Devigiti Shatakam Lyrics in Oriya:
॥ ଦେଵୀଗୀତିଶତକମ୍ ॥
ଶ୍ରୀଗଣେଶାୟ ନମଃ ॥
କିଂ ଦେଵୈଃ କିଂ ଜୀଵୈଃ କିଂ ଭାଵୈସ୍ତେଽପି ୟେନ ଜୀଵନ୍ତି ।
ତଵ ଚରଣଂ ଶରଣଂ ମେ ଦରହଣଂ ଦେଵି କାନ୍ତିମତ୍ୟମ୍ବ ॥ ୧ ॥
ଅରୁଣାମ୍ବୁଦନିଭକାନ୍ତେ କରୁଣାରସପୂରପୂର୍ଣନେତ୍ରାନ୍ତେ ।
ଶରଣଂ ଭଵ ଶଶିବିମ୍ବଦ୍ୟୁତିମୁଖି ଜଗଦମ୍ବ କାନ୍ତିମତ୍ୟମ୍ବ ॥ ୨ ॥
କଲିହରଣଂ ଭଵତରଣଂ ଶୁଭଭରଣଂ ଜ୍ଞାନସମ୍ପଦାଂ କରଣମ୍ ।
ନତଶରଣଂ ତଵ ଚରଣଂ କରୋତୁ ମେ ଦେଵି କାନ୍ତିମତ୍ୟମ୍ବ ॥ ୩ ॥
ଅମିତାଂ ସମତାଂ ମମ ତାଂ ତନୁ ତାଂ ତନୁତାଂ ଗତାଂ ପଦାବ୍ଜଂ ତେ ।
କୃପୟା ଵିଦିତୋ ଵିହିତୋ ୟୟା ତଵାହଂ ହି କାନ୍ତିମତ୍ୟମ୍ବ ॥ ୪ ॥
ମମ ଚରିତଂ ଵିଦିତଂ ଚେଦୁଦୟେନ୍ନ ଦୟା କଦାପି ତେ ସତ୍ୟମ୍ ।
ତଦପି ଵଦାମ୍ୟୟି କୁରୁ ତାଂ ନିର୍ହେତୁକମାଶୁ କାନ୍ତିମତ୍ୟମ୍ବ ॥ ୫ ॥
ନ ବୁଧତ୍ଵଂ ନ ଵିଧୁତ୍ଵଂ ନ ଵିଧିତ୍ଵଂ ନୌମି କିଂ ତୁ ଭୃଙ୍ଗତ୍ଵମ୍ ।
ଅସକୃତ୍ପ୍ରଣମ୍ୟ ୟାଚେ ତ୍ଵଚ୍ଚରଣାବ୍ଜସ୍ୟ କାନ୍ତିମତ୍ୟମ୍ବ ॥ ୬ ॥
ଅଭଜମହଂ କିଂ ସାରେ କଂସାରେ ଵୀପଦେଽପି ସଂସାରେ ।
ରୁଚିମତ୍ତାଂ ଶୁଚିମତ୍ତାମହହ ତ୍ଵଂ ପାହି କାନ୍ତିମତ୍ୟମ୍ବ ॥ ୭ ॥
ମାମସକୃଦପ୍ରସାଦାଦ୍ଦୁଷ୍କୃତକାରୀତି ମାଽଵମନ୍ୟସ୍ଵ ।
ସ୍ମର କିଂ ନ ମୟା ସୁକୃତଂ ଵର୍ଧିତମିଦମଦ୍ୟ କାନ୍ତିମତ୍ୟମ୍ବ ॥ ୮ ॥
କରୁଣାଵିଷୟଂ ୟଦି ମାଂ ନ ତନୋଷି ୟଥା ତଥାପି ଵର୍ତେଽହମ୍ ।
ଭଵତି କୃପାଲୁତ୍ଵଂ ତେ ସୀଦାମି ମୃଷେତି କାନ୍ତିମତ୍ୟମ୍ବ ॥ ୯ ॥
ଅତୁଲିତଭଵାନୁରାଗିଣି ଦୁର୍ଵର୍ଣାଚଲଵିହାରିଣି ମୟି ତ୍ଵମ୍ ।
ସମତେର୍ଷ୍ୟୟା ପ୍ରସାଦଂ ନ ଵିଧତ୍ସେ କିଂ ନୁ କାନ୍ତିମତ୍ୟମ୍ବ ॥ ୧୦ ॥
ଦ୍ୟାଂ ଗାଂ ଵାଭ୍ୟପତଂ ୟଦି ଜୀଵାତୁସ୍ତ୍ଵାମୃତେଽନ୍ତତଃ କୋ ମେ ।
ହିତ୍ଵା ପୟୋଦପଙ୍କ୍ତିଂ ସ୍ତୋକସ୍ୟ ଗତିଃ କ୍ଵ କାନ୍ତିମତ୍ୟମ୍ବ ॥ ୧୧ ॥
କଂ ଵା କଟାକ୍ଷଲକ୍ଷ୍ୟଂ ନ କରୋଷ୍ୟେଵଂ ମୟି ତ୍ଵମାସୀଃ କିମ୍ ।
କିଂ ତ୍ଵାମୁପାଲଭେଽହଂ ଵିଧିର୍ଗରୀୟାନ୍ ହି କାନ୍ତିମତ୍ୟମ୍ବ ॥ ୧୨ ॥
ତନୁଜେ ଜନନୀ ଜନୟତ୍ୟହିତେଽପି ପ୍ରେମ ହୀତି ତନ୍ମିଥ୍ୟା ।
ୟଦୁପେକ୍ଷସେ ତ୍ରିଲୋକୀଂ ମାତର୍ମାଂ ଦେଵି କାନ୍ତିମତ୍ୟମ୍ବ ॥ ୧୩ ॥
ନିନ୍ଦାମି ସାଧୁଵର୍ଗଂ ସ୍ତୌମି ପୁନଃ କ୍ଷୀଣଷଡ୍ଗସଂସର୍ଗମ୍ ।
ଵନ୍ଦେ କିଂ ତେ ଚରଣେ କିଂ ସ୍ୟାତ୍ପ୍ରୀତିସ୍ତୁ କାନ୍ତିମତ୍ୟମ୍ବ ॥ ୧୪ ॥
ଗୀର୍ଵାଣଵୃନ୍ଦଜିହ୍ଵାରସାୟନସ୍ଵୀୟମାନନୀୟଗୁଣେ ।
ନିଗମାନ୍ତପଞ୍ଜରାନ୍ତରମରାଲିକେ ପାହି କାନ୍ତିମତ୍ୟମ୍ବ ॥ ୧୫ ॥
ତ୍ରିନୟନକାନ୍ତେ ଶାନ୍ତେ ତାନ୍ତେ ସ୍ଵାନ୍ତେ ମମାସ୍ତୁ ଵଦ ଦାନ୍ତେ ।
କୃପୟା ମୁନିଜନଚିନ୍ତିତଚରଣେ ନିଵସାଦ୍ୟ କାନ୍ତିମତ୍ୟମ୍ବ ॥ ୧୬ ॥
ଧୁତକଦନେ କୃତମଦନେ ଭୃଶମଦନେ ୟୋଗିଶର୍ଵଭକ୍ତାନାମ୍ ।
ମଣିସଦନେ ଶୁଭରଦନେ ଶଶିଵଦନେ ପାହି କାନ୍ତିମତ୍ୟମ୍ବ ॥ ୧୭ ॥
ଗିରିତନୁଜେ ହତଦନୁଜେ ଵରମନୁଜେଦ୍ଧାଭିଧେ ଚ ହର୍ୟନୁଜେ ।
ଗୁହତନୁଜେଽଵିତମନୁଜେ କୁରୁ କରୁଣାଂ ଦେଵି କାନ୍ତିମତ୍ୟମ୍ବ ॥ ୧୮ ॥
ଗଜଗମନେ ରିପୁଦମନେ ହରକମନେ କୢପ୍ତପାପକୃଚ୍ଛମନେ ।
କଲିଜନନେ ମୟି ଦୟୟା ପ୍ରସୀଦ ହେ ଦେଵି କାନ୍ତିମତ୍ୟମ୍ବ ॥ ୧୯ ॥
ୟନ୍ମାନସେ ପଦାବ୍ଜଂ ତଵ ସଂଵିଦ୍ଭାସ୍ଵଦାଭୟାଽଽଭାତି ।
ତତ୍ପାଦଦାସଦାସକଦାସତ୍ଵଂ ନୌମି କାନ୍ତିମତ୍ୟମ୍ବ ॥ ୨୦ ॥
ଦୁଷ୍କରଦୁଷ୍କୃତରାଶେର୍ନ ବିଭେମି ଶିଵେ ୟଦି ପ୍ରସାଦସ୍ତେ ।
ଦଲନେ ଦୃଷଦାଂ ଟଙ୍କଃ କଲ୍ପେତ ନ କିଂ ନୁ କାନ୍ତିମତ୍ୟମ୍ବ ॥ ୨୧ ॥
କୋମଲଦେହଂ କିମପି ଶ୍ୟାମଲଶୋଭଂ ଶରନ୍ମୃଗାଙ୍କମୁଖମ୍ ।
ରୂପଂ ତଵ ହୃଦୟେ ମମ ଦୀପଶ୍ରିୟମେତୁ କାନ୍ତିମତ୍ୟମ୍ବ ॥ ୨୨ ॥
କିଞ୍ଚନଵଞ୍ଚନଦକ୍ଷଂ ପଞ୍ଚଶରାରେଃ ପ୍ରପଞ୍ଚଜୀଵାତୁମ୍ ।
ଚଞ୍ଚଲମଞ୍ଚଲମକ୍ଷ୍ଣୋରୟି ମୟି କୁରୁ ଦେଵି କାନ୍ତିମତ୍ୟମ୍ବ ॥ ୨୩ ॥
ଅଞ୍ଚତି ୟଂ ତ୍ଵଦପାଙ୍ଗଃ କିଞ୍ଚିତ୍ତସ୍ୟୈଵ କୁମ୍ଭଦାସତ୍ଵେ ।
ଅହମହମିକୟା ଵିବୁଧାଃ କଲହଂ କଲୟନ୍ତି କାନ୍ତିମତ୍ୟମ୍ବ ॥ ୨୪ ॥
କିମିଦଂ ଵଦାଦ୍ଭୁତଂ ତେ କସ୍ମିଂଶ୍ଚିଲ୍ଲକ୍ଷିତେ କଟାକ୍ଷେଣ ।
ବୃଂହାଦୀନାଂ ହୃଦୟଂ ଦୀନତ୍ଵଂ ୟାତି କାନ୍ତିମତ୍ୟମ୍ବ ॥ ୨୫ ॥
ପ୍ରାୟୋ ରାୟୋପଚିତେ ମାୟୋପାୟୋଲ୍ବଣାସୁରକ୍ଷପଣେ ।
ଗେୟୋ ଜାୟୋରୁବଲେ ଶ୍ରେୟୋ ଭୂୟୋଽସ୍ତୁ କାନ୍ତିମତ୍ୟମ୍ବ ॥ ୨୬ ॥
କରଣଂ ଶରଣଂ ତଵ ଲସଦଲକଂ କୁଲକଂ ଗିରୀଶଭାଗ୍ୟାନାମ୍ ।
ସରଲଂ ଵିରଲଂ ଜୟତି ସକରୁଣଂ ତରୁଣାଂ ହି କାନ୍ତିମତ୍ୟମ୍ବ ॥ ୨୭ ॥
ଶଙ୍କରି ନମାଂସି ଵାଣୀ କିଙ୍କରି ଦୈତେୟରାଡ୍ଭୟଙ୍କରି ତେ ।
କରଵୈ ମୁରଵୈର୍ୟନୁଜେ ପୁରଵୈର୍ୟଭିକେଽଦ୍ୟ କାନ୍ତିମତ୍ୟମ୍ବ ॥ ୨୮ ॥
ତଵ ସେଵାଂ ଭୁଵି କେ ଵା ନାକାଙ୍କ୍ଷନ୍ତେ କ୍ଷମାଭୃତସ୍ତନୟେ ।
ତ୍ଵମିଵ ଭଵେୟୁର୍ୟଦି ତେ ଭଜନ୍ତି ୟେ ୟାଂ ହି କାନ୍ତିମତ୍ୟମ୍ବ ॥ ୨୯ ॥
ଭଵଦଵଶିଖାଭିଵୀତଂ ଶୀତଲୟେର୍ମାଂ କଟାକ୍ଷଵିକ୍ଷେପୈଃ ।
କାଦମ୍ବିନୀଵ ସଲିଲୈଃ ଶିଖଣ୍ଡିନଂ ଦେଵି କାନ୍ତିମତ୍ୟମ୍ବ ॥ ୩୦ ॥
ତ୍ଵଦ୍ଗୁଣପୟଃକଣଂ ମେ ନିପୀୟ ମୁକ୍ତେରଲଙ୍କ୍ରିୟାଂ ଗିରତୁ ।
ଚେତଃଶୁକ୍ତିର୍ମୁକ୍ତାଂ ଭକ୍ତିମିଷାଂ ଦେଵି କାନ୍ତିମତ୍ୟମ୍ବ ॥ ୩୧ ॥
ଗୁଣଗଣମହାମଣୀନାମାଗମପାଥୋଧିଜନ୍ମଭାଜାଂ ତେ ।
ଗୁଣତାଂ କଦା ନୁ ଭଜତାଂ ମମ ଧିଷଣା ଦେଵି କାନ୍ତିମତ୍ୟମ୍ବ ॥ ୩୨ ॥
ପାଟୀରଚର୍ଚିତସ୍ତନି କୋଟୀରକୃତକ୍ଷପାଧିରାଟ୍କଲିକେ ।
ଵୀଟୀରସେନ କଵିତାଧାଟୀଂ କୁରୁ ମେଽଦ୍ୟ କାନ୍ତିମତ୍ୟମ୍ବ ॥ ୩୩ ॥
ତଵ କରୁଣାଂ କିଂ ବ୍ରୂମସ୍ତ୍ଵାମପ୍ୟେଷାନଵେକ୍ଷ୍ୟ ତୂଷ୍ଣୀକାମ୍ ।
ଊରୀକରୋତି ପାପିନମପି ଵିନତଂ ଦେଵି କାନ୍ତିମତ୍ୟମ୍ବ ॥ ୩୪ ॥
ଈଶୋଽପି ଵିନା ଭଵତୀଂ ନ ଚଲିତୁମପି କିଂ ପୁନର୍ଵୟଂ ଶକ୍ତାଃ ।
କିମୁପେକ୍ଷସେ ପ୍ରସୀଦ କ୍ଷିତିଧରକନ୍ୟେଽଦ୍ୟ କାନ୍ତିମତ୍ୟମ୍ବ ॥ ୩୫ ॥
ମନ୍ମାନସାମ୍ରଶାଖୀ ପଲ୍ଲଵିତଃ ପୁଷ୍ପିତୋଽନୁରାଗେଣ ।
ହର୍ଷେଣ ଚ ପ୍ରସାଦାଲ୍ଲଘୁ ତଵ ଫଲିନୋଽସ୍ତୁ କାନ୍ତିମତ୍ୟମ୍ବ ॥ ୩୬ ॥
ଧ୍ୟାନାମ୍ବରଵସତେର୍ମମ ମାନସମେଘସ୍ୟ ଦୈନ୍ୟଵର୍ଷସ୍ୟ ।
ପଦୟୁଗଲୀ ତଵ ଶମ୍ପା ଲକ୍ଷ୍ମୀଂ ଵିଦଧାତୁ କାନ୍ତିମତ୍ୟମ୍ବ ॥ ୩୭ ॥
କଲିତପନଭାନୁତପ୍ତଂ ଚିତ୍ତଚକୋରଂ ମମାତିଶୀତାଭିଃ ।
ଜୀଵୟ କଟାକ୍ଷଦମ୍ଭଜ୍ୟୋତ୍ସ୍ନାଭିର୍ଦେଵି କାନ୍ତିମତ୍ୟମ୍ବ ॥ ୩୮ ॥
ଜ୍ୟୋତ୍ସ୍ନାସଧ୍ରୀଚୀଭିର୍ଦୁଗ୍ଧଶ୍ରୀଭିଃ କଟାକ୍ଷଵୀଚୀଭିଃ ।
ଶୀତଲୟାନୀଚୀଭିଃ କୃପୟା ମାଂ ଦେଵି କାନ୍ତିମତ୍ୟମ୍ବ ॥ ୩୯ ॥
ରୁଷ୍ଟା ତ୍ଵମାଗସା ୟଦି ତର୍ଜୟ ଦୃଷ୍ଟ୍ୟାପି ନେକ୍ଷସେ ୟଦି ମାମ୍ ।
ବାଲ ଇଵ ଲୋଲଚକ୍ଷୁଃ କଂ ଶରଣଂ ୟାମି କାନ୍ତିମତ୍ୟମ୍ବ ॥ ୪୦ ॥
ଵିଭଵଃ କେ କିଂ କର୍ତୁଂ ପ୍ରଭଵଃ କରୁଣା ନ ଚେତ୍ତଵାନ୍ତେଽପି ।
ନୋଚ୍ଛ୍ଵସିତୁଂ କୃତମେଭିସ୍ତ୍ଵାମୀଶ୍ଵରି ନୌମି କାନ୍ତିମତ୍ୟମ୍ଵ ॥ ୪୧ ॥
ଜିତ୍ଵା ମଦମୁଖରିପୁଗଣମିତ୍ଵା ତ୍ଵଦ୍ଭକ୍ତଭାଵସାମ୍ରାଜ୍ୟମ୍ ।
ଗତ୍ଵା ସୁଖଂ ଜନୋଽୟଂ ଵର୍ତେତ କଦା ନୁ କାନ୍ତିମତ୍ୟମ୍ବ ॥ ୪୨ ॥
ଅଖିଲଦିଵିଷଦାଲମ୍ବେ ପଦୟୁଗ୍ମଂ ଦେଵି ତେ ସଦାଽଽଲମ୍ବେ ।
ଜଗତାଂ ଗୋମତ୍ୟମ୍ବ କ୍ଷିତିଧରକନ୍ୟେଽଦ୍ୟ କାନ୍ତିମତ୍ୟମ୍ବ ॥ ୪୩ ॥
ଅତ୍ରୈଵ କଲ୍ପଵଲ୍ଲୀଚିନ୍ତାମଣିରସ୍ତି କାମଧେନୁରପି ।
ଵେଦ୍ମି ନ କିଂ ୟଦି ବୁଧତା ପୁଂସା ଲଭ୍ୟେତ କାନ୍ତିମତ୍ୟମ୍ବ ॥ ୪୪ ॥
ନାହଂ ଭଜାମି ଦୈଵଂ ମନସାପ୍ୟନ୍ୟତ୍ତ୍ଵମେଵ ଦୈଵଂ ମେ ।
ନ ମୃଷା ଭଣାମି ଶୋଧୟ ମାନସମାଵିଶ୍ୟ କାନ୍ତିମତ୍ୟମ୍ବ ॥ ୪୫ ॥
ଖେଦୟସି ମାଂ ମୃଗଂ କିଂ ମୃଗତୃଷ୍ଣେଵ ପ୍ରସୀଦ ନୌମି ଶିଵେ ।
ମୋଦୟ କୃପୟା ନୋ ଚେତ୍କ୍ଵ ନୁ ୟାୟାଂ ଦେଵି କାନ୍ତିମତ୍ୟମ୍ବ ॥ ୪୬ ॥
କାର୍ୟଂ ସ୍ଵେନ ସ୍ଵହିତଂ କୋ ନାମ ଵଦେଦୟଂ ଜନୋ ଵେତ୍ତି ।
ତ୍ଵଂ ଵା ଵଦସି କିମସ୍ମାଦ୍ଗତିସ୍ତ୍ଵମେଵାସ୍ୟ କାନ୍ତିମତ୍ୟମ୍ବ ॥ ୪୭ ॥
ଧନ୍ୟୋଽସ୍ତି କୋ ମଦନ୍ୟୋ ଦିଵି ଵା ଭୁଵି ଵା କରୋଷି ଚେତ୍କରୁଣାମ୍ ।
ଇଦମପି ଵିଶ୍ଵଂ ଵିଶ୍ଵଂ ମମ ହସ୍ତେ କିଂ ଚ କାନ୍ତିମତ୍ୟମ୍ବ ॥ ୪୮ ॥
ତରୁଣେନ୍ଦୁଚୂଡଜାୟେ ତ୍ଵାଂ ମନୁଜା ୟେ ଭଜନ୍ତି ତେଷାଂ ତେ ।
ଭୂତିଃ ପଦାବ୍ଜଧୂଲିର୍ଧୂଲିର୍ଭୂତିସ୍ତୁ କାନ୍ତିମତ୍ୟମ୍ବ ॥ ୪୯ ॥
ତ୍ଵାମତ୍ର ସେଵତେ ୟସ୍ତ୍ଵତ୍ସାରୂପ୍ୟଂ ସମେତ୍ୟ ସୋଽମୁତ୍ର ।
ହରକେଲ୍ୟାଂ ତ୍ଵଦସୂୟାପାତ୍ରତି ଚିତ୍ରାଙ୍ଗି କାନ୍ତିମତ୍ୟମ୍ବ ॥ ୫୦ ॥
ଚିତ୍ରୀୟତେ ମନସ୍ତ୍ଵାଂ ଦୃଷ୍ଟ୍ଵା ଭାଗ୍ୟାଵତାରମୂର୍ତିଂ ମେ ।
କିଞ୍ଚ ସୁଧାବ୍ଧେର୍ଲହରୀଵିହାରିତାମେତି କାନ୍ତିମତ୍ୟମ୍ବ ॥ ୫୧ ॥
କିରତୁ ଭଵତୀ କଟାକ୍ଷାଞ୍ଜଲଜସଦୃକ୍ଷାନ୍ ରସେନ ତାଦୃକ୍ଷାନ୍ ।
କୃତସୁରରକ୍ଷାନ୍ମୋହନଦକ୍ଷାନ୍ଭୀମସ୍ୟ କାନ୍ତିମତ୍ୟମ୍ବ ॥ ୫୨ ॥
ମାନସଵାର୍ଧିନିଲୀନୌ ରାଗଦ୍ଵେଷୌ ପ୍ରଵୋଧଵେଦମୁଷୌ ।
ମଧୁକୈଟଭୌ ତଵେକ୍ଷଣମୀନୋ ମେ ହରତୁ କାନ୍ତିମତ୍ୟମ୍ବ ॥ ୫୩ ॥
ମଞ୍ଜୁଲଭାଷିଣି ଵଞ୍ଜୁଲକୁଡ୍ମଲଲଲିତାଲକେ ଲସତ୍ତିଲକେ ।
ପାଲୟ କୁଵଲୟନୟନେ ବାଲଂ ମାଂ ଦେଵି କାନ୍ତିମତ୍ୟମ୍ଵ ॥ ୫୪ ॥
ପୁରମଥନଵିଲୋଲାଭିଃ ପଟୁଲୀଲାଭିଃ କଟାକ୍ଷମାଲାଭିଃ ।
ଶୁଭଶୀଲାଭିଃ କୁଵଲୟନୀଲାଭିଃ ପଶ୍ୟ କାନ୍ତିମତ୍ୟମ୍ବ ॥ ୫୫ ॥
କରୁଣାରସାର୍ଦ୍ରନୟନେ ଶରଣାଗତପାଲନୈକକୃତଦୀକ୍ଷେ ।
ପ୍ରଗୁଣାଭରଣେ ପାଲୟ ଦୀନଂ ମାଂ ଦେଵି କାନ୍ତିମତ୍ୟମ୍ବ ॥ ୫୬ ॥
ନରଜନ୍ମୈଵ ଵରଂ ତ୍ଵଦ୍ଭଜନଂ ୟେନ କ୍ରିୟେତ ଚେଦସ୍ମାତ୍ ।
କିମଵରମେଵଂ ନୋ ଚେଦତସ୍ତଦେଵାସ୍ତୁ କାନ୍ତିମତ୍ୟମ୍ବ ॥ ୫୭ ॥
ୟଦ୍ଦୁର୍ଲଭଂ ସୁରୈରପି ତନ୍ନରଜନ୍ମାଦିଶୋ ନମାମ୍ୟେତତ୍ ।
ସାର୍ଥୟ ଦାନାଦ୍ଭକ୍ତେର୍ଵ୍ୟର୍ଥୟ ମାନ୍ୟେନ କାନ୍ତିମତ୍ୟମ୍ବ ॥ ୫୮ ॥
ଜୀଵତି ପଞ୍ଚଭିରେଭିର୍ନ ଵିନାଽସ୍ତ୍ୟେଭିର୍ଜନସ୍ତନୁଂ ଭଜତେ ।
ତଦପି ତଦାସୀନାଂ ତ୍ଵାଂ ଦରମପି ନୋ ଵେତ୍ତି କାନ୍ତିମତ୍ୟମ୍ବ ॥ ୫୯ ॥
ୟତ୍ପ୍ରେମଦ୍ଵିପଵଦନେ ଷଡ୍ଵଦନେ ଵା କୁରୁଷ୍ଵ ତନ୍ମୟି ତେ ।
ଜାତ୍ଵପି ମା ଭୂଦ୍ଭେଦଃ ସ୍ତୋକେଷ୍ଵସ୍ମାସୁ କାନ୍ତିମତ୍ୟମ୍ବ ॥ ୬୦ ॥
ଶମ୍ବରରୁହରୁଚିଵଦନେ ଶମ୍ବରରିପୁଜୀଵିକେ ହିମାଦ୍ରିସୁତେ ।
ଅମ୍ବରମଧ୍ୟେ ବମ୍ବରଡମ୍ବରଚିକୁରେଽଵ କାନ୍ତିମତ୍ୟମ୍ବ ॥ ୬୧ ॥
ମନ୍ମାନସପାଠୀନଂ କଲିପୁଲିନେ କ୍ରୋଧଭାନୁସନ୍ତପ୍ତେ ।
ସିଞ୍ଚ ପରିତୋ ଭ୍ରମନ୍ତଂ କୃପୋର୍ମିଭିର୍ଦେଵି କାନ୍ତିମତ୍ୟମ୍ବ ॥ ୬୨ ॥
ୟମିନଃ କ୍ଵ ଵେଦ ମୁକୁଟାନ୍ୟପି ଭଵତୀଂ ଭାଵୟନ୍ତି ଵା ନୋ ଵା ।
ୟଦ୍ୟେଵଂ ମମ ହୃଦୟଂ ଵେତ୍ତୁ କଥଂ ବ୍ରୂହି କାନ୍ତିମତ୍ୟମ୍ବ ॥ ୬୩ ॥
କ୍ଲିଶ୍ୟତ୍ୟୟଂ ଜନୋ ବତ ଜନନାଦ୍ୟୈରିତ୍ୟହଂ ଶ୍ରିତୋ ଭଵତୀମ୍ ।
ତତ୍ରାପ୍ୟେଵଂ ୟଦି ଵଦ ତଵ କିଂ ମହିମାଽତ୍ର କାନ୍ତିମତ୍ୟମ୍ବ ॥ ୬୪ ॥
ଵୃଜିନାନି ସନ୍ତୁ କିମତସ୍ତେଷାଂ ଧୂତ୍ୟୈ ନ କିଂ ଭଵେଦ୍ଵଦ ତେ ।
ସ୍ମରଣଂ ଦୃଷଦୁତ୍କ୍ଷେପଣମିଵ କାକଗଣସ୍ୟ କାନ୍ତିମତ୍ୟମ୍ବ ॥ ୬୫ ॥
ପ୍ରସରତି ତଵ ପ୍ରସାଦେ କିମଲଭ୍ୟଂ ଵ୍ୟତ୍ୟୟେ ତୁ କିଂ ଲଭ୍ୟମ୍ ।
ଲଭ୍ୟମଲଭ୍ୟଂ କିଂ ନସ୍ତେନ ଵିନା ଦେଵି କାନ୍ତିମତ୍ୟମ୍ବ ॥ ୬୬ ॥
କିଂ ଚିନ୍ତୟାମି ସଂଵିଚ୍ଛରଦୁଦୟଂ ତ୍ଵତ୍ପଦଚ୍ଛଲଂ କତକମ୍ ।
ଘୃଷ୍ଟଂ ୟଦି ପ୍ରସୀଦେଦ୍ଧୃଦୟଜଲଂ ମେଽଦ୍ୟ କାନ୍ତିମତ୍ୟମ୍ବ ॥ ୬୭ ॥
ଵିଭଜତୁ ତଵ ପଦୟୁଗଲୀ ହଂସୀୟୋଗୀନ୍ଦ୍ରମାନସୈକଚରୀ ।
ସଂଵିଦସଂଵିତ୍ପୟସୀ ମିଲିତେ ହୃଦି ମେଽଦ୍ୟ କାନ୍ତିମତ୍ୟମ୍ବ ॥ ୬୮ ॥
କିୟଦାୟୁସ୍ତତ୍ରାର୍ଧଂ ସ୍ଵପ୍ନେ ନ ହୃତଂ କିୟଚ୍ଚ ବାଲ୍ୟାଦ୍ୟୈଃ ।
କିୟଦସ୍ତି କେନ ଭଜନଂ ତୃପ୍ତିସ୍ତଵ କେନ କାନ୍ତିମତ୍ୟମ୍ବ ॥ ୬୯ ॥
ଵେଦ୍ମି ନ ଧର୍ମମଧର୍ମଂ କାୟକ୍ଲେଶୋଽସ୍ତ୍ୟଦୋ ଵିଚାରଫଲମ୍ ।
ଜାନାମ୍ୟେକଂ ଭଜନଂ ତଵ ଶୁଭଦଂ ହୀତି କାନ୍ତିମତ୍ୟମ୍ବ ॥ ୭୦ ॥
ସ୍ନିହ୍ୟତି ଭୋଗେ ଦ୍ରୁହ୍ୟତି ୟୋଗାୟେଦଂ ଵୃଥାଽଦ୍ୟ ମୁହ୍ୟତି ମେ ।
ହୃଦୟଂ କିମୁ ସ୍ଵତୋ ଵା ପରତୋ ଵା ଵେତ୍ତି କାନ୍ତିମତ୍ୟମ୍ବ ॥ ୭୧ ॥
ନ ବିଭୀମୋ ଭଵଜଲଧେର୍ଦରମପି ଦନୁଜାରିସୋଦରି ଶିଵେ ତେ ।
ଆସ୍ତେ କଟାକ୍ଷଵୀକ୍ଷାତରଣିର୍ନନୁ ଦେଵି କାନ୍ତିମତ୍ୟମ୍ବ ॥ ୭୨ ॥
ଚିନ୍ତାମଣୌ କରସ୍ଥେଽପ୍ୟଟନଂ ଵୀଥୀଷୁ କିଂ ବ୍ରୁଵେ ମାତଃ ।
ଵଦ କିଂ ମେ ତ୍ଵୟି ସତ୍ୟାମନ୍ୟାଶ୍ରୟଣେ ନ କାନ୍ତିମତ୍ୟମ୍ବ ॥ ୭୩ ॥
ନରଵର୍ଣନେନ ରସନା ପରଵନିତାଵୀକ୍ଷଣେନ ନେତ୍ରମପି ।
କ୍ରୌର୍ୟେଣ ମନୋଽପି ହତଂ ଭାଵ୍ୟଂ ତୁ ନ ଵେଦ୍ମି କାନ୍ତିମତ୍ୟମ୍ବ ॥ ୭୪ ॥
ତ୍ରାସିତସୁରପତିତପ୍ତଂ ତପ୍ତଂ କିଂ ଧର୍ମମେଵ ଵା କୢପ୍ତମ୍ ।
କିମପି ନ ସଞ୍ଚିତମମିତଂ ଵୃଜିନମୟେ କିଂ ତୁ କାନ୍ତିମତ୍ୟମ୍ବ ॥ ୭୫ ॥
ପାପୀତ୍ୟୁପେକ୍ଷସେ ଚେତ୍ପାତୁଂ କାଽନ୍ୟା ଭଵେଦ୍ଵିନା ଭଵତୀମ୍ ।
କିମିଦଂ ନ ଵେଦ୍ମି ସୋଽୟଂ ବକମନ୍ତ୍ରଃ କସ୍ୟ କାନ୍ତିମତ୍ୟମ୍ବ ॥ ୭୬ ॥
ଵଞ୍ଚୟିତୁଂ ଵୃଜିନାଦ୍ୟୈର୍ମୁଗ୍ଧାନ୍ଭଵତୀଂ ଵିନେତରାନ୍ନେକ୍ଷେ ।
କିମତଃ ପରଂ କରିଷ୍ୟସି ଵିଦିତମିଦଂ ମେଽଦ୍ୟ କାନ୍ତିମତ୍ୟମ୍ବ ॥ ୭୭ ॥
ଵଞ୍ଚୟସି ମାଂ ରୁଦନ୍ତଂ ବାଲମିଵ ଫଲେନ ମାଂ ଧନାଢ୍ୟେନ ।
ମାସ୍ତୁ କଦାପି ମମେଦଂ କୈଵଲ୍ୟଂ ଦେହି କାନ୍ତିମତ୍ୟମ୍ବ ॥ ୭୮ ॥
ତ୍ରୟ୍ୟା କିଂ ମେଽଦ୍ୟ ଗୁଣେ ତଵ ଵିଦିତେ ୟୋ ୟତସ୍ତୁ ସମ୍ଭଵତି ।
ଆସ୍ତାଂ ମୌକ୍ତିକଲାଭେ ସତି ଶୁକ୍ତ୍ୟା କିଂ ନୁ କାନ୍ତିମତ୍ୟମ୍ବ ॥ ୭୯ ॥
ଅଦ୍ଭୁତମିଦଂ ସକୃଦ୍ୟେନ ଜ୍ଞାତା ଵା ଶ୍ରିୟୋ ଦିଶସ୍ୟେଭ୍ୟଃ ।
ୟେ ଖଲୁ ଭକ୍ତାସ୍ତେଭ୍ୟଃ କୈଵଲ୍ୟଂ ଦିଶସି କାନ୍ତିମତ୍ୟମ୍ବ ॥ ୮୦ ॥
ସୁରନୈଚିକୀଵ ଵିବୁଧାନ୍କାଦମ୍ବିନିକେଵ ନୀଲକଣ୍ଠମପି ।
ପ୍ରୀଣୟସି ମାନସଂ ମେ ଶୋଭୟ ହଂସୀଵ କାନ୍ତିମତ୍ୟମ୍ବ ॥ ୮୧ ॥
କର୍ତୁଂ ମନଃପ୍ରସାଦଂ ତଵ ମୟି ଚେତ୍କିଂ କରିଷ୍ୟତି ଵୃଜିନମ୍ ।
ଜଲଜଵିକାସେ ଭାନୋଃ ପରିପନ୍ଥିତମୋ ନୁ କାନ୍ତିମତ୍ୟମ୍ବ ॥ ୮୨ ॥
ତଵ ତୁ କରୁଣା ସ୍ରଵନ୍ତ୍ୟାଂ ପ୍ରଵହନ୍ତ୍ୟାଂ ସ୍ତୋକତା ଗତେତି ମୟା ।
ଲୁଠତି ସ୍ଫୁଟତି ମନୋ ମେ ନେଦଂ ଜାନାସି କାନ୍ତିମତ୍ୟମ୍ବ ॥ ୮୩ ॥
ଶୋଧୟିତୁମୁଦାସୀନା ୟଦି ମାଂ ପାତ୍ରଂ କିମସ୍ୟ ପଶ୍ୟାହମ୍ ।
ମାଦୃଶି କା ଵା ଵାର୍ତା ଦାସଜନେ କାନ୍ତିମତ୍ୟମ୍ବ ॥ ୮୪ ॥
ଅଭଜମନନ୍ୟଗତିସ୍ତ୍ଵାଂ କିଂ କୁର୍ୟାସ୍ତ୍ଵଂ ନ ଵେଦ୍ମ୍ୟତଃପ୍ରଭୃତି ।
ଅଵନେ ଵାଽନଵନେ ଵା ନ ଵିଚାରୋ ମେଽସ୍ତି କାନ୍ତିମତ୍ୟମ୍ବ ॥ ୮୫ ॥
କିଂ ଵର୍ତତେ ମମାସ୍ମାନ୍ନିଖିଲଜଗନ୍ମସ୍ତଲାଲିତଂ ଭାଗ୍ୟମ୍ ।
ୟମିହୃଦୟପଦ୍ମହଂସୀଂ ୟତ୍ତ୍ଵାଂ ସେଵେଽଦ୍ୟ କାନ୍ତିମତ୍ୟମ୍ବ ॥ ୮୬ ॥
କର୍ତୁଂ ଜଗନ୍ତି ଵିଧିଵଦ୍ଭର୍ତୁଂ ହରିଵଦ୍ଗିରୀଶଵଦ୍ଧର୍ତୁମ୍ ।
ଲୀଲାଵତୀ ତ୍ଵମେଵ ପ୍ରତୀୟସେ ଦେଵି କାନ୍ତିମତ୍ୟମ୍ବ ॥ ୮୭ ॥
କେଚିଦ୍ଵିଦନ୍ତି ଭଵତୀଂ କେଚିନ୍ନ ଵିଦନ୍ତି ଦେଵି ସର୍ଵମିଦମ୍ ।
ତ୍ଵତ୍କୃତ୍ୟଂ ଵଦ ସତ୍ୟଂ କିଂ ଲବ୍ଧଂ ତେନ କାନ୍ତିମତ୍ୟମ୍ବ ॥ ୮୮ ॥
ଶାସ୍ତ୍ରାଣି କୁକ୍ଷିପୂର୍ତ୍ୟୈ ସ୍ଫୂର୍ତ୍ୟୈ ନିଗମାଶ୍ଚ କର୍ମଣା କିଂ ତୈଃ ।
କିଂ ତଵ ତତ୍ତ୍ଵଂ ଜ୍ଞେୟଂ ୟୈସ୍ତ୍ଵତ୍କୃପୟୈଵ କାନ୍ତିମତ୍ୟମ୍ବ ॥ ୮୯ ॥
କିଂ ପ୍ରାର୍ଥୟେ ପୁନଃ ପୁନରଵନେ ଭଵତୀଂ ଵିନା ଵିଚାରଃ ସ୍ୟାତ୍ ।
କସ୍ୟାଃ କ ଇତି ଵିଦନ୍ନପି ଦୂୟେ ମୋହେନ କାନ୍ତିମତ୍ୟମ୍ବ ॥ ୯୦ ॥
ଵିଦୁଷସ୍ତ୍ଵାଂ ଶରଣଂ ମେ ଶାସ୍ତ୍ରଶ୍ରମଲେଶଵାର୍ତୟାପି କୃତମ୍ ।
କରଜୁଷି ନଵନୀତେ କିଂ ଦୁଗ୍ଧଵିଚାରେଣ କାନ୍ତିମତ୍ୟମ୍ବ ॥ ୯୧ ॥
ପ୍ରଣଵୋପନିଷନ୍ନିଗମାଗମୟୋଗିମନଃସ୍ଵିଵାତିତୁଙ୍ଗେଷୁ ।
ଭାହି ପ୍ରଭେଵ ତରଣେର୍ମମ ହୃଦି ନିମ୍ନେଽପି କାନ୍ତିମତ୍ୟମ୍ବ ॥ ୯୨ ॥
ସ୍ଫୁଟିତାରୁଣମଣିଶୋଭଂ ତ୍ରୁଟିତାଭିନଵପ୍ରଵାଲମୃଦୁଲତ୍ଵମ୍ ।
ଶ୍ରୁତିଶିଖରଶେଖରଂ ତେ ଚରଣାବ୍ଜଂ ସ୍ତୌମି କାନ୍ତିମତ୍ୟମ୍ବ ॥ ୯୩ ॥
ତଵ ଚରଣାମ୍ବୁଜଭଜନାଦମୃତରସସ୍ୟନ୍ଦିନଃ କଦାପ୍ୟନ୍ୟତ୍ ।
ସ୍ଵପ୍ନେଽପି କିଞ୍ଚିଦପି ମେ ମା ସ୍ମ ଭଵେଦ୍ଦେଵି କାନ୍ତିମତ୍ୟମ୍ବ ॥ ୯୪ ॥
ଵିସ୍ମାପନଂ ପୁରାରେରସ୍ମାଦୃଗ୍ଜୀଵିକାଂ ପରାତ୍ପରମମ୍ ।
ସୁଷମାମୟଂ ସ୍ଵରୂପଂ ସଦା ନିଷେଵେୟ କାନ୍ତିମତ୍ୟମ୍ବ ॥ ୯୫ ॥
ମଙ୍ଗଲମସ୍ତ୍ଵିତି ପିଷ୍ଟଂ ପିନଷ୍ଟି ଗୀଃ ସର୍ଵମଙ୍ଗଲାୟାସ୍ତେ ।
ଵଶିତଜୟାୟାଶ୍ଚ ତଥା ଜୟେତି ଵାଦୋଽପି କାନ୍ତିମତ୍ୟମ୍ବ ॥ ୯୬ ॥
ଆଶାସିତୁର୍ଵିଭୂତ୍ୟୈ ଭଵତି ଭଵତ୍ୟୈ ହି ମଙ୍ଗଲାଶାସ୍ତିଃ ।
ସ୍ଵାମିସମୃଦ୍ଧ୍ୟାଶଂସା ଭୃତ୍ୟୋନ୍ନତ୍ୟୈ ହି କାନ୍ତିମତ୍ୟମ୍ବ ॥ ୯୭ ॥
ନିଗମୈରପରିଚ୍ଛେଦ୍ୟଂ କ୍ଵ ଵୈଭଵଂ ତେଽଲ୍ପଧୀଃ କ୍ଵ ଚାହମିତି ।
ତୂଷ୍ଣୀକଂ ମାଂ ଭକ୍ତିସ୍ତଵ ମୁଖରୟତି ସ୍ମ କାନ୍ତିମତ୍ୟମ୍ବ ॥ ୯୮ ॥
ଅନୁକମ୍ପାପରଵଶିତଂ କମ୍ପାତଟସୀମ୍ନି କଲ୍ପିତାଵସଥମ୍ ।
ଉପନିଷଦାଂ ତାତ୍ପର୍ୟଂ ତଵ ରୂପଂ ସ୍ତୌମି କାନ୍ତିମତ୍ୟମ୍ବ ॥ ୯୯ ॥
ଜୟ ଧରଣୀଧରତନୟେ ଜୟ ଵେଣୁଵନାଧିରାଟ୍ପ୍ରିୟେ ଦେଵି ।
ଜୟ ଜମ୍ଭଭେଦିଵିନୁତେ ଜୟ ଜଗତାମମ୍ବ କନ୍ତିମତ୍ୟମ୍ବ ॥ ୧୦୦ ॥
ଗୁଣମଞ୍ଜରିପିଞ୍ଜରିତଂ ସୁନ୍ଦରରଚିତଂ ଵିଭୂଷଣଂ ସୁଦୃଶାମ୍ ।
ଗୀତିଶତକଂ ଭଵତ୍ୟାଃ କ୍ଷୟତୁ କଟାକ୍ଷେଣ କାନ୍ତିମତ୍ୟମ୍ବ ॥ ୧୦୧ ॥
ଵପ୍ତା ୟସ୍ୟ ମନୀଷିହାରତରଲଃ ଶ୍ରୀଵେଙ୍କଟେଶୋ ମହାନ୍-
ମାତା ୟସ୍ୟ ପୁନଃ ସରୋଜନିଲୟା ସାଧ୍ଵୀଶିରୋଭୂଷଣମ୍ ।
ଶ୍ରୀଵତ୍ସାଭିଜନାମୃତାମ୍ବୁଧିଵିଧୁଃ ସୋଽୟଂ କଵିଃ ସୁନ୍ଦରୋ
ଦେଵ୍ୟା ଗୀତିଶତଂ ଵ୍ୟଧତ୍ତ ମହିତଂ ଶ୍ରୀକାନ୍ତିମତ୍ୟା ମୁଦେ ॥ ୧୦୨ ॥
ଇତି ଶ୍ରୀସୁନ୍ଦରାଚାର୍ୟପ୍ରଣୀତଂ ଦେଵୀଗୀତିଶତକଂ ସମ୍ପୂର୍ଣମ୍ ॥
