Templesinindiainfo

Best Spiritual Website

Ananda Mandakini Lyrics in Oriya | Anandamandakini

Ananda Mandakini in Oriya:

॥ ଆନନ୍ଦମନ୍ଦାକିନୀ ॥
ଶ୍ରୀମଧୁସୂଦନସରସ୍ଵତୀଵିରଚିତା
ଆନନ୍ଦମନ୍ଦାକିନୀ ।
ଵାଗ୍ଦେଵୀଚତୁରାସ୍ୟପଞ୍ଚଵଦନା ନିତ୍ୟଂ ସହସ୍ରାନନୋ-
ଽପ୍ୟୁଚ୍ଚୈର୍ୟତ୍ର ଜଡାତ୍ମତାମୁପଗତାଃ କେଽନ୍ୟେ ଵରାକାଃ ସୁରାଃ ।
ମର୍ତ୍ୟାଃ ସ୍ଵଲ୍ପଧିୟଃ କଥଂ ନୁ କୁଶଲାସ୍ତତ୍ରାପ୍ୟହଂ ପ୍ରଜ୍ଞୟା
ହୀନଃ କିଂ କରଵାଣି ତାଂ ଵ୍ରଜକୁଲୋତ୍ତଂସ ପ୍ରଶଂସାଂ ତଵ ॥ ୧ ॥

ନିତ୍ୟଂ ବ୍ରହ୍ମସୁରେନ୍ଦ୍ରଶଙ୍କରମୁଖୈର୍ଦତ୍ତୋପହାରାୟ ତେ
ଵିସ୍ଵାଦାଂସ୍ତୁଷମିଶ୍ରତଣ୍ଡୁଲକଣାନ୍ଵିପ୍ରଃ ସୁଦାମା ଦଦୌ ।
ତଦ୍ଵଦ୍ଦେଵ ନିରର୍ଥକୈଃ କତିପୟୈ ରୂକ୍ଷାକ୍ଷରୈର୍ନିର୍ମିତାଂ
ଵାଗୀଶପ୍ରମୁଖସ୍ତୁତସ୍ୟ ଭଵତଃ କୁର୍ୟାଂ ସ୍ତୁତିଂ ନିସ୍ତ୍ରପଃ ॥ ୨ ॥

ଶଶ୍ଵଦ୍ବ୍ରହ୍ମଶିଵେନ୍ଦ୍ରଦେଵଗୁରୁଵାଗ୍ଦେଵୀଫଣୀନ୍ଦ୍ରାଦିଭିଃ
ସ୍ତୁତ୍ୟସ୍ୟାପି ହରେ ମମାସ୍ତୁ ରଚିତା ଵାଣୀ ଵିନୋଦାୟ ତେ ।
ଚିତ୍ରାଲଙ୍କୃତିଶାଲିଭିଃ ସୁଲଲିତୈର୍ନିତ୍ୟଂ କଵୀନାଂ ସ୍ତଵୈଃ
ସମ୍ରାଜଃ ସମୁପାସିତସ୍ୟ ଶୁକଗୀର୍ଧତ୍ତେ ପ୍ରମୋଦଂ ୟଥା ॥ ୩ ॥

ଚିତ୍ରାକାରକିରୀଟକୋଟିଵିଲସଦ୍ରତ୍ନୌଘକାନ୍ତିଚ୍ଛଟା-
ସଙ୍ଘଟ୍ଟେନ ଵିଚିତ୍ରମମ୍ବରତଲଂ କୁର୍ଵତ୍ସ୍ଥିତଂ ମୂର୍ଧନି ।
ଜୀୟାତ୍କେକିଶିଖଣ୍ଡମଣ୍ଡନମିଦଂ ନୀଲାଚଲସ୍ଥାୟିନୀ
ସ୍ଵର୍ଣାଦ୍ରେଃ ଶିଖରେ ପୁରନ୍ଦରଧନୁର୍ଵ୍ୟୂହସ୍ୟ ନିନ୍ଦାଵହମ୍ ॥ ୪ ॥

ୟତ୍ପାଦାନ୍ତନଖାଂଶୁଚିନ୍ତନଵଶାଦଜ୍ଞାନମନ୍ଧଂ ତମୋ-
ଽପ୍ୟନ୍ତଂ ୟାତି ମୁକୁନ୍ଦ ତସ୍ୟ ଭଵତୋ ଧ୍ଵାନ୍ତାନି କିଂ ମୂର୍ଧନି ।
ଜ୍ଞାତଂ ତ୍ଵାଂ ଦୟିତଂ ସମେତ୍ୟଜଲଦା ୟେ କେଶତାମାଶ୍ରିତା-
ସ୍ତେ ବଦ୍ଧାଶ୍ଚପଲାଗଣୈଃ ପ୍ରଣୟଜକ୍ରୋଧାତ୍କିରୀଟଚ୍ଛଲାତ୍ ॥ ୫ ॥

ତ୍ଵଚ୍ଚକ୍ଷୁଃ ସଵିତୁଃ ସରୋରୁହରୁଚେଃ ସାକ୍ଷାତ୍କଥଂ ଗଣ୍ଡୟୋ-
ର୍ଭାଲେ ଚ ଵ୍ରଜନାଥ ନର୍ତନପରା ଧ୍ଵାନ୍ତାର୍ଭକାଃ ସନ୍ତତମ୍ ।
ନିର୍ଣୀତଂ ମୁଖନେତ୍ରପଙ୍କଜଵନୀମାଧ୍ଵୀକପାନାନ୍ମୁହୁ-
ର୍ମାଦ୍ୟନ୍ତୋ ମଧୁପା ଭ୍ରମନ୍ତି ପରିତୋ ଵକ୍ତ୍ରାଲକଵ୍ୟାଜତଃ ॥ ୬ ॥

ତ୍ଵଦ୍ଭାଲେ ନିକଷୋପଲେ ଵିଜୟତେ କାଶ୍ମୀରଗୋରୋଚନା-
ସମ୍ଭୂତସ୍ତିଲକଃ ପରୀକ୍ଷଣଵିଧୌ କିଂ ହେମରେଖୋଦ୍ଗମଃ ।
ଚାଞ୍ଚଲ୍ୟଂ ଚପଲା ଵିହାୟ ଜଲଦଂ କିଂ ଵା ସମାଲମ୍ବତେ
କିଂ ଵା ମାରକତସ୍ଥଲେ ସମୁଦିତଃ କନ୍ଦର୍ପଵୃକ୍ଷାଙ୍କୁରଃ ॥ ୭ ॥

ତ୍ଵଦ୍ଭୂଵଲ୍ଲିମିଷେଣ କାର୍ମୁକଲତାମାକୃଷ୍ୟ ପୁଷ୍ପାଶୁଗଃ
କୃତ୍ଵା ଚମ୍ପକକୋରକଂ ଚ ତିଲକଵ୍ୟାଜେନ ବାଣଂ ହରେ ।
ଲକ୍ଷ୍ୟଂ କୁନ୍ତଲନୀଲକଣ୍ଠମତୁଲଶ୍ରୀଚନ୍ଦ୍ରକଂ ଵିଧ୍ୟତି
ପ୍ରାୟଃ ଶତ୍ରୁସମାନନାମ୍ନ୍ୟପିଜନେ କ୍ରୋଧୋ ୟଦୂର୍ଜସ୍ଵିନାମ୍ ॥ ୮ ॥

ନିଃଶେଷପ୍ରମଦାମନୋମନସିଜକ୍ରୀଡାମହାମନ୍ଦିର-
ଵ୍ରୀଡାଵଜ୍ରକପାଟିକାଵିଘଟନପ୍ରୌଢାକୃତିଃ କୁଞ୍ଚିକା ।
ଦୁର୍ମାନଗ୍ରହିଲତ୍ରିଲୋକମହିଲାମାନଚ୍ଛିଦାକର୍ତରୀ
ଶୃଙ୍ଗାରଦ୍ରୁମମଞ୍ଜରୀ ସ୍ଫୁରତି କିଂ ଗୋଵିନ୍ଦ ତେ ଭ୍ରୂଲତା ॥ ୯ ॥

ନୋ କାର୍ୟଂ ଶ୍ରୁତିଵର୍ତ୍ମଲଙ୍ଘନମିଦଂ ନାଲୀକମୁଗ୍ଧାକୃତିଃ
ପର୍ୟନ୍ତାକଲନଂ ଵିଧାୟ ସହଜସ୍ଵଚ୍ଛେନ ଭାଵ୍ୟଂ ସଦା ।
ଅନ୍ତଃ କୃଷ୍ଣମୁପାସ୍ୟ ତଦ୍ରୁଚିମତା ସମ୍ଭାଵନା ସର୍ଵତଃ
କାର୍ୟେତ୍ୟମ୍ବୁଜଲୋଚନାକ୍ଷିୟୁଗଲଂ ମାନଂ ଦଧୌ ତେ ସତାମ୍ ॥ ୧୦ ॥

ସୌନ୍ଦର୍ୟାମୃତଦୀର୍ଘ୍ହିକେ ତଵ ଦୃଶୌ ପକ୍ଷ୍ମାଵଲିଶ୍ଚୈତୟୋଃ
କୂଲେ କାମକୃଷୀଵଲେନ ରଚିତା ଶୃଙ୍ଗାରସସ୍ୟୋନ୍ନତିଃ ।
ଦୃଗ୍ଭଙ୍ଗୀର୍ନିଗଦନ୍ତି ୟାସ୍ତୁ ଵିବୁଧା ରତ୍ୟମ୍ଭସାଂ ଵୀଚୟ-
ସ୍ତାଃ ସ୍ୟୁର୍ଗୋପଵଧୂହୃଦମ୍ବୁଜଵନୀଦୋଲାୟିତା ୟତ୍ନତଃ ॥ ୧୧ ॥

ଦୂରେ ବ୍ରହ୍ମଶିଵେନ୍ଦ୍ରପୂର୍ଵଦିଵିଷଦ୍ଵୃନ୍ଦେ ନମସ୍କୁର୍ଵତି
ଵ୍ୟାଵଲ୍ଗଦ୍ଵ୍ରଜବାଲକୌଘଲଗୁଡତ୍ରୁଟ୍ୟତ୍କିରୀଟେ ହଠାତ୍ ।
ସାଵଜ୍ଞା ମଧୁମତ୍ତସୁନ୍ଦରଦୃଶାଂ ଶୋଭାଦ୍ଵିଷଃ ସାଲସାଃ
ଦୃକ୍ପାତାସ୍ତଵ ନନ୍ଦଵଂଶତିଲକ ସ୍ଵାନ୍ତେ ସଦା ସନ୍ତୁ ମେ ॥ ୧୨ ॥

ମୁକ୍ତେରପ୍ୟତିଦୁର୍ଲଭା ହିମଗିରିପ୍ରସ୍ୟନ୍ଦିମନ୍ଦାକିନୀ-
ଧାରାତୋଽପ୍ୟତିଶୀତଲାତିମସୃଣା ଚାନ୍ଦ୍ରାନ୍ମୟୂଖାଦପି ।
ଵାଞ୍ଛାତୋଽପ୍ୟତିଵିସ୍ତୃତା ଵିଷୟିଣାଂ ତ୍ଵତ୍ପାଦଚିନ୍ତାପର-
ସ୍ଵାନ୍ତାଦପ୍ୟତିନିର୍ମଲା ମୟି କୃପାଦୃଷ୍ଟିସ୍ତଵାସ୍ତାଂ ହରେ ॥ ୧୩ ॥

କଲ୍ପାନ୍ତାଗ୍ନିଶିଖୋନ୍ନତିର୍ଦିତିସୁତଵ୍ରାତେ ପ୍ରପନ୍ନେ ଜନେ
ପୀୟୂଷଦ୍ରଵସିନ୍ଧୁଵୃଦ୍ଧିରମରସ୍ତୋମେ ଵିଭୂତ୍ୟାୟତିଃ ।
ସୀମା ପ୍ରେମଭରସ୍ୟ ଗୋପନିକରେ କନ୍ଦର୍ପକାଣ୍ଡାହତି-
ର୍ବ୍ରହ୍ମାଣ୍ଡୋଦରସୁନ୍ଦରୀହୃଦି ହରେ ଜୀୟାଦ୍ଦୃଶୋସ୍ତେ ଦ୍ୟୁତିଃ ॥ ୧୪ ॥

ନିର୍ବନ୍ଧେନ ୟଦୀନ୍ଦ୍ରନୀଲମହସା ସମ୍ପାଦିତୌ ଦର୍ପଣୌ
ତାଭ୍ୟାଂ କିଂ ତୁଲନା କପୋଲତଲୟୋଃ ସମ୍ଭାଵ୍ୟତେ ଵା ନ ଵା ।
ଏଵଂ ଜ୍ଞାତୁମୁପାଗତେ ଶ୍ରୁତିପଥଂ ନେତ୍ରେ ତ୍ରପାକୁଞ୍ଚିତେ
ଶଙ୍କେ ଦ୍ଵୈଧଵତୀ ତ୍ଵଦୀୟଵଦନପ୍ରାନ୍ତଶ୍ରିୟଂ ପଶ୍ୟତଃ ॥ ୧୫ ॥

ତ୍ଵାଂ ପାଦାଙ୍ଗଦକଙ୍କଣାଙ୍ଗଦଶିରୋଲଙ୍କାରହାରାମ୍ବରୈଃ
ସମ୍ପୂଜ୍ୟ ପ୍ରଦଦୌ ସୁତାମଥ ମଣିଂ ରତ୍ନାକରଃ କୌସ୍ତୁଭମ୍ ।
ଆସ୍ୟେ ତସ୍ୟ ସୁତଃ ସୁଧାଂଶୁରଖିଲାଂ କାନ୍ତିଂ ୟଦା ଦତ୍ତଵା-
ନ୍ସ୍ଵାକାରଂ ଵ୍ୟତରଂସ୍ତଦୈଵ ମକରାଃ କିଂ କୁଣ୍ଡଲାନ୍ତସ୍ତଵ ॥ ୧୬ ॥

ଲାଵଣ୍ୟାମୃତଵାହିନୀ ତଵ ମୁଖସ୍ୟେୟଂ ମନୋଜ୍ଞାକୃତି-
ସ୍ତସ୍ୟାମଦ୍ଭୁତବୁଦ୍ବୁଦଃ ସମଭଵତ୍ତତ୍ରାପି ଫେନୋଦ୍ଗମଃ ।
ନାସାଵଂଶଗତଂ ତମେଵ ଵିଶଦଂ ମୁକ୍ତାଫଲଂ ୟେ ଵିଦୁ-
ସ୍ତେ ମାନ୍ୟା ମଧୁସୂଦନ ତ୍ଵୟି ମନୋଵୃତ୍ତ୍ୟୈଵ ଧନ୍ୟା ୟତଃ ॥ ୧୭ ॥

ନେତ୍ରାମ୍ଭୋଜମୁଖେନ୍ଦୁଭାଲତିଲକୈର୍ନିତ୍ୟଂ ଵିଵାଦୋ ୟତଃ
ସୌନ୍ଦର୍ୟାର୍ଥମିତି ପ୍ରତୀତ୍ୟ ଵିଧିନା ସୀତା କୃତା ନାସିକା ।
ତୂଣୀ ଵା କୁସୁମାୟୁଧସ୍ୟ ନୃପତେର୍ୟନ୍ମଲ୍ଲିକାକୋରକଃ
କାଣ୍ଡସ୍ତତ୍ର ଚକାସ୍ତି ମୌକ୍ତିକଫଲଵ୍ୟାଜେନ ନନ୍ଦାତ୍ମଜ ॥ ୧୮ ॥

ୟୋଽହଂ ତେ ପଦପଙ୍କଜଦ୍ୟୁତିଲଵଂ ପ୍ରାପ୍ୟାଭଵଂ ପଲ୍ଲଵଃ
କଲ୍ପକ୍ଷ୍ମାରୁହମସ୍ତକାଭରଣତାଂ ୟାତଶ୍ଚ ରାଧାପତେ ।
ତଂ ମାଂ ନିନ୍ଦତି ବିମ୍ବଵିଦ୍ରୁମଲତାଶ୍ରୀତସ୍କରୋଽୟଂଶ୍ରୁତା-
ଵେଵଂ ଜଲ୍ପିତୁମାଗତେ କିସଲୟେ ସ୍ଥାନେଽଧରୋ ରାଗଵାନ୍ ॥ ୧୯ ॥

ଦୃଗ୍ଭଙ୍ଗୀଃ ସ୍ଫୁରଦିନ୍ଦ୍ରନୀଲନିଚୟଃ ପକ୍ଷ୍ମାଣି କସ୍ତୂରିକା
ଜିହ୍ଵେୟଂ ତଵ ପଦ୍ମରାଗନିକରଃ ଶୋଣାଧରୋ ଵିଦ୍ରୁମଃ ।
ଦନ୍ତାଲୀ ଗଜମୌକ୍ତିକାନି ମଧୁଜିନ୍ମନ୍ଦସ୍ମିତଂ ଚନ୍ଦନଂ
ପଣ୍ୟସ୍ଥାନମିଦଂ ମନୋଜଵଣିଜୋ ଜାନେ ତଵାସ୍ତେ ମୁଖମ୍ ॥ ୨୦ ॥

ୟା ରକ୍ତା ଵଦନେନ୍ଦୁମଣ୍ଡଲଗତଂ ମାଧୁର୍ୟମୁଚ୍ଚୈସ୍ତରା-
ମାସ୍ଵାଦ୍ୟେହ ସରସ୍ଵତୀ ସ୍ଥିତଵତୀ ସତ୍ୟଂ ରସଜ୍ଞେଵ ସା ।
ୟତ୍ସପ୍ତସ୍ଵରମଣ୍ଡଲାନି ବହୁଧା ତ୍ଵତ୍କଣ୍ଠଦେଶାଦ୍ବହିଃ
ପ୍ରାଦୁର୍ଭୂୟ ମୁଦଂ ଶ୍ରୁତୌ ସୁକୃତିନାଂ ୟଚ୍ଛନ୍ତି ନନ୍ଦାତ୍ମଜ ॥ ୨୧ ॥

ସାମ୍ୟଂ ତ୍ଵଦ୍ଵଦନସ୍ୟ ଵାଞ୍ଛତି ଵିଧୁର୍ଦୋଷାକରୋ ୟଦ୍ୟପି
କ୍ଷିପ୍ତୋଽପ୍ୟମ୍ବୁନି ପଦ୍ମରାଗଶକଲୋ ଦନ୍ତଚ୍ଛଦଂ ସ୍ପର୍ଧତେ ।
ଦୃଷ୍ଟ୍ଵୈଵଂ କୁଶଲଃ କୁଶେଶୟଭଵଃ କ୍ଲେଶାଦ୍ୟଶୋଦାତ୍ମଜ
ଵ୍ୟକ୍ତଂ ତ୍ଵଚ୍ଚିବୁକଂ ତଥୈଵ ଵିଦଧେ ୟତ୍ତୁଲ୍ୟତା ନ କ୍ଵଚିତ୍ ॥ ୨୨ ॥

ମାଧୁର୍ୟଂ ନ ଲଵଂ ମଧୂନି ଦଧତି ଦ୍ରାକ୍ଷା ତୁ ସାକ୍ଷାଦ୍ଵିଷଂ
ପୀୟୂଷାନ୍ୟପି ୟାନ୍ତି ନିମ୍ବସମତାଂ କେ ଦୁଗ୍ଧଖଣ୍ଡାଦୟଃ ।
ପ୍ରାଲେୟାନି ନ ଶୀତଲାନି ସରସଂ ନୋ କୋକିଲାକୂଜିତଂ
ଗୋଧୁଗ୍ଵଂଶଵତଂସ ଜାତୁ ଜୟତି ତ୍ଵଦ୍ଵାଗ୍ଵିଲାସୋଦୟେ ॥ ୨୩ ॥

ଵେଦାଶ୍ଚନ୍ଦ୍ରମସଂ ଵଦନ୍ତି ଭଵତଃ ସ୍ଵାନ୍ତଂ କଥଂ ତଦ୍ଵୃଥା-
କୁର୍ଵନ୍ତ୍ୟତ୍ର ଵିଵାଦମାତ୍ରକୁଶଲା ଗୋଵିନ୍ଦ ନନ୍ଦାଦୟଃ ।
ତସ୍ୟୈଵାମୃତପଙ୍କିଲାସ୍ତଵ ମୁଖାଦାଵିର୍ଭଵନ୍ତୋ ବହି-
ର୍ଧ୍ଵାନ୍ତଂ ୟତ୍ତିରୟନ୍ତି ହନ୍ତ କିରଣା ମନ୍ଦସ୍ମିତଵ୍ୟାଜତଃ ॥ ୨୪ ॥

ୟନ୍ନାମସ୍ମରଣାଦପି ଶ୍ରଵଣତଃ ପ୍ରକ୍ଷୀଣରାଗାଶୟା
ୟାନ୍ତି ତ୍ଵତ୍ପରମଂ ସଦାଶିଵପଦଂ ୟଦ୍ୟୋଗିନାଂ ଦୁର୍ଲଭମ୍ ।
ତସ୍ୟାପ୍ୟାନନପଙ୍କଜେ ତଵ ଜୟତ୍ୟୁଚ୍ଚୈସ୍ତରାଂ ରାଗିତା
ୟେନାଭୀରକୁଲପ୍ରଦୀପ ତଦଲଂ ତାମ୍ବୂଲମାସ୍ତାଂ ମୁଦେ ॥ ୨୫ ॥

ପୀୟୂଷଦ୍ରଵସାରସାରଘମଧୁଦ୍ରୋଣୀ ତ୍ଵଦୀୟାଧରା-
ସ୍ଵାଦାୟାର୍କସୁତାତଟେ ଶ୍ରିତଵତୀ ସଦ୍ଵଂଶଜାତା ତପଃ ।
ତତ୍ପୁଣ୍ୟୈର୍ମୁରଲୀମିଷେଣ ରସିକା ମାଧୁର୍ୟମୁଚ୍ଚୈସ୍ତରା-
ମାସ୍ୟେନ୍ଦୋରନୁଭୂୟ ଗୋକୁଲପତେ ଗୀତାମୃତଂ ମୁଞ୍ଚତି ॥ ୨୬ ॥

ସାଫଲ୍ୟଂ ଶ୍ରୁତିସମ୍ପଦାଂ ତ୍ରିଜଗତାଂ ପ୍ରାଲେୟଧାରାପ୍ରପା
ପୀୟୂଷଦ୍ରଵମାଧୁରୀ ପରିଭଵକ୍ଲେଶାମ୍ବୁଧେଃ ଶୋଷଣମ୍ ।
ବ୍ରହ୍ମାନନ୍ଦତିରସ୍କୃତିଃ କୁଲଵଧୂଧୈର୍ୟାଦ୍ରିଵଜ୍ରାହତିଃ
କଂସଧ୍ଵଂସନ ଶଂସ କିଂ ନ ଭଵତୋ ଵଂଶୀନିନାଦୋଦୟଃ ॥ ୨୭ ॥

ଧୈର୍ୟଂ ଧିକ୍କୁରୁତେ ତ୍ରପାଂ ଵିଚିନୁତେ କୌଲଂ ୟଶଃ ପ୍ରୋଞ୍ଛତି
ପ୍ରତ୍ୟେକଂ ଗୁରୁଵର୍ଗଗଞ୍ଜନଶତଂ ଵିସ୍ମାରୟତ୍ୟଞ୍ଜସା ।
ସାଧ୍ଵୀନାମ ନିରାକରୋତି ଭଵନଂ ଭର୍ତୁର୍ଵିଧତ୍ତେ ଵିଷଂ
କିଂ କିଂ ନୋ ଵିଦଧାତି ହନ୍ତ ସୁଦୃଶାଂ ଵଂଶୀନିନାଦସ୍ତଵ ॥ ୨୮ ॥

ଲାଵଣ୍ୟୈରଖିଲୈସ୍ତ୍ଵଦାସ୍ୟମୁକୁରଂ ନିର୍ମାୟ ଘାତା ଚିରା-
ନ୍ମୁଷ୍ଟିଂ ମାରକତଂ ଵିଧାୟ ତଦଧଃ କଣ୍ଠସ୍ଥଲଵ୍ୟାଜତଃ ।
ଧ୍ୟାୟଂ ଧ୍ୟାୟମଶେଷଵସ୍ତୁସୁଷମାଧାରାୟ ରେଖାତ୍ରୟଂ
ବ୍ରୂତେ ନାସ୍ତି ବଭୂଵ ନୋ ନ ଭଵିତା ସୌନ୍ଦର୍ୟମେତାଦୃଶମ୍ ॥ ୨୯ ॥

ଆଶାନାଗକରପ୍ରସାରିମହସା ନିଃଶେଷଵାମଭ୍ରୁଵା-
ମାଶାଭିସ୍ତ୍ରିଦଶେଶନିର୍ଭରଶୁଭୈଃ କଂସାଦିନାଶଶ୍ରିୟା ।
ପ୍ରେମ୍ଣା ନନ୍ଦୟଶୋଦୟୋସ୍ତନୁଜୁଷାଂ ନିଃସୀମଭାଗ୍ୟୈର୍ଦୃଶାଂ
ସୌଭାଗ୍ୟୈର୍ଵ୍ରଜସୁଭ୍ରୁଵାଂ ଵ୍ରଜପତେ କିଂ ତେ ଭୁଜୌ ନିର୍ମିତୌ ॥ ୩୦ ॥

କଂ ୟସ୍ମାଦଲମଭ୍ୟୁଦେତି ଭଵତଃ ସର୍ଵାଙ୍ଗମେତାଦୃଶଂ
ସାମ୍ୟଂ ଵା ଭଜତାଂ କଥଂ ଜଲରୁହେ ସର୍ଵଜ୍ଞମଧ୍ୟସ୍ୟତୋଃ ।
ମତ୍ତର୍କଃ ପୁନରତ୍ର ଗୋକୁଲପତେ ତ୍ରୈଲୋକ୍ୟଲକ୍ଷ୍ମୀ ୟତ-
ସ୍ତ୍ଵତ୍ପାଣ୍ୟୋରିତି ତୌ ଵଦନ୍ତି କମଲେ ସା ୟତ୍ତଦେକାଲୟା ॥ ୩୧ ॥

ଅଙ୍ଗୁଲ୍ୟସ୍ତଵ ହସ୍ତୟୋର୍ମୁରହର ପ୍ରାୟୋ ରସାଲାଙ୍କୁର-
ଶ୍ରେଣୀ ୟତ୍ପରିତୋଽଙ୍ଗୁଲୀୟକମିଷସ୍ନିଗ୍ଧାଲଵାଲାଵଲିଃ
କିଂ ଵା ପଞ୍ଚଶରପ୍ରଚଣ୍ଡତପସା ପଞ୍ଚାଶୁଗାଃ ପଞ୍ଚତୋ-
ତ୍ତୀର୍ଣାଃ ସତ୍ଫଲିନଃ ପୁନର୍ଭଵରୁଚା ପୁଷ୍ଣନ୍ତି ନେତ୍ରୋତ୍ସଵାନ୍ ॥ ୩୨ ॥

ଭକ୍ତାନୁଗ୍ରହକାତରେଣ ଭଵତା କୃତ୍ଵା ନୃସିଂହାକୃତିଂ
ରାଗାନ୍ଧସ୍ୟ ପୁରା ହିରଣ୍ୟକଶିପୋର୍ଵକ୍ଷସ୍ଥଲୀ ପାଟିତା ।
ତେନାଭୂତ୍ତଵ ପାଣିପଙ୍କଜୟୁଗେ ରାଗଃ ସ ରାଧାପତେ
ଗୋପୀନାଂ କୁଚକୁଙ୍କୁମୈର୍ଦ୍ଵିଗୁଣିତୋ ନାଦ୍ୟାପି ଵିଶ୍ରାମ୍ୟତି ॥ ୩୩ ॥

ଏତୌ ପଞ୍ଚଶିରସ୍ତ୍ଵିଷା ଦଶଦିଶଃ ସମ୍ଭାଵୟନ୍ତୌ ଭୃଶଂ
ଦୈତ୍ୟପ୍ରାଣସମୀରସଂହତିୟମୌ ଶ୍ୟାମୌ ଭୁଜଙ୍ଗୋତ୍ତମୌ ।
ତନ୍ମୌଲିଦ୍ୟୁତିଶାଲିନୀ ପୁନରିୟଂ ରତ୍ନାଵଲୀ ଜୃମ୍ଭତେ
ୟାଂ ପ୍ରାହୁସ୍ତଵ ଗୋକୁଲେଶ ନଖରଶ୍ରେଣୀଂ କରସ୍ଥାଂ ଜନାଃ ॥ ୩୪ ॥

ଦୋର୍ଦଣ୍ଡଦ୍ଵୟବନ୍ଧନାନି ଵିଦଧୁର୍ନନ୍ଦୋପନନ୍ଦାଦୟ-
ସ୍ତଦ୍ଗ୍ରନ୍ଥିତ୍ରୁଟିଶଙ୍କୟାତିଚକିତା ଗୋଵର୍ଧନୋଦ୍ଧାରଣେ ।
ତାନ୍ୟେଵାପ୍ରତିମପ୍ରଭାଣି ହରିତୋ ଵିଦ୍ୟୋତୟନ୍ତ୍ୟଦ୍ଭୁତଂ
ଵିଦ୍ଵାଂସସ୍ତଵ କଙ୍କଣାଙ୍ଗଦତୟା ଗୋଵିନ୍ଦ ୟଜ୍ଜାନତେ ॥ ୩୫ ॥

ଶୃଙ୍ଗାରଦ୍ରୁମସାରକଣ୍ଡନଵଶାତ୍ତ୍ରୈଲୋକ୍ୟସୀମନ୍ତିନୀ-
କ୍ରୀଡାମନ୍ଦିରମଣ୍ଡନାୟ ଵିଧିନା ସ୍ତମ୍ଭୌ ପ୍ରଲମ୍ବୌ କୃତୌ ।
ତନ୍ମଧ୍ୟେ ପୁନରିନ୍ଦ୍ରନୀଲମଣିଭିଃ ସମ୍ପାଦିତା ଵେଦିକା
ତୌ ବାହୂ ମଧୁଜିଦ୍ଵଦନ୍ତି ଭଵତୋ ଵକ୍ଷଃସ୍ଥଲୀଂ ତାମପି ॥ ୩୬ ॥

ୟଦ୍ରକ୍ତଃ କମଲାକରଂ କରତଲେନାଲମ୍ବତେ ଭାସ୍କର-
ସ୍ତ୍ଵଚ୍ଚକ୍ଷୁର୍ମୁଖପାଣିପାଦକମଲେ ଜାତସ୍ତତଃ ଶୋଣିମା ।
ତନ୍ମିତ୍ରଂ ପୁନରାକଲୟ୍ୟ ସ ଧୃତଃ କଣ୍ଠେ ତ୍ଵୟା କୌସ୍ତୁଭ-
ଵ୍ୟାଜେନେତି ମୁକୁନ୍ଦ ମାଦୃଶି ଜନେ ତର୍କଃ ସମୁଜ୍ଜୃମ୍ଭତେ ॥ ୩୭ ॥

ଆଲୋକ୍ୟାଖିଲଵେଦଶାସ୍ତ୍ରଜଲଧେସ୍ତତ୍ତ୍ଵଂ ୟଦେକାନ୍ତତଃ
କୃତ୍ଵା ସଙ୍କଲିତଂ ସ୍ଵକୀୟନିଲୟେ କ୍ଷୀରାବ୍ଧିମଧ୍ୟେ ଧୃତମ୍ ।
ସର୍ଵାର୍ଥପ୍ରତିଭାସକଂ ଵ୍ରଜକୁଲାଲଙ୍କାର ତତ୍କୌସ୍ତୁଭ-
ଵ୍ୟାଜାଦ୍ଵିସ୍ମୃତିଶଙ୍କୟେଵ ଭଵତା କଣ୍ଠେ କୃତଂ ସାମ୍ପ୍ରତମ୍ ॥ ୩୮ ॥

ୟାତ୍ଵା ଵିଷ୍ଣୁପଦଂ ସମାଶ୍ରିତଵତୀ ନକ୍ଷତ୍ରମାଲା ସ୍ଫୁର-
ଦ୍ଦୀପ୍ତିର୍ୟୋଗ୍ୟମିଦଂ କଥଂ ମୁରରିପୋ ନକ୍ତନ୍ଦିନଂ ଦ୍ୟୋତତେ ।
ଆଂ ଜ୍ଞାତଂ ଦୟିତଂ ତଵାନନଵିଧୁଂ ୟାନ୍ତୀମିମାଂ ୟାମିନୀ
ରୋମଶ୍ରେଣିମିଷାତ୍ତତୋ ଧୃତଵତୀ ଜ୍ଞାତ୍ଵା ସପ୍ତ୍ନୀମିୟମ୍ ॥ ୩୯ ॥

ୟଃ ପାଶେନ ୟଶୋଦୟା ନିୟମିତୋ ୟେନାପରାଧଂ ଵିନା
ତସ୍ମିନ୍ନସ୍ତି ଵଲିସ୍ତ୍ରିଧା ମୟି ପୁରଃ ସୋଽୟଂ ବଲିଧ୍ଵଂସିନଃ ।
ଏଵଂ ଚିନ୍ତନତତ୍ପରଃ କୃଶତରସ୍ତ୍ଵନ୍ମଧ୍ୟଦେଶୋ ଭୃଶଂ
ୟାଶୋଦେୟ ସ ଶୋକମୁଦ୍ଗିରତି ତେ ରୋମାଵଲିଵ୍ୟାଜତଃ ॥ ୪୦ ॥

ସୃଷ୍ଟ୍ୟାଦୌ ପ୍ରକୃତିର୍ଗୁଣତ୍ରୟମୟୀ ୟା ସ୍ଵୀକୃତାଽଽସୀତ୍ତ୍ଵୟା
ସେୟଂ ସତ୍ତ୍ଵମୟୀ ସୁଖାୟ ଜଗତାଂ ହାରାକୃତିସ୍ତେ ଭୁଵି ।
ଗୁଞ୍ଜାଦାମମିଷାନ୍ମୁକୁନ୍ଦ ଦଧତୀ ରାଗାଦ୍ରଜୋଵିଗ୍ରହଂ
ନାଭୀସୀମ୍ନି ତମୋମୟୀ ପୁନରିୟଂ ରୋମାଵଲୀ ରାଜତେ ॥ ୪୧ ॥

ସୌନ୍ଦର୍ୟାମୃତଵାରିଧୌ ସ୍ମରମହାୟାଦଃସମାରମ୍ଭତଃ
ସମ୍ଭୂତା ଭ୍ରମିରମ୍ଭସାଂ ସୁଲଲିତା ଜାତାସ୍ତତୋ ଵୀଚୟଃ ।
ତାଂ ଜାନେ ସ୍ଫୁରଦିନ୍ଦ୍ରନୀଲଘଟିତଶ୍ରୀସମ୍ପୁଟାର୍ଧଦ୍ୟୁତିଂ
ତ୍ଵନ୍ନାଭୀମପି ତାଂ ଵଲିତ୍ରୟମିତି ଶ୍ୟାମାଭିରାମାକୃତେ ॥ ୪୨ ॥

ନୀଲାମ୍ଭୋରୁହଵଲ୍ଲିରୁଲ୍ଲସତି ତେ ନାଭୀସରସ୍ୟାଂ ଧ୍ରୁଵଂ
ୟଚ୍ଛ୍ରୀଵତ୍ସମିଷାଦ୍ବିଭର୍ତି କୁସୁମଂ ନାଲଂ ଚ ରୋମାଵଲୀ ।
ୟଂ ଵା ଵକ୍ଷସି କୌସ୍ତୁଭଂ ବୁଧଜନା ଜାନନ୍ତି ନନ୍ଦାତ୍ମଜ
ପ୍ରାୟଃ ସୋଽପ୍ୟନୁରାଗ ଏଵ ଭଵିତା ତ୍ରୈଲୋକ୍ୟଵାମଭ୍ରୁଵାମ୍ ॥ ୪୩ ॥

ନୀରୂପୋଽପି ଘନଦ୍ୟୁତିର୍ମୁନିମନୋମାତ୍ରୈକପାତ୍ରୀକୃତୋ-
ଽପ୍ୟାଭୀରୀଗଣସଙ୍ଗତଃ ସୁଖଘନୋଽପ୍ୟାନନ୍ଦିତୋ ବନ୍ଧଵୈଃ ।
ଜ୍ଞାନାତ୍ମାପ୍ୟତିମୁଗ୍ଧତାମୁପଗତୋ ଵାମଭ୍ରୁଵାଂ ଵିଭ୍ରମୈ-
ରିତ୍ଥଂ ତେ ତ୍ରିଵଲୀମିଷାନ୍ମୁରହର ତ୍ରୟ୍ୟସ୍ତି ଚିତ୍ରାର୍ପିତା ॥ ୪୪ ॥

ଦେଵ୍ୟଃ ପଲ୍ଲଵସମ୍ପଦା ଵିଦଧତେ ସୌଭାଗ୍ୟଲକ୍ଷ୍ମୀଂ ଶ୍ରୁତୌ
ସ୍ଵଚ୍ଛନ୍ଦଂ ସୁମନଃଫଲାନି ଵିବୁଧା ଵିନ୍ଦନ୍ତି ତେ ସେଵୟା ।
ଵେଦେନାପି ନିଗଦ୍ୟତେ ମୁରହର ତ୍ଵଂ ଭକ୍ତକଲ୍ପଦ୍ରୁମଃ
ପ୍ରାୟଃ କଲ୍ପଲତା ତତଃ ଶ୍ରିତଵତୀ ତ୍ଵାଂ ଵୈଜୟନ୍ତୀଛଲାତ୍ ॥ ୪୫ ॥

ଵିଶ୍ଵାନନ୍ଦକଦମ୍ବସମ୍ପଦମତିସ୍ନିଗ୍ଧଂ ତମାଲଦ୍ୟୁତିଂ
ଦୃଷ୍ଟ୍ଵା ନିର୍ଭରଵିଭ୍ରମଂ ଘନ ଇତି ତ୍ଵାଂ ସଙ୍ଗତା ଵିଦ୍ୟୁତଃ ।
ତ୍ଵଦ୍ରୂପାମୃତସିନ୍ଧୁସଙ୍ଗମଵଶାତ୍ପ୍ରାପ୍ୟାମ୍ବରପ୍ରଚ୍ୟଵଂ
ଚାଞ୍ଚଲ୍ୟାତ୍କିମୁ ନନ୍ଦନନ୍ଦନ ଭଵତ୍ପୀତାମ୍ବରତ୍ଵଂ ଦଧୁଃ ॥ ୪୬ ॥

କାଞ୍ଚୀ ତେ ଧୃତୟୋଗସମ୍ପଦଭିତୋ ଜାତା ଵିଶାଲାକୃତି-
ର୍ୟାଵନ୍ତୀ ମଧୁରା ଧ୍ଵନିଂ ଵିଦଧତୀ ପଶ୍ଚାଦୟୋଧ୍ୟାଭଵତ୍ ।
ମାୟାଦ୍ଵାରଵତୀ ଶିଵାଧିଵସତିଃ ସା କାଶିକା ଦୃଶ୍ୟତେ
ତଚ୍ଚିତ୍ରଂ ନ ଵଦାମି ମାଧଵ ୟତସ୍ତ୍ଵାଂ ସା ସଦା ସଂଶ୍ରିତା ॥ ୪୭ ॥

ଜାନୀମଃ ସହଜାଂ ତ୍ଵଦଙ୍ଗମିଲିତାମାଲୋକ୍ୟ ପଦ୍ମାଲୟାଂ
ତତ୍ସଙ୍ଗସ୍ଥିତିଭଙ୍ଗକାତରତମୌ କଲ୍ପଦ୍ରୁମୈରାଵତୌ ।
ଆଦ୍ୟଃ ପଲ୍ଲଵସମ୍ପଦଂ କରପଦେ ବିମ୍ବାଧରେ ଚାପରଃ
ଶୁଣ୍ଡାଦଣ୍ଡଗୁଣଂ ତଵୋରୁୟୁଗଲେ ୟେନାଦଧେ ମାଧଵ ॥ ୪୮ ॥

ରମ୍ଭାସ୍ତମ୍ଭୟୁଗଂ ନ ତଦ୍ୟଦୁପରି ସ୍ଥୂଲଂ ତଥୋରୁଦ୍ଵୟଂ
ତୂଣୀରୌ ମକରଧ୍ଵଜସ୍ୟ ସୁମନୋମୋଦେନ ଵିଦ୍ମୋ ଵୟମ୍ ।
ହା କଷ୍ଟଂ ମଧୁକୈଟଭୌ ସ୍ଫୁଟମଦୌ କିଂ କୈଟଭାରେ ହଠା-
ନ୍ନିଷ୍ପିଷ୍ଟୌ ଶତକୋଟିକୋଟିକଠିନୌ ତସ୍ମିନ୍ସ୍ଥଲେ କୋମଲେ ॥ ୪୯ ॥

ସ୍ତମ୍ଭଦ୍ଵୈତମିଦଂ ପୟୋନିଧିସୁତାଗେହସ୍ୟ ମନ୍ଦାକିନୀ-
ସ୍ୟନ୍ଦାମନ୍ଦମରନ୍ଦିତାଙ୍ଘ୍ରିକମଲଦ୍ଵନ୍ଦ୍ଵସ୍ୟ ନାଲାୟୁଗମ୍ ।
ତ୍ଵଜ୍ଜଙ୍ଘାୟୁଗଲଂ ଵିମୁକ୍ତିକଲଶୀନିର୍ମାଣଦଣ୍ଡଦ୍ଵୟଂ
ସମ୍ପତ୍ତିଦ୍ଵିପସଙ୍ଘୟନ୍ତ୍ରଣଵିଧାଵାଲାନୟୁଗ୍ମଂ ଭଜେ ॥ ୫୦ ॥

ଵିଦ୍ଵାନ୍ ସୋଽପି କଥଂ କଠୋରକମଠୀପୃଷ୍ଠେନ ତୁଲ୍ୟଂ ଵଦ-
ନ୍ନୀଦୃକ୍ପାଦୟୁଗଂ କଥଂ ନୁ କମଲାଵକ୍ଷୋଜଶୈଲେ ଦଧତ୍ ।
ଧିଙ୍ମନ୍ଦାଂ ଵସୁଧାମିଦଂ ମଧୁରିପୋ ଗୋଚାରଣେ ସଞ୍ଚରତ୍-
ପାଷାଣାଙ୍କୁରକଣ୍ଟକାଦିଷୁ ହଠାଦ୍ଦୃଷ୍ଟ୍ଵା ଵିଦୀର୍ଣା ନ ୟତ୍ ॥ ୫୧ ॥

ୟଦ୍ରତ୍ନୌଘମରୀଚୟୋଽପି ସମତାଵ୍ୟାଵର୍ତନଂ ଵିଶ୍ଵତଃ
କୃତ୍ଵା ଦିଗ୍ଵଲୟଂ ଭ୍ରମନ୍ତି ମହିତା ନାଦୈର୍ମଧୁସ୍ୟନ୍ଦିଭିଃ ।
ୟଚ୍ଚ ବ୍ରହ୍ମଶିଵେନ୍ଦ୍ରଵନ୍ଦିତପଦଦ୍ଵନ୍ଦ୍ଵୋପରି ଦ୍ୟୋତତେ
ତତ୍କୃଷ୍ଣସ୍ୟ ପଦାଙ୍ଗଦଦ୍ଵୟମତଃ କିଂ ଵର୍ଣ୍ୟତାଂ ମାଦୃଶୈଃ ॥ ୫୨ ॥

ଶେତେ ୟତ୍କମଲାଲୟା ତଵ ପଦାମ୍ଭୋଜଦ୍ଵୟେ ସଂଗତା
ଧାତା ତତ୍ର ତନୂପଧାନ୍ୟୁଗଲଂ ଗୁଲ୍ଫଚ୍ଛଲାନ୍ନିର୍ମମେ ।
କିଂ ଵା ମନ୍ମଥକାରୁଣା ଵିରଚିତେ ତସ୍ୟା ମୁଦେ କନ୍ଦୁକେ
ସା ୟତ୍କ୍ରୀଡତି ପାଣିପଙ୍କଜତଲେ କୃତ୍ଵା ସଖୀଭିଃ ସହ ॥ ୫୩ ॥

ୟା ରକ୍ତା ଦଶଲୋକପାଲମୁକୁଟପ୍ରାନ୍ତତ୍ଵିଷଃ ସନ୍ତତଂ
କଲ୍ପକ୍ଷ୍ମାରୁହପୁଷ୍ପସମ୍ଭୃତରୁଚସ୍ତ୍ଵତ୍ପାଦମୂଲେ ବଭୁଃ ।
ତା ଦୀଵ୍ୟନ୍ନଖରାଞ୍ଚିତାଙ୍ଗୁଲିତୟା ଜାନନ୍ତି ସତ୍ୟଂ ଜନାଃ
ସ୍ଵସ୍ମିନ୍ନେଵ ସଦାଧରେଣ ଦଧତେ ଲେଖା ୟଦୂର୍ଧ୍ଵଶ୍ରିୟମ୍ ॥ ୫୪ ॥

ପୀୟୁଷଦ୍ୟୁତିବିମ୍ବମମ୍ବରତଲେ ଵିଦ୍ୟୋତମାନଂ ପୁରଃ
ପ୍ରେକ୍ଷ୍ୟୋତ୍ଫୁଲ୍ଲଦୃଶା ତ୍ଵୟା ମୁହୁରିଦଂ ଦେହୀତି ୟଦ୍ଭାଷିତମ୍ ।
ତନ୍ମନ୍ୟେ ତଵ ପଙ୍କଜେକ୍ଷଣ ମହଚ୍ଚିତ୍ରଂ ୟଶୋଦାର୍ଥନଂ
ୟତ୍ତ୍ଵତ୍ପାଦସରୋଜୟୋର୍ନଖମଣିଵ୍ୟାଜେନ ଶୀତାଂଶଵଃ ॥ ୫୫ ॥

ସତ୍ୟଂ ୟଦ୍ଵିବୁଧା ଵଦନ୍ତି ପଦୟୋର୍ଦ୍ଵନ୍ଦ୍ଵଂ ତଵାମ୍ଭୋରୁହେ
ଗୋଧୂଲିଚ୍ଛଲତଃ ସ୍ଥିତାନି ପରିତୋ ହଂସାଲିଚେତାଂସ୍ୟଲମ୍ ।
ପୀତ୍ଵୈତନ୍ମକରନ୍ଦବିନ୍ଦୁମସକୃଦ୍ଵୃନ୍ଦାଵନୀଭୂପତେ
ମଞ୍ଜୀରଦ୍ଵୟମଞ୍ଜୁଶିଞ୍ଜିତମିଷାଦଞ୍ଚନ୍ତି ୟତ୍ପଞ୍ଚମମ୍ ॥ ୫୬ ॥

ଆକୃପ୍ୟାଖିଲଵସ୍ତୁତଃ ପ୍ରଥମତୋ ରାଗଂ ମୁନୀନ୍ଦ୍ରୈସ୍ତତଃ
କୃତ୍ଵା ମାନସପଙ୍କଜେ ତଵ ପଦଦ୍ଵନ୍ଦ୍ଵଂ ସ ତସ୍ମିନ୍ଧୃତୈଃ ।
ୟେନାସ୍ମିନ୍ନରଵିନ୍ଦଲୋଚନ ପୁନସ୍ତତ୍କେସରାଣାଂ ଦ୍ୟୁତି-
ସ୍ତୋମେନାପି ସମଞ୍ଚିତଃ ସମୁଦୟତ୍ୟୁଚ୍ଚୈସ୍ତରାଂ ଶୋଣିମା ॥ ୫୭ ॥

ହଂସାସ୍ତ୍ଵାମୁପନୀୟ ମାନସସରୋଜନ୍ମପ୍ରଦେଶେଽନିଶଂ
କ୍ରୀଡନ୍ତଃ କମଲାଲୟେନ ଭଵତା ସାର୍ଧଂ ପ୍ରମୋଦଂ ଦଧୁଃ ।
ସ ତ୍ଵଂ ଲୋଚନଲୋହିତାଧରପଦଦ୍ୟୋତଃ ଶ୍ରିତୋ ହଂସତାଂ var ଲୋହିତଲୋଚନା
ତତ୍ସମ୍ପର୍କଵଶାଦିତି ଵ୍ରଜକୁଲାଲଙ୍କାର ଶଙ୍କାମହେ ॥ ୫୮ ॥

କ୍ଷୁଦ୍ରାତ୍ମା ନିତରାଂ କିମୁନ୍ନତତରଃ କାଠିନ୍ୟଵାନ୍ନିର୍ଭୟଂ
କିଂ ୟା କେଵଲକୋମଲଃ ଶ୍ରୟତି ଚେତ୍କିଞ୍ଚିନ୍ମଦୀୟଂ ପଦମ୍ ।
ଧନ୍ୟଃ ସୋଽୟମିତୀଵ ଲୋକମଖିଲଂ ସମ୍ବୋଧୟନ୍ମାଧଵ
ତ୍ଵଂ ଧତ୍ସେ ପଦୟୋର୍ୟଵଂ ଧ୍ଵଜଵରଂ ଦମ୍ଭୋଲିମମ୍ଭୋରୁହମ୍ ॥ ୫୯ ॥

ତ୍ଵାଂ ନିତ୍ୟଂ ସମୁପାସ୍ୟ ଦାସ୍ୟଵିଧୟା ସ୍ଥାସ୍ୟାମ ଇତ୍ୟାଶୟା
ବ୍ରହ୍ମେନ୍ଦ୍ରାଦ୍ୟମରୈସ୍ତ୍ଵଦୀୟପଦୟୋଃ ସ୍ଵୀୟା ଧୃତାଃ ସମ୍ପଦଃ ।
ତାସାମଙ୍କୁଶନୀରଜାଶନିଲସଚ୍ଛତ୍ରଧ୍ଵଜାଦ୍ୟାକୃତିଂ
ବିଭ୍ରାଣା ଵିଜୟଶ୍ରିୟଂ ତ୍ରିଜଗତାଂ ଵନ୍ଦ୍ୟାରଵିନ୍ଦାଲୟା ॥ ୬୦ ॥

ତ୍ଵତ୍ପାଦାମ୍ବୁଜସଙ୍ଗମାତ୍ତ୍ରିଜଗତାଂ ଵନ୍ଦ୍ୟାରଵିନ୍ଦାଲୟା
ସ୍ଥାନେ ସ୍ଥାନଗୁଣାଦ୍ଭଵନ୍ତି ହି ଜନାଃ ପ୍ରାୟଃ ପଦଂ ସମ୍ପଦାମ୍ ।
କିଂ ତ୍ଵେକଂ ଶତପତ୍ରଲୋଚନ ମହଚ୍ଚିତ୍ରଂ ୟଦସ୍ମାଦଧଃ
ପାତା ପୁଣ୍ୟତମା ଵିମୁକ୍ତିନଗରୀନିଃଶ୍ରେଣିକା ସ୍ଵର୍ଧୁନୀ ॥ ୬୧ ॥

ୟତ୍ପାଦାମ୍ବୁ ଵିଧାୟ ମୂର୍ଧନି ଚିତାଵାସଃ ଶିଵତ୍ଵଂ ହଠା-
ତ୍ପ୍ରାପ୍ତୋ ଭକ୍ଷିତକାଲକୂଟନିକରୋ ମୃତ୍ୟୁଜୟତ୍ଵଂ ୟୟୌ ।
ଦିଗ୍ଵାସା ନୃକପାଲମାତ୍ରଵିଭଵଶ୍ଚାଵିନ୍ଦଦୀଶାନତାଂ
ସ ତ୍ଵଂ ନନ୍ଦସି ୟସ୍ୟ ମନ୍ଦିରଗତୋ ନନ୍ଦାୟ ତସ୍ମୈ ନମଃ ॥ ୬୨ ॥

ଧୂଲୀଧୂସରିତଂ ମୁଖଂ ତଵ ଶରତ୍ପୂର୍ଣେନ୍ଦୁନିନ୍ଦାଵହଂ
ଵ୍ୟାଲୋଲାଲକକୁଣ୍ଡଲଦ୍ୟୁତି ଚଲନ୍ନେତ୍ରଶ୍ରିୟା ପ୍ରୋଲ୍ଲସତ୍ ।
ୟାଲୋକ୍ୟାର୍ଦ୍ରଵିଲୋଚନା ସ୍ମିତମୁଖୀ ପ୍ରସ୍ୟନ୍ଦମାନସ୍ତନୀ
ପାଣିଭ୍ୟାମଵଲମ୍ବ୍ୟ ଚୁମ୍ବିତଵତୀ ତାଂ ନନ୍ଦଜାୟାଂ ଭଜେ ॥ ୬୩ ॥

ପୀତ୍ଵା ସ୍ତନ୍ୟଵିଷଂ ସହାସୁପଵନୈଃ ସମ୍ପାତିତେ ପୂତନା-
ଦେହେ ଵୈ ଭଵତା ଜନାର୍ଦନ ତୃଣାଵର୍ତେ ଚ ନୀତେ କ୍ଷୟମ୍ ।
ରାହୂନ୍ମୁକ୍ତସୁଧାମୟୂଖସୁଷମା ୟାଦୃକ୍ଚକୋରାଲିଭି-
ର୍ୟାଭିସ୍ତ୍ଵଦ୍ଵଦନଦ୍ୟୁତିଶ୍ଚୁଲୁକିତା ତା ଗୋପକନ୍ୟାଃ ସ୍ତୁମଃ ॥ ୬୪ ॥

ୟଦ୍ବନ୍ଧସ୍ୟ ଵିଧିତ୍ସୟାପି ଵିଵଶଃ କୀନାଶପାଶୈର୍ଦୃଢଂ
ବଦ୍ଧଃ ସାନୁଗପୁତ୍ରବାନ୍ଧଵଜନୋ ଦୁର୍ୟୋଧନୋଽନ୍ତଂ ଗତଃ ।
ତଂ ତ୍ଵାଂ ୟେନ ନିବଧ୍ୟ ନନ୍ଦଦୟିତା ଵୃନ୍ଦାରକୈର୍ଵନ୍ଦିତା
ଜାତାଽଽନନ୍ଦମୟୀ ମୁକୁନ୍ଦ ମହତେ ଭାଵାୟ ତସ୍ମୈ ନମଃ ॥ ୬୫ ॥

ନିର୍ଭିନ୍ନେ ୟମଲାର୍ଜୁନେଽତିଚକିତାସ୍ତୂର୍ଣଂ ଗୃହାନ୍ନିର୍ଗତାଃ
ପୀତ୍ଵା ଦୃକ୍ଚଷକୈସ୍ତ୍ଵଦକ୍ଷତତନୂରୂପାମୃତଂ ନିର୍ଵୃତାଃ ।
ତ୍ଵାମାଦାୟ ଵିଧାୟ ନେତ୍ରସଲିଲୈଃ ସିକ୍ତଂ ତ୍ଵରାମାଶ୍ରିତା
ୟେ ଵୃନ୍ଦାଵନମାଗତାଃ କୃତଧିୟସ୍ତାନ୍ଗୋପଵୃଦ୍ଧାନ୍ସ୍ତୁମଃ ॥ ୬୬ ॥

କୃତ୍ଵା କାଲିୟଦନ୍ଦଶୂକଦମନଂ ତ୍ଵୟ୍ୟାସ୍ଥିତେ ତାଣ୍ଡଵଂ
ତସ୍ୟୋତ୍ତବ୍ଧସମସ୍ତମସ୍ତକମଣିସ୍ତୋମେ ସମୁତ୍ତସ୍ଥୁଷି ।
ୟେନାଲମ୍ଭି ଵିଭାତଭାସ୍କରସୁରପ୍ରାଗ୍ଭାରଶୋଭାସ୍ଫୁର-
ଦ୍ରତ୍ନାମ୍ଭୋଜୟୁଗଦ୍ୟୁତିଃ ପ୍ରତିପଦଂ ତତ୍ତେଽଙ୍ଘ୍ରିୟୁଗ୍ମଂ ଭଜେ ॥ ୬୭ ॥

ଉତ୍ଫୁଲ୍ଲୈଃ ପରିପୀୟ କର୍ଣପୁଟକୈର୍ଵଂଶୀନିନାଦାମୃତଂ
ତଚ୍ଚ ଘ୍ରାଣମୁଦସ୍ୟ ଦତ୍ତକଵଲଂ ପ୍ରୋଦ୍ଭିନ୍ନରୋମାଙ୍କୁରମ୍ ।
ନିଃସ୍ପନ୍ଦୈର୍ନୟନୈରମନ୍ଦମଧୁରୈଃ ଶ୍ୟାମଂ ମହସ୍ତାଵକଂ
ୟେନୋଦ୍ଵୀକ୍ଷିତମମ୍ବୁଜେକ୍ଷଣ ଭଜେ ତଦ୍ଗୋକଦମ୍ବଂ ତଵ ॥ ୬୮ ॥

ଜମ୍ମାରେଃ ସ୍ଫୁରଦାୟୁଧସ୍ୟ ଭଵତା ଦମ୍ଭାଦ୍ରିଵିଦ୍ରାଵଣଂ
କୃତ୍ଵା ଵାମଭୁଜେନ ସପ୍ତଦିଵସାନ୍ୟୋଽସୌ ଧୃତଃ ପର୍ଵତଃ ।
ସୋଽସ୍ତୁ ସ୍ନିଗ୍ଧତମାଲସାରଘଟିତସ୍ତମ୍ଭୈକସମ୍ଭାଵିତ-
ପ୍ରାସାଦଦ୍ୟୁତିନିନ୍ଦକଃ ପ୍ରତିପଦଂ ଭଵ୍ୟାୟ ଗୋଵର୍ଧନଃ ॥ ୬୯ ॥

ତ୍ଵଦ୍ବାହୂଦ୍ଧୃତପର୍ଵତାର୍ପିତଦୃଶଃ ପ୍ରେକ୍ଷ୍ୟ ପ୍ରିୟାୟାଃ ସ୍ଖଲ-
ଦ୍ଵାସଃପୀନପୟୋଧରକ୍ଷିତିଧରୌ ଦୋଃସ୍ତମ୍ଭକମ୍ପେ ତଵ ।
ଶୈଲେ ଚଞ୍ଚଲତାଂ ଗତେ ଵ୍ରଜପତେ ତ୍ରାସାକୁଲେ ଗୋକୁଲେ
ନନ୍ଦେ ମନ୍ଦମୁଖଦ୍ୟୁତୌ ଜୟତି ତେ ମନ୍ଦାକ୍ଷମନ୍ଦେକ୍ଷଣମ୍ ॥ ୭୦ ॥

ପୌଗଣ୍ଡଂ ମଦଖଣ୍ଡନଂ ବଲଭିଦଃ କିଂ ତେ ହରେ ସ୍ତୂୟତେ
କୌମାରଂ ଚରିତଂ ୟତୋ ଵିଜୟତେ ଵ୍ୟାମୋହନଂ ବ୍ରହ୍ମଣଃ ।
କିଂ ସ୍ତଵ୍ୟଂ ତଵ ୟୌଵନଂ ତ୍ରିପୁରଜିଦ୍ୟଦ୍ବାଣୟୁଦ୍ଧେ ଜିତଃ
ସମ୍ମୋହଂ ଗମିତାସ୍ତ୍ଵୟା ୟଦବଲା ଭାଵେଽପି ନେତ୍ରଶ୍ରିୟା ॥ ୭୧ ॥

ପୀତେ ଦାଵହୁତାଶନେ ନିଜଜନତ୍ରାଣୈକହେତୋସ୍ତ୍ଵୟା
ନିଃସ୍ପନ୍ଦଂ ପଶୁପୌଘପକ୍ଷିପଶୁଭିଃ ପେପୀୟମାନେ ତ୍ଵୟି ।
ପ୍ରେମାର୍ଦ୍ରାଣ୍ୟତିନିର୍ମଲାନି ଦିଵିଷଚ୍ଚିତ୍ତାନି ସତ୍ୟଂ ମୁହୁ-
ସ୍ତ୍ଵଦ୍ଗାତ୍ରେ ନୁ ଵିତୀର୍ୟମାଣକୁସୁମଵ୍ୟାଜେନ ଭାନ୍ତି ପ୍ରଭୋ ॥ ୭୨ ॥

କଙ୍କେଲ୍ଲିସ୍ତବକଂ ମୁହୁଃ କମଲିନୀକାନ୍ତଂ ପ୍ରତୀଚୀଗତଂ
ପର୍ୟାଲୋଚ୍ୟ ଵିଲୋକ୍ୟ ଧୂମପଟଲଂ ଗୋଧୂଲିବୁଦ୍ଧ୍ୟାକୁଲାଃ ।
ଉଚ୍ଚୈଃ କୋକିଲକୂଜିତଂ ଚ ମୁରଲୀନାଦଂ ଵିଦିତ୍ଵା ଗୃହା-
ତ୍ତ୍ଵାଂ ୟା ଵୀକ୍ଷିତୁମାଗତାଃ ପଥି ଗଵାଂ ଗୋପାଙ୍ଗନାସ୍ତାଃ ସ୍ତୁମଃ ॥ ୭୩ ॥

ସାୟାହ୍ନେ ସମୁଦଞ୍ଚତି ଶ୍ରୁତିପଥଂ ଵଂଶୀନିନାଦେ ହଠା-
ନ୍ନେପଥ୍ୟସ୍ୟ ସମାପନେନ ଶପଥୈରାଲୀଜନୈଃ ପ୍ରାର୍ଥିତେ ।
ପାଣିଭ୍ୟାମଵଲମ୍ବ୍ୟ ନୀଵିରଶନା ନିର୍ଗମ୍ୟ ତୂର୍ଣଂ ବହି-
ର୍ଦୃଗ୍ଭ୍ୟାଂ ତେ ମୁଖସୌରଭଂ ଚୁଲୁକିତଂ ୟାଭିର୍ଭଜେ ତା ଜନୀଃ ॥ ୭୪ ॥

ୟତ୍ରାଘାସୁରକେଶିଧେନୁକବକାରିଷ୍ଟପ୍ରଲମ୍ବାଦୟଃ
କ୍ରୋଧାଗ୍ନୌ ଭଵତା ହୁତା ଦିତିସୁତାଃ ସନ୍ତର୍ପିତା ଦେଵତାଃ ।
ୟସ୍ମିଂସ୍ତେ ପଦପଙ୍କଜଦ୍ଵୟରଜଃ ପଦ୍ମୋଦ୍ଭଵପ୍ରାର୍ଥିତଂ
ଭେଜୁର୍ଗୋମୃଗପକ୍ଷିଭୂରୁହଲତା ଵୃନ୍ଦାଵନଂ ତଦ୍ଭଜେ ॥ ୭୫ ॥

ଦେଵେନ୍ଦ୍ରସ୍ୟ ପରାଭଵଂ କିମପରଂ ଵ୍ୟାମୋହନଂ ବ୍ରହ୍ମଣଃ
ସମ୍ପଶ୍ୟନ୍ନପି ଵୈଭଵଂ ଵ୍ରଜକୁଲୋତ୍ତଂସ ପ୍ରଚେତାସ୍ତଵ ।
ନନ୍ଦଂ ୟତ୍ପିତରଂ ଜହାର ଭଵତଃ ସ୍ଥାନେ ଜଲାତ୍ମନ୍ୟଦଃ
ସ୍ଥାନେ ତାଦୃଶି ତେ ବଭୂଵ ନ ମନାକ୍କ୍ରୋଧସ୍ୟ ଲେଶୋଽପି ତତ୍ ॥ ୭୬ ॥

ମଞ୍ଜୀରଦ୍ଵୟକଙ୍କଣାଵଲିଲସତ୍କାଞ୍ଚୀଘଟାଶିଞ୍ଜିତେ
ଵୀଣାଵେଣୁମୃଦଙ୍ଗଝର୍ଝରକରୋତ୍ତାଲେ ଦିଶଶ୍ଚୁମ୍ବତି ।
କାମଂ ପୂର୍ଣକଲାନିଧୌ ଵିଲସତି ଭ୍ରଶ୍ୟତ୍ପଟେ ସ୍ଵର୍ଵଧୂ-
ଵୃନ୍ଦେ ଵର୍ଷତି ଦୈଵତେ ସୁମନସୋ ରାସସ୍ତଵାସ୍ତାଂ ମୁଦେ ॥ ୭୭ ॥

ନୃତ୍ୟଦ୍ଭ୍ରୂନୟନୋତ୍ପଲସ୍ମିତମୁଖସ୍ଵିଦ୍ୟତ୍କପୋଲସ୍ଥଲଂ
ଲୀଲାଚଞ୍ଚଲକୁଣ୍ଡଲଂ ଭୁଜଲତାନ୍ଦୋଲକ୍ଵଣତ୍କଙ୍କଣମ୍ ।
ତ୍ରୁଟ୍ୟତ୍କଞ୍ଚୁକବନ୍ଧମୁନ୍ନତକୁଚଂ ତିର୍ୟକ୍ତ୍ରିକଂ ପ୍ରସ୍ଖଲ-
ନ୍ନୀଵି ଵ୍ୟଞ୍ଜିତଶିଞ୍ଜିତଂ ଜୟତି ତେ ରାସଃ ପ୍ରିୟାଭିଃ ସହ ॥ ୭୮ ॥

ଆକୁଞ୍ଚଦ୍ଵଦନଂ କ୍ଵଚିଦ୍ଵିଲସିତାମ୍ଭୋଜାସ୍ୟଶୋମଂ କ୍ଵଚି-
ନ୍ମନ୍ଦସ୍ୟନ୍ଦିଵିଲୋଚଲଂ କ୍ଵଚିଦଲଂ ଦୃକ୍ଚାପଲଂ କୁତ୍ରଚିତ୍ ।
କ୍ଵାପ୍ୟୁଦ୍ଦାମମଦାନ୍ଧସିନ୍ଧୁରଗତଂ କୁତ୍ରାପି ଵିଦୁଲ୍ଲତା-
ଚାଞ୍ଚଲ୍ୟଂ ସ୍ମରଵର୍ଧନଂ ଵିଜୟତେ ଲାସ୍ୟଂ ପ୍ରିୟାଣାଂ ତଵ ॥ ୭୯ ॥

ଅଧ୍ୟାସ୍ୟୋରୁତଲଂ ଵପୁଃ ପୁଲକିତଂ ସ୍ଵିଦ୍ୟତ୍କପୋଲସ୍ଥଲୀଂ
ଦୋର୍ଵଲ୍ଲୀମପି ତାଵକାଂସମିଲିତାଂ କମ୍ପାକୁଲାଂ ବିଭ୍ରତି ।
ପ୍ରୋଦ୍ୟତ୍ପୂର୍ଣକଲାନିଧାଵରୁଚିରେ ସ୍ମେରେ ମୁହୁଃସୀତ୍କୃତେ
ରାଧା ଧନ୍ୟତମା ଦଧାର ଵଦନେ ତାମ୍ବୂଲକଲ୍କଂ ତଵ ॥ ୮୦ ॥

ୟସ୍ୟାଂ ତୁଙ୍ଗତରଙ୍ଗସଙ୍ଗମଵଶାଦ୍ଭୀତା ଭୁଜଙ୍ଗଭ୍ରମା-
ଦାଲିଙ୍ଗତି ଵରାଙ୍ଗନାସ୍ତଵ ଜଲକ୍ରୀଡାଜୁଶୋଽଙ୍ଗଂ ହଠାତ୍ ।
ସା ନିତ୍ୟଂ ଦଲିତେନ୍ଦ୍ରନୀଲନିକରଶ୍ରୀତସ୍କରା ଭାସ୍କର-
ସ୍ୟାପତ୍ୟଂ ତଟିନୀ ଶିଵଂ ଦିଶତୁ ମେ ଗୋପାଲଭୂପାଲଜ ॥ ୮୧ ॥

ଉତ୍ଫୁଲ୍ଲାମ୍ବୁଜମାକଲୟ୍ୟ ଦୟିତାସ୍ମେରାନନଂ ଵିଭ୍ରମ-
ଦ୍ଭୃଙ୍ଗଶ୍ରେଣିମନଙ୍ଗଭଙ୍ଗୁରଦୃଶସ୍ତସ୍ୟାଃ କଟାକ୍ଷଚ୍ଛଟାମ୍ ।
ଶୈଵାଲଂ ପରିଗୃହ୍ୟ କୁନ୍ତଲଧିୟା ଦ୍ରାକ୍ଚୁମ୍ବନାୟୋଦ୍ୟତ-
ସ୍ତ୍ଵଂ ୟସ୍ୟାଂ ହସିତଃ ପ୍ରିୟାଭିରଭିତସ୍ତାଂ ଭାନୁକନ୍ୟାଂ ଭଜେ ॥ ୮୨ ॥

ପୁଷ୍ପଂ ତ୍ଵୟ୍ୟଵଚିନ୍ଵତି ପ୍ରିୟତମାଵୃନ୍ଦେନ ସାର୍ଧଂ ମୁଦା
ଵୃନ୍ଦାରଣ୍ୟମହୀରୁହସ୍ୟ ନିକରେ କମ୍ପାକୁଲେ ନିର୍ଭରମ୍ ।
ତସ୍ମିନ୍ଵର୍ଷତି କୌତୁକେନ କୁସୁମାନ୍ୟୁଚ୍ଚୈଃ ପୁନର୍ଦୈଵତ-
ସ୍ତୋମେଽପି ଵ୍ରଜଭୂପତେ ଵିଜୟତେ ତୈସ୍ତୈଶ୍ଚିତଂ ତେ ଵପୁଃ ॥ ୮୩ ॥

କାନ୍ତାକୋଟିକଲାକୁଲସ୍ୟ ଭଵତଃ ସନ୍ତୋଷ୍ୟ ରାସେ ସ୍ମର-
କ୍ଷୀଣାଂ ଵୀକ୍ଷ୍ୟ ନିଶାଂ ନିଶାକରକରସ୍ତୋମେ ପରଂ ମୁଞ୍ଚତି ।
ସାତଙ୍କଂ ସମୁପାଗତସ୍ୟ ସଦନାଦ୍ୟାନ୍ତଂ ଶୟାନେ ଜନେ
କୀରସ୍ୟାପି ଗିରା ଜୟନ୍ତି ପରିତଃ ପର୍ୟାକୁଲା ଦୃଷ୍ଟୟଃ ॥ ୮୪ ॥

ଉଦ୍ୟନ୍ନେଵ ଭଵାନିଵ ଵ୍ରଜଭୁଵାଂ ସର୍ଵାପଦାଂ ସଂହତି-
ଧ୍ଵାନ୍ତସ୍ତୋମମନୁତ୍ତମଂ ତମନୟତ୍କାନ୍ତଃ ସରୋଜନ୍ମନାମ୍ ।
ସୋଲ୍ଲାସାନି ସରୋରୁହାଣି ନୟନାନୀଵ ତ୍ଵଦାଲୋକନେ
ଲୋକାନାଂ କିଲ ନନ୍ଦଵଂଶତିଲକ ସ୍ଵାପସ୍ୟ ନାୟଂ କ୍ଷଣଃ ॥ ୮୫ ॥

ମିତ୍ରେଣେହ ତମସ୍ଵିନୀଂ ଵିନିହତାଂ ନାଥ ତ୍ଵୟା ପୂତନାଂ
ଵ୍ୟାଧୂତାମିଵ କୈରଵେଷ୍ଵପି ଭଵଦ୍ଵିଦ୍ଵେଷିଵକ୍ତ୍ରଦ୍ୟୁତିମ୍ ।
ଆଶାଂ ପଶ୍ୟ ପୁରନ୍ଦରସ୍ୟ ଦୟିତାଂ ରକ୍ତାମ୍ବରାଲଙ୍କୃତାଂ
ସିନ୍ଦୂରାନ୍ଵିତକୁମ୍ଭମମ୍ବରମଣେର୍ବିମ୍ବଂ ଵହନ୍ତୀଂ ପୁରଃ ॥ ୮୬ ॥

ଗୀତଜ୍ଞାଃ କଵୟୋ ନଟା ବହୁକଲାଶିକ୍ଷାସୁ ଦକ୍ଷାଃ ପରେ
ଵିପ୍ରେନ୍ଦ୍ରାଃ କୁଶପାଣୟୋଽପି ଭଵନଦ୍ଵାରେଷୁ ସନ୍ତ୍ୟୁତ୍ସୁକାଃ ।
ତଲ୍ପଂ ମୁଞ୍ଚ ଦଦସ୍ଵ ଲୋଚନଫଲଂ ତ୍ଵଂ ଦେହଭାଜାମିତି
ପ୍ରାତର୍ଵନ୍ଦିଗିରୋ ଜୟନ୍ତି ଭଵତଃ ସମ୍ବୋଧନେ ନିତ୍ୟଶଃ ॥ ୮୭ ॥ (ଵିଶେଷକମ୍)
ଭାନୋର୍ମଣ୍ଡଲମାଵିରସ୍ତି ପୁରତୋ ନାଦ୍ୟାପି ନିଦ୍ରାହତିଃ
କିଂ ତେ ତାତ ବଲାନୁଜେତି ଜନନୀଵାଗ୍ଵୀଚିମାଚାମତଃ ।
ଅର୍ଧୋନ୍ମୀଲିତପାଟଲାକ୍ଷିୟୁଗଲଂ ପର୍ୟସ୍ତନୀଲାଲକଂ
ଜୃମ୍ଭାରମ୍ଭଵିଶେଷଶୋଭି ଵଦନାମ୍ଭୋଜଂ ଭଜାମସ୍ତଵ ॥ ୮୮ ॥

ମୁଞ୍ଚନ୍ତଂ ଶୟନଂ ଭଵନ୍ତମଭିତଃ ସଙ୍ଗମ୍ୟଗୋପାଙ୍ଗନା-
ସ୍ତୈଲାଭ୍ୟଞ୍ଜନମଞ୍ଜନାଦି ଦଧତୀଃ ସଂଵୀକ୍ଷ୍ୟ ଦେଵ୍ୟଶ୍ଚିରମ୍ ।
ଉଜ୍ଝନ୍ତ୍ୟଃ ସୁମନୋଽମ୍ବରାଣି ସୁମନୋଭାଵା ଵରଂ ସଙ୍ଗତାଃ
ପ୍ରାୟୋ ଗୋପଵଧୂତ୍ଵଲବ୍ଧିମନସୈଵାକାଶସାମ୍ୟଂ ଦଧୁଃ ॥ ୮୯ ॥ var ଭୂୟୋ
ପ୍ରାତର୍ଭୋଜନମାରଚୟ୍ୟ ଵିପିନଂ ପ୍ରସ୍ଥାତୁକାମେ ତ୍ଵୟି
ପ୍ରାୟୋ ଗୋପଵଧୂଲତାସୁ ମିଲିତଃ କନ୍ଦର୍ପଦାଵାନଲଃ ।
ୟଦ୍ଗୋଧୂଲିମିଷାଦୁଦେତି ପରିତୋ ଧୂମାଲିରଭ୍ରଂଲିହା
ତାସାମଶ୍ରୁରସାଃ ସ୍ରଵନ୍ତି ଚ ମୁହୁର୍ଦନ୍ଦହ୍ୟମାନେଽନ୍ତରେ ॥ ୯୦ ॥

ପଞ୍ଚାସ୍ୟେ ଚତୁରାନନେ ଦଶଶତୀନେତ୍ରାଦିପୂର୍ଵେ ଗଵା-
ମଧ୍ଵନ୍ୟଧ୍ଵନି ଲୋକପାଲନିଵହେ ଭୂମୀଲୁଠନ୍ମୂର୍ଧନି ।
ତଦ୍ଵ୍ୟାଘ୍ରାଜିନଭୂଷଣାଦିଭିରଲଂ ତ୍ରସ୍ତେ ସମସ୍ତେ ପଶୌ
ଗୋପାଃ କୋପଵଶାଦ୍ଗୃହୀତଲଗୁଡା ହୀହୀରଵାଃ ସ୍ୟୁର୍ମୁଦେ ॥ ୯୧ ॥

ତିଗ୍ମାଂଶୌ ତପତି କ୍ଵଚିଜ୍ଜଲମୁଚାଂ ସ୍ତୋମେ ଜଲଂ ମୁଞ୍ଚତି
ପ୍ରେମାର୍ଦ୍ରଃ ପ୍ରତନୋତି ୟଃ ସ୍ଵଵପୁଷା ଚିତ୍ରାତପତ୍ରଂ ତଵ ।
ସୋଽୟଂ ଭାସ୍କରକୋଟିଭାସ୍ଵରମହଃସମ୍ଭାରପାଟଚ୍ଚରଃ
ପାରୀନ୍ଦ୍ରୋଽସୁରଦନ୍ତିନାଂ ଦିଶତୁ ମେଂ ଭଵ୍ୟଂ ଭୁଜଙ୍ଗାନ୍ତକଃ ॥ ୯୨ ॥

ମଧ୍ୟାହ୍ନେ ୟମୁନାତଟେ ଵିଟପିନାଂ ମୂଲେ ଵୟସ୍ୟୈଃ ସମଂ
ଦଧ୍ୟନ୍ନାନ୍ୟୁପଭୁଜ୍ୟ ରଜ୍ୟତି ପୁନସ୍ତତ୍କ୍ରୀଡନେ ଚ ତ୍ଵୟି ।
ଦେଵେନ୍ଦ୍ରସ୍ତ୍ରିପୁରାନ୍ତକଃ କମଲଭୂରନ୍ୟେ ଚ ନାକାଲୟାଃ
କାକାକାରଜୁଷୋ ମୁହୁଃ କଵଲୟନ୍ତ୍ୟୁଚ୍ଛିଷ୍ଟମିଷ୍ଟଂ ତଵ ॥ ୯୩ ॥

ନିଦ୍ରାଣେ ତ୍ଵୟି ଶୀତଲେ ତରୁତଲେ ତଲ୍ପୈ ଦଲୈଃ କଲ୍ପିତେ
ସଂଵୀକ୍ଷ୍ୟାମ୍ବୁଜପତ୍ରମନ୍ଦମରୁତା ସଂଵାହିତେ ପାଦୟୋଃ ।
ରୁଦ୍ରବ୍ରହ୍ମମହେନ୍ଦ୍ରତର୍ଜନଵିଧୌ ଗୋପାର୍ଭକାଣାଂ କର-
ଵ୍ୟାଧୂତାନି ଜୟନ୍ତି ଭଙ୍ଗୁରଦୃଶାଂ କାନ୍ତିଶ୍ଚ ଶୋଣାୟିତା ॥ ୯୪ ॥

ସ୍ଫୂର୍ଜନ୍ତସ୍ତପସା ପୁଲସ୍ତ୍ୟପୁଲହାଗସ୍ତ୍ୟାଃ ସଦୁର୍ଵାସସଃ
ସନ୍ତ୍ୟୁଚ୍ଚୈର୍ୟଶସଃ ପରେଽପି ସ ପରଂ ଧନ୍ୟୋ ମୁନିର୍ନାରଦଃ ।
ୟସ୍ୟ ତ୍ଵଦ୍ଗୁଣଗାନମଗ୍ନମନସୋ ଵ୍ୟାପାଦିତେ କେଶିନି
ପ୍ରାଲେୟାଦ୍ରିଵିନିଃସୃତାମରଧୁନୀଧାରାୟତେଽସ୍ରାଵଲିଃ ॥ ୯୫ ॥

ଲକ୍ଷ୍ମାଣି ଧ୍ଵଜଵଜ୍ରପଙ୍କଜୟଵଚ୍ଛତ୍ରୋର୍ଧ୍ଵଲେଖାୟୁତା-
ନ୍ୟାଲକ୍ଷ୍ମ୍ୟାମ୍ବୁରୁହାକ୍ଷ ତେ ଚରଣୟୋଃ କ୍ଷୋଣୀତଲେଽହ୍ନାୟ ୟଃ ।
ଧ୍ୟାୟତ୍ତ୍ୟୁତ୍ପୁଲକତ୍ୟୁଦଞ୍ଚତି ଲୁଠତ୍ୟାକ୍ରନ୍ଦତି ପ୍ରୀୟତେ
କୋଽନ୍ୟୋ ଧନ୍ୟତମସ୍ତତସ୍ତ୍ରିଭୁଵନେ ସ୍ୟାଦ୍ଗାନ୍ଦିନୀନନ୍ଦନାତ୍ ॥ ୯୬ ॥

ଧନ୍ୟଂ ତସ୍ୟ ଜନୁସ୍ତଥୈଵ ପିତରୌ ଧନ୍ୟଂ ତଦୀୟଂ କୁଲଂ
ଧନ୍ୟା ତେନ ଵସୁନ୍ଧରା କିମଧିକଂ ତେନୈଵ ଧନ୍ୟଂ ଜଗତ୍ ।
ୟଃ କଂସୈକନିଦେଶଵର୍ତ୍ୟପି ଭଵତ୍ପାଦାମ୍ବୁଜାଲୋକନା-
ଦକ୍ରୂରୋଽଶ୍ରୁନିରୁଦ୍ଧକଣ୍ଠକୁହରଃ ପ୍ରେମାବ୍ଧିମଗ୍ନୋଽଜନି ॥ ୯୭ ॥

ପର୍ୟାଵୃତ୍ତ୍ୟ ପଶୂନଶେଷସଖିଭିଃ ସାକଂ ତ୍ଵୟା ସ୍ଵୀକୃତେ
ଗୋପୀଲୋଚନପଙ୍କଜାଲିନିଚିତେ ସାୟଂ ଗଵାମଧ୍ଵନି ।
ଜୀୟାସୁର୍ଦୟିତାନନେଷୁ ନିତରାଂ ସାକୂତନୃତ୍ୟାକୁଲାଃ
କାଲିନ୍ଦୀସଦୃଶାଃ ସ୍ମିତେନ ସୁରସାସ୍ତ୍ଵଚ୍ଚକ୍ଷୁଷୋଃ କାନ୍ତୟଃ ॥ ୯୮ ॥

ୟୋ ଵାଚୋ ମନସୋଽପି ନୈଵ ଵିଷୟସ୍ତ୍ଵଂ ତ୍ଵାଂ ଵିଧାୟାତ୍ମଜଂ
ୟାଭ୍ୟଙ୍ଗସ୍ନପନାଶନପ୍ରଭୃତିଭିଃ ସଂଲାଲୟତ୍ୟନ୍ଵହମ୍ ।
ନୋ ଦାନେନ ନ ଚେଜ୍ୟୟା ନ ତପସା ନୋ ସାଙ୍ଖ୍ୟୟୋଗାଦିଭି-
ର୍ୟଲ୍ଲଭ୍ୟଂ ତଦଵାପ ଗୋପଦୟିତା ସାଽଽସ୍ତାଂ ୟଶୋଦା ମୁଦେ ॥ ୯୯ ॥

ପୂର୍ଣେ ଦାନପତେର୍ମନୋରଥଶତୈଃ ସାର୍ଧଂ ପ୍ରଲମ୍ବାରିଣା
ତଲ୍ପେ ନିନ୍ଦିତଦୁଗ୍ଧସିନ୍ଧୁସୁଷମାସାରେ ତ୍ଵୟା ସ୍ଵୀକୃତେ ।
ସନ୍ଦଷ୍ଟୋଷ୍ଠମୁଦଶ୍ରୁ ମର୍ଦିତକରଂ ତଚ୍ଚେଷ୍ଟିତଂ ଶୃଣ୍ଵତଃ
କଂସଧ୍ଵଂସମଭୀପ୍ସତୋ ଜୟତି ତେ ଭ୍ରାତା ସମଂ ମନ୍ତ୍ରଣା ॥ ୧୦୦ ॥

ୟା ସଂଵ୍ୟାପ୍ୟ ସୁଵର୍ଣଭୂଧରପଦଂ ଜାତା ଗିରୀଶାର୍ଚିତା
ସ୍ଵଚ୍ଛା ହଂସକଵିପ୍ରିୟା କମଲମୁଦ୍ଗାମ୍ଭୀର୍ୟମଭ୍ୟଞ୍ଚତି ।
ୟେୟଂ କୃଷ୍ଣପଦାବ୍ଜଭକ୍ତିଵସୁଧାପାତାଲମାଲମ୍ବିତା
ସା ତାପଂ ମମ ସର୍ଵତଃ ପ୍ରଶମୟତ୍ଵାନନ୍ଦମନ୍ଦାକିନୀ ॥ ୧୦୧ ॥

ୟେ ପାଣ୍ଡିତ୍ୟକଵିତ୍ଵସୂନୁଧରଣୀଧର୍ମାର୍ଥକାମାଣିମା-
ଦୀଶିତ୍ଵେନ୍ଦ୍ରପଦାପ୍ତିମୋକ୍ଷମଥଵା ଵାଞ୍ଛନ୍ତି ଭକ୍ତିଂ ହରୌ ।
ସମ୍ଭୂତାଂ ମଧୁସୂଦନପ୍ରପଦତଃ ସନ୍ତୋ ଭଜନ୍ତ୍ଵାଦରା-
ତ୍ତେ ସଂସାରଦଵାଗ୍ନିତାପଶମନୀମାନନ୍ଦମନ୍ଦାକିନୀମ୍ ॥ ୧୦୨ ॥

ଇତି ଶ୍ରୀମନ୍ନନ୍ଦନନ୍ଦନପଦଦ୍ଵନ୍ଦ୍ଵସମୁଦଞ୍ଚନ୍ନଖଚନ୍ଦ୍ରଚନ୍ଦ୍ରିକାଚୟ-
ଦତ୍ତଚିତ୍ତଚକୋରଶ୍ରୀମଧୁସୂଦନସରସ୍ଵତୀଵିରଚିତାନନ୍ଦମନ୍ଦାକିନୀ ସମ୍ପୂର୍ଣା ॥

Ananda Mandakini Lyrics in Oriya | Anandamandakini

Leave a Reply

Your email address will not be published. Required fields are marked *

Scroll to top