Shanti Geetaa in Bengali:
॥ শান্তিগীতা ॥
মঙ্গলাচরণম্
শান্তায়াব্যক্তরূপায় মায়াধারায় বিষ্ণবে ।
স্বপ্রকাশায় সত্যায় নমোঽস্তু বিশ্বসাক্ষিণে ॥ ১॥
বাণী যস্য প্রকটতি পরং ব্রহ্মতত্ত্বং সুগূঢং
মুক্তীচ্ছূনাং গময়তি পদং পূর্ণমানন্দরূপম্ ।
বিভ্রান্তানাং শময়তি মতিং ব্যাকুলাং ভ্রান্তিমূলাং
ব্রহ্মা হ্যেকাং বিদিশতি পরং শ্রীগুরুং তং নমামি ॥ ২॥
অথ প্রথমোঽধ্যায়ঃ ।
বিখ্যাতঃ পাণ্ডবে বংশে নৃপেশো জনমেজয়ঃ ।
তস্য পুত্রো মহারাজঃ শতানীকো মহামতিঃ ॥ ১॥
একদা সচিবৈর্মিত্রৈর্বেষ্টিতো রাজমন্দিরে ।
উপবিষ্টঃ স্তূয়মানে মাগধৈঃ সূতবন্দিভিঃ ॥ ২॥
সিংহাসনসমারূঢো মহেন্দ্রসদৃশপ্রভঃ ।
নানাকাব্যরসালাপৈঃ পণ্ডিতৈঃ সহ মোদিতঃ ॥ ৩॥
এতস্মিন্ সময়ে শ্রীমান্ শান্তব্রতো মহাতপাঃ ।
সমাগতঃ প্রসন্নাত্মা তেজোরাশিস্তপোনিধিঃ ॥ ৪॥
রাজা দর্শনমাত্রেণ সামাত্যমিত্রবান্ধবৈঃ ।
প্রোত্থিতো ভক্তিভাবেন হর্ষেণোৎফুল্লমানসঃ ॥ ৫॥
প্রণম্য বিনয়াপন্নঃ প্রহ্বীভাবেন শ্রদ্ধয়া ।
দদৌ সিংহাসনং তস্মৈ চোপবেশনকাঙ্ক্ষয়া ॥ ৬॥
পাদ্যমর্ঘ্যং যথায়োগ্যং ভক্তিয়ুক্তেন চেতসা ।
দিব্যাসনে সমাসীনং মুনিং শান্তব্রতং নৃপঃ ॥ ৭॥
পপ্রচ্ছ বিনতঃ স্বাস্থ্যং কুশলং তপসস্ততঃ ।
মুনিঃ প্রোবাচ সর্বত্র সুখং সর্বসুখান্বয়াৎ ॥ ৮॥
অস্মাকং কুশলং রাজন্ রাজ্ঞঃ কুশলতঃ সদা ।
স্বাচ্ছন্দ্যং রাজদেহস্য রাজ্যস্য কুশলং বদ ॥ ৯॥
রাজোবাচ যত্র ব্রহ্মন্নীদৃশস্তাপসোঽনিশম্ ।
তিষ্ঠন্ বিরাজতে তত্র কুশলং কুশলেপ্সয়া ॥ ১০॥
ক্ষেময়ুক্তো প্রসাদেন ভবতঃ শুভদৃষ্টিতঃ ।
দেহে গেহে শুভং রাজ্যে শান্তির্মে বর্ততে সদা ॥ ১১॥
প্রণিপত্য ততো রাজা বিনয়াবনতঃ পুনঃ ।
কৃতাঞ্জলিপুটঃ প্রহ্বঃ প্রাহ তং মুনিসত্তমম্ ॥ ১২॥
শ্রুতা ভবৎপ্রসাদেন তত্ত্ববার্তা সুধা পুরা ।
ইদানীং শ্রোতুমিচ্ছামি যচ্চ সারতরং প্রভো ।
শ্রুৎবা তৎ কৃতকৃত্যঃ স্যাং কৃপয়া বদ মে মুনে ॥ ১৩॥
শান্তব্রত উবাচ ।
শৃণু রাজন্ প্রবক্ষ্যামি সারং গুহ্যতমং পরম্ ।
যদুক্তং বাসুদেবেন পার্থায় শোকশান্তয়ে ॥ ১৪॥
শান্তিগীতেতি বিখ্যাতা সদা শান্তিপ্রদায়িনী ।
পুরা শ্রীগুরুণা দত্তা কৃপয়া পরয়া মুদা ॥ ১৫॥
তং তে বক্ষ্যামি রাজেন্দ্র রক্ষিতা যত্নতো ময়া ।
ভবদ্বুভুৎসয়া রাজন্ শৃণুষ্বাবহিতঃ স্থিরঃ ॥ ১৬॥
ইত্যধ্যাত্মবিদ্যায়াং যোগশাস্ত্রে শান্তিগীতায়াং
শ্রীবাসুদেবর্জুনসংবাদে প্রথমোঽধ্যায়ঃ ॥১॥
অথ দ্বিতীয়োঽধ্যায়ঃ ।
যুদ্ধে বিনিহতে পুত্রে শোকবিহ্বলমর্জুনম্ ।
দৃষ্ট্বা তং বোধয়ামাস ভগবান্ মধসূদনঃ ॥ ১॥
শ্রীভগবানুবাচ ।
কিং শোচসি সখে পার্থ বিস্মৃতোঽসি পুরোদিতম্ ।
মূঢপ্রায়ো বিমুগ্ধোঽসি মগ্নোঽসি শোকসাগরে ॥ ২॥
মায়িকে সত্যবজ্জ্ঞানং শোকমোহস্য কারণম্ ।
ৎবং বুদ্ধোঽসি চ ধীরোঽসি শোকং ত্যক্ত্বা সুখী ভব ॥ ৩॥
সংসারে মায়িকে ঘোরে সত্যভাবেন মোহিতঃ ।
মমতাবদ্ধচিত্তোঽসি দেহাভিমানয়োগতঃ ॥ ৪॥
কো বাসি ৎবং কথং জাতঃ কঃ সুতো বা কলত্রকম্ ।
কথং বা স্নেহবদ্ধোঽসি ক্ষণমাত্রং বিচারয় ॥ ৫॥
অজ্ঞানপ্রভবং সর্বং জীবা মায়াবশংগতাঃ ।
দেহাভিমানয়োগেন নানাদুঃখাদি ভুঞ্জতে ॥ ৬॥
মনঃকল্পিতসংসারং সত্যং মৎবা মৃষাত্মকম্ ।
দুঃখং সুখং চ মন্যন্তে প্রাতিকূল্যানুকূল্যযোঃ ॥ ৭॥
মমতাপাশসংবদ্ধঃ সংসারে ভ্রমপ্রত্যযে ।
অনাদিকালতো জীবঃ সত্যবুদ্ধ্যা বিমোহিতঃ ॥ ৮॥
ত্যক্ত্বা গৃহং যাতি নবং পুরাণমালম্বতে দিব্যগৃহং যথান্যৎ ।
জীবস্তথা জীর্ণবপুর্বিহায় গৃহ্ণাতি দেহান্তরমাশু দিব্যম্ ॥ ৯॥
অভাবঃ প্রাগভাবস্য চাবস্থাপরিবর্তনাৎ ।
পরিণামান্বিতে দেহে পূর্বভাবো ন বিদ্যতে ॥ ১০॥
ন দৃশ্যতে বাল্যভাবো দেহস্য যৌবনোদয়ে ।
অবস্থান্তরসম্প্রাপ্তৌ দেহঃ পরিণমেদ্যতঃ ॥ ১১॥
অতীতে বহুলে কালে দৃষ্ট্বা ন জ্ঞায়তে হি সঃ ।
বুদ্ধেঃ প্রত্যযমাত্রং তৎ স এবেতি বিনিশ্চয়ঃ ॥ ১২॥
ন পশ্যন্তি বাল্যভাবং দেহস্য যৌবনাগমে ।
সুতস্য জনকস্তেন ন শোচতি ন রোদিতি ।
তথা দেহান্তরপ্রাপ্তির্মৎবা শোকং সখে জহি ॥ ১৩॥
যৎপশ্যসি মহাবাহো জগত্তৎপ্রাতিভাসিকম্ ।
সংস্কারবশতো বুদ্ধের্দৃষ্টপূর্বেতি প্রত্যযঃ ॥ ১৪॥
দৃষ্ট্বা তু শুক্তিরজতং লোভাদ্গ্রহীতুমুদ্যতঃ ।
প্রাক্ চ বোধোদয়াৎ দ্রষ্টা স্থানান্তরগতস্ততঃ ॥ ১৫॥
পুনরাগত্য তত্রৈব রজতং স প্রপশ্যতি ।
পূর্বদৃষ্টং মন্যমানো রজতং হর্ষমোদিতঃ ।
বুদ্ধেঃ প্রত্যযসঙ্কল্পাৎ নাস্তি রূপং ত্রিকালকে ॥ ১৬॥
দেহো ভার্যা ধনং পুত্রস্তরুরাজিনিকেতনম্ ।
শুক্তিরজতবৎ সর্বং ন কিঞ্চিৎ সত্যমস্তি তৎ ॥ ১৭॥
সুষুপ্তিকালে ন হি দৃশ্যমানং মনঃস্থিতং সর্বমনন্তবিশ্বম্ ।
সমুত্থিতে তন্মনসি প্রভাতি চরাচরং বিশ্বমিদং ন সত্যম্ ॥ ১৮॥
সদেবাসীৎপুরা সৃষ্টের্নান্যৎ কিঞ্চিন্মিষত্ততঃ ।
ন দেশো নাপি বা কালো নো ভূতং নাপি ভৌতিকম্ ॥ ১৯॥
মায়াবিজৃম্ভিতে তস্মিন্ স্রক্ফণীবোত্থিতং জগৎ ।
তৎসৎ মায়াপ্রভাবেন বিশ্বাকারেণ ভাসতে ॥ ২০॥
ভোক্তা ভোগস্তথা ভোগ্যং কর্তা চ করণং ক্রিয়া ।
জ্ঞাতা জ্ঞানং তথা জ্ঞেয়ং স্বপ্নবদ্ভাতি সর্বশঃ ॥ ২১॥
মায়ানিদ্রাবশাৎ স্বপ্নঃ সংসারো জীবগঃ খলু ।
কারণং হ্যাত্মনোঽজ্ঞানং সংসারস্য ধনঞ্জয় ॥ ২২॥
অজ্ঞানং গুণভেদেন শক্তিভেদেন ন বৈ পুনঃ ।
মায়াঽবিদ্যা ভবেদেকা চিদাভাসেন দীপিতা ॥ ২৩॥
মায়াভাসেন জীবেশো করোতি চ পৃথগ্বিধৌ ।
মায়াভাসো ভবেদীশোঽবিদ্যোপাধিশ্চ জীবকঃ ॥ ২৪॥
চিদধ্যাসাচ্চিদাভাসো ভাসিতৌ চেতনাকৃতী ।
মায়াবচ্ছিন্নচৈতন্যঞ্চাভাসাধ্যাসয়োগতঃ ॥ ২৫॥
ঈশঃ কর্তা ব্রহ্ম সাক্ষী মায়োপহিতসত্তয়া ।
অখণ্ডং সচ্চিদানন্দং পূর্বাধিষ্ঠানমব্যযম্ ॥ ২৬॥
ন জায়তে ম্রিয়াতে বা ন দহ্যতে ন শোষ্যতে ।
অধিকারঃ সদাসঙ্গো নিত্যমুক্তো নিরঞ্জনঃ ।
ইত্যুক্তং তে ময়া পূর্বং স্মৃৎবাত্মন্যবধারয় ॥ ২৭॥
শুক্রশোণিতয়োগেন দেহোঽয়ং ভৌতিকঃ স্মৃতঃ ।
বাল্যে বালকরূপোঽসৌ যৌবনে যুবকঃ পুনঃ ॥ ২৮॥
গৃহীতান্যস্য কন্যাং হি পত্নীভাবেন মোহিতঃ ।
পুরা যয়া ন সম্বন্ধঃ সার্দ্ধাঙ্গী সহধর্মিণী ॥ ২৯॥
তদ্গর্ভে রেতসা জাতঃ পুত্রশ্চ স্নেহভাজনঃ ।
দেহমলোদ্ভবঃ পুত্রঃ কীটবন্মলনির্মিতঃ ।
পিতরৌ মমতাপাশং গলে বদ্ধ্বা বিমোহিতৌ ॥ ৩০॥
ন দেহে তব সম্বন্ধো ন দারেষু সুতে ন চ ।
পাশবদ্ধঃ স্বয়ং ভূৎবা মুগ্ধোঽসি মমতাগুণৈঃ ॥ ৩১॥
দুর্জয়ো মমতাপাশশ্চাচ্ছেদ্যঃ সুরমানবৈঃ ।
মম ভার্যা মমাপত্যঃ মৎবা মুগ্ধোঽসি মূঢবৎ ॥ ৩২॥
ন ৎবং দেহো মহাবাহো তব পুত্রঃ কথং বদ ।
সর্বং ত্যক্ত্বা বিচারেণ স্বরূপমবধারয় ॥ ৩৩॥
অর্জুন উবাচ ।
কিং করোমি জগন্নাথ শোকেন দহ্যতে মনঃ ।
পুত্রস্য গুণকর্মাণি রূপং চ স্মরতো মম ॥ ৩৪॥
চিন্তাপরং মনো নিত্যং ধৈর্যং ন লভতে ক্ষণম্ ।
উপায়ং বদ মে কৃষ্ণ যেন শোকঃ প্রশাম্যতি ॥ ৩৫॥
শ্রীভগবানুবাচ ।
মনসি শোকসন্তাপৌ দহ্যমানস্ততো মনঃ ।
ৎবং পশ্যসি মহাবাহো দ্রষ্টাসি ৎবং মনো ন হি ॥ ৩৬॥
দ্রষ্টা দৃশ্যাৎ পৃথক্ ন্যাসাৎ ৎবং পৃথক্ চ বিলক্ষণঃ ।
অবিবেকাৎ মনো ভূৎবা দগ্ধোঽহমিতি মন্যসে ॥ ৩৭॥
অন্তঃকরণমেকং তচ্চতুর্বৃত্তিসমন্বিতম্ ।
মনঃ সঙ্কল্পরূপং বৈ বুদ্ধিশ্চ নিশ্চয়াত্মিকা ॥ ৩৮॥
অনুসন্ধানবচ্চিত্তমহঙ্কারোঽভিমানকঃ ।
পঞ্চভূতাংশসংভূতা বিকারী দৃশ্যচঞ্চলঃ ॥ ৩৯॥
যদঙ্গমগ্নিনা দগ্ধং জানাতি পুরুষো যথা ।
তথা মনঃ শুচা তপ্তং ৎবং জানাসি ধনঞ্জয় ॥ ৪০॥
দগ্ধহস্তো যথা লোকো দগ্ধোঽহমিতি মন্যতে ।
অবিবেকাত্তথা শোকতপ্তোঽহমিতি মন্যতে ॥ ৪১॥
জাগ্রতি জায়মানং তৎ সুষুপ্তৌ লীয়তে পুনঃ ।
ৎবং চ পশ্যসি বোধস্ত্বং ন মনোঽসি শুচালয়ঃ ॥ ৪২॥
সুষুপ্তো মানসে লীনে ন শোকোঽপ্যণুমাত্রকঃ ।
জাগ্রতি শোকদুঃখাদি ভবেন্মনসি চোত্থিতে ॥ ৪৩॥
সর্বং পশ্যসি সাক্ষী ৎবং তব শোকঃ কথং বদ ।
শোকো মনোময়ে কোষে দুঃখোদ্বেগভয়াদিকম্ ॥ ৪৪॥
স্বরূপোঽনবোধেন তাদাত্ম্যাধ্যাসয়োগতঃ ।
অবিবেকান্মনোধর্মং মৎবা চাত্মনি শোচসি ॥ ৪৫॥
শোকং তরতি চাত্মজ্ঞঃ শ্রুতিবাক্যং বিনিশ্চিনু ।
অতঃ প্রয়ত্নতো বিদ্বান্নাত্মানং বিদ্ধি ফাল্গুন ॥ ৪৬॥
ইত্যধ্যাত্মবিদ্যায়াং যোগশাস্ত্রে শান্তিগীতায়াং
শ্রীবাসুদেবর্জুনসংবাদে দ্বিতীয়োঽধ্যায়ঃ ॥২॥
অথ তৃতীয়োঽধ্যায়ঃ ।
অর্জুন উবাচ ।
মনোবুদ্ধীন্দ্রিয়াদীনাং য আত্মা ন হি গোচরঃ ।
স কথং লভ্যতে কৃষ্ণ তদ্ব্রূহি যদুনন্দন ॥ ১॥
শ্রীভগবানুবাচ ।
আত্মাতিসূক্ষ্মরূপৎবাৎ বুদ্ধ্যাদীনামগোচরঃ ।
লভ্যতে বেদবাক্যেন চাচার্যানুগ্রহেণ চ ॥ ২॥
মহাবাক্যবিচারেণ গুরূপদিষ্টমার্গতঃ ।
শিষ্যো গুণাভিসম্পন্নো লভেত শুদ্ধমানসঃ ॥ ৩॥
একার্থবোধকং বেদে মহাবাক্যচতুষ্টয়ম্ ।
তত্ত্বমসি গুরোর্বক্ত্রাৎ শ্রুৎবা সিদ্ধিমবাপ্নুয়াৎ ॥ ৪॥
গুরুসেবাং প্রকুর্বাণো গুরুভক্তিপরায়ণঃ ।
গুরোঃ কৃপাবশাৎ পার্থ লভ্য আত্মা ন সংশয়ঃ ॥ ৫॥
আত্মবাসনয়া যুক্তো জিজ্ঞাসুঃ শুদ্ধমানসঃ ।
বিষয়াসক্তিসংত্যক্তঃ স্বাত্মানং বেত্তি শ্রদ্ধয়া ॥ ৬॥
বৈরাগ্যং কারণং চাদৌ যদ্ভবেদ্বুধিশুদ্ধিতঃ ।
কর্মণা চিত্তশুদ্ধিঃ স্যাদ্বিশেষং শৃণু কাথ্যতে ॥ ৭॥
স্ববর্ণাশ্রমধর্মেণ বেদোক্তেন চ কর্মণা ।
নিষ্কামেন সদাচার ঈশ্বরং পরিতোষয়েৎ ॥ ৮॥
কামসঙ্কল্পসংত্যাগাদীশ্বরপ্রীতিমানসাৎ ।
স্বধর্মপালনাচ্চৈব শ্রদ্ধাভক্তিসমন্বয়াৎ ॥ ৯॥
নিত্যনৈমিত্তিকাচারাৎ ব্রহ্মণি কর্মণোঽর্পণাৎ ।
দেবায়তনতীর্থানাং দর্শনাৎ পরিসেবনাৎ ।
যথাবিধি ক্রমেণৈব বুদ্ধিশুদ্ধিঃ প্রজায়তে ॥ ১০॥
পাপেন মলিনা বুদ্ধিঃ কর্মণা শোধিতা যদা ।
তদা শুদ্ধা ভবেৎ সৈব মলদোষবিবর্জনাৎ ॥ ১১॥
নির্মলায়াং তত্র পার্থ বিবেক উপজায়তে ।
কিং সত্যং কিমসত্যং বেত্যদ্যালোচনতৎপরঃ ॥ ১২॥
ব্রহ্ম সত্যং জগন্মিথ্যা বিবেকাদ্দৃঢনিশ্চয়ঃ ।
ততো বৈরাগ্যমাসক্তেস্ত্যাগো মিথ্যাত্মকেষু চ ॥ ১৩॥
ভোগ্যং বৈ ভোগিভোগং বিষময়বিষয়ং প্লোষিণী চাপি পত্নী
বিত্তং চিত্তপ্রমাথং নিধনকরধনং শত্রুবৎ পুত্রকন্যে ।
মিত্রং মিত্রোপতাপং বনমিব ভবনং চান্ধবদ্বন্ধুবর্গাঃ
সর্বং ত্যক্ত্বা বিরাগী নিজহিতনিরতঃ সৌখ্যলাভে প্রসক্তঃ ॥ ১৪॥
ভোগাসক্তাঃ প্রমুগ্ধাঃ সততধনপরা ভ্রাম্যমাণা যথেচ্ছং
দারাপত্যাদিরক্তা নিজজনভরণে ব্যগ্রচিত্তা বিষণ্ণাঃ ।
লপ্স্যেঽহং কুত্র দর্ভং স্মরণমনুদিনং চিন্তয়া ব্যাকুলাত্মা
হা হা লোকা বিমূঢাঃ সুখরসবিমুখাঃ কেবলা দুঃখভারাঃ ॥ ১৫॥
ব্রহ্মাদি স্তম্বপর্যন্তং বস্তু সর্বং জুগুপ্সিতম্ ।
শুনো বিষ্ঠাসমং ত্যাজ্যং ভোগবাসনয়া সহ ॥ ১৬॥
নোদেতি বাসনা ভোগে ঘৃণা বান্তাশনে যথা ।
ততঃ শমদমৌ চৈব মন ইন্দ্রিয়নিগ্রহঃ ॥ ১৭॥
তিতিক্ষোপরতিশ্চৈব সমাধানং ততঃ পরম্ ।
শ্রদ্ধা শ্রুতি-গুরোর্বাক্যে বিশ্বাসঃ সত্যনিশ্চয়াৎ ॥ ১৮॥
সংসারগ্রন্ধিভেদেন মোক্তুমিচ্ছা মুমুক্ষুতা ।
এতৎসাধনসম্পন্নো জিজ্ঞাসুর্গুরুমাশ্রয়েৎ ॥ ১৯॥
জ্ঞানদাতা গুরুঃ সাক্ষাৎ সংসারার্ণবতারকঃ ।
শ্রীগুরুকৃপয়া শিষ্যস্তরেৎ সংসারবারিধিম্ ॥ ২০॥
বিনাচার্যং ন হি জ্ঞানং ন মুক্তির্নাপি সদ্গতিঃ ।
অতঃ প্রয়ত্নতো বিদ্বান্ সেবয়া তোষয়েদ্গুরুম্ ॥ ২১॥
সেবয়া সম্প্রসন্নাত্মা গুরুঃ শিষ্যং প্রবোধয়েৎ ।
ন ৎবং দেহো নেন্দ্রিয়াণি ন প্রাণো ন মনোধিয়ঃ ॥ ২২॥
এষাং দ্রষ্টা চ সাক্ষী ৎবং সচ্চিদানন্দবিগ্রহঃ ।
প্রতিবন্ধকশূন্যস্য জ্ঞানং স্যাৎ শ্রুতিমাত্রতঃ ॥ ২৩॥
ন চেন্মননয়োগেন নিদিধ্যাসনতঃ পুনঃ ।
প্রতিবন্ধক্ষয়ে জ্ঞানং স্বয়মেবোপজায়তে ॥ ২৪॥
বিস্মৃতং স্বরূপং তত্র লব্ধ্বা চামীকরং যথা ।
কৃতার্থঃ পরমানন্দো মুক্তো ভবতি তৎক্ষণম্ ॥ ২৫॥
অর্জুন উবাচ ।
জীবঃ কর্তা সদা ভোক্তা নিষ্ক্রিয়ং ব্রহ্ম যাদব ।
ঐক্যজ্ঞানং তয়োঃ কৃষ্ণ বিরুদ্ধৎবাৎ কথং ভবেৎ ॥ ২৬॥
এতন্মে সংশয়ং ছিন্ধি প্রপন্নোঽহং জনার্দন ।
ৎবাং বিনা সংশয়চ্ছেত্তা নাস্তি কশ্চিদ্বিনিশ্চয়ঃ ॥ ২৭॥
শ্রীবাসুদেব উবাচ ।
সংশোধ্য ৎবং পদং পূর্বং স্বরূপমবধারয়েৎ ।
প্রকারং শৃণু বক্ষ্যামি বেদবাক্যানুসারতঃ ॥ ২৮॥
দেহত্রয়ং জডৎবেন নাশ্যৎবেন নিরাসয় ।
স্থূলং সূক্ষ্মং কারণং চ পুনঃ পুনর্বিচারয় ॥ ২৯॥
কাষ্ঠাদি লোষ্টবৎ সর্বমনাত্মজডনশ্বরম্ ।
কদলীদলবৎ সর্বং ক্রমেণৈব পরিত্যজ ॥ ৩০॥
তদ্বাধস্য হি সীমানং ত্যাগয়োগ্যং স্বয়ম্প্রভম্ ।
ৎবমাত্মৎবেন সংবিদ্ধি চেতি ৎবং-পদ-শোধনম্ ॥ ৩১॥
তৎপদস্য চ পারোক্ষ্যং মায়োপাধিং পরিত্যজ ।
তদধিষ্ঠানচৈতন্যং পূর্ণমেকং সদব্যযম্ ॥ ৩২॥
তয়োরৈক্যং মহাবাহো নিত্যাখণ্ডাবধারণম্ ।
ঘটাকাশো মহাকাশ ইবাত্মানং পরাত্মনি ।
ঐক্যমখণ্ডভাবং ৎবং জ্ঞাৎবা তূষ্ণীং ভবার্জুন ॥ ৩৩॥
জ্ঞাৎবৈবং যোগয়ুক্তাত্মা স্থিরপ্রজ্ঞঃ সদা সুখী ।
প্রারব্ধবেগপর্যন্তং জীবন্মুক্তো বিহারবান্ ॥ ৩৪॥
ন তস্য পুণ্যং ন হি তস্য পাপং নিষেধনং নৈব পুনর্ন বৈধম্ ।
সদা স মগ্নঃ সুখবারিরাশৌ বপুশ্চরেৎ প্রাক্কৃতকর্ময়োগাৎ ॥ ৩৫॥
ইত্যধ্যাত্মবিদ্যায়াং যোগশাস্ত্রে শান্তিগীতায়াং
শ্রীবাসুদেবর্জুনসংবাদে তৃতীয়োঽধ্যায়ঃ ॥৩॥
অথ চতুর্থোঽধ্যায়ঃ ।
অর্জুন উবাচ ।
যোগয়ুক্তঃ কথং কৃষ্ণ ব্যবহারে চরেদ্বদ ।
বিনা কস্যাপ্যহঙ্কারং ব্যবহারো ন সম্ভবেৎ ॥ ১॥
শ্রীভগবানুবাচ ।
শৃণু তত্ত্বং মহাবাহো গুহ্যাৎ গুহ্যতরং পরম্ ।
যচ্ছ্রুৎবা সংশয়চ্ছেদাৎ কৃতকৃত্যো ভবিষ্যসি ॥ ২॥
ব্যাবহারিকদেহেঽস্মিন্নাত্মবুদ্ধ্যা বিমোহিতঃ ।
করোতি বিবিধং কর্ম জীবোঽহঙ্কারয়োগতঃ ॥ ৩॥
ন জানাতি স্বমাত্মানমহং কর্তেতি মোহিতঃ ।
অহঙ্কারস্য সদ্ধর্মং সংঘাতং ন বিচালয়েৎ ॥ ৪॥
আত্মা শুদ্ধঃ সদা মুক্তঃ সঙ্গহীনশ্চিদক্রিয়ঃ ।
ন হি সম্বন্ধগন্ধং তৎ সংঘাতৈর্মায়িকৈঃ ক্বচিৎ ॥ ৫॥
সচ্চিদানন্দমাত্মানং যদা জানাতি নিষ্ক্রিয়ম্ ।
তদা তেভ্যঃ সমুত্তীর্ণঃ স্বস্বরূপে ব্যবস্থিতম্ ॥ ৬॥
প্রারব্ধাৎ বিচরেদ্দেহো ব্যবহারং করোতি চ ।
স্বয়ং স সচ্চিদানন্দো নিত্যঃ সঙ্গবিবর্জিতঃ ॥ ৭॥
অখণ্ডমদ্বয়ং পূর্ণং সদা সচ্চিৎসুখাত্মকম্ ।
দেশকালজগজ্জীবা ন হি তত্র মনাগপি ॥ ৮॥
মায়াকার্যমিদং সর্বং ব্যবহারিকমেব তু ।
ইন্দ্রজালময়ং মিথ্যা মায়ামাত্রবিজৃম্ভিতম্ ॥ ৯॥
জাগ্রদাদি বিমোক্ষান্তং মায়িকং জীবকল্পিতম্ ।
জীবস্যানুভবঃ সর্বঃ স্বপ্নবদ্ভরতর্ষভ ॥ ১০॥
ন ৎবং নাহং ন বা পৃথ্বী ন দারা ন সুতাদিকম্ ।
ভ্রান্তোঽসি শোকসন্তাপৈঃ সত্যং মৎবা মৃষাত্মকম্ ॥ ১১॥
শোকং জহি মহাবাহো জ্ঞাৎবা মায়াবিলাসকম্ ।
ৎবং সদাদ্বয়রূপোঽসি দ্বৈতলেশবিবর্জিতঃ ।
দ্বৈতং মায়াময়ং সর্বং ৎবয়ি ন স্পৃশ্যতে ক্বচিৎ ॥ ১২॥
একং ন সঙ্খ্যাবদ্ধৎবাৎ ন দ্বয়ং তত্র শোভতে ।
একং স্বজাতিহীনৎবাদ্বিজাতিশূন্যমদ্বয়ম্ ॥ ১৩॥
কেবলং সর্বশূন্যৎবাদক্ষয়াচ্চ সদব্যযম্ ।
তুরীয়ং ত্রিতয়াপেক্ষং প্রত্যক্ প্রকাশকৎবতঃ ॥ ১৪॥
সাক্ষি-সাক্ষ্যমপেক্ষ্যৈব দ্রষ্টৃদৃশ্যব্যপেক্ষয়া ।
অলক্ষ্যং লক্ষণাভাবাৎ জ্ঞানং বৃত্যধিরূঢতঃ ॥ ১৫॥
অর্জুন উবাচ ।
কা মায়া বাঽদ্ভুতা কৃষ্ণ কাঽবিদ্যা জীবসূতিকা ।
নিত্যা বাপ্যপরাঽনিত্যা কঃ স্বভাবস্তয়োর্হরে ॥ ১৬॥
শ্রীভগবানুবাচ ।
শৃণু মহাদ্ভুতা মায়া সত্ত্বাদি ত্রিগুণান্বিতা ।
উৎপত্তিরহিতাঽনাদির্নৈসর্গিক্যপি কথ্যতে ॥ ১৭॥
অবস্তু বস্তুবদ্ভাতি বস্তুসত্তাসমাশ্রিতা ।
সদসদ্ভ্যামনির্বাচ্যা সান্তা চ ভাবরূপিণী ॥ ১৮॥
ব্রহ্মাশ্রয়া চিদ্বিষয়া ব্রহ্মশক্তির্মহাবলা ।
দুর্ঘটোদ্ঘটনাশীলা জ্ঞাননাশ্যা বিমোহিনী ॥ ১৯॥
শক্তিদ্বয়ং হি মায়ায়া বিক্ষেপাবৃত্তিরূপকম্ ।
তমোঽধিকাবৃতিঃ শক্তিবিক্ষেপাখ্যা তু রাজসী ॥ ২০॥
বিদ্যারূপা শুদ্ধসত্ত্বা মোহিনী মোহনাশিনী ।
তমঃপ্রাধান্যতোঽবিদ্যা সাবৃতিশক্তিমত্ত্বতঃ ॥ ২১॥
মায়াঽবিদ্যা ন বৈ ভিন্না সমষ্টি-ব্যষ্টিরূপতঃ ।
মায়াবিদ্যা-সমষ্টিঃ সা চৈকৈব বহুধা মতা ॥ ২২॥
চিদাশ্রয়া চিতিভাস্যা বিষয়ং তাং করোতি হি ।
আবৃত্য চিৎস্বভাবং সদ্বিক্ষেপং জনয়েত্ততঃ ॥ ২৩॥
অর্জুন উবাচ ।
যদ্ব্রহ্মশক্তির্যা মায়া সাপি নাশ্যা ভবেৎ কথম্ ।
যদি মিথ্যা হি সা মায়া নাশস্তস্যাঃ কথং বদ ॥ ২৪॥
শ্রীভগবানুবাচ ।
মায়াখ্যাং ভাবসংয়ুক্তাং কথয়ামি শৃণুষ্ব মে ।
প্রকৃতিং গুণসাম্যাত্তাং মায়াং চাদ্ভুতকারিণীম্ ॥ ২৫॥
প্রধানমাত্মসাৎকৃৎবা সর্বং তিষ্ঠেদুদাসিনী ।
বিদ্যা নাশ্যা তথাঽবিদ্যা শক্তির্ব্রহ্মাশ্রয়ৎবতঃ ॥ ২৬॥
বিনা চৈতন্যমন্যত্র নোদেতি ন চ তিষ্ঠতি ।
অত,এব ব্রহ্মশক্তিরিত্যাহুর্ব্রহ্মবাদিনঃ ॥ ২৭॥
শক্তিতত্ত্বং প্রবক্ষ্যামি শৃণুষ্ব তৎসমাহিতঃ ।
ব্রহ্মণশ্চিজ্জডৈর্ভেদাৎ দ্বে শক্তী পরিকীর্তিতে ॥ ২৮॥
চিচ্ছক্তিঃ স্বরূপং জ্ঞেয়া মায়া জডা বিকারিণী ।
কার্যপ্রসাধিনী মায়া নির্বিকারা চিতিঃ পরা ॥ ২৯॥
অগ্নের্যথা দ্বয়ী শক্তির্দাহিকা চ প্রকাশিকা ।
ন হি ভিন্নাথবাঽভিন্না দাহশক্তিশ্চ পাবকাৎ ॥ ৩০॥
ন জ্ঞায়তে কথং কুত্র বিদ্যতে দাহতঃ পুরা ।
কার্যানুমেয়া সা জ্ঞেয়া দাহেনানুমিতির্যতঃ ॥ ৩১॥
মণিমন্ত্রাদিয়োগেন রুধ্যতে ন প্রকাশতে ।
সা শক্তিরনলাদ্ভিন্না রোধনান্ন হি তিষ্ঠতি ॥ ৩২॥
নোদেতি পাবকাদ্ভিন্না ততোঽভিন্নেতি মন্যতে ।
নানলে বর্ততে সা চ ন কার্যে স্ফোটকে তথা ॥ ৩৩॥
অনির্বাচ্যাদ্দতা চৈব মায়াশক্তিস্তথেষ্যতাম্ । dda?dhR^i
যা শক্তির্নানলাদ্ভিন্না তাং বিনাগ্নির্ন কিঞ্চন ॥ ৩৪॥
অনলস্বরূপা জ্ঞেয়া শক্তিঃ প্রকাশরূপিণী ।
চিচ্ছক্তির্ব্রহ্মণস্তদ্বৎ স্বরূপং ব্রহ্মণঃ স্মৃতম্ ॥ ৩৫॥
দাহিকাসদৃশী মায়া জডা নাশ্যা বিকারিণী ।
মৃষাত্মিকা তু যাঽবস্তু তন্নাশস্তত্ত্বদৃষ্টিতঃ ॥ ৩৬॥
মিথ্যেতি নিশ্চয়াৎ পার্থ মিথ্যাবস্তু বিনশ্যতি ।
আশ্চর্যরূপিণী মায়া স্বনাশেন হি হর্ষদা ॥ ৩৭॥
অজ্ঞানাৎ মোহিনী মায়া প্রেক্ষণেন বিনশ্যতি ।
মায়াস্বভাববিজ্ঞানং সান্নিধ্যং ন হি বাঞ্ছতি ॥ ৩৮॥
মহামায়া ঘোরা জনয়তি মহামোহমতুলং
ততো লোকাঃ স্বার্থে বিবশপতিতাঃ শোকবিকলাঃ ।
সহন্তে দুঃসহ্যং জনিমৃতিজরাক্লেশবহুলং
সুভুঞ্জানা দুঃখং ন হি গতিপরাং জন্মবহুভিঃ ॥ ৩৯॥
ইত্যধ্যাত্মবিদ্যায়াং যোগশাস্ত্রে শ্রীবাসুদেবার্জুনসংবাদে
শান্তিগীতায়াং চতুর্থোঽধ্যায়ঃ ॥৪॥
অথ পঞ্চমোঽধ্যায়ঃ ।
অর্জুন উবাচ ।
মায়াঽবস্তু মৃষারূপা কার্যং তস্যা ন সম্ভবেৎ ।
বন্ধ্যাপুত্রো রণে দক্ষো জয়ী যুদ্ধে তথা ন কিম্ ॥ ১॥
ব্যোমারবিন্দবাসেন যথা বাসঃ সুবাসিতম্ ।
মায়ায়াঃ কার্যবিস্তারস্তথা যাদব মে মতিঃ ॥ ২॥
শ্রীভগবানুবাচ ।
দৃশ্যতে কার্যবাহুল্যং মিথ্যারূপস্য ভারত ।
অসত্যো ভুজগো রজ্জ্বাং জনয়েদ্বেপথুং ভয়ম্ ॥ ৩॥
উৎপাদয়েদ্রূপ্যখণ্ডং শুক্তৌ চ লোভমোহনম্ ।
সূয়তে হি মৃষামায়া ব্যবহারাস্পদং জগৎ ॥ ৪॥
তত্ত্বজ্ঞস্য মৃষামায়া পুরা প্রোক্তা ময়ানঘ ।
মৃষামায়া চ তৎকার্যং মৃষাজীবঃ প্রপশ্যতি ।
সর্বং তৎস্বপ্নবদ্ভানং চৈতন্যেন বিভাস্যতে ॥ ৫॥
অজ্ঞঃ সত্যং বিজানাতি তৎকার্যেণ বিমোহিতঃ ॥ ৬॥
প্রবুদ্ধতত্ত্বস্য তু পূর্ণবোধে ন সত্যমায়া ন চ কার্যমস্যাঃ ।
তমন্তমঃকার্যমসত্যসর্বং ন দৃশ্যতে ভানুমহাপ্রকাশে ॥ ৭॥
অর্জুন উবাচ ।
অকর্মকর্মণোর্ভেদং পুরোক্তং যত্ত্বয়া হরে ।
তত্তাৎপর্যং সুগূঢং যদ্বিশেষং কথয়াধুনা ॥ ৮॥
শ্রীবাসুদেব উবাচ ।
কর্মণ্যকর্ম যঃ পশ্যেদ্যদুক্তং কুরুনন্দন ।
শৃণুষ্বাবহিতো বিদ্বন্ তত্তাৎপর্যং বদামি তে ॥ ৯॥
ভবতি স্বপ্নে যৎকর্ম শয়ানস্য ন কর্তৃতা ।
পশ্যত্যকর্ম বুদ্ধঃ সন্নসঙ্গং ন ফলং যতঃ ॥ ১০॥
স্বপ্নব্যাপারমিথ্যাৎবাৎ ন সত্যং কর্ম তৎফলম্ ।
অতোঽকর্মৈব তৎকর্ম দার্ষ্টান্তিকমতঃ শৃণু ॥ ১১॥
সঙ্ঘাত্যৈর্মায়িকৈঃ কর্ম ব্যবহারশ্চ লৌকিকঃ ।
মায়ানিদ্রাবশাৎস্বপ্নমনৃতং সর্বমেব হি ॥ ১২॥
সাভাসাহঙ্কৃতির্জীবঃ কর্তা ভোক্তা চ তত্র বৈ ।
জ্ঞানী প্রবুদ্ধো নিদ্রায়াঃ সর্বং মিথ্যেতি নিশ্চয়ী ॥ ১৩॥
কর্মণ্যকর্ম পশ্যেৎ স স্বয়ং সাক্ষিস্বরূপতঃ ।
জ্ঞানাভিমানিনস্ত্বজ্ঞাস্ত্যক্ত্বা কর্মাণ্যবস্থিতাঃ ॥ ১৪॥
প্রত্যবায়াদ্ভবেদ্ভোগঃ জ্ঞানী কর্ম তমিচ্ছতি ।
উদ্দেশ্যং সর্ববেদানাং সফলং কৃৎস্নকর্মণাম্ ॥ ১৫॥
তত্তত্ত্বজ্ঞো যতো বিদ্বানতঃ স কৃৎস্নকর্মকৃৎ ।
সর্বে বেদা যত্র চৈকীভবন্তীতি প্রমাণতঃ ।
উদ্দেশ্যং সর্ববেদানাং ফলং তৎকৃৎস্নকর্মণাম্ ॥ ১৬॥
অজ্ঞানিনাং জগৎ সত্যং তত্তুচ্ছং হি বিচারিণাম্ ।
বিজ্ঞানাং মায়িকং মিথ্যা ত্রিবিধো ভাবনির্ণয়ঃ ॥ ১৭॥
অর্জুন উবাচ ।
জ্ঞাৎবা তত্ত্বমিদং সত্যং কৃতার্থোঽহং ন সংশয়ঃ ।
অন্যৎ পৃচ্ছামি তত্তথ্যং কথয়স্ব সবিস্তরম্ ॥ ১৮॥
সর্বকর্ম পরিত্যজ্য মামেকং শরণং ব্রজ ।
পুরা প্রোক্তস্য তাৎপর্যং শ্রোতুমিচ্ছামি তদ্বদ ॥ ১৯॥
শ্রীভগবানুবাচ ।
নিত্যং নৈমিত্তিকং কার্যং স্বাভাব্যং চ নিষেধিতম্ ।
এতৎ পঞ্চবিধং কর্ম বিশেষং শৃণু কথ্যতে ॥ ২০॥
কর্তুং বিধানং যদ্বেদে নিত্যাদি বিহিতং মতম্ ।
নিবারয়তি যদ্বেদস্তন্নিষিদ্ধং পরন্তপ ।
বেদঃ স্বাভাবিকে সর্বং ঔদসীন্যাবলম্বিতঃ ॥ ২১॥
প্রত্যবায়ো ভবেদ্যস্যাঽকরণে নিত্যমেব তৎ ।
ফলং নাস্তীতি নিত্যস্য কেচিদ্বদন্তি পণ্ডিতাঃ ॥ ২২॥
ন সৎ তদ্যুক্তিতঃ পার্থ কর্তব্যং নিষ্ফলং কথম্ ।
ন প্রবৃত্তিঃ ফলাভাবে তাং বিনাচরণং ন হি ॥ ২৩॥
নিত্যেনৈব দেবলোকং তথৈব বুদ্ধিশোধনম্ ।
ফলমকরণে পাপং প্রত্যবায়াচ্চ দৃশ্যতে ॥ ২৪॥
প্রত্যবায়ঃ ফলং পাপং ফলাভাবে ন সম্ভবেৎ ।
নাভাবাজ্জায়তে ভাবো ফলাভাবো ন সম্মতঃ ॥ ২৫॥
নৈমিত্তিকং নিমিত্তেন কর্তব্যং বিহিতং সদা ।
চন্দ্রসূর্যগ্রহে দানং শ্রাদ্ধাদি তর্পণং যথা ॥ ২৬॥
কাম্যং তৎ কামনায়ুক্তং স্বর্গাদিসুখসাধনম্ ।
ধনাগমশ্চ কুশলং সমৃদ্ধির্জয় ঐহিকে ॥ ২৭॥
তদ্বন্ধদৃঢতাহেতুঃ সত্যবুদ্ধেস্তু সংসৃতৌ ।
অতঃ প্রয়ত্নতস্ত্যাজ্যঃ কাম্যঞ্চৈব নিষেধিতম্ ॥ ২৮॥
অধিকারিবিশেষে তু কাম্যস্যাপ্যুপয়োগিতা ।
কামনাসিদ্ধিরুক্তৎবাৎ কাম্যে লোভপ্রদর্শনাৎ ॥ ২৯॥
প্রবৃত্তিজননাচ্চৈব লোভবাক্যং প্রলোভনাৎ ।
বহির্মুখানাং দুর্বৃত্তিনিবৃত্তিঃ কাম্যকর্মভিঃ ॥ ৩০॥
সৎপ্রবৃত্তিবিবৃদ্ধ্যর্থং বিধানং কাম্যকর্মণাম্ ।
কাম্যোঽবান্তরভোগশ্চ তদন্তে বুদ্ধিশোধনম্ ॥ ৩১॥
ঈশ্বরারাধনাদুগ্ধং কামনাজলমিশ্রিতম্ ।
বৈরাগ্যানলতাপেন তজ্জলং পরিশোষ্যতে ॥ ৩২॥
ঈশ্বরারাধনা তত্র দুগ্ধবদবশিষ্যতে ।
তেন শুদ্ধং ভবেচ্চিত্তং তাৎপর্যং কামকর্মণঃ ॥ ৩৩॥
কর্মবীজাদিহৈকস্মাজ্জায়তে চাঙ্কুরদ্বয়ম্ ।
অপূর্বমেকমপরা বাসনা পরিকীর্তিতা ॥ ৩৪॥
ভবত্যপূর্বতো ভোগো দৎবা ভোগং স নশ্যতি ।
বাসনা সূয়তে কর্ম শুভাশুভবিভেদতঃ ॥ ৩৫॥
বাসনয়া ভবেৎ কর্ম কর্মণা বাসনা পুনঃ ।
এতাভ্যাং ভ্রমিতো জীবঃ সংসৃতের্ন নিবর্ততে ॥ ৩৬॥
দুঃখহেতুস্ততঃ কর্ম জীবানাং পদশৃঙ্খলম্ ।
চিন্তা বৈষম্যচিত্তস্য অশেষদুঃখকারণম্ ॥ ৩৭॥
সর্বং কর্ম পরিত্যজ্য একং মাং শরণং ব্রজেৎ ।
মাংশব্দস্তত্ত্বদৃষ্ট্যা তু ন হি সঙ্ঘাতদৃষ্টিতঃ ॥ ৩৮॥
একোঽহং সচ্চিদানন্দস্তাৎপর্যেণ তমাশ্রয় ।
সদেকাসীদিতি শ্রৌতং প্রমাণমেকশব্দকে ।
একং মাং সর্বভূতেষু যঃ পশ্যতি স পশ্যতি ॥ ৩৯॥
সর্বকর্ম মহাবাহো ত্যজেৎ সন্ন্যাসপূর্বকম্ ।
সর্বকর্ম তথা চিন্তাং ত্যক্ত্বা সন্ন্যাসয়োগতঃ ।
জানীয়াদেকমাত্মানং সদা তচ্চিত্তসংয়তঃ ॥ ৪০॥
বিধিনা কর্মসংত্যাগঃ সন্ন্যাসেন বিবেকতঃ ।
অবৈধং স্বেচ্ছয়া কর্ম ত্যক্ত্বা পাপেন লিপ্যতে ॥ ৪১॥
আত্মজ্ঞানং বিনা ন্যাসং পাতিত্যায়ৈব কল্প্যতে ।
কর্ম ব্রহ্মোভয়ভ্রষ্টো নদ্যাং দ্বিকূলবর্জিতঃ ।
অহঙ্কারমহাগ্রাহগ্রস্যমানো বিনশ্যতি ॥ ৪২॥
জাঠরে ভরণে রক্তঃ সংসক্তঃ সঞ্চয়ে তথা ।
পরাঙ্মুখঃ স্বাত্মতত্ত্বে স সন্ন্যাসী বিডম্বিতঃ ॥ ৪৩॥
সর্বকর্মবিরাগেণ সন্ন্যসেদ্বিধিপূর্বকম্ ।
অথবা সন্ন্যসেৎ কর্ম জন্মহেতুং হি সর্বতঃ ॥ ৪৪॥
একং মাং সংশ্রয়েৎ পার্থ সচ্চিদানন্দমব্যযম্ ।
অহংপদস্য লক্ষ্যং তদহমঃ সাক্ষি নিষ্কলম্ ॥ ৪৫॥
আত্মানং ব্রহ্মরূপেণ জ্ঞাৎবা মুক্তো ভবার্জুন ॥ ৪৬॥
দেহাত্মমানিনাং দৃষ্টির্দেহেঽহংমমশব্দতঃ ।
কুবুদ্ধয়ো ন জানন্তি মম ভাবমনাময়ম্ ॥ ৪৭॥
চৈতন্যং ৎবমহং সর্বং স্বরূপমবলোকয় ।
ইতি তে কথিতং তত্ত্বং সর্বসারমনুত্তমম্ ॥ ৪৮॥
ইত্যধ্যাত্মবিদ্যায়াং যোগশাস্ত্রে শ্রীবাসুদেবার্জুনসংবাদে
শান্তিগীতায়াং পঞ্চমোঽধ্যায়ঃ ॥৫॥
অথ ষষ্ঠোঽধ্যায়ঃ ।
অর্জুন উবাচ ।
কিং কর্তব্যং বিদাং কৃষ্ণ কিং নিরুদ্ধং বদস্ব মে ।
বিশেষলক্ষণং তেষাং বিস্তরেণ প্রকাশয় ॥ ১॥
শ্রীকৃষ্ণ উবাচ ।
কর্তব্যং বাপ্যকর্তব্যং নাস্তি তত্ত্ববিদাং সখে ।
তেঽকর্তারো ব্রহ্মরূপা নিষেধবিধিবর্জিতাঃ ॥ ২॥
বেদঃ প্রভুর্ন বৈ তেষাং নিয়োজননিষেধনে ।
স্বয়ং ব্রহ্ম সদানন্দা বিশ্রান্তাঃ পরমাত্মনি ॥ ৩॥
ন প্রবৃত্তির্নিবৃত্তির্বা শুভে বাপ্যশুভে তথা ।
ফলং ভোগস্তথা কর্ম নাদেহস্য ভবেৎক্বচিৎ ॥ ৪॥
দেহঃ প্রাণো মনো বুদ্ধিশ্চিত্তাহঙ্কারমিন্দ্রিয়ম্ ।
দৈবং চ বাসনা চেষ্টা তদ্যোগাৎ কর্ম সম্ভবেৎ ॥ ৫॥
জ্ঞানী সর্বং বিচারেণ নিরস্য জডবোধতঃ ।
স্বরূপে সচ্চিদানন্দে বিশ্রান্তশ্চাদ্বয়ৎবতঃ ॥ ৬॥
কর্মলেশো ভবেন্নাস্য নিষ্ক্রিয়াত্মতয়া যতেঃ ।
তস্যৈব ফলভোগঃ স্যাদ্যেন কর্ম কৃতং ভবেৎ ॥ ৭॥
শরীরে সতি যৎকর্ম ভবতীতি প্রপশ্যসি ।
অহঙ্কারশ্চ সাভাসঃ কর্তা ভোক্তাত্র কর্মণঃ ॥ ৮॥
সাক্ষিণা ভাস্যতে সর্বং জ্ঞানী সাক্ষী স্বয়ংপ্রভঃ ।
সঙ্গস্পর্শৌ ততো ন স্তো ভানুবল্লোককর্মভিঃ ॥ ৯॥
বিচরতি গৃহকার্যে ত্যক্তদেহাভিমানো
বিহরতি জনসঙ্গে লোকয়াত্রানুরূপম্ ।
পবনসমবিহারী রাগসঙ্গাদিমুক্তো
বিলসতি নিজরূপে তত্ত্ববিদ্ব্যক্তলিঙ্গঃ ॥ ১০॥
লক্ষণং কিং তে বক্ষ্যামি স্বভাবতো বিলক্ষণঃ ।
ভাবাতীতস্য কো ভাবঃ কিমলক্ষ্যস্য লক্ষণম্ ॥ ১১॥
বিহরেদ্বিবিধৈর্ভাবৈর্ভাবাভাববিবর্জিতঃ ।
সর্বাচারানতীতঃ স নানাচারৈশ্চরেদ্যতিঃ ॥ ১২॥
প্রারব্ধৈর্নীয়তে দেহঃ কঞ্চুকং পবনৈর্যথা ।
ভোগে নিয়োজ্যতে কালে যথায়োগ্যং শরীরকম্ ॥ ১৩॥
নানাবেশধরো যোগী বিমুক্তঃ সর্ববেশতঃ ।
ক্বচিদ্ভিক্ষুঃ ক্বচিন্নগ্নো ভোগে মগ্নমনাঃ ক্বচিৎ ॥ ১৪॥
শৈলূষসদৃশো বেশৈর্নানারূপধরঃ সদা ।
ভিক্ষাচাররতঃ কশ্চিৎ কশ্চিত্তু রাজবৈভবঃ ॥ ১৫॥
কশ্চিদ্ভোগরতঃ কামী কশ্চিদ্বৈরাগ্যমাশ্রিতঃ ।
দিব্যবাসাশ্চীরাচ্ছন্নো দিগ্বাসা বদ্ধমেখলঃ ॥ ১৬॥
কশ্চিৎ সুগন্ধলিপ্তাঙ্গঃ কশ্চিদ্ভস্মানুলেপিতঃ ।
কশ্চিদ্ভোগবিহারী চ যুবতী-যান-তাম্বূলৈঃ ॥ ১৭॥
কশ্চিদুন্মত্তবদ্বেশঃ পিশাচ ইব বা বনে ।
কশ্চিন্মৌনী ভবেৎ পার্থ কশ্চিদ্বক্তাতিতার্কিকঃ ॥ ১৮॥
কশ্চিচ্ছুভাশীঃ সৎপাত্রঃ কশ্চিত্তদ্ভাববর্জিতঃ ।
কশ্চিদ্গৃহী বনস্থোঽন্যঃ কশ্চিন্মূঢোঽপরঃ সুখী ॥ ১৯॥
ইত্যাদি বিবিধৈর্ভাবৈশ্চরন্তি জ্ঞানিনো ভুবি ।
অব্যক্তা ব্যক্তলিঙ্গশ্চ ভ্রমন্তি ভ্রমবর্জিতাঃ ॥ ২০॥
নানাভাবেন বেশেন চরন্তি গতসংশয়াঃ ।
ন জ্ঞায়তে তু তান্ দৃষ্ট্বা কিঞ্চিচ্চিহ্নঞ্চ বাহ্যতঃ ॥ ২১॥
দেহাত্মবুদ্ধিতো লোকে বাহ্যলক্ষণমীক্ষতে ।
অন্তর্ভাবে ন বৈ বেদ্যো বহির্লক্ষণতঃ ক্বচিৎ ॥ ২২॥
যো জানাতি স জানাতি নান্যে বাদরতা জনাঃ ।
শাস্ত্রারণ্যে ভ্রমন্তে তে ন তেষাং নিষ্কৃতিঃ ক্বচিৎ ॥ ২৩॥
দুষ্প্রাপ্যতত্ত্বং বহুনা ধনেন লভ্যং পরং জন্মশতেন চৈব ।
ভাগ্যং যদি স্যাচ্ছুভসঞ্চয়েন পুণ্যেন চাচার্যকৃপাবশেন ॥ ২৪॥
যদি সর্বং পরিত্যজ্য ময়ি ভক্তিপরায়ণঃ ।
সাধয়েদেকচিত্তেন সাধনানি পুনঃ পুনঃ ॥ ২৫॥
বিধায় কর্ম নিষ্কামং সৎপ্রীতি-লাভ-মানসঃ ।
ময়ি কৃৎবার্পণং সর্বং চিত্তশুদ্ধিরবাপ্যতে ॥ ২৬॥
ততো বিবেকসম্প্রাপ্তঃ সাধনানি সমাচরেৎ ।
আত্মবাসনয়া যুক্তো বুভুৎসুর্ব্যগ্রমানসঃ ॥ ২৭॥
সংশ্রয়েৎ সদ্গুরুং প্রাজ্ঞং দম্ভাদিদোষবর্জিতঃ ।
গুরুসেবারতো নিত্যং তোষয়েদ্গুরুমীশ্বরম্ ।
তত্ত্বাতীতো ভবেত্তত্ত্বং লব্ধ্বা গুরুপ্রসাদতঃ ॥ ২৮॥
গুরৌ প্রসন্নে পরতত্ত্বলাভস্ততঃ ক্ব তাপো ভববন্ধমুক্তঃ ।
বিমুক্তসঙ্গঃ পরমাত্মরূপো ন সংসরেৎ সোঽপি পুনর্ভবাব্ধৌ ॥ ২৯॥
জ্ঞানী কশ্চিদ্বিরক্তঃ প্রবিরতবিষয়স্ত্যক্তভোগো নিরাশঃ
কশ্চিদ্ভোগী প্রসিদ্ধো বিচরতি বিষয়ে ভোগরাগপ্রসক্তঃ ।
প্রারব্ধস্তত্র হেতুর্জনয়তি বিবিধা বাসনাঃ কর্ময়োগাৎ
প্রারব্ধে যস্য ভোগঃ স যততি বিভবে ভোগহীনো বিরক্তঃ ॥ ৩০॥
প্রারব্ধাদ্বাসনা চেচ্ছা প্রবৃত্তির্জায়তে নৃণাম্ ।
প্রবৃত্তো বা নিবৃত্তো বা প্রভুৎবং তস্য সর্বতঃ ॥ ৩১॥
ভোগো জ্ঞানং ভবেদ্দেহে একেনারব্ধকর্মণা ।
প্রারব্ধং ভোগদং লোকে দৎবা ভোগং বিনশ্যতি ॥ ৩২॥
প্রারব্ধং লক্ষ্যসম্পন্নে ঘটবজ্জ্ঞানজন্মতঃ ।
শেষস্তিষ্ঠেৎসমুৎপন্নে ঘটে চক্রস্য বেগবৎ ॥ ৩৩॥
প্রারব্ধং বিদুষাঃ পার্থ জ্ঞানোত্তরমৃষাত্মকম্ ।
কর্তুং নাতিশয়ং কিঞ্চিৎ প্রারব্ধং জ্ঞানিনাং ক্ষমম্ ॥ ৩৪॥
তদ্দেহারম্ভিকা শক্তির্ভোগদানায় দেহিনাম্ ।
দদ্যাজ্জ্ঞানোত্তরং ভোগং দেহাভাসং বিধায় তৎ ॥ ৩৫॥
আভাসশরীরে ভোগো ভবেৎ প্রারব্ধকল্পিতে ।
মুক্তো জ্ঞানদশায়ান্তু তত্ত্বজ্ঞো ভোগবর্জিতঃ ॥ ৩৬॥
ইত্যধ্যাত্মবিদ্যায়াং যোগশাস্ত্রে শ্রীবাসুদেবার্জুনসংবাদে
শান্তিগীতায়াং ষষ্ঠোঽধ্যায়ঃ ॥৬॥
অথ সপ্তমোঽধ্যায়ঃ ।
শ্রীভগবনুবাচ ।
সারং তত্ত্বং প্রবক্ষ্যামি তচ্ছৃণুষ্ব সখেঽর্জুন ।
অতিগুহ্যং মহৎপূর্ণং যচ্ছ্রুৎবা মুচ্যতে নরঃ ॥ ১॥
পূর্ণং চৈতন্যমেকং সত্ততোঽন্যন্ন হি কিঞ্চন ।
ন মায়া নেশ্বরো জীবো দেশঃ কালশ্চরাচরম্ ॥ ২॥
ন ৎবং নাহং ন বা পৃথ্বী নেমে লোকা ভুবাদয়ঃ ।
কিঞ্চিন্নাস্ত্যপি লেশেন নাস্তি নাস্তীতি নিশ্চিনু ॥ ৩॥
কেবলং ব্রহ্মমাত্রং সন্নান্যদস্তীতি ভাবয় ।
পশ্যসি স্বপ্নবৎসর্বং বিবর্তং চেতনে খলু ॥ ৪॥
বিষয়ং দেশকালাদিং ভোক্তৃজ্ঞাতৃক্রিয়াদিকম্ ।
মিথ্যা তৎস্বপ্নবদ্ভানং ন কিঞ্চিন্নাপি কিঞ্চন ॥ ৫॥
যৎসত্ত্বং সততং প্রকাশমমলং সংসারধারাবহং
নান্যৎ কিঞ্চ তরঙ্গফেনসলিলং সত্তৈব বিশ্বং তথা ।
দৃশ্যং স্বপ্নময়ং ন চাস্তি বিততং মায়াময়ং দৃশ্যতে
চৈতন্যং বিষয়ো বিভাতি বহুধা ব্রহ্মাদিকং মায়যা ॥ ৬॥
বিশ্বং দৃশ্যমসত্যমেতদখিলং মায়াবিলাসাস্পদং
আত্মাঽজ্ঞাননিদানভানমনৃতং সদ্বচ্চ মোহালয়ম্ ।
বাধ্যং নাশ্যমচিন্ত্যচিত্ররচিতং স্বপ্নোপমং তদ্ধ্রুবম্
আস্থাং তত্র জহি স্বদুঃখনিলয়ে রজ্জ্বাং ভুজঙ্গোপমে ॥ ৭॥
অর্জুন উবাচ ।
নির্গুণং পরমং ব্রহ্ম নির্বিকারং বিনিষ্ক্রিয়ম্ ।
জগৎসৃষ্টিঃ কথং তস্মাদ্ভবতি তদ্বদস্ব মে ॥ ৮॥
শ্রীভগবানুবাচ ।
সৃষ্টির্নাস্তি জগন্নাস্তি জীবো নাস্তি তথেশ্বরঃ ।
মায়যা দৃশ্যতে সর্বং ভাস্যতে ব্রহ্মসত্তয়া ॥ ৯॥
যথা স্তিমিতগম্ভীরে জলরাশৌ মহার্ণবে ।
সমীরণবশাদ্বীচির্ন বস্তু সলিলেতরৎ ॥ ১০॥
তথা হি পূর্ণচৈতন্যে মায়যা দৃশ্যতে জগৎ ।
ন তরঙ্গো জলাদ্ভিন্নো ব্রহ্মণোঽন্যজ্জগন্ন হি ॥ ১১॥
চৈতন্যং বিশ্বরূপেণ ভাসতে মায়যা তথা ।
কিঞ্চিদ্ভবতি নো সত্যং স্বপ্নকর্মেব নিদ্রয়া ॥ ১২॥
যাবন্নিদ্রা ঋতং তাবৎ তথাঽজ্ঞানাদিদং জগৎ ।
ন মায়া কুরুতে কিঞ্চিন্মায়াবী ন করোত্যণু ।
ইন্দ্রজালসমং সর্বং বদ্ধদৃষ্টিঃ প্রপশ্যতি ॥ ১৩॥
অজ্ঞানজনবোধার্থং বাহ্যদৃষ্ট্যা শ্রুতীরিতম্ ।
বালানাং প্রীতয়ে যদ্বদ্ধাত্রী জল্পতি কল্পিতম্ ।
তৎপ্রকারং প্রবক্ষ্যামি শৃণুষ্ব কুন্তিনন্দন ॥ ১৪॥
চৈতন্যে বিমলে পূর্ণে কস্মিন্ দেশেঽণুমাত্রকম্ ।
অজ্ঞানমুদিতং সত্তাং চৈতন্যস্ফূর্তিমাশ্রিতম্ ॥ ১৫॥
তদজ্ঞানং পরিণতং স্বস্যৈব শক্তিভেদতঃ ।
মায়ারূপা ভবেদেকা চাবিদ্যারূপিণীতরা ॥ ১৬॥
সত্ত্বপ্রধানমায়ায়াং চিদাভাসো বিভাসিতঃ ।
চিদধ্যাসাচ্চিদাভাস ঈশ্বরোঽভূৎস্বমায়যা ॥ ১৭॥
মায়াবৃত্যা ভবেদীশঃ সর্বজ্ঞঃ সর্বশক্তিমান্ ।
ইচ্ছাদি সর্বকর্তৃৎবং মায়াবৃত্যা তথেশ্বরে ॥ ১৮॥
ততঃ সঙ্কল্পবানীশস্তদ্বৃত্যা স্বেচ্ছয়া স্বতঃ ।
বহুঃ স্যামহমেবৈকঃ সঙ্কল্পোঽস্য সমুত্থিতঃ ॥ ১৯॥
মায়ায়া উদ্গতঃ কালো মহাকাল ইতি স্মৃতঃ ।
কালশক্তির্মহাকালী চাদ্যা সদ্যসমুদ্ভবাৎ ॥ ২০॥
কালেন জায়তে সর্বং কালে চ পরিতিষ্ঠতি ।
কালে বিলয়মাপ্নোতি সর্বে কালবশানুগাঃ ॥ ২১॥
সর্বব্যাপী মহাকালো নিরাকারো নিরাময়ঃ ।
উপাধিয়োগতঃ কালো নানাভাবেন ভাসতে ॥ ২২॥
নিমেষাদির্যুগঃ কল্পঃ সর্বং তস্মিন্ প্রকাশিতম্ ।
কালতোঽভূন্মহত্তত্ত্বং মহত্তত্ত্বাদহঙ্কৃতিঃ ॥ ২৩॥
ত্রিবিধঃ সোঽপ্যহঙ্কারঃ সত্ত্বাদিগুণভেদতঃ ।
অহঙ্কারাদ্ভবেৎ সূক্ষ্মতন্মাত্রাণ্যপি পঞ্চ বৈ ॥ ২৪॥
সূক্ষ্মাণি পঞ্চভূতানি স্থূলানি ব্যাকৃতানি তু ।
সত্ত্বাংশাৎ সূক্ষ্মভূতানাং ক্রমাদ্ধীন্দ্রিয়পঞ্চকম্ ।
অন্তঃকরণমেকং তৎ সমষ্টিগুণতত্ত্বতঃ ॥ ২৫॥
কর্মেন্দ্রিয়াণি রজসঃ প্রত্যেকং ভূতপঞ্চকাৎ ।
পঞ্চবৃত্তিময়ঃ প্রাণঃ সমষ্টিঃ পঞ্চরাজসৈঃ ॥ ২৬॥
পঞ্চীকৃতং তামসাংশং তৎপঞ্চস্থূলতাং গতম্ ।
স্থূলভূতাৎ স্থূলসৃষ্টির্ব্রহ্মাণ্ডশরীরাদিকম্ ॥ ২৭॥
মায়োপাধির্ভবেদীশশ্চাবিদ্যা জীবকারণম্ ।
শুদ্ধসত্ত্বাধিকা মায়া চাবিদ্যা সা তমোময়ী ॥ ২৮॥
মলিনসত্ত্বপ্রধানা হ্যবিদ্যাঽঽবরণাত্মিকা ।
চিদাভাসস্তত্র জীবঃ স্বল্পজ্ঞশ্চাপি তদ্বশঃ ।
চৈতন্যে কল্পিতং সর্বং বুদ্বুদা ইব বারিণি ॥ ২৯॥
তৈলবিন্দুর্যথা ক্ষিপ্তঃ পতিতঃ সরসীজলে ।
নানারূপেণ বিস্তীর্ণো ভবেত্তন্ন জলং তথা ॥ ৩০॥
অনন্তপূর্ণচৈতন্যে মহামায়া বিজৃম্ভিতা ।
কস্মিন্ দেশে চাণুমাত্রং বিভৃতা নামরূপতঃ ॥ ৩১॥
ন মায়াতিশয়ং কর্তুং ব্রহ্মণি কশ্চিদর্হতি ।
চৈতন্যং স্ববলেনৈব নানাকারং প্রদর্শয়েৎ ॥ ৩২॥
বিবর্তং স্বপ্নবৎসর্বমধিষ্ঠানে তু নির্মলে ।
আকাশে ধূমবন্মায়া তৎকার্যমপি বিস্তৃতম্ ।
সঙ্গঃ স্পর্শস্ততো নাস্তি নাম্বরং মলিনং ততঃ ॥ ৩৩॥
কার্যানুমেয়া সা মায়া দাহকানলশক্তিবৎ ।
অধিজ্ঞৈরনুমীয়েত জগদ্দৃষ্ট্যাস্য কারণম্ ॥ ৩৪॥
ন মায়া চৈতন্যে ন হি দিনমণাবন্ধকারপ্রবেশঃ
দিবান্ধাঃ কল্পন্তে দিনকরকরে শার্বরং ঘোরদৃষ্ট্যা ।
ন সত্যং তদ্ভাবঃ স্বমতিবিষয়ং নাস্তি তল্লেশমাত্রঃ
তথা মূঢাঃ সর্বে মনসি সততং কল্পয়ন্ত্যেব মায়া ॥ ৩৫॥
স্বসত্তাহীনরূপৎবাদবস্তুৎবাত্তথৈব চ ।
অনাত্মৎবাজ্জডৎবাচ্চ নাস্তি মায়েতি নিশ্চিনু ॥ ৩৬॥
মায়া নাস্তি জগন্নাস্তি নাস্তি জীবস্তথেশ্বরঃ ।
কেবলং ব্রহ্মমাত্রৎবাৎ স্বপ্নকল্পেব কল্পনা ॥ ৩৭॥
একং বক্ত্রং ন যোগ্যং তদ্দ্বিতীয়ং কুত ইষ্যতে ।
সংখ্যাবদ্ধং ভবেদেকং ব্রহ্মণি তন্ন শোভতে ॥ ৩৮॥
লেশমাত্রং ন হি দ্বৈতং দ্বৈতং ন সহতে শ্রুতিঃ ।
শব্দাতীতং মনোঽতীতং বাক্যাতীতং সদামলম্ ।
উপমাভাবহীনৎবাদীদৃশস্তাদৃশো ন হি ॥ ৩৯॥
ন হি তৎ শ্রূয়তে শ্রোত্রৈর্ন স্পৃশ্যতে ৎবচা তথা ।
ন হি পশ্যতি চক্ষুস্তদ্রসনাস্বাদয়েন্ন হি ।
ন চ জিঘ্রতি তদ্ঘ্রাণং ন বাক্যং ব্যাকরোতি চ ॥ ৪০॥
সদ্রূপো হ্যবিনাশিৎবাৎ প্রকাশৎবাচ্চিদাত্মকঃ ।
আনন্দঃ প্রিয়রূপৎবান্নাত্মন্যপ্রিয়তা ক্বচিৎ ॥ ৪১॥
ব্যাপকৎবাদধিষ্ঠানাদ্দেহস্যাত্মেতি কথ্যতে ।
বৃংহণৎবাদ্বৃহৎবাচ্চ ব্রহ্মেতি গীয়তে শ্রুতৌ ॥ ৪২॥
যদা জ্ঞাৎবা স্বরূপং স্বং বিশ্রান্তিং লভসে সখে ।
তদা ধন্যঃ কৃতার্থঃ সন্ জীবন্মুক্তো ভবিষ্যসি ॥ ৪৩॥
মোক্ষরূপং তমেবাহুর্যোগিনস্তত্ত্বদর্শিনঃ ।
স্বরূপজ্ঞানমাত্রেণ লাভস্তৎকণ্ঠহারবৎ ॥ ৪৪॥
প্রবুদ্ধতত্ত্বস্য তু পূর্ণবোধে ন সত্যমায়া ন চ কার্যমস্যাঃ ।
তমস্তমঃকার্যমসত্যসর্বং ন দৃশ্যতে ভানোর্মহাপ্রকাশে ॥ ৪৫॥
অতস্ততো নাস্তি জগৎপ্রসিদ্ধং শুদ্ধে পরে ব্রহ্মণি লেশমাত্রম্ ।
মৃষাময়ং কল্পিতনামরূপং রজ্জ্বাং ভুজঙ্গো মৃদি কুম্ভভাণ্ডম্ ॥ ৪৬॥
ইত্যধ্যাত্মবিদ্যায়াং যোগশাস্ত্রে শ্রীবাসুদেবার্জুনসংবাদে
শান্তিগীতায়াং সপ্তমোঽধ্যায়ঃ ॥৭॥
অথাষ্টমোঽধ্যায়ঃ ।
অর্জুন উবাচ ।
কিং লক্ষ্যং স্বাত্মরূপেণ যদ্ব্রহ্ম কথ্যতে বিদা ।
যজ্জ্ঞাৎবা ব্রহ্মরূপেণ স্বাত্মানং বেদ্মি তদ্বদ ॥ ১॥
শ্রীভগবনুবাচ ।
অঙ্গুষ্ঠমাত্রঃ পুরুষো হৃৎপদ্মে যো ব্যবস্থিতঃ ।
তমাত্মানঞ্চ বেত্তারং বিদ্ধি বুদ্ধ্যা সুসূক্ষ্ময়া ॥ ২॥
হৃদয়কমলং পার্থ অঙ্গুষ্ঠপরিমাণতঃ ।
তত্র তিষ্ঠতি যো ভাতি বংশপর্বণীবাম্বরম্ ।
অঙ্গুষ্ঠমাত্রং পুরুষং তেনৈব বদতি শ্রুতিঃ ॥ ৩॥
মহাকাশে ঘটে জাতেঽবকাশো ঘটমধ্যগঃ ।
ঘটাবচ্ছিন্ন আকাশঃ কথ্যতে লোকপণ্ডিতৈঃ ॥ ৪॥
কূটস্থোঽপি তথা বুদ্ধিঃ কল্পিতা তু যদা ভবেৎ ।
তদা কূটস্থচৈতন্যঃ বুদ্ধ্যন্তস্থং বিভাসতে ।
বুদ্ধ্যবচ্ছিন্নচৈতন্যং জীবলক্ষ্যং ৎবমেব হি ॥ ৫॥
প্রজ্ঞানং তচ্চ গায়ন্তি বেদশাস্ত্রবিশারদাঃ ।
আনন্দং ব্রহ্মশব্দাভ্যাং বিশেষণবিশেষিতম্ ॥ ৬॥
শৃণোতি যেন জানাতি পশ্যতি চ বিজিঘ্রতি ।
স্বাদাস্বাদং বিজানাতি শীতঞ্চোষ্ণাদিকং তথা ॥ ৭॥
চৈতন্যং বেদনারূপং তৎসর্ববেদনাশ্রয়ম্ ।
অলক্ষ্যং শুদ্ধচৈতন্যং কূটস্থং লক্ষয়েৎ শ্রুতিঃ ॥ ৮॥
বুদ্ধ্যাবচ্ছিন্নচৈতন্যং বৃত্যারূঢং যদা ভবেৎ ।
জ্ঞানশব্দাভিধং তর্হি তেন চৈতন্যবোধনম্ ॥ ৯॥
যদা বৃত্তিঃ প্রমাণেন বিষয়েণৈকতাং ব্রজেৎ ।
বৃত্তবিষয়চৈতন্যে একৎবেন ফলোদয়ঃ ॥ ১০॥
তদা বৃত্তিলয়ে প্রাপ্তে জ্ঞানং চৈতন্যমেব তৎ ।
প্রবোধনায় চৈতন্যং জ্ঞানশব্দেন কথ্যতে ॥ ১১॥
শৃণোষি বীক্ষসে যদ্যত্তত্র সংবিদনুত্তমা ।
অনুস্যূততয়া ভাতি তত্তৎসর্বপ্রকাশিকা ॥ ১২॥
সংবিদং তাং বিচারেণ চৈতন্যমবধারয় ।
তত্র পশ্যসি যদ্বস্তু জানামীতি বিভাসতে ।
তদ্ধি সংবিৎপ্রভাবেন বিজ্ঞেয়ং স্বরূপং ততঃ ॥ ১৩॥
সর্বং নিরস্য দৃশ্যৎবাদনাত্মৎবাজ্জডৎবতঃ ।
তমবিচ্ছিন্নমাত্মানং বিদ্ধি সুসূক্ষ্ময়া ধিয়া ॥ ১৪॥
যা সংবিৎ সৈব হি ৎবাত্মা চৈতন্যং ব্রহ্ম নিশ্চিনু ।
ৎবংপদস্য চ লক্ষ্যং তজ্জ্ঞাতব্যং গুরুবাক্যতঃ ॥ ১৫॥
ঘটাকাশো মহাকাশ ইব জানীহি চৈকতাম্ ।
অখণ্ডৎবং ভবেদৈক্যং জ্ঞাৎবা ব্রহ্মময়ো ভব ॥ ১৬॥
কুম্ভাকাশমহাকাশো যথাঽভিন্নো স্বরূপতঃ ।
তথাত্মব্রহ্মণোঽভেদং জ্ঞাৎবা পূর্ণো ভবার্জুন ॥ ১৭॥
নানাধারে যথাকাশঃ পূর্ণ একো হি ভাসতে ।
তথোপাধিষু সর্বত্র চৈকাত্মা পূর্ণনিরদ্বয়ঃ ॥ ১৮॥
যথা দীপসহস্রেষু বহ্নিরেকো হি ভাস্বরঃ ।
তথা সর্বশরীরেষু হ্যেকাত্মা চিৎসদব্যযঃ ॥ ১৯॥
সহস্রধেনুষু ক্ষীরং সর্পিরেকং ন ভিদ্যতে ।
নানারণিপ্রস্তরেষু কৃশানুর্ভেদবর্জিতঃ ॥ ২০॥
নানাজলাশয়েষ্বেবং জলমেকং স্ফুরত্যলম্ ।
নানাবর্ণেষু পুষ্পেষু হ্যেকং তন্মধুরং মধু ॥ ২১॥
ইক্ষুদণ্ডেষ্বসংখ্যেষু চৈকং হি রসমৈক্ষবম্ ।
তথা হি সর্বভাবেষু চৈতন্যং পূর্ণমদ্বয়ম্ ॥ ২২॥
অদ্বয়ে পূর্ণচৈতন্যে কল্পিতং মায়যাখিলম্ ।
মৃষা সর্বমধিষ্ঠানং নানারূপেণ ভাসতে ॥ ২৩॥
অখণ্ডে বিমলে পূর্ণে দ্বৈতগন্ধবিবর্জিতে ।
নান্যৎকিঞ্চিৎকেবলং সন্নানাভাবেন রাজতে ॥ ২৪॥
স্বপ্নবদ্দৃশ্যতে সর্বং চিদ্বিবর্তং চিদেব হি ।
কেবলং ব্রহ্মমাত্রন্তু সচ্চিদানন্দমব্যযম্ ॥ ২৫॥
সচ্চিদানন্দশব্দেন তল্লক্ষ্যং লক্ষয়েৎ শ্রুতিঃ ।
অক্ষরমক্ষরাতীতং শব্দাতীতং নিরঞ্জনম্ ।
তৎস্বরূপং স্বয়ং জ্ঞাৎবা ব্রহ্মবিত্ত্বং পরিত্যজ ॥ ২৬॥
অভিমানাবৃতির্মুখ্যা তেনৈব স্বরূপাবৃতিঃ ।
পঞ্চকোশেষ্বহঙ্কারঃ কর্তৃভাবেন রাজতে ॥ ২৭॥
ব্রহ্মবিত্ত্বাভিমানং যদ্ভবেদ্বিজ্ঞানসংজ্ঞিতে ।
অহঙ্কারস্য তদ্ধর্ম পিহিতে স্বরূপেঽমলে ॥ ২৮॥
অতঃ সংত্যজ্য তদ্ভাবং কেবলং স্বরূপে স্থিতম্ ।
তত্ত্বজ্ঞানমিতি প্রাহুর্যোগিনস্তত্ত্বদর্শিনঃ ॥ ২৯॥
অন্ধকারগৃহে শায়ী শরীরং তূলিকাবৃতম্ ।
দেহাদিকং চ নাস্তীতি নিশ্চয়েন বিভাবয় ॥ ৩০॥
ন পশ্যসি তদা কিঞ্চিদ্বিভাতি সাক্ষি সৎস্বয়ম্ ।
অহমস্মীতি ভাবেন চান্তঃ স্ফুরতি কেবলম্ ॥ ৩১॥
নিঃশেষত্যক্তসংঘাতঃ কেবলঃ পুরুষঃ স্বয়ম্ ।
অস্তি নাস্তি বুদ্ধিধর্মে সর্বাত্মনা পরিত্যজেৎ ॥ ৩২॥
অহং সর্বাত্মনা ত্যক্ত্বা সর্বভাবেন সর্বদা ।
অহমস্মীত্যহং ভামি বিসৃজ্য কেবলো ভব ॥ ৩৩॥
জাগ্রদপি সুষুপ্তিস্থো জাগ্রদ্ধর্মবিবর্জিতঃ ।
সৌষুপ্তে ক্ষয়িতে ধর্মে ৎবজ্ঞানে চেতনঃ স্বয়ম্ ॥ ৩৪॥
হিৎবা সুষুপ্তাবজ্ঞানং যদ্ভাবো ভাববর্জিতঃ ।
প্রজ্ঞয়া স্বরূপং জ্ঞাৎবা প্রজ্ঞাহীনস্তথা ভব ॥ ৩৫॥
ন শব্দঃ শ্রবণং নাপি ন রূপং দর্শনং তথা ।
ভাবাভাবৌ ন বৈ কিঞ্চিৎ সদেবাস্তি ন কিঞ্চন ॥ ৩৬॥
সুসূক্ষ্ময়া ধিয়া বুদ্ধ্বা স্বরূপং স্বস্থচেতনম্ ।
বুদ্ধৌ জ্ঞানেনে লীনায়াং যত্তচ্ছুদ্ধস্বরূপকম্ ॥ ৩৭॥
ইতি তে কথিতং তত্ত্বং সারভূতং শুভাশয় ।
শোকো মোহস্ত্বয়ি নাস্তি শুদ্ধরূপোঽসি নিষ্কলঃ ॥ ৩৮॥
শান্তব্রত উবাচ ।
শ্রুৎবা প্রোক্তং বাসুদেবেন পার্থো হিৎবাঽঽসক্তিং মায়িকেঽসত্যরূপে ।
ত্যক্ত্বা সর্বং শোকসন্তাপজালং জ্ঞাৎবা তত্ত্বং সারভূতং কৃতার্থঃ ॥ ৩৯॥
কৃষ্ণং প্রণম্যাথ বিনীতভাবৈর্ধ্যাৎবা হৃদিস্থং বিমলং প্রপন্নম্ ।
প্রোবাচ ভক্ত্যা বচনেন পার্থঃ কৃতাঞ্জলির্ভাবভরেণ নম্রঃ ॥ ৪০॥
অর্জুন উবাচ ।
ৎবমাদ্যরূপঃ পুরুষঃ পুরাণো ন বেদ বেদস্তব সারতত্ত্বম্ ।
অহং ন জানে কিমু বচ্মি কৃষ্ণ নমামি সর্বান্তরসম্প্রতিষ্ঠম্ ॥ ৪১॥
ৎবমেব বিশ্বোদ্ভবকারণং সৎ সমাশ্রয়স্ত্বং জগতঃ প্রসিদ্ধঃ ।
অনন্তমূর্তির্বরদঃ কৃপালুর্নমামি সর্বান্তরসম্প্রতিষ্ঠম্ ॥ ৪২॥
বদামি কিং তে পরিশেষতত্ত্বং ন জানে কিঞ্চিত্তব মর্ম গূঢম্ ।
ৎবমেব সৃষ্টিস্থিতিনাশকর্তা নমামি সর্বান্তরসম্প্রতিষ্ঠম্ ॥ ৪৩॥
বিশ্বরূপং পুরা দৃষ্টং ৎবমেব স্বয়মীশ্বরঃ ।
মোহয়িৎবা সর্বলোকান্ রূপমেতৎ প্রকাশিতম্ ॥ ৪৪॥
সর্বে জানন্তি ৎবং বৃষ্ণিঃ পাণ্ডবানাং সখা হরিঃ ।
কিং তে বক্ষ্যামি তত্তত্ত্বং ন জানন্তি দিবৌকসঃ ॥ ৪৫॥
শ্রীভগবানুবাচ ।
তত্ত্বজ্ঞোঽসি যদা পার্থ তূষ্ণীং ভব তদা সখে ।
যদ্দৃষ্টং বিশ্বরূপং মে মায়ামাত্রং তদেব হি ॥ ৪৬॥
তেন ভ্রান্তোঽসি কৌন্তেয় স্বস্বরূপং বিচিন্তয় ।
মুহ্যন্তি মায়যা মূঢাস্তত্ত্বজ্ঞা মোহবর্জিতাঃ ॥ ৪৭॥
শান্তিগীতামিমাং পার্থ ময়োক্তাং শান্তিদায়িনীম্ ।
যঃ শৃণুয়াৎ পঠেদ্বাপি মুক্তঃ স্যাদ্ভববন্ধনাৎ ॥ ৪৮॥
ন কদাচিদ্ভবেৎ সোঽপি মোহিতো মম মায়যা ।
আত্মজ্ঞানাচ্ছোকশান্তির্ভবেদ্গীতাপ্রসাদতঃ ॥ ৪৯॥
শান্তব্রত উবাচ ।
ইত্যুক্ত্বা ভগবান্ কৃষ্ণঃ প্রফুল্লবদনঃ স্বয়ম্ ।
অর্জুনস্য করং ধৃৎবা যুধিষ্ঠিরান্তিকং যয়ৌ ॥ ৫০॥
ইয়ং গীতা তু শান্ত্যাখ্যা গুহ্যাদ্গুহ্যতরা পরা ।
তব স্নেহান্ময়া প্রোক্তা যদ্দত্তা গুরুণা ময়ি ॥ ৫১॥
ন দাতব্যা ক্বচিন্মোহাচ্ছঠায় নাস্তিকায় চ ।
কুতর্কায় চ মূর্খায় নির্দেয়োন্মার্গবর্তিনে ॥ ৫২॥
প্রদাতব্যা বিরক্তায় প্রপন্নায় মুমুক্ষবে ।
গুরুদৈবতভক্তায় শান্তায় ঋজবে তথা ॥ ৫৩॥
সশ্রদ্ধায় বিনীতায় দয়াশীলায় সাধবে ।
বিদ্বেষক্রোধহীনায় দেয়া গীতা প্রয়ত্নতঃ ॥ ৫৪॥
ইতি তে কথিতা রাজন্ শান্তিগীতা সুগোপিতা ।
শোকশান্তিকরী দিব্যা জ্ঞানদীপপ্রদীপনী ॥ ৫৫॥
গীতেয়ং শান্তিনাম্নী মধুরিপুগদিতা পার্থশোকপ্রশান্ত্যৈ
পাপৌঘং তাপসংঘং প্রহরতি পঠনাৎ সারভূতাতিগুহ্যা ।
আবির্ভূতা স্বয়ং সা স্বগুরুকরুণয়া শান্তিদা শান্তভাবা
কাশীসত্ত্বে সভাসা তিমিরচয়হরা নর্তয়ন্ পদ্যবন্ধৈঃ ॥ ৫৬॥
ইত্যধ্যাত্মবিদ্যায়াং যোগশাস্ত্রে শ্রীবাসুদেবার্জুনসংবাদে
শান্তিগীতায়ামষ্টমোঽধ্যায়ঃ ॥৮॥
ইতি শান্তিগীতা সমাপ্তা ॥
Also Read:
Shanti Gita Lyrics in Hindi | English | Bengali | Gujarati | Kannada | Malayalam | Oriya | Telugu | Tamil
