Bhartrihari’s Vijnana Shataka Lyrics in Kannada:
ವಿಜ್ಞಾನಶತಕಂ ಪಾಠಕಸ್ಯ ಕ್ರಮ ಭರ್ತೃಹರಿಕೃತ
ವಿಗಲದಮಲದಾನಶ್ರೇಣಿಸೌರಭ್ಯಲೋಭೋ-
ಪಗತಮಧುಪಮಾಲಾವ್ಯಾಕುಲಾಕಾಶದೇಶಃ ।
ಅವತು ಜಗದಶೇಷಂ ಶಶ್ವದುಗ್ರಾತ್ಮದರ್ಯ್ಯೋ ?
ವಿಪುಲಪರಿಘದನ್ತೋದ್ದಂಡಶುಂಡೋ ಗಣೇಶಃ ॥ 1-1 ॥
ಯತ್ಸತ್ತಯಾ ಶುಚಿ ವಿಭಾತಿ ಯದಾತ್ಮಭಾಸಾ
ಪ್ರದ್ಯೋತಿತಂ ಜಗದಶೇಷಮಪಾಸ್ತದೋಷಮ್ ।
ತದ್ಬ್ರಹ್ಮ ನಿಷ್ಕಲಮಸಂಗಮಪಾರಸೌಖ್ಯಂ
ಪ್ರತ್ಯಗ್ಭಜೇ ಪರಮಮಂಗಲಮದ್ವಿತೀಯಮ್ ॥ 2-2 ॥
ಹೇ ಪುತ್ರಾಃ ವ್ರಜತಾಭಯಂ ಯತ ಇತೋ ಗೇಹಂ ಜನನ್ಯಾ ಸಮಂ
ರಾಗದ್ವೇಷಮದಾದಯೋ ಭವತು ವಃ ಪನ್ಥಾಃ ಶಿವೋಽಮಾಯಯಾ ।
ಕಾಶೀಂ ಸಾಮ್ಪ್ರತಮಾಗತೋಽಹಮಹಹ ಕ್ಲೇಶೇನ ಹಾತುಂ ವಪುಃ
ಸರ್ವಾನರ್ಥಗೃಹಂ ಸುಪರ್ವತಟಿನೀವೀಚಿಶ್ರಿಯಾಮಂಡಿತಾಮ್ ॥ 3-101 ॥
ತೀರ್ಥಾವಸ್ಥಾನಜನ್ಯಂ ನ ಭವತಿ ಸುಕೃತಂ ದುಷ್ಕೃತೋನ್ಮೂಲನಂ ವಾ
ಯಸ್ಮಾದಾಭ್ಯಾಂ ವಿಹೀನಃ ಶ್ರುತಿಸಮಧಿಗತಃ ಪ್ರತ್ಯಗಾತ್ಮಾ ಜನಾನಾಮ್ ।
ಸರ್ವೇಷಾಮದ್ವಿತೀಯೋ ನಿರತಿಶಯಸುಖಂ ಯದ್ಯಪಿ ಸ್ವಪ್ರಕಾಶಾ-
ಸ್ತೀರ್ಥೇ ವಿದ್ಯಾಸ್ತಥಾಪಿ ಸ್ಪೃಹಯತಿ ತಪಸೇ ಯತ್ತದಾಶ್ಚರ್ಯಹೇತುಃ ॥ 4-64 ॥
ಪ್ರಜ್ಞಾವನ್ತೋಽಪಿ ಕೇಚಿಚ್ಚಿರಮುಪನಿಷದಾದ್ಯರ್ಥಕಾರಾ ಯತನ್ತೋ
ವ್ಯಾಕುರ್ವನ್ತೋಽಪಿ ಕೇಚಿದ್ದಲಿತಪರಮತಾ ಯದ್ಯಪಿ ಜ್ಞಾತತತ್ತ್ವಾಃ ।
ತೀರ್ಥೇ ತೀರ್ಥಂ ತಥಾಪಿ ಭ್ರಮಣರಸಿಕತಾಂ ನೋ ಜಹತ್ಯಧ್ವಖೇದಾ
ಯತ್ತತ್ಕಷ್ಟಂ ವಿಧತ್ತೇ ಮಮ ಮನಸಿ ಸದಾ ಪಶ್ಯತಸ್ತತ್ರ ಕೃತ್ಯಮ್ ॥ 5-63 ॥
ಯಾವತ್ತೇ ಯಮಕಿಂಕರಾಃ ಕರತಲಕ್ರೂರಾಸಿಪಾಶಾದಯೋ
ವುರ್ದಾನ್ತಾಃ ಸೃಣಿರಾಜದೀರ್ಘಸುನಖಾ ದಂಷ್ಟ್ರಾಕರಾಲಾನನಾಃ ।
ನಾಕರ್ಷನ್ತಿ ನರಾನ್ಧನಾದಿರಹಿತಾನ್ಯತ್ತಾವದಿಷ್ಟೇಚ್ಛಯಾ
ಯುಷ್ಮಾಭಿಃ ಕ್ರಿಯತಾಂ ಧನಸ್ಯ ಕೃಪಣಾಸ್ತ್ಯಾಗಃ ಸುಪರ್ವಾದಿಷು ॥ 6-32 ॥
ಆಢ್ಯಃ ಕಶ್ಚಿದಪಂಡಿತೋಽಪಿ ವಿದುಷಾಂ ಸೇವ್ಯಃ ಸದಾ ಧಾರ್ಮಿಕೋ
ವಿಶ್ವೇಷಾಮುಪಜಾರಕೋ ಮೃಗದೃಶಾಮಾನನ್ದಕನ್ದಾಕರಃ ।
ಕರ್ಪೂರದ್ಯುತಿಕೀರ್ತಿಭೂಷಿತಹರಿದ್ಭೂಮಂಡಲೇ ಗೀಯತೇ
ಶಶ್ವದ್ದ್ವನ್ದಿಜನೈರ್ಮಹೀತನುಭೃತಃ ಪುಣ್ಯೈರ್ನ ಕಸ್ಯೋದಯಃ ॥ 7-82 ॥
ಯಮಾರಾಧ್ಯಾರಾಧ್ಯಂ ತ್ರಿಭುವನಗುರೋರಾಪ್ತವಸತಿಃ
ಧ್ರುವೋ ಜ್ಯೋತಿಶ್ಚಕ್ರೇ ಸುಚಿರಮನವದ್ಯಂ ಶಿಶುರಪಿ ।
ಅವಾಪ ಪ್ರಲ್ಹಾದಃ ಪರಮಪದಮಾರಾಧ್ಯ ಯಮಿತಃ
ಸ ಕಸ್ಯಾಲಂ ಕ್ಲೇಶೋ ಹರತಿ ನ ಹರಿಃ ಕೀರ್ತಿತಗುಅಣಃ ॥ 8-19 ॥
ಕೋ ದೇವೋ ಭುವನೋದಯಾವನಕರೋ ವಿಶ್ವೇಶ್ವರೋ ವಿದ್ಯತೇ
ಯಸ್ಯಾಜ್ಞಾವಶವರ್ತಿನೋ ಜಲಧಿಯೋ ನಾಪ್ಲಾವಯನ್ತಿ ಕ್ಷಿತಿಮ್ ।
ಇತ್ಯಾಮ್ನಾತಮಪೀಶ್ವರಂ ಸುರಶಿರೋರತ್ನಂ ಜಗತ್ಸಾಕ್ಷಿಣಂ
ಸರ್ವಜ್ಞಂ ಧನಯೌವನೋದ್ಘತಮನಾ ನೋ ಮನ್ಯತೇ ಬಾಲಿಶಃ ॥ 9-78 ॥
ಕಸ್ಯೇಮೌ ಪಿತರೌ ಮನೋಭವವತಾ ತಾಪೇನ ಸಂಯೋಜಿತಾ-
ವನ್ಯೋನ್ಯಂ ತನಯಾದಿಕಂ ಜನಯತೋ ಭೂಮ್ಯಾದಿಭೂತಾತ್ಮಭಿಃ ।
ಇತ್ಥಂ ದುಃಸ್ಥಮತಿರ್ಮನೋಭವರತಿರ್ಯೋ ಮನ್ಯತೇ ನಾಸ್ತಿಕಃ
ಶಾನ್ತಿಸ್ತಸ್ಯ ಕಥಂ ಭವೇದ್ಘನವತೋ ದುಷ್ಕರ್ಮಧರ್ಮಶ್ರಮಾತ್ ॥ 10-79 ॥
ದೇಹಾದ್ಯಾತ್ಮಮತಾನುಸಾರಿ ಭವತಾಂ ಯದ್ಯಸ್ತಿ ಮುಗ್ಧಂ ಮತಂ
ವೇದವ್ಯಾಸವಿನಿನ್ದಿತಂ ಕಥಮಹೋ ಪಿತ್ರಾದ್ಯಪತ್ಯೇ ತದಾ ।
ದಾಹಾದಿಃ ಕ್ರಿಯತೇ ವಿಶುದ್ಧಫಲಕೋ ಯುಷ್ಮಾಭಿರುದ್ವೇಜಿತೈಃ
ಶೋಕೇನಾರ್ಥಪರಾಯಣೈರಪಸದೈರ್ದೃಷ್ಟಾರ್ಥಮಾತ್ರಾರ್ಥಿಭಿಃ ॥ 11-33 ॥
ವಿಪಶ್ಚಿದ್ದೇಹಾದೌ ಕ್ವಚಿದಪಿ ಮಮತ್ವಂ ನ ಕುರುತೇ
ಪರಬ್ರಹ್ಮಧ್ಯಾತಾ ಗಗನನಗರಾಕಾರಸದೃಶೇ ।
ನಿರಸ್ತಾಹಂಕಾರಃ ಶ್ರುತಿಜನಿತವಿಶ್ವಾಸಮುಷಿತೋ
ನಿರಾತಂಕೋಽವ್ಯಗ್ರಃ ಪ್ರಕೃತಿಮಧುರಾಲಾಪಚತುರಃ ॥ 12-12 ॥
ನಿತ್ಯಾನಿತ್ಯಪದಾರ್ಥತತ್ತ್ವವಿಷಯೇ ನಿತ್ಯಂ ವಿಚಾರಃ ಸತಾಂ
ಸಂಸರ್ಗೇ ಮಿತಭಾಷಿತಾ ಹಿತಮಿತಾಹಾರೋಽನಹಂಕಾರಿತಾ ।
ಕಾರುಣ್ಯಂ ಕೃಪಣೇ ಜನೇ ಸುಖಿಜನೇ ಪ್ರೀತಿಃ ಸದಾ ಯಸ್ಯ ಸ
ಪ್ರಾಯೇಣೈವ ತಪಃ ಕರೋತಿ ಸುಕೃತೀ ಚೇತೋಮುಕುನ್ದಪ್ರಿಯಃ ॥ 13-27 ॥
ಸಂಸಾರೇಽಪಿ ಪರೋಪಕಾರಕರಣಖ್ಯಾತವ್ರತಾ ಮಾನವಾ
ಯೇ ಸಮ್ಪತ್ತಿಗೃಹಾ ವಿಚಾರಚತುರಾ ವಿಶ್ವೇಶ್ವರಾರಾಧಕಾಃ ।
ತೇಽಪ್ಯೇನಂ ಭವಸಾಗರಂ ಜನಿಮೃತಿಗ್ರಾಹಾಕುಲಂ ದುಸ್ತರಂ
ಗಮ್ಭೀರಂ ಸುತರಾಂ ತರನ್ತಿ ವಿವಿಧವ್ಯಾಧ್ಯಾಧಿವೀಚೀಮಯಮ್ ॥ 14-30 ॥
ಧನ್ಯಾ ಏತೇ ಪುಮಾಂಸೋ ಯದಯಮಹಮಿತಿ ತ್ಯಕ್ತಚೇತೋವಿಕಲ್ಪಾ
ನಿಶ್ಶಂಕಂ ಸಂಚರನ್ತೋ ವಿದಧತಿ ಮಲಿನಂ ಕರ್ಮ ಕಾಮಪ್ರಯುಕ್ತಾಃ ।
ಜಾನನ್ತೋಽಪ್ಯರ್ಥಹೀನಂ ಜಗದಿದಮಖಿಲಂ ಭ್ರಾನ್ತವದ್ದ್ವೈತಜಾಲಂ
ರಾಗದ್ವೇಷಾದಿಮನ್ತೋ ವಯಮಯಮಿತಿ ಹಾ ನ ತ್ಯಜನ್ತೇಽಭಿಮಾನಮ್ ॥ 15-62 ॥
ನ ಚೇತ್ತೇ ಸಾಮರ್ಥ್ಯಂ ಭವನಮರಣಾತಂಕಹರಣೇ
ಮನೋಽನಿರ್ದಿಷ್ಟೇಽಸ್ಮಿನ್ನವಗತಗುಣೇ ಜ್ಞಾತುಮಕಲೇ ।
ತದಾ ಮೇಘಶ್ಯಾಮಂ ಕಮಲದಲದೀರ್ಘಾಕ್ಷಮಮಲಂ
ಭಜಸ್ವ ಶ್ರೀರಂಗಂ ಶರದಮೃತಧಾಮಾಧಿಕಮುಖಮ್ ॥ 16-16 ॥
ಭ್ರಾತಃ ಶಾನ್ತಂ ಪ್ರಶಾನ್ತಂ ಕ್ವಚಿದಪಿ ನಿಪತನ್ಮಿತ್ರ ರೇ ಭೂಧರಾಗ್ರೇ
ಗ್ರೀಷ್ಮೇ ಧ್ಯಾನಾಯ ವಿಷ್ಣೋಃ ಸ್ಪೃಹಯಸಿ ಸುತರಾಂ ನಿರ್ವಿಶಂಕೇ ಗುಹಾಯಾಮ್ ।
ಅನ್ವೇಷ್ಯಾನ್ತಾದೃಗತ್ರ ಕ್ಷಿತಿವಲಯತಲೇ ಸ್ಥಾನಮುನ್ಮೂಲ ಯಾವ-
ತ್ಸಂಸಾರಾನರ್ಥವೃಕ್ಷಂ ಪ್ರಥಿತತಮಮಹಾಮೋಹಮೂಲಂ ವಿಶಾಲಮ್ ॥ 17-49 ॥
ವಿಶ್ವೇಶ್ವರೇ ಭವತಿ ವಿಶ್ವಜನೀನಜನ್ಮ-
ವಿಶ್ವಮ್ಭರೇ ಭಗವತಿ ಪ್ರಥಿತಪ್ರಭಾವೇ ।
ಯೋ ದತ್ತಚಿತ್ತವಿಷಯಃ ಸುಕೃತೀ ಕೃತಾರ್ಥೋ
ಯತ್ರ ಕ್ವಚಿತ್ಪ್ರತಿದಿನಂ ನಿವಸನ್ ಗೃಹಾದೌ ॥ 18-54 ॥
ಧ್ಯಾನವ್ಯಗ್ರಂ ಭವತು ತವ ಹೃತ್ತಿಷ್ಠತೋ ಯತ್ರ ತತ್ರ
ಶ್ರೀಮದ್ವಿಷ್ಣೋಸ್ತ್ರಿಭುವನಪತೇರ್ನಿತ್ಯಮಾನನ್ದಮೂರ್ತೇಃ ।
ಲಕ್ಷ್ಮೀಚೇತಃಕುಮುದವಿಪುಲಾನನ್ದಪೀಯೂಷಧಾಮ್ನೋ
ಮೇಘಚ್ಛಾಯಾಪ್ರತಿಭಟತನೋಃ ಕ್ಲೇಶಸಿನ್ಧುಂ ತಿತೀರ್ಷೋಃ ॥ 19-36 ॥
ಕಾಮಾದಿತ್ರಿಕಮೇವ ಮೂಲಮಖಿಲಕ್ಲೇಶಸ್ಯ ಮಾಯೋದ್ಭವಂ
ಮರ್ತ್ಯಾನಾಮಿತಿ ದೇವಮೌಲಿವಿಲಸದ್ಭಾಜಿಷ್ಣುಚೂಡಾಮಣಿಃ ।
ಶ್ರೀಕೃಷ್ಣೋ ಭಗವಾನವೋಚದಖಿಲಪ್ರಾಣಿಪ್ರಿಯೋ ಮತ್ಪ್ರಭು-
ರ್ಯಸ್ಮಾತ್ತತ್ತ್ರಿಕಮುದ್ಯತೇನ ಮನಸಾ ಹೇಯಂ ಪುಮರ್ಥಾರ್ಥಿನಾ ॥ 20-97 ॥
ಕಾಮಸ್ಯಾಪಿ ನಿದಾನಮಾಹುರಪರೇ ಮಾಯಾಂ ಮಹಾಶಾಸನಾ
ನಿಶ್ಚಿತ್ಕಾಂ ಸಕಲಪ್ರಪಂಚರಚನಾಚಾತುರ್ಯಲೀಲಾವತೀಮ್ ।
ಯತ್ಸಂಗಾದ್ಭಗವಾನಪಿ ಪ್ರಭವತಿ ಪ್ರತ್ಯಙ್ಮಹಾಮೋಹಹಾ
ಶ್ರೀರಂಗೋ ಭುವನೋದಯಾವನಲಯವ್ಯಾಪಾರಚಕ್ರೇಕ್ರಿಯಾಃ ॥ 21-85 ॥
ಯದಧ್ಯಸ್ತಂ ಸರ್ವಂ ಸ್ರಜಿ ಭುಜಗವದ್ಭಾತಿ ಪುರತೋ
ಮಹಾಮಾಯೋದ್ಗೀರ್ಣಂ ಗಗನಪವನಾದ್ಯಂ ತನುಭೃತಾಮ್ ।
ಭವೇತ್ತಸ್ಯಾ ಭ್ರಾನ್ತೇರ್ಮುರರಿಪುರಧಿಷ್ಠಾನಮುದಯೇ
ಯತೋ ನಸ್ಯಾದ್ಭ್ರಾನ್ತಿರ್ನಿರಧಿಕರಣಾ ಕ್ವಾಪಿ ಜಗತಿ ॥ 22-24 ॥
ವಿಯದ್ಭೂತಂ ಭೂತಂ ಯದವನಲಭಂ ? ಚಾಖಿಲಮಿದಂ
ಮಹಾಮಾಯಾಸಂಗಾದ್ಭುಜಗ ಇವ ರಜ್ವಾಂ ಭ್ರಮಕರಮ್ ।
ತದತ್ಯನ್ತಾಲ್ಹಾದಂ ವಿಜರಮಮರಂ ಚಿನ್ತಯ ಮನಃ
ಪರಬ್ರಹ್ಮಾವ್ಯಗ್ರಂ ಹರಿಹರಸುರಾದ್ಯೈರವಗತಮ್ ॥ 23-15 ॥
ಚಿದ್ರತ್ನಮತ್ರ ಪತಿತಂ ವಪುರನ್ಧಕೂಪೇ
ಪುಂಸೋ ಭ್ರಮಾದನುಪಮಂ ಸಹನೀಯತೇಜಃ ।
ಉದ್ಧೃತ್ಯ ಯೋ ಜಗತಿ ತದ್ಭವಿತಾ ಕೃತಾರ್ಥೋ
ಮನ್ಯೇ ಸ ಏವ ಸಮುಪಾಸಿತವಿಶ್ವನಾಥಃ ॥ 24-55 ॥
ಸ್ವಾನ್ತವ್ಯೋಮ್ನಿ ನಿರಸ್ತಕಲ್ಮಷಘನೇ ಸದ್ಬುದ್ಧಿತಾರಾವಲೀ-
ಸನ್ದೀಪ್ತೇ ಸಮುದೇತಿ ಚೇನ್ನಿರುಪಮಾನನ್ದಪ್ರಭಾಮಂಡಲಃ ।
ಬ್ರಹ್ಮಜ್ಞಾನಸುಧಾಕರಃ ಕವಲಿತಾವಿದ್ಯಾನ್ಧಕಾರಸ್ತದಾ
ಕ್ವ ವ್ಯೋಮ ಕ್ವ ಸದಾಗತಿಃ ಕ್ವ ಹುತಭುಕ್ ಕ್ವಾಮ್ಭಾಃ ಕ್ವ ಸರ್ವಂಸಹಾ ॥ 25-53 ॥
ಕ್ವಾಹಂ ಬ್ರಹ್ಮೇತಿ ವಿದ್ಯಾ ನಿರತಿಶಯಸುಖಂ ದರ್ಶಯನ್ತೀ ವಿಶುದ್ಧಂ
ಕೂಟಸ್ಥಂ ಸ್ವಪ್ರಕಾಶಂ ಪ್ರಕೃತಿ ಸುಚರಿತಾ ಖಂಡಯನ್ತೀ ಚ ಮಾಯಾಮ್ ।
ಕ್ವಾವಿದ್ಯಾಹಂ ಮಮೇತಿ ಸ್ಥಗಿತಪರಸುಖಾ ಚಿತ್ತಭಿತ್ತೌ ಲಿಖನ್ತೀ
ಸರ್ವಾನರ್ಥಾನನರ್ಥಾನ್ ವಿಷಯಗಿರಿಭುವಾ ವಾಸನಾಗೈರಿಕೇಣ ॥ 26-91 ॥
ಚಿದೇವ ಧ್ಯಾತವ್ಯಾ ಸತತಮನವದ್ಯಾ ಸುಖತನು-
ರ್ನಿರಾಧಾರಾ ನಿತ್ಯಾ ನಿರವಧಿರವಿದ್ಯಾದಿರಹಿತಾ ।
ಅನಾಸ್ಥಾಮಾಸ್ಥಾಯ ಭ್ರಮವಪುಷಿ ಸರ್ವತ್ರ ವಿಷಯೇ
ಸದಾ ಶೇಷವ್ಯಾಖ್ಯಾನಿಪುಣಮತಿಭಿಃ ಖ್ಯಾತಯತಿಭಿಃ ॥ 27-75 ॥
ನಿಷ್ಕಾಮಾ ಮುನಯಃ ಪರಾವರದೃಶೋ ನಿರ್ಧೂತಪಾಪ್ಮೋದಯಾ
ನಿಃಸಂಗಾ ನಿರಹಂಕೃತಾ ನಿರುಪಮಾನನ್ದಂ ಪರಂ ಲೇಭಿರೇ ।
ಯದ್ಗತ್ವಾ ನ ಲುಠನ್ತಿ ಮಾತೃಜಠರೇ ದುಃಖಾಕರೇ ಮಾನವಾ
ದುರ್ಗನ್ಧೇ ಪುನರೇತ್ಯಕಾಮಮಕರೇ ಸಂಸಾರಪಾಥೋನಿಧೌ ॥ 28-84 ॥
ಸ್ವಾನ್ತವ್ಯೋಮ್ನಿ ನಿರಸ್ತಕಲ್ಮಷಘನೇ ಸದ್ಬುದ್ಧಿತಾರಾವಲೀ-
ಸನ್ದೀಪ್ತೇ ಸಮುದೇತಿ ಚೇನ್ನಿರುಪಮಾನನ್ದಪ್ರಭಾಮಂಡಲಃ ।
ಬ್ರಹ್ಮಜ್ಞಾನಸುಧಾಕರಃ ಕವಲಿತಾವಿದ್ಯಾನ್ಧಕಾರಸ್ತದಾ
ಕ್ವ ವ್ಯೋಮ ಕ್ವ ಸದಾಗತಿಃ ಕ್ವ ಹುತಭುಕ್ ಕ್ವಾಮ್ಭಾಃ ಕ್ವ ಸರ್ವಂಸಹಾ ॥ 53 ॥
ಬ್ರಹ್ಮಾಮೃತಂ ಭಜ ಸದಾ ಸಹಜಪ್ರಕಾಶಂ
ಸರ್ವಾನ್ತರಂ ನಿರವಧಿ ಪ್ರಥಿತಪ್ರಭಾವಮ್ ।
ಯದ್ಯಸ್ತಿ ತೇ ಜಿಗಮಿಷಾ ಸಹಸಾ ಭವಾಬ್ಧೇಃ
ಪಾರೇ ಪರೇ ಪರಮಶರ್ಮಣಿ ನಿಷ್ಕಲಂಕೇ ॥ 29-4 ॥
ಚಿದೇವ ಧ್ಯಾತವ್ಯಾ ಸತತಮನವದ್ಯಾ ಸುಖತನು-
ರ್ನಿರಾಧಾರಾ ನಿತ್ಯಾ ನಿರವಧಿರವಿದ್ಯಾದಿರಹಿತಾ ।
ಅನಾಸ್ಥಾಮಾಸ್ಥಾಯ ಭ್ರಮವಪುಷಿ ಸರ್ವತ್ರ ವಿಷಯೇ
ಸದಾ ಶೇಷವ್ಯಾಖ್ಯಾನಿಪುಣಮತಿಭಿಃ ಖ್ಯಾತಯತಿಭಿಃ ॥ 30-25 ॥
ಯತ್ಸಾಕ್ಷಾದಭಿಧಾತುಮಕ್ಷಮತಯಾ ಶಬ್ದಾದ್ಯನಾಲಿಂಗಿತಂ
ಕೂಟಸ್ಥಂ ಪ್ರತಿಪಾದಯನ್ತಿ ವಿಲಯದ್ವಾರಾ ಪ್ರಪಂಚಸ್ರಜಃ ।
ಮೋಕ್ಷಾಯ ಶ್ರುತಯೋ ನಿರಸ್ತವಿಧಯೋ ಧ್ಯಾನಸ್ಯ ಚೋಚ್ಛಿತ್ತಯೇ
ತತ್ರಾದ್ವೈತವನೇ ಸದಾ ವಿಚರತಾಚ್ಚೇತಃ ಕುರಂಗಃ ಸತಾಮ್ ॥ 31-102 ॥
ತುಲ್ಯಾರ್ಥೇನ ತ್ವಮೈಕ್ಯಂ ತ್ರಿಭುವನಜನಕಸ್ತತ್ಪದಾರ್ಥಃಪ್ರಪದ್ಯ
ಪ್ರತ್ಯಕ್ಷಂ ಮೋಹಜನ್ಮ ತ್ಯಜತಿ ಭಗವತಿ ತ್ವಂಪದಾರ್ಥೋಽಪಿ ಜೀವಃ ।
ಶ್ರುತ್ಯಾಚಾರ್ಯಪ್ರಸಾದಾನ್ನಿರುಪಮವಿಲಸದ್ಬ್ರಹ್ಮವಿದ್ಯೈಸ್ತದೈಕ್ಯಂ
ಪ್ರಾಪ್ಯಾನನ್ದಪ್ರತಿಷ್ಠೋ ಭವತಿ ವಿಗಲಿತಾನಾದ್ಯವಿದ್ಯೋಪರೀಹಃ ॥ 32-86 ॥
ಅಹಂ ಬ್ರಹ್ಮಾಸ್ಮೀತಿ ಸ್ಫುರದಮಲಬೋಧೋ ಯದಿ ಭವೇ-
ತ್ಪುಮಾನ್ಪುಣ್ಯೋದ್ರೇಕಾದುಪಚಿತಪರಾನರ್ಥವಿರತಿಃ ।
ತದಾನೀಂ ಕ್ವಾವಿದ್ಯಾ ಭೃಶಮಸಹಮಾನೌಪನಿಷದಂ
ವಿಚಾರಂ ಸಂಸಾರಃ ಕ್ವ ಚ ವಿವಿಧದುಃಖೈಕವಸತಿಃ ॥ 33-92 ॥
ಹಿತ್ವಾ ವಿಶ್ವಾದ್ಯವಸ್ಥಾಃ ಪ್ರಕೃತಿವಿಲಸಿತಾ ಜಾಗ್ರದಾದ್ಯೈರ್ವಿಶೇಷೈಃ
ಸಾರ್ಧಂ ಚೈತನ್ಯಧಾತೌ ಪ್ರಕೃತಿಮಪಿ ಸಮಂ ಕಾರ್ಯಜಾತೈರಶೇಷೈಃ ।
ಜ್ಞಾನಾನನ್ದಂ ತುರೀಯಂ ವಿಗಲಿತಗುಣಕಂ ದೇಶಕಾಲಾದ್ಯತೀತಂ
ಸ್ವಾತ್ಮಾನಂ ವೀತನಿದ್ರಃ ಸತತಮಧಿಕೃತಶ್ಚಿನ್ತಯೇದದ್ವಿತೀಯಮ್ ॥ 34-88 ॥
ಸಂನ್ಯಾಸೋ ವಿಹಿತಸ್ಯ ಕೇಶವಪದದ್ವನ್ದ್ವೇ ವ್ಯಧಾಯಿ ಶ್ರುತಾ
ವೇದಾನ್ತಾ ನಿರವದ್ಯನಿಷ್ಕಲಪರಾನನ್ದಾಃ ಸುನಿಷ್ಠಾಶ್ಚಿರಮ್ ।
ಸಂಸಾರೇ ವಧಬನ್ಧದುಃಖಬಹುಲೇ ಮಾಯಾವಿಲಾಸೇಽವ್ಯಯಂ
ಬ್ರಹ್ಮಾಸ್ಮೀತಿ ವಿಹಾಯ ನಾನ್ಯದಧುನಾ ಕರ್ತವ್ಯಮಾಸ್ತೇ ಕ್ವಚಿತ್ ॥ 35-87 ॥
ಅಗ್ರೇಪಶ್ಚಾದಧಸ್ತಾದುಪರಿ ಚ ಪರಿತೋ ದಿಕ್ಷು ಧಾನ್ಯಾಸ್ವನಾದಿಃ
ಕೂಟಸ್ಥಾ ಸಂವಿದೇಕಾ ಸಕಲತನುಭೃತಾಮನ್ತರಾತ್ಮಾನಿಯನ್ತ್ರೀ ।
ಯಸ್ಯಾನನ್ದಸ್ವಭಾವಾ ಸ್ಫುರತಿ ಶುಭಧಿಯಃ ಪ್ರತ್ಯಹಂ ನಿಷ್ಪ್ರಪಂಚಾ
ಜೀವನ್ಮುಕ್ತಃ ಸ ಲೋಕೇ ಜಯತಿ ಗತಮಹಾಮೋಹವಿಶ್ವಪ್ರಪಂಚಃ ॥ 36-90 ॥
ತೇ ಧನ್ಯಾ ಭುವನೇ ಸುಶಿಕ್ಷಿತಪರಬ್ರಹ್ಮಾತ್ಮವಿದ್ಯಾಜನಾ
ಲೋಕಾನಾಮನುರಂಜಕಾ ಹರಿಕಥಾಪೀಯೂಷಪಾನಪ್ರಿಯಾಃ ।
ಯೇಷಾಂ ನಾಕತರಂಗಿಣೀತಟಶಿಲಾಬದ್ಧಾಸನಾನಾಂ ಸತಾಂ
ಪ್ರಾಣಾ ಯನ್ತಿ ಲಯಂ ಸುಖೇನ ಮನಸಾ ಶ್ರೀರಂಗಚಿನ್ತಾಭೃತಾಮ್ ॥ 37-100 ॥
ಶಿವ ಶಿವ ಮಹಾಭ್ರಾನ್ತಿಸ್ಥಾನಂ ಸತಾಂ ವಿದುಷಾಮಪಿ
ಪ್ರಕೃತಿಚಪಲಾ ಧಾತ್ರಾ ಸೃಷ್ಟಾಃ ಸ್ತ್ರಿಯೋ ಹರಿಣೀದೃಶಃ ।
ವಿಜಹತಿ ಧನಂ ಪ್ರಾಣೈಃ ಸಾಕಂ ಯತಸ್ತದವಾಪ್ತಯೇ
ಜಗತಿ ಮನುಜಾ ರಾಗಾಕೃಷ್ಟಾಸ್ತದೇಕಪರಾಯಣಾಃ ॥ 38-58 ॥
ಹರತಿ ವಪುಷಃ ಕಾನ್ತಿಂ ಪುಂಸಃ ಕರೋತಿ ಬಲಕ್ಷಿತಿಂ
ಜನಯತಿ ಭೃಶಂ ಭ್ರಾನ್ತಿಂ ನಾರೀ ಸುಖಾಯ ನಿಷೇವಿತಾ ।
ವಿರತಿವಿರಸಾ ಭುಕ್ತಾ ಯಸ್ಮಾತ್ತತೋ ನ ವಿವೇಕಿಭಿ-
ರ್ವಿಷಯವಿರಸೈಃ ಸೇವ್ಯಾ ಮಾಯಾಸಮಾಶ್ರಿತವಿಗ್ರಹಾ ॥ 39-59 ॥
ಕಮಲವದನಾ ಪೀನೋತ್ತುಂಗಂ ಘಟಾಕೃತಿ ಬಿಭ್ರತೀ
ಸ್ತನಯುಗಮಿಯಂ ತನ್ವೀ ಶ್ಯಾಮಾ ವಿಶಾಲದೃಗಂಚಲಾ ।
ವಿಶದದಶನಾ ಮಧ್ಯಕ್ಷಾಮಾ ವೃಥೇತಿ ಜನಾಃ ಶ್ರಮಂ
ವಿದಧತಿ ಮುಧಾರಾಗಾದುಚ್ಚೈರನೀದೃಶವರ್ಣನೇ ॥ 40-60 ॥
ಯದ್ಯೇತಾ ಮದನೇಷವೋ ಮೃಗದೃಶಶ್ಚೇತಃಕುರಂಗಾರಯೋ
ಧೀರಾಣಾಮಪಿ ನೋ ಭವೇಯುರಬಲಾಃ ಸಂಸಾರಮಾಯಾಪುರೇ ।
ಕೋ ನಾಮಾಮೃತಸಾಗರೇ ನ ರಮತೇ ಧೀರಸ್ತದಾ ನಿರ್ಮಲೇ
ಪೂರ್ಣಾನನ್ದಮಹೋರ್ಮಿರಮ್ಯನಿಕರೇ ರಾಗಾದಿನಕ್ರೋಜ್ಝಿತೇ ॥ 41-56 ॥
ಬಾಲೇಯಂ ಬಾಲಭಾವಂ ತ್ಯಜತಿ ನ ಸುದತಿ ಯತ್ಕಟಾಕ್ಷೈರ್ವಿಶಾಲೈ-
ರಸ್ಮಾನ್ವಿಭ್ರಾಮಯನ್ತೀ ಲಸದಧರದಲಾಕ್ಷಿಪ್ತಚೂತಪ್ರವಾಲಾ ।
ನೇತುಂ ವಾಂಛತ್ಯಕಾಮಾನ್ ಸ್ವಸದನಮಧುನಾ ಕ್ರೀಡಿತುಂ ದತ್ತಚಿತ್ತಾನ್
ಪುಷ್ಯನ್ನೀಲೋತ್ಪಲೋತ್ಪಲಾಭೇ ಮುರಜಿತಿ ಕಮಲಾವಲ್ಲಭೇ ಗೋಪಲೀಲೇ ॥ 42-57 ॥
ಜನಯತಿ ಸುತಂ ಕಂಚಿನ್ನಾರೀ ಸತೀ ಕುಲಭೂಷಣಂ
ನಿರುಪಮಗುಣೈಃ ಪುಣ್ಯಾತ್ಮಾನಂ ಜಗತ್ಪರಿಪಾಲಕಮ್ ।
ಕಥಮಪಿ ನ ಸಾಽನಿನ್ದ್ಯಾ ವನ್ದ್ಯಾ ಭವೇನ್ಮಹತಾಂ ಯತಃ ।
ಸುರಸರಿದಿವ ಖ್ಯಾತಾ ಲೋಕೇ ಪವಿತ್ರಿತಭೂತಲಾ ॥ 43-61 ॥
ಕಿಂ ಸ್ಥಾನಸ್ಯ ನಿರೀಕ್ಷಣೇನ ಮುರಜಿದ್ಧ್ಯಾನಾಯ ಭೂಮಂಡಲೇ
ಭ್ರಾತಶ್ಚೇದ್ವಿರತಿರ್ಭವೇದ್ದೃಢತರಾ ಯಸ್ಯ ಸ್ರಗಾದೌ ಸದಾ ।
ತಸ್ಯೈಷಾ ಯದಿ ನಾಸ್ತಿ ಹನ್ತ ಸುತರಾಂ ವ್ಯರ್ಥಂ ತದಾನ್ವೇಷಣಂ
ಸ್ಥಾನಸ್ಯಾನಧಿಕಾರಿಣಃ ಸುರಧುನೀತೀರಾದ್ರಿಕುಂಜಾದಿಷು ॥ 44-52 ॥
ಜಾನನ್ನೇವ ಕರೋತಿ ಕರ್ಮ ಬಹುಲಂ ದುಃಖಾತ್ಮಕಂ ಪ್ರೇರಿತಃ
ಕೇನಾಪ್ಯಪ್ರತಿವಾಚ್ಯಶಕ್ತಿಮಹಿನಾ ದೇವೇನ ಮುಕ್ತಾತ್ಮನಾ ।
ಸರ್ವಜ್ಞೇನ ಹೃದಿಸ್ಥಿತೇನ ತನುಮತ್ಸಂಸಾರರಂಗಾಂಗಣೇ
ಮಾದ್ಯದ್ಬುದ್ಧಿನಟೀವಿನೋದನಿಪುಣೋ ನೃತ್ಯನ್ನಂಗಪ್ರಿಯಃ ॥ 45-77 ॥
ಕರ್ತವ್ಯಂ ನ ಕರೋತಿ ಬನ್ಧುಭಿರಪಿ ಸ್ನೇಹಾತ್ಮಭಿರ್ವೋದಿತಃ
ಕಾಮಿತ್ವಾದಭಿಮನ್ಯತೇ ಹಿತಮತಂ ಧೀರೋಪ್ಯಭೀಷ್ಟಂ ನರಃ ।
ನಿಷ್ಕಾಮಸ್ಯ ನ ವಿಕ್ರಿಯಾ ತನುಭೃತೋ ಲೋಕೇ ಕ್ವಚಿದ್ದೃಶ್ಯತೇ
ಯತ್ತಸ್ಮಾದಯಮೇವ ಮೂಲಮಖಿಲಾನರ್ಥಸ್ಯ ನಿರ್ಧಾರಿತಮ್ ॥ 46-83 ॥
ಯದಾ ದೇವಾದೀನಾಪಿ ಭವತಿ ಜನ್ಮಾದಿ ನಿಯತಂ
ಮಹಾಹರ್ಮ್ಯಸ್ಥಾನೇ ಲಲಿತಲಲನಾಲೋಲಮನಸಾಮ್ ।
ತದಾ ಕಾಮಾರ್ತಾನಾಂ ಸುಗತಿರಿಹ ಸಂಸಾರಜಲಧೌ
ನಿಮಗ್ನಾನಾಮುಚ್ಚೈ ರತಿವಿಷಯಶೋಕಾದಿಮಕರೇ ॥47-10 ॥
ನ ಜಾನೀಷೇ ಮೂರ್ಖ ಕ್ವಚಿದಪಿ ಹಿತಂ ಲೋಕಮಹಿತಂ
ಭ್ರಮದ್ಭೋಗಾಕಾಂಕ್ಷಾಕಲುಷಿತತಯಾ ಮೋಹಬಹುಲೇ ।
ಜಗತ್ಯತ್ರಾರಣ್ಯೇ ಪ್ರತಿಪದಮನೇಕಾಪದಿ ಸದಾ
ಹರಿಧ್ಯಾನೇ ವ್ಯಗ್ರಂ ಭವ ಸಕಲತಾಪೈಕಕದನೇ ॥ 48-14 ॥
ಸದ್ದ್ವಂಶೋ ಗುಣವಾನಹಂ ಸುಚರಿತಃ ಶ್ಲಾಘ್ಯಾಂ ಕರೋತ್ಯಾತ್ಮನೋ
ನೀಚಾನಾಂ ವಿದಧಾತಿ ಚ ಪ್ರತಿದಿನಂ ಸೇವಾಂ ಜನಾನಾಂ ದ್ವಿಜಃ ।
ಯೋಷಿತ್ತಸ್ಯ ಜಿಘೃಕ್ಷಯಾ ಸ ಚ ಕುತೋ ನೋ ಲಜ್ಜತೇ ಸಜ್ಜನಾ-
ಲ್ಲೋಭಾನ್ಧಸ್ಯ ನರಸ್ಯ ನೋ ಖಲು ಸತಾಂ ದೃಷ್ಟಂ ಹಿ ಲಜ್ಜಾಭಯಮ್ ॥ 49-96 ॥
ನಾನ್ನಂ ಜೀರ್ಯತಿ ಕಿಂಚಿದೌಷಧಬಲಂ ನಾಲಂ ಸ್ವಕಾರ್ಯೋದಯೇ
ಶಕ್ತಿಶ್ಚಂಕ್ರಮಣೇ ನ ಹನ್ತ ಜರಯಾ ಜೀರ್ಣೀಕೃತಾಯಾಂ ತನೌ ।
ಅಸ್ಮಾಕಂ ತ್ವಧುನಾ ನ ಲೋಚನಬಲಂ ಪುತ್ರೇತಿ ಚಿನ್ತಾಕುಲೋ
ಗ್ಲಾಯತ್ಯರ್ಥಪರಾಯಣೋಽತಿಕೃಪಣೋ ಮಿಥ್ಯಾಭಿಮಾನೋ ಗೃಹೀ ॥ 50-94 ॥
ಅದ್ಯಶ್ವೋ ವಾ ಮರಣಮಶಿವಪ್ರಾಣಿನಾಂ ಕಾಲಪಾಶೈ-
ರಾಕೃಷ್ಟಾನಾಂ ಜಗತಿ ಭವತೋ ನಾನ್ಯಥಾತ್ವಂ ಕದಾಚಿತ್ ।
ಯದ್ಯಪ್ಯೇವಂ ನ ಖಲು ಕುರುತೇ ಹಾ ತಥಾಪ್ಯರ್ಥಲೋಭಂ
ಹಿತ್ವಾ ಪ್ರಾಣೀ ಹಿತಮವಹಿತೋ ದೇವಲೋಕಾನುಕೂಲಮ್ ॥ 51-34 ॥
ರೇ ರೇ ಚಿತ್ತ ಮದಾನ್ಧ ಮೋಹಬಧಿರಾ ಮಿಥ್ಯಾಭಿಮಾನೋದ್ಧತಾ
ವ್ಯರ್ಥೇಯಂ ಭವತಾಂ ಧನಾವನರತಿಃ ಸಂಸಾರಕಾರಾಗೃಹೇ ।
ಬದ್ಧಾನಾಂ ನಿಗಡೇನ ಗಾತ್ರಮಮತಾಸಂಜ್ಞೇನ ಯತ್ಕರ್ಹಿಚಿ-
ದ್ದೇವಬ್ರಾಹ್ಮಣಭಿಕ್ಷುಕಾದಿಷು ಧನಂ ಸ್ವಪ್ನೇಽಪಿ ನ ವ್ಯೇತಿ ವಃ ॥ 52-31 ॥
ನಾಭ್ಯಸ್ತೋ ಧಾತುವಾದೋ ನ ಚ ಯುವತೀವಶೀಕಾರಕಃ ಕೋಪ್ಯುಪಾಯೋ
ನೋ ವಾ ಪೌರಾಣಿಕತ್ವಂ ನ ಚ ಸರಸಕವಿತಾ ನಾಪಿ ನೀತಿರ್ನ ಗೀತಿಃ ।
ತಸ್ಮಾದರ್ಥಾರ್ಥಿನಾಂ ಯಾ ನ ಭವತಿ ಭವತಶ್ಚಾತುರೀ ಕ್ವಾಪಿ ವಿದ್ವನ್
ಜ್ಞಾತ್ವೇತ್ಥಂ ಚಕ್ರಪಾಣೇರನುಸರ ಚರಣಾಮ್ಭೋಜಯುಗ್ಮಂ ವಿಭೂತ್ಯೈ ॥ 53-47 ॥
ಅರ್ಥೇಭ್ಯೋಽನರ್ಥಜಾತಂ ಭವತಿ ತನುಭೃತಾಂ ಯೌವನಾದಿಷ್ವವಶ್ಯಂ
ಪಿತ್ರಾದ್ಯೈರರ್ಜಿತೇಭ್ಯೋಽನುಪಕೃತಿಮತಿಭಿಃ ಸ್ವಾತ್ಮನೈವಾರ್ಜಿತೇಭ್ಯಃ ।
ಯಸ್ಮಾದ್ದುಃಖಾಕರೇಭ್ಯಸ್ತಮನುಸರ ಸದಾ ಭದ್ರ ಲಕ್ಷ್ಮೀವಿಲಾಸಂ
ಗೋಪಾಲಂ ಗೋಪಕಾನ್ತಾಕುಚಕಲಶತಟೀಕುಂಕುಮಾಸಂಗರಂಗಮ್ ॥ 54-48 ॥
ಮಾದ್ಯತ್ತಾರ್ಕಿಕತಾನ್ತ್ರಿಕದ್ವಿಪಘಟಾಸಂಘಟ್ಟಪಂಚಾನನ-
ಸ್ತದ್ವದೃಪ್ತಕದನ್ತವೈದ್ಯಕಕಲಾಕಲ್ಪೋಽಪಿ ನಿಷ್ಕಿಂಚನಃ ।
ಯತ್ರ ಕ್ವಾಪಿ ವಿನಾಶಯಾ ಕೃಶತನುರ್ಭೂಪಾಲಸೇವಾಪರೋ
ಜೀವನ್ನೇವ ಮೃತಾಯತೇ ಕಿಮಪರಂ ಸಂಸಾರದುಃಸಾಗರೇ ॥ 55-81 ॥
ಜಗಾಮ ವ್ಯರ್ಥಂ ಮೇ ಬಹುದಿನಮಥಾರ್ಥಾರ್ಥಿತತಯಾ
ಕುಭೂಮೀಪಾಲಾನಾಂ ನಿಕಟಗತಿದೋಷಾಕುಲಮತೇಃ ।
ಹರಿಧ್ಯಾನವ್ಯಗ್ರಂ ಭವಿತುಮಧುನಾ ವಾಂಛತಿ ಮನಃ
ಕ್ವಚಿದ್ಗಂಗಾತೀರೇ ತರುಣತುಲಸೀಸೌರಭಭರೇ ॥ 56-21 ॥
ಅನ್ನಾಶಾಯ ಸದಾ ರಟನ್ತಿ ಪೃಥುಕಾಃಕ್ಷುತ್ಕ್ಷಾಮಕಂಠಾಸ್ತ್ರಿಯೋ
ವಾಸೋಭೀ ರಹಿತಾ ಬಹಿರ್ವ್ಯವಹೃತೌ ನಿರ್ಯಾನ್ತಿ ನೋ ಲಜ್ಜಯಾ ।
ಗೇಹಾದಂಗಣಮಾರ್ಜನೇಽಪಿ ಗೃಹಿಣೋ ಯಸ್ಯೇತಿ ದುರ್ಜೀವಿತಂ
ಯದ್ಯಪ್ಯಸ್ತಿ ತಥಾಪಿ ತಸ್ಯ ವಿರತಿರ್ನೋದೇತಿ ಚಿತ್ರಂ ಗೃಹೇ ॥ 59-95 ॥
ಸನ್ತ್ಯರ್ಥಾ ಮಮ ಸಂಚಿತಾ ಬಹುಧಾಃ ಪಿತ್ರಾದಿಭಿಃ ಸಾಮ್ಪ್ರತಂ
ವಾಣಿಜ್ಯೈಃ ಕೃಷಿಭಿಃ ಕಲಾಭಿರಪಿ ತಾನ್ವಿಸ್ತಾರಯಿಷ್ಯಾಮಿ ವಃ ।
ಹೇ ಪುತ್ರಾ ಇತಿ ಭಾವನ್ನನುದಿನಂ ಸಂಸಾರಪಾಶಾವಲೀಂ
ಛೇತ್ತಾಯಂ ತು ಕಥಂ ಮನೋರಥಮಯೀಂ ಜೀವೋ ನಿರಾಲಮ್ಬನಃ ॥ 60-76 ॥
ಮಾತಾ ಮೃತಾ ಜನಯಿತಾಪಿ ಜಗಾಮ ಶೀಘ್ರಂ
ಲೋಕಾನ್ತರಂ ತವ ಕಲತ್ರಸುತಾದಯೋಽಪಿ ।
ಭ್ರಾತಸ್ತಥಾಪಿ ನ ಜಹಾಸಿ ಮೃಷಾಭಿಮಾನಂ
ದುಃಖಾತ್ಮಕೇ ವಪುಷಿ ಮೂತ್ರಕುದರ್ಪಕೂಪೇ ॥ 61-3 ॥
ಕಾಮವ್ಯಾಘ್ರೇ ಕುಮತಿಫಣಿನಿ ಸ್ವಾನ್ತದುರ್ವಾರನೀಡೇ
ಮಾಯಾಸಿಂಹೀವಿಹರಣಮಹೀಲೋಭಭಲ್ಲೂಕಭೀಮೇ ।
ಜನ್ಮಾರಣ್ಯೇ ನ ಭವತಿ ರತಿಃ ಸಜ್ಜನಾನಾಂ ಕದಾಚಿ-
ತ್ತತ್ತ್ವಜ್ಞಾನಾಂ ವಿಷಯತುಷಿತಾಕಂಟಕಾಕೀರ್ಣಪಾರ್ಶ್ವೇ ॥ 62-37 ॥
ಸ್ವಾಧೀನೇ ನಿಕಟಸ್ಥಿತೇಽಪಿ ವಿಮಲಜ್ಞಾನಾಮೃತೇ ಮಾನಸೇ
ವಿಖ್ಯಾತೇ ಮುನಿಸೇವಿತೇಽಪಿ ಕುಧಿಯೋ ನ ಸ್ನಾನ್ತಿ ತೀರ್ಥೇ ದ್ವಿಜಾಃ ।
ಯತ್ತತ್ಕಷ್ಟಮಹೋ ವಿವೇಕರಹಿತಾಸ್ತೀರ್ಥಾರ್ಥಿನೋ ದುಃಖಿತಾ
ಯತ್ರ ಕ್ವಾಪ್ಯಟವೀಮಟನ್ತಿ ಜಲಧೌ ಮಜ್ಜನ್ತಿ ದುಃಖಾಕರೇ ॥ 63-46 ॥
ತ್ವತ್ಸಾಕ್ಷಿಕಂ ಸಕಲಮೇತದವೋಚಮಿತ್ಥಂ
ಭ್ರಾತರ್ವಿಚಾರ್ಯ ಭವತಾ ಕರಣೀಯಮಿಷ್ಟಮ್ ।
ಯೇನೇದೃಶಂ ನ ಭವಿತಾ ಭವತೋಽಪಿ ಕಷ್ಟಂ
ಶೋಕಾಕುಲಸ್ಯ ಭವಸಾಗರಮಗ್ನಮೂರ್ತೇಃ ॥ 64-7 ॥
ಯತ್ಪ್ರೀತ್ಯರ್ಥಮನೇಕಧಾಮನಿ ಮಯಾ ಕಷ್ಟೇನ ವಸ್ತು ಪ್ರಿಯಂ
ಸ್ವಸ್ಯಾಶಾಕವಲೀಕೃತೇನ ವಿಕಲೀಭಾವಂ ದಧಾನೇನ ಮೇ ।
ತತ್ಸರ್ವಂ ವಿಲಯಂ ನಿನಾಯ ಭಗವಾನ್ ಯೋ ಲೀಲಯಾ ನಿರ್ಜರೋ
ಮಾಂ ಹಿತ್ವಾ ಜರಯಾಕುಲೀಕೃತತನುಂ ಕಾಲಾಯ ತಸ್ಮೈ ನಮಃ ॥ 65-98 ॥
ಆಯುರ್ವೇದವಿದಾಂ ರಸಾಶನವತಾಂ ಪಥ್ಯಾಶಿನಾಂ ಯತ್ನತೋ
ವೈದ್ಯಾನಾಮಪಿ ರೋಗಜನ್ಮ ವಪುಷೋ ಹ್ಯನ್ತರ್ಯತೋ ದೃಶ್ಯತೇ ।
ದುಶ್ಚಕ್ಷೋತ್ಕವಲೀಕೃತತ್ರಿಭುವನೋ ಲೀಲಾವಿಹಾರಸ್ಥಿತಃ
ಸರ್ವೋಪಾಯವಿನಾಶನೈಕಚತುರಃ ಕಾಲಾಯ ತಸ್ಮೈ ನಮಃ ॥ 66-99 ॥
ದೃಷ್ಟಪ್ರಾಯಂ ವಿಕಲಮಖಿಲಂ ಕಾಲಸರ್ಪೇಣ ವಿಶ್ವಂ
ಕ್ರೂರೇಣೇದಂ ಶಿವ ಶಿವ ಮುನೇ ಬ್ರೂಹಿ ರಕ್ಷಾಪ್ರಕಾರಮ್ ।
ಅಸ್ಯಾಸ್ತೇಕಃ ಶೃಣು ಮುರರಿಪೋರ್ಧ್ಯಾನಪೀಯೂಷಪಾನಂ
ತ್ಯಕ್ತ್ವಾ ನಾನ್ಯತ್ಕಿಮಪಿ ಭುವನೇ ದೃಶ್ಯತೇ ಶಾಸ್ತ್ರದೃಷ್ಟ್ಯಾ ॥ 67-35 ॥
ಕಶ್ಚಿತ್ಕ್ರನ್ದತಿ ಕಾಲಕರ್ಕಶಕರಾಕೃಷ್ಟಂ ವಿನಷ್ಟಂ ಹಠಾ-
ದುತ್ಕೃಷ್ಟಂ ತನಯಂ ವಿಲೋಕ್ಯ ಪುರತಃ ಪುತ್ರೇತಿ ಹಾ ಹಾ ಕ್ವಚಿತ್ ।
ಕಶ್ಚಿನ್ನರ್ತಕನರ್ತಕೀಪರಿವೃತೋ ನೃತ್ಯತ್ಯಹೋ ಕುತ್ರಚಿ-
ಚ್ಚಿತ್ರಂ ಸಂಸೃತಿಪದ್ಧತಿಃ ಪ್ರಥಯತಿ ಪ್ರೀತಿಂಚ ಕಷ್ಟಂಚ ನಃ ॥ 68-93 ॥
ಸಾ ರೋಗಿಣೀ ಯದಿ ಭವೇದಥವಾ ವಿವರ್ಣಾ
ಬಾಲಾಪ್ರಿಯಾಶಶಿಮುಖೀ ರಸಿಕಸ್ಯ ಪುಂಸಃ ।
ಶಲ್ಯಾಯತೇ ಹೃದಿ ತಥಾ ಮರಣಂ ಕೃಶಾಂಗ್ಯಾ-
ಯತ್ತಸ್ಯ ಸಾ ವಿಗತನಿದ್ರಸರೋರುಹಾಕ್ಷೀ ॥ 69-6 ॥
ನಿಷ್ಕಂಟಕೇಽಪಿ ನ ಸುಖಂ ವಸುಧಾಧಿಪತ್ಯೇ
ಕಸ್ಯಾಪಿ ರಾಜತಿಲಕಸ್ಯ ಯದೇಷ ದೇವಃ ।
ವಿಶ್ವೇಶ್ವರೋ ಭುಜಗರಾಜವಿಭೂತಿಭೂಷೋ
ಹಿತ್ವಾ ತಪಸ್ಯತಿ ಚಿರಂ ಸಕಲಾ ವಿಭೂತೀಃ ॥ 70-8 ॥
ಕದಾಚಿತ್ಕಷ್ಟೇನ ದ್ರವಿಣಮಧಮಾರಾಧನವಶಾ-
ನ್ಮಯಾ ಲಬ್ಧಂ ಸ್ತೋಕಂ ನಿಹಿತಮವನೌ ತಸ್ಕರಭಯಾತ್ ।
ತತೋ ನಿತ್ಯೇ ಕಶ್ಚಿತ್ಕ್ವಚಿದಪಿ ತದಾಖುರ್ಬಿಲಗೃಹೇಽ-
ನಯಲ್ಲಬ್ಧೋಽಪ್ಯರ್ಥೋ ನ ಭವತಿ ಯದಾ ಕರ್ಮ ವಿಷಮಮ್ ॥ 71-20 ॥
ಸ್ವಯಂ ಭೋಕ್ತಾ ದಾತಾ ವಸು ಸುಬಹು ಸಮ್ಪಾದ್ಯ ಭವಿತಾ
ಕುಟುಮ್ಬಾನಾಂ ಪೋಷ್ಟಾ ಗುಣನಿಧಿರಶೇಷೇಪ್ಸಿತನರಃ ।
ಇತಿ ಪ್ರತ್ಯಾಶಸ್ಯ ಪ್ರಬಲದುರಿತಾನೀತವಿಧುರಂ
ಶಿರಸ್ಯಸ್ಯಾಕಸ್ಮಾತ್ಪತತಿ ನಿಧನಂ ಯೇನ ಭವತಿ ॥ 72-11 ॥
ಭಾನುರ್ಭೂವಲಯಪ್ರದಕ್ಷಿಣಗತಿಃ ಕ್ರೀಡಾರತಿಃ ಸರ್ವದಾ
ಚನ್ದ್ರೋಪ್ಯೇಷಕಲಾನಿಧಿಃ ಕವಲಿತಃ ಸ್ವರ್ಭಾನುನಾ ದುಃಖಿತಃ ।
ಱ್ಹಾಸಂ ಗಚ್ಛತಿ ವರ್ಧತೇ ಚ ಸತತಂ ಗೀರ್ವಾಣವಿಶ್ರಾಮಭೂ-
ಸ್ತತ್ಸ್ಥಾನಂ ಖಲು ಯತ್ರ ನಾಸ್ತ್ಯಪಹತಿಃ ಕ್ಲೇಶಸ್ಯ ಸಂಸಾರಿಣಾಮ್ ॥ 73-29 ॥
ಭೂಮಂಡಲಂ ಲಯಮುಪೈತಿ ಭವತ್ಯಬಾಧಂ
ಲಬ್ಧಾತ್ಮಕಂ ಪುನರಪಿ ಪ್ರಲಯಂ ಪ್ರಯಾತಿ ।
ಆವರ್ತತೇ ಸಕಲಮೇತದನನ್ತವಾರಂ
ಬ್ರಹ್ಮಾದಿಭಿಃ ಸಮಮಹೋ ನ ಸುಖಂ ಜನಾನಾಮ್ ॥ 74-9 ॥
ಅಹೋಽತ್ಯರ್ಥೇಽಪ್ಯರ್ಥೇ ಶ್ರುತಿಶತಗುರುಭ್ಯಾಮವಗತೇ
ನಿಷಿದ್ಧತ್ವೇನಾಪಿ ಪ್ರತಿದಿವಸಮಾಧಾವತಿ ಮನಃ ।
ಪಿಶಾಚಸ್ತತ್ರೈವ ಸ್ಥಿರರತಿರಸಾರೇಽಪಿ ಚಪಲಂ
ನ ಜಾನೇ ಕೇನಾಸ್ಯ ಪ್ರತಿಕೃತಿರನಾರ್ಯಸ್ಯ ಭವಿತಾ ॥ 75-26 ॥
ಅರೇ ಚೇತಶ್ಚಿತ್ರಂ ಭ್ರಮಸಿ ಯದಪಾಸ್ಯ ಪ್ರಿಯತಮಂ
ಮುಕುನ್ದಂ ಪಾರ್ಶ್ವಸ್ಥಂ ಪಿತರಮಪಿ ಮಾನ್ಯಂ ಸುಮನಸಾಮ್ ।
ಬಹಿಃ ಶಬ್ದಾದ್ಯರ್ಥೇ ಪ್ರಕೃತಿಚಪಲೇ ಕ್ಲೇಶಬಹುಲೇ
ನ ತೇ ಸಂಸಾರೇಽಸ್ಮಿನ್ಭವತಿ ಸುಖದಾದ್ಯಾಪಿ ವಿರತಿಃ ॥ 76-13 ॥
ಅಹಂ ಶ್ರಾನ್ತೋಽಧ್ವಾನಂ ಬಹುವಿಷಮತಿಕ್ರಮ್ಯ ವಿಷಮಂ
ಧನಾಕಾಂಕ್ಷಾಕ್ಷಿಪ್ತಃ ಕುನೃಪತಿಮುಖಾಲೋಕನಪರಃ ।
ಇದಾನೀಂ ಕೇನಾಪಿ ಸ್ಥಿತಿಮುದರಕೂಪಸ್ಯ ಭರಣೇ
ಕದನ್ನೇನಾರಣ್ಯೇ ಕ್ವಚಿದಪಿ ಸಮೀಹೇ ಸ್ಥಿರಮತಿಃ ॥ 77-18 ॥
ಸಾ ಗೋಷ್ಠೀ ಸುಹೃದಾಂ ನಿವಾರಿತಸುಧಾಸ್ವಾದಾಧುನಾ ಕ್ವಾಗಮ-
ತ್ತೇಧೀರಾ ಧರಣೀಧರೋಪಕರಣೀಭೂತಾ ಯಯುಃ ಕ್ವಾಪರೇ ।
ತೇ ಭೂಪಾ ಭವಭೀರವೋ ಭವರತಾಃ ಕ್ವಾಗುರ್ನಿರಸ್ತಾರಯೋ
ಹಾ ಕಷ್ಟಂ ಕ್ವ ಚ ಗಮ್ಯತೇ ನಹಿ ಸುಖಂ ಕ್ವಾಪ್ಯಸ್ತಿ ಲೋಕತ್ರಯೇ ॥ 78-28 ॥
ಉದಾಸೀನೋ ದೇವೋ ಮದನಮಥನಃ ಸಜ್ಜನಕುಲೇ
ಕಲಿಕ್ರೀಡಾಸಕ್ತಃಕೃತಪರಿಜನಃ ಪ್ರಾಕೃತಜನಃ ।
ಇಯಂ ಮ್ಲೇಚ್ಛಾಕ್ರಾನ್ತಾ ತ್ರಿದಶತಟಿನೀ ಚೋಭಯತಟೇ
ಕಥಂ ಭ್ರಾನ್ತಸ್ಥಾತಾ ಕಥಯ ಸುಕೃತೀ ಕುತ್ರ ವಿಭಯಃ ॥ 79-65 ॥
ನಿಸ್ಸಾರಾವಸುಧಾಧುನಾ ಸಮಜನಿ ಪ್ರೌಢಪ್ರತಾಪನಲ-
ಜ್ವಾಲಾಜ್ವಾಲಸಮಾಕುಲಾ ದ್ವಿಪಘಟಾಸಂಘಟ್ಟವಿಕ್ಷೋಭಿತಾ ।
ಮ್ಲೇಚ್ಛಾನಾಂ ರಥವಾಜಿಪತ್ತಿನಿವಹೈರುನ್ಮೀಲಿತಾ ಕೀದೃಶೀ-
ಯಂ ವಿದ್ಯಾ ಭವಿತೇತಿ ಹನ್ತ ನ ಸಖೇ ಜಾನೀಮಹೇ ಮೋಹಿತಾಃ ॥ 80-66 ॥
ವೇದೋ ನಿರ್ವೇದಮಾಗಾದಿಹ ನಮನಭಿಯಾ ಬ್ರಾಹ್ಮಣಾನಾಂ ವಿಯೋಗಾ-
ದ್ವೈಯಾಸಿಕ್ಯೋ ಗಿರೋಽಪಿ ಕ್ವಚಿದಪಿ ವಿರಲಾಃ ಸಮ್ಮತಂ ಸನ್ತಿ ದೇಶೇ ।
ಇತ್ಥಂ ಧರ್ಮೇ ವಿಲೀನೇ ಯವನಕುಲಪತೌ ಶಾಸತಿ ಕ್ಷೋಣಿಬಿಮ್ಬಂ
ನಿತ್ಯಂ ಗಂಗಾವಗಾಹಾದ್ಭವತಿ ಗತಿರಿತಃ ಸಂಸೃತೇರರ್ಥಸಿದ್ಧೌ ॥ 81-67 ॥
ಗಂಗಾ ಗಂಗೇತಿ ಯಸ್ಯಾಃ ಶ್ರುತಮಪಿ ಪಠಿತಂ ಕೇನಚಿನ್ನಾಮಮಾತ್ರಂ
ದುರಸ್ಥಸ್ಯಾಪಿ ಪುಂಸೋ ದಲಯತಿ ದುರಿತಂ ಪ್ರೌಢಮಿತ್ಯಾಹುರೇಕೇ ।
ಸ ಗಂಗಾ ಕಸ್ಯ ಸೇವ್ಯಾ ನ ಭವತಿ ಭುವನೇ ಸಜ್ಜನಸ್ಯಾತಿಭವ್ಯಾ
ಬ್ರಹ್ಮಾಂಡಂ ಪ್ಲಾವಯನ್ತೀ ತ್ರಿಪುರಹರಜಟಾಮಂಡಲಂ ಮಂಡಯನ್ತೀಮ್ ॥ 82-68 ॥
ಕಲೌ ಗಂಗಾ ಕಾಶ್ಯಾಂ ತ್ರಿಪುರಹರಪುರ್ಯಾಂ ಭಗವತೀ
ಪ್ರಶಸ್ತಾದೇವಾನಾಮಪಿ ಭವತಿ ಸೇವ್ಯಾನುದಿವಸಮ್ ।
ಇತಿ ವ್ಯಾಸೋ ಬ್ರೂತೇ ಮುನಿಜನಧುರೀಣೋ ಹರಿಕಥಾ-
ಸುಧಾಪಾನಸ್ವಸ್ಥೋ ಗಲಿತಭವಬನ್ಧೋಽತುಲಮತಿಃ ॥ 83-74 ॥
ಯಸ್ಯಾಃ ಸಂಗತಿರುನ್ನತಿಂ ವಿತನುತೇ ವಾರಾಮಮೀಷಾಂ ಜನೈ-
ರುದ್ಗೀತಾ ಕವಿಭಿರ್ಮಹೇಶ್ವರಮನೋಭೀಷ್ಟಾ ಮಹೀಮಂಡಲೇ ।
ಸಾ ಸನ್ತಃ ಶರದಿನ್ದುಸೋದರಪಯಃ ಪೂರಾಭಿರಾಮಾ ನದ-
ತ್ಕೋಕಶ್ರೇಣಿಮನೋಜಪುಣ್ಯಪುಲಿನಾ ಭಾಗೀರಥೀ ಸೇವ್ಯತಾಮ್ ॥ 84-72 ॥
ಕದಾ ಭಾಗೀರಥ್ಯಾ ಭವಜಲಧಿಸನ್ತಾರತರಣೇಃ
ಸ್ಖಲದ್ವೀಚೀಮಾಲಾಚಪಲತಲವಿಸ್ತಾರಿತಮುದಃ ।
ತಮಸ್ಸ್ಥಾನೇ ಕುಂಜೇ ಕ್ವಚಿದಪಿ ನಿವಿಶ್ಯಾಹೃತಮನಾ
ಭವಿಷ್ಯಾಮ್ಯೇಕಾಕೀ ನರಕಮಥನೇ ಧ್ಯಾನರಸಿಕಃ ॥ 85-22 ॥
ಕದಾ ಗೋವಿನ್ದೇತಿ ಪ್ರತಿದಿವಸಮುಲ್ಲಾಸಮಿಲಿತಾಃ
ಸುಧಾಧಾರಾಪ್ರಾಯಾಸ್ತ್ರಿದಶತಟಿನೀವೀಚಿಮುಖರೇ ।
ಭವಿಷ್ಯನ್ತ್ಯೇಕಾನ್ತೇ ಕ್ವಚಿದಪಿ ನಿಕುಂಜೇ ಮಮ ಗಿರೋ
ಮರಾಲೀಚಕ್ರಾಣಾಂ ಸ್ಥಿತಿಸುಖರವಾಕ್ರಾನ್ತಪುಲಿನೇ ॥ 86-23 ॥
ಭಜತ ವಿಬುಧಸಿನ್ಧುಂ ಸಾಧವೋ ಲೋಕಬನ್ಧುಂ
ಹರಹಸಿತತರಂಗಂ ಶಂಕರಾಶೀರ್ಷಸಂಗಮ್ ।
ದಲಿತಭವಭುಜಂಗಂ ಖ್ಯಾತಮಾಯಾವಿಭಂಗಂ
ನಿಖಿಲಭುವನವನ್ದ್ಯಂ ಸರ್ವತೀರ್ಥಾನವದ್ಯಮ್ ॥ 87-44 ॥
ಯದಮೃತಮಮೃತಾನಾಂ ಭಂಗರಂಗಪ್ರಸಂಗ-
ಪ್ರಕಟಿತರಸವತ್ತಾವೈಭವಂ ಪೀತಮುಚ್ಚೈಃ ।
ದಲಯತಿ ಕಲಿದನ್ತಾಂಸ್ತಾಂ ಸುಪರ್ವಸ್ರವನ್ತೀಂ
ಕಿಮಿತಿ ನ ಭಜತಾರ್ತಾ ಬ್ರಹ್ಮಲೋಕಾವತೀರ್ಣಾಮ್ ॥ 88-45 ॥
ಯತ್ತೀರೇ ವಸತಾಂ ಸತಾಮಪಿ ಜಲೈರ್ಮೂಲೈಃ ಫಲೈರ್ಜೀವತಾಂ
ಮುಕ್ತಾಹಂಮಮಭಾವಶುದ್ಧಮನಸಾಮಾಚಾರವಿದ್ಯಾವತಾಮ್ ।
ಕೈವಲ್ಯಂ ಕರಬಿಲ್ವತುಲ್ಯಮಮಲಂ ಸಮ್ಪದ್ಯತೇ ಹೇಲಯಾ ।
ಸ ಗಂಗಾ ಹ್ಯತುಲಾಮಲೋರ್ಮಿಮಪಟಲಾ ಸದ್ಭಿಃ ಕುತೋ ನೇಕ್ಷ್ಯತೇ ॥ 89-69 ॥
ತೀರ್ಥಾನಾಮವಲೋಕನೇ ಸುಮನಸಾಮುತ್ಕಂಠತೇ ಮಾನಸಂ
ತಾವದ್ಭೂವಲಯೇ ಸತಾಂ ಪುರರಿಪುಧ್ಯಾನಾಮೃತಾಸ್ವಾದಿನಾಮ್।
ಪಾವತ್ತೇ ನ ವಿಲೋಕಯನ್ತಿ ಸರಿತಾಂ ರೋಚಿಷ್ಣುಮುಕ್ತಾವಲೀಮ್ ।
ಶ್ರೀಮನ್ನಾಕತರಂಗಿಣೀಂ ಹರಜಟಾಜೂಟಾಟವೀವಿಭ್ರಮಾಮ್ ॥ 90-70 ॥
ಸಂಸಾರೋ ವಿವಿಧಾಧಿಬಾಧಬಧಿರಃ ಸಾರಾಯತೇ ಮಾನಸೇ
ನಿಃಸಾರೋಽಪಿ ವಪುಷ್ಮತಾಂ ಕಲಿವೃಕಗ್ರಾಸೀಕೃತಾನಾಂ ಚಿರಮ್ ।
ದೃಷ್ಟಾಯಾಂ ಘನಸಾರಪಾಥಸಿ ಮಹಾಪುಣ್ಯೇನ ಯಸ್ಯಾಂ ಸತಾಂ
ಸಾ ಸೇವ್ಯಾ ನ ಕುತೋ ಭವೇತ್ಸುರಧುನೀಸ್ವರ್ಗಾಪವರ್ಗೋದಯಾ ॥ 91-71 ॥
ಕ್ವಚಿದ್ಧಂಸಶ್ರೇಣೀ ಸುಖಯತಿ ರಿರಂಸುಃ ಶ್ರುತಿಸುಖಂ
ನದನ್ತೀ ಚೇತೋ ನೋ ವಿಪುಲಪುಲಿನೇ ಮನ್ಥರಗತಿಃ ।
ತದೇತಸ್ಯಾ ಯೋಽರ್ಥೀ ಸುರತರುಲತಾ ನಾಕತಟಿನೀಈ
ಸದಾ ಸದ್ಭಿಃ ಸೇವ್ಯಾ ಸಕಲಪುರುಷಾರ್ಥಾಯ ಕೃತಿಭಿಃ ॥ 92-73 ॥
ಯಾಮಾಸಾದ್ಯ ತ್ರಿಲೋಕೀಜನಮಹಿತಶಿವಾವಲ್ಲಭಾರಾಮಭೂಮಿಂ
ಬ್ರಹ್ಮಾದೀನಾಂ ಸುರಾಣಾಂ ಸುಖವಸತಿಭುವೋ ಮಂಡಲಂ ಮಂಡಯನ್ತೀಮ್ ।
ನೋ ಗರ್ಭೇ ವ್ಯಾಲುಠನ್ತಿ ಕ್ವಚಿದಪಿ ಮನುಜಾ ಮಾತುರುತ್ಕ್ರಾನ್ತಿಭಾಜ-
ಸ್ತಾಂ ಕಾಶೀಂ ನೋ ಭಜನ್ತೇ ಕಿಮಿತಿ ಸುಮತಯೋ ದುಃಖಭಾರಂ ವಹನ್ತೇ ॥ 93-38 ॥
ವಿದ್ಯನ್ತೇ ದ್ವಾರಕಾದ್ಯಾ ಜಗತಿ ಕತಿ ನ ತಾ ದೇವತಾರಾಜಧಾನ್ಯೋ
ಯದ್ಯಪ್ಯನ್ಯಾಸ್ತಥಾಪಿ ಸ್ಖಲದಮಲಜಲಾವರ್ತಗಂಗಾತರಂಗಾ ।
ಕಾಶ್ಯೇವಾರಾಮಕೂಜತ್ಪಿಕಶುಕಚಟಕಾಕ್ರಾನ್ತದಿಕ್ಕಾಮಿನೀನಾಂ
ಕ್ರೀಡಾಕಾಸಾರಶಾಲಾ ಜಯತಿ ಮುನಿಜನಾನನ್ದಕನ್ದೈಕಭೂಮಿಃ ॥ 94-41 ॥
ಕಾಶೀಯಂ ಸಮಲಂಕೃತಾ ನಿರುಪಮಸ್ವರ್ಗಾಪಗಾವ್ಯೋಮಗಾ-
ಸ್ಥೂಲೋತ್ತಾರತರಂಗಬಿನ್ದುವಿಲಸನ್ಮುಕ್ತಾಫಲಶ್ರೇಣಿಭಿಃ ।
ಚಂಚಚ್ಚಂಚಲಚಂಚರೀಕನಿಕರಾರಾಗಾಮ್ಬರಾ ರಾಜತೇ
ಕಾಸಾರಸ್ಥವಿನಿದ್ರಪದ್ಮನಯನಾ ವಿಶ್ವೇಶ್ವರಪ್ರೇಯಸೀ ॥ 95-42 ॥
ವನ್ಹಿಪ್ರಾಕಾರಬುದ್ಧಿಂ ಜನಯತಿ ವಲಭೀವಾಸಿನಾಂ ನಾಗರಾಣಾಂ
ಗನ್ಧಾರಣ್ಯಪ್ರಸೂತಸ್ಫುಟಕುಸುಮಚಯಃ ಕಿಂಶುಕಾನಾಂ ಶುಕಾನಾಮ್ ।
ಚಂಚ್ವಾಕಾರೋ ವಸನ್ತೇ ಪರಮಪದಪದಂ ರಾಜಧಾನೀ ಪುರಾರೇಃ
ಸಾ ಕಾಶ್ಯಾರಾಮರಮ್ಯಾ ಜಯತಿ ಮುನಿಜನಾನನ್ದಕನ್ದೈಕಭೂಮಿಃ ॥ 96-43 ॥
ಕಿಂ ಕುರ್ಮಃ ಕಿಂ ಭಜಾಮಃ ಕಿಮಿಹ ಸಮುದ್ರಿತಂ ಸಾಧನಂ ಕಿಂ ವಯಸ್ಯಾಃ
ಸಂಸಾರೋನ್ಮೂಲನಾಯ ಪ್ರತಿದಿವಸಮಿಹಾನರ್ಥಶಂಕಾವತಾರಃ ।
ಭ್ರಾತರ್ಜ್ಞಾತಂ ನಿದಾನಂ ಭವಭಯದಲನೇ ಸಂಗತಂ ಸಜ್ಜ್ನಾಂ
ತಾಂ ಕಾಶೀಮಾಶ್ರಯಾಮೋ ನಿರುಪಮಯಶಸಃ ಸ್ವಃಸ್ರವನ್ತ್ಯಾ ವಯಸ್ಯಾಮ್ ॥ 97-39 ॥
ಭುಕ್ತಿಃ ಕ್ವಾಪಿ ನ ಮುಕ್ತಿರಸ್ತ್ಯಭಿಮತಾ ಕ್ವಾಣ್ಯಸ್ತಿ ಮುಕ್ತಿರ್ನ ಸಾ
ಕಾಶ್ಯಾಮಸ್ತಿ ವಿಶೇಷ ಏವ ಸುತರಾಂ ಶ್ಲಾಘ್ಯಂ ಯದೇತದ್ರೂಪಮ್ ।
ಸರ್ವೈರುತ್ತಮಮಧ್ಯಮಾಧಮಜನೈರಾಸಾದ್ಯತೇಽನುಗ್ರಹಾ-
ದ್ದೇವಸ್ಯ ತ್ರಿಪುರದ್ವಿಷಃ ಸುರಧುನೀಸ್ನಾನಾವದಾತವ್ಯಯೈಃ ॥ 98-40 ॥
ಸನ್ತನ್ಯೇ ತ್ರಿದಶಾಪಗಾದಿಪತನಾದೇವ ಪ್ರಯಾಗಾದಯಃ
ಪ್ರಾಲೇಯಾಚಲಸಮ್ಭವಾ ಬಹುಫಲಾಃ ಸಿದ್ಧಾಶ್ರಮಾಃ ಸಿದ್ಧಯಃ ।
ಯತ್ರಾಘೌಘಸಹಾ ಭವನ್ತಿ ಸುಧಿಯಾಂ ಧ್ಯಾನೇಶ್ವರಣಾಂ ಚಿರಂ
ಮುಕ್ತಾಶೇಷಭಿಯಾಂ ವಿನಿದ್ರಮನಸಾಂ ಕನ್ದಾಮ್ಬುಪರ್ಣಾಶಿನಾಮ್ ॥ 99-51 ॥
ಕೇದಾರಸ್ಥಾನಮೇಕಂ ರುಚಿರತರಮುಮಾನಾಟ್ಯಲೀಲಾವನೀಕಂ
ಪ್ರಾಲೇಯಾದ್ರಿಪ್ರದೇಶೇ ಪ್ರಥಿತಮತಿತರಾಮಸ್ತಿ ಗಂಗಾನಿವೇಶೇ ।
ಖ್ಯಾತಂ ನಾರಾಯಣಸ್ಯ ತ್ರಿಜಗತಿ ಬದರೀನಾಮ ಸಿದ್ಧಾಶ್ರಮಸ್ಯ
ತತ್ರೈವಾನಾದಿಮೂರ್ತೇರ್ಮುನಿಜನಮನಸಾಮನ್ಯದಾನನ್ದಮೂರ್ತೇಃ ॥ 100-50 ॥
ಬುಧಾನಾಂ ವೈರಾಗ್ಯಂ ಸುಘಟಯತು ವೈರಾಗ್ಯಶತಕಂ
ಗೃಹಸ್ಥಾನಾಮೇಕಂ ಹರಿಪದಸರೋಜಪ್ರಣಯಿನಾಮ್ ।
ಜನಾನಾಮಾನನ್ದಂ ವಿತರತು ನಿತಾನ್ತಂ ಸುವಿಶದ-
ತ್ರಯಂ ಶೇಷವ್ಯಾಖ್ಯಾಗಲಿತತಮಸಾಂ ಶುದ್ಧಮನಸಾಮ್ ॥ 101-103 ॥
ಇತಿ ಶ್ರೀಭರ್ತೃಹರಿವಿರಚಿತಂ ವಿಜ್ಞಾನಶತಕಂ ಚತುರ್ಥಮ್ ।
This verse sequence is based on two books, one by Pathak with Gujarati
translation and -number is based on that of Ghule with Sanskrit
commentary, 101 in number. While Ghule’s book has 103 verses,
Pathak’s book has selected resequenced 101 and 38 more as
parishiShTa given below and appears to be expanded.
॥ ವಿಜ್ಞಾನಶತಕ ಪರಿಶಿಷ್ಟ ॥
ಅಕಿಂಚನಸ್ಯ ದಾನ್ತಸ್ಯ ಶಾನ್ತಸ್ಯ ಸಮಚೇತಸಃ ।
ಸದಾ ಸನ್ತುಷ್ಟಮನಸಃ ಸರ್ವಾಃ ಸುಖಮಯಾ ದಿಶಃ ॥ 1 ॥
ಅಭಿಮತಮಹಾಮಾನಗ್ರನ್ಥಿಪ್ರಭೇದಪಟೀಯಸೀ
ಗುರುತರಗುರುಗ್ರಾಮಾಮ್ಭೋಜಸ್ಫುಟೋಜ್ಜ್ವಲಚನ್ದ್ರಿಕಾ ।
ವಿಪುಲವಿಲಸಲ್ಲಜ್ಜಾವಲ್ಲೀವಿದಾರಕುಠಾರಿಕಾ
ಜಠರಪಿಠರೀ ದುಃಪೂರೇಯಂ ಕರೋತಿ ವಿಡಮ್ಬನಮ್ ॥ 2 ॥
ಉತ್ತಿಷ್ಠ ಕ್ಷಣಮೇಕಮುದ್ವಹ ಗುರುಂ ದಾರಿದ್ರ್ಯಭಾರಂ ಸಖೇ
ಶ್ರಾನ್ತಸ್ತಾವದಹಂ ಚಿರಂ ಮರಣಜಂ ಸೇವೇ ತ್ವದೀಯಂ ಸುಖಮ್ ।
ಇತ್ಯುಕ್ತೋ ಧನವರ್ಜಿತೇನ ಸಹಸಾ ಗತ್ವಾ ಸ್ಮಶಾನೇ ಶವೋ
ದಾರಿದ್ರ್ಯಾನ್ಮರಣಂ ವರಂ ವರಮಿತಿ ಜ್ಞಾತ್ವೈವ ತೂಷ್ಣೀಂ ಸ್ಥಿತಃ ॥ 3 ॥
ಉದನ್ವಚ್ಛನ್ನಾ ಭೂಃ ಸ ಚ ನಿಧಿರಪಾಂ ಯೋಜನಶತಮ್
ಸದಾ ಪಾನ್ಥಃ ಪೂಷಾ ಗಗನಪರಿಮಾಣಂ ಕಲಯತಿ ।
ಇತಿ ಪ್ರಾಯೋ ಭಾವಾಃ ಸ್ಫುರದವಧಿಮುದ್ರಾಮುಕುಲಿತಾಃ
ಸತಾಂ ಪ್ರಜ್ಞೋನ್ಮೇಷಃ ಪುನರಯಮಸೀಮಾ ವಿಜಯತೇ ॥ 4 ॥
ಏತಾ ಹಸನ್ತಿ ಚ ರುದನ್ತಿ ಚ ಕಾರ್ಯಹೇತೋ-
ರ್ವಿಶ್ವಾಸಯನ್ತಿ ಚ ಪರಂ ನ ಚ ವಿಶ್ವಸನ್ತಿ ।
ತಸ್ಮಾನ್ನರೇಣ ತು ಸುಶೀಲಸಮನ್ವಿತೇನ
ನಾರ್ಯಃ ಸ್ಮಶಾನಘಟಿಕಾ ಇವ ವರ್ಜನೀಯಾಃ ॥ 5 ॥
ಕಾರ್ಕಶ್ಯಂ ಸ್ತನಯೋರ್ದೃಶೋಸ್ತರಲತಾಲೀಕಂ ಮುಖೇ ಶ್ಲಾಘ್ಯತೇ
ಕೌಟಿಲ್ಯಂ ಕಚಸಂಚಯೇ ಚ ವದನೇ ಮಾನ್ದ್ಯಂ ತ್ರಿಕೇ ಸ್ಥೂಲತಾ ।
ಭೀರುತ್ವಂ ಹೃದಯೇ ಸದೈವ ಕಥಿತಂ ಮಾಯಾಪ್ರಯೋಗಃ ಪ್ರಿಯೇ
ಯಾಸಾಂ ದೋಷಗಣಃ ಸದಾ ಮೃಗದೃಶಾಂ ತಾಃ ಸ್ಯುಃ ಪಶೂನಾಂ ಪ್ರಿಯಾಃ ॥ 6 ॥
ಕದಾ ವಾರಾಣಸ್ಯಾಮಮರತಟಿನೀರೋಧಸಿ ವಸನ್
ವಸಾನಃ ಕೌಪೀನಂ ಶಿರಸಿ ನಿದಧಾನೋಽಂಜಲಿಪುಟಮ್ ।
ಅಯೇ ಗೌರೀನಾಥ ತ್ರಿಪುರಹರ ಶಮ್ಭೋ ತ್ರಿನಯನ
ಪ್ರಸೀದೇತ್ಯಾಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ 7 ॥
ಗಾತ್ರೈರ್ಗಿರಾ ಚ ವಿಕಲಶ್ಚಟುರೀಶ್ವರಾಣಾಂ
ಕುರ್ವನ್ನಯಂ ಪ್ರಹಸನಸ್ಯ ನಟಃ ಕೃತೋಽಸಿ ।
ತಂ ತ್ವಾಂ ಪುನಃ ಪಲಿತಕರ್ಣಕಭಾಜಮೇನಂ
ನಾಟ್ಯೇನ ಕೇನ ನಟಯಿಷ್ಯತಿ ದೀರ್ಘಮಾಯುಅಃ ॥ 8 ॥
ಚಲಾ ಲಕ್ಷ್ಮೀಶ್ಚಲಾಃ ಪ್ರಾಣಾಶ್ಚಲೇ ಜೀವಿತಯೌವನೇ ।
ಚಲಾಚಲೋ ಚ ಸಂಸಾರೇ ಧರ್ಮ ಏಕೋ ಹಿ ನಿಶ್ಚಲಃ ॥ 9 ॥
ಚೇತಶ್ಚಿನ್ತಯ ಮಾ ರಮಾಂ ಸಕೃದಿಮಾಮಸ್ಥಾಯಿನೀಮಾಸ್ಥಯಾ
ಭೂಪಾಲಭ್ರುಕುಟೀರವಿಹರವ್ಯಾಪಾರಪಣ್ಯಾಂಗನಾಮ್ ।
ಕನ್ಯಾಕಂಚುಕಿತಾಃ ಪ್ರವಿಶ್ಯ ಭವನದ್ವಾರಾಣಿ ವಾರಾಣಸೀ-
ರಥ್ಯಾಪಂಕ್ತಿಷು ಪಾಣಿಪಾತ್ರಪತಿತಾಂ ಭಿಕ್ಷಾಮಪೇಕ್ಷಾಮಹೇ ॥ 10 ॥
ತುಂಗಂ ವೇಶ್ಮ ಸುತಾಃ ಸತಾಮಭಿಮತಾಃ ಸಂಖ್ಯಾತಿಗಾಃ ಸಮ್ಪದಃ
ಕಲ್ಯಾಣೀ ದಯಿತಾ ವಯಶ್ಚ ನವಮಿತ್ಯಜ್ಞಾನಮೂಢೋ ಜನಃ ।
ಮತ್ವಾ ವಿಶ್ವಮನಶ್ವರಂ ನಿವಿಶತೇ ಸಂಸಾರಕಾರಾಗೃಹೇ
ಸನ್ದೃಶ್ಯಂ ಕ್ಷಣಭಂಗುರಂ ತದಖಿಲಂ ಧನ್ಯಸ್ತು ಸಂನ್ಯಸ್ಯತಿ ॥ 11 ॥
ನ ಭಿಕ್ಷಾ ದುಷ್ಪ್ರಾಪಾ ಪಥಿ ಮಮ ಮಹಾರಾಮರಚಿತೇ
ಫಲೈಃ ಸಮ್ಪೂರ್ಣಾ ಭೂರ್ದ್ವಿಪಮೃಗಸುಚರ್ಮಾಪಿ ವಸನಮ್ ।
ಸುಖೈರ್ವಾ ದುಃಖೈರ್ವಾ ಸದೃಶಪರಿಪಾಕಃ ಖಲು ತದಾ
ತ್ರಿನೇತ್ರಂ ಕಸ್ತ್ಯಕ್ತ್ವಾ ಧನಲಯಮದಾನ್ಧಂ ಪ್ರಣಮತಿ ॥ 12 ॥
ನೋ ಖಡ್ಗಪ್ರವಿದಾರಿತಃ ಕರಟಿನೋ ನೋದ್ವೇಜಿತಾ ವೈರಿಣ-
ಸ್ತನ್ವಂಗ್ಯಾ ವಿಪುಲೇ ನಿಬದ್ಧಫಲಕೇ ನ ಕ್ರೀಡಿತಂ ಲೀಲಯಾ ।
ನೋ ಜುಷ್ಟಂ ಗಿರಿರಾಜನಿರ್ಝರಝಣಜ್ಝಾಂಕಾರಕಾರಂ ವಯಃ
ಕಾಲೋಽಯಂ ಪರಪಿಂಡಲೋಲುಪತಯಾ ಕಾಕೈರಿವ ಪ್ರೇರಿತಃ ॥ 13 ॥
ಪರಿಭ್ರಮಸಿ ಕಿಂ ವೃಥಾಕ್ವಚನ ಚಿತ್ತ ವಿಶ್ರಾಮ್ಯತಾಂ
ಸ್ವಯಂ ಭವತಿ ಯದ್ಯಥಾ ಭವತಿ ತತ್ತಥಾ ನಾನ್ಯಥಾ ।
ಅತೀತಮಪಿ ನ ಸ್ಮರನ್ನಪಿ ಚ ಭಾವ್ಯಸಂಕಲ್ಪಯ-
ನ್ನತರ್ಕಿತಗಮಾಗಮಾನನುಭವಸ್ವ ಭೋಗಾನಿಹ ॥ 14 ॥
ಪಾಣಿಂ ಪಾತ್ರಯತಾಂ ನಿಸರ್ಗಶುಚಿನಾ ಭೈಕ್ಷೇಣ ಸನ್ತುಷ್ಯತಾಂ
ಯತ್ರ ಕ್ವಾಪಿ ನಿಷೀದತಾಂ ಬಹುತೃಣಂ ವಿಶ್ವಂ ಮುಹುಃ ಪಶ್ಯತಾಮ್ ।
ಅತ್ಯಾಗೇಽಪಿ ತನೋರಖಂಡಪರಮಾನನ್ದಾವಬೋಧಸ್ಪೃಹಾಂ
ಮತ್ಯಃ ಕೋಽಪಿ ಶಿವಪ್ರಸಾದಸುಲಭಾಂ ಸಮ್ಪತ್ಸ್ಯತೇ ಯೋಗಿನಾಮ್ ॥ 15 ॥
ಪಾತಾಲಾನ್ನ ವಿಮೋಚಿತೋ ಬತ ಬಲೀ ನೀತೋ ನ ಮೃತ್ಯುಃ ಕ್ಷಯಂ
ನೋ ಮೃಷ್ಟಂ ಶಶಿಲಾಂಛನಂ ಚ ಮಲಿನಂ ನೋನ್ಮೂಲಿತಾ ವ್ಯಾಧಯಃ ।
ಶೇಷಸ್ಯಾಪಿ ಧರಾಂ ವಿಧೃತ್ಯ ನ ಕೃತೋ ಭಾರಾವತಾರಃ ಕ್ಷಣಂ
ಚೇತಃ ಸತ್ಪುರುಷಾಭಿಮಾನಗಣನಾಂ ಮಿಥ್ಯಾ ವಹನ್ ಲಜ್ಜಸೇ ॥ 16 ॥
ಫಲಂ ಸ್ವೇಚ್ಛಾಲಭ್ಯಂ ಪ್ರತಿವನಮಖೇದಂ ಕ್ಷಿತಿರುಹಾಂ
ಪಯಃ ಸ್ಥಾನೇ ಸ್ಥಾನೇ ಶಿಶಿರಮಧುರಂ ಪುಣ್ಯಸರಿತಾಮ್ ।
ಮೃದುಸ್ಪರ್ಶಾ ಶಯ್ಯಾ ಸುಲಲಿತಲತಾಪಲ್ಲವಮಯೀ
ಸಹನ್ತೇ ಸನ್ತಾಪಂ ತದಪಿ ಧನಿನಾಂ ದ್ವಾರಿ ಕೃಪಣಾಃ ॥ 17 ॥
ಭಿಕ್ಷಾ ಕಾಮ್ದುಧಾ ಧೇನುಃ ಕನ್ಥಾ ಶೀತನಿವಾರಿಣೀ ।
ಅಚಲಾ ತು ಶಿವ ಭಕ್ತಿರ್ವಿಭವೈಃ ಕಿಂ ಪ್ರಯೋಜನಮ್ ॥ 18 ॥
ಯದ್ವಕ್ತ್ರಂ ಮುಹರೀಕ್ಷಸೇ ನ ಧನಿನಾಂ ಬ್ರೂಷೇ ನ ಚಾಟುಂ ಮೃಷಾ
ನೈಷಾಂ ಗರ್ವಗಿರಃ ಶೃಣೋಷಿ ನ ಪುನಃ ಪ್ರತ್ಯಾಶಯಾ ಧಾವಸಿ ।
ಕಾಲೋ ಬಾಲತೃಣಾನಿ ಖಾದಸಿ ಸುಖಂ ನಿದ್ರಾಸಿ ನಿದ್ರಾಗಮೇ
ತನ್ಮೇ ಬ್ರೂಹಿ ಕುರಂಗ ಕುತ್ರ ಭವತಾ ಕಿಂ ನಾಮ ತಪ್ತಂ ತಪಃ ॥ 19 ॥
ಯೇ ಸನ್ತೋಷಸುಖಪ್ರಮೋದಮುದಿತಾಸ್ತೇಷಾಂ ನ ಭಿನ್ನಾ ಮುದೋ
ಯೇ ತ್ವನ್ಯೇ ಧನಲೋಭಸಂಕುಲಧಿಯಸ್ತೇಷಾಂ ನ ತೃಷ್ಣಾ ಹತಾ ।
ಇತ್ಥಂ ಕಸ್ಯ ಕೃತೇ ಕೃತಃ ಸ ವಿಧಿನಾ ತಾದೃಕ್ಪದಂ ಸಮ್ಪದಾಂ
ಸ್ವಾತ್ಮನ್ಯೇವ ಸಮಾಪ್ತಹೇಮಮಹಿಮಾ ಮೇರುರ್ನ ಮೇ ರೋಚತೇ ॥ 20 ॥
ವರ್ಣೇ ಸಿತಂ ಶಿರಸಿ ವೀಕ್ಷ್ಯ ಶಿರೋರುಹಾಣಾಂ
ಸ್ಥಾನಂ ಜರಾಪರಿಭವಸ್ಯ ತದೇವ ಪುಂಸಾಮ್ ।
ಆರೋಪಿತಾಸ್ಥಿಶಕಲಂ ಪರಿಹೃತ್ಯ ಯಾನ್ತಿ
ಚಾಂಡಾಲಕೂಪಮಿವ ದೂರತರಂ ತರುಣ್ಯಃ ॥ 21 ॥
ಸಮಾರಮ್ಭಾ ಭಗ್ನಾಃ ಕತಿ ನ ಕತಿವಾರಾँಸ್ತವ ಪಶೋ
ಪಿಪಾಸೋಸ್ತುಚ್ಛೇಽಸ್ಮಿನ್ದ್ರವಿಣಮೃಗತೃಷ್ಣಾರ್ಣವಜಲೇ ।
ತಥಾಪಿ ಪ್ರತ್ಯಾಶಾ ವಿರಮತಿ ನ ತೇಽದ್ಯಾಪಿ ಶತಧಾ
ನ ದೀರ್ಣಂ ಯಚ್ಚೇತೋ ನಿಯತಮಶನಿಗ್ರಾವಘಟಿತಮ್ ॥ 22 ॥
ಸಿಂಹೋ ಬಲೀ ದ್ವಿರದಶೂಕರಮಾಂಸಭೋಜೀ
ಸಂವತ್ಸರೇಣ ರತಿಮೇತಿ ಕಿಲೈಕವಾರಮ್ ।
ಪಾರಾವತಃ ಖರಶಿಲಾಕಣಮಾತ್ರಭೋಜೀ
ಕಾಮೀ ಭವತ್ಯನುದಿನಂ ವದ ಕೋಽತ್ರ ಹೇತುಃ ॥ 23 ॥
ಚೂಡೋತ್ತಂಸಿತಚಾರುಚನ್ದ್ರಕಲಿಕಾಚಂಚಚ್ಛಿಖಾಭಾಸ್ವರೋ
ಲೀಲಾದಗ್ಧವಿಲೋಲಕಾಮಶಲಭಾ ಶ್ರೇಯೋದಶಾಗ್ರೇ ಸ್ಫುರನ್ ।
ಅನ್ತಃಸ್ಫೂರ್ಜದಪಾರಮೋಹತಿಮಿರಪ್ರಾಗ್ಭಾರಮುಚ್ಚಾಟಯಂ-
ಶ್ಚೇತಃ ಸದ್ಮನಿ ಯೋಗಿನಾಂ ವಿಜಯತೇ ಜ್ಞಾನಪ್ರದೀಪೋ ಹರಃ ॥ 24 ॥
ಭಿಕ್ಷಾಹಾರಮದೈನ್ಯಮಪ್ರತಿಸುಖಂ ಭೀತಿಚ್ಛಿದಂ ಸರ್ವದಾ
ದುರ್ಮಾತ್ಸರ್ಯಮದಾಭಿಮಾನಮಥನಂ ದುಃಖೌಘವಿಧ್ವಂಸನಮ್ ।
ಸರ್ವತ್ರಾನ್ವಹಮಪ್ರಯತ್ನಸುಲಭಂ ಸಾಧುಪ್ರಿಯಂ ಪಾವನಂ
ಶಮ್ಭೋಃ ಸತ್ರಮವಾರ್ಯಮಕ್ಷಯನಿಧಿಂ ಶಂಸನ್ತಿ ಯೋಗೀಶ್ವರಾಃ ॥ 25 ॥
ಭೋಗಾಸ್ತುಂಗತರಂಗಭಂಗಚಪಲಾಃ ಪ್ರಾಣಾಃ ಕ್ಷಣಧ್ವಂಸಿನ-
ಸ್ತೋಕಾನ್ಯೇವದಿನಾನಿ ಯೌವನಸುಖಂ ಪ್ರೀತಿಃ ಪ್ರಿಯೇಷ್ವಸ್ಥಿರಾ ।
ತತ್ಸಂಸಾರಮಸಾರಮೇವ ನಿಖಿಲಂ ಬುದ್ಧ್ವಾ ಬುಧಾ ಬೋಧಕಾ
ಲೋಕಾನುಗ್ರಹಪೇಶಲೇನ ಮನಸಾ ಯತ್ನಃ ಸಮಾಧೀಯತಾಮ್ ॥ 26 ॥
ಬ್ರಹ್ಮೇನ್ದ್ರಾದಿಮರುದ್ಗಣಾಂಸ್ತೃಣಕಣಾನ್ಯತ್ರ ಸ್ಥಿತೋ ಮನ್ಯತೇ
ಯತ್ಸ್ವಾದಾದ್ವಿರಸಾ ಭವನ್ತಿ ವಿಭವಾಸ್ತ್ರೈಲೋಕ್ಯರಾಜ್ಯಾದಯಃ ।
ಭೋಗಃ ಕೋಽಪಿ ಸ ಏಕ ಏವ ಪರಮೋ ನಿತ್ಯೋದಿತೋ ಜೃಮ್ಭತೇ
ಭೋ ಸಾಧೋ ಕ್ಷಣಭಂಗುರೇ ತದಿತರೇ ಭೋಗೇ ರತಿಂ ಮಾ ಕೃಥಾಃ ॥ 27 ॥
ಸಾ ರಮ್ಯಾ ನಗರೀ ಮಹಾನ್ಸ ನೃಪತಿಃ ಸಾಮನ್ತಚಕ್ರಂ ಚ ತತ್
ಪಾರ್ಶ್ವೇ ತಸ್ಯ ಚ ಸಾ ವಿದಗ್ಧಪರಿಷತ್ತಶ್ಚನ್ದ್ರಬಿಮ್ಬಾನನಾಃ ।
ಉತ್ಸಿಕ್ತಃ ಸ ಚ ರಾಜಪುತ್ರನಿವಹಸ್ತೇ ಬನ್ದಿನಸ್ತಾಃ ಕಥಾಃ
ಸರ್ವಂ ಯಸ್ಯ ವಶಾದಗಾತ್ಸ್ಮೃತಿಪಥಂ ಕಾಲಾಯ ತಸ್ಮೈ ನಮಃ ॥ 28 ॥
ಫಲಮಲಮಶನಾಯ ಸ್ವಾದು ಪಾನಾಯ ತೋಯಮ್
ಶಯನಮವನಿಪೃಷ್ಠಂ ವಲ್ಕಲೇ ವಾಸಸೀ ಚ ।
ನವಧನಮಧುಪಾನಭ್ರಾನ್ತಸರ್ವೇನ್ದ್ರಿಯಾಣಾ-
ಮವಿನಯಮನುಮನ್ತಂ ನೋತ್ಸಹೇ ದುರ್ಜನಾನಾಮ್ ॥ 29 ॥
ಅಶೀಮಹಿ ವಯಂ ಭಿಕ್ಷಾಮಾಶಾವಾಸೋ ವಸೀಮಹಿ ।
ಶಯೀಮಹಿ ಮಹೀಪೃಷ್ಠೇ ಕುರ್ವೀಮಹಿ ಕಿಮೀಶ್ವರೈಃ ॥ 30 ॥
ಅಹೌ ವಾ ಹಾರೇ ವಾ ಬಲವತಿ ರಿಪೌ ವಾ ಸುಹೃದಿ ವಾ
ಮಣೌ ವಾ ಲೋಷ್ಠೇ ವಾ ಕುಸುಮಶಯನೇ ವಾ ದೃಶದಿ ವಾ ।
ತೃಣೇ ವಾ ಸ್ತ್ರೈಣೇ ವಾ ಮಮ ಸಮದೃಶೋ ಯಾನ್ತು ದಿವಸಾಃ
ಕ್ವಚಿತ್ಪುಣ್ಯಾರಣ್ಯೇ ಶಿವ ಶಿವ ಶಿವೇತಿ ಪ್ರಲಪತಃ ॥ 31 ॥
ಅನಾವರ್ತೀ ಕಾಲೋ ವ್ರಜತಿ ಸ ವೃಥಾ ತನ್ನ ಗಣಿತಂ
ದಶಾಸ್ತಾಸ್ತಾ ಸೋಢಾ ವ್ಯಸನಶತಸಮ್ಪಾತವಿಧುರಾಃ ।
ಕಿಯದ್ವಾ ವಕ್ಷ್ಯಾಮಃ ಕಿಮಿವ ಬತ ನಾತ್ಮನ್ಯಪಕೃತಂ
ತ್ವಯಾ ಯಾವತ್ತಾವತ್ಪುನರಪಿ ತದೇವ ವ್ಯವಸಿತಮ್ ॥ 32 ॥
ದದತು ದದತು ಗಾಲೀರ್ಗಾಲೀಮನ್ತೋ ಭವನ್ತೋ
ವಯಮಪಿ ತದಭಾವಾದ್ಗಾಲಿದಾನೇಽಸಮರ್ಥಾಃ ।
ಜಗತಿ ವಿದಿತಮೇತದ್ದೀಯತೇ ವಿದ್ಯಮಾನಂ
ನಹಿ ಶಶಕವಿಷಾಣಂ ಕೋಽಪಿ ಕಸ್ಮೈ ದದಾತಿ ॥ 33 ॥
ಭವ್ಯಂ ಭುಕ್ತಂ ತತಃ ಕಿಂ ಕದಶನಮಥವಾ ವಾಸರಾನ್ತೇ ತತಃ ಕಿಂ
ಕೌಪೀನಂ ವಾ ತತಃ ಕಿಂ ಕಿಮಥ ಸಿತಮಹಚ್ಚಾಮ್ಬರಂ ವಾ ತತಃ ಕಿಮ್ ।
ಏಕಾ ಭಾರ್ಯಾ ತತಃ ಕಿಂ ಶತಗುಣಗುಣಿತಾ ಕೋಟಿರೇಕಾ ತತಃ ಕಿಂ
ತ್ವೇಕೋ ಭ್ರಾನ್ತಸ್ತತಃ ಕಿಂ ಕರಿತುರಗಶತೈರ್ವೇಷ್ಟಿತೋ ವಾ ತತಃ ಕಿಮ್ ॥ 34 ॥
ಭೂಃ ಪರ್ಯಂಕೋ ನಿಜಭುಜಲತಾ ಕನ್ದುಕಂ ಖಂ ವಿತಾನಂ
ದೀಪಶ್ಚಾನ್ದ್ರೋ ವಿರತಿವನಿತಾಲಬ್ಧಸಂಗಪ್ರಮೋದಃ ।
ದಿಕ್ಕಾನ್ತಾಭಿಃ ಪವನಚಮರೈರ್ವೀಜ್ಯಮಾನಃ ಸಮನ್ತಾ-
ದ್ಭಿಕ್ಷುಃ ಶೇತೇ ನೃಪ ಇವ ಭುವಿ ತ್ಯಕ್ತಸರ್ವಸ್ಪೃಹೋಽಪಿ ॥ 35 ॥
ಸಂಮೋಹಯನ್ತಿ ಮದಯನ್ತಿ ವಿಡಮ್ಬಯನ್ತಿ
ನಿರ್ಭರ್ತ್ಸಯನ್ತಿ ರಮಯನ್ತಿ ವಿಷಾದಯನ್ತಿ ।
ಏತಾಃ ಪ್ರವಿಶ್ಯ ಸದಯಂ ಹೃದಯಂ ನರಾಣಾಂ
ಕಿಂ ನಾಮ ವಾಮನಯನಾ ನ ಸಮಾಚರನ್ತಿ ॥ 36 ॥
ಸ್ಥಿತಿಃ ಪುಣ್ಯೇಽರಣ್ಯೇ ಸಹ ಪರಿಚಯೋ ಹನ್ತ ಹರಿಣೈಃ
ಫಲೈರ್ಮೇಧ್ಯಾ ವೃತ್ತಿಃ ಪ್ರತಿನದಿ ಚ ತಲ್ಪಾನಿ ದೃಷದಃ ।
ಇತೀಯಂ ಸಾಮಗ್ರೀ ಭವತಿ ಹರಭಕ್ತಿಂ ಸ್ಪೃಹಯತಾಂ
ವನಂ ವಾ ಗೇಹಂ ವಾ ಸದೃಶಮುಪಶಾನ್ತ್ಯೇಕಮನಸಾಮ್ ॥ 37 ॥
ಸ್ವಾದಿಷ್ಠಂ ಮಧುನೋ ಘೃತಾಚ್ಚ ರಸವದ್ಯತ್ಪ್ರಸ್ರವತ್ಯಕ್ಷರೇ
ದೈವೀ ವಾಗಮೃತಾತ್ಮನೋ ರಸವತಸ್ತೇನೈವ ತೃಪ್ತಾ ವಯಮ್ ।
ಕುಕ್ಷೌ ಯಾವದಿಮೇ ಭವನ್ತಿ ಧೃತಯೇ ಭಿಕ್ಷಾಹೃತಾಃ ಸಕ್ತವ-
ಸ್ತಾವದ್ದಾಸ್ಯಕೃತಾರ್ಜನೈರ್ನ ಹಿ ಧನೈರ್ವೃತ್ತಿಂ ಸಮೀಹಾಮಹೇ ॥ 38 ॥
