Devigiti Shatakam Lyrics in Bengali:
॥ দেবীগীতিশতকম্ ॥
শ্রীগণেশায় নমঃ ॥
কিং দেবৈঃ কিং জীবৈঃ কিং ভাবৈস্তেঽপি য়েন জীবন্তি ।
তব চরণং শরণং মে দরহণং দেবি কান্তিমত্যম্ব ॥ ১ ॥
অরুণাম্বুদনিভকান্তে করুণারসপূরপূর্ণনেত্রান্তে ।
শরণং ভব শশিবিম্বদ্যুতিমুখি জগদম্ব কান্তিমত্যম্ব ॥ ২ ॥
কলিহরণং ভবতরণং শুভভরণং জ্ঞানসম্পদাং করণম্ ।
নতশরণং তব চরণং করোতু মে দেবি কান্তিমত্যম্ব ॥ ৩ ॥
অমিতাং সমতাং মম তাং তনু তাং তনুতাং গতাং পদাব্জং তে ।
কৃপয়া বিদিতো বিহিতো য়য়া তবাহং হি কান্তিমত্যম্ব ॥ ৪ ॥
মম চরিতং বিদিতং চেদুদয়েন্ন দয়া কদাপি তে সত্যম্ ।
তদপি বদাম্যয়ি কুরু তাং নির্হেতুকমাশু কান্তিমত্যম্ব ॥ ৫ ॥
ন বুধত্বং ন বিধুত্বং ন বিধিত্বং নৌমি কিং তু ভৃঙ্গত্বম্ ।
অসকৃত্প্রণম্য য়াচে ত্বচ্চরণাব্জস্য কান্তিমত্যম্ব ॥ ৬ ॥
অভজমহং কিং সারে কংসারে বীপদেঽপি সংসারে ।
রুচিমত্তাং শুচিমত্তামহহ ত্বং পাহি কান্তিমত্যম্ব ॥ ৭ ॥
মামসকৃদপ্রসাদাদ্দুষ্কৃতকারীতি মাঽবমন্যস্ব ।
স্মর কিং ন ময়া সুকৃতং বর্ধিতমিদমদ্য কান্তিমত্যম্ব ॥ ৮ ॥
করুণাবিষয়ং য়দি মাং ন তনোষি য়থা তথাপি বর্তেঽহম্ ।
ভবতি কৃপালুত্বং তে সীদামি মৃষেতি কান্তিমত্যম্ব ॥ ৯ ॥
অতুলিতভবানুরাগিণি দুর্বর্ণাচলবিহারিণি ময়ি ত্বম্ ।
সমতের্ষ্যয়া প্রসাদং ন বিধত্সে কিং নু কান্তিমত্যম্ব ॥ ১০ ॥
দ্যাং গাং বাভ্যপতং য়দি জীবাতুস্ত্বামৃতেঽন্ততঃ কো মে ।
হিত্বা পয়োদপঙ্ক্তিং স্তোকস্য গতিঃ ক্ব কান্তিমত্যম্ব ॥ ১১ ॥
কং বা কটাক্ষলক্ষ্যং ন করোষ্যেবং ময়ি ত্বমাসীঃ কিম্ ।
কিং ত্বামুপালভেঽহং বিধির্গরীয়ান্ হি কান্তিমত্যম্ব ॥ ১২ ॥
তনুজে জননী জনয়ত্যহিতেঽপি প্রেম হীতি তন্মিথ্যা ।
য়দুপেক্ষসে ত্রিলোকীং মাতর্মাং দেবি কান্তিমত্যম্ব ॥ ১৩ ॥
নিন্দামি সাধুবর্গং স্তৌমি পুনঃ ক্ষীণষড্গসংসর্গম্ ।
বন্দে কিং তে চরণে কিং স্যাত্প্রীতিস্তু কান্তিমত্যম্ব ॥ ১৪ ॥
গীর্বাণবৃন্দজিহ্বারসায়নস্বীয়মাননীয়গুণে ।
নিগমান্তপঞ্জরান্তরমরালিকে পাহি কান্তিমত্যম্ব ॥ ১৫ ॥
ত্রিনয়নকান্তে শান্তে তান্তে স্বান্তে মমাস্তু বদ দান্তে ।
কৃপয়া মুনিজনচিন্তিতচরণে নিবসাদ্য কান্তিমত্যম্ব ॥ ১৬ ॥
ধুতকদনে কৃতমদনে ভৃশমদনে য়োগিশর্বভক্তানাম্ ।
মণিসদনে শুভরদনে শশিবদনে পাহি কান্তিমত্যম্ব ॥ ১৭ ॥
গিরিতনুজে হতদনুজে বরমনুজেদ্ধাভিধে চ হর্যনুজে ।
গুহতনুজেঽবিতমনুজে কুরু করুণাং দেবি কান্তিমত্যম্ব ॥ ১৮ ॥
গজগমনে রিপুদমনে হরকমনে কৢপ্তপাপকৃচ্ছমনে ।
কলিজননে ময়ি দয়য়া প্রসীদ হে দেবি কান্তিমত্যম্ব ॥ ১৯ ॥
য়ন্মানসে পদাব্জং তব সংবিদ্ভাস্বদাভয়াঽঽভাতি ।
তত্পাদদাসদাসকদাসত্বং নৌমি কান্তিমত্যম্ব ॥ ২০ ॥
দুষ্করদুষ্কৃতরাশের্ন বিভেমি শিবে য়দি প্রসাদস্তে ।
দলনে দৃষদাং টঙ্কঃ কল্পেত ন কিং নু কান্তিমত্যম্ব ॥ ২১ ॥
কোমলদেহং কিমপি শ্যামলশোভং শরন্মৃগাঙ্কমুখম্ ।
রূপং তব হৃদয়ে মম দীপশ্রিয়মেতু কান্তিমত্যম্ব ॥ ২২ ॥
কিঞ্চনবঞ্চনদক্ষং পঞ্চশরারেঃ প্রপঞ্চজীবাতুম্ ।
চঞ্চলমঞ্চলমক্ষ্ণোরয়ি ময়ি কুরু দেবি কান্তিমত্যম্ব ॥ ২৩ ॥
অঞ্চতি য়ং ত্বদপাঙ্গঃ কিঞ্চিত্তস্যৈব কুম্ভদাসত্বে ।
অহমহমিকয়া বিবুধাঃ কলহং কলয়ন্তি কান্তিমত্যম্ব ॥ ২৪ ॥
কিমিদং বদাদ্ভুতং তে কস্মিংশ্চিল্লক্ষিতে কটাক্ষেণ ।
বৃংহাদীনাং হৃদয়ং দীনত্বং য়াতি কান্তিমত্যম্ব ॥ ২৫ ॥
প্রায়ো রায়োপচিতে মায়োপায়োল্বণাসুরক্ষপণে ।
গেয়ো জায়োরুবলে শ্রেয়ো ভূয়োঽস্তু কান্তিমত্যম্ব ॥ ২৬ ॥
করণং শরণং তব লসদলকং কুলকং গিরীশভাগ্যানাম্ ।
সরলং বিরলং জয়তি সকরুণং তরুণাং হি কান্তিমত্যম্ব ॥ ২৭ ॥
শঙ্করি নমাংসি বাণী কিঙ্করি দৈতেয়রাড্ভয়ঙ্করি তে ।
করবৈ মুরবৈর্যনুজে পুরবৈর্যভিকেঽদ্য কান্তিমত্যম্ব ॥ ২৮ ॥
তব সেবাং ভুবি কে বা নাকাঙ্ক্ষন্তে ক্ষমাভৃতস্তনয়ে ।
ত্বমিব ভবেয়ুর্যদি তে ভজন্তি য়ে য়াং হি কান্তিমত্যম্ব ॥ ২৯ ॥
ভবদবশিখাভিবীতং শীতলয়ের্মাং কটাক্ষবিক্ষেপৈঃ ।
কাদম্বিনীব সলিলৈঃ শিখণ্ডিনং দেবি কান্তিমত্যম্ব ॥ ৩০ ॥
ত্বদ্গুণপয়ঃকণং মে নিপীয় মুক্তেরলঙ্ক্রিয়াং গিরতু ।
চেতঃশুক্তির্মুক্তাং ভক্তিমিষাং দেবি কান্তিমত্যম্ব ॥ ৩১ ॥
গুণগণমহামণীনামাগমপাথোধিজন্মভাজাং তে ।
গুণতাং কদা নু ভজতাং মম ধিষণা দেবি কান্তিমত্যম্ব ॥ ৩২ ॥
পাটীরচর্চিতস্তনি কোটীরকৃতক্ষপাধিরাট্কলিকে ।
বীটীরসেন কবিতাধাটীং কুরু মেঽদ্য কান্তিমত্যম্ব ॥ ৩৩ ॥
তব করুণাং কিং ব্রূমস্ত্বামপ্যেষানবেক্ষ্য তূষ্ণীকাম্ ।
ঊরীকরোতি পাপিনমপি বিনতং দেবি কান্তিমত্যম্ব ॥ ৩৪ ॥
ঈশোঽপি বিনা ভবতীং ন চলিতুমপি কিং পুনর্বয়ং শক্তাঃ ।
কিমুপেক্ষসে প্রসীদ ক্ষিতিধরকন্যেঽদ্য কান্তিমত্যম্ব ॥ ৩৫ ॥
মন্মানসাম্রশাখী পল্লবিতঃ পুষ্পিতোঽনুরাগেণ ।
হর্ষেণ চ প্রসাদাল্লঘু তব ফলিনোঽস্তু কান্তিমত্যম্ব ॥ ৩৬ ॥
ধ্যানাম্বরবসতের্মম মানসমেঘস্য দৈন্যবর্ষস্য ।
পদয়ুগলী তব শম্পা লক্ষ্মীং বিদধাতু কান্তিমত্যম্ব ॥ ৩৭ ॥
কলিতপনভানুতপ্তং চিত্তচকোরং মমাতিশীতাভিঃ ।
জীবয় কটাক্ষদম্ভজ্যোত্স্নাভির্দেবি কান্তিমত্যম্ব ॥ ৩৮ ॥
জ্যোত্স্নাসধ্রীচীভির্দুগ্ধশ্রীভিঃ কটাক্ষবীচীভিঃ ।
শীতলয়ানীচীভিঃ কৃপয়া মাং দেবি কান্তিমত্যম্ব ॥ ৩৯ ॥
রুষ্টা ত্বমাগসা য়দি তর্জয় দৃষ্ট্যাপি নেক্ষসে য়দি মাম্ ।
বাল ইব লোলচক্ষুঃ কং শরণং য়ামি কান্তিমত্যম্ব ॥ ৪০ ॥
বিভবঃ কে কিং কর্তুং প্রভবঃ করুণা ন চেত্তবান্তেঽপি ।
নোচ্ছ্বসিতুং কৃতমেভিস্ত্বামীশ্বরি নৌমি কান্তিমত্যম্ব ॥ ৪১ ॥
জিত্বা মদমুখরিপুগণমিত্বা ত্বদ্ভক্তভাবসাম্রাজ্যম্ ।
গত্বা সুখং জনোঽয়ং বর্তেত কদা নু কান্তিমত্যম্ব ॥ ৪২ ॥
অখিলদিবিষদালম্বে পদয়ুগ্মং দেবি তে সদাঽঽলম্বে ।
জগতাং গোমত্যম্ব ক্ষিতিধরকন্যেঽদ্য কান্তিমত্যম্ব ॥ ৪৩ ॥
অত্রৈব কল্পবল্লীচিন্তামণিরস্তি কামধেনুরপি ।
বেদ্মি ন কিং য়দি বুধতা পুংসা লভ্যেত কান্তিমত্যম্ব ॥ ৪৪ ॥
নাহং ভজামি দৈবং মনসাপ্যন্যত্ত্বমেব দৈবং মে ।
ন মৃষা ভণামি শোধয় মানসমাবিশ্য কান্তিমত্যম্ব ॥ ৪৫ ॥
খেদয়সি মাং মৃগং কিং মৃগতৃষ্ণেব প্রসীদ নৌমি শিবে ।
মোদয় কৃপয়া নো চেত্ক্ব নু য়ায়াং দেবি কান্তিমত্যম্ব ॥ ৪৬ ॥
কার্যং স্বেন স্বহিতং কো নাম বদেদয়ং জনো বেত্তি ।
ত্বং বা বদসি কিমস্মাদ্গতিস্ত্বমেবাস্য কান্তিমত্যম্ব ॥ ৪৭ ॥
ধন্যোঽস্তি কো মদন্যো দিবি বা ভুবি বা করোষি চেত্করুণাম্ ।
ইদমপি বিশ্বং বিশ্বং মম হস্তে কিং চ কান্তিমত্যম্ব ॥ ৪৮ ॥
তরুণেন্দুচূডজায়ে ত্বাং মনুজা য়ে ভজন্তি তেষাং তে ।
ভূতিঃ পদাব্জধূলির্ধূলির্ভূতিস্তু কান্তিমত্যম্ব ॥ ৪৯ ॥
ত্বামত্র সেবতে য়স্ত্বত্সারূপ্যং সমেত্য সোঽমুত্র ।
হরকেল্যাং ত্বদসূয়াপাত্রতি চিত্রাঙ্গি কান্তিমত্যম্ব ॥ ৫০ ॥
চিত্রীয়তে মনস্ত্বাং দৃষ্ট্বা ভাগ্যাবতারমূর্তিং মে ।
কিঞ্চ সুধাব্ধের্লহরীবিহারিতামেতি কান্তিমত্যম্ব ॥ ৫১ ॥
কিরতু ভবতী কটাক্ষাঞ্জলজসদৃক্ষান্ রসেন তাদৃক্ষান্ ।
কৃতসুররক্ষান্মোহনদক্ষান্ভীমস্য কান্তিমত্যম্ব ॥ ৫২ ॥
মানসবার্ধিনিলীনৌ রাগদ্বেষৌ প্রবোধবেদমুষৌ ।
মধুকৈটভৌ তবেক্ষণমীনো মে হরতু কান্তিমত্যম্ব ॥ ৫৩ ॥
মঞ্জুলভাষিণি বঞ্জুলকুড্মলললিতালকে লসত্তিলকে ।
পালয় কুবলয়নয়নে বালং মাং দেবি কান্তিমত্যম্ব ॥ ৫৪ ॥
পুরমথনবিলোলাভিঃ পটুলীলাভিঃ কটাক্ষমালাভিঃ ।
শুভশীলাভিঃ কুবলয়নীলাভিঃ পশ্য কান্তিমত্যম্ব ॥ ৫৫ ॥
করুণারসার্দ্রনয়নে শরণাগতপালনৈককৃতদীক্ষে ।
প্রগুণাভরণে পালয় দীনং মাং দেবি কান্তিমত্যম্ব ॥ ৫৬ ॥
নরজন্মৈব বরং ত্বদ্ভজনং য়েন ক্রিয়েত চেদস্মাত্ ।
কিমবরমেবং নো চেদতস্তদেবাস্তু কান্তিমত্যম্ব ॥ ৫৭ ॥
য়দ্দুর্লভং সুরৈরপি তন্নরজন্মাদিশো নমাম্যেতত্ ।
সার্থয় দানাদ্ভক্তের্ব্যর্থয় মান্যেন কান্তিমত্যম্ব ॥ ৫৮ ॥
জীবতি পঞ্চভিরেভির্ন বিনাঽস্ত্যেভির্জনস্তনুং ভজতে ।
তদপি তদাসীনাং ত্বাং দরমপি নো বেত্তি কান্তিমত্যম্ব ॥ ৫৯ ॥
য়ত্প্রেমদ্বিপবদনে ষড্বদনে বা কুরুষ্ব তন্ময়ি তে ।
জাত্বপি মা ভূদ্ভেদঃ স্তোকেষ্বস্মাসু কান্তিমত্যম্ব ॥ ৬০ ॥
শম্বররুহরুচিবদনে শম্বররিপুজীবিকে হিমাদ্রিসুতে ।
অম্বরমধ্যে বম্বরডম্বরচিকুরেঽব কান্তিমত্যম্ব ॥ ৬১ ॥
মন্মানসপাঠীনং কলিপুলিনে ক্রোধভানুসন্তপ্তে ।
সিঞ্চ পরিতো ভ্রমন্তং কৃপোর্মিভির্দেবি কান্তিমত্যম্ব ॥ ৬২ ॥
য়মিনঃ ক্ব বেদ মুকুটান্যপি ভবতীং ভাবয়ন্তি বা নো বা ।
য়দ্যেবং মম হৃদয়ং বেত্তু কথং ব্রূহি কান্তিমত্যম্ব ॥ ৬৩ ॥
ক্লিশ্যত্যয়ং জনো বত জননাদ্যৈরিত্যহং শ্রিতো ভবতীম্ ।
তত্রাপ্যেবং য়দি বদ তব কিং মহিমাঽত্র কান্তিমত্যম্ব ॥ ৬৪ ॥
বৃজিনানি সন্তু কিমতস্তেষাং ধূত্যৈ ন কিং ভবেদ্বদ তে ।
স্মরণং দৃষদুত্ক্ষেপণমিব কাকগণস্য কান্তিমত্যম্ব ॥ ৬৫ ॥
প্রসরতি তব প্রসাদে কিমলভ্যং ব্যত্যয়ে তু কিং লভ্যম্ ।
লভ্যমলভ্যং কিং নস্তেন বিনা দেবি কান্তিমত্যম্ব ॥ ৬৬ ॥
কিং চিন্তয়ামি সংবিচ্ছরদুদয়ং ত্বত্পদচ্ছলং কতকম্ ।
ঘৃষ্টং য়দি প্রসীদেদ্ধৃদয়জলং মেঽদ্য কান্তিমত্যম্ব ॥ ৬৭ ॥
বিভজতু তব পদয়ুগলী হংসীয়োগীন্দ্রমানসৈকচরী ।
সংবিদসংবিত্পয়সী মিলিতে হৃদি মেঽদ্য কান্তিমত্যম্ব ॥ ৬৮ ॥
কিয়দায়ুস্তত্রার্ধং স্বপ্নে ন হৃতং কিয়চ্চ বাল্যাদ্যৈঃ ।
কিয়দস্তি কেন ভজনং তৃপ্তিস্তব কেন কান্তিমত্যম্ব ॥ ৬৯ ॥
বেদ্মি ন ধর্মমধর্মং কায়ক্লেশোঽস্ত্যদো বিচারফলম্ ।
জানাম্যেকং ভজনং তব শুভদং হীতি কান্তিমত্যম্ব ॥ ৭০ ॥
স্নিহ্যতি ভোগে দ্রুহ্যতি য়োগায়েদং বৃথাঽদ্য মুহ্যতি মে ।
হৃদয়ং কিমু স্বতো বা পরতো বা বেত্তি কান্তিমত্যম্ব ॥ ৭১ ॥
ন বিভীমো ভবজলধের্দরমপি দনুজারিসোদরি শিবে তে ।
আস্তে কটাক্ষবীক্ষাতরণির্ননু দেবি কান্তিমত্যম্ব ॥ ৭২ ॥
চিন্তামণৌ করস্থেঽপ্যটনং বীথীষু কিং ব্রুবে মাতঃ ।
বদ কিং মে ত্বয়ি সত্যামন্যাশ্রয়ণে ন কান্তিমত্যম্ব ॥ ৭৩ ॥
নরবর্ণনেন রসনা পরবনিতাবীক্ষণেন নেত্রমপি ।
ক্রৌর্যেণ মনোঽপি হতং ভাব্যং তু ন বেদ্মি কান্তিমত্যম্ব ॥ ৭৪ ॥
ত্রাসিতসুরপতিতপ্তং তপ্তং কিং ধর্মমেব বা কৢপ্তম্ ।
কিমপি ন সঞ্চিতমমিতং বৃজিনময়ে কিং তু কান্তিমত্যম্ব ॥ ৭৫ ॥
পাপীত্যুপেক্ষসে চেত্পাতুং কাঽন্যা ভবেদ্বিনা ভবতীম্ ।
কিমিদং ন বেদ্মি সোঽয়ং বকমন্ত্রঃ কস্য কান্তিমত্যম্ব ॥ ৭৬ ॥
বঞ্চয়িতুং বৃজিনাদ্যৈর্মুগ্ধান্ভবতীং বিনেতরান্নেক্ষে ।
কিমতঃ পরং করিষ্যসি বিদিতমিদং মেঽদ্য কান্তিমত্যম্ব ॥ ৭৭ ॥
বঞ্চয়সি মাং রুদন্তং বালমিব ফলেন মাং ধনাঢ্যেন ।
মাস্তু কদাপি মমেদং কৈবল্যং দেহি কান্তিমত্যম্ব ॥ ৭৮ ॥
ত্রয়্যা কিং মেঽদ্য গুণে তব বিদিতে য়ো য়তস্তু সম্ভবতি ।
আস্তাং মৌক্তিকলাভে সতি শুক্ত্যা কিং নু কান্তিমত্যম্ব ॥ ৭৯ ॥
অদ্ভুতমিদং সকৃদ্যেন জ্ঞাতা বা শ্রিয়ো দিশস্যেভ্যঃ ।
য়ে খলু ভক্তাস্তেভ্যঃ কৈবল্যং দিশসি কান্তিমত্যম্ব ॥ ৮০ ॥
সুরনৈচিকীব বিবুধান্কাদম্বিনিকেব নীলকণ্ঠমপি ।
প্রীণয়সি মানসং মে শোভয় হংসীব কান্তিমত্যম্ব ॥ ৮১ ॥
কর্তুং মনঃপ্রসাদং তব ময়ি চেত্কিং করিষ্যতি বৃজিনম্ ।
জলজবিকাসে ভানোঃ পরিপন্থিতমো নু কান্তিমত্যম্ব ॥ ৮২ ॥
তব তু করুণা স্রবন্ত্যাং প্রবহন্ত্যাং স্তোকতা গতেতি ময়া ।
লুঠতি স্ফুটতি মনো মে নেদং জানাসি কান্তিমত্যম্ব ॥ ৮৩ ॥
শোধয়িতুমুদাসীনা য়দি মাং পাত্রং কিমস্য পশ্যাহম্ ।
মাদৃশি কা বা বার্তা দাসজনে কান্তিমত্যম্ব ॥ ৮৪ ॥
অভজমনন্যগতিস্ত্বাং কিং কুর্যাস্ত্বং ন বেদ্ম্যতঃপ্রভৃতি ।
অবনে বাঽনবনে বা ন বিচারো মেঽস্তি কান্তিমত্যম্ব ॥ ৮৫ ॥
কিং বর্ততে মমাস্মান্নিখিলজগন্মস্তলালিতং ভাগ্যম্ ।
য়মিহৃদয়পদ্মহংসীং য়ত্ত্বাং সেবেঽদ্য কান্তিমত্যম্ব ॥ ৮৬ ॥
কর্তুং জগন্তি বিধিবদ্ভর্তুং হরিবদ্গিরীশবদ্ধর্তুম্ ।
লীলাবতী ত্বমেব প্রতীয়সে দেবি কান্তিমত্যম্ব ॥ ৮৭ ॥
কেচিদ্বিদন্তি ভবতীং কেচিন্ন বিদন্তি দেবি সর্বমিদম্ ।
ত্বত্কৃত্যং বদ সত্যং কিং লব্ধং তেন কান্তিমত্যম্ব ॥ ৮৮ ॥
শাস্ত্রাণি কুক্ষিপূর্ত্যৈ স্ফূর্ত্যৈ নিগমাশ্চ কর্মণা কিং তৈঃ ।
কিং তব তত্ত্বং জ্ঞেয়ং য়ৈস্ত্বত্কৃপয়ৈব কান্তিমত্যম্ব ॥ ৮৯ ॥
কিং প্রার্থয়ে পুনঃ পুনরবনে ভবতীং বিনা বিচারঃ স্যাত্ ।
কস্যাঃ ক ইতি বিদন্নপি দূয়ে মোহেন কান্তিমত্যম্ব ॥ ৯০ ॥
বিদুষস্ত্বাং শরণং মে শাস্ত্রশ্রমলেশবার্তয়াপি কৃতম্ ।
করজুষি নবনীতে কিং দুগ্ধবিচারেণ কান্তিমত্যম্ব ॥ ৯১ ॥
প্রণবোপনিষন্নিগমাগময়োগিমনঃস্বিবাতিতুঙ্গেষু ।
ভাহি প্রভেব তরণের্মম হৃদি নিম্নেঽপি কান্তিমত্যম্ব ॥ ৯২ ॥
স্ফুটিতারুণমণিশোভং ত্রুটিতাভিনবপ্রবালমৃদুলত্বম্ ।
শ্রুতিশিখরশেখরং তে চরণাব্জং স্তৌমি কান্তিমত্যম্ব ॥ ৯৩ ॥
তব চরণাম্বুজভজনাদমৃতরসস্যন্দিনঃ কদাপ্যন্যত্ ।
স্বপ্নেঽপি কিঞ্চিদপি মে মা স্ম ভবেদ্দেবি কান্তিমত্যম্ব ॥ ৯৪ ॥
বিস্মাপনং পুরারেরস্মাদৃগ্জীবিকাং পরাত্পরমম্ ।
সুষমাময়ং স্বরূপং সদা নিষেবেয় কান্তিমত্যম্ব ॥ ৯৫ ॥
মঙ্গলমস্ত্বিতি পিষ্টং পিনষ্টি গীঃ সর্বমঙ্গলায়াস্তে ।
বশিতজয়ায়াশ্চ তথা জয়েতি বাদোঽপি কান্তিমত্যম্ব ॥ ৯৬ ॥
আশাসিতুর্বিভূত্যৈ ভবতি ভবত্যৈ হি মঙ্গলাশাস্তিঃ ।
স্বামিসমৃদ্ধ্যাশংসা ভৃত্যোন্নত্যৈ হি কান্তিমত্যম্ব ॥ ৯৭ ॥
নিগমৈরপরিচ্ছেদ্যং ক্ব বৈভবং তেঽল্পধীঃ ক্ব চাহমিতি ।
তূষ্ণীকং মাং ভক্তিস্তব মুখরয়তি স্ম কান্তিমত্যম্ব ॥ ৯৮ ॥
অনুকম্পাপরবশিতং কম্পাতটসীম্নি কল্পিতাবসথম্ ।
উপনিষদাং তাত্পর্যং তব রূপং স্তৌমি কান্তিমত্যম্ব ॥ ৯৯ ॥
জয় ধরণীধরতনয়ে জয় বেণুবনাধিরাট্প্রিয়ে দেবি ।
জয় জম্ভভেদিবিনুতে জয় জগতামম্ব কন্তিমত্যম্ব ॥ ১০০ ॥
গুণমঞ্জরিপিঞ্জরিতং সুন্দররচিতং বিভূষণং সুদৃশাম্ ।
গীতিশতকং ভবত্যাঃ ক্ষয়তু কটাক্ষেণ কান্তিমত্যম্ব ॥ ১০১ ॥
বপ্তা য়স্য মনীষিহারতরলঃ শ্রীবেঙ্কটেশো মহান্-
মাতা য়স্য পুনঃ সরোজনিলয়া সাধ্বীশিরোভূষণম্ ।
শ্রীবত্সাভিজনামৃতাম্বুধিবিধুঃ সোঽয়ং কবিঃ সুন্দরো
দেব্যা গীতিশতং ব্যধত্ত মহিতং শ্রীকান্তিমত্যা মুদে ॥ ১০২ ॥
ইতি শ্রীসুন্দরাচার্যপ্রণীতং দেবীগীতিশতকং সম্পূর্ণম্ ॥
