Shri Mookapanchasati Lyrics in Malayalam:
॥ ശ്രീമൂകപഞ്ചശതീ ॥
മാതാ മരകതശ്യാമാ മാതങ്ഗീ മദശാലിനീ ।
കുര്യാത് കടാക്ഷം കല്യാണീ കദംബവനവാസിനീ ॥
॥ ശ്രീഃ ॥
॥ ശ്രീചന്ദ്രമൌലീശ്വരായ നമഃ ॥
॥ ശ്രീകാരണപരചിദ്രൂപായൈ നമഃ ॥
ശ്രീമൂകമഹാകവിപ്രണീതാ
॥ ശ്രീഃ ॥
॥ ശ്രീമൂകപഞ്ചശതീ ॥
ശ്രീകാമാക്ഷീപരദേവതായാഃ പാദാരവിന്ദയോഃ
ഭക്തിഭരേണ സമര്‍പിതം ॥
ആര്യാമേവ വിഭാവയന്‍മനസി യഃ പാദാരവിന്ദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിം ।
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാ-
മാരോഹത്യപവര്‍ഗസൌധവലഭീമാനന്ദവീചീമയീം ॥
[മന്ദസ്മിത 101 ]
ശ്രീമത്പരമഹംസപരിവ്രാജകാചാര്യവര്യ ശ്രീകാമകോടിപീഠാധീശ്വര-
ജഗദ്ഗുരു ശ്രീമത് ചന്ദ്രശേഖരേന്ദ്രസരസ്വതീ ശ്രീപാദാനാം
ശ്രീമുഖേന സമദ്ഭാസിതാ
॥ ശ്രീഃ ॥
॥ ശ്രീചന്ദ്രമൌലീശ്വര ॥
മുദ്രാ
സ്വസ്തി ശ്രീമദഖിലഭൂമണ്ഡലാലംകാര-ത്രയസ്ത്രിംശത്കോടി-
ദേവതാസേവിത ശ്രീകാമാക്ഷീദേവീസനാഥ-ശ്രീമദേകാംരനാഥ-
ശ്രീമഹാദേവീസനാഥ-ശ്രീഹസ്തിനിരിനാഥ-സാക്ഷാത്കാരപരമ-
അധിഷ്ഠാനസത്യവ്രതനാമാങ്കിത-കാഞ്ചീദിവ്യക്ഷേത്രേ ശാരദാ-
മഠസുസ്ഥിതാനാം, അതുലിതസുധാരസമാധുര്യകമലാസനകാമിനീ-
ധമ്മില്ല സംഫുല്ലമല്ലികാമാലികാനിഷ്യന്ദമകരന്ദഝരീ-
സൌവസ്തികവാങ്നിഗുംഭവിജൃംഭണാനന്ദതുന്ദിലിതമണീഷി-
മണ്ഡലാനാം, അനവരതാദ്വൈതവിദ്യാവിനോദരസികാനാം,
നിരന്തരാലംകൃതീകൃതശാന്തിദാന്തിഭൂംനാം, സകലഭുവന-
ചക്രപ്രതിഷ്ഠാപക ശ്രീചക്രപ്രതിഷ്ഠാവിഖ്യാതയശോഽലംകൃതാനാം,
നിഖിലപാഷണ്ഡഷണ്ഡകണ്ടകോദ്ധാടനേന വിശദീകൃതവേദവേദാന്ത-
മാര്‍ഗഷണ്‍മതപ്രതിഷ്ഠാപകാചാര്യാണാം, ശ്രീമത്പരമഹംസപരിവ്രാജക-
ആചാര്യവര്യ-ശ്രീജഗദ്ഗുരു ശ്രീമച്ഛംകരഭഗവത്പാദാചാര്യാണാം
അധിഷ്ഠാനേ സിംഹാസനാഭിഷിക്ത ശ്രീമന്‍മഹാദേവേന്ദ്രസരസ്വതീ-
സംയമീന്ദ്രാണാം, അന്തേവാസിവര്യ ശ്രീമച്ചന്ദ്രശേഖരേന്ദ്രസരസ്വതീ
ശ്രീപാദൈഃ ।
ക്രിയതേ നാരായണസ്മൃതിഃ
തത്രഭവാന്‍ മൂക ഇതി സുപ്രസിദ്ധഃ മഹാകവിശിരോമണിഃ
ശ്രീകാമാക്ഷീദേവീകരുണാകടാക്ഷതരങ്ഗിതപുണ്യകവിതാരസപൂരഃ
`മൂകപഞ്ചശതീ’ ഇതി കര്‍തുര്‍നാംനാ പ്രസിദ്ധമിമം ലോകോത്തരം
ഗ്രന്ഥം പ്രണീയ ഭൂമണ്ഡലേഽനുത്തമം പുണ്യയശോവിശേഷം ശാശ്വതീം
പരാനന്ദാനുഭൂതിം ച ലബ്ധവാനിതി സുവിദിതമേവ । സ്തോത്രരത്നേ
ചാസ്മിന്‍ കാഞ്ചീമധ്യഗത കാമകോടിപീഠാധിഷ്ഠാത്രീം
ഇന്ദുമൌലേരൈശ്വര്യരൂപാം ശ്രീകാമാക്ഷീം പരദേവതാം,
ആരൂഢയൌവനാടോപാ, തരുണിമസര്‍വസ്വം, നിത്യതരുണീ,
ലാവണ്യാമൃതതരങ്ഗമാലാ, വിഭ്രമസമവായസാരസന്നാഹാ,
ശൃങ്ഗാരാദ്വൈതതന്ത്രസിദ്ധാന്തം, മീനധ്വജതന്ത്രപരമതാത്പര്യം\,
കന്ദര്‍പസൂതികാപാങ്ഗീ, മനസിജസാംരാജ്യഗര്‍വബീജം,
പുഷ്പായുധവീര്യസരസപരിപാടീ, മദനാഗമസമയദീക്ഷിത-
കടാക്ഷാ, കുസുമശരഗര്‍വസമ്പത്കോശഗൃഹം, അനങ്ഗബ്രഹ്മതത്ത്വ-
ബോധസിരാ, പഞ്ചശരശാസ്ത്രബോധനപരമാചാര്യദൃഷ്ടിപാതാ
ഇത്യാദിരൂപേണ വര്‍ണയന്‍ പുനഃ ലാവണ്യമൃതപരകാഷ്ഠാഭൂതാം
താമേവ പരദേവതാം, കാരണപരചിദ്രൂപാ, കൈവല്യാനന്ദകന്ദഃ,
ആംനായരഹസ്യം, ഉപനിഷദരവിന്ദകുഹരമധുധാരാ,
വാങ്മനോഽതീതാ, ആനന്ദാദ്വൈതകന്ദലീ, മുക്തിബീജം,
ആഗമസല്ലാപസാരയാഥാര്‍ഥ്യം, ബോധാമൃതവീചീ, അഭിദാകൃതിഃ,
ഐകാത്മ്യപ്രകൃതിഃ, നിഗമവചസ്സിദ്ധാന്തഃ, ഗുരുമൂര്‍തിഃ, ഇത്യേവം-
രൂപേണ സാക്ഷത്കുര്‍വന്‍ യൌവനശൃങ്ഗാരാദിവിഷയരസാനുഭവ-
സാമഗ്രീം ജ്ഞാനവൈരാഗ്യാദിബ്രഹ്മാനന്ദാനുഭവസാമഗ്രീത്വേന
സമ്പാദയന്‍ –
ശിവ ശിവ പശ്യന്തി സമം ശ്രീകാമാക്ഷീകടാക്ഷിതാഃ പുരുഷാഃ ।
വിപിനം ഭവനമമിത്രം മിത്രം ലോഷ്ടം ച യുവതിബിംബോഷ്ഠം ॥
ഇതി പരദേവതാനുഗ്രഹഫലീഭൂതാം പരവൈരാഗ്യകാഷ്ഠാം പ്രകടയതി ।
[ആര്യാ 48 ]
പദ്മപഞ്ചശതകാത്മകേഽത്ര ഗ്രന്ഥേ ശതകാനാം യാ ആനുപൂര്‍വീ
തസ്യാമയം വിശേഷോ ദൃശ്യതേ । യഥാ കശ്ചന ശിശുഃ ചക്ഷുരാദി
ഇന്ദ്രിയപ്രാഗല്‍ഭ്യാവിര്‍ഭാവാത്പൂര്‍വം മനോവൃത്തിമാത്രേണ കലയതി
സ്വേപ്സിതം ; ഏവമാര്യാശതകേ ഭക്തശിശോഃ മനഃ പ്രവൃത്തിം
അംബികായാഃ സ്വരൂപാനുസന്ധാനപടീയസീം സമ്പാദയതി
കവിപുങ്ഗവഃ ; അയമാശയഃ –
അന്തരപി ബഹിരപി ത്വം ജന്തുതതേരന്തകാന്തകൃദഹന്തേ ।
ചിന്തിതസന്താനവതാം സന്തതമപി തന്തനീഷി മഹിമാനം ॥
ഇതി ശ്ലോകേന സൂചിതഃ ॥ [ആര്യാ 98 ]
ദ്വിതീയശതകേ താവത് യഥാ കിഞ്ചിത്പ്രവൃദ്ധഗ്രഹണശക്തിഃ
ബാലകഃ ഖാന്തികേ വിദ്യമാനസ്യ വസ്തുനഃ ദര്‍ശന-
സ്പര്‍ശനാദിഭിഃ ആഹ്ലാദമധിഗച്ഛതി തദ്വത് ഭക്തബാലകഃ
അത്യന്തമധോഭാഗേ വിദ്യമാനസ്യ സ്വസ്യാന്തികത്വേനൈവ
ജഗന്‍മാതുഃ നിരന്തരധ്യാനഫലീഭൂത പാദാരവിന്ദ ദര്‍ശന-
ആനന്ദമനുഭവതീത്യയമാശയഃ –
മരാലീനാം യാനാഭ്യസനകലനാമൂലഗുരവേ
ദരിദ്രാണാം ത്രാണവ്യതികരസുരോദ്യാനതരവേ ।
തമസ്കാണ്ഡപ്രൌഢിപ്രകടനതിരസ്കാരപടവേ
ജനോഽയം കാമാക്ഷ്യാശ്ചരണനലിനായ സ്പൃഹയതേ ॥
ഇതി ശ്ലോകേന സൂചിതഃ ॥ [പാദാരവിന്ദ 3 ]
യഥാ മനസഃ ജ്ഞാനേന്ദ്രിയാണാം ച സ്ഫൂര്‍ത്യനന്തരമേവ
വാക്പ്രസരതി, തഥൈവ ആര്യാപാദാരവിന്ദശതകയോരനന്തരം
സ്വപ്രേമാസ്പദം വസ്തു നിരര്‍ഗലം സ്തോതുമാരഭതേ –
പാണ്ഡിത്യം പരമേശ്വരി സ്തുതിവിധൌ നൈവാശ്രയന്തേ ഗിരാം
വൈരിഞ്ചാന്യപി ഗുംഫനാനി വിഗലദ്ഗര്‍വാണി ശര്‍വാണി തേ ।
സ്തോതും ത്വാം പരിഫുല്ലനീലനലിനശ്യാമാക്ഷി കാമാക്ഷി മാം
വാചാലീകുരുതേ തഥാപി നിതരാം ത്വത്പാദസേവാദരഃ ॥
ഇതാദിനാ സ്തുതിശതകേന । [സ്തുതി 1 ]
ലൌകികാവിദ്യാദിഷു കുശലഃ കശ്ചന യഥാ ലൌകികസമ്പദഃ
പ്രാപ്തുര്‍മഹോ ഭവതി തദ്വത് പൂര്‍വകൃതസ്തുതിഫലത്വേന ഭക്തഃ
അംബികായാഃ കടാക്ഷവിശേഷമധിഗംയ പരസംവിദനുഭൂത്യ-
ഉചിതതേജഃപുഷ്ട്യാദിപാത്രം ഭവതീത്യയമാശയഃ-
അസ്തം ക്ഷണാന്നയതു മേ പരിതാപസൂര്യ-
മാനന്ദചന്ദ്രമസമാനയതാം പ്രകാശം ।
കാലാന്ധകാരസുഷമാം കലയന്‍ ദിഗന്തേ
കാമാക്ഷി കോമലകടാക്ഷനിശാഗമസ്തേ ॥
ഇത്യാദിഭിര്‍വര്‍ണനൈഃ കടാക്ഷശതകേ സൂചിതഃ ॥ [കടാക്ഷ 6 ]
യഥാ ലൌകികസമ്പത്സമ്പൂര്‍ണഃ കശ്ചന സമഗ്രയൌവനഃ
ലൌകികശൃങ്ഗാരസുഖാനുഭവായ പാത്രം ഭവതി, തദ്വത്
ദേവ്യാഃ പരമാനുഗ്രഹപാത്രീഭൂതഃ തദീയമന്ദസ്മിത-
ചന്ദ്രികാസനാഥഃ ആനന്ദചന്ദ്ര ഇവ അലൌകിക-
നിരതിശയാനന്ദാനുഭവാത്മകഃ പ്രകാശത ഇതി
അമൂമേവ ഭാവപ്രണാലികാം മഹാകവിഃ സ്വയമേവ
പഞ്ചശതീപുര്‍തിമ്പദ്യേന ആവിഷ്യകരോതി । യഥാ –
ആര്യാമേവ വിഭാവയന്‍മനസി യഃ പാദാരവിന്ദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിം ।
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാ-
മാരോഹത്യപവര്‍ഗസൌധവലഭീമാനന്ദവീചീമയീം ॥
ഇതി । [മന്ദസ്മിത 101 ]
അസ്യാ ലോകോത്തരായാഃ സ്തുതേഃ പഠനമാത്രേണ തത്ക്ഷണേ
മഹാകവിനാഽമുനാ അന്തതഃ പരദേവതയൈവ വാ
ഐകാത്മ്യമനുഭവതീവ സാധകഃ ।
തദിദം ഗ്രന്ഥരത്നം ദ്രാവിഡഭാഷാമയാര്‍ഥാനുവാദ-
സഹിതമചിരാദേവ മഹതാ പരിശ്രമേണ ഭക്തിഭരേണ
മുദ്രാപ്യ ശ്രീ കാമാക്ഷീ ദേവീ കുംഭാഭിഷേക ശുഭ-
മുഹൂര്‍ത ഏവ ഉപഹാരീകൃതവതേ, മുദ്രാപണദിവിഷയേ പരമം
സാഹായ്യമാചരിതവദ്ഭയഃ, തദ്ഗ്രന്ഥപഠിതൃഭ്യശ്ച
ഭക്തപുങ്ഗവേഭ്യഃ ശ്രീകാമാക്ഷീകടാക്ഷാഃ സമുല്ല-
സന്ത്വിത്യാശാസ്മഹേ ॥
॥ ഇതി നാരായണസ്മൃതിഃ ॥
॥ ആര്യാശതകം ॥
കാരണപരചിദ്രൂപാ കാഞ്ചീപുരസീംനി കാമപീഠഗതാ ।
കാചന വിഹരതി കരുണാ കാശ്മീരസ്തബകകോമലാങ്ഗലതാ ॥ 1 ॥
കംചന കാഞ്ചീനിലയം കരധൃതകോദണ്ഡബാണസൃണിപാശം ।
കഠിനസ്തനഭരനംരം കൈവല്യാനന്ദകന്ദമവലംബേ ॥ 2 ॥
ചിന്തിതഫലപരിപോഷണചിന്താമണിരേവ കാഞ്ചിനിലയാ മേ ।
ചിരതരസുചരിതസുലഭാ ചിത്തം ശിശിരയതു ചിത്സുഖാധാരാ ॥ 3 ॥
കുടിലകചം കഠിനകുചം കുന്ദസ്മിതകാന്തി കുങ്കുമച്ഛായം ।
കുരുതേ വിഹൃതിം കാഞ്ച്യാം കുലപര്‍വതസാര്‍വഭൌമസര്‍വസ്വം ॥ 4 ॥
പഞ്ചശരശാസ്ത്രബോധനപരമാചാര്യേണ ദൃഷ്ടിപാതേന ।
കാഞ്ചീസീംനി കുമാരീ കാചന മോഹയതി കാമജേതാരം ॥ 5 ॥
പരയാ കാഞ്ചീപുരയാ പര്‍വതപര്യായപീനകുചഭരയാ ।
പരതന്ത്രാ വയമനയാ പങ്കജസബ്രഹ്മചാരിലോചനയാ ॥ 6 ॥
ഐശ്വര്യമിന്ദുമൌലേരൈകാത്മ്യപ്രകൃതി കാഞ്ചിമധ്യഗതം ।
ഐന്ദവകിശോരശേഖരമൈദമ്പര്യം ചകാസ്തി നിഗമാനാം ॥ 7 ॥
ശ്രിതകമ്പസീമാനം ശിഥിലിതപരമശിവധൈര്യമഹിമാനം ।
കലയേ പടലിമാനം കംചന കഞ്ചുകിതഭുവനഭൂമാനം ॥ 8 ॥
ആദൃതകാഞ്ചീനിലയമാദ്യാമാരൂഢയൌവനാടോപാം ।
ആഗമവതംസകലികാമാനന്ദാദ്വൈതകന്ദലീം വന്ദേ ॥ 9 ॥
തുങ്ഗാഭിരാമകുചഭരശൃങ്ഗാരിതമാശ്രയാമി കാഞ്ചിഗതം ।
ഗങ്ഗാധരപരതന്ത്രം ശൃങ്ഗാരാദ്വൈതതന്ത്രസിദ്ധാന്തം ॥ 10 ॥
കാഞ്ചീരത്നവിഭൂഷാം കാമപി കന്ദര്‍പസൂതികാപാങ്ഗീം ।
പരമാം കലാമുപാസേ പരശിവവാമാങ്കപീഠികാസീനാം ॥ 11 ॥
കമ്പാതീചരാണാം കരുണാകോരകിതദൃഷ്ടിപാതാനാം ।
കേലീവനം മനോ മേ കേഷാംചിദ്ഭവതു ചിദ്വിലാസാനാം ॥ 12 ॥
ആംരതരുമൂലവസതേരാദിമപുരുഷസ്യ നയനപീയൂഷം ।
ആരബ്ധയൌവനോത്സവമാംനായരഹസ്യമന്തരവലംബേ ॥ 13 ॥
അധികാഞ്ചി പരമയോഗിഭിരാദിമപരപീഠസീംനി ദൃശ്യേന ।
അനുബദ്ധം മമ മാനസമരുണിമസര്‍വസ്വസമ്പ്രദായേന ॥ 14 ॥
അങ്കിതശംകരദേഹാമങ്കുരിതോരോജകങ്കണാശ്ലേഷൈഃ ।
അധികാഞ്ചി നിത്യതരുണീമദ്രാക്ഷം കാംചിദദ്ഭുതാം ബാലാം ॥ 15 ॥
മധുരധനുഷാ മഹീധരജനുഷാ നന്ദാമി സുരഭിബാണജുഷാ ।
ചിദ്വപുഷാ കാഞ്ചിപുരേ കേലിജുഷാ ബന്ധുജീവകാന്തിമുഷാ ॥ 16 ॥
മധുരസ്മിതേന രമതേ മാംസലകുചഭാരമന്ദഗമനേന ।
മധ്യേകാഞ്ചി മനോ മേ മനസിജസാംരാജ്യഗര്‍വബീജേന ॥ 17 ॥
ധരണിമയീം തരണിമയീം പവനമയീം ഗഗനദഹനഹോതൃമയീം ।
അംബുമയീമിന്ദുമയീമംബാമനുകമ്പമാദിമാമീക്ഷേ ॥ 18 ॥
ലീനസ്ഥിതി മുനിഹൃദയേ ധ്യാനസ്തിമിതം തപസ്യദുപകമ്പം ।
പീനസ്തനഭരമീഡേ മീനധ്വജതന്ത്രപരമതാത്പര്യം ॥ 19 ॥
ശ്വേതാ മന്ഥരഹസിതേ ശാതാ മധ്യേ ച വാഡ്ഭനോഽതീതാ ।
ശീതാ ലോചനപാതേ സ്ഫീതാ കുചസീംനി ശാശ്വതീ മാതാ ॥ 20 ॥
പുരതഃ കദാ ന കരവൈ പുരവൈരിവിമര്‍ദപുലകിതാങ്ഗലതാം ।
പുനതീം കാഞ്ചീദേശം പുഷ്പായുധവീര്യസരസപരിപാടീം ॥ 21 ॥
പുണ്യാ കാഽപി പുരന്ധ്രീ പുങ്ഖിതകന്ദര്‍പസമ്പദാ വപുഷാ ।
പുലിനചരീ കമ്പായാഃ പുരമഥനം പുലകനിചുലിതം കുരുതേ ॥ 22 ॥
തനിമാദ്വൈതവലഗ്നം തരുണാരുണസമ്പ്രദായതനുലേഖം ।
തടസീമനി കമ്പായാസ്തരുണിമസര്‍വസ്വമാദ്യമദ്രാക്ഷം ॥ 23 ॥
പൌഷ്ടികകര്‍മവിപാകം പൌഷ്പശരം സവിധസീംനി കമ്പായാഃ ।
അദ്രാക്ഷമാത്തയൌവനമഭ്യുദയം കംചിദര്‍ധശശിമൌലൈഃ ॥ 24 ॥
സംശ്രിതകാഞ്ചീദേശേ സരസിജദൌര്‍ഭാഗ്യജാഗ്രദുത്തംസേ ।
സംവിന്‍മയേ വിലീയേ സാരസ്വതപുരുഷകാരസാംരാജ്യേ ॥ 25 ॥
മോദിതമധുകരവിശിഖം സ്വാദിമസമുദായസാരകോദണ്ഡം ।
ആദൃതകാഞ്ചീഖേലനമാദിമമാരുണ്യഭേദമാകലയേ ॥ 26 ॥
ഉരരീകൃതകാഞ്ചിപുരീമുപനിഷദരവിന്ദകുഹരമധുധാരാം ।
ഉന്നംരസ്തനകലശീമുത്സവലഹരീമുപാസ്മഹേ ശംഭോഃ ॥ 27 ॥
ഏണശിശുദീര്‍ഘലോചനമേനഃപരിപന്ഥി സന്തതം ഭജതാം ।
ഏകാംരനാഥജീവിതമേവമ്പദദൂരമേകമവലംബേ ॥ 28 ॥
സ്മയമാനമുഖം കാഞ്ചീഭയമാനം കമപി ദേവതാഭേദം ।
ദയമാനം വീക്ഷ്യ മുഹുര്‍വയമാനന്ദാമൃതാംബുധൌ മഗ്നാഃ ॥ 29 ॥
കുതുകജുഷി കാഞ്ചിദേശേ കുമുദതപോരാശിപാകശേഖരിതേ ।
കുരുതേ മനോവിഹാരം കുലഗിരിപരിബൃഢകുലൈകമണിദീപേ ॥ 30 ॥
വീക്ഷേമഹി കാഞ്ചിപുരേ വിപുലസ്തനകലശഗരിമപരവശിതം ।
വിദ്രുമസഹചരദേഹം വിഭ്രമസമവായസാരസന്നാഹം ॥ 31 ॥
കുരുവിന്ദഗോത്രഗാത്രം കൂലചരം കമപി നൌമി കമ്പായാഃ ।
കൂലംകഷകുചകുംഭം കുസുമായുധവീര്യസാരസംരംഭം ॥ 32 ॥
കുഡൂമലിതകുചകിശോരൈഃ കുര്‍വാണൈഃ കാഞ്ചിദേശസൌഹാര്‍ദം ।
കുങ്കുമശോണൈര്‍നിചിതം കുശലപഥം ശംഭുസുകൃതസംഭാരൈഃ ॥ 33 ॥
അങ്കിതകചേന കേനചിദന്ധംകരണൌഷധേന കമലാനാം ।
അന്തഃപുരേണ ശംഭോരലംക്രിയാ കാഽപി കല്‍പ്യതേ കാഞ്ച്യാം ॥ 34 ॥
ഊരീകരോമി സന്തതമൂഷ്മലഫാലേന ലലിതം പുംസാ ।
ഉപകമ്പമുചിതഖേലനമുര്‍വീധരവംശസമ്പദുന്‍മേഷം ॥ 35 ॥
അങ്കുരിതസ്തനകോരകമങ്കാലംകാരമേകചൂതപതേഃ ।
ആലോകേമഹി കോമലമാഗമസംലാപസാരയാഥാര്‍ഥ്യം ॥ 36 ॥
പുഞ്ജിതകരുണമുദഞ്ചിതശിഞ്ജിതമണികാഞ്ചി കിമപി കാഞ്ചിപുരേ ।
മഞ്ജരിതമൃദുലഹാസം പിഞ്ജരതനുരുചി പിനാകിമൂലധനം ॥ 37 ॥
ലോലഹൃദയോഽസ്തി ശംഭോര്ലോചനയുഗലേന ലേഹ്യമാനായാം ।
ലലിതപരമശിവായാം ലാവണ്യാമൃതതരങ്ഗമാലായാം ॥ 38 ॥
മധുകരസഹചരചികുരൈര്‍മദനാഗമസമയദീക്ഷിതകടാക്ഷൈഃ ।
മണ്ഡിതകമ്പാതീരൈര്‍മങ്ഗലകന്ദൈര്‍മമാസ്തു സാരൂപ്യം ॥ 39 ॥
വദനാരവിന്ദവക്ഷോവാമാങ്കതടീവശംവദീഭൂതാ ।
പൂരുഷത്രിതയേ ത്രേധാ പുരന്ധ്രിരൂപാ ത്വമേവ കാമാക്ഷി ॥ 40 ॥
ബാധാകരീം ഭവാബ്ധേരാധാരാദ്യംബുജേഷു വിചരന്തീം ।
ആധാരീകൃതകാഞ്ചീ ബോധാമൃതവീചിമേവ വിമൃശാമഃ ॥ 41 ॥
കലയാംയന്തഃ ശശധരകലയാഽങ്കിതമൌലിമമലചിദ്വലയാം ।
അലയാമാഗമപീഠീനിലയാം വലയാങ്കസുന്ദരീമംബാം ॥ 42 ॥
ശര്‍വാദിപരമസാധകഗുര്‍വാനീതായ കാമപീഠജുഷേ ।
സര്‍വാകൃതയേ ശോണിമഗര്‍വായാസ്മൈ സമര്‍പ്യതേ ഹൃദയം ॥ 43 ॥
സമയാ സാന്ധ്യമയൂഖൈഃ സമയാ ബുദ്ധയാ സദൈവ ശീലിതയാ ।
ഉമയാ കാഞ്ചീരതയാ ന മയാ ലഭ്യതേ കിം നു താദാത്മ്യം ॥ 44 ॥
ജന്തോസ്തവ പദപൂജനസന്തോഷതരങ്ഗിതസ്യ കാമാക്ഷി ।
വന്ധോ യദി ഭവതി പുനഃ സിന്ധോരംഭസ്സു ബംഭ്രമീതി ശിലാ ॥ 45 ॥
കുണ്ഡലി കുമാരി കുടിലേ ചണ്ഡി ചരാചരസവിത്രി ചാമുണ്ഡേ ।
ഗുണിനി ഗുഹാരിണി ഗുഹ്യേ ഗുരുമൂര്‍തേ ത്വാം നമാമി കാമാക്ഷി ॥ 46 ॥
അഭിദാകൃതിര്‍ഭിദാകൃതിരചിദാകൃതിരപി ചിദാകൃതിര്‍മാതഃ ।
അനഹന്താ ത്വമഹന്താ ഭ്രമയസി കാമാക്ഷി ശാശ്വതീ വിശ്വം ॥ 47 ॥
ശിവ ശിവ പശ്യന്തി സമം ശ്രീകാമാക്ഷീകടാക്ഷിതാഃ പുരുഷാഃ ।
വിപിനം ഭവനമമിത്രം മിത്രം ലോഷ്ടം ച യുവതിബിംബോഷ്ഠം ॥ 48 ॥
കാമപരിപന്ഥികാമിനി കാമേശ്വരി കാമപീഠമധ്യഗതേ ।
കാമദുഘാ ഭവ കമലേ കാമകലേ കാമകോടി കാമാക്ഷി ॥ 49 ॥
മധ്യേഹൃദയം മധ്യേനിടിലം മധ്യേശിരോഽപി വാസ്തവ്യാം ।
ചണ്ഡകരശക്രകാര്‍മുകചന്ദ്രസമാഭാം നമാമി കാമാക്ഷീം ॥ 50 ॥
അധികാഞ്ചി കേലിലോലൈരഖിലാഗമയന്ത്രതന്ത്രമയൈഃ ।
അതിശീതം മമ മാനസമസമശരദ്രോഹിജീവനോപായൈഃ ॥ 51 ॥
നന്ദതി മമ ഹൃദി കാചന മന്ദിരയന്താ നിരന്തരം കാഞ്ചീം ।
ഇന്ദുരവിമണ്ഡലകുചാ ബിന്ദുവിയന്നാദപരിണതാ തരുണീ ॥ 52 ॥
ശമ്പാലതാസവര്‍ണം സമ്പാദയിതും ഭവജ്വരചികിത്സാം ।
ലിമ്പാമി മനസി കിംചന കമ്പാതടരോഹി സിദ്ധഭൈഷജ്യം ॥ 53 ॥
അനുമിതകുചകാഠിന്യാമധിവക്ഷഃപീഠമങ്ഗജന്‍മരിപോഃ ।
ആനന്ദദാം ഭജേ താമാനങ്ഗബ്രഹ്മതത്വബോധസിരാം ॥ 54 ॥
ഐക്ഷിഷി പാശാങ്കുശധരഹസ്താന്തം വിസ്മയാര്‍ഹവൃത്താന്തം ।
അധികാഞ്ചി നിഗമവാചാം സിദ്ധാന്തം ശൂലപാണിശുദ്ധാന്തം ॥ 55 ॥
ആഹിതവിലാസഭങ്ഗീമാബ്രഹ്മസ്തംബശില്‍പകല്‍പനയാ ।
ആശ്രിതകാഞ്ചീമതുലാമാദ്യാം വിസ്ഫൂര്‍തിമാദ്രിയേ വിദ്യാം ॥ 56 ॥
മൂകോഽപി ജടിലദുര്‍ഗതിശോകോഽപി സ്മരതി യഃ ക്ഷണം ഭവതീം ।
ഏകോ ഭവതി സ ജന്തുര്ലോകോത്തരകീര്‍തിരേവ കാമാക്ഷി ॥ 57 ॥
പഞ്ചദശവര്‍ണരൂപം കംചന കാഞ്ചീവിഹാരധൌരേയം ।
പഞ്ചശരീയം ശംഭോര്‍വഞ്ചനവൈദഗ്ധ്യമൂലമവലംബേ ॥ 58 ॥
പരിണതിമതീം ചതുര്‍ധാ പദവീം സുധിയാം സമേത്യ സൌഷുംനീം ।
പഞ്ചാശദര്‍ണകല്‍പിതമദശില്‍പാം ത്വാം നമാമി കാമാക്ഷി ॥ 59 ॥
ആദിക്ഷന്‍മമ ഗുരുരാഡാദിക്ഷാന്താക്ഷരാത്മികാം വിദ്യാം ।
സ്വാദിഷ്ഠചാപദണ്ഡാം നേദിഷ്ഠാമേവ കാമപീഠഗതാം ॥ 60 ॥
തുഷ്യാമി ഹര്‍ഷിതസ്മരശാസനയാ കാഞ്ചിപുരകൃതാസനയാ ।
സ്വാസനയാ സകലജഗദ്ഭാസനയാ കലിതശംബരാസനയാ ॥ 61 ॥
പ്രേമവതീ കമ്പായാം സ്ഥേമവതീ യതിമനസ്സു ഭൂമവതീ ।
സാമവതീ നിത്യഗിരാ സോമവതീ ശിരസി ഭാതി ഹൈമവതീ ॥ 62 ॥
കൌതുകിനാ കമ്പായാം കൌസുമചാപേന കീലിതേനാന്തഃ ।
കുലദൈവതേന മഹതാ കുഡ്മലമുദ്രാം ധുനോതു നഃപ്രതിഭാ ॥ 63 ॥
യൂനാ കേനാപി മിലദ്ദേഹാ സ്വാഹാസഹായതിലകേന ।
സഹകാരമൂലദേശേ സംവിദ്രൂപാ കുടുംബിനീ രമതേ ॥ 64 ॥
കുസുമശരഗര്‍വസമ്പത്കോശഗൃഹം ഭാതി കാഞ്ചിദേശഗതം ।
സ്ഥാപിതമസ്മിന്‍കഥമപി ഗോപിതമന്തര്‍മയാ മനോരത്നം ॥ 65 ॥
ദഗ്ധഷഡധ്വാരണ്യം ദരദലിതകുസുംഭസംഭൃതാരുണ്യം ।
കലയേ നവതാരുണ്യം കമ്പാതടസീംനി കിമപി കാരുണ്യം ॥ 66 ॥
അധികാഞ്ചി വര്‍ധമാനാമതുലാം കരവാണി പാരണാമക്ഷ്ണോഃ ।
ആനന്ദപാകഭേദാമരുണിമപരിണാമഗര്‍വപല്ലവിതാം ॥ 67 ॥
ബാണസൃണിപാശകാര്‍മുകപാണിമമും കമപി കാമപീഠഗതം ।
ഏണധരകോണചൂഡം ശോണിമപരിപാകഭേദമാകലയേ ॥ 68 ॥
കിം വാ ഫലതി മമാന്യൌര്‍ബിംബാധരചുംബിമന്ദഹാസമുഖീ ।
സംബാധകരീ തമസാമംബാ ജാഗര്‍തി മനസി കാമാക്ഷീ ॥ 69 ॥
മഞ്ചേ സദാശിവമയേ പരിശിവമയലലിതപൌഷ്പപര്യങ്കേ ।
അധിചക്രമധ്യമാസ്തേ കാമാക്ഷീ നാമ കിമപി മമ ഭാഗ്യം ॥ 70 ॥
രക്ഷ്യോഽസ്മി കാമപീഠീലാസികയാ ഘനകൃപാംബുരാശികയാ ।
ശ്രുതിയുവതികുന്തലീമണിമാലികയാ തുഹിനശൈലബാലികയാ ॥ 71 ॥
ലീയേ പുരഹരജായേ മായേ തവ തരുണപല്ലവച്ഛായേ ।
ചരണേ ചന്ദ്രാഭരണേ കാഞ്ചീശരണേ നതാര്‍തിസംഹരണേ ॥ 72 ॥
മൂര്‍തിമതി മുക്തിബീജേ മൂര്‍ധ്നി സ്തബകിതചകോരസാംരാജ്യേ ।
മോദിതകമ്പാകൂലേ മുഹുര്‍മുഹുര്‍മനസി മുമുദിഷാഽസ്മാകം ॥ 73 ॥
വേദമയീം നാദമയീം ബിന്ദുമയീം പരപദോദ്യദിന്ദുമയീം ।
മന്ത്രമയീം തന്ത്രമയീം പ്രകൃതിമയീം നൌമി വിശ്വവികൃതിമയീം ॥ 74 ॥
പുരമഥനപുണ്യകോടീ പുഞ്ജിതകവിലോകസൂക്തിരസധാടീ ।
മനസി മമ കാമകോടീ വിഹരതു കരുണാവിപാകപരിപാടീ ॥ 75 ॥
കുടിലം ചടുലം പൃഥുലം മൃദുലം കചനയനജഘനചരണേഷു ।
അവലോകിതമവലംബിതമധികമ്പാതടമമേയമസ്മാഭിഃ ॥ 76 ॥
പ്രത്യങ്മുഖ്യാ ദൃഷ്ടയാ പ്രസാദദീപാങ്കുരേണ കാമാക്ഷ്യാഃ ।
പശ്യാമി നിസ്തുലമഹോ പചേലിമം കമപി പരശിവോല്ലാസം ॥ 77 ॥
വിദ്യേ വിധാതൃവിഷയേ കാത്യായനി കാലി കാമകോടികലേ ।
ഭാരതി ഭൈരവി ഭദ്രേ ശാകിനി ശാംഭവി ശിവേ സ്തുവേ ഭവതീം ॥ 78 ॥
മാലിനി മഹേശചാലിനി കാഞ്ചീഖേലിനി വിപക്ഷകാലിനി തേ ।
ശൂലിനി വിദ്രുമശാലിനി സുരജനപാലിനി കപാലിനി നമോഽസ്തു ॥ 79 ॥
ദേശിക ഇതി കിം ശംകേ തത്താദൃക്തവ നു തരുണിമോന്‍മേഷഃ ।
കാമാക്ഷി ശൂലപാണേഃ കാമാഗമസമയദീക്ഷായാം ॥ 80 ॥
വേതണ്ഡകുംഭഡംബരവൈതണ്ഡികകുചഭരാര്‍തമധ്യായ ।
കുങ്കുമരുചേ നമസ്യാം ശംകരനയനാമൃതായ രചയാമഃ ॥ 81 ॥
അധികാഞ്ചിതമണികാഞ്ചനകാഞ്ചീമധികാഞ്ചി കാംചിദദ്രാക്ഷം ।
അവനതജനാനുകമ്പാമനുകമ്പാകൂലമസ്മദനുകൂലാം ॥ 82 ॥
പരിചിതകമ്പാതീരം പര്‍വതരാജന്യസുകൃതസന്നാഹം ।
പരഗുരുകൃപയാ വീക്ഷേ പരമശിവോത്സങ്ഗമങ്ഗലാഭരണം ॥ 83 ॥
ദഗ്ധമദനസ്യ ശംഭോഃ പ്രഥീയസീം ബ്രഹ്മചര്യവൈദഗ്ധീം ।
തവ ദേവി തരുണിമശ്രീചതുരിമപാകോ ന ചക്ഷമേ മാതഃ ॥ 84 ॥
മദജലതമാലപത്രാ വസനിതപത്രാ കരാദൃതഖാനിത്രാ ।
വിഹരതി പുലിന്ദയോഷാ ഗുഞ്ജാഭൂഷാ ഫണീന്ദ്രകൃതവേഷാ ॥ 85 ॥
അങ്കേ ശുകിനീ ഗീതേ കൌതുകിനീ പരിസരേ ച ഗായകിനീ ।
ജയസി സവിധേഽംബ ഭൈരവമണ്ഡലിനീ ശ്രവസി ശങ്ഖകുണ്ഡലിനീ ॥ 86 ॥
പ്രണതജനതാപവര്‍ഗാ കൃതബഹുസര്‍ഗാ സസിംഹസംസര്‍ഗാ ।
കാമാക്ഷി മുദിതഭര്‍ഗാ ഹതരിപുവര്‍ഗാ ത്വമേവ സാ ദുര്‍ഗാ ॥ 87 ॥
ശ്രവണചലദ്വേതണ്ഡാ സമരോദ്ദണ്ഡാ ധുതാസുരശിഖണ്ഡാ ।
ദേവി കലിതാന്ത്രഷണ്ഡാ ധൃതനരമുണ്ഡാ ത്വമേവ ചാമുണ്ഡാ ॥ 88 ॥
ഉര്‍വീധരേന്ദ്രകന്യേ ദര്‍വീഭരിതേന ഭക്തപൂരേണ ।
ഗുര്‍വീമകിംചനാര്‍തി ഖര്‍വീകുരുഷേ ത്വമേവ കാമാക്ഷി ॥ 89 ॥
താഡിതരിപുപരിപീഡനഭയഹരണ നിപുണഹലമുസലാ ।
ക്രോഡപതിഭീഷണമുഖീ ക്രീഡസി ജഗതി ത്വമേവ കാമാക്ഷി ॥ 90 ॥
സ്മരമഥനവരണലോലാ മന്‍മഥഹേലാവിലാസമണിശാലാ ।
കനകരുചിചൌര്യശീലാ ത്വമംബ ബാലാ കരാബ്ജധൃതമാലാ ॥ 91 ॥
വിമലപടീ കമലകുടീ പുസ്തകരുദ്രാക്ഷശസ്തഹസ്തപുടീ ।
കാമാക്ഷി പക്ഷ്മലാക്ഷീ കലിതവിപഞ്ചീ വിഭാസി വൈരിഞ്ചീ ॥ 92 ॥
കുങ്കുമരുചിപിങ്ഗമസൃക്പങ്കിലമുണ്ഡാലിമണ്ഡിതം മാതഃ ।
ശ്രീകാമാക്ഷി തദീയസങ്ഗമകലാമന്ദീഭവത്കൌതുകഃ
ജയതി തവ രൂപധേയം ജപപടപുസ്തകവരാഭയകരാബ്ജം ॥ 93 ॥
കനകമണികലിതഭൂഷാം കാലായസകലഹശീലകാന്തികലാം ।
കാമാക്ഷി ശീലയേ ത്വാം കപാലശൂലാഭിരാമകരകമലാം ॥ 94 ॥
ലോഹിതിമപുഞ്ജമധ്യേ മോഹിതഭുവനേ മുദാ നിരീക്ഷന്തേ ।
വദനം തവ കുവയുഗലം കാഞ്ചീസീമാം ച കേഽപി കാമാക്ഷി ॥ 95 ॥
ജലധിദ്വിഗുണിതഹുതബഹദിശാദിനേശ്വരകലാശ്വിനേയദലൈഃ ।
നലിനൈര്‍മഹേശി ഗച്ഛസി സര്‍വോത്തരകരകമലദലമമലം ॥ 96 ॥
സത്കൃതദേശികചരണാഃ സബീജനിര്‍ബീജയോഗനിശ്രേണ്യാ ।
അപവര്‍ഗസൌധവലഭീമാരോഹന്ത്യംബ കേഽപി തവ കൃപയാ ॥ 97 ॥
അന്തരപി ബഹിരപി ത്വം ജന്തുതതേരന്തകാന്തകൃദഹന്തേ ।
ചിന്തിതസന്താനവതാം സന്തതമപി തന്തനീഷി മഹിമാനം ॥ 98 ॥
കലമഞ്ജുലവാഗനുമിതഗലപഞ്ജരഗതശുകഗ്രഹൌത്കണ്ഠ്യാത് ।
അംബ രദനാംബരം തേ ബിംബഫലം ശംബരാരിണാ ന്യസ്തം ॥ 99 ॥
ജയ ജയ ജഗദംബ ശിവേ ജയ ജയ കാമാക്ഷി ജയ ജയാദ്രിസുതേ ।
ജയ ജയ മഹേശദയിതേ ജയ ജയ ചിദ്ഗഗനകൌമുദീധാരേ ॥ 100 ॥
ആര്യാശതകം ഭക്ത്യാ പഠതാമാര്യാകടാക്ഷേണ ।
നിസ്സരതി വദനകമലാദ്വാണീ പീയൂഷധോരണീ ദിവ്യാ ॥ 101 ॥
ആര്യാശതകം സമ്പൂര്‍ണം ॥
॥ പാദാരവിന്ദശതകം ॥
മഹിംനഃ പന്ഥാനം മദനപരിപന്ഥിപ്രണയിനി
പ്രഭുര്‍നിര്‍ണേതും തേ ഭവതി യതമാനോഽപി കതമഃ ।
തഥാപി ശ്രീകാഞ്ചീവിഹൃതിരസികേ കോഽപി മനസോ
വിപാകസ്ത്വത്പാദസ്തുതിവിധിഷു ജല്‍പാകയതി മാം ॥ 1 ॥
ഗലഗ്രാഹീ പൌരന്ദരപുരവനീപല്ലവരുചാം
ധൃതപാഥംയാനാമരുണമഹസാമാദിമഗുരുഃ ।
സമിന്ധേ ബന്ധൂകസ്തബകസഹയുധ്വാ ദിശി ദിശി
പ്രസര്‍പന്‍കാമാക്ഷ്യാശ്ചരണകിരണാനാമരുണിമാ ॥ 2 ॥
മരാലീനാം യാനാഭ്യസനകലനാമൂലഗുരവേ
ദരിദ്രാണാം ത്രാണവ്യതികരസുരോദ്യാനതരവേ ।
തമസ്കാണ്ഡപ്രൌഢിപ്രകടനതിരസ്കാരപടവേ
ജനോഽയം കാമാക്ഷ്യാശ്ചരണനലിനായ സ്പൃഹയതേ ॥ 3 ॥
വഹന്തീ സൈന്ദൂരീം സരണിമവനംരാമരപുറീ-
പുരന്ധ്രീസീമന്തേ കവികമലബാലാര്‍കസുഷമാ ।
ത്രയീസീമന്തിന്യാഃ സ്തനതടനിചോലാരുണപടീ
വിഭാന്തീ കാമാക്ഷ്യാഃ പദനലിനകാന്തിര്‍വിജയതേ ॥ 4 ॥
പ്രണംരീഭൂതസ്യ പ്രണയകലഹത്രസ്തമനസഃ
സ്മരാരാതേശ്ചൂഡാവിയതി ഗൃഹമേധീ ഹിമകരഃ ।
യയോഃ സാന്ധ്യാം കാന്തിം വഹതി സുഷമാഭിശ്ചരണയോഃ
തയോര്‍മേ കാമാക്ഷ്യാ ഹൃദയമപതന്ദ്രം വിഹരതാം ॥ 5 ॥
യയോഃ പീഠായന്തേ വിബുധമുകുടീനാം പടലികാ
യയോഃ സൌധായന്തേ സ്വയമുദയഭാജോ ഭണിതയഃ ।
യയോഃ ദാസായന്തേ സരസിജഭവാദ്യാശ്ചരണയോഃ
തയോര്‍മേ കാമാക്ഷ്യാ ദിനമനു വരീവര്‍തു ഹൃദയം ॥ 6 ॥
നയന്തീ സംകോചം സരസിജരുചം ദിക്പരിസരേ
സൃജന്തീ ലൌഹിത്യം നഖകിരണചന്ദ്രാര്‍ധഖചിതാ ।
കവീന്ദ്രാണാം ഹൃത്കൈരവവികസനോദ്യോഗജനനീ
സ്ഫുരന്തീ കാമാക്ഷ്യാഃ ചരണരുചിസന്ധ്യാ വിജയതേ ॥ 7 ॥
വിരാവൈര്‍മാഞ്ജീരൈഃ കിമപി കഥയന്തീവ മധുരം
പുരസ്താദാനംരേ പുരവിജയിനി സ്മേരവദനേ ।
വയസ്യേവ പ്രൌഢാ ശിഥിലയതി യാ പ്രേമകലഹ-
പ്രരോഹം കാമാക്ഷ്യാഃ ചരണയുഗലീ സാ വിജയതേ ॥ 8 ॥
സുപര്‍വസ്ത്രീലോലാലകപരിചിതം ഷട്പദകുലൈഃ
സ്ഫുരല്ലാക്ഷാരാഗം തരുണതരണിജ്യോതിരരുണൈഃ ।
ഭൃതം കാന്ത്യംഭോഭിഃ വിസൃമരമരന്ദൈഃ സരസിജൈഃ
വിധത്തേ കാമാക്ഷ്യാഃ ചരണയുഗലം ബന്ധുപദവീം ॥ 9 ॥
രജഃസംസര്‍ഗേഽപി സ്ഥിതമരജസാമേവ ഹൃദയേ
പരം രക്തത്വേന സ്ഥിതമപി വിരക്തൈകശരണം ।
അലഭ്യം മന്ദാനാം ദധദപി സദാ മന്ദഗതിതാം
വിധത്തേ കാമാക്ഷ്യാഃ ചരണയുഗമാശ്ചര്യലഹരീം ॥ 10 ॥
ജടാലാ മഞ്ജീരസ്ഫുരദരുണരത്നാംശുനികരൈഃ
നിഷിദന്തീ മധ്യേ നഖരുചിഝരീഗാങ്ഗപയസാം ।
ജഗത്ത്രാണം കര്‍തും ജനനി മമ കാമാക്ഷി നിയതം
തപശ്ചര്യാം ധത്തേ തവ ചരണപാഥോജയുഗലീ ॥ 11 ॥
തുലാകോടിദ്വന്ദ്വക്കണിതഭണിതാഭീതിവചസോഃ
വിനംരം കാമാക്ഷീ വിസൃമരമഹഃപാടലിതയോഃ ।
ക്ഷണം വിന്യാസേന ക്ഷപിതതമസോര്‍മേ ലലിതയോഃ
പുനീയാന്‍മൂര്‍ധാനം പുരഹരപുരന്ധ്രീ ചരണയോഃ ॥ 12 ॥
ഭവാനി ദ്രുഹ്യേതാം ഭവനിബിഡിതേഭ്യോ മമ മുഹു-
സ്തമോവ്യാമോഹേഭ്യസ്തവ ജനനി കാമാക്ഷി ചരണൌ ।
യയോര്ലാക്ഷാബിന്ദുസ്ഫുരണധരണാദ്ധ്വര്‍ജടിജടാ-
കുടീരാ ശോണാങ്കം വഹതി വപുരേണാങ്കകലികാ ॥ 13 ॥
പവിത്രീകുര്യുര്‍നുഃ പദതലഭുവഃ പാടലരുചഃ
പരാഗാസ്തേ പാപപ്രശമനധുരീണാഃ പരശിവേ ।
കണം ലബ്ധും യേഷാം നിജശിരസി കാമാക്ഷി വിവശാ
വലന്തോ വ്യാതന്വന്ത്യഹമഹമികാം മാധവമുഖാഃ ॥ 14 ॥
ബലാകാമാലാഭിര്‍നഖരുചിമയീഭിഃ പരിവൃതേ
വിനംരസ്വര്‍നാരീവികചകചകാലാംബുദകുലേ ।
സ്ഫുരന്തഃ കാമാക്ഷി സ്ഫുടദലിതബന്ധൂകസുഹൃദ-
സ്തടില്ലേഖായന്തേ തവ ചരണപാഥോജകിരണാഃ ॥ 15 ॥
സരാഗഃ സദ്വേഷഃ പ്രസൃമരസരോജേ പ്രതിദിനം
നിസര്‍ഗാദാക്രാമന്വിബുധജനമൂര്‍ധാനമധികം ।
കഥംകാരം മാതഃ കഥയ പദപദ്മസ്തവ സതാം
നതാനാം കാമാക്ഷി പ്രകടയതി കൈവല്യസരണിം ॥ 16 ॥
ജപാലക്ഷ്മീശോണോ ജനിതപരമജ്ഞാനനലിനീ-
വികാസവ്യാസങ്ഗോ വിഫലിതജഗജ്ജാഡ്യഗരിമാ ।
മനഃപൂര്‍വാദ്രിം മേ തിലകയതു കാമാക്ഷി തരസാ
തമസ്കാണ്ഡദ്രോഹീ തവ ചരണപാഥോജരമണഃ ॥ 17 ॥
നമസ്കുര്‍മഃ പ്രേങ്ഖന്‍മണികടകനീലോത്പലമഹഃ-
പയോധൌ രിങ്ഖദ്ഭിര്‍നഖകിരണഫേനൈര്‍ധവലിതേ ।
സ്ഫുടം കുര്‍വാണായ പ്രബലചലദൌര്‍വാനലശിഖാ-
വിതര്‍കം കാമാക്ഷ്യാഃ സതതമരുണിംനേ ചരണയോഃ ॥ 18 ॥
ശിവേ പാശായേതാമലഘുനി തമഃകൂപകുഹരേ
ദിനാധീശായേതാം മമ ഹൃദയപാഥോജവിപിനേ ।
നഭോമാസായേതാം സരസകവിതാരീതിസരിതി
ത്വദീയൌ കാമാക്ഷി പ്രസൃതകിരണൌ ദേവി ചരണൌ ॥ 19 ॥
നിഷക്തം ശ്രുത്യന്തേ നയനമിവ സദ്വൃത്തരുചിരൈഃ
സമൈര്‍ജുഷ്ടം ശുദ്ധൈരധരമിവ രംയൈര്‍ദ്വിജഗണൈഃ ।
ശിവേ വക്ഷോജന്‍മദ്വിതയമിവ മുക്താശ്രിതമുമേ
ത്വദീയം കാമാക്ഷി പ്രണതശരണം നൌമി ചരണം ॥ 20 ॥
നമസ്യാസംസജ്ജന്നമുചിപരിപന്ഥിപ്രണയിനീ-
നിസര്‍ഗപ്രേങ്ഖോലത്കുരലകുലകാലാഹിശബലേ ।
നഖച്ഛായാദുഗ്ധോദധിപയസി തേ വൈദ്രുമരുചാം
പ്രചാരം കാമാക്ഷി പ്രചുരയതി പാദാബ്ജസുഷമാ ॥ 21 ॥
കദാ ദൂരീകര്‍തും കടുദുരിതകാകോലജനിതം
മഹാന്തം സന്താപം മദനപരിപന്ഥിപ്രിയതമേ ।
ക്ഷണാത്തേ കാമാക്ഷി ത്രിഭുവനപരീതാപഹരണേ
പടീയാംസം ലപ്സ്യേ പദകമലസേവാമൃതരസം ॥ 22 ॥
യയോഃ സാന്ധ്യം രോചിഃ സതതമരുണിംനേ സ്പൃഹയതേ
യയോശ്ചാന്ദ്രീ കാന്തിഃ പരിപതതി ദൃഷ്ട്വാ നഖരുചിം ।
യയോഃ പാകോദ്രേകം പിപഠിഷതി ഭക്ത്യാ കിസലയം
ംരദിംനഃ കാമാക്ഷ്യാ മനസി ചരണൌ തൌ തനുമഹേ ॥ 23 ॥
ജഗന്നേദം നേദം പരമിതി പരിത്യജ്യ യതിഭിഃ
കുശാഗ്രീയസ്വാന്തൈഃ കുശലധിഷണൈഃ ശാസ്ത്രസരണൌ ।
ഗവേഷ്യം കാമാക്ഷി ധ്രുവമകൃതകാനാം ഗിരിസുതേ
ഗിരാമൈദമ്പര്യം തവ ചരണപദ്മം വിജയതേ ॥ 24 ॥
കൃതസ്നാനം ശാസ്ത്രാമൃതസരസി കാമാക്ഷി നിതരാം
ദധാനം വൈശദ്യം കലിതരസമാനന്ദസുധയാ ।
അലംകാരം ഭൂമേര്‍മുനിജനമനശ്ചിന്‍മയമഹാ-
പയോധേരന്തസ്സ്ഥം തവ ചരണരത്നം മൃഗയതേ ॥ 25 ॥
മനോഗേഹേ മോഹോദ്ഭവതിമിരപൂര്‍ണേ മമ മുഹുഃ
ദരിദ്രാണീകുര്‍വന്ദിനകരസഹസ്രാണി കിരണൈഃ ।
വിധത്താം കാമാക്ഷി പ്രസൃമരതമോവഞ്ചനചണഃ
ക്ഷണാര്‍ധം സാന്നിധ്യം ചരണമണിദീപോ ജനനി തേ ॥ 26 ॥
കവീനാം ചേതോവന്നഖരരുചിസമ്പര്‍കി വിബുധ-
സ്രവന്തീസ്രോതോവത്പടുമുഖരിതം ഹംസകരവൈഃ ।
ദിനാരംഭശ്രീവന്നിയതമരുണച്ഛായസുഭഗം
മദന്തഃ കാമാക്ഷ്യാഃ സ്ഫുരതു പദപങ്കേരുഹയുഗം ॥ 27 ॥
സദാ കിം സമ്പര്‍കാത്പ്രകൃതികഠിനൈര്‍നാകിമുകുടൈഃ
തടൈര്‍നീഹാരാദ്രേരധികമണുനാ യോഗിമനസാ ।
വിഭിന്തേ സമ്മോഹം ശിശിരയതി ഭക്താനപി ദൃശാം
അദൃശ്യം കാമാക്ഷി പ്രകടയതി തേ പാദയുഗലം ॥ 28 ॥
പവിത്രാഭ്യാമംബ പ്രകൃതിമൃദുലാഭ്യാം തവ ശിവേ
പദാഭ്യാം കാമാക്ഷി പ്രസഭമഭിഭൂതൈഃ സചകിതൈഃ ।
പ്രവാലൈരംഭോജൈരപി ച വനവാസവ്രതദശാഃ
സദൈവാരഭ്യന്തേ പരിചരിതനാനാദ്വിജഗണൈഃ ॥ 29 ॥
ചിരാദ്ദൃശ്യാ ഹംസൈഃ കഥമപി സദാ ഹംസസുലഭം
നിരസ്യന്തീ ജാഡ്യം നിയതജഡമധ്യൈകശരണം ।
അദോഷവ്യാസങ്ഗാ സതതമപി ദോഷാപ്തിമലിനം
പയോജം കാമാക്ഷ്യാഃ പരിഹസതി പാദാബ്ജയുഗലീ ॥ 30 ॥
സുരാണാമാനന്ദപ്രബലനതയാ മണ്ഡനതയാ
നഖേന്ദുജ്യോത്സ്നാഭിര്‍വിസൃമരതമഃഖണ്ഡനതയാ ।
പയോജശ്രീദ്വേഷവ്രതരതതയാ ത്വച്ചരണയോഃ
വിലാസഃ കാമാക്ഷി പ്രകടയതി നൈശാകരദശാം ॥ 31 ॥
സിതിംനാ കാന്തീനാം നഖരജനുഷാം പാദനലിന-
ച്ഛവീനാം ശോണിംനാ തവ ജനനി കാമാക്ഷി നമനേ ।
ലഭന്തേ മന്ദാരഗ്രഥിതനവബന്ധൂകകുസുമ-
സ്രജാം സാമീചീന്യം സുരപുരപുരന്ധ്രീകചഭരാഃ ॥ 32 ॥
സ്ഫുരന്‍മധ്യേ ശുദ്ധേ നഖകിരണദുഗ്ധാബ്ധിപയസാം
വഹന്നബ്ജം ചക്രം ദരമപി ച ലേഖാത്മകതയാ ।
ശ്രിതോ മാത്സ്യം രൂപം ശ്രിയമപി ദധാനോ നിരുപമാം
ത്രിധാമാ കാമാക്ഷ്യാഃ പദനലിനനാമാ വിജയതേ ॥ 33 ॥
നഖശ്രീസന്നദ്ധസ്തബകനിചിതഃ സ്വൈശ്ച കിരണൈഃ
പിശങ്ഗൈഃ കാമാക്ഷി പ്രകടിതലസത്പല്ലവരുചിഃ ।
സതാം ഗംയഃ ശങ്കേ സകലഫലദാതാ സുരതരുഃ
ത്വദീയഃ പാദോഽയം തുഹിനഗിരിരാജന്യതനയേ ॥ 34 ॥
വഷട്കുര്‍വന്‍മാഞ്ജീരകലകലൈഃ കര്‍മലഹരീ-
ഹവീംഷി പ്രൌദ്ദണ്ഡം ജ്വലതി പരമജ്ഞാനദഹനേ ।
മഹീയാന്‍കാമാക്ഷി സ്ഫുടമഹസി ജോഹോതി സുധിയാം
മനോവേദ്യാം മാതസ്തവ ചരണയജ്വാ ഗിരിസുതേ ॥ 35 ॥
മഹാമന്ത്രം കിംചിന്‍മണികടകനാദൈര്‍മൃദു ജപന്‍
ക്ഷിപന്ദിക്ഷു സ്വച്ഛം നഖരുചിമയം ഭാസ്മനരജഃ ।
നതാനാം കാമാക്ഷി പ്രകൃതിപടുരച്ചാട്യ മമതാ-
പിശാചീം പാദോഽയം പ്രകടയതി തേ മാന്ത്രികദശാം ॥ 36 ॥
ഉദീതേ ബോധേന്ദൌ തമസി നിതരാം ജഗ്മുഷി ദശാം
ദരിദ്രാം കാമാക്ഷി പ്രകടമനുരാഗം വിദധതീ ।
സിതേനാച്ഛാദ്യാങ്ഗം നഖരുചിപടേനാങ്ഘ്രിയുഗലീ-
പുരന്ധ്രീ തേ മാതഃ സ്വയമഭിസരത്യേവ ഹൃദയം ॥ 37 ॥
ദിനാരംഭഃ സമ്പന്നലിനവിപിനാനാമഭിനവോ
വികാസോ വാസന്തഃ സുകവിപികലോകസ്യ നിയതഃ ।
പ്രദോഷഃ കാമാക്ഷി പ്രകടപരമജ്ഞാനശശിന-
ശ്ചകാസ്തി ത്വത്പാദസ്മരണമഹിമാ ശൈലതനയേ ॥ 38 ॥
ധൃതച്ഛായം നിത്യം സരസിരുഹമൈത്രീപരിചിതം
നിധാനം ദീപ്തീനാം നിഖിലജഗതാം ബോധജനകം ।
മുമുക്ഷൂണാം മാര്‍ഗപ്രഥനപടു കാമാക്ഷി പദവീം
പദം തേ പാതങ്ഗീം പരികലയതേ പര്‍വതസുതേ ॥ 39 ॥
ശനൈസ്തീര്‍ത്വാ മോഹാംബുധിമഥ സമാരോഢുമനസഃ
ക്രമാത്കൈവല്യാഖ്യാം സുകൃതിസുലഭാം സൌധവലഭീം ।
ലഭന്തേ നിഃശ്രേണീമിവ ഝടിതി കാമാക്ഷി ചരണം
പുരശ്ചര്യാഭിസ്തേ പുരമഥനസീമന്തിനി ജനാഃ ॥ 40 ॥
പ്രചണ്ഡാര്‍തിക്ഷോഭപ്രമഥനകൃതേ പ്രാതിഭസരി-
ത്പ്രവാഹപ്രോദ്ദണ്ഡീകരണജലദായ പ്രണമതാം ।
പ്രദീപായ പ്രൌഢേ ഭവതമസി കാമാക്ഷി ചരണ-
പ്രസാദൌന്‍മുഖ്യായ സ്പൃഹയതി ജനോഽയം ജനനി തേ ॥ 41 ॥
മരുദ്ഭിഃ സംസേവ്യാ സതതമപി ചാഞ്ചല്യരഹിതാ
സദാരുണ്യം യാന്തീ പരിണതിദരിദ്രാണസുഷമാ ।
ഗുണോത്കര്‍ഷാന്‍മാഞ്ജീരകകലകലൈസ്തര്‍ജനപടുഃ
പ്രവാലം കാമാക്ഷ്യാഃ പരിഹസതി പാദാബ്ജയുഗലീ ॥ 42 ॥
ജഗദ്രക്ഷാദക്ഷാ ജലജരുചിശിക്ഷാപടുതരാ
സമൈര്‍നംയാ രംയാ സതതമഭിഗംയാ ബുധജനൈഃ ।
ദ്വയീ ലീലാലോലാ ശ്രുതിഷു സുരപാലാദിമുകുടീ-
തടീസീമാധാമാ തവ ജനനി കാമാക്ഷി പദയോഃ ॥ 43 ॥
ഗിരാം ദൂരൌ ചോരൌ ജഡിമതിമിരാണാം കൃതജഗ-
ത്പരിത്രാണൌ ശോണൌ മുനിഹൃദയലീലൈകനിപുണൌ ।
നഖൈഃ സ്മേരൌ സാരൌ നിഗമവചസാം ഖണ്ഡിതഭവ-
ഗ്രഹോന്‍മാദൌ പാദൌ തവ ജനനി കാമാക്ഷി കലയേ ॥ 44 ॥
അവിശ്രാന്തം പങ്കം യദപി കലയന്യാവകമയം
നിരസ്യന്‍കാമാക്ഷി പ്രണമനജുഷാം പങ്കമഖിലം ।
തുലാകോടിദ്വന്ദം ദധദപി ച ഗച്ഛന്നതുലതാം
ഗിരാം മാര്‍ഗം പാദോ ഗിരിവരസുതേ ലങ്ഘയതി തേ ॥ 45 ॥
പ്രവാലം സവ്രീലം വിപിനവിവരേ വേപയതി യാ
സ്ഫുരല്ലീലം ബാലാതപമധികബാലം വദതി യാ ।
രുചിം സാന്ധ്യാം വന്ധ്യാം വിരചയതി യാ വര്‍ധയതു സാ
ശിവം മേ കാമാക്ഷ്യാഃ പദനലിനപാടല്യലഹരീ ॥ 46 ॥
കിരഞ്ജ്യോത്സ്നാരീതിം നഖമുഖരുചാ ഹംസമനസാം
വിതന്വാനഃ പ്രീതിം വികചതരുണാംഭോരുഹരുചിഃ ।
പ്രകാശഃ ശ്രീപാദസ്തവ ജനനി കാമാക്ഷി തനുതേ
ശരത്കാലപ്രൌഢിം ശശിശകലചൂഡപ്രിയതമേ ॥ 47 ॥
നഖാങ്കൂരസ്മേരദ്യുതിവിമലഗങ്ഗാംഭസി സുഖം
കൃതസ്നാനം ജ്ഞാനാമൃതമമലമാസ്വാദ്യ നിയതം ।
ഉദഞ്ചന്‍മഞ്ജീരസ്ഫുരണമണിദീപേ മമ മനോ
മനോജ്ഞേ കാമാക്ഷ്യാശ്ചരണമണിഹര്‍ംയേ വിഹരതാം ॥ 48 ॥
ഭവാംഭോധൌ നൌകാം ജഡിമവിപിനേ പാവകശിഖാ-
മമര്‍ത്യേന്ദ്രാദീനാമധിമുകുടമുത്തംസകലികാം ।
ജഗത്താപേ ജ്യോത്സ്നാമകൃതകവചഃപഞ്ജരപുടേ
ശുകസ്ത്രീം കാമാക്ഷ്യാ മനസി കലയേ പാദയുഗലീം ॥ 49 ॥
പരത്മപ്രാകാശ്യപ്രതിഫലനചുഞ്ചുഃ പ്രണമതാം
മനോജ്ഞസ്ത്വത്പാദോ മണിമുകുരമുദ്രാം കലയതേ ।
യദീയാം കാമാക്ഷി പ്രകൃതിമസൃണാഃ ശോധകദശാം
വിധാതും ചേഷ്ഠന്തേ ബലരിപുവധൂടീകചഭരാഃ ॥ 50 ॥
അവിശ്രാന്തം തിഷ്ഠന്നകൃതകവചഃകന്ദരപുടീ-
കുടീരാന്തഃ പ്രൌഢം നഖരുചിസടാലീം പ്രകടയന്‍ ।
പ്രചണ്ഡം ഖണ്ഡത്വം നയതു മമ കാമാക്ഷി തരസാ
തമോവേതണ്ഡേന്ദ്രം തവ ചരണകണ്ഠീരവപതിഃ ॥ 51 ॥
പുരസ്താത്കാമാക്ഷി പ്രചുരരസമാഖണ്ഡലപുരീ-
പുരന്ധ്രീണാം ലാസ്യം തവ ലലിതമാലോക്യ ശനകൈഃ ।
നഖശ്രീഭിഃ സ്മേരാ ബഹു വിതനുതേ നൂപുരരവൈ-
ശ്ചമത്കൃത്യാ ശങ്കേ ചരണയുഗലീ ചാടുരചനാഃ ॥ 52 ॥
സരോജം നിന്ദന്തീ നഖകിരണകര്‍പൂരശിശിരാ
നിഷിക്താ മാരാരേര്‍മുകുടശശിരേഖാഹിമജലൈഃ ।
സ്ഫുരന്തീ കാമാക്ഷി സ്ഫുടരുചിമയേ പല്ലവചയേ
തവാധത്തേ മൈത്രീം പഥികസുദൃശാ പാദയുഗലീ ॥ 53 ॥
നതാനാം സമ്പത്തേരനവരതമാകര്‍ഷണജപഃ
പ്രരോഹത്സംസാരപ്രസരഗരിമസ്തംഭനജപഃ ।
ത്വദീയഃ കാമാക്ഷി സ്മരഹരമനോമോഹനജപഃ
പടീയാന്നഃ പായാത്പദനലിനമഞ്ജീരനിനദഃ ॥ 54 ॥
വിതന്വീഥാ നാഥേ മമ ശിരസി കാമാക്ഷി കൃപയാ
പദാംഭോജന്യാസം പശുപരിബൃഢപ്രാണദയിതേ ।
പിബന്തോ യന്‍മുദ്രാം പ്രകടമുപകമ്പാപരിസരം
ദൃശാ നാനന്ദ്യന്തേ നലിനഭവനാരായണമുഖാഃ ॥ 55 ॥
പ്രണാമോദ്യദ്ബൃന്ദാരമുകുടമന്ദാരകലികാ-
വിലോലല്ലോലംബപ്രകരമയധൂമപ്രചുരിമാ ।
പ്രദീപ്തഃ പാദാബ്ജദ്യുതിവിതതിപാടല്യലഹരീ-
കൃശാനുഃ കാമാക്ഷ്യാ മമ ദഹതു സംസാരവിപിനം ॥ 56 ॥
വലക്ഷശ്രീരൃക്ഷാധിപശിശുസദൃക്ഷൈസ്തവ നഖൈഃ
ജിഘൃക്ഷുര്‍ദക്ഷത്വം സരസിരുഹഭിക്ഷുത്വകരണേ ।
ക്ഷണാന്‍മേ കാമാക്ഷി ക്ഷപിതഭവസംക്ഷോഭഗരിമാ
വചോവൈചക്ഷന്യം ചരണയുഗലീ പക്ഷ്മലയതാത് ॥ 57 ॥
സമന്താത്കാമാക്ഷി ക്ഷതതിമിരസന്താനസുഭഗാന്‍
അനന്താഭിര്‍ഭാഭിര്‍ദിനമനു ദിഗന്താന്വിരചയന്‍ ।
അഹന്തായാ ഹന്താ മമ ജഡിമദന്താവലഹരിഃ
വിഭിന്താം സന്താപം തവ ചരണചിന്താമണിരസൌ ॥ 58 ॥
ദധാനോ ഭാസ്വത്താമമൃതനിലയോ ലോഹിതവപുഃ
വിനംരാണാം സൌംയോ ഗുരുരപി കവിത്വം ച കലയന്‍ ।
ഗതൌ മന്ദോ ഗങ്ഗാധരമഹിഷി കാമാക്ഷി ഭജതാം
തമഃകേതുര്‍മാതസ്തവ ചരണപദ്മോ വിജയതേ ॥ 59 ॥
നയന്തീം ദാസത്വം നലിനഭവമുഖ്യാനസുലഭ-
പ്രദാനാദ്ദീനാനാമമരതരുദൌര്‍ഭാഗ്യജനനീം ।
ജഗജ്ജന്‍മക്ഷേമക്ഷയവിധിഷു കാമാക്ഷി പദയോ-
ര്‍ധുരീണാമീഷ്ടേ കരസ്തവ ഭണിതുമാഹോപുരുഷികാം ॥ 60 ॥
ജനോഽയം സന്തപ്തോ ജനനി ഭവചണ്ഡാംശുകിരണൈഃ
അലബ്ധവൈകം ശീതം കണമപി പരജ്ഞാനപയസഃ ।
തമോമാര്‍ഗേ പാന്ഥസ്തവ ഝടിതി കാമാക്ഷി ശിശിരാം
പദാംഭോജച്ഛായാം പരമശിവജായേ മൃഗയതേ ॥ 61 ॥
ജയത്യംബ ശ്രീമന്നഖകിരണചീനാംശുകമയം
വിതാനം ബിഭ്രാണേ സുരമുകുടസംഘട്ടമസൃണേ ।
നിജാരുണ്യക്ഷൌമാസ്തരണവതി കാമാക്ഷി സുലഭാ
ബുധൈഃ സംവിന്നാരീ തവ ചരണമാണിക്യഭവനേ ॥ 62 ॥
പ്രതീമഃ കാമാക്ഷി സ്ഫുരിതതരുണാദിത്യകിരണ-
ശ്രിയോ മൂലദ്രവ്യം തവ ചരണമദ്രീന്ദ്രതനയേ ।
സുരേന്ദ്രാശാമാപൂരയതി യദസൌ ധ്വാന്തമഖിലം
ധുനീതേ ദിഗ്ഭാഗാനപി ച മഹസാ പാടലയതേ ॥ 63 ॥
മഹാഭാഷ്യവ്യാഖ്യാപടുശയനമാരോപയതി വാ
സ്മരവ്യാപാരേര്‍ഷ്യാപിശുനനിടിലം കാരയതി വാ ।
ദ്വിരേഫാണാമധ്യാസയതി സതതം വാധിവസതിം
പ്രണംരാന്‍കാമാക്ഷ്യാഃ പദനലിനമാഹാത്മ്യഗരിമാ ॥ 64 ॥
വിവേകാംഭസ്സ്രോതസ്സ്നപനപരിപാടീശിശിരിതേ
സമീഭൂതേ ശാസ്ത്രസ്മരണഹലസംകര്‍ഷണവശാത് ।
സതാം ചേതഃക്ഷേത്രേ വപതി തവ കാമാക്ഷി ചരണോ
മഹാസംവിത്സസ്യപ്രകരവരബീജം ഗിരിസുതേ ॥ 65 ॥
ദധാനോ മന്ദാരസ്തബകപരിപാടീം നഖരുചാ
വഹന്ദീപ്താം ശോണാങ്ഗുലിപടലചാമ്പേയകലികാം ।
അശോകോല്ലാസം നഃ പ്രചുരയതു കാമാക്ഷി ചരണോ
വികാസീ വാസന്തഃ സമയ ഇവ തേ ശര്‍വദയിതേ ॥ 66 ॥
നഖാംശുപ്രാചുര്യപ്രസൃമരമരാലാലിധവലഃ
സ്ഫുരന്‍മഞ്ജീരോദ്യന്‍മരകതമഹശ്ശൈവലയുതഃ ।
ഭവത്യാഃ കാമാക്ഷി സ്ഫുടചരണപാടല്യകപടോ
നദഃ ശോണാഭിഖ്യോ നഗപതിതനൂജേ വിജയതേ ॥ 67 ॥
ധുനാനം പങ്കൌഘം പരമസുലഭം കണ്ടകകുലൈഃ
വികാസവ്യാസങ്ഗം വിദധദപരാധീനമനിശം ।
നഖേന്ദുജ്യോത്സ്നാഭിര്‍വിശദരുചി കാമാക്ഷി നിതരാം
അസാമാന്യം മന്യേ സരസിജമിദം തേ പദയുഗം ॥ 68 ॥
കരീന്ദ്രായ ദ്രുഹ്യത്യലസഗതിലീലാസു വിമലൈഃ
പയോജൈര്‍മാത്സര്യം പ്രകടയതി കാമം കലയതേ ।
പദാംഭോജദ്വന്ദ്വം തവ തദപി കാമാക്ഷി ഹൃദയം
മുനീനാം ശാന്താനാം കഥമനിശമസ്മൈ സ്പൃഹയതേ ॥ 69 ॥
നിരസ്താ ശോണിംനാ ചരണകിരണാനാം തവ ശിവേ
സമിന്ധാനാ സന്ധ്യാരുചിരചലരാജന്യതനയേ ।
അസാമര്‍ഥ്യാദേനം പരിഭവിതുമേതത്സമരുചാം
സരോജാനാം ജാനേ മുകുലയതി ശോഭാം പ്രതിദിനം ॥ 70 ॥
ഉപാദിക്ഷദ്ദാക്ഷ്യം തവ ചരണനാമാ ഗുരുരസൌ
മരാലാനാം ശങ്കേ മസൃണഗതിലാലിത്യസരണൌ ।
അതസ്തേ നിസ്തന്ദ്രം നിയതമമുനാ സഖ്യപദവീം
പ്രപന്നം പാഥോജം പ്രതി ദധതി കാമാക്ഷി കുതുകം ॥ 71 ॥
ദധാനൈഃ സംസര്‍ഗം പ്രകൃതിമലിനൈഃ ഷട്പദകുലൈഃ
ദ്വിജാധീശശ്ലാഘാവിധിഷു വിദധദ്ഭിര്‍മുകുലതാം ।
രജോമിശ്രൈഃ പദ്മൈര്‍നിയതമപി കാമാക്ഷി പദയോഃ
വിരോധസ്തേ യുക്തോ വിഷമശരവൈരിപ്രിയതമേ ॥ 72 ॥
കവിത്വശ്രീമിശ്രീകരണനിപുണൌ രക്ഷണചണൌ
വിപന്നാനാം ശ്രീമന്നലിനമസൃണൌ ശോണകിരണൌ ।
മുനീന്ദ്രാണാമന്തഃകരണശരണൌ മന്ദസരണൌ
മനോജ്ഞൌ കാമാക്ഷ്യാ ദുരിതഹരണൌ നൌമി ചരണൌ ॥ 73 ॥
പരസ്മാത്സര്‍വസ്മാദപി ച പരയോര്‍മുക്തികരയോഃ
നഖശ്രീഭിര്‍ജ്യോത്സ്നാകലിതതുലയോസ്താംരതലയോഃ ।
നിലീയേ കാമാക്ഷ്യാ നിഗമനുതയോര്‍നാകിനതയോഃ
നിരസ്തപ്രോന്‍മീലന്നലിനമദയോരേവ പദയോഃ ॥ 74 ॥
സ്വഭാവാദന്യോന്യം കിസലയമപീദം തവ പദം
ംരദിംനാ ശോണിംനാ ഭഗവതി ദധാതേ സദൃശതാം ।
വനേ പൂര്‍വസ്യേച്ഛാ സതതമവനേ കിം തു ജഗതാം
പരസ്യേത്ഥം ഭേദഃ സ്ഫുരതി ഹൃദി കാമാക്ഷി സുധിയാം ॥ 75 ॥
കഥം വാചാലോഽപി പ്രകടമണിമഞ്ജീരനിനദൈഃ
സദൈവാനന്ദാര്‍ദ്രാന്വിരചയതി വാചംയമജനാന്‍ ।
പ്രകൃത്യാ തേ ശോണച്ഛവിരപി ച കാമാക്ഷി ചരണോ
മനീഷാനൈര്‍മല്യം കഥമിവ നൃണാം മാംസലയതേ ॥ 76 ॥
ചലത്തൃഷ്ണാവീചീപരിചലനപര്യാകുലതയാ
മുഹുര്‍ഭ്രാന്തസ്താന്തഃ പരമശിവവാമാക്ഷി പരവാന്‍ ।
തിതീര്‍ഷുഃ കാമാക്ഷി പ്രചുരതരകര്‍മാംബുധിമമും
കദാഹം ലപ്സ്യേ തേ ചരണമണിസേതും ഗിരിസുതേ ॥ 77 ॥
വിശുഷ്യന്ത്യാം പ്രജ്ഞാസരിതി ദുരിതഗ്രീഷ്മസമയ-
പ്രഭാവേണ ക്ഷീണേ സതി മമ മനഃകേകിനി ശുചാ ।
ത്വദീയഃ കാമാക്ഷി സ്ഫുരിതചരണാംഭോദമഹിമാ
നഭോമാസാടോപം നഗപതിസുതേ കിം ന കുരുതേ ॥ 78 ॥
വിനംരാണാം ചേതോഭവനവലഭീസീംനി ചരണ-
പ്രദീപേ പ്രാകാശ്യം ദധതി തവ നിര്‍ധൂതതമസി ।
അസീമാ കാമാക്ഷി സ്വയമലഘുദുഷ്കര്‍മലഹരീ
വിഘൂര്‍ണന്തീ ശാന്തിം ശലഭപരിപാടീവ ഭജതേ ॥ 79 ॥
വിരാജന്തീ ശുക്തിര്‍നഖകിരണമുക്താമണിതതേഃ
വിപത്പാഥോരാശൌ തരിരപി നരാണാം പ്രണമതാം ।
ത്വദീയഃ കാമാക്ഷി ധ്രുവമലഘുവഹ്നിര്‍ഭവവനേ
മുനീനാം ജ്ഞാനാഗ്നേരരണിരയമങ്ഘിര്‍വിജയതേ ॥ 80 ॥
സമസ്തൈഃ സംസേവ്യഃ സതതമപി കാമാക്ഷി വിബുധൈഃ
സ്തുതോ ഗന്ധര്‍വസ്ത്രീസുലലിതവിപഞ്ചീകലരവൈഃ ।
ഭവത്യാ ഭിന്ദാനോ ഭവഗിരികുലം ജൃംഭിതതമോ-
ബലദ്രോഹീ മാതശ്ചരണപുരുഹൂതോ വിജയതേ ॥ 81 ॥
വസന്തം ഭക്താനാമപി മനസി നിത്യം പരിലസദ്-
ഘനച്ഛായാപൂര്‍ണം ശുചിമപി നൃണാം താപശമനം ।
നഖേന്ദുജ്യോത്സ്നാഭിഃ ശിശിരമപി പദ്മോദയകരം
നമാമഃ കാമാക്ഷ്യാശ്ചരണമധികാശ്ചര്യകരണം ॥ 82 ॥
കവീന്ദ്രാണാം നാനാഭണിതിഗുണചിത്രീകൃതവചഃ-
പ്രപഞ്ചവ്യാപാരപ്രകടനകലാകൌശലനിധിഃ ।
അധഃകുര്‍വന്നബ്ജം സനകഭൃഗുമുഖ്യൈര്‍മുനിജനൈഃ
നമസ്യഃ കാമാക്ഷ്യാശ്ചരണപരമേഷ്ഠീ വിജയതേ ॥ 83 ॥
ഭവത്യാഃ കാമാക്ഷി സ്ഫുരിതപദപങ്കേരുഹഭുവാം
പരാഗാണാം പൂരൈഃ പരിഹൃതകലങ്കവ്യതികരൈഃ ।
നതാനാമാമൃഷ്ടേ ഹൃദയമുകുരേ നിര്‍മലരുചി
പ്രസന്നേ നിശ്ശേഷം പ്രതിഫലതി വിശ്വം ഗിരിസുതേ ॥ 84 ॥
തവ ത്രസ്തം പാദാത്കിസലയമരണ്യാന്തരമഗാത്
പരം രേഖാരൂപം കമലമമുമേവാശ്രിതമഭൂത് ।
ജിതാനാം കാമാക്ഷി ദ്വിതയമപി യുക്തം പരിഭവേ
വിദേശേ വാസോ വാ ശരണഗമനം വാ നിജരിപോഃ ॥ 85 ॥
ഗൃഹീത്വാ യാഥാര്‍ഥ്യം നിഗമവചസാം ദേശികകൃപാ-
കടാക്ഷര്‍കജ്യോതിശ്ശമിതമമതാബന്ധതമസഃ ।
യതന്തേ കാമാക്ഷി പ്രതിദിവസമന്തര്‍ദ്രഢയിതും
ത്വദീയം പാദാബ്ജം സുകൃതപരിപാകേന സുജനാഃ ॥ 86 ॥
ജഡാനാമപ്യംബ സ്മരണസമയേ തവച്ചരണയോഃ
ഭ്രമന്‍മന്ഥക്ഷ്മാഭൃദ്ധുമുഘുമിതസിന്ധുപ്രതിഭടാഃ ।
പ്രസന്നാഃ കാമാക്ഷി പ്രസഭമധരസ്പന്ദനകരാ
ഭവന്തി സ്വച്ഛന്ദം പ്രകൃതിപരിപക്കാ ഭണിതയഃ ॥ 87 ॥
വഹന്നപ്യശ്രാന്തം മധുരനിനദം ഹംസകമസൌ
തമേവാധഃ കര്‍തും കിമിവ യതതേ കേലിഗമനേ ।
ഭവസ്യൈവാനന്ദം വിദധദപി കാമാക്ഷി ചരണോ
ഭവത്യാസ്തദ്ദ്രോഹം ഭഗവതി കിമേവം വിതനുതേ ॥ 88 ॥
യദത്യന്തം താംയത്യലസഗതിവാര്‍താസ്വപി ശിവേ
തദേതത്കാമാക്ഷി പ്രകൃതിമൃദുലം തേ പദയുഗം ।
കിരീടൈഃ സംഘട്ടം കഥമിവ സുരൌഘസ്യ സഹതേ
മുനീന്ദ്രാണാമാസ്തേ മനസി ച കഥം സൂചിനിശിതേ ॥ 89 ॥
മനോരങ്ഗേ മത്കേ വിബുധജനസമ്മോദജനനീ
സരാഗവ്യാസങ്ഗം സരസമൃദുസംചാരസുഭഗാ ।
മനോജ്ഞാ കാമാക്ഷി പ്രകടയതു ലാസ്യപ്രകരണം
രണന്‍മഞ്ജീരാ തേ ചരണയുഗലീനര്‍തകവധൂഃ ॥ 90 ॥
പരിഷ്കുര്‍വന്‍മാതഃ പശുപതികപര്‍ദം ചരണരാട്
പരാചാം ഹൃത്പദ്മം പരമഭണിതീനാം ച മകുടം ।
ഭവാഖ്യേ പാഥോധൌ പരിഹരതു കാമാക്ഷി മമതാ-
പരാധീനത്വം മേ പരിമുഷിതപാഥോജമഹിമാ ॥ 91 ॥
പ്രസൂനൈഃ സമ്പര്‍കാദമരതരുണീകുന്തലഭവൈഃ
അഭീഷ്ടാനാം ദാനാദനിശമപി കാമാക്ഷി നമതാം ।
സ്വസങ്ഗാത്കങ്കേലിപ്രസവജനകത്വേന ച ശിവേ
ത്രിധാ ധത്തേ വാര്‍താം സുരഭിരിതി പാദോ ഗിരിസുതേ ॥ 92 ॥
മഹാമോഹസ്തേനവ്യതികരഭയാത്പാലയതി യോ
വിനിക്ഷിപ്തം സ്വസ്മിന്നിജജനമനോരത്നമനിശം ।
സ രാഗസ്യോദ്രേകാത്സതതമപി കാമാക്ഷി തരസാ
കിമേവം പാദോഽസൌ കിസലയരുചിം ചോരയതി തേ ॥ 93 ॥
സദാ സ്വാദുംകാരം വിഷയലഹരീശാലികണികാം
സമാസ്വാദ്യ ശ്രാന്തം ഹൃദയശുകപോതം ജനനി മേ ।
കൃപാജാലേ ഫാലേക്ഷണമഹിഷി കാമാക്ഷി രഭസാത്
ഗൃഹീത്വാ രുന്ധീഥാരസ്തവ പദയുഗീപഞ്ജരപുടേ ॥ 94 ॥
ധുനാനം കാമാക്ഷി സ്മരണലവമാത്രേണ ജഡിമ-
ജ്വരപ്രൌഢിം ഗൂഢസ്ഥിതി നിഗമനൈകുഞ്ജകുഹരേ ।
അലഭ്യം സര്‍വേഷാം കതിചന ലഭന്തേ സുകൃതിനഃ
ചിരാദന്വിഷ്യന്തസ്തവ ചരണസിദ്ധൌഷധമിദം ॥ 95 ॥
രണന്‍മഞ്ജീരാഭ്യാം ലലിതഗമനാഭ്യാം സുകൃതിനാം
മനോവാസ്തവ്യാഭ്യാം മഥിതതിമിരാഭ്യാം നഖരുചാ ।
നിധേയാഭ്യാം പത്യാ നിജശിരസി കാമാക്ഷി സതതം
നമസ്തേ പാദാഭ്യാം നലിനമൃദുലാഭ്യാം ഗിരിസുതേ ॥ 96 ॥
സുരാഗേ രാകേന്ദുപ്രതിനിധിമുഖേ പര്‍വതസുതേ
ചിരാല്ലഭ്യേ ഭക്ത്യാ ശമധനജനാനാം പരിഷദാ ।
മനോഭൃങ്ഗോ മത്കഃ പദകമലയുഗ്മേ ജനനി തേ
പ്രകാമം കാമാക്ഷി ത്രിപുരഹരവാമാക്ഷി രമതാം ॥ 97 ॥
ശിവേ സംവിദ്രൂപേ ശശിശകലചൂഡപ്രിയതമേ
ശനൈര്‍ഗത്യാഗത്യാ ജിതസുരവരേഭേ ഗിരിസുതേ ।
യതന്തേ സന്തസ്തേ ചരണനലിനാലാനയുഗലേ
സദാ ബദ്ധം ചിത്തപ്രമദകരിയൂഥം ദൃഢതരം ॥ 98 ॥
യശഃ സൂതേ മാതര്‍മധുരകവിതാം പക്ഷ്മലയതേ
ശ്രിയം ദത്തേ ചിത്തേ കമപി പരിപാകം പ്രഥയതേ ।
സതാം പാശഗ്രന്ഥിം ശിഥിലയതി കിം കിം ന കുരുതേ
പ്രപന്നേ കാമാക്ഷ്യാഃ പ്രണതിപരിപാടീ ചരണയോഃ ॥ 99 ॥
മനീഷാം മാഹേന്ദ്രീം കകുഭമിവ തേ കാമപി ദശാം
പ്രധത്തേ കാമാക്ഷ്യാശ്ചരണതരുണാദിത്യകിരണഃ ।
യദീയേ സമ്പര്‍കേ ധൃതരസമരന്ദാ കവയതാം
പരീപാകം ധത്തേ പരിമലവതീ സൂക്തിനലിനീ ॥ 100 ॥
പുരാ മാരാരാതിഃ പുരമജയദംബ സ്തവശതൈഃ
പ്രസന്നായാം സത്യാം ത്വയി തുഹിനശൈലേന്ദ്രതനയേ ।
അതസ്തേ കാമാക്ഷി സ്ഫുരതു തരസാ കാലസമയേ
സമായാതേ മാതര്‍മമ മനസി പാദാബ്ജയുഗലം ॥ 101 ॥
പദദ്വന്ദ്വം മന്ദം ഗതിഷു നിവസന്തം ഹൃദി സതാം
ഗിരാമന്തേ ഭ്രാന്തം കൃതകരഹിതാനാം പരിബൃഢേ ।
ജനാനാമാനന്ദം ജനനി ജനയന്തം പ്രണമതാം
ത്വദീയം കാമാക്ഷി പ്രതിദിനമഹം നൌമി വിമലം ॥ 102 ॥
ഇദം യഃ കാമാക്ഷ്യാശ്ചരണനലിനസ്തോത്രശതകം
ജപേന്നിത്യം ഭക്ത്യാ നിഖിലജഗദാഹ്ലാദജനകം ।
സ വിശ്വേഷാം വന്ദ്യഃ സകലകവിലോകൈകതിലകഃ
ചിരം ഭുക്ത്വാ ഭോഗാന്‍പരിണമതി ചിദ്രൂപകലയാ ॥ 103 ॥
പാദാരവിന്ദശതകം സമ്പൂര്‍ണം ॥
॥ സ്തുതിശതകം ॥
പാണ്ഡിത്യം പരമേശ്വരി സ്തുതിവിധൌ നൈവാശ്രയന്തേ ഗിരാം
വൈരിഞ്ചാന്യപി ഗുംഫനാനി വിഗലദ്ഗര്‍വാണി ശര്‍വാണി തേ ।
സ്തോതും ത്വാം പരിഫുല്ലനീലനലിനശ്യാമാക്ഷി കാമാക്ഷി മാം
വാചാലീകുരുതേ തഥാപി നിതരാം ത്വത്പാദസേവാദരഃ ॥ 1 ॥
താപിഞ്ഛസ്തബകത്വിഷേ തനുഭൃതാം ദാരിദ്ര്യമുദ്രാദ്വിഷേ
സംസാരാഖ്യതമോമുഷേ പുരരിപോര്‍വാമാങ്കസീമാജുഷേ ।
കമ്പാതീരമുപേയുഷേ കവയതാം ജിഹ്വാകുടീം ജഗ്മുഷേ
വിശ്വത്രാണപുഷേ നമോഽസ്തു സതതം തസ്മൈ പരംജ്യോതിഷേ ॥ 2 ॥
യേ സന്ധ്യാരുണയന്തി ശംകരജടാകാന്താരചന്‍രാര്‍ഭകം
സിന്ദൂരന്തി ച യേ പുരന്ദരവധൂസീമന്തസീമാന്തരേ ।
പുണ്യം യേ പരിപക്കയന്തി ഭജതാം കാഞ്ചീപുരേ മാമമീ
പായാസുഃ പരമേശ്വരപ്രണയിനീപാദോദ്ഭവാഃ പാംസവഃ ॥ 3 ॥
കാമാഡംബരപൂരയാ ശശിരുചാ കംരസ്മിതാനാം ത്വിഷാ
കാമാരേരനുരാഗസിന്ധുമധികം കല്ലോലിതം തന്വതീ ।
കാമാക്ഷീതി സമസ്തസജ്ജനനുതാ കല്യാണദാത്രീ നൃണാം
കാരുണ്യാകുലമാനസാ ഭഗവതീ കമ്പാതടേ ജൃംഭതേ ॥ 4 ॥
കാമാക്ഷീണപരാക്രമപ്രകടനം സംഭാവയന്തീ ദൃശാ
ശ്യാമാ ക്ഷീരസഹോദരസ്മിതരുചിപ്രക്ഷാലിതാശാന്തരാ ।
കാമാക്ഷീജനമൌലിഭൂഷണമണിര്‍വാചാം പരാ ദേവതാ
കാമാക്ഷീതി വിഭാതി കാപി കരുണാ കമ്പാതടിന്യാസ്തടേ ॥ 5 ॥
ശ്യാമാ കാചന ചന്ദ്രികാ ത്രിഭുവനേ പുണ്യാത്മനാമാനനേ
സീമാശൂന്യകവിത്വവര്‍ഷജനനീ യാ കാപി കാദംബിനീ ।
മാരാരാതിമനോവിമോഹനവിധൌ കാചിതത്തമഃകന്ദലീ
കാമാക്ഷ്യാഃ കരുണാകടാക്ഷലഹരീ കാമായ മേ കല്‍പതാം ॥ 6 ॥
പ്രൌഢധ്വാന്തകദംബകേ കുമുദിനീപുണ്യാംകുരം ദര്‍ശയന്‍
ജ്യോത്സ്നാസംഗമനേഽപി കോകമിഥുനം മിശ്രം സമുദ്ഭാവയന്‍ ।
കാലിന്ദീലഹരീദശാം പ്രകടയന്‍കംരാം നഭസ്യദ്ഭുതാം
കശ്ചിന്നേത്രമഹോത്സവോ വിജയതേ കാഞ്ചീപുരേ ശൂലിനഃ ॥ 7 ॥
തന്ദ്രാഹീനതമാലനീലസുഷമൈസ്താരുണ്യലീലാഗൃഹൈഃ
താരാനാഥകിശോരലാഞ്ഛിതകചൈസ്താംരാരവിന്ദേക്ഷണൈഃ ।
മാതഃ സംശ്രയതാം മനോ മനസിജപ്രാഗല്‍ഭ്യനാഡിന്ധമൈഃ
കമ്പാതീരചരൈര്‍ഘനസ്തനഭരൈഃ പുണ്യാങ്കരൈഃ ശാംകരൈഃ ॥ 8 ॥
നിത്യം നിശ്ചലതാമുപേത്യ മരുതാം രക്ഷാവിധിം പുഷ്ണതീ
തേജസ്സംചയപാടവേന കിരണാനുഷ്ണദ്യുതേര്‍മുഷ്ണതീ ।
കാഞ്ചീമധ്യഗതാപി ദീപ്തിജനനീ വിശ്വാന്തരേ ജൃംഭതേ
കാചിച്ചിത്രമഹോ സ്മൃതാപി തമസാം നിര്‍വാപികാ ദീപികാ ॥ 9 ॥
കാന്തൈഃ കേശരുചാം ചയൈര്‍ഭ്രമരിതം മന്ദസ്മിതൈഃ പുഷ്പിതം
കാന്ത്യാ പല്ലവിതം പദാംബുരുഹയോര്‍നേത്രത്വിഷാ പത്രിതം ।
കമ്പാതീരവനാന്തരം വിദധതീ കല്യാണജന്‍മസ്ഥലീ
കാഞ്ചീമധ്യമഹാമണിര്‍വിജയതേ കാചിത്കൃപാകന്ദലീ ॥ 10 ॥
രാകാചന്ദ്രസമാനകാന്തിവദനാ നാകാധിരാജസ്തുതാ
മൂകാനാമപി കുര്‍വതീ സുരധുനീനീകാശവാഗ്വൈഭവം ।
ശ്രീകാഞ്ചീനഗരീവിഹാരരസികാ ശോകാപഹന്ത്രീ സതാം
ഏകാ പുണ്യപരമ്പരാ പശുപതേരാകാരിണീ രാജതേ ॥ 11 ॥
ജാതാ ശീതലശൈലതഃ സുകൃതിനാം ദൃശ്യാ പരം ദേഹിനാം
ലോകാനാം ക്ഷണമാത്രസംസ്മരണതഃ സന്താപവിച്ഛേദിനീ ।
ആശ്ചര്യം ബഹു ഖേലനം വിതനുതേ നൈശ്ചല്യമാബിഭ്രതീ
കമ്പായാസ്തടസീംനി കാപി തടിനീ കാരുണ്യപാഥോമയീ ॥ 12 ॥
ഐക്യം യേന വിരച്യതേ ഹരതനൌ ദംഭാവപുംഭാവുകേ
രേഖാ യത്കചസീംനി ശേഖരദശാം നൈശാകരീ ഗാഹതേ ।
ഔന്നത്യം മുഹുരേതി യേന സ മഹാന്‍മേനാസഖഃ സാനുമാന്‍
കമ്പാതീരവിഹാരിണാ സശരണാസ്തേനൈവ ധാംനാ വയം ॥ 13 ॥
അക്ഷ്ണോശ്ച സ്തനയോഃ ശ്രിയാ ശ്രവണയോര്‍ബാഹ്വോശ്ച മൂലം സ്പൃശന്‍
ഉത്തംസേന മുഖേന ച പ്രതിദിനം ദ്രുഹ്യന്‍പയോജന്‍മനേ ।
മാധുര്യേണ ഗിരാം ഗതേന മൃദുനാ ഹംസാങ്ഗനാം ഹ്രേപയന്‍
കാഞ്ചീസീംനി ചകാസ്തി കോഽപി കവിതാസന്താനബീജാങ്കുരഃ ॥ 14 ॥
ഖണ്ഡം ചാന്ദ്രമസം വതംസമനിശം കാഞ്ചീപുരേ ഖേലനം
കാലായശ്ഛവിതസ്കരീം തനുരുചിം കര്‍ണജപേ ലോചനേ ।
താരുണ്യോഷ്മനഖമ്പചം സ്തനഭരം ജങ്ഘാസ്പൃശം കുന്തലം
ഭാഗ്യം ദേശികസംചിതം മമ കദാ സമ്പാദയേദംബികേ ॥ 15 ॥
തന്വാനം നിജകേലിസൌധസരണിം നൈസര്‍ഗികീണാം ഗിരാം
കേദാരം കവിമല്ലസൂക്തിലഹരീസസ്യശ്രിയാം ശാശ്വതം ।
അംഹോവഞ്ചനചുഞ്ചു കിംചന ഭജേ കാഞ്ചീപുരീമണ്ഡനം
പര്യായച്ഛവി പാകശാസനമണേഃ പൌഷ്പേഷവം പൌരുഷം ॥ 16 ॥
ആലോകേ മുഖപങ്കജേ ച ദധതീ സൌധാകരീം ചാതുരീം
ചൂഡാലംക്രിയമാണപങ്കജവനീവൈരാഗമപ്രക്രിയാ ।
മുഗ്ധസ്മേരമുഖീ ഘന്‍സതനതടീമൂര്‍ച്ഛാലമധ്യാഞ്ചിതാ
കാഞ്ചീസീമനി കാമിനീ വിജയതേ കാചിജ്ജഗന്‍മോഹിനീ ॥ 17 ॥
യസ്മിന്നംബ ഭവത്കടാക്ഷരജനീ മന്ദേഽപി മന്ദസ്മിത-
ജ്യോത്സ്നാസംസ്നപിതാ ഭവത്യഭിമുഖീ തം പ്രത്യഹോ ദേഹിനം ।
ദ്രക്ഷാമാക്ഷികമാധുരീമദഭരവ്രീഡാകരീ വൈഖരീ
കാമാക്ഷി സ്വയമാതനോത്യഭിസൃതിം വാമേക്ഷണേവ ക്ഷണം ॥ 18 ॥
കാലിന്ദീജലകാന്തയഃ സ്മിതരുചിസ്വര്‍വാഹിനീപാഥസി
പ്രൌഢധ്വാന്തരുചഃ സ്ഫുടാധരമഹോലൌഹിത്യസന്ധ്യോദയേ ।
മണിക്യോപലകുണ്ഡലാംശുശിഖിനി വ്യാമിശ്രധൂമശ്രിയഃ
കല്യാണൈകഭുവഃ കടാക്ഷസുഷമാഃ കാമാക്ഷി രാജന്തി തേ ॥ 19 ॥
കലകലരണത്കാഞ്ചീ കാഞ്ചീവിഭൂഷണമാലികാ
കചഭരലസച്ചന്ദ്രാ ചന്ദ്രാവതംസസധര്‍മിണീ ।
കവികുലഗിര്‍ഃ ശ്രാവംശ്രാവം മിലത്പുലകാംകുരാ
വിരചിതശിരഃകമ്പാ കമ്പാതടേ പരിശോഭതേ ॥ 20 ॥
സരസവചസാം വീചീ നീചീഭവന്‍മധുമാധുരീ
ഭരിതഭുവനാ കീര്‍തിര്‍മൂര്‍തിര്‍മനോഭവജിത്വരീ ।
ജനനി മനസോ യോഗ്യം ഭോഗ്യം നൃണാം തവ ജായതേ
കഥമിവ വിനാ കാഞ്ചീഭൂഷേ കടാക്ഷതരങ്ഗിതം ॥ 21 ॥
ഭ്രമരിതസരിത്കൂലോ നീലോത്പലപ്രഭയാഽഽഭയാ
നതജനതമഃഖണ്ഡീ തുണ്ഡീരസീംനി വിജൃംഭതേ ।
അചലതപസാമേകഃ പാകഃ പ്രസൂനശരാസന-
പ്രതിഭടമനോഹാരീ നാരീകുലൈകശിഖാമണിഃ ॥ 22 ॥
മധുരവചസോ മന്ദസ്മേരാ മതങ്ഗജഗാമിനഃ
തരുണിമജുഷസ്താപിച്ഛാഭാസ്തമഃപരിപന്ഥിനഃ ।
കുചഭരനതാഃ കുര്യുര്‍ഭദ്രം കുരങ്ഗവിലോചനാഃ
കലിതകരുണാഃ കാഞ്ചീഭാജഃ കപാലിമഹോത്സവാഃ ॥ 23 ॥
കമലസുഷമാക്ഷ്യാരോഹേ വിചക്ഷണവീക്ഷണാഃ
കുമുദസുകൃതക്രീഡാചൂഡാലകുന്തലബന്ധുരാഃ ।
രുചിരരുചിഭിസ്താപിച്ഛശ്രീപ്രപഞ്ചനചുഞ്ചവഃ
പുരവിജയിനഃ കമ്പാതീരേ സ്ഫുരന്തി മനോരഥാഃ ॥ 24 ॥
കലിതരതയഃ കാഞ്ചീലീലാവിധൌ കവിമണ്ഡലീ-
വചനലഹരീവാസന്തീനാം വസന്തവിഭൂതയഃ ।
കുശലവിധയേ ഭൂയാസുര്‍മേ കുരങ്ഗവിലോചനാഃ
കുസുമവിശിഖാരാതേരക്ഷ്ണാം കുതൂഹലവിഭ്രമാഃ ॥ 25 ॥
കബലിതതമസ്കാണ്ഡാസ്തുണ്ഡീരമണ്ഡലമണ്ഡനാഃ
സരസിജവനീസന്താനാനാമരുന്തുദശേഖരാഃ ।
നയനസരണേര്‍നേദീയംസഃ കദാ നു ഭവന്തി മേ
തരുണജലദശ്യാമാഃ ശംഭോസ്തപഃഫലവിഭ്രമാഃ ॥ 26 ॥
അചരമമിഷും ദീനം മീനധ്വജസ്യ മുഖശ്രിയാ
സരസിജഭുവോ യാനം ംലാനം ഗതേന ച മഞ്ജുനാ ।
ത്രിദശസദസാമന്നം ഖിന്നം ഗിരാ ച വിതന്വതീ
തിലകയതി സാ കമ്പാതീരം ത്രിലോചനസുന്ദരീ ॥ 27 ॥
ജനനി ഭുവനേ ചങ്ക്രംയേഽഹം കിയന്തമനേഹസം
കുപുരുഷകരഭ്രഷ്ടൈര്‍ദുഷ്ടൈര്‍ധനൈരുദരംഭരിഃ ।
തരുണകരുണേ തന്ദ്രാശൂന്യേ തരങ്ഗയ ലോചനേ
നമതി മയി തേ കിംചിത്കാഞ്ചീപുരീമണിദീപികേ ॥ 28 ॥
മുനിജനമനഃപേടീരത്നം സ്ഫുരത്കരുണാനടീ-
വിഹരണകലാഗേഹം കാഞ്ചീപുരീമണിഭൂഷണം ।
ജഗതി മഹതോ മോഹവ്യാധേര്‍നൃണാം പരമൌഷധം
പുരഹരദൃശാം സാഫല്യം മേ പുരഃ പരിജൃംഭതാം ॥ 29 ॥
മുനിജനമോധാംനേ ധാംനേ വചോമയജാഹ്നവീ-
ഹിമഗിരിതടപ്രാഗ്ഭാരായാക്ഷരായ പരാത്മനേ ।
വിഹരണജുഷേ കാഞ്ചീദേശേ മഹേശ്വരലോചന-
ത്രിതയസരസക്രീഡാസൌധാങ്ഗണായ നമോ നമഃ ॥ 30 ॥
മരകതരുചാം പ്രത്യാദേശം മഹേശ്വരചക്ഷുഷാം
അമൃതലഹരീപൂരം പാരം ഭവാഖ്യപയോനിധേഃ ।
സുചരിതഫലം കാഞ്ചീഭാജോ ജനസ്യ പചേലിമം
ഹിമശിഖരിണോ വംശസ്യൈകം വതംസമുപാസ്മഹേ ॥ 31 ॥
പ്രണമനദിനാരംഭേ കമ്പാനദീസഖി താവകേ
സരസകവിതോന്‍മേഷഃ പൂഷാ സതാം സമുദഞ്ചിതഃ ।
പ്രതിഭടമഹാപ്രൌഢപ്രോദ്യത്കവിത്വകുമുദ്വതീം
നയതി തരസാ നിദ്രാമുദ്രാം നഗേശ്വരകന്യകേ ॥ 32 ॥
ശമിതജഡിമാരംഭാ കമ്പാതടീനികടേചരീ
നിഹതദുരിതസ്തോമാ സോമാര്‍ധമുദ്രിതകുന്തലാ ।
ഫലിതസുമനോവാഞ്ഛാ പാഞ്ചായുധീ പരദേവതാ
സഫലയതു മേ നേത്രേ ഗോത്രേശ്വരപ്രിയനന്ദിനീ ॥ 33 ॥
മമ തു ധിഷണാ പീഡ്യാ ജാഡ്യാതിരേക കഥം ത്വയാ
കുമുദസുഷമാമൈത്രീപാത്രീവതംസിതകുന്തലാം ।
ജഗതി ശമിതസ്തംഭാം കമ്പാനദീനിലയാമസൌ
ശ്രിയതി ഹി ഗലത്തന്ദ്രാ ചന്ദ്രാവതംസസധര്‍മിണീം ॥ 34 ॥
പരിമലപരീപാകോദ്രേകം പയോമുചി കാഞ്ചനേ
ശിഖരിണി പുനര്‍ദ്ബൈധീഭാവം ശശിന്യരുണാതപം ।
അപി ച ജനയന്‍കംബോര്ലക്ഷ്മീമനംബുനി കോഽപ്യസൌ
കുസുമധനുഷഃ കാഞ്ചീദേശേ ചകാസ്തി പരാക്രമഃ ॥ 35 ॥
പുരദമയിതുര്‍വാമോത്സങ്ഗസ്ഥലേന രസജ്ഞയാ
സരസകവിതാഭാജാ കാഞ്ചീപുരോദരസീമയാ ।
തടപരിസരൈര്‍നീഹാരാദ്രേര്‍വചോഭിരകൃത്രിമൈഃ
കിമിവ ന തുലാമസ്മച്ചേതോ മഹേശ്വരി ഗാഹതേ ॥ 36 ॥
നയനയുഗലീമാസ്മാകീനാം കദാ നു ഫലേഗ്രഹീം
വിദധതി ഗതൌ വ്യാകുര്‍വാണാ ഗജേന്ദ്രചമത്ക്രിയാം ।
മരതകരുചോ മാഹേശാനാ ഘനസ്തനനംരിതാഃ
സുകൃതവിഭവാഃ പ്രാഞ്ചഃ കാഞ്ചീവതംസധുരന്ധരാഃ ॥ 37 ॥
മനസിജയശഃപാരമ്പര്യം മരന്ദഝരീസുവാം
കവികുലഗിരാം കന്ദം കമ്പാനദീതടമണ്ഡനം ।
മധുരലലിതം മത്കം ചക്ഷുര്‍മനീഷിമനോഹരം
പുരവിജയിനഃ സര്‍വസ്വം തത്പുരസ്കുരുതേ കദാ ॥ 38 ॥
ശിഥിലിതതമോലീലാം നീലാരവിന്ദവിലോചനാം
ദഹനവിലസത്ഫാലാം ശ്രീകാമകോടിമുപാസ്മഹേ ।
കരധൃതസച്ഛൂലാം കാലാരിചിത്തഹരാം പരാം
മനസിജകൃപാലീലാം ലോലാലകാമലികേക്ഷണാം ॥ 39 ॥
കലാലീലാശാലാ കവികുലവചഃകൈരവവനീ-
ശരജ്ജ്യോത്സ്നാധാരാ ശശധരശിശുശ്ലാഘ്യമുകുടീ ।
പുനീതേ നഃ കമ്പാപുലിനതടസൌഹാര്‍ദതരലാ
കദാ ചക്ഷുര്‍മാര്‍ഗം കനകഗിരിധാനുഷ്കമഹിഷീ ॥ 40 ॥
നമഃ സ്താന്നംരേഭ്യഃ സ്തനഗരിമഗര്‍വേണ ഗുരുണാ
ദധാനേഭ്യശ്ചൂഡാഭരണമമൃതസ്യന്ദി ശിശിരം ।
സദാ വാസ്തവേഭ്യഃ സുവിധഭുവി കമ്പാഖ്യസരിതേ
യശോവ്യാപാരേഭ്യഃ സുകൃതവിഭവേഭ്യോ രതിപതേഃ ॥ 41 ॥
അസൂയന്തീ കാചിന്‍മരകതരുചോ നാകിമുകുടീ-
കദംബം ചുംബന്തീ ചരണനഖചന്ദ്രാംശുപടലൈഃ ।
തമോമുദ്രാം വിദ്രാവയതു മമ കാഞ്ചീര്‍നിലയനാ
ഹരോത്സങ്ഗശ്രീമന്‍മണിഗൃഹമഹാദീപകലികാ ॥ 42 ॥
അനാദ്യന്താ കാചിത്സുജനനയനാനന്ദജനനീ
നിരുന്ധാനാ കാന്തിം നിജരുചിവിലാസൈര്‍ജലമുചാം ।
സ്മരാരേസ്താരല്യം മനസി ജനയന്തീ സ്വയമഹോ
ഗലത്കമ്പാ ശമ്പാ പരിലസതി കമ്പാപരിസരേ ॥ 43 ॥
സുധാഡിണ്ഡീരശ്രീഃ സ്മിതരുചിഷു തുണ്ഡീരവിഷയം
പരിഷ്കുര്‍വാണാസൌ പരിഹസിതനീലോത്പലരുചിഃ ।
സ്തനാഭ്യാമാനംരാ സ്തബകയതു മേ കാങ്ക്ഷിതതരും
ദൃശാമൈശാനീനാം സുകൃതഫലപാണ്ഡിത്യഗരിമാ ॥ 44 ॥
കൃപാധാരാദ്രോണീ കൃപണധിഷണാനാം പ്രണമതാം
നിഹന്ത്രീ സന്താപം നിഗമമുകുടോത്തംസകലികാ ।
പരാ കാഞ്ചീലീലാപരിചയവതീ പര്‍വതസുതാ
ഗിരാം നീവീ ദേവീ ഗിരിശപരതന്ത്രാ വിജയതേ ॥ 45 ॥
കവിത്വശ്രീകന്ദഃ സുകൃതപരിപാടീ ഹിമഗിരേഃ
വിധാത്രീ വിശ്വേഷാം വിഷമശരവീരധ്വജപടീ ।
സഖീ കമ്പാനദ്യാഃ പദഹസിതപാഥോജയുഗലീ
പുരാണോ പായാന്നഃ പുരമഥനസാംരാജ്യപദവീ ॥ 46 ॥
ദരിദ്രാണാ മധ്യേ ദരദലിതതാപിച്ഛസുഷമാഃ
സ്തനാഭോഗക്കാന്താസ്തരുണഹരിണാങ്കാങ്കിതകചാഃ ।
ഹരാധീനാ നാനാവിബുധമുകുടീചുംബിതപദാഃ
കദാ കമ്പാതീരേ കഥയ വിഹരാമോ ഗിരിസുതേ ॥ 47 ॥
വരീവര്‍തു സ്ഥേമാ ത്വയി മമ ഗിരാം ദേവി മനസോ
നരീനര്‍തു പ്രൌഢാ വദനകമലേ വാക്യലഹരീ ।
ചരീചര്‍തു പ്രജ്ഞാജനനി ജഡിമാനഃ പരജനേ
സരീസര്‍തു സ്വൈരം ജനനി മയി കാമാക്ഷി കരുണാ ॥ 48 ॥
ക്ഷണാത്തേ കാമാക്ഷി ഭ്രമരസുഷമാശിക്ഷണഗുരുഃ
കടാക്ഷവ്യാക്ഷേപോ മമ ഭവതു മോക്ഷായ വിപദാം ।
നരീനര്‍തു സ്വൈരം വചനലഹരീ നിര്‍ജരപുരീ-
സരിദ്വീചീനീചീകരണപടുരാസ്യേ മമ സദാ ॥ 49 ॥
പുരസ്താന്‍മേ ഭൂയഃപ്രശമനപരഃ സ്താന്‍മമ രുജാം
പ്രചാരസ്തേ കമ്പാതടവിഹൃതിസമ്പാദിനി ദൃശോഃ ।
ഇമാം യാച്ഞാമൂരീകുരു സപദി ദൂരീകുരു തമഃ-
പരീപാകം മത്കം സപദി ബുധലോകം ച നയ മാം ॥ 50 ॥
ഉദഞ്ചന്തീ കാഞ്ചീനഗരനിലയേ ത്വത്കരുണയാ
സമൃദ്ധാ വാഗ്ധാടീ പരിഹസിതമാധ്വീ കവയതാം ।
ഉപാദത്തേ മാരപ്രതിഭടജടാജൂടമുകുടീ-
കുടീരോല്ലാസിന്യാഃ ശതമഖതടിന്യാ ജയപടീം ॥ 51 ॥
ശ്രിയം വിദ്യാം ദദ്യാജ്ജനനി നമതാം കീര്‍തിമമിതാം
സുപുത്രാന്‍ പ്രാദത്തേ തവ ഝടിതി കാമാക്ഷി കരുണാ ।
ത്രിലോക്യാമാധിക്യം ത്രിപുരപരിപന്ഥിപ്രണയിനി
പ്രണാമസ്ത്വത്പാദേ ശമിതദുരിതേ കിം ന കുരുതേ ॥ 52 ॥
മനഃസ്തംഭം സ്തംഭം ഗമയദുപകമ്പം പ്രണമതാം
സദാ ലോലം നീലം ചികുരജിതലോലംബനികരം ।
ഗിരാം ദൂരം സ്മേരം ധൃതശശികിശോരം പശുപതേഃ
ദൃശാം യോഗ്യം ഭോഗ്യം തുഹിനഗിരിഭാഗ്യം വിജയതേ ॥ 53 ॥
ഘനശ്യാമാന്‍കാമാന്തകമഹിഷി കാമാക്ഷി മധുരാന്‍
ദൃശാം പാതാനേതാനമൃതജലശീതാനനുപമാന്‍ ।
ഭവോത്പാതേ ഭീതേ മയി വിതര നാഥേ ദൃഢഭവ-
ന്‍മനശ്ശോകേ മൂകേ ഹിമഗിരിപതാകേ കരുണയാ ॥ 54 ॥
നതാനാം മന്ദാനാം ഭവനിഗലബന്ധാകുലധിയാം
മഹാന്ധ്യാം രുന്ധാനാമഭിലഷിതസന്താനലതികാം ।
ചരന്തീം കമ്പായാസ്തടഭുവി സവിത്രീം ത്രിജഗതാം
സ്മരാമസ്താം നിത്യം സ്മരമഥനജീവാതുകലികാം ॥ 55 ॥
പരാ വിദ്യാ ഹൃദ്യാശ്രിതമദനവിദ്യാ മരകത-
പ്രഭാനീലാ ലീലാപരവശിതശൂലായുധമനാഃ ।
തമഃപൂരം ദൂരം ചരണനതപൌരന്ദരപുരീ-
മൃഗാക്ഷീ കാമാക്ഷീ കമലതരലാക്ഷീ നയതു മേ ॥ 56 ॥
അഹന്താഖ്യാ മത്കം കബലയതി ഹാ ഹന്ത ഹരിണീ
ഹഠാത്സംവിദ്രൂപം ഹരമഹിഷി സസ്യാങ്കുരമസൌ ।
കടാക്ഷവ്യാക്ഷേപപ്രകടഹരിപാഷാണപടലൈഃ
ഇമാമുച്ചൈരുച്ചാടയ ഝടിതി കാമാക്ഷി കൃപയാ ॥ 57 ॥
ബുധേ വാ മൂകേ വാ തവ പതതി യസ്മിന്‍ക്ഷണമസൌ
കടാക്ഷഃ കാമാക്ഷി പ്രകടജഡിമക്ഷോദപടിമാ ।
കഥംകാരം നാസ്മൈ കരമുകുലചൂഡാലമുകുടാ
നമോവാകം ബ്രൂയുര്‍നമുചിപരിപന്ഥിപ്രഭൃതയഃ ॥ 58 ॥
പ്രതീചീം പശ്യാമഃ പ്രകടരുചിനീവാരകമണി-
പ്രഭാസധ്രീചീനാം പ്രദലിതഷഡാധാരകമലാം ।
ചരന്തീം സൌഷുംനേ പഥി പരപദേന്ദുപ്രവിഗല-
ത്സുധാര്‍ദ്രാം കാമാക്ഷീം പരിണതപരംജ്യോതിരുദയാം ॥ 59 ॥
ജംഭാരാതിപ്രഭൃതിമുകുടീഃ പാദയോഃ പീഠയന്തീ
ഗുംഫാന്വാചാം കവിജനകൃതാന്‍സ്വൈരമാരാമയന്തീ ।
ശമ്പാലക്ഷ്മീം മണിഗണരുചാപാടലൈഃ പ്രാപയന്തീ
കമ്പാതീരേ കവിപരിഷദാം ജൃംഭതേ ഭാഗ്യസീമാ ॥ 60 ॥
ചന്ദ്രാപീഡാം ചതുരവദനാം ചഞ്ചലാപാങ്ഗലീലാം
കുന്ദസ്മേരാം കുചഭരനതാം കുന്തലോദ്ധൂതഭൃങ്ഗാം ।
മാരാരാതേര്‍മദനശിഖിനം മാംസലം ദീപയന്തീം
കാമാക്ഷീം താം കവികുലഗിരാം കല്‍പവല്ലീമുപാസേ ॥ 61 ॥
കാലാംഭോദപ്രകരസുഷമാം കാന്തിഭിസ്തിര്‍ജയന്തീ
കല്യാണാനാമുദയസരണിഃ കല്‍പവല്ലീ കവീനാം ।
കന്ദര്‍പാരേഃ പ്രിയസഹചരീ കല്‍മഷാണാം നിഹന്ത്രീ
കാഞ്ചീദേശം തിലകയതി സാ കാപി കാരുണ്യസീമാ ॥ 62 ॥
ഊരീകുര്‍വന്നുരസിജതടേ ചാതുരീം ഭൂധരാണാം
പാഥോജാനാം നയനയുഗലേ പരിപന്ഥ്യം വിതന്വന്‍ ।
കമ്പാതീരേ വിഹരതി രുചാ മോഘയന്‍മേഘശൈലീം
കോകദ്വേഷം ശിരസി കലയന്‍കോഽപി വിദ്യാവിശേഷഃ ॥ 63 ॥
കാഞ്ചീലീലാപരിചയവതീ കാപി താപിച്ഛലക്ഷ്മീഃ
ജാഡ്യാരണ്യേ ഹുതവഹശിഖാ ജന്‍മഭൂമിഃ കൃപായാഃ ।
മാകന്ദശ്രീര്‍മധുരകവിതാചാതുരീ കോകിലാനാം
മാര്‍ഗേ ഭൂയാന്‍മമ നയനയോര്‍മാന്‍മഥീ കാപി വിദ്യാ ॥ 64 ॥
സേതുര്‍മാതര്‍മരതകമയോ ഭക്തിഭാജാം ഭവാബ്ധൌ
ലീലാലോലാ കുവലയമയീ മാന്‍മഥീ വൈജയന്തീ ।
കാഞ്ചീഭൂഷാ പശുപതിദൃശാം കാപി കാലാഞ്ജനാലീ
മത്കം ദുഃഖം ശിഥിലയതു തേ മഞ്ജുലാപാങ്ഗമാലാ ॥ 65 ॥
വ്യാവൃണ്വാനാഃ കുവലയദലപ്രക്രിയാവൈരമുദ്രാം
വ്യാകുര്‍വാണാ മനസിജമഹാരാജസാംരാജ്യലക്ഷ്മീം ।
കാഞ്ചീലീലാവിഹൃതിരസികേ കാങ്ക്ഷിതം നഃ ക്രിയാസുഃ
ബന്ധച്ഛേദേ തവ നിയമിനാം ബദ്ധദീക്ഷാഃ കടാക്ഷാഃ ॥ 66 ॥
കാലാംഭോദേ ശശിരുചി ദലം കൈതകം ദര്‍ശയന്തീ
മധ്യേസൌദാമിനി മധുലിഹാം മാലികാം രാജയന്തീ ।
ഹംസാരാവം വികചകമലേ മഞ്ജുമുല്ലാസയന്തീ
കമ്പാതീരേ വിലസതി നവാ കാപി കാരുണ്യലക്ഷ്മീഃ ॥ 67 ॥
ചിത്രം ചിത്രം നിജമൃദുതയാ ഭര്‍ത്സയന്‍പല്ലവാലീം
പുംസാം കാമാന്‍ഭുവി ച നിയതം പൂരയന്‍പുണ്യഭാജാം ।
ജാതഃ ശൈലാന്ന തു ജലനിധേഃ സ്വൈരസംചാരശീലഃ
കാഞ്ചീഭൂഷാ കലയതു ശിവം കോഽപി ചിന്താമണിര്‍മേ ॥ 68 ॥
താംരാംഭോജം ജലദനികടേ തത്ര ബന്ധൂകപുഷ്പം
തസ്മിന്‍മല്ലീകുസുമസുഷമാം തത്ര വീണാനിനാദം ।
വ്യാവൃന്വാനാ സുകൃതലഹരീ കാപി കാഞ്ചിനഗര്യാം
ഐശാനീ സാ കലയതിതരാമൈന്ദ്രജാലം വിലാസം ॥ 69 ॥
ആഹാരാംശം ത്രിദശസദസാമാശ്രയേ ചാതകാനാം
ആകാശോപര്യപി ച കലയന്നാലയം തുങ്ഗമേഷാം ।
കമ്പാതീരേ വിഹരതിതരാം കാമധേനുഃ കവീനാം
മന്ദസ്മേരോ മദനനിഗമപ്രക്രിയാസമ്പ്രദായഃ ॥ 70 ॥
ആര്‍ദ്രീഭൂതൈരവിരലകൃപൈരാത്തലീലാവിലാസൈഃ
ആസ്ഥാപൂര്‍ണൈരധികചപലൈരഞ്ചിതാംഭോജശില്‍പൈഃ ।
കാന്തൈര്ലക്ഷ്മീലലിതഭവനൈഃ കാന്തികൈവല്യസാരൈഃ
കാശ്മല്യം നഃ കബലയതു സാ കാമകോടീ കടാക്ഷൈഃ ॥ 71 ॥
ആധൂന്വന്ത്യൈ തരലനയനൈരാങ്ഗജീം വൈജയന്തീം
ആനന്ദിന്യൈ നിജപദജുഷാമാത്തകാഞ്ചീപുരായൈ ।
ആസ്മാകീനം ഹൃദയമഖിലൈരാഗമാനാം പ്രപഞ്ചൈഃ
ആരാധ്യായൈ സ്പൃഹയതിതരാമദിമായൈ ജനന്യൈ ॥ 72 ॥
ദൂരം വാചാം ത്രിദശസദസാം ദുഃഖസിന്ധോസ്തരിത്രം
മോഹക്ഷ്വേലക്ഷിതിരുഹവനേ ക്രൂരധാരം കുഠാരം ।
കമ്പാതീരപ്രണയി കവിഭിര്‍വര്‍ണിതോദ്യച്ചരിത്രം
ശാന്ത്യൈ സേവേ സകലവിപദാം ശാംകരം തത്കലത്രം ॥ 73 ॥
ഖണ്ഡീകൃത്യ പ്രകൃതികുടിലം കല്‍മഷം പ്രാതിഭശ്രീ-
ശുണ്ഡീരത്വം നിജപദജുഷാം ശൂന്യതന്ദ്രം ദിശന്തീ ।
തുണ്ഡീരാഖ്യൈ മഹതി വിഷയേ സ്വര്‍ണവൃഷ്ടിപ്രദാത്രീ
ചണ്ഡീ ദേവീ കലയതി രതിം ചന്ദ്രചൂഡാലചൂഡേ ॥ 74 ॥
യേന ഖ്യാതോ ഭവതി സ ഗൃഹീ പൂരുഷോ മേരുധന്വാ
യദ്ദൃക്കോണേ മദനനിഗമപ്രാഭവം ബോഭവീതി ।
യത്പ്രീത്യൈവ ത്രിജഗദധിപോ ജൃംഭതേ കിമ്പചാനഃ
കമ്പാതീരേ സ ജയതി മഹാന്‍കശ്ചിദോജോവിശേഷഃ ॥ 75 ॥
ധന്യാ ധന്യാ ഗതിരിഹ ഗിരാം ദേവി കാമാക്ഷി യന്‍മേ
നിന്ദ്യാം ഭിന്ദ്യാത്സപദി ജഡതാം കല്‍മഷാദുന്‍മിഷന്തീം ।
സാധ്വീ മാധ്വീരസമധുരതാഭഞ്ജിനീ മഞ്ജുരീതിഃ
വാണീവേണീ ഝടിതി വൃണുതാത്സ്വര്‍ധുനീസ്പര്‍ധിനീ മാം ॥ 76 ॥
യസ്യാ വാടീ ഹൃദയകമലം കൌസുമീ യോഗഭാജാം
യസ്യാഃ പീഠീ സതതശിശിരാ ശീകരൈര്‍മാകരന്ദൈഃ ।
യസ്യാഃ പേടീ ശ്രുതിപരിചലന്‍മൌലിരത്നസ്യ കാഞ്ചീ
സാ മേ സോമാഭരണമഹിഷീ സാധയേത്കാങ്ക്ഷിതാനി ॥ 77 ॥
ഏകാ മാതാ സകലജഗതാമീയുഷീ ധ്യാനമുദ്രാം
ഏകാംരാധീശ്വരചരണയോരേകതാനാം സമിന്ധേ ।
താടങ്കോദ്യന്‍മണിഗണരുചാ താംരകര്‍ണപ്രദേശാ
താരുണ്യശ്രീസ്തബകിതതനുസ്താപസീ കാപി ബാലാ ॥ 78 ॥
ദന്താദന്തിപ്രകടനകരീ ദന്തിഭിര്‍മന്ദയാനൈഃ
മന്ദാരാണാം മദപരിണതിം മഥ്നതീ മന്ദഹാസൈഃ ।
അങ്കൂരാഭ്യാം മനസിജതരോരങ്കിതോരാഃ കുചാഭ്യാ-
മന്തഃകാഞ്ചി സ്ഫുരതി ജഗതാമാദിമാ കാപി മാതാ ॥ 79 ॥
ത്രിയംബകകുടുംബിനീം ത്രിപുരസുന്ദരീമിന്ദിരാം
പുലിന്ദപതിസുന്ദരീം ത്രിപുരഭൈരവീം ഭാരതീം ।
മതങ്ഗകുലനായികാം മഹിഷമര്‍ദനീം മാതൃകാം
ഭണന്തി വിബുധോത്തമാ വിഹൃതിമേവ കാമാക്ഷി തേ ॥ 80 ॥
മഹാമുനിമനോനടീ മഹിതരംയകമ്പാതടീ-
കുടീരകവിഹാരിണീ കുടിലബോധസംഹാരിണീ ।
സദാ ഭവതു കാമിനീ സകലദേഹിനാം സ്വാമിനീ
കൃപാതിശയകിംകരീ മമ വിഭൂതയേ ശാംകരീ ॥ 81 ॥
ജഡാഃ പ്രകൃതിനിര്‍ധനാ ജനവിലോചനാരുന്തുദാ
നരാ ജനനി വീക്ഷണം ക്ഷണമവാപ്യ കാമാക്ഷി തേ ।
വചസ്സു മധുമാധുരീം പ്രകടയന്തി പൌരന്ദരീ-
വിഭൂതിഷു വിഡംബനാം വപുഷി മാന്‍മഥീം പ്രക്രിയാം ॥ 82 ॥
ഘന്‍സതനതടസ്ഫുടസ്ഫുരിതകഞ്ചുലീചഞ്ചലീ-
കൃതത്രിപുരശാസനാ സുജനശീലിതോപാസനാ ।
ദൃശോഃ സരണിമശ്നുതേ മമ കദാ നു കാഞ്ചീപുരേ
പരാ പരമയോഗിനാം മനസി ചിത്കുലാ പുഷ്കലാ ॥ 83 ॥
കവീന്ദ്രഹൃദയേചരീ പരിഗൃഹീതകാഞ്ചീപുരീ
നിരൂഢകരുണാഝരീ നിഖിലലോകരക്ഷാകരീ ।
മനഃപഥദവീയസീ മദനശാസനപ്രേയസീ
മഹാഗുണഗരീയസീ മമ ദൃശോഽസ്തു നേദീയസീ ॥ 84 ॥
ധനേന ന രമാമഹേ ഖലജനാന്ന സേവാമഹേ
ന ചാപലമയാമഹേ ഭവഭയാന്ന ദൂയാമഹേ ।
സ്ഥിരാം തനുമഹേതരാം മനസി കിം ച കാഞ്ചീരത-
സ്മരാന്തകകുടുംബിനീചരണപല്ലവോപാസനാം ॥ 85 ॥
സുരാഃ പരിജനാ വപുര്‍മനസിജായ വൈരായതേ
ത്രിവിഷ്ടപനിതംബിനീകുചതടീ ച കേലീഗിരിഃ ।
ഗിരഃ സുരഭയോ വയസ്തരുണിമാ ദരിദ്രസ്യ വാ
കടാക്ഷസരണൌ ക്ഷണം നിപതിതസ്യ കാമാക്ഷി തേ ॥ 86 ॥
പവിത്രയ ജഗത്ത്രയീവിബുധബോധജീവാതുഭിഃ
പുരത്രയവിമര്‍ദിനഃ പുലകകഞ്ചുലീദായിഭിഃ ।
ഭവക്ഷയവിചക്ഷണൈര്‍വ്യസനമോക്ഷണൈര്‍വീക്ഷണൈഃ
നിരക്ഷരശിരോമണിം കരുണയൈവ കാമാക്ഷി മാം ॥ 87 ॥
കദാ കലിതഖേലനാഃ കരുണയൈവ കാഞ്ചീപുരേ
കലായമുകുലത്വിഷഃ ശുഭകദംബപൂര്‍ണാങ്കുരാഃ ।
പയോധരഭരാലസാഃ കവിജനേഷു തേ ബന്ധുരാഃ
പചേലിമകൃപാരസാ പരിപതന്തി മാര്‍ഗേ ദൃശോഃ ॥ 88 ॥
അശോധ്യമചലോദ്ഭവം ഹൃദയനന്ദനം ദേഹിനാം
അനര്‍ഘമധികാഞ്ചി തത്കിമപി രത്നമുദ്ദ്യോതതേ ।
അനേന സമലംകൃതാ ജയതി ശങ്കരാങ്കസ്ഥലീ
കദാസ്യ മമ മാനസം വ്രജതി പേടികാവിഭ്രമം ॥ 89 ॥
പരാമൃതഝരീപ്ലുതാ ജയതി നിത്യമന്തശ്ചരീ
ഭുവാമപി ബഹിശ്ചരീ പരമസംവിദേകാത്മികാ ।
മഹദ്ഭിരപരോക്ഷിതാ സതതമേവ കാഞ്ചീപുരേ
മമാന്വഹമഹമ്മതിര്‍മനസി ഭാതു മാഹേശ്വരീ ॥ 90 ॥
തമോവിപിനധാവിനം സതതമേവ കാഞ്ചീപുരേ
വിഹാരരസികാ പരാ പരമസംവിദുര്‍വീരുഹേ ।
കടാക്ഷനിഗലൈര്‍ദൃഢം ഹൃദയദുഷ്ടദന്താവലം
ചിരം നയതു മാമകം ത്രിപുരവൈരിസീമന്തിനീ ॥ 91 ॥
ത്വമേവ സതി ചണ്ഡികാ ത്വമസി ദേവി ചാമുണ്ഡികാ
ത്വമേവ പരമാതൃകാ ത്വമപി യോഗിനീരൂപിണീ ।
ത്വമേവ കില ശാംഭവീ ത്വമസി കാമകോടീ ജയാ
ത്വമേവ വിജയാ ത്വയി ത്രിജഗദംബ കിം ബ്രൂമഹേ ॥ 92 ॥
പരേ ജനനി പാര്‍വതി പ്രണതപാലിനി പ്രാതിഭ-
പ്രദാത്രി പരമേശ്വരി ത്രിജഗദാശ്രിതേ ശാശ്വതേ ।
ത്രിയംബകകുടുംബിനി ത്രിപദസങ്ഗിനി ത്രീക്ഷണേ
ത്രിശക്തിമയി വീക്ഷണം മയി നിധേഹി കാമാക്ഷി തേ ॥ 93 ॥
മനോമധുകരോത്സവം വിദധതീ മനീഷാജുഷാം
സ്വയമ്പ്രഭവവൈഖരീവിപിനവീഥികാലംബിനീ ।
അഹോ ശിശിരിതാ കൃപാമധുരസേന കമ്പാതടേ
ചരാചരവിധായിനീ ചലതി കാപി ചിന്‍മഞ്ജരീ ॥ 94 ॥
കലാവതി കലാഭൃതോ മുകുടസീംനി ലീലാവതി
സ്പൃഹാവതി മഹേശ്വരേ ഭുവനമോഹനേ ഭാസ്വതി ।
പ്രഭാവതി രമേ സദാ മഹിതരൂപശോഭാവതി
ത്വരാവതി പരേ സതാം ഗുരുകൃപാംബുധാരാവതി ॥ 95 ॥
ത്വയൈവ ജഗദംബയാ ഭുവനമണ്ഡലം സൂയതേ
ത്വയൈവ കരുണാര്‍ദ്രയാ തദപി രക്ഷണം നീയതേ ।
ത്വയൈവ ഖരകോപയാ നയനപാവകേ ഹൂയതേ
ത്വയൈവ കില നിത്യയാ ജഗതി സന്തതം സ്ഥീയതേ ॥ 96 ॥
ചരാചരജഗന്‍മയീം സകലഹൃന്‍മയീം ചിന്‍മയീം
ഗുണത്രയമയീം ജഗത്ത്രയമയീം ത്രിധാമാമയീം ।
പരാപരമയീം സദാ ദശദിശാം നിശാഹര്‍മയീം
പരാം സതതസന്‍മയീം മനസി ചിന്‍മയീം ശീലയേ ॥ 97 ॥
ജയ ജഗദംബികേ ഹരകുടുംബിനി വക്ത്രരുചാ
ജിതശരദംബുജേ ഘനവിഡംബിനി കേശരുചാ ।
പരമവലംബനം കുരു സദാ പരരൂപധരേ
മമ ഗതസംവിദോ ജഡിമഡംബരതാണ്ഡവിനഃ ॥ 98 ॥
ഭുവനജനനി ഭൂഷാഭൂതചന്ദ്രേ നമസ്തേ
കലുഷശമനി കമ്പാതീരഗേഹേ നമസ്തേ ।
നിഖിലനിഗമവേദ്യേ നിത്യരൂപേ നമസ്തേ
പരശിവമയി പാശച്ഛേദഹസ്തേ നമസ്തേ ॥ 99 ॥
ക്വണത്കാഞ്ചീ കാഞ്ചീപുരമണിവിപഞ്ചീലയഝരീ-
ശിരഃകമ്പാ കമ്പാവസതിരനുകമ്പാജലനിധിഃ ।
ഘനശ്യാമാ ശ്യാമാ കഠിനകുചസീമാ മനസി മേ
മൃഗാക്ഷീ കാമാക്ഷീ ഹരനടനസാക്ഷീ വിഹരതാത് ॥ 100 ॥
സമരവിജയകോടീ സാധകാനന്ദധാടീ
മൃദുഗുണപരിപേടീ മുഖ്യകാദംബവാടീ ।
മുനിനുതപരിപാടീ മോഹിതാജാണ്ഡകോടീ
പരമശിവവധൂടീ പാതു മാം കാമകോടീ ॥ 101 ॥
ഇമം പരവരപ്രദം പ്രകൃതിപേശലം പാവനം
പരാപരചിദാകൃതിപ്രകടനപ്രദീപായിതം ।
സ്തവം പഠതി നിത്യദാ മനസി ഭാവയന്നംബികാം
ജപൈരലമലം മഖൈരധികദേഹസംശോഷണൈഃ ॥ 102 ॥
സ്തുതിശതകം സമ്പൂര്‍ണം ॥
॥ കടാക്ഷശതകം ॥
മോഹാന്ധകാരനിവഹം വിനിഹന്തുമീഡേ
മൂകാത്മനാമപി മഹാകവിതാവദാന്യാന്‍ ।
ശ്രീകാഞ്ചിദേശശിശിരീകൃതിജാഗരൂകാന്‍
ഏകാംരനാഥതരുണീകരുണാവലോകാന്‍ ॥ 1 ॥
മാതര്‍ജയന്തി മമതാഗ്രഹമോക്ഷണാനി
മാഹേന്ദ്രനീലരുചിശിക്ഷണദക്ഷിണാനി ।
കാമാക്ഷി കല്‍പിതജഗത്ത്രയരക്ഷണാനി
ത്വദ്വീക്ഷണാനി വരദാനവിചക്ഷണാനി ॥ 2 ॥
ആനങ്ഗതന്ത്രവിധിദര്‍ശിതകൌശലാനാം
ആനന്ദമന്ദപരിഘൂര്‍ണിതമന്ഥരാണാം ।
താരല്യമംബ തവ താഡിതകര്‍ണസീംനാം
കാമാക്ഷി ഖേലതി കടാക്ഷനിരീക്ഷണാനാം ॥ 3 ॥
കല്ലോലിതേന കരുണാരസവേല്ലിതേന
കല്‍മാഷിതേന കമനീയമൃദുസ്മിതേന ।
മാമഞ്ചിതേന തവ കിംചന കുഞ്ചിതേന
കാമാക്ഷി തേന ശിശിരീകുരു വീക്ഷിതേന ॥ 4 ॥
സാഹായ്യകം ഗതവതീ മുഹുരര്‍ജനസ്യ
മന്ദസ്മിതസ്യ പരിതോഷിതഭീമചേതാഃ ।
കാമാക്ഷി പാണ്ഡവചമൂരിവ താവകീനാ
കര്‍ണാന്തികം ചലതി ഹന്ത കടാക്ഷലക്ഷ്മീഃ ॥ 5 ॥
അസ്തം ക്ഷണാന്നയതു മേ പരിതാപസൂര്യം
ആനന്ദചന്ദ്രമസമാനയതാം പ്രകാശം ।
കാലാന്ധകാരസുഷുമാം കലയന്ദിഗന്തേ
കാമാക്ഷി കോമലകടാക്ഷനിശാഗമസ്തേ ॥ 6 ॥
താടാങ്കമൌക്തികരുചാങ്കുരദന്തകാന്തിഃ
കാരുണ്യഹസ്തിപശിഖാമണിനാധിരൂഢഃ ।
ഉന്‍മൂലയത്വശുഭപാദപമസ്മദീയം
കാമാക്ഷി താവകകടാക്ഷമതങ്ഗജേതന്ദ്രഃ ॥ 7 ॥
ഛായാഭരണേ ജഗതാം പരിതാപഹാരീ
താടങ്കരത്നമണിതല്ലജപല്ലവശ്രീഃ ।
കാരുണ്യനാമ വികിരന്‍മകരന്ദജാലം
കാമാക്ഷി രാജതി കടാക്ഷസുരദ്രുമസ്തേ ॥ 8 ॥
സൂര്യാശ്രയപ്രണയിനീ മണികുണ്ഡലാംശു-
ലൌഹിത്യകോകനദകാനനമാനനീയാ ।
യാന്തീ തവ സ്മരഹരാനനകാന്തിസിന്ധും
കാമാക്ഷി രാജതി കടാക്ഷകലിന്ദകന്യാ ॥ 9 ॥
പ്രാപ്നോതി യം സുകൃതിനം തവ പക്ഷപാതാത്
കാമാക്ഷി വീക്ഷണവിലാസകലാപുരന്ധ്രീ ।
സദ്യസ്തമേവ കില മുക്തിവധൂര്‍വൃണീതേ
തസ്മാന്നിതാന്തമനയോരിദമൈകമത്യം ॥ 10 ॥
യാന്തീ സദൈവ മരുതാമനുകൂലഭാവം
ഭ്രൂവല്ലിശക്രധനുരുല്ലസിതാ രസാര്‍ദ്രാ ।
കാമാക്ഷി കൌതുകതരങ്ഗിതനീലകണ്ഠാ
കാദംബിനീവ തവ ഭാതി കടാക്ഷമാലാ ॥ 11 ॥
ഗങ്ഗാംഭസി സ്മിതമയേ തപനാത്മജേവ
ഗങ്ഗാധരോരസി നവോത്പലമാലികേവ ।
വക്ത്രപ്രഭാസരസി ശൈവലമണ്ഡലീവ
കാമാക്ഷി രാജതി കടാക്ഷരുചിച്ഛടാ തേ ॥ 12 ॥
സംസ്കാരതഃ കിമപി കന്ദലിതാന്‍ രസജ്ഞ-
കേദാരസീംനി സുധിയാമുപഭോഗയോഗ്യാന്‍ ।
കല്യാണസൂക്തിലഹരീകലമാംകുരാന്നഃ
കാമാക്ഷി പക്ഷ്മലയതു ത്വദപാങ്ഗമേഘഃ ॥ 13 ॥
ചാഞ്ചല്യമേവ നിയതം കലയന്‍പ്രകൃത്യാ
മാലിന്യഭൂഃ ശ്രതിപഥാക്രമജാഗരൂകഃ ।
കൈവല്യമേവ കിമു കല്‍പയതേ നതാനാം
കാമാക്ഷി ചിത്രമപി തേ കരുണാകടാക്ഷഃ ॥ 14 ॥
സംജീവനേ ജനനി ചൂതശിലീമുഖസ്യ
സമ്മോഹനേ ശശികിശോരകശേഖരസ്യ ।
സംസ്തംഭനേ ച മമതാഗ്രഹചേഷ്ടിതസ്യ
കാമാക്ഷി വീക്ഷണകലാ പരമൌഷധം തേ ॥ 15 ॥
നീലോഽപി രാഗമധികം ജനയന്‍പുരാരേഃ
ലോലോഽപി ഭക്തിമധികാം ദൃഢയന്നരാണാം ।
വക്രോഽപി ദേവി നമതാം സമതാം വിതന്വന്‍
കാമാക്ഷി നൃത്യതു മയി ത്വദപാങ്ഗപാതഃ ॥ 16 ॥
കാമദ്രുഹോ ഹൃദയയന്ത്രണജാഗരൂകാ
കാമാക്ഷി ചഞ്ചലദൃഗഞ്ചലമേഖലാ തേ ।
ആശ്ചര്യമംബ ഭജതാം ഝടിതി സ്വകീയ-
സമ്പര്‍ക ഏവ വിധുനോതി സമസ്തബന്ധാന്‍ ॥ 17 ॥
കുണ്ഠീകരോതു വിപദം മമ കുഞ്ചിതഭ്രൂ-
ചാപാഞ്ചിതഃ ശ്രിതവിദേഹഭവാനുരാഗഃ ।
രക്ഷോപകാരമനിശം ജനയഞ്ജഗത്യാം
കാമാക്ഷി രാമ ഇവ തേ കരുണാകടാക്ഷഃ ॥ 18 ॥
ശ്രീകാമകോടി ശിവലോചനശോഷിതസ്യ
ശൃങ്ഗാരബീജവിഭവസ്യ പുനഃപ്രരോഹേ ।
പ്രേമാംഭസാര്‍ദ്രമചിരാത്പ്രചുരേണ ശങ്കേ
കേദാരമംബ തവ കേവലദൃഷ്ടിപാതം ॥ 19 ॥
മാഹാത്മ്യശേവധിരസൌ തവ ദുര്‍വിലങ്ഘ്യ-
സംസാരവിന്ധ്യഗിരികുണ്ഠനകേലിചുഞ്ചുഃ ।
ധൈര്യാംബുധിം പശുപതേശ്ചുലകീകരോതി
കാമാക്ഷി വീക്ഷണവിജൃംഭണകുംഭജന്‍മാ ॥ 20 ॥
പീയൂഷവര്‍ഷവശിശിരാ സ്ഫുടദുത്പലശ്രീ-
മൈത്രീ നിസര്‍ഗമധുരാ കൃതതാരകാപ്തിഃ ।
കാമാക്ഷി സംശ്രിതവതീ വപുരഷ്ടമൂര്‍തേഃ
ജ്യോത്സ്നായതേ ഭഗവതി ത്വദപാങ്ഗമാലാ ॥ 21 ॥
അംബ സ്മരപ്രതിഭടസ്യ വപുര്‍മനോജ്ഞം
അംഭോജകാനനമിവാഞ്ചിതകണ്ടകാഭം ।
ഭൃങ്ഗീവ ചുംബതി സദൈവ സപക്ഷപാതാ
കാമാക്ഷി കോമലരുചിസ്ത്വദപാങ്ഗമാലാ ॥ 22 ॥
കേശപ്രഭാപടലനീലവിതാനജാലേ
കാമാക്ഷി കുണ്ഡലമണിച്ഛവിദീപശോഭേ ।
ശങ്കേ കടാക്ഷരുചിരങ്ഗതലേ കൃപാഖ്യാ
ശൈലൂഷികാ നടതി ശംകരവല്ലഭേ തേ ॥ 23 ॥
അത്യന്തശീതലമതന്ദ്രയതു ക്ഷണാര്‍ധം
അസ്തോകവിഭ്രമമനങ്ഗവിലാസകന്ദം ।
അല്‍പസ്മിതാദൃതമപാരകൃപാപ്രവാഹം
അക്ഷിപ്രരോഹമചിരാന്‍മയി കാമകോടി ॥ 24 ॥
മന്ദാക്ഷരാഗതരലീകൃതിപാരതന്ത്ര്യാത്
കാമാക്ഷി മന്ഥരതരാം ത്വദപാങ്ഗഡോലാം ।
ആരുഹ്യ മന്ദമതികൌതുകശാലി ചക്ഷുഃ
ആനന്ദമേതി മുഹുരര്‍ധശശാങ്കമൌലേഃ ॥ 25 ॥
ത്രൈയംബകം ത്രിപുരസുന്ദരി ഹര്‍ംയഭൂമി-
രങ്ഗം വിഹാരസരസീ കരുണാപ്രവാഹഃ ।
ദാസാശ്ച വാസവമുഖാഃ പരിപാലനീയം
കാമാക്ഷി വിശ്വമപി വീക്ഷണഭൂഭൃതസ്തേ ॥ 26 ॥
വാഗീശ്വരീ സഹചരീ നിയമേന ലക്ഷ്മീഃ
ഭ്രൂവല്ലരീവശകരീ ഭുവനാനി ഗേഹം ।
രൂപം ത്രിലോകനയനാമൃതമംബ തേഷാം
കാമാക്ഷി യേഷു തവ വീക്ഷണപാരതന്ത്രീ ॥ 27 ॥
മാഹേശ്വരം ഝടിതി മാനസമീനമംബ
കാമാക്ഷി ധൈര്യജലധൌ നിതരാം നിമഗ്നം ।
ജാലേന ശൃങ്ഖലയതി ത്വദപാങ്ഗനാംനാ
വിസ്താരിതേന വിഷമായുധദാശകോഽസൌ ॥ 28 ॥
ഉന്‍മഥ്യ ബോധകമലാകാരമംബ ജാഡ്യ-
സ്തംബേരമം മമ മനോവിപിനേ ഭ്രമന്തം ।
കുണ്ഠീകുരുഷ്വ തരസാ കുടിലാഗ്രസീംനാ
കാമാക്ഷി താവകകടാക്ഷമഹാങ്കുശേന ॥ 29 ॥
ഉദ്വേല്ലിതസ്തബകിതൈര്ലലിതൈര്‍വിലാസൈഃ
ഉത്ഥായ ദേവി തവ ഗാഢകടാക്ഷകുഞ്ജാത് ।
ദൂരം പലായയതു മോഹമൃഗീകുലം മേ
കാമാക്ഷി സ്തവരമനുഗ്രഹകേസരീന്ദ്രഃ ॥ 30 ॥
സ്നേഹാദൃതാം വിദലിതോത്പലകന്തിചോരാം
ജേതാരമേവ ജഗദീശ്വരി ജേതുകാമഃ ।
മാനോദ്ധതോ മകരകേതുരസൌ ധുനീതേ
കാമാക്ഷി താവകകടാക്ഷകൃപാണവല്ലീം ॥ 31 ॥
ശ്രൌതീം വ്രജന്നപി സദാ സരണിം മുനീനാം
കാമാക്ഷി സന്തതമപി സ്മൃതിമാര്‍ഗഗാമീ ।
കൌടില്യമംബ കഥമസ്ഥിരതാം ച ധത്തേ
ചൌര്യം ച പങ്കജരുചാം ത്വദപാങ്ഗപാതഃ ॥ 32 ॥
നിത്യം ശ്രേതുഃ പരിചിതൌ യതമാനമേവ
നീലോത്പലം നിജസമീപനിവാസലോലം ।
പ്രീത്യൈവ പാഠയതി വീക്ഷണദേശികേന്ദ്രഃ
കാമാക്ഷീ കിന്തു തവ കാലിമസമ്പ്രദായം ॥ 33 ॥
ഭ്രാന്ത്വാ മുഹുഃ സ്തബകിതസ്മിതഫേനരാശൌ
കാമാക്ഷി വക്ത്രരുചിസംചയവാരിരാശൌ ।
ആനന്ദതി ത്രിപുരമര്‍ദനനേത്രലക്ഷ്മീഃ
ആലംബ്യ ദേവി തവ മന്ദമപാങ്ഗസേതും ॥ 34 ॥
ശ്യാമാ തവ ത്രിപുരസുന്ദരി ലോചനശ്രീഃ
കാമാക്ഷി കന്ദലിതമേദുരതാരകാന്തിഃ ।
ജ്യോത്സ്നാവതീ സ്മിതരുചാപി കഥം തനോതി
സ്പര്‍ധാമഹോ കുവലയൈശ്ച തഥാ ചകോരൈഃ ॥ 35 ॥
കാലാഞ്ജനം ച തവ ദേവി നിരീക്ഷണം ച
കാമാക്ഷി സാംയസരണിം സമുപൈതി കാന്ത്യാ ।
നിശ്ശേഷനേത്രസുലഭം ജഗതീഷു പൂര്‍വ-
മന്യത്ത്രിനേത്രസുലഭം തുഹിനാദ്രികന്യേ ॥ 36 ॥
ധൂമാങ്കുരോ മകരകേതനപാവകസ്യ
കാമാക്ഷി നേത്രരുചിനീലിമചാതുരീ തേ ।
അത്യന്തമദ്ഭുതമിദം നയനത്രയസ്യ
ഹര്‍ഷോദയം ജനയതേ ഹരുണാങ്കമൌലേഃ ॥37 ॥
ആരഭ്ഭലേശസമയേ തവ വീക്ഷണസ്സ
കാമാക്ഷി മൂകമപി വീക്ഷണമാത്രനംരം ।
സര്‍വജ്ഞതാ സകലലോകസമക്ഷമേവ
കീര്‍തിസ്വയംവരണമാല്യവതീ വൃണീതേ ॥ 38 ॥
കാലാംബുവാഹ ഉവ തേ പരിതാപഹാരീ
കാമാക്ഷി പുഷ്കരമധഃകുരുതേ കടാഖ़്ഷഃ ।
പൂര്‍വഃ പരം ക്ഷണരുചാ സമുപൈതി മൈത്രീ-
മന്യസ്തു സ।തതരുചിം പ്രകടീകരോതി ॥ 39 ॥
സൂക്ഷ്മേഽപി ദുര്‍ഗമതരേഽപി ഗുരുപ്രസാദ-
സാഹായ്യകേന വിചരന്നപവര്‍ഗമാര്‍ഗേ ।
സംസാരപങ്കനിചയേ ന പതത്യമൂം തേ
കാമാക്ഷി ഗാഢമവലംബ്യ കടാക്ഷയഷ്ടിം ॥ 40 ॥
കാമാക്ഷി സന്തതമസൌ ഹരിനീലരത്ന-
സ്തംഭേ കടാക്ഷരുചിപുഞ്ജമയേ ഭവത്യാഃ ।
ബദ്ധോഽപി ഭക്തിനിഗലൈര്‍മമ ചിത്തഹസ്തീ
സ്തംഭം ച ബന്ധമപി മുഞ്ചതി ഹന്ത ചിത്രം ॥ 41 ॥
കാമാക്ഷി കാഷ്ണര്യമപി സന്തതമഞ്ജനം ച
ബിഭ്രന്നിസര്‍ഗതരലോഽപി ഭവത്കടാക്ഷഃ ।
വൈമല്യമന്വഹമനഞ്ജനതാ ച ഭൂയഃ
സ്ഥൈര്യം ച ഭക്തഹൃദയായ കഥം ദദാതി ॥ 42 ॥
മന്ദസ്മിതസ്തബകിതം മണികുണ്ഡലാംശു-
സ്തോമപ്രവാലരുചിരം ശിശിരീകൃതാശം ।
കാമാക്ഷി രാജതി കടാക്ഷരുചേഃ കദംബം
ഉദ്യാനമംബ കരുണാഹരിണേക്ഷണായാഃ ॥ 43 ॥
കാമാക്ഷി താവകകടാക്ഷമഹേന്ദ്രനീല-
സിംഹാസനം ശ്രിതവതോ മകരധ്വജസ്യ ।
സാംരാജ്യമങ്ഗലവിധൌ മുണികുണ്ഡലശ്രീഃ
നീരാജനോത്സവതരങ്ഗിതദീപമാലാ ॥ 44 ॥
മാതഃ ക്ഷണം സ്നപയ മാം തവ വീക്ഷിതേന
മന്ദാക്ഷിതേന സുജനൈരപരോക്ഷിതേന ।
കാമാക്ഷി കര്‍മതിമിരോത്കരഭാസ്കരേണ
ശ്രേയസ്കരേണ മധുപദ്യുതിതസ്കരേണ ॥ 45 ॥
പ്രേമാപഗാപയസി മജ്ജനമാരചയ്യ
യുക്തഃ സ്മിതാംശുകൃതഭസ്മവിലേപനേന ।
കാമാക്ഷി കുണ്ഡലമണിദ്യുതിഭിര്‍ജടാലഃ
ശ്രീകണ്ഠമേവ ഭജതേ തവ ദൃഷ്ടിപാതഃ ॥ 46 ॥
കൈവല്യദായ കരുണാരസകിംകരായ
കാമാക്ഷി കന്ദലിതവിഭ്രമശംകരായ ।
ആലോകനായ തവ ഭക്തശിവംകരായ
മാതര്‍നമോഽസ്തു പരതന്ത്രിതശംകരായ ॥ 47 ॥
സാംരാജ്യമങ്ഗലവിധൌ മകരധ്വജസ്യ
ലോലാലകാലികൃതതോരണമാല്യശോഭേ ।
കാമേശ്വരി പ്രചലദുത്പലവൈജയന്തീ-
ചാതുര്യമേതി തവ ചഞ്ചലദൃഷ്ടിപാതഃ ॥ 48 ॥
മാര്‍ഗേണ മഞ്ജുകചകാന്തിതമോവൃതേന
മന്ദായമാനഗമനാ മദനാതുരാസൌ ।
കാമാക്ഷി ദൃഷ്ടിരയതേ തവ ശംകരായ
സംകേതഭൂമിമചിരാദഭിസാരികേവ ॥ 49 ॥
വ്രീഡനുവൃത്തിരമണീകൃതസാഹചര്യാ
ശൈവാലിതാം ഗലരുചാ ശശിശേഖരസ്യ ।
കാമാക്ഷി കാന്തിസരസീം ത്വദപാങ്ഗലക്ഷ്മീഃ
മന്ദം സമാശ്രയതി മജ്ജനഖേലനായ ॥ 50 ॥
കാഷായമംശുകമിവ പ്രകടം ദധാനോ
മാണിക്യകുണ്ഡലരുചിം മമതാവിരോധീ ।
ശ്രുത്യന്തസീമനി രതഃ സുതരാം ചകാസ്തി
കാമാക്ഷി താവകകടാക്ഷയതീശ്വരോഽസൌ ॥ 51 ॥
പാഷാണ ഏവ ഹരിനീലമണിര്‍ദിനേഷു
പ്രംലനതാം കുവലയം പ്രകടീകരോതി ।
നൌമിത്തികോ ജലദമേചകിമാ തതസ്തേ
കാമാക്ഷി ശൂന്യമുപമനമപാങ്ഗലക്ഷ്ംയാഃ ॥ 52 ॥
ശൃങ്ഗാരവിഭ്രമവതീ സുതരാം സലജ്ജാ
നാസാഗ്രമൌക്തികരുചാ കൃതമന്ദഹാസാ ।
ശ്യാമാ കടാക്ഷസുഷമാ തവ യുക്തമേതത്
കാമാക്ഷി ചുംബതി ദിഗംബരവക്ത്രബിംബം ॥ 53 ॥
നീലോത്പലേന മധുപേന ച ദൃഷ്ടിപാതഃ
കാമാക്ഷി തുല്യ ഇതി തേ കഥമാമനന്തി ।
ശൈത്യേന നിന്ദയതി യദന്വഹമിന്ദുപാദാന്‍
പാഥോരുഹേണ യദസൌ കലഹായതേ ച ॥ 54 ॥
ഓഷ്ഠപ്രഭാപടലവിദ്രുമമുദ്രിതേ തേ
ഭ്രൂവല്ലിവീചിസുഭഗേ മുഖകാന്തിസിന്ധൌ ।
കാമാക്ഷി വാരിഭരപൂരണലംബമാന-
കാലാംബുവാഹസരണിം ലഭതേ കടാക്ഷഃ ॥ 55 ॥
മന്ദസ്മിതൈര്‍ധവലിതാ മണികുണ്ഡലാംശു-
സമ്പര്‍കലോഹിതരുചിസ്ത്വദപാങ്ഗധാരാ ।
കാമാക്ഷി മല്ലികുസുമൈര്‍നവപല്ലവൈശ്ച
നീലോത്പലൈശ്ച രചിതേവ വിഭാതി മാലാ ॥ 56 ॥
കാമാക്ഷി ശീതലകൃപാരസനിര്‍ഝരാംഭഃ-
സമ്പര്‍കപക്ഷ്മലരുചിസ്ത്വദപാങ്ഗമാലാ ।
ഗോഭിഃ സദാ പുരരിപോരഭിലഷ്യമാണാ
ദൂര്‍വാകദംബകവിഡംബനമാതനോതി ॥ 57 ॥
ഹൃത്പങ്കജം മമ വികാസയതു പ്രമുഷ്ണ-
ന്നുല്ലാസമുത്പലരുചേസ്തമസാം നിരോദ്ധാ ।
ദോഷാനുഷങ്ഗജഡതാം ജഗതാം ധുനാനഃ
കാമാക്ഷി വീക്ഷണവിലാസദിനോദയസ്തേ ॥ 58 ॥
ചക്ഷുര്‍വിമോഹയതി ചന്ദ്രവിഭൂഷണസ്യ
കാമാക്ഷി താവകകടാക്ഷതമഃപ്രരോഹഃ ।
പ്രത്യങ്മുഖം തു നയനം സ്തിമിതം മുനീനാം
പ്രാകാശ്യമേവ നയതീതി പരം വിചിത്രം ॥ 59 ॥
കാമാക്ഷി വീക്ഷണരുചാ യുധി നിര്‍ജിതം തേ
നീലോത്പലം നിരവശേഷഗതാഭിമാനം ।
ആഗത്യ തത്പരിസരം ശ്രവണവതംസ-
വ്യോജേന നൂനമഭയാര്‍ഥനമാതനോതി ॥ 60 ॥
ആശ്ചര്യമംബ മദാനാഭ്യുദയാവലംബഃ
കാമാക്ഷി ചഞ്ചലനിരീക്ഷണവിഭ്രമസ്തേ ।
ധൈര്യം വിധൂയ തനുതേ ഹൃദി രാഗബന്ധം
ശംഭോസ്തദേവ വിപരീതതയാ മുനീനാം ॥ 61 ॥
ജന്തോഃ സകൃത്പ്രണമതോ ജഗദീഡ്യതാം ച
തേജാസ്വിതാം ച നിശിതാം ച മതിം സഭായാം ।
കാമാക്ഷി മാക്ഷികഝരീമിവ വൈഖരീം ച
ലക്ഷ്മീം ച പക്ഷ്മലയതി ക്ഷണവീക്ഷണം തേ ॥ 62 ॥
കാദംബിനീ കിമയതേ ന ജലാനുഷങ്ഗം
ഭൃങ്ഗാവലീ കിമുരരീകുരുതേ ന പദ്മം ।
കിം വാ കലിന്ദതനയാ സഹതേ ന ഭങ്ഗം
കാമാക്ഷി നിശ്ചയപദം ന തവാക്ഷിലക്ഷ്മീഃ ॥ 63 ॥
കാകോലപാവകതൃണീകരണേഽപി ദക്ഷഃ
കാമാക്ഷി ബാലകസുധാകരശേഖരസ്യ ।
അത്യന്തശീതലതമോഽപ്യനുപാരതം തേ
ചിത്തം വിമോഹയതി ചിത്രമയം കടാക്ഷഃ ॥ 64 ॥
കാര്‍പണ്യപൂരപരിവര്‍ധിതമംബ മോഹ-
കന്ദോദ്ഗതം ഭവമയം വിഷപാദപം മേ ।
തുങ്ഗം ഛിനത്തു തുഹിനാദ്രിസുതേ ഭവത്യാഃ
കാഞ്ചീപുരേശ്വരി കടാക്ഷകുഠാരധാരാ ॥ 65 ॥
കാമാക്ഷി ഘോരഭവരോഗചികിത്സനാര്‍ഥ-
മഭ്യര്‍ഥ്യ ദേശികകടാക്ഷഭിഷക്പ്രസാദാത് ।
തത്രാപി ദേവി ലഭതേ സുകൃതീ കദാചി-
ദന്യസ്യ ദുര്ലഭമപാങ്ഗമഹൌഷധം തേ ॥ 66 ॥
കാമാക്ഷി ദേശികകൃപാംകുരമാശ്രയന്തോ
നാനാതപോനിയമനാശിതപാശബന്ധാഃ ।
വാസാലയം തവ കടാക്ഷമമും മഹാന്തോ
ലബ്ധ്വാ സുഖം സമാധിയോ വിചരന്തി ലോകേ ॥ 67 ॥
സാകൂതസംലപിതസംഭൃതമുഗ്ധഹാസം
വ്രീഡാനുരാഗസഹചാരി വിലോകനം തേ ।
കാമാക്ഷി കാമപരിപന്ഥിനി മാരവീര-
സാംരാജ്യവിഭ്രമദശാം സഫലീകരോതി ॥ 68 ॥
കാമാക്ഷി വിഭ്രമബലൈകനിധിര്‍വിധായ
ഭ്രൂവല്ലിചാപകുടിലീകൃതിമേവ ചിത്രം ।
സ്വാധീനതാം തവ നിനായ ശശാങ്കമൌലേ-
രങ്ഗാര്‍ധരാജ്യസുഖലാഭമപാങ്ഗവീരഃ ॥ 69 ॥
കാമാംകുരൈകനിലയസ്തവ ദൃഷ്ടിപാതഃ
കാമാക്ഷി ഭക്തമനസാം പ്രദദാതു കാമാന്‍ ।
രാഗാന്വിതഃ സ്വയമപി പ്രകടീകരോതി
വൈരാഗ്യമേവ കഥമേഷ മഹാമുനീനാം ॥ 70 ॥
കാലാംബുവാഹനിവഹൈഃ കലഹായതേ തേ
കാമാക്ഷി കാലിമമദേന സദാ കടാക്ഷഃ ।
ചിത്രം തഥാപി നിതരാമമുമേവ ദൃഷ്ട്വാ
സോത്കണ്ഠ ഏവ രമതേ കില നീലകണ്ഠഃ ॥ 71 ॥
കാമാക്ഷി മന്‍മഥരിപും പ്രതി മാരതാപ-
മോഹാന്ധകാരജലദാഗമനേന നൃത്യന്‍ ।
ദുഷ്കര്‍മകഞ്ചുകികുലം കബലീകരോതു
വ്യാമിശ്രമേചകരുചിസ്ത്വദപാങ്ഗകേകീ ॥ 72 ॥
കാമാക്ഷി മന്‍മഥരിപോരവലോകനേഷു
കാന്തം പയോജമിവ താവകമക്ഷിപാതം ।
പ്രേമാഗമോ ദിവസവദ്വികചീകരോതി
ലജ്ജാഭരോ രജനിവന്‍മുകുലീകരോതി ॥ 73 ॥
മൂകോ വിരിഞ്ചതി പരം പുരുഷഃ കുരൂപഃ
കന്ദര്‍പതി ത്രിദശരാജതി കിമ്പചാനഃ ।
കാമാക്ഷി കേവലമുപക്രമകാല ഏവ
ലീലാതരങ്ഗിതകടാക്ഷരുചഃ ക്ഷണം തേ ॥ 74 ॥
നീലാലകാ മധുകരന്തി മനോജ്ഞനാസാ-
മുക്താരുചഃ പ്രകടകന്ദബിസാങ്കുരന്തി ।
കാരുണ്യമംബ മകരന്ദതി കാമകോടി
മന്യേ തതഃ കമലമേവ വിലോചനം തേ ॥ 75 ॥
ആകാംക്ഷ്യമാണഫലദാനവിചക്ഷണായാഃ ।
കാമാക്ഷി താവകകടാക്ഷകകാമധേനോഃ ।
സമ്പര്‍ക ഏവ കഥമംബ വിമുക്തപാശ-
ബന്ധാഃ സ്ഫുടം തനുഭൃതഃ പശുതാം ത്യജന്തി ॥ 76 ॥
സംസാരഘര്‍മപരിതാപജുഷാം നരാണാം
കാമാക്ഷി ശീതലതരാണി തവേക്ഷിതാനി ।
ചന്ദ്രാതപന്തി ഘനചന്ദനകര്‍ദമന്തി
മുക്താഗുണന്തി ഹിമവാരിനിഷേചനന്തി ॥ 77 ॥
പ്രേമാംബുരാശിസതതസ്നപിതാനി ചിത്രം
കാമാക്ഷി താവകകടാക്ഷനിരീക്ഷണാനി ।
സന്ധുക്ഷയന്തി മുഹുരിന്ധനരാശിരീത്യാ
മാരദ്രുഹോ മനസി മന്‍മഥചിത്രഭാനും ॥ 78 ॥
കാലാഞ്ജനപ്രതിഭടം കമനീയകാന്ത്യാ
കന്ദര്‍പതന്ത്രകലയാ കലിതാനുഭാവം ।
കാഞ്ചീവിഹാരരസികേ കലുഷാര്‍തിചോരം
കല്ലോലയസ്വ മയി തേ കരുണാകടാക്ഷം ॥ 79 ॥
ക്രാന്തേന മന്‍മഥദേന വിമോഹ്യമാന-
സ്വാന്തേന ചൂതതരുമൂലഗതസ്യ പുംസഃ ।
കാന്തേന കിംചിദവലോകയ ലോചനസ്യ
പ്രാന്തേന മാം ജനനി കാഞ്ചിപുരീവിഭൂഷേ ॥ 80 ॥
കാമാക്ഷി കോഽപി സുജനാസ്ത്വദപാങ്ഗസംഗേ
കണ്ഠേന കന്ദലിതകാലിമസമ്പ്രദായാഃ ।
ഉത്തംസകല്‍പിതചകോരകുടുംബപോഷാ
നക്തന്ദിവസപ്രസവഭൂനയനാ ഭവന്തി ॥ 81 ॥
നീലോത്പലപ്രസവകാന്തിനിര്‍ദശനേന
കാരുണ്യവിഭ്രമജുഷാ തവ വീക്ഷണേന ।
കാമാക്ഷി കര്‍മജലധേഃ കലശീസുതേന
പാശത്രയാദ്വയമമീ പരിമോചനീയാഃ ॥ 82 ॥
അത്യന്തചഞ്ചലമകൃത്രിമമഞ്ജനം കിം
ഝംകാരഭങ്ഗിരഹിതാ കിമു ഭൃങ്ഗമാലാ ।
ധൂമാങ്കുരഃ കിമു ഹുതാശനസംഗഹീനഃ
കാമാക്ഷി നേത്രരുചിനീലിമകന്ദലീ തേ ॥ 83 ॥
കാമാക്ഷി നിത്യമയമഞ്ജലിരസ്തു മുക്തി-
ബീജായ വിഭ്രമമദോദയഘൂര്‍ണിതായ ।
കന്ദര്‍പദര്‍പപുനരുദ്ഭവസിദ്ധിദായ
കല്യാണദായ തവ ദേവി ദൃഗഞ്ചലായ ॥ 84 ॥
ദര്‍പാങ്കുരോ മകരകേതനവിഭ്രമാണാം
നിന്ദാങ്കുരോ വിദലിതോത്പലചാതുരീണാം ।
ദീപാങ്കുരോ ഭവതമിസ്രകദംബകാനാം
കാമാക്ഷി പാലയതു മാം ത്വദപാങ്ഗപാതഃ ॥ 85 ॥
കൈവല്യദിവ്യമണിരോഹണപര്‍വതേഭ്യഃ
കാരുണ്യനിര്‍ഝരപയഃകൃതമഞ്ജനേഭ്യഃ ।
കാമാക്ഷി കിംകരിതശങ്കരമാനസേഭ്യ-
സ്തേഭ്യോ നമോഽസ്തു തവ വീക്ഷണവിഭ്രമേഭ്യഃ ॥ 86 ॥
അല്‍പീയ ഏവ നവമുത്പലമംബ ഹീനാ
മീനസ്യ വാ സരണിരംബുരുഹാം ച കിം വാ ।
ദൂരേ മൃഗീദൃഗസമഞ്ജസമഞ്ജനം ച
കാമാക്ഷി വീക്ഷണരുചൌ തവ തര്‍കയാമഃ ॥ 87 ॥
മിശ്രീഭവദ്ഗരലപങ്കിലശങ്കരോരസ്-
സീമാങ്ഗണേ കിമപി രിങ്ഖണമാദധാനഃ ।
ഹേലാവധൂതലലിതശ്രവണോത്പലോഽസൌ
കാമാക്ഷി ബാല ഇവ രാജതി തേ കടാക്ഷഃ ॥ 88 ॥
പ്രൌഢികരോതി വിദുഷാം നവസൂക്തിധാടീ-
ചൂതാടവീഷു ബുധകോകിലലാല്യമാനം ।
മാധ്വീരസം പരിമലം ച നിരര്‍ഗലം തേ
കാമാക്ഷി വീക്ഷണവിലാസവസന്തലക്ഷ്മീഃ ॥ 89 ॥
കൂലംകഷം വിതനുതേ കരുണാംബുവര്‍ഷീ
സാരസ്വതം സുകൃതിനഃ സുലഭം പ്രവാഹം ।
തുച്ഛീകരോതി യമുനാംബുതരങ്ഗഭങ്ഗീം
കാമാക്ഷി കിം തവ കടാക്ഷമഹാംബുവാഹഃ ॥ 90 ॥
ജഗര്‍തി ദേവി കരുണാശുകസുന്ദരീ തേ
താടങ്കരത്നരുചിദാഡിമഖണ്ഡശോണേ ।
കാമാക്ഷി നിര്‍ഭരകടാക്ഷമരീചിപുഞ്ജ-
മാഹേന്ദ്രനീലമണിപഞ്ജരമധ്യഭാഗേ ॥ 91 ॥
കാമാക്ഷി സത്കുവലയസ്യ സഗോത്രഭാവാ-
ദാക്രാമതി ശ്രുതിമസൌ തവ ദൃഷ്ടിപാതഃ ।
കിംച സ്ഫുടം കുടിലതാം പ്രകടീകരോതി
ഭ്രൂവല്ലരീപരിചിതസ്യ ഫലം കിമേതത് ॥ 92 ॥
ഏഷാ തവാക്ഷിസുഷമാ വിഷമായുധസ്യ
നാരാചവര്‍ഷലഹരീ നഗരാജകന്യേ ।
ശംകേ കരോതി ശതധാ ഹൃദി ധൈര്യമുദ്രാം
ശ്രീകാമകോടി യദസൌ ശിശിരാംശുമൌലേഃ ॥ 93 ॥
ബാണേന പുഷ്പധനുഷഃ പരികല്‍പ്യമാന-
ത്രാണേന ഭക്തമനസാം കരുണാകരേണ ।
കോണേന കോമലദൃശസ്തവ കാമകോടി
ശോണേന ശോഷയ ശിവേ മമ ശോകസിന്ധും ॥ 94 ॥
മാരദ്രുഹാ മുകുടസീമനി ലാല്യമാനേ
മന്ദാകിനീപയസി തേ കുടിലം ചരിഷ്ണുഃ ।
കാമാക്ഷി കോപരഭസാദ്വലമാനമീന-
സന്ദേഹമങ്കുരയതി ക്ഷണമക്ഷിപാതഃ ॥ 95 ॥
കാമാക്ഷി സംവലിതമൌക്തികകുണ്ഡലാംശു-
ചഞ്ചത്സിതശ്രവണചാമരചാതുരീകഃ ।
സ്തംഭേ നിരന്തരമപാങ്ഗമയേ ഭവത്യാ
ബദ്ധശ്ചകാസ്തി മകരധ്വജമത്തഹസ്തീ ॥ 96 ॥
യാവത്കടാക്ഷരജനീസമയാഗമസ്തേ
കാമാക്ഷി താവദചിരാന്നമതാം നരാണാം ।
ആവിര്‍ഭവത്യമൃതദീധിതിബിംബമംബ
സംവിന്‍മയം ഹൃദയപൂര്‍വഗിരീന്ദ്രശൃങ്ഗേ ॥ 97 ॥
കാമാക്ഷി കല്‍പവിടപീവ ഭവത്കടാക്ഷോ
ദിത്സുഃ സമസ്തവിഭവം നമതാം നരാണാം ।
ഭൃങ്ഗസ്യ നീലനലിനസ്യ ച കാന്തിസമ്പ-
ത്സര്‍വസ്വമേവ ഹരതീതി പരം വിചിത്രം ॥ 98 ॥
അത്യന്തശീതലമനര്‍ഗലകര്‍മപാക-
കാകോലഹാരി സുലഭം സുമനോഭിരേതത് ।
പീയൂഷമേവ തവ വീക്ഷണമംബ കിന്തു
കാമാക്ഷി നീലമിദമിത്യയമേവ ഭേദഃ ॥ 99 ॥
അജ്ഞാതഭക്തിരസമപ്രസരദ്വിവേക-
മത്യന്തഗര്‍വമനധീതസമസ്തശാസ്ത്രം ।
അപ്രാപ്തസത്യമസമീപഗതം ച മുക്തേഃ
കാമാക്ഷി നൈവ തവ സ്പൃഹയതി ദൃഷ്ടിപാതഃ ॥ 100 ॥
(കാമാക്ഷി മാമവതു തേ കരുണാകടാക്ഷഃ)
പാതേന ലോചനരുചേസ്തവ കാമകോടി
പോതേന പതകപയോധിഭയാതുരാണാം ।
പൂതേന തേന നവകാഞ്ചനകുണ്ഡലാംശു-
വീതേന ശീതലയ ഭൂധരകന്യകേ മാം ॥ 101 ॥
കടാക്ഷശതകം സമ്പൂര്‍ണം ॥
॥ മന്ദസ്മിതശതകം ॥
ബധ്നീമോ വയമഞ്ജലിം പ്രതിദിനം ബന്ധച്ഛിദേ ദേഹിനാം
കന്ദര്‍പാഗമതന്ത്രമൂലഗുരവേ കല്യാണകേലീഭുവേ ।
കാമാക്ഷ്യാ ഘനസാരപുഞ്ജരജസേ കാമദ്രുഹശ്ചക്ഷുഷാം
മന്ദാരസ്തബകപ്രഭാമദമുഷേ മന്ദസ്മിതജ്യോതിഷേ ॥ 1 ॥
സധ്രീചേ നവമല്ലികാസുമനസാം നാസാഗ്രമുക്താമണേ-
രാചാര്യായ മൃണാലകാണ്ഡമഹസാം നൈസര്‍ഗികായ ദ്വിഷേ ।
സ്വര്‍ധുന്യാ സഹ യുധ്വേന ഹിമരുചേരര്‍ധാസനാധ്യാസിനേ
കാമാക്ഷ്യാഃ സ്മിതമഞ്ജരീധവലിമാദ്വൈതായ തസ്മൈ നമഃ ॥ 2 ॥
കര്‍പൂരദ്യുതിചാതുരീമതിതരാമല്‍പീയസീം കുര്‍വതീ
ദൌര്‍ഭാഗ്യോദയമേവ സംവിദധതീ ദൌഷാകരീണാം ത്വിഷാം ।
ക്ഷുല്ലാനേവ മനോജ്ഞമല്ലിനികരാന്‍ഫുല്ലാനപി വ്യഞ്ജതീ
കാമാക്ഷ്യാ മൃദുലസ്മിതാംശുലഹരീ കാമപ്രസൂരസ്തു മേ ॥ 3 ॥
യാ പീനസ്തനമണ്ഡലോപരി ലസത്കര്‍പൂരലേപായതേ
യാ നീലേക്ഷണരാത്രികാന്തിതതിഷു ജ്യോത്സ്നാപ്രരോഹായതേ ।
യാ സൌന്ദര്യധുനീതരങ്ഗതതിഷു വ്യാലോലഹംസായതേ
കാമാക്ഷ്യാഃ ശിശിരീകരോതു ഹൃദയം സാ മേ സ്മിതപ്രാചുരീ ॥ 4 ॥
യേഷാം ഗച്ഛതി പൂര്‍വപക്ഷസരണിം കൌമുദ്വതഃ ശ്വേതിമാ
യേഷാം സന്തതമാരുരുക്ഷതി തുലാകക്ഷ്യാം ശരച്ചന്ദ്രമാഃ ।
യേഷാമിച്ഛതി കംബുരപ്യസുലഭാമന്തേവസത്പ്രക്രിയാം
കാമാക്ഷ്യാ മമതാം ഹരന്തു മമ തേ ഹാസത്വിഷാമങ്കുരാഃ ॥ 5 ॥
ആശാസീമസു സന്തതം വിദധതീ നൈശാകരീം വ്യാക്രിയാം
കാശാനാമഭിമാനഭങ്ഗകലനാകൌശല്യമാബിഭ്രതീ ।
ഈശാനേന വിലോകിതാ സകുതുകം കാമാക്ഷി തേ കല്‍മഷ-
ക്ലേശാപായകരീ ചകാസ്തി ലഹരീ മന്ദസ്മിതജ്യോതിഷാം ॥ 6 ॥
ആരൂഢസ്യ സമുന്നതസ്തനതടീസാംരാജ്യസിംഹാസനം
കന്ദര്‍പസ്യ വിഭോര്‍ജഗത്ത്രയപ്രാകട്യമുദ്രാനിധേഃ ।
യസ്യാശ്ചാമരചാതുരീം കലയതേ രശ്മിച്ഛടാ ചഞ്ചലാ
സാ മന്ദസ്മിതമഞ്ജരീ ഭവതു നഃ കാമായ കാമാക്ഷി തേ ॥ 7 ॥
ശംഭോര്യാ പരിരംഭസംഭ്രമവിധൌ നൈര്‍മല്യസീമാനിധിഃ
ഗൈര്‍വാണീവ തരങ്ഗിണീ കൃതമൃദുസ്യന്ദാം കലിന്ദാത്മജാം ।
കല്‍മാഷീകുരുതേ കലങ്കസുഷമാം കണ്ഠസ്ഥലീചുംബിനീം
കാമാക്ഷ്യാഃ സ്മിതകന്ദലീ ഭവതു നഃ കല്യാണസന്ദോഹിനീ ॥ 8 ॥
ജേതും ഹാരലതാമിവ സ്തനതടീം സംജഗ്മുഷീ സന്തതം
ഗന്തും നിര്‍മലതാമിവ ദ്വിഗുണിതാം മഗ്നാ കൃപാസ്ത്രോതസി ।
ലബ്ധും വിസ്മയനീയതാമിവ ഹരം രാഗാകുലം കുര്‍വതീ
മഞ്ജുസ്തേ സ്മിതമഞ്ജരീ ഭവഭയം മഥ്നാതു കാമാക്ഷി മേ ॥ 9 ॥
ശ്വേതാപി പ്രകടം നിശാകരരുചാം മാലിന്യമാതന്വതീ
ശീതാപി സ്മരപാവകം പശുപതേഃ സന്ധുക്ഷയന്തീ സദാ ।
സ്വാഭാവ്യാദധരാശ്രിതാപി നമതാമുച്ചൈര്‍ദിശന്തീ ഗതിം
കാമാക്ഷി സ്ഫുടമന്തരാ സ്ഫുരതു നസ്ത്വന്‍മന്ദഹാസപ്രഭാ ॥ 10 ॥
വക്ത്രശ്രീസരസീജലേ തരലിതഭ്രൂവല്ലികല്ലോലിതേ
കാലിംനാ ദധതീ കടാക്ഷജനുഷാ മാധുവ്രതീം വ്യാപൃതിം ।
നിര്‍നിദ്രാമലപുണ്ഡരീകകുഹനാപാണ്ഡിത്യമാബിഭ്രതീ
കാമാക്ഷ്യാഃ സ്മിതചാതുരീ മമ മനഃ കാതര്യമുന്‍മൂലയേത് ॥ 11 ॥
നിത്യം ബാധിതബന്ധുജീവമധരം മൈത്രീജുഷം പല്ലവൈഃ
ശുദ്ധസ്യ ദ്വിജമണ്ഡലസ്യ ച തിരസ്കര്‍താരമപ്യാശ്രിതാ ।
യാ വൈമല്യവതീ സദൈവ നമതാം ചേതഃ പുനീതേതരാം
കാമാക്ഷ്യാ ഹൃദയം പ്രസാദയതു മേ സാ മന്ദഹാസപ്രഭാ ॥ 12 ॥
ദ്രുഹ്യന്തീ തമസേ മുഹുഃ കുമുദിനീസാഹായ്യമാബിഭ്രതീ
യാന്തീ ചന്ദ്രകിശോരശേഖരവപുഃസൌധാങ്ഗണേ പ്രേങ്ഖണം ।
ജ്ഞാനാംഭോനിധിവീചികാം സുമനസാം കൂലംകഷാം കുര്‍വതീ
കാമാക്ഷ്യാഃ സ്മിതകൌമുദീ ഹരതു മേ സംസാരതാപോദയം ॥ 13 ॥
കാശ്മീരദ്രവധാതുകര്‍ദമരുചാ കല്‍മാഷതാം ബിഭ്രതീ
ഹംസൌധൈരിവ കുര്‍വതീ പരിചിതിം ഹാരീകൃതൈര്‍മൌക്തികൈഃ ।
വക്ഷോജന്‍മതുഷാരശൈലകടകേ സംചാരമാതന്വതീ
കാമാക്ഷ്യാ മൃദുലസ്മിതദ്യുതിമയീ ഭാഗീരഥീ ഭാസതേ ॥ 14 ॥
കംബോര്‍വംശപരമ്പരാ ഇവ കൃപാസന്താനവല്ലീഭുവഃ
സംഫുല്ലസ്തബകാ ഇവ പ്രസൃമരാ മൂര്‍താഃ പ്രസാദാ ഇവ ।
വാക്പീയൂഷകണാ ഇവ ത്രിപഥഗാപര്യായഭേദാ ഇവ
ഭ്രാജന്തേ തവ മന്ദഹാസകിരണാഃ കാഞ്ചീപുരീനായികേ ॥ 15 ॥
വക്ഷോജേ ഘനസാരപത്രരചനാഭങ്ഗീസപത്നായിതാ
കണ്ഠേ മൌക്തികഹാരയഷ്ടികിരണവ്യാപാരമുദ്രായിതാ ।
ഓഷ്ഠശ്രീനികുരുംബപല്ലവപുടേ പ്രേങ്ഖത്പ്രസൂനായിതാ
കാമാക്ഷി സ്ഫുരതാം മദീയഹൃദയേ ത്വന്‍മന്ദഹാസപ്രഭാ ॥ 16 ॥
യേഷാം ബിന്ദുരിവോപരി പ്രചലിതോ നാസാഗ്രമുക്താമണിഃ
യേഷാം ദീന ഇവാധികണ്ഠമയതേ ഹാരഃ കരാലംബനം ।
യേഷാം ബന്ധുരിവോഷ്ഠയോരരുണിമാ ധത്തേ സ്വയം രഞ്ജനം
കാമാക്ഷ്യാഃ പ്രഭവന്തു തേ മമ ശിവോല്ലാസായ ഹാസാങ്കുരാഃ ॥ 17 ॥
യാ ജാഡ്യാംബുനിധിം ക്ഷിണോതി ഭജതാം വൈരായതേ കൈരവൈഃ
നിത്യം യാം നിയമേന യാ ച യതതേ കര്‍തും ത്രിണേത്രോത്സവം ।
ബിംബം ചാന്ദ്രമസം ച വഞ്ചയതി യാ ഗര്‍വേണ സാ താദൃശീ
കാമാക്ഷി സ്മിതമഞ്ജരീ തവ കഥം ജ്യോത്സ്നേത്യസൌ കീര്‍ത്യതേ ॥ 18 ॥
ആരുഢാ രഭസാത്പുരഃ പുരരിപോരാശ്ലേഷണോപക്രമേ
യാ തേ മാതരുപൈതി ദിവ്യതടിനീശങ്കാകരീ തത്ക്ഷണം ।
ഓഷ്ഠൌ വേപയതി ഭ്രുവൌ കുടിലയത്യാനംരയത്യാനനം
താം വന്ദേ മൃദുഹാസപൂരസുഷമാമേകാംരനാഥപ്രിയേ ॥ 19 ॥
വക്ത്രേന്ദോസ്തവ ചന്ദ്രികാ സ്മിതതതിര്‍വല്‍ഗു സ്ഫുരന്തീ സതാം
സ്യാച്ചേദ്യുക്തിമിദം ചകോരമനസാം കാമാക്ഷി കൌതൂഹലം ।
ഏതച്ചിത്രമഹര്‍നിശം യദധികാമേഷാ രുചിം ഗാഹതേ
ബിംബോഷ്ഠദ്യുമണിപ്രഭാസ്വപി ച യദ്ബിബ്ബോകമാലംബതേ ॥ 20 ॥
സാദൃശ്യം കലശാംബുധേര്‍വഹതി യത്കാമാക്ഷി മന്ദസ്മിതം
ശോഭാമോഷ്ഠരുചാംബ വിദ്രുമഭവാമേതാദ്ഭിദാം ബ്രൂമഹേ ।
ഏകസ്മാദുദിതം പുരാ കില പപൌ ശര്‍വഃ പുരാണഃ പുമാന്‍
ഏതന്‍മധ്യസമുദ്ഭവം രസയതേ മാധുര്യരൂപം രസം ॥ 21 ॥
ഉത്തുങ്ഗസ്തനകുംഭശൈലകടകേ വിസ്താരികസ്തൂരികാ-
പത്രശ്രീജുഷി ചഞ്ചലാഃ സ്മിതരുചഃ കാമാക്ഷി തേ കോമലാഃ ।
സന്ധ്യാദീധിതിരഞ്ജിതാ ഇവ മുഹുഃ സാന്ദ്രാധരജ്യോതിഷാ
വ്യാലോലാമലശാരദാഭ്രശകലവ്യാപാരമാതന്വതേ ॥ 22 ॥
ക്ഷീരം ദൂരത ഏവ തിഷ്ഠതു കഥം വൈമല്യമാത്രാദിദം
മാതസ്തേ സഹപാഠവീഥിമയതാം മന്ദസ്മിതൈര്‍മഞ്ജുലൈഃ ।
കിം ചേയം തു ഭിദാസ്തി ദോഹനവശാദേകം തു സംജായതേ
കാമാക്ഷി സ്വയമര്‍ഥിതം പ്രണമതാമന്യത്തു ദോദുഹ്യതേ ॥ 23 ॥
കര്‍പൂരൈരമൃതൈര്‍ജഗജ്ജനനി തേ കാമാക്ഷി ചന്ദ്രാതപൈഃ
മുക്താഹാരഗുണൈര്‍മൃണാലവലയൈര്‍മുഗ്ധസ്മിതശ്രീരിയം ।
ശ്രീകാഞ്ചീപുരനായികേ സമതയാ സംസ്തൂയതേ സജ്ജനൈഃ
തത്താദൃങ്മമ താപശാന്തിവിധയേ കിം ദേവി മന്ദായതേ ॥ 24 ॥
മധ്യേഗര്‍ഭിതമഞ്ജുവാക്യലഹരീമാധ്വീഝരീശീതലാ
മന്ദാരസ്തബകായതേ ജനനി തേ മന്ദസ്മിതാംശുച്ഛടാ ।
യസ്യാ വര്‍ധയിതും മുഹുര്‍വികസനം കാമാക്ഷി കാമദ്രുഹോ
വല്‍ഗുര്‍വീക്ഷണവിഭ്രമവ്യതികരോ വാസന്തമാസായതേ ॥ 25 ॥
ബിംബോഷ്ഠദ്യുതിപുഞ്ജരഞ്ജിതരുചിസ്ത്വന്‍മന്ദഹാസച്ഛടാ ।
കല്യാണം ഗിരിസാര്‍വഭൌമതനയേ കല്ലോലയത്വാശു മേ ।
ഫുല്ലന്‍മല്ലിപിനദ്ധഹല്ലകമയീ മാലേവ യാ പേശലാ
ശ്രീകാഞ്ചീശ്വരി മാരമര്‍ദിതുരുരോമധ്യേ മുഹുര്ലംബതേ ॥ 26 ॥
ബിഭ്രാണാ ശരദഭ്രവിഭ്രമദശാം വിദ്യോതമാനാപ്യസോ
കാമാക്ഷി സ്മിതമഞ്ജരീ കിരതി തേ കാരുണ്യധാരാരസം ।
ആശ്ചര്യം ശിശിരീകരോതി ജഗതീശ്ചാലോക്യ ചൈനാമഹോ
കാമം ഖേലതി നീലകണ്ഠഹൃദയം കൌതൂഹലാന്ദോലിതം ॥ 27 ॥
പ്രേങ്ഖത്പ്രൌഢകടാക്ഷകുഞ്ജകുഹരേഷ്വത്യച്ഛഗുച്ഛായിതം
വക്ത്രേന്ദുച്ഛവിസിന്ധുവീചിനിചയേ ഫേനപ്രതാനായിതം ।
നൈരന്തര്യവിജൃംഭിതസ്തനതടേ നൈചോലപട്ടായിതം
കാലുഷ്യം കബലീകരോതു മമ തേ കാമാക്ഷി മന്ദസ്മിതം ॥ 28 ॥
പീയൂഷം തവ മന്ഥരസ്മിതമിതി വ്യര്‍ഥൈവ സാപപ്രഥാ
കാമാക്ഷി ധ്രുവമീദൃശം യദി ഭവേദേതത്കഥം വാ ശിവേ ।
മന്ദാരസ്യ കഥാലവം ന സഹതേ മഥ്നാതി മന്ദാകിനീ-
മിന്ദും നിന്ദതി കീര്‍തിതേഽപി കലശീപാഥോധിമീര്‍ഷ്യായതേ ॥ 29 ॥
വിശ്വേഷാം നയനോത്സവം വിതനുതാം വിദ്യോതതാം ചന്ദ്രമാ
വിഖ്യാതോ മദനാന്തകേന മുകുടീമധ്യേ ച സമ്മാന്യതാം ।
ആഃ കിം ജാതമനേന ഹാസസുഷമാമാലോക്യ കാമാക്ഷി തേ
കാലങ്കീമവലംബതേ ഖലു ദശാം കല്‍മാഷഹീനോഽപ്യസൌ ॥ 30 ॥
ചേതഃ ശീതലയന്തു നഃ പശുപതേരാനന്ദജീവാതവോ
നംരാണാം നയനാധ്വസീമസു ശരച്ചന്ദ്രാതപോപക്രമാഃ ।
സംസാരാഖ്യസരോരുഹാകരഖലീകാരേ തുഷാരോത്കരാഃ
കാമാക്ഷി സ്മരകീര്‍തിബീജനികരാസ്ത്വന്‍മന്ദഹാസാങ്കുരാഃ ॥ 31 ॥
കര്‍മൌഘാഖ്യതമഃകചാകചികരാന്‍കാമാക്ഷി സംചിന്തയേ
ത്വന്‍മന്ദസ്മിതരോചിഷാം ത്രിഭുവനക്ഷേമംകരാനങ്കുരാന്‍ ।
യേ വക്ത്രം ശിശിരശ്രിയോ വികസിതം ചന്ദ്രാതപാംഭോരുഹ-
ദ്വേഷോദ്ധേഷോണചാതുരീമിവ തിരസ്കര്‍തും പരിഷ്കുര്‍വതേ ॥ 32 ॥
കുര്യുര്‍നഃ കുലശൈലരാജതനയേ കൂലംകഷം മങ്ഗലം
കുന്ദസ്പര്‍ധനചുഞ്ചവസ്തവ ശിവേ മന്ദസ്മിതപ്രക്രമാഃ ।
യേ കാമാക്ഷി സമസ്തസാക്ഷിനയനം സന്തോഷയന്തീശ്വരം
കര്‍പൂരപ്രകരാ ഇവ പ്രസൃമരാഃ പുംസാമസാധാരണാഃ ॥ 33 ॥
കംരേണ സ്നപയസ്വ കര്‍മകുഹനാചോരേണ മാരാഗമ-
വ്യാഖ്യാശിക്ഷണദീക്ഷിതേന വിദുഷാമക്ഷീണലക്ഷ്മീപുഷാ ।
കാമാക്ഷി സ്മിതകന്ദലേന കലുഷസ്ഫോടക്രിയാചുഞ്ചുനാ
കാരുണ്യാമൃതവീചികാവിഹരണപ്രാചുര്യധുര്യേണ മാം ॥ 34 ॥
ത്വന്‍മന്ദസ്മിതകന്ദലസ്യ നിയതം കാമാക്ഷി ശങ്കാമഹേ
ബിംബഃ കശ്ചന നൂതനഃ പ്രചലിതോ നൈശാകരഃ ശീകരഃ ।
കിംച ക്ഷീരപയോനിധിഃ പ്രതിനിധിഃ സ്വര്‍വാഹിനീവീചികാ-
ബിബ്വോകോഽപി വിഡംബ ഏവ കുഹനാ മല്ലീമതല്ലീരുചഃ ॥ 35 ॥
ദുഷ്കര്‍മാര്‍കനിസര്‍ഗകര്‍കശമഹസ്സമ്പര്‍കതപതം മില-
ത്പങ്കം ശങ്കരവല്ലഭേ മമ മനഃ കാഞ്ചീപുരാലംക്രിയേ ।
അംബ ത്വന്‍മൃദുലസ്മിതാമൃതരസേ മങ്ക്ത്വാ വിധൂയ വ്യഥാ-
മാനന്ദോദയസൌധശൃങ്ഗപദവീമാരോഢുമാകാങ്ക്ഷതി ॥ 36 ॥
നംരാണാം നഗരാജശേഖരസുതേ നാകാലയാനാം പുരഃ
കാമാക്ഷി ത്വരയാ വിപത്പ്രശമേന കാരുണ്യധാരാഃ കിരന്‍ ।
ആഗച്ഛന്തമനുഗ്രഹം പ്രകടയന്നാനന്ദബീജാനി തേ
നാസീരേ മൃദുഹാസ ഏവ തനുതേ നാഥേ സുധാശീതലഃ ॥ 37 ॥
കാമാക്ഷി പ്രഥമാനവിഭ്രമനിധിഃ കന്ദര്‍പദര്‍പപ്രസൂഃ
മുഗ്ധസ്തേ മൃദുഹാസ ഏവ ഗിരിജേ മുഷ്ണാതു മേ കില്‍ബിഷം ।
യം ദ്രഷ്ടും വിഹിതേ കരഗ്രഹ ഉമേ ശംഭുസ്ത്രപാമീലിതം
സ്വൈരം കാരയതി സ്മ താണ്ഡവവിനോദാനന്ദിനാ തണ്ഡുനാ ॥ 38 ॥
ക്ഷുണ്ണം കേനചിദേവ ധീരമനസാ കുത്രാപി നാനാജനൈഃ
കര്‍മഗ്രന്ഥിനിയന്ത്രിതൈരസുഗമം കാമാക്ഷി സാമാന്യതഃ ।
മുഗ്ധൈര്‍ദ്രുഷ്ടുമശക്യമേവ മനസാ മൂഢസയ മേ മൌക്തികം
മാര്‍ഗം ദര്‍ശയതു പ്രദീപ ഇവ തേ മന്ദസ്മിതശ്രീരിയം ॥ 39 ॥
ജ്യോത്സ്നാകാന്തിഭിരേവ നിര്‍മലതരം നൈശാകരം മണ്ഡലം
ഹംസൈരേവ ശരദ്വിലാസസമയേ വ്യാകോചമംഭോരുഹം ।
സ്വച്ഛൈരേവ വികസ്വരൈരുഡുഗുണൈഃ കാമാക്ഷി ബിംബം ദിവഃ
പുണ്യൈരേവ മൃദുസ്മിതൈസ്തവ മുഖം പുഷ്ണാതി ശോഭാഭരം ॥ 40 ॥
മാനഗ്രന്ഥിവിധുന്തുദേന രഭസാദാസ്വാദ്യമാനേ നവ-
പ്രേമാഡംബരപൂര്‍ണിമാഹിമകരേ കാമാക്ഷി തേ തത്ക്ഷണം ।
ആലോക്യ സ്മിതചന്ദ്രികാം പുനരിമാമുന്‍മീലനം ജഗ്മുഷീം
ചേതഃ ശീലയതേ ചകോരചരിതം ചന്ദ്രാര്‍ധചൂഡാമണേഃ ॥ 41 ॥
കാമാക്ഷി സ്മിതമഞ്ജരീം തവ ഭജേ യസ്യാസ്ത്വിഷാമങ്കുരാ-
നാപീനസ്തനപാനലാലസതയാ നിശ്ശങ്കമങ്കേശയഃ ।
ഊര്‍ധ്വം വീക്ഷ്യ വികര്‍ഷതി പ്രസൃമരാനുദ്ദാമയാ ശുണ്ഡയാ
സൂനുസുതേ ബിസശങ്കയാശു കുഹനാദന്താവലഗ്രാമണീഃ ॥ 42 ॥
ഗാഢാശ്ലേഷവിമര്‍ദസംഭ്രമവശാദുദ്ദാമമുക്താഗുണ-
പ്രാലംബേ കുചകുംഭയോര്‍വിഗലിതേ ദക്ഷദ്വിഷോ വക്ഷസി ।
യാ സഖ്യേന പിനഹ്യതി പ്രചുരയാ ഭാസാ തദീയാം ദശാം
സാ മേ ഖേലതു കാമകോടി ഹൃദയേ സാന്ദ്രസ്മിതാംശുച്ഛടാ ॥ 43 ॥
മന്ദാരേ തവ മന്ഥരസ്മിതരുചാം മാത്സര്യമാലോക്യതേ
കാമാക്ഷി സ്മരശാസനേ ച നിയതോ രാഗോദയോ ലക്ഷ്യതേ ।
ചാന്ദ്രീഷു ദ്യുതിമഞ്ജരീഷു ച മഹാന്ദ്വേഷാങ്കുരോ ദൃശ്യതേ
ശുദ്ധാനാം കഥമീദൃശീ ഗിരിസുതേഽതിശുദ്ധാ ദശാ കഥ്യതാം ॥ 44 ॥
പീയൂഷം ഖലു പീയതേ സുരജനൈര്‍ദുഗ്ധാംബുധിര്‍മഥ്യതേ
മാഹേശൈശ്ച ജടാകലാപനിഗഡൈര്‍മന്ദാകിനീ നഹ്യതേ ।
ശീതാംശുഃ പരിഭൂയതേ ച തമസാ തസ്മാദനേതാദൃശീ
കാമാക്ഷി സ്മിതമഞ്ജരീ തവ വചോവൈദഗ്ധ്യമുല്ലങ്ഘതേ ॥ 45 ॥
ആശങ്കേ തവ മന്ദഹാസലഹരീമന്യാദൃശീം ചന്ദ്രികാ-
മേകാംരേശകുടുംബിനി പ്രതിപദം യസ്യാഃ പ്രഭാസംഗമേ ।
വക്ഷോജാംബുരുഹേ ന തേ രചയതഃ കാംചിദ്ദശാം കൌങ്മലീ-
മാസ്യാംഭോരുഹമംബ കിംച ശനകൈരാലംബതേ ഫുല്ലതാം ॥ 46 ॥
ആസ്തീര്‍ണാധരകാന്തിപല്ലവചയേ പാതം മുഹുര്‍ജഗ്മുഷീ
മാരദ്രോഹിണി കന്ദലത്സ്മരശരജ്വാലാവലീര്‍വ്യഞ്ജതീ ।
നിന്ദന്തീ ഘനസാരഹാരവലയജ്യോത്സ്നാമൃണാലാനി തേ
കാമാക്ഷി സ്മിതചാതുരീ വിരഹിണീരീതിം ജഗാഹേതരാം ॥ 47 ॥
സൂര്യാലോകവിധൌ വികാസമധികം യാന്തീ ഹരന്തീ തമ-
സ്സന്ദോഹം നമതാം നിജസ്മരണതോ ദോഷാകരദ്വേഷിണീ ।
നിര്യാന്തീ വദനാരവിന്ദകുഹരാന്നിര്‍ധൂതജാഡ്യാ നൃണാം
ശ്രീകാമാക്ഷി തവ സ്മിതദ്യുതിമയീ ചിത്രീയതേ ചന്ദ്രികാ ॥ 48 ॥
കുണ്ഠീകുര്യുരമീ കുബോധഘടനാമസ്മന്‍മനോമാഥിനീം
ശ്രീകാമാക്ഷി ശിവംകരാസ്തവ ശിവേ ശ്രീമന്ദഹാസാങ്കുരാഃ ।
യേ തന്വന്തി നിരന്തരം തരുണിമസ്തംബേരമഗ്രാമണീ-
കുംഭദ്വന്ദ്വവിഡംബിനി സ്തനതടേ മുക്താകുഥാഡംബരം ॥ 49 ॥
പ്രേങ്ഖന്തഃ ശരദംബുദാ ഇവ ശനൈഃ പ്രേമാനിലൈഃ പ്രേരിതാ
മജ്ജന്തോ മന്ദനാരികണ്ഠസുഷമാസിന്ധൌ മുഹുര്‍മന്ഥരം ।
ശ്രീകാമാക്ഷി തവ സ്മിതാംശുനികരാഃ ശ്യാമായമാനശ്രിയോ
നീലാംഭോധരനൈപുണീം തത ഇതോ നിര്‍നിദ്രയന്ത്യഞ്ജസാ ॥ 50 ॥
വ്യാപാരം ചതുരാനനൈകവിഹൃതൌ വ്യാകുര്‍വതീ കുര്‍വതീ
രുദ്രാക്ഷഗ്രഹണം മഹേശി സതതം വാഗൂര്‍മികല്ലോലിതാ ।
ഉത്ഫുല്ലം ധവലാരവിന്ദമധരീകൃത്യ സ്ഫുരന്തീ സദാ
ശ്രീകാമാക്ഷി സരസ്വതീ വിജയതേ ത്വന്‍മന്ദഹാസപ്രഭാ ॥ 51 ॥
കര്‍പൂരദ്യുതിതസ്കരേണ മഹസാ കല്‍മാഷയത്യാനനം
ശ്രീകാഞ്ചീപുരനായികേ പതിരിവ ശ്രീമന്ദഹാസോഽപി തേ ।
ആലിങ്ഗത്യതിപീവരാം സ്തനതടീം ബിംബാധരം ചുംബതി
പ്രൌഢം രാഗഭരം വ്യനക്തി മനസോ ധൈര്യം ധുനീതേതരാം ॥ 52 ॥
വൈശദ്യേന ച വിശ്വതാപഹരണക്രീഡാപടീയസ്തയാ
പാണ്ഡിത്യേന പചേലിമേന ജഗതാം നേത്രോത്സവോത്പാദേന ।
കാമാക്ഷി സ്മിതകന്ദലൈസ്തവ തുലാമാരോഢുമുദ്യോഗിനീ
ജ്യോത്സ്നാസൌ ജലരാശിപോഷണതയാ ദൂഷ്യാം പ്രപന്നാ ദശാം ॥ 53 ॥
ലാവണ്യാംബുജിനീമൃണാലവലയൈഃ ശൃങ്ഗാരഗന്ധദ്വിപ-
ഗ്രാമണ്യഃ ശ്രുതിചാമരൈസ്തരുണിമസ്വാരാജ്യതേജോങ്കുരൈഃ ।
ആനന്ദാമൃതസിന്ധുവീചിപൃഷതൈരാസ്യാബ്ജഹംസൈസ്തവ
ശ്രീകാമാക്ഷി മഥാന മന്ദഹസിതൈര്‍മത്കം മനഃകല്‍മഷം ॥ 54 ॥
ഉത്തുങ്ഗസ്തനമണ്ഡലീപരിചലന്‍മാണിക്യഹാരച്ഛടാ-
ചഞ്ചച്ഛോണിമപുഞ്ജമധ്യസരണിം മാതഃ പരിഷ്കുര്‍വതീ ।
യാ വൈദഗ്ധ്യമുപൈതി ശംകരജടാകാന്താരവാടീപത-
ത്സ്വര്‍വാപീപയസഃ സ്മിതദ്യുതിരസൌ കാമാക്ഷി തേ മഞ്ജുലാ ॥ 55 ॥
സന്നാമൈകജുഷാ ജനേന സുലഭം സംസൂചയന്തീ ശനൈ-
രുത്തുങ്ഗസ്യ ചിരാദനുഗ്രഹതരോരുത്പത്സ്യമാനം ഫലം ।
പ്രാഥംയേന വികസ്വരാ കുസുമവത്പ്രാഗല്‍ഭ്യമഭ്യേയുഷീ
കാമാക്ഷി സ്മിതചാതുരീ തവ മമ ക്ഷേമംകരീ കല്‍പതാം ॥ 56 ॥
ധാനുഷ്കാഗ്രസരസ്യ ലോലകുടിലഭ്രൂലേഖയാ ബിഭ്രതോ
ലീലാലോകശിലീമുഖം നവവയസ്സാംരാജ്യലക്ഷ്മീപുഷഃ ।
ജേതും മന്‍മഥമര്‍ദിനം ജനനി തേ കാമാക്ഷി ഹാസഃ സ്വയം
വല്‍ഗുര്‍വിഭ്രമഭൂഭൃതോ വിതനുതേ സേനാപതിപ്രക്രിയാം ॥ 57 ॥
യന്നാകമ്പത കാലകൂടകബലീകാരേ ചുചുംബേ ന യദ്-
ഗ്ലാന്യാ ചക്ഷുഷി രൂഷിതാനലശിഖേ രുദ്രസ്യ തത്താദൃശം ।
ചേതോ യത്പ്രസഭം സ്മരജ്വരശിഖിജ്വാലേന ലേലിഹ്യതേ
തത്കാമാക്ഷി തവ സ്മിതാംശുകലികാഹേലാഭവം പ്രാഭവം ॥ 58 ॥
സംഭിന്നേവ സുപര്‍വലോകതടിനീ വീചീചയൈര്യാമുനൈഃ
സമ്മിശ്രേവ ശശാങ്കദീപ്തിലഹരീ നീലൈര്‍മഹാനീരദൈഃ ।
കാമാക്ഷി സ്ഫുരിതാ തവ സ്മിതരുചിഃ കാലാഞ്ജനസ്പര്‍ധിനാ
കാലിംനാ കചരോചിഷാം വ്യതികരേ കാംചിദ്ദശാമശ്നുതേ ॥ 59 ॥
ജാനീമോ ജഗദീശ്വരപ്രണയിനി ത്വന്‍മന്ദഹാസപ്രഭാം
ശ്രീകാമാക്ഷി സരോജിനീമഭിനവാമേഷാ യതഃ സര്‍വദാ ।
ആസ്യേന്ദോരവലോകേന പശുപതേരഭ്യേതി സംഫുല്ലതാം
തന്ദ്രാലുസ്തദഭാവ ഏവ തനുതേ തദ്വൈപരീത്യക്രമം ॥ 60 ॥
യാന്തീ ലോഹിതിമാനമഭ്രതടിനീ ധാതുച്ഛടാകര്‍ദമൈഃ
ഭാന്തീ ബാലഗഭസ്തിമാലികിരണൈര്‍മേഘാവലീ ശാരദീ ।
ബിംബോഷ്ഠദ്യുതിപുഞ്ജചുംബനകലാശോണായമാനേന തേ
കാമാക്ഷി സ്മിതരോചിഷാ സമദശാമാരോഢുമാകാങ്ക്ഷതേ ॥ 61 ॥
ശ്രീകാമാക്ഷി മുഖേന്ദുഭൂഷണമിദം മന്ദസ്മിതം താവകം
നേത്രാനന്ദകരം തഥാ ഹിമകരോ ഗച്ഛേദ്യഥാ തിഗ്മതാം ।
ശീതം ദേവി തഥാ യഥാ ഹിമജലം സന്താപമുദ്രാസ്പദം
ശ്വേതം കിംച തഥാ യഥാ മലിനതാം ധത്തേ ച മുക്താമണിഃ ॥ 62 ॥
ത്വന്‍മന്ദസ്മിതമഞ്ജരീം പ്രസൃമരാം കാമാക്ഷി ചന്ദ്രാതപം
സന്തഃ സന്തതമാമനന്ത്യമലതാ തല്ലക്ഷണം ലക്ഷ്യതേ ।
അസ്മാകം ന ധുനോതി താപകമധികം ധൂനോതി നാഭ്യന്തരം
ധ്വാന്തം തത്ഖലു ദുഃഖിനോ വയമിദം കേനോതി നോ വിദ്മഹേ ॥ 63 ॥
നംരസ്യ പ്രണയപ്രരൂഢകലഹച്ഛേദായ പാദാബ്ജയോഃ
മന്ദം ചന്ദ്രകിശോരശേഖരമണേഃ കാമാക്ഷി രാഗേണ തേ ।
ബന്ധൂകപ്രസവശ്രിയം ജിതവതോ ബംഹീയസീം താദൃശീം
ബിംബോഷ്ഠസ്യ രുചിം നിരസ്യ ഹസിതജ്യോത്സ്നാ വയസ്യായതേ ॥ 64 ॥
മുക്താനാം പരിമോചനം വിദധതസ്തത്പ്രീതിനിഷ്പാദിനീ
ഭൂയോ ദൂരത ഏവ ധൂതമരുതസ്തത്പാലനം തന്വതീ ।
ഉദ്ഭൂതസ്യ ജലാന്തരാദവിരതം തദ്ദൂരതാം ജഗ്മുഷീ
കാമാക്ഷി സ്മിതമഞ്ജരീ തവ കഥം കംബോസ്തുലാമശ്നുതേ ॥ 65 ॥
ശ്രീകാമാക്ഷി തവ സ്മിതദ്യുതിഝരീവൈദഗ്ധ്യലീലായിതം
പശ്യന്തോഽപി നിരന്തരം സുവിമലമ്മന്യാ ജഗന്‍മണ്ഡലേ ।
ലോകം ഹാസയിതും കിമര്‍ഥമനിശം പ്രാകാശ്യമാതന്വതേ
മന്ദാക്ഷം വിരഹയ്യ മങ്ഗലതരം മന്ദാരചന്ദ്രാദയഃ ॥ 66 ॥
ക്ഷീരാബ്ധേരപി ശൈലരാജതനയേ ത്വന്‍മന്ദഹാസസ്യ ച
ശ്രീകാമാക്ഷി വലക്ഷിമോദയനിധേഃ കിംചിദ്ഭിദാം ബ്രൂമഹേ ।
ഏകസ്മൈ പുരുഷായ ദേവി സ ദദൌ ലക്ഷ്മീം കദാചിത്പുരാ
സര്‍വേഭ്യോഽപി ദദാത്യസൌ തു സതതം ലക്ഷ്മീം ച വാഗീശ്വരീം ॥ 67 ॥
ശ്രീകാഞ്ചീപുരരത്നദീപകലികേ താന്യേവ മേനാത്മജേ
ചാകോരാണി കുലാനി ദേവി സുതരാം ധന്യാനി മന്യാമഹേ ।
കമ്പാതീരകുടുംബചംക്രമകലാചുഞ്ചൂനി ചഞ്ചൂപുടൈഃ
നിത്യം യാനി തവ സ്മിതേന്ദുമഹസാമാസ്വാദമാതന്വതേ ॥ 68 ॥
ശൈത്യപ്രക്രമമാശ്രിതോഽപി നമതാം ജാഡ്യപ്രഥാം ധൂനയന്‍
നൈര്‍മല്യം പരമം ഗതോഽപി ഗിരിശം രാഗാകുലം ചാരയന്‍ ।
ലീലാലാപപുരസ്സരോഽപി സതതം വാചംയമാന്‍പ്രീണയന്‍
കാമാക്ഷി സ്മിതരോചിഷാം തവ സമുല്ലാസഃ കഥം വര്‍ണ്യതേ ॥ 69 ॥
ശ്രോണീചഞ്ചലമേഖലാമുഖരിതം ലീലാഗതം മന്ഥരം
ഭ്രൂവല്ലീചലനം കടാക്ഷവലനം മന്ദാക്ഷവീക്ഷാചണം ।
യദ്വൈദഗ്ധ്യമുഖേന മന്‍മഥരിപും സമ്മോഹയന്ത്യഞ്ജസാ
ശ്രീകാമാക്ഷി തവ സ്മിതായ സതതം തസ്മൈ നംസകുര്‍മഹേ ॥ 70 ॥
ശ്രീകാമാക്ഷി മനോജ്ഞമന്ദഹസിതജ്യോതിഷ്പ്രരോഹേ തവ
സ്ഫീതശ്വേതിമസാര്‍വഭൌമസരണിപ്രാഗല്‍ഭ്യമഭ്യേയുഷി ।
ചന്ദ്രോഽയം യുവരാജതാം കലയതേ ചേടീധുരം ചന്ദ്രികാ
ശുദ്ധാ സാ ച സുധാഝരീ സഹചരീസാധര്‍ംയമാലംബതേ ॥ 71 ॥
ജ്യോത്സ്നാ കിം തനുതേ ഫലം തനുമതാമൌഷ്ണ്യപ്രശാന്തിം വിനാ
ത്വന്‍മന്ദസ്മിതരോചിഷാ തനുമതാം കാമാക്ഷി രോചിഷ്ണുനാ ।
സന്താപോ വിനിവാര്യതേ നവവയഃപ്രാചുര്യമങ്കൂര്യതേ
സൌന്ദര്യം പരിപൂര്യതേ ജഗതി സാ കീര്‍തിശ്ച സംചാര്യതേ ॥ 72 ॥
വൈമല്യം കുമുദശ്രിയാം ഹിമരുചഃ കാന്ത്യൈവ സന്ധുക്ഷ്യതേ
ജ്യോത്സ്നാരോചിരപി പ്രദോഷസമയം പ്രാപ്യൈവ സമ്പദ്യതേ ।
സ്വച്ഛത്വം നവമൌക്തികസ്യ പരമം സംസ്കാരതോ ദൃശ്യതേ
കാമാക്ഷ്യാഃ സ്മിതദീധിതേര്‍വിശദിമാ നൈസര്‍ഗികോ ഭാസതേ ॥ 73 ॥
പ്രാകാശ്യം പരമേശ്വരപ്രണയിനി ത്വന്‍മന്ദഹാസശ്രിയഃ
ശ്രീകാമാക്ഷി മമ ക്ഷിണോതു മമതാവൈചക്ഷണീമക്ഷയാം ।
യദ്ഭീത്യേവ നിലീയതേ ഹിമകരോ മേഘോദരേ ശുക്തികാ-
ഗര്‍ഭേ മൌക്തികമണ്ഡലീ ച സരസീമധ്യേ മൃണാലീ ച സാ ॥ 74 ॥
ഹേരംബേ ച ഗുഹേ ഹര്‍ഷഭരിതം വാത്സല്യമങ്കൂരയത്
മാരദ്രോഹിണി പൂരുഷേ സഹഭുവം പ്രേമാങ്കുരം വ്യഞ്ജയത് ।
ആനംരേഷു ജനേഷു പൂര്‍ണകരുണാവൈദഗ്ധ്യമുത്താലയത്
കാമാക്ഷി സ്മിതമഞ്ജസാ തവ കഥംകാരം മയാ കഥ്യതേ ॥ 75 ॥
സംക്രുദ്ധദ്വിജരാജകോഽപ്യവിരതം കുര്‍വന്ദ്വിജൈഃ സംഗമം
വാണീപദ്ധതിദൂരഗോഽപി സതതം തത്സാഹചര്യം വഹന്‍ ।
അശ്രാന്തം പശുദുര്ലഭോഽപി കലയന്‍പത്യൌ പശൂനാം രതിം
ശ്രീകാമാക്ഷി തവ സ്മിതാമൃതരസസ്യന്ദോ മയി സ്പന്ദതാം ॥ 76 ॥
ശ്രീകാമാക്ഷി മഹേശ്വരേ നിരുപമപ്രേമാങ്കുരപ്രക്രമമ്മ്
നിത്യം യഃ പ്രകടീകരോതി സഹജാമുന്നിദ്രയന്‍മാധുരീം ।
തത്താദൃക്തവ മന്ദഹാസമഹിമാ മാതഃ കഥം മാനിതാം
തന്‍മൂര്‍ധ്നാ സുരനിംനഗാം ച കലികാമിന്ദോശ്ച താം നിന്ദതി ॥ 77 ॥
യേ മാധുര്യവിഹാരമണ്ടപഭുവോ യേ ശൈത്യമുദ്രാകരാ
യേ വൈശദ്യദശാവിശേഷസുഭഗാസ്തേ മന്ദഹാസാങ്കുരാഃ ।
കാമാക്ഷ്യാഃ സഹജം ഗുണത്രയമിദം പര്യായതഃ കുര്‍വതാം
വാണീഗുംഫനഡംബരേ ച ഹൃദയേ കീര്‍തിപ്രരോഹേ ച മേ ॥ 78 ॥
കാമാക്ഷ്യാ മൃദുലസ്മിതാംശുനികരാ ദക്ഷാന്തകേ വീക്ഷണേ
മന്ദാക്ഷഗ്രഹിലാ ഹിമദ്യുതിമയൂഖാക്ഷേപദീക്ഷാങ്കുരാഃ ।
ദാക്ഷ്യം പക്ഷ്മലയന്തു മാക്ഷികഗുഡദ്രാക്ഷാഭവം വാക്ഷു മേ
സൂക്ഷ്മം മോക്ഷപഥം നിരീക്ഷിതുമപി പ്രക്ഷാലയേയുര്‍മനഃ ॥ 79 ॥
ജാത്യാ ശീതശീതലാനി മധുരാണ്യേതാനി പൂതാനി തേ
ഗാങ്ഗാനീവ പയാംസി ദേവി പടലാന്യല്‍പസ്മിതജ്യോതിഷാം ।
ഏനഃപങ്കപരമ്പരാമലിനിതാമേകാംരനാഥപ്രിയേ
പ്രജ്ഞാനാത്സുതരാം മദീയധിഷണാം പ്രക്ഷാലയന്തു ക്ഷണാത് ॥ 80 ॥
അശ്രാന്തം പരതന്ത്രിതഃ പശുപതിസ്ത്വന്‍മന്ദഹാസാങ്കുരൈഃ
ശ്രീകാമാക്ഷി തദീയവര്‍ണസമതാസങ്ഗേന ശങ്കാമഹേ ।
ഇന്ദും നാകധുനീം ച ശേഖരയതേ മാലാം ച ധത്തേ നവൈഃ
വൈകുണ്ഠൈരവകുണ്ഠനം ച കുരുതേ ധൂലീചയൈര്‍ഭാസ്മനൈഃ ॥ 81 ॥
ശ്രീകാഞ്ചീപുരദേവതേ മൃദുവചസ്സൌരഭ്യമുദ്രാസ്പദം
പ്രൌഢപ്രേമലതാനവീനകുസുമം മന്ദസ്മിതം താവകം ।
മന്ദം കന്ദലതി പ്രിയസ്യ വദനാലോകേ സമാഭാഷണേ
ശ്ലക്ഷ്ണേ കുങ്മലതി പ്രരൂഢപുലകേ ചാശ്ലോഷണേ ഫുല്ലതി ॥ 82 ॥
കിം ത്രൈസ്രോതസമംബികേ പരിണതം സ്രോതശ്ചതുര്‍ഥം നവം
പീയൂഷസ്യ സമസ്തതാപഹരണം കിംവാ ദ്വിതീയം വപുഃ ।
കിംസ്വിത്ത്വന്നികടം ഗതം മധുരിമാഭ്യാസായ ഗവ്യം പയഃ
ശ്രീകാഞ്ചീപുരനായകപ്രിയതമേ മന്ദസ്മിതം താവകം ॥ 83 ॥
ഭൂഷാ വക്ത്രസരോരുഹസ്യ സഹജാ വാചാം സഖീ ശാശ്വതീ
നീവീ വിഭ്രമസന്തതേഃ പശുപതേഃ സൌധീ ദൃശാം പാരണാ ।
ജീവാതുര്‍മദനശ്രിയഃ ശശിരുചേരുച്ചാടനീ ദേവതാ
ശ്രീകാമാക്ഷി ഗിരാമഭൂമിമയതേ ഹാസപ്രഭാമഞ്ജരീ ॥ 84 ॥
സൂതിഃ ശ്വേതിമകന്ദലസ്യ വസതിഃ ശൃങ്ഗാരസാരശ്രിയഃ
പൂര്‍തിഃ സൂക്തിഝരീരസസ്യ ലഹരീ കാരുണ്യപാഥോനിധേഃ ।
വാടീ കാചന കൌസുമീ മധുരിമസ്വാരാജ്യലക്ഷ്ംയാസ്തവ
ശ്രീകാമാക്ഷി മമാസ്തു മങ്ഗലകരീ ഹാസപ്രഭാചാതുരീ ॥ 85 ॥
ജന്തൂനാം ജനിദുഃഖമൃത്യുലഹരീസന്താപനം കൃന്തതഃ
പ്രൌഢാനുഗ്രഹപൂര്‍ണശീതലരുചോ നിത്യോദയം ബിഭ്രതഃ ।
ശ്രീകാമാക്ഷി വിസൃത്വരാ ഇവ കരാ ഹാസാങ്കുരാസ്തേ ഹഠാ-
ദാലോകേന നിഹന്യുരന്ധതമസസ്തോമസ്യ മേ സന്തതിം ॥ 86 ॥
ഉത്തുങ്ഗസ്തനമണ്ഡലസ്യ വിലസല്ലാവണ്യലീലാനടീ-
രങ്ഗസ്യ സ്ഫുടമൂര്‍ധ്വസീമനി മുഹുഃ പ്രാകാശ്യമഭ്യേയുഷീ ।
ശ്രീകാമാക്ഷി തവ സ്മിതദ്യുതിതതിര്‍ബിംബോഷ്ഠകാന്ത്യങ്കുരൈഃ
ചിത്രാം വിദ്രുമമുദ്രിതാം വിതനുതേ മൌക്തീം വിതാനശ്രിയം ॥ 87 ॥
സ്വാഭാവ്യാത്തവ വക്ത്രമേവ ലലിതം സന്തോഷസമ്പാദനം
ശംഭോഃ കിം പുനരഞ്ചിതസ്മിതരുചഃ പാണ്ഡിത്യപാത്രീകൃതം ।
അംഭോജം സ്വത ഏവ സര്‍വജഗതാം ചക്ഷുഃപ്രിയംഭാവുകം
കാമാക്ഷി സ്ഫുരിതേ ശരദ്വികസിതേ കീദൃഗ്വിധം ഭ്രാജതേ ॥ 88 ॥
പുംഭിര്‍നിര്‍മലമാനസൌര്‍വിദധതേ മൈത്രീം ദൃഢം നിര്‍മലാം
ലബ്ധ്വാ കര്‍മലയം ച നിര്‍മലതരാം കീര്‍തിം ലഭന്തേതരാം ।
സൂക്തിം പക്ഷ്മലയന്തി നിര്‍മലതമാം യത്താവകാഃ സേവകാഃ
തത്കാമാക്ഷി തവ സ്മിതസ്യ കലയാ നൈര്‍മല്യസീമാനിധേഃ ॥ 89 ॥
ആകര്‍ഷന്നയനാനി നാകിസദസാം ശൈത്യേന സംസ്തംഭയ-
ന്നിന്ദും കിംച വിമോഹയന്‍പശുപതിം വിശ്വാര്‍തിമുച്ചാടയന്‍ ।
ഹിംസത്സംസൃതിഡംബരം തവ ശിവേ ഹാസാഹ്വയോ മാന്ത്രികഃ
ശ്രീകാമാക്ഷി മദീയമാനസതമോവിദ്വേഷണേ ചേഷ്ടതാം ॥ 90 ॥
ക്ഷേപീയഃ ക്ഷപയന്തു കല്‍മഷഭയാന്യസ്മാകമല്‍പസ്മിത-
ജ്യോതിര്‍മണ്ഡലചംക്രമാസ്തവ ശിവേ കാമാക്ഷി രോചിഷ്ണവഃ ।
പീഡാകര്‍മഠകര്‍മഘര്‍മസമയവ്യാപാരതാപാനല-
ശ്രീപാതാ നവഹര്‍ഷവര്‍ഷണസുധാസ്രോതസ്വിനീശീകരാഃ ॥ 91 ॥
ശ്രീകാമാക്ഷി തവ സ്മിതൈന്ദവമഹഃപൂരേ പരിംഫൂര്‍ജതി
പ്രൌഢാം വാരിധിചാതുരീം കലയതേ ഭക്താത്മനാം പ്രാതിഭം ।
ദൌര്‍ഗത്യപ്രസരാസ്തമഃപടലികാസാധര്‍ംയമാബിഭ്രതേ
സര്‍വം കൈരവസാഹചര്യപദവീരീതിം വിധത്തേ പരം ॥ 92 ॥
മന്ദാരാദിഷു മന്‍മഥാരിമഹിഷി പ്രാകാശ്യരീതിം നിജാം
കാദാചിത്കതയാ വിശങ്ക്യ ബഹുശോ വൈശദ്യമുദ്രാഗുണഃ ।
സാതത്യേന തവ സ്മിതേ വിതനുതേ സ്വൈരാസനാവാസനാം ॥ 93 ॥
ഇന്ധാനേ ഭവവീതിഹോത്രനിവഹേ കര്‍മൌഘചണ്ഡാനില-
പ്രൌഢിംനാ ബഹുലീകൃതേ നിപതിതം സന്താപചിന്താകുലം ।
മാതര്‍മാം പരിഷിഞ്ച കിംചിദമലൈഃ പീയൂഷവര്‍ഷൈരിവ
ശ്രീകാമാക്ഷി തവ സ്മിതദ്യുതികണൈഃ ശൈശിര്യലീലാകരൈഃ ॥ 94 ॥
ഭാഷായാ രസനാഗ്രഖേലനജുഷഃ ശൃങ്ഗാരമുദ്രാസഖീ-
ലീലാജാതരതേഃ സുഖേന നിയമസ്നാനായ മേനാത്മജേ ।
ശ്രീകാമാക്ഷി സുധാമയീവ ശിശിരാ സ്രോതസ്വിനീ താവകീ
ഗാഢാനന്ദതരങ്ഗിതാ വിജയതേ ഹാസപ്രഭാചാതുരീ ॥ 95 ॥
സന്താപം വിരലീകരോതു സകലം കാമാക്ഷി മച്ചേതനാ
മജ്ജന്തീ മധുരസ്മിതാമരധുനീകല്ലോലജാലേഷു തേ ।
നൈരന്തര്യമുപേത്യ മന്‍മഥമരുല്ലോലേഷു യേഷു സ്ഫുടം
പ്രേമേന്ദുഃ പ്രതിബിംബിതോ വിതനുതേ കൌതൂഹലം ധൂര്‍ജടേഃ ॥ 96 ॥
ചേതഃക്ഷീരപയോധിമന്ഥരചലദ്രാഗാഖ്യമന്ഥാചല-
ക്ഷോഭവ്യാപൃതിസംഭവാം ജനനി തേ മന്ദസ്മിതശ്രീസുധാം ।
സ്വാദംസ്വാദമുദീതകൌതുകരസാ നേത്രത്രയീ ശാംകരീ
ശ്രീകാമാക്ഷി നിരന്തരം പരിണമത്യാനന്ദവീചീമയീ ॥ 97 ॥
ആലോകേ തവ പഞ്ചസായകരിപോരുദ്ദാമകൌതൂഹല-
പ്രേങ്ഖന്‍മാരുതഘട്ടനപ്രചലിതാദാനന്ദദുഗ്ധാംബുധേഃ ।
കാചിദ്വീചിരുദഞ്ചതി പ്രതിനവാ സംവിത്പ്രരോഹാത്മികാ
താം കാമാക്ഷി കവീശ്വരാഃ സ്മിതമിതി വ്യാകുര്‍വതേ സര്‍വദാ ॥ 98 ॥
സൂക്തിഃ ശീലയതേ കിമദ്രിതനയേ മന്ദസ്മിതാത്തേ മുഹുഃ
മാധുര്യാഗമസമ്പ്രദായമഥവാ സൂക്തേര്‍നു മന്ദസ്മിതം ।
ഇത്ഥം കാമപി ഗാഹതേ മമ മനഃ സന്ദേഹമാര്‍ഗഭ്രമിം
ശ്രീകാമാക്ഷി ന പാരമാര്‍ഥ്യസരണിസ്ഫൂര്‍തൌ നിധത്തേ പദം ॥ 99 ॥
ക്രീഡാലോലകൃപാസരോരുഹമുഖീസൌധാങ്ഗണേഭ്യഃ കവി-
ശ്രേണീവാക്പരിപാടികാമൃതഝരീസൂതീഗൃഹേഭ്യഃ ശിവേ ।
നിര്‍വാണാങ്കുരസാര്‍വഭൌമപദവീസിംഹാസനേഭ്യസ്തവ
ശ്രീകാമാക്ഷി മനോജ്ഞമന്ദഹസിതജ്യോതിഷ്കണേഭ്യോ നമഃ ॥ 100 ॥
ആര്യാമേവ വിഭാവയന്‍മനസി യഃ പാദാരവിന്ദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിം ।
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാം
ആരോഹത്യപവര്‍ഗസൌധവലഭീമാനന്ദവീചീമയീം ॥ 101 ॥
മന്ദസ്മിതശതകം സമ്പൂര്‍ണം ॥
ശ്രീ മൂകപഞ്ചശതീ സമ്പൂര്‍ണാ ॥
॥ ഓം തത് സത് ॥
