sri venkatesa mangalastakam Lyrics in Telugu:
॥ శ్రీవేఙ్కటేశ మఙ్గలాష్టకమ్ ॥
శ్రీక్షోణ్యౌ రమణీయుగం సురమణీపుత్రోఽపి వాణీపతిః
పౌత్రశ్చన్ద్రశిరోమణిః ఫణిపతిః శయ్యా సురాః సేవకాః ।
తార్క్ష్యో యస్య రథో మహశ్చ భవనం బ్రహ్మాణ్డమాద్యః పుమాన్
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౧॥
యత్తేజో రవికోటికోటికిరణాన్ ధిక్కృత్య జేజీయతే
యస్య శ్రీవదనామ్బుజస్య సుషమా రాకేన్దుకోటీరపి ।
సౌన్దర్యం చ మనోభవానపి బహూన్ కాన్తిశ్చ కాదమ్బినీం
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౨॥
నానారత్న కిరీటకుణ్డలముఖైర్భూషాగణైర్భూషితః
శ్రీమత్కౌస్తుభరత్న భవ్యహృదయః శ్రీవత్ససల్లాఞ్ఛనః ।
విద్యుద్వర్ణసువర్ణవస్త్రరుచిరో యః శఙ్ఖచక్రాదిభిః
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౩॥
యత్ఫాలే మృగనాభిచారుతిలకో నేత్రేఽబ్జపత్రాయతే
కస్తూరీఘనసారకేసరమిలచ్ఛ్రీగన్ధసారో ద్రవైః ।
గన్ధైర్లిప్తతనుః సుగన్ధసుమనోమాలాధరో యః ప్రభుః
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౪॥
ఏతద్దివ్యపదం మమాస్తి భువి తత్సమ్పశ్యతేత్యాదరా-
ద్భక్తేభ్యః స్వకరేణ దర్శయతి యద్దృష్ట్యాఽతిసౌఖ్యం గతః ।
ఏతద్భక్తిమతో మహానపి భవామ్భోధిర్నదీతి స్పృశన్
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౫॥
యః స్వామీ సరసస్తటే విహరతో శ్రీస్వామిన్నామ్నః సదా
సౌవర్ణాలయమన్దిరో విధిముఖైర్బర్హిర్ముఖైః సేవితః ।
యః శత్రూన్ హనయన్ నిజానవతి చ శ్రీభూవరాహాత్మకః
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౬॥
యో బ్రహ్మాదిసురాన్ మునీంశ్చ మనుజాన్ బ్రహ్మోత్సవాయాగతాన్
దృష్ట్వా హృష్టమనా బభూవ బహుశస్తైరర్చితః సంస్తుతః ।
తేభ్యో యః ప్రదదాద్వరాన్ బహువిధాన్ లక్ష్మీనివాసో విభుః
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౭॥
యో దేవో భువి వర్తతే కలియుగే వైకుణ్ఠలోకస్థితో
భక్తానాం పరిపాలనాయ సతతం కారుణ్యవారాం నిధిః ।
శ్రీశేషాఖ్యమహీధ్రమస్తకమణిర్భక్తైకచిన్తామణి
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౮॥
శేషాద్రిప్రభుమఙ్గలాష్టకమిదం తుష్టేన యస్యేశితుః
ప్రీత్యర్థం రచితం రమేశచరణద్వన్ద్వైకనిష్టావతా ।
వైవాహ్యాదిశుభక్రియాసు పఠితం యైః సాధు తేషామపి
శ్రీమద్వేఙ్కటభూధరేన్ద్రరమణః కుర్యాద్ధరిర్మఙ్గలమ్ ॥ ౯॥
॥ ఇతి శ్రీ వేఙ్కటేశ మఙ్గలాష్టకమ్ సమ్పూర్ణమ్ ॥
