Brihadambaryashatakam Lyrics in Telugu:
॥ బృహదమ్బార్యాశతకమ్ ॥
శ్రీగోకర్ణనికేతా శ్రీవిద్యాదివ్యశుక్తికాముక్తా ।
శ్రీకణ్ఠనిత్యమిలితా శ్రీచక్రేశీ పురోఽస్తు మే మాతా ॥ ౧ ॥
కల్యాణం కలయేన్నః కల్యానస్మాన్ కరోతు శతమబ్దాన్ ।
కల్యాతఙ్కమపాస్యేత్ కల్యాణీ నః సదైవ బృహదమ్బా ॥ ౨ ॥
తరుణారుణప్రకాశం తరుణా వకులేన భాసురనివేశమ్ ।
గురుణా స్తనేన నమితం గురుణా సదయేన వస్తుః న కథితమ్ ॥ ౩ ॥
వకులద్రుమూలసదనాం వనజసహాధ్యాయిపరిలసద్వదనామ్ ।
వల్గుస్మితేక్ష్యరదనాం వన్దే దృక్తర్జితామ్బుజచ్ఛదనామ్ ॥ ౪ ॥
ఏకా ద్విలోకసుఖదా త్ర్యక్షర్యాఖ్యాపితా చతుఃపీఠా ।
పఞ్చామ్నాయశిరఃస్థా బృహదమ్బ త్వం షడధ్వజనయిత్రీ ॥ ౫ ॥
నాసాభాసా చమ్పకశోభాక్షోభావహాస్తు బృహదమ్బా ।
పారావారాత్మజయా సేవ్యా దేవ్యా గిరాం చ భవ్యాయ ॥ ౬ ॥
కమ్బులసత్కంధరయా కైశ్యవినిర్ధూతనీలకంధరయా ।
పాల్యే శోణాధరయా పావితవకులద్రుమూలసద్ధరయా ॥ ౭ ॥
పీనస్తనావనమ్రే పాదనతామ్భోజవాసినీకమ్రే ।
వాణీజితసరసామ్రే వాచో వల్గన్తు ధామ్ని మే తామ్రే ॥ ౮ ॥
వకులవనీవాసిన్యా విద్రుమసచ్ఛాయచేలవాసిన్యా ।
హృద్రాజీవాసిన్యా హృదయం శంభోర్హృతం సువాసిన్యా ॥ ౯ ॥
వన్దే శ్రీబృహదమ్బాం వల్గుగతాపాస్తరాజకాదమ్బామ్ ।
ఆశ్రితజనావలమ్బామాసేవే కైశ్యధూతలోలమ్బామ్ ॥ ౧౦ ॥
కేసరసరభాసురయా కేవలదాసీభవత్సురాసురయా ।
కలితా వాణీ సురయా కయాపి మే భక్తినమ్రభూసురయా ॥ ౧౧ ॥
శిరసా ధృతసోమాయాః శ్రీగోకర్ణైకదివ్యధామాయాః ।
పదనమ్రాణాం మాయాః పాపవిధాత్ర్యః కదాపి నోమాయాః ॥ ౧౨ ॥
ఆనన్దసారసీమామానఙ్గోత్కర్షపోషకాపాఙ్గామ్ ।
ఆనన్తుం బృహదమ్బామానన్త్యం మూర్ధ్ని వాఞ్ఛామి ॥ ౧౩ ॥
వకులాటవీనివిష్టాం వన్దకసంరక్షణాత్యభినివిష్టామ్ ।
నిరవధికరుణావిష్టాం నిత్యం సేవేమహీష్టశిపివిష్టామ్ ॥ ౧౪ ॥
అభిధాయితహృల్లేఖామతీతవిద్వత్సుకవిజనోల్లేఖామ్ ।
పదపద్మనమల్లేఖాం పశ్యామః శాశ్వతీం తటిల్లేఖామ్ ॥ ౧౫ ॥
కరుణామృతవర్షిణ్యాః సేవకసర్వాపరాధమర్షిణ్యాః ।
వకులవిపినహర్షిణ్యా వశ్యాః స్మః శంభుచిత్తకర్షిణ్యాః ॥ ౧౬ ॥
కరుణాఝరసరసాక్షీమరుణాధరశోభిసున్దరసుహాసామ్ ।
తరునార్ధఘటితదేహాం వరుణాలయజేడితాం శివాం వృణుమః ॥ ౧౭ ॥
ధన్యాః కే ను మదన్యా వలయేఽవన్యా యతో వకులవన్యాః ।
మూలే మోక్షవదాన్యా మాన్యా కన్యా గిరోర్హితమాన్యా మే ॥ ౧౮ ॥
కేచిత్ త్వాం కులమూలే సాక్షాత్కుర్వన్త్యహం వకులమూలే ।
అర్ధేశ్వరాం కతిపయే మాతః సర్వేశ్వరామహం కలయే ॥ ౧౯ ॥
వాఞ్ఛితసిద్ధ్యై భవితా లాఞ్ఛితచికురా చకోరవృత్తికృతా ।
కాఙ్క్షితచరణా సద్భిః కాం క్షిప్రం నాతనోతి సంసిద్ధిమ్ ॥ ౨౦ ॥
అరుణిమసారసమష్టిః సంసృతికూపోత్తరణయష్టిః ।
కలితామృతౌఘవృష్టిర్బృహదమ్బా భాతు మే కృపాదృష్టిః ॥ ౨౧ ॥
సామజసమానగమనా సామసమాజోపగానతుష్టమనాః ।
సమజానుపేతచరణా సమరసతాపన్నపన్నగాభరణా ॥ ౨౨ ॥
విశ్వపతివశ్యహృదయా నశ్వరవిశ్వాసపశ్వనాశాస్యా ।
అశ్వముఖస్తవశస్యా నిఃశ్వసితానుశ్రవాస్తి బృహదమ్బా ॥ ౨౩ ॥
లఘు తవ చరణం శరణం తరణం మృత్యోర్భజామి బృహదమ్బ ।
యావత్ తరసా జరసా పరసాదఙ్గాని న కృతాని ॥ ౨౪ ॥
ప్రభవతి యత్ర న గౌర్వా నోర్మీణాం సంకథా న వా జడతా ।
కోఽపి వకులాలవాలే జయతి చిరానన్దసాగరోఽపార ॥ ౨౫ ॥
స్థావరరాజతనూజా భావరసస్ఫీతవైఖరీ జననీ ।
పీవరవక్షోజనతా ధీవరదౌహిత్రసూక్తిపరిచిన్త్యా ॥ ౨౬ ॥
సర్వానన్దనివాసా శక్రశతానన్దముఖ్యసురసేవ్యా ।
ధృతనన్దసూనుదేహా భూమనిజానన్దమేదురా జయతి ॥ ౨౭ ॥
అపహృత్య చిత్తశల్యం భక్తిమతామాతనోషి కైవల్యమ్ ।
బృహదమ్బ కో న్వకల్యం దేవాన్తరం త్వ్యా పాల్యమ్ ॥ ౨౮ ॥
భవనీకృతగోకర్ణం భాస్వన్మణికుణ్డలస్ఫురత్కర్ణమ్ ।
ధ్యాయామి శోణవర్ణం ధామ పరం భక్తమానసాభ్యర్ణమ్ ॥ ౨౯ ॥
కలితా లలితా కలితాపహరా దహరాన్తరవిచిన్త్యా ।
వకులే ముకులేడ్యకులే సదయాభ్యుదయా కిమన్యదేవైర్మే ॥ ౩౦ ॥
వారాణసీనిషేవాం వారాశ్యవగాహనాని చ న తన్యాః ।
వారాన్ బహూనథాఙ్ఘ్ర్యోర్వారా పూయస్వ వకులమూలేశ్యాః ॥ ౩౧ ॥
శ్రేయశ్చ యా విధత్తే శ్రీబృహదమ్బాపదామ్బురుహచిన్తా ।
కలికలుషణి విభిన్తే మదమపి కార్తాన్తమాహన్తా ॥ ౩౨ ॥
నీవీ నవాన్యవచసాం సా వీణా వాణ్యభిపణార్యా ।
భావీ భవార్తిహరణీ దేవీ దయతాం సదైవ బృహదమ్బా ॥ ౩౩ ॥
మాతా సారసనేత్రా మాన్యా వారాశికన్యకానేత్రా ।
మృగచక్రవర్తిపత్రా మనసి మమ స్తాత్ స్తనోల్లసత్పత్రా ॥ ౩౪ ॥
వేలతిగానుకమ్పా వకులవనామ్భోదమఞ్జుతరశమ్పా ।
భవతప్తామృతఝమ్పా భవతు హృదిస్థా కృతద్విషత్కమ్పా ॥ ౩౫ ॥
పద్యాయామాద్ యాయామాద్యాయామమ్బ తావకజనానామ్ ।
విద్యాం తే నిరవద్యాం విద్యాం గోకర్ణరాజ్ఞి దయయా తే ॥ ౩౬ ॥
తరణిం తమశ్ఛటానామరణిం జ్ఞానానలస్య కలయామి ।
తరణిం భవామ్బురాశేః సరణిం వేద్యాగమస్య బృహదమ్బామ్ ॥ ౩౭ ॥
వక్షోజభారనమితా లక్షోత్తరవేదగీఃప్రమితా ।
ఇక్షోర్మధురోక్తిమితా న క్షోభ్యా త్వం దయాధునీ స్తిమితా ॥ ౩౮ ॥
హృదయం పురాణవచసాం సదయం దీనావనే పరం తేజః ।
మదయన్నధరం శంభోస్తదయం యాతో జనః శరణమ్ ॥ ౩౯ ॥
మాఙ్కణతీరకుటీరా మేదురవక్షోజలిప్తపాటీరా ।
పతిధృతచన్ద్రాణ్డీరా ధ్యేయామ్బా ముక్తిదానశౌణ్డీరా ॥ ౪౦ ॥
ఆపన్నరక్షణార్థే చాపం పుణ్డ్రేక్షుమాదధానా సా ।
రోపం చ పౌష్పమమ్బా పాపం ప్రోత్సారయేన్మమాశేషమ్ ॥ ౪౧ ॥
దక్షా నిరర్గలా సా దాతుం స్వర్గం త్రివర్గమపవర్గమ్ ।
బృహదమ్బా మహదన్తర్వాసా భాసారుణా జయతి ॥ ౪౨ ॥
వారిదసోదరచికురాం వదనపరాభూతవిస్ఫురన్ముకురామ్ ।
సున్దరహాసాఙ్కూరాం సేవేఽమ్బాం వాగ్జితామృతాసారామ్ ॥ ౪౩ ॥
బిన్దుత్రయాత్మకతయా కలయన్తి త్వామపారకరుణాబ్ధిమ్ ।
యే బృహదమ్బ భవాబ్ధిర్విదుషాం తేషాం కతి పృషన్తి ॥ ౪౪ ॥
నీవారశూకశాతా నీహారాంశుచ్ఛటాశీతా ।
బాలాదిత్యశతాభా మూలాధారాత్ సముద్యతా భాసి ॥ ౪౫ ॥
విశ్వప్రథానిదానం వేదశిరఃస్ఫూర్జదపదానమ్ ।
బృహదమ్బికాభిధానం బహుశః సేవేయ మఙ్గలవిధానమ్ ॥ ౪౬ ॥
ఆలోలనీలవేణీ ఫాలోత్సఙ్గానుషఙ్గిదివ్యమణీ ।
కాలోన్మిషత్కువలయచ్ఛాయాదాయాదలోచనద్వితయా ॥ ౪౭ ॥
మణితాటఙ్కసముద్యద్ఘృణిగణనీరాజితకపోలమ్ ।
నాసాగ్రలమ్బిముక్తాభాసా సంపృక్తమన్దహాసరుచిః ॥ ౪౮ ॥
అరుణాధరజితబిమ్బా వక్త్రపరాభూతశీతకరబిమ్బా ।
పీనోన్నతస్తనభరా పాశసృణీష్విక్షుచాపకరా ॥ ౪౯ ॥
శిఞ్జితమఞ్జీరలసన్మఞ్జులచరణాబ్జనమ్రసురలోకా ।
బృహదమ్బా మమ హృదయే నివసతు వాత్సల్యశీతలాలోకా ॥ ౫౦ ॥
భానవ్యా యా నవ్యా మానవ్యాఘాతభీతయా దీప్త్యా ।
ఆతన్వీత సుతన్వీ సా తన్వీడ్యా శ్రియం తవామ్బ తనూః ॥ ౫౧ ॥
ఇచ్ఛాత్తవిశ్వశిల్పాం పఞ్చబ్రహ్మప్రకల్పితసుతల్పామ్ ।
వన్దీకృతాదిజల్పాం వన్దే దేవీం దయోదయానల్పామ్ ॥ ౫౨ ॥
కేచిన్మదాలసాక్షం కాలోన్మీలత్కువాలజయదక్షమ్ ।
గాత్రం తవాపరోక్షం కుర్యుర్బృహదమ్బ దుష్కృతవిపక్షమ్ ॥ ౫౩ ॥
శయధృతచారువిపఞ్చీ శ్రోణీబిమ్బావలమ్బిమణికాఞ్చీ ।
గోకర్ణేశ్యఘవఞ్చీ దృష్టా చేత్ కో న భక్తిరోమాఞ్చీ ॥ ౫౪ ॥
కాలం ప్రయాప్య మేఽలం భారైర్దుఃస్థైరచారుకుచభారైః ।
క్షామైరశుకశ్యామైరన్యైర్దేవైరధూతనతదైన్యైః ॥ ౫౫ ॥
సోమార్ధసల్లలామా సా మామవ్యాత్ సువకులవనదామా ।
కామారిదివ్యరామా పరమా సంవిద్ ఘనశ్యామా ॥ ౫౬ ॥
కోమలవాకులమూలా స్తోమలసత్కున్తలాధిగోకర్ణమ్ ।
యామలవర్ణ్యా కాపి శ్యామలవర్ణా విభాతి గురుమూర్తిః ॥ ౫౭ ॥
ప్రవహత్కరుణాపాఙ్గం ప్రత్యగ్రామ్భోదమేచకశ్యామమ్ ।
విశ్వాధికాన్తరఙ్గం వకులవనే భాతి పాలితపాఙ్గమ్ ॥ ౫౮ ॥
శిఖిపిఞ్ఛం తాపిఞ్ఛం సభయం ధమ్మిల్లశోభయా స్వభయా ।
ఆదధతీ దధతీన్దుం మాఙ్కణరోధోఽఙ్కణే జయత్యమ్బా ॥ ౫౯ ॥
వామకుచచుమ్బివీణామర్ధోన్మీలన్మనోజ్ఞట్టక్కోణామ్ ।
విశ్వావనప్రవీణాం వకులాటవ్యాం నమామి రమమాణామ్ ॥ ౬౦ ॥
అంసానుషఙ్గిచూలీ సంసారాపారవారిధేరాలీ ।
శం సా దదాతు కాలీ కంసారీడ్యా సదాత్తవకులాలీ ॥ ౬౧ ॥
వీణావాదిని శర్మాస్వాదిని కర్మాద్రిభేదిని స్యాన్మే ।
విశ్వాకారిణి చన్ద్రాలంకారిణి బోధకారిణి ప్రేమ ॥ ౬౨ ॥
అరుణాంశుకాముపాసే నిగమం శుకరూపిణం దధతీమ్ ।
దదతీమాశుకవిత్వం స్వాంశుకదర్థీకృతాతసీం జననీమ్ ॥ ౬౩ ॥
సజ్జనకృతవరివస్యం సారసపరిహాససాదరనిజాస్యమ్ ।
గాన్ధర్వస్య రహస్యం కించన కుర్యాన్మదాశాస్యమ్ ॥ ౬౪ ॥
దూర్వాశ్యామలకాయే దుర్వాసోముఖ్యమౌనిగణసేవ్యే ।
అర్వాస్యవర్ణితగుణే కుర్వాశాపూర్తిమద్య బృహదమ్బ ॥ ౬౫ ॥
లీలాలోలా వకులాటవ్యామవ్యాచ్ఛుకాభిరామకరా ।
వీణాక్కాణాభిరతా మాతా భూతాధిపస్య దయితా నః ॥ ౬౬ ॥
దురితేభ్యో న కృతేభ్యో నాపి కృతాన్తాద్ బిభేమి దుర్దాన్తాత్ ।
దృష్టా దయాసమష్టిర్వకులవనే శ్యామలాకృతిర్యేన ॥ ౬౭ ॥
ధన్యోఽహం ధన్యోఽహం వంశద్వితయీ మదీక్షితా ధన్యా ।
పరిపణమామ్నాయానాం శ్యామలమాలోకి వకులమూలే యత్ ॥ ౬౮ ॥
విత్తాదిభిర్నరాణాం మత్తానాం దుర్లభా వినా భక్తిమ్ ।
తత్తాదృశానుభావా సత్తా కాచిద్ విభాతి గోకర్ణే ॥ ౬౯ ॥
పరిహృతసర్వవికల్పా పరిధృతశీతాంశుకోరకాకల్పా ।
బాలదివాకరకల్పా బృహదమ్బా పాతు సత్యసంకల్పా ॥ ౭౦ ॥
చమ్పకనీపరసాలాః సన్త్యేవాన్యే రసాస్థలే సాలాః ।
వకులే తు మేఽస్తి భక్తిర్యస్మిన్ దృష్టే స్మృతా భవత్యమ్బా ॥ ౭౧ ॥
భ్రమరీవిభ్రమకబరీం భ్రూభ్రమణేనైవ పఞ్చకృత్యకరీమ్ ।
సంవిత్సుఖామృతఝరీం సంసేవేఽమ్బాం భవామ్బురాశితరీమ్ ॥ ౭౨ ॥
కుముదేశపాకచూడం కలితసురోద్యానమాలికాపీడమ్ ।
అఞ్చితవకులాక్రీడం కించిదుపాసే దయానివహనీడమ్ ॥ ౭౩ ॥
సరలే సరలే విరలే తరలే హృన్నేత్రకుచసీమ్ని ।
వస్తుని మేఽస్తు నివాస్తుని కరుణాయాశ్చిత్తవృత్తిరపతన్ద్రా ॥ ౭౪ ॥
కం గణయేఽన్యముపాస్యం మఙ్కణకాసారతీరకౌతుకినః ।
అఙ్గణవాకులసుమనోరిఙ్ఖణసౌరభ్యనిర్భరాద్ధామ్నః ॥ ౭౫ ॥
వేశన్తతుల్యనాభీ వాసన్తస్ఫారపుష్పశుభవేణీ ।
సీమన్తభాసివుసృణా సా హన్త ప్రేక్షితాద్య బృహదమ్బా ॥ ౭౬ ॥
శ్రుతిలాసికాలిరఙ్గాయితస్వమహిమాక్షినిర్జితకురఙ్గా ।
ప్రోద్యత్కృపాతరఙ్గా పాయాదమ్బా మృగేశ్వరతురఙ్గా ॥ ౭౭ ॥
నిబిడఘనస్తనకుమ్భా నిజవేణీన్యస్తశీతకరడిమ్భా ।
నివసితవరకౌసుమ్భా నివసతు చిత్తే జగద్ధితారమ్భా ॥ ౭౮ ॥
గమ్భీరనాభికుహరాం కుమ్భీన్ద్రస్పర్ధిముగ్ధసంచారామ్ ।
తాం భీమస్య న భామాం కుమ్భీపాకేచ్ఛవో భజన్త్యజ్ఞాః ॥ ౭౯ ॥
వాహ్యాపి నో పురాణ్యా తత్త్వవిపణ్యా యదుచ్చతాగణ్యా ।
సా వర్ణ్యాస్తు శరణ్యా కస్య ధరణ్యాముమాఖిలవరేణ్యా ॥ ౮౦ ॥
గోకర్ణేశయసేవ్యాం గోకర్ణేశప్రియాం ప్రణమన్ ।
గోకర్ణే వస తూష్ణీం గోకర్ణే భ్రామకాంస్తు జప మన్త్రాన్ ॥ ౮౧ ॥
క్షుద్రార్థదానశీలా న ద్రాగారాధితాః ప్రసీదన్తి ।
నిద్రాలసాస్త్వదన్యే తద్రాజ్ఞి త్వాం భజే వకులవన్యాః ॥ ౮౨ ॥
ఆగమకోటినిరుక్తామాబ్రహ్మస్తమ్బరక్షణాసక్తామ్ ।
ఆర్యామనాదిముక్తామాలోకే కేసరాటవీసక్తామ్ ॥ ౮౩ ॥
సేవే కించన దివ్యం భావే తేజః సమస్తసంసేవ్యమ్ ।
ధీవేదిమేత్య హృద్యం సంవేద్యాఖ్యం దహేన్మమాభవ్యమ్ ॥ ౮౪ ॥
వాణీ చామ్బుధికన్యా సా వృణుతే తం బలాదివానన్యా ।
కించిత్ త్వయా జనన్యా కటాక్షితో యః కియత్యథ స్త్ర్యన్యా ॥ ౮౫ ॥
శక్తః కోఽపి యదీయాం లఙ్ఘితుమాజ్ఞాం న లోకేషు ।
యస్యాజ్ఞాం బృహదమ్బా సాధ్యాస్తే కస్తతో హ్యధికః ॥ ౮౬ ॥
అష్టాపదాది సర్వం లోష్టాభిన్నం సదాభిపశ్యన్తః ।
అష్టాత్మనః ప్రణయినీం శిష్టాః పశ్యన్త్యనన్యతయా ॥ ౮౭ ॥
దాహం భవానలోత్థం వ్యాహన్తుం వాకులాటవీం దేవీమ్ ।
సోఽహం భజామి భక్త్యా యాహంతారూపినీతి గురుణోక్తా ॥ ౮౮ ॥
కులదైవతం మదీయం కులకుణ్డాభ్యన్తరైకవాస్తవ్యమ్ ।
కులపర్వతేశభాగ్యం కులాయమీక్షేఽనుపాధికరుణాయాః ॥ ౮౯ ॥
అగ్నావిష్ణుముఖేడ్యా భగ్నాశేషార్తిరాత్మభక్తానామ్ ।
భుగ్నాలకా మదీయే లగ్నా చిత్తే చకాస్తు బృహదమ్బా ॥ ౯౦ ॥
అవ్యాజభూతకరుణా భవ్యాపాఙ్గప్రకల్పితత్రాణా ।
అవ్యాద్విలిప్తఘుసృణా స్తవ్యా శ్రుత్యా సదాప్తగోకర్ణా ॥ ౯౧ ॥
అమ్భోజతుల్యనయనామఙ్కాలంకారిణీం త్రినేత్రస్య ।
అఙ్గీకృతాదిమరసామ్బాం గోకర్ణనాయికాం సేవే ॥ ౯౨ ॥
భార్యామనాదియూనోఽహార్యాధీశాన్వవాయమణిభూషామ్ ।
ఆర్యాముపాధ్వమనిశం కార్యాకార్యావమర్శనిష్ణాతాః ॥ ౯౩ ॥
వరదే సురదేశికవాఙ్నికరాసుకరానువర్ణనే ధామ్ని ।
కరవై మురవైరిముఖైః శిరసా సురసార్థకైర్నతే చేతః ॥ ౯౪ ॥
మఙ్కణకాసారఝరీసమీరధారామనోహరోదారే ।
మిలదలిలోలన్ముకులే వకులవనే లాలసీతి సకలేశీ ॥ ౯౫ ॥
పశ్యల్లలాటదారాన్ పరిపూర్ణానన్దసంవిదాకారాన్ ।
కఠినఘనస్తనభారాన్ కలయే గోకర్ణపావనాగారాన్ ॥ ౯౬ ॥
గోకర్ణేశమహిష్యా వ్యాకర్తుం కో గుణాన్ భవేదీశః ।
స్వీకర్తుం హృది వా తాన్ శ్రీకర్కాస్యం తమేకమపహాయ ॥ ౯౭ ॥
తుష్టా శ్రీబృహదమ్బా కష్టానున్మూలయేత్ కృపాదృష్ట్యా ।
ఇష్టాని చ ప్రదద్యాన్మృష్టాం ప్రతిభాం పరత్ర చ శ్రేయః ॥ ౯౮ ॥
వన్దే విశ్వవిధాత్రీం వన్దే విద్యాచిముక్తిఫలదాత్రీమ్ ।
వన్దే వకులవనేశీం వన్దే గోకర్ణవల్లభసుకేశీమ్ ॥ ౯౯ ॥
జయతి స్ఫారదయార్ద్రా గోకర్ణాధీశవల్లభా జయతి ।
జయతి ప్రసాదసుముఖీ శ్రీరఘునాథేన్ద్రపూజితా జయతి ॥ ౧౦౦ ॥
ఆఖ్యాం సకృద్ యదీయామాఖ్యాయాశేషవాఞ్ఛితం లభతే ।
తస్యాః స్తుతిప్రియాయాః యః స్యాత్ స్తోత్రం పఠన్ స పూర్ణార్థః ॥ ౧౦౧ ॥
॥ ఇతి శ్రీబృహదమ్బాశతకం సంపూర్ణమ్ ॥
