Sri Sharada Shatashlokistavah in Bengali:
শ্রীশারদাশতশ্লোকীস্তবঃ
করোতু পদবিন্যাসান্কমলাসনকামিনী ।
জিহ্বাগ্রে মম কারুণ্যাজ্জিতচন্দ্রায়ুতপ্রভা ॥ ১ ॥
পাপেঽপি শারদাম্ব ত্বং কৃত্বা বহুকৃপাং ময়ি ।
গরীয়সীং চাপি বাঞ্ছাং পূরয়াশু কৃপানিধে ॥ ২ ॥
বহুভিস্ত্বদ্বদনাম্বুজমুল্লেখৈঃ স্তোতুমার্যজনহৃদ্যৈঃ ।
প্রতিভাং প্রয়চ্ছ মহ্যং করুণাজলধে পয়োজভবজায়ে ॥ ৩ ॥
চম্পকসুমকোরকয়ুক্চকিতমৃগীপ্রেক্ষণেন সংয়ুক্তম্ ।
শুককেকিনিনদজুষ্টং বনমিব তব ভাতি বদনাব্জম্ ॥ ৪ ॥
নাসিকাখ্যবরশাখয়া য়ুতং খঞ্জরীটখগয়ুগ্মভূষিতম্ ।
পক্ববিম্বফলসংয়ুতং শিবে ভাতি ভূরুহ ইবাননং তব ॥ ৫ ॥
ভক্তকেকিকুলতোষণব্রতং পদ্মসম্ভবহৃদম্বরাশ্রিতম্ ।
গদ্যপদ্যময়বারিসন্দদন্মেঘবত্তব মুখং বিভাতি মে ॥ ৬ ॥
নেত্রোত্পলালঙ্কৃতমধ্যভাগং ভ্রূবল্লিকাবম্ভরপঙ্ক্তিরম্যম্ ।
পক্ষ্মালিশৈবালয়ুতং বিভাতি তবাস্যমেতত্সরসীব বাণি ॥ ৭ ॥
সুচিল্লিকাতোরণশোভমানং বিশালফালাঙ্গণরম্যরম্যম্ ।
উত্তুঙ্গমাণিক্যকিরীটহর্ম্যং বিভাতি বেশ্মেব তবাম্ব বক্ত্রম্ ॥ ৮ ॥
নয়নঝষয়ুতোঽয়ং দন্তমুক্তাফলাঢ্যো
দশনবসননামশ্রীপ্রবালপ্রভায়ুক্ ।
প্রতিপদমভিবৃদ্ধৈঃ কান্তিপূরৈঃ সমেতঃ
শরধিরিব বিভাতি ত্বন্মুখং বাক্সবিত্রি ॥ ৯ ॥
কলয় কলিবিমোকং কালকালানুজাতে
কলয় শুভসমৃদ্ধিং ভূমিমধ্যেঽখিলেঽস্মিন্ ।
কলয় রুচিসমৃদ্ধিং স্বস্বধর্মে জনানাং
কলয় সুখসমৃদ্ধিং স্বস্বধর্মে রতানাম্ ॥ ১০ ॥
স্ফুর হ্রুদয়সরোজে শারদে শুভ্রবর্ণে
কলশমমৃতপূর্ণং মালিকাং বোধমুদ্রাম্ ।
সরসিজনিভহস্তৈর্বিভ্রতী পুস্তকং চ
প্রণতহৃদয়মচ্ছং কুর্বতী তূর্ণমেব ॥ ১১ ॥
পালয় মাং করুণাব্ধে পরিবারয়ুতং ত্বিহাপি শৃঙ্গাদ্রৌ ।
শারদশশিনিভবদনে বরদে লঘু শারদে সদয়ে ॥ ১২ ॥
ঐন্দ্রীমাশামৈন্দবীং বা কলামি-
ত্যাদৌ বীজং জাতু মাতস্ত্বদীয়ম্ ।
ব্যাজাদ্বা য়ো ব্যাহরেত্তস্য বক্ত্রা-
দ্দিব্যা বাচো নিঃসরন্ত্যপ্রয়ত্নাত্ ॥ ১৩ ॥
শারদে তব পদাম্বুজয়ুগ্মং বোধপুষ্পরসপূর্ণমজস্রম্ ।
মামকং হৃদয়সংজ্ঞকমীশে নৈব মুঞ্চতু সরঃ করুণাব্ধে ॥ ১৪ ॥
কথিতানি মদীপ্সিতানি মাতর্মুহুরগ্রে তব শারদাম্বিকে ত্বম্ ।
ন হি পূরয়সে চিরায়সে কিং মদঘৌঘাত্কিমু শক্ত্যভাবতো বা ॥ ১৫ ॥
অদ্যৈব মত্প্রার্থিতমম্ব দদ্যা য়দি ত্বপারাং করুণাং বিধায় ।
বেলাবিহীনং সুখমাপ্নুয়াং হি নৈবাত্র সন্দেহলবোঽপি কশ্চিত্ ॥ ১৬ ॥
কমনীয়কবিত্বদাং জবাদ্রমণীয়াম্বুজতুল্যপদ্যুতাম্ ।
শমনীয়ভয়াপহারিণীং রমণীং পদ্মভবস্য ভাবয়ে ॥ ১৭ ॥
কাঙ্ক্ষে কমলজকামিনি কমনীয়ৈঃ পদ্যনিকুরুম্বৈঃ ।
স্তোতুং বাচাং নিকরং স্বায়ত্তং কলয় জগদম্ব ॥ ১৮ ॥
কামং মম ফালতলে লিখতু লিপিং দুঃখদাং বিধিঃ সততম্ ।
নাহং বিভেমি মাতর্লুম্পামি ত্বত্পদাব্জরজসা তাম্ ॥ ১৯ ॥
কিং কল্পবৃক্ষমুখ্যৈঃ কিং করধৃতমেরুণা শিবেনাপি ।
কিং কমলয়া চ হৃদি চেত্কিঙ্করসর্বেষ্টদা বাণী ॥ ২০ ॥
তুঙ্গাতটনিকটচরং ভৃঙ্গাবলিগর্বহরণচণচিকুরম্ ।
শ্রীশারদাভিধানং ভাগ্যং মম জয়তি শৃঙ্গশৈলাগ্রে ॥ ২১ ॥
নিরণায়ি ময়া সমস্তশাস্ত্রা-
ণ্যপি বীক্ষ্য প্রণতার্তিহারি লোকে ।
প্রবিহায় তবাঙ্ঘ্রিপঙ্কজাতং
ন পরং বস্ত্বিতি বাণি নিশ্চিতং তত্ ॥ ২২ ॥
পদ্মাসনাসি খলু ভারতি বাগধীশে
পদ্মাসনপ্রিয়তমে করলগ্নপদ্মে ।
মত্কং মনোঽম্বুজমহো স্বয়মেব মাতঃ
শ্রীশারদাম্ব বিজহাসি কিমত্র বাচ্যম্ ॥ ২৩ ॥
আনীয় দিব্যকুসুমানি কিরন্তি লোকা
য়ে ত্বত্পদাব্জয়ুগলং বচসাং সবিত্রি ।
তান্প্রাপ্তরাজপদবীংস্তরসা কিরন্তি
পৌরাঙ্গনাঃ কুসুমলাজচয়েন নূনম্ ॥ ২৪ ॥
আজ্ঞাসীদ্গৌরবী মে তব খলু করুণাবারিধিঃ শারদাম্বা
সাষ্টাঙ্গং য়োগমারাদুপদিশতি ভবানৌরসঃ সূনুরস্যাঃ ।
ইত্যপ্যদ্যাপি মাতর্ন হি খলু করুণা জায়তে ময়্যনাথে
কিং বা কুর্যাং বদাম্ব প্রণতভয়হরে শারদে চাপলোঽহম্ ॥ ২৫ ॥
নাহং নিগৃহ্য করণানি সরোজজাত-
জায়ে ত্বদীয়পদপঙ্কজয়োর্হি সেবাম্ ।
শক্নোমি কর্তুমলসাজ্ঞশিখামণির্য-
ত্তস্মান্নিসর্গকরুণাং কুরু ময়্যনাথে ॥ ২৬ ॥
বাণি সরস্বতি ভারতি বাগ্বাদিনি বারিজাতজনিজায়ে ।
কাশ্মীরপুরনিবাসিনি কামিতফলবৃন্দদায়িনি নমস্তে ॥ ২৭ ॥
শরণং ত্বচ্চরণং মে নান্যদ্বাগ্দেবি নিশ্চিতং ত্বেতত্ ।
তস্মাত্কুরু করুণাং ময়্যনন্যশরণে দ্রুতং মাতঃ ॥ ২৮ ॥
শরদভ্রসদভ্রবস্ত্রবীতা করদূরীকৃতপঙ্কজাভিমানা ।
চরণাম্বুজলগ্ননাকিমৌলির্বরদা স্যান্মম শারদা দয়ার্দ্রা ॥ ২৯ ॥
স্থাপয় নরকেষু সদাপ্যথ সুখকাষ্ঠাসু দিব্যলোকেষু ।
ন হি তত্র মে বিচারঃ পরং তু চিত্তং তবাঙ্ঘ্রিগতমস্তু ॥ ৩০ ॥
শৃঙ্গাদ্রিবাসলোলে ভৃঙ্গাহঙ্কারহারিকচভারে ।
তুঙ্গাতীরবিহারে গঙ্গাধরসোদরি প্রসীদ মম ॥ ৩১ ॥
ঋষ্যশৃঙ্গজনিভূমিবিভূষে কশ্যপাদিমুনিবন্দিতপাদে ।
পশ্যদঙ্ঘ্রিমুখপালনলোলে বশ্যপঙ্কজভবেঽব সদা মাম্ ॥ ৩২ ॥
কম্বুডম্বরনিবর্তককণ্ঠামম্বুধিং নিরবধি করুণয়াঃ ।
অম্বুদপ্রতিমকেশসমূহামম্বুজোদ্ভবসখীং কলয়েঽহম্ ॥ ৩৩ ॥
ভর্মগর্বহরসংহননাভাং শর্মদাং পদসরোজনতেভ্যঃ ।
কর্মভক্তিমুখপদ্ধতিগম্যাং কুর্মহে মনসি পদ্মজজায়াম্ ॥ ৩৪ ॥
শম্ভুসোদরি শশাঙ্কনিভাস্যে মন্দবুদ্ধিবিততেরপি শীঘ্রম্ ।
বাক্প্রদায়িনি কৃপামৃতরাশে শৃঙ্গশৈলবরবাসবিলোলে ॥ ৩৫ ॥
তুষ্টিমেহি বচসাং জননি ত্বং মত্কৃতেন বিধিনাঽবিধিনা বা ।
ঐঞ্জপেন পরিপূরয় বাঞ্ছাং মামকীং চ মহতীমপি শীঘ্রম্ ॥ ৩৬ ॥
তবৌরসং সূনুমহো ত্বদীয়ভক্তাগ্রগণ্যা মম দেশিকেন্দ্রাঃ ।
প্রাহুর্যতোঽতো ময়ি শারদাম্ব পাপ্যগ্রগণ্যেঽপি দয়া বিধেয়া ॥ ৩৭ ॥
তবৌরসং মাং সুতমাহুরার্যাস্ত্বত্পাদভক্তাগ্রসরা য়তোঽতঃ ।
সোঢ্বা মদীয়ান্সকলাপরাধান্পুরো ভবাম্বাশু গিরাং সবিত্রি ॥ ৩৮ ॥
ভক্তেষ্টপাথোনিধিপূর্ণচন্দ্রঃ কবিত্বমাকন্দবসন্তকালঃ ।
জাড্যান্ধকারব্রজপদ্মবন্ধুরম্ব প্রণামস্তব পাদপদ্মে ॥ ৩৯ ॥
মুখাম্বুজং ভাতু জগজ্জনন্যা হৃদম্বুজে মে জিতচন্দ্রবিম্বম্ ।
রদাম্বরাধঃকৃতপক্ববিম্বং মহাঘবিধ্বংসনচঞ্চ্বজস্রম্ ॥ ৪০ ॥
য়ানেন হংসং বদনেন চন্দ্রং শ্রোণীভরাচ্ছৈলপতিং চ কামম্ ।
কাঞ্চিদ্ধসন্তীং কলয়ে হৃদব্জে চন্দ্রার্ধরাজদ্বরকেশপাশাম্ ॥ ৪১ ॥
বিস্মৃত্য দেহাদিকমম্ব সম্যক্সমুচ্চরংস্তাবকমন্ত্ররাজম্ ।
তুঙ্গানদীপুণ্যতটে কদাহং সুসৈকতে স্বৈরগতির্ভবামি ॥ ৪২ ॥
শ্রীশাদিসংসেবিতপাদপদ্মে শ্রীবোধদানব্রতবদ্ধদীক্ষে ।
শ্রীকণ্ঠসোদর্যমিতানুকম্পে শ্রীশারদাম্বাশু কৃপাং কুরুষ্ব ॥ ৪৩ ॥
হৃদ্যানি পদ্যানি বিনিঃসরন্তি ত্বদঙ্ঘ্রিসম্পূজকবক্ত্রপদ্মাত্ ।
বিনা প্রয়ত্নং তরসা ন চিত্রং ত্বমম্ব য়স্মাদ্বচসাং সবিত্রী ॥ ৪৪ ॥
গমাগমবিবর্জিতৈরসুভিরন্তরঙ্গেঽনিশং
গজাস্যগুহনন্দিভিঃ সুরবরৈর্মুদা চিন্তিতে ।
গজাজিনধরানুজে গলিততৃষ্ণলোকেক্ষিতে
গতিং মম শুভাং মতিং সপদি দেহি বাগীশ্বরি ॥ ৪৫ ॥
জলোদ্ভবজভামিনি প্রণতসৌখ্যভূমপ্রদে
জডত্ববিনিবারণব্রতনিষক্তচেতোঽম্বুজে ।
জগত্ত্রয়নিবাসিভিঃ সততসেব্যপাদাম্বুজে
জগজ্জননি শারদে জনয় সৌখ্যমত্যদ্ভুতম্ ॥ ৪৬ ॥
মদেভগমনেঽবনে নতততেরনেকৈঃ সুখৈ-
রনারতমজামিতং প্রবণহৃত্সরোজেঽম্বিকে ।
কুতো ময়ি কৃপা ন তে প্রসরতি প্রসন্নে বদ
প্রপঞ্চজননপ্রভুপ্রণয়িনি প্রপদ্যেঽদ্য কম্ ॥ ৪৭ ॥
কদা বা শ্রুঙ্গাদ্রৌ বিমলতরতুঙ্গাপরিসরে
বসন্মাতর্বাচাং শিরসি নিদধানোঽঞ্জলিপুটম্ ।
গিরাং দেবি ব্রাহ্মি প্রণতবরদে ভারতি জবা-
ত্প্রসীদেতি ক্রোশন্নিমিষমিব নেষ্যামি দিবসান্ ॥ ৪৮ ॥
জগন্নাথং গঙ্গা বিবিধবৃজিনোঘৈঃ পরিবৃতং
য়থাঽরক্ষত্পূর্বং সকলমপি হত্বাঽঽশু দুরিতম্ ।
পুনশ্চান্তে দত্ত্বা করসরসিজং পূর্ণকৃপয়া
জনৈঃ সদ্ভিঃ প্রাপ্যাং পরমপদবীং প্রাপিতবতী ॥ ৪৯ ॥
তথা শান্তং পাপং সকলমপি কৃত্বা মম জবা-
দ্ধৃদম্ভোজে লগ্নং কুরু তব পদাম্ভোরুহয়ুগম্ ।
করাম্ভোজে পশ্চাত্পরমকৃপয়া দেবি বচসাং
প্রদত্ত্বাঽঽলম্বং মাং গময় পদবীং নির্মলতরাম্ ॥ ৫০ ॥
দবীয়াংসং ত্বেনং পরমকৃপয়া দেশিকমুখা-
ত্সমানীয়াম্ব ত্বং তব পদপয়োজাতনিকটম্ ।
অবিত্বাঽঽপীয়ন্তং সময়মধুনা দেবি ভজসে
য়দৌদাস্যং তর্হি ত্রিজগতি মমান্যাং বদ গতিম্ ॥ ৫১ ॥
কামং সন্তু সুরা নিরন্তরনিজধ্যানার্চনাকারিণো
লোকান্স্বেপ্সিতসর্বসৌখ্যসহিতান্কর্তুং জগত্যাং কিল ।
পূজাধ্যানজপাদিগন্ধরহিতাংস্ত্রাতুং পুনস্ত্বাং বিনা
নান্যদ্দৈবতমস্তিপদ্মজমনঃপদ্মার্ভকার্কপ্রভে ॥ ৫২ ॥
কারুণ্যং ময়ি ধেহি মাতরনিশং পদ্মোদ্ভবপ্রেয়সি
প্রারব্ধং মম দুষ্টমাশু শময় প্রজ্ঞাং শুভাং য়চ্ছ মে ।
কর্তুং কাব্যচয়ং রসৌঘভরিতং শক্তিং দৃঢাং ভক্তিম-
প্যংহঃসঞ্চয়বারিণীং তব পদাম্ভোজে কৃপাম্ভোনিধে ॥ ৫৩ ॥
কুর্যামদ্য কিমম্ব ভক্তিরহিতঃ পূজাং জপং তর্পণং
কিং বৈরাগ্যবিবেকগন্ধরহিতঃ কুর্যাং বিচারং শ্রুতেঃ ।
কিং য়োগং প্রকরোমি চঞ্চলমনাঃ শৃঙ্গাদ্রিবাসপ্রিয়ে
ত্বত্পাদপ্রণতিং বিহায় ন গতির্মেঽন্যা গিরাং দেবতে ॥ ৫৪ ॥
জহ্যান্নৈব কদাপি তাবকপদং মাতর্মনো মামকং
মান্দ্যধ্বান্তনিবারণোদ্যতদিনেশাখর্বগর্বাবলি ।
গৌরীনাথরমাধবাব্জভবনৈঃ সম্ভাব্যমানং মুদা
বাক্চাতুর্যবিধানলব্ধসুয়শঃসম্পূরিতাশামুখম্ ॥ ৫৫ ॥
তুঙ্গাতীরবিহারসক্তহৃদয়ে শৃঙ্গারজন্মাবনে
গঙ্গাধারিমুখামরেন্দ্রবিনুতেঽনঙ্গাহিতাপদ্ধরে ।
সঙ্গাতীতমনোবিহাররসিকে গঙ্গাতরঙ্গায়িতা
ভৃঙ্গাহঙ্কৃতিভেদদক্ষচিকুরে তুঙ্গাগিরো দেহি মে ॥ ৫৬ ॥
ত্বত্পাদাম্বুজপূজনাপ্তহৃদয়াম্ভোজাতশুদ্ধির্জনঃ
স্বর্গং রৌরবমেব বেত্তি কমলানাথাস্পদং দুঃখদম্ ।
কারাগারমবৈতি চন্দ্রনগরং বাগ্দেবি কিং বর্ণনৈ-
র্দৃশ্যং সর্বমুদীক্ষতে স হি পুনা রজ্জূরগাদ্যৈঃ সমম্ ॥ ৫৭ ॥
ত্বত্পাদাম্বুরুহং বিহায় শরণং নাস্ত্যেব মেঽন্যদ্ধ্রুবং
বাচাং দেবি কৃপাপয়োজলনিধে কুত্রাপি বা স্থাপয় ।
অপ্যূর্ধ্বং ধ্রুবমণ্ডলাদথ ফণীন্দ্রাদপ্যধস্তত্র মে
ত্বন্ন্যস্তৈহিকপারলৌকিকভরস্ত্বাসে ন কাপি ব্যথা ॥ ৫৮ ॥
ত্বত্পাদাম্বুরুহং হৃদাখ্যসরসিস্যাদ্রূঢমূলং য়দা
বক্ত্রাব্জে ত্বমিবাম্ব পদ্মনিলয়া তিষ্ঠেদ্গৃহে নিশ্চলা ।
কীর্তির্যাস্যতি দিক্তটানপি নৃপৈঃ সম্পূজ্যতা স্যাত্তদা
বাদে সর্বনয়েষ্বপি প্রতিভটান্দূরীকরোত্যেব হি ॥ ৫৯ ॥
মাতস্ত্বত্পদবৈভবং নিগদিতুং প্রারভ্য নাগেশ্বরা-
স্বপ্নাচার্যকবীন্দুশেখরদিনেশাদ্যাঃ প্রভগ্না মুহুঃ ।
ক্বাহং তত্কথনে জডেষ্বচরমঃ কারুণ্যপাথোনিধে
বাচাং দেবি সুতস্য সাহসমিদং ক্ষন্তব্যমেবাম্বয়া ॥ ৬০ ॥
মাতঃ শৃঙ্গপুরীনিবাসরসিকে মাতঙ্গকুম্ভস্তনি
প্রাণায়ামমুখৈর্বিনাপি মনসঃ স্থৈর্যং দ্রুতং দেহি মে ।
য়েনাহং সুখমন্যদুর্লভমহোরাত্রং ভজাম্যন্বহং
প্রাপ্স্যাম্যাত্মপরৈকবোধমচলং নিঃসংশয়ং শারদে ॥ ৬১ ॥
বেদাভ্যাসজডোঽপি য়ত্করসরোজাতগ্রহাত্পদ্মভূ-
শ্চিত্রং বিশ্বমিদং তনোতি বিবিধং বীতক্রিয়ং সক্রিয়ম্ ।
তাং তুঙ্গাতটবাসসক্তহৃদয়াং শ্রীচক্ররাজালয়াং
শ্রীমচ্ছঙ্করদেশিকেন্দ্রবিনুতাং শ্রীশারদাম্বাং ভজে ॥ ৬২ ॥
বৈরাগ্যং দৃঢমম্ব দেহি বিষয়েষ্বাদ্যন্তদুঃখপ্রদে-
ষ্বাম্নায়ান্তবিচারণে স্তিরতরাং চাস্থাং কৃপাবারিধে ।
প্রত্যগ্ব্রহ্মণি চিত্তসংস্থিতিবিধিং সম্বোধয়াশ্বেব মাং
ত্বং ব্রূষে সকলং মমেতি গুরবঃ প্রাহুর্যতঃ শারদে ॥ ৬৩ ॥
কমলাসনবরকামিনি করধৃতচিন্মুদ্রিকে কৃপাম্ভোধে ।
করকলিতামলকাভং তত্ত্বং মাং বোধয়তু জগদম্ব ॥ ৬৪ ॥
করবিধৃতকীরডিম্ভাং শরদভ্রসধর্মবস্ত্রসংবীতাম্ ।
বরদাননিরতপাণিং সুরদাং প্রণমামি শারদাং সদয়াম্ ॥ ৬৫ ॥
কামাক্ষীবিপুলাক্ষীমীনাক্ষীত্যাদিনামভির্মাতঃ ।
কাঞ্চীকাশীমধুরাপুরেষু ভাসি ত্বমেব বাগ্জননি ॥ ৬৬ ॥
চন্দ্রার্ধশেখরাপররূপশ্রীশঙ্করার্যকরপূজ্যে ।
চন্দ্রার্ধকৃতবতংসে চন্দনদিগ্ধে নমামি বাণি পদে ॥ ৬৭ ॥
জয় জয় চিন্মুদ্রকরে জয় জয় শৃঙ্গাদ্রিবিহরণব্যগ্রে ।
জয় জয় পদ্মজজায়ে জয় জয় জগদম্ব শারদে সদয়ে ॥ ৬৮ ॥
দুর্বসনদত্তশাপপ্রতিপালনলক্ষ্যতঃ সমস্তানাম্ ।
রক্ষার্থমবনিমধ্যে কৃতচিরবাসাং নমামি বাগ্দেবীম্ ॥ ৬৯ ॥
নবনবকবনসমর্থং পটুতরবাগ্ধূতবাসবাচার্যম্ ।
বনজাসনবরমানিনি বরদে কুরু শীঘ্রমঙ্ঘ্রিনতম্ ॥ ৭০ ॥
ভগবত্পদমণ্ডনয়োর্বাদমহে সকললোকচিত্রকরে ।
অঙ্গীকৃতমাধ্যস্থ্যাং জগদম্বাং নৌমি শারদাং সদয়াম্ ॥ ৭১ ॥
সেবাপূজানমনবিধয়ঃ সন্তু দূরে নিতান্তং
কাদাচিত্কা স্মৃতিরপি পদাম্ভোজয়ুগ্মস্য তেঽম্ব ।
মূকং রঙ্কং কলয়তি সুরাচার্যমিন্দ্রং চ বাচা
লক্ষ্ম্যা লোকো ন চ কলয়তে তাং কলেঃ কিং হি দৌঃস্থ্যম্ ॥ ৭২ ॥
আশাবস্ত্রঃ সদাত্মন্যবিরতহৃদয়স্ত্যক্তসর্বানুরাগঃ
কায়ে চক্ষুর্মুখেষ্বপ্যনুদিতমমতঃ ক্বাপি কস্মিংশ্চ কালে ।
শৈলাগ্রেঽরণ্যকোণে ক্বচিদপি পুলিনে ক্বাপি রেবাতটে বা
গঙ্গাতীরেঽথ তুঙ্গাতটভুবি চ কদা স্বৈরচারী ভবেয়ম্ ॥ ৭৩ ॥
কল্পন্তাং কাম্যসিদ্ধ্যৈ কলিমলহতয়ে চাক্ষয়ৈশ্বর্যসিদ্ধ্যৈ
কারুণ্যাপারপূরাঃ কমলভবমনোমোদদানব্রতাঢ্যাঃ
কাত্যায়ন্যব্ধিকন্যামুখসুররমণীকাঙ্ক্ষ্যমাণাঃ কবিত্ব-
প্রাগ্ভারাম্ভোধিরাকাহিমকরকিরণাঃ শারদাম্বাকটাক্ষাঃ ॥ ৭৪ ॥
কল্পাদৌ তন্মহিম্না কতিপয়দিবসেষ্বেব লুপ্তেষু মার্গে-
ষ্বাম্নায়প্রোদিতেষু প্রবরসুরগণৈঃ প্রার্থিতঃ পার্বতীশঃ ।
আম্নায়াধ্বপ্রবৃদ্ধ্যৈ য়তিবরবপুষাগত্য য়াং শৃঙ্গশৈলে
সংস্থাপ্যার্চাং প্রচক্রে নিবসতু বদনে শারদা সাদরং সা ॥ ৭৫ ॥
তিষ্ঠাম্যত্রৈব মাতস্তব পদয়ুগলং বীক্ষমাণঃ প্রমোদা-
ন্নাহং ত্যক্ত্বা তবাঙ্ঘ্রিং সকলসুখকরং ক্বাপি গচ্ছামি নূনম্ ।
ছায়াং মত্কাং বিধত্স্ব প্রবচননমনধ্যানপূজাসু শক্তাং
শুদ্ধামেকাং ত্রিলোকীজননপটুবিধিপ্রাণকান্তে নমস্তে ॥ ৭৬ ॥
ত্বদ্বীজে বর্তমানে বদনসরসিজে দুর্লভং কিং নরাণাং
ধর্মো বাঽর্থশ্চ কামোঽপ্যথ চ সকলসন্ত্যাগসাধ্যশ্চ মোক্ষঃ ।
কাম্যং বা সার্বভৌম্যং কমলজদয়িতেঽহেতুকারুণ্যপূর্ণে
শৃঙ্গাদ্র্যাবাসলোলে ভবতি সুরবরারাধ্যপাদারবিন্দে ॥ ৭৭ ॥
দৃষ্ট্বা ত্বত্পাদপঙ্কেরুহনমনবিধাবুদ্যতান্ভক্তলোকা-
ন্দূরং গচ্ছন্তি রোগা হরিমিব হরিণা বীক্ষ্য য়দ্বত্সুদূরম্ ।
কালঃ কুত্রাপি লীনো ভবতি দিনকরে প্রোদ্যমানে তমোব-
ত্সৌখ্যং চায়ুর্যথাব্জং বিকসতি বচসাং দেবি শৃঙ্গাদ্রিবাসে ॥ ৭৮ ॥
নাহং ত্বত্পাদপূজামিহ গুরুচরণারাধনং চাপ্যকার্ষং
নাশ্রৌষং তত্ত্বশাস্ত্রং ন চ খলু মনসঃ স্থৈর্যলেশোঽপি কশ্চিত্ ।
নো বৈরাগ্যং বিবেকো ন চ মম সুদৃঢা মোক্ষকাঙ্ক্ষাঽপি নূনং
মাতঃ কাবা গতির্মে সরসিজভবনপ্রাণকান্তে ন জানে ॥ ৭৯ ॥
নৌমি ত্বাং শৈববর্যাঃ শিব ইতি গণনাথার্চকা বিঘ্নহর্তে-
ত্যার্যেত্যম্বাঙ্ঘ্রিসক্তা হরিভজনরতা বিষ্ণুরিত্যামনন্তি ।
য়াং তাং সর্বস্বরূপাং সকলমুনিমনঃপদ্মসঞ্চারশীলাং
শৃঙ্গাদ্র্যাবাসলোলাং কমলজমহিষীং শারদাং পারদাভাম্ ॥ ৮০ ॥
য়ঃ কশ্চিদ্বুদ্ধিহীনোঽপ্যবিদিতনমনধ্যানপূজাবিধানঃ
কুর্যাদ্যদ্যম্ব সেবাং তব পদসরসীজাতসেবারতস্য ।
চিত্রং তস্যাস্যমধ্যাত্প্রসরতি কবিতা বাহিনীবামরাণাং
সালঙ্কারা সুবর্ণা সরসপদয়ুতা য়ত্নলেশং বিনৈব ॥ ৮১ ॥
য়াচন্তে নম্রলোকা বিবিধগুরুরুজাক্রান্তদেহাঃ পিশাচৈ-
রাবিষ্টাঙ্গাশ্চ তত্তজ্জনিতবহুতরক্লেশনাশায় শীঘ্রম্ ।
কিং কুর্যাং মন্ত্রয়ন্ত্রপ্রমুখবিধিপরিজ্ঞানশূন্যশ্চিকিত্সাং
কর্তুং ন ত্বত্পদাব্জস্মরণলবমৃতে বাণি জানেঽত্র কিঞ্চিত্ ॥ ৮২ ॥
রাগদ্বেষাদিদোষৈঃ সততবিরহিতৈঃ শান্তিদান্ত্যাদিয়ুক্তৈ-
রাচার্যাঙ্ঘ্র্যব্জসেবাকরণপটুতরৈর্লভ্যপাদারবিন্দা ।
মুদ্রাস্রক্কুম্ভবিদ্যাঃ করসলিলরুহৈঃ সন্দধানা পুরস্তা-
দাস্তাং বাগ্দেবতা নঃ কলিকৃতবিবিধাপত্তিবিধ্বংসনায় ॥ ৮৩ ॥
বারয় পাপকদম্বং তারয় সংসারসাগরং তরসা ।
শোধয় চিত্তসরোজং বোধয় পরতত্ত্বমাশু মামম্ব ॥ ৮৪ ॥
সচ্চিদ্রূপাত্মনিষ্ঠঃ প্রগলিতসকলাক্ষাদিবৃত্তিঃ শয়ানো
ভুঞ্জানঃ সত্যসৌখ্যং তদিতরসুখতঃ প্রাপ্তনীরাগভাবঃ ।
পাষাণে বাথ তল্পে বনভুবি সদনে পার্থিবস্যাঽশ্মহেম্নো-
র্নার্যাং মৃত্যৌ চ তুল্যঃ সততসুখিমনাঃ স্যাং কদা শারদাম্ব ॥ ৮৫ ॥
কিং পাঠয়েয়ং লঘুচন্দ্রিকাং বা কিং বা ত্যজেয়ং সকলপ্রপঞ্চম্ ।
স্বপ্নেঽদ্য মে ব্রূহি কিমত্র কার্যং ডোলায়িতং মামকমম্ব চেতঃ ॥ ৮৬ ॥
ত্যাগে বাঽধ্যাপনে বা মম খলু ন গিরাং দেবি কাপ্যস্তি শক্তি-
স্ত্বং বৈ সর্বত্র হেতুর্যদসি নিরবধির্বারিরাশিঃ কৃপায়াঃ ।
তস্মাত্স্বপ্নেঽদ্য কার্যং মম খলু নিখিলং বোধয়ৈবং কুরুষ্বে-
ত্যজ্ঞানাং বোধনার্থং ত্বমিহ বহুবিধা অম্ব মূর্তীর্বিভর্ষি ॥ ৮৭ ॥
বিতর বিধিপ্রেয়সি মে বিমলধিয়ং বাঞ্ছিতং চ তরসৈব ।
বিষ্ণুমুখামরবন্দ্যে বিধুবিম্বসমানবদনকঞ্জাতে ॥ ৮৮ ॥
শারদনীরদসন্নিভবসনে বনজাসনান্তরঙ্গচরে ।
বরটাবল্লভয়ানে বরদে বাগ্দেবি শারদে পাহি ॥ ৮৯ ॥
সপ্তদশঘস্রমবিরতমীশেন সমস্তবিদ্যানাম্ ।
বিরচিতবাদাং কুতুকাত্সামোদং নৌমি বাগ্জননীম্ ॥ ৯০ ॥
সুরবরনিষেব্যপাদে সুখলবাধূতকেকিকুলনিনদে
সুরবনবিহারবলদে সুরবরদে পাহি শারদে সুরদে ॥ ৯১ ॥
কুন্দরদনেঽম্ব বাণি মুকুন্দরবীন্দ্বাদিদেববর্যেড্যে ।
কুন্দরকৃপাবশান্মুকুন্দবরাদ্যাংশ্চ মে নিধীন্দেহি ॥ ৯২ ॥
স্ফুরশরদিন্দুপ্রতিভটবদনে বাগ্দেবি মামকে মনসি ।
বরদাননিরতপাণে সরসিজনয়নে সরোজজাতসখি ॥ ৯৩ ॥
অস্থিরভক্তের্মম দেবি গিরাং শীঘ্রং দত্ত্বা কাঞ্চিত্সিদ্ধিম্ ।
কুরু সুদৃঢাং মম তব পাদাব্জে ভক্তিং শৃঙ্গগিরীন্দ্রনিবাসে ॥ ৯৪ ॥
সহমানসোদরি সহ প্রণ্তকৃতা মানহীনমন্তুততীঃ ।
সহমানসোদরীত্বং ত্যজ বা য়ুক্তং য়দত্র কুরু বাণি ॥ ৯৫ ॥
বলভিন্মুখনির্জরবরসেব্যে কলবচনন্যক্কৃতপিকরাবে ।
জলজপ্রতিভটপদয়ুগরম্যে কলয় প্রবরং কৃতিনামেনম্ ॥ ৯৬ ॥
করবিলসদ্বরপুস্তকমালে শরদব্জাহঙ্কৃতিহরচেলে ।
অরণীসুমনিভকুঙ্কুমফালে শরণং মম ভব ধৃতশুকবালে ॥ ৯৭ ॥ var অরণীসুতনিভ
কলয়াসক্তিং কমলজদয়িতে তুলনাশূন্যামীম্মনুবর্যে ।
বলয়াঞ্চিতকরসরসীজাতে ললনাভিঃ সুরবিততেঃ পূজ্যে ॥ ৯৮ ॥
শৃঙ্গক্ষ্মাভৃত্কূটবিহারে তুঙ্গাতটভূকৃতসঞ্চারে ।
বাচাং দেবি প্রার্থিতমর্থং শীঘ্রং দেহি প্রণতায়াস্মৈ ॥ ৯৯ ॥
নাহং সোঢুং কালবিলম্বং শক্নোম্যম্ব প্রণতপ্রবণে ।
ঈপ্সিতমর্থং দেহি তদাশু দ্রুহিণস্বান্তাম্বুজবালঘৃণে ॥ ১০০ ॥
ইতি শৃঙ্গেরি শ্রীজগদ্গুরু শ্রীসচ্চিদানন্দশিবাভিনবনৃসিংহ-
ভারতীস্বামিভিঃ বিরচিতঃ শ্রীশারদাশতশ্লোকীস্তবঃ সম্পূর্ণঃ ।
