রতি অপেশলং স্যাৎ । যস্মাৎ চ
অর্জুনস্য অত্যন্তং এব হিত এষী ভগবান্ তস্য সম্যগ্-দর্শন-অনন্বিতং
কর্ম-যোগং ভেদ-দৃষ্টিমন্তং এব উপদিশতি । ন চ আত্মানং ঈশ্বরং
প্রমাণতঃ বুদ্ধ্বা কস্যচিৎ গুণ-ভাবং জিগমিষতি কশ্চিৎ, বিরোধাৎ ।
তস্মাৎ অক্ষর-উপাসকানাং সম্যগ্-দর্শন-নিষ্ঠানাং সন্ন্যাসিনাং
ত্যক্ত-সর্ব-এষণানাং “অদ্বেষ্টা সর্ব-ভূতানাম্” ইত্যাদি
ধর্ম-পূগং সাক্ষাৎ অমৃতৎব-কারণং বক্ষ্যামি ইতি প্রবর্ততে —
অদ্বেষ্টা সর্বভূতানাং মৈত্রঃ করুণ এব চ ।
নির্মমো নিরহঙ্কারঃ সমদুঃখসুখঃ ক্ষমী ॥ ১২-১৩॥
অদ্বেষ্টা সর্বভূতানাং ন দ্বেষ্টা, আত্মনঃ দুঃখ-হেতুং অপি ন কিঞ্চিৎ
দ্বেষ্টি, সর্বাণি ভূতানি আত্মৎবেন হি পশ্যতি । মৈত্রঃ মিত্র-ভাবঃ মৈত্রী
মিত্রতয়া বর্ততে ইতি মৈত্রঃ । করুণঃ এব চ, করুণা কৃপা দুঃখিতেষু
দয়া, তদ্বান্ করুণঃ, সর্ব-ভূত-অভয়-প্রদঃ, সন্ন্যাসী ইতি অর্থঃ ।
নির্মমঃ মম-প্রত্যয-বর্জিতঃ । নিরহঙ্কারঃ নির্গত-অহং-প্রত্যযঃ ।
সম-দুঃখ-সুখঃ সমে দুঃখ-সুখে দ্বেষ-রাগয়োঃ অপ্রবর্তকে যস্য
সঃ সম-দুঃখ-সুখঃ । ক্ষমী ক্ষমাবান্, আক্রুষ্টঃ অভিহতঃ বা অবিক্রিয়ঃ
এব আস্তে ॥
সন্তুষ্টঃ সততং যোগী যতাত্মা দৃঢনিশ্চয়ঃ ।
ময়্যর্পিতমনোবুদ্ধিঃ যো মদ্ভক্তঃ স মে প্রিয়ঃ ॥ ১২-১৪॥
সন্তুষ্টঃ সততং নিত্যং দেহ-স্থিতি-কারণস্য লাভে অলাভে চ
উৎপন্ন-অলং-প্রত্যযঃ । তথা গুণবৎ-লাভে বিপর্যযে চ সন্তুষ্টঃ ।
সততং যোগী সমাহিত-চিত্তঃ । যত-আত্মা সংয়ত-স্বভাবঃ ।
দৃঢ-নিশ্চয়ঃ দৃঢঃ স্থিরঃ নিশ্চয়ঃ অধ্যবসায়ঃ যস্য
আত্ম-তত্ত্ব-বিষয়ে সঃ দৃঢ-নিশ্চয়ঃ । ময়ি-অর্পিত-মনো-বুদ্ধিঃ
সঙ্কল্প-বিকল্প-আত্মকং মনঃ, অধ্যবসায়-লক্ষণা বুদ্ধিঃ, তে ময়ি
এব অর্পিতে স্থাপিতে যস্য সন্ন্যাসিনঃ সঃ ময়ি-অর্পিত-মনো-বুদ্ধিঃ । যঃ
ঈদৃশঃ মৎ-ভক্তঃ সঃ মে প্রিয়ঃ । “প্রিয়ঃ হি জ্ঞানিনঃ অত্যর্থমহং
সঃ চ মম প্রিয়ঃ” (ভ. গী. ৭-১৭) ইতি সপ্তমে অধ্যায়ে সূচিতম্,
তৎ ইহ প্রপঞ্চ্যতে ॥
যস্মান্নোদ্বিজতে লোকঃ লোকান্নোদ্বিজতে চ যঃ ।
হর্ষামর্ষভয়োদ্বেগৈঃ মুক্তো যঃ স চ মে প্রিয়ঃ ॥ ১২-১৫॥
যস্মাৎ সন্ন্যাসিনঃ ন উদ্বিজতে ন উদ্বেগং গচ্ছতি ন
সন্তপ্যতে ন সঙ্ক্ষুভ্যতি লোকঃ, তথা লোকাৎ ন উদ্বিজতে চ যঃ,
হর্ষ-অমর্ষ-ভয়-উদ্বেগৈঃ হর্ষঃ চ অমর্ষঃ চ ভয়ং চ উদ্বেগঃ
চ তৈঃ হর্ষ-অমর্ষ-ভয়-উদ্বেগৈঃ মুক্তঃ; হর্ষঃ প্রিয়-লাভে
অন্তঃকরণস্য উৎকর্ষঃ রোমাঞ্চন-অশ্রু-পাত-আদি-লিঙ্গঃ, অমর্ষঃ
অসহিষ্ণুতা, ভয়ং ত্রাসঃ, উদ্বেগঃ উদ্বিগ্নতা, তৈঃ মুক্তঃ যঃ সঃ চ মে
প্রিয়ঃ ॥
অনপেক্ষঃ শুচির্দক্ষ উদাসীনো গতব্যথঃ ।
সর্বারম্ভপরিত্যাগী যো মদ্ভক্তঃ স মে প্রিয়ঃ ॥ ১২-১৬॥
দেহ-ইন্দ্রিয়-বিষয়-সম্বন্ধ-আদিষু অপেক্ষা-বিষয়েষু অনপেক্ষঃ
নিঃস্পৃহঃ । শুচিঃ বাহ্যেন আভ্যন্তরেণ চ শৌচেন সম্পন্নঃ ।
দক্ষঃ প্রত্যুৎপন্নেষু কার্যেষু সদ্যঃ যথাবৎ প্রতিপত্তুং সমর্থঃ ।
উদাসীনঃ ন কস্যচিৎ মিত্র-আদেঃ পক্ষং ভজতে যঃ, সঃ উদাসীনঃ যতিঃ ।
গত-ব্যথঃ গত-ভয়ঃ । সর্ব-আরম্ভ-পরিত্যাগী আরভ্যন্তে ইতি আরম্ভাঃ
ইহ-অমুত্র-ফল-ভোগ-অর্থানি কাম-হেতূনি কর্মাণি সর্ব-আরম্ভাঃ,
তান্ পরিত্যক্তুং শীলং অস্য ইতি সর্ব-আরম্ভ-পরিত্যাগী যঃ মৎ-ভক্তঃ
সঃ মে প্রিয়ঃ ॥ কিং চ —
যো ন হৃষ্যতি ন দ্বেষ্টি ন শোচতি ন কাঙ্ক্ষতি ।
শুভাশুভপরিত্যাগী ভক্তিমান্যঃ স মে প্রিয়ঃ ॥ ১২-১৭॥
যঃ ন হৃষ্যতি ইষ্ট-প্রাপ্তৌ, ন দ্বেষ্টি অনিষ্ট-প্রাপ্তৌ, ন শোচতি
প্রিয়-বিয়োগে, ন চ অপ্রাপ্তং কাঙ্ক্ষতি, শুভ-অশুভে কর্মণী পরিত্যক্তুং
শীলং অস্য ইতি শুভ-অশুভ-পরিত্যাগী ভক্তিমান্ যঃ সঃ মে প্রিয়ঃ ॥
সমঃ শত্রৌ চ মিত্রে চ তথা মানাপমানয়োঃ ।
শীতোষ্ণসুখদুঃখেষু সমঃ সঙ্গবিবর্জিতঃ ॥ ১২-১৮॥
সমঃ শত্রৌ চ মিত্রে চ, তথা মান-অপমানয়োঃ পূজা-পরিভবয়োঃ,
শীত-উষ্ণ-সুখ-দুঃখেষু সমঃ, সর্বত্র চ সঙ্গ-বিবর্জিতঃ ॥
কিং চ —
তুল্যনিন্দাস্তুতির্মৌনী সন্তুষ্টো যেন কেনচিৎ ।
অনিকেতঃ স্থিরমতিঃ ভক্তিমান্মে প্রিয়ো নরঃ ॥ ১২-১৯॥
তুল্য-নিন্দা-স্তুতিঃ নিন্দা চ স্তুতিঃ চ নিন্দা-স্তুতী তে তুল্যে যস্য
সঃ তুল্য-নিন্দা-স্তুতিঃ । মৌনী মৌনবান্ সংয়ত-বাক্ । সন্তুষ্টঃ
যেন কেনচিৎ শরীর-স্থিতি-হেতু-মাত্রেণ; তথা চ উক্তং —
“যেন কেনচিৎ আচ্ছন্নঃ যেনকেনচিৎ আশিতঃ । যত্র ক্বচন
শায়ী স্যাৎ তং দেবা ব্রাহ্মণং বিদুঃ” (মো. ধ. ২৪৫-১২) ইতি । কিং
চ, অনিকেতঃ নিকেতঃ আশ্রয়ঃ নিবাসঃ নিয়তঃ ন বিদ্যতে যস্য সঃ
অনিকেতঃ, “নাগারে” ইত্যাদি স্মৃতি-অন্তরাৎ । স্থির-মতিঃ
স্থিরা পরমার্থ-বিষয়া যস্য মতিঃ সঃ স্থির-মতিঃ । ভক্তিমান্ মে
প্রিয়ঃ নরঃ ॥
“অদ্বেষ্টা সর্ব-ভূতানাম্” (ভ. গী. ১২-১৩), ইত্যাদিনা
অক্ষর-উপাসকানাং নিবৃত্ত-সর্ব-এষণানাং সন্যাসিনাং
পরমার্থ-জ্ঞান-নিষ্ঠানাং ধর্ম-জাতং প্রক্রান্তং উপসংহ্রিয়তে —
যে তু ধর্ম্যামৃতমিদং যথোক্তং পর্যুপাসতে ।
শ্রদ্দধানা মৎপরমাঃ ভক্তাস্তেঽতীব মে প্রিয়াঃ ॥ ১২-২০॥
যে তু সন্ন্যাসিনঃ ধর্ম্য-অমৃতং ধর্মাৎ অনপেতং ধর্ম্যং চ তৎ
অমৃতং চ তৎ, অমৃতৎব-হেতুৎবাৎ, ইদং যথোক্তং “অদ্বেষ্টা
সর্ব-ভূতানাম্” (ভ. গী. ১২-১৩) ইত্যাদিনা পর্যুপাসতে অনুতিষ্ঠন্তি
শ্রদ্দধানাঃ সন্তঃ মৎ-পরমাঃ যথোক্তঃ অহং অক্ষর-আত্মা পরমঃ
নিরতিশয়া গতিঃ যেষাং তে মৎ-পরমাঃ, মৎ-ভক্তাঃ চ উত্তমাং
পরমার্থ-জ্ঞান-লক্ষণাং ভক্তিম্-আশ্রিতাঃ, তে অতীব মে প্রিয়াঃ ॥
“প্রিয়ঃ হি জ্ঞানিনঃ অত্যর্থম্” (ভ. গী. ৭-১৭) ইতি যৎ সূচিতং
তৎ ব্যাখ্যায়ঃ ইহ উপসংহৃতং “ভক্তাঃ তেঽতীব মে প্রিয়াঃ”
ইতি । যস্মাৎ ধর্ম্য-অমৃতং ইদং যথোক্তং অনুতিষ্ঠন্ ভগবতঃ
বিষ্ণোঃ পরমেশ্বরস্য অতীব প্রিয়ঃ ভবতি, তস্মাৎ ইদং ধর্ম্য-অমৃতং
মুমুক্ষুণা যত্নতঃ অনুষ্ঠেয়ং বিষ্ণোঃ প্রিয়ং পরং ধাম জিগমিষুণা ইতি
বাক্য-অর্থঃ ॥
ওঁ তৎসদিতি শ্রীমদ্-ভগবদ্গীতাসু উপনিষৎসু ব্রহ্ম-বিদ্যায়াং
যোগ-শাস্ত্রে শ্রী-কৃষ্ণ-অর্জুন-সংবাদে ভক্তি-যোগঃ নাম দ্বাদশঃ
অধ্যায়ঃ ॥১২॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে ভক্তি-যোগঃ নাম
দ্বাদশোঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ ত্রয়োদশোঽধ্যায়ঃ ॥
(পাঠভেদঃ-
অর্জুন উবাচ ।
প্রকৃতিং পুরুষং চৈব ক্ষেত্রং ক্ষেত্রজ্ঞমেব চ ।
এতদ্বেদিতুমিচ্ছামি জ্ঞানং জ্ঞেয়ং চ কেশব ॥ ১৩-১॥)
সপ্তমে অধ্যায়ে সূচিতে দ্বে প্রকৃতী ঈশ্বরস্য —
ত্রিগুণাত্মিকা অষ্টধা ভিন্না অপরা, সংসারহেতুৎবাৎ; পরা চ
অন্যা জীবভূতা ক্ষেত্রজ্ঞলক্ষণা ঈশ্বরাত্মিকা — যাভ্যাং
প্রকৃতিভ্যামীশ্বরঃ জগদুৎপত্তিস্থিতিলয়হেতুৎবং প্রতিপদ্যতে ।
তত্র ক্ষেত্রক্ষেত্রজ্ঞলক্ষণপ্রকৃতিদ্বয়নিরূপণদ্বারেণ
তদ্বতঃ ঈশ্বরস্য তত্ত্বনির্ধারণার্থং ক্ষেত্রাধ্যায়ঃ আরভ্যতে ।
অতীতানন্তরাধ্যায়ে চ “অদ্বেষ্টা সর্বভূতানাম্”
(ভ. গী. ১২-১৩)ইত্যাদিনা যাবৎ অধ্যায়পরিসমাপ্তিঃ তাবৎ
তত্ত্বজ্ঞানিনাং সন্ন্যাসিনাং নিষ্ঠা যথা তে বর্তন্তে ইত্যেতৎ উক্তম্ ।
কেন পুনঃ তে তত্ত্বজ্ঞানেন যুক্তাঃ যথোক্তধর্মাচরণাৎ ভগবতঃ
প্রিয়া ভবন্তীতি এবমর্থশ্চ অয়মধ্যায়ঃ আরভ্যতে । প্রকৃতিশ্চ
ত্রিগুণাত্মিকা সর্বকার্যকরণবিষয়াকারেণ পরিণতা পুরুষস্য
ভোগাপবর্গার্থকর্তব্যতয়া দেহেন্দ্রিয়াদ্যাকারেণ সংহন্যতে । সোঽয়ং
সঙ্ঘাতঃ ইদং শরীরম্ । তদেতৎ ভগবান্ উবাচ —
শ্রীভগবানুবাচ —
ইদং শরীরং কৌন্তেয় ক্ষেত্রমিত্যভিধীয়তে ।
এতদ্যো বেত্তি তং প্রাহুঃ ক্ষেত্রজ্ঞ ইতি তদ্বিদঃ ॥ ১৩-১॥
ইদং ইতি সর্বনাম্না উক্তং বিশিনষ্টি শরীরং ইতি । হে
কৌন্তেয়, ক্ষতত্রাণাৎ, ক্ষয়াৎ, ক্ষরণাৎ, ক্ষেত্রবদ্বা অস্মিন্
কর্মফলনিষ্পত্তেঃ ক্ষেত্রং ইতি — ইতিশব্দঃ এবংশব্দপদার্থকঃ
— ক্ষেত্রং ইত্যেবং অভিধীয়তে কথ্যতে । এতৎ শরীরং ক্ষেত্রং
যঃ বেত্তি বিজানাতি, আপাদতলমস্তকং জ্ঞানেন বিষয়ীকরোতি,
স্বাভাবিকেন ঔপদেশিকেন বা বেদনেন বিষয়ীকরোতি বিভাগশঃ,
তং বেদিতারং প্রাহুঃ কথয়ন্তি ক্ষেত্রজ্ঞঃ ইতি — ইতিশব্দঃ
এবংশব্দপদার্থকঃ এব পূর্ববৎ — ক্ষেত্রজ্ঞঃ ইত্যেবম্ আহুঃ ।
কে? তদ্বিদঃ তৌ ক্ষেত্রক্ষেত্রজ্ঞৌ যে বিদন্তি তে তদ্বিদঃ ॥ এবং
ক্ষেত্রক্ষেত্রজ্ঞৌ উক্তৌ । কিং এতাবন্মাত্রেণ জ্ঞানেন জ্ঞাতব্যৌ ইতি? ন
ইতি উচ্যতে —
ক্ষেত্রজ্ঞং চাপি মাং বিদ্ধি সর্বক্ষেত্রেষু ভারত ।
ক্ষেত্রক্ষেত্রজ্ঞয়োর্জ্ঞানং যত্তজ্জ্ঞানং মতং মম ॥ ১৩-২॥
ক্ষেত্রজ্ঞং যথোক্তলক্ষণং চাপি মাং পরমেশ্বরম্
অসংসারিণং বিদ্ধি জানীহি । সর্বক্ষেত্রেষু যঃ ক্ষেত্রজ্ঞঃ
ব্রহ্মাদিস্তম্বপর্যন্তানেকক্ষেত্রোপাধিপ্রবিভক্তঃ, তং
নিরস্তসর্বোপাধিভেদং সদসদাদিশব্দপ্রত্যযাগোচরং
বিদ্ধি ইতি অভিপ্রায়ঃ । হে ভারত, যস্মাৎ
ক্ষেত্রক্ষেত্রজ্ঞেশ্বরয়াথাত্ম্যব্যতিরেকেণ ন জ্ঞানগোচরম্
অন্যৎ অবশিষ্টং অস্তি, তস্মাৎ ক্ষেত্রক্ষেত্রজ্ঞয়োঃ জ্ঞেয়ভূতয়োঃ
যৎ জ্ঞানং ক্ষেত্রক্ষেত্রজ্ঞৌ যেন জ্ঞানেন বিষয়ীক্রিয়েতে, তৎ
জ্ঞানং সম্যগ্জ্ঞানং ইতি মতং অভিপ্রায়ঃ মম ঈশ্বরস্য বিষ্ণোঃ ॥
ননু সর্বক্ষেত্রেষু এক এব ঈশ্বরঃ, ন অন্যঃ তদ্ব্যতিরিক্তঃ ভোক্তা
বিদ্যতে চেৎ, ততঃ ঈস্বরস্য সংসারিৎবং প্রাপ্তম্; ঈশ্বরব্যতিরেকেণ
বা সংসারিণঃ অন্যস্য অভাবাৎ সংসারাভাবপ্রসঙ্গঃ । তচ্চ
উভয়মনিষ্টম্, বন্ধমোক্ষতদ্ধেতুশাস্ত্রানর্থক্যপ্রসঙ্গাৎ,
প্রত্যক্ষাদিপ্রমাণবিরোধাচ্চ । প্রত্যক্ষেণ তাবৎ
সুখদুঃখতদ্ধেতুলক্ষণঃ সংসারঃ উপলভ্যতে;
জগদ্বৈচিত্র্যোপলব্ধেশ্চ ধর্মাধর্মনিমিত্তঃ সংসারঃ
অনুমীয়তে । সর্বমেতৎ অনুপপন্নমাত্মেশ্বরৈকৎবে ॥ ন;
জ্ঞানাজ্ঞানয়োঃ অন্যৎবেনোপপত্তেঃ — “দূরমেতে বিপরীতে
বিষূচী অবিদ্যা যা চ বিদ্যেতি জ্ঞাতা” (ক. উ. ১-২-৪) ।
তথা তয়োঃ বিদ্যাবিদ্যাবিষয়যোঃ ফলভেদোঽপি বিরুদ্ধঃ নির্দিষ্টঃ
— “শ্রেয়শ্চ প্রেয়শ্চ” (ক. উ. ১-২-২) ইতি;
বিদ্যাবিষয়ঃ শ্রেয়ঃ, প্রেয়স্তু অবিদ্যাকার্যং ইতি । তথা চ ব্যাসঃ —
”দ্বাবিমাবথ পন্থানৌ” (মো. ধ. ২৪১-৬) ইত্যাদি, “ইমৌ
দ্বাবেব পন্থানৌ” ইত্যাদি চ । ইহ চ দ্বে নিষ্ঠে উক্তে । অবিদ্যা চ
সহ কার্যেণ হাতব্যা ইতি শ্রুতিস্মৃতিন্যায়েভ্যঃ অবগম্যতে । শ্রুতয়ঃ
তাবৎ — “ইহ চেদবেদীদথ সত্যমস্তি ন চেদিহাবেদীন্মহতী
বিনষ্টিঃ” (কে. উ. ২-৫) ”তমেবং বিদ্বানমৃত ইহ ভবতি ।
নান্যঃ পন্থা বিদ্যতেঽয়নায়” (তৈ. আ. ৩-১৩) “বিদ্বান্ন
বিভেতি কুতশ্চন” (তৈ. উ. ২-৯-১) । অবিদুষস্তু
–“অথ তস্য ভয়ং ভবতি” (তৈ. উ. ২-৭-১),
“অবিদ্যায়ামন্তরে বর্তমানাঃ” (ক. উ. ১-২-৫),
“ব্রহ্ম বেদ ব্রহ্মৈব ভবতি”“অন্যোঽসাবন্যোঽহমস্মীতি
ন স বেদ যথা পশুরেবং স দেবানাম্” (বৃ. উ. ১-৪-১০)
আত্মবিৎ যঃ “স ইদং সর্বং ভবতি” (বৃ. উ. ১-৪-১০)
; “যদা চর্মবৎ” (শ্বে. উ. ৬-২০) ইত্যাদ্যাঃ সহস্রশঃ ।
স্মৃতয়শ্চ — “অজ্ঞানেনাবৃতং জ্ঞানং তেন মুহ্যন্তি
জন্তবঃ” (ভ. গী. ৫-১৫) “ইহৈব তৈর্জিতঃ সর্গো যেষাং
সাম্যে স্থিতং মনঃ” (ভ. গী. ৫-১৯) “সমং পশ্যন্
হি সর্বত্র” (ভ. গী. ১৩-২৮) ইত্যাদ্যাঃ । ন্যায়তশ্চ
— ”সর্পান্কুশাগ্রাণি তথোদপানং জ্ঞাৎবা মনুষ্যাঃ
পরিবর্জয়ন্তি । অজ্ঞানতস্তত্র পতন্তি কেচিজ্জ্ঞানে ফলং পশ্য
যথাবিশিষ্টম্” (মো. ধ. ২০১-১৭) । তথা চ — দেহাদিষু
আত্মবুদ্ধিঃ অবিদ্বান্ রাগদ্বেষাদিপ্রয়ুক্তঃ ধর্মাধর্মানুষ্ঠানকৃৎ
জায়তে ম্রিয়তে চ ইতি অবগম্যতে; দেহাদিব্যতিরিক্তাত্মদর্শিনঃ
রাগদ্বেষাদিপ্রহাণাপেক্ষধর্মাধর্ম-প্রবৃত্ত্যুপশমাৎ মুচ্যন্তে
ইতি ন কেনচিৎ প্রত্যাখ্যাতুং শক্যং ন্যায়তঃ । তত্র এবং সতি,
ক্ষেত্রজ্ঞস্য ঈশ্বরস্যৈব সতঃ অবিদ্যাকৃতোপাধিভেদতঃ
সংসারিৎবমিব ভবতি, যথা দেহাদ্যাত্মৎবমাত্মনঃ । সর্বজন্তূনাং
হি প্রসিদ্ধঃ দেহাদিষু অনাত্মসু আত্মভাবঃ নিশ্চিতঃ অবিদ্যাকৃতঃ,
যথা স্থাণৌ পুরুষনিশ্চয়ঃ; ন চ এতাবতা পুরুষধর্মঃ স্থাণোঃ
ভবতি, স্থাণুধর্মো বা পুরুষস্য, তথা ন চৈতন্যধর্মো দেহস্য,
দেহধর্মো বা চেতনস্য সুখদুঃখমোহাত্মকৎবাদিঃ আত্মনঃ ন যুক্তঃ;
অবিদ্যাকৃতৎবাবিশেষাৎ, জরামৃত্যুবৎ ॥ ন, অতুল্যৎবাৎ; ইতি চেৎ
— স্থাণুপুরুষৌ জ্ঞেয়াবেব সন্তৌ জ্ঞাত্রা অন্যোন্যস্মিন্ অধ্যস্তৌ
অবিদ্যযা; দেহাত্মনোস্তু জ্ঞেয়জ্ঞাত্রোরেব ইতরেতরাধ্যাসঃ, ইতি ন
সমঃ দৃষ্টান্তঃ । অতঃ দেহধর্মঃ জ্ঞেয়োঽপি জ্ঞাতুরাত্মনঃ
ভবতীতি চেৎ, ন; অচৈতন্যাদিপ্রসঙ্গাৎ । যদি হি জ্ঞেয়স্য
দেহাদেঃ ক্ষেত্রস্য ধর্মাঃ সুখদুঃখমোহেচ্ছাদয়ঃ জ্ঞাতুঃ
ভবন্তি, তর্হি, “জ্ঞেয়স্য ক্ষেত্রস্য ধর্মাঃ কেচিৎ আত্মনঃ
ভবন্তি অবিদ্যাধ্যারোপিতাঃ, জরামরণাদয়স্তু ন ভবন্তি”
ইতি বিশেষহেতুঃ বক্তব্যঃ । “ন ভবন্তি” ইতি অস্তি
অনুমানং — অবিদ্যাধ্যারোপিতৎবাৎ জরামরণাদিবৎ ইতি, হেয়ৎবাৎ,
উপাদেয়ৎবাচ্চ ইত্যাদি । তত্র এবং সতি, কর্তৃৎবভোক্তৃৎবলক্ষণঃ
সংসারঃ জ্ঞেয়স্থঃ জ্ঞাতরি অবিদ্যযা অধ্যারোপিতঃ ইতি, ন তেন
জ্ঞাতুঃ কিঞ্চিৎ দুষ্যতি, যথা বালৈঃ অধ্যারোপিতেন আকাশস্য
তলমলিনৎবাদিনা ॥ এবং চ সতি, সর্বক্ষেত্রেষ্বপি সতঃ ভগবতঃ
ক্ষেত্রজ্ঞস্য ঈশ্বরস্য সংসারিৎবগন্ধমাত্রমপি নাশঙ্ক্যম্ । ন হি
ক্বচিদপি লোকে অবিদ্যাধ্যস্তেন ধর্মেণ কস্যচিৎ উপকারঃ অপকারো বা
দৃষ্টঃ ॥ যত্তু উক্তং — ন সমঃ দৃষ্টান্তঃ ইতি, তৎ অসৎ ।
কথম্? অবিদ্যাধ্যাসমাত্রং হি দৃষ্টান্তদার্ষ্টান্তিকয়োঃ সাধর্ম্যং
বিবক্ষিতম্ । তৎ ন ব্যভিচরতি । যত্তু জ্ঞাতরি ব্যভিচরতি ইতি
মন্যসে, তস্যাপি অনৈকান্তিকৎবং দর্শিতং জরাদিভিঃ ॥ অবিদ্যাবত্ত্বাৎ
ক্ষেত্রজ্ঞস্য সংসারিৎবং ইতি চেৎ, ন; অবিদ্যায়াঃ তামসৎবাৎ । তামসো হি
প্রত্যযঃ, আবরণাত্মকৎবাৎ অবিদ্যা বিপরীতগ্রাহকঃ, সংশয়োপস্থাপকো
বা, অগ্রহণাত্মকো বা; বিবেকপ্রকাশভাবে তদভাবাৎ, তামসে চ
আবরণাত্মকে তিমিরাদিদোষে সতি অগ্রহণাদেঃ অবিদ্যাত্রয়স্য উপলব্ধেঃ ॥
অত্র আহ — এবং তর্হি জ্ঞাতৃধর্মঃ অবিদ্যা । ন; করণে চক্ষুষি
তৈমিরিকৎবাদিদোষোপলব্ধেঃ । যত্তু মন্যসে — জ্ঞাতৃধর্মঃ অবিদ্যা,
তদেব চ অবিদ্যাধর্মবত্ত্বং ক্ষেত্রজ্ঞস্য সংসারিৎবম্; তত্র যদুক্তং
“ঈশ্বর এব ক্ষেত্রজ্ঞঃ, ন সংসারী” ইত্যেতৎ অয়ুক্তমিতি —
তৎ ন; যথা করণে চক্ষুষি বিপরীতগ্রাহকাদিদোষস্য দর্শনাৎ ।
ন বিপরীতাদিগ্রহণং তন্নিমিত্তং বা তৈমিরিকৎবাদিদোষঃ গ্রহীতুঃ,
চক্ষুষঃ সংস্কারেণ তিমিরে অপনীতে গ্রহীতুঃ
অদর্শনাৎ ন গ্রহীতুর্ধর্মঃ যথা; তথা সর্বত্রৈব
অগ্রহণবিপরীতসংশয়প্রত্যযাস্তন্নিমিত্তাঃ করণস্যৈব কস্যচিৎ
ভবিতুমর্হন্তি, ন জ্ঞাতুঃ ক্ষেত্রজ্ঞস্য । সংবেদ্যৎবাচ্চ তেষাং
প্রদীপপ্রকাশবৎ ন জ্ঞাতৃধর্মৎবং — সংবেদ্যৎবাদেব
স্বাত্মব্যতিরিক্তসংবেদ্যৎবম্; সর্বকরণবিয়োগে চ কৈবল্যে
সর্ববাদিভিঃ অবিদ্যাদিদোষবত্ত্বানভ্যুপগমাৎ । আত্মনঃ যদি
ক্ষেত্রজ্ঞস্য অগ্ন্যুষ্ণবৎ স্বঃ ধর্মঃ, ততঃ ন কদাচিদপি
তেন বিয়োগঃ স্যাৎ । অবিক্রিয়স্য চ ব্যোমবৎ সর্বগতস্য অমূর্তস্য
আত্মনঃ কেনচিৎ সংয়োগবিয়োগানুপপত্তেঃ, সিদ্ধং ক্ষেত্রজ্ঞস্য
নিত্যমেব ঈশ্বরৎবম্; “অনাদিৎবান্নির্গুণৎবাৎ”
(ভ. গী. ১৩-৩১) ইত্যাদীশ্বরবচনাচ্চ ॥ ননু এবং সতি
সংসারসংসারিৎবাভাবে শাস্ত্রানর্থক্যাদিদোষঃ স্যাদিতি চেৎ, ন;
সর্বৈরভ্যুপগতৎবাৎ । সর্বৈর্হি আত্মবাদিভিঃ অভ্যুপগতঃ দোষঃ
ন একেন পরিহর্তব্যঃ ভবতি । কথং অভ্যুপগতঃ ইতি? মুক্তাত্মনাং
হি সংসারসংসারিৎবব্যবহারাভাবঃ সর্বৈরেব আত্মবাদিভিঃ ইষ্যতে ।
ন চ তেষাং শাস্ত্রানর্থক্যাদিদোষপ্রাপ্তিঃ অভ্যুপগতা । তথা
নঃ ক্ষেত্রজ্ঞানাম্ ঈশ্বরৈকৎবে সতি, শাস্ত্রানর্থক্যং ভবতু;
অবিদ্যাবিষয়ে চ অর্থবত্ত্বম্ — যথা দ্বৈতিনাং সর্বেষাং
বন্ধাবস্থায়ামেব শাস্ত্রাদ্যর্থবত্ত্বম্, ন মুক্তাবস্থায়াম্, এবম্ ॥
ননু আত্মনঃ বন্ধমুক্তাবস্থে পরমার্থত এব বস্তুভূতে দ্বৈতিনাং
সর্বেষাম্ । অতঃ হেয়োপাদেয়তৎসাধনসদ্ভাবে শাস্ত্রাদ্যর্থবত্ত্বং স্যাৎ ।
অদ্বৈতিনাং পুনঃ, দ্বৈতস্য অপরমার্থৎবাৎ, অবিদ্যাকৃতৎবাৎ
বন্ধাবস্থায়াশ্চ আত্মনঃ অপরমার্থৎবে নির্বিষয়ৎবাৎ,
শাস্ত্রাদ্যানর্থক্যং ইতি চেৎ, ন; আত্মনঃ অবস্থাভেদানুপপত্তেঃ । যদি
তাবৎ আত্মনঃ বন্ধমুক্তাবস্থে, যুগপৎ স্যাতাম্, ক্রমেণ বা । যুগপৎ
তাবৎ বিরোধাৎ ন সম্ভবতঃ স্থিতিগতী ইব একস্মিন্ । ক্রমভাবিৎবে
চ, নির্নিমিত্তৎবে অনির্মোক্ষপ্রসঙ্গঃ । অন্যনিমিত্তৎবে চ স্বতঃ
অভাবাৎ অপরমার্থৎবপ্রসঙ্গঃ । তথা চ সতি অভ্যুপগমহানিঃ ।
কিঞ্চ, বন্ধমুক্তাবস্থয়োঃ পৌর্বাপর্যনিরূপণায়াং বন্ধাবস্থা
পূর্বং প্রকল্প্যা, অনাদিমতী অন্তবতী চ; তচ্চ প্রমাণবিরুদ্ধম্ ।
তথা মোক্ষাবস্থা আদিমতী অনন্তা চ প্রমাণবিরুদ্ধৈব অভ্যুপগম্যতে ।
ন চ অবস্থাবতঃ অবস্থান্তরং গচ্ছতঃ নিত্যৎবং উপপাদয়িতুং
শক্যম্ । অথ অনিত্যৎবদোষপরিহারায় বন্ধমুক্তাবস্থাভেদো ন
কল্প্যতে, অতঃ দ্বৈতিনামপি শাস্ত্রানর্থক্যাদিদোষঃ অপরিহার্য
এব; ইতি সমানৎবাৎ ন অদ্বৈতবাদিনা পরিহর্তব্যঃ দোষঃ ॥ ন
চ শাস্ত্রানর্থক্যম্, যথাপ্রসিদ্ধাবিদ্বৎপুরুষবিষয়ৎবাৎ
শাস্ত্রস্য । অবিদুষাং হি ফলহেৎবোঃ অনাত্মনোঃ আত্মদর্শনম্,
ন বিদুষাম্; বিদুষাং হি ফলহেতুভ্যাম্ আত্মনঃ অন্যৎবদর্শনে
সতি, তয়োঃ অহমিতি আত্মদর্শনানুপপত্তেঃ । ন হি অত্যন্তমূঢঃ
উন্মত্তাদিরপি জলাগ্ন্যোঃ ছায়াপ্রকাশয়োর্বা ঐকাত্ম্যং পশ্যতি; কিমুত
বিবেকী । তস্মাৎ ন বিধিপ্রতিষেধশাস্ত্রং তাবৎ ফলহেতুভ্যাং
আত্মনঃ অন্যৎবদর্শিনঃ ভবতি । ন হি “দেবদত্ত, ৎবং ইদং
কুরু” ইতি কস্মিংশ্চিৎ কর্মণি নিয়ুক্তে, বিষ্ণুমিত্রঃ “অহং
নিয়ুক্তঃ” ইতি তত্রস্থঃ নিয়োগং শৃণ্বন্নপি প্রতিপদ্যতে ।
বিয়োগবিষয়বিবেকাগ্রহণাৎ তু উপপদ্যতে প্রতিপত্তিঃ; তথা
ফলহেৎবোরপি ॥ ননু প্রাকৃতসম্বন্ধাপেক্ষয়া যুক্তৈব প্রতিপত্তিঃ
শাস্ত্রার্থবিষয়া — ফলহেতুভ্যাং অন্যাত্মবিষয়দর্শনেঽপি
সতি — ইষ্টফলহেতৌ প্রবর্তিতঃ অস্মি, অনিষ্টফলহেতোশ্চ
নিবর্তিতঃ অস্মীতি; যথা পিতৃপুত্রাদীনাম্ ইতরেতরাত্মান্যৎবদর্শনে
সত্যপি অন্যোন্যনিয়োগপ্রতিষেধার্থপ্রতিপত্তিঃ । ন;
ব্যতিরিক্তাত্ম-দর্শনপ্রতিপত্তেঃ প্রাগেব ফলহেৎবোঃ আত্মাভিমানস্য
সিদ্ধৎবাৎ । প্রতিপন্ননিয়োগপ্রতিষেধার্থো হি ফলহেতুভ্যাং আত্মনঃ
অন্যৎবং প্রতিপদ্যতে, ন পূর্বম্ । তস্মাৎ বিধিপ্রতিষেধশাস্ত্রম্
অবিদ্বদ্বিষয়ং ইতি সিদ্ধম্ ॥ ননু ”স্বর্গকামো যজেত” ”ন
কলঞ্জং ভক্ষয়েৎ” ইত্যাদৌ আত্মব্যতিরেকদর্শিনাং অপ্রবৃত্তৌ,
কেবলদেহাদ্যাত্মদৃষ্টীনাং চ; অতঃ কর্তুঃ অভাবাৎ শাস্ত্রানর্থক্যমিতি
চেৎ, ন; যথাপ্রসিদ্ধিত এব প্রবৃত্তিনিবৃত্ত্যুপপত্তেঃ ।
ঈশ্বরক্ষেত্রজ্ঞৈকৎবদর্শী ব্রহ্মবিৎ তাবৎ ন প্রবর্ততে ।
তথা নৈরাত্ম্যবাদ্যপি নাস্তি পরলোকঃ ইতি ন প্রবর্ততে ।
যথাপ্রসিদ্ধিতস্তু বিধিপ্রতিষেধশাস্ত্রশ্রবণান্যথানুপপত্ত্যা
অনুমিতাত্মাস্তিৎবঃ আত্মবিশেষানভিজ্ঞঃ কর্মফলসঞ্জাততৃষ্ণঃ
শ্রদ্দধানতয়া চ প্রবর্ততে । ইতি সর্বেষাং নঃ প্রত্যক্ষম্ । অতঃ
ন শাস্ত্রানর্থক্যম্ ॥ বিবেকিনাং অপ্রবৃত্তিদর্শনাৎ তদনুগামিনাং
অপ্রবৃত্তৌ শাস্ত্রানর্থক্যং ইতি চেৎ, ন; কস্যচিদেব বিবেকোপপত্তেঃ ।
অনেকেষু হি প্রাণিষু কশ্চিদেব বিবেকী স্যাৎ, যথেদানীম্ । ন চ
বিবেকিনং অনুবর্তন্তে মূঢাঃ, রাগাদিদোষতন্ত্রৎবাৎ প্রবৃত্তেঃ,
অভিচরণাদৌ চ প্রবৃত্তিদর্শনাৎ, স্বাভাব্যাচ্চ প্রবৃত্তেঃ
— “স্বভাবস্তু প্রবর্ততে” (ভ. গী. ৫-১৪) ইতি হি
উক্তম্ ॥ তস্মাৎ অবিদ্যামাত্রং সংসারঃ যথাদৃষ্টবিষয়ঃ এব । ন
ক্ষেত্রজ্ঞস্য কেবলস্য অবিদ্যা তৎকার্যং চ । ন চ মিথ্যাজ্ঞানং
পরমার্থবস্তু দূষয়িতুং সমর্থম্ । ন হি ঊষরদেশং স্নেহেন
পঙ্কীকর্তুং শক্নোতি মরীচ্যুদকম্ । তথা অবিদ্যা ক্ষেত্রজ্ঞস্য ন
কিঞ্চিৎ কর্তুং শক্নোতি । অতশ্চেদমুক্তং — “ক্ষেত্রজ্ঞং
চাপি মাং বিদ্ধি” (ভ. গী. ১৩-২), “অজ্ঞানেনাবৃতং
জ্ঞানম্” (ভ. গী. ৫-১৫) ইতি চ ॥ অথ কিমিদং সংসারিণামিব
“অহমেবম্” “মমৈবেদম্” ইতি পণ্ডিতানামপি? শৃণু;
ইদং তৎ পাণ্ডিত্যম্, যৎ ক্ষেত্রে এব আত্মদর্শনম্ । যদি পুনঃ
ক্ষেত্রজ্ঞং অবিক্রিয়ং পশ্যেয়ুঃ, ততঃ ন ভোগং কর্ম বা আকাঙ্ক্ষেয়ুঃ
“মম স্যাৎ” ইতি । বিক্রিয়ৈব ভোগকর্মণী । অথ এবং সতি,
ফলার্থিৎবাৎ অবিদ্বান্ প্রবর্ততে । বিদুষঃ পুনঃ অবিক্রিয়াত্মদর্শিনঃ
ফলার্থিৎবাভাবাৎ প্রবৃত্ত্যনুপপত্তৌ কার্যকরণসঙ্ঘাতব্যাপারোপরমে
নিবৃত্তিঃ উপচর্যতে ॥ ইদং চ অন্যৎ পাণ্ডিত্যং কেষাঞ্চিৎ অস্তু
— ক্ষেত্রজ্ঞঃ ঈশ্বর এব । ক্ষেত্রং চ অন্যৎ ক্ষেত্রজ্ঞস্যৈব
বিষয়ঃ । অহং তু সংসারী সুখী দুঃখী চ । সংসারোপরমশ্চ
মম কর্তব্যঃ ক্ষেত্রক্ষেত্রজ্ঞবিজ্ঞানেন, ধ্যানেন চ ঈশ্বরং
ক্ষেত্রজ্ঞং সাক্ষাৎকৃৎবা তৎস্বরূপাবস্থানেনেতি । যশ্চ
এবং বুধ্যতে, যশ্চ বোধয়তি, নাসৌ ক্ষেত্রজ্ঞঃ ইতি । এবং
মন্বানঃ যঃ সঃ পণ্ডিতাপসদঃ, সংসারমোক্ষয়োঃ শাস্ত্রস্য চ
অর্থবত্ত্বং করোমীতি; আত্মহা স্বয়ং মূঢঃ অন্যাংশ্চ ব্যামোহয়তি
শাস্ত্রার্থসম্প্রদায়রহিতৎবাৎ, শ্রুতহানিং অশ্রুতকল্পনাং চ
কুর্বন্ । তস্মাৎ অসম্প্রদায়বিৎ সর্বশাস্ত্রবিদপি মূর্খবদেব
উপেক্ষণীয়ঃ ॥ যত্তূক্তম্ “ঈশ্বরস্য ক্ষেত্রজ্ঞৈকৎবে
সংসারিৎবং প্রাপ্নোতি, ক্ষেত্রজ্ঞানাং চ ঈশ্বরৈকৎবে
সংসারিণঃ অভাবাৎ সংসারাভাবপ্রসঙ্গঃ” ইতি, এতৌ দোষৌ
প্রত্যুক্তৌ “বিদ্যাবিদ্যযোঃ বৈলক্ষণ্যাভ্যুপগমাৎ”
ইতি । কথম্? অবিদ্যাপরিকল্পিতদোষেণ তদ্বিষয়ং বস্তু
পারমার্থিকং ন দুষ্যতীতি । তথা চ দৃষ্টান্তঃ দর্শিতঃ —
মরীচ্যম্ভসা ঊষরদেশো ন পঙ্কীক্রিয়তে ইতি । সংসারিণঃ অভাবাৎ
সংসারাভাবপ্রসঙ্গদোষোঽপি সংসারসংসারিণোঃ অবিদ্যাকল্পিতৎবোপপত্ত্যা
প্রত্যুক্তঃ ॥ ননু অবিদ্যাবত্ত্বমেব ক্ষেত্রজ্ঞস্য সংসারিৎবদোষঃ ।
তৎকৃতং চ সুখিৎবদুঃখিৎবাদি প্রত্যক্ষং উপলভ্যতে ইতি
চেৎ, ন; জ্ঞেয়স্য ক্ষেত্রধর্মৎবাৎ, জ্ঞাতুঃ ক্ষেত্রজ্ঞস্য
তৎকৃতদোষানুপপত্তেঃ । যাবৎ কিঞ্চিৎ ক্ষেত্রজ্ঞস্য দোষজাতং
অবিদ্যমানং আসঞ্জয়সি, তস্য জ্ঞেয়ৎবোপপত্তেঃ ক্ষেত্রধর্মৎবমেব,
ন ক্ষেত্রজ্ঞধর্মৎবম্ । ন চ তেন ক্ষেত্রজ্ঞঃ দুষ্যতি, জ্ঞেয়েন
জ্ঞাতুঃ সংসর্গানুপপত্তেঃ । যদি হি সংসর্গঃ স্যাৎ, জ্ঞেয়ৎবমেব
নোপপদ্যেত । যদি আত্মনঃ ধর্মঃ অবিদ্যাবত্ত্বং দুঃখিৎবাদি চ
কথং ভোঃ প্রত্যক্ষং উপলভ্যতে, কথং বা ক্ষেত্রজ্ঞধর্মঃ ।
“জ্ঞেয়ং চ সর্বং ক্ষেত্রং জ্ঞাতৈব ক্ষেত্রজ্ঞঃ”
ইতি অবধারিতে, “অবিদ্যাদুঃখিৎবাদেঃ ক্ষেত্রজ্ঞবিশেষণৎবং
ক্ষেত্রজ্ঞ ধর্মৎবং তস্য চ প্রত্যক্ষোপলভ্যৎবম্” ইতি
বিরুদ্ধং উচ্যতে অবিদ্যামাত্রাবষ্টম্ভাৎ কেবলম্ ॥ অত্র আহ — সা
অবিদ্যা কস্য ইতি । যস্য দৃশ্যতে তস্য এব । কস্য দৃশ্যতে ইতি ।
অত্র উচ্যতে — “অবিদ্যা কস্য দৃশ্যতে?” ইতি প্রশ্নঃ
নিরর্থকঃ । কথম্? দৃশ্যতে চেৎ অবিদ্যা, তদ্বন্তমপি পশ্যসি ।
ন চ তদ্বতি উপলভ্যমানে “সা কস্য?” ইতি প্রশ্নো যুক্তঃ ।
ন হি গোমতি উপলভ্যমানে “গাবঃ কস্য?” ইতি প্রশ্নঃ
অর্থবান্ ভবতি । ননু বিষমো দৃষ্টান্তঃ । গবাং তদ্বতশ্চ
প্রত্যক্ষৎবাৎ তৎসম্বন্ধোঽপি প্রত্যক্ষ ইতি প্রশ্নো নিরর্থকঃ ।
ন তথা অবিদ্যা তদ্বাংশ্চ প্রত্যক্ষৌ, যতঃ প্রশ্নঃ নিরর্থকঃ
স্যাৎ । অপ্রত্যক্ষেণ অবিদ্যাবতা অবিদ্যাসম্বন্ধে জ্ঞাতে, কিং তব
স্যাৎ? অবিদ্যায়াঃ অনর্থহেতুৎবাৎ পরিহর্তব্যা স্যাৎ । যস্য অবিদ্যা,
সঃ তাং পরিহরিষ্যতি । ননু মমৈব অবিদ্যা । জানাসি তর্হি অবিদ্যাং
তদ্বন্তং চ আত্মানম্ । জানামি, ন তু প্রত্যক্ষেণ । অনুমানেন চেৎ
জানাসি, কথং সম্বন্ধগ্রহণম্? ন হি তব জ্ঞাতুঃ জ্ঞেয়ভূতয়া
অবিদ্যযা তৎকালে সম্বন্ধঃ গ্রহীতুং শক্যতে, অবিদ্যায়া বিষয়ৎবেনৈব
জ্ঞাতুঃ উপয়ুক্তৎবাৎ । ন চ জ্ঞাতুঃ অবিদ্যায়াশ্চ সম্বন্ধস্য যঃ
গ্রহীতা, জ্ঞানং চ অন্যৎ তদ্বিষয়ং সম্ভবতি; অনবস্থাপ্রাপ্তেঃ ।
যদি জ্ঞাত্রাপি জ্ঞেয়সম্বন্ধো জ্ঞায়তে, অন্যঃ জ্ঞাতা কল্প্যঃ স্যাৎ,
তস্যাপি অন্যঃ, তস্যাপি অন্যঃ ইতি অনবস্থা অপরিহার্যা । যদি
পুনঃ অবিদ্যা জ্ঞেয়া, অন্যদ্বা জ্ঞেয়ং জ্ঞেয়মেব । তথা জ্ঞাতাপি
জ্ঞাতৈব, ন জ্ঞেয়ং ভবতি । যদা চ এবম্, অবিদ্যাদুঃখিৎবাদ্যৈঃ
ন জ্ঞাতুঃ ক্ষেত্রজ্ঞস্য কিঞ্চিৎ দুষ্যতি ॥ ননু অয়মেব দোষঃ, যৎ
দোষবৎক্ষেত্রবিজ্ঞাতৃৎবম্; ন চ বিজ্ঞানস্বরূপস্যৈব অবিক্রিয়স্য
বিজ্ঞাতৃৎবোপচারাৎ; যথা উষ্ণতামাত্রেণ অগ্নেঃ তপ্তিক্রিয়োপচারঃ
তদ্বৎ । যথা অত্র ভগবতা ক্রিয়াকারকফলাত্মৎবাভাবঃ আত্মনি
স্বত এব দর্শিতঃ — অবিদ্যাধ্যারোপিতঃ এব ক্রিয়াকারকাদিঃ আত্মনি
উপচর্যতে; তথা তত্র তত্র “য এবং বেত্তি হন্তারম্”
(ভ. গী. ২-১৯),“প্রকৃতেঃ ক্রিয়মাণানি গুণৈঃ কর্মাণি
সর্বশঃ” (ভ. গী. ৩-২৭), “নাদত্তে কস্যচিৎপাপম্”
(ভ. গী. ৫-১৫)ইত্যাদিপ্রকরণেষু দর্শিতঃ । তথৈব চ
ব্যাখ্যাতম্ অস্মাভিঃ । উত্তরেষু চ প্রকরণেষু দর্শয়িষ্যামঃ ॥
হন্ত । তর্হি আত্মনি ক্রিয়াকারকফলাত্মতায়াঃ স্বতঃ অভাবে,
অবিদ্যযা চ অধ্যারোপিতৎবে, কর্মাণি অবিদ্বৎকর্তব্যান্যেব, ন
বিদুষাং ইতি প্রাপ্তম্ । সত্যং এবং প্রাপ্তম্, এতদেব চ “ন হি
দেহভৃতা শক্যম্” (ভ. গী. ১৮-১১)ইত্যত্র দর্শয়িষ্যামঃ ।
সর্বশাস্ত্রার্থোপসংহারপ্রকরণে চ “সমাসেনৈব কৌন্তেয়
নিষ্ঠা জ্ঞানস্য যা পরা” (ভ. গী. ১৮-৫০)ইত্যত্র বিশেষতঃ
দর্শয়িষ্যামঃ । অলং ইহ বহুপ্রপঞ্চনেন, ইতি উপসংহ্রিয়তে ॥
“ইদং শরীরম্” ইত্যাদিশ্লোকোপদিষ্টস্য ক্ষেত্রাধ্যায়ার্থস্য
সঙ্গ্রহশ্লোকঃ অয়ং উপন্যস্যতে “তৎক্ষেত্রং যচ্চ” ইত্যাদি,
ব্যাচিখ্যাসিতস্য হি অর্থস্য সঙ্গ্রহোপন্যাসঃ ন্যায়্যঃ ইতি —
তৎক্ষেত্রং যচ্চ যাদৃক্চ যদ্বিকারি যতশ্চ যৎ ।
স চ যো যৎপ্রভাবশ্চ তৎসমাসেন মে শৃণু ॥ ১৩-৩॥
যৎ নির্দিষ্টং “ইদং শরীরম্” ইতি তৎ তচ্ছব্দেন
পরামৃশতি । যচ্চ ইদং নির্দিষ্টং ক্ষেত্রং তৎ যাদৃক্
যাদৃশং স্বকীয়ৈঃ ধর্মৈঃ । চ-শব্দঃ সমুচ্চয়ার্থঃ ।
যদ্বিকারি যঃ বিকারঃ যস্য তৎ যদ্বিকারি, যতঃ যস্মাৎ চ যৎ,
কার্যং উৎপদ্যতে ইতি বাক্যশেষঃ । স চ যঃ ক্ষেত্রজ্ঞঃ নির্দিষ্টঃ
সঃ যৎপ্রভাবঃ যে প্রভাবাঃ উপাধিকৃতাঃ শক্তয়ঃ যস্য সঃ
যৎপ্রভাবশ্চ । তৎ ক্ষেত্রক্ষেত্রজ্ঞয়োঃ যাথাত্ম্যং যথাবিশেষিতং
সমাসেন সঙ্ক্ষেপেণ মে মম বাক্যতঃ শৃণু, শ্রুৎবা অবধারয়
ইত্যর্থঃ ॥ তৎ ক্ষেত্রক্ষেত্রজ্ঞয়াথাত্ম্যং বিবক্ষিতং স্তৌতি
শ্রোতৃবুদ্ধিপ্ররোচনার্থং —
ঋষিভির্বহুধা গীতং ছন্দোভির্বিবিধৈঃ পৃথক্ ।
ব্রহ্মসূত্রপদৈশ্চৈব হেতুমদ্ভির্বিনিশ্চিতৈঃ ॥ ১৩-৪॥
ঋষিভিঃ বসিষ্ঠাদিভিঃ বহুধা বহুপ্রকারং গীতং কথিতম্ ।
ছন্দোভিঃ ছন্দাংসি ঋগাদীনি তৈঃ ছন্দোভিঃ বিবিধৈঃ নানাভাবৈঃ
নানাপ্রকারৈঃ পৃথক্ বিবেকতঃ গীতম্ । কিঞ্চ, ব্রহ্মসূত্রপদৈশ্চ
এব ব্রহ্মণঃ সূচকানি বাক্যানি ব্রহ্মসূত্রাণি তৈঃ পদ্যতে গম্যতে
জ্ঞায়তে ইতি তানি পদানি উচ্যন্তে তৈরেব চ ক্ষেত্রক্ষেত্রজ্ঞয়াথাত্ম্যং
“গীতম্” ইতি অনুবর্ততে ।“আত্মেত্যেবোপাসীত”
(বৃ. উ. ১-৪-৭) ইত্যেবমাদিভিঃ ব্রহ্মসূত্রপদৈঃ আত্মা
জ্ঞায়তে, হেতুমদ্ভিঃ যুক্তিয়ুক্তৈঃ বিনিশ্চিতৈঃ নিঃসংশয়রূপৈঃ
নিশ্চিতপ্রত্যযোৎপাদকৈঃ ইত্যর্থঃ ॥ স্তুত্যা অভিমুখীভূতায় অর্জুনায়
আহ ভগবান্ —
মহাভূতান্যহঙ্কারো বুদ্ধিরব্যক্তমেব চ ।
ইন্দ্রিয়াণি দশৈকং চ পঞ্চ চেন্দ্রিয়গোচরাঃ ॥ ১৩-৫॥
মহাভূতানি মহান্তি চ তানি সর্ববিকারব্যাপকৎবাৎ ভূতানি চ
সূক্ষ্মাণি । স্থূলানি তু ইন্দ্রিয়গোচরশব্দেন অভিধায়িষ্যন্তে
অহঙ্কারঃ মহাভূতকারণম্ অহম্প্রত্যযলক্ষণঃ । অহঙ্কারকারণং
বুদ্ধিঃ অধ্যবসায়লক্ষণা । তৎকারণং অব্যক্তমেব চ,
ন ব্যক্তং অব্যক্তং অব্যাকৃতং ঈশ্বরশক্তিঃ “মম
মায়া দুরত্যযা” (ভ. গী. ৭-১৪) ইত্যুক্তম্ । এবশব্দঃ
প্রকৃত্যবধারণার্থঃ এতাবত্যেব অষ্টধা ভিন্না প্রকৃতিঃ ।
চ-শব্দঃ ভেদসমুচ্চয়ার্থঃ । ইন্দ্রিয়াণি দশ, শ্রোত্রাদীনি
পঞ্চ বুদ্ধ্যুৎপাদকৎবাৎ বুদ্ধীন্দ্রিয়াণি, বাক্পাণ্যাদীনি পঞ্চ
কর্মনিবর্তকৎবাৎ কর্মেন্দ্রিয়াণি; তানি দশ । একং চ; কিং তৎ? মনঃ
একাদশং সঙ্কল্পাদ্যাত্মকম্ । পঞ্চ চ ইন্দ্রিয়গোচরাঃ শব্দাদয়ো
বিষয়াঃ । তানি এতানি সাঙ্খ্যাঃ চতুর্বিংশতিতত্ত্বানি আচক্ষতে ॥
ইচ্ছা দ্বেষঃ সুখং দুঃখং সঙ্ঘাতশ্চেতনা ধৃতিঃ ।
এতৎক্ষেত্রং সমাসেন সবিকারমুদাহৃতম্ ॥ ১৩-৬॥
ইচ্ছা, যজ্জাতীয়ং সুখহেতুমর্থং উপলব্ধবান্ পূর্বম্, পুনঃ
তজ্জাতীয়মুপলভমানঃ তমাদাতুমিচ্ছতি সুখহেতুরিতি; সা ইয়ং ইচ্ছা
অন্তঃকরণধর্মঃ জ্ঞেয়ৎবাৎ ক্ষেত্রম্ । তথা দ্বেষঃ, যজ্জাতীয়মর্থং
দুঃখহেতুৎবেন অনুভূতবান্, পুনঃ তজ্জাতীয়মর্থমুপলভমানঃ তং
দ্বেষ্টি; সোঽয়ং দ্বেষঃ জ্ঞেয়ৎবাৎ ক্ষেত্রমেব । তথা সুখম্ অনুকূলং
প্রসন্নসত্ত্বাত্মকং জ্ঞেয়ৎবাৎ ক্ষেত্রমেব । দুঃখং প্রতিকূলাত্মকম্;
জ্ঞেয়ৎবাৎ তদপি ক্ষেত্রম্ । সঙ্ঘাতঃ দেহেন্দ্রিয়াণাং সংহতিঃ ।
তস্যামভিব্যক্তান্তঃকরণবৃত্তিঃ, তপ্ত ইব লোহপিণ্ডে অগ্নিঃ
আত্মচৈতন্যাভাসরসবিদ্ধা চেতনা; সা চ ক্ষেত্রং জ্ঞেয়ৎবাৎ ।
ধৃতিঃ যয়া অবসাদপ্রাপ্তানি দেহেন্দ্রিয়াণি ধ্রিয়ন্তে; সা চ জ্ঞেয়ৎবাৎ
ক্ষেত্রম্ । সর্বান্তঃকরণধর্মোপলক্ষণার্থং ইচ্ছাদিগ্রহণম্ । যত
উক্তমুপসংহরতি — এতৎ ক্ষেত্রং সমাসেন সবিকারং সহ বিকারেণ
মহদাদিনা উদাহৃতম্ উক্তম্ ॥ যস্য ক্ষেত্রভেদজাতস্য সংহতিঃ
“ইদং শরীরং ক্ষেত্রম্” (ভ. গী. ১৩-১) ইতি উক্তম্, তৎ
ক্ষেত্রং ব্যাখ্যাতং মহাভূতাদিভেদভিন্নং ধৃত্যন্তম্ । ক্ষেত্রজ্ঞঃ
বক্ষ্যমাণবিশেষণঃ — যস্য সপ্রভাবস্য ক্ষেত্রজ্ঞস্য পরিজ্ঞানাৎ
অমৃতৎবং ভবতি, তং “জ্ঞেয়ং যত্তৎপ্রবক্ষ্যামি”
(ভ. গী. ১৩-১২) ইত্যাদিনা সবিশেষণং স্বয়মেব বক্ষ্যতি
ভগবান্ । অধুনা তু তজ্জ্ঞানসাধনগণমমানিৎবাদিলক্ষণম্,
যস্মিন্ সতি তজ্জ্ঞেয়বিজ্ঞানে যোগ্যঃ অধিকৃতঃ ভবতি, যৎপরঃ
সন্ন্যাসী জ্ঞাননিষ্ঠঃ উচ্যতে, তং অমানিৎবাদিগণং জ্ঞানসাধনৎবাৎ
জ্ঞানশব্দবাচ্যং বিদধাতি ভগবান্ —
অমানিৎবমদম্ভিৎবমহিংসা ক্ষান্তিরার্জবম্ ।
আচার্যোপাসনং শৌচং স্থৈর্যমাত্মবিনিগ্রহঃ ॥ ১৩-৭॥
অমানিৎবং মানিনঃ ভাবঃ মানিৎবমাত্মনঃ শ্লাঘনম্, তদভাবঃ অমানিৎবম্ ।
অদম্ভিৎবং স্বধর্মপ্রকটীকরণং দম্ভিৎবম্, তদভাবঃ অদম্ভিৎবম্ ।
অহিংসা অহিংসনং প্রাণিনামপীডনম্ । ক্ষান্তিঃ পরাপরাধপ্রাপ্তৌ অবিক্রিয়া ।
আর্জবং ঋজুভাবঃ অবক্রৎবম্ । আচার্যোপাসনং মোক্ষসাধনোপদেষ্টুঃ
আচার্যস্য শুশ্রূষাদিপ্রয়োগেণ সেবনম্ । শৌচং কায়মলানাং
মৃজ্জলাভ্যাং প্রক্ষালনম্; অন্তশ্চ মনসঃ প্রতিপক্ষভাবনয়া
রাগাদিমলানামপনয়নং শৌচম্ । স্থৈর্যং স্থিরভাবঃ, মোক্ষমার্গে
এব কৃতাধ্যবসায়ৎবম্ । আত্মবিনিগ্রহঃ আত্মনঃ অপকারকস্য
আত্মশব্দবাচ্যস্য কার্যকরণসঙ্ঘাতস্য বিনিগ্রহঃ স্বভাবেন সর্বতঃ
প্রবৃত্তস্য সন্মার্গে এব নিরোধঃ আত্মবিনিগ্রহঃ ॥ কিঞ্চ —
ইন্দ্রিয়ার্থেষু বৈরাগ্যমনহঙ্কার এব চ ।
জন্মমৃত্যুজরাব্যাধিদুঃখদোষানুদর্শনম্ ॥ ১৩-৮॥
ইন্দ্রিয়ার্থেষু শব্দাদিষু দৃষ্টাদৃষ্টেষু ভোগেষু
বিরাগভাবো বৈরাগ্যং অনহঙ্কারঃ অহঙ্কারাভাবঃ এব চ
জন্মমৃত্যুজরাব্যাধিদুঃখদোষানুদর্শনং জন্ম চ মৃত্যুশ্চ জরা
চ ব্যাধয়শ্চ দুঃখানি চ তেষু জন্মাদিদুঃখান্তেষু প্রত্যেকং
দোষানুদর্শনম্ । জন্মনি গর্ভবাসয়োনিদ্বারনিঃসরণং দোষঃ,
তস্য অনুদর্শনমালোচনম্ । তথা মৃত্যৌ দোষানুদর্শনম্ । তথা
জরায়াং প্রজ্ঞাশক্তিতেজোনিরোধদোষানুদর্শনং পরিভূততা চেতি ।
তথা ব্যাধিষু শিরোরোগাদিষু দোষানুদর্শনম্ । তথা দুঃখেষু
অধ্যাত্মাধিভূতাধিদৈবনিমিত্তেষু । অথবা দুঃখান্যেব দোষঃ দুঃখদোষঃ
তস্য জন্মাদিষু পূর্ববৎ অনুদর্শনং — দুঃখং জন্ম, দুঃখং মৃত্যুঃ,
দুঃখং জরা, দুঃখং ব্যাধয়ঃ । দুঃখনিমিত্তৎবাৎ জন্মাদয়ঃ দুঃখম্,
ন পুনঃ স্বরূপেণৈব দুঃখমিতি । এবং জন্মাদিষু দুঃখদোষানুদর্শনাৎ
দেহেন্দ্রিয়াদিবিষয়ভোগেষু বৈরাগ্যমুপজায়তে । ততঃ প্রত্যগাত্মনি
প্রবৃত্তিঃ করণানামাত্মদর্শনায় । এবং জ্ঞানহেতুৎবাৎ জ্ঞানমুচ্যতে
জন্মাদিদুঃখদোষানুদর্শনম্ ॥ কিঞ্চ —
অসক্তিরনভিষ্বঙ্গঃ পুত্রদারগৃহাদিষু ।
নিত্যং চ সমচিত্তৎবমিষ্টানিষ্টোপপত্তিষু ॥ ১৩-৯॥
অসক্তিঃ সক্তিঃ সঙ্গনিমিত্তেষু বিষয়েষু প্রীতিমাত্রম্, তদভাবঃ অসক্তিঃ ।
অনভিষ্বঙ্গঃ অভিষ্বঙ্গাভাবঃ । অভিষ্বঙ্গো নাম আসক্তিবিশেষ এব
অনন্যাত্মভাবনালক্ষণঃ; যথা অন্যস্মিন্ সুখিনি দুঃখিনি বা “অহমেব
সুখী, দুঃখী চ,” জীবতি মৃতে বা “অহমেব জীবামি মরিষ্যামি
চ” ইতি । ক্ব ইতি আহ — পুত্রদারগৃহাদিষু, পুত্রেষু দারেষু
গৃহেষু আদিগ্রহণাৎ অন্যেষ্বপি অত্যন্তেষ্টেষু দাসবর্গাদিষু । তচ্চ
উভয়ং জ্ঞানার্থৎবাৎ জ্ঞানমুচ্যতে । নিত্যং চ সমচিত্তৎবং তুল্যচিত্ততা ।
ক্ব? ইষ্টানিষ্ঠোপপত্তিষু ইষ্টানামনিষ্টানাং চ উপপত্তয়ঃ সম্প্রাপ্তয়ঃ
তাসু ইষ্টানিষ্ঠোপপত্তিষু নিত্যমেব তুল্যচিত্ততা । ইষ্টোপপত্তিষু
ন হৃষ্যতি, ন কুপ্যতি চ অনিষ্টোপপত্তিষু । তচ্চ এতৎ নিত্যং
সমচিত্তৎবং জ্ঞানম্ ॥ কিঞ্চ —
ময়ি চানন্যযোগেন ভক্তিরব্যভিচারিণী ।
বিবিক্তদেশসেবিৎবমরতির্জনসংসদি ॥ ১৩-১০॥
ময়ি চ ঈশ্বরে অনন্যযোগেন অপৃথক্সমাধিনা “ন অন্যো
ভগবতো বাসুদেবাৎ পরঃ অস্তি, অতঃ স এব নঃ গতিঃ” ইত্যেবং
নিশ্চিতা অব্যভিচারিণী বুদ্ধিঃ অনন্যযোগঃ, তেন ভজনং ভক্তিঃ ন
ব্যভিচরণশীলা অব্যভিচারিণী । সা চ জ্ঞানম্ । বিবিক্তদেশসেবিৎবম্,
বিবিক্তঃ স্বভাবতঃ সংস্কারেণ বা অশুচ্যাদিভিঃ সর্পব্যাঘ্রাদিভিশ্চ
রহিতঃ অরণ্যনদীপুলিনদেবগৃহাদিভির্বিবিক্তো দেশঃ, তং সেবিতুং
শীলমস্য ইতি বিবিক্তদেশসেবী, তদ্ভাবঃ বিবিক্তদেশসেবিৎবম্ । বিবিক্তেষু
হি দেশেষু চিত্তং প্রসীদতি যতঃ ততঃ আত্মাদিভাবনা বিবিক্তে উপজায়তে ।
অতঃ বিবিক্তদেশসেবিৎবং জ্ঞানমুচ্যতে । অরতিঃ অরমণং জনসংসদি,
জনানাং প্রাকৃতানাং সংস্কারশূন্যানাং অবিনীতানাং সংসৎ সমবায়ঃ
জনসংসৎ; ন সংস্কারবতাং বিনীতানাং সংসৎ; তস্যাঃ জ্ঞানোপকারকৎবাৎ ।
অতঃ প্রাকৃতজনসংসদি অরতিঃ জ্ঞানার্থৎবাৎ জ্ঞানম্ ॥ কিঞ্চ —
অধ্যাত্মজ্ঞাননিত্যৎবং তত্ত্বজ্ঞানার্থদর্শনম্ ।
এতজ্জ্ঞানমিতি প্রোক্তমজ্ঞানং যদতোঽন্যথা ॥ ১৩-১১॥
অধ্যাত্মজ্ঞাননিত্যৎবং আত্মাদিবিষয়ং জ্ঞানং অধ্যাত্মজ্ঞানম্,
তস্মিন্ নিত্যভাবঃ নিত্যৎবম্ । অমানিৎবাদীনাং জ্ঞানসাধনানাং
ভাবনাপরিপাকনিমিত্তং তত্ত্বজ্ঞানম্, তস্য অর্থঃ মোক্ষঃ
সংসারোপরমঃ; তস্য আলোচনং তত্ত্বজ্ঞানার্থদর্শনম্;
তত্ত্বজ্ঞানফলালোচনে হি তৎসাধনানুষ্ঠানে প্রবৃত্তিঃ স্যাদিতি ।
এতৎ অমানিৎবাদিতত্ত্বজ্ঞানার্থদর্শনান্তমুক্তং জ্ঞানং ইতি প্রোক্তং
জ্ঞানার্থৎবাৎ । অজ্ঞানং যৎ অতঃ অস্মাৎ যথোক্তাৎ অন্যথা বিপর্যযেণ ।
মানিৎবং দম্ভিৎবং হিংসা অক্ষান্তিঃ অনার্জবং ইত্যাদি অজ্ঞানং বিজ্ঞেয়ং
পরিহরণায়, সংসারপ্রবৃত্তিকারণৎবাৎ ইতি ॥ যথোক্তেন জ্ঞানেন
জ্ঞাতব্যং কিং ইত্যাকাঙ্ক্ষায়ামাহ — “জ্ঞেয়ং যত্তৎ” ইত্যাদি ।
ননু যমাঃ নিয়মাশ্চ অমানিৎবাদয়ঃ । ন তৈঃ জ্ঞেয়ং জ্ঞায়তে । ন হি
অমানিৎবাদি কস্যচিৎ বস্তুনঃ পরিচ্ছেদকং দৃষ্টম্ । সর্বত্রৈব চ
যদ্বিষয়ং জ্ঞানং তদেব তস্য জ্ঞেয়স্য পরিচ্ছেদকং দৃশ্যতে ।
ন হি অন্যবিষয়েণ জ্ঞানেন অন্যৎ উপলভ্যতে, যথা ঘটবিষয়েণ
জ্ঞানেন অগ্নিঃ । নৈষ দোষঃ, জ্ঞাননিমিত্তৎবাৎ জ্ঞানমুচ্যতে ইতি
হি অবোচাম; জ্ঞানসহকারিকারণৎবাচ্চ —
জ্ঞেয়ং যত্তৎপ্রবক্ষ্যামি যজ্জ্ঞাৎবামৃতমশ্নুতে ।
অনাদিমৎপরং ব্রহ্ম ন সত্তন্নাসদুচ্যতে ॥ ১৩-১২॥
জ্ঞেয়ং জ্ঞাতব্যং যৎ তৎ প্রবক্ষ্যামি প্রকর্ষেণ যথাবৎ বক্ষ্যামি ।
কিম্ফলং তৎ ইতি প্ররোচনেন শ্রোতুঃ অভিমুখীকরণায় আহ —
যৎ জ্ঞেয়ং জ্ঞাৎবা অমৃতং অমৃতৎবং অশ্নুতে, ন পুনঃ ম্রিয়তে
ইত্যর্থঃ । অনাদিমৎ আদিঃ অস্য অস্তীতি আদিমৎ, ন আদিমৎ অনাদিমৎ; কিং
তৎ? পরং নিরতিশয়ং ব্রহ্ম, “জ্ঞেয়ম্” ইতি প্রকৃতম্ ॥
অত্র কেচিৎ “অনাদি মৎপরম্” ইতি পদং ছিন্দন্তি, বহুব্রীহিণা
উক্তে অর্থে মতুপঃ আনর্থক্যং অনিষ্টং স্যাৎ ইতি । অর্থবিশেষং চ
দর্শয়ন্তি — অহং বাসুদেবাখ্যা পরা শক্তিঃ যস্য তৎ মৎপরম্ ইতি ।
সত্যমেবমপুনরুক্তং স্যাৎ, অর্থঃ চেৎ সম্ভবতি । ন তু অর্থঃ
সম্ভবতি, ব্রহ্মণঃ সর্ববিশেষপ্রতিষেধেনৈব বিজিজ্ঞাপয়িষিতৎবাৎ
“ন সত্তন্নাসদুচ্যতে” ইতি । বিশিষ্টশক্তিমত্ত্বপ্রদর্শনং
বিশেষপ্রতিষেধশ্চ ইতি বিপ্রতিষিদ্ধম্ । তস্মাৎ মতুপঃ বহুব্রীহিণা
সমানার্থৎবেঽপি প্রয়োগঃ শ্লোকপূরণার্থঃ ॥ অমৃতৎবফলং
জ্ঞেয়ং ময়া উচ্যতে ইতি প্ররোচনেন অভিমুখীকৃত্য আহ —
ন সৎ তৎ জ্ঞেয়মুচ্যতে ইতি ন অপি অসৎ তৎ উচ্যতে ॥ ননু মহতা
পরিকরবন্ধেন কণ্ঠরবেণ উদ্ঘুষ্য “জ্ঞেয়ং প্রবক্ষ্যামি”
ইতি, অননুরূপমুক্তং “ন সত্তন্নাসদুচ্যতে” ইতি । ন,
অনুরূপমেব উক্তম্ । কথম্? সর্বাসু হি উপনিষৎসু জ্ঞেয়ং ব্রহ্ম
“নেতি নেতি” (বৃ. উ. ২-৩-৬) “অস্থূলমনণু”
(বৃ. উ. ৩-৮-৮) ইত্যাদিবিশেষপ্রতিষেধেনৈব নির্দিশ্যতে, ন
“ইদং তৎ” ইতি, বাচঃ অগোচরৎবাৎ ॥ ননু ন তদস্তি,
যদ্বস্তু অস্তিশব্দেন নোচ্যতে । অথ অস্তিশব্দেন নোচ্যতে, নাস্তি
তৎ জ্ঞেয়ম্ । বিপ্রতিষিদ্ধং চ — “জ্ঞেয়ং তৎ,”
“অস্তিশব্দেন নোচ্যতে” ইতি চ । ন তাবন্নাস্তি,
নাস্তিবুদ্ধ্যবিষয়ৎবাৎ ॥ ননু সর্বাঃ বুদ্ধয়ঃ অস্তিনাস্তিবুদ্ধ্যনুগতাঃ
এব । তত্র এবং সতি জ্ঞেয়মপি অস্তিবুদ্ধ্যনুগতপ্রত্যযবিষয়ং বা
স্যাৎ, নাস্তিবুদ্ধ্যনুগতপ্রত্যযবিষয়ং বা স্যাৎ । ন, অতীন্দ্রিয়ৎবেন
উভয়বুদ্ধ্যনুগতপ্রত্যযাবিষয়ৎবাৎ । যদ্ধি ইন্দ্রিয়গম্যং
বস্তু ঘটাদিকম্, তৎ অস্তিবুদ্ধ্যনুগতপ্রত্যযবিষয়ং
বা স্যাৎ, নাস্তিবুদ্ধ্যনুগতপ্রত্যযবিষয়ং বা স্যাৎ ।
ইদং তু জ্ঞেয়ং অতীন্দ্রিয়ৎবেন শব্দৈকপ্রমাণগম্যৎবাৎ ন
ঘটাদিবৎ উভয়বুদ্ধ্যনুগতপ্রত্যযবিষয়ম্ ইত্যতঃ “ন
সত্তন্নাসৎ” ইতি উচ্যতে ॥ যত্তু উক্তং — বিরুদ্ধমুচ্যতে,
“জ্ঞেয়ং তৎ” “ন সত্তন্নাসদুচ্যতে” ইতি —
ন বিরুদ্ধম্, “অন্যদেব তদ্বিদিতাদথো অবিদিতাদধি”
(কে. উ. ১-৪) ইতি শ্রুতেঃ । শ্রুতিরপি বিরুদ্ধার্থা ইতি চেৎ
— যথা যজ্ঞায় শালামারভ্য”যদ্যমুষ্মিংল্লোকেঽস্তি
বা ন বেতি” (তৈ. সং. ৬-১-১-১) ইত্যেবমিতি চেৎ, ন;
বিদিতাবিদিতাভ্যামন্যৎবশ্রুতেঃ অবশ্যবিজ্ঞেয়ার্থপ্রতিপাদনপরৎবাৎ
“যদ্যমুষ্মিন্” ইত্যাদি তু বিধিশেষঃ অর্থবাদঃ ।
উপপত্তেশ্চ সদসদাদিশব্দৈঃ ব্রহ্ম নোচ্যতে ইতি । সর্বো হি
শব্দঃ অর্থপ্রকাশনায় প্রয়ুক্তঃ, শ্রূয়মাণশ্চ শ্রোতৃভিঃ,
জাতিক্রিয়াগুণসম্বন্ধদ্বারেণ সঙ্কেতগ্রহণসব্যপেক্ষঃ
অর্থং প্রত্যায়যতি; ন অন্যথা, অদৃষ্টৎবাৎ । তৎ যথা
— “গৌঃ” “অশ্বঃ” ইতি বা জাতিতঃ,
“পচতি” “পঠতি” ইতি বা ক্রিয়াতঃ,
“শুক্লঃ” “কৃষ্ণঃ” ইতি বা গুণতঃ,
“ধনী” “গোমান্” ইতি বা সম্বন্ধতঃ । ন তু
ব্রহ্ম জাতিমৎ, অতঃ ন সদাদিশব্দবাচ্যম্ । নাপি গুণবৎ, যেন
গুণশব্দেন উচ্যেত, নির্গুণৎবাৎ । নাপি ক্রিয়াশব্দবাচ্যং নিষ্ক্রিয়ৎবাৎ
“নিষ্কলং নিষ্ক্রিয়ং শান্তম্” (শ্বে. উ. ৬-১৯) ইতি শ্রুতেঃ ।
ন চ সম্বন্ধী, একৎবাৎ । অদ্বয়ৎবাৎ অবিষয়ৎবাৎ আত্মৎবাচ্চ ন
কেনচিৎ শব্দেন উচ্যতে ইতি যুক্তম্; “যতো বাচো নিবর্তন্তে”
(তৈ. উ. ২-৯-১) ইত্যাদিশ্রুতিভিশ্চ ॥ সচ্ছব্দপ্রত্যযাবিষয়ৎবাৎ
অসত্ত্বাশঙ্কায়াং জ্ঞেয়স্য সর্বপ্রাণিকরণোপাধিদ্বারেণ তদস্তিৎবং
প্রতিপাদয়ন্ তদাশঙ্কানিবৃত্ত্যর্থমাহ —
সর্বতঃপাণিপাদং তৎসর্বতোক্ষিশিরোমুখম্ ।
সর্বতঃশ্রুতিমল্লোকে সর্বমাবৃত্য তিষ্ঠতি ॥ ১৩-১৩॥
সর্বতঃপাণিপাদং সর্বতঃ পাণয়ঃ পাদাশ্চ অস্য ইতি সর্বতঃপাণিপাদং
তৎ জ্ঞেয়ম্ । সর্বপ্রাণিকরণোপাধিভিঃ ক্ষেত্রজ্ঞস্য অস্তিৎবং
বিভাব্যতে । ক্ষেত্রজ্ঞশ্চ ক্ষেত্রোপাধিতঃ উচ্যতে । ক্ষেত্রং
চ পাণিপাদাদিভিঃ অনেকধা ভিন্নম্ । ক্ষেত্রোপাধিভেদকৃতং
বিশেষজাতং মিথ্যৈব ক্ষেত্রজ্ঞস্য, ইতি তদপনয়নেন
জ্ঞেয়ৎবমুক্তং “ন সত্তন্নাসদুচ্যতে” ইতি । উপাধিকৃতং
মিথ্যারূপমপি অস্তিৎবাধিগমায় জ্ঞেয়ধর্মবৎ পরিকল্প্য উচ্যতে
“সর্বতঃপাণিপাদম্” ইত্যাদি । তথা হি সম্প্রদায়বিদাং বচনং
–”অধ্যারোপাপবাদাভ্যাং নিষ্প্রপঞ্চং প্রপঞ্চ্যতে”
ইতি । সর্বত্র সর্বদেহাবয়বৎবেন গম্যমানাঃ পাণিপাদাদয়ঃ
জ্ঞেয়শক্তিসদ্ভাবনিমিত্তস্বকার্যাঃ ইতি জ্ঞেয়সদ্ভাবে লিঙ্গানি
“জ্ঞেয়স্য” ইতি উপচারতঃ উচ্যন্তে । তথা ব্যাখ্যেয়ং
অন্যৎ । সর্বতঃপাণিপাদং তৎ জ্ঞেয়ম্ । সর্বতোক্ষিশিরোমুখং
সর্বতঃ অক্ষীণি শিরাংসি মুখানি চ যস্য তৎ সর্বতোক্ষিশিরোমুখম্;
সর্বতঃশ্রুতিমৎ শ্রুতিঃ শ্রবণেন্দ্রিয়ম্, তৎ যস্য তৎ শ্রুতিমৎ,
লোকে প্রাণিনিকায়ে, সর্বং আবৃত্য সংব্যাপ্য তিষ্ঠতি স্থিতিং লভতে ॥
উপাধিভূতপাণিপাদাদীন্দ্রিয়াধ্যারোপণাৎ জ্ঞেয়স্য তদ্বত্তাশঙ্কা মা ভূৎ
ইত্যেবমর্থঃ শ্লোকারম্ভঃ —
সর্বেন্দ্রিয়গুণাভাসং সর্বেন্দ্রিয়বিবর্জিতম্ ।
অসক্তং সর্বভৃচ্চৈব নির্গুণং গুণভোক্তৃ চ ॥ ১৩-১৪॥
সর্বেন্দ্রিয়গুণাভাসং সর্বাণি চ তানি ইন্দ্রিয়াণি শ্রোত্রাদীনি
বুদ্ধীন্দ্রিয়কর্মেন্দ্রিয়াখ্যানি, অন্তঃকরণে চ বুদ্ধিমনসী,
জ্ঞেয়োপাধিৎবস্য তুল্যৎবাৎ, সর্বেন্দ্রিয়গ্রহণেন গৃহ্যন্তে ।
অপি চ, অন্তঃকরণোপাধিদ্বারেণৈব শ্রোত্রাদীনামপি উপাধিৎবম্
ইত্যতঃ অন্তঃকরণবহিষ্করণোপাধিভূতৈঃ সর্বেন্দ্রিয়গুণৈঃ
অধ্যবসায়সঙ্কল্পশ্রবণবচনাদিভিঃ অবভাসতে ইতি
সর্বেন্দ্রিয়গুণাভাসং সর্বেন্দ্রিয়ব্যাপারৈঃ ব্যাপৃতমিব তৎ জ্ঞেয়ং
ইত্যর্থঃ; “ধ্যায়তীব লেলায়তীব” (বৃ. উ. ৪-৩-৭)
ইতি শ্রুতেঃ । কস্মাৎ পুনঃ কারণাৎ ন ব্যাপৃতমেবেতি গৃহ্যতে
ইত্যতঃ আহ — সর্বেন্দ্রিয়বিবর্জিতম্, সর্বকরণরহিতমিত্যর্থঃ ।
অতঃ ন করণব্যাপারৈঃ ব্যাপৃতং তৎ জ্ঞেয়ম্ । যস্তু অয়ং
মন্ত্রঃ — “অপাণিপাদো জবনো গ্রহীতা পশ্যত্যচক্ষুঃ
স শৃণোত্যকর্ণঃ” (শ্বে. উ. ৩-১৯) ইত্যাদিঃ, স
সর্বেন্দ্রিয়োপাধিগুণানুগুণ্যভজনশক্তিমৎ তৎ জ্ঞেয়ং ইত্যেবং
প্রদর্শনার্থঃ, ন তু সাক্ষাদেব জবনাদিক্রিয়াবত্ত্বপ্রদর্শনার্থঃ ।
”অন্ধো মণিমবিন্দৎ” (তৈ. আ. ১-১১) ইত্যাদিমন্ত্রার্থবৎ
তস্য মন্ত্রস্য অর্থঃ । যস্মাৎ সর্বকরণবর্জিতং জ্ঞেয়ম্,
তস্মাৎ অসক্তং সর্বসংশ্লেষবর্জিতম্ । যদ্যপি এবম্, তথাপি
সর্বভৃচ্চ এব । সদাস্পদং হি সর্বং সর্বত্র সদ্বুদ্ধ্যনুগমাৎ ।
ন হি মৃগতৃষ্ণিকাদয়োঽপি নিরাস্পদাঃ ভবন্তি । অতঃ সর্বভৃৎ
সর্বং বিভর্তি ইতি । স্যাৎ ইদং চ অন্যৎ জ্ঞেয়স্য সত্ত্বাধিগমদ্বারং
— নির্গুণং সত্ত্বরজস্তমাংসি গুণাঃ তৈঃ বর্জিতং তৎ জ্ঞেয়ম্,
তথাপি গুণভোক্তৃ চ গুণানাং সত্ত্বরজস্তমসাং শব্দাদিদ্বারেণ
সুখদুঃখমোহাকারপরিণতানাং ভোক্তৃ চ উপলব্ধৃ চ তৎ জ্ঞেয়ং
ইত্যর্থঃ ॥ কিঞ্চ —
বহিরন্তশ্চ ভূতানামচরং চরমেব চ ।
সূক্ষ্মৎবাত্তদবিজ্ঞেয়ং দূরস্থং চান্তিকে চ তৎ ॥ ১৩-১৫॥
বহিঃ ৎবক্পর্যন্তং দেহং আত্মৎবেন অবিদ্যাকল্পিতং অপেক্ষ্য তমেব
অবধিং কৃৎবা বহিঃ উচ্যতে । তথা প্রত্যগাত্মানমপেক্ষ্য দেহমেব
অবধিং কৃৎবা অন্তঃ উচ্যতে । “বহিরন্তশ্চ” ইত্যুক্তে
মধ্যে অভাবে প্রাপ্তে, ইদমুচ্যতে — অচরং চরমেব চ, যৎ
চরাচরং দেহাভাসমপি তদেব জ্ঞেয়ং যথা রজ্জুসর্পাভাসঃ ।
যদি অচরং চরমেব চ স্যাৎ ব্যবহারবিষয়ং সর্বং জ্ঞেয়ম্,
কিমর্থং “ইদম্” ইতি সর্বৈঃ ন বিজ্ঞেয়ং ইতি? উচ্যতে —
সত্যং সর্বাভাসং তৎ; তথাপি ব্যোমবৎ সূক্ষ্মম্ । অতঃ সূক্ষ্মৎবাৎ
স্বেন রূপেণ তৎ জ্ঞেয়মপি অবিজ্ঞেয়ং অবিদুষাম্ । বিদুষাং তু,
“আত্মৈবেদং সর্বম্” (ছা. উ. ৭-২৫-২)“ব্রহ্মৈবেদং
সর্বম্” ইত্যাদিপ্রমাণতঃ নিত্যং বিজ্ঞাতম্ । অবিজ্ঞাততয়া দূরস্থং
বর্ষসহস্রকোট্যাপি অবিদুষাং অপ্রাপ্যৎবাৎ । অন্তিকে চ তৎ, আত্মৎবাৎ
বিদুষাম্ ॥ কিঞ্চ —
অবিভক্তং চ ভূতেষু বিভক্তমিব চ স্থিতম্ ।
ভূতভর্তৃ চ তজ্জ্ঞেয়ং গ্রসিষ্ণু প্রভবিষ্ণু চ ॥ ১৩-১৬॥
অবিভক্তং চ প্রতিদেহং ব্যোমবৎ তদেকম্ । ভূতেষু সর্বপ্রাণিষু
বিভক্তমিব চ স্থিতং দেহেষ্বেব বিভাব্যমানৎবাৎ । ভূতভর্তৃ
চ ভূতানি বিভর্তীতি তৎ জ্ঞেয়ং ভূতভর্তৃ চ স্থিতিকালে ।
প্রলয়কালে গৃসিষ্ণু গ্রসনশীলম্ । উৎপত্তিকালে প্রভবিষ্ণু চ
প্রভবনশীলং যথা রজ্জ্বাদিঃ সর্পাদেঃ মিথ্যাকল্পিতস্য ॥ কিঞ্চ,
সর্বত্র বিদ্যমানমপি সৎ ন উপলভ্যতে চেৎ, জ্ঞেয়ং তমঃ তর্হি? ন ।
কিং তর্হি? —
জ্যোতিষামপি তজ্জ্যোতিস্তমসঃ পরমুচ্যতে ।
জ্ঞানং জ্ঞেয়ং জ্ঞানগম্যং হৃদি সর্বস্য বিষ্ঠিতম্ ॥ ১৩-১৭॥
জ্যোতিষাং আদিত্যাদীনামপি তৎ জ্ঞেয়ং জ্যোতিঃ । আত্মচৈতন্যজ্যোতিষা
ইদ্ধানি হি আদিত্যাদীনি জ্যোতীংষি দীপ্যন্তে, ”যেন সূর্যস্তপতি
তেজসেদ্ধঃ” (তৈ. ব্রা. ৩-১২-৯) “তস্য ভাসা সর্বমিদং
বিভাতি” (মু. উ. ২-২-১১)ইত্যাদিশ্রুতিভ্যঃ; স্মৃতেশ্চ
ইহৈব — “যদাদিত্যগতং তেজঃ” (ভ. গী. ১৫-১২)
ইত্যাদেঃ । তমসঃ অজ্ঞানাৎ পরং অস্পৃষ্টং উচ্যতে । জ্ঞানাদেঃ
দুঃসম্পাদনবুদ্ধ্যা প্রাপ্তাবসাদস্য উত্তম্ভনার্থমাহ —
জ্ঞানং অমানিৎবাদি; জ্ঞেয়ং “জ্ঞেয়ং যৎ তৎ প্রবক্ষ্যামি”
(ভ. গী. ১৩-১২) ইত্যাদিনা উক্তম্; জ্ঞানগম্যং জ্ঞেয়মেব জ্ঞাতং সৎ
জ্ঞানফলমিতি জ্ঞানগম্যমুচ্যতে; জ্ঞায়মানং তু জ্ঞেয়ম্ । তৎ এতৎ
ত্রয়মপি হৃদি বুদ্ধৌ সর্বস্য প্রাণিজাতস্য বিষ্ঠিতং বিশেষেণ
স্থিতম্ । তত্রৈব হি ত্রয়ং বিভাব্যতে ॥ যথোক্তার্থোপসংহারার্থঃ
অয়ং শ্লোকঃ আরভ্যতে —
ইতি ক্ষেত্রং তথা জ্ঞানং জ্ঞেয়ং চোক্তং সমাসতঃ ।
মদ্ভক্ত এতদ্বিজ্ঞায় মদ্ভাবায়োপপদ্যতে ॥ ১৩-১৮॥
ইতি এবং ক্ষেত্রং মহাভূতাদি ধৃত্যন্তং তথা জ্ঞানং অমানিৎবাদি
তত্ত্বজ্ঞানার্থদর্শনপর্যন্তং জ্ঞেয়ং চ “জ্ঞেয়ং যৎ
তৎ” (ভ. গী. ১৩-১২) ইত্যাদি “তমসঃ পরমুচ্যতে”
(ভ. গী. ১৩-১৭) ইত্যেবমন্তং উক্তং সমাসতঃ সঙ্ক্ষেপতঃ ।
এতাবান্ সর্বঃ হি বেদার্থঃ গীতার্থশ্চ উপসংহৃত্য উক্তঃ । অস্মিন্
সম্যগ্দর্শনে কঃ অধিক্রিয়তে ইতি উচ্যতে — মদ্ভক্তঃ ময়ি ঈশ্বরে
সর্বজ্ঞে পরমগুরৌ বাসুদেবে সমর্পিতসর্বাত্মভাবঃ, যৎ পশ্যতি
শৃণোতি স্পৃশতি বা “সর্বমেব ভগবান্ বাসুদেবঃ”
ইত্যেবঙ্গ্রহাবিষ্টবুদ্ধিঃ মদ্ভক্তঃ স এতৎ যথোক্তং সম্যগ্দর্শনং
বিজ্ঞায়, মদ্ভাবায় মম ভাবঃ মদ্ভাবঃ পরমাত্মভাবঃ তস্মৈ
মদ্ভাবায় উপপদ্যতে মোক্ষং গচ্ছতি ॥ তত্র সপ্তমে ঈশ্বরস্য
দ্বে প্রকৃতী উপন্যস্তে, পরাপরে ক্ষেত্রক্ষেত্রজ্ঞলক্ষণে;
“এতদ্যোনীনি ভূতানি” (ভ. গী. ৭-৬) ইতি চ উক্তম্ ।
ক্ষেত্রক্ষেত্রজ্ঞপ্রকৃতিদ্বয়যোনিৎবং কথং ভূতানামিতি অয়মর্থঃ
অধুনা উচ্যতে —
প্রকৃতিং পুরুষং চৈব বিদ্ধ্যনাদী উভাবপি ।
বিকারাংশ্চ গুণাংশ্চৈব বিদ্ধি প্রকৃতিসম্ভবান্ ॥ ১৩-১৯॥
প্রকৃতিং পুরুষং চৈব ঈশ্বরস্য প্রকৃতী তৌ প্রকৃতিপুরুষৌ
উভাবপি অনাদী বিদ্ধি, ন বিদ্যতে আদিঃ যয়োঃ তৌ অনাদী ।
নিত্যেশ্বরৎবাৎ ঈশ্বরস্য তৎপ্রকৃত্যোরপি যুক্তং নিত্যৎবেন
ভবিতুম্ । প্রকৃতিদ্বয়বত্ত্বমেব হি ঈশ্বরস্য ঈশ্বরৎবম্ । যাভ্যাং
প্রকৃতিভ্যাং ঈশ্বরঃ জগদুৎপত্তিস্থিতিপ্রলয়হেতুঃ, তে দ্বে অনাদী
সত্যৌ সংসারস্য কারণম্ ॥ ন আদী অনাদী ইতি তৎপুরুষসমাসং কেচিৎ
বর্ণয়ন্তি । তেন হি কিল ঈশ্বরস্য কারণৎবং সিধ্যতি । যদি পুনঃ
প্রকৃতিপুরুষাবেব নিত্যৌ স্যাতাং তৎকৃতমেব জগৎ ন ঈশ্বরস্য
জগতঃ কর্তৃৎবম্ । তৎ অসৎ ; প্রাক্ প্রকৃতিপুরুষয়োঃ উৎপত্তেঃ
ঈশিতব্যাভাবাৎ ঈশ্বরস্য অনীশ্বরৎবপ্রসঙ্গাৎ, সংসারস্য
নির্নিমিত্তৎবে অনির্মোক্ষপ্রসঙ্গাৎ শাস্ত্রানর্থক্যপ্রসঙ্গাৎ
বন্ধমোক্ষাভাবপ্রসঙ্গাচ্চ । নিত্যৎবে পুনঃ ঈশ্বরস্য
প্রকৃত্যোঃ সর্বমেতৎ উপপন্নং ভবেৎ । কথম্? বিকারাংশ্চ
গুণাংশ্চৈব বক্ষ্যমাণান্বিকারান্ বুদ্ধ্যাদিদেহেন্দ্রিয়ান্তান্ গুণাংশ্চ
সুখদুঃখমোহপ্রত্যযাকারপরিণতান্ বিদ্ধি জানীহি প্রকৃতিসম্ভবান্,
প্রকৃতিঃ ঈশ্বরস্য বিকারকারণশক্তিঃ ত্রিগুণাত্মিকা মায়া, সা
সম্ভবো যেষাং বিকারাণাং গুণানাং চ তান্ বিকারান্ গুণাংশ্চ বিদ্ধি
প্রকৃতিসম্ভবান্ প্রকৃতিপরিণামান্ ॥ কে পুনঃ তে বিকারাঃ গুণাশ্চ
প্রকৃতিসম্ভবাঃ —
কার্যকরণকর্তৃৎবে হেতুঃ প্রকৃতিরুচ্যতে ।
পুরুষঃ সুখদুঃখানাং ভোক্তৃৎবে হেতুরুচ্যতে ॥ ১৩-২০॥
কার্যকরণকর্তৃৎবে — কার্যং শরীরং করণানি তৎস্থানি ত্রয়োদশ ।
দেহস্যারম্ভকাণি ভূতানি পঞ্চ বিষয়াশ্চ প্রকৃতিসম্ভবাঃ
বিকারাঃ পূর্বোক্তাঃ ইহ কার্যগ্রহণেন গৃহ্যন্তে । গুণাশ্চ
প্রকৃতিসম্ভবাঃ সুখদুঃখমোহাত্মকাঃ করণাশ্রয়ৎবাৎ করণগ্রহণেন
গৃহ্যন্তে । তেষাং কার্যকরণানাং কর্তৃৎবং উৎপাদকৎবং যৎ তৎ
কার্যকরণকর্তৃৎবং তস্মিন্ কার্যকরণকর্তৃৎবে হেতুঃ কারণং
আরম্ভকৎবেন প্রকৃতিঃ উচ্যতে । এবং কার্যকরণকর্তৃৎবেন
সংসারস্য কারণং প্রকৃতিঃ । কার্যকারণকর্তৃৎবে ইত্যস্মিন্নপি
পাঠে, কার্যং যৎ যস্য পরিণামঃ তৎ তস্য কার্যং বিকারঃ বিকারি
কারণং তয়োঃ বিকারবিকারিণোঃ কার্যকারণয়োঃ কর্তৃৎবে ইতি । অথবা,
ষোডশ বিকারাঃ কার্যং সপ্ত প্রকৃতিবিকৃতয়ঃ কারণং তান্যেব
কার্যকারণান্যুচ্যন্তে তেষাং কর্তৃৎবে হেতুঃ প্রকৃতিঃ উচ্যতে,
আরম্ভকৎবেনৈব । পুরুষশ্চ সংসারস্য কারণং যথা স্যাৎ
তৎ উচ্যতে — পুরুষঃ জীবঃ ক্ষেত্রজ্ঞঃ ভোক্তা ইতি পর্যায়ঃ,
সুখদুঃখানাং ভোগ্যানাং ভোক্তৃৎবে উপলব্ধৃৎবে হেতুঃ উচ্যতে ॥
কথং পুনঃ অনেন কার্যকরণকর্তৃৎবেন সুখদুঃখভোক্তৃৎবেন চ
প্রকৃতিপুরুষয়োঃ সংসারকারণৎবমুচ্যতে ইতি, অত্র উচ্যতে —
কার্যকরণসুখদুঃখরূপেণ হেতুফলাত্মনা প্রকৃতেঃ পরিণামাভাবে,
পুরুষস্য চ চেতনস্য অসতি তদুপলব্ধৃৎবে, কুতঃ সংসারঃ
স্যাৎ? যদা পুনঃ কার্যকরণসুখদুঃখস্বরূপেণ হেতুফলাত্মনা
পরিণতয়া প্রকৃত্যা ভোগ্যযা পুরুষস্য তদ্বিপরীতস্য ভোক্তৃৎবেন
অবিদ্যারূপঃ সংয়োগঃ স্যাৎ, তদা সংসারঃ স্যাৎ ইতি । অতঃ যৎ
প্রকৃতিপুরুষয়োঃ কার্যকরণকর্তৃৎবেন সুখদুঃখভোক্তৃৎবেন
চ সংসারকারণৎবমুক্তম্, তৎ যুক্তম্ । কঃ পুনঃ অয়ং সংসারো
নাম? সুখদুঃখসম্ভোগঃ সংসারঃ । পুরুষস্য চ সুখদুঃখানাং
সম্ভোক্তৃৎবং সংসারিৎবমিতি ॥ যৎ পুরুষস্য সুখদুঃখানাং
ভোক্তৃৎবং সংসারিৎবং ইতি উক্তং তস্য তৎ কিন্নিমিত্তমিতি উচ্যতে —
পুরুষঃ প্রকৃতিস্থো হি ভুঙ্ক্তে প্রকৃতিজান্গুণান্ ।
কারণং গুণসঙ্গোঽস্য সদসদ্যোনিজন্মসু ॥ ১৩-২১॥
পুরুষঃ ভোক্তা প্রকৃতিস্থঃ প্রকৃতৌ অবিদ্যালক্ষণায়াং
কার্যকরণরূপেণ পরিণতায়াং স্থিতঃ প্রকৃতিস্থঃ, প্রকৃতিমাত্মৎবেন
গতঃ ইত্যেতৎ, হি যস্মাৎ, তস্মাৎ ভুঙ্ক্তে উপলভতে ইত্যর্থঃ ।
প্রকৃতিজান্ প্রকৃতিতঃ জাতান্ সুখদুঃখমোহাকারাভিব্যক্তান্ গুণান্
“সুখী, দুঃখী, মূঢঃ, পণ্ডিতঃ অহম্” ইত্যেবম্ । সত্যামপি
অবিদ্যায়াং সুখদুঃখমোহেষু গুণেষু ভুজ্যমানেষু যঃ সঙ্গঃ আত্মভাবঃ
সংসারস্য সঃ প্রধানং কারণং জন্মনঃ, “সঃ যথাকামো ভবতি
তৎক্রতুর্ভবতি” (বৃ. উ. ৪-৪-৫)ইত্যাদিশ্রুতেঃ । তদেতৎ আহ
— কারণং হেতুঃ গুণসঙ্গঃ গুণেষু সঙ্গঃ অস্য পুরুষস্য ভোক্তুঃ
সদসদ্যোনিজন্মসু, সত্যশ্চ অসত্যশ্চ যোনয়ঃ সদসদ্যোনয়ঃ তাসু
সদসদ্যোনিষু জন্মানি সদসদ্যোনিজন্মানি, তেষু সদসদ্যোনিজন্মসু
বিষয়ভূতেষু কারণং গুণসঙ্গঃ । অথবা, সদসদ্যোনিজন্মসু
অস্য সংসারস্য কারণং গুণসঙ্গঃ ইতি সংসারপদমধ্যাহার্যম্ ।
সদ্যোনয়ঃ দেবাদিয়োনয়ঃ; অসদ্যোনয়ঃ পশ্বাদিয়োনয়ঃ । সামর্থ্যাৎ
সদসদ্যোনয়ঃ মনুষ্যযোনয়োঽপি অবিরুদ্ধাঃ দ্রষ্টব্যাঃ ॥ এতৎ উক্তং
ভবতি — প্রকৃতিস্থৎবাখ্যা অবিদ্যা, গুণেষু চ সঙ্গঃ কামঃ,
সংসারস্য কারণমিতি । তচ্চ পরিবর্জনায় উচ্যতে । অস্য চ
নিবৃত্তিকারণং জ্ঞানবৈরাগ্যে সসন্ন্যাসে গীতাশাস্ত্রে প্রসিদ্ধম্ ।
তচ্চ জ্ঞানং পুরস্তাৎ উপন্যস্তং ক্ষেত্রক্ষেত্রজ্ঞবিষয়ম্
“যজ্জ্ঞাৎবামৃতমশ্নুতে” (ভ. গী. ১৩-১২) ইতি । উক্তং চ
অন্যাপোহেন অতদ্ধর্মাধ্যারোপেণ চ ॥ তস্যৈব পুনঃ সাক্ষাৎ নির্দেশঃ
ক্রিয়তে —
উপদ্রষ্টানুমন্তা চ ভর্তা ভোক্তা মহেশ্বরঃ ।
পরমাত্মেতি চাপ্যুক্তো দেহেঽস্মিন্পুরুষঃ পরঃ ॥ ১৩-২২॥
উপদ্রষ্টা সমীপস্থঃ সন্ দ্রষ্টা স্বয়ং অব্যাপৃতঃ । যথা
ঋৎবিগ্যজমানেষু যজ্ঞকর্মব্যাপৃতেষু তটস্থঃ অন্যঃ অব্যাপৃতঃ
যজ্ঞবিদ্যাকুশলঃ ঋৎবিগ্যজমানব্যাপারগুণদোষাণাং ঈক্ষিতা,
তদ্বচ্চ কার্যকরণব্যাপারেষু অব্যাপৃতঃ অন্যঃ তদ্বিলক্ষণঃ তেষাং
কার্যকরণানাং সব্যাপারাণাং সামীপ্যেন দ্রষ্টা উপদ্রষ্টা । অথবা,
দেহচক্ষুর্মনোবুদ্ধ্যাত্মানঃ দ্রষ্টারঃ, তেষাং বাহ্যঃ দ্রষ্টা দেহঃ,
ততঃ আরভ্য অন্তরতমশ্চ প্রত্যক্ সমীপে আত্মা দ্রষ্টা, যতঃ পরঃ
অন্তরতমঃ নাস্তি দ্রষ্টা; সঃ অতিশয়সামীপ্যেন দ্রষ্টৃৎবাৎ উপদ্রষ্টা
স্যাৎ । যজ্ঞোপদ্রষ্টৃবদ্বা সর্ববিষয়ীকরণাৎ উপদ্রষ্টা । অনুমন্তা
চ, অনুমোদনং অনুমননং কুর্বৎসু তৎক্রিয়াসু পরিতোষঃ, তৎকর্তা
অনুমন্তা চ । অথবা, অনুমন্তা, কার্যকরণপ্রবৃত্তিষু স্বয়ং
অপ্রবৃত্তোঽপি প্রবৃত্ত ইব তদনুকূলঃ বিভাব্যতে, তেন অনুমন্তা ।
অথবা, প্রবৃত্তান্ স্বব্যাপারেষু তৎসাক্ষিভূতঃ কদাচিদপি ন
নিবারয়তি ইতি অনুমন্তা । ভর্তা, ভরণং নাম দেহেন্দ্রিয়মনোবুদ্ধীনাং
সংহতানাং চৈতন্যাত্মপারার্থ্যেন নিমিত্তভূতেন চৈতন্যাভাসানাং
যৎ স্বরূপধারণম্, তৎ চৈতন্যাত্মকৃতমেব ইতি ভর্তা আত্মা
ইতি উচ্যতে । ভোক্তা, অগ্ন্যুষ্ণবৎ নিত্যচৈতন্যস্বরূপেণ বুদ্ধেঃ
সুখদুঃখমোহাত্মকাঃ প্রত্যযাঃ সর্ববিষয়বিষয়াঃ চৈতন্যাত্মগ্রস্তা
ইব জায়মানাঃ বিভক্তাঃ বিভাব্যন্তে ইতি ভোক্তা আত্মা উচ্যতে ।
মহেশ্বরঃ, সর্বাত্মৎবাৎ স্বতন্ত্রৎবাচ্চ মহান্ ঈশ্বরশ্চ ইতি
মহেশ্বরঃ । পরমাত্মা, দেহাদীনাং বুদ্ধ্যন্তানাং প্রত্যগাত্মৎবেন
কল্পিতানাং অবিদ্যযা পরমঃ উপদ্রষ্টৃৎবাদিলক্ষণঃ আত্মা ইতি পরমাত্মা ।
সঃ অতঃ “পরমাত্মা” ইত্যনেন শব্দেন চ অপি উক্তঃ কথিতঃ
শ্রুতৌ । ক্ব অসৌ? অস্মিন্ দেহে পুরুষঃ পরঃ অব্যক্তাৎ, “উত্তমঃ
পুরুষস্ত্বন্যঃ পরমাত্মেত্যুদাহৃতঃ” (ভ. গী. ১৫-১৭)
ইতি যঃ বক্ষ্যমাণঃ ॥ “ক্ষেত্রজ্ঞং চাপি মাং বিদ্ধি”
(ভ. গী. ১৩-২) ইতি উপন্যস্তঃ ব্যাখ্যায় উপসংহৃতশ্চ, তমেতং
যথোক্তলক্ষণং আত্মানং —
য এবং বেত্তি পুরুষং প্রকৃতিং চ গুণৈঃ সহ ।
সর্বথা বর্তমানোঽপি ন স ভূয়োঽভিজায়তে ॥ ১৩-২৩॥
যঃ এবং যথোক্তপ্রকারেণ বেত্তি পুরুষং সাক্ষাৎ অহমিতি প্রকৃতিং
চ যথোক্তাং অবিদ্যালক্ষণাং গুণৈঃ স্ববিকারৈঃ সহ নিবর্তিতাং
অভাবং আপাদিতাং বিদ্যযা, সর্বথা সর্বপ্রকারেণ বর্তমানোঽপি সঃ
ভূয়ঃ পুনঃ পতিতে অস্মিন্ বিদ্বচ্ছরীরে দেহান্তরায় ন অভিজায়তে
ন উৎপদ্যতে, দেহান্তরং ন গৃহ্ণাতি ইত্যর্থঃ । অপিশব্দাৎ
কিমু বক্তব্যং স্ববৃত্তস্থো ন জায়তে ইতি অভিপ্রায়ঃ ॥ ননু,
যদ্যপি জ্ঞানোৎপত্ত্যনন্তরং পুনর্জন্মাভাব উক্তঃ, তথাপি প্রাক্
জ্ঞানোৎপত্তেঃ কৃতানাং কর্মণাং উত্তরকালভাবিনাং চ, যানি চ
অতিক্রান্তানেকজন্মকৃতানি তেষাং চ, ফলমদত্ত্বা নাশো ন যুক্ত
ইতি, স্যুঃ ত্রীণি জন্মানি, কৃতবিপ্রণাশো হি ন যুক্ত ইতি, যথা
ফলে প্রবৃত্তানাম্ আরব্ধজন্মনাং কর্মণাম্ । ন চ কর্মণাং বিশেষঃ
অবগম্যতে । তস্মাৎ ত্রিপ্রকারাণ্যপি কর্মাণি ত্রীণি জন্মানি আরভেরন্;
সংহতানি বা সর্বাণি একং জন্ম আরভেরন্ । অন্যথা কৃতবিনাশে
সতি সর্বত্র অনাশ্বাসপ্রসঙ্গঃ, শাস্ত্রানর্থক্যং চ স্যাৎ ।
ইত্যতঃ ইদময়ুক্তমুক্তং “ন স ভূয়োঽভিজায়তে” ইতি । ন;
“ক্ষীয়ন্তে চাস্য কর্মাণি” (মু. উ. ২-২-৯) “ব্রহ্ম
বেদ ব্রহ্মৈব ভবতি” (মু. উ. ৩-২-৯) “তস্য তাবদেব
চিরম্” (ছা. উ. ৬-১৪-২)“ইষীকাতূলবৎ সর্বাণি কর্মাণি
প্রদূয়ন্তে” (ছা. উ. ৫-২৪-৩) ইত্যাদিশ্রুতিশতেভ্যঃ উক্তো
বিদুষঃ সর্বকর্মদাহঃ । ইহাপি চ উক্তঃ “যথৈধাংসি”
(ভ. গী. ৪-৩৭) ইত্যাদিনা সর্বকর্মদাহঃ, বক্ষ্যতি চ ।
উপপত্তেশ্চ — অবিদ্যাকামক্লেশবীজনিমিত্তানি হি কর্মাণি
জন্মান্তরাঙ্কুরং আরভন্তে; ইহাপি চ “সাহঙ্কারাভিসন্ধীনি
কর্মাণি ফলারম্ভকাণি, ন ইতরাণি” ইতি তত্র তত্র ভগবতা
উক্তম্ । ”বীজান্যগ্ন্যুপদগ্ধানি ন রোহন্তি যথা পুনঃ ।
জ্ঞানদগ্ধৈস্তথা ক্লেশৈর্নাত্মা সম্পদ্যতে পুনঃ” (মো. ২১১-১৭)
ইতি চ । অস্তু তাবৎ জ্ঞানোৎপত্ত্যুত্তরকালকৃতানাং কর্মণাং
জ্ঞানেন দাহঃ জ্ঞানসহভাবিৎবাৎ । ন তু ইহ জন্মনি জ্ঞানোৎপত্তেঃ
প্রাক্ কৃতানাং কর্মণাং অতীতজন্মকৃতানাং চ দাহঃ যুক্তঃ ।
ন; “সর্বকর্মাণি” (ভ. গী. ৪-৩৭) ইতি বিশেষণাৎ ।
জ্ঞানোত্তরকালভাবিনামেব সর্বকর্মণাং ইতি চেৎ, ন; সঙ্কোচে
কারণানুপপত্তেঃ । যত্তু উক্তং “যথা বর্তমানজন্মারম্ভকাণি
কর্মাণি ন ক্ষীয়ন্তে ফলদানায় প্রবৃত্তান্যেব সত্যপি জ্ঞানে,
তথা অনারব্ধফলানামপি কর্মণাং ক্ষয়ো ন যুক্তঃ” ইতি,
তৎ অসৎ । কথম্? তেষাং মুক্তেষুবৎ প্রবৃত্তফলৎবাৎ । যথা
পূর্বং লক্ষ্যবেধায় মুক্তঃ ইষুঃ ধনুষঃ লক্ষ্যবেধোত্তরকালমপি
আরব্ধবেগক্ষয়াৎ পতনেনৈব নিবর্ততে, এবং শরীরারম্ভকং কর্ম
শরীরস্থিতিপ্রয়োজনে নিবৃত্তেঽপি, আ সংস্কারবেগক্ষয়াৎ পূর্ববৎ
বর্ততে এব । যথা স এব ইষুঃ প্রবৃত্তিনিমিত্তানারব্ধবেগস্তু
অমুক্তো ধনুষি প্রয়ুক্তোঽপি উপসংহ্রিয়তে, তথা অনারব্ধফলানি
কর্মাণি স্বাশ্রয়স্থান্যেব জ্ঞানেন নির্বীজীক্রিয়ন্তে ইতি, পতিতে অস্মিন্
বিদ্বচ্ছরীরে “ন স ভূয়োঽভিজায়তে” ইতি যুক্তমেব উক্তমিতি
সিদ্ধম্ ॥ অত্র আত্মদর্শনে উপায়বিকল্পাঃ ইমে ধ্যানাদয়ঃ উচ্যন্তে —
ধ্যানেনাত্মনি পশ্যন্তি কেচিদাত্মানমাত্মনা ।
অন্যে সাঙ্খ্যেন যোগেন কর্ময়োগেন চাপরে ॥ ১৩-২৪॥
ধ্যানেন, ধ্যানং নাম শব্দাদিভ্যো বিষয়েভ্যঃ শ্রোত্রাদীনি করণানি মনসি
উপসংহৃত্য, মনশ্চ প্রত্যক্চেতয়িতরি, একাগ্রতয়া যৎ চিন্তনং
তৎ ধ্যানম্; তথা, ধ্যায়তীব বকঃ, ধ্যায়তীব পৃথিবী, ধ্যায়ন্তীব
পর্বতাঃ ইতি উপমোপাদানাৎ । তৈলধারাবৎ সন্ততঃ অবিচ্ছিন্নপ্রত্যযো
ধ্যানম্; তেন ধ্যানেন আত্মনি বুদ্ধৌ পশ্যন্তি আত্মানং প্রত্যক্চেতনম্
আত্মনা স্বেনৈব প্রত্যক্চেতনেন ধ্যানসংস্কৃতেন অন্তঃকরণেন কেচিৎ
যোগিনঃ । অন্যে সাঙ্খ্যেন যোগেন, সাঙ্খ্যং নাম “ইমে সত্ত্বরজস্তমাংসি
গুণাঃ ময়া দৃশ্যা অহং তেভ্যোঽন্যঃ তদ্ব্যাপারসাক্ষিভূতঃ নিত্যঃ
গুণবিলক্ষণঃ আত্মা” ইতি চিন্তনং এষঃ সাঙ্খ্যো যোগঃ, তেন
“পশ্যন্তি আত্মানমাত্মনা” ইতি বর্ততে । কর্ময়োগেন, কর্মৈব যোগঃ,
ঈশ্বরার্পণবুদ্ধ্যা অনুষ্ঠীয়মানং ঘটনরূপং যোগার্থৎবাৎ যোগঃ উচ্যতে
গুণতঃ; তেন সত্ত্বশুদ্ধিজ্ঞানোৎপত্তিদ্বারেণ চ অপরে ॥
অন্যে ৎবেবমজানন্তঃ শ্রুৎবান্যেভ্য উপাসতে ।
তেঽপি চাতিতরন্ত্যেব মৃত্যুং শ্রুতিপরায়ণাঃ ॥ ১৩-২৫॥
অন্যে তু এষু বিকল্পেষু অন্যতমেনাপি এবং যথোক্তং আত্মানং অজানন্তঃ
অন্যেভ্যঃ আচার্যেভ্যঃ শ্রুৎবা “ইদমেব চিন্তয়ত”
ইতি উক্তাঃ উপাসতে শ্রদ্দধানাঃ সন্তঃ চিন্তয়ন্তি । তেঽপি চ
অতিতরন্ত্যেব অতিক্রামন্ত্যেব মৃত্যুম্, মৃত্যুয়ুক্তং সংসারং
ইত্যেতৎ । শ্রুতিপরায়ণাঃ শ্রুতিঃ শ্রবণং পরং অয়নং গমনং
মোক্ষমার্গপ্রবৃত্তৌ পরং সাধনং যেষাং তে শ্রুতিপরায়ণাঃ;
কেবলপরোপদেশপ্রমাণাঃ স্বয়ং বিবেকরহিতাঃ ইত্যভিপ্রায়ঃ । কিমু
বক্তব্যং প্রমাণং প্রতি স্বতন্ত্রাঃ বিবেকিনঃ মৃত্যুং অতিতরন্তি ইতি
অভিপ্রায়ঃ ॥ ক্ষেত্রজ্ঞেশ্বরৈকৎববিষয়ং জ্ঞানং মোক্ষসাধনম্
“যজ্জ্ঞাৎবামৃতমশ্নুতে” (ভ. গী. ১৩-১২)ইত্যুক্তম্,
তৎ কস্মাৎ হেতোরিতি, তদ্ধেতুপ্রদর্শনার্থং শ্লোকঃ আরভ্যতে —
যাবৎসঞ্জায়তে কিঞ্চিৎসত্ত্বং স্থাবরজঙ্গমম্ ।
ক্ষেত্রক্ষেত্রজ্ঞসংয়োগাত্তদ্বিদ্ধি ভরতর্ষভ ॥ ১৩-২৬॥
যাবৎ যৎ কিঞ্চিৎ সঞ্জায়তে সমুৎপদ্যতে সত্ত্বং বস্তু; কিম্
অবিশেষেণ? নেত্যাহ — স্থাবরজঙ্গমং স্থাবরং জঙ্গমং
চ ক্ষেত্রক্ষেত্রজ্ঞসংয়োগাৎ তৎ জায়তে ইত্যেবং বিদ্ধি জানীহি
ভরতর্ষভ ॥ কঃ পুনঃ অয়ং ক্ষেত্রক্ষেত্রজ্ঞয়োঃ সংয়োগঃ
অভিপ্রেতঃ? ন তাবৎ রজ্জ্বেব ঘটস্য অবয়বসংশ্লেষদ্বারকঃ
সম্বন্ধবিশেষঃ সংয়োগঃ ক্ষেত্রেণ ক্ষেত্রজ্ঞস্য সম্ভবতি,
আকাশবৎ নিরবয়বৎবাৎ । নাপি সমবায়লক্ষণঃ তন্তুপটয়োরিব
ক্ষেত্রক্ষেত্রজ্ঞয়োঃ ইতরেতরকার্যকারণভাবানভ্যুপগমাৎ
ইতি, উচ্যতে — ক্ষেত্রক্ষেত্রজ্ঞয়োঃ বিষয়বিষয়িণোঃ
ভিন্নস্বভাবয়োঃ ইতরেতরতদ্ধর্মাধ্যাসলক্ষণঃ সংয়োগঃ
ক্ষেত্রক্ষেত্রজ্ঞস্বরূপ-বিবেকাভাবনিবন্ধনঃ, রজ্জুশুক্তিকাদীনাং
তদ্বিবেকজ্ঞানাভাবাৎ অধ্যারোপিতসর্পরজতাদিসংয়োগবৎ । সঃ অয়ং
অধ্যাসস্বরূপঃ ক্ষেত্রক্ষেত্রজ্ঞসংয়োগঃ মিথ্যাজ্ঞানলক্ষণঃ ।
যথাশাস্ত্রং ক্ষেত্রক্ষেত্রজ্ঞলক্ষণভেদপরিজ্ঞানপূর্বকং প্রাক্
দর্শিতরূপাৎ ক্ষেত্রাৎ মুঞ্জাদিব ইষীকাং যথোক্তলক্ষণং ক্ষেত্রজ্ঞং
প্রবিভজ্য “ন সত্তন্নাসদুচ্যতে” (ভ. গী. ১৩-১২)
ইত্যনেন নিরস্তসর্বোপাধিবিশেষং জ্ঞেয়ং ব্রহ্মস্বরূপেণ যঃ পশ্যতি,
ক্ষেত্রং চ মায়ানির্মিতহস্তিস্বপ্নদৃষ্টবস্তুগন্ধর্বনগরাদিবৎ
“অসদেব সদিব অবভাসতে” ইতি এবং নিশ্চিতবিজ্ঞানঃ যঃ,
তস্য যথোক্তসম্যগ্দর্শনবিরোধাৎ অপগচ্ছতি মিথ্যাজ্ঞানম্ ।
তস্য জন্মহেতোঃ অপগমাৎ “য এবং বেত্তি পুরুষং প্রকৃতিং চ
গুণৈঃ সহ” (ভ. গী. ১৩-২৩) ইত্যনেন “বিদ্বান্ ভূয়ঃ ন
অভিজায়তে” ইতি যৎ উক্তম্, তৎ উপপন্নমুক্তম্ ॥ “ন স
ভূয়োঽভিজায়তে” (ভ. গী. ১৩-২৩) ইতি সম্যগ্দর্শনফলম্
অবিদ্যাদিসংসারবীজনিবৃত্তিদ্বারেণ জন্মভাবঃ উক্তঃ । জন্মকারণং চ
অবিদ্যানিমিত্তকঃ ক্ষেত্রক্ষেত্রজ্ঞসংয়োগঃ উক্তঃ; অতঃ তস্যাঃ অবিদ্যায়াঃ
নিবর্তকং সম্যগ্দর্শনং উক্তমপি পুনঃ শব্দান্তরেণ উচ্যতে —
সমং সর্বেষু ভূতেষু তিষ্ঠন্তং পরমেশ্বরম্ ।
বিনশ্যৎস্ববিনশ্যন্তং যঃ পশ্যতি স পশ্যতি ॥ ১৩-২৭॥
সমং নির্বিশেষং তিষ্ঠন্তং স্থিতিং কুর্বন্তম্; ক্ব? সর্বেষু
সমস্তেষু ভূতেষু ব্রহ্মাদিস্থাবরান্তেষু প্রাণিষু; কম্? পরমেশ্বরং
দেহেন্দ্রিয়মনোবুদ্ধ্যব্যক্তাত্মনঃ অপেক্ষ্য পরমেশ্বরঃ, তং সর্বেষু
ভূতেষু সমং তিষ্ঠন্তম্ । তানি বিশিনষ্টি বিনশ্যৎসু ইতি,
তং চ পরমেশ্বরং অবিনশ্যন্তং ইতি, ভূতানাং পরমেশ্বরস্য
চ অত্যন্তবৈলক্ষণ্যপ্রদর্শনার্থম্ । কথম্? সর্বেষাং হি
ভাববিকারাণাং জনিলক্ষণঃ ভাববিকারো মূলম্; জন্মোত্তরকালভাবিনঃ
অন্যে সর্বে ভাববিকারাঃ বিনাশান্তাঃ; বিনাশাৎ পরো ন কশ্চিৎ অস্তি
ভাববিকারঃ, ভাবাভাবাৎ । সতি হি ধর্মিণি ধর্মাঃ ভবন্তি ।
অতঃ অন্ত্যভাববিকারাভাবানুবাদেন পূর্বভাবিনঃ সর্বে ভাববিকারাঃ
প্রতিষিদ্ধাঃ ভবন্তি সহ কার্যৈঃ । তস্মাৎ সর্বভূতৈঃ বৈলক্ষণ্যং
অত্যন্তমেব পরমেশ্বরস্য সিদ্ধম্, নির্বিশেষৎবং একৎবং চ । যঃ
এবং যথোক্তং পরমেশ্বরং পশ্যতি, সঃ পশ্যতি ॥ ননু সর্বোঽপি
লোকঃ পশ্যতি, কিং বিশেষণেন ইতি । সত্যং পশ্যতি; কিং তু বিপরীতং
পশ্যতি । অতঃ বিশিনষ্টি — স এব পশ্যতীতি । যথা তিমিরদৃষ্টিঃ
অনেকং চন্দ্রং পশ্যতি, তমপেক্ষ্য একচন্দ্রদর্শী বিশিষ্যতে —
স এব পশ্যতীতি; তথা ইহাপি একং অবিভক্তং যথোক্তং আত্মানং যঃ
পশ্যতি, সঃ বিভক্তানেকাত্মবিপরীতদর্শিভ্যঃ বিশিষ্যতে — স
এব পশ্যতীতি । ইতরে পশ্যন্তোঽপি ন পশ্যন্তি, বিপরীতদর্শিৎবাৎ
অনেকচন্দ্রদর্শিবৎ ইত্যর্থঃ ॥ যথোক্তস্য সম্যগ্দর্শনস্য
ফলবচনেন স্তুতিঃ কর্তব্যা ইতি শ্লোকঃ আরভ্যতে —
সমং পশ্যন্হি সর্বত্র সমবস্থিতমীশ্বরম্ ।
ন হিনস্ত্যাত্মনাত্মানং ততো যাতি পরাং গতিম্ ॥ ১৩-২৮॥
সমং পশ্যন্ উপলভমানঃ হি যস্মাৎ সর্বত্র সর্বভূতেষু সমবস্থিতং
তুল্যতয়া অবস্থিতং ঈশ্বরং অতীতানন্তরশ্লোকোক্তলক্ষণমিত্যর্থঃ ।
সমং পশ্যন্ কিম্? ন হিনস্তি হিংসাং ন করোতি আত্মনা স্বেনৈব স্বমাত্মানম্ ।
ততঃ তদহিংসনাৎ যাতি পরাং প্রকৃষ্টাং গতিং মোক্ষাখ্যাম্ ॥ ননু
নৈব কশ্চিৎ প্রাণী স্বয়ং স্বং আত্মানং হিনস্তি । কথং উচ্যতে অপ্রাপ্তং
“ন হিনস্তি” ইতি? যথা ”ন পৃথিব্যামগ্নিশ্চেতব্যো
নান্তরিক্ষে” (তৈ. সং. ৫-২-৭) ইত্যাদি । নৈষ দোষঃ,
অজ্ঞানাং আত্মতিরস্করণোপপত্তেঃ । সর্বো হি অজ্ঞঃ অত্যন্তপ্রসিদ্ধং
সাক্ষাৎ অপরোক্ষাৎ আত্মানং তিরস্কৃত্য অনাত্মানং আত্মৎবেন পরিগৃহ্য,
তমপি ধর্মাধর্মৌ কৃৎবা উপাত্তং আত্মানং হৎবা অন্যং আত্মানং উপাদত্তে
নবং তং চৈবং হৎবা অন্যমেব তমপি হৎবা অন্যং ইত্যেবং উপাত্তমুপাত্তং
আত্মানং হন্তি, ইতি আত্মহা সর্বঃ অজ্ঞঃ । যস্তু পরমার্থাত্মা, অসাবপি
সর্বদা অবিদ্যযা হত ইব, বিদ্যমানফলাভাবাৎ, ইতি সর্বে আত্মহনঃ
এব অবিদ্বাংসঃ । যস্তু ইতরঃ যথোক্তাত্মদর্শী, সঃ উভয়থাপি আত্মনা
আত্মানং ন হিনস্তি ন হন্তি । ততঃ যাতি পরাং গতিম্ যথোক্তং ফলং
তস্য ভবতি ইত্যর্থঃ ॥ সর্বভূতস্থং ঈশ্বরং সমং পশ্যন্
“ন হিনস্তি আত্মনা আত্মানম্” ইতি উক্তম্ । তৎ অনুপপন্নং
স্বগুণকর্মবৈলক্ষণ্যভেদভিন্নেষু আত্মসু, ইত্যেতৎ আশঙ্ক্য আহ —
প্রকৃত্যৈব চ কর্মাণি ক্রিয়মাণানি সর্বশঃ ।
যঃ পশ্যতি তথাত্মানমকর্তারং স পশ্যতি ॥ ১৩-২৯॥
প্রকৃত্যা প্রকৃতিঃ ভগবতঃ মায়া ত্রিগুণাত্মিকা, “মায়াং
তু প্রকৃতিং বিদ্যাৎ” (শ্বে. উ. ৪-১০) ইতি মন্ত্রবর্ণাৎ,
তয়া প্রকৃত্যৈব চ ন অন্যেন মহদাদিকার্যকারণাকারপরিণতয়া
কর্মাণি বাঙ্মনঃকায়ারভ্যাণি ক্রিয়মাণানি নির্বর্ত্যমানানি সর্বশঃ
সর্বপ্রকারৈঃ যঃ পশ্যতি উপলভতে, তথা আত্মানং ক্ষেত্রজ্ঞং
অকর্তারং সর্বোপাধিবিবর্জিতং সঃ পশ্যতি, সঃ পরমার্থদর্শী
ইত্যভিপ্রায়ঃ; নির্গুণস্য অকর্তুঃ নির্বিশেষস্য আকাশস্যেব ভেদে
প্রমাণানুপপত্তিঃ ইত্যর্থঃ ॥ পুনরপি তদেব সম্যগ্দর্শনং
শব্দান্তরেণ প্রপঞ্চয়তি —
যদা ভূতপৃথগ্ভাবমেকস্থমনুপশ্যতি ।
তত এব চ বিস্তারং ব্রহ্ম সম্পদ্যতে তদা ॥ ১৩-৩০॥
যদা যস্মিন্ কালে ভূতপৃথগ্ভাবং ভূতানাং পৃথগ্ভাবং পৃথক্ত্বম্
একস্মিন্ আত্মনি স্থিতং একস্থং অনুপশ্যতি শাস্ত্রাচার্যোপদেশম্,
অনু আত্মানং প্রত্যক্ষৎবেন পশ্যতি “আত্মৈব ইদং সর্বম্”
(ছা. উ. ৭-২৫-২) ইতি, তত এব চ তস্মাদেব চ বিস্তারং উৎপত্তিং
বিকাসং “আত্মতঃ প্রাণ আত্মত আশা আত্মতঃ স্মর আত্মত আকাশ
আত্মতস্তেজ আত্মত আপ আত্মত আবির্ভাবতিরোভাবাবাত্মতোঽন্নম্”
(ছা. উ. ৭-২৬-১) ইত্যেবমাদিপ্রকারৈঃ বিস্তারং যদা পশ্যতি, ব্রহ্ম
সম্পদ্যতে ব্রহ্মৈব ভবতি তদা তস্মিন্ কালে ইত্যর্থঃ ॥ একস্য আত্মানঃ
সর্বদেহাত্মৎবে তদ্দোষসম্বন্ধে প্রাপ্তে, ইদং উচ্যতে —
অনাদিৎবান্নির্গুণৎবাৎপরমাত্মায়মব্যযঃ ।
শরীরস্থোঽপি কৌন্তেয় ন করোতি ন লিপ্যতে ॥ ১৩-৩১॥
অনাদিৎবাৎ অনাদেঃ ভাবঃ অনাদিৎবম্, আদিঃ কারণম্, তৎ যস্য
নাস্তি তৎ আনাদি । যদ্ধি আদিমৎ তৎ স্বেন আত্মনা ব্যেতি; অয়ং তু
অনাদিৎবাৎ নিরবয়ব ইতি কৃৎবা ন ব্যেতি । তথা নির্গুণৎবাৎ ।
সগুণো হি গুণব্যযাৎ ব্যেতি; অয়ং তু নির্গুণৎবাচ্চ ন ব্যেতি; ইতি
পরমাত্মা অয়ং অব্যযঃ; ন অস্য ব্যযো বিদ্যতে ইতি অব্যযঃ । যত
এবমতঃ শরীরস্থোঽপি, শরীরেষু আত্মনঃ উপলব্ধিঃ ভবতীতি
শরীরস্থঃ উচ্যতে; তথাপি ন করোতি । তদকরণাদেব তৎফলেন
ন লিপ্যতে । যো হি কর্তা, সঃ কর্মফলেন লিপ্যতে । অয়ং তু অকর্তা,
অতঃ ন ফলেন লিপ্যতে ইত্যর্থঃ ॥ কঃ পুনঃ দেহেষু করোতি লিপ্যতে
চ? যদি তাবৎ অন্যঃ পরমাত্মনো দেহী করোতি লিপ্যতে চ, ততঃ ইদং
অনুপপন্নম্ উক্তং ক্ষেত্রজ্ঞেশ্বরৈকৎবং “ক্ষেত্রজ্ঞং চাপি
মাং বিদ্ধি” (ভ. গী. ১৩-২) ইত্যাদি । অথ নাস্তি ঈশ্বরাদন্যো
দেহী, কঃ করোতি লিপ্যতে চ? ইতি বাচ্যম্; পরো বা নাস্তি ইতি সর্বথা
দুর্বিজ্ঞেয়ং দুর্বাচ্যং চ ইতি ভগবৎপ্রোক্তং ঔপনিষদং দর্শনং
পরিত্যক্তং বৈশেষিকৈঃ সাঙ্খ্যার্হতবৌদ্ধৈশ্চ । তত্র অয়ং
পরিহারো ভগবতা স্বেনৈব উক্তঃ “স্বভাবস্তু প্রবর্ততে”
(ভ. গী. ৫-১৪)ইতি । অবিদ্যামাত্রস্বভাবো হি করোতি লিপ্যতে ইতি
ব্যবহারো ভবতি, ন তু পরমার্থত একস্মিন্ পরমাত্মনি তৎ অস্তি ।
অতঃ এতস্মিন্ পরমার্থসাঙ্খ্যদর্শনে স্থিতানাং জ্ঞাননিষ্ঠানাং
পরমহংসপরিব্রাজকানাং তিরস্কৃতাবিদ্যাব্যবহারাণাং কর্মাধিকারো নাস্তি
ইতি তত্র তত্র দর্শিতং ভগবতা ॥ কিমিব ন করোতি ন লিপ্যতে ইতি
অত্র দৃষ্টান্তমাহ —
যথা সর্বগতং সৌক্ষ্ম্যাদাকাশং নোপলিপ্যতে ।
সর্বত্রাবস্থিতো দেহে তথাত্মা নোপলিপ্যতে ॥ ১৩-৩২॥
যথা সর্বগতং ব্যাপি অপি সৎ সৌক্ষ্ম্যাৎ সূক্ষ্মভাবাৎ আকাশং খং
ন উপলিপ্যতে ন সম্বধ্যতে, সর্বত্র অবস্থিতঃ দেহে তথা আত্মা ন
উপলিপ্যতে ॥ কিঞ্চ —
যথা প্রকাশয়ত্যেকঃ কৃৎস্নং লোকমিমং রবিঃ ।
ক্ষেত্রং ক্ষেত্রী তথা কৃৎস্নং প্রকাশয়তি ভারত ॥ ১৩-৩৩॥
যথা প্রকাশয়তি অবভাসয়তি একঃ কৃৎস্নং লোকং ইমং রবিঃ সবিতা
আদিত্যঃ, তথা তদ্বৎ মহাভূতাদি ধৃত্যন্তং ক্ষেত্রং একঃ সন্
প্রকাশয়তি । কঃ? ক্ষেত্রী পরমাত্মা ইত্যর্থঃ । রবিদৃষ্টান্তঃ অত্র
আত্মনঃ উভয়ার্থোঽপি ভবতি — রবিবৎ সর্বক্ষেত্রেষু এক এব আত্মা,
অলেপকশ্চ ইতি ॥ সমস্তাধ্যায়ার্থোপসংহারার্থঃ অয়ং শ্লোকঃ —
ক্ষেত্রক্ষেত্রজ্ঞয়োরেবমন্তরং জ্ঞানচক্ষুষা ।
ভূতপ্রকৃতিমোক্ষং চ যে বিদুর্যান্তি তে পরম্ ॥ ১৩-৩৪॥
ক্ষেত্রক্ষেত্রজ্ঞয়োঃ যথাব্যাখ্যাতয়োঃ এবং যথাপ্রদর্শিতপ্রকারেণ
অন্তরং ইতরেতরবৈলক্ষণ্যবিশেষং জ্ঞানচক্ষুষা
শাস্ত্রাচার্যপ্রসাদোপদেশজনিতং আত্মপ্রত্যযিকং জ্ঞানং চক্ষুঃ,
তেন জ্ঞানচক্ষুষা, ভূতপ্রকৃতিমোক্ষং চ, ভূতানাং প্রকৃতিঃ
অবিদ্যালক্ষণা অব্যক্তাখ্যা, তস্যাঃ ভূতপ্রকৃতেঃ মোক্ষণং
অভাবগমনং চ যে বিদুঃ বিজানন্তি, যান্তি গচ্ছন্তি তে পরং
পরমাত্মতত্ত্বং ব্রহ্ম, ন পুনঃ দেহং আদদতে ইত্যর্থঃ ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে ক্ষেত্রক্ষেত্রজ্ঞয়োগো নাম ত্রয়োদশোঽধ্যায়ঃ ॥১৩॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে ক্ষেত্র-ক্ষেত্রজ্ঞ-যোগঃ নাম
ত্রয়োদশোঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ চতুর্দশোঽধ্যায়ঃ ॥
সর্বং উৎপদ্যমানং ক্ষেত্রক্ষেত্রজ্ঞসংয়োগাৎ উৎপদ্যতে ইতি উক্তম্ । তৎ
কথমিতি, তৎপ্রদর্শনার্থং “পরং ভূয়ঃ” ইত্যাদিঃ অধ্যায়ঃ
আরভ্যতে । অথবা, ঈশ্বরপরতন্ত্রয়োঃ ক্ষেত্রক্ষেত্রজ্ঞয়োঃ জগৎকারণৎবং
ন তু সাঙ্খ্যানামিব স্বতন্ত্রয়োঃ ইত্যেবমর্থম্ । প্রকৃতিস্থৎবং গুণেষু
চ সঙ্গঃ সংসারকারণং ইতি উক্তম্ । কস্মিন্ গুণে কথং সঙ্গঃ? কে
বা গুণাঃ? কথং বা তে বধ্নন্তি ইতি? গুণেভ্যশ্চ মোক্ষণং কথং
স্যাৎ? মুক্তস্য চ লক্ষণং বক্তব্যম্, ইত্যেবমর্থং চ ভগবান্ উবাচ —
শ্রীভগবানুবাচ —
পরং ভূয়ঃ প্রবক্ষ্যামি জ্ঞানানাং জ্ঞানমুত্তমম্ ।
যজ্জ্ঞাৎবা মুনয়ঃ সর্বে পরাং সিদ্ধিমিতো গতাঃ ॥ ১৪-১॥
পরং জ্ঞানং ইতি ব্যবহিতেন সম্বন্ধঃ, ভূয়ঃ পুনঃ
পূর্বেষু সর্বেষ্বধ্যায়েষু অসকৃৎ উক্তমপি প্রবক্ষ্যামি ।
তচ্চ পরং পরবস্তুবিষয়ৎবাৎ । কিং তৎ? জ্ঞানং সর্বেষাং
জ্ঞানানাং উত্তমম্, উত্তমফলৎবাৎ । জ্ঞানানাং ইতি ন অমানিৎবাদীনাম্;
কিং তর্হি? যজ্ঞাদিজ্ঞেয়বস্তুবিষয়াণাং ইতি । তানি ন মোক্ষায়, ইদং তু
মোক্ষায় ইতি পরোত্তমশব্দাভ্যাং স্তৌতি শ্রোতৃবুদ্ধিরুচ্যুৎপাদনার্থম্ ।
যৎ জ্ঞাৎবা যৎ জ্ঞানং জ্ঞাৎবা প্রাপ্য মুনয়ঃ সন্ন্যাসিনঃ মননশীলাঃ সর্বে
পরাং সিদ্ধিং মোক্ষাখ্যাং ইতঃ অস্মাৎ দেহবন্ধনাৎ ঊর্ধ্বং গতাঃ প্রাপ্তাঃ ॥
অস্যাশ্চ সিদ্ধেঃ ঐকান্তিকৎবং দর্শয়তি —
ইদং জ্ঞানমুপাশ্রিত্য মম সাধর্ম্যমাগতাঃ ।
সর্গেঽপি নোপজায়ন্তে প্রলয়ে ন ব্যথন্তি চ ॥ ১৪-২॥
ইদং জ্ঞানং যথোক্তমুপাশ্রিত্য, জ্ঞানসাধনং অনুষ্ঠায় ইত্যেতৎ, মম
পরমেশ্বরস্য সাধর্ম্যং মৎস্বরূপতাং আগতাঃ প্রাপ্তাঃ ইত্যর্থঃ । ন তু
সমানধর্মতা সাধর্ম্যম্, ক্ষেত্রজ্ঞেশ্বরয়োঃ ভেদানভ্যুপগমাৎ গীতাশাস্ত্রে ।
ফলবাদশ্চ অয়ং স্তুত্যর্থং উচ্যতে । সর্গেঽপি সৃষ্টিকালেঽপি ন
উপজায়ন্তে । ন উৎপদ্যন্তে । প্রলয়ে ব্রহ্মণোঽপি বিনাশকালে ন ব্যথন্তি
চ ব্যথাং ন আপদ্যন্তে, ন চ্যবন্তি ইত্যর্থঃ ॥ ক্ষেত্রক্ষেত্রজ্ঞসংয়োগঃ
ঈদৃশঃ ভূতকারণং ইত্যাহ —
মম যোনির্মহদ্ব্রহ্ম তস্মিন্গর্ভং দধাম্যহম্ ।
সম্ভবঃ সর্বভূতানাং ততো ভবতি ভারত ॥ ১৪-৩॥
মম স্বভূতা মদীয়া মায়া ত্রিগুণাত্মিকা প্রকৃতিঃ যোনিঃ সর্বভূতানাং
কারণম্ । সর্বকার্যেভ্যো মহত্ত্বাৎ ভরণাচ্চ স্ববিকারাণাং মহৎ
ব্রহ্ম ইতি যোনিরেব বিশিষ্যতে । তস্মিন্ মহতি ব্রহ্মণি যোনৌ গর্ভং
হিরণ্যগর্ভস্য জন্মনঃ বীজং সর্বভূতজন্মকারণং বীজং দধামি
নিক্ষিপামি ক্ষেত্রক্ষেত্রজ্ঞপ্রকৃতিদ্বয়শক্তিমান্ ঈশ্বরঃ অহম্,
অবিদ্যাকামকর্মোপাধিস্বরূপানুবিধায়িনং ক্ষেত্রজ্ঞং ক্ষেত্রেণ সংয়োজয়ামি
ইত্যর্থঃ । সম্ভবঃ উৎপত্তিঃ সর্বভূতানাং হিরণ্যগর্ভোৎপত্তিদ্বারেণ
ততঃ তস্মাৎ গর্ভাধানাৎ ভবতি হে ভারত ॥
সর্বয়োনিষু কৌন্তেয় মূর্তয়ঃ সম্ভবন্তি যাঃ ।
তাসাং ব্রহ্ম মহদ্যোনিরহং বীজপ্রদঃ পিতা ॥ ১৪-৪॥
দেবপিতৃমনুষ্যপশুমৃগাদিসর্বয়োনিষু কৌন্তেয়, মূর্তয়ঃ
দেহসংস্থানলক্ষণাঃ মূর্ছিতাঙ্গাবয়বাঃ মূর্তয়ঃ সম্ভবন্তি যাঃ, তাসাং
মূর্তীনাং ব্রহ্ম মহৎ সর্বাবস্থং যোনিঃ কারণং অহং ঈশ্বরঃ বীজপ্রদঃ
গর্ভাধানস্য কর্তা পিতা ॥ কে গুণাঃ কথং বধ্নন্তীতি, উচ্যতে —
সত্ত্বং রজস্তম ইতি গুণাঃ প্রকৃতিসম্ভবাঃ ।
নিবধ্নন্তি মহাবাহো দেহে দেহিনমব্যযম্ ॥ ১৪-৫॥
সত্ত্বং রজঃ তমঃ ইতি এবন্নামানঃ । গুণাঃ ইতি পারিভাষিকঃ শব্দঃ, ন
রূপাদিবৎ দ্রব্যাশ্রিতাঃ গুণাঃ । ন চ গুণগুণিনোঃ অন্যৎবমত্র বিবক্ষিতম্ ।
তস্মাৎ গুণা ইব নিত্যপরতন্ত্রাঃ ক্ষেত্রজ্ঞং প্রতি অবিদ্যাত্মকৎবাৎ
ক্ষেত্রজ্ঞং নিবধ্নন্তীব । তং আস্পদীকৃত্য আত্মানং প্রতিলভন্তে ইতি
নিবধ্নন্তি ইতি উচ্যতে । তে চ প্রকৃতিসম্ভবাঃ ভগবন্মায়াসম্ভবাঃ
নিবধ্নন্তি ইব হে মহাবাহো, মহান্তৌ সমর্থতরৌ আজানুপ্রলম্বৌ বাহূ
যস্য সঃ মহাবাহুঃ, হে মহাবাহো দেহে শরীরে দেহিনং দেহবন্তং অব্যযম্,
অব্যযৎবং চ উক্তং “অনাদিৎবাৎ” (ভ. গী. ১৩-৩১) ইত্যাদিশ্লোকেন ।
ননু “দেহী ন লিপ্যতে” (ভ. গী. ১৩-৩১) ইত্যুক্তম্ । তৎ কথং ইহ
নিবধ্নন্তি ইতি অন্যথা উচ্যতে? পরিহৃতং অস্মাভিঃ ইবশব্দেন নিবধ্নন্তি
ইব ইতি ॥ তত্র সত্ত্বাদীনাং সত্ত্বস্যৈব তাবৎ লক্ষণং উচ্যতে —
তত্র সত্ত্বং নির্মলৎবাৎপ্রকাশকমনাময়ম্ ।
সুখসঙ্গেন বধ্নাতি জ্ঞানসঙ্গেন চানঘ ॥ ১৪-৬॥
নির্মলৎবাৎ স্ফটিকমণিরিব প্রকাশকং অনাময়ং নিরুপদ্রবং
সত্ত্বং তন্নিবধ্নাতি । কথম্? সুখসঙ্গেন “সুখী অহম্” ইতি
বিষয়ভূতস্য সুখস্য বিষয়িণি আত্মনি সংশ্লেষাপাদনং মৃষৈব সুখে
সঞ্জনং ইতি । সৈষা অবিদ্যা । ন হি বিষয়ধর্মঃ বিষয়িণঃ ভবতি ।
ইচ্ছাদি চ ধৃত্যন্তং ক্ষেত্রস্যৈব বিষয়স্য ধর্মঃ ইতি উক্তং ভগবতা ।
অতঃ অবিদ্যযৈব স্বকীয়ধর্মভূতয়া বিষয়বিষয়্যবিবেকলক্ষণয়া
অস্বাত্মভূতে সুখে সঞ্জয়তি ইব, আসক্তমিব করোতি, অসঙ্গং সক্তমিব
করোতি, অসুখিনং সুখিনমিব । তথা জ্ঞানসঙ্গেন চ, জ্ঞানমিতি
সুখসাহচর্যাৎ ক্ষেত্রস্যৈব বিষয়স্য অন্তঃকরণস্য ধর্মঃ, ন আত্মনঃ;
আত্মধর্মৎবে সঙ্গানুপপত্তেঃ, বন্ধানুপপত্তেশ্চ । সুখে ইব জ্ঞানাদৌ
সঙ্গঃ মন্তব্যঃ । হে অনঘ অব্যসন ॥
রজো রাগাত্মকং বিদ্ধি তৃষ্ণাসঙ্গসমুদ্ভবম্ ।
তন্নিবধ্নাতি কৌন্তেয় কর্মসঙ্গেন দেহিনম্ ॥ ১৪-৭॥
রজঃ রাগাত্মকং রঞ্জনাৎ রাগঃ গৈরিকাদিবদ্রাগাত্মকং বিদ্ধি জানীহি ।
তৃষ্ণাসঙ্গসমুদ্ভবং তৃষ্ণা অপ্রাপ্তাভিলাষঃ, আসঙ্গঃ প্রাপ্তে
বিষয়ে মনসঃ প্রীতিলক্ষণঃ সংশ্লেষঃ, তৃষ্ণাসঙ্গয়োঃ সমুদ্ভবং
তৃষ্ণাসঙ্গসমুদ্ভবম্ । তন্নিবধ্নাতি তৎ রজঃ নিবধ্নাতি কৌন্তেয়
কর্মসঙ্গেন, দৃষ্টাদৃষ্টার্থেষু কর্মসু সঞ্জনং তৎপরতা
কর্মসঙ্গঃ, তেন নিবধ্নাতি রজঃ দেহিনম্ ॥
তমস্ত্বজ্ঞানজং বিদ্ধি মোহনং সর্বদেহিনাম্ ।
প্রমাদালস্যনিদ্রাভিস্তন্নিবধ্নাতি ভারত ॥ ১৪-৮॥
তমঃ তৃতীয়ঃ গুণঃ অজ্ঞানজং অজ্ঞানাৎ জাতং অজ্ঞানজং বিদ্ধি
মোহনং মোহকরং অবিবেককরং সর্বদেহিনাং সর্বেষাং দেহবতাম্ ।
প্রমাদালস্যনিদ্রাভিঃ প্রমাদশ্চ আলস্যং চ নিদ্রা চ প্রমাদালস্যনিদ্রাঃ
তাভিঃ প্রমাদালস্যনিদ্রাভিঃ তৎ তমঃ নিবধ্নাতি ভারত ॥ পুনঃ গুণানাং
ব্যাপারঃ সঙ্ক্ষেপতঃ উচ্যতে —
সত্ত্বং সুখে সঞ্জয়তি রজঃ কর্মণি ভারত ।
জ্ঞানমাবৃত্য তু তমঃ প্রমাদে সঞ্জয়ত্যুত ॥ ১৪-৯॥
সত্ত্বং সুখে সঞ্জয়তি সংশ্লেষয়তি, রজঃ কর্মণি হে ভারত সঞ্জয়তি
ইতি অনুবর্ততে । জ্ঞানং সত্ত্বকৃতং বিবেকং আবৃত্য আচ্ছাদ্য তু তমঃ
স্বেন আবরণাত্মনা প্রমাদে সঞ্জয়তি উত প্রমাদঃ নাম প্রাপ্তকর্তব্যাকরণম্ ॥
উক্তং কার্যং কদা কুর্বন্তি গুণা ইতি উচ্যতে —
রজস্তমশ্চাভিভূয় সত্ত্বং ভবতি ভারত ।
রজঃ সত্ত্বং তমশ্চৈব তমঃ সত্ত্বং রজস্তথা ॥ ১৪-১০॥
রজঃ তমশ্চ উভাবপি অভিভূয় সত্ত্বং ভবতি উদ্ভবতি বর্ধতে যদা,
তদা লব্ধাত্মকং সত্ত্বং স্বকার্যং জ্ঞানসুখাদি আরভতে হে ভারত । তথা
রজোগুণঃ সত্ত্বং তমশ্চ এব উভাবপি অভিভূয় বর্ধতে যদা, তদা কর্ম
কৃষ্যাদি স্বকার্যং আরভতে । তম আখ্যো গুণঃ সত্ত্বং রজশ্চ উভাবপি
অভিভূয় তথৈব বর্ধতে যদা, তদা জ্ঞানাবরণাদি স্বকার্যং আরভতে ॥
যদা যো গুণঃ উদ্ভূতঃ ভবতি, তদা তস্য কিং লিঙ্গমিতি উচ্যতে —
সর্বদ্বারেষু দেহেঽস্মিন্প্রকাশ উপজায়তে ।
জ্ঞানং যদা তদা বিদ্যাদ্বিবৃদ্ধং সত্ত্বমিত্যুত ॥ ১৪-১১॥
সর্বদ্বারেষু, আত্মনঃ উপলব্ধিদ্বারাণি শ্রোত্রাদীনি সর্বাণি করণানি,
তেষু সর্বদ্বারেষু অন্তঃকরণস্য বুদ্ধেঃ বৃত্তিঃ প্রকাশঃ দেহে অস্মিন্
উপজায়তে । তদেব জ্ঞানম্ । যদা এবং প্রকাশো জ্ঞানাখ্যঃ উপজায়তে, তদা
জ্ঞানপ্রকাশেন লিঙ্গেন বিদ্যাৎ বিবৃদ্ধং উদ্ভূতং সত্ত্বং ইতি উত অপি ॥
রজসঃ উদ্ভূতস্য ইদং চিহ্নং —
লোভঃ প্রবৃত্তিরারম্ভঃ কর্মণামশমঃ স্পৃহা ।
রজস্যেতানি জায়ন্তে বিবৃদ্ধে ভরতর্ষভ ॥ ১৪-১২॥
লোভঃ পরদ্রব্যাদিৎসা, প্রবৃত্তিঃ প্রবর্তনং সামান্যচেষ্টা, আরম্ভঃ;
কস্য? কর্মণাম্ । অশমঃ অনুপশমঃ, হর্ষরাগাদিপ্রবৃত্তিঃ, স্পৃহা
সর্বসামান্যবস্তুবিষয়া তৃষ্ণা — রজসি গুণে বিবৃদ্ধে এতানি লিঙ্গানি
জায়ন্তে হে ভরতর্ষভ ॥
অপ্রকাশোঽপ্রবৃত্তিশ্চ প্রমাদো মোহ এব চ ।
তমস্যেতানি জায়ন্তে বিবৃদ্ধে কুরুনন্দন ॥ ১৪-১৩॥
অপ্রকাশঃ অবিবেকঃ, অত্যন্তং অপ্রবৃত্তিশ্চ প্রবৃত্ত্যভাবঃ তৎকার্যং
প্রমাদো মোহ এব চ অবিবেকঃ মূঢতা ইত্যর্থঃ । তমসি গুণে বিবৃদ্ধে
এতানি লিঙ্গানি জায়ন্তে হে কুরুনন্দন ॥ মরণদ্বারেণাপি যৎ ফলং প্রাপ্যতে,
তদপি সঙ্গরাগহেতুকং সর্বং গৌণমেব ইতি দর্শয়ন্ আহ —
যদা সত্ত্বে প্রবৃদ্ধে তু প্রলয়ং যাতি দেহভৃৎ ।
তদোত্তমবিদাং লোকানমলান্প্রতিপদ্যতে ॥ ১৪-১৪॥
যদা সত্ত্বে প্রবৃদ্ধে উদ্ভূতে তু প্রলয়ং মরণং যাতি প্রতিপদ্যতে
দেহভৃৎ আত্মা, তদা উত্তমবিদাং মহদাদিতত্ত্ববিদাং ইত্যেতৎ, লোকান্ অমলান্
মলরহিতান্ প্রতিপদ্যতে প্রাপ্নোতি ইত্যেতৎ ॥
রজসি প্রলয়ং গৎবা কর্মসঙ্গিষু জায়তে ।
তথা প্রলীনস্তমসি মূঢয়োনিষু জায়তে ॥ ১৪-১৫॥
রজসি গুণে বিবৃদ্ধে প্রলয়ং মরণং গৎবা প্রাপ্য কর্মসঙ্গিষু
কর্মাসক্তিয়ুক্তেষু মনুষ্যেষু জায়তে । তথা তদ্বদেব প্রলীনঃ মৃতঃ
তমসি বিবৃদ্ধে মূঢয়োনিষু পশ্বাদিয়োনিষু জায়তে ॥ অতীতশ্লোকার্থস্যৈব
সঙ্ক্ষেপঃ উচ্যতে —
কর্মণঃ সুকৃতস্যাহুঃ সাত্ত্বিকং নির্মলং ফলম্ ।
রজসস্তু ফলং দুঃখমজ্ঞানং তমসঃ ফলম্ ॥ ১৪-১৬॥
কর্মণঃ সুকৃতস্য সাত্ত্বিকস্য ইত্যর্থঃ, আহুঃ শিষ্টাঃ সাত্ত্বিকং এব
নির্মলং ফলং ইতি । রজসস্তু ফলং দুঃখং রাজসস্য কর্মণঃ ইত্যর্থঃ,
কর্মাধিকারাৎ ফলং অপি দুঃখং এব, কারণানুরূপ্যাৎ রাজসমেব । তথা
অজ্ঞানং তমসঃ তামসস্য কর্মণঃ অধর্মস্য পূর্ববৎ ॥ কিঞ্চ গুণেভ্যো
ভবতি —
সত্ত্বাৎসঞ্জায়তে জ্ঞানং রজসো লোভ এব চ ।
প্রমাদমোহৌ তমসো ভবতোঽজ্ঞানমেব চ ॥ ১৪-১৭॥
সত্ত্বাৎ লব্ধাত্মকাৎ সঞ্জায়তে সমুৎপদ্যতে জ্ঞানম্, রজসো লোভ এব চ,
প্রমাদমোহৌ চ উভৌ তমসো ভবতঃ, অজ্ঞানমেব চ ভবতি ॥ কিঞ্চ —
ঊর্ধ্বং গচ্ছন্তি সত্ত্বস্থা মধ্যে তিষ্ঠন্তি রাজসাঃ ।
জঘন্যগুণবৃত্তস্থা অধো গচ্ছন্তি তামসাঃ ॥ ১৪-১৮॥
ঊর্ধ্বং গচ্ছন্তি দেবলোকাদিষু উৎপদ্যন্তে সত্ত্বস্থাঃ সত্ত্বগুণবৃত্তস্থাঃ ।
মধ্যে তিষ্ঠন্তি মনুষ্যেষু উৎপদ্যন্তে রাজসাঃ । জঘন্যগুণবৃত্তস্থাঃ
জঘন্যশ্চ অসৌ গুণশ্চ জঘন্যগুণঃ তমঃ, তস্য বৃত্তং নিদ্রালস্যাদি,
তস্মিন্ স্থিতাঃ জঘন্যগুণবৃত্তস্থাঃ মূঢাঃ অধঃ গচ্ছন্তি পশ্বাদিষু
উৎপদ্যন্তে তামসাঃ ॥ পুরুষস্য প্রকৃতিস্থৎবরূপেণ মিথ্যাজ্ঞানেন
যুক্তস্য ভোগ্যেষু গুণেষু সুখদুঃখমোহাত্মকেষু “সুখী দুঃখী
মূঢঃ অহং অস্মি” ইত্যেবংরূপঃ যঃ সঙ্গঃ তৎকারণং পুরুষস্য
সদসদ্যোনিজন্মপ্রাপ্তিলক্ষণস্য সংসারস্য ইতি সমাসেন পূর্বাধ্যায়ে যৎ
উক্তম্, তৎ ইহ “সত্ত্বং রজস্তম ইতি গুণাঃ প্রকৃতিসম্ভবাঃ”
(ভ. গী. ১৪-৫) ইতি আরভ্য গুণস্বরূপম্, গুণবৃত্তম্, স্ববৃত্তেন চ
গুণানাং বন্ধকৎবম্, গুণবৃত্তনিবদ্ধস্য চ পুরুষস্য যা গতিঃ,
ইত্যেতৎ সর্বং মিথ্যাজ্ঞানমূলং বন্ধকারণং বিস্তরেণ উক্ত্বা, অধুনা
সম্যগ্দর্শনান্মোক্ষো বক্তব্যঃ ইত্যত আহ ভগবান্ —
নান্যং গুণেভ্যঃ কর্তারং যদা দ্রষ্টানুপশ্যতি ।
গুণেভ্যশ্চ পরং বেত্তি মদ্ভাবং সোঽধিগচ্ছতি ॥ ১৪-১৯॥
ন অন্যং কার্যকরণবিষয়াকারপরিণতেভ্যঃ গুণেভ্যঃ কর্তারং অন্যং যদা
দ্রষ্টা বিদ্বান্ সন্ ন অনুপশ্যতি, গুণা এব সর্বাবস্থাঃ সর্বকর্মণাং কর্তারঃ
ইত্যেবং পশ্যতি, গুণেভ্যশ্চ পরং গুণব্যাপারসাক্ষিভূতং বেত্তি, মদ্ভাবং
মম ভাবং সঃ দ্রষ্টা অধিগচ্ছতি ॥ কথং অধিগচ্ছতি ইতি, উচ্যতে —
গুণানেতানতীত্য ত্রীন্দেহী দেহসমুদ্ভবান্ ।
জন্মমৃত্যুজরাদুঃখৈর্বিমুক্তোঽমৃতমশ্নুতে ॥ ১৪-২০॥
গুণান্ এতান্ যথোক্তান্ অতীত্য জীবন্নেব অতিক্রম্য মায়োপাধিভূতান্ ত্রীন্ দেহী
দেহসমুদ্ভবান্ দেহোৎপত্তিবীজভূতান্ জন্মমৃত্যুজরাদুঃখৈঃ জন্ম চ
মৃত্যুশ্চ জরা চ দুঃখানি চ জন্মমৃত্যুজরাদুঃখানি তৈঃ জীবন্নেব
বিমুক্তঃ সন্ বিদ্বান্ অমৃতং অশ্নুতে, এবং মদ্ভাবং অধিগচ্ছতি ইত্যর্থঃ ॥
জীবন্নেব গুণান্ অতীত্য অমৃতং অশ্নুতে ইতি প্রশ্নবীজং প্রতিলভ্য,
অর্জুন উবাচ —
অর্জুন উবাচ —
কৈর্লিঙ্গৈস্ত্রীন্গুণানেতানতীতো ভবতি প্রভো ।
কিমাচারঃ কথং চৈতাংস্ত্রীন্গুণানতিবর্ততে ॥ ১৪-২১॥
কৈঃ লিঙ্গৈঃ চিহ্নৈঃ ত্রীন্ এতান্ ব্যাখ্যাতান্ গুণান্ অতীতঃ অতিক্রান্তঃ
ভবতি প্রভো, কিমাচারঃ কঃ অস্য আচারঃ ইতি কিমাচারঃ কথং কেন চ
প্রকারেণ এতান্ ত্রীন্ গুণান্ অতিবর্ততে অতীত্য বর্ততে ॥ গুণাতীতস্য লক্ষণং
গুণাতীতৎবোপায়ং চ অর্জুনেন পৃষ্টঃ অস্মিন্ শ্লোকে প্রশ্নদ্বয়ার্থং
প্রতিবচনং ভগবান্ উবাচ । যৎ তাবৎ “কৈঃ লিঙ্গৈঃ যুক্তো গুণাতীতো
ভবতি” ইতি, তৎ শৃণু —
শ্রীভগবানুবাচ —
প্রকাশং চ প্রবৃত্তিং চ মোহমেব চ পাণ্ডব ।
ন দ্বেষ্টি সম্প্রবৃত্তানি ন নিবৃত্তানি কাঙ্ক্ষতি ॥ ১৪-২২॥
প্রকাশং চ সত্ত্বকার্যং প্রবৃত্তিং চ রজঃকার্যং মোহমেব চ
তমঃকার্যং ইত্যেতানি ন দ্বেষ্টি সম্প্রবৃত্তানি সম্যগ্বিষয়ভাবেন
উদ্ভূতানি — “মম তামসঃ প্রত্যযো জাতঃ, তেন অহং মূঢঃ; তথা
রাজসী প্রবৃত্তিঃ মম উৎপন্না দুঃখাত্মিকা, তেন অহং রজসা প্রবর্তিতঃ
প্রচলিতঃ স্বরূপাৎ; কষ্টং মম বর্ততে যঃ অয়ং মৎস্বরূপাবস্থানাৎ
ভ্রংশঃ; তথা সাত্ত্বিকো গুণঃ প্রকাশাত্মা মাং বিবেকিৎবং আপাদয়ন্ সুখে
চ সঞ্জয়ন্ বধ্নাতি” ইতি তানি দ্বেষ্টি অসম্যগ্দর্শিৎবেন । তৎ
এবং গুণাতীতো ন দ্বেষ্টি সম্প্রবৃত্তানি । যথা চ সাত্ত্বিকাদিপুরুষঃ
সত্ত্বাদিকার্যাণি আত্মানং প্রতি প্রকাশ্য নিবৃত্তানি কাঙ্ক্ষতি, ন তথা
গুণাতীতো নিবৃত্তানি কাঙ্ক্ষতি ইত্যর্থঃ । এতৎ ন পরপ্রত্যক্ষং
লিঙ্গম্ । কিং তর্হি? স্বাত্মপ্রত্যক্ষৎবাৎ আত্মার্থমেব এতৎ লক্ষণম্ ।
ন হি স্বাত্মবিষয়ং দ্বেষমাকাঙ্ক্ষাং বা পরঃ পশ্যতি ॥ অথ ইদানীম্
“গুণাতীতঃ কিমাচারঃ?” ইতি প্রশ্নস্য প্রতিবচনং আহ —
উদাসীনবদাসীনো গুণৈর্যো ন বিচাল্যতে ।
গুণা বর্তন্ত ইত্যেব যোঽবতিষ্ঠতি নেঙ্গতে ॥ ১৪-২৩॥
উদাসীনবৎ যথা উদাসীনঃ ন কস্যচিৎ পক্ষং ভজতে, তথা অয়ং
গুণাতীতৎবোপায়মার্গেঽবস্থিতঃ আসীনঃ আত্মবিৎ গুণৈঃ যঃ সন্ন্যাসী ন
বিচাল্যতে বিবেকদর্শনাবস্থাতঃ । তদেতৎ স্ফুটীকরোতি — গুণাঃ
কার্যকরণবিষয়াকারপরিণতাঃ অন্যোন্যস্মিন্ বর্তন্তে ইতি যঃ অবতিষ্ঠতি ।
ছন্দোভঙ্গভয়াৎ পরস্মৈপদপ্রয়োগঃ । যোঽনুতিষ্ঠতীতি বা পাঠান্তরম্ ।
ন ইঙ্গতে ন চলতি, স্বরূপাবস্থ এব ভবতি ইত্যর্থঃ ॥ কিঞ্চ —
সমদুঃখসুখঃ স্বস্থঃ সমলোষ্টাশ্মকাঞ্চনঃ ।
তুল্যপ্রিয়াপ্রিয়ো ধীরস্তুল্যনিন্দাত্মসংস্তুতিঃ ॥ ১৪-২৪॥
সমদুঃখসুখঃ সমে দুঃখসুখে যস্য সঃ সমদুঃখসুখঃ, স্বস্থঃ স্বে
আত্মনি স্থিতঃ প্রসন্নঃ, সমলোষ্টাশ্মকাঞ্চনঃ লোষ্টং চ অশ্মা চ
কাঞ্চনং চ লোষ্টাশ্মকাঞ্চনানি সমানি যস্য সঃ সমলোষ্টাশ্মকাঞ্চনঃ,
তুল্যপ্রিয়াপ্রিয়ঃ প্রিয়ং চ অপ্রিয়ং চ প্রিয়াপ্রিয়ে তুল্যে সমে যস্য
সোঽয়ং তুল্যপ্রিয়াপ্রিয়ঃ, ধীরঃ ধীমান্, তুল্যনিন্দাত্মসংস্তুতিঃ নিন্দা চ
আত্মসংস্তুতিশ্চ নিন্দাত্মসংস্তুতী, তুল্যে নিন্দাত্মসংস্তুতী যস্য যতেঃ সঃ
তুল্যনিন্দাত্মসংস্তুতিঃ ॥ কিঞ্চ —
মানাপমানয়োস্তুল্যস্তুল্যো মিত্রারিপক্ষয়োঃ ।
সর্বারম্ভপরিত্যাগী গুণাতীতঃ স উচ্যতে ॥ ১৪-২৫॥
মানাপমানয়োঃ তুল্যঃ সমঃ নির্বিকারঃ; তুল্যঃ মিত্রারিপক্ষয়োঃ,
যদ্যপি উদাসীনা ভবন্তি কেচিৎ স্বাভিপ্রায়েণ, তথাপি পরাভিপ্রায়েণ
মিত্রারিপক্ষয়োরিব ভবন্তি ইতি তুল্যো মিত্রারিপক্ষয়োঃ ইত্যাহ ।
সর্বারম্ভপরিত্যাগী, দৃষ্টাদৃষ্টার্থানি কর্মাণি আরভ্যন্তে ইতি
আরম্ভাঃ, সর্বান্ আরম্ভান্ পরিত্যক্তুং শীলং অস্য ইতি সর্বারম্ভপরিত্যাগী,
দেহধারণমাত্রনিমিত্তব্যতিরেকেণ সর্বকর্মপরিত্যাগী ইত্যর্থঃ ।
গুণাতীতঃ সঃ উচ্যতে ॥ “উদাসীনবৎ” (ভ. গী. ১৪-২৩) ইত্যাদি
“গুণাতীতঃ স উচ্যতে” (ভ. গী. ১৪-২৫)ইত্যেতদন্তং উক্তং যাবৎ
যত্নসাধ্যং তাবৎ সন্ন্যাসিনঃ অনুষ্ঠেয়ং গুণাতীতৎবসাধনং মুমুক্ষোঃ;
স্থিরীভূতং তু স্বসংবেদ্যং সৎ গুণাতীতস্য যতেঃ লক্ষণং ভবতি ইতি ।
অধুনা“কথং চ ত্রীন্গুণানতিবর্ততে?” (ভ. গী. ১৪-২১) ইত্যস্য
প্রশ্নস্য প্রতিবচনং আহ —
মাং চ যোঽব্যভিচারেণ ভক্তিয়োগেন সেবতে ।
স গুণান্সমতীত্যৈতান্ব্রহ্মভূয়ায় কল্পতে ॥ ১৪-২৬॥
মাং চ ঈশ্বরং নারায়ণং সর্বভূতহৃদয়াশ্রিতং যো যতিঃ কর্মী বা
অব্যভিচারেণ ন কদাচিৎ যো ব্যভিচরতি ভক্তিয়োগেন ভজনং ভক্তিঃ
সৈব যোগঃ তেন ভক্তিয়োগেন সেবতে, সঃ গুণান্ সমতীত্য এতান্ যথোক্তান্
ব্রহ্মভূয়ায়, ভবনং ভূয়ঃ, ব্রহ্মভূয়ায় ব্রহ্মভবনায় মোক্ষায়
কল্পতে সমর্থো ভবতি ইত্যর্থঃ ॥ কুত এতদিতি উচ্যতে —
ব্রহ্মণো হি প্রতিষ্ঠাহমমৃতস্যাব্যযস্য চ ।
শাশ্বতস্য চ ধর্মস্য সুখস্যৈকান্তিকস্য চ ॥ ১৪-২৭॥
ব্রহ্মণঃ পরমাত্মনঃ হি যস্মাৎ প্রতিষ্ঠা অহং প্রতিতিষ্ঠতি অস্মিন্ ইতি
প্রতিষ্ঠা অহং প্রত্যগাত্মা । কীদৃশস্য ব্রহ্মণঃ? অমৃতস্য অবিনাশিনঃ
অব্যযস্য অবিকারিণঃ শাশ্বতস্য চ নিত্যস্য ধর্মস্য ধর্মজ্ঞানস্য
জ্ঞানয়োগধর্মপ্রাপ্যস্য সুখস্য আনন্দরূপস্য ঐকান্তিকস্য অব্যভিচারিণঃ
অমৃতাদিস্বভাবস্য পরমানন্দরূপস্য পরমাত্মনঃ প্রত্যগাত্মা প্রতিষ্ঠা,
সম্যগ্জ্ঞানেন পরমাত্মতয়া নিশ্চীয়তে । তদেতৎ “ব্রহ্মভূয়ায়
কল্পতে” (ভ. গী. ১৪-২৬) ইতি উক্তম্ । যয়া চ ঈশ্বরশক্ত্যা
ভক্তানুগ্রহাদিপ্রয়োজনায় ব্রহ্ম প্রতিষ্ঠতে প্রবর্ততে, সা শক্তিঃ
ব্রহ্মৈব অহম্, শক্তিশক্তিমতোঃ অনন্যৎবাৎ ইত্যভিপ্রায়ঃ । অথবা,
ব্রহ্মশব্দবাচ্যৎবাৎ সবিকল্পকং ব্রহ্ম । তস্য ব্রহ্মণো নির্বিকল্পকঃ
অহমেব নান্যঃ প্রতিষ্ঠা আশ্রয়ঃ । কিংবিশিষ্টস্য? অমৃতস্য
অমরণধর্মকস্য অব্যযস্য ব্যযরহিতস্য । কিঞ্চ, শাশ্বতস্য চ
নিত্যস্য ধর্মস্য জ্ঞাননিষ্ঠালক্ষণস্য সুখস্য তজ্জনিতস্য ঐকান্তিকস্য
একান্তনিয়তস্য চ, “প্রতিষ্ঠা অহম্” ইতি বর্ততে ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে গুণত্রয়বিভাগয়োগো নাম চতুর্দশোঽধ্যায়ঃ ॥১৪॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে গুণ-ত্রয়-বিভাগ-যোগঃ নাম
চতুর্দশোঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ পঞ্চদশোঽধ্যায়ঃ ॥
যস্মাৎ মদধীনং কর্মিণাং কর্মফলং জ্ঞানিনাং চ জ্ঞানফলম্, অতঃ
ভক্তিয়োগেন মাং যে সেবন্তে তে মম প্রসাদাৎ জ্ঞানপ্রাপ্তিক্রমেণ গুণাতীতাঃ
মোক্ষং গচ্ছন্তি । কিমু বক্তব্যং আত্মনঃ তত্ত্বমেব সম্যক্ বিজানন্তঃ
ইতি অতঃ ভগবান্ অর্জুনেন অপৃষ্টোঽপি আত্মনঃ তত্ত্বং বিবক্ষুঃ উবাচ
“ঊর্ধ্বমূলম্” ইত্যাদিনা । তত্র তাবৎ বৃক্ষরূপককল্পনয়া
বৈরাগ্যহেতোঃ সংসারস্বরূপং বর্ণয়তি — বিরক্তস্য হি সংসারাৎ
ভগবত্তত্ত্বজ্ঞানে অধিকারঃ, ন অন্যস্যেতি ॥
শ্রীভগবানুবাচ —
ঊর্ধ্বমূলমধঃশাখমশ্বত্থং প্রাহুরব্যযম্ ।
ছন্দাংসি যস্য পর্ণানি যস্তং বেদ স বেদবিৎ ॥ ১৫-১॥
ঊর্ধ্বমূলং কালতঃ সূক্ষ্মৎবাৎ কারণৎবাৎ নিত্যৎবাৎ মহত্ত্বাচ্চ
ঊর্ধ্বম্; উচ্যতে ব্রহ্ম অব্যক্তং মায়াশক্তিমৎ, তৎ মূলং অস্যেতি সোঽয়ং
সংসারবৃক্ষঃ ঊর্ধ্বমূলঃ । শ্রুতেশ্চ — “ঊর্ধ্বমূলোঽবাক্শাখ
এষোঽশ্বত্থঃ সনাতনঃ” (ক. উ. ২-৩-১)ইতি । পুরাণে চ —
“অব্যক্তমূলপ্রভবস্তস্যৈবানুগ্রহোত্থিতঃ । বুদ্ধিস্কন্ধময়শ্চৈব
ইন্দ্রিয়ান্তরকোটরঃ ॥ মহাভূতবিশাখশ্চ বিষয়ৈঃ পত্রবাংস্তথা ।
ধর্মাধর্মসুপুষ্পশ্চ সুখদুঃখফলোদয়ঃ ॥ আজীব্যঃ সর্বভূতানাং
ব্রহ্মবৃক্ষঃ সনাতনঃ । এতদ্ব্রহ্মবনং চৈব ব্রহ্মাচরতি নিত্যশঃ ॥
এতচ্ছিত্ত্বা চ ভিত্ত্বা চ জ্ঞানেন পরমাসিনা । ততশ্চাত্মরতিং
প্রাপ্য তস্মান্নাবর্ততে পুনঃ ॥” — ইত্যাদি । তং ঊর্ধ্বমূলং সংসারং
মায়াময়ং বৃক্ষং অধঃশাখং মহদহঙ্কারতন্মাত্রাদয়ঃ শাখা ইব অস্য
অধঃ ভবন্তীতি সোঽয়ং অধঃশাখঃ, তং অধঃশাখম্ । ন শ্বোঽপি স্থাতা
ইতি অশ্বত্থঃ তং ক্ষণপ্রধ্বংসিনং অশ্বত্থং প্রাহুঃ কথয়ন্তি অব্যযং
সংসারমায়ায়াঃ অনাদিকালপ্রবৃত্তৎবাৎ সোঽয়ং সংসারবৃক্ষঃ অব্যযঃ,
অনাদ্যন্তদেহাদিসন্তানাশ্রয়ঃ হি সুপ্রসিদ্ধঃ, তং অব্যযম্ । তস্যৈব
সংসারবৃক্ষস্য ইদং অন্যৎ বিশেষণং — ছন্দাংসি যস্য পর্ণানি,
ছন্দাংসি চ্ছাদনাৎ ঋগ্যজুঃসামলক্ষণানি যস্য সংসারবৃক্ষস্য
পর্ণানীব পর্ণানি । যথা বৃক্ষস্য পরিরক্ষণার্থানি পর্ণানি, তথা বেদাঃ
সংসারবৃক্ষপরিরক্ষণার্থাঃ, ধর্মাধর্মতদ্ধেতুফলপ্রদর্শনার্থৎবাৎ ।
যথাব্যাখ্যাতং সংসারবৃক্ষং সমূলং যঃ তং বেদ সঃ বেদবিৎ,
বেদার্থবিৎ ইত্যর্থঃ । ন হি সমূলাৎ সংসারবৃক্ষাৎ অস্মাৎ জ্ঞেয়ঃ
অন্যঃ অণুমাত্রোঽপি অবশিষ্টঃ অস্তি ইত্যতঃ সর্বজ্ঞঃ সর্ববেদার্থবিদিতি
সমূলসংসারবৃক্ষজ্ঞানং স্তৌতি ॥ তস্য এতস্য সংসারবৃক্ষস্য অপরা
অবয়বকল্পনা উচ্যতে —
অধশ্চোর্ধ্বং প্রসৃতাস্তস্য শাখা গুণপ্রবৃদ্ধা বিষয়প্রবালাঃ ।
অধশ্চ মূলান্যনুসন্ততানি কর্মানুবন্ধীনি মনুষ্যলোকে ॥ ১৫-২॥
অধঃ মনুষ্যাদিভ্যো যাবৎ স্থাবরং ঊর্ধ্বং চ যাবৎ ব্রহ্মণঃ বিশ্বসৃজো
ধাম ইত্যেতদন্তং যথাকর্ম যথাশ্রুতং জ্ঞানকর্মফলানি, তস্য
বৃক্ষস্য শাখা ইব শাখাঃ প্রসৃতাঃ প্রগতাঃ, গুণপ্রবৃদ্ধাঃ
গুণৈঃ সত্ত্বরজস্তমোভিঃ প্রবৃদ্ধাঃ স্থূলীকৃতাঃ উপাদানভূতৈঃ,
বিষয়প্রবালাঃ বিষয়াঃ শব্দাদয়ঃ প্রবালাঃ ইব দেহাদিকর্মফলেভ্যঃ
শাখাভ্যঃ অঙ্কুরীভবন্তীব, তেন বিষয়প্রবালাঃ শাখাঃ ।
সংসারবৃক্ষস্য পরমমূলং উপাদানকারণং পূর্বং উক্তম্ । অথ ইদানীং
কর্মফলজনিতরাগদ্বেষাদিবাসনাঃ মূলানীব ধর্মাধর্মপ্রবৃত্তিকারণানি
অবান্তরভাবীনি তানি অধশ্চ দেবাদ্যপেক্ষয়া মূলানি অনুসন্ততানি
অনুপ্রবিষ্টানি কর্মানুবন্ধীনি কর্ম ধর্মাধর্মলক্ষণং অনুবন্ধঃ
পশ্চাদ্ভাবি, যেষাং উদ্ভূতিং অনু উদ্ভবতি, তানি কর্মানুবন্ধীনি মনুষ্যলোকে
বিশেষতঃ । অত্র হি মনুষ্যাণাং কর্মাধিকারঃ প্রসিদ্ধঃ ॥ যস্তু অয়ং
বর্ণিতঃ সংসারবৃক্ষঃ —
ন রূপমস্যেহ তথোপলভ্যতে নান্তো ন চাদির্ন চ সম্প্রতিষ্ঠা ।
অশ্বত্থমেনং সুবিরূঢমূলমসঙ্গশস্ত্রেণ দৃঢেন ছিত্ত্বা ॥ ১৫-৩॥
ন রূপং অস্য ইহ যথা উপবর্ণিতং তথা নৈব উপলভ্যতে,
স্বপ্নমরীচ্যুদকমায়াগন্ধর্বনগরসমৎবাৎ; দৃষ্টনষ্টস্বরূপো হি স
ইতি অত এব ন অন্তঃ ন পর্যন্তঃ নিষ্ঠা পরিসমাপ্তির্বা বিদ্যতে । তথা ন
চ আদিঃ, “ইতঃ আরভ্য অয়ং প্রবৃত্তঃ” ইতি ন কেনচিৎ গম্যতে ।
ন চ সম্প্রতিষ্ঠা স্থিতিঃ মধ্যং অস্য ন কেনচিৎ উপলভ্যতে ।
অশ্বত্থং এনং যথোক্তং সুবিরূঢমূলং সুষ্ঠু বিরূঢানি বিরোহং গতানি
সুদৃঢানি মূলানি যস্য তং এনং সুবিরূঢমূলম্, অসঙ্গশস্ত্রেণ
অসঙ্গঃ পুত্রবিত্তলোকৈষণাভ্যঃ ব্যুত্থানং তেন অসঙ্গশস্ত্রেণ
দৃঢেন পরমাত্মাভিমুখ্যনিশ্চয়দৃঢীকৃতেন পুনঃ পুনঃ
বিবেকাভ্যাসাশ্মনিশিতেন চ্ছিৎবা সংসারবৃক্ষং সবীজং উদ্ধৃত্য ॥
ততঃ পদং তৎপরিমার্গিতব্যং যস্মিন্গতা ন নিবর্তন্তি ভূয়ঃ ।
তমেব চাদ্যং পুরুষং প্রপদ্যে যতঃ প্রবৃত্তিঃ প্রসৃতা পুরাণী ॥ ১৫-৪॥
ততঃ পশ্চাৎ যৎ পদং বৈষ্ণবং তৎ পরিমার্গিতব্যম্, পরিমার্গণম্
অন্বেষণং জ্ঞাতব্যমিত্যর্থঃ । যস্মিন্ পদে গতাঃ প্রবিষ্টাঃ ন নিবর্তন্তি
ন আবর্তন্তে ভূয়ঃ পুনঃ সংসারায় । কথং পরিমার্গিতব্যমিতি আহ —
তমেব চ যঃ পদশব্দেন উক্তঃ আদ্যং আদৌ ভবং আদ্যং পুরুষং প্রপদ্যে
ইত্যেবং পরিমার্গিতব্যং তচ্ছরণতয়া ইত্যর্থঃ । কঃ অসৌ পুরুষঃ ইতি,
উচ্যতে — যতঃ যস্মাৎ পুরুষাৎ সংসারমায়াবৃক্ষপ্রবৃত্তিঃ প্রসৃতা
নিঃসৃতা, ঐন্দ্রজালিকাদিব মায়া, পুরাণী চিরন্তনী ॥ কথম্ভূতাঃ তৎ
পদং গচ্ছন্তীতি, উচ্যতে —
নির্মানমোহা জিতসঙ্গদোষা অধ্যাত্মনিত্যা বিনিবৃত্তকামাঃ ।
দ্বন্দ্বৈর্বিমুক্তাঃ সুখদুঃখসংজ্ঞৈর্গচ্ছন্ত্যমূঢাঃ পদমব্যযং তৎ ॥ ১৫-৫॥
নির্মানমোহাঃ মানশ্চ মোহশ্চ মানমোহৌ, তৌ নির্গতৌ যেভ্যঃ তে
নির্মানমোহাঃ মানমোহবর্জিতাঃ । জিতসঙ্গদোষাঃ সঙ্গ এব দোষঃ
সঙ্গদোষঃ, জিতঃ সঙ্গদোষঃ যৈঃ তে জিতসঙ্গদোষাঃ । অধ্যাত্মনিত্যাঃ
পরমাত্মস্বরূপালোচননিত্যাঃ তৎপরাঃ । বিনিবৃত্তকামাঃ বিশেষতো নির্লেপেন
নিবৃত্তাঃ কামাঃ যেষাং তে বিনিবৃত্তকামাঃ যতয়ঃ সন্ন্যাসিনঃ দ্বন্দ্বৈঃ
প্রিয়াপ্রিয়াদিভিঃ বিমুক্তাঃ সুখদুঃখসংজ্ঞৈঃ পরিত্যক্তাঃ গচ্ছন্তি অমূঢাঃ
মোহবর্জিতাঃ পদং অব্যযং তৎ যথোক্তম্ ॥ তদেব পদং পুনঃ বিশেষ্যতে —
ন তদ্ভাসয়তে সূর্যো ন শশাঙ্কো ন পাবকঃ ।
যদ্গৎবা ন নিবর্তন্তে তদ্ধাম পরমং মম ॥ ১৫-৬॥
তৎ ধাম ইতি ব্যবহিতেন ধাম্না সম্বধ্যতে । তৎ ধাম তেজোরূপং পদং
ন ভাসয়তে সূর্যঃ আদিত্যঃ সর্বাবভাসনশক্তিমত্ত্বেঽপি সতি । তথা ন
শশাঙ্কঃ চন্দ্রঃ, ন পাবকঃ ন অগ্নিরপি । যৎ ধাম বৈষ্ণবং পদং গৎবা
প্রাপ্য ন নিবর্তন্তে, যচ্চ সূর্যাদিঃ ন ভাসয়তে, তৎ ধাম পদং পরমং
বিষ্ণোঃ মম পদম্, যৎ গৎবা ন নিবর্তন্তে ইত্যুক্তম্ ॥ ননু সর্বা হি গতিঃ
আগত্যন্তা, “সংয়োগাঃ বিপ্রয়োগান্তাঃ” ইতি প্রসিদ্ধম্ । কথং উচ্যতে
“তৎ ধাম গতানাং নাস্তি নিবৃত্তিঃ” ইতি? শৃণু তত্র কারণং —
মমৈবাংশো জীবলোকে জীবভূতঃ সনাতনঃ ।
মনঃষষ্ঠানীন্দ্রিয়াণি প্রকৃতিস্থানি কর্ষতি ॥ ১৫-৭॥
মমৈব পরমাত্মনঃ নারায়ণস্য, অংশঃ ভাগঃ অবয়বঃ একদেশঃ ইতি
অনর্থান্তরং জিবলোকে জীবানাং লোকে সংসারে জীবভূতঃ কর্তা ভোক্তা ইতি
প্রসিদ্ধঃ সনাতনঃ চিরন্তনঃ; যথা জলসূর্যকঃ সূর্যাংশঃ জলনিমিত্তাপায়ে
সূর্যমেব গৎবা ন নিবর্ততে চ তেনৈব আত্মনা গচ্ছতি, এবমেব; যথা
ঘটাদ্যুপাধিপরিচ্ছিন্নো ঘটাদ্যাকাশঃ আকাশাংশঃ সন্ ঘটাদিনিমিত্তাপায়ে
আকাশং প্রাপ্য ন নিবর্ততে । অতঃ উপপন্নং উক্তং “যদ্গৎবা ন
নিবর্তন্তে” (ভ. গী. ১৫-৬) ইতি । ননু নিরবয়বস্য পরমাত্মনঃ
কুতঃ অবয়বঃ একদেশঃ অংশঃ ইতি? সাবয়বৎবে চ বিনাশপ্রসঙ্গঃ
অবয়ববিভাগাৎ । নৈষ দোষঃ, অবিদ্যাকৃতোপাধিপরিচ্ছিন্নঃ একদেশঃ
অংশ ইব কল্পিতো যতঃ । দর্শিতশ্চ অয়মর্থঃ ক্ষেত্রাধ্যায়ে বিস্তরশঃ ।
স চ জীবো মদংশৎবেন কল্পিতঃ কথং সংসরতি উৎক্রামতি চ ইতি,
উচ্যতে — মনঃষষ্ঠানি ইন্দ্রিয়াণি শ্রোত্রাদীনি প্রকৃতিস্থানি স্বস্থানে
কর্ণশষ্কুল্যাদৌ প্রকৃতৌ স্থিতানি কর্ষতি আকর্ষতি ॥ কস্মিন্ কালে? —
শরীরং যদবাপ্নোতি যচ্চাপ্যুৎক্রামতীশ্বরঃ ।
গৃহীৎবৈতানি সংয়াতি বায়ুর্গন্ধানিবাশয়াৎ ॥ ১৫-৮॥
যচ্চাপি যদা চাপি উৎক্রামতি ঈশ্বরঃ দেহাদিসঙ্ঘাতস্বামী জীবঃ, তদা
“কর্ষতি” ইতি শ্লোকস্য দ্বিতীয়পাদঃ অর্থবশাৎ প্রাথম্যেন
সম্বধ্যতে । যদা চ পূর্বস্মাৎ শরীরাৎ শরীরান্তরং অবাপ্নোতি তদা গৃহীৎবা
এতানি মনঃষষ্ঠানি ইন্দ্রিয়াণি সংয়াতি সম্যক্ যাতি গচ্ছতি । কিমিব ইতি,
আহ — বায়ুঃ পবনঃ গন্ধানিব আশয়াৎ পুষ্পাদেঃ ॥ কানি পুনঃ তানি —
শ্রোত্রং চক্ষুঃ স্পর্শনং চ রসনং ঘ্রাণমেব চ ।
অধিষ্ঠায় মনশ্চায়ং বিষয়ানুপসেবতে ॥ ১৫-৯॥
শ্রোত্রং চক্ষুঃ স্পর্শনং চ ৎবগিন্দ্রিয়ং রসনং ঘ্রাণমেব চ মনশ্চ
ষষ্ঠং প্রত্যেকং ইন্দ্রিয়েণ সহ, অধিষ্ঠায় দেহস্থঃ বিষয়ান্ শব্দাদীন্
উপসেবতে ॥ এবং দেহগতং দেহাৎ —
উৎক্রামন্তং স্থিতং বাপি ভুঞ্জানং বা গুণান্বিতম্ ।
বিমূঢা নানুপশ্যন্তি পশ্যন্তি জ্ঞানচক্ষুষঃ ॥ ১৫-১০॥
উৎক্রামন্তং দেহং পূর্বোপাত্তং পরিত্যজন্তং স্থিতং বাপি দেহে
তিষ্ঠন্তং ভুঞ্জানং বা শব্দাদীংশ্চ উপলভমানং গুণান্বিতং
সুখদুঃখমোহাদ্যৈঃ গুণৈঃ অন্বিতং অনুগতং সংয়ুক্তমিত্যর্থঃ ।
এবম্ভূতমপি এনং অত্যন্তদর্শনগোচরপ্রাপ্তং বিমূঢাঃ
দৃষ্টাদৃষ্টবিষয়ভোগবলাকৃষ্টচেতস্তয়া অনেকধা মূঢাঃ ন
অনুপশ্যন্তি — অহো কষ্টং বর্ততে ইতি অনুক্রোশতি চ ভগবান্ — যে
তু পুনঃ প্রমাণজনিতজ্ঞানচক্ষুষঃ তে এনং পশ্যন্তি জ্ঞানচক্ষুষঃ
বিবিক্তদৃষ্টয়ঃ ইত্যর্থঃ ॥
যতন্তো যোগিনশ্চৈনং পশ্যন্ত্যাত্মন্যবস্থিতম্ ।
যতন্তোঽপ্যকৃতাত্মানো নৈনং পশ্যন্ত্যচেতসঃ ॥ ১৫-১১॥
যতন্তঃ প্রয়ত্নং কুর্বন্তঃ যোগিনশ্চ সমাহিতচিত্তাঃ এনং প্রকৃতম্
আত্মানং পশ্যন্তি “অয়ং অহং অস্মি” ইতি উপলভন্তে আত্মনি
স্বস্যাং বুদ্ধৌ অবস্থিতম্ । যতন্তোঽপি শাস্ত্রাদিপ্রমাণৈঃ, অকৃতাত্মানঃ
অসংস্কৃতাত্মানঃ তপসা ইন্দ্রিয়জয়েন চ, দুশ্চরিতাৎ অনুপরতাঃ,
অশান্তদর্পাঃ, প্রয়ত্নং কুর্বন্তোঽপি ন এবং পশ্যন্তি অচেতসঃ অবিবেকিনঃ ॥
যৎ পদং সর্বস্য অবভাসকমপি অগ্ন্যাদিত্যাদিকং জ্যোতিঃ ন অবভাসয়তে,
যৎ প্রাপ্তাশ্চ মুমুক্ষবঃ পুনঃ সংসারাভিমুখাঃ ন নিবর্তন্তে, যস্য
চ পদস্য উপাধিভেদং অনুবিধীয়মানাঃ জীবাঃ — ঘটাকাশাদয়ঃ ইব
আকাশস্য — অংশাঃ, তস্য পদস্য সর্বাত্মৎবং সর্বব্যবহারাস্পদৎবং
চ বিবক্ষুঃ চতুর্ভিঃ শ্লোকৈঃ বিভূতিসঙ্ক্ষেপমাহ ভগবান্ —
যদাদিত্যগতং তেজো জগদ্ভাসয়তেঽখিলম্ ।
যচ্চন্দ্রমসি যচ্চাগ্নৌ তত্তেজো বিদ্ধি মামকম্ ॥ ১৫-১২॥
যৎ আদিত্যগতং আদিত্যাশ্রয়ম্ । কিং তৎ? তেজঃ দীপ্তিঃ প্রকাশঃ জগৎ
ভাসয়তে প্রকাশয়তি অখিলং সমস্তম্; যৎ চন্দ্রমসি শশভৃতি
তেজঃ অবভাসকং বর্ততে, যচ্চ অগ্নৌ হুতবহে, তৎ তেজঃ বিদ্ধি
বিজানীহি মামকং মদীয়ং মম বিষ্ণোঃ তৎ জ্যোতিঃ । অথবা, আদিত্যগতং
তেজঃ চৈতন্যাত্মকং জ্যোতিঃ, যচ্চন্দ্রমসি, যচ্চ অগ্নৌ বর্ততে তৎ
তেজঃ বিদ্ধি মামকং মদীয়ং মম বিষ্ণোঃ তৎ জ্যোতিঃ ॥ ননু স্থাবরেষু
জঙ্গমেষু চ তৎ সমানং চৈতন্যাত্মকং জ্যোতিঃ । তত্র কথং ইদং
বিশেষণং — “যদাদিত্যগতম্” ইত্যাদি । নৈষ দোষঃ,
সত্ত্বাধিক্যাৎ আবিস্তরৎবোপপত্তেঃ । আদিত্যাদিষু হি সত্ত্বং অত্যন্তপ্রকাশম্
অত্যন্তভাস্বরম্; অতঃ তত্রৈব আবিস্তরং জ্যোতিঃ ইতি তৎ বিশিষ্যতে, ন
তু তত্রৈব তৎ অধিকমিতি । যথা হি শ্লোকে তুল্যেঽপি মুখসংস্থানে ন
কাষ্ঠকুড্যাদৌ মুখং আবির্ভবতি, আদর্শাদৌ তু স্বচ্ছে স্বচ্ছতরে চ
তারতম্যেন আবির্ভবতি; তদ্বৎ ॥ কিঞ্চ —
গামাবিশ্য চ ভূতানি ধারয়াম্যহমোজসা ।
পুষ্ণামি চৌষধীঃ সর্বাঃ সোমো ভূৎবা রসাত্মকঃ ॥ ১৫-১৩॥
গাং পৃথিবীং আবিশ্য প্রবিশ্য ধারয়ামি ভূতানি জগৎ অহং ওজসা বলেন; যৎ
বলং কামরাগবিবর্জিতং ঐশ্বরং রূপং জগদ্বিধারণায় পৃথিব্যাং আবিষ্টং
যেন পৃথিবী গুর্বী ন অধঃ পততি ন বিদীর্যতে চ । তথা চ মন্ত্রবর্ণঃ
— ”যেন দ্যৌরুগ্রা পৃথিবী চ দৃঢা” (তৈ. সং. ৪-১-৮)
ইতি, ”স দাধার পৃথিবীম্” (তৈ. সং. ৪-১-৮) ইত্যাদিশ্চ ।
অতঃ গামাবিশ্য চ ভূতানি চরাচরাণি ধারয়ামি ইতি যুক্তমুক্তম্ । কিঞ্চ,
পৃথিব্যাং জাতাঃ ওষধীঃ সর্বাঃ ব্রীহিয়বাদ্যাঃ পুষ্ণামি পুষ্টিমতীঃ
রসস্বাদুমতীশ্চ করোমি সোমো ভূৎবা রসাত্মকঃ সোমঃ সন্ রসাত্মকঃ
রসস্বভাবঃ । সর্বরসানাং আকরঃ সোমঃ । স হি সর্বরসাত্মকঃ সর্বাঃ
ওষধীঃ স্বাত্মরসান্ অনুপ্রবেশ্যন্ পুষ্ণাতি ॥ কিঞ্চ —
অহং বৈশ্বানরো ভূৎবা প্রাণিনাং দেহমাশ্রিতঃ ।
প্রাণাপানসমায়ুক্তঃ পচাম্যন্নং চতুর্বিধম্ ॥ ১৫-১৪॥
অহমেব বৈশ্বানরঃ উদরস্থঃ অগ্নিঃ ভূৎবা —
“অয়মগ্নির্বৈশ্বানরো যোঽয়মন্তঃ পুরুষে যেনেদমন্নং পচ্যতে”
(বৃ. উ. ৫-৯-১)ইত্যাদিশ্রুতেঃ; বৈশ্বানরঃ সন্ প্রাণিনাং প্রাণবতাং দেহম্
আশ্রিতঃ প্রবিষ্টঃ প্রাণাপানসমায়ুক্তঃ প্রাণাপানাভ্যাং সমায়ুক্তঃ সংয়ুক্তঃ
পচামি পক্তিং করোমি অন্নং অশনং চতুর্বিধং চতুষ্প্রকারং ভোজ্যং
ভক্ষ্যং চোষ্যং লেহ্যং চ । “ভোক্তা বৈশ্বানরঃ অগ্নিঃ, অগ্নেঃ
ভোজ্যং অন্নং সোমঃ, তদেতৎ উভয়ং অগ্নীষোমৌ সর্বম্” ইতি পশ্যতঃ
অন্নদোষলেপঃ ন ভবতি ॥ কিঞ্চ —
সর্বস্য চাহং হৃদি সন্নিবিষ্টো মত্তঃ স্মৃতির্জ্ঞানমপোহনং চ ।
বেদৈশ্চ সর্বৈরহমেব বেদ্যো বেদান্তকৃদ্বেদবিদেব চাহম্ ॥ ১৫-১৫॥
সর্বস্য চ প্রাণিজাতস্য অহং আত্মা সন্ হৃদি বুদ্ধৌ সন্নিবিষ্টঃ । অতঃ
মত্তঃ আত্মনঃ সর্বপ্রাণিনাং স্মৃতিঃ জ্ঞানং তদপোহনং চ অপগমনং
চ; যেষাং যথা পুণ্যকর্মণাং পুণ্যকর্মানুরোধেন জ্ঞানস্মৃতী ভবতঃ,
তথা পাপকর্মণাং পাপকর্মানুরূপেণ স্মৃতিজ্ঞানয়োঃ অপোহনং চ অপায়নম্
অপগমনং চ । বেদৈশ্চ সর্বৈঃ অহমেব পরমাত্মা বেদ্যঃ বেদিতব্যঃ ।
বেদান্তকৃৎ বেদান্তার্থসম্প্রদায়কৃৎ ইত্যর্থঃ, বেদবিৎ বেদার্থবিৎ এব
চ অহম্ ॥ ভগবতঃ ঈশ্বরস্য নারায়ণাখ্যস্য বিভূতিসঙ্ক্ষেপঃ উক্তঃ
বিশিষ্টোপাধিকৃতঃ“যদাদিত্যগতং তেজঃ” (ভ. গী. ১৫-১২)
ইত্যাদিনা । অথ অধুনা তস্যৈব ক্ষরাক্ষরোপাধিপ্রবিভক্ততয়া নিরুপাধিকস্য
কেবলস্য স্বরূপনির্দিধারয়িষয়া উত্তরে শ্লোকাঃ আরভ্যন্তে । তত্র সর্বমেব
অতীতানাগতাধ্যায়ার্থজাতং ত্রিধা রাশীকৃত্য আহ —
দ্বাবিমৌ পুরুষৌ লোকে ক্ষরশ্চাক্ষর এব চ ।
ক্ষরঃ সর্বাণি ভূতানি কূটস্থোঽক্ষর উচ্যতে ॥ ১৫-১৬॥
দ্বৌ ইমৌ পৃথগ্রাশীকৃতৌ পুরুষৌ ইতি উচ্যেতে লোকে সংসারে —
ক্ষরশ্চ ক্ষরতীতি ক্ষরঃ বিনাশী ইতি একো রাশিঃ; অপরঃ পুরুষঃ অক্ষরঃ
তদ্বিপরীতঃ, ভগবতঃ মায়াশক্তিঃ, ক্ষরাখ্যস্য পুরুষস্য উৎপত্তিবীজম্
অনেকসংসারিজন্তুকামকর্মাদিসংস্কারাশ্রয়ঃ, অক্ষরঃ পুরুষঃ উচ্যতে । কৌ
তৌ পুরুষৌ ইতি আহ স্বয়মেব ভগবান্ — ক্ষরঃ সর্বাণি ভূতানি, সমস্তং
বিকারজাতং ইত্যর্থঃ । কূটস্থঃ কূটঃ রাশী রাশিরিব স্থিতঃ । অথবা, কূটঃ
মায়া বঞ্চনা জিহ্মতা কুটিলতা ইতি পর্যায়াঃ, অনেকমায়াবঞ্চনাদিপ্রকারেণ
স্থিতঃ কূটস্থঃ, সংসারবীজানন্ত্যাৎ ন ক্ষরতি ইতি অক্ষরঃ উচ্যতে ॥
আভ্যাং ক্ষরাক্ষরাভ্যাং অন্যঃ বিলক্ষণঃ ক্ষরাক্ষরোপাধিদ্বয়দোষেণ
অস্পৃষ্টঃ নিত্যশুদ্ধবুদ্ধমুক্তস্বভাবঃ —
উত্তমঃ পুরুষস্ত্বন্যঃ পরমাত্মেত্যুদাহৃতঃ ।
যো লোকত্রয়মাবিশ্য বিভর্ত্যব্যয ঈশ্বরঃ ॥ ১৫-১৭॥
উত্তমঃ উৎকৃষ্টতমঃ পুরুষস্তু অন্যঃ অত্যন্তবিলক্ষণঃ আভ্যাং পরমাত্মা
ইতি পরমশ্চ অসৌ দেহাদ্যবিদ্যাকৃতাত্মভ্যঃ, আত্মা চ সর্বভূতানাং
প্রত্যক্চেতনঃ, ইত্যতঃ পরমাত্মা ইতি উদাহৃতঃ উক্তঃ বেদান্তেষু । স এব
বিশিষ্যতে যঃ লোকত্রয়ং ভূর্ভুবঃস্বরাখ্যং স্বকীয়যা চৈতন্যবলশক্ত্যা
আবিশ্য প্রবিশ্য বিভর্তি স্বরূপসদ্ভাবমাত্রেণ বিভর্তি ধারয়তি; অব্যযঃ
ন অস্য ব্যযঃ বিদ্যতে ইতি অব্যযঃ । কঃ? ঈশ্বরঃ সর্বজ্ঞঃ নারায়ণাখ্যঃ
ঈশনশীলঃ ॥ যথাব্যাখ্যাতস্য ঈশ্বরস্য “পুরুষোত্তমঃ” ইত্যেতৎ
নাম প্রসিদ্ধম্ । তস্য নামনির্বচনপ্রসিদ্ধ্যা অর্থবত্ত্বং নাম্নো দর্শয়ন্
“নিরতিশয়ঃ অহং ঈশ্বরঃ” ইতি আত্মানং দর্শয়তি ভগবান্ —
যস্মাৎক্ষরমতীতোঽহমক্ষরাদপি চোত্তমঃ ।
অতোঽস্মি লোকে বেদে চ প্রথিতঃ পুরুষোত্তমঃ ॥ ১৫-১৮॥
যস্মাৎ ক্ষরং অতীতঃ অহং সংসারমায়াবৃক্ষং অশ্বত্থাখ্যং অতিক্রান্তঃ অহম্
অক্ষরাদপি সংসারমায়ারূপবৃক্ষবীজভূতাদপি চ উত্তমঃ উৎকৃষ্টতমঃ
ঊর্ধ্বতমো বা, অতঃ তাভ্যাং ক্ষরাক্ষরাভ্যাং উত্তমৎবাৎ অস্মি লোকে
বেদে চ প্রথিতঃ প্রখ্যাতঃ । পুরুষোত্তমঃ ইত্যেবং মাং ভক্তজনাঃ
বিদুঃ । কবয়ঃ কাব্যাদিষু চ ইদং নাম নিবধ্নন্তি । পুরুষোত্তম
ইত্যনেনাভিধানেনাভিগৃণন্তি ॥ অথ ইদানীং যথানিরুক্তং আত্মানং যো বেদ,
তস্য ইদং ফলং উচ্যতে —
যো মামেবমসম্মূঢো জানাতি পুরুষোত্তমম্ ।
স সর্ববিদ্ভজতি মাং সর্বভাবেন ভারত ॥ ১৫-১৯॥
যঃ মাং ঈশ্বরং যথোক্তবিশেষণং এবং যথোক্তেন প্রকারেণ অসম্মূঢঃ
সম্মোহবর্জিতঃ সন্ জানাতি “অয়ং অহং অস্মি” ইতি পুরুষোত্তমং সঃ
সর্ববিৎ সর্বাত্মনা সর্বং বেত্তীতি সর্বজ্ঞঃ সর্বভূতস্থং ভজতি মাং
সর্বভাবেন সর্বাত্মতয়া হে ভারত ॥ অস্মিন্ অধ্যায়ে ভগবত্তত্ত্বজ্ঞানং
মোক্ষফলং উক্ত্বা, অথ ইদানীং তৎ স্তৌতি —
ইতি গুহ্যতমং শাস্ত্রমিদমুক্তং ময়ানঘ ।
এতদ্বুদ্ধ্বা বুদ্ধিমান্স্যাৎকৃতকৃত্যশ্চ ভারত ॥ ১৫-২০॥
ইতি এতৎ গুহ্যতমং গোপ্যতমম্, অত্যন্তরহস্যং ইত্যেতৎ । কিং তৎ? শাস্ত্রম্ ।
যদ্যপি গীতাখ্যং সমস্তং “শাস্ত্রম্” উচ্যতে, তথাপি অয়মেব
অধ্যায়ঃ ইহ “শাস্ত্রম্” ইতি উচ্যতে স্তুত্যর্থং প্রকরণাৎ । সর্বো
হি গীতাশাস্ত্রার্থঃ অস্মিন্ অধ্যায়ে সমাসেন উক্তঃ । ন কেবলং গীতাশাস্ত্রার্থ
এব, কিন্তু সর্বশ্চ বেদার্থঃ ইহ পরিসমাপ্তঃ । “যস্তং বেদ স
বেদবিৎ” (ভ. গী. ১৫-১) “বেদৈশ্চ সর্বৈরহমেব বেদ্যঃ”
(ভ. গী. ১৫-১৫) ইতি চ উক্তম্ । ইদং উক্তং কথিতং ময়া হে অনঘ
অপাপ । এতৎ শাস্ত্রং যথাদর্শিতার্থং বুদ্ধ্বা বুদ্ধিমান্ স্যাৎ ভবেৎ
ন অন্যথা কৃতকৃত্যশ্চ ভারত কৃতং কৃত্যং কর্তব্যং যেন সঃ
কৃতকৃত্যঃ; বিশিষ্টজন্মপ্রসূতেন ব্রাহ্মণেন যৎ কর্তব্যং তৎ সর্বং
ভগবত্তত্ত্বে বিদিতে কৃতং ভবেৎ ইত্যর্থঃ; ন চ অন্যথা কর্তব্যং
পরিসমাপ্যতে কস্যচিৎ ইত্যভিপ্রায়ঃ । “সর্বং কর্মাখিলং পার্থ
জ্ঞানে পরিসমাপ্যতে” (ভ. গী. ৪-৩৩) ইতি চ উক্তম্ ।
”এতদ্ধি জন্মসামগ্র্যং ব্রাহ্মণস্য বিশেষতঃ । প্রাপ্যৈতৎকৃতকৃত্যো
হি দ্বিজো ভবতি নান্যথা” (মনু. ১২-৯৩) ইতি চ মানবং বচনম্ ।
যতঃ এতৎ পরমার্থতত্ত্বং মত্তঃ শ্রুতবান্ অসি, অতঃ কৃতার্থঃ ৎবং
ভারত ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে পুরুষোত্তময়োগো নাম পঽচদশোঽধ্যায়ঃ ॥১৫॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে পুরুষোত্তম-যোগঃ নাম পঽচদশঃ
অধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ ষোডশোঽধ্যায়ঃ ॥
দৈবী আসুরী রাক্ষসী ইতি প্রাণিণাং প্রকৃতয়ঃ নবমে অধ্যায়ে সূচিতাঃ ।
তাসাং বিস্তরেণ প্রদর্শনায় “অভয়ং সত্ত্বসংশুদ্ধিঃ”
ইত্যাদিঃ অধ্যায়ঃ আরভ্যতে । তত্র সংসারমোক্ষায় দৈবী প্রকৃতিঃ,
নিবন্ধায় আসুরী রাক্ষসী চ ইতি দৈব্যাঃ আদানায় প্রদর্শনং ক্রিয়তে,
ইতরয়োঃ পরিবর্জনায় চ ॥
শ্রীভগবানুবাচ —
অভয়ং সত্ত্বসংশুদ্ধির্জ্ঞানয়োগব্যবস্থিতিঃ ।
দানং দমশ্চ যজ্ঞশ্চ স্বাধ্যায়স্তপ আর্জবম্ ॥ ১৬-১॥
অভয়ং অভীরুতা । সত্ত্বসংশুদ্ধিঃ সত্ত্বস্য অন্তঃকরণস্য সংশুদ্ধিঃ
সংব্যবহারেষু পরবঞ্চনামায়ানৃতাদিপরিবর্জনং শুদ্ধসত্ত্বভাবেন
ব্যবহারঃ ইত্যর্থঃ । জ্ঞানয়োগব্যবস্থিতিঃ জ্ঞানং শাস্ত্রতঃ
আচার্যতশ্চ আত্মাদিপদার্থানাং অবগমঃ, অবগতানাং ইন্দ্রিয়াদ্যুপসংহারেণ
একাগ্রতয়া স্বাত্মসংবেদ্যতাপাদনং যোগঃ, তয়োঃ জ্ঞানয়োগয়োঃ ব্যাবস্থিতিঃ
ব্যবস্থানং তন্নিষ্ঠতা । এষা প্রধানা দৈবী সাত্ত্বিকী সম্পৎ । যত্র
যেষাং অধিকৃতানাং যা প্রকৃতিঃ সম্ভবতি, সাত্ত্বিকী সা উচ্যতে । দানং
যথাশক্তি সংবিভাগঃ অন্নাদীনাম্ । দমশ্চ বাহ্যকরণানাং উপশমঃ;
অন্তঃকরণস্য উপশমং শান্তিং বক্ষ্যতি । যজ্ঞশ্চ শ্রৌতঃ অগ্নিহোত্রাদিঃ ।
স্মার্তশ্চ দেবয়জ্ঞাদিঃ, স্বাধ্যায়ঃ ঋগ্বেদাদ্যধ্যযনং অদৃষ্টার্থম্ ।
তপঃ বক্ষ্যমাণং শারীরাদি । আর্জবং ঋজুৎবং সর্বদা ॥ কিঞ্চ —
অহিংসা সত্যমক্রোধস্ত্যাগঃ শান্তিরপৈশুনম্ ।
দয়া ভূতেষ্বলোলুপ্ত্বং মার্দবং হ্রীরচাপলম্ ॥ ১৬-২॥
অহিংসা অহিংসনং প্রাণিনাং পীডাবর্জনম্ । সত্যং অপ্রিয়ানৃতবর্জিতং
যথাভূতার্থবচনম্ । অক্রোধঃ পরৈঃ আক্রুষ্টস্য অভিহতস্য বা
প্রাপ্তস্য ক্রোধস্য উপশমনম্ । ত্যাগঃ সন্ন্যাসঃ, পূর্বং দানস্য উক্তৎবাৎ ।
শান্তিঃ অন্তঃকরণস্য উপশমঃ । অপৈশুনং অপিশুনতা; পরস্মৈ
পররন্ধ্রপ্রকটীকরণং পৈশুনম্, তদভাবঃ অপৈশুনম্ । দয়া কৃপা
ভূতেষু দুঃখিতেষু । অলোলুপ্ত্বং ইন্দ্রিয়াণাং বিষয়সন্নিধৌ অবিক্রিয়া ।
মার্দবং মৃদুতা অক্রৌর্যম্ । হ্রীঃ লজ্জা । অচাপলং অসতি প্রয়োজনে
বাক্পাণিপাদাদীনাং অব্যাপারয়িতৃৎবম্ ॥ কিঞ্চ —
তেজঃ ক্ষমা ধৃতিঃ শৌচমদ্রোহো নাতিমানিতা ।
ভবন্তি সম্পদং দৈবীমভিজাতস্য ভারত ॥ ১৬-৩॥
তেজঃ প্রাগল্ভ্যং ন ৎবগ্গতা দীপ্তিঃ । ক্ষমা আক্রুষ্টস্য তাডিতস্য বা
অন্তর্বিক্রিয়ানুৎপত্তিঃ, উৎপন্নায়াং বিক্রিয়ায়াং উপশমনং অক্রোধঃ ইতি অবোচাম ।
ইত্থং ক্ষমায়াঃ অক্রোধস্য চ বিশেষঃ । ধৃতিঃ দেহেন্দ্রিয়েষু অবসাদং
প্রাপ্তেষু তস্য প্রতিষেধকঃ অন্তঃকরণবৃত্তিবিশেষঃ, যেন উত্তম্ভিতানি
করণানি দেহশ্চ ন অবসীদন্তি । শৌচং দ্বিবিধং মৃজ্জলকৃতং
বাহ্যং আভ্যন্তরং চ মনোবুদ্ধ্যোঃ নৈর্মল্যং মায়ারাগাদিকালুষ্যাভাবঃ;
এবং দ্বিবিধং শৌচম্ । অদ্রোহঃ পরজিঘাংসাভাবঃ অহিংসনম্ । নাতিমানিতা
অত্যর্থং মানঃ অতিমানঃ, সঃ যস্য বিদ্যতে সঃ অতিমানী, তদ্ভাবঃ অতিমানিতা,
তদভাবঃ নাতিমানিতা আত্মনঃ পূজ্যতাতিশয়ভাবনাভাব ইত্যর্থঃ । ভবন্তি
অভয়াদীনি এতদন্তানি সম্পদং অভিজাতস্য । কিংবিশিষ্টাং সম্পদম্? দৈবীং
দেবানাং যা সম্পৎ তাং অভিলক্ষ্য জাতস্য দেববিভূত্যর্হস্য ভাবিকল্যাণস্য
ইত্যর্থঃ, হে ভারত ॥ অথ ইদানীং আসুরী সম্পৎ উচ্যতে —
দম্ভো দর্পোঽতিমানশ্চ ক্রোধঃ পারুষ্যমেব চ ।
অজ্ঞানং চাভিজাতস্য পার্থ সম্পদমাসুরীম্ ॥ ১৬-৪॥
দম্ভঃ ধর্মধ্বজিৎবম্ । দর্পঃ বিদ্যাধনস্বজনাদিনিমিত্তঃ উৎসেকঃ ।
অতিমানঃ পূর্বোক্তঃ । ক্রোধশ্চ । পারুষ্যমেব চ পরুষবচনম্
— যথা কাণং “চক্ষুষ্মান্” বিরূপং “রূপবান্”
হীনাভিজনং “উত্তমাভিজনঃ” ইত্যাদি । অজ্ঞানং চ অবিবেকজ্ঞানং
কর্তব্যাকর্তব্যাদিবিষয়মিথ্যাপ্রত্যযঃ । অভিজাতস্য পার্থ । কিম্
অভিজাতস্যেতি, আহ — সম্পদং আসুরীং অসুরাণাং সম্পৎ আসুরী তাং অভিজাতস্য
ইত্যর্থঃ ॥ অনয়োঃ সম্পদোঃ কার্যং উচ্যতে —
দৈবী সম্পদ্বিমোক্ষায় নিবন্ধায়াসুরী মতা ।
মা শুচঃ সম্পদং দৈবীমভিজাতোঽসি পাণ্ডব ॥ ১৬-৫॥
দৈবী সম্পৎ যা, সা বিমোক্ষায় সংসারবন্ধনাৎ । নিবন্ধায় নিয়তঃ
বন্ধঃ নিবন্ধঃ তদর্থং আসুরী সম্পৎ মতা অভিপ্রেতা । তথা রাক্ষসী
চ । তত্র এবং উক্তে সতি অর্জুনস্য অন্তর্গতং ভাবং “কিং অহম্
আসুরসম্পদ্যুক্তঃ? কিং বা দৈবসম্পদ্যুক্তঃ?” ইত্যেবং আলোচনারূপম্
আলক্ষ্য আহ ভগবান্ — মা শুচঃ শোকং মা কার্ষীঃ । সম্পদং দৈবীম্
অভিজাতঃ অসি অভিলক্ষ্য জাতোঽসি, ভাবিকল্যাণঃ ৎবং অসি ইত্যর্থঃ, হে
পাণ্ডব ॥
দ্বৌ ভূতসর্গৌ লোকেঽস্মিন্দৈব আসুর এব চ ।
দৈবো বিস্তরশঃ প্রোক্ত আসুরং পার্থ মে শৃণু ॥ ১৬-৬॥
দ্বৌ দ্বিসঙ্খ্যাকৌ ভূতসর্গৌ ভূতানাং মনুষ্যাণাং সর্গৌ সৃষ্টী ভূতসর্গৌ
সৃজ্যেতেতি সর্গৌ ভূতান্যেব সৃজ্যমানানি দৈবাসুরসম্পদ্বয়যুক্তানি
ইতি দ্বৌ ভূতসর্গৌ ইতি উচ্যতে, “দ্বয়া হ বৈ প্রাজাপত্যা
দেবাশ্চাসুরাশ্চ” (বৃ. উ. ১-৩-১) ইতি শ্রুতেঃ । লোকে অস্মিন্,
সংসারে ইত্যর্থঃ, সর্বেষাং দ্বৈবিধ্যোপপত্তেঃ । কৌ তৌ ভূতসর্গৌ ইতি,
উচ্যতে — প্রকৃতাবেব দৈব আসুর এব চ । উক্তয়োরেব পুনঃ অনুবাদে
প্রয়োজনং আহ — দৈবঃ ভূতসর্গঃ “অভয়ং সত্ত্বসংশুদ্ধিঃ”
(ভ. গী. ১৬-১) ইত্যাদিনা বিস্তরশঃ বিস্তরপ্রকারৈঃ প্রোক্তঃ কথিতঃ, ন তু
আসুরঃ বিস্তরশঃ; অতঃ তৎপরিবর্জনার্থং আসুরং পার্থ, মে মম বচনাৎ
উচ্যমানং বিস্তরশঃ শৃণু অবধারয় ॥ আ অধ্যায়পরিসমাপ্তেঃ আসুরী
সম্পৎ প্রাণিবিশেষণৎবেন প্রদর্শ্যতে, প্রত্যক্ষীকরণেন চ শক্যতে
তস্যাঃ পরিবর্জনং কর্তুমিতি —
প্রবৃত্তিং চ নিবৃত্তিং চ জনা ন বিদুরাসুরাঃ ।
ন শৌচং নাপি চাচারো ন সত্যং তেষু বিদ্যতে ॥ ১৬-৭॥
প্রবৃত্তিং চ প্রবর্তনং যস্মিন্ পুরুষার্থসাধনে কর্তব্যে প্রবৃত্তিঃ তাম্,
নিবৃত্তিং চ এতদ্বিপরীতাং যস্মাৎ অনর্থহেতোঃ নিবর্তিতব্যং সা নিবৃত্তিঃ
তাং চ, জনাঃ আসুরাঃ ন বিদুঃ ন জানন্তি । ন কেবলং প্রবৃত্তিনিবৃত্তী
এব তে ন বিদুঃ, ন শৌচং নাপি চ আচারঃ ন সত্যং তেষু বিদ্যতে;
অশৌচাঃ অনাচারাঃ মায়াবিনঃ অনৃতবাদিনো হি আসুরাঃ ॥ কিঞ্চ —
অসত্যমপ্রতিষ্ঠং তে জগদাহুরনীশ্বরম্ ।
অপরস্পরসম্ভূতং কিমন্যৎকামহৈতুকম্ ॥ ১৬-৮॥
অসত্যং যথা বয়ং অনৃতপ্রায়াঃ তথা ইদং জগৎ সর্বং অসত্যম্, অপ্রতিষ্ঠং
চ ন অস্য ধর্মাধর্মৌ প্রতিষ্ঠা অতঃ অপ্রতিষ্ঠং চ, ইতি তে আসুরাঃ
জনাঃ জগৎ আহুঃ, অনীশ্বরং ন চ ধর্মাধর্মসব্যপেক্ষকঃ অস্য শাসিতা
ঈশ্বরঃ বিদ্যতে ইতি অতঃ অনীশ্বরং জগৎ আহুঃ । কিঞ্চ, অপরস্পরসম্ভূতং
কামপ্রয়ুক্তয়োঃ স্ত্রীপুরুষয়োঃ অন্যোন্যসংয়োগাৎ জগৎ সর্বং সম্ভূতম্ ।
কিমন্যৎ কামহৈতুকং কামহেতুকমেব কামহৈতুকম্ । কিমন্যৎ জগতঃ
কারণম্? ন কিঞ্চিৎ অদৃষ্টং ধর্মাধর্মাদি কারণান্তরং বিদ্যতে জগতঃ
“কাম এব প্রাণিনাং কারণম্” ইতি লোকায়তিকদৃষ্টিঃ ইয়ম্ ॥
এতাং দৃষ্টিমবষ্টভ্য নষ্টাত্মানোঽল্পবুদ্ধয়ঃ ।
প্রভবন্ত্যুগ্রকর্মাণঃ ক্ষয়ায় জগতোঽহিতাঃ ॥ ১৬-৯॥
এতাং দৃষ্টিং অবষ্টভ্য আশ্রিত্য নষ্টাত্মানঃ নষ্টস্বভাবাঃ
বিভ্রষ্টপরলোকসাধনাঃ অল্পবুদ্ধয়ঃ বিষয়বিষয়া অল্পৈব বুদ্ধিঃ
যেষাং তে অল্পবুদ্ধয়ঃ প্রভবন্তি উদ্ভবন্তি উগ্রকর্মাণঃ ক্রূরকর্মাণঃ
হিংসাত্মকাঃ । ক্ষয়ায় জগতঃ প্রভবন্তি ইতি সম্বন্ধঃ । জগতঃ অহিতাঃ,
শত্রবঃ ইত্যর্থঃ ॥ তে চ —
কামমাশ্রিত্য দুষ্পূরং দম্ভমানমদান্বিতাঃ ।
মোহাদ্গৃহীৎবাসদ্গ্রাহান্প্রবর্তন্তেঽশুচিব্রতাঃ ॥ ১৬-১০॥
কামং ইচ্ছাবিশেষং আশ্রিত্য অবষ্টভ্য দুষ্পূরং অশক্যপূরণং
দম্ভমানমদান্বিতাঃ দম্ভশ্চ মানশ্চ মদশ্চ দম্ভমানমদাঃ তৈঃ
অন্বিতাঃ দম্ভমানমদান্বিতাঃ মোহাৎ অবিবেকতঃ গৃহীৎবা উপাদায় অসদ্গ্রাহান্
অশুভনিশ্চয়ান্ প্রবর্তন্তে লোকে অশুচিব্রতাঃ অশুচীনি ব্রতানি যেষাং
তে অশুচিব্রতাঃ ॥ কিঞ্চ —
চিন্তামপরিমেয়াং চ প্রলয়ান্তামুপাশ্রিতাঃ ।
কামোপভোগপরমা এতাবদিতি নিশ্চিতাঃ ॥ ১৬-১১॥
চিন্তাং অপরিমেয়াং চ, ন পরিমাতুং শক্যতে যস্যাঃ চিন্তায়াঃ ইয়ত্তা সা
অপরিমেয়া, তাং অপরিমেয়াম্, প্রলয়ান্তাং মরণান্তাং উপাশ্রিতাঃ, সদা চিন্তাপরাঃ
ইত্যর্থঃ । কামোপভোগপরমাঃ, কাম্যন্তে ইতি কামাঃ বিষয়াঃ শব্দাদয়ঃ
তদুপভোগপরমাঃ “অয়মেব পরমঃ পুরুষার্থঃ যঃ কামোপভোগঃ”
ইত্যেবং নিশ্চিতাত্মানঃ, এতাবৎ ইতি নিশ্চিতাঃ ॥
আশাপাশশতৈর্বদ্ধাঃ কামক্রোধপরায়ণাঃ ।
ঈহন্তে কামভোগার্থমন্যায়েনার্থসঞ্চয়ান্ ॥ ১৬-১২॥
আশাপাশশতৈঃ আশা এব পাশাঃ তচ্ছতৈঃ বদ্ধাঃ নিয়ন্ত্রিতাঃ সন্তঃ
সর্বতঃ আকৃষ্যমাণাঃ, কামক্রোধপরায়ণাঃ কামক্রোধৌ পরং অয়নম্
আশ্রয়ঃ যেষাং তে কামক্রোধপরায়ণাঃ, ঈহন্তে চেষ্টন্তে কামভোগার্থং
কামভোগপ্রয়োজনায় ন ধর্মার্থম্, অন্যায়েন পরস্বাপহরণাদিনা ইত্যর্থঃ;
কিম্? অর্থসঞ্চয়ান্ অর্থপ্রচয়ান্ ॥ ঈদৃশশ্চ তেষাং অভিপ্রায়ঃ —
ইদমদ্য ময়া লব্ধমিদং প্রাপ্স্যে মনোরথম্ ।
ইদমস্তীদমপি মে ভবিষ্যতি পুনর্ধনম্ ॥ ১৬-১৩॥
ইদং দ্রব্যং অদ্য ইদানীং ময়া লব্ধম্ । ইদং চ অন্যৎ প্রাপ্স্যে মনোরথং
মনস্তুষ্টিকরম্ । ইদং চ অস্তি ইদমপি মে ভবিষ্যতি আগামিনি সংবৎসরে
পুনঃ ধনং তেন অহং ধনী বিখ্যাতঃ ভবিষ্যামি ইতি ॥
অসৌ ময়া হতঃ শত্রুর্হনিষ্যে চাপরানপি ।
ঈশ্বরোঽহমহং ভোগী সিদ্ধোঽহং বলবান্সুখী ॥ ১৬-১৪॥
অসৌ দেবদত্তনামা ময়া হতঃ দুর্জয়ঃ শত্রুঃ । হনিষ্যে চ অপরান্ অন্যান্
বরাকান্ অপি । কিং এতে করিষ্যন্তি তপস্বিনঃ; সর্বথাপি নাস্তি মত্তুল্যঃ ।
কথম্? ঈশ্বরঃ অহম্, অহং ভোগী । সর্বপ্রকারেণ চ সিদ্ধঃ অহং সম্পন্নঃ
পুত্রৈঃ নপ্তৃভিঃ, ন কেবলং মানুষঃ, বলবান্ সুখী চ অহমেব; অন্যে
তু ভূমিভারায়াবিতীর্ণাঃ ॥
আঢ্যোঽভিজনবানস্মি কোঽন্যোঽস্তি সদৃশো ময়া ।
যক্ষ্যে দাস্যামি মোদিষ্য ইত্যজ্ঞানবিমোহিতাঃ ॥ ১৬-১৫॥
আঢ্যঃ ধনেন, অভিজনবান্ সপ্তপুরুষং শ্রোত্রিয়ৎবাদিসম্পন্নঃ —
তেনাপি ন মম তুল্যঃ অস্তি কশ্চিৎ । কঃ অন্যঃ অস্তি সদৃশঃ তুল্যঃ
ময়া? কিঞ্চ, যক্ষ্যে যাগেনাপি অন্যান্ অভিভবিষ্যামি, দাস্যামি নটাদিভ্যঃ,
মোদিষ্যে হর্ষং চ অতিশয়ং প্রাপ্স্যামি, ইতি এবং অজ্ঞানবিমোহিতাঃ অজ্ঞানেন
বিমোহিতাঃ বিবিধং অবিবেকভাবং আপন্নাঃ ॥
অনেকচিত্তবিভ্রান্তা মোহজালসমাবৃতাঃ ।
প্রসক্তাঃ কামভোগেষু পতন্তি নরকেঽশুচৌ ॥ ১৬-১৬॥
অনেকচিত্তবিভ্রান্তাঃ উক্তপ্রকারৈঃ অনেকৈঃ চিত্তৈঃ বিবিধং ভ্রান্তাঃ
অনেকচিত্তবিভ্রান্তাঃ, মোহজালসমাবৃতাঃ মোহঃ অবিবেকঃ অজ্ঞানং তদেব
জালমিব আবরণাত্মকৎবাৎ, তেন সমাবৃতাঃ । প্রসক্তাঃ কামভোগেষু
তত্রৈব নিষণ্ণাঃ সন্তঃ তেন উপচিতকল্মষাঃ পতন্তি নরকে অশুচৌ
বৈতরণ্যাদৌ ॥
আত্মসম্ভাবিতাঃ স্তব্ধা ধনমানমদান্বিতাঃ ।
যজন্তে নাময়জ্ঞৈস্তে দম্ভেনাবিধিপূর্বকম্ ॥ ১৬-১৭॥
আত্মসম্ভাবিতাঃ সর্বগুণবিশিষ্টতয়া আত্মনৈব সম্ভাবিতাঃ আত্মসম্ভাবিতাঃ,
ন সাধুভিঃ । স্তব্ধাঃ অপ্রণতাত্মানঃ । ধনমানমদান্বিতাঃ ধননিমিত্তঃ
মানঃ মদশ্চ, তাভ্যাং ধনমানমদাভ্যাং অন্বিতাঃ । যজন্তে নাময়জ্ঞৈঃ
নামমাত্রৈঃ যজ্ঞৈঃ তে দম্ভেন ধর্মধ্বজিতয়া অবিধিপূর্বকং
বিধিবিহিতাঙ্গেতিকর্তব্যতারহিতম্ ॥
অহঙ্কারং বলং দর্পং কামং ক্রোধং চ সংশ্রিতাঃ ।
মামাত্মপরদেহেষু প্রদ্বিষন্তোঽভ্যসূয়কাঃ ॥ ১৬-১৮॥
অহঙ্কারং অহঙ্করণং অহঙ্কারঃ, বিদ্যমানৈঃ অবিদ্যমানৈশ্চ গুণৈঃ আত্মনি
অধ্যারোপিতৈঃ “বিশিষ্টমাত্মানমহম্” ইতি মন্যতে, সঃ অহঙ্কারঃ
অবিদ্যাখ্যঃ কষ্টতমঃ, সর্বদোষাণাং মূলং সর্বানর্থপ্রবৃত্তীনাং চ,
তম্ । তথা বলং পরাভিভবনিমিত্তং কামরাগান্বিতম্ । দর্পং দর্পো নাম
যস্য উদ্ভবে ধর্মং অতিক্রামতি সঃ অয়ং অন্তঃকরণাশ্রয়ঃ দোষবিশেষঃ ।
কামং স্ত্র্যাদিবিষয়ম্ । ক্রোধং অনিষ্টবিষয়ম্ । এতান্ অন্যাংশ্চ মহতো
দোষান্ সংশ্রিতাঃ । কিঞ্চ তে মাং ঈশ্বরং আত্মপরদেহেষু স্বদেহে পরদেহেষু
চ তদ্বুদ্ধিকর্মসাক্ষিভূতং মাং প্রদ্বিষন্তঃ, মচ্ছাসনাতিবর্তিৎবং
প্রদ্বেষঃ, তং কুর্বন্তঃ অভ্যসূয়কাঃ সন্মার্গস্থানাং গুণেষু অসহমানাঃ ॥
তানহং দ্বিষতঃ ক্রূরান্সংসারেষু নরাধমান্ ।
ক্ষিপাম্যজস্রমশুভানাসুরীষ্বেব যোনিষু ॥ ১৬-১৯॥
তান্ অহং সন্মার্গপ্রতিপক্ষভূতান্ সাধুদ্বেষিণঃ দ্বিষতশ্চ মাং ক্রূরান্
সংসারেষু এব অনেকনরকসংসরণমার্গেষু নরাধমান্ অধর্মদোষবত্ত্বাৎ
ক্ষিপামি প্রক্ষিপামি অজস্রং সন্ততং অশুভান্ অশুভকর্মকারিণঃ
আসুরীষ্বেব ক্রূরকর্মপ্রায়াসু ব্যাঘ্রসিংহাদিয়োনিষু “ক্ষিপামি”
ইত্যনেন সম্বন্ধঃ ॥
আসুরীং যোনিমাপন্না মূঢা জন্মনি জন্মনি ।
মামপ্রাপ্যৈব কৌন্তেয় ততো যান্ত্যধমাং গতিম্ ॥ ১৬-২০॥
আসুরীং যোনিং আপন্নাঃ প্রতিপন্নাঃ মূঢাঃ অবিবেকিনঃ জন্মনি জন্মনি প্রতিজন্ম
তমোবহুলাস্বেব যোনিষু জায়মানাঃ অধো গচ্ছন্তো মূঢাঃ মাং ঈশ্বরং অপ্রাপ্য
অনাসাদ্য এব হে কৌন্তেয়, ততঃ তস্মাদপি যান্তি অধমাং গতিং নিকৃষ্টতমাং
গতিম্ । “মাং অপ্রাপ্যৈব” ইতি ন মৎপ্রাপ্তৌ কাচিদপি আশঙ্কা অস্তি,
অতঃ মচ্ছিষ্টসাধুমার্গং অপ্রাপ্য ইত্যর্থঃ ॥ সর্বস্যা আসুর্যাঃ সম্পদঃ
সঙ্ক্ষেপঃ অয়ং উচ্যতে, যস্মিন্ ত্রিবিধে সর্বঃ আসুরীসম্পদ্ভেদঃ অনন্তোঽপি
অন্তর্ভবতি । যৎপরিহারেণ পরিহৃতশ্চ ভবতি, যৎ মূলং সর্বস্য
অনর্থস্য, তৎ এতৎ উচ্যতে —
ত্রিবিধং নরকস্যেদং দ্বারং নাশনমাত্মনঃ ।
কামঃ ক্রোধস্তথা লোভস্তস্মাদেতত্ত্রয়ং ত্যজেৎ ॥ ১৬-২১॥
ত্রিবিধং ত্রিপ্রকারং নরকস্য প্রাপ্তৌ ইদং দ্বারং নাশনং আত্মনঃ,
যৎ দ্বারং প্রবিশন্নেব নশ্যতি আত্মা; কস্মৈচিৎ পুরুষার্থায় যোগ্যো ন
ভবতি ইত্যেতৎ, অতঃ উচ্যতে “দ্বারং নাশনমাত্মনঃ” ইতি । কিং
তৎ? কামঃ ক্রোধঃ তথা লোভঃ । তস্মাৎ এতৎ ত্রয়ং ত্যজেৎ । যতঃ এতৎ
দ্বারং নাশনং আত্মনঃ তস্মাৎ কামাদিত্রয়মেতৎ ত্যজেৎ ॥ ত্যাগস্তুতিরিয়ং —
এতৈর্বিমুক্তঃ কৌন্তেয় তমোদ্বারৈস্ত্রিভির্নরঃ ।
আচরত্যাত্মনঃ শ্রেয়স্ততো যাতি পরাং গতিম্ ॥ ১৬-২২॥
এতৈঃ বিমুক্তঃ কৌন্তেয় তমোদ্বারৈঃ তমসঃ নরকস্য দুঃখমোহাত্মকস্য
দ্বারাণি কামাদয়ঃ তৈঃ, এতৈঃ ত্রিভিঃ বিমুক্তঃ নরঃ আচরতি অনুতিষ্ঠতি ।
কিম্? আত্মনঃ শ্রেয়ঃ । যৎপ্রতিবদ্ধঃ পূর্বং ন আচচার, তদপগমাৎ
আচরতি । ততঃ তদাচরণাৎ যাতি পরাং গতিং মোক্ষমপি ইতি ॥ সর্বস্য
এতস্য আসুরীসম্পৎপরিবর্জনস্য শ্রেয়আচরণস্য চ শাস্ত্রং কারণম্ ।
শাস্ত্রপ্রমাণাৎ উভয়ং শক্যং কর্তুম্, ন অন্যথা । অতঃ —
যঃ শাস্ত্রবিধিমুৎসৃজ্য বর্ততে কামকারতঃ ।
ন স সিদ্ধিমবাপ্নোতি ন সুখং ন পরাং গতিম্ ॥ ১৬-২৩॥
যঃ শাস্ত্রবিধিং শাস্ত্রং বেদঃ তস্য বিধিং কর্তব্যাকর্তব্যজ্ঞানকারণং
বিধিপ্রতিষেধাখ্যং উৎসৃজ্য ত্যক্ত্বা বর্ততে কামকারতঃ কামপ্রয়ুক্তঃ
সন্, ন সঃ সিদ্ধিং পুরুষার্থয়োগ্যতাং অবাপ্নোতি, ন অপি অস্মিন্ লোকে সুখং
ন অপি পরাং প্রকৃষ্টাং গতিং স্বর্গং মোক্ষং বা ॥
তস্মাচ্ছাস্ত্রং প্রমাণং তে কার্যাকার্যব্যবস্থিতৌ ।
জ্ঞাৎবা শাস্ত্রবিধানোক্তং কর্ম কর্তুমিহার্হসি ॥ ১৬-২৪॥
তস্মাৎ শাস্ত্রং প্রমাণং জ্ঞানসাধনং তে তব কার্যাকার্যব্যবস্থিতৌ
কর্তব্যাকর্তব্যব্যবস্থায়াম্ । অতঃ জ্ঞাৎবা বুদ্ধ্বা শাস্ত্রবিধানোক্তং বিধিঃ
বিধানং শাস্ত্রমেব বিধানং শাস্ত্রবিধানং “কুর্যাৎ, ন কুর্যাৎ”
ইত্যেবংলক্ষণম্, তেন উক্তং স্বকর্ম যৎ তৎ কর্তুং ইহ অর্হসি, ইহ ইতি
কর্মাধিকারভূমিপ্রদর্শনার্থং ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং যোগশাস্ত্রে
শ্রীকৃষ্নার্জুনসংবাদে দৈবাসুরীসম্পত্ত্বিভাগয়োগো নাম শোডশোঽধ্যায়ঃ ॥১৬॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে দৈব-আসুরী-সম্পত্ত্-বিভাগ-যোগঃ
নাম শোডশোঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ সপ্তদশোঽধ্যায়ঃ ॥
“তস্মাৎ শাস্ত্রং প্রমাণং তে” (ভ. গী. ১৬-২৪) ইতি ভগবৎ-বাক্যাৎ
লব্ধ-প্রশ্ন-বীজঃ অর্জুনঃ উবাচ —
অর্জুন উবাচ —
যে শাস্ত্রবিধিমুৎসৃজ্য যজন্তে শ্রদ্ধয়ান্বিতাঃ ।
তেষাং নিষ্ঠা তু কা কৃষ্ণ সত্ত্বমাহো রজস্তমঃ ॥ ১৭-১॥
যে কেচিৎ অবিশেষিতাঃ শাস্ত্র-বিধিং শাস্ত্র-বিধানং
শ্রুতি-স্মৃতি-শাস্ত্র-চোদনাং উৎসৃজ্য পরিত্যজ্য যজন্তে দেব-আদীন্
পূজয়ন্তি শ্রদ্ধয়া অন্বিতাঃ শ্রদ্ধয়া আস্তিক্য-বুদ্ধ্যা অন্বিতাঃ সংয়ুক্তাঃ
সন্তঃ — শ্রুতি-লক্ষণং স্মৃতি-লক্ষণং বা কঞ্চিৎ শাস্ত্র-বিধিম্
অপশ্যন্তঃ বৃদ্ধ-ব্যবহার-দর্শনাৎ এব শ্রদ্দধানতয়া
যে দেব-আদীন্ পূজয়ন্তি, তে ইহ “যে শাস্ত্র-বিধিম্-উৎসৃজ্য
যজন্তে শ্রদ্ধয়া-অন্বিতাঃ” ইতি এবং গৃহ্যন্তে । যে পুনঃ কঞ্চিৎ
শাস্ত্র-বিধিং উপলভমানাঃ এব তং উৎসৃজ্য অয়থা-বিধি দেব-আদীন্
পূজয়ন্তি, তে ইহ “যে শাস্ত্র-বিধিম্-উৎসৃজ্য যজন্তে”
ইতি ন পরিগৃহ্যন্তে । কস্মাৎ? শ্রদ্ধয়া অন্বিতৎব-বিশেষণাৎ ।
দেব-আদি-পূজা-বিধি-পরং কিঞ্চিৎ শাস্ত্রং পশ্যন্তঃ এব তৎ উৎসৃজ্য
অশ্রদ্দধানতয়া তৎ-বিহিতায়াং দেব-আদি-পূজায়াং শ্রদ্ধয়া অন্বিতাঃ
প্রবর্তন্তে ইতি ন শক্যং কল্পয়িতুং যস্মাৎ, তস্মাৎ পূর্ব-উক্তাঃ এব
“যে শাস্ত্র-বিধিম্-উৎসৃজ্য যজন্তে শ্রদ্ধয়া-অন্বিতাঃ” ইতি
অত্র গৃহ্যন্তে তেষাং এবং-ভূতানাং নিষ্ঠা তু কা কৃষ্ণ সত্ত্বং আহো রজঃ
তমঃ, কিং সত্ত্বং নিষ্ঠা অবস্থানম্, আহোস্বিৎ রজঃ, অথবা তমঃ ইতি । এতৎ
উক্তং ভবতি — যা তেষাং দেব-আদি-বিষয়া পূজা, সা কিং সাত্ত্বিকী, আহোস্বিৎ
রাজসী, উত তামসী ইতি ॥ সামান্য-বিষয়ঃ অয়ং প্রশ্নঃ ন অপ্রবিভজ্যং
প্রতি-বচনং অর্হতি ইতি শ্রী-ভগবান্ উবাচ —
শ্রীভগবানুবাচ —
ত্রিবিধা ভবতি শ্রদ্ধা দেহিনাং সা স্বভাবজা ।
সাত্ত্বিকী রাজসী চৈব তামসী চেতি তাং শৃণু ॥ ১৭-২॥
ত্রি-বিধা ত্রি-প্রকারা ভবতি শ্রদ্ধা, যস্যাং নিষ্ঠায়াং ৎবং
পৃচ্ছসি, দেহিনাং শরীরিণাং সা স্বভাব-জা; জন্ম-অন্তর-কৃতঃ
ধর্ম-আদি-সংস্কারঃ মরণ-কালে অভিব্যক্তঃ স্বভাবঃ উচ্যতে, ততঃ জাতা
স্বভাব-জা । সাত্ত্বিকী সত্ত্ব-নির্বৃত্তা দেব-পূজা-আদি-বিষয়া; রাজসী
রজো-নির্বৃত্তা যক্ষ-রক্ষঃ-পূজা-আদি-বিষয়া; তামসী তমো-নির্বৃত্তা
প্রেত-পিশাচ-আদি-পূজা-বিষয়া; এবং ত্রি-বিধাং তাং উচ্যমানাং শ্রদ্ধাং
শৃণু অবধারয় ॥ সা ইয়ং ত্রি-বিধা ভবতি —
সত্ত্বানুরূপা সর্বস্য শ্রদ্ধা ভবতি ভারত ।
শ্রদ্ধাময়োঽয়ং পুরুষঃ যো যচ্ছ্রদ্ধঃ স এব সঃ ॥ ১৭-৩॥
সত্ত্ব-অনুরূপা বিশিষ্ট-সংস্কার-উপেত-অন্তঃকরণ-অনুরূপা সর্বস্য
প্রাণি-জাতস্য শ্রদ্ধা ভবতি ভারত । যদি এবং ততঃ কিং স্যাৎ ইতি,
উচ্যতে — শ্রদ্ধা-ময়ঃ অয়ং শ্রদ্ধা-প্রায়ঃ পুরুষঃ সংসারী জীবঃ ।
কথম্? যঃ যৎ-শ্রদ্ধঃ যা শ্রদ্ধা যস্য জীবস্য সঃ যৎ-শ্রদ্ধঃ
সঃ এব তৎ-শ্রদ্ধ-অনুরূপঃ এব সঃ জীবঃ ॥ ততঃ চ কার্যেণ লিঙ্গেন
দেব-আদি-পূজয়া সত্ত্ব-আদি-নিষ্ঠা অনুমেয়া ইতি আহ —
যজন্তে সাত্ত্বিকা দেবান্-যক্ষরক্ষাংসি রাজসাঃ ।
প্রেতান্ভূতগণাংশ্চান্যে যজন্তে তামসা জনাঃ ॥ ১৭-৪॥
যজন্তে পূজয়ন্তি সাত্ত্বিকাঃ সত্ত্ব-নিষ্ঠাঃ দেবান্, যক্ষ-রক্ষাংসি রাজসাঃ,
প্রেতান্ ভূত-গণান্ চ সপ্ত-মাতৃকা-আদীন্ চ অন্যে যজন্তে তামসাঃ জনাঃ ॥
এবং কার্যতঃ নির্ণীতাঃ সত্ত্ব-আদি-নিষ্ঠাঃ শাস্ত্র-বিধি-উৎসর্গে । তত্র
কশ্চিৎ এব সহস্রেষু দেব-পূজা-আদি-পরঃ সত্ত্ব-নিষ্ঠঃ ভবতি,
বাহুল্যেন তু রজো-নিষ্ঠাঃ তমো-নিষ্ঠাঃ চ এব প্রাণিনঃ ভবন্তি ।
কথম্? —
অশাস্ত্রবিহিতং ঘোরং তপ্যন্তে যে তপো জনাঃ ।
দম্ভাহঙ্কারসংয়ুক্তাঃ কামরাগবলান্বিতাঃ ॥ ১৭-৫॥
অশাস্ত্র-বিহিতং ন শাস্ত্র-বিহিতং অশাস্ত্র-বিহিতং ঘোরং পীডাকরং
প্রাণিনাং আত্মনঃ চ তপঃ তপ্যন্তে নির্বর্তয়ন্তি যে জনাঃ তে চ
দম্ভ-অহঙ্কার-সংয়ুক্তাঃ, দম্ভঃ চ অহঙ্কারঃ চ দম্ভ-অহঙ্কারৌ,
তাভ্যাং সংয়ুক্তাঃ দম্ভ-অহঙ্কার-সংয়ুক্তাঃ, কাম-রাগ-বল-অন্বিতাঃ
কামঃ চ রাগঃ চ কাম-রাগৌ তৎ-কৃতং বলং কাম-রাগ-বলং তেন
অন্বিতাঃ কাম-রাগ-বল-অন্বিতাঃ ॥
কর্শয়ন্তঃ শরীরস্থং ভূতগ্রামমচেতসঃ ।
মাং চৈবান্তঃশরীরস্থং তান্বিদ্ধ্যাসুরনিশ্চয়ান্ ॥ ১৭-৬॥
কর্শয়ন্তঃ কৃশী-কুর্বন্তঃ শরীর-স্থং ভূত-গ্রামং করণ-সমুদায়ম্
অচেতসঃ অবিবেকিনঃ মাং চ এব তৎ-কর্ম-বুদ্ধি-সাক্ষি-ভূতম্
অন্তঃ-শরীর-স্থং নারায়ণং কর্শয়ন্তঃ, মৎ-অনুশাসন-অকরণং এব
মৎ-কর্শনম্, তান্ বিদ্ধি আসুর-নিশ্চয়ান্ আসুরঃ নিশ্চয়ঃ যেষাং তে
আসুর-নিশ্চয়াঃ তান্ পরিহরণ-অর্থং বিদ্ধি ইতি উপদেশঃ ॥ আহারাণাং
চ রস্য-স্নিগ্ধ-আদি-বর্গ-ত্রয়-রূপেণ ভিন্নানাং যথা-ক্রমং
সাত্ত্বিক-রাজস-তামস-পুরুষ-প্রিয়ৎব-দর্শনং ইহ ক্রিয়তে
রস্য-স্নিগ্ধ-আদিষু আহার-বিশেষেষু আত্মনঃ প্রীতি-অতিরেকেণ লিঙ্গেন
সাত্ত্বিকৎবং রাজসৎবং তামসৎবং চ বুদ্ধ্বা রজস্-তমো-লিঙ্গানাম্
আহারাণাং পরিবর্জন-অর্থং সত্ত্ব-লিঙ্গানাং চ উপাদান-অর্থম্ । তথা
যজ্ঞ-আদীনাম্-অপি সত্ত্ব-আদি-গুণ-ভেদেন ত্রি-বিধৎব-প্রতিপাদনম্
ইহ “রাজস-তামসান্ বুদ্ধ্বা কথং নু নাম পরিত্যজেৎ, সাত্ত্বিকান্ এব
অনুতিষ্ঠেৎ” ইতি এবং অর্থম্ । আহ —
আহারস্ত্বপি সর্বস্য ত্রিবিধো ভবতি প্রিয়ঃ ।
যজ্ঞস্তপস্তথা দানং তেষাং ভেদমিমং শৃণু ॥ ১৭-৭॥
আহারঃ তু অপি সর্বস্য ভোক্তুঃ প্রাণিনঃ ত্রি-বিধঃ ভবতি প্রিয়ঃ ইষ্টঃ,
তথা যজ্ঞঃ, তথা তপঃ, তথা দানম্ । তেষাং আহার-আদীনাং ভেদং ইমং
বক্ষ্যমাণং শৃণু ॥
আয়ুঃসত্ত্ববলারোগ্য-সুখপ্রীতিবিবর্ধনাঃ ।
রস্যাঃ স্নিগ্ধাঃ স্থিরা হৃদ্যাঃ আহারাঃ সাত্ত্বিকপ্রিয়াঃ ॥ ১৭-৮॥
আয়ুঃ চ সত্ত্বং চ বলং চ আরোগ্যং চ সুখং চ প্রীতিঃ
চ আয়ুঃ-সত্ত্ব-বল-আরোগ্য-সুখ-প্রীতয়ঃ তাসাং বিবর্ধনাঃ
আয়ুঃ-সত্ত্ব-বল-আরোগ্য-সুখ-প্রীতিবি-বর্ধনাঃ, তে চ রস্যাঃ
রস-উপেতাঃ, স্নিগ্ধাঃ স্নেহবন্তঃ, স্থিরাঃ চির-কাল-স্থায়িনঃ দেহে,
হৃদ্যাঃ হৃদয়-প্রিয়াঃ আহারাঃ সাত্ত্বিক-প্রিয়াঃ সাত্ত্বিকস্য ইষ্টাঃ ॥
কট্বম্ললবণাত্যুষ্ণ-তীক্ষ্ণরূক্ষবিদাহিনঃ ।
আহারা রাজসস্যেষ্টাঃ দুঃখশোকাময়প্রদাঃ ॥ ১৭-৯॥
কটু-অম্ল-লবণ-অতি-উষ্ণ-তীক্ষ্ণ-রূক্ষ-বিদাহিনঃ ইতি অত্র
অতি-শব্দঃ কটু-আদিষু সর্বত্র যোজ্যঃ, অতি-কটুঃ অতি-তীক্ষ্ণঃ ইতি এবম্ ।
কটুঃ চ অম্লঃ চ লবণঃ চ অতি-উষ্ণঃ চ তীক্ষ্ণঃ চ রূক্ষঃ চ
বিদাহী চ তে আহারাঃ রাজসস্য ইষ্টাঃ, দুঃখ-শোক-আময়-প্রদাঃ দুঃখং
চ শোকং চ আময়ং চ প্রয়চ্ছন্তি ইতি দুঃখ-শোক-আময়-প্রদাঃ ॥
যাতয়ামং গতরসং পূতি পর্যুষিতং চ যৎ ।
উচ্ছিষ্টমপি চামেধ্যং ভোজনং তামসপ্রিয়ম্ ॥ ১৭-১০॥
যাত-যামং মন্দ-পক্বম্, নির্বীর্যস্য গত-রস-শব্দেন উক্তৎবাৎ ।
গত-রসং রস-বিয়ুক্তম্, পূতি দুর্গন্ধি, পর্যুষিতং চ পক্বং সৎ
রাত্রি-অন্তরিতং চ যৎ, উচ্ছিষ্টং অপি ভুক্ত-শিষ্টং উচ্ছিষ্টম্,
অমেধ্যং অয়জ্ঞ-অর্হম্, ভোজনং ঈদৃশং তামস-প্রিয়ম্ ॥ অথ ইদানীং
যজ্ঞঃ ত্রি-বিধঃ উচ্যতে —
অফলাকাঙ্ক্ষিভির্যজ্ঞঃ বিধিদৃষ্টো য ইজ্যতে ।
যষ্টব্যমেবেতি মনঃ সমাধায় স সাত্ত্বিকঃ ॥ ১৭-১১॥
অফল-আকাঙ্ক্ষিভিঃ অফল-অর্থিভিঃ যজ্ঞঃ বিধি-দৃষ্টঃ
শাস্ত্র-চোদনা-দৃষ্টঃ যঃ যজ্ঞঃ ইজ্যতে নির্বর্ত্যতে, যষ্টব্যং এব
ইতি যজ্ঞ-স্বরূপ-নির্বর্তনং এব কার্যং ইতি মনঃ সমাধায়, ন অনেন
পুরুষার্থঃ মম কর্তব্যঃ ইতি এবং নিশ্চিত্য, সঃ সাত্ত্বিকঃ যজ্ঞঃ
উচ্যতে ॥
অভিসন্ধায় তু ফলং দম্ভার্থমপি চৈব যৎ ।
ইজ্যতে ভরতশ্রেষ্ঠ তং যজ্ঞং বিদ্ধি রাজসম্ ॥ ১৭-১২॥
অভিসন্ধায় তু উদ্দিশ্য ফলং দম্ভ-অর্থং অপি চ এব যৎ ইজ্যতে
ভরত-শ্রেষ্ঠ তং যজ্ঞং বিদ্ধি রাজসম্ ॥
বিধিহীনমসৃষ্টান্নং মন্ত্রহীনমদক্ষিণম্ ।
শ্রদ্ধাবিরহিতং যজ্ঞং তামসং পরিচক্ষতে ॥ ১৭-১৩॥
বিধি-হীনং যথা-চোদিত-বিপরীতম্, অসৃষ্ট-অন্নং ব্রাহ্মণেভ্যঃ
ন সৃষ্টং ন দত্তং অন্নং যস্মিন্ যজ্ঞে সঃ অসৃষ্ট-অন্নঃ তম্
অসৃষ্ট-অন্নম্, মন্ত্র-হীনং মন্ত্রতঃ স্বরতঃ বর্ণতঃ বা বিয়ুক্তং
মন্ত্র-হীনম্, অদক্ষিণং উক্ত-দক্ষিণা-রহিতম্, শ্রদ্ধা-বিরহিতং
যজ্ঞং তামসং পরিচক্ষতে তমো-নির্বৃত্তং কথয়ন্তি ॥ অথ ইদানীং
তপঃ ত্রি-বিধং উচ্যতে —
দেবদ্বিজগুরুপ্রাজ্ঞ-পূজনং শৌচমার্জবম্ ।
ব্রহ্মচর্যমহিংসা চ শারীরং তপ উচ্যতে ॥ ১৭-১৪॥
দেবাঃ চ দ্বিজাঃ চ গুরবঃ চ প্রাজ্ঞাঃ চ দেব-দ্বিজ-গুরু-প্রাজ্ঞাঃ
তেষাং পূজনং দেব-দ্বিজ-গুরু-প্রাজ্ঞ-পূজনম্, শৌচম্, আর্জবম্
ঋজুৎবম্, ব্রহ্মচর্যং অহিংসা চ শরীর-নির্বর্ত্যং শারীরং
শরীর-প্রধানৈঃ সর্বৈঃ এব কার্য-করণৈঃ কর্তৃ-আদিভিঃ সাধ্যং
শারীরং তপঃ উচ্যতে ।“পঞ্চ এতে তস্য হেতবঃ” (ভ. গী. ১৮-১৫)
ইতি হি বক্ষ্যতি ॥
অনুদ্বেগকরং বাক্যং সত্যং প্রিয়হিতং চ যৎ ।
স্বাধ্যায়াভ্যসনং চৈব বাঙ্ময়ং তপ উচ্যতে ॥ ১৭-১৫॥
অনুদ্বেগ-করং প্রাণিনাং অদুঃখ-করং বাক্যং সত্যং প্রিয়-হিতং চ
যৎ প্রিয়-হিতে দৃষ্ট-অদৃষ্ট-অর্থে । অনুদ্বেগকরৎব-আদিভিঃ
ধর্মৈঃ বাক্যং বিশেষ্যতে । বিশেষণ-ধর্ম-সমুচ্চয়-অর্থঃ
চ–শব্দঃ । পর-প্রত্যয-অর্থং প্রয়ুক্তস্য বাক্যস্য
সত্য-প্রিয়-হিত-অনুদ্বেগকরৎবানাং অন্য-তমেন দ্বাভ্যাং ত্রিভিঃ বা
হীনতা স্যাৎ যদি, ন তৎ-বাঙ্ময়ং তপঃ । তথা সত্য-বাক্যস্য ইতরেষাম্
অন্যতমেন দ্বাভ্যাং ত্রিভিঃ বা বিহীনতায়াং ন বাঙ্-ময়-তপস্ত্বম্ । তথা
প্রিয়-বাক্যস্য অপি ইতরেষাং অন্যতমেন দ্বাভ্যাং ত্রিভিঃ বা বিহীনস্য ন
বাঙ্-ময়-তপস্ত্বম্ । তথা হিত-বাক্যস্য অপি ইতরেষাং অন্যতমেন দ্বাভ্যাং
ত্রিভিঃ বা বিহীনস্য ন বাঙ্-ময়-তপস্ত্বম্ । কিং পুনঃ তৎ তপঃ? যৎ
সত্যং বাক্যং অনুদ্বেগকরং প্রিয়ং হিতং চ, তৎ তপঃ বাঙ্-ময়ম্; যথা
“শান্তঃ ভব বৎস, স্বাধ্যায়ং যোগং চ অনুতিষ্ঠ, তথা তে শ্রেয়ঃ
ভবিষ্যতি” ইতি । স্বাধ্যায়-অভ্যসনং চ এব যথা-বিধি বাঙ্-ময়ং
তপঃ উচ্যতে ॥
মনঃপ্রসাদঃ সৌম্যৎবং মৌনমাত্মবিনিগ্রহঃ ।
ভাবসংশুদ্ধিরিত্যেতৎ তপো মানসমুচ্যতে ॥ ১৭-১৬॥
মনঃ-প্রসাদঃ মনসঃ প্রশান্তিঃ, স্বচ্ছতা-আপাদনং প্রসাদঃ,
সৌম্যৎবং যৎ সৌমনস্যং আহুঃ — মুখ-আদি-প্রসাদ-আদি-কার্য-উন্নেয়া
অন্তঃকরণস্য বৃত্তিঃ । মৌনং বাঙ্-নিয়মঃ অপি মনঃ-সংয়ম-পূর্বকঃ
ভবতি ইতি কার্যেণ কারণং উচ্যতে মনঃ-সংয়মঃ মৌনং ইতি ।
আত্ম-বিনিগ্রহঃ মনো-নিরোধঃ সর্বতঃ সামান্য-রূপঃ আত্ম-বিনিগ্রহঃ,
বাগ্-বিষয়স্য এইব মনসঃ সংয়মঃ মৌনং ইতি বিশেষঃ । ভাব-সংশুদ্ধিঃ
পরৈঃ ব্যবহার-কালে অমায়াবিৎবং ভাব-সংশুদ্ধিঃ । ইতি এতৎ তপঃ
মানসং উচ্যতে ॥ যথোক্তং কায়িকং বাচিকং মানসং চ তপঃ তপ্তং নরৈঃ
সত্ত্ব-আদি-গুণ-ভেদেন কথং ত্রি-বিধং ভবতি ইতি, উচ্যতে —
শ্রদ্ধয়া পরয়া তপ্তং তপস্তত্ত্রিবিধং নরৈঃ ।
অফলকাঙ্ক্ষিভির্যুক্তৈঃ সাত্ত্বিকং পরিচক্ষতে ॥ ১৭-১৭॥
শ্রদ্ধয়া আস্তিক্য-বুদ্ধ্যা পরয়া প্রকৃষ্টয়া তপ্তং অনুষ্ঠিতং তপঃ তৎ
প্রকৃতং ত্রি-বিধং ত্রি-প্রকারং ত্রি-অধিষ্ঠানং নরৈঃ অনুষ্ঠাতৃভিঃ
অফল-আকাঙ্ক্ষিভিঃ ফল-আকাঙ্ক্ষা-রহিতৈঃ যুক্তৈঃ সমাহিতৈঃ — যৎ
ঈদৃশং তপঃ, তৎ সাত্ত্বিকং সত্ত্ব-নির্বৃত্তং পরিচক্ষতে কথয়ন্তি
শিষ্টাঃ ॥
সৎকারমানপূজার্থং তপো দম্ভেন চৈব যৎ ।
ক্রিয়তে তদিহ প্রোক্তং রাজসং চলমধ্রুবম্ ॥ ১৭-১৮॥
সৎ-কারঃ সাধু-কারঃ “সাধুঃ অয়ং তপস্বী ব্রাহ্মণঃ” ইতি
এবম্-অর্থম্, মানঃ মাননং প্রত্যুত্থান-অভিবাদন-আদিঃ তৎ-অর্থম্,
পূজা পাদ-প্রক্ষালন-অর্চনা-শয়িতৃৎব-আদিঃ তৎ-অর্থং চ তপঃ
সৎ-কারমান-পূজা-অর্থম্, দম্ভেন চ এব যৎ ক্রিয়তে তপঃ তৎ ইহ
প্রোক্তং কথিতং রাজসং চলং কাদাচিৎক-ফলৎবেন অধ্রুবম্ ॥
মূঢগ্রাহেণাত্মনো যৎ পীডয়া ক্রিয়তে তপঃ ।
পরস্যোৎসাদনার্থং বা তত্তামসমুদাহৃতম্ ॥ ১৭-১৯॥
মূঢ-গ্রাহেণ অবিবেক-নিশ্চয়েন আত্মনঃ পীডয়া যৎ ক্রিয়তে তপঃ পরস্য
উৎসাদন-অর্থং বিনাশ-অর্থং বা, তৎ তামসং তপঃ উদাহৃতম্ ॥ ইদানীং
দান-ত্রৈ-বিধ্যং উচ্যতে —
দাতব্যমিতি যদ্দানং দীয়তেঽনুপকারিণে ।
দেশে কালে চ পাত্রে চ তদ্দানং সাত্ত্বিকং স্মৃতম্ ॥ ১৭-২০॥
দাতব্যং ইতি এবং মনঃ কৃৎবা যৎ দানং দীয়তে অনুপকারিণে
প্রতি-উপকার-অসমর্থায়, সমর্থায় অপি নিরপেক্ষং দীয়তে, দেশে
পুণ্যে কুরুক্ষেত্র-আদৌ, কালে সঙ্ক্রান্তি-আদৌ, পাত্রে চ ষড্-অঙ্গ-বিৎ
বেদ-পার-গঃ ইত্যাদৌ, তৎ দানং সাত্ত্বিকং স্মৃতম্ ॥
যত্তু প্রত্যুপকারার্থং ফলমুদ্দিশ্য বা পুনঃ ।
দীয়তে চ পরিক্লিষ্টং তদ্দানং রাজসং স্মৃতম্ ॥ ১৭-২১॥
যৎ তু দানং প্রতি-উপকার-অর্থং কালে তু অয়ং মাং প্রতি-উপকরিষ্যতি ইতি
এবং অর্থম্, ফলং বা অস্য দানস্য মে ভবিষ্যতি অদৃষ্টং ইতি, তৎ উদ্দিশ্য
পুনঃ দীয়তে চ পরিক্লিষ্টং খেদ-সংয়ুক্তম্, তৎ দানং রাজসং স্মৃতম্ ॥
অদেশকালে যদ্দানং অপাত্রেভ্যশ্চ দীয়তে ।
অসৎকৃতমবজ্ঞাতং তত্তামসমুদাহৃতম্ ॥ ১৭-২২॥
অদেশ-কালে অদেশে অপুণ্য-দেশে ম্লেচ্ছ-অশুচি-আদি-সঙ্কীর্ণে অকালে
পুণ্য-হেতুৎবেন অপ্রখ্যাতে সঙ্ক্রান্তি-আদি-বিশেষ-রহিতে অপাত্রেভ্যঃ
চ মূর্খ-তস্কর-আদিভ্যঃ, দেশ-আদি-সম্পত্তৌ বা অসৎকৃতং
প্রিয়-বচন-পাদ-প্রক্ষালন-পূজা-আদি-রহিতং অবজ্ঞাতং
পাত্র-পরিভব-যুক্তং চ যৎ দানম্, তৎ তামসং উদাহৃতম্ ॥
যজ্ঞ-দান-তপঃ-প্রভৃতীনাং সাৎ-গুণ্য-করণায় অয়ং উপদেশঃ
উচ্যতে —
ওং তৎসদিতি নির্দেশঃ ব্রহ্মণস্ত্রিবিধঃ স্মৃতঃ ।
ব্রাহ্মণাস্তেন বেদাশ্চ যজ্ঞাশ্চ বিহিতাঃ পুরা ॥ ১৭-২৩॥
ওং তৎ সৎ ইতি এবং নির্দেশঃ, নির্দিশ্যতে অনেন ইতি নির্দেশঃ, ত্রি-বিধো
নাম-নির্দেশঃ ব্রহ্মণঃ স্মৃতঃ চিন্তিতঃ বেদান্তেষু ব্রহ্ম-বিদ্ভিঃ ।
ব্রাহ্মণাঃ তেন নির্দেশেন ত্রি-বিধেন বেদাঃ চ যজ্ঞাঃ চ বিহিতাঃ নির্মিতাঃ
পুরা পূর্বং ইতি নির্দেশ-স্তুতি-অর্থং উচ্যতে ॥
তস্মাদোমিত্যুদাহৃত্য যজ্ঞদানতপঃক্রিয়াঃ ।
প্রবর্তন্তে বিধানোক্তাঃ সততং ব্রহ্মবাদিনাম্ ॥ ১৭-২৪॥
তস্মাৎ “ওং ইতি উদাহৃত্য” উচ্চার্য যজ্ঞ-দান-তপঃ-ক্রিয়াঃ
যজ্ঞ-আদি-স্বরূপাঃ ক্রিয়াঃ প্রবর্তন্তে বিধান-উক্তাঃ শাস্ত্র-চোদিতাঃ
সততং সর্বদা ব্রহ্ম-বাদিনাং ব্রহ্ম-বদন-শীলানাম্ ॥
তদিত্যনভিসন্ধায় ফলং যজ্ঞতপঃক্রিয়াঃ ।
দানক্রিয়াশ্চ বিবিধাঃ ক্রিয়ন্তে মোক্ষকাঙ্ক্ষিভিঃ ॥ ১৭-২৫॥
তৎ ইতি অনভিসন্ধায়, “তৎ” ইতি ব্রহ্ম-অভিধানং উচ্চার্য
অনভিসন্ধায় চ যজ্ঞ-আদি-কর্মণঃ ফলং যজ্ঞ-তপঃ-ক্রিয়াঃ
যজ্ঞ-ক্রিয়াঃ চ তপঃ-ক্রিয়াঃ চ যজ্ঞ-তপঃ-ক্রিয়াঃ দান-ক্রিয়াঃ চ
বিবিধাঃ ক্ষেত্র-হিরণ্য-প্রদান-আদি-লক্ষণাঃ ক্রিয়ন্তে নির্বর্ত্যন্তে
মোক্ষ-কাঙ্ক্ষিভিঃ মোক্ষ-অর্থিভিঃ মুমুক্ষুভিঃ ॥ ওং-তৎ-শব্দয়োঃ
বিনিয়োগঃ উক্তঃ । অথ ইদানীং সৎ-শব্দস্য বিনিয়োগঃ কথ্যতে —
সদ্ভাবে সাধুভাবে চ সদিত্যেতৎপ্রয়ুজ্যতে ।
প্রশস্তে কর্মণি তথা সচ্ছব্দঃ পার্থ যুজ্যতে ॥ ১৭-২৬॥
সৎ-ভাবে, অসতঃ সৎ-ভাবে যথা অবিদ্যমানস্য পুত্রস্য জন্মনি, তথা
সাধু-ভাবে চ অসৎ-বৃত্তস্য অসাধোঃ সৎ-বৃত্ততা সাৎধু-ভাবঃ তস্মিন্
সাধু-ভাবে চ সৎ ইতি এতৎ অভিধানং ব্রহ্মণঃ প্রয়ুজ্যতে অভিধীয়তে ।
প্রশস্তে কর্মণি বিবাহ-আদৌ চ তথা সৎ শব্দঃ পার্থ, যুজ্যতে প্রয়ুজ্যতে
ইতি এতৎ ॥
যজ্ঞে তপসি দানে চ স্থিতিঃ সদিতি চোচ্যতে ।
কর্ম চৈব তদর্থীয়ং সদিত্যেবাভিধীয়তে ॥ ১৭-২৭॥
যজ্ঞে যজ্ঞ-কর্মণি যা স্থিতিঃ, তপসি চ যা স্থিতিঃ, দানে চ যা
স্থিতিঃ, সা সৎ ইতি চ উচ্যতে বিদ্বদ্ভিঃ । কর্ম চ এব তৎ-অর্থীয়ং
যজ্ঞ-দান-তপো-অর্থীয়ম্; অথবা, যস্য অভিধান-ত্রয়ং প্রকৃতং
তৎ-অর্থীয়ং যজ্ঞ-দান-তপো-অর্থীয়ং ঈশ্বর-অর্থীয়ং ইতি এতৎ;
সৎ ইতি এব অভিধীয়তে । তৎ এতৎ যজ্ঞ-দান-তপ-আদি কর্ম অসাত্ত্বিকং
বিগুণং অপি শ্রদ্ধা-পূর্বকং ব্রহ্মণঃ অভিধান-ত্রয়-প্রয়োগেণ সগুণং
সাত্ত্বিকং সম্পাদিতং ভবতি ॥ তত্র চ সর্বত্র শ্রদ্ধা-প্রধানতয়া
সর্বং সম্পাদ্যতে যস্মাৎ, তস্মাৎ —
অশ্রদ্ধয়া হুতং দত্তং তপস্তপ্তং কৃতং চ যৎ ।
অসদিত্যুচ্যতে পার্থ ন চ তৎপ্রেত্য নো ইহ ॥ ১৭-২৮॥
অশ্রদ্ধয়া হুতং হবনং কৃতম্, অশ্রদ্ধয়া দত্তং ব্রাহ্মণেভ্যঃ,
অশ্রদ্ধয়া তপঃ তপ্তং অনুষ্ঠিতম্, তথা অশ্রদ্ধয়া এব
কৃতং যৎ স্তুতি-নমস্কার-আদি, তৎ সর্বং অসৎ ইতি উচ্যতে,
মৎ-প্রাপ্তি-সাধন-মার্গ-বাহ্যৎবাৎ পার্থ । ন চ তৎ বহুল-আয়াসম্
অপি প্রেত্য ফলায় ন উ অপি ইহ-অর্থম্, সাধুভিঃ নিন্দিতৎবাৎ ইতি ॥
ওঁ তৎসদিতি শ্রীমদ্-ভগবদ্গীতাসু উপনিষৎসু ব্রহ্ম-বিদ্যায়াং
যোগ-শাস্ত্রে শ্রী-কৃষ্ণ-অর্জুন-সংবাদে শ্রদ্ধা-ত্রয়-বিভাগ-যোগঃ
নাম সপ্তদশোঽধ্যায়ঃ ॥১৭॥
ইতি
শ্রীমদ্-পরমহংস-পরিব্রাজক-আচার্য-পূজ্যপাদ-শ্রীশঙ্কর-ভগবতা
কৃতৌ শ্রীমদ্-ভগবদ্গীতা-ভাষ্যে শ্রদ্ধা-ত্রয়-বিভাগ-যোগঃ নাম
সপ্তদশোঽধ্যায়ঃ ॥
॥ শ্রীমদ্-ভগবদ্গীতা শাঙ্কর-ভাষ্যম্ ॥ ॥ অষ্টাদশোঽধ্যায়ঃ ॥
সর্বস্যৈব গীতাশাস্ত্রস্য অর্থঃ অস্মিন্ অধ্যায়ে উপসংহৃত্য সর্বশ্চ
বেদার্থো বক্তব্যঃ ইত্যেবমর্থঃ অয়ং অধ্যায়ঃ আরভ্যতে । সর্বেষু হি
অতীতেষু অধ্যায়েষু উক্তঃ অর্থঃ অস্মিন্ অধ্যায়ে অবগম্যতে । অর্জুনস্তু
সংন্যাসত্যাগশব্দার্থয়োরেব বিশেষবুভুৎসুঃ উবাচ –
অর্জুন উবাচ –
সংন্যাসস্য মহাবাহো তত্ত্বমিচ্ছামি বেদিতুম্ ।
ত্যাগস্য চ হৃষীকেশ পৃথক্কেশিনিষূদন ॥ ১৮-১॥
সংন্যাসস্য সংন্যাসশব্দার্থস্য ইত্যেতৎ, হে মহাবাহো, তত্ত্বং তস্য
ভাবঃ তত্ত্বম্, যাথাত্ম্যমিত্যেতৎ, ইচ্ছামি বেদিতুং জ্ঞাতুম্, ত্যাগস্য
চ ত্যাগশব্দার্থস্যেত্যেতৎ, হৃষীকেশ, পৃথক্ ইতরেতরবিভাগতঃ
কেশিনিষূদন কেশিনামা হয়চ্ছদ্মা কশ্চিৎ অসুরঃ তং নিষূদিতবান্
ভগবান্ বাসুদেবঃ, তেন তন্নাম্না সংবোধ্যতে অর্জুনেন ॥
সংন্যাসত্যাগশব্দৌ তত্র তত্র নির্দিষ্টৌ, ন নির্লুঠিতার্থৌ পূর্বেষু
অধ্যায়েষু । অতঃ অর্জুনায় পৃষ্টবতে তন্নির্ণয়ায় ভগবান্ উবাচ –
শ্রীভগবানুবাচ –
কাম্যানাং কর্মণাং ন্যাসং সংন্যাসং কবয়ো বিদুঃ ।
সর্বকর্মফলত্যাগং প্রাহুস্ত্যাগং বিচক্ষণাঃ ॥ ১৮-২॥
কাম্যানাং অশ্বমেধাদীনাং কর্মণাং ন্যাসং সংন্যাসশব্দার্থম্,
অনুষ্ঠেয়ৎবেন প্রাপ্তস্য অনুষ্ঠানম্, কবয়ঃ পণ্ডিতাঃ কেচিৎ
বিদুঃ বিজানন্তি । নিত্যনৈমিত্তিকানাং অনুষ্ঠীয়মানানাং সর্বকর্মণাম্
আত্মসংবন্ধিতয়া প্রাপ্তস্য ফলস্য পরিত্যাগঃ সর্বকর্মফলত্যাগঃ
তং প্রাহুঃ কথয়ন্তি ত্যাগং ত্যাগশব্দার্থং বিচক্ষণাঃ পণ্ডিতাঃ ।
যদি কাম্যকর্মপরিত্যাগঃ ফলপরিত্যাগো বা অর্থঃ বক্তব্যঃ,
সর্বথা পরিত্যাগমাত্রং সংন্যাসত্যাগশব্দয়োঃ একঃ অর্থঃ স্যাৎ, ন
ঘটপটশব্দাবিব জাত্যন্তরভূতার্থৌ ॥
ননু নিত্যনৈমিত্তিকানাং কর্মণাং ফলমেব নাস্তি ইতি আহুঃ । কথম্
উচ্যতে তেষাং ফলত্যাগঃ, যথা বন্ধ্যায়াঃ পুত্রত্যাগঃ? নৈষ
দোষঃ, নিত্যানামপি কর্মণাং ভগবতা ফলবত্ত্বস্য ইষ্টৎবাৎ ।
বক্ষ্যতি হি ভগবান্ “অনিষ্টমিষ্টং মিশ্রং চ”
(ভ. গী. ১৮-১২) ইতি “ন তু সংন্যাসিনাম্” (ভ. গী. ১৮-১২)
ইতি চ । সংন্যাসিনামেব হি কেবলং কর্মফলাসংবন্ধং দর্শয়ন্
অসংন্যাসিনাং নিত্যকর্মফলপ্রাপ্তিং “ভবত্যত্যাগিনাং প্রেত্য”
(ভ. গী. ১৮-১২) ইতি দর্শয়তি ॥
ত্যাজ্যং দোষবদিত্যেকে কর্ম প্রাহুর্মনীষিণঃ ।
যজ্ঞদানতপঃকর্ম ন ত্যাজ্যমিতি চাপরে ॥ ১৮-৩॥
ত্যাজ্যং ত্যক্তব্যং দোষবৎ দোষঃ অস্য অস্তীতি দোষবৎ । কিং তৎ? কর্ম
বন্ধহেতুৎবাৎ সর্বমেব । অথবা, দোষঃ যথা রাগাদিঃ ত্যজ্যতে, তথা
ত্যাজ্যং ইতি একে কর্ম প্রাহুঃ মনীষিণঃ পণ্ডিতাঃ সাংখ্যাদিদৃষ্টিম্
আশ্রিতাঃ, অধিকৃতানাং কর্মিণামপি ইতি । তত্রৈব যজ্ঞদানতপঃকর্ম
ন ত্যাজ্যং ইতি চ অপরে ॥
কর্মিণঃ এব অধিকৃতাঃ, তান্ অপেক্ষ্য এতে বিকল্পাঃ, ন তু জ্ঞাননিষ্ঠান্
ব্যুত্থায়িনঃ সংন্যাসিনঃ অপেক্ষ্য ।“জ্ঞানয়োগেন সাংখ্যানাং
নিষ্ঠা ময়া পুরা প্রোক্তা” (ভ. গী. ৩-৩) ইতি কর্মাধিকারাৎ
অপোদ্ধৃতাঃ যে, ন তান্ প্রতি চিন্তা ॥
ননু “কর্ময়োগেন যোগিনাম্” (ভ. গী. ৩-৩) ইতি অধিকৃতাঃ
পূর্বং বিভক্তনিষ্ঠাঃ অপি ইহ সর্বশাস্ত্রার্থোপসংহারপ্রকরণে যথা
বিচার্যন্তে, তথা সাংখ্যা অপি জ্ঞাননিষ্ঠাঃ বিচার্যন্তাং ইতি ।
ন, তেষাং মোহদুঃখনিমিত্তত্যাগানুপপত্তেঃ । ন কায়ক্লেশনিমিত্তং
দুঃখং সাংখ্যাঃ আত্মনি পশ্যন্তি, ইচ্ছাদীনাং ক্ষেত্রধর্মৎবেনৈব
দর্শিতৎবাৎ । অতঃ তে ন কায়ক্লেশদুঃখভয়াৎ কর্ম পরিত্যজন্তি ।
নাপি তে কর্মাণি আত্মনি পশ্যন্তি, যেন নিয়তং কর্ম মোহাৎ পরিত্যজেয়ুঃ ।
গুণানাং কর্ম “নৈব কিংচিৎকরোমি” (ভ. গী. ৫-৮)
ইতি হি তে সংন্যস্যন্তি । “সর্বকর্মাণি মনসা সংন্যস্য”
(ভ. গী. ৫-১৩) ইত্যাদিভিঃ তত্ত্ববিদঃ সংন্যাসপ্রকারঃ উক্তঃ । তস্মাৎ
যে অন্যে অধিকৃতাঃ কর্মণি অনাত্মবিদঃ, যেষাং চ মোহনিমিত্তঃ ত্যাগঃ
সংভবতি কায়ক্লেশভয়াচ্চ, তে এব তামসাঃ ত্যাগিনঃ রাজসাশ্চ
ইতি নিন্দ্যন্তে কর্মিণাং অনাত্মজ্ঞানাং কর্মফলত্যাগস্তুত্যর্থম্;
“সর্বারম্ভপরিত্যাগী” (ভ. গী. ১২-১৬) “মৌনী সংতুষ্টো
যেন কেনচিৎ । অনিকেতঃ স্থিরমতিঃ” (ভ. গী. ১২-১৯) ইতি
গুণাতীতলক্ষণে চ পরমার্থসংন্যাসিনঃ বিশেষিতৎবাৎ । বক্ষ্যতি
চ “নিষ্ঠা জ্ঞানস্য যা পরা” (ভ. গী. ১৮-৫৮) ইতি । তস্মাৎ
জ্ঞাননিষ্ঠাঃ সংন্যাসিনঃ ন ইহ বিবক্ষিতাঃ । কর্মফলত্যাগঃ এব
সাত্ত্বিকৎবেন গুণেন তামসৎবাদ্যপেক্ষয়া সংন্যাসঃ উচ্যতে, ন মুখ্যঃ
সর্বকর্মসংন্যাসঃ ॥
সর্বকর্মসংন্যাসাসংভবে চ “ন হি দেহভৃতা”
(ভ. গী. ১৮-১১) ইতি হেতুবচনাৎ মুখ্য এব ইতি চেৎ, ন; হেতুবচনস্য
স্তুত্যর্থৎবাৎ । যথা “ত্যাগাচ্ছান্তিরনন্তরম্”
(ভ. গী. ১২-১২) ইতি কর্মফলত্যাগস্তুতিরেব
যথোক্তানেকপক্ষানুষ্ঠানাশক্তিমন্তং অর্জুনং অজ্ঞং প্রতি বিধানাৎ;
তথা ইদমপি “ন হি দেহভৃতা শক্যম্” (ভ. গী. ১৮-১১)
ইতি কর্মফলত্যাগস্তুত্যর্থম্; ন “সর্বকর্মাণি মনসা সংন্যস্য
নৈব কুর্বন্ন কারয়ন্নাস্তে” (ভ. গী. ৫-১৩)ইত্যস্য পক্ষস্য
অপবাদঃ কেনচিৎ দর্শয়িতুং শক্যঃ । তস্মাৎ কর্মণি অধিকৃতান্
প্রত্যেব এষঃ সংন্যাসত্যাগবিকল্পঃ । যে তু পরমার্থদর্শিনঃ
সাংখ্যাঃ, তেষাং জ্ঞাননিষ্ঠায়ামেব সর্বকর্মসংন্যাসলক্ষণায়াম্
অধিকারঃ, ন অন্যত্র, ইতি ন তে বিকল্পার্হাঃ । তচ্চ উপপাদিতম্
অস্মাভিঃ “বেদাবিনাশিনম্” (ভ. গী. ২-২১) ইত্যস্মিন্প্রদেশে,
তৃতীয়াদৌ চ ॥
তত্র এতেষু বিকল্পভেদেষু –
নিশ্চয়ং শৃণু মে তত্র ত্যাগে ভরতসত্তম ।
ত্যাগো হি পুরুষব্যাঘ্র ত্রিবিধঃ সংপ্রকীর্তিতঃ ॥ ১৮-৪॥
নিশ্চয়ং শৃণু অবধারয় মে মম বচনাৎ; তত্র ত্যাগে
ত্যাগসংন্যাসবিকল্পে যথাদর্শিতে ভরতসত্তম ভরতানাং সাধুতম ।
ত্যাগো হি, ত্যাগসংন্যাসশব্দবাচ্যো হি যঃ অর্থঃ সঃ এক এবেতি
অভিপ্রেত্য আহ – ত্যাগো হি ইতি । পুরুষব্যাঘ্র, ত্রিবিধঃ ত্রিপ্রকারঃ
তামসাদিপ্রকারৈঃ সংপ্রকীর্তিতঃ শাস্ত্রেষু সম্যক্ কথিতঃ যস্মাৎ
তামসাদিভেদেন ত্যাগসংন্যাসশব্দবাচ্যঃ অর্থঃ অধিকৃতস্য
কর্মিণঃ অনাত্মজ্ঞস্য ত্রিবিধঃ সংভবতি, ন পরমার্থদর্শিনঃ,
ইত্যযমর্থঃ দুর্জ্ঞানঃ, তস্মাৎ অত্র তত্ত্বং ন অন্যঃ বক্তুং সমর্থঃ ।
তস্মাৎ নিশ্চয়ং পরমার্থশাস্ত্রার্থবিষয়ং অধ্যবসায়ং ঐশ্বরং
মে মত্তঃ শৃণু ॥
কঃ পুনঃ অসৌ নিশ্চয়ঃ ইতি, আহ –
যজ্ঞদানতপঃকর্ম ন ত্যাজ্যং কার্যমেব তৎ ।
যজ্ঞো দানং তপশ্চৈব পাবনানি মনীষিণাম্ ॥ ১৮-৫॥
যজ্ঞঃ দানং তপঃ ইত্যেতৎ ত্রিবিধং কর্ম ন ত্যাজ্যং ন ত্যক্তব্যম্,
কার্যং করণীয়ং এব তৎ । কস্মাৎ? যজ্ঞঃ দানং তপশ্চৈব পাবনানি
বিশুদ্ধিকরাণি মনীষিণাং ফলানভিসংধীনাং ইত্যেতৎ ॥
এতান্যপি তু কর্মাণি সঙ্গং ত্যক্ত্বা ফলানি চ ।
কর্তব্যানীতি মে পার্থ নিশ্চিতং মতমুত্তমম্ ॥ ১৮-৬॥
এতান্যপি তু কর্মাণি যজ্ঞদানতপাংসি পাবনানি উক্তানি সঙ্গং আসক্তিং
তেষু ত্যক্ত্বা ফলানি চ তেষাং পরিত্যজ্য কর্তব্যানি ইতি অনুষ্ঠেয়ানি
ইতি মে মম নিশ্চিতং মতং উত্তমম্ ॥
“নিশ্চয়ং শৃণু মে তত্র” (ভ. গী. ১৮-৪) ইতি
প্রতিজ্ঞায়, পাবনৎবং চ হেতুং উক্ত্বা, “এতান্যপি কর্মাণি
কর্তব্যানি” ইত্যেতৎ “নিশ্চিতং মতমুত্তমম্”
ইতি প্রতিজ্ঞাতার্থোপসংহার এব, ন অপূর্বার্থং বচনম্,
“এতান্যপি” ইতি প্রকৃতসংনিকৃষ্টার্থৎবোপপত্তেঃ ।
সাসঙ্গস্য ফলার্থিনঃ বন্ধহেতবঃ এতান্যপি কর্মাণি মুমুক্ষোঃ
কর্তব্যানি ইতি অপিশব্দস্য অর্থঃ । ন তু অন্যানি কর্মাণি অপেক্ষ্য
“এতান্যপি” ইতি উচ্যতে ॥
অন্যে তু বর্ণয়ন্তি – নিত্যানাং কর্মণাং ফলাভাবাৎ “সঙ্গং
ত্যক্ত্বা ফলানি চ” ইতি ন উপপদ্যতে । অতঃ “এতান্যপি”
ইতি যানি কাম্যানি কর্মণি নিত্যেভ্যঃ অন্যানি, এতানি অপি কর্তব্যানি,
কিমুত যজ্ঞদানতপাংসি নিত্যানি ইতি । তৎ অসৎ, নিত্যানামপি কর্মণাম্
ইহ ফলবত্ত্বস্য উপপাদিতৎবাৎ “যজ্ঞো দানং তপশ্চৈব
পাবনানি” (ভ. গী. ১৮-৫)ইত্যাদিনা বচনেন । নিত্যান্যপি
কর্মাণি বন্ধহেতুৎবাশঙ্কয়া জিহাসোঃ মুমুক্ষোঃ কুতঃ কাম্যেষু
প্রসঙ্গঃ? “দূরেণ হ্যবরং কর্ম” (ভ. গী. ২-৪৯)
ইতি চ নিন্দিতৎবাৎ, “যজ্ঞার্থাৎ কর্মণোঽন্যত্র”
(ভ. গী. ৩-৯) ইতি চ কাম্যকর্মণাং বন্ধহেতুৎবস্য নিশ্চিতৎবাৎ,
“ত্রৈগুণ্যবিষয়া বেদাঃ” (ভ. গী. ২-৪৫) “ত্রৈবিদ্যা
মাং সোমপাঃ” (ভ. গী. ৯-২০) “ক্ষীণে পুণ্যে মর্ত্যলোকং
বিশন্তি” (ভ. গী. ৯-২১) ইতি চ, দূরব্যবহিতৎবাচ্চ, ন
কাম্যেষু “এতান্যপি” ইতি ব্যপদেশঃ ॥
তস্মাৎ অজ্ঞস্য অধিকৃতস্য মুমুক্ষোঃ –
নিয়তস্য তু সংন্যাসঃ কর্মণো নোপপদ্যতে ।
মোহাত্তস্য পরিত্যাগস্তামসঃ পরিকীর্তিতঃ ॥ ১৮-৭॥
নিয়তস্য তু নিত্যস্য সংন্যাসঃ পরিত্যাগঃ কর্মণঃ ন উপপদ্যতে,
অজ্ঞস্য পাবনৎবস্য ইষ্টৎবাৎ । মোহাৎ অজ্ঞানাৎ তস্য নিয়তস্য
পরিত্যাগঃ – নিয়তং চ অবশ্যং কর্তব্যম্, ত্যজ্যতে চ, ইতি
বিপ্রতিষিদ্ধম্; অতঃ মোহনিমিত্তঃ পরিত্যাগঃ তামসঃ পরিকীর্তিতঃ
মোহশ্চ তমঃ ইতি ॥
দুঃখমিত্যেব যৎকর্ম কায়ক্লেশভয়াত্ত্যজেৎ ।
স কৃৎবা রাজসং ত্যাগং নৈব ত্যাগফলং লভেৎ ॥ ১৮-৮॥
দুঃখং ইতি এব যৎ কর্ম কায়ক্লেশভয়াৎ শরীরদুঃখভয়াৎ ত্যজেৎ, সঃ
কৃৎবা রাজসং রজোনির্বর্ত্যং ত্যাগং নৈব ত্যাগফলং জ্ঞানপূর্বকস্য
সর্বকর্মত্যাগস্য ফলং মোক্ষাখ্যং ন লভেৎ নৈব লভেত ॥
কঃ পুনঃ সাত্ত্বিকঃ ত্যাগঃ ইতি, আহ –
কার্যমিত্যেব যৎকর্ম নিয়তং ক্রিয়তেঽর্জুন ।
সঙ্গং ত্যক্ত্বা ফলং চৈব স ত্যাগঃ সাত্ত্বিকো মতঃ ॥ ১৮-৯॥
কার্যং কর্তব্যং ইত্যেব যৎ কর্ম নিয়তং নিত্যং ক্রিয়তে নির্বর্ত্যতে
হে অর্জুন, সঙ্গং ত্যক্ত্বা ফলং চ এব । এতৎ নিত্যানাং কর্মণাং
ফলবত্ত্বে ভগবদ্বচনং প্রমাণং অবোচাম । অথবা, যদ্যপি ফলং
ন শ্রূয়তে নিত্যস্য কর্মণঃ, তথাপি নিত্যং কর্ম কৃতং আত্মসংস্কারং
প্রত্যবায়পরিহারং বা ফলং করোতি আত্মনঃ ইতি কল্পয়ত্যেব অজ্ঞঃ ।
তত্র তামপি কল্পনাং নিবারয়তি “ফলং ত্যক্ত্বা” ইত্যনেন ।
অতঃ সাধু উক্তং “সঙ্গং ত্যক্ত্বা ফলং চ” ইতি । সঃ ত্যাগঃ
নিত্যকর্মসু সঙ্গফলপরিত্যাগঃ সাত্ত্বিকঃ সত্ত্বনির্বৃত্তঃ মতঃ
অভিপ্রেতঃ ॥
ননু কর্মপরিত্যাগঃ ত্রিবিধঃ সংন্যাসঃ ইতি চ প্রকৃতঃ । তত্র তামসো
রাজসশ্চ উক্তঃ ত্যাগঃ । কথং ইহ সঙ্গফলত্যাগঃ তৃতীয়ৎবেন
উচ্যতে? যথা ত্রয়ো ব্রাহ্মণাঃ আগতাঃ, তত্র ষডঙ্গবিদৌ দ্বৌ,
ক্ষত্রিয়ঃ তৃতীয়ঃ ইতি তদ্বৎ । নৈষ দোষঃ ত্যাগসামান্যেন
স্তুত্যর্থৎবাৎ । অস্তি হি কর্মসংন্যাসস্য ফলাভিসংধিত্যাগস্য
চ ত্যাগৎবসামান্যম্ । তত্র রাজসতামসৎবেন কর্মত্যাগনিন্দয়া
কর্মফলাভিসংধিত্যাগঃ সাত্ত্বিকৎবেন স্তূয়তে “স ত্যাগঃ সাত্ত্বিকো
মতঃ” ইতি ॥
যস্তু অধিকৃতঃ সঙ্গং ত্যক্ত্বা ফলাভিসংধিং চ নিত্যং কর্ম করোতি,
তস্য ফলরাগাদিনা অকলুষীক্রিয়মাণং অন্তঃকরণং নিত্যৈশ্চ কর্মভিঃ
সংস্ক্রিয়মাণং বিশুধ্যতি । তৎ বিশুদ্ধং প্রসন্নং আত্মালোচনক্ষমং
ভবতি । তস্যৈব নিত্যকর্মানুষ্ঠানেন বিশুদ্ধান্তঃকরণস্য
আত্মজ্ঞানাভিমুখস্য ক্রমেণ যথা তন্নিষ্ঠা স্যাৎ, তৎ বক্তব্যমিতি
আহ –
ন দ্বেষ্ট্যকুশলং কর্ম কুশলে নানুষজ্জতে ।
ত্যাগী সত্ত্বসমাবিষ্টো মেধাবী চ্ছিন্নসংশয়ঃ ॥ ১৮-১০॥
ন দ্বেষ্টি অকুশলং অশোভনং কাম্যং কর্ম, শরীরারম্ভদ্বারেণ
সংসারকারণম্, “কিমনেন?” ইত্যেবম্ । কুশলে শোভনে নিত্যে
কর্মণি সত্ত্বশুদ্ধিজ্ঞানোৎপত্তিতন্নিষ্ঠাহেতুৎবেন “মোক্ষকারণম্
ইদম্” ইত্যেবং ন অনুষজ্জতে অনুষঙ্গং প্রীতিং ন করোতি ইত্যেতৎ ।
কঃ পুনঃ অসৌ? ত্যাগী পূর্বোক্তেন সঙ্গফলত্যাগেন তদ্বান্ ত্যাগী,
যঃ কর্মণি সঙ্গং ত্যক্ত্বা তৎফলং চ নিত্যকর্মানুষ্ঠায়ী
সঃ ত্যাগী । কদা পুনঃ অসৌ অকুশলং কর্ম ন দ্বেষ্টি, কুশলে
চ ন অনুষজ্জতে ইতি, উচ্যতে – সত্ত্বসমাবিষ্টঃ যদা সত্ত্বেন
আত্মানাত্মবিবেকবিজ্ঞানহেতুনা সমাবিষ্টঃ সংব্যাপ্তঃ, সংয়ুক্ত ইত্যেতৎ ।
অত এব চ মেধাবী মেধয়া আত্মজ্ঞানলক্ষণয়া প্রজ্ঞয়া সংয়ুক্তঃ
তদ্বান্ মেধাবী । মেধাবিৎবাদেব চ্ছিন্নসংশয়ঃ ছিন্নঃ অবিদ্যাকৃতঃ
সংশয়ঃ যস্য “আত্মস্বরূপাবস্থানমেব পরং নিঃশ্রেয়সসাধনম্,
ন অন্যৎ কিংচিৎ” ইত্যেবং নিশ্চয়েন চ্ছিন্নসংশয়ঃ ॥
যঃ অধিকৃতঃ পুরুষঃ পূর্বোক্তেন প্রকারেণ কর্ময়োগানুষ্ঠানেন
ক্রমেণ সংস্কৃতাত্মা সন্ জন্মাদিবিক্রিয়ারহিতৎবেন নিষ্ক্রিয়ং আত্মানম্
আত্মৎবেন সংবুদ্ধঃ, সঃ সর্বকর্মাণি মনসা সংন্যস্য নৈব কুর্বন্ ন
কারয়ন্ আসীনঃ নৈষ্কর্ম্যলক্ষণাং জ্ঞাননিষ্ঠাং অশ্নুতে ইত্যেতৎ ।
পূর্বোক্তস্য কর্ময়োগস্য প্রয়োজনং অনেনৈব শ্লোকেন উক্তম্ ॥
যঃ পুনঃ অধিকৃতঃ সন্ দেহাত্মাভিমানিৎবেন দেহভৃৎ
অজ্ঞঃ অবাধিতাত্মকর্তৃৎববিজ্ঞানতয়া “অহং কর্তা”
ইতি নিশ্চিতবুদ্ধিঃ তস্য অশেষকর্মপরিত্যাগস্য অশক্যৎবাৎ
কর্মফলত্যাগেন চোদিতকর্মানুষ্ঠানে এব অধিকারঃ, ন তত্ত্যাগে ইতি
এতং অর্থং দর্শয়িতুং আহ –
ন হি দেহভৃতা শক্যং ত্যক্তুং কর্মাণ্যশেষতঃ ।
যস্তু কর্মফলত্যাগী স ত্যাগীত্যভিধীয়তে ॥ ১৮-১১॥
ন হি যস্মাৎ দেহভৃতা, দেহং বিভর্তীতি দেহভৃৎ, দেহাত্মাভিমানবান্
দেহভৃৎ উচ্যতে, ন বিবেকী; স হি“বেদাবিনাশিনম্”
(ভ. গী. ২-২১) ইত্যাদিনা কর্তৃৎবাধিকারাৎ নিবর্তিতঃ । অতঃ তেন
দেহভৃতা অজ্ঞেন ন শক্যং ত্যক্তুং সংন্যসিতুং কর্মাণি অশেষতঃ
নিঃশেষেণ । তস্মাৎ যস্তু অজ্ঞঃ অধিকৃতঃ নিত্যানি কর্মাণি কুর্বন্
কর্মফলত্যাগী কর্মফলাভিসংধিমাত্রসংন্যাসী সঃ ত্যাগী ইতি অভিধীয়তে
কর্মী অপি সন্ ইতি স্তুত্যভিপ্রায়েণ । তস্মাৎ পরমার্থদর্শিনৈব
অদেহভৃতা দেহাত্মভাবরহিতেন অশেষকর্মসংন্যাসঃ শক্যতে
কর্তুম্ ॥
কিং পুনঃ তৎ প্রয়োজনম্, যৎ সর্বকর্মসংন্যাসাৎ স্যাদিতি, উচ্যতে –
অনিষ্টমিষ্টং মিশ্রং চ ত্রিবিধং কর্মণঃ ফলম্ ।
ভবত্যত্যাগিনাং প্রেত্য ন তু সংন্যাসিনাং ক্বচিৎ ॥ ১৮-১২॥
অনিষ্টং নরকতির্যগাদিলক্ষণম্, ইষ্টং দেবাদিলক্ষণম্, মিশ্রম্
ইষ্টানিষ্টসংয়ুক্তং মনুষ্যলক্ষণং চ, তত্র ত্রিবিধং ত্রিপ্রকারং
কর্মণঃ ধর্মাধর্মলক্ষণস্য ফলং বাহ্যানেককারকব্যাপারনিষ্পন্নং
সৎ অবিদ্যাকৃতং ইন্দ্রজালমায়োপমং মহামোহকরং প্রত্যগাত্মোপসর্পি
ইহ – ফল্গুতয়া লয়ং অদর্শনং গচ্ছতীতি ফলনির্বচনং –
তৎ এতৎ এবংলক্ষণং ফলং ভবতি অত্যাগিনাং অজ্ঞানাং কর্মিণাং
অপরমার্থসংন্যাসিনাং প্রেত্য শরীরপাতাৎ ঊর্ধ্বম্ । ন তু সংন্যাসিনাং
পরমার্থসংন্যাসিনাং পরমহংসপরিব্রাজকানাং কেবলজ্ঞাননিষ্ঠানাং
ক্বচিৎ । ন হি কেবলসম্যগ্দর্শননিষ্ঠা অবিদ্যাদিসংসারবীজং
ন উন্মূলয়তি কদাচিৎ ইত্যর্থঃ । অতঃ পরমার্থদর্শিনঃ এব
অশেষকর্মসংন্যাসিৎবং সংভবতি, অবিদ্যাধ্যারোপিতৎবাৎ আত্মনি
ক্রিয়াকারকফলানাম্; ন তু অজ্ঞস্য অধিষ্ঠানাদীনি ক্রিয়াকর্তৃকারকাণি
আত্মৎবেনৈব পশ্যতঃ অশেষকর্মসংন্যাসঃ সংভবতি ॥
তদেতৎ উত্তরৈঃ শ্লোকৈঃ দর্শয়তি –
পঞ্চৈতানি মহাবাহো কারণানি নিবোধ মে ।
সাংখ্যে কৃতান্তে প্রোক্তানি সিদ্ধয়ে সর্বকর্মণাম্ ॥ ১৮-১৩॥
পঞ্চ এতানি বক্ষ্যমাণানি হে মহাবাহো, কারণানি নির্বর্তকানি । নিবোধ
মে মম ইতি উত্তরত্র চেতঃসমাধানার্থম্, বস্তুবৈষম্যপ্রদর্শনার্থং
চ । তানি চ কারণানি জ্ঞাতব্যতয়া স্তৌতি – সাংখ্যে জ্ঞাতব্যাঃ
পদার্থাঃ সংখ্যায়ন্তে যস্মিন্ শাস্ত্রে তৎ সাংখ্যং বেদান্তঃ । কৃতান্তে
ইতি তস্যৈব বিশেষণম্ । কৃতং ইতি কর্ম উচ্যতে, তস্য অন্তঃ
পরিসমাপ্তিঃ যত্র সঃ কৃতান্তঃ, কর্মান্তঃ ইত্যেতৎ । “যাবানর্থ
উদপানে” (ভ. গী. ২-৪৬) “সর্বং কর্মাখিলং পার্থ জ্ঞানে
পরিসমাপ্যতে” (ভ. গী. ৪-৩৩) ইতি আত্মজ্ঞানে সংজাতে সর্বকর্মণাং
নিবৃত্তিং দর্শয়তি । অতঃ তস্মিন্ আত্মজ্ঞানার্থে সাংখ্যে কৃতান্তে
বেদান্তে প্রোক্তানি কথিতানি সিদ্ধয়ে নিষ্পত্ত্যর্থং সর্বকর্মণাম্ ॥
কানি তানীতি, উচ্যতে –
অধিষ্ঠানং তথা কর্তা করণং চ পৃথগ্বিধম্ ।
বিবিধাশ্চ পৃথক্চেষ্টা দৈবং চৈবাত্র পঞ্চমম্ ॥ ১৮-১৪॥
অধিষ্ঠানং ইচ্ছাদ্বেষসুখদুঃখজ্ঞানাদীনাং অভিব্যক্তেরাশ্রয়ঃ
অধিষ্ঠানং শরীরম্, তথা কর্তা উপাধিলক্ষণঃ ভোক্তা, করণং
চ শ্রোত্রাদি শব্দাদ্যুপলব্ধয়ে পৃথগ্বিধং নানাপ্রকারং তৎ
দ্বাদশসংখ্যং বিবিধাশ্চ পৃথক্চেষ্টাঃ বায়বীয়াঃ প্রাণাপানাদ্যাঃ
দৈবং চৈব দৈবমেব চ অত্র এতেষু চতুর্ষু পঞ্চমং পঞ্চানাং
পূরণং আদিত্যাদি চক্ষুরাদ্যনুগ্রাহকম্ ॥
শরীরবাঙ্মনোভির্যৎকর্ম প্রারভতে নরঃ ।
ন্যায়্যং বা বিপরীতং বা পঞ্চৈতে তস্য হেতবঃ ॥ ১৮-১৫॥
শরীরবাঙ্মনোভিঃ যৎ কর্ম ত্রিভিঃ এতৈঃ প্রারভতে নির্বর্তয়তি
নরঃ, ন্যায়্যং বা ধর্ম্যং শাস্ত্রীয়ম্, বিপরীতং বা অশাস্ত্রীয়ম্
অধর্ম্যং যচ্চাপি নিমিষিতচেষ্টিতাদি জীবনহেতুঃ তদপি
পূর্বকৃতধর্মাধর্ময়োরেব কার্যমিতি ন্যায়্যবিপরীতয়োরেব গ্রহণেন
গৃহীতম্, পঞ্চ এতে যথোক্তাঃ তস্য সর্বস্যৈব কর্মণো হেতবঃ
কারণানি ॥
ননু এতানি অধিষ্ঠানাদীনি সর্বকর্মণাং নির্বর্তকানি । কথং উচ্যতে
“শরীরবাঙ্মনোভিঃ যৎ কর্ম প্রারভতে” ইতি? নৈষ
দোষঃ; বিধিপ্রতিষেধলক্ষণং সর্বং কর্ম শরীরাদিত্রয়প্রধানম্;
তদঙ্গতয়া দর্শনশ্রবণাদি চ জীবনলক্ষণং ত্রিধৈব রাশীকৃতম্
উচ্যতে শরীরাদিভিঃ আরভ্যতে ইতি । ফলকালেঽপি তৎপ্রধানৈঃ
সাধনৈঃ ভুজ্যতে ইতি পঞ্চানামেব হেতুৎবং ন বিরুধ্যতে ইতি ॥
তত্রৈবং সতি কর্তারমাত্মানং কেবলং তু যঃ ।
পশ্যত্যকৃতবুদ্ধিৎবান্ন স পশ্যতি দুর্মতিঃ ॥ ১৮-১৬॥
তত্র ইতি প্রকৃতেন সংবধ্যতে । এবং সতি এবং যথোক্তৈঃ
পঞ্চভিঃ হেতুভিঃ নির্বর্ত্যে সতি কর্মণি । তত্রৈবং সতি ইতি
দুর্মতিৎবস্য হেতুৎবেন সংবধ্যতে । তত্র এতেষু আত্মানন্যৎবেন
অবিদ্যযা পরিকল্পিতৈঃ ক্রিয়মাণস্য কর্মণঃ “অহমেব
কর্তা” ইতি কর্তারং আত্মানং কেবলং শুদ্ধং তু যঃ পশ্যতি
অবিদ্বান্; কস্মাৎ? বেদান্তাচার্যোপদেশন্যায়ৈঃ অকৃতবুদ্ধিৎবাৎ
অসংস্কৃতবুদ্ধিৎবাৎ; যোঽপি দেহাদিব্যতিরিক্তাত্মবাদী আত্মানমেব কেবলং
কর্তারং পশ্যতি, অসাবপি অকৃতবুদ্ধিঃ; অতঃ অকৃতবুদ্ধিৎবাৎ ন সঃ
পশ্যতি আত্মনঃ তত্ত্বং কর্মণো বা ইত্যর্থঃ । অতঃ দুর্মতিঃ, কুৎসিতা
বিপরীতা দুষ্টা অজস্রং জননমরণপ্রতিপত্তিহেতুভূতা মতিঃ অস্য ইতি
দুর্মতিঃ । সঃ পশ্যন্নপি ন পশ্যতি, যথা তৈমিরিকঃ অনেকং চন্দ্রম্,
যথা বা অভ্রেষু ধাবৎসু চন্দ্রং ধাবন্তম্, যথা বা বাহনে উপবিষ্টঃ
অন্যেষু ধাবৎসু আত্মানং ধাবন্তম্ ॥
কঃ পুনঃ সুমতিঃ যঃ সম্যক্ পশ্যতীতি, উচ্যতে –
যস্য নাহংকৃতো ভাবো বুদ্ধির্যস্য ন লিপ্যতে ।
হৎবাপি স ইমাংল্লোকান্ন হন্তি ন নিবধ্যতে ॥ ১৮-১৭॥
যস্য শাস্ত্রাচার্যোপদেশন্যায়সংস্কৃতাত্মনঃ ন ভবতি অহংকৃতঃ
“অহং কর্তা” ইত্যেবংলক্ষণঃ ভাবঃ ভাবনা প্রত্যযঃ –
এতে এব পঞ্চ অধিষ্ঠানাদয়ঃ অবিদ্যযা আত্মনি কল্পিতাঃ সর্বকর্মণাং
কর্তারঃ, ন অহম্, অহং তু তদ্ব্যাপারাণাং সাক্ষিভূতঃ“অপ্রাণো
হ্যমনাঃ শুভ্রো হ্যক্ষরাৎপরতঃ পরঃ” (মু. উ. ২-১-২) কেবলঃ
অবিক্রিয়ঃ ইত্যেবং পশ্যতীতি এতৎ – বুদ্ধিঃ অন্তঃকরণং যস্য আত্মনঃ
উপাধিভূতা ন লিপ্যতে ন অনুশয়িনী ভবতি – “ইদমহমকার্ষম্,
তেন অহং নরকং গমিষ্যামি” ইত্যেবং যস্য বুদ্ধিঃ ন লিপ্যতে –
সঃ সুমতিঃ, সঃ পশ্যতি । হৎবা অপি সঃ ইমান্ লোকান্, সর্বান্ ইমান্
প্রাণিনঃ ইত্যর্থঃ, ন হন্তি হননক্রিয়াং ন করোতি, ন নিবধ্যতে নাপি
তৎকার্যেণ অধর্মফলেন সংবধ্যতে ॥ ননু হৎবাপি ন হন্তি
ইতি বিপ্রতিষিদ্ধং উচ্যতে যদ্যপি স্তুতিঃ । নৈষ দোষঃ,
লৌকিকপারমার্থিকদৃষ্ট্যপেক্ষয়া তদুপপত্তেঃ ।
দেহাদ্যাত্মবুদ্ধ্যা “হন্তা অহম্” ইতি লৌকিকীং দৃষ্টিং আশ্রিত্য
“হৎবাপি” ইতি আহ । যথাদর্শিতাং পারমার্থিকীং দৃষ্টিম্
আশ্রিত্য “ন হন্তি ন নিবধ্যতে” ইতি । এতৎ উভয়ং উপপদ্যতে
এব ॥
ননু অধিষ্ঠানাদিভিঃ সংভূয় করোত্যেব আত্মা, “কর্তারমাত্মানং
কেবলং তু” (ভ. গী. ১৮-১৬) ইতি কেবলশব্দপ্রয়োগাৎ ।
নৈষ দোষঃ, আত্মনঃ অবিক্রিয়স্বভাবৎবে অধিষ্ঠানাদিভিঃ,
সংহতৎবানুপপত্তেঃ । বিক্রিয়াবতো হি অন্যৈঃ সংহননং সংভবতি,
সংহত্য বা কর্তৃৎবং স্যাৎ । ন তু অবিক্রিয়স্য আত্মনঃ কেনচিৎ
সংহননং অস্তি ইতি ন সংভূয় কর্তৃৎবং উপপদ্যতে । অতঃ
কেবলৎবং আত্মনঃ স্বাভাবিকমিতি কেবলশব্দঃ অনুবাদমাত্রম্ ।
অবিক্রিয়ৎবং চ আত্মনঃ শ্রুতিস্মৃতিন্যায়প্রসিদ্ধম্ ।
“অবিকার্যোঽয়মুচ্যতে” (ভ. গী. ২-২৫) “গুণৈরেব কর্মাণি
ক্রিয়ন্তে” (ভ. গী. ৩-২৭)“শরীরস্থোঽপি ন করোতি”
(ভ. গী. ১৩-৩১) ইত্যাদি অসকৃৎ উপপাদিতং গীতাস্বেব তাবৎ । শ্রুতিষু
চ “ধ্যায়তীব লেলায়তীব” (বৃ. উ. ৪-৩-৭) ইত্যেবমাদ্যাসু ।
ন্যায়তশ্চ – নিরবয়বং অপরতন্ত্রং অবিক্রিয়ং আত্মতত্ত্বং ইতি
রাজমার্গঃ । বিক্রিয়াবত্ত্বাভ্যুপগমেঽপি আত্মনঃ স্বকীয়ৈব বিক্রিয়া
স্বস্য ভবিতুং অর্হতি, ন অধিষ্ঠানাদীনাং কর্মাণি আত্মকর্তৃকাণি
স্যুঃ । ন হি পরস্য কর্ম পরেণ অকৃতং আগন্তুং অর্হতি । যত্তু
অবিদ্যযা গমিতম্, ন তৎ তস্য । যথা রজতৎবং ন শুক্তিকায়াঃ;
যথা বা তলমলিনৎবং বালৈঃ গমিতং অবিদ্যযা, ন আকাশস্য, তথা
অধিষ্ঠানাদিবিক্রিয়াপি তেষামেব, ন আত্মনঃ । তস্মাৎ যুক্তং উক্তম্
“অহংকৃতৎববুদ্ধিলেপাভাবাৎ বিদ্বান্ ন হন্তি ন নিবধ্যতে”
ইতি । “নায়ং হন্তি ন হন্যতে” (ভ. গী. ২-১৯) ইতি প্রতিজ্ঞায়
“ন জায়তে” (ভ. গী. ২-২০)ইত্যাদিহেতুবচনেন অবিক্রিয়ৎবম্
আত্মনঃ উক্ত্বা, “বেদাবিনাশিনম্” (ভ. গী. ২-২১) ইতি বিদুষঃ
কর্মাধিকারনিবৃত্তিং শাস্ত্রাদৌ সংক্ষেপতঃ উক্ত্বা, মধ্যে প্রসারিতাং
তত্র তত্র প্রসঙ্গং কৃৎবা ইহ উপসংহরতি শাস্ত্রার্থপিণ্ডীকরণায়
“বিদ্বান্ ন হন্তি ন নিবধ্যতে” ইতি । এবং চ সতি
দেহভৃত্ত্বাভিমানানুপপত্তৌ অবিদ্যাকৃতাশেষকর্মসংন্যাসোপপত্তেঃ
সংন্যাসিনাং অনিষ্টাদি ত্রিবিধং কর্মণঃ ফলং ন ভবতি ইতি
উপপন্নম্; তদ্বিপর্যযাচ্চ ইতরেষাং ভবতি ইত্যেতচ্চ অপরিহার্যম্
ইতি এষঃ গীতাশাস্ত্রার্থঃ উপসংহৃতঃ । স এষঃ সর্ববেদার্থসারঃ
নিপুণমতিভিঃ পণ্ডিতৈঃ বিচার্য প্রতিপত্তব্যঃ ইতি তত্র তত্র
প্রকরণবিভাগেন দর্শিতঃ অস্মাভিঃ শাস্ত্রন্যায়ানুসারেণ ॥
অথ ইদানীং কর্মণাং প্রবর্তকং উচ্যতে –
জ্ঞানং জ্ঞেয়ং পরিজ্ঞাতা ত্রিবিধা কর্মচোদনা ।
করণং কর্ম কর্তেতি ত্রিবিধঃ কর্মসংগ্রহঃ ॥ ১৮-১৮॥
জ্ঞানং জ্ঞায়তে অনেন ইতি সর্ববিষয়ং অবিশেষেণ উচ্যতে । তথা
জ্ঞেয়ং জ্ঞাতব্যম্, তদপি সামান্যেনৈব সর্বং উচ্যতে । তথা পরিজ্ঞাতা
উপাধিলক্ষণঃ অবিদ্যাকল্পিতঃ ভোক্তা । ইতি এতৎ ত্রয়ং অবিশেষেণ
সর্বকর্মণাং প্রবর্তিকা ত্রিবিধা ত্রিপ্রকারা কর্মচোদনা । জ্ঞানাদীনাং
হি ত্রয়াণাং সংনিপাতে হানোপাদানাদিপ্রয়োজনঃ সর্বকর্মারম্ভঃ স্যাৎ ।
ততঃ পঞ্চভিঃ অধিষ্ঠানাদিভিঃ আরব্ধং বাঙ্মনঃকায়াশ্রয়ভেদেন
ত্রিধা রাশীভূতং ত্রিষু করণাদিষু সংগৃহ্যতে ইত্যেতৎ উচ্যতে –
করণং ক্রিয়তে অনেন ইতি বাহ্যং শ্রোত্রাদি, অন্তঃস্থং বুদ্ধ্যাদি, কর্ম
ঈপ্সিততমং কর্তুঃ ক্রিয়যা ব্যাপ্যমানম্, কর্তা করণানাং ব্যাপারয়িতা
উপাধিলক্ষণঃ, ইতি ত্রিবিধঃ ত্রিপ্রকারঃ কর্মসংগ্রহঃ, সংগৃহ্যতে
অস্মিন্নিতি সংগ্রহঃ, কর্মণঃ সংগ্রহঃ কর্মসংগ্রহঃ, কর্ম এষু হি
ত্রিষু সমবৈতি, তেন অয়ং ত্রিবিধঃ কর্মসংগ্রহঃ ॥
অথ ইদানীং ক্রিয়াকারকফলানাং সর্বেষাং গুণাত্মকৎবাৎ
সত্ত্বরজস্তমোগুণভেদতঃ ত্রিবিধঃ ভেদঃ বক্তব্য ইতি আরভ্যতে –
জ্ঞানং কর্ম চ কর্তা চ ত্রিধৈব গুণভেদতঃ ।
প্রোচ্যতে গুণসংখ্যানে যথাবচ্ছৃণু তান্যপি ॥ ১৮-১৯॥
জ্ঞানং কর্ম চ, কর্ম ক্রিয়া, ন কারকং পারিভাষিকং ঈপ্সিততমং
কর্ম, কর্তা চ নির্বর্তকঃ ক্রিয়াণাং ত্রিধা এব, অবধারণং
গুণব্যতিরিক্তজাত্যন্তরাভাবপ্রদর্শনার্থং গুণভেদতঃ
সত্ত্বাদিভেদেন ইত্যর্থঃ । প্রোচ্যতে কথ্যতে গুণসংখ্যানে কাপিলে
শাস্ত্রে তদপি গুণসংখ্যানশাস্ত্রং গুণভোক্তৃবিষয়ে প্রমাণমেব ।
পরমার্থব্রহ্মৈকৎববিষয়ে যদ্যপি বিরুধ্যতে, তথাপি তে হি
কাপিলাঃ গুণগৌণব্যাপারনিরূপণে অভিয়ুক্তাঃ ইতি তচ্ছাস্ত্রমপি
বক্ষ্যমাণার্থস্তুত্যর্থৎবেন উপাদীয়তে ইতি ন বিরোধঃ । যথাবৎ
যথান্যায়ং যথাশাস্ত্রং শৃণু তান্যপি জ্ঞানাদীনি তদ্ভেদজাতানি
গুণভেদকৃতানি শৃণু, বক্ষ্যমাণে অর্থে মনঃসমাধিং কুরু
ইত্যর্থঃ ॥
জ্ঞানস্য তু তাবৎ ত্রিবিধৎবং উচ্যতে –
সর্বভূতেষু যেনৈকং ভাবমব্যযমীক্ষতে ।
অবিভক্তং বিভক্তেষু তজ্জ্ঞানং বিদ্ধি সাত্ত্বিকম্ ॥ ১৮-২০॥
সর্বভূতেষু অব্যক্তাদিস্থাবরান্তেষু ভূতেষু যেন জ্ঞানেন একং ভাবং
বস্তু – ভাবশব্দঃ বস্তুবাচী, একং আত্মবস্তু ইত্যর্থঃ; অব্যযং ন
ব্যেতি স্বাত্মনা স্বধর্মেণ বা, কূটস্থং ইত্যর্থঃ; ঈক্ষতে পশ্যতি যেন
জ্ঞানেন, তং চ ভাবং অবিভক্তং প্রতিদেহং বিভক্তেষু দেহভেদেষু
ন বিভক্তং তৎ আত্মবস্তু, ব্যোমবৎ নিরন্তরমিত্যর্থঃ; তৎ জ্ঞানং
সাক্ষাৎ সম্যগ্দর্শনং অদ্বৈতাত্মবিষয়ং সাত্ত্বিকং বিদ্ধি ইতি ॥
যানি দ্বৈতদর্শনানি তানি অসম্যগ্ভূতানি রাজসানি তামসানি চ ইতি ন
সাক্ষাৎ সংসারোচ্ছিত্তয়ে ভবন্তি –
পৃথক্ত্বেন তু যজ্জ্ঞানং নানাভাবান্পৃথগ্বিধান্ ।
বেত্তি সর্বেষু ভূতেষু তজ্জ্ঞানং বিদ্ধি রাজসম্ ॥ ১৮-২১॥
পৃথক্ত্বেন তু ভেদেন প্রতিশরীরং অন্যৎবেন যৎ জ্ঞানং নানাভাবান্
ভিন্নান্ আত্মনঃ পৃথগ্বিধান্ পৃথক্প্রকারান্ ভিন্নলক্ষণান্
ইত্যর্থঃ, বেত্তি বিজানাতি যৎ জ্ঞানং সর্বেষু ভূতেষু, জ্ঞানস্য
কর্তৃৎবাসংভবাৎ যেন জ্ঞানেন বেত্তি ইত্যর্থঃ, তৎ জ্ঞানং বিদ্ধি
রাজসং রজোগুণনির্বৃত্তম্ ॥
যত্তু কৃৎস্নবদেকস্মিন্কার্যে সক্তমহৈতুকম্ ।
অতত্ত্বার্থবদল্পং চ তত্তামসমুদাহৃতম্ ॥ ১৮-২২॥
যৎ জ্ঞানং কৃৎস্নবৎ সমস্তবৎ সর্ববিষয়মিব একস্মিন্ কার্যে
দেহে বহির্বা প্রতিমাদৌ সক্তং “এতাবানেব আত্মা ঈশ্বরো বা, ন
অতঃ পরং অস্তি” ইতি, যথা নগ্নক্ষপণকাদীনাং শরীরান্তর্বর্তী
দেহপরিমাণো জীবঃ, ঈশ্বরো বা পাষাণদার্বাদিমাত্রম্, ইত্যেবং একস্মিন্
কার্যে সক্তং অহৈতুকং হেতুবর্জিতং নির্যুক্তিকম্, অতত্ত্বার্থবৎ
অয়থাভূতার্থবৎ, যথাভূতঃ অর্থঃ তত্ত্বার্থঃ, সঃ অস্য জ্ঞেয়ভূতঃ
অস্তীতি তত্ত্বার্থবৎ, ন তত্ত্বার্থবৎ অতত্ত্বার্থবৎ; অহৈতুকৎবাদেব
অল্পং চ, অল্পবিষয়ৎবাৎ অল্পফলৎবাদ্বা । তৎ তামসং উদাহৃতম্ ।
তামসানাং হি প্রাণিনাং অবিবেকিনাং ঈদৃশং জ্ঞানং দৃশ্যতে ॥
অথ ইদানীং কর্মণঃ ত্রৈবিধ্যং উচ্যতে –
নিয়তং সঙ্গরহিতমরাগদ্বেষতঃকৃতম্ ।
অফলপ্রেপ্সুনা কর্ম যত্তৎসাত্ত্বিকমুচ্যতে ॥ ১৮-২৩॥
নিয়তং নিত্যং সঙ্গরহিতং আসক্তিবর্জিতং অরাগদ্বেষতঃকৃতং
রাগপ্রয়ুক্তেন দ্বেষপ্রয়ুক্তেন চ কৃতং রাগদ্বেষতঃকৃতম্,
তদ্বিপরীতং অরাগদ্বেষতঃকৃতম্, অফলপ্রেপ্সুনা ফলং প্রেপ্সতীতি
ফলপ্রেপ্সুঃ ফলতৃষ্ণঃ তদ্বিপরীতেন অফলপ্রেপ্সুনা কর্ত্রা কৃতং
কর্ম যৎ, তৎ সাত্ত্বিকং উচ্যতে ॥
যত্তু কামেপ্সুনা কর্ম সাহংকারেণ বা পুনঃ ।
ক্রিয়তে বহুলায়াসং তদ্রাজসমুদাহৃতম্ ॥ ১৮-২৪॥
যত্তু কামেপ্সুনা কর্মফলপ্রেপ্সুনা ইত্যর্থঃ, কর্ম সাহংকারেণ ইতি ন
তত্ত্বজ্ঞানাপেক্ষয়া । কিং তর্হি? লৌকিকশ্রোত্রিয়নিরহংকারাপেক্ষয়া ।
যো হি পরমার্থনিরহংকারঃ আত্মবিৎ, ন তস্য
কামেপ্সুৎববহুলায়াসকর্তৃৎবপ্রাপ্তিঃ অস্তি । সাত্ত্বিকস্যাপি কর্মণঃ
অনাত্মবিৎ সাহংকারঃ কর্তা, কিমুত রাজসতামসয়োঃ । লোকে অনাত্মবিদপি
শ্রোত্রিয়ো নিরহংকারঃ উচ্যতে “নিরহংকারঃ অয়ং ব্রাহ্মণঃ”
ইতি । তস্মাৎ তদপেক্ষয়ৈব “সাহংকারেণ বা” ইতি উক্তম্ ।
পুনঃশব্দঃ পাদপূরণার্থঃ । ক্রিয়তে বহুলায়াসং কর্ত্রা মহতা আয়াসেন
নির্বর্ত্যতে, তৎ কর্ম রাজসং উদাহৃতম্ ॥
অনুবন্ধং ক্ষয়ং হিংসামনপেক্ষ্য চ পৌরুষম্ ।
মোহাদারভ্যতে কর্ম যত্তত্তামসমুচ্যতে ॥ ১৮-২৫॥
অনুবন্ধং পশ্চাদ্ভাবি যৎ বস্তু সঃ অনুবন্ধঃ উচ্যতে তং চ
অনুবন্ধম্, ক্ষয়ং যস্মিন্ কর্মণি ক্রিয়মাণে শক্তিক্ষয়ঃ অর্থক্ষয়ো
বা স্যাৎ তং ক্ষয়ম্, হিংসাং প্রাণিবাধাং চ; অনপেক্ষ্য চ পৌরুষং
পুরুষকারং “শক্নোমি ইদং কর্ম সমাপয়িতুম্” ইত্যেবম্
আত্মসামর্থ্যম্, ইত্যেতানি অনুবন্ধাদীনি অনপেক্ষ্য পৌরুষান্তানি মোহাৎ
অবিবেকতঃ আরভ্যতে কর্ম যৎ, তৎ তামসং তমোনির্বৃত্তং উচ্যতে ॥
ইদানীং কর্তৃভেদঃ উচ্যতে –
মুক্তসঙ্গোঽনহংবাদী ধৃত্যুৎসাহসমন্বিতঃ ।
সিদ্ধ্যসিদ্ধ্যোর্নির্বিকারঃ কর্তা সাত্ত্বিক উচ্যতে ॥ ১৮-২৬॥
মুক্তসঙ্গঃ মুক্তঃ পরিত্যক্তঃ সঙ্গঃ যেন সঃ মুক্তসঙ্গঃ,
অনহংবাদী ন অহংবদনশীলঃ, ধৃত্যুৎসাহসমন্বিতঃ ধৃতিঃ ধারণম্
উৎসাহঃ উদ্যমঃ তাভ্যাং সমন্বিতঃ সংয়ুক্তঃ ধৃত্যুৎসাহসমন্বিতঃ,
সিদ্ধ্যসিদ্ধ্যোঃ ক্রিয়মাণস্য কর্মণঃ ফলসিদ্ধৌ অসিদ্ধৌ চ
সিদ্ধ্যসিদ্ধ্যোঃ নির্বিকারঃ, কেবলং শাস্ত্রপ্রমাণেন প্রয়ুক্তঃ ন
ফলরাগাদিনা যঃ সঃ নির্বিকারঃ উচ্যতে । এবংভূতঃ কর্তা যঃ সঃ
সাত্ত্বিকঃ উচ্যতে ॥
রাগী কর্মফলপ্রেপ্সুর্লুব্ধো হিংসাত্মকোঽশুচিঃ ।
হর্ষশোকান্বিতঃ কর্তা রাজসঃ পরিকীর্তিতঃ ॥ ১৮-২৭॥
রাগী রাগঃ অস্য অস্তীতি রাগী, কর্মফলপ্রেপ্সুঃ কর্মফলার্থী ইত্যর্থঃ,
লুব্ধঃ পরদ্রব্যেষু সংজাততৃষ্ণঃ, তীর্থাদৌ স্বদ্রব্যাপরিত্যাগী বা,
হিংসাত্মকঃ পরপীডাকরস্বভাবঃ, অশুচিঃ বাহ্যাভ্যন্তরশৌচবর্জিতঃ,
হর্ষশোকান্বিতঃ ইষ্টপ্রাপ্তৌ হর্ষঃ অনিষ্টপ্রাপ্তৌ ইষ্টবিয়োগে চ
শোকঃ তাভ্যাং হর্ষশোকাভ্যাং অন্বিতঃ সংয়ুক্তঃ, তস্যৈব চ কর্মণঃ
সংপত্তিবিপত্তিভ্যাং হর্ষশোকৌ স্যাতাম্, তাভ্যাং সংয়ুক্তো যঃ কর্তা
সঃ রাজসঃ পরিকীর্তিতঃ ॥
অয়ুক্তঃ প্রাকৃতঃ স্তব্ধঃ শঠো নৈকৃতিকোঽলসঃ ।
বিষাদী দীর্ঘসূত্রী চ কর্তা তামস উচ্যতে ॥ ১৮-২৮॥
অয়ুক্তঃ ন যুক্তঃ অসমাহিতঃ, প্রাকৃতঃ অত্যন্তাসংস্কৃতবুদ্ধিঃ
বালসমঃ, স্তব্ধঃ দণ্ডবৎ ন নমতি কস্মৈচিৎ, শঠঃ
মায়াবী শক্তিগূহনকারী, নৈকৃতিকঃ পরবিভেদনপরঃ, অলসঃ
অপ্রবৃত্তিশীলঃ কর্তব্যেষ্বপি, বিষাদী বিষাদবান্ সর্বদা
অবসন্নস্বভাবঃ, দীর্ঘসূত্রী চ কর্তব্যানাং দীর্ঘপ্রসারণঃ, সর্বদা
মন্দস্বভাবঃ, যৎ অদ্য শ্বো বা কর্তব্যং তৎ মাসেনাপি ন করোতি,
যশ্চ এবংভূতঃ, সঃ কর্তা তামসঃ উচ্যতে ॥
বুদ্ধের্ভেদং ধৃতেশ্চৈব গুণতস্ত্রিবিধং শৃণু ।
প্রোচ্যমানমশেষেণ পৃথক্ত্বেন ধনংজয় ॥ ১৮-২৯॥
বুদ্ধেঃ ভেদং ধৃতেশ্চৈব ভেদং গুণতঃ সত্ত্বাদিগুণতঃ ত্রিবিধং
শৃণু ইতি সূত্রোপন্যাসঃ । প্রোচ্যমানং কথ্যমানং অশেষেণ
নিরবশেষতঃ যথাবৎ পৃথক্ত্বেন বিবেকতঃ ধনংজয়, দিগ্বিজয়ে
মানুষং দৈবং চ প্রভূতং ধনং জিতবান্, তেন অসৌ ধনংজয়ঃ
অর্জুনঃ ॥
প্রবৃত্তিং চ নিবৃত্তিং চ কার্যাকার্যে ভয়াভয়ে ।
বন্ধং মোক্ষং চ যা বেত্তি বুদ্ধিঃ সা পার্থ সাত্ত্বিকী ॥ ১৮-৩০॥
প্রবৃত্তিং চ প্রবৃত্তিঃ প্রবর্তনং বন্ধহেতুঃ কর্মমার্গঃ
শাস্ত্রবিহিতবিষয়ঃ, নিবৃত্তিং চ নির্বৃত্তিঃ মোক্ষহেতুঃ
সংন্যাসমার্গঃ – বন্ধমোক্ষসমানবাক্যৎবাৎ প্রবৃত্তিনিবৃত্তী
কর্মসংন্যাসমার্গৌ ইতি অবগম্যতে – কার্যাকার্যে বিহিতপ্রতিষিদ্ধে
লৌকিকে বৈদিকে বা শাস্ত্রবুদ্ধেঃ কর্তব্যাকর্তব্যে করণাকরণে ইত্যেতৎ;
কস্য? দেশকালাদ্যপেক্ষয়া দৃষ্টাদৃষ্টার্থানাং কর্মণাম্ । ভয়াভয়ে
বিভেতি অস্মাদিতি ভয়ং চোরব্যাঘ্রাদি, ন ভয়ং অভয়ম্, ভয়ং চ
অভয়ং চ ভয়াভয়ে, দৃষ্টাদৃষ্টবিষয়যোঃ ভয়াভয়যোঃ কারণে
ইত্যর্থঃ । বন্ধং সহেতুকং মোক্ষং চ সহেতুকং যা বেত্তি বিজানাতি
বুদ্ধিঃ, সা পার্থ সাত্ত্বিকী । তত্র জ্ঞানং বুদ্ধেঃ বৃত্তিঃ; বুদ্ধিস্তু
বৃত্তিমতী । ধৃতিরপি বৃত্তিবিশেষঃ এব বুদ্ধেঃ ॥
যয়া ধর্মমধর্মং চ কার্যং চাকার্যমেব চ ।
অয়থাবৎপ্রজানাতি বুদ্ধিঃ সা পার্থ রাজসী ॥ ১৮-৩১॥
যয়া ধর্মং শাস্ত্রচোদিতং অধর্মং চ তৎপ্রতিষিদ্ধং কার্যং চ
অকার্যমেব চ পূর্বোক্তে এব কার্যাকার্যে অয়থাবৎ ন যথাবৎ সর্বতঃ
নির্ণয়েন ন প্রজানাতি, বুদ্ধিঃ সা পার্থ, রাজসী ॥
অধর্মং ধর্মমিতি যা মন্যতে তমসাবৃতা ।
সর্বার্থান্বিপরীতাংশ্চ বুদ্ধিঃ সা পার্থ তামসী ॥ ১৮-৩২॥
অধর্মং প্রতিষিদ্ধং ধর্মং বিহিতং ইতি যা মন্যতে জানাতি তমসা
আবৃতা সতী, সর্বার্থান্ সর্বানেব জ্ঞেয়পদার্থান্ বিপরীতাংশ্চ
বিপরীতানেব বিজানাতি, বুদ্ধিঃ সা পার্থ, তামসী ॥
ধৃত্যা যয়া ধারয়তে মনঃপ্রাণেন্দ্রিয়ক্রিয়াঃ ।
যোগেনাব্যভিচারিণ্যা ধৃতিঃ সা পার্থ সাত্ত্বিকী ॥ ১৮-৩৩॥
ধৃত্যা যয়া – অব্যভিচারিণ্যা ইতি ব্যবহিতেন সংবন্ধঃ,
ধারয়তে; কিম্? মনঃপ্রাণেন্দ্রিয়ক্রিয়াঃ মনশ্চ প্রাণাশ্চ
ইন্দ্রিয়াণি চ মনঃপ্রাণেন্দ্রিয়াণি, তেষাং ক্রিয়াঃ চেষ্টাঃ, তাঃ
উচ্ছাস্ত্রমার্গপ্রবৃত্তেঃ ধারয়তে ধারয়তি – ধৃত্যা হি ধার্যমাণাঃ
উচ্ছাস্ত্রমার্গবিষয়াঃ ন ভবন্তি – যোগেন সমাধিনা, অব্যভিচারিণ্যা,
নিত্যসমাধ্যনুগতয়া ইত্যর্থঃ । এতৎ উক্তং ভবতি – অব্যভিচারিণ্যা
ধৃত্যা মনঃপ্রাণেন্দ্রিয়ক্রিয়াঃ ধার্যমাণাঃ যোগেন ধারয়তীতি । যা
এবংলক্ষণা ধৃতিঃ, সা পার্থ, সাত্ত্বিকী ॥
যয়া তু ধর্মকামার্থান্ধৃত্যা ধারয়তেঽর্জুন ।
প্রসঙ্গেন ফলাকাঙ্ক্ষী ধৃতিঃ সা পার্থ রাজসী ॥ ১৮-৩৪॥
যয়া তু ধর্মকামার্থান্ ধর্মশ্চ কামশ্চ অর্থশ্চ ধর্মকামার্থাঃ
তান্ ধর্মকামার্থান্ ধৃত্যা যয়া ধারয়তে মনসি নিত্যমেব
কর্তব্যরূপান্ অবধারয়তি হে অর্জুন, প্রসঙ্গেন যস্য যস্য ধর্মাদেঃ
ধারণপ্রসঙ্গঃ তেন তেন প্রসঙ্গেন ফলাকাঙ্ক্ষী চ ভবতি যঃ
পুরুষঃ, তস্য ধৃতিঃ যা, সা পার্থ, রাজসী ॥
যয়া স্বপ্নং ভয়ং শোকং বিষাদং মদমেব চ ।
ন বিমুঞ্চতি দুর্মেধা ধৃতিঃ সা তামসী মতা ॥ ১৮-৩৫॥
যয়া স্বপ্নং নিদ্রাং ভয়ং ত্রাসং শোকং বিষাদং বিষণ্ণতাং মদং
বিষয়সেবাং আত্মনঃ বহুমন্যমানঃ মত্ত ইব মদং এব চ মনসি
নিত্যমেব কর্তব্যরূপতয়া কুর্বন্ ন বিমুঞ্চতি ধারয়ত্যেব দুর্মেধাঃ
কুৎসিতমেধাঃ পুরুষঃ যঃ, তস্য ধৃতিঃ যা, সা তামসী মতা ॥
গুণভেদেন ক্রিয়াণাং কারকাণাং চ ত্রিবিধো ভেদঃ উক্তঃ । অথ ইদানীং
ফলস্য সুখস্য ত্রিবিধো ভেদঃ উচ্যতে –
সুখং ৎবিদানীং ত্রিবিধং শৃণু মে ভরতর্ষভ ।
অভ্যাসাদ্রমতে যত্র দুঃখান্তং চ নিগচ্ছতি ॥ ১৮-৩৬॥
সুখং তু ইদানীং ত্রিবিধং শৃণু, সমাধানং কুরু ইত্যেতৎ, মে মম
ভরতর্ষভ । অভ্যাসাৎ পরিচয়াৎ আবৃত্তেঃ রমতে রতিং প্রতিপদ্যতে
যত্র যস্মিন্ সুখানুভবে দুঃখান্তং চ দুঃখাবসানং দুঃখোপশমং
চ নিগচ্ছতি নিশ্চয়েন প্রাপ্নোতি ॥
যত্তদগ্রে বিষমিব পরিণামেঽমৃতোপমম্ ।
তৎসুখং সাত্ত্বিকং প্রোক্তমাত্মবুদ্ধিপ্রসাদজম্ ॥ ১৮-৩৭॥
যৎ তৎ সুখং অগ্রে পূর্বং প্রথমসংনিপাতে
জ্ঞানবৈরাগ্যধ্যানসমাধ্যারম্ভে অত্যন্তায়াসপূর্বকৎবাৎ বিষমিব
দুঃখাত্মকং ভবতি, পরিণামে জ্ঞানবৈরাগ্যাদিপরিপাকজং সুখম্
অমৃতোপমম্, তৎ সুখং সাত্ত্বিকং প্রোক্তং বিদ্বদ্ভিঃ, আত্মনঃ বুদ্ধিঃ
আত্মবুদ্ধিঃ, আত্মবুদ্ধেঃ প্রসাদঃ নৈর্মল্যং সলিলস্য ইব স্বচ্ছতা,
ততঃ জাতং আত্মবুদ্ধিপ্রসাদজম্ । আত্মবিষয়া বা আত্মাবলম্বনা বা বুদ্ধিঃ
আত্মবুদ্ধিঃ, তৎপ্রসাদপ্রকর্ষাদ্বা জাতমিত্যেতৎ । তস্মাৎ সাত্ত্বিকং তৎ ॥
বিষয়েন্দ্রিয়সংয়োগাদ্যত্তদগ্রেঽমৃতোপমম্ ।
পরিণামে বিষমিব তৎসুখং রাজসং স্মৃতম্ ॥ ১৮-৩৮॥
বিষয়েন্দ্রিয়সংয়োগাৎ জায়তে যৎ সুখং তৎ সুখম্
অগ্রে প্রথমক্ষণে অমৃতোপমং অমৃতসমম্, পরিণামে
বিষমিব, বলবীর্যরূপপ্রজ্ঞামেধাধনোৎসাহহানিহেতুৎবাৎ
অধর্মতজ্জনিতনরকাদিহেতুৎবাচ্চ পরিণামে তদুপভোগপরিণামান্তে
বিষমিব, তৎ সুখং রাজসং স্মৃতম্ ॥
যদগ্রে চানুবন্ধে চ সুখং মোহনমাত্মনঃ ।
নিদ্রালস্যপ্রমাদোত্থং তত্তামসমুদাহৃতম্ ॥ ১৮-৩৯॥
যৎ অগ্রে চ অনুবন্ধে চ অবসানোত্তরকালে চ সুখং মোহনং মোহকরম্
আত্মনঃ নিদ্রালস্যপ্রমাদোত্থং নিদ্রা চ আলস্যং চ প্রমাদশ্চ তেভ্যঃ
সমুত্তিষ্ঠতীতি নিদ্রালস্যপ্রমাদোত্থম্, তৎ তামসং উদাহৃতম্ ॥
অথ ইদানীং প্রকরণোপসংহারার্থঃ শ্লোকঃ আরভ্যতে –
ন তদস্তি পৃথিব্যাং বা দিবি দেবেষু বা পুনঃ ।
সত্ত্বং প্রকৃতিজৈর্মুক্তং যদেভিঃ স্যাত্ত্রিভির্গুণৈঃ ॥ ১৮-৪০॥
ন তৎ অস্তি তৎ নাস্তি পৃথিব্যাং বা মনুষ্যাদিষু সত্ত্বং প্রাণিজাতম্
অন্যদ্বা অপ্রাণি, দিবি দেবেষু বা পুনঃ সত্ত্বম্, প্রকৃতিজৈঃ প্রকৃতিতঃ
জাতৈঃ এভিঃ ত্রিভিঃ গুণৈঃ সত্ত্বাদিভিঃ মুক্তং পরিত্যক্তং যৎ স্যাৎ,
ন তৎ অস্তি ইতি পূর্বেণ সংবন্ধঃ ॥
সর্বঃ সংসারঃ ক্রিয়াকারকফললক্ষণঃ সত্ত্বরজস্তমোগুণাত্মকঃ
অবিদ্যাপরিকল্পিতঃ সমূলঃ অনর্থঃ উক্তঃ, বৃক্ষরূপকল্পনয়া
চ “ঊর্ধ্বমূলম্” (ভ. গী. ১৫-১)ইত্যাদিনা, “তং চ
অসঙ্গশস্ত্রেণ দৃঢেন চ্ছিত্ত্বা ততঃ পদং তৎপরিমার্গিতব্যম্”
(ভ. গী. ১৫-৩), (ভ. গী. ১৫-৪) ইতি চ উক্তম্ । তত্র চ সর্বস্য
ত্রিগুণাত্মকৎবাৎ সংসারকারণনিবৃত্ত্যনুপপত্তৌ প্রাপ্তায়াম্, যথা
তন্নিবৃত্তিঃ স্যাৎ তথা বক্তব্যম্, সর্বশ্চ গীতাশাস্ত্রার্থঃ
উপসংহর্তব্যঃ, এতাবানেব চ সর্ববেদস্মৃত্যর্থঃ পুরুষার্থম্
ইচ্ছদ্ভিঃ অনুষ্ঠেয়ঃ ইত্যেবমর্থং “ব্রাহ্মণক্ষত্রিয়বিশাম্”
ইত্যাদিঃ আরভ্যতে –
ব্রাহ্মণক্ষত্রিয়বিশাং শূদ্রাণাং চ পরংতপ ।
কর্মাণি প্রবিভক্তানি স্বভাবপ্রভবৈর্গুণৈঃ ॥ ১৮-৪১॥
ব্রাহ্মণাশ্চ ক্ষত্রিয়াশ্চ বিশশ্চ ব্রাহ্মণক্ষত্রিয়বিশঃ, তেষাং
ব্রাহ্মণক্ষত্রিয়বিশাং শূদ্রাণাং চ – শূদ্রাণাং অসমাসকরণম্
একজাতিৎবে সতি বেদানধিকারাৎ – হে পরংতপ, কর্মাণি প্রবিভক্তানি
ইতরেতরবিভাগেন ব্যবস্থাপিতানি । কেন? স্বভাবপ্রভবৈঃ গুণৈঃ,
স্বভাবঃ ঈশ্বরস্য প্রকৃতিঃ ত্রিগুণাত্মিকা মায়া সা প্রভবঃ
যেষাং গুণানাং তে স্বভাবপ্রভবাঃ, তৈঃ, শমাদীনি কর্মাণি
প্রবিভক্তানি ব্রাহ্মণাদীনাম্ । অথবা ব্রাহ্মণস্বভাবস্য সত্ত্বগুণঃ
প্রভবঃ কারণম্, তথা ক্ষত্রিয়স্বভাবস্য সত্ত্বোপসর্জনং
রজঃ প্রভবঃ, বৈশ্যস্বভাবস্য তমউপসর্জনং রজঃ
প্রভবঃ, শূদ্রস্বভাবস্য রজউপসর্জনং তমঃ প্রভবঃ,
প্রশান্ত্যৈশ্বর্যেহামূঢতাস্বভাবদর্শনাৎ চতুর্ণাম্ । অথবা,
জন্মান্তরকৃতসংস্কারঃ প্রাণিনাং বর্তমানজন্মনি স্বকার্যাভিমুখৎবেন
অভিব্যক্তঃ স্বভাবঃ, সঃ প্রভবো যেষাং গুণানাং তে স্বভাবপ্রভবাঃ
গুণাঃ; গুণপ্রাদুর্ভাবস্য নিষ্কারণৎবানুপপত্তেঃ । “স্বভাবঃ
কারণম্” ইতি চ কারণবিশেষোপাদানম্ । এবং স্বভাবপ্রভবৈঃ
প্রকৃতিভবৈঃ সত্ত্বরজস্তমোভিঃ গুণৈঃ স্বকার্যানুরূপেণ শমাদীনি
কর্মাণি প্রবিভক্তানি ॥
ননু শাস্ত্রপ্রবিভক্তানি শাস্ত্রেণ বিহিতানি ব্রাহ্মণাদীনাং শমাদীনি
কর্মাণি; কথং উচ্যতে সত্ত্বাদিগুণপ্রবিভক্তানি ইতি? নৈষ দোষঃ;
শাস্ত্রেণাপি ব্রাহ্মণাদীনাং সত্ত্বাদিগুণবিশেষাপেক্ষয়ৈব শমাদীনি
কর্মাণি প্রবিভক্তানি, ন গুণানপেক্ষয়া, ইতি শাস্ত্রপ্রবিভক্তান্যপি
কর্মাণি গুণপ্রবিভক্তানি ইতি উচ্যতে ॥
কানি পুনঃ তানি কর্মাণি ইতি, উচ্যতে –
শমো দমস্তপঃ শৌচং ক্ষান্তিরার্জবমেব চ ।
জ্ঞানং বিজ্ঞানমাস্তিক্যং ব্রহ্মকর্ম স্বভাবজম্ ॥ ১৮-৪২॥
শমঃ দমশ্চ যথাব্যাখ্যাতার্থৌ, তপঃ যথোক্তং শারীরাদি,
শৌচং ব্যাখ্যাতম্, ক্ষান্তিঃ ক্ষমা, আর্জবং ঋজুতা এব চ জ্ঞানং
বিজ্ঞানম্, আস্তিক্যং আস্তিকভাবঃ শ্রদ্দধানতা আগমার্থেষু, ব্রহ্মকর্ম
ব্রাহ্মণজাতেঃ কর্ম স্বভাবজং – যৎ উক্তং স্বভাবপ্রভবৈর্গুণৈঃ
প্রবিভক্তানি ইতি তদেবোক্তং স্বভাবজং ইতি ॥
শৌর্যং তেজো ধৃতির্দাক্ষ্যং যুদ্ধে চাপ্যপলায়নম্ ।
দানমীশ্বরভাবশ্চ ক্ষাত্রং কর্ম স্বভাবজম্ ॥ ১৮-৪৩॥
শৌর্যং শূরস্য ভাবঃ, তেজঃ প্রাগল্ভ্যম্, ধৃতিঃ ধারণম্,
সর্বাবস্থাসু অনবসাদঃ ভবতি যয়া ধৃত্যা উত্তম্ভিতস্য,
দাক্ষ্যং দক্ষস্য ভাবঃ, সহসা প্রত্যুৎপন্নেষু কার্যেষু অব্যামোহেন
প্রবৃত্তিঃ, যুদ্ধে চাপি অপলায়নং অপরাঙ্মুখীভাবঃ শত্রুভ্যঃ,
দানং দেয়দ্রব্যেষু মুক্তহস্ততা, ঈশ্বরভাবশ্চ ঈশ্বরস্য ভাবঃ,
প্রভুশক্তিপ্রকটীকরণং ঈশিতব্যান্ প্রতি, ক্ষাত্রং কর্ম ক্ষত্রিয়জাতেঃ
বিহিতং কর্ম ক্ষাত্রং কর্ম স্বভাবজম্ ॥
কৃষিগৌরক্ষ্যবাণিজ্যং বৈশ্যকর্ম স্বভাবজম্ ।
পরিচর্যাত্মকং কর্ম শূদ্রস্যাপি স্বভাবজম্ ॥ ১৮-৪৪॥
কৃষিগৌরক্ষ্যবাণিজ্যং কৃষিশ্চ গৌরক্ষ্যং চ বাণিজ্যং চ
কৃষিগৌরক্ষ্যবাণিজ্যম্, কৃষিঃ ভূমেঃ বিলেখনম্, গৌরক্ষ্যং গাঃ
রক্ষতীতি গোরক্ষঃ তস্য ভাবঃ গৌরক্ষ্যম্, পাশুপাল্যং ইত্যর্থঃ,
বাণিজ্যং বণিক্কর্ম ক্রয়বিক্রয়াদিলক্ষণং বৈশ্যকর্ম বৈশ্যজাতেঃ
কর্ম বৈশ্যকর্ম স্বভাবজম্ । পরিচর্যাত্মকং শুশ্রূষাস্বভাবং
কর্ম শূদ্রস্যাপি স্বভাবজম্ ॥
এতেষাং জাতিবিহিতানাং কর্মণাং সম্যগনুষ্ঠিতানাং
স্বর্গপ্রাপ্তিঃ ফলং স্বভাবতঃ, ”বর্ণা আশ্রমাশ্চ
স্বকর্মনিষ্ঠাঃ প্রেত্য কর্মফলমনুভূয় ততঃ শেষেণ
বিশিষ্টদেশজাতিকুলধর্মায়ুঃশ্রুতবৃত্তবিত্তসুখমেধসো জন্ম
প্রতিপদ্যন্তে” (গৌ. ধ. ২-২-২৯), (মৈ. গৌ. ধ. ১১-৩১)
ইত্যাদিস্মৃতিভ্যঃ; পুরাণে চ বর্ণিনাং আশ্রমিণাং চ
লোকফলভেদবিশেষস্মরণাৎ । কারণান্তরাত্তু ইদং বক্ষ্যমাণং
ফলং –
স্বে স্বে কর্মণ্যভিরতঃ সংসিদ্ধিং লভতে নরঃ ।
স্বকর্মনিরতঃ সিদ্ধিং যথা বিন্দতি তচ্ছৃণু ॥ ১৮-৪৫॥
স্বে স্বে যথোক্তলক্ষণভেদে কর্মণি অভিরতঃ তৎপরঃ
সংসিদ্ধিং স্বকর্মানুষ্ঠানাৎ অশুদ্ধিক্ষয়ে সতি কার্যেন্দ্রিয়াণাং
জ্ঞাননিষ্ঠায়োগ্যতালক্ষণাং সংসিদ্ধিং লভতে প্রাপ্নোতি নরঃ
অধিকৃতঃ পুরুষঃ; কিং স্বকর্মানুষ্ঠানত এব সাক্ষাৎ সংসিদ্ধিঃ? ন;
কথং তর্হি? স্বকর্মনিরতঃ সিদ্ধিং যথা যেন প্রকারেণ বিন্দতি,
তৎ শৃণু ॥
যতঃ প্রবৃত্তির্ভূতানাং যেন সর্বমিদং ততম্ ।
স্বকর্মণা তমভ্যর্চ্য সিদ্ধিং বিন্দতি মানবঃ ॥ ১৮-৪৬॥
যতঃ যস্মাৎ প্রবৃত্তিঃ উৎপত্তিঃ চেষ্টা বা যস্মাৎ অন্তর্যামিণঃ ঈশ্বরাৎ
ভূতানাং প্রাণিনাং স্যাৎ, যেন ঈশ্বরেণ সর্বং ইদং ততং জগৎ ব্যাপ্তম্
স্বকর্মণা পূর্বোক্তেন প্রতিবর্ণং তং ঈশ্বরং অভ্যর্চ্য পূজয়িৎবা
আরাধ্য কেবলং জ্ঞাননিষ্ঠায়োগ্যতালক্ষণাং সিদ্ধিং বিন্দতি মানবঃ
মনুষ্যঃ ॥
যতঃ এবম্, অতঃ –
শ্রেয়ান্স্বধর্মো বিগুণঃ পরধর্মাৎস্বনুষ্ঠিতাৎ ।
স্বভাবনিয়তং কর্ম কুর্বন্নাপ্নোতি কিল্বিষম্ ॥ ১৮-৪৭॥
শ্রেয়ান্ প্রশস্যতরঃ স্বো ধর্মঃ স্বধর্মঃ, বিগুণোঽপি ইতি অপিশব্দো
দ্রষ্টব্যঃ, পরধর্মাৎ । স্বভাবনিয়তং স্বভাবেন নিয়তম্, যদুক্তং
স্বভাবজমিতি, তদেবোক্তং স্বভাবনিয়তং ইতি; যথা বিষজাতস্য
কৃমেঃ বিষং ন দোষকরম্, তথা স্বভাবনিয়তং কর্ম কুর্বন্ ন
আপ্নোতি কিল্বিষং পাপম্ ॥
স্বভাবনিয়তং কর্ম কুর্বাণো বিষজঃ ইব কৃমিঃ কিল্বিষং ন আপ্নোতীতি
উক্তম্; পরধর্মশ্চ ভয়াবহঃ ইতি, অনাত্মজ্ঞশ্চ “ন হি
কশ্চিৎক্ষণমপি অকর্মকৃত্তিষ্ঠতি” (ভ. গী. ৩-৫) ইতি ।
অতঃ –
সহজং কর্ম কৌন্তেয় সদোষমপি ন ত্যজেৎ ।
সর্বারম্ভা হি দোষেণ ধূমেনাগ্নিরিবাবৃতাঃ ॥ ১৮-৪৮॥
সহজং সহ জন্মনৈব উৎপন্নম্ । কিং তৎ? কর্ম কৌন্তেয় সদোষমপি
ত্রিগুণাত্মকৎবাৎ ন ত্যজেৎ । সর্বারম্ভাঃ আরভ্যন্ত ইতি আরম্ভাঃ,
সর্বকর্মাণি ইত্যেতৎ; প্রকরণাৎ যে কেচিৎ আরম্ভাঃ স্বধর্মাঃ
পরধর্মাশ্চ, তে সর্বে হি যস্মাৎ – ত্রিগুণাত্মকৎবং অত্র হেতুঃ –
ত্রিগুণাত্মকৎবাৎ দোষেণ ধূমেন সহজেন অগ্নিরিব, আবৃতাঃ । সহজস্য
কর্মণঃ স্বধর্মাখ্যস্য পরিত্যাগেন পরধর্মানুষ্ঠানেঽপি দোষাৎ
নৈব মুচ্যতে; ভয়াবহশ্চ পরধর্মঃ । ন চ শক্যতে অশেষতঃ
ত্যক্তুং অজ্ঞেন কর্ম যতঃ, তস্মাৎ ন ত্যজেৎ ইত্যর্থঃ ॥
কিং অশেষতঃ ত্যক্তুং অশক্যং কর্ম ইতি ন ত্যজেৎ? কিং বা সহজস্য
কর্মণঃ ত্যাগে দোষো ভবতীতি? কিং চ অতঃ? যদি তাবৎ অশেষতঃ
ত্যক্তুং অশক্যং ইতি ন ত্যাজ্যং সহজং কর্ম, এবং তর্হি অশেষতঃ
ত্যাগে গুণ এব স্যাদিতি সিদ্ধং ভবতি । সত্যং এবম্; অশেষতঃ ত্যাগ
এব ন উপপদ্যতে ইতি চেৎ, কিং নিত্যপ্রচলিতাত্মকঃ পুরুষঃ, যথা
সাংখ্যানাং গুণাঃ? কিং বা ক্রিয়ৈব কারকম্, যথা বৌদ্ধানাং স্কন্ধাঃ
ক্ষণপ্রধ্বংসিনঃ? উভয়থাপি কর্মণঃ অশেষতঃ ত্যাগঃ ন সংভবতি ।
অথ তৃতীয়োঽপি পক্ষঃ – যদা করোতি তদা সক্রিয়ং বস্তু । যদা ন
করোতি, তদা নিষ্ক্রিয়ং তদেব । তত্র এবং সতি শক্যং কর্ম অশেষতঃ
ত্যক্তুম্ । অয়ং তু অস্মিন্ তৃতীয়ে পক্ষে বিশেষঃ – ন নিত্যপ্রচলিতং
বস্তু, নাপি ক্রিয়ৈব কারকম্ । কিং তর্হি? ব্যবস্থিতে দ্রব্যে অবিদ্যমানা
ক্রিয়া উৎপদ্যতে, বিদ্যমানা চ বিনশ্যতি । শুদ্ধং তৎ দ্রব্যং শক্তিমৎ
অবতিষ্ঠতে । ইতি এবং আহুঃ কাণাদাঃ । তদেব চ কারকং ইতি । অস্মিন্
পক্ষে কো দোষঃ ইতি । অয়মেব তু দোষঃ – যতস্তু অভাগবতং মতং ইদম্ ।
কথং জ্ঞায়তে? যতঃ আহ ভগবান্ “নাসতো বিদ্যতে ভাবঃ”
(ভ. গী. ২-১৬) ইত্যাদি । কাণাদানাং হি অসতঃ ভাবঃ, সতশ্চ অভাবঃ,
ইতি ইদং মতং অভাগবতম্ । অভাগবতমপি ন্যায়বচ্চেৎ কো দোষঃ ইতি
চেৎ, উচ্যতে – দোষবত্তু ইদম্, সর্বপ্রমাণবিরোধাৎ । কথম্? যদি
তাবৎ দ্ব্যণুকাদি দ্রব্যং প্রাক্ উৎপত্তেঃ অত্যন্তমেব অসৎ, উৎপন্নং
চ স্থিতং কংচিৎ কালং পুনঃ অত্যন্তমেব অসত্ত্বং আপদ্যতে, তথা
চ সতি অসদেব সৎ জায়তে, সদেব অসত্ত্বং আপদ্যতে, অভাবঃ ভাবো
ভবতি, ভাবশ্চ অভাবো ভবতি; তত্র অভাবঃ জায়মানঃ প্রাক্ উৎপত্তেঃ
শশবিষাণকল্পঃ সমবায়্যসমবায়িনিমিত্তাখ্যং কারণং অপেক্ষ্য জায়তে
ইতি । ন চ এবং অভাবঃ উৎপদ্যতে, কারণং চ অপেক্ষতে ইতি শক্যং
বক্তুম্, অসতাং শশবিষাণাদীনাং অদর্শনাৎ । ভাবাত্মকাশ্চেৎ ঘটাদয়ঃ
উৎপদ্যমানাঃ, কিংচিৎ অভিব্যক্তিমাত্রে কারণং অপেক্ষ্য উৎপদ্যন্তে ইতি
শক্যং প্রতিপত্তুম্ । কিংচ, অসতশ্চ সতশ্চ সদ্ভাবে অসদ্ভাবে ন
ক্বচিৎ প্রমাণপ্রমেয়ব্যবহারেষু বিশ্বাসঃ কস্যচিৎ স্যাৎ, “সৎ
সদেব অসৎ অসদেব” ইতি নিশ্চয়ানুপপত্তেঃ ॥
কিংচ, উৎপদ্যতে ইতি দ্ব্যণুকাদেঃ দ্রব্যস্য স্বকারণসত্তাসংবন্ধং আহুঃ ।
প্রাক্ উৎপত্তেশ্চ অসৎ, পশ্চাৎ কারণব্যাপারং অপেক্ষ্য স্বকারণৈঃ
পরমাণুভিঃ সত্তয়া চ সমবায়লক্ষণেন সংবন্ধেন সংবধ্যতে ।
সংবদ্ধং সৎ কারণসমবেতং সৎ ভবতি । তত্র বক্তব্যং কথং অসতঃ
স্বং কারণং ভবেৎ সংবন্ধো বা কেনচিৎ স্যাৎ? ন হি বন্ধ্যাপুত্রস্য
স্বং কারণং সংবন্ধো বা কেনচিৎ প্রমাণতঃ কল্পয়িতুং শক্যতে ॥
ননু নৈবং বৈশেষিকৈঃ অভাবস্য সংবন্ধঃ কল্প্যতে । দ্ব্যণুকাদীনাং
হি দ্রব্যাণাং স্বকারণসমবায়লক্ষণঃ সংবন্ধঃ সতামেব উচ্যতে
ইতি । ন; সংবন্ধাৎ প্রাক্ সত্ত্বানভ্যুপগমাৎ । ন হি বৈশেষিকৈঃ
কুলালদণ্ডচক্রাদিব্যাপারাৎ প্রাক্ ঘটাদীনাং অস্তিৎবং ইষ্যতে । ন চ
মৃদ এব ঘটাদ্যাকারপ্রাপ্তিং ইচ্ছন্তি । ততশ্চ অসত এব সংবন্ধঃ
পারিশেষ্যাৎ ইষ্টো ভবতি ॥ ননু অসতোঽপি সমবায়লক্ষণঃ সংবন্ধঃ
ন বিরুদ্ধঃ ।
ন; বন্ধ্যাপুত্রাদীনাং অদর্শনাৎ । ঘটাদেরেব প্রাগভাবস্য
স্বকারণসংবন্ধো ভবতি ন বন্ধ্যাপুত্রাদেঃ, অভাবস্য তুল্যৎবেঽপি ইতি
বিশেষঃ অভাবস্য বক্তব্যঃ । একস্য অভাবঃ, দ্বয়োঃ অভাবঃ, সর্বস্য
অভাবঃ, প্রাগভাবঃ, প্রধ্বংসাভাবঃ, ইতরেতরাভাবঃ, অত্যন্তাভাবঃ ইতি
লক্ষণতো ন কেনচিৎ বিশেষো দর্শয়িতুং শক্যঃ । অসতি চ বিশেষে
ঘটস্য প্রাগভাবঃ এব কুলালাদিভিঃ ঘটভাবং আপদ্যতে সংবধ্যতে
চ ভাবেন কপালাখ্যেন, সংবদ্ধশ্চ সর্বব্যবহারয়োগ্যশ্চ
ভবতি, ন তু ঘটস্যৈব প্রধ্বংসাভাবঃ অভাবৎবে সত্যপি, ইতি
প্রধ্বংসাদ্যভাবানাং ন ক্বচিৎ ব্যবহারয়োগ্যৎবম্, প্রাগভাবস্যৈব
দ্ব্যণুকাদিদ্রব্যাখ্যস্য উৎপত্ত্যাদিব্যবহারার্হৎবং ইত্যেতৎ অহমঞ্জসম্;
অভাবৎবাবিশেষাৎ অত্যন্তপ্রধ্বংসাভাবয়োরিব ॥
ননু নৈব অস্মাভিঃ প্রাগভাবস্য ভাবাপত্তিঃ উচ্যতে । ভাবস্যৈব
তর্হি ভাবাপত্তিঃ; যথা ঘটস্য ঘটাপত্তিঃ, পটস্য বা পটাপত্তিঃ ।
এতদপি অভাবস্য ভাবাপত্তিবদেব প্রমাণবিরুদ্ধম্ । সাংখ্যস্যাপি
যঃ পরিণামপক্ষঃ সোঽপি অপূর্বধর্মোৎপত্তিবিনাশাঙ্গীকরণাৎ
বৈশেষিকপক্ষাৎ ন বিশিষ্যতে । অভিব্যক্তিতিরোভাবাঙ্গীকরণেঽপি
অভিব্যক্তিতিরোভাবয়োঃ বিদ্যমানৎবাবিদ্যমানৎবনিরূপণে পূর্ববদেব
প্রমাণবিরোধঃ । এতেন কারণস্যৈব সংস্থানং উৎপত্ত্যাদি ইত্যেতদপি
প্রত্যুক্তম্ ॥
পারিশেষ্যাৎ সৎ একমেব বস্তু অবিদ্যযা উৎপত্তিবিনাশাদিধর্মৈঃ অনেকধা
নটবৎ বিকল্প্যতে ইতি । ইদং ভাগবতং মতং উক্তং “নাসতো
বিদ্যতে ভাবঃ” (ভ. গী. ২-১৬) ইত্যস্মিন্ শ্লোকে, সৎপ্রত্যযস্য
অব্যভিচারাৎ, ব্যভিচারাচ্চ ইতরেষামিতি ॥
কথং তর্হি আত্মনঃ অবিক্রিয়ৎবে অশেষতঃ কর্মণঃ ত্যাগঃ ন
উপপদ্যতে ইতি? যদি বস্তুভূতাঃ গুণাঃ, যদি বা অবিদ্যাকল্পিতাঃ,
তদ্ধর্মঃ কর্ম, তদা আত্মনি অবিদ্যাধ্যারোপিতমেব ইতি অবিদ্বান্ “ন
হি কশ্চিৎ ক্ষণমপি অশেষতঃ ত্যক্তুং শক্নোতি” (ভ. গী. ৩-৫)
ইতি উক্তম্ । বিদ্বাংস্তু পুনঃ বিদ্যযা অবিদ্যায়াং নিবৃত্তায়াং শক্নোত্যেব
অশেষতঃ কর্ম পরিত্যক্তুম্, অবিদ্যাধ্যারোপিতস্য শেষানুপপত্তেঃ । ন হি
তৈমিরিকদৃষ্ট্যা অধ্যারোপিতস্য দ্বিচন্দ্রাদেঃ তিমিরাপগমেঽপি শেষঃ
অবতিষ্ঠতে । এবং চ সতি ইদং বচনং উপপন্নং “সর্বকর্মাণি
মনসা” (ভ. গী. ৫-১৩) ইত্যাদি, “স্বে স্বে কর্মণ্যভিরতঃ
সংসিদ্ধিং লভতে নরঃ” (ভ. গী. ১৮-৪৫) “স্বকর্মণা
তমভ্যর্চ্য সিদ্ধিং বিন্দতি মানবঃ” (ভ. গী. ১৮-৪৬) ইতি চ ॥
যা কর্মজা সিদ্ধিঃ উক্তা জ্ঞাননিষ্ঠায়োগ্যতালক্ষণা, তস্যাঃ ফলভূতা
নৈষ্কর্ম্যসিদ্ধিঃ জ্ঞাননিষ্ঠালক্ষণা চ বক্তব্যেতি শ্লোকঃ
আরভ্যতে –
অসক্তবুদ্ধিঃ সর্বত্র জিতাত্মা বিগতস্পৃহঃ ।
নৈষ্কর্ম্যসিদ্ধিং পরমাং সংন্যাসেনাধিগচ্ছতি ॥ ১৮-৪৯॥
অসক্তবুদ্ধিঃ অসক্তা সঙ্গরহিতা বুদ্ধিঃ অন্তঃকরণং যস্য সঃ
অসক্তবুদ্ধিঃ সর্বত্র পুত্রদারাদিষু আসক্তিনিমিত্তেষু, জিতাত্মা জিতঃ
বশীকৃতঃ আত্মা অন্তঃকরণং যস্য সঃ জিতাত্মা, বিগতস্পৃহঃ বিগতা
স্পৃহা তৃষ্ণা দেহজীবিতভোগেষু যস্মাৎ সঃ বিগতস্পৃহঃ, যঃ
এবংভূতঃ আত্মজ্ঞঃ সঃ নৈষ্কর্ম্যসিদ্ধিং নির্গতানি কর্মাণি যস্মাৎ
নিষ্ক্রিয়ব্রহ্মাত্মসংবোধাৎ সঃ নিষ্কর্মা তস্য ভাবঃ নৈষ্কর্ম্যম্,
নৈষ্কর্ম্যং চ তৎ সিদ্ধিশ্চ সা নৈষ্কর্ম্যসিদ্ধিঃ, নিষ্কর্মৎবস্য
বা নিষ্ক্রিয়াত্মরূপাবস্থানলক্ষণস্য সিদ্ধিঃ নিষ্পত্তিঃ, তাং
নৈষ্কর্ম্যসিদ্ধিং পরমাং প্রকৃষ্টাং কর্মজসিদ্ধিবিলক্ষণাং
সদ্যোমুক্ত্যবস্থানরূপাং সংন্যাসেন সম্যগ্দর্শনেন তৎপূর্বকেণ
বা সর্বকর্মসংন্যাসেন, অধিগচ্ছতি প্রাপ্নোতি । তথা চ উক্তং –
“সর্বকর্মাণি মনসা সংন্যস্য নৈব কুর্বন্ন কারয়ন্নাস্তে”
(ভ. গী. ৫-১৩) ইতি ॥
পূর্বোক্তেন স্বকর্মানুষ্ঠানেন ঈশ্বরাভ্যর্চনরূপেণ জনিতাং
প্রাগুক্তলক্ষণাং সিদ্ধিং প্রাপ্তস্য উৎপন্নাত্মবিবেকজ্ঞানস্য
কেবলাত্মজ্ঞাননিষ্ঠারূপা নৈষ্কর্ম্যলক্ষণা সিদ্ধিঃ যেন ক্রমেণ
ভবতি, তৎ বক্তব্যমিতি আহ –
সিদ্ধিং প্রাপ্তো যথা ব্রহ্ম তথাপ্নোতি নিবোধ মে ।
সমাসেনৈব কৌন্তেয় নিষ্ঠা জ্ঞানস্য যা পরা ॥ ১৮-৫০॥
সিদ্ধিং প্রাপ্তঃ স্বকর্মণা ঈশ্বরং সমভ্যর্চ্য তৎপ্রসাদজাং
কায়েন্দ্রিয়াণাং জ্ঞাননিষ্ঠায়োগ্যতালক্ষণাং সিদ্ধিং প্রাপ্তঃ – সিদ্ধিং
প্রাপ্তঃ ইতি তদনুবাদঃ উত্তরার্থঃ । কিং তৎ উত্তরম্, যদর্থঃ
অনুবাদঃ ইতি, উচ্যতে – যথা যেন প্রকারেণ জ্ঞাননিষ্ঠারূপেণ ব্রহ্ম
পরমাত্মানং আপ্নোতি, তথা তং প্রকারং জ্ঞাননিষ্ঠাপ্রাপ্তিক্রমং
মে মম বচনাৎ নিবোধ ৎবং নিশ্চয়েন অবধারয় ইত্যেতৎ । কিং
বিস্তরেণ? ন ইতি আহ – সমাসেনৈব সংক্ষেপেণৈব হে কৌন্তেয়, যথা
ব্রহ্ম প্রাপ্নোতি তথা নিবোধেতি । অনেন যা প্রতিজ্ঞাতা ব্রহ্মপ্রাপ্তিঃ,
তাং ইদংতয়া দর্শয়িতুং আহ – “নিষ্ঠা জ্ঞানস্য যা পরা”
ইতি । নিষ্ঠা পর্যবসানং পরিসমাপ্তিঃ ইত্যেতৎ । কস্য? ব্রহ্মজ্ঞানস্য
যা পরা । কীদৃশী সা? যাদৃশং আত্মজ্ঞানম্ । কীদৃক্ তৎ? যাদৃশঃ
আত্মা । কীদৃশঃ সঃ? যাদৃশো ভগবতা উক্তঃ, উপনিষদ্বাক্যৈশ্চ
ন্যায়তশ্চ ॥
ননু বিষয়াকারং জ্ঞানম্ । ন জ্ঞানবিষয়ঃ, নাপি আকারবান্
আত্মা ইষ্যতে ক্বচিৎ । ননু “আদিত্যবর্ণম্”
(শ্বে. উ. ৩-৮) “ভারূপঃ” (ছা. উ. ৩-১৪-২)
“স্বয়ংজ্যোতিঃ” (বৃ. উ. ৪-৩-৯) ইতি আকারবত্ত্বম্
আত্মনঃ শ্রূয়তে । ন; তমোরূপৎবপ্রতিষেধার্থৎবাৎ তেষাং
বাক্যানাং – দ্রব্যগুণাদ্যাকারপ্রতিষেধে আত্মনঃ তমোরূপৎবে প্রাপ্তে
তৎপ্রতিষেধার্থানি“আদিত্যবর্ণম্” (শ্বে. উ. ৩-৮) ইত্যাদীনি
বাক্যানি । “অরূপম্” (ক. উ. ১-৩-১৫) ইতি চ বিশেষতঃ
রূপপ্রতিষেধাৎ । অবিষয়ৎবাচ্চ – “ন সংদৃশে তিষ্ঠতি
রূপমস্য ন চক্ষুষা পশ্যতি কশ্চনৈনম্” (শ্বে. উ. ৪-২০)
“অশব্দমস্পর্শম্” (ক. উ. ১-৩-১৫) ইত্যাদেঃ । তস্মাৎ আত্মাকারং
জ্ঞানং ইতি অনুপপন্নম্ ॥
কথং তর্হি আত্মনঃ জ্ঞানম্? সর্বং হি যদ্বিষয়ং যৎ জ্ঞানম্, তৎ
তদাকারং ভবতি । নিরাকারশ্চ আত্মা ইত্যুক্তম্ ।
জ্ঞানাত্মনোশ্চ উভয়োঃ নিরাকারৎবে কথং তদ্ভাবনানিষ্ঠা ইতি? ন;
অত্যন্তনির্মলৎবাতিস্বচ্ছৎবাতিসূক্ষ্মৎবোপপত্তেঃ আত্মনঃ । বুদ্ধেশ্চ
আত্মবৎ নৈর্মল্যাদ্যুপপত্তেঃ আত্মচৈতন্যাকারাভাসৎবোপপত্তিঃ ।
বুদ্ধ্যাভাসং মনঃ, তদাভাসানি ইন্দ্রিয়াণি, ইন্দ্রিয়াভাসশ্চ দেহঃ ।
অতঃ লৌকিকৈঃ দেহমাত্রে এব আত্মদৃষ্টিঃ ক্রিয়তে ॥
দেহচৈতন্যবাদিনশ্চ লোকায়তিকাঃ “চৈতন্যবিশিষ্টঃ
কায়ঃ পুরুষঃ” ইত্যাহুঃ । তথা অন্যে ইন্দ্রিয়চৈতন্যবাদিনঃ,
অন্যে মনশ্চৈতন্যবাদিনঃ, অন্যে বুদ্ধিচৈতন্যবাদিনঃ ।
ততোঽপি আন্তরং অব্যক্তং অব্যাকৃতাখ্যং অবিদ্যাবস্থং আত্মৎবেন
প্রতিপন্নাঃ কেচিৎ । সর্বত্র বুদ্ধ্যাদিদেহান্তে আত্মচৈতন্যাভাসতা
আত্মভ্রান্তিকারণং ইত্যতশ্চ আত্মবিষয়ং জ্ঞানং ন বিধাতব্যম্ ।
কিং তর্হি? নামরূপাদ্যনাত্মাধ্যারোপণনিবৃত্তিরেব কার্যা,
আত্মচৈতন্যবিজ্ঞানং কার্যম্, অবিদ্যাধ্যারোপিতসর্বপদার্থাকারৈঃ
অবিশিষ্টতয়া দৃশ্যমানৎবাৎ ইতি । অত এব হি বিজ্ঞানবাদিনো
বৌদ্ধাঃ বিজ্ঞানব্যতিরেকেণ বস্ত্বেব নাস্তীতি প্রতিপন্নাঃ,
প্রমাণান্তরনিরপেক্ষতাং চ স্বসংবিদিতৎবাভ্যুপগমেন ।
তস্মাৎ অবিদ্যাধ্যারোপিতনিরাকরণমাত্রং ব্রহ্মণি কর্তব্যম্, ন তু
ব্রহ্মবিজ্ঞানে যত্নঃ, অত্যন্তপ্রসিদ্ধৎবাৎ ।
অবিদ্যাকল্পিতনামরূপবিশেষাকারাপহৃতবুদ্ধীনাং অত্যন্তপ্রসিদ্ধং
সুবিজ্ঞেয়ং আসন্নতরং আত্মভূতমপি, অপ্রসিদ্ধং দুর্বিজ্ঞেয়ং অতিদূরম্
অন্যদিব চ প্রতিভাতি অবিবেকিনাম্ । বাহ্যাকারনিবৃত্তবুদ্ধীনাং তু
লব্ধগুর্বাত্মপ্রসাদানাং ন অতঃ পরং সুখং সুপ্রসিদ্ধং সুবিজ্ঞেয়ং
স্বাসন্নতরম্ অস্তি । তথা চোক্তং – “প্রত্যক্ষাবগমং
ধর্ম্যম্” (ভ. গী. ৯-২) ইত্যাদি ॥
কেচিত্তু পণ্ডিতংমন্যাঃ “নিরাকারৎবাৎ আত্মবস্তু ন
উপৈতি বুদ্ধিঃ । অতঃ দুঃসাধ্যা সম্যগ্জ্ঞাননিষ্ঠা”
ইত্যাহুঃ সত্যম্; এবং গুরুসংপ্রদায়রহিতানাং অশ্রুতবেদান্তানাম্
অত্যন্তবহির্বিষয়াসক্তবুদ্ধীনাং সম্যক্প্রমাণেষু অকৃতশ্রমাণাম্ ।
তদ্বিপরীতানাং তু লৌকিকগ্রাহ্যগ্রাহকদ্বৈতবস্তুনি সদ্বুদ্ধিঃ নিতরাং
দুঃসংপাদা, আত্মচৈতন্যব্যতিরেকেণ বস্ত্বন্তরস্য অনুপলব্ধেঃ,
যথা চ “এতৎ এবমেব, ন অন্যথা” ইতি অবোচাম; উক্তং চ
ভগবতা “যস্যাং জাগ্রতি ভূতানি সা নিশা পশ্যতো মুনেঃ”
(ভ. গী. ২-৬৯) ইতি । তস্মাৎ বাহ্যাকারভেদবুদ্ধিনিবৃত্তিরেব
আত্মস্বরূপাবলম্বনকারণম্ । ন হি আত্মা নাম কস্যচিৎ কদাচিৎ
অপ্রসিদ্ধঃ প্রাপ্যঃ হেয়ঃ উপাদেয়ো বা; অপ্রসিদ্ধে হি তস্মিন্ আত্মনি স্বার্থাঃ
সর্বাঃ প্রবৃত্তয়ঃ ব্যর্থাঃ প্রসজ্যেরন্ । ন চ দেহাদ্যচেতনার্থৎবং
শক্যং কল্পয়িতুম্ । ন চ সুখার্থং সুখম্, দুঃখার্থং দুঃখম্ ।
আত্মাবগত্যবসানার্থৎবাচ্চ সর্বব্যবহারস্য । তস্মাৎ যথা স্বদেহস্য
পরিচ্ছেদায় ন প্রমাণান্তরাপেক্ষা, ততোঽপি আত্মনঃ অন্তরতমৎবাৎ
তদবগতিং প্রতি ন প্রমাণান্তরাপেক্ষা; ইতি আত্মজ্ঞাননিষ্ঠা বিবেকিনাং
সুপ্রসিদ্ধা ইতি সিদ্ধম্ ॥
যেষামপি নিরাকারং জ্ঞানং অপ্রত্যক্ষম্, তেষামপি জ্ঞানবশেনৈব
জ্ঞেয়াবগতিরিতি জ্ঞানং অত্যন্তপ্রসিদ্ধং সুখাদিবদেব ইতি
অভ্যুপগন্তব্যম্ । জিজ্ঞাসানুপপত্তেশ্চ – অপ্রসিদ্ধং চেৎ জ্ঞানম্,
জ্ঞেয়বৎ জিজ্ঞাস্যেত । যথা জ্ঞেয়ং ঘটাদিলক্ষণং জ্ঞানেন জ্ঞাতা
ব্যাপ্তুং ইচ্ছতি, তথা জ্ঞানমপি জ্ঞানান্তরেণ জ্ঞাতব্যং আপ্তুম্
ইচ্ছেৎ । ন এতৎ অস্তি । অতঃ অত্যন্তপ্রসিদ্ধং জ্ঞানম্, জ্ঞাতাপি অত
এব প্রসিদ্ধঃ ইতি । তস্মাৎ জ্ঞানে যত্নো ন কর্তব্যঃ, কিং তু অনাত্মনি
আত্মবুদ্ধিনিবৃত্তাবেব । তস্মাৎ জ্ঞাননিষ্ঠা সুসংপাদ্যা ॥
সা ইয়ং জ্ঞানস্য পরা নিষ্ঠা উচ্যতে, কথং কার্যা ইতি –
বুদ্ধ্যা বিশুদ্ধয়া যুক্তো ধৃত্যাত্মানং নিয়ম্য চ ।
শব্দাদীন্বিষয়াংস্ত্যক্ত্বা রাগদ্বেষৌ ব্যুদস্য চ ॥ ১৮-৫১॥
বুদ্ধ্যা অধ্যবসায়লক্ষণয়া বিশুদ্ধয়া মায়ারহিতয়া যুক্তঃ সংপন্নঃ,
ধৃত্যা ধৈর্যেণ আত্মানং কার্যকরণসংঘাতং নিয়ম্য চ নিয়মনং
কৃৎবা বশীকৃত্য, শব্দাদীন্ শব্দঃ আদিঃ যেষাং তান্ বিষয়ান্
ত্যক্ত্বা, সামর্থ্যাৎ শরীরস্থিতিমাত্রহেতুভূতান্ কেবলান্ মুক্ত্বা ততঃ
অধিকান্ সুখার্থান্ ত্যক্ত্বা ইত্যর্থঃ, শরীরস্থিত্যর্থৎবেন প্রাপ্তেষু
রাগদ্বেষৌ ব্যুদস্য চ পরিত্যজ্য চ ॥
ততঃ –
বিবিক্তসেবী লঘ্বাশী যতবাক্কায়মানসঃ ।
ধ্যানয়োগপরো নিত্যং বৈরাগ্যং সমুপাশ্রিতঃ ॥ ১৮-৫২॥
বিবিক্তসেবী অরণ্যনদীপুলিনগিরিগুহাদীন্ বিবিক্তান্ দেশান্ সেবিতুং
শীলং অস্য ইতি বিবিক্তসেবী, লঘ্বাশী লঘ্বশনশীলঃ –
বিবিক্তসেবালঘ্বশনয়োঃ নিদ্রাদিদোষনিবর্তকৎবেন চিত্তপ্রসাদহেতুৎবাৎ
গ্রহণম্; যতবাক্কায়মানসঃ বাক্ চ কায়শ্চ মানসং চ
যতানি সংয়তানি যস্য জ্ঞাননিষ্ঠস্য সঃ জ্ঞাননিষ্ঠঃ যতিঃ
যতবাক্কায়মানসঃ স্যাৎ । এবং উপরতসর্বকরণঃ সন্ ধ্যানয়োগপরঃ
ধ্যানং আত্মস্বরূপচিন্তনম্, যোগঃ আত্মবিষয়ে একাগ্রীকরণং তৌ
পরৎবেন কর্তব্যৌ যস্য সঃ ধ্যানয়োগপরঃ নিত্যং নিত্যগ্রহণং
মন্ত্রজপাদ্যন্যকর্তব্যাভাবপ্রদর্শনার্থম্, বৈরাগ্যং বিরাগস্য
ভাবঃ দৃষ্টাদৃষ্টেষু বিষয়েষু বৈতৃষ্ণ্যং সমুপাশ্রিতঃ সম্যক্
উপাশ্রিতঃ নিত্যমেব ইত্যর্থঃ ॥
কিংচ –
অহংকারং বলং দর্পং কামং ক্রোধং পরিগ্রহম্ ।
বিমুচ্য নির্মমঃ শান্তো ব্রহ্মভূয়ায় কল্পতে ॥ ১৮-৫৩॥
অহংকারং অহংকরণং অহংকারঃ দেহাদিষু তম্, বলং
সামর্থ্যং কামরাগসংয়ুক্তং – ন ইতরৎ শরীরাদিসামর্থ্যং
স্বাভাবিকৎবেন তত্ত্যাগস্য অশক্যৎবাৎ – দর্পং দর্পো নাম
হর্ষানন্তরভাবী ধর্মাতিক্রমহেতুঃ ”হৃষ্টো দৃপ্যতি দৃপ্তো
ধর্মমতিক্রামতি” (আ. ধ. সূ. ১-১৩-৪) ইতি স্মরণাৎ; তং চ,
কামং ইচ্ছাং ক্রোধং দ্বেষং পরিগ্রহং ইন্দ্রিয়মনোগতদোষপরিত্যাগেঽপি
শরীরধারণপ্রসঙ্গেন ধর্মানুষ্ঠাননিমিত্তেন বা বাহ্যঃ পরিগ্রহঃ
প্রাপ্তঃ, তং চ বিমুচ্য পরিত্যজ্য, পরমহংসপরিব্রাজকো ভূৎবা,
দেহজীবনমাত্রেঽপি নির্গতমমভাবঃ নির্মমঃ, অত এব শান্তঃ
উপরতঃ, যঃ সংহৃতহর্ষায়াসঃ যতিঃ জ্ঞাননিষ্ঠঃ ব্রহ্মভূয়ায়
ব্রহ্মভবনায় কল্পতে সমর্থো ভবতি ॥
অনেন ক্রমেণ –
ব্রহ্মভূতঃ প্রসন্নাত্মা ন শোচতি ন কাঙ্ক্ষতি ।
সমঃ সর্বেষু ভূতেষু মদ্ভক্তিং লভতে পরাম্ ॥ ১৮-৫৪॥
ব্রহ্মভূতঃ ব্রহ্মপ্রাপ্তঃ প্রসন্নাত্মা লব্ধাধ্যাত্মপ্রসাদস্বভাবঃ ন
শোচতি, কিংচিৎ অর্থবৈকল্যং আত্মনঃ বৈগুণ্যং বা উদ্দিশ্য ন শোচতি
ন সংতপ্যতে; ন কাঙ্ক্ষতি, ন হি অপ্রাপ্তবিষয়াকাঙ্ক্ষা ব্রহ্মবিদঃ
উপপদ্যতে; অতঃ ব্রহ্মভূতস্য অয়ং স্বভাবঃ অনূদ্যতে – ন শোচতি
ন কাঙ্ক্ষতি ইতি । “ন হৃষ্যতি” ইতি বা পাঠান্তরম্ । সমঃ
সর্বেষু ভূতেষু, আত্মৌপম্যেন সর্বভূতেষু সুখং দুঃখং বা সমমেব
পশ্যতি ইত্যর্থঃ । ন আত্মসমদর্শনং ইহ, তস্য বক্ষ্যমাণৎবাৎ
“ভক্ত্যা মামভিজানাতি” (ভ. গী. ১৮-৫৫) ইতি । এবংভূতঃ
জ্ঞাননিষ্ঠঃ, মদ্ভক্তিং ময়ি পরমেশ্বরে ভক্তিং ভজনং পরাম্
উত্তমাং জ্ঞানলক্ষণাং চতুর্থীং লভতে,“চতুর্বিধা ভজন্তে
মাম্” (ভ. গী. ৭-১৬) ইতি হি উক্তম্ ॥
ততঃ জ্ঞানলক্ষণয়া –
ভক্ত্যা মামভিজানাতি যাবান্যশ্চাস্মি তত্ত্বতঃ ।
ততো মাং তত্ত্বতো জ্ঞাৎবা বিশতে তদনন্তরম্ ॥ ১৮-৫৫॥
ভক্ত্যা মাং অভিজানাতি যাবান্ অহং উপাধিকৃতবিস্তরভেদঃ, যশ্চ
অহং অস্মি বিধ্বস্তসর্বোপাধিভেদঃ উত্তমঃ পুরুষঃ আকাশকল্পঃ,
তং মাং অদ্বৈতং চৈতন্যমাত্রৈকরসং অজরং অভয়ং অনিধনং
তত্ত্বতঃ অভিজানাতি । ততঃ মাং এবং তত্ত্বতঃ জ্ঞাৎবা বিশতে
তদনন্তরং মামেব জ্ঞানানন্তরম্ । নাত্র জ্ঞানপ্রবেশক্রিয়ে
ভিন্নে বিবক্ষিতে “জ্ঞাৎবা বিশতে তদনন্তরম্” ইতি । কিং
তর্হি? ফলান্তরাভাবাৎ জ্ঞানমাত্রমেব, “ক্ষেত্রজ্ঞং চাপি মাং
বিদ্ধি” (ভ. গী. ১৩-২) ইতি উক্তৎবাৎ ॥
ননু বিরুদ্ধং ইদং উক্তং “জ্ঞানস্য যা পরা নিষ্ঠা তয়া মাম্
অভিজানাতি” ইতি । কথং বিরুদ্ধং ইতি চেৎ, উচ্যতে – যদৈব
যস্মিন্ বিষয়ে জ্ঞানং উৎপদ্যতে জ্ঞাতুঃ, তদৈব তং বিষয়ং অভিজানাতি
জ্ঞাতা ইতি ন জ্ঞাননিষ্ঠাং জ্ঞানবৃত্তিলক্ষণাং অপেক্ষতে ইতি;
অতশ্চ জ্ঞানেন ন অভিজানাতি, জ্ঞানাবৃত্ত্যা তু জ্ঞাননিষ্ঠয়া
অভিজানাতীতি । নৈষ দোষঃ; জ্ঞানস্য স্বাত্মোৎপত্তিপরিপাকহেতুয়ুক্তস্য
প্রতিপক্ষবিহীনস্য যৎ আত্মানুভবনিশ্চয়াবসানৎবং তস্য
নিষ্ঠাশব্দাভিলাপাৎ । শাস্ত্রাচার্যোপদেশেন জ্ঞানোৎপত্তিহেতুং
সহকারিকারণং বুদ্ধিবিশুদ্ধৎবাদি অমানিৎবাদিগুণং
চ অপেক্ষ্য জনিতস্য ক্ষেত্রজ্ঞপরমাত্মৈকৎবজ্ঞানস্য
কর্তৃৎবাদিকারকভেদবুদ্ধিনিবন্ধনসর্বকর্মসংন্যাসসহিতস্য
স্বাত্মানুভবনিশ্চয়রূপেণ যৎ অবস্থানম্, সা পরা জ্ঞাননিষ্ঠা ইতি
উচ্যতে । সা ইয়ং জ্ঞাননিষ্ঠা আর্তাদিভক্তিত্রয়াপেক্ষয়া পরা চতুর্থী
ভক্তিরিতি উক্তা । তয়া পরয়া ভক্ত্যা ভগবন্তং তত্ত্বতঃ অভিজানাতি,
যদনন্তরমেব ঈশ্বরক্ষেত্রজ্ঞভেদবুদ্ধিঃ অশেষতঃ নিবর্ততে । অতঃ
জ্ঞাননিষ্ঠালক্ষণয়া ভক্ত্যা মাং অভিজানাতীতি বচনং ন বিরুধ্যতে ।
অত্র চ সর্বং নিবৃত্তিবিধায়ি শাস্ত্রং
বেদান্তেতিহাসপুরাণস্মৃতিলক্ষণং ন্যায়প্রসিদ্ধং অর্থবৎ ভবতি
– “বিদিৎবা . . . ব্যুত্থায়াথ ভিক্ষাচর্যং চরন্তি”
(বৃ. উ. ৩-৫-১) ”তস্মান্ন্যাসমেষাং তপসামতিরিক্তমাহুঃ”
(তৈ. না. ৭৯) ”ন্যাস এবাত্যরেচয়ৎ” (তৈ. না. ৭৮) ইতি ।
”সংন্যাসঃ কর্মণাং ন্যাসঃ” ”বেদানিমং চ লোকমমুং চ
পরিত্যজ্য” (আ. ধ. ২-৯-১৩) ”ত্যজ ধর্মমধর্মং চ”
(মো. ধ. ৩২৯-৪০) ইত্যাদি । ইহ চ প্রদর্শিতানি বাক্যানি । ন চ তেষাং
বাক্যানাং আনর্থক্যং যুক্তম্; ন চ অর্থবাদৎবম্, স্বপ্রকরণস্থৎবাৎ,
প্রত্যগাত্মাবিক্রিয়স্বরূপনিষ্ঠৎবাচ্চ মোক্ষস্য । ন হি পূর্বসমুদ্রং
জিগমিষোঃ প্রাতিলোম্যেন প্রত্যক্সমুদ্রজিগমিষুণা সমানমার্গৎবং
সংভবতি । প্রত্যগাত্মবিষয়প্রত্যযসংতানকরণাভিনিবেশশ্চ
জ্ঞাননিষ্ঠা; সা চ প্রত্যক্সমুদ্রগমনবৎ কর্মণা সহভাবিৎবেন
বিরুধ্যতে । পর্বতসর্ষপয়োরিব অন্তরবান্ বিরোধঃ প্রমাণবিদাং
নিশ্চিতঃ । তস্মাৎ সর্বকর্মসংন্যাসেনৈব জ্ঞাননিষ্ঠা কার্যা ইতি
সিদ্ধম্ ॥
স্বকর্মণা ভগবতঃ অভ্যর্চনভক্তিয়োগস্য সিদ্ধিপ্রাপ্তিঃ ফলং
জ্ঞাননিষ্ঠায়োগ্যতা, যন্নিমিত্তা জ্ঞাননিষ্ঠা মোক্ষফলাবসানা ।
সঃ ভগবদ্ভক্তিয়োগঃ অধুনা স্তূয়তে শাস্ত্রার্থোপাসংহারপ্রকরণে
শাস্ত্রার্থনিশ্চয়দার্ঢ্যায় –
সর্বকর্মাণ্যপি সদা কুর্বাণো মদ্ব্যপাশ্রয়ঃ ।
মৎপ্রসাদাদবাপ্নোতি শাশ্বতং পদমব্যযম্ ॥ ১৮-৫৬॥
সর্বকর্মাণ্যপি প্রতিষিদ্ধান্যপি সদা কুর্বাণঃ অনুতিষ্ঠন্
মদ্ব্যপাশ্রয়ঃ অহং বাসুদেবঃ ঈশ্বরঃ ব্যপাশ্রয়ো ব্যপাশ্রয়ণং যস্য
সঃ মদ্ব্যপাশ্রয়ঃ ময়্যর্পিতসর্বভাবঃ ইত্যর্থঃ । সোঽপি মৎপ্রসাদাৎ
মম ঈশ্বরস্য প্রসাদাৎ অবাপ্নোতি শাশ্বতং নিত্যং বৈষ্ণবং পদম্
অব্যযম্ ॥
যস্মাৎ এবং –
চেতসা সর্বকর্মাণি ময়ি সংন্যস্য মৎপরঃ ।
বুদ্ধিয়োগমপাশ্রিত্য মচ্চিত্তঃ সততং ভব ॥ ১৮-৫৭॥
চেতসা বিবেকবুদ্ধ্যা সর্বকর্মাণি দৃষ্টাদৃষ্টার্থানি ময়ি ঈশ্বরে
সংন্যস্য “যৎ করোষি যদশ্নাসি” (ভ. গী. ৯-২৭) ইতি
উক্তন্যায়েন, মৎপরঃ অহং বাসুদেবঃ পরো যস্য তব সঃ ৎবং মৎপরঃ
সন্ ময়্যর্পিতসর্বাত্মভাবঃ বুদ্ধিয়োগং সমাহিতবুদ্ধিৎবং বুদ্ধিয়োগঃ
তং বুদ্ধিয়োগং অপাশ্রিত্য অপাশ্রয়ঃ অনন্যশরণৎবং মচ্চিত্তঃ
ময়্যেব চিত্তং যস্য তব সঃ ৎবং মচ্চিত্তঃ সততং সর্বদা ভব ॥
মচ্চিত্তঃ সর্বদুর্গাণি মৎপ্রসাদাত্তরিষ্যসি ।
অথ চেত্ত্বমহংকারান্ন শ্রোষ্যসি বিনঙ্ক্ষ্যসি ॥ ১৮-৫৮॥
মচ্চিত্তঃ সর্বদুর্গাণি সর্বাণি দুস্তরাণি সংসারহেতুজাতানি মৎপ্রসাদাৎ
তরিষ্যসি অতিক্রমিষ্যসি । অথ চেৎ যদি ৎবং মদুক্তং অহংকারাৎ
“পণ্ডিতঃ অহম্” ইতি ন শ্রোষ্যসি ন গ্রহীষ্যসি, ততঃ ৎবং
বিনঙ্ক্ষ্যসি বিনাশং গমিষ্যসি ॥
ইদং চ ৎবয়া ন মন্তব্যং “স্বতন্ত্রঃ অহম্, কিমর্থং পরোক্তং
করিষ্যামি?” ইতি –
যদ্যহংকারমাশ্রিত্য ন যোৎস্য ইতি মন্যসে ।
মিথ্যৈষ ব্যবসায়স্তে প্রকৃতিস্ত্বাং নিয়োক্ষ্যতি ॥ ১৮-৫৯॥
যদি চেৎ ৎবং অহংকারং আশ্রিত্য ন যোৎস্যে ইতি ন যুদ্ধং করিষ্যামি ইতি
মন্যসে চিন্তয়সি নিশ্চয়ং করোষি, মিথ্যা এষঃ ব্যবসায়ঃ নিশ্চয়ঃ
তে তব; যস্মাৎ প্রকৃতিঃ ক্ষত্রিয়স্বভাবঃ ৎবাং নিয়োক্ষ্যতি ॥
যস্মাচ্চ –
স্বভাবজেন কৌন্তেয় নিবদ্ধঃ স্বেন কর্মণা ।
কর্তুং নেচ্ছসি যন্মোহাৎকরিষ্যস্যবশোঽপি তৎ ॥ ১৮-৬০॥
স্বভাবজেন শৌর্যাদিনা যথোক্তেন কৌন্তেয় নিবদ্ধঃ নিশ্চয়েন বদ্ধঃ
স্বেন আত্মীয়েন কর্মণা কর্তুং ন ইচ্ছসি যৎ কর্ম, মোহাৎ অবিবেকতঃ
করিষ্যসি অবশোঽপি পরবশ এব তৎ কর্ম ॥
যস্মাৎ –
ঈশ্বরঃ সর্বভূতানাং হৃদ্দেশেঽর্জুন তিষ্ঠতি ।
ভ্রাময়ন্সর্বভূতানি যন্ত্রারূঢানি মায়যা ॥ ১৮-৬১॥
ঈশ্বরঃ ঈশনশীলঃ নারায়ণঃ সর্বভূতানাং সর্বপ্রাণিনাং হৃদ্দেশে
হৃদয়দেশে অর্জুন শুক্লান্তরাত্মস্বভাবঃ বিশুদ্ধান্তঃকরণঃ –
”অহশ্চ কৃষ্ণমহরর্জুনং চ” (ঋ. মং. ৬-১-৯-১) ইতি
দর্শনাৎ – তিষ্ঠতি স্থিতিং লভতে । তেষু সঃ কথং তিষ্ঠতীতি,
আহ – ভ্রাময়ন্ ভ্রমণং কারয়ন্ সর্বভূতানি যন্ত্রারূঢানি যন্ত্রাণি
আরূঢানি অধিষ্ঠিতানি ইব – ইতি ইবশব্দঃ অত্র দ্রষ্টব্যঃ – যথা
দারুকৃতপুরুষাদীনি যন্ত্রারূঢানি । মায়যা চ্ছদ্মনা ভ্রাময়ন্
তিষ্ঠতি ইতি সংবন্ধঃ ॥
তমেব শরণং গচ্ছ সর্বভাবেন ভারত ।
তৎপ্রসাদাৎপরাং শান্তিং স্থানং প্রাপ্স্যসি শাশ্বতম্ ॥ ১৮-৬২॥
তমেব ঈশ্বরং শরণং আশ্রয়ং সংসারার্তিহরণার্থং গচ্ছ আশ্রয়
সর্বভাবেন সর্বাত্মনা হে ভারত । ততঃ তৎপ্রসাদাৎ ঈশ্বরানুগ্রহাৎ
পরাং প্রকৃষ্টাং শান্তিং উপরতিং স্থানং চ মম বিষ্ণোঃ পরমং
পদং প্রাপ্স্যসি শাশ্বতং নিত্যম্ ॥
ইতি তে জ্ঞানমাখ্যাতং গুহ্যাদ্গুহ্যতরং ময়া ।
বিমৃশ্যৈতদশেষেণ যথেচ্ছসি তথা কুরু ॥ ১৮-৬৩॥
ইতি এতৎ তে তুভ্যং জ্ঞানং আখ্যাতং কথিতং গুহ্যাৎ গোপ্যাৎ গুহ্যতরম্
অতিশয়েন গুহ্যং রহস্যং ইত্যর্থঃ, ময়া সর্বজ্ঞেন ঈশ্বরেণ ।
বিমৃশ্য বিমর্শনং আলোচনং কৃৎবা এতৎ যথোক্তং শাস্ত্রং অশেষেণ
সমস্তং যথোক্তং চ অর্থজাতং যথা ইচ্ছসি তথা কুরু ॥
ভূয়োঽপি ময়া উচ্যমানং শৃণু –
সর্বগুহ্যতমং ভূয়ঃ শৃণু মে পরমং বচঃ ।
ইষ্টোঽসি মে দৃঢমিতি ততো বক্ষ্যামি তে হিতম্ ॥ ১৮-৬৪॥
সর্বগুহ্যতমং সর্বেভ্যঃ গুহ্যেভ্যঃ অত্যন্তগুহ্যতমং অত্যন্তরহস্যম্,
উক্তমপি অসকৃৎ ভূয়ঃ পুনঃ শৃণু মে মম পরমং প্রকৃষ্টং বচঃ
বাক্যম্ । ন ভয়াৎ নাপি অর্থকারণাদ্বা বক্ষ্যামি; কিং তর্হি? ইষ্টঃ প্রিয়ঃ
অসি মে মম দৃঢং অব্যভিচারেণ ইতি কৃৎবা ততঃ তেন কারণেন
বক্ষ্যামি কথয়িষ্যামি তে তব হিতং পরমং জ্ঞানপ্রাপ্তিসাধনম্,
তদ্ধি সর্বহিতানাং হিততমম্ ॥
কিং তৎ ইতি, আহ –
মন্মনা ভব মদ্ভক্তো মদ্যাজী মাং নমস্কুরু ।
মামেবৈষ্যসি সত্যং তে প্রতিজানে প্রিয়োঽসি মে ॥ ১৮-৬৫॥
মন্মনাঃ ভব মচ্চিত্তঃ ভব । মদ্ভক্তঃ ভব মদ্ভজনো ভব ।
মদ্যাজী মদ্যজনশীলো ভব । মাং নমস্কুরু নমস্কারং অপি মমৈব কুরু ।
তত্র এবং বর্তমানঃ বাসুদেবে এব সমর্পিতসাধ্যসাধনপ্রয়োজনঃ
মামেব এষ্যসি আগমিষ্যসি । সত্যং তে তব প্রতিজানে, সত্যাং প্রতিজ্ঞাং
করোমি এতস্মিন্ বস্তুনি ইত্যর্থঃ; যতঃ প্রিয়ঃ অসি মে । এবং ভগবতঃ
সত্যপ্রতিজ্ঞৎবং বুদ্ধ্বা ভগবদ্ভক্তেঃ অবশ্যংভাবি মোক্ষফলম্
অবধার্য ভগবচ্ছরণৈকপরায়ণঃ ভবেৎ ইতি বাক্যার্থঃ ॥
কর্ময়োগনিষ্ঠায়াঃ পরমরহস্যং ঈশ্বরশরণতাং উপসংহৃত্য, অথ
ইদানীং কর্ময়োগনিষ্ঠাফলং সম্যগ্দর্শনং সর্ববেদান্তসারবিহিতং
বক্তব্যমিতি আহ –
সর্বধর্মান্পরিত্যজ্য মামেকং শরণং ব্রজ ।
অহং ৎবা সর্বপাপেভ্যো মোক্ষয়িষ্যামি মা শুচঃ ॥ ১৮-৬৬॥
সর্বধর্মান্ সর্বে চ তে ধর্মাশ্চ সর্বধর্মাঃ তান্ – ধর্মশব্দেন
অত্র অধর্মোঽপি গৃহ্যতে, নৈষ্কর্ম্যস্য বিবক্ষিতৎবাৎ,“নাবিরতো
দুশ্চরিতাৎ” (ক. উ. ১-২-২৪) ”ত্যজ ধর্মমধর্মং
চ” (মো. ধ. ৩২৯-৪০) ইত্যাদিশ্রুতিস্মৃতিভ্যঃ – সর্বধর্মান্
পরিত্যজ্য সংন্যস্য সর্বকর্মাণি ইত্যেতৎ । মাং একং সর্বাত্মানং সমং
সর্বভূতস্থিতং ঈশ্বরং অচ্যুতং গর্ভজন্মজরামরণবর্জিতম্
“অহমেব” ইত্যেবং শরণং ব্রজ, ন মত্তঃ অন্যৎ অস্তি
ইতি অবধারয় ইত্যর্থঃ । অহং ৎবা ৎবাং এবং নিশ্চিতবুদ্ধিং
সর্বপাপেভ্যঃ সর্বধর্মাধর্মবন্ধনরূপেভ্যঃ মোক্ষয়িষ্যামি
স্বাত্মভাবপ্রকাশীকরণেন । উক্তং চ“নাশয়াম্যাত্মভাবস্থো
জ্ঞানদীপেন ভাস্বতা” (ভ. গী. ১০-১১) ইতি । অতঃ মা শুচঃ
শোকং মা কার্ষীঃ ইত্যর্থঃ ॥
অস্মিন্গীতাশাস্ত্রে পরমনিঃশ্রেয়সসাধনং নিশ্চিতং
কিং জ্ঞানম্, কর্ম বা, আহোস্বিৎ উভয়ম্? ইতি । কুতঃ
সংশয়ঃ?“যজ্জ্ঞাৎবামৃতমশ্নুতে” (ভ. গী. ১৩-১২)
“ততো মাং তত্ত্বতো জ্ঞাৎবা বিশতে তদনন্তরম্”
(ভ. গী. ১৮-৫৫) ইত্যাদীনি বাক্যানি কেবলাজ্জ্ঞানাৎ নিঃশ্রেয়সপ্রাপ্তিং
দর্শয়ন্তি । “কর্মণ্যেবাধিকারস্তে” (ভ. গী. ২-৪৭) “কুরু
কর্মৈব” (ভ. গী. ৪-১৫) ইত্যেবমাদীনি কর্মণামবশ্যকর্তব্যতাং
দর্শয়ন্তি । এবং জ্ঞানকর্মণোঃ কর্তব্যৎবোপদেশাৎ সমুচ্চিতয়োরপি
নিঃশ্রেয়সহেতুৎবং স্যাৎ ইতি ভবেৎ সংশয়ঃ কস্যচিৎ ।
কিং পুনরত্র মীমাংসাফলম্? ননু এতদেব – এষামন্যতমস্য
পরমনিঃশ্রেয়সসাধনৎবাবধারণম্; অতঃ বিস্তীর্ণতরং মীমাংস্যম্
এতৎ ॥
আত্মজ্ঞানস্য তু কেবলস্য নিঃশ্রেয়সহেতুৎবম্,
ভেদপ্রত্যযনিবর্তকৎবেন কৈবল্যফলাবসায়িৎবাৎ ।
ক্রিয়াকারকফলভেদবুদ্ধিঃ অবিদ্যযা আত্মনি নিত্যপ্রবৃত্তা
– “মম কর্ম, অহং কর্তামুষ্মৈ ফলায়েদং কর্ম করিষ্যামি”
ইতি ইয়ং অবিদ্যা অনাদিকালপ্রবৃত্তা ।
অস্যা অবিদ্যায়াঃ নিবর্তকং “অয়মহমস্মি কেবলোঽকর্তা
অক্রিয়োঽফলঃ; ন মত্তোঽন্যোঽস্তি কশ্চিৎ” ইত্যেবংরূপম্
আত্মবিষয়ং জ্ঞানং উৎপদ্যমানম্, কর্মপ্রবৃত্তিহেতুভূতায়াঃ
ভেদবুদ্ধেঃ নিবর্তকৎবাৎ । তু-শব্দঃ পক্ষব্যাবৃত্ত্যর্থঃ –
ন কেবলেভ্যঃ কর্মভ্যঃ, ন চ জ্ঞানকর্মভ্যাং সমুচ্চিতাভ্যাং
নিঃশ্রেয়সপ্রাপ্তিঃ ইতি পক্ষদ্বয়ং নিবর্তয়তি । অকার্যৎবাচ্চ
নিঃশ্রেয়স্য কর্মসাধনৎবানুপপত্তিঃ । ন হি নিত্যং বস্তু
কর্মণা জ্ঞানেন বা ক্রিয়তে । কেবলং জ্ঞানমপি অনর্থকং তর্হি? ন,
অবিদ্যানিবর্তকৎবে সতি দৃষ্টকৈবল্যফলাবসানৎবাৎ ।
অবিদ্যাতমোনিবর্তকস্য জ্ঞানস্য দৃষ্টং কৈবল্যফলাবসানৎবম্,
রজ্জ্বাদিবিষয়ে সর্পাদ্যজ্ঞানতমোনিবর্তকপ্রদীপপ্রকাশফলবৎ ।
বিনিবৃত্তসর্পাদিবিকল্পরজ্জুকৈবল্যাবসানং হি প্রকাশফলম্;
তথা জ্ঞানম্ । দৃষ্টার্থানাং চ চ্ছিদিক্রিয়াগ্নিমন্থনাদীনাং
ব্যাপৃতকর্ত্রাদিকারকাণাং দ্বৈধীভাবাগ্নিদর্শনাদিফলাৎ অন্যফলে
কর্মান্তরে বা ব্যাপারানুপপত্তিঃ যথা, তথা দৃষ্টার্থায়াং
জ্ঞাননিষ্ঠাক্রিয়ায়াং ব্যাপৃতস্য জ্ঞাত্রাদিকারকস্য আত্মকৈবল্যফলাৎ
কর্মান্তরে প্রবৃত্তিঃ অনুপপন্না ইতি ন জ্ঞাননিষ্ঠা কর্মসহিতা
উপপদ্যতে । ভুজ্যগ্নিহোত্রাদিক্রিয়াবৎস্যাৎ ইতি চেৎ, ন; কৈবল্যফলে
জ্ঞানে ক্রিয়াফলার্থিৎবানুপপত্তেঃ । কৈবল্যফলে হি জ্ঞানে প্রাপ্তে,
সর্বতঃসংপ্লুতোদকফলে কূপতটাকাদিক্রিয়াফলার্থিৎবাভাববৎ,
ফলান্তরে তৎসাধনভূতায়াং বা ক্রিয়ায়াং অর্থিৎবানুপপত্তিঃ ।
ন হি রাজ্যপ্রাপ্তিফলে কর্মণি ব্যাপৃতস্য ক্ষেত্রমাত্রপ্রাপ্তিফলে
ব্যাপারঃ উপপদ্যতে, তদ্বিষয়ং বা অর্থিৎবম্ । তস্মাৎ ন কর্মণোঽস্তি
নিঃশ্রেয়সসাধনৎবম্ । ন চ জ্ঞানকর্মণোঃ সমুচ্চিতয়োঃ । নাপি
জ্ঞানস্য কৈবল্যফলস্য কর্মসাহায়্যাপেক্ষা, অবিদ্যানিবর্তকৎবেন
বিরোধাৎ । ন হি তমঃ তমসঃ নিবর্তকম্ । অতঃ কেবলমেব জ্ঞানং
নিঃশ্রেয়সসাধনং ইতি । ন; নিত্যাকরণে প্রত্যবায়প্রাপ্তেঃ, কৈবল্যস্য
চ নিত্যৎবাৎ । যৎ তাবৎ কেবলাজ্জ্ঞানাৎ কৈবল্যপ্রাপ্তিঃ ইত্যেতৎ,
তৎ অসৎ; যতঃ নিত্যানাং কর্মণাং শ্রুত্যুক্তানাং অকরণে প্রত্যবায়ঃ
নরকাদিপ্রাপ্তিলক্ষণঃ স্যাৎ । ননু এবং তর্হি কর্মভ্যো মোক্ষো নাস্তি
ইতি অনির্মোক্ষ এব । নৈষ দোষঃ; নিত্যৎবাৎ মোক্ষস্য । নিত্যানাং
কর্মণাং অনুষ্ঠানাৎ প্রত্যবায়স্য অপ্রাপ্তিঃ, প্রতিষিদ্ধস্য চ অকরণাৎ
অনিষ্ঠশরীরানুপপত্তিঃ, কাম্যানাং চ বর্জনাৎ অনিষ্টাশরীরানুপপত্তিঃ,
বর্তমানশরীরারম্ভকস্য চ কর্মণঃ ফলোপভোগক্ষয়ে পতিতে
অস্মিন্ শরীরে দেহান্তরোৎপত্তৌ চ কারণাভাবাৎ আত্মনঃ রাগাদীনাং
চ অকরণে স্বরূপাবস্থানমেব কৈবল্যমিতি অয়ত্নসিদ্ধং কৈবল্যম্
ইতি । অতিক্রান্তানেকজন্মান্তরকৃতস্য স্বর্গনরকাদিপ্রাপ্তিফলস্য
অনারব্ধকার্যস্য উপভোগানুপপত্তেঃ ক্ষয়াভাবঃ ইতি চেৎ, ন;
নিত্যকর্মানুষ্ঠানায়াসদুঃখোপভোগস্য তৎফলোপভোগৎবোপপত্তেঃ ।
প্রায়শ্চিত্তবদ্বা পূর্বোপাত্তদুরিতক্ষয়ার্থং নিত্যং কর্ম । আরব্ধানাং
চ কর্মণাং উপভোগেনৈব ক্ষীণৎবাৎ অপূর্বাণাং চ কর্মণাং অনারম্ভে
অয়ত্নসিদ্ধং কৈবল্যমিতি । ন; “তমেব বিদিৎবাতিমৃত্যুমেতি নান্যঃ
পন্থা বিদ্যতেঽয়নায়” (শ্বে. উ. ৩-৮) ইতি বিদ্যায়া অন্যঃ পন্থাঃ
মোক্ষায় ন বিদ্যতে ইতি শ্রুতেঃ, চর্মবদাকাশবেষ্টনাসংভববৎ
অবিদুষঃ মোক্ষাসংভবশ্রুতেঃ, ”জ্ঞানাৎকৈবল্যমাপ্নোতি”
ইতি চ পুরাণস্মৃতেঃ; অনারব্ধফলানাং পুণ্যানাং কর্মণাং
ক্ষয়ানুপপত্তেশ্চ । যথা পূর্বোপাত্তানাং দুরিতানাং অনারব্ধফলানাং
সংভবঃ, তথা পুণ্যানাং অনারব্ধফলানাং স্যাৎসংভবঃ ।
তেষাং চ দেহান্তরং অকৃৎবা ক্ষয়ানুপপত্তৌ মোক্ষানুপপত্তিঃ ।
ধর্মাধর্মহেতূনাং চ রাগদ্বেষমোহানাং অন্যত্র আত্মজ্ঞানাৎ
উচ্ছেদানুপপত্তেঃ ধর্মাধর্মোচ্ছেদানুপপত্তিঃ । নিত্যানাং চ কর্মণাং
পুণ্যফলৎবশ্রুতেঃ,”বর্ণা আশ্রমাশ্চ স্বকর্মনিষ্ঠাঃ”
(গৌ. ধ. সূ. ২-২-২৯) ইত্যাদিস্মৃতেশ্চ কর্মক্ষয়ানুপপত্তিঃ ॥
যে তু আহুঃ – নিত্যানি কর্মাণি দুঃখরূপৎবাৎ পূর্বকৃতদুরিতকর্মণাং
ফলমেব, ন তু তেষাং স্বরূপব্যতিরেকেণ অন্যৎ ফলং অস্তি,
অশ্রুতৎবাৎ, জীবনাদিনিমিত্তে চ বিধানাৎ ইতি । ন অপ্রবৃত্তানাং কর্মণাং
ফলদানাসংভবাৎ; দুঃখফলবিশেষানুপপত্তিশ্চ স্যাৎ । যদুক্তং
পূর্বজন্মকৃতদুরিতানাং কর্মণাং ফলং নিত্যকর্মানুষ্ঠানায়াসদুঃখং
ভুজ্যত ইতি, তদসৎ । ন হি মরণকালে ফলদানায় অনঙ্কুরীভূতস্য
কর্মণঃ ফলং অন্যকর্মারব্ধে জন্মনি উপভুজ্যতে ইতি
উপপত্তিঃ । অন্যথা স্বর্গফলোপভোগায় অগ্নিহোত্রাদিকর্মারব্ধে
জন্মনি নরকফলোপভোগানুপপত্তিঃ ন স্যাৎ । তস্য দুরিতস্য
দুঃখবিশেষফলৎবানুপপত্তেশ্চ – অনেকেষু হি দুরিতেষু সংভবৎসু
ভিন্নদুঃখসাধনফলেষু নিত্যকর্মানুষ্ঠানায়াসদুঃখমাত্রফলেষু
কল্প্যমানেষু দ্বন্দ্বরোগাদিবাধনং নির্নিমিত্তং ন হি শক্যতে
কল্পয়িতুম্, নিত্যকর্মানুষ্ঠানায়াসদুঃখমেব পূর্বোপাত্তদুরিতফলং
ন শিরসা পাষাণবহনাদিদুঃখমিতি । অপ্রকৃতং চ ইদং উচ্যতে
– নিত্যকর্মানুষ্ঠানায়াসদুঃখং পূর্বকৃতদুরিতকর্মফলম্
ইতি । কথম্? অপ্রসূতফলস্য হি পূর্বকৃতদুরিতস্য ক্ষয়ঃ ন
উপপদ্যত ইতি প্রকৃতম্ । তত্র প্রসূতফলস্য কর্মণঃ ফলং
নিত্যকর্মানুষ্ঠানায়াসদুঃখং আহ ভবান্, ন অপ্রসূতফলস্যেতি ।
অথ সর্বমেব পূর্বকৃতং দুরিতং প্রসূতফলমেব ইতি মন্যতে
ভবান্, ততঃ নিত্যকর্মানুষ্ঠানায়াসদুঃখমেব ফলং ইতি বিশেষণম্
অয়ুক্তম্ । নিত্যকর্মবিধ্যানর্থক্যপ্রসঙ্গশ্চ, উপভোগেনৈব
প্রসূতফলস্য দুরিতকর্মণঃ ক্ষয়োপপত্তেঃ । কিংচ, শ্রুতস্য
নিত্যস্য কর্মণঃ দুঃখং চেৎ ফলম্, নিত্যকর্মানুষ্ঠানায়াসাদেব তৎ
দৃশ্যতে ব্যায়ামাদিবৎ; তৎ অন্যস্য ইতি কল্পনানুপপত্তিঃ ।
জীবনাদিনিমিত্তে চ বিধানাৎ, নিত্যানাং কর্মণাং প্রায়শ্চিত্তবৎ
পূর্বকৃতদুরিতফলৎবানুপপত্তিঃ । যস্মিন্ পাপকর্মণি নিমিত্তে যৎ
বিহিতং প্রায়শ্চিত্তং ন তু তস্য পাপস্য তৎ ফলম্ । অথ তস্যৈব
পাপস্য নিমিত্তস্য প্রায়শ্চিত্তদুঃখং ফলম্, জীবনাদিনিমিত্তেঽপি
নিত্যকর্মানুষ্ঠানায়াসদুঃখং জীবনাদিনিমিত্তস্যৈব ফলং
প্রসজ্যেত, নিত্যপ্রায়শ্চিত্তয়োঃ নৈমিত্তিকৎবাবিশেষাৎ । কিংচ
অন্যৎ – নিত্যস্য কাম্যস্য চ অগ্নিহোত্রাদেঃ অনুষ্ঠানায়াসদুঃখস্য
তুল্যৎবাৎ নিত্যানুষ্ঠানায়াসদুঃখমেব পূর্বকৃতদুরিতস্য
ফলম্, ন তু কাম্যানুষ্ঠানায়াসদুঃখং ইতি বিশেষো নাস্তীতি
তদপি পূর্বকৃতদুরিতফলং প্রসজ্যেত । তথা চ সতি নিত্যানাং
ফলাশ্রবণাৎ তদ্বিধানান্যথানুপপত্তেশ্চ নিত্যানুষ্ঠানায়াসদুঃখং
পূর্বকৃতদুরিতফলং ইতি অর্থাপত্তিকল্পনা চ অনুপপন্না, এবং
বিধানান্যথানুপপত্তেঃ অনুষ্ঠানায়াসদুঃখব্যতিরিক্তফলৎবানুমানাচ্চ
নিত্যানাম্ । বিরোধাচ্চ; বিরুদ্ধং চ ইদং উচ্যতে – নিত্যকর্মণা
অনুষ্টীয়মানেন অন্যস্য কর্মণঃ ফলং ভুজ্যতে ইতি অভ্যুপগম্যমানে
স এব উপভোগঃ নিত্যস্য কর্মণঃ ফলং ইতি, নিত্যস্য কর্মণঃ
ফলাভাব ইতি চ বিরুদ্ধং উচ্যতে । কিংচ, কাম্যাগ্নিহোত্রাদৌ
অনুষ্ঠীয়মানে নিত্যমপি অগ্নিহোত্রাদি তন্ত্রেণৈব অনুষ্ঠিতং ভবতীতি
তদায়াসদুঃখেনৈব কাম্যাগ্নিহোত্রাদিফলং উপক্ষীণং স্যাৎ, তত্তন্ত্রৎবাৎ ।
অথ কাম্যাগ্নিহোত্রাদিফলং অন্যদেব স্বর্গাদি, তদনুষ্ঠানায়াসদুঃখমপি
ভিন্নং প্রসজ্যেত । ন চ তদস্তি, দৃষ্টবিরোধাৎ; ন হি
কাম্যানুষ্ঠানায়াসদুঃখাৎ কেবলনিত্যানুষ্ঠানায়াসদুঃখং ভিন্নং
দৃশ্যতে । কিংচ অন্যৎ – অবিহিতমপ্রতিষিদ্ধং চ কর্ম
তৎকালফলম্, ন তু শাস্ত্রচোদিতং প্রতিষিদ্ধং বা তৎকালফলং
ভবেৎ । তদা স্বর্গাদিষ্বপি অদৃষ্টফলাশাসনেন উদ্যমো ন স্যাৎ –
অগ্নিহোত্রাদীনামেব কর্মস্বরূপাবিশেষে অনুষ্ঠানায়াসদুঃখমাত্রেণ
উপক্ষয়ঃ নিত্যানাম্; স্বর্গাদিমহাফলৎবং কাম্যানাম্,
অঙ্গেতিকর্তব্যতাদ্যাধিক্যে তু অসতি, ফলকামিৎবমাত্রেণেতি ।
তস্মাচ্চ ন নিত্যানাং কর্মণাং অদৃষ্টফলাভাবঃ কদাচিদপি
উপপদ্যতে । অতশ্চ অবিদ্যাপূর্বকস্য কর্মণঃ বিদ্যৈব শুভস্য
অশুভস্য বা ক্ষয়কারণং অশেষতঃ, ন নিত্যকর্মানুষ্ঠানম্ ।
অবিদ্যাকামবীজং হি সর্বমেব কর্ম । তথা চ উপপাদিতমবিদ্বদ্বিষয়ং
কর্ম, বিদ্বদ্বিষয়া চ সর্বকর্মসংন্যাসপূর্বিকা জ্ঞাননিষ্ঠা –
“উভৌ তৌ ন বিজানীতঃ” (ভ. গী. ২-১৯) “বেদাবিনাশিনং
নিত্যম্” (ভ. গী. ২-২১)“জ্ঞানয়োগেন সাংখ্যানাং কর্ময়োগেন
যোগিনাম্” (ভ. গী. ৩-৩) “অজ্ঞানাং কর্মসঙ্গিনাম্”
(ভ. গী. ৩-২৬) “তত্ত্ববিত্তু মহাবাহো. . . গুণা গুণেষু বর্তন্তে
ইতি মৎবা ন সজ্জতে” (ভ. গী. ৩-২৮) “সর্বকর্মাণি মনসা
সংন্যস্যাস্তে” (ভ. গী. ৫-১৩) “নৈব কিংচিৎ করোমীতি যুক্তো
মন্যেত তত্ত্ববিৎ” (ভ. গী. ৫-৮), অর্থাৎ অজ্ঞঃ করোমি ইতি;
আরুরুক্ষোঃ কর্ম কারণম্, আরূঢস্য যোগস্থস্য শম এব কারণম্;
উদারাঃ ত্রয়োঽপি অজ্ঞাঃ, “জ্ঞানী ৎবাত্মৈব মে মতম্”
(ভ. গী. ৭-১৮)“অজ্ঞাঃ কর্মিণঃ গতাগতং কামকামাঃ লভন্তে”;
অনন্যাশ্চিন্তয়ন্তো মাং নিত্যযুক্তাঃ যথোক্তং আত্মানং আকাশকল্পম্
উপাসতে; “দদামি বুদ্ধিয়োগং তং যেন মামুপয়ান্তি তে”,
অর্থাৎ ন কর্মিণঃ অজ্ঞাঃ উপয়ান্তি । ভগবৎকর্মকারিণঃ যে যুক্ততমা
অপি কর্মিণঃ অজ্ঞাঃ, তে উত্তরোত্তরহীনফলত্যাগাবসানসাধনাঃ;
অনির্দেশ্যাক্ষরোপাসকাস্তু “অদ্বেষ্টা সর্বভূতানাম্”
(ভ. গী. ১২-১৩) ইতি অধ্যায়পরিসমাপ্তি উক্তসাধনাঃ
ক্ষেত্রাধ্যায়াদ্যধ্যায়ত্রয়োক্তজ্ঞানসাধনাশ্চ ।
অধিষ্ঠানাদিপঞ্চকহেতুকসর্বকর্মসংন্যাসিনাং
আত্মৈকৎবাকর্তৃৎবজ্ঞানবতাং পরস্যাং জ্ঞাননিষ্ঠায়াং
বর্তমানানাং ভগবত্তত্ত্ববিদাং অনিষ্টাদিকর্মফলত্রয়ং
পরমহংসপরিব্রাজকানামেব লব্ধভগবৎস্বরূপাত্মৈকৎবশরণানাং
ন ভবতি; ভবত্যেব অন্যেষামজ্ঞানাং কর্মিণামসংন্যাসিনাং ইত্যেষঃ
গীতাশাস্ত্রোক্তকর্তব্যার্থস্য বিভাগঃ ॥
অবিদ্যাপূর্বকৎবং সর্বস্য কর্মণঃ অসিদ্ধমিতি চেৎ, ন;
ব্রহ্মহত্যাদিবৎ । যদ্যপি শাস্ত্রাবগতং নিত্যং কর্ম, তথাপি
অবিদ্যাবত এব ভবতি । যথা প্রতিষেধশাস্ত্রাবগতমপি
ব্রহ্মহত্যাদিলক্ষণং কর্ম অনর্থকারণং অবিদ্যাকামাদিদোষবতঃ
ভবতি, অন্যথা প্রবৃত্ত্যনুপপত্তেঃ, তথা নিত্যনৈমিত্তিককাম্যান্যপীতি ।
দেহব্যতিরিক্তাত্মনি অজ্ঞাতে প্রবৃত্তিঃ নিত্যাদিকর্মসু অনুপপন্না
ইতি চেৎ, ন; চলনাত্মকস্য কর্মণঃ অনাত্মকর্তৃকস্য “অহং
করোমি” ইতি প্রবৃত্তিদর্শনাৎ । দেহাদিসংঘাতে অহংপ্রত্যযঃ
গৌণঃ, ন মিথ্যা ইতি চেৎ, ন; তৎকার্যেষ্বপি গৌণৎবোপপত্তেঃ । আত্মীয়ে
দেহাদিসংঘাতে অহংপ্রত্যযঃ গৌণঃ; যথা আত্মীয়ে পুত্রে ”আত্মা বৈ
পুত্রনামাসি” (তৈ. আ. একা. ২-১১) ইতি, লোকে চ “মম প্রাণ এব
অয়ং গৌঃ” ইতি, তদ্বৎ । নৈবায়ং মিথ্যাপ্রত্যযঃ । মিথ্যাপ্রত্যযস্তু
স্থাণুপুরুষয়োঃ অগৃহ্যমাণবিশেষয়োঃ । ন গৌণপ্রত্যযস্য
মুখ্যকার্যার্থতা, অধিকরণস্তুত্যর্থৎবাৎ লুপ্তোপমাশব্দেন ।
যথা “সিংহো দেবদত্তঃ” “অগ্নির্মাণবকঃ”
ইতি সিংহ ইব অগ্নিরিব ক্রৌর্যপৈঙ্গল্যাদিসামান্যবত্ত্বাৎ
দেবদত্তমাণবকাধিকরণস্তুত্যর্থমেব, ন তু সিংহকার্যং অগ্নিকার্যং
বা গৌণশব্দপ্রত্যযনিমিত্তং কিংচিৎসাধ্যতে; মিথ্যাপ্রত্যযকার্যং
তু অনর্থমনুভবতি ইতি । গৌণপ্রত্যযবিষয়ং জানাতি “নৈষ
সিংহঃ দেবদত্তঃ”, তথা “নায়মগ্নির্মাণবকঃ” ইতি ।
তথা গৌণেন দেহাদিসংঘাতেন আত্মনা কৃতং কর্ম ন মুখ্যেন
অহংপ্রত্যযবিষয়েণ আত্মনা কৃতং স্যাৎ । ন হি গৌণসিংহাগ্নিভ্যাং
কৃতং কর্ম মুখ্যসিংহাগ্নিভ্যাং কৃতং স্যাৎ । ন চ ক্রৌর্যেণ
পৈঙ্গল্যেন বা মুখ্যসিংহাগ্ন্যোঃ কার্যং কিংচিৎ ক্রিয়তে, স্তুত্যর্থৎবেন
উপক্ষীণৎবাৎ । স্তূয়মানৌ চ জানীতঃ “ন অহং সিংহঃ” “ন
অহং অগ্নিঃ” ইতি; ন হি “সিংহস্য কর্ম মম অগ্নেশ্চ”
ইতি । তথা “ন সংঘাতস্য কর্ম মম মুখ্যস্য আত্মনঃ” ইতি
প্রত্যযঃ যুক্ততরঃ স্যাৎ; ন পুনঃ “অহং কর্তা মম কর্ম” ইতি ।
যচ্চ আহুঃ “আত্মীয়ৈঃ স্মৃতীচ্ছাপ্রয়ত্নৈঃ কর্মহেতুভিরাত্মা
কর্ম করোতি” ইতি, ন; তেষাং মিথ্যাপ্রত্যযপূর্বকৎবাৎ ।
মিথ্যাপ্রত্যযনিমিত্তেষ্টানিষ্টানুভূতক্রিয়াফলজনিতসংস্কারপূর্বকাঃ
হি স্মৃতীচ্ছাপ্রয়ত্নাদয়ঃ । যথা অস্মিন্ জন্মনি
দেহাদিসংঘাতাভিমানরাগদ্বেষাদিকৃতৌ ধর্মাধর্মৌ
তৎফলানুভবশ্চ, তথা অতীতে অতীততরেঽপি জন্মনি ইতি
অনাদিরবিদ্যাকৃতঃ সংসারঃ অতীতোঽনাগতশ্চ অনুমেয়ঃ । ততশ্চ
সর্বকর্মসংন্যাসসহিতজ্ঞাননিষ্ঠয়া আত্যন্তিকঃ সংসারোপরম
ইতি সিদ্ধম্ । অবিদ্যাত্মকৎবাচ্চ দেহাভিমানস্য, তন্নিবৃত্তৌ
দেহানুপপত্তেঃ সংসারানুপপত্তিঃ । দেহাদিসংঘাতে আত্মাভিমানঃ
অবিদ্যাত্মকঃ । ন হি লোকে “গবাদিভ্যোঽন্যোঽহম্, মত্তশ্চান্যে
গবাদয়ঃ” ইতি জানন্ তান্ “অহম্” ইতি মন্যতে কশ্চিৎ ।
অজানংস্তু স্থাণৌ পুরুষবিজ্ঞানবৎ অবিবেকতঃ দেহাদিসংঘাতে কুর্যাৎ
“অহম্” ইতি প্রত্যযম্, ন বিবেকতঃ জানন্ । যস্তু”আত্মা
বৈ পুত্র নামাসি” (তৈ. আ. একা. ২-১১) ইতি পুত্রে অহংপ্রত্যযঃ,
স তু জন্যজনকসংবন্ধনিমিত্তঃ গৌণঃ । গৌণেন চ আত্মনা
ভোজনাদিবৎ পরমার্থকার্যং ন শক্যতে কর্তুম্, গৌণসিংহাগ্নিভ্যাং
মুখ্যসিংহাগ্নিকার্যবৎ ॥
অদৃষ্টবিষয়চোদনাপ্রামাণ্যাৎ আত্মকর্তব্যং গৌণৈঃ দেহেন্দ্রিয়াত্মভিঃ
ক্রিয়ত এব ইতি চেৎ, ন; অবিদ্যাকৃতাত্মৎবাত্তেষাম্ । ন চ গৌণাঃ
আত্মানঃ দেহেন্দ্রিয়াদয়ঃ; কিং তর্হি? মিথ্যাপ্রত্যযেনৈব অনাত্মানঃ সন্তঃ
আত্মৎবমাপাদ্যন্তে, তদ্ভাবে ভাবাৎ, তদভাবে চ অভাবাৎ ।
অবিবেকিনাং হি অজ্ঞানকালে বালানাং দৃশ্যতে “দীর্ঘোঽহম্”
“গৌরোঽহম্” ইতি দেহাদিসংঘাতে অহংপ্রত্যযঃ । ন তু
বিবেকিনাং “অন্যোঽহং দেহাদিসংঘাতাৎ” ইতি জানতাং তৎকালে
দেহাদিসংঘাতে অহংপ্রত্যযঃ ভবতি । তস্মাৎ মিথ্যাপ্রত্যযাভাবে অভাবাৎ
তৎকৃত এব, ন গৌণঃ । পৃথগ্গৃহ্যমাণবিশেষসামান্যযোর্হি
সিংহদেবদত্তয়োঃ অগ্নিমাণবকয়োর্বা গৌণঃ প্রত্যযঃ শব্দপ্রয়োগো
বা স্যাৎ, ন অগৃহ্যমাণবিশেষসামান্যযোঃ । যত্তু উক্তম্
“শ্রুতিপ্রামাণ্যাৎ” ইতি, তৎ ন; তৎপ্রামাণ্যস্য
অদৃষ্টবিষয়ৎবাৎ । প্রত্যক্ষাদিপ্রমাণানুপলব্ধে হি
বিষয়ে অগ্নিহোত্রাদিসাধ্যসাধনসংবন্ধে শ্রুতেঃ প্রামাণ্যম্, ন
প্রত্যক্ষাদিবিষয়ে, অদৃষ্টদর্শনার্থবিষয়ৎবাৎ প্রামাণ্যস্য ।
তস্মাৎ ন দৃষ্টমিথ্যাজ্ঞাননিমিত্তস্য অহংপ্রত্যযস্য
দেহাদিসংঘাতে গৌণৎবং কল্পয়িতুং শক্যম্ । ন হি শ্রুতিশতমপি
“শীতোঽগ্নিরপ্রকাশো বা” ইতি ব্রুবৎ প্রামাণ্যমুপৈতি ।
যদি ব্রূয়াৎ “শীতোঽগ্নিরপ্রকাশো বা” ইতি, তথাপি
অর্থান্তরং শ্রুতেঃ বিবক্ষিতং কল্প্যম্, প্রামাণ্যান্যথানুপপত্তেঃ,
ন তু প্রমাণান্তরবিরুদ্ধং স্ববচনবিরুদ্ধং বা । কর্মণঃ
মিথ্যাপ্রত্যযবৎকর্তৃকৎবাৎ কর্তুরভাবে শ্রুতেরপ্রামাণ্যমিতি চেৎ,
ন; ব্রহ্মবিদ্যায়ামর্থবত্ত্বোপপত্তেঃ ॥
কর্মবিধিশ্রুতিবৎ ব্রহ্মবিদ্যাবিধিশ্রুতেরপি অপ্রামাণ্যপ্রসঙ্গ ইতি
চেৎ, ন; বাধকপ্রত্যযানুপপত্তেঃ । যথা ব্রহ্মবিদ্যাবিধিশ্রুত্যা
আত্মনি অবগতে দেহাদিসংঘাতে অহংপ্রত্যযঃ বাধ্যতে, তথা আত্মন্যেব
আত্মাবগতিঃ ন কদাচিৎ কেনচিৎ কথংচিদপি বাধিতুং শক্যা,
ফলাব্যতিরেকাদবগতেঃ, যথা অগ্নিঃ উষ্ণঃ প্রকাশশ্চ ইতি । ন
চ এবং কর্মবিধিশ্রুতেরপ্রামাণ্যম্, পূর্বপূর্বপ্রবৃত্তিনিরোধেন
উত্তরোত্তরাপূর্বপ্রবৃত্তিজননস্য প্রত্যগাত্মাভিমুখ্যেন
প্রবৃত্ত্যুৎপাদনার্থৎবাৎ । মিথ্যাৎবেঽপি উপায়স্য উপেয়সত্যতয়া
সত্যৎবমেব স্যাৎ, যথা অর্থবাদানাং বিধিশেষাণাম্; লোকেঽপি
বালোন্মত্তাদীনাং পয়আদৌ পায়যিতব্যে চূডাবর্ধনাদিবচনম্ ।
প্রকারান্তরস্থানাং চ সাক্ষাদেব বা প্রামাণ্যং সিদ্ধম্, প্রাগাত্মজ্ঞানাৎ
দেহাভিমাননিমিত্তপ্রত্যক্ষাদিপ্রামাণ্যবৎ । যত্তু মন্যসে –
স্বয়মব্যাপ্রিয়মাণোঽপি আত্মা সংনিধিমাত্রেণ করোতি, তদেব মুখ্যং
কর্তৃৎবমাত্মনঃ; যথা রাজা যুধ্যমানেষু যোধেষু যুধ্যত ইতি
প্রসিদ্ধং স্বয়ময়ুধ্যমানোঽপি সংনিধানাদেব জিতঃ পরাজিতশ্চেতি,
তথা সেনাপতিঃ বাচৈব করোতি; ক্রিয়াফলসংবন্ধশ্চ রাজ্ঞঃ
সেনাপতেশ্চ দৃষ্টঃ । যথা চ ঋৎবিক্কর্ম যজমানস্য, তথা
দেহাদীনাং কর্ম আত্মকৃতং স্যাৎ, ফলস্য আত্মগামিৎবাৎ । যথা বা
ভ্রামকস্য লোকভ্রাময়িতৃৎবাৎ অব্যাপৃতস্যৈব মুখ্যমেব কর্তৃৎবম্,
তথা চ আত্মনঃ ইতি । তৎ অসৎ; অকুর্বতঃ কারকৎবপ্রসঙ্গাৎ ।
কারকমনেকপ্রকারমিতি চেৎ, ন; রাজপ্রভৃতীনাং মুখ্যস্যাপি
কর্তৃৎবস্য দর্শনাৎ । রাজা তাবৎ স্বব্যাপারেণাপি যুধ্যতে;
যোধানাং চ যোধয়িতৃৎবে ধনদানে চ মুখ্যমেব কর্তৃৎবম্, তথা
জয়পরাজয়ফলোপভোগে । যজমানস্যাপি প্রধানত্যাগে দক্ষিণাদানে চ
মুখ্যমেব কর্তৃৎবম্ । তস্মাৎ অব্যাপৃতস্য কর্তৃৎবোপচারো যঃ, সঃ
গৌণঃ ইতি অবগম্যতে । যদি মুখ্যং কর্তৃৎবং স্বব্যাপারলক্ষণং
নোপলভ্যতে রাজয়জমানপ্রভৃতীনাম্, তদা সংনিধিমাত্রেণাপি
কর্তৃৎবং মুখ্যং পরিকল্প্যেত; যথা ভ্রামকস্য লোহভ্রমণেন, ন
তথা রাজয়জমানাদীনাং স্বব্যাপার নোপলভ্যতে । তস্মাৎ সংনিধিমাত্রেণ
কর্তৃৎবং গৌণমেব । তথা চ সতি তৎফলসংবন্ধোঽপি গৌণ এব
স্যাৎ । ন গৌণেন মুখ্যং কার্যং নির্বর্ত্যতে । তস্মাৎ অসদেব এতৎ
গীয়তে “দেহাদীনাং ব্যাপারেণ অব্যাপৃতঃ আত্মা কর্তা ভোক্তা চ
স্যাৎ” ইতি । ভ্রান্তিনিমিত্তং তু সর্বং উপপদ্যতে, যথা স্বপ্নে;
মায়ায়াং চ এবম্ । ন চ দেহাদ্যাত্মপ্রত্যযভ্রান্তিসংতানবিচ্ছেদেষু
সুষুপ্তিসমাধ্যাদিষু কর্তৃৎবভোক্তৃৎবাদ্যনর্থঃ উপলভ্যতে ।
তস্মাৎ ভ্রান্তিপ্রত্যযনিমিত্তঃ এব অয়ং সংসারভ্রমঃ, ন তু পরমার্থঃ;
ইতি সম্যগ্দর্শনাৎ অত্যন্ত এবোপরম ইতি সিদ্ধম্ ॥
সর্বং গীতাশাস্ত্রার্থমুপসংহৃত্য অস্মিন্নধ্যায়ে, বিশেষতশ্চ অন্তে,
ইহ শাস্ত্রার্থদার্ঢ্যায় সংক্ষেপতঃ উপসংহারং কৃৎবা, অথ ইদানীং
শাস্ত্রসংপ্রদায়বিধিমাহ –
ইদং তে নাতপস্কায় নাভক্তায় কদাচন ।
ন চাশুশ্রূষবে বাচ্যং ন চ মাং যোঽভ্যসূয়তি ॥ ১৮-৬৭॥
ইদং শাস্ত্রং তে তব হিতায় ময়া উক্তং সংসারবিচ্ছিত্তয়ে অতপস্কায়
তপোরহিতায় ন বাচ্যং ইতি ব্যবহিতেন সংবধ্যতে । তপস্বিনেঽপি
অভক্তায় গুরৌ দেবে চ ভক্তিরহিতায় কদাচন কস্যাংচিদপি অবস্থায়াং
ন বাচ্যম্ । ভক্তঃ তপস্বী অপি সন্ অশুশ্রূষুঃ যো ভবতি তস্মৈ
অপি ন বাচ্যম্ । ন চ যো মাং বাসুদেবং প্রাকৃতং মনুষ্যং মৎবা
অভ্যসূয়তি আত্মপ্রশংসাদিদোষাধ্যারোপণেন ঈশ্বরৎবং মম অজানন্ ন
সহতে, অসাবপি অয়োগ্যঃ, তস্মৈ অপি ন বাচ্যম্ । ভগবতি অনসূয়ায়ুক্তায়
তপস্বিনে ভক্তায় শুশ্রূষবে বাচ্যং শাস্ত্রং ইতি সামর্থ্যাৎ গম্যতে ।
তত্র ”মেধাবিনে তপস্বিনে বা” (যাস্ক. নি. ২-১-৬) ইতি অনয়োঃ
বিকল্পদর্শনাৎ শুশ্রূষাভক্তিয়ুক্তায় তপস্বিনে তদ্যুক্তায় মেধাবিনে
বা বাচ্যম্ । শুশ্রূষাভক্তিবিয়ুক্তায় ন তপস্বিনে নাপি মেধাবিনে
বাচ্যম্ । ভগবতি অসূয়ায়ুক্তায় সমস্তগুণবতেঽপি ন বাচ্যম্ ।
গুরুশুশ্রূষাভক্তিমতে চ বাচ্যং ইত্যেষঃ শাস্ত্রসংপ্রদায়বিধিঃ ॥
সংপ্রদায়স্য কর্তুঃ ফলং ইদানীং আহ –
য ইমং পরমং গুহ্যং মদ্ভক্তেষ্বভিধাস্যতি ।
ভক্তিং ময়ি পরাং কৃৎবা মামেবৈষ্যত্যসংশয়ঃ ॥ ১৮-৬৮॥
যঃ ইমং যথোক্তং পরমং পরমনিঃশ্রেয়সার্থং কেশবার্জুনয়োঃ
সংবাদরূপং গ্রন্থং গুহ্যং গোপ্যতমং মদ্ভক্তেষু ময়ি ভক্তিমৎসু
অভিধাস্যতি বক্ষ্যতি, গ্রন্থতঃ অর্থতশ্চ স্থাপয়িষ্যতীত্যর্থঃ,
যথা ৎবয়ি ময়া । ভক্তেঃ পুনর্গ্রহণাৎ ভক্তিমাত্রেণ কেবলেন
শাস্ত্রসংপ্রদানে পাত্রং ভবতীতি গম্যতে । কথং অভিধাস্যতি ইতি,
উচ্যতে – ভক্তিং ময়ি পরাং কৃৎবা “ভগবতঃ পরমগুরোঃ
অচ্যুতস্য শুশ্রূষা ময়া ক্রিয়তে” ইত্যেবং কৃৎবেত্যর্থঃ । তস্য
ইদং ফলং – মামেব এষ্যতি মুচ্যতে এব । অসংশয়ঃ অত্র সংশয়ঃ
ন কর্তব্যঃ ॥
কিংচ –
ন চ তস্মান্মনুষ্যেষু কশ্চিন্মে প্রিয়কৃত্তমঃ ।
ভবিতা ন চ মে তস্মাদন্যঃ প্রিয়তরো ভুবি ॥ ১৮-৬৯॥
ন চ তস্মাৎ শাস্ত্রসংপ্রদায়কৃতঃ মনুষ্যেষু মনুষ্যাণাং
মধ্যে কশ্চিৎ মে মম প্রিয়কৃত্তমঃ অতিশয়েন প্রিয়করঃ, অন্যঃ
প্রিয়কৃত্তমঃ, নাস্ত্যেব ইত্যর্থঃ বর্তমানেষু । ন চ ভবিতা
ভবিষ্যত্যপি কালে তস্মাৎ দ্বিতীয়ঃ অন্যঃ প্রিয়তরঃ প্রিয়কৃত্তরঃ
ভুবি লোকেঽস্মিন্ ন ভবিতা ॥
যোঽপি –
অধ্যেষ্যতে চ য ইমং ধর্ম্যং সংবাদমাবয়োঃ ।
জ্ঞানয়জ্ঞেন তেনাহমিষ্টঃ স্যামিতি মে মতিঃ ॥ ১৮-৭০॥
অধ্যেষ্যতে চ পঠিষ্যতি যঃ ইমং ধর্ম্যং ধর্মাদনপেতং
সংবাদরূপং গ্রন্থং আবয়োঃ, তেন ইদং কৃতং স্যাৎ । জ্ঞানয়জ্ঞেন
– বিধিজপোপাংশুমানসানাং যজ্ঞানাং জ্ঞানয়জ্ঞঃ মানসৎবাৎ
বিশিষ্টতমঃ ইত্যতঃ তেন জ্ঞানয়জ্ঞেন গীতাশাস্ত্রস্য অধ্যযনং
স্তূয়তে; ফলবিধিরেব বা, দেবতাদিবিষয়জ্ঞানয়জ্ঞফলতুল্যং অস্য
ফলং ভবতীতি – তেন অধ্যযনেন অহং ইষ্টঃ পূজিতঃ স্যাং ভবেয়ম্
ইতি মে মম মতিঃ নিশ্চয়ঃ ॥
অথ শ্রোতুঃ ইদং ফলং –
শ্রদ্ধাবাননসূয়শ্চ শৃণুয়াদপি যো নরঃ ।
সোঽপি মুক্তঃ শুভাংল্লোকান্প্রাপ্নুয়াৎপুণ্যকর্মণাম্ ॥ ১৮-৭১॥
শ্রদ্ধাবান্ শ্রদ্দধানঃ অনসূয়শ্চ অসূয়াবর্জিতঃ সন্ ইমং
গ্রন্থং শৃণুয়াদপি যো নরঃ, অপিশব্দাৎ কিমুত অর্থজ্ঞানবান্,
সোঽপি পাপাৎ মুক্তঃ শুভান্ প্রশস্তান্ লোকান্ প্রাপ্নুয়াৎ পুণ্যকর্মণাম্
অগ্নিহোত্রাদিকর্মবতাম্ ॥ শিষ্যস্য
শাস্ত্রার্থগ্রহণাগ্রহণবিবেকবুভুৎসয়া পৃচ্ছতি ।
তদগ্রহণে জ্ঞাতে পুনঃ গ্রাহয়িষ্যামি উপায়ান্তরেণাপি ইতি প্রষ্টুঃ
অভিপ্রায়ঃ । যত্নান্তরং চ আস্থায় শিষ্যস্য কৃতার্থতা কর্তব্যা
ইতি আচার্যধর্মঃ প্রদর্শিতো ভবতি –
কচ্চিদেতচ্ছ্রুতং পার্থ ৎবয়ৈকাগ্রেণ চেতসা ।
কচ্চিদজ্ঞানসংমোহঃ প্রণষ্টস্তে ধনংজয় ॥ ১৮-৭২॥
কচ্চিৎ কিং এতৎ ময়া উক্তং শ্রুতং শ্রবণেন অবধারিতং পার্থ,
ৎবয়া একাগ্রেণ চেতসা চিত্তেন? কিং বা অপ্রমাদতঃ? কচ্চিৎ
অজ্ঞানসংমোহঃ অজ্ঞাননিমিত্তঃ সংমোহঃ অবিবিক্তভাবঃ অবিবেকঃ
স্বাভাবিকঃ কিং প্রণষ্টঃ? যদর্থঃ অয়ং শাস্ত্রশ্রবণায়াসঃ তব,
মম চ উপদেষ্টৃৎবায়াসঃ প্রবৃত্তঃ, তে তুভ্যং হে ধনংজয় ॥
অর্জুন উবাচ –
নষ্টো মোহঃ স্মৃতির্লব্ধা ৎবৎপ্রসাদান্ময়াচ্যুত ।
স্থিতোঽস্মি গতসংদেহঃ করিষ্যে বচনং তব ॥ ১৮-৭৩॥
নষ্টঃ মোহঃ অজ্ঞানজঃ সমস্তসংসারানর্থহেতুঃ, সাগর ইব
দুরুত্তরঃ । স্মৃতিশ্চ আত্মতত্ত্ববিষয়া লব্ধা, যস্যাঃ লাভাৎ
সর্বহৃদয়গ্রন্থীনাং বিপ্রমোক্ষঃ; ৎবৎপ্রসাদাৎ তব প্রসাদাৎ ময়া
ৎবৎপ্রসাদং আশ্রিতেন অচ্যুত । অনেন মোহনাশপ্রশ্নপ্রতিবচনেন
সর্বশাস্ত্রার্থজ্ঞানফলং এতাবদেবেতি নিশ্চিতং দর্শিতং ভবতি,
যতঃ জ্ঞানাৎ মোহনাশঃ আত্মস্মৃতিলাভশ্চেতি । তথা চ শ্রুতৌ
“অনাত্মবিৎ শোচামি” (ছা. উ. ৭-১-৩) ইতি উপন্যস্য
আত্মজ্ঞানেন সর্বগ্রন্থীনাং বিপ্রমোক্ষঃ উক্তঃ; “ভিদ্যতে
হৃদয়গ্রন্থিঃ” (মু. উ. ২-২-৯) “তত্র কো মোহঃ কঃ শোকঃ
একৎবমনুপশ্যতঃ” (ঈ. উ. ৭) ইতি চ মন্ত্রবর্ণঃ । অথ ইদানীং
ৎবচ্ছাসনে স্থিতঃ অস্মি গতসংদেহঃ মুক্তসংশয়ঃ ।
করিষ্যে বচনং তব । অহং ৎবৎপ্রসাদাৎ কৃতার্থঃ, ন মে কর্তব্যম্
অস্তি ইত্যভিপ্রায়ঃ ॥
পরিসমাপ্তঃ শাস্ত্রার্থঃ । অথ ইদানীং কথাসংবন্ধপ্রদর্শনার্থং
সংজয়ঃ উবাচ –
সংজয় উবাচ –
ইত্যহং বাসুদেবস্য পার্থস্য চ মহাত্মনঃ ।
সংবাদমিমমশ্রৌষমদ্ভুতং রোমহর্ষণম্ ॥ ১৮-৭৪॥
ইতি এবং অহং বাসুদেবস্য পার্থস্য চ মহাত্মনঃ সংবাদং ইমং যথোক্তম্
অশ্রৌষং শ্রুতবান্ অস্মি অদ্ভুতং অত্যন্তবিস্ময়করং রোমহর্ষণং
রোমাঞ্চকরম্ ॥
তং চ ইমং –
ব্যাসপ্রসাদাচ্ছ্রুতবানিমং গুহ্যতমং পরম্ ।
যোগং যোগেশ্বরাৎকৃষ্ণাৎসাক্ষাৎকথয়তঃ স্বয়ম্ ॥ ১৮-৭৫॥
ব্যাসপ্রসাদাৎ ততঃ দিব্যচক্ষুর্লাভাৎ শ্রুতবান্ ইমং সংবাদং গুহ্যতমং
পরং যোগম্, যোগার্থৎবাৎ গ্রন্থোঽপি যোগঃ, সংবাদং ইমং যোগমেব বা
যোগেশ্বরাৎ কৃষ্ণাৎ সাক্ষাৎ কথয়তঃ স্বয়ম্, ন পরম্পরয়া ॥
রাজন্ সংস্মৃত্য সংস্মৃত্য সংবাদমিমমদ্ভুতম্ ।
কেশবার্জুনয়োঃ পুণ্যং হৃষ্যামি চ মুহুর্মুহুঃ ॥ ১৮-৭৬॥
হে রাজন্ ধৃতরাষ্ট্র, সংস্মৃত্য সংস্মৃত্য প্রতিক্ষণং সংবাদম্
ইমং অদ্ভুতং কেশবার্জুনয়োঃ পুণ্যং ইমং শ্রবণেনাপি পাপহরং শ্রুৎবা
হৃষ্যামি চ মুহুর্মুহুঃ প্রতিক্ষণম্ ॥
তচ্চ সংস্মৃত্য সংস্মৃত্য রূপমত্যদ্ভুতং হরেঃ ।
বিস্ময়ো মে মহান্রাজন্ হৃষ্যামি চ পুনঃ পুনঃ ॥ ১৮-৭৭॥
তচ্চ সংস্মৃত্য সংস্মৃত্য রূপং অত্যদ্ভুতং হরেঃ বিশ্বরূপং
বিস্ময়ো মে মহান্ রাজন্, হৃষ্যামি চ পুনঃ পুনঃ ॥
কিং বহুনা –
যত্র যোগেশ্বরঃ কৃষ্ণো যত্র পার্থো ধনুর্ধরঃ ।
তত্র শ্রীর্বিজয়ো ভূতির্ধ্রুবা নীতির্মতির্মম ॥ ১৮-৭৮॥
যত্র যস্মিন্ পক্ষে যোগেশ্বরঃ সর্বয়োগানাং ঈশ্বরঃ, তৎপ্রভবৎবাৎ
সর্বয়োগবীজস্য, কৃষ্ণঃ, যত্র পার্থঃ যস্মিন্ পক্ষে ধনুর্ধরঃ
গাণ্ডীবধন্বা, তত্র শ্রীঃ তস্মিন্ পাণ্ডবানাং পক্ষে শ্রীঃ বিজয়ঃ,
তত্রৈব ভূতিঃ শ্রিয়ো বিশেষঃ বিস্তারঃ ভূতিঃ, ধ্রুবা অব্যভিচারিণী
নীতিঃ নয়ঃ, ইত্যেবং মতিঃ মম ইতি ॥
ওঁ তৎসদিতি শ্রীমদ্ভগবদ্গীতাসূপনিষৎসু ব্রহ্মবিদ্যায়াং
যোগশাস্ত্রে শ্রীকৃষ্ণার্জুনসংবাদে মোক্ষসংন্যাসয়োগো নাম
অষ্টাদশোঽধ্যায়ঃ ॥১৮॥
ইতি শ্রীমদ্পরমহংসপরিব্রাজকাচার্যপূজ্যপাদশ্রীশঙ্করভগবতা
কৃতৌ শ্রীমদ্ভগবদ্গীতাভাষ্যে মোক্ষসংন্যাসয়োগো নাম
অষ্টাদশোঽধ্যায়ঃ ॥
Also Read:
Shrimad Bhagavadgitasha~Nkarabhashyam Lyrics in Hindi | English | Bengali | Gujarati | Kannada | Malayalam | Oriya | Telugu | Tamil
