Ajagara Geetaa in Bengali:
॥ অজগরগীতা ॥
ভীষ্মেণ যুধিষ্ঠিরম্প্রতি প্রপঞ্চস্যানিত্যৎবাদিজ্ঞানপূর্বকবিরক্তেঃ
সুখহেতুতায়াং প্রমাণতয়া প্রহ্লাদাজগরমুনিসংবাদানুবাদঃ ॥ ১ ॥
যুধিষ্ঠির উবাচ ।
কেন বৃত্তেন বৃত্তজ্ঞ বীতশোকশ্চরেন্মহীম্ ।
কিঞ্চ কুর্বন্নরো লোকে প্রাপ্নোতি গতিমুত্তমাম্ ॥ ১ ॥
ভীষ্ম উবাচ ।
অত্রাপ্যুদাহরন্তীমমিতিহাসং পুরাতনম্ ।
প্রহ্লাদস্য চ সংবাদং মুনেরাজগরস্য চ ॥ ২ ॥
চরন্তং ব্রাহ্মণং কঞ্চিৎকল্যচিত্তমনাময়ম্ ।
পপ্রচ্ছ রাজা প্রহ্লাদো বুদ্ধিমান্প্রাজ্ঞসত্তমঃ ॥ ৩ ॥
প্রহ্লাদ উবাচ ।
স্বস্থঃ শক্তো মৃদুর্দান্তো নির্বিধিৎসোঽনসূয়কঃ ।
সুবাগ্বহুমতো লোকে প্রাজ্ঞশ্চরসি বালবৎ ॥ ৪ ॥
নৈব প্রার্থয়সে লাভং নালাভেষ্বনুশোচসি ।
নিত্যতৃপ্ত ইব ব্রহ্মন্ন কিঞ্চিদিব মন্যসে ॥ ৫ ॥
স্রোতসা হ্রিয়মাণাসু প্রজাসু বিমনা ইব ।
ধর্মকামার্থকার্যেষু কূটস্থ ইব লক্ষ্যসে ॥ ৬ ॥
নানুতিষ্ঠসি ধর্মার্থৌ ন কামে চাপি বর্তসে ।
ইন্দ্রিয়ার্থাননাদৃত্য মুক্তশ্চরসি সাক্ষিবৎ ॥ ৭ ॥
কা নু প্রজ্ঞা শ্রুতং বা কিং বৃত্তির্বা কা নু তে মুনে ।
ক্ষিপ্রমাচক্ষ্ব মে ব্রহ্মঞ্শ্রেয়ো যদিহ মন্যসে ॥ ৮
ভীষ্ম উবাচ ।
অনুয়ুক্তঃ স মেধাবী লোকধর্মবিধানবিৎ ।
উবাচ শ্লক্ষ্ণয়া বাচা প্রহ্লাদমনপার্থয়া ॥ ৯
পশ্য প্রহ্লাদ ভূতানামুৎপত্তিমনিমিত্ততঃ ।
হ্রাসং বৃদ্ধিং বিনাশং চ ন প্রহৃষ্যে ন চ ব্যথে ॥ ১০ ॥
(৭২১০২)
স্বভাবাদেব সন্দৃশ্যা বর্তমানাঃ প্রবৃত্তয়ঃ ।
স্বভাবনিরতাঃ সর্বাঃ প্রতিপাদ্যা ন কেনচিৎ ॥ ১১ ॥
পশ্য প্রহ্লাদ সংয়োগান্বিপ্রয়োগপরায়ণান্ ।
সঞ্চয়াংশ্চ বিনাশান্তান্ন ক্বচিদ্বিদধে মনঃ ॥ ১২ ॥
অন্তবন্তি চ ভূতানি গুণয়ুক্তানি পশ্যতঃ ।
উৎপত্তিনিধনজ্ঞস্য কিং পর্যায়েণোপলক্ষয়ে। ১৩ ॥
জলজানামপি হ্যন্তং পর্যায়েণোপলক্ষয়ে ।
মহতামপি কায়ানাং সূক্ষ্মাণাং চ মহোদধৌ ॥ ১৪ ॥
জঙ্গমস্থাবরাণাং চ ভূতানামসুরাধিপ ।
পার্থিবানামপি ব্যক্তং মৃত্যুং পশ্যামি সর্বশঃ ॥ ১৫ ॥
অন্তরিক্ষচরাণাং চ দানবোত্তমপক্ষিণাম্ ।
উত্তিষ্ঠতে যথাকালং মৃত্যুর্বলবতামপি ॥ ১৬ ॥
দিবি সঞ্চরমাণানি হ্রস্বানি চ মহান্তি চ ।
জ্যোতীংষ্যপি যথাকালং পতমানানি লক্ষয়ে ॥ ১৭ ॥
ইতি ভূতানি সম্পশ্যন্ননুষক্তানি মৃত্যুনা ।
সর্বং সামান্যতো বিদ্বান্কৃতকৃত্যঃ সুখং স্বপে ॥ ১৮ ॥
সুমহান্তমপি গ্রাসং গ্রসে লব্ধং যদৃচ্ছয়া ।
শয়ে পুনরভুঞ্জানো দিবসানি বহূন্যপি ॥ ১৯ ॥
আশয়ন্ত্যপি মামন্নং পুনর্বহুগুণং বহু ।
পুনরল্পং পুনস্তোকং পুনর্নৈবোপপদ্যতে ॥ ২০ ॥
কণং কদাচিৎখাদামি পিণ্যাকমপি চ গ্রসে ।
ভক্ষয়ে শালিমাংসানি ভক্ষাংশ্চোচ্চাবচান্পুনঃ ॥ ২১ ॥
শয়ে কদাচিৎপর্যঙ্কে ভূমাবপি পুনঃ শয়ে ।
প্রাসাদে চাপি মে শয়্যা কদাচিদুপপদ্যতে ॥ ২২ ॥
ধারয়ামি চ চীরাণি শাণক্ষৌমাজিনানি চ ।
মহার্হাণি চ বাসাংসি ধারয়াম্যহমেকদা ॥ ২৩ ॥
ন সন্নিপতিতং ধর্ম্যমুপভোগং যদৃচ্ছয়া ।
প্রত্যাচক্ষে ন চাপ্যেনমনুরুধ্যে সুদুর্লভম্ ॥ ২৪ ॥
অচলমনিধনং শিবং বিশোকং
শুচিমতুলং বিদুষাং মতে প্রবিষ্টম্ ।
অনভিমতমসেবিতং বিমূঢৈ
র্ব্রতমিদমাজগরং শুচিশ্চরামি ॥ ২৫ ॥
অচলিতমতিরচ্যুতঃ স্বধর্মা
ৎপরিমিতসংসরণঃ পরাবরজ্ঞঃ ।
বিগতভয়কষায়লোভমোহো
ব্রতমিদমাজগরং শুচিশ্চরামি ॥ ২৬ ॥
অনিয়তফলভক্ষ্যভোজ্যপেয়ং
বিধিপরিণামবিভক্তদেশকালম্ ।
হৃদয়সুখমসেবিতং কদর্যৈ
র্ব্রতমিদমাজগরং সুচিশ্চরামি ॥ ২৭ ॥
ইদমিদমিতি তৃষ্ণয়াঽভিভূতং
জনমনবাপ্তধনং বিষীদমানম্ ।
নিপুণমনুনিশাম্য তত্ত্ববুদ্ধ্যা
ব্রতমিদমাজগরং শুচিশ্চরামি ॥ ২৮ ॥
বহুবিধমনুদৃশ্য চার্থহেতোঃ
কৃপণমিহার্যমনার্যমাশ্রয়ং তম্ ।
উপশমরুচিরাত্মবান্প্রশান্তো
ব্রতমিদমাজগরং শুচিশ্চরামি ॥ ২৯ ॥
সুখমসুখমলাভমর্থলাভং
রতিমরতিং মরণং চ জীবিতং চ ।
বিধিনিয়তমবেক্ষ্য তত্ত্বতোঽহং
ব্রতমিদমাজগরং শুচিশ্চরামি ॥ ৩০ ॥
অপগতভয়রাগমোহদর্পো
ধৃতিমতিবুদ্ধিসমন্বিতঃ প্রশান্তঃ ।
উপগতফলভোগিনো নিশাম্য
ব্রতমিদমাজগরং শুচিশ্চরামি ॥ ৩১ ॥
অনিয়তশয়নাসনঃ প্রকৃত্যা
দমনিয়মব্রতসত্যশৌচয়ুক্তঃ ।
অপগতফলসঞ্চয়ঃ প্রহৃষ্টো
ব্রতমিদমাজগরং শুচিশ্চরামি ॥ ৩২ ॥
অপগতমসুখার্থমীহনার্থৈ
রুপগতবুদ্ধিরবেক্ষ্য চাত্মসংস্থম্ ।
তৃপিতমনিয়তং মনো নিয়ন্তুং
ব্রতমিদমাজগরং শুচিশ্চরামি ॥ ৩৩ ॥
ন হৃদয়মনুরুধ্যতে মনো বা
প্রিয়সুখদুর্লভতামনিত্যতাং চ ।
তদুভয়মুপলক্ষয়ন্নিবাহং
ব্রতমিদমাজগরং শুচিশ্চরামি ॥ ৩৪ ॥
বহু কথিতমিদং হি বুদ্ধিমদ্ভিঃ
কবিভিরপি প্রথয়দ্ভিরাত্মকীর্তিম্ ।
ইদমিদমিতি তত্রতত্র হন্ত
স্বপরমতৈর্গহনং প্রতর্কয়দ্ভিঃ ॥ ৩৫ ॥
তদিদমনুনিশাম্য বিপ্রপাতং
পৃথগভিপন্নমিহাবুধৈর্মনুষ্যৈঃ ।
অনবসিতমনন্তদোষপারং
নৃপু বিহরামি বিনীতদোষতৃষ্ণঃ ॥ ৩৬ ॥
ভীষ্ম উবাচ ।
অজগরচরিতং ব্রতং মহাত্মা
য ইহ নরোঽনুচরেদ্বিনীতরাগঃ ।
অপগতভয়লোভমোহমন্যুঃ
স খলু সুখী বিচরেদিমং বিহারম্ ॥ ॥ ৩৭ ॥
ইতি শ্রীমন্মহাভারতে শান্তিপর্বণি মোক্ষধর্মপর্বণি
সপ্তসপ্তত্যধিকশততমোঽধ্যায়ঃ ॥
Mahabharata – Shanti Parva – Chapter Footnotes
২ আজগরস্যাঽজগরবৃত্ত্যা জীবতঃ ॥
৪ নির্বিধিৎসো নিরারম্ভঃ ॥
৬ স্রোতসা কামাদিবেগেন । কূটস্থো নির্ব্যাপারঃ ॥
৭ ইন্দ্রিয়ার্থান্ গন্ধরসাদীননাদৃত্য চরসি
তন্নির্বাহমাত্রার্থী অশ্নাসি ॥
৮ প্রজ্ঞা তত্ত্বদর্শনম্ । শ্রুতং তন্মূলভূতং
শাস্ত্রম্। বৃত্তিস্তদর্থানুষ্ঠানম্। শ্রেয়ো মমেতি শেষঃ ॥
৯ অনুয়ুক্তঃ পৃষ্টঃ । লোকস্য ধর্মো জন্মজরাদিস্তস্য বিধানং
কারণং তদভিজ্ঞঃ লোকধর্মবিধানবিৎ ॥
১০ অনিমিত্ততঃ কারণহীনাদ্ব্রহ্মণঃ । পশ্য আলোচয় ॥
১২ তস্মাদহং মনো ন ক্বচিদ্বিষয়ে বিদধে ধারয়ামি তদ্বিনাশে
শোকোৎপত্তিং জানন্ ॥
১৫ পার্থিবানাং পৃথিবীস্থানাম্ ॥
১৯ আজগরীং বৃত্তিং প্রপঞ্চয়তি সুমহান্তমিত্যাদিনা ॥
২০ আশয়ন্তি ভোজয়ন্তি ॥
২৬ কষায়ঃ রাগদ্বেষাদিঃ ॥
২৮ ধনপ্রাপ্তৌ কর্মৈব কারণং ন পৌরুষমিতি ধিয়া
নিশাম্যালোচ্য ॥
২৯ অর্থহেতোরনার্যং নীচম্ । অর্যং স্বামিনগাশ্রয়তি যঃ
কৃপণো দীনজনস্তমনুদৃশ্যোপশমরুচিঃ। আত্মবান্ জিতচিত্তঃ ॥
৩০ বিধিনিয়তং দৈবাধীনম্ ॥
৩১ মতিরালোচনম্ । বুদ্ধির্নিশ্চয়ঃ। উপগতং সমীপাগতং
ফলং প্রিয়ং যেষাং তান্ ভোগিনঃ সর্পান্ অজগরান্ নিশাম্য
দৃষ্ট্বা। ফলভোগিন ইতি মধ্যমপদলোপঃ ॥
৩২ প্রকৃত্যা দমাদিয়ুক্তঃ
অপগতফলসঞ্চয়স্ত্যক্তয়োগফলসমূহঃ ॥
৩৩ এষণাবিষয়ৈঃ পুত্রবিত্তাদির্ভির্হেতুভিঃ । অসুখার্থং
পরিণামে দুঃখার্থম্। অপগতমাত্মনঃ পরাঙ্ভুখং তৃষিতমনিয়তং
চ মনোঽবেক্ষ্য। উপগতবুদ্ধির্লব্ধালোকঃ। আত্মসংস্থমাত্মনি সংস্থা
সমাপ্তির্যস্য তত্তথা তুং ব্রতং চরামি ॥
Also Read:
Ajagara Gita Lyrics in Hindi | English | Bengali | Gujarati | Kannada | Malayalam | Oriya | Telugu | Tamil