శ్రీకాన్తిమతీశ్వర్యష్టకమ్ Lyrics in Telugu:
॥ శ్రీః ॥
శ్రీమద్వేణువనేశ్వరస్య రమణీం శీతాంశుబిమ్బాననాం
శిఞ్జన్నూపురకోమలాఙ్ఘ్రికమలాం కేయూరహారాన్వితామ్ ।
రత్నస్యూతకిరీటకుణ్డలధరాం హేలావినోదప్రియాం
శ్రీమత్కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౧॥
తత్త్వజ్ఞానిహృదబ్జమధ్యనిలయాం తామ్రాపగాతీరగాం
కారుణ్యామ్బునిధిం తడిత్తులితభాం తాలీదలశ్యామలామ్ ।
లీలాసృష్టివిధాయినీం తనుభృతాం తాత్పర్యబోధాప్తయే
తన్వీం కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౨॥
సఙ్గీతామృతసిన్ధుమధ్యభవనాం సాహిత్యనిత్యాదరాం
స్వారస్యాద్భుతనాట్యవీక్షణపరాం సాలోక్యముక్త్యాదిదామ్ ।
సాధుభ్యః సకలామరార్థితమహాసామ్రాజ్యలక్ష్మీప్రదాం
సాధ్వీం కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౩॥
కల్యాణీమఖిలాణ్డకోటిజననీం కల్హారదామోజ్జ్వలాం
కస్తూరీతిలకాభిరామనిటిలాం కఞ్జాసనారాధితామ్ ।
కామారేఃకనకాచలేన్ద్రధనుషః కారుణ్యవారాన్నిధేః
కాన్తాం కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౪॥
భక్తానాం భయజాలభఞ్జనకరీం భాన్వబ్జశుక్రేక్షణాం
భాగ్యోదారగుణాన్వితాం భగవతీం భణ్డాసురధ్వంసినీమ్ ।
భాస్వద్రత్నకిరీటకుణ్డలధరాం భద్రాసనాధ్యాసినీం
భవ్యాం కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౫॥
దేవానామభయప్రదాం విధినుతాం దుష్టాపహన్త్రీం సుఖాం
దేశానేకదిగన్తమధ్యనిలయాం దేహార్ధదాస్యప్రియామ్ ।
మాధుర్యాకరచన్ద్రఖణ్డమకుటాం దేవాఙ్గనాసేవితాం
దేవీం కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౬॥
దుష్టాటోపవినాశనైకనిపుణాం దౌర్భాగ్యవిచ్ఛేదినీం
దుర్మాత్సర్యమదాభిమానమథినీం దుఃఖాపహాం ప్రాణినామ్ ।
దుర్వారామితదైత్యభఞ్జనకరీం దుఃస్వప్నహన్త్రీం శివాం
దుర్గాం కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౭॥
మన్దస్మేరముఖామ్బుజాం మరకతశ్యామాం మహావైభవాం
మాతఙ్గీం మహిషాసురస్య శమనీం మాతఙ్గకుమ్భస్తనీమ్ ।
మన్దారద్రుమసన్నిభాం సుమధురాం సింహాసనాధ్యాసితాం
మాన్యాం కాన్తిమతీశ్వరీం హృది భజే శ్రీరాజరాజేశ్వరీమ్ ॥ ౮॥
ఇతి శృఙ్గేరి శ్రీజగద్గురు శ్రీసచ్చిదానన్దశివాభినవనృసింహ-
భారతీస్వామిభిః విరచితం శ్రీకాన్తిమతీశ్వర్యష్టకం సమ్పూర్ణమ్ ।