Suryashatakam in Oriya:
॥ ସୂର୍ୟଶତକମ୍ ॥
ମହାକଵିଶ୍ରୀମୟୂରପ୍ରଣୀତମ୍
॥ ଶ୍ରୀ ଗଣେଶାୟ ନମଃ ॥
ଜମ୍ଭାରାତୀଭକୁମ୍ଭୋଦ୍ଭଵମିଵ ଦଧତଃ ସାନ୍ଦ୍ରସିନ୍ଦୂରରେଣୁଂ
ରକ୍ତାଃ ସିକ୍ତା ଇଵୌଘୈରୁଦୟଗିରିତଟୀଧାତୁଧାରାଦ୍ରଵସ୍ୟ । var ସକ୍ତୈଃ
ଆୟାନ୍ତ୍ୟା ତୁଲ୍ୟକାଲଂ କମଲଵନରୁଚେଵାରୁଣା ଵୋ ଵିଭୂତ୍ୟୈ
ଭୂୟାସୁର୍ଭାସୟନ୍ତୋ ଭୁଵନମଭିନଵା ଭାନଵୋ ଭାନଵୀୟାଃ ॥ ୧ ॥
ଭକ୍ତିପ୍ରହ୍ଵାୟ ଦାତୁଂ ମୁକୁଲପୁଟକୁଟୀକୋଟରକ୍ରୋଡଲୀନାଂ
ଲକ୍ଷ୍ମୀମାକ୍ରଷ୍ଟୁକାମା ଇଵ କମଲଵନୋଦ୍ଧାଟନଂ କୁର୍ଵତେ ୟେ ।
କାଲାକାରାନ୍ଧକାରାନନପତିତଜଗତ୍ସାଧ୍ଵସଧ୍ଵଂସକଲ୍ୟାଃ
କଲ୍ୟାଣଂ ଵଃ କ୍ରିୟାସୁଃ କିସଲୟରୁଚୟସ୍ତେ କରା ଭାସ୍କରସ୍ୟ ॥ ୨ ॥
ଗର୍ଭେଷ୍ଵମ୍ଭୋରୁହାଣାଂ ଶିଖରିଷୁ ଚ ଶିତାଗ୍ରେଷୁ ତୁଲ୍ୟଂ ପତନ୍ତଃ
ପ୍ରାରମ୍ଭେ ଵାସରସ୍ୟ ଵ୍ୟୁପରତିସମୟେ ଚୈକରୂପାସ୍ତଥୈଵ ।
ନିଷ୍ପର୍ୟାୟଂ ପ୍ରଵୃତ୍ତାସ୍ତ୍ରିଭୁଵନଭଵନପ୍ରାଙ୍ଗଣେ ପାନ୍ତୁ ୟୁଷ୍ମା-
ନୂଷ୍ମାଣଂ ସଂତତାଧ୍ଵଶ୍ରମଜମିଵ ଭୃଶଂ ବିଭ୍ରତୋ ବ୍ରଧ୍ନପାଦାଃ ॥ ୩ ॥
ପ୍ରଭ୍ରଶ୍ୟତ୍ୟୁତ୍ତରୀୟତ୍ଵିଷି ତମସି ସମୁଦ୍ଦୀକ୍ଷ୍ୟ ଵୀତାଵୃତୀନ୍ପ୍ରା-
ଗ୍ଜନ୍ତୂଂସ୍ତନ୍ତୂନ୍ୟଥା ୟାନତନୁ ଵିତନୁତେ ତିଗ୍ମରୋଚିର୍ମରୀଚୀନ୍ ।
ତେ ସାନ୍ଦ୍ରୀଭୂୟ ସଦ୍ୟଃ କ୍ରମଵିଶଦଦଶାଶାଦଶାଲୀଵିଶାଲଂ
ଶଶ୍ଵତ୍ସମ୍ପାଦୟନ୍ତୋଽମ୍ବରମମଲମଲଂ ମଙ୍ଗଲଂ ଵୋ ଦିଶନ୍ତୁ ॥ ୪ ॥
ନ୍ୟକ୍କୁର୍ଵନ୍ନୋଷଧୀଶେ ମୁଷିତରୁଚି ଶୁଚେଵୌଷଧୀଃ ପ୍ରୋଷିତାଭା
ଭାସ୍ଵଦ୍ଗ୍ରାଵୋଦ୍ଗତେନ ପ୍ରଥମମିଵ କୃତାଭ୍ୟୁଦ୍ଗତିଃ ପାଵକେନ ।
ପକ୍ଷଚ୍ଛେଦଵ୍ରଣାସୃକ୍ସ୍ରୁତ ଇଵ ଦୃଷଦୋ ଦର୍ଶୟନ୍ପ୍ରାତରଦ୍ରେ-
ରାତାମ୍ରସ୍ତୀଵ୍ରଭାନୋରନଭିମତନୁଦେ ସ୍ତାଦ୍ଗଭସ୍ତ୍ୟୁଦ୍ଗମୋ ଵଃ ॥ ୫ ॥
ଶୀର୍ଣଘ୍ରାଣାଙ୍ଘ୍ରିପାଣୀନ୍ଵ୍ରଣିଭିରପଘନୈର୍ଘର୍ଘରାଵ୍ୟକ୍ତଘୋଷାନ୍
ଦୀର୍ଘାଘ୍ରାତାନଘୌଘୈ ପୁନରପି ଘଟୟତ୍ୟେକ ଉଲ୍ଲାଘୟନ୍ ୟଃ ।
ଘର୍ମାଂଶୋସ୍ତସ୍ୟ ଵୋଽନ୍ତର୍ଦ୍ଵିଗୁଣଘନଘୃଣାନିଘ୍ନନିର୍ଵିଘ୍ନଵୃତ୍ତେ-
ର୍ଦତ୍ତାର୍ଘାଃ ସିଦ୍ଧସଂଘୈର୍ଵିଦଧତୁ ଘୃଣୟଃ ଶୀଘ୍ରମଂହୋଵିଧାତମ୍ ॥ ୬ ॥
ବିଭ୍ରାଣା ଵାମନତ୍ଵଂ ପ୍ରଥମମଥ ତଥୈଵାଂଶଵଃ ପ୍ରାଂଶଵୋ ଵଃ
କ୍ରାନ୍ତାକାଶାନ୍ତରାଲାସ୍ତଦନୁ ଦଶଦିଶଃ ପୂରୟନ୍ତସ୍ତତୋଽପି ।
ଧ୍ଵାନ୍ତାଦାଚ୍ଛିଦ୍ୟ ଦେଵଦ୍ଵିଷ ଇଵ ବଲିତୋ ଵିଶ୍ଵମାଶ୍ଵଶ୍ନୁଵାନାଃ var ଦେଵଦ୍ରୁହ
କୃଚ୍ଛ୍ରାଣ୍ୟୁଚ୍ଛ୍ରାୟହେଲୋପହସିତହରୟୋ ହାରିଦଶ୍ଵା ହରନ୍ତୁ ॥ ୭ ॥
ଉଦ୍ଗାଢେନାରୁଣିମ୍ନା ଵିଦଧତି ବହୁଲଂ ୟେଽରୁଣସ୍ୟାରୁଣତ୍ଵଂ
ମୂର୍ଧୋଦ୍ଧୂତୌ ଖଲୀନକ୍ଷତରୁଧିରରୁଚୋ ୟେ ରଥାଶ୍ଵାନନେଷୁ ।
ଶୈଲାନାଂ ଶେଖରତ୍ଵଂ ଶ୍ରିତଶିଖରିଶିଖାସ୍ତନ୍ଵତେ ୟେ ଦିଶନ୍ତୁ var ଶିଖରଶିଖାଃ
ପ୍ରେଙ୍ଖନ୍ତଃ ଖେ ଖରାଂଶୋଃ ଖଚିତଦିନମୁଖାସ୍ତେ ମୟୂଖାଃ ସୁଖଂ ଵଃ ॥ ୮ ॥
ଦତ୍ତାନନ୍ଦାଃ ପ୍ରଜାନାଂ ସମୁଚିତସମୟାକୃଷ୍ଟସୃଷ୍ଟୈଃ ପୟୋଭିଃ var ଅକ୍ଲିଷ୍ଟସୃଷ୍ଟୈଃ
ପୂର୍ଵାହ୍ଣେ ଵିପ୍ରକୀର୍ଣା ଦିଶି ଦିଶି ଵିରମତ୍ୟହ୍ନି ସଂହାରଭାଜଃ ।
ଦୀପ୍ତାଂଶୋର୍ଦୀର୍ଘଦୁଃଖପ୍ରଭଵଭଵଭୟୋଦନ୍ଵଦୁତ୍ତାରନାଵୋ
ଗାଵୋ ଵଃ ପାଵନାନାଂ ପରମପରିମିତାଂ ପ୍ରୀତିମୁତ୍ପାଦୟନ୍ତୁ ॥ ୯ ॥
ବନ୍ଧଧ୍ଵଂସୈକହେତୁଂ ଶିରସି ନତିରସାବଦ୍ଧସଂଧ୍ୟାଞ୍ଜଲୀନାଂ
ଲୋକାନାଂ ୟେ ପ୍ରବୋଧଂ ଵିଦଧତି ଵିପୁଲାମ୍ଭୋଜଖଣ୍ଡାଶୟେଵ ।
ୟୁଷ୍ମାକଂ ତେ ସ୍ଵଚିତ୍ତପ୍ରଥିତପୃଥୁତରପ୍ରାର୍ଥନାକଲ୍ପଵୃକ୍ଷାଃ var ପ୍ରଥିମ
କଲ୍ପନ୍ତାଂ ନିର୍ଵିକଲ୍ପଂ ଦିନକରକିରଣାଃ କେତଵଃ କଲ୍ମଷସ୍ୟ ॥ ୧୦ ॥
ଧାରା ରାୟୋ ଧନାୟାପଦି ସପଦି କରାଲମ୍ବଭୂତାଃ ପ୍ରପାତେ
ତତ୍ତ୍ଵାଲୋକୈକଦୀପାସ୍ତ୍ରିଦଶପତିପୁରପ୍ରସ୍ଥିତୌ ଵୀଥ୍ୟ ଏଵ ।
ନିର୍ଵାଣୋଦ୍ୟୋଗିୟୋଗିପ୍ରଗମନିଜତନୁଦ୍ଵାରି ଵେତ୍ରାୟମାଣା-
ସ୍ତ୍ରାୟନ୍ତାଂ ତୀଵ୍ରଭାନୋର୍ଦିଵସମୁଖସୁଖା ରଶ୍ମୟଃ କଲ୍ମଷାଦ୍ଵଃ ॥ ୧୧ ॥
var ତୀଵ୍ରଭାସଃ var କଶ୍ମଲାଦ୍ଵଃ
ପ୍ରାଚି ପ୍ରାଗାଚରନ୍ତ୍ୟୋଽନତିଚିରମଚଲେ ଚାରୁଚୂଡାମଣିତ୍ଵଂ
ମୁଞ୍ଚନ୍ତ୍ୟୋ ରୋଚନାମ୍ଭଃ ପ୍ରଚୁରମିଵ ଦିଶାମୁଚ୍ଚକୈଶ୍ଚର୍ଚନାୟ ।
ଚାଟୂତ୍କୈଶ୍ଚକ୍ରନାମ୍ନାଂ ଚତୁରମଵିଚଲୈର୍ଲୋଚନୈରର୍ଚ୍ୟମାନା- var ସୁଚିରଂ
ଶ୍ଚେଷ୍ଟନ୍ତାଂ ଚିନ୍ତିତାନାମୁଚିତମଚରମାଶ୍ଚଣ୍ଡରୋଚୀରୁଚୋ ଵଃ ॥ ୧୨ ॥
ଏକଂ ଜ୍ୟୋତିର୍ଦୃଶୌ ଦ୍ଵେ ତ୍ରିଜଗତି ଗଦିତାନ୍ୟବ୍ଜଜାସ୍ୟୈଶ୍ଚତୁର୍ଭି-
ର୍ଭୂତାନାଂ ପଞ୍ଚମଂ ୟାନ୍ୟଲମୃତୁଷୁ ତଥା ଷଟ୍ସୁ ନାନାଵିଧାନି ।
ୟୁଷ୍ମାକଂ ତାନି ସପ୍ତତ୍ରିଦଶମୁନିନୁତାନ୍ୟଷ୍ଟଦିଗ୍ଭାଞ୍ଜି ଭାନୋ-
ର୍ୟାନ୍ତି ପ୍ରାହ୍ଣେ ନଵତ୍ଵଂ ଦଶ ଦଧତୁ ଶିଵଂ ଦୀଧିତୀନାଂ ଶତାନି ॥ ୧୩ ॥ var ଦଦତୁ
ଆଵୃତ୍ତିଭ୍ରାନ୍ତଵିଶ୍ଵାଃ ଶ୍ରମମିଵ ଦଧତଃ ଶୋଷିଣଃ ସ୍ଵୋଷ୍ମଣେଵ
ଗ୍ରୀଷ୍ମେ ଦାଵାଗ୍ନିତପ୍ତା ଇଵ ରସମସକୃଦ୍ୟେ ଧରିତ୍ର୍ୟା ଧୟନ୍ତି ।
ତେ ପ୍ରାଵୃଷ୍ୟାତ୍ତପାନାତିଶୟରୁଜ ଇଵୋଦ୍ଵାନ୍ତତୋୟା ହିମର୍ତୌ
ମାର୍ତଣ୍ଡସ୍ୟାପ୍ରଚଣ୍ଡାଶ୍ଚିରମଶୁଭଭିଦେଽଭୀଷଵୋ ଵୋ ଭଵନ୍ତୁ ॥ ୧୪ ॥
ତନ୍ଵାନା ଦିଗ୍ଵଧୂନାଂ ସମଧିକମଧୁରାଲୋକରମ୍ୟାମଵସ୍ଥା-
ମାରୁଢପ୍ରୌଢିଲେଶୋତ୍କଲିତକପିଲିମାଲଂକୃତିଃ କେଵଲୈଵ ।
ଉଜ୍ଜୃମ୍ଭାମ୍ଭୋଜନେତ୍ରଦ୍ୟୁତିନି ଦିନମୁଖେ କିଂଚିଦୁଦ୍ଭିଦ୍ୟମାନା
ଶ୍ମଶ୍ରୁଶ୍ରେଣୀଵ ଭାସାଂ ଦିଶତୁ ଦଶଶତୀ ଶର୍ମ ଘର୍ମତ୍ଵିଷୋ ଵଃ ॥ ୧୫ ॥
ମୌଲୀନ୍ଦୋର୍ମୈଷ ମୋଷୀଦ୍ଦ୍ୟୁତିମିତି ଵୃଷଭାଙ୍କେନ ୟଃ ଶଙ୍କିନେଵ
ପ୍ରତ୍ୟଗ୍ରୋଦ୍ଘାଟିତାମ୍ଭୋରୁହକୁହରଗୁହାସୁସ୍ଥିତେନେଵ ଧାତ୍ରା ।
କୃଷ୍ଣେନ ଧ୍ଵାନ୍ତକୃଷ୍ଣସ୍ଵତନୁପରିଭଵତ୍ରସ୍ନୁନେଵ ସ୍ତୁତୋଽଲଂ
ତ୍ରାଣାୟ ସ୍ତାତ୍ତନୀୟାନପି ତିମିରରିପୋଃ ସ ତ୍ଵିଷାମୁଦ୍ଗମୋ ଵଃ ॥ ୧୬ ॥
ଵିସ୍ତୀର୍ଣଂ ଵ୍ୟୋମ ଦୀର୍ଘାଃ ସପଦି ଦଶ ଦିଶୋ ଵ୍ୟସ୍ତଵେଲାମ୍ଭସୋଽବ୍ଧୀନ୍
କୁର୍ଵଦ୍ଭିର୍ଦୃଶ୍ୟନାନାନଗନଗରନଗାଭୋଗପୃଥ୍ଵୀଂ ଚ ପୃଥ୍ଵୀମ୍ ।
ପଦ୍ମିନ୍ୟୁଚ୍ଛ୍ଵାସ୍ୟତେ ୟୈରୁଷସି ଜଗଦପି ଧ୍ଵଂସୟିତ୍ଵା ତମିସ୍ରା-
ମୁସ୍ରା ଵିସ୍ରଂସୟନ୍ତୁ ଦ୍ରୁତମନଭିମତଂ ତେ ସହସ୍ରତ୍ଵିଷୋ ଵଃ ॥ ୧୭ ॥ var ଵିସ୍ରାଵୟନ୍ତୁ
ଅସ୍ତଵ୍ୟସ୍ତତ୍ଵଶୂନ୍ୟୋ ନିଜରୁଚିରନିଶାନଶ୍ଵରଃ କର୍ତୁମୀଶୋ
ଵିଶ୍ଵଂ ଵେଶ୍ମେଵ ଦୀପଃ ପ୍ରତିହତତିମିରଂ ୟଃ ପ୍ରଦେଶସ୍ଥିତୋଽପି ।
ଦିକ୍କାଲାପେକ୍ଷୟାସୌ ତ୍ରିଭୁଵନମଟତସ୍ତିଗ୍ମଭାନୋର୍ନଵାଖ୍ୟାଂ
ୟାତଃ ଶାତକ୍ରତଵ୍ୟାଂ ଦିଶି ଦିଶତୁ ଶିଵଂ ସୋଽର୍ଚିଷାମୁଦ୍ଗମୋ ଵଃ ॥ ୧୮ ॥
ମାଗାନ୍ମ୍ଲାନିଂ ମୃଣାଲୀ ମୃଦୁରିତି ଦୟୟେଵାପ୍ରଵିଷ୍ଟୋଽହିଲୋକଂ
ଲୋକାଲୋକସ୍ୟ ପାର୍ଶ୍ଵଂ ପ୍ରତପତି ନ ପରଂ ୟସ୍ତଦାଖ୍ୟାର୍ଥମେଵ ।
ଊର୍ଧ୍ଵଂ ବ୍ରହ୍ମାଣ୍ଡଖଣ୍ଡସ୍ଫୁଟନଭୟପରିତ୍ୟକ୍ତଦୈର୍ଘ୍ୟୋ ଦ୍ୟୁସୀମ୍ନି
ସ୍ଵେଛାଵଶ୍ୟାଵକାଶାଵଧିରଵତୁ ସ ଵସ୍ତାପନୋ ରୋଚିରୋଘଃ ॥ ୧୯ ॥
ଅଶ୍ୟାମଃ କାଲ ଏକୋ ନ ଭଵତି ଭୁଵନାନ୍ତୋଽପି ଵୀତେଽନ୍ଧକାରେ var ଵୀତାନ୍ଧକାରଃ
ସଦ୍ୟଃ ପ୍ରାଲେୟପାଦୋ ନ ଵିଲୟମଚଲଶ୍ଚନ୍ଦ୍ରମା ଅପ୍ୟୁପୈତି ।
ବନ୍ଧଃ ସିଦ୍ଧାଞ୍ଜଲୀନାଂ ନ ହି କୁମୁଦଵନସ୍ୟାପି ୟତ୍ରୋଜ୍ଜିହାନେ
ତତ୍ପ୍ରାତଃ ପ୍ରେକ୍ଷଣୀୟଂ ଦିଶତୁ ଦିନପତେର୍ଧାମ କାମାଧିକଂ ଵଃ ॥ ୨୦ ॥
ୟତ୍କାନ୍ତିଂ ପଙ୍କଜାନାଂ ନ ହରତି କୁରୁତେ ପ୍ରତ୍ୟୁତାଧିକ୍ୟରମ୍ୟାଂ var ପ୍ରତ୍ୟୁତାତୀଵ ରମ୍ୟାଂ
ନୋ ଧତ୍ତେ ତାରକାଭାଂ ତିରୟତି ନିତରାମାଶୁ ୟନ୍ନିତ୍ୟମେଵ । var ନାଧତ୍ତେ
କର୍ତୁଂ ନାଲଂ ନିମେଷଂ ଦିଵସମପି ପରଂ ୟତ୍ତଦେକଂ ତ୍ରିଲୋକ୍ୟା-
ଶ୍ଚକ୍ଷୁଃ ସାମାନ୍ୟଚକ୍ଷୁର୍ଵିସଦୃଶମଘଭିଦ୍ଭାସ୍ଵତସ୍ତାନ୍ମହୋ ଵଃ ॥ ୨୧ ॥
କ୍ଷ୍ମାଂ କ୍ଷେପୀୟଃ କ୍ଷପାମ୍ଭଃଶିଶିରତରଜଲସ୍ପର୍ଶତର୍ଷାଦୃତେଵ
ଦ୍ରାଗାଶା ନେତୁମାଶାଦ୍ଵିରଦକରସରଃପୁଷ୍କରାଣୀଵ ବୋଧମ୍ ।
ପ୍ରାତଃ ପ୍ରୋଲ୍ଲଙ୍ଘ୍ୟ ଵିଷ୍ଣୋଃ ପଦମପି ଘୃଣୟେଵାତିଵେଗାଦ୍ଦଵୀୟ-
ସ୍ୟୁଦ୍ଦାମ ଦ୍ୟୋତମାନା ଦହତୁ ଦିନପତେର୍ଦୁର୍ନିମିତ୍ତଂ ଦ୍ୟୁତିର୍ଵଃ ॥ ୨୨ ॥
ନୋ କଲ୍ପାପାୟଵାୟୋରଦୟରୟଦଲତ୍କ୍ଷ୍ମାଧରସ୍ୟାପି ଗମ୍ୟା var ଶମ୍ୟା
ଗାଢୋଦ୍ଗୀର୍ଣୋଜ୍ଜ୍ଵଲଶ୍ରୀରହନି ନ ରହିତା ନୋ ତମଃକଜ୍ଜଲେନ ।
ପ୍ରାପ୍ତୋତ୍ପତ୍ତିଃ ପତଙ୍ଗାନ୍ନ ପୁନରୁପଗତା ମୋଷମୁଷ୍ଣତ୍ଵିଷୋ ଵୋ
ଵର୍ତିଃ ସୈଵାନ୍ୟରୂପା ସୁଖୟତୁ ନିଖିଲଦ୍ଵୀପଦୀପସ୍ୟ ଦୀପ୍ତିଃ ॥ ୨୩ ॥
ନିଃଶେଷାଶାଵପୂରପ୍ରଵଣଗୁରୁଗୁଣଶ୍ଲାଘନୀୟସ୍ଵରୂପା
ପର୍ୟାପ୍ତଂ ନୋଦୟାଦୌ ଦିନଗମସମୟୋପପ୍ଲଵେଽପ୍ୟୁନ୍ନତୈଵ ।
ଅତ୍ୟନ୍ତଂ ୟାନଭିଜ୍ଞା କ୍ଷଣମପି ତମସା ସାକମେକତ୍ର ଵସ୍ତୁଂ
ବ୍ରଧ୍ନସ୍ୟେଦ୍ଧା ରୁଚିର୍ଵୋ ରୁଚିରିଵ ରୁଚିତସ୍ୟାପ୍ତୟେ ଵସ୍ତୁନୋସ୍ତୁ ॥ ୨୪ ॥ var ଚିରୁରସ୍ୟ, ରୁଚିରସ୍ୟ
ଵିଭ୍ରାଣଃ ଶକ୍ତିମାଶୁ ପ୍ରଶମିତବଲଵତ୍ତାରକୌର୍ଜିତ୍ୟଗୁର୍ଵୀଂ
କୁର୍ଵାଣୋ ଲୀଲୟାଧଃ ଶିଖିନମପି ଲସଚ୍ଚନ୍ଦ୍ରକାନ୍ତାଵଭାସମ୍ ।
ଆଦଧ୍ୟାଦନ୍ଧକାରେ ରତିମତିଶୟିନୀମାଵହନ୍ଵୀକ୍ଷଣାନାଂ var ଆଦେୟାଦୀକ୍ଷଣାନାଂ
ବାଲୋ ଲକ୍ଷ୍ମୀମପାରାମପର ଇଵ ଗୁହୋଽହର୍ପତେରାତପୋ ଵଃ ॥ ୨୫ ॥
ଜ୍ୟୋତ୍ସ୍ନାଂଶାକର୍ଷପାଣ୍ଡୁଦ୍ୟୁତି ତିମିରମଷୀଶେଷକଲ୍ମାଷମୀଷ-
ଜ୍ଜୃମ୍ଭୋଦ୍ଭୂତେନ ପିଙ୍ଗଂ ସରସିଜରଜସା ସଂଧ୍ୟୟା ଶୋଣଶୋଚିଃ ।
ପ୍ରାତଃପ୍ରାରମ୍ଭକାଲେ ସକଲମପି ଜଗଚ୍ଚିତ୍ରମୁନ୍ମୀଲୟନ୍ତୀ
କାନ୍ତିସ୍ତୀକ୍ଷ୍ଣତ୍ଵିଷୋଽକ୍ଷ୍ଣାଂ ମୁଦମୁପନୟତାତ୍ତୂଲିକେଵାତୁଲାଂ ଵଃ ॥ ୨୬ ॥
ଆୟାନ୍ତୀ କିଂ ସୁମେରୋଃ ସରଣିରରୁଣିତା ପାଦ୍ମରାଗୈଃ ପରାଗୈ-
ରାହୋସ୍ଵିତ୍ସ୍ଵସ୍ୟ ମାହାରଜନଵିରଚିତା ଵୈଜୟନ୍ତୀ ରଥସ୍ୟ ।
ମାଞ୍ଜିଷ୍ଠୀ ପ୍ରଷ୍ଠଵାହାଵଲିଵିଧୁତଶିରଶ୍ଚାମରାଲୀ ନୁ ଲୋକୈ- var ଚାମରାଲୀଵ
ରାଶଙ୍କ୍ୟାଲୋକିତୈଵଂ ସଵିତୁରଘନୁଦେ ସ୍ତାତ୍ପ୍ରଭାତପ୍ରଭା ଵଃ ॥ ୨୭ ॥
ଧ୍ଵାନ୍ତଧ୍ଵଂସଂ ଵିଧତ୍ତେ ନ ତପତି ରୁଚିମନ୍ନାତିରୂପଂ ଵ୍ୟନକ୍ତି
ନ୍ୟକ୍ତ୍ଵଂ ନୀତ୍ଵାପି ନକ୍ତଂ ନ ଵିତରତିତରାଂ ତାଵଦହ୍ନସ୍ତ୍ଵିଷଂ ୟଃ । var ନ୍ୟକ୍ତାମହ୍ନି
ସ ପ୍ରାତର୍ମା ଵିରଂସୀଦସକଲପଟିମା ପୂରୟନ୍ୟୁଷ୍ମଦାଶା-
ମାଶାକାଶାଵକାଶାଵତରଣତରୁଣପ୍ରକ୍ରମୋଽର୍କପ୍ରକାଶଃ ॥ ୨୮ ॥
ତୀଵ୍ରଂ ନିର୍ଵାଣହେତୁର୍ୟଦପି ଚ ଵିପୁଲଂ ୟତ୍ପ୍ରକର୍ଷେଣ ଚାଣୁ
ପ୍ରତ୍ୟକ୍ଷଂ ୟତ୍ପରୋକ୍ଷଂ ୟଦିହ ୟଦପରଂ ନଶ୍ଵରଂ ଶାଶ୍ଵତଂ ଚ ।
ୟତ୍ସର୍ଵସ୍ୟ ପ୍ରସିଦ୍ଧଂ ଜଗତି କତିପୟେ ୟୋଗିନୋ ୟଦ୍ଵିଦନ୍ତି
ଜ୍ୟୋତିସ୍ତଦ୍ଦ୍ଵିପ୍ରକାରଂ ସଵିତୁରଵତୁ ଵୋ ବାହ୍ୟମାଭ୍ୟନ୍ତରଂ ଚ ॥ ୨୯ ॥
ରତ୍ନାନାଂ ମଣ୍ଡନାୟ ପ୍ରଭଵତି ନିୟତୋଦ୍ଦେଶଲବ୍ଧାଵକାଶଂ
ଵହ୍ନେର୍ଦାର୍ଵାଦି ଦଗ୍ଧୁଂ ନିଜଜଡିମତୟା କର୍ତୁମାନନ୍ଦମିନ୍ଦୋଃ ।
ୟଚ୍ଚ ତ୍ରୈଲୋକ୍ୟଭୂଷାଵିଧିରଘଦହନଂ ହ୍ଲାଦି ଵୃଷ୍ଟ୍ୟାଶୁ ତଦ୍ଵୋ var ୟତ୍ତୁ
ବାହୁଲ୍ୟୋତ୍ପାଦ୍ୟକାର୍ୟାଧିକତରମଵତାଦେକମେଵାର୍କତେଜଃ ॥ ୩୦ ॥
ମୀଲଚ୍ଚକ୍ଷୁର୍ଵିଜିହ୍ମଶ୍ରୁତି ଜଡରସନଂ ନିଘ୍ନିତଘ୍ରାଣଵୃତ୍ତି
ସ୍ଵଵ୍ୟାପାରାକ୍ଷମତ୍ଵକ୍ପରିମୁଷିତମନଃ ଶ୍ଵାସମାତ୍ରାଵଶେଷମ୍ ।
ଵିସ୍ରସ୍ତାଙ୍ଗଂ ପତିତ୍ଵା ସ୍ଵପଦପହରତାଦଶ୍ରିୟଂ ଵୋଽର୍କଜନ୍ମା var ଅପ୍ରିୟଂ
କାଲଵ୍ୟାଲାଵଲୀଢଂ ଜଗଦଗଦ ଇଵୋତ୍ଥାପୟନ୍ପ୍ରାକ୍ପ୍ରତାପଃ ॥ ୩୧ ॥
ନିଃଶେଷଂ ନୈଶମମ୍ଭଃ ପ୍ରସଭମପନୁଦନ୍ନଶ୍ରୁଲେଶାନୁକାରି
ସ୍ତୋକସ୍ତୋକାପନୀତାରୁଣରୁଚିରଚିରାଦସ୍ତଦୋଷାନୁଷଙ୍ଗଃ ।
ଦାତା ଦୃଷ୍ଟିଂ ପ୍ରସନ୍ନାଂ ତ୍ରିଭୁଵନନୟନସ୍ୟାଶୁ ୟୁଷ୍ମଦ୍ଵିରୁଦ୍ଧଂ
ଵଧ୍ୟାଦ୍ବ୍ରଧ୍ନସ୍ୟ ସିଦ୍ଧାଞ୍ଜନଵିଧିରପରଃ ପ୍ରାକ୍ତନୋଽର୍ଚିଃପ୍ରଚାରଃ ॥ ୩୨ ॥
ଭୂତ୍ଵା ଜମ୍ଭସ୍ୟ ଭେତ୍ତୁଃ କକୁଭି ପରିଭଵାରମ୍ଭଭୂଃ ଶୁଭ୍ରଭାନୋ- var ସ୍ଥିତ୍ଵା
ର୍ବିଭ୍ରାଣା ବଭ୍ରୁଭାଵଂ ପ୍ରସଭମଭିନଵାମ୍ଭୋଜଜୃମ୍ଭାପ୍ରଗଲ୍ଭା ।
ଭୂଷା ଭୂୟିଷ୍ଠଶୋଭା ତ୍ରିଭୁଵନଭଵନସ୍ୟାସ୍ୟ ଵୈଭାକରୀ ପ୍ରାଗ୍-
ଵିଭ୍ରାନ୍ତା ଭ୍ରାଜମାନା ଵିଭଵତୁ ଵିଭଵୋଦ୍ଭୂତୟେ ସା ଵିଭା ଵଃ ॥ ୩୩ ॥ var ନିର୍ଭାନ୍ତି, ଵିଭ୍ରାନ୍ତି
ସଂସକ୍ତଂ ସିକ୍ତମୂଲାଦଭିନଵଭୁଵନୋଦ୍ୟାନକୌତୂହଲିନ୍ୟା
ୟାମିନ୍ୟା କନ୍ୟୟେଵାମୃତକରକଲଶାଵର୍ଜିତେନାମୃତେନ ।
ଅର୍କାଲୋକଃ କ୍ରିୟାଦ୍ଵୋ ମୁଦମୁଦୟଶିରଶ୍ଚକ୍ରଵାଲାଲଵାଲା-
ଦୁଦ୍ୟନ୍ବାଲପ୍ରଵାଲପ୍ରତିମରୁଚିରହଃପାଦପପ୍ରାକ୍ପ୍ରରୋହଃ ॥ ୩୪ ॥
ଭିନ୍ନଂ ଭାସାରୁଣସ୍ୟ କ୍ଵଚିଦଭିନଵୟା ଵିଦ୍ରୁମାଣାଂ ତ୍ଵିଷେଵ
ତ୍ଵଙ୍ନ୍ନକ୍ଷତ୍ରରତ୍ନଦ୍ୟୁତିନିକରକରାଲାନ୍ତରାଲଂ କ୍ଵଚିଚ୍ଚ ।
ନାନ୍ତର୍ନିଃଶେଷକୃଷ୍ଣଶ୍ରିୟମୁଦଧିମିଵ ଧ୍ଵାନ୍ତରାଶିଂ ପିବନ୍ସ୍ତା-
ଦୌର୍ଵଃ ପୂର୍ଵୋଽପ୍ୟପୂର୍ଵୋଽଗ୍ନିରିଵ ଭଵଦଘପ୍ଲୁଷ୍ଟୟେଽର୍କାଵଭାସଃ ॥ ୩୫ ॥
ଗନ୍ଧର୍ଵୈର୍ଗଦ୍ୟପଦ୍ୟଵ୍ୟତିକରିତଵଚୋହୃଦ୍ୟମାତୋଦ୍ୟଵାଦ୍ୟୈ-
ରାଦ୍ୟୈର୍ୟୋ ନାରଦାଦ୍ୟୈର୍ମୁନିଭିରଭିନୁତୋ ଵେଦଵେଦ୍ୟୈର୍ଵିଭିଦ୍ୟ ।
var ଵୀତଵେଦ୍ୟୈର୍ଵିଵିଦ୍ୟ, ଵେଦଵିଦ୍ଭିର୍ଵିଭିଦ୍ୟ
ଆସାଦ୍ୟାପଦ୍ୟତେ ୟଂ ପୁନରପି ଚ ଜଗଦ୍ୟୌଵନଂ ସଦ୍ୟ ଉଦ୍ୟ-
ନ୍ନୁଦ୍ଦ୍ୟୋତୋ ଦ୍ୟୋତିତଦ୍ୟୌର୍ଦ୍ୟତୁ ଦିଵସକୃତୋଽସାଵଵଦ୍ୟାନି ଵୋଽଦ୍ୟ ॥ ୩୬ ॥
ଆଵାନୈଶ୍ଚନ୍ଦ୍ରକାନ୍ତୈଶ୍ଚ୍ୟୁତତିମିରତୟା ତାନଵାତ୍ତାରକାଣା- var ଆଵାନ୍ତୈଃ
ମେଣାଙ୍କାଲୋକଲୋପାଦୁପହତମହସାମୋଷଧୀନାଂ ଲୟେନ ।
ଆରାଦୁତ୍ପ୍ରେକ୍ଷ୍ୟମାଣା କ୍ଷଣମୁଦୟତଟାନ୍ତର୍ହିତସ୍ୟାହିମାଂଶୋ-
ରାଭା ପ୍ରାଭାତିକୀ ଵୋଽଵତୁ ନ ତୁ ନିତରାଂ ତାଵଦାଵିର୍ଭଵନ୍ତୀ ॥ ୩୭ ॥
ସାନୌ ସା ନୌଦୟେ ନାରୁଣିତଦଲପୁନର୍ୟୌଵନାନାଂ ଵନାନା- var ଲସଦ୍ୟୌଵନାନାଂ
ମାଲୀମାଲୀଢପୂର୍ଵା ପରିହୃତକୁହରୋପାନ୍ତନିମ୍ନା ତନିମ୍ନା ।
ଭା ଵୋଽଭାଵୋପଶାନ୍ତିଂ ଦିଶତୁ ଦିନପତେର୍ଭାସମାନା ସମାନା-
ରାଜୀ ରାଜୀଵରେଣୋଃ ସମସମୟମୁଦେତୀଵ ୟସ୍ୟା ଵୟସ୍ୟା ॥ ୩୮ ॥
ଉଜ୍ଜୃମ୍ଭାମ୍ଭୋରୁହାଣାଂ ପ୍ରଭଵତି ପୟସାଂ ୟା ଶ୍ରିୟେ ନୋଷ୍ଣତାୟୈ
ପୁଷ୍ଣାତ୍ୟାଲୋକମାତ୍ରଂ ନ ତୁ ଦିଶତି ଦୃଶାଂ ଦୃଶ୍ୟମାନା ଵିଧାତମ୍ ।
ପୂର୍ଵାଦ୍ରେରେଵ ପୂର୍ଵଂ ଦିଵମନୁ ଚ ପୁନଃ ପାଵନୀ ଦିଙ୍ମୁଖାନା- var ତତଃ
ମେନାଂସ୍ୟୈନୀ ଵିଭାସୌ ନୁଦତୁ ନୁତିପଦୈକାସ୍ପଦଂ ପ୍ରାକ୍ତନୀ ଵଃ ॥ ୩୯ ॥
ଵାଚାଂ ଵାଚସ୍ପତେରପ୍ୟଚଲଭିଦୁଚିତାଚାର୍ୟକାଣାଂ ପ୍ରପଞ୍ଚୈ-
ର୍ଵୈରଞ୍ଚାନାଂ ତଥୋଚ୍ଚାରିତଚତୁରଋଚାଂ ଚାନନାନାଂ ଚତୁର୍ଣାମ୍ । var ରୁଚିର
ଉଚ୍ୟେତାର୍ଚାସୁ ଵାଚ୍ୟଚ୍ୟୁତିଶୁଚିଚରିତଂ ୟସ୍ୟ ନୋଚ୍ଚୈର୍ଵିଵିଚ୍ୟ var ଅର୍ଚାସ୍ଵଵାଚ୍ୟ
ପ୍ରାଚ୍ୟଂ ଵର୍ଚଶ୍ଚକାସଚ୍ଚିରମୁପଚିନୁତାତ୍ତସ୍ୟ ଚଣ୍ଡାର୍ଚିଷୋ ଵଃ ॥ ୪୦ ॥ var ଶ୍ରିୟଂ
ମୂର୍ଧ୍ନ୍ୟଦ୍ରେର୍ଧାତୁରାଗସ୍ତରୁଷୁ କିସଲୟୋ ଵିଦ୍ରୁମୌଘଃ ସମୁଦ୍ରେ
var – କିସଲୟାଦ୍ଵିଦ୍ରୁମୌଘାତ୍ସମୁଦ୍ରେ
ଦିଙ୍ମାତଙ୍ଗୋତ୍ତମାଙ୍ଗେଷ୍ଵଭିନଵନିହିତଃ ସାନ୍ଦ୍ରସିନ୍ଦୂରରେଣୁଃ ।
var ଵିହିତଃ, ନିହିତାତ୍ସନ୍ଦ୍ରସିନ୍ଦୂରର୍Eଣୋଃ
ସୀମ୍ନି ଵ୍ୟୋମ୍ନଶ୍ଚ ହେମ୍ନଃ ସୁରଶିଖରିଭୁଵୋ ଜାୟତେ ୟଃ ପ୍ରକାଶଃ
ଶୋଣିମ୍ନାସୌ ଖରାଂଶୋରୁଷସି ଦିଶତୁ ଵଃ ଶର୍ମ ଶୋଭୈକଦେଶଃ ॥ ୪୧ ॥
ଅସ୍ତାଦ୍ରୀଶୋତ୍ତମାଙ୍ଗେ ଶ୍ରିତଶଶିନି ତମଃକାଲକୂଟେ ନିପୀତେ
ୟାତି ଵ୍ୟକ୍ତିଂ ପୁରସ୍ତାଦରୁଣକିସଲୟେ ପ୍ରତ୍ୟୁଷଃପାରିଜାତେ ।
ଉଦ୍ୟନ୍ତ୍ୟାରକ୍ତପୀତାମ୍ବରଵିଶଦତରୋଦ୍ଵୀକ୍ଷିତା ତୀକ୍ଷ୍ଣଭାନୋ-
var ରୁଚିରତରୋଦ୍ଵୀକ୍ଷିତା var ତୀଵ୍ରଭାସଃ
ର୍ଲକ୍ଷ୍ମୀର୍ଲକ୍ଷ୍ମୀରିଵାସ୍ତୁ ସ୍ଫୁଟକମଲପୁଟାପାଶ୍ରୟା ଶ୍ରେୟସେ ଵଃ ॥ ୪୨ ॥ var ପୁଟୋପାଶ୍ରୟ
ନୋଦନ୍ଵାଞ୍ଜନ୍ମଭୂମିର୍ନ ତଦୁଦରଭୁଵୋ ବାନ୍ଧଵାଃ କୌସ୍ତୁଭାଦ୍ୟା
ୟସ୍ୟାଃ ପଦ୍ମଂ ନ ପାଣୌ ନ ଚ ନରକରିପୂରଃସ୍ଥଲୀ ଵାସଵେଶ୍ମ ।
ତେଜୋରୂପାପରୈଵ ତ୍ରିଷୁ ଭୁଵନତଲେଷ୍ଵାଦଧାନା ଵ୍ୟଵସ୍ଥାଂ var ତ୍ରିଭୁଵନଭଵନେ
ସା ଶ୍ରୀଃ ଶ୍ରେୟାଂସି ଦିଶ୍ୟାଦଶିଶିରମହସୋ ମଣ୍ଡଲାଗ୍ରୋଦ୍ଗତା ଵଃ ॥ ୪୩ ॥
॥ ଇତି ଦ୍ୟୁତିଵର୍ଣନମ୍ ॥ var ତେଜୋଵର୍ଣନମ୍
॥ ଅଥ ଅଶ୍ଵଵର୍ଣନମ୍ ॥
ରକ୍ଷନ୍ତ୍ଵକ୍ଷୁଣ୍ଣହେମୋପଲପଟଲମଲଂ ଲାଘଵାଦୁତ୍ପତନ୍ତଃ
ପାତଙ୍ଗାଃ ପଙ୍ଗ୍ଵଵଜ୍ଞାଜିତପଵନଜଵା ଵାଜିନସ୍ତେ ଜଗନ୍ତି ।
ୟେଷାଂ ଵୀତାନ୍ୟଚିହ୍ନୋନ୍ନୟମପି ଵହତାଂ ମାର୍ଗମାଖ୍ୟାତି ମେରା-
ଵୁଦ୍ୟନ୍ନୁଦ୍ଦାମଦୀପ୍ତିର୍ଦ୍ୟୁମଣିମଣିଶିଲାଵେଦିକାଜାତଵେଦାଃ ॥ ୪୪ ॥
ପ୍ଲୁଷ୍ଟାଃ ପୃଷ୍ଠେଂଽଶୁପାତୈରତିନିକଟତୟା ଦତ୍ତଦାହାତିରେକୈ-
ରେକାହାକ୍ରାନ୍ତକୃତ୍ସ୍ନତ୍ରିଦିଵପଥପୃଥୁଶ୍ଵାସଶୋଷାଃ ଶ୍ରମେଣ ।
ତୀଵ୍ରୋଦନ୍ୟାସ୍ତ୍ଵରନ୍ତାମହିତଵିହତୟେ ସପ୍ତୟଃ ସପ୍ତସପ୍ତେ-
ରଭ୍ୟାଶାକାଶଗଙ୍ଗାଜଲସରଲଗଲାଵାଙ୍ନତାଗ୍ରାନନା ଵଃ ॥ ୪୫ ॥ var ଗଲଵର୍ଜିତାଗ୍ରାନନାଃ
ମତ୍ଵାନ୍ୟାନ୍ପାର୍ଶ୍ଵତୋଽଶ୍ଵାନ୍ ସ୍ଫଟିକତଟଦୃଷଦ୍ଦୃଷ୍ଟଦେହା ଦ୍ରଵନ୍ତୀ
ଵ୍ୟସ୍ତେଽହନ୍ୟସ୍ତସଂଧ୍ୟେୟମିତି ମୃଦୁପଦା ପଦ୍ମରାଗୋପଲେଷୁ ।
ସାଦୃଶ୍ୟାଦୃଶ୍ୟମୂର୍ତିର୍ମରକତକଟକେ କ୍ଲିଷ୍ଟସୂତା ସୁମେରୋ-
ର୍ମୂର୍ଧନ୍ୟାଵୃତ୍ତିଲବ୍ଧଧ୍ରୁଵଗତିରଵତୁ ବ୍ରଧ୍ନଵାହାଵଲିର୍ଵଃ ॥ ୪୬ ॥ var ଦ୍ରୁତ
ହେଲାଲୋଲଂ ଵହନ୍ତୀ ଵିଷଧରଦମନସ୍ୟାଗ୍ରଜେନାଵକୃଷ୍ଟା
ସ୍ଵର୍ଵାହିନ୍ୟାଃ ସୁଦୂରଂ ଜନିତଜଵଜୟା ସ୍ୟନ୍ଦନସ୍ୟ ସ୍ୟଦେନ ।
ନିର୍ଵ୍ୟାଜଂ ତାୟମାନେ ହରିତିମନି ନିଜେ ସ୍ଫୀତଫେନାହିତଶ୍ରୀ- var ସ୍ଫୀତଫେନାସ୍ମିତଶ୍ରୀଃ
ରଶ୍ରେୟାଂସ୍ୟଶ୍ଵପଙ୍କ୍ତିଃ ଶମୟତୁ ୟମୁନେଵାପରା ତାପନୀ ଵଃ ॥ ୪୭ ॥
ମାର୍ଗୋପାନ୍ତେ ସୁମେରୋର୍ନୁଵତି କୃତନତୌ ନାକଧାମ୍ନାଂ ନିକାୟେ
ଵୀକ୍ଷ୍ୟ ଵ୍ରୀଡାନତାନାଂ ପ୍ରତିକୁହରମୁଖଂ କିଂନରୀଣାଂ ମୁଖାନି ।
ସୂତେଽସୂୟତ୍ୟପୀଷଜ୍ଜଡଗତି ଵହତାଂ କଂଧରାର୍ଧୈର୍ଵଲଦ୍ଭି- var କଂଧରାଗ୍ରୈଃ
ର୍ଵାହାନାଂ ଵ୍ୟସ୍ୟତାଦ୍ଵଃ ସମମସମହରେର୍ହେଷିତଂ କଲ୍ମଷାଣି ॥ ୪୮ ॥
ଧୁନ୍ଵନ୍ତୋ ନୀରଦାଲୀର୍ନିଜରୁଚିହରିତାଃ ପାର୍ଶ୍ଵୟୋଃ ପକ୍ଷତୁଲ୍ୟା-
ସ୍ତାଲୂତ୍ତାନୈଃ ଖଲୀନୈଃ ଖଚିତମୁଖରୁଚଶ୍ଚ୍ୟୋତତା ଲୋହିତେନ ।
ଉଡ୍ଡୀୟେଵ ଵ୍ରଜନ୍ତୋ ଵିୟତି ଗତିଵଶାଦର୍କଵାହାଃ କ୍ରିୟାସୁଃ
କ୍ଷେମଂ ହେମାଦ୍ରିହୃଦ୍ୟଦ୍ରୁମଶିଖରଶିରଃଶ୍ରେଣିଶାଖାଶୁକା ଵଃ ॥ ୪୯ ॥
॥ ଇତ୍ୟଶ୍ଵଵର୍ଣନମ୍ ॥
॥ ଅଥ ଅରୁଣଵର୍ଣନମ୍ ॥
ପ୍ରାତଃ ଶୈଲାଗ୍ରରଙ୍ଗେ ରଜନିଜଵନିକାପାୟସଂଲକ୍ଷ୍ୟଲକ୍ଷ୍ମୀ-
ର୍ଵିକ୍ଷିପ୍ତାପୂର୍ଵପୁଷ୍ପାଞ୍ଜଲିମୁଡୁନିକରଂ ସୂତ୍ରଧାରାୟମାଣଃ ।
ୟାମେଷ୍ଵଙ୍କେଷ୍ଵିଵାହ୍ନଃ କୃତରୁଚିଷୁ ଚତୁର୍ଷ୍ଵେଵ ଜାତପ୍ରତିଷ୍ଠା- var ୟାତଃ ପ୍ରତିଷ୍ଠାଂ
ମଵ୍ୟାତ୍ପ୍ରସ୍ତାଵୟନ୍ଵୋ ଜଗଦଟନମହାନାଟିକାଂ ସୂର୍ୟସୂତଃ ॥ ୫୦ ॥
ଆକ୍ରାନ୍ତ୍ୟା ଵାହ୍ୟମାନଂ ପଶୁମିଵ ହରିଣା ଵାହକୋଽଗ୍ର୍ୟୋ ହରୀଣାଂ
ଭ୍ରାମ୍ୟନ୍ତଂ ପକ୍ଷପାତାଜ୍ଜଗତି ସମରୁଚିଃ ସର୍ଵକର୍ମୈକସାକ୍ଷୀ ।
ଶତ୍ରୁଂ ନେତ୍ରଶ୍ରୁତୀନାମଵଜୟତି ଵୟୋଜ୍ୟେଷ୍ଠଭାଵେ ସମେଽପି
ସ୍ଥାମ୍ନାଂ ଧାମ୍ନାଂ ନିଧିର୍ୟଃ ସ ଭଵଦଘନୁଦେ ନୂତନଃ ସ୍ତାଦନୂରୁଃ ॥ ୫୧ ॥
ଦତ୍ତାର୍ଘୈର୍ଦୂରନମ୍ରୈର୍ଵିୟତି ଵିନୟତୋ ଵୀକ୍ଷିତଃ ସିଦ୍ଧସାର୍ଥୈଃ var ସିଦ୍ଧସାଧ୍ୟୈଃ
ସାନାଥ୍ୟଂ ସାରଥିର୍ଵଃ ସ ଦଶଶତରୁଚେଃ ସାତିରେକଂ କରୋତୁ ।
ଆପୀୟ ପ୍ରାତରେଵ ପ୍ରତତହିମପୟଃସ୍ୟନ୍ଦିନୀରିନ୍ଦୁଭାସୋ
ୟଃ କାଷ୍ଠାଦୀପନୋଽଗ୍ରେ ଜଡିତ ଇଵ ଭୃଶଂ ସେଵତେ ପୃଷ୍ଠତୋଽର୍କମ୍ ॥ ୫୨ ॥
ମୁଞ୍ଚନ୍ରଶ୍ମୀନ୍ଦିନାଦୌ ଦିନଗମସମୟେ ସଂହରଂଶ୍ଚ ସ୍ଵତନ୍ତ୍ର-
ସ୍ତୋତ୍ରପ୍ରଖ୍ୟାତଵୀର୍ୟୋଽଵିରତହରିପଦାକ୍ରାନ୍ତିବଦ୍ଧାଭିୟୋଗଃ । var ଵିତତ
କାଲୋତ୍କର୍ଷାଲ୍ଲଘୁତ୍ଵଂ ପ୍ରସଭମଧିପତୌ ୟୋଜୟନ୍ୟୋ ଦ୍ଵିଜାନାଂ
ସେଵାପ୍ରୀତେନ ପୂଷ୍ଣାତ୍ମସମ ଇଵ କୃତସ୍ତ୍ରାୟତାଂ ସୋଽରୁଣୋ ଵଃ ॥ ୫୩ ॥ var ସ୍ଵସମ
ଶାତଃ ଶ୍ୟାମାଲତାୟାଃ ପରଶୁରିଵ ତମୋଽରଣ୍ୟଵହ୍ନେରିଵାର୍ଚିଃ var ଦାହେ ଦଵାଭଃ
ପ୍ରାଚ୍ୟେଵାଗ୍ରେ ଗ୍ରହୀତୁଂ ଗ୍ରହକୁମୁଦଵନଂ ପ୍ରାଗୁଦସ୍ତୋଽଗ୍ରହସ୍ତଃ ।
var ପ୍ରାଚୀଵାଗ୍ରେ, ଗ୍ରହକୁମୁଦରୁଚିଂ
ଐକ୍ୟଂ ଭିନ୍ଦନ୍ଦ୍ୟୁଭୂମ୍ୟୋରଵଧିରିଵ ଵିଧାତେଵ ଵିଶ୍ଵପ୍ରବୋଧେ
ଵାହାନାଂ ଵୋ ଵିନେତା ଵ୍ୟପନୟତୁ ଵିପନ୍ନାମ ଧାମାଧିପସ୍ୟ ॥ ୫୪ ॥
ପୌରସ୍ତ୍ୟସ୍ତୋୟଦର୍ତୋଃ ପଵନ ଇଵ ପତତ୍ପାଵକସ୍ୟେଵ ଧୂମୋ var ପତନ୍
ଵିଶ୍ଵସ୍ୟେଵାଦିସର୍ଗଃ ପ୍ରଣଵ ଇଵ ପରଂ ପାଵନୋ ଵେଦରାଶେଃ
ସଂଧ୍ୟାନୃତ୍ୟୋତ୍ସଵେଚ୍ଛୋରିଵ ମଦନରିପୋର୍ନନ୍ଦିନାନ୍ଦୀନିନାଦଃ
ସୌରସ୍ୟାଗ୍ରେ ସୁଖଂ ଵୋ ଵିତରତୁ ଵିନତାନନ୍ଦନଃ ସ୍ୟନ୍ଦନସ୍ୟ ॥ ୫୫ ॥ var ସ୍ୟନ୍ଦନୋ ଵଃ
ପର୍ୟାପ୍ତଂ ତପ୍ତଚାମୀକରକଟକତଟେ ଶ୍ଲିଷ୍ଟଶୀତେତରାଂଶା-
ଵାସୀଦତ୍ସ୍ୟନ୍ଦନାଶ୍ଵାନୁକୃତିମରକତେ ପଦ୍ମରାଗାୟମାଣଃ । var ଅଶ୍ଵାନୁକୃତମରକତେ
ୟଃ ସୋତ୍କର୍ଷାଂ ଵିଭୂଷାଂ କୁରୁତ ଇଵ କୁଲକ୍ଷ୍ମାଭୃଦୀଶସ୍ୟ ମେରୋ-
ରେନାଂସ୍ୟହ୍ନାୟ ଦୂରଂ ଗମୟତୁ ସ ଗୁରୁଃ କାଦ୍ରଵେୟଦ୍ଵିଷୋ ଵଃ ॥ ୫୬ ॥
ନୀତ୍ଵାଶ୍ଵାନ୍ସପ୍ତ କକ୍ଷା ଇଵ ନିୟମଵଶଂ ଵେତ୍ରକଲ୍ପପ୍ରତୋଦ- var କକ୍ଷ୍ୟା
ସ୍ତୂର୍ଣଂ ଧ୍ଵାନ୍ତସ୍ୟ ରାଶାଵିତରଜନ ଇଵୋତ୍ସାରିତେ ଦୂରଭାଜି ।
ପୂର୍ଵଂ ପ୍ରଷ୍ଠୋ ରଥସ୍ୟ କ୍ଷିତିଭୃଦଧିପତୀନ୍ଦର୍ଶୟଂସ୍ତ୍ରାୟତାଂ ଵ-
ସ୍ତ୍ରୈଲୋକ୍ୟାସ୍ଥାନଦାନୋଦ୍ୟତଦିଵସପତେଃ ପ୍ରାକ୍ପ୍ରତୀହାରପାଲଃ ॥ ୫୭ ॥
ଵଜ୍ରିଞ୍ଜାତଂ ଵିକାସୀକ୍ଷଣକମଲଵନଂ ଭାସି ନାଭାସି ଵହ୍ନେ! var ନୋ ଭାସି
ତାତଂ ନତ୍ଵାଶ୍ଵପାର୍ଶ୍ଵାନ୍ନୟ ୟମ! ମହିଷଂ ରାକ୍ଷସା ଵୀକ୍ଷିତାଃ ସ୍ଥ ।
ସପ୍ତୀନ୍ସିଞ୍ଚ ପ୍ରଚେତଃ! ପଵନ! ଭଜ ଜଵଂ ଵିତ୍ତପାଵେଦିତସ୍ତ୍ଵଂ
ଵନ୍ଦେ ଶର୍ଵେତି ଜଲ୍ପନ୍ପ୍ରତିଦିଶମଧିପାନ୍ପାତୁ ପୂଷ୍ଣୋଽଗ୍ରଣୀର୍ଵଃ ॥ ୫୮ ॥
ପାଶାନାଶାନ୍ତପାଲାଦରୁଣ ଵରୁଣତୋ ମା ଗ୍ରହୀଃ ପ୍ରଗ୍ରହାର୍ଥଂ
ତୃଷ୍ଣାଂ କୃଷ୍ଣସ୍ୟ ଚକ୍ରେ ଜହିହି ନହି ରଥୋ ୟାତି ମେ ନୈକଚକ୍ରଃ ।
ୟୋକ୍ତୁଂ ୟୁଗ୍ୟଂ କିମୁଚ୍ଚୈଃଶ୍ରଵସମଭିଲଷସ୍ୟଷ୍ଟମଂ ଵୃତ୍ରଶତ୍ରୋ- var ତ୍ଵାଷ୍ଟ୍ରଶତ୍ରୋଃ
ସ୍ତ୍ୟକ୍ତାନ୍ୟାପେକ୍ଷଵିଶ୍ଵୋପକୃତିରିଵ ରଵିଃ ଶାସ୍ତି ୟଂ ସୋଽଵତାଦ୍ଵଃ ॥ ୫୯ ॥
ନୋ ମୂର୍ଚ୍ଛାଚ୍ଛିନ୍ନଵାଞ୍ଛଃ ଶ୍ରମଵିଵଶଵପୁର୍ନୈଵ ନାପ୍ୟାସ୍ୟଶୋଷୀ
ପାନ୍ଥଃ ପଥ୍ୟେତରାଣି କ୍ଷପୟତୁ ଭଵତାଂ ଭାସ୍ଵତୋଽଗ୍ରେସରଃ ସଃ ।
ୟଃ ସଂଶ୍ରିତ୍ୟ ତ୍ରିଲୋକୀମଟତି ପଟୁତରୈସ୍ତାପ୍ୟମାନୋ ମୟୂଖୈ-
ରାରାଦାରାମଲେଖାମିଵ ହରିତମଣିଶ୍ୟାମଲାମଶ୍ଵପଙ୍କ୍ତିମ୍ ॥ ୬୦ ॥ var ହରିତତୃଣ
ସୀଦନ୍ତୋଽନ୍ତର୍ନିମଜ୍ଜଜ୍ଜଡଖୁରମୁସଲାଃ ସୈକତେ ନାକନଦ୍ୟାଃ
ସ୍କନ୍ଦନ୍ତଃ କନ୍ଦରାଲୀଃ କନକଶିଖରିଣୋ ମେଖଲାସୁ ସ୍ଖଲନ୍ତଃ ।
ଦୂରଂ ଦୂର୍ଵାସ୍ଥଲୋତ୍କା ମରକତଦୃଷଦି ସ୍ଥାସ୍ନଵୋ ୟନ୍ନ ୟାତାଃ
ପୂଷ୍ଣୋଽଶ୍ଵାଃ ପୂରୟଂସ୍ତୈସ୍ତଦଵତୁ ଜଵନୈର୍ହୁଂକୃତେନାଗ୍ରଗୋ ଵଃ ॥ ୬୧ ॥ var ପ୍ରେରୟନ୍ ହୁଂକୃତୈରଗ୍ରଣୀଃ
॥ ଇତ୍ୟରୁଣଵର୍ଣନମ୍ ॥ var ସୂତଵର୍ଣନମ୍
॥ ଅଥ ରଥଵର୍ଣନମ୍ ॥
ପୀନୋରଃପ୍ରେରିତାଭ୍ରୈଶ୍ଚରମଖୁରପୁଟାଗ୍ରସ୍ଥିତୈଃ ପ୍ରାତରଦ୍ରା-
ଵାଦୀର୍ଘାଙ୍ଗୈରୁଦସ୍ତୋ ହରିଭିରପଗତାସଙ୍ଗନିଃଶବ୍ଦଚକ୍ରଃ ।
ଉତ୍ତାନାନୂରୁମୂର୍ଧାଵନତିହଠଭଵଦ୍ଵିପ୍ରତୀପପ୍ରଣାମଃ
ପ୍ରାହ୍ଣେ ଶ୍ରେୟୋ ଵିଧତ୍ତାଂ ସଵିତୁରଵତରନ୍ଵ୍ୟୋମଵୀଥୀଂ ରଥୋ ଵଃ ॥ ୬୨ ॥ var ପ୍ରେୟୋ
ଧ୍ଵାନ୍ତୌଘଧ୍ଵଂସଦୀକ୍ଷାଵିଧିପଟୁ ଵହତା ପ୍ରାକ୍ସହସ୍ରଂ କରାଣା- var ଵିଧିଗୁରୁ ଦ୍ରାକ୍ସହସ୍ରଂ
ମର୍ୟମ୍ଣା ୟୋ ଗରିମ୍ଣଃ ପଦମତୁଲମୁପାନୀୟତାଧ୍ୟାସନେନ ।
ସ ଶ୍ରାନ୍ତାନାଂ ନିତାନ୍ତଂ ଭରମିଵ ମରୁତାମକ୍ଷମାଣାଂ ଵିସୋଢୁଂ
ସ୍କନ୍ଧାତ୍ସ୍କନ୍ଧଂ ଵ୍ରଜନ୍ଵୋ ଵୃଜିନଵିଜିତୟେ ଭାସ୍ଵତଃ ସ୍ୟନ୍ଦନୋଽସ୍ତୁ ॥ ୬୩ ॥
ୟୋକ୍ତ୍ରୀଭୂତାନ୍ୟୁଗସ୍ୟ ଗ୍ରସିତୁମିଵ ପୁରୋ ଦନ୍ଦଶୂକାନ୍ଦଧାନୋ
ଦ୍ଵେଧାଵ୍ୟସ୍ତାମ୍ବୁଵାହାଵଲିଵିହିତବୃହତ୍ପକ୍ଷଵିକ୍ଷେପଶୋଭଃ ।
ସାଵିତ୍ରଃ ସ୍ୟନ୍ଦନୋଽସୌ ନିରତିଶୟରୟପ୍ରୀଣିତାନୂରୁରେନଃ-
କ୍ଷେପୀୟୋ ଵୋ ଗରୁତ୍ମାନିଵ ହରତୁ ହରୀଚ୍ଛାଵିଧେୟପ୍ରଚାରଃ ॥ ୬୪ ॥
ଏକାହେନୈଵ ଦୀର୍ଘାଂ ତ୍ରିଭୁଵନପଦଵୀଂ ଲଙ୍ଘୟନ୍ ୟୋ ଲଘିଷ୍ଠଃ var କୃସ୍ତ୍ନାଂ
ପୃଷ୍ଠେ ମେରୋର୍ଗରୀୟାନ୍ ଦଲିତମଣିଦୃଷତ୍ତ୍ଵିଂଷି ପିଂଷଞ୍ଶିରାଂସି ।
ସର୍ଵସ୍ୟୈଵୋପରିଷ୍ଟାଦଥ ଚ ପୁନରଧସ୍ତାଦିଵାସ୍ତାଦ୍ରିମୂର୍ନ୍ଧି
ବ୍ରଧ୍ନସ୍ୟାଵ୍ୟାତ୍ସ ଏଵଂ ଦୁରଧିଗମପରିସ୍ପନ୍ଦନଃ ସ୍ୟନ୍ଦନୋ ଵଃ ॥ ୬୫ ॥
ଧୂର୍ଧ୍ଵସ୍ତାଗ୍ର୍ୟଗ୍ରହାଣି ଧ୍ଵଜପଟପଵନାନ୍ଦୋଲିତେନ୍ଦୂନି ଦୂରଂ var ଦୂରାତ୍
ରାହୌ ଗ୍ରାସାଭିଲାଷାଦନୁସରତି ପୁନର୍ଦତ୍ତଚକ୍ରଵ୍ୟଥାନି ।
ଶ୍ରାନ୍ତାଶ୍ଵଶ୍ଵାସହେଲାଧୁତଵିବୁଧଧୁନୀନିର୍ଝରାମ୍ଭାଂସି ଭଦ୍ରଂ
ଦେୟାସୁର୍ଵୋ ଦଵୀୟୋ ଦିଵି ଦିଵସପତେଃ ସ୍ୟନ୍ଦନପ୍ରସ୍ଥିତାନି ॥ ୬୬ ॥
ଅକ୍ଷେ ରକ୍ଷାଂ ନିବଧ୍ୟ ପ୍ରତିସରଵଲୟୈର୍ୟୋଜୟନ୍ତ୍ୟୋ ୟୁଗାଗ୍ରଂ
ଧୂଃସ୍ତମ୍ଭେ ଦଗ୍ଧଧୂପାଃ ପ୍ରହିତସୁମନସୋ ଗୋଚରେ କୂବରସ୍ୟ ।
ଚର୍ଚାଶ୍ଚକ୍ରେ ଚରନ୍ତ୍ୟୋ ମଲୟଜପୟସା ସିଦ୍ଧଵଧ୍ଵସ୍ତ୍ରିସଂଧ୍ୟଂ var ଚର୍ଚାଂ
ଵନ୍ଦନ୍ତେ ୟଂ ଦ୍ୟୁମାର୍ଗେ ସ ନୁଦତୁ ଦୁରିତାନ୍ୟଂଶୁମତ୍ସ୍ୟନ୍ଦନୋ ଵଃ ॥ ୬୭ ॥
ଉତ୍କୀର୍ଣସ୍ଵର୍ଣରେଣୁଦ୍ରୁତଖୁରଦଲିତା ପାର୍ଶ୍ଵୟୋଃ ଶଶ୍ଵଦଶ୍ଵୈ- var ରେଣୁର୍ଦ୍ରୁତ
ରଶ୍ରାନ୍ତଭ୍ରାନ୍ତଚକ୍ରକ୍ରମନିଖିଲମିଲନ୍ନେମିନିମ୍ନା ଭରେଣ ।
ମେରୋର୍ମୂର୍ଧନ୍ୟଘଂ ଵୋ ଵିଘଟୟତୁ ରଵେରେକଵୀଥୀ ରଥସ୍ୟ
ସ୍ଵୋଷ୍ମୋଦକ୍ତାମ୍ବୁରିକ୍ତପ୍ରକଟିତପୁଲିନୋଦ୍ଧୂସରା ସ୍ଵର୍ଧୁନୀଵ ॥ ୬୮ ॥ var ସ୍ଵୋଷ୍ମୋଦସ୍ତାମ୍ବୁ
ନନ୍ତୁଂ ନାକାଲୟାନାମନିଶମନୁୟତାଂ ପଦ୍ଧତିଃ ପଙ୍କ୍ତିରେଵ var ଉପୟତାଂ
କ୍ଷୋଦୋ ନକ୍ଷତ୍ରରାଶେରଦୟରୟମିଲଚ୍ଚକ୍ରପିଷ୍ଟସ୍ୟ ଧୂଲିଃ ।
ହେଷହ୍ଲାଦୋ ହରୀଣାଂ ସୁରଶିଖରିଦରୀଃ ପୂରୟନ୍ନେମିନାଦୋ var ନାଦୋ
ୟସ୍ୟାଵ୍ୟାତ୍ତୀଵ୍ରଭାନୋଃ ସ ଦିଵି ଭୁଵି ୟଥା ଵ୍ୟକ୍ତଚିହ୍ନୋ ରଥୋ ଵଃ ॥ ୬୯ ॥
ନିଃସ୍ପନ୍ଦାନାଂ ଵିମାନାଵଲିଵିତତଦିଵାଂ ଦେଵଵୃନ୍ଦାରକାଣାଂ var ଵଲିତଦିଶା
ଵୃନ୍ଦୈରାନନ୍ଦସାନ୍ଦ୍ରୋଦ୍ୟମମପି ଵହତାଂ ଵିନ୍ଦତାଂ ଵନ୍ଦିତୁଂ ନୋ ।
ମନ୍ଦାକିନ୍ୟାମମନ୍ଦଃ ପୁଲିନଭୃତି ମୃଦୁର୍ମନ୍ଦରେ ମନ୍ଦିରାଭେ var ମନ୍ଦରାଭେ
ମନ୍ଦାରୈର୍ମଣ୍ଡିତାରଂ ଦଧଦରି ଦିନକୃତ୍ସ୍ୟନ୍ଦନଃ ସ୍ତାନ୍ମୁଦେ ଵଃ ॥ ୭୦ ॥
ଚକ୍ରୀ ଚକ୍ରାରପଙ୍କ୍ତିଂ ହରିରପି ଚ ହରୀନ୍ ଧୂର୍ଜଟିର୍ଧୂର୍ଧ୍ଵଜାନ୍ତା-
ନକ୍ଷଂ ନକ୍ଷତ୍ରନାଥୋଽରୁଣମପି ଵରୁଣଃ କୂବରାଗ୍ରଂ କୁବେରଃ ।
ରଂହଃ ସଂଘଃ ସୁରାଣାଂ ଜଗଦୁପକୃତୟେ ନିତ୍ୟୟୁକ୍ତସ୍ୟ ୟସ୍ୟ
ସ୍ତୌତି ପ୍ରୀତିପ୍ରସନ୍ନୋଽନ୍ଵହମହିମରୁଚେଃ ସୋଽଵତାତ୍ସ୍ୟନ୍ଦନୋ ଵଃ ॥ ୭୧ ॥ var ରୁଚ
ନେତ୍ରାହୀନେନ ମୂଲେ ଵିହିତପରିକରଃ ସିଦ୍ଧସାଧ୍ୟୈର୍ମରୁଦ୍ଭିଃ
ପାଦୋପାନ୍ତେ ସ୍ତୁତୋଽଲଂ ବଲିହରିରଭସାକର୍ଷଣାବଦ୍ଧଵେଗଃ ।
ଭ୍ରାମ୍ୟନ୍ଵ୍ୟୋମାମ୍ବୁରାଶାଵଶିଶିରକିରଣସ୍ୟନ୍ଦନଃ ସଂତତଂ ଵୋ
ଦିଶ୍ୟାଲ୍ଲକ୍ଷ୍ମୀମପାରାମତୁଲିତମହିମେଵାପରୋ ମନ୍ଦରାଦ୍ରିଃ ॥ ୭୨ ॥ var ଅତୁଲ୍ୟାଂ
॥ ଇତି ରଥଵର୍ଣନମ୍ ॥
॥ ଅଥ ମଣ୍ଡଲଵର୍ଣନମ୍ ॥
ୟଜ୍ଜ୍ୟାୟୋ ବୀଜମହ୍ନାମପହତତିମିରଂ ଚକ୍ଷୁଷାମଞ୍ଜନଂ ୟ- var ଜ୍ୟାୟୋ ୟଦ୍ବୀଜମହ୍ନାମପହୃତ
ଦ୍ଦ୍ଵାରଂ ୟନ୍ମୁକ୍ତିଭାଜାଂ ୟଦଖିଲଭୁଵନଜ୍ୟୋତିଷାମେକମୋକଃ ।
ୟଦ୍ଵୃଷ୍ଟ୍ୟମ୍ଭୋନିଧାନଂ ଧରଣିରସସୁଧାପାନପାତ୍ରଂ ମହଦ୍ୟ-
ଦ୍ଦିଶ୍ୟାଦୀଶସ୍ୟ ଭାସାଂ ତଦଧୀକଲମଲଂ ମଙ୍ଗଲଂ ମଣ୍ଡଲଂ ଵଃ ॥ ୭୩ ॥ var ଦେଵସ୍ୟ
ଭାନୋଃ ତଦଧିକମମଲଂ ମଣ୍ଡଲଂ ମଙ୍ଗଲଂ
ଵେଲାଵର୍ଧିଷ୍ଣୁ ସିନ୍ଧୋଃ ପୟ ଇଵ ଖମିଵାର୍ଧୋଦ୍ଗତାଗ୍ୟ୍ରଗ୍ରହୋଡୁ
ସ୍ତୋକୋଦ୍ଭିନ୍ନସ୍ଵଚିହ୍ନପ୍ରସଵମିଵ ମଧୋରାସ୍ୟମସ୍ୟନ୍ମନାଂସି । var ମହାଂସି
ପ୍ରାତଃ ପୂଷ୍ଣୋଽଶୁଭାନି ପ୍ରଶମୟତୁ ଶିରଃଶେଖରୀଭୂତମଦ୍ରେଃ
ପୌରସ୍ତ୍ୟସ୍ୟୋଦ୍ଗଭସ୍ତିସ୍ତିମିତତମତମଃଖଣ୍ଡନଂ ମଣ୍ଡଲଂ ଵଃ ॥ ୭୪ ॥
ପ୍ରତ୍ୟୁପ୍ତସ୍ତପ୍ତହେମୋଜ୍ଜ୍ଵଲରୁଚିରଚଲଃ ପଦ୍ମରାଗେଣ ୟେନ
ଜ୍ୟାୟଃ କିଂଜଲ୍କପୁଞ୍ଜୋ ୟଦଲିକୁଲଶିତେରମ୍ବରେନ୍ଦୀଵରସ୍ୟ ।
କାଲଵ୍ୟାଲସ୍ୟ ଚିହ୍ନଂ ମହିତତମମହୋମୂର୍ନ୍ଧି ରତ୍ନଂ ମହଦ୍ୟ-
ଦ୍ଦୀପ୍ତାଂଶୋଃ ପ୍ରାତରଵ୍ୟାତ୍ତଦଵିକଲଜଗନ୍ମଣ୍ଡନଂ ମଣ୍ଡଲଂ ଵଃ ॥ ୭୫ ॥
କସ୍ତ୍ରାତା ତାରକାଣାଂ ପତତି ତନୁରଵଶ୍ୟାୟବିନ୍ଦୁର୍ୟଥେନ୍ଦୁ-
ର୍ଵିଦ୍ରାଣା ଦୃକ୍ସ୍ମରାରେରୁରସି ମୁରରିପୋଃ କୌସ୍ତୁଭୋ ନୋଦ୍ଗଭସ୍ତିଃ ।
ଵହ୍ନେଃ ସାପହ୍ନଵେଵ ଦ୍ୟୁତିରୁଦୟଗତେ ୟତ୍ର ତନ୍ମଣ୍ଡଲଂ ଵୋ
ମାର୍ତଣ୍ଡୀୟଂ ପୁନୀତାଦ୍ଦିଵି ଭୁଵି ଚ ତମାଂସୀଵ ମୃଷ୍ଣନ୍ମହାଂସି ॥ ୭୬ ॥
ୟତ୍ପ୍ରାଚ୍ୟାଂ ପ୍ରାକ୍ଚକାସ୍ତି ପ୍ରଭଵତି ଚ ୟତଃ ପ୍ରାଚ୍ୟସାଵୁଜ୍ଜିହାନା-
ଦିଦ୍ଧଂ ମଧ୍ୟେ ୟଦହ୍ନୋ ଭଵତି ତତରୁଚା ୟେନ ଚୋତ୍ପାଦ୍ୟତେଽହଃ ।
ୟତ୍ପର୍ୟାୟେଣ ଲୋକାନଵତି ଚ ଜଗତାଂ ଜୀଵିତଂ ୟଚ୍ଚ ତଦ୍ଵୋ
ଵିଶ୍ଵାନୁଗ୍ରାହି ଵିଶ୍ଵଂ ସୃଜଦପି ଚ ରଵେର୍ମଣ୍ଡଲଂ ମୁକ୍ତୟେଽସ୍ତୁ ॥ ୭୭ ॥
ଶୁଷ୍ୟନ୍ତ୍ୟୂଢାନୁକାରା ମକରଵସତୟୋ ମାରଵୀଣାଂ ସ୍ଥଲୀନାଂ
ୟେନୋତ୍ତପ୍ତାଃ ସ୍ଫୁଟନ୍ତସ୍ତଡିତି ତିଲତୁଲାଂ ୟାନ୍ତ୍ୟଗେନ୍ଦ୍ରା ୟୁଗାନ୍ତେ । var ଚଟିତି
ତଚ୍ଚଣ୍ଡାଂଶୋରକାଣ୍ଡତ୍ରିଭୁଵନଦହନାଶଙ୍କୟା ଧାମ କୃଚ୍ଛାତ୍ var କୃତ୍ସ୍ନଂ
ସଂହୃତ୍ୟାଲୋକମାତ୍ରଂ ପ୍ରଲଘୁ ଵିଦଧତଃ ସ୍ତାନ୍ମୁଦେ ମଣ୍ଡଲଂ ଵଃ ॥ ୭୮ ॥ var ଆହୃତ୍ୟାଲୋକମାତ୍ରଂ ପ୍ରତନୁ
ଉଦ୍ୟଦ୍ଦ୍ୟୂଦ୍ୟାନଵାପ୍ୟାଂ ବହୁଲତମତମଃପଙ୍କପୂରଂ ଵିଦାର୍ୟ var ବହଲ
ପ୍ରୋଦ୍ଭିନ୍ନଂ ପତ୍ରପାର୍ଶ୍ଵେଷ୍ଵଵିରଲମରୁଣଚ୍ଛାୟୟା ଵିସ୍ଫୁରନ୍ତ୍ୟା ।
କଲ୍ୟାଣାନି କ୍ରିୟାଦ୍ଵଃ କମଲମିଵ ମହନ୍ମଣ୍ଡଲଂ ଚଣ୍ଡଭାନୋ- var ଚଣ୍ଡରଶ୍ମେଃ
ରନ୍ଵୀତଂ ତୃପ୍ତିହେତୋରସକୃଦଲିକୁଲାକାରିଣା ରାହୁଣା ୟତ୍ ॥ ୭୯ ॥
ଚକ୍ଷୁର୍ଦକ୍ଷଦ୍ଵିଷୋ ୟନ୍ନ ତୁ ଦହତି ପୁରଃ ପୂରୟତ୍ୟେଵ କାମଂ var ନ ଦହତି ନିତରାଂ ପୁନଃ
ନାସ୍ତଂ ଜୁଷ୍ଟଂ ମରୁଦ୍ଭିର୍ୟଦିହ ନିୟମିନାଂ ୟାନପାତ୍ରଂ ଭଵାବ୍ଧୌ ।
ୟଦ୍ଵୀତଶ୍ରାନ୍ତି ଶଶ୍ଵଦ୍ଭ୍ରମଦପି ଜଗତାଂ ଭ୍ରାନ୍ତିମଭ୍ରାନ୍ତି ହନ୍ତି
ବ୍ରଧ୍ନସ୍ୟାଖ୍ୟାଦ୍ଵିରୁଦ୍ଧକ୍ରିୟମଥ ଚ ହିତାଧାୟି ତନ୍ମଣ୍ଡଲଂ ଵଃ ॥ ୮୦ ॥
॥ ଇତି ମଣ୍ଡଲଵର୍ଣନମ୍ ॥
॥ ଅଥ ସୂର୍ୟଵର୍ଣନମ୍ ।
ସିଦ୍ଧୈଃ ସିଦ୍ଧାନ୍ତମିଶ୍ରଂ ଶ୍ରିତଵିଧି ଵିବୁଧୈଶ୍ଚାରଣୈଶ୍ଚାଟୁଗର୍ଭଂ
ଗୀତ୍ୟା ଗନ୍ଧର୍ଵମୁଖ୍ୟୈର୍ମୁହୁରହିପତିଭିର୍ୟାତୁଧାନୈର୍ୟତାତ୍ମ ।
ସାର୍ଧଂ ସାଧ୍ୟୈର୍ମୁନୀନ୍ଦ୍ରୈର୍ମୁଦିତମତମନୋ ମୋକ୍ଷିଭିଃ ପକ୍ଷପାତା- var ମୋକ୍ଷୁଭିଃ
ତ୍ପ୍ରାତଃ ପ୍ରାରଭ୍ୟମାଣସ୍ତୁତିରଵତୁ ରଵିର୍ଵିଶ୍ଵଵନ୍ଦ୍ୟୋଦୟୋ ଵଃ ॥ ୮୧ ॥
ଭାସାମାସନ୍ନଭାଵାଦଧିକତରପଟୋଶ୍ଚକ୍ରଵାଲସ୍ୟ ତାପା-
ଚ୍ଛେଦାଦଚ୍ଛିନ୍ନଗଚ୍ଛତ୍ତୁରଗଖୁରପୁଟନ୍ୟାସନିଃଶଙ୍କଟଙ୍କୈଃ । var ନ୍ୟସ୍ତ
ନିଃସଙ୍ଗସ୍ୟନ୍ଦନାଙ୍ଗଭ୍ରମଣନିକଷଣାତ୍ପାତୁ ଵସ୍ତ୍ରିପ୍ରକାରଂ var ତ୍ରିପ୍ରକାରୈଃ
ତପ୍ତାଂଶୁସ୍ତତ୍ପରୀକ୍ଷାପର ଇଵ ପରିତଃ ପର୍ୟଟନ୍ହାଟକାଦ୍ରିମ୍ ॥ ୮୨ ॥
ନୋ ଶୁଷ୍କଂ ନାକନଦ୍ୟା ଵିକସିତକନକାମ୍ଭୋଜୟା ଭ୍ରାଜିତଂ ତୁ var କନକାମ୍ଭୋରୁହା
ପ୍ଲୁଷ୍ଟା ନୈଵୋପଭୋଗ୍ୟା ଭଵତି ଭୃଶତରଂ ନନ୍ଦନୋଦ୍ୟାନଲକ୍ଷ୍ମୀଃ ।
ନୋ ଶୃଙ୍ଗାଣି ଦ୍ରୁତାନି ଦ୍ରୁତମମରଗିରେଃ କାଲଧୌତାନି ଧୌତା-
ନୀଦ୍ଧଂ ଧାମ ଦ୍ୟୁମାର୍ଗେ ମ୍ରଦୟତି ଦୟୟା ୟତ୍ର ସୋଽର୍କୋଽଵତାଦ୍ଵଃ ॥ ୮୩ ॥
ଧ୍ଵାନ୍ତସ୍ୟୈଵାନ୍ତହେତୁର୍ନ ଭଵତି ମଲିନୈକାତ୍ମନଃ ପାପ୍ମନୋଽପି
ପ୍ରାକ୍ପାଦୋପାନ୍ତଭାଜାଂ ଜନୟତି ନ ପରଂ ପଙ୍କଜାନାଂ ପ୍ରବୋଧମ୍ ।
କର୍ତା ନିଃଶ୍ରେୟସାନାମପି ନ ତୁ ଖଲୁ ୟଃ କେଵଲଂ ଵାସରାଣାଂ
ସୋଽଵ୍ୟାଦେକୋଦ୍ୟମେଚ୍ଛାଵିହିତବହୁବୃହଦ୍ଵିଶ୍ଵକାର୍ୟୋଽର୍ୟମା ଵଃ ॥ ୮୪ ॥
ଲୋଟଁଲ୍ଲୋଷ୍ଟାଵିଚେଷ୍ଟଃ ଶ୍ରିତଶୟନତଲୋ ନିଃସହୀଭୂତଦେହଃ
ସଂଦେହୀ ପ୍ରାଣିତଵ୍ୟେ ସପଦି ଦଶ ଦିଶଃ ପ୍ରେକ୍ଷମାଣୋଽନ୍ଧକାରାଃ ।
ନିଃଶ୍ଵାସାୟାସନିଷ୍ଠଃ ପରମପରଵଶୋ ଜାୟତେ ଜୀଵଲୋକଃ var ଚିରତରଵଶୋ
ଶୋକେନେଵାନ୍ୟଲୋକାନୁଦୟକୃତି ଗତେ ୟତ୍ର ସୋଽର୍କୋଽଵତାଦ୍ଵଃ ॥ ୮୫ ॥ var ଲୋକାଭ୍ୟୁଦୟ
କ୍ରାମଁଲ୍ଲୋଲୋଽପି ଲୋକାଁସ୍ତଦୁପକୃତିକୃତାଵାଶ୍ରିତଃ ସ୍ଥୈର୍ୟକୋଟିଂ
ନୄଣାଂ ଦୃଷ୍ଟିଂ ଵିଜିହ୍ମାଂ ଵିଦଧଦପି କରୋତ୍ୟନ୍ତରତ୍ୟନ୍ତଭଦ୍ରାମ୍ ।
ୟସ୍ତାପସ୍ୟାପି ହେତୁର୍ଭଵତି ନିୟମିନାମେକନିର୍ଵାଣଦାୟୀ
ଭୂୟାତ୍ସ ପ୍ରାଗଵସ୍ଥାଧିକତରପରିଣାମୋଦୟୋଽର୍କଃ ଶ୍ରିୟେ ଵଃ ॥ ୮୬ ॥
ଵ୍ୟାପନ୍ନର୍ତୁର୍ନ କାଲୋ ଵ୍ୟଭିଚରତି ଫଲଂ ନୌଷଧୀର୍ଵୃଷ୍ଟିରିଷ୍ଟା
ନୈଷ୍ଟୈସ୍ତୃପ୍ୟନ୍ତି ଦେଵା ନ ହି ଵହତି ମରୁନ୍ନିର୍ମଲାଭାନି ଭାନି ।
ଆଶାଃ ଶାନ୍ତା ନ ଭିନ୍ଦନ୍ତ୍ୟଵଧିମୁଦଧୟୋ ବିଭ୍ରତି କ୍ଷ୍ମାଭୃତଃ କ୍ଷ୍ମାଂ
ୟସ୍ମିଂସ୍ତ୍ରୈଲୋକ୍ୟମେଵଂ ନ ଚଲତି ତପତି ସ୍ତାତ୍ସ ସୂର୍ୟଃ ଶ୍ରିୟେ ଵଃ ॥ ୮୭ ॥
କୈଲାସେ କୃତ୍ତିଵାସା ଵିହରତି ଵିରହତ୍ରାସଦେହୋଢକାନ୍ତଃ
ଶ୍ରାନ୍ତଃ ଶେତେ ମହାହାଵଧିଜଲଧି ଵିନା ଛଦ୍ମନା ପଦ୍ମନାଭଃ ।
ୟୋଗୋଦ୍ୟୋଗୈକତାନୋ ଗମୟତି ସକଲଂ ଵାସରଂ ସ୍ଵଂ ସ୍ଵୟମ୍ଭୂ-
ର୍ଭୂରିତ୍ରୈଲୋକ୍ୟାଚିନ୍ତାଭୃତି ଭୁଵନଵିଭୌ ୟତ୍ର ଭାସ୍ଵାନ୍ସ ଵୋଽଵ୍ୟାତ୍ ॥ ୮୮ ॥
ଏତଦ୍ୟନ୍ମଣ୍ଡଲଂ ଖେ ତପତି ଦିନକୃତସ୍ତା ଋଚୋଽର୍ଚୀଂଷି ୟାନି
ଦ୍ୟୋତନ୍ତେ ତାନି ସାମାନ୍ୟୟମପି ପୁରୁଷୋ ମଣ୍ଡଲେଽଣୁର୍ୟଜୂଂଷି ।
ଏଵଂ ୟଂ ଵେଦ ଵେଦତ୍ରିତୟମୟମୟଂ ଵେଦଵେଦୀ ସମଗ୍ରୋ
ଵର୍ଗଃ ସ୍ଵର୍ଗାପଵର୍ଗପ୍ରକୃତିରଵିକୃତିଃ ସୋଽସ୍ତୁ ସୂର୍ୟଃ ଶ୍ରିୟେ ଵଃ ॥ ୮୯ ॥
ନାକୌକଃପ୍ରତ୍ୟନୀକକ୍ଷତିପଟୁମହସାଂ ଵାସଵାଗ୍ରେସରାଣାଂ
ସର୍ଵେଷାଂ ସାଧୁ ପାତାଂ ଜଗଦିଦମଦିତେରାତ୍ମଜତ୍ଵେ ସମେଽପି ।
ୟେନାଦିତ୍ୟାଭିଧାନଂ ନିରତିଶୟଗୁଣୈରାତ୍ମନି ନ୍ୟସ୍ତମସ୍ତୁ var ଗୁଣେନାତ୍ମନି
ସ୍ତୁତ୍ୟସ୍ତ୍ରୈଲୋକ୍ୟଵନ୍ଦ୍ୟୈସ୍ତ୍ରିଦଶମୁନିଗଣୈଃ ସୋଂଽଶୁମାନ୍ ଶ୍ରେୟସେ ଵଃ ॥ ୯୦ ॥
ଭୂମିଂ ଧାମ୍ନୋଽଭିଵୃଷ୍ଟ୍ୟା ଜଗତି ଜଲମୟୀଂ ପାଵନୀଂ ସଂସ୍ମୃତାଵ- var ଧାମ୍ନୋଽଥ
ପ୍ୟାଗ୍ନେୟୀଂ ଦାହଶକ୍ତ୍ୟା ମୁହୁରପି ୟଜମାନାଂ ୟଥାପ୍ରାର୍ଥିତାର୍ଥୈଃ । var ୟଜମାନାତ୍ମିକାଂ
ଲୀନାମାକାଶ ଏଵାମୃତକରଘଟିତାଂ ଧ୍ଵାନ୍ତପକ୍ଷସ୍ୟ ପର୍ଵ-
ଣ୍ଵେଵଂ ସୂର୍ୟୋଽଷ୍ଟଭେଦାଂ ଭଵ ଇଵ ଭଵତଃ ପାତୁ ବିଭ୍ରତ୍ସ୍ଵମୂର୍ତିମ୍ ॥ ୯୧ ॥
ପ୍ରାକ୍କାଲୋନ୍ନିଦ୍ରପଦ୍ମାକରପରିମଲନାଵିର୍ଭଵତ୍ପାଦଶୋଭୋ
ଭକ୍ତ୍ୟା ତ୍ୟକ୍ତୋରୁଖେଦୋଦ୍ଗତି ଦିଵି ଵିନତାସୂନୁନା ନୀୟମାନଃ ।
ସପ୍ତାଶ୍ଵାପ୍ତାପରାନ୍ତାନ୍ୟଧିକମଧରୟନ୍ୟୋ ଜଗନ୍ତି ସ୍ତୁତୋଽଲଂ
ଦେଵୈର୍ଦେଵଃ ସ ପାୟାଦପର ଇଵ ମୁରାରାତିରହ୍ନାଂ ପତିର୍ଵଃ ॥ ୯୨ ॥
ୟଃ ସ୍ରଷ୍ଟାଽପାଂ ପୁରସ୍ତାଦଚଲଵରସମଭ୍ୟୁନ୍ନତେର୍ହେତୁରେକୋ
ଲୋକାନାଂ ୟସ୍ତ୍ରୟାଣାଂ ସ୍ଥିତ ଉପରି ପରଂ ଦୁର୍ଵିଲଙ୍ଘ୍ୟେନ ଧାମ୍ନା । var ଚ ତ୍ରୟାଣାଂ
ସଦ୍ୟଃ ସିଦ୍ଧ୍ୟୈ ପ୍ରସନ୍ନଦ୍ୟୁତିଶୁଭଚତୁରାଶାମୁଖଃ ସ୍ତାଦ୍ଵିଭକ୍ତୋ var ଶୁଚି
ଦ୍ଵେଧା ଵେଧା ଇଵାଵିଷ୍କୃତକମଲରୁଚିଃ ସୋଽର୍ଚିଷାମାକରୋ ଵଃ ॥ ୯୩ ॥
ସାଦ୍ରିଦ୍ୟୂର୍ଵୀନଦୀଶା ଦିଶତି ଦଶ ଦିଶୋ ଦର୍ଶୟନ୍ପ୍ରାଗ୍ଦୃଶୋ ୟଃ var ଦ୍ରାକ୍ ଦୃଶୋ
ସାଦୃଶ୍ୟଂ ଦୃଶ୍ୟତେ ନୋ ସଦଶଶତଦୃଶି ତ୍ରୈଦଶେ ୟସ୍ୟ ଦେଶେ ।
ଦୀପ୍ତାଂଶୁର୍ଵଃ ସ ଦିଶ୍ୟାଦଶିଵୟୁଗଦଶାଦର୍ଶିତଦ୍ଵାଦଶାତ୍ମା
ଶଂ ଶାସ୍ତ୍ୟଶ୍ଵାଂଶ୍ଚ ୟସ୍ୟାଶୟଵିଦତିଶୟାଦ୍ଦନ୍ଦଶୂକାଶନାଦ୍ୟଃ ॥ ୯୪ ॥
ତୀର୍ଥାନି ଵ୍ୟର୍ଥକାନି ହୃଦନଦସରସୀନିର୍ଝରାମ୍ଭୋଜିନୀନାଂ
ନୋଦନ୍ଵନ୍ତୋ ନୁଦନ୍ତି ପ୍ରତିଭୟମଶୁଭଶ୍ଵଭ୍ରପାତାନୁବନ୍ଧି ।
ଆପୋ ନାକାପଗାୟା ଅପି କଲୁଷମୁଷୋ ମଜ୍ଜତାଂ ନୈଵ ୟତ୍ର var ସ୍ଵର୍ଗାପଗାୟାଃ
ତ୍ରାତୁଂ ୟାତେଽନ୍ୟଲୋକାନ୍ ସ ଦିଶତୁ ଦିଵସସ୍ୟୈକହେତୁର୍ହିତଂ ଵଃ ॥ ୯୫ ॥ var ଲୋକଂ
ଏତତ୍ପାତାଲପଙ୍କପ୍ଲୁତମିଵ ତମସୈଵୈକମୁଦ୍ଗାଢମାସୀ-
ଦପ୍ରଜ୍ଞାତାପ୍ରତର୍କ୍ୟଂ ନିରଵଗତି ତଥାଲକ୍ଷଣଂ ସୁପ୍ତମନ୍ତଃ ।
ୟାଦୃକ୍ସୃଷ୍ଟେଃ ପୁରସ୍ତାନ୍ନିଶି ନିଶି ସକଲଂ ଜାୟତେ ତାଦୃଗେଵ
ତ୍ରୈଲୋକ୍ୟଂ ୟଦ୍ଵିୟୋଗାଦଵତୁ ରଵିରସୌ ସର୍ଗତୁଲ୍ୟୋଦୟୋ ଵଃ ॥ ୯୬ ॥
ଦ୍ଵୀପେ ୟୋଽସ୍ତାଚଲୋଽସ୍ମିନ୍ଭଵତି ଖଲୁ ସ ଏଵାପରତ୍ରୋଦୟାଦ୍ରି-
ର୍ୟା ୟାମିନ୍ୟୁଜ୍ଜ୍ଵଲେନ୍ଦୁଦ୍ୟୁତିରିହ ଦିଵସୋଽନ୍ୟତ୍ର ତୀଵ୍ରାତପଃ ସା ।
ୟଦ୍ଵଶ୍ୟୌ ଦେଶକାଲାଵିତି ନିୟମୟତୋ ନୋ ତୁ ୟଂ ଦେଶକାଲା- var ନୁ
ଵଵ୍ୟାତ୍ସ ସ୍ଵପ୍ରଭୁତ୍ଵାହିତଭୁଵନହିତୋ ହେତୁରହ୍ନାମିନୋ ଵଃ ॥ ୯୭ ॥
ଵ୍ୟଗ୍ରୈରଗ୍ର୍ୟଗ୍ରହେନ୍ଦୁଗ୍ରସନଗୁରୁ ଭରୈର୍ନୋ ସମଗ୍ରୈରୁଦଗ୍ରୈଃ var ଗୁରୁତରୈଃ
ପ୍ରତ୍ୟଗ୍ରୈରୀଷଦୁଗ୍ରୈରୁଦୟଗିରିଗତୋ ଗୋଗଣୈର୍ଗୌରୟନ୍ ଗାମ୍ ।
ଉଦ୍ଗାଢାର୍ଚିର୍ଵିଲୀନାମରନଗରନଗଗ୍ରାଵଗର୍ଭାମିଵାହ୍ନା-
ମଗ୍ରେ ଶ୍ରେୟୋ ଵିଧତ୍ତେ ଗ୍ଲପୟତୁ ଗହନଂ ସ ଗ୍ରହଗ୍ରାମଣୀର୍ଵଃ ॥ ୯୮ ॥
ୟୋନିଃ ସାମ୍ନାଂ ଵିଧାତା ମଧୁରିପୁରଜିତୋ ଧୂର୍ଜଟିଃ ଶଂକରୋଽସୌ
ମୃତ୍ୟୁଃ କାଲୋଽଲକାୟାଃ ପତିରପି ଧନଦଃ ପାଵକୋ ଜାତଵେଦାଃ ।
ଇତ୍ଥଂ ସଂଜ୍ଞା ଡଵିତ୍ଥାଦିଵଦମୃତଭୁଜାଂ ୟା ୟଦୃଚ୍ଛାପ୍ରଵୃତ୍ତା-
ସ୍ତାସାମେକୋଽଭିଧେୟସ୍ତଦନୁଗୁଣଗୁଣୈର୍ୟଃ ସ ସୂର୍ୟୋଽଵତାଦ୍ଵଃ ॥ ୯୯ ॥ var ଗଣୈଃ
ଦେଵଃ କିଂ ବାନ୍ଧଵଃ ସ୍ୟାତ୍ପ୍ରିୟସୁହୃଦଥଵାଽଽଚାର୍ୟ ଆହୋସ୍ଵିଦର୍ୟୋ var ଆର୍ୟଃ
ରକ୍ଷା ଚକ୍ଷୁର୍ନୁ ଦୀପୋ ଗୁରୁରୁତ ଜନକୋ ଜୀଵିତଂ ବୀଜମୋଜଃ ।
ଏଵଂ ନିର୍ଣୀୟତେ ୟଃ କ ଇଵ ନ ଜଗତାଂ ସର୍ଵଥା ସର୍ଵଦାଽସୌ var ସର୍ଵଦାଃ
ସର୍ଵାକାରୋପକାରୀ ଦିଶତୁ ଦଶଶତାଭୀଷୁରଭ୍ୟର୍ଥିତଂ ଵଃ ॥ ୧୦୦ ॥
ଶ୍ଲୋକା ଲୋକସ୍ୟ ଭୂତ୍ୟୈ ଶତମିତି ରଚିତାଃ ଶ୍ରୀମୟୂରେଣ ଭକ୍ତ୍ୟା
ୟୁକ୍ତଶ୍ଚୈତାନ୍ପଠେଦ୍ୟଃ ସକୃଦପି ପୁରୁଷଃ ସର୍ଵପାପୈର୍ଵିମୁକ୍ତଃ ।
ଆରୋଗ୍ୟଂ ସତ୍କଵିତ୍ଵଂ ମତିମତୁଲବଲଂ କାନ୍ତିମାୟୁଃପ୍ରକର୍ଷଂ
ଵିଦ୍ୟାମୈଶ୍ଵର୍ୟମର୍ଥଂ ସୁତମପି ଲଭତେ ସୋଽତ୍ର ସୂର୍ୟପ୍ରସାଦାତ୍ ॥ ୧୦୧ ॥
ଇତି ଶ୍ରୀମୟୂରକଵିପ୍ରଣୀତଂ ସୂର୍ୟଶତକଂ ସମାପ୍ତମ୍ ।
