Sri Madradhashtakam 2 Lyrics in Telugu:
శ్రీమద్రాధాష్టకమ్ ౨
నికుఞ్జే మఞ్జూషద్వివిధమృదుపుష్పైకనిచయైః
సమాకీర్ణం దాన్తం సుమణిజటితం కేలిశయనమ్ ।
హృది ప్రాదుర్భూతోద్భటవిరహభావైః సపది యత్
కరే కృత్వా పత్రవ్యజనముపవిశన్తీం హృది భజే ॥ ౧॥
విదిత్వా గోపీశం శ్రమవిహితనిద్రం హృది భియా
రణత్కారైర్భూయాన్న ఖలు గతనిద్రః పరమితి ।
ద్వితీయేన స్తబ్ధాచలనచపలం కఙ్కణచయం
వితన్వన్తీం మన్దం వ్యజనమథ రాధాం హృది భజే ॥ ౨॥
విధాయాచ్ఛైః పుష్పైర్వివిధరచనాం చారుమృదులాం
పదప్రాన్తాలమ్బాం స్వకరకమలాభ్యాం పునరసౌ ।
స్థితం స్వప్రాణానాం ప్రియతమమనన్యం నిజపురో-
ఽవగత్యాతన్వన్తీమురసి వనమాలాం హృది భజే ॥ ౩॥
పురా రాసారమ్భే శరదమలరాత్రిష్వపి హరి-
ప్రభావాద్యుల్లీఢస్మరణకృతచిన్తాశతయుతామ్ ।
హృది ప్రాదుర్భూతం బహిరపి సముద్వీక్షితుమివ
స్వతో వారం వారం వికసితదృగబ్జాం హృది భజే ॥ ౪॥
విచిన్వన్తీం నాథం నిరతిశయలీలాకృతిరతం
ప్రపశ్యన్తీం చిహ్నం చరణయుగసమ్భూతమతులమ్ ।
ప్రకుర్వన్తీం మూర్ధన్యహహ పదరేణూత్కరమపి
ప్రియాం గోపీశస్య ప్రణతనిజనాథాం హృది భజే ॥ ౫॥
నిజప్రాణాధీశప్రసభమిలనానన్దవికస-
త్సమస్తాఙ్గప్రేమోద్గతమతనురోమావలిమపి ।
స్ఫురత్సీత్కారాన్తఃస్థితసభయభావైకనయనాం
పునః పశ్చాత్తప్తామతులరసపాత్రం హృది భజే ॥ ౬॥
లసద్గోపీనాథాననకమలసంయోజితముఖాం
ముఖామ్భోధిప్రాదుర్భవదమృతపానైకచతురామ్ ।
పరీరమ్భప్రాప్తప్రియతమశరీరైక్యరసికాం
తృతీయార్థప్రాప్తిప్రకటహరిసిద్ధిం హృది భజే ॥ ౭॥
న మే వాఞ్ఛ్యో మోక్షః శ్రుతిషు చతురాత్మా నిగదితో
న శాస్త్రీయా భక్తిర్న పునరపి విజ్ఞానమపి మే ।
కదాచిన్మాం స్వామిన్యహహ మయి దాసే కృపయతు
స్వతః స్వాచార్యాణాం చరణశరణే దీనకరుణా ॥ ౮॥
ఇతి శ్రీమద్రాధాష్టకం సమ్పూర్ణమ్ ।
