Shri Yama Geetaa-s from Vishnu, Nrisimha, and Agni Purana in Bengali:
॥ শ্রীবিষ্ণু নৃসিংহ অথবা অগ্নিপুরাণান্তর্গত যমগীতা ॥
॥ অথ প্রারভ্যতে বিষ্ণুপুরাণান্তর্গতা যমগীতা ॥
মৈত্রেয় উবাচ –
যথাবৎকথিতং সর্বং যৎপৃষ্টোঽসি ময়া দ্বিজ ।
শ্রোতুমিচ্ছাম্যহং ৎবেকং তদ্ভবান্প্রব্রবীতু মে ॥ ১ ॥
সপ্তদ্বীপানি পাতালবীথ্যশ্চ সুমহামুনে ।
সপ্তলোকা যেঽন্তরস্থা ব্রহ্মাণ্ডস্যস্য সর্বতঃ ॥ ২ ॥
স্থূলৈঃ সূক্ষ্মৈস্তথা স্থূলসূক্ষ্মৈঃ সূক্ষ্মস্থূলৈস্তথা ।
স্থূলাস্থূলতরৈশ্চৈতৎসর্বং প্রাণিভিরাবৃতম্ ॥ ৩ ॥
অঙ্গুলস্যাষ্টভাগোঽপি ন সোঽস্তি মুনিসত্তম ।
ন সন্তি প্রাণিনো যত্র কর্মবন্ধনিবন্ধনাঃ ॥ ৪ ॥
সর্বে চৈতে বশং যান্তি যমস্য ভগবন্কিল ।
আয়ুষোঽন্তেন তে যান্তি যাতনাস্তৎপ্রচোদিতাঃ ॥ ৫ ॥
যাতনাভ্যঃ পরিভ্রষ্টা দেবাদ্যাস্বথ যোনিষু ।
জন্তবঃ পরিবর্তন্তে শাস্ত্রাণামেষ নির্ণয়ঃ ॥ ৬ ॥
সোঽহমিচ্ছামি তচ্ছ্রোতুং যমস্য বশবর্তিনঃ ।
ন ভবন্তি নরা যেন তৎকর্ম কথয়ামলম্ ॥ ৭ ॥
পরাশর উবাচ –
অয়মেব মুনে প্রশ্নো নকুলেন মহাত্মনা ।
পৃষ্টঃ পিতামহঃ প্রাহ ভীষ্মো যত্তচ্ছ্রুণুষ্ব মে ॥ ৮ ॥
ভীষ্ম উবাচ –
পুরা মমাগতো বৎস সখা কালিংগকো দ্বিজঃ ।
স মামুবাচ পৃষ্টো বৈ ময়া জাতিস্মরো মুনিঃ ॥ ৯ ॥
তেনাখ্যাতমিদং চেদমিত্থং চৈতদ্ভবিষ্যতি ।
তথা চ তদভূদ্বৎস যথোক্তং তেন ধীমতা ॥ ১০ ॥
স পৃষ্টশ্চ ময়া ভূয়ঃ শ্রদ্দধানবতা দ্বিজঃ ।
যদ্যদাহ ন তদ্দৃষ্টমন্যথা হি ময়া ক্বচিৎ ॥ ১১ ॥
একদা তু ময়া পৃষ্টং যদেতদ্ভবতোদিতম্ ।
প্রাহ কালিংগকো বিপ্রঃ স্মৃৎবা তস্য মুনের্বচঃ ॥ ১২ ॥
জাতিস্মরেণ কথিতো রহস্যঃ পরমো মম ।
যমকিংকরয়োর্যোঽভূৎসংবাদস্তং ব্রবীমি তে ॥ ১৩ ॥
কালিংগ উবাচ –
স্বপুরুষমভিবীক্ষ্য পাশহস্তং
বদতি যমঃ কিল তস্য কর্ণমূলে ।
পরিহর মধুসূদনং প্রপন্নান্
প্রভুরহমস্মি নৃণাং ন বৈষ্ণবানাম্ ॥ ১৪ ॥
অহমমরগণার্চিতেন ধাত্রা
যম ইতি লোকহিতাহিতে নিয়ুক্তঃ ।
হরিগুরুবশগোঽস্মি ন স্বতন্ত্রঃ
প্রভবতি সংয়মনি মমাপি বিষ্ণুঃ ॥ ১৫ ॥
কটকমুকুটকর্ণিকাদিভেদৈঃ
কনকমভেদমপীষ্যতে যথৈকম্ ।
সুরপশুমনুজাদিকল্পনাভি-
র্হরিরখিলাভিরুদীয়তে তথৈকঃ ॥ ১৬ ॥
ক্ষিতিজলপরমাণবোঽনিলান্তে
পুনরপি যান্তি যথৈকতাং ধরিত্র্যা ।
সুরপশুমনুজাদয়স্তথান্তে
গুণকলুষেণ সনাতনেন তেন ॥ ১৭ ॥
হরিমমরগণার্চিতাংঘ্রিপদ্মং
প্রণমতি যঃ পরমার্থতো হি মর্ত্যঃ ।
তমথ গতসমস্তপাপবন্ধং
ব্রজ পরিহৃত্য যথাগ্নিমাজ্যসিক্তম্ ॥ ১৮ ॥
ইতি যমবচনং নিশম্য পাশী
যমপুরুষমুবাচ ধর্মরাজম্ ।
কথয় মম বিভোঃ সমস্তধাতু-
র্ভবতি হরেঃ খলু যাদৃশোঽস্য ভক্তঃ ॥ ১৯ ॥
যম উবাচ –
ন চলতি নিজবর্ণধর্মতো
যঃ সমমতিরাত্মসুহৃদ্বিপক্ষপক্ষে ।
ন হরতি ন চ হন্তি কিংচিদুচ্চৈঃ
সিতমনসং তমবেহি বিষ্ণুভক্তম্ ॥ ২০ ॥
কলিকলুষমলেন যস্য নাত্মা
বিমলমতের্মলিনীকৃতোঽস্তমোহে ।
মনসি কৃতজনার্দনং মনুষ্যং
সত্তমবেহি হরেরতীবভক্তম্ ॥ ২১ ॥
কনকমপি রহস্যবেক্ষ্য বুদ্ধ্যা
তৃণমিব যঃ সমবৈতি বৈ পরস্বম্ ।
ভবতি চ ভগবত্যনন্যচেতাঃ
পুরুষবরং তমবেহি বিষ্ণুভক্তম্ ॥ ২২ ॥
স্ফটিকগিরিশিলামলঃ ক্ব বিষ্ণু-
র্মনসি নৃণাং ক্ব চ মৎসরাদিদোষঃ ।
ন হি তুহিনময়ূখরশ্মিপুঞ্জে
ভবতি হুতাশনদীপ্তিজঃ প্রতাপঃ ॥ ২৩ ॥
বিমলমতিবিমৎসরঃ প্রশান্তঃ
শুচিচরিতোঽখিলসত্ত্বমিত্রভূতঃ ।
প্রিয়হিতবচনোঽস্তমানমায়ো
বসতি সদা হৃদি তস্য বাসুদেবঃ ॥ ২৪ ॥
বসতি হৃদি সনাতনে চ তস্মিন্
ভবতিপুমাঞ্জগতোঽস্য সৌম্যরূপঃ ।
ক্ষিতিরসমতিরম্যমাত্মনোঽন্তঃ
কথয়তি চারুতয়ৈব শালপোতঃ ॥ ২৫ ॥
যমনিয়মবিধূতকল্মষাণা-
মনুদিনমচ্যুতসক্তমানসানাম্ ।
অপগতমদমানমৎসরাণাং
ব্রজ ভট দূরতরেণ মানবানাম্ ॥ ২৬ ॥
হৃদি যদি ভগবাননাদিরাস্তে
হরিরসিশংখগদাধরোঽব্যযাত্মা ।
তদঘমঘবিঘাতকর্তৃভিন্নম্
ভবতি কথং সতি বান্ধকারমর্কে ॥ ২৭ ॥
হরতি পরধনং নিহন্তি জন্তূন্
বদতি তথানিশনিষ্ঠুরাণি যশ্চ ।
অশুভজনিতদুর্মদস্য পুংসঃ
কলুষমতের্হৃদি তস্য নাস্ত্যনন্তঃ ॥ ২৮ ॥
ন সহতি পরমং পদং বিনিন্দাং
কলুষমতিঃ কুরুতে সতামসাধুঃ ।
ন যজতি ন দদাতি যশ্চ সন্তং
মনসি ন তস্য জনার্দনোঽধমস্য ॥ ২৯ ॥
পরমসুহৃদি বান্ধবে কলত্রে
সুততনয়াপিতৃমাতৃভৃত্যবর্গে ।
শঠমতিরুপয়াতি যোঽর্থতৃষ্ণাং
তমধমচেষ্টমবেহি নাস্য ভক্তম্ ॥ ৩০ ॥
অশুভমতিরসৎপ্রবৃত্তিসক্তঃ
সততমনার্যবিশালসংগমত্তঃ ।
অনুদিনকৃতপাপবন্ধয়ত্নঃ
পুরুষপশুর্ন হি বাসুদেবভক্তঃ ॥ ৩১ ॥
সকলমিদমহং চ বাসুদেবঃ
পরমপুমান্পরমেশ্বরঃ স একঃ ।
ইতি মতিরমলা ভবত্যনন্তে
হৃদয়গতে ব্রজ তান্বিহায় দূরাৎ ॥ ৩২ ॥
কমলনয়ন বাসুদেব বিষ্ণো
ধরণিধরাচ্যুত শংখচক্রপাণে ।
ভব শরণমিতীরয়ন্তি যে বৈ
ত্যজ ভট দূরতরেণ তানপাপান্ ॥ ৩৩ ॥
বসতি মনসি যস্য সোঽব্যযাত্মা
পুরুষবরস্য ন তস্য দৃষ্টিপাতে ।
তব গতিরথবা মমাস্তি চক্র-
প্রতিহতবীর্যবলস্য সোঽন্যলোক্যঃ ॥ ৩৪ ॥
কালিংগ উবাচ –
ইতি নিজভটশাসনায় দেবো
রবিতনয়ঃ স কিলাহ ধর্মরাজঃ ।
মম কথিতমিদং চ তেন তুভ্যং
কুরুবর সম্যগিদং ময়াপি চোক্তম্ ॥ ৩৫ ॥
ভীষ্ম উবাচ –
নকুলৈতন্মমাখ্যাতং পূর্বং তেন দ্বিজন্মনা ।
কলিংগদেশাদভ্যেত্য প্রীয়তা সুমহাত্মনা ॥ ৩৬ ॥
ময়াপ্যেতদ্যথান্যায়ং সম্যগ্বৎস তবোদিতম্ ।
যথা বিষ্ণুমৃতে নান্যত্ত্রাণং সংসারসাগরে ॥ ৩৭
কিংকরা দণ্ডপাশৌ বা ন যমো ন চ যাতনাঃ ।
সমর্থাস্তস্য যস্যাত্মা কেশবালম্বনঃ সদা ॥ ৩৮ ॥
পরাশর উবাচ –
এতন্মুনে তবাখ্যাতং গীতং বৈবস্বতেন যৎ ।
ৎবৎপ্রশ্নানুগতং সম্যক্কিমন্যচ্ছ্রোতুমিচ্ছসি ॥ ৩৯ ॥
॥ ইতি বিষ্ণুপুরাণান্তর্গতা যমগীতা সমাপ্তা ॥
॥ অথ প্রারভ্যতে নৃসিংহপুরাণান্তর্গতা যমগীতা ॥
ব্যাস উবাচ –
মৃত্যুশ্চ কিংকরাশ্চৈব বিষ্ণুদূতৈঃ প্রপীডিতাঃ ।
স্বরাজ্ঞস্তেঽনুনির্বেশং গৎবা সংচক্রুশুর্ভৃশম্ ॥ ১ ॥
মৃত্যুকিংকরাঃ ঊচুঃ –
শৃণু রাজন্বচোঽস্মাকং তবাগ্রে যদ্ব্রবীমহে ।
ৎবদাদেশাদ্বয়ং গৎবা মৃত্যুং সংস্থাপ্য দূরতঃ ॥ ২ ॥
ব্রাহ্মণস্য সমীপং চ ভৃগোঃ পৌত্রস্য সত্তমঃ ।
তং ধ্যায়মানং কমপি দেবমেবাগ্রমানসম্ ॥ ৩ ॥
গন্তুং ন শক্তাস্তৎপার্শ্বং বয়ং সর্বে মহামতে ।
যাবত্তাবন্মহাকায়ৈঃ পুরুষৈর্মুশলৈর্হতাঃ ॥ ৪ ॥
বয়ং নিবৃত্তাস্তদ্বীক্ষ্য মৃত্যুস্তত্র গতঃ পুনঃ ।
অস্মান্নির্ভর্ত্স্য তত্রায়ং তৈর্নরৈর্মুশলৈর্হতঃ ॥ ৫ ॥
এবমত্র তমানেতুং ব্রাহ্মণং তপসি স্থিতম্ ।
অশক্তা বয়মেবাত্র মৃত্যুনা সহ বৈ প্রভো ॥ ৬ ॥
তদ্ব্রবীমি মহাভাগ যদ্ব্রহ্ম ব্রাহ্মণস্য তু ।
দেবং কং ধ্যায়তে বিপ্রঃ কে বা তে যৈর্হতা বয়ম্ ॥ ৭ ॥
ব্যাস উবাচ –
ইত্যুক্তঃ কিংকরৈঃ সর্বৈর্মৃত্যুনা চ মহামতে ।
ধ্যাৎবা ক্ষণং মহাবুদ্ধিঃ প্রাহ বৈবস্বতো যমঃ ॥ ৮ ॥
যম উবাচ –
শৃণ্বন্তু কিংকরাঃ সর্বে মৃত্যুশ্চান্যে চ মে বচঃ ।
সত্যমেতৎপ্রবক্ষ্যামি জ্ঞানং যদ্যোগমার্গতঃ ॥ ৯ ॥
ভৃগোঃ পৌত্রো মহাভাগো মার্কণ্ডেয়ো মহামতিঃ ।
স জ্ঞাৎবাদ্যাত্মনঃ কালং গতো মৃত্যুজিগীষয়া ॥ ১০ ॥
ভৃগুণোক্তেন মার্গেণ স তেপে পরমং তপঃ ।
হরিমারাধ্য মেধাবী জপন্বৈ দ্বাদশাক্ষরম্ ॥ ১১ ॥
একাগ্রেণৈব মনসা ধ্যায়তে হৃদি কেশবম্ ।
সততং যোগয়ুক্তস্তু স মুনিস্তত্র কিংকরাঃ ॥ ১২ ॥
হরিধ্যানমহাদক্ষা বলং তস্য মহামুনেঃ ।
নান্যদ্বৈ প্রাপ্তকালস্য বলং পশ্যামি কিংকরাঃ ॥ ১৩ ॥
হৃদিস্থে পুণ্ডরীকাক্ষে সততং ভক্তবৎসলে ।
পশ্যন্তং বিষ্ণুভূতং নু কো হি স্যাৎকেশবাশ্রয়ম্ ॥ ১৪ ॥
তেঽপি বৈ পুরুষা বিষ্ণোর্যৈর্যূয়ং তাডিতা ভৃশম্ ।
অত ঊর্ধ্বং ন গন্তব্যং যত্র বৈ বৈষ্ণবাঃ স্থিতাঃ ॥ ১৫ ॥
ন চিত্রং তাডনং তত্র অহং মন্যে মহাত্মভিঃ ।
ভবতাং জীবনং চিত্রং যক্ষৈর্দত্তং কৃপালুভিঃ ॥ ১৬ ॥
নারায়ণপরং বিপ্রং কস্তং বীক্ষিতুমুৎসহেৎ ।
যুষ্মাভিশ্চ মহাপাপৈর্মার্কণ্ডেয়ং হরিপ্রিয়ম্ ।
সমানেতুং কৃতো যত্নঃ সমীচীনং ন তৎকৃতম্ ॥ ১৭ ॥
নরসিংহং মহাদেবং যে নরাঃ পর্যুপাসতে ।
তেষাং পার্শ্বং ন গন্তব্যং যুষ্মাভির্মম শাসনাৎ ॥ ১৮ ॥
ব্যাস উবাচ –
স এবং কিংকরানুক্ত্বা মৃত্যুং চ পুরতঃ স্থিতম্ ।
যমো নিরীক্ষ্য চ জনং নরকস্থং প্রপীডিতম্ ॥ ১৯ ॥
কৃপয়া পরয়া যুক্তো বিষ্ণুভক্ত্যা বিশেষতঃ ।
জনস্যানুগ্রহার্থায় তেনোক্তা চাগিরঃ শৃণু ॥ ২০ ॥
নরকে পচ্যমানস্য যমেন পরিভাষিতম্ ।
কিং ৎবয়া নার্চিতো দেবঃ কেশবঃ ক্লেশনাশনঃ ॥ ২১ ॥
উদকেনাপ্যলাভে তু দ্রব্যাণাং পূজিতঃ প্রভুঃ ।
যো দদাতি স্বকং লোকং স ৎবয়া কিং ন পূজিতঃ ॥ ২২ ॥
নরসিংহো হৃষীকেশঃ পুণ্ডরীকনিভেক্ষণঃ ।
স্মরণান্মুক্তিদো নৄণাং স ৎবয়া কিং ন পূজিতঃ ॥ ২৩ ॥
ইত্যুক্ত্বা নারকান্সর্বান্পুনরাহ স কিংকরান্ ।
বৈবস্বতো যমঃ সাক্ষাদ্বিষ্ণুভক্তিসমন্বিতঃ ॥ ২৪ ॥
নারদায় স বিশ্বাত্মা প্রাহৈবং বিষ্ণুরব্যযঃ ।
অন্যেভ্যো বৈষ্ণবেভ্যশ্চ সিদ্ধেভ্যঃ সততং শ্রুতম্ ॥ ২৫ ॥
তদ্বঃ প্রীত্যা প্রবক্ষ্যামি হরিবাক্যমনুত্তমম্ ।
শিক্ষার্থং কিংকরাঃ সর্বে শৃণুত প্রণতা হরেঃ ॥ ২৬ ॥
হে কৃষ্ণ কৃষ্ণ কৃষ্ণেতি যো মাং স্মরতি নিত্যশঃ ।
জলং ভিত্ত্বা যথা পদ্মং নরকাদুদ্ধরাম্যহম্ ॥ ২৭ ॥
পুণ্ডরীকাক্ষ দেবেশ নরসিংহ ত্রিবিক্রম ।
ৎবামহং শরণং প্রাপ্ত ইতি যস্তং সমুদ্ধর ॥ ২৮ ॥
ৎবাং প্রপন্নোঽস্মি শরণং দেবদেব জনার্দন ।
ইতি যঃ শরণং প্রাপ্তস্তং ক্লেশাদুদ্ধরাম্যহম্ ॥ ২৯ ॥
ব্যাস উবাচ –
ইত্যুদীরিতমাকর্ণ্য হরিবাক্যং যমেন চ ।
নারকাঃ কৃষ্ণ কৃষ্ণেতি নারসিংহেতি চুক্রুশুঃ ॥ ৩০ ॥
যথা যথা হরের্নাম কীর্তয়ন্ত্যত্র নারকাঃ ।
তথা তথা হরের্ভক্তিমুদ্বহন্তোঽব্রুবন্নিদম্ ॥ ৩১ ॥
নারকা ঊচুঃ –
নমো ভগবতে তস্মৈ কেশবায় মহাত্মনে ।
যন্নামকীর্তনাৎসদ্যো নরকাগ্নিঃ প্রশাম্যতি ॥ ৩২ ॥
ভক্তপ্রিয়ায় দেবায় রক্ষায় হরয়ে নমঃ ।
লোকনাথায় শান্তায় যজ্ঞেশায়াদিমূর্তয়ে ॥ ৩৩ ॥
অনন্তায়াপ্রমেয়ায় নরসিংহায় তে নমঃ ।
নারায়ণায় গুরবে শংখচক্রগদাভৃতে ॥ ৩৪ ॥
বেদপ্রিয়ায় মহতে বিক্রমায় নমো নমঃ ।
বারাহায়াপ্রতর্ক্যায় বেদাংগায় মহীভৃতে ॥ ৩৫ ॥
নমো দ্যুতিমতে নিত্যং ব্রাহ্মণায় নমো নমঃ ।
বামনায় বহুজ্ঞায় বেদবেদাংগধারিণে ॥ ৩৬ ॥
বলিবন্ধনদত্তায় বেদপালায় তে নমঃ ।
বিষ্ণবে সুরনাথায় ব্যাপিনে পরমাত্মনে ॥ ৩৭ ॥
চতুর্ভুজায় শুদ্ধায় শুদ্ধদ্রব্যায় তে নমঃ ।
জামদগ্ন্যায় রামায় দুষ্টক্ষত্রান্তকারিণে ॥ ৩৮ ॥
রামায় রাবণান্তায় নমস্তুভ্যং মহাত্মনে ।
অস্মানুদ্ধর গোবিন্দ পূতিগন্ধান্নমোঽস্তু তে ॥ ৩৯ ॥
ইতি নৃসিংহপুরাণে যমগীতাধ্যায়ঃ ॥
॥ ইতি যমগীতা সমাপ্তা ॥
॥ অথ প্রারভ্যতে অগ্নিপুরাণান্তর্গতা যমগীতা ॥
অগ্নিরুবাচ –
যমগীতাং প্রবক্ষ্যামি উক্তা যা নাচিকেতসে ।
পঠতাং শৃণ্বতাং ভুক্ত্যৈ মুক্ত্যৈ মোক্ষার্থিনং সতাম্ ॥ ১ ॥
যম উবাচ –
আসনং শয়নং যানপরিধানগৃহাদিকম্ ।
বাংছন্ত্যহোঽতিমোহেন সুস্থিরং স্বয়মস্থিরঃ ॥ ২ ॥
ভোগেষু শক্তিঃ সততং তথৈবাত্মাবলোকনম্ ।
শ্রেয়ঃ পরং মনুষ্যাণাং কপিলোদ্গীতমেব হি ॥ ৩ ॥
সর্বত্র সমদর্শিৎবং নির্মমৎবমসংগতা ।
শ্রেয়ঃ পরং মনুষ্যাণাং গীতং পংচশিখেন হি ॥ ৪ ॥
আগর্ভজন্মবাল্যাদিবয়োঽবস্থাদিবেদনম্ ।
শ্রেয়ঃ পরং মনুষ্যাণাং গংগাবিষ্ণুপ্রগীতকম্ ॥ ৫ ॥
আধ্যাত্মিকাদিদুঃখানামাদ্যন্তাদিপ্রতিক্রিয়া ।
শ্রেয়ঃ পরং মনুষ্যাণাং জনকোদ্গীতমেব চ ॥ ৬ ॥
অভিন্নয়োর্ভেদকরঃ প্রত্যযো যঃ পরাত্মনঃ ।
তচ্ছান্তিপরমং শ্রেয়ো ব্রহ্মোদ্গীতমুদাহৃতম্ ॥ ৭ ॥
কর্তবয়মিতি যৎকর্ম ঋগ্যজুঃসামসংজ্ঞিতম্ ।
কুরুতে শ্রেয়সে সংগান্ জৈগীষব্যেণ গীয়তে ॥ ৮ ॥
হানিঃ সর্ববিধিৎসানামাত্মনঃ সুখহৈতুকী ।
শ্রেয়ঃ পরং মনুষ্যাণাং দেবলোদ্গীতমীরিতম্ ॥ ৯ ॥
কামত্যাগাত্তু বিজ্ঞানং সুখং ব্রহ্মপরং পদম্ ।
কামিনাং ন হি বিজ্ঞানং সনকোদ্গীতমেব তৎ ॥ ১০ ॥
প্রবৃত্তং চ নিবৃত্তং চ কার্যং কর্মপরোঽব্রবীৎ ।
শ্রেয়সা শ্রেয় এতদ্ধি নৈষ্কর্ম্য ব্রহ্ম তদ্দহরিঃ ॥ ১১ ॥
পুমাংশ্চাধিগতজ্ঞানো ভেদং নাপ্নোতি সত্তমঃ ।
ব্রহ্মণা বিষ্ণুসংজ্ঞেন পরমেণাব্যযেন চ ॥ ১২ ॥
জ্ঞানং বিজ্ঞানমাস্তিক্যং সৌভাগ্যং রূপমুত্তমম্ ।
তপসা লক্ষ্যতে সর্বং মনসা যদ্যদিচ্ছতি ॥ ১৩ ॥
নাস্তি বিষ্ণুসমং ধ্যেয়ং তপো নানশনাৎপরম্ ।
নাস্ত্যারোগ্যসমং ধন্যং নাস্তি গংগাসমা সরিৎ ॥ ১৪ ॥
ন সোঽস্তি বান্ধবঃ কশ্চিদ্বিষ্ণুং মুক্ত্বা জগদ্গুরুম্ ।
অধশ্চোর্ধ্বং হরিশ্চাগ্রে দেহেন্দ্রিয়মনোমুখে ॥ ১৫ ॥
ইত্যেব সংস্মরন্প্রাণান্যস্ত্যজেৎস হরির্ভবেৎ ।
যত্তদ্ব্রহ্ম যতঃ সর্বং যৎসর্বং তস্য সংস্থিতম্ ॥ ১৬ ॥
অগ্রাহ্যকমনির্দেশ্যং সুপ্রতীকং চ যৎপরম্ ।
পরাপরস্বরূপেণ বিষ্ণুঃ সর্বহৃদি স্থিতঃ ॥ ১৭ ॥
যজ্ঞেশং যজ্ঞপুরুষং কেচিদিচ্ছন্তি তৎপরম্ ।
কেচিদ্বিষ্ণুং হরং কেচিৎকেচিদ্ব্রহ্মাণমীশ্বরম্ ॥ ১৮ ॥
ইন্দ্রাদিনামভিঃ কেচিৎসূর্যং সোমং চ কালকম্ ।
ব্রহ্মাদিস্তম্বপর্যন্তং জগদ্বিষ্ণুং বদন্তি চ ॥ ১৯ ॥
স বিষ্ণুঃ পরমং ব্রহ্ম যতো নাবর্ততে পুনঃ ।
সুবর্ণাদিমহাদানপুণ্যতীর্থাবগাহনৈঃ ॥ ২০ ॥
ধ্যানৈর্ব্রতৈঃ পূজয়া চ ধর্মশ্রুত্যা তদাপ্নুয়াৎ ।
আত্মানং রথিনং বিদ্ধি শরীরং রথমেব চ ॥ ২১ ॥
বুদ্ধিং তু সারথিং বিদ্ধি মনঃ প্রগ্রহমেব চ ।
ইন্দ্রিয়াণি হয়ানাহুর্বিষয়াংস্তেষু গোচরান্ ॥ ॥ ২২ ॥
আত্মেন্দ্রিয়মনোয়ুক্তং ভোক্তেত্যাহুর্মনীষিণঃ ।
যস্ত্ববিজ্ঞানবান্ভবত্যযুক্যেন মনসা সদা ॥ ২৩ ॥
ন তৎপদমবাপ্নোতি সংসারং চাধিগচ্ছতি ।
যস্তু বিজ্ঞানবান্ভবতি যুক্তেন মনসা সদা ॥ ২৪ ॥
স তৎপদমবাপ্নোতি যস্মাদ্ভূয়ো ন জায়তে ।
বিজ্ঞানসারথির্যস্তু মনঃ প্রগ্রহবান্নরঃ ॥ ২৫ ।
সোঽধ্বানং পরমাপ্নোতি তদ্বিষ্ণোঃ পরমং পদম্ ।
ইন্দ্রিয়েভ্যঃ পরা হ্যর্থা অর্থেভ্যশ্চ পরং মনঃ ॥ ২৬ ॥
মনসস্তু পরা বুদ্ধির্বুদ্ধেরাত্মা মহান্পরঃ ।
মহতঃ পরমব্যক্তমব্যক্তাৎপুরুষঃ পরঃ ॥ ২৭ ॥
পুরুষান্ন পরং কিংচিৎ সা কাষ্ঠা সা পরা গতিঃ ।
এষু সর্বেষু ভূতেষু গূঢাত্মা ন প্রকাশতে ॥ ২৮ ॥
দৃশ্যতে ৎবগ্র্যযা বুদ্ধ্যা সূক্ষ্ময়া সূক্ষ্মদর্শিভিঃ ।
যচ্ছেদ্বাঙ্মনসী প্রাজ্ঞঃ তদ্যচ্ছেজ্জ্ঞানমাত্মনি ॥ ২৯ ॥
জ্ঞানমাত্মনি মহতি নিয়চ্ছেচ্ছান্ত আত্মনি ।
জ্ঞাৎবা ব্রহ্মাত্মনোর্যোগং যমাদ্যৈর্ব্রহ্ম সদ্ভবেৎ ॥ ৩০ ॥
অহিংসা সত্যমস্তেয়ং ব্রহ্মচর্যাপরিগ্রহৌ ।
যমাশ্চ নিয়মাঃ পংচং শৌচং সংতোষসত্তমঃ ॥ ৩১ ॥
স্বাধ্যায়েশ্বরপূজা চ আসনং পদ্মকাদিকম্ ।
প্রাণায়ামো বায়ুজয়ঃ প্রত্যাহারঃ স্বনিগ্রহঃ ॥ ৩২ ॥
শুভে হ্যেকত্র বিষয়ে চেতসো যৎপ্রধারণম্ ।
নিশ্চলৎবাত্তু ধীমদ্ভির্ধারণা দ্বিজ কথ্যতে ॥ ৩৩ ॥
পৌনঃ পুন্যেন তত্রৈব বিষয়েষ্বেব ধারণা ।
ধ্যানং স্মৃতং সমাধিস্তু অহংব্রহ্মাত্মসংস্থিতিঃ ॥ ৩৪ ॥
ঘটধ্বংসাদ্যথাকাশমভিন্নং নভসা ভবেৎ ।
মুক্তো জীবো ব্রহ্মণৈবং সদ্ব্রহ্ম ব্রহ্ম বৈ ভবেৎ ॥ ৩৫ ॥
আত্মানং মন্যতে ব্রহ্ম জীবো জ্ঞানেন নান্যথা ।
জীবো হ্যজ্ঞানতৎকার্যমুক্তঃ স্যাদজরামরঃ ॥ ৩৬ ॥
অগ্নিরুবাচ –
বসিষ্ঠ যমগীতোক্তা পঠতাং ভুক্তিমুক্তিদা ।
আত্যন্তিকো লয়ঃ প্রোক্তো বেদান্তব্রহ্মধীময়ঃ ॥ ৩৭ ॥
॥ ইতি অগ্নিপুরাণান্তর্গতা যমগীতা সমাপ্তা ॥
Also Read:
Sri Yama Gita-s from Vishnu, Nrisimha, and Agni Purana Lyrics in Hindi | English | Bengali | Gujarati | Kannada | Malayalam | Oriya | Telugu | Tamil
