Shri Appayya Dikshit’s Arya Ashatakam Lyrics in Oriya:
॥ ଆର୍ୟାଶତକମ୍ ଶ୍ରୀମଦପ୍ପୟ୍ୟଦୀକ୍ଷିତଵିରଚିତମ୍ ॥
ଦୟୟା ୟଦୀୟୟା ଵାଙ୍ନଵରସରୁଚିରା ସୁଧାଧିକୋଦେତି ।
ଶରଣାଗତଚିନ୍ତିତଦଂ ତଂ ଶିଵଚିନ୍ତାମଣିଂ ଵନ୍ଦେ ॥ ୧ ॥
ଶିରସି ସିତାଂଶୁକଲାଢ୍ୟଂ କରୁଣାପୀୟୂଷପୂରିତଂ ନୟନେ ।
ସ୍ମିତଦୁଗ୍ଧମୁଗ୍ଧଵଦନଂ ଲଲନାକଲିତଂ ମହଃ କଲୟେ ॥ ୨ ॥
ଅନ୍ତେ ଚିନ୍ତୟତେ ୟତ୍ତତ୍ତାମେତୀତି ଚ ତ୍ଵୟା ଗଦିତମ୍ ।
ଶିଵ ତଵ ଚରଣଦ୍ଵନ୍ଦ୍ଵଧ୍ୟାନାନ୍ନିର୍ଦ୍ଵନ୍ଦ୍ଵତା ଚିତ୍ରମ୍ ॥ ୩ ॥
ଦ୍ରୁତମୁଦ୍ଧର ହର ସଂହର ସଂହର ଭଵଵୈରିଣଂ ତ୍ଵତିତ୍ଵରୟା।
ଭଵ ଭଵତୋଽପି ଭଵୋଽୟଂ ରିପୁରେତନ୍ନିନ୍ଦିତଂ ଜଗତି ॥ ୪ ॥
ଚେତସି ଚିନ୍ତୟ ଵାମାଂ ଵା ମାଂ ଵା ନ ଦ୍ଵିଧା ସ୍ଥିତସ୍ୟାହମ୍ ।
ଇତି ୟଦି ଵଦସି ଦୟାବ୍ଧେ ଵାମାର୍ଧେ ସା ତଵାପ୍ୟସ୍ତି ॥ ୫ ॥
ମିତ୍ରକଲତ୍ରସୁତାଦୀନ୍ ଧ୍ୟାୟସ୍ୟନିଶଂ ନ ମାଂ କ୍ଷଣଂ ଜାତୁ।
ୟଦି କୁପ୍ୟସି ମୟି ଦୀନେ ତୁଲୟାମି ତ୍ଵାଂ କଥଂ ସହ ତୈଃ ॥ ୬ ॥
ମତ୍କୃତଦୁଷ୍କୃତଶାନ୍ତିର୍ଵିଷଵହ୍ନିଜଲାଦିୟାତନୟା ।
ୟଦି ନିଶ୍ଚୟସ୍ତଵାୟଂ ପ୍ରେଷୟ ଗରଲାଗ୍ନିଗଙ୍ଗୌଘାନ୍ ॥ ୭ ॥
ଭୋଗଂ ଵିହାୟ ୟୋଗଂ ସାଧୟ ଦାସ୍ୟେ ତଵାପି ପରଭାଗମ୍ ।
ମମ କିଂ ନ ଵାଵକାଶସ୍ତ୍ଵଦ୍ଭୂଷାଭୋଗିନାଂ ମଧ୍ୟେ ॥ ୮ ॥
ଲଲନାଲୋଲଵିଲୋକନଜିତମିତ୍ୟଵମନ୍ୟସେ କଥଂ ମାଂ ତ୍ଵମ୍।
ତ୍ଵୟି ଜାୟାର୍ଧଶରୀରେ ଶିଵ ଶିଵ ନାଽଽଲୋକନାନୁଭଵଃ ॥ ୯ ॥
ସ୍ମରଣାଦନୁପଦମୀଦୃଗ୍ଵିସ୍ମୃତିଶୀଲୋ ନ ଵଲ୍ଲଭୋଽସି ମମ।
ଉତ୍ପାଦ୍ୟାଶାଂ ଭଙ୍କ୍ତୁର୍ଲଗ୍ନା ଵୃତ୍ତିସ୍ତଵୈଵେୟମ୍ ॥ ୧୦ ॥
ପୁତ୍ରଃ ପିତୃଵତ୍ପୁତ୍ରୀ ମାତୃଵଦିତ୍ଥଂ ମମାତ୍ର କୋ ଦୋଷଃ ।
ଅହମପି ଭୋଗାସକ୍ତଃ ପ୍ରକୃତିର୍ଜାତା ଵିଷାଦଵତୀ ॥ ୧୧ ॥
ଵପୁରର୍ଧଂ ଵାମାର୍ଧଂ ଶିରସି ଶଶୀ ସୋଽପି ଭୂଷଣଂ ତେଽର୍ଧମ୍ ।
ମାମପି ତଵାର୍ଧଭକ୍ତଂ ଶିଵ ଶିଵ ଦେହେ ନ ଧାରୟସି ॥ ୧୨ ॥
ସ୍ତନପଂ ଶିଶୁଂ ତ୍ଵଦୀୟଂ ପାଲୟ ସାମ୍ବ ଦ୍ରୁତଂ ନ ପାସି ୟଦି ।
ଜଗତଃ ପିତେତି ଗୀତଂ ୟାତଂ ନାମେତି ଜାନୀହି ॥ ୧୩ ॥
ମାତରି ହିତ୍ଵା ବାଲଂ କାର୍ୟାକୁଲଧୀଃ ପିତା ବହିର୍ୟାତି ।
ଶିଵ ବତ ଶକ୍ନୋଷି କଥଂ ସ୍ଵାଙ୍ଗାନ୍ମନ୍ମାତରଂ ମୋକ୍ତୁମ୍ ॥ ୧୪ ॥
ଗୁଣହୀନତାଂ ତନୂଜେ ମୟି ଦୃଷ୍ଟ୍ଵା କିଂ ପରିତ୍ୟଜସ୍ୟେଵମ୍ ।
ଉଚିତଂ ଗୁଣିନସ୍ତ୍ଵେତନ୍ନିର୍ଗୁଣରୂପସ୍ୟ ତେଽନୁଚିତମ୍ ॥ ୧୫ ॥
କାମକ୍ରୋଧକଟାଭ୍ୟାଂ ମଦଜଲଧାରାଂ ନିରଙ୍କୁଶେ ସ୍ରଵତି ।
ମତ୍କୃତଦୁଷ୍କୃତକରିଣି ପ୍ରକଟା ପଞ୍ଚାସ୍ୟତା ତେଽସ୍ତୁ ॥ ୧୬ ॥
ତ୍ଵଦ୍ଧୀନଂ ମାଂ ଦୀନଂ ଦୃଷ୍ଟ୍ଵା ଵିଷୟାତିରାଗସମ୍ବଦ୍ଧମ୍ ।
ଧାଵତ୍ୟକୀର୍ତିରେଷା ନାଥଃ ଶକ୍ତୋଽପ୍ୟୁଦାସୀନଃ ॥ ୧୭ ॥
ଅରିଭିର୍ଜିତୈରଶକ୍ତୈର୍ଵିଜ୍ଞାପ୍ୟଂ ସେଵକୈଃ ପ୍ରଭୋର୍ନୀତିଃ ।
ଵିଷୟୈର୍ଜିତୋଽସ୍ମି ଶମ୍ଭୋ ତଵ ୟଚ୍ଛ୍ଲାଘ୍ୟଂ ତଦାରଚୟ ॥ ୧୮ ॥
ସଂରକ୍ଷ୍ୟତେ ସ୍ଵଦାସୈର୍ୟଦ୍ୟଦ୍ଵସ୍ତୁ ପ୍ରଭୋରଭୀଷ୍ଟତରମ୍ ।
ଦାସସ୍ତଵେଷ୍ଟକାମଃ କାନ୍ତାଂ କନକଂ କଥଂ ତ୍ୟଜେୟମହମ୍ ॥ ୧୯ ॥
ପାପୀ ପାପଂ ସୁକୃତୀ ସୁକୃତଂ ଭୁଙ୍କ୍ତେ ମମାତ୍ର କିଂ ନୁ ଗତମ୍।
ଇତ୍ୟୌଦାସ୍ୟମୟୁକ୍ତଂ ଭୃତ୍ୟାକୀର୍ତିଃ ପ୍ରଭୋରେଵ ॥ ୨୦ ॥
ଵିକଲେଽତିଦୀନଚିତ୍ତେ ଵିଷୟାଶାମାତ୍ରଧାରିଣି ନିତାନ୍ତମ୍ ।
ମୟି ରୋଷତଃ କିୟତ୍ ତେ ଵଦ ଵଦ ଶମ୍ଭୋ ୟଶୋ ଭାଵି ॥ ୨୧ ॥
ସ୍ଵଗୃହେ ଭୁଵନତ୍ରିତୟେ ୟୋଗକ୍ଷେମେ ମୁଖାନି ଚତ୍ଵାରି ।
ମତ୍ପ୍ରତିଵଚନଂ ହି ଵିନା ପଞ୍ଚମଵଦନସ୍ୟ କୁତ୍ର ଗତିଃ ॥ ୨୨ ॥
ତଵ କୋଽହଂ ତ୍ଵଂ ମମ କଃ ପଞ୍ଚସ୍ଵେଵଂ ଵିଚାରୟସ୍ଵେତି ।
ବ୍ରୂଷେ ଦୀନଦୟାବ୍ଧେ ପଞ୍ଚମୁଖତ୍ଵଂ ତ୍ଵୟି ଵ୍ୟକ୍ତମ୍ ॥ ୨୩ ॥
ୟାଚସ୍ଵାନ୍ୟଂ ଧନିନଂ ଭଵିତା ତଵ କୋ ଦିଗମ୍ବରାଲ୍ଲାଭଃ ।
ମାଂ ମା ପ୍ରତାରୟୈଵଂ ଖ୍ୟାତଃ ଶ୍ରୀକଣ୍ଠନାମାସି ॥ ୨୪ ॥
ଵସନାଶନପ୍ରଦାତରି ମୟି ଜୀଵତି କିଂ ସମାକୁଲସ୍ତ୍ଵମିତି ।
ଦୋହାୟ ମୋଚ୍ୟମାନୋ ଵତ୍ସଃ କିଂ ନ ତ୍ଵରାମୟତେ ॥ ୨୫ ॥
ପାତକରାଶିରିତୀଦଂ ତ୍ଵୟାଭିଧାନଂ ଶ୍ରୁତଂ ନ ତଦ୍ ଦୃଷ୍ଟମ୍।
ତଦ୍ଦର୍ଶନକୁତୁକଂ ୟଦି ମାଂ ଦ୍ରଷ୍ଟୁଂ କିଂ ଵିଲମ୍ବସେ ଦେଵ ॥ ୨୬ ॥
ପାତକରାଶିରସି ତ୍ଵଂ ପଶ୍ୟାମ୍ୟତ ଏଵ ନାହମିତି ଵଦସି ।
ପାତକରୂପାଜ୍ଞାନେ ଶିଵ ତଵ ସର୍ଵଜ୍ଞତାଭଙ୍ଗଃ ॥ ୨୭ ॥
ପାପଂ ପାପମିତୀଦଂ କରୋଷି ଶିଵ କିଂ ମୁଧା ବୁଧାନ୍ ଭ୍ରାନ୍ତାନ୍ ।
ତତ୍ସତ୍ୟଂ ଚେନ୍ନ କଥଂ ତ୍ଵୟାନୁଭୂତଂ ନ ଦୃଷ୍ଟଂ ଵା ॥ ୨୮ ॥
ପାପେ ଲୋକାନୁଭଵଃ ସ ଏଵ ମାନଂ ମମାପ୍ୟନନୁଭୂତେ ।
ନ ହି ପରକୀୟାନୁଭଵଃ ଜ୍ଞାତୁଂ ଶକ୍ୟଃ ପରେଣାପି ॥ ୨୯ ॥
ଲୋକାଭିନ୍ନଃ ସୋଽହଂ ଵକ୍ତୁଂ ଵାକ୍ୟଂ ହ୍ୟୁପକ୍ରମସ୍ତଵ ଚେତ୍।
ସିଦ୍ଧା ମନୋରଥା ମେ ତ୍ଵତ୍ତଃ କସ୍ୟାପି ଲୋକସ୍ୟ ॥ ୩୦ ॥
ଅତିଵଲ୍ଗନଂ ମମୈତନ୍ମୂଢତ୍ଵଂ ୟଦ୍ୟପି ପ୍ରଭୋଃ ପୁରତଃ ।
ଦୀନଃ କରୋମି କିଂ ଵା ମଦ୍ଵିଷୟେ କୋ ନିଵେଦୟତି ॥ ୩୧ ॥
ଲଘୁରସି କିଂ ତ୍ଵୟି ଦୟୟା ମା ମା ମଂସ୍ଥାଃ ଶିଵେତି ସହସା ତ୍ଵମ୍।
ଭାରୋ ଭୁଵୋଽସ୍ମି ଧୃତ୍ଵା ସ୍ଵକରେ ତୁଲୟାଶୁ ମାଂ ଶମ୍ଭୋ ॥ ୩୨ ॥
ସସ୍ୟେ ତୃଣେ ଚ ଵୃଷ୍ଟିଂ ତୁଲ୍ୟାଂ ଦେଵଃ ସଦୈଵ ଵିଦଧାତି ।
ଦେଵୋ ମହାନ୍ ବତ ତ୍ଵଂ ଗୁରୁଲଘୁଵାର୍ତାଂ କଥଂ କୁରୁଷେ ॥ ୩୩ ॥
ଦିଷ୍ଟୋଦ୍ଦିଷ୍ଟଂ ଦାସ୍ୟାମ୍ୟନ୍ୟନ୍ନେଷ୍ଟଂ ୟଦି ସ୍ଫୁଟଂ ଵାକ୍ୟମ୍ ।
ଦତ୍ତା କଥଂ ତ୍ଵୟାସାଵଜରାମରତା ମୃକଣ୍ଡୁଜନେଃ ॥ ୩୪ ॥
ନାଦତ୍ତଂ ପ୍ରାପ୍ନୋତୀତ୍ୟେତଦ୍ଵାକ୍ୟଂ ପ୍ରତାରଣାମାତ୍ରମ୍ ।
ଉପମନ୍ୟୁନା କଦା ଵା କସ୍ମୈ ଦୁଗ୍ଧୋଦଧିର୍ଦତ୍ତଃ ॥ ୩୫ ॥
ପ୍ରବଲତରୋନ୍ମାଦାଢ୍ୟଂ ତ୍ଵାମପ୍ୟଗଣୟ୍ୟ ଧାଵମାନଂ ଚ ।
ମଚ୍ଚେତୋଽପସ୍ମାରଂ ନିୟମୟ ଶମ୍ଭୋ ପଦାଭ୍ୟାଂ ତେ ॥ ୩୬ ॥
ଆଶାପିଶାଚିକା ମାଂ ଭ୍ରମୟତି ପରିତୋ ଦଶସ୍ଵପି ଦିଶାସୁ ।
ସ୍ଵୀୟେ ପିଶାଚଵର୍ଗେ ସେଵାୟୈ କିଂ ନ ୟୋଜୟସି ॥ ୩୭ ॥
ୟକ୍ଷାଧୀନାଂ ରକ୍ଷାଂ ତ୍ର୍ୟକ୍ଷ ନିଧୀନାଂ କୁତୋ ନୁ ଵା କୁରୁଷେ।
ସାକ୍ଷାନ୍ମନୁଷ୍ୟଧର୍ମାଽପ୍ୟହହ କଥଂ ନୁ ଵିସ୍ମୃତିର୍ମମ ତେ ॥ ୩୮ ॥
ଧନଦେ ସଖିତ୍ଵମେତତ୍ ତଵ ୟତ୍ ତତ୍ରାସ୍ତି ଵିସ୍ମୟଃ କ ଇଵ ।
ମୟି ନିର୍ଧନେ ତଦାସ୍ତାଂ ତ୍ରିଜଗତି ଚିତ୍ରଂ କିୟଦ୍ଭାଵି ॥ ୩୯ ॥
ସଖିତାରୂପନିଧାନଂ ଵିତ୍ତନିଧାନଂ ଦ୍ଵିଧା ଧନଂ ତଵ ୟତ୍ ।
ନୈକକରେ ନୃପନୀତିସ୍ତତ୍ରାନ୍ୟତରନ୍ନିଧେହି ମୟି ॥ ୪୦ ॥
ପାଲୟ ଵା ମାଂ ମା ଵା ମତ୍ତନୁଭୂତା ତୁ ପଞ୍ଚଭୂତତତିଃ ।
ପୋଷ୍ୟାଵଶ୍ୟଂ ଭଵତା ଭଵିତା ନୋ ଚେନ୍ନ ଭୂତପତିଃ ॥ ୪୧ ॥
ଅତିକୋମଲଂ ମନସ୍ତେ ମୁନିଭିର୍ଗୀତଂ କୁତୋଽଧୁନା କଠିନମ୍ ।
ମନ୍ୟେ ଵିଷାଶନାର୍ଥଂ କଠିନଂ ଚେତସ୍ତ୍ଵୟା ଵିହିତମ୍ ॥ ୪୨ ॥
ମାଂ ଦ୍ରଷ୍ଟୁମଷ୍ଟମୂର୍ତେ କରୁଣା ତେଽଦ୍ୟାପି କିଂ ନ ଵୋଲ୍ଲସତି ।
ଭିକ୍ଷାପ୍ରସଙ୍ଗତୋ ଵା କିୟତାଂ ନୋ ୟାସି ସଦନାନି ॥ ୪୩ ॥
ଵିତ୍ତାଧିପଃ ସଖା ତେ ଭାର୍ୟା ଦେହେ ତଵାନ୍ନପୂର୍ଣାଖ୍ୟା ।
ଊରୀକୃତଂ ନ ଦୂରୀକୁରୁଷେ ଭିକ୍ଷାଟନମପୀଶ ॥ ୪୪ ॥
ନାଙ୍ଗୀକୃତୋ ମୟା ତ୍ଵଂ ତତ ଏଵ ନ ଦର୍ଶନଂ ମମ ତଵାସ୍ତି ।
ଇତି ନୋତ୍ତରଂ ପ୍ରଦେୟଂ ଶିଵ ଶିଵ ଵିଶ୍ଵେଶନାମାସି ॥ ୪୫ ॥
ୟଦି ଦେହଗେହରୂପଂ ଦଦାସି ଦେଶାଧିକାରକାର୍ୟଂ ମମ ।
ରସନାଖ୍ୟଲେଖପତ୍ରେ ସୁଦୃଢାଂ କୁରୁ ନାମମୁଦ୍ରାଂ ତେ ॥ ୪୬ ॥
ରସନୋକ୍ତଂ କୁରୁ ସର୍ଵଂ ଶିଵ ତଵ ନାମାଧିମୁଦ୍ରିତାସ୍ତୀୟମ୍ ।
ଗଣୟସି ମୁଦ୍ରାଂ ନ ହି ଚେତ୍ ପ୍ରଭୁତୋଚ୍ଛିନ୍ନା ତଵୈଵ ସ୍ୟାତ୍ ॥ ୪୭ ॥
ଅତ୍ୟାଟିନଂ କରାଲଂ ଭିକ୍ଷାୟୁକ୍ତଂ କପାଲଶୂଲକରମ୍ ।
ମଦ୍ଦାରିଦ୍ର୍ୟଂ ଭୈରଵରୂପଂ କୁରୁ ଚାର୍ଧଚନ୍ଦ୍ରୟୁତମ୍ ॥ ୪୮ ॥
ଦାରିଦ୍ର୍ୟଚଣ୍ଡରଶ୍ମୌ ପ୍ରତପତି କେଦାରଵଚ୍ଚ ମୟି ଶୁଷ୍କେ ।
ଜଲଧରତାୟାଂ ସତ୍ୟାଂ ତ୍ଵୟି ଶିଵ ନାଦ୍ୟାପି ସମୁପୈଷି ॥ ୪୯ ॥
ଦାରିଦ୍ର୍ୟାଖ୍ୟମନୋଭୂଃ କ୍ଲୀବଂ ଚେତୋଽପି ମୋହୟତ୍ୟନିଶମ୍ ।
ଏନଂ ଲୀନଂ କର୍ତୁଂ ଧନ୍ୟଃ କୋଽନ୍ୟସ୍ତ୍ଵଦନ୍ୟୋଽସ୍ତି ॥ ୫୦ ॥
ଭାଲାନଲାକ୍ଷିୟୁକ୍ତସ୍ତ୍ରିଜଗତି ନାନ୍ୟୋ ମଦନ୍ୟ ଇତି।
ଗର୍ଵଂ ମା ଵହ ୟାଵଦ୍ଦାରିଦ୍ର୍ୟାଗ୍ନିଃ କପାଲେ ମେ ॥ ୫୧ ॥
ଚେତଃ କୁରୁ ମା କଲହଂ ତଵ ଵୈକ୍ଲଵ୍ୟେଽପି ଶମ୍ଭୁନା ପ୍ରଭୁଣା।
ନ ଵଦତି ୟଦ୍ୟପି ଭର୍ତା ତଵୋପକର୍ତା ସ ଏଵାସ୍ତି ॥ ୫୨ ॥
ଅୟି ଚିତ୍ତ ଵିତ୍ତଲେଶେ ସହଜପ୍ରେମ୍ଣା କିୟନ୍ନୁ ଲୁବ୍ଧମସି ।
ନ ତଥାପି ତଦ୍ଵିୟୋଗଃ କେଵଲମାସ୍ତେ ଶିଵେନାପି ॥ ୫୩ ॥
ଚେତଃ କୀର ଵିହାରଂ ପରିହର ପରିତଃ ସ୍ଵୟଂ ପ୍ରୟତ୍ନେନ।
ଅତ୍ତୁଂ କାଲବିଡାଲୋ ଧାଵତି ଶିଵପଞ୍ଜରଂ ପ୍ରଵିଶ ॥ ୫୪ ॥
ଚେତଃ ସଦାଗତେ ତ୍ଵଂ ପ୍ରତ୍ୟାଶାଵାତ୍ୟୟାନୁଗତମୂର୍ତିଃ।
ମା ଵହ ଵିଷୟାରଣ୍ୟେ ଲୀନୋ ଭଵ ସଚ୍ଚିଦାକାଶେ ॥ ୫୫ ॥
ଚେତଃ ଶୃଣୁ ମଦ୍ଵଚନଂ ମା କୁରୁ ରଚନଂ ମନୋରଥାନାଂ ତ୍ଵମ୍ ।
ଶରଣଂ ପ୍ରୟାହି ଶର୍ଵଂ ସର୍ଵଂ ସକୃଦେଵ ସୋଽର୍ପୟିତା ॥ ୫୬ ॥
ଭ୍ରାତଃ ଶୃଣୁ ମଚ୍ଚେତୋ ମା ନୟ କାଲଂ ତ୍ଵିତସ୍ତତୋ ଭ୍ରମଣାତ୍ ।
କାଲକ୍ଷେପେଚ୍ଛା ଚେଦଵଲମ୍ବୟ କାଲକାଲଂ ତ୍ଵମ୍ ॥ ୫୭ ॥
ଅୟି ଚେତୋଵିହଗ ତ୍ଵଂ ଵିଷୟାରଣ୍ୟେ ଭ୍ରମନ୍ନସି ଶ୍ରାନ୍ତଃ ।
ଵିଶ୍ରାମକାମନା ଚେଚ୍ଛିଵକଲ୍ପରୁହେ ଚିରଂ ତିଷ୍ଠ ॥ ୫୮ ॥
ଚେତୋମଧୁକର ଦୂରଂ ଦୂରଂ କମଲାଶୟା କୁତୋ ୟାସି ।
ଧ୍ୟାନାଦନୁପଦମେତଚ୍ଛିଵପଦକମଲଂ ତଵାୟାତି ॥ ୫୯ ॥
ଚେତଶ୍ଚକୋର ତାପଂ ଭୂପଂ ସଂସେଵ୍ୟ କିଂ ଵୃଥା ୟାସି ।
ୟଦି ଚନ୍ଦ୍ରିକାଭିଲାଷୋ ନିକଷା ଭଵ ଚନ୍ଦ୍ରଚୂଡସ୍ୟ ॥ ୬୦ ॥
ଚେତଃକୁରଙ୍ଗ ଗୀତେ ରକ୍ତଂ ଚେତସ୍ତଵାସ୍ତ୍ଵନଵଗୀତେ ।
ଭଗଵଦ୍ଗୀତାଗୀତେ ନଗଜାକଲିତେ ତଦାରଚୟ ॥ ୬୧ ॥
ରସନେ ନିନ୍ଦାଵ୍ୟସନେ ପୈଶୁନ୍ୟେ ଵା ନ ଵାଗ୍ମିତାଂ ୟାହି ।
ତ୍ରିପୁରାରିନାମମାଲାଂ ଜିତକାଲାଂ ଶୀଲୟାଶୁ ତ୍ଵମ୍ ॥ ୬୨ ॥
ରସନେ ରସାନ୍ ସମସ୍ତାନ୍ ରସୟିତ୍ଵା ତଦ୍ଵିଵେଚନେ କୁଶଲା ।
ଅସି ତଦ୍ଵଦାଶୁ ପଶ୍ୟେଃ ଶିଵନାମ୍ନଃ କୋ ରସୋଽୟମିତି ॥ ୬୩ ॥
ଶିଵନାମସଲ୍ଲତାଂ ତ୍ଵଂ ରସନାପଲ୍ଲଵ କଦାପି ନ ଵିହାତୁମ୍ ।
ୟଦି ଵାଞ୍ଛସେ ତଦା ମା କୋମଲତାଂ ସର୍ଵଥା ଜହିହି ॥ ୬୪ ॥
ହାଲାହଲସ୍ୟ ତାପଃ ଶଶିନା ଗଙ୍ଗାମ୍ବୁନା ନ ୟଦି ୟାତି ।
ଶିଵ ମା ଗୃହାଣ ଭୁଜଗାନ୍ ମଦ୍ରସନାପଲ୍ଲଵେ ସ୍ଵପିହି ॥ ୬୫ ॥
ଲୋଚନ କୋଽଭୂଲ୍ଲାଭଃ ସର୍ଵାନେଵ ଦ୍ଵିଲୋଚନାନ୍ ଵୀକ୍ଷ୍ୟ ।
ଦୃଷ୍ଟସ୍ତ୍ରିଲୋଚନଶ୍ଚେତ୍ ସଫଲଂ ଜନ୍ମୈଵ ତେ ଭାଵି ॥ ୬୬ ॥
ନାଲୋକତେ ୟଦି ତ୍ଵାଂ ମନ୍ନେତ୍ରଂ କୃଷ୍ଣମସ୍ତୁ ମୁଖମସ୍ୟ ।
ସ୍ଵାଂ ତ୍ର୍ୟକ୍ଷ ଦକ୍ଷତାଂ ମେ ଦର୍ଶୟ ନୟନାଵଲୋକସ୍ୟ ॥ ୬୭ ॥
ତ୍ଵଂ ଲୋଚନାନ୍ଧକାରେ ଦ୍ରଷ୍ଟୁଂ ଵସ୍ତ୍ଵନ୍ଧକାରଭିନ୍ନଂ କିମ୍ ।
ଵାଚ୍ଛସ୍ୟନେନ ସଙ୍ଗେଽଦ୍ଦୃଶ୍ୟମପୀଦଂ ତ୍ଵୟା ଦୃଶ୍ୟମ୍ ॥ ୬୮ ॥
ଶ୍ରଵଣ ସଖେ ଶୃଣୁ ମେ ତ୍ଵଂ ୟଦ୍ୟପି ଜାତୋ ବହୁଶ୍ରୁତୋଽସ୍ତି ଭଵାନ୍ ।
ଶବ୍ଦାତୀତଂ ଶ୍ରୋତୁଂ ଶିଵମନ୍ତ୍ରାତ୍ କୋଽପରୋ ମନ୍ତ୍ରଃ ॥ ୬୯ ॥
ଘ୍ରାଣ ପ୍ରାଣସଖୋ ମେ ଭଵସି ଭଵାନ୍ ପାର୍ଥିଵୋଽସ୍ତି କିମୁ ଵାନ୍ୟତ୍ ।
ଶିଵପଦକମଲାମୋଦେ ମୋଦଂ ଗନ୍ତାସି ୟଦି ଶୀଘ୍ରମ୍ ॥ ୭୦ ॥
ରାମାସ୍ପର୍ଶସୁଖେ ତେ ନିତରାଂ ଭୋ ଵିଗ୍ରହାଗ୍ରହୋଽସ୍ତି ୟଦି ।
ଆଲିଙ୍ଗୟାର୍ଧରାମଂ ରାମାଽଭିନ୍ନଃ ସ୍ଵୟଂ ଭଵସି ॥ ୭୧ ॥
ଵିଗ୍ରହ ଵିଗ୍ରହମେଵ ତ୍ଵଂ କୁରୁ ଦେଵେନ ନାଽମୁନା ସଖ୍ୟମ୍ ।
ରୁଚିରପ୍ୟସ୍ମିନ୍ ଶମ୍ଭୌ ଜନୟତ୍ୟରୁଚିଂ ସ୍ଵଦେହେଽପି ॥ ୭୨ ॥
ସମ୍ମୀଲୟାଶୁ ରାମାଂ ତ୍ଵଦ୍ଵାମାଙ୍ଗାନ୍ମୟା ସମଂ ଶମ୍ଭୋ ।
ଜାତଂ ମମାପି ୟସ୍ମାଦ୍ ଦୁଃଖେନାର୍ଧଂ ଶରୀରମିଦମ୍ ॥ ୭୩ ॥
ଅପରାଧକାରିଣଂ ମାଂ ମତ୍ଵା ଶମ୍ଭୋ ୟଦି ତ୍ୟଜସ୍ୟେଵମ୍ ।
ଵ୍ୟାଧଃ ଶିରସି ପଦଂ ତେ ଦତ୍ଵା ନ ଜଗାମ କିଂ ମୁକ୍ତିମ୍ ॥ ୭୪ ॥
ପାର୍ଥଃ କଲହଂ ଧନୁଷା ତାଡନମପି ମୂର୍ଧ୍ନି ତେ ନ କିଂ କୃତଵାନ୍ ।
ତତ୍ରାପି ତେ ପ୍ରସନ୍ନଂ ଚେତଃ ସନ୍ନେ ମୟି କୁତୋ ନ ॥ ୭୫ ॥
ତ୍ଵୟି ତୁଷ୍ଟେ ରୁଷ୍ଟେ ଵା ଶିଵ କା ଚିନ୍ତା ସ୍ଵଦୁଃଖଭଙ୍ଗେ ମେ ।
ଉଷ୍ଣଂ ଵାନୁଷ୍ଣଂ ଵା ଶମୟତି ସଲିଲଂ ସଦୈଵାଗ୍ନିମ୍ ॥ ୭୬ ॥
ଦୋଷାକରେ ଦ୍ଵିଜିହ୍ଵେ ରତିମତିଶୟିତାଂ କରୋଷି ୟଦି ଶମ୍ଭୋ।
ଅହମସ୍ମି ତଥା ଵିତଥା କୁରୁଷେ ମାଂ ଦୃକ୍ପଥାତୀତମ୍ ॥ ୭୭ ॥
ଚେତୋ ମଦୀୟମେତତ୍ସେଵାଚୌର୍ୟେ ୟଦି ପ୍ରସକ୍ତଂ ତେ ।
ଦଣ୍ଡୟ ନିତରାଂ ଶମ୍ଭୋ ସର୍ଵସ୍ଵଂ ଲୁଣ୍ଠୟୈତସ୍ୟ ॥ ୭୮ ॥
ସଦନଂ ପ୍ରତ୍ୟାଗମନଂ କୁଶଲପ୍ରଶ୍ନୋକ୍ତିରସ୍ତୁ ଦୂରତରେ ।
ଆଲୋକନେଽପି ଶମ୍ଭୋ ୟଦି ସନ୍ଦେହଃ କଥଂ ଜୀଵେ ॥ ୭୯ ॥
ଆଵାହିତଃ ସ୍ଵଭକ୍ତୈସ୍ତ୍ଵରୟୈଵାୟାସି ସର୍ଵପାଷାଣେ ।
ଚିତ୍ତୋପଲେ ମଦୀୟେ ହେ ଶିଵ ଵସ୍ତୁଂ କୁତୋଽସ୍ୟଲସଃ ॥ ୮୦ ॥
ଵୃଷଭେ ପଶୌ ଦୟା ତେ କିୟତୀ ଶମ୍ଭୋ ପଶୁପ୍ରିୟୋଽସି ୟଦି ।
ଵିଷୟଵିଷାଶନତୋଽହଂ ପଶୁରେଵାସ୍ମୀତି ମାଂ ପାହି ॥ ୮୧ ॥
ତ୍ଵୟି ଦୃଷ୍ଟ୍ଵୌଦାସୀନ୍ୟଂ ତତ୍ସ୍ପର୍ଧାତୋ ଵିଵର୍ଧତେ ଦୈନ୍ୟମ୍ ।
ମୟି ତଜ୍ଜେତୁଂ ତ୍ଵରୟା ପ୍ରେଷୟ ନିକଟେଽସ୍ତି ୟତ୍ ସୈନ୍ୟମ୍ ॥ ୮୨ ॥
ପରିପାଲୟାମ୍ୟହଂ ତ୍ଵାଂ ନିକଟେନ ମୟା କିମସ୍ତି ତେ କାର୍ୟମ୍ ।
ମୈଵଂ ଦୂରେ ରମଣେ ସୁଭୃତାଽପି ନ ମୋଦତେ ସାଧ୍ଵୀ ॥ ୮୩ ॥
କତିକତିଵାରଂ ଜନନଂ ତଵ ନୋ ଜାତଂ ନ ମତ୍ସ୍ମୃତିଃ କ୍ଵାପି ।
ଇତି କୁପିତୋଽସି ୟଦି ତ୍ଵତ୍ପଦୟୋର୍ନିଦଧାମି ମୂର୍ଧାନମ୍ ॥ ୮୪ ॥
ଶିଵ ଶଙ୍କର ସ୍ମରାରେ କିଞ୍ଚିତ୍ପ୍ରଷ୍ଟଵ୍ୟମସ୍ତି ତତ୍କଥୟ ।
ଵଞ୍ଚନମେଵ କରିଷ୍ୟସି କିଂ ଵା କାଲାନ୍ତରେ ପ୍ରୀତିମ୍ ॥ ୮୫ ॥
ୟୋ ୟନ୍ନ ଵେତ୍ତି ଦୁଃଖଂ କର୍ମ ସ ତସ୍ମିନ୍ନିୟୋଜୟତୁ ଶମ୍ଭୋ ।
ଭିକ୍ଷାଦୁଃଖଂ ଜାନଂସ୍ତତ୍ର କଥଂ ମାଂ ନିୟୋଜୟସି ॥ ୮୬ ॥
କାକୂକ୍ତିର୍ମୁଖଦୈନ୍ୟଂ ଶିଵ ମେ ବାଷ୍ପସ୍ତଥାଶ୍ରୁସମ୍ପାତଃ ।
ତ୍ଵୟ୍ୟେକସ୍ମିନ୍ ପୁରୁଷେ ସର୍ଵମିଦଂ ନିଷ୍ଫଲଂ ଭଵତି ॥ ୮୭ ॥
ଶିଵ ଦେହି ମେ ସ୍ଵଭକ୍ତିଂ ତୃଷ୍ଣା ସ୍ଵୟମେଵ ୟାସ୍ୟତି ତତୋ ମେ ।
ପତିମନ୍ୟତ୍ର ଵିଷକ୍ତଂ ଦୃଷ୍ଟ୍ଵା କାନ୍ତା ନ କିଂ ତ୍ୟଜତି ॥ ୮୮ ॥
ଗୁଣହୀନୋଽପି ଶିଵାହଂ ତ୍ଵତ୍କରମୁକ୍ତୋଽପି ତତ୍ ପଦଂ ୟାସ୍ୟେ ।
ଭ୍ରଷ୍ଟୋଽପି ଭୂପହସ୍ତାଦ୍ଗୁଣତୋଽପି ଶରୋ ୟଥା ଲକ୍ଷ୍ୟମ୍ ॥ ୮୯ ॥
ଭକ୍ତଜନେଷ୍ଵନୁରକ୍ତଂ ଧରଣୀଧରକନ୍ୟୟା ପରିଷ୍ଵକ୍ତମ୍ ।
ପ୍ରଖ୍ୟାତନାମଧେୟଂ ଜୟତିତରାଂ ଭାଗଧେୟଂ ମେ ॥ ୯୦ ॥
ଫଣିକୁଣ୍ଡଲଂ ଵହନ୍ତୀ ଶ୍ରଵଣେ ତାଟଙ୍କମପ୍ୟପରଭାଗେ ।
ସିତଶୋଣକାନ୍ତିୟୁକ୍ତା କାଚିନ୍ମଦ୍ଵାସନା ଜୟତି ॥ ୯୧ ॥
ଆଲିଙ୍ଗିତୋଽପି ସଵ୍ୟେ ଶମ୍ପାତତ୍ୟା ଶିଵଃ ପ୍ରକୃତିତୋଽୟମ୍ ।
କରୁଣାମ୍ବୁପୂର୍ଣଗର୍ଭଃ କଶ୍ଚିଦ୍ଧାରାଧରୋ ଜୟତି ॥ ୯୨ ॥
ଜଟିଲଂ ଶିରଃପ୍ରଦେଶେ ନିଟିଲେ କୁଟିଲଂ ଗଲେ ତଥା ନୀଲମ୍ ।
ହୃଦୟୀକୃତାଦ୍ରିବାଲଂ ଵିଲସତି କାଲଂ ଜୟତ୍ ତେଜଃ ॥ ୯୩ ॥
ଧନୁରେକତ୍ର ପିନାକଂ ସଶରଂ ବିଭ୍ରତ୍ ତଥାଽପରତ୍ରାଽପି ।
ଶରମୈକ୍ଷଵଂ ଚ ଚାପଂ କିଞ୍ଚିତ୍ ତତ୍ ପ୍ରେମ ମେ ଜୟତି ॥ ୯୪ ॥
ଵାଞ୍ଛିତଵିତରଣଶୀଲଂ ଵିଚିତ୍ରଲୀଲଂ ନିରାଲଵାଲଂ ଚ ।
ଲଲନାଲତୈକତାନଂ କଲୟେ ଶିଵକଲ୍ପଭୂମିରୁହମ୍ ॥ ୯୫ ॥
ପରିହୃତଦୁର୍ଜନ ତିମିରଂ ନଗଜାନନ୍ଦୈକସିନ୍ଧୁଵୃଦ୍ଧିକରମ୍ ।
ନନ୍ଦିତଭକ୍ତଚକୋରଂ ଵନ୍ଦେ ଚନ୍ଦ୍ରୋଦୟଂ କଞ୍ଚିତ୍ ॥ ୯୬ ॥
ନିଖିଲନିଗମୈଗଦୁଗ୍ଧାଂ ଦାନଵିଦଗ୍ଧାଂ ଶୁକାଦିମୁନିଦୁଗ୍ଧାମ୍ ।
ଵପୁଷା ସଦୈଵ ମୁଗ୍ଧାଂ କଲୟେ ଶିଵକାମଧେନୁମହମ୍ ॥ ୯୭ ॥
ନିତ୍ୟପ୍ରଭାଭିରାମଂ ଵିଦଲିତକାମଂ ସଦାର୍ଧଧୃତଭାମମ୍ ।
ହୃଦି କୋମଲଂ ନିକାମଂ ଶ୍ରୀଶିଵଚିନ୍ତାମଣିଂ ଵନ୍ଦେ ॥ ୯୮ ॥
ନିର୍ଵ୍ୟାଧି ମେ ଶରୀରଂ ନିରାଧି ଚେତଃ ସଦା ସମାଧିପରମ୍ ।
କୁରୁ ଶର୍ଵ ସର୍ଵଦା ତ୍ଵଂ ନାନ୍ୟଂ କାମଂ ଵୃଣେ କଞ୍ଚିତ୍ ॥ ୯୯ ॥
ଆର୍ୟାପତେଃ ପଦାବ୍ଜେ ନିହିତଂ ଶତପଦ୍ୟପତ୍ରମୟପୁଷ୍ପମ୍ ।
ଆର୍ୟାଶତଂ ସୁକୃତିନାଂ ହୃଦୟାମୋଦଂ ସଦା ଵହତୁ ॥ ୧୦୦ ॥
॥ ଇତି ଭରଦ୍ଵାଜକୁଲତିଲକଶ୍ରୀମଦପ୍ପୟ୍ୟଦୀକ୍ଷିତ-
ଵିରଚିତଶୈଵାର୍ୟାଶତକଂ ସମ୍ପୂର୍ଣମ୍ ॥
