Shri Guru Geetaa in Bengali:
॥ শ্রীগুরুগীতা ॥ (Dharma Mandala DLI version)
॥ অথ শ্রীগুরুগীতা ॥
ঋষয় ঊচুঃ ।
গুহ্যাদ্গুহ্যতরা বিদ্যা গুরুগীতা বিশেষতঃ ।
ব্রূহি নঃ সূত কৃপয়া শৃণুমস্ত্বৎপ্রসাদতঃ ॥ ১ ॥
সূত উবাচ ।
গিরীন্দ্রশিখরে রম্যে নানারত্নোপশোভিতে ।
নানাবৃক্ষলতাকীর্ণে নানাপক্ষিরবৈর্যুতে ॥ ২ ॥
সর্বর্তুকুসুমামোদমোদিতে সুমনোহরে ।
শৈত্যসৌগন্ধ্যমান্দ্যাঢ্যমরুদ্ভিরুপবীজিতে ॥ ৩ ॥
অপ্সরোগণসঙ্গীতকলধ্বনিনিনাদিতে ।
স্থিরচ্ছায়াদ্রুমচ্ছায়াচ্ছাদিতে স্নিগ্ধমঞ্জুলে ॥ ৪ ॥
মত্তকোকিলসন্দোহসঙ্ঘুষ্টবিপিনান্তরে ।
সর্বদা স্বগণৈঃ সার্দ্ধমৃতুরাজনিপেবিতে ॥ ৫ ॥
সিদ্ধচারণগন্ধর্বগাণপত্যগণৈর্বৃতে ।
তত্র মৌনধরং দেবং চরাচরজগদ্গুরুম্ ॥ ৬ ॥
সদাশিবং সদানন্দং করুণামৃতসাগরম্ ।
কর্পূরকুন্দধবলং শুদ্ধতত্ত্বময়ং বিভুম্ ॥ ৭ ॥
দিগম্বরং দীননাথং যোগীন্দ্রং যোগিবল্লভম্ ।
গঙ্গাশীকরসংসিক্তজটামণ্ডলমণ্ডিতম্ ॥ ৮ ॥
বিভূতিভূষিতং শান্তং ব্যালমালং কপালিনম্ ।
অন্ধকারিং ত্রিলোকেশং ত্রিশূলবরধারকম্ ॥ ৯ ॥
আশুতোষং জ্ঞানময়ং কৈবল্যফলদায়কম্ ।
নির্বিকল্পং নিরাতঙ্কং নির্বিশেষং নিরঞ্জনম্ ॥ ১০ ॥
সর্বেষাং হিতকর্তারং দেবদেবং নিরাময়ম্ ।
কৈলাসশিখরাসীনং পঞ্চবক্ত্রং সুভূষিতম্ ॥ ১১ ॥
সর্বাত্মনাবিষ্টচিত্তং গিরিজামুখপঙ্কজে ।
প্রণম্য পরয়া ভক্ত্যা কৃতাঞ্জলিপুটা সতী ॥ ১২ ॥
প্রসন্নবদনং বীক্ষ্য লোকানাং হিতকাম্যযা ।
বিনয়াঽবনতা দেবী পার্বতী শিবমব্রবীৎ ॥ ১৩ ॥
শ্রীমহাদেব্যুবাচ ।
নমস্তে দেবদেবেশ সদাশিব জগদ্গুরো ।
প্রাণেশ্বর মহাদেব গুরুগীতাং বদ প্রভো ॥ ১৪ ॥
কেন মার্গেণ ভোঃ স্বামিন্ দেহী ব্রহ্মময়ো ভবেৎ ।
ৎবং কৃপাং কুরু মে দেব নমামি চরণং তব ॥ ১৫ ॥
শ্রী মহাদেব উবাচ ।
গুশব্দস্ত্বন্ধকারঃ স্যাদ্রুশব্দস্তন্নিরোধকঃ ।
অন্ধকারনিরোধিৎবাদ্গুরুরিত্যভিধীয়তে ॥ ১৬ ॥
গুকারঃ প্রথমো বর্ণো মায়াদিগুণভাসকঃ ।
রুকারো দ্বিতীয়ো ব্রহ্ম মায়াভ্রান্তিবিমোচকঃ ॥ ১৭ ॥
গকারঃ সিদ্ধিদঃ প্রোক্তো রেফঃ পাপস্য দাহকঃ ।
উকারঃ শম্ভুরিত্যুক্তস্ত্রিতয়াঽঽত্মা গুরুঃ স্মৃতঃ ॥ ১৮ ॥
শ্রীমহাদেব্যুবাচ ।
মায়ামোহিতজীবানাং জন্মমৃত্যুজরাদিতঃ ।
রক্ষায়ৈ কঃ প্রভবতি স্বামিন্ সংসারসাগরে ॥ ১৯ ॥
ৎবত্তো নাঽন্যো দয়াসিন্ধো কশ্চিচ্ছক্নোতি বৈ প্রভো ।
দাতুং প্রতিবচশ্চাঽস্য লোকশোকবিমোচনম্ ॥ ২০ ॥
ত্রিতাপতপ্তজীবানাং কল্যাণার্থং ময়া প্রভো ।
বিহিতঃ সাদরং প্রশ্ন উত্তরেণাঽনুগৃহ্যতাম্ ॥ ২১ ॥
শ্রীমহাদেব উবাচ ।
সংসারাঽপারপাথোধেঃ পারং গন্তুং মহেশ্বরি ।
শ্রীগুরোশ্চরণাঽম্ভোজনৌকেবৈকাঽবলম্বনম্ ॥ ২২ ॥
সদ্গুরো রূপমাদায় জগত্যামহমেব হি ।
উদ্ধরাম্যখিলাঞ্জীবান্মৃত্যুসংসারসাগরাৎ ॥ ২৩ ॥
যো গুরুঃ স শিবঃ সাক্ষাদ্যঃ শিবঃ স গুরুর্মতঃ ।
গুরৌ ময়ি ন ভেদোঽস্তি ভেদস্তত্র নিরর্থকঃ ॥ ২৪ ॥
গুরুর্জ্ঞানপ্রদো নিত্যং পরমাঽঽনন্দসাগরে ।
উন্মজ্জয়তি জীবান্স তােংস্তথৈব নিমজ্জয়ন্ ॥ ২৫ ॥
গুরুস্ত্রিতাপতপ্তানাং জীবানাং রক্ষিতা ক্ষিতৌ ।
সচ্চিদানন্দরূপং হি গুরুর্ব্রহ্ম ন সংশয়ঃ ॥ ২৬ ॥
যাদৃগস্তীহ সম্বন্ধো ব্রহ্মাণ্ডস্যেশ্বরেণ বৈ ।
তথা ক্রিয়াঽঽখ্যযোগস্য সম্বন্ধো গুরুণা সহ ॥ ২৭ ॥
দীক্ষাবিধাবীশ্বরো বৈ কারণস্থলমুচ্যতে ।
গুরুঃ কার্যস্থলঞ্চাঽতো গুরুর্ব্রহ্ম প্রগীয়তে ॥ ২৮ ॥
গুরৌ মানুপবুদ্ধিং তু মন্ত্রে চাঽক্ষরভাবনাম্ ।
প্রতিমাসু শিলাবুদ্ধিং কুর্বাণো নরকং ব্রজেৎ ॥ ২৯ ॥
জন্মহেতূ হি পিতরৌ পূজনীয়ৌ প্রয়ত্নতঃ ।
গুরুর্বিশেষতঃ পূজ্যো ধর্মাঽধর্মপ্রদর্শকঃ ॥ ৩০ ॥
গুরুঃ পিতা গুরুর্মাতা গুরুর্দেবো গুরুর্গতিঃ ।
শিবে রুষ্টে গুরুস্ত্রাতা গুরৌ রুষ্টে ন কশ্চন ॥ ৩১ ॥
শ্রীমহাদেব্যুবাচ ।
জগন্মঙ্গলকৃন্নাথ বিশেষেণোপদিশ্যতাম্ ।
লক্ষণং সদ্গুরোর্যেন সম্যগ্জ্ঞাতং ভবেদ্ধ্রুবম্ ॥ ৩২ ॥
আচার্যগুরুভেদোঽপি যেন স্যাদ্বিদিতো মম ।
শ্রেষ্ঠৎবং বা তয়োঃ কেন লক্ষণেনাঽনুমীয়তে ॥ ৩৩ ॥
শ্রীমহাদেব উবাচ ।
সর্বশাস্ত্রপরো দক্ষঃ সর্বশাত্রার্থবিৎসদা ।
সুবচাঃ সুন্দরঃ স্বঙ্গঃ কুলীনঃ শুভদর্শনঃ ॥ ৩৪ ॥
জিতেন্দ্রিয়ঃ সত্যবাদী ব্রাহ্মণঃ শান্তমানসঃ ।
মাতৃপিতৃহিতে যুক্তঃ সর্বকর্মপরায়ণঃ ॥ ৩৫ ॥
আশ্রমী দেশবাসী চ গুরুরেবং বিধীয়তে ।
আচার্যগুরুশব্দৌ দ্বৌ ক্বচিৎপর্যায়বাচকৌ ॥ ৩৬ ॥
এবমর্থগতো ভেদো ভবত্যপি তয়োঃ ক্বচিৎ ।
উপনীয় দদদ্বেদমাচার্যঃ স উদাহৃতঃ ॥ ৩৭ ॥
যঃ সাধনপ্রকর্ষার্থং দীক্ষয়েৎস গুরুঃ স্মৃতঃ ।
ঔপপত্তিকমংশন্তু ধর্মশাস্ত্রস্য পণ্ডিতঃ ॥ ৩৮ ॥
ব্যাচষ্টে ধর্মমিচ্ছূনাং স আচার্যঃ প্রকীর্তিতঃ ।
সর্বদর্শী তু যঃ সাধুর্মুমুক্ষূণাং হিতায় বৈ ॥ ৩৯ ॥
ব্যাখ্যায় ধর্মশাস্ত্রাণাং ক্রিয়াসিদ্ধিপ্রবোধকম্ ।
উঅপাসনাবিধেঃ সম্যগীশ্বরস্য পরাত্মনঃ ॥ ৪০ ॥
ভেদান্প্রশাস্তি ধর্মজ্ঞঃ স গুরুঃ সমুদাহৃতঃ ।
সপ্তানাং জ্ঞানভূমীনাং শাস্ত্রোক্তানাং বিশেষতঃ ॥ ৪১ ॥
প্রভেদান্ যো বিজানাতি নিগমস্যাঽঽগমস্য চ্ অ ।
জ্ঞানস্য চাঽধিকারােংস্ত্রীন্ভবতাৎপর্যলক্ষ্যতঃ ॥ ৪২ ॥
তন্ত্রেষু চ পুরাণেষু ভাষায়াস্ত্রিবিধাং সৃতিম্ ।
সম্যগ্ভেদৈর্বিজানাতি ভাষাতত্ত্ববিশারদঃ ॥ ৪৩ ॥
নিপুণো লোকশিক্ষায়াং শ্রেষ্ঠাঽঽচার্যঃ স উচ্যতে ।
পঞ্চতত্ত্ববিভেদজ্ঞঃ পঞ্চভেদাং বিশেষতঃ ॥ ৪৪ ॥
সগুণোপাসনাং যস্তু সম্যগ্জানাতি কোবিদঃ ।
চাতুর্বিধ্যেন বিততাং ব্রহ্মণঃ সমুপাসনাম্ ॥ ৪৫ ॥
গম্ভীরার্থাং বিজানীতে বুধো নির্মলমানসঃ ।
সর্বকার্যেষু নিপুণো জীবন্মুক্তস্ত্রিতাপহৃৎ ॥ ৪৬ ॥
করোতি জীবকল্যাণং গুরুঃ শ্রেষ্ঠঃ স কথ্যতে ॥ ৪৭ ॥
শ্রীমহাদেব্যুবাচ ।
সচ্ছিষ্যলক্ষণং নাথ উক্ষূণাং ত্রিতাপহৃৎ ।
গুরুভক্তস্য শিষ্যস্য কর্তব্যঞ্চাঽপি মে বদ ॥ ৪৮ ॥
মুমুক্ষুভিশ্চ শিষ্যৈঃ কৈঃ শুভাঽঽচারৈরবাপ্যতে ।
আত্মজ্ঞানং দয়াসিন্ধো কৃপয়া ব্রূহি তানপি ॥ ৪৯ ॥
যেন জ্ঞানেন লব্ধেন শুভাঽঽচারান্বিতৈর্দ্রুতম্ ।
মুচ্যতে বন্ধনান্নাথ শিষ্যৈঃ সদ্গুরুসেবকৈঃ ॥ ৫০ ॥
শ্রীমহাদেব উবাচ ।
শিষ্যঃ কুলীনঃ শুদ্ধাঽঽত্মা পুরুষার্থপরায়ণঃ ।
অধীতবেদঃ কুশলো দূরমুক্তমনোভবঃ ॥ ৫১ ॥
হিতৈষী প্রাণিনাং নিত্যমাস্তিকস্ত্যক্তবঞ্চনঃ ।
স্বধর্মনিরতো ভক্ত্যা পিতৃমাতৃহিতে স্থিতঃ ॥ ৫২ ॥
গুরুশুশ্রূষণরতো বাঙ্মনঃকায়কর্মভিঃ ।
শিষ্যস্তু স গুণৈর্যুক্তো গুরুভক্তিরতঃ সদা ॥ ৫৩ ॥
ধর্মকামাদিসংয়ুক্তো গুরুমন্ত্রপরায়ণঃ ।
সত্যবুদ্ধির্গুরোমন্ত্রে দেবপূজনতৎপরঃ ॥ ৫৪ ॥
গুরূপদিষ্টমার্গে চ সত্যবুদ্ধিরুদারধীঃ ।
অলুব্ধঃ স্থিরগাত্রশ্চ আজ্ঞাকারী জিতেন্দ্রিয়ঃ ॥ ৫৫ ॥
এবংবিধো ভবেচ্ছিষ্য ইতরো দুঃখকৃদ্গুরোঃ ।
শরীরমর্থং প্রাণােংশ্চ গুরুভ্যো যঃ সমর্পয়ন্ ॥ ৫৬ ॥
গুরুভিঃ শিষ্যতে যোগং স শিষ্য ইতি কথ্যতে ।
দীর্ঘদণ্ডবদানম্য সুমনা গুরুসন্নিধৌ ॥ ৫৭ ॥
আত্মদারাঽঽদিকং সর্বং গুরবে চ নিবেদয়েৎ ।
আসনং শয়নং বস্ত্রং বাহনং ভূষণাঽঽদিকম্ ॥ ৫৮ ॥
সাধকেন প্রদাতব্যং গুরোঃ সন্তোষকারণাৎ ।
গুরুপাদোদকং পেয়ং গুরোরুচ্ছিষ্টভোজনম্ ॥ ৫৯ ॥
গুরুমূর্তেঃ সদা ধ্যানং গুরুস্তোত্রং সদা জপেৎ ।
ঊর্ধ্বং তিষ্ঠেদ্গুরোরগ্রে লব্ধাঽনুজ্ঞো বসেৎ পৃথক্ ॥ ৬০ ॥
নিবীতবাসা বিনয়ী প্রহ্বস্তিষ্ঠেদ্গুরৌ পরম্ ।
গুরৌ তিষ্ঠতি তিষ্ঠেচ্চোপবিষ্টেঽনুজ্ঞয়া বসেৎ ॥ ৬১ ॥
সেবতাঽঙ্ঘ্রী শয়ানস্য গচ্ছন্তঞ্চাঽপ্যনুব্রজেৎ ।
শরীরং চৈব বাচং চ বুদ্ধীন্দ্রিয়মনাংসি চ ॥ ৬২ ॥
নিয়ম্য প্রাঞ্জলিস্তিষ্ঠেদ্বীক্ষমাণো গুরোর্মুখম্ ।
নিত্যমুদ্রিতপাণিঃ স্যাৎ সাধ্বাচারঃ সুসংয়তঃ ॥ ৬৩ ॥
আস্যতামিতি চোক্তঃ সন্নাসীতাঽভিমুখং গুরোঃ ।
হীনান্নবস্ত্রবেশঃ স্যাৎ সর্বদা গুরুসন্নিধৌ ॥ ৬৪ ॥
উত্তিষ্ঠেৎ প্রথমং চাঽস্য চরমং চৈব সংবিশেৎ ।
দুষ্কৃতং ন গুরোর্ব্রূয়াৎ ক্রুদ্ধং চৈনং প্রসাদয়েৎ ॥ ৬৫ ॥
পরিবাদং ন শ্রুণুয়াদন্যেষামপি কুর্বতাম্ ।
নীচং শয়্যাসনং চাঽস্য সর্বদা গুরুসন্নিধৌ ॥ ৬৬ ॥
গুরোস্তু চক্ষুর্বিষয়ে ন যথেষ্টাঽঽসনো ভবেৎ ।
চাপল্যং প্রমদাগাথামহঙ্কারং চ বর্জয়েৎ ॥ ৬৭ ॥
নাঽপৃষ্টো বচনং কিংচিদ্ব্রূয়ান্নাঽপি নিষেধয়েৎ ।
গুরুমূর্তিং স্মরেন্নিত্যং গুরুনাম সদা জপেৎ ॥ ৬৮ ॥
গুরোরাজ্ঞাং প্রকুর্বীত গুরোরন্যং ন ভাবয়েৎ ।
গুরুরূপে স্থিতং ব্রহ্ম প্রাপ্যতে তৎপ্রসাদতঃ ॥ ৬৯ ॥
জাত্যাশ্রময়শোবিদ্যাবিত্তগর্বং পরিত্যজন্ ।
গুরোরাজ্ঞাং প্রকুর্বীত গুরোরন্যং ন ভাবয়েৎ ॥ ৭০ ॥
গুরুবক্ত্রে স্থিতা বিদ্যা গুরুভক্ত্যাঽনুলভ্যতে ।
তস্মাৎ সর্বপ্রয়ত্নেন গুরোরারাধনং কুরু ॥ ৭১ ॥
নোদাহরেদস্য নাম পরোক্ষমপি কেবলম্ ।
ন চ বাঽস্যাঽনুকুর্বীত গতিভাষিতচেষ্টিতম্ ॥ ৭২ ॥
গুরোর্যত্র পরীবাদো নিন্দা বাঽপি প্রবর্ততে ।
কর্ণৌ তত্র পিধাতব্যৌ গন্তব্যং বা ততোঽন্যতঃ ॥ ৭৩ ॥
পরীবাদাৎ খরো ভবেৎ শ্বা বৈ ভবতি নিন্দকঃ ।
পরিভোক্তা ভবেৎকৃমিঃ কীটো ভবতি মৎসরী ॥ ৭৪ ॥
গুরোঃ শয়্যাঽসনং যানং পাদুকোপানৌৎপীঠকম্ ।
স্নানোদকং তথা ছায়াং কদাপি ন বিলঙ্ঘয়েৎ ॥ ৭৫ ॥
গুরোরগ্রে পৃথক্ পূজামৌদ্ধত্যং চ বিবর্জয়েৎ ।
দীক্ষাং ব্যাখ্যাং প্রভুৎবং চ গুরোরগ্রে পরিত্যজেৎ ॥ ৭৬ ॥
ঋণদানং তথাঽঽদানং বস্তূনাং ক্রয়বিক্রয়ম্ ।
ন কুর্যাদ্গুরুণা সার্দ্ধে শিষ্যো ভৃৎবা কদাচন ॥ ৭৮ ॥
ন প্রেরয়েদ্গুরুং তাতং শিষ্যঃ পুত্রশ্চ কর্মসু ।
গুরবে দেবি পিত্রে চ নিত্যং সর্বস্বমর্পয়েৎ ॥ ৭৯ ॥
স চ শিষ্যঃ স চ জ্ঞানী য আজ্ঞাং পালয়েদ্গুরোঃ ।
ন ক্ষেমং তস্য মূঢস্য যো গুরোরবচস্করঃ ॥ ৮০ ॥
গুরোর্হিতং প্রকর্তব্যং বাঙ্মনঃকায়কর্মভিঃ ।
অহিতাঽঽচরণাদ্দেবি বিষ্ঠায়াং জায়তে কৃমিঃ ॥ ৮১ ॥
যথা খনন্ খনিত্রেণ নরো বার্য্যধিগচ্ছতি ।
তথা গুরুগতাং বিদ্যাং শুশ্রূষুরধিগচ্ছতি ॥ ৮২ ॥
আসমাপ্তেঃ শরীরস্য যস্তু শুশ্রূষতে গুরুম্ ।
স গচ্ছত্যঞ্জসা বিপ্রো ব্রহ্মণঃ সদ্ম শাশ্বতম্ ॥ ৮৩ ॥
শ্রীমহাদেব্যুবাচ ।
হে বিশ্বাত্মন্ মহায়োগিন্ দীনবন্ধো জগদ্গুরো ।
ত্রিতাপাদ্রক্ষিতুং জীবান্নেতুং মুক্তেঃ পদং তথা ॥ ৮৪ ॥
যোগমার্গপ্রচারোঽত্র গুরুভির্যঃ প্রকাশিতঃ ।
তল্লক্ষণানি ভেদােংশ্চ কৃপয়া বদ মে প্রভো ॥ ৮৫ ॥
শ্রীমহাদেব উবাচ ।
মন্ত্রয়োগো লয়শ্চৈব রাজয়োগো হঠস্তথা ।
যোগশ্চতুর্বিধঃ প্রোক্তো যোগিভিস্তত্ত্বদর্শিভিঃ ॥ ৮৬ ॥
নামরূপাত্মিকা সৃষ্টির্যস্মাত্তদবলম্বনাৎ ।
বন্ধনান্মুচ্যমানোঽয়ং মুক্তিমাপ্নোতি সাধকঃ ॥ ৮৭ ॥
তামেব ভূমিমালম্ব্য স্খলনং যত্র জায়তে ।
উত্তিষ্ঠতি জনস্সর্বোঽধ্যক্ষেণৈতৎসমীক্ষ্যতে ॥ ৮৮ ॥
নামরূপাত্মকৈর্ভাবৈর্বধ্যন্তে নিখিলা জনাঃ ।
অবিদ্যাকলিতাশ্চৈব তাদৃক্প্রকৃতিবৈভবাৎ ॥ ৮৯ ॥
আত্মনস্সূক্ষ্মপ্রকৃতিং প্রবৃত্তিঞ্চাঽনুসৃত্য বৈ ।
নামরূপাত্মনোশ্শব্দভাবয়োরবলম্বনাৎ ॥ ৯০ ॥
যো যোগঃ সাধ্যতে সোঽয়ং মন্ত্রয়োগঃ প্রকীর্তিতঃ ।
প্রাণাঽপাননাদবিন্দুজীবাত্মপরমাত্মনাম্ ॥ ৯১ ॥
মেলনাদ্ঘটতে যস্মাত্তস্মাদ্বৈ ঘট উচ্যতে ।
আমকুম্ভমিবাঽম্ভস্থং জীর্যমাণং সদা ঘটম্ ॥ ৯২ ॥
যোগানলেন সন্দহ্য ঘটশুদ্ধিং সমাচরেৎ ।
ঘটয়োগসমায়োগাদ্ধঠয়োগঃ প্রকীর্তিতঃ ॥ ৯৩ ॥
মন্ত্রাদ্ধঠেন সম্পাদ্যো যোগোঽয়মিতি বা প্রিয়ে ।
হঠয়োগ ইতি প্রোক্তো হঠাজ্জীবশুভপ্রদঃ ॥ ৯৪ ॥
হঠয়োগেন প্রথমং জীর্যমাণামিমাং তনুম্ ।
দ্রঢ্যন্সূক্ষ্মদেহং বৈ কুর্যাদ্যোগয়ুজং পুনঃ ॥ ৯৫ ॥
স্থূলঃ সূক্ষ্মস্য দেহো বৈ পরিণামান্তরং যতঃ ।
কাদিবর্ণান্সমভ্যস্য শাস্ত্রজ্ঞানং যথাক্রমম্ ॥ ৯৬ ॥
যথোপলভ্যতে তদ্বৎস্থূলদেহস্য সাধনৈঃ ।
যোগেন মনসো যোগো হঠয়োগঃ প্রকীর্তিতঃ ॥ ৯৭ ॥
ব্রহ্মাণ্ডপিণ্ডে সদৃশে ব্রহ্মপ্রকৃতিসম্ভবাৎ ।
সমষ্টিব্যষ্টিসম্বন্ধাদেকসম্বন্ধগুম্ফিতে ॥ ৯৮ ॥
ঋষিদেবাশ্চ পিতরো নিত্যং প্রকৃতিপূরুষৌ ।
তিষ্ঠন্তি পিণ্ডে ব্রহ্মাণ্ডে গ্রহনক্ষত্ররাশয়ঃ ॥ ৯৯ ॥
পিণ্ডজ্ঞানেন ব্রহ্মাণ্ডজ্ঞানং ভবতি নিশ্চিতম্ ।
গুরূপদেশতঃ পিণ্ডজ্ঞানমাপ্ত্বা যথায়থম্ ॥ ১০০ ॥
ততো নিপুণয়া যুক্ত্যা পুরুষে প্রকৃতের্লয়ঃ ।
লয়যোগাঽভিধেয়ঃ স্যাৎ কৃতঃ শুদ্ধৈর্মহর্ষিভিঃ ॥ ১০১ ॥
ভবন্তি মন্ত্রয়োগস্য ষোডশাঙ্গানি নিশ্চিতম্ ।
যথা সুধাংশোর্জায়ন্তে কলাঃ ষোডশ শোভনাঃ ॥ ১০২ ॥
ভক্তিঃ শুদ্ধিশ্চাঽঽসনঞ্চ পঞ্চাঙ্গস্যাঽপি সেবনম্ ।
আচারধারণে দিব্যদেশসেবনমিত্যপি ॥ ১০৩ ॥
প্রাণক্রিয়া তথা মুদ্রা তর্পণং হবনং বলিঃ ।
যাগো জপস্তথা ধ্যানং সমাধিশ্চেতি ষোডশ ॥ ১০৪ ॥
ষট্কর্মাঽঽসনমুদ্রাঃ প্রত্যাহারঃ প্রাণসংয়মশ্চৈব ।
ধ্যানসমাধী সপ্তৈবাঙ্গানি স্যুর্হঠস্য যোগস্য ॥ ১০৫ ॥
অঙ্গানি লয়যোগস্য নবৈবেতি বুধা বিদুঃ ।
যমশ্চ নিয়মশ্চৈব স্থূলসূক্ষ্মক্রিয়ে তথা ॥ ১০৬ ॥
প্রত্যাহারো ধারণা চ ধ্যানঞ্চাপি লয়ক্রিয়া ।
সমাধিশ্চ নবাঙ্গানি লয়যোগস্য নিশ্চিতম্ ॥ ১০৭ ॥
ধ্যানং বৈ মন্ত্রয়োগস্যাঽধ্যাত্মভাবাদ্বিনির্গতম্ ।
পরানন্দময়ে ভাবেঽতীন্দ্রিয়ে চ বিলক্ষণে ॥ ১০৮ ॥
ভ্রমদ্ভিঃ সাধকশ্রেয়োবাঞ্ছদ্ভির্যোগবিত্তমৈঃ ।
উপাসনাং পঞ্চবিধাং জ্ঞাৎবা সাধকয়োগ্যতাম্ ॥ ১০৯ ॥
মন্ত্রধ্যানং হি কথিতমধ্যাত্মস্যাঽনুসারতঃ ।
বেদতন্ত্রপুরাণেষু মন্ত্রশাস্ত্রপ্রবর্তকৈঃ ॥ ১১০ ॥
বর্ণিতং শ্রেয়ৈচ্ছদ্ভির্মন্ত্রয়োগপরস্য বৈ ।
ধ্যানানাং বৈ বহুৎবেঽপি তৎপ্রোক্তং পঞ্চধৈব হি ॥ ১১১ ॥
তেষাং ভাবময়ৎবেন সমাধিরধিগম্যতে ।
মন্ত্রয়োগো হঠশ্চৈব লয়যোগঃ পৃথক্ পৃথক্ ॥ ১১২ ॥
স্থূলং জ্যোতিস্তথা বিন্দু ধ্যানং তু ত্রিবিধং বিদুঃ ।
স্থূলং মূর্তিময়ং প্রোক্তং জ্যোতিস্তেজোময়ং ভবেৎ ॥ ১১৩ ॥
বিন্দুং বিন্দুময়ং ব্রহ্ম কুণ্ডলী পরদেবতা ।
সৃষ্টিস্থিতিবিনাশানাং হেতুতা মনসি স্থিতা ॥ ১১৪ ॥
তৎসাহায়্যাৎসাধ্যতে যো রাজয়োগ ইতি স্মৃতঃ ।
মন্ত্রে হঠে লয়ে চৈব সিদ্ধিমাসাদ্য যত্নতঃ ॥ ১১৫ ॥
পূর্ণাঽধিকারমাপ্নোতি রাজয়োগপরো নরঃ ।
সমাধির্মন্ত্রয়োগস্য মহাভাব ইতীরিতঃ ॥ ১১৬ ॥
হঠস্য চ মহাবোধঃ সমাধিস্তেন সিধ্যতি ।
প্রশস্তো লয়যোগস্য সমাধির্হি মহালয়ঃ ॥ ১১৭ ॥
বিচারবুদ্ধেঃ প্রাধান্যং রাজয়োগস্য সাধনে ।
ব্রহ্মধ্যানং হি তদ্ধ্যানং সমাধির্নির্বিকল্পকঃ ॥ ১১৮ ॥
তেনোপলব্ধসিদ্ধির্হি জীবন্মুক্তঃ প্রকথ্যতে ।
উপলব্ধ মহাভাবা মহাবোধাঽন্বিতাশ্চ বা ॥ ১১৯ ॥
মহালয়ং প্রপন্নাশ্চ তত্ত্বজ্ঞানাঽবলম্বতঃ ।
যোগিনো রাজয়োগস্য ভূমিমাসাদয়ন্তি তে ॥ ১২০ ॥
যোগসাধনমূর্দ্ধর্ন্যো রাজয়োগোঽভিধীয়তে ॥ ১২১ ॥
শ্রীমহাদেব্যুবাচ ।
যোগেশ জগদাধার কতিধোপাসনা চ কে ।
তদ্বিধের্ভগবন্ ভেদা মুক্তিমার্গপ্রদর্শিনঃ ॥ ১২২ ॥
তস্যা কে দিব্যদেশাশ্চ দিব্যভাবেন ভাস্বরাঃ ।
তৎসর্বং কৃপয়া নাথ বদস্ব বদতাং বর ॥ ১২৩ ॥
শ্রীমহাদেব উবাচ ।
সগুণো নির্গুণশ্চাঽপি দ্বিবিধো ভেদ ঈর্যতে ।
উপাসনাবিধের্দেবি সগুণোঽপি দ্বিধা মতঃ ॥ ১২৪ ॥
সকামোপাসনায়াশ্চ ভেদা যদ্যপি নৈকশঃ ।
পরন্ত্বনন্যভক্তানাং জনানাং মুক্তিমিচ্ছতাম্ ॥ ১২৫ ॥
ভেদত্রিতয়মেবৈতদ্রহস্যং দেবি গোপিতম্ ।
বক্ষ্যে গুপ্তরহস্যং তদ্ভবতীং ভাগ্যশালিনীম্ ॥ ১২৬ ॥
সমাহিতেন শান্তেন স্বান্তেনৈবাঽবধার্যতাম্ ।
পঞ্চানামপি দেবানাং ব্রহ্মণো নির্গুণস্য চ ॥ ১২৭ ॥
লীলাবিগ্রহরূপাণাঞ্চেত্যুপাস্তিস্ত্রিধা মতা ।
বিষ্ণুঃ সূর্যশ্চ শক্তিশ্চ গণাধীশশ্চ শঙ্করঃ ॥ ১২৮ ॥
পঞ্চোপাস্যাঃ সদা দেবি সগুণোপাসনাবিধৌ ।
এতে পঞ্চ মহেশানি সগুণো ভেদ ঈরিতঃ ॥ ১২৯ ॥
সচ্চিদানন্দরূপস্য ব্রহ্মণো নাঽত্র সংশয়ঃ ।
নির্গুণোঽপি নিরাকারো ব্যাপকঃ স পরাৎপরঃ ॥ ১৩০ ॥
সাধকানাং হি কল্যাণং বিধাতুং বসুধাতলে ।
বিভর্তি সগুণং রূপং ৎবৎসাহায়্যাৎপতিব্রতে ॥ ১৩১ ॥
যথা গবাং শরীরেষু ব্যাপ্তং দুগ্ধং রসাত্মকম্ ।
পরং পয়োধরাদেব কেবলং ক্ষরতে ধ্রুবম্ ॥ ১৩২ ॥
তথৈব সর্বব্যাপ্তোঽপি দেবো ব্যাপকভাবতঃ ।
দিব্যষোডশদেশেষু পূজ্যতে পরমেশ্বরঃ ॥ ১৩৩ ॥
বহ্ন্যম্বুলিঙ্গকুড্যানি স্থণ্ডিলং পটমণ্ডলে ।
বিশিখং নিত্যযন্ত্রঞ্চ ভাবয়ন্ত্রঞ্চ বিগ্রহঃ ॥ ১৩৪ ॥
পীঠশ্চাপি বিভূতিশ্চ হৃন্মূর্দ্ধাপি মহেশ্বরি ।
এতে ষোডশ দিব্যাশ্চ দেশাঃ প্রোক্তা ময়াঽনঘে ॥ ১৩৫ ॥
যদ্যচ্ছরীরমাশ্রিত্য ভগবান্সর্বশক্তিমান্ ।
বতীর্ণো বিবিধা লীলা বিধায় বসুধাতলে ॥ ১৩৬ ॥
জগৎপালয়তে দেবি লীলাবিগ্রহ এব সঃ ।
উপাসনাঽনুসারেণ বেদশাস্ত্রেষু ভূরিশঃ ॥ ১৩৭ ॥
লীলাবিগ্রহরূপাণামিতিহাসোঽপি লভ্যতে ।
তদুপাসনকঞ্চাঽপি সগুণং পরিকীর্তিতম্ ॥ ১৩৮ ॥
বিষ্ণোঃ সূর্যশ্চ শক্তেশ্চ গণেশস্য শিবস্য চ ।
গীতাসু গীতা যে শব্দা বিষ্ণুসূর্যাদয়ঃ প্রিয়ে ॥ ১৩৯ ॥
ব্রহ্মণশ্চাদ্বিতীয়স্য সাক্ষাত্তে চাপি বাচকঃ ।
ভক্তিস্তু ত্রিবিধা জ্ঞেয়া বৈধী রাগাত্মিকা পরা ॥ ১৪০ ॥
দেবে পরোঽনুরাগস্তু ভক্তিঃ সম্প্রোচ্যতে বুধৈঃ ।
বিধিনা যা বিনির্ণীতা নিষেধেন তথা পুনঃ ॥ ১৪১ ॥
সাধ্যমানা চ যা ধীরৈঃ সা বৈধী ভক্তিরুচ্যতে ।
যয়াঽঽস্বাদ্য রসান্ভক্তের্ভাবে মজ্জতি সাধকঃ ॥ ১৪২ ॥
রাগাত্মিকা সা কথিতা ভক্তিয়োগবিশারদৈঃ ।
পরাঽঽনন্দপ্রদা ভক্তিঃ পরাভক্তির্মতা বুধৈঃ ॥ ১৪৩ ॥
যা প্রাপ্যতে সমাধিস্থৈর্যোগিভির্যোগপারগৈঃ ।
ত্রৈগুণ্যভেদাস্ত্রিবিধা ভক্তা বৈ পরিকীর্তিতাঃ ॥ ১৪৪ ॥
আর্তো জিজ্ঞাসুরর্থার্থী তথা ত্রিগুণতঃ পরঃ ।
পরাভক্ত্যধিকারী যো জ্ঞানিভক্তঃ স তুর্যকঃ ॥ ১৪৫ ॥
উপাসকাঃ স্যুস্ত্রিবিধাস্ত্রিগুণস্যাঽনুসারতঃ ।
ব্রহ্মোপাসক এবাঽত্র শ্রেষ্ঠঃ প্রোক্তো মনীষিভিঃ ॥ ১৪৬ ॥
প্রথমা সগুণোপাস্তিরবতারাঽর্চনাশ্চ যাঃ ।
বিহিতা ব্রহ্মবুদ্ধ্যা চেদত্রৈবাঽন্তর্ভবন্তি তাঃ ॥ ১৪৭ ॥
সকামবুদ্ধ্যা বিহিতং দেবর্ষিপিতৃপূজনম্ ।
মধ্যমং মধ্যমা জ্ঞেয়াস্তৎকর্তারস্তথা পুনঃ ॥ ১৪৮ ॥
অধমা বৈ সমাখ্যাতাঃ ক্ষুদ্রশক্তিসমর্চকাঃ ।
প্রেত্যাদ্যুপাসঙ্কাশ্চৈব বিজ্ঞেয়া হ্যধমাঽধমাঃ ॥ ১৪৯ ॥
সর্বোপাসনহীনাস্তু পশবঃ পরিকীর্তিতাঃ ।
ব্রহ্মোপাসনমেবাঽত্র মুখ্যং পরমমঙ্গলম্ ॥ ১৫০ ॥
নিঃশ্রেয়সকরং জ্ঞেয়ং সর্বশ্রেষ্ঠং শুভাবহম্ ॥ ১৫১ ॥
শ্রীমহাদেব্যুবাচ ।
যথা মে গুরুমাহাত্ম্যং সম্যগ্জ্ঞাতং ভবেৎপ্রভো ।
তথা বিস্তরতো নাথ তন্মাহাত্ম্যমুদাহর ॥ ১৫২ ॥
সদ্গুরোমহিমা দেব সম্যগ্জ্ঞাতঃ শ্রুতো ভুবি ।
অজ্ঞানতমসাঽঽচ্ছন্নং মনোমলমপোহতি ॥ ১৫৩ ॥
শ্রীমহাদেব উবাচ ।
গুরুর্ব্রহ্মা গুরুর্বিষ্ণুর্গুরুর্দেবো মহেশ্বরঃ ।
গুরুরেব পরং ব্রহ্ম তস্মৈ শ্রীগুরবে নমঃ ॥ ১৫৪ ॥
অখণ্ডমণ্ডলাকারং ব্যাপ্তং যেন চরাচরম্ ।
তৎপদং দর্শিতং যেন তস্মৈ শ্রীগুরবে নমঃ ॥ ১৫৫ ॥
অজ্ঞানতিমিরাঽন্ধস্য জ্ঞানাঞ্জনশলাকয়া ।
চক্ষুরুন্মীলিতং যেন তস্মৈ শ্রীগুরবে নমঃ ॥ ১৫৬ ॥
স্থাবরং জঙ্গমং ব্যাপ্তং যৎকিঞ্চিৎসচরাঽচরম্ ।
তৎপদং দর্শিতং যেন তস্মৈ শ্রীগুরবে নমঃ ॥ ১৫৭ ॥
চিন্ময়ং ব্যাপ্নুবন্সর্বং ত্রৈলোক্যং সচরাচরম্ ।
তৎপদং দর্শিতং যেন তস্মৈ শ্রীগুরবে নমঃ ॥ ১৫৮ ॥
সর্বশ্রুতিশিরোরত্নবিরাজিতপদাঽম্বুজঃ ।
বেদান্তাঽম্বুজসূর্যো যস্তস্মৈ শ্রীগুরবে নমঃ ॥ ১৫৯ ॥
চেতনঃ শাশ্বতঃ শান্তো ব্যোমাঽতীতো নিরঞ্জনঃ ।
বিন্দুনাদকলাতীতস্তস্মৈ শ্রীগুরবে নমঃ ॥ ১৬০ ॥
জ্ঞানশক্তিসমারূঢস্তত্ত্বমালাবিভূষিতঃ ।
ভুক্তিমুক্তিপ্রদাতা চ তস্মৈ শ্রীগুরবে নমঃ ॥ ১৬১ ॥
অনেকজন্মসম্প্রাপ্তকর্মবন্ধবিদাহিনে ।
আত্মজ্ঞানপ্রদানেন তস্মৈ শ্রীগুরবে নমঃ ॥ ১৬২ ॥
শোষণং ভবসিন্ধোশ্চ জ্ঞাপনং সারসম্পদঃ ।
গুরোঃ পাদোদকং সম্যক্ তস্মৈ শ্রীগুরবে নমঃ ॥ ১৬৩ ॥
ন গুরোরধিকং তত্ত্বং ন গুরোরধিকং তপঃ ।
তত্ত্বজ্ঞানাৎপরং নাঽস্তি তস্মৈ শ্রীগুরবে নমঃ ॥ ১৬৪ ॥
মন্নাথঃ শ্রীজগন্নাথো মদ্গুরুঃ শ্রীজগদ্গুরুঃ ।
মদাত্মা সর্বভূতাত্মা তস্মৈ শ্রীগুরবে নমঃ ॥ ১৬৫ ॥
গুরুরাদিরনাদিশ্চ গুরুঃ পরমদৈবতম্ ।
গুরোঃ পরতরং নাঽস্তি তস্মৈ শ্রীগুরবে নমঃ ॥ ১৬৬ ॥
ধ্যানমূলং গুরোর্মূর্তিঃ পূজামূলং গুরোঃ পদম্ ।
মন্ত্রমূলং গুরোর্বাক্যং মোক্ষমূলং গুরোঃ কৃপা ॥ ১৬৭ ॥
সপ্তসাগরপর্যন্ততীর্থস্নানাদিকৈঃ ফলম্ ।
গুরোরঙ্ঘ্রিপয়োবিন্দুসহস্রাংশেন দুর্লভম্ ॥ ১৬৮ ॥
গুরুরেব জগৎসর্বং ব্রহ্মবিষ্ণুশিবাত্মকম্ ।
গুরোঃ পরতরং নাঽস্তি তস্মাৎ সম্পূজয়েদ্গুরুম্ ॥ ১৬৯ ॥
জ্ঞানং বিনা মুক্তিপদং লভতে গুরুভক্তিতঃ ।
গুরোঃ পরতরং নাঽস্তি ধ্যেয়োঽসৌ গুরুমার্গিণা ॥ ১৭০ ॥
গুরোঃ কৃপাপ্রসাদেন ব্রহ্মবিষ্ণুসদাশিবাঃ ।
সৃষ্ট্যাদিকসমর্থাস্তে কেবলং গুরুসেবয়া ॥ ১৭১ ॥
দেবকিন্নরগন্ধর্বাঃ পিতরো যক্ষচারণাঃ ।
মুনয়োঽপি ন জানন্তি গুরুশুশ্রূষণাবিধিম্ ॥ ১৭২ ॥
ন মুক্তা দেবগন্ধর্বাঃ পিতরো যক্ষকিন্নরাঃ ।
ঋষয়ঃ সর্বসিদ্ধাশ্চ গুরুসেবাপরাঙ্মুখাঃ ॥ ১৭৩ ॥
শ্রুতিস্মৃতিমবিজ্ঞায় কেবলং গুরুসেবয়া ।
তে বৈ সংন্যাসিনঃ প্রোক্তা ইতরে বেষধারিণঃ ॥ ১৭৪ ॥
গুরোঃ কৃপাপ্রসাদেন আত্মারামো হি লভ্যতে ।
অনেন গুরুমার্গেণ আত্মজ্ঞানং প্রবর্ততে ॥ ১৭৫ ॥
সর্বপাপবিশুদ্ধাত্মা শ্রীগুরোঃ পাদসেবনাৎ ।
সর্বতীর্থাবগাহস্য ফলং প্রাপ্নোতি নিশ্চিতম্ ॥ ১৭৬ ॥
যজ্ঞব্রততপোদানজপতীর্থাঽনুসেবনম্ ।
গুরুতত্ত্বমবিজ্ঞায় নিষ্ফলং নাঽত্র সংশয়ঃ ॥ ১৭৭ ॥
মন্ত্ররাজমিদং দেবি গুরুরিত্যক্ষরদ্বয়ম্ ।
শ্রুতিবেদান্তবাক্যেন গুরুঃ সাক্ষাৎপরং পদম্ ॥ ১৭৮ ॥
গুরুর্দেবো গুরুর্ধর্মো গুরুনিষ্ঠা পরং তপঃ ।
গুরোঃ পরতরং নাস্তি নাস্তি তত্ত্বং গুরোঃ পরম্ ॥ ১৭৯ ॥
ধন্যা মাতা পিতা ধন্যো ধন্যো বংশঃ কুলং তথা ।
ধন্যা চ বসুধা দেবি গুরুভক্তিঃ সুদুর্লভা ॥ ১৮০ ॥
শরীরমিন্দ্রিয়প্রাণা অর্থস্বজনবান্ধবাঃ ।
মাতা পিতা কুলং দেবি গুরুরেব ন সংশয়ঃ ॥ ১৮১ ॥
আজন্মকোট্যাং দেবেশি জপব্রততপঃক্রিয়াঃ ।
এতৎসর্বং সমং দেবি গুরুসন্তোষমাত্রতঃ ॥ ১৮২ ॥
বিদ্যাধনমদেনৈব মন্দভাগ্যাশ্চ যে নরাঃ ।
গুরোঃ সেবাং ন কুর্বন্তি সত্যং সত্যং বদাম্যহম্ ॥ ১৮৩ ॥
গুরুসেবাপরং তীর্থমন্যত্তীর্থমনর্থকম্ ।
সর্বতীর্থাশ্রয়ং দেবি সদ্গুরোশ্চরণাম্বুজম্ ॥ ১৮৪ ॥
গুরুধ্যানং মহাপুণ্যং ভুক্তিমুক্তিপ্রদায়কম্ ।
বক্ষ্যামি তব দেবেশি শৃণুষ্ব কমলাননে ॥ ১৮৫ ॥
প্রাতঃ শিরসি শুক্লাব্জে দ্বিনেত্রং দ্বিভুজং গুরুম্ ।
বরাঽভয়করং শান্তং স্মরেত্তন্নামপূর্বকম্ ॥ ১৮৬ ॥
বামোরুশক্তিসহিতং কারুণ্যেনাঽবলোকিতম্ ।
প্রিয়যা সব্যহস্তেন ধৃতচারুকলেবরম্ ॥ ১৮৭ ॥
বামেনোৎপলধারিণ্যা রক্তাঽঽভরণভূষয়া ।
জ্ঞানাঽঽনন্দসমায়ুক্তং স্মরেত্তন্নামপূর্বকম্ ॥ ১৮৮ ॥
অখণ্ডমণ্ডলাঽঽকারং ব্যাপ্তং যেন চরাচরম্ ।
তৎপদং দর্শিতং যেন তস্মৈ শ্রীগুরবে নমঃ ॥ ১৮৯ ॥
নমোঽস্তু গুরবে তস্মৈ ইষ্টদেবস্বরূপিণে ।
যস্য বাক্যাঽমৃতং হন্তি বিষং সংসারসংজ্ঞিতম্ ॥ ১৯০ ॥
শ্রীমহাদেব্যুবাচ ।
মদেকহৃদয়াঽঽনন্দ জগদাত্মন্ মহেশ্বর ।
উপাস্যস্য রহস্যং মে মাহাত্ম্যঞ্চাপি সদ্গুরোঃ ॥ ১৯১ ॥
বর্ণিতং যত্ত্বয়া নাথ কৃতকৃত্যাঽস্মি সাম্প্রতম্ ।
ভূয়োঽপি শ্রোতুমিচ্ছামি ৎবন্মুখাজ্জগদীশ্বর ॥ ১৯২ ॥
পরতত্ত্বৈকরূপস্য তত্ত্বাঽতীতপরাঽঽত্মনঃ ।
সমাসেন স্বরূপং মে বর্ণয়িৎবা কৃপাং কুরু ॥ ১৯৩ ॥
শ্রীমহদেব উবাচ ।
স এক এব সদ্রূপঃ সত্যোঽদ্বৈতঃ পরাৎপরঃ ।
স্বপ্রকাশঃ সদা পূর্ণঃ সচ্চিদানন্দলক্ষণঃ ॥ ১৯৪ ॥
নির্বিকারো নিরাধারো নির্বিশেষো নিরাকুলঃ ।
গুণাতীতঃ সর্বসাক্ষী সর্বাত্মা সর্বদৃগ্বিভুঃ ॥ ১৯৫ ॥
গূঢঃ সর্বেষু ভূতেষু সর্বব্যাপী সনাতনঃ ।
সর্বেন্দ্রিয় গুণাভাসঃ সর্বেন্দ্রিয়বিবর্জিতঃ ॥ ১৯৬ ॥
লোকাঽতীতো লোকহেতুরবাঙ্মনসগোচরঃ ।
স বেত্তি বিশ্বং সর্বজ্ঞস্তং ন জানাতি কশ্চন ॥ ১৯৭ ॥
তদধীনং জগৎসর্বং ত্রৈলোক্যং সচরাঽচরম্ ।
তদালম্বনতস্তিষ্ঠেদবিতর্ক্যমিদং জগৎ ॥ ১৯৮ ॥
তৎসত্যতামুপাঽঽশ্রিত্য সদ্বদ্ভাতি পৃথক্ পৃথক্ ।
তেনৈব হেতুভূতেন বয়ং জাতা মহেশ্বরি ॥ ১৯৯ ॥
কারণং সর্বভূতানাং স একঃ পরমেশ্বরঃ ।
লোকেষু সৃষ্টিকরণাৎস্রষ্টা ব্রহ্মেতি গীয়তে ॥ ২০০ ॥
বিষ্ণুঃ পালয়িতা দেবি সংহর্তাঽহং তদিচ্ছয়া ।
ইন্দ্রাঽঽদয়ো লোকপালাঃ সর্বে তদ্বশবর্তিনঃ ॥ ২০১ ॥
স্বে স্বেঽধিকারে নিরতাস্তে শাসতি তদাজ্ঞয়া ।
ৎবং পুরা প্রকৃতিস্তস্য পূজ্যাঽসি ভুবনত্রয়ে ॥ ২০২ ॥
তেনাঽন্তর্যামিরূপেণ তত্তদ্বিপয়যোজিতাঃ ।
স্বস্বকর্ম প্রকুর্বন্তি ন স্বতন্ত্রাঃ কদাচন ॥ ২০৩ ॥
যদ্ভয়াদ্বাতি বাতোঽপি সূর্যস্তপতি যদ্ভয়াৎ ।
বর্ষন্তি তোয়দাঃ কালে পুষ্ষ্যন্তি তরবো বনে ॥ ২০৪ ॥
কালং কলয়তে কালে মৃত্যোর্মৃত্যুর্ভিয়ো ভয়ম্ ।
বেদান্তবেদ্যো ভগবান্যত্তচ্ছব্দোপলক্ষিতঃ ॥ ২০৫ ॥
সর্বে দেবাশ্চ দেব্যশ্চ তন্ময়াঃ সুরবন্দিতে ।
আব্রহ্মস্তম্বপর্যন্তং তন্ময়ং সকলং জগৎ ॥ ২০৬ ॥
তস্মিংস্তুষ্টে জগত্তুষ্টং প্রীণিতে প্রীণিতং জগৎ ।
তদারাধনতো দেবি সর্বেষাং প্রীণনং ভবেৎ ॥ ২০৭ ॥
তরোর্মূলাঽভিষীকেণ যথা তদ্ভুজপল্লবাঃ ।
তৃপ্যন্তি তদনুষ্ঠানাত্তথা সর্বেঽমরাদয়ঃ ॥ ২০৮ ॥
শ্রীমহাদেব্যুবাচ ।
সংসাররোগহৃন্নাথ করুণাবরুণাঽঽলয় ।
গুরোত্মাহাত্ম্যপূর্ণা যা গুরোর্গীতা সুবর্ণিতা ॥ ২০৯ ॥
তৎস্বাধ্যায়স্য মাহাত্ম্যং ফলঞ্চাঽপি বিনির্দিশ ।
জীবমঙ্গলমেতেন কৃপাতোঽতঃ কৃপাঽর্ণব ॥ ২১০ ॥
সম্যগ্বিবিচ্য সংবর্ণ্য বিনোদয় দয়ার্ণব ।
ৎবদৃতে কো হি দেবেশ শিক্ষাং মেঽন্যো বিধাস্যতি ॥ ২১১ ॥
শ্রীমহাদেব উবাচ ।
ইদং তু ভক্তিভাবেন পঠ্যতে শ্রূয়তেঽথবা ।
লিখিৎবা বা প্রদীয়েত সর্বকামফলপ্রদম্ ॥ ২১২ ॥
গুরুগীতাঽভিধং দেবি শুদ্ধং তত্ত্বং ময়োদিতম্ ।
ভবব্যাধিবিনাশার্থং স্বয়মেব সদা জপেৎ ॥ ২১৩ ॥
গুরুগীতাঽক্ষরৈকৈকং মন্ত্ররাজমিদং প্রিয়ে ।
অনেন বিবিধা মন্ত্রাঃ কলাং নার্হন্তি ষোডশীম্ ॥ ২১৪ ॥
সর্বপাপহরং স্তোত্রং সর্বদারিদ্র্যনাশনম্ ।
অকালমৃত্যুহরণং সর্বসঙ্কটনাশনম্ ॥ ২১৫ ॥
যক্ষরাক্ষসভূতানাং চৌরব্যাঘ্রভয়াঽপহম্ ।
মহাব্যাধি হরঞ্চৈব বিভূতিসিদ্ধিদং ধ্রুবম্ ॥ ২১৬ ॥
মোহনং সর্বভূতানাং পরং বন্ধনমোচনম্ ।
দেবভূতপ্রিয়করং লোকান্স্ববশমানয়েৎ ॥ ২১৭ ॥
মুখস্তম্ভকরং নৄণাং সদ্গুণানাং বিবর্ধনম্ ।
দুষ্কর্মনাশনঞ্চৈব সৎকর্মসিদ্ধিদং ভবেৎ ॥ ২১৮ ॥
ভক্তিদং সিদ্ধয়েৎ কার্যং নবগ্রহভয়াঽপহম্ ।
দুঃস্বপ্ননাশনঞ্চৈব সৎকর্মসিদ্ধিদং ভবেৎ ॥ ২১৯ ॥
সর্বশান্তিকরং নিত্যং বন্ধ্যাপুত্রফলপ্রদম্ ।
অবৈধব্যকরং স্ত্রীণাং সৌভাগ্যদায়কং পরম্ ॥ ২২০ ॥
আয়ুরারোগ্যমৈশ্বর্যপুত্রপৌত্রাদিবর্ধকম্ ।
নিষ্কামতস্ত্রিবারং বা জপন্মোক্ষমবাপ্নুয়াৎ ॥ ২২১ ॥
সর্বদুঃখভয়ং বিঘ্নং নাশয়েত্তাপহারকম্ ।
সর্ববাধাপ্রশমনং ধর্মাঽর্থকামমোক্ষদম্ ॥ ২২২ ॥
যো যং চিন্তয়তে কামং স তমাপ্নোতি নিশ্চিতম্ ।
কামিনাং কামধেনুশ্চ কল্পিতং চ সুরদ্রুমঃ ॥ ২২৩ ॥
চিন্তামণিং চিন্তিতস্য সর্বমঙ্গলকারকম্ ।
জপেচ্ছাক্তস্য শৈবশ্চ গাণপত্যশ্চ বৈষ্ণবঃ ॥ ২২৪ ॥
সৌরশ্চ সিদ্ধিদং দেবি ধর্মার্থকামমোক্ষদম্ ।
সংসারমলনাশাঽর্থং ভবতাপনিবৃত্তয়ে ॥ ২২৫ ॥
গুরুগীতাঽম্ভসি স্নানং তত্ত্বজ্ঞঃ কুরুতে সদা ।
যোগয়ুঞ্জানচিত্তানাং গীতেয়ং জ্ঞানবর্ধিকা ॥ ২২৬ ॥
ত্রিতাপতাপিতানাঞ্চ জীবানাং পরমৌষধম্ ।
সংসারাঽপারপাথোধৌ মজ্জতাং তরণিঃ শুভা ॥ ২২৭ ॥
দেশঃ শুদ্ধঃ স যত্রাঽসৌ গীতা তিষ্ঠতি দুর্লভা ।
তত্র দেবগণাঃ সর্বে ক্ষেত্রপীঠে বসন্তি হি ॥ ২২৮ ॥
শুচিরেব সদা জ্ঞানী গুরুগীতাজপেন তু ।
তস্য দর্শনমাত্রেণ পুনর্জন্ম ন বিদ্যতে ॥ ২২৯ ॥
সত্যং সত্যং পুনঃ সত্যং নিজধর্মো ময়োদিতঃ ।
গুরুগীতাসমো নাঽস্তি সত্যং সত্যং বরাননে ॥ ২৩০ ॥
ইতি শ্রীগুরুগীতা সমাপ্তা ।
Also Read:
Sri Guru Gita Lyrics in Hindi | English | Bengali | Gujarati | Kannada | Malayalam | Oriya | Telugu | Tamil
