Uttara Geetaa Bhashya in Bengali:
॥ উত্তর গীতা ভাষ্য ॥
॥ উত্তরগীতা ॥
শ্রীমৎপরমহংসপরিব্রাজকাচার্য শ্রীমদ্গৌডপাদাচার্যৈঃ
বিরচিতয়া ব্যাখ্যযা সমেতা সংভূষিতা ॥
অখণ্ডং সচ্চিদানন্দমবাঙ্মনসগোচরম্ ।
আত্মানমখিলাধারমাশ্রয়েঽভীষ্টসিদ্ধয়ে ॥
ইহ খলু ভগবানর্জুনঃ ধর্মক্ষেত্রে কুরুক্ষেত্রে
ভগবদুপদিষ্টমাত্মতত্ত্বোপদেশং বিষয়ভোগপ্রাবণ্যেন
বিস্মৃত্য পুনস্তদেবাত্মতত্ত্বং জ্ঞাতুং ভগবন্তং পৃচ্ছতি—
অর্জুন উবাচ —
যদেকং নিষ্কলং ব্রহ্ম ব্যোমাতীতং নিরঞ্জনম্ ।
অপ্রতর্ক্যমবিজ্ঞেয়ং বিনাশোৎপত্তিবর্জিতম্ ॥ ১ ॥
কারণং যোগনির্মুক্তং হেতুসাধনবর্জিতম্ ।
হৃদয়াম্বুজমধ্যস্থং জ্ঞানজ্ঞেয়স্বরূপকম্ ॥ ২ ॥
তৎক্ষণাদেব মুচ্যেত যজ্জ্ঞানাদ্ব্রূহি কেশব ।
হে কেশব যজ্জ্ঞানাৎ যস্য ব্রহ্মণঃ সম্যগ্জ্ঞানাৎ
তৎক্ষণাদেব জ্ঞানোত্তরক্ষণাদেব মুচ্যেত
অবিদ্যানিবৃত্তিদ্বারা
আনন্দাবাপ্তির্ভবেৎ, তৎ ব্রহ্ম ব্রূহি
স্বরূপতটস্থলক্ষণাভ্যাং
প্রতিপাদয় ইত্যর্থঃ । এতদেব লক্ষণৈর্দর্শয়তি—
যদিত্যাদিনা ।
একং সজাতীয়বিজাতীয়স্বগতভেদরহিতম্, নিষ্কলং
অবয়বরহিতম্, ব্যোমাতীতম্,
আকাশাদিচতুর্বিংশতিতত্ত্বাতীতম্,
নিরঞ্জনম্ স্বয়ংপ্রকাশম্, অপ্রতর্ক্যম্,
অমনোগোচরম্—
‘যন্মনসা ন মনুতে’ ইতি শ্রুতেঃ, অবিজ্ঞেয়ং
প্রমাণাবিষয়ম্—
‘যদ্বাচানিরুক্তম্’ ‘যতো বাচো নিবর্তন্তে’
ইতি শ্রুতেঃ,
বিনাশোৎপত্তিবর্জিতং ত্রৈকালিকরূপম্, কারণং
সর্বোৎপত্তিনিমিত্তোপাদান-
রূপম্, যোগনির্মুক্তং বস্ত্বন্তরসংবন্ধরহিতম্,
হেতুসাধনবর্জিতং নিমিত্তৎবোপাদনৎবধর্মাদিবর্জিতং
ইত্যর্থঃ, স্বস্য সনাতনৎবেন তাভ্যামেব বর্জিতমিতি বা,
হৃদয়াম্বুজমধ্যস্থং সর্বলোকান্তর্নিয়ামকতয়া
সর্বলোকহৃদয়-
কমলমধ্যস্থম্, জ্ঞানজ্ঞেয়স্বরূপকং জ্ঞানং
স্ববিষয়প্রকাশঃ
জ্ঞেয়ং বিষয়ঃ তদুভয়স্বরূপং তদুভয়সত্তাত্মকম্,
যৎ ব্রহ্ম, তৎ কীদৃশমিতি প্রশ্নার্থঃ ॥
এবমর্জুনেন পৃষ্টো ভগবান্
প্রশ্নার্থমভিনন্দন্ উত্তরমাহ—
শ্রীভগবানুবাচ —
সাধু পৃষ্টং মহাবাহো বুদ্ধিমানসি পাণ্ডব ॥ ৩ ॥
যন্মাং পৃচ্ছসি তত্ত্বার্থমশেষং প্রবদাম্যহম্ ।
হে মহাবাহো ইতি সম্বোধয়ন্
সর্বশত্রুনিবর্হণসামর্থ্যং
দ্যোতয়তি । শত্রবো রাগাদয়শ্চ । হে পাণ্ডবেতি সৎকুলপ্রসূতিং
দ্যোতয়তি । বুদ্ধিমানসীতি স্তুবন্
স্বোক্তার্থগ্রহণাবধারণসামর্থ্যং
দ্যোতয়তি ।ৎবং মাং প্রতি যদাত্মতত্ত্বং পৃচ্ছসি, তদশেষং
যথা ভবতি তথা তুভ্যমহং প্রবদামি ।
তদেবাত্মতত্ত্বং সোপায়মাহ—
আত্মমন্ত্রস্য হংসস্য পরস্পরসমন্বয়াৎ ॥ ৪ ॥
যোগেন গতকামানাং ভাবনা ব্রহ্ম চক্ষতে ।
আত্মনি তাৎপর্যেণ পর্যবসন্নস্য প্রণবাত্মকস্য মন্ত্রস্য
তাৎপর্যবিষয়স্য, হংসস্য হন্তি স্বতত্ত্বজ্ঞানেন
জ্ঞাতৃসংসারমিতি হংসঃ তস্য পরমাত্মনঃ,
পরস্পরসমন্বয়াৎ
অন্যোন্যপ্রতিপাদ্যপ্রতিপাদকভাবসংসর্গাৎ, অনেন
সর্ববেদান্ততাৎপর্যগোচরৎবম্ ‘ তত্তু সমন্বয়াৎ ‘
ইতি সমন্বয়াধিকরণোক্তং দর্শিতম্; যোগেন
আত্মতত্ত্ববিচারাখ্যেন,
গতকামানাং নষ্টারিষড্বর্গাণাম্—অনেন জ্ঞানপ্রতি-
বন্ধককল্মষনিবৃত্তিঃ দর্শিতা; তেষাং যা ভাবনা
‘ তত্ত্বমসি ‘ ইত্যাদিবাক্যজন্যা চরমবৃত্তিঃ,
তন্নিবৃত্তির্বা,
তজ্জন্যাবিদ্যানিবৃত্তির্বা, তন্নিবৃত্ত্যধিষ্ঠানং বা, সা
ব্রহ্মেতি চক্ষতে
প্রাহুঃ তত্ত্বজ্ঞাঃ ইতি শেষঃ ।
তদেব তত্ত্বজ্ঞানং তন্নিবর্ত্যাবিদ্যানিবৃত্তিং চ আহ—
শরীরিণামজস্যান্তং হংসৎবং পারদর্শনম্ ॥ ৫ ॥
হংসো হংসাক্ষরং চৈতৎকূটস্থং যত্তদক্ষরম্ ।
তদ্বিদ্বানক্ষরং প্রাপ্য জহ্যান্মরণজন্মনী ॥ ৬ ॥
অজস্য জীবস্য অন্তম্ অবধিভূতং হংসৎবং
পরব্রহ্মস্বরূপৎবং শরীরিণাং জীবানাং পারদর্শনং
পরমজ্ঞানং হংসঃ ব্রহ্ম হংসাক্ষরং চ প্রণবং চ
এতৎকূটস্থং যৎ,এতদুভয়সাক্ষিভূতং যৎ,
তদক্ষরমিত্যুচ্যতে ।
অনেন ত্রিবিধপরিচ্ছেদশূন্যৎবং দর্শিতম্ । তৎস্বরূপং
বিদ্বান্
বিবেকীসন্ তদক্ষরং বস্তু প্রাপ্য
মরণজন্মনীজননমরণপ্রবাহরূপং
সংসারং জহ্যাৎ ত্যজেদিতি যাবৎ ॥
সা চ মুক্তিঃ জীবপরমাত্মনোরৈক্যমিতি প্রতিপাদয়তি—
অধ্যারোপাপবাদাভ্যাং নিষ্প্রপঞ্চং প্রপঞ্চ্যতে—
কাকীমুখং ককারান্তমুকারশ্চেতনাকৃতিঃ ।
মকারস্য তু লুপ্তস্য কোঽর্থঃ সম্প্রতিপদ্যতে ॥ ৭ ॥
কং চ অকং চ কাকে সুখদুঃখে, তে অস্য স্ত ইতি কাকী
জীবঃ অবিদ্যাপ্রতিবিম্বঃ, তস্য মুখং মুখস্থানীয়ং
বিম্বভূতং যদ্ব্রহ্ম, তৎপ্রতিপাদকং যৎ ককারান্তং,
মুখমিত্যেতৎ কাকাক্ষিন্যায়েন অত্রাপি সংবধ্যতে । তথা চ
শব্দশ্লেষঃ মুখভূতককারস্য কাকীত্যত্র প্রাথমিক-
ককারস্য অন্তম্ অন্তিমং যদক্ষরম্ অকারাত্মকং
পঞ্চীকৃতপঞ্চমহাভূতানি তৎকার্যাণি সর্বং
বিরাডিত্যুচ্যতে । এতৎ স্থূলশরীরমাত্মনঃ ।
ইন্দ্রিয়ৈরর্থোপলব্ধির্জাগরিতম্ । তদুভয়াভিমান্যাত্মা
বিশ্বঃ ।
এতত্ত্রয়ম্ অকারস্যার্থঃ । উকারশ্চেতনাকৃতিঃ ।
কাকীমুখেত্যত্র
মকারাৎ পরো য উকারঃ অপঞ্চীকৃতপঞ্চমহাভূতানি
তৎকার্যং
সপ্তদশকং লিঙ্গং হিরণ্যগর্ভ ইত্যুচ্যতে । এতৎ
সূক্ষ্মরীরমাত্মনঃ । করণেষূপসংহৃতেষু
জাগরিতসংস্কারজন্য-
প্রত্যযঃ সবিষয়ঃ স্বপ্নঃ, তদুভয়াভিমানী আত্মা তৈজসঃ ।
এতত্ত্রয়মুকারস্যার্থঃ । অত এব
উকারশ্চেতনাকৃতিরিত্যুক্তম্ ।
চেতনাকৃতিঃ চেতনস্য হিরণ্যগর্ভাত্মকতৈজসস্য আকৃতিঃ
বাচকঃ । মকারস্য — কাকীমুখেত্যত্র
উকারাৎপূর্বমভিহিতো
যো মকারঃ শরীরদ্বয়কারণমাত্মাজ্ঞানং সাভাসং
অব্যাকৃতমিত্যুচ্যতে । তচ্চ ন সৎ, নাসৎ, নাপি
সদসৎ; ন ভিন্নম্, নাভিন্নম্, নাপি ভিন্নাভিন্নং
কুতশ্চিৎ
ন নিরবয়বম্, সাবয়বম্, নোভয়ম্ :
কেবলব্রহ্মাত্মৈকৎব-
জ্ঞানাপনোদ্যম্ । সর্বপ্রকারকজ্ঞানোপসংহারো বুদ্ধেঃ
কারণাত্মনাবস্থানং সুষুপ্তিঃ । তদুভয়াভিমান্যাত্মা
প্রাজ্ঞঃ । এতত্ত্রয়ং তস্য মকারস্যার্থঃ । লুপ্তস্য—অকার
উকারে, উকারো মকারে, মকার ওংকারে, এবং লুপ্তস্য কোঽর্থঃ
ককারাৎপরো যঃ অকারঃ তস্য যোঽর্থঃ লক্ষ্যস্বরূপং
মকারাৎপরস্যোংকারস্য
অর্থঃ লক্ষ্যস্বরূপম্, ওংকারাত্মাসাক্ষী কেবলচিন্মাত্র-
স্বরূপঃ নাজ্ঞানং তৎকার্যং চ, কিং তু নিত্যশুদ্ধবুদ্ধ-
মুক্তসত্যপরমানন্দাদ্বিতীয়ং ব্রহ্মৈব সম্প্রতিপদ্যতে তদৈক্যং
প্রাপ্নোতীত্যর্থঃ । ‘ অয়মাত্মা ব্রহ্ম ‘ ‘ স
যশ্চায়ং পুরুষে যশ্চাসাবাদিত্যে স একঃ ‘ ‘
তত্ত্বমসি ‘
‘ অহং ব্রহ্মাস্মি ‘ ইত্যাদিশ্রুতিভ্য ইতি ভাবঃ ॥
যদ্বা পাঠান্তরে—
কাকীমুখককারান্তমুকারশ্চেতনাকৃতিঃ ।
অকারস্য তু লুপ্তস্য কোঽর্থঃ সম্প্রতিপদ্যতে ॥
কং চ অকং চ কাকে সুখদুঃখে, তে অস্য স্ত ইতি কাকী
জীবঃ তৎপ্রতিপাদকশব্দস্য মুখে অগ্রে যঃ ককারঃ তস্যান্তঃ অকারঃ
ব্রহ্ম চেতনাকৃতিঃ জীবাকারবদিত্যর্থঃ । ব্রহ্মৈব
স্বাবিদ্যযা সংসরতি ইতি ন্যায়াৎ । মকারস্য জীবৎবাকারস্য
লুপ্তস্যাপগতস্য কোঽর্থঃ
অখণ্ডাদ্বিতীয়সচ্চিদানন্দস্বরূপোঽর্থঃ ।
তং কাকীমুখেত্যাদ্যুক্তপ্রকারেণৈক্যানুসন্ধানবান্
সম্প্রতিপদ্যতে
প্রাপ্নোতি ইত্যর্থঃ । যদ্বা, হে কাকীমুখ ব্রহ্ম ৎবং
ককারান্তঃ
ককারস্যান্তিমো বর্ণো য অকারঃ তৎপ্রতিপাদ্যব্রহ্মৈবেত্যর্থঃ ।
উকারঃ মূলপ্রকৃতিঃ তস্য ব্রহ্মণঃ চেতনা চেতয়মানা
আকৃতিঃ শক্তিঃ । মকারস্য চ লুপ্তস্য পরিণমমানাবিদ্যা-
লোপবতো ব্রহ্মণঃ কোঽর্থঃ ককারাৎপরো য অকারঃ তস্য যোঽর্থঃ
লক্ষ্যস্বরূপং তৎসম্প্রতিপদ্যতে তদৈক্যং প্রাপ্নোতীত্যর্থঃ ।
এবমুপাস্স্বেতি শেষঃ । তথা চ শ্রুতিঃ ‘ আপ্লবস্ব
প্রপ্লবস্ব, আণ্ডী ভব জ মা মুহুঃ, সুখাদীং
দুঃখনিধনাম্,
প্রতিমুঞ্চস্ব স্বাং পুরম্ ‘ ইতি । অস্যার্থঃ—হে জ
জননমরণ-
যুক্তজীব ৎবমাপ্লবস্ব জীবন্মুক্তো ভব প্রপ্লবস্য সাক্ষান্মুক্তো
ভব, আণ্ডী ব্রহ্মাণ্ডান্তর্বর্তী সংসারি মুহুর্মা ভব মা
ভূঃ । সংসারী চেৎ কিমপরাধ ইত্যাশঙ্ক্যাহ—সুখাদীং
বৈষয়িকসুখহেতুং দুঃখনিধনাং দুঃখমেব নিধনে অন্তে,
যস্যাস্তাং
স্বাং পুরং স্থূলসূক্ষ্মরূপদেহদ্বয়ং প্রতিমুঞ্চস্ব ত্যজ ।
এবং যোগধারণয়োপাসকস্য প্রাণায়ামপরায়ণস্য
নান্তরীয়কফলমপ্যাহ—
গচ্ছংস্তিষ্ঠন্সদা কালং বায়ুস্বীকরণং পরম্ ।
সর্বকালপ্রয়োগেন সহস্রায়ুর্ভবেন্নরঃ ॥ ৮ ॥
নরঃ ‘ শতায়ুঃ পুরুষঃ শতেন্দ্রিয়ঃ ‘ ইতি
পরিমিতায়ুরপি গচ্ছন্ গমনকালে তিষ্ঠন্ অবস্থানকালে
সদা কালং সর্বস্মিন্কালে শয়নাদিকালান্তরে পরং বিশেষেণ
বায়ুস্বীকরণং প্রাণায়ামং কুর্বন্ তেন সার্বকালপ্রয়োগেন
সার্বকালিকবায়ুধারণয়া সহস্রায়ুঃ সহস্রবর্ষজীবী
ভবেৎ ভূয়াদিত্যর্থঃ ॥
ননু পরমফলং কদা ভবতীত্যত আহ—
যাবৎপশ্যেৎখগাকারং তদাকারং বিচিন্তয়েৎ ।
খগাকারং হংসস্বরূপং যাবৎপশ্যেৎ যাবৎপর্যন্তং
সাক্ষাৎকুর্যাৎ, তাবৎপর্যন্তং তদাকারং পরব্রহ্মস্বরূপং
পূর্বোক্তধারণয়া প্রবৃদ্ধায়ুঃ পুরুষঃ বিচিন্তয়েৎ
ধ্যায়েদিত্যর্থঃ ॥
তাদৃশাত্মসাক্ষাৎকারার্থং নৈরন্তর্যেণ আত্মজগতো-
রভেদধ্যানমাহ—
খমধ্যে কুরু চাত্মানমাত্মমধ্যে চ খং কুরু ।
আত্মানং খময়ং কৃৎবা ন কিংচিদপি চিন্তয়েৎ ॥ ৯ ॥
খমধ্যে দহরাকাশমধ্যে আত্মানং পরমাত্মানং
কুরু এতদভিন্নসত্তাত্মকমিতি ভাবয়েদিত্যর্থঃ । আত্মমধ্যে চ
পরমাত্মনি খং কুরু আকাশং কুরু তদুপাদানকং ভাবয়েৎ ।
আত্মানং পরমাত্মানং খময়ম্ আকাশাত্মকং কৃৎবা
কিংচিদপি ব্রহ্মব্যতিরিক্তমন্যদপি ন চিন্তয়েৎ ন
ধ্যায়েদিত্যর্থঃ । যদ্বা, খ-শব্দেন জীবোঽভিধীয়তে,
‘
আকাশশরীরং ব্রহ্ম ‘ ইত্যাদিশ্রুতেঃ । আত্মশব্দেন
পরমাত্মা
অভিধীয়তে । তয়োরৈক্যং বুদ্ধ্ব ন কিংচিদপি চিন্তয়েদিতি ॥
এবমুক্তপ্রকারেণ যোগী ভূৎবা ব্রহ্মজ্ঞাননিষ্ঠ এব
স্যাৎ ইত্যাহ—
স্থিরবুদ্ধিরসংমূঢো ব্রহ্মবিদ্ব্রহ্মণি স্থিতঃ ।
বহির্ব্যোমস্থিতং নিত্যং নাসাগ্রে চ ব্যবস্থিতম্ ।
নিষ্কলং তং বিজানীয়াচ্ছ্বাসো যত্র লয়ং গতঃ ॥ ১০ ॥
ব্রহ্মবিৎ উক্তপ্রকারেণ ব্রহ্মজ্ঞানী সন্ স্থিরবুদ্ধিঃ
নিশ্চলজ্ঞানী ভূৎবা অসংমূঢঃ অজ্ঞানরহিতঃ সন্
ব্রহ্মণিস্থিতঃ ব্রহ্মনিষ্ঠ এব নিত্যং যত্র শ্বাসঃ শ্বাসবায়ুঃ
লয়ং গতঃ নাশং প্রাপ্তঃ, তত্র নাসাগ্রে ব্যবস্থিতং
বহির্ব্যোমস্থিতং বহিরাকাশস্থিতং চ নিষ্কলং কলাতীতং কং
ব্রহ্ম
বিজানীয়াৎ বুধ্যাৎ ॥
ব্রহ্মজ্ঞাননিষ্ঠস্য মনোনৈশ্চল্যার্থং ধারণা-
বিশেষমাহ—
পুটদ্বয়বিনির্মুক্তো বায়ুর্যত্র বিলীয়তে ॥ ১১ ॥
তত্র সংস্থং মনঃ কৃৎবা তং ধ্যায়েৎপার্থ ঈশ্বরম্ ॥ ১২ ॥
হে পার্থ পুটদ্বয়নির্মুক্তঃ নাসারন্ধ্রদ্বয়বিনির্গতঃ
বায়ুঃ যত্র বিলীয়তে লয়ং গচ্ছতি, তস্মিন্মার্গে সম্যক্
স্থিতং মনঃ কৃৎবা তম্ ঈশ্বরং ধ্যায়েৎ
বক্ষ্যমাণপ্রকারেণ
ধ্যায়েৎ ॥
তমেব প্রকারমাহ—
নির্মলং তং বিজানীয়াৎষডূর্মিরহিতং শিবম্ ।
নির্মলং নিষ্কৃষ্টাহংকারচৈতন্যাত্মকম্, অত এব
ষডূর্মিরহিতং ক্ষুৎপিপাসাদিহীনং শিবং মঙ্গলস্বরূপমিতি
বিজানীয়াৎ ধ্যায়েদিত্যর্থঃ
কিং চ,
প্রভাশূন্যং মনঃশূন্যং বুদ্ধিশূন্যং নিরাময়ম্ ॥ ১৩ ॥
সর্বশূন্যং নিরাভাসং সমাধিস্তস্য লক্ষণম্ ।
ত্রিশূন্যং যো বিজানীয়াৎস তু মুচ্যেত বন্ধনাৎ ॥ ১৪ ॥
প্রভাশূন্যং বৃত্ত্যাত্মকপ্রকাশরহিতম্, তত্র
হেতুঃ মনঃশূন্যং মনোরহিতম্, অত এব বুদ্ধিশূন্যং
আসক্তি-
রহিতং নিরাময়ং নির্ব্যাজম্, অত এব নিরাভাসং
ভ্রমরহিতম্,
অত এব সর্বশূন্যম্ স্বব্যতিরিক্তবস্তুমাত্রস্য মিথ্যাৎবেন
আনন্দৈকরসং যৎ ব্রহ্ম, তদ্ধ্যানং সমাধিঃ । তস্য তস্মিন্
স্থিতস্য কিং লক্ষণমিত্যাশঙ্ক্যাহ—ত্রিশূন্যং পূর্বোক্ত-
প্রভাদিশূন্যং যো বিজানীয়াৎ বুধ্যেৎ । এতেন
জাগ্রদাদ্যবস্থা-
ত্রয়শূন্যৎবং দর্শিতম্ প্রভামনোবুদ্ধিশব্দৈঃ ক্রমেণ
তাসামভিধানাৎ । তাদৃশং ব্রহ্ম যো বিজানীয়াৎ, স
সমাধিস্থঃ সংসারবন্ধনাৎ মুচ্যেত মুক্তো ভবতি ॥
এবং জীবন্মুক্তস্য দেহাদিষ্বভিনিবেশো নাস্তীত্যাহ—
স্বয়মুচ্চলিতে দেহে দেহী ন্যস্তসমাধিনা ।
নিশ্চলং তদ্বিজানীয়াৎসমাধিস্থস্য লক্ষণম্ ॥ ১৫ ॥
দেহে স্বয়ম্ অনাদিপ্রারব্ধকর্মবাসনাবশাৎ
উচ্চলিতে গমনাদিকং কুর্বত্যপি দেহী জীবঃ ন্যস্তসমাধিনা
নিশ্চলসমাধিয়োগেন নিশ্চলং যথা ভবতি তথা তং
পরমাত্মানং বিজানীয়াৎ । তদেব সমাধিস্থিতস্য আত্ময়োগ-
স্থিতস্য লক্ষণমিত্যুচ্যতে ॥
ইতোঽপ্যাত্মজ্ঞস্য লক্ষণমুচ্যতে—
অমাত্রং শব্দরহিতং স্বরব্যঞ্জনবর্জিতম্ ।
বিন্দুনাদকলাতীতং যস্তং বেদ স বেদবিৎ ॥ ১৬ ॥
অমাত্রং হ্রস্বদীর্ঘপ্লুতাদিরহিতং শব্দরহিতং
শব্দাতীতম্, স্বরব্যঞ্জনবর্জিতং
অক্ষরসমূহাত্মকপদানভিধেয়ং
বিন্দুনাদকলাতীতম্—অনুস্বারো বিন্দুঃ সংবৃতে গলবিবরে
যদ্দীর্ঘ-
ঘণ্টানির্হ্নাদবদনুরণনং স নাদঃ, কলা নাদৈকদেশঃ
তৈরতীতম্, ন যথাকথংচিচ্ছব্দবাচ্যমিত্যর্থঃ ।
এতাদৃশং ব্রহ্ম
যো বেদ, স বেদবিৎ সকলবেদান্ততাৎপর্যজ্ঞঃ নান্য
ইত্যর্থঃ ॥
এবং প্রাপ্তাত্মতত্ত্বজ্ঞানস্য অসম্ভাবনাবিপরীত-
ভাবনাদিনিবৃত্তৌ সত্যাং ন কিংচিৎকৃত্যমস্তীত্যাহ—
প্রাপ্তে জ্ঞানেন বিজ্ঞানে জ্ঞেয়ে চ হৃদি সংস্থিতে ।
লব্ধশান্তিপদে দেহে ন যোগো নৈব ধারণা ॥ ১৭ ॥
জ্ঞানেন পরোক্ষাত্মকেন বিজ্ঞানে অপরোক্ষানুভবাত্মকে,
যদ্বা, জ্ঞানেন শাস্ত্রাচার্যোপদেশজন্যেন বিজ্ঞানে
অনুভবাত্মকে প্রাপ্তে সতি, জ্ঞেয়ে সর্ববেদান্ততাৎপর্যগোচরে
পরমাত্মনি হৃদি সংস্থিতে হৃদ্যপরোক্ষতয়া ভাসমানে
সতি, দেহে দেহোপাধিমতি জীবে লব্ধশান্তিপদে
সম্প্রাপ্তব্রহ্মভাবে সতি, তদা, যোগোঽপি নাস্তি ধারণা
চ নাস্তি;
সিদ্ধে ফলে সাধনেন প্রয়োজনাভাবাদিতি ভাবঃ ॥
এবমাত্মতত্ত্বাপরোক্ষজ্ঞানেন মুক্তঃ সন্ ঈশ্বর এব
জায়তে ইতি তস্য স্বরূপমাহ—
যো বেদাদৌ স্বরঃ প্রোক্তো বেদান্তে চ প্রতিষ্ঠিতঃ ।
তস্য প্রকৃতিলীনস্য যঃ পরঃ স মহেশ্বরঃ ॥ ১৮ ॥
বেদাদৌ সর্ববেদানামাদৌ বেদস্যাধঃস্রবণপরিহারায়
বিধীয়মানঃ বেদান্তে চ সর্ববেদানামন্তে চ উপর্যুৎক্রমণ-
পরিহারায় প্রতিষ্ঠিতঃ সংস্থাপিতঃ, চকারাৎ সর্ববেদ-
রক্ষণায় বেদমধ্যে চ নিপাতিতঃ যঃ স্বরঃ প্রণবাত্মকঃ,
তস্য প্রণবস্য প্রকৃতৌ পরাবস্থায়াং লীনস্য যঃ পরঃ
পরাদিবাক্চতুষ্টয়োদ্বোধকঃ, উপলক্ষণং চৈতৎ সর্ব-
প্রাণেন্দ্রিয়করণবর্গপ্রবোধকঃ সর্বনিয়ন্তা সর্বান্তর্যামী
যো মহেশ্বর ইতি প্রসিদ্ধঃ স এব আত্মতত্ত্বজ্ঞানী, নান্য
ইত্যর্থঃ ॥
আত্মতত্ত্বাপরোক্ষানুভবাৎপূর্বং যাবান্ তৎসাধন-
প্রয়াসঃ কৃতঃ, জাতে চ তস্মিন্ অনুভবে স ন কর্তব্য ইতি
সদৃষ্টান্তমাহ—
নাবার্থী চ ভবেত্তাবদ্যাবৎপারং ন গচ্ছতি ।
উত্তীর্ণে চ সরিৎপারে নাবয়া কিং প্রয়োজনম্ ॥ ১৯ ॥
যাবৎ যাবৎপর্যন্তং পারং নদীতীরং ন গচ্ছতি ন
সম্প্রাপ্নোতি, তাবৎ তাবৎপর্যন্তং নাবার্থী নদীতরণ-
সাধনপ্লবনার্থী ভবেৎ ভূয়াৎ, সরিৎপারে নদীতীরে
উত্তীর্ণে সতি নাবয়া নদীতরণসাধনেন কিং প্রয়োজনং কিমপি
নাস্তীত্যর্থঃ । তদ্বদত্রাপি আত্মাপরোক্ষে জাতে
শাস্ত্রাদিভারৈঃ কিং
প্রয়োজনমিতি ভাবঃ ॥
তদেব ভঙ্গ্যন্তরেণ সদৃষ্টান্তমাহ—
গ্রন্থমভ্যস্য মেধাবী জ্ঞানবিজ্ঞানতৎপরঃ ।
পলালমিব ধান্যার্থী ত্যজেদ্গ্রন্থমশেষতঃ ॥ ২০ ॥
মেধাবী বুদ্ধিমান্ গ্রন্থমভ্যস্য বেদান্তাদিশ্রবণং
কৃৎবা, জ্ঞানে সামান্যজ্ঞানে বিজ্ঞানে বিশেষানুভবে
তৎপরঃ সন্ গ্রন্থং সর্বশাস্ত্রং ত্যজেৎ । অত্র দৃষ্টান্তঃ—
ধান্যার্থী ধান্যসহিতং তৃণমাদায় তদ্গতধান্যস্বীকা-
রানন্তরং পলালং গতকণিশং তৃণং যথা ত্যজেৎ
তদ্বদিত্যর্থঃ ॥
কিংচ —
উল্কাহস্তো যথা কশ্চিদ্দ্রব্যমালোক্য তাং ত্যজেৎ
জ্ঞানেন জ্ঞেয়মালোক্য পশ্চাজ্জ্ঞানং পরিত্যজেৎ ॥ ২১ ॥
কশ্চিৎ লোকে অন্ধকারস্থিতদ্রব্যদর্শনার্থী সন্,
যথা উল্কাহস্তো ভবতি, পশ্চাদ্দ্রব্যমালোক্য তদনন্তরং
তামুল্কাং যথা ত্যজেৎ, তথা জ্ঞানেন জ্ঞানসাধনেন
জ্ঞেয়ং ব্রহ্ম আলোক্য অপরোক্ষীকৃত্য পশ্চাৎ জ্ঞানং
জ্ঞানসাধনং পরিত্যজেৎ ইত্যর্থঃ ।
জাতে চাপরোক্ষজ্ঞানে, তেন প্রয়োজনাভাবাৎ
সাধনং পরিত্যাজ্যমিত্যেতদ্দৃষ্টান্তান্তরেণাপ্যাহ—
যথামৃতেন তৃপ্তস্য পয়সা কিং প্রয়োজনম্ ।
এবং তং পরমং জ্ঞাৎবা বেদৈর্নাস্তি প্রয়োজনম্ ॥ ২২ ॥
যথা অমৃতেন সাগরমথনাদ্ভূতেন অমৃতেন তৃপ্তস্য
সন্তুষ্টস্য পয়সা ক্ষীরেণ প্রয়োজনং নাস্তি, এবং পরমং
তং জ্ঞাৎবা পরমাত্মানমপরোক্ষীকৃত্য বেদৈঃ বেদান্ত-
শাস্ত্রাদিভিঃ কিং প্রয়োজনম্, ন কিমপীত্যর্থঃ ॥
কিংচ, তত্ত্বজ্ঞানিনঃ বিধিনিষেধাদিকর্তব্যমপি নাস্তীত্যাহ—
জ্ঞানামৃতেন তৃপ্তস্য কৃতকৃত্যস্য যোগিনঃ ।
ন চাস্তি কিঞ্চিৎকর্তব্যমস্তি চেন্ন স তত্ত্ববিৎ ॥ ২৩ ॥
জ্ঞানামৃতেন তৃপ্তস্য আনন্দৈকরসং প্রাপ্তস্য কৃত-
কৃত্যস্য কৃতার্থস্য যোগিনঃ মুক্তস্য কিংচিদপি
বিধিনিষেধাদি কর্তব্যং নাস্তি, তত্ত্বেন উত্তীর্ণৎবাদিতি ভাবঃ ।
কর্তব্যমপি লোকসংগ্রহার্থমেব, যদ্যভিনিবেশেন কর্মাসক্তিরস্তি,
তর্হি স তত্ত্ববিন্ন ভবতি, আরূঢো ন ভবতীত্যর্থঃ ॥
অর্থজ্ঞানং বিনা কেবলং বেদপাঠমাত্রেণ বেদবিত্ত্বং
নাস্তি, কিং তু বেদতাৎপর্যগোচরব্রহ্মজ্ঞানেনৈব
বেদবিত্ত্বমিত্যাহ—
তৈলধারামিবাচ্ছিন্নং দীর্ঘঘণ্টানিনাদবৎ ।
অবাচ্যং প্রণবস্যাগ্রং যস্তং বেদ স বেদবিৎ ॥ ২৪ ॥
তৈলধারামিবাচ্ছিন্নং সন্ততধারাবৎ
বিচ্ছেদরহিতং দীর্ঘঘণ্টানিনাদবৎ
অতিদীর্ঘঘণ্টাধ্বন্যগ্রবচ্চ
বিচ্ছেদরহিতং অবাচ্যম্ অবাঙ্মনসগোচরং প্রণবস্য
অকারোমকারবিন্দুনাদাত্মকস্য সকলবেদসারস্য অগ্রং লক্ষ্যং
ব্রহ্ম যো বেদ, স বেদবিৎ বেদান্তার্থজ্ঞানী; নান্য ইত্যর্থঃ ॥
তত্ত্বজ্ঞানিনঃ সমাধিসাধনস্বরূপমাহ—
আত্মানমরণিং কৃৎবা প্রণবং চোত্তরারণিম্ ।
ধ্যাননির্মথনাভ্যাসাদেবং পশ্যেন্নিগূঢবৎ ॥ ২৫ ॥
আত্মানং আত্মনি কর্তৃৎবাদ্যধ্যাসবন্তং জীবং অরণিং
কৃৎবা অধরারণিং ভাবয়িৎবা, প্রণবং পরমাত্মপ্রতিপাদকং
শব্দং উত্তরারণিং কৃৎবা ভাবয়িৎবা,
ধ্যাননির্মথনাভ্যাসাৎ
ধ্যানরূপমথনেন পৌনঃপুন্যেন পূর্বোক্তপ্রকারেণ নিগূঢবৎ
পাণ্ডিত্যাপ্রকটনেন যো বর্ততে, স এবং পরমাত্মানং পশ্যেৎ;
নান্য ইত্যর্থঃ ॥
যাবদপরোক্ষানুভবপর্যন্তং স্বয়ংপ্রকাশব্রহ্ম-
ধারণামাহ—
তাদৃশং পরমং রূপং স্মরেৎপার্থ হ্যনন্যধীঃ ।
বিধূমাগ্নিনিভং দেবং পশ্যেদন্ত্যন্তনির্মলম্ ॥ ২৬ ॥
হে পার্থ, বিধূমাগ্নিনিভং বিগতধূমাগ্নিরিব
দ্যোতমানম্ অত্যন্তনির্মলম্ অতিস্বচ্ছং দেবং স্বয়ং-
প্রকাশং পরমাত্মানং যাবৎপশ্যেৎ অপরোক্ষীকুর্যাৎ,
তাবৎ তাদৃশং পরমং সর্বোৎকৃষ্টং রূপং ব্রহ্ম-
স্বরূপম্, অনন্যধীরিতি অনন্যচিত্তঃ সন্ সংস্মরেৎ
ব্রহ্মধারণং কুর্যাদিত্যর্থঃ ॥
ভাবনাপ্রকারমেব ব্রহ্মস্বরূপপ্রকটনব্যাজেন
বিশদয়তি—
দূরস্থোঽপি ন দূরস্থঃ পিণ্ডস্থঃ পিণ্ডবর্জিতঃ ।
বিমলঃ সর্বদা দেহী সর্বব্যাপী নিরঞ্জনঃ ॥ ২৭ ॥
দেহী জীবঃ সর্বদা সর্বস্মিন্ কালে দূরস্থোঽপি অজ্ঞস্য
পরোক্ষবৎ স্থিতোঽপি ন দূরস্থঃ পরোক্ষস্থিতো ন ভবতি;
কিং তু সর্বদাপি অপরোক্ষ এবেত্যর্থঃ । পিণ্ডস্থোঽপি অজ্ঞস্য
শরীরসম্বন্ধাধ্যাসাৎ পরিচ্ছিন্নবৎ ভাসমানোঽপি,
পিণ্ডবর্জিতঃ শরীরসম্বন্ধধ্যাসরহিতঃ; তত্র হেতুঃ—
বিমলঃ নির্মলঃ সর্বব্যাপী সর্বতঃ পরিপূর্ণঃ নিরঞ্জনঃ স্বয়ং-
প্রকাশশ্চ । এবং ধ্যায়েদিতি পূর্বেণ সম্বন্ধঃ ॥
কিংচ, দেহাধ্যাসাৎ প্রতীয়মানং
কর্তৃৎবভোক্তৃৎবাদিকমাত্মনো নাস্তি ইত্যাহ—
কায়স্থোঽপি ন কায়স্থঃ কায়স্থোঽপি ন জায়তে ।
কায়স্থোঽপি ন ভুঞ্জানঃ কায়স্থোঽপি ন বধ্যতে ॥ ২৮ ॥
দেহী জীবঃ কায়স্থোঽপি শরীরাধ্যাসবানপি ন
কায়স্তঃ শরীরনিমিত্তবন্ধরহিতঃ । কায়স্থোঽপি
জন্মাদিবচ্ছরীরস্থোঽপি ন জায়তে শরীরনিমিত্তজন্মরহিত ইত্যর্থঃ ।
কায়স্থোঽপি ভোগসাধনীভূতশরীরস্থোঽপি ন ভুঞ্জানঃ ভোগরহিতঃ ।
কায়স্থোঽপি বন্ধহেতুভূতদেহস্থোঽপি ন বধ্যতে বন্ধনং
ন প্রাপ্নোতীত্যর্থঃ ।
কিংচ—
কায়স্থোঽপি ন লিপ্তঃ স্যাৎকায়স্থোঽপি ন বাধ্যতে ।
কায়স্থোঽপি সুখদুঃখাদিহেতুভূতদেহসম্বন্ধোঽপি
ন লিপ্তঃ স্যাৎ সুখদুঃখাদিসম্বন্ধরহিত ইত্যর্থঃ ।
কায়স্থোঽপি মরণধর্মবদ্দেহস্থোঽপি ন বাধ্যতে ন ম্রিয়ত ইত্যর্থঃ ।
অনেন জন্মাদিষড্ভাববিকারশূন্যৎবং দর্শিতম্ ॥
যদধ্যাসেন আত্মমোহাৎসংসৃতিঃ, তদপবাদেন তত্রৈব
দেহান্তঃকরণাদাবাত্মা বিচারণীয় ইত্যাহ—
তিলমধ্যে যথা তৈলং ক্ষীরমধ্যে যথা ঘৃতম্ ॥ ২৯ ॥
পুষ্পমধ্যে যথা গন্ধঃ ফলমধ্যে যথা রসঃ ।
কাষ্ঠাগ্নিবৎপ্রকাশেত আকাশে বায়ুবচ্চরেৎ ॥ ৩০ ॥
আত্মা তিলমধ্যে তৈলাচ্ছাদকতিলেষু যথা তৈলম্,
যন্ত্রাদিনা তিলে নিষ্পিষ্টে যথা তিলাৎপৃথক্ তৈলং শুদ্ধং
ভাসতে, যথা ক্ষীরমধ্যে ঘৃতাচ্ছাদকক্ষীরাণাং মধ্যে
ক্ষীরৎবাপনোদকোপায়দ্বারা দধিপরিণামে মথনেনাপনীতে
নবনীতাদিপরিণামদ্বারা অগ্নিসংয়োগাৎ যথা ঘৃতং
প্রতীয়তে, তথা পুষ্পাণাং মধ্যে যথা গন্ধঃ প্রতীয়তে,
ফলমধ্যে ৎবগস্থ্যাদিহেয়াংশপরিত্যাগেন যথা রসো
ভাসতে, আকাশে যথা বায়ুঃ সর্বগতঃ সন্ বাতি
সংচরতি, তথা কাষ্ঠাগ্নিবৎ অরণ্যাদিস্থিতাগ্নিঃ
মথনাদিনা মথিতে
যথা কাষ্ঠভাবং বিহায় স্বয়ংপ্রকাশতয়া ভাসতে,
তদ্বদাত্মাপি অশ্রময়াদিপঞ্চকোশেষু মধ্যে হেয়াংশ-
পরিত্যাগেন আনন্দাত্মকতয়া স্বয়ংপ্রকাশঃ সন্ ভাসত
ইত্যর্থঃ ॥
এতদেব দার্ষ্টান্তিকে সর্বং স্পষ্টমুপপাদয়তি—
তথা সর্বগতো দেহী দেহমধ্যে ব্যবস্থিতঃ ।
মনস্থো দেশিনাং দেবো মনোমধ্যে ব্যবস্থিতঃ ॥ ৩১ ॥
তথা পূর্বোক্ততৈলাদিবৎ সর্বগতঃ সর্বব্যাপী দেহী
জীবঃ দেহমধ্যে নানাভিন্নতির্যগ্দেহাদিদেহমধ্যে ব্যবস্থিতঃ
নানাভিন্নতিলেষু তৈলবৎ একৎবেন স্থিত ইত্যর্থঃ । দেহিনাং
তত্তদ্দেহভেদেন ভিন্নানাং জীবানাং মনস্থঃ তত্তদন্তঃ-
করণস্থঃ দেবঃ ঈশ্বরঃ মনোমধ্যে
তত্তদ্দুষ্টাদুষ্টান্তঃকরণেষু
ব্যবস্থিতঃ সাক্ষিতয়া ভাসত ইত্যর্থঃ ॥
তাদৃশব্রহ্মাপরোক্ষ্যেণ মুচ্যন্ত ইত্যাহ—
মনস্থং মনমধ্যস্থং মধ্যস্থং মনবর্জিতম্ ।
মনসা মন আলোক্য স্বয়ং সিধ্যন্তি যোগিনঃ ॥ ৩২ ॥
মনস্থং মনোঽবচ্ছিন্নং মনমধ্যস্থং মনঃসাক্ষি-
ভূতং মধ্যস্থং সর্বসাক্ষিভূতম্ মনবর্জিতং
সঙ্কল্পবিকল্পাদিরহিতং মনঃ অববোধাত্মকং দেবং মনসা
পরিশুদ্ধান্তঃকরণেন আলোক্য তদ্গোচরাপরোক্ষচরমবৃত্তিং
লব্ধ্বা যোগিনঃ স্বয়মেব সিধ্যন্তি নিবৃত্তাবিদ্যকা মুক্তা
ভবন্তীত্যর্থঃ ॥
আকাশং মানসং কৃৎবা মনঃ কৃৎবা নিরাস্পদম্ ।
নিশ্চলং তদ্বিজানীয়াৎসমাধিস্থস্য লক্ষণম্ ॥ ৩৩ ॥
আকাশবন্মানসং মনো নির্মলং কৃৎবা মনঃ
সঙ্কল্পবিকল্পাত্মকং নিরাস্পদম্ নির্বিষয়ং কৃৎবা নিশ্চলং
নিষ্ক্রিয়মীশ্বরং যো বিজানীয়াৎ, স এব সমাধিস্থঃ ।
তাদৃশজ্ঞানমেব সমাধিস্থস্যাপি লক্ষণমিত্যর্থঃ ॥
আরূঢস্য লক্ষণমুক্তম্, আরুরুক্ষোরুপায়মাহ—
যোগামৃতরসং পীৎবা বায়ুভক্ষঃ সদা সুখী ।
যমমভ্যস্যতে নিত্যং সমাধির্মৃত্যুনাশকৃৎ ॥ ৩৪ ॥
যোগামৃতরসং পীৎবা যমনিয়মাদ্যষ্টাঙ্গয়োগ-
অমৃতপানং কৃৎবা তত্তৎপ্রতিপাদকশাস্ত্রমভ্যস্যেত্যর্থঃ,
বায়ুভক্ষঃ বায়ুমাত্রাহরঃ, উপলক্ষণমেতৎ, হিতমিত-
মেধ্যাশী, সদা সুখী সর্বদা সন্তুষ্টঃ সন্, যং যমং
মনোনিগ্রহং নিত্যমভ্যস্যতে, স সমাধিরিত্যুচ্যতে । স সমাধিঃ
মৃত্যুনাশকৃৎ জননমরণসংসারনাশকৃদিত্যর্থঃ ॥
তাদৃশসমাধৌ স্থিতস্য লক্ষণমাহ—
ঊর্ধ্বশূন্যমধঃশূন্যং মধ্যশূন্যং যদাত্মকম্ ।
সর্বশূন্যং স আত্মেতি সমাধিস্থস্য লক্ষণম্ ॥ ৩৫ ॥
ঊর্ধ্বশূন্যম্ ঊর্ধ্বদেশপরিচ্ছেদরহিতং
অধঃশূন্যম্ অধোমধ্যদেশপরিচ্ছেদরহিতং সর্বশূন্যং
দেশকালাদিপরিচ্ছেদরহিতং যদাত্মকং যৎস্বরূপম্, স
আত্মেতি ভাবনা সমাধিস্থস্য লক্ষণমিত্যর্থঃ ॥
এতস্যাইকান্তিকদৃষ্টেঃ বিধিনিষেধাতীতৎবমাহ—
শূন্যভাবিতভাবাত্মা পুণ্যপাপৈঃ প্রমুচ্যতে ।
শূন্যমিতি সর্বপরিচ্ছেদরহিতমিতি ভাবিতঃ বাসিতঃ
ভাবঃ অভিপ্রায়ো যস্যাত্মনঃ তাদৃশঃ সন্
শূন্যভাবিতভাবাত্মা
যোগী পুণ্যপাপৈঃ বিধিনিষেধপ্রয়ুক্তৈঃ প্রমুচ্যতে মুক্তো
ভবতীত্যর্থঃ ॥
এবং ভগবদুপদিষ্টসমাধৌ বিরোধমসম্ভবং চ আহ—
অর্জুন উবাচ—
অদৃশ্যে ভাবনা নাস্তি দৃশ্যমেতদ্বিনশ্যতি ॥ ৩৬ ॥
অবর্ণমস্বরং ব্রহ্ম কথং ধ্যায়ন্তি যোগিনঃ ।
অদৃশ্যে জ্ঞানাগোচরে বস্তুনি ভাবনা ধ্যানং নাস্তি;
ননু তর্হি দৃশ্যং ভবৎবিতি চেৎ, দৃশ্যমেতৎসর্বং
বিনশ্যতি নাশং প্রাপ্নোতি শুক্তিকারূপ্যবৎ । তথা চ
অবর্ণং রূপ-
রহিতম্ অস্বরং শব্দাগোচরং ব্রহ্ম যোগিনঃ কথং ধ্যায়ন্তি,
ধ্যানস্য স্মৃত্যাত্মকৎবেনাননুভূতে তদয়োগাৎ ইতি ভাবঃ ।
ন হি সাবয়বমূর্ত্যাদিমত্ত্বেন বয়ং ধ্যানং ব্রূমঃ
যেন ৎবয়োক্তং ঘটেত, কিং তু নির্বিশেষপরব্রহ্মণ এব নির্মলং
নিষ্কলমিত্যাদিনা, বেদান্তজন্যবৃত্তিগোচরৎবেন
তৎসম্ভবতীত্যভিপ্রায়েণাহ—
শ্রীভগবানুবাচ—
ঊর্ধ্বপূর্ণমধঃপূর্ণং মধ্যপূর্ণং যদাত্মকম্ ॥ ৩৭ ॥
সর্বপূর্ণং স আত্মেতি সমাধিস্থস্য লক্ষণম্ ।
ঊর্ধ্বাধোমধ্যপূর্ণশব্দৈঃ সর্বদেশতঃ সর্বকালতঃ
পরিচ্ছেদং ব্যাবর্তয়তি । যদাত্মকং যৎ এতাদৃশং বস্তু
সর্বত্র পরিপূর্ণং স আত্মেতি যো ধ্যায়তি, স সমাধিস্থঃ ।
তস্য লক্ষণমপি তদেবেত্যর্থঃ ॥
নন্বয়ং সালম্বনয়োগো নিরালম্বনয়োগো বেতি দ্বেধা
বিকল্প্য তত্র দোষমাশঙ্ক্যাহ—
অর্জুন উঅবাচ—
সালম্বস্যাপ্যনিত্যৎবং নিরালম্বস্য শূন্যতা ॥ ৩৮ ॥
উভয়োরপি দুষ্ঠৎবাৎকথং ধ্যায়ন্তি যোগিনঃ ।
সালম্বস্য মূর্ত্যাধারাদিসহিতস্য অনিত্যৎবং বিনাশিৎবম্,
নিরালম্বস্য মূর্ত্যাধারাদিরহিতস্য শূন্যতা শশ-
বিষাণায়িতৎবম্, এবমুভয়োরপি দুষ্টৎবাৎ
দোষঘটিতৎবাৎ যোগিনঃ কথং ধ্যায়ন্তীতি প্রশ্নার্থঃ ॥
যজ্ঞদানাদিনা শুদ্ধান্তঃকরণস্য
বেদান্তজন্যনির্বিশেষব্রহ্মগোচরবৃত্তিসম্ভবাৎ ন
শূন্যতেত্যভিপ্রায়েণাহ—
শ্রীভগবানুবাচ—
হৃদয়ং নির্মলং কৃৎবা চিন্তয়িৎবাপ্যনাময়ম্ ॥ ৩৯ ॥
অহমেব ইদং সর্বমিতি পশ্যেৎপরং সুখম্ ।
হৃদয়ং চিত্তং নির্মলং জ্ঞানবিরোধিরাগাদিদোষরহিতং
কৃৎবা অনাময়ং চিন্তয়িৎবা ঈশ্বরং ধ্যাৎবা পরং সুখী সন্
এক এবাহমিদং সর্বং জগজ্জালমহমেব ন মত্তো ব্যতিরিক্তমন্যৎ
ইতি পশ্যেৎ অপরোক্ষানুভবং প্রাপ্নুয়াৎ ইত্যর্থঃ ॥
অর্থাত্মকস্য জগতঃ শব্দনিরূপ্যৎবেন শব্দস্য বর্ণা-
ত্মকৎবেন বর্ণানাং প্রণবাত্মকৎবেন প্রণবস্য বিন্দ্বাত্মকৎবেন
বিন্দোঃ নাদাত্মকৎবেন নাদস্য ব্রহ্মধ্যানস্থানাত্মক-
কলাত্মকৎবেন ব্রহ্মণি সমন্বয়েন বিন্দুনাদকলাতীতং ব্রহ্ম
ধ্যায়েদিতি ভগবতোক্তম্, তদ্বিবিচ্য জ্ঞাতুং পৃচ্ছতি—
অর্জুন উবাচ—
অক্ষরাণি সমাত্রাণি সর্বে বিন্দুসমাশ্রিতাঃ ॥ ৪০ ॥
বিন্দুভির্ভিদ্যতে নাদঃ স নাদঃ কেন ভিদ্যতে ।
হে ভগবন্ সমাত্রাণি অক্ষরাণি অকারাদীনি সর্বে
সর্বাণি লিঙ্গব্যত্যযঃ আর্ষঃ, বিন্দুসমাশ্রিতাঃ
বিন্দুতন্মাত্রাণীত্যর্থঃ । বিন্দুস্তু নাদেন ভিদ্যতে নাদতন্মাত্রঃ
সন্ তত্র সমন্বেতীত্যর্থঃ । স নাদঃ কলায়াং সমন্বেতি । সা
কলা
কুত্র সমন্বেতি ইতি প্রশ্নার্থঃ । যদ্যপি শ্লোকে স নাদঃ কেন
ভিদ্যত ইতি
নাদস্যৈব সমন্বয়ঃ পৃষ্ট ইতি ভাতি, তথাপি নাদস্য
কলাসমন্বয়
ইতি প্রসিদ্ধৎবাৎ নাদপদং কলোপলক্ষণম্ ॥
এবং পৃষ্টো ভগবান্ ব্রহ্মণি সমন্বেতি ইতি
উত্তরমাহ—
শ্রীভগবানুবাচ—
অনাহতস্য শব্দস্য তস্য শব্দস্য যো ধ্বনিঃ ॥ ৪১ ॥
ধ্বনেরন্তর্গতং জ্যোতির্জ্যোতিরন্তর্গতং মনঃ ।
তন্মনো বিলয়ং যাতি তদ্বিষ্ণোঃ পরমং পদম্ ॥ ৪২ ॥
অনাহতস্য শব্দস্য পরাবস্থাপন্নপ্রণবস্য যঃ ধ্বনিঃ
নাদঃ তস্য নাদস্য জ্যোতিঃ অন্তর্গতম্ । তেন তেজোরূপকলায়াং
নাদস্যান্তর্ভাব ইতি তাৎপর্যম্ । কলান্তর্ভাবমাহ—
জ্যোতিরন্তর্গতং মন ইতি । মনসঃ জ্যোতিষ্যন্তর্ভাবো নাম
তন্মাত্রয়া তত্র ব্যাপ্তিঃ । তথা চ মনসি জ্যোতিষঃ কলায়াঃ
সমন্বয় ইতি
ভাবঃ । তৎ মনঃ শব্দাদিপ্রপঞ্চকারণভূতং মনঃ
যত্র বিলয়ং যাতি, যত্র ব্রহ্মণি
বেদান্তজন্যনির্বিকল্পকব্রহ্ম-
গোচরমনোবৃত্তিঃ লয়ং যাতি, তৎ বৃত্তিলয়স্থানং বৃত্তি-
লয়াত্মকং বা বিষ্ণোঃ পরমম্ উৎকৃষ্টং পদং স্বরূপমিতি ।
তদুক্তম্—মনঃ কায়াগ্নিনা হন্তীত্যাদিনা ॥
পুনস্তদেব বিশিনষ্টি—
ওঁকারধ্বনিনাদেন বায়োঃ সংহরণান্তিকম্ ।
নিরালম্বং সমুদ্দিশ্য যত্র নাদো লয়ং গতঃ ॥ ৪৩ ॥
ওংকারধ্বনিনাদেন ওংকারধ্বন্যাত্মকনাদেন সহ বায়োঃ
সংহরণান্তিকং রেচকপূরকাদিক্রমেণ নিয়মিতবায়োরুপসংহার-
পর্যন্তং নিরালম্বং নির্বিশেষং ব্রহ্ম সমুদ্দিশ্য লক্ষ্যং
কৃৎবা ধ্যায়েৎ । যত্র স নাদো লয়ং গতঃ নাশং
প্রাপ্নুয়াৎ, তৎ নাদনাশাধিকরণাত্মকং নাদনাশাত্মকং
বা বিষ্ণোঃ পরমং পদমিত্যর্থঃ ॥
এবং ধ্যানপ্রকারেণ শুদ্ধান্তঃকরণস্য আরূঢস্য
পুণ্যপাপে বিধূয় ব্রহ্মসায়ুজ্যেঽভিহিতে,
আরুরুক্ষোরপরিশুদ্ধ-
অন্তঃকরণিৎবেন ব্রহ্মসায়ুজ্যাসম্ভবে
ধর্মাধর্মবিধূননাসম্ভবেন
তদ্দ্বারা জননমরণাদিকমবশ্যং ভাব্যমিতি মনসি নিশ্চিত্য var ভাবিতব্যমিতি
পুনরাবৃত্তিপ্রকারং পৃচ্ছতি—
অর্জুন উবাচ—
ভিন্নে পঞ্চাত্মকে দেহে গতে পঞ্চসু পঞ্চধা ।
প্রাণৈর্বিমুক্তে দেহে তু ধর্মাধর্মৌ ক্ব গচ্ছতঃ ॥ ৪৪ ॥
পঞ্চাত্মকে পঞ্চভূতাত্মকে দেহে স্থূলশরীরে
ভিন্নে গতে সতি, পঞ্চসু পঞ্চভূতেষু পঞ্চধা
তত্তৎপৃথিব্যাদ্যা-
কারেণ স্থিতেষু সৎসু, দেহে প্রাণৈঃ প্রাণাদিপঞ্চবায়ুভিঃ
বিয়ুক্তে সতি, ধর্মাধর্মৌ পুণ্যপাপে ক্ব গচ্ছতঃ কুত্র
যাস্যতঃ ॥
এবং পৃষ্টো ভগবান্ লিঙ্গশরীরাধারতয়া তিষ্ঠত
ইত্যুত্তরমাহ—
শ্রীভগবানুবাচ—
ধর্মাধর্মৌ মনশ্চৈব পঞ্চভূতানি যানি চ ।
ইন্দ্রিয়াণি চ পঞ্চৈব যাশ্চান্যাঃ পঞ্চ দেবতাঃ ॥ ৪৫ ॥
তাশ্চৈব মনসা সর্বে নিত্যমেবাভিমানতঃ ।
জীবেন সহ গচ্ছন্তি যাবত্তত্ত্বং ন বিন্দতি ॥ ৪৬ ॥
ধর্মাধর্মৌ পুণ্যপাপে মনশ্চ অন্তঃকরণং যানি চ
পঞ্চভূতানি পৃথিব্যাদীনি যানি চ পঞ্চেন্দ্রিয়াণি চক্ষু-
রাদীনি বাগাদীনি জ্ঞানকর্মাত্মকানি চ যাশ্চান্যাঃ
পঞ্চদেবতাঃ পঞ্চেন্দ্রিয়াভিমানিন্যঃ দিগ্বাতাদয়ঃ,
তদুক্তম্—
দিগ্বাতাদর্কপ্রবেতাশ্বিবহ্নিপ্রাপ্যপ্রলীয়কাঃ ইতি, তা
দেবতাঃ, এতে সর্বভূতাদয়ঃ মনসা অন্তরিন্দ্রিয়েণ নিত্যমেব
সর্বদা
অভিমানতঃ মমতাহঙ্কারবিষয়ৎবেন যাবত্তত্ত্বং ন বিন্দতি
অপরোক্ষব্রহ্মানুভবং ন প্রাপ্নোতি, তাবজ্জীবেন সহ
জীবোপাধিনা
লিঙ্গেন সহ গচ্ছন্তি গতাগতং প্রাপ্নুবন্তীত্যর্থঃ ॥
এবং স্থূলদেহলয়েঽপি ধর্মাধর্মৌ
লিঙ্গশরীরমাশ্রিত্য তিষ্ঠত ইত্যুক্তে, লিঙ্গশরীরভঙ্গঃ
কদেতি
পৃচ্ছতি—
অর্জুন উবাচ—
স্থাবরং জঙ্গমং চৈব যৎকিংচিৎসচরাচরম্ ।
জীবা জীবেন সিধ্যন্তি স জীবঃ কেন সিধ্যতি ॥ ৪৭ ॥
স্থাবরজঙ্গমাত্মকং সচরাচরং চরাচরসহিতং
জগজ্জালং সর্বস্মিন্ যে জীবাঃ অভিমানবন্তঃ
স্থূলদেহাভিমানিনো
বিশ্বাত্মকা জীবাঃ জীবেন লিঙ্গশরীরাভিমানিনা তৈজসেন
সিধ্যন্তি বিশ্বাভিমানং ত্যজন্তি । স জীবঃ তৈজসাভিমানী কেন
হেতুনা সিধ্যতি স্বাভিমানং ত্যজতীতি প্রশ্নার্থঃ ॥
এবং পৃষ্টে সতি প্রাজ্ঞেন তৈজসঃ সিধ্যতি,
প্রাজ্ঞস্তুরীয়ে-
ণেত্যেবং ক্রমেণ সিধ্যতীত্যুত্তরমাহ—
শ্রীভগবানুবাচ—
মুখনাসিকয়োর্মধ্যে প্রাণঃ সংচরতে সদা ।
আকাশঃ পিবতে প্রাণং স জীবঃ কেন জীবতি ॥ ৪৮ ॥
মুখনাসিকয়োর্মধ্যে মুখনাসিকামধ্যতঃ সদা সর্বদা
যাবদদৃষ্টং প্রাণবায়ুঃ সংচরতে অজপামন্ত্রাত্মকৎবেন
একৈকস্য দিনস্য ষট্শতাধিকৈকবিংশতিসহস্রসঙ্খ্যযা
সংচরতি, তাবৎপর্যন্তমদৃষ্টমহিম্না লিঙ্গমপি বর্ততে ।
যদা তু যোগমহিম্না ব্রহ্মজ্ঞানানন্তরং জীবস্যাদৃষ্ট-
নিবৃত্তিঃ, তদা আকাশঃ জীবৎবনিমিত্তং প্রাণং পিবতে, তদা
জীবঃ কেন জীবতি জীবৎবাপাদকাবিদ্যানিবৃত্ত্যা
নিরঞ্জনব্রহ্ম-
ভাবে জাতে জীবৎবমেব নাস্তীত্যর্থঃ ॥
ননু ব্রহ্মাণ্ডাদ্যুপাধিবিশিষ্টস্য সর্বগতস্য ব্রহ্মণঃ
কথং নিরঞ্জনৎবমিতি পৃচ্ছতি—
অর্জুন উবাচ—
ব্রহ্মাণ্ডব্যাপিতং ব্যোম ব্যোম্না চাবেষ্টিতং জগৎ ।
অন্তর্বহিশ্চ তদ্ব্যোম কথং দেবো নিরঞ্জনঃ ॥ ৪৯ ॥
হে ভগবন্ ব্যোম আকাশং ব্রহ্মাণ্ডব্যাপিতং
ব্রহ্মাণ্ডা-
বচ্ছিন্নমিত্যর্থঃ । ব্যোম্না চ আকাশেন জগৎ আবেষ্টিতং
ব্যাপ্তম্, তস্মাৎকারণাৎ অন্তর্বহিশ্চ ব্যোমৈব বর্ততে,
এবং সতি দেবঃ ঈশ্বরঃ কথং নিরঞ্জনঃ অন্যপ্রকাশনিরপেক্ষঃ
কথমিত্যর্থঃ ॥
আকাশাদিসর্বপ্রপঞ্চস্য কল্পিতৎবেন সর্বং
সেৎস্যতীত্যভিপ্রায়েণাহ—
শ্রীভগবানুবাচ—
আকাশো হ্যবকাশশ্চ আকাশব্যাপিতং চ যৎ ।
আকাশস্য গুণঃ শব্দো নিঃশব্দো ব্রহ্ম উচ্যতে ॥ ৫০ ॥
আকাশঃ মহাকাশঃ অবকাশঃ পরিচ্ছিন্নাকাশঃ
উভয়মপ্যাকাশেন আকাশতন্মাত্রভূতেন শব্দেন
ব্যাপিতং ব্যাপ্তং তদুপাদনকতয়া তদতিরিক্তং ন
ভবতীত্যর্থঃ । তর্হি উপাদানস্য শব্দস্য
অতিরিক্তৎবমস্ত্বিত্যত আহ—
আকাশস্য গুণঃ শব্দ ইতি, শব্দঃ তন্মাত্রভূতঃ আকাশস্য
মিথ্যা-
ভূতাকাশস্য গুণঃ পরিণাম্যুপাদানং যতঃ, অত এব স্বয়মপি
মিথ্যাভূত ইত্যর্থঃ । ব্রহ্ম তু নিঃশব্দঃ নিষ্প্রপঞ্চঃ
ইত্যুচ্যতে । তথা চ সত্যস্যাক্ষরস্য ব্রহ্মণঃ অসত্যেন সহ
সম্বন্ধাসম্ভবাৎ নিরঞ্জনৎবমুপপদ্যত ইত্যর্থঃ ॥
এবং ভগবতোক্তে, অক্ষরশব্দস্য ভগবদভিমতার্থং
অজানানঃ সন্ লোকপ্রসিদ্ধবর্ণাত্মকাক্ষরবুদ্ধ্যা
বর্ণানামক্ষরৎবং ন সম্ভবতীত্যভিপ্রায়েণ পৃচ্ছতি—
অর্জুন উবাচ—
দন্তোষ্ঠতালুজিহ্বানামাস্পদং যত্র দৃশ্যতে ।
অক্ষরৎবং কুতস্তেষাং ক্ষরৎবং বর্ততে সদা ॥ ৫১ ॥
হে ভগবন্ যত্র বর্ণাত্মকাক্ষরেষু দন্তোষ্ঠতালু-
জিহ্বানাম্, উপলক্ষণেমেতৎ কণ্ঠাদীনামষ্টানাং
স্থানানাম্, আস্পদম্ আস্পদৎবং দৃশ্যতে প্রত্যক্ষ-
মনুভূয়তে । ‘ অকুহবিসর্জনীয়ানাং কণ্ঠঃ ‘ ইত্যাদিনা
শ্রূয়তে চ । তথা চ তেষাং বর্ণানাম্ অক্ষরৎবং নাশ-
রহিতৎবং কুতঃ, উৎপত্তিমতো নাশাবশ্যংভাবাৎ ? সদা
সর্বকালং ক্ষরৎবং নাশবত্ত্বমেব বর্ততে তেষাম্, নাশ-
রহিতৎবং কুত ইতি প্রশ্নার্থঃ ॥
এবমভিপ্রায়মজানানেন অর্জুনেন পৃষ্ঠে স্বাভিপ্রেত-
মক্ষরশব্দার্থং স্ফুটয়ন্ ভগবানুবাচ—
শ্রীভগবানুবাচ—
অঘোষমব্যঞ্জনমস্বরং চা-
প্যতালুকণ্ঠোষ্ঠমনাসিকং চ ।
অরেখজাতং পরমূষ্মবর্জিতং
তদক্ষরং ন ক্ষরতে কথংচিৎ ॥ ৫২ ॥
অঘোষং ঘোষাখ্যবর্ণগুণরহিতম্ অব্যঞ্জনং
ককারাদিব্যঞ্জনাতীতম্ অস্বরম্ অজতীতম্, অতালুকণ্ঠো-
ষ্ঠমপি অজ্ব্যঞ্জনাদ্যুৎপত্তিস্থানতাল্বোষ্ঠাদিরহিতং
অনাসিকম্ অনুস্বারোৎপত্তিস্থাননাসিকাতীতম্ অরেখজাতং
বর্ণব্যঞ্জকরেখাসমূহাতীতম্ ঊষ্মবর্জিতং শষসহ-
অতীতম্, যদ্বা, ঊষ্মশব্দেন শ্বাসাখ্যো গুণোঽভিধীয়তে
তদ্রহিতম্, পরং লোকপ্রসিদ্ধবর্ণলক্ষণাতীতং যৎ ব্রহ্ম
কথংচিৎ সর্বপ্রকারেণ সর্বকালেঽপি ন ক্ষরতে,
তদেবাক্ষর-
শব্দেনোচ্যতে । ন লৌকিকান্যক্ষরাণীত্যর্থঃ ॥
এতাদৃশং ব্রহ্মজ্ঞানোপায়ম্ অনুভবদার্ঢ্যায়
পুনরপি পৃচ্ছতি—
অর্জুন উবাচ—
জ্ঞাৎবা সর্বগতং ব্রহ্ম সর্বভূতাধিবাসিতম্ ।
ইন্দ্রিয়াণাং নিরোধেন কথং সিধ্যন্তি যোগিনঃ ॥ ৫৩ ॥
সর্বভূতাধিবাসিতং সর্বভূতেষ্বপ্যন্তর্যামিতয়া
স্থিতং
সর্বগতম্ অন্তর্বহিশ্চ পরিপূর্ণম্, ব্রহ্ম জ্ঞাৎবা সম্যগ্-
বিবুধ্য যোগিনঃ ইন্দ্রিয়াণাং নিরোধেন ইন্দ্রিয়নিয়মনেন কথং
সিধ্যন্তি কেনোপায়েন মুক্তা ভবন্তীত্যর্থঃ ॥
এবং পৃষ্টো ভগবান্ তমেব জ্ঞানোপায়ং পুনরপ্যাহ—
শ্রীভগবানুবাচ—
ইন্দ্রিয়াণাং নিরোধেন দেহে পশ্যন্তি মানবাঃ ।
দেহে নষ্টে কুতো বুদ্ধির্বুদ্ধিনাশে কুতো জ্ঞতা ॥ ৫৪ ॥
মানবাঃ মনুষ্যাঃ ইন্দ্রিয়াণাং নিরোধেন ইন্দ্রিয়নিয়মনেন
দেহে দেহে এব পশ্যন্তি জ্ঞাস্যন্তি, তস্মাৎ দেহদার্ঢ্যং চ
জ্ঞানোপায় ইতি ভাবঃ । তদভাবে জ্ঞানমেব নাস্তি ইত্যাহ—
দেহে নষ্টে অদৃষ্টে সতি বুদ্ধিঃ কুতঃ তত্ত্বজ্ঞানং কুতঃ ?
তস্মাদ্দেহেন্দ্রিয়াদিভিঃ যজ্ঞদানাদিশ্রবণাদিকমেব তত্ত্বজ্ঞানে
কারণমিতি ভাবঃ ॥
তাদৃশং চ কারণং
যাবৎপর্যন্তমনুষ্ঠেয়মিত্যাশঙ্ক্য
অবধিমাহ—
তাবদেব নিরোধঃ স্যাদ্যাবত্তত্ত্বং ন বিন্দতি ।
বিদিতে তু পরে তত্ত্বে একমেবানুপশ্যতি ॥ ৫৫ ॥
যাবত্তত্ত্বজ্ঞানং নাস্তি,
তাবৎপর্যন্তমিন্দ্রিয়নিরোধঃ স্যাৎ;
পরে তত্ত্বে অখণ্ডানন্দব্রহ্মণি বিদিতে অপরোক্ষভূতে সতি,
একমেবানুপশ্যতি একমেব দেহেন্দ্রিয়সাধনানুষ্ঠানাদিসাধন-
রহিতং ব্রহ্মৈবানুপশ্যতি, নান্যৎ; তদনন্তরং সাধনা-
নুষ্ঠানপ্রয়াসোঽপি মা ভূদিতি ভাবঃ ॥
তস্মাদ্যাবত্তত্ত্বজ্ঞাং তাবৎসাধনমনুষ্ঠেয়ম্,
তদভাবে তন্ন সিধ্যতীত্যাহ—
নবচ্ছিদ্রকৃতা দেহাঃ স্রবন্তি গলিকা ইব ।
নৈব ব্রহ্ম ন শুদ্ধং স্যাৎপুমান্ব্রহ্ম ন বিন্দতি ॥ ৫৬ ॥
দেহাঃ জ্ঞানকারণীভূতশরীরাণি নবচ্ছিদ্রকৃতাঃ
বিষয়স্রাবিবৃত্তিমন্নবেন্দ্রিয়ঘটিতানি; তত্র দৃষ্টান্তঃ
গলিকা ইব চ্ছিদ্রঘটা ইব সর্বদা জ্ঞানং স্রবন্তীত্যর্থঃ ।
তাদৃশবিষয়প্রবণচিত্তস্য ব্রহ্ম ন শুদ্ধং স্যাৎ ইতি
নৈব ঈশ্বরৎবকর্তৃৎববিম্বৎবাদিঘটিতং ন ভবতি । তথা চ
ব্রহ্মণি বিম্বৎবাদিঘটিতে পুমান্ সুখদুঃখাভিমানী
প্রতিবিম্বো জীবঃ ব্রহ্ম ন বিন্দতি আনন্দানুভবং ন প্রাপ্নো-
তীত্যর্থঃ ॥
তস্মাৎ যাবত্তত্ত্বাপরোক্ষপর্যন্তং সাধনে যত্নঃ
কর্তব্যঃ, জাতে চ তত্ত্বাববোধে বিধিনিষেধাতীতৎবেন ন কোঽপি
যত্নঃ কর্তব্য ইত্যভিপ্রায়বানাহ—
অত্যন্তমলিনো দেহো দেহী চাত্যন্তনির্মলঃ ।
উভয়োরন্তরং জ্ঞাৎবা কস্য শৌচং বিধীয়তে ॥ ৫৭ ॥
দেহঃ পাঞ্চভৌতিকঃ অত্যন্তমলিনঃ জডৎবাদিতি ভাবঃ ।
দেহী আত্মা নিষ্কৃষ্টাহঙ্কারঃ সন্ অত্যন্তনির্মলঃ
অহঙ্কারো-
পাধিকসংসাররহিতঃ ইত্যেবমুভয়োর্দেহাত্মনোঃ অন্তরং কল্পিতৎব-
সত্যৎবে জ্ঞাৎবা যো বর্ততে, তং প্রতি কস্য শৌচং বিধীয়তে
দেহস্য
বা আত্মনো বা ? দেহস্য চেৎ, জডস্য জডেন জলাদিনা ন
শুদ্ধিঃ; আত্মনশ্চেৎ পূর্বমেব শুদ্ধস্য ন শৌচাদিনা
প্রয়োজনমিতি ভাবঃ ॥
ইতি শ্রীগৌডপাদাচার্যবিরচিতায়াং উত্তরগীতাব্যাখ্যায়াং প্রথমোঽধ্যায়ঃ ॥
॥ দ্বিতীয়োঽধ্যায়ঃ ॥
অরূঢস্যারুরুক্ষোশ্চ স্বরূপে পরিকীর্তিতে ।
তত্রারূঢস্য বিম্বৈক্যং কথং স্যাদিতি পৃচ্ছতি ॥
অর্জুন উবাচ—
জ্ঞাৎবা সর্বগতং ব্রহ্ম সর্বজ্ঞং পরমেশ্বরম্ ।
অহং ব্রহ্মেতি নির্দেষ্টুং প্রমাণং তত্র কিং ভবেৎ ॥ ১ ॥
হে ভগবন্ ব্রহ্ম বিম্বভূতং চৈতন্যং সর্বগতং
সর্বত্র পরিপূর্ণং সর্বজ্ঞং সর্বসাক্ষিভূতং পরমেশ্বরং
সর্বনিয়ামকমিতি জ্ঞাৎবা তত্ত্বমসীত্যাদিবাক্যতো বিবুধ্য অহং
ব্রহ্মেতি, প্রতিবিম্বাত্মা জীবঃ ব্রহ্মেতি নির্দেষ্টুং বক্তুং তত্র
তস্মিন্নৈক্যে কিং প্রমাণং কিমুপপাদকমিত্যর্থঃ ॥
এবং পৃষ্টো ভগবান্ ক্ষীরজলাদিদৃষ্টান্তেন
উপাধিনিবৃত্তাবাত্মৈক্যং সম্ভবতীত্যাহ—
শ্রীভগবানুবাচ—
যথা জলং জলে ক্ষিপ্তং ক্ষীরে ক্ষীরং ঘৃতে ঘৃতম্ ।
অবিশেষো ভবেত্তদ্বজ্জীবাত্মপরমাত্মনোঃ ॥ ২ ॥
জলে নদ্যাদৌ জলং তদেব পাত্রাদুদ্ধৃতং পাত্রোপাধিতঃ
পৃথক্ভূতং তত্রৈব ক্ষিপ্তে পাত্রোপাধিনিবৃত্তৌ মহাজলৈক্যং
প্রাপ্নোতি, এবং ক্ষীরে ক্ষীরং ঘৃতে ঘৃতং ক্ষিপ্তং সৎ
তত্তদৈক্যং প্রাপ্নোতি, তদ্বৎ জীবাত্মপরমাত্মনোঃ অবিদ্যা-
দ্যুপাধিতো ভেদেঽপি তন্নিবৃত্তাববিশেষঃ সম্ভবতীতি ভাবঃ
॥
এবমৈক্যজ্ঞানং গুরুমুখাদেব সম্ভাবিতমবিদ্যা-
নিবর্তকম্, ন তু স্বতন্ত্রবিচারসম্ভাবিতমিতি বদন্
তত্ত্ব-
জ্ঞানার্থং গুরুমেব অভিগচ্ছেদিতি গুরূপাসনামাহ—
জীবে পরেণ তাদাত্ম্যং সর্বগং জ্যোতিরীশ্বরম্ ।
প্রমাণলক্ষণৈর্জ্ঞেয়ং স্বয়মেকাগ্রবেদিনা ॥ ৩ ॥
স্বয়মধিকারী একাগ্রবেদিনা ব্রহ্মনিষ্ঠেন গুরুণা
প্রমাণলক্ষণৈঃ ‘ তত্ত্বমসি ‘ ‘ যতো বা ইমানি
ভূতানি ‘ ‘ যঃ সর্বজ্ঞঃ সর্ববিৎ ‘ ইত্যাদিভিঃ
জীবে পরেণ
পরমাত্মনা তাদাত্ম্যম্ ঐক্যং বোধিতে সতি, তদনন্তরং
স্বয়মেব সর্বগং
সর্বব্যাপিনমীশ্বরং সর্বনিয়ন্তারং জ্যোতিঃ স্বয়ংপ্রকাশাত্মা
ইতি বিজ্ঞেয়ং জ্ঞাতুং যোগ্যমিত্যর্থঃ ॥
এবং গুরূপদেশানন্তরভবিজ্ঞানেনৈবোপপত্তৌ কিং
কর্ময়োগেনেতি পৃচ্ছতি—
অর্জুন উবাচ—
জ্ঞানাদেব ভবেজ্জ্ঞেয়ং বিদিৎবা তৎক্ষণেন তু ।
জ্ঞানমাত্রেণ মুচ্যেত কিং পুনর্যোগধারণা ॥ ৪ ॥
হে ভগবন্ জ্ঞেয়ং বিচার্যং ব্রহ্মৈক্যং জ্ঞানাদেব
গুরূপদিষ্টাদেব ভবেৎ; তথা চ বিদিৎবা
গুরূপদেশানন্তরং
তত্ত্বং জ্ঞাৎবা তৎক্ষণেন তু
বেদান্তবাক্যজন্যচরমবৃত্ত্যুত্তর-
ক্ষণমেব মুচ্যেত মুক্তো ভবেৎ; এবং জ্ঞানমাত্রেণ
মুক্ত্যুপপত্তৌ
যোগধারণাকর্ময়োগাভ্যাসঃ কিং পুনঃ কিং প্রয়োজনম্ ব্যর্থ-
ৎবাদিত্যভিপ্রায়ঃ ॥
এবং কর্ময়োগবৈয়র্থ্যে শঙ্কিতে যাবত্তত্ত্বজ্ঞানং ন
সম্ভবতি, তাবদন্তঃকরণশুদ্ধ্যর্থমনুষ্ঠেয়ং কর্ম;
সিদ্ধে চ তস্মিন্ জ্ঞানে, পুনঃ কর্মানুষ্ঠানং মা ভূৎ
ইত্যাহ—
শ্রীভগবানুবাচ—
জ্ঞানেন দীপিতে দেহে বুদ্ধির্ব্রহ্মসমন্বিতা ।
ব্রহ্মজ্ঞানাগ্নিনা বিদ্বান্নির্দহেৎকর্মবন্ধনম্ ॥ ৫ ॥
হে অর্জুন বিদ্বান্ বিবেকী জ্ঞানেন দেহে লিঙ্গশরীরে
দীপিতে
শুদ্ধে, ততঃ বুদ্ধিঃ নিশ্চয়াত্মিকা ব্রহ্মসমন্বিতা চেৎ
ব্রহ্মণি স্থিতা অসম্ভাবনারহিতা চেৎ, তদনন্তরং
ব্রহ্মজ্ঞানাগ্নিনা
ব্রহ্মজ্ঞানানলেন কর্মবন্ধনং কর্মপাশং নির্দহেৎ
ত্যজেদিত্যর্থঃ ।
তদুক্তম্—‘ জ্ঞানাগ্নিঃ সর্বকর্মাণি
ভস্মসাৎকুরুতেঽর্জুন ‘ ইতি ॥
এবং প্রাপ্ততত্ত্বৈকস্য ততঃ পরং কিমপি ন
কার্যমিত্যাহ—
ততঃ পবিত্রং পরমেশ্বরাখ্য-
মদ্বৈতরূপং বিমলাম্বরাভম্ ।
যথোদকে তোয়মনুপ্রবিষ্টং
তথাত্মরূপো নিরুপাধিসংস্থঃ ॥ ৬ ॥
ততঃ তত্ত্বজ্ঞানানন্তরম্ উদকে মহোদকে অনুপ্রবিষ্টং
ঐক্যং গতং তোয়ং পরিচ্ছিন্নোদকম্, তদ্বৎ পবিত্রং
শুদ্ধং
পরমেশ্বরাখ্যং পরমেশ্বরসজ্ঞং তথাপি বিমলাম্বরাভং
নির্মলাকাশবদসঙ্গম্ অদ্বৈতরূপং
সজাতীয়বিজাতীয়স্বগত-
ভেদরহিতং ব্রহ্ম পরং ব্রহ্ম অনুপ্রবিষ্টঃ তদৈক্যং গতঃ অত
এব পরমাত্মরূপঃ সন্ নিরুপাধিসংস্থো ভবেৎ ঔপাধিক-
কর্তৃৎবাদিভেদরহিতো ভবেৎ, স্বয়ং নিষ্ক্রিয়
আসীতেত্যর্থঃ;
গুণা গুণেষু বর্তন্তে ইতি ন্যায়াদিতি ভাবঃ ॥
এবং যথোক্তকর্মানুষ্ঠানদ্বারা তত্ত্বজ্ঞানে জাত এব
পরমাত্মতত্ত্বং জ্ঞাতুং শক্যম্, ন ততঃ পূর্বৈত্যাহ—
আকাশবৎসূক্ষ্মশরীর আত্মা
ন দৃশ্যতে বায়ুবদন্তরাত্মা ।
স বাহ্যমভ্যন্তরনিশ্চলাত্মা
জ্ঞানোল্কয়া পশ্যতি চান্তরাত্মা ॥ ৭ ॥
আকাশবৎ সূক্ষ্মশরীরঃ আকাশং যথাতীন্দ্রিয়ং,
তদ্বৎ পরমাত্মা সূক্ষ্মশরীরঃ, সূক্ষ্মৎবমত্র
অতীন্দ্রিয়ৎব-
মভিপ্রেতম্, তাদৃশঃ পরমাত্মা বায়ুবৎ বায়ুর্যথা
চক্ষুরাদিবিষয়ো ন, তদ্বৎ অন্তরাত্মা জীবোঽপি ন
দৃশ্যতে,
তৎস্বরূপমপীন্দ্রিয়বিষয়ং ন ভবতীত্যর্থঃ,
মনসোঽপ্রমাণৎবসাধনাদিতি ভাবঃ । তর্হি তয়োঃ
অপরোক্ষতত্ত্বজ্ঞানং
কেনেত্যত আহ—স বাহ্যমভ্যন্তরনিশ্চলাত্ম
বিষয়বিক্ষিপ্তচিত্তো
ন ভবতি, সঃ জ্ঞানোল্কয়া
বেদান্তজন্যতত্ত্বাপরোক্ষবৃত্তিরূপজ্ঞানদীপেন
অন্তরাত্মা অন্তর্মুখচিত্তঃ পশ্যতি তদুভয়ৈক্যং
জানাতীত্যর্থঃ ॥
ইহ কেষাংচিদ্দর্শনং অর্চিরাদিমার্গেণ লোকান্তরপ্রাপ্তিঃ
মুক্তিঃ ইতি, তন্নিরাকর্তুম্ ‘ অত্র ব্রহ্ম সমশ্নুতে ‘
ইত্যাদি
শ্রুত্যা পূর্বোক্তজ্ঞানিনো মুক্তিস্বরূপমাহ—
যত্র যত্র মৃতো জ্ঞানী যেন কেনাপি মৃত্যুনা ।
যথা সর্বগতং ব্যোম তত্র তত্র লয়ং গতঃ ॥ ৮ ॥
সর্বগতং সর্ববস্ত্ববচ্ছিন্নং ব্যোম আকাশং যথা
অবচ্ছেদকবস্তুনাশে তত্রৈব মহাব্যোম্নি লয়ম্ ঐক্যং
প্রাপ্নোতি, তথা সর্বগতঃ জ্ঞানী সর্বত্র
পরিপূর্ণব্রহ্মাভিন্নঃ
শরীরাদ্যুপাধিনা ভিন্নৎবেন ব্যবহ্রিয়মাণঃ ব্রহ্মাপরোক্ষ-
জ্ঞানী যেন কেন মৃত্যুনা যত্র কুত্রাপি বা মৃতঃ
অজ্ঞানোপাদানক-
দেহং জ্ঞানেন নাশয়তি, তত্র তত্রৈব ব্রহ্মণি লয়ম্ ঐক্যং
গতঃ
প্রাপ্ত এবেত্যর্থঃ । অনেন তত্ত্বজ্ঞানিনো দেশকালাদ্যপেক্ষা
মরণে
মা ভূদিতি সূচিতম্ । ভৃগ্বগ্ন্যাদ্যপমৃত্যুনিমিত্তক-
প্রায়শ্চিত্তান্যপি আরুরুক্ষ্বধিকৃতানি ইতি বেদিতব্যম্ ॥
একস্যাপি জীবস্য দেহাদ্যবচ্ছেদকভেদেন নানাৎবং
জীব-
স্যাণুৎবপক্ষে ন সম্ভবতীত্যাশঙ্ক্য জীবস্য ব্যাপিৎবং
সাধয়তি —
শরীরব্যাপিতং ব্যোম ভুবনানি চতুর্দশ ।
নিশ্চলো নির্মলো দেহী সর্বব্যাপী নিরঞ্জনঃ ॥ ৯ ॥
শরীরব্যাপিতং শরীরাদিসর্বদ্রব্যব্যাপিতং ব্যোমং
আকাশং
যথা ভুবনানি চতুর্দশ ভূর্ভুবরাদীনি ব্যাপিতং সৎ
বর্ততে,
এবং নিশ্চলঃ ক্রিয়ারহিতঃ নির্মলঃ পরিশুদ্ধঃ নিরঞ্জনঃ
স্বয়ং-
প্রকাশো দেহী জীবঃ সর্বব্যাপী জগদ্ব্যাপীত্যর্থঃ ।
জগন্মাত্রস্য
অবিদ্যাপরিণামৎবেন জগদুপাদানাবিদ্যাপ্রতিবিম্বস্যৈব জীবৎবেন
তস্য ব্যাপিৎবমেব নাণুৎবমিতি ভাবঃ ॥
এবং তত্ত্বজ্ঞানিনো মুক্তিস্বরূপমভিধায় ততঃ পরং
তত্ত্ব-
জ্ঞানসাধনানুষ্ঠাতুঃ তদেব সর্বপাপপ্রায়শ্চিত্তমিত্যাহ—
মুহূর্তমপি যো গচ্ছেন্নাসাগ্রে মনসা সহ ।
সর্বং তরতি পাপ্মানং তস্য জন্ম শতার্জিতম্ ॥ ১০ ॥
যঃ জ্ঞানসাধনানুষ্ঠাতা মনসা সহ সাধনেন সহ
মুহূর্তমাত্রমপি নাসাগ্রে গচ্ছেৎ নাসাগ্রে তত্ত্বজ্ঞানার্থং
নিশ্চলং চক্ষুঃ কুর্যাৎ, তস্য তাদৃশহংসমুদ্রানিষ্ঠস্য
জন্মশতার্জিতং অনেকজন্মসংচিতং সর্বং যৎপাপমস্তি তৎসর্বং
পাপ্মানং পাপং যোগী তরতি নাশয়তীত্যর্থঃ । তদুক্তং
‘ যস্য
ব্রহ্মবিচারণং ক্ষণমপি প্রাপ্নোতি ধৈর্যং মনঃ ‘ ‘
কুলং
পবিত্রং জননী কৃতার্থা বিশ্বম্ভরা পুণ্যবতী চ তেন
‘ ইত্যাদি—
মুক্তিঃ দ্বিবিধা—সদ্যো মুক্তিঃ ক্রমমুক্তিরিতি, তত্র
সদ্যো মুক্তিঃ
‘ যত্র যত্র মৃতো যোগী ‘ ইত্যাদিনা, ‘ অত্র ব্রহ্ম
সমশ্নুতে ‘
ইত্যাদি শ্রুত্যা চ, প্রতিপাদিতা । ‘ ব্রহ্মণা সহ তে
সর্বে সম্প্রাপ্তে
প্রতিসংচরে । পরস্যান্তে কৃতাত্মানঃ প্রবিশন্তি পরং
পরম্ ‘
ইত্যাদিভিঃ প্রতিপাদিতাং ক্রমমুক্তিং নিরূপয়িতুম্,
অর্চিরাদিমার্গং গন্তুঃ
পুনরাবৃত্তিরাহিত্যম্, ধূমাদিমার্গং গন্তুঃ পুনরাবৃত্তিং
চ, নিরূপয়িতুং যোগধারণয়া তদুভয়মার্গস্বরূপমাহ—
দক্ষিণে পিঙ্গলা নাডী বহ্নিমণ্ডলগোচরা ।
দেবয়ানমিতি জ্ঞেয়া পুণ্যকর্মানুসারিণী ॥ ১১ ॥
দক্ষিণে দেহস্য দক্ষিণে ভাগে বহ্নিমণ্ডলগোচরা বহ্নি-
মণ্ডলং সম্প্রাপ্তা পুণ্যকর্মানুসারিণী পুণ্যকর্মভিঃ প্রাপ্তুং
যোগ্যা পিঙ্গলা নাম নাডী মূলাধারাদারভ্য দক্ষিণভাগতঃ
সহস্রারপর্যন্তং ব্যামা যা নাডী সা দেবয়ানমিতি জ্ঞেয়া
পুনরা-
বৃত্তিরহিতার্চিরাদিমার্গ ইতি জ্ঞেয়ত্যর্থঃ ॥
ধূমাদিমার্গপ্রাপকেলানাডীস্বরূপমাহ—
ইলা চ বামনিশ্বাসসোমমণ্ডলগোচরা ।
পিতৃয়ানমিতি জ্ঞেয়ং বামমাশ্রিত্য তিষ্ঠতি ॥ ১২ ॥
ইলানাডী বামনিশ্বাসসোমমণ্ডলগোচরা বামনাসাপুট-
মার্গেণ চন্দ্রমণ্ডলং প্রাপ্তা বামমাশ্রিত্য তিষ্ঠতি,
মূলা-
ধারাদারভ্য বামভাগতঃ সহস্রারপর্যন্তং গতা যা নাডী
সা পিতৃয়ানমিতি জ্ঞেয়া পুনরাবৃত্ত্যনুকূলধূমমার্গ ইতি
জ্ঞেয়েত্যর্থঃ ॥
এবমিলাপিঙ্গলানাড্যোঃ স্থানং স্বরূপং চ অভিধায়
সুষুম্নানাডীস্বরূপং নিরূপয়িতুং তৎসম্বন্ধিন্যাঃ ব্রহ্ম-
দণ্ড্যাঃ স্বরূপমাহ—
গুদস্য পৃষ্ঠভাগেঽস্মিন্বীণাদণ্ডস্য দেহভৃৎ ।
দীর্ঘাস্তি মূর্ধ্নিপর্যন্তং ব্রহ্মদণ্ডীতি কথ্যতে ॥ ১৩ ॥
অস্মিন্ দেহে গুদস্য মূলাধারস্য পৃষ্ঠভাগে
পশ্চিম-
ভাগে বীণাদণ্ডস্য দেহভৃৎ বীণায়াস্তন্ত্র্যাধারভূতো
যো দণ্ডঃ তদাকারভৃৎ তদ্বৎস্থিতং মূর্ধ্নিপর্যন্তং
সহস্রারপর্যন্তব্যাপ্তং যদ্দীর্ঘাস্তি দীর্ঘং পৃষ্ঠভাগ-
স্থিতম্, তৎ ব্রহ্মনাডীতি কথ্যতে
ব্রহ্মৈক্যপ্রতিপাদকসুষুম্না-
ধারৎবাদিতি ভাবঃ ॥
ইতঃ পরং সুষুম্নানাডীস্বরূপমাহ—
তস্যান্তে সুষিরং সূক্ষ্মং ব্রহ্মনাডীতি সূরিভিঃ ।
তস্য ব্রহ্মদণ্ড্যাখ্যাস্থ্নঃ অন্তে অগ্রে সূক্ষ্মং সুষিরং
রন্ধ্রং বর্তত ইতি শেষঃ, তদ্গতা নাডী সূরিভিঃ বিবেকিভিঃ
ব্রহ্মনাডীতি ব্রহ্মৈক্যপ্রতিপাদিকা নাডীতি কথ্যত ইতি শেষঃ
॥
তামেব নাডীং নিরূপয়তি—
ইলাপিঙ্গলয়োর্মধ্যে সুষুম্না সূক্ষ্মরূপিণী ।
সর্বং প্রতিষ্ঠিতং যস্মিন্সর্বগং সর্বতোমুখম্ ॥ ১৪ ॥
ইলাপিঙ্গলনাড্যোর্মধ্যে সূক্ষ্মরূপিণী অতিসূক্ষ্মবিস-
তন্তুরূপিণী মূলাধারাদারভ্য স্বাধিষ্ঠানাদিচক্রদ্বারা
সহস্রারপর্যন্তং গতা কুণ্ডলিনী শক্তিরিতি প্রসিদ্ধা যা
সুষুম্না
নাডী, তস্যাঃ অগ্রে উপরি সর্বং সর্বাত্মকং বিশ্বতোমুখং
সর্ব-
দ্রষ্টৃ সর্বগং সর্বব্যাপ্তং যত্তেজঃ ব্রহ্মজ্যোতিঃ, তৎ
প্রতিষ্ঠিতং বিদ্যত ইত্যর্থঃ, ‘ তস্যাঃ শিখায়া মধ্যে
‘
ইতি শ্রুতেঃ । ‘ শতং চৈকা চ হৃদয়স্য নাড্যস্তাসাং
মূর্ধানমভিনিঃসৃতৈকা । তয়োর্ধ্বমায়ন্নমৃতৎবমেতি—
‘
ইত্যাদিশ্রুতেঃ ।
সুষুম্নামার্গগতস্য ব্রহ্মপ্রাপ্তিং নিরূপয়িতুং তস্যাঃ
কুণ্ডলিন্যাঃ সকলজগদাত্মকৎবং সকলজগদাধারৎবং সর্ব-
দেবাত্মৎবং সর্ববেদাধারকৎবং চ আহ—
তস্য মধ্যগতাঃ সূর্যসোমাগ্নিপরমেশ্বরাঃ ।
ভূতলোকা দিশঃ ক্ষেত্রসমুদ্রাঃ পর্বতাঃ শিলাঃ ॥ ১৫ ॥
দ্বীপাশ্চ নিম্নগা বেদাঃ শাস্ত্রবিদ্যাকলাক্ষরাঃ ।
স্বরমন্ত্রপুরাণানি গুণাশ্চৈতে চ সর্বশঃ ॥ ১৬ ॥
বীজং বীজাত্মকাস্তেষাং ক্ষেত্রজ্ঞাঃ প্রাণবায়বঃ ।
সুষুম্নান্তর্গতং বিশ্বং তস্মিন্সর্বং প্রতিষ্ঠিতম্ ॥ ১৭ ॥
সূর্যসোমাগ্নিপরমেশ্বরাঃ সূর্যমণ্ডলসোমমণ্ডল-
বহ্নিমণ্ডলানি তন্মধ্যস্থিতেশ্বরশ্চ, ভূতলোকাঃ পঞ্চ-
মহাভূতানি ব্যোমাদীনি, চতুর্দশ ভুবনানি ভূর্ভুবঃ-
সুবরাদীনি, দিশঃ পূর্বাদয়ঃ, ক্ষেত্রাণি বারাণস্যাদীনি,
সমুদ্রাঃ লবণেক্ষ্বাদয়ঃ, পর্বতাশ্চ মের্বাদয়ঃ, শিলাঃ
যজ্ঞশিলাঃ চিত্তশিলাদয়ঃ, দ্বীপাঃ জম্ব্বাদয়ঃ, নিম্নগাঃ
জাহ্নব্যাদয়ঃ, বেদাঃ ঋগ্বেদাদয়ঃ, শাস্ত্রাণি
মীমাংসাদীনি,
কলাঃ চতুঃষষ্টিকলাঃ, অক্ষরাঃ ককারাদীনি, স্বরাঃ
অকারাদয়ঃ, মন্ত্রাঃ গায়ত্র্যাদয়ঃ, পুরাণানি
ব্রহ্মাণ্ডাদীনি,
গুণাঃ সত্ত্বাদয়ঃ, বীজং প্রধানম্, বীজাত্মকাঃ
মহদাদয়ঃ,
ক্ষেত্রং জানন্তীতি ক্ষেত্রজ্ঞাঃ জীবাঃ, প্রাণবায়বঃ—
প্রাণাদয়ঃ
পঞ্চনাগাদয়ঃ পঞ্চ আহত্য দশবায়বঃ, সর্ব এতে তস্য
সুষুম্নানাডীবিশেষস্য মধ্যগতাঃ যস্মাৎ,
তস্মাৎকারণাৎ
সর্বং জগজ্জাতং সুষুম্নান্তর্গতং কুণ্ডলিনীশক্ত্যন্তর্ভূত-
মিত্যর্থঃ । অত এব তস্মিন্ সর্বং প্রতিষ্ঠিতম্ ইতি, ‘
তস্যান্তে
সুষিরꣳ সূক্ষ্মং তস্মিন্সর্বং প্রতিষ্ঠিতম্ ‘ ইতি
শ্রুতেঃ ॥
তস্মাৎসর্বজগদুৎপত্তিকারণমাহ—
নানানাডীপ্রসবকং সর্বভূতান্তরাত্মনি ।
ঊর্ধ্বমূলমধঃ শাখং বায়ুমার্গেণ সর্বগম্ ॥ ১৮ ॥
সর্বভূতানাং সর্বপ্রাণিনাং অন্তরাত্মনি দেহে নানা-
নাডীপ্রসবকং নানানাড্যুৎপত্তিস্থানভূতম্, ঊর্ধ্বমূলং
ঊর্ধ্বং ব্রহ্ম তদেব মূলং উৎপত্তিস্থানং যস্য তৎ, অধঃ-
শাখং হিরণ্যগর্ভাদিসৃষ্টিপরম্পরাখ্যাদধঃ প্রসৃত-
তির্যগাদিশাখম্, বায়ুমার্গেণ প্রাণাপানাদিবায়ুমার্গেণ,
সর্বগং সর্বব্যাপ্তং সৎ জগদুপাদানতয়া তিষ্ঠতীত্যর্থঃ ॥
ব্রহ্মোপাসনস্থানতয়া ইতরনাড্যাধিক্যমাহ—
দ্বিসপ্ততিসহস্রাণি নাড্যঃ স্যুর্বায়ুগোচরাঃ ।
কর্মমার্গেণ সুষিরাস্তির্যঞ্চঃ সুষিরাত্মকাঃ ॥ ১৯ ॥
অধশ্চোর্ধ্বগতাস্তাসু নবদ্বারাণি শোধয়ন্ ।
বায়ুনা সহ জীবোর্ধ্বজ্ঞানী মোক্ষমবাপ্নুয়াৎ ॥ ২০ ॥
বায়ুগোচরাঃ বায়ুসংচারানুকূলাঃ নাড্যঃ সিরাঃ
দ্বিসপ্ততিসহস্রাণি দ্বয়াধিকসপ্ততিসহস্রাণি কর্মমার্গেণ
সুষিরাঃ পুনরাবৃত্তিপ্রাপকসুষিরবত্যঃ; অত এব তির্যঞ্চঃ
তির্যগ্ভূতাঃ সুষিরাত্মকাঃ রন্ধ্রপ্রধানাঃ অধশ্চোর্ধ্ব-
গতাঃ অধোভাগমূর্ধ্বভাগং চ গতাঃ সর্বত্র ব্যাপ্তাঃ;
তাসু নাডীষু মধ্যে সুষুম্নানাড্যা নব দ্বারাণি শিধয়ন্
প্রাণায়ামেন মুখাদিসর্বদ্বারাণি শোধয়ন্; জীবঃ বায়ুনা
সহ ঊর্ধ্বজ্ঞানী ব্রহ্মাপরোক্ষজ্ঞানী সন্
মোক্ষমবাপ্নুয়াৎ
ব্রহ্মৈক্যং প্রাপ্নুয়াদিত্যর্থঃ । ‘ তয়োর্ধ্বমায়ন্নমৃতৎব-
মেতি ‘ ইত্যাদিশ্রুতেরিতি ভাবঃ ॥
তস্যাঃ কুণ্ডলিন্যাঃ সকলজগদাধারকৎবেন চ উপাসনাং
কর্তুমস্যামেব সর্বাণীন্দ্রাদিপুরাণি কল্পয়তি—
অমরাবতীন্দ্রলোকোঽস্মিন্নাসাগ্রে পূর্বতো দিশি ।
অগ্নিলোকো হৃদি জ্ঞেয়শ্চক্ষুস্তেজোবতী পুরী ॥ ২১ ॥
অস্মিন্নাডীবিশেষে পূর্বতো দিশি পূর্বস্যাং দিশি নাসাগ্রে
নাসিকাগ্রভাগে অমরাবতী অমরাবত্যাখ্যঃ ইন্দ্রলোকঃ ইন্দ্রাদি-
দেবাবাসভূতো লোকঃ বর্তত ইতি শেষঃ । তথা অনন্তরং চক্ষুঃ
দক্ষিণং নেত্রং তেজোবতী তেজোবতী নাম পুরীতি প্রসিদ্ধ,
হৃদি হৃদয়ে
অগ্নিলোকঃ অগ্ন্যাদিদেবাবাসভূতো লোকঃ জ্ঞেয়ঃ বর্তত ইতি শেষঃ
॥
যাম্যা সংয়মনী শ্রোত্রে যমলোকঃ প্রতিষ্ঠিতঃ ।
নৈরৃতো হ্যথ তৎপার্শ্বে নৈরৃতো লোক আশ্রিতঃ ॥ ২২ ॥
শ্রোত্রে দক্ষিণে কর্ণে যাম্যা যমসম্বন্ধিনী
সংয়মিন্যাখ্যো
যমলোকঃ যমাদিদেববাসভূতো লোকঃ প্রতিষ্ঠিতঃ অস্তীত্যর্থঃ ।
অথ তৎপার্শ্বে দক্ষিণকর্ণভাগে নৈরৃতঃ নিরৃতিসম্বন্ধো
নৈরৃত্যাখ্যো লোকঃ আশ্রিতঃ অস্তীত্যর্থঃ ॥
কিংচ—
বিভাবরী প্রতীচ্যাং তু পৃষ্ঠে বারুণিকা পুরী ।
বায়োর্গন্ধবতী কর্ণপার্শ্বে লোকঃ প্রতিষ্ঠিতঃ ॥ ২৩ ॥
প্রতীচ্যাং পশ্চিমদিশি পৃষ্ঠে পশ্চিমভাগে
বিবাবরী-
সংজ্ঞকা বারুণিকা পুরী বরুণসম্বন্ধিনী পুরী বর্তত ইতি
শেষঃ;
কর্ণপার্শ্বে বামকর্ণসমীপে গন্ধবতী গন্ধ্বতীপুর্যাখ্যা
বায়োর্লোকঃ প্রতিষ্ঠিতঃ অস্তীত্যর্থঃ ॥
কিংচ—
সৌম্যা পুষ্পবতী সৌম্যে সোমলোকস্তু কণ্ঠতঃ ।
বামকর্ণে তু বিজ্ঞেয়ো দেহমাশ্রিত্য তিষ্ঠতি ॥ ২৪ ॥
সৌম্যে উত্তরদিশি কণ্ঠতঃ কণ্ঠদেশাদারভ্য বামকর্ণে
বামশ্রোত্রে সৌম্যা কুবেরসম্বন্ধিনী পুষ্পবতী পুষ্পবত্যাখ্যা
সোমলোকঃ এবং দেহমাশ্রিত্য তিষ্ঠতীতি বিজ্ঞেয়ঃ ॥
কিংচ—
বামে চক্ষুষি চৈশানী শিবলোকো মনোন্মনী ।
মূর্ধ্নি ব্রহ্মপুরী জ্ঞেয়া ব্রহ্মাণ্ডং দেহমাশ্রিতম্ ॥ ২৫ ॥
বামে চক্ষুষি বামনেত্রে ঐশানী ঈশানসম্বন্ধিনী
মনোন্মনী মনোন্মনীপুর্যাখ্যঃ শিবলোকঃ শিবাবাসভূতো
লোকঃ জ্ঞেয়ঃ; মূর্ধ্নি শিরসি ব্রহ্মপুরী ব্রহ্মলোকঃ জ্ঞেয়ঃ;
এবং ব্রহ্মাণ্ডং সর্বজগজ্জাতং দেহমাশ্রিতং দেহ এব বর্তত
ইত্যর্থঃ ॥
দেহে এব লোকাদিকল্পনামাহ—
পাদাদধঃ শিবোঽনন্তঃ কালাগ্নিপ্রলয়াত্মকঃ ।
অনাময়মধশ্চোর্ধ্বং মধ্যমং তু বহিঃ শিবম্ ॥ ২৬ ॥
পাদাদধঃ পাদাধঃপ্রদেশে অনন্তঃ মহাশেষঃ বর্ততে,
স তু কীদৃশঃ ? শিবঃ রুদ্রাত্মকঃ; পুনঃ কীদৃশঃ ?
কালাগ্নিপ্রলয়াত্মকঃ প্রলয়কালাগ্ন্যাত্মক ইত্যর্থঃ; ‘
ত্রিলোক্যাং
দহ্যমানায়াং সংকর্ষণমুখাগ্নিনা ‘ ইতি স্মৃতেরিতি
ভাবঃ ।
তদধঃ কিমিত্যাশঙ্ক্যাহ—অধশ্চোর্ধ্বমিতি অধোদেশে
ঊর্ধ্ব-
দেশে মধ্যদেশে বহির্দেশে চ সর্বত্র অনাময়ং নিরঞ্জনং শিবং
মঙ্গলাত্মকং ব্রহ্মৈব বর্তত ইত্যর্থঃ ॥
শেষোপরি অতলাদিলোককল্পনামাহ—
অধঃ পদোঽতলং বিদ্যাৎপাদং চ বিতলং বিদুঃ ।
নিতলং পাদসন্ধিশ্চ সুতলং জঙ্ঘমুচ্যতে ॥ ২৭ ॥
মহাতলং তু জানু স্যাদূরুদেশো রসাতলম্ ।
কটিস্তালতলং প্রোক্তং সপ্ত পাতালসংজ্ঞয়া ॥ ২৮ ॥
পদঃ পাদস্যাধোদেশে অতললোকং বিদ্যাৎ; পাদং তু
বিতলং
লোকমিতি বিদুঃ যোগিন ইতি শেষঃ; পাদসন্ধিং তু গুল্ফস্থানং
নিতলং বিদ্যাৎ; জঙ্ঘং সুতলমিত্যুচ্যতে; জানুদেশঃ
মহাতলং
স্যাৎ; ঊরুদেশঃ রসাতলং বিদ্যাৎ; কটিদেশঃ তলাতলং
প্রোক্তম্; এবং দেহাবয়বাঃ সপ্ত পাতালাদিলোকসংজ্ঞয়া
কল্পনীয়া ইত্যর্থঃ ॥
কিংচ—
কালাগ্নিনরকং ঘোরং মহাপাতালসংজ্ঞয়া ।
পাতালং নাভ্যধোভাগো ভোগীন্দ্রফণিমণ্ডলম্ ॥ ২৯ ॥
বেষ্টিতঃ সর্বতোঽনন্তঃ স বিভ্রজ্জীবসংজ্ঞকঃ ।
ঘোরং ভয়ংকরং কালাগ্নিনরকং কালাগ্নিদেশবৎ
কালাগ্ন্যা-
কারসহ্যনরকদেশবৎ ভোগীন্দ্রফণিমণ্ডলং ভোগীন্দ্রাঃ
সর্পরাজানঃ ফণয়ঃ ইতরে সর্পাঃ তেষাং মণ্ডলং সমূহবৎ
যৎ পাতালম্, তৎ নাভ্যধোভাগে নাভ্যধঃপ্রদেশে
মহাপাতালসংজ্ঞয়া অভিহিতমিতি বিদ্যাৎ; স জীবসংজ্ঞকঃ
জীবসংজ্ঞাবান্ শেষঃ সর্বতঃ সর্বং বেষ্টিতঃ সন্
বিভ্রন্সন্
স্থিতঃ কুণ্ডলাকারেণাবৃত্য বর্তত ইত্যর্থঃ ॥
ভূলোকং নাভিদেশং তু ভুবর্লোকং তু কুক্ষিতঃ ॥ ৩০ ॥
হৃদয়ং স্বর্গলোকং বিদ্যাৎ, তত্র সূর্যাদিগ্রহাঃ
নক্ষত্রাণি চ তিষ্ঠন্তীত্যর্থঃ । শেষং স্পষ্টম্ ॥
কিংচ—
হৃদয়ং স্বর্গলোকং তু সূর্যাদিগ্রহতারকাঃ ।
সূর্যসোমসুনক্ষত্রং বুধশুক্রকুজাঙ্গিরাঃ ॥ ৩১ ॥
মন্দশ্চ সপ্তমো হ্যেষ ধ্রুবোঽন্তঃ স্বর্গলোকতঃ ।
সূর্যসোমেত্যাদি সূর্যাদিগ্রহনক্ষত্রমিত্যস্য
ব্যাখ্যানম্ । ধ্রুবোঽন্তঃ স্বর্গলোকতঃ স্বর্গলোকস্যান্তে ধ্রুবো
বর্তত ইত্যর্থঃ ॥
এবং কল্পনাফলমাহ
হৃদয়ে কল্পয়ন্যোগী তস্মিন্সর্বসুখং লভেৎ ॥ ৩২ ॥
যোগী হৃদয়ে এব সূর্যাদিগ্রহনক্ষত্রাদীনি কল্পয়ন্
তস্মিন্
হৃদি কল্পনাবিশেষেণ সর্বসুখং লভেৎ;
তত্তল্লোকগতসুখানি
প্রাপ্নোতীত্যর্থঃ ॥
কিংচ—
হৃদয়স্য মহর্লোকং জনোলোকং তু কণ্ঠতঃ ।
তপোলোকং ভ্রুবোর্মধ্যে মূর্ধ্নি সত্যং প্রতিষ্ঠিতম্ ॥ ৩৩ ॥
হৃদয়স্যোপরীতি শেষঃ । স্পষ্টমন্যৎ ॥
এবং দেহে এব সর্বলোককল্পনামুক্ত্বা তল্লয়প্রকারমাহ—
ব্রহ্মাণ্ডরূপিণী পৃথ্বী তোয়মধ্যে বিলীয়তে ।
অগ্নিনা পচ্যতে তোয়ং বায়ুনা গ্রস্যতেঽনলঃ ॥ ৩৪ ॥
আকাশং তু পিবেদ্বায়ুং মনশ্চাকাশমেব চ ।
বুদ্ধ্যহঙ্কারচিত্তং চ ক্ষেত্রজ্ঞঃ পরমাত্মনি ॥ ৩৫ ॥
অত্র তামসাহঙ্কারকার্যাণাং পৃথিব্যাদীনাং
সাত্ত্বিক-
অহঙ্কারকার্যে মনসি ক্রমেণ লয়কথনং মনোবৃত্তিবিষয়-
ৎবাদুপচারাৎ ইতি মন্তব্যম্ । তচ্চ মনো বুদ্ধৌ বুদ্ধি-
রহঙ্কারে অহ্ঙ্কারং চিত্তে চিত্তং ক্ষেত্রজ্ঞে ক্ষেত্রজ্ঞঃ
পরমাত্মনি এবং সর্বাত্মনি প্রবিলাপয়েদিত্যর্থঃ ॥
এবং যোগাভ্যাসেন ব্রহ্মৈক্যানুসন্ধানবতঃ সকল-
দুরিতনিবৃত্তিরিত্যাহ—
অহং ব্রহ্মেতি মাং ধ্যায়েদেকাগ্রমনসা সকৃৎ ।
সর্বং তরতি পাপ্মানং কল্পকোটিশতৈঃ কৃতম্ ॥ ৩৬ ॥
স্পষ্টোঽর্থঃ ॥
জীবস্য মুক্তিস্বরূপমাহ—
ঘটসংবৃতমাকাশং নীয়মানে ঘটে যথা ।
ঘটো নশ্যতি নাকাশং তদ্বজ্জীব ইহাত্মনি ॥ ৩৭ ॥
ঘটে নীয়মানে পূর্বদেশাদন্যদেশং প্রাপ্যমানে ঘটে
নষ্টে চ যথা ঘটাকাশং মহাকাশে ঐক্যং প্রাপ্নোতি,
তদ্বজ্জীবঃ পরমাত্মনীত্যর্থঃ ॥
কিংচ—
ঘটাকাশমিবাত্মানং বিলয়ং বেত্তি তত্ত্বতঃ ।
স গচ্ছতি নিরালম্বং জ্ঞানালোক্যং ন সংশয়ঃ ॥ ৩৮ ॥
যঃ আত্মানং জীবং ঘটাকাশমিব পরমাত্মনি লয়ং
গতং তত্ত্বতঃ যথার্থতয়া বেত্তি, সঃ জ্ঞানী নিরালম্বং
নিঃসঙ্গং
জ্ঞানালোক্যং ব্রহ্মপ্রকাশাত্মতত্ত্বং গচ্ছতি প্রাপ্নোতি,
ন সংশয়ঃ সন্দেহো নাস্তিত্যর্থঃ ॥
এতস্য জ্ঞানয়োগস্য কিমপি তুল্যমিত্যাহ—
তপেদ্বর্ষসহস্রাণি একপাদস্থিতো নরঃ ।
একস্য ধ্যানয়োগস্য কলাং নার্হন্তি ষোডশীম্ ॥ ৩৯ ॥
আলোড্য চতুরো বেদান্ধর্মশাস্ত্রাণি সর্বদা ।
যো বৈ ব্রহ্ম ন জানাতি দর্বী পাকরসং যথা ॥ ৪০ ॥
যথা খরশ্চন্দনভারবাহী
সারস্য বাহী ন তু চন্দনস্য ।
এবং হি শাস্ত্রাণি বহূন্যধীত্য
সারং ৎবজানন্খরবদ্বহেৎসঃ ॥ ৪১ ॥
চন্দনভারবাহী শ্রীচন্দনকাষ্ঠভারবাহী খরঃ
চন্দনসারবাহী ন ভবতি তদ্গন্ধানুভববান্ন ভবতি, এবং
বহূনি শাস্ত্রাণ্যধীত্যপি সারং তু অজানন্ ব্রহ্ম ন জানন্
খরবৎ শোচ্যঃ আক্রোশ্য ইত্যর্থঃ ॥
ব্রহ্মজ্ঞানপর্যন্তং সর্বমনুষ্ঠেয়ম্, জ্ঞাতে তু
সর্বং
ব্যর্থমিত্যাহ—
অনন্তকর্ম শৌচং চ জপো যজ্ঞস্তথৈব চ ।
তীর্থয়াত্রাদিগমনং যাবত্তত্ত্বং ন বিন্দতি ॥ ৪২ ॥
দেহে ভিন্নেঽপ্যাত্মৈক্যং দৃষ্টান্তেনাহ —
গবামনেকবর্ণানাং ক্ষীরং স্যাদেকবর্ণকম্ ।
ক্ষীরবদ্দৃশ্যতে জ্ঞানং দেহিনাং চ গবাং যথা ॥ ৪৩ ॥
অনেকবর্ণানাং শুক্লাদিভিন্নভিন্নবর্ণানাং গবাং
ক্ষীরং
যথা একবর্ণম্, মীমাংসকমতে গুণব্যক্তেরেকৎবাদিতি ভাবঃ;
তথা ভিন্নভিন্নানাং দেহিনাং জ্ঞানং ব্রহ্ম একং দৃশ্যত
ইত্যর্থঃ ॥
অহং ব্রহ্মেতি নিয়তং মোক্ষহেতুর্মহাত্মনাম্ ।
দ্বে পদে বন্ধমোক্ষায় ন মমেতি মমেতি চ ॥ ৪৪ ॥
মমেতি বধ্যতে জন্তুর্ন মমেতি বিমুচ্যতে ॥
মমেতি মমতাবিষয়ৎবেন স্বীকৃতং সর্বং বন্ধায়
ভবতি;
ন মমেতি মমৎবং বিহায় ত্যক্তং মোক্ষায়ৈবেত্যর্থঃ ।
স্পষ্টমন্যৎ ॥
অহঙ্কারত্যাগকার্যমাহ—
মনসো হ্যুন্মনীভাবাদ্দ্বৈতং নৈবোপলভ্যতে ।
যদা যাত্যুন্মনীভাবং তদা তৎপরমং পদম্ ॥ ৪৫ ॥
মনসঃ চিত্তস্য উন্মনীভাবাৎ অহঙ্কারত্যাগাৎ
দ্বৈতং
নৈবোপলভ্যতে, অহঙ্কারোপাধিকৎবাদ্ভেদস্যেতি ভাবঃ । তথা
উন্মনীভাবং মনো যদা যাতি নিষ্কৃষ্টাহঙ্কার চৈতন্যং
ভবতি তদা তদেব পরমং পদং মোক্ষ ইত্যভিধীয়তে ॥
ব্রহ্মবিচারমকুর্বতঃ সর্বং ব্যর্থমিত্যাহ—
হন্যান্মুষ্টিভিরাকাশং ক্ষুধার্তঃ কণ্ডয়েত্তুষম্ ।
নাহং ব্রহ্মেতি জানাতি তস্য মুক্তির্ন জায়তে ॥ ৪৬ ॥
যো বেদশাস্ত্রাণ্যধীত্য শ্রুৎবাপি নাহং ব্রহ্মেতি
জানাতি তস্য সর্বাণি শাস্ত্রণি প্রয়াসকরাণ্যেব । যথা
ক্ষুধার্তঃ
মুষ্টিভিরাকাশং হন্যাচ্চেতি করভঙ্গ এব জায়তে ন কিমপি
ফলং
যথা বা তুষং কণ্ডয়েদবহন্যাৎ । অবহননশ্রম এব ফলং
ন তু
তণ্ডুলভাবঃ । তদ্বন্মুক্তির্ন জায়তে ইতি ভাবঃ । তদুক্তং
ভাগবতে ‘ তেষামসৌ ক্লেশল এব শিষ্যতে নান্যদ্যথা
স্থূলতুষা-
বধাতিনাম্ ‘ ইতি ॥
ইতি শ্রীগৌডপাদাচার্যবিরচিতায়াং
উত্তরগীতাব্যাখ্যায়াং
দ্বিতীয়োঽধ্যায়ঃ ॥
॥ তৃতীয়োঽধ্যায়ঃ ॥
যোগী ব্যর্থক্রিয়ালাপপরিত্যাগেন শান্তধীঃ ।
তৃতীয়ে শরণং যায়াদ্ধরিমেবেতি কীর্ত্যতে ॥
শ্রীভগবানুবাচ—
অনন্তশাস্ত্রং বহুবেদিতব্য-
মল্পশ্চ কালো বহবশ্চ বিঘ্নাঃ ।
যৎসারভূতং তদুপাসিতব্যং
হংসো যথা ক্ষীরমিবাম্বুমিশ্রম্ ॥ ১ ॥
বিবেকিনা যোগিনা
সারভূতমধ্যাত্মশাস্ত্রমেবোপাসিতব্যং ন
ৎবন্যৎ অশক্যৎবাৎ অনন্তশাস্ত্রং পর্যবসানরহিতানি
শাস্ত্রাণীত্যর্থঃ । যথাকথংচিৎপর্যবসানেঽপি বহু
বেদিতব্যং
তত্তাৎপর্যাণি বহূনি বেদিতব্যানীত্যর্থঃ । জ্ঞাতুং শক্যৎবেঽপি
কালঃ স্বল্প এব ‘পুংসো বর্ষশতং হ্যায়ুঃ’ ইতি
ন্যায়াৎ ।
তস্মাদ্যৎসারভূতং সর্বশাস্ত্রাণালোড্য
যন্নিশ্চিতমখণ্ডৈকরসং
ব্রহ্ম তদেবোপাসিতব্যম্ । তদুক্তম্ ‘ আলোড্য
সর্বশাস্ত্রাণি ‘
ইত্যাদি । উক্তং চ হরিবংশে—‘
অসৎকীর্তনকান্তারপরিবর্তনপাংসুভিঃ ।
বাচং হরিকথালাপগঙ্গয়ৈব পুনীমহে ‘ ইতি । তত্র
দৃষ্টান্তমাহ—হংসো যথা অম্বুমিশ্রৎবেঽপি অম্ব্বংশং
বিহায়
ক্ষীরমেবোপাদত্তে তদ্বদিতি ভাবঃ ॥
তস্মাৎপাণ্ডিত্যং নির্বিদ্যেত্যাদিশ্রুত্যা পাণ্ডিত্যপ্রকটনস্য
ব্রহ্মোপাসনাপ্রতিবন্ধকৎবেন সর্বমপি পাণ্ডিত্যং হেয়মিত্যাহ—
পুরাণং ভারতং বেদশাস্ত্রাণি বিবিধানি চ ।
পুত্রদারাদিসংসারো যোগাভ্যাসস্য বিঘ্নকৃৎ ॥ ২ ॥
যোগাভ্যাসস্য আত্মৈক্যযোগাভ্যাসস্য । শেষং
স্পষ্টম্ ॥
কিং চ আত্মবিচারমন্তরেণ ইতরশাস্ত্রাণি ন বিচারয়িতব্যা-
নীত্যাহ—
ইদং জ্ঞানমিদং জ্ঞেয়ং যঃ সর্বং জ্ঞাতুমিচ্ছতি ।
অপি বর্ষসহস্রায়ুঃ শাস্ত্রান্তং নাধিগচ্ছতি ॥ ৩ ॥
সহস্রবর্ষপরিমিতায়ুষ্মানপি একৈকস্য শাস্ত্রস্য অন্তং
পারং ভাবনিশ্চয়ং বা নাধিগচ্ছতি; কিমুত বক্তব্যং
সর্বাণি শাস্ত্রাণি নাধিগচ্ছতীতি ভাবঃ ॥
তর্হি সর্বমপি বিহায় অধিগন্তব্যং বা
কিমিত্যাশঙ্ক্যাহ—
বিজ্ঞেয়োঽক্ষরতন্মাত্রং জীবিতং চাপি চঞ্চলম্ ।
বিহায় শাস্ত্রজালানি যৎসত্যং তদুপাস্যতাম্ ॥ ৪ ॥
অক্ষরতন্মাত্রং নাশরহিতসত্তামাত্রাত্মক আত্মা
বিজ্ঞেয়ঃ । তত্র চ বৈরাগ্যার্থং জীবিতমপি চঞ্চলমিতি
বিজ্ঞেয়ম্,
‘ চরমশ্বাসবেলায়াং যৎকৃত্যং তৎসদা কুরু ‘ ইতি
ন্যায়াৎ । তস্মাচ্ছাস্ত্রজালানি বিহায় যৎসত্যং
তদেবোপাস্যতামিতি ॥
ইন্দ্রিয়জয়ে বৈরাগ্যং স্বত এব জায়ত ইত্যাহ—
পৃথিব্যাং যানি ভূতানি জিহ্বোপস্থনিমিত্তিকম্ ।
জিহ্বোপস্থপরিত্যাগে পৃথিব্যাং কিং প্রয়োজনম্ ॥ ৫ ॥
জিহ্বোপস্থনিমিত্তিকম্ আহারব্যবায়নিমিত্তং সৎ
পৃথিব্যাং
যানি ভূতানি সন্তি, প্রায়শঃ তৎপরিত্যাগী চেৎ,
পৃথিব্যাং কিং
প্রয়োজনম্, কিমপি প্রয়োজনং নাস্তীত্যর্থঃ, ‘ জিতং
সর্বং
জিতে রসে ‘ ইতি ন্যায়াৎ ॥
এবমাত্মসমাধিনিষ্ঠস্য সর্বত্র ব্রহ্মদর্শনমেব,
নান্যদ্দর্শনমিত্যাহ—
তীর্থানি তোয়পূর্ণানি দেবান্পাষাণমৃন্ময়ান্ ।
যোগিনো ন প্রপদ্যন্তে আত্মধ্যানপরায়ণাঃ ॥ ৬ ॥
তীর্থস্নানাদিনা দেবতাপূজাদিনা চ অধ্যাত্মসমাধৌ
সিদ্ধে পুনস্তেন কিং প্রয়োজনমিতি ভাবঃ । স্পষ্টমন্যৎ ॥
যোগিনঃ সর্বত্র ব্রহ্মদর্শনমেবেত্যেতৎ অধিকারিভেদে-
নোপপাদয়তি—
অগ্নির্দেবো দ্বিজাতীনাং মুনীনাং হৃদি দৈবতম্ ।
প্রতিমা স্বল্পবুদ্ধীনাং সর্বত্র সমদর্শিনাম্ ॥ ৭ ॥
দ্বিজাতীনাং কর্মকাণ্ডরতানাম্ অগ্নির্দৈবতম্,
মুনীনাং
মননশীলানাং যোগিনাং হৃদি হৃৎকমলমধ্যস্থিতা পরি-
চ্ছিন্নমূর্তির্দৈবতম্, স্বল্পবুদ্ধীনাং প্রাকৃতানাং তু
মৃৎপাষাণাদিপ্রতিমৈব দৈবতম্, সমদর্শিনাং তু
আরূঢানাং
সর্বত্র ‘ সর্বং খল্বিদং ব্রহ্ম ‘ ইতি শ্রুত্যা সর্বমপি
দৈবতমেবেত্যর্থঃ ॥
তস্মাৎ জ্ঞানেনৈব জ্ঞাতব্যম্, জ্ঞানাভাবে
ব্রহ্ম ন
পশ্যতীত্যাহ—
সর্বত্রাবস্থিতং শান্তং ন প্রপশ্যেজ্জনার্দনম্ ।
জ্ঞানচক্ষুর্বিহীনৎবাদন্ধঃ সূর্যমিবোদিতম্ ॥ ৮ ॥
সর্বত্রাবস্থিতং সর্বত্র পরিপূর্ণমপি অজ্ঞঃ ন
পশ্যতি; তত্র
হেতুঃ জ্ঞানচক্ষুর্বিহীনৎবাৎ
জ্ঞানাখ্যচক্ষূরহিতৎবাৎ,
তত্র দৃষ্টান্তমাহ—অন্ধ ইতি । স্পষ্টমন্যৎ ॥
সর্বং ব্রহ্মেত্যেত্তদুপপাদয়তি—
যত্র যত্র মনো যাতি তত্র তত্র পরং পদম্ ।
তত্র তত্র পরং ব্রহ্ম সর্বত্র সমবস্থিতম্ ॥ ৯ ॥
যত্র যত্র মনো যাতি মনো যদ্যদ্বিষয়ীকরোতি তত্র তত্র
পরং
সর্বোৎকৃষ্টং পদং প্রাপ্য স্থানং পরং ব্রহ্মৈব
সমবস্থিতম্ ।
ঘটঃ স্ফুরতীত্যাদিস্ফুরণানুভবাদিতি ভাবঃ ॥
এতাদৃশস্য যোগিনঃ সর্বমপি প্রত্যক্ষতয়া ভাসত
ইত্যাহ—
দৃশ্যন্তে দৃশি রূপাণি গগনং ভাতি নির্মলম্ ।
অহমিত্যক্ষরং ব্রহ্ম পরমং বিষ্ণুমব্যযম্ ॥ ১০ ॥
পরমং সর্বোৎকৃষ্টমক্ষরমপক্ষয়রহিতমব্যযং
নাশরহিতং বিষ্ণুং পরমাত্মানমহমিত্যভেদেনৈব যো ভাবয়তি
তস্য ভাবয়িতুঃ দৃশি জ্ঞানে রূপাণি দৃশ্যন্তে নামরূপা-
ত্মকানি জগন্তি ভাসন্ত ইত্যর্থঃ । গগনমপি নির্মলং ভাসতে;
তথা চ সর্বমপি প্রত্যক্ষেণানুভবতীত্যর্থঃ । ইয়ং চারুরু-
ক্ষাবস্থায়ামন্তরাপতিতা যোগসিদ্ধিরিতি তত্ত্বজ্ঞা বর্ণয়ন্তি ।
আরূঢস্য ব্রহ্মনিষ্ঠৎবেনৈতদ্দর্শনায়োগাৎ । ‘ যা নিশা
সর্বভূতানাম্ ‘ ইতি স্মৃতেঃ ।
দৃশ্যতে চেৎখগাকারং খগাকারং বিচিন্তয়েৎ ।
সকলং নিষ্কলং সূক্ষ্মং মোক্ষদ্বারেণ নির্গতম্ ॥ ১১ ॥
অপবর্গস্য নির্বাণং পরমং বিষ্ণুমব্যযম্ ।
সর্বজ্যোতির্নিরাকারং সর্বভূতগুণান্বিতম্ ॥ ১২ ॥
সর্বত্র পরমাত্মানং অহমাত্মা পরমব্যযম্ ।
খগাকারং হংসাত্মকং পরং ব্রহ্ম ‘ হংসো বিধিঃ
শঙ্কর এব হংসঃ হংসশ্চ বিষ্ণুর্গুরুরেব হংসঃ ‘ ইত্যাদি
স্মৃতেঃ দৃশ্যতে চেদ্যদি প্রকাশেত তর্হি স্বয়ং ব্রহ্মাত্মা
পরব্রহ্মাত্মকঃ সন্ সকলং তেজোময়ং নিষ্কলং কলাতীতং
সূক্ষ্মং প্রমাণাগম্যং মোক্ষদ্বারেণ নির্গতং
মোক্ষমার্গৈকগম্যম্ ॥
অপবর্গস্য নির্বাণং মোক্ষসুখাত্মকং পরমং
উৎকৃষ্টং বিষ্ণুং ব্যাপকম্ অব্যযং নাশরহিতং
সর্বতোজ্যোতিরাকাশং
সর্বতঃ স্বয়ংপ্রকাশং সর্বভূতাধিবাসিনং সর্বান্তর্নিয়ামকং
পরমাত্মানং খগাকারং হংসাত্মকং বিচিন্তয়েৎ
ধ্যায়েদিত্যর্থঃ ॥
এবং চিন্তয়তঃ পাপলেশোঽপি নাস্তীত্যাহ—
অহং ব্রহ্মেতি যঃ সর্বং বিজানাতি নরঃ সদা ।
হন্যাৎস্বয়মিমান্কামান্সর্বাশী সর্ববিক্রয়ী ॥ ১৩ ॥
সর্বং নিষিদ্ধং কৃৎবাপি কর্মভির্ন স বধ্যতে ইতি,
যঃ
সদা সর্বং ব্রহ্মেতি বিজানাতি, সর্বাশ্যপি
সর্বনিষিদ্ধভক্ষ্যপি
সর্ববিক্রয়ী সর্বনিষিদ্ধবিক্রয়্যপি ইমান্ কামান্
অরিষড্বর্গান্
হন্যাৎ জয়েৎ, সর্বনিষিদ্ধকর্ম কৃৎবাপি
তৈর্নিষিদ্ধকর্মভির্ন
বধ্যতে ॥
ক্ষণমাত্রং বা ব্রহ্মধ্যানরতস্য
নান্যসুখচিন্তেত্যাহ—
নিমিষং নিমিষার্ধং বা শীতাশীতনিবারণম্ ।
অচলা কেশবে ভক্তির্বিভবৈঃ কিং প্রয়োজনম্ ॥ ১৪ ॥
শীতাশীতনিবারণং যথা তথা
শীতোষ্ণসুখদুঃখাদি-
দ্বন্দ্বসহিষ্ণুতয়া নিমিষং নিমিষার্ধং বা কেশবে ভক্তি-
রচলা চেৎ, বিভবৈঃ ভক্ত্যতিরিক্তবিষয়সুখৈঃ কিং
প্রয়োজনমিতি ॥
এতাদৃশো যোগী যদি মোক্ষমাপেক্ষেত, তর্হি
নান্যবিষয়-
চিন্তাং কুর্যাদিত্যাহ—
ভিক্ষান্নং দেহরক্ষার্থং বস্ত্রং শীতনিবারণম্ ।
অশ্মানং চ হিরণ্যং চ শাকং শাল্যোদনং তথা ॥ ১৫ ॥
সমানং চিন্তয়েদ্যোগী যদি চিন্ত্যমপেক্ষতে ।
যোগী চিন্ত্যং মোক্ষং যদি অপেক্ষেত, তর্হি
দেহরক্ষণার্থমেব
ভিক্ষান্ন চিন্তয়েৎ, ন ৎবিন্দ্রিয়প্রীত্যর্থমিত্যর্থঃ;
বস্ত্রং চ
শীতনিবারণার্থং চিন্তয়েৎ, ন অলংকারায়; অশ্মানং
পাষাণং
হিরণ্যং সুবর্ণং চ শাকং শাল্যোদনং চ হেয়োপাদেয়বৈষম্য-
রাহিত্যেন চিন্তয়েদিত্যর্থঃ ॥
কিং চ—
ভূতবস্তুন্যশোচিৎবং পুনর্জন্ম ন বিদ্যতে ॥ ১৬ ॥
ভূতবস্তুনি গতবস্তুনি অশোচিৎবে গতমিতি দুঃখরাহিত্যে
সিদ্ধে, উপলক্ষণমেতৎ, আগামিবস্তুনিরপেক্ষৎবে সিদ্ধে,
বর্তমানবস্তুনি লব্ধে হর্ষরাহিত্যে সিদ্ধে চ পুনর্জন্ম ন
বিদ্যতে ॥
আত্ময়োগমবোচদ্যো ভক্তিয়োগশিরোমণিম্ ।
তং বন্দে পরমানন্দং নন্দনন্দনমীশ্বরম্ ॥
ইতি শ্রীগৌডপাদাচার্যবিরচিতায়াং উত্তরগীতাব্যাখ্যায়াং তৃতীয়োঽধ্যায়ঃ ॥
Also Read:
Uttara Gita Bhashya in Hindi | English | Bengali | Gujarati | Kannada | Malayalam | Oriya | Telugu | Tamil
