Sri Siddhasarayustotrashtakam in Telugu:
శ్రీసిద్ధసరయూస్తోత్రాష్టకమ్
శ్రీరామనామమహిమానముదీరయన్తీ
తద్ధామ-సామ-గుణ-గౌరవముద్గీరన్తీ ।
ఆపూర-పూర-పరిపూత-గభీరఘోషా
దోషాటవీ-విఘటనం సరయూస్తనోతు || ౧ ||
శ్రీభారతీయ-విజయ-ధ్వజ-శైలరాజ-
ప్రోడ్డీయమాన-కలకేతన-కీర్తివల్లీ ।
శ్రీమానసోత్తరసరః-ప్రభవాద్యశక్తి-
ర్మూర్తా నదీశతనుతా సరయూర్విభాతి || ౨ ||
సాకేత-గౌరవగిరః పరిబృంహయన్తీ
శ్రీరాఘవేన్ద్రమభితఃకిల దర్శయన్తీ ।
గఙ్గాం భృగుప్రవరతీర్థమనుస్రవన్తీ
ధన్యా పునాతు సరయూర్గిరిరాజకన్యా || ౩ ||
ఇక్ష్వాకుముఖ్య-రవివంశ-సమర్చితాఙ్ఘ్రి-
ర్దివ్యావదాత-జలరాశి-లసత్ప్రవాహా ।
పాపౌఘ -కాననఘటా -దహనప్రభావా
దారిద్ర్య-దుఃఖ-దమనీ సరయూర్ధినోతు || ౪ ||
త్రైలోక్యపుణ్యమివ విద్రుతమేకనిష్ఠం
నిస్తన్ద్ర-చన్ద్రకిరణామృత-లోభనీయమ్ ।
సర్వార్థదం సకల-మఙ్గల-దానదక్షం
వన్దే ప్రవాహమతులం లలితం సరయ్వాః || ౫ ||
నిత్యం సమస్త-జన-తాపహరం పవిత్రం
దేవాసురార్చితముదగ్ర -సమగ్రధారమ్ ।
హారం హరేర్హరిణ-రేణువిలాసకూలం
శ్రీసారవం సలిలముద్ధముపఘ్నమీడే || ౬ ||
వన్యాః సరిద్-ద్రుమలతా-గజ-వాజి-సింహా
హంసాః శుకా హరిణ-మర్కట-కోల-కీటాః ।
మత్స్యా భుజఙ్గ-కమఠా అపి సంశ్రితాస్త్వాం
పూజ్యా భవన్తి జగతాం మహితా మహార్హాః || ౭ ||
ఏకాదశీమథ మహానవమీం భజన్తో
దివ్యావగాహనరతా సముపేత్య ధీరాః ।
శ్రీజానకీశచరణామ్బుజ -దత్తచిత్తా-
నావర్తయన్తి భవమత్ర జలే సరయ్వాః || ౮ ||
పుణ్యైర్ధన్యైర్వసిష్ఠాదిభిరథ మునిభిః సేవితాం దివ్యదేహాం
గౌరాఙ్గీం స్వర్ణరత్నోజ్జ్వల-పటల-లసద్-భూషణాఖ్యాం దయార్ద్రామ్ ।
శ్రీనాగేశాభిముఖ్యాం సురవరఝరిణీం సర్వసిద్ధిప్రదాత్రీం
తోష్టయే బ్రహ్మరూప-ప్రకటిత-సరయూం కోటిసూర్య-ప్రకాశామ్ || ౯ ||
దేవ్యాః సరయ్వాః స్తవనం సర్వమఙ్గల-మఙ్గలమ్ ।
శ్రీరామేశ్వరయోః సద్యో వశీకరణముత్తమమ్ || ౧౦ ||
కాశీపీఠాధినాథేన శఙ్కరాచార్యభిక్షుణా ।
మహేశ్వరేణ రచితః స్తవోఽయం సత్సు రాజతామ్ || ౧౧ ||
ఇతి కాశీపీఠాధీశ్వర-జగద్గురు శఙ్కరాచార్య-స్వామి-
శ్రీమహేశ్వరానన్దసరస్వతీవిరచితం సిద్ధసరయూస్తోత్రాష్టకం సమ్పూర్ణమ్ ।