Shatru Samharaka Ekadanta Stotram Kannada Lyrics:
ಶತ್ರುಸಂಹಾರಕ ಏಕದಂತ ಸ್ತೋತ್ರಂ
ದೇವರ್ಷಯ ಊಚುಃ |
ನಮಸ್ತೇ ಗಜವಕ್ತ್ರಾಯ ಗಣೇಶಾಯ ನಮೋ ನಮಃ |
ಅನಂತಾನಂದಭೋಕ್ತ್ರೇ ವೈ ಬ್ರಹ್ಮಣೇ ಬ್ರಹ್ಮರೂಪಿಣೇ || ೧ ||
ಆದಿಮಧ್ಯಾಂತಹೀನಾಯ ಚರಾಚರಮಯಾಯ ತೇ |
ಅನಂತೋದರಸಂಸ್ಥಾಯ ನಾಭಿಶೇಷಾಯ ತೇ ನಮಃ || ೨ ||
ಕರ್ತ್ರೇ ಪಾತ್ರೇ ಚ ಸಂಹರ್ತ್ರೇ ತ್ರಿಗುಣಾನಾಮಧೀಶ್ವರ |
ಸರ್ವಸತ್ತಾಧರಾಯೈವ ನಿರ್ಗುಣಾಯ ನಮೋ ನಮಃ || ೩ ||
ಸಿದ್ಧಿಬುದ್ಧಿಪತೇ ತುಭ್ಯಂ ಸಿದ್ಧಿಬುದ್ಧಿಪ್ರದಾಯ ಚ |
ಬ್ರಹ್ಮಭೂತಾಯ ದೇವೇಶ ಸಗುಣಾಯ ನಮೋ ನಮಃ || ೪ ||
ಪರಶುಂ ದಧತೇ ತುಭ್ಯಂ ಕಮಲೇನ ಪ್ರಶೋಭಿನೇ |
ಪಾಶಾಭಯಧರಾಯೈವ ಮಹೋದರ ನಮೋ ನಮಃ || ೫ ||
ಮೂಷಕಾರೂಢದೇವಾಯ ಮೂಷಕಧ್ವಜಿನೇ ನಮಃ |
ಆದಿಪೂಜ್ಯಾಯ ಸರ್ವಾಯ ಸರ್ವಪೂಜ್ಯಾಯ ತೇ ನಮಃ || ೬ ||
ಗುಣಸಂಯುಕ್ತಕಾಯಾಯ ನಿರ್ಗುಣಾತ್ಮಕಮಸ್ತಕ |
ತಯೋರಭೇದರೂಪೇಣ ಚೈಕದಂತಾಯ ತೇ ನಮಃ || ೭ ||
ವೇದಾಂತಗೋಚರಾಯೈವ ವೇದಾಂತಾಲಭ್ಯಕಾಯ ತೇ |
ಯೋಗಾಧೀಶಾಯ ವೈ ತುಭ್ಯಂ ಬ್ರಹ್ಮಾಧೀಶಾಯ ತೇ ನಮಃ || ೮ ||
ಅಪಾರಗುಣಧಾರಾಯಾನಂತಮಾಯಾಪ್ರಚಾಲಕ |
ನಾನಾವತಾರಭೇದಾಯ ಶಾಂತಿದಾಯ ನಮೋ ನಮಃ || ೯ ||
ವಯಂ ಧನ್ಯಾ ವಯಂ ಧನ್ಯಾ ಯೈರ್ದೃಷ್ಟೋ ಗಣನಾಯಕಃ |
ಬ್ರಹ್ಮಭೂಯಮಯಃ ಸಾಕ್ಷಾತ್ ಪ್ರತ್ಯಕ್ಷಂ ಪುರತಃ ಸ್ಥಿತಃ || ೧೦ ||
ಏವಂ ಸ್ತುತ್ವಾ ಪ್ರಹರ್ಷೇಣ ನನೃತುರ್ಭಕ್ತಿಸಂಯುತಾಃ |
ಸಾಶ್ರುನೇತ್ರಾನ್ ಸರೋಮಾಂಚಾನ್ ದೃಷ್ಟ್ವಾ ತಾನ್ ಢುಂಢಿರಬ್ರವೀತ್ || ೧೧ ||
ಏಕದಂತ ಉವಾಚ |
ವರಂ ವೃಣುತ ದೇವೇಶಾ ಮುನಯಶ್ಚ ಯಥೇಪ್ಸಿತಮ್ |
ದಾಸ್ಯಾಮಿ ತಂ ನ ಸಂದೇಹೋ ಭವೇದ್ಯದ್ಯಪಿ ದುರ್ಲಭಃ || ೧೨ ||
ಭವತ್ಕೃತಂ ಮದೀಯಂ ಯತ್ ಸ್ತೋತ್ರಂ ಸರ್ವಾರ್ಥದಂ ಭವೇತ್ |
ಪಠತೇ ಶ್ರುಣ್ವತೇ ದೇವಾ ನಾನಾಸಿದ್ಧಿಪ್ರದಂ ದ್ವಿಜಾಃ || ೧೩ ||
ಶತ್ರುನಾಶಕರಂ ಚೈವಾಂತೇ ಸ್ವಾನಂದಪ್ರದಾಯಕಮ್ |
ಪುತ್ರಪೌತ್ರಾದಿಕಂ ಸರ್ವಂ ಲಭತೇ ಪಾಠತೋ ನರಃ || ೧೪ ||
ಇತಿ ಶ್ರೀಮನ್ಮುದ್ಗಲಪುರಾಣೇ ದ್ವಿತೀಯೇಖಂಡೇ ಏಕದಂತಚರಿತೇ ದ್ವಿಪಂಚಾಶತ್ತಮೋಽಧ್ಯಾಯೇ ಏಕದಂತಸ್ತೋತ್ರಂ ಸಂಪೂರ್ಣಮ್ |
Also Read:
Shatru Samharaka Ekadanta Stotram lyrics in Sanskrit | English | Telugu | Tamil | Kannada
