Templesinindiainfo

Best Spiritual Website

1000 Names of Sri Shiva from Vayupurana Adhyaya 30 Lyrics in Bengali

Shiva Sahasranama Stotram from Vayu Purana Adhyaya 30 in Bengali:

॥ শ্রীশিবসহস্রনামস্তোত্রং বায়ুপুরাণে অধ্যায় ৩০ ॥

॥ দক্ষ উবাচ ॥

নমস্তে দেবদেবেশ দেবারিবলসূদন ।
দেবেন্দ্র হ্যমরশ্রেষ্ঠ দেবদানবপূজিত ॥ ৩০.১৮০ ॥

সহস্রাক্ষ বিরূপাক্ষ ত্র্যক্ষ য়ক্ষাধিপপ্রিয় ।
সর্বতঃ পাণিপাদস্ত্বং সর্বতোঽক্ষিশিরোমুখঃ ।
সর্বতঃ শ্রুতিমান্ লোকে সর্বানাবৃত্য তিষ্ঠসি ॥ ৩০.১৮১ ॥

শঙ্কুকর্ণ মহাকর্ণ কুম্ভকর্ণার্ণবালয় ।
গজেন্দ্রকর্ণ গোকর্ণ পাণিকর্ণ নমোঽস্তু তে ॥ ৩০.১৮২ ॥

শতোদর শতাবর্ত্ত শতজিহ্ব শতানন ।
গায়ন্তি ত্বাং গায়ত্রিণো হ্যর্চ্চয়ন্তি তথার্চ্চিনঃ ॥ ৩০.১৮৩ ॥

দেবদানবগোপ্তা চ ব্রহ্মা চ ত্বং শতক্রতুঃ ।
মূর্ত্তীশস্ত্বং মহামূর্তে সমুদ্রাম্বু ধরায় চ ॥ ৩০.১৮৪ ॥

সর্বা হ্যস্মিন্ দেবতাস্তে গাবো গোষ্ঠ ইবাসতে ।
শরীরন্তে প্রপশ্যামি সোমমগ্নিং জলেশ্বরম্ ॥ ৩০.১৮৫ ॥

আদিত্যমথ বিষ্ণুঞ্চ ব্রহ্মাণং সবৃহস্পতিম্ ।
ক্রিয়া কার্য্যং কারণঞ্চ কর্ত্তা করণমেব চ ॥ ৩০.১৮৬ ॥

অসচ্চ সদসচ্চৈব তথৈব প্রভবাব্যয়ম্ ।
নমো ভবায় শর্বায় রুদ্রায় বরদায় চ ॥ ৩০.১৮৭ ॥

পশূনাং পতয়ে চৈব নমস্ত্বন্ধকঘাতিনে ।
ত্রিজটায় ত্রিশীর্ষায় ত্রিশূলবরধারিণে ॥ ৩০.১৮৮ ॥

ত্র্যম্বকায় ত্রিনেত্রায় ত্রিপুরঘ্নায় বৈ নমঃ ।
নমশ্চণ্ডায় মুণ্ডায় প্রচণ্ডায় ধরায় চ ॥ ৩০.১৮৯ ॥

দণ্ডি মাসক্তকর্ণায় দণ্ডিমুণ্ডায় বৈ নমঃ ।
নমোঽর্দ্ধদণ্ডকেশায় নিষ্কায় বিকৃতায় চ ॥ ৩০.১৯০ ॥

বিলোহিতায় ধূম্রায় নীলগ্রীবায় তে নমঃ ।
নমস্ত্বপ্রতিরূপায় শিবায় চ নমোঽস্তু তে ॥ ৩০.১৯১ ॥

সূর্য্যায় সূর্য্যপতয়ে সূর্য্যধ্বজপতাকিনে ।
নমঃ প্রমথনাথায় বৃষস্কন্ধায় ধন্বিনে ॥ ৩০.১৯২ ॥

নমো হিরণ্যগর্ভায় হিরণ্যকবচায় চ ।
হিরণ্যকৃতচূডায় হিরণ্যপতয়ে নমঃ ॥ ৩০.১৯৩ ॥

সত্রঘাতায় দণ্ডায় বর্ণপানপুটায় চ ।
নমঃ স্তুতায় স্তুত্যায় স্তূয়মানায় বৈ নমঃ ॥ ৩০.১৯৪ ॥

সর্বায়াভক্ষ্যভক্ষ্যায় সর্বভূতান্ত্তরাত্মনে ।
নমো হোত্রায় মন্ত্রায় শুক্লধ্বজপতাকিনে ॥ ৩০.১৯৫ ॥

নমো নমায় নম্যায় নমঃ কিলিকিলায় চ ।
নমস্তে শয়মানায় শয়িতায়োত্থিতায় চ ॥ ৩০.১৯৬ ॥

স্থিতায় চলমানায় মুদ্রায় কুটিলায় চ ।
নমো নর্ত্তনশীলায় মুখবাদিত্রকারিণে ॥ ৩০.১৯৭ ॥

নাট্যোপহারলুব্ধায় গীতবাদ্যরতায় চ ।
নমো জ্যেষ্ঠায় শ্রেষ্ঠায় বলপ্রমথনায় চ ॥ ৩০.১৯৮ ॥

কলনায় চ কল্পায় ক্ষয়ায়োপক্ষয়ায় চ ।
ভীমদুন্দুভিহাসায় ভীমসেনপ্রিয়ায় চ ॥ ৩০.১৯৯ ॥

উগ্রায় চ নমো নিত্যং নমস্তে দশবাহবে ।
নমঃ কপালহস্তায় চিতাভস্মপ্রিয়ায় চ ॥ ৩০.২০০ ॥

বিভীষণায় ভীষ্মায় ভীষ্মব্রতধরায় চ ।
নমো বিকৃতবক্ষায় খড্গজিহ্বাগ্রদংষ্ট্রিণে ॥ ৩০.২০১ ॥

পক্বামমাংসলুব্ধায় তুম্ববীণাপ্রিয়ায় চ ।
নমো বৃষায় বৃষ্যায় বৃষ্ণয়ে বৃষণায় চ ॥ ৩০.২০২ ॥

কটঙ্কটায় চণ্ডায় নমঃ সাবয়বায় চ ।
নমস্তে বরকৃষ্ণায় বরায় বরদায় চ ॥ ৩০.২০৩ ॥

বরগন্ধমাল্যবস্ত্রায় বরাতিবরয়ে নমঃ ।
নমো বর্ষায় বাতায় ছায়ায়ৈ আতপায় চ ॥ ৩০.২০৪ ॥

নমো রক্তবিরক্তায় শোভনায়াক্ষমালিনে ।
সম্ভিন্নায় বিভিন্নায় বিবিক্তবিকটায় চ ॥ ৩০.২০৫ ॥

অঘোররূপরূপায় ঘোরঘোরতরায় চ ।
নমঃ শিবায় শান্তায় নমঃ শান্ততরায় চ ॥ ৩০.২০৬ ॥

একপাদ্বহুনেত্রায় একশীর্ষন্নমোঽস্তু তে ।
নমো বৃদ্ধায় লুব্ধায় সংবিভাগপ্রিয়ায় চ ॥ ৩০.২০৭ ॥

পঞ্চমালার্চিতাঙ্গায় নমঃ পাশুপতায় চ ।
নমশ্চণ্ডায় ঘণ্টায় ঘণ্টয়া জগ্ধরন্ধ্রিণে ॥ ৩০.২০৮ ॥

সহস্রশতঘণ্টায় ঘণ্টামালাপ্রিয়ায় চ ।
প্রাণদণ্ডায় ত্যাগায় নমো হিলিহিলায় চ ॥ ৩০.২০৯ ॥

হূংহূঙ্কারায় পারায় হূংহূঙ্কারপ্রিয়ায় চ ।
নমশ্চ শম্ভবে নিত্যং গিরি বৃক্ষকলায় চ ॥ ৩০.২১০ ॥

গর্ভমাংসশৃগালায় তারকায় তরায় চ ।
নমো য়জ্ঞাধিপতয়ে দ্রুতায়োপদ্রুতায় চ ॥ ৩০.২১১ ॥

য়জ্ঞবাহায় দানায় তপ্যায় তপনায় চ ।
নমস্তটায় ভব্যায় তডিতাং পতয়ে নমঃ ॥ ৩০.২১২ ॥

অন্নদায়ান্নপতয়ে নমোঽস্ত্বন্নভবায় চ ।
নমঃ সহস্রশীর্ষ্ণে চ সহস্রচরণায় চ ॥ ৩০.২১৩ ॥

সহস্রোদ্যতশূলায় সহস্রনয়নায় চ ।
নমোঽস্তু বালরূপায় বালরূপধরায় চ ॥ ৩০.২১৪ ॥

বালানাঞ্চৈব গোপ্ত্রে চ বালক্রীডনকায় চ ।
নমঃ শুদ্ধায় বুদ্ধায় ক্ষোভণায়াক্ষতায় চ ॥ ৩০.২১৫ ॥

তরঙ্গাঙ্কিতকেশায় মুক্তকেশায় বৈ নমঃ ।
নমঃ ষট্কর্মনিষ্ঠায় ত্রিকর্মনিরতায় চ ॥ ৩০.২১৬ ॥

বর্ণাশ্রমাণাং বিধিবত্ পৃথক্কর্মপ্রবর্তিনে ।
নমো ঘোষায় ঘোষ্যায় নমঃ কলকলায় চ ॥ ৩০.২১৭ ॥

শ্বেতপিঙ্গলনেত্রায় কৃষ্ণরক্তক্ষণায় চ ।
ধর্মার্থ কামমোক্ষায় ক্রথায় কথনায় চ ॥ ৩০.২১৮ ॥

সাঙ্খ্যায় সাঙ্খ্যমুখ্যায় য়োগাধিপতয়ে নমঃ ।
নমো রথ্যবিরথ্যায় চতুষ্পথরতায় চ ॥ ৩০.২১৯ ॥

কৃষ্ণা জিনোত্তরীয়ায় ব্যালয়জ্ঞোপবীতিনে ।
ঈশানবজ্রসংহায় হরিকেশ নমোঽস্তু তে ।
অবিবেকৈকনাথায় ব্যক্তাব্যক্ত নমোঽস্তু তে ॥ ৩০.২২০ ॥

কাম কামদ কামধ্ন ধৃষ্টোদৃপ্তনিষূদন ।
সর্ব সর্বদ সর্বজ্ঞ সন্ধ্যারাগ নমোঽস্তু তে ॥ ৩০.২২১ ॥

মহাবাল মহাবাহো মহাসত্ত্ব মহাদ্যুতে ।
মহামেঘবরপ্রেক্ষ মহাকাল নমোঽস্তু তে ॥ ৩০.২২২ ॥

স্থূলজীর্ণাঙ্গজটিনে বল্কলাজিনধারিণে ।
দীপ্তসূর্যাগ্নিজটিনে বল্কলাজিনবাসসে ।
সহস্রসূর্যপ্রতিম তপোনিত্য নমোঽস্তু তে ॥ ৩০.২২৩ ॥

উন্মাদনশতাবর্ত্ত গঙ্গাতোয়ার্দ্ধমূর্দ্ধজ ।
চন্দ্রাবর্ত্ত য়ুগাবর্ত্ত মেঘাবর্ত্ত নমোঽস্তু তে ॥ ৩০.২২৪ ॥

ত্বমন্নমন্নকর্ত্তা চ অন্নদশ্চ ত্বমেব হি ।
অন্নস্রষ্টা চ পক্তা চ পক্বভুক্তপচে নমঃ ॥ ৩০.২২৫ ॥

জরায়ুজোঽণ্ডজশ্চৈব স্বেদজোদ্ভিজ্জ এব চ ।
ত্বমেব দেবদেবশো ভূতগ্রামশ্চতুর্বিধঃ ॥ ৩০.২২৬ ।
চরাচরস্য ব্রহ্মা ত্বং প্রতিহর্ত্তা ত্বমেব চ ।
ত্বমেব ব্রহ্মবিদুষামপি ব্রহ্মবিদাং বরঃ ॥ ৩০.২২৭ ॥

সত্ত্বস্য পরমা য়োনিরব্বায়ুজ্যোতিষাং নিধিঃ ।
ঋক্সামানি তথোঙ্কারমাহুস্ত্বাং ব্রহ্মবাদিনঃ ॥ ৩০.২২৮ ॥

হবির্হাবী হবো হাবী হুবাং বাচাহুতিঃ সদা ।
গায়ন্তি ত্বাং সুরশ্রেষ্ঠ সামগা ব্রহ্মবাদিনঃ ॥ ৩০.২২৯ ॥

য়জুর্ময়ো ঋঙ্ময়শ্চ সামাথর্বময়স্তথা ।
পঠ্যসে ব্রহ্মবিদ্ভিস্ত্বং কল্পোপনিষদাং গণৈঃ ॥ ৩০.২৩০ ॥

ব্রাহ্মণাঃ ক্ষত্রিয়া বৈশ্যাঃ শূদ্রা বর্ণাবরাশ্চ য়ে ।
ত্বামেব মেঘসঙ্ঘাশ্চ বিশ্বস্ত নিতগর্জ্জিতম্ ॥ ৩০.২৩১ ॥

সংবত্সরস্ত্বমৃতবো মাসা মাসার্দ্ধমেব চ ।
কলা কাষ্ঠা নিমেষাশ্চ নক্ষত্রাণি য়ুগা গ্রহাঃ ॥ ৩০.২৩২ ॥

বৃষাণাং ককুদং ত্বং হি গিরীণাং শিখরাণি চ ।
সিংহো মৃগাণাং পততাং তার্ক্ষ্যোঽনন্তশ্চ ভোগিনাম্ ॥ ৩০.২৩৩ ॥

ক্ষীরোদো হ্যুদধীনাঞ্চ য়ন্ত্রাণাং ধনুরেব চ ।
বজ্রম্প্রহরণানাঞ্চ ব্রতানাং সত্যমেব চ ॥ ৩০.২৩৪ ॥

ইচ্ছা দ্বেষশ্চ রাগশ্চ মোহঃ ক্ষামো দমঃ শমঃ ।
ব্যবসায়ো ধৃতির্লোভঃ কামক্রোধৌ জয়াজয়ৌ ॥ ৩০.২৩৫ ॥

ত্বং গদী ত্বং শরী চাপি খট্বাঙ্গী ঝর্ঝরী তথা ।
ছেত্তা ভেত্তা প্রহর্ত্তা চ ত্বং নেতাপ্যন্তকো মতঃ ॥ ৩০.২৩৬ ॥

দশলক্ষণসংয়ুক্তো ধর্মোঽর্থঃ কাম এব চ ।
ইন্দ্রঃ সমুদ্রাঃ সরিতঃ পল্বলানি সরাংসি চ ॥ ৩০.২৩৭ ॥

লতাবল্লী তৃণৌষধ্যঃ পশবো মৃগপক্ষিণঃ ।
দ্রব্যকর্মগুণারম্ভঃ কালপুষ্পফলপ্রদঃ ॥ ৩০.২৩৮ ॥

আদিশ্চান্তশ্চ মধ্যশ্চ গায়ত্র্যোঙ্কার এব চ ।
হরিতো লোহিতঃ কৃষ্ণো নীলঃ পীতস্তথারুণঃ ॥ ৩০.২৩৯ ॥

কদ্রুশ্চ কপিলশ্চৈব কপোতো মেচকস্তথা ।
সুবর্ণরেতা বিখ্যাতঃ সুবর্ণশ্চাপ্যতো মতঃ ॥ ৩০.২৪০ ॥

সুবর্ণনামা চ তথা সুবর্ণপ্রিয় এব চ ।
ত্বমিন্দ্রোঽথ য়মশ্চৈব বরুণো ধনদোঽনলঃ ॥ ৩০.২৪১ ॥

উত্ফুল্লশ্চিত্রভানুশ্চ স্বর্ভানুর্ভানুরেব চ ।
হোত্রং হোতা চ হোমস্ত্বং হুতঞ্চ প্রহুতং প্রভুঃ ॥ ৩০.২৪২ ॥

সুপর্ণঞ্চ তথা ব্রহ্ম য়জুষাং শতরুদ্রিয়ম্ ।
পবিত্রাণাং পবিত্রং চ মঙ্গলানাঞ্চ মঙ্গলম্ ॥ ৩০.২৪৩ ॥

গিরিঃ স্তোকস্তথা বৃক্ষো জীবঃ পুদ্গল এব চ ।
সত্ত্বং ত্বঞ্চ রজস্ত্বঞ্চ তমশ্চ প্রজনং তথা ॥ ৩০.২৪৪ ॥

প্রাণোঽপানঃ সমানশ্চ উদানো ব্যান এব চ ।
উন্মেষশ্চৈব মেষশ্চ তথা জৃম্ভিতমেব চ ॥ ৩০.২৪৫ ॥

লোহিতাঙ্গো গদী দংষ্ট্রী মহাবক্ত্রো মহোদরঃ ।
শুচিরোমা হরিচ্ছ্মশ্রুরূর্দ্ধ্বকেশস্ত্রিলোচনঃ ॥ ৩০.২৪৬ ॥

গীতবাদিত্রনৃত্যাঙ্গো গীতবাদনকপ্রিয়ঃ ।
মত্স্যো জলী জলো জল্যো জবঃ কালঃ কলী কলঃ ॥ ৩০.২৪৭ ॥

বিকালশ্চ সুকালশ্চ দুষ্কালঃ কলনাশনঃ ।
মৃত্যুশ্চৈব ক্ষয়োঽন্তশ্চ ক্ষমাপায়করো হরঃ ॥ ৩০.২৪৮ ॥

সংবর্ত্তকোঽন্তকশ্চৈব সংবর্ত্তকবলাহকৌ ।
ঘটো ঘটীকো ঘণ্টীকো চূডালোলবলো বলম্ ॥ ৩০.২৪৯ ॥

ব্রহ্মকালোঽগ্নিবক্ত্রশ্চ দণ্ডী মুণ্ডী চ দণ্ডধৃক্ ।
চতুর্যুগশ্চতুর্বেদশ্চতুর্হোত্রশ্চতুষ্পথঃ ॥ ৩০.২৫০ ॥

চতুরা শ্রমবেত্তা চ চাতুর্বর্ণ্যকরশ্চ হ ।
ক্ষরাক্ষরপ্রিয়ো ধূর্ত্তোঽগণ্যোঽগণ্যগণাধিপঃ ॥ ৩০.২৫১ ॥

রুদ্রাক্ষমাল্যাম্বরধরো গিরিকো গিরিকপ্রিয়ঃ ।
শিল্পীশঃ শিল্পিনাং শ্রেষ্ঠঃ সর্বশিল্পপ্রবর্ত্তকঃ ॥ ৩০.২৫২ ॥

ভগনেত্রান্তকশ্চন্দ্রঃ পূষ্ণো দন্তবিনাশনঃ ।
গূঢাবর্ত্তশ্চ গূঢশ্চ গূঢপ্রতিনিষেবিতা ॥ ৩০.২৫৩ ॥

তরণস্তারকশ্চৈব সর্বভূতসুতারণঃ ।
ধাতা বিধাতা সত্বানাং নিধাতা ধারণো ধরঃ ॥ ৩০.২৫৪ ॥

তপো ব্রহ্ম চ সত্যঞ্চ ব্রহ্মচর্যমথার্জবম্ ।
ভূতাত্মা ভূতকৃদ্ভূতো ভূতভব্যভবোদ্ভবঃ ॥ ৩০.২৫৫ ॥

ভূর্ভুবঃস্বরিতশ্চৈব তথোত্পত্তির্মহেশ্বরঃ ।
ঈশানো বীক্ষণঃ শান্তো দুর্দান্তো দন্তনাশনঃ ॥ ৩০.২৫৬ ॥

ব্রহ্মাবর্ত্ত সুরাবর্ত্ত কামাবর্ত্ত নমোঽস্তু তে ।
কামবিম্বনিহর্ত্তা চ কর্ণিকাররজঃপ্রিয়ঃ ॥ ৩০.২৫৭ ॥

মুখচন্দ্রো ভীমমুখঃ সুমুখো দুর্মুখো মুখঃ ।
চতুর্মুখো বহুমুখো রণে হ্যভিমুখঃ সদা ॥ ৩০.২৫৮ ॥

হিরণ্যগর্ভঃ শকুনির্মহোদধিঃ পরো বিরাট্ ।
অধর্মহা মহাদণ্ডো দণ্ডধারী রণপ্রিয়ঃ ॥ ৩০.২৫৯ ॥

গোতমো গোপ্রতারশ্চ গোবৃষেশ্বরবাহনঃ ।
ধর্মকৃদ্ধর্মস্রষ্টা চ ধর্মো ধর্মবিদুত্তমঃ ॥ ৩০.২৬০ ॥

ত্রৈলোক্যগোপ্তা গোবিন্দো মানদো মান এব চ ।
তিষ্ঠন্ স্থিরশ্চ স্থাণুশ্চ নিষ্কম্পঃ কম্প এব চ ॥ ৩০.২৬১ ॥

দুর্বারণো দুর্বিষদো দুঃসহো দুরতিক্রমঃ ।
দুর্দ্ধরো দুষ্প্রকম্পশ্চ দুর্বিদো দুর্জ্জয়ো জয়ঃ ॥ ৩০.২৬২ ॥

শশঃ শশাঙ্কঃ শমনঃ শীতোষ্ণং দুর্জরাঽথ তৃট্ ।
আধয়ো ব্যাধয়শ্চৈব ব্যাধিহা ব্যাধিগশ্চ হ ॥ ৩০.২৬৩ ॥

সহ্যো য়জ্ঞো মৃগা ব্যাধা ব্যাধীনামাকরোঽকরঃ ।
শিখণ্ডী পুণ্ডরীকাক্ষঃ পুণ্ডরীকাবলোকনঃ ॥ ৩০.২৬৪ ॥

দণ্ডধরঃ সদণ্ডশ্চ দণ্ডমুণ্ডবিভূষিতঃ ।
বিষপোঽমৃতপশ্চৈব সুরাপঃ ক্ষীরসোমপঃ ॥ ৩০.২৬৫ ॥

মধুপশ্চাজ্যপশ্চৈব সর্বপশ্চ মহাবলঃ ।
বৃষাশ্ববাহ্যো বৃষভস্তথা বৃষভলোচনঃ ॥ ৩০.২৬৬ ॥

বৃষভশ্চৈব বিখ্যাতো লোকানাং লোকসত্কৃতঃ ।
চন্দ্রাদিত্যৌ চক্ষুষী তে হৃদয়ঞ্চ পিতামহঃ ।
অগ্নিরাপস্তথা দেবো ধর্মকর্মপ্রসাধিতঃ ॥ ৩০.২৬৭ ॥

ন ব্রহ্মা ন চ গোবিন্দঃ পুরাণঋষয়ো ন চ ।
মাহাত্ম্যং বেদিতুং শক্তা য়াথাতথ্যেন তে শিব ॥ ৩০.২৬৮ ॥

য়া মূর্ত্তয়ঃ সুসূক্ষ্মাস্তে ন মহ্যং য়ান্তি দর্শনম্ ।
তাভির্মাং সততং রক্ষ পিতা পুত্রমিবৌরসম্ ॥ ৩০.২৬৯ ॥

রক্ষ মাং রক্ষণীয়োঽহং তবানঘ নমোঽস্তু তে ॥

ভক্তানুকম্পী ভগবান্ ভক্তশ্চাহং সদা ত্বয়ি ॥ ৩০.২৭০ ॥

য়ঃ সহস্রাণ্যনেকানি পুংসামাহৃত্য দুর্দ্দশঃ ।
তিষ্ঠত্যেকঃ সমুদ্রান্তে স মে গোপ্তাস্তু নিত্যশঃ ॥ ৩০.২৭১ ॥

য়ং বিনিদ্রা জিতশ্বাসাঃ সত্ত্বস্থাঃ সমদর্শিনঃ ।
জ্যোতিঃ পশ্যন্তি য়ুঞ্জানাস্তস্মৈ য়োগাত্মনে নমঃ ॥ ৩০.২৭২ ॥

সম্ভক্ষ্য সর্ব ভূতানি য়ুগান্তে সমুপস্থিতে ।
য়ঃ শেতে জলমধ্যস্থস্তং প্রপদ্যেঽপ্সুশায়িনম্ ॥ ৩০.২৭৩ ॥

প্রবিশ্য বদনে রাহোর্যঃ সোমং গ্রসতে নিশি ।
গ্রসত্যর্কঞ্চ স্বর্ভানুর্ভূত্বা সোমাগ্নিরেব চ ॥ ৩০.২৭৪ ॥

য়েঽঙ্গুষ্ঠমাত্রাঃ পুরুষা দেহস্থাঃ সর্বদেহিনাম্ ।
রক্ষন্তু তে হি মাং নিত্যং নিত্যমাপ্যায়য়ন্তু মাম্ ॥ ৩০.২৭৫ ॥

য়ে চাপ্যুত্পতিতা গর্ভাদধোভাগগতাশ্চ য়ে ।
তেষাং স্বাহাঃ স্বধাশ্চৈব আপ্নুবন্তু স্বদন্তু চ ॥ ৩০.২৭৬ ॥

য়ে ন রোদন্তি দেহস্থাঃ প্রাণিনো রোদয়ন্তি চ ।
হর্ষয়ন্তি চ হৃষ্যন্তি নমস্তেভ্যোঽস্তু নিত্যশঃ ॥ ৩০.২৭৭ ॥

য়ে সমুদ্রে নদীদুর্গে পর্বতেষু গুহাসু চ ।
বৃক্ষমূলেষু গোষ্ঠেষু কান্তারগহনেষু ন ॥ ৩০.২৭৮ ॥

চতুষ্পথেষু রথ্যাসু চত্বরেষু সভাসু চ ।
চন্দ্রার্কয়োর্মধ্যগতা য়ে চ চন্দ্রার্করশ্মিষু ॥ ৩০.২৭৯ ॥

রসাতলগতা য়ে চ য়ে চ তস্মাত্পরঙ্গতাঃ ।
নমস্তেভ্যো নমস্তেভ্যো নমস্তেভ্যশ্চ নিত্যশঃ ।
সূক্ষ্মাঃ স্থূলাঃ কৃশা হ্রস্বা নমস্তেভ্যস্তু নিত্যশঃ ॥ ৩০.২৮০ ॥

সর্বস্ত্বং সর্বগো দেব সর্বভূতপতির্ভবান্ ।
সর্বভূতান্তরাত্মা চ তেন ত্বং ন নিমন্ত্রিতঃ ॥ ৩০.২৮১ ॥

ত্বমেব চেজ্যসে য়স্মাদ্যজ্ঞৈর্বিবিধদক্ষিণৈঃ ।
ত্বমেব কর্ত্তা সর্বস্য তেন ত্বং ন নিমন্ত্রিতঃ ॥ ৩০.২৮২ ॥

অথ বা মায়য়া দেব মোহিতঃ সূক্ষ্ময়া ত্বয়া ।
এতস্মাত্ কারণাদ্বাপি তেন ত্বং ন নিমন্ত্রিতঃ ॥ ৩০.২৮৩ ॥

প্রসীদ মম দেবেশ ত্বমেব শরণং মম ।
ত্বং গতিস্ত্বং প্রতিষ্ঠা চ ন চান্যাস্তি ন মে গতিঃ ॥ ৩০.২৮৪ ॥

স্তুত্বৈবং স মহাদেবং বিররাম প্রজাপতিঃ ।
ভগবানপি সুপ্রীতঃ পুনর্দক্ষমভাষত ॥ ৩০.২৮৫ ॥

পরিতুষ্টোঽস্মি তে দক্ষ স্তবেনানেন সুব্রত ।
বহুনাত্র কিমুক্তেন মত্সমীপং গমিষ্যসি ॥ ৩০.২৮৬ ॥

অথৈনমব্রবীদ্বাক্যং ত্রৈলোক্যাধিপতির্ভবঃ ।
কৃত্বাশ্বাসকরং বাক্যং বাক্যজ্ঞো বাক্যমাহতম্ ॥ ৩০.২৮৭ ॥

দক্ষ দক্ষ ন কর্ত্তব্যো মন্যুর্বিঘ্নমিমং প্রতি ।
অহং য়জ্ঞহা ন ত্বন্যো দৃশ্যতে তত্পুরা ত্বয়া ॥ ৩০.২৮৮ ॥

ভূয়শ্চ তং বরমিমং মত্তো গৃহ্ণীষ্ব সুব্রত ।
প্রসন্নবদনো ভূত্বা ত্বমেকাগ্রমনাঃ শৃণু ॥ ৩০.২৮৯ ॥

অশ্বমেধসহস্রস্য বাজপেয়শতস্য চ ।
প্রজাপতে মত্প্রসাদাত্ ফলভাগী ভবিষ্যসি ॥ ৩০.২৯০ ॥

বেদান্ ষডঙ্গানুদ্ধৃত্য সাঙ্খ্যান্যোগাংশ্চ কৃত্স্নশঃ ।
তপশ্চ বিপুলং তপ্ত্বা দুশ্চরং দেবদানবৈঃ ॥ ৩০.২৯১ ॥

অর্থৈর্দ্দশার্দ্ধসংয়ুক্তৈর্গূঢমপ্রাজ্ঞনির্ম্মিতম্ ।
বর্ণাশ্রমকৃতৈর্ধর্মৈংর্বিপরীতং ক্বচিত্সমম্ ॥ ৩০.২৯২ ॥

শ্রুত্যর্থৈরধ্যবসিতং পশুপাশবিমোক্ষণম্ ।
সর্বেষামাশ্রমাণান্তু ময়া পাশুপতং ব্রতম্ ।
উত্পাদিতং শুভং দক্ষ সর্বপাপবিমোক্ষণম্ ॥ ৩০.২৯৩ ॥

অস্য চীর্ণস্য য়ত্সম্যক্ ফলং ভবতি পুষ্কলম্ ।
তদস্তু তে মহাভাগ মানসস্ত্যজ্যতাং জ্বরঃ ॥ ৩০.২৯৪ ॥

এবমুক্ত্বা মহাদেবঃ সপত্নীকঃ সহানুগঃ ।
অদর্শনমনুপ্রাপ্তো দক্ষস্যামিতবিক্রমঃ ॥ ৩০.২৯৫ ॥

অবাপ্য চ তদা ভাগং য়থোক্তং ব্রহ্মণা ভবঃ ।
জ্বরঞ্চ সর্বধর্মজ্ঞো বহুধা ব্যভজত্তদা ।
শান্ত্যর্থং সর্বভূতানাং শৃণুধ্বং তত্র বৈ দ্বিজাঃ ॥ ৩০.২৯৬ ॥

শীর্ষাভিতাপো নাগানাং পর্বতানাং শিলারুজঃ ।
অপান্তু নালিকাং বিদ্যান্নির্মোকম্ভুজগেষ্বপি ॥ ৩০.২৯৭ ॥

স্বৌরকঃ সৌরভেয়াণামূষরঃ পৃথিবীতলে ।
ইভা নামপি ধর্মজ্ঞ দৃষ্টিপ্রত্যবরোধনম্ ॥ ৩০.২৯৮ ॥

রন্ধ্রোদ্ভূতং তথাশ্বানাং শিখোদ্ভেদশ্চ বর্হিণাম্ ।
নেত্ররোগঃ কোকিলানাং জ্বরঃ প্রোক্তো মহাত্মভিঃ ॥ ৩০.২৯৯ ॥

অজানাং পিত্তভেদশ্চ সর্বেষামিতি নঃ শ্রুতম্ ।
শুকানামপি সর্বেষাং হিমিকা প্রোচ্যতে জ্বরঃ ।
শার্দূলেষ্বপি বৈ বিপ্রাঃ শ্রমো জ্বর ইহোচ্যতে ॥ ৩০.৩০০ ॥

মানুষেষু তু সর্বজ্ঞ জ্বরো নামৈষ কীর্তিতঃ ।
মরণে জন্মনি তথা মধ্যে চ বিশতে সদা ॥ ৩০.৩০১ ॥

এতন্মাহেশ্বরং তেজো জ্বরো নাম সুদারুণঃ ।
নমস্যশ্চৈব মান্যশ্চ সর্বপ্রাণিভিরীশ্বরঃ ॥ ৩০.৩০২ ॥

ইমাং জ্বরোত্পত্তিমদীনমানসঃ পঠেত্সদা য়ঃ সুসমাহিতো নরঃ ।
বিমুক্তরোগঃ স নরো মুদা য়ুতো লভেত কামান্ স য়থামনীষিতান্ ॥ ৩০.৩০৩ ॥

দক্ষপ্রোক্তং স্তবঞ্চাপি কীর্ত্তয়েদ্যঃ শৃণোতি বা ।
নাশুভং প্রাপ্নুয়াত্ কিঞ্চিদ্দীর্ঘঞ্চায়ুরবাপ্নুয়াত্ ॥ ৩০.৩০৪ ॥

য়থা সর্বেষু দেবেষু বরিষ্ঠো য়োগবান্ হরঃ ।
তথা স্তবো বরিষ্ঠোঽয়ং স্তবানাং ব্রহ্মনির্মিতঃ ॥ ৩০.৩০৫ ॥

য়শোরাজ্যসুখৈশ্বর্যবিত্তায়ুর্ধনকাঙ্ক্ষিভিঃ ।
স্তোতব্যো ভক্তিমাস্থায় বিদ্যাকামৈশ্চ য়ত্নতঃ ॥ ৩০.৩০৬ ॥

ব্যাধিতো দুঃখিতো দীনশ্চৌরত্রস্তো ভয়ার্দিতঃ ।
রাজকার্যনিয়ুক্তো বা মুচ্যতে মহতো ভয়াত্ ॥ ৩০.৩০৭ ॥

অনেন চৈব দেহেন গণানাং স গণাধিপঃ ।
ইহ লোকে সুখং প্রাপ্য গণ এবোপপদ্যতে ॥ ৩০.৩০৮ ॥

ন চ য়ক্ষাঃ পিশাচা বা ন নাগা ন বিনায়কাঃ ।
কুর্যুর্বিঘ্নং গৃহে তস্য য়ত্র সংস্তূয়তে ভবঃ ॥ ৩০.৩০৯ ॥

শৃণুয়াদ্বা ইদং নারী সুভক্ত্যা ব্রহ্মচারিণী ।
পিতৃভির্ভর্তৃপক্ষাভ্যাং পূজ্যা ভবতি দেববত্ ॥ ৩০.৩১০ ॥

শৃণুয়াদ্বা ইদং সর্বং কীর্ত্তয়েদ্বাপ্যভীক্ষ্ণশঃ ।
তস্য সর্বাণি কার্যাণি সিদ্ধিং গচ্ছন্ত্যবিঘ্নতঃ ॥ ৩০.৩১১ ॥

মনসা চিন্তিতং য়চ্চ য়চ্চ বাচাপ্যুদাহৃতম্ ।
সর্বং সম্পদ্যতে তস্য স্তবনস্যানুকীর্ত্তনাত্ ॥ ৩০.৩১২ ॥

দেবস্য সগুহস্যাথ দেব্যা নন্দীশ্বরস্য তু ।
বলিং বিভবতঃ কৃত্বা দমেন নিয়মেন চ ॥ ৩০.৩১৩ ॥

ততঃ স য়ুক্তো গৃহ্ণীয়ান্নামান্যাশু য়থাক্রমম্ ।
ঈপ্সিতান্ লভতেঽত্যর্থং কামান্ ভোগাংশ্চ মানবঃ ।
মৃতশ্চ স্বর্গমাপ্নোতি স্ত্রীসহস্রপরিবৃতঃ ॥ ৩০.৩১৪ ॥

সর্ব কর্মসু য়ুক্তো বা য়ুক্তো বা সর্বপাতকৈঃ ।
পঠন্ দক্ষকৃতং স্তোত্রং সর্বপাপৈঃ প্রমুচ্যতে ।
মৃতশ্চ গণসালোক্যং পূজ্যমানঃ সুরাসুরৈঃ ॥ ৩০.৩১৫ ॥

বৃষেব বিধিয়ুক্তেন বিমানেন বিরাজতে ।
আভূতসম্প্লবস্থায়ী রুদ্রস্যানুচরো ভবেত্ ॥ ৩০.৩১৬ ॥

ইত্যাহ ভগবান্ ব্যাসঃ পরাশরসুতঃ প্রভুঃ ।
নৈতদ্বেদয়তে কশ্চিন্নেদং শ্রাব্যন্তু কস্যচিত্ ॥ ৩০.৩১৭ ॥

শ্রুত্বৈতত্পরমং গুহ্যং য়েঽপি স্যুঃ পাপকারিণঃ ।
বৈশ্যাঃ স্ত্রিয়শ্চ শূদ্রাশ্চ রুদ্রলোকমবাপ্নুয়ুঃ ॥ ৩০.৩১৮ ॥

শ্রাবয়েদ্যস্তু বিপ্রেভ্যঃ সদা পর্বসু পর্বসু ।
রুদ্রলোকমবাপ্নোতি দ্বিজো বৈ নাত্র সংশয়ঃ ॥ ৩০.৩১৯ ॥

ইতি শ্রীমহাপুরাণে বায়ুপ্রোক্তে দক্ষশাপবর্ণনং নাম ত্রিংশোঽধ্যায়ঃ ॥ ৩০ ॥

Also Read:

1000 Names of Sri Shiva | Sahasranama Stotram from Vayupurana Adhyaya 30 Lyrics in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil

1000 Names of Sri Shiva from Vayupurana Adhyaya 30 Lyrics in Bengali

Leave a Reply

Your email address will not be published. Required fields are marked *

Scroll to top