Sri Vishakhanandabhidhastotram Lyrics in Oriya:
ଶ୍ରୀଵିଶାଖାନନ୍ଦାଭିଧସ୍ତୋତ୍ରମ୍
ଭାଵନାମଗୁଣାଦୀନାମୈକ୍ୟାତ୍ଶ୍ରୀରାଧିକୈଵ ୟା ।
କୃଷ୍ଣେନ୍ଦୋଃ ପ୍ରେୟସୀ ସା ମେ ଶ୍ରୀଵିଶାଖା ପ୍ରସୀଦତୁ ॥ ୧ ॥
ଜୟତି ଶ୍ରୀମତୀ କାଚିଦ୍ଵୃନ୍ଦାରଣ୍ୟଵିହାରିଣୀ ।
ଵିଧାତୁସ୍ତରୁଣୀସୃଷ୍ଟିକୌଶଲଶ୍ରୀଋ ଇହୋଜ୍ଜ୍ଵଲା ॥ ୨ ॥
ଛିନ୍ନସ୍ଵର୍ଣସଦୃକ୍ଷାଙ୍ଗୀ ରକ୍ତଵସ୍ତ୍ରାଵଗୁଣ୍ଠିନୀ ।
ନିର୍ବନ୍ଧବଦ୍ଧଵେଣୀକା ଚାରୁକାଶ୍ମୀରଚର୍ଚିତା ॥ ୩ ॥
ଦ୍ଵିକାଲେନ୍ଦୁଲଲାଟୋଦ୍ୟତ୍କସ୍ତୂରୀତିଲକୋଜ୍ଜ୍ଵଲା ।
ସ୍ଫୁଟକୋକନଦଦ୍ଵନ୍ଦ୍ଵ ବନ୍ଧୁରୀକୃତକର୍ଣିକା ॥ ୪ ॥
ଵିଚିତ୍ରଵର୍ଣଵିନ୍ୟାସ ଚିତ୍ରିତୀକୃତଵିଗ୍ରହା
କୃଷ୍ଣଚୋରଭୟାଚ୍ଚୋଲୀ ଗୁମ୍ଫୀକୃତମଣିସ୍ତନୀ ॥ ୫ ॥
ହାରମଞ୍ଜୀରକେୟୂର ଚୂଡାନାସାଗ୍ରମୌକ୍ତିକୈଃ ।
ମୁଦ୍ରିକାଦିଭିରନ୍ୟୈଶ୍ଚ ଭୂଷିତା ଭୂଷଣୋତ୍ତମୈଃ ॥ ୬ ॥
ସୁଦୀପ୍ତକଜ୍ଜଲୋଦ୍ଦୀପ୍ତ ନୟନେନ୍ଦୀଵରଦ୍ଵୟ ।
ସୌରଭୋଜ୍ଜ୍ଵଲତାମ୍ବୂଲ ମଞ୍ଜୁଲା ଶ୍ରୀମୁଖାମ୍ବୁଜା ॥ ୭ ॥
ସ୍ମିତଲେଶଲସତ୍ପକ୍ଵ ଚାରୁବିମ୍ବଫଲାଧରା ।
ମଧୁରାଲାପପୀୟୂଷ ସଞ୍ଜୀଵିତସଖୀକୁଲା ॥ ୮ ॥
ଵୃଷଭାନୁକୁଲୋତ୍କୀର୍ତି ଵର୍ଧିକା ଭାନୁସେଵିକା ।
କୀର୍ତିଦାଖଣିରତ୍ନଶ୍ରୀଃ ଶ୍ରୀଜିତଶ୍ରୀଃ ଶ୍ରିୟୋଜ୍ଜ୍ଵଲା ॥ ୯ ॥
ଅନଙ୍ଗମଞ୍ଜରୀଜ୍ୟେଷ୍ଠା ଶ୍ରୀଦାମାନନ୍ଦଦାନୁଜା ।
ମୁଖରାଦୃଷ୍ଟିପୀୟୂଷ ଵର୍ତିନପ୍ତ୍ରୀ ତଦାଶ୍ରିତା ॥ ୧୦ ॥
ପୌର୍ଣମାସୀବହିଃଖେଲତ୍ପ୍ରାଣପଞ୍ଜରସାରିକା ।
ସୁବଲପ୍ରଣୟୋଲ୍ଲାସା ତତ୍ର ଵିନ୍ୟସ୍ତଭାରକା ॥ ୧୧ ॥
ଵ୍ରଜେଶ୍ୟାଃ କୃଷ୍ଣଵତ୍ପ୍ରେମ ପାତ୍ରୀ ତତ୍ରାତି ଭକ୍ତିକା ।
ଅମ୍ବାଵାତ୍ସଲ୍ୟସଂସିକ୍ତା ରୋହିଣୀଘ୍ରାତମସ୍ତକା ॥ ୧୨ ॥
ଵ୍ରଜେନ୍ଦ୍ରଚରଣାମ୍ଭୋଜେ ଽର୍ପିତଭକ୍ତିପରମ୍ପରା ।
ତସ୍ୟାପି ପ୍ରେମପାତ୍ରୀୟଂ ପିତୁର୍ଭାନୋରିଵ ସ୍ଫୁଟମ୍ ॥ ୧୩ ॥
ଗୁରୁବୁଦ୍ଧ୍ୟା ପ୍ରଲମ୍ବାରୌ ନତିଂ ଦୂରେ ଵିତନ୍ଵତୀ ।
ଵଧୂବୁଦ୍ଧ୍ୟୈଵ ତସ୍ୟାପି ପ୍ରେମଭୂମୀହ ହ୍ରୀୟୁତା ॥ ୧୪ ॥
ଲଲିତାଲଲିତା ସ୍ଵୀୟ ପ୍ରାଣୋରୁଲଲିତାଵୃତା ।
ଲଲିତାପ୍ରାଣରକ୍ଷୈକରକ୍ଷିତା ତଦ୍ଵଶାତ୍ମିକା ॥ ୧୫ ॥
ଵୃନ୍ଦାପ୍ରସାଧିତୋତ୍ତୁଙ୍ଗ କୁଡୁଙ୍ଗାନଙ୍ଗଵେଶ୍ମନି ।
କୃଷ୍ଣଖଣ୍ଡିତମାନତ୍ଵାଲ୍ ଲଲିତାଭୀତିକମ୍ପିନୀ ॥ ୧୬ ॥
ଵିଶାଖନର୍ମସଖ୍ୟେନ ସୁଖିତା ତଦ୍ଗତାତ୍ମିକା ।
ଵିଶାଖାପ୍ରାଣଦୀପାଲି ନିର୍ମଞ୍ଛ୍ୟନଖଚନ୍ଦ୍ରିକା ॥ ୧୭ ॥
ସଖୀଵର୍ଗୈକଜୀଵାତୁସ୍ମିତକୈରଵକୋରକା ।
ସ୍ନେହଫୁଲ୍ଲୀକୃତସ୍ଵୀୟଗଣା ଗୋଵିନ୍ଦଵଲ୍ଲଭା ॥ ୧୮ ॥
ଵୃନ୍ଦାରଣ୍ୟମହାରାଜ୍ୟମହାସେକମହୋଜ୍ଜ୍ଵଲା ।
ଗୋଷ୍ଠସର୍ଵଜନାଜୀଵ୍ୟଵଦନା ରଦନୋତ୍ତମା ॥ ୧୯ ॥
ଜ୍ଞାତଵୃନ୍ଦାଟଵୀସର୍ଵଲତାତରୁମୃଗଦ୍ଵିଜା ।
ତଦୀୟସଖ୍ୟସୌରଭ୍ୟସୁରଭୀକୃତମାନସା ॥ ୨୦ ॥
ସର୍ଵତ୍ର କୁର୍ଵତି ସ୍ନେହଂ ସ୍ନିଗ୍ଧପ୍ରକୃତିରାଭଵମ୍ ।
ନାମମାତ୍ରଜଗାଚିତ୍ତଦ୍ରାଵିକା ଦୀନପାଲିକା ॥ ୨୧ ॥
ଗୋକୁଲେ କୃଷ୍ଣଚନ୍ଦ୍ରସ୍ୟ ସର୍ଵାପଚ୍ଛାନ୍ତିପୂର୍ଵକମ୍ ।
ଧୀରଲାଲିତ୍ୟଵୃଦ୍ଧ୍ୟର୍ଥଂ କ୍ରିୟମାଣଵ୍ରତାଧିକା ॥ ୨୨ ॥
ଗୁରୁଗୋଵିପ୍ରସତ୍କାରରତା ଵିନୟସନ୍ନତା ।
ତଦାଶୀଃଶତଵର୍ଧିଷ୍ଣୁସୌଭାଗ୍ୟାଦିଗୁଣାଞ୍ଚିତା ॥ ୨୩ ॥
ଆୟୁର୍ଗୋଶ୍ରୀୟଶୋଦାୟିପାକୋ ଦୁର୍ଵାସସୋ ଵରାତ୍ ।
ଅତଃ କୁନ୍ଦଲତାନୀୟମାନା ରାଜ୍ଞ୍ୟାଃ ସମାଜ୍ଞୟା ॥ ୨୪ ॥
ଗୋଷ୍ଠଜୀଵାତୁଗୋଵିନ୍ଦଜୀଵାତୁଲପିତାମୃତା ।
ନିଜପ୍ରାନାର୍ବୁଦଶ୍ରେଣିରକ୍ଷ୍ୟତତ୍ପାଦରେଣୁକା ॥ ୨୫ ॥
କୃଷ୍ଣପଦାରଵିନ୍ଦୋଦ୍ୟନ୍ମକରନ୍ଦମୟେ ମୁଦା ।
ଅରିଷ୍ଟମର୍ଦି କାସାରେ ସ୍ନାତ୍ରୀ ନିର୍ବନ୍ଧତୋଽନ୍ଵହମ୍ ॥ ୨୬ ॥
ନିଜକୁନ୍ଦପୁରସ୍ତୀରେ ରତ୍ନସ୍ଥଲ୍ୟାମହର୍ନିଶମ୍ ।
ପ୍ରେଷ୍ଠନର୍ମାଲିଭିର୍ଭଙ୍ଗ୍ୟା ସମଂ ନର୍ମ ଵିତନ୍ଵତୀ ॥ ୨୭ ॥
ଗୋଵର୍ଧନଗୁହାଲକ୍ଷ୍ମୀର୍ଗୋଵର୍ଧନଵିହାରିଣୀ ।
ଧୃତଗୋଵର୍ଧନପ୍ରେମା ଧୃତଗୋଵର୍ଧନପ୍ରିୟା ॥ ୨୮ ॥
ଗାନ୍ଧର୍ଵାଦ୍ଭୁତଗାନ୍ଧର୍ଵା ରାଧା ବାଧାପହାରିଣୀ ।
ଚନ୍ଦ୍ରକାନ୍ତିଶ୍ଚଲାପଙ୍ଗୀ ରାଧିକା ଭାନୁରାଧିକା ॥ ୨୯ ॥
ଗାନ୍ଧର୍ଵିକା ସ୍ଵଗନ୍ଧାତିସୁଗନ୍ଧୀକୃତଗୋକୁଲା ।
ଇତି ପଞ୍ଚଭିରାହୂତା ନାମଭିର୍ଗୋକୁଲେ ଜନୈଃ ॥ ୩୦ ॥
ହରିଣୀ ହରିଣୀନେତ୍ରା ରଙ୍ଗିଣୀ ରଙ୍ଗିଣୀପ୍ରିୟା ।
ରଙ୍ଗିଣୀଧ୍ଵନିନାଗଚ୍ଛତ୍ସୁରଙ୍ଗଧ୍ଵନିହାସିନୀ ॥ ୩୧ ॥
ବଦ୍ଧନନ୍ଦୀଶ୍ଵରୋତ୍କଣ୍ଠା କାନ୍ତକୃଷ୍ଣୈକକଙ୍କ୍ଷୟା ।
ନଵାନୁରାଗସମ୍ବନ୍ଧମଦିରୋନ୍ମତ୍ତମାନସା ॥ ୩୨ ॥
ମଦନୋନ୍ମାଦିଗୋଵିନ୍ଦମକସ୍ମାତ୍ପ୍ରେକ୍ଷ୍ୟ ହାସିନୀ ।
ଲପନ୍ତୀ ରୁଦତୀ କମ୍ପ୍ରା ରୁଷ୍ଟା ଦଷ୍ଟାଧରାତୁରା ॥ ୩୩ ॥
ଵିଲୋକୟତି ଗୋଵିନ୍ଦେ ସ୍ମିତ୍ଵା ଚାରୁମୁଖାମ୍ବୁଜମ୍ ।
ପୁଷ୍ପାକୃଷ୍ଟିମିଷାଦୂର୍ଧ୍ଵେ ଧୃତଦୋର୍ମୁଲଚାଲନା ॥ ୩୪ ॥
ସମକ୍ଷମପି ଗୋଵିନ୍ଦମଵିଲୋକ୍ୟେଵ ଭାଵତଃ ।
ଦଲେ ଵିଲିଖ୍ୟ ତନ୍ମୂର୍ତିଂ ପଶ୍ୟନ୍ତୀ ତଦ୍ଵିଲୋକିତାମ୍ ॥ ୩୫ ॥
ଲୀଲୟା ୟାଚକଂ କୃଷ୍ଣମଵଧୀର୍ୟେଵ ଭାମିନୀ ।
ଗିରୀନ୍ଦ୍ରଗାହ୍ଵରଂ ଭଙ୍ଗ୍ୟା ପଶ୍ୟନ୍ତୀ ଵିକସଦ୍ଦୃଶା ॥ ୩୬ ॥
ସୁବଲସ୍କନ୍ଧଵିନ୍ୟସ୍ତବାହୌ ପଶ୍ୟତି ମାଧଵେ ।
ସ୍ମେରା ସ୍ମେରାରଵିନ୍ଦେନ ତମାଲଂ ତଡୟନ୍ତ୍ୟଥ ॥ ୩୭ ॥
ଲୀଲୟା କେଲିପାଥୋଜଂ ସ୍ମିତ୍ଵା ଚୁମ୍ବିତମାଧଵେ ।
ସ୍ମିତ୍ଵା ଭାଲାତ୍ତକସ୍ତୂରୀରସଂ ଘୃତଵତୀ କ୍ଵଚିତ୍ ॥ ୩୮ ॥
ମହାଭାଵୋଜ୍ଜ୍ଵଲାଚିନ୍ତାରତ୍ନୋଦ୍ଭଵିତଵିଗ୍ରହାମ୍ ।
ସଖୀପ୍ରଣୟସଦ୍ଗନ୍ଧଵରୋଦ୍ଵର୍ତନସୁପ୍ରଭାମ୍ ॥ ୩୯ ॥
କାରୁଣ୍ୟାମୃତଵୀଚିଭିସ୍ତାରୁଣ୍ୟାମୃତଧାରୟା ।
ଲାଵଣ୍ୟାମୃତଵନ୍ୟାଭିଃ ସ୍ନପିତାଂ ଗ୍ଲପିତେନ୍ଦିରାମ୍ ॥ ୪୦ ॥
ହ୍ରୀପଟ୍ଟଵସ୍ତ୍ରଗୁପ୍ତାଙ୍ଗୀଂ ସୌନ୍ଦର୍ୟଘୁସୃଣାଞ୍ଚିତାମ୍ ।
ଶ୍ୟାମଲୋଜ୍ଜ୍ଵଲକସ୍ତୂରୀଵିଚିତ୍ରିତକଲେଵରାମ୍ ॥ ୪୧ ॥
କମ୍ପାଶ୍ରୁପୁଲକସ୍ତମ୍ଭସ୍ଵେଦଗଦ୍ଗଦରକ୍ତତା ।
ଉନ୍ମଦୋ ଜାଡ୍ୟମିତ୍ୟେତୈ ରତ୍ନୈର୍ନଵଭିରୁତ୍ତମୈଃ ॥ ୪୨ ॥
କ୍ଲ୍ପ୍ତାଲଙ୍କୃତିସଂଶ୍ଲିଷ୍ଟାଂ ଗୁଣାଲିପୁଷ୍ପମାଲିନୀମ୍ ।
ଧୀରାଧିରତ୍ଵସଦ୍ଵଷପଟଵାସୈଃ ପରିଷ୍କୃତାମ୍ ॥ ୪୩ ॥
ପ୍ରଚ୍ଛନ୍ନମାନଧମ୍ମିଲ୍ଲାଂ ସୌଭାଗ୍ୟତିଲକୋଜ୍ଜ୍ଵଲାମ୍ ।
କୃଷ୍ଣନାମୟଶଃଶ୍ରାଵାଵତଂସୋଲ୍ଲାସିକର୍ଣିକାମ୍ ॥ ୪୪ ॥
ରାଗତମ୍ବୂଲରକ୍ତୋଷ୍ଠୀଂ ପ୍ରେମକୌଟିଲ୍ୟକଜ୍ଜଲାମ୍ ।
ନର୍ମଭାଷିତନିଃସ୍ୟନ୍ଦସ୍ମିତକର୍ପୂରଵାସିତାମ୍ ॥ ୪୫ ॥
ସୌରଭାନ୍ତଃପୁରେ ଗର୍ଵପର୍ୟଙ୍କୋପରି ଲୀଲୟା ।
ନିଵିଷ୍ଟାଂ ପ୍ରେମଵୈଚିତ୍ତ୍ୟଵିଚଲତ୍ତରଲାଞ୍ଚିତାମ୍ ॥ ୪୬ ॥
ପ୍ରଣୟକ୍ରୋଧସାଚୋଲୀବନ୍ଧଗୁପ୍ତିକୃତସ୍ତନାମ୍ ।
ସପତ୍ନୀଵକ୍ତ୍ରହୃଚ୍ଛୋଶିୟଶଃଶ୍ରୀକଚ୍ଛପୀରଵାମ୍ ॥ ୪୭ ॥
ମଧ୍ୟତାତ୍ମସଖୀସ୍କନ୍ଧଲୀଲାନ୍ୟସ୍ତକରାମ୍ବୁଜାମ୍ ।
ଶ୍ୟାମାଂ ଶ୍ୟାମସ୍ମରାମୋଦମଧୁଲୀପରିଵେଶିକାମ୍ ॥ ୪୮ ॥
ସୁଭଗଵଲ୍ଗୁଵିଞ୍ଛୋଲୀମୌଲୀଭୂଷଣମଞ୍ଜରୀ ।
ଆଵୈକୁଣ୍ଠମଜାଣ୍ଡାଲିଵତଂସୀକୃତସଦ୍ୟଶଃ ॥ ୪୯ ॥
ଵୈଦଗ୍ଧ୍ୟୈକସୁଧାସିନ୍ଧୁଶ୍ଚାଟୁର୍ୟୈକସୁଧାପୁରୀ ।
ମାଧୁର୍ୟୈକସୁଧାଵଲ୍ଲୀ ଗୁଣରତ୍ନୈକପେଟିକା ॥ ୫୦ ॥
ଗୋଵିନ୍ଦାନଙ୍ଗରାଜୀଵେ ଭାନୁଶ୍ରୀର୍ଵାର୍ଷଭାନଵୀ ।
କୃଷ୍ଣହୃତ୍କୁମୁଦୋଲ୍ଲାସେ ସୁଧାକାରକରସ୍ଥିତିଃ ॥ ୫୧ ॥
କୃଷ୍ଣମାନସହଂସସ୍ୟ ମାନସୀ ସରସୀ ଵରା ।
କୃଷ୍ଣଚାତକଜୀଵାତୁନଵାମ୍ଭୋଦପୟଃଶ୍ରୁତିଃ ॥ ୫୨ ॥
ସିଦ୍ଧାଞ୍ଜନସୁଧାଵାର୍ତିଃ କୃଷ୍ଣଲୋଚନୟୋର୍ଦ୍ଵୟୋଃ ।
ଵିଲାସଶ୍ରାନ୍ତକୃଷ୍ଣାଙ୍ଗେ ଵାତଲୀ ମାଧଵୀ ମତା ॥ ୫୩ ॥
ମୁକୁନ୍ଦମତ୍ତମାତଙ୍ଗଵିହାରାପରଦୀର୍ଘିକା ।
କୃଷ୍ଣପ୍ରାଣମହାମୀନଖେଲନାନନ୍ଦଵାରିଧିଃ ॥ ୫୪ ॥
ଗିରୀନ୍ଦ୍ରଧାରିରୋଲମ୍ବରସାଲନଵମଞ୍ଜରୀ ।
କୃଷ୍ଣକୋକିଲସମ୍ମୋଦିମନ୍ଦରୋଦ୍ୟାନଵିସ୍ତୃତିଃ ॥ ୫୫ ॥
କୃଷ୍ଣକେଲିଵରାରାମଵିହାରାଦ୍ଭୁତକୋକିଲା ।
ନାଦାକୃଷ୍ଟବକଦ୍ଵେଷିଵୀରଧୀରମନୋମୃଗା ॥ ୫୬ ॥
ପ୍ରଣୟୋଦ୍ରେକସିଦ୍ଧ୍ୟେକଵଶିକୃତଧୃତାଚଲା ।
ମାଧଵାତିଵଶା ଲୋକେ ମାଧଵୀ ମାଧଵପ୍ରିୟା ॥ ୫୭ ॥
କୃଷ୍ଣମଞ୍ଜୁଲତାପିଞ୍ଛେ ଵିଲସତ୍ସ୍ଵର୍ଣୟୂଥିକା ।
ଗୋଵିନ୍ଦନଵ୍ୟପାଥୋଦେ ସ୍ଥିରଵିଦ୍ୟୁଲ୍ଲତାଦ୍ଭୁତା ॥ ୫୮ ॥
ଗ୍ରୀଷ୍ମେ ଗୋଵିନ୍ଦସର୍ଵାଙ୍ଗେ ଚନ୍ଦ୍ରଚନ୍ଦନଚନ୍ଦ୍ରିକା ।
ଶୀତେ ଶ୍ୟାମଶୁଭାଙ୍ଗେଷୁ ପୀତପଟ୍ଟଲସତ୍ପଟୀ ॥ ୫୯ ॥
ମଧୌ କୃଷ୍ଣତରୂଲ୍ଲାସେ ମଧୁଶ୍ରୀର୍ମଧୁରାକୃତିଃ ।
ମଞ୍ଜୁମଲ୍ଲାରରାଗଶ୍ରୀଃ ପ୍ରାଵୃଷୀ ଶ୍ୟାମହର୍ଷିଣୀ ॥ ୬୦ ॥
ଋତୌ ଶରଦି ରାସୈକରସିକେନ୍ଦ୍ରମିହ ସ୍ଫୁଟମ୍ ।
ଵରିତୁଂ ହନ୍ତ ରାସଶ୍ରୀର୍ଵିହରନ୍ତୀ ସଖୀଶ୍ରିତା ॥ ୬୧ ॥
ହେମାନ୍ତେ ସ୍ମରୟୁଦ୍ଧାର୍ଥମଟନ୍ତଂ ରାଜନନ୍ଦନମ୍ ।
ପୌରୁଷେଣ ପରାଜେତୁଂ ଜୟଶ୍ରୀର୍ମୂର୍ତିଧାରିଣୀ ॥ ୬୨ ॥
ସର୍ଵତଃ ସକଲସ୍ତଵ୍ୟଵସ୍ତୁତୋ ୟତ୍ନତଶ୍ଚିରାତ୍ ।
ସାରଣାକୃଷ୍ୟ ତୈର୍ୟୁକ୍ତ୍ୟା ନିର୍ମାୟାଦ୍ଭୁତଶୋଭୟା ॥ ୬୩ ॥
ସ୍ଵଶ୍ଲାଘଂ କୁର୍ଵତା ଫୁଲ୍ଲଵିଧିନା ଶ୍ଲାଘିତା ମୁହୁଃ ।
ଗୌରୀଶ୍ରୀମୃଗ୍ୟସୌନ୍ଦର୍ୟଵନ୍ଦିତଶ୍ରୀନଖପ୍ରଭା ॥ ୬୪ ॥
ଶରତ୍ସରୋଜଶୁଭ୍ରାଂଶୁମଣିଦର୍ପନମାଲୟା ।
ନିର୍ମଞ୍ଛିତମୁଖାମ୍ଭୋଜଵିଲସତ୍ସୁଷମକଣା ॥ ୬୫ ॥
ସ୍ଥାୟୀସଞ୍ଚାରିସୂଦ୍ଦୀପ୍ତସତ୍ତ୍ଵିକୈରନୁଭାଵକୈଃ ।
ଵିଭାଵାଦ୍ୟୈର୍ଵିଭାଵୋଽପି ସ୍ଵୟଂ ଶ୍ରୀରସତାଂ ଗତା ॥ ୬୬ ॥
ସୌଭାଗ୍ୟଦୁନ୍ଦୁଭିପ୍ରୋଦ୍ୟଦ୍ଧ୍ଵନିକୋଲାହଲୈଃ ସଦା ।
ଵିତ୍ରସ୍ତୀକୃତଗର୍ଵିଷ୍ଠଵିପକ୍ଷାଖିଲଗୋପିକା ॥ ୬୭ ॥
ଵିପକ୍ଷଲକ୍ଷାହୃତ୍କମ୍ପାସମ୍ପାଦକମୁଖଶ୍ରିୟା ।
ଵଶୀକୃତବକାରାତିମାନସା ମଦନାଲସା ॥ ୬୮ ॥
କନ୍ଦର୍ପକୋଟିରମ୍ୟଶ୍ରୀଜୟିଶ୍ରୀଗିରିଧାରିଣା ।
ଚଞ୍ଚଲାପଙ୍ଗଭଙ୍ଗେନ ଵିସ୍ମାରିତସତୀଵ୍ରତା ॥ ୬୯ ॥
କୃଷ୍ଣେତିଵର୍ଣୟୁଗ୍ମୋରୁମୋହମନ୍ତ୍ରେଣ ମୋହିତା ।
କୃଷ୍ଣଦେହଵରାମୋଦହୃଦ୍ୟମାଦନମାଦିତା ॥ ୭୦ ॥
କୁଟିଲଭ୍ରୂଚଲାଚଣ୍ଡକନ୍ଦର୍ପୋଦ୍ଦଣ୍ଡକର୍ମୁକା ।
ନ୍ୟସ୍ତାପଙ୍ଗଶରକ୍ଷେପୈର୍ଵିହ୍ଵଲୀକୃତମାଧଵା ॥ ୭୧ ॥
ନିଜାଙ୍ଗସୌରଭୋଦ୍ଗାରମଦକୌଷଧିଵାତ୍ୟୟା ।
ଉନ୍ମଦୀକୃତସର୍ଵୈକମଦକପ୍ରଵରାଚ୍ୟୁତା ॥ ୭୨ ॥
ଦୈଵାଚ୍ଛ୍ରୁତିପଥାୟାତନାମନୀହାରଵାୟୁନା ।
ପ୍ରୋଦ୍ୟଦ୍ରୋମାଞ୍ଚଶୀତ୍କାରକମ୍ପିକୃଷ୍ଣମନୋହରା ॥ ୭୩ ॥
କୃଷ୍ଣନେତ୍ରଲସଞ୍ଜିହ୍ଵାଲେହ୍ୟଵକ୍ତ୍ରପ୍ରଭାମୃତା ।
କୃଷ୍ଣାନ୍ୟତୃଷ୍ଣାସଂହାରୀ ସୁଧାସାରୈକଝର୍ଝରୀ ॥ ୭୪ ॥
ରାସଲାସ୍ୟରସୋଲ୍ଲାସଵଶୀକୃତବଲାନୁଜା ।
ଗାନଫୁଲ୍ଲୀକୃତୋପେନ୍ଦ୍ରା ପିକୋରୁମଧୁରସ୍ଵରା ॥ ୭୫ ॥
କୃଷ୍ଣକେଲିସୁଧାସିନ୍ଧୁମକରୀ ମକରଧ୍ଵଜମ୍ ।
ଵର୍ଧୟନ୍ତୀ ସ୍ଫୁଟଂ ତସ୍ୟ ନର୍ମାସ୍ଫଲନଖେଲୟା ॥ ୭୬ ॥
ଗତିର୍ମତ୍ତଗଜଃ କୁମ୍ଭୌ କୁଚୌ ଗନ୍ଧମଦୋଦ୍ଧୁରୌ ।
ମଧ୍ୟମୁଦ୍ଦାମସିଂହୋଽୟଂ ତ୍ରିବଲ୍ୟୋ ଦୁର୍ଗଭିତ୍ତୟଃ ॥ ୭୭ ॥
ରୋମାଲୀ ନାଗପାଶଶ୍ରୀର୍ନିତମ୍ବୋ ରଥ ଉଲ୍ବନଃ ।
ଦାନ୍ତା ଦୁର୍ଦନ୍ତସାମାନ୍ତାଃ ପାଦାଙ୍ଗୁଲ୍ୟଃ ପଦାତୟଃ ॥ ୭୮ ॥
ପାଦୌ ପଦତିକାଧ୍ୟକ୍ଷୌ ପୁଲକଃ ପୃଥୁକଙ୍କତଃ ।
ଊରୂ ଜୟମଣିସ୍ତମ୍ଭୌ ବାହୂ ପାଶଵରୌ ଦୃଢୌ ॥ ୭୯ ॥
ଭ୍ରୂଦ୍ଵନ୍ଦ୍ଵଂ କର୍ମୁକଂ କ୍ରୂରଂ କଟାକ୍ଷାଃ ଶନିତାଃ ଶରାଃ ।
ଭାଲମର୍ଧେନ୍ଦୁଦିଵ୍ୟାସ୍ତ୍ରମଙ୍କୁଶାଣି ନଖାଙ୍କୁରାଃ ॥ ୮୦ ॥
ସ୍ଵର୍ଣେନ୍ଦୁଫଲକଂ ଵକ୍ତ୍ରଂ କୃପଣୀ କରୟୋର୍ଦ୍ୟୁତିଃ ।
ଭଲ୍ଲଭାରଃ କରାଙ୍ଗୁଲ୍ୟୋ ଗଣ୍ଡୌ କନକଦର୍ପନୌ ॥ ୮୧ ॥
କେଶପାଶଃ କଟୁକ୍ରୋଧଃ କର୍ଣୌ ମୌର୍ଵଗୁଣୋତ୍ତମୌ ।
ବନ୍ଧୁକାଧରରାଗୋଽତିପ୍ରତାପଃ କରକମ୍ପକଃ ॥ ୮୨ ॥
ଦୁନ୍ଦୁଭ୍ୟାଦିରଵଶ୍ଚୂଡାକିଙ୍କିନୀନୂପୁରସ୍ଵନଃ ।
ଚିବୁକଂ ସ୍ଵସ୍ତିକଂ ଶାସ୍ତଂ କଣ୍ଠଃ ଶଙ୍ଖୋ ଜୟପ୍ରଦଃ ॥ ୮୩ ॥
ପରିଷ୍ଵଙ୍ଗୋ ହି ଵିଦ୍ଧ୍ୟସ୍ତ୍ରଂ ସୌରଭଂ ମଦକୌଷଦମ୍ ।
ଵାଣୀ ମୋହନମନ୍ତ୍ରଶ୍ରୀର୍ଦେହବୁଦ୍ଧିଵିମୋହିନୀ ॥ ୮୪ ॥
ନାଭୀ ରତ୍ନାଦିଭାଣ୍ଡାରଂ ନାସାଶ୍ରୀଃ ସକଲୋନ୍ନତା ।
ସ୍ମିତଲେଶୋଽପ୍ୟଚିନ୍ତ୍ୟାଦି ଵଶୀକରଣତନ୍ତ୍ରକଃ ॥ ୮୫ ॥
ଅଲକାନାଂ କୁଲଂ ଭୀଷ୍ମଂ ଭୃଙ୍ଗାସ୍ତ୍ରଂ ଭଙ୍ଗଦାୟକମ୍ ।
ମୂର୍ତିଃ କନ୍ଦର୍ପୟୁଦ୍ଧଶ୍ରୀର୍ଵେଣୀ ସଞ୍ଜୟିନୀ ଧ୍ଵଜା ॥ ୮୬ ॥
ଇତି ତେ କାମସଙ୍ଗ୍ରାମସାମଗ୍ୟୋ ଦୁର୍ଘଟାଃ ପରୈଃ ।
ଈଦୃଶ୍ୟୋ ଲଲିତାଦୀନାଂ ସେନାନୀନାଂ ଚ ରାଧିକେ ॥ ୮୭ ॥
ଅତୋ ଦର୍ପମଦାଦ୍ୟୂତଂ ଦାନୀନ୍ଦ୍ରମଵଧୀର୍ୟ ମାମ୍ ।
ମହାମାରମହାରାଜନିୟୁକ୍ତଂ ପ୍ରଥିତଂ ଵ୍ରଜେ ॥ ୮୮ ॥
ସୁଷ୍ଠୁ ସୀମାନ୍ତସିନ୍ଦୂର ତିଲକାନାଂ ଵରତ୍ଵିଷାମ୍ ।
ହାରାଙ୍ଗଦାଦିଚୋଲୀନାଂ ନାସାମୌକ୍ତିକଵାସସାମ୍ ॥ ୮୯ ॥
କେୟୂରମୁଦ୍ରିକାଦୀନାଂ କଜ୍ଜଲୋଦ୍ୟଦ୍ଵତଂସୟୋଃ ।
ଏତାଵଦ୍ୟୁଦ୍ଧଵସ୍ତୂନାଂ ପରାର୍ଧ୍ୟାନାଂ ପରର୍ଧ୍ୟତଃ ॥ ୯୦ ॥
ତଥା ଦଧ୍ୟାଦିଗଵ୍ୟାନଆମମୂଲ୍ୟାନାନାଂ ଵ୍ରଜୋଦ୍ଭଵାତ୍ ।
ଅଦତ୍ତ୍ଵା ମେ କରଂ ନ୍ୟାୟ୍ୟଂ ଖେଲନ୍ତ୍ୟୋ ଭ୍ରମତେହ ୟତ୍ ॥ ୯୧ ॥
ତତୋ ମୟା ସମଂ ୟୁଦ୍ଧଂ କର୍ତୁମିଚ୍ଛତ ବୁଧ୍ୟତେ ।
କିଂ ଚୈକୋଽହଂ ଶତଂ ୟୂୟଂ କୁରୁଧ୍ଵଂ କ୍ରମଶସ୍ତତଃ ॥ ୯୨ ॥
ପ୍ରଥମଂ ଲଲିତୋଚ୍ଚଣ୍ଡା ଚରତାଚ୍ଚଣ୍ଡସଙ୍ଗରମ୍ ।
ତତସ୍ତ୍ଵଂ ତଦନୁ ପ୍ରେଷ୍ଠସଙ୍ଗରାଃ ସକଲାଃ କ୍ରମାତ୍ ॥ ୯୩ ॥
ଅଥ ଚେନ୍ମିଲିତାଃ କର୍ତୁଂ କାମୟଧ୍ଵେ ରଣଂ ମଦାତ୍ ।
ଅଗ୍ରେ ସରତ ତଦ୍ଦୋର୍ଭ୍ୟାଂ ପିନଷ୍ମି ସକଲାଃ କ୍ଷଣାତ୍ ॥ ୯୪ ॥
ଇତି କୃଷ୍ଣଵଚଃ ଶ୍ରୁତ୍ଵା ସାଟୋପଂ ନର୍ମନିର୍ମିତମ୍ ।
ସାନନ୍ଦଂ ମଦନାକ୍ରାନ୍ତମାନସାଲିକୁଲାନ୍ଵିତା ॥ ୯୫ ॥
ସ୍ମିତ୍ଵା ନେତ୍ରାନ୍ତବାଣୈସ୍ତଂ ସ୍ତବ୍ଧୀକୃତ୍ୟ ମଦୋଦ୍ଧତମ୍ ।
ଗଚ୍ଛନ୍ତୀ ହଂସଵଦ୍ଭଙ୍ଗ୍ୟା ସ୍ମିତ୍ଵା ତେନ ଧୃତାଞ୍ଚଲା ॥ ୯୬ ॥
ଲୀଲୟାଞ୍ଚଲମାକୃଷ୍ୟ ଚଲନ୍ତୀ ଚାରୁହେଲୟା ।
ପୁରୋ ରୁଦ୍ଧପଥଂ ତଂ ତୁ ପଶ୍ୟନ୍ତୀ ରୁଷ୍ଟୟା ଦୃଶା ॥ ୯୭ ॥
ମାନସସ୍ଵର୍ଧୁନୀଂ ତୂର୍ଣମୁତ୍ତରୀତୁଂ ତରୀଂ ଶ୍ରିତା ।
କମ୍ପିତାୟାଂ ତରୌ ଭୀତ୍ୟା ସ୍ତୁଵନ୍ତୀ କୃଷ୍ଣନାଵିକମ୍ ॥ ୯୮ ॥
ନିଜକୁଣ୍ଡପୟଃକେଲିଲୀଲାନିର୍ଜିତମଚ୍ୟୁତମ୍ ।
ହସିତୁଂ ୟୁଞ୍ଜତୀ ଭଙ୍ଗ୍ୟା ସ୍ମେରା ସ୍ମେରମୁଖୀଃ ସଖୀଃ ॥ ୯୯ ॥
ମକନ୍ଦମକୁଲସ୍ୟନ୍ଦିମରନ୍ଦସ୍ୟନ୍ଦିମନ୍ଦିରେ ।
କେଲିତଲ୍ପେ ମୁକୁନ୍ଦେନ କୁନ୍ଦଵୃନ୍ଦେନ ମଣ୍ଡିତା ॥ ୧୦୦ ॥
ନାନାପୁଷ୍ପମଣିଵ୍ରାତପିଞ୍ଛାଗୁଞ୍ଜାଫଲାଦିଭିଃ ।
କୃଷ୍ଣଗୁମ୍ଫିତଧମ୍ମିଲ୍ଲୋତ୍ଫୁଲ୍ଲରୋମସ୍ମରଙ୍କୁରା ॥ ୧୦୧ ॥
ମଞ୍ଜୁକୁଞ୍ଜେ ମୁକୁନ୍ଦସ୍ୟ କୁଚୌ ଚିତ୍ରୟତଃ କରମ୍ ।
କ୍ଷପୟନ୍ତୀ କୁଚକ୍ଷେପୈଃ ସୁସଖ୍ୟମଧୁନୋନ୍ମଦା ॥ ୧୦୨ ॥
ଵିଲାସେ ୟତ୍ନତଃ କୃଷ୍ଣଦତ୍ତଂ ତାମ୍ବୂଲଚର୍ଵିତମ୍ ।
ସ୍ମିତ୍ଵା ଵାମ୍ୟାଦଗୃହ୍ଣାନା ତତ୍ରାରୋପିତଦୂଷଣମ୍ ॥ ୧୦୩ ॥
ଦ୍ୟୂତେ ପାଣିକୃତାଂ ଵଂଶୀଂ ଜିତ୍ଵା କୃଷ୍ଣସୁଗୋପିତାମ୍ ।
ହସିତ୍ଵାଚ୍ଛିଦ୍ୟ ଗୃହ୍ଣାନା ସ୍ତୁତା ସ୍ମେରାଲିସଞ୍ଚୟୈଃ ॥ ୧୦୪ ॥
ଵିଶାଖାଗୂଢନର୍ମୋକ୍ତିଜିତକୃଷ୍ଣାର୍ପିତସ୍ମିତା ।
ନର୍ମାଧ୍ୟାୟଵରାଚାର୍ୟା ଭାରତୀଜୟଵାଗ୍ମିତା ॥ ୧୦୫ ॥
ଵିଶାଖାଗ୍ରେ ରହଃକେଲିକଥୋଦ୍ଘାଟକମାଧଵମ୍ ।
ତାଡୟନ୍ତୀ ଦ୍ଵିରବ୍ଜେନ ସଭ୍ରୂଭଙ୍ଗେନ ଲୀଲୟା ॥ ୧୦୬ ॥
ଲଲିତାଦିପୁରଃ ସାକ୍ଷାତ୍କୃଷ୍ଣସମ୍ଭୋଗଲଞ୍ଛନେ ।
ସୂଚ୍ୟମାନେ ଦୃଶା ଦୂତ୍ୟା ସ୍ମିତ୍ଵା ହୁଙ୍କୁର୍ଵତୀ ରୁଷା ॥ ୧୦୭ ॥
କ୍ଵଚିତ୍ପ୍ରଣୟମାନେନ ସ୍ମିତମାଵୃତ୍ୟ ମୌନିନୀ ।
ଭୀତ୍ୟା ସ୍ମରଶରୈର୍ଭଙ୍ଗ୍ୟଲିଙ୍ଗନ୍ତୀ ସସ୍ମିତଂ ହରିମ୍ ॥ ୧୦୮ ॥
କୁପିତଂ କୌତୁକୈଃ କ୍ର୍ଷ୍ଣଂ ଵିହାରେ ବାଢମୌନିନମ୍ ।
କତରା ପରିରଭ୍ୟାଶୁ ମାନୟନ୍ତୀ ସ୍ମିତାନନମ୍ ॥ ୧୦୯ ॥
ମିଥଃ ପ୍ରଣୟମାନେନ ମୌନିନୀ ମୌନିନଂ ହରିମ୍ ।
ନିର୍ମୌନା ସ୍ମରମିତ୍ରେଣ ନିର୍ମୌନଂ ଵୀକ୍ଷ୍ୟ ସସ୍ମିତା ॥ ୧୧୦ ॥
କ୍ଵଚିତ୍ପଥି ମିଲାଚନ୍ଦ୍ରାଵଲୀସମ୍ଭୋଗଦୂଷଣମ୍ ।
ଶ୍ରୁତ୍ଵା କ୍ରୂରସଖୀଵକ୍ତ୍ରାନ୍ମୁକୁନ୍ଦେ ମାନିନୀ ରୁଷା ॥ ୧୧୧ ॥
ପାଦଲକ୍ଷାରସୋଲ୍ଲାସିଶିରସ୍କଂ କଂସଵିଦ୍ଵିଷମ୍ ।
କୃତକାକୁଶତଂ ସାସ୍ରା ପଶ୍ୟନ୍ତୀଷାଚଲଦ୍ଦୃଶା ॥ ୧୧୨ ॥
କ୍ଵଚିତ୍କଲିନ୍ଦଜାତୀରେ ପୁଷ୍ପତ୍ରୋଟନଖେଲୟା ।
ଵିହରନ୍ତୀ ମୁକୁନ୍ଦେନ ସାର୍ଧମାଲୀକୁଲାଵୃତା ॥ ୧୧୩ ॥
ତତ୍ର ପୁଷ୍ପକୃତେ କୋପାଦ୍ଵ୍ରଜନ୍ତୀ ପ୍ରେମକାରିତାତ୍ ।
ଵ୍ୟାଘୋତିତା ମୁକୁନ୍ଦେନ ସ୍ମିତ୍ଵା ଧୃତ୍ଵା ପଟାଞ୍ଚଲମ୍ ॥ ୧୧୪ ॥
ଵିହାରଶ୍ରାନ୍ତିତଃ କାନ୍ତଂ ଲଲିତାନ୍ୟସ୍ତମସ୍ତକମ୍ ।
ଵୀଜୟନ୍ତୀ ସ୍ଵୟଂ ପ୍ରେମ୍ଣା କୃଷ୍ଣଂ ରକ୍ତପଟାଞ୍ଚଲୈଃ ॥ ୧୧୫ ॥
ପୁଷ୍ପକଲ୍ପିତଦୋଲାୟାଂ କଲଗାନକୁତୂହଲୈଃ ।
ପ୍ରେମ୍ଣା ପ୍ରେଷ୍ଠସଖୀଵର୍ଗୈର୍ଦୋଲିତା ହରିଭୂଷିତା ॥ ୧୧୬ ॥
କୁଣ୍ଡକୁଞ୍ଜାଙ୍ଗନେ ଵଲ୍ଗୁ ଗାୟଦାଲୀଗଣାନ୍ଵିତା ।
ଵୀଣାନନ୍ଦିତଗୋଵିନ୍ଦଦତ୍ତଚୁମ୍ବେନ ଲଜ୍ଜିତା ॥ ୧୧୭ ॥
ଗୋଵିନ୍ଦଵଦନାମ୍ଭୋଜେ ସ୍ମିତ୍ଵା ତାମ୍ବୂଲଵୀଟିକାମ୍ ।
ୟୁଞ୍ଜତୀହ ମିଥୋ ନର୍ମକେଲିକର୍ପୂରଵାସିତାମ୍ ॥ ୧୧୮ ॥
ଗିରୀନ୍ଦ୍ରଗାହ୍ଵରେ ତଲ୍ପେ ଗୋଵିନ୍ଦୋରସି ସାଲସମ୍ ।
ଶୟନା ଲଲିତାଵୀଜ୍ୟମାନା ସ୍ଵୀୟପଟାଞ୍ଚଲୈଃ ॥ ୧୧୯ ॥
ଅପୂର୍ଵବନ୍ଧଗାନ୍ଧର୍ଵାକଲୟୋନ୍ମଦ୍ୟ ମାଧଵମ୍ ।
ସ୍ମିତ୍ଵା ହରିତତଦ୍ଵେଣୁହାରା ସ୍ମେରଵିଶାଖୟା ॥ ୧୨୦ ॥
ଵୀଣାଧ୍ଵନିଧୁତୋପେନ୍ଦ୍ରହସ୍ତାଚ୍ଚ୍ୟୋତିତଵଂଶିକା ।
ଚୂଡାସ୍ଵନହୃତଶ୍ୟାମଦେହଗେହପଥସ୍ମୃତିଃ ॥ ୧୨୧ ॥
ମୁରଲୀଗିଲିତୋତ୍ତୁଙ୍ଗଗୃହଧର୍ମକୁଲସ୍ଥିତିଃ ।
ଶୃଙ୍ଗତୋ ଦତ୍ତତତ୍ସର୍ଵସତିଲାପୋଽଞ୍ଜଲିତ୍ରୟା ॥ ୧୨୨ ॥
କୃଷ୍ଣପୁଷ୍ଟିକରାମୋଦିସୁଧାସାରାଧିକାଧରା ।
ସ୍ଵମଧୁରିତ୍ଵସମ୍ପାଦିକୃଷ୍ଣପାଦାମ୍ବୁଜାମୃତା ॥ ୧୨୩ ॥
ରାଧେତି ନିଜନାମ୍ନୈଵ ଜଗତ୍ଖ୍ୟାପିତମାଧଵା ।
ମାଧଵସ୍ୟୈଵ ରାଧେତି ଜ୍ଞାପିତାତ୍ମା ଜଗତ୍ତ୍ରୟେ ॥ ୧୨୪ ॥
ମୃଗନାଭେଃ ସୁଗନ୍ଧଶ୍ରୀରିଵେନ୍ଦୋରିଵ ଚନ୍ଦ୍ରିକା ।
ତରୋଃ ସୁମଞ୍ଜରୀଵେହ କୃଷ୍ଣସ୍ୟାଭିନ୍ନତାଂ ଗତା ॥ ୧୨୫ ॥
ରଙ୍ଗିନା ସଙ୍ଗରଙ୍ଗେନ ସାନଙ୍ଗରଙିନୀକୃତା ।
ସାନଙ୍ଗରଙ୍ଗଭଙ୍ଗେନ ସୁରଙ୍ଗୀକୃତରଙ୍ଗଦା ॥ ୧୨୬ ॥
ଇତ୍ୟେତନ୍ନାମଲୀଲାକ୍ତପଦ୍ୟୈଃ ପୀୟୂଷଵର୍ଷକୈଃ ।
ତଦ୍ରସାସ୍ଵାଦନିଷ୍ଣାତଵସନାଵାସିତାନ୍ତରୈଃ ॥ ୧୨୭ ॥
ଗୀୟମାନଂ ଜନୈର୍ଧନ୍ୟୈଃ ସ୍ନେହଵିକ୍ଲିନ୍ନମାନସୈଃ ।
ନତ୍ଵା ତାଂ କୃପୟାଵିଷ୍ଟାଂ ଦୁଷ୍ଟୋଽପି ନିଷ୍ଠୁରଃ ଶଠଃ ॥ ୧୨୮ ॥
ଜନୋଽୟଂ ୟାଚତେ ଦୁଃଖୀ ରୁଦନ୍ନୁଚ୍ଚୈରିଦଂ ମୁହୁଃ ।
ତତ୍ପଦାମ୍ଭୋଜୟୁଗ୍ମୈକଗତିଃ କାତରତାଂ ଗତଃ ॥ ୧୨୯ ॥
କୃତ୍ଵା ନିଜଗଣସ୍ୟାନ୍ତଃ କାରୁଣ୍ୟାନ୍ନିଜସେଵନେ ।
ନିୟିଜୟତୁ ମାଂ ସାକ୍ଷାତ୍ସେୟଂ ଵୃନ୍ଦାଵନେଶ୍ଵରୀ ॥ ୧୩୦ ॥
ଭଜାମି ରାଧାମରଵିନ୍ଦନେତ୍ରାଂ
ସ୍ମରାମି ରାଧାଂ ମଧୁରସ୍ମିତାସ୍ୟାମ୍ ।
ଵଦାମି ରାଧାଂ କରୁଣଭରାର୍ଦ୍ରାଂ
ତତୋ ମମାନ୍ୟାସ୍ତି ଗତିର୍ନ କାପି ॥ ୧୩୧ ॥
ଲୀଲାନାମାଙ୍କିତସ୍ତୋତ୍ରଂ ଵିଶାଖାନନ୍ଦଦାଭିଧମ୍ ।
ୟଃ ପଠେନ୍ନିୟତଂ ଗୋଷ୍ଠେ ଵସେନ୍ନିର୍ଭରଦୀନଧୀଃ ॥ ୧୩୨ ॥
ଆତ୍ମାଲଙ୍କୃତିରାଧାୟାଂ ପ୍ରୀତିମୁତ୍ପଦ୍ୟ ମୋଦଭାକ୍
ନିୟୋଜୟତି ତାଂ କୃଷ୍ଣଃ ସାକ୍ଷାତ୍ତତ୍ପ୍ରିୟସେଵନେ ॥ ୧୩୩ ॥
ଶ୍ରୀମଦ୍ରୂପପଦାମ୍ଭୋଜଧୂଲୀମାତ୍ରୈକସେଵିନା
କେନଚିଦ୍ଗ୍ରଥିତା ପଦ୍ୟୈର୍ମାଲାଘ୍ରେୟା ତଦାଶ୍ରୟୈଃ ॥ ୧୩୪ ॥
ଇତି ଶ୍ରୀରଘୁନାଥଦାସଗୋସ୍ଵାମିଵିରଚିତସ୍ତଵାଵଲ୍ୟାଂ
ଶ୍ରୀଵିଶାଖାନନ୍ଦାଭିଧସ୍ତୋତ୍ରଂ ସମ୍ପୂର୍ଣମ୍ ।
