Suratakathamritam Athava Arya Ashatakam in Bengali:
সুরতকথামৃতং অথবা আর্যশতকম্
মূলগ্রন্থস্য কেন্দ্রীয়শ্লোকঃ-
কদাহং সেবিষ্যে ব্রততিচমরীচামরমরু-
দ্বিনোদেন ক্রীডা কুসুমশয়নে ন্যস্তবপুষৌ ।
দরোন্মীলন্নেত্রৌ শ্রমজলকণক্লিদ্যদলকৌ
ব্রুবাণাবন্যোন্যং ব্রজনবয়ুবানাবিহ য়ুবাম্ ॥
উত্কলিকাবল্লরী ৫২
শ্রীকৃষ্ণ উবাচ-
চিত্রমিদং নহি য়দহো বিতরস্যধরসুধাং নিকামং মে ।
অতি কৃপণোঽপি কদাচিদ্বদান্যতমতাং জনঃ প্রিয়ে ধত্তে ॥ ১ ॥
লয়মপি ন য়াতি দানে প্রত্যুত ঋদ্ধিং রসাধিকাং লভতে ।
অধরসুধোত্তমবিদ্যাং বিবুধবরায়াদ্য মে দেহি ॥ ২ ॥
স্বান্তে বিভ্রতি ভবতীং স্বান্তে বাসিন্যতিস্নিগ্ধে ।
ময়ি কিমপূর্বাং নাদাস্ত্বমিমাং চ য়স্মাদ্বিদুষ্যহো তত্র ॥ ৩ ॥
শ্রীরাধাহ-
কুলরমণীততিলজ্জানির্মূলনতন্ত্রকৌশলোদ্গারৈঃ ।
প্রথয়সি কিমু নিজগর্বং জ্ঞাতং পাণ্ডিত্যমস্তি তে তত্র ॥ ৪ ॥
দৈবাদ্বিপক্ষতামপি ময়ি য়ান্ত্যা বত মমৈব সহচর্যা ।
ন্যস্তাহং তব হস্তে কথমত্র গর্বো ভবেন্ ন তে ॥ ৫ ॥
অয়মপি পরমো ধর্মঃ শ্লাঘা মহতী তবেয়মেবেষ্টা ।
য়ৌবনফলমপি চেদং কুলাবলাপীডনং য়দহো ॥ ৬ ॥
শ্রীকৃষ্ণ আহ-
স্মরনরপতিবররাজ্যে ধর্মঃ শর্মপ্রদোঽয়মাদিষ্টঃ ।
বত্স্যায়নমুনিনির্মিতপদ্ধত্যুক্তানুসারেণ হি ॥ ৭ ॥
অপি চ-
অত্র প্রমাণমিষ্টং চেন্মদুক্তেঽপি ন মন্যতে কিঞ্চিত্ ।
ভরতমুনেঃ কিল শাস্ত্রং শাস্ত্রান্তরমত্র কো গণয়েত্ ॥ ৮ ॥
বিদ্যুতি বিদ্যুতিদায়ী শ্লাঘাং মনুতে পয়োধরঃ স্বীয়াম্ ।
বিদ্যুদপি স্বাং সুষমাং পয়োধরে শ্লাঘয়ত্যধিকাম্ ॥ ৯ ॥
শ্রীরাধাহ-
গোবর্ধনগিরিকন্দরবাসী হরিরসীতি শ্রুতং কতিধা ।
কুলবালাহরিণীততিরথাপি গচ্ছত্যতো ন তে দোষঃ ॥ ১০ ॥
কিং কুর্মঃ স্বাচরিতো ধর্মস্ত্যক্তুং কথং পুনঃ শক্যঃ ।
দিনকরপূজনবিধিরিহ কুসুমাবচয়ে প্রবর্ত্যতে ॥ ১১ ॥
শ্রীকৃষ্ণ আহ-
বৃন্দারণ্যপুরন্দরমপি মাং ন গিরাপি কর্হিচিন্মনুষে ।
সূর্যারাধনগর্বস্তদয়ং রাধে ন তে ভবেত্খর্বঃ ॥ ১২ ॥
গোবর্ধনগিরিধারণকারণমোজো ন তেঽধিকং মনুতে ।
তব সবয়স্ততিরপি স তবৈককুচশৈলগর্বেণ ॥ ১৩ ॥
শ্রীরাধাহ-
ন কিল কুচৌ মম শৈলৌ পশ্যাম্বুজকোরকৌ নবোত্পন্নৌ ।
ন তয়োর্দলনং মরকতশিলানিভেনোরসাঽদ্য তে য়োগ্যম্ ॥ ১৪ ॥
কৌস্তুভমণিরতিতরলঃ সরলমতিঃ পুনরহং কুল প্রমদা ।
তদলমনেন ধিনোতু ত্বাং নিজসদৃশং ভৃশং হৃদিস্থস্তে ॥ ১৫ ॥
শ্রীকৃষ্ণ আহ-
সত্যময়ং ভয়তরলঃ কণ্ঠতটান্তং মম প্রিয়ে শ্রয়তে ।
দয়তে তব কুচদ্বয়মধিকং সম্মর্দয়ত্যহো সদ্যঃ ॥ ১৬ ॥
শ্রীরাধাহ-
তব খরনখরবিদারণসহনং কুচয়োরিয়ং বরা শক্তিঃ ।
কিমত্র সম্ভবতি স্ফুটমনয়োঃ স্ববলপ্রকাশনাটোপঃ ॥ ১৭ ॥
শ্রীকৃষ্ণ আহ-
মম খরনখরমহাঙ্কুশঘাতাদপি শতগুণং বলং লব্ধ্বা ।
কোলাদিব কুচ কুম্ভৌ মমার্দয়তো ভৃশং প্রিয়ে পশ্য ॥ ১৮ ॥
শ্রীরাধাহ-
কুচপদ্মকুট্মলয়ুগং মর্দয়তি ত্বাং নিজাতিদৌরাত্ম্যাত্ ।
বৃন্দাবনবরসিন্ধুর ননু দয়সে ত্বং নিসর্গকারুণ্যাত্ ॥ ১৯ ॥
শ্রীকৃষ্ণ আহ-
তন্বাতে মুদমুচ্চৈস্তাবককুচকোরকৌ য়দিমৌ ।
নখচন্দ্রোদয়মধি কিং স্বয়োগ্যমতুলং ন শোভতে প্রিয়ে ॥ ২০ ॥
শ্রীরাধাহ-
নখরানামতিখরতারতায় তে তাবকেন কিল বিধিনা ।
ব্রজবনিতানামরুচ্য রুষেব নিরমায়ি কিং নূনম্ ॥ ২১ ॥
শ্রীকৃষ্ণ আহ-
কুসুমাদপি মৃদুলাঙ্গ্যাঃ কুচয়োরেবাস্তি হন্ত কাঠিন্যম্ ।
ইতি তন্ নিষ্কাশয়িতুং ক্ষুণত্তি নখরাবলী চতুরা ॥ ২২ ॥
শ্রীরাধাহ-
হন্ত কৃতং বত কিমিদং সুরতরসোন্মদকুলস্ত্রিয়াঃ কদনম্ ।
হারাস্ত্রুটিতাঃ কাঞ্চী গলিতা স্খলিতা তথৈব মে বেণী ॥ ২৩ ॥
শ্রীকৃষ্ণ আহ-
হারা বলাদুরুভারাঃ কৃশমপি মধ্যং চ নহ্যতে কাঞ্চী ।
চিকুরকদর্থনভূতা বেণী তদিমা রক্ষিতুং ন য়োগ্যাঃ ॥ ২৪ ॥
শ্রীরাধাহ-
ঊধো য়েন গিরীন্দ্রস্তমপি ন বহতো মমোরসো ভারঃ ।
হারৈর্ভূষণভূতৈরভূদিয়ং স্নেহমুদ্রা কিম্ ॥ ২৫ ॥
কুচগিরিবহনপটুত্বং কৃশমপি মধ্যং য়তো বলাদ্ধত্তে ।
মণিময়কাঞ্চীবন্ধাদেব তমৃতে দৃঢতাঽস্য কেন স্যাত্ ॥ ২৬ ॥
উত্কর্ষণাবাকর্ষণপর্যায়োদিতপরস্পরাসক্ত্যা ।
প্রীতিরিয়ং কিল বেণীচিকুরাণাং ন চ কদর্থনং বাচ্যম্ ॥ ২৭ ॥
শ্রীকৃষ্ণ আহ-
সত্যমহং গিরিধারী করনলিনাভ্যাং গিরিদ্বয়ং ধাস্যে ।
মধ্যস্যাত্র পটুত্বৈরলং বলং কিল মমৈবাস্তাম্ ॥ ২৮ ॥
চিকুরাণামপি বেণ্যাঃ পরস্পরাসক্তিঃ সূচিতা ।
প্রীত্যা কিং ফলমিহ য়দি পরিচরণং তে ন কুর্বন্তি ॥ ২৯ ॥
বেণীবন্ধবিমুক্তশ্চিকুর কলাপোঽত্র বেল্লিতো মরুতা ।
চামরতামুপয়াতঃ স্বিন্নাঙ্গীং বীজয়ত্যহো ভবতীম্ ॥ ৩০ ॥
শ্রীরাধাহ-
আবিস্কৃত পুরু শিল্পং সখ্যা মে বহু বিলম্বতো রচিতম্ ।
চিত্রকমলিকতটে তত্ক্ষণেন বিধ্বংসিতং ভবতা ॥ ৩১ ॥
শ্রীকৃষ্ণ আহ-
স্মিতমুখি রুচার্ধবিধুনা সুচারুভালেন মে মিলন্ত্যেষা ।
ত্বদলিকবিধুরেখাঽস্মৈ প্রেম্নাঽর্পয়তি স্ম সর্বস্বম্ ॥ ৩২ ॥
শ্রীরাধাহ-
গণ্ডতটে মম মকরী শ্যামা সরলাতিচিত্রিতাপ্যবলাম্ ।
মকরদ্বয়তাটঙ্কশ্চপলো ধৃষ্টঃ কদর্থয়ত্যেনাম্ ॥ ৩৩ ॥
শ্রীকৃষ্ণ আহ-
রমণি মম শ্রুতিয়ুগলং ত্বদুদিতসৌধদ্রবৈঃ প্লুতং তদপি ।
দ্বিগুণিততৃষ্ণং জাতং লোলুপতায়াঃ স্বরূপমেবৈতত্ ॥ ৩৪ ॥
শ্রীরাধাহ-
লোলুপচূডামণিরসি তবাঙ্গবৃন্দং চ লোলুপং য়দয়ম্ ।
মন্নয়নাক্তমসীমপ্যধরো রাগী স্ব মণ্ডনং কুরুতে ॥ ৩৫ ॥
শ্রীকৃষ্ণ আহ-
বন্ধূকান্তরবর্তিনমলিনমিবায়ং মসীদ্রবং ধৃত্বা ।
অক্ষ্ণোরেব মুদং তে তনুতে তদিমং কিমাক্ষিপসি ॥ ৩৬ ॥
শ্রীরাধাহ-
বন্দে তব পরিহসিতং কং দেবং পরিচরস্যহো নিভিঋতম্ ।
য়ত্প্রসাদাদধীতা সৌরতবিদ্যাতিচাতুরীধারা ॥ ৩৭ ॥
শ্রীকৃষ্ণ আহ-
তব জঘনোত্তমসদনং সরসং দেবং সমুপচরাম্যতুলম্ ।
নিভৃতনিকুঞ্জগৃহস্থঃ প্রতি দিনমুচিতাধিকার এবাহম্ ॥ ৩৮ ॥
শ্রীরাধাহ-
সত্যমতঃ স্বারূপ্যং লব্ধ্বা দৃপ্তঃ কুলাবলানলিনীঃ ।
মলিনীঃ কুরুষে কা তব নয়নে পতিতা স্বকং পতিং ভজতাম্ ॥ ৩৯ ॥
শ্রীকৃষ্ণ আহ-
সখি তব নিরাবৃতান্যতিরুচিরান্যঙ্গান্যতীব সঙ্কুচন্তি ।
সম্প্রতি মন্নয়নান্তর্বিশন্তি মন্দাক্ষমগ্নানি ॥ ৪০ ॥
শ্রীরাধাহ-
ধৃষ্টতমে তব নয়নে য়ন্মিত্রং কৌস্তুভো দ্যুতিং তনুতে ।
তদিহ মদঙ্গান্যধুনা শরণং য়ান্তু ত্বদঙ্গানাম্ ॥ ৪১ ॥
শ্রীকৃষ্ণ আহ-
হিত্বা সতৃষদৃশৌ মম বৈরাদিব কৌস্তুভং পরাভূয় ।
বিশতি তব স্তনয়ুগলং মদ্ধৃদয়ান্তঃ স্ববিক্রমং বিভ্রত্ ॥ ৪২ ॥
শ্রীরাধাহ-
কঠিনতমং তব হৃদয়ং কুচয়ুগমপি মে প্রতীয়তে কঠিনম্ ।
তদুচিতমনয়োর্মিলনং য়োগ্যং য়োগ্যেন য়ুজ্যতে য়স্মাত্ ॥ ৪৩ ॥
শ্রীকৃষ্ণ আহ-
মদুরঃ পক্ষগতা ত্বং মম য়দ্যক্ষ্ণোর্বিপক্ষতাং কুরুষে ।
তদপি তয়োস্ত্বদ্বদনং প্রকামসুভগং মুদং তনুতে ॥ ৪৪ ॥
শ্রীরাধাহ-
স্বচ্ছন্দং য়দি রমসে রমস্ব তত্রাবলাস্মি কিং কুর্যাম্ ।
ক্ষিপসি দৃশং য়দলজ্জং মদপঘনে তত্কথং সহে কুলজা ॥ ৪৫ ॥
শ্রীকৃষ্ণ আহ-
য়দি মম দৃষ্তিচকোর্যা বিধুমুখি নৈবোপলভ্যসে দৈবাত্ ।
হৃদয়গৃহে খেলস্যপি তথাপি হা জ্বলয়সি প্রসভম্ ॥ ৪৬ ॥
শ্রীরাধাহ-
তব ভুজয়ুগদৃঢবন্ধং বামাপীহেঽন্যথা ভবন্নয়নে ।
নিস্ত্রপশিরোমণে মাং ত্রপাম্বুধৌ পাতয়িষ্যতঃ প্রকটম্ ॥ ৪৭ ॥
শ্রীকৃষ্ণ আহ-
ত্বন্নয়নে চ মদক্ষ্ণোরন্তেবাসিত্বমিচ্ছতঃ কিন্তু ।
গর্বাদিব ন চ পঠতঃ প্রকটং প্রৌঢিঃ কিয়তো অহো য়দিয়ম্ ॥ ৪৮ ॥
শ্রীরাধাহ-
চেতঃ স্ফুটতি স্বয়ং চ তথাপি নয়নে ন তাদৃশে ভবতঃ ।
সাধ্বীনামিয়মুচিতা এব নিসর্গত্রপাকুলতা ॥ ৪৯ ॥
শ্রীকৃষ্ণ আহ-
সম্প্রতি সত্যং ব্রূষে ত্রপাবতীনাং শিরোমণিস্ত্বমসি ।
বত্স্যায়নতন্ত্রোক্তঃ সাধ্বীনাময়মেব ধর্মঃ ॥ ৫০ ॥
শ্রীরাধাহ-
য়দ্যপ্যরুন্ধতী সা সাধ্বীগণগণ্যগৌরবা জগতি ।
ধর্মমিমং পাঠয়িতুং তামপি শক্নোতি তে নয়নম্ ॥ ৫১ ॥
শ্রীকৃষ্ণ আহ-
রাঢে দ্বিগুণিতশোভং মদাস্যপঙ্কেরুহং ধ্রুবং পিবতু ।
সম্প্রত্যপি নিজলোচনমধুকরয়ুগং কিং ন সর্বথা দিশসি ॥ ৫২ ॥
শ্রীরাধাহ-
লাবণ্যাদ্ভুতবন্যাময়ং ত্বদঙ্গং ন শীলয়ত্যধিকম্ ।
লোচনশফরয়ুগং মম দৃগন্তজালং য়দা নু তত্ক্ষিপসি ॥ ৫৩ ॥
শ্রীকৃষ্ণ আহ-
নূপুরমঙ্গলবাদ্যজ্ঞাপিতমনসিজনৃপোত্সবামোদঃ ।
ত্বরিতমুপয়াতি অলিবন্দী কীর্তিং চ তব প্রথয়ন্বিরাজতে ॥ ৫৪ ॥
শ্রীরাধাহ-
দয়িত নৃপোঽস্যনুভূতঃ সত্যং মনসিজপরঃশতানাং ত্বম্ ।
দিশি দিশি সতীষু বিক্রমবিজয়ং শংসতি তবৈবায়ম্ ॥ ৫৫ ॥
শ্রীকৃষ্ণ আহ-
সুরতমহামখভেরী ত্রিজগতি গর্জংস্তবৈষ নূপুরঃ ।
তর্জতি গর্ববতীস্তাঃ প্রকামমমরাঙ্গনা অপি প্রসভম্ ॥ ৫৬ ॥
শ্রীরাধাহ-
রমণমহোদিতমদভরমত্তাহং কিং ব্রবীমি তে চরিতম্ ।
স্তৌষি মুহুর্নূপুরমপি নূপুরমাত্রাবশিষ্টভূষায়াঃ ॥ ৫৭ ॥
শ্রীকৃষ্ণ আহ-
কিং কথ্যসে স্বয়ং বত রমণমহে ত্বং সমুদ্ধতা সত্যম্ ।
মদভরমত্ত য়ন্ নিজপরিহিতবাসোঽপি কুরুষে স্মরসাত্ ॥ ৫৮ ॥
শ্রীরাধাহ-
স কিল তবেষ্টা দেবতা মদনঃ শ্রদ্ধাবতীরতো য়ুবতীঃ ।
উপদিষ্যৈতন্মন্ত্রং শিষ্যাঃ কুরুষে বিতীর্ণসর্বস্বাঃ ॥ ৫৯ ॥
শ্রীকৃষ্ণ আহ-
ত্বয়ি পুনরসৌ রসজ্ঞঃ স্মরোঽপি রোপিতমুদা বসতি ।
য়দিদং কুচহাটক সম্পুটয়ুগমস্য সর্বস্বম্ ॥ ৬০ ॥
শ্রীরাধাহ-
এবং চেত্কথমনয়োঃ কঞ্চুকমথ মৌক্তিকং লসদ্ধারম্ ।
মৃগমদচর্চাং দলয়সি কলয়সি চ কঠিনকরাঘাতম্ ॥ ৬১ ॥
শ্রীকৃষ্ণ আহ-
স্বধনব্যবহৃতিসময়ে হাটকময়সম্পুতস্য য়দ্দৃষ্টঃ ।
মঙ্গলভূষণবসনোদ্ঘাটো মুখদার্ঢ্যতঃ নখাঘাতঃ ॥ ৬২ ॥
শ্রীরাধাহ-
তদ্ব্যবহর্তা পুনরথ কৃত্বা দ্বিগুণিতসুসম্ভারম্ ।
আবৃত্যাতিরহঃস্থং কুরুতে সম্পুটমিদং চ ভো দৃষ্টম্ ॥ ৬৩ ॥
শ্রীকৃষ্ণ আহ-
স্মরমণিসম্পুটকুচয়ুগমধুনাপ্যুত্তানমস্তি তত্কান্তে ।
হৃদয়গৃহং মম পূরয় কৃত্বাঽধো মুখমিদং মহারত্নৈঃ ॥ ৬৪ ॥
শ্রীরাধাহ-
বিধিনা বিমৃশ্য নিহিতং য়াসামবলেতি নাম য়ুক্তার্থম্ ।
তাসাং কুচসম্পুটয়োরধো মুখী কৃতিবিধৌ ক্ব বা শক্তিঃ ॥ ৬৫ ॥
শ্রীকৃষ্ণ আহ-
কতি ন করগ্রহবিধিনা কুচসম্পুটকান্তরাহৃত রাধে ।
মোদমণীনাং ততয়স্তদপি ন মে পূর্যতে হৃদয়ম্ ॥ ৬৬ ॥
শ্রীরাধাহ-
ব্রজবনিতাঃ শতকোট্যস্তবৈব তাঃ পণ্ডিতাশ্চ রতিতন্ত্রে ।
হৃদয়ং তদপি রতৌ বত রঙ্কতমত্বং ন তে ত্যজতি ॥ ৬৭ ॥
শ্রীকৃষ্ণ আহ-
স্মরশিখিতপ্তে মম হৃদি সুকুমার্যস্তাঃ বিশন্তু কিং মুগ্ধাঃ ।
ত্বমতিসমর্থা প্রসভং প্রবিশ্য রাজসি সদৈবৈকা ॥ ৬৮ ॥
শ্রীরাধাহ-
তদয়ে স্বরঙ্গদানে স্বরঙ্গনাস্তাঃ সমানয় ক্ষিপ্রম্ ।
তত্তন্নাম গৃহীত্বা মুরলীগানে তবাত্র কো য়ত্নঃ ॥ ৬৯ ॥
শ্রীকৃষ্ণ আহ-
নন্দনবনকুসুমাঞ্চিতশিরোঽপি ধর্তুং নিজাত্যয়োগ্যতয়া ।
তব পদনখতলসবিধে লজ্জং তে সুরবরাঙ্গনা অপি তাঃ ॥ ৭০ ॥
শ্রীরাধাহ-
নাভীবিবরবরান্মে সমুদ্গতেয়ং ন কান্তরোমালী ।
কিন্তু প্রকুপিতভুজগী তদুন্মুখং কিমু চিকীর্ষসি স্বকরম্ ॥ ৭১ ॥
শ্রীকৃষ্ণ আহ-
তব রোমালীভুজগীং খেলয়িতুং মত্করশ্চলত্যভিতঃ ।
ভবদখিলাঙ্গগতান্যপি রোমান্যুদ্যান্তি কিং রোদ্ধুম্ ॥ ৭২ ॥
শ্রীরাধাহ-
মদখিলগাত্রভটা অপি য়তঃ পরাভবমবাপ্য মুহ্যন্তি ।
স্মররণমত্তে ত্বয়ি কিং বত রোম্নাং য়ুজ্যতে য়ুদ্ধম্ ॥ ৭৩ ॥
শ্রীকৃষ্ণ আহ-
বয়মতিকৃশাশ্চ তদপি প্রভবামোদ্গমবিধাবিতি প্রকটম্ ।
ভবতীমুদ্গমচর্যাং রোমভটাঃ স্মরয়ন্ত্যহো চতুরাঃ ॥ ৭৪ ॥
শ্রীরাধাহ-
রতিরসপরবশ ! সহতে তেঽতথ্যং কিং মে তনোরন্বয়ঃ ।
রময়স্ব অতিবামামপি তাং ন চ দয়সে কান্ত্যা বেদয়সে ॥ ৭৫ ॥
শ্রীকৃষ্ণ আহ-
স্মরশররাধে রাধে সমরে সমরেখয়াঞ্চিতে দ্বিতয়ে ।
ইহ ভবদঙ্গমদঙ্গে প্রতিভটমধুনা ধুনানেস্তাম্ ॥ ৭৬ ॥
শ্রীরাধাহ-
প্রস্বেদাম্বু বমন্তী ঘনরসসিক্তেব গাত্রবল্লী মে ।
দলিতো ললিতাকল্পস্তল্পশ্চ খণ্ডিতো নো বা কতিধা ॥ ৭৭ ॥
শ্রীকৃষ্ণ আহ-
মদনঘনাঘন এষ স্বেদমিষাদ্বর্ষতীহ তনুবল্লীম্ ।
ঘনরসভরৈঃ প্রতিপদমুদিতলসত্কোরকাং কান্তে ॥ ৭৮ ॥
শ্রীরাধাহ-
প্রিয় তব তরুণিমজলধেরবধেরন্বেষণং কথং কুরুতাম্ ।
মহিলামতিমকরী তদ্বিরম্যতাং রম্যতাং রতং য়াতু ॥ ৭৯ ॥
শ্রীকৃষ্ণ আহ-
অতিনিঃশ্বসিতসমীরণবেগাদ্দ্বিগুণীভবন্মহাবীচিম্ ।
কেলিসুধাসরিতং নৌ মানসকরিণৌ মুহুর্মুহুর্ভজতাম্ ॥ ৮০ ॥
শ্রীরাধাহ-
খেলতি মনঃকরী তে সত্যং প্রকটং স লক্ষ্যতে কিন্তু ।
তত্রৈক্যং মম মনসো ব্রূষে কোঽত্রাভিপ্রায়স্তে ॥ ৮১ ॥
শ্রীকৃষ্ণ আহ-
শ্রীমন্মদনসুরোত্তমসেবা সম্সিদ্ধয়ে তু নৌ মনসী ।
ঐক্যমবাপ্য ত্বরয়া তত্র চ সায়ুজ্যমীহেতে ॥ ৮২ ॥
শ্রীরাধাহ-
স্বস্মিন্নেব তনোর্মম মনসশ্চাপ্যেকদৈব সায়ুজ্যম্ ।
প্রসভং কুরুষে দেব ত্বমেব সাক্ষান্মহামদনঃ ॥ ৮৩ ॥
শ্রীকৃষ্ণ আহ-
সর্বস্বাত্মসমর্পণকারিণ্যৈ তে মুদা মারঃ ।
স্বীয়াং মৌক্তিকমালামলিকে স্বেদকণব্যাজাদ্দত্তে ॥ ৮৪ ॥
শ্রীরাধাহ-
ত্বদলকনিকরস্তামপি নীত্বা স্তিম্যতি হঠাদয়ং চপলঃ ।
মদনপ্রসাদ ইত্যতিভাগ্যং সংশ্লাঘতে স্বীয়ম্ ॥ ৮৫ ॥
শ্রীকৃষ্ণ আহ-
তাম্বূলামৃতরসলবলাভেনৈবাত্র গর্বিতে ভবন্নয়নে ।
অন্তর্বহিরপি তদ্রসমুদিতে গণ্ডে কথং নু মে হসতঃ ॥ ৮৬ ॥
শ্রীরাধাহ-
য়ত্সূচয়সি রসপ্রিয় তদিদং স্বেনৈব পাঠিতং তন্ত্রম্ ।
স্বয়মেব ব্যাচষ্টে স ভবানিতি কিল নমস্তুভ্যম্ ॥ ৮৭ ॥
শ্রীকৃষ্ণ আহ-
মন্মুখপঙ্কেরুহমপি চিত্রমিদং য়দ্বিকাশয়স্যধিকম্ ।
গুণবত্যতিসুরভিতেন স্ববদনসুধাকরসুধাদ্রবেণ হি ॥ ৮৮ ॥
শ্রীরাধাহ-
নীলনিধের্বত পোতো বিন্দুব্যাজেন রক্ষিতশ্চিবুকে ।
তমপি চ ভবদধরোঽয়ং হৃতবানিতি কতি মৃষাম্যনয়ম্ ॥ ৮৯ ॥
শ্রীকৃষ্ণ আহ-
অনুরাগিণমপি সাগসমধরং মে দণ্ডয়স্যতঃ কোপাত্ ।
রদনাস্ত্রেণ তদপ্যভিমনুতে লব্ধপ্রসাদমেবায়ম্ ॥ ৯০ ॥
শ্রীরাধাহ-
অধি রদনচ্ছন্দনং মে স্বরদনকীর্তিং ন কিং বিচারয়সি ।
য়ুবতীসভাসু চিত্রং ত্রপাকুলতমতেয়ং নু ময়ি সৃষ্টা ॥ ৯১ ॥
শ্রীকৃষ্ণ আহ-
বিষমাশুগরণরঙ্গে স্বাঙ্গেনাতুল পরাক্রমা ক্রমসে ।
দর্শয় ভুজবলময়ি ভো ময়ি তে দয়িতে গুণাবলী ফলতু ॥ ৯২ ॥
শ্রীরাধাহ-
তন্বীমপি তনুমেতাং মুহুরতিদার্ঢ্যেন বেষ্টয়তে ।
ত্বদ্ভুজভুজাঙ্গপাশঃ শ্বাসো মে কেবলং বলতে ॥ ৯৩ ॥
শ্রীকৃষ্ণ আহ-
সম্প্রতি সাক্ষাত্কারো মদনস্য স্যাদিতীব জানীমঃ ।
য়ন্ নশ্চেতস্ত্বরতে নিরুপমমত্রৈকভাবায় ॥ ৯৪ ॥
শ্রীরাধাহ-
তাণ্ডবপণ্ডিত নিতরামলমধ্যাপনশ্রমেণ তে ।
মদপঘনাঃ স্বয়মেতে চারণচর্যাসু য়ান্তি নৈপুণ্যম্ ॥ ৯৫ ॥
শ্রীকৃষ্ণ আহ-
মদনমহাঘনঘূর্ণাঘ্রাতান্যঙ্গানি নৌ প্রিয়ে য়ুগপত্ ।
শ্বাসোদিতজয়চতুরিমভরমন্যোন্যং দিশন্তি সোন্মাদম্ ॥ ৯৬ ॥
(শ্রী গ্রন্থকর্তাহ- )
লোচনমীনচতুষ্টয়মধুনা নিষ্পন্দতামুরীকুরুতে ।
রসভরবিস্ময়মত্তে নৈসর্গিকচেষ্টিতস্মৃতিঃ কিং স্যাত্ ॥ ৯৭ ॥
চন্দননলদসুধাংশুদ্রবময়জলয়ন্ত্রবেশ্মমধ্যস্থে ।
স্থলজলরুহদলকল্পিততল্পেঽসুপ্তাং রতশ্রান্তৌ ॥ ৯৮ ॥
ক্রমবলিতৈর্নিঃশ্বসিতৈঃ সুরভয়তোঃ স্বামিনোরথান্যোন্যম্ ।
নিদ্রাবৃদ্ধিমবেত্য প্রমোদসিন্ধাবয়ং জনঃ প্লবতাম্ ॥ ৯৯ ॥
সুরতকথামৃতমার্যশতকং নতকন্ধরো জনো জুষতাম্ ।
রতসুখধামগবাক্ষশ্রিতনয়নঃ স্বামিনোরহো কৃপয়া ॥ ১০০ ॥
প্রবিশতু শনৈঃ শনৈরথ মূকিতনূপুরং জনস্তত্র ।
গাত্রে নিভাল্য য়ূনোঃ স্ববলয়রাজীং পিধায় বধ্নাতু ॥ ১০১ ॥
কম্পনচকিতৈরলিভিস্ত্যক্তুমশক্যেন তালবৃন্তেন ।
বীজয়তু শ্রমসলিলং প্রত্যঙ্গং শোষিতং নিরূপয়তু ॥ ১০২ ॥
রাধাকুণ্ডতটবাসমহাসম্পদং মদঃ সোঽয়ম্ ।
কিমু বাঞ্ছিতমতিদুর্লভবস্তুনি তমৃতে মমাস্তু সম্ভাব্যম্ ॥ ১০৩ ॥
অষ্টমক্ অধিকরহস্যব্যঞ্জকং মথ্নন্ নিবধ্যতেঽত্র শতকে ।
তাদৃশভাববিভাবিতহৃদয়েনৈবাস্তু তত্সেব্যম্ ॥ ১০৪ ॥
খবিয়দৃতুক্ষমাগণিতে শাকে বৃষসংস্থিতে দিবাধীশে ।
সুরতকথামৃতমুদগদুদয়তাং চ ভক্তহৃন্নভসি ॥ ১০৫ ॥
ইতি মহামহোপাধ্যায়শ্রীবিশ্বনাথচক্রবর্তিবিরচিতং
সুরতকথামৃতং সমাপ্তম্ ॥
