Shri Appayya Dikshit’s Arya Ashatakam Lyrics in Kannada:
॥ ಆರ್ಯಾಶತಕಮ್ ಶ್ರೀಮದಪ್ಪಯ್ಯದೀಕ್ಷಿತವಿರಚಿತಮ್ ॥
ದಯಯಾ ಯದೀಯಯಾ ವಾಙ್ನವರಸರುಚಿರಾ ಸುಧಾಧಿಕೋದೇತಿ ।
ಶರಣಾಗತಚಿನ್ತಿತದಂ ತಂ ಶಿವಚಿನ್ತಾಮಣಿಂ ವನ್ದೇ ॥ 1 ॥
ಶಿರಸಿ ಸಿತಾಂಶುಕಲಾಢ್ಯಂ ಕರುಣಾಪೀಯೂಷಪೂರಿತಂ ನಯನೇ ।
ಸ್ಮಿತದುಗ್ಧಮುಗ್ಧವದನಂ ಲಲನಾಕಲಿತಂ ಮಹಃ ಕಲಯೇ ॥ 2 ॥
ಅನ್ತೇ ಚಿನ್ತಯತೇ ಯತ್ತತ್ತಾಮೇತೀತಿ ಚ ತ್ವಯಾ ಗದಿತಮ್ ।
ಶಿವ ತವ ಚರಣದ್ವನ್ದ್ವಧ್ಯಾನಾನ್ನಿರ್ದ್ವನ್ದ್ವತಾ ಚಿತ್ರಮ್ ॥ 3 ॥
ದ್ರುತಮುದ್ಧರ ಹರ ಸಂಹರ ಸಂಹರ ಭವವೈರಿಣಂ ತ್ವತಿತ್ವರಯಾ।
ಭವ ಭವತೋಽಪಿ ಭವೋಽಯಂ ರಿಪುರೇತನ್ನಿನ್ದಿತಂ ಜಗತಿ ॥ 4 ॥
ಚೇತಸಿ ಚಿನ್ತಯ ವಾಮಾಂ ವಾ ಮಾಂ ವಾ ನ ದ್ವಿಧಾ ಸ್ಥಿತಸ್ಯಾಹಮ್ ।
ಇತಿ ಯದಿ ವದಸಿ ದಯಾಬ್ಧೇ ವಾಮಾರ್ಧೇ ಸಾ ತವಾಪ್ಯಸ್ತಿ ॥ 5 ॥
ಮಿತ್ರಕಲತ್ರಸುತಾದೀನ್ ಧ್ಯಾಯಸ್ಯನಿಶಂ ನ ಮಾಂ ಕ್ಷಣಂ ಜಾತು।
ಯದಿ ಕುಪ್ಯಸಿ ಮಯಿ ದೀನೇ ತುಲಯಾಮಿ ತ್ವಾಂ ಕಥಂ ಸಹ ತೈಃ ॥ 6 ॥
ಮತ್ಕೃತದುಷ್ಕೃತಶಾನ್ತಿರ್ವಿಷವಹ್ನಿಜಲಾದಿಯಾತನಯಾ ।
ಯದಿ ನಿಶ್ಚಯಸ್ತವಾಯಂ ಪ್ರೇಷಯ ಗರಲಾಗ್ನಿಗಂಗೌಘಾನ್ ॥ 7 ॥
ಭೋಗಂ ವಿಹಾಯ ಯೋಗಂ ಸಾಧಯ ದಾಸ್ಯೇ ತವಾಪಿ ಪರಭಾಗಮ್ ।
ಮಮ ಕಿಂ ನ ವಾವಕಾಶಸ್ತ್ವದ್ಭೂಷಾಭೋಗಿನಾಂ ಮಧ್ಯೇ ॥ 8 ॥
ಲಲನಾಲೋಲವಿಲೋಕನಜಿತಮಿತ್ಯವಮನ್ಯಸೇ ಕಥಂ ಮಾಂ ತ್ವಮ್।
ತ್ವಯಿ ಜಾಯಾರ್ಧಶರೀರೇ ಶಿವ ಶಿವ ನಾಽಽಲೋಕನಾನುಭವಃ ॥ 9 ॥
ಸ್ಮರಣಾದನುಪದಮೀದೃಗ್ವಿಸ್ಮೃತಿಶೀಲೋ ನ ವಲ್ಲಭೋಽಸಿ ಮಮ।
ಉತ್ಪಾದ್ಯಾಶಾಂ ಭಂಕ್ತುರ್ಲಗ್ನಾ ವೃತ್ತಿಸ್ತವೈವೇಯಮ್ ॥ 10 ॥
ಪುತ್ರಃ ಪಿತೃವತ್ಪುತ್ರೀ ಮಾತೃವದಿತ್ಥಂ ಮಮಾತ್ರ ಕೋ ದೋಷಃ ।
ಅಹಮಪಿ ಭೋಗಾಸಕ್ತಃ ಪ್ರಕೃತಿರ್ಜಾತಾ ವಿಷಾದವತೀ ॥ 11 ॥
ವಪುರರ್ಧಂ ವಾಮಾರ್ಧಂ ಶಿರಸಿ ಶಶೀ ಸೋಽಪಿ ಭೂಷಣಂ ತೇಽರ್ಧಮ್ ।
ಮಾಮಪಿ ತವಾರ್ಧಭಕ್ತಂ ಶಿವ ಶಿವ ದೇಹೇ ನ ಧಾರಯಸಿ ॥ 12 ॥
ಸ್ತನಪಂ ಶಿಶುಂ ತ್ವದೀಯಂ ಪಾಲಯ ಸಾಮ್ಬ ದ್ರುತಂ ನ ಪಾಸಿ ಯದಿ ।
ಜಗತಃ ಪಿತೇತಿ ಗೀತಂ ಯಾತಂ ನಾಮೇತಿ ಜಾನೀಹಿ ॥ 13 ॥
ಮಾತರಿ ಹಿತ್ವಾ ಬಾಲಂ ಕಾರ್ಯಾಕುಲಧೀಃ ಪಿತಾ ಬಹಿರ್ಯಾತಿ ।
ಶಿವ ಬತ ಶಕ್ನೋಷಿ ಕಥಂ ಸ್ವಾಂಗಾನ್ಮನ್ಮಾತರಂ ಮೋಕ್ತುಮ್ ॥ 14 ॥
ಗುಣಹೀನತಾಂ ತನೂಜೇ ಮಯಿ ದೃಷ್ಟ್ವಾ ಕಿಂ ಪರಿತ್ಯಜಸ್ಯೇವಮ್ ।
ಉಚಿತಂ ಗುಣಿನಸ್ತ್ವೇತನ್ನಿರ್ಗುಣರೂಪಸ್ಯ ತೇಽನುಚಿತಮ್ ॥ 15 ॥
ಕಾಮಕ್ರೋಧಕಟಾಭ್ಯಾಂ ಮದಜಲಧಾರಾಂ ನಿರಂಕುಶೇ ಸ್ರವತಿ ।
ಮತ್ಕೃತದುಷ್ಕೃತಕರಿಣಿ ಪ್ರಕಟಾ ಪಂಚಾಸ್ಯತಾ ತೇಽಸ್ತು ॥ 16 ॥
ತ್ವದ್ಧೀನಂ ಮಾಂ ದೀನಂ ದೃಷ್ಟ್ವಾ ವಿಷಯಾತಿರಾಗಸಮ್ಬದ್ಧಮ್ ।
ಧಾವತ್ಯಕೀರ್ತಿರೇಷಾ ನಾಥಃ ಶಕ್ತೋಽಪ್ಯುದಾಸೀನಃ ॥ 17 ॥
ಅರಿಭಿರ್ಜಿತೈರಶಕ್ತೈರ್ವಿಜ್ಞಾಪ್ಯಂ ಸೇವಕೈಃ ಪ್ರಭೋರ್ನೀತಿಃ ।
ವಿಷಯೈರ್ಜಿತೋಽಸ್ಮಿ ಶಮ್ಭೋ ತವ ಯಚ್ಛ್ಲಾಘ್ಯಂ ತದಾರಚಯ ॥ 18 ॥
ಸಂರಕ್ಷ್ಯತೇ ಸ್ವದಾಸೈರ್ಯದ್ಯದ್ವಸ್ತು ಪ್ರಭೋರಭೀಷ್ಟತರಮ್ ।
ದಾಸಸ್ತವೇಷ್ಟಕಾಮಃ ಕಾನ್ತಾಂ ಕನಕಂ ಕಥಂ ತ್ಯಜೇಯಮಹಮ್ ॥ 19 ॥
ಪಾಪೀ ಪಾಪಂ ಸುಕೃತೀ ಸುಕೃತಂ ಭುಂಕ್ತೇ ಮಮಾತ್ರ ಕಿಂ ನು ಗತಮ್।
ಇತ್ಯೌದಾಸ್ಯಮಯುಕ್ತಂ ಭೃತ್ಯಾಕೀರ್ತಿಃ ಪ್ರಭೋರೇವ ॥ 20 ॥
ವಿಕಲೇಽತಿದೀನಚಿತ್ತೇ ವಿಷಯಾಶಾಮಾತ್ರಧಾರಿಣಿ ನಿತಾನ್ತಮ್ ।
ಮಯಿ ರೋಷತಃ ಕಿಯತ್ ತೇ ವದ ವದ ಶಮ್ಭೋ ಯಶೋ ಭಾವಿ ॥ 21 ॥
ಸ್ವಗೃಹೇ ಭುವನತ್ರಿತಯೇ ಯೋಗಕ್ಷೇಮೇ ಮುಖಾನಿ ಚತ್ವಾರಿ ।
ಮತ್ಪ್ರತಿವಚನಂ ಹಿ ವಿನಾ ಪಂಚಮವದನಸ್ಯ ಕುತ್ರ ಗತಿಃ ॥ 22 ॥
ತವ ಕೋಽಹಂ ತ್ವಂ ಮಮ ಕಃ ಪಂಚಸ್ವೇವಂ ವಿಚಾರಯಸ್ವೇತಿ ।
ಬ್ರೂಷೇ ದೀನದಯಾಬ್ಧೇ ಪಂಚಮುಖತ್ವಂ ತ್ವಯಿ ವ್ಯಕ್ತಮ್ ॥ 23 ॥
ಯಾಚಸ್ವಾನ್ಯಂ ಧನಿನಂ ಭವಿತಾ ತವ ಕೋ ದಿಗಮ್ಬರಾಲ್ಲಾಭಃ ।
ಮಾಂ ಮಾ ಪ್ರತಾರಯೈವಂ ಖ್ಯಾತಃ ಶ್ರೀಕಂಠನಾಮಾಸಿ ॥ 24 ॥
ವಸನಾಶನಪ್ರದಾತರಿ ಮಯಿ ಜೀವತಿ ಕಿಂ ಸಮಾಕುಲಸ್ತ್ವಮಿತಿ ।
ದೋಹಾಯ ಮೋಚ್ಯಮಾನೋ ವತ್ಸಃ ಕಿಂ ನ ತ್ವರಾಮಯತೇ ॥ 25 ॥
ಪಾತಕರಾಶಿರಿತೀದಂ ತ್ವಯಾಭಿಧಾನಂ ಶ್ರುತಂ ನ ತದ್ ದೃಷ್ಟಮ್।
ತದ್ದರ್ಶನಕುತುಕಂ ಯದಿ ಮಾಂ ದ್ರಷ್ಟುಂ ಕಿಂ ವಿಲಮ್ಬಸೇ ದೇವ ॥ 26 ॥
ಪಾತಕರಾಶಿರಸಿ ತ್ವಂ ಪಶ್ಯಾಮ್ಯತ ಏವ ನಾಹಮಿತಿ ವದಸಿ ।
ಪಾತಕರೂಪಾಜ್ಞಾನೇ ಶಿವ ತವ ಸರ್ವಜ್ಞತಾಭಂಗಃ ॥ 27 ॥
ಪಾಪಂ ಪಾಪಮಿತೀದಂ ಕರೋಷಿ ಶಿವ ಕಿಂ ಮುಧಾ ಬುಧಾನ್ ಭ್ರಾನ್ತಾನ್ ।
ತತ್ಸತ್ಯಂ ಚೇನ್ನ ಕಥಂ ತ್ವಯಾನುಭೂತಂ ನ ದೃಷ್ಟಂ ವಾ ॥ 28 ॥
ಪಾಪೇ ಲೋಕಾನುಭವಃ ಸ ಏವ ಮಾನಂ ಮಮಾಪ್ಯನನುಭೂತೇ ।
ನ ಹಿ ಪರಕೀಯಾನುಭವಃ ಜ್ಞಾತುಂ ಶಕ್ಯಃ ಪರೇಣಾಪಿ ॥ 29 ॥
ಲೋಕಾಭಿನ್ನಃ ಸೋಽಹಂ ವಕ್ತುಂ ವಾಕ್ಯಂ ಹ್ಯುಪಕ್ರಮಸ್ತವ ಚೇತ್।
ಸಿದ್ಧಾ ಮನೋರಥಾ ಮೇ ತ್ವತ್ತಃ ಕಸ್ಯಾಪಿ ಲೋಕಸ್ಯ ॥ 30 ॥
ಅತಿವಲ್ಗನಂ ಮಮೈತನ್ಮೂಢತ್ವಂ ಯದ್ಯಪಿ ಪ್ರಭೋಃ ಪುರತಃ ।
ದೀನಃ ಕರೋಮಿ ಕಿಂ ವಾ ಮದ್ವಿಷಯೇ ಕೋ ನಿವೇದಯತಿ ॥ 31 ॥
ಲಘುರಸಿ ಕಿಂ ತ್ವಯಿ ದಯಯಾ ಮಾ ಮಾ ಮಂಸ್ಥಾಃ ಶಿವೇತಿ ಸಹಸಾ ತ್ವಮ್।
ಭಾರೋ ಭುವೋಽಸ್ಮಿ ಧೃತ್ವಾ ಸ್ವಕರೇ ತುಲಯಾಶು ಮಾಂ ಶಮ್ಭೋ ॥ 32 ॥
ಸಸ್ಯೇ ತೃಣೇ ಚ ವೃಷ್ಟಿಂ ತುಲ್ಯಾಂ ದೇವಃ ಸದೈವ ವಿದಧಾತಿ ।
ದೇವೋ ಮಹಾನ್ ಬತ ತ್ವಂ ಗುರುಲಘುವಾರ್ತಾಂ ಕಥಂ ಕುರುಷೇ ॥ 33 ॥
ದಿಷ್ಟೋದ್ದಿಷ್ಟಂ ದಾಸ್ಯಾಮ್ಯನ್ಯನ್ನೇಷ್ಟಂ ಯದಿ ಸ್ಫುಟಂ ವಾಕ್ಯಮ್ ।
ದತ್ತಾ ಕಥಂ ತ್ವಯಾಸಾವಜರಾಮರತಾ ಮೃಕಂಡುಜನೇಃ ॥ 34 ॥
ನಾದತ್ತಂ ಪ್ರಾಪ್ನೋತೀತ್ಯೇತದ್ವಾಕ್ಯಂ ಪ್ರತಾರಣಾಮಾತ್ರಮ್ ।
ಉಪಮನ್ಯುನಾ ಕದಾ ವಾ ಕಸ್ಮೈ ದುಗ್ಧೋದಧಿರ್ದತ್ತಃ ॥ 35 ॥
ಪ್ರಬಲತರೋನ್ಮಾದಾಢ್ಯಂ ತ್ವಾಮಪ್ಯಗಣಯ್ಯ ಧಾವಮಾನಂ ಚ ।
ಮಚ್ಚೇತೋಽಪಸ್ಮಾರಂ ನಿಯಮಯ ಶಮ್ಭೋ ಪದಾಭ್ಯಾಂ ತೇ ॥ 36 ॥
ಆಶಾಪಿಶಾಚಿಕಾ ಮಾಂ ಭ್ರಮಯತಿ ಪರಿತೋ ದಶಸ್ವಪಿ ದಿಶಾಸು ।
ಸ್ವೀಯೇ ಪಿಶಾಚವರ್ಗೇ ಸೇವಾಯೈ ಕಿಂ ನ ಯೋಜಯಸಿ ॥ 37 ॥
ಯಕ್ಷಾಧೀನಾಂ ರಕ್ಷಾಂ ತ್ರ್ಯಕ್ಷ ನಿಧೀನಾಂ ಕುತೋ ನು ವಾ ಕುರುಷೇ।
ಸಾಕ್ಷಾನ್ಮನುಷ್ಯಧರ್ಮಾಽಪ್ಯಹಹ ಕಥಂ ನು ವಿಸ್ಮೃತಿರ್ಮಮ ತೇ ॥ 38 ॥
ಧನದೇ ಸಖಿತ್ವಮೇತತ್ ತವ ಯತ್ ತತ್ರಾಸ್ತಿ ವಿಸ್ಮಯಃ ಕ ಇವ ।
ಮಯಿ ನಿರ್ಧನೇ ತದಾಸ್ತಾಂ ತ್ರಿಜಗತಿ ಚಿತ್ರಂ ಕಿಯದ್ಭಾವಿ ॥ 39 ॥
ಸಖಿತಾರೂಪನಿಧಾನಂ ವಿತ್ತನಿಧಾನಂ ದ್ವಿಧಾ ಧನಂ ತವ ಯತ್ ।
ನೈಕಕರೇ ನೃಪನೀತಿಸ್ತತ್ರಾನ್ಯತರನ್ನಿಧೇಹಿ ಮಯಿ ॥ 40 ॥
ಪಾಲಯ ವಾ ಮಾಂ ಮಾ ವಾ ಮತ್ತನುಭೂತಾ ತು ಪಂಚಭೂತತತಿಃ ।
ಪೋಷ್ಯಾವಶ್ಯಂ ಭವತಾ ಭವಿತಾ ನೋ ಚೇನ್ನ ಭೂತಪತಿಃ ॥ 41 ॥
ಅತಿಕೋಮಲಂ ಮನಸ್ತೇ ಮುನಿಭಿರ್ಗೀತಂ ಕುತೋಽಧುನಾ ಕಠಿನಮ್ ।
ಮನ್ಯೇ ವಿಷಾಶನಾರ್ಥಂ ಕಠಿನಂ ಚೇತಸ್ತ್ವಯಾ ವಿಹಿತಮ್ ॥ 42 ॥
ಮಾಂ ದ್ರಷ್ಟುಮಷ್ಟಮೂರ್ತೇ ಕರುಣಾ ತೇಽದ್ಯಾಪಿ ಕಿಂ ನ ವೋಲ್ಲಸತಿ ।
ಭಿಕ್ಷಾಪ್ರಸಂಗತೋ ವಾ ಕಿಯತಾಂ ನೋ ಯಾಸಿ ಸದನಾನಿ ॥ 43 ॥
ವಿತ್ತಾಧಿಪಃ ಸಖಾ ತೇ ಭಾರ್ಯಾ ದೇಹೇ ತವಾನ್ನಪೂರ್ಣಾಖ್ಯಾ ।
ಊರೀಕೃತಂ ನ ದೂರೀಕುರುಷೇ ಭಿಕ್ಷಾಟನಮಪೀಶ ॥ 44 ॥
ನಾಂಗೀಕೃತೋ ಮಯಾ ತ್ವಂ ತತ ಏವ ನ ದರ್ಶನಂ ಮಮ ತವಾಸ್ತಿ ।
ಇತಿ ನೋತ್ತರಂ ಪ್ರದೇಯಂ ಶಿವ ಶಿವ ವಿಶ್ವೇಶನಾಮಾಸಿ ॥ 45 ॥
ಯದಿ ದೇಹಗೇಹರೂಪಂ ದದಾಸಿ ದೇಶಾಧಿಕಾರಕಾರ್ಯಂ ಮಮ ।
ರಸನಾಖ್ಯಲೇಖಪತ್ರೇ ಸುದೃಢಾಂ ಕುರು ನಾಮಮುದ್ರಾಂ ತೇ ॥ 46 ॥
ರಸನೋಕ್ತಂ ಕುರು ಸರ್ವಂ ಶಿವ ತವ ನಾಮಾಧಿಮುದ್ರಿತಾಸ್ತೀಯಮ್ ।
ಗಣಯಸಿ ಮುದ್ರಾಂ ನ ಹಿ ಚೇತ್ ಪ್ರಭುತೋಚ್ಛಿನ್ನಾ ತವೈವ ಸ್ಯಾತ್ ॥ 47 ॥
ಅತ್ಯಾಟಿನಂ ಕರಾಲಂ ಭಿಕ್ಷಾಯುಕ್ತಂ ಕಪಾಲಶೂಲಕರಮ್ ।
ಮದ್ದಾರಿದ್ರ್ಯಂ ಭೈರವರೂಪಂ ಕುರು ಚಾರ್ಧಚನ್ದ್ರಯುತಮ್ ॥ 48 ॥
ದಾರಿದ್ರ್ಯಚಂಡರಶ್ಮೌ ಪ್ರತಪತಿ ಕೇದಾರವಚ್ಚ ಮಯಿ ಶುಷ್ಕೇ ।
ಜಲಧರತಾಯಾಂ ಸತ್ಯಾಂ ತ್ವಯಿ ಶಿವ ನಾದ್ಯಾಪಿ ಸಮುಪೈಷಿ ॥ 49 ॥
ದಾರಿದ್ರ್ಯಾಖ್ಯಮನೋಭೂಃ ಕ್ಲೀಬಂ ಚೇತೋಽಪಿ ಮೋಹಯತ್ಯನಿಶಮ್ ।
ಏನಂ ಲೀನಂ ಕರ್ತುಂ ಧನ್ಯಃ ಕೋಽನ್ಯಸ್ತ್ವದನ್ಯೋಽಸ್ತಿ ॥ 50 ॥
ಭಾಲಾನಲಾಕ್ಷಿಯುಕ್ತಸ್ತ್ರಿಜಗತಿ ನಾನ್ಯೋ ಮದನ್ಯ ಇತಿ।
ಗರ್ವಂ ಮಾ ವಹ ಯಾವದ್ದಾರಿದ್ರ್ಯಾಗ್ನಿಃ ಕಪಾಲೇ ಮೇ ॥ 51 ॥
ಚೇತಃ ಕುರು ಮಾ ಕಲಹಂ ತವ ವೈಕ್ಲವ್ಯೇಽಪಿ ಶಮ್ಭುನಾ ಪ್ರಭುಣಾ।
ನ ವದತಿ ಯದ್ಯಪಿ ಭರ್ತಾ ತವೋಪಕರ್ತಾ ಸ ಏವಾಸ್ತಿ ॥ 52 ॥
ಅಯಿ ಚಿತ್ತ ವಿತ್ತಲೇಶೇ ಸಹಜಪ್ರೇಮ್ಣಾ ಕಿಯನ್ನು ಲುಬ್ಧಮಸಿ ।
ನ ತಥಾಪಿ ತದ್ವಿಯೋಗಃ ಕೇವಲಮಾಸ್ತೇ ಶಿವೇನಾಪಿ ॥ 53 ॥
ಚೇತಃ ಕೀರ ವಿಹಾರಂ ಪರಿಹರ ಪರಿತಃ ಸ್ವಯಂ ಪ್ರಯತ್ನೇನ।
ಅತ್ತುಂ ಕಾಲಬಿಡಾಲೋ ಧಾವತಿ ಶಿವಪಂಜರಂ ಪ್ರವಿಶ ॥ 54 ॥
ಚೇತಃ ಸದಾಗತೇ ತ್ವಂ ಪ್ರತ್ಯಾಶಾವಾತ್ಯಯಾನುಗತಮೂರ್ತಿಃ।
ಮಾ ವಹ ವಿಷಯಾರಣ್ಯೇ ಲೀನೋ ಭವ ಸಚ್ಚಿದಾಕಾಶೇ ॥ 55 ॥
ಚೇತಃ ಶೃಣು ಮದ್ವಚನಂ ಮಾ ಕುರು ರಚನಂ ಮನೋರಥಾನಾಂ ತ್ವಮ್ ।
ಶರಣಂ ಪ್ರಯಾಹಿ ಶರ್ವಂ ಸರ್ವಂ ಸಕೃದೇವ ಸೋಽರ್ಪಯಿತಾ ॥ 56 ॥
ಭ್ರಾತಃ ಶೃಣು ಮಚ್ಚೇತೋ ಮಾ ನಯ ಕಾಲಂ ತ್ವಿತಸ್ತತೋ ಭ್ರಮಣಾತ್ ।
ಕಾಲಕ್ಷೇಪೇಚ್ಛಾ ಚೇದವಲಮ್ಬಯ ಕಾಲಕಾಲಂ ತ್ವಮ್ ॥ 57 ॥
ಅಯಿ ಚೇತೋವಿಹಗ ತ್ವಂ ವಿಷಯಾರಣ್ಯೇ ಭ್ರಮನ್ನಸಿ ಶ್ರಾನ್ತಃ ।
ವಿಶ್ರಾಮಕಾಮನಾ ಚೇಚ್ಛಿವಕಲ್ಪರುಹೇ ಚಿರಂ ತಿಷ್ಠ ॥ 58 ॥
ಚೇತೋಮಧುಕರ ದೂರಂ ದೂರಂ ಕಮಲಾಶಯಾ ಕುತೋ ಯಾಸಿ ।
ಧ್ಯಾನಾದನುಪದಮೇತಚ್ಛಿವಪದಕಮಲಂ ತವಾಯಾತಿ ॥ 59 ॥
ಚೇತಶ್ಚಕೋರ ತಾಪಂ ಭೂಪಂ ಸಂಸೇವ್ಯ ಕಿಂ ವೃಥಾ ಯಾಸಿ ।
ಯದಿ ಚನ್ದ್ರಿಕಾಭಿಲಾಷೋ ನಿಕಷಾ ಭವ ಚನ್ದ್ರಚೂಡಸ್ಯ ॥ 60 ॥
ಚೇತಃಕುರಂಗ ಗೀತೇ ರಕ್ತಂ ಚೇತಸ್ತವಾಸ್ತ್ವನವಗೀತೇ ।
ಭಗವದ್ಗೀತಾಗೀತೇ ನಗಜಾಕಲಿತೇ ತದಾರಚಯ ॥ 61 ॥
ರಸನೇ ನಿನ್ದಾವ್ಯಸನೇ ಪೈಶುನ್ಯೇ ವಾ ನ ವಾಗ್ಮಿತಾಂ ಯಾಹಿ ।
ತ್ರಿಪುರಾರಿನಾಮಮಾಲಾಂ ಜಿತಕಾಲಾಂ ಶೀಲಯಾಶು ತ್ವಮ್ ॥ 62 ॥
ರಸನೇ ರಸಾನ್ ಸಮಸ್ತಾನ್ ರಸಯಿತ್ವಾ ತದ್ವಿವೇಚನೇ ಕುಶಲಾ ।
ಅಸಿ ತದ್ವದಾಶು ಪಶ್ಯೇಃ ಶಿವನಾಮ್ನಃ ಕೋ ರಸೋಽಯಮಿತಿ ॥ 63 ॥
ಶಿವನಾಮಸಲ್ಲತಾಂ ತ್ವಂ ರಸನಾಪಲ್ಲವ ಕದಾಪಿ ನ ವಿಹಾತುಮ್ ।
ಯದಿ ವಾಂಛಸೇ ತದಾ ಮಾ ಕೋಮಲತಾಂ ಸರ್ವಥಾ ಜಹಿಹಿ ॥ 64 ॥
ಹಾಲಾಹಲಸ್ಯ ತಾಪಃ ಶಶಿನಾ ಗಂಗಾಮ್ಬುನಾ ನ ಯದಿ ಯಾತಿ ।
ಶಿವ ಮಾ ಗೃಹಾಣ ಭುಜಗಾನ್ ಮದ್ರಸನಾಪಲ್ಲವೇ ಸ್ವಪಿಹಿ ॥ 65 ॥
ಲೋಚನ ಕೋಽಭೂಲ್ಲಾಭಃ ಸರ್ವಾನೇವ ದ್ವಿಲೋಚನಾನ್ ವೀಕ್ಷ್ಯ ।
ದೃಷ್ಟಸ್ತ್ರಿಲೋಚನಶ್ಚೇತ್ ಸಫಲಂ ಜನ್ಮೈವ ತೇ ಭಾವಿ ॥ 66 ॥
ನಾಲೋಕತೇ ಯದಿ ತ್ವಾಂ ಮನ್ನೇತ್ರಂ ಕೃಷ್ಣಮಸ್ತು ಮುಖಮಸ್ಯ ।
ಸ್ವಾಂ ತ್ರ್ಯಕ್ಷ ದಕ್ಷತಾಂ ಮೇ ದರ್ಶಯ ನಯನಾವಲೋಕಸ್ಯ ॥ 67 ॥
ತ್ವಂ ಲೋಚನಾನ್ಧಕಾರೇ ದ್ರಷ್ಟುಂ ವಸ್ತ್ವನ್ಧಕಾರಭಿನ್ನಂ ಕಿಮ್ ।
ವಾಚ್ಛಸ್ಯನೇನ ಸಂಗೇಽದ್ದೃಶ್ಯಮಪೀದಂ ತ್ವಯಾ ದೃಶ್ಯಮ್ ॥ 68 ॥
ಶ್ರವಣ ಸಖೇ ಶೃಣು ಮೇ ತ್ವಂ ಯದ್ಯಪಿ ಜಾತೋ ಬಹುಶ್ರುತೋಽಸ್ತಿ ಭವಾನ್ ।
ಶಬ್ದಾತೀತಂ ಶ್ರೋತುಂ ಶಿವಮನ್ತ್ರಾತ್ ಕೋಽಪರೋ ಮನ್ತ್ರಃ ॥ 69 ॥
ಘ್ರಾಣ ಪ್ರಾಣಸಖೋ ಮೇ ಭವಸಿ ಭವಾನ್ ಪಾರ್ಥಿವೋಽಸ್ತಿ ಕಿಮು ವಾನ್ಯತ್ ।
ಶಿವಪದಕಮಲಾಮೋದೇ ಮೋದಂ ಗನ್ತಾಸಿ ಯದಿ ಶೀಘ್ರಮ್ ॥ 70 ॥
ರಾಮಾಸ್ಪರ್ಶಸುಖೇ ತೇ ನಿತರಾಂ ಭೋ ವಿಗ್ರಹಾಗ್ರಹೋಽಸ್ತಿ ಯದಿ ।
ಆಲಿಂಗಯಾರ್ಧರಾಮಂ ರಾಮಾಽಭಿನ್ನಃ ಸ್ವಯಂ ಭವಸಿ ॥ 71 ॥
ವಿಗ್ರಹ ವಿಗ್ರಹಮೇವ ತ್ವಂ ಕುರು ದೇವೇನ ನಾಽಮುನಾ ಸಖ್ಯಮ್ ।
ರುಚಿರಪ್ಯಸ್ಮಿನ್ ಶಮ್ಭೌ ಜನಯತ್ಯರುಚಿಂ ಸ್ವದೇಹೇಽಪಿ ॥ 72 ॥
ಸಮ್ಮೀಲಯಾಶು ರಾಮಾಂ ತ್ವದ್ವಾಮಾಂಗಾನ್ಮಯಾ ಸಮಂ ಶಮ್ಭೋ ।
ಜಾತಂ ಮಮಾಪಿ ಯಸ್ಮಾದ್ ದುಃಖೇನಾರ್ಧಂ ಶರೀರಮಿದಮ್ ॥ 73 ॥
ಅಪರಾಧಕಾರಿಣಂ ಮಾಂ ಮತ್ವಾ ಶಮ್ಭೋ ಯದಿ ತ್ಯಜಸ್ಯೇವಮ್ ।
ವ್ಯಾಧಃ ಶಿರಸಿ ಪದಂ ತೇ ದತ್ವಾ ನ ಜಗಾಮ ಕಿಂ ಮುಕ್ತಿಮ್ ॥ 74 ॥
ಪಾರ್ಥಃ ಕಲಹಂ ಧನುಷಾ ತಾಡನಮಪಿ ಮೂರ್ಧ್ನಿ ತೇ ನ ಕಿಂ ಕೃತವಾನ್ ।
ತತ್ರಾಪಿ ತೇ ಪ್ರಸನ್ನಂ ಚೇತಃ ಸನ್ನೇ ಮಯಿ ಕುತೋ ನ ॥ 75 ॥
ತ್ವಯಿ ತುಷ್ಟೇ ರುಷ್ಟೇ ವಾ ಶಿವ ಕಾ ಚಿನ್ತಾ ಸ್ವದುಃಖಭಂಗೇ ಮೇ ।
ಉಷ್ಣಂ ವಾನುಷ್ಣಂ ವಾ ಶಮಯತಿ ಸಲಿಲಂ ಸದೈವಾಗ್ನಿಮ್ ॥ 76 ॥
ದೋಷಾಕರೇ ದ್ವಿಜಿಹ್ವೇ ರತಿಮತಿಶಯಿತಾಂ ಕರೋಷಿ ಯದಿ ಶಮ್ಭೋ।
ಅಹಮಸ್ಮಿ ತಥಾ ವಿತಥಾ ಕುರುಷೇ ಮಾಂ ದೃಕ್ಪಥಾತೀತಮ್ ॥ 77 ॥
ಚೇತೋ ಮದೀಯಮೇತತ್ಸೇವಾಚೌರ್ಯೇ ಯದಿ ಪ್ರಸಕ್ತಂ ತೇ ।
ದಂಡಯ ನಿತರಾಂ ಶಮ್ಭೋ ಸರ್ವಸ್ವಂ ಲುಂಠಯೈತಸ್ಯ ॥ 78 ॥
ಸದನಂ ಪ್ರತ್ಯಾಗಮನಂ ಕುಶಲಪ್ರಶ್ನೋಕ್ತಿರಸ್ತು ದೂರತರೇ ।
ಆಲೋಕನೇಽಪಿ ಶಮ್ಭೋ ಯದಿ ಸನ್ದೇಹಃ ಕಥಂ ಜೀವೇ ॥ 79 ॥
ಆವಾಹಿತಃ ಸ್ವಭಕ್ತೈಸ್ತ್ವರಯೈವಾಯಾಸಿ ಸರ್ವಪಾಷಾಣೇ ।
ಚಿತ್ತೋಪಲೇ ಮದೀಯೇ ಹೇ ಶಿವ ವಸ್ತುಂ ಕುತೋಽಸ್ಯಲಸಃ ॥ 80 ॥
ವೃಷಭೇ ಪಶೌ ದಯಾ ತೇ ಕಿಯತೀ ಶಮ್ಭೋ ಪಶುಪ್ರಿಯೋಽಸಿ ಯದಿ ।
ವಿಷಯವಿಷಾಶನತೋಽಹಂ ಪಶುರೇವಾಸ್ಮೀತಿ ಮಾಂ ಪಾಹಿ ॥ 81 ॥
ತ್ವಯಿ ದೃಷ್ಟ್ವೌದಾಸೀನ್ಯಂ ತತ್ಸ್ಪರ್ಧಾತೋ ವಿವರ್ಧತೇ ದೈನ್ಯಮ್ ।
ಮಯಿ ತಜ್ಜೇತುಂ ತ್ವರಯಾ ಪ್ರೇಷಯ ನಿಕಟೇಽಸ್ತಿ ಯತ್ ಸೈನ್ಯಮ್ ॥ 82 ॥
ಪರಿಪಾಲಯಾಮ್ಯಹಂ ತ್ವಾಂ ನಿಕಟೇನ ಮಯಾ ಕಿಮಸ್ತಿ ತೇ ಕಾರ್ಯಮ್ ।
ಮೈವಂ ದೂರೇ ರಮಣೇ ಸುಭೃತಾಽಪಿ ನ ಮೋದತೇ ಸಾಧ್ವೀ ॥ 83 ॥
ಕತಿಕತಿವಾರಂ ಜನನಂ ತವ ನೋ ಜಾತಂ ನ ಮತ್ಸ್ಮೃತಿಃ ಕ್ವಾಪಿ ।
ಇತಿ ಕುಪಿತೋಽಸಿ ಯದಿ ತ್ವತ್ಪದಯೋರ್ನಿದಧಾಮಿ ಮೂರ್ಧಾನಮ್ ॥ 84 ॥
ಶಿವ ಶಂಕರ ಸ್ಮರಾರೇ ಕಿಂಚಿತ್ಪ್ರಷ್ಟವ್ಯಮಸ್ತಿ ತತ್ಕಥಯ ।
ವಂಚನಮೇವ ಕರಿಷ್ಯಸಿ ಕಿಂ ವಾ ಕಾಲಾನ್ತರೇ ಪ್ರೀತಿಮ್ ॥ 85 ॥
ಯೋ ಯನ್ನ ವೇತ್ತಿ ದುಃಖಂ ಕರ್ಮ ಸ ತಸ್ಮಿನ್ನಿಯೋಜಯತು ಶಮ್ಭೋ ।
ಭಿಕ್ಷಾದುಃಖಂ ಜಾನಂಸ್ತತ್ರ ಕಥಂ ಮಾಂ ನಿಯೋಜಯಸಿ ॥ 86 ॥
ಕಾಕೂಕ್ತಿರ್ಮುಖದೈನ್ಯಂ ಶಿವ ಮೇ ಬಾಷ್ಪಸ್ತಥಾಶ್ರುಸಮ್ಪಾತಃ ।
ತ್ವಯ್ಯೇಕಸ್ಮಿನ್ ಪುರುಷೇ ಸರ್ವಮಿದಂ ನಿಷ್ಫಲಂ ಭವತಿ ॥ 87 ॥
ಶಿವ ದೇಹಿ ಮೇ ಸ್ವಭಕ್ತಿಂ ತೃಷ್ಣಾ ಸ್ವಯಮೇವ ಯಾಸ್ಯತಿ ತತೋ ಮೇ ।
ಪತಿಮನ್ಯತ್ರ ವಿಷಕ್ತಂ ದೃಷ್ಟ್ವಾ ಕಾನ್ತಾ ನ ಕಿಂ ತ್ಯಜತಿ ॥ 88 ॥
ಗುಣಹೀನೋಽಪಿ ಶಿವಾಹಂ ತ್ವತ್ಕರಮುಕ್ತೋಽಪಿ ತತ್ ಪದಂ ಯಾಸ್ಯೇ ।
ಭ್ರಷ್ಟೋಽಪಿ ಭೂಪಹಸ್ತಾದ್ಗುಣತೋಽಪಿ ಶರೋ ಯಥಾ ಲಕ್ಷ್ಯಮ್ ॥ 89 ॥
ಭಕ್ತಜನೇಷ್ವನುರಕ್ತಂ ಧರಣೀಧರಕನ್ಯಯಾ ಪರಿಷ್ವಕ್ತಮ್ ।
ಪ್ರಖ್ಯಾತನಾಮಧೇಯಂ ಜಯತಿತರಾಂ ಭಾಗಧೇಯಂ ಮೇ ॥ 90 ॥
ಫಣಿಕುಂಡಲಂ ವಹನ್ತೀ ಶ್ರವಣೇ ತಾಟಂಕಮಪ್ಯಪರಭಾಗೇ ।
ಸಿತಶೋಣಕಾನ್ತಿಯುಕ್ತಾ ಕಾಚಿನ್ಮದ್ವಾಸನಾ ಜಯತಿ ॥ 91 ॥
ಆಲಿಂಗಿತೋಽಪಿ ಸವ್ಯೇ ಶಮ್ಪಾತತ್ಯಾ ಶಿವಃ ಪ್ರಕೃತಿತೋಽಯಮ್ ।
ಕರುಣಾಮ್ಬುಪೂರ್ಣಗರ್ಭಃ ಕಶ್ಚಿದ್ಧಾರಾಧರೋ ಜಯತಿ ॥ 92 ॥
ಜಟಿಲಂ ಶಿರಃಪ್ರದೇಶೇ ನಿಟಿಲೇ ಕುಟಿಲಂ ಗಲೇ ತಥಾ ನೀಲಮ್ ।
ಹೃದಯೀಕೃತಾದ್ರಿಬಾಲಂ ವಿಲಸತಿ ಕಾಲಂ ಜಯತ್ ತೇಜಃ ॥ 93 ॥
ಧನುರೇಕತ್ರ ಪಿನಾಕಂ ಸಶರಂ ಬಿಭ್ರತ್ ತಥಾಽಪರತ್ರಾಽಪಿ ।
ಶರಮೈಕ್ಷವಂ ಚ ಚಾಪಂ ಕಿಂಚಿತ್ ತತ್ ಪ್ರೇಮ ಮೇ ಜಯತಿ ॥ 94 ॥
ವಾಂಛಿತವಿತರಣಶೀಲಂ ವಿಚಿತ್ರಲೀಲಂ ನಿರಾಲವಾಲಂ ಚ ।
ಲಲನಾಲತೈಕತಾನಂ ಕಲಯೇ ಶಿವಕಲ್ಪಭೂಮಿರುಹಮ್ ॥ 95 ॥
ಪರಿಹೃತದುರ್ಜನ ತಿಮಿರಂ ನಗಜಾನನ್ದೈಕಸಿನ್ಧುವೃದ್ಧಿಕರಮ್ ।
ನನ್ದಿತಭಕ್ತಚಕೋರಂ ವನ್ದೇ ಚನ್ದ್ರೋದಯಂ ಕಂಚಿತ್ ॥ 96 ॥
ನಿಖಿಲನಿಗಮೈಗದುಗ್ಧಾಂ ದಾನವಿದಗ್ಧಾಂ ಶುಕಾದಿಮುನಿದುಗ್ಧಾಮ್ ।
ವಪುಷಾ ಸದೈವ ಮುಗ್ಧಾಂ ಕಲಯೇ ಶಿವಕಾಮಧೇನುಮಹಮ್ ॥ 97 ॥
ನಿತ್ಯಪ್ರಭಾಭಿರಾಮಂ ವಿದಲಿತಕಾಮಂ ಸದಾರ್ಧಧೃತಭಾಮಮ್ ।
ಹೃದಿ ಕೋಮಲಂ ನಿಕಾಮಂ ಶ್ರೀಶಿವಚಿನ್ತಾಮಣಿಂ ವನ್ದೇ ॥ 98 ॥
ನಿರ್ವ್ಯಾಧಿ ಮೇ ಶರೀರಂ ನಿರಾಧಿ ಚೇತಃ ಸದಾ ಸಮಾಧಿಪರಮ್ ।
ಕುರು ಶರ್ವ ಸರ್ವದಾ ತ್ವಂ ನಾನ್ಯಂ ಕಾಮಂ ವೃಣೇ ಕಂಚಿತ್ ॥ 99 ॥
ಆರ್ಯಾಪತೇಃ ಪದಾಬ್ಜೇ ನಿಹಿತಂ ಶತಪದ್ಯಪತ್ರಮಯಪುಷ್ಪಮ್ ।
ಆರ್ಯಾಶತಂ ಸುಕೃತಿನಾಂ ಹೃದಯಾಮೋದಂ ಸದಾ ವಹತು ॥ 100 ॥
॥ ಇತಿ ಭರದ್ವಾಜಕುಲತಿಲಕಶ್ರೀಮದಪ್ಪಯ್ಯದೀಕ್ಷಿತ-
ವಿರಚಿತಶೈವಾರ್ಯಾಶತಕಂ ಸಮ್ಪೂರ್ಣಮ್ ॥