About Sri Parasara Battar’s Sri Rangaraja Stavam:
One of the dear most disciples of Sri Kurathazhwan was Pillaipillaiazhwan. He was living in Srirangam when the temple was administered by Sri Parasara Battar (more affectionately called Battar). The king who was ruling the province at that time was Veerasundaran. He was in the process of repairing the ramports of the Srirangam temple. At that stage, he noticed that the house of Pillai Pillai Azhwan was obstructing the reparing of the ramport. Hence he ordered to evict Pillai Pillai Azhwan. On hearing this, Battar intervened in vain. After this incident, friction developed between Battar and the king. The king gave constant troubles to Battar. One day Battar left Srirangam without informing anyone. He moved to Thirukoshtiyuur.
When Battar was residing at Thirukoshtiyuur, suffering due to the separation of Periyaperumal, Pillai pillai azhwan came to him. He carried a very happy message for Battar – king eerasundavan passed away. Battar immediately left Thirukoshtiyuur and came to Srirangam. When he returned, he describes the temple city starting from Cauvery, each of the streets, and finally falls at the lotus-feet of Sri Ranganatha. Thus the sloka beautifully describes Srirangam.
This sloka has two parts – poorva (first)and the uttara (concluding ) part. The poorva part has 147 slokas while the uttara part has 105 slokas. This sloka is said to explain the meaning of the dwaya mantra. The poorva part explains the first line of the dwayam while the uttara part explains the second line of the dwayam.
Sri Rangaraja Stavam in Bengali:
শ্রীরঙ্গরাজস্তবম্
শ্রীরঙ্গরাজস্তবম্ ॥
শ্রীমতে রামানুজায় নমঃ ।
শ্রীপরাশরভট্টার্যঃ শ্রীরঙ্গেশপুরোহিতঃ ।
শ্রীবত্সাঙ্কসুতঃ শ্রীমান্শ্রেয়সে মেঽস্তু ভূয়সে ।
অথ শ্রীরঙ্গরাজস্তবে পূর্বশতকম্ ।
শ্রীবত্সচিহ্নমিশ্রেভ্যো নম উক্তিমধীমহে ।
য়দুক্তয়স্ত্রয়ীকণ্ঠে য়ান্তি মঙ্গলসূত্রতাম্ ॥ ১ ॥
রামানুজপদচ্ছায়া গোবিন্দাহ্বাঽনপায়িনী ।
তদায়ত্তস্বরূপা সা জীয়ান্মদ্বিশ্রমস্থলী ॥ ২ ॥
রামানুজমুনির্জীয়াদ্যো হরের্ভক্তিয়ন্ত্রতঃ ।
কলিকোলাহলক্রীডামুধাগ্রহমপাহরত্ ॥ ৩ ॥
বিধায় বৈদিকম্মার্গমকৌতস্কুতকণ্টকম্ ।
নেতারং ভগবদ্ভক্তের্যামুনং মনবামহৈ ॥ ৪ ॥
নৌমি নাথমুনিং নাম জীমূতং ভক্ত্যবগ্রহে ।
বৈরাগ্যভগবত্তত্ত্বজ্ঞানভক্ত্যভিবর্ষুকম্ ॥ ৫ ॥
ঋষিং জুষামহে কৃষ্ণতৃষ্ণাতত্ত্বমিবোদিতং
সহস্রশাখাং য়োঽদ্রাক্ষীদ্দ্রাবিডীং ব্রহ্মসংহিতাম্ ॥ ৬ ॥
নমঃ শ্রীরঙ্গনায়ক্যৈ য়দ্ভ্রূবিভ্রমভেদতঃ ।
ঈশেশিতব্যবৈষম্যনিম্নোন্নতমিদং জগত্ ॥ ৭ ॥
শ্রীস্তনাভরণং তেজঃ শ্রীরঙ্গেশয়মাশ্রয়ে ।
চিন্তামণিমিবোদ্বান্তমুত্সঙ্গেঽনন্তভোগিনঃ ॥ ৮ ॥
অস্তি বস্ত্বিদমিত্থং ত্বপ্রসঙ্খ্যানপরাঙ্মুখম্ ।
শ্রীমত্যায়তনে লক্ষ্মীপদলাক্ষৈকলক্ষণম্ ॥ ৯ ॥
লক্ষ্মীকল্পলতোত্তুঙ্গস্তনস্তবকচঞ্চলঃ ।
শ্রীরঙ্গরাজভৃঙ্গো মে রমতাং মানসাম্বুজে ॥ ১০ ॥
স্বস্তি শ্রীস্তনকস্তূরীমকরীমুদ্রিতোরসঃ ।
শ্রীরঙ্গরাজাচ্ছরদশ্শতমাশাস্মহেতমাম্ ॥ ১১ ॥
পাতু প্রণতরক্ষায়াং বিলম্বমসহন্নিব ॥
সদা পঞ্চায়ুধীং বিভ্রত্স নঃ শ্রীরঙ্গনায়কঃ ॥ ১২ ॥
অমতং মতং মতমথামতং স্তুতং
পরিনিন্দিতং ভবতি নিন্দিতং স্তুতম্ ।
ইতি রঙ্গরাজমুদজূঘুষত্ত্রয়ী
স্তুমহে বয়ম্কিমিতি তন্ন শক্নুমঃ ॥ ১৩ ॥
য়দি মে সহস্রবদনাদিবৈভবং
নিজমর্পয়েত্স কিল রঙ্গচন্দ্রমাঃ ।
অথ শেষবন্মম চ তদ্বদেব বা
স্তুতিশক্ত্যভাববিভবেঽপি ভাগিতা ॥ ১৪ ॥
সো অঙ্গ বেদ য়দি বা ন কিলেতি বেদঃ
সন্দেগ্ধ্যনর্ঘবিদমাত্মনি রঙ্গনাথম্ ।
স্থানে তদেষ খলু দোষমলীমসাভিঃ
মদ্বাগ্ভিরৈশমতিশায়নমাবৃণোতি ॥ ১৫ ॥
স্বং সংস্কৃতদ্রাবিডবেদসূক্তৈঃ
ভান্তং মদুক্তৈর্মলিনীকরোতি ।
শ্রীরঙ্গকম্রঃ কলভং ক এব
স্নাত্বাঽপি ধূলীরসিকং নিষেদ্ধা ॥ ১৬ ॥
কিন্তু প্রপত্তিবলতারিতবিষ্ণুমায়-
মদ্বংশ্যরাজকুলদুর্ললিতং কিলৈবম্ ।
শ্রীরঙ্গরাজকমলাপদলালিতত্বং
য়দ্বাঽপরাধ্যতি মম স্তুতিসাহসেঽস্মিন্ ॥ ১৭ ॥
নাথস্য চ স্বমহিমার্ণবপারদৃশ্ব-
বিজ্ঞানবাগ্বিলসিতং সহতে ন বেদঃ ।
আপেক্ষিকং য়দি তদস্তি মমাপি তেন
শ্রীরঙ্গিণঃ স্তুতিবিধাবহমধ্যকার্ষম্ ॥ ১৮ ॥
অন্যত্রাতদ্গুণোক্তির্ভগবতি ন তদুত্কর্ষচৌর্যৈঃ পরেষাং
স্তুত্যত্বাদ্যাবদর্থা ফণিতিরপি তথা তস্য নিস্সীমকত্বাত্ ।
আম্নায়ানামসীম্নামপি হরিবিভবে বর্ষবিন্দোরিবাঽব্ধৌ
সং বন্ধাত্স্বাত্মলাভো ন তু কবলনতঃ স্তোতুরেবং ন কিং মে ॥ ১৯ ॥
কাবেরীমবগাহিষীয় ভগবদ্ভোগান্তরায়ী ভবত্
কর্মক্লেশফলাশয়প্রশমনোদ্বেলামলস্রোতসম্ ।
জন্তোস্সম্সরতোঽর্চিরাদিসরণিব্যাসঙ্গভঙ্গায় য়া
লোকেঽস্মিণ্ বিরজেব বেল্লিতজলা শ্রীরঙ্গমালিঙ্গতি ॥ ২০ ॥
দুগ্ধাব্ধির্জনকো জনন্যহমিয়ং শ্রীরেব পুত্রী বরঃ
শ্রীরঙ্গেশ্বর এতদর্হমিহ কিং কুর্যামিতীবাকুলা ।
চঞ্চচ্চামরচন্দ্রচন্দনমহামাণিক্যমুক্তোত্করান্
কাবেরী লহরীকরৈর্বিদধতী পর্যেতি সা সেব্যতাম্ ॥ ২১ ॥
তীর্থং শুন্ধতি পাতি নন্দনতরূন্ রথ্যাঙ্গণান্যুক্ষতি
স্নানীয়ার্হণপানবারি বহতি স্নাতঃ পুনীতে জনান্ ।
শ্যামং বেদরহো ব্যনক্তি পুলিনে ফেনৈর্হসন্তীব তত্
গঙ্গাং বিষ্ণুপদীত্বমাত্রমুখরাং হেমাপগা হন্ত্বঘম্ ॥ ২২ ॥
অগণিতগুণাবদ্যং সর্বং স্থিরত্রসমপ্রতি-
ক্রিয়মপি পয়ঃ পূরৈরাপ্যায়য়ন্ত্যনুজাগ্রতী ।
প্রবহতি জগদ্ধাত্রী ভূত্বেব রঙ্গপতের্দয়া
শিশিরমধুরাঽগাধা সা নঃ পুনাতু মরুদ্বৃধা ॥ ২৩ ॥
তরল়তনুতরঙ্গৈর্মন্দমান্দোল্যমান-
স্বতটবিটপিরাজীমঞ্জরীসুপ্তভৃঙ্গা ।
ক্ষিপতু কনকনাম্নী নিম্নগা নারিকেল-
ক্রমুকজমকরন্দৈর্মাংসলাপা মদংহঃ ॥ ২৪ ॥
কদলবকুলজম্বূপূগমাকন্দকণ্ঠ-
দ্বয়সসরসনীরামন্তরা সহ্যকন্যাম্ ।
প্রবলজলপিপাসালম্বমানাম্বুদৌঘ-
ভ্রমকরতরুবৃন্দং বন্দ্যতামন্তরীপম্ ॥ ২৫ ॥
য়দ্বিষ্ণোঃ পদমতমঃ পরোরজোঽগ্র্যং
মুক্তানামনুবিরজং বিদীপ্রমাহুঃ ।
তত্পুণ্যং পুলিনমিদন্তয়াঽদ্য মধ্যে
কাবেরি স্ফুরতি তদীক্ষিষীয় নিত্যম্ ॥ ২৬ ॥
ত্রয়্যন্তপ্রহতিমতীষু বৈষ্ণবানাং
প্রাপ্যাসু প্রচুরভবশ্রমাপহাসু ।
কাবেরীপরিচরিতাসু পাবনীষু
শ্রীরঙ্গোপবনতটীষু বর্তিষীয় ॥ ২৭ ॥
স্ফুরিতশফরদীর্যন্নালিকেরীগুলুচ্ছ-
প্রসৃমরমধুকুল্যাবর্ধিতানোকহানি ।
রতিমবিরতি রঙ্গারামরম্যস্থলানি
ক্রমুকপদসমোচামেচকানি ক্রিয়াসুঃ ॥ ২৮ ॥
অধিপরমপদং পুরীময়োধ্যাং
অমৃতবৃতামপরাজিতামুশন্তি ।
পুলিনমুপরি রঙ্গরাজধানী
পিশিতদৃশামপি সা পুরশ্চকাস্তি ॥ ২৯ ॥
ভবপদমপি দিব্যধাম কর্তুং
তদুভয়তন্ত্রিতহর্ম্যমালিকেব ।
ভবনমণিতলৈর্বিজৃম্ভমাণা
জয়তিতরামিহ রঙ্গরাজধানী ॥ ৩০ ॥
মণিমকররুচীর্বিতত্য পাশান্
বিসৃমরকেতুকরৈর্মৃগং হিমাংশোঃ ।
শ্রিয় ইব নবকেলয়ে জিঘৃক্ষুঃ
সুখয়তু রঙ্গপুরী চকাসতী নঃ ॥ ৩১ ॥
জনপদসরিদন্তরীপপুষ্যত্
পুরপরিপালননিত্যজাগরূকান্ ।
প্রহরণপরিবারবাহনাঢ্যান্
কুমুদমুখাণ্ গণনায়কান্ নমামি ॥ ৩২ ॥
অহৃতসহজদাস্যাঃ সূরয়স্স্রস্তবন্ধা
বিমলচরমদেহা ইত্যমী রঙ্গধাম ।
মহিতমনুজয়তির্যক্স্থাবরত্বাঃ শ্রয়ন্তে
সুনিয়তমিতি হ স্ম প্রাহুরেভ্যো নমঃ স্তাত্ ॥ ৩৩ ॥
শ্রীরঙ্গদিব্যভবনম্ভুবি গোপুরাণাং
প্রাকারিতেন নিকরেণ গুরুত্মতেব ।
পার্শ্বপ্রসারিতপতত্ত্রপুটেন ভক্ত্যা
নানাতনূভিরূপগূঢমুপঘ্নয়ামঃ ॥ ৩৪ ॥
প্রাকারমধ্যাজিরমণ্ডপোক্ত্যা
সদ্বীপরত্নাকররত্নশৈলা ।
সর্বংসহা রঙ্গবিমানসেবাং
প্রাপ্তেব তন্মন্দিরমাবিরস্তি ॥ ৩৫ ॥
জিতবাহ্যজিনাদিমণিপ্রতিমা
অপি বৈদিকয়ন্নিব রঙ্গপুরে ।
মণিমণ্ডপবপগণন্ বিদধে
পরকালকবিঃ প্রনমেমহি তান্ ॥ ৩৬ ॥
স্মেরাননাক্ষিকমলৈর্নমতঃ পুনানান্
দংষ্ট্রাগদাভ্রুকুটিভির্দ্বিষতো ধুনানান্ ।
চন্দ্রপ্রচণ্ডমুখতঃ প্রণমামি রঙ্গ-
দ্বারাবলীষু চতসৃষ্বধিকারভাজঃ ॥ ৩৭ ॥
সর্বাত্মসাধারণনাথগোষ্ঠী-
পূরেঽপি দুষ্পূরমহাবকাশম্ ।
আস্থানমানন্দময়ং সহস্র-
স্থূণাদিনাঽঽম্নাতমবাপ্নবানি ॥ ৩৮ ॥
বিহরতি হরৌ লক্ষ্ম্যা লীলাতপত্রপরিষ্ক্রিয়া-
বিনিময়বিধাসূনাসূনিক্রিয়াসফলোত্পলাম্ ।
অথ মুনিমনঃ পদ্মেষ্বব্জাসহায়বিহারজ-
শ্রমহরতটীং য়ামস্তামৈন্দবীমরবিন্দিনীম্ ॥ ৩৯ ॥
তাপত্রয়ীমৈন্দবপুষ্করিণ্যাং
নিমজ্জ্য নির্বাপয়িতাঽস্মি য়স্যাঃ ।
অভ্যাসতোঽপামঘমর্ষণীনাং
চন্দ্রঃ সুধাদীধিতিতামবাপ ॥ ৪০ ॥
পূর্বেণ তাং তদ্বদুদারনিম্ন-
প্রসন্নশীতাশয়মগ্ননাথাঃ ।
পরাঙ্কুশাদ্যাঃ প্রথমে পুমাংসো
নিষেদিবাংসো দশ মাং দয়েরন্ ॥ ৪১ ॥
আধারশক্তিমুপরি প্রকৃতিং পরেণ
তাং কূর্মমত্র ফণিনং পৃথিবীং ফণাসু ।
পৃথ্ব্যাং পয়োধিমধি তন্নলিনং নিধায়
শ্রীরঙ্গধাম সুনিবিষ্টমভিষ্টবানি ॥ ৪২ ॥
পরেণ নাকং পুরি হেমময়্যাং
য়ো ব্রহ্মকোশোঽস্ত্যপরাজিতাখ্যঃ ।
শ্রীরঙ্গনাম্না তমপৌরুষেয়ং
বিমানরাজং ভুবি ভাবয়ানি ॥ ৪৩ ॥
অনাদ্যাম্নাতত্বাত্পুরুষরচনাদোষরহিতং
জনে তাংস্তান্ কামাণ্ বিদধদপি সায়ুজ্যহৃদয়ম্ ।
অসন্দেহাধ্যাসং ভগবদুপলম্ভস্থলমমী
প্রতীমঃ শ্রীরঙ্গং শ্রুতিশতসমানর্দ্ধি শরণম্ ॥ ৪৪ ॥
অপি ফণিপতিভাবাচ্ছুভ্রমন্তঃ শয়ালোঃ
মরকতসুকুমারৈঃ রঙ্গভর্তুর্ময়ূখৈঃ ।
সকলজলধিপানশ্যামজীমূতজৈত্রং
পুলকয়তি বিমানং পাবনং লোচনে নঃ ॥ ৪৫ ॥
ব্যাপি রূপমপি গোষ্পদয়িত্বা
ভক্তবত্সলতয়োজ্ঝিতবেলম্ ।
তদ্বিষন্তপনৃকেসরিরূপং
গোপুরোপরি বিজৃম্ভিতমীডে ॥ ৪৬ ॥
অহমলমবলম্বঃ সীদতামিত্যজস্রং
নিবসদুপরিভাগে গোপুরং রঙ্গধাম্নঃ ।
ক্বচন নৃপরিপাটীবাসিতং ক্বাপি সিম্হ-
ক্রমসুরভিতমেকং জ্যোতিরগ্রে চকাস্তি ॥ ৪৭ ॥
সংশোধ্য পাবনমনোহরদৃষ্টিপাতৈঃ
দেবায় মামপি নিবেদয়তাং গুরূণাম্ ।
সব্যোত্তরে ভগবতোঽস্য কটাক্ষবীক্ষা-
পঙ্ক্তিং প্রপদ্য পরিতঃ পরিতো ভবেয়ম্ ॥ ৪৮ ॥
শ্রীরঙ্গরাজকরনম্রিতশাখিকাভ্যো
লক্ষ্ম্যা স্বহস্তকলিতশ্রবণবতংসম্ ।
পুন্নাগতল্লজমজস্রসহস্রগীতি-
সেকোত্থদিব্যনিজসৌরভমামনামঃ ॥ ৪৯ ॥
শ্রীরঙ্গচন্দ্রমসমিন্দিরয়া বিহর্তুং
বিন্যস্য বিশ্বচিদচিন্নয়নাধিকারম্ ।
য়ো নির্বহত্যনিশমঙ্গুলিমুদ্রয়ৈব
সেনান্যমন্যবিমুখাস্তমশিশ্রিয়াম ॥ ৫০ ॥
সৈন্যধুরীণপ্রাণসহায়াং সূত্রবতীমাশিশ্রিয়মম্বাম্ ।
শ্রীপদলাক্ষালাঞ্ছিতসেবাপ্রোতলসদ্দোর্বল্লিবিলাসাম্ ॥ ৫১ ॥
বিদধতু সুখং বিষ্বক্সেনস্য তে প্রথমে ভটাঃ
করিমুখজয়ত্সেনৌ কালাহ্বসিংহমুখৌ চ নঃ ।
জগতি ভজতাং তত্তত্প্রত্যূহতূলদবানলাঃ
দিশি দিশি দিবারাত্রং শ্রীরঙ্গপালনকর্মঠাঃ ॥ ৫২ ॥
শ্রুতিময়মতিহর্ষপ্রশ্রয়স্মেরবক্ত্রং
মণিমুকুরমিবাগ্রে মঙ্গলং রঙ্গধাম্নঃ ।
শরণমভিগতাঃ স্মো য়ত্র রূপস্বরূপ-
স্বগুণমহিমদর্শী মোদতে রঙ্গশায়ী ॥ ৫৩ ॥
তার্ক্ষ্যপক্ষতিবদস্য বল্লভাং
রুদ্রয়া সহ সুকীর্তিমর্চয়ে ।
হর্ষবাষ্পমপি কীর্তিমর্থিনাং
য়ন্মুখেন কমলা কটাক্ষয়েত্ ॥ ৫৪ ॥
স্বাস্ত্ররূপস্ফুরন্মৌলি মা শব্দ ইতি
উদ্ধুনানাং সুরাস্তর্জনীমুদ্রয়া ।
নাথনিদ্রোচিতোন্নিদ্রতাম্রেক্ষণাং
সঞ্চরন্তীং স্তুমস্তাং চ পঞ্চায়ুধীম্ ॥ ৫৫ ॥
অস্ত্রগ্রামাগ্রেসরং নাথবীক্ষা-
শীধুক্ষীবোদ্বেলনৃত্তাভিরামম্ ।
চক্রং দৈত্যচ্ছেদকল্মাষিতাঙ্গং
ভ্রাম্যজ্জ্বালামালভারি প্রপদ্যে ॥ ৫৬ ॥
হনুভূষবিভীষণয়োঃ স্যাং য়তমাবিহ মোক্ষমুপেক্ষ্য ।
রঘুনায়কনিষ্ক্রয়ভূতং ভুবি রঙ্গধনং রময়েতে ॥ ৫৭ ॥
ইতো বহিঃ পঞ্চ পরাঞ্চি খানি প্রত্যঞ্চি তানি স্যুরিতোঽন্তরিত্থম্ ।
ঔপাধিকেভ্যো নিরুপাধিভোগ্যে প্রত্যাহরদ্বেত্রধরং নমামি ॥ ৫৮ ॥
শেষশয়লোচনামৃতনদীরয়াকুলিতলোলমানানাম্ ।
আলম্বমিবামোদস্তম্ভদ্বয়মন্তরঙ্গমভিয়ামঃ ॥ ৫৯ ॥
শ্রীরঙ্গান্তর্মন্দিরং দীপ্রশেষং শ্রীভূমীতদ্রম্যজামাতৃগর্ভম্ ।
পশ্যেম শ্রীদিব্যমাণিক্যভূষামঞ্জূষায়াস্তুল্যমুন্মীলিতায়াঃ ॥ ৬০ ॥
লীলালতাকৃপাণীভৃঙ্গারপতদ্গ্রহার্পিতকরাগ্রাঃ ।
প্রোতাবতংসিতকুচাঃ পদাব্জসম্বাহিনীর্বয়ং স্তুমহে ॥ ৬১ ॥
মুকুলিতনলিনাঃ সকৌমুদীকা
ইব সুনিশা বিমলাদিকা নবাপি ।
শিরসি কৃতনমস্যদেকহস্তা
ইতরকরোচ্চলচামরাঃ শ্রয়েয়ম্ ॥ ৬২ ॥
উত্ফুল্লপঙ্কজতটাকমিবাভিয়ানি
শ্রীরঙ্গরাজমিহ দক্ষিণসব্যসীম্নোঃ ।
লক্ষ্মীং বিহাররসিকামিব রাজহম্সীং
ছায়ামিবাভ্যুদয়িনীমবনীং চ তস্যাঃ ॥ ৬৩ ॥
পিব নয়ন পুরস্তে রঙ্গধুর্যাভিধানং
স্থিতমিব পরিফুল্লত্পুণ্ডরীকং তটাকম্ ।
শ্রিয়মপি বিহরন্তীং রাজহম্সীমিবাস্মিন্
প্রতিফলনমিবাস্যাঃ পশ্য বিশ্বম্ভরাং চ ॥ ৬৪ ॥
সৌশীল্যশীতলমবেলকৃপাতরঙ্গ-
সম্প্লাবিতাখিলমকৃত্রিমভূম নিম্নম্ ।
লক্ষ্ম্যা চ বাসিতমভূম বিগাহমানাঃ
শ্রীরঙ্গরাজমিষপদ্মসরঃ প্রসন্নম্ ॥ ৬৫ ॥
সিংহাসনে কমলয়া ক্ষময়া চ বিশ্বং
একাতপত্রয়িতুমস্মদসূন্নিষণ্ণম্ ।
লক্ষ্মীস্বয়ম্বরসনাথিতয়ৌবনশ্রী-
সৌন্দর্য সম্পদবলিপ্তমিবালিহীয় ॥ ৬৬ ॥
আপাদমূলমণিমৌলিসমুল্লসন্ত্যা
স্বাতন্ত্র্যসৌহৃদতরঙ্গিতয়াঽঙ্গভঙ্গ্যা ।
সখ্যং সমস্তজনচেতসি সন্দধানং
শ্রীরঙ্গরাজমনিমেষমনুস্রিয়াস্ম ॥ ৬৭ ॥
ক্ষিতিকমলনিবাসাকল্পবল্লীসলীলো-
ল্লুঠনদশদিশোদ্যদ্যৌবনারম্ভজৃম্ভঃ ।
শ্রমমপহরতাং মে রঙ্গধামেতি তত্তদ্-
বরময়ফলনম্রঃ পত্রলঃ পারিজাতঃ ॥ ৬৮ ॥
সম্ভাষমাণমিব সর্ববশংবদেন
মন্দস্মিতেন মধুরেণ চ বীক্ষণেন ।
দিব্যাস্ত্রপুষ্পিতচতুর্ভুজমত্যুদারং
রঙ্গাস্পদং মম শুভাশ্রয়মাশ্রয়াণি ॥ ৬৯ ॥
এতে শঙ্খগদাসুদর্শনভৃতঃ ক্ষেমাঙ্করা বাহবঃ
পাদদ্বন্দ্বমিদং শরণ্যমভয়ং ভদ্রং চ বো হে জনাঃ ।
ইত্যূচিষ্যভয়ঙ্করে করতলে স্মেরেণ বক্ত্রেণ তদ্-
ব্যাকুর্বন্নিব নির্বহেন্মম ধুরং শ্রীরঙ্গসর্বংসহঃ ॥ ৭০ ॥
অঙ্গৈরহম্প্রথমিকাচরিতাত্মদানৈঃ
আমোদমাননবয়ৌবনসাবলেপৈঃ ।
হৈ পারিজাতমিব নূতনতায়মান-
শাখাশতং হৃদি দধীমহি রঙ্গধুর্যম্ ॥ ৭১ ॥ বর্। কথমধীমহি
আলোকা হৃদয়ালবো রসবশাদীশানমীষত্স্মিতং
প্রচ্ছায়ানি বচাংসি পদ্মনিলয়া চেতঃ শরব্যং বপুঃ ।
চক্ষুষ্মন্তি গতাগতানি ত ইমে শ্রীরঙ্গশৃঙ্গার তে
ভাবা য়ৌবনগন্ধিনঃ কিমপরং সিঞ্চন্তি চেতাংসি নঃ ॥ ৭২ ॥
আয়ত্কিরীটমলিকোল্লসদূর্ধ্বপুণ্ড্রং
আকর্ণলোচনমনঙ্কুশকর্ণপাশম্ ।
উত্ফুল্লবক্ষসমুদায়ুধবাহুমর্হ-
ন্নীবিং চ রঙ্গপদমব্জপদং ভজামঃ ॥ ৭৩ ॥ বর্। পতি
অব্জন্যস্তপদাব্জমঞ্চিতকটীসংবাদিকৌশেয়কং
কিঞ্চিত্তাণ্ডবগন্ধিসংহননকং নির্ব্যাজমন্দস্মিতম্ ।
চূডাচুম্বিমুখাম্বুজং নিজভুজাবিশ্রান্তদিব্যায়ুধং
শ্রীরঙ্গে শরদঃ শতং তত ইতঃ পশ্যেম লক্ষ্মীসখম্ ॥ ৭৪ ॥
অগ্রে তার্ক্ষ্যেণ পশ্চাদহিপতিশয়নেনাত্মনা পার্শ্বয়োশ্চ
শ্রীভূমিভ্যামতৃপ্ত্যা নয়নচুলকনৈঃ সেব্যমানামৃতৌঘম্ ।
বক্ত্রেণাবিঃস্মিতেন স্ফুরদভয়গদাশঙ্খচক্রৈর্ভুজাগ্রৈঃ
বিশ্বস্মৈ তিষ্ঠমানং শরণমশরণা রঙ্গরাজং ভজামঃ ॥ ৭৫ ॥
আর্তাপাশ্রয়মার্থিকল্পকমসহ্যাগস্করক্ষ্মাতলং
সদ্যঃ সম্শ্রিতকামধেনুমভিয়ত্সর্বস্বমস্মদ্ধনম্ ।
শ্রীরঙ্গেশ্বরমাশ্রয়েম কমলাচক্ষুর্মহীজীবিতং
শ্রীরঙ্গে স সুখাকরোতু সুচিরং দাস্যং চ ধত্তাং ময়ি ॥ ৭৬ ॥
স্বফণবিতানদীপ্রমণিমালিসুদামরুচি-
ম্রদিমসুগন্ধিভোগসুখশায়িতরঙ্গধনম্ ।
মদভরমন্থরোচ্ছ্বসিতনিঃশ্বসিতোত্তরলং
ফণিপতিডোলিকাতলিমমাশ্বসিমঃ প্রণতাঃ ॥ ৭৭ ॥
বটদলদেবকীজঠরবেদশিরঃ কমলা-
স্তনশঠকোপবাগ্বপুষি রঙ্গগৃহে শয়িতম্ ।
বরদমুদারদীর্ঘভুজলোচনসংহননং
পুরুষমুপাসিষীয় পরমং প্রণতার্তিহরম্ ॥ ৭৮ ॥
উদধিপরমব্যোম্নোর্বিস্মৃত্য পদ্মবনালয়া-
বিনিময়ময়ীং নিদ্রাং শ্রীরঙ্গনামনি ধামনি ।
ফণিপরিবৃঢস্ফারপ্রশ্বাসনিঃশ্বসিতক্রম-
স্খলিতনয়নং তন্বন্মন্বীত নঃ পরমঃ পুমান্ ॥ ৭৯ ॥
জলধিমিব নিপীতং নীরদেনাদ্রিমব্ধৌ
নিহিতমিব শয়ানং কুঞ্জরং বাদ্রিকুঞ্জে ।
কমলপদকরাক্ষং মেচকং ধাম্নি নীলে
ফণিনমধিশয়ানং পূরুষং বন্দিষীয় ॥ ৮০ ॥
শ্রীরঙ্গেশয় ইহ শর্ম নির্মিমীতামাতাম্রাধরপদপাণিবিদ্রুমো নঃ ।
কাবেরীলহরিকরোপলাল্যমানো গম্ভীরাদ্ভুত ইব তর্ণকোঽর্ণবস্য ॥ ৮১ ॥
সিঞ্চেদিমং চ জনমিন্দিরয়া তটিত্বান্
ভূষামণিদ্যুতিভিরিন্দ্রধনুর্দধানঃ ।
শ্রীরঙ্গধামনি দয়ারসনির্ভরত্বা-
দাদ্রৌ শয়ালুরিব শীতলকালমেঘঃ ॥ ৮২ ॥
আমৌলিরত্নমকরাত্পুনরা চ পদ্ভ্যাং
ধামক্রমোন্নমদুদারমনোহরাঙ্গম্ ।
শ্রীরঙ্গশেষশয়নং নয়নৈঃ পিবামঃ
পশ্যন্মনঃপ্রবণমোঘমিবামৃতস্য ॥ ৮৩ ॥
অরবিন্দিতমঙ্ঘ্রিপাণিপদ্মৈ-
রপি তাপিঞ্ছিতমঞ্চিতাঙ্গকান্ত্যা ।
অধরেণ স বন্ধুজীবিতং শ্রীঃ
নিয়তং নন্দনয়েত রঙ্গচন্দ্রম্ ॥ ৮৪ ॥
অন্যোন্যরঞ্জকরুচোঽনুপমানশোভাঃ
দিব্যস্রগম্বরপরিষ্করণাঙ্গরাগাঃ ।
সংস্পর্শতঃ পুলকিতা ইব চিন্ময়ত্বাত্
রঙ্গেন্দুকান্তিমধিকামুপবৃম্হয়ন্তি ॥ ৮৫ ॥
দ্রুতকনকজগিরিপরিমিলদুদধি-
প্রচলিতলহরিবদহমহমিকয়া ।
স্নপয়তি জনমিমমপহরতি তমঃ
ফণিশয়মরকতমণিকিরণগণঃ ॥ ৮৬ ॥
ভোগীন্দ্রনিঃশ্বসিত সৌরভবর্ধিতং শ্রী
নিত্যানুষক্তপরমেশ্বরভাবগন্ধি ।
সৌরভ্যমাপ্লুতদিশাবধি রঙ্গনেতুঃ
আনন্দসম্পদি নিমজ্জয়তে মনাংসি ॥ ৮৭ ॥
রঙ্গভর্তুরপি লোচনচর্চাং সাহসাবলিষু লেখয়মানম্ ।
পুষ্পহাস ইতি নাম দুহানং সৌকুমার্যমতিবাঙ্মনসং নঃ ॥ ৮৮ ॥
একৈকস্মিন্পরমবয়বেঽনন্তসৌন্দর্যমগ্নং
সর্বং দ্রক্ষ্যে কথমিতি মুধা মামথা মন্দচক্ষুঃ ।
ত্বাং সৌভ্রাত্রব্যতিকরকরং রঙ্গরাজাঙ্গকানাং
তল্লাবণ্যং পরিণময়িতা বিশ্বপারীণবৃত্তি ॥ ৮৯ ॥
বপুর্মন্দারস্য প্রথমকুসুমোল্লাসসময়ঃ
ক্ষমালক্ষ্মীভৃঙ্গীসকলকরণোন্মাদনমধু ।
বিকাসঃ সৌন্দর্যস্রজি রসিকতাশীধুচুলকো
য়ুবত্বং রঙ্গেন্দোঃ সুরভয়তি নিত্যং সুভগতাম্ ॥ ৯০ ॥
কিরীটচূডরত্নরাজিরাধিরাজ্যজল্পিকা ।
মুখেন্দুকান্তিরুন্মুখং তরঙ্গিতেব রঙ্গিণঃ ॥ ৯১ ॥
শিখারত্নোদ্দীপ্রং দিশি দিশি চ মাণিক্যমকরী-
লসচ্ছৃঙ্গং রঙ্গপ্রভুমণিকিরীটং মনুমহে ।
সমুত্তুঙ্গস্ফীতং চিদচিদধিরাজশ্রিয় ইব
প্রিয়াক্রীডং চূডামণিমপি নিতম্বং তমভিতঃ ॥ ৯২ ॥
বিহরতু ময়ি রঙ্গিনশ্চূলিকাভ্রমরকতিলকোর্ধ্বপুণ্ড্রোজ্জ্বলম্ ।
মুখমমৃততটাকচন্দ্রাম্বুজস্ময়হরশুচিমুগ্ধমন্দস্মিতম্ ॥ ৯৩ ॥
মুখপুণ্ডরীকমুপরি ত্রিকণ্টকং তিলকাশ্চ কেসরসমাঃ সমৌক্তিকাঃ ।
ইহ রঙ্গভর্তুরভিয়ন্মধুব্রতপ্রকরশ্রিয়ং ভ্রমরকাণি বিভ্রতি ॥ ৯৪ ॥
হৃদয়ং প্রসাদয়তি রঙ্গপতের্মধুরোর্ধ্বপুণ্ড্রতিলকং ললিতম্ ।
অলিকার্ধচন্দ্রদলসংবলিতামমৃতস্রুতিং য়দভিশঙ্কয়তে ॥ ৯৫ ॥
সরসীরুহে সমবনাম্য মদাদুপরি প্রনৃত্যদলিপঙ্ক্তিনিভে ।
স্ফুরতো ভ্রুবাবুপরি লোচনয়োঃ সবিলাসলাস্যগতি রঙ্গভৃতঃ ॥ ৯৬ ॥
স্মরশরনলিনভ্রমান্নেত্রয়োঃ পরিসরনমদিক্ষুচাপচ্ছবি ।
য়ুগমুদয়তি রঙ্গভর্তুর্ভ্রুবোঃ গুরুকুলমিব শার্ঙ্গনৃত্তশ্রিয়ঃ ॥ ৯৭ ॥
কৃপয়া পরয়া করিষ্যমাণে সকলাঙ্গং কিল সর্বতোঽক্ষি নেত্রে ।
প্রথমং শ্রবসী সমাস্তৃণাতে ইতি দৈর্ঘ্যেণ বিদন্তি রঙ্গনেতুঃ ॥ ৯৮ ॥
শ্রবোনাসারোধাত্তদবধিকডোলায়িতগতে
বিশালস্ফীতায়দ্রুচিরশিশিরাতাম্রধবলে ।
মিথো বদ্ধস্পর্ধস্ফুরিতশফরদ্বন্দ্বললিতে
ক্রিয়াস্তাং শ্রীরঙ্গপ্রণয়িনয়নাব্জে ময়ি দয়াম্ ॥ ৯৯ ॥
করুণামৃতকূলমুদ্বহৈষ প্রণমত্স্বাগতিকী প্রসন্নশীতা ।
ময়ি রঙ্গধনোপকর্ণিকাঽক্ষ্ণোঃ সরিতোর্বীক্ষণবীচিসন্ততিঃ স্তাত্ ॥ ১০০ ॥
বিলসতি নাসা কল্পকবল্লী মুগ্ধেব রঙ্গনিলয়স্য ।
স্মিতমপি তন্নবকুসুমং চুবুককপোলং চ পল্লবোল্লসিতম্ ॥ ১০১ ॥
নয়নশফরিবিদ্ধৌ কর্ণপাশাবরুদ্ধৌ
রুষ ইব লুঠতোঽর্চির্মঞ্জরীরুদ্গিরন্তৌ ।
পরিমিলদলকালীশৈবলামংসবেলাং
অনুমণিমকরোদ্ধৌ রঙ্গধুর্যামৃতাব্ধেঃ ॥ ১০২ ॥
অধরমধুরাম্ভোজং তত্কর্ণপাশমৃণালিকা-
বলয়মভি মামাস্তাং রঙ্গেন্দুবক্ত্রসরশ্চিরম্ ।
নয়নশফরং নাসাশৈবালবল্লরি কর্ণিকা-
মকরমলকশ্রেণীপর্যন্তনীলবনাবলি ॥ ১০৩ ॥
রময়তু স মাং কণ্ঠঃ শ্রীরঙ্গনেতুরুদঞ্চিত-
ক্রমুকতরুণগ্রীবাকম্বুপ্রলম্বমলিম্লুচঃ ।
প্রণয়বিলগল্লক্ষ্মীবিশ্বম্ভরাকরকন্দলী-
কনকবলয়ক্রীডাসঙ্ক্রান্তরেখ ইবোল্লসন্ ॥ ১০৪ ॥
অধিষ্ঠানস্তম্ভৌ ভুবনপৃথুয়ন্ত্রস্য কমলা-
করেণোরালানে অরিকরিঘটোন্মাথমুসলৌ ।
ফণীন্দ্রস্ফীতস্রগ্ব্যতিকরিতসন্দিগ্ধবিভবৌ
ভুজৌ মে ভূয়াস্তামভয়মভি রঙ্গপ্রণয়িনঃ ॥ ১০৫ ॥
প্রতিজলধিতো বেলাশয়্যাং বিভীষণকৌতুকাত্
পুনরিব পুরস্কর্তুং শ্রীরঙ্গিণঃ ফণিপুঙ্গবে ।
সমুপদধতঃ কঞ্চিত্কঞ্চিত্প্রসারয়তো ভুজ-
দ্বয়মপি সদা দানশ্রদ্ধালু দীর্ঘমুপাস্মহে ॥ ১০৬ ॥
কুসুমভরালসৌ স্ফটিকবেদিশয়ৌ বিটপা-
বমরতরোঃ পরং পরিহসত্পৃথু রঙ্গভুজঃ ।
বহুমণিমুদ্রিকাকনককঙ্কণদোর্বলয়ৈঃ
কিসলয়ি দোর্দ্বয়ং ফণিনি নির্ভরসুপ্তমিমঃ ॥ ১০৭ ॥
মদ্রক্ষাব্রতকৌতুকে সুকটকে বিক্রান্তিকর্ণেজপে
শার্ঙ্গজ্যাকিণকর্কশিম্নি সুমনস্স্রঙ্মোহনে মার্দবে ।
দোর্দ্বন্দ্বং বহুশঃ প্রলোভ্য কমলালীলোপধানং ভবত্
তচ্চিত্রালকমুদ্রিতং বিজয়তে শ্রীরঙ্গসংসঙ্গিনঃ ॥ ১০৮ ॥
ভবার্তানাং বক্ত্রামৃতসরসি মার্গং দিশদিব
স্বয়ং বক্ত্রেণেদং বরদমিতি সন্দর্শিতমিব ।
করাম্ভোজং পঙ্কেরুহবনরুষা পাটলমিব
শ্রয়ামি শ্রীরঙ্গেশয়িতুরুপধানীকৃতমহম্ ॥ ১০৯ ॥
কিরীটং শ্রীরঙ্গেশয়িতুরুপধানীকৃতভুজঃ
বিধীশাধীশত্বাদ্ধটত ইতি সংস্পৃশ্য বদতি ।
নিহীনানাং মুখ্যং শরণমিতি বাহুস্তদিতরঃ
স্ফুটং ব্রূতে পাদাম্বুজয়ুগলমাজানুনিহিতঃ ॥ ১১০ ॥
মলয়জশশিলিপ্তং মালতীদামতল্পং
সুমণিসরবিতানং কৌস্তুভস্বস্তিদীপম্ ।
দনুজবৃষবিষাণোল্লেখচিত্রং চ লক্ষ্মী-
ললিতগৃহমুপাসে রঙ্গসর্বংসহোরঃ ॥ ১১১ ॥
হারস্ফারিতফেনমংশুলহরীমালর্দ্ধি মুক্তাফল-
শ্রেণীশীকরদুর্দিনং তত ইতো ব্যাকীর্ণরত্নোত্করম্ ।
আবিঃকৌস্তুভলক্ষ্মি রঙ্গবসতের্নিস্সীমভূমাদ্ভুতং
বক্ষো মন্দরমথ্যমানজলধিশ্লাঘং বিলোকেমহি ॥ ১১২ ॥
বক্ষঃস্থল্যাং তুলসিকমলাকৌস্তুভৈর্বৈজয়ন্তী
সর্বেশত্বং কথয়তিতরাং রঙ্গধাম্নস্তদাস্তাম্ ।
কূর্মব্যাঘ্রীনখপরিমিলত্পঞ্চহেতী য়শোদা-
নদ্ধা মৌগ্ধ্যাভরণমধিকং নঃ সমাধিং ধিনোতি ॥ ১১৩ ॥
কিয়ান্ভরো মম জগদণ্ডমণ্ডলী-
ত্যতৃপ্তিতঃ কৃশিতমিবোদরং বিভোঃ ।
রিরক্ষিষোচিতজগতীপরম্পরাং
পরামিব প্রথয়তি নাভিপঙ্কজম্ ॥ ১১৪ ॥
ত্রিবিধচিদচিদ্বৃন্দং তুন্দাবলম্বিবলিত্রয়ং
বিগণয়দিবৈশ্বর্যং ব্যাখ্যাতি রঙ্গমহেশিতুঃ ।
প্রণতবশতাং ব্রূতে দামোদরত্বকরঃ কিণঃ
তদুভয়গুণাকৃষ্টং পট্টং কিলোদরবন্ধনম্ ॥ ১১৫ ॥
ত্রয়ো দেবাস্তুল্যাস্ত্রিতয়মিদমদ্বৈতমধিকং
ত্রিকাদস্মাত্তত্ত্বং পরমিতি বিতর্কান্ বিঘটয়ন্ ।
বিভোর্নাভীপদ্মো বিধিশিবনিদানং ভগবতঃ
তদন্যদ্ভ্রূভঙ্গীপরবদিতি সিদ্ধান্তয়তি নঃ ॥ ১১৬ ॥
গর্ভে কৃত্বা গোপ্তুমনন্তং জগদন্ত-
র্মজ্জদ্ভ্রম্যা বাঞ্ছতি সাম্যং ননু নাভিঃ ।
উত্ক্ষিপ্যৈতত্প্রেক্ষিতুমুদ্যদ্ভ্রমিভূয়ং
নাভীপদ্মো রংহতি রঙ্গায়তনাব্ধেঃ ॥ ১১৭ ॥
মদমিব মধুকৈটভস্য রম্ভাকরভকরীন্দ্রকরাভিরূপ্যদর্পম্ ।
স্ফুটমিব পরিভূয় গর্বগুর্বোঃ কিমুপমিমীমহি রঙ্গকুঞ্জরোর্বোঃ ॥ ১১৮ ॥
কটীকান্তিসংবাদিচাতুর্যনীবীলসদ্রত্নকাঞ্চীকলাপানুলেপম্ ।
মহাভ্রং লিহন্মেরুমাণিক্যসানূরিবাভাতি পীতাম্বরং রঙ্গবন্ধোঃ ॥ ১১৯ ॥
ভর্মস্থলাংশুপরিবেষ ইবাম্বুরাশেঃ
সন্ধ্যাম্বুবাহনিকুরুম্বমিবাম্বরস্য ।
শম্পাকদম্বকমিবাম্বুমুচো মনা নঃ
পীতাম্বরং পিবতি রঙ্গধুরন্ধরস্য ॥ ১২০ ॥
বৈভূষণ্যাং কান্তিরাঙ্গী নিমগ্না বিষ্বদ্রীচী ক্বাপি সোন্মাদবৃত্তিঃ ।
জানে জানুদ্বন্দ্ববার্তাবিবর্তো জাতঃ শ্রীমদ্রঙ্গতুঙ্গালয়স্য ॥ ১২১ ॥
শ্রীরঙ্গেশয়জঙ্ঘে শ্রীভূম্যামর্শহর্ষকণ্টকিতে ।
তত্কেলিনলিনমাংসলনালদ্বয়ললিতমাচরতঃ ॥ ১২২ ॥
বন্দারুবৃন্দারকমৌলিমালায়ুঞ্জানচেতঃ কমলাকরেভ্যঃ ।
সঙ্ক্রন্তরাগাবিব পাদপদ্মৌ শ্রীরঙ্গভর্তুর্মনবৈ নবৈ চ ॥ ১২৩ ॥
য়দ্বৃন্দাবনপণ্ডিতং দধিরবৈর্যত্তাণ্ডবং শিক্ষিতং
য়ল্লক্ষ্মীকরসৌখ্যসাক্ষি জলজপ্রস্পর্ধমানর্দ্ধি য়ত্ ।
য়দ্ভক্তেষ্বজলস্থলজ্ঞমপি য়দ্দূত্যপ্রসঙ্গোত্সুকং
তদ্বিষ্ণোঃ পরমং পদং বহতু নঃ শ্রীরঙ্গিণো মঙ্গলম্ ॥ ১২৪ ॥
শিঞ্জানশ্রুতিশিঞ্জিনীমণিরবৈর্বজ্রারবিন্দধ্বজ-
চ্ছত্রীকল্পকশঙ্খচক্রমুকুরৈস্স্তৈস্তৈশ্চ রেখাময়ৈঃ ।
ঐশ্বর্যেণ জয়ং ত্রিবিক্রমমুখং ঘুষ্যদ্ভিরাম্রেডিতং
শ্রীরঙ্গেশয়পাদপঙ্কজয়ুগং বন্দামহে সুন্দরম্ ॥ ১২৫ ॥
পুনানি ভুবনান্যহং বহুমুখীতি সর্বাঙ্গুলী
ঝলজ্ঝলিতজাহ্নবীলহরিবৃন্দসন্দেহদাঃ ।
দিবা নিশি চ রঙ্গিণশ্চরণচারুকল্পদ্রুম-
প্রবালনবমঞ্জরীঃ নখরুচীর্বিগাহেমহি ॥ ১২৬ ॥
শ্রীরঙ্গেন্দোঃ পদকিসলয়ে নীলমঞ্জীরমৈত্র্যা
বন্দে বৃন্তপ্রণয়িমধুপব্রাতরাজীবজৈত্রে ।
নিত্যাভ্যর্চানতবিধিমুখস্তোমসংশয়্যমানৈঃ
হেমাম্ভোজৈর্নিবিডনিকটে রামসীতোপনীতৈঃ ॥ ১২৭ ॥
ইতি শ্রীরঙ্গরাজস্তবে পূর্বশতকং সমাপ্তম্ ।
অথ শ্রীরঙ্গরাজস্তবে উত্তরশতকম্ ।
শ্রীপরাশরভট্টার্যঃ শ্রীরঙ্গেশপুরোহিতঃ ।
শ্রীবত্সাঙ্কসুতঃ শ্রীমান্ শ্রেয়সে মেঽস্তু ভূয়সে ॥
হর্তুং তমস্সদসতী চ বিবেক্তুমীশো
মানং প্রদীপমিব কারুণিকো দদাতি ।
তেনাবলোক্য কৃতিনঃ পরিভুঞ্জতে তং
তত্রৈব কেঽপি চপলাশ্শলভীভবন্তি ॥ ১ ॥
য়া বেদবাহ্যাঃ স্মৃতয়োঽর্হদাদের্বেদেষু য়াঃ কাশ্চ কুদৃষ্টয়ঃ ।
var কুদৃষ্টয়স্তাঃ?
আগস্কৃতাং রঙ্গনিধে ত্বদধ্বন্যন্ধঙ্করণ্যঃ
স্মৃতবান্ মনুস্তত্ ॥ ২ ॥
প্রত্যক্ষপ্রমথনপশ্যতোহরত্বা-
ন্নির্দোষশ্রুতিবিমতেশ্চ বাহ্যবর্ত্ম ।
দুস্তর্কপ্রভবতয়া চ বক্তৃদোষ-
স্পৃষ্ট্যা চ প্রজহতি রঙ্গবিন্দ বৃদ্ধাঃ ॥ ৩ ॥
অবয়বিতয়েদঙ্কুর্বাণৈর্বহিষ্করণৈর্বপু-
র্নিরবয়বকোঽহঙ্কারার্হঃ পুমান্ করণাতিগঃ ।
স্ফুরতি হি জনাঃ প্রত্যাসত্তেরিমৌ ন বিবিঞ্চতে
তদধিকুরুতাং শাস্ত্রং রঙ্গেশ তে পরলোকিনি ॥ ৪ ॥
প্রত্যক্ষা শ্রুতিরর্থধীশ্চ ন তথা দোষস্তদর্থঃ
পুনর্ধর্মাধর্মপরাবরেশ্বরমুখঃ প্রত্যক্ষবাধ্যো ন চ ।
তচ্চার্বাকমতেঽপি রঙ্গরমণ প্রত্যক্ষবত্ সা প্রমা
য়োগোন্মীলিতধীস্তদর্থমথবা প্রত্যক্ষমীক্ষেত সঃ ॥ ৫ ॥
ন সদসদুভয়ং বা নোভয়স্মাদ্বহির্বা জগদিতি
ন কিলৈকাং কোটিমাটীকতে তত্ ।
ইতি নিরুপধি সর্বং সর্বিকাতো নিষেধন্
বরদ সুগতপাশশ্চোরলাবং বিলাব্যঃ ॥ ৬ ॥
প্রতীতিশ্চেদিষ্টা ন নিখিলনিষেধো য়দি ন কো
নিষেদ্ধাঽতো নেষ্টো নিরুপধিনিষেধস্সদুপধৌ ।
নিষেধেঽন্যত্সিধ্যেদ্বরদ ঘটভঙ্গে শকলবত্
প্রমাশূন্যে পক্ষে শ্রুতিরপি মতেঽস্মিন্বিজয়তাম্ ॥ ৭ ॥
য়োগাচারো জগদপলপত্যত্র সৌত্রান্তিকস্ত-
দ্ধীবৈচিত্র্যাদনুমিতিপদং বক্তি বৈভাষিকস্তু ।
প্রত্যক্ষং তত্ক্ষণিকয়তি তে রঙ্গনাথ ত্রয়োঽপি
জ্ঞানাত্মত্বক্ষণভিদুরতে চক্ষতে তান্ ক্ষিপামঃ ॥ ৮ ॥
জগদ্ভঙ্কুরং ভঙ্গুরা বুদ্ধিরাত্মেত্যসদ্বেত্ত্রভাবে
তথা বেদ্যবিত্ত্যোঃ ।
ক্ষণধ্বংসতশ্চ স্মৃতিপ্রত্যভিজ্ঞাদরিদ্রং
জগত্স্যাদিদং রঙ্গচন্দ্র ॥ ৯ ॥
অহমিদমভিবেদ্মীত্যাত্মবিত্ত্যোর্বিভেদে
স্ফুরতি য়দি তদৈক্যং বাহ্যমপ্যেকমস্তু ।
প্রমিতিরপি মৃষা স্যান্মেয়মিথ্যাত্ববাদে
য়দি তদপি সহেরন্ দীর্ঘমস্মন্মতায়ুঃ ॥ ১০ ॥
এতদ্রামাস্ত্রং দলয়তু কলির্ব্রহ্মমীমাংসকাংশ্চ
জ্ঞপ্তির্ব্রহ্মৈতজ্জ্বলদপি নিজাবিদ্যয়া বম্ভ্রমীতি ।
তস্য ভ্রান্তিং তাং শ্লথয়তি জিতাদ্বৈতবিদ্যস্তু জীবো
য়দ্যদ্দৃশ্যং তদ্বিতথমিতি য়ে জ্ঞাপয়াঞ্চক্রুরজ্ঞাঃ ॥ ১১ ॥
অঙ্গীকৃত্য তু সপ্তভঙ্গিকুসৃতিং স্যাদস্তিনাস্ত্যাত্মিকাং
বিশ্বং ত্বদ্বিভবং জগজ্জিনমতে নৈকান্তমাচক্ষতে ।
ভিন্নাভিন্নমিদং তথা জগদুষে বন্ধ্যা মমাম্বেতিব-
ন্নূত্নব্রহ্মবিদে রহঃ পরমিদং রঙ্গেন্দ্র তে চক্ষতাম্ ॥ ১২ ॥
কণচরচরণাক্ষৌ ভিক্ষমাণৌ কুতর্কৈঃ
শ্রুতিশিরসি সুভিক্ষং ত্বজ্জগত্কারণত্বম্ ।
অণুষু বিপরিণাম্য ব্যোমপূর্বং চ কার্যং
তব ভবদনপেক্ষং রঙ্গভর্তর্ব্রুবাতে ॥ ১৩ ॥
বেদে কর্ত্রাদ্যভাবাদ্বলবতি হি নয়ৈস্ত্বন্মুখে নীয়মানে
তন্মূলত্বেন মানং তদিতরদখিলং জায়তে রঙ্গধামন্
তস্মাত্সাঙ্খ্যং সয়োগং সপশুপতিমতং কুত্রচিত্পঞ্চরাত্রং
সর্বত্রৈব প্রমাণং তদিদমবগতং পঞ্চমাদেব বেদাত্ ॥ ১৪ ॥
সঞ্চষ্টে নেশ্বরং ত্বাং পুরুষপরিষদি ন্যস্য য়দ্বাঽঽন্যপর্যাত্
সাঙ্খ্যো য়োগী চ কাক্বা প্রতিফলনমিবৈশ্বর্যমূচে কয়াচিত্ ।
ভিক্ষৌ শৈবস্সুরাজম্ভবমভিমনুতে রঙ্গরাজাতিরাগাত্
ত্বাং ত্বামেবাভ্যধাস্ত্বং ননু পরবিভবব্যূহনাঢ্যম্ভবিষ্ণুম্ ॥ ১৫ ॥
ইতি মোহনবর্ত্মনা/বর্ষ্মণা ত্বয়াঽপি গ্রথিতং বাহ্যমতং তৃণায় মন্যে ।
অথ বৈদিকবর্মবর্মিতানাং মনিতাহে কুদৃশাং কিমীশ বর্ত্ম ॥ ১৬ ॥
সংস্কারং প্রতিসঞ্চরেষু নিদধত্সর্গেসু তত্স্মারিতং
রূপং নাম চ তত্তদর্হনিবহে ব্যাকৃত্য রঙ্গাস্পদ ।
সুপ্তোদ্বুদ্ধবিরিঞ্চপূর্বজনতামধ্যাপ্য তত্তদ্ধিতং
শাসন্নস্মৃতকর্তৃকান্ বহসি য়দ্বেদাঃ প্রমাণং ততঃ ॥ ১৭ ॥
শীক্ষায়াং বর্ণশিক্ষা পদসমধিগমো ব্যাক্রিয়ানির্বচোভ্যাং
ছন্দশ্ছন্দশ্চিতৌ স্যাদ্গময়তি সময়ং জ্যৌতিষং রঙ্গনাথ ।
কল্পেঽনুষ্ঠানমুক্তং হ্যুচিতগমিতয়োর্ন্যায়মীমাংসয়োস্স্যাত্
অর্থব্যক্তিঃ পুরাণস্মৃতিষু তদনুগাস্ত্বাং বিচিন্বন্তি বেদাঃ ॥ ১৮ ॥
আদৌ বেদাঃ প্রমাণং স্মৃতিরুপকুরুতে সেতিহাসৈঃ পুরাণৈঃ
ন্যায়ৈস্সার্ধং ত্বদর্চাবিধিমুপরি পরক্ষীয়তে পূর্বভাগঃ ।
ঊর্ধ্বো ভাগত্স্বদীহাগুণবিভবপরিজ্ঞাপনৈস্ত্বত্পদাপ্তৌ
বেদ্যো বেদৈশ্চ সর্বৈরহমিতি ভগবন্ স্বেন চ ব্যাচকর্থ ॥ ১৯ ॥
ক্রিয়া তচ্ছক্তির্বা কিমপি তদপূর্বং পিতৃসুর-
প্রসাদো বা কর্তুঃ ফলদ ইতি রঙ্গেশ কুদৃশঃ ।
ত্বদর্চেষ্টাপূর্তে ফলমপি ভবত্প্রীতিজমিতি
ত্রয়ীবৃদ্ধাস্তত্তদ্বিধিরপি ভবত্প্রেরণমিতি ॥ ২০ ॥
আজ্ঞা তে সনিমিত্তনিত্যবিধয়ঃ স্বর্গাদিকাম্যদ্বিধিঃ
সোঽনুজ্ঞা শঠচিত্তশাস্ত্রবশতোপায়োঽভিচারশ্রুতিঃ ।
সর্বীয়স্য সমস্তশাসিতুরহো শ্রীরঙ্গসর্বস্ব তে
রক্ষাকূতনিবেদিনী শ্রুতিরসৌ ত্বন্নিত্যশাস্তিস্ততঃ ॥ ২১ ॥
অত্রাস্তে নিধিরিতিবত্পুমর্থভূতে সিদ্ধার্থা অপি গুণরূপবৃত্তবাদাঃ ।
রঙ্গেশ ত্বয়ি সকলাস্সমন্বয়ন্তে নোপাসাফলবিধিভির্বিশেষ এষাম্ ॥ ২২ ॥
দেহো দেহিনি কারণে বিকৃতয়ো জাতির্গুণাঃ কর্ম চ
দ্রব্যে নিষ্ঠিতরূপবুদ্ধিবচনাস্তাত্স্থ্যাত্ তথেদং জগত্ ।
বিশ্বং ত্বয়্যভিমন্যসে জগদিষে তেনাদ্বিতীয়স্ততঃ
মায়োপাধিবিকারসঙ্করকথা কা নাম রঙ্গেশ্বর ॥ ২৩ ॥
স্থিত্যুত্পত্তিপ্রবৃত্তিগ্রসননিয়মনব্যাপনৈরাত্মনস্তে
শেষোঽশেষঃ প্রপঞ্চো বপুরিতি ভবতস্তস্য চাভেদবাদাঃ ।
সর্বং খল্বৈতদাত্ম্যং সকলমিদমহং তত্ত্বমস্যেবমাদ্যাঃ
ব্যাখ্যাতা রঙ্গধামপ্রবণ বিজয়িভির্বৈদিকৈস্সার্বভৌমৈঃ ॥ ২৪ ॥
সরাজকমরাজকং পুনরনেকরাজং তথা
য়থাভিমতরাজকং জগদিদং জজল্পুর্জডাঃ ।
জগাববশচিত্রতাতরতমত্বতর্কাঙ্গিকা
শ্রুতিশ্চিদচিতী ত্বয়া বরদ নিত্যরাজন্বতী ॥ ২৫ ॥
ব্রহ্মাদ্যাস্সৃজ্যবর্গে ভ্রুকুটিভটতয়োদ্ঘাটিতা নাবতার-
প্রস্তাবে তেন ন ত্বং ন চ তব সদৃশা বিশ্বমেকাতপত্রম্ ।
লক্ষ্মীনেত্রা ত্বয়েতি শ্রুতিমুনিবচনৈস্ত্বত্পরৈরর্পয়ামঃ
শ্রীরঙ্গাম্ভোধিচন্দ্রোদয় জলমুচিতং বাদিকৌতস্কুতেভ্যঃ ॥ ২৬ ॥
দোষোপধাবধিসমাতিশয়ানসঙ্খ্যা
নির্লেপমঙ্গলগুণৌঘদুঘাষ্ষডেতাঃ ।
জ্ঞানৈশ্বরীশকনবীর্যবলার্চিষস্ত্বাং
রঙ্গেশ ভাস ইব রত্নমনর্ঘয়ন্তি ॥ ২৭ ॥
য়ুগপদনিশমক্ষৈঃ স্বৈঃ স্বতো বাঽঽক্ষকার্যে
নিয়মমনিয়মং বা প্রাপ্য রঙ্গাধিরাজ ।
করতলবদশেষং পশ্যসি স্বপ্রকাশং
তদবরণমমোঘং জ্ঞানমাম্নাসিষুস্তে ॥ ২৮ ॥
নয়নশ্রবণো দৃশা শৃণোষি অথ তে রঙ্গপতে মহেশিতুঃ ।
করণৈরপি কামকারিণঃ ঘটতে সর্বপথীনমীক্ষণম্ ॥ ২৯ ॥
সার্বজ্ঞ্যেনাজ্ঞমূলং জগদভিদধতো বারিতাস্সাক্ষিমাত্রাত্
সাঙ্খ্যোক্তাত্কারণং ত্বাং পরয়তি ভগবন্নৈশ্বরী রঙ্গশায়িন্
অপ্রের্যোঽন্যৈঃ স্বতন্ত্রোঽপ্রতিহতি সদসত্কর্মচৈত্র্যা বিচিত্রং
য়ত্রেচ্ছালেশতস্ত্বং য়ুগপদগণয়ন্ বিশ্বমাবিশ্চকর্থ ॥ ৩০ ॥
কার্যেঽনন্তে স্বতনুমুখতস্ত্বামুপাদানমাহুঃ
সা তে শক্তিস্সুকরমিতরচ্চেতি বেলাং বিলঙ্ঘ্য ।
ইচ্ছা য়াবদ্বিহরতি সদা রঙ্গরাজানপেক্ষা
সৈবৈশানাদতিশয়করি সোর্ণনাভৌ বিভাব্যা ॥ ৩১ ॥
স্বমহিমস্থিতিরীশ ভৃশক্রিয়োঽপ্যকলিতশ্রম এব বিভর্ষি য়ত্ ।
বপুরিব স্বমশেষমিদং বলং তব পরাশ্রিতকারণবারণম্ ॥ ৩২ ॥
মৃগনাভিগন্ধ ইব য়ত্সকলার্থান্ নিজসন্নিধেরবিকৃতো বিকৃণোষি ।
প্রিয়রঙ্গ বীর্যমিতি তত্তু বদন্তে সবিকারকারণমিতো বিনিবার্যম্ ॥ ৩৩ ॥
সহকার্যপেক্ষমপি হাতুমিহ তদনপেক্ষকর্তৃতা ।
রঙ্গধন জয়তি তেজ ইতি প্রণতার্তিজিত্ প্রতিভটাভিভাবুকম্ ॥ ৩৪ ॥
মর্ত্যৌত্থায়ং বিরিঞ্চাবধিকমুপরি চোত্প্রেক্ষ্য মীমাংসমানা
রঙ্গেন্দ্রানন্দবল্লী তব গুণনিবহং য়ৌবনানন্দপূর্বম্ ।
ন স্বার্থং স্প্রষ্টুমীষ্টে স্খলতি পথি পরং মূকলায়ং নিলিল্যে
হন্তৈবং ত্বদ্গুণানামবধিগণনয়োঃ কা কথা চিত্তবাচোঃ ॥ ৩৫ ॥
ন্যধায়িষত য়ে গুণা নিধিনিধায়মারণ্যকেষ্বমী
ম্রদিমচাতুরীপ্রণতচাপলক্ষান্তয়ঃ ।
দয়াবিজয়সৌন্দরীপ্রভৃতয়োঽপি রত্নৌঘবত্
জগদ্ব্যবহৃতিক্ষমা বরদ রঙ্গরত্নাপণে ॥ ৩৬ ॥
য়মাশ্রিত্যৈবাত্মম্ভরয় ইব তে সদ্গুণগণাঃ
প্রথন্তে সোঽনন্তস্ববশঘনশান্তোদিতদশঃ ।
ত্বমেব ত্বাং বেত্থ স্তিমিতবিতরঙ্গং বরদ ভোঃ
স্বসংবেদ্যস্বাত্মদ্বয়সবহুলানন্দভরিতম্ ॥ ৩৭ ॥
আঘ্রায়েশ্বরগন্ধমীশসদৃশং মন্যাস্তবেন্দ্রাদয়ো
মুহ্যন্তি ত্বমনাবিলো নিরবধের্ভূম্নঃ কণেহত্য য়ত্ ।
চিত্রীয়েমহি নাত্র রঙ্গরসিক ত্বং ত্বন্মহিম্নঃ পরঃ
বৈপুল্যান্মহিতঃ স্বভাব ইতি বা কিন্নাম সাত্ম্যং ন তে ॥ ৩৮ ॥
ষাড্গুণ্যাদ্বাসুদেবঃ পর ইতি স ভবান্ মুক্তভোগ্যো বলাঢ্যাত্
বোধাত্ সঙ্কর্ষণস্ত্বং হরতি বিতনুষে শাস্ত্রমৈশ্বর্যবীর্যাত্ ।
প্রদ্যুম্নস্সর্গধর্মৌ নয়সি চ ভগবঞ্চ্ছক্তিতেজোঽনিরুদ্ধঃ
বিভ্রাণঃ পাসি তত্ত্বং গময়সি চ তথা ব্যূহ্য রঙ্গাধিরাজ ॥ ৩৯ ॥
জাগ্রত্স্বপ্নাত্যলসতুরীয়প্রায়ধ্যাতৃক্রমবদুপাস্যঃ ।
স্বামিংস্তত্তত্সহপরিবর্হঃ চাতুর্ব্যূহং বহসি চতুর্ধা ॥ ৪০ ॥
অচিদবিশেষিতান্ প্রলয়সীমনি সংসরতঃ
করণকল়েবরৈর্ঘটয়িতুং দয়মানমনাঃ ।
বরদ নিজেচ্ছয়ৈব পরবানকরোঃ প্রকৃতিং
মহদভিমানভূতকরণাবলিকোরকিণীম্ ॥ ৪১ ॥
নিম্নোন্নতং চ করুণং চ জগদ্বিচিত্রং
কর্ম ব্যপেক্ষ্য স্র্জতস্তব রঙ্গশেষিন্ ।
বৈষম্যনির্ঘৃণতয়োর্ন খলু প্রসক্তিঃ
তদ্ব্রহ্মসূত্রসচিবাঃ শ্রুতয়ো গৃণন্তি ॥ ৪২ ॥
স্বাধীনে সহকারিকারণগণে কর্তুশ্শরীরেঽথবা
ভোক্তুঃ স্বানুবিধাপরাধবিধয়োঃ রাজ্ঞো য়থা শাসিতুঃ ।
দাতুর্বাঽর্থিজনে কটাক্ষাণমিব শ্রীরঙ্গসর্বস্ব তে
স্রষ্টুস্সৃজ্যদশাব্যপেক্ষণমপি স্বাতন্ত্র্যমেবাবহেত্ ॥ ৪৩ ॥
প্রলয়সময়সুপ্তং স্বং শরীরৈকদেশং
বরদ চিদচিদাখ্যং স্বেচ্ছয়া বিস্তৃণানঃ ।
খচিতমিব কলাপং চিত্রমাতত্য ধূন্বন্
অনুশিখিনি শিখীব ক্রীডসি শ্রীসমক্ষম্ ॥ ৪৪ ॥
ভূয়ো ভূয়স্ত্বয়ি হিতপরেঽপ্যুত্পথানাত্মনীন-
স্রোতোমগ্নানপি পথি নয়ংস্ত্বং দুরাশাবশেন ।
রুগ্ণে তোকে স্ব ইব জননি তত্কষায়ং পিবন্তী
তত্তদ্বর্ণশ্রমবিধিবশঃ ক্লিশ্যসে রঙ্গরাজ ॥ ৪৫ ॥
সার্ব ত্বত্কং সকলচরিতং রঙ্গধামন্ দুরাশা-
পাশেভ্যস্স্যান্ন য়থি জগতাং জাতু মূর্খোত্তরাণাম্ ।
নিস্তন্দ্রালোস্তব নিয়মতো নর্তুলিঙ্গপ্রবাহা
সর্গস্থেমপ্রভৃতিষু সদাজাগরা জাঘটীতি ॥ ৪৬ ॥
সুহৃদিব নিগলাদ্যৈরুন্মদিষ্ণুং নৃশংসং
ত্বমপি নিরয়পূর্বৈর্দণ্দয়ন্ রঙ্গনেতঃ ।
তদিতরমপি বাধাত্ত্রায়সে ভোগমোক্ষ-
প্রদিরপি তব দণ্ডাপূপিকাতস্সুহৃত্ত্বম্ ॥ ৪৭ ॥
ধৃতিনিয়মনরক্ষাবীক্ষণৈশ্শাস্ত্রদান-
প্রমৃতিভিরচিকিত্স্যান্ প্রাণিনঃ প্রেক্ষ্য ভূয়ঃ ।
সুরমনুজতিরশ্চাং সর্বথা তুল্যধর্মা
ত্বমবতরসি দেবোঽজোঽপি সন্নব্যয়াত্মা ॥ ৪৮ ॥
অনুজনুরনুরূপরূপচেষ্টা ন য়দি সমাগমমিন্দিরাঽকরিষ্যত্ ।
অসরসমথবাঽপ্রিয়ম্ভবিষ্ণু ধ্রুবমকরিষ্যত রঙ্গরাজনর্ম ॥ ৪৯ ॥
গরীয়স্ত্বং পরিজানন্তি ধীরাঃ পরং ভাবং মনুজত্বাদিভূষ্ণুম্ ।
অজানন্তস্ত্ববজানন্তি মূঢাঃ জনিঘ্নং তে ভগবঞ্জন্ম কর্ম ॥ ৫০ ॥
মধ্যেবিরিঞ্চগিরিশং প্রথমাবতারঃ
তত্সাম্যতঃ স্থগয়িতুং তব চেত্স্বরূপম্ ।
কিং তে পরত্বপিশুনৈরিহ রঙ্গধামন্
সত্ত্বপ্রবর্তনকৃপাপরিপালনাদ্যৈঃ ॥ ৫১ ॥
মধুঃ কৈটভশ্চেতি রোধং বিধূয় ত্রয়ীদিব্যচক্ষুর্বিধাতুর্বিধায় ।
স্মরস্যঙ্গ রঙ্গিস্তুরঙ্গাবতারঃ সমস্তং জগজ্জীবয়িষ্যস্যকস্মাত্ ॥ ৫২ ॥
রঙ্গধে তিমিরঘস্মরশীতস্বচ্ছহংসতনুরিন্দুরিবোদ্যন্ ।
বেদভাভিরনুজগ্রহিথাঽঽর্তান্ জ্ঞানয়জ্ঞসুধয়ৈব সমৃদ্ধ্যন্ ॥ ৫৩ ॥
বটদলমধিশয়্য রঙ্গধামন্ শয়িত ইবার্ণবতর্ণকঃ পদাব্জম্ ।
অধিমুখমুদরে জগন্তি মাতুং নিদধিথ বৈষ্ণবভোগ্যলিপ্সয়া বা ॥ ৫৪ ॥
উন্মূল্যাহর মন্দরাদ্রিমহিনা তং সম্বধানামুনা
দোর্ভিশ্চঞ্চলমালিকৈশ্চ দধিনির্মাথং মথানাম্বুধিম্ ।
শ্রীরঙ্গেশ্বর চন্দ্রকৌস্তুভসুধাপূর্বং গৃহাণেতি তে
কুর্বাণস্য ফলেগ্রহির্হি কমলালাভেন সর্বঃ শ্রমঃ ॥ ৫৫ ॥
দেবীহস্তাম্বুজেভ্যশ্চরণকিসলয়ে সংবহদ্ভ্যোঽপহৃত্য
প্রত্যস্যানন্তভোগং ঝতিতি চলপুটে চক্ষুষি বিস্তৃণানঃ ।
আক্ষিপ্যোরশ্চ লক্ষ্ম্যাঃ স্তনকলশকনত্কুঙ্কুমস্তোমপঙ্কা-
দ্দেবঃ শ্রীরঙ্গধামা গজপতিঘুষিতে ব্যাকুলঃ স্তাত্ পুরো নঃ ॥ ৫৬ ॥
অতন্ত্রিতচমূপতিপ্রহিতহস্তমস্বীকৃত
প্রণীতমণিপাদুকং কিমিতি চাকুলান্তঃ পুরম্ ।
অবাহনপরিষ্ক্রিয়ং পতগরাজমারোহতঃ
করিপ্রবরবৃম্হিতে ভগবতস্ত্বরায়ৈ নমঃ ॥ ৫৭ ॥
য়ং পশ্যন্বিশ্বধুর্যাং ধিয়মসকৃদথো মন্থরাং মন্যমানঃ
হুঙ্কারাস্ফালনাঙ্ঘ্রিপ্রহতিভিরপি তং তার্ক্ষ্যমধ্যক্ষিপস্ত্বম্ ।
কিঞ্চোদঞ্চন্নুদস্থাস্তমথ গজপতের্বৃম্হিতে জৃম্ভমাণে
দেব শ্রীরঙ্গবন্ধো প্রণমতি হি জনে কান্দিশীকী দশা তে ॥ ৫৮ ॥
শ্রীরঙ্গেশয় শরণং মমাসি বাত্যাব্যালোলত্কমলতটাকতাণ্ডবেন ।
স্রগ্ভূষাম্বরময়থায়থং দধানঃ ধিঙ্মামিত্যনুগজগর্জমাজগন্থ ॥ ৫৯ ॥
মীনতনুস্ত্বং নাবি নিধায় স্থিরচরপরিকরমনুমনু ভগবন্
বেদসনাভিস্বোক্তিবিনৌদৈরকলিতলয়ভয়লবমমুমবহঃ ॥ ৬০ ॥
শ্রীনয়নাভোদ্ভাসুরদীর্ঘপ্রবিপুলসুরুচিরশুচিশিশিরবপুঃ ।
পক্ষনিগীর্ণোদ্গীর্ণমহাব্ধিস্থলজলবিহরণরতগতিরচরঃ ॥ ৬১ ॥
চকর্থ শ্রীরঙ্গিন্নিখিলজগদাধারকমঠো
ভবন্ ধর্মান্ কূর্মঃ পুনরমৃতমন্থাচলধরঃ ।
জগন্থ শ্রেয়স্ত্বং মরকতশিলাপীঠললিতং
জলাদুদ্যল্লক্ষ্মীপদকিসলয়ন্যাসসুলভম্ ॥ ৬২ ॥
হৃদি সুররিপোর্দংষ্ট্রোত্খাতে ক্ষিপন্ প্রলয়ার্ণবং
ক্ষিতিকুচতটীমর্চন্ দৈত্যাস্রকুঙ্কুমচর্চয়া ।
স্ফুটধুতসটাভ্রাম্যদ্ব্রহ্মস্তবোন্মুখবৃম্হিতঃ
শরণমসি মে রঙ্গিস্ত্বং মূলকোলতনুর্ভবন্ ॥ ৬৩ ॥
নৃহরিদশয়োঃ পশ্যন্নৌত্পত্তিকং ঘটনাদ্ভুতং
নরমুত হরিং দৃষ্ট্বৈকৈকং সমুদ্বিজতে জনঃ ।
ইতি কিল সিতাক্ষীরন্যায়েন সঙ্গমিতাঙ্গকং
স্ফুটসটমহাদম্ষ্ট্রং রঙ্গেন্দ্রসিম্হমুপাস্মহে ॥ ৬৪ ॥
দ্বিষাণদ্বেষোদ্যন্নয়নবনবহ্নিপ্রশমন
ভ্রমল্লক্ষ্মীবক্ত্রপ্রহিতমধুগণ্ডূষসুষমৈঃ
নখক্ষুণ্ণারাতিক্ষতজপটলৈরাপ্লুতসটা-
চ্ছটাস্কন্ধো রুন্ধে দুরিতমিহ পুংস্পঞ্চবদনঃ ॥ ৬৫ ॥
নখাগ্রগ্রস্তেঽপি দ্বিষতি নিজভক্তদ্রুহি রূষঃ
প্রকর্ষাদ্বিষ্ণুত্বদ্বিগুণপরিণাহোত্কটতনুঃ ।
বিরুদ্ধে বৈয়গ্রীসুঘটিতসমানাধিকরণে
নৃসিংহত্বে বিভ্রদ্বরদ বিভরামাসিথ জগত্ ॥ ৬৬ ॥
দৈত্যৌদার্যেন্দ্রয়াচ্ঞাবিহতিমপনয়ন্ বামনোঽর্থী ত্বমাসীঃ
বিক্রান্তে পাদপদ্মে ত্রিজগদণুসমং পাংসুলীকৃত্য লিল্যে ।
নাভীপদ্মশ্চ মানক্ষমমিব ভুবনগ্রামমন্যং সিসৃক্ষুঃ
তস্থৌ রঙ্গেন্দ্র বৃত্তে তব জয়মুখরো দিণ্ডিমস্তত্র বেদঃ ॥ ৬৭ ॥
ভবান্ রামো ভূত্বা পরশুপরিকর্মা ভৃগুকুলা-
দলাবীদ্ভূপালান্ পিতৃগণমতার্প্সীত্তদসৃজা ।
ভুবো ভারাক্রান্তং লঘু তলমুপাচীক্লৃপদিতি
দ্বিষামুগ্রম্পশ্যোঽপ্যনঘ মম মা জীগণদঘম্ ॥ ৬৮ ॥
মনুজসময়ং কৃত্বা নাথাবতেরিথ পদ্ময়া
ক্বচন বিপিনে সা চেদন্তর্ধিনর্ম বিনির্মমে ।
কিমথ জলধিং বধ্বা রক্ষো বিধীশবরোদ্ধতং
বলিমুখকুলোচ্ছিষ্টং কুর্বন্ রিপুং নিরপত্রয়ঃ ॥ ৬৯ ॥ ॥ ॥।ত্রপঃ?
য়দ্যূতে বিজয়াপদানগণনা কালিঙ্গদন্তাঙ্কুরৈঃ
য়দ্বিশ্লেষলবোঽপি কালিয়ভুবে কোলাহলায়াভবত্ ।
দূত্যেনাপি চ য়স্য গোপবনিতাঃ কৃষ্ণাগসাং ব্যস্মরন্
তং ত্বাং ক্ষেমকৃষীবলং হলধরং রঙ্গেশ ভক্তাস্মহে ॥ ৭০ ॥
আকণ্ঠবারিভরমন্থরমেঘদেশ্যং
পীতাম্বরং কমললোচনপঞ্চহেতি ।
ব্রহ্ম স্তনন্ধয়ময়াচত দেবকী ত্বাং
শ্রীরঙ্গকান্ত সুতকাম্যতি কাঽপরৈবম্ ॥ ৭১ ॥
শৈলোঽগ্নিশ্চ জলাম্বভূব মুনয়ো মূঢাম্বভূবুর্জডাঃ
প্রাজ্ঞামাসুরগাস্সগোপমমৃতামাসুর্মহাশীবিষাঃ ।
গোব্যাঘ্রাস্সহজাম্বভূবুরপরে ত্বন্যাম্বভূবুঃ প্রভো
ত্বং তেষ্বন্যতমাম্বভূবিথ ভবদ্বেণুক্বণোন্মাথনে ॥ ৭২ ॥
কল্কিতনুর্ধরণীং লঘয়িষ্যন্ কলিকলুষান্ বিলুনাসি পুরা ত্বম্ ।
রঙ্গনিকেত লুনীহি লুনীহীত্যখিলমরুন্তুদমদ্য লুনীহি ॥ ৭৩ ॥
আস্তাং তে গুণরাশিবদ্গুণপরীবাহাত্মনাং জন্মনাং
সঙ্খ্যা ভৌমনিকেতনেষ্বপি কুটীকুঞ্জেশূ রঙ্গেশ্বর ।
অর্চ্যস্সর্বসহিষ্ণুরর্চকপরাধীনাখিলাত্মস্থিতিঃ
প্রীণীষে হৃদয়ালুভিস্তব ততশ্শীলাজ্জডীভূয়তে ॥ ৭৪ ॥
শ্রীমদ্ব্যোম নসীম বাঙ্মনসয়োস্সর্বেঽবতারাঃ ক্বচিত্
কালে বিশ্বজনীনমেতদিতিধীঃ শ্রীরঙ্গধামন্যথ ।
আর্তস্বাগতিকৈঃ কৃপাকলুষিতৈরালোকিতৈরার্দ্রয়ন্
বিশ্বত্রাণবিমর্শনস্খলিতয়া নিদ্রাসি জাগর্যয়া ॥ ৭৫ ॥
সর্গাভ্যাসবিশালয়া নিজধিয়া জানন্ননন্তেশয়ং
ভারত্যা সহধর্মচাররতয়া স্বাধীনসঙ্কীর্তনঃ ।
কল্পানেব বহূন্ কমণ্ডলুগলদ্গঙ্গাপ্লুতোঽপূজয়-
দ্ব্রহ্মা ত্বাং মুখলোচনাঞ্জলিপুটৈঃ পদ্মৈরিবাঽবর্জিতৈঃ ॥ ৭৬ ॥
মনুকুলমহীপালব্যানম্রমৌলিপরম্পরা-
মণিমকরিকারোচির্নীরাজিতাঙ্ঘ্রিসরোরুহঃ ।
স্বয়মথ বিভো স্বেন শ্রীরঙ্গধামনি মৈথিলী-
রমণবপুষা স্বার্হাণ্যারাধনান্যসি লম্ভিতঃ ॥ ৭৭ ॥
মন্বন্ববায়ে দ্রুহিণে চ ধন্যে বিভীষণেনৈব পুরস্কৃতেন ।
গুণৈর্দরিদ্রাণমিমং জনং ত্বং মধ্যেসরিন্নাথ সুখাকরোষি ॥ ৭৮ ॥
তেজঃ পরং তত্সবিতুর্বরেণ্যং ধাম্না পরেণাপ্রণখাত্সুবর্ণাম্ ।
ত্বাং পুণ্ডরীকেক্ষণমামনন্তি শ্রীরঙ্গনাথং তমুপাসিষীয় ॥ ৭৯ ॥
আত্মাঽস্য গন্তুঃ পরিতস্থুষশ্চ মিত্রস্য চক্ষুর্বরুণস্য চাগ্নেঃ ।
লক্ষ্ম্যা সহৌত্পত্তিকগাঢবন্ধং পশ্যেম রঙ্গে শরদশ্শতং ত্বাম্ ॥ ৮০ ॥
য়স্যাস্মি পত্যুর্ন তমন্তরেমি শ্রীরঙ্গতুঙ্গায়তনে শয়ানম্ ।
স্বভাবদাস্যেন চ য়োঽহমস্মি স সন্ য়জে জ্ঞানময়ৈর্মখৈস্তম্ ॥ ৮১ ॥
আয়ুঃ প্রজানামমৃতং সুরাণাং রঙ্গেশ্বরং ত্বাং শরণং প্রপদ্যে ।
মাং ব্রহ্মণেঽস্মৈ মহসে তদর্থং প্রত্যঞ্চমেনং য়ুনজৈ পরস্মৈ ॥ ৮২ ॥
আর্তিং তিতীর্ষুরথ রঙ্গপতে ধনায়ন্ আত্মম্ভরির্বিবিদিষুর্নিজদাস্যকাম্যন্ ।
জ্ঞানীত্যমূন্ সমমথাস্সমমত্যুদারান্ গীতাসু দেব ভবদাশ্রয়ণোপকারান্ ॥ ৮৩ ॥
নিত্যং কাম্যং পরমপি কতিচিত্ত্বয়্যধ্যাত্মস্বমতিভিরমমাঃ ।
ন্যস্যাসঙ্গা বিদধতি বিহিতং শ্রীরঙ্গেন্দো বিদধতি ন চ তে ॥ ৮৪ ॥
প্রত্যঞ্চং স্বং পঞ্চবিংশং পরাচস্সঞ্চক্ষাণাস্তত্ত্বরাশের্বিবিচ্য ।
য়ুঞ্জানাশ্চর্তম্ভরায়াং স্ববুদ্ধৌ স্বং বা ত্বাং বা রঙ্গনাথাঽপ্নুবন্তি ॥ ৮৫ ॥
অথ মৃদিতকষায়াঃ কেচিদাজানদাস্য-
ত্বরিতশিথিলচিত্তাঃ কীর্তিচিন্তানমস্যাঃ ।
বিদধতি ননু পারং ভক্তিনিঘ্না লভন্তে
ত্বয়ি কিল ততমে ত্বং তেষু রঙ্গেন্দ্র কিং তত্ ॥ ৮৬ ॥
উপাদত্তে সত্তাস্থিতিনিয়মনাদ্যৈশ্চিদচিতৌ
স্বমুদ্দিশ্য শ্রীমানিতি বদতি বাগৌপনিষদী ।
উপায়োপেয়ত্বে তদিহ তব তত্ত্বং ন তু গুণা-
বতস্ত্বাং শ্রীরঙ্গেশয় শরণমব্যাজমভজম্ ॥ ৮৭ ॥
পটুনৈকবরাটিকেব ক্লৃপ্তা স্থলয়োঃ কাকণিকাসুবর্ণকোট্যোঃ ।
ভবমোক্ষণয়োস্ত্বয়ৈব জন্তুঃ ক্রিয়তে রঙ্গনিধে ত্বমেব পাহি ॥ ৮৮ ॥
জ্ঞানক্রিয়াভজনসম্পদকিঞ্চনোঽহ-
মিচ্ছাধিকারশকনানুশয়ানভিজ্ঞঃ ।
রঙ্গেশ পূর্ণবৃনশ্শরণং ভবেতি
মৌখ্যাদ্ব্রবীমি মনসা বিষয়াকুলেন ॥ ৮৯ ॥
ত্বয়ি সতি পুরুসাহর্থে মত্পরে চাহমাত্ম-
ক্ষয়করকুহনার্থাঞ্ছ্রদ্দধদ্রঙ্গচন্দ্র ।
জনমখিলমহম্যুর্বঞ্চয়ামি ত্বদাত্ম-
প্রতিমভবদনন্যজ্ঞানিবদ্দেশিকস্সন্ ॥ ৯০ ॥
অতিক্রামন্নাজ্ঞাং তব বিধিনিষেধেষু ভবতেঽপি
অভিদ্রুহ্যন্বাগ্ধীকৃতিভিরপি ভক্তায় সততম্ ।
অজানন্ জানন্ বা ভবদসহনীয়াগসি রত-
স্সহিষ্ণুত্বাদ্রঙ্গপ্রবণ তব মাভূবমভরঃ ॥ ৯১ ॥
প্রকুপিতভুজগফণানামিব বিষয়াণমহং ছায়াম্ ।
সতি তব ভুজসুরবিটপিপ্রচ্ছায়ে রঙ্গজীবিত ভজামি ॥ ৯২ ॥
ত্বত্সর্বশক্তেরধিকাঽস্মদাদেঃ কীটস্য শক্তির্বত রঙ্গবন্ধো ।
য়ত্ত্বত্কৃপামপ্যতিকোশকারন্যায়াদসৌ নশ্যতি জীবনাশম্ ॥ ৯৩ ॥
শ্রীরঙ্গেশ ত্বদ্গুণানামিবাস্মদ্দোষাণাং কঃ পারদৃশ্বা য়তোঽহম্ ।
ওঘে মোঘোদন্যবত্ত্বদ্গুণানাং তৃষ্ণাপূরং বর্ষতাং নাস্মি পাত্রম্ ॥ ৯৪ ॥
ত্বং চেন্মনুষ্যাদিষু জায়মানস্তত্কর্মপাকং কৃপয়োপভুঙ্ক্ষে ।
শ্রীরঙ্গশায়িন্ কুশলেতরাভ্যাং ভূয়োঽভিভূয়েমহি কস্য হেতোঃ ॥ ৯৫ ॥
ক্ষমা সাপরধেঽনুতাপিন্যুপেয়া কথং সাপরাধেঽপি দৃপ্তে ময়ি স্যাত্ ।
তথাপ্যত্র রঙ্গাধিনাথানুতাপব্যপায়ং ক্ষমেতাতিবেলা ক্ষমা তে ॥ ৯৬ ॥
বলিভুজি শিশুপালে তাদৃগাগস্করে বা
গুনলবসহবাসাত্ত্বত্ক্ষমা সঙ্কুচন্তী ।
ময়ি গুণপরমাণূদন্তচিন্তানভিজ্ঞে
বিহরতু বরদাসৌ সর্বদা সার্বভৌমী ॥ ৯৭ ॥
দয়া পরব্যসনহরা ভবব্যথা সুখায়তে মম তদহং দয়াতিগঃ ।
তথাঽপ্যসৌ সুখয়তি দুঃখমিত্যতঃ দয়স্ব মাং গুণময় রঙ্গমন্দির ॥ ৯৮ ॥
গর্ভজন্মজরামৃতিক্লেশকর্মষডূর্মিগঃ ।
শ্বেব দেববষট্কৃতং ত্বাং শ্রিয়োঽর্হমকাময়ে ॥ ৯৯ ॥
অনুকৃত্য পূর্বপুম্সঃ রঙ্গনিধে বিনয়ডম্ভতোঽমুষ্মাত্ ।
শুন ইব মম বরমৃদ্ধেঃ উপভোগস্ত্বদ্বিতীর্ণায়াঃ ॥ ১০০ ॥
সকৃত্প্রপন্নায় তবাহমস্মীত্যায়াচতে চাভয়দীক্ষমাণম্ ।
ত্বামপ্যপাস্যাহমহম্ভবামি রঙ্গেশ বিস্রম্ভবিবেকরেকাত্ ॥ ১০১ ॥
তব ভরোঽহমকারিষি ধার্মিকৈশ্শরণমিত্যপি বাচমুদৈরিরম্ ।
ইতি সসাক্ষিকয়ন্নিদমদ্য মাং কুরু ভরং তব রঙ্গধুরন্ধর ॥ ১০২ ॥
দয়াঽন্যেষাং দুঃখাপ্রসহনমনন্যোঽসি সকলৈঃ
দয়ালুস্ত্বং নাতঃ প্রণমদপরাধানবিদুষঃ ।
ক্ষমা তে রঙ্গেন্দো ভবতি ন তরাং নাথ ন তমাং
তবৌদার্যং য়স্মাত্তব বিভবমর্থিস্বমমথাঃ ॥ ১০৩ ॥
গুণতুঙ্গতয়া তব রঙ্গপতে ভৃশনিম্নমিমং জনমুন্নময় ।
য়দপেক্ষ্যমপেক্ষিতুরস্য হি তত্পরিপূরণমীশিতুরীশ্বরতা ॥ ১০৪ ॥
ত্বং মীনপানীয়নয়েন কর্মধীভক্তিবৈরাগ্যজুষো বিভর্ষি ।
রঙ্গেশ মাং পাসি মিতম্পচং য়ত্পানীয়শালং মরুভূষু তত্স্যাত্ ॥ ১০৫ ॥
ইতি শ্রী রঙ্গরাজস্তবে উত্তরশতকং সমাপ্তম্ ।
ইতি শ্রীপরাশরভট্টবিরচিতং শ্রীরঙ্গরাজস্তবং সম্পূর্ণম্ ।
